ཆང་མཆོད།

༄༅། ཆང་མཆོད་ནི། ཨོཾ་ཨཱཿཧཱུྃ་ཧྲཱི༔ ཞལ་སྣོད་ཡེ་ཤེས་ཀ་པ་ལ་ཡི་ནང་། །དྲི་རོ་ཁ་ཏོག་ནུས་བཅུད་ཕུན་སུམ་ཚོགས། །ཡེ་ཤེས་བདུད་རྩིའི་རང་བཞིན་རྣམ་དག་རྫས། །ཟག་མེད་མཆོད་པའི་སྤྲིན་ཕུང་མི་ཟད་གཏེར། །སྤྱི་བོར་རྩ་བ་བརྒྱུད་པའི་བླ་མ་དང་། །སྙིང་གར་ཡི་དམ་ཞི་བའི་དཀྱིལ་འཁོར་ལྷ། །དུང་ཁང་ཁྲག་འཐུང་འབར་བའི་ཁྲོ་བོའི་ཚོགས། །རྩ་གནས་དཔའ་བོ་མཁའ་འགྲོའི་ཚོགས་དང་བཅས། །ཟག་མེད་བདུད་རྩིའི་མཆོད་པ་འདི་འབུལ་བས། །ཚོགས་རྫོགས་སྒྲིབ་དག་འགལ་འཁྲུལ་ཉམས་ཆགས་བྱང་། །རྩ་གནས་བདེ་བ་ཆེན་པོའི་རོས་གང་ཞིང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། སརྦ་པཉྩ་ཨ་མྲྀ་ཏ་ཁ་ཧཱི། ཞེས་པའང་མགོ་སྤྲུལ་བས་སོ།།