འཆར་བྱེད་རླུང་གི་གནད།
གསུམ་པ་འཆར་བྱེད་རླུང་གི་གནད་ནི། རྒྱུད་ལས། ཕྱི་ནང་རླུང་ནི་དལ་ཞིང་མཉམ། །ཡུད་ཙམ་ཕྱི་རུ་འདུར་བ་ཡིས། །རླུང་ནི་འགྲོ་འོང་ཆད་པར་འགྱུར། ཞེས་དང་། འདས་རྗེས་ལས། རླུང་གནད་ཤིན་ཏུ་དལ་བར་བསླབ། ཅེས་རླུང་གནད་དལ་བ་ལ་བརྟེན་ན་རླུང་གིས་རིག་པ་སྤུར། རྣམ་རྟོག་གིས་རླུང་ཞོན་ནས་བདེ་བར་གཤེགས་པའི་སྙིང་པོ་ཅན་ཡང་བསླུ་བར་གསུངས་ཤིང་། དེའི་རྒྱུ་འགག་པར་བྱེད་པའི་ཐབས་སུ་རླུང་སྣ་ནས་དྲངས་ན་འཁོར་ལོ་བཞིའི་སྦྱང་བྱའི་རླུང་རྣམས་སྟོབས་སུ་གྱུར་ནས་གེགས་སྐྱོན་འབྱུང་ཉེ་ཞིང་། འདིར་ཁ་ནས་དྲངས་པས་གློ་བའི་རླུང་འགྲོ་འོང་གི་རྣམ་པ་ཅན་རང་བབས་སུ་དག་པས་གདངས་སྙིང་གར་ཐིམ་ནས་སྦྱང་བྱའི་རླུང་རྟོག་མ་སྤངས་རང་སར་དག་ཅིང་འཁོར་ལོ་སོ་སོའི་ཡོན་ཏན་མ་བཙལ་ལྷུན་གྱིས་གྲུབ་ནས་ཡེ་ཤེས་ཀྱི་རླུང་འོད་གསལ་དུ་གྲོལ་བའི་གནད་ཡོད་པར་གསུངས་པས། འབྱུང་འཇུག་མཉམ་པར་ཤིན་ཏུ་དལ་བུས་ཕྱི་ནས་ཤེད་མ་བསྐྱེད་པར་ཅུང་ཟད་རེ་ཕྱིར་གནས་རིང་པོར་འཛིན་པ་སྟེ། དེ་འབྱོངས་བའི་རྟགས་སུ་རྩ་རླུང་གི་འགྲོ་འོང་ཟད་པས་རྟོག་པའི་འགྲོ་འོང་ཟད་དེ་དབྱིངས་རིག་གཡོ་འགུལ་མེད་པར་སྡོད་པའོ། །དེ་ལྟར་སྒོ་གསུམ་གྱི་བྱ་བ་བཏང་ཞིང་གནད་དུ་གཟིར་བ་དང་། སྒོ་ཡུལ་རླུང་གི་གནད་རྣམས་ལ་བརྟེན་ནས། ཙིཏྟ་ཤའི་སྒྲོན་མ་རིན་པོ་ཆེའི་སྒྲོམ་ནང་ན་གནས་ལུགས་ཡེ་ཤེས་གཞིའི་སྒྲོན་མ་ངོ་བོ་རང་བཞིན་ཐུགས་རྗེ་གསུམ་གྱིས་མཚོན་པར་བུམ་སྐུའི་ཚུལ་དུ་གནས་པ་དེ་ཉིད་རང་བྱུང་གསང་བ་ཆེན་པོའི་རྩ་ཀ་ཏི་ཤེལ་གྱི་སྦུ་གུ་ཅན་དཀར་འཇམ་སྟོང་པ་སྙིང་ནས་མིག་ཏུ་འབྲེལ་ཞིང་། རྩ་བ་ཕྲ་ལ་རྩེ་མོ་ཡངས་པ་བ་མེན་གྱི་རྭ་འདྲ་བ་གཉིས་མིག་གི་ཨ་འབྲས་ཀྱི་དཀྱིལ་དུ་ཟུག་པ་ནས་བརྒྱུད་དེ། རྒྱང་ཞགས་ཆུའི་སྒྲོན་མ་དཀར་ནག་ཕྱེད་མ་ཆུའི་རང་བཞིན་ཅན་དངས་ལ་གསལ་བ་དེའི་རྒྱན་དུ་ནང་གདངས་ཅུང་ཟད་ཕྱིར་ཤར་བའི་ཕྱི་དབྱིངས་ནམ་མཁའ་སྔོ་སང་སྟོང་པ་གོ་འབྱེད་འཆར་གཞིའི་ཆ་ཙམ་དུ་མེ་ལོང་དང་འདྲ་བ་ལ། མི་གསལ་བ་གསལ་བར་གོ་འཕོས་པ་ཙམ་དུ་སྣང་བའི་གོ་ཕྱེས་ནས་ནང་དབྱིངས་རྣམ་དག་གི་སྒྲོན་མ་བདག་པོའི་བཞིན་དང་འདྲ་བ་དེ་ཉིད། ཐོག་མར་སྨིན་མཚམས་མཐིང་ཀ་ཁྱབ་པ་ཆེན་པོའི་འོད་སྣང་ལས་མཆེད་པའི་ཚུལ་དུ་རིམ་གྱིས་འོད་ལྔའི་གདངས་ཁ་ཏོག་ལྔ་པ་ཟ་འོག་ཁ་ཕྱེས་པའམ། ནམ་མཁའི་འཇའ་ཚོན་ལྟ་བུ་འོད་ལྔའི་ཐིག་ཕྲན་དང ་བཅས་པ་གསལ་བའི་ནང་དུ། ལས་ཀྱི་རླུང་དག་པའི་ཆ་ལས་བྱུང་བའི་ཐིག་ལེ་སྟོང་པའི་སྒྲོན་མ་མཚོའམ་རྫིང་བུ་དངས་མར་རྡོ་བོར་བའི་རི་མོའི་རྣམ་པས་མཚོན་པའི་ཐིག་ཟླུམ་དངས་གསལ་འོད་ལྔའི་མུ་ཁྱུད་ཅན་ལ་སོགས་པར་སྣང་ཞིང་དེའི་ནང་དུ་ཤེས་རབ་རང་བྱུང་གི་སྒྲོན་མ་རྡོ་རྗེ་ལུ་གུ་རྒྱུད་བདག་པོའི་སེམས་དང་འདྲ་བ་དེ་ལྷག་གེར་འཆར་བ་དེ་ཉིད་ངོ་བོ་གཅིག་ལ་ལྡོག་པ་གསུམ་གྱི་དབྱེ་བས་ངོས་ཟིན་དགོས་ཏེ། ནང་གི་རིག་པ་ཤིན་ཏུ་ཡུལ་མེད་པ་ཞིག་ཉམས་སུ་མྱོང་བ་དེ་ནི་ཤེས་རབ་ཀྱི་ངོ་བོ་དང་། དེ་ལ་ཡུལ་ཤེས་ཀྱི་ཤེས་རབ་རྣོ་ལ་མྱུར་བ་དང་། ཚིག་དོན་ཀློང་རྡོལ་དུ་འཆར་བ་ཤེས་རབ་ཀྱི་རྩལ་དང་། ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད་ཐོག་མར་རྟ་རྔ་ལ་མདུད་པ་བཏབ་པ་ལྟ་བུའམ། མུ་ཏིག་གི་ཕྲེང་བ་དང་། གསེར་གྱི་སྐུད་པ་ལྡིང་བའམ་མེ་ཏོག་གི་ཆུན་པོ་ལྟ་བུར་སྣང་བ་ནི་ཤེས་རབ་ཀྱི་གདངས་སུ་བཞེད་དོ། །དེ་ལྟར་ཡང་རྩ་རྒྱུད་ལས། ཙིཏྟ་རིན་ཆེན་གཞལ་ཡས་ནས། །ངོ་བོ་ཀ་ནས་དག་པའི་ཆ། །སྟོང་གསལ་འདུས་པ་སྐུ་ཡི་གདངས། །ཞལ་ཕྱག་རྫོགས་པ་བུམ་སྐུའི་ཚུལ། །ལྷུན་གྲུབ་འོད་ཀྱི་གོང་བུར་གནས། །ཐུགས་རྗེ་ཁ་ཏོག་སོ་སོར་གསལ། ཞེས་དང་། རྫོགས་པ་ཆེན་པོ་ཡེ་ཤེས་ཀློང་གི་རྒྱུད་ལས། སྙིང་ནས་མིག་ཏུ་འབྲེལ་བ་ཡི། །རང་བྱུང་གསང་བ་ཆེན་པོའི་རྩ། །ཀ་ཏི་ཤེལ་གྱི་སྦུ་གུ་ཅན། ཞེས་དང་། གསེར་ཕྲེང་ལས། རིན་ཆེན་རྒྱ་མཚོར་འབྲེལ་བའི་རྩ། །དཀར་འཇམ་ཁོག་པ་སྟོང་པ་ནི། །ཐིག་ལེ་ཁྲག་གིས་མ་གོས་པ། །ཡེ་ཤེས་ཆེན་པོ་དེ་ནས་རྒྱུ། །ཞེས་དང་། རྒྱུད་ལས། ཁྱད་པར་ཙིཏྟ་ནས་འབྲེལ་བའི། །དར་སྐུད་བ་ཆེན་རྭ་འདྲ་ལ། །དབང་པོའི་མིག་ལ་ཟུག་པ་སྟེ། །ཆོས་ཉིད་ཀུན་ནི་ལམ་ཡིན་ནོ། །ཞེས་དང་། རང་ཤར་ལས། སྒྲོན་མ་རྣམ་བཞི་འདི་ལྟ་སྟེ། །ཐིག་ལེ་སྟོང་པའི་སྒྲོན་མ་དང་། །རིག་པ་དབྱིངས་ཀྱི་སྒྲོན་མ་དང་། །ཤེས་རབ་རང་བྱུང་སྒྲོན་མ་དང་། །རྒྱང་ཞགས་ཆུ་ཡི་སྒྲོན་མ་རྣམས། །སེམས་ཅན་ཀུན་ལ་གནས་པའོ། །ཞེས་གསུངས་སོ། །