འབྱུང་བཞིའི་རྣལ་འབྱོར་ལ་བསླབ་པ།
གཉིས་པ་དེ་དང་རྗེས་སུ་འབྲེལ་བར་ཐུན་མོང་མ་ཡིན་པའི་སྔོན་འགྲོས་གནས་ལུགས་གཏན་ལ་འབེབས་པ་ལ། འབྱུང་བཞིའི་རྣལ་འབྱོར་ལ་བསླབ་པ། འཁོར་འདས་རུ་ཤན་དབྱེ་བ། ལུས་ངག་ཡིད་གསུམ་གྱི་སྒྲིབ་པ་སྦྱང་བ། སྒོ་གསུམ་རྣལ་དུ་དབབ་ཅིང་སོར་གཞུག་པ་སྟེ་བཞི་ལས། དང་པོ་འབྱུང་བཞིའི་རྣལ་འབྱོར་ནི། ཐལ་འགྱུར་རྩ་བའི་རྒྱུད་ལས། སྐུ་གསུམ་བསླབ་པའི་རིམ་པ་ཉིད། །འབྱུང་བའི་ཡོན་ཏན་གཙོར་བྱས་ཏེ། །མཆོག་ཏུ་ས་ཆུ་མེ་རླུང་གི། །སྒྲ་ལས་བསླབ་པས་ངེས་པར་འགྲུབ། ཅེས་བསྟན་ཀྱང་ལག་ལེན་ལ་འདེབས་པའི་རྒྱུད་པ་མི་མང་བས་མ་བྱས་ཀྱང་ཆོག་ཕྱིར་འདིར་ཡང་མ་བརྗོད་དོ། །