གངས་བར་ཕུག་མོ་ཆེ་ནས་རྒྱ་སྟོན་པདྨ་དབང་ཕྱུག་གིས་སྤྱན་དྲངས་པའི་དཔལ་རྡོ་རྗེ་ནག་པོ་ཆེན་པོ་གུར་གྱི་མགོན་པོའི་སྐོར།
གསོལ་འདེབས་ལས། རྒྱལ་མཆོག་དབྱངས་སྤྲུལ་པདྨ་དབང་ཕྱུག་དང་། །གུ་རུ་ཚེ་བརྟན་རྒྱལ་མཚན་སྙེ་མོ་བ། །གྲུབ་ཐོབ་དངོས་གྲུབ་དགེ་བཤེས་དྲི་འཛིན་ཚེས། །གྲུ་གུ་ཡང་དབང་ཞེས་རྣམས་ལ་གསོལ་བ་འདེབས། ཞེས་པའི་རྒྱལ་བ་མཆོག་དབྱངས་ཀྱི་སྤྲུལ་པ་པདྨ་དབང་ཕྱུག་ནི། ཐང་ཡིག་ལས་ལྷ་ཁང་ནང་དུ་འབྲི་ཡིས་རྟ་ཆུ་བླུད༔ ཞོ་ཀླུང་ནང་དུ་མེ་ཡི་འཇིགས་པ་དང་འབྱུང་༔ དཔལ་མོའི་ཐང་དུ་མཚོན་གྱི་ཆར་པ་འབབ༔ གངས་བར་ཕུག་མོར་སྦས་པའི་གཏེར་ཁ་འདི༔ མི་གཞག་འདོན་པའི་རྟགས་དེ་བསྟན་ནས་འབྱུང་༔ གཏེར་སྟོན་པདྨ་དབང་ཕྱུག་ཅེས་བྱ་འབྱུང་༔ ཞེས་ཨེ་གངས་བར་ཕུག་མོ་ཆེ་ནས་རྒྱ་སྟོན་པདྨ་དབང་ཕྱུག་གིས་སྤྱན་དྲངས་པའི་དཔལ་རྡོ་རྗེ་ནག་པོ་ཆེན་པོ་གུར་གྱི་མགོན་པོའི་སྐོར་ལ། སློབ་དཔོན་ཆེན་པོ་པདྨ་འབྱུང་གནས་ཀྱིས་བསམ་ཡས་མཆིམས་ཕུར་མཛད་པའི་དཔལ་མགོན་པོ་ནག་པོའི་སྒྲུབ་ཐབས་དྲེགས་པ་ཟིལ་གནོན། གཤིན་རྗེ་པྲ་ཁོག་སྣང་གི་རྒྱུད་ནས་གསུངས་པའི་དམ་ཅན་སྲུང་མ་ཆོས་སྐྱོང་ལ་རུ་མཚོན་འཛུགས་ཐབས་ཨོ་རྒྱན་མཁན་པོས་གུད་དུ་བཀོལ་བ་ཞར་བྱུང་འཕྲིན་བཅོལ་མཆོག་གསུམ་མ་དང་བཅས་པ། དམ་བདར་འཕྲིན་བཅོལ་གྱི་རིམ་པ་སློབ་དཔོན་པདྨ་འབྱུང་གནས་ཀྱིས་ཇོ་མོ་མཁར་ཆེན་བཟའ་ལ་གདམས་པ། དམ་ཅན་ནང་མི་འཁྲུག་པའི་ཕྱིར་སྙིང་ཆུ་བསྲེ་ཐབས་ཡོན་ཏན་རབ་རྒྱས་སློབ་དཔོན་པདྨས་བཀོད་པ། ཆོས་སྐྱོང་གི་སྲོག་འཕྲོག་པ། བཅིང་བ། ཁྱི་བཞིན་འཁྲིད་པ། མི་འཁྲེན་པ། རྩལ་འགྲན་དུ་གཞུག་པའི་ཟབ་པའི་གནད་ལྔའི་མན་ངག་སློབ་དཔོན་མཚོ་སྐྱེས་ཀྱི་གདམས་པ་རྣམས་ལེགས་པར་ཐོབ་པའི་བརྒྱུད་པ་ནི། རྡོ་རྗེ་འཆང་འཕགས་
མཆོག་ཀླུ་སྒྲུབ། སློབ་དཔོན་པདྨ་འབྱུང་གནས། ངན་ལམ་རྒྱལ་བ་མཆོག་དབྱངས། གཏེར་སྟོན་རྒྱ་པདྨ་དབང་ཕྱུག །ལྷོ་པ་སྟོན་ཉི། རྒྱལ་ཚ་ལུང་མང་པོ་ཆོས་ཀྱི་དབང་ཕྱུག །མཁས་པ་ཡོན་ཏན་ཁྲི། མཁན་ཆེན་སེང་གེ་བཟང་པོ། རྣལ་འབྱོར་དབང་ཕྱུག་སེང་གེ་རྒྱལ་མཚན། མཁན་ཆེན་བསོད་ནམས་རྒྱལ་བ་མཆོག་དབྱངས། ཡབ་འཇམ་དབྱངས་ནམ་མཁའ་རྒྱལ་མཚན། བདག་ཆེན་རྡོ་རྗེ་འཆང་བློ་གྲོས་རྒྱལ་མཚན། མཐུ་སྟོབས་ཀྱི་དབང་ཕྱུག་ཀུན་སྤངས་ཆོས་ཀྱི་ཉི་མ། ཚར་ཆེན་ཆོས་ཀྱི་རྒྱལ་པོ། ཐམས་ཅད་མཁྱེན་པ་མཁྱེན་བརྩེའི་དབང་ཕྱུག །སྔགས་འཆང་བསོད་ནམས་ཆོས་འཕེལ། རྡོ་རྗེ་འཆང་དབང་ཕྱུག་རབ་བརྟན་ཁྱབ་བདག་བཀའ་འགྱུར་བ་ཆེན་པོ། རིགས་འཛིན་ཆོས་དབྱིངས་རང་གྲོལ། དེས་བདག་ཟ་ཧོར་བནྡེ་ལའོ། །བླ་མ་སོག་བཟློག་པས་བདག་ཆེན་རྒྱ་དཀར་བས་མཛད་པའི་མགོན་པོད་མེ་འབར་མའི་ཟབ་གནད་མཐའ་དག་གངས་བར་ཕུག་མོ་ཆེའི་གཏེར་མ་ཡིན་ཟེར་བ་ནི་མེ་འབར་ནང་གི་རྒྱ་བོད་ཀྱི་བླ་མ་སོ་སོས་མཛད་པའི་སྒྲུབ་སྐོར་རྣམས་གཏེར་མ་མིན་པ་མངོན་སུམ་གྱིས་གྲུབ་ཅིང་། གཅེན་བདག་ཆེན་རྒྱ་དཀར་བ་ནི་ཕུར་པ་གཙོ་བོར་མཛད་པ་ལས་མགོན་པོ་ལ་མན་ངག་ཐུན་མོང་བ་ལས་རྫོགས་པར་གསན་འཕྲོས་མི་འདུག །མགོན་པོའི་སྐོར་ལ་མཁས་ཤིང་གྲུབ་པ་བརྙེས་པ་ནི་གཅུང་རྡོ་རྗེ་འཆང་བློ་གྲོས་རྒྱལ་མཚན་ཡིན་ཞིང་མེ་འབར་མ་ལ་རྡོ་རྗེ་འཆང་གིས་དཀར་ཆག་མཛད་ནས་བསྒྲིགས་པ་ཡིན་པས་སྐུ་མཆེད་སུ་ཡིན་ཀྱང་རྩད་མ་ཆོད་པར་གདམས་པའི་གནད་རྣམས་རྟོགས་རྒྱུའི་ལུགས་ཀྱི་རྫུན་ཟོབ་འདི་ཀ་ཁྱོད་ཀྱིས་བརྩམས་ཆོས་ཀུན་ལ་ཡོད་ན་སྣག་ཤོག་གི་གྲོན་ཙམ་དུ་ཟད་དོ། །གུ་རུ་ཚེ་བརྟན་རྒྱལ་མཚན་ནི། མཚོ་རྒྱལ་གྱིས་མཛད་
པའི་ཐེམས་ལས། ལས་ཅན་ཤེས་རབ་སྙིང་རྗེ་ཅན་གྱི་མི༔ རྒྱལ་བ་མཆོག་དབྱངས་སྐྱེ་མཐའི་སེམས་དཔའ་ནི༔ ཕག་སྦྲུལ་སྟག་སྤྲེལ་ལོ་པ་གཅིག་ལ་སྤྲོད༔ ཅེས་པ་ལྟར། ངན་ལམ་རྒྱལ་བ་མཆོག་གི་སྤྲུལ་སྐུ་འདིའི་གཏེར་ཆོས་ཀྱི་ནང་ཚན་བླ་མ་ཞི་དྲག་གི་ཆོས་སྐོར་ནི། ཐེམས་ཡིག་ལས། ཆོས་སྐུ་ཡང་དག་རྩ་བའི་མཚན་རྒྱ་དང་༔ འགག་མེད་ལོངས་སྐུ་མཚན་མཆོག་བརྒྱ་རྩ་བརྒྱད༔ མཐའ་ཡས་སྤྲུལ་པའི་མཚན་ནི་སྟོང་ལ་སོགས༔ གང་ལ་གང་འདུལ་སྐུར་བསྟན་བརྗོད་ལས་འདས༔ དེ་ལྟར་མཐའ་ཡས་མཛད་པའི་སྐུ་རེ་ལའང་༔ སྒྲུབ་ཐབས་རེ་དང་ལས་ཚོགས་བསམ་འདས་ཀྱང་༔ དྲིལ་ནས་བསྟན་ན་སྒྲུབ་ཐབས་གསུམ་དུ་འདུས༔ ཕྱི་ལྟར་དགེ་སློང་ཚུལ་དུ་སྒྲུབ་པ་དང་༔ ནང་ལྟར་རྡོ་རྗེ་འཆང་དུ་སྒྲུབ་པ་དང་༔ གསང་བ་ལྟར་དུ་རྟ་ཕག་ཞལ་སྦྱོར་རོ༔ དེ་ལྟར་ཕྱི་ནང་གསང་གསུམ་ཡོད་པ་ཡི༔ བླ་མ་ནང་སྒྲུབ་ཡང་གསང་དོན་གྱི་སྐོར༔ སྒྲུབ་ཐབས་འདི་ལ་ཆོས་སྡེ་ཉི་ཤུ་བདུན༔ སྒོ་འབྱེད་དབང་གཉིས་ཕྱི་ནང་ལས་བྱང་གཉིས༔ སྒོམ་པའི་ལྷ་བརྒྱད་མཚན་བརྒྱད་སྒྲུབ་ཐབས་དང་༔ སྤྱན་མང་དྲག་སྒྲུབ་གསང་སྒྲུབ་ཐུགས་སྒྲུབ་དང་༔ བླ་མ་རིགས་འདུས་བླ་མ་ཡང་གསང་དང་༔ རིན་ཅེན་གཏེར་སྤུངས་ལ་སོགས་ཉེར་བདུན་ནོ༔ ཞེས་གསུངས་པ་ལྟར་མཆོག་ཐུན་གྱི་དངོས་གྲུབ་སྒྲུབ་པའི་མན་ངག་ཟབ་ཅིང་འདུས་པ་ཤིན་ཏུ་ཟབ་པའི་སྐོར་རྣམས་ཇི་སྐད་དུ། རིན་ཅེན་གཏེར་འདི་ཆུ་མོ་ཕུག་ཏུ་སྦས༔ སྨོན་ལམ་མཐུ་བཙན་མ་འོངས་དུས་མཐའ་ལ༔ ལས་ཅན་ཞིག་དང་ཆོས་འདི་ཕྲད་པར་ཤོག༔ ཅེས་དང་། ལར་ནི་ཆུ་ཕུག་མོ་ཡིག་གཏེར་ཆོས་རྣམས༔ ཌཱ་ཀི་ཡེ་ཤེས་འཚོ་རྒྱལ་གཏེར་ཁ་ཡིན༔ གཞན་དུ་མ་སྦས་མོན་གྱི་ཆུ་ཕུག་མོར༔ ཡིད་བཞིན་
ནོར་བུ་ཡན་ལག་ཚང་བར་སྦས༔ ཞེས་པ་ལྟར་ཨོ་རྒྱན་ཆེན་པོའི་འཕྲིན་ལས་ཀྱི་སྤྲུལ་པ་གཏེར་སྟོན་ཆེན་པོ་ཤཱཀྱའི་དགེ་སློང་རྡོ་རྗེ་འཛིན་པ་ཚེ་བརྟན་རྒྱལ་མཚན་གྱིས་མོན་གྱི་བྲག་མཐའ་ཕྲ་མ་དཔལ་གྱི་ཆུ་མོ་ཕུག་ལྷ་མོ་ལཱ་སྱ་གར་བྱེད་པ་འདྲ་བའི་གསང་གནས་ནས་སྤྱན་དྲངས་པའི་སྐོར་ལ། ཐོག་མར་ཟབ་རྒྱས་གཏེར་ཆེན་ཚེ་དབང་བཅུད་ལེན་དང་ཟབ་རྒྱས་ཚེ་དབང་། ཕྱག་མཚན་རྫས་ཀྱི་དབང་ཕྱག་མཚན་གྱི་དབང་ཆུ་མ་རྙེད་པས་བསྡུས་པའི་ལུགས་བསྐུར་ཚིག་སྔགས་ཀྱི་སྟེང་ནས། སྟ་གོན། དངོས་གཞི། བུམ་དབང་རིག་པའི་རྒྱལ་པོ། ཕྱག་མཚན་རྫས་དབང་། གསང་དབང་། ཤེར་དབང་། སྤྱན་མང་། བཞི་པ་ཚིག་དབང་། དམ་ཚིག་རྗེས་སུ་གནང་བ། རྡོ་རྗེ་རྒྱལ་པོ་མཐའ་རྟེན་དང་བཅས་པ་ཡོངས་སུ་རྫོགས་པར་ཐོབ། རྩ་གསུམ་གཏོར་དབང་གི་དབང་ཆུ། རྩ་གསུམ་གཏོར་དབང་ཞལ་གདམས་གཉིས་ཀྱི་སྟེང་ནས་གཏོར་དབང་། དྲག་སྒྲུབ་ཀྱི་དབང་ཆོག་རྡོ་རྗེ་འཕྲེང་བའི་སྟེང་ནས། དྲག་པོ་ཡཀྴ་མེ་དབལ་དབུ་དགུ་ཕྱག་བཅོ་བརྒྱད་པ་ལྷ་བཅོ་བརྒྱད་ཀྱི་དབང་ཐམས་ཅད་ཡོངས་སུ་རྫོགས་པ་དང་། ཚེ་སྒྲུབ་བདུད་རྩི་འཁྱིལ་པ་ཚེ་འགུགས་གཉིས་ཀྱི་སྟེང་ནས་ཚེ་དབང་ཐོབ་ཅིང་། ལུང་གི་སྐོར་ལ། ཐེམས་ཡིག །དབང་གི་སྐོར། ཁ་སྐོང་སྐོར། སྒྲུབ་ཐབས་སྐོར། ལས་ཚོགས་སྐོར། སྐུ་གསུམ་གབ་པ་མངོན་ཕྱུང་། ཇོ་མོའི་སྒྲུབ་སྐོར། བསྟོད་འཕྲིན་མདོས་སྐོར། གཤིན་དོན་སྐོར། སྨེ་བརྩེགས་སྒྲུབ་སྐོར། ཚེ་སྒྲུབ་སྐོར། གཏེར་བདག་སྐོར་དང་བཅུ་གཉིས། དང་པོ་ནི། ཆུ་མོ་ཕུག་གི་ཐེམས་བྱང་བསྡུས་པ། གདམས་སྐོར་གྱི་ཐེམས་ཡིག་རྒྱས་པ། གཉིས་པ་དབང་གི་སྐོར་ལ། རྩ་གསུམ་གཏོར་དབང་པདྨའི་གཏོར་དབང་ཡིན། ཞེས་པ་ལྟར། རྩ་གསུམ་
གཏོར་དབང་གི་དབང་ཆུ། དེའི་ཐེམས་མེད་ལ། རྩ་གསུམ་གཏོར་དབང་ཞལ་གདམས། རིན་ཅེན་ཚེ་དབང་བླ་མའི་སྤྱི་དབང་ཡིན། ཞེས་པ་ལ། ཟབ་རྒྱས་རིན་ཅེན་ཚེ་དབང་། གཏེར་ཆེན་དེའི་ཐེམས་མེད་ལ། ཞལ་གདམས་ཟབ་རྒྱས་ཚེ་དབང་བཅུད་ཆེན་རྣམས། གསུམ་པ། ཁ་སྐོང་སྐོར་ལ། ཕྱིའི་ཁ་སྐོང་དང་ནང་གི་ཁ་སྐོང་གཉིས། དང་པོ་ནི། ནོར་བུ་རྒྱ་མཚོ་ཕྱི་ཡི་ཁ་སྐོང་ཡིན། ཞེས་པ་ལྟར་བླ་མའི་ལས་བྱང་ནོར་བུ་རྒྱ་མཚོ་གུ་རུའི་ཕྱི་སྒྲུབ་ཐོར་བུ་ཐེམས་མེད་ལ། མངོན་རྟོགས་ནོར་བུ་སྒྲོན་མ། མངོན་རྟོགས་རིན་ཅེན་སྒྲོན་མ། ནང་སྒྲུབ་ཐོད་འཕྲེང་རིགས་ལྔའི་སྒྲུབ་པ་གཙུག་གི་ནོར་བུ། ཐོད་སྐུལ་ལ་བརྟེན་ནས་རིགས་ལྔ་སོ་སོར་སྒྲུབ་པ། བསྲུང་སྐུད་ཀྱི་ལས་ཚོགས། ཐིག་ལེ་བསྲུང་བ། མཚོན་བསྲུང་བ། འབྱུང་པོ་བསྐྲད་པ། ཅང་ཏེའི་ལས་ཚོགས་ཐོད་འཕྲེང་རྩལ་རིགས་ལྔའི་མངོན་རྟོགས་བདེ་བའི་འཁོར་ལོ་རྣམས། གཉིས་པ་ནང་གི་ཁ་སྐོང་ནི། ཐུགས་ཀྱི་ལས་བྱང་ནང་གི་ཁ་སྐོང་ཡིན། ཞེས་པ་ལྟར་གསང་བ་ཐུགས་ཀྱི་ལས་བྱང་། སློབ་དཔོན་པདྨའི་རྩ་བའི་སྒྲུབ་ཐབས་རྟགས་རིམ་དང་བཅས་པ། དེའི་སྒྲུབ་བསྙེན་ཡང་གསང་སྙིང་གི་སྒྲུབ་པ་རྟགས་རིམ་དང་བཅས་པ། མཐར་ཐུག་ལུས་དཀྱིལ་གྱི་མངོན་རྟོགས་རིག་གསལ་སྒྲོན་མ་རྣམས། བཞི་པ་སྒྲུབ་སྐོར་ལ། མཚན་བརྒྱད་སྒྲུབ་པ། སྤྱན་མང་སྒྲུབ་པ། གུ་རུ་དྲག་སྒྲུབ། ཐུགས་སྒྲུབ་སྐོར་གསུམ་དང་བཞི། དང་པོ་ནི། མཚན་བརྒྱད་མངོན་རྟོགས་རང་ལུས་ཚགས་འཛུད་ཡིན། ཞེས་པ་ལྟར་གུ་རུ་པདྨ་རྒྱལ་པོའི་མངོན་རྟོགས། བློ་ལྡན་མཆོག་སྲེད་ཀྱི་མངོན་རྟོགས། ཐུགས་རྗེ་ཆེན་པོ་ཀུན་ཁྱབ་ཉི་མའི་འོད་ཟེར་གྱི་མངོན་རྟོགས། ཤཱཀྱ་སེང་གེའི་མངོན་རྟོགས། པདྨ་སཾ་བྷའི་
མངོན་རྟོགས། མཚོ་སྐྱེས་རྡོ་རྗེའི་མངོན་རྟོགས། གུ་རུ་སེང་གེ་སྒྲ་སྒྲོགས་ཀྱི་མངོན་རྟོགས། གུ་རུ་རྡོ་རྗེ་གྲོ་ལོད་ཀྱི་མངོན་རྟོགས་རྡོ་རྗེ་ཕ་ལམ། མཚན་བརྒྱད་དུ་སྒྲུབ་པ་ཟབ་པའི་ཁྱད་ཆོས་ཡིན། ཞེས་པ་ལ། པདྨ་རྒྱལ་པོའི་སྒྲུབ་ཐབས་རྟགས་རིམ་དང་བཅས་པ། དེའི་ལས་ཚོགས་ལ། རྒྱལ་པོ། བཙུན་མོ། མི་ནོར་ཟས་གསུམ་རྣམས་དབང་སྡུད། དུག་ནད་གི་ཞི་བྱེད། རིམས་ནད་བསྲུང་བ། སེར་བ་བསྲུང་བ་ལས་ཀྱི་མཐའ་རྒྱས་རྣམས་སོ། །གུ་རུ་བློ་ལྡན་མཆོག་སྲེད་ཀྱི་སྒྲུབ་ཐབས་རྟགས་རིམ་དང་བཅས་པ། དེའི་ལས་ཚོགས་ལ། ཉམས་རྟོགས་སྤེལ་བ། ཉོན་མོངས་ཞི་བྱེད། ཆུ་ལ་མི་བྱིང་བ། མེས་མི་འཚིག་པ། རྡོ་ལ་གྲུབ་རྟགས་འཇོག་པ། རྐང་མགྱོགས་སྒྲུབ་པ། རྐང་པ་ལ་སེར་ག་མི་འབྱུང་བ། རྫས་ཀྱི་གཏུམ་མོ། རིམས་བསྲུང་བ། དུག་ཞ་ིབ། གཞན་སེམས་ཤེས་པ། མཚོན་བསྲུང་བ་ཕུར་ཁ་ངན་སྔགས་བསྲུང་བ། མིག་མཐོང་སྒྲུབ་པ། མིག་མི་ཕྱིད་པ། མིག་གི་རབ་རིབ་སེལ་བ། རྣ་བ་མི་འོན་པའི་ཐབས། ཚེ་བསྲིང་པ། ལོངས་སྤྱོད་སྒྲུབ་པ། ནད་པ་མི་འཆི་བ། བསམ་ཚད་འགྲུབ་པ། བར་ཆད་བསྲུང་བ། སྨན་མ་བསླབས་པར་ཤེས་པའི་ཐབས་ཤེས་བྱ་མཐའ་དག་ལ་མཁས་པ། སེར་བ་བསྲུང་བ། ཤུ་བ་ཞི་བྱེད། དབང་སྡུད་སྲིད་སྤེལ་བ། བུ་ཚ་གསོ་བ། སྦྱིན་སྲེག་དང་གཏོར་མ་ལ་བརྟེན་ནས་སྟོབས་དང་ནུས་པ་སྤེལ་བ། དགྲ་བགེགས་བརླག་པ། ཆར་འབེབས། ལྷ་སྲིན་སྡེ་བརྒྱད་ཀྱིས་མི་མཐོང་བའི་སྒྲིབ་ཤིང་། སྟག་དང་སྦྲུལ་གྱིས་མི་ཚུགས་པ་རྣམས་སོ། །གུ་རུ་ཉི་མ་འོད་ཟེར་གྱི་སྒྲུབ་པ་རྟགས་རིམ་དང་བཅས་པ། དེའི་ལས་ཚོགས་ལ། དག་བྱེད་སྟོབས་ཆེན་ཆུའི་སྒྲུབ་པ། འགྲོ་བའི་ཚེ་སྒྲུབ་པ། འགྲོ་བ་བྱང་ཆུབ་སེམས་དང་ལྡན་པའི་ཐབས། ཤཱཀྱ་སེང་གེའི་སྒྲུབ་ཐབས་རྟགས་
རིམ་དང་བཅས་པ། པདྨ་སཾ་བྷ་ཝའི་སྒྲུབ་ཐབས་བདུད་རྩི་རིལ་བུའི་སྒྲུབ་པ་དང་བཅས་པ། མཚོ་སྐྱེས་རྡོ་རྗེ་སྒྲུབ་ཐབས་ཐིག་ལེ་ཀུན་གསལ་རྟགས་རིམ། བསྙེན་པའི་བཟླས་ཐབས་ཀྱི་སྒྲུབ་པའི་བར་ཆད་བསལ་ཐབས་དང་བཅས་པ་བདེ་བ་ལྷུན་གྲུབ་ཏུ་གྲགས་པ། འཕགས་པ་སེང་གེ་སྒྲ་སྒྲོག་གི་སྒྲུབ་ཐབས་རྟགས་རིམ་དང་བཅས་པ། འདིའི་ལས་ཚོགས་ལ། མུ་སྟེགས་རུ་ཏྲ་གདུལ་བ། ཕ་རོལ་ནུས་པ་ཞི་བ། ངག་མནན་པ། མུ་སྟེགས་རུ་ཏྲ་བྲན་དུ་བཀོལ་བ། མུ་སྟེགས་རུ་ཏྲའི་དཔུང་བཤིག་པ། མདུན་གྲོས་བཤིག་པ། དགྲ་བགེགས་རེངས་སུ་བཅུག་པ། དགྲ་བགེགས་ལྷ་དང་ཕྲལ་བ། དགྲ་བགེགས་བསྐྲད་པའི་མན་ངག །མུ་སྟེགས་ཀྱི་ངན་སྔགས་བསྲུང་བ། མུ་སྟེགས་འགྲོ་བ་ཟིལ་གྱིས་གནོན་པ། རྩོད་པ་རྒྱལ་བ་རྣམས་སོ། །གུ་རུ་རྡོ་རྗེ་གྲོ་ལོད་ཀྱི་ཕྱི་སྒྲུབ་ནང་སྒྲུབ། གསང་སྒྲུབ། སྒྲུབ་པའི་དམ་ཚིག་དང་། དྲག་པོ་ཐོག་མདའ་ལྟ་བུའི་སྔགས་རྒོད་བསྟོད་པ། དེའི་ལས་ཚོགས་ལ། རྫས་མཆོག་བཞི་བཅུ་རྩ་བཞི་པ་བསྲུང་བ་རྣམས། གཉིས་པ་སྤྱན་མང་སྒྲུབ་པ་ནི། སྤྱན་མང་སྒྲུབ་ཐབས་གནམ་ལྕགས་སྤུ་གྲི་ཡིན། ཞེས་པ་ལྟར་སྤྱན་མང་ཞི་བའི་སྒྲུབ་ཐབས་ཐུགས་རྗེ་ཀུན་གཟིགས། སྤྱན་མང་ཞི་མ་ཁྲོའི་སྒྲུབ་པ། དེའི་ལས་ཚོགས། མེ་ལྟོ། ཆུ་ལྟོ། ཆུའི་ལྷ་མོ་སྒྲུབ་པ། ལམ་གྱི་དགྲ་དང་འཇིགས་པ་བསྲུང་བ། འགྲོ་བ་དབང་སྡུད། སྲིའུ་གསོ་བ། ཕུར་ཁ་བསྲུང་བ། གཏོར་མ་གཏང་བ་རྣམས་སོ། །སྤྱན་མང་ཁྲོ་བོའི་སྒྲུབ་པ་གནམ་ལྕགས་སྤུ་གྲི་ལས་སྦྱོར་དང་བཅས་པ། དེའི་ལས་ཚོགས་མེ་ལྟོ། ཆུ་ལྟོ། ཚད་ནད་ཞི་བ། ཆུ་ལ་མི་བྱིང་བ། ཆུ་གདོན་པ། མི་རྒོད་བཅིང་པ། མི་ནོར་ཟས་གསུམ་དབང་སྡུད།
སྲིའུ་གསོ་བ། ཕུར་ཁ་བསྲུང་བ། མཛེ་རྒྱུད་གཅོད་པ། གྲི་འཐབ་གཅོད་པ། སྲི་བརྒྱུད་གཅོད་པ། སྐྱེ་བརྒྱུད་གཅོད་པ། སྡེ་བརྒྱད་བསྲུང་བ། རིམས་བསྲུང་བ། གཏོར་ཆོག་རྫོགས་རིམ་རྣམས་སོ། །གསུམ་པ་གུ་རུ་དྲག་སྒྲུབ་ནི། གུ་རུ་དྲག་སྒྲུབ་ཀུན་འཇོམས་རྡོ་རྗེ་ཡིན། ཞེས་པ་ལྟར་དྲག་སྒྲུབ་ཀྱི་དབང་ཆོག་རྡོ་རྗེའི་འཕྲེང་བ་ཡཀྴ་མེ་དབལ་གྱི་སྒྲུབ་ཐབས། འདིའི་ལས་ཚོགས་ལ། རྒྱལ་འགོང་གདུལ་བ་དང་འཁོར་ལོས་རྒྱལ་འགོང་བསྲུང་བ། བདུད་རིགས་གདུལ་བ་དང་བསྲུང་བ། བཙན་རིགས་གདུལ་བ་དང་བསྲུང་བ། མ་མོ་གདུལ་བ་དང་བསྲུང་བ། ས་བདག་ཀླུ་གཉན་གདུལ་བ་དང་བསྲུང་བ། གཤིན་རྗེ་གདུལ་བ་དང་བསྲུང་བ། དྲང་སྲོང་གདུལ་བ་དང་བསྲུང་བ། ཀླུ་བདུད་གདུལ་བ་དང་བསྲུང་བ། ཀླུ་བཙན་གདུལ་བ་དང་བསྲུང་བ། གཤིན་འདྲེ་གདུལ་བ་དང་བསྲུང་བ། རིམས་ནད་བསྲུང་བ། སེར་བ་གཅོད་པ། ཆུ་བཟློག་པ། ཕུར་ཁ་བསྲུང་བ། གཞོན་སྲི་བསྲུང་བ། རང་ལུས་སྒྲིབ་པ། ཐོག་བསྲུང་བ་རྣམས་སོ། །གུ་རུ་དྲག་པོ་ཡཀྴ་མེ་དབལ་དུ་སྒྲུབ་པ་ལེའུ་བཅུ་གཅིག་པ། ཡཀྴ་མེ་དབལ་གྱིས་ལས་སྒྲུབ་རེག་ཆོད་མའི་སྤུ་གྲི་ཞེས་པ་འདི་ལ་ཚེའི་བར་ཆད་སེལ་བ། འགྲོ་བ་ཐམས་ཅད་ཀྱི་ནད་རིམས་བསྲུང་བ། དུག་སྦྱོར་བསྲུང་བ། མཚོན་བསྲུང་བ། སྨྱོ་བོག་གདུལ་བ། རྦོད་གཏོར་བྱད་ཁ་བསྲུང་བ། སེར་བ་བསྲུང་བ། ཐོག་བསྲུང་བ་རི་བོང་བྱི་བ་འབུ་བསྲུང་བ། སྲི་ཅན་གནོད་པ་བསྲུང་བ། སྲི་རྐུན་བསྲུང་བ་རྣམས་སོ། །སློབ་དཔོན་པདྨའི་དྲག་སྒྲུབ་རྟགས་རིམ་གཏོར་འབུལ་དང་བཅས་པ། ཡཀྴ་མེ་དབལ་ཞལ་གཅིག་ཕྱག་གཉིས་པའི་སྒྲུབ་པ། དེའི་ལས་ཚོགས་ལ། གཡུལ་ལས་རྒྱལ་བ། སེར་བ་བསྲུང་བ། ཆུ་སྣ་སྒྱུར་བ།
རླུང་གནོན། ལམ་གྱི་འཇིགས་པ་བསྲུང་བ། ཆེ་སྲི་ཆུང་སྲི་བསྲུང་བ། མི་ནད་ཕྱུགས་ནད་བསྲུང་བ། རྐུན་པོ་བསྲུང་བ། ཤ་མ་འདོན་པ། ཞོ་ཆང་ཉེས་པ་བསྲུང་བ། འགོང་པོའི་ཉལ་རོགས་བསྲུང་བ། བསམ་པ་འགྲུབ་པ། ལྷ་མི་བྱམས་ཤིང་ཡིད་དུ་འོང་བའི་ཐབས། རྫོགས་རིམ་རྣམས་སོ། །བླ་མ་དྲག་པོ་ལྕགས་སྡིག་ཏུ་བྱོན་པའི་སྐུ་ཐོག་གི་འཕྲེང་བའི་སྒྲུབ་ཐབས་རྟགས་རིམ་དང་བཅས་པ། འདིའི་ལས་ཚོགས་ལ། སྲིའུ་གསོ་བ། དཀོར་འགོང་བསྐྲད་པ། ནོར་ལ་རྒྱལ་པོ་བསྲུང་བ། སྲིད་ལ་རྒྱལ་པོ་བསྲུང་བ། ཐོག་དང་སེར་བ་བསྲུང་བ། པེ་དཀར་སྡེ་བརྒྱད་གདུལ་བ་རྣམས་སོ། །བཞི་པ་ཐུགས་སྒྲུབ་སྐོར་གསུམ་ནི། ཐུགས་སྒྲུབ་སྐོར་གསུམ་གསང་བའི་མན་ངག་ཡིན། ཞེས་པ་ལྟར་ཐུགས་སྒྲུབ་རང་བྱུང་དོན་གསལ། ཕྱི་སྤྲོས་བཅས་རྡུལ་ཚོན་ལ་བརྟེན་ནས་སྒྲུབ་པ་ཐུགས་སྒྲུབ་ནོར་བུའི་སྙིང་པོ། ནང་སྤྲོས་མེད་ཚོམ་བུ་ལ་བརྟེན་ནས་སྒྲུབ་པ་ཐུགས་སྒྲུབ་ནོར་བུའི་སྙིང་པོ། གསང་བ་ཤིན་ཏུ་སྤྲོས་མེད་གཏོར་མ་ལ་བརྟེན་ཏེ་སྐད་ཅིག་དྲན་རྫོགས་སུ་བསྐྱེད་པ་ཐུགས་སྒྲུབ་ནོར་བུའི་སྙིང་པོ། སྒྲུབ་ཐབས་འདི་གསུམ་ཚེ་འདིར་བླ་མ་སྒྲུབ་པའི་མན་ངག་ཡིན་ནོ། །འཆི་ཁར་བླ་མ་སྒྲུབ་པའི་མན་ངག །བར་དོར་བླ་མ་སྒྲུབ་པའི་མན་ངག །ཐུགས་སྒྲུབ་ནོར་བུ་སྙིང་པོ་ལྷ་ལྔ་ལས་ཚོགས་དང་བཅས་པ། ཐུགས་སྒྲུབ་གཏེར་གྱི་སྙིང་པོ། རྟགས་རིམ་གཏོར་འབུལ་དང་བཅས་པ། ཡེ་ཤེས་དབབ་པའི་རྫས་སྦྱོར། འགྲོ་བ་དབང་སྡུད། ལུང་པ་དབང་སྡུད། ཤེས་རབ་མ་འགུགས་པ། སྲིའུ་གསོ་བ། སེར་བ་བསྲུང་བའི་མན་ངག །སྲིད་བཙལ་བ། ཤྭ་བཟློག་པ། ཕུར་ཁ་བསྲུང་བ། འགོམ་ཆོག་བསྲུང་བ། ཁྱིམ་གྱི་དགྲ་བསྲུང་བ་རྣམས་སོ། །
བླ་མ་རིགས་འདུས་སྒྲུབ་པ། སློབ་དཔོན་པདྨའི་གསང་སྒྲུབ་ཆེན་པོ། འདིའི་ལས་ཚོགས་ལ། སྟོང་གསུམ་ཕོ་བརྒྱུད་དབང་སྡུད། མོ་བརྒྱུད་དབང་སྡུད། སྦྱིན་སྲེག །གསང་སྒྲུབ་ནང་གི་རྒྱུན་གྱི་གཏོར་མ། ཚྭ་ཚྭ། སེར་བ་བསྲུང་བ། རིམས་བསྲུང་བ། གོད་ཁ་བསྲུང་བ། ཐོག་བསྲུང་བ། ཕུར་ཁ་བཟློག་པ། ངག་འགྲོལ་བ། སྲིའུ་གསོ་བ། གུ་རུ་གསང་སྒྲུབ་རྟ་ཕག་ཞལ་སྦྱོར་གྱི་སྒྲུབ་པ། དེའི་ལས་ཚོགས། ནད་གདོན་ཞི་བ། འབུ་སྲིན་བསྲུང་བ། རིམས་བསྲུང་བ། ཚེ་བསོད་རྒྱས་པ། རིགས་བརྒྱུད་སྤེལ་བ། ལྷ་མི་བྱམས་ཤིང་ཟས་ནོར་དབང་དུ་སྡུད་པ། དགྲ་དཔུང་ཞི་བ། སྡེ་བརྒྱད་སྒྲུབ་ཤིང་། ཕྱི་ནང་གསང་བའི་བར་ཆད་ཞི་བ་རྣམས་སོ། །ལྔ་པ་ལས་ཚོགས་སྐོར་ལ། རྟ་མགྲིན་ལས་ཚོགས། བླ་མ་ཡང་གསང་གི་ལས་ཚོགས་དང་གཉིས། དང་པོ་ནི། རྟ་མགྲིན་དྲེགས་པ་ཟིལ་གནོན་གྱི་ལས་ཚོགས་བརྒྱ་པ་ཞེས་པ་གོང་བསྙེན་ལ་བརྟེན་ནས་དོན་ཀུན་འགྲུབ་པ། འཕྲེང་བ་བྱིན་བརླབ། ཟས་སྒོམ་བདུད་རྩིར་བསྒྱུར་བ། ཆོས་དབང་དུ་འདུ་བ། སྐུ་དབང་དུ་འདུ་བ། མཆོད་རྫས་དབང་དུ་འདུ་བ། བཟའ་བཏུང་དབང་དུ་འདུ་བ། ལོ་སྟོང་ཐུབ་པ། མིག་གསལ་བ། རྣ་བ་གསང་བ། རྐང་ལག་ལ་སེར་ཁ་མི་གས་པ། དུག་སྦྲུལ་ཁྱིི་སྨྱོན་གྱི་དུག་མི་ལྡང་བ། ཆང་གི་མི་གཟི་བ། ཞིང་གི་འབུ་བསྲུང་བ། ཆར་འབེབས་པ། རླུང་གནོན། སྲིས་རྐུན་བསྲུང་བ། སེར་བསྲུང་། རི་བོང་སོགས་རི་དྭགས་ཀྱིས་ཞིང་མི་ཟ་བ། མངལ་ཁྲག་འབྱམས་པ་གཅོད་པ། ཐིག་ལེ་བསྲུང་བ། ཤྭ་འོད་བསྲུང་བ། ཤིག་བསྲུང་བ། ཁྱི་བསྲུང་བ། ཞིང་གི་འབུ་བསྲུང་བ་རིགས་མི་གཅིག་པ། དུག་ཞི་བ། རིམས་བསྲུང་བ། ཕུར་ཁ་བསྲུང་བ། འབྲུམ་པ་དང་བལ་ནད་བསྲུང་བ། ཆམ་པ་
བསྲུང་བ། སྲིད་མི་ཆགས་པ། ལུས་ངག་ཡིད་གསུམ་བཅིངས་པ། འགྲོལ་བ། མཛེ་རིགས་གཅོད་པ། རྒྱལ་འགོང་འདོན་པ། སྤུར་ནག་མ་བསྲུང་བ། ལུད་མེད་པར་ལོ་སྐྱེ་བ། གཅན་གཟན་བསྲུང་བ། སྲོ་ལོང་སེལ་བ། དམ་སྲི་འདོན་པ། སྲིད་ངན་འདོན་པ། སྲིད་ངན་བསྲུང་བ། ཁྱེའུ་ཆགས་པ། ལམ་བསྲུང་བ། དགྲ་རེང་བ། ཕོ་འདྲེ་བསྲུང་བ། ལྷ་འདྲེ་མི་གསུམ་སྒྲིབ་པ། ལྷ་འདྲེ་མི་གསུམ་གྱིས་མཐོང་བར་བྱེད་པ། །མནའ་ཆད་བསྲུང་བ། འཁྲུ་བ་གཅོད་པ། ཕྱུགས་ནད་བསྲུང་བ། ལུག་ནད་བསྲུང་བ། ཆང་འདྲེ་བསྲུང་བ། དཀར་འདྲེ་བསྲུང་བ། བཙའ་བསྲུང་བ། སད་བསྲུང་བ། བྱ་རྒོད་དར་མའི་ཉིན་ལམ་རེ་ཆོད་པ། ཁྱི་ཤིག་བསྲུང་བ། སྐད་ཐམས་ཅད་ཤེས་པ། དུས་ཐམས་ཅད་དུ་རྒྱན་རྒྱལ་བ། གཤིན་རྗེ་བསྲུང་བ། ལྷ་གདོན་བསྲུང་བ། མ་མོའི་གདོན་རིམས་བསྲུང་བ། བདུད་བསྲུང་བ། ཡི་དྭགས་བསྲུང་བ། བཙན་བསྲུང་བ། འབྱུང་པོ་བསྲུང་བ། མི་དང་མི་མ་ཡིན་བསྲུང་བ། ངག་ལྐུགས་པ། མིག་མཐོང་དབང་པོ་མི་ལྡང་བ། ཞག་ཉེར་གཅིག་ལ་གསོད་པ། མཁར་འཇིགས་པ། གཉེན་དང་བྲལ་བ། བཀྲ་ཤིས་ཤིང་དོན་འགྲུབ་པ་རྣམས། གཉིས་པ་བླ་མ་ཡང་གསང་གི་ལས་ཚོགས་ནི། བླ་མ་ཡང་གསང་སྙིང་པོ་རྒྱུན་འཁྱེར་ཡིན། ཞེས་པ་ལྟར་བླ་མ་ཡང་གསང་ཐུགསསྒྲུབ་སྙིང་པོ་རྒྱུན་འཁྱེར། རིན་ཅེན་གཏེར་དཔུང་ཚོགས་གསོག་ཁ་སྐོང་ཡིན། ཞེས་པའི་གུ་རུའི་ལས་ཚོགས་རིན་པོ་ཆེའི་གཏེར་མཛོད་འདི་ལ། བླ་མའི་ཐུགས་རྗེས་སེམས་ཉིད་ཆོས་སྐུར་སྒྲུབ་པ། གུ་རུ་ཤཱཀྱ་སེང་གེས་མཚོན་འཁྲུགས་ཞི་བྱེད་བསམ་འཕེལ་རྡོ་རྗེ། གུ་རུ་ཤཱཀྱ་རྡོ་རྗེས་མི་མཐུན་པའི་ཕྱོགས་ཀུན་ཞི་བྱེད། གུ་རུ་ཤཱཀྱ་རིན་ཅེན་གྱིས་ཚེ་
དང་བསོད་ནམས་རྒྱས་པར་བྱེད་པ། གུ་རུ་ཤཱཀྱ་དྲི་མེད་ཀྱིས་ཁམས་གསུམ་དབང་དུ་སྡུད་པ། གུ་རུ་ཤཱཀྱ་བདུད་འདུལ་གྱིས་གདུག་པའི་དགྲ་བགེགས་གདུལ་བ། གུ་རུ་ཤཱཀྱ་རྣོན་པོས་མཚོན་བཟློག་ཅིང་གཡུལ་ལས་རྒྱལ་བ། གུ་རུ་ཤཱཀྱ་ཀུན་སྐྱོབ་ཀྱིས་འགྲོ་བ་ཀུན་ལ་སྐྱབས་སྦྱིན་པ། རྒྱལ་པོ་ཆེན་པོ་སྡེ་བཞིས་སེམས་ཅན་བདེ་བར་སྐྱོང་བ། གུ་རུ་ཤཱཀྱ་སེང་གེ་འཁོར་དང་བཅས་པས་འགྲོ་བ་བདེ་བར་བྱ་བ། གུ་རུ་ཉི་མ་འོད་ཟེར་གྱིས་འགྲོ་བའི་དུག་ལྔ་ཞི་བ། གུ་རུ་ཚེ་དབང་རྒྱལ་པོས་འགྲོ་བའི་ཚེ་འཕེལ་བ། གུ་རུ་བདེ་བའི་མྱུ་གུས་འགྲོ་བའི་ལུས་ངག་ཡིད་གསུམ་བདེ་བར་བྱ་བ། གུ་རུ་ཡཀྴ་མེ་དབལ་གྱིས་བརྒྱལ་རེངས་སྨྱོ་བོག་འབྱུང་པོ་གདོན་ཀུན་ཞི་བར་བྱ་བ། གུ་རུ་པདྨ་རྡོ་རྗེས་ཆུང་སྲི་བསྲུང་བ། གུ་རུ་པདྨ་ཀ་རས་ལྷ་སྲིན་མ་ལུས་རླག་པར་བྱེད་པ། གུ་རུ་ཐོར་ཅོག་དགུ་པས་འགྲོ་བའི་ནད་རབ་ཞི་བ། གུ་རུ་དྲི་མེད་སྙིང་པོས་འགྲོ་བའི་གྲིབ་དང་མི་གཙང་བ་ཞི་བར་བྱེད་པ། གུ་རུ་འབར་བའི་མེ་ཏོག་གིས་མཛེ་ནད་རབ་ཏུ་ཞི་བ། གུ་རུ་འགྲོ་བ་ཡིད་ལ་བཅགས་ཀྱིས་ཕྱུགས་ནད་རབ་ཏུ་ཞི་བ། གུ་རུ་པདྨ་རྒྱལ་པོས་འགྲོ་བའི་བསོད་ནམས་དཔལ་དང་བྱིན་རླབས་རྒྱས་པར་བྱ་བ། གུ་རུ་མཐོང་ན་དགའ་བས་བཟའ་བཏུང་བསྒྲུབ་པ། གུ་རུ་གཏེར་བཞད་རྩལ་གྱིས་ནོར་དང་ལོངས་སྤྱོད་སྒྲུབ་པ། གུ་རུ་ཉི་མའི་འོད་ལྡན་གྱིས་སྲིད་གསུམ་སྣང་བ་གསལ་བར་བྱེད་པ། གུ་རུ་སྲིད་གསུམ་རྒྱལ་པོས་རང་ལུས་ཡིད་བཞིན་ནོར་བུར་བྱ་བ། གུ་རུ་པདྨ་འབྱུང་གནས་ཀྱིས་མཆེ་བ་ཅན་ཁ་བཅིང་བ། གུ་རུ་འཇིགས་པ་ཐམས་ཅད་དང་བྲལ་བས་ལམ་གྱི་འཇིགས་པ་ཐམས་ཅད་བསྲུང་བ། པདྨ་མཚོ་སྐྱེས་རྡོ་རྗེས་ཤེས་རབ་མས་ཉན་པར་བྱ་བ། གུ་རུ་ཡཀྴ་རྡོ་རྗེས་དཔེ་དཀར་བརླག་པར་བྱ་བ། གུ་རུ་རོ་ལངས་བདེ་
བས་དམ་སྲི་མོ་བརླག་པར་བྱ་བ། གུ་རུ་ཉི་མ་འོད་ཟེར་གྱིས་བཙན་གྱི་གནོད་པ་ཞི་བ། གུ་རུ་རྡོ་རྗེ་དྲག་པོ་རྩལ་གྱིས་བདུད་འདུལ་བ། གུ་རུ་རྡོ་རྗེ་གནོད་སྦྱིན་གྱིས་ཀླུ་བདུད་འདུལ་ཞིང་ཀླུ་བདུད་ཀྱིས་མི་མཐོང་བ། པདྨ་གར་གྱི་དབང་ཕྱུག་གིས་གཤིན་འདྲེ་བསྲུང་བ། གུ་རུ་རྡོ་རྗེ་གྲོ་ལོད་ཀྱིས་ལྷ་འདྲེ་རྒྱུ་སྲང་གཅད་པ། གུ་རུ་བློ་ལྡན་མཆོག་སྲེད་ཀྱིས་ཤིག་བསྲུང་བ། གུ་རུ་བློ་ལྡན་མཆོག་སྲེད་ཀྱིས་ཤེས་རབ་ཐོགས་མེད་བསྒྲུབ་པ། མི་ཕམ་རྡོ་རྗེ་གྲུ་གཟིངས་མི་རྡིབ་ནོར་བུ་རྙེད་པ། པདྨ་དྲི་མེད་རྩལ་གྱིས་ཆར་པ་དབབ་པ། ཀླུའི་དབང་པོས་ལུང་པ་སྐམ་པོར་ཆུ་དབབ་པ། རཏྣ་ཐོད་འཕྲེང་རྩལ་གྱིས་འབྲུའི་ཆར་པ་དབབ་པ། པདྨ་ཐོད་འཕྲེང་རྩལ་གྱིས་སྲིད་བཙལ་བ་ལྟེ་བསྒྱུར་བ། ཀརྨ་ཐོད་འཕྲེང་རྩལ་གྱིས་དགྲ་བོ་རྒྱ་མཚོའི་མཐར་བསྐྲད་པ། བུདྡྷ་ཐོད་འཕྲེང་རྩལ་གྱིས་དགྲ་བོ་ལུས་ངག་ཡིད་གསུམ་མནན་པ། རྡོ་རྗེ་ཐོད་འཕྲེང་རྩལ་གྱིས་རང་གི་ལུས་ངག་ཡིད་གསུམ་ནུས་པ་དང་ལྡན་པར་བྱ་བ། གུ་རུ་རྡོ་རྗེ་གྲོ་ལོད་ཀྱིས་སེར་བས་ལོ་ཏོག་གཞོམ་པ། གུ་རུ་སེང་གེ་སྒྲ་སྒྲོགས་ཀྱིས་དགྲ་བོའི་ཁྱིམ་བཤིག་པ། གུ་རུ་རྡོ་རྗེ་གྲོ་ལོད་ཀྱིས་དགྲ་བོའི་ཞིང་ལ་ལོ་ཏོག་མི་སྐྱེ་བ། རྡོ་རྗེ་གྲོ་ལོད་ཀྱིས་དགྲ་བོ་མཐུན་པ་འབྱེད་པ། རྡོ་རྗེ་གྲོ་ལོད་ཀྱིས་དགྲ་བོ་སྨྱོ་ཞིང་འབོག་པར་བྱེད་པ། སེང་གེ་སྒྲ་སྒྲོགས་ཀྱིས་ཕ་རོལ་ལྐུགས་པ། བློ་ལྡན་མཆོག་སྲེད་ཀྱིས་ཤོ་རྒྱན་རྒྱལ་བ། རྡོ་རྗེ་འཇིགས་མེད་རྩལ་གྱིས་ཐོག་བསྲུང་བ། རྡོ་རྗེ་རྣོན་པོ་རྩལ་གྱིས་སེར་བ་བཟློག་ཅིང་རྒྱུ་སྲང་གཅད་པ། པདྨ་དོན་གྲུབ་རྩལ་གྱིས་སད་བསྲུང་བ། པདྨ་ཞལ་གྱིས་ཁ་བ་བསྲུང་བ། འཁོར་ལོ་ཞབས་ཀྱིས་མགྱོགས་པར་བྱ་བ། པདྨ་སྙིང་པོ་རྩལ་གྱིས་མིག་ཁ་བས་མི་ཕྱིད་པ། བདུད་རྩི་རྩལ་གྱིས་སྐྱེས་
བུ་ཆང་གིས་མི་གཟི་བ། གུ་རུ་པདྨ་འབྱུང་གནས་ཀྱིས་འགྲོ་བའི་དོན་ཐམས་ཅད་རབ་ཏུ་འགྲུབ་པར་བྱེད་པ། ཞི་བ། རྒྱས་པ། དབང་། དྲག་པོ་རྣམས་ཀྱི་སྦྱིན་སྲེག་རེ་རེ། གུ་རུ་པདྨ་སཾ་བྷ་ཝས་འཁོར་བ་ཐམས་ཅད་སྤང་བྱ་འཛིན་དོར་མེད་པར་བླ་མ་སྒྲུབ་པའི་ལས་ཚོགས་རྣམས་སོ། །དྲུག་པ་སྐུ་གསུམ་གབ་པ་སྔོན་བྱུང་ལ། འདོད་ཆགས་ལམ་འཁྱེར་སྤྲུལ་སྐུའི་སར་འཁྲིད་པའི་གབ་པ་སྔོན་བྱུང་ཞེ་སྡང་ལམ་འཁྱེར་ལོངས་སྐུའི་སར་འཁྲིད་པའི་གབ་པ་སྔོན་བྱུང་། གཏི་མུག་ལམ་འཁྱེར་ཆོས་སྐུའི་སར་འཁྲིད་པའི་གབ་པ་མངོན་ཕྱུང་རྣམས་རྩ་དང་ཐིག་ལེ་སྦྱང་སྤེལ་ཟབ་པ་མཐར་ཐུག །བདུན་པ་ཇོ་མོའི་སྒྲུབ་སྐོར་ལ། མཁར་ཆེན་མཚོའི་སྒྲུབ་ཐབས། མཁའ་འགྲོ་ཡང་གསང་གཙུག་རྒྱན། འདིའི་ལས་ཚོགས་ལ། མེས་མི་འཚིག་པ། ཆུ་ལ་མི་བྱིང་བ། ས་ལ་འབིགས་པ། རྡོ་ལ་རྫི་བ། མོ་རིགས་འདུ་བ། ཕོ་རིགས་དབང་སྡུད། ཟས་ནོར་དབང་སྡུད། མི་རྒོད་གཅན་གཟན་གྱི་ཟིལ་གྱིས་གནོན་པ། དམག་དཔུང་འབྲོས་པ། ཞོ་ཆང་ཉེས་པ་བསྲུང་བ། ཆང་སྤེལ། སྲིད་འཕེལ་བ། སེར་བ་སྲུང་བ། འབུ་སྲིན་བྱི་བ་རི་བོང་བསྲུང་བ། ཆོམ་རྐུན་བསྲུང་བ། དགྲའི་ཕྱུགས་གསད་པ། དགྲ་བོ་བརྒྱལ་ཞིང་རེངས་ནས་འགུམ་པ། བུམ་སྒྲུབ། སྐུ་གསུང་ཐུགས་རྟེན་ལ་མེ་ཏོག་ཆགས་པ། གཞོན་སྲི་བསྲུང་བ། རྦོད་གཏོང་བསྲུང་བ་རྣམས། བརྒྱད་པ་བསྟོད་འཕྲིན་མདོས་སྐོར་ལ། སློབ་དཔོན་པདྨའི་བསྟོད་པ་རིན་ཅེན་གཏེར་དཔུང་འདི་ལ་འབུམ་བསྟོད། ༡ གུ་རུ་ལ་ལྷ་ལྕམ་མནྡྷར་བས་འཕྲིན་ལས་བཞིའི་སྒོ་ནས་བསྟོད་པ། ༢ ཁྱད་འཕགས་ལྔའི་སྒོ་ནས་བསྟོད་པ། ༣ གུ་རུ་ལ་མ་གཅིག་ཡེ་ཤེས་མཚོ་རྒྱལ་གྱིས་ཡོན་ཏན་དྲུག་གི་སྒོ་ནས་བསྟོད་པ། ༤ རྟགས་བསྟོད། ༥ གུ་རུ་པདྨ་འཁོར་
དང་བཅས་པ་ལ་མཚོ་རྒྱལ་གྱིས་བསྟོད་པ། ༦ སློབ་དཔོན་ཆེན་པོ་ལ་ཨོ་རྒྱན་གྱི་རྒྱལ་པོ་པྲ་ཝ་གརྟིས་བསྟོད་པ། བརྗོད་བྱ་མཚན་གྱིས་སྒོ་ནས་བསྟོད་པ། མནྡྷ་ར་བས་དངོས་གྲུབ་ཀུན་འབྱུང་གི་སྒོ་ནས་བསྟོད་པ། གུ་རུ་ལ་དུར་ཁྲོད་ཀྱི་བདག་པོས་བསྟོད་པ། གུ་རུ་ལ་ཨིནྡྲ་བོ་དྷིས་བསྟོད་པ། མ་གཅིག་བཀྲ་ཤིས་སྐྱིད་ཀྱིས་སྐྱོན་སྤངས་ཡོན་ཏན་ལྡན་པའི་བསྟོད་པ། སྐུ་ལ་བྲམ་ཟེ་ངྷེ་བ་ཤྲཱིས་བསྟོད་པ། གུ་རུ་ལ་མཁའ་འགྲོ་ཡེ་ཤེས་མཚོ་རྒྱལ་གྱིས་ཐུགས་རྗེས་ཚོགས་ཀྱི་འགྲོ་བ་འདྲེན་པའི་སྒོ་ནས་བསྟོད་པ། གུ་རུ་ལྷ་སྲིན་སྡེ་བརྒྱད་ཀྱིས་དངོས་གྲུབ་བརྙེས་པའི་སྒོ་ནས་བསྟོད་པ། གུ་རུ་ལ་བསྟན་མ་བཅུ་གཉིས་ཀྱིས་བསྟོད་པ། གུ་རུ་ལ་ཆོས་རྒྱལ་ཁྲི་སྲོང་ལྡེ་བཙན་གྱིས་བསྟོད་པ། གུ་རུ་ལ་བཙུན་པ་རྒྱལ་བ་མཆོག་དབྱངས་ཀྱིས་བསྟོད་པ། གུ་རུ་ལ་སྲས་མུ་ཏིག་བཙན་པོས་བསྟོད་པ། གུ་རུ་ལ་མ་གཅིག་ཤེལ་དཀར་བཟས་འཕྲིན་ལས་ཞུ་གསོལ། གུ་རུ་ལ་ཆོས་རྒྱལ་ཁྲི་སྲོང་ལྡེ་བཙན་གྱིས་འཕྲིན་ལས་སུ་གསོལ་བ། གུ་རུ་ལ་མཁའ་འགྲོ་གསང་བ་ཡེ་ཤེས་ཀྱིས་འཕྲིན་ལས་སུ་གསོལ་པ། གུ་རུའི་སྒྲུབ་མདོས། རིགས་འཛིན་གྱི་བསྐང་མདོས། མཁའ་འགྲོ་མའི་གྲིབ་མདོས་རྣམས། དགུ་པ་གཤིན་དོན་སྐོར་ལ། གཤིན་དོན་ཐུགས་རྗེའི་ལྕགས་ཀྱུ། རོ་སྲེག་སྣང་གསལ་སྒྲོན་མ། མེ་བཀྲ་གསལ་བའི་སྒྲོན་མ་སྦུགས་བཤིག་རྣམས། བཅུ་པ་སྨེ་བརྩེགས་སྒྲུབ་པ་ལ། ཁྲོ་བོ་སྨེ་བརྩེགས་ཆེན་པོའི་སྒྲུབ་ཐབས། འདིའི་ལས་ཚོགས་ལ། ནད་གྲིབ། དམེ་གྲིབ། དམ་གྲིབ། ནལ་ཡུགས་ཀྱི་གྲིབ། ཉམས་གྲིབ། གོས་སྟན་གྱི་གྲིབ། གནས་གྲིབ། ཟས་གྲིབ། སྣོད་གྲིབ། གཞན་དོན་དུ་གྲིབ་སེལ་བ་ཁྲོ་བོ་སྨེ་བ་བརྩེགས་པའི་
མངོན་རྟོགས་ཀྱི་ལས་བྱང་རྣམས། བཅུ་གཅིག་པ་ཚེ་སྒྲུབ་ལ། ཚེ་སྒྲུབ་བདུད་རྩི་འཁྱིལ་པ། ཚེ་སྒྲུབ་རྒྱུན་འཁྱེར་རྫོགས་རིམ་དང་བཅས་པ། གསང་སྒྲུབ་ཚེ་དབང་གི་ཉམས་ལེན། ཚེ་སྒྲུབ་ཡང་གསང་སྙིང་བཅུད་ཧྲཱིཿགཅིག་མ། འདིའི་ལས་ཚོགས་ལ། མིའི་ཚེ་འཁོར། ཕྱུགས་ཀྱི་ཚེ་འཁོར། འཆི་བ་བརྟག་པ། བཟློག་པ། བྱེ་བྲག་ཏུ་བཟློག་པ། ཚེ་སྒྲུབ་བདུད་རྩི་འཁྱིལ་པའི་དབང་ཆོག་འཆི་མེད་ཚེའི་གདམས་པ་འོད་ལྔ་དྲིལ་བའི་ཚེ་སྒྲུབ་རྒྱུན་འཁྱེར། ངོ་མཚར་བདུད་རྩི་མར་ཁུ། འདི་ལ་རྫི་བ། རིལ་མ། རུས་པ། རྡོ་ལྷམ་རྙིང་རྣམས་ཀྱི་མར་ཁུས་ནད་སེལ། བཅུད་ལེན་བདུད་རྩིའི་འཕྲེང་བ། འདི་ལ་གཏུམ་མོའི་བཅུད་ལེན། ཅུང་ཞི། ས། བདུད་རྩི་ཚན། བྱེ་མ། དབང་ལག །འོམ་བུ། བདུད་རྩི་ཆེན་པོ། ཨུཏྤལ། ཆུ། རྡོ། གླང་སྣ། སྤང་རྒྱན། ལྕེ་འབྱོའི་བཅུད་ལེན་རེ་རེ་ཡོད། འཇམ་དཔལ་ཤེས་རབ་འཛིན་ཆེན་རྣམས། བཅུ་གཉིས་པ་གཏེར་བདག་སྐོར་ལ། གཏེར་བདག་སྒོས་སྒྲུབ་སྲོག་གི་སྤུ་གྲི་རེག་ཆོད། གཏེར་བདག་གི་མདོས། རབ་གནས་བདེ་ལེགས་ལྷུན་གྲུབ་མ་རྣམས་ཀྱི་དབང་ལུང་ཡོངས་སུ་རྫོགས་པར་ཐོབ་པའི་ཞི་བའི་སྐོར་གྱི་བརྒྱུད་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། ངན་ལམ་རྒྱལ་བ་མཆོག་དབྱངས། སྤྲུལ་སྐུ་ཚེ་བརྟན་རྒྱལ་མཚན་ནམ་ཆོས་ཀྱི་བློ་གྲོས། ཙ་རི་བ་ཤིནྟཾ་ཕ་ལ། ཟུར་པ་ཤཱཀྱ་འབྱུང་གནས། འབྲོམ་སྟོན་ཚེ་དབང་རྒྱལ་པོ། མཁས་གྲུབ་རྒྱལ་སྲས་ཆོས་རྗེ། སྔགས་འཆང་ལེགས་པ་དཔལ་བཟང་། ཉང་སྟོན་ཆོས་ཀྱི་དབང་ཕྱུག །གནུབས་སྟོན་རིན་ཅེན་དཔལ་བཟང་། བླ་མ་ཚུལ་ཁྲིམས་དཔལ་བཟང་། གནུབས་རྒྱལ་སྲས་པདྨ་ཡང་ཟེར། པཎ་
ཆེན་པདྨ་དབང་རྒྱལ། རྗེ་བཙུན་སྤྲུལ་སྐུ་ཆེན་པོ་པདྨ་རྒྱལ་པོ་ལེགས་ལྡན་རྗེ། དྲིན་ཅན་ཚེ་རིང་དབང་པོ། ཀླུ་གྲུབ་ཆོས་ཀྱི་རྒྱལ་མཚན། ཟུར་ཆེན་ངག་དབང་ཕུན་ཚོགས། མཁས་གྲུབ་ཁྲ་ཚང་པ་ཆེན་པོ། དེས་བདག་ཟ་ཧོར་བནྡེ་ལའོ། །དྲག་པོའི་སྐོར་གྱི་བརྒྱུད་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་པདྨ་དབང་ཆེན། སྤྲུལ་སྐུ་པདྨ་འབྱུང་གནས་མན་སྔར་བཞིན་ནོ། །དྲག་པོ་ཡཀྴ་མེ་དབལ་གྱི་དབང་དང་ལས་བྱང་གི་ལུང་བསྐྱར་བའི་བརྒྱུད་པ་ནི། ཀླུ་སྒྲུབ་པ་ནས། བཀྲ་བཟང་པ་སེ་སྟོན་ནམ་མཁའ་རིགས་འཛིན། བཀྲ་བཟང་པ་སེ་སྟོན་རྡོ་རྗེ་ཐུགས་མཆོག་རྩལ། ཁྲ་ཚང་པ་ཆེན་པོ་བློ་མཆོག་རྡོ་རྗེ། དེས་བདག་ལའོ། །སྤྱན་མང་ཞི་བ་ཞི་དྲག་ཕྱེད་མ། དྲག་པོ་རྣམས་ཀྱི་སྒྲུབ་ཐབས་ལས་ཚོགས་ཀྱི་ལུང་བརྒྱུད་ལུགས་གཅིག་ལ། ཀླུ་སྒྲུབ་རྗེ་ནས། རྡོ་རྗེ་འཆང་མགོན་པོ་བསོད་ནམས་མཆོག་ལྡན། ཉང་སྟོད་བློ་མཆོག་རྡོ་རྗེ། དེས་བདག་ཟ་ཧོར་གྱི་བནྡེ་ལའོ། །ཆོས་སྡེ་འདིའི་གྲལ་དུ་མི་གཏོགས་པའི་གཏེར་ཁ་གཅིག་པ་ལ། མཚོན་བསྲུང་རྡོ་རྗེའི་གོ་ཆ། སྒྲོལ་མ་ཨུ་པ་ལའི་འཕྲེང་བ་ཞེས་པ་ལ། ལྷ་དགུའི་སྒྲུབ་ཐབས། སྒྲུབ་པའི་བར་གཅོད་རྒྱལ་པོའི་ཆད་པ། དུག་སྦྲུལ་གྱི་འཇིགས་པ། ཆུའི་འཇིགས་པ། མེའི་འཇིགས་པ། ཤ་ཟའི་འཇིགས་པ། ལྕེ་འབབ་ལྕགས་སྒྲོག །གཅན་གཟན་གྱི་འཇིགས་པ། ལམ་གྱི་འཇིགས་པ་རྣམས་བསྲུང་བ། བྱིས་པ་གསོ་བ། དབུལ་ཕོངས་སེལ་བ། མཚོན་བསྲུང་། ཐོག་སེར་བསྲུང་བ་དང་བཅས་ཐོབ་པ་ཡང་ཀླུ་སྒྲུབ་རྗེ་ནས། ཟུར་ཆེན་ངག་དབང་ཕུན་ཚོགས། མཁས་གྲུབ་ཁྲ་ཚང་པ་ཆེན་པོ། དེས་བདག་ལའོ། །སྤྲུལ་སྐུ་ཚེ་བརྟན་རྒྱལ་མཚན་གྱིས་རོང་གི་རྫ་ལྷུད་མོ་ནས་
སྤྱན་དྲངས་པའི་རྒྱལ་པོ་ཡུལ་འཁོར་བསྲུང་གི་དམག་བཟློག་མི་མཐུན་ཀུན་སེལ་ལ་ནང་གསེས་ཀྱི་བསྙེན་པ། ལས་སྦྱོར་ལ་ལུང་པ་ཆེན་པོ་བསྲུང་བ། གང་ཟག་སྒོ་གཅིག་བསྲུང་བ། རྣལ་འབྱོར་གར་འགྲོའི་ལམ་བསྲུང་བ། ལག་ལེན་རྒྱས་པར་བསྟན་པ་ལ་རིན་ཅེན་ཉི་ཟླའི་གནད། མནན་བསྲེགས་བཟློག་པའི་གནད། བསྐུལ་ཚིག་དམ་བདར་གྱི་གནད། སངས་རྒྱས་ཐམས་ཅད་འདུས་པའི་རྟ་གནས་ཀྱི་གནད། མི་ཕྱུགས་བསྲུང་བ་ཆུ་གཙང་གི་གནད། སྒྲིབ་ཤིང་གི་གནད། རྟགས་ཀྱི་གནད་དེ་བདུན་གྱིས་བསྟན་པ་རྣམས་ཕྱག་ལེན་དམར་འཁྲིད་དང་བཅས་པ་ཐོབ་པའི་བརྒྱུད་པ་ནི། ལེགས་ལྡན་རྗེ་ཡན་གོང་ལྟར་ལ། དེ་ནས་ཆོས་རྒྱལ་མངྒའི་མཚན་ཅན། རིགས་འཛིན་ངག་གི་དབང་པོ། ཟུར་ཆེན་ཆོས་དབྱིངས་རང་གྲོལ། དེས་བདག་ཟ་ཧོར་བནྡེ་ལའོ། །གཏེར་ཁ་འདིའི་བསྐྱེད་པ་བཞི་ལྡན་གྱི་བསྲུང་བ་ཡང་ཟུར་རྩ་བའི་བླ་མར་ཞུས་སོ། །