ཞི་ཁྲོའི་དབང་གི་མཚམས་སྦྱོར་མདོར་བསྡུས།
༄༅། ཞི་ཁྲོའི་དབང་གི་མཚམས་སྦྱོར་མདོར་བསྡུས་བཞུགས། འོ་སྐལ་ལྡན་རིགས་ཀྱི་བུ་མ་ཡེངས་བར་ཉོན་ཅིག དེ་ཡང་སྔོན་ཚེ་མོའུ་གལ་མ་ཞེས་བྱ་བ་འདོད་སྲེད་དང་ཕྲག་ཏོག་གི་དབང་གིས་ལས་ངན་གྱི་རྒྱུ་མང་པོ་བསགས་པས་དམྱལ་བར་སྐྱེས་སྒྲིབ་སྦྱང་གི་ཆོ་གས་གྲོལ་བ་དང་། བར་དུ་རྒྱལ་བུ་དགེ་སྦྱོང་ཞེས་བྱ་བ་བྲམ་ཟེ་དུང་གི་ཕྲེང་བ་ཅན་ནམ་མིའི་ཐོད་པ་ཅན་ལས་རིག་པའི་གནས་ཐམས་ཅད་བསླབས་ནས་མཁས་པར་སོང་ཚེ་འགྲན་སེམས་དང་ཕྲག་ཏོག་གི་བསམ་སྤྱོད་ཀྱིས་སློབ་དཔོན་མྱོས་བྱེད་ཀྱིས་ར་རོ་བར་བྱས་ཏེ་རྔན་བསད་བྱས་པས་སེམས་ཅན་ལུས་སྲུལ་པོ་རིགས་དྲུག་གི་སྡུག་བསྔལ་དུས་གཅིག་ཏུ་མྱོང་བ་ཞིག་ཏུ་གྱུར་པ་དང་། སློབ་དཔོན་ཡང་བྱང་ཆུབ་ཀྱི་སེམས་ཉམས་ཤིང་སྨོན་ལམ་ལོག་པས་ངན་སོང་དུ་སྐྱེས་པ་ཡང་ཞི་ཁྲོའི་ལྷ་ཚོགས་ཀྱི་མཚན་བསྒྲགས་ཤིང་ཕྱག་འཚལ་དུ་བཅུག་པས་དམ་ཚིག་ཉམས་པ་སོར་ཆུད་ནས་རིག་འཛིན་གྱི་སར་བཀོད་པ་དང་། ཐ་མ་མཁའ་འགྲོ་མཚོ་རྒྱལ་གྱིས་ཆོས་བྱས་པ་ལ་བདུད་བློན་ཤནྟ་ཞེས་བྱ་བས་ཆད་པ་མང་པོ་བཅད་པའི་རྣམ་སྨིན་གྱིས་མནར་མེད་དུ་སྐྱེས་པ་འདྲེན་ཕྱིར་མཚོ་རྒྱལ་བྱོན་ཚེ་ལྕགས་སྲེག་གི་ཁང་པའི་སྒོ་ཕྱེ་མ་ནུས་པ་ལ་ལས་མཁན་རྣམས་ཀྱིསཞི་ཁྲོའི་ཆོ་ག་མ་གཏོགས་ཐར་ཐབས་མེད་པར་སྨྲས་པས་ཞི་ཁྲོའི་ཆོ་ག་མཛད་པས་ལྕགས་སྲེག་གི་ཁང་པ་རང་ཞིག་ལ་སོང་ནས་བློན་པོ་ཤནྟ་སོགས་སེམས་ཅན་འབུམ་ཚོ་ལྔ་དྲངས་པ་ལྟར། ཞི་ཁྲོའི་ལྷ་ཚོགས་ཀྱི་མཚན་འདི་རྣམས་མཚམས་མེད་པ་ལྔ་བསགས་པའི་མིའི་རྣ་ལམ་དུ་ལན་གཅིག་ཐོས་པས་ཀྱང་ན་རཀ་ཆེན་པོར་མི་ལྟུང་ངེས་པར་མྱུར་དུ་གྲོལ་བའི་ཚུལ་ནི། འགྱོད་ཚངས་ཀྱི་རྒྱལ་པོ་འབྱུང་ཁུངས་ཀྱི་རྒྱུད་ལས། ཞི་བའི་ལྷ་ཚོགས་བུདྡྷ་བཞི་བཅུ་རྩ་གཉིས་ཀྱི་མཚན་བརྗོད་པས་མཚམས་མེད་པ་ལྔ་དང་སྡིག་པ་ལྕི་བ་ཐམས་ཅད་བྱང་བར་འགྱུར་རོ། །ཁྲག་འཐུང་གི་ལྷ་ཚོགས་དྲུག་ཅུའི་མཚན་བརྗོད་ཅིང་ཕྱག་འཚལ་བས་སྡིག་སྒྲིབ་ཐམས་ཅད་བྱང་བར་འགྱུར་རོ། །ཞེས་དང་། སྒྱུ་འཕྲུལ་ཞི་ཁྲོའི་རྒྱུད་གསང་བ་སྙིང་པོ་ལས། གང་གིས་རྒྱལ་བ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆགས་མ་ལུས་ཀུན་བྱང་ནས། །མཚམས་མེད་ལྔ་ལ་སྨོས་ཅི་དགོས། །ན་རཀ་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། ཞེས་དང་། དྲི་མེད་རྒྱལ་པོ་བཤགས་པའི་རྒྱུད་ལས། གལ་ཏེ་རྣལ་འབྱོར་བ་གང་ཞིག་གིས་དཀྱིལ་འཁོར་གྱི་ལྷ་འདི་རྣམས་ཀྱི་མཚན་རྣ་བར་ལན་གཅིག་ཐོས་པ་ཙམ་གྱིས་ཀྱང་ན་རཀ་ཆེན་པོར་མི་ལྟུང་ངོ་། །དེ་བས་གུས་པས་ཕྱག་འཚལ་ལོ། །ཞེས་དང་། རང་བཞིན་སྒྱུ་འཕྲུལ་དཀྱིལ་འཁོར་ལ། །གང་གིས་གུས་པས་ཕྱག་འཚལ་ན། །ཉམས་ཆགས་ཀུན་ཀྱང་བྱང་བར་འགྱུར། །དམ་ཚིག་སྐོངས་ནས་དངོས་གྲུབ་འཐོབ། ཅེས་སོགས་གསུངས་པའི་དོན་དེར་དགའ་སྤྲོ་གྱིས་ལ་ཁྱེད་རང་རིགས་དྲུག་གི་གནས་ནས་དྲངས་བའི་ཆེད་དུ་འདིའི་རྗེས་ཟློས་མཛོད། ཀྱཻ་མ་མགོན་པོ༴སོགས། ༈ དེ་ནས་ཆས་སུ་གཞུག་པ་ནི། ཁྱེད་རང་རྣམས་སྔོན་ཆད་གཉིས་འཛིན་གྱི་ཞེན་རྟོག་འཐུག་པོས་འཐིབ་ཏེ་གསང་བ་སྔགས་ཀྱི་དཀྱིལ་འཁོར་མཇལ་མ་མྱོང་བའམ། གལ་ཏེ་མྱོང་ནའང་དཀྱིལ་འཁོར་སོ་མ་འདི་ཉིད་མཇལ་མ་མྱོང་བའི་མཚོན་བྱེད་དུ་དར་ཡུག་དམར་པོ་རེས་གདོང་གཡོག་བཅིང་བའི་མོས་པ་མཛོད། ཨོཾ་ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱ། དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་པར་མཇལ་དུ་མི་རུང་བས། ཕྱག་རྟེན་གྱི་སླད་དུ་ཨུ་དུམ་ཝ་ར་ལ་སོགས་པའི་མེ་ཏོག་གི་ཕྲེང་བ་ཁ་ཏོག་ལྔ་བ་རེ་བྱིན་པའི་མོས་པ་མཛོད་ལ། ཨོཾ་ཨ་ཁཾ་ཝི་ར་ཧཱུྃ། གཞུང་གང་ཡིན་གྱི་ཚིག་བརྗོད། དེ་ནས་རིགས་བརྟགས་པའི་ཕྱིར་མེ་ཏོག་དོར་བ་ནི། མདུན་འདི་ན་བཞུགས་པའི་སྒྱུ་འཕྲུལ་ཞི་ཁྲོ་རབ་འབྱམས་ཀྱི་ལྷ་ཚོགས་གཙོ་དང་འཁོར་གྱི་རྣམ་པར་བཞུགས་པ་ཡེ་ཤེས་གཅིག་གི་རོལ་པ་ལ་མཆོག་དམན་དང་བཟང་ངན་མ་མཆིས་མོད། འོན་ཀྱང་རང་རང་གི་སྔོན་གྱི་ལས་འབྲེལ་ཡོད་པའི་ལྷ་ཞིག་ལ་འབབ་པར་ཤོག་ཅིག་སྙམས་པས་ཚིག་འདིའི་རྗེས་ཟློས་དང་བཅས་ཏེ་དོར་བར་མཛོད། ཧོ། བདག་ཅག་རིག་པའི༴སོགས། དེ་ལྟར་མེ་ཏོག་གང་ལ་བབས་པའི་རིགས་དང་མཐུན་པའི་མིང་བཏགས་པ་ཡིན་དེ། དབུས་སུ་བབས་ན་ཆོས་དབྱིངས་རང་གྲོལ། ཤར་དུ་བབས་ན་འགྱུར་མེད་རྡོ་རྗེ། དེ་བཞིན་དུ་ལྷོར་རིན་ཆེན་རྒྱལ་པོ། ནུབ་ཏུ་པདྨ་བཞད་པ། བྱང་དུ་ཀརྨ་དོན་ཡོད། མཚམས་བཞིར་སྣ་ཚོགས་རང་གྲོལ། མོ་རིགས་རྣམས་ལ་དབུས་སུ་ཆོས་དབྱིངས་དཔའ་མོ། དེ་བཞིན་དེ་བཞིན་དུ་རྡོ་རྗེ་སྤྱན་མ། རིན་ཆེན་སྒེག་མོ། བདེ་ཆེན་དབང་མོ། ལས་རབ་སྒྲོལ་མ། ལྷག་བསམ་བཟང་མོ་ལ་སོགས་པ་རྣམས་དབང་གི་གསང་མཚན་ཡིན་པས་འཛིན་པར་ཞུ།