སྐྱེས་བུ་དམ་པ་ལ་འཆི་བ་གསལ་འདེབས་ཚུལ།

༄༅། སྐྱེས་བུ་དམ་པ་ལ་གསལ་འདེབས་ཚུལ་ནི། འོ་དམ་པ་གང་ཉིད་འཇིག་རྟེན་ཚེ་འདིའི་སྣང་བ་ལས་ནི་འདས། འཇིག་རྟེན་ཕྱི་མའི་སྣང་བ་མ་ཤར་བར། ད་ལྟ་འཆི་བ་དང་པོ་འོད་གསལ་ཆོས་ཀྱི་སྐུ་ཞེས་སྐྱེ་འགགས་གནས་གསུམ་དང་བྲལ་བའི་ཡེ་ཤེས་སྤྲོས་པའི་མཐའ་ལས་འདས་པ་ཞིག་ཤར་ནས་ཡོད་པ་དེ་གདོད་མ་གཞིའི་གནས་ལུགས་ཡིན་པས་དེ་རྟོགས་པས་རང་ངོ་ཤེས་པར་གྱིས་ལ་ཀ་དག་གདོད་མའི་གཞི་དབྱིངས་སུ་བཙན་ས་ཟུངས་དང་འཕོ་མེད་ཆོས་སྐུའི་རྒྱལ་ས་ཟིན་པ་ཡིན་ནོ།། གལ་ཏེ་དེ་ལས་ཡོལ་ནས་བར་དོ་ལྷུན་གྲུབ་ལོངས་སྐུའི་སྣང་བ་ཞེས་བྱ་བ་དེ་ཤར་ན་སྣང་བ་གང་སྣང་ཐམས་ཅད་འོད་ལྔའི་ཁ་ཏོག་ཏུ་སྣང་ཞིང་། ཕྱོགས་མཚམས་སྟེང་འོག་གང་དུ་བལྟས་ཚད་ཟ་འོག་གི་གུར་ཁྱིམ་བཀྲམ་པ་བཞིན་འཇའ་འོད་ཀྱི་རང་བཞིན། ཐིག་ལེ་དང་ཐིག་ཕྲན་གྱི་རྣམ་པ་ཞི་བ་དང་། ཁྲོ་བོའི་སྣང་བརྙན། སྒྲ་འོད་ཟེར་གསུམ་གྱི་སྣང་བ་སོགས་གང་ལྟར་སྣང་བ་དེ་དག་ཐམས་ཅད་ཆོས་ཉིད་བར་དོའི་སྣང་བ་ཡིན་པས་དེ་དག་གཞན་དུ་མི་སེམས་པར་རང་སྣང་དུ་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་ཐབས་མཆོག་ཏུ་དྲན་པར་གྱིས་དང་། ཀ་དག་གི་རིག་གདངས་མ་ལྟ་བུ་དེའི་པང་དུ་ལྷུན་གྲུབ་ཀྱི་འོད་གདངས་བུ་ལྟ་བུ་དེ་ཐིམ་ཞིང་གྲོལ་ནས་དབྱིངས་རིག་མ་བུ་དབྱེར་མེད་དུ་འདྲེས་ཏེ་སངས་རྒྱས་པ་ཡིན་ནོ།། གལ་ཏེ་དེ་དག་བརྟན་པ་མ་ཐོབ་སྲིད་ན་རང་བཞིན་སྤྲུལ་པ་སྐུའི་ཞིང་ཞེས་མཁའ་སྤྱོད་དག་པའི་ཞིང་དུ་ཐུགས་ཀྱི་འདུན་པ་གཏད་དགོས་པ་ལགས་ཏེ། དེའི་ཐབས་ཀྱི་ཡན་ལག་ཏུ་བཀའ་དྲིན་གསུམ་ལྡན་གྱི་སྐྱབས་མགོན་བླ་མ་དམ་པ་རྣམས་ཡིད་ལ་སྒོམས་ཤིག ཡི་དམ་དང་ལྟ་བ་དྲན་པར་གྱིས་ཤིག ཐེག་པ་ཆེན་པོའི་སྨོན་འཇུག་གི་སེམས་བསྐྱེད་སྒོམས་ཤིག དེ་དག་གནད་དུ་འགྲོ་བའི་རྟེན་འབྲེལ་དུ་མ་བསྒོམ་པར་སངས་རྒྱས་པ། སྐད་ཅིག་གཅིག་གིས་བྱེ་བྲག་ཕྱེད་ཅིང་སྐད་ཅིག་གཅིག་གིས་རྫོགས་སངས་རྒྱས་པའི་ཆོས། ཟབ་ལམ་འཕོ་བའི་གདམས་པ་ཟབ་མོ་བསྒོམ་ནས་སྒྲ་ཇི་བཞིན་པར་ལས་ལ་སྦྱར་བའི་སྐབས་སུ་བབས་པ་ཡིན་པས་ཐོག་མར་སྐྱབས་ཡུལ་གསལ་གདབ་པའི་ཐུགས་འདུན་འདི་བཞིན་མཛད་འཚལ། མདུན་གྱི་ནམ་མཁར༴སོགས།