རྟ་མགྲིན་པདྨ་དབང་ཆེན་ཡང་གསང་ཁྲོས་པ་ཁྲག་འཐུང་ལྷ་དགུའི་རྒྱུད་སྒྲུབ་ཐབས་མན་ངག་རྣམས་ཀྱི་སྐོར།
གསོལ་འདེབས་ལས། གྲགས་པ་གསུམ་པ་དབང་ཕྱུག་མཚན་མཐའ་ཅན། །འབྲེ་བན་ཚུལ་བཟང་རྣམ་གསུམ་ཚོགས་པའི་གཏེར། །བླ་མ་གྲུམ་དང་ཡོན་བདག་ནག་པོ་མཁར། གཉིས་ཚོགས་གཏེར་སྒོ་འབྱེད་རྣམས་ལ་གསོལ་བ་འདེབས། ཞེས་པའི་གཏེར་སྟོན་གསུམ་ཚོགས་ནི་རྐྱང་པོ་གྲགས་པ་དབང་ཕྱུག །སུམ་པ་བྱང་ཆུབ་ཚུལ་ཁྲིམས། འབྲེ་ཤེས་རབ་བླ་མ་གསུམ་གྱིས་ཡེར་པ་སེ་བ་ལུང་ནས་རྟ་མགྲིན་པདྨ་དབང་ཆེན་ཡང་གསང་ཁྲོས་པ་ཁྲག་འཐུང་ལྷ་དགུའི་རྒྱུད་སྒྲུབ་ཐབས་མན་ངག་རྣམས་སྤྱན་དྲངས་ནས་འབྲུ་ཚང་གི་གཉགས་སྟོན་ལ་ཤོག་སེར་སྟེང་ནས་ཆོས་རྒྱུན་ལན་ཅིག་ཙམ་ལས་སྤེལ་རྒྱུ་མ་བྱུང་བར་གཏེར་རྔུར་གྱིས་རྐྱང་པོ་ལ་མཛེ་བྱུང་། སུམ་པ་འདས། འབྲེ་སྨྱོ་བས་ཤོག་སེར་རྣམས་རྟ་མགྲིན་གྱི་གྲུབ་ཐོབ་ཞུ་སྟོན་བྱ་བའི་ལག་ཏུ་བྱུང་ཡང་དེས་ཞུ་ས་རྩད་མ་ཆོད་པས་ལས་འཕྲོ་གཏེར་བརྒྱུད་ཀྱི་བྱིན་རླབས་བཀའ་མ་ཉམས་པ་ཡོངས་གྲགས་ལ་མེད་པར་ཡུན་རིང་འབྱམས། རིང་ཞིག་ན་གྲུབ་པའི་དབང་ཕྱུག་ཆེན་པོ་འདར་ཕྱ་རུ་བ་གཙང་ཇོ་མོ་ནགས་རྒྱལ་ན་བཞུགས་པའི་དུས་སློབ་དཔོན་ཆེན་པོ་པདྨ་འབྱུང་གནས་ཞང་ཚེ་ཟླ་གྲགས་བྱ་བའི་སྔགས་པ་ཞིག་ཏུ་སྤྲུལ་ནས་དབང་ལུང་རྣམས་རྫོགས་པར་གནང་
སྔགས་ཀྱི་ཨོཾ་དེ་ཧྲཱིཿརུ་བསྒྱུར་ལ་སྒྲུབས་ཤིག་གསུངས། འདར་ཕྱར་གྱིས་བླ་མ་རྒྱ་ལ་གཏེར་བརྒྱུད་ཀྱང་རྩད་ཆོད་ནས་གསན་པའི་བཀའ་གཏེར་ཟུང་འཇུག་གི་ཆོས་སྐོར་ལ། ཐོག་མར་རས་བྲིས་ཀྱི་དཀྱིལ་འཁོར་ཏུ་ཀུན་མཁྱེན་དཔལ་ལྡན་སེང་གེས་མཛད་པའི་དབང་ཆོག་བདེ་ཆེན་མྱུ་གུ་ལ་ལྷ་དབང་གི་ལྷན་ཐབས་སྦྱར་ཞིང་། བླ་ཆེན་ཆོས་དཔལ་བཟང་པོས་མཛད་པའི་དབང་ཆུ་མ་དག་པའི་དྲི་མ་འཁྲུད་བྱེད་ཀྱི་སྟེང་ནས་ཞིབ་ཆའི་ཕྱག་ལེན་དང་བཅས་དཀྱིལ་འཁོར་དུ་འཇུག་པ་སྔོན་དུ་གཏང་སྟེ་བུམ་པ་ལ་བརྟེན་ནས་ཁྲག་འཐུང་རིགས་ལྔའི་རིག་པའི་དབང་། ལྷ་དབང་། དུར་ཁྲོད་ཆོས་དབང་། གཏོར་དབང་། གསང་དབང་། ཤེར་དབང་། བཞི་པའི་དབང་དང་བཅས་པ་རིགས་འཛིན་བརྒྱུད་པའི་བྱིན་རླབས་ཀྱི་བཀའ་སྲོལ་མ་ཉམས་པ་ཡིད་ཆེས་ཁུངས་བཙུན་དུ་མནོས། དབུས་སྟོན་པ་སོགས་ས་དགེའི་མཁས་རློམ་གཞན་དག་གིས་རིག་པའི་དབང་ལྔ་སོ་སོར་ཕྲལ་ནས་བསྐུར་བས་མཚོན་ཏེ་གསང་འདུས་དགྱེས་རྡོར་སོགས་རྒྱུད་སྡེ་གཞན་གྱི་རྒྱས་བཀབ་རང་བཟོའི་དྲི་མ་ཙམ་ཡང་མ་འདྲེས་པ་ཡིན་ནོ། །འཆི་མེད་ཚེའི་རྫོང་ཆུང་གི་དབང་ཀུན་མཁྱེན་ཆེན་པོའི་ཡིག་ཆ་དང་དེའི་གསལ་བྱེད་ཚར་ཆེན་རྡོ་རྗེ་འཆང་གིས་མཛད་པའི་ནག་པོ་འགྲོ་ཤེས་ཀྱི་སྟེང་ནས་ཚེ་འགུགས་འཆིང་། བསྡུ་བ། དབང་དངོས། སྦ་བ། སྤེལ་བ། ཚེ་རྫས་མྱང་བ། བསྲུང་བ་རྣམས་སྨིན་རྒྱས། བདེ་གཤེགས་འདུས་པའི་བྱིན་རླབས་དབང་གི་ཆོ་གའི་སྟེང་ནས་བུམ་པ། རྟ་མགོ །དུར་ཁྲོད་ཆས། བཟླས་ལུང་། གཏོར་མ་ལ་བརྟེན་པའི་དབང་། བཀའ་སྲུང་གིང་ལྔ་གཟའ་གདོང་གི་སྲོག་གཏད་ཀྱི་རྗེས་གནང་
ཟབ་མོ་རྣམས་ཀྱང་ཡིད་བརྟན་དུ་རུང་བ་ཐོབ་ནས། རྒྱབ་རྟེན་ལུང་གི་སྐོར་ལ། སྤྱིར་རྩ་བ་རྒྱུད་ཀྱིས་སྟེང་དུ་དྲིལ་བ། སྒྲུབ་ཐབས་བྱང་བུའི་སྟེང་དུ་དྲིལ་བ། མན་ངག་ལས་ཚོགས་ཀྱིས་སྟེེང་དུ་དྲིལ་བའི་ཚུལ་དང་གསུམ། དང་པོ་ནི། རྒྱུད་ཀྱི་ལེའུ་དྲུག་པ་ཡན་གྱིས་སྟོད་ལས་བྱང་ཆུབ་སྒྲུབ་པ་རྣམས་སྟོན་པས། སྨིན་བྱེད་དབང་གི་སྐོར། སྒྲུབ་ཐབས་ལས་བྱང་། བསྟོད་བསྐུལ། རབ་གནས། སྦྱིན་སྲེག །ཟོར་སོགས་སྒྲུབ་པ་ཆེན་པོའི་ཆ་ལག་ཏུ་ངེས་པར་དགོས་པས་སྨད་ལས་ཀྱི་ཆར་གཏོགས་པ་འགའ་ཞིག་ཀྱང་དེར་ཚང་དགོས་ལ། རྒྱུད་ཀྱི་ལེའུ་བདུན་པ་ནས་བཅུ་གཉིས་པའི་བར་གྱི་སྨད་ལས་དགྲ་བགེགས་སྒྲོལ་བ་མངོན་སྤྱོད་དྲག་པོའི་སྐོར་ནི་སྒྲུབ་ཆེན་གྱི་ལེ་ལག་ཏུ་བྱུང་བའི་སྨོད་པ་ཁ་སྦྱོར་དབྱེ་བ་སོགས་མ་ཡིན་པ་མིན་ནའང་། གཙོ་བོར་སྦས་པ་མིག་འབྱེད་ཀྱི་ལེའུ་གསུམ་པ་མན་ཆད་ཀྱི་སྐོར་དང་། གཏོར་མའི་ལས་ཚོགས་བཅུ་བདུན་གྱི་ནང་གི་མངོན་སྤྱོད་ཀྱི་སྐོར་སོགས་འཕྲུལ་ཤེས་པར་བྱས་ནས་སྐབས་གང་དང་གང་དུ་དགོས་པ་དེ་དང་དེར་ལེན་པ་ཡིན། གཉིས་པ་ནི། སྒྲུབ་འཕྲིན་སྦྱོར་དངོས་རྗེས་ཚང་ལ་བརྟེན་ནས་རྒྱུད་དང་མན་ངག་ཤོག་དྲིལ་སོགས་སྐབས་ཐོབ་གང་དུ་དགོས་པ་དེ་བསྣན་ནས་ཉམས་སུ་ལེན། གསུམ་པ་ནི། སྦས་པ་མིག་འབྱེད་ཀྱི་སྐོར་ཏེ། དེ་ཡང་རྒྱུད་ལྟར་བྱེད་ན་ལེའུ་དང་པོ་དང་གཉིས་པས་སྟོད་ལས་རྒྱུད་ལེའུ་དྲུག་པ་ཡན་དང་སྦྱར། ལྷག་མས་སྨད་ལས་རྒྱུད་ཀྱི་ལེའུ་བདུན་པ་མན་དང་སྦྱོར། མན་ངག་ལྟར་བྱེད་ན་ཞལ་གདམས་ཤོག་དྲིལ་བྱང་བུ་སོགས་སྟོད་ལས་དང་ཐུན་མོང་གི་ལས་སྒྲུབ་རྣམས་སྨད་ལས་སུ་སྦྱོར། །མན་ངག་རང་རྐྱང་དུ་བྱེད་ན་སྨན་སྒྲུབ་དང་ལྷ་སྔགས་དམིགས་པའི་
ངེས་པ་བསྟན་པས་སྟོད་ལས། ལེའུ་གསུམ་པ་མན་ཆད་ཀྱི་སྨད་ལས་སུ་སྦྱོར་དགོས་པས་སྡོམ་འདི་ལྟ་བུ་ཤེས་ན་ཆོས་ལུགས་འདི་ལ་ནང་བྱན་ཆུད་པར་མངོན་ནོ། །དེ་ཡང་རྩ་བ་རྒྱུད་ཀྱི་སྐོར། སྡོང་བུ་བྱང་བུའི་སྐོར། སྨིན་བྱེད་དབང་གི་སྐོར། སྒྲུབ་པ་འཕྲིན་ལས་ཀྱི་སྐོར། སྦས་པ་མིག་འབྱེད་སྐོར། བདེ་གཤེགས་སྤྱི་དྲིལ་གྱི་སྐོར། ཐུན་མོང་ལས་ཕྲན་ཤོག་དྲིལ་གྱི་སྐོར། ཐུན་མོང་མ་ཡིན་པ་མཆོག་ལམ་གྱི་སྐོར་དང་བརྒྱད། དང་པོ་ལ། པདྨ་དབང་ཆེན་ཡང་གསང་ཁྲོས་པའི་རྒྱུད་ལེའུ་༼ཕ༽བཅུ་གསུམ་པ་རྫོགས་བྱང་གི་མཐའ་ཅན་སློབ་དཔོན་ཆེན་པོས་མངའ་བདག་རྗེ་ལ་གཏད་པ་ལོ་ཆེན་བཻ་རོས་བསྒྱུར་བ། དཔལ་ཨོ་རྒྱན་ཆེན་པོས་མཛད་པའི་རྒྱུད་ཀྱི་སྐོར་སྐབས་སྤྱོད་༼ཕ༽དོན་འགྲེལ་བཻ་རོ་ཙ་ནའི་འགྱུར། རྒྱུད་ཀྱི་ས་བཅད་དབང་ཆེན་ཞལ་གཟིགས་ཀུན་མཁྱེན་མུས་སྲད་པ་དཔལ་ལྡན་སེང་གེས་མཛད་པ་པིཎ་ཏ་ཐ་རྫོགས་བྱང་གི་མཐའ་ཅན་རྣམས། གཉིས་པ་སྡོང་བུ་ལྟ་བུ་བྱང་བུའི་སྐོར་ལ། ཨོ་རྒྱན་ཆེན་པོས་མཛད་པའི་དབང་གི་བྱང་བུ། འདི་རྒྱུད་ཀྱི་ལེའུ་གསུམ་པའི་དབང་བགྲོད་དམ་ལྡན་སློབ་དཔོན་ཁུར་ཞེས་པའི་སྐབས་དང་སྦྱོར། སྒྲུབ་པའི་བྱང་བུ། ལེའུ་གསུམ་པ་དང་སྦྱོར། ཚེའི་བྱང་བུ། སྦྱིན་སྲེག་གི་བྱང་བུ། ལེའུ་བཅུ་པ་དང་སྦྱོར། རབ་གནས་ཀྱི་བྱང་བུ། གསུམ་པ་དང་འབྲེལ། གནས་ལུང་གི་བྱང་བུ་རྣམས། གསུམ་པ་སྨིན་བྱེད་དབང་གི་སྐོར་ལ། རྩ་བའི་དབང་བྱང་མཛད་པ་པོ་སློབ་དཔོན་ཆེན་པོ་པདྨ་བཟང་པོ་ཡིན་པས་སློབ་དཔོན་པདྨ་བཟང་པོའི་རྣམ་ཐར་ལོ་རྒྱུས་ཞེས་པ་མཛད་པ་པོ། རྒྱུད། ཕྱོགས། དགོས་པ་བསྡུས་དོན་ཏེ་ལྔའི་སྒོ་ནས་གཏན་ལ་ཕབ་པ་གསལ་བའི་མཐའ་ཅན། ལེའུ་གསུམ་པ་དང་སྦྱོར། ཆོས་ཁུངས་བཙུན་པ་བརྒྱུད་
པའི་རྣམ་ཐར་ལ་གྲུབ་ཐོབ་འདར་ཕྱ་རུ་པ་རིན་ཅེན་བཟང་པོའི་རྣམ་ཐར་ཟུར་ཙམ་བྲིས་པ་བླ་མེད་བྱང་ཆུབ་ཏུ་འཚང་རྒྱ་བར་འགྱུར་རོའི་མཐའ་ཅན། བོ་དོང་བརྩོན་འགྲུས་རྡོ་རྗེའི་རྣམ་ཐར་ཚིག་ཉུང་དོན་རྒྱས། ལེའུ་གསུམ་པ་དང་སྦྱོར། ཆོས་རྗེ་ཉན་ཆེན་པའི་རྣམ་ཐར་འགོར་འཁྲུངས་ཡུལ་དང་མཇུག་ན་གཤེགས་ཚུལ་བསྟན་པ་ལེགས་པར་གདའ་བོའི་མཐའ་ཅན། སྒྲུབ་ཆེན་གྱི་ཕྱིའི་སྔོན་འགྲོ་རྒྱན་མཆོད་པ་རྒྱལ་མཐོ། དམ་སྲི། སྒོ་བྱང་དང་བཅས་པ་སྒོ་གོང་དུ་གཞག་གོའི་མཐའ་ཅན། ལེའུ་གསུམ་པ་དང་སྦྱོར། རྒྱན་དགོད་པའི་ལས་བྱང་མདའ་བརྒྱད་མ་དང་བདེ་སྟོང་དབྱེར་མེད་པ། ཆག་ཆག་གདབ་པ་དྲིན་ཆེན་དྲི་ཆུ་མ། ལེའུ་གསུམ་པ་དང་སྦྱོར། ཐིག་འདེབས་སྟོང་གསུམ་འཇིག་རྟེན་མ། དབང་ཆེན་སྒྲུབ་པའི་ཐོ་ཡིག་བླ་མའི་ཕྱག་ལེན་བཞིན་རྡོ་རྗེ་འཛིན་པ་སེང་གེའི་མཚན་ཅན་གྱིས་བཀོད་པ། ལེའུ་གསུམ་པ་དང་སྦྱོར། དམ་རྫས་རྣམ་པ་ལྔའི་རྩ་བརྒྱད་སྟོང་སྦྱར་གྱི་ངོས་འཛིན། ཀུན་མཁྱེན་དཔལ་ལྡན་སེང་གེས་མཛད་པའི་དབང་ཆོག་བདེ་ཆེན་མྱུ་གུ། ལེའུ་གསུམ་པ་དང་སྦྱོར། དབང་ཆོག་གི་ལྷན་ཐབས་ལྷ་དབང་དང་རྫས་དབང་གི་ཡི་གེ །ལེའུ་གསུམ་པ་དང་སྦྱོར། རྭ་བན་ཆོས་དཔལ་བཟང་པོས་མཛད་པའི་དབང་ཆུ་༼རྭ༽མ་དག་པའི་དྲི་མ་འཁྲུ་བྱེད། རྫོང་ཆུང་ཚེ་དབང་གི་ཡི་གེ་རྡོ་རྗེ་འཛིན་པ་དཔལ་ལྡན་སེང་གེས་བཀོད་པ། ལེའུ་གསུམ་པ་དང་སྦྱོར། ཚེའི་འགྲང་རྒྱས་ཀྱི་བཟང་ངན་བརྟག་པ། ཚེ་ཆང་གི་ཁ་ལ་བཟང་ངན་བརྟག་པ། ལེའུ་གསུམ་པ་དང་སྦྱོར། ཡང་གསང་ཁྲོས་པའི་སྒོ་ནས་འཆི་མེད་ཚེའི་དངོས་གྲུབ་སྒྲུབ་པའི་ཐབས་ནག་པོ་འགྲོ་ཤེས་ཚར་ཆེན་གྱིས་མཛད་པ། དེས་མཛད་པའི་ཚེ་སྤེལ་བ་འདིར་ཚོགས་སྐལ་ལྡན་མ་རྣམས། ལེའུ་གསུམ་པ་དང་སྦྱོར། བཞི་པ་སྒྲུབ་པའི་འཕྲིན་ལས་སྐོར་ལ། དཔལ་
ལྡན་སེང་གེས་མཛད་པའི་བརྒྱུད་འདེབས་དངོས་གྲུབ་ཀྱི་གཏེར་མཛོད། ལེའུ་གསུམ་པ་བཞི་པ་ལྔ་པ་གང་དགོས་ལ་སྦྱོར། ཚར་ཆེན་ཆོས་ཀྱི་རྒྱལ་པོས་མཛད་པའི་བརྒྱུད་འདེབས་སྨོན་ལམ་དང་བཅས་པ། རྟ་མགྲིན་དཔའ་གཅིག་ཕྱག་གཉིས་པའི་མངོན་རྟོགས་བླ་མའི་གསུང་ཇི་ལྟ་བ་བཞིན་བྲིས་པ། ལེའུ་གསུམ་པ་བཞི་པ་ལྔ་པ་གང་དགོས་ལ་སྦྱོར། ཡབ་ཡུམ་རྐྱང་སྒྲུབ་ཀྱི་མངོན་རྟོགས་བསྙེན་པ་དང་མཇུག་ཏུ་གདོན་བགེགས་སྐྲོད་པའི་སྔགས་དམིགས་དང་བཅས་པ། ཚར་ཆེན་ཆོས་ཀྱི་རྒྱལ་པོས་མཛད་པའི་ཡབ་ཡུམ་རྐྱང་སྒྲུབ་༼དྷཱི༽ཀྱི་སྒྲུབ་ཐབས་རྒྱུན་འཁྱེར་དངོས་གྲུབ་མྱུར་རྩོལ། ལེའུ་གསུམ་པ་བཞི་པ་ལྔ་པ་གང་དགོས་ལ་སྦྱོར། ཡབ་ཡུམ་རྐྱང་སྒྲུབ་ཀྱི་མངོན་རྟོགས་འཇམ་དབྱངས་མཁྱེན་བརྩེས་མཛད་པ། པདྨ་དབང་ཆེན་ཡང་གསང་ཁྲོས་པའི་འཕྲིན་ལས་སློབ་དཔོན་ཆེན་པོ་པདྨས་མཛད་པ། ལེའུ་གསུམ་པ་ནས་དྲུག་པའི་བར་དང་བཅུ་གཉིས་པ་རྣམས་གང་དགོས་ལ་སྦྱོར། འཕྲིན་ལས་ཀྱི་བསྡུས་དོན་སྤྱི་དོན་གསུམ་གྱི་སྒོ་ནས་གཏན་ལ་ཕབ་པ། ཁྲོ་བོའི་རྒྱལ་པོ་པདྨ་དབང་ཆེན་གྱི་འཕྲིན་ལས་ངག་འདོན་མཆན་བུར་བཏབ་པ་གཉགས་ཀྱི་བནྡེ་རྣམ་རྒྱལ་དཔལ་བཟང་གིས་མཛད་པ། ལེའུ་གསུམ་པ་ནས་དྲུག་པའི་བར་དང་བཅུ་གཉིས་པ་རྣམས་གང་དགོས་ལ་སྦྱོར། དུས་གསུམ་སངས་རྒྱས་ཀྱི་བསྟོད་པ་རྒྱལ་བ་ཀུན་བདག་མ། ལེའུ་གསུམ་པ་ནས་དྲུག་པའི་བར་གང་དགོས་ལ་སྦྱོར། རྟགས་བསྟོད་སློབ་དཔོན་པདྨས་མཛད་པ། ཁྱུང་བསྟོད་དབང་ཆེན་མ། ལེའུ་གསུམ་པ་ནས་དྲུག་པའི་བར་གང་དགོས་ལ་སྦྱོར། བཀྲ་ཤིས་ཚིགས་སུ་བཅད་པ་བརྒྱད་པ་ཀུན་མཁྱེན་དཔལ་ལྡན་སེང་གེས་མཛད་པ། བདུད་རྩིའི་བྱིན་བརླབ་ཀྱི་ཤོག་དྲིལ་འབྲུ་ལྔས་བྱིན་གྱིས་བརླབ་པ། ལེའུ་གསུམ་པ་དང་བཞི་པ་ལ་སྦྱོར། གཏོར་མ་བྱིན་
བརླབ་ཀྱི་ཤོག་དྲིལ་འབྲུ་གསུམ་གྱིས་བྱིན་གྱིས་བརླབ་པ། ལེའུ་གསུམ་པ་དང་བཞི་པ་ལ་སྦྱོར། རཀྟ་བྱིན་བརླབ་ཀྱི་ཤོག་དྲིལ་འབྲུ་གཅིག་གིས་བྱིན་གྱིས་བརླབ་པ། བྱིན་འབེབས་ཀྱི་དམིགས་པ། ལེའུ་གསུམ་པ་ནས་དྲུག་པའི་བར་ལ་སྦྱོར། ཚོགས་མཐའ་མའི་ལག་ལེན་ཀུན་མཁྱེན་དཔལ་ལྡན་སེང་གེས་མཛད་པ། ལེའུ་དྲུག་པ་དང་བཅུ་གཉིས་པར་སྦྱོར། དེས་མཛད་པའི་རིགས་འཛིན་༼ཕ༽སྤྱི་བསྐུལ། ལེའུ་དྲུག་པ་བདུན་པ་ལ་སྦྱོར། དེས་མཛད་པའི་༼ཕ༽དཀོན་ཅོག་སྤྱི་བསྐུལ། དེས་མཛད་པའི་ཆོས་སྐྱོང་༼ཕ༽སྤྱི་བསྐུལ། ལེའུ་དྲུག་པ་དང་བདུན་པ་ལ་སྦྱོར། དེས་མཛད་པའི་གསེར་སྐྱེམས་མདོར་བསྡུས་ཚིགས་བཅད་མ། དེས་མཛད་པའི་གསེར་སྐྱེམས་རྒྱས་པ་ཚིག་ལྷུག །ལེའུ་དྲུག་པ་དང་བདུན་པ་ལ་སྦྱོར། གཉེན་པོའི་ཕོ་ཉ་དམ་༼ཕ༽ཚིག་ཆེན་པོ་མ། ཡུངས་ཀར་གྱི་ཕོ་ཉ་ཡུངས་༼ཕ༽ཀར་རྒྱལ་པོ་མ། ལེའུ་དྲུག་པ་དང་བདུན་པ་ལ་སྦྱོར། སྒྲོལ་གྱིང་༼ཕ༽སོགས་ཁྲོ་བོའི་ཕོ་ཉ། ཡུངས་ཐུན་དབབ་པ་གསེར་སྒོང་༼ཕ༽བསྒྲིལ་འདྲ་མ། ལེའུ་དྲུག་པ་དང་བདུན་པ་ལ་སྦྱོར། ལྷ་དང་༼ཕ༽དབྲལ་བ། ཁྲག་ཟོར་དགྲ་༼ཕ༽ལ་འཕེན་པ། ལེའུ་དྲུག་པ་དང་བདུན་པ་ལ་སྦྱོར། གཏོར་༼ཕ༽སྒོ་དབྱེ་བ། གཏོར་ཟོར་༼ཕ༽བྱ་བ། ལེའུ་དྲུག་པ་དང་བདུན་པ་ལ་སྦྱོར། དབང་པོ་རབ་ཀྱི་བྲོ་དམར་༼ཕ༽ནག་གྲུ་གསུམ་མ། འབྲིང་གི་བྲོ་ནུབ་༼ཕ༽ཕྱོགས་པདྨ། ལེའུ་དྲུག་པ་དང་བདུན་པ་ལ་སྦྱོར། མཐའ་མའི་༼ཕ༽བྲོ་ཡུངས་ཀར་མ། ལེའུ་དྲུག་པ་དང་བདུན་པ་ལ་སྦྱོར། རྟའི་བརྟུལ་བཞུགས་༼ཕ༽ཀྱི་བྲོ། ལེའུ་དྲུག་པ་དང་བདུན་པ་ལ་སྦྱོར། ཟློག་པ་རྣམ་པར་རྒྱལ་བའི་ལག་ལེན་མུས་སྲད་པ་བྱམས་པ་རྡོ་རྗེ་རྒྱལ་མཚན་གྱིས་མཛད་པ། ལེའུ་དྲུག་པ་དང་བདུན་པ་ལ་སྦྱོར། ཟློག་པ་རྣམ་རྒྱལ་༼འདར༽སྟོབས་ཀྱི་མཚོན་ཆ་སངས་རྒྱས་བསྟན་པ་མ། ལེའུ་དྲུག་པ་དང་བདུན་པ་ལ་སྦྱོར། རྟ་མགྲིན་གྱི་ཡང་༼འདར༽མདོས་ནག་པོ་བསྔོ་
བ། དགྲ་བགེགས་ལ་དམོད་པ་གདབ་པ་དུག་མཚོ་ཁོལ་མ། ལེའུ་དྲུག་པ་དང་བདུན་པ་ལ་སྦྱོར། པདྨ་དབང་ཆེན་གྱི་དྲག་པོའི་སྦྱིན་སྲེག་དོན་བཅུ་གཅིག་མ། ལེའུ་བཅུ་པ་ལ་སྦྱོར། གནས་བྱང་གི་ཊིཀྐཱ་ཉི་མའི་འོད་ཟེར་ཀུན་མཁྱེན་དཔལ་ལྡན་སེང་གེས་མཛད་པ། ལེའུ་གསུམ་པ་དང་བཞི་པར་སྦྱོར། དེས་མཛད་པའི་འཕྲིན་ལས་ཀྱི་གསལ་བྱེད་རིན་པོ་ཆེའི་འཕྲེང་བ། ལེའུ་གསུམ་པ་ནས་དྲུག་པའི་བར་སྦྱོར། སྒྲུབ་ཐབས་ཀྱི་སྒོམ་ཁོག་ཆེན་པོ་༼རྭ༽རྭ་བན་ཆོས་དཔལ་བཟང་པོས་མཛད་པ་རྣམས། ལྔ་པ་སྦས་པ་མིག་འབྱེད་༼ཕ༽སྐོར་ལ། སྒྲུབ་ཐབས་སྦས་པ་མིག་འབྱེད་དང་ལས་ཚོགས་སྦས་པ་མིག་འབྱེད་གཉིས་དཔེ་ཚན་སོ་སོར་འདུག་ཀྱང་ཕྱག་ལེན་ལྟར་གོ་རིམ་དུ་བཀོད་པ་ལ། འཕྲིན་ལས་ཀྱི་ཞལ་ཁྲིགས། ལེའུ་བཞི་པར་སྦྱོར། ཚོགས་མཐའ་མའི་ཞལ་ཁྲིགས། དྲུག་པར་སྦྱོར། ཕོ་ཉ་གཏོང་བའི་ཞལ་ཁྲིགས། བདུན་པར་སྦྱོར། བཀྲ་ཤིས་ཀྱི་ཞལ་ཁྲིགས། དྲུག་པར་སྦྱོར། དབང་པོ་རབ་ཀྱི་རྟ་བྲོའི་ཞལ་ཁྲིགས། རྟ་བྲོའི་དམིགས་རིམ་གྱི་ཞལ་ཁྲིགས། དྲུག་པར་སྦྱོར། དབང་གི་ཞལ་ཁྲིགས། གསུམ་པར་སྦྱོར། མངོན་རྟོགས་ཀྱི་ཞལ་ཁྲིགས་བདུད་རྩིའི་ཆར་རྒྱུན། གསུམ་པ་དང་བཞི་པར་སྦྱོར། སྒྲུབ་པའི་ཞལ་ཁྲིགས་རྟ་བདུན་ཚ་ཟེར། གསུམ་པ་དང་བཞི་པ་ལྔ་པ་ལ་སྦྱོར། བསྙེན་སྒྲུབ་ཀྱི་ཞལ་ཁྲིགས། གནས་བཙལ་བའི་ཞལ་ཁྲིགས། གསུམ་པར་སྦྱོར། ལྕགས་མཁར་འབྲུབ་ཁུང་གི་ཞལ་ཁྲིགས། བདུན་པར་སྦྱོར། རྟེན་བཅའ་བ་ལིངྒའི་ཞལ་ཁྲིགས། འགུགས་པའི་ཞལ་ཁྲིགས་ཉི་ཟེར་ལྕགས་ཀྱུ། བདུན་པ་དང་བཅུ་གཉིས་པར་སྦྱོར། མནན་པའི་ཞལ་ཁྲིགས་ཆུ་སྲིན་ལྟོ་བ། བརྒྱད་པར་སྦྱོར། དྲག་སྔགས་བདུན་པའི་ཞལ་ཁྲིགས་སྤུ་གྲི་མེ་འབར། ལེའུ་བརྒྱད་པར་སྦྱོར། ཟློག་པའི་ཞལ་ཁྲིགས་གནམ་
ལྕགས་འབར་བ། སྐྱིན་ཐང་ཆུ་འཁྱགས་ཀྱི་ཞལ་ཁྲིགས། དགུ་པར་སྦྱོར། གནམ་ཐོག་གི་ཞལ་ཁྲིགས། གདོན་ཆེན་གཟིར་བའི་ཞལ་ཁྲིགས། བཅུ་པར་སྦྱོར། མེ་དཔུང་འབར་བ་མཛེ་ནད་འཇོམས་པའི་ཞལ་ཁྲིགས། རལ་གྲི་འབར་བ་ཆུང་སྲི་གསད་པའི་ཞལ་ཁྲིགས། བཅུ་པར་སྦྱོར། ཕྱུགས་ནད་གཅོད་པའི་ཞལ་ཁྲིགས། སྦྱིན་སྲེག་གི་ཞལ་ཁྲིགས་འཁོར་བའི་རྩ་ཚིག །བཅུ་པར་སྦྱོར། དངོས་གྲུབ་བསྡུ་བའི་ཞལ་ཁྲིགས་བདུད་རྩིའི་རྒྱ་མཚོ། དྲུག་པར་སྦྱོར། སྦྱིན་སྲེག་གི་ཞལ་ཁྲིགས་མེའི་སྦྱོར་བ། བཅུ་པར་སྦྱོར། གྱིང་ལྔ་དྲིལ་བའི་དྲག་སྔགས་ཞལ་ཁྲིགས། བཅུ་གཅིག་པར་སྦྱོར། ཤེལ་གྱིང་དཀར་པོའི་དྲག་སྔགས་ཞལ་ཁྲིགས། དེའི་ཆོ་འཕྲུལ་ཞལ་ཁྲིགས། བཅུ་གཅིག་པར་སྦྱོར། ཚངས་པ་དུང་ཐོད་ཅན་གྱི་དྲག་སྔགས་ཞལ་ཁྲིགས། དེའི་ཆོ་འཕྲུལ་ཞལ་ཁྲིགས། བཅུ་གཅིག་པར་སྦྱོར། རྡོ་རྗེ་ལེགས་པའི་དྲག་སྔགས་ཞལ་ཁྲིགས། དེའི་ཆོ་འཕྲུལ་ཞལ་ཁྲིགས། བཅུ་གཅིག་པར་སྦྱོར། རི་ནག་སྤུངས་པའི་དྲག་སྔགས་ཞལ་ཁྲིགས། དེའི་ཆོ་འཕྲུལ་ཞལ་ཁྲིགས། བཅུ་གཅིག་པར་སྦྱོར། ཡབ་ཤུད་དམར་པོའི་དྲག་སྔགས་ཞལ་ཁྲིགས། དེའི་ཆོ་འཕྲུལ་ཞལ་ཁྲིགས། གྱིང་ལྔ་མཆོད་པའི་ཞལ་ཁྲིགས། བཅུ་གཅིག་པར་སྦྱོར། གཟའ་རྒོད་ཀྱི་དྲག་སྔགས་ཞལ་ཁྲིགས། བཅུ་གཅིག་པར་སྦྱོར། དེའི་ཆོ་འཕྲུལ་ཞལ་ཁྲིགས། བཅུ་གཅིག་པར་སྦྱོར། དེའི་མཆོད་པའི་ཞལ་ཁྲིགས། དབང་སྡུད་འབྲུབ་ཁུང་གི་ཞལ་ཁྲིགས། བཅུ་གཅིག་པར་སྦྱོར། འགུགས་པ་ཏིང་འཛིན་གྱི་ཞལ་ཁྲིགས། གནོད་བྱེད་བགེགས་དབང་དུ་བསྡུ་བའི་ཞལ་ཁྲིགས། བཅུ་གཅིག་པར་སྦྱོར། གནོད་བྱེད་མི་དབང་དུ་བསྡུ་བའི་ཞལ་ཁྲིགས། ཡུལ་ཁམས་དབང་དུ་བསྡུ་བའི་ཞལ་ཁྲིགས། བཅུ་གཅིག་པར་སྦྱོར། ཟས་ནོར་དབང་དུ་བསྡུ་བའི་ཞལ་
ཁྲིགས། ལས་མཐའ་སྦྱིན་སྲེག་གི་ཞལ་ཁྲིགས། བཅུ་གཅིག་པར་སྦྱོར། དགྲ་ལྐུགས་པར་བྱེད་པའི་ཞལ་ཁྲིགས། བརྒྱད་པར་སྦྱོར། གཏེར་བདག་བདུད་ཀྱི་ཞལ་ཁྲིགས། གཏེར་བདག་དྲག་བཙན་གྱི་ཞལ་ཁྲིགས། གཏེར་བདག་ཀླུ་ལྕམ་གྱི་ཞལ་ཁྲིགས། མི་ཕྱུགས་ཐེམས་ཀྱི་ཞལ་ཁྲིགས་ཏེ་ལྔ་བཅུ་རྩ་གསུམ་རྣམས། དྲུག་པ་བདེ་གཤེགས་སྤྱི་དྲིལ་གྱི་སྐོར་ལ། རྟ་མཆོག་བདེ་གཤེགས་འདུས་པའི་འཕྲིན་ལས་ཀྱི་སྒོམ་རིམ་༼ཕ༽རྫོགས་བྱང་གི་མཐའ་ཅན། བྱིན་རླབས་དབང་བསྐུར་གྱི་ཆོ་ག་རྫོགས་བྱང་གི་མཐའ་ཅན། བྲག་དམར་འོམ་བུའི་ཚལ་དུ་གུ་རུ་ལ་རྗེས་ཞུས་པའི་ལོ་རྒྱུས་ལས་འཕྲོས་ཏེ་བསྲུང་བ་བདེ་གཤེགས་ཐམས་ཅད་ཀྱི་ནུས་པ་༼ཕ༽༼གནས༽གཅིག་དྲིལ་སྡེ་བརྒྱད་བཅུད་བོར་དྲེགས་པ་ཀུན་སྒྲོལ་ཤིན་ཏུ་གསང་བའི་མཐའ་ཅན། རླུང་མེའི་ས་བོན་ལ་བརྟེན་པའི་དམིགས་རིམ་དང་སེང་ལྡིང་༼ཕ༽༼གནས༽གི་ཕུར་པས་ཆུ་དང་ཡུངས་དཀར་ནག་ཐལ་ཆེན་གྱིས་སེར་བ་བསྲུང་གཏོར་༼ཕ༽༼གནས༽མའི་ལས། གཉེན་པོའི་རྫས་ལུས་ལ་༼གནས༽བཅངས་པས་ཀླུ་འགྲོས་ཤིང་སྡངས་བྲེད་བརྒྱལ་བར་འགྱུར་བ། བསྙེན་སྒྲུབ་ལས་གསུམ་གྱི་རྫས་བསྟན་པ། ཕུར་པ་སྦྱིན་སྲེག་མནན་པ་གསུམ་གྱི་སྒོ་ནས་ལས་ཀྱི་མཇུག་བསྡུ་བ། སློབ་དཔོན་པདྨ་འབྱུང་གནས་ཀྱིས་ལྷ་སྲས་ལ་གཏད་ནས་གཏེར་དུ་སྦས་ཞིང་ལས་ཅན་ལ་ཕྲད་ཤོག་གི་མཐའ་ཅན། བསྲུང་ཟློག་གསོ་བའི་ལས་སྦྱོར་སློབ་དཔོན་པདྨ་འབྱུང་གནས་ཀྱིས་ཁྲི་སྲོང་ལྡེ་བཙན་གྱི་ཕྱག་ཏུ་གཏད་པའི་མཐའ་ཅན། བདེ་གཤེགས་འདུས་པའི་དྲག་སྔགས་མན་ངག་བཅུད་ཀྱི་ཉིང་ཁུ་རྫོགས་བྱང་གི་མཐའ་
ཅན། བདེ་གཤེགས་འདུས་པའི་ལས་རིམ་རྣམ་བརྒྱད་ལ་བསྙེན་པ། སྒྲིབ་པ་བསྲེག་པ། ཆོས་སྐྱོང་བསྐུལ་བ། སྡེ་བརྒྱད་བཀོལ་བ། ཀླུ་གཉན་གདུལ་བ། དགྲ་བགེགས་སྒྲོལ་བ། བགེགས་དཔུང་གཞོམ་པ། གཏོར་མ་དབུལ་པ་རྣམས། ཡང་དྲག་སྔགས་ལ་བསྙེན་པ་སྐྱེལ་བའི་དོན་སྒྲུབ་རྟགས་དངོས་གྲུབ་འགྲུབ་ཚུལ་ལས་ཅན་ལ་ཕྲད་ཤོག་རྫོགས་བྱང་གི་མཐའ་ཅན། དམ་ཅན་སྲོག་འཁོར་ལ་བརྟེན་ནས་ཆོས་སྐྱོང་བསྐུལ་ཏེ་དགྲ་བོ་སྒྲོལ་བ། གནད་འབེབས་ཀྱི་འཁོར་ལོ་ལ་བརྟེན་ནས་སྡེ་བརྒྱད་བྲན་དུ་བསྐུལ་བ། འཁོར་ལོ་ལ་བརྟེན་ནས་རིགས་བཞིའི་ཀླུ་གདོན་གདུལ་བ། འཁོར་ལོ་ལ་བརྟེན་ནས་དགྲ་བགེགས་དམ་སྲི་གདུལ་བ། འཁོར་ལོ་ལ་བརྟེན་ནས་རྦོད་གཏོང་ཟློག་པ། རང་བསྲུང་འཁོར་ལོ། ལྕགས་སམ་སེང་ལྡེང་གི་ཕུར་པ་ལ་བརྟེན་ནས་སྲིའུ་གསོ་བ། འཁོར་ལོ་ལ་བརྟེན་ནས་སྨྱོ་འབོག་གདུལ་བ། གུ་གུལ་དང་སྲིན་ལག་བསྡམས་པའི་འཁྲུལ་འཁོར་གྱིས་འདྲེ་ངན་གདུལ་བ། འཁོར་ལོ་དང་ལ་ཆའི་སྦལ་པས་ཞོ་ཆང་བསྲུང་བ། མུ་ཟི་བཅུ་པ་དང་གྷི་ཧཾ་དགུ་སྦྱོར་གྱིས་མཛེ་ལྷོག་སོགས་གདོན་རིམས་བསྲུང་བ་རྣམས། བདུན་པ་ཐུན་མོང་ལས་ཕྲན་ཤོག་དྲིལ་གྱི་སྐོར་ལ། ཆུའི་བཅུད་ལེན། འདི་གཙོ་བོར་བསྙེན་སྒྲུབ་དང་མཆོག་སྒྲུབ་ལ་སྦྱོར། ནས་ཕྱེའི་དཀའ་ཐུབ། གཏོར་མའི་ལས་ཚོགས་ལ་༼ཕ༽དངོས་གྲུབ་སྒྲུབ་པ། དགྲ་བགེགས་སྒྲུབ་པ། ཟློག་པ། མནན་པ། ཟོར་དུ་བྱ་བ། འདི་ཡན་སྒྲུབ་ཐབས་ལ་སྦྱོར། སྦྱིན་སྲེག་ཏུ་བྱ་བ། བྱབ་པར་བྱེད་པ། དབང་བསྐུར་དུ་བྱེད་པ། དངོས་གྲུབ་ཏུ་སྒྲུབ་པ། ཚེ་སྒྲུབ་པ། འདི་ཡན་སྒྲུབ་ཆེན་དང་ཚེ་སྒྲུབ་ལ་སྦྱོར། རིགས་བརྒྱུད་སྒྲུབ་པ། སྲིའུ་གསོ་བ། ནོར་དུ་སྒྲུབ་པ། ལྷ་འདྲེའི་མི་གསུམ་དབང་དུ་དབྱེ། འབྱུང་པོ་སྡུད་པ། སེར་བ་ཟློག་པ།
ཆུ་མེ་རིམས་སོགས་གང་གནོད་པར་བརྡེག་པ་སྟེ་བཅུ་བདུན། འདི་ཡན་གང་དགོས་སུ་ལེན་ནའང་གཙོ་བོར་སྒྲུབ་ཐབས་ལ་སྦྱོར། ལས་ཐོར་བུའི་སྐོར་༼ཕ༽ལ་འཁོར་ལོ་བསྲུང་བ། ལེའུ་བཅུ་པར་སྦྱོར། བསྙེན་ཚད། ལྔ་པར་སྦྱོར། གདོན་བརྟག་པ། བཅུ་པར་སྦྱོར། སྔགས་ཆུ། བསྲུང་སྐུད། བཅུ་པར་སྦྱོར། ཆུ་དང་བྱེ་མས་བསྲུང་བ་ནད་གདོན། བཅུ་པར་སྦྱོར། མི་མ་ཡིན་མནན་པ། བརྒྱད་པར་སྦྱོར། མིག་མཐོང་། དྲུག་པར་སྦྱོར། འཁོར་ལོ་ཁ་སྦྱོར་གྱི་བགེགས་གདུལ་བ། བཅུ་པར་སྦྱོར། རྒྱལ་འགོང་གདུལ་བ། བདུད་བཞི་གདུལ་བ། བཅུ་པར་སྦྱོར། ཞི་བས་མི་ཐུལ་ན་གཟིར་བ། བཅུ་པར་སྦྱོར། མནན་པ། བཅུ་པར་སྦྱོར། བྱུག་པ། བཅུ་པར་སྦྱོར། མཛེ་བརྟག་པ། བཅུ་པར་སྦྱོར། ཆུང་སྲི་གསད་པ། ཆུང་སྲི་ཁང་བུ་གཞུག་པ། བཅུ་པར་སྦྱོར། སྲིའུ་གསོ་བ། བཅུ་པར་སྦྱོར། གཤིན་པོའི་འདྲེ་རུ་མི་ཡོང་། བཅུ་པར་སྦྱོར། མཁའ་འགྲོ་མའི་བྱས་པ་བཤིག་པའི་ཕྲ་མེན་འཛུལ་ཆོག །བཅུ་པར་སྦྱོར། ལམ་བསྲུང་ལྕགས་ཁང་མ་རྣམས། ཞར་བྱུང་སེར་བསྲུང་བཀའ་རྒྱ་མ། དགུ་པར་སྦྱོར། མཐོ་ཕུར་གྱི་ཞལ་གདམས་བཀའ་རྒྱ་མ། སེར་བ་འོང་མི་འོང་། དགུ་པར་སྦྱོར། སེར་ལམ་གཅོད་པ། ཐུན་ཟོར་གཏའ་མའི་ལས་ཀྱིས་སེར་༼ཕ༽བ་དབབ་པ་ལ། ཀླུ་གནད་ལ་བོར་བས་དབབ་པ། སྦྱིན་སྲེག །ཐབས་གཞོབ། སེར་གཏའ། དབྱུག་པ། གཏོར་མ། གློ་བུར་དྲག་ཤུལ། རྫས་རྒོད། ཐོད་སྐམ། ཐོད་གཤེར། གཅེར་བུ་གཡང་བཞི། གྲོད་པས་དབབ་པ་དང་བཅུ་གཉིས་བཻ་རོའི་ཞལ་ཁྲིགས། དགུ་པར་སྦྱོར། རྒྱུད་དུ་གབ་པའི་སྔགས་ཀྱི་ཤམ་བུ་སྦྱོར་ཚུལ་མཛེ་དང་སྲིའུ་བསྲུང་བ་སོགས་ཞར་ལ་བསྟན་པ་རྒྱུད་ལྷ་སར་བསྒྱུར་ནས། ལྔ་པར་སྦྱོར། རྗེ་ལ་གཏད་པ་བཻ་རོའི་ཞལ་ཁྲིགས་ཟབ་པའི་གནད། ཁྱད་པར་གསད་ཐབས་གྱིང་ལྔ་སྲོག་གཅོད་ཀྱི་མན་ངག །བཅུ་གཅིག་པར་སྦྱོར། མན་ངག་འདི་
གཉིས་ལ་རྒྱ་གསུམ་བཏབ་པའི་མན་ངག་མངའ་བདག་གིས་བཻ་རོ་ལ་དུང་གཡས་འཁྱིལ་སོགས་ཕུལ་སྐད་དོ། །གྱིང་ལྔ་གཟའ་གདོང་གི་མངོན་༼ཕ༽༼འདར༽རྟོགས་ཡིག་རྙིང་། བཅུ་གཅིག་པར་སྦྱོར། དེའི་མདོས།༼ཕ༽༼འདར༽ཆོག །གྱིང་ལྔ་གཟའ་གདོང་གི་གཏོར་འབུལ། བཅུ་གཅིག་པར་སྦྱོར། འཕྲིན་ལས་མྱུར་འགྲུབ་ཚར་ཆེན་གྱིས་མཛད་པ། བཅུ་གཅིག་པར་སྦྱོར། དེས་མཛད་པའི་གཏོར་མའི་བཅའ་ཐབས་དང་ཕན་ཡོན། བཅུ་གཅིག་པར་སྦྱོར། གྱིང་ལྔ་གཟའ་གདོང་གི་རྗེས་གནང་གི་ཡི་གེ་རྣམས། བཅུ་གཅིག་པར་སྦྱོར། བརྒྱད་པ་མཆོག་ལམ་སྐོར་ལ། བུམ་དབང་གི་ལམ་ལྷ་༼ཕ༽འཁྲིད་སེམས་བཟུང་གི་ཤོག་དྲིལ། འདི་མན་ལེའུ་གསུམ་པའི་དབང་བགྲོད་དམ་ལྡན་སློབ་དཔོན་བཀུར༔ བརྩོན་འགྲུས་ལྡན་པས་བརྩེ་གཅིག་སྒྲུབ༔ ཅེས་པའི་ཤུགས་བསྟན་གྱི་དགོངས་པར་སྦྱོར་རོ། །ལྷ་འགྲུབ་མི་འགྲུབ་བརྟག་༼ཕ༽པའི་ཤོག་དྲིལ། གསང་དབང་དང་འབྲེལ་པ་དྲོད་ཀྱི་གདམས་པ་གཏུམ་མོའི་དམིགས་སྐོར་བཅོ་བརྒྱད། ཤེར་དབང་ཞལ་ལས་ཤེས་པར་བྱ། བཞི་པ་འབྲེལ་བ་རྟ་སྐད་ཐེངས་གཅིག་༼ཕ༽མའི་དགོངས་པ་དབུ་གཙུག་སྤྲུལ་པ་མ། དབང་བཞི་ཐུན་མོང་གི་ལམ་དང་འབྲེལ་པ་བསྐྱེད་༼ཕ༽རྫོགས་ཟུང་འཇུག་གི་ཤོག་དྲིལ། དངོས་གྲུབ་༼ཕ༽སྤྱོད་པ། དུག་གསུམ་༼ཕ༽ལམ་སློང་། སྡོམ་པ་༼ཕ༽དམ་ཚིག །དངོས་༼ཕ༽གྲུབ། ཡང་དག་ལྟ་བ་རྣམས། ༼ཕ༽ཀྱི་ཤོག་དྲིལ། པདྨ་དབང་ཆེན་གྱི་རྫོགས་རིམ་ཡེ་ཤེས་གསང་ལམ་ཟབ་མོ། རྫོགས་རིམ་པདྨ་གསང་ལམ་གྱི་ཉམས་ལེན་གུ་རུ་ཆོས་རྒྱལ་ལ་གསུངས་པ། དཔལ་རྟ་མགྲིན་གྱི་དབང་བཞིའི་འཁྲིད་འགོར་བློ་གྲོས་མཉམ་མེད་དང་ཞེས་ཡོད་པ་བླ་མ་མཁས་ལ་བཟོད་པར་མཛོད་ཅེས་པའི་མཐའ་ཅན་རྭ་བན་ཆོས་དཔལ་བཟང་པོའི་ཟིན་བྲིས་རྣམས་ལེགས་པར་ཐོབ་
པའི་གྱིང་ལྔ་གཟའ་གདོང་གི་དབང་ལུང་ལ། བདེ་གཤེགས་སྤྱི་དྲིལ་གྱི་གནས་ཀྱི་རྟགས་མེད་པ་རྣམས་དང་ས་བཅད་ལྔ་པ་ཡོངས་རྫོགས། རྭ། དྷཱི། འདར་གྱི་རྟགས་ཡོད་པ་རྣམས་མ་གཏོགས་པའི་དབང་ལུང་ཡོངས་རྫོགས་ཀྱི་བརྒྱུད་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་པདྨ་དབང་ཆེན། སྤྲུལ་སྐུ་པདྨ་འབྱུང་གནས། ལོ་ཆེན་བཻ་རོ་ཙ་ན། མངའ་བདག་ཁྲི་སྲོང་ལྡེ་བཙན། གཏེར་སྟོན་རྐྱང་པོ་གྲགས་པ་དབང་ཕྱུག །སུམ་པ་དབང་ཕྱུག་ཚུལ་ཁྲིམས། འབྲེ་ཤེས་རབ་བླ་མ། འབྲུག་ཚར་གྱི་ཞང་སྟོན་གཟི་བརྗིད་འབར། གསང་མཚན་དྲི་མེད་ཟླ་ཤར། རྟ་ནག་གི་བླ་མ་རྒྱ། དཔལ་ལྡན་གྲུབ་ཐོབ་འདར་ཕྱ་རུ་བ། ཆོས་རྒྱལ་བོ་དོང་རིན་ཅེན། ཉན་ཆེན་བསོད་ནམས་བརྟན་པ། བྲག་རམ་པ་ཆོས་རྒྱལ་དཔལ་བཟང་། ཀུན་མཁྱེན་དཔལ་ལྡན་སེང་གེ །རྣམ་གྲོལ་བ་རིན་ཅེན་བཀྲ་ཤིས། རྟོགས་ལྡན་ཡོན་ཏན་མགོན་པོ། བླ་ཆེན་ཆོས་དཔལ་བཟང་པོ། མུས་སྲས་པ་རྡོ་རྗེ་རྒྱལ་མཚན། མུས་ཆེན་རྣམ་རྒྱལ་བཟང་པོ། འཁྲུལ་ཞིག་དཀོན་ཅོག་བཟང་པོ། རྡོ་རྗེ་འཆང་ཚར་པ་ཆོས་རྗེ། འཇམ་དབྱངས་མཁྱེན་བརྩེའི་དབང་ཕྱུག །སྔགས་འཆང་བསོད་ནམས་ཆོས་འཕེལ། རྡོ་རྗེ་འཆང་དབང་ཕྱུག་རབ་བརྟན། རིགས་བརྒྱའི་ཁྱབ་བདག་མགོན་པོ་བསོད་ནམས་མཆོག་ལྡན། ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ། དེས་བདག་ཟ་ཧོར་བནྡེ་ལའོ། །ས་བཅད་ལྔ་པའི་བརྒྱུད་པ་ནི། འདི་སྐོར་མངའ་བདག་གཙོ་ཆེ་བ་ཙམ་མ་གཏོགས་གཏེར་སྟོན་གསུམ་ཚོགས་ལ་ཡང་བྱུང་བ་སྦས་པ་མིག་འབྱེད་གཏེར་དུ་སྦས་ཚུལ་གྱི་ལོ་རྒྱུས་ཀྱིས་ཤེས། མངའ་བདག་ཡན་གོང་ལྟར་ལ་གཏེར་སྟོན་ཉང་རལ། ཤེ་མ་འོད་འབྱུང་། གྲུབ་ཐོབ་འདར་ཕྱར། བརྩོན་འགྲུས་རྡོ་རྗེ། ཉན་ཆེན་པ། ཆོས་རྒྱལ་དཔལ་བཟང་། ཉེ་གནས་ཆོས་ཀྱི་རྒྱལ་མཚན། བླ་མ་བློ་གྲོས་སེང་གེ །བླ་མ་སིདྷི་སིངྷ། བླ་ཆེན་ཆོས་དཔལ་བ་མན་གོང་ལྟར་
རྭའི་རྟགས་ཅན་གྱི་བརྒྱུད་པ་ནི། བླ་ཆེན་ནས། ཆོས་རྗེ་ནོར་བུ་ཕུན་ཚོགས། སྔགས་འཆང་སངས་རྒྱས་གྲགས་པ། ཚར་ཆེན་ཆོས་ཀྱི་རྒྱལ་པོ་མན་གོང་ལྟར་རོ། །དྷཱིའི་རྟགས་ཅན་གྱི་བརྒྱུད་པ་ནི། འཇམ་དབྱངས་མཁྱེན་བརྩེ་ནས། འཕགས་མཆོག་བྱམས་པ་སྐལ་བཟང་། རྗེ་དབང་རབ་མན་འདྲ། ཡང་ཉེ་བརྒྱུད་དུ་བྱེད་ན། སློབ་དཔོན་པདྨ་ལ་གྲུབ་ཐོབ་འདར་ཕྱར་གྱིས་དངོས་སུ་གསན་པས། སློབ་དཔོན་ཆེན་པོ་ནས་གྲུབ་ཐོབ་འདར་ཕྱར་གྱིས་ཀྱང་འཐུས། ཡང་དབང་དང་ལུང་ཕའི་རྟགས་ཡོད་པ་རྣམས་ཀྱི་བརྒྱུད་པ་ནི། ཀུན་མཁྱེན་དཔལ་ལྡན་སེང་གེ་ཡན་གོང་ལྟར་ལ། ཆོས་རྗེ་བསོད་ནམས་བཟང་པོ། རྟོགས་ལྡན་ཡོན་ཏན་མགོན་པོ། རྗེ་ནམ་མཁའི་རྣལ་འབྱོར། མུས་སྲད་པ་བློ་གྲོས་རིན་ཅེན་སེང་གེ །གཉལ་སྟོན་དཔལ་འབྱོར་ལྷུན་གྲུབ། རྗེ་བཙུན་ཆོས་ཀྱི་རྒྱལ་མཚན། ཆོས་རྗེ་བདེ་ལེགས་ཉི་མ། ཤར་པ་ནམ་མཁའ་རྒྱལ་མཚན། ཆོས་རྗེ་རིན་ཅེན་བཤེས་གཉེན། བླ་མ་འཕྲིན་ལས་ལྷུན་གྲུབ། རྡོ་རྗེ་འཆང་ཕ་བོང་ཁ་པ་དཔལ་འབྱོར་ལྷུན་གྲུབ། དེས་བདག་ཟ་ཧོར་བནྡེ་ལའོ། །ཡང་ན་རྗེ་བཙུན་ཆོས་རྒྱན་ནས། ཡང་དགོན་སྤྱན་སྔ་ངག་དབང་རྒྱ་མཚོ། བླ་མ་འཕྲིན་ལས་ལྷུན་གྲུབ་མན་འདྲ། བརྒྱུད་ལུགས་འདིའི་སྦས་པ་མིག་འབྱེད་ཀྱང་ཆོས་རྒྱལ་དཔལ་བཟང་ནས་དཔལ་ལྡན་སེང་གེ་ལ་བརྒྱུད་པས་ཆོག་གོ །རྟ་མགྲིན་བདེ་གཤེགས་གཅིག་དྲིལ་གྱི་དབང་ལུང་ཡོངས་རྫོགས་དང་འདར་གྱི་རྟགས་ཅན་གྱིང་ལྔ་གཟའ་གདོང་གི་སྲོག་གཏད་ཀྱི་བརྒྱུད་པ་ནི། མུས་སྲད་པ་རྡོ་རྗེ་རྒྱལ་མཚན་ཡན་གོང་ལྟར་ལ། དེ་ནས་མཉམ་མེད་དཀོན་ཅོག་དཔལ་བཟང་། ནུབ་དགོན་པ་བྱམས་པ་ཆོས་ཀྱི་རྒྱལ་མཚན། ཐུགས་སྲས་བྱམས་པ་བློ་གྲོས་རྒྱལ་མཚན། མཁས་གྲུབ་བྱམས་པ་བཟང་པོ། ནུབ་དགོན་སྤྲུལ་སྐུ་ཤཱཀྱ་རྒྱལ་མཚན། འདར་ནག་རྒྱལ་སྲས་བདེ་བ་བཟང་པོ། དེས་
བདག་ལའོ། གྱིང་ལྔ་གཟའ་གདོང་གི་སྲོག་གཏད་བརྒྱུད་ལུགས་གཅིག་ནི། འཁྲུལ་ཞིག་དཀོན་ཅོག་བཟང་པོ་ཡན་གོང་ལྟར་ལ། དེ་ནས་ནུབ་དགོན་པ་ཉི་ཟླ་བཟང་པོ། སྔགས་འཆང་ཀུན་བཟང་ཉི་མ། ཟུར་ཆེན་ངག་དབང་ཕུན་ཚོགས། ཁྱབ་བདག་ཆོས་དབྱིངས་རང་གྲོལ། དེས་བདག་ལའོ། །ས་བཅུའི་དབང་ཕྱུག་འདར་ཕྱ་རུ་བ་རིན་ཅེན་བཟང་པོ་ལ་ཁྱབ་འཇུག་གིས་དངོས་སུ་ཕུལ་བའི་ལས་ཅི་བཅོལ་ཉན། མི་ཟློག །དུག་མི་ཕོག །ནད་པ་མྱུར་དུ་བསོས་པ་སོགས་ཕན་ཡོན་ཤིན་ཏུ་ཆེ་བའི་ཆོས་སྐྱོང་གཟའ་མཆོག་ཆེན་པོའི་གཏོར་དབང་ཟབ་ཁྱད་ཅན། དེ་ལ་དགོས་པའི་ཁྱབ་འཇུག་གཟའི་སྤུ་གྲི་ནང་ལྟར་བཀང་བའི་ལས་རིམ་ལ་སྤྱན་འདྲེན་གདུག་པ་ཚར་གཅོད། བཞུགས་གསོལ་སྲིན་ཁྲོས་མ། ཕྱག་འཚལ་འཇིག་རྟེན་མ། གཏོར་བསྔོ་ཕྱག་རྡོར་མ། སྨན་མཆོད་རྩ་བརྒྱད་མ། དམ་བསྲེ་འབྲུ་གསུམ་མ། མཆོད་བཀང་རཱ་ཧུ་ལ། བསྐུལ་ནམ་མཁའ་གཡུ་འོད། ལས་མཁན་བསྐུལ་བ་འཇིག་རྟེན་མཐུ་ཆེན། རྒྱུན་གྱི་གཏོར་བསྔོ་པདྨའི་རྒྱལ་པོ་མ་གཏོར་སྔགས་དང་བཅས་པ་ཐོབ་པའི་བརྒྱུད་པ་ནི། གྲུབ་པའི་དབང་ཕྱུག་འདར་ཕྱ་རུ་བ་རིན་ཅེན་བཟང་པོ། བོ་དོང་བརྩོན་འགྲུས་རྡོ་རྗེ། ཉན་ཆེན་བསོད་ནམས་བརྟན་པ། མཁན་ཆེན་ཆོས་རྒྱལ་དཔལ་བཟང་། ཀུན་མཁྱེན་དཔལ་ལྡན་སེང་གེ །དཔལ་ལྡན་རཏྣ་ཀཱིརྟི། གུ་རུ་དུག་གསུམ་ནད་སེལ། སྔགས་འཆང་ཆོས་སྐྱོང་མགོན་ནེ། ཡར་འདྲེན་ནམ་མཁའི་མཚན་ཅན། རིག་འཛིན་ཚེ་དབང་རྒྱལ་པོ། རིག་འཛིན་གྲགས་པ་རྡོ་རྗེ། བླ་མ་གུ་རུ་རིན་ཅེན། རྒྱལ་སྲས་བདེ་བ་བཟང་པོ་རིག་པ་ཡེ་ཤེས། དེས་བདག་ལའོ། །ནགས་རྒྱལ་ལྷ་ཆུའི་བྲག་ཕུག་གོང་མར་གྲུབ་ཆེན་འདར་ཕྱ་རུ་བར་རཱ་ཧུ་ལས་མཛེས་པའི་གཟུགས་བསྟན་ནས་སྲོག་གི་སྙིང་པོ་ཕུལ་བའི་གསེར་ཆོས་འཁོར་ལོའི་
གདམས་པ་ལ་ནང་གསེས་ཀྱི་བརྟག་པ། བསྲུང་འཁོར་རྒྱས་འབྲིང་བསྡུས་གསུམ་རབ་གནས་དང་བཅས་པ། རྒྱབ་བཅོས། སྨན་བཅོས། སྤུར་ཆོག །ཡིག་ཆུང་སྐོར་ལ་གསེར་ཆོས་མ་གཏོགས་པའི་འདི་ལ་ཕྱག་ལེན་ལས་ལུང་རྒྱུན་མེད། དོན་སྣོད་གང་ལ་བབས་ཀྱི་བཅོས། རང་བསྲུང་། སྤུ་གྲི་གློག་དམར། ལྐུགས་པ་ཁ་འབྱེད་གསུམ། གཟའི་རྦོད་གཏོང་བསྲུང་བ། སྤང་བྱ། བསྡུ་སྨན། སློང་སྨན། ཞུགས་ལྷུང་རྒྱབ་གསུམ་གྱི་དབྱེ་བ། རང་ལ་བརྟག་པ་དང་རྫས་ཀྱི་བརྟག་པ་རྣམས་ཀྱི་ལུང་དང་ཕྱག་ལེན་དམར་འཁྲིད་དུ་ཐོབ་པའི་བརྒྱུད་པ་ནི། གྲུབ་ཐོབ་ཆེན་པོ་འདར་ཕྱར། འདར་མགོན་པ་ཆོས་ཀྱི་འབྱུང་གནས། གུ་རུ་དུག་གསུམ་ནད་སེལ། མཚུངས་མེད་བསོད་ནམས་ཡེ་ཤེས། མཁས་གྲུབ་གཞོན་ནུ་བཟང་པོ། སྔགས་འཆང་ཆོས་སྐྱོང་མགོན་ནེ། ཡར་འདྲེན་ནམ་མཁའི་མཚན་ཅན། འདར་སྟོན་གུ་རུ་རིན་ཅེན། རིག་འཛིན་ཚེ་དབང་རྒྱལ་པོ། རིག་འཛིན་གྲགས་པ་རྡོ་རྗེ། བླ་མ་གུ་རུ་རིན་ཅེན། འདར་ནག་བདེ་བ་བཟང་པོའམ་ཡི་དམ་ལྷས་ལུང་བསྟན་པ་རིག་པ་ཡེ་ཤེས། དེས་བདག་ཟ་ཧོར་བནྡེ་ལའོ། །ཀུན་མཁྱེན་མུས་སྲད་པ་དཔལ་ལྡན་སེང་གེ་ལ་ཁྱབ་འཇུག་གིས་དངོས་སུ་ཕུལ་བའི་སེར་བསྲུང་བསམ་གཏན་ཉལ་ཆོག་ལ་སྨར་ཟོང་གཉིས་ཡོད་པའི་སྨར་དང་ཐོག་བསྲུང་འབྲུག་སྐད་གཅོག་པ་ཟབ་ཁྱད་ཅན་གྱི་བརྒྱུད་པ་ནི། ཀུན་མཁྱེན་དཔལ་ལྡན་སེང་གེ །དཔལ་ལྡན་རཏྣ་ཀཱིརྟི། གུ་རུ་དུག་གསུམ་ནད་སེལ། མཚུངས་མེད་རིན་ཅེན་བཀྲ་ཤིས། རྟོགས་ལྡན་ཡོན་ཏན་མགོན་པོ། རྭ་ཆེན་ཆོས་དཔལ་བཟང་པོ། གབ་ཆག་པ་རྡོ་རྗེ་རྒྱལ་མཚན། མཐུ་ཆེན་དཀོན་ཅོག་བཟང་པོ། མཉམ་མེད་ནུབ་དགོན་པ། བྱམས་པ་བློ་གྲོས་རྒྱལ་མཚན། རྗེ་བྱམས་པ་བཟང་པོ་ནུབ་དགོན་སྤྲུལ་སྐུ། འདར་ནག་བདེ་བ་བཟང་
པོ། དེས་བདག་ལའོ། །གཟའི་རྗེས་གཅོད་ལ། རྫས་སྔགས་ཆོག་གསུམ་གྱིས་གཅོད་པ། ཡུལ་དང་གང་ཟག་ལ་གཟའ་ལམ་གཅད་པ། དེ་དག་རྣམས་ཀྱི་སྟེང་འོག་གི་འཁོར་ལོ་མཆོད་རྟེན་ཕུར་པ་རྣམས་ཀྱི་དཔེ་རིས་བཅས་པ་དཔལ་ཨོ་རྒྱན་ཆེན་པོས་ཁྱུང་འདབ་ཀ་བ་སྦྲུལ་མགོར་གཏེར་དུ་སྦས་པ་ལོ་ཙཱ་བ་ཁམས་པ་ཁྲ་མོས་བཏོན་པ་དང་། གསེར་ཆོས་ལུགས་ཀྱི་ཁྱབ་འཇུག་འགྱུ་ལམ་གཅོད་པ་རིགས་གསུམ་མགོན་པོ་སོགས་དཔེ་རིས་བཞི་དང་བཅས་པ། རྒྱ་ནག་སྟོང་ཁུན་གྱི་ལུགས་སྲོལ་མི་ཉག་མཁས་པ་ཨཱ་ཙཪྻའི་གདམས་པ་ལོ་ཙཱ་བ་ཞྭ་སེར་ཅན་གྱིས་བསྒྱུར་བའི་གཟའ་མདོས་གསལ་བའི་སྒྲོན་མེ། ཡབ་ཡུམ་སྲས་གསུམ་གྱི་སྐུ་དང་བཅས་པའི་གཟའ་བསྲུང་ལ་ཧྲིལ་མ་རྣམས་ཀྱི་རྗེས་གཅོད་མན་ལ་ལུང་རྒྱུན་མི་འདུག །ཕྱག་ལེན་དམར་འཁྲིད་དུ་ཐོབ་པའི་བརྒྱུད་པ་ཡང་གསེར་ཆོས་བཞིན་ནོ། །རྒྱ་གར་ཀེའུ་ཚང་དགུའི་བདག་པོ་རིག་པ་གློང་དུ་ཤར་བ་སློབ་དཔོན་ཤྲཱི་སིངྷས་མཛད་པའི་གཟའ་རྒོད་སྤུ་གྲི་དྲག་སྔགས་བར་སྣང་ཧོམ་ཁུང་མར་གྲགས་པ་སློབ་དཔོན་ཆེན་པོ་པདྨ་ལྷོ་ནུབ་སྲིན་པོའི་ཁ་གནོན་ལ་གཤེགས་ཁའི་དུས་སྤ་གྲོ་སྐྱེར་ཆུའི་ལྷ་ཁང་དུ་ཁྱུང་རུམ་སྨུག་པོའི་ཆུ་ནང་དུ་བསེའི་གའུར་བཅུག་ནས་སྦས་པ་བླ་མ་གྲུམ་དང་སྤ་གྲོའི་ཡོན་བདག་ནག་པོ་མཁར་གཉིས་ཀྱིས་ལྷན་ཅིག་ཏུ་སྤྱན་དྲངས་པའི་སྐོར་ལ། ཡིད་ཆེས་ཁུངས་བཙུན་པ་བྱུང་ཚུལ་དང་ཆེ་བའི་ལོ་རྒྱུས། གཟའ་རྒོད་དུག་གི་སྤུ་གྲིའི་མཱ་ར་ཡ་གསོད་པའི་སྦྱོར་བ་བར་སྣང་ཧོམ་ཁུང་མའི་སྒྲུབཐབས་ལ་ནང་གསེས་ཀྱི་བཅའ་གཞི། བཟླས་པ། རྟགས་རིམ། ལམ་དུ་ཞུགས་པ། ཨར་གཏད། མནན་བསྲེག་འཕང་གསུམ་དང་བཅས་པའི་དོན་ལྔ་
བསྟན་པ། བར་སྣང་ཧོམ་ཁུང་མའི་ཡིག་ཕྲན་ལ་དགྲ་ལ་རྦད་པ། ཐུགས་དམ་བསྐང་བ། རང་གི་ཧོམ་ཁུང་དགག་པ། དགྲའི་ཧོམ་ཁུང་དབྱེ་བ་སྟེ་དོན་བཞི་པ། དགྲ་གློ་བུར་དུ་བྱུང་ན་ཡེ་འབྲོག་དྲག་པོ་གཏོང་བ། གནད་ཀྱི་གདོང་གཏད་རྒྱུད་དོན་བཅུད་དུ་དྲིལ་བ་སྤུ་གྲི་རེག་ཆོད་ཕྲད་ཤོག་གི་མཐའ་ཅན། གཤིན་རྗེ་མི་ཡུལ་དུ་དངོས་སུ་རྒྱུ་བ་གབ་པའི་གདོང་གཏད་མངོན་སུམ་ཅོག་འགྱེལ་བུ་ལ་ཕྲད་ཤོག་གི་མཐའ་ཅན། ཨར་གཏད་ལམ་ཞུགས་ཀྱི་འཁོར་ལོ་ལིངྒ་དཔེ་ཆུང་བཅས་པའི་སྟེང་ནས་ཕྱག་ལེན་དམར་འཁྲིད་དུ་ཐོབ་པའི་བརྒྱུད་པ་ནི། སངས་རྒྱས་རིན་ཅེན་སྙིང་པོ། རྡོ་རྗེ་འཆང་། ཐུབ་པའི་དབང་པོ། སློབ་དཔོན་ཤྲཱི་སིངྷ། ཨོ་རྒྱན་སངས་རྒྱས་གཉིས་པ། མཁའ་འགྲོ་ཡེ་ཤེས་འཚོ་རྒྱལ། མངའ་བདག་ཁྲི་སྲོང་ལྡེ་བཙན། གཏེར་སྟོན་བླ་མ་གྲུམ། ཡོན་བདག་ནག་པོ་མཁར། ཁྱུང་ལུང་གི་བྱ་ཙ་གནུབས་བན་སྟོན་པ། དགེ་བཤེས་གཉན་ཆད་པ་པུ་རང་གི་སྔགས་པ་སྤུན་དྲུག་གི་དཔོན་ཡིན་ཟེར། འདན་སྟོན་པ། གཉོས་འབུམ་ཁྲི་སྟོན་པ། སྐྱོག་བྱ་ཞུ་ཅན། རཏྣ་ཤྭ་ར། སྔགས་ནག་གསང་སྔགས་རྡོ་རྗེ། རིག་འཛིན་བདུད་འཇོམས་རྡོ་རྗེ། ཆོས་རྒྱལ་བཀྲ་ཤིས་སྟོབས་རྒྱལ། ལེགས་ལྡན་ཆེན་པོས་འདི་གཅིག་པུའི་དོན་དུའང་ལྷོ་བྲག་ཕྱོགས་སུ་དཀའ་བ་སྤྱད་ཚུལ་དང་བཅས་གནང་སྐད། རིག་འཛིན་ངག་གི་དབང་པོ་ནུས་མཐུའི་མངའ་བདག་ཆོས་དབྱིངས་རང་གྲོལ། དེས་བདག་ཟ་ཧོར་སྔགས་ནག་ལ་བསྟན་པ་བསྲུང་བའི་ཆོས་སྐྱོང་དུ་སྩལ་ཏོ། །ཡང་ན་རཏྣ་ཤྭ་ར་ནས། བླ་མ་མདོ་སྡེ་རྒྱ་མཚོ། རིག་འཛིན་པདྨ་དབང་ཕྱུག །མཚུངས་མེད་བཀྲ་ཤིས་དབང་ཕྱུག །བྱང་བདག་རིག་འཛིན་མན་གོང་བཞིན་ནོ། །གསོལ་འདེབས་ལས། སྐྱེ་བན་རྡོ་རྗེ་བནྡེ་ཆུང་ངུ་བཟུང་། ཁྱུང་རྒོད་མི་ཉག་
དབུ་མར་འགར་སྟོན་དཀར། །ཨ་ཝ་དྷཱུ་ཏི་པ་སོགས་ཐ་དད་བཞི། ཟུང་དུ་བཅས་པ་དེ་རྣམས་ལ་གསོལ་བ་འདེབས། ཞེས་པ་རྣམས་ཀྱི་གཏེར་ཆོས་ནི་སྔོན་ཆད་མཐོང་ཐོས་སུ་མ་གྱུར་ལ། མི་ཉག་གྲགས་འབྱུང་གིས་བུམ་ཐང་གཙུག་ལག་ཁང་ནས་བཏོན་པའི་ཐོག་རིས་ཟུར་ལྔ་པ་ལ་བརྟེན་པའི་ཐོག་བསྲུང་གི་བརྒྱུད་པ་ནི། གཏེར་སྟོན་ནས་རིམ་པར། འཕྱོང་རྒྱས་ཆོས་རྗེ་བྱ་དཀར་མ། ཟུར་ངག་དབང་ཕུན་ཚོགས། སྤྲུལ་སྐུ་གཏེར་བདག་གླིང་པ། དེས་བདག་ལའོ། །གསོལ་འདེབས་ལས། སྒོམ་ཆེན་འབྲུག་པ་གཉན་སྟོན་ཛམྦྷ་ལ། །དོན་གྲུབ་སེང་གེ་པདྨ་གྲགས་པར་བཅས། །ཐ་དད་གཉིས་འཛོམ་ཆོས་ཀྱི་དབང་ཕྱུག་གི །བཀའ་བཞིན་ཉེར་སྒྲུབ་དེ་དག་ལ་གསོལ་བ་འདེབས། ཞེས་པའི་སྒོམ་ཆེན་འབྲུག་པ་ནི་སྲས་མཁར་ཆོས་དྲུག་མ་གཏེར་ནས་འདོན་མཁན་དེ་ཡིན་པས་ཆོས་དབང་གི་གཏེར་ཁ་བཅུ་པར་ངོས་འཛིན་ཡང་ཁོ་བོས་མ་ཐོབ། གཉན་སྟོན་ཛམྦྷ་ལས་ནི་མཁོ་མཐིང་ལྷ་ཁང་གི་གཤིན་རྗེ་གཤེད་དམར་པོའི་ཐུགས་ཀ་ནས་འཇམ་དཔལ་རྫོགས་ཆེན་གྱི་སྐོར་སོགས་བཏོན་པ་ཆོས་དབང་རིན་པོ་ཆེའི་གཏེར་ཁ་བདུན་པ་ཡིན་པས་དེའི་གྲས་སུ་བཀོད་ཕྱིར་ལོགས་སུ་སྨོོས་མ་དགོས། དོན་གྲུབ་སེང་གེ་དང་པདྨ་གྲགས་པ་ནི་ཐ་དད་གཉིས་འཇོམ་ཞེས་པའི་ནུས་པས་གོང་མ་གཉིས་ཀྱི་འདོན་གྲོགས་ཡིན་པར་མངོན་ནོ། །