དབྱངས་ཅན་མའི་དབང་གི་མཚམ་སྦྱོར།
༄༅། དབྱངས་ཅན་མའི་ལོ་རྒྱུས་ནི། དེ་ཡང་དོན་ལ་ལྷ་མོ་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་མ་ཉིད་ཡིན་ཞིང་། སྤྱིར་རྒྱུད་སྡེ་ཀུན་དང་། ཁྱད་པར་དུ་མདོ་སྡེ་ཟ་མ་ཏོག་དང་། འཇམ་དཔལ་རྩ་བའི་རྒྱུད་དང་། གསེར་འོད་དམ་པ་སོགས་ནས་གསལ་བར་གསུངས་ལ། འཇིག་རྟེན་སྤྲུལ་རྒྱུད་ལྟར་ན། སྔོན་འཇིག་རྟེན་འདི་ཆགས་ནས་མི་རིང་བར་རྫོགས་ལྡན་གྱི་ཐོག་མའི་སྐབས་ཤིག་ཏུ་རི་རབ་ཀྱི་ལྷོ་ཕྱོགས་རྒྱ་མཚོ་ཆེན་པོ་བདུད་རྩིའི་རང་བཞིན་དུ་གནས་པ་ཞིག་ཡོད་པ་ཕྱོགས་ཀུན་ནས་རླུང་གིས་བསྐྱོད་པའི་རླབས་ལས། སྲིད་པ་གསུམ་གྱི་བརྟན་གཡོའི་སྒྲ་སྐད་སྙན་པ་དུ་མ་དཔག་ཚད་བྱེ་བ་ཁྱབ་པར་གནས་སོ། །དེའི་ཚེ་ཚངས་པ་ཆེན་པོ་འཆི་མེད་ཅེས་བྱ་བས་སྒྲ་དེ་ཚངས་པའི་གྲོང་ཁྱེར་དུ་ཐོས་ནས་ལོ་སྟོང་གི་བར་སྒྲ་དེའི་རོ་མྱང་ནས་བསྡད་པའི་ཚེ། སྒྲ་སྐད་དེ་རྣམས་འདུས་པ་ལས་ལྷ་མོ་འཚེར་སྒེག་དང་ལྡན་པ་ཞིག་འཁྲུངས་སོ། །དེ་ལྟར་རྒྱ་མཚོ་ཡུམ་གྱི་དོད་དང་། ཚངས་པའི་བསམ་པ་ནི་ཡབ་ཀྱི་དོད་ཡིན་པས་ཚངས་པའི་སྲས་མོ་དང་། མཚོ་ལས་བྱུང་བས་མཚོ་བྱུང་ལྷ་མོ་དང་། རྒྱ་མཚོའི་བུ་མོ། སྒྲ་ལས་བྱུང་བས་སྒྲ་དབྱངས་ལྷ་མོ་ཞེས་གྲགས་ལ། ལྷོ་ཕྱོགས་ཀྱི་རྒྱ་མཚོ་ནི་གཤིན་རྗེའི་གནས་ཡིན་པས་གཤིན་རྗེའི་སྲིང་མོ་ཞེས་ཀྱང་གྲགས་སོ། །གང་གི་ཚེ་ལྷ་མོ་དེ་ནམ་མཁའ་ལ་འདུག་ཏེ། གང་སྐྱེ་དགུ་རྣམས་བདེན་པ་དང་ཚུལ་ཁྲིམས་དང་མི་འཚེ་བ་ལ་གནས་པའི་ཚེ་ལྷ་མོ་དེ་དགའ་བས་གར་མཛད་པས་བརྟན་གཡོ་ཐམས་ཅད་ལས་ཡིད་དུ་འོང་བའི་སྒྲ་མཐའ་ཡས་པ་འབྱུང་ཞིང་། ཡིད་ཅན་རྣམས་བློ་གྲོས་རྒྱས་ཤིང་བརྗོད་པ་ལེགས་པ་ཡིན་ལ། སྐྱེ་རྒུ་རྣམས་དེ་ལྟ་བུའི་སྤྱོད་པ་ལས་ལྡོག་པའི་ཚེ་ལྷ་མོ་དེ་ཕྱིར་ཕྱོགས་དེ་འདུག་པས་སྒྲ་ཐམས་ཅད་ཉམས་ཏེ་ཡིད་ཅན་རྣམས་རྨོངས་ཤིང་བརྗོད་མི་མཁས་པར་འགྱུར་བ་ཡིན་ཞིང་དེ་ཚེ་དབྱངས་ཅན་མ་ཞེས་གྲགས་པར་བཤད། རང་ཅག་ནང་པའི་ཐེག་པ་ཐུན་མོང་པའི་ལུགས་ལྟར་ན། སྤྱན་རས་གཟིགས་ཀྱིས་འགྲོ་བ་མཐའ་དག་ཐུགས་རྗེ་ཆེན་པོས་སྐྱོབས་པར་དགོངས་ཤིང་སྤྱན་ཆབ་གཡས་གཡོན་ལས་སྒྲོལ་མ་དཀར་ལྗང་དང་། ཚེམས་ཀྱི་མཆེ་བ་ལས་དབྱངས་ཅན་ལྷ་མོ་སོགས་སྤྲུལ་པར་གྲགས་ཤིང་། རང་འདྲའི་སྒྲ་དབྱངས་ལྷ་མོ་མང་པོ་སྐུ་ལས་སྤྲུལ་ནས་སེམས་ཅན་གྱི་དོན་བྱེད་པར་བཞེད་དེ། ལྷ་མོ་བརྒྱད་ཁྲི་བཞི་སྟོང་སྐུ་ལས་སྤྲོས་པའི་མཚམས་སུ་བདུད་སྡིག་ཅན་གྱིས་རྒྱུན་བཅད་པས་འཇིག་རྟེན་ན་མཁས་པ་ཉུང་བ་ནི་རྒྱུ་དེས་ལན་ཞིང་། ལྷ་མོ་རབ་བཀྲམ་ཞིག་བྱུང་ན་སྐྱེ་འགྲོ་ཐམས་ཅད་མཁས་པ་འབའ་ཞིག་ཏུ་འགྲོ་རྒྱུ་ཡིན་པར་ཡང་བཞེད་པ་མང་ངོ་། །ཐུན་མོང་མ་ཡིན་པའི་ལུགས་ལྟར་ན་ཉག་གཅིག་ཆོས་ཀྱི་དབྱིངས་ནས་ཡེ་ཤེས་སྒྱུ་མའི་སྣང་བརྙན་ཆུ་ཟླའི་རོལ་གར་བཞིན་དུ་རྡུལ་གཅིག་གི་སྟེང་ན་རྡུལ་སྙེད་ཀྱི་ཞིང་རྣམས་སུ་ཡེ་ནས་རང་བྱུང་རང་ཤར་ཆེན་པོར་གནས་པར་འདོད་དོ། །དེ་ལྟ་བུའི་འཕགས་མ་དེ་ཉིད་ལའང་སྒྲུབ་ཐབས་ཀྱི་རྣམ་གྲངས་མང་དུ་ཡོད་པ་ལས། འདིར་སྤྲུལ་པའི་སྐུ་མཆོག་ལུང་རིག་གླིང་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱུང་བའི་རྗེས་སུ་གནང་བ་ཟབ་མོ་བསྐུར་བའི་སྐབས་སུ་བབས་པ་ཡིན། ཞེས་སོགས་བརྗོད། མགོ་སྤྲུལ་བས་སོ།