ས་མུ་ངོས་ཀྱི་གནས་ཡིག
གནས་མཆོག་རྡོ་རྗེའི་བྲག་རྫོངས་ལ་ཆ་ཙམ་བསྔགས་པ་ཐར་ལམ་མྱུར་བགྲོད་བཞུགས་སོ།།
ཨེ་མ་ཧོ། ཆོས་སྐུའི་སྟོན་མཆོག་ཀུན་བཟང་ཚེ་མཐའ་ཡས། །ལོངས་སྤྱོད་རྫོགས་སྐུ་རིགས་ལྔ་གངས་ཆེན་མཚོ། །སྤྲུལ་སྐུ་རབ་བདུན་མཆེད་བརྒྱད་བདེ་གཤེགས་སྟོང་། །ཡོངས་འདུས་གུ་རུ་རིན་པོ་ཆེ་ལ་འདུད། །གངས་ཅན་བོད་ཀྱི་ལྷ་སྐལ་སྤྱན་རས་གཟིགས། །འགྲོ་བློའི་མ་རིག་མུན་སེལ་འཇམ་པའི་དབྱངས། །གསང་ཆེན་རྒྱ་མཚོའི་མངའ་བདག་རྡོ་རྗེ་འཆང་། །རིགས་གསུམ་འགྲོ་བའི་མགོན་པོ་ལ་ཕྱག་འཚལ། །རྒྱལ་བ་ཀུན་འདུས་གུ་རུ་གྲོ་བོ་ལོད། །ཡེ་ཤེས་སྤྱན་ལྡན་ལོ་ཆེན་བཻ་རོ་དང་། །བྲག་རིར་ཐོག་མེད་དཔལ་ཆེན་དགའ་ལོ་སོགས། །དཔོན་སློབ་བརྒྱུད་པར་བཅས་ལ་ཕྱག་འཚལ་ནས། །རིགས་གསུམ་འཕགས་པས་བྱིན་གྱིས་བརླབས་པའི་གནས། །ཨོ་རྒྱན་པདྨས་ཞབས་ཀྱིས་བཅགས་པའི་རི། །བཻ་རོ་ཙ་ནས་སྒྲུབ་པ་མཛད་པའི་བྲག །དཔལ་ཆེན་དགའ་ལོས་གྲུབ་རྟགས་བསྟན་པའི་རྫོངས། །ཕྱི་ལྟར་ས་སྤྱོད་གནས་མཆོག་པོ་ཏ་ལ། །ནང་ལྟར་མཁའ་སྤྱོད་དཔལ་རི་པདྨ་འོད། །གསང་བ་འོག་མིན་ཞིང་མཆོག་བདེ་བ་ཅན། །མཐུན་སྣང་མངོན་གྲུབ་རྡོ་རྗེའི་བྲག་རྫོངས་གནས། །མཆོག་དམན་བར་མའི་གདུལ་བྱའི་བློ་ཁྱད་བཞིན། །སྣང་ཚུལ་མ་ངེས་ཡོན་ཏན་བསམ་མི་ཁྱབ། །དེ་ཕྱིར་མཐའ་དག་བརྗོད་པར་སྤོབས་མིན་ཡང་། །དད་ལྡན་དྭངས་བ་འདྲེན་ཕྱིར་ཆ་ཙམ་འབྲི། །སྤྱིར་ནི་བསྐལ་བཟང་འབྱུང་གནས་འཛམ་གླིང་འདིར། །གནས་ཆེན་ཉེར་བཞི་ཡུལ་ཆེན་སུམ་ཅུ་གཉིས། །ཧེ་རུ་ཀ་ཡི་གནས་བཅུ་དུར་ཁྲོད་བརྒྱད། །གྲུ་འཛིན་རི་བོ་རྩེ་ལྔ་ཤམྦྷ་ལ། །ཙ་རི་འབྲས་ལྗོངས་ཏན་ཏིག་ཡང་ཏིག་སོགས། །སྦས་ཡུལ་སྒྲུབ་གནས་མང་བས་བྱིན་རླབས་ཆེ། །ཁྱད་པར་རྒྱལ་མོ་རོང་འདིར་ཐུགས་ཆེན་སོགས། །གནས་ཆེན་ཉེར་ལྔ་གནས་ལག་ལྔ་བཅུ་གཉིས། །ཡང་ལག་བརྒྱ་རྩ་ལ་སོགས་མང་བཞུགས་ཕྱིར། །དག་སྣང་ཅན་ལ་གང་བཞུད་སྐོར་ལམ་ཡིན། །ཡང་སྒོས་གསང་ཆེན་རྡོ་རྗེའི་བྲག་རྫོངས་འདིར། །སྔོན་ཚེ་པད་འབྱུང་སྟག་ལ་ཆིབས་ནས་བྱོན། །བྱིན་ཆེན་དབབ་ཅིང་ཆོས་ནོར་གཏེར་མང་སྦས། །སྡེ་བརྒྱད་དམ་བཏགས་གནས་གཏེར་སྲུང་མར་བསྐོས། །བཻ་རོ་ཙཱ་ན་དཔོན་སློབ་སྒྲུབ་གནས་མཛད། །གྲུབ་པའི་ཆུ་མིག་གཏེར་ནས་བཏོན་པ་དང་། །སོ་སོའི་སྒྲུབ་ཕུག་ཡི་གེ་རང་བྱོན་མང་། །གྲུབ་པའི་རྟགས་བཞག་བྱིན་དབབ་རབ་ཏུ་གནས། །དགའ་ལོ་པ་ཞེས་ལྷ་ལུང་དཔལ་རྡོར་བྱོན། །གནས་དབུས་ལྷ་ལུང་ཕུག་ཏུ་ཞག་བདུན་བཞུགས། །གནས་འདིར་བྱིན་དབབ་ལྷ་འདྲེ་དམ་ལ་བཏགས། །བཀའ་རྟགས་ཕྱག་གི་རི་མོ་རྡོ་ལ་བཀོད། །རྔུལ་གཟན་བྱབས་པའི་རི་མོ་བྲག་ལ་དོད། །སྲིན་མོ་བྲེད་སྔངས་བཤང་གཅི་ཤོར་རྗེས་ཡོད། །མདུན་ཟུར་ནང་སྐོར་བྲག་གི་ངོས་གཡས་ལ། །དགའ་ལོའི་ཕྱག་བྲིས་རྡོ་དཀར་ཡིག་དྲུག་དང་། །དེ་འཕྲོར་རྡོ་བརྐོས་སྐུ་བརྙན་གསུང་བྱོན་མ། །ཁྱད་འཕགས་བྱིན་རླབས་ལྡན་པའི་རྟེན་མཆོག་ཡིན། །ཆུ་ཁར་སྲིན་མོ་ཕ་ཝཾ་ནང་གབ་ཚེ། །དཔལ་ཆེན་དགའ་ལོས་ཕ་ཝཾ་འདམ་ལྟར་བརྫིས།། གནས་ཡིག་འདིའི་མ་དཔེར་འདི་མན་མ་ཚང་།། གནས་སྒོ་ཕྱེས་མཁན་དང་གནས་ཡིག་མཛད་པ་པོ་ནི་མགོ་སྤྲུལ་གར་དབང་འཇིགས་མེད་རྣམ་རྒྱལ་ལོ།།