འོད་ཟེར་ཅན་མའི་དགྲ་མནན་ལྕགས་ཀྱི་མཆོད་རྟེན་ནག་པོ།

དཔའ་མོ་འོད་ཟེར་ཅན་མའི་དྲག་པོའི་ལས་མཐའ་དགྲ་མནན་ལྕགས་ཀྱི་མཆོད་རྟེན་ནག་པོ་ཞེས་བྱ་བ་བཞུགས་སོ།།

འཆི་བདག་བདུད་དཔུང་འཇོམ་མཛད་ཧེ་རུ་ཀའི། །སྦྱོར་ཡུམ་མཁའ་འགྲོའི་གཙོ་མོ་མ་རི་ཙྱཻར། །གུས་པས་བཏུད་ནས་མངོན་སྤྱོད་དྲག་པོའི་ལས། །དགྲ་མནན་ལྕགས་ཀྱི་མཆོད་རྟེན་ནག་པོ་འབྲི། །དེ་ཡང་བསྙེན་སྒྲུབ་ཐེམ་པའི་རྣལ་འབྱོར་བས་ཤིན་ཏུ་མ་རུང་བའི་དགྲ་དང་ཇག་ཆོམ་རྐུན་པོ་གདུག་པ་ཅན་རྣམས་མནན་པའི་ལས་ཀྱི་སྦྱོར་བ་རྩོམ་པར་འདོད་པས། གང་དུ་བྱ་བའི་གནས་སུ། རང་གཞུང་ལས། མི་བསད་ས་ལ་དུག་ཁྲག་སྦྲུས༔ དབུས་སུ་བྲུབ་ཁུང་བང་རིམ་གསུམ༔ དེ་ནང་དགྲ་འདྲེའི་ལིང་ག་ནི༔ ཟག་རྫས་བྱུགས་ཤིང་ཚོན་སྐུད་དཀྲིས༔ རྩང་མཚེ་ཡུངས་དང་མཚོན་ཆས་བསྐོར༔ ཅེས་དང་། ཁྲིའུར་ལྕགས་སྣོད་དམར་གྱི་གཏོར༔ ལྷ་གྲངས་མཚེ་ཡུངས་རྩང་ཕུར་བསྐོར༔ ཞེས་སོགས་གསུངས་པ་རྣམས་དཀྱུས་ལྟར་དང་། གཞན་ཡང་ཐུན་རྫས། མནན་སྣོད། ཕུང་རེ། བྱད་ཐག རོ་གཡམ་སོགས་བསགས་པ་མཐོང་བརྒྱུད་བཞིན་བྱའོ། །དེ་ནས་བདག་གི་རྣལ་འབྱོར་སྒྲུབ་པའི་རིམ་པ་རྣམས་གྲུབ་ནས་སྐབས་སུ་བབ་པ་ན། དགྲ་མནན་ཁོ་ནའི་ཚེ་ཐོག་མར་བསྐུལ་བ་ནི། རྒྱས་པར་སྤྲོ་ན་དྲག་བསྐུལ་ཀླུ་བདུད་ཁྲོས་པའི་ང་རོ་ཚང་བར་གཏོང་བའམ། ཅུང་ཟད་བསྡུ་ན། ཧཱུྃ་བྷྱོ༔ དགོངས་སུ་གསོལ་ལོ་རྩ་གསུམ་དམ་ཅན་ཚོགས༔ གསན་དུ་གསོལ་ལོ་འཕགས་མ་འོད་ཟེར་ཅན༔ ཐུགས་དམ་བསྐུལ་ལོ་དམ་ཅན་དྲེགས་པའི་སྡེ༔ དབྱིངས་ནས་བཞེངས་ཤིག་དགྲ་འདྲེའི་གཤེད་དུ་ཆས༔ དམ་ཅན་ཕོ་རྒྱུད་ཚོགས་རྣམས་གཡས་ནས་ཆས༔ དགྲ་བོའི་ཕོ་རྒྱུད་མ་ལུས་གྲི་རུ་སོད༔ བསྲུང་མ་མོ་རྒྱུད་ཚོགས་རྣམས་གཡོན་ནས་ཆས༔ དགྲ་བོའི་མོ་རྒྱུད་མ་ལུས་མངལ་ནས་སྐོམས༔ ཡུལ་ལྷ་དྲག་རྩལ་ཅན་རྣམས་རྒྱབ་ནས་ཆས༔ དགྲ་བོའི་ལྷ་སྲུང་རང་གཤེད་རང་ལ་ཕོབས༔ བདག་གི་ཚེ་རབས་བསྲུང་མ་མདུན་ནས་ཆས༔ དགྲ་རྐུན་ཇག་ཆོམ་ལུས་སྲོག་སོ་སོར་ཕྲོལ༔ ཁྱད་པར་སྔ་དགྲ་བརྡར་བའི་དམ་ཉམས་ཀྱི། །མགོ་བོ་ཆོད་ལ་དོན་སྙིང་རྔམ་ཟས་གྱིས། །ཕྱི་དགྲ་ཡིད་ལ་བརྣག་པའི་ལོག་འདྲེན་གྱི། །བསམ་ངན་རླུང་ལ་སྐུར་ལ་དབང་པོ་སྣུབས། །ད་དགྲ་ལག་ཏུ་ལེན་པའི་དགྲ་རྐུན་གྱི། །མིག་དབང་སྐུད་པས་ཚེམས་ལ་ཚ་གྲང་གི། །ནད་ཡམས་ཆར་དུ་ཕོབས་ལ་མི་ནོར་རློགས། །མདོར་ན་ལོག་སྦྱོར་ཤོམ་པའི་དགྲ་འདྲེ་ལ། །མངོན་སྤྱོད་དྲག་པོའི་ཕྲིན་ལས་མི་ཟད་པས། །གནམ་ལྕགས་ཐོག་མདས་བྲག་རུལ་བཤིགས་པ་ལྟར། །ད་ལྟ་སྐད་ཅིག་བརླག་པའི་ཕྲིན་ལས་མཛོད། །ཅེས་བསྐུལ་ལོ། །གསེར་སྐྱེམས་ནི། རཾ་ཡཾ་ཁཾ། བརྗོད་པས། གསེར་སྐྱེམས་ཟག་མེད་བདུད་རྩིའི་རྒྱ་མཚོར་གྱུར་བར་བསམ་ལ། ཨོཾ་ཨཱ༔ཧཱུྃ་གིས་བྱིན་གྱིས་བརླབས་ལ། རྩ་རྒྱུད་བླ་མ་ཡི་དམ་ཞི་ཁྲོའི་ཚོགས། །ཁྱད་པར་རྒྱལ་ཡུམ་ཁྲོ་མོ་འོད་ཟེར་ཅན། །རིགས་བཞི་ཁྲོ་མོ་བརྒྱད་སོགས་སྤྲུལ་འཁོར་བཅས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །དཔལ་མགོན་ཕྱག་དྲུག་རལ་གཅིག་དུད་སོལ་མ། །དྲང་སྲོང་རྡོར་ལེགས་སྡེ་དཔོན་སྔགས་བདག་ཚོགས། །འཁོར་དང་ཡང་འཁོར་སྤྲུལ་པ་ཡང་སྤྲུལ་བཅས། ། གསེར་སྐྱེམས་འདི་བཞེས་དགྲ་ཇག་ཆོམ་རྐུན་སྒྲོལ། །སྔགས་འཆང་བདག་གི་རིགས་ཀྱི་སྲུང་མ་དང་། །ས་ཕྱོགས་འདི་ཡི་ཡུལ་གཞི་གནས་གཏེར་བདག །ལོ་ཟླ་ཞག་དུས་ཚེས་ལ་དབང་བའི་ལྷས། །གསེར་སྐྱེམས་འདི་བཞེས་མངོན་སྤྱོད་ཕྲིན་ལས་མཛོད། །ཅེས་ཕུལ་ལོ། །གཟུ་དཔང་ནི། ཧཱུྃ་བྷྱོཿ དགོངས་ཤིག་རྩ་གསུམ་སྲུང་མ་རྣམས། །གསོན་ཅིག་ཁྲོ་མོ་འོད་ཟེར་ཅན། །གཟིགས་ཤིག་སྤྲུལ་པ་ཡང་སྤྲུལ་འཁོར། །གཟུ་དཔང་མཛོད་ཅིག་མཁྱེན་ལྡན་རྣམས། །ཐབས་ཀྱིས་གདུལ་དཀའ་འདུལ་བའི་ཕྱིར། །ཐུགས་རྗེས་ཡེ་ཤེས་སྐུར་བཞེངས་ལ། །དབྱིངས་ནས་དགོངས་ཤིང་གཟིགས་སུ་གསོལ། །རྣལ་འབྱོར་སྒྲུབ་པོའི་གཟུ་དཔང་མཛོད། །རིག་འཛིན་བདག་ལ་དགྲ་བྱུང་ན། །མ་ཉེས་མ་ཡོ་སྲུང་མས་མཁྱེན། །གཟུ་དང་དཔང་དུ་དཀོན་མཆོག་བཞུགས། །ཞལ་ལྕེ་སྣང་སྲིད་ལྷ་འདྲེས་ཆོད། །དམ་ཉམས་དགྲ་བོ་ལས་ངན་འདིས། །རྒྱལ་བསྟན་བཤིགས་ཤིང་མཆོག་གསུམ་སྨད། །བླ་མའི་ཐུགས་དཀྲུགས་འདུས་སྡེ་བརྙས། །རྟེན་གསུམ་བཤིག་ཅིང་མཚམས་མེད་སྤྱད། །ལུས་ཀྱིས་དཀོར་འཕྲོག་བརྡུང་བརྡེག་བྱས། །ངག་གིས་ངན་བརྗོད་ཡ་ག་བསྒྲགས། །ཡིད་ཀྱིས་བསམ་ངན་དུག་ལྟར་གཡོས། །ཚེ་དང་སྲོག་ལ་བར་ཆད་བྱས། །སྔ་དགྲ་ཇག་ཆོམ་རྐུ་འཕྲོག་བྱས། །ཕྱི་དགྲ་བསམ་ངན་དུག་ལྟར་གཡོས། །ད་དགྲ་ངན་སྦྱོར་སྣ་ཚོགས་བརྩམས། །མི་ཕྱུག་ནོར་ལ་བྱེ་བྲལ་གཏོང་། །ཉམས་པ་བདུན་ལྡན་ཞིང་བཅུ་ཚངས། །འབྲས་བུ་ཤིན་ཏུ་བརྣག་དཀའ་ལ། །ཐོགས་མེད་ཡེ་ཤེས་སྤྱན་ལྡན་རྣམས། །མྱུར་དུ་མངོན་སྤྱོད་ཕྲིན་ལས་མཛོད། །དམིགས་བྱ་བསྐྱེད་པ་ནི། ཨེ་སྥ་ར་ཎ་ཕཊ། མདུན་བསྐྱེད་རྒྱལ་ཡུམ་ཁྲོ་མོའི་དཀྱིལ་འཁོར་གྱི་འོག་ཕྱོགས་སུ་དགྲ་བོ་བྲུབ་པའི་བཙོན་དོང་ཨེ་ལས་གྲུ་གསུམ་གནམ་ལྕགས་ཀྱི་ཁང་སྒྲོམ་དམར་ནག་འབར་བ། ཁ་དོག་ཅིང་གཏིང་ཟབ་པའི་ནང་དུ་ནྲྀ་དང་ཏྲི་ལས་བསྒྲལ་བའི་ཞིང་བཅུ་དང་ཉམས་པ་བདུན་ལ་གཏོགས་པའི་དགྲ་བགེགས་གང་ལ་བྱ་བ་དེ་རྣམས་མྱ་ངན་གྱི་ཕྱག་རྒྱ་ཅན་ཉམས་ཐག་པའི་གཟུགས་སུ་གནས་པར་གྱུར་བར་བསམ་ལ། ཕོ་ཉ་སྤྲོ་བ་ནི། བདག་མདུན་ཐུགས་ལས་འོད་ཟེར་དམར་ནག་འཕྲོས༔ དེ་ལས་འགུགས་བྱེད་ཕོ་ཉ་རྡུལ་ལྟར་འཚུབསཿ བསྟན་འགྲོར་གནོད་བྱེད་སྤྱི་དགྲ་སྒོས་དགྲ་དང༔ ཁྱད་པར་བདག་ལ་དངོས་སུ་གཤེ་ཞིང་སྡང༔ ནོར་རྫས་ཕྲོགས་ཤིང་བརྡུང་བརྡེག་སྨྲ་ཕབ་བྱེད༔ ལྐོག་ནས་བསམ་ངན་རྐུ་ཤོམ་ཟས་དུག་སྦྱོར༔ མི་ཁ་སྒྲོ་སྐུར་གཏམ་ངན་ཕྱོགས་སུ་བཀྲམ༔ གསོད་ཤོམ་མཐུ་གཏད་ཁ་རྗེ་དབང་ཐང་ལ༔ གནོད་ཅིང་ལེགས་པའི་ལམ་ལ་བར་གཅོད་པའི༔ མུ་སྟེགས་ཀླ་ཀློ་མཐའ་དམག་བོད་ཆེན་དགྲ༔ ཡིད་ལ་དམིགས་པའི་ཇག་ཆོམ་རྐུན་པོ་དང༔ ཕུང་བྱེད་དམ་སྲི་འབྱུང་པོའི་བླ་ཚེ་སྲོག༔ ལྕགས་ཀྱུས་བཀུགས་ཤིང་ཞགས་པས་རབ་ཏུ་བཅིང་༔ ལྕགས་སྒྲོག་གིས་བསྡམས་དྲིལ་བུས་མྱོས་བྱས་ཏེ༔ རང་དབང་མེད་པར་ཉེས་ཅན་བཙོན་ཁྲིད་ལྟར༔ མདུན་དུ་གྲུ་གསུམ་དགྲ་གཟུགས་རྫས་ལ་བསྟིམས༔ འགུགས་པ་ནི། ན་མོ། རིག་འཛིན་རྩ་རྒྱུད་ཀྱི་བླ་མ། ཡི་དམ་རྒྱལ་བ་ཞི་ཁྲོ། གནས་གསུམ་གྱི་དཔའ་བོ་མཁའ་འགྲོ། བསྟན་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བསླུ་བ་མེད་པའི་དཀོན་མཆོག་རིན་པོ་ཆེ་རྣམ་པ་གསུམ་གྱི་བཀའ་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་རྣམས་ཀྱི་བཀའ་བདེན་པ་དང་། ཁྱད་པར་དུ་དྲག་མོ་འོད་ཟེར་ཅན་གྱི་དཀྱིལ་འཁོར་གྱི་ལྷ་ཚོགས་སྤྲུལ་པ་ཡང་སྤྲུལ་ཕྱག་བརྙན་དང་བཅས་པའི་བཀའ་བདེན་པ་དང་། ཆོས་ཉིད་རང་བཞིན་གྱིས་རྣམ་པར་དག་ཅིང་འགྱུར་བ་མེད་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བདེན་པ་ཆེན་པོའི་མཐུས། མུ་སྟེགས་ཀླ་ཀློ་མཐའ་དམག་རྒྱ་འདྲེ་དགྲ་སྲི་གདུག་པ་ཅན་རྣམས་དང་། ཁྱད་པར་བདག་ཅག་དཔོན་སློབ་ཡོན་མཆོད་རྣམས་ལ་གནོད་ཅིང་འཚེ་བར་བྱེད་པའི་ཇག་ཆོམ་རྐུན་པོ་ཡིད་ལ་དམིགས་པ་རྣམས་ཀྱི་བླ་སྲོག་རྣམ་པར་ཤེས་པ་སྲིད་པ་གསུམ་གྱི་ཁོང་གང་ན་གནས་ཀྱང་སྐད་ཅིག་རང་དབང་མེད་པར་དགྲ་གཟུགས་ལིང་ཀ་མིང་རུས། བླ་རྟེན་རྫས་དང་བཅས་པ་འདི་རྣམས་དང་དབྱེར་མེད་དུ་ཁུག་ཅིག ཨོཾ་ཨཱརྱ་མ་རི་ཙྱཻ་མཱུཾ་སྭཱཧཱ༔ ནྲྀ་ཏྲི་སརྦ་ཤ་ཏྲུཾ་ཧུར་ཐུམ་ཛཿ ནྲྀ་ཤ་ཀུ་རུ་ནྲྀ་ཤ་ཀུ་རུ༔ ཁོ་སོ་པ་ཏི་ཡཾ་རི་ཏི༔ ཡཾ་སེན་ཡཾ་སེན་མེན་ཡཾ༔ སྙིང་ཚལ་པ་བཾ་རིལ་རྦད༔ གནོད་བྱེད་མཐའ་དམག་ཡུལ་འདྲེ་དགྲ་རྐུན་ཇག་པའི་བླ་རྟེན་ཚེ་རྟེན་སྲོག་རྟེན་ཐམས་ཅད་ཁུག་ཅིག་ཛ་ཛཿ ཛཿཧཱུྃ་བཾ་ཧོ༔ ལན་གསུམ་མམ་དགུ་སོགས་ཀྱིས་འགུགས་གཞུག་དྲག་པོ་རྟགས་ཐོན་དུ་བྱ། བསྒྲལ་མནན་ལྟོ་སྦྱར་ཏེ་གཏོང་སྐབས་བསྒྲལ་ལས་ཀྱི་གཞུང་གི་འགུགས་པའི་བར་བརྗོད་པས་འཐུས་ཕྱིར་འདི་ཡན་གཏོང་མི་དགོས། དེ་ནས་གང་ལྟར་ཡང་ཁྱད་པར་དུ་དགྲ་བོའི་བླ་འགུགས་པ་ནི། ཧཱུྃ་བྷྱོ༔ ད་ནི་དགྲ་བོ་བསྒྲལ་བའི་དུས་ལ་བབས། །ཇག་ཆོམ་རྐུན་པོ་འགུགས་པའི་དུས་ལ་བབས། །ད་ལྟ་ནམ་གྱི་སྲོད་ལ་བབས་དུས་འདིར། །དམ་ཉམས་ཆོམ་རྐུན་ལས་ལ་གཡེངས་བའི་དུས། །དགྲ་བོའི་བླ་ཚེ་རྣམ་ཤེས་བླ་ཚེ་གཡེངས་བའི་ཚེ། །བླ་འཁྱམས་ལས་ངན་མྱུར་དུ་ཁུག་ལ་ཤོག བྷྱོ༔ ད་ལྟ་ནམ་གྱི་གུང་ལ་བབས་པའི་དུས། །སེམས་མེད་འབྱུང་བ་ཆུ་ཡང་གཉིད་ལོག་གི། །དགྲ་བོ་ལས་ངན་སྡིག་ཅན་གཉིད་ལོག་ཚེ། །བླ་ཡིད་འཁྱམས་པོ་མྱུར་དུ་ཁུག་ལ་ཤོག །བྷྱོ༔ ད་ལྟ་ནམ་གྱི་ཐོ་རངས་ལ་བབས་ཚེ། །དམ་ཉམས་དགྲ་བོའི་བླ་ཚེ་ཤེས་པ་འཕྱོ། །དགྲ་བོའི་བླ་ཚེ་རྣམ་ཤེས་འཕྱོ་བའི་དུས། །བླ་ཚེ་འཁྱམས་པོ་མྱུར་དུ་ཁུག་ལ་ཤོག །བྷྱོ༔ ད་ལྟ་ནམ་ལང་ཉི་མ་ཤར་བའི་དུས། །མི་ཕྱུགས་ཐམས་ཅད་ལས་ལ་འགྲིམ་དུས་སུ། །དགྲ་བོའི་རྣམ་ཤེས་སྒོ་རུ་ཐོན་པའི་དུས། །བླ་ཡིད་འཁྱམས་པོ་མྱུར་དུ་ཁུག་ལ་ཤོག །བྷྱོ༔ ད་ལྟ་ཉི་མའི་གུང་ལ་བབས་པའི་དུས། །དགྲ་རྐུན་ཇག་པའི་རྣམ་ཤེས་བྱིང་ཞིང་མྱོས། །དགྲ་བོའི་བླ་ཚེ་འཐོམས་ཤིང་མྱོས་པའི་དུས། །བླ་ཡིད་སེམས་གསུམ་མྱུར་དུ་ཁུག་ལ་ཤོག །བྷྱོ༔ ད་ལྟ་ཉི་ནུབ་གྲིབ་སོ་ཕོག་པའི་དུས། །སྙིང་མི་དགའ་ཞིང་ཤེས་པ་འཐིབ་ཅིང་རྨུགས། །དགྲ་བོའི་བླ་ཚེ་རྣམ་ཤེས་རྨོངས་པའི་དུས། །ལས་ངན་བླ་འཁྱམས་མྱུར་དུ་ཁུག་ལ་ཤོག །བླ་འཁྱམས་ལས་ངན་འཕྱོ་བའི་དུས་དྲུག་ལ། །བླ་གཤེད་ཕོ་ཉ་ཁྱེད་རྣམས་མྱུར་དུ་རྒྱུགས། །མགོན་མེད་བྱིའུ་ཕྲུག་རྒྱ་ཁྲས་ཟིན་པ་ལྟར། །རང་དབང་མེད་པར་མྱུར་དུ་ཁུག་ལ་ཤོག །བྷྱོ༔ དགྲ་བོའི་བླ་འཁྱམས་མི་རུ་བརྫུ་བ་ན། །ཕོ་ཉ་གནོད་སྦྱིན་སྲིན་མོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག ། དགྲ་བོའི་བླ་འཁྱམས་ཤ་བར་བརྫུ་བ་ན། །ཕོ་ཉ་གསེར་གྱི་སྟག་མོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམས་དགོ་བར་བརྫུ་བ་ན། །ཕོ་ཉ་ལྕགས་དོམ་ནག་པོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག ། དགྲ་བོའི་བླ་འཁྱམས་ལུག་ཏུ་བརྫུ་བ་ན། །ཕོ་ཉ་ལྕགས་ཀྱི་སྤྱང་མོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམས་ར་རུ་བརྫུ་བ་ན། །ཕོ་ཉ་བྱི་རུའི་ཁྱི་མོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམས་བྱ་རུ་བརྫུ་བ་ན། །ཕོ་ཉ་བྱ་རྒྱལ་ཁྱུང་གི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམས་གླ་བར་བརྫུ་བ་ན། །ཕོ་ཉ་གསེར་གྱི་འཕར་བའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག ། དགྲ་བོའི་བླ་འཁྱམས་བོང་བུར་བརྫུ་བ་ན། །ཕོ་ཉ་ཟངས་ཀྱི་དྲེད་མོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །བྷྱོ༔ དམ་ཉམས་དགྲ་བོའི་བླ་རྟགས་བརྒྱད་པོ་ལ། །ཕོ་ཉ་གཉེན་པོ་བརྒྱད་ཀྱི་སྐུར་སྤྲུལ་ནས། །བྲུབ་ཁུང་ཐར་མེད་བཙོན་དོང་འདིའི་ནང་དུ། །དགྲ་གཟུགས་རྟེན་ལ་དམ་ཉམས་བླ་སྲོག་ཁུག །བླ་ཚེ་སྲོག་ལ་དྲག་པོའི་ཕུར་བུ་ཐོབ། །ཕུར་མཚོན་ཐུན་གྱིས་ལུས་སེམས་ཕྱེ་མར་ཐོངས། །དགྲ་བོའི་བླ་སྲོག་སྟེང་དུ་མཱ་ར་ཡ། །སྲོག་རྩ་དམར་པོ་རྦད་ཀྱིས་ཆོད་ལ་ཤོག །ར་དང་ལུག་དང་བོང་བུ་རྣམ་པ་གསུམ། །བླ་རྟགས་ཡིན་པས་མྱུར་དུ་ཁུག་ལ་ཤོག །སོ་དང་སེན་མོ་པགས་པ་གསུམ་པོ་ནི། །ཕྱི་རྟགས་ཡིན་པས་ད་ལྟ་ཁྱེར་ལ་ཤོག །རྣ་བ་ལྕེ་དང་མིག་བུ་གསུམ་པོ་ནི། །དབང་རྟགས་ཡིན་པས་མྱུར་དུ་ཁྱེར་ལ་ཤོག །གློ་བ་སྙིང་དང་མཆིན་པ་གསུམ་པོ་ནི། །དོན་སྙིང་ཡིན་པས་མ་ཐོགས་ཁྱེར་ལ་ཤོག །གཉེ་མ་སྒྱུ་མ་མཁལ་མ་གསུམ་པོ་ནི། །ནང་ཁྲོལ་ཡིན་པས་མ་འགྱངས་ཁྱེར་ལ་ཤོག །ཤ་ཁྲག་བརྒྱན་པའི་གཏོར་མ་འདི་བཞེས་ལ། །བཅོལ་པའི་ཕྲིན་ལས་ད་ལྟ་མྱུར་འགྲུབ་མཛོད། །ཅེས་བསྐུལ་ཞིང་། རྩ་སྔགས་མཐར། གནོད་བྱེད་མཐའ་དམག་ཡུལ་འདྲེ་དགྲ་ཇག་ཆོམ་རྐུན་ཐམས་ཅད་ཀྱི་བླ་ཤ་རེ་མ་ཏི་འགྲིམ་འགྲིམ༔ ཤ་མ་རུ་ཏི་ཐུལ་ཐུལ༔ མྱོགས་མྱོགས༔ ཡེད་ཡེད༔ ཤ་མ་རུ་ཏི་ཁུག་ཁུག༔ ལིང་མྱོགས༔ ལིང་ཤག༔ ལིང་ཐུཾ༔ ཙ་མུནྟྲི་བྷྱོ་ཛ༔ ཞེས་བླ་འགུགས་ལྡེ་མིག་གི་སྔགས་ཅི་ནུས་དང་། ཡང་རྩ་སྔགས་མཐར། ནྲྀ་ཛ་ཏིལ་བཾ་རིལ༔ ཨ་ཀརྴ་ཡ་ཛ་ཛཿ ནྲྀ་ཤ་ཀུ་རུ་ནྲྀ་ཤ་ཀུ་རུ༔ ཁོ་སོ་བ་ཏི༔ ཡཾ་རི་ཏི༔ ཡཾ་སེན་ཡཾ་སེན༔ སྙིང་ཚལ་པ་བཾ་རིལ་རྦད༔ གནོད་བྱེད་མཐའ་དམག་ཡུལ་འདྲེ་དགྲ་རྐུན་ཇག་པའི་བླ་རྟེན་ཚེ་རྟེན་སྲོག་རྟེན་ཐམས་ཅད་ཁུག་ཅིག་ཛ་ཛ༔ ཞེས་བཏགས་པའང་མང་དུ་བཟླས་ལ། བསྒྲལ་མནན་ལྟོ་སྦྱར་ཚེ་ཕྱག་རྒྱ་རྣམ་བཞིས་རྒྱས་བཏབ་པ་སོགས་ནས་ཚེ་ཁྲུས་ཀྱི་དགོངས་པའི་མཇུག་བར་བསྒྲལ་ལས་ཀྱི་དཀྱུས་ལྟར་བཏང་ནས་འོག་གི་བསད་དམིགས་ལ་འཇུག མནན་པ་ཁོ་ནའི་སྐབས་ཕྱག་རྒྱ་རྣམ་བཞིས་རྒྱས་གདབ་འདིར་ལེན་ཏེ། ཧཱུྃ་ཧཱུྃ༔ དཀོན་མཆོག་བདེན་མཐུས་བཀུགས་པའི་མཐའ་བཞིའི་དམག༔ དགྲ་ཇག་ཆོམ་རྐུན་ཡུལ་འདྲེ་ཕུང་སྲི་རྣམས༔ ཛཿཡིག་ལས་སྐྱེས་ཕོ་ཉ་ལྕགས་ཀྱུ་ཅན༔ གྲངས་མེད་འཕྲོས་པས་ལྕགས་ཀྱུས་སྙིང་ནས་བཟུང་༔ དམ་ཉམས་དགྲ་བགེགས་རང་དབང་མེད་པར་བཀུགས༔ དམིགས་རྟེན་གཟུགས་དང་དབྱེར་མེད་གཅིག་ཏུ་གྱུར༔ ཧཱུྃ་ཡིག་ལས་སྐྱེས་ཕོ་ཉ་ཞགས་པ་ཅན༔ བདག་མདུན་ཐུགས་ལས་གྲངས་མེད་འཕྲོས་པ་ཡིས༔ ཞགས་པ་ནག་པོས་ཡན་ལག་རབ་ཏུ་བསྡམ༔ དམིགས་རྟེན་གཟུགས་དང་ཐ་དད་མེད་པར་གྱུར༔ བཾ་ཡིག་ལས་སྐྱེས་ཕོ་ཉ་ལྕགས་སྒྲོག་ཅན༔ རྡུལ་དུ་འཚུབས་པས་རྐང་ལག་ལྕགས་སུ་བཅུག༔ དམིགས་པའི་གཟུགས་དང་དབྱེ་བ་མེད་པ་རུ༔ རབ་ཏུ་བསྡམ་པས་རང་དབང་མེད་པར་གྱུར༔ ཧོ་ལས་བྱུང་བའི་ཕོ་ཉ་དྲིལ་བུ་ཅན༔ གྲངས་མེད་འཕྲོས་པས་དགྲ་བགེགས་གང་ཡིན་གྱི༔ ཡིད་མྱོས་དྲན་པ་སྟོར་ཏེ་དབང་མེད་པར༔ གཟུགས་དང་དབྱེར་མེད་མཉམ་པ་ཉིད་དུ་གྱུར༔ རྩ་བའི་སྔགས་ཀྱི་ཤམ་བུ་རུ༔ བཛྲ་ཨངྐུ་ཤ་ཡ་ཛ༔ རཏྣ་པ་ཤ་ཧཱུྃ༔ པདྨ་སྥོ་ཊ་བཾ༔ ཀརྨ་གནྚེ་ཧོ༔ དེ་ནས་ལྷ་དང་དབྱེ་བ་ནི། དམར་གཏོར་དང་ཕུད་ཀོང་ཨ་ཀ་རོས་བྱིན་གྱིས་བརླབས་ལ། རྩ་སྔགས་དང་བཱ་ལིང་ཏའི་སྔགས་ཀྱིས་ཕུལ་ནས། ཧཱུྃ་བྷྱོ༔ ཡེ་ཤེས་སྤྱན་ལྡན་ལྷ་སྲུང་དམ་ཚིག་ཅན༔ ཁྱེད་རྣམས་ཐུགས་རྗེ་ཕྲིན་ལས་དུས་ལ་བབས། །ཞིང་བཅུ་ཉམས་པ་བདུན་ཚང་དགྲ་བོ་ལ། །བསྲུང་སྐྱོབས་བྱེད་པའི་ཡེ་ཤེས་ལྷ་ཡོད་ན། །མགོན་སྐྱབས་མ་མཛད་འགྲ་འདིའི་བདུད་དུ་ཕོབས༔ ཐུགས་རྗེ་ཆེན་པོས་ཆོས་ཀྱི་དབྱིངས་སུ་སྒྲོལ། །དགྲ་འདི་སྐྱོབས་བྱེད་འཇིག་རྟེན་ལྷ་འདྲེ་རྣམས། །དགྱེས་མཆོད་གཏོར་སྐྱེམས་བཞེས་ལ་རིང་དུ་སྤོངས། །ཕུང་བྱེད་དགྲ་འདྲེའི་སྲོག་གཤེད་མ་མཛད་ན། །བསྲུང་བྱ་སྲུང་བྱེད་ཆབ་གཅིག་འཇོམ་པར་འགྱུར། །དེ་བས་དམ་ཉམས་ཕུང་བྱེད་སྡིག་ཅན་དགྲ། །སྐྱོབས་བྱེད་ལྷ་དང་ཕྱེས་ལ་བདུད་དང་སྤྲོད། །ཞིང་བཅུ་ལྡན་པའི་དམ་ཉམས་དགྲ་བོ་རྣམས། །སྲུང་སྐྱོབས་བྱེད་པའི་ལྷ་དང་ད་ལྟ་ཕྲོལ། །བསྲུང་བཟློག་མཁན་གྱི་བན་བོན་རྡུལ་དུ་རློགས། །རུས་ནས་ཉེ་བའི་ཕ་སྤུན་ནང་ནས་ཤིག །ཤ་ནས་ཉེ་བའི་ཞང་པོ་གྲི་རུ་སོད། །མནའ་ཐོས་སྦྲེལ་བའི་གྲོགས་པོ་བདུད་དུ་ཕོབ། །ཕ་མིང་མ་སྲིང་བྱམས་པའི་མགོ་བོ་ཆོད། །བུ་ཚ་རིགས་རྒྱུད་འཛིན་པའི་སྙིང་ཁྲག་འཐུང་། །སྲིད་སྡེ་ཁྱིམ་ཚང་དགོས་ཚན་དགྲ་རུ་སློངས། །ཕོ་རྒྱུད་རབ་ཆད་སྒོང་ཚལ་ཧུར་ཐུམ་སོད། །མོ་རྒྱུད་མགོ་ལ་ཡུག་རབས་རྒྱུན་མ་གཅོད། །མགྱོགས་པའི་རྟ་སོད་སྲ་བའི་གོ་ཆ་ཤུས། །རྣོ་བའི་མཚོན་དབྲོག་དཔའ་བའི་དོན་སྙིང་ཕྱུངས། །རུ་བའི་སྦྲ་གཏུབ་ཐུ་བའི་སྒོ་ཁྱི་སོད། །སྡུག་བསྔལ་ཆར་དྲག་བཞིན་དུ་བར་མ་གཅོད། །མྱ་ངན་མེ་ཆེན་བཞིན་དུ་འབར་དུ་ཆུག །བསམ་པའི་དོན་རྣམས་འགྲུབ་པའི་སྐབས་མ་གཏོང་། །ཕོ་སྲི་མོ་སྲི་ཆེ་སྲི་ཆུང་སྲི་དང་། །རྒན་སྲི་གཞོན་སྲི་དར་སྲི་གོད་སྲི་དང་། །དགྲ་སྲི་མཚོན་སྲི་ནད་སྲི་མ་ལུས་ཕོབས། །ལྟས་ངན་གདོན་བགེགས་གློ་བུར་ཡེ་འདྲོག་དང་། །ནད་ཡམས་དུས་མིན་འཆི་བ་མཐའ་དག་ཀུན། །གནོད་སྡང་གདུག་སེམས་ལྡན་རྣམས་སྟེང་དུ་བཟློག །བཀྲ་མི་ཤིས་དང་མི་རུང་སྣ་ཚོགས་ཀྱིས། །ལོ་ཟླ་ཞག་དང་ཟ་མར་མ་འགྱང་བར། །མངོན་སྤྱོད་དྲག་པོས་མྱུར་སྒྲོལ་ཕྲིན་ལས་མཛོད། །དབྱེ་རྒྱ་བཅས། རྩ་སྔགས་མཐར། མ་མ་ཏྲག་རུ་ཏྲ་མ་ར་ཡ་ཕྱེ་ཕྱེ། ཨ་ནྲྀ་ཏྲག་རཀྴ་མ་ར་ཡ་ཕྱེ་ཕྱེ། ཡ་མ་ར་ཛ། ཀླུ་ལིང་ཡ་ཀུན་སང་། མོ་ལྕགས་སང་སང་ཀུ་ཏ་ཀུ་ཏ་ཧཱུྃ་ཕཊ། ཕུང་བྱེད་དམ་སྲི་དགྲ་ཇག་ཆོམ་རྐུན། མུ་སྟེགས་ཀླ་ཀློ་མཐའ་དམག་ཡུལ་འདྲེ་གདུག་པ་ཅན་རྣམས་ཀྱི་ཕ་ལྷ་མ་ལྷ་ཞང་ལྷ་ཡུལ་ལྷ་སྲོག་ལྷ་ཐམས་ཅད་དང་ཕྱེས་ཤིག ཕོ་སྲི་མོ་སྲི་ཞང་སྲི་དགྲ་སྲི་ཡུལ་འདྲེ་སྲོག་གཅོད་ཀྱི་ཤན་པ་རྣམས་དང་སྤྲོད་ཅིག ཅེས་བརྗོད་ཅིང་། བདག་གི་ཤངས་སྒྲོམ་དང་བ་སྤུའི་བུ་ག་ཐམས་ཅད་ནས་སྤྲུལ་པའི་ཁྲོ་ཚོགས་ནམ་མཁའ་གང་བར་འཕྲོས། ཁོའི་ལྷ་སྲུང་ཐམས་ཅད་བྱ་སྤུ་རླུང་གིས་ཁྱེར་བ་ལྟར་བསྐྲད་པར་བསམ་མོ། དེ་ནས་བསད་དམིགས་ནི། བདག་མདུན་ལྷ་ཚོགས་ཐུགས་ཀ་ནས། །བྷྲུཾ་འཕྲོས་དམིགས་བྱའི་སྙིང་གར་ཞུགས། །གནམ་ལྕགས་ཙཀྲ་རྩིབས་དྲུག་པ། །རྣོ་དབལ་གཅོད་པའི་དབལ་ངར་ཅན། །སྤུ་གྲི་རེག་གཅོད་རླུང་ལྟར་འཁོར། །ཤ་རུས་ནང་ཁྲོལ་དུམ་བུར་གཏུབ། །རྔམ་ཤིང་ཧབ་དིར་ཟ་བར་གྱུར། །ཨོཾ་མ་རི་ཙྱཻ་སྭཱཧཱ། ཞེས་དང་ལས་སྦྱོར་དྲག་སྔགས་མེ་དཔུང་མ་བཅས་པའི་མཐར། དགྲ་བགེགས་བྱད་མ་ཇག་ཆོམ་རྐུན་པོའི་ལུས་ངག་ཡིད་གསུམ་མ་ར་ཡ་རྦད། བྷྱོ་བཟློག་སོད་སྟྭཾ་བྷ་ཡ་ནན། ཅེས་ཏིང་འཛིན་གསལ་བཞིན་ངར་ལྡན་དུ་བཟླས་ནས་ཐུན་ལ་བསྔགས་ནས་བརྡེག་པར་བྱ། བསད་རྟགས་ཐོན་ནས་མནན་དམིགས་ནི། ཧཱུྃ་བྷྱོ༔ བདག་མདུན་ཐུགས་ལས་དཔའ་མོ་འོད་ཟེར་ཅན། །གསེར་མདོག་ཁབ་སྐུད་འཛིན་པ་གྲངས་མེད་འཕྲོས། བྱད་ཕུར་མཐུ་གཏད་རྦོད་གཏོང་རིགས་སྔགས་མཁན། །དགྲ་ཇག་ཆོམ་རྐུན་གནོད་སྡང་གདུག་སེམས་ཅན། །མཐོ་གནོན་སྨྲ་ལབ་ངན་བརྗོད་གྱོད་གླེང་མཁན། །ཐམས་ཅད་ཁ་མིག་བཙེམས་ནས་ནུས་མེད་བྱས། །སླར་ཡང་ཁྲོ་མཚོན་ཐུན་རྫས་ཆེས་ཆེར་འཕྲོས། །སྡང་བྱེད་དགྲ་དང་གནོད་བྱེད་བགེགས་རྣམས་ཀྱི། །བླ་སྲོག་རྣམ་ཤེས་གཟུགས་བྱང་ལིང་ཀ་དང་། །དབྱེར་མེད་བཀུག་བསྟིམ་བརྡེག་ཅིང་གཞོབ་ཏུ་བསྲེགས། །གཟིར་ཞིང་བཅོམ་པས་བག་ཆགས་སྣང་གཟུགས་ཀྱི། །དབང་པོའི་སྒོ་རྣམས་གནམ་ལྕགས་ཞུན་མས་གཡོག །གནས་ལྔར་གནམ་ལྕགས་འཁོར་ལོ་རྩིབས་བརྒྱད་པ། །ལྟེ་བར་སྣ་ཚོགས་རྡོ་རྗེས་མཚན་པ་དང་། །ཚིགས་བཞིར་རྒྱ་གྲམ་ལྕི་ཞིང་འཐས་པ་རེས། །སྒོ་གསུམ་གཡོ་འགུལ་སྨྲ་བསམ་མེད་པར་མནན། །དེ་སྟེང་འོད་ཟེར་ཅན་མའི་ལྷ་ཚོགས་ཀྱིས། །རྔམས་བརྗིད་བྲོ་གར་འཁྲབ་པས་ལྡང་མེད་གྱུར། ཨོཾ་མ་རི་ཙྱཻ་བ་ཏ་ལི་བ་ཏ་ལི་བ་ར་ཧ་མུ་ཁཾ་སརྦ་དུཥྚཾ་པྲ་དུཥྚཾ་གནོད་བྱེད་དགྲ་ཇག་ཆོམ་རྐུན་རྒྱལ་བསེན་ཡུལ་འདྲེ་འབྱུང་པོ་དམ་སྲི་ཀླ་ཀློ་མུ་སྟེགས་རྒྱ་འདྲེ་མཐའ་དམག་གདུག་པ་ཅན་ཐམས་ཅད་ཀྱི་ཙཀྵུ་མུ་ཁཾ་བྷནྡྷ་བྷནྡྷ་ཧཱུྃ་ཧཱུྃ་ཕཊ༔ ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན༔ སྟཾ་བྷ་ཡ་ནན་ནན༔ ཅེས་སོགས་མནན་རྟགས་ཐོན་བར་བཟླ་ཞིང་། ཐུན་རྫས་རྣམས་དྲེགས་པ་ལྷ་སྲིན་སྡེ་བརྒྱད་འདུས་པའི་དམག་ཚོགས་ནད་མཚོན་དུག་གི་ཐོག་སེར་དྲག་པོ་དམིགས་བྱའི་སྙིང་གར་གཟིར་ཞིང་བསྡིགས་པས་གཟུགས་ཕུང་བྱེ་མའི་མཁར་ཆུས་བཤིགས་པ་ལྟར་རྡུལ་དུ་བཅོམ་ནས་མཐར་རྣམ་ཤེས་ཀྱི་ངོ་བོ་ནྲྀ་དུད་ཁ་མར་མེ་འཆི་ཁའི་འོད་ལྟ་བུ་དེ་ཡང་ནག་སྐེམ་གྱིས་བསད་པར་བསམ་ལ། ཧཱུྃ་བྷྱོ༔ དྲག་མོ་འོད་ཟེར་ཅན་མ་ཡི། །ཕོ་ཉར་བསྔགས་པ་ཐུན་གྱི་བདག །དགྲ་བགེགས་སྒྲོལ་ཕྱིར་ལས་ལ་ཡ། །སྣ་ཚོགས་དྲག་པོ་ཐུན་གྱི་རྫས། །གློག་ལྟར་འཁྱུག་ཅིང་ཐོག་ལྟར་འབེབ། །དགྲ་བགེགས་ལུས་སེམས་འབེན་ལ་ཡ། །རྩ་སྔགས་དང་དྲག་སྔགས་མེ་དཔུང་མའི་མཐར། དགྲ་བགེགས་བྱད་མ་ཇག་ཆོམ་རྐུན་པོ་དམ་སྲི་རྒྱ་འདྲེ་མཐའ་དམག་ཡིད་ལ་བརྣག་པ་ཐམས་ཅད་ཀྱི་ལུས་ངག་ཡིད་གསུམ་མ་ར་ཡ་རྦད། བྷྱོ་བཟློག་སོད་སྟྭཾ་བྷ་ཡ་ནན། ནྲྀ་ཏྲི་སརྦ་ཤ་ཏྲུཾ་མ་ར་ཡ་རྦད། ཅེས་ཐུན་བརྡེག་ཅིང་། གདབ་ཀ་དང་འབྲེལ་ཚེ། འབྱུང་བཞིའི་ཐུན་བརྡེགས་ནས་བཟུང་བསྟབ་པའི་མཇུག་ཡན་བཏང་། དེ་ནས་ཐུན་གཏོར་ལ་དགུག་གཞུག་དང་བྱིན་རླབས་བྱས་ཏེ། རྩ་སྔགས་དང་། ནྲྀ་ཏྲི་སརྦ་ཤ་ཏྲུཾ་མ་ར་ཡ་མ་ཧཱ་བཱ་ལིང་ཏ་ཁ་ཁ་ཁ་ཧཱི་ཁ་ཧཱི། ལན་གསུམ་གྱིས་ཕུལ་ལ། བཛྲ་པུཥྤེ་སོགས་ཀྱིས་མཆོད། གང་གི་མཚན་ཙམ་སོགས་ཀྱིས་བསྟོད། ཧཱུྃ་བྷྱོ༔ རྒྱལ་ཡུམ་ཁྲོ་མོ་འོད་ཟེར་ཅན། །འཁོར་ཚོགས་སྤྲུལ་པར་བཅས་པ་རྣམས། །དམར་གྱི་གཏོར་མ་འདི་བཞེས་ལ། །རྣལ་འབྱོར་དཔོན་སློབ་འཁོར་བཅས་ཀྱི། །མི་མཐུན་ཞི་ཞིང་ལེགས་ཚོགས་རྒྱས། །མོས་བཞི་དབང་སྡུད་ཕྲིན་ལས་མཛོད། །དགྲ་གདོན་བར་ཆད་དམ་སྲི་བདུད། །སྲོག་ལ་རྒོལ་བའི་གདུག་པ་ཅན། །མཐའ་དམག་སྣ་འདྲེན་སྡོང་ཟླར་བཅས། །མིང་ལྷག་མེད་པར་རྡུལ་དུ་རློགས། །མེ་ཆུ་ས་གཡོ་རླུང་འཇིགས་དང་། །ནད་མཚོན་མུ་གེ་ལྟ་ལོག་སོགས། །སྣོད་བཅུད་སྙིགས་མའི་འཕོ་འགྱུར་རྣམས། །བཟློག་བསྒྱུར་མནན་པའི་ཕྲིན་ལས་མཛོད། །ཅེས་བརྗོད། དེ་དང་འབྲེལ་བར། ཧཱུྃ་བྷྱོ༔ དཔའ་མོ་འོད་ཟེར་ཅན་མ་ཡི། །བསྙེན་བསྒྲུབ་གྲངས་ཐེམ་རྣལ་འབྱོར་བས། །བྱམས་བརྩེ་དྲིན་ལྡན་ཕ་དང་མས། །མཁས་པའི་ཐབས་ཀྱིས་བུ་བཅོས་བཞིན། །ཚར་གཅོད་དབྱིངས་སྒྲོལ་མངོན་སྤྱོད་ཀྱིས། །གདུལ་དཀའ་མ་ལུས་རྗེས་བཟུང་བའི། །དགེས་མཚོན་དུས་གསུམ་ལེགས་བྱས་ཀུན། །དམིགས་མེད་ངང་ནས་ཡོངས་ལ་བསྔོ། །དེ་མཐུས་བོད་དང་བོད་ཆེན་གྱིས། །མཚོན་པའི་ཡིད་ཅན་འགྲོ་བ་ཀུན། །མི་མཐུན་གཡུལ་ལས་རྣམ་རྒྱལ་ནས། །གཏན་བདེའི་དཔལ་ཡོན་ལོངས་སྤྱོད་ཤོག །ཅེས་དེ་ལྟར་ཉིན་མཚན་ཐུན་བཞིའམ་དྲུག་ཏུ་བསྒྲུབ་ཅིང་། དགུང་སྲོད་ཀྱི་ཐུན་ལ་ཚོགས་མཆོད་ཆོས་སྐྱོང་གི་བསྐང་གསོལ་དང་། སྒྲོལ་ལས་བཟློག་པའི་རིམ་པ་དང་གཞན་རྣམས་ལ་ཉེར་བསྡུ་ཙམ་བྱ། མནན་པའི་རྟགས་ཐོན་ནས་ཁ་བཅད་ཅིང་རེ་བས་དྲིལ་བ་སོགས་མན་ངག་ཟུར་རྒྱན་དུ་བཀོལ་བ་ལྟར་བྱའོ། །འཇིགས་བྱེད་ཡ་མནྟ་ཀའི་དགྱེས་སྐོང་ཡུམ། །ཁྲོ་མོ་འོད་ཟེར་སྟོང་འབར་དཔལ་ཆེན་མོའི། །ལས་མཐའ་དགྲ་མནན་ལྕགས་ཀྱི་མཆོད་སྡོང་ཆེ། །མུན་པའི་མདངས་ལྡན་སྟོབས་ནུས་རྔམས་ཤིང་བརྗིད། །འདི་ནི་སྐྱེས་མཆོག་དམ་པའི་ཐུགས་བཞེད་བཞིན། །སྔགས་གཟུགས་འཛིན་དེས་འདི་ཙམ་བཏུས་པའི་མཐུས། །བསམ་སྤྱོད་ལོག་པའི་ཞིང་གྱུར་དགྲ་སྡེའི་དཔུང་། །བདེ་སྟོང་མཉམ་པའི་དབྱིངས་ཀློང་བྱང་ཆུབ་ཤོག །ཅེས་དཔའ་མོ་འོད་ཟེར་ཅན་གྱི་ལས་ཚོགས་དགྲ་སྲི་ཐམས་ཅད་གནོན་པའི་ཐབས་ཚུལ་ལྕགས་ཀྱི་མཆོད་རྟེན་ནག་པོ་ཞེས་བྱ་བ་འདི་ནི་སྔ་སོར་རང་སློབ་མཆོག་ཏུ་གྱུར་པ་མཁན་ཆེན་སྐལ་བཟང་དར་རྒྱས་རིན་པོ་ཆེ་མཆོག་གི་ཐུགས་བཞེད་སྐོང་ཕྱིར་བྱས་པ་ལས་ཅུང་ཟད་རྒྱས་པར་བཏང་ཞིང་། མནན་པ་དངོས་སོགས་ཕལ་ཆེར་འཐད་འོས་རྣམས་ཟུར་རྒྱན་དུ་བཀོལ་ནས། ཕྱུག་ཤུལ་ཕུར་སྐོར་གྱི་རིགས་ལས་བལྟམས་པའི་སྔགས་རྒན་གཅོལ་པོ་འགྱུར་མེད་ཞིང་སྐྱོང་མགོན་པོའམ། གར་དབང་འཇིགས་མེད་རྣམ་རྒྱལ་བཟང་པོར་འབོད་པ་དེས་བླ་མ་དམ་པ་སྐྱིད་པ་མཁྱེན་རབ་རྒྱ་མཚོའི་བཀས་བསྐུལ་ངོར། སུག་ལས་སུ་བསྟར་བའི་དགེ་བས་བསྟན་འགྲོ་ཡོངས་ལ་ཕན་ཐོགས་རྒྱ་ཆེན་པོ་འབྱུང་བར་གྱུར་ཅིག སརྦ་མངྒ་ལཾ།