སྡིག་ཅན་གཤིན་པོའི་འཕོ་ལུང་།

༄༅། དམ་ཆོས་ཡང་ཟབ་པདྨའི་ཐུག་ཐིག་གི་ཆ་ལག་སྡིག་ཅན་གཤིན་པོའི་འཕོ་ལུང་བཞུགས་སོ།།

༄༅། བདེ་ལྡན་ཞིང་གི་མགོན་པོ་དང་། །དབྱེར་མེད་དཔལ་ལྡན་བླ་མར་འདུད། །མཚམས་མེད་ལས་བསགས་སྡིག་པ་ཅན། །མྱུར་གྲོལ་ཉུང་ཞིག་བྲི། །དེ་ལ་ཐོག་མར་ཐུགས་རྗེ་ཆེན་པོའི་བསྒོམ་བཟླས་སྔོན་དུ་འགྲོ་བས་བྱམས་སྙིང་རྗེའི་ངང་ནས། མདུན་གྱི་རྟེན་དེ་ཉིད་ཤུ་ནྱ་ཏས་བསངས། སྭཱ་བྷ་ཝས་སྦྱངས། མདུན་གྱི་རྟེན་སྣང་བ་མི་དམིགས་པ་སྟོང་པ་ཉིད་དུ་གྱུར། །སྟོང་པའི་ངང་ལས་པདྨ་དང་ཟླ་བའི་གདན་ལ་ནྲྀཿཡིག་ཡོངས་སུ་གྱུར་པ་ལས། ཚེ་ལས་འདས་པ་གསོན་དུས་ཀྱི་རྣམ་པ་གཞོན་ནུའི་ཚུལ་ཅན་མཛེས་ཤིང་ཡིད་དུ་འོང་བ་གོས་དཀར་དྲི་མེད་གསོལ་ཞིང་དད་མོས་གུས་དང་ལྡན་པ་གཅིག་ཏུ་གྱུར། བདག་ཉིད་འཕགས་པར་གསལ་བའི་ཐུགས་ཀ་ནས་བྱམས་བརྩེའི་འོད་ཟེར་གློག་ལྟར་མྱུར་བ་འཕྲོས་པས་ཚེ་འདས་ཀྱི་རྣམ་ཤེས་འཇིག་རྟེན་བདུན་པོ་གང་ན་ཡོད་པ་དེ་ལ་རེག་པ་ཙམ་གྱིས་སྐད་ཅིག་ཡུད་ཙམ་ལ་ཨཱ༔ཡིག་དཀར་པོའི་རྣམ་པར་བཀུགས་ནས་རྟེན་ལ་ཐིམ་པར་གྱུར་བར་མོས་ལ། ན་མོ། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་རྣམས་ཀྱི་བཀའ་བདེན་པ་དང་། ཡི་དམ་རྒྱུད་སྡེ་དྲུག་གི་དཀྱིལ་འཁོར་རྣམས་ཀྱི་བཀའ་བདེན་པ་དང་། གནས་གསུམ་གྱི་དཔའ་བོ་མཁའ་འགྲོ་དམ་ཅན་བསྲུང་མ་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། ཁྱད་པར་དུ་བཅོམ་ལྡན་འདས་མགོན་པོ་འོད་དཔག་ཏུ་མེད་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བཀའ་བདེན་པ་དང་། རྒྱལ་བ་གང་གི་ཐུགས་བསྐྱེད་སྨོན་ལམ་རྒྱ་ཆེན་པོའི་སྟོབས་ཀྱིས། འཇིག་རྟེན་འདི་ནས་ཕ་རོལ་ཏུ་ཚེ་དུས་ལས་འདས་པའི་རྣམ་པར་ཤེས་པ་འཁོར་བ་སྡུག་བསྔལ་ཀྱི་གནས་ཡུལ་གང་ན་ཡོད་ཀྱང་རྟེན་ཕུང་པོ་འདི་ལ་ཁུག་ཅིག །ནྲྀཿཨ་ཀརྴ་ཡ་ཛ་ཛཿ ལན་གྲངས་མང་དུ་བརྗོད་ནས། ཛཿཧཱུྃ་བཾ་ཧོ༔ ཆུ་ལ་ཆུ་བཞག་པ་བཞིན་དབྱེར་མེད་དུ་གྱུར་ནས་དགའ་བ་དང་གུས་པའི་སེམས་ཀྱིས་བག་ཕེབས་བཞིན་གནས་པར་མོས་ལ། སྦྱངས་གཏོར། རཾ་ཡཾ་ཁཾ་གིས་བསངས། སྭཱ་བྷ་ཝས་སྦྱངས། སྟོང་པའི་ངང་ལས་བྷྲུྃ་ལས་རིན་པོ་ཆེའི་སྣོད་དུ་ལན་ཆགས་བགེགས་ཀྱི་གཏོར་མ་འདོད་པའི་ཡོན་ཏན་བསམ་གྱིས་མི་ཁྱབ་པ་དང་ལྡན་པར་གྱུར། ཨོཾ་ཨཱ༔ཧཱུྃ་གིས་བྱིན་གྱིས་རླབས། ཨོཾ་སརྦ་བྷུ་ཏ་ཨ་ཀརྴ་ཡ་ཛ་ཛ༔ ལན་གསུམ། ཨོཾ་སརྦ་བིགྷྣན་ན་མཿསརྦ་ཏ་ཐཱ༴སོགས། གསུམ། ཨོཾ་སུམ་བྷ་ནི་སུམ་བྷ་ནི༴སོགས། གསུམ་གྱི་མཐར། ཨོཾ་བཛྲ་ཀྲོ་ཏ་ཧྱ་གྷྲྀ་ཝ་ཧཱུྃ་ཕཊཿ རང་ཉིད་སྐད་ཅིག་གིས་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བའི་གཟི་བརྗིད་བསྐལ་པའི་མེ་ལྟར་འབར་བར་གྱུར། ཧྲཱིཿ སྟོང་ཉིད་དབྱིངས་ལས་རང་ཤར་བའི༔ སྙིང་རྗེ་ཆེན་པོའི་སྐུར་བཞེངས་པ༔ བྱང་ཆུབ་མཆོག་གི་ལྷ་ཆེན་པོ༔ ཉོན་མོངས་བདུད་སྡེ་འདུལ་བའི་སྐུ༔ དབང་ཆེན་འབར་བའི་ཆོ་འཕྲུལ་གྱིས༔ ཐར་བའི་ལམ་ལ་འཚེ་བྱེད་བདུད༔ ཟ་འདྲེ་སྲོག་གཅོད་རྡུལ་དུ་རློགས༔ ན་མོ། རྩ་རྒྱུད་ཀྱི་བླ་མ་མཆོག་གསུམ་རྒྱལ་བ་རྒྱ་མཚོ་དམ་ཅན་བསྲུང་མའི་ཚོགས་དང་བཅས་པའི་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་ཆོས་ཉིད་འགྱུར་མེད་རྟེན་འབྱུང་བསླུ་མེད་ལྷག་བསམ་རྣམ་དག་དང་བཅས་པའི་བདེན་པ་དང་། བདེན་པ་ཆེན་པོའི་སྟོབས་ཀྱིས་ཚེ་ལས་འདས་པ་འདི་ཉིད་གསོན་གྱི་དུས་སུ་ཚེ་སྲོག་དང་། གཤིན་གྱི་དུས་སུ་ཐར་བའི་ལམ་ལ་བར་དུ་གཅོད་པའི་གསོན་བདུད་གཤིན་ལྕགས་སྤྱི་དང་། ཁྱད་པར་དྲི་ཟ་འཆི་ཁ་མའི་སེམས་ལ་ཉེ་བར་འཇུག་པའི་རིགས་དང་། དྲི་ཟ་ཁྱབ་བྱེད་དང་། གནོད་སྦྱིན་སྨྲ་འདོད་དང་། ཡི་དྭགས་གཤིན་རྗེའི་ཆད་པ་ལ་སོགས་པ་ལན་ཆགས་དང་ཤ་འཁོན་གཉེར་བའི་རིགས་རྣམས་མཆོད་སྦྱིན་གྱི་གཏོར་མ་འདིས་ཚིམ་པར་གྱིས་ལ་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་ཡེ་ཤེས་ཀྱི་ཁྲོ་བོ་དང་ཁྲོ་མོ་མཚོན་ཆ་མེ་དཔུང་འབར་བའི་ཚོགས་སྤྲོས་པས་རྡུལ་དུ་བརླག་པར་འགྱུར་ཏ་རེ། དྲག་སྔགས་ཐུན་དང་བཅས་པས་བགེགས་བསྐྲད། བཛྲ་རཀྵ་རཀྵ་ཧཱུྃ། གིས་བསྲུང་འཁོར་བྱས་ནས། སྤྲོ་ན་འདོད་ཡོན་བསྔོས་མཐར། འོ། འཇིག་རྟེན་འདི་ནས་ཕ་རོལ་ཏུ་ཚེ་དུས་ལས་འདས་པ་ཆེ་གེ་མོ་ཁྱོད་ཤི་ནས་ད་ལྟ་བར་དོ་ན་གནས་པའི་སྐབས་ཡིན་ནོ། །དེ་ཡང་ཁྱོད་རང་ལ་འཆི་བ་མི་རྟག་པ་བྱུང་བས་སྔངས་སྐྲག་འཇིགས་གསུམ་དང་སེམས་ཁོང་དུ་ཆུད་པར་མ་བྱེད། མཐོ་བ་སྲིད་པའི་རྩེ་མོ་མན་ཆོད་ནས་དམའ་བ་ན་རཀ་འོག་མ་ཡན་ཆད་ཀྱི་སེམས་ཅན་སྲོག་ཆགས་ཤིང་དབུགས་གནས་ཚད་ལ་མི་འཆི་ཚེ་ཐར་དུ་ལུས་པ་གཅིག་ཀྱང་མེད་པའི་ཚུལ་དུ་སོམས་ལ་མྱ་ངན་དང་སྡུག་བསྔལ་གང་ཡང་མ་བྱེད། མ་སྐྲག་མ་སྔངས་མ་འཇིགས་པར་ད་ལྟ་བདག་གིས་བསྟན་པའི་གདམས་ངག་གི་གནད་རྣམས་ཡིད་ལ་མ་བརྗེད་པར་ཟུངས་ཤིག་དང་། བདག་གིས་མ་བསྒོམ་སངས་རྒྱས་ཆོས་དྲུག་གི་ནང་ཚན་སངས་རྒྱས་ལག་འཆང་གི་གདམས་པ་སྟེང་སྒོ་རྣམ་པར་གྲོལ་བའི་ལམ་ནས་ལེ་ལོ་ཅན་འཆི་ཁར་གྲོལ་ཞིང་། སྡིག་པོ་ཆེ་བཙན་ཐབས་སུ་འཚང་རྒྱ་བའི་མན་ངག་ཟབ་ལམ་འཕོ་བའི་ཆོས་སྒོ་ཕྱེས་ནས་ཁྱོད་རང་དག་པ་མཁའ་སྤྱོད་ཀྱི་ཞིང་ཁམས་སུ་གནས་སྤར་བ་ཡིན་པས་དགའ་བ་དང་སྤྲོ་བའི་སེམས་བསྐྱེད་ལ། ད་རེས་ཀྱི་འཆི་བ་འདི་ལ་བརྟེན་ནས་རང་ཉིད་རྣམ་པར་གྲོལ་ཞིང་གཞན་ལ་ཕན་ཐོགས་པ་ཞིག་བྱའོ་སྙམ་པས། འདྲེན་མཆོག་གང་གི་མཚན་ལན་གཅིག་ཐོས་ནས་དད་པ་སྐྱེས་པ་དང་། གཟུགས་སྐུའི་རྣམ་པ་ཡིད་ལ་དྲན་ནས་གསོལ་བ་ལན་གཅིག་བཏབ་པ་དང་། ཞིང་དེར་སྐྱེ་བར་མོས་པས་སྨོན་ལམ་ལན་གཅིག་བཏབ་པ་ཙམ་གྱིས་བར་དོའི་འཇིགས་པ་དང་། ངན་སོང་གི་རྒྱུན་ཡོངས་སུ་གཅོད་པ་དང་། ཞིང་དེར་འདྲེན་པར་ཞལ་གྱིས་བཞེས་པ་བཅོམ་ལྡན་འདས་མགོན་པོ་འོད་དཔག་ཏུ་མེད་པ་ཞེས་བྱ་བ་དང་། དེའི་ཞིང་ཁམས་བདེ་བ་ཅན་ཞེས་བྱ་བ་དེ་ཡིད་ལ་མ་བརྗེད་པར་ཟུངས་ལ། ཁྱོད་གདོས་བཅས་ཤ་ཁྲག་གི་ལུས་དང་བྲལ་བས་འགྲོ་སླ་བའི་ཕྱིར་ཞིང་མཆོག་དེ་རུ་འདུན་པ་ཐེ་ཚོམ་མེད་པར་གཏོད་ཅིག དེ་ཡང་སྒྱུ་འཕྲུལ་དྲྭ་བའི་རྒྱུད་ལས། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་གསུངས་པ་ལྟར། ཚེ་ལུས་འདི་ཉིད་ནས་འཚང་རྒྱ་བར་ནུས་པ་གསང་སྔགས་བླ་ན་མེད་པའི་ཉེ་ལམ་དེ་ཉིད་ལ། བཏགས་གྲོལ་དང་མཐོང་གྲོལ། མྱོང་གྲོལ་དང་རེག་གྲོལ། ཐོས་གྲོལ་དང་དྲན་གྲོལ་གྱི་མན་ངག་མང་པོ་སྣང་བ་རྣམས་སོ་སོར་འཕགས་ཆོས་རྨད་དུ་བྱུང་བ་མངའ་ཞིང་། བཅོམ་ལྡན་འདས་ཀུན་རིག་རྣམ་པར་སྣང་མཛད་དང་། དེ་བཞིན་གཤེགས་པ་མི་འཁྲུགས་པ་དང་། སངས་རྒྱས་སྨན་གྱི་བླ་མ་སོགས་ཀྱི་མཚན་ལན་རེ་ཐོས་པས་ཀྱང་ངན་སོང་གི་འཇིགས་པ་སེལ་བ་དང་། རིན་ཆེན་གཙུག་ཏོར་ཅན་གྱི་མཚན་འཆི་ཁ་མའི་རྣ་ལམ་དུ་བསྒྲགས་ན་སུམ་ཅུ་རྩ་གསུམ་གྱི་ལྷར་སྐྱེ་བ་དང་། སོར་འབྲང་འཁོར་ལོས་བར་དོའི་འཇིགས་པ་དང་བར་དོའི་སྡུག་བསྔལ་སེལ་བ་སོགས་སྔགས་གསར་རྙིང་ཀུན་ན་མང་དུ་ཡོད་ཀྱང་ཀུན་ལས་ཁྱད་པར་དུ་འཕགས་པ་ནི་ཟབ་ལམ་འཕོ་བའི་གདམས་པ་འདི་ཉིད་ཡིན་ཏེ། གདན་བཞིའི་རྒྱུད་ལས། བུ་ག་དགུ་ཡི་སྟེང་ཕྱོགས་སུ། །འཕྲལ་དུ་ཡིད་ཀྱིས་འཕོ་བྱེད་པ། །ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་པོ་བྱེད་པ་དང་། །ཆོམ་རྐུན་ལས་ཀྱིས་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ཏེ། །སྡིག་གིས་ཀུན་ནས་མི་གོས་ཤིང་། །འཁོར་བའི་ཕ་རོལ་མཆོག་ཏུ་འགྲོ། །ཞེས་དང་། དགེ་སྦྱོར་ཐམས་ཅད་གཞུ་དང་འདྲ། །འཕོ་བ་ཐེབས་པ་མདའ་དང་འདྲ། །ཞེས་སོགས་གསུངས་པ་ལྟར་རོ། །དེ་ལྟ་བུའི་ཆོས་ཚུལ་ཟབ་མོ་འཕོ་བའི་གདམས་པ་དེ་ཡང་སྔགས་གསར་རྙིང་བཀའ་གཏེར་དག་སྣང་ཀུན་ནས་མང་དུ་གསུངས་ཀྱང་། ད་ལམ་སྐབས་སུ་བབ་པ་ཟབ་ལམ་འཕོ་བའི་མན་ངག་སྡིག་ཅན་མྱུར་གྲོལ་ཞེས་བྱ་བ་འདི་ཉིད་ནི། མཁར་ཆེན་བཟའ་ཡེ་ཤེས་མཚོ་རྒྱལ་གྱི་ཕྲིན་ལས་ཀྱི་སྤྲུལ་པ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་ལུང་རིག་གླིང་པ་རྩལ་ཞེས་མཚན་སྙན་ལྷ་ཡི་རོལ་མོ་ཕྱོགས་བཅུར་གྲགས་པ་དེ་ཉིད་ཀྱི་ཐུགས་བརྒྱུད་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱུང་བ། དམ་ཆོས་ཡང་ཟབ་པདྨའི་ཐུགས་ཐིག་གི་ཆ་ལག་ཏུ་བརྗོད་པ་ཡི་གེའི་རིས་སུ་ཕབ་ནས། བོད་གངས་ཅན་ལྗོངས་ཀྱི་འགྲོ་བ་དཔག་ཏུ་མེད་པ་རང་སྐལ་དང་འཚམས་པར་ཐར་པ་དང་ཐམས་ཅད་མཁྱེན་པའི་ལམ་ལ་འགོད་པར་མཛད་ཅིང་། དེ་ནས་བཟུང་ད་ལྟའི་བདག་ཅག་གི་རྩ་བའི་བླ་མའི་བར་གྱི་རྩ་བ་དང་ཡན་ལག་གི་ཆོས་བདག་བརྒྱུད་པར་བཅས་པ་རྣམས་ཀྱིས་གཞན་དོན་གྱི་ཕྲིན་ལས་རླབ་པོ་ཆེ་མཛད་པའི་གཙོ་བོར་ཟབ་ཆོས་འདི་ཉིད་ཁོ་ན་ཐུགས་ཉམས་སུ་བཞེས་ཤིང་ཕྱག་ལེན་དུ་མཛད་པ་ཡིན། དེ་ལྟ་བུའི་ཟབ་ལམ་འཕོ་བའི་གདམས་པ་དེ་ཉིད་ཉམས་སུ་ལེན་པ་ལ། ཐོག་མར་རང་རྒྱུད་ཀྱི་ལས་ཉོན་བག་ཆགས་ལྷག་མེད་དུ་སྦྱངས་ཤིང་ཚོགས་གསོག་པའི་ཕྱིར་ཡིད་གཞན་དུ་མ་གཡེང་བར་སངས་རྒྱས་དང་བྱང་ཆུབ་སེམས་དཔའ་རྣམས་ལ་སྒོ་གསུམ་དད་པ་ཆིག་དྲིལ་གྱིས་ཕྱག་འཚལ་བའི་མོས་པ་བརྟན་པོ་མཛོད་ཅིག་བྱས་ལ། འཁོར་བར་མི་གཏོང་ཕྱིར་ར་མདའ་སྦྲན་པའི་བློས་མོས་གུས་དང་སྙིང་རྗེ་དྲག་པོ་ཟུང་དུ་འབྲེལ་བས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གདོད་མའི་མགོན་པོ་ཀུན་ཏུ་བཟང་པོ་རིགས་བརྒྱ་ཞི་ཁྲོའི་ལྷ་ཚོགས་དང་བཅས་པ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་རིག་པ་རྣམ་པར་སྣང་མཛད་རིགས་ལྔ་གངས་ཆེན་མཚོ་རྒྱལ་བ་རྒྱ་མཚོ་དང་བཅས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་འཕགས་དྲན་པ་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱི་ཕུད་སྟོང་གི་འཇིག་རྟེན་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚངས་པ་སྟོང་གི་ཡེ་སྲིད་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མ་སྟོང་གི་རྒྱལ་བ་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་སྟོང་གི་མུ་ཁྱུད་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲྭ་བ་མགོན་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཁྱེའུ་སྣང་བ་བསམ་གྱིས་མི་ཁྱབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཁྱེའུ་འོད་མི་འཁྲུགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་འཇམ་དཔལ་འཇིགས་སྐྱོབས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གཞོན་ནུ་རོལ་བ་རྣམ་པར་བརྩེ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གཞོན་ནུ་དཔའ་བོ་སྟོབས་དང་ལྡན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་དྲང་སྲོང་ཁྲོས་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་བརྩེ་བས་རོལ་བའི་བློ་གྲོས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གསེར་འོད་དམ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་འོད་སྲུང་བགྲེས་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་མངོན་རྫོགས་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཤཱཀྱ་ཐུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པ་མངོན་པར་མཁྱེན་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻཌཱུརྱའི་འོད་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ཡོན་ཏན་ཐམས་ཅད་འབྱུང་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྡོ་རྗེ་སེམས་དཔའ་མི་བསྐྱོད་མི་འཁྲུགས་མི་བསྒུལ་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྣང་མཐའ་ཡས་ཚེ་དང་ཡེ་ཤེས་དཔག་ཏུ་མེད་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་རྣམ་སེལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་མགོན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ སྔ་རབས་འདས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ད་ལྟར་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཕྱི་རབས་འབྱོན་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །སངས་རྒྱས་དང་བྱང་ཆུབ་སེམས་དཔའ་གང་གའི་ཀླུང་གི་བྱེ་མ་སྙེད་ཀྱི་གྲངས་དང་ངེས་པར་མཉམ་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ ཁྱེད་རྣམས་ལ་ཐུགས་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབས་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། བདག་སོགས་ནམ་མཁའི་མཐའ་དང་མཉམ་པའི་སེམས་ཅན་དང་། ཁྱད་པར་དམིགས་ཡུལ་ཚེ་ལས་འདས་པ་འདི་ཉིད་ཀྱི་མདུན་ནས་བསུ་མ་མཛད་དུ་གསོལ། རྒྱབ་ནས་སྐྱེལ་མ་མཛད་དུ་གསོལ། འཇིགས་པའི་མུན་ནག་ཆེན་པོ་ལ་ཡེ་ཤེས་ཀྱི་སྒྲོན་མེ་སྦར་བར་མཛད་དུ་གསོལ། ལས་ཀྱི་རླུང་དམར་དྲག་པོ་ཐུགས་རྗེའི་ཤུགས་ཀྱིས་བཟློག་པར་མཛད་དུ་གསོལ། གཡང་ས་ཆེན་པོ་བདེ་བའི་ལམ་ལ་བསྒྱུར་བར་མཛད་དུ་གསོལ། གཤིན་རྗེ་དང་བར་དོའི་འགྲོ་བ་ཐམས་ཅད་སེམས་དཔའ་དང་སེམས་མའི་གྲོགས་སུ་བསྒྱུར་བར་མཛད་དུ་གསོལ། སྒྲ་འོད་ཟེར་གསུམ་གྱི་འཇིགས་སྐྲག་ཐམས་ཅད་རང་བྱུང་རིག་པའི་རང་རྩལ་དུ་ངོ་སྤྲོད་པར་མཛད་དུ་གསོལ། རིགས་བརྒྱ་ཞི་ཁྲོའི་ལྷ་ཚོགས་ཐམས་ཅད་སྐྱོབས་པའི་ལྷ་དང་ལྷ་མོར་སྟོན་པར་མཛད་དུ་གསོལ། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ཐར་བར་མཛད་དུ་གསོལ། རིགས་དྲུག་གི་སྐྱེ་སྒོ་ངན་པ་ཆོད་པར་མཛད་དུ་གསོལ། སྐུ་གསུམ་དག་པའི་ཞིང་ཁམས་རྣམས་སུ་འདྲེན་པར་མཛད་དུ་གསོལ། ཅེས་བརྗོད་ལ། དེ་ནས། ད་ནི་ཁྱོད་ལ་མྱུར་ལམ་ཟབ་མོ་འཕོ་བའི་གདམས་པ་དངོས་འདེབས་པའི་སྐབས་སུ་བབ་པ་ཡིན་ཞིང་། དེ་ཡང་ལུས་རྟེན་ཐ་མལ་དུ་འཕོ་ན་མི་ལེགས་པས་ལྷག་པའི་ལྷའི་སྒོམ་ལུང་ཞིག་འབོག་དགོས་པར་གསུངས་ཕྱིར་ཡིད་མ་ཡེངས་བར་དམིགས་པ་འདི་བཞིན་དུ་མཛོད་ཅིག ཨོཾ་སྭ་བྷ་ཝ༴སོགས། གཟུང་བ་དང་འཛིན་པས་བསྡུས་པའི་ཐ་མལ་གྱི་སྣང་ཞེན་ཐམས་ཅད་མི་དམིགས་པ་སྟོང་པ་ཉིད་དུ་གྱུར། སྟོང་པ་ཆེན་པོ་དེའི་ངང་ལས་སྐད་ཅིག་དྲན་རྫོགས་སུ། ཨེ་མ་ཧོ༔ ཁྱེད་རང་གནས་པའི་འཇིག་རྟེན་ཁམས་འདི་དག༔ སྡུག་བསྔལ་མིང་མེད་བདེ་བ་ཅན་གྱི་ཞིང་༔ སྨོན་ལམ་ཡོངས་རྫོགས་བཀོད་ལེགས་ཕོ་བྲང་དབུས༔ ཉོན་མོངས་སྐྱོན་བྲལ་པདྨ་ཟླ་བའི་སྟེང་༔ ཁྱོད་ལུས་གནས་འགྱུར་རྒྱལ་བ་ཀུན་གྱི་ཡུམ༔ སྒྲོལ་མ་དཔའ་མོ་མརྒད་ལྗང་གུའི་མདོག༔ ཞལ་གཅིག་བརྩེ་བའི་སྤྱན་དཀྱུས་འགྲོ་ལ་གཟིགས༔ ཕྱག་གཉིས་གཡས་པའི་མཆོག་སྦྱིན་པུས་སྟེང་སླེབས༔ གཡོན་པས་སྐྱབས་སྦྱིན་ཕྱག་རྒྱ་ཐུགས་ཀར་མཛད༔ ཨུཏྤལ་འདབ་སྟེང་བཻཌཱུར་སྤྱི་བླུགས་ནས༔ བདུད་རྩིའི་རྒྱུན་འབེབས་དམྱལ་བའི་མེ་མདག་གཞིལ༔ ལོངས་སྐུའི་རྒྱན་རྫོགས་མཉམ་པའི་སྟབས་ཀྱིས་བཞེངས༔ ལུས་དབུས་སྣང་སྟོང་འོད་ཀྱི་ཁང་པ་རུ༔ རྩ་གཞན་མི་དམིགས་དབུ་མ་ཀ་བའི་ཚུལ༔ ཕྱི་དཀར་ནང་དམར་ཐབས་ཤེས་ཟུང་དུ་འབྲེལ༔ མར་སྣ་ལྟེ་འོག་སོར་བཞིའི་ཐད་དུ་ཟླུམ༔ ངན་སོང་གསུམ་སོགས་འཁོར་བའི་སྐྱེ་སྒོ་གཅོད༔ ཡར་སྣ་དྲང་པོར་སྤྱི་གཙུག་ཚངས་པའི་སྒོ༔ སྐར་ཁུང་ཇི་བཞིན་དཀར་སེང་ཧ་རེ་སྒོམ༔ ཐུགས་ཀར་ཨུཏྤལ་སྔོན་པོ་འདབ་རྒྱས་སྟེང༔ རླུང་གི་དཀྱིལ་འཁོར་ལྗང་ཁུ་ཡངས་ཤིང་གཡོ༔ དེ་སྟེང་རང་སེམས་དྭངས་མ་ལྔ་ལྡན་གྱི༔ ཐིག་ལེ་མ་སར་བྱ་ཡི་སྒོ་ང་ལྟར༔ གསལ་ལ་འཚེར་བ་སྣུམ་ལ་འདྲིལ་བ་བསྒོམ༔ མིག་དང་རྣ་བ་ཁ་སྣ་འོག་སྒོ་གཉིས༔ ཏཱཾཿཡིག་ཁ་དོག་ལྔ་ལྡན་རེ་རེས་བཀག༔ སྤྱི་བོར་པདྨ་དམར་པོ་འདབ་བརྒྱད་སྟེང་༔ ཟླ་བའི་གདན་ལ་སྐྱབས་གནས་ཀུན་འདུས་པ༔ རྩ་བའི་བླ་མ་མགོན་པོ་འོད་དཔག་མེད༔ དམར་གསལ་བྱུ་རུར་ཉི་འོད་འཁྱུད་བཞིན་མཛེས༔ མཚན་དཔེ་ཡོངས་རྫོགས་རྡོ་རྗེའི་སྐྱིལ་ཀྲུང་བཞུགས༔ ཆོས་གོས་གསོལ་ཞིང་མཉམ་བཞག་ལྷུང་བཟེད་འཛིན༔ འཛུམ་པའི་སྤྱན་དཀྱུས་འགྲོ་བ་ཀུན་ལ་གཟིགས༔ གཡས་གཡོན་སྤྱན་རས་གཟིགས་དང་མཐུ་ཆེན་ཐོབ༔ སངས་རྒྱས་བྱང་སེམས་རྩ་བརྒྱུད་བླ་མས་བསྐོར༔ མཐོང་ཐོས་དྲན་རེག་འགྲོ་བ་མ་ལུས་པ༔ སྒྲོལ་བའི་དེད་དཔོན་ཆེན་པོར་བཞུགས་པར་དམིགས༔ སྤྲོ་ན་འོད་དཔག་མེད་ཀྱི་མཚན་ཅི་ནུས་བརྗོད་ཅིང་། ཨེ་མ་ཧོ༔ རྣམ་གྲོལ་བདེ་ཆེན་དག་པའི་ཞིང་ཁམས་ནས༔ རྒྱལ་ཀུན་སྤྱི་གཟུགས་འདྲེན་པ་འོད་དཔག་མེད༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ ལྷུན་གྲུབ་འོད་གསལ་རི་བོ་ཏ་ལ་ནས༔ སྙིང་རྗེའི་གཏེར་མཛོད་འཕགས་པ་སྤྱན་རས་གཟིགས༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ རང་སྣང་རྣམ་དག་གཡུ་ལོ་བཀོད་པ་ནས༔ འཁོར་བའི་འཇིགས་སྒྲོལ་རྗེ་བཙུན་འཕགས་མ་ཡུམ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ རྔ་ཡབ་དཔལ་རི་སྤྲུལ་པའི་ཕོ་བྲང་ནས༔ སྐྱབས་ཀུན་འདུས་པ་ཨོ་རྒྱན་ཐོད་ཕྲེང་རྩལ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ དགའ་བཞི་བདེ་སྟོང་མཁའ་འགྲོའི་ཚོགས་ཁང་ན༔ མཁའ་སྤྱོད་གཙོ་མོ་ཡེ་ཤེས་མཚོ་རྒྱལ་རྗེ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ རྩ་ཐིག་རླུང་གསུམ་དག་པ་སྤྲུལ་པའི་གནས༔ གྲུབ་པའི་དབང་བསྒྱུར་རྗེ་འབངས་ཉི་ཤུ་ལྔ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ སྨོན་ལམ་དུས་བབས་ལས་ཀྱི་འཕྲོ་སད་པའི༔ སྤྲུལ་པའི་སྐུ་མཆོག་ལུང་རིག་གླིང་པ་ལ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ རྒྱལ་བའི་བསྟན་ལ་བྱ་བ་བྱེད་མཁས་པའི༔ ཆོས་བདག་སྐྱེས་ཆེན་རིག་པ་འཛིན་རྣམས་ལ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ ངེས་མེད་གཅིག་ཏུ་འདྲེས་པ་རྡོ་རྗེའི་སྤུན༔ ཐེག་གསུམ་བསྒྲུབ་ལ་བརྩོན་པ་དགེ་འདུན་སྡེ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ རིམ་གཉིས་མཐར་ཕྱིན་སྐུ་གསུམ་དཀྱིལ་འཁོར་ནས༔ དངོས་གྲུབ་འདོད་སྟེར་ཡི་དམ་དཀྱིལ་འཁོར་ལྷ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ ལེགས་ཉེས་སྟངས་འཛིན་མཁའ་སྤྱོད་ཕོ་བྲང་ནས༔ རྡོ་རྗེ་ཕག་མོ་མཁའ་འགྲོ་སྡེ་ལྔའི་ཚོགས༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ བཀའ་དང་དམ་ཚིག་གཉན་པོའི་ཕོ་བྲང་ནས༔ ཨེ་ཀ་ཛ་ཊི་བརྒྱུད་གསུམ་བསྲུང་མའི་ཚོགས༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ དེ་ལྟར་གསོལ་བ་བཏབ་པའི་བྱིན་རླབས་ཀྱིས༔ ལུས་རྟེན་མི་གཙང་སྒྱུ་མའི་མགྲོན་ཁང་ནས༔ སེམས་ཉིད་འཁྲུལ་མེད་རང་བྱུང་ཆོས་ཀྱི་སྐུ༔ མཐའ་བརྒྱད་བྲལ་བ་དབུ་མའི་ཀློང་ཡངས་ནས༔ འོད་གསལ་འདུས་མ་བྱས་པའི་གདངས་ཚད་ཀྱིས༔ སྐུ་གསུམ་བླ་མའི་ཐུགས་གར་འཕོ་བར་ཤོག༔ ཅེས་བརྗོད་ལ། འོག་རླུང་གྱེན་དུ་དྲངས་ཏེ་བསྡམས༔ བར་རླུང་བུམ་ཅན་ཐད་སོར་བརྒྱངས༔ སྟེང་རླུང་སྤྱི་གཙུག་མཁའ་ལ་འཕངས༔ མིག་ཀྱང་བར་སྣང་དབྱིངས་སུ་བལྟ༔ ཞེས་གསུངས་པ་ལྟར་རླུང་དང་མིག་གནད་གཅུན་ཏེ། ཚེ་འདས་ཀྱི་རིག་པ་སེམས་ཀྱི་ངོ་བོ་འོད་ཀྱི་ཐིག་ལེ་དེ་ཉིད་སྐར་མདའ་ཡར་བ་ལྟར་ཚངས་པའི་སྒོ་ནས་སངས་རྒྱས་འོད་དཔག་མེད་པའི་ཐུགས་ཀར་ཐིམ་པར་མོས་ཤིང་། ཧིཀ་གི་སྒྲ་གསུམ་ལྔ་བདུན་སོགས་བསྟུད་མར་བརྗོད་པས་སྤར་རོ། །ཡང་སངས་རྒྱས་འོད་དཔག་མེད་པའི་རྣམ་པ་གསལ། འོད་མཚན་དང་གསོལ་འདེབས་ཀྱིས་དགེ་རྩ་བསྐྱེད་པ། གཞན་དོན་བྱང་ཆུབ་སེམས་བསྐྱེད་པ། བསྔོ་སྨོན་དག་པས་རྒྱས་འདེབས་པ་སྟེ་བདེ་བ་ཅན་དུ་སྐྱེ་བའི་རྒྱུ་བཞི་པོ་ཡིད་ལ་བྱ་བ་དང་མ་བྲལ་བས། སངས་རྒྱས་འོད་དཔག་མེད་ལ་གསོལ་བ་འདེབས༔ འཕགས་མཆོག་ཐུགས་རྗེ་ཆེན་པོ་ལ་གསོལ་བ་འདེབས༔ རྗེ་བཙུན་འཕགས་མ་སྒྲོལ་མ་ལ་གསོལ་བ་འདེབས༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས༔ གྲུབ་ཆེན་རྗེ་འབངས་ཉེར་ལྔ་ལ་གསོལ་བ་འདེབས༔ འགྲོ་མགོན་ལུང་རིག་གླིང་པ་ལ་གསོལ་བ་འདེབས༔ འཁྲུལ་ཞིག་འགྱུར་མེད་བློ་གྲོས་ལ་གསོལ་བ་འདེབས༔ དྲིན་ཆེན་རྩ་བའི་བླ་མ་ལ་གསོལ་བ་འདེབས༔ ཟབ་ལམ་འཕོ་བ་འབྱོང་བར་བྱིན་གྱིས་རློབས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ མི་ལྡོག་བཙན་ས་ཟིན་པར་བྱིན་གྱིས་རློབས༔ ཅེས་གསོལ་འདེབས་བསྡུས་པ་དང་། གཞན་ཡང་། སངས་རྒྱས་འོད་དཔག་མེད་ལ་ཕྱག་འཚལ་ལོ༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ དྲིན་ཆེན་རྩ་བའི་བླ་མས་ཐུགས་རྗེས་ཟུངས༔ རྩ་བ་བརྒྱུད་པའི་བླ་མས་ལམ་སྣ་དྲོངས༔ ཟབ་ལམ་འཕོ་བ་འབྱོང་བར་བྱིན་གྱིས་རློབས༔ མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས༔ ཚེ་འདས་འདི་ནས་ཚེ་འཕོས་གྱུར་མ་ཐག༔ བདེ་བ་ཅན་དུ་སྐྱེ་བར་བྱིན་གྱིས་རློབས༔ ཅེས་འཇག་ཟུག་མའི་འཕོ་བ་བསྡུས་པ་དང་། ཨེ་མ་ཧོ། ཤིན་ཏུ་ངོ་མཚར་འོད་དཔག་མེད་མགོན་དང་། །ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ། །ཚེ་འདས་རྩེ་གཅིག་ཡིད་ཀྱིས་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །འཇིག་རྟེན་ཕྱི་མར་སོང་བའི་ཚེ་འདས་ཀྱི། །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །ཅེས་གནམ་ཆོས་འཕོ་ལུང་སོགས་ཅི་རིགས་བརྗོད་ཅིང་སོ་སོའི་མཐར། བདག་གིས་ཧིཀ་དང་ཕཊ་ཀྱི་སྒྲས་བསྐུལ་བས་སྙིང་གི་རིག་པ་སེམས་ཀྱི་ངོ་བོ་འོད་ཀྱི་ཐིག་ལེ་དེ་ཉིད་སྐར་མདའ་ཡར་བ་ལྟར་འོད་དཔག་མེད་ཀྱི་ཐུགས་ཀར་ཐིམ་པར་མོས་ལ། ཧིཀ་དང་ཕཊ་ཀྱི་སྒྲས་སྤར་བར་བྱའོ། །མཇུག་ཏུ། ཨེ་མ་ཧོ། །འཕགས་མ་འོད་ཞུ་སྤྱི་བོའི་གཙོ་ལ་ཐིམ། །དེ་ཉིད་འོད་ཀྱི་ལམ་ནས་རྫུ་འཕྲུལ་གྱིས། །བདེ་ཆེན་ཞིང་གི་གཙོ་དང་འཁོར་ལ་འདྲེས། །མཐའ་ཡས་འགྲོ་བ་འདྲེན་པའི་དཔལ་དུ་གྱུར། །ཕཊ༔ ཅེས་གནས་ལུགས་མ་བཅོས་པའི་ངང་དུ་བཞག་མཐར། བསྔོ་སྨོན་རྣམ་དག་བརྗོད་པར་བྱ་བ་ཁོ་ནའོ། །ཞེས་འགྲོ་མགོན་ལུང་རིག་གླིང་པའི་དགོངས་གཏེར་གྱི་འཕོ་ལུང་གཤིན་པོར་འདེབས་ཚུལ་འདི་ནི་དགེ་རྒན་འཇམ་དབྱངས་བློ་འཕེལ་གྱི་ངོར། མགོ་སྤྲུལ་པས་སོ། །