གནས་ཀྱི་ཁྱད་པར།
གསུམ་པ་གདམས་པ་ལ་འཇུག་པའི་རྒྱུ་བསྟན་པ་ལ། གནས་ཀྱི་ཁྱད་པར། དུས་ཀྱི་བྱེ་བྲག བླ་མའི་མཚན་ཉིད། སློབ་མའི་མཚན་ཉིད། དབང་ཡོན་དང་འཚོ་ཆས་བསྟན་པ། གདམས་ངག་ཇི་ལྟར་གནང་བའི་ཚུལ་བསྟན་པ། གྲོགས་ཀྱི་མཚན་ཉིད་བརྗོད་པ་སྟེ་བདུན། དེའི་དང་པོ་གནས་ཀྱི་ཁྱད་པར་བརྗོད་པ་ནི། རྒྱུད་ཀློང་གསལ་ཉི་མ་ལས། གངས་ཁྲོད་ལུང་སྟོང་རི་རྩེ་དུར་ཁྲོད་དམ། ཤིན་ཏུ་དབེན་པ་དྭངས་ཤིང་མཐོ་བའི་སར། །སྐལ་ལྡན་སྐྱེས་བུ་ཉམས་ལེན་བྱེད་པའི་གནས། ཞེས་གསུངས་པ་ལྟར། ཡང་གསང་སྙིང་ཐིག་སྙིང་པོ་འདི་ཉིད་ཉམས་སུ་ལེན་པའི་གནས་ནི། གངས་ཁྲོད་དུ་རིག་པ་དྭངས་ཤིང་རི་རྩེར་ཤེས་པ་གསལ། ལུང་སྟོང་རང་བཞིན་གྱིས་དགེ་སྦྱོར་འཕེལ་ཞིང་དུར་ཁྲོད་དུ་སྐྱོ་ཤས་དང་ངེས་འབྱུང་སྐྱེ། དྭངས་ཤིང་མཐོ་བས་དབྱིངས་རིག་གསལ་ལ་དབེན་པའི་གནས་སུ་ཉམས་ལེན་འཕེལ་ཆེ། ཤར་ཐག་རིང་ཞིང་དམའ་བས་ཤར་གྱི་མདངས་འཕྲོག་ཅིང་། ནུབ་ཐག་རིང་ཞིང་དམའ་བས་ནུབ་ཀྱི་ཟེར་སྡུད་པའི་སར་ལས་དང་པོ་བས་ཐོད་རྒལ་སྒོམ་བདེ་བར་གསུངས་ཤིང་། དེ་ལྟ་བུའི་གནས་ཁྱད་པར་ཅན་དང་པོ་ནས་འཚོལ་དགོས་པ་ཡང་། རྒྱུད་དེ་ཉིད་ལས། གསང་སྔགས་གནས་ཀྱི་ཁྱད་པར་འབྱུང་། ཞེས་དང་། གནས་དེར་བསྡད་པའི་ཕན་ཡོན་ཡང་། དེ་ཉིད་ལས། བསམ་གཏན་འཕེལ་ཞིང་བརྟན་པ་མྱུར་དུ་འཐོབ། ཅེས་དང་། གནས་ངན་པའི་སྐྱོན་ནི། མཚན་ལྡན་གནས་བྲལ་རྐྱེ ན་དབང་ཉིད་དུ་འགྱུར། ཞེས་གསུངས་སོ།།