ཤམ་བྷ་ལའི་ཆོས་རྒྱལ་རིགས་ལྡན་བརྒྱུད་པར་བཅས་ལ་གསོལ་བ་འདེབས་པའི་འཕོ་བ།
༄༅། དཔལ་དུས་ཀྱི་འཁོར་ལོའི་རྒྱུད་ཀྱི་དགོངས་པ་ལྟར་བྱང་ཤམ་བྷ་ལའི་ཆོས་རྒྱལ་རིགས་ལྡན་བརྒྱུད་པར་བཅས་ལ་གསོལ་བ་འདེབས་པའི་འཕོ་བ་ནི། དང་པོའི་སངས་རྒྱས་དཔལ་ལྡན་རྡོ་རྗེ་འཆང་། །དུས་ཀྱི་འཁོར་ལོ་འདྲེན་མཆོག་ཤཱཀྱའི་ཏོག །ཉི་མའི་འོད་དང་གསང་བདག་ཟླ་བཟང་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །ཆོས་རྒྱལ་ལྷ་ཡི་དབང་ལྡན་གཟི་བརྗིད་ཅན། །ཟླ་བས་བྱིན་དང་ལྷ་ཡི་དབང་ཕྱུག་ཆེ། །སྣ་ཚོགས་གཟུགས་དང་ཟླ་བའི་དབང་ལྡན་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །རིགས་ལྡན་འཇམ་དཔལ་གྲགས་དང་པདྨ་དཀར། །བཟང་པོ་རྣམ་རྒྱལ་བཤེས་གཉེན་བཟང་པོ་དང་། །ཕྱག་ན་རིན་ཆེན་ཁྱབ་འཇུག་སྦས་པ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །ཉི་མ་གྲགས་པ་ཤིན་ཏུ་བཟང་པོ་དང་། །རྒྱ་མཚོ་རྣམ་རྒྱལ་རྒྱལ་དཀའ་ཉི་མའི་མཚན། །སྣ་ཚོགས་གཟུགས་དང་ཟླ་འོད་མཐའ་ཡས་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །ས་སྐྱོང་དཔལ་སྐྱོང་སེང་གེ་རྣམ་པར་གནོན། །སྟོབས་ཆེན་མ་འགག་པ་དང་མིའི་སེང་གེ། །དབང་ཕྱུག་ཆེ་དང་མཐའ་ཡས་དྲག་པོ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །ས་ཡི་ཕྱེད་སྐྱོང་ཚངས་པ་ལྷ་དབང་དང་། །དུམ་བུར་སྐྱོང་བ་འོད་སྲུང་ལ་སོགས་བརྒྱད། །ཤམ་བྷ་ལར་བཞུགས་རིག་འཛིན་ཚོགས་བཅས་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །དུས་ཞབས་ཆེ་ཆུང་ན་ལེནྟྲ་པ་དང་། །ཟླ་བ་མགོན་པོ་འབྲོ་སྟོན་ལོ་ཙཱ་པ། །སྒྲོལ་བའི་མགོན་པོ་ཉེ་བརྒྱུད་བླ་མར་བཅས། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །རྒྱ་བོད་རིག་འཛིན་བརྒྱུད་པར་བཅས་རྣམས་དང་། །དྲུག་བརྒྱ་སོ་དྲུག་དཀྱིལ་འཁོར་ལྷ་ཡི་ཚོགས། །རིགས་བརྒྱའི་རྣལ་འབྱོར་བསྟན་བསྲུང་བཅས་རྣམས་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །གཞི་དབྱིངས་འགྱུར་མེད་བདེ་གཤེགས་སྙིང་པོ་དང་། །ལམ་མཆོག་རྡོ་རྗེ་རྣལ་འབྱོར་ཡན་ལག་དྲུག །འབྲས་བུ་ཁྱབ་རྟག་གདོད་མའི་ཆོས་སྐུ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །འབྱུང་འདུས་སྒྱུ་མའི་ཚོགས་པ་ཞིག་པའི་ཚེ། །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །རང་རིག་དོན་གྱི་སྣང་མཐའི་ཐུགས་ཀློང་དུ། །མི་ལྡོག་གཉུག་མའི་གཏན་སྲིད་ཟིན་པར་ཤོག །ཞེས་བརྗོད་པས་བླ་མའི་ཐུགས་ཀ་ནས་བྱམས་བརྩེའི་འོད་ཟེར་ལྕགས་ཀྱུའི་དབྱིབས་ཅན་ཁ་ཏོག་སྣ་ཚོགས་པ་བྱུང་ནས་རྣམ་ཤེས་ཧཱུྃ་ཡིག་གི་རྣམ་པས་དྲངས་ཏེ་བླ་མའི་ཐུགས་ཀར་འཕོས་པར་བསམ་ལ། ཧིཀ་དང་ཕཊ་ཀྱི་སྒྲས་སྤར་བའོ།།