གསང་བདག་རྡོ་རྗེ་གཏུམ་པོའི་སྒྲོལ་བ་དྲག་པོའི་ལས་རིམ།

༄༅། གསང་བདག་རྡོ་རྗེ་གཏུམ་པོའི་སྒྲོལ་བ་དྲག་པོའི་ལས་རིམ་ཁྲིགས་སུ་བསྡེབས་པ་ཁྲོ་རྒྱལ་སྟོབས་འདུས་ཞེས་བྱ་བ་བཞུགས་སོ།།

༄༅། ཨོཾ་སྭ་སྟི། རབ་འབྱམས་རྒྱལ་བ་མ་ལུས་པའི། །མཐུ་སྟོབས་ནུས་བྱིན་འདུས་པའི་དཔལ། །གསང་བ་ཀུན་བདག་དཔའ་བོ་ཆེར། །མི་ལྡོག་དད་པས་ལེགས་བཏུད་ནས། །ལུང་རིག་གླིང་པའི་དགོངས་མཛོད་ལས། །ལེགས་འོང་གསང་འཛིན་སྒྲུབ་ཐབས་ཀྱི། །སྒྲོལ་བ་དྲག་པོའི་ལས་རིམ་རྣམས། །ལེགས་བཤད་རྣམས་ནས་བསྡུས་ཏེ་འབྲི། །དེ་ལ་འདིར་གཏུམ་པོའི་ཐུགས་སྒྲུབ་ལ་བརྟེན་ནས་དྲག་པོའི་ཕྲིན་ལས་ལ་འཇུག་པར་འདོད་པས། དབང་ཐོབ་བསྙེན་བསྒྲུབ་ཐེམས་ཤིང་དམ་ཚིག་དང་ལྡན་པས་ཚུལ་འདི་ལྟར་འཇུག་པར་བྱ་སྟེ། དེ་ཡང་ཡོ་བྱད་ཀྱི་བཤམས་ཚུལ་དང་། ཆོ་ག་དངོས་གཉིས་ལས། དང་པོ་ནི། དྲག་པོའི་ལས་དང་མཐུན་པའི་གནས་སུ། ལྕགས་སླང་སོགས་དྲག་པོར་འོས་པའི་སྣོད་གས་ཆག་མེད་པར་སྲིད་པའི་བྱེ་མའམ། ས་གཙང་མས་ལེགས་པར་བཀང་ཞིང་འདག་འཇལ་བྱས་པ་ལ་རོ་སོལ་གྱིས་བྱུགས་པའི་སྟེང་། མ་ཊཾ་རྒྱས་པའམ་ཆོས་འབྱུང་མཐིང་ནག་ནྲྀ་ཏྲིས་མཚན་པ་ཐོད་ར་དང་མེ་རི་བྲིས་པའི་སྟེང་དུ་འབྲུ་ནག་གི་བག་ཕྱེ་ཞིབ་པར་བཏག་པ་ལས། དབུས་སུ་དམར་གཏོར་གྲུ་གང་བ་ཞལ་དང་མེ་རིས་མཛེས་པ་བྱ། དེའི་མཐའ་སྐོར་དུ་དམར་གཏོར་ཆུང་ངུ་བཞི་དང་། དེ་མཐར་བཅུ་དང་། དེའི་ཕྱོགས་བཞིར་བཞི་སྟེ་ལྷ་གྲངས་ཀྱིས་བསྐོར། ཁྲག་ཕོར་སྐྱུ་གུ་མཚེ་ཡུངས་རྩང་སོགས་དང་། སྐུ་རྟེན་གྱི་ཙཀ་ལི། དར་རས་ནག་པོའི་ལྡིང་གུར་གྱིས་བརྒྱན་པ་བཤམས། དེ་མཐར་ཁྲག་གི་མཆོད་ཡོན་དང་ཞབས་བསིལ། དབང་པོ་ལྔའི་མེ་ཏོག ཚིལ་ཆེན་གྱི་བདུག་སྤོས། ཞུན་ཆེན་གྱི་མར་མེ། མཁྲིས་པའི་དྲི་ཆབ། ཤ་རུས་ཀྱི་ཞལ་ཟས། རྐང་གླིང་དང་ཐོད་པའི་རོལ་མོ་རྣམས་ཀྱིས་གཡོན་དུ་བསྐོར་ཞིང་། གཞན་ཡང་ཇི་ལྟར་བདེ་བའི་སྟེགས་ཀྱི་ཁར་རྩ་གསུམ་བསྲུང་མར་བཅས་པའི་གཏོར་ཚོགས་སྨན་རཀ་ཉེར་སྤྱོད་དང་བཅས་པ་རང་གཞུང་གི་བཅའ་ཤོམ་སྤྱི་དང་། བྲུབ་ཁུང་ལིང་ཀ་ཅན་དང་། ཕུར་བ་ཐུན་རྫས་སོགས་འོག་ཏུ་དགོས་པའི་ཡོ་བྱད་ཐམས་ཅད་ཚོགས་པར་བྱའོ། །གཉིས་པ་ཆོ་ག་དངོས་ལ། སྦྱོར་བ་དངོས་གཞི། རྗེས་དང་གསུམ། དང་པོ་སྦྱོར་བའི་རིམ་པ་ནི། བླ་མ་བརྒྱུད་པའི་གསོལ་འདེབས་ནས་མཆོད་རྫས་བྱིན་གྱིས་བརླབས་པའི་བར་རོ། །གཉིས་པ་དངོས་གཞི་ལ་སྒྲུབ་པའི་ལས་རིམ་དང་། ལས་ལ་སྦྱོར་བ་གཉིས་ལས། དང་པོ་ལ་བདག་བསྐྱེད་ཏིང་འཛིན་རྣམ་གསུམ་ནས་སྤྱན་འདྲེན་ལ་ཐུག་གི་བར་དང་། མདུན་བསྐྱེད་ལ་དམིགས་ནས། ཨོཾ་སྭ་བྷ་ཝ་ཤུདྡྷ༴སོགས་ནས། ཤུདྡྷོ྅ཧཾ། ཆོས་ཐམས་ཅད་སྟོང་ཆེན་བློ་འདས་ཀ་དག་དོན་གྱི་དབྱིངས་སྤྲོས་པའི་མཐའ་བརྒྱད་དང་བྲལ་བར་གྱུར། །བཛྲ་མ་ཧཱ་ཀཱ་རུ་ཎི་ཀ་བོ་དྷི་ཙིཏྟ་ཛྙ་ན་ས་མ་ཏི་ཨཱ༔ ཞེས་བརྗོད་པས། ངོ་བོ་སྐྱེ་འགགས་མཐའ་དབུས་དང་བྲལ་བ་སྟོང་ཆེན་གཉུག་མའི་མཁའ་དབྱིངས་ལ། རང་བཞིན་དམིགས་པ་མེད་པའི་སྙིང་རྗེ་ཆེན་པོས་ཕྱོགས་དང་རིས་མེད་པར་སྙོམས་པར་བརྡལ་བར་གྱུར། མ་ཧཱ་ཙིཏྟ་བཛྲ་ཛྙཱ་ན་ཨེ་ཀ་ཏི་ལ་ས་མ་ཡཱ་ཧཱུྃ༔ རྣམ་པ་ཀུན་ལྡན་གྱི་སྟོང་པ་ཉིད་དང་མཆོག་ཏུ་མི་འགྱུར་བའི་བདེ་བ་ཆེན་པོ་ཟུང་དུ་འཇུག་པའི་རང་མདངས་ལས། རང་བྱུང་རིག་པའི་ངོ་བོ་ཧཱུྃ་ཡིག་སྔོན་པོ་ཡེ་ཤེས་ལྔའི་བདག་ཉིད་ཅན་གསལ་ལ་འཚེར་བ་ནམ་མཁའི་ཁམས་སུ་གནས་པར་གྱུར། དེ་ལས་ཨེཿཡཾཿརཾཿརཿསུཾཿཀེཾཿརྣམས་རིམ་པར་སྤྲོས་པ་སོ་སོར་ཡོངས་སུ་གྱུར་པ་ལས། ཨེཿལས་ནམ་མཁའི་དཀྱིལ་འཁོར་མཐིང་ནག་མཐའ་དབུས་མེད་པ། ཡཾཿལས་རླུང་གི་དཀྱིལ་འཁོར་ནག་པོ་སྲ་ཞིང་འཐས་པ། རཾ་ལས་མེའི་དཀྱིལ་འཁོར་དམར་པོ་ཚ་ཟེར་འབར་བ། རཿལས་རཀྟའི་རྒྱ་མཚོ་རྦ་ཀློང་འཁྱིལ་བ། སུཾ་ལས་བམ་ཆེན་གསར་རྙིང་གི་ས་གཞི་སྙོམ་པར་བརྡལ་བ་རྣམས་རིམ་པར་བརྩེགས་པ། དེའི་སྟེང་དུ་ཀེཾ་ལས་རུས་པའི་རི་རབ་གྲུ་བཞི་པ་རྒྱ་ཁྱོན་ཆོས་ཀྱི་དབྱིངས་དང་མཉམ་པའི་སྟེང་དུ། ཧཱུྃ་ལས་སླར་ཡང་པཾ་འཕྲོས་ལས་པདྨ་འདབ་མ་སྟོང་ལྡན་གྱི་དབུས་སུ་སྣ་ཚོགས་རྡོ་རྗེའི་ལྟེ་བར་བྷྲུཾཿའཕྲོས་པ་ལས་གནས་མཆོག་ལྗང་ལོ་ཅན་གྱི་ཕོ་བྲང་ཆེན་པོ་ཡངས་ཤིང་རྒྱ་ཆེ་ལ་དཔང་མཐོ་བ། ཕྱི་རིན་པོ་ཆེ་སྣ་ཚོགས་ཀྱི་གཞལ་ཡས་ཁང་གྲུ་བཞི་སྒོ་བཞི་པ། རྒྱན་རྟ་བབས་ཆོས་འཁོར་རི་དྭགས་གདུགས་དང་རྒྱལ་མཚན་ཉི་ཟླ་ནོར་བུའི་ཏོག་ལ་སོགས་པའི་མཚན་ཉིད་ཐམས་ཅད་ཡོངས་སུ་རྫོགས་པ། ནང་དུར་ཁྲོད་འབར་བའི་གཞལ་ཡས་ཁང་ཆེན་པོ་ཐོད་པ་སྐམ་རློན་གྱི་རྩིགས་པ་ལ་གནམ་ལྕགས་ཀྱི་གཟེར་ཆེན་བཏབ་པ། རུས་སྦལ་གྱི་ཀ་གདན། ལྷ་བརྒྱད་ཀྱི་ཀ་བ། ཀླུ་བརྒྱད་ཀྱི་གདུང་མ། གཟའ་བརྒྱད་ཀྱི་ཀ་ཞུ། རྒྱུ་སྐར་ཉེར་བརྒྱད་ཀྱི་དྲལ་ཕྱམ། ཞིང་ཆེན་གྱི་ཐོག་ཕེབ། ཐོད་སྐམ་ཀྱི་ཁ་པད། མི་རོའི་རྒྱལ་མཚན། ཀེང་རུས་ཀྱི་འཕན་གདུགས། རྒྱུ་མའི་དྲྭ་བ་དང་དྲྭ་ཕྱེད། ཙིཏྟའི་ཕོ་ལུང་། རྡོ་རྗེའི་ཡ་ཐེམ་དང་མ་ཐེམ། གནམ་ལྕགས་འབར་བའི་སྒོ་ལེབ། ཉི་ཟླའི་ཡག་ཤིང་། རྡོ་རྗེ་སྔོན་པོའི་ཏོག་དང་བཅས་པའི་ནང་དབུས་སུ། གནམ་ལྕགས་ཀྱི་འཁོར་ལོ་རྩིབས་བཅུ་པའི་ལྟེ་བར་སླར་ཡང་རྡོ་རྗེའི་རང་བཞིན་འཁོར་ལོ་སྔོན་པོ་རྩིབས་བཞི་པ། དེའི་ལྟེ་བར་མཐིང་ནག་གྲུ་གསུམ་འབར་བའི་དབུས་སུ། པཾ་ལས་པདྨ་དང་། ཨ་ལས་ཟླ་བ། མ་ལས་ཉི་མའི་དཀྱིལ་འཁོར་རྣམས་རིམ་པར་བརྩེགས་པའི་གདན་ལ། དྲེགས་པ་ཕོ་མོ་བསྣོལ་བའི་སྟེང་དུ་ནམ་མཁར་གནས་པའི་ཧཱུྃ་ཡིག་དེ་ཉིད། ཨོཾ་བཛྲ་པཱ་ཎི་ཙཎྚ་མ་ཧཱ་རོ་ཥ་ཎ་ཧཱུྃ་ཧཱུྃ་ཕཊཿཅེས་སྔགས་ཀྱི་སྒྲ་གདངས་དང་བཅས་ཏེ་བབས་པ་ལས་རྡོ་རྗེ་སྔོན་པོ་རྩེ་ལྔ་པ་ཧཱུྃ་གིས་མཚན་པར་གྱུར། དེ་ལས་འོད་ཟེར་དཔག་ཏུ་མེད་པ་འཕྲོས། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་མཆོད་ཅིང་ཐུགས་དམ་གྱི་རྒྱུད་བསྐུལ། མཐུ་སྟོབས་ནུས་བྱིན་མ་ལུས་པ་འོད་ཟེར་སྔོན་པོའི་རྣམ་པར་བསྡུས་ཏེ་ཧཱུྃ་ལ་ཐིམ། སླར་ཡང་འོད་ཟེར་དང་ཁྲོ་མཚོན་མེ་དཔུང་གི་ཚོགས་བསམ་གྱིས་མི་ཁྱབ་པ་འཕྲོས། དངོས་གྲུབ་ལ་བར་དུ་གཅོད་པའི་དགྲ་བགེགས་ཐམས་ཅད་ཚར་བཅད། སེམས་ཅན་མ་ལུས་པའི་སྡིག་སྒྲིབ་སྦྱངས། ཐམས་ཅད་གསང་བའི་བདག་པོའི་གོ་འཕང་ལ་བཀོད། འོད་ཟེར་ཚུར་འདུས་རྡོ་རྗེ་ཧཱུྃ་དང་བཅས་པ་ལ་ཐིམ། དེ་ཡོངས་སུ་གྱུར་པ་ལས། ཕྱོགས་བཅུ་དུས་གསུམ་གྱི་རྒྱལ་བ་སྲས་བཅས་མ་ལུས་པའི་མཐུ་སྟོབས་གཅིག་ཏུ་བསྡུས་པའི་བདག་ཉིད་བཅོམ་ལྡན་འདས་གསང་བའི་བདག་པོ་ཕྱག་ན་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ། སྨ་ར་དང་སྨིན་མ་དུས་མཐའི་མེ་ལྟར་འབར་ཞིང་། དབུ་སྐྲ་ཁམ་སེར་གྱེན་དུ་བརྫེས་ཤིང་སྦྲུལ་གྱིས་བཅིངས་པ། རིགས་བདག་མི་བསྐྱོད་པ་སྔོན་པོ་ལོངས་སྐུའི་ཆ་བྱད་ཅན་གྱིས་དབུ་ལ་བརྒྱན་པ། ཕྱག་གཡས་གནམ་ལྕགས་ཀྱི་རྡོ་རྗེ་རྩེ་དགུ་པ་ནམ་མཁའ་ལ་ཕྱར་ཞིང་། གཡོན་པས་སྡིག་མཛུབ་ཀྱིས་ལོག་འདྲེན་དུག་སྦྲུལ་གྱི་གཟུགས་བཟུང་ནས་ཞལ་དུ་གསོལ་བ། སྒེག་པ་ལ་སོགས་པ་འབར་བའི་གར་དགུ་དང་ལྡན་པ། ཁྲག་གི་ཐིག་ལེ། ཞག་གི་ཟོ་རིས། ཐལ་ཆེན་གྱི་ཚོམ་བུ། གླང་ཆེན་གྱི་ཀོ་རློན། སྟག་ལྤགས་ཀྱི་ཤམས་ཐབས། ཞིང་ལྤགས་ཀྱི་སྐེད་དཀྲིས། ཐོད་སྐམ་གྱི་དབུ་རྒྱན། ཐོད་རློན་གྱི་དོ་ཤལ། སྦྲུལ་རིགས་ལྔའི་ཡན་ལག་གི་རྒྱན་སོགས་ཤིན་ཏུ་འཇིགས་པའི་ཆས་ཐམས་ཅད་ཀྱིས་བརྒྱན་ཅིང་། ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་ན་ཞབས་གཉིས་གཡས་བསྐུམ་པའི་སྟབས་ཀྱིས་བཞུགས་པ། ཁམས་གསུམ་སྲིད་པ་གསུམ་ལས་རྣམ་པར་རྒྱལ་བ། འཇིག་རྟེན་གསུམ་པོས་བལྟ་བར་ཡང་མི་བཟོད་པའི་སྐུ་ཅན་དུ་གྱུར། དེའི་སྤྱི་བོར་ཟླ་བ་ལ་གནས་པའི་ཨོཾ་ཡིག་དཀར་པོ་ལས་དུས་གསུམ་གྱི་རྒྱལ་བ་མ་ལུས་པའི་སྐུའི་སྤྲུལ་པ་བུདྡྷ་རིགས་ཀྱི་བྱ་ཁྱུང་དཀར་པོ། མགྲིན་པར་པདྨ་དམར་པོ་ཨཱཿས་མཚན་པ་ལས་གསུང་གི་སྤྲུལ་པ་པདྨ་རིགས་ཀྱི་བྱ་ཁྱུང་དམར་པོ། ཐུགས་ཀར་རྡོ་རྗེ་སྔོན་པོ་ཧཱུྃ་གིས་མཚན་པ་ལས་ཐུགས་ཀྱི་སྤྲུལ་པ་རྡོ་རྗེ་རིགས་ཀྱི་བྱ་ཁྱུང་མཐིང་ནག ལྟེ་བར་རིན་པོ་ཆེ་སྭཱ་ཡིག་གིས་མཚན་པ་ལས་ཡོན་ཏན་གྱི་སྤྲུལ་པ་རིན་ཆེན་རིགས་ཀྱི་བྱ་ཁྱུང་སེར་པོ། གསང་བར་སྣ་ཚོགས་རྡོ་རྗེ་ཧས་མཚན་པ་ལས་ཕྲིན་ལས་ཀྱི་སྤྲུལ་པ་ལས་ཀྱི་རིགས་ཀྱི་བྱ་ཁྱུང་ལྗང་གུ། ཀུན་ཀྱང་གནམ་ལྕགས་རྡོ་རྗེའི་རྭ་དང་མཆུ་སྡེར་རྣོ་ཞིང་མེ་ཡི་ཚ་ཚྭ་འཕྲོ་བ། གཡས་རྣམས་འཁོར་ལོ། པདྨ། རྡོ་རྗེ། རིན་ཆེན། རལ་གྲི་རྣམས་བསྣམས་ཤིང་། གཡོན་རྣམས་ཀླུ་རིགས་ལྔའི་ངོ་བོ་སྦྲུལ་ཆེན་ལྔ་བཟུང་ནས་ཞལ་དུ་གསོལ་བ། སྐུ་ལས་རང་དང་འདྲ་བའི་བྱ་ཁྱུང་རིགས་ལྔ་གྲངས་མེད་འཕྲོ་ཞིང་དྲེགས་པ་མ་ལུས་འཇོམས་ཤིང་འཇིགས་པར་མཛད་པའོ། །དེའི་ཕྱི་རོལ་ཕྱོགས་བཞིར་འཁོར་ལོའི་རྩིབས་ལ་གཙོ་བོའི་ཐུགས་ཀ་ནས་ཧཱུྃ་ཡིག་དཀར་སེར་དམར་ལྗང་བཞི་འཕྲོས་པ་ཡོངས་སུ་གྱུར་པ་ལས། ཤར་དུ་རྡོ་རྗེ་གཏུམ་པོ། ལྷོར་རིན་ཆེན་གཏུམ་པོ། ནུབ་ཏུ་པདྨ་གཏུམ་པོ། བྱང་དུ་ཀརྨ་གཏུམ་པོ་རྣམས་ཕྱོགས་ཀྱི་མདོག་ཅན། ཞལ་གཅིག་ཕྱག་གཉིས་སྤྱན་གསུམ་པ། གཡས་རྣམས་རྡོ་རྗེ་རིན་ཆེན་པདྨ་རྒྱ་གྲམ། གཡོན་རྣམས་རང་རྟགས་ཀྱིས་ཡུ་བ་བྱས་པའི་དྲིལ་བུ་བསྣམས་པ། ཁྲོ་བོའི་རྒྱན་དང་ཆ་ལུགས་ཡོངས་སུ་རྫོགས་ཤིང་། ཡེ་ཤེས་ཀྱི་མེ་དཔུང་འབར་བའི་དབུས་ན། པད་ཉི་དྲེགས་པའི་གདན་ལ་ཞབས་གཉིས་གཡོན་བརྐྱང་བའི་སྟབས་ཀྱིས་བཞུགས་པའོ། དེའི་ཕྱི་རོལ་འཁོར་ལོ་རྩིབས་བཅུར་པད་ཉི་ཕྱོགས་སྐྱོང་ཕོ་མོ་བསྣོལ་བའི་གདན་ལ། གཙོ་བོའི་ཐུགས་ཀ་ནས་ཧཱུྃ་མཐིང་ནག་བཅུ་འཕྲོས་པ་སོ་སོར་ཡོངས་སུ་གྱུར་པ་ལས། ཤར་སྟོད་དུ་ཁྲོ་བོ་ཆེན་པོ་ཧཱུྃ་ཀ་ར། ཤར་སྨད་དུ་རྣམ་པར་རྒྱལ་བ། ཤར་ལྷོར་དབྱུག་སྔོན་ཅན། ལྷོར་གཤིན་རྗེ་གཤེད་པོ། ལྷོ་ནུབ་ཏུ་མི་གཡོ་མགོན་པོ། ནུབ་སྟོད་དུ་རྟ་མགྲིན། ནུབ་སྨད་དུ་སྟོབས་པོ་ཆེ་། ནུབ་བྱང་དུ་གཞན་གྱིས་མི་ཐུབ་པ། བྱང་དུ་བདུད་རྩི་འཁྱིལ་བ། བྱང་ཤར་དུ་ཁམས་གསུམ་རྣམ་རྒྱལ། ཐམས་ཅད་ཀྱང་སྐུ་མདོག་མཐིང་ནག ཞལ་གཅིག་ཕྱག་གཉིས་སྤྱན་གསུམ་པ། ཕྱག་གཡས་རྡོ་རྗེ་དང་གཡོན་སྡིག་མཛུབ་མཛད་པ། སྟག་ཤམ་དང་སྦྲུལ་ཆུན་ལ་སོགས་ཁྲོ་བོའི་ཆས་ཐམས་ཅད་ཀྱིས་བརྒྱན་ཅིང་། ཞབས་གཉིས་འདོར་སྟབས་ཀྱིས་མེ་དཔུང་འབར་བའི་ཀློང་ན་བཞུགས་པའོ། །སླར་ཡང་གཙོ་བོའི་ཐུགས་ཀ་ནས་ཛཿཧཱུྃ་བཾ་ཧོཿབཞི་འཕྲོས་པ་ལས་གཞལ་ཡས་ཁང་གི་སྒོ་བཞིར་པད་ཉིའི་གདན་ལ། ཤར་སྒོར་རྣམ་པར་རྒྱལ་བ། ལྷོ་སྒོར་གཤིན་རྗེ་གཤེད། ནུབ་སྒོར་རྟ་མགྲིན། བྱང་སྒོར་བདུད་རྩི་འཁྱིལ་བ་རྣམས་ཕྱོགས་ཀྱི་མདོག་ཅན། གཡས་རྡོ་རྗེ་རིན་ཆེན་པདྨ་རྒྱ་གྲམ་རྣམས་ཀྱིས་མཚན་པའི་དབྱུག་པ་ཕྱར་ཞིང་། གཡོན་རྣམས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་རྣམས་འཛིན་པ། ཁྲོ་བོའི་རྒྱན་དང་ཆ་ལུགས་རྫོགས་པའོ། །གཞལ་ཡས་ཁང་གི་ཁྱམས་ལ་དབང་ཕྱུག་མ་ཉི་ཤུ་རྩ་བརྒྱད་དང་། དཔལ་མགོན་བདུན་ཅུ་རྩ་ལྔ་ལ་སོགས་པ་སྤྲུལ་པ་དང་ཡང་སྤྲུལ་གྱི་འཁོར་ཚོགས་བསམ་གྱིས་མི་ཁྱབ་པས་བསྐོར་བ། ཐམས་ཅད་ཀྱང་ཕྲིན་ལས་རྣམ་པ་བཞི་སྒྲུབ་པ་ལ་མངའ་བརྙེས་པའི་ཚུལ་ཅན་ནོ། །བདག་མདུན་གྱི་ལྷ་ཚོགས་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱ༔དམར་པོ། ཐུགས་ཀར་ཧཱུྃ་སྔོན་པོ། དེ་ལས་འོད་ཟེར་འཕྲོས་པས་བྱང་ཕྱོགས་ལྕང་ལོ་ཅན་གྱི་ཕོ་བྲང་ནས་དཔལ་གསང་བའི་བདག་པོའི་དཀྱིལ་འཁོར་གྱི་ལྷ་ཚོགས་རྣམས་དང་། གཞན་ཡང་ཕྱོགས་བཅུའི་ཞིང་ཁམས་རབ་འབྱམས་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་གསང་བདག་ཕྱག་ན་རྡོ་རྗེའི་དཀྱིལ་འཁོར་གྱི་ལྷ་ཚོགས་ཀྱི་རྣམ་པར་སྤྱན་དྲངས་བར་བསམ་ལ། ཨོཾ་བཛྲ་པཱ་ཎི་ས་པཱ་རི་ཝ་ར་བཛྲ་ས་མཱ་ཡ་ཛ་ཛཿ ཞེས་བརྗོད། སྤོས་རོལ་དབྱངས་དང་བཅས་ཏེ་གཞུང་གི་སྤྱན་འདྲེན་ནས་བཟུང་སྟེ། བསྙེན་སྒྲུབ་ཀྱི་བཟླས་དམིགས་བར་བྱས་ལ། ལས་སྦྱོར་གྱི་སྐབས་སུ་རང་ཉིད་ཅེས་པར། བདག་མདུན་ལྷ་ཡི་སོགས་སྦྱོར་ལ། རྩ་སྔགས་སྤྱི་འདུལ་གྱི་ཤམ་བུ་ཅན་དང་། ཁྲོ་བཅུ། ཁྱུང་ལྔ། སྒོ་སྲུང་གི་སྔགས་རྣམས་རིམ་པར་བཟླ་བའམ། སྤྲོས་པ་ལ་དགའ་ན་བཟླས་དམིགས་བྱེ་བྲག་ཏུ་བྱ་བ་ནི། བདག་མདུན་གསང་བདག་རྡོ་རྗེ་འཆང་། །གཏུམ་པོ་རིགས་ལྔའི་ཐུགས་ཀ་རུ། །རྡོ་རྗེ་མཐིང་ནག་ཚོན་གང་བའི། །ལྟེ་བར་ཉི་མའི་དལ་གྱི་སྟེང་། །ཧཱུྃ་ཡིག་མཐིང་གའི་མཐའ་བསྐོར་དུ། །སྔགས་ཕྲེང་སྤུ་ཤད་ཙམ་གྱིས་བསྐོར། །བཟླས་པས་འོད་ཟེར་ཁྲོ་ཆུང་མཚོན། །ཡེ་ཤེས་མེ་ཡི་ཚ་ཚྭ་འཕྲོས། །གཟུགས་ཅན་དགྲ་དང་གཟུགས་མེད་བགེགས། །སྡེ་བརྒྱད་ལོག་འདྲེན་བྱད་ཕུར་དཔུང་། །བསྟན་དང་འགྲོ་ལ་གནོད་པའི་རིགས། །ལུས་གདོན་གློ་བུར་གདོན་དང་བཅས། །རྩྭ་སྦུར་མེ་ལ་བསྲེགས་པ་བཞིན། །མིང་མེད་རྡུལ་དུ་བརླག་ནས་ཀྱང་། །ཆོས་ཉིད་སྟོང་པའི་ངང་མདངས་སུ། །རང་བབས་ཆེན་པོའི་གནས་ལུགས་བསྐྱངས། །ཨཱོྃ་བཛྲ་ཙཎྚ་མ་ཧཱ་རོ་ཥ་ཎ་ཧཱུྃ་ཕཊ༔ ཨཱོྃ་བཛྲ་ཙཎྚ་སརྦ་དུཥྚཾ་ད་ཀ་ཧ་ན་ད་ཧ་པ་ཙ་ཧཱུྃ་ཕཊ༔ ཅེས་བརྒྱ་རྩ་བརྒྱད་བཟླའོ། །དེ་ནས། བདག་མདུན་གསང་བདག་ཐུགས་ཀ་ནས། །འོད་ཟེར་མཐིང་ནག་ཕྱོགས་བཅུར་འཕྲོས། །ཁྲོ་རྒྱལ་བཅུ་ཡི་ཐུགས་རྒྱུད་བསྐུལ། །སོ་སོའི་ཐུགས་ལས་འོད་འཕྲོས་པས། །བགེགས་ཀྱི་གཙོ་བོ་ཕྱོགས་སྐྱོང་བཅུ། །བཀུགས་ཤིང་ཞབས་ཀྱི་འོག་ཏུ་མནན། །ཕྱོགས་བཅུའི་དགྲ་བགེགས་དམ་སྲིའི་དཔུང་། །གནོད་ཅིང་གདུག་པའི་བསམ་སྦྱོར་ཅན། །མ་ལུས་ལྷག་མེད་མཐར་བྱས་ནས། །ཆོས་དབྱིངས་ཀློང་དུ་བསྒྲལ་བར་བསམ། ། ཨོཾ་བཛྲ་ཀྲོ་ཏ་ཧཱུྃ་ཀཱ་ར་ཧཱུྃ༔ གརྫ་གརྫ་ཧཱུྃ་ཕཊ༔ ཨོཾ་བཛྲ་ཀྲོ་ཏ་བཱི་ཛ་ཡ་ཧཱུྃ༔ ཧ་ན་ཧ་ན་ཧཱུྃ་ཕཊ༔ ཨོཾ་བཛྲ་ཀྲོ་ཏ་ནི་ལ་ཏནྟྲ་ཧཱུྃ༔ ད་ཧ་ད་ཧ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཡ་མནྟ་ཀ་ཧཱུྃ༔ པ་ཙ་པ་ཙ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨཱརྱ་ཨ་ཙ་ལ་ཧཱུྃ༔ བྷནྡྷ་བྷནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཧྱ་གྷྲྀ་ཝ་ཧཱུྃ༔ ཧུ་ལུ་ཧུ་ལུ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨ་པ་ར་ཙིཏྟ་ཧཱུྃ༔ ཏིཥྛ་ཏིཥྛ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨ་མྲྀ་ཏ་ཀུཎྚ་ལི་ཧཱུྃ༔ ཚིནྡྷ་ཚིནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཏྲཻ་ལོ་ཀྱ་བི་ཛ་ཡ་ཧཱུྃ༔ བྷིནྡྷ་བྷིནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་མ་ཧཱ་བྷ་ལ་ཧཱུྃ༔ སྥོ་ཊ་སྥོ་ཊ་ཧཱུྃ་ཕཊ༔ ཞེས་པ་རྣམས་རེ་རེར་ལྔ་བཅུ་སོགས་བཟླས་ལ། དཔལ་ཆེན་ཡང་དག་ཧེ་རུ་ཀའི། །སྐུ་གསུང་ཐུགས་ཡོན་ཕྲིན་ལས་ལས། །གདུག་པ་འདུལ་ཕྱིར་སྤྲུལ་པའི་སྐུ། །ཡེ་ཤེས་ཁྱུང་ཆེན་རིགས་ལྔ་ཡི། །ཐུགས་ཀར་རང་སྲོག་ས་བོན་མཐར། །སོ་སོའི་སྔགས་ཀྱིས་བསྐོར་བ་ལས། །འོད་ཟེར་ཁྱུང་དང་མཚོན་ཆ་མེ། །དཔག་མེད་སྟོང་གསུམ་གང་བར་འཕྲོས། །གནོད་ཅིང་འཚེ་བའི་དགྲ་བགེགས་སྤྱི། །ཁྱད་པར་ཀླུ་གཉན་ས་བདག་ལས། །བྱུང་བའི་ནད་གདོན་བར་གཅོད་རྣམས། །ན་བུན་རླུང་གིས་གཏོར་བ་བཞིན། །སྟོང་ཆེན་ཡུམ་ལྔའི་ཀློང་དུ་བཅོམ། །ཞེས་བསམ་ལ། ཨཱོྃ་བུདྡྷ་ཁྲོཾ་ག་རུ་ཊ་ཙ་ལེ་ཙ་ལེ་ཧཱུྃ་ཕཊཿ ཅེས་དང་། དེ་བཞིན་དུ། བཛྲ། རཏྣ། པདྨ། ཀརྨ་སོགས་ནས་ཧཱུྃ་ཕཊ༔ ཅེས་སོ་སོར་ཅི་ནུས་བཟླས། སླར་ཡང་དཔལ་ཆེན་ཐུགས་ཀ་ནས། །འོད་ཟེར་དཀར་སེར་དམར་མཐིང་བཞི། །འཕྲོས་པས་སྒོ་སྐྱོང་ཐུགས་རྒྱུད་བསྐུལ། །སོ་སོའི་སྔོན་གྱི་དམ་བཅས་ལྟར། །ཞི་རྒྱས་དབང་དྲག་ཕྲིན་ལས་ཀྱིས། །བདག་ཅག་རྣལ་འབྱོར་སྒྲུབ་པ་པོའི། །ཇི་ལྟར་རེ་ཞིང་སྨོན་པའི་དོན། །གེགས་མེད་ཡིད་བཞིན་བསྒྲུབ་པར་དམིགས། །ཛཿཧཱུྃ་བཾ་ཧོ༔ །ཉེར་གཅིག་སོགས་བཟླའོ། །གཞན་ཡང་གཉན་སྔགས་སྲོག་གི་སྤུ་གྲི་དང་། ལས་སྔགས་མེ་དཔུང་མ་སོགས་ཀྱང་སྤྲོ་ན་འདིར་བྱ། བཟླས་པའི་མཇུག་ཏུ་ལས་བཞིའི་སྔགས་ཤམ་དང་། དབྱངས་གསལ། ཡིག་བརྒྱ། རྟེན་འབྲེལ་སྙིང་པོ་རྣམས་ལན་གསུམ་གསུམ་སོགས་བཟླས་མཐར། མཆོད་པ་ཉུང་བསྡུས་སུ་བྱ་བ་ནི། ཧཱུྃ་ཧཱུྃ༔ གསང་བདག་དཀྱིལ་འཁོར་ལྷ་ཚོགས་ལ། །འདོད་ཡོན་མ་སྤངས་ཕྱི་མཆོད་འབུལ། །ཉོན་མོངས་མ་སྤངས་ནང་མཆོད་འབུལ། །འདུ་འབྲལ་མེད་པའི་གསང་མཆོད་འབུལ། །དཀྱིལ་འཁོར་ལྷ་ཚོགས་མཉེས་གྱུར་ཅིག །ཨཱོྃ་བཛྲ་པཱ་ཎི་ས་པཱ་རི་ཝ་ར་ཨརྒྷཾ་སོགས་ནས་ཤཔྟ་མ་ཧཱ་པུཙྪ་ཧོ། བསྟོད་པ་ནི། ཧཱུྃ་ཧཱུྃ༔ ཆོས་སྐུ་སྤྲོས་མེད་མཁའ་དབྱིངས་ལས། །གཟུགས་སྐུ་རྡོ་རྗེ་གཏུམ་པོར་ཤར། །བདུད་བཞི་འདུལ་མཛད་ཁྲོ་བོའི་རྒྱལ། །གསང་བའི་བདག་པོར་ཕྱག་འཚལ་བསྟོད། །གཏུམ་པོ་རིགས་བཞི་ཁྱུང་ཆེན་ལྔ། །ཁྲོ་བཅུ་ཡབ་ཡུམ་སྒོ་སྐྱོང་བཞི། །དབང་ཕྱུག་དམ་ཅན་བསྲུང་མར་བཅས། །ཡོངས་རྫོགས་དཀྱིལ་འཁོར་ལྷ་ལ་བསྟོད། །ཅེས་སོགས་ཀྱིས་བསྟོད་ཅིང་དཀྱུས་བཞིན་དངོས་གྲུབ་བླངས། དེ་ནས་སྤྱི་དང་སྒོས་ཀྱི་བཀའ་གཏེར་སྲུང་མ་རྣམས་ཀྱི་གཏོར་ཆོག་ལག་ལེན་བཞིན་ཕུལ་ལ། ཚོགས་ཀྱི་ཡོ་བྱད་ཅི་འབྱོར་འདུ་བར་བྱས་ནས་གཞུང་བཞིན་བྱིན་རླབས་ནས་བཟུང་། ཚོགས་བར་བ་ཡན་གྲུབ་པར་བྱས་ལ། དེ་ནས་ལྷ་ཚོགས་རྣམས་ཀྱི་ཐུགས་དམ་སྐོང་བའི་ལས་རིམས་ལ་བརྩོན་པར་བྱ་སྟེ། དེ་ཡང་བསྐང་རྫས་རྣམས་ནམ་མཁའ་མཛོད་ཀྱི་སྔགས་དང་ཕྱག་རྒྱས་བྱིན་གྱིས་བརླབས་ལ། གདུངས་དབྱངས་རོལ་མོ་བཅས་པས་འདི་བཞིན་བྱའོ།། ཧཱུྃ་ཧཱུྃ། ཆོས་དབྱིངས་སྐྱེ་མེད་སྤྲོས་བྲལ་ངང་ཉིད་ལས། །འགགས་མེད་སྒྱུ་འཕྲུལ་གར་གྱིས་རྣམ་རོལ་བའི། །བླ་མ་ཡི་དམ་མཁའ་འགྲོ་ཆོས་སྐྱོང་ཚོགས། །རང་བཞིན་དབྱིངས་ནས་བསྐང་བའི་གནས་འདིར་གཤེགས། །ཚོགས་ཁང་གཞལ་ཡས་འདི་ལ་བརྟན་པར་བཞུགས། །ཕྱི་ནང་གསང་གསུམ་བསྐང་རྟེན་རྫས་ཀྱིས་མཆོད། །ལུས་ངག་ཡིད་གསུམ་དད་གུས་ལྡན་པས་བསྟོད། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཧཱུྃ་ཧཱུྃ། སྐུ་གསུམ་ཞིང་ནས་འགྲོ་དོན་སྐུར་སྣང་བ། །ཀུན་བཟང་རིགས་ལྔ་གསང་བདག་པདྨ་འབྱུང་། །མཚོ་རྒྱལ་མངའ་བདག་རླངས་ཆེན་དཔལ་སེང་དང་། །དཔལ་གྱི་དབང་ཕྱུག་ཀླུ་དབང་ལུང་རིག་གླིང་། །རིག་འཛིན་བཟང་པོ་མ་ཏིའི་མཚན་ཅན་སོགས། །དྲིན་ཆེན་རྩ་རྒྱུད་བླ་མའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི་དམ་རྫས་ནི། །དངོས་འབྱོར་ཡིད་སྤྲུལ་ཕྱི་ནང་གསང་མཆོད་ཚོགས། །བསྐང་རྫས་སྒྲུབ་རྫས་རྟེན་རྫས་སྣ་ཚོགས་དང་། །བདུད་རྩི་སྨན་དང་རཀྟ་བྷ་ལིང་ཏ། །འདོད་ཡོན་ལོངས་སྤྱོད་བཟའ་བཏུང་ཚོགས་འཁོར་སོགས། །རབ་འབྱམས་ནམ་མཁའི་ཁྱོན་ཀུན་ཡོངས་བཀང་བའི། །རྨད་བྱུང་མཆོད་སྤྲིན་རྒྱ་མཚོས་ཐུགས་དམ་བསྐང་། །ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ། །ཧཱུྃ་ཧཱུྃ། གནས་མཆོག་ལྕང་ལོ་ཅན་གྱི་ཕོ་བྲང་ནས། །རྒྱལ་བ་ཀུན་གྱི་ཕྲིན་ལས་གཅིག་བསྡུས་པའི། །གསང་སྔགས་རིགས་སྔགས་ཀུན་གྱི་མངའ་བདག་རྗེ། །བདུད་སྡེ་དཔུང་འཇོམས་ལོག་འདྲེན་ཚར་གཅོད་པའི། །བཅོམ་ལྡན་དཔལ་ཆེན་ཁྲོ་བོ་ཡོངས་ཀྱི་རྒྱལ། །གསང་བདག་རྡོ་རྗེ་འཛིན་པའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། ཁྲོ་རྒྱལ་ཆེན་པོའི་སྐུ་ཡི་གནས་ལྔ་ནས། །སྐུ་གསུང་ཐུགས་ཡོན་ཕྲིན་ལས་སྤྲུལ་པའི་ཁྱུང་། །དཀར་སེར་དམར་ལྗང་མཐིང་མདོག་ཀླུ་རིགས་གསོལ། །ས་བདག་ཀླུ་གཉན་དྲེགས་པའི་སྲོག་སྙིང་འདྲེན། །དུག་ལྔའི་གདོན་ཚོགས་ཡེ་ཤེས་ལྔར་སྒྲོལ་བའི། །བྱ་ཁྱུང་རིགས་ལྔའི་ཚོགས་ཀྱི་ཐུགས་དམ་བསྐང་། ། ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། དཔལ་ཆེན་ཁྲོ་རྒྱལ་ཐུགས་ཀྱི་སྤྲུལ་པ་ལས། །ཕྱོགས་བཞིའི་འཁོར་ལོ་འབར་བའི་རྩིབས་སྟེང་དུ། །པད་ཉི་དྲེགས་པ་ཕོ་མོ་བསྣོལ་བའི་ཁར། །ཉོན་མོངས་བདུད་བཞི་འཇོམས་མཛད་ཡེ་ཤེས་སྐུ། །ཁྲོ་བོ་ཆས་རྫོགས་རང་རྟགས་ཕྱག་རྒྱ་བསྣམས། །གསང་བདག་གཏུམ་པོ་རིགས་བཞིའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། ཕྱོགས་བཅུའི་དྲེགས་པ་ཕོ་མོའི་གདན་སྟེང་ནས། །བདུད་དཔུང་འཇོམས་མཛད་ཡེ་ཤེས་ཁྲོ་བོའི་སྐུ། །ཧཱུྃ་དཀར་རྣམ་རྒྱལ་དབྱུག་སྔོན་གཤིན་རྗེ་གཤེད། །མི་གཡོ་རྟ་མགྲིན་འདོད་རྒྱལ་བདུད་རྩི་འཁྱིལ། །ཁམས་གསུམ་རྣམ་རྒྱལ་སྟོབས་ཆེན་ཁྲོ་བོ་བཅུ། །མ་ལུས་འཁོར་དང་བཅས་པའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། གཞལ་ཡས་ཆེན་པོའི་ཕྱོགས་བཞིའི་སྒོ་བཞི་ནས། །བདུད་བཞི་འདུལ་མཛད་ཏ་ཀྲྀཏ་སྒོ་བ་བཞི། །ཁྲོ་བོའི་ཆ་ལུགས་དཀར་སེར་དམར་ལྗང་མདོག །རིགས་རྒྱ་གཡས་དང་རང་རྟགས་གཡོན་ན་བསྣམས། །ཞི་རྒྱས་དབང་དྲག་ཕྲིན་ལས་སྒྲུབ་པའི་ལྷ། །རང་རང་སྤྲུལ་འཁོར་བཅས་པའི་ཐུགས་དམ་བསྐང་། ། ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། དཀྱིལ་འཁོར་ཕྱི་རིམ་ཁོར་ཡུག་ལ་གནས་པའི། །དབང་ཕྱུག་ཆེན་མོ་ཉི་ཤུ་རྩ་བརྒྱད་དང་། །ཚངས་པ་བརྒྱ་བྱིན་རྒྱལ་ཆེན་ཕྱོགས་སྐྱོང་བཅུ། །ལྷ་བརྒྱད་ཀླུ་བརྒྱད་གཟའ་བརྒྱད་ནོར་སྲུང་བརྒྱད། །རྒྱུ་སྐར་ཉི་ཤུ་རྩ་བརྒྱད་ལ་སོགས་པའི། །གཙང་རིས་དཔལ་མགོན་འཁོར་བཅས་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། རྒྱལ་བསྟན་དྲི་མེད་སྐྱོང་བར་ཞལ་བཞེས་པའི། །དཔལ་མགོན་ཕྱག་དྲུག་སྔགས་སྲུང་རལ་གཅིག་མ། །དུད་སོལ་ལྷ་མོ་གཟའ་བདུད་རཱ་ཧུ་ལ། །དམ་ཅན་རྡོར་ལེགས་བཙན་རྒོད་དྲག་པོ་རྩལ། །ཚེ་རིང་མཆེད་ལྔ་གནོད་སྦྱིན་མི་ཐུང་སོགས། །གཙོ་འཁོར་སྤྲུལ་པར་བཅས་པའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། བདེ་སྟོང་ཡེ་ཤེས་ཆེན་པོའི་རོལ་པ་ལས། །རང་བྱུང་རང་ཤར་མཆོད་པའི་སྤྲིན་ཆེན་པོ། །བླ་མེད་ལྷ་ཚོགས་དགྱེས་པ་སྐོང་བའི་རྫས། །ཕྱོགས་ཀྱི་འཁོར་ལོའི་ཁྱོན་ཀུན་འགེང་བ་འདིས། །རྩ་རྒྱུད་བླ་མ་རྣམས་ཀྱི་ཐུགས་དམ་བསྐང་། །ཡི་དམ་ཞི་ཁྲོ་རབ་འབྱམས་ཐུགས་དམ་བསྐང་། །མ་ཚོགས་མཁའ་འགྲོ་རྒྱ་མཚོའི་ཐུགས་དམ་བསྐང་། །དམ་ཅན་ཆོས་སྐྱོང་སྲུང་མའི་ཐུགས་དམ་བསྐང་། །བསྐང་དུ་མེད་དེ་སྐྱེ་མེད་དབྱིངས་སུ་བསྐང་། །སྦྱོར་དུ་མེད་དེ་ཟུང་འཇུག་ཆེན་པོར་སྦྱོར། །སྒྲོལ་དུ་མེད་དེ་མཉམ་ཉིད་ཀློང་དུ་སྒྲོལ། །ཡེ་སྦྱོར་ཡེ་སྒྲོལ་ཆེན་པོས་ཐུགས་དམ་བསྐང་། །དེ་ལྟར་ཐུགས་དམ་བསྐང་བའི་བྱིན་རླབས་ཀྱིས། །བདག་གི་ཉམས་ཆགས་སྡིག་སྒྲིབ་ཀུན་དག་ནས། །ནད་གདོན་བར་ཆད་རྐྱེན་རྣམས་ཞི་བ་དང་། །ཚེ་དབང་ལོངས་སྤྱོད་བསོད་ནམས་རྒྱས་པར་མཛོད། །ཁམས་གསུམ་སྲིད་གསུམ་མ་ལུས་དབང་དུ་སྡུས། །གནོད་བྱེད་དགྲ་བགེགས་འབྱུང་པོ་རྡུལ་དུ་རློགས། །མདོར་ན་ཡིད་ལ་གང་ལྟར་འདོད་པའི་དོན། །རྩོལ་བ་མེད་པར་ལྷུན་གྱིས་གྲུབ་པ་དང་། །རྡོ་རྗེ་འཛིན་གྱི་གོ་འཕང་མྱུར་ཐོབ་ནས། །མཁའ་ཁྱབ་འགྲོ་བའི་མགོན་དུ་འགྱུར་བར་ཤོག །ཞེས་བརྗོད་ཅིང་སྡོམ་གསུམ་ཉམས་ཆགས་བཤགས་པ་ཟག་མེད་བདུད་རྩིའི་ཁྲུས་བུམ་དང་ཡིག་བརྒྱ་བཟླའོ། །དེ་ཡན་ཆད་ཀྱིས་སྒྲུབ་པའི་ལས་རིམ་རྣམས་རེ་ཞིག་གྲུབ་ནས། ༧ གཉིས་པ་ལས་སྦྱོར་དངོས་ལ་འཇུག་པ་ལ། བསྐུལ་བ། བསྒྲལ་ལས། བཟློག་པའི་ལས་རིམ་གསུམ་གྱི། དང་པོ་དཀྱིལ་འཁོར་གྱི་ལྷ་ཚོགས་རྣམས་མངོན་སྤྱོད་ཀྱི་ལས་ལ་དྲག་ཏུ་བསྐུལ་བ་ནི། དམར་གཏོར་བཤམས་ཤིང་དགུག་གཞུག་བྱས་ལ། སྤོས་བསྲེག །རྐང་གླིང་འབུད། དར་ནག་གཡབ་ཅིང་རྔ་རོལ་དབྱངས་དང་བཅས་ཏེ་འདི་སྐད་གྱེར་རོ། །ཧཱུྃ་ཧཱུྃ༔ ཆོས་སྐུ་ཞི་བའི་ངང་ལས་མ་གཡོས་ཀྱང་། །ཐུགས་རྗེ་ཆེན་པོས་གདུག་པའི་ཚོགས་འདུལ་ཕྱིར། །ཐབས་ཀྱི་གཟུགས་མཆོག་འཆོལ་བའི་ཁྲོ་རྒྱལ་སྐུར། །སྟོན་མཛད་དཔལ་ཆེན་ཡང་དག་ཧེ་རུ་ཀཿ གཏུམ་པོ་རིགས་བཞི་ཁྲོ་བཅུ་སྒོ་མར་བཅས། །མངོན་སྤྱོད་རོལ་བ་དྲག་པོའི་ཕྲིན་ལས་ཀྱིས། །ཉོན་མོངས་དགྲ་བགེགས་དབྱིངས་སུ་གཞོམ་པའི་ཕྱིར། །དབྱིངས་ནས་སྤྱན་འདྲེན་འདིར་གཤེགས་བརྟན་པར་བཞུགས། །དབྱེར་མེད་ངང་ནས་ཕྱག་བགྱིད་མཆོད་པ་འབུལ། །གུས་པས་བསྟོད་དོ་དབང་དང་དངོས་གྲུབ་སྩོལ། །ཐུགས་རྗེས་ཁྲོས་པ་གཏུམ་ཆེན་ཧེ་རུ་ཀའི། །དམ་ཚིག་ཐུགས་དམ་ཆེན་པོ་བདག་བསྐུལ་ན། །ཁྱེད་ཀྱི་དབང་དྲག་ཐུགས་དམ་དུས་ལ་བབས། །དམ་རྫས་བརྒྱན་པའི་གཏོར་མ་འདི་བཞེས་ལ། །དྲག་ཤུལ་མཐུ་སྟོབས་ནུས་པའི་རྩལ་ཕྱུངས་ནས། །ཐུགས་དམ་ཐུགས་རྗེས་དགྲ་བགེགས་མྱུར་དུ་སྒྲོལ། །ཧཱུྃ་ཧཱུྃཿ དུས་གསུམ་ཕྱོགས་བཅུའི་རྒྱལ་བ་མ་ལུས་པའི། །མཐུ་སྟོབས་འདུས་པ་གསང་བདག་རྡོ་རྗེ་འཆང་། །བདུད་འདུལ་ཁྲོ་རྒྱལ་གཏུམ་པོ་ཁྲོས་པའི་སྐུ། །སྐུ་མདོག་མཐིང་ནག་ནམ་མཁའི་མདོག་ལྟར་གསལ། །ཞལ་གཅིག་ཕྱག་གཉིས་ཞབས་གཉིས་བསྐྱང་བསྐུམ་བཞུགས། །སྤྱན་གསུམ་སྡང་མིག་ཁྲོ་གཉེར་མཆེ་བ་གཙིགས། །རལ་བ་ཁམ་ནག་ཨག་ཚོམ་སྨིན་མ་སེར། །ཕྱག་གཡས་རྡོ་རྗེས་དྲེགས་པ་མ་ལུས་འཇོམས། །གཡོན་པས་སྡིགས་མཛུབ་སྦྲུལ་གྱིས་ཀླུ་གཉན་འདུལ། །གཏུམ་ཆེན་བསྐལ་པ་དུས་མཐའི་མེ་ལྟར་འབར། །དུར་ཁྲོད་ཆས་བརྒྱད་སྐུ་ཡི་རྒྱན་དུ་རྫོགས། །སྙན་ནས་འབྲུག་སྒྲས་དྲེགས་པ་ཐམས་ཅད་བརྒྱལ། །སྤྱན་ནས་མེ་འབར་ཁམས་གསུམ་བསྲེགས་པར་བྱེད། །ཤངས་ནས་རླུང་འབྱུང་སྣང་སྲིད་ཐལ་བར་གཏོར། །ཞལ་ནས་སྔགས་སྒྲས་ཉོན་མོངས་ཐམས་ཅད་སྒྲོལ། །བ་སྤུ་ཀུན་ལས་བྱ་ཁྱུང་སྤྲུལ་པ་འགྱེད། །བཀའ་ལས་འདའ་བྱེད་ཀླུ་གཉན་ཟས་སུ་ཟ། །སྐུ་ལས་ཁྲོ་ཆུང་མཚོན་ཐོགས་དཔག་མེད་འཕྲོས། །ལྷ་སྲིན་སྡེ་བརྒྱད་མ་ལུས་བྲན་དུ་བཀོལ། །རབ་འཇིགས་དཔའ་བོ་ཆེན་པོ་ཁྱོད་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །སྔོན་གྱི་ཐུགས་དམ་ཞལ་བཞེས་མ་གཡེལ་བར། །སྡང་བའི་དགྲ་དང་གནོད་བྱེད་བགེགས་རིགས་སོགས། །བདུད་དང་བར་དུ་གཅོད་པ་རྣམ་མང་པོ། །མ་ལུས་ན་བུན་རླུང་གིས་གཏོར་བ་བཞིན། །ལྷག་མེད་རྡུལ་དུ་རློག་པའི་ཕྲིན་ལས་མཛོད། །ཧཱུྃ་ཧཱུྃཿ བཅོམ་ལྡན་གསང་བདག་ཐུགས་ལས་སྤྲུལ་པའི་སྲས། །རྣམ་བཞིའི་ཕྲིན་ལས་སྒྲུབ་མཛད་ཡེ་ཤེས་ལྷ། །བདུད་བཞིའི་དཔུང་འཇོམས་ཁྲོ་རྒྱལ་གཏུམ་པོ་བཞི། །ཐུགས་དམ་རྒྱུད་བསྐུལ་བཅོལ་པའི་ལས་ལ་དགོངས། །ཤར་རྩིབས་པད་ཉི་ལྷ་བདུད་དྲེགས་པའི་སྟེང་། །ཞེ་སྡང་གནས་གྱུར་མེ་ལོང་ཡེ་ཤེས་སྐུ། །མཐིང་གསལ་རྡོ་རྗེ་དྲིལ་འཛིན་ཁྲོ་ཆས་རྫོགས། །ཞི་མཛད་རྡོ་རྗེ་གཏུམ་པོ་ཁྱོད་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །ནད་གདོན་སྡིག་སྒྲིབ་བར་ཆད་མི་མཐུན་ཕྱོགས། །མ་ལུས་ཆོས་ཀྱི་དབྱིངས་སུ་ཞི་བར་མཛོད། །ལྷོ་རྩིབས་པད་ཉི་ཕུང་བདུད་དྲེགས་པའི་སྟེང་། །ང་རྒྱལ་གནས་གྱུར་མཉམ་ཉིད་ཡེ་ཤེས་སྐུ། །སེར་གསལ་རིན་ཆེན་དྲིལ་འཛིན་ཁྲོ་ཆས་རྫོགས། །རྒྱས་མཛད་རིན་ཆེན་གཏུམ་པོ་ཁྱོད་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །ཚེ་བསོད་དཔལ་འབྱོར་ཆོས་སྲིད་ཡོན་ཏན་ཀུན། །འབད་མེད་དབྱར་མཚོ་ལྟ་བུར་རྒྱས་པར་མཛོད། །ནུབ་རྩིབས་པད་ཉི་ཉོན་བདུད་དྲེགས་པའི་སྟེང་། །འདོད་ཆགས་གནས་གྱུར་སོར་རྟོག་ཡེ་ཤེས་སྐུ། །དམར་གསལ་པདྨ་དྲིལ་འཛིན་ཁྲོ་ཆས་རྫོགས། །དབང་མཛད་པདྨ་གཏུམ་པོ་ཁྱོད་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །ཁམས་གསུམ་སྲིད་གསུམ་མོས་པ་བཞི་ལ་སོགས། །རྩོལ་མེད་དབང་དུ་འདུ་བའི་ཕྲིན་ལས་མཛོད། །བྱང་རྩིབས་པད་ཉི་འཆི་བདག་དྲེགས་པའི་སྟེང་། །ཕྲག་དོག་གནས་གྱུར་བྱ་གྲུབ་ཡེ་ཤེས་སྐུ། །ལྗང་གསལ་རྒྱ་གྲམ་དྲིལ་འཛིན་ཁྲོ་ཆས་རྫོགས། །དྲག་པོའི་ལས་མཛད་ཀརྨ་གཏུམ་པོར་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །དགྲ་བགེགས་དམ་སྲི་བསམ་སྦྱོར་གནག་པའི་ཚོགས། །ལྷག་མེད་རྡུལ་དུ་བརླག་པའི་ཕྲིན་ལས་མཛོད། །ཧཱུྃ་ཧཱུྃཿ དཔལ་ཆེན་ཐུགས་སྤྲུལ་ཕྱོགས་བཅུའི་གདོན་འདུལ་བ། །གཏུམ་དྲག་རབ་འཇིགས་ཁྲོ་རྒྱལ་ཆེན་པོ་བཅུ། །ཐུགས་དམ་བསྐུལ་ལོ་དབྱིངས་ནས་སྐུར་བཞེངས་ལ། །གང་བཅོལ་ཕྲིན་ལས་མཛད་པའི་དུས་ལ་བབས། །ཕྱི་རིམ་འཁོར་ལོ་རྩིབས་བཅུར་པད་ཉི་དང་། །ཕྱོགས་སྐྱོང་གདན་ལ་རང་བྱུང་གྲུབ་པའི་ལྷ། །ཧཱུྃ་དཀར་རྣམ་རྒྱལ་དབྱུག་སྔོན་གཤིན་རྗེ་གཤེད། །མི་གཡོ་རྟ་མགྲིན་འདོད་རྒྱལ་བདུད་རྩི་འཁྱིལ། །གསུམ་རྒྱལ་སྟོབས་པོ་ཆེ་རྣམས་སྐུ་མདོག་མཐིང་། །གཡས་རྣམས་རྡོ་རྗེ་གཡོན་ཕྱག་སྡིག་མཛུབ་མཛད། །ཁྲོ་ཆས་ཡོངས་རྫོགས་ཐབས་ཤེས་གཉིས་མེད་རོལ། །མི་དགེ་གནས་གྱུར་ཁྲོ་རྒྱལ་བཅུ་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །ཕྱོགས་བཅུའི་དགྲ་གདོན་བགེགས་རྣམས་མ་ལུས་ཀུན། །མིང་ལྷག་མེད་པར་ཐལ་བ་རྡུལ་དུ་རློགས། །ཧཱུྃ་ཧཱུྃཿ དཔལ་ཆེན་ཐུགས་སྤྲུལ་སྒོ་སྐྱོང་ཁྲོ་བོ་བཞི། །རྣམ་རྒྱལ་གཤིན་རྗེ་དབང་ཆེན་བདུད་རྩི་འཁྱིལ། །ཕྱོགས་མདོག་རིགས་དང་རྟགས་ཀྱི་ཕྱག་རྒྱ་ཅན། །ཁྲོ་ཆས་ཡོངས་རྫོགས་སྒོ་སྲུང་བཞི་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །དངོས་གྲུབ་འཕྲོག་ཅིང་འཚེ་བའི་དགྲ་བགེགས་རྣམས། །རྣམ་བཞིའི་ལས་ཀྱིས་ཚར་ཆོད་དབྱིངས་སུ་སྒྲོལ། །གཞན་ཡང་ཁྱམས་ཀྱི་དབང་མོ་ཉེར་བརྒྱད་སོགས། །སྤྲུལ་པ་ཡང་སྤྲུལ་བསམ་མི་ཁྱབ་པའི་ཚོགས། །དུ་མ་རོ་གཅིག་ཆུ་ཟླ་ལྟ་བུའི་འཁོར། །མ་ལུས་བསྟོད་ཅིང་བསྐུལ་ལོ་ལས་ལ་དགོངས། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །གང་བཅོལ་ཡིད་བཞིན་འགྲུབ་པའི་ཕྲིན་ལས་ཀྱིས། །རྣལ་འབྱོར་བསྒྲུབ་པའི་འབྲས་བུ་མཆིས་པར་མཛོད། །ཧཱུྃ་ཧཱུྃཿ ཁྲོ་རྒྱལ་ཆེན་པོའི་སྐུ་ཡི་གནས་ལྔ་ནས། །རྒྱལ་ཀུན་ཡེ་ཤེས་ལྔ་ཡི་རང་མདངས་ལས། །རང་བྱུང་སྤྲུལ་པའི་ཁྱུང་ཆེན་རིགས་ལྔ་ཡང་། །ཐུགས་དམ་བསྐུལ་ལོ་ཕྲིན་ལས་དུས་ལ་བབས། །སྐུ་སྤྲུལ་བུདྡྷ་རིགས་ཀྱི་ཁྱུང་ཆེན་དཀར། །གཏི་མུག་འཇོམས་པའི་ཁྲོ་རྒྱལ་བསྟོད་ཅིང་བསྐུལ། །མཆོད་གཏོར་འདི་བཞེས་བསམ་སྦྱོར་ངན་རྩོམ་པའི། །རྒྱལ་རིགས་ས་བདག་ཀླུ་གཉན་རྡུལ་དུ་རློགས། །གསུང་སྤྲུལ་པདྨ་རིགས་ཀྱི་ཁྱུང་ཆེན་དམར། །འདོད་ཆགས་འཇོམས་པའི་ཁྲོ་རྒྱལ་བསྟོད་ཅིང་བསྐུལ། །མཆོད་གཏོར་འདི་བཞེས་བསམ་སྦྱོར་ངན་རྩོམ་པའི། །བྲམ་ཟེ་ས་བདག་ཀླུ་གཉན་རྡུལ་དུ་རློགས། །ཐུགས་སྤྲུལ་རྡོ་རྗེ་རིགས་ཀྱི་ཁྱུང་ཆེན་མཐིང་། །ཞེ་སྡང་འཇོམས་པའི་ཁྲོ་རྒྱལ་བསྟོད་ཅིང་བསྐུལ། །མཆོད་གཏོར་འདི་བཞེས་བསམ་སྦྱོར་ངན་རྩོམ་པའི། །དམངས་རིགས་ས་བདག་ཀླུ་གཉན་རྡུལ་དུ་རློགས། །ཡོན་ཏན་རིན་ཆེན་རིགས་ཀྱི་ཁྱུང་ཆེན་སེར། །ང་རྒྱལ་འཇོམས་པའི་ཁྲོ་རྒྱལ་བསྟོད་ཅིང་བསྐུལ། །མཆོད་གཏོར་འདི་བཞེས་བསམ་སྦྱོར་ངན་རྩོམ་པའི། །རྗེ་རིགས་ས་བདག་ཀླུ་གཉན་རྡུལ་དུ་རློགས། །ཕྲིན་ལས་སྤྲུལ་པ་ཀརྨ་ཁྱུང་ཆེན་ལྗང་། །ཕྲག་དོག་འཇོམས་པའི་ཁྲོ་རྒྱལ་བསྟོད་ཅིང་བསྐུལ། །མཆོད་གཏོར་འདི་བཞེས་བསམ་སྦྱོར་ངན་རྩོམ་པའི། །གདོལ་རིགས་ས་བདག་ཀླུ་གཉན་རྡུལ་དུ་རློགས། །གསང་བདག་སྤྲུལ་པ་ཡེ་ཤེས་ཁྱུང་ཆེན་ལྔ། །རང་རྟགས་གཡས་ལ་ཀླུ་སྦྲུལ་རིགས་ལྔ་གཡོན། །གནམ་ལྕགས་རྡོ་རྗེའི་རྭ་དང་མཆུ་སྡེར་ཅན། །ཉི་ཟླས་དབུ་བརྒྱན་གསེར་མིག་འཁྱིལ་ཞིང་གསལ། །སྤུ་གྲིའི་སྒྲོ་གཤོག་མེ་མཚོན་ཐོག་སེར་འབེབས། །ཡང་སྤྲུལ་ཁྱུང་ཆེན་རིགས་ལྔ་གྲངས་མེད་འགྱེད། །བཀའ་ལས་འདའ་བྱེད་ཀླུ་གཉན་ཟས་སུ་ཟ། །ཁྱེད་རྣམས་ཐུགས་དམ་བསྐུལ་ལོ་དབྱིངས་ནས་བཞེངས། །འོག་ཕྱོགས་ས་བདག་ཀླུ་གཉན་ལས་བྱུང་བའི། །ནད་གདོན་རྐྱེན་བགེགས་བར་ཆད་མི་མཐུན་ཕྱོགས། །མངོན་སྤྱོད་རོལ་བ་དྲག་པོའི་ཕྲིན་ལས་ཀྱིས། །ཚར་ཆོད་ཡེ་ཤེས་ལྔ་ཡི་དབྱིངས་སུ་སྒྲོལ། །ཧཱུྃ་ཧཱུྃཿ གསང་བདག་ཐུགས་རྗེའི་ཀློང་ནས་སྐུར་སྤྲུལ་པ། །མཚོ་རྒྱལ་དགོངས་མཛོད་སྐྱོངས་བའི་བསྲུང་མའི་ཚོགས། །ཕྱག་དྲུག་ཡེ་ཤེས་མགོན་པོ་བཀའ་ཉན་བཅས། །སྔགས་སྲུང་རལ་གཅིག་དཔལ་ལྡན་དུད་སོལ་མ། །དྲང་སྲོང་ཁྱབ་འཇུག་གནོད་སྦྱིན་ཙིའུ་དམར། །དམ་ཅན་སྐྱེས་བུ་བཙན་རྒོད་དྲག་པོ་རྩལ། །སྨན་བཙུན་མཆེད་ལྔ་མི་ཐུང་ནོར་བདག་སོགས། །ཕོ་རྒྱུད་མོ་རྒྱུད་བཀའ་གཏེར་བསྲུང་མ་རྣམས། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །ངེས་པའི་དོན་ལ་སྨོད་པའི་སྡིག་ཅན་དང་། །བླ་མའི་ཐུགས་རྒྱུད་དཀྲུགས་པའི་དམ་ཉམས་མཁན། །གསང་སྔགས་རྡོ་རྗེའི་ཐེག་པ་འཕྱ་བྱེད་དང་། །ཉེས་མེད་མར་གྱུར་འགྲོ་ལ་འཚེ་བ་དང་། །བྱང་ཆུབ་སྒྲུབ་ལ་བར་དུ་གཅོད་པ་སོགས། །ཞིང་བཅུ་ཉམས་པ་བདུན་ལ་གཏོགས་པ་རྣམས། །སྔོན་ཚེ་རྡོ་རྗེ་འཆང་གི་བཀའ་བཞིན་དུ། །དམ་ཅན་དྲེགས་པའི་དམག་ཚོགས་ཁྱེད་རྣམས་ཀྱིས། །སྟག་སྤྱང་འཕར་བ་ཤ་ལ་རྔམ་པ་ལྟར། །ཞལ་གདངས་མཆེ་གཙིགས་ཁྲོས་པའི་རྔམ་སྟབས་ཀྱིས། །དོན་སྙིང་དམར་པོ་སྲུང་མའི་ཞལ་དུ་གསོལ། །ཁྲག་རྒྱུན་དྲོན་མོ་སྲུང་མའི་སྐོམ་དུ་བཞེས། །ཞིང་ཆེན་གཡང་གཞི་སྲུང་མའི་རྒྱན་དུ་ཀླུབས། །མིང་བརྡ་ཙམ་ཡང་མེད་པར་བརླག་པར་མཛོད། །བསྐུལ་ཡང་མི་དགོངས་བཅོལ་ཀྱང་མ་མཛད་ན། །དམ་ཚིག་གཉན་པོར་འགལ་བར་མི་འགྱུར་རམ། །ནུས་སྟོབས་ཅི་འདུག་བལྟའོ་བསྲུང་མའི་ཚོགས། །ཐུགས་དམ་དུས་ལ་བབ་པོ་དམ་ཅན་རྣམས། །རྣལ་འབྱོར་བདག་གིས་ཇི་ལྟར་བཅོལ་པའི་ལས། །ཐོགས་མེད་མྱུར་དུ་འགྲུབ་པའི་ཕྲིན་ལས་མཛོད། །ཅེས་བསྐུལ་བས་ལྷ་ཚོགས་རྣམས་དགྲ་བགེགས་སྒྲོལ་བའི་ལས་ལ་དགོངས་ཤིང་བཞུགས་པར་བསམ། གཉིས་པ་བསྒྲལ་བའི་ལས་རིམ་ལ། དང་པོ་གསེར་སྐྱེམས་བཤམས་ལ་བསང་ཆུས་འཐོར་ཏེ། རཾ་ཡཾ་ཁཾ། གསེར་སྐྱེམས་ཟག་པ་མེད་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱ༔ཧཱུྃ།ཞེས་བྱིན་གྱིས་བརླབས་ལ། བདུད་བཞིའི་དཔུང་འཇོམས་སྟོན་པ་རྫོགས་སངས་རྒྱས། །སྲིད་ཞིའི་སྡུག་བསྔལ་ལས་སྐྱོབས་དམ་པའི་ཆོས། །ཡང་དག་ཐར་བའི་ལམ་སྟོན་དགེ་འདུན་སྡེ། །གསེར་སྐྱེམས་འདི་བཞེས་བདེན་རྫུན་དཔང་པོ་མཛོད། །བྱིན་རླབས་རྩ་བ་བརྒྱུད་ལྡན་བླ་མ་དང་། །དངོས་གྲུབ་གཏེར་མཛོད་ཡི་དམ་ཞི་ཁྲོའི་ལྷ། །བར་ཆད་ཀུན་སེལ་གནས་གསུམ་མཁའ་འགྲོའི་ཚོགས། །གསེར་སྐྱེམས་འདི་བཞེས་རྣལ་འབྱོར་སྡོང་གྲོགས་མཛོད། །ཁྱད་པར་དཔལ་ཆེན་ཡང་དག་ཧེ་རུ་ཀཿ གཏུམ་པོ་རིགས་བཞི་ཁྲོ་བཅུ་ཡུམ་དང་བཅས། །སྒོ་སྐྱོང་བཞི་དང་དབང་མོ་ཉེར་བརྒྱད་སོགས། །གསེར་སྐྱེམས་འདི་བཞེས་ཞིང་བཅུའི་དགྲ་བགེགས་སྒྲོལ། །སྔགས་བསྲུང་ཁྲོ་མོ་མ་མོ་རལ་གཅིག་མ། །བཀའ་བསྲུང་དུད་སོལ་ལྷ་མོ་གཟའ་བདུད་སོགས། །མཚོ་རྒྱལ་དགོངས་མཛོད་སྐྱོང་བའི་བསྲུང་མ་རྣམས། །གསེར་སྐྱེམས་འདི་བཞེས་དམ་ཉམས་དགྲ་བགེགས་སྒྲོལ། །ཞེས་ཕུད་ཕྱོགས་བཅུར་གཏོར་རོ། ། གཉིས་པ་གཟུ་དཔང་ནི། ཧཱུྃ་ཧཱུྃཿ ངོ་བོ་སྟོང་ཆེན་འགྱུར་མེད་ཆོས་ཀྱི་སྐུ། །རང་བཞིན་གསལ་དག་བདེ་ཆེན་ལོངས་སྤྱོད་རྫོགས། །ཐུགས་རྗེ་ཀུན་ཁྱབ་རྨད་བྱུང་སྤྲུལ་པའི་སྐུ། །སྐུ་གསུམ་རྒྱལ་བ་མ་ལུས་གཟུ་དང་དཔང་། །དོན་གཉིས་མཐར་ཕྱིན་རྫོགས་སངས་རྒྱས་རྣམས་དང་། །བདེན་གཉིས་ཟུང་འཇུག་ལུང་དང་རྟོགས་པའི་ཆོས། །ཚོགས་གཉིས་ཉམས་ལེན་འཕགས་པའི་དགེ་འདུན་ཏེ། །བསླུ་མེད་དཀོན་མཆོག་རྣམ་གསུམ་གཟུ་དང་དཔང་། །བྱིན་རླབས་མཆོག་སྩོལ་རྩ་རྒྱུད་བླ་མ་དང་། །དངོས་གྲུབ་ཆར་འབེབས་ཡི་དམ་ཞི་ཁྲོའི་ལྷ། །དམ་ལྡན་བུ་བཞིན་སྐྱོང་བའི་མཁའ་འགྲོའི་ཚོགས། །རྩ་གསུམ་རྒྱ་མཚོས་གཟུ་དང་དཔང་མཛོད་ཅིག །ཁྱད་པར་དུས་གསུམ་རྒྱལ་བ་མ་ལུས་པའི། །མཐུ་སྟོབས་འདུས་པ་ཡང་དག་ཧེ་རུ་ཀཿ གཏུམ་པོ་རིགས་བཞི་ཁྲོ་བཅུ་སྒོ་བར་བཅས། །མངོན་སྤྱོད་དྲག་པོའི་ལས་ཀྱིས་གཟུ་དཔང་མཛོད། །གསང་སྔགས་ཕྱི་ནང་བཀའ་གཏེར་སྲུང་མའི་ཚོགས། །གཙང་རིགས་དཔལ་མགོན་ཡུལ་ལྷ་གཞི་བདག་སོགས། །དཀར་ཕྱོགས་སྐྱོང་བའི་མཐུ་ལྡན་ཐམས་ཅད་ཀྱིས། །དམ་ལྡན་བདག་གི་གཟུ་དང་དཔང་མཛོད་ཅིག །འགྲོ་ཀུན་བདེ་གཤེགས་སྙིང་པོའི་རང་བཞིན་ལ། །དགྲ་གཉེན་ཕྱོགས་ཆའི་སྡང་ཞེན་མ་དམིགས་ཀྱང་། །གཟུང་འཛིན་གདོན་གྱིས་བརླམས་པའི་ཉམས་པ་བདུན། །བྱང་ཆུབ་སེམས་གཉིས་བསྒོམ་པའི་དགྲ་རུ་ལངས། །དམ་ལས་ཉམས་པས་སློབ་དཔོན་མཆེད་ལ་བརྙས། །བཀའ་ལས་ཉམས་པས་ལས་འབྲས་ཁྱད་དུ་བསད། །དོན་ལས་ཉམས་པས་བདེན་གཉིས་ཆད་པར་བལྟ། །ལས་ཀྱིས་ཉམས་པས་ཉེས་མེད་རྣམས་ལ་འཇུག །མཚན་མས་ཉམས་པས་ཆོས་ལ་ཕྱོགས་རིས་བཟུང་། །འདོད་པས་ཉམས་པས་ཉེས་མེད་འཕྲོག་བཅོམ་བྱས། །ལོག་པས་ཉམས་པས་སེམས་ཅན་སྡུག་ལ་སྦྱོར། །དང་པོ་སངས་རྒྱས་བསྟན་པ་གཉན་པོ་བཤིགས། །བར་དུ་དཀོན་མཆོག་གསུམ་གྱི་དབུ་འཕང་སྨད། །ཐ་མ་གསང་སྔགས་དྲལ་ཞིང་ལོག་ལྟ་བྱས། །བླ་མའི་སྐུར་བསྡོས་གསུང་བཅག་ཐུགས་རྒྱུད་དཀྲུགས། །རྡོ་རྗེའི་མཆེད་དང་ལྕམ་དྲལ་བརྙས་ཤིང་སྨད། །ཉེས་མེད་སེམས་ཅན་ཡོངས་ལ་གནོད་ཅིང་འཚེ། །དགེ་བཅུ་ཁྱད་བསད་མི་དགེ་དང་དུ་བླངས། །བསྲུང་སྡོམ་བསླབ་བྱ་དམ་ཚིག་ཀུན་དང་འགལ། །མཚམས་མེད་ལྔ་ཡི་ལས་ཀྱང་འདི་ཡིས་བྱས། །དེ་འབྲས་ངན་སོང་སྡུག་བསྔལ་མྱོང་ངེས་པས། །འདི་ལ་མངོན་སྤྱོད་ཕྲིན་ལས་མི་མཛད་ན། །མཐར་གྱིས་འཆི་བ་སེམས་ཅན་ཀུན་ལ་ཡོད། །དུས་ལ་བབས་ན་དཔག་བསམ་ཤིང་ཡང་འགྱེལ། །བསམ་སྦྱོར་ངན་པའི་འབྲས་བུ་མཐར་ཕྱིན་ན། །ཚར་གཅོད་རྗེས་འཛིན་མཐུ་སྟོབས་རྫུན་དུ་ཟད། །ཆོས་ཉིད་བདེན་པ་བསླུ་བ་མེད་པ་དང་། །སྔགས་ཀྱིས་སྒྲོལ་བ་སངས་རྒྱས་རྣམས་ཀྱི་མཐུས། །ཨ་བྷི་ཙརྱའི་དུས་ལ་ད་བབ་ན། །བརྣག་པའི་ལས་ལ་བཏང་སྙོམ་མ་མཛད་ཅིག །དུས་གསུམ་སངས་རྒྱས་རྣམས་ཀྱང་དབྱིངས་ནས་གཟིགས། །བདེན་གཉིས་རྒྱུ་འབྲས་བསླུ་མེད་གཟུ་དང་དཔང་། །དཔལ་མགོན་ཆོས་སྐྱོང་རྣམས་ནི་མཐུ་རྩལ་བསྐྱེད། །ཉེས་ཅན་འདི་ལ་མངོན་སྤྱོད་ཕྲིན་ལས་མཛོད། ། གསང་བདག་ཕྱག་རྡོར ་ལྷ་ཚོགས་འཁོར་བཅས་རྣམས། །ཆོས་ཉིད་ཞི་བའི་ངང་ལས་མ་གཡོས་ཀྱང་། །ཐུགས་རྗེའི་ཐབས་ཀྱིས་དྲག་པོའི་སྐུར་བཞེངས་ལ། །དགྲ་བགེགས་མ་ལུས་སྒྲོལ་བའི་ཕྲིན་ལས་མཛོད། །ཅེས་བརྗོད་པས་འགྲོ་ཀུན་ཐུགས་རྗེས་མི་གཏོང་བའི་ཕྱིར་ཚར་གཅོད་དབྱིངས་སྒྲོལ་གྱི་ཕྲིན་ལས་ལ་ཆེས་ཆེར་དགོངས་པར་བསམ་མོ། །གསུམ་པ་དམིགས་བྱ་གསལ་བ་ནི། བདག་ཉིད་དཔལ་ཆེན་པོ་ཡང་དག་ཧེ་རུ་ཀར་གསལ་བའི་ཐུགས་ཀ་ནས་ཨེ་ནག་པོ་གཅིག་མདུན་དུ་འཕྲོས་པ་ལས། དམ་ཉམས་པའི་དགྲ་བགེགས་ཀྱི་ལས་ངན་པའི་རྣམ་སྨིན་ལས་གྲུབ་པའི་གནམ་ལྕགས་ཀྱི་ཁང་སྒྲོམ་ནག་པོ་ཟུར་གསུམ་པ། མཚན་ཉིད་དང་ལྡན་པར་གྱུར་པའི་ནང་དུ་ནྲྀ་ཏྲི་ལས། དམ་ཉམས་པའི་དགྲ་བགེགས་གང་ཡིན་པ་དེ་ཉིད་ཤིན་ཏུ་ཉམས་ཐག་པའི་གཟུགས་ཅན། མྱ་ངན་གྱི་ཕྱག་རྒྱ་བྱེད་ཅིང་འོ་དོད་ཀྱི་སྨྲེ་སྔགས་འདོན་པ། མགོན་སྐྱབས་ཀྱི་ལྷ་དང་བྲལ་ཞིང་འདར་ཡེད་ཡེད་གནས་པ་ཞིག་ཏུ་གྱུར་བར་བསམ་མོ། བཞི་པ་རྣམ་ཤེས་དགུག་གཞུག་བྱ་བ་ནི། བདག་མདུན་གྱི་ཐུགས་ཀ་ནས་སྤྲུལ་པའི་ཕོ་ཉ་འགུགས་པར་བྱེད་པའི་ལྕགས་ཀྱུ་ཅན་དང་། རིང་ནས་འཛིན་བྱེད་ཞགས་པ་ཅན་དང་། ཡན་ལག་སྡོམ་བྱེད་ལྕག་སྒྲོག་ཅན་དང་། མྱོས་ཤིང་བརྒྱལ་བྱེད་དྲིལ་བུ་མ་དང་། ལས་རླུང་བསྐུལ་ནས་སྐྱོད་བྱེད་མ་དང་། སྟོབས་ནུས་འཇོམས་པའི་ཐོ་བ་ཅན་དང་། འདེད་པར་བྱེད་པའི་དབྱུག་པ་ཅན་དང་། ལྷ་དང་འབྱེད་པའི་ཕྲ་མ་མཁན་དང་། ལྷ་སྲུང་སྐྲོད་པའི་རྫུ་འཕྲུལ་ཅན་ལ་སོགས་པ་གཟུགས་དང་ཁ་ཏོག་སྣ་ཚོགས་པ། རྣམ་པར་འགྱུར་བའི་སྤྲུལ་བསྒྱུར་ཅིར་ཡང་སྟོན་པ་གྲངས་མེད་འཕྲོས་པས་དགྲ་བགེགས་གང་ཡིན་པ་དེ་ཉིད་རང་དབང་མེད་པར་བཀུགས་ནས་ལིང་ཀ་ལ་ཐིམ་པར་གྱུར་བར་བསམ་ལ། ན་མོ་རིག་འཛིན་རྩ་རྒྱུད་ཀྱི་དཔལ་ལྡན་བླ་མ་དམ་པ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས། གནས་གསུམ་གྱི་དཔའ་བོ་མཁའ་འགྲོ། དམ་ཅན་ཆོས་སྐྱོང་སྲུང་མ་དང་བཅས་པ་རྣམས་ཀྱི་བཀའ་བདེན་པ་དང་། བསླུ་བ་མེད་པ་དཀོན་མཆོག་རིན་པོ་ཆེ་རྣམ་པ་གསུམ་གྱི་བཀའ་བདེན་པ་དང་། ཕྱོགས་བཅུ་དུས་གསུམ་གྱི་རྒྱལ་བ་མ་ལུས་པའི་མཐུ་སྟོབས་གཅིག་ཏུ་བསྡུས་པའི་བདག་ཉིད་དཔལ་གསང་བའི་བདག་པོ་ཕྱག་ན་རྡོ་རྗེའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་ཆོས་ཉིད་དེ་བཞིན་ཉིད་རྒྱུ་འབྲས་བསླུ་བ་མེད་པ་དང་བཅས་པའི་བདེན་པ་དང་། བདེན་པ་ཆེན་པོའི་མཐུས། བསྒྲལ་བའི་ཞིང་བཅུ་དང་། ཉམས་པ་བདུན་ལ་གཏོགས་པའི་དགྲ་བགེགས་སྤྱི་དང་། ཁྱད་པར་དུ་སངས་རྒྱས་ཀྱི་བསྟན་པ་བཤིགས་པ། བླ་མ་དམ་པའི་སྐུ་ལ་བསྡོ་བ། མཚམས་མེད་པ་ལྔ་བྱེད་པ་རྣམས་དང་། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གཟུགས་ཅན་སྡང་བའི་དགྲ་དང་། གཟུགས་མེད་གནོད་བྱེད་བགེགས་ཀྱི་ཚོགས་རྣམས་སྲིད་པ་གསུམ་གྱི་ཁོངས་གར་གནས་གང་དུ་བྲོས་ཀྱང་མགོན་སྐྱབས་ཀྱི་ལྷ་དང་། ཚེ་དང་དབང་ཐང་བསོད་ནམས་དང་དུས་ཀྱི་དབང་དུ་མི་བཏང་བར་དུས་ད་ལྟ་ཉིད་དུ་དམིགས་པའི་རྟེན་གཟུགས་ལིང་ག་འདི་ལ་ཁུག་ཅིག རྩ་སྔགས་ཀྱི་གཤམ་དུ། ནྲྀ་ཏྲི་སརྦ་ཤ་ཏྲུཾ་ཧུར་ཐུམ་ཛཿ ཛཿཧཱུྃ་བཾ་ཧོ། ཨ་ཝེ་ཤ་ཡ་ཨ་ཨཿ ཞེས་རོལ་མོའི་སྒྲ་དྲག་པོ་དང་བཅས་འགུགས་གཞུག་ལན་མང་དུ་བྱའོ། །ལྔ་པ་བསྐུལ་ཞིང་ཕོ་ཉ་ལས་ལ་འགྱེད་པ་ནི། ཧཱུྃ་ཧཱུྃཿ རྒྱལ་ཀུན་མཐུ་སྟོབས་འདུས་པའི་སྐུ། །གསང་བདག་དཀྱིལ་འཁོར་ལྷ་ཚོགས་རྣམས། །བསྟན་པ་གཉན་ལ་དགྲ་དར་ན། །མི་མངོན་དབྱིངས་ནས་སྐུར་བཞེངས་ལ། །རྣལ་འབྱོར་བདག་གི་ར་མདའ་རློག །གནས་འདིར་དྲག་པོའི་ལས་ལ་ཡ། །ཡིད་ལ་བརྣག་པའི་དགྲ་བགེགས་རྣམས། །དྲག་པོའི་ལས་ཀྱིས་མྱུར་དུ་སྒྲོལ། །སླས་དང་བྱན་མོ་བྲན་གྱི་ཚོགས། །གནས་འདིར་དྲག་པོའི་ལས་ལ་དགོངས། །སྔོན་ཚེ་དཔལ་ཆེན་ཧེ་རུ་ཀ །ཤིན་ཏུ་གདུག་ཅིང་གཏུམ་བག་ཅན། །ཐམས་ཅད་མ་ལུས་འདུལ་མཛད་པའི། །དབང་དང་བྱིན་རླབས་རྨད་པོ་ཆེ། །ལྷ་ཆེན་ལ་སོགས་དབང་བསྡུས་ནས། །འཁོར་རྣམས་དབང་ཕྱུག་སླས་སུ་བྱས། །སོ་སོའི་ལས་རྣམས་བསྐོས་པ་དེ། །ཇི་ལྟར་ཁས་བླངས་དམ་བཅས་པ། །མ་ཐོགས་མྱུར་བར་མངོན་དུ་ཕྱུང་། །དམ་བཅའ་བཞིན་དུ་མ་བྱས་ན། །མགོ་ལུས་སྙིང་ཡང་ཚལ་བ་བདུན། །ཡཀྴ་ཁྲོ་བོས་གཏུབ་པར་འགྱུར། །དེ་བས་རྣལ་འབྱོར་སྔགས་འཆང་གིས། །ཇི་ལྟར་བཅོལ་བ་བཞིན་དུ་བྱོས། །ལས་དེ་མངོན་དུ་མ་བྱས་ན། །རང་གིས་ཁས་བླངས་མནའ་བོར་བཞིན། །རུས་མྱགས་ཚིགས་ནས་དམྱལ་བར་འགྲོ། །དེ་བས་རང་གིས་མནའ་བོར་བའི། །སྡོམ་བྱས་དེ་ལས་མ་འདའ་བར། །རྣལ་འབྱོར་དམ་ལ་གནས་གྱུར་བའི། །ལས་རྣམས་ཡོངས་སུ་བྱ་བ་དང་། །འཁོར་རྣམས་བུ་གཅིག་བཞིན་དུ་སྐྱོངས། །ཕྲ་མེན་མ་ཡང་དངོས་གྲུབ་ཐོབ། །བཅོལ་པའི་ལས་རྣམས་མངོན་དུ་བྱོས། །ཞིང་བཅུ་ཉམས་པ་བདུན་ཚངས་པའི། །གཟུགས་ཅན་དགྲ་དང་གཟུགས་མེད་བགེགས། །ཞི་བའི་ཐབས་ཀྱིས་གདུལ་དཀའ་བས། །དྲག་པོའི་ལས་ཀྱིས་མྱུར་དུ་སྒྲོལ། །གྲངས་མེད་སྤྲུལ་པ་ཡང་སྤྲུལ་ཚོགས། །ཁྱེད་རྣམས་དཔལ་གྱི་ཕོ་ཉ་སྟེ། །རྦད་ཅིང་བཏང་བ་ང་ཡིས་བྱེད། །འགུགས་ཤིང་སྒྲོལ་བ་ཁྱེད་ཀྱིས་གྱིས། །རྣལ་འབྱོར་མངོན་ཤེས་མི་ལྡན་པས། །སྒྲོལ་ཞིང་གང་ལགས་མ་རྟོགས་ཀྱང་། །ཁྱེད་རྣམས་ཐུགས་རྗེས་ཉེར་དགོངས་ལ། །གང་ལ་བྱ་བ་ཁྱོད་ཀྱིས་ཤེས། །བསྒྲལ་བར་འོས་པའི་དགྲ་བགེགས་རྣམས། །ལྕགས་ཀྱུ་ཅན་གྱིས་སྙིང་ནས་ཟུངས། །ཞགས་པ་ཅན་གྱིས་མགུལ་ནས་ཆིངས། །ལྕགས་སྒྲོག་ཅན་གྱིས་དབང་པོ་སྡོམ། །དྲིལ་བུ་ཅན་གྱིས་མྱོས་སུ་ཆུགས། །རང་དབང་མེད་པར་འདིར་ཁུག་ལ། །གཟུགས་བྱང་འདི་དང་གཉིས་མེད་མཛོད། །རྩ་སྔགས་ཀྱི་ཤམ་དུ། གནོད་བྱེད་དགྲ་བགེགས་ཐམས་ཅད་བཛྲ་ཨངྐུ་ཤ་ཡ་ཛ༔ རཏྣ་པཱ་ཤ་ཧཱུྃ༔ པདྨ་སྥོ་ཊ་བཾཿ ཀརྨ་གྷནྚེ་ཧོཿ ཞེས་བརྗོད་པས། སྤྲུལ་པའི་ཕོ་ཉ་རྣམས་ཀྱིས་དགྲ་བགེགས་འགུགས་འཆིང་སྡོམ་མྱོས་ཀྱི་ལས་མཛད་ཅིང་། ལས་རླུང་གིས་བཏེགས་ནས་རང་དབང་མེད་པར་བྱེ་ཚན་ལ་མར་ཐིམ་པ་བཞིན་ལིང་ག་ལ་ཐིམ་ནས་རེངས་ཤིང་འགུལ་མི་ནུས་པར་བསམ་མོ། །དྲུག་པ་ལྷ་དང་དབྱེ་བ་ནི། ལིང་གར་དབྱེ་རྫས་ཀྱིས་བདུག་ཅིང་། བྱ་འུག་གི་སྒྲོ་བཅས་དབྱེ་བའི་ཕྱག་རྒྱ་བྱས་ལ། ཧཱུྃ་ཧཱུྃཿ དཀྱིལ་འཁོར་ལྷ་དང་རྣལ་འབྱོར་བའི། །ཐུགས་ལ་བརྣག་པའི་དགྲ་བགེགས་རྣམས། །སྲུང་སྐྱོབས་བྱེད་པའི་ལྷ་ཁྱོད་ཉོན། །གདུག་པའི་སེམས་ལྡན་དགྲ་བགེགས་འདིས། །རྒྱལ་བསྟན་བསྣུབས་ཤིང་རྟེན་གསུམ་བཤིགས། །དཀོན་མཆོག་གསུམ་སྨོད་བླ་མར་བསྐུར། །གསང་སྔགས་བྲལ་ཞིང་མཆེད་ལྕམ་བརྙས། །རྣལ་འབྱོར་ལ་སྡང་སེམས་ཅན་འཚེ། །མཚམས་མེད་ལྔ་དང་མི་དགེ་བཅུ། །སྤྱད་ཅིང་རྒྱུ་འབྲས་ཁྱད་བསད་ནས། །དཔག་ཚད་སྟོང་དུ་ལྷུང་བ་ཡི། །དམྱལ་བའི་སྡུག་བསྔལ་མྱོང་འགྱུར་བས། །བདག་གིས་མྱུར་དུ་བསྒྲལ་ནས་ནི། །གཟུགས་ཀྱིས་ལྷ་རྣམས་མཆོད་པ་ཡིན། །ཁྱེད་ཀྱིས་སྲུང་བར་མ་བྱེད་པར། །སྡིག་ཅན་འདི་ནི་མྱུར་དུ་སྤོངས། །རྣམ་པར་མི་རྟོག་ཐུགས་ཀྱི་བདག །ལས་ངན་འདི་ལ་མ་ཞུགས་ཅིག །སྤྲོས་བྲལ་ཆོས་སྐུའི་མཁའ་དབྱིངས་སུ། །ཡེ་ཤེས་ལྷར་བཅས་གཤེགས་སུ་གསོལ། །ལས་ཀྱིས་བསྐྱེད་པའི་འཇིག་རྟེན་ལྷ། །དམ་ཚིག་ནུས་སྟོབས་ཉམས་སྲིད་པས། །འདི་ཡི་མགོན་སྐྱབས་མ་མཛད་པར། །རང་རང་གནས་སུ་མྱུར་དུ་དེངས། །རྩ་སྔགས་མཐར། ནྲྀ་ཏྲི་སརྦ་ཧ་ས་ན་ཡ་ཧ་ས་ན་ཡ་ཧཱུྃ་ཕཊ༔ དམ་ཉམས་པའི་དགྲ་བགེགས་འདི་རྣམས་ལ་སྲུང་སྐྱོབ་བྱེད་པའི་ལྷ་སྲུང་ཐམས་ཅད་ཨུ་ཙ་ཏ་ཡ་ཧཱུྃ་ཕཊཿ ཅེས་བརྗོད་པ་ཙམ་གྱིས་མགོན་སྐྱབས་བྱེད་པའི་ལྷ་དང་སྲུང་མ་ཐམས་ཅད་ཀྱིས་རིང་དུ་སྤངས་བར་བསམ་མོ། །བདུན་པ་གནད་ལ་དབབ་པ་ལ་བཞི་ལས། དང་པོ་བསད་པ་ནི། ཧཱུྃ་ཧཱུྃཿ དམ་ཚིག་ཆེན་པོའི་དུས་ལ་བབས། །སྤྲུལ་པ་ཆེན་པོའི་དུས་ལ་བབས། །བྲན་དང་བཀའ་ཉན་ཕོ་ཉའི་ཚོགས། །ཁྱེད་ཀྱི་དམ་ཚིག་དུས་ལ་བབས། །བྱང་ཆུབ་མཆོག་ཏུ་སེམས་བསྐྱེད་ཅིང་། །དུས་གསུམ་རྒྱལ་བའི་གདུང་གསོབ་པའི། །རིག་འཛིན་བདག་ཅག་དཔོན་སློབ་ལ། །གནོད་ཅིང་གདུག་པའི་དགྲ་དང་བགེགས། །བདུད་དང་བར་དུ་གཅོད་པའི་ཚོགས། །དངོས་གྲུབ་འཕྲོག་ཅིང་འཚེ་བ་རྣམས། །ལྷ་འམ་འོན་དེ་བདུད་ཀྱང་རུང་། །ཁྲོ་བོ་ཆེན་པོའི་བྱིན་རླབས་ཀྱིས། །ཡུད་ཙམ་གྱིས་ནི་འདིར་ཁུག་ལ། །མཐུ་དང་རྫུ་འཕྲུལ་མེད་པར་གྱིས། །ཟུངས་ཤིག་རྒྱོབས་ཤིག་རྣམ་པར་ཆིངས་། །གཏོགས་ཤིག་གྲོགས་དང་བྲལ་བར་གྱིས། །སྨྱོ་ཞིང་འབོག་དང་བརྒྱལ་དུ་ཆུགས། །ཕོབ་ཅིག་རྣམ་པར་གཟིར་བར་གྱིས། །ང་ཡི་དབང་དུ་གྱུར་ནས་ཀྱང་། །བསྒོ་བའི་བཀའ་ལ་ཉན་པར་གྱིས། །སྔོན་ཆད་ཁས་བླངས་དམ་བཅས་ལྟར། །མངོན་སྤྱོད་ཚུལ་བཞིན་བསྒྲལ་བ་དང་། །ལུས་ངག་རྡུལ་དུ་བཤིགས་ནས་ཀྱང་། །སྡུག་བསྔལ་ཉམས་སུ་མྱོང་བར་མཛོད། །ཅེས་དང་། གང་ཞིག་དཀོན་མཆོག་གསུམ་སོགས་དང་། །སངས་རྒྱས་བསྟན་ལ་གནོད་བྱེད་དང་། །བླ་མ་སྨོད་བརྩོན་མ་རུང་རྣམས། །མཁས་པས་བསྒྲིམས་ཏེ་གསད་པར་བྱ། །ཆོས་མིན་ལྡན་དང་སྡིག་སྤྱོད་དང་། །རྟག་ཏུ་སེམས་ཅན་གནོད་བརྩོན་དང་། །དམ་ཚིག་སྡང་རྣམས་སྙིང་བརྩེ་བས། །སྔགས་པས་སྔགས་ཀྱིས་གཞོམ་པར་བྱ། །རྩ་སྔགས་མཐར། ཨོཾ་མཱ་ར་ན་སོད་སོད། མཱ་ར་ན་བྱིང་བྱིང་། མཱ་ར་ན་རྨུགས་རྨུགས། མཱ་ར་ན་ཧལ་ཧལ། མཱ་ར་ན་དུན་དུན། མཱ་ར་ན་མྱོགས་མྱོགས། བྱིང་བྱིང་། ཐུཾ་རི་ལི་ལི་རྦད་ཛ་ཛ༔ ནྲྀ་ཏྲི་སརྦ་ཤ་ཏྲུཾ་ཨེ་ཧུར་ཐུམ་ཛ༔ མ་ར་ཡ་རྦད་རྦད། ཅེས་བཟླས་པས། ཁོའི་སྙིང་ནང་དུ་ངན་སེམས་གདུག་པའི་རྣམ་སྨིན་དེ་ཉིད་ལྕགས་བསྲེགས་ཀྱི་འཁོར་ལོ་རྩིབས་དྲུག་པ། དྲག་སྔགས་དང་བཅས་པའི་རྣམ་པས་གཡོན་དུ་འཁོར་བས་སྙིང་ཁྲག་དམར་ཐོ་རོ་རོ་གཏོར་ཞིང་སྲོག་རྩ་རྦད་རྦད་བཅད། རྣམ་ཤེས་མར་མེ་བསད་པ་ལྟར་ནག་སྐེམ་སྐེམ་སོང་བར་བསམ་ལ། བསད་སྔགས་མང་དུ་བཟླའོ། །གཉིས་པ་མནན་པ་ནི། ཧཱུྃ་ཧཱུྃ༔ གསང་བདག་དཀྱིལ་འཁོར་ལྷ་ཚོགས་རྣམས། །ཐུགས་རྗེའི་ཀློང་ནས་སྐུར་བཞེངས་ལ། །མ་རིག་གཉིས་འཛིན་རྟོག་ཚོགས་ཀྱིས། །བསྐྱེད་པའི་དགྲ་བགེགས་དམ་སྲིའི་དཔུང་། །ཚད་མེད་རྣམ་བཞིའི་ཕྱག་རྒྱ་ཡིས། །དགུག་གཞུག་བཅིངས་དང་མྱོས་བྱས་ནས། །སྐྱེ་མེད་ཆོས་སྐུའི་ཀློང་ཆེན་པོར། །ལྡོག་མེད་མནན་པའི་ལས་མཛོད་ཅིག །རྩ་སྔགས་མཐར། ནྲྀ་ཏྲི་སརྦ་ཤ་ཏྲུཾ་ཧུར་ཐུམ་ཛ༔ མཱ་ར་ཡ་བྷྱོ་རྦད་ཐུམ་རིལ་ནན། ཨོཾ་སརྦ་ཛི་ན་ཧཱུྃ་ཛ༔ ཏྲི་ཛ་དྲིག་ནན། ནྲྀ་ཏྲི་མུ་ཏྲི་ལཾ་ནན། ཤན་ཏྲི་གན་ཏྲི་ནན། ཕུང་སྲི་གུཾ་གུཾ་སྟྭཾ་བྷ་ཡ་ནན། ནྲྀ་ཏྲི་སརྦ་ཤ་ཏྲུཾ་ཀཱ་ཡ་ཝཀྐ་ཙིཏྟ་སྟྭཾ་བྷ་ཡ་ནན། མ་ར་ཡ་ནན། ན་ཤ་ཡ་ནན། ཆིངས་ཤིག ཅེས་བརྗོད་པས། བདག་མདུན་གྱི་ལྷ་ཚོགས་རྣམས་དགྲ་བགེགས་མནན་པའི་ལས་ལ་དགོངས་པ་ཙམ་གྱིས་མདུན་གྱི་ལིང་ག་དགྲ་བགེགས་དངོས་སུ་གསལ་བའི་གནས་ལྔར་གནམ་ལྕགས་ཀྱི་འཁོར་ལོ་རྩིབས་བཞི་པ་ལྟེ་བར་སྣ་ཚོགས་རྡོ་རྗེའི་མཚན་པ་རེ་རེས་མནན་ཅིང་། ཡན་ལག་དང་ཚིགས་བཞི་ཐམས་ཅད་རྡོ་རྗེ་རྒྱ་གྲམ་རེ་རེས་གཟིར་བས་ཉམས་ཐག་ཅིང་གཡོ་འགུལ་མི་ཤེས་པར་གྱུར་བར་བསམ། མནན་སྔགས་མང་དུ་བཟླའོ། །གསུམ་པ་ཐུན་བརྡེག་པ་ནི། ཧཱུྃ་ཧཱུྃཿ ཁྲག་འཐུང་ཁྲོས་པ་དྲག་པོའི་མཚོན། །གཏུམ་དྲག་ཕོ་ཉ་འབར་བའི་ཐུན། །ལྕགས་ཕྱེ་རྡོ་ཕྱེ་དུག་སྣ་དང་། །ཡུངས་དཀར་ཡུངས་ནག་སྐེ་ཚེ་ཏིལ། གཟེ་མ་སྐྱེར་མ་སེ་བའི་ཚེར། །རྣོ་མྱུར་ཤུགས་དྲག་རྡོ་རྗེའི་མེ། །མི་བཟད་མཚོན་ཆའི་འཁྲུལ་འཁོར་ནི། །གནམ་ས་འཁྲུགས་པའི་ཐོག་སེར་བཞིན། །རྫས་སྔགས་ཏིང་འཛིན་ལྡན་པས་བྲབ། །དགྲ་བགེགས་གཟུགས་ཕུང་རྟེན་ལ་ཡ། །རྡུལ་ཕྲན་བཞིན་དུ་བརླག་པར་མཛོད། །རྣམ་ཤེས་ཆོས་དབྱིངས་ཀློང་དུ་སྒྲོལ། །རྩ་སྔགས་མཐར། །དགྲ་བགེགས་གནོད་བྱེད་སརྦ་ཤ་ཏྲུཾ་ཧུར་ཐུཾ་ཛཿ ནྲྀ་ཏྲི་མ་ར་ཡ་རྦད་རྦདཿ ཅེས་བརྗོད་པས། ཐུན་རྫས་དྲེགས་པའི་དམག་ཚོགས་ནད་མཚོན་དུག་གི་ཐོག་སེར་དྲག་པོས་དམིགས་བྱ་རྣམས་གཟིར་ཞིང་བརྡེག་པས་གཟུགས་ཕུང་ཕྱེ་མར་བརླག་ནས་རྣམ་པར་ཤེས་པའི་ངོ་བོ་ཏྲི་དམར་སེར་ནྲྀ་དུད་ཁ་མར་མེ་འཆི་ཁའི་འོད་ལྟ་བུ་དེ་ཡང་ནག་སྐེམ་གྱིས་བསད་པར་བསམ་མོ། །བཞི་པ་དེ་ལྟར་གནད་ལ་དབབ་པའི་དོན་བསྟན་པ་ནི། ཧཱུྃ་ཧཱུྃཿ ཞེ་སྡང་རྡོ་རྗེ་འཁོར་བཅས་པས། །འཇིག་རྟེན་ཁམས་ནི་རབ་འབྱམས་ཀུན། །ཁྲོས་པས་སྐད་ཅིག་བརླག་མཛད་དེ། །བརླག་པར་མ་གྱུར་གང་ཡང་མེད། །སྙིང་རྗེའི་སེམས་ཀྱིས་རབ་བཅིངས་ནས། །དྲག་པོའི་ལས་ཀྱིས་བསྒྲལ་བ་རྣམས། །འཁོར་བ་ལས་ནི་ཕ་རོལ་བྱས། །སངས་རྒྱས་རྣམས་ཀྱི་ཞིང་དུ་འགྲོ། །ཀྱེ་མ་གསད་བྱ་ལེགས་པར་བྱས། །གསད་པར་བྱ་བ་མ་བསད་དོ། །ཇི་སྲིད་སྡིག་རྣམས་གྲོལ་བར་བྱས། །ཤི་བ་དེ་ཡང་མ་ཤི་སྟེ། །སྡིག་པ་སྟོང་ཕྲག་བྱས་པ་སྤངས། །མནར་མེད་ལ་སོགས་མི་སྐྱེའོ། །ཨེ་མ་བདག་ཉིད་ཆེན་པོ་སྟེ། །བསད་པས་སངས་རྒྱས་བྱང་ཆུབ་ཐོབ། །སླར་ཡང་བརྩེ་བས་སེམས་ཅན་རྣམས། །བསད་པར་བྱ་བས་གསད་པར་བྱ། །ཨེ་མ་སྙིང་རྗེའི་སྟོབས་ཀྱིས་ཏེ། །སྙིང་རྗེ་དམན་པས་འགྲུབ་མི་འགྱུར། །སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེས་གཏམས་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །ཞེས་བརྗོད། བརྒྱད་པ་ཕུར་བུ་གདབ་པ་ལ་གསུམ་ལས། དང་པོ་ཕུར་བུ་ལྷར་བསྐྱེད་ཅིང་བསྐུལ་བ་ནི། ཕུར་བུ་ཐལ་མོ་སྦྱར་བའི་བར་དུ་བཟུང་ལ། བདག་ཉིད་དཔལ་ཆེན་པོ་ཡང་དག་ཧེ་རུ་ཀར་གསལ་བའི་གཡས་ཀྱི་སོར་མོ་ལྔ་ལ་ཨོཾ་ཧཱུྃ་ཏྲཾ་ཧྲཱི་ཨཱ༔ལས་རིགས་ཀྱི་ཡབ་ལྔ་དང་། གཡོན་གྱི་སོར་མོ་ལྔ་མཱུཾ་ལཱཾ་མཱཾ་པཱཾ་ཏཱཾ་ལས་རིགས་ཀྱི་ཡུམ་ལྔ་སྟེ་རིགས་ལྔ་ཡབ་ཡུམ་བཅུར་གྱུར་པ་རྣམས་ཀྱིས་ས་མ་ཡཱ་སྟྭཾ། ཞེས་བརྗོད་ཅིང་རྗེས་སུ་ཆགས་པའི་སྦྱོར་བས་སྙོམས་པར་ཞུགས་པའི་མཁའ་ལ་སྲས་མཆོག་བཛྲ་ཀཱི་ལ་ཡ་སྐུ་སྟོད་ཁྲོ་བོ་མཐིང་ནག་ཕུར་བུ་འདྲིལ་བ། དུར་ཁྲོད་ཀྱི་ཆས་ཀྱིས་བརྒྱན་པ། སྐུ་སྨད་གནམ་ལྕགས་ཀྱི་ཕུར་བུ་ཟུར་གསུམ་པ་ཤིན་ཏུ་རྣོ་བའི་དབལ་དང་ལྡན་པ་ཆུ་སྲིན་གྱི་ཁ་ནས་སྦྲུལ་གྱི་ཆུན་པོ་སྐྱུགས་པ། ཕྱི་ཕུར་བུའི་རྣམ་པ་ཅན་ལ་ནང་དུ་གསང་བའི་བདག་པོའི་དཀྱིལ་འཁོར་ཡོངས་སུ་རྫོགས་པ། རྩེ་མོར་དྲེགས་པའི་དམག་ཚོགས་ལས་ལ་རྔམས་ཤིང་འོད་དང་མེ་ཡི་ཚ་ཚྭ་འཕྲོ་བ་ཞིག་ཏུ་གྱུར། ཨཱོྃ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཀྐ་ཙིཏྟ་ཨ་བྷི་ཥིཉྩ་མཾ། ཞེས་བརྗོད་པས། ཕུར་བུའི་གནས་གསུམ་དུ་ཨོཾ་ཨཱ༔ཧཱུྃ་གསུམ་གསལ་བ་ལས་འོད་ཟེར་འཕྲོས། ཕྱོགས་དུས་ཀྱི་རྒྱལ་བ་སྲས་བཅས་མ་ལུས་པ་མཆོད་ཅིང་བྱིན་རླབས་ནུས་མཐུ་ཐམས་ཅད་བསྡུས་ནས་ཕུར་པ་ལ་ཐིམ་པས་སྲིད་ཁམས་རྒྱ་མཚོ་དུས་གཅིག་ལ་སྒྲོལ་བར་ནུས་པའི་དབང་ཐོབ་པར་གྱུར་བར་བསམ་ལ། ཧཱུྃ་ཧཱུྃཿ ཁྲོ་རྒྱལ་ཁྲག་འཐུང་ཆེན་པོ་ཡི། །སྲས་མཆོག་བཛྲ་ཀཱི་ལ་ཡ། །བསྒྲིལ་བས་ལྷ་ཡང་སྐྲག་བྱེད་ཅིང་། །ཕྱར་བས་ཁམས་གསུམ་སྔངས་བྱེད་ན། །བཏབ་པས་དགྲ་བགེགས་སྨོས་ཅི་དགོས། །ཡེ་ནས་མ་བྱུང་མ་སྐྱེས་པའི། །ཆོས་ཉིད་དོན་གྱི་སྙིང་པོ་ནི། །གཟུང་འཛིན་མཐའ་བྲལ་དོན་རྟོགས་ཏེ། །ང་བདག་འཛིན་པའི་རྣམ་རྟོག་གིས། །དྲེགས་ཤིང་གཟིར་བའི་རུ་ཏྲ་དེ། །མ་བསྒྲལ་བ་ནི་ཉེས་པ་སྟེ། །ཐབས་དང་ཤེས་རབ་སྙིང་རྗེ་གསུམ། །མཐུན་ཞིང་མཚུངས་ལྡན་སྲས་ཀྱིས་བསྒྲལ། །དམ་པའི་དོན་དེ་མ་རྟོགས་པར། །དངོས་པོར་སྤྱད་པས་འཁོར་བར་ལྟུང་། །མཁས་རྟོགས་ལྡན་པས་སྤྱད་པ་ཡིས། །འཕགས་པ་མཉེས་ཤིང་སེམས་ཅན་སྒྲོལ། །ཚོགས་གཉིས་རྫོགས་ཏེ་སྐུ་གསུམ་ཐོབ། །དེ་ཕྱིར་སྙིང་རྗེའི་ཡུལ་གྱུར་པའི། །ཞིང་བཅུ་ཚངས་པའི་ལོག་འདྲེན་རྣམས། །གཟུང་འཛིན་བག་ཆགས་རྒྱུན་གཅོད་ཕྱིར། །ཐུགས་རྗེས་ཡེ་ཤེས་ཀློང་དུ་སྒྲོལ། །ཞེས་དང་། ཆོ་ག་ལྷག་ཆད་དུ་མི་འགྲོ་ཕྱིར་ཚོགས་ཐ་མ་བསྒྲལ་བསྟབས་ཀྱང་སྦྱོར་བ་ལེགས་པར་བཤད་པས་འདིར་ཡང་། ཧཱུྃ་ཧཱུྃཿ དུས་གསུམ་སངས་རྒྱས་སྟོང་རྩའི་སྐུ་བསྲུང་བ༔ བདག་ཉིད་གསང་བདག་གཏུམ་པོའི་ཁྲོས་པའི་རྩལ༔ སྤྲུལ་པའི་སྲས་མཆོག་བཛྲ་ཀཱི་ལ་ཡས༔ དགྲ་བགེགས་དུག་ལྔའི་ཕུང་པོ་རྡུལ་དུ་བརླགས༔ རྣམ་ཤེས་རིག་པ་ཆོས་ཀྱི་དབྱིངས་སུ་སྤར༔ ཨཱོྃ་བཛྲ་ཀཱི་ལི་ཀཱི་ལ་ཡ་བཛྲ་པཱ་ཎི་སརྦ་ཤ་ཏྲུཾ་དགྲ་བགེགས་འབྱུང་པོ་མ་ར་ཡ་ཧཱུྃ་ཕཊ༔ ཅེས་སོ། གཉིས་པ་རྫོང་འཕྲང་སྲོག་གསུམ་གྱི་གནད་དང་ལྡན་པས་བརྟེན་པ་དབྱིངས་སུ་བསྒྲལ་བ་ནི། གསལ་བ་གསུམ་གྱི་ང་རྒྱལ་བརྟན་པོའི་ངང་ནས་དྲག་སྔགས་སོ་ལྔ་པ་ཕུར་སྐོར་དང་སྦྱར་ཏེ། ཕུར་བུ་སྙིང་གར་གདབ་པས་སྲས་མཆོག་གི་འོད་ཟེར་གྱིས་ཁོ་ལ་ལྷན་སྐྱེས་སུ་གནས་པའི་བདུད་བཞི་རང་གཤེད་དུ་བབ་ནས་འཁོར་ལོ་བཞིའི་རྩ་རྣམས་བཅད། གཟུགས་ཕུང་གི་འབྱུང་ལྔའི་དངས་མ་རྣམས་རིམ་བཞིན་དུ་འདུས་ནས་ཡལ། ཁོའི་ཚེ་བསོད་བཀྲག་མདངས་ཐམས་ཅད་ཡི་གེ་ཨའི་རྣམ་པར་བསྡུས་ནས་རང་ལ་བསྟིམ་པས་གཉིས་མེད་བྱང་ཆུབ་ཀྱི་སེམས་སུ་གྱུར་པས་བདག་ཉིད་བཀྲག་མདངས་གཟི་བྱིན་དང་ལྡན་པར་གྱུར་བར་བསམ་པ་ནི་ཚེ་ལུང་དང་། ཀུན་གཞི་ནྲྀ་ཡི་རྣམ་པར་གནས་པ་དེ་ཉིད་ཕུར་རྩེའི་ཧཱུྃ་གིས་བླངས་ཏེ་ཕུར་པའི་ཁོང་སེང་ནས་བརྒྱུད་པས་ལས་ཉོན་དང་ཤེས་བྱའི་སྒྲིབ་པ་མ་ལུས་པ་ལྷག་མེད་དུ་སྦྱངས་ནས་རྣམ་ཤེས་དྭངས་མའི་ཐིག་ལེ་ཧཱུྃ་སྔོན་པོར་གྱུར་པ་རྒྱ་མདུད་ཀྱི་དབུས་ནས་ཐོན་ཏེ། འོག་མིན་དུ་རྡོ་རྗེ་སེམས་དཔའི་ཐུགས་ཀར་ཐིམ་པར་གྱུར་བར་བསམ་པ་ནི་ཁྲུས་ལུང་སྟེ། དམིགས་པ་དེ་དག་དང་ལྡན་པས་སླར་ཡང་། ཧཱུྃ་ཧཱུྃ༔ ཆོས་ཀུན་སྒྱུ་མ་ལྟ་བུ་ལ། །བསྒྲལ་བྱ་སྒྲོལ་བྱེད་བསྒྲལ་བའི་ལས། །ཡང་དག་ཉིད་དུ་མི་དམིགས་ཀྱང་། །ལས་ཉོན་བགས་ཆགས་གཞོམ་པའི་ཕྱིར། །ཀུན་ཁྱབ་ཐུགས་རྗེའི་རང་མདངས་ལས། །ལོག་རྟོག་འཁོར་བར་འཁྱམས་པའི་འགྲོ། །མ་ལུས་དབྱིངས་སུ་སྒྲོལ་བྱེད་པའི། །རང་བྱུང་ཡེ་ཤེས་ཕུར་པ་འདིས། །ཐོག་མར་རྟོག་གོམ་བདག་ཉིད་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །གསལ་བ་གསུམ་ལྡན་ཏིང་འཛིན་གྱིས། །ཐུགས་རྗེའི་ཀློང་ནས་སྤྲུལ་པའི་སྲས། །བསྒྲིལ་ཞིང་གདབ་པས་ཞིང་བཅུ་ཡི། །ཚེ་བསོད་བསྡུས་ཏེ་རང་ལ་བསྟིམ། །ལས་སྒྲིབ་བག་ཆགས་དྲུང་ཕྱུངས་ཤིང་། །འཁོར་བའི་ལམ་ལྔ་སྒོ་བཅད་ནས། །རྣམ་ཤེས་ཧཱུྃ་གིས་བསྡུས་གཏུབ་ཏེ། །བླ་མེད་འོག་མིན་གནས་མཆོག་ཏུ། །གཙོ་བོ་ལྔ་དང་གཙོ་མོ་ལྔ། །སེམས་དཔའ་དང་ནི་སེམས་མ་དང་། །ཁྲོ་བོ་དང་ནི་ཁྲོ་མོ་རྣམས། །སྦྱོར་བའི་ལྷུམས་སུ་ཕཊ་ཀྱིས་འཕང་། །ཞེས་པས་སྐྱེ་མེད་དབྱིངས་སུ་སྤར་ནས། དམིགས་མེད་ཀྱི་ངང་ལ་དར་ཅིག་མཉམ་པར་བཞག་གོ །གསུམ་པ་རྟེན་གཞི་སྙིགས་མའི་ལུས་དབྱིངས་སུ་བསྒྲལ་བ་ནི། གདབ་ཕུར་དམིགས་བྱའི་གནས་སོ་སོར་གདབ་ཅིང་། ཧཱུྃ་ཧཱུྃཿ ལྕགས་སམ་ནག་པོའི་ཤིང་རྣམས་ལ། །མགོ་བོ་རྒྱ་མདུད་རྩེ་ཟུར་གསུམ། །ལོགས་ལ་དྲག་པོའི་ལྷ་བཀོད་དེ། །ཞེ་སྡང་རྡོ་རྗེར་གསལ་བར་གདབ། །ཞེ་སྡང་རྡོ་རྗེའི་ཏིང་འཛིན་གྱིས། །ཆོ་ག་སྔགས་དང་རྫས་ལྡན་པས། །ཆོས་སྐུ་རྡོ་རྗེའང་འཇིག་འགྱུར་ན། །གཞན་ལྟ་སྨོས་ཀྱང་ཅི་ཞིག་དགོས། །རྣོ་མྱུར་ཤུགས་དྲག་ཕུར་པ་འདིས། །ཞིང་བཅུའི་སྤྱི་བོ་མགྲིན་པ་དང་། །སྙིང་ག་ལྟེ་བ་གསང་གནས་ལྔར། །གཟིར་ཅིག་བཛྲ་ཀཱི་ལ་ཡ། །མིག་དང་རྣ་བ་སྣ་དང་ལྕེ། །དོན་ལྔ་སྣོད་དྲུག་ཡན་ལག་ལྔ། །ཤ་རུས་པགས་པ་རྩ་རྒྱུས་ལ། །གཟིར་ཅིག་བཛྲ་ཀཱི་ལ་ཡ། །གཞན་ཡང་མཛའ་བཤེས་གཉེན་འཁོར་དཔུང་། །ཡུལ་མཁར་དབང་ཐང་ལོངས་སྤྱོད་སོགས། །བརྣག་པའི་ཡུལ་དུ་གྱུར་རྣམས་ལ། །གཟིར་ཅིག་བཛྲ་ཀཱི་ལ་ཡ། །ཞེས་བརྗོད་ཅིང་གདབ་པས། ཕུར་བའི་དབལ་སོ་ནས་མེ་དང་མཚོན་ཆའི་ཆར་བབས་པས་ལས་ཉོན་འདུས་པའི་གཟུགས་ཕུང་དེ་ཉིད་དུམ་བུར་གཏུབ་པར་བསམ་མོ། །དགུ་པ་མཚོན་ཆས་བསྒྲལ་བ་ནི། །སྒྲོལ་གྲི་ཐོགས་ལ། ཧཱུྃ་ཧཱུྃཿ གནམ་ལྕགས་རལ་གྲི་གདུག་པའི་དབལ། །རེག་གཅོད་ཡེ་ཤེས་མཚོན་ཆེན་པོས། །ཞིང་བཅུ་ཚངས་བའི་དགྲ་བགེགས་ཀྱི། །ཕུང་ཁམས་སྐྱེ་མཆེད་ལས་ཉོན་སྒྲིབ། །ཐལ་བའི་རྡུལ་བཞིན་བརླག་ནས་ནི། །ལོག་རྟོག་འཁོར་བ་རྒྱུན་བཅད་དེ། །ཐར་མཆོག་གཉུག་མའི་གཏན་སྲིད་ལ། །མངའ་དབང་བསྒྱུར་བའི་མཐུ་ལྡན་ཤོག །རྩ་སྔགས་མཐར། དགྲ་བགེགས་གནོད་བྱེད་སརྦ་ཤ་ཏྲུཾ་ཧུར་ཐུམ་ཛཿ ནྲྀ་ཏྲི་མ་ར་ཡ་རྦད༔ ཅེས་བརྗོད་ཅིང་། རྣམ་ཤེས་སྤར་ཤུལ་གྱི་ལས་ཉོན་སྒྲིབ་ཚོགས་ཕུང་པོའི་རྣམ་པར་གནས་པ་དེ་ཉིད་ཕྱེ་མར་འཐག་པར་བསམ་ལ་སྒྲོལ་གྲིས་དུམ་བུར་གཏུབ་བོ། བཅུ་པ་གཏུན་དུ་བརྡུང་བ་ནི། ཧཱུྃ་ཧཱུྃཿ སྟོང་ཆེན་རྡོ་རྗེ་བཙུན་མོའི་མཁར། །ཐབས་མཆོག་བདེ་ཆེན་རྡོ་རྗེ་ཡིས། །ཞིང་བཅུ་བསྒྲལ་བའི་ཤ་ཁྲག་རུས། །བརྡུངས་ཤིག་ཆོམས་ཤིག་རྡུལ་དུ་རློགས། །ཁྲོ་མོ་འབར་བའི་ཧོམ་ཁུང་དུ། །རྡོ་རྗེ་ཐོ་བས་བརྡུང་བྱས་པས། །ལྷ་ཡང་རུང་སྟེ་བརླག་བྱེད་ན། །དགྲ་དང་བགེགས་ལ་སྨོས་ཅི་དགོས། །རྩ་སྔགས་དང་། ཨཱོྃ་བཛྲ་པདྨ་ཨ་ཀོ་ཊ་ཡ་ཁ་ཐཾ་ཁ་ཐཾ་ཧཱུྃ་ཕཊཿ ཅེས་བརྡུངས་པས་ངོ་བོ་ཞིང་བཅུའི་ལས་ཉོན་བག་ཆགས་ཀྱི་ཕུང་པོ་ལ་རྣམ་པ་ཤ་ཁྲག་རུས་གསུམ་གཅིག་ཏུ་འདྲེས་པའི་རྒྱ་མཚོ་ཆེན་པོ་ཟག་མེད་ཀྱི་བདུད་རྩི་དང་གཉིས་སུ་མེད་པ་རྒྱ་ཁྱོན་བསམ་གྱིས་མི་ཁྱབ་པ་ལྷ་ཚོགས་རྣམས་ཀྱི་དགྱེས་པ་སྐོང་བར་བྱེད་པའི་རང་བཞིན་ཅན་དུ་གྱུར་བར་བསམ་མོ། །བཅུ་གཅིག་པ་ཞལ་དུ་བསྟབས་པ་ནི། ཧཱུྃ་ཧཱུྃཿ ཕྱེས་ཤིག་ཕྱེས་ཤིག་ཞལ་ཕྱེས་ཤིག །གསང་བདག་དཀྱིལ་འཁོར་ལྷ་ཚོགས་རྣམས། །གནམ་ས་ཙམ་གྱི་ཞལ་གདངས་ཤིང་། །རི་རབ་ཙམ་གྱི་མཆེ་བ་གཙིགས། །བར་སྣང་ཙམ་གྱི་ལྗགས་རྐྱོངས་ལ། །སྟོང་གསུམ་ཙམ་གྱི་མྱིད་པ་རུ། །ཞིང་བཅུའི་དགྲ་བགེགས་མ་ལུས་པའི། །ཟག་བཅས་ཕུང་པོ་ཁམས་སྐྱེ་མཆེད། །སེམས་དང་སེམས་བྱུང་འཁྲུལ་རྟོག་ཚོགས། །ལས་ཉོན་རྒྱུ་དང་འབྲས་བུར་བཅས། །ཞལ་དུ་བསྟབ་པོ་ཁ་རཾ་ཁཱ་ཧི། །མགུལ་དུ་བསྒྲེང་ངོ་ཨ་ར་ལི། །དབྱིངས་སུ་བསྟིམ་མོ་ས་མ་ཡཱ། །བཞེས་ཤིག་ལྷག་མ་མེད་པར་མཛོད། །ཞེས་དང་ཆད་ལྷག་བསྐང་ཕྱིར་སླར་ཡང་། ཧཱུྃ་ཧཱུྃཿ དགྲ་བགེགས་བསྒྲལ་བའི་ཕུང་པོ་ཚོགས་ཀྱི་རྫས༔ དུག་གསུམ་ཤ་ཁྲག་རུས་པ་མ་ལུས་ཀུན༔ སྐུ་གསུམ་བདག་ཉིད་ལྷ་ཚོགས་ཞལ་དུ་བསྟབས༔ དུག་གསུམ་དབྱིངས་གྲོལ་བདེ་ཆེན་མཆོག་ཐོབ་ཤོག༔ རུ་ཏྲ་ཧ་ལ་པཉྩ་མ་ཧཱ་མཾ་ས་རཀྟ་ཀེཾ་ནི་རི་ཏི་ཁཱ་ཧི༔ ཞེས་བརྗོད་ཅིང་བསྟབས་པས། ལྷ་ཚོགས་རྣམས་ཀྱིས་རྐན་སྒྲ་དང་བཅས་ཏེ་གསོལ་བས་མཉེས་ཤིང་ཚིམས་ནས་ཅི་བཅོལ་བའི་ཕྲིན་ལས་མཛད་པར་བསམ་ལ་ལིང་རོ་སྒྲུབ་གཏོར་སོགས་ལ་བྲན་ནོ། །དེ་ནས་ཚོགས་ལ་རོལ་ཅིང་སྒོ་གསུམ་རྡོ་རྗེ་གསུམ་གྱི་རོལ་པར་ཤེས་བཞིན་པའི་ངང་ནས་སྤྱོད་ལམ་ལ་འཇུག་པའོ། ། ༧ གསུམ་པ་བཟློག་པའི་ལས་རིམ་ལ་ལྔ་ལས། ཐོག་མར་དཀྱིལ་འཁོར་གྱི་ལྷ་ཚོགས་རྣམས་ལ་བཟློག་པའི་ཕྲིན་ལས་བཅོལ་བ་ནི། གཏོར་ཆུང་ལྷ་གྲངས་སོགས་བཤམས་ཤིང་། འགུགས་གཞུག་དང་བྱིན་རླབས་སྤྱི་ལྟར་བྱས་ལ། རོལ་མོའི་སྒྲ་དང་བཅས་ཏེ་འདི་བཞིན་དུ་གྱེར་རོ། །ཧཱུྃ་ཧཱུྃཿ སྐུ་གསུམ་རྒྱལ་བ་མ་ལུས་པའི། །མཐུ་སྟོབས་ཡེ་ཤེས་འདུས་པའི་དཔལ། །གསང་བ་ཀུན་བདག་ཧེ་རུ་ཀཿ བཅོམ་ལྡན་ཕྱག་ན་རྡོ་རྗེ་ནི། །འཁོར་འདས་ཡོངས་ཀྱི་སྤྱི་དཔལ་ཏེ། །ཐུགས་རྗེ་ཕྲིན་ལས་དཔག་མེད་པས། །གཉིས་འཛིན་གློ་བུར་འཁྲུལ་སྣང་ཀུན། །སྐྱེ་འགགས་མེད་པའི་དབྱིངས་སུ་ཟློག །ཆོས་ཉིད་འགྱུར་བ་མེད་པའི་ཕྱིར། །སྐུ་མདོག་མཐིང་ནག་རབ་ཏུ་འབར། །ཀུན་རྫོབ་སྣང་ཆའི་ཉེས་ཚོགས་ཀུན། །འཕོ་འགྱུར་མེད་པའི་ངང་དུ་ཟློག །ཉག་གཅིག་ཆོས་གཅིག་མི་གཉིས་ཕྱིར། །ཞལ་གཅིག་ནམ་མཁའི་མདོག་ལྟར་གསལ། །གཉིས་སྣང་དངོས་པོར་ཞེན་པ་རྣམས། །གཉིས་མེད་ཆོས་སྐུའི་ཀློང་དུ་ཟློག །བདེ་སྟོང་ཟུང་དུ་འཇུག་པའི་ཕྱིར། །དཔའ་བོ་ཆེན་པོའི་ཕྱག་གཉིས་ཀྱིས། །ཟག་བཅས་འཕོ་བའི་འཛིན་ཞེན་ཀུན། །ལྷན་སྐྱེས་ཡེ་ཤེས་ཆེན་པོར་ཟློག །ལོག་རྟོག་དྲེགས་པ་འདུལ་བའི་ཕྱིར། །གནམ་ལྕགས་རྡོ་རྗེ་ཕྱར་བ་ཡིས། །གནོད་ཅིང་གདུག་པའི་བསམ་སྦྱོར་ཀུན། །དམིགས་མེད་ཐུགས་རྗེའི་ཀློང་དུ་ཟློག །ཉོན་མོངས་གདོན་ཚོགས་འཆིང་བའི་ཕྱིར། །སྦྲུལ་ཞགས་ཐོགས་པའི་སྡིགས་མཛུབ་ཀྱིས། །མ་རིག་ལས་བྱུང་དགྲ་གདོན་བགེགས། །རང་བྱུང་རིག་པའི་ངང་དུ་ཟློག །ཁམས་གསུམ་མ་ལུས་དབང་སྡུད་ཕྱིར། །གློག་ལྟར་གཡོ་བའི་སྤྱན་གསུམ་གྱིས། །ཁམས་གསུམ་ལ་གནས་རྒྱུ་འབྲས་ཀུན། །སྐུ་གསུམ་དགོངས་པའི་ཀློང་དུ་ཟློག །སྲིད་གསུམ་ཟིལ་གྱིས་གནོན་བྱེད་པའི། །སྨིན་མ་སྨ་ར་ཨག་ཚོམ་འབར། །དུག་གསུམ་ལས་ཉོན་རྣམ་སྨིན་བཅས། །གསང་བ་གསུམ་གྱི་ངང་དུ་ཟློག །བདུད་བཞིའི་གཡུལ་ལས་རྒྱལ་བའི་ཕྱིར། །རྣོ་དཀར་མཆེ་བ་བཞི་གཙིགས་པས། །བདུད་བཞིས་གནོད་ཅིང་འཚེ་བ་རྣམས། །ཚད་མེད་རྣམ་བཞིའི་ངང་དུ་ཟློག །རིགས་སྔགས་རྦོད་གཏོང་བཟློག་པའི་ཕྱིར། །གློག་ལྟར་མྱུར་བའི་ལྗགས་འདྲིལ་བས། །དམོད་སྔགས་མཐུ་གཏད་ཧོམ་སྦྱོར་སོགས། །བསམ་བརྗོད་བྲལ་བའི་དབྱིངས་སུ་ཟློག །དྲེགས་ཚོགས་བྲན་དུ་ཁོལ་བའི་ཕྱིར། །ཁམ་ནག་དབུ་སྐྲ་བརྫེས་པ་ཡིས། །དྲེགས་པ་ཡོངས་ཀྱི་གདུག་པའི་སེམས། །དམིགས་པ་མེད་པའི་དབྱིངས་སུ་ཟློག །རིགས་ལྔའི་སངས་རྒྱས་རྫོགས་པའི་ཕྱིར། །ཐོད་སྐམ་ལྔ་ཡིས་དབུ་བརྒྱན་པས། །ཉོན་མོངས་དུག་ལྔའི་རྟོག་སྒྲིབ་ཀུན། །ཡེ་ཤེས་ལྔ་ཡི་ངང་དུ་ཟློག །སེམས་བྱུང་ལྔ་བཅུ་གནས་དག་པའི། །ཐོད་རློན་ཕྲེང་བའི་དོ་ཤལ་གྱིས། །བརྒྱད་ཁྲི་བཞི་སྟོང་རྟོག་པའི་ཚོགས། །གསལ་སྟོང་འཛིན་མེད་ངང་དུ་ཟློག །ལོག་རྟོག་མ་སྤང་གནས་དག་ཕྱིར། །བཀོད་པ་ཐལ་ཆེན་ཚོམ་བུ་ཡིས། །ལོག་པར་ལྟ་བའི་དགྲ་གདོན་བགེགས། །རང་གྲོལ་ཡེ་ཤེས་ཆེན་པོར་ཟློག །ང་རྒྱལ་མ་སྤང་གནས་དག་ཕྱིར། །བྱུགས་པ་ཞག་གི་ཟོ་རིས་ཀྱིས། །ང་རྒྱལ་ལས་བྱུང་དགྲ་གདོན་བགེགས། །མཉམ་ཉིད་ཡེ་ཤེས་ཀློང་དུ་ཟློག །འདོད་ཆགས་མ་སྤང་གནས་དག་ཕྱིར། །བྲིས་པ་རཀྟའི་ཐིག་ལེ་ཡིས། །འདོད་ཆགས་ལས་བྱུང་དགྲ་གདོན་བགེགས། །སོར་རྟོག་ཡེ་ཤེས་ཀློང་དུ་ཟློག །གཏི་མུག་མ་སྤང་གནས་དག་པའི། །སྟོད་གཡོག་གླང་ཆེན་ཀོ་རློན་གྱིས། །གཏི་མུག་ལས་བྱུང་དགྲ་གདོན་བགེགས། །ཆོས་དབྱིངས་ཡེ་ཤེས་ཀློང་དུ་ཟློག །ཞེ་སྡང་མ་སྤང་གནས་དག་པའི། །སྨད་དཀྲིས་སྟག་གི་པགས་པ་ཡིས། །ཞེ་སྡང་ལས་བྱུང་དགྲ་གདོན་བགེགས། །མེ་ལོང་ཡེ་ཤེས་ཀློང་དུ་ཟློག །ཕྲག་ཏོག་མ་སྤང་གནས་དག་པའི། །སྐེད་དཀྲིས་ཞིང་ཆེན་གཡང་གཞི་ཡིས། །ཕྲག་ཏོག་ལས་བྱུང་དགྲ་གདོན་བགེགས། །ནན་ཏན་ཡེ་ཤེས་ཀློང་དུ་ཟློག །རྒྱལ་རིགས་ཀླུ་གཉན་འདུལ་བའི་ཕྱིར། །མགུལ་རྒྱན་དུང་སྦྲུལ་དཀར་པོ་ཡིས། །རྒྱལ་རིགས་ས་བདག་ཀླུ་གཉན་གྱི། །གནོད་པའི་བསམ་སྦྱོར་དབྱིངས་སུ་ཟློག །བྲམ་ཟེ་ཀླུ་གཉན་འདུལ་བའི་ཕྱིར། །དབུ་རྒྱན་སྦྲུལ་ཆེན་དབང་མདོག་གིས། །བྲམ་ཟེའི་ས་བདག་ཀླུ་གཉན་གྱི། །གནོད་པའི་བསམ་སྦྱོར་དབྱིངས་སུ་ཟློག །རྗེ་རིགས་ཀླུ་གཉན་འདུལ་བའི་ཕྱིར། །ཕྱག་གདུབ་གསེར་སྦྲུལ་སེར་པོ་ཡིས། །རྗེ་རིགས་ས་བདག་ཀླུ་གཉན་གྱི། །གནོད་པའི་བསམ་སྦྱོར་དབྱིངས་སུ་ཟློག །དམངས་རིགས་ཀླུ་གཉན་འདུལ་བའི་ཕྱིར། །སྐ་རགས་གཡུ་སྦྲུལ་ལྗང་ཀུ་ཡིས། །དམངས་རིགས་ས་བདག་ཀླུ་གཉན་གྱི། །གནོད་པའི་བསམ་སྦྱོར་དབྱིངས་སུ་ཟློག །གདོལ་བའི་ཀླུ་གཉན་འདུལ་བའི་ཕྱིར། །དུག་སྦྲུལ་ནག་པོའི་ཞབས་གདུབ་ཀྱིས། །གདོལ་རིགས་ས་བདག་ཀླུ་གཉན་གྱི། །གནོད་པའི་བསམ་སྦྱོར་དབྱིངས་སུ་ཟློག །མ་ལུས་ཟིལ་གནོན་དབང་སྡུད་ཕྱིར། །ཞབས་གཉིས་བརྐྱང་བསྐུམ་བགྲད་པ་ཡིས། །དྲེགས་པ་ཕོ་མོ་མ་ལུས་པའི། །གནོད་པའི་བསམ་སྦྱོར་དབྱིངས་སུ་ཟློག །གཟའ་ཀླུའི་གདུག་པ་འདུལ་བའི་ཕྱིར། །གཟའ་བརྒྱད་ཀླུ་བརྒྱད་བཏིང་བ་ཡིས། །གཟའ་ཀླུའི་གདུག་པའི་བསམ་སྦྱོར་རྣམས། །དམིགས་མེད་སྟོང་པའི་དབྱིངས་སུ་ཟློག །སྲིད་ཞིའི་ཁམས་ལ་དབང་བསྒྱུར་རྟགས། །པད་ཉིའི་གདན་ལ་བཞུགས་པ་ཡིས། །འགལ་རྐྱེན་མི་མཐུན་ཕྱོགས་རྣམས་ཀུན། །མི་གནས་ཡེ་ཤེས་ཆེན་པོར་ཟློག །ལས་ཉོན་བག་ཆགས་སྲེག་པའི་ཕྱིར། །ཡེ་ཤེས་མེ་དཔུང་ཀློང་བཞུགས་པས། །སྔོན་ལས་འཕྲལ་རྐྱེན་ངན་པའི་ཚོགས། །རང་བཞིན་རྣམ་དག་དབྱིངས་སུ་ཟློག །རྒྱལ་ཀུན་གསང་བའི་མཛོད་འཛིན་རྟགས། །རིགས་བདག་མི་བསྐྱོད་རྒྱལ་པོ་ཡིས། །རྟེན་འབྱུང་སྒྱུ་མའི་འཁྲུལ་སྣང་ཀུན། །བདལ་ཁྱབ་ཀ་དག་ཀློང་དུ་ཟློག །ཆོས་ཉིད་ཞི་ལས་མ་གཡོས་ཀྱང་། །ཐུགས་རྗེས་ཁྲོ་བོའི་སྐུར་སྟོན་པ། །གདུལ་དཀའ་མ་ལུས་འདུལ་བ་པོ། །ཡང་དག་དཔལ་ཆེན་ཧེ་རུ་ཀས། །ལོག་རྟོག་རུ་ཏྲའི་དུག་གསུམ་གྱི། །ཤ་ཁྲག་གཏོར་མ་འདི་བཞེས་ལ། །བླ་མའི་ཐུགས་དང་འགལ་བ་སོགས། །བྱང་ཆུབ་སྒྲུབ་པའི་བར་ཆད་ཟློག །ཡེ་ཤེས་ལྷ་ཡི་བཀའ་ཆད་དང་། །མ་མོ་མཁའ་འགྲོའི་བསུན་མ་ཟློག ། ༧ གསོད་གཅོད་རྐུ་འཕྲོག་འཐབ་རྩོད་སོགས། །སྡང་བ་དགྲ་ཡི་གནོད་པ་ཟློག ཧོར་སོག་མཐའ་བཞིའི་དམག་དཔུང་དང་། །དུས་འཁྲུགས་མཚོན་ཁ་དར་བ་ཟློག །དལ་ཡམས་འགོ་བའི་ནད་རིམ་སོགས། །མི་ལ་ན་ཚ་བྱུང་བ་ཟློག །གློ་གོར་ཧོན་གསུམ་སྐེ་འགགས་སོགས། །ཕྱུག་ལ་གོད་ཁ་བྱུང་བ་ཟློག །བཙའ་སད་སེར་བ་འབུ་སྲིན་སོགས། །མི་འདོད་ལོ་ཉེས་སྣ་ཚོགས་ཟློག །ཐུན་ཟོར་གཏད་མནན་སྦྱིན་སྲེག་སོགས། །བན་བོན་བྱད་ཕུར་རྦོད་གཏོང་ཟློག །ལུང་བསྟན་རྩིས་དང་མོ་ལྟས་པྲ། །རྨི་ལམ་མཚན་མ་ངན་པ་ཟློག །ཉམ་ང་ཁུ་འཕྲིག་བག་གྲང་བའི། །རྟགས་དང་རྟེན་འབྲེལ་ངན་པ་ཟློག །མིག་འཕྲུལ་ཐོག་དང་གཅན་གཟན་སོགས། །སྡེ་བརྒྱད་འཁྲུགས་པའི་ཆོ་འཕྲུལ་ཟློག །ས་གཡོ་ཆུ་ལུད་རི་ཉིལ་སོགས། །འབྱུང་བཞིའི་གཡོ་འཁྲུགས་མ་ལུས་ཟློག །མེ་ཆུ་དུག་མཚོན་ཟ་བྱེད་སོགས། །འཇིགས་དང་དུས་མིན་འཆི་བ་ཟློག །གཞན་ཡང་ཡིད་ལ་མི་འདོད་པའི། །རྐྱེན་དང་བར་གཅོད་མ་ལུས་ཟློག །མདོར་ན་སྔོན་ལས་འཕྲལ་རྐྱེན་གྱིས། །བསྐྱེད་པའི་ནད་གདོན་བར་ཆད་སོགས། །མི་མཐུན་གནོད་པའི་ཕྱོགས་རྣམས་ཀུན། །སྤྲོས་བྲལ་བློ་འདས་དབྱིངས་སུ་ཟློག ཧཱུྃ་ཧཱུྃཿ ཁྲོ་རྒྱལ་གསང་བའི་བདག་པོ་ཡི། །སྐུ་གསུང་ཐུགས་ཡོན་ཕྲིན་ལས་ཀྱི། །སྤྲུལ་པ་བྱ་ཁྱུང་རིགས་ལྔ་པོ། །ཀུན་ཀྱང་ཁྲོ་ཆུ་ཞུན་མའི་ལུས། །ལྕགས་ཀྱི་རྭ་དང་མཆུ་སྡེར་ཅན། །མེ་གཤོག་རྡེབ་ཅིང་ཀླུ་རིགས་ཟ། །སྤྱི་གཙུག་རིགས་ལྔའི་ཕྱག་རྒྱས་བརྒྱན། །རལ་གྲིའི་མཇུག་སྒྲོར་མེ་མཚོན་འཕྲོ། །བ་སྤུའི་ཀློང་ནས་ཐོག་སེར་འཁྲིགས། །རང་འདྲའི་ཡང་སྤྲུལ་གྲངས་མེད་འགྱེད། །ཁྱེད་རྣམས་དཔལ་གྱི་བཀའ་ལུང་བཞིན། །བཟློག་ཅིང་བསྒྱུར་བའི་ཕྲིན་ལས་མཛོད། །སྐུ་སྤྲུལ་བུདྡྷ་ག་རུ་ཡིས། །རྒྱལ་རིགས་ས་བདག་ཀླུ་གཉན་གྱི། །གནོད་ཅིང་གདུག་པའི་བསམ་སྦྱོར་དང་། །གསོད་གཅོད་རྐུ་འཕྲོག་ལོག་གཡེམ་སོགས། །ལུས་ཀྱི་ལས་ཉོན་རྒྱུ་འབྲས་ཀུན། །སྣང་སྟོང་སྐུ་ཡི་ངང་དུ་ཟློག །གསུང་སྤྲུལ་པདྨ་ག་རུ་ཊ། །བྲམ་ཟེ་ས་བདག་ཀླུ་གཉན་གྱི། །གནོད་ཅིང་གདུག་པའི་བསམ་སྦྱོར་དང་། །རྫུན་དང་ཚིག་རྩུབ་ངག་འཁྱལ་དབྱེན། །ངག་གི་ལས་ཉོན་རྒྱུ་འབྲས་ཀུན། །གྲགས་སྟོང་གསུང་གི་དབྱིངས་སུ་ཟློག །ཐུགས་སྤྲུལ་བཛྲ་ག་རུ་ཊ། །དམངས་རིགས་ས་བདག་ཀླུ་གཉན་གྱི། །གནོད་ཅིང་གདུག་པའི་བསམ་སྦྱོར་དང་། །བརྣབ་སེམས་གནོད་སེམས་ལོག་ལྟ་སོགས། །ཡིད་ཀྱི་ལས་ཉོན་རྒྱུ་འབྲས་ཀུན། །གསལ་སྟོང་ཐུགས་ཀྱི་ངང་དུ་ཟློག །ཡོན་ཏན་རཏྣ་ག་རུ་ཊས། །རྗེ་རིགས་ས་བདག་ཀླུ་གཉན་གྱི། །གནོད་ཅིང་གདུག་པའི་བསམ་སྦྱོར་དང་། །བག་མེད་རྣམ་གཡེང་ལེ་སོགས། །ཀུན་གཞིའི་ལས་ཉོན་རྒྱུ་འབྲས་རྣམས། །རིག་སྟོང་ཡོན་ཏན་ཀློང་དུ་ཟློག །ཕྲིན་ལས་ཀརྨ་ག་རུ་ཊས། །གདོལ་རིགས་ས་བདག་ཀླུ་གཉན་གྱི། །གནོད་ཅིང་གདུག་པའི་བསམ་སྦྱོར་དང་། །མཚམས་མེད་ལྔ་དང་དེར་ཉེ་སོགས། །སྒོ་ལྔའི་ལས་ཉོན་རྒྱུ་འབྲས་ཀུན། །བདེ་སྟོང་ཕྲིན་ལས་ཀློང་དུ་ཟློག །ཡེ་ཤེས་ཁྱུང་ཆེན་རིགས་ལྔའི་ཚོགས། །ཤ་ཁྲག་གཏོར་མ་འདི་བཞེས་ལ། །འོག་གདོན་ཀླུ་གཉན་ས་བདག་དང་། །ས་སྲིན་ས་འདྲེའི་གདུག་རྩུབ་ཟློག །འབྲས་འབྲུམ་མེ་དབལ་དྲེག་གྲུམ་དང་། །རྨ་སྐྲང་ཤུ་ཐོར་གཉན་གཟེར་ཟློག །གག་ལྷོག་གཟེར་གསུམ་ཚད་རིམ་དང་། །མཛེ་རིགས་བཅོ་བརྒྱད་ནད་རྣམས་ཟློག །གསོད་གཅོད་རྐུ་འཕྲོག༴སོགས་ཀུན་ལ་འགྲེས་སོ། །ཧཱུྃ་ཧཱུྃཿ གསང་བདག་ཐུགས་ལས་སྤྲུལ་པའི་སྲས། །དྲེགས་པ་ཀུན་འདུལ་གཏུམ་པོ་བཞི། །ཕྱོགས་མདོག་རང་རྟགས་ཕྱག་རྒྱ་བསྣམས། །ཁྲོ་བོའི་རྒྱན་དང་ཆ་ལུགས་རྫོགས། །སྐུ་ལས་ཁྲོ་མཚོན་མེ་ཁྱུང་འཕྲོ། །སྡེ་བརྒྱད་དྲེགས་ཚོགས་ལས་ལ་འགྱེད། །གཏུམ་དྲག་མཐུ་ལྡན་ཁྲོ་བོའི་རྒྱལ། །ཁྱེད་རྣམས་ཐུགས་དམ་དབྱིངས་ནས་བསྐུལ། །ཁྲོ་རྒྱལ་རྡོ་རྗེ་གཏུམ་པོ་ཡིས། །ལྷ་བདུད་ལས་བྱུང་དགྲ་གདོན་བགེགས། །ཞེ་སྡང་ལས་ཉོན་རྒྱུ་འབྲས་ཀུན། །མེ་ལོང་ལྟ་བུའི་དབྱིངས་སུ་ཟློག ། ཁྲོ་རྒྱལ་རཏྣ་གཏུམ་པོ་ཡིས། །ཕུང་བདུད་ལས་བྱུང་དགྲ་གདོན་བགེགས། །ང་རྒྱལ་ལས་ཉོན་རྒྱུ་འབྲས་ཀུན། །མཉམ་པ་ཉིད་ཀྱི་དབྱིངས་སུ་ཟློག ། ཁྲོ་རྒྱལ་པདྨ་གཏུམ་པོ་ཡིས། །ཉོན་བདུད་ལས་བྱུང་དགྲ་གདོན་བགེགས། །འདོད་ཆགས་ལས་ཉོན་རྒྱུ་འབྲས་ཀུན། །སོ་སོར་རྟོག་པའི་དབྱིངས་སུ་ཟློག ། ཁྲོ་རྒྱལ་ཀརྨ་གཏུམ་པོ་ཡིས། །འཆི་བདུད་ལས་བྱུང་དགྲ་གདོན་བགེགས། །ཕྲག་དོག་ལས་ཉོན་རྒྱུ་འབྲས་ཀུན། །བྱ་བ་གྲུབ་པའི་དབྱིངས་སུ་ཟློག །བདུད་ཚོགས་ཀུན་འདུལ་ཁྲོ་བོ་བཞིས། །ཤ་ཁྲག་གཏོར་མ་འདི་བཞེས་ལ། །ཕྱོགས་བཞིའི་དགྲ་བགེགས་དམ་སྲི་དང་། །བདུད་བཞིའི་གནོད་པའི་བསམ་སྦྱོར་ཟློག །གསོད་གཅོད་རྐུ་འཕྲོག༴སོགས་ཀུན་ལ་འགྲེས་སོ། །ཧཱུྃ་ཧཱུྃཿ དཔལ་ཆེན་ཕྲིན་ལས་སྤྲུལ་པ་ལས། །རང་བྱུང་ཁྲོ་རྒྱལ་ཆེན་པོ་བཅུ། །མཐིང་ནག་རྡོ་རྗེ་སྡིག་མཛུབ་ཀྱིས། །དགྲ་དཔུང་འཇོམས་ཤིང་བགེགས་ཚོགས་བསྲེགས། །ཡང་སྤྲུལ་ཁྲོ་བོས་སྟོང་ཁམས་འགེངས། །ཧཱུྃ་ཕཊ་རྔམ་པའི་སྒྲ་སྒྲོགས་པས། །སྣང་སྲིད་དབང་བསྡུད་ཟིལ་གྱིས་གནོན། །ཁྱེད་རྣམས་ཐུགས་དམ་གནད་ནས་བསྐུལ། །ཁྲོ་ཆེན་རྣམ་པར་རྒྱལ་བ་ཡིས། །ལྷ་དང་དྲི་ཟ་ལ་སོགས་པའི། །ཤར་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་གཤིན་རྗེ་གཤེད་པོ་ཡིས། །གྲུལ་བུམ་འཆི་བདག་གཤིན་རྗེ་སོགས། །ལྷོ་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་ཆེན་རྟ་མགྲིན་རྒྱལ་པོ་ཡིས། །གཉན་དང་ཆུ་བདག་ཀླུ་རིགས་སོགས། །ནུབ་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་བདུད་རྩི་འཁྱིལ་བ་ཡིས། །ཟ་བྱེད་ནོར་བདག་གནོད་སྦྱིན་སོགས། །བྱང་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་དབྱུག་པ་སྔོན་པོ་ཡིས། །རྒྱལ་བཙན་ཐེའུ་རིང་མེ་ལྷ་སོགས། །ཤར་ལྷོའི་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་མི་གཡོ་མགོན་པོ་ཡིས། །དྲང་སྲོང་གཟའ་དང་སྲིན་པོ་སོགས། །ལྷོ་ནུབ་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་གཞན་གྱིས་མི་ཐུབ་པས། །བདུད་དང་འབྱུང་པོ་རླུང་ལྷ་སོགས། །ནུབ་བྱང་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་ཁམས་གསུམ་རྣམ་རྒྱལ་གྱིས། །སྲོག་འཕྲོག་མ་མོ་དབང་བདག་སོགས། །བྱང་ཤར་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་ཧཱུྃ་ཆེན་ཀཱ་ར་ཡིས། །མཁའ་སྤྱོད་གཟའ་དང་སྒྱུ་སྐར་སོགས། །སྟེང་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་མཆོག་སྟོབས་ཆེན་རྒྱལ་པོ་ཡིས། །ས་བདག་ཀླུ་གཉན་གཏོད་ལ་སོགས། །འོག་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་བཅུ་ཡབ་ཡུམ་སྤྲུལ་པར་བཅས། །ཤ་ཁྲག་གཏོར་མ་འདི་བཞེས་ལ། །ཕྱོགས་བཅུའི་དགྲ་བགེགས་དམ་སྲི་སོགས། །མི་མཐུན་གནོད་པའི་ཕྱོགས་རྣམས་ཟློག །གསོད་གཅོད་རྐུ་འཕྲོག༴སོགས་འགྲེས་སོ། ། ཧཱུྃ་ཧཱུྃཿ གསང་བདག་ཐུགས་རྗེའི་རང་རྩལ་ལས། །སྤྲུལ་པའི་སྒོ་སྐྱོང་ཁྲོ་བོ་བཞི། །ཕྱོགས་མདོག་རང་རྟགས་བེ་ཅོན་གཡས། །ལས་བཞི་སྒྲུབ་པའི་ཕྱག་རྒྱ་གཡོན། །རྔམ་བརྗིད་ཁྲོ་བོའི་ཆས་ཀྱིས་བརྒྱན། །འགུགས་འཆིང་སྡོམ་མྱོས་ལས་མཛད་པའི། །སྤྲུལ་པ་སྟོང་གསུམ་ཁྱབ་པར་འགྱེད། །ཁྱེད་རྣམས་ཐུགས་དམ་གནད་ནས་བསྐུལ། །ཁྲོ་ཆེན་ཤེས་རབ་མཐར་བྱེད་ཀྱིས། །ཤར་ཕྱོགས་དགྲ་བགེགས་གནོད་པའི་ཚོགས། །ནད་གདོན་འཇིགས་བརྒྱད་མི་མཐུན་ཕྱོགས། །ཞི་བའི་ཐབས་ཀྱིས་བཟློག་ཏུ་གསོལ། །ཁྲོ་རྒྱལ་གཤིན་རྗེ་མཐར་བྱེད་ཀྱིས། །ལྷོ་ཕྱོགས་དགྲ་དང་བགེགས་ཀྱི་ཚོགས། །ཆོས་སྲིད་འདོད་དོན་སྒྲུབ་པའི་གེགས། །རྒྱས་པའི་ལས་ཀྱིས་བཟློག་ཏུ་གསོལ། །ཁྲོ་རྒྱལ་པདྨ་མཐར་བྱེད་ཀྱིས། །ནུབ་ཕྱོགས་དགྲ་དང་བགེགས་ཀྱི་ཚོགས། །རྣམ་བཞི་དབང་དུ་འདུ་བའི་གེགས། །དབང་གི་ལས་ཀྱིས་བཟློག་ཏུ་གསོལ། །ཁྲོ་རྒྱལ་བགེགས་རྣམས་མཐར་བྱེད་ཀྱིས། །བྱང་ཕྱོགས་དགྲ་དང་བགེགས་ཀྱི་ཚོགས། །ཞིང་བཅུ་ཚང་བའི་ལོག་འདྲེན་རྣམས། །དྲག་པོའི་ལས་ཀྱིས་བཟློག་ཏུ་གསོལ། །བདུད་འདུལ་ཁྲག་འཐུང་སྒོ་བ་བཞིས། །ཤ་ཁྲག་གཏོར་མ་འདི་བཞེས་ལ། །ཐོགས་མེད་ལས་བཞིའི་ཕྲིན་ལས་ཀྱིས། །མི་མཐུན་གནོད་པའི་ཕྱོགས་རྣམས་ཟློག །གསོད་གཅོད་རྐུ་འཕྲོག༴སོགས་འགྲེས་སོ། །ཧཱུྃ་ཧཱུྃཿ གསང་བ་ཀུན་བདག་ཧེ་རུ་ཀའི། །དཀྱིལ་འཁོར་མུ་རན་སྐྱོང་མཛད་པའི། །མ་ཚོགས་དབང་ཕྱུག་ཉེར་བརྒྱད་དང་། །ཚངས་པ་བརྒྱ་བྱིན་རྒྱལ་ཆེན་བཞི། །ཕྱོགས་སྐྱོང་ལྷ་ཀླུ་གནོད་སྦྱིན་དང་། །འཇིགས་བྱེད་གཟའ་དང་སྒྱུ་སྐར་སོགས། །མགུར་ལྷ་དགེ་བསྙེན་བསྟན་མའི་ཚོགས། །སོ་སོའི་བྲན་གཡོག་དཔུང་དང་བཅས། །སྐུ་མདོག་ཕྱག་མཚན་ཅིར་ཡང་བསྒྱུར། །ཀུན་ཀྱང་དཀར་ཕྱོགས་སྐྱོང་ལ་དགྱེས། །སངས་རྒྱས་བསྟན་སྲུང་མཐུ་སྟོབས་ཅན། །ཁྱེད་རྣམས་ཐུགས་དམ་དབྱིངས་ནས་བསྐུལ། །ཤ་ཁྲག་གཏོར་མ་འདི་བཞེས་ལ། །མ་མོ་འཁྲུགས་པའི་ཆོ་འཕྲུལ་ཟློག །ཆོས་སྐྱོང་སྲུང་མའི་བཀའ་ཆད་དང་། །སྣང་སྲིད་ལྷ་འདྲེའི་གདུག་རྩུབ་ཟློག །གསོད་གཅོད་རྐུ་འཕྲོག༴སོགས་ནས་དབྱིངས་སུ་ཟློག །ཧཱུྃ་ཧཱུྃཿ གསང་བདག་བཀའ་ཡི་སྲུང་མ་ཆེ། །ཡེ་ཤེས་མགོན་པོ་བཀའ་ཉན་བཅས། །སྔགས་སྲུང་ཁྲོ་མོ་རལ་གཅིག་མ། །དུད་སོལ་ལྷ་མོ་སྤྲུལ་འཁོར་བཅས། །གཟའ་མཆོག་ཆེན་པོ་རཱ་ཧུ་ལ། །དམ་ཅན་སྐྱེས་བུ་ཐིག་ལེ་རྩལ། །རྒྱལ་ཆེན་སྐུ་ལྔ་ཡང་ལེ་བེར། །བཙན་རྒོད་རྡོ་རྗེ་དྲག་པོ་རྩལ། །ཁྱེད་རྣམས་སྤྲུལ་པ་ཡང་སྤྲུལ་བཅས། །ཤ་ཁྲག་མཆོད་པ་འདི་བཞེས་ལ། །སྔོན་ཚེ་ཁས་བླངས་དམ་བཅས་ལྟར། །བཟློག་བསྒྱུར་བཅོལ་པའི་ཕྲིན་ལས་མཛོད། །སྨན་བཙུན་ཚེ་རིང་མཆེད་ལྔ་དང་། །ཚེ་འཛིན་རིགས་བཞི་སྨན་གྱི་ལྷ། །འཛམ་གླིང་མི་ཐུང་ནོར་གྱི་བདག། །རྒྱལ་ཆེན་རྣམ་མང་ཐོས་སྲས་སོགས། །སོ་སོའི་གཡོག་འཁོར་སྤྲུལ་པར་བཅས། །དམ་རྫས་གཏོར་མ་འདི་བཞེས་ལ། །འགལ་རྐྱེན་མི་མཐུན་ཕྱོགས་རྣམས་ཀུན། །བཟློག་ཅིང་བསྒྱུར་བའི་ཕྲིན་ལས་མཛོད། །མཚོ་རྒྱལ་དགོངས་པའི་གསང་མཛོད་སོགས། །ཡང་ཟབ་དག་སྣང་སྐོར་གསུམ་གྱི། །བསྟན་བསྲུང་མ་ལུས་ཁྱེད་རྣམས་ལ། །བཟློག་པའི་ཕྲིན་ལས་བཅོལ་བ་ནི། །རྣལ་འབྱོར་དཔོན་སློབ་འཁོར་བཅས་ལ། །ལྷ་ཡིས་བཀའ་ཆད་འབེབས་པ་ཟློག །བདུད་ཀྱིས་ཞགས་པ་འདེབས་པ་ཟློག །རྒྱལ་པོས་སྨྱོ་འབོགས་གཏོང་བ་ཟློག །གཤིན་རྗེས་འཁོར་ལོ་བསྐོར་བ་ཟློག །འཆི་བདག་ཁྲམ་ལ་བཏབ་པ་ཟློག །བཙན་གྱིས་ཇག་པ་རྒྱུག་པ་ཟློག །གནོད་སྦྱིན་རྩིས་ལ་འདེབས་པ་ཟློག །མ་མོས་ཁྲག་ཟོར་འཕེན་པ་ཟློག །གཟའ་ཡིས་དུག་རླངས་གཏོང་བ་ཟློག །ཀླུ་ཡིས་བྱད་དུ་བཅུག་པ་ཟློག །ཐེའུ་རིང་སྲི་ལ་རྐུ་བ་ཟློག །མུ་སྟེགས་ངན་སྔགས་བྱེད་པ་ཟློག །བནྡྷེས་སྔགས་ཟོར་འཕེན་པ་ཟློག །བོན་པོས་སྟྭ་ཟོར་འཕེན་པ་ཟློག །ཞང་ཞུང་བཙོ་ཟོར་འཕེན་པ་ཟློག །སུམ་པའི་གླང་ཟོར་འཕེན་པ་ཟློག །རྒྱ་གར་ཆོས་ཀྱི་མཐུ་བྱེད་ཟློག །རྒྱ་ནག་གཙུག་ལག་ཙང་ཀུན་ཟློག །བོད་ཀྱི་རྦོད་གཏོང་དམོད་མོ་ཟློག །བྲམ་ཟེ་དྲང་སྲོང་དམོད་པ་ཟློག །ནད་རིགས་བཞི་བརྒྱ་རྩ་བཞི་ཟློག །བགེགས་རིགས་སྟོང་ཕྲག་བརྒྱད་ཅུ་ཟློག །དུས་མིན་འཆི་བ་རྣམ་བརྒྱད་ཟློག །ལྟས་ངན་བརྒྱད་ཅུ་རྩ་གཅིག་ཟློག །ཡེ་འདྲོག་སུམ་བརྒྱ་དྲུག་ཅུ་ཟློག །གློ་བུར་ཉི་ཁྲི་ཆིག་སྟོང་ཟློག །ཆགས་ཆེ་ཉམ་ང་ཐམས་ཅད་ཟློག །རྒན་སྲི་གཞོན་སྲི་ཆུང་སྲི་ཟློག །ལོ་ཀེགས་ཟླ་ཀེགས་ཞག་ཀེགས་ཟློག །མི་ནད་ཕྱུགས་ནད་ཐམས་ཅད་ཟློག །རིམས་ནད་ཡམས་ནད་ཐམས་ཅད་ཟློག །ཚེ་ལ་བར་ཆད་བྱེད་པ་ཟློག །སྲོག་ལ་ཧུར་ཐུམ་འབྱུང་བ་ཟློག །མདོར་ན་རྣལ་འབྱོར་འཁོར་བཅས་ཀྱི། །འབྱུང་བཞིའི་གཡོ་འཁྲུགས་ཕྱི་ཡི་དགྲ། །ན་ཚ་སྡུག་བསྔལ་ནང་གི་བགེགས། །བར་ཆད་འཁྲུལ་རྟོག་གསང་བའི་གདོན། །ཐམས་ཅད་ཆོས་ཀྱི་དབྱིངས་སུ་ཟློག །བཟློག་གོ་བྱད་ཕུར་རྦོད་གཏོང་བཟློག །བསྒྱུར་རོ་ལྟས་ངན་མཚེར་རྩུབ་སྒྱུར། །བཟློག་བསྒྱུར་ཕྲིན་ལས་དུས་ལ་བབས། །དུས་ལ་བབ་པོ་ས་མ་ཡཱཿ བཅོལ་པའི་ཕྲིན་ལས་འགྲུབ་པར་མཛོད། །རྩ་སྔགས་དང་། ས་མ་ཡཱཿ བྷྱོ་བྷྱོ་བྷྱོཿ བཟློག་བཟློག་བཟློགཿ ཞེས་བརྗོད་པས། རྩ་བ་གསུམ་གྱི་ལྷ་ཚོགས་བཀའ་སྲུང་དང་བཅས་པ་ཐམས་ཅད་རྔམ་ཤིང་ཁྲོས་པའི་ཚུལ་གྱིས་མི་མཐུན་པའི་ཕྱོགས་ཐམས་ཅད་དམིགས་མེད་ཆོས་ཀྱི་དབྱིངས་སུ་བཟློག་པར་བསམ་ལ། བྷྱོ་བཟློག་གི་དྲག་སྔགས་བརྗོད། དུལ་མོ་བརྡབ་ཅིང་། ཞིང་ལྤགས་དང་དར་ནག་གཡབ་པ་སོགས་བྱའོ། །གཉིས་པ་ཡེ་ཤེས་ཁྱུང་གི་བཟློག་པ་བྱ་བ་ནི། ཧཱུྃ་ཧཱུྃཿ ཁྲོ་རྒྱལ་གསང་བའི་བདག་པོ་ཡི། །སྐུ་གསུང་ཐུགས་ཡོན་ཕྲིན་ལས་ཀྱི། །སྤྲུལ་པ་ཡེ་ཤེས་ཁྱུང་ཆེན་ལྔ། །ཡང་སྤྲུལ་ཁྱུང་ཆེན་གྲངས་མེད་བཅས། །བཞེངས་ཤིག་སྐུ་ལྔའི་ཀློང་ནས་བཞེངས། །རོལ་ཅིག་ཤ་ཁྲག་མཆོད་གཏོར་བཞེས། །བསྐུལ་ལོ་ཐུགས་དམ་གནད་ནས་བསྐུལ། །མཛོད་ཅིག་བཟློག་བསྒྱུར་ཕྲིན་ལས་མཛོད། །ཕྱག་ན་རྡོ་རྗེའི་སྤྲུལ་པ་ནི། །ཡེ་ཤེས་ཁྱུང་ཆེན་རིགས་ལྔའི་ཚོགས། །བཞུགས་པ་འབྱུང་ལྔའི་དབྱིངས་ན་བཞུགས། །ཕྲིན་ལས་སྤྲུལ་པ་ཕྱོགས་བཅུར་འཕྲོས། །དབུ་ལ་རང་རྟགས་ཉི་ཟླས་བརྒྱན། །གཤོག་པས་ནམ་མཁའ་ཁྱབ་པར་མཛད། །རྡོ་རྗེ་རལ་གྲིའི་གཤོག་པ་ལས། །ཁྲོ་ཁྱུང་མེ་མཚོན་ཐོག་སེར་འབེབས། །མཆུ་ནི་གནམ་ལྕགས་རྡོ་རྗེའི་མཆུ། །ས་བདག་ཀླུ་གཉན་འདུལ་ཞིང་ཟ། །གནམ་ལྕགས་ངར་མའི་མཆེ་བ་ཡིས། །གནོད་བྱེད་མ་ལུས་ཚལ་བར་གཤག །ལྕགས་ཀྱི་སྡེར་མོ་བགྲད་པ་ཡིས། །ཀླུ་གཉན་གདུག་པའི་སྙིང་ཁྲག་འབྱིན། །རལ་བ་དྲག་ཏུ་བསིག་པ་ལས། །ཡུལ་གྱི་མ་མོ་བཅུ་གསུམ་འགྱེད། །གཡས་གཤོག་བརྡབ་ཅིང་སྤྲུག་པ་ལས། །ཁྲོ་བོ་ལྔ་བཅུ་རྩ་དྲུག་འཕྲོ། །གཡོན་གཤོག་བརྡབ་ཅིང་སྤྲུག་པ་ལས། །ལྔ་བཅུ་རྩ་དྲུག་མ་མོ་བྱུང་། །མཇུག་སྒྲོ་སྤྲུག་ཅིང་བརྡབ་པ་ལས། །རྒྱལ་མོ་བཞི་དང་གདོང་བཞི་འགྱེད། །ཁྱེད་རྣམས་སྤྲུལ་པ་ཡང་སྤྲུལ་བཅས། །ཤ་ཁྲག་གཏོར་མ་འདི་བཞེས་ལ། །སྡང་བའི་དགྲ་དང་གནོད་པའི་བགེགས། །འགལ་རྐྱེན་སྤྱི་དང་ཁྱད་པར་དུ། །ནམ་མཁའ་སྨུག་ནག་འཐིབ་པ་དང་། །དྲེད་མོ་རལ་འཛིང་བཟློག་ཏུ་གསོལ། །སེང་གེ་འབྲུག་སྔོན་འཐབ་པ་དང་། །གནམ་ལྕགས་འབར་བ་བཟློག་ཏུ་གསོལ། །གླང་ཆེན་རྦ་ལ་འཕྱོ་བ་དང་། །སྟག་སེང་འཛིང་བ་བཟློག་ཏུ་གསོལ། །གནམ་ས་སྤྲིན་དམར་མཆེད་པ་དང་། །བུད་མེད་རལ་འཛིང་བཟློག་ཏུ་གསོལ། །སྐར་མདའ་ས་ལ་ལྟུང་བ་དང་། །དབྱིག་གི་ནོར་བུ་བཟློག་ཏུ་གསོལ། །རི་རབ་མེ་ཆེན་མཆེད་པ་དང་། །ལྕི་བ་ཟས་སུ་སྤྱོད་པ་ཟློག །རྒྱ་མཚོར་དུག་སྦྲུལ་འཁྱིལ་བ་དང་། །མེ་ཏོག་བཅུད་ཉམས་བཟློག་ཏུ་གསོལ། །མཁའ་ལ་སྟག་མོ་འཕྱོ་བ་དང་། །རྫི་བས་སྤྱོད་པ་བཟློག་ཏུ་གསོལ། །ནམ་མཁར་བྱ་རྒོད་སྡེར་འཛིང་དང་། །གཏེར་གྱི་བཅུད་ཉམས་བཟློག་ཏུ་གསོལ། །གཡུ་ཤ་དཀར་མོ་འཛིང་བ་དང་། །སེང་གེ་ངུ་འབོད་བཟློག་ཏུ་གསོལ། །རྣོ་དབལ་ངར་གྱི་ལྟས་ངན་དང་། །རྨ་བྱ་གཡེང་བ་བཟློག་ཏུ་གསོལ། །གཡུ་སྒོང་སྔོན་པོ་ཡར་བ་དང་། །ལྕགས་ཀྱི་སེར་བ་འབེབས་པ་ཟློག །ཤེལ་སྒོང་སྣོད་དུ་དུག་གཡོས་དང་། །ཟངས་སྒོང་དམར་པོ་འདྲིལ་བ་ཟློག །མི་བཟད་འབར་བ་ཀླད་ལ་བསྐོར། །ཉི་མ་སྤྲིན་གྱིས་འཁྲིགས་པ་ཟློག །འཚུབ་མ་མང་པོའི་སྙིང་རྟགས་དང་། །སེང་གེ་གངས་ནས་ལྟུང་བ་ཟློག །ཤེལ་གྱི་སྒོ་ང་ཡར་བ་དང་། །སྤྲིན་ཆེན་རལ་བའི་རྟགས་བསྟན་ཟློག །བོང་བུའི་བཅུད་ཆེན་ཟག་པ་དང་། །འོད་ཀྱི་ཕྲེང་བ་ཤར་བ་ཟློག །གསེར་སྒོང་ཁྲ་བོ་ཟུར་བསྟན་ཏེ། །ལྕུགས་ཕྲན་ཟོར་བས་འདེབས་པ་ཟློག །ཟོར་བརྒྱད་རྩེ་ལ་སྦུད་པ་ཆགས། །གཟའ་སྐར་འཁྲིགས་པ་བཟློག་ཏུ་གསོལ། །མདོར་ན་མི་མཐུན་ཕྱོགས་རྣམས་ཀུན། །བཟློག་ཅིང་བསྒྱུར་བའི་ཕྲིན་ལས་མཛོད། །ཅེས་དང་། ཨཱོྃ་བཛྲ་པཱ་ཎི་ཀརྨ་མ་ཧཱ་པཉྩ་ག་རུ་ཊ་ཧཱུྃ་ཕཊ། སརྦ་དུཥྚན་ས་མ་ཡཱ་བྷྱོ་བྷྱོ་བཟློག་བཟློག །ཅེས་བརྗོད་དོ། །གསུམ་པ་དྲག་པོའི་རྩང་གི་བཟློག་པ་བྱ་བ་ནི། ཧཱུྃ་ཧཱུྃ༔ གསང་བ་ཀུན་བདག་ཧེ་རུ་ཀ །དྲག་པོའི་གཏོར་ཆེན་ལྕགས་རི་ལ། །དམར་ནག་རྩང་ཕུར་ཟུར་གསུམ་པ། །བསྣོལ་ཐབས་སྲིན་མོའི་འགྲོས་སུ་བཙུགས། །མི་མཐུན་བཟློག་པའི་བྱང་བུ་བཀོད། །རྩེ་ལ་ཤ་ཆེན་ལིང་གས་བརྒྱན། །ཁ་ཏོག་ལྔ་ལྡན་སྲད་བུས་དཀྲིས། །ལས་མཁན་ཕོ་ཉའི་སྐུར་བསྒོམ་ཏེ། །ཉོན་མོངས་དགྲ་བགེགས་འདུལ་བའི་ཕྱིར། །བསྐུལ་ཞིང་ལས་ལ་མངག་པའི་ཚེ། །ཡེ་ཤེས་རྩང་གི་ཕུར་བུ་རྣམས། །ཆོས་ཀྱི་དབྱིངས་ནས་ད་བཞེངས་ཤིག །ཐུགས་དམ་བསྐུལ་ལོ་ལས་ལ་བསྐྱོད། །བཟློག་བསྒྱུར་ཕྲིན་ལས་དུས་ལ་བབས། །དགྲ་བགེགས་ཤ་ཁྲག་ཚོགས་སུ་རོལ། །བར་ཆད་སོལ་ལ་རྐྱེན་རྣམས་ཟློག །དངུལ་ལམ་དཀར་པོའི་ཤིང་རྣམས་ལ། །ཞི་བའི་རྩང་ཕུར་ཟུར་གསུམ་པ། །སྐེད་པ་ཟླུམ་པོ་གཞལ་ཡས་ཁང་། །ཞི་མཛད་ཧེ་རུ་ཀར་བསྒོམ་ནས། །གཏོར་ཆེན་ཤར་ཕྱོགས་ལྕགས་རི་ལ། །བཙུགས་པས་ཐམས་ཅད་ཞི་བར་འགྱུར། །ཐུགས་རྗེ་ཞི་བའི་ཕྲིན་ལས་ཀྱིས། །ཞི་བར་མ་གྱུར་གང་ཡང་མེད། །གནོད་བྱེད་དགྲ་བགེགས་བྱད་མ་ཡི། །རིགས་སྔགས་རྦོད་གཏོང་ཞི་བར་མཛོད། །ནད་གདོན་རྐྱེན་དང་བར་ཆད་ཀུན། །བྱམས་པ་ཚད་མེད་དབྱིངས་སུ་ཟློག །གསེར་རམ་སེར་པོའི་ཤིང་རྣམས་ལ། །རྒྱས་པའི་རྩང་ཕུར་ཟུར་གསུམ་པ། །སྐེད་པ་རྒྱ་མདུད་གཞལ་ཡས་ཁང་། །རྒྱས་མཛད་ཧེ་རུ་ཀར་བསྒོམ་ནས། །གཏོར་ཆེན་ལྷོ་ཕྱོགས་ལྕགས་རི་ལ། །བཙུགས་པས་ཐམས་ཅད་རྒྱས་པར་འགྱུར། །ཐུགས་རྗེ་རྒྱས་པའི་ཕྲིན་ལས་ཀྱིས། །རྒྱས་པར་མ་གྱུར་གང་ཡང་མེད། །རྣལ་འབྱོར་དཔོན་སློབ་འཁོར་བཅས་ཀྱི། །ཚེ་དང་བསོད་ནམས་རྒྱས་པར་མཛོད། །མི་མཐུན་རྐྱེན་དང་བར་ཆད་ཀུན། །སྙིང་རྗེ་ཚད་མེད་ཀློང་དུ་ཟློག །ཟངས་སམ་དམར་པོའི་ཤིང་རྣམས་ལ། །དབང་གི་རྩང་ཕུར་ཟུར་གསུམ་པ། །སྐེད་པ་ཟླ་གམ་གཞལ་ཡས་ཁང་། །དབང་མཛད་ཧེ་རུ་ཀར་བསྒོམ་ནས། །གཏོར་ཆེན་ནུབ་ཕྱོགས་ལྕགས་རི་ལ། །བཙུགས་པས་ཐམས་ཅད་དབང་དུ་བསྡུད། །ཐུགས་རྗེ་དབང་གི་ཕྲིན་ལས་ཀྱིས། །དབང་དུ་མ་འདུས་གང་ཡང་མེད། །རྒྱལ་བློན་རྗེ་འབངས་འབྲུ་བཅུད་དང་། །དམིགས་བྱ་དབང་དུ་འདུ་བར་མཛོད། །མི་མཐུན་རྐྱེན་དང་བར་ཆད་ཀུན། །དགའ་བ་ཚད་མེད་དབྱིངས་སུ་ཟློག །ལྕགས་སམ་གདུག་པའི་ཤིང་རྣམས་ལ། །དྲག་པོའི་རྩང་ཕུར་ཟུར་གསུམ་པ། །སྐེད་པ་ཆོས་འབྱུང་གཞལ་ཡས་ཁང་། །མཐར་མཛད་ཧེ་རུ་ཀར་བསྒོམ་ནས། །གཏོར་ཆེན་བྱང་ཕྱོགས་ལྕགས་རི་ལ། །བཙུགས་པས་དགྲ་བགེགས་བརླག་པར་འགྱུར། །ཐུགས་རྗེ་དྲག་པོའི་ཕྲིན་ལས་ཀྱིས། །བརླག་པར་མ་གྱུར་གང་ཡང་མེད། །སྡིག་ཅན་དགྲ་བགེགས་བྱད་མ་རྣམས། །སྐད་ཅིག་ཉིད་ལ་བརླག་པར་མཛོད། །མི་མཐུན་རྐྱེན་དང་བར་ཆད་ཀུན། །བཏང་སྙོམས་ཚད་མེད་དབྱིངས་སུ་ཟློག །ཐུགས་རྗེའི་ཀློང་ནས་རང་བྱུང་བ། །འདུལ་བྱེད་དྲག་པོའི་རྩང་ཕུར་འདི། །ཡར་གྱི་རྩེ་མོ་ཟུར་གསུམ་ལྡན། །འོག་མིན་ཆོས་དབྱིངས་ཞིང་དུ་སླེབས། །མ་རིག་ལས་ཉོན་གྱིས་བསྐྱེད་པའི། །དགྲ་གདོན་བགེགས་ཚོགས་དབྱིངས་སུ་ཟློག །མར་གྱི་རྩེ་མོ་དབལ་དང་ལྡན། །ངན་སོང་གསུམ་གྱི་གནས་སུ་ཟུག །གཟུང་འཛིན་འཁྲུལ་བའི་དགྲ་གདོན་བགེགས། །རང་གྲོལ་ཡེ་ཤེས་དབྱིངས་སུ་ཟློག །སྐེད་པ་རྒྱ་མདུད་ཕོ་ཉའི་གྲོང་། །སྟོང་གསུམ་ཀུན་དང་གཉིས་སུ་མེད། །སྡུག་བསྔལ་གསུམ་དང་ཆུ་བོ་བཞི། །བདེ་སྟོང་གཉིས་མེད་ཀློང་དུ་ཟློག །ཟུར་གསུམ་སྐུ་གསུང་ཐུགས་སུ་གྲུབ། །ངོས་ལ་རྩ་གསུམ་ལྷ་ཚོགས་བཞུགས། །དུག་གསུམ་དགྲ་བགེགས་ལོག་འདྲེན་རྣམས། །སྐུ་གསུམ་དགོངས་པའི་ཀློང་དུ་ཟློག །རྩེ་ལ་འདབ་ཆགས་སྣ་ཚོགས་ལྡིང་། །མཁའ་ལྡིང་བྱ་ཡི་ལྟས་ངན་ཟློག །སྐེད་པར་སྟག་སེང་དོམ་དྲེད་ངར། །སྡེར་ཆགས་ཡོངས་ཀྱི་ལྟས་ངན་ཟློག །རྩ་བར་སྦལ་སྦྲུལ་སྡོམ་སྡིག་འཕྱོ། །ཀླུ་དང་དུད་འགྲོའི་ལྟས་ངན་ཟློག །རྩེ་ལ་ཡེ་ཤེས་མེ་དཔུང་འབར། །བསྲེག་པ་ཧོམ་གྱི་ལས་སྦྱོར་ཟློག །སྐེད་པར་རླུང་ནག་འཚུབ་ཤིང་འཁྱིལ། །འབོད་རྦད་གསོད་པའི་ངན་སྔགས་ཟློག །རྩ་བར་དུག་གི་རྒྱ་མཚོ་ཁོལ། །མནན་གཏད་བཅིང་བའི་མཐུ་ནུས་ཟློག །རྩེ་ལ་གློག་འཁྱུག་འབྲུག་སྟོང་ལྡིར། །དྲག་སྔགས་དམོད་པའི་རྦོད་གཏོང་ཟློག །རྐེད་པར་དུག་ཁྲག་སེར་ཆེན་འབེབ། །བྲབ་པ་ཐུན་གྱི་རྦོད་གཏོང་ཟློག །རྩ་བར་གནམ་ལྕགས་ཐོག་རྒོད་འདྲིལ། །འཕེན་པ་ཟོར་གྱི་རྦོད་གཏོང་ཟློག །རྩེ་ལ་ཤ་ཆེན་ལིང་གས་བརྒྱན། །སྡང་བྱེད་དགྲ་ཡི་གནོད་པ་ཟློག །སྐེད་པར་བཟློག་པའི་བྱང་བུས་བརྒྱན། །ལོག་འདྲེན་བགེགས་ཀྱི་གནོད་པ་ཟློག། །རྩ་བར་དུར་འཇིམ་ལྕགས་རིས་བསྐོར། །བར་གཅོད་དམ་སྲིའི་གནོད་པ་ཟློག །གདུག་རྩུབ་ལས་ཀྱི་རྩང་ཕུར་གྱིས། །ཆོ་འཕྲུལ་ཐན་ལྟས་མཁའ་ལ་སྒྱུར། །མི་མཐུན་ཕྱོགས་ཀུན་དབྱིངས་སུ་ཟློག །བཟློག་གོ་བསྒྱུར་རོ་མཱ་ར་ཡ། །དྲག་པོའི་རྩང་གི་དྲྭ་མིག་ནས། །ལས་བྱེད་ཕོ་ཉའི་ཚོགས་འཕྲོས་པས། །བཞི་བརྒྱ་རྩ་བཞིའི་ནད་རྣམས་ཟློག །སྟོང་ཕྲག་བརྒྱད་ཅུའི་བགེགས་རྣམས་ཟློག །བརྒྱད་ཁྲི་བཞི་སྟོང་གདོན་རྣམས་ཟློག །དུས་མིན་འཆི་བ་རྣམ་བརྒྱད་ཟློག །གསོན་གྱི་བདུད་དུ་གཡོས་པ་ཟློག །གཤིན་གྱི་དུར་སྲི་ལང་པ་ཟློག །གེགས་དང་ཡེ་འདྲོགས་ཐམས་ཅད་ཟློག །ཆགས་ཆེ་ཉམས་ང་ཐམས་ཅད་ཟློག །བྱད་ཕུར་རྦོད་གཏོང་ཐམས་ཅད་ཟློག །ཆོ་འཕྲུལ་ལྟས་ངན་ཐམས་ཅད་ཟློག །ནད་མཚོན་མུ་གེ་དུས་འཁྲུགས་ཟློག །མི་ཕྱུགས་ནོར་གྱི་གོད་ཁ་ཟློག །དགྲ་གདོན་བགེགས་ཀྱི་བསམ་སྦྱོར་ཟློག །ཧོར་སོགས་མཐའ་བཞིའི་དམག་དཔུང་ཟློག །འཇིགས་དང་སྡུག་བསྔལ་ཐམས་ཅད་ཟློག །རྐྱེན་དང་བར་ཆད་ཐམས་ཅད་ཟློག །མི་མཐུན་གནོད་པའི་ཕྱོགས་རྣམས་ཀུན། །བཟློག་ཅིང་བསྒྱུར་བའི་ཕྲིན་ལས་མཛོད། །ཅེས་སོ། །བཞི་པ་ལྟས་ངན་དམིགས་ཀྱིས་བཟློག་པ་བྱ་བ་ནི། །ཧཱུྃ་ཧཱུྃ༔ ཁྲོ་རྒྱལ་ཁམས་གསུམ་ཧཱུྃ་སྒྲ་ཅན། །སྐུ་ལ་ཟངས་ཁྲབ་འོད་ཀྱིས་མཛེས། །ཕྱག་ན་མདུང་དམར་ཆེམས་སེ་ཆེམས། །བ་དན་རྩེ་གསུམ་གཡབ་མོས་འདེབས། །གཡས་ནས་བསྐོར་བས་ལྷ་སྲིན་སྡུད། །གཡོན་ནས་བསྐོར་བས་ཀླུ་སྲིན་འཇོམས། །ཀླད་ལ་བསྐོར་བས་བདུད་དཔུང་འཇོམས། །སྲོག་ལ་དབང་བྱེད་དྲོད་ལ་ཁྱབ། །ཤ་ཁྲག་མཆོད་པ་འདི་བཞེས་ལ། །ལྟས་ངན་དམིགས་ཀྱིས་བཟློག་ཏུ་གསོལ། །ལྟས་ངན་ཀུན་གྱི་ཕ་སྨོས་པ། །གནམ་གྱི་བྱ་དཀར་མཆེ་བ་ཅན། །ལྟས་ངན་ཀུན་གྱི་མ་སྨོས་པ། །ས་ལ་བྱི་དཀར་གཤོག་པ་ཅན། །དེ་གཉིས་སྲིད་ཅིང་བསྡེབས་པ་ལས། །བྱུང་བའི་ལྟས་ངན་སྣ་ཚོགས་ཟློག །ཉི་ཟླ་ཤི་བ་མ་བདུད་ལྟས། །གནམ་ནས་ལྟས་ངན་བྱུང་བ་ཟློག །བྱ་དང་རྒོད་སོགས་སྲོག་བདག་ཐན། །བར་སྣང་ནས་བྱུང་ལྟས་ངན་ཟློག །དབྱིངས་དང་མཐའ་ཡས་ལྷ་བདུད་ལྟས། །གངས་ནས་བྱུང་བའི་ཐན་ལྟས་ཟློག །ཤ་ལྒོ་སྨན་དང་གཟའ་ཡི་ཐན། །སྤང་ནས་བྱུང་བའི་ཐན་ལྟས་ཟློག །གླ་འུག་བྲག་བཙན་གཉན་གྱི་ཐན། །བྲག་ནས་ཐན་ལྟས་བྱུང་བ་ཟློག། །དོམ་དྲེད་མ་བདུད་གཉན་གྱི་ཐན། །ནགས་ནས་ཐན་ལྟས་བྱུང་བ་ཟློག །འབྲོང་བུ་གཡག་སོགས་དམུ་བདུད་ཐན། །གཡའ་སྔོན་ནས་བྱུང་ཐན་ལྟས་ཟློག །རྒོད་པོ་སྡེར་འཛིང་ལྷ་གཉན་ལྟས། །མཁའ་དབྱིངས་ནས་བྱུང་ཐན་ལྟས་ཟློག །སྦལ་སྦྲུལ་ཉ་སོགས་ཀླུ་གཉན་ལྟས། །རྒྱ་མཚོ་ནས་བྱུང་ཐན་ལྟས་ཟློག །མཛེ་ཤུ་གཡན་པ་ས་བདག་ཐན། །ས་གཞི་ནས་བྱུང་ཐན་ལྟས་ཟློག །སྲིན་བྱ་ཁུས་འདེབས་འདྲེ་མོའི་ཐན། །དུར་དང་འཆད་པའི་ཐན་ལྟས་ཟློག །གོང་སྲེག་གླུ་ལེན་འདྲེ་སྲིན་ཐན། །བྲག་དང་ནགས་ཀྱི་ཐན་ལྟས་ཟློག །ཤ་ཕོ་རུ་འཛིང་གཉན་བདུད་ཐན། །ཕུ་ནས་ཐན་ལྟས་བྱུང་བ་ཟློག །ཉ་མོ་མངལ་འཛིང་ཀླུ་སྲིན་ཐན། །མདའ་ནས་ཐན་ལྟས་བྱུང་བ་ཟློག །ཝ་བརྒྱལ་ཝ་རོ་དུར་སྲིའི་ཐན། །དུར་ནས་བྱུང་བའི་ཐན་ལྟས་ཟློག །དྲུག་གྲུམ་གདོང་གས་གཟི་མིག་སོགས། །རྟ་ལ་བྱུང་བའི་ཐན་ལྟས་ཟློག །མིག་གསུམ་ཡན་ལག་མཚེ་མ་སོགས། །ཕྱུགས་ལ་བྱུང་བའི་ཐན་ལྟས་ཟློག །རོ་སྒལ་སྐེད་འཁོར་ནག་པོ་སོགས། །ལུག་ལ་བྱུང་བའི་ཐན་ལྟས་ཟློག །ཟངས་ལྡན་སྤུ་རྟགས་དམར་པོ་སོགས། །ར་ལ་བྱུང་བའི་ཐན་ལྟས་ཟློག །འཚེ་བ་བྱུང་དང་ཐོ་རེངས་ངུ། །ཁྱི་ལ་བྱུང་བའི་ཐན་ལྟས་ཟློག །སྲོད་ལ་བྱ་ཕོ་འཚེར་བ་སོགས། །རྒྱལ་འགོང་འདྲེ་ཡི་ཐན་ལྟས་ཟློག །བྱ་རོག་འུག་པ་སྡེར་འཛིང་བྱེད། །དམེ་འཁོན་བདུད་ཀྱི་ཐན་ལྟས་ཟློག །གཤིན་རྗེའི་སེང་གེ་ངུ་འབོད་དང་། །འཇའ་འཁྱིལ་ལྷ་ཡི་ཐན་ལྟས་ཟློག །གཅན་གཟན་འཐབ་དང་ནང་དམེ་བྱེད། །སྲིད་པ་མ་མོའི་ལྟས་ངན་ཟློག །ཤ་རྐྱང་བཙན་གྱི་ལྟས་ངན་དང་། །གླ་བ་སྨན་གྱི་ཐན་ལྟས་ཟློག །སྦྲུལ་ནག་འཁྱིལ་བ་ཀླུ་ཡི་ལྟས། །དོམ་ནག་བདུད་ཀྱི་ཐན་ལྟས་ཟློག །བྱ་རྒོད་རྒྱལ་པོའི་ལྟས་ངན་དང་། །ཁྲུང་ཁྲུང་འདྲེ་ཡི་ཐན་ལྟས་ཟློག །འཕར་སྤྱང་སྟག་གཟིག་མི་རྒོད་སོགས། །དགེ་བསྙེན་ཟོ་དོར་ཐན་ལྟས་ཟློག །བྱ་ནག་སྡེར་འཛིང་བྱེད་པ་སོགས། །བདུད་ཀྱི་ཐན་ལྟས་བྱུང་བ་ཟློག །ཁྲ་གསུམ་ཁ་ནས་སྦྲུལ་ཁྱེར་བ། །ཀླུ་དང་རྒྱལ་པོའི་ཆོ་འཕྲུལ་ཟློག །དུར་བྱའི་ཁ་ནས་ཉ་ཁྱེར་བ། །ཀླུ་དང་མ་མོའི་ཆོ་འཕྲུལ་ཟློག །བྱ་གསུམ་སྡེར་འཛིང་བྱེད་པ་སོགས། །ཕུང་སྲི་ལངས་པའི་ལྟས་ངན་ཟློག །རྒོད་བཞི་གཤོག་འཛིང་བྱེད་པ་སོགས། །གནམ་ལྷ་དཀར་པོའི་ལྟས་ངན་ཟློག །རྨ་བྱ་མི་རོ་ཟ་བ་སོགས། །སྲིད་པའི་རྒྱལ་མོའི་ཐན་ལྟས་ཟློག །བྱ་གསུམ་གནམ་ལ་ཤ་འབྲད་པ། །བདུད་ཀྱི་ཕྱག་བརྙན་ལྟས་ངན་ཟློག །འདབ་ཆགས་གཅིག་ལ་གཅིག་ཞོན་པ། །སྲི་ཁ་ལྡང་བའི་ཐན་ལྟས་ཟློག །དོམ་གསུམ་ཁ་ནས་མི་རོ་ཁྱེར། །དབྱིངས་ཀྱི་མ་མོའི་ལྟས་ངན་ཟློག །སྦྲུལ་ནག་ཐུར་དུ་རྒྱུག་པ་སོགས། །ཀླུ་དང་མ་མོའི་ལྟས་ངན་ཟློག །དུར་སར་ཝ་མོ་བརྒྱལ་བ་སོགས། །དུར་སྲི་ཕུང་སྲི་ལྡང་བ་ཟློག །སྲེ་མོང་བྱི་རོ་ཁྱེར་བ་སོགས། །མོ་རྒྱུད་ཆུང་སྲིའི་ཐན་ལྟས་ཟློག །སྤྱང་གསུམ་འོ་དོད་འབོད་པ་སོགས། །རྒྱལ་པོ་བཙན་གྱི་ཆོ་འཕྲུལ་ཟློག ། ཁྱི་སྤྱང་ཁ་ནས་སྙིང་ཁྱེར་བ། །ལྷ་བདུད་ཁྲོས་པའི་ཐན་ལྟས་ཟློག །ཐོ་རེངས་སྒོ་ཁྱི་ངུ་ཟུག་བྱེད། །ཡ་བདུད་ལངས་པའི་ཐན་ལྟས་ཟློག །བྱི་བས་སྐྲ་ལ་ཟ་བ་སོགས། །གནམ་ས་འཁྲུགས་པའི་ལྟས་ངན་ཟློག །ཅང་ཤེས་དྲུག་གྲུམ་ཤེལ་མིག་སོགས། །ཡ་བདུད་རྒྱལ་པོའི་ཐན་ལྟས་ཟློག །དྲེལ་ཕྲུག་བླང་དོར་བྱུང་བ་སོགས། །ཀླུ་བཙན་འཁྲུགས་པའི་ཐན་ལྟས་ཟློག །རྔ་མོང་མི་རོ་ཁུར་བ་སོགས། །ཕུང་གསུམ་ལངས་པའི་ཐན་ལྟས་ཟློག །རྨིག་ཟླུམ་ཕྲུ་གུར་མགོ་བརྙན་བྱུང་། །དགྲ་སྲི་ལངས་པའི་ཐན་ལྟས་ཟློག །དྲེའུའི་སྟེང་དུ་འདབ་ཆགས་ཞོན། །མ་མོ་དམ་སྲིའི་ལྟས་ངན་ཟློག །མི་སྲིད་པ་ཡི་བུ་བྱུང་བ། །གདག་སྲིབ་ལོགས་པའི་ལྟས་ངན་ཟློག །བོང་བུ་སྦྲུལ་གྱི་མཐུར་ཐག་ཅན། །མ་བདུད་ཁྲོས་པའི་ཐན་ལྟས་ཟློག །བོང་དོར་མགོ་གསུམ་བྱུང་བ་སོགས། །མ་ཡམས་བསྟན་མའི་ལྟས་ངན་ཟློག །སྤྲེལ་གསུམ་ལག་ན་ཁྲམ་བམ་ཁྱེར། །ཐེའུ་རིང་སྤུན་གསུམ་ཐན་ལྟས་ཟློག །སྤྲེལ་གསུམ་སྟག་ལ་ཞོན་པ་སོགས། །ཕུང་སྲི་ལངས་པའི་ཐན་ལྟས་ཟློག །འདབ་ཆགས་དྲེད་ལ་ཞོན་པ་སོགས། །རྒྱལ་བློན་བྲན་གསུམ་ལྟས་ངན་ཟློག །སྤྱང་གསུམ་མི་རོ་ཟ་བ་སོགས། །མ་ཡམས་བསྟན་མའི་ཐན་ལྟས་ཟློག །སྦལ་བའི་ལག་ན་སྦྲུལ་ཁྱེར་བ། །ཀླུ་དང་ས་བདག་ཐན་ལྟས་ཟློག །བུད་མེད་འཐབ་ཅིང་རལ་འཛིང་བྱེད། །མ་ཡམས་དམ་སྲིའི་ཐན་ལྟས་ཟློག །དྲེད་མོས་སྐྲ་འབལ་བྲང་བརྡུང་བ། །ལྷ་མོ་བདུད་མོའི་ཐན་ལྟས་ཟློག །ཕོ་མོས་ལྷ་སར་མནོལ་བྱེད་པ། །ལྷ་ཀླུ་འཕངས་པའི་ཐན་ལྟས་ཟློག །མཛོ་ལ་དུར་བྱ་ཞོན་པ་ནི། །བདེ་ཆེན་རྒྱལ་མོའི་ཐན་ལྟས་ཟློག །ནམ་གུང་རྟ་ཕོ་འཚེར་བ་དང་། །སྲོད་ལ་མཛོ་ཕོ་ངུར་བ་ཟློག །ཁང་ཁྱིམ་འུག་པ་རྒོད་པ་དང་། །སྲིན་བྱས་ཉིན་པར་ཀུས་འདེབས་ཟློག །དྲེལ་རྟའི་རྔ་རྔོག་ཆད་པ་དང་། །ཆོན་ཐག་རྟ་རྒྱུག་བྱེད་པ་ཟློག །ཁྱིམ་བྱས་རོ་བྱུང་ཟེར་བ་དང་། །མི་ནག་འོ་དོད་འབོད་པ་ཟློག །སྒོ་ཁྱི་ངུ་ཟུག་བྱེད་པ་དང་། །འོག་རྟ་སྲབ་འགྲོས་བྱེད་པ་ཟློག །མདོར་ན་སྣང་ཞིང་སྲིད་པ་ལ། །མི་རུང་མི་སྲིད་མི་འདོད་པའི། །ཆོ་འཕྲུལ་ཐན་ལྟས་མ་ལུས་ཀུན། །དམིགས་མེད་སྟོང་པའི་དབྱིངས་སུ་ཟློག །བཟློག་གོ་དགྲ་བགེགས་དབྱིངས་སུ་ཟློག །བསྒྱུར་རོ་ཐན་ལྟས་དབྱིངས་སུ་སྒྱུར། །བཟློག་བསྒྱུར་དྲག་པོའི་ཕྲིན་ལས་མཛོད། །དུས་ལ་བབ་པོ་ས་མ་ཡཱ༔ ཞེས་བརྗོད་དོ། ལྔ་པ་ཐུན་གཏོར་འབུལ་བ་ནི། དམར་གཏོར་རཀྟས་བྲན་ཏེ། དགུག་གཞུག་ལན་གསུམ་བྱ་ཞིང་། བདུད་རྩིས་བྲན་ལ། རཾ་ཡཾ་ཁཾ། སྟོང་པའི་ངང་ལས་བྷཉྫའི་སྣོད་དུ་དམར་གཏོར་དགྲ་བགེགས་བསྒྲལ་བའི་ཤ་ཁྲག་རུས་པ་ནང་ཁྲོལ་གྱི་རྣམ་པ་ལྷུན་པོར་སྤུངས་པ་ངོ་བོ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། །ཨོཾ་ཨཱ༔ཧཱུྃ། ལན་གསུམ་གྱིས་བྱིན་གྱིས་བརླབས་ནས། རྩ་སྔགས་མཐར། ཨེ་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཕུལ། བཛྲ་པུཥྤེ་དྷུཔྤེ༴སོགས་ནས། ཤཔྟ་ཨ་མྲྀ་ཏ་རཀྟ་བྷ་ལིང་ཏ་མ་ཧཱ་སརྦ་པུ་ཙ་ས་མ་ཡཱ་ཁཱ་ཧི་ཁཱ་ཧི། ཞེས་པས་མཆོད་ཅིང་བསྟོད་པ་ནི། ཧཱུྃ་ཧཱུྃཿ རབ་འབྱམས་རྒྱལ་ཀུན་ཕྲིན་ལས་འདུས་པའི་དཔལ། །གསང་བ་ཀུན་བདག་ཁྲོ་རྒྱལ་རྡོ་རྗེ་འཆང་། །གཏུམ་པོ་རིགས་བཞི་ཁྲོ་བཅུ་སྒོ་བར་བཅས། །ཡོངས་རྫོགས་དཀྱིལ་འཁོར་ལྷ་ལ་ཕྱག་འཚལ་བསྟོད། །ཅེས་བསྟོད་ནས་ཕྲིན་ལས་བཅོལ་བ་ནི། ཧཱུྃ་ཧཱུྃ༔  གསང་བདག་ཕྱག་རྡོར ་ལྷ་ཚོགས་འཁོར་བཅས་ལ། །དགྲ་བགེགས་ཤ་ཁྲག་རུས་པ་ནང་ཁྲོལ་ཚོགས། །ལྷུན་པོར་སྤུངས་པའི་འདོད་དགུའི་བྷ་ལིང་ཏ། །ཕྱི་ནང་ཉེར་སྤྱོད་སྨན་རཀ་བདུད་རྩིའི་ཚོགས། །འབུལ་ལོ་དགྱེས་པར་རོལ་ལ་བདག་ཅག་གི། །ནད་གདོན་ཀུན་གཞི་ཚེ་དཔལ་ལོངས་སྤྱོད་སྤེལ། །ཁམས་གསུམ་དབང་བསྡུས་དགྲ་བགེགས་བདུད་སྡེའི་དཔུང་། །ཐམས་ཅད་མིང་གི་ལྷག་མར་ཚར་ཆོད་ཅིག །ཕས་རྒོལ་བསམ་ངན་སྦྱོར་རྩུབ་བྱད་ལྟེམ་དཔུང་། །ཐམས་ཅད་རང་གཤེད་ཕོབ་ལ་མཐུ་ནུས་ཤིག །མནན་པའི་སྐབས་ཡིན་ན། ལུས་ངག་ཡིད་གསུམ་མཐུ་རྩལ་ནུས་པ་རྣམས། །ནམ་ཡང་ལྡང་མེད་མནན་པའི་ལས་མཛོད་ཅིག །ཅེས་དང་། གང་ལྟར་ཡང་། མདོར་ན་བདག་གི་རེ་འབྲས་གང་ཡིན་པ། །འབད་མེད་ལྷུན་གྱིས་གྲུབ་པའི་ཕྲིན་ལས་མཛོད། །ཅེས་བཟློག་སྔགས་དང་། ཐུན་གཏོར་གཏོར་ཆེན་དུ་འབུལ་ལོ། །གསུམ་པ་རྗེས་ཀྱི་ལས་རིམ་ནི། ཉིན་སྔ་མ་རྣམས་ལ་ལྷག་གཏོར། ཆད་བརྟན། བྲོ་བརྡུང་། མཆོད་བསྟོད། བཟོད་གསོལ། བརྟན་བཞུགས། བསྡུ་ལྡང་། བསྔོ་སྨོན། ཤིས་བརྗོད་རྣམས་བྱའོ།། ཉིན་རྗེས་མར་ཐུན་གཏོར་ཡན་གྲུབ་ནས། ཟོར་གྱི་ལས་རིམ་ལའང་དྲུག་ལས། དང་པོ་ཕྱི་སྒོ་དབྱེ་བ་ནི། གསེར་སྐྱེམས་བསང་སྦྱངས་བྱིན་གྱིས་བརླབས་ལ། ཧཱུྃ་ཧཱུྃ༔ བདེ་གཤེགས་སྙིང་པོ་གདོད་མའི་དབྱིངས། །ཀུན་ཁྱབ་ལྷུན་གྲུབ་འདུས་མ་བྱས། །འཁོར་འདས་དག་མཉམ་ཆོས་སྐུའི་ཞིང་། །སྐྱེ་འགག་མེད་པའི་གཞལ་ཡས་ནས། །བླ་མ་ཡི་དམ་མཁའ་འགྲོའི་ཚོགས། །མཆོག་གསུམ་བཀའ་གཏེར་བསྲུང་མར་བཅས། །བདུད་རྩི་གསེར་སྐྱེམས་འདི་གསོལ་ལ། །དྲག་པོའི་ལས་ཀྱི་གཟུ་དཔང་མཛོད། །ཚངས་པ་ལ་སོགས་ལྷ་ཆེན་བརྒྱད། །དགའ་བོ་ལ་སོགས་ཀླུ་ཆེན་བརྒྱད། །ཉི་ཟླ་ལ་སོགས་གཟའ་ཆེན་བརྒྱད། །དབང་པོ་ལ་སོགས་ཕྱོགས་སྐྱོང་བཅུ། །རྒྱུ་སྐར་ཉེར་བརྒྱད་འཇིགས་བྱེད་དགུ། །རྒྱལ་ཆེན་བཞི་སོགས་དཔལ་མགོན་ཚོགས། །སྣང་སྲིད་ལྷ་སྲིན་སྡེ་བརྒྱད་དང་། །ལོ་ཟླ་ཞག་དུས་ཚེས་ཀྱི་ལྷ། །ས་བདག་གཞི་བདག་གནས་ཀྱི་བདག །དཀར་ཕྱོགས་སྐྱོང་རྣམས་མ་ལུས་ཀུན། །མཆོད་སྦྱིན་གསེར་སྐྱེམས་འདི་བཞེས་ལ། །ཀོ་ལོང་རུ་ང་མ་མཛད་པར། །ཟོར་གྱི་ལམ་ཕྱེས་དམག་དཔུང་བསྐྱེད། །དགྲ་གདོན་བགེགས་ཚོགས་རྡུལ་དུ་རློགས། །སྟེང་འོག་ཕྱོགས་བཅུར་གནས་པ་ཡི། །ལྷ་ཀླུ་གཞི་བདག་དྲེགས་ཚོགས་ཀུན། །དམ་རྫས་གསེར་སྐྱེམས་འདི་བཞེས་ལ། །མཐོ་བ་རྣམས་ཀྱིས་ཞབས་བསྐུམ་ལ། །དམའ་བ་ཐམས་ཅད་དབུ་ཁུག་ཅིག །ཐད་ན་འདུག་པ་སྐུ་ཟུར་ལ། །དྲག་པོ་ཟོར་གྱི་ལམ་ཕྱེས་ཤིག །གཏོར་ཟོར་གཉན་པོར་འོད་འཕྲོས་ནས། །ཁྱེད་རྣམས་སྐུ་ལ་ཕོག་པར་མཆིས། །དེ་བས་ཐམས་ཅད་སྐུ་བསྐྱོད་ལ། །དམག་དཔུང་བསྐྱེད་ལ་རུ་མཚོན་ཕྱོར། །རྣལ་འབྱོར་མགོན་དང་གྲོགས་མཛོད་ཅིག །ཞེས་བརྗོད་ཅིང་གསེར་སྐྱེམས་མཆོད། གཉིས་པ་ཟོར་སྒྲུབ་པ་ནི། གཏོར་མའི་ལྷ་ཚོགས་ལ་མཆོད་བསྟོད་བཟོད་གསོལ་བྱ། ཁྱུང་སྐུ་དང་ཙཀ་ལི་སོགས་ལས་དབང་བཞི་བླངས། ཨོཾ་བཛྲ་ཨུ་ཊིཥྛཿ ཞེས་པས། གཏོར་ཆེན་གྱི་ཡེ་ཤེས་པ་མདུན་གྱི་ནམ་མཁར་བཏེགས་པའམ། ཙཀ་ལི་སོགས་ལ་བསྟིམ། དམ་ཚིག་པ་རྣམས་འོད་དུ་ཞུ་ནས་རང་ལ་ཐིམ་པར་བསམ་ནས། སླར་ཡང་གཏོར་ཆེན་ཟོར་རྫས་དང་བཅས་པ་སྐད་ཅིག་གིས་གསང་བདག་ཕྱག་ན་རྡོ་རྗེའི་དཀྱིལ་འཁོར་གྱི་ལྷ་ཚོགས་བཀའ་བསྲུང་དྲེགས་པ་ལྷ་སྲིན་སྡེ་བརྒྱད་ཀྱི་དམག་དཔུང་བསམ་གྱིས་མི་ཁྱབ་པ་དང་བཅས་པ་ཐམས་ཅད་ཁྲོ་གཏུམ་འཇིགས་པའི་གཟུགས་ཅན་སྲིད་གསུམ་གང་བ། ནད་མཚོན་དུག་གི་ཆར་བ་འབེབས་པ་དགྲ་བགེགས་སྒྲོལ་བའི་ལས་ལ་རྔམ་པའི་སྐུར་བཞེངས་པར་གྱུར་བར་བསམ་ཞིང་། ཧཱུྃ་ཧཱུྃཿ ཁྲོ་རྒྱལ་ཡོངས་ཀྱི་སྟོབས་འདུས་པ། །གསང་བདག་ལྷ་ཚོགས་མ་ལུས་དང་། །རྩ་རྒྱུད་བླ་མ་ཡི་དམ་ལྷ། །མཆོག་གསུམ་མཁའ་འགྲོ་ཆོས་སྐྱོང་དགོངས། །ད་དུས་བསྐལ་པའི་ཡང་མཐའ་འདིར། །སངས་རྒྱས་བསྟན་པ་ལྷག་ལ་ཉེ། །དགྲ་གདོན་བུ་ཡུག་རླུང་ལྟར་འཚུབ། །ནད་མཚོན་མུ་གེའི་བསྐལ་པ་དང་། །མཆོག་གསུམ་བསྟན་པའི་དབུ་འཕང་དམའ། །ཆོས་མཛད་རྣལ་འབྱོར་སྐྱབས་མགོན་བྲལ། །ཀྱེ་མ་བསྟན་པའི་གཞུག་གཉེར་འདི། །དབྱིངས་ན་བཞུགས་པའི་རྒྱལ་བ་རྣམས། །ཐུགས་རྗེ་མ་གཡེལ་ཐུགས་བསྐྱེད་དགོངས། །བརྟེན་ཅིང་བསྒྲུབ་པའི་རྩ་བ་གསུམ། །མོས་འདུན་གཏད་པ་སུན་མ་ཕྱུངས། །བསྙེན་སྒྲུབ་བརྩམ་པའི་ཡིད་མ་གཅོད། །མཆོད་གཏོར་ཕུལ་བའི་ཆོས་སྐྱོངས་རྣམས། །གསོལ་མཆོད་བྱས་པ་ཆུད་མ་གསོན། །སྣང་སྲིད་ལྷ་སྲིན་སྡེ་བརྒྱད་རྣམས། །རྒྱལ་བ་རྣམས་ཀྱིས་བཀའ་བསྒོས་ལྟར། །དམ་ཚིག་ལྡན་པའི་ཕྲིན་ལས་མཛོད། །མངོན་སྤྱོད་དྲག་པོའི་དུས་ལ་བབས། །ཉམས་པའི་བྱད་མ་དགྲ་བགེགས་འདིས། །བླ་མའི་སྐུ་དང་བསྟན་ལ་བསྡོས། །སྡིག་ལྟུང་མི་དགེ་མཚམས་མེད་སྤྱད། །ད་ལྟ་བདག་གི་དགྲ་རུ་ལངས། །རྣལ་འབྱོར་བདག་ལ་ལྷ་མེད་ཟེར། །རྩ་གསུམ་བསྲུང་མར་མཐུ་མེད་ཟེར། །དེ་ཕྱིར་བསྒྲལ་བའི་ཞིང་བཅུ་འདི། །མཐུ་སྟོབས་དྲག་པོས་མ་བསྒྲལ་ན། །རྗེས་འཇུག་རྣལ་འབྱོར་སུ་ལ་རེ། །སངས་རྒྱས་བསྟན་པ་མི་འཇིག་གམ། །དེ་ཕྱིར་ཐུགས་རྗེའི་ཤུགས་ཕྱུངས་ཤིག །དེ་ཕྱིར་ནུས་པའི་སྟོབས་བསྐྱེད་ཅིག །ཅེས་བརྗོད་ཅིང་བསད་ཟློག་གི་སྔགས་བཟླས་པས་ཟོར་ནུས་ལྡན་དུ་བསྒྲུབ། དམར་གཏོར་ཁྲག་སྐྱེམས་བཅས་བཤམས་ལ། གོང་བཞིན་འགུགས་གཞུག་དང་བྱིན་རླབས་བྱ་ཞིང་། དམག་ལྟོའི་ཚུལ་དུ་ཕུལ་ལ་ཕྲིན་བཅོལ་བྱ། གོང་དུ་ཚོགས་ལྷག་བཙོན་འཛིན་བྱས་ན་མཚམས་འདིར་གཏོང་། གསུམ་པ་ནང་སྒོ་དབྱེ་བ་ནི། གསེར་སྐྱེམས་འབྲུ་གསུམ་གྱིས་སྤེལ་ལ། ཧཱུྃ་ཧཱུྃཿ རང་བྱུང་སྤྲུལ་པའི་སྒོ་བཞི་ནས། །སྤྲུལ་པའི་ཁྲོ་རྒྱལ་སྒོ་བ་བཞི། །གསེར་སྐྱེམས་མཆོད་པ་འདི་བཞེས་ལ། །ཡེ་ཤེས་བཞི་ཡི་སྒོ་ཕྱེས་ཤིག ། རབ་འཇིགས་དྲག་པོའི་དུར་ཁྲོད་ནས། །ལས་བྱེད་ཕོ་ཉ་སྒོ་མའི་ཚོགས། །གསེར་སྐྱེམས་མཆོད་པ་འདི་བཞེས་ལ། །དྲག་པོ་དཔལ་གྱི་ཟོར་ལམ་ཕྱེས། །བཀའ་གཏེར་སྤྱི་དང་བྱེ་བྲག་གི། །བསྲུང་མ་དམ་ཅན་རྒྱ་མཚོའི་ཚོགས། །གསེར་སྐྱེམས་མཆོད་པ་འདི་བཞེས་ལ། །དྲག་པོའི་ཟོར་གྱི་དཔུང་ལ་གཤེགས། །སྡེ་བརྒྱད་ལྷ་ཀླུ་དྲེགས་པའི་ཚོགས། །ལས་དང་གྲོགས་ལ་མ་བྱོན་ན། །དྲག་པོའི་ཟོར་གྱི་འོད་འཕྲོས་པས། །ཕོག་ན་རྡུལ་དུ་བརླག་པར་འགྱུར། །དེ་བས་སྔོན་གྱི་དམ་དགོངས་ལ། །གསེར་སྐྱེམས་འདི་བཞེས་ཕྲིན་ལས་མཛོད། །དམག་དཔུང་བསྐྱེད་ལ་རུ་མཚོན་ཕྱོར། །ཟོར་སྣ་དྲོངས་ལ་དགྲ་བགེགས་སྒྲོལ། །ཡེ་ཤེས་ལས་དང་འཇིག་རྟེན་གྱི། །དམ་ཅན་ཆོས་སྐྱོང་སྲུང་མ་རྣམས། ། གསེར་སྐྱེམས་མཆོད་པ་འདི་བཞེས་ལ། །མངོན་སྤྱོད་ལས་ཆེན་བཅུ་གཉིས་ཀྱིས། །དགྲ་གདོན་བགེགས་ཚོགས་མ་ལུས་པའི། །དྲག་ཤུལ་གདུག་པའི་བསམ་སྦྱོར་རྣམས། །ཀུན་བཟང་དགོངས་པའི་ཀློང་ཆེན་པོར། །རྡུལ་དུ་རློག་ཅིང་གཞོམ་པར་མཛོད། །ཅེས་བརྗོད་ཅིང་སྒོ་བཞི་དབྱེའོ། །དེ་ནས་ཟོར་ལམ་འཐེན་ཞིང་། ཟོར་རྣམས་འགྲོ་ཕྱོགས་སུ་དཔག་ལ། སྨན་རཀ་བྲན་ཅིང་ཞུན་ཆེན་གྱི་མར་མེ་དང་། ཚིལ་ཆེན་གྱི་དཔལ་འབར་བཙུགས། བསྐུལ་བ་དང་ཆད་མདོ་བསྒྲགས་ཤིང་ཆད་གཏོར་གཏོར་ཆེན་དུ་འབུལ་ལོ། །བཞི་པ་སྲིན་མོ་ཟ་ལམ་ནི། གཟུགས་སམ་ཞལ་གཏོར་ཟོར་ཀོང་བཅས་བཤམས་ལ། རཀྟ་སྦྲེང་། རྐང་གླིང་འབུད། ཞིང་ལྤགས་བརྡབ་ཅིང་འདི་བཞིན་བྱའོ། །ཧཱུྃ་བྷྱོཿ སྲིན་མོ་ཟ་ལམ་གོམ་པ་བདུན་ཅུ་འདས་པའི་ཕ་རོལ་ན། །འཇིག་རྟེན་འདས་ཀྱང་འཁོར་བའི་ཆ་ལུགས་འཛིན། །ཡེ་ཤེས་གྲུབ་ཀྱང་ལས་ཀྱི་ཕོ་ཉར་སྟོན། །དྲེགས་པ་སྡེ་བརྒྱད་ཡོངས་ཀྱི་ལྕམ་སྲིང་ཚུལ། །ཕྱོགས་མཚམས་སྟེང་འོག་དྲེགས་པའི་བཀའ་བསྒྱུར་ནས། །བདག་དང་བསྲུང་བྱ་འཁོར་དང་བཅས་པ་ལ། །སྡེ་བརྒྱད་དྲེགས་པའི་བཀའ་ཆད་ཕོག་ཏ་རེ། །བཟློག་གོ་དམར་ཆེན་གཏོར་མ་འདི་ཡིས་ཟློག །བསྒྱུར་རོ་རྐྱེན་ངན་བར་ཆད་མ་ལུས་པ། །དམ་ཉམས་སྡང་དགྲ་གནོད་པའི་བགེགས་ལ་བསྒྱུར། །བཟློག་གོ་སྔོན་ལས་འཕྲལ་རྐྱེན་མི་མཐུན་ཕྱོགས། །བསྟན་འགྲོར་གནོད་པའི་ཞིང་བཅུའི་སྟེང་དུ་ཟློག །རྣལ་འབྱོར་བཅོལ་པའི་ཕྲིན་ལས་གྲུབ་པར་མཛོད། །ས་མ་ཡཱཿ བྷྱོ་བྷྱོ་བཟློག་བཟློགཿ ཞེས་སོ། ལྔ་པ་ཟོར་འཕེན་པ་ནི། ཟོར་རྣམས་རིམ་བཞིན་ཁྱེར་བའི་ཕྱི་ནས་སྒྲུབ་པ་པོ་རྣམས་ལྟ་སྒོམ་གྱི་གདེངས་དང་ལྡན་པས་རིག་པ་ཧུར་ཕྱུངས་ཏེ། རྩ་སྔགས་དང་། ཨོཾ་བཛྲ་ཙཎྚ་སརྦ་དུཥྚན་ཨེ་ཛ་བྷྱོ་ཧཱུྃ་ཕཊ། ཅེས་བཟླ་ཞིང་འཕེན་པའི་ས་དེར་སོང་ལ་ཟོར་རྣམས་སྟེགས་ལ་བཀོད། རྒྱས་པར་དཀར་གཏོར་དང་གསེར་སྐྱེམས་མཆོད་ཅིང་རྒྱབ་ཡིག་བསྒྲགས། བསྡུ་ན། ཧཱུྃ་ཧཱུྃཿ ཕྱོགས་མཚམས་སྟེང་འོག་ལ་གནས་པའི། །སྣང་སྲིད་ལྷ་འདྲེ་དྲེགས་པའི་ཚོགས། །གསེར་སྐྱེམས་མཆོད་པ་འདི་བཞེས་ལ། །རིག་འཛིན་བདག་གི་བཀའ་ལ་ཉོན། །དམར་ཆེན་དྲག་པོའི་གཏོར་ཟོར་འདི། །དགྲ་གདོན་བགེགས་ཀྱི་སྟེང་དུ་འཕེན། །ཕྱོགས་འདིར་གནས་པའི་གཞི་བདག་རྣམས། །འཁོར་བཅས་དྲག་པོའི་དམག་སྣ་དྲོངས། ། གསེར་སྐྱེམས་མཆོད་པ་འདི་བཞེས་ལ། །ཞིང་བཅུ་ཉམས་པ་བདུན་ལྡན་པའི། །དགྲ་གདོན་བགེགས་རྣམས་མ་ལུས་ཀུན། །ལྷག་མེད་རྡུལ་དུ་རློག་པར་མཛོད། །ཅེས་ཕུད་གཏོར་རོ། །འཕེན་པ་དངོས་ནི། །འགུགས་གཞུག་བྱ་ཞིང་དམིགས་བྱ་འབེན་དུ་བཙུགས་ནས། ཧཱུྃ་ཧཱུྃཿ ང་ནི་ཁྲོ་རྒྱལ་ཡོངས་ཀྱི་རྗེ། །ང་ནི་གསང་བ་ཀུན་གྱི་བདག །འཁོར་འདས་སྐྱེ་འགྲོ་ང་ཡི་དབང་། །དྲེགས་པ་མ་ལུས་ང་ཡི་བྲན། །སྤྲུལ་པ་ཡང་སྤྲུལ་ཕོ་ཉའི་ཚོགས། །གྲངས་མེད་ཞིང་གི་རྡུལ་སྙེད་འཕྲོས། །གདུག་ཅིང་སྡང་སེམས་ལྡན་པ་རྣམས། །ལྷ་ཡང་རུང་སྟེ་བརླག་པར་བྱེད། །འཇིག་རྟེན་འདས་དང་མ་འདས་པའི། །དྲེགས་པ་ཕོ་རྒྱུད་མོ་རྒྱུད་ཀུན། །རང་རང་ཕོ་ཉའི་དམག་བསྡུས་ལ། །དེ་རིང་དགྲ་བགེགས་སྟེང་དུ་དྲོངས། །རྦད་དོ་བསྐུལ་ལོ་དྲེགས་པའི་ཚོགས། །དྲག་རྩལ་མཐུ་དང་དཔུང་བསྐྱེད་ལ། །མེ་ཆུ་ས་རླུང་རྡོ་ཟོར་མཚོན། །ཁྲག་མདའ་མཚེ་ཡུངས་ནམ་མཁའི་ཟོར། །ཐོག་སེར་བུ་ཡུག་འཚུབ་ལྟ་བུས། །གནོད་ཅིང་འཚེ་བའི་སེམས་ལྡན་པའི། །ཞིང་གྱུར་དགྲ་བགེགས་མ་ལུས་པའི། །གཟུགས་ཕུང་ཐལ་བའི་རྡུལ་བཞིན་ཤིགས། །རྣམ་ཤེས་ཚངས་པའི་ལམ་ནས་དྲོངས། །རིག་པ་སྐྱེ་མེད་དབྱིངས་སུ་སྤོར། །ཚར་གཅོད་དབྱིངས་སྒྲོལ་མངོན་སྤྱོད་ཀྱི། །དུས་ལ་བབ་བོ་མཐུ་རྩལ་བསྐྱེད། །ཅེས་དང་། རྦད་ཐུམ་རི་ལི་ལི། །ཨཱོྃ་བཛྲ་པཱ་ཎི་ཙཎྚ་མ་ཧཱ་རོ་ཥ་ཎ་ཧཱུྃ་ཧཱུྃ་ཕཊཿ ཏྲིལ་ཤག་སྲོག་ཁྱེར་བྷྱོ་ཏྲིག་མྱག་ཀ་པ་ཡེ་དགྲ་བགེགས་ཐུན་བྷྱོ་བཟློག ཞེས་བཟླའོ། །དེ་ནས་རྡོ་རྗེ་སློབ་དཔོན་གྱིས་རྟིང་མནན་ཏེ་ཚུར་ལོག རྡོ་རྗེའི་གུར་ཁང་གི་ནང་དུ་བདག་གཞན་བསྲུང་བྱ་ཐམས་ཅད་ཚུད་པར་བསམ་ལ། བསྲུང་འཁོར་བསྒོམ། རྩ་སྔགས་མཐར་བཟློག་ཤམ་དང་། ཧཱུྃ་ཧཱུྃ་ཧཱུྃཿ བདུད་པྲ་མ་ར་ཡ་རྦད་ནན་ནན༔ སོགས་བདུན་ནམ་ཉེར་གཅིག་བཟླས། སྒོ་དྲུང་དུ་བསྟན་མའི་གཏོར་མ་སྐྱོང་། བྲོ་བརྡུང་བྱ་ཞིང་རྒྱལ་དབྱངས་གྱེར། ནང་དུ་འོང་ནས་ཚེ་འགུགས་བྱ་ཞིང་སྒྲུབ་གཏོར་ལྷར་གསལ་བ་ལ་དབང་བཞི་བླངས། གཏང་རག་མཆོད་བསྟོད་དང་བཟོད་གསོལ་བྱ། ནམ་མཁར་བཏེགས་པའི་ཡེ་ཤེས་པ་རྣམས་གཤེགས་གསོལ་བྱ་བའམ། བྲིས་སྐུ་སོགས་རྟེན་ལ་བརྟན་བཞུགས་བྱ། དམ་ཚིག་པ་རྣམས་རང་ལ་བསྡུ་ཞིང་རྒྱུན་སྤྱོད་བསྔོ་སྨོན་ཤིས་བརྗོད་རྣམས་རིམ་པར་དཀྱུས་བཞིན་བྱ་བ་ཁོ་ནའོ། །འདིར་སྨྲས་པ། གཞན་ཕན་བྱང་སེམས་རྩི་ཡིས་མ་ཐེབས་པའི། །རང་དོན་ལོག་པའི་དྲག་ལས་ངན་འགྲོའི་རྒྱུན། །མི་དགེ་ཕལ་དང་ཐུན་མོང་མིན་ཞེ་ན། །དྲག་པོའི་ཕྲིན་ལས་ཡིན་འདོད་གད་མོའི་གནས། །རང་འདོད་འཁྲི་བ་མེད་པའི་ལྷག་བསམ་གྱིས། །བསྒྲལ་བྱའི་ལས་ཉོན་རྒྱུ་འབྲས་གཞོམ་པའི་བློས། །དྲག་པོའི་ལས་ཀྱིས་འགྲོ་བ་ཀུན་བསྒྲལ་ནས། །ཚོགས་རྫོགས་རྒྱལ་བ་དགྱེས་པའི་ལམ་དུ་འགྱུར། །ཐུགས་རྗེ་ཕྱོགས་རིས་མེད་པའི་རྣལ་འབྱོར་བས། །ཐབས་ཀྱིས་གདུལ་དཀའི་འགྲོ་དོན་མཛད་པ་ལ། །ཚར་གཅོད་དབྱིངས་སྒྲོལ་མངོན་སྤྱོད་ཕྲིན་ལས་ཉིད། །འདྲེན་མཆོག་ལྗགས་ལས་བསྔགས་པ་དང་བཅས་བསྩལ། །རྣམ་དཔྱོད་ལྷ་བུ་གཞོན་ནུས་དོན་གཉེར་གྱིས། །བསྒྲལ་བའི་ལས་རིམ་རྡོ་རྗེའི་མཚོན་འཁོར་འདི། །བཀའ་གཏེར་འཆི་མེད་དབང་པོའི་འདུན་ཁང་ནས། །བླངས་ཏེ་ལེགས་བཤད་གཉིས་འཐུང་སྣ་རྩེར་བཀོད། །འདི་སྦྱར་དགེ་བས་བསྟན་འགྲོའི་ལེགས་ཚོགས་ལ། །བར་གཅོད་རྩོམ་པའི་ལོག་འདྲེན་ལྷ་མིན་དཔུང་། །ཆོས་དབྱིངས་ཀློང་དུ་སྨག་མེད་མཐར་བྱས་ནས། །བསྟན་འཛིན་ལྷ་དབང་སྡེར་བཅས་རྒྱལ་གྱུར་ཅིག ། ཅེས་སྤྲུལ་པའི་གཏེར་ཆེན་འགྲོ་འདུལ་ལུང་རིག་གླིང་པའི་ཟབ་གཏེར་མཚོ་རྒྱལ་དགོངས་པའི་གསང་མཛོད་ཀྱི་ཆོས་སྡེ་ལས་བྱུང་བ། གསང་བདག་གཏུམ་པོའི་ཐུགས་སྒྲུབ་ཀྱི་སྨད་ལས་སྒྲོལ་བ་དྲག་པོའི་ལས་རིམ་ཁྲོ་རྒྱལ་སྟོབས་འདུས་ཞེས་བྱ་བ་འདི་ཡང་། གཏེར་ཆེན་ཆོས་ཀྱི་རྒྱལ་པོ་གང་གི་རིགས་དབོན་བླ་མ་རིན་པོ་ཆེའི་བཀའ་ལུང་ལྷ་རེག་བཅས་བསྩལ་བ་སྤྱི་བོར་བླངས་ནས་ཟབ་ཆོས་འདི་ཉིད་ལ་དད་པ་ཅུང་ཟད་ཐོབ་པའི་སྤྲུལ་མིང་པ་མགོ་སྤྲུལ་ཆོས་དབྱིངས་ཀུན་གསལ་བློ་གྲོས་རྒྱ་མཚོས་བཀའ་གཏེར་དུ་མ་ནས་བསྡུས་ཏེ་ཁྲིགས་སུ་བསྡེབ་པ་ཡི་གེའི་རིས་སུ་འབེབས་པ་པོ་ནི་གོས་དཀར་འཆང་བ་རྡོ་རྗེ་དཔལ་འཛིན་སྟེ། ཉེས་འགལ་གང་མཆིས་རྩ་བ་གསུམ་ལ་བཤགས་ཤིང་དགེ་བས་བསྟན་འགྲོའི་རྒུད་པ་མཐའ་དག་ལྷག་མེད་དུ་བཅོམ་ནས་གསང་སྔགས་རྡོ་རྗེ་ཐེག་པའི་འོད་སྟོང་ཕྱོགས་ཀུན་ཏུ་རྒྱས་པར་གྱུར་ཅིག །དགེའོ། །དགེའོ། །དགེའོ། །