བླང་བྱའི་སློབ་མའི་མཚན་ཉིད།
བླང་བྱ་ནི། རིག་པ་རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །ཕུ་དུད་ཆེ་ཞིང་གསང་སྔགས་སྤྱོད། །རྟོག་མེད་སེམས་ལ་གཡེང་བ་མེད། །དམ་ཚིག་ལྡན་ཞིང་སྒྲུབ་ལ་བརྩོན། ཅེས་དང་། ཀློང་གསལ་ལས། དད་ལྡན་སྙིང་རྗེ་གཏོང་ཕོད་ཆེ། །རྒྱུད་དུལ་སྡིག་འཛེམ་དབང་པོ་རྣོ། །གསང་ཐུབ་ཉམས་ལེན་བརྟུལ་ཞུགས་ཆེ། །སྐྱོ་ཤས་སྡུག་བསྲན་སྙིང་རུས་ཆེ། །དེ་ནི་གསང་སྔགས་གསང་བའི་སྣོད་ཡིན་པས། །བདུད་རྩི་ཐིག་པ་སྙིང་གི་ཡང་ཞུན་འདི། །བུ་ཡི་བུ་མཆོག་དེ་ལ་བསྟན་པར་བྱ། ཞེས་ཏེ། བླ་མ་དང་གདམས་ངག་ལ་ཡིད་སྤྲོ་བ་དྭངས་བའི་དད་པ། དོན་དུ་གཉེར་ཞིང་ཆེས་དུང་བ་འདོད་པའི་དད་པ། ཐེ་ཚོམ་མེད་པ་ཡིད་ཆེས་པའི་དད་པ། རྐྱེན་གྱིས་བསྒྱུར་མི་བཏུབ་པ་མཐར་ཐུག་མི་ལྡོག་པའི་དད་པ་སྟེ། བྱིན་རླབས་འཇུག་པའི་རྒྱུ་ཚང་བས་ཞུམ་པ་མེད་པའི་བློ་སྟོབས་དང་ལྡན་པ། ཕྱི་བཤོལ་དང་ཐང་ལྷོད་མེད་པའི་བརྩོན་འགྲུས་ཀྱི་དམ་བཅའ་བརྟན་པ། ཚིག་དོན་གོ་བས་གནས་ལུགས་ཟབ་མོའི་དོན་ལ་གོལ་ས་གཅོད་པ། འཛིན་ཆགས་ཀྱི་ཞེན་པ་ལོག་པས་འཁོར་བའི་བྱ་བ་ལ་བློ་མི་འཇུག་པ། སྒོ་གསུམ་གྱི་ཞབས་ཏོག་བློ་རྩེ་གཅིག་ཏུ་བྱེད་པ། ཐེ་ཚོམ་གྱི་སྒྲོ་འདོགས་ཆོད་པས་གསང་སྔགས་ཟབ་མོའི་སྤྱོད་པ་ལ་འཇུག་པ། ཐ་མལ་གྱི་ལོག་རྟོག་མེད་པས་སྔགས་སྤྱོད་ལ་སྔངས་སྐྲག་མི་སྐྱེ་བ། གཡེང་བ་ཆུང་བས་སྒོ་གསུམ་དལ་ཆ་བསྟན་པ། དམ་ཚིག་གཙང་བས་ཉེས་ལྟུང་མི་འབྱུང་བ། སྐྱོ་དུབ་དང་ལེ་ལོ་མེད་པས་ཉམས་རྟོགས་སྐྱེ་སླ་བ། དག་སྣང་དང་མོས་གུས་ཕྱོགས་རིས་མེད་པ། སྙིང་རྗེས་ཀུན་ལ་བརྩེ་ཞིང་ཕན་སེམས་ཆེ་བ། ཚོགས་གསོག་པ་ལ་གཏོང་ཕོད་ཆེ་བ། རྒོད་བག་མེད་ཅིང་ཞི་དུལ་ཅན། སྡིག་པའི་ལས་ལ་འཛེམ་བག་ཆེ་བ། ཆོས་དང་ཆོས་མིན་འབྱེད་ཤེས་པ། ཉམས་ལེན་དང་རྟག་ཏུ་མི་འབྲལ་ཞིང་སྤྱོད་ཚུལ་ཉམས་པ་མེད་པ། འཇིག་རྟེན་མཐུན་འཇུག་གི་བྱ་བ་ལ་བློ་སྣ་ཐུང་བ། དཀའ་སྤྱད་ལ་སྡུག་བསྲན་དང་ཆོས་ལ་སྙིང་རུས་ཆེ་བ་རྣམས་ནི་ལས་འཕྲོ་དང་སྐལ་བ་བཟང་པོ་ཅན་གསང་སྔགས་ཀྱི་སྣོད་མཆོག་མཚན་ཉིད་དང་ལྡན་པ་ཡིན་པས་དབང་དང་གདམས་པ་རྣམས་གནང་བར་འོས་པའོ། །དེ་ལ་རིགས་ཀྱི་བུ་མཆོག་དེ་འདྲ་དེར་གདམས་པ་བྱིན་པས་ཡོན་ཏན་དང་མ་བྱིན་ན་སྐྱོན་དུ་འགྱུར་ཏེ། ཀློང་གསལ་ལས། གསང་སྔགས་སྙིང་པོའི་སྣོད་དུ་རུང་། །འགྲོ་བ་འདྲེན་པའི་བུ་ཆེན་མཆོག །ཅེས་དང་། སྙིང་ཏིག་གི་སྣོད་དང་དུས་བརྟགས་པ་ལས། འདི་ཉིད་སྦྱིན་པའི་གནས་ལ་མ་བསྟན་ན། །ཟབ་མོའི་ཆོས་གཏེར་ནུབ་པར་འགྱུར་ཏ་རེ། །དུས་ལ་བབ་ཚེ་རང་གིས་མ་བསྟན་ན། །འགྲོ་དོན་རྒྱུན་ཆད་ལྟུང་བ་ཕོག་ཏ་རེ། ཞེས་སོ། །དེ་ཡང་དུས་གཅིག་ཁོ་ནར་མ་ཡིན་པར་དབང་ཁྲིད་གནང་ནས་རིམ་པར་གདམས་ངག་སྦྱིན་ཞིང་ཡེ་ཤེས་འོད་གསལ་གྱི་སྣང་བ་ལ་ཡིད་ཆེས་ཤིང་ཉམས་ལེན་ལ་དམ་བཅའ་དང་ཁས་ལེན་ནུས་པ་ན་རྫོགས་པར་གནང་དགོས་པ་ཡང་། དེ་ཉིད་ལས། དབང་ཁྲིད་རྫོགས་ནས་ལོ་དང་ཟླ་རེའི་བར། །དུས་གཅིག་མི་སྦྱིན་རིམ་པ་བཞིན་དུ་སྦྱིན། །ཐིག་ལེ་ཉིད་ལ་སློབ་བུས་འཕྲིག་ཚུད་ནས། །ཉམས་ལེན་མནའ་བསྐྱལ་ནུས་ན་རྫོགས་པར་སྦྱིན། ཅེས་གསུངས་སོ།།