དགྲ་མནན་འདོན་འགྲིགས།
༄༅། འོད་ཟེར་ཅན་མའི་དགྲ་མནན་འདོན་འགྲིགས་ནི། བསྒྲུབ་པ་དང་འབྲེལ་ཚེ། སྨད་ཀྱི་བསྐུལ་བའི་འཕྲོས་བླ་གབ་མེད་པའི་སར་ལིང་ཁྲུས་དང་ཆས་གཞུག་བྱ། དེ་ནས་གསེར་གཟུ་ཧོམ་བསྐྱེད། འགུགས་པ་བཅས་སྤྱི་ལྟར་བཏང་མཐར། དགྲ་མནན་ལས། ཧཱུྃ་བྷྱོ། ད་ནི་དགྲ་བོ་བསྒྲལ་བའི་སོགས་ནས་ཁུག་ཅིག་ཅིག་ཛ་ཛ། དེ་ནས་སྨད་ལས་ཀྱི་ཧཱུྃ་ཧཱུྃ། དཀོན་མཆོག་བདེན་མཐུས་བཀུག་པའི་སོགས་ནས། གཞན་དོན་མཐར་ཕྱིན་རྒྱལ་བའི་སྲས་སུ་བསྐྱེད་བར་གཞུང་ལྟར་བཏང་། དེ་ནས་ཟུར་རྒྱན་ལས། བླ་རྡོ་གཅོག་པ། གླང་ཁྲམ། སྨྲེང་གྱེར། དགྲ་རྫས་བཅུ་ཚན་བྲུབ་པ་བཅས་བཏང་ནས། སྟཾ་བྷ་ཡ་ནན་ནན་བར་འདོན། དེ་ནས་དགྲ་མནན་གྱི་བསད་དམིགས། མནན་དམིགས། ནྲི་ཏྲི་ཤ་ཏྲུན་མ་ར་ཡ་རྦད་རྦད་བར་འདོན། དམ་ཆོས་པདྨའི་ཐུགས་ཐིག་གི་དགྲ་མནན་སྔགས། ལོ་ཟླ་མ་སོགས་འདོན། དེ་ནས་སྨད་ལས་ཀྱི་འབྱུང་བཞིའི་ཐུན་བརྡེག་ནས་བཟུང་ཞལ་བསྟབས་བཅས་འདོན། དེ་ནས་དགྲ་མནན་གྱི་ཐུན་གཏོར། དགེ་བསྔོ་བྱ། དྲང་བ་ལྷག་མ་སོགས་སྤྱི་ལྟར་རོ། དགུང་ཐུན་དང་སྲོད་ཐུན་ལ་རྒྱུན་ཁྱེར་ཉི་ཟླའི་ཞགས་པ་འདོན་ལ་བསྙེན་བསྟོད་མཇུག་དགྲ་མནན་གྱི་བསྐུལ་བ་ནས་བཟུང་དགེ་བསྔོའི་བར་ནག་འགྲོས་སུ་འདོན། ཟུར་རྒྱན་མི་དགོས། རྒྱུན་ཁྱེར་གྱི་བཟོད་གསོལ་ནས་བཀྲ་ཤིས་བར་བྱའོ།། ཉིན་ཐ་མ་ཆོ་གའི་བསྙེན་བསྟོད་མཇུག་དགྲ་མནན་ཚར་གཅིག་འདོན། སྨད་ལས་སྐབས་སུ་བླ་རྡོ་གླང་ཁྲམ་སོགས་ཟུར་རྒྱན་མི་དགོས། དགྲ་མནན་དང་སྨད་ལས་འདོན་ཚུལ་ཉིན་སྔ་མ་ལྟར་ལ། ཞལ་བསྟབས་མཇུག ཟུར་རྒྱན་ལས། ཧཱུྃ་བྷྱོ། ང་ནི་གཏུམ་ཆེན་ཁྲོ་མོ་འོད་ཟེར་ཅན། ཞེས་པ་ནས་བཟུང་། རྟེན་འབྲེལ་ནག་པོའི་རབ་གནས་བཅས་འདོན། དེ་ནས་དགྲ་མནན་གྱི་ཐུན་གཏོར། དགེ་བསྔོ། དྲང་བ། བཟློག་པ་སོགས་སྤྱི་ལྟར་རོ།། ༧ གཏོར་མ་འཕང་རྗེས། མནན་པ་བྱེད་སར་ཕྱིན་ལ། རང་ཉིད་འཕགས་པ་སྤྱན་རས་གཟིགས་སུ་སོགས། སྡེ་བརྒྱད་མཆོད་པ་འདོད་གསོལ་བཅས་བཏང་། དགྲ་མནན་གྱི་གཟུ་དཔང་ནས་བཟུང་། ནྲི་ཏྲི་སྟཾ་བྷ་ཡ་ལཾ་ནན་བར། དེ་ནས་བསྟན་མ། བྲོ་མནན། ཟུར་རྒྱན་ལས། ཧཱུྃ་བྷྱོ། ང་ནི་རྒྱལ་ཀུན་བསྐྱེད་པའི་ཡུམ། སོགས། དགྲ་མནན་མཇུག་གི་ཧཱུྃ་བྷྱོ། དཔའ་མོ་འོད་ཟེར་ཅན་མ་ཡི། སོགས། དགེ་བསྔོ་བྱ། ནང་དུ་ལོག་ནས་རྒྱལ་དབྱངས་སོགས་ཆོ་གའི་མཇུག་བསྡུའོ།། ༧ ཉིན་ཆོག་བྱེད་ན། འོད་ཟེར་ཅན་མའི་ལས་བྱང་། ཚོགས་བསྐང་། ལྷག་མའི་མཇུག ལིང་ཁྲུས། ཆས་གཞུག མནན་པ་དང་ཟུར་རྒྱན་སྦྱར་ཏེ་གཏོང་། ཐུན་གཏོར་མཇུག་ཆད་བསྐུལ། ཆད་ཐོ། མནན་པ་བྱ། བསྟན་མ་སོགས་སྤྱི་ལྟར་རོ།།