འབྲེལ་ཚད་དོན་ལྡན་དུ་བརྗོད་པ།
བཞི་པ་མྱུར་ལམ་འདི་ཉིད་འབྲེལ་ཚད་དོན་ལྡན་ཆེན་པོར་བརྗོད་པ་ནི། འདོད་འབྱུང་དབང་གི་རྒྱལ་པོ་ལྟ་བུའི་མན་ངག་རིན་པོ་ཆེ་འདི་དང་འཕྲད་ཙམ་ཉིད་ནས་དོན་ཆེན་པོ་དང་ལྡན་པ་ཡིན་ལ། ཁྱད་པར་སྔོན་གྱི་ལས་དང་སྨོན་ལམ་བཟང་པོ་ཡོད་པའི་ལས་འཕྲོ་སད་པའམ། ཡང་ན་ད་ལྟ་དབང་པོ་དང་བརྩོན་འགྲུས་རབ་དང་ལྡན་པར་གྱུར་ནས། ཇི་ལྟར་བསྟན་པའི་གནད་དོན་མཐའ་དག་ཉམས་སུ་ལོངས་ཤིང་། མཐར་ཕྱིན་པ་ན་དུས་ཡུན་རིང་པོར་འགྱང་མི་དགོས་པར་ལོ་དྲུག་ཁོ་ནས་ཕུང་པོ་ལྷག་མེད་ཉིད་དུ་སངས་རྒྱས་པར་འགྱུར་བ་ལ་ཐེ་ཚོམ་མེད་པ་ཡང་། སྙིང་ཐིག་གི་སྣོད་དུས་བརྟགས་པ་ལས། ཡང་གསང་སྙིང་ཐིག་འདི་ལ་སུས་སྤྱོད་པ། །སྔོན་དུས་ལས་ཅན་སྐྱེས་བུ་མིན་རེ་ཀན། །མངལ་དུ་མི་འཇུག་ཚེ་གཅིག་སངས་རྒྱས་ཡིན། །འདི་ཉིད་བྲིས་སམ་བཅིངས་པས་དངོས་གྲུབ་ཐོབ། །ལན་གཅིག་བཀའ་ཤོག་མཐོང་བ་ཐམས་ཅད་ཀྱང་། །ཨོ་རྒྱན་སྨོན་ལམ་མཐུ་ཡིས་ངན་སོང་ཁེགས། །དབང་ཐོབ་ཙམ་གྱིས་པདྨ་འོད་དུ་སྐྱེ། །ཉམས་སུ་བླངས་བས་འབྲས་ཐོབ་སྨོས་ཅི་དགོས། །འདི་ལ་སྤྱོད་ཚད་ཨོ་རྒྱན་ང་ཡི་སྲས། །སྐྱེ་བ་གཅིག་གིས་ཐོགས་པའི་བྱང་སེམས་ཡིན། །ཞེས་དང་། དོན་གསལ་ལས། འདི་དང་ཚིག་གི་འབྲེལ་བ་ཡང་། །སྐྱེ་བ་གསུམ་དུ་མི་ཐོགས་གྲོལ། །སྒྲ་ཙམ་རྣ་བར་ཐོས་པ་ཡང་། །ཐ་མལ་སྐྱེ་བ་འདིས་ཆོད་འགྱུར། །མངོན་སུམ་གནད་འདི་སུས་མཐོང་བ། །ཆོས་ཉིད་བར་དོར་སངས་རྒྱའོ། །ཞེས་དང་། འདི་དང་བཏགས་གྲོལ་གཉིས་སྦྲེལ་ན། །ལོ་དྲུག་ནང་ནས་ལྷག་མེད་འགྲོ། །ཞེས་དང་། ལོ་སྟོང་སྡིག་པ་སྤྱད་པས་ཀྱང་། །འདི་ཉིད་ལོ་དྲུག་ཉམས་བླངས་ན། །ལྷག་མ་མེད་པར་སངས་རྒྱའོ། །ཅིའི་ཕྱིར་ངོ་བོ་ཅེར་མཐོང་ཡིན། །རིག་པ་ཡེ་ཤེས་ངོ་བོ་ལ། །སྡིག་པའི་སྐྱོན་གྱིས་གོས་པ་མེད། །དགེ་བ་སྤྱད་ཀྱང་ཕན་མ་བཏགས། །རིག་པ་དགེ་སྡིག་དོན་ལས་འདས། །ཞེས་གསུངས་པ་ལྟར་རོ། །