སྤྲུལ་སྐུ་དམ་པ་དམར་པོས་སྦ་གྲོ་བཅལ་གྱི་བྲག་ནས་སྤྱན་དྲངས་པའི་བདུད་རྩི་ཆེན་པོའི་བཅུད་ལེན་སྐོར།
སྤྲུལ་སྐུ་དམ་པ་དམར་པོས་སྤ་གྲོ་བཅལ་གྱི་བྲག་སེང་གེའི་ཁོག་པ་འདྲ་བའི་ཕ་བོང་སྡིག་རུ་ཅན་གྱི་རྩ་བ་ནས་སྤྱན་དྲངས་པའི་དངོས་གྲུབ་ཀུན་གྱི་རྩ་བ་བདུད་རྩི་ཆེན་པོའི་བཅུད་ལེན་གྱི་སྐོར་ལ། བདུད་རྩིའི་བྱིན་རླབས་
ལེགས་པར་མནོས་ནས། ལུང་ལ། བདུད་རྩི་འབྱུང་བའི་རྒྱུད་ལེའུ་ཉེར་གཅིག་པ། འགོར་སློབ་དཔོན་ཆེན་པོའི་མཚན་གྱི་རྣམ་གྲངས་བསྟན་པའི་བདུད་རྩིའི་ལག་ལེན་རིན་ཅེན་འཕྲེང་སྦྱོར། བདུད་རྩི་དྲི་ཆེན་གྱི་སྒྲུབ་ཐབས་ཚེའི་གདམས་པ་ཁྱད་པར་འཕགས་པའི་མན་ངག་མི་ཤེས་འཕྲང་སྒྲོལ་གཅེས་པའི་ལག་ལེན་མདོར་བསྡུས་རྫོགས་སོའི་མཐའ་ཅན། བདུད་རྩི་ལུང་འབོགས་པ་ཞར་བྱུང་མཆོད་རྫས་དཀའ་ཐུབ་ཀྱི་དབྱེ་བ་སྦྱང་བྱ་རྫས་ཀྱི་སྒོམ་ཐབས་བཅས་སྟོན་པ་དོན་རྟོགས་ཤོག་གི་མཐའ་ཅན། བཅུད་ལེན་ལག་ཏུ་བླང་བའི་ཞལ་གདམས་དཀའ་ཐུབ་དང་བསྲུང་བའི་སྐྱོབས་ཀྱི་དབྱེ་བ་བསྲུང་བར་བགེགས་སྐྲོད་བྱ་ཚུལ་བླ་མ་དམ་པའི་གདམས་ངག་རྫོགས་སོའི་མཐའ་ཅན། བདུད་རྩི་མར་དུ་དྲངས་པའི་གདམས་པ་ཞེས་པ་འཇམ་དཔལ་ཟླ་གསང་ལས་རྫས་ཀྱི་བསྲུང་བ་དང་བཅུད་ལེན་བྱ་ཐབས་ཞར་བྱུང་ཕན་ཡོན་ནག་པོ་དགུ་ཐུབ་ལ་བརྟེན་ནས་བདུག་པ། བྱུག་པ། རིལ་བུ། འཕུར་མ་སོགས་ཀྱི་ཁ་བསྒྱུར་བསྟན་པ། བདུད་རྩི་མར་ཁུའི་གདམས་པ་རྣམ་པར་སྣང་མཛད་མར་ཁུ་བཅུད་འབྱུང་བའི་ཐབས་ཞེས་པ་ལག་ལེན། རྫས་སྔགས་ཀྱི་ཁ་བསྒྱུར། སྤང་བྱ། ཟ་བའི་ཚད། ཕན་ཡོན་མདོག་ལེགས་པར་བྱ་བ་དང་བཅས་སྟོན་པ། བདུད་རྩི་མར་ཁུའི་གདམས་པ་དོན་བདུན་གྱིས་བསྟན་པ་མཁས་ཁྱད་མན་ངག་གི་ཡིག་ཆུང་རྫོགས་སོའི་མཐའ་ཅན། གདོན་དང་ནད་སོགས་བརྟགས་ཏེ་གེགས་སེལ་བའི་ཐབས་སྨན་གྱི་འཕྲང་བསལ་རྫོགས་བྱང་གི་མཐའ་ཅན། ཞར་བྱུང་གནས་སྐབས་མཐར་ཐུག་གི་ཕན་ཡོན་སྐུ་གསུམ་གྱི་གྲོལ་ཚུལ་དང་བཅས་པ་གུ་
རུ་པདྨས་མཛད་པ་འོའི་མཐའ་ཅན་རྣམས་ཀྱི་ལུང་མན་ངག་ཕྱག་ལེན་བཅས་ཐོབ་པའི་བརྒྱུད་པ་ནི། ཆོས་སྐུ་ཀུན་ཏུ་བཟང་པོ། ལོངས་སྐུ་རྒྱལ་བ་རྒྱ་མཚོ། སྤྲུལ་སྐུ་ཤཱཀྱའི་དབང་པོ། འཇམ་དབྱངས་གཞོན་ནུར་གྱུར་པ། བདུད་རྩི་འབྱུང་བའི་ལྷ་མོ། རྒྱལ་བ་ཛི་ན་པ་ཏྲ། ཨོ་རྒྱན་པདྨ་འབྱུང་གནས། མཁའ་འགྲོ་ཀ་ལ་སིདྷི། སྤྲུལ་སྐུ་དམ་པ་དམར་པོ། རིགས་འཛིན་ཀརྨའི་མཚན་ཅན། གྲུབ་ཐོབ་ཐང་སྟོང་རྒྱལ་པོ། བྱང་སེམས་དཔལ་འབྱོར་རྒྱ་མཚོ། སྤྲུལ་སྐུ་རིན་ཅེན་ཆོས་རྡོར། ཡོངས་འཛིན་ངག་དབང་ནས་མཆོག་གི་དངོས་གྲུབ་བརྙེས་པ་ཆོས་དབང་ལྷུན་གྲུབ། རིགས་འཛིན་ཆེན་པོ་འཕྲིན་ལས་ལྷུན་གྲུབ། རྩ་བའི་བླ་མ་སྤྲུལ་སྐུ་གཏེར་བདག་གླིང་པ། དེས་བདག་ལའོ། །ཨཱ་ཙཪྻ་ཧེ་ཝ་ནག་པོའི་ངན་སྔགས་བཅོམ་ལྡན་འདས་ཀྱིས་ཌཱ་ཀི་རྣམས་ལ་བཀའ་གནང་ནས་བྱས་པ་བཤིག་པའི་འཁོར་ལོས་གཏུམས་ཏེ་ལྕགས་ཀྱི་རྡོ་རྗེའི་བུམ་པར་བཅུག་ནས་རི་མ་ལ་ཡའི་ནུབ་དབང་ཕྱུག་ལྡེར་བཟོའི་འོག་ཏུ་སྦས་པས་མུ་སྟེགས་རྣམས་ཕུང་བ་ཙཪྻ་ཕྲ་བ་རི་མོས་རྙེད་དེ་སློབ་དཔོན་པདྨ་ལ་ཕུལ་བ་བསམ་ཡས་མཆོད་རྟེན་ས་འདིས་གཞན་ལ་གནོད་པ་ཡོང་བའི་རྒྱུ་མཚན་དེ་ཡིན། ནག་པོའི་འོག་ཏུ་སྦས་པ་ལ་སྟོད་སྤྲུལ་སྐུ་དམར་པོས་གདན་དྲངས་པའི་འཇིག་རྟེན་ཕུང་བྱེད་ནག་པོ་གྲི་ཐལ་མའི་སྐོར་ལ། རྩ་བ་གྲི་ཐལ་གྱི་རྒྱུད་ཆེན་པོའི་ལེའུ་དང་པོ་ལོ་རྒྱུས་འབྱུང་ཁུངས། གཉིས་པ་རང་བསྲུང་རྡོ་རྗེའི་གོ་གྱོན་པ་གསུམ་པ་བཅའ་གཞི་བསྟན་པ། བཞི་པ་འཁོར་ལོ་འདྲི་བ། ལྔ་པ་སྔགས་ཀྱི་རིམ་པ། དྲུག་པ་ལྷ་སྒོམ་
སྔགས་བཟླ། བདུན་པ་རྫས་བསྟན་པ། བརྒྱད་པ་རྫས་གཏོར་ཐབས་རྣམས། ལག་ལེན་གནད་འགག་གི་ཕྲེང་བ་ལ། མུ་སྟེགས་ཀྱི་སྟོན་པ་ཨཱ་ཙཪྻ་བནྡེ་ནག་པོ་དང་། སྟོན་པ་ཨ་ཝ་སེང་གེ་གཉིས་ཀྱིས་གསུངས་པའི་འཁོར་ལོ་དང་གནད་ཀྱི་ལག་ལེན་བསྟན་པ། སྟོན་པ་ཨ་ཝ་སེང་གེས་གསུངས་པའི་ལྷ་ལྔ་གཤེད་འབེབས་ཀྱི་འཁོར་ལོ། མུ་སྟེགས་ཨ་ཝ་སེང་གེ་དང་དེ་ཝ་ནག་པོ་གཉིས་ཀྱིས་གསུངས་པའི་ལྷ་འདྲེའི་ཕོ་བྲང་འདེབས་པའི་འཁོར་ལོ། མུ་སྟེགས་དེ་ཝ་བཟང་པོས་གསུངས་པའི་སྔགས་ཀྱི་དག་ཡིག །ལྷ་མིན་འདྲེ་མིན་མུ་སྟེགས་ཀྱི་མཁའ་འགྲོ་མ་ནག་མོས་ཨཱ་ཙཪྻ་དེ་ཝ་བཟང་པོ་ལ་གསུངས་པའི་རྨི་ལྟས་བརྟག་ཅིང་གཉེན་པོ་བསྟེན་པ། འཁོར་ལོ་འདྲི་བའི་གཟའ་སྐར། རང་བསྲུང་བྱ་ཐབས་རྣམས་ལ་དབང་ཕྱུག་ཆེན་པོའི་སྐུ་གསུང་ཐུགས་ཀྱི་རྒྱ་ཅན། ཞལ་གདམས་མཚོན་གྲི་ཆུ་གྲི་སོགས་རྫས་སྣ་བསགས་ཏེ་སྒྲུབ་ཅིང་སྦ་ཚུལ་བསྲུང་འཁོར་བསྒོམ་མོ་ཞེས་པའི་མཐའ་ཅན་རྣམས་ཐོབ་པའི་བརྒྱུད་པ་ནི། མུ་སྟེགས་ཀྱི་སྟོན་པ་བནྡེ་ནག་པོ། ཙཪྻ་ཕྲ་བ་རི་མོ། སློབ་དཔོན་པདྨ་འབྱུང་གནས། ཨཱ་ཙཪྻ་དྲ་བ་བཟང་པོ། སྤྲུལ་སྐུ་ལ་སྟོད་དམར་པོ་ནས་རིམ་བཞིན་མ་ཎི་ཨིནྡྲ་རཱ་ཛ། མཐུ་ཆེན་བླ་མེད་རྡོ་རྗེ་རྩལ། རླུང་མི་འགྱུར་རྡོ་རྗེ། དབྱངས་དཔོན་པ་མཐུ་སྟོབས་གསང་བའི་དབང་ཕྱུག །ཟུར་ཀུན་མཁྱེན་ཆོས་དབྱིངས་རང་གྲོལ། དེས་བདག་ཟ་ཧོར་སྔགས་སྨྱོན་ལ་ཕྱག་ལེན་ཞལ་ཤེས་དམར་འཁྲིད་དུ་སྩལ་ཏེ་བསྟན་པ་བསྲུང་བའི་མཚོན་ཆར་གདམས་སོ། །ཡེར་པ་བྱ་ར་ས་ནས་སྤྲུལ་སྐུ་ལ་སྟོད་དམར་པོས་སྤྱན་དྲངས་པའི་ལྷ་གཅིག་ཀོང་ཇོའི་ཕྱག་བྲིས་ཀྱི་ཡེར་པའི་དཀར་ཆག་
བསྟན་པ་དར་རྒྱས་མའི་ལུང་ཡང་སྤྲུལ་སྐུ་གཏེར་བདག་གླིང་པ་ལ་ཐོབ་བོ། །མང་མཁར་མུ་གུ་ལུང་ནས་གྲུབ་ཐོབ་དམར་པོས་སྤྱན་དྲངས་པའི་རྫས་བདུན་ལ་བརྟེན་ནས་བགེགས་འཇོམས་པ་སྲ་བའི་བྲག་ཀྱང་འགས་ནུས་པའི་བརྒྱུད་པ་ནི། གཏེར་སྟོན་ནས་རིམ་པར་སྔགས་འཆང་ལེགས་མཆོག་པ། ཟུར་ངག་དབང་ཕུན་ཚོགས། རྗེ་ཁྲ་ཚང་བ། དེས་བདག་ལའོ། །