ཤིས་པ་བརྗོད་པའི་སྒོ་དང་པོ།
ཕུན་ཚོགས་རང་བཞིན་རྣམ་དག་འདུས་མ་བྱས་ཤིང་འབད་རྩོལ་མཚན་མ་ཉེར་ཞིའི་ལྷུན་གྲུབ་ཡོན་ཏན་སྒྲ་རྟོག་ཙམ་གྱིས་འཇལ་མིན་མཁྱེན་བརྩེ་ནུས་མངའ་དོན་གཉིས་ཅན། །
རྟོག་གེའི་ཡུལ་བྲལ་ལས་ཉོན་ཚུལ་མིན་ཡིད་བྱེད་རྣམ་རྟོག་ཉེར་སྤངས་འཛིན་སྟངས་སྒྲིབ་པས་བསླད་པ་མ་ཞུགས་དེ་ཉིད་ལེགས་གསལ་མི་མཐུན་ཕྱོགས་གཉེན་འགོག་ལམ་ལྡན། །
དོན་དམ་ཀུན་རྫོབ་ཆོས་ལུགས་རིག་ཅིང་ནང་གི་ཡེ་ཤེས་ཡོངས་གཟིགས་སྤང་བྱ་ཆགས་ཐོགས་དམན་པའི་སྒྲིབ་ལས་ཡོངས་གྲོལ་ཕྱིར་མི་ལྡོག་སྟེ་ཡོན་ཏན་བདུན་མངའ་བ། །སངས་རྒྱས་ཆོས་དང་དགེ་འདུན་ཞེས་མཚན་གྲགས་པའི་གདུགས་དཀར་སྲིད་རྩེར་འཁོར་བའི་གྲིབ་ཏུ་བསིལ་བར་འགྲོ་ཀུན་ངལ་གསོར་སྤྱོད་པའི་བཀྲ་ཤིས་དཔལ་གྱིས་དེང་འདིར་སྐྱོངས། ཤིས་པ་བརྗོད་པའི་སྒོ་གཉིས་པ། གང་གི་མཚན་སྙན་ཛམྦུའི་ལྗོན་པ་སྣོད་ལྡན་རྒྱ་མཚོར་ལྷུངས་པའི་མོད་ལ་འཆི་མེད་ཆུ་བོའི་གསེར་དུ་སྒྱུར་མཛད་ཚེ་མཐའ་ཡས་པའི་མགོན། །ཐུགས་རྗེའི་ཀ་པུ་ར་ཡི་གཟེགས་མས་དུས་ཀྱི་ཕོ་ཉའི་ཚ་རེག་ཡོངས་བཅིལ་བསྐལ་བརྒྱའི་ཡུན་འཚོ་བསིལ་བའི་བདེ་སྟེར་ཡིད་བཞིན་འཁོར་ལོའི་ཞབས། །ཡིད་འཕྲོག་ཐབས་ཀྱི་ཉག་ཕྲན་གཞོན་ནུ་ཤེས་རབ་རྒྱུད་ལས་ཉེ་བར་འཕོས་པས་
སྲིད་ཞིའི་བརྟན་པ་ཀུན་འཕྲོག་བཅོམ་ལྡན་རིག་བྱེད་དབང་གི་རྒྱལ། །ལྷ་མཆོག་རྣམ་གསུམ་སྙིང་གི་ཟེའུ་འབྲུར་རྟག་ཏུ་བཞུགས་ལ་མཁྱེན་བརྩེ་ནུས་པའི་ཆུ་འཛིན་ལས་འོངས་དངོས་གྲུབ་ཆར་དུ་འབེབས་པའི་དགེ་ལེགས་སྩོལ། ཤིས་པ་བརྗོད་པའི་སྒོ་གསུམ་པ། ཞིང་ཁམས་རྒྱ་མཚོའི་ཕྲ་རབ་རྡུལ་གྱི་གྲངས་བཞིན་ཕ་མཐའ་མི་མངོན་རྒྱལ་བ་ཀུན་གྱི་ཡབ་ཏུ་གྱུར་ཀྱང་གཞོན་ནུའི་ཚུལ། །འཛིན་མཛད་འཚམས་སྤྲིན་གསར་པའི་ལང་ཚོ་རབ་རྒྱས་མཚན་དཔེའི་ངོ་མཚར་ཅི་ཡང་ངོམས་པའི་ཟུར་ཕུད་ལྔ་ལྡན་འཇམ་དཔལ་དབྱངས། །གང་དང་གཉིས་མེད་མཉམ་པར་སྦྱོར་བའི་དགའ་བཞིའི་བདེ་ཆེན་འདྲེན་མཛད་རྒྱུད་མངས་གླུ་ལས་དམ་ཆོས་སྒྲ་འཁྲོལ་དབྱངས་ཅན་ལྷ། །ཡབ་ཡུམ་ཟུང་འཇུག་ཐུགས་རྗེའི་ཉི་མས་བདག་ཡིད་མི་ཤེས་སྨག་རུམ་ལེགས་བསལ་ངག་ལ་ངག་གི་དངོས་གྲུབ་མ་ལུས་སྩོལ།