འཕོ་བའི་ལས་རིམ་ཁྲིགས་སུ་བསྡེབ་པ་འཕྲད་ཚད་མྱུར་གྲོལ།

༄༅། བཀའ་འདུས་ལས་ཟབ་ལམ་འཕོ་བའི་ལས་རིམ་ཁྲིགས་སུ་བསྡེབ་པ་འཕྲད་ཚད་མྱུར་གྲོལ་ཞེས་བྱ་བ་བཞུགས་སོ།།

༄༅། ན་མོ་གུ་རུ་ཨ་མི་ཏཱ་བྷ་ཡེ། ཆོས་ཀྱི་འབྱུང་གནས་ཐུགས་བསྐྱེད་སྨོན་ལམ་ལས། །ཡང་དག་སྣང་བ་བདེ་ཆེན་ཞིང་གི་དཔལ། །སྐུ་གསུམ་ཀུན་དངོས་འོད་སྣང་མཐའ་ཡས་དང་། །དབྱེར་མེད་བླ་མ་མཆོག་གིས་བརྩེ་བས་སྐྱོངས། །སྡུག་བསྔལ་སྲིད་པའི་འདམ་ཁྲོད་ཡ་ང་བར། །ཐར་མེད་ལས་ཀྱི་སྲད་བུས་བཅིངས་པ་ལས། །བཀྲོལ་ནས་ཐར་མཆོག་དགའ་བདེའི་གནས་སྦྱིན་པའི། །ཐབས་ལམ་ཁྱད་འཕགས་འཕོ་བའི་ཆོས་ཚུལ་རྨད། །མ་བསྒོམ་པར་ཡང་བཙན་ཐབས་སུ། །མངོན་སངས་རྒྱས་བྱེད་བརྗོད་གྲོལ་ཆོས། །ལེགས་བཤད་ཟབ་དགུའི་བཅུད་བསྡུས་པ། །འཕྲད་ཚད་མྱུར་གྲོལ་ལས་རིམ་སྤེལ། །དེ་ལ་འདིར་དུས་གསུམ་གྱི་བརྒྱུད་ལྡན་བླ་མ་དམ་པ་རྣམས་ཀྱིས་གཞན་ལ་ཕན་པའི་འགྲོ་དོན་རླབས་ཆེན་མཛད་པའི་ཐབས་ལམ་ཟབ་མོ་མཆོག་ཏུ་གྱུར་པ། ཉེས་ལྟུང་ཤིན་ཏུ་ལྕི་བའི་སྡིག་པོ་ཆེ་རྣམས་ཀྱང་ལས་དང་རྣམ་སྨིན་གྱི་དབང་དུ་མི་གཏོང་བར་སྟེང་སྒོ་རྣམ་པར་གྲོལ་བའི་ལམ་ནས་བཙན་ཐབས་སུ་འཚང་རྒྱ་བར་བྱེད་པའི་གདམས་པ་མྱུར་ལམ་འཕོ་བའི་ཟབ་ཆོས་ཉིད་ཉམས་སུ་ལེན་པར་འདོད་པས། ཐོག་མར་ཐེག་པ་ཐུན་མོང་དང་ཐུན་མོང་མ་ཡིན་པའི་སྔོན་འགྲོ་རྣམས་ཀྱི་ཉམས་བཞེས་དང་འབྲེལ་བའམ། སྐབས་གཞན་དུའང་རུང་བར་རང་ཉིད་ཀྱིས་ཟབ་ཆོས་འདི་ཉིད་ཀྱི་ཁྲིད་སྦྱངས་གནད་སྨིན་དུ་བྱས་པས། དངོས་སུ་བརྒྱལ་བ་དང་། ཐིམ་སྡུད་དང་། སྣང་མཆེད་ཀྱི་ཉམས་བན་བུན་འཆར་བ་དང་། རླུང་དང་རྟོག་པའི་འཕྲོ་འདུ་ཉུང་བ་དང་། དམིགས་པ་གསལ་བ་དང་། རིག་མདངས་ཀྱི་སྣང་བ་འཕེལ་བ་དང་། ཀླད་པ་ཁོལ་བུར་ན་ཞིང་ཚ་ཙག་བྱེད་པ་དང་། ཚངས་བུག་སྐྲང་ཞིང་ཆུ་སེར་རྡོལ་བ་དང་། གཙུག་སྐྲ་འགུལ་ཞིང་ཟ་བ་དང་། རྨི་ལམ་ལ་ཐེམ་སྐས་བགྲོད་པ་དང་། གྱེན་ལ་འགྲོ་བ་དང་། མཐོ་སར་སླེབས་པ་དང་། བདེ་ཞིང་སྐྱིད་པའི་གནས་སུ་ཕྱིན་པ་སོགས་ཡང་ཡང་བྱུང་བས་རྟགས་ཐོན་ཡིད་ཆེས་ངེས་ཤེས་འདྲོང་བར་བྱས་ལ། དེ་ནས་སྐབས་སུ་བབས་པ་ན། རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བ། འབྲིང་ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ། ཐ་མ་སྤྲུལ་སྐུ་ཚད་མེད་སྙིང་རྗེའི་འཕོ་བ་འདེབས་པའི་ཚུལ་ཏེ་གསུམ་གྱི་ནང་ཚན་ལས། སྔ་མ་གཉིས་དང་། ཕྱི་མ་ལ་ཡང་རང་དང་གཞན་གྱིས་འདེབས་ཚུལ་གཉིས་ལས་འཆི་ཁར་རང་ཉིད་ཀྱིས་འཕོ་བ་གསལ་འདེབས་བཅས་རེ་ཞིག་བཏང་སྙོམས་སུ་བཞག་ནས། འདིར་གཞན་གྱིས་འདེབས་པའི་ཚུལ། དེ་ལ་ཡང་འཆི་བའི་དུས་ལ་བབ་ངེས་པའི་རྟགས་བྱུང་ཞིང་། དེ་ཙམ་གྱི་ལོང་ཁོམ་ཡོད་ན་གསང་སྔགས་ཀྱི་དབང་བསྐུར་བས་དམ་སྡོམ་སོ་མ་ལ་ལས་འཕྲོ་བཟང་པོར་ཤི་བས་ངན་སོང་ལས་ཐར་ཞིང་ཡོན་ཏན་ཆེ་བར་གསུངས། དེ་མིན་ཡང་རིག་པ་ཅུང་ཟད་གསལ་ཞིང་ཁམས་ཀྱིས་ལྕོག་ན་འོག་ནས་བཤད་པའི་རྒྱུད་སྦྱོང་རྣམས་བྱེད་དུ་གཞུག དེ་ཡང་མི་ནུས་པ་ལ་དལ་བུས་མིང་ནས་འབོད་ཅིང་། ཁྱོད་རང་གི་སྤྱི་བོར་མགོན་པོ་འོད་དཔག་མེད་བཞུགས་ནས་ཡོད་དོ། །མོས་གུས་གྱིས་ཤིག བརྗོད་ལ་སྤྱི་བོར་རེག་ཅིང་ཚངས་བུག་གི་སྐྲ་ལ་རན་ཙམ་འཐེན་པས་རྣམ་ཤེས་ཚངས་བུག་ནས་ཐོན་ཅིང་། སངས་རྒྱས་རིན་ཆེན་གཙུག་ཏོར་ཅན་གྱི་མཚན་དང་། སྨན་བླའི་མཚན་སོགས་བརྗོད། དུས་དེ་ལས་འདས་པ་ན། བར་དོ་དང་ངན་སོང་གི་འགྲོ་བ་སྤྱི་དང་བྱེ་བྲག་ཏུ་གཤིན་པོ་གང་རུང་ལ་དམིགས་ནས་འཕོ་བ་འདེབས་པ་ཡིན་ལ། དེ་ཇི་ལྟར་གདབ་པའི་ཚུལ་ལ་ཡང་སྦྱོར་བ། དངོས་གཞི། རྗེས་དང་གསུམ་ལས། དང་པོ་སྦྱོར་བའི་རིམ་པ་ལ། །བདག་གསལ་བ། རྟེན་བསྐྱེད་དགུག གཤེད་སྦྱང་བ། ངོ་སྤྲོད་པ། རྒྱུད་སྦྱང་བ། ཟས་གཏད་པ་སྟེ་དྲུག་གོ །དང་པོ་བདག་ཉིད་ལྷར་གསལ་བ་ནི། རང་རྒྱུད་ལ་བྱམས་དང་སྙིང་རྗེ་འབྱོངས་ཤིང་། གཞན་ལ་ཕན་འདོགས་ནུས་པའི་ཕྱིར། ཐུགས་རྗེ་ཆེན་པོའི་བསྒོམ་བཟླས་རྒྱས་བསྡུས་གང་ཡང་རུང་བ་ཞིག་ཐུན་མཚམས་ཀྱི་ལྷར་ལྡང་བའི་བར་བྱའོ།། གཉིས་པ་རྟེན་བསྐྱེད་ཅིང་རྣམ་ཤེས་འགུགས་བསྟིམ་བྱ་བ་ནི། ཤི་ནས་ཞག་ཡུན་འགའ་མ་སོང་བའི་རོའམ། གཞན་དུ་དྲི་གོས་སམ། རུས་པའམ། མིང་བྱང་ལ་དམིགས་ཏེ། རཾ་ཡཾ་ཁཾ་གིས་མ་དག་པའི་འཁྲུལ་འཛིན་ཡེ་ཤེས་ཀྱི་མེ་རླུང་ཆུས་བསྲེག་གཏོར་བཀྲུས། སྭ་བྷཱ་ཝས་སྟོང་པར་སྦྱངས་ཏེ། མདུན་གྱི་རྟེན་སྣང་བ་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་པདྨ་དཀར་པོ་འདབ་མ་བརྒྱད་པའི་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་ནྲྀ་ཡིག་ཡོངས་སུ་གྱུར་པ་ལས་འཇིག་རྟེན་འདི་ནས་ཕ་རོལ་དུ་ཚེ་ལས་འདས་པའམ་འདས་མ་དེ་ཉིད་གསོན་དུས་ཀྱི་རྣམ་པ་གཞོན་ནུའི་ཚུལ་ལ་མཛེས་ཤིང་ཡིད་དུ་འོང་བ་གོས་དཀར་པོ་དང་བཅས་ཏེ་ལུས་ངག་ཡིད་གསུམ་ཞི་ཞིང་དུལ་བ། དཀོན་མཆོག་གསུམ་དང་བླ་མའི་ངོ་བོ་ཐུགས་རྗེ་ཆེན་པོའི་དཀྱིལ་འཁོར་དུ་སྐྱབས་སུ་འགྲོ་སྙམ་པའི་མོས་གུས་དང་ལྡན་པ་གཅིག་ཏུ་གྱུར།བར་བསམ། དེ་ནས། བདག་ཉིད་ཐུགས་རྗེ་ཆེན་པོར་གསལ་བའི་ཐུགས་ཀ་ནས་བྱམས་བརྩེའི་འོད་ཟེར་ལྕགས་ཀྱུའི་དབྱིབས་ཅན་གློག་ལྟར་མྱུར་བ་འཕྲོས་པས་ཚེ་འདས་ཀྱི་རྣམ་ཤེས་འཇིག་རྟེན་བདུན་པོ་གང་ན་ཡོད་པ་དེ་ལ་རེག་པ་ཙམ་གྱིས་སྐད་ཅིག་ཡུད་ཙམ་ལ་བཀུག་ནས་ཕུང་པོའམ་མིང་བྱང་སོགས་གང་ཡིན་དང་དབྱེར་མེད་དུ་ཐིམ་པར་གྱུར་བར་བསམ་ཞིང་། ན་མོ་རྩ་བརྒྱུད་ཀྱི་བླ་མ་ཡི་དམ་ཞི་ཁྲོ་རབ་འབྱམས། དཔའ་བོ་མཁའ་འགྲོ། སྐུ་གསུམ་རྒྱལ་བ་རྒྱ་མཚོ། ལུང་དང་རྟོགས་པའི་ཆོས། བྱང་སེམས་ཉན་རང་དགྲ་བཅོམ། ལྷ་དང་དྲང་སྲོང་བདེན་ཚིག་གྲུབ་པ་རྣམས་ཀྱི་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན། ཆོས་ཉིད་འགྱུར་མེད་རྟེན་འབྱུང་བསླུ་མེད། ལྷག་བསམ་རྣམ་དག་དང་བཅས་པའི་བདེན་པ་དང་། ཁྱད་པར་དུ་བཅོམ་ལྡན་འདས་མགོན་པོ་འོད་དཔག་ཏུ་མེད་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བདེན་པ་དང་། རྒྱལ་བ་གང་གི་ཐུགས་བསྐྱེད་དང་སྨོན་ལམ་རྒྱ་ཆེན་པོའི་སྟོབས་ཀྱིས། འཇིག་རྟེན་འདི་ནས་ཕ་རོལ་ཏུ་ཚེ་དུས་ལས་འདས་པའི་རྣམ་པར་ཤེས་པ་འཁོར་བ་སྡུག་བསྔལ་གྱི་གནས་ཡུལ་གང་ན་ཡོད་ཀྱང་སྐད་ཅིག་ཡུད་ཙམ་གྱིས་རྟེན་ཕུང་པོ་འདི་དང་དབྱེར་མེད་དུ་ཁུག་ཅིག ནྲྀ་ཨ་ཀརྴ་ཡ་ཛ་ཛཿ ལན་གྲངས་ཅི་ནུས་བརྗོད་མཐར། ཛཿཧཱུྃ་བཾ་ཧོ། ཆུ་ལ་ཆུ་བཞག་པ་བཞིན་དུ་གྱུར་ནས་དགའ་བ་དང་གུས་པ་དད་པའི་སེམས་ཀྱིས་བག་ཕེབས་བཞིན་དུ་གནས་པར་བསམ་མོ།། གསུམ་པ་གཤེད་སྦྱངས་བ་ནི། རྣམ་ཤེས་ཀྱི་རྗེས་སུ་གཤེད་མ་འབྲང་ཞིང་ཐར་ལམ་ལ་བར་དུ་གཅོད་པས་དེ་བསལ་བའི་ཕྱིར། སྦྱངས་གཏོར་གྱི་མཚན་འཛིན་ རཾ་ཡཾ་ཁཾ་གིས་བསངས། སྭ་བྷ་ཝས་སྦྱངས། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཁཾ་ལས་གཤིན་བདུད་བགེགས་ཀྱི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་ཟག་མེད་བདུད་རྩིའི་རང་བཞིན་དུ་གྱུར། ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབས། ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རང་བཞིན་གྱིས་རྣམ་པར་དག་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་འཕགས་མཆོག་ཐུགས་རྗེ་ཆེན་པོའི་དཀྱིལ་འཁོར་གྱི་ལྷ་ཚོགས་སྤྲུལ་པ་ཡང་སྤྲུལ་ཕྱག་བརྙན་དང་བཅས་པའི་བདེན་པ་ཆེན་པོའི་མཐུས། དེང་འདིར་དམིགས་ཡུལ་ཚེ་ལས་འདས་པ་འདི་གསོན་གྱི་དུས་སུ་ཚེ་སྲོག་ལ་བར་དུ་གཅོད་པ་ཅིང་། གཤིན་གྱི་དུས་ན་ཐར་ལམ་ལ་བར་དུ་གཅོད་པའི་སྲོག་གཅོད་ཀྱི་གཤེད་མའི་རིགས་སུ་གྱུར་པ་ཐམས་ཅད་ལན་ཆགས་གླུད་གཏོར་ལེན་པའི་ཕྱིར་དུ་འདིར་འདུས་ཤིག ཨོཾ་སརྦ་བྷུ་ཏ་ཨ་ཀར་ཤ་ཡ་ཛ་ཛ། ལན་གསུམ་གྱིས་བགེགས་བཀུགས། ཨོཾ་སརྦ་བིགྷྣན་ན་མཿསརྦ་ཏ་ཐཱ་ག་ཏ་བྷྱོ་བྷི་ཤྭ་མུ་ཥེ་བྷྱ༔སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨེ་མཾ་ག་ག་ན་ཁཾ་གྷྲི་ཧྞ་ཨེ་དཾ་བྷ་ལིང་ཏ་ཡེ་སྭཱ་ཧཱ། ལན་གསུམ་གྱིས་ཞི་སྦྱངས་དང་། ཨོཾ་སུམ་བྷ་ནི་སུམ་བྷ་ནི་ཧཱུྃ། གྲིཧྞ་གྲྀཧྞ་ཧཱུྃ། གྲྀཧྞ་པ་ཡ་གྲྀཧྞ་པ་ཡ་ཧཱུྃ། ཨ་ན་ཡ་ཧོ། བྷ་ག་ཝན། བིདྱཱ་རཱ་ཛ་ཡ་ཧཱུྃ་ཕཊ། ལན་གསུམ་གྱིས་ཕྱེད་མར་སྦྱངས། ཨོཾ་ཧྲཱིཿཔདྨ་ཏ་ཀྲིཏ་བཛྲ་ཀྲོ་ཏ་ཧྱཱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ། རང་ཉིད་སྐད་ཅིག་གིས་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བའི་གཟི་བྱིན་ཅན། དུར་ཁྲོད་རོལ་པའི་ཆས་ཀྱིས་བརྗིད་པ་བསྐལ་པའི་མེ་ལྟར་འབར་བར་གྱུར། ཧྲཱིཿ སྟོང་ཉིད་དབྱིངས་ལས་རང་ཤར་བའི། །སྙིང་རྗེ་ཆེན་པོའི་སྐུར་བཞེངས་པ། །བྱང་ཆུབ་མཆོག་གི་ལྷ་ཆེན་པོ། །ཉོན་མོངས་བདུད་སྡེ་འདུལ་བའི་སྐུ། །དབང་ཆེན་འབར་བའི་ཆོ་འཕྲུལ་གྱིས། །ཐར་པའི་ལམ་ལ་འཚེ་བྱེད་བདུད། །ཟ་འདྲེ་སྲོག་གཅོད་རྡུལ་དུ་རློགས། །ན་མོ་དཀོན་མཆོག་གསུམ་ལ༴སོགས་བདེན་བརྗོད་གོང་ལྟར་ལས། ཁྱད་པར་དུ་དབང་ཆེན་རྟ་མཆོག་རོལ་པའི་དཀྱིལ་འཁོར་གྱི་ལྷ་ཚོགས་སྤྲུལ་པ་ཡང་སྤྲུལ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བདེན་པ་ཆེན་པོའི་མཐུས། དེང་འདིར་ཚེ་ལས་འདས་པ་འདི་གསོན་གྱི་དུས་སུ་གནས་བྱེད་ཀྱི་ཚེ་སྲོག་ལ་བར་དུ་གཅོད་ཅིང་། གཤིན་གྱི་དུས་ན་སྡིག་པ་སྦྱངས་བ་དང་། ས་ལམ་ལ་བར་དུ་གཅོད་པའི་སྲོག་གཅོད་ཀྱི་གཤེད་མ་འཆི་ཁར་དབུགས་སྡུད་ཅིང་ཕུང་པོ་བདག་ཏུ་འཛིན་པ། གཤིན་པོ་གནས་མི་བདེ་ཞིང་གསོན་པོ་བཀྲ་མི་ཤིས་པར་བྱེད་པ། ཡར་མཐོ་རིས་དང་ཐར་པའི་གེགས་བྱེད་ཅིང་། མར་འཁོར་བ་ད་ངན་སོང་གི་སྣ་འདྲེན་པ། བར་རིགས་དྲུག་གི་གཡང་ས་ཉམས་ང་བར་སྐྱུར་བར་བྱེད་པའི་ཟ་འདྲེ་ཤི་གཤེད་སྲོག་གཅོད་དབུགས་ལེན། ཤི་མིག་གསོན་ལ་བལྟ་བར་བྱེད་པའི་གསོན་བདུད་གཤིན་ལྕགས་སྤྱི་དང་། ཁྱད་པར་དུ་དྲི་ཟ་འཆི་ཁ་མའི་སེམས་ལ་ཉེ་བར་འཇུག་པའི་རིགས་དང་། དྲི་ཟ་ཁྱབ་བྱེད་དང། དྲི་ཟ་པི་ཤ་ཙ་ན་དང་། གནོད་སྦྱིན་སྨྲ་འདོད་དང་། གནོད་སྦྱིན་ཝ་ར་ཧི་ཀུན་ཏུ་གཏོགས་འདོད་དང་། ཡི་དྭགས་གཤིན་རྗེའི་ཆད་པ་ལ་སོགས་པ་ལན་ཆགས་དང་ཤ་འཁོན་གཉེར་བའི་རིགས་རྣམས་མཆོད་སྦྱིན་གྱི་གཏོར་མ་འདིས་ཚིམས་པར་གྱིས་ལ་འདིར་མ་གནས་པར་གཞན་ཏུ་དེངས་ཤིག །གལ་ཏེ་མི་འགྲོ་ན་བདག་ཉིད་འཁོར་འདས་ཀུན་གྱི་སྤྱི་དཔལ་ཆེན་པོའི་ཐུགས་ཀ་ནས་ཡེ་ཤེས་ཀྱི་ཁྲོ་མཚོན་མེ་དཔུང་འབར་བའི་ཚོགས་སྤྲོས་ཏེ་བགེགས་རྣམས་རྡུལ་དུ་བརླག་པར་གདོན་མི་ཟའོ།། ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྚ་ལ་ཕཊ་ཕཊ་ཕཊ༔ ཧ་ལ་ཧ་ལ་ཧ་ལ་ཧཱུྃ༔ དྲག་སྔགས་བརྗོད། གུ་གུལ་བདུག་ཅིང་ཐུན་གྱིས་གཟིར་བས་དྲག་སྦྱངས་བྱའོ།། དེ་དང་རྗེས་འབྲེལ་དུ་བསྲུང་འཁོར་བསྒོམ་པ་ནི། སྲོག་གཅོད་གཤེད་མའི་རིགས་སུ་གྱུར་པ་ཐམས་ཅད་ཕྱིར་བསྐྲད། འོད་ཟེར་དང་ཁྲོ་ཚོགས་རྣམས་ཚུར་འདུས། སྟེང་འོག་ཕྱོགས་མཚམས་ཐམས་ཅད་མི་ཕྱེད་རྡོ་རྗེ་གུར་ཐབས་སུ་འཁྲིགས་པའི་བསྲུང་བའི་འཁོར་ལོ་ཡངས་ཤིང་རྒྱ་ཆེ་བར་གྱུར་པའི་ནང་དུ་ཚེ་ལས་འདས་པ་མིང་གཟུགས་དྲི་མའི་རྟེན་ལ་རྣམ་པར་ཤེས་པ་བག་ཕེབ་ཏེ་ཆོས་ཉན་པར་གྱུར། ཨོཾ་བཛྲ་རཀྵ་རཀྵ་ཧཱུྃ། ཞེས་བརྗོད་དོ། བཞི་པ་ངོ་སྤྲོད་པ་ནི། གཤེད་བྲལ་ཡང་ཤི་བར་མི་ཤེས་ཤིང་། གལ་ཏེ་ཤེས་ཀྱང་མྱ་ངན་དང་བར་དོའི་སྣང་བ་ངོ་མ་ཤེས་པས་འཇིགས་སྐྲག་སྣ་ཚོགས་འབྱུང་ངེས་ཕྱིར། འདུས་བྱས་མི་རྟག་པའི་གཏམ་གྱིས་མྱ་ངན་བསལ་ཞིང་བར་དོ་གསུམ་རིམ་པར་ངོ་སྤྲོད་པ་ལ། ཐོག་མར་མྱ་ངན་བསལ་ཕྱིར་བྱམས་དང་སྙིང་རྗེ་ཡ་མ་བྲལ་བའི་ངང་ནས། འོ་འཇིག་རྟེན་འདི་ནས་ཕ་རོལ་དུ་ཚེ་དུས་ལས་འདས་པ་ཆེ་གེ་མོ་ཁྱོད་ཤི་བ་ཡིན་ནོ། །ཞེས་ལན་གསུམ་བོས་ལ། འོ། ཁྱོད་ལ་འཆི་བ་མི་རྟག་པ་ཞེས་བྱ་བ་དེ་ཉིད་གློ་བུར་དུ་བྱུང་བ་ལ་སྔང་སྐྲག་དང་མྱ་ངན་མ་བྱེད་པར་སེམས་ཡེང་འཁྲུལ་སྤོངས་ལ་ལེགས་པར་ཉོན་ཅིག དེ་ཡང་ཁྱོད་གཅིག་པུར་ཤི་འམ་སྙམ་ན་མ་ཡིན་ཏེ། སྤྱིར་འདུས་བྱས་ཐམས་ཅད་མི་རྟག་པའི་ཚུལ། བཅོམ་ལྡན་འདས་མཉམ་མེད་ཐུབ་པའི་དབང་པོས་མདོ་རྒྱ་ཆེར་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །སྐྱེས་བུའི་ཚེ་འགྲོ་ནམ་མཁའི་གློག་འདྲ་ཞིང་། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ཞེས་གསུངས་པ་ལྟར་རོ། །ཁྱད་པར་དུ་ཕྱི་སྣོད་ཀྱི་འཇིག་རྟེན་ལ་བསམ་ཀྱང་མི་རྟག་སྟེ། འཛམ་གླིང་མཛེས་རྒྱན་ཀླུ་ཡི་དབང་པོའི་ཞལ་ནས། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེག་པའི་ལུས་ཅན་འདི་དག་ནི། །ཐལ་བ་ཡང་ནི་ལུས་པར་མི་འགྱུར་ན། །ཤིན་ཏུ་ཉམས་ཆུང་མི་ལྟ་སྨོས་ཅི་དགོས། །ཞེས་གསུངས་པ་ལྟར་ད་ལྟ་འགྲོ་བ་ཐམས་ཅད་ཀྱི་རྟེན་གཞི་ས་ཆེན་པོ་རི་རབ་གླིང་བཞི་གླིང་ཕྲན་བརྒྱད་ཁོར་ཡུག་དང་བཅས་པ་ཡང་མཐར་མེ་བདུན་གྱིས་བསྲེགས་པའི་ཐལ་བ་ཆུས་བཤལ། རླུང་གིས་གཏོར་ནས་ནམ་མཁའ་སྟོང་པར་འགྱུར་བའི་དུས་འབྱུང་དགོས་པ་ཡིན། དེ་བཞིན་དུ་ནང་བཅུད་ཀྱི་སེམས་ཅན་ལ་བསམ་ཀྱང་མི་རྟག་སྟེ། ཆེད་དུ་བརྗོད་པའི་ཚོམ་ལས། འདུས་བྱས་ཐམས་ཅད་མི་རྟག་སྟེ། །སྐྱེས་ནས་འཆི་བའི་ཆོས་ཅན་ཡིན། །གསུངས་པ་བཞིན་ཁྱོད་ཉིད་འཇིག་རྟེན་འདིར་གནས་པའི་ཚེ་ཡང་འགྲོ་བ་མཆོག་དམན་བར་བ་ཅི་ཙམ་ཞིག་ངེས་པ་མེད་པར་ཤི་བ་དེ་བཞིན་དུ་ད་འདི་ནས་ལོ་བརྒྱ་སོང་བའི་དུས་སུ་མ་འོངས་པ་ན་སྐྱེ་བར་འགྱུར་བའི་སེམས་ཅན་ཁོ་ན་ལས་ད་ལྟ་ས་སྟེང་འདི་ན་གནས་པའི་འགྲོ་བ་ཕོ་མོ་སྲོག་ཆགས་ཤིང་དབུགས་གནས་ཚད་འདི་ཐམས་ཅད་ལ་གཅིག་ཀྱང་མ་ལུས་པར་སྔ་ཕྱི་ངེས་མེད་དུ་མི་རྟག་འཆི་བའི་འཇིགས་པས་འཕྲལ་དང་འཕྲལ་དུ་བཅོམ་ནས། འཇིག་རྟེན་ཕ་རོལ་དུ་འགྲོ་བར་འགྱུར་བ་ཡིན། སྐྱེས་བུ་དམ་པ་ལ་བསམ་ཀྱང་མི་རྟག་སྟེ། །སློབ་དཔོན་དཔའ་བོས། ཇི་སྟེ་སངས་རྒྱས་རྣམས་ཀྱི་སྐུ། །མཚན་དང་དཔེ་བྱད་ཀྱིས་བརྒྱན་པའི། །རྡོ་རྗེའི་སྐུ་ཡང་མི་རྟག་ན། །ཕལ་བ་གཞན་ལ་སྨོས་ཅི་དགོས། །ཞེས་གསུངས་པ་བཞིན། སྔོན་དུས་སུ་འགྲོ་བ་ལྷ་དང་བཅས་པའི་སྟོན་པ་རྫོགས་པའི་སངས་རྒྱས་སྲས་དང་བཅས་པ་ཇི་སྙེད་ཅིག་བྱོན་པ་རྣམས་ཀྱང་། གདུལ་བྱའི་དབང་གིས་མྱ་ངན་ལས་འདས་པའི་ཚུལ་བསྟན་ཅིང་། གཞན་ཡང་འཕགས་ཡུལ་གྲུབ་ཆེན་བརྒྱད་ཅུ་དང་། འཛམ་གླིང་མཛེས་པར་བྱེད་པའི་རྒྱན་དྲུག་མཆོག་གཉིས་སོགས་པཎ་གྲུབ་ནམ་མཁའི་སྐར་ཚོགས་ཙམ་བྱོན་པ་རྣམས་དང་། གངས་ཅན་གྱི་ལྗོངས་འདིར་ཡང་ཆོས་རྒྱལ་མེས་དབོན་རྣམ་གསུམ་དང་མཁན་སློབ་རྣམ་གཉིས། གྲུབ་བརྙེས་རྗེ་འབངས་ཉེར་ལྔ། མཁས་པ་བུ་དོལ་རྣམ་གཉིས། བཀའ་བརྒྱུད་མར་མི་དྭགས་གསུམ། ཀུན་མཁྱེན་ཀློང་ཆེན་ཡབ་སྲས། སྨིན་གླིང་གཏེར་ཆེན་སྐུ་མཆེད། རྫོགས་ཆེན་སྐུ་ཕྲེང་རིམ་བྱོན། སངས་རྒྱས་མིའི་གཟུགས་སུ་བྱོན་པ་འགྲོ་འདུལ་ལུང་རིག་གླིང་པ་ཡབ་སྲས་སོགས་གསར་རྙིང་རིས་མེད་ཀྱི་སྐྱེས་ཆེན་གྲངས་མེད་པ་ཞིག་བྱོན་པ་རྣམས་ཀྱང་། དེང་སང་སྐུ་བརྙན་དང་རྣམ་ཐར་ཕྲན་བུ་ཙམ་ལས་མི་སྣང་ཞིང་། ད་ལྟ་ཚད་མའི་སྐྱེས་བུ་ཇི་སྙེད་ཅིག་བཞུགས་བཞིན་པ་འདི་རྣམས་ཀྱང་ཚུལ་དེ་ལས་མ་འདས་པ་ཡིན། སྐྱེ་དགུའི་བདག་པོ་ལ་བསམ་ཀྱང་མི་རྟག་སྟེ། ཀུན་མཁྱེན་ཀློང་ཆེན་པས། ཚངས་དང་བརྒྱ་བྱིན་དྲག་པོ་མིག་སྟོང་ལྡན། །སྲེད་མེད་བུ་ཡང་མི་རྟག་ཕ་རོལ་འགྲོ། །ཞེས་དང་། ཆེད་དུ་བརྗོད་པའི་ཚོམ་ལས། རིན་ཆེན་བདུན་ལྡན་རྒྱལ་པོ་དང་། །གཞན་ཡང་རྒྱལ་ཕྲན་བློན་པོ་དང་། །དགེ་སྦྱོང་བྲམ་ཟེ་ཁྱིམ་བདག་སོགས། །འགྲོ་བ་འདི་ཀུན་མི་རྟག་སྟེ། །རྨི་ལམ་འགྲོ་བ་ཇི་བཞིན་ནོ། །ཞེས་གསུངས་པ་ལྟར་སྲིད་པ་གསུམ་ན་ཆེ་བར་གྲགས་པའི་ཚངས་པ་དང་བརྒྱ་བྱིན། དབང་ཕྱུག་དང་ཁྱབ་འཇུག་ལ་སོགས་པའི་ལྷ་རྣམས་དང་། གླིང་བཞིར་དབང་བསྒྱུར་ནུས་པའི་འཁོར་ལོས་བསྒྱུར་བའི་རྒྱལ་པོ་རྣམས་ཀྱང་རྟག་པར་མི་གནས་ཏེ། མི་དབང་སྤྱི་བོས་སྐྱེས་དང་། མང་པོས་བཀུར་བའི་རྒྱལ་པོ། རྩིབས་ཀྱི་མུ་ཁྱུད་སོགས་ཀྱི་དཔེ་བཞིན་དུ་ད་ལྟ་མཐོ་ཞིང་དབང་ཆེ་བ་ལྟར་སྣང་བ་འདི་རྣམས་ཀྱང་ལོ་རྒྱུས་ཙམ་ཡང་མེད་པའི་དུས་འབྱུང་བར་འགྱུར་ངེས་པ་ཡིན། དཔེ་དོན་སྣ་ཚོགས་ལ་བསམ་ཀྱང་རྟག་པ་མེད་དེ། ཡིད་བཞིན་རིན་པོ་ཆེའི་མཛོད་ལས། ཕྱི་ནང་དུས་བཞི་ན་ཚོད་འགྱུར་བས་ན། །མི་རྟག་འཆི་བར་ངེས་ཀྱི་རྟག་འཛིན་སྤོངས། །གཟུགས་ནི་རྡུལ་ཕྲན་དུས་ནི་སྐད་ཅིག་མ། །བར་སྣང་གློག་འགྱུ་བཞིན་དུ་མི་རྟག་གིས། །ཞེས་གསུངས་པ་ལྟར། དུས་ཀྱང་སྔོན་བསྐལ་པ་རྫོགས་ལྡན། དེ་ནས་སུམ་ལྡན་དང་ཉིས་ལྡན། ད་ལྟ་རྩོད་ལྡན་དུ་གྱུར་པ་དང་། ན་ཚོད་ཀྱང་མངལ་ནས་སྐྱེས་པ། དར་ལ་བབས་པ། རྒས་ཤིང་རྒུད་པ། ན་ཞིང་ཤི་བ་སོགས་སུ་འགྱུར་བ་དང་། གཟུགས་སྣང་ཀྱང་ལོ་གཅིག་ལ། དཔྱིད་ས་བོན་རྨོ་འདེབས་ཀྱི་དུས། དབྱར་ལོ་འདབ་རྒྱས་པ། སྟོན་འབྲུ་བཅུད་སྨིན་པ། དགུན་ས་སྐམ་རྡོ་འཁྱག་སྟེ་རིམ་གྱིས་དུས་བཞིར་འགྱུར་བ་དང་། དེ་བཞིན་དུ་ཟླ་བའི་འཕེལ་འགྲིབ། ཞག་གི་ཉིན་མཚན། དུས་ཚོད་ཀྱི་སྔ་ཕྱི། འབྱུང་བའི་སྙོམ་མིན་སོགས་ཀྱང་མི་རྟག་ལ། རྡུལ་ཕྲན་ཚོགས་པ་ལས་གྲུབ་པའི་གཟུགས་སུ་སྣང་བ་ཕྲ་རགས་འདི་ཀུན་མཐར་རྡུལ་ཕྲན་ཆ་མེད་དུ་ཡལ་ནས་འགྲོ་ཞིང་། ནང་གི་སེམས་ཀྱང་དགེ་སེམས་དང་སྡིག་སེམས། ཆགས་སྡང་རྨོང་གསུམ་དང་། བདེ་སྡུག་གི་རྟོག་པ་སོགས་ཀྱིས་སྐད་ཅིག་ལ་མི་རྟག་པར་འགྱུར་བ་ཡིན་ཏེ། ཀུན་མཁྱེན་ཆོས་རྗེས། མཐའ་བཞིས་བསྡུས་ཕྱིར་རྟག་པ་འགའ་ཡང་མེད། །གསུངས་པ་ལྟར་སྐྱེས་པ་མི་རྟག་སྟེ་མཐའ་འཆི། འདུས་པ་མི་རྟག་སྟེ་མཐའ་འབྲལ། བསོགས་པ་མི་རྟག་སྟེ་མཐའ་འཛད། མཐོན་པོ་མི་རྟག་སྟེ་མཐའ་ལྟུང་བར་འགྱུར་བ་འདི་དག་ནི་འདུས་བྱས་སྤྱིའི་ངང་ཚུལ་ཡིན། མདོར་ན། དཔལ་མགོན་འཕགས་པ་ཀླུ་སྒྲུབ་ཀྱིས། སྐྱེ་རྒ་ན་འཆི་ཐགས་ཀྱི་རི་མོ་འདྲ། །འཆི་བདག་བདུད་ནི་སོ་བྱ་ཉ་གསོད་འདྲ། །འཇིག་རྟེན་འདི་ན་ཆེ་ཆུང་ཕྱུག་དབུལ་ཀུན། །འཆི་བདག་བདུད་ཀྱི་ལག་ཏུ་མི་འགྲོ་མེད། ཅེས་དང་། ཚེ་ནི་ཟིལ་བ་འདྲ་སྟེ་མེད་ལ་ཁད། །དབུགས་ནི་ན་བུན་འདྲ་སྟེ་ཡལ་ལ་ཁད། །ལུས་ནི་སྒྱུ་མ་འདྲ་སྟེ་སྣང་ལ་མེད། །སེམས་ནི་གློག་དང་འདྲ་སྟེ་སྐད་ཅིག་མ། །ཞེས་གསུངས་པ་བཞིན། སྤྱིར་དལ་འབྱོར་གྱི་མི་ལུས་འདི་ཉིད་རྙེད་པར་དཀའ་བ་ཨུ་དུམ་ཝ་རའི་མེ་ཏོག་དང་འདྲ་ལ། འཇིག་པར་སླ་བ་ཐང་དཀྱིལ་གྱི་མར་མེ་དང་མཚུངས་ཤིང་། ཁྱད་པར་དུ་རང་རང་སོ་སོའི་སྔོན་གྱི་ཚེ་རབས་རྣམས་སུ་དགེ་སྡིག་གི་ལས་བསགས་ཚུལ་གྱིས། ཚེ་ཚད་དང་འཆི་བའི་རྐྱེན་སོགས་མཐའ་གཅིག་ཏུ་མ་ངེས་ཏེ། རིན་ཆེན་ཕྲེང་བ་ལས། །འཆི་བའི་རྐྱེན་ནི་མང་བ་སྟེ། །གསོན་པོའི་རྐྱེན་ནི་ཉུང་ཟད་ཙམ། །ཞེས་དང་། རྒྱལ་སྲས་ཞི་བ་ལྷས། ཉིན་མཚན་སྡོད་པ་ཡོངས་མེད་པར། །ཚེ་འདི་རྟག་ཏུ་གོད་འགྱུར་ཞིང་། །སྣོན་པའང་གུད་ནས་འོང་མེད་ན། །བདག་ལྟ་འཆི་བར་ཅིའི་མི་འགྱུར། །ཞེས་གསུངས་པ་ལྟར། འཚོ་བའི་རྐྱེན་ཉུང་ཞིང་། འཆི་བའི་རྐྱེན་མང་བས། ལ་ལ་སྐྱེས་ཙམ་ཉིད་ནས་འཆི། ལ་ལ་བྱིས་པ་ཆུང་ངུ་དང་། ལ་ལ་དར་ལ་བབ་པ་དང་། ལ་ལ་རྒས་པའི་དུས་སུ་འཆི་བ་དང་། འགའ་ཞིག་ནད་དང་། འགའ་ཞིག་མཚོན་དང་། འགའ་ཞིག་མུ་གེས་འཆི་ཞིང་། ཁ་ཅིག་རང་གིས་བྱས་པ་དང་། ཁ་ཅིག་གཞན་གྱིས་བྱས་པའི་རྐྱེན་གྱིས་འགྲོ་བ་འདི་དག་ཐམས་ཅད་སོ་སོར་མི་འདོད་བཞིན་དུ་ལུས་སེམས་བྲལ་ནས་འགྲོ་དགོས་ཤིང་། དེ་ཐབས་གང་གིས་ཀྱང་བཟློག་པའི་མཐུ་མེད་དེ། སྲོག་གཅོད་ཀྱི་ནད་དེ་འཚོ་བྱེད་ཀྱི་སྨན་པས་མི་སོས། །འཆི་བདག་གི་གཤིན་རྗེ་ནི་གཟའ་ཁྱབ་འཇུག་གི་མདུང་ཐུང་གིས་མི་ཟློག །ལས་ཀྱི་རྣམ་པར་སྨིན་པ་ནི་དཔལ་ཕྱག་ན་རྡོ་རྗེའི་ནུས་པས་མི་ཁོག །དེ་ལྟར་འཆི་བའི་དུས་ལ་བབས་པ་ན། ཟས་ཀྱི་ཟ་འཕྲོ། གོས་ཀྱི་གྱོན་འཕྲོ། ལས་ཀྱི་བྱེད་འཕྲོ། གཅེས་པའི་སྒྱུ་ལུས་དང་བཅས་པ་དབང་མེད་དུ་བསྒྱུར། བརྩེ་བའི་ཕ། བྱམས་པའི་མ། སྙིང་སྡུག་གི་བུ། །ཚེ་རོག་གི་ཆུང་མ། བསགས་པའི་ནོར་སོགས་ཅི་འདྲ་ཞིག་ཡོད་ན་ཡང་ཐམས་ཅད་ལའང་མིག་གི་ལྟ་བའི་དབང་ཙམ་ཡང་མེད་པར་འཆི་དགོས་པ་ཡིན་ལ། དེ་བཞིན་དུ་ད་ལྟ་ཁྱོད་ཀྱང་སྐྱེ་འགྲོ་སེམས་ཅན་འགྲོ་བའི་ལམ་པོ་ཆེ་དེར་ཞུགས་པ་ཡིན་མ་གཏོགས། ཁྱོད་ཉིད་གཅིག་པུར་དགོས་སུ་འཆི་བའི་སྡུག་བསྔལ་གྱིས་མནར་བ་མ་ཡིན་པས་མྱ་ངན་དང་སྡུག་བསྔལ་གང་ཡང་མ་བྱེད། མ་སྐྲག་མ་སྔངས་མ་འཇིག་པར་ད་ལྟ་བདག་གིས་བསྟན་པའི་གདམས་ངག་གི་གནད་རྣམས་མ་བརྗེད་པར་ཡིད་ལ་ཟུངས་ཤིག བརྗོད་ལ། དབུགས་དང་བྲལ་མ་ཐག་པ་ལ་འཆི་ཁའི་བར་དོ་ངོ་སྤྲད་པར་བྱ་སྟེ། དེ་ཡང་ལུས་དང་སེམས་བྲལ་བའི་ཚེ་འཆི་ཁའི་བར་དོ་ཞེས་བྱ་བ་འདི་ལྟར་འབྱུང་བ་ཡིན་ཏེ། ཡེ་ཤེས་རོལ་པའི་རྒྱུད་ལས། དང་པོ་ས་ནི་ཆུ་ལ་ཐིམ། །ཆུ་ཡང་མེ་ལ་ཐིམ་གྱུར་ཏེ། །མེ་ནི་རླུང་ལ་ཐིམ་གྱུར་ནས། །རླུང་ཡང་རྣམ་པར་ཤེས་ལ་ཐིམ། །རྣམ་ཤེས་གཟུང་བ་འདི་ཉིད་ནི། །འོད་གསལ་བར་དུ་འཇུག་པར་འགྱུར། །ཞེས་གསུངས་པས། ས་ཆུ་ལ་ཐིམ་པའི་དུས་སུ་འདེགས་བྱེད་ཀྱི་རླུང་བྲོས་པས་བསྒུལ་བསྐྱོད་མི་ནུས་ཤིང་། དོང་དུ་ལྷུང་བ་དང་རི་བོས་ནོན་པ་ལྟ་བུའི་ལྕི་སྣང་འབྱུང་། མིག་གིས་གཟུགས་མི་མཐོང་། ནང་རྟགས་སུ་ཕྱོགས་མཚམས་ཐམས་ཅད་སྨིག་སྒྱུ་ལྟ་བུའི་སྣང་བ་འཆར་ཞིང་། ཆུ་མེ་ལ་ཐིམ་པའི་དུས། དྭངས་སྙིགས་འབྱེད་པའི་རླུང་བྲོས་པས་ཟས་སྐོམ་མི་ལེན་ཅིང་ཁ་ཆུ་དང་སྣ་ཆུ་ལ་སོགས་པ་འཛགས། རྣ་བས་སྒྲ་མི་ཐོས། ནང་རྟགས་སུ་དུ་གདང་འཁྲིགས་པ་ལྟ་བུའི་སྣང་བ་དང་། མེ་རླུང་ལ་ཐིམ་སྐབས་མེ་མཉམ་གྱི་རླུང་བྲོས་པས་ལུས་ཀྱི་དྲོད་མཐའ་ནས་ཡལ། དངུལ་ཆུ་དང་ཁ་སྣ་ཐམས་ཅད་སྐམ། སྣས་དྲི་མི་ཚོར། ནང་རྟགས་སུ་སྲིན་བུ་མེ་ཁྱེར་བར་སྣང་ལ་རྒྱུ་བ་ལྟ་བུའི་སྣང་བ་དང་། རླུང་རྣམ་ཤེས་ལ་ཐིམ་སྐབས་གྱེན་རྒྱུ་དང་ཐུར་སེལ་ཁྱབ་བྱེད་ཀྱི་རླུང་རྣམས་སྲོག་འཛིན་གྱི་རླུང་ལ་འདུས་ནས་དབུགས་ནང་དུ་སྡུད་དཀའ་ཞིང་ཕྱིར་བརྩེགས་མར་འཕེན། ནང་རྟགས་སུ་མར་མེ་འབར་བ་དང་། སྒྲོན་མེའི་ཕྲེང་བ་བསྒྲིགས་པ་ལྟ་བུའི་སྣང་བ་འཆར། དུས་འདིར་མིག་ནས་རང་རིག་གི་འོད་ཟེར་དུང་གི་ཐག་པ་ལྟ་བུ་ཤར་བ་ལ་རྡོ་རྗེ་སེམས་དཔའི་ཐུགས་རྗེའི་འོད་ཟེར་བྱུང་བར་ངོ་ཤེས་ནས་རིག་པ་རྩེ་གཅིག་ཏུ་གཏོད་པའི་འདུན་པ་དྲག་པོས་ཡར་གྱི་ཟངས་ཐལ་དུ་སྐད་ཅིག་ལ་གྲོལ་བར་འགྱུར་རོ།། དུས་དེར་མ་གྲོལ་ན་རྣམ་ཤེས་ནམ་མཁའ་ལ་ཐིམ་པའི་ཚེ་ལས་ཀྱི་རླུང་བྲོས་པས་རླུང་སེམས་ཀྱི་འགྲོ་འོང་འགགས་ནས། ལུས་ཀྱི་ཁྲག་ཐམས་ཅད་སྲོག་རྩར་འདུས་ཏེ་སྙིང་དབུས་སུ་ཁྲག་གི་ཐིགས་པ་གསུམ་རིམ་པར་བརྒྱབ་པས། དབུགས་རིང་པོ་གསུམ་ཕྱིར་ལ་འཕེན་ཞིང་ཕྱི་དབུགས་ཁྲོག་གིས་ཆད། ནང་རྟགས་སུ་སྤྲིན་མེད་པའི་ནམ་མཁའ་ལྟ་བུ་འབྱུང་། དེ་ནས་ནམ་མཁའ་འོད་གསལ་ལ་ཐིམ་སྐབས་རོ་རྐྱང་གི་དྭངས་མ་རྣམས་ཨ་ཧཾ་ལ་འདུས་ཏེ་སྤྱི་བོར་ཕ་ལས་ཐོབ་པའི་སྲོག་འཛིན་གྱི་དྭངས་མ་ཐིག་ལེ་དཀར་ཆ་ཧཾ་གི་དབྱིབས་ཅན་ཐུར་དུ་བབས་པ་ན་སྣང་བ་ཞེས་བྱ་སྟེ། ཕྱི་རྟགས་སུ་སྣང་བ་ཐམས་ཅད་སྤྲིན་མེད་ཀྱི་ནམ་མཁའ་གཡའ་དག་པ་ལ་ཟླ་འོད་ཀྱིས་ཁྱབ་པ་ལྟ་བུ་དཀར་ལམ་མེ་བ་དང་། ནང་རྟགས་སུ་ཤེས་པ་གསལ་ཉམས་དང་ལྡན་ཞིང་ཞེ་སྡང་གི་རྟོག་པ་སོ་གསུམ་འགགས། དེ་རྗེས་སྣང་བ་མཆེད་པ་ལ་ཐིམ་པའི་ཚེ། ལྟེ་བ་ནས་མ་ལས་ཐོབ་པའི་མཉམ་གནས་ཀྱི་དྭངས་མ་རཀྟ་དམར་ཆ་ཨ་ཐུང་གི་དབྱིབས་ཅན་གྱེན་དུ་ལོག་པས་ཕྱི་རྟགས་སུ་ནམ་མཁར་ཉི་འོད་ཀྱིས་ཁྱབ་པ་ལྟ་བུ་དམར་ལམ་མེ་བ་དང་། ནང་རྟགས་སུ་ཤེས་པ་བདེ་ཉམས་དང་ལྡན་ཞིང་འདོད་ཆགས་ཀྱི་རྟོག་པ་བཞི་བཅུ་འགགས། མཆེད་པ་ཉེར་ཐོབ་ལ་ཐིམ་པས་སྙིང་དབུས་སུ་ཐིག་ལེ་དཀར་དམར་འཕྲད་པའི་བར་དུ་རྣམ་ཤེས་ཚུད་ནས་ཕྱི་རྟགས་སུ་ནམ་མཁའ་ལ་མུན་ནག་འཐིབ་པ་ལྟ་བུའི་ནག་ལམ་མེ་བ་དང་། ནང་རྟགས་སུ་མི་རྟོག་པའི་ཉམས་འཆར་ཞིང་གཏི་མུག་གི་རྟོག་པ་བདུན་འགགས། རྣམ་ཤེས་དབུ་མར་ཐིམ་པས་ནང་དབུགས་འཆད་ཅིང་རྟོག་མེད་ཀྱི་ངང་དུ་ནག་ཐིམ་གྱིས་བརྒྱལ་འགྲོའོ།། དེ་ནས་བརྒྱལ་བ་ལས་སངས་མ་ཁད་ལ་ཉེར་ཐོབ་འོད་གསལ་དང་འདྲེས་པས་ཟུང་འཇུག་ཡེ་ཤེས་ཞི་བ་ཆོས་སྐུའི་ནམ་མཁའ་ཞེས་བྱ་བ་སྟོན་གྱི་ནམ་མཁའ་སྤྲིན་དང་བྲལ་བ་ལྟ་བུ། རིག་པ་སྟོང་གསལ་རྗེན་པ་ཉོན་མོངས་ཕྲ་རགས་ཀྱི་རྟོག་པ་རྡུལ་ཙམ་ཡང་མེད་པའི་སེམས་དྲི་མ་དང་བྲལ་བའི་ཉམས་འཆར་བ་དེ་ཉིད་འཆི་བ་ཆོས་ཀྱི་སྐུ་ཡེ་ནས་སེམས་ཅན་ལ་སངས་རྒྱས་རང་ཆས་སུ་ཡོད་པ་དེ་ཡིན་པས་ངོ་ཤེས་ནས་མཉམ་པར་བཞག་པས། སྒྱུ་འཕྲུལ་དྲྭ་བའི་རྒྱུད་ལས། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་གསུངས་པ་ལྟར་རབ་ཆོས་སྐུར་འཕོ་བ་ཞེས་བྱ་བ་ཡིན་ཏེ་བར་དོ་མེད་པར་གཞི་ཀ་དག་ཡེ་ཐོག་ཏུ་གྲོལ་བ་ཞེས་བྱ་སྟེ་མངོན་པར་འཚང་རྒྱ་བ་ཡིན་ནོ།། དབུགས་ཆད་མ་ཁད་ལ་འདི་ནས་རྒྱུད་སྦྱངས་བ་སོགས་དང་། འཕོ་བ་དངོས་ཀྱི་མཚམས་སྦྱོར་བྱས་ཀྱང་རུང་ལ། ཡང་ན་སྔར་གྱི་འཕྲོར་ཆོས་ཉིད་བར་དོའི་ངོ་སྤྲོད་བྱ་སྟེ། དེ་ཡང་། གལ་ཏེ་འཆི་ཁའི་བར་དོར་མ་གྲོལ་ན། དབྱིངས་སྣང་ལྷུན་གྲུབ་དང་འོད་གསལ་ཟུང་དུ་འཇུག་པ་ཞི་བ་ཆོས་ཀྱི་སྐུའི་ནམ་མཁའ་ལས། སླར་ཡང་དག་དང་མ་དག་གི་རྟོག་ཚོགས་མཆེད་པ་དང་། དེ་ལས་ཆོས་ཉིད་བར་དོའི་སྣང་བ་རྣམས་འཆར་བ་ཡིན་ཏེ། ཀློང་ཆེན་ནམ་མཁའི་རྣལ་འབྱོར་གྱིས། གལ་ཏེ་བར་དོ་དང་པོ་མ་གྲོལ་ན། །དབྱིངས་སྣང་ལྷུན་གྲུབ་འོད་གསལ་ལ་ཐིམ་ནས། །སྒྲ་འོད་ཟེར་དང་ཚོམ་བུའི་དཀྱིལ་འཁོར་སོགས། །ཐིམ་ལུགས་བརྒྱད་ཀྱི་སྣང་བ་འཆར་བའི་ཚེ། །ཆོས་ཉིད་བར་དོར་རང་སྣང་ངོ་ཤེས་ནས། །མ་པང་བུ་འཇུག་ལྟ་བུར་གྲོལ་བར་ཤོག །ཅེས་གསུངས་པ་ལྟར། ཁྱབ་བྱ་ཕུང་པོ་ལྔ་ལ་ཁྱབ་བྱེད་སངས་རྒྱས་ཀྱི་སྐུ་དང་། རིགས་དང་། ཞིང་ཁམས་ཐམས་ཅད་རང་ཆས་སུ་ཡོད་པའི་གནད་ཀྱིས་རང་གི་རིག་པའི་རྩལ་ལས་རང་སྣང་བ་དག་ཆེན་ཡེ་ཤེས་ཀྱི་མདངས་ལྔའི་ཟེར་ཐག་དུང་དང་། བཻཌཱུརྱ་དང་། གསེར་དང་། དངུལ་དང་། པངྨ་ར་ག་དང་། གཡུ་ཡི་སྐུད་པ་བརྐྱང་བ་ལྟ་བུ་གྲངས་མེད་བྱུང་བ་དང་འབྲེལ་བར་འོད་ལྔའི་ཕུང་པོ་བཟོད་མེད་དུ་འབར་བ། ཆོས་ཉིད་ཀྱི་རང་སྒྲ་འབྲུག་སྟོང་ལྡིར་བ་ལྟ་བུ་དང་བཅས་པས་སྣ་དྲངས་ནས་རྣམ་སྣང་། རྡོར་སེམས། རིན་འབྱུང་། སྣང་མཐའ། དོན་གྲུབ་རྣམས་ཡབ་ཡུམ་རིགས་ལྔ་སོ་སོའི་འཁོར་ཚོགས་དང་བཅས་པའི་ཚོམ་བུའི་དཀྱིལ་འཁོར་དང་། ཁྲག་འཐུང་རིགས་ལྔ་ཡབ་ཡུམ། ཀཽ་སེང་སྒོ་མ། དབང་ཕྱུག་མ་སོགས་ཞི་ཁྲོའི་ལྷ་ཚོགས། སྐུ་དང་ཞིང་ཁམས་ནམ་མཁའི་མཐའ་ལྟར་ཁྱབ་པ། གཟི་བཀྲག་དཔག་ཏུ་མེད་པ་རིམ་པར་འཆར་ཞིང་། དེ་དང་ལྷན་དུ་འོད་བཀྲག་མེད་པའི་རིགས་ཉམས་དགའ་བ་ལྟ་བུ་གང་ཤར་ན་ཡང་རིགས་དྲུག་གི་འོད་ལམ་ཡིན་པས། ཆགས་ཤིང་ཞེན་ན་རིགས་དྲུག་གི་གནས་རྣམས་སུ་སྐྱེ་ཞིང་སྡུག་བསྔལ་དཔག་ཏུ་མེད་པ་མྱོང་དགོས་པས་དགའ་སྤྲོ་དང་ཆགས་ཞེན་མ་བྱེད་པར་དག་པ་ཡེ་ཤེས་ཀྱི་སྒྲ་འོད་ཟེར་གསུམ་ཞི་ཁྲོའི་ལྷ་ཚོགས་འཇིགས་ཤིང་བལྟ་བར་མི་བཟོད་པ་དེ་རྣམས་རང་སྣང་དུ་ངོ་ཤེས་ཤིང་གསལ་སྟོང་གི་ངང་དུ་བཞག་པས་བར་དོ་ལོངས་སྤྱོད་རྫོགས་པའི་སྐུ་ཞི་ཁྲོའི་ལྷ་ཚོགས་དང་དབྱེར་མེད་དུ་སངས་རྒྱས་པར་འགྱུར་རོ། །དེ་ལྟར་འོད་གསལ་ཡེ་ཤེས་དང་ཟུང་འཇུག་གི་སྣང་བ་རྣམས་རང་སྣང་དུ་ངོ་ཤེས་པའི་གདེངས་མ་ཐོབ་ན། ཟུང་འཇུག་ཡེ་ཤེས་ལ་ཐིམ་པའི་དུས་སུ་སྙིང་ག་ནས་མདུན་གྱི་ནམ་མཁར་ཡེ་ཤེས་བཞི་ལྡན་གྱི་སྣང་བ་འོད་མཐིང་ག་དང་། དཀར་པོ། སེར་པོ་དང་། དམར་པོའི་གདན་ལ་རང་མདོག་དང་མཐུན་པའི་ཐིག་ལེ་དྭངས་གསལ་ཐིག་ཕྲན་ལྔ་ལྔས་བརྒྱན་པ་དང་། དེའི་སྟེང་དུ་འོད་ཟླུམ་རྨ་བྱའི་གདུགས་འཁོར་བ་ལྟ་བུ་འཆར་ཞིང་ཕུང་པོ་བདག་འཛིན་ལས་གྲོལ་བས་ལུས་འོད་གསལ་ཆོས་ཉིད་ཀྱི་རང་ངོ་ལ་གནས། འབྱུང་བ་དང་ཉོན་མོངས་པ་ཕྲ་རགས་ལས་གྲོལ་བའི་རང་སྣང་དེ་ཉིད་ངོ་ཤེས་པ་ནི་གྲོལ་བ་ལུས་ཀྱི་གནད་དོ། །དེ་ནས་ཡེ་ཤེས་ལྷུན་གྲུབ་ལ་ཐིམ་པའི་དུས་སུ་ཡེ་ཤེས་ཀྱི་སྣང་བ་དེ་རྣམས་སྟེང་གི་འོད་ཟླུམ་ལ་འདུས་ནས། ཀ་དག་གི་སྣང་བ་ནམ་མཁའ་སྤྲིན་བྲལ་ལྟ་བུའི་ངང་ལས་དག་པ་ཞི་ཁྲོའི་ཞིང་ཁམས་དང་། མ་དག་འགྲོ་དྲུག་གི་སྣང་བ་མཐའ་ཡས་པ་སྐད་ཅིག་ལ་འཆར་བ་དེ་རྣམས་རང་སྣང་དུ་སྒྲོ་འདོགས་ཆོད་པས་གྲོལ་བ་ཐོབ་པ་ནི་མཐར་ཕྱིན་པ་ངོ་ཤེས་པའི་གནད་དོ། །དེ་ལྟར་ཀ་དག་གི་རིག་གདངས་མ་ལྟ་བུའི་པང་དུ་ལྷུན་གྲུབ་ཀྱི་འོད་གདངས་བུ་ལྟ་བུ་དེ་ཐིམ་ལུགས་བརྒྱད་ཀྱི་སྒོ་ནས་དབྱིངས་རིག་མ་བུ་དབྱེར་མེད་དུ་འདྲེས་ཏེ་སངས་རྒྱས་པ་ཡིན་ནོ།། ཞེས་བརྗོད་ཅིང་ཤི་ནས་ཞག་ཡུན་མ་སོང་བ་ལ་འདི་ནས་རྒྱུད་སྦྱངས་སོགས་འཕོ་བའི་ལས་རིམ་སྦྱར་ཀྱང་ཆོག གཞན་ཞག་འགའ་སོང་བའི་རིགས་ལ་སྲིད་པ་བར་དོའི་ངོ་སྤྲོད་ཀྱང་བྱ་སྟེ། གལ་ཏེ་ཆོས་ཉིད་བར་དོར་བརྟན་པ་མ་ཐོབ་པས་མ་གྲོལ་ན། སྲིད་པ་བར་དོའི་ཡིད་ལུས་བླངས་ནས་འཁྲུལ་སྣང་སྣ་ཚོགས་འབྱུང་བ་ཡིན་ཏེ། སློབ་དཔོན་དབྱིག་གཉེན་གྱིས། སྔོན་འབྱུང་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོགས་མེད་རྒྱུ། །ལས་ཀྱི་རྫུ་འཕྲུལ་ཤུགས་དང་ལྡན། །རིགས་མཐུན་ལྷ་མིག་དག་པས་མཐོང་། །མི་ལྡོག་དེ་ནི་དྲི་ཟའོ། །ཞེས་གསུངས་པ་བཞིན་བར་དོར་ཡིད་ཀྱི་ལུས་རྟེན། ས་ཁམས་ཤ་ཡི་གཟུགས་ཕུང་། ཆུ་ཁམས་ཁྲག་གི་ཚོར་བ། མེ་ཁམས་དྲོད་ཀྱི་འདུ་ཤེས། རླུང་ཁམས་དབུགས་ཀྱི་འདུ་བྱེད་དེ་འབྱུང་བཞིའི་ས་བོན་གྱི་ཆ་ལ་བརྟེན་པའི་མིང་བཞིའི་ཕུང་པོ། བར་དོར་ཡུན་ཅི་ཙམ་གནས་པའི་ཕྱེད་སྔ་མར་གསོན་དུས་ཀྱི་བྱད་གཟུགས་དང་། ཕྱེད་ཕྱི་མར་སྐྱེ་བ་ལེན་འགྱུར་གྱི་གཟུགས་དབྱིབས་སུ་གནས་པ་དེ་ཉིད། དབང་པོ་ཀུན་ཚང་བ་བྱ་སྤུ་རླུང་གིས་བསྐྱོད་པ་ལྟར། གང་དུ་ཡང་སྡོད་མི་ཚུགས་ཤིང་མ་ཡི་མངལ་དང་འོག་མིན་རྡོ་རྗེ་གདན་མ་གཏོགས་སྣོད་བཅུད་གང་ལ་ཡང་ཐོགས་པ་མེད་པའི་རྫུ་འཕྲུལ་གྱི་ཤུགས་དང་ལྡན་པས། འཛམ་བུའི་གླིང་པ་མི་ཡི་རྟེན་ཅན་རིགས་མཐུན་པའི་བར་དོའི་སེམས་ཅན་རྣམས་དང་། གང་ཟག་ལྷ་མིག་དག་པ་ཐོབ་པ་རྣམས་ཀྱིས་མཐོང་ལ། གཞན་གྱིས་མི་མཐོང་ཞིང་། དགེ་སྡིག་གི་ལས་ཀྱིས་དག་པའི་ཞིང་དང་། རིགས་དྲུག་གི་གནས་གང་དུ་འཕེན་པ་དེར་འགྲོ་བ་ལས། གསོན་གྲལ་དུ་སྔོན་བཞིན་ལྡོག་རྒྱུ་མེད་ཅིང་། ཟས་སུ་གསུར་གྱི་དྲི་ཙམ་གྱིས་ཚིམ་པ་ཡང་ཁྱོད་བར་དོ་ན་གནས་པའི་རྟགས་ཡིན། གཞན་ཡང་འབྱུང་བ་བཞིའི་རླུང་གི་ཆོ་འཕྲུལ་ལ་བརྟེན་ནས་རི་རབ་ཉིལ་བ་ལྟ་བུའི་སྒྲ་དང་། རྒྱ་མཚོ་ཆེན་པོ་རྦ་ཀློང་འཁྲུགས་པ་ལྟ་བུའི་སྒྲ་དང་། ནགས་ཚལ་ལ་མེ་མཆེད་པ་ལྟ་བུའི་སྒྲ་དང་། རླུང་ཆེན་པོ་འུར་བ་ལྟ་བུའི་སྒྲ་སྟེ་འཇིགས་པའི་སྒྲ་བཞི་དང་། ཕྱོགས་གང་དུ་ཕྱིན་ཀྱང་དུག་གསུམ་ལས་གྲུབ་པའི་འཁྲུལ་སྣང་འཇིགས་སུ་རུང་བའི་གཡང་ས་ཆེན་པོ་དམར་ཟེང་ངེ་བ་དང་། སྐྱ་ཆད་དེ་བ། ནག་ངམ་མེ་བ་གསུམ་འབྲལ་མེད་དུ་འོང་ནས་ལྟུང་ལ་ཁད་ཀྱི་འཇིགས་སྐྲག་འབྱུང་བ་ནི་ཡ་ང་བའི་གཡང་ས་གསུམ་དང་། ཤུལ་གྱི་ཉེ་འབྲེལ་རྣམས་ཀྱི་མྱ་ངན་དང་ངུ་ཆོམ་བྱེད་ཅིང་དྲུང་དུ་ཕྱིན་ནས་གཏམ་སྨྲས་ཀྱང་ལན་མི་འདེབས་པ་དང་། །ཁམས་དཀར་དམར་མེད་པས་ཉི་ཟླ་དང་སྐར་མའི་གཟུགས་དང་འོད་མི་མཐོང་བ་དང་། ལུས་ལ་གྲིབ་མ་དང་རྐང་རྗེས་མེད་པ་དང་། ཆུ་དང་རི་བྲག་རྩིགས་པ་སོགས་ལ་ཐོགས་མེད་དུ་འགྲོ་ནུས་པ་དང་། མངོན་ཤེས་ཕྲ་མོ་འཆར་བ་སྟེ་ངེས་པའི་རྟགས་ལྔ་དང་། གནས་མ་ངེས་པ་ཡུད་ཙམ་རེ་ལ་ཕྱོགས་སྣ་ཚོགས་སུ་སླེབ་པ་དང་། རྟེན་མ་ངེས་པ་མཆོད་རྟེན་དང་། ཟམ་འོག་དང་། ཕུག་པ་སོགས་ལ་སྐྱབས་སུ་རེ་བ་དང་། གྲོགས་མ་ངེས་པ་འབྱུང་པོ་ཡི་དྭགས་སོགས་འགྲོ་བ་སྣ་ཚོགས་པར་འགྲོགས་པ་དང་། ཁ་ཟས་མ་ངེས་པ་བཟང་ངན་སྣ་ཚོགས་མཐོང་ཡང་མ་བསྔོས་ན་བཟའ་མི་ནུས་པ་དང་། སྤྱོད་ལམ་མ་ངེས་པ་སྐད་ཅིག་རེ་ལ་འགྱུར་ཞིང་མི་ཐུབ་པའི་སྤྱོད་པ་སྣ་ཚོགས་བྱེད་པ་དང་། ཚོར་བ་མ་ངེས་པ་དགའ་སྡུག་དང་འཇིགས་སྐྲག་གི་སྣང་བ་སྣ་ཚོགས་འབྱུང་བ་སྟེ་མ་ངེས་པའི་རྟགས་དྲུག་རྣམས་དང་། གཞན་ཡང་ཞག་བདུན་རེའི་མཚམས་སུ་འཆི་བའི་སྣང་བ་རེ་འཆར་ཞིང་། གཤིན་རྗེའི་སྐྱེས་བུ་འཇིགས་པའི་མཚོན་ཆ་སྣ་ཚོགས་ཐོགས་པ་མང་པོས་རྒྱོབ་སོད་ཀྱི་སྒྲ་དང་བཅས་ཏེ་འདེད་པ་དང་། གཅན་གཟན་འཇིགས་སུ་རུང་བ་དང་། ཁ་ཆར་རླུང་དང་མུན་ནག་གིས་དེད་པ་དང་། ལས་ཀྱི་རྡེའུ་དཀར་ནག་བགྲང་བ་ལ་སོགས་པ་ཡ་ང་ཞིང་ཡི་མུག་པའི་སྔང་སྐྲག་འཇིགས་གསུམ་གྱི་སྣང་བ་སྣ་ཚོགས་འབྱུང་སྲིད་ཀྱང་། བར་དོར་གནས་པའི་རྟགས་དེ་རྣམས་འཁྲུལ་སྣང་ཁོ་ན་མ་གཏོགས་བདེན་པར་གྲུབ་པ་ཅུང་ཟད་ཀྱང་མེད་པས། དེ་ཐམས་ཅད་བར་དོའི་འཁྲུལ་སྣང་དུ་ངོ་ཤེས་པར་གྱིས་ལ་གང་ལའང་མ་འཇིགས་མ་སྐྲག་པར་རྨི་ལམ་གྱི་སྣང་བ་དང་ཁྱད་པར་མེད་པར་ཤེས་པར་གྱིས་ཤིག བར་དོའི་སྐབས་འདིར་སྲང་ཁའི་མཐོ་དམན་དང་རྟ་ཁ་སྲབ་ཀྱིས་བསྒྱུར་བ་འདྲ་བས་འཁྲུལ་ན་འཁྲུལ་ཚབ་ཆེ་སྟེ་ཆགས་སྡང་གི་རྣམ་རྟོག་ཕྲ་མོ་རེས་ཀྱང་ངན་སོང་དུ་སྐྱེ་ནུས། ལམ་བསྒོམ་ན་གྲོལ་ཚབ་ཆེ་སྟེ་དད་པ་དང་སྙིང་རྗེ་བསྐྱེད་རྫོགས་ཅུང་ཟད་རེ་བསྒོམ་པས་ཀྱང་གྲོལ་བ་ཐོབ་ནུས་ཏེ། བར་དོའི་རིག་པ་འདི་གསོན་དུས་ཀྱི་ཤེས་པ་བས་བདུན་འགྱུར་གྱིས་བསྒྱུར་བར་སླ་བས་མ་དད་པ་དང་ལོག་ལྟ་སོགས་མ་དག་པའི་བསམ་སྦྱོར་སྤོངས་ལ་འདུན་པ་བཟང་པོར་བསྒྱུར་ཞིང་། མ་དག་འཁོར་བའི་གནས་དང་མངལ་སྒོ་ངན་པ་རྣམས་སྤང་ནས། དཀོན་མཆོག་གསུམ་ལ་སྐྱབས་འགྲོ་དང་གསོལ་འདེབས་གྱིས་ལ་ཆོས་ལྡན་གྱི་ཕ་མ་བཟང་པོའི་མངལ་དུ་ཉིང་མཚམས་སྦྱོར་ཞིང་། སྐྱེས་མ་ཐག་ནས་རྒྱལ་བའི་བསྟན་པ་དང་མཇལ། དམ་པས་རྗེས་སུ་བཟུང་། ཆོས་ཉམས་སུ་བླངས་ནས་བསྟན་འགྲོའི་དོན་རྒྱ་ཆེན་འགྲུབ་པའི་འདུན་པ་དང་སྨོན་ལམ་དྲག་པོ་ཐོབ་ཅིག ཁྱོད་ཀྱི་ཤུལ་མི་རྣམས་ཀྱིས་ཀྱང་མཆོད་པ་དང་སྦྱིན་གཏོང་། བདུན་ཚིག་གི་ཆོ་ག་དང་། གཟུངས་སྔགས་ཟབ་མོ་སྒྲོགས་པ། རྟེན་བཞེངས་དང་། སྨོན་ལམ་འདེབས་པ་སོགས་དགེ་བ་གང་འགྲུབ་ལ་བརྩོན་པ་འདིས་ངན་སོང་ལས་ལྡོག་ནས་མཐོ་རིས་དང་ཐར་བའི་གོ་འཕང་ཐོབ་པར་འགྱུར་རོ།། ཞེས་ངོ་སྤྲད་པར་བྱའོ།། ལྔ་པ་རྒྱུད་སྦྱངས་པ་ནི། ངོ་ཅུང་ཟད་རེ་འཕྲོད་སྲིད་ཀྱང་རྒྱུད་མ་དག་ན་ལས་ཉོན་བག་ཆགས་ཀྱི་དབང་གིས་གྲོལ་བར་དཀའ་བས་དེས་ན་ངོ་སྤྲོད་དང་འབྲེལ་བར་འདི་ལྟར། ཁྱད་པར་ད་ལམ་ཚེ་འདས་ཁྱོད་རང་ཆོས་དར་བའི་ཡུལ་དུ་སྐྱེས། དལ་འབྱོར་གྱི་མི་ལུས་ཐོབ། སངས་རྒྱས་ཀྱི་བསྟན་པ་དང་མཇལ། དགེ་བའི་བཤེས་གཉེན་བླ་མ་དམ་པ་རྣམས་དང་འཕྲད། དཀོན་མཆོག་རིན་པོ་ཆེ་རྣམ་པ་གསུམ་ལ་དད་པ་ཐོབ། དམ་པའི་ཆོས་ཐོས་ཤིང་བསྟན་པ་མ་ནུབ་པའི་དུས་འདིར་འཆི་འཕོ་བའི་གནས་སྐབས་ཉམས་སུ་མྱོང་བ་ནི། བསྐལ་བ་བཟང་ཞིང་བསོད་ནམས་ཤིན་ཏུ་ཆེ་བ་ཡིན་པས་དགའ་བར་གྱིས་ཤིག དེའི་རྒྱུ་མཚན་གང་ཡིན་ཞེ་ན། སངས་རྒྱས་ཀྱི་མཚན་ཐོས་པ་ཡང་དོན་ཆེན་པོ་དང་ལྡན་པ་ཡིན་ཏེ། སངས་རྒྱས་འོད་དཔག་མེད་ཀྱི་ཞིང་གི་ཡོན་ཏན་བཀོད་པའི་མདོ་ལས། གང་གིས་ཕྲ་རབ་རྡུལ་སྙེད་འཇིག་རྟེན་ཁམས། །བཤིགས་ཤིང་བཏགས་ཏེ་རྡུལ་དུ་བྱས་གྱུར་པ། །དེ་བས་མང་བའི་འཇིག་རྟེན་རྣམས་ཀྱི་ཁམས། །རིན་ཆེན་བཀང་སྟེ་སྦྱིན་པ་བྱིན་པས་ནི། །གང་གིས་འོད་དཔག་མེད་པའི་མཚན་དང་ནི། །བདེ་བ་ཅན་གྱི་ཡོན་ཏན་ཁྱད་འཕགས་རྣམས། །ཐོས་ནས་དགའ་སྟེ་ཐལ་མོ་སྦྱོར་བྱེད་པ། །བསོད་ནམས་འདི་ཡི་ཆར་ཡང་འགྱུར་མ་ཡིན། ཞེས་དང་། འདྲེན་པ་དེ་ཉིད་སྔོན་དགེ་སློང་ཆོས་ཀྱི་འབྱུང་གནས་ཞེས་བྱ་བར་གྱུར་ནས། བྱང་ཆུབ་ཏུ་ཐུགས་བསྐྱེད་ཅིང་སྨོན་ལམ་བཏབ་པའི་ཚེ། བདག་གི་མིང་ཐོས་ཏེ་སེམས་རབ་ཏུ་དད་པར་གྱུར་ལ་བདག་རྗེས་སུ་དྲན་པ་དེ་དག གལ་ཏེ་འགུམ་པའི་དུས་ཀྱི་ཚེ་བདག་དགེ་སློང་གི་དགེ་འདུན་གྱིས་ཡོངས་སུ་བསྐོར་བའི་མདུན་དུ་གཡེང་བ་མ་མཆིས་པའི་སེམས་ཀྱིས་གནས་པར་མ་གྱུར་པ་དེ་སྲིད་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་བགྱིའོ།། ཞེས་གསུངས་པ་ལྟར། སངས་རྒྱས་ཀྱི་མཚན་ལན་གཅིག་ཐོས་པ་དང་། ལན་གཅིག་དད་པའི་ཕན་ཡོན་ཡང་དེ་དང་འདྲ་ན། ཁྱོད་ཀྱང་སངས་རྒྱས་ཀྱི་མཚན་ཐོས་ཤིང་དད་པ་སྐྱེས། འཆི་འཕོས་པའི་དུས་འདིར་ཡང་། བླ་མ་དགེ་བའི་བཤེས་གཉེན་རྣམས་ཀྱི་གཙོས་འཕགས་པའི་གང་ཟག་རྣམས་ཀྱིས་རྗེས་སུ་བཟུང་ནས། རྣམ་གྲོལ་བྱང་ཆུབ་འཐོབ་པའི་རྒྱུ་རྐྱེན་ལེགས་པར་འཛོམས་པ་ལ་ཤིན་ཏུ་དགའ་བ་དང་སྤྲོ་བའི་ཡིད་ཀྱིས་བདག་གིས་ད་རེས་ཀྱི་འཆི་བ་འདི་ལ་བརྟེན་ནས་རང་ཉིད་རྣམ་པར་གྲོལ་ཞིང་། གཞན་ལ་ཕན་ཐོགས་ནུས་པ་ཞིག་བྱའོ་སྙམ་དུ་སེམས་བསྐྱེད་ལ། ཁྱོད་རང་གི་རྩ་བའི་བླ་མ་དང་སྟོན་པ་བདེ་བར་གཤེགས་པ་ལ་དད་པ་དང་མོས་གུས་བསྐྱེད་ནས་སྐྱབས་སུ་འགྲོ་དགོས་པ་ཡིན་ཏེ། བུ་མོ་རིན་ཆེན་གྱིས་ཞུས་པའི་མདོ་ལས། འདི་ན་ཕ་དང་མ་དང་བཤེས་རྣམས་དང་། །གཉེན་དང་རྩ་ལག་སྐྱབས་སུ་མི་འགྱུར་ཏེ། །བུ་དང་བུ་མོ་དེ་བཞིན་མགོན་སྐྱབས་མིན། །ཡོན་ཏན་ལྡན་པ་འདི་དག་མ་གཏོགས་པ། །འཇིག་རྟེན་མགོན་སྐྱབས་གྱུར་པ་གཞན་འགའ་མེད། །ཅེས་གསུངས་པ་བཞིན་འཁོར་བ་དང་ངན་སོང་གི་སྡུག་བསྔལ་ཆེན་པོ་ལས་སྐྱོབས་ནུས་པའི་སྐྱབས་དང་རེ་ས་མགོན་དང་དཔུང་གཉེན། བླ་མ་དང་དཀོན་མཆོག་གསུམ་པོ་མ་གཏོགས་གཞན་ན་མེད་པས་སྐྱིད་སྡུག་ལེགས་ཉེས་ཇི་ལྟར་བྱུང་ཡང་ཡིད་ཁྱེད་ཤེས་ཀྱི་དད་པས་བློ་རྩེ་གཅིག་ཏུ་གཏད་ནས་སྐྱབས་སུ་འགྲོ་དགོས་པ་ཡིན། དེ་ལའང་ཐར་པའི་ལམ་བགྲོད་པ་ལ་ལས་ཉོན་བག་ཆགས་ཀྱི་སྒྲིབ་པ་མ་སྦྱངས་ན་བྱ་གནམ་ལ་འཕུར་བའི་རྐང་པ་རྡོ་ལ་བཏགས་པ་དང་འདྲ་བས་རྒྱུད་སྦྱངས་པའི་ཐབས་ལ་བརྩོན་དགོས་ཏེ། དེ་ཡང་སྐྱབས་སུ་འགྲོ་དགོས་པའི་ཚུལ་ནི། ཕག་མོའི་རྟོགས་བརྗོད་ལས། དཀོན་མཆོག་གསུམ་ལ་སྐྱབས་སོང་ན། །མི་དེ་ངན་འགྲོར་མི་འགྲོ་ཞིང་། །མི་ཡི་ལུས་དག་བོར་ནས་ནི། །དེ་ནི་ལྷ་ཡི་ལུས་ཐོབ་བོ། །ལྷ་ཡི་ལུས་དག་བོར་ནས་ནི། །དེས་ནི་སངས་རྒྱས་བྱང་ཆུབ་འགྲུབ། ཅེས་དང་། སྐྱབས་འགྲོ་བདུན་ཅུ་པ་ལས། དཀོན་མཆོག་གསུམ་སྐྱབས་འགྲོ་བ། །དེ་ཡིས་མྱུར་དུ་སངས་རྒྱས་ཐོབ། །ཅེས་གསུངས་ཤིང་། དེ་བཞིན་དུ་སེམས་བསྐྱེད་སོགས་ཀྱང་། འོད་དཔག་མེད་ཀྱི་བཀོད་པའི་མདོ་ལས། སེམས་ཅན་གང་དག་ཁ་ཅིག་གིས་བཅོམ་ལྡན་འདས་འོད་དཔག་མེད་དེའི་མཚན་ཐོས་ལ་ཐོས་ནས་ཀྱང་ཐ་ན་སེམས་བསྐྱེད་པ་གཅིག་ཙམ་ཞིག་བསམ་པ་ཐག་པ་ནས་དད་པ་དང་དགའ་བ་བསྐྱེད་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ཞེས་དང་། ཀུན་དགའ་བོ་སེམས་ཅན་གང་དག་ཁ་ཅིག་ནི་དེ་བཞིན་གཤེགས་པ་དེ་རྣམ་པས་ཡང་དང་ཡང་དུ་ཡིད་ལ་བྱེད་པ་དང་། དགེ་བའི་རྩ་བ་མང་པོ་དཔག་ཏུ་མེད་པ་བསྐྱེད་པ་དང་། བྱང་ཆུབ་ཏུ་སེམས་ཡོངས་སུ་བསྔོས་ཏེ། འཇིག་རྟེན་གྱི་ཁམས་དེར་སྐྱེས་པར་སྨོན་ལམ་འདེབས་པ་དེ་དག་འཆི་བའི་དུས་ཉེ་བར་གནས་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ་དགེ་སློང་གི་ཚོགས་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་བཞུགས་པར་འགྱུར་ཏེ། དེ་དག་གིས་བཅོམ་ལྡན་འདས་འོད་དཔག་མེད་དེ་མཐོང་ནས་རབ་ཏུ་དངས་བའི་སེམས་ཀྱིས་ཤི་འཕོས་ཏེ། འཇིག་རྟེན་གྱི་ཁམས་བདེ་བ་ཅན་དེ་ཉིད་དུ་སྐྱེ་བར་འགྱུར་རོ། །ཞེས་གསུངས་པ་ལྟར་བདག་གིས་ཀྱང་ཁྱོད་རང་གི་རྒྱུད་དག་པར་བྱ་བའི་ཕྱིར་སྙིང་རྗེ་ཆེན་པོའི་ངང་ནས་བླ་མ་སངས་རྒྱས་རིན་པོ་ཆེ་ལ་སྐྱབས་སུ་འགྲོ་བ་དང་། བྱང་ཆུབ་མཆོག་ཏུ་སེམས་བསྐྱེད་པ། ཡན་ལག་བདུན་གྱིས་ཚོགས་བསགས་པ། ལྟུང་བཤགས་སོགས་རྒྱུན་བཤགས་བརྗོད་པ། ཚད་མེད་པ་བཞི་བསྒོམ་པ། རྒྱལ་བའི་སྲས་ཀྱི་བསླབ་སྡོམ་བཟུང་བ་རྣམས་རིམ་པར་བགྱིད་པ་ཡིན་པས། ཁྱོད་ཀྱང་སེམས་གཞན་དུ་མ་ཡེང་བར་དད་པ་དང་མོས་གུས་མཆོག་ཏུ་བསྐྱེད་ལ། ༧ མདུན་གྱི་ནམ་མཁར་ནུབ་ཕྱོགས་བདེ་བ་ཅན་གྱི་ཞིང་ཁམས་ཞེས་བྱ་བ་གྲངས་དང་ཚད་ལས་འདས་པའི་སངས་རྒྱས་ཀྱིས་བསྐལ་པ་བྱེ་བར་ཡང་བརྗོད་མི་ནུས་པའི་དཔལ་དང་ཡོན་ཏན་གྱི་བཀོད་པ་ཕུན་སུམ་ཚོགས་པའི་རྟེན་གྱི་དབུས་སུ། བརྟེན་པ་བཅོམ་ལྡན་འདས་མགོན་པོ་འོད་དཔག་ཏུ་མེད་པ་ལ་འཁོར་ཉེ་བའི་སྲས་བརྒྱད་དང་། བྱང་ཆུབ་སེམས་དཔའི་དགེ་སློང་བྱེ་བ་འབུམ་སོགས་དང་། ཕྱོགས་བཅུའི་རྒྱལ་བ་སྲས་དང་བཅས་པས་བསྐོར་བ། ནམ་མཁའ་ལ་འཇའ་ཚོན་ལྟར་གསལ་བར་མོས་པ་ནི་རྟེན་གྱི་སྟོབས་དང་། ཚེ་རབས་ཐོག་མེད་ནས་སྡིག་པ་མི་དགེ་བའི་ལས་བྱས་ཤིང་བསགས་པ་རྣམས་ལ་འགྱོད་སེམས་བསྐྱེད་པ་སུན་འབྱིན་པའི་སྟོབས། ཕྱིན་ཆད་སྲོག་ལ་བབས་ཀྱང་མི་བགྱིད་སྙམ་དུ་དམ་བཅའ་བ་སོར་ཆུད་པའི་སྟོབས། སྐྱབས་སུ་འགྲོ་བ་སོགས་རྒྱུད་སྦྱངས་བའི་རིམ་པ་རྣམས་ལ་ནན་ཏན་ཏུ་བྱ་བ་ནི་གཉེན་པོ་ཀུན་སྤྱོད་ཀྱི་སྟོབས་ཏེ་སྟོབས་བཞི་ཚངས་བའི་སྒོ་ནས་ལྷ་དང་བླ་མ་དབྱེར་མེད་པར་མངོན་སུམ་དུ་བཞུགས་སྙམ་པས་དད་མོས་གདུང་ཤུགས་དྲག་པོས་ཚིག་རྗེས་སུ་དོན་དྲན་བཞིན་བདག་གི་རྗེས་སུ་འཇུག་པར་གྱིས་ཤིག སྐྱབས་འགྲོ་ནི། ན་མོ། དེང་ནས་བཟུང་སྟེ་བླ་མེད་བྱང་ཆུབ་བར། །བདག་སོགས་རིགས་དྲུག་འཁོར་བའི་སེམས་ཅན་རྣམས། །མགོན་པོ་འོད་དཔག་མེད་པའི་ལྷ་ཚོགས་ལ། །ལུས་ངག་ཡིད་གསུམ་གུས་པས་སྐྱབས་སུ་མཆི།། ལན་གསུམ། སེམས་བསྐྱེད་ནི། ཧོ། ཐོག་མཐའ་མེད་པ་རིགས་དྲུག་རྒྱུད་ལྔའི་འགྲོ། །འོད་དཔག་མེད་པའི་གོ་འཕང་ལ་འགོད་ཕྱིར། །སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་ནས། །ཟབ་ལམ་འཕོ་བའི་རྣལ་འབྱོར་བསྒོམ་པར་བྱ།། ལན་གསུམ། ཚོགས་བསགས་ནི། ན་མོ། བདག་ལུས་རབ་འབྱམས་རྒྱ་མཚོའི་རྡུལ་སྙེད་དུ། །སྤྲུལ་ནས་འཆི་མེད་མགོན་པོར་ཕྱག་འཚལ་ལོ། །དངོས་འབྱོར་ཡིད་སྤྲུལ་མཆོད་པ་དཔག་མེད་ཀུན། །བདེ་ཆེན་ཞིང་གི་ལྷ་ཚོགས་རྣམས་ལ་འབུལ། །ལུས་ངག་ཡིད་གསུམ་སྡིག་སྒྲིབ་ཉེས་ལྟུང་ཀུན། །གནོང་འགྱོད་དྲག་པོའི་སེམས་ཀྱིས་མཐོལ་ལོ་བཤགས། །བདེན་གཉིས་ཀྱིས་བསྡུས་དགེ་ཚོགས་ཇི་སྙེད་ལ། །སྙིང་ནས་དགའ་བས་རྗེས་སུ་ཡི་རང་ངོ་། །གདུལ་བྱའི་དབང་པོ་སྐལ་བར་འཚམས་པ་བཞིན། །ཆོས་འཁོར་རྒྱུན་ཆད་མེད་པར་བསྐོར་བར་བསྐུལ། །རྒྱལ་བ་སྲས་བཅས་མྱ་ངན་མི་འདའ་བར། །སྲིད་མཐའི་བར་དུ་བཞུགས་པར་གསོལ་བ་འདེབས། །འདིས་མཚོན་དུས་གསུམ་བསགས་པའི་དགེ་ཚོགས་ཀུན། །འགྲོ་རྣམས་བདེ་ཆེན་ཞིང་ཁམས་ཐོབ་ཕྱིར་བསྔོ།། རྒྱུན་བཤགས་ནི། ལྟུང་བ་བཤགས་པ་སོགས་བརྗོད། ཚད་མེད་བཞི་ནི། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་སོགས། གྱུར་ཅིག ལན་གསུམ། བྱང་སྡོམ་ནི། བྱང་ཆུབ་སྙིང་བོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། སོགས་ལན་གསུམ། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི།། ལན་གསུམ། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་བདག་གྱུར་ཏོ། །བདག་གིས་དེ་རིང་སྐྱོབས་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱི། །ལྷ་དང་ལྷ་མིན་ལ་སོགས་དགའ་བར་གྱིས། ཞེས་བརྗོད་དོ། དྲུག་པ་འདོད་ཡོན་བསྔོ་བ་ནི། དེ་ལྟར་རྒྱུད་སྦྱངས་ནས་ཤུལ་གྱི་ཟས་ནོར་ལོངས་སྤྱོད་སོགས་ལ་སྲེད་ལེན་གྱི་ཆགས་ཞེན་མ་སྤངས་ན་དེ་ཡང་ཐར་ལམ་གྱི་གེགས་སུ་འགྱུར་བས། དེ་བསལ་ནུས་པའི་མོས་འདུན་དྲག་པོས། དེ་ལྟར་རྒྱུད་དག་པར་བྱས་ནས་འཁོར་བར་འཁྱམས་པའི་རྩ་བ་ཆགས་ཞེན་ཡིན་པས་ཤུལ་དུ་ལུས་པའི་དངོས་རྫས་རྣམས་ལ་ཆགས་ཞེན་བྱས་ཀྱང་རང་གི་རྗེས་སུ་མི་འབྲངས། རང་དེ་རྣམས་དང་འགྲོགས་ཤིང་སྤྱོད་པའི་དུས་ལས་ཡོལ་བའི་ཚུལ། རྒྱལ་པོ་ལ་གདམས་པའི་མདོ་ལས། དུས་ཀྱིས་ཉེན་ཏེ་རྒྱལ་པོ་འགྲོ་འགྱུར་ན། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲངས། །ཞེས་དང་། ཞི་བ་ལྷའི་སྤྱོད་འཇུག་ལས། །འཆི་བ་ཐོག་ཏུ་བབས་པའི་ཚེ། །ཚེ་འདིའི་དཔལ་འབྱོར་སྙན་གྲགས་དང་། །སྟོབས་འབྱོར་གང་གིས་མི་ཕན་ཞིང་། །ཕྱི་མར་གནོད་པའི་རྒྱུ་བྱས་པས། །བྱས་པ་དོན་མེད་སྟོང་ལོག་དང་། །ཤི་ཁར་ཆགས་སེམས་སེམས་ཁྲལ་རྒྱུ། །ཞེས་གསུངས་པ་ལྟར། བྱམས་ཤིང་བརྩེ་བའི་ཕ་མ་དང་བུ་ཚ། རྣམ་ཐོས་སྲས་ལྟ་བུའི་ནོར་དང་ལོངས་སྤྱོད། འཁོར་ལོས་བསྒྱུར་རྒྱལ་ལྟ་བུའི་གཉེན་གྲོགས་དང་འཁོར་འབངས། ལྷ་བུ་གཞོན་ནུ་ལྟ་བུའི་གཟུགས་དང་ལང་ཚོ། གེ་སར་རྒྱལ་པོ་ལྟ་བུའི་དཔའ་རྩལ་དང་སྙན་གྲགས་སོགས་ཡོད་ན་ཡང་ཕན་པ་སྤུ་ཙམ་མེད་པས། ཤུལ་གྱི་གཉེན་འཁོར་ཡུལ་གཞི་ནོར་རྫས་སོགས་ལ་ཆགས་ཀྱང་། ཁྱོད་རང་འཁོར་བར་འཁྱམས་པའི་རྒྱུ་ལས་མེད་ངེས་པས་ཞེན་ཆགས་ཀྱི་འཁྲི་བ་རྦད་ཀྱིས་གཅོད་པའི་དུས་ལ་བབས་པ་ཡིན་ཏེ། སྔོན་འདས་པའི་དུས་ན་སངས་རྒྱས་མར་མེ་མཛད་ཞལ་བཞུགས་པའི་ཚེ། རྒྱལ་པོ་སྣང་བ་འོད་ལྡན་ཚེ་འཕོས་པ་ལ། རྒྱལ་བུ་འཁོར་ལོ་སྟོང་ལྡན་གྱིས་གདུང་ཞིང་བརྩེ་བའི་སེམས་ཀྱིས་ཟས་གཏད་པས་ཡུན་གྱི་སྲིད་དང་དགེ་བའི་ཕུལ་དུ་གྱུར་པ་དང་། དེ་རྗེས་ཐུབ་པའི་དབང་པོའི་བསྟན་པ་ལ་རྒྱལ་པོ་མ་སྐྱེས་དགྲ་ཚེ་ལས་འདས་པའི་དུས་སུ་དགྲ་བཅོམ་གནས་བསྟན་ཆེན་པོ་ཤཱ་རིས་བུས་ཟས་གཏད་པས་ཆགས་པའི་མདུད་པ་གྲོལ་བ་དང་། རྒྱལ་པོ་སྐར་མ་འོད་བཟང་དུས་ལས་འདས་པའི་ཚེ། དགེ་སློང་མ་པདྨའི་སྤྱན་གྱིས་བྱམས་ཤིང་བརྩེ་བས་ཟས་གཏད། འཇམ་པའི་གཏམ་བཤད་ཅིང་བདེན་པའི་ཆོས་བསྟན་པས་འཁོར་བའི་སྒོ་བཅད་པ་དེ་བཞིན་དུ། ཉེ་དུ་འབྲེལ་བ་ཐམས་ཅད་ཀྱིས། གདུང་བའི་མཆི་མ་ཕྱུངས། བརྩེ་བས་སྨྲེ་སྔགས་བཏོན། དཀོན་པའི་ཟས་བཙལ། མོས་གུས་ཀྱི་ཤུགས་ཕྱུང་ནས་བཟའ་བཏུང་གོས་ནོར་ལ་སོགས་མཁོ་དགུའི་ལོངས་སྤྱོད་ཕུན་སུམ་ཚོགས་ཤིང་ཟད་པ་མེད་པའི་གཏེར་ཆེན་པོ་ནམ་མཁའི་མཛོད་ལྟ་བུར་བྱིན་གྱིས་བརླབས་ནས་གཏད་ཅིང་བདེན་པའི་ཆོས་བཤད། ཐར་པའི་ལམ་བསྟན་པས། ཡུན་གྱི་ལོངས་སྤྱོད། དགེ་བའི་མཆོག་ཏུ་གྱུར་ནས། ཆགས་པའི་མདུད་པ་གྲོལ། འཁོར་བའི་སྒོ་བཅད་དེ་རིགས་དྲུག་གི་སྡུག་བསྔལ་དང་བྲལ་ནས་བདེ་བའི་མཆོག་དང་ལྡན་པར་གྱུར་ཅིག གཤིན་གྱི་བརྩེ་གདུང་གསོན་ལ་གནོད་པའི་འདྲེ་རུ་འགྱུར་བས་གཤིན་མིག་གསོན་ལ་མ་བལྟ་བར། འཁོར་བའི་གནས་འདིར་ཉེ་འབྲེལ་དང་ནོར་རྫས་སོགས་འདོད་པའི་ལོངས་སྤྱོད་ལ་ཆགས་ཞེན་བྱས་ན། ཁྱོད་འཁོར་བའི་འདམ་དུ་བྱིང་ནས་སྡུག་བསྔལ་བཟོད་བླག་མེད་པར་མྱོང་དགོས་པས་མ་ཆགས་མ་ཞེན་ཅིག །གནས་འདིར་འདུག་པའི་ལས་ཟད་ནས་བྲལ་ཟིན་པ་ཡིན་པས་འདི་རུ་མ་འདུག་པར་ཇི་ལྟར་བསྟན་པའི་ལམ་ལ་ཐེ་ཚོམ་མེད་པར་བཞུད་ཅིག ཁྱད་པར་དུ་འདྲེན་མཆོག་གང་གི་མཚན་ལན་གཅིག་ཙམ་ཐོས་པ་དང་། དད་པ་ལན་གཅིག་སྐྱེས་ཤིང་གསོལ་བ་བཏབ་པ་དང་། གཟུགས་སྐུའི་རྣམ་པ་ལན་གཅིག་དྲན་པ་དང་། ཞིང་དེར་སྐྱེ་བའི་འདུན་པས་སྨོན་ལམ་ལན་གཅིག་བཏབ་པ་ཙམ་གྱིས་བར་དོའི་འཇིགས་པ་དང་། ངན་སོང་གི་རྒྱུན་ཡོངས་སུ་གཅོད་པ་དང་། ཞིང་དེར་འདྲེན་པར་ཞལ་གྱིས་བཞེས་པ་བཅོམ་ལྡན་འདས་མགོན་པོ་འོད་དཔག་ཏུ་མེད་པ་ཞེས་བྱ་བ་བྱང་ཆུབ་སེམས་དཔའ་སྤྱན་རས་གཟིགས་དང་། མཐུ་ཆེན་ཐོབ་ཀྱིས་ཡོངས་སུ་བསྟེན་པ་དང་། དེའི་ཞིང་ཁམས་བདེ་བ་ཅན་ཞེས་བྱ་བ་དེ་ཡིད་ལ་མ་བརྗེད་པར་ཟུངས་ལ་ཁྱོད་གདོས་བཅས་ཤ་ཁྲག་གི་ལུས་ལས་འདས་པའི་ཕྱིར་ཞིང་མཆོག་དེ་རུ་འདུན་པ་གཏོད་ལ་ཐེ་ཚོམ་མེད་པར་ཏ་ལ་ལ་སོངས་ཤིག རིག་པ་ཡེངས་འཁྲུལ་སྤོངས་ལ་ཕྱིར་མི་ལྡོག་པ་བདེ་ཆེན་གཏན་གྱི་ཞིང་ཁམས་དམ་པ་དེ་ཡིད་ལ་ཟུངས་ཤིག ཅེས་བརྗོད་ལ། འདོད་ཡོན་སྤྱི་ལྟར་བསྔོས་རྗེས་སུ། སྤྲོ་ན། སྲིད་པ་བར་མ་དོར་ཉམ་ང་བའི་འཕྲང་ལ་སྐྱབས་དང་སྐྱོབ་པ་མེད་པ། མགོན་དང་དཔུང་གཉེན་མེད་པ། སྔོན་གྱི་བསགས་རྒྱབ་མེད་པ། དགེ་བའི་ར་མདའ་ཉུང་བ། མིང་བཞི་འདུས་པའི་ཕུང་པོ། ཚོར་བ་སྡུག་བསྔལ་གྱི་རང་བཞིན། འཇིགས་སྐྲག་འཁྲུལ་སྣང་གིས་མནར་བ། འཁྱགས་ལྟོགས་སྐོམ་གསུམ་གྱིས་གདུང་བ། ཚེ་ཚད་ལ་ངེས་པ་མེད་པ། བྱ་སྒྲོ་རླུང་གིས་བཏེགས་པ་བཞིན། གར་འགྲོའི་རང་དབང་དང་བྲལ་བའི་སེམས་ཅན་ཚེ་ལས་འདས་པའི་ཐོག་དྲངས་བར་དོར་འཁྱམས་པའི་འགྲོ་བ་རྣམས་ཀྱི། མིག་གི་ཡུལ་དུ་གཟུགས་མཛེས་པ། རྣ་བའི་ཡུལ་དུ་སྒྲ་སྙན་པ། སྣའི་ཡུལ་དུ་དྲི་ཞིམ་པ། ལྕེ་ཡི་ཡུལ་དུ་རོ་མངར་བ། ལུས་ཀྱི་ཡུལ་དུ་རེག་བྱ་འཇམ་པ། ཡིད་ཀྱི་ཡུལ་དུ་བདེ་སྐྱིད་ཕུན་སུམ་ཚོགས་པའི་སྣང་བ་མཆོག་དང་འབྲལ་བ་མེད་བཞིན། བཟའ་བ་རི་རབ། བཏུང་བ་རྒྱ་མཚོ། ན་བཟའ་ལྷོ་སྤྲིན་ཙམ་ལ་ཆགས་མེད་ཞེན་མེད་ཀྱི་ངང་ནས་ལོངས་སྤྱོད་པའི་སྐལ་བ་དང་ལྡན་བཞིན། འཕགས་པ་སྤྱན་རས་གཟིགས་དང་། བྱང་ཆུབ་སེམས་དཔའ་སྒྲིབ་པ་རྣམ་སེལ་མཐོང་ནས་བར་དོ་ལ་བར་དོ་ཡིན་པར་ངོ་ཤེས། འཁྲུལ་སྣང་ལ་རྒྱས་ཐེབས། བླ་མ་དང་དཀོན་མཆོག་ཡི་དམ་དང་ལྟ་བ་རྗེས་སུ་དྲན་ཏེ། ལས་ངན་པའི་སྒྲིབ་པ་སྐད་ཅིག་ལ་དག་ནས་རིག་པ་ལ་རང་དབང་ཐོབ། བདེ་བ་ཅན་དང་པདྨ་འོད་ལ་སོགས་པའི་ཞིང་ཁམས་ཁྱད་པར་ཅན་བཙན་ཐབས་སུ་བགྲོད་ནུས་པར་ཤོག་ཅིག །ཐམས་ཅད་ནམ་མཁའ༴སོགས་དང་། གང་དུ་ལུས་བླངས་སྐྱེ་གནས་ཐམས་ཅད་ལ། །རྟག་ཏུ་དཀོན་མཆོག་གསུམ་པོ་མཆོད་པ་དང་། །རྣམ་དག་ཐེག་ཆེན་ལམ་ལ་བློ་སྦྱངས་ནས། །རྒྱལ་བ་འོད་དཔག་མེད་པའི་ཞལ་མཐོང་ཤོག །ཅེས་བརྗོད་ཅིང་། དེའི་རྗེས་སུ་བདེ་སྡུག་གཏོང་ལེན་གྱི་དམིགས་པའང་བྱས་ན་ལེགས་པས། འགྲོ་བའི་སྡུག་བསྔལ་གང་ཅིའང་རུང་། །དེ་ཀུན་བདག་ལ་སྨིན་གྱུར་ཅིག །བྱང་ཆུབ་སེམས་དཔའི་དགེ་བ་ཡིས། །འགྲོ་ཀུན་བདེ་ལ་སྤྱོད་པར་ཤོག །ཅེས་དང་། མཉམ་བཞག་གི་ངང་ནས་རླུང་ནང་དུ་ལྡོག་པ་དང་ཆབ་གཅིག་ཏུ། ཚེ་འདས་ཀྱི་སྡིག་སྒྲིབ་ཉེས་ལྟུང་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་བསྡུ་བ་བཞིན་དུ་རང་གི་སྒོ་གསུམ་ལ་ཐིམ་པས་སྒོ་གསུམ་གྱི་ཉེས་ཚོགས་ཤེལ་གོང་ཕྱིས་པ་ལྟར་དག་པར་བསམ། རླུང་ཕྱིར་འཕོས་པའི་ཚེ། བདག་གི་དུས་གསུམ་གྱི་དགེ་ཚོགས་བདེ་སྐྱིད་གང་ཡོད་རྣམས་དམིགས་ཡུལ་ལ་ཐིམ་པས་བདེ་བ་དང་ལྡན། སྡུག་བསྔལ་དང་བྲལ་བར་བསམ་མོ།། སྤྱི་དོན་གཉིས་པ་འཕོ་བ་དངོས་ལ། མཚན་བརྗོད་པ། ལོ་རྒྱུས་བཤད་པ། འཕོ་བའི་དམིགས་རིམ། འཇག་ཟུག་མའི་འཕོ་ལུང་དངོས། །སྤར་ཆོག་གཞན་མའི་སྐོར། ཕྱིར་མི་ལྡོག་པའི་རྒྱས་གདབ་པ་སྟེ་ས་བཅད་རྣམ་པ་དྲུག་གི། དང་པོ་རྒྱལ་བ་སྲས་བཅས་ཀྱི་མཚན་བརྗོད་ནས་རམ་ཟླར་སྦྲན་པ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གདོད་མའི་མགོན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལོངས་སྐུ་རྣམ་པར་སྣང་མཛད་རིགས་ལྔའི་སངས་རྒྱས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་འཕགས་དྲན་པ་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱི་ཕུད་སྟོང་གི་འཇིག་རྟེན་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚངས་པ་སྟོང་གི་ཡེ་སྲིད་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མ་སྟོང་གི་རྒྱལ་བ་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲྭ་བ་མགོན་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་སྟོང་གི་མུ་ཁྱུད་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲུག་པ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཁྱེའུ་སྣང་བ་བསམ་གྱིས་མི་ཁྱབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཁྱེའུ་སྣང་བ་འོད་མི་འཁྲུགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་འཇམ་དཔལ་འཇིགས་སྐྱོབས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གཞོན་ནུ་རོལ་བ་རྣམ་པར་བརྩེ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གཞོན་ནུ་དཔའ་བོ་སྟོབས་དང་ལྡན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་དྲང་སྲོང་ཁྲོས་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་བརྩེ་བས་རོལ་པའི་བློ་གྲོས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གསེར་འོད་དམ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་འོད་སྲུང་བགྲེས་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་མངོན་རྫོགས་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུརྱའི་འོད་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པ་མངོན་པར་མཁྱེན་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་རྒྱལ་བའི་མཛོད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འོད་ཀྱི་རྒྱལ་པོ་མེ་འོད་རབ་ཏུ་གསལ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་ཀྱི་རྒྱལ་པོ་སྣང་བ་འོད་ཅན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་མེ་ཏོག་ལ་དབང་བ་སྟོབས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་དཔའ་བརྟན་ཞི་ཞིང་དུལ་བ་ཕ་རོལ་གྱི་སྟོབས་རབ་ཏུ་འཇོམས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་ཟླ་འོད་སྐྱབས་གནས་དམ་པ་དགྲ་ལས་རྣམ་པར་རྒྱལ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟི་བརྗིད་ངེས་པར་གནོན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་དཀྱིལ་འཁོར་རྣམ་པར་དག་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཐམས་ཅད་ཀྱི་ཚུལ་ལས་རྣམ་པར་འཕྲུལ་བ་ངེས་པ་གཟི་བརྗིད་འབྱུང་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་མི་འཁྲུགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འོད་སེང་གེ་རྣམ་པར་རོལ་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་ཀུན་ནས་འཕགས་པ་དཔལ་བརྩེགས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་ཤིན་ཏུ་བརྟན་པ་ནོར་བུ་བརྩེགས་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་རྣམ་སེལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་མགོན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ སྔ་རབས་འདས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ད་ལྟར་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཕྱི་རབས་འབྱོན་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །སངས་རྒྱས་དང་བྱང་ཆུབ་སེམས་དཔའ་གང་གའི་ཀླུང་གི་བྱེ་མ་སྙེད་ཀྱི་གྲངས་དང་ངེས་པར་མཉམ་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ ཁྱེད་རྣམས་ལ་ཐུགས་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབས་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། བདག་སོགས་ནམ་མཁའི་མཐའ་དང་མཉམ་པའི་སེམས་ཅན་དང་། ཁྱད་པར་དམིགས་ཡུལ་ཚེ་ལས་འདས་པ་འདི་ཉིད་ཀྱི་མདུན་ནས་བསུ་མ་མཛད་དུ་གསོལ། རྒྱབ་ནས་སྐྱེལ་མ་མཛད་དུ་གསོལ། འཇིགས་པའི་མུན་ནག་ཆེན་པོ་ལ་ཡེ་ཤེས་ཀྱི་སྒྲོན་མེ་སྦར་བར་མཛད་དུ་གསོལ། ལས་ཀྱི་རླུང་དམར་དྲག་པོ་ཐུགས་རྗེའི་ཤུགས་ཀྱིས་བཟློག་པར་མཛད་དུ་གསོལ། གཡང་ས་ཆེན་པོ་བདེ་བའི་ལམ་ལ་བསྒྱུར་བར་མཛད་དུ་གསོལ། གཤིན་རྗེ་དང་བར་དོའི་འགྲོ་བ་ཐམས་ཅད་སེམས་དཔའ་དང་སེམས་མའི་གྲོགས་སུ་བསྒྱུར་བར་མཛད་དུ་གསོལ། སྒྲ་འོད་ཟེར་གསུམ་གྱི་འཇིགས་སྐྲག་ཐམས་ཅད་རང་བྱུང་རིག་པའི་རང་རྩལ་དུ་ངོ་སྤྲོད་པར་མཛད་དུ་གསོལ། རིགས་བརྒྱ་ཞི་ཁྲོའི་ལྷ་ཚོགས་ཐམས་ཅད་སྐྱོབས་པའི་ལྷ་དང་ལྷ་མོར་སྟོན་པར་མཛད་དུ་གསོལ། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ཐར་བར་མཛད་དུ་གསོལ། རིགས་དྲུག་གི་སྐྱེ་སྒོ་ངན་པ་ཆོད་པར་མཛད་དུ་གསོལ། སྐུ་གསུམ་དག་པའི་ཞིང་ཁམས་རྣམས་སུ་འདྲེན་པར་མཛད་དུ་གསོལ། གཉིས་པ་ཟབ་ལམ་འཕོ་བའི་གདམས་པ་བྱུང་ཚུལ་གྱི་ལོ་རྒྱུས་ནི། འོ་ད་ནི་ཚེ་ལས་འདས་པ་ཁྱོད་ལ་བདག་གིས་མ་བསྒོམ་སངས་རྒྱས་ཆོས་དྲུག་གི་ནང་ཚན། སངས་རྒྱས་ལག་འཆང་གི་གདམས་པ་ལེ་ལོ་ཅན་འཆི་ཁར་གྲོལ་ཞིང་སྡིག་པོ་ཆེ་བཙན་ཐབས་སུ་འཚང་རྒྱ་བའི་མན་ངག ཟབ་ལམ་འཕོ་བའི་ཆོས་སྒོ་ཕྱེས་ནས། ཁྱོད་དག་པ་མཁའ་སྤྱོད་ཀྱི་ཞིང་ཁམས་སུ་གནས་སྤར་བའི་དུས་ལ་བབས་པ་ཡིན་པས་དགའ་བ་དང་སྤྲོ་བའི་སེམས་བསྐྱེད་ལ་མ་ཡེངས་བར་ལེགས་པར་ཉོན་ལ་ཡིད་ལ་ཟུངས་ཤིག དེ་ཡང་ཇི་སྐད་དུ། རྒྱུད་ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཞེས་གསུངས་པ་ལྟར། བརྒྱུད་པ་ཁུངས་བཙུན་ཞིང་གདམས་ངག་ལ་ངེས་ཤེས་བསྐྱེད་ཕྱིར་ལོ་རྒྱུས་མདོ་ཙམ་བརྗོད་པར་བྱ་སྟེ། དེ་ལ་ཡང་མདོ་ལམ་གྱིས་གྲངས་མེད་གསུམ་དུ་དམ་བཅའ་བ། སྔགས་ཀྱིས་ཚེ་གཅིག་ལུས་གཅིག་ལ་གྲོལ་བ་ཐོབ་པར་གསུངས་ཤིང་། སྔགས་ཀྱི་ཚེ་གཅིག་གི་དམ་བཅའ་ལ་ཡང་བཏགས་གྲོལ་འཁོར་ལོ། མཐོང་གྲོལ་ཙཀྲ། རེག་གྲོལ་མུ་ཏྲ། མྱོང་གྲོལ་དམ་རྫས་སོགས་མང་དུ་ཡོད་ལ། སོ་སོར་འཕགས་ཆོས་རྨད་དུ་བྱུང་བ་སྣང་ཞིང་བཅོམ་ལྡན་འདས་ཀུན་རིག་རྣམ་པར་སྣང་མཛད་དང་། དེ་བཞིན་གཤེགས་པ་མི་འཁྲུགས་པ་དང་། སངས་རྒྱས་སྨན་གྱི་བླ་སོགས་ཀྱི་མཚན་ལན་རེ་ཐོས་པས་ཀྱང་། ངན་སོང་གི་སྡུག་བསྔལ་སེལ་བ་དང་། རིན་ཆེན་གཙུག་ཏོར་ཅན་གྱི་མཚན་འཆི་ཁ་མའི་རྣ་ལམ་དུ་བསྒྲགས་ན་སུམ་ཅུ་རྩ་གསུམ་གྱི་ལྷར་སྐྱེ་བ་དང་། སོར་འབྲང་འཁོར་ལོས་བར་དོའི་འཇིགས་པ་དང་སྡུག་བསྔལ་སེལ་བ་སོགས་སྔགས་གསར་རྙིང་གཉིས་ཀ་ན་མང་དུ་ཡོད་མོད་ཀྱང་། དེ་རྣམས་ཀུན་ལས་ཁྱད་པར་དུ་འཕགས་པ་ནི། ཟབ་ལམ་འཕོ་བའི་གདམས་པ་ཡིན་ཞིང་ཁྱད་པར་འཆི་བའི་དུས་ལ་བབས་པའམ། འཆི་འཕོས་པའི་འགྲོ་བ་རྣམས་ལ་ལམ་ཟབ་མོ་འདི་ཉིད་ལས་ཁྱད་པར་དུ་འཕགས་པའམ། འདི་དང་མཚུངས་པ་་གཞན་མ་མཆིས་ཏེ། དེ་ཡང་མཁའ་འགྲོ་མ་ཀུན་ཏུ་རྟོགས་པའི་རྒྱུད་ལས། རྣམ་ཤེས་རླུང་ལ་ཞོན་པ་ནི། །སྟེང་གི་ལམ་ལ་འཕོས་གྱུར་ན། །སྡིག་ལ་གོམས་པའི་གང་ཟག་ཀྱང་། །མཐོ་རིས་དག་ཏུ་སྐྱེ་བ་མང་། །ཞེས་དང་། གདན་བཞིའི་རྒྱུད་ལས། བུ་ག་དགུ་ཡི་སྟེང་ཕྱོགས་སུ། །འཕྲལ་དུ་ཡིད་ཀྱིས་འཕོ་བྱེད་པ། །ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་པོ་བྱེད་པ་དང་། །ཆོམ་རྐུན་ལས་ཀྱིས་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ཏེ། །སྡིག་གིས་ཀུན་ནས་མི་གོས་ཤིང་། །འཁོར་བའི་ཕ་རོལ་མཆོག་ཏུ་འགྲོ། །ཞེས་གསུངས་པ་ལྟར། སྟེང་སྒོ་བདེ་བ་ཆེན་པོའི་ལམ་ནས་རྣམ་པར་གྲོལ་ཞིང་ཐར་བ་ཐོབ་པ་ནི། ཟབ་ཆོས་འདི་ཁོ་ན་ལ་རག་ལས་པ་ཡིན་ཞིང་། དེ་ལྟ་བུའི་ཆོས་ཚུལ་ཟབ་མོ་འཕོ་བའི་གདམས་པ་དེ་ཡང་། གསང་སྔགས་གསར་རྙིང་བཀའ་གཏེར་དག་སྣང་ཅི་རིགས་པར་ཟབ་ཅིང་རྒྱ་ཆེ་ལ་ཡ་མཚན་རྨད་དུ་བྱུང་བ་མཐའ་ཡས་པ་ཞིག་བཞུགས་པ་ལས། ད་ལམ་སྐབས་སུ་བབས་པ་ཟབ་ལམ་འཕོ་བའི་མན་ངག་འཇག་ཟུག་མར་གྲགས་པ་འདི་ཉིད་ཇི་ལྟར་བྱུང་བའི་ལོ་རྒྱུས་ནི། སྔོན་ཆོས་རྒྱལ་ཁྲི་སྲོང་ལྡེའུ་བཙན་གྱིས། སྟོན་པ་ཤཱཀྱ་ཐུབ་པའི་ཞལ་སྐྱིན་ཨོ་རྒྱན་གྱི་སློབ་དཔོན་པདྨ་འབྱུང་གནས་སྤྱན་དྲངས་ནས་བསམ་ཡས་མཆིམས་ཕུ་ན་བཞུགས་པའི་སྐབས་ཤིག་ཏུ། བློན་པོ་ཉི་མ་ཞེས་བྱ་བ་འཇིག་རྟེན་ལུགས་ཀྱི་བྱ་བ་ལ་ཤིན་ཏུ་མཁས་པ་ཞིག་ཡོད་པ་དེ་ཉིད་ཀྱིས། རང་གི་གནས་ཁང་ནས་ཡོ་བྱད་འཇུག་ལེན་གྱི་ཕྱིར་དུ་མཚན་མོ་མེ་སྒྲོན་ཐོགས་ཏེ་ཁྱིམ་ཕུག་ཉུལ་བས་མེ་ཤོར་ནས། མཆོད་གནས་གཅིག་དང་ཕ་མའི་གཙོས་བྲན་འཁོར་སུམ་ཅུའི་སྐོར། རྐང་འགྲོས་དང་ནོར་རྫས་གང་ཡོད་རྣམས་ལྷག་མེད་དུ་ཚིག་པར་གྱུར་བས། བློན་པོ་བཟོད་བརླག་མེད་པའི་སྡུག་བསྔལ་གྱིས་ནོན་ཚེ། རྒྱལ་པོས་སློབ་དཔོན་རིན་པོ་ཆེ་ལ་དེ་ཚུལ་གྱི་ལོ་རྒྱུས་རྣམས་ཞིབ་ཏུ་གསོལ་ཞིང་བློན་པོ་ཉི་མ་སྡུག་བསྔལ་ལས་གྲོལ་བར་གསོལ་བ་བཏབ་པས། གུ་རུ་རིན་པོ་ཆེ་རྫུ་འཕྲུལ་གྱིས་སྐྱེས་བུའི་ལག་པ་བརྐྱང་བསྐུམ་ཙམ་ལ་བཅོམ་ལྡན་འདས་མགོན་པོ་འོད་དཔག་མེད་པའི་དྲུང་དུ་ཕྱིན་ནས། རྡོ་རྗེ་ཕག་མོས་བརྡ་སྤྲོད་བྱས་ཏེ། བློན་པོ་ཉི་མའི་ལོ་རྒྱུས་རྣམས་ཞུས་ནས་ཟབ་ལམ་འཕོ་བའི་གདམས་པ་འདི་ཉིད་གནང་ཞིང་། འོད་དཔག་མེད་ཀྱི་ཞལ་ནས། འཕོ་བའི་གདམས་པ་འདི་ལྟ་བུ་དུས་གསུམ་གྱི་སངས་རྒྱས་རྣམས་ཀྱིས་མ་གསུངས། མི་གསུང་། གསུང་བར་མི་འགྱུར་བས། ད་ལྟ་ཆོས་འདི་སྤེལ་བའི་དུས་མིན་ཅིང་མ་འོངས་སྙིགས་དུས་སུ་གཏེར་སྟོན་ཉི་ཟླ་སངས་རྒྱས་བྱ་བ་འབྱུང་བས་གཏེར་དུ་སྦོས་ཤིག ཅེས་བཀའ་རྒྱས་བཏབ་ཏེ་གནང་བ་བཞིན། བློན་པོས་གསེར་དངུལ་གྱི་ཉི་ཟླ་གཉིས་མཎྚལ་དུ་ཕུལ་ནས་སློབ་དཔོན་གྱིས་བློན་པོ་གཅིག་པུ་ལ་གནང་ཞིང་ཉམས་སུ་བླངས་བས། ཞག་གསུམ་ནས་སྡུག་བསྔལ་སངས། ཞག་ལྔ་ནས་ཚེ་འདས་རྣམས་སངས་རྒྱས་ཐོབ་པའི་རྟགས་ཁྱད་པར་ཅན་བྱུང་བར་གྱུར་ཏོ། །དེ་ནས་གདམས་པ་ཟབ་མོ་དེ་ཉིད་སློབ་དཔོན་གྱི་ཕྱག་གཡོན་པའི་སྲིན་ལག་ལས་ཕྱུང་བའི་སྐུ་མཚལ་གྱིས་ཏ་ལའི་ལོ་མར་བྲིས་ནས། གསང་འཛིན་ཡེ་ཤེས་མཚོ་རྒྱལ་གྱི་དབུ་སྐྲས་བཅིངས་ཏེ། གསེར་སོགས་རིན་པོ་སྣ་ལྔའི་སྒྲོམ་ཕྱི་ནང་གི་ཚུལ་དུ་བྱས་པར་ཆུ་དར་སྔོན་པོས་དྲིལ་ཏེ་བཅུག་ནས། དྭགས་ལྷ་སྒམ་པོ་གདར་རིའི་རྒྱབ། མཚོ་ནག་པོ་མཎྚལ་འདྲ་བའི་དབུས་སུ་གཏེར་དུ་སྦས་ཤིང་། ཀླུ་རྒྱལ་གཙུག་ན་རིན་ཆེན་གཏེར་གྱི་སྲུང་མར་བསྐོས། ཕྱིས་སུ་གཏེར་འདོན་པའི་དུས་ལ་བབས་ཚེ་སྔོན་གསེར་དངུལ་གྱི་ཉི་ཟླ་མཎྚལ་དུ་ཕུལ་བའི་རྟེན་འབྲེལ་གྱིས་བློན་པོ་ཉིད་གཏེར་སྟོན་ཉི་ཟླ་སངས་རྒྱས་ཞེས་བྱ་བར་སྐྱེ་བ་བཞེས་ནས་ཟབ་ཆོས་འདི་ཉིད་གདན་དྲངས་ཤིང་། ཐོག་མར་གདམས་པ་འདི་ཀླུ་རྒྱལ་འཁོར་བཅས་ལ་གནང་ནས་ཀླུ་རྣམས་ཀྱིས་སེམས་ཅན་ལ་གནོད་འཚེ་མི་བྱེད་པར་ཁས་བླངས་ཤིང་། མཚོ་དེར་གནས་པའི་སྲོག་ཆགས་ཐམས་ཅད་གྲོལ་ནས། ལུས་སེམས་བྲལ་མ་ཐག་ཏུ་སངས་རྒྱས་སོ། །དེ་ནས་དར་ཞིང་རྒྱས་པར་སྤེལ་བས་བོད་གངས་ཅན་སོགས་ཀྱི་མཆོག་དམན་བར་མའི་འགྲོ་བ་རྣམས་རང་སྐལ་དང་འཚམས་པའི་ཐར་ལམ་ལ་བཀོད་པ་མཐའ་ཡས་ཤིང་བསམ་གྱིས་མི་ཁྱབ་པ་ལ། དེ་ནས་བཟུང་སྟེ་ད་ལྟའི་བདག་ཅག་གི་རྩ་བའི་བླ་མའི་བར་དུ་རིམ་པར་བརྒྱུད་པའི་བླ་མ་དམ་པ་རྣམས་ཀྱིས་གཞན་དོན་གྱི་ཕྲིན་ལས་རླབ་པོ་ཆེ་མཛད་པའི་གཙོ་བོར་ཟབ་ཆོས་འདི་ཉིད་ཁོ་ན་ཐུགས་ཉམས་སུ་བཞེས་ཤིང་ཕྱག་ལེན་དུ་མཛད་པ་ཡིན་ནོ།། གསུམ་པ་འཕོ་བའི་དམིགས་རིམ་གསལ་གདབ་པ་ནི། ད་ནི་ཁྱོད་ལ་མྱུར་ལམ་འཕོ་བའི་གདམས་པ་ཟབ་མོ་དེ་ཉིད་འདེབས་པའི་སྐབས་སུ་བབས་པ་ཡིན་པས། དེ་ཡང་མ་དག་པའི་ལུས་རྟེན་ཐ་མལ་བ་ལྟར་དུ་འཕོས་ན་མི་རུང་བས། དག་པ་ལྷའི་རྣལ་འབྱོར་གསལ་འདེབས་པའི་ཕྱིར་དུ་ཡིད་གཞན་དུ་མ་ཡེངས་བར་དམིགས་པ་འདི་བཞིན་དུ་མཛོད་ཅིག ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅ཧཾ།གིས་སྦྱངས། སྟོང་པའི་ངང་ལས་དག་ཆེན་ཡེ་ཤེས་ཀྱི་རང་སྣང་ལས་གྲུབ་པའི་གཞལ་ཡས་ཁང་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པདྨ་དང་ཉི་མའི་སྟེང་དུ་བམ་རོ་སེར་པོ་གན་རྐྱལ་གྱི་ཁྲི་ལ། ཁྱེད་རང་གི་ལུས་རྟེན་དེ་ཉིད་སྐད་ཅིག་གིས་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་དམར་གསལ་བྱི་རུའི་སྡོང་པོ་ལ་ཏིལ་མར་གྱིས་བྱུག་པ་ལྟ་བུ། ཞལ་གཅིག་ཁྲོ་འཛུམ་ཆགས་པའི་ཉམས་ཅན། སྤྱན་གསུམ་དང་ལྡན་ཞིང་མཆེ་བའི་མྱུ་གུ་བཞི་ཅུང་ཟད་ངོམ་པ། རྣ་ལྟག་གཡས་སུ་ཕག་ཞལ་ནག་པོས་ངུར་སྒྲ་སྒྲོགས་པ། དབུ་སྐྲ་ཐོར་ཅོག་བྱས་ཤིང་ལྷག་མས་སྐུ་རྒྱབ་ཁེབ་པ། ཕྱག་གཡས་རྡོ་རྗེས་མཚན་པའི་གྲི་གུག་ཐུར་དུ་འཛིན་པ། གཡོན་ཐོད་ཁྲག་ཐུགས་ཀར་བསྣམས་ཤིང་ཡབ་ཧེ་རུ་ཀའི་ངོ་བོ་ཁ་ཊཱྃ་མཆན་ཁུང་གཡོན་ན་བསྒྲེང་ཚུལ་གྱིས་འཛིན་པ། ཞབས་གཡས་བསྐུམ་པའི་རྟིང་པ་གསང་བར་གཏད་ཅིང་གཡོན་བརྐྱང་བས་བམ་རོའི་སྙིང་གར་བརྫིས་པ། གཅེར་བུ་གཞོན་ཚུལ་ལང་ཚོ་དར་ལ་བབ་ཅིང་ནུ་འབུར་རྒྱས་པ། ཐོད་སྐམ་ལྔའི་དབུ་རྒྱན་དང་། ཐོད་རློན་ལྔ་བཅུའི་དོ་ཤལ། སྤྱི་བོར་འཁོར་ལོ། སྙན་ཆ། ཕྱག་ཞབས་ཀྱི་གདུ་བུ། མགུལ་རྒྱན། སྐ་རག་སྟེ་རུས་པའི་ཕྱག་རྒྱ་ལྔས་བརྒྱན་པ། མི་རོའི་སྐྲ་ལས་བྱས་པའི་ཚངས་སྐུད་ཕྲག་གོང་གཡོན་ནས་མཆན་ཁུང་གཡས་སུ་འཁྱུད་པ། བདེ་སྟོང་ཡེ་ཤེས་ཀྱི་ཉམས་རྒྱས་པའི་སྐུ་སྣང་ལ་རང་བཞིན་མེད་པ་ཆུ་ཟླ་ལྟ་བུ། དྭངས་གསལ་འོད་ཀྱི་རང་བཞིན་ཅན་ཐོགས་པ་དང་རེག་པའི་སྐྱོན་དང་བྲལ་བ་ཞིག་གསལ་ཐོབ་ལ། དེ་ནས་མ་དག་འཁོར་བའི་སྒོ་རྣམས་བཀག་དགོས་པར་སྔགས་གསར་རྙིང་ཀུན་ནས་གསུངས་ཏེ། རྡོ་རྗེ་གདན་བཞིའི་རྒྱུད་ལས། སྒོ་རྣམས་ཀྱིས་ནི་བྱེ་བྲག་ལས། །འཁོར་བའི་བྱེ་བྲག་འབྱུང་བ་ཡིན། །དེ་ཕྱིར་སྒོ་ཡི་བྱེ་བྲག་ལས། །བསྒྲུབ་པའི་ལམ་ནི་བཟང་པོ་ཡིན། །ཞེས་གསུངས་པ་ལྟར། མ་དག་པ་འཁོར་བའི་སྒོ་དགུ་པོ་ལས་རྣམ་ཤེས་སོང་ན། བཤང་ལམ་ནས་དམྱལ་བ། ཆུ་ལམ་ནས་དུད་འགྲོ། ཁ་ནས་ཡི་དྭགས། སྣ་ནས་ལྷ་མིན་དང་གནོད་སྦྱིན། མིག་ནས་མི་མཆོག་དམན། རྣ་བ་ནས་གྲུབ་པའི་ལྷ་དང་མིའམ་ཅི། ལྟེ་བ་ནས་འདོད་ཁམས། དཔྲལ་བ་ནས་གཟུགས་ཁམས། མཚོག་མ་ནས་གཟུགས་མེད་ཁམས་ཀྱི་ལྷ་རྣམས་སུ་འགྲོ་བས། དེ་དག་བཀག་དགོས་པར་ཡང་ཨོ་རྒྱན་སངས་རྒྱས་གཉིས་པའི་ཞལ་ནས། སྒོ་དགུ་བཀག་ནས་སྒོ་གཅིག་དབྱེ། །རྣམ་པར་ཤེས་པ་དེར་འཕོས་ན། །འགྲོ་དྲུག་གནས་ནས་རྒྱང་གིས་འཕགས། །མཆོག་གི་དངོས་གྲུབ་ཐོབ་པར་འགྱུར། ཞེས་གསུངས་པའི་ཕྱིར། ཚངས་བུག་མ་གཏོགས་པའི་སྒོ་དགུ་པོ་བུག་པ་འདག་ཞལ་བྱས་པ་ལྟར་ཧྲཱིཿཡིག་དམར་པོ་འོད་འབར་བ་དགུས་བཀག་པར་གྱུར་བར་བསམ་ལ། ཧྲཱིཿདགུ་བརྗོད། ད་ཁྱོད་རང་གི་ལུས་དབུས་དྲང་པོར་རྩ་གཞན་མི་དམིགས་པར་ཁང་སྟོང་ཀ་བ་གཅིག་པའི་ཚུལ་གྱིས་བྱང་ཆུབ་མཁའ་སྤྱོད་ཀྱི་ལམ། རྩ་དབུ་མ་ཕྱི་དཀར་ལ་ནང་དམར་ཞིང་སྔོ་བ། ཆུ་ཤིང་གི་སྡོང་པོ་ལྟར་དྲང་བ། ཏིལ་གྱི་མར་མེ་ལྟར་གསལ་ཞིང་རྒྱ་སྐྱེགས་ཀྱིས་བཙོས་པ་ལྟར་དམར་ལ་དྭངས་པ། པདྨའི་འདབ་མ་ལྟར་སྲབ་པ་སྟེ་མཚན་ཉིད་བཞི་དང་ལྡན་པ། སྦ་ལྕགས་འབྲིང་པོའི་ཚད་ཙམ་གྱི་ཡར་སྣེ་སྤྱི་གཙུག་ཚངས་པའི་བུ་གར་རྒྱ་མཐོངས་ལྟར་ཧར་རེ་གསལ་བ། མར་སྣེ་ལྟེ་འོག་སོར་བཞིའི་ཐད་དུ་ཁ་ཟུམ་ཞིང་ཕུགས་རྡུགས་སུ་འགགས་པ། སྙིང་གའི་ཐད་དུ་སྨྱུག་མ་ཚིགས་ཀྱིས་བཅད་པ་ལྟ་བུའི་ནང་དུ་པདྨ་དམར་པོ་འདབ་མ་བརྒྱད་པ་ཟེའུ་འབྲུ་དང་བཅས་པའི་དབུས་སུ། ཁྱོད་རང་གི་རླུང་སེམས་འདུས་པའི་ངོ་བོ་རྣམ་ཤེས་མི་འགྱུར་བའི་ཐིག་ལེ་སྲན་ཟླུམ་ཙམ། དཀར་ལ་དམར་བའི་མདངས་དང་ལྡན་པ། བྱ་མ་གསར་གྱི་སྒོ་ང་ལྟར་འོད་ཟེར་ཁ་ཏོག་ལྔ་དང་ལྡན་པ། གསལ་ལ་འཚེར་ཞིང་སྣུམ་ལ་འདྲིལ་བ་ཞིག་ཚངས་བུག་གི་ལམ་ནས་འཕུར་ལ་ཁད་ཀྱི་འདར་ཕྲིལ་གྱིས་གནས་པར་མོས་ལ། དེ་ཡང་ཕ་དམ་པས། །འཆི་བ་འཆི་བ་མ་ཡིན་ཏེ། །རྣལ་འབྱོར་སངས་ཆུང་རྒྱ་བ་ཡིན། །ཞེས་གསུངས་པ་ལྟར། ཁྱོད་རང་གི་རྣམ་ཤེས་འོད་དཔག་མེད་ཀྱི་ཐུགས་ཀར་གནས་སྤར་དགོས་པ་ལ། བདེ་ལྡན་ཞིང་བཀོད་ཀྱི་མདོ་ལས། སངས་རྒྱས་ཀྱི་ཞིང་དེར་སེམས་ཡང་དག་པར་གཏོད་པ་དེ་དག་འཆི་བའི་དུས་ཉེ་བར་གནས་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་དེའི་ཁ་དོག་དང་། དབྱིབས་དང་། ཆུ་ཞེང་དང་། ཞབས་འབྲིང་བ་དགེ་སློང་གི་དགེ་འདུན་ཅི་འདྲ་བ་དེ་འདྲ་བའི་སངས་རྒྱས་ཀྱི་སྤྲུལ་པ་དག་མདུན་དུ་གནས་པར་འགྱུར་ཏེ། དེ་དག་དེ་བཞིན་གཤེགས་པ་མཐོང་བས་རབ་ཏུ་དད་ཅིང་དམིགས་པའི་ཏིང་ངེ་འཛིན་དེ་དང་། བརྗེད་པ་མེད་པའི་དྲན་པས་ཤི་འཕོས་ནས་སངས་རྒྱས་ཀྱི་ཞིང་དེ་ཉིད་དུ་སྐྱེ་བར་འགྱུར་རོ། །ཞེས་དང་། སེམས་ཅན་གང་དག་ང་ཡི་མིང་ཐོས་པའི། །འཇིག་རྟེན་ཁམས་མང་དག་གི་སེམས་ཅན་རྣམས། །དེ་དག་ང་ཡི་ཞིང་དུ་ལྷགས་ནས་ནི། །སྐྱེ་བ་གཅིག་ལས་ཕྱིར་མི་ལྡོག་པར་འགྱུར། །ཞེས་སོགས་གསུངས་པས། ཁྱོད་རང་གི་ཚངས་བུག་གི་སྟེང་ཐད་ཀྱི་གྲུ་གང་ཙམ་འཕགས་པའི་ནམ་མཁར། རྨ་བྱ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲིའི་སྟེང་དུ། པདྨ་དམར་པོ་འདབ་མ་སྟོང་དང་ལྡན་པའི་ལྟེ་བར་ཟླ་བའི་གདན་ལ། ངོ་བོ་དུས་གསུམ་སངས་རྒྱས་ཐམས་ཅད་འདུས་པའི་བདག་ཉིད། མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་ཡིན་པ་ལ། རྣམ་པ་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྐུ་མདོག་དམར་པོ་པདྨ་རཱ་གའི་ལྷུན་པོ་ལ་ཉི་གཞོན་བྱེ་བ་འབུམ་གྱིས་འཁྱུད་པ་ལྟ་བུ། འོད་དང་འོད་ཟེར་མུ་མཐའ་མེད་པར་འཕྲོ་བ། མཆོག་གི་སྤྲུལ་སྐུ་ཚངས་པར་སྤྱོད་པའི་ཆ་ལུགས་ཅན། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ཡོངས་སུ་རྫོགས་པས་མཛེས་པ། ན་བཟའ་ཆོས་གོས་རྣམ་གསུམ་གསོལ་ཞིང་། ཕྱག་གཉིས་མཉམ་བཞག་གི་ཕྱག་རྒྱས་ལྷུང་བཟེད་བདུད་རྩིས་བཀང་བ་བསྣམས་པ། སྲིད་ཞིའི་མཐའ་ལ་མི་གནས་པའི་ཕྱིར་ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་གཡས་སུ་རྒྱལ་བ་ཀུན་གྱི་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་དབང་ཕྱུག་དཀར་པོ། གཡོན་དུ་སངས་རྒྱས་ཐམས་ཅད་ཀྱི་མཐུ་སྟོབས་ནུས་པའི་བདག་ཉིད་སེམས་དཔའ་མཐུ་ཆེན་ཐོབ་སྐུ་མདོག་སྔོན་པོ། གཉིས་ཀའང་ཕྱག་གཡས་སྐྱབས་སྦྱིན། གཡོན་པས་པདྨ་དཀར་པོ་དང་། རྡོ་རྗེས་མཚན་པའི་ཨུཏྤལ་སྔོན་པོ་སྙན་གྱི་ཐད་ཀར་ཁ་ཕྱེ་བའི་ཡུ་བ་ཐུགས་ཀར་འཛིན་པ། སྐུ་ལ་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་གྱིས་སྤྲས་ཤིང་། འགྲོ་དོན་སྐྱོ་དུབ་དང་བྲལ་བའི་ཕྱིར་ཞབས་གཉིས་བཞེངས་པའི་སྟབས་ཀྱིས་བཞུགས་པ། དེའི་མཐའ་བསྐོར་དུ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཉན་ཐོས་དང་རང་རྒྱལ་བསམ་གྱིས་མི་ཁྱབ་པ་དང་། ཁྱད་པར་དུ་ལམ་ཟབ་མོ་འདི་ཉིད་ཀྱི་བརྒྱུད་པའི་བླ་མ་དམ་པ་རྣམས་དང་། རྩ་གསུམ་རྒྱལ་བ་རབ་འབྱམས་དམ་ཅན་བསྲུང་མའི་ཚོགས་དང་བཅས་པ། ཐམས་ཅད་ཀྱང་སྐུ་མཚན་དཔེའི་རོལ་གར་གང་ལ་གང་འདུལ་གདུལ་བྱའི་མོས་ངོར་ཅིར་ཡང་འཆར་བ། གསུང་གྲགས་སྟོང་ཆོས་ཉིད་ཀྱི་རང་སྒྲ་སྣ་ཚོགས་གདུལ་བྱའི་ཁམས་དང་དབང་པོ་དང་། བསམ་པའི་ཁྱད་པར་དང་མཐུན་པར་ཐ་དད་དུ་སྒྲོགས་པ། ཐུགས་ཟབ་གསལ་གཉིས་མེད་ཀྱི་ཏིང་ངེ་འཛིན་བརྒྱ་ཕྲག་དུ་མར་འཇུག་ཅིང་ལྡང་བ། ཡོན་ཏན་དང་ཕྲིན་ལས་བསམ་གྱིས་མི་ཁྱབ་པའི་འཇུག་པ་གློག་ལྟར་མྱུར་བས་མཁའ་མཉམ་གྱི་འགྲོ་ལ་སྐད་ཅིག་ཀྱང་མི་གཡེལ་བ། ཁྱད་པར་དུ་དམིགས་ཡུལ་ཆེ་གེ་མོ་ཁྱོད་ལ་མཁྱེན་པའི་ཡེ་ཤེས་ཀྱིས་དགོངས། བྱམས་བརྩེའི་ཐུགས་ཀྱིས་བརྩེ། དགྱེས་པའི་ཞལ་གྱིས་ཕྱོགས། འཛུམ་པའི་སྤྱན་གྱིས་གཟིགས་ཏེ་ཁྱོད་རང་གཙོ་བོར་གྱུར་པའི་མཐོང་ཐོས་དྲན་རེག་གི་འགྲོ་བ་མ་ལུས་པ། བདེ་ཆེན་དག་པའི་ཞིང་དུ་འདྲེན་པའི་དེད་དཔོན་ཆེན་པོར་བྱོན་ནས་བཞུགས་པར་བསྒོམས་ལ། ལས་ངན་འཁྲུལ་བའི་དབང་དུ་མི་གཏོང་བར་མྱུར་དུ་འདྲེན་པའི་སྔོན་གྱི་ཐུགས་དམ་ཞལ་བཞེས་དུས་ལས་མི་ཡོལ་བ་ཞིག་ཁྱེད་མཁྱེན་ནོ། །ཁྱེད་ལ་བརྟེན་ནོ། །སྐྱབས་དང་རེ་ས་ཁྱེད་ལས་གཞན་མེད་པས་བཀའ་དྲིན་དང་ཐུགས་རྗེ་མ་ཆུང་ཤིག་སྙམ་པས་བློ་སེམས་རྩེ་གཅིག་ཏུ་གཏོད་ལ་ཁ་ཙམ་ཚིག་ཙམ་མ་ཡིན་པར་ཐུགས་རྗེ་དང་ཡོན་ཏན་རྗེས་སུ་དྲན་པའི་མོས་གུས་སྙིང་དཀྱིལ་ནས་བཟོད་མེད་དུ་འབར་ཞིང་གདུང་ཤུགས་དྲག་པོས་གསོལ་བ་འདི་ལྟར་དུ་ཐོབ་ཅིག ཅེས་བརྗོད། བཞི་པ་འཕོ་བ་འཇག་ཟུག་མར་གྲགས་པའི་དངོས་གཞིའི་འཕོ་ལུང་ཆེན་མོ་ནི། ཐོག་མར་དད་པ་དང་སྙིང་རྗེ་ཤུགས་བསྐྱེད་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། ཞེས་བརྒྱ་རྩ་བརྒྱད་སོགས་དལ་ཁོམ་དང་བསྟུན་དེ་བརྗོད་ལ། བདག་དང་འཕོ་བྱ་ཟུང་འཇུག་གི་རྣམ་པའམ་དབྱེར་མེད་དུ་མོས་པས་ཤིན་ཏུ་སྙན་པའི་དབྱངས་ཀྱིས། གསོལ་འདེབས་རྒྱས་པ་བྱ་བ་ནི། ཨེ་མ་ཧོ། སངས་རྒྱས་འོད་དཔག་མེད་ལ་ཕྱག་འཚལ་ལོ། ཆོས་སྐུ་སྣང་བ་མཐའ་ཡས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ལོངས་སྐུ་ཐུགས་རྗེ་ཆེན་པོ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས།། དེ་བཞིན་དུ་མཚན་གྱི་ཐོག་མཐའ་ཀུན་འདྲ་བར་སྦྱར་ལ། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས། །གཏེར་སྟོན་ཉི་ཟླ་སངས་རྒྱས་ལ་གསོལ་བ་འདེབས། །མཚུངས་མེད་ནམ་མཁའ་རྒྱལ་མཚན་ལ་གསོལ་བ་འདེབས། །རྟོགས་ལྡན་སང་ག་བྷ་ཏྲ་ལ་གསོལ་བ་འདེབས། །ཕ་རྒོད་དྲི་མེད་བློ་གྲོས་ལ་གསོལ་བ་འདེབས། །ཆོས་རྗེ་སངས་རྒྱས་རྒྱལ་མཚན་ལ་གསོལ་བ་འདེབས། །མཚུངས་མེད་མ་ཏིའི་མཚན་ཅན་ལ་གསོལ་བ་འདེབས། །ཡོངས་འཛིན་ཕུན་ཚོགས་རྣམ་རྒྱལ་ལ་གསོལ་བ་འདེབས། །འདྲེན་མཆོག་ཀརྨ་ཆོས་རྒྱལ་ལ་གསོལ་བ་འདེབས། །སྔགས་འཆང་པདྨ་དབང་དྲག་ལ་གསོལ་བ་འདེབས། །ཐུགས་ཆེན་ཀརྨ་ཆགས་མེད་ལ་གསོལ་བ་འདེབས། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས། །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །འགྱུར་མེད་ཐེག་མཆོག་བསྟན་འཛིན་ལ་གསོལ་བ་འདེབས། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ནམ་མཁའ་ཚེ་དབང་མཆོག་གྲུབ་ལ་གསོལ་བ་འདེབས། །མི་འགྱུར་ནམ་མཁའི་རྡོ་རྗེ་ལ་གསོལ་བ་འདེབས། །འཇིགས་མེད་ཆོས་དབྱིངས་འོད་གསལ་ལ་གསོལ་བ་འདེབས། །ཐུབ་བསྟན་ཆོས་ཀྱི་རྡོ་རྗེ་ལ་གསོལ་བ་འདེབས། །ཟབ་ལམ་འཕོ༴སོགས། དེས་འཕོ་བའི་བརྒྱུད་པ་དངོས་ཕྱོགས་གཅིག་ནས་ཚང་བ་ཡིན་ཀྱང་། བཀའ་དྲིན་གསུམ་ལྡན་གྱི་བརྒྱུད་པའི་བླ་མ་གཞན་ལ་ཡང་གསོལ་བ་བཏབ་ན་ལེགས་པས། རྒྱལ་སྲས་གཞན་ཕན་མཐའ་ཡས་ལ་གསོལ་བ་འདེབས། །མཁན་ཆེན་པདྨ་བཛྲ་ལ་གསོལ་བ་འདེབས། །ཀུན་བཟང་ཐེག་མཆོག་རྡོ་རྗེ་ལ་གསོལ་བ་འདེབས། །འགྲོ་འདུལ་ལུང་རིག་གླིང་པ་གསོལ་བ་འདེབས།། གང་ལྟར་ཡང་། དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་གསོལ་བ་རྩེ་གཅིག་ཏུ་ཐོབ་ལ། ཨོ་རྒྱན་ཆེན་པོས། རིག་པ་ཐིག་ལེའི་རྣམ་པ་རུ༔ སྤྱི་གཙུག་ཚངས་པའི་སྒོ་ནས་བྱུང་༔ འོད་དཔག་མེད་ཀྱི་ཐུགས་ཀ་རུ༔ ཧིཀ་གི་སྒྲ་དང་བཅས་པས་འཕང༔ གསུངས་པ་ལྟར་རིག་པ་སེམས་ཀྱི་ངོ་བོ་འོད་ཀྱི་ཐིག་ལེ་དེ་ཉིད་དབུ་མའི་ལམ་ནས་མེ་སྟག་འཕྲོ་བ་བཞིན་སྤྱི་གཙུག་ནས་རྒྱངས་ཀྱིས་ཡར་ཏེ་སངས་རྒྱས་འོད་དཔག་མེད་ཀྱི་ཐུགས་ཀར་ཐིམ་པར་མོས་ཤིག བརྗོད་ལ། དམིགས་པའི་བབས་དང་བསྟུན་ཏེ་ཧིཀ་ལྔའམ་བདུན་ནམ་ཉེར་གཅིག་བརྗོད། དེ་ནས་འོད་མཚན་ལན་གསུམ་བརྗོད་ཅིང་གསོལ་འདེབས་གོང་ལྟར་ལས། ཐོག་མར་སངས་རྒྱས་འོད་དཔག་མེད་ལ་ཞེས་པ་ལན་གཅིག་དང་མཚན་རྣམས་ཀྱི་རྗེས་སུ་ཟབ་ལམ་འཕོ་བ་ཞེས་པའི་ཚིག་རྐང་དེ་སོ་སོར་སྦྱར་བའི་མཇུག་ཏུ། མྱུར་ལམ་འཕོ་བས་སོགས་ཀྱི་རྐང་པ་གསུམ་པོ་ལན་གཅིག་བརྗོད་ལ། རིག་པ་སེམས་ཀྱི་ངོ་བོ༴སོགས་ནས་སྤར་ཆོག་གོང་ལྟར་བྱས་པས་འཐུས། གསོལ་འདེབས་འབྲིང་པོ་ནི། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས། །གཏེར་སྟོན་ཉི་ཟླ་སངས་རྒྱས་ལ་གསོལ་བ་འདེབས། །མཚུངས་མེད་ནམ་མཁའ་རྒྱལ་མཚན་ལ་གསོལ་བ་འདེབས། །རྟོགས་ལྡན་སང་ག་བྷ་ཏྲ་ལ་གསོལ་བ་འདེབས། །ཕ་རྒོད་དྲི་མེད་བློ་གྲོས་ལ་གསོལ་བ་འདེབས། །ཆོས་རྗེ་སངས་རྒྱས་རྒྱལ་མཚན་ལ་གསོལ་བ་འདེབས། །མཚུངས་མེད་མ་ཏིའི་མཚན་ཅན་ལ་གསོལ་བ་འདེབས། །ཡོངས་འཛིན་ཕུན་ཚོགས་རྣམ་རྒྱལ་ལ་གསོལ་བ་འདེབས། །འདྲེན་མཆོག་ཀརྨ་ཆོས་རྒྱལ་ལ་གསོལ་བ་འདེབས། །སྔགས་འཆང་པདྨ་དབང་དྲག་ལ་གསོལ་བ་འདེབས། །ཐུགས་ཆེན་ཀརྨ་ཆགས་མེད་ལ་གསོལ་བ་འདེབས། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས། །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །འགྱུར་མེད་ཐེག་མཆོག་བསྟན་འཛིན་ལ་གསོལ་བ་འདེབས། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ནམ་མཁའ་ཚེ་དབང་མཆོག་གྲུབ་ལ་གསོལ་བ་འདེབས། །མི་འགྱུར་ནམ་མཁའི་རྡོ་རྗེ་ལ་གསོལ་བ་འདེབས། །ལུང་རྟོགས་བསྟན་པའི་ཉིན་བྱེད་ལ་གསོལ་བ་འདེབས། །གསུམ་ལྡན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས །གོང་ལྟར་རོ།། གསོལ་འདེབས་བསྡུས་པ་ནི། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །དྲིན་ཆེན་རྩ་བའི་བླ་མས་ཐུགས་རྗེས་ཟུངས། །རྩ་བ་བརྒྱུད་པའི་བླ་མས་ལམ་སྣ་དྲོངས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་འགྲུབ་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས།། ཧིཀ་གིས་སྤར་ཞིང་རྟགས་ཐོན་དུ་འབད་དོ།། ལྔ་པ་འཕོ་ཆོག་བྱིན་རླབས་ཅན་གཞན་གྱི་སྐོར་ལ། ཐོག་མར་རྫོགས་པ་ཆེན་པོ་མན་ངག་སྡེ་པའི་སྙིང་ཐིག་ཐུན་མོངས་མ་ཡིན་པའི་དོན་བརྒྱུད་རིན་པོ་ཆེའི་གསོལ་འདེབས་ནི། ཨེ་མ་ཧོ། སྟོན་མཆོག་ཀུན་བཟང་རིགས་ལྔ་ཞི་ཁྲོའི་ལྷ། །རྡོ་རྗེ་འཆང་དབང་རྡོར་སེམས་གསང་བའི་བདག །དགོངས་བརྒྱུད་རྒྱལ་བ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །དགའ་རབ་རྡོ་རྗེ་འཇམ་དཔལ་བཤེས་གཉེན་དང་། །ཤྲཱི་སེང་ཛྙཱ་ན་སཱུ་ཏྲ་བཱི་མ་ལ། །བརྡ་བརྒྱུད་བླ་མ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །རྒྱལ་བ་ཀུན་དངོས་མཚོ་སྐྱེས་སྤྲུལ་པའི་སྐུ། །མཁར་ཆེན་མཚོ་རྒྱལ་མངའ་བདག་ཁྲི་སྲོང་རྗེ། །ཏིང་འཛིན་བཟང་པོ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །ལྡང་མ་ལྷུན་རྒྱལ་ལྕེ་བཙུན་སེང་གེ་དབང་། །རྒྱལ་བ་ཞང་སྟོན་མཁས་པ་ཉི་འབུམ་རྗེ། །གུ་རུ་ཇོ་འབེར་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །སེང་གེ་རྒྱབ་པ་མེ་ལོང་རྡོ་རྗེའི་མཚན། །ཀུ་མ་ར་ཛ་པདྨ་ལས་འབྲེལ་རྩལ། །ཀློང་ཆེན་རབ་འབྱམས་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །ཁྱབ་བདལ་ལྷུན་གྲུབ་འཇམ་དབྱངས་གྲགས་པའི་འོད། །འཁྲུལ་ཞིག་ཆེན་པོ་ཟླ་བ་གྲགས་པ་དང་། །ཀུན་བཟང་རྡོ་རྗེ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །རྒྱལ་མཚན་དཔལ་བཟང་སྣ་ཚོགས་རང་གྲོལ་བ། །བསྟན་འཛིན་གྲགས་པ་མདོ་སྔགས་བསྟན་འཛིན་རྗེ། །ཕྲིན་ལས་ལྷུན་གྲུབ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །འགྱུར་མེད་རྡོ་རྗེ་ཆོས་དཔལ་རྒྱ་མཚོའི་མཚན། །མི་འགྱུར་དཔལ་སྒྲོན་རིན་ཆེན་རྣམ་རྒྱལ་དང་། །པདྨ་དགྱེས་པ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །པདྨ་རིག་འཛིན་ནམ་མཁའ་འོད་གསལ་དང་། །ཐེག་མཆོག་བསྟན་འཛིན་ཀུན་གྲོལ་རྣམ་པར་རྒྱལ། །ངེས་དོན་བསྟན་འཛིན་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །ཚེ་དབང་མཆོག་གྲུབ་ཨོ་རྒྱན་ཆེ་མཆོག་དཔལ། །པདྨ་བཛྲ་ལུང་རིག་གླིང་པ་རྗེ། །རྩ་བའི་བླ་མ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །དོན་བརྒྱུད་རྫོགས་པ་ཆེན་པོའི་བྱིན་རླབས་ཀྱིས། །འཕོ་བྱ་འཕོ་བྱེད་འཕོ་ཡུལ་མི་དམིགས་པ། །འོད་སྣང་མཐའ་ཡས་དགོངས་པའི་ཀློང་ཆེན་པོར། །ཕྱིར་མི་ལྡོག་པའི་བྱང་ཆུབ་ཐོབ་པར་ཤོག །ཅེས་དང་ཧིཀ་ལྔ་ཚར་བརྗོད་དོ། །དེ་ནས་ཀློང་ཆེན་སྙིང་ཐིག་རང་ལུགས་ཀྱི་བརྒྱུད་པ་ནི། ཆོས་སྐུ་ཀུན་བཟང་ཡབ་ཡུམ་ལ་གསོལ་བ་འདེབས། །ལོངས་སྐུ་རྡོ་རྗེ་སེམས་དཔའ་ལ་གསོལ་བ་འདེབས། །སྤྲུལ་སྐུ་དགའ་རབ་རྡོ་རྗེ་ལ་གསོལ་བ་འདེབས། །རིག་འཛིན་དཔལ་གྱི་སེང་གེ་ལ་གསོལ་བ་འདེབས། །སློབ་དཔོན་འཇམ་དཔལ་བཤེས་གཉེན་ལ་གསོལ་བ་འདེབས། །མཁས་པ་ཡེ་ཤེས་མདོ་མཆོག་ལ་གསོལ་བ་འདེབས། །པཎ་ཆེན་དྲི་མེད་བཤེས་གཉེན་ལ་གསོལ་བ་འདེབས། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །ཚངས་པ་ལྷ་ཡི་མེ་ཏོག་ལ་གསོལ་བ་འདེབས། །གསང་འཛིན་ཡེ་ཤེས་མཚོ་རྒྱལ་ལ་གསོལ་བ་འདེབས། །མཁས་པ་རྣམ་སྣང་ལོ་ཙཱ་ལ་གསོལ་བ་འདེབས། །ཀུན་མཁྱེན་དྲི་མེད་འོད་ཟེར་ལ་གསོལ་བ་འདེབས། །འགྲོ་མགོན་མཁྱེན་བརྩེའི་འོད་ཟེར་ལ་གསོལ་བ་འདེབས། །འཇིགས་མེད་ཕྲིན་ལས་འོད་ཟེར་ལ་གསོལ་བ་འདེབས། །འཇིགས་མེད་ཡེ་ཤེས་རྡོ་རྗེ་ལ་གསོལ་བ་འདེབས། །འཇིགས་མེད་མཁྱེན་བརྩེའི་དབང་ཕྱུག་ལ་གསོལ་བ་འདེབས། །ལུང་རྟོགས་བསྟན་པའི་ཉིན་བྱེད་ལ་གསོལ་བ་འདེབས། །དོན་བརྒྱུད་ཕྱོགས་གཅིག་ལ་དེ་ལྟར་དང་། བཀའ་བབས་ཀྱི་བརྒྱུད་པ་གཞན་ཡང་། འཇིགས་མེད་རྒྱལ་བའི་མྱུ་གུ་ལ་གསོལ་བ་འདེབས། །འཇིགས་མེད་ཆོས་ཀྱི་དབང་པོ་ལ་གསོལ་བ་འདེབས། །འཇིགས་མེད་མཁྱེན་བརྩེའི་དབང་པོ་ལ་གསོལ་བ་འདེབས། །འཇིགས་མེད་གཞན་ཕན་དབང་པོ་ལ་གསོལ་བ་འདེབས། །གང་ལྟར་ཡང་། དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་འགྲུབ་པ་དང་། །ཕྱིར་མི་ལྡོག་པའི་ཆོས་སྐུ་ཐོབ་པར་ཤོག །ཧྲཱིཿ དང་ཧིཀ་ལྔ་ཚར་གྱི་སྒྲས་སྤར་རོ།། ཀློང་ཆེན་ནམ་མཁའི་རྣལ་འབྱོར་གྱི་ཐུགས་གཏེར་ལས་བྱུང་བའི་འཕོ་བ་ནི། ཨེ་མ་ཧོཿ གནས་རང་སྣང་དོན་གྱི་འོག་མིན་ནཿ ཡིད་དད་བརྒྱའི་འཇའ་གུར་འཁྲིགས་པའི་ཀློངཿ སྐྱབས་ཀུན་འདུས་རྩ་བའི་བླ་མ་ནིཿ་ སྐུ་ཐ་མལ་མ་ཡིན་དྭངས་མའི་ལུསཿ དཔལ་སངས་རྒྱས་སྣང་མཐའི་ངོ་བོར་བཞུགསཿ ཡིད་མོས་གུས་གདུང་བས་གསོལ་བ་འདེབསཿ ལམ་འཕོ་བ་འབྱོང་བར་བྱིན་གྱིས་རློབསཿ གནས་འོག་མིན་བགྲོད་པར་བྱིན་གྱིས་རློབསཿ དབྱིངས་ཆོས་སྐུའི་རྒྱལ་ཟིན་པར་ཤོགཿ ཧྲཱིཿལྔ་ཚར་དང་། ཧིཀ་དང་ཕཊ་ཀྱི་སྒྲས་སྤར་བར་བྱའོ།། ཡང་སྤྲུལ་སྐུ་མི་འགྱུར་རྡོ་རྗེའི་གནམ་གཏེར་གྱི་འཕོ་བ་ནི། ཨེ་མ་ཧོ། ཤིན་ཏུ་ངོ་མཚར་འོད་དཔག་མེད་མགོན་དང་། །ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ། །ཚེ་འདས་རྩེ་གཅིག་ཡིད་ཀྱིས་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །འཇིག་རྟེན་ཕྱི་མར་སོང་བའི་ཚེ་འདས་ཀྱི། །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །ཅེས་བརྗོད་ལ། ཧིཀ་དང་ཕཊ་ཀྱི་སྒྲ་བརྗོད་དོ། ། གཞན་ཡང་ཉམས་མྱོང་བྱིན་རླབས་བརྒྱུད་པའི་ཁྲིད་གང་ཐོས་པ་དང་། གང་ལ་མོས་པ་ཐོབ་པ་རྣམས་ལ་ཡང་ནན་ཏན་དུ་བྱའོ།། དྲུག་པ་ཕྱིར་མི་ལྡོག་སངས་རྒྱས་སྐུ་ལྔའི་ཀློང་དུ་རྒྱས་གདབ་ཅིང་སྐྱེ་མེད་ཀ་དག་གི་ངང་ལ་མཉམ་པར་འཇོག་པ་ནི། ཨེ་མ་ཧོ། སྔོན་འདས་དུས་བསྐལ་པའི་དགེ་སློང་མཆོག །དཔལ་རྒྱལ་སྲས་ཆོས་ཀྱི་འབྱུང་གནས་ཀྱིས། །མགོན་འཇིག་རྟེན་དབང་ཕྱུག་རྒྱལ་བའི་དྲུང་། །ཡོངས་འགྲོ་རྣམས་སྒྲོལ་ཕྱིར་དམ་བཅས་ནས། །ནུབ་བདེ་ཆེན་ཞིང་གི་རྟེན་བརྟེན་པར། །དབང་བསྒྱུར་བའི་ཐུགས་བསྐྱེད་སྨོན་པའི་འབྲས། །མགོན་ཚེ་མཐའ་ཡས་པ་སྟོན་འཁོར་བཅས། །མ་འགྲོ་བའི་དཔལ་དུ་ཡོངས་ཤར་བཞིན། །བདག་གསོལ་བ་འདེབས་སོ་མཁྱེན་བརྩེའི་གཏེར། །ཚེ་འདིར་སྣང་ལས་ཐལ་ཚེ་འདས་དེ། །སྲིད་འཁོར་བའི་འཇིགས་ལས་དབུགས་དབྱུང་ཞིང་། །ནུབ་བདེ་ཆེན་པདྨ་བཀོད་ཞིང་དུ། །དུས་སྐད་ཅིག་ཡུད་ཙམ་འདི་ཉིད་ལ། །མགོན་ཁྱེད་ཀྱི་ཐུགས་རྗེས་འདྲེན་པར་མཛོད། །ལས་ཉོན་མོངས་དབང་དུ་བཏང་གྱུར་ན། །མགོན་ཁྱེད་ཀྱི་དམ་བཅའ་གང་དུ་ཐལ། །གནས་ངན་འགྲོར་སྙོགས་ལས་མ་བཟློག་ན། །མགོན་ཐུགས་རྗེ་ཆེ་ཞེས་ཚིག་ཏུ་བས། །སེམས་གདུང་བས་གསོལ་འདེབས་འདིར་གསོན་ལ། །ཚེ་ཕྱི་མར་སོང་བའི་དམིགས་ཡུལ་དེ། །ནུབ་བདེ་ཆེན་ཞིང་དུ་འདྲེན་པར་མཛོད། །སྐྱབས་བསླུ་མེད་མགོན་པོ་འོད་དཔག་མེད། །ལྷ་ཐུགས་རྗེའི་གཏེར་མཛོད་སྤྱན་རས་གཟིགས། །སྟོབས་ནུས་པའི་མངའ་བདག་རྡོ་རྗེ་འཛིན། །དཔལ་འདྲེན་པ་སྟོང་རྩ་རྒྱལ་སྲས་ཚོགས། །ཚེ་ཕྱི་མའི་ལམ་ཞུགས་ཚེ་འདས་ཀྱི། །བཤེས་རམ་ཟླ་མཛོད་ཅིག་སྣང་མཐའ་ཡས། །འཁོར་སེམས་དཔའི་གྲལ་དུ་སྐྱེལ་བར་མཛོད། །སེམས་འོད་ཀྱི་ཐིག་ལེ་དཀར་དམར་མདངས། །དཔེ་མཁའ་ལ་སྐར་མདའ་རྒྱུག་པ་བཞིན། །དཔལ་འཆི་མེད་མགོན་པོའི་ཐུགས་ཀར་བསྟིམས། །སླར་ལྡོག་མེད་སྐུ་ལྔའི་རྒྱས་གདབ་བོ།། ཅེས་དང་། ཕཊཿསྤྲུལ་སྐུ། ཕཊཿལོངས་སྐུ། ཕཊཿཆོས་སྐུ། ཕཊཿམི་འགྱུར་རྡོ་རྗེའི་སྐུ། ཕཊཿམངོན་པར་བྱང་ཆུབ་པའི་སྐུ་ཐོབ་པར་བསམ་ལ། ཀྱཻ་མ་ཚེ་འདས་ཕུང་ཁམས་ལྷར་གསལ་རྟེན། །མགོན་འོད་དཔག་མེད་ཀྱི་གསང་གསུམ་ལ། །དཔེ་འཇའ་ཚོན་མཁའ་ལ་ཐིམ་བཞིན་དུ། །ཀློང་དབྱེར་མེད་རོ་གཅིག་འདྲེས་པར་གྱུར། །ཞེས་བརྗོད་ཅིང་། ཚེ་འདས་ཀྱི་ལུས་རྟེན་རྡོ་རྗེ་རྣལ་འབྱོར་མར་གསལ་བ་འཇའ་ཚོན་ནམ་མཁར་ཐིམ་པ་ལྟར་སྐྱབས་ཡུལ་གྱི་ལྷ་ལ་ཐིམ། དེ་ཉིད་འོད་ཀྱི་ཕུང་པོར་གྱུར་ཏེ་རང་སྣང་ལོངས་སྐུའི་ཞིང་དུ་བཅོམ་ལྡན་འདས་རྒྱལ་བ་འོད་མི་འགྱུར་བ་དང་དབྱེར་མེད་དུ་གྱུར་བར་བསམ་ལ། ཕཊཿཅེས་དམིགས་བསམ་སྤྲོས་པ་དང་བྲལ་བའི་ངང་ལ་ཅི་གནས་སུ་བཞག་གོ།། སྤྱི་དོན་གསུམ་པ་རྗེས་ཀྱི་བྱ་བ་ལ། བསྔོ་བ་དང་སྨོན་ལམ། ཤིས་བརྗོད་གསུམ་ལས། དང་པོ་བསྔོ་བ་ནི། དགེ་བ་འདིས་མཚོན་དུས་གསུམ་ལེགས་ཚོགས་རྣམས། །གཅིག་ཏུ་བསྡུས་ནས་མཁའ་མཉམ་འགྲོ་ཀུན་གྱི། །ཚོགས་རྫོགས་སྒྲིབ་དག་ས་ལམ་མྱུར་བགྲོད་ནས། །རྣམ་མཁྱེན་སངས་རྒྱས་ཐོབ་པའི་རྒྱུ་རུ་བསྔོ། ། ཞེས་དང་། ལུས་དང་ངག་དང་ཡིད་ཀྱང་རྣམ་དག་ཅིང་། །སྤྱོད་པ་དག་ཞིང་རྣམས་ཡོངས་དག་དང་། །བསྔོ་བ་བཟང་པོ་མཁས་པ་ཅི་འདྲ་བ། །དེ་འདྲ་བདག་ཀྱང་དེ་དང་མཚུངས་པར་ཤོག །འཇམ་དཔལ་དཔའ་བོས་ཇི་ལྟར༴སོགས། རབ་ཏུ་བསྔོ།། གཉིས་པ་སྨོན་ལམ་ནི། བཅོམ་ལྡན་འདས་རྡུལ་བྲལ་ཤིན་ཏུ་རྣམ་པར་དག་པ་ལ་ཕྱག་འཚལ་ལོ། །སངས་རྒྱས་བསོད་ནམས་ཕུང་པོ་ལས་གྲུབ་པའི། །འོད་སྣང་མཐའ་ཡས་བདེ་བ་ཅན་གྱི་ཞིང་། །དེ་ན་བཞུགས་པའི་མགོན་པོ་འོད་དཔག་མེད། །སྐུ་ཚེ་དཔག་མེད་ཞབས་ལ་ཕྱག་འཚལ་ལོ། །བདེ་བ་ཅན་གྱི་ཞིང་དུ་སྐྱེ་བར་ཤོག །གང་ཁྱོད་འཇིག་རྟེན་དབང་ཕྱུག་རྒྱལ་པོའི་དྲུང་། །དགེ་སློང་ཆོས་ཀྱི་འབྱུང་གནས་ཞེས་གྲགས་ཚེ། །ཞིང་ཁམས་བཟུང་བར་སྨོན་པའི་དམ་བཅའ་ལ། །བླ་མར་བྱའོ་མྱུར་དུ་སྐབས་དབྱེར་གསོལ། །བདེ་བ་ཅན་གྱི་ཞིང་དུ་སྐྱེ་བར་ཤོག །གཞོན་ཤ་ཤིན་ཏུ་ཆགས་པའི་ལག་མཐིལ་དང་། །མཉམ་པའི་དཔེ་བྱར་འོས་པའི་འགལ་ཟླ་ནི། །ཆུ་ཞེང་སྲིད་དུ་མི་མངོན་ཐ་གྲུའི་ཁྱོན། །རིན་ཆེན་སྣ་ཚོགས་གཅལ་དུ་བཀྲམ་པས་བྱས། །བདེ་བ་ཅན་གྱི་ཞིང་དུ་སྐྱེ་བར་ཤོག །ལྷུན་པོ་ཆུ་གཏེར་ཁོར་ཡུག་རི་ནག་པོའི། །བསྟི་གནས་ཕལ་བ་མེད་པས་ཉམས་དགའ་ཞིང་། །རིན་ཆེན་སྣ་བདུན་ལས་གྲུབ་ལྗོན་པ་ནི། །དཔག་ཚད་སྟོང་དང་དྲུག་བརྒྱའི་འཕོངས་སུ་སྙེགས། །བདེ་བ་ཅན་གྱི་ཞིང་དུ་སྐྱེ་བར་ཤོག །ཡལ་འདབ་མེ་ཏོག་འབྲས་བུས་དུད་པ་ལ། །གསེར་གྱི་དྲ་བས་དཔྱངས་པར་དྲི་བཞོན་གྱིས། །བསྐུལ་ལས་ཆོག་མི་ཤེས་པའི་སྒྲ་དབྱངས་ཀུན། །ཡིད་འོང་སྙན་དང་མཐུན་པ་དར་དིར་སྒྲོག །བདེ་བ་ཅན་གྱི་ཞིང་དུ་སྐྱེ་བར་ཤོག །དྲི་བསུང་ལྷག་པར་རྒྱས་པའི་མེ་ཏོག་གིས། །ཀུན་ནས་ཀུན་ཏུ་བཀྲམ་པའི་བསྟི་སྟང་ནི། །མི་འགྲེང་བདུན་དུ་སྙེགས་པས་མི་ངོམས་པར། །མནན་ན་ནེམ་ལ་བཏེག་ན་སྤར་བས་འགྲན། །བདེ་བ་ཅན་གྱི་ཞིང་དུ་སྐྱེ་བར་ཤོག །ལྷ་དང་མི་ལས་ངན་སོང་ལྷ་མིན་གྱི། །མིང་ཙམ་མི་གྲགས་འབྱོར་ཞིང་རྒྱས་པ་དང་། །ལོ་ལེགས་ཕུན་སུམ་ཚོགས་པའི་བདེ་བ་ཡིས། །ངོམས་པ་མེད་པའི་དཔལ་ལ་མི་ཆགས་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །འབབ་སྟེགས་མཆོག་ཏུ་བདེ་བའི་སྤོས་ཆུའི་ཀླུང་། །ཅ་ཅོའི་གཞན་དབང་མ་ཡིན་ཡིད་ལ་འབབ། །རྣམ་པར་བདེ་དང་མཉན་པས་ཆོག་མི་ཤེས། །མི་རྟག་ཞི་དང་བདག་མེད་དོན་ལ་རྟོན། །བདེ་བ་ཅན་གྱི་ཞིང་དུ་སྐྱེ་བར་ཤོག། །འདམ་རྫབ་སྤངས་པའི་གསེར་གྱི་བྱེ་མ་ལ། །བཞད་དང་ཁྲུང་ཁྲུང་ངང་ངུར་ཀ་རན་ད། །ནེ་ཙོ་རི་སྐེགས་རྨ་བྱ་ཀུ་ལ་ན། །ཀ་ལ་པིང་ཀའི་རྒྱུད་མངས་ལ་བསྙེན་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །དེ་ལས་རྣ་བའི་འདུས་ཏེ་རེག་ཚོར་ཀུན། །རིན་ཆེན་རྣམ་གསུམ་སྒྲ་དང་ཚད་མེད་བཞི། །ས་དང་ཕར་ཕྱིན་སྟོབས་བཅུ་མི་འཇིགས་བཞི། །མ་འདྲེས་བཅོ་བརྒྱད་རྫོགས་པའི་དོན་དང་ལྡན། །བདེ་བ་ཅན་གྱི་ཞིང་དུ་སྐྱེ་བར་ཤོག །བལྟ་ན་སྡུག་པའི་སྐྱེད་ཚལ་ལྗོན་པ་ལས། །འདོད་པའི་ཡོན་ཏན་བརྒྱ་ཕྲག་མོད་ལ་འབྱུང་། །བར་སྣང་ལ་སྤྲུལ་གཞལ་མེད་ཁང་ལ་སོགས། །གཞན་འཕྲུལ་དབང་བྱེད་ཀྱིས་ཀྱང་དོ་ཟླར་མིན། །བདེ་བ་ཅན་གྱི་ཞིང་དུ་སྐྱེ་བར་ཤོག །དེ་ན་གཟའ་དང་རྒྱུ་སྐར་ཉིན་མཚན་ཆ། །ཁྱིམ་དང་དེ་ལ་ཡོངས་སུ་འཛིན་པའི་སེམས། །གཏན་ནས་མེད་ཀྱང་མཆོད་སྤྲིན་སྤྲོ་བ་ཡི། །ལྷ་ཡི་བུ་མོས་ཤིན་ཏུ་ཉམས་བདེ་བ། །བདེ་བ་ཅན་གྱི་ཞིང་དུ་སྐྱེ་བར་ཤོག །གང་ན་འཚོ་ཞིང་གཞེས་པའི་རྒྱལ་བ་དེའི། །བསྔགས་པ་བརྗོད་ལ་གངྒཱའི་རྡུལ་སྙེད་ཀྱི། །སངས་རྒྱས་རྣམས་ཀྱང་བརྩོན་པ་མི་འདོར་བས། །སྤྱན་རས་གཟིགས་དང་མཐུ་ཆེན་ཐོབ་པའང་བསྙེན། །བདེ་བ་ཅན་གྱི་ཞིང་དུ་སྐྱེ་བར་ཤོག། །ཞིང་ཁམས་འདིར་སོན་དགེ་བའི་རྩ་བ་ལ། །སྒྲིབ་པ་དང་བཅས་པདྨོའི་མངལ་འཛིན་དང་། སྐྱིལ་མོ་ཀྲུང་བཅས་མོད་ལ་སྐྱེ་གཉིས་ཀ །སྐྱེས་བུ་ཆེན་པོའི་མཚན་དང་ཡང་དག་ལྡན། །བདེ་བ་ཅན་གྱི་ཞིང་དུ་སྐྱེ་བར་ཤོག །ཉན་རང་བྱང་སེམས་ལྷ་མིའི་རྣམ་པ་ཅན། །ཀུན་ཀྱང་དབང་རྣོན་བཟོད་པ་ཐོབ་པ་སྟེ། །བར་སྣང་ལ་འགྲོ་ལོག་པར་མི་ལྟུང་ཞིང་། །སངས་རྒྱས་མཐོང་དང་མི་འབྲལ་དམ་ཆོས་ཉན། །བདེ་བ་ཅན་གྱི་ཞིང་དུ་སྐྱེ་བར་ཤོག །བསམ་གཏན་དང་ནི་མངོན་པར་ཤེས་པ་ལ། །མཁས་པའི་ཤེས་རབ་ཀྱིས་ནི་རྣམ་དབྱེ་བཟོད། །མ་བསྡམས་མི་མངའ་དབང་པོ་མི་གཡོ་ཞིང་། །ཀུན་ཤེས་ཡོན་ཏན་མཐའ་ཡས་མུ་མེད་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །ཀུན་འབྱུང་རྒྱུ་འབྲས་སྤངས་པའི་ལམ་བདེན་གྱིས། །འགོག་པ་མངོན་དུ་བྱས་པའི་དགྲ་བཅོམ་ཀྱང་། །རྣམ་ཐར་གསུམ་གྱི་དབྱིངས་ལ་དབུགས་ཕྱུང་ནས། །འོད་ཟེར་ཆེན་པོའི་དབང་བསྐུར་ལ་སྦྱོར་བ། །བདེ་བ་ཅན་གྱི་ཞིང་དུ་སྐྱེ་བར་ཤོག །སྐད་ཅིག་རེར་བསྟན་ཆོས་ཀྱི་རྣམ་གྲངས་ཀྱང་། །བགྲང་བར་མི་བཟོད་རྫུ་འཕྲུལ་ཆེན་པོ་ཡིས། །ཞིང་ཁམས་གཞན་ཉུལ་ཆོས་ལས་ཐོབ་པ་ཡི། །བྱེ་བ་ཕྲག་བརྒྱའི་ཏིང་འཛིན་སྒོ་འབྱེད་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །མདོར་ན་གང་གི་མཚན་དང་སྒྲ་དང་ནི། །ལྟ་བ་ཡིད་ལ་གོམས་པར་བྱས་པ་ཡང་། །ཞིང་ཁམས་བདེ་བ་ཅན་དུ་དབུགས་འབྱིན་པའི། །ཐུགས་བསྐྱེད་དམ་བཅའ་བསླུ་བ་མེད་པའི་ཕྱིར། ཁྱོད་ཀྱིས་གཞན་དོན་མཛད་པའི་དཔེ་ཟླ་ལ། །རྒྱ་མཚོའི་དུས་རླབས་ངལ་བའི་སྐབས་བསྟན་པས། །བུ་རམ་ཤིང་པའི་ཞལ་ནས་ཀུན་དགའ་བོ། ཁྱོད་ལོངས་ནུབ་ཀྱི་ཕྱོགས་སུ་ཁ་སྟོན་ལ། །མེ་ཏོག་གཏོར་ནས་ཐལ་མོ་སྦྱར་བྱས་ཏེ། །རྫོགས་པའི་སངས་རྒྱས་འོད་སྣང་དཔག་ཏུ་མེད། །རྡུལ་བྲལ་ཤིན་ཏུ་རྣམ་པར་དག་པ་ལ། །ཕྱག་འཚོལ་དེ་མཚན་སྒྲིབ་པ་མེད་པ་ནི། །ཕྱོགས་བཅུར་གྲགས་ནས་རྒྱལ་བ་དེ་རྣམས་ཀྱང་། །བསྔགས་པ་བརྗོད་པར་གསུངས་ན་བདག་ཅག་ནི། །ལུས་དང་ལོངས་སྤྱོད་ལྟོས་པ་མེད་པར་འབུལ། །བྱས་ཤིང་བསགས་པའི་སྡིག་སྒྲིབ་མཐོལ་བ་དང་། །ཆབས་གཅིག་མཛད་པ་རྒྱ་མཚོར་ཡི་རང་འབུལ། །རྟག་པར་ཆོས་འཁོར་དང་བཅས་བཞུགས་སུ་གསོལ། །དགེ་རྩ་ཇི་སྙེད་མཆིས་པ་འགྲོ་བ་ཀུན། །བདེ་བ་ཅན་དུ་སྐྱེ་བའི་རྒྱུར་བསྔོ་ན། །སྨོན་པ་ཇི་བཞིན་འགྲུབ་པའི་བཀྲ་ཤིས་ཤོག །ཅེས་དང་། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་ཚེ་འདས་དེར་ཐོབ་ཤོག །དེར་ནི་ཚེ་འདས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང་། །སེམས་ཅན་རྣམས་ལ་ཕན་པ་མང་བྱེད་ཤོག །སྨོན་ལམ་རྒྱལ་པོ་འདི་དག་མཆོག་གི་གཙོ། །མཐའ་ཡས་འགྲོ་བ་ཀུན་ལ་ཕན་བྱེད་ཅིང་། །ཀུན་ཏུ་བཟང་པོས་བརྒྱན་པའི་གཞུང་གྲུབ་སྟེ། །ངན་སོང་གནས་རྣམས་མ་ལུས་སྟོང་བར་ཤོག །ངན་སོང་སྡུག་བསྔལ་མི་མྱོང་ཞིང་། །དཀའ་བ་སྤྱད་པ་མེད་པར་ཡང་། །ལྷ་བས་ལྷག་པའི་ལུས་ཀྱིས་ནི། །དེ་དག་སངས་རྒྱས་མྱུར་འགྲུབ་ཤོག །གང་དུ་སྐྱེ་བའི༴སོགས། ཐོབ་པར་ཤོག །གསུམ་པ་ཤིས་བརྗོད་ནི། ཧཱུྃ་ཧྲཱིཿ ཕྱོགས་བཅུའི་རྒྱལ་བ་རྣམས་ཀྱི་ཐུགས་རྗེ་དང་། །བདག་ཅག་ལྷག་བསམ་དག་པའི་བདེན་སྟོབས་ཀྱིས། །རྒྱུ་སྦྱོར་ཡོན་བདག་མི་ནོར་འཁོར་བཅས་ལ། །བཀྲ་ཤིས་དཔལ་འབར་བདེ་ལེགས་ཕུན་ཚོགས་ཤོག །ཅེས་བརྗོད་ཅིང་མེ་ཏོག་གི་སིལ་མ་འཐོར་བར་བྱའོ།། རྣམ་དག་ལེགས་བཤད་ཉི་འོད་འབུམ་བརྡལ་བཞིན། །མེ་ཁྱེར་རང་འོད་འབྱིན་པ་ལེགས་མིན་ཡང་། །གསུང་རབས་རྒྱ་མཚོར་འཇུག་པའི་སྐལ་ལྡན་དུས། འདོད་དགུའི་ནོར་བུ་བླངས་འདིར་འགལ་མེད་སྙམས། །དེ་ཕྱིར་ཟབ་དོན་ཆུ་གཏེར་བྱེ་བའི་བཅུད། །འཕྲད་ཚད་མྱུར་གྲོལ་དབང་གི་རྒྱལ་པོའི་མཛོད། །སྤེལ་འདིས་ཡིད་ཅན་བདེ་བས་ཕོངས་པ་རྣམས་། །གཏན་བདེ་སྐུ་བཞིའི་རྒྱལ་སྲིད་མཆོག་ཐོབ་ཤོག །ཅེས་ཟབ་ལམ་འཕོ་བའི་ལས་རིམ་ཁྲིགས་སུ་བསྡེབ་པ་འཕྲད་ཚད་མྱུར་གྲོལ་ཞེས་བྱ་བ་འདི་ནི་གཏེར་སྟོན་ཉི་ཟླ་སངས་རྒྱས་ཀྱི་འཕོ་བའི་རྩ་བ་རྫོགས་ཆེན་ནས་བརྒྱུད་པའི་འཕོ་བའི་གདམས་པ་རྡོ་རྗེའི་ཐེམ་སྐས་དང་། འཇིགས་མེད་ཕྲིན་ལས་འོད་ཟེར་གྱིས་མཛད་པའི་འཕོ་བ་རྣམ་གྲོལ་མྱུར་ལམ་དང་། འགྱུར་མེད་རྒྱལ་མཚན་བཟང་པོའི་འཕོ་བ་འཁྲུལ་སྣང་རང་གྲོལ། གཏེར་ཆེན་ལུང་རིག་གླིང་པའི་འཕོ་བ་ཐུགས་རྗེའི་ལྕགས་ཀྱུ་ཞེས་བྱ་བ་སྲིད་གསུམ་རང་གྲོལ་རྣམས་ལ་གཞི་བྱས་ནས། སངས་རྒྱས་འོད་དཔག་མེད་ཀྱི་ཞིང་གི་ཡོན་ཏན་བཀོད་པའི་མདོ་དང་། ཞི་ཁྲོ་དགོངས་པ་རང་གྲོལ་གྱི་བར་དོ་རྣམ་གསུམ་གྱི་ཁྲིད་ཡིག་རྒྱབ་ཆོས་བཅས་དང་། ཨོ་རྒྱན་འཇིགས་མེད་ཆོས་ཀྱི་དབང་པོའི་སྔོན་འགྲོའི་ཁྲིད་ཡིག་ལས་བྱུང་བའི་འཕོ་ཁྲིད་དང་། ཟེ་ཆེན་རྒྱལ་ཚབ་བསྟན་འཛིན་ཆོས་ཀྱི་རྒྱལ་པོས་མཛད་པའི་བར་དོའི་ངོ་སྤྲོད་ཐར་བའི་ལམ་སྟོན་དང་། གྲུབ་ཆེན་གྱིས་མཛད་པའི་བར་དོའི་ངོ་སྤྲོད་འཁྲུལ་སྣང་གདུང་སེལ་བདུད་རྩིའི་དགའ་སྟོན་དང་། བར་དོའི་རྣམ་བཤད་དྲན་པའི་མེ་ལོང་དང་། ཁོ་བོས་བྱས་པའི་འཕོ་ཡིག་ཐུགས་རྗེའི་ལྕགས་ཀྱུ་རྣོན་པོ་ཞེས་བྱ་བ་དང་། གཞན་ཡང་སྐྱེས་བུ་དམ་པ་རྣམས་ཀྱི་གསུང་ཚིག་ཚོགས་གང་ཟབ་ཀྱིས་ཁ་བསྐང་ནས། སྔ་སོར་གོས་དཀར་ལྕང་ལོའི་ཟུར་ཕུད་ཅན་བཛྲ་ཤྲཱི་དྷ་རས་ཀྱང་གསོལ་འདེབས་སོགས་བསྒྲིག་ཆོག་བྱས་པ་ཞིག་དགོས་ཞེས་བཀས་བསྐུལ་བ་དང་། །ཉེ་ཆར་མཆོག་སྤྲུལ་རིན་པོ་ཆེ་པདྨ་ཀལྤ་བྷ་དྲས་ཡང་ཡང་ནན་ཏན་ཆེན་པོས་བསྐུལ་བ་ལྡོག་ཏུ་མ་ནུས་པས། ཉིད་ཀྱི་ཐུགས་བཞེད་དང་བསྟུན་ནས། ཕྲན་གསང་སྔགས་ཀྱི་ལམ་ལ་ཞུགས་པར་མོས་པ་ཨ་བྷྱཱ་བི་ཛ་ཡ་ཕ་ལས་འཇུག་པ་བདེ་བའི་ཕྱིར། རང་ནུས་དང་བསྟུན་པའི་རྟོག་དཔྱོད་གང་འོས་ནན་ཏན་ཆེན་པོས་བྱས་ཏེ། ཁྲིགས་ཆོགས་སུ་ལེགས་པར་བསྡེབས་པ་ལ་ཡི་གེ་པའང་བསྐུལ་པོ་དེ་ཉིད་དོ།། ཚུལ་འདི་བསྒྲུབ་པ་ལ་ཉེས་ལྟུང་གི་ཆ་མཆིས་ན་ཕྱོགས་བཅུའི་རྒྱལ་བ་སྲས་དང་བཅས་པའི་སྤྱན་སྔར་བཟོད་པར་གསོལ་ཞིང་། རྣམ་དཀར་ལེགས་པའི་ཆ་སྲིད་ན་དེས་མཚོན་པའི་དུས་གསུམ་གྱི་དགེ་ཚོགས་རྒྱ་མཚོའི་མཐུས། ཕྱོགས་བཅུའི་ནམ་མཁའ་དང་མཉམ་པའི་ཡིད་ཅན་གྱི་འགྲོ་བ་མ་ལུས་པ་བར་དོ་དང་སྲིད་པའི་སྡུལ་བསྔལ་ལས་གྲོལ་ནས་ཞི་བདེ་བླ་ན་མེད་པ་གདོད་མའི་མགོན་པོ་འོད་སྣང་མཐའ་ཡས་ཀྱི་དགོངས་པའི་ཀློང་ཆེན་པོར་མངོན་པར་བྱང་ཆུབ་པའི་རྒྱུར་གྱུར་ཅིག སརྦ་དཱ་སུ་ཤྲཱེ་ཡོ་བྷ་བ་ཏུ།།