གཏེར་སྟོན་པད་མ་ཀུན་སྐྱོང་གླིང་པས་གཏེར་ནས་བཞེས་པའི་གཏེར་ཆོས་ཁག་གིས་སྐོར།
པདྨ་ཀུན་སྐྱོང་གླིང་པ་ནི། ཐང་ཡིག་ལས། སྣ་བོ་ལ་ཁར་སོ་པ་རེ་མོས་བྱེད༔ མཆོད་རྟེན་དཀར་པོར་སྦས་པའི་གཏེར་ཁ་ནི༔ མི་གཞག་
གདོན་པའི་ལྟས་དེ་བསྟན་ནས་འབྱུང༔ གཏེར་སྟོན་ཀུན་སྐྱོང་གླིང་པ་ཞེས་བྱ་འབྱུང་༔ ཞེས་དང་། རང་གཏེར་ལས། བཻ་རོ་ཁྱོད་ཀྱི་སྤྲུལ་པ་ནི༔ ཆུ་ཁམས་བྱའམ་ཁྱི་ལོ་པ༔ ཡབ་མེད་ཡུམ་བྲལ་སྔགས་འཆང་རིགས༔ ཨོ་རྒྱན་མིང་འཛིན་ཤེས་རབ་ཅན༔ མ་ངེས་སྤྱོད་པ་འགྲོ་བ་འདུལ༔ གནས་མེད་རླུང་བཞིན་ཀུན་ཏུ་རྒྱུ༔ མོན་བལ་རྩེ་ལྔ་ཕྱོགས་སུ་འདའ༔ ཐུགས་གཏེར་དགོངས་གཏེར་མང་ཞིག་འབྱེད༔ ཅེས་པ་ལྟར་ལོ་ཆེན་བཻ་རོའི་རྣམ་སྤྲུལ་རྒྱལ་བའི་སྲས་པོ་རྡོ་རྗེ་གླིང་པའི་སྐུ་སྐྱེ་པདྨ་ཀུན་སྐྱོང་གླིང་པས་མི་ཚོར་རྡོ་རྗེ་སྐྱེ་བྲག་ནས་ཁྲོ་ལས་གྲུབ་པའི་གཏེར་སྒྲོམ་རཱ་ཧུ་ལའི་གཟུགས་མདའ་གང་པ་སྤྱན་དྲངས་པའི་ཐུགས་ཀ་ནས་བྱོན་པའི་ཐེག་དགུའི་ཡང་རྩེ་རྡོར་སེམས་སྙིང་ཐིག་ནི། རང་གཏེར་ལས། རྒྱུད་མཆོག་འདི་ཉིད་ལ་བརྟེན་ནས༔ སྤྲོས་མེད་མྱ་ངན་འདས་དོན་དུ༔ སྤྲོས་པའི་ཚིག་མཆོག་ཀུན་བསྡུས་ནས༔ ཉམས་ལེན་གནད་ཀྱི་གདམས་པ་བརྩམས༔ འདི་ཉིད་བཻ་རོ་ཁྱོད་ལ་གཏད༔ ད་ལྟ་སྤེལ་བའི་གནས་མེད་དེ༔ ཕྱི་མ་སྙིགས་མ་ལྔ་བདོའི་དུས༔ ཁྱོད་ཀྱི་སྤྲུལ་པ་ཤེས་རབ་ཅན༔ སྐལ་ལྡན་གཅིག་གི་དོན་དུ་སྦེད༔ ཅེས་སྙིང་ཏིག་བཅུ་གསུམ་གྱི་དོན་བཏུས་པ་དགའ་རབ་རྡོ་རྗེས་ཨོ་རྒྱན་ཆེན་པོ་ལ་གནང་བའི་རྫོགས་པ་ཆེན་པོ་ཚིག་ཉུང་དོན་རྒྱས་གནད་ཀྱི་གདམས་སྐོར་ལ། ཐོག་མར་རས་བྲིས་ཀྱི་དཀྱིལ་འཁོར་དུ་འཇུག་པ་སྔོན་དུ་འགྲོ་བའི་སྤྲོས་བཅས་བུམ་དབང་ལུས་ལ་བསྐུར་བ། སྤྲོས་མེད་གསང་དབང་ངག་ལ་བསྐུར་བ། ཤིན་ཏུ་སྤྲོས་མེད་ཤེས་རབ་ཡེ་ཤེས་སེམས་ལ་བསྐུར་བ། རབ་ཏུ་སྤྲོས་མེད་རིག་པ་རྩལ་དབང་བར་སྣང་ལ་བསྐུར་བ་རྣམས་སྨིན་རྒྱས་སུ་མནོས་ནས། རྒྱབ་རྟེན་ལུང་ལ། རྡོ་རྗེ་སྐྱེ་བྲག་དང་བསམ་ཡས་ཀྱི་གཏེར་བྱུང་། ཐེམས་མེད། སྤྲུལ་སྐུ་
ཀུན་སྐྱོང་གླིང་པའི་ལུང་བསྟན་གསང་ཡིག་ལེའུ་བཅུ་གསུམ་མ། ཐེམས་མེད། བོད་ཀྱི་བདེ་སྡུག་དུས་རྟག་ལུང་བསྟན་པདྨ་དྲན་པར་གྱིས་ཀྱི་མཐའ་ཅན། ཐེམས་མེད། རྡོ་རྗེ་སེམས་དཔའི་སྙིང་ཐིག་གི་རྒྱུད་ཐེག་པ་ཀུན་གྱི་ཡང་བཅུད་སྙིང་གི་ཐིག་ལེ་ལེའུ་བཅུ་གསུམ་པ་རྫོགས་སོའི་མཐའ་ཅན། ཁུངས་བཙུན་ཡིད་ཆེས་བསྐྱེད་པ་རྒྱལ་བ་དགོངས་བརྒྱུད། རིགས་འཛིན་བརྡ་བརྒྱུད། གང་ཟག་སྙན་བརྒྱུད། ཐུགས་རྗེ་བྱིན་རླབས་བརྒྱུད་པ། མཁའ་འགྲོ་གཏད་རྒྱ་བརྒྱུད་པ། ལས་འཕྲོ་གཏེར་བརྒྱུད་དེ་བརྒྱུད་པ་དྲུག་ལྡན་རྡོ་རྗེ་སེམས་དཔའི་སྙིང་ཐིག་གི་ལོ་རྒྱུས་ཨོ་རྒྱན་ཐུགས་སྲས་དངོས་ལ་སྤྲོད་པའི་མཐའ་ཅན། མཉམ་མེད་ཆོས་ལེགས་མཚན་ཅན་གྱིས་མཛད་པའི་དབང་ཆོག་བདུད་རྩིའི་དགའ་སྟོན། སྐལ་ལྡན་སྨིན་པར་བྱེད་པའི་ཨ་ཏིའི་ཡང་རྩེ་ཐེག་པའི་ཡང་བཅུད་དབང་ཞེས་པ་སྤྲོས་བཅས། སྤྲོས་མེད། ཤིན་ཏུ་སྤྲོས་མེད། རབ་ཏུ་སྤྲོས་མེད། དམ་ཚིག །ཐོབ་པའི་ཕན་ཡོན། མ་ཐོབ་པའི་ཉེས་དམིགས་རྣམས་སྟོན་པ་སྙིང་ཐིག་དབང་བཞིའི་རིམ་པ་རྫོགས་སོའི་མཐའ་ཅན། ཐེམས་མེད། རྡོར་སེམས་སྙིང་ཏིག་ཉམས་སུ་ལེན་ཐབས་ཞེས་པ་སྔོན་འགྲོའི་སྐོར་ཕྱོགས་གཅིག་ཏུ་གསལ་བར་བསྒྲིགས་པ། འཕྱུག་མེད་ལམ་ལ་འཛུད་པ་འཁྲིད་ཆོག་འཁོར་བ་དོང་སྤྲུག་གི་སྔོན་འགྲོའི་གནད་ཉམས་སུ་བླང་པ་ཕྲད་ཤོག་གི་མཐའ་ཅན། གྲོལ་བྱེད་འཁོར་བ་དོང་སྤྲུག་གི་དངོས་གཞིའི་གནད་རྣམས་ཉམས་སུ་བླང་པ་ཕྲད་ཤོག་གི་མཐའ་ཅན། རྫས་ཀྱི་རྟགས་ཚད་འབྲས་བུ་དང་བཅས་སྟོན་པ་ཕྲད་ཤོག་གི་མཐའ་ཅན། བྱིན་རླབས་འཇུག་བྱེད་རྩ་གསུམ་དྲིལ་སྒྲུབ་རྒྱུད་ནས་ཕྱུང་བ་ལས་འཕྲོ་ཅན་ལ་སྤྲོད་པའི་མཐའ་ཅན། ཚོགས་གསོག་བར་གཅོད་སེལ་བ་རྩ་གསུམ་ལས་བྱང་སྔོན་འགྲོ་དངོས་
གཞི་རྗེས་གསུམ་གྱིས་བསྟན་པ་དོན་གྱི་གསལ་འདེབས་རྫོགས་སོའི་མཐའ་ཅན། ལས་བྱང་ཆོག་བསྒྲིགས་མ་འགོར་ང་ནི་ཡེ་ནས་རྡོ་རྗེ་སེམས་དང་མཇུག་ཏུ་སླར་ཡང་སྐྱེ་མེད་གླིང་དུ་བསྡུ་ཞེས་ཡོད་པ། ཐེམས་མེད། ཚོགས་མཆོད། རིགས་ཆད་ཐུགས་རྗེས་གཟུང་བ་འདའ་ཁ་འཆི་དྲོད་རང་གྲོལ་གནད་ཀྱི་ཡི་གེ་གཏགས་གྲོལ་རེག་པ་དོན་ལྡན་ཕྲད་ཤོག་གི་མཐའ་ཅན། རང་བཞིན་སྐྱེ་གནས་བར་དོ། འཆི་ཁ་སྡུག་བསྔལ་གྱི་བར་དོ། ཆོས་ཉིད་འོད་གསལ་བར་དོ། སྲིད་པ་ལས་ཀྱི་བར་དོ་རྣམས་སྟོན་པ་བར་དོ་གནད་ཀྱི་གདམས་པ། བཀའ་སྲུང་གཟའི་གསང་སྒྲུབ་ལ་ནང་གསེས་ཀྱི་བསྙེན་པ། སྒྲུབ་པ། རྟགས། ལས་སྦྱོར། དམ་ཚིག །འཕྲིན་ལས་བསྐུལ་བ་གཟའ་མཆོག་ཆེན་མོ་མ། གཏོར་བསྔོ། གཟའ་ནད་གསོ་བའི་བུ་མཆོག་དང་བཅས་པ། གཏེར་སྟོན་གྱིས་མཛད་པའི་བཀའ་སྲུང་གཟའི་གཏོར་བསྔོ་བ་བདེ་ལེགས་ཀུན་འབྱུང་། ལྷག་ཆད་ཐེ་ཚོམ་སེལ་བ་འཛོམ་ཡིག་ཆོས་བདག་ལུང་བསྟན་དང་བཅས་བསྟན་པ་སྟེ་དངོས་བསྟན་འཛོམ་ཡིག་ཏུ་གསལ་བ་ཆོས་ཚན་བཅུ་གཉིས་དང་ཐེམས་མེད་ཁ་སྐོང་ཆོག་བསྒྲིགས་དང་བཅས་པ་ཐོབ་པའི་བརྒྱུད་པ་ནི། ཆོས་སྐུ་ཀུན་ཏུ་བཟང་པོ། ལོངས་སྐུ་རྡོ་རྗེ་སེམས་དཔའ། སྤྲུལ་སྐུ་དགའ་རབ་རྡོ་རྗེ། རིག་འཛིན་པདྨ་འབྱུང་གནས། ཇོ་མོ་ཡེ་ཤེས་འཚོ་རྒྱལ། ལོ་ཆེན་བཻ་རོ་ཙ་ན། གཏེར་སྟོན་ཀུན་སྐྱོང་གླིང་པ། ཐུགས་སྲས་ཉི་ཟླ་བཟང་པོ། སྐྱེས་མཆོག་བསོད་ནམས་རྒྱལ་མཚན། མཁས་གྲུབ་ཆོས་ལེགས་མཚན་ཅན། རྒྱལ་སྲས་ཆོས་དབང་རྒྱལ་མཚན། གུ་རུ་ནམ་མཁའ་རྡོ་རྗེ། རྒོད་ཕྲུག་སྙན་བརྒྱུད་རས་པ། ཕ་ཇོ་ལྷུན་གྲུབ་རྡོ་རྗེ། རིགས་འཛིན་འཁོར་ལོའི་དབང་ཕྱུག་གཞོན་ནུ་དོན་གྲུབ། ཟུར་ཐམས་ཅད་མཁྱེན་པ་ཆོས་དབྱིངས་རང་
གྲོལ། དེས་བདག་ཟ་ཧོར་བནྡེ་གང་ཤར་རང་གྲོལ་ལ་བཀའ་དྲིན་དུ་སྩལ་ཏོ། །པདྨ་ཀུན་སྐྱོང་གླིང་པས་གནས་མཆོག་དཔལ་གྱི་ཟ་ཕུ་ལུང་གི་མགོན་པོའི་བླ་མཚོ་ནག་མཐིང་མའི་དབུས་ཕ་བོང་རུས་སྦལ་ཁོག་པ་ནས་སྤྱན་དྲངས་པའི་འཇམ་དཔལ་གཤིན་རྗེ་འཇོམས་བྱེད་ཐོག་མཐའ་ནག་པོ་རབ་ཏུ་ཁྲོས་པའི་རྒྱལ་པོའི་གཤོར་ཐོད་པ་བརྡབས་ཆོག་སྤུ་གྲི་རེག་ཆོད་ཀྱི་སྐོར་ལ། ལྷ་དང་ལྷ་མིན་གྱི་རྩོད་པ་སོགས་ལོ་རྒྱུས་ཕྲད་ཤོག་གི་མཐའ་ཅན། གཤོར་སྤུ་གྲི་རེག་ཆོད་ཀྱི་འཁོར་ལོ་འདྲི་བ་སོགས་གདམས་སྐོར་དངོས་གཞི་རི་གཟར་གྱི་རྦབ་དང་འདྲ་བ། བདག་སྲུང་ལིང་གའི་ཞལ་གདམས་ཡིག་ཆུང་། རབ་གནས་ཟ་ཡིག་གི་ཡིག་ཆུང་། ཕོ་འཁོར་མོ་འཁོར་གྱི་དཔེ་རིས། ལིང་ག །གྲི། ཕུར་བ། ཐོག་མེད། ཐོད་པ། རྒྱ་གྲམ་རྣམས་ཀྱི་དཔེ་རིས་དང་བཅས་ལེགས་པར་མནོས་པའི་བརྒྱུད་པ་ནི། འཇམ་དཔལ་གཤིན་རྗེ་གཤེད། སློབ་དཔོན་སངས་རྒྱས་གཉིས་པ། ཇོ་མོ་ཡེ་ཤེས་འཚོ་རྒྱལ། ལོ་ཆེན་བཻ་རོ་ཙ་ན། སྤྲུལ་སྐུ་ཀུན་སྐྱོང་གླིང་པ། བྲག་མི་ར་ཕུ་རྩ། སྔགས་འཆང་ཀྱུ་ཁ་སྤྱོད་པ། དྲུང་པ་ཚ་བོ། བླ་མ་ཨའོ་སངས་རྒྱས། དགེ་འདུན་རྒྱལ་མཚན། གཙང་པ་སྔགས་འཆང་དགྲ་ཕུང་ནག་པོ། བྱ་ཁྱུང་པ་ངག་དབང་པདྨ། རྒྱལ་དབང་པདྨ་བསྟན་འཛིན། དཔལ་འབྲི་གུང་པ་ཆོས་ཀྱི་གྲགས་པ། དཔལ་རི་སློབ་དཔོན་བསོད་ནམས་རིན་ཅེན། རིགས་འཛིན་འཕྲིན་ལས་ལྷུན་གྲུབ། རྩ་བའི་བླ་མ་གཏེར་བདག་གླིང་པ། དེས་བདག་ཟ་ཧོར་བནྡེ་ལའོ། །གཏེར་སྟོན་ཀུན་སྐྱོང་གླིང་པས་བསམ་ཡས་མཆོད་རྟེན་དཀར་པོ་ནས་གདན་དྲངས་པའི་ནག་པོ་བཀའ་བཟློག་ཐུགས་ཀྱི་རེག་ཆོད་རྦོད་གཏོང་ཁ་འཆིང་འཁོར་ལོ་ཡང་བཟློག་ལྕགས་ཀྱི་སྤུ་གྲི་ཞེས་པ་གནུབས་
ནམ་མཁའི་སྙིང་པོས་ཨྱོན་ཆེན་པོ་ལ་གསེར་སྲང་ཉི་ཤུ་རྩ་ལྔའི་མནྜལ་ཕུལ་ནས་ཞུས། དེ་ལ་གནུབས་སངས་རྒྱས་ཡེ་ཤེས་ཀྱིས་གསེར་བ་མེན་གྱི་རྭ་གང་ཕུལ་ཏེ་ཞུས་པའི་རྒྱ་གར་མཁས་པ་མི་ལྔའི་ཡང་བཅུད་ཟབ་མོའི་ལུང་། འཁོར་ལོ་འདྲི་བའི་ཞལ་ཤེས་བཅས་མནོས་པའི་བརྒྱུད་པ་ནི། ཀུན་ཏུ་བཟང་པོ། རིགས་ལྔའི་སངས་རྒྱས། གསང་བའི་བདག་པོ། ཨྱོན་སངས་རྒྱས་གཉིས་པ། གནུབས་ནམ་མཁའ་སྙིང་པོ། གནུབས་ཆེན་སངས་རྒྱས་ཡེ་ཤེས། གཏེར་སྟོན་ཀུན་སྐྱོང་གླིང་བ། སྲས་ཉི་ཟླ་བཟང་པོ། གུ་རུ་ནམ་མཁའ་དོན་གྲུབ། སྔགས་འཆང་བདེ་ལེགས་རྒྱལ་མཚན། མདོངས་སྟོན་ཆོས་རྒྱལ་བསོད་ནམས། ཡོལ་མོ་སྤྲུལ་སྐུ་ཤཱཀྱ་བཟང་པོ། གུ་རུ་ནམ་མཁའ་རྡོ་རྗེ། རྒོད་ཕྲུག་སྙན་བརྒྱུད་རས་པ། མཐུ་ལྡན་ལྷུན་གྲུབ་རྡོ་རྗེ། དེ་སྲས་གཞོན་ནུ་དོན་གྲུབ། དེ་སྲས་རྩ་བའི་བླ་མ་ཆོས་དབྱིངས་རང་གྲོལ། དེས་བདག་ཟ་ཧོར་སྔགས་སྨྱོན་གྱི་བསྲུང་བཟློག་གི་གོ་ཆར་གདམས་སོ། །སྤྲུལ་སྐུ་ཀུན་སྐྱོང་གླིང་པའི་གཏེར་བྱོན་རུ་ཏྲ་རླག་པར་བྱེད་པའི་ཐབས་རྒྱ་ནག་སྟོང་གསུམ་དཀྲུག་པ་ཞིང་སྐྱོང་གི་ལས་ཚོགས་མི་ཧྲེང་ནག་པོའི་ལུང་ཕྱག་ལེན་ཞལ་ཤེས་བཅས་ཐོབ་པའི་རྒྱུད་པ་ནི། རྡོ་རྗེ་འཆང་། གསང་བདག །པདྨ་ཐོད་འཕྲེང་། བཻ་རོ་ཙ་ན། གཏེར་སྟོན་ཀུན་སྐྱོང་གླིང་པ། ཐུགས་སྲས་ཀྱི་ཉི་ཟླ་བཟང་པོ། བསོད་ནམས་རྒྱལ་མཚན། ཆོས་ལེགས་མཚན་ཅན། ཆོས་དབང་རྒྱལ་མཚན། ནམ་མཁའ་རྡོ་རྗེ། སྡེ་པ་ཡུག་པ་ནོར་བུ་དབང་རྒྱལ། དེ་སྲས་མི་འགྱུར་རྡོ་རྗེ། གུང་རུ་དབྱངས་དཔོན་པ་མཐུ་སྟོབས་གསང་བའི་དབང་ཕྱུག །ཟུར་གཞོན་ནུ་དོན་གྲུབ། ཁྱབ་བདག་ཆོས་དབྱིངས་རང་གྲོལ། དེས་བདག་ཟ་ཧོར་བནྡེ་ལའོ། །ཡང་ན་གུ་རུ་ནམ་མཁའ་རྡོ་རྗེ་ནས། རྒོད་ཕྲུག་སྙན་རྒྱུད་
རས་པ། ཕ་ཇོ་ལྷུན་གྲུབ་རྡོ་རྗེ་ཡབ་སྲས་མན་གོང་བཞིན་ནོ། །གཏེར་སྟོན་རིན་ཅེན་གླིང་པ་ནི། རང་གཏེར་ལས། གཏེར་འདི་དབང་བའི་ལས་ཅན་སྐྱེས་བུ་དེ༔ ད་ལྟ་ཨྱོན་ང་ཡི་འཁོར་གྱི་མཆོག༔ རྒྱ་གར་མཁས་པ་ཤེས་རབ་འབྱུང་གནས་འདི༔ སྐྱེ་བ་ལྔ་ཡི་མཐའ་མ་རྡོ་བོད་མཚམས༔ ཐ་མལ་འགྲོ་བ་འདྲེན་ཕྱིར་མི་ལུས་ལེན༔ གཟུགས་བཟང་སྐྱེས་མཐའི་བྱང་ཆུབ་སེམས་པ་ཆེ༔ དེ་ནས་ཚེ་འཕོས་ཕྱིར་མི་ལྡོག་པའི་རྟགས༔ ཚེ་ཡི་མཇུག་ལ་དབང་པོ་གང་རུང་འགྲིབ༔ སྐྱེ་བ་མི་ལེན་བདེ་བ་ཅན་དུ་སྤྱོད༔ ཅེས་དང་། ཨོ་རྒྱན་ང་ཡི་ཐུགས་སྲས་རཏྣའི་མཚན༔ ཐོས་བསམ་འཛིན་པ་རྐྱང་ནི་དོན་ལྡན་འགྱུར༔ སྤྲུལ་པའི་སྲས་ནི་མཚོ་སྐྱེས་མེ་ཏོག་འདྲ༔ སྐལ་ལྡན་བུ་སློབ་བུང་བ་རྩི་འཚོལ་འདྲ༔ ཉམས་གྲིབ་དམ་སེལ་དུས་མིན་སད་དང་འདྲ༔ མཁའ་འགྲོའི་གདན་འདྲེན་དབང་ཆེན་སྣག་རྒྱུག་འདྲ༔ ལོག་ལྟ་ཅན་རྣམས་རླུང་ནག་འཚུབ་མ་འདྲ༔ དེ་ཕྱིར་འབྲེལ་ཚད་འཕྲིན་ལས་རྫོགས་བྱའི་དོན༔ གསོལ་བ་གང་བཏབ་དེ་ཡིས་དོན་ཀུན་འགྲུབ༔ དེ་ལ་སོགས་པའི་མཚན་ཉིད་ཡོན་ཏན་རྣམས༔ ཡི་གེར་བཀོད་པས་མི་ལང་ཨོ་རྒྱན་སྲས༔ རིན་ཅེན་གླིང་པ་ཞེས་སུ་གྲགས་པ་ཡི༔ ལས་ཅན་སྐྱེས་བུ་དེ་དང་འདི་ཕྲད་ཤོག༔ ཅེས་ལུང་བསྟན་པའི་ཨོ་རྒྱན་ཐུགས་སྤྲུལ་ལྷ་སྲས་སྐྱེ་བ་ལྔ་མཐར་སྐུ་འཁྲུངས་པ་གཏེར་སྟོན་རིན་ཅེན་གླིང་པས་རྒྱ་གར་གྱི་ཕ་བོང་ཀླུ་བདུད་རུས་སྦལ་ནག་པོའི་ལྟོ་བ་ནས་སྤྱན་དྲངས་པའི་ལྟ་བའི་ཡང་རྩེ། སྒོམ་པའི་རྒྱལ་པོ། སྤྱོད་པའི་ཉིང་ཁུ། དམ་ཚིག་གི་རྩ་བ། འབྲས་བུའི་མཐར་ཐུག་དམ་ཆོས་རྫོགས་པ་ཆེན་པོ་ཆིག་ཆོད་ཀུན་གྲོལ་ཞེས་པ་ཡོ་ག་རྣམ་གསུམ་ལས། ཨ་ཏི། དེ་ལ་རྒྱུད་ལུང་མན་ངག་གསུམ་ལས་མན་ངག །དེ་ལ་སེམས་
གློང་གནད་གསུམ་ལས་གནད་སྡེ། དེ་ལ་ཕྱི་ནང་གསང་བ་བླ་མེད་ཡང་གསང་ལྔ་ལས་ཡང་གསང་། དེ་ལ་ཐིག་ལེ་དང་ཡང་བཅུད་ལས་ཡང་བཅུད་སྙིང་གི་ནོར་བུའི་སྐོར་ལ། པདྨ་འདབ་བརྒྱད་འཇའ་རིས། བུམ་པ་དང་ཚོགས་འཁོར་ལ་བརྟེན་ནས་སྤྲོས་བཅས་སྣང་བའི་བརྡ་དབང་། མེ་ལོང་འཇའ་ཤེལ་རྨ་བྱའི་མདོངས་ལ་བརྟེན་ནས་སྤྲོས་མེད་སྟོང་པའི་བརྡ་དབང་། ཏིང་འཛིན་ཀྱི་དཀྱིལ་འཁོར་ནམ་མཁའ་ལ་བརྟེན་ནས་གཉིས་མེད་རང་གྲོལ་གྱི་བརྡ་དབང་། ཆོས་ཉིད་ཀྱི་དཀྱིལ་འཁོར་ལ་བརྟེན་ནས་རང་གྲོལ་ལྷུན་གྲུབ་ཀྱི་བརྡ་དབང་རྣམས་སྨིན་རྒྱས་སུ་མནོས་ནས། རྒྱབ་བརྟེན་ལུང་ལ། གང་ཟག་ཡིད་ཆེས་བསྐྱེད་པ་ཁོག་དབུབ་སྟོང་ཐུན་མན་ངག་ཅེས་པ་རྒྱལ་བ་དགོངས་བརྒྱུད། རིགས་འཛིན་བརྡ་བརྒྱུད། གང་ཟག་སྙན་བརྒྱུད་ཀྱི་ལོ་རྒྱུས། རྩ་བ་དོན་གྱི་བཤད་པ། ཐེག་པ་རིམ་དགུའི་འབྱུང་ལུགས། རྫོགས་ཆེན་དགོས་ཆེད་དོན་གྱི་བཤད་ཐབས། ཉམས་སུ་བླང་བའི་བཤད་ཐབས། ཆེ་བ་དོན་གྱི་བཤད་ཐབས་རྣམས་སྟོན་པ་བདེ་བ་ཆེན་པོར་འཚང་རྒྱ་པར་ཤོག་གི་མཐའ་ཅན། སྤྱི་ཁྱད་རྩ་བ་རྫོགས་པ་ཆེན་པོ་ཆིག་ཆོད་ཀུན་གྲོལ་ཞེས་པའི་རྒྱུད་ལེའུ་བཅུ་གཉིས་པ་ཨོ་རྒྱན་གྱི་སྐད་ལས་བོད་སྐད་དུ་རང་བསྒྱུར་ཐུགས་ཀྱི་སྲས་དང་ཕྲད་ཤོག་གི་མཐའ་ཅན། ཆོས་ཀྱི་གནད་ཚང་སྟོན་པ་མན་ངག་ཐེམས་བྱང་ཞེས་པ་སྤྱི་ཐེམས་སྒོས་ཐེམས་ཕྲད་ཤོག་གི་མཐའ་ཅན། དུས་ཚོད་གནང་བཀག་སྟོན་པ་གཏེར་སྟོན་ལུང་བསྟན་ཆོས་སྤེལ་བའི་དུས་རྟག །སྣོད་བརྟག་པ། གཏད་རྒྱ་དང་བཅས་པ་འགྲོ་དོན་རྫོགས་པར་ཤོག་གི་མཐའ་ཅན། མི་རྟག་པ། བྱམས་སྙིང་རྗེ། བླ་མའི་རྣལ་འབྱོར། འཁོར་འདས་རུ་ཤན་འབྱེད་པ་བཞིའི་སྒོ་ནས་ཐུན་མོང་སྔོན་འགྲོའི་མན་ངག་ཕྲད་ཤོག་གི་
མཐའ་ཅན། བྱིན་རླབས་བརྡས་སྨིན་པར་བྱེད་པ་སྤྲོས་བཅས་སྣང་བ། སྤྲོས་མེད་སྟོང་པ། གཉིས་མེད་རང་གྲོལ། ཆོས་ཉིད་ལྷུན་གྲུབ་བཞིའི་བརྡ་དབང་གི་ཡི་གེ་ཞག་བདུན་ནས་ཆོས་ཉིད་ཀྱི་བདེན་པ་མཐོང་བའི་མན་ངག་དགའ་རབ་རྡོ་རྗེས་མཛད་པ་ཙིཏྟར་བསྟིམ་པའི་མཐའ་ཅན། ཆོས་ཉིད་སྔོན་དུ་རྟོགས་པའི་ཐབས་རིགས་པ་མངོན་སུམ་གྱི་རང་ངོར་རང་ཐོག་ཏུ་སྤྲོད་པ། མངོན་སུམ་ཉམས་མྱོང་གིས་ཐག་གཅིག་ཐོག་ཏུ་གཅོད་པ། ཉམས་མྱོང་ཚད་འབེབས་ཀྱི་རྩལ་དྲོད་ཐོག་ཏུ་སྦྱང་བ། ཚད་ཟད་སར་འཁྱོལ་བས་སྐུ་གསུམ་ལྷུན་གྲུབ་ཏུ་ངོ་སྤྲོད་པ་རྣམས་སྟོན་པའི་གསང་ཆེན་གནད་ཀྱི་དོན་འཁྲིད་ཤྲཱི་སིངྷས་མཛད་པ་ཕྲད་ཤོག་གི་མཐའ་ཅན། དང་པོར་འཁྲུལ་ལུགས། བར་དུ་རྟོགས་ལུགས། མཐར་གྲོལ་ལུགས་གསུམ་སྟོན་པའི་བརྡ་དོན་སྙིང་ཐིག་གསང་བའི་ངོ་སྤྲོད་དམ་གསང་སྐོར་སྙིང་ཐིག་ཕྲད་ཤོག་གི་མཐའ་ཅན། ཐ་མལ་པ་ཐབས་ཀྱིས་འཁྲིད་པར་བྱེད་པ་ལས་བཟང་ངན་མེད་པར་འགྲོ་བའི་ཚིག་འཁྲིད་གནད་ཀྱི་སྒྲོན་མེ་ཕྲད་ཤོག་གི་མཐའ་ཅན། ཉམས་ལེན་མཐའ་རུ་འདོན་པ་རྩལ་སྦྱོང་རྗེས་ཀྱི་མན་ངག་གང་ཟག་རབ་འབྲིང་ཐ་མ་དང་ཐ་མའི་ཐ་མ་འཚང་རྒྱ་ལུགས་སྟོན་པ་ཕྲད་ཤོག་གི་མཐའ་ཅན། འབྲས་བུ་འབྱིན་པའི་དུས་ཚོད་ངེས་པར་སྟོན་པ་ལམ་གྱི་རྟགས་ཚད་ཤྲཱི་སིངྷས་ཨོ་རྒྱན་ལ་གཏད་པ་བཀའ་སྲུང་ལ་གཉེར་གཏད་ཀྱི་མཐའ་ཅན། རྩོལ་མེད་སངས་རྒྱས་ལག་བཅངས་ཨ་ཏི་གསང་བའི་སངས་རྒྱས་སྲས་གཅིག་གི་རྟགས་གྲོལ་གསང་རྒྱ་གཏད་དོའི་མཐའ་ཅན། ཐུན་མོང་ལམ་གྱི་ཆ་རྐྱེན་དུག་ལྔ་རང་གྲོལ་ལམ་འཁྱེར་ཕྲད་ཤོག་མཐའ་ཅན་རྣམས་ལེགས་པར་ཐོབ་པའི་བརྒྱུད་པ་ནི། ཆོས་སྐུ་ཀུན་ཏུ་བཟང་པོ། ལོངས་སྐུ་རྡོ་རྗེ་འཆང་ཆེན། སྤྲུལ་སྐུ་རྡོ་རྗེ་སེམས་དཔའ། སློབ་དཔོན་དགའ་རབ་རྡོ་རྗེ། རིགས་འཛིན་ཤྲཱི་
སིངྷ། ཨོ་རྒྱན་སངས་རྒྱས་གཉིས་པ། མངའ་བདག་ཁྲི་སྲོང་ལྡེ་བཙན། ལྷ་སྲས་བཙན་པོ། མེ་བན་གཏེར་སྟོན་རིན་ཅེན་གླིང་པ། བླ་མ་བསོད་ནམས་རྒྱལ་བ། ཆོས་རྗེ་བདེ་ཆེན་ལྷུན་གྲུབ། རྟོགས་ལྡན་ཉི་མའི་མཚན། རྗེ་བཙུན་སཱུཪྱ་ཙནྡྲ། མཚུངས་མེད་སངས་རྒྱས་འོད་ཟེར། འཁྲུལ་ཞིག་ཏིང་འཛིན་འོད། རྗེ་བཙུན་སངས་རྒྱས་བརྩོན་འགྲུས། བྱེ་ཚང་པ་རིན་ཅེན་དཔལ་འབྱོར། རིགས་འཛིན་དཔལ་ལྡན་གྲགས་པ། རྒྱལ་དབང་སངས་རྒྱས་རྣམ་རྒྱལ། མཁས་གྲུབ་ཀརྨ་གུ་རུ། རང་གྲོལ་ནམ་མཁའ་ཆོས་དབང་། ཁྱབ་བདག་ཉང་སྟོན་བློ་གྲོས་མཆོག་གི་རྡོ་རྗེ། དེས་བདག་ཟ་ཧོར་བནྡེ་ལའོ། །ཆོས་རྒྱལ་རིན་ཅེན་གླིང་པས་འབྲིང་ཐང་ཀོ་རོ་བྲག་དཀར་ནས་སྤྱན་དྲངས་པའི་གུ་རུ་དྲག་དམར་གྱི་རས་བྲིས་ཀྱི་དཀྱིལ་འཁོར་དུ་འཇུག་པ་སྔོན་དུ་འགྲོ་བའི་སྐུ། བདུད་རྩི། མེ་ལོང་། བུམ་པ་ལ་བརྟེན་པའི་རྩ་བའི་དབང་། ཕྱག་རྡོར། འཇམ་དཔལ། རྟ་མགྲིན། མེ་དབལ་གྱི་དབང་། མཐའ་རྟེན་དམ་རྫས་གཏོར་མའི་དབང་དང་བཅས་ཐོབ་པའི་བརྒྱུད་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་ཡེ་ཤེས་འཚོ་རྒྱལ། གཏེར་སྟོན་རིན་ཅེན་གླིང་པ། མཁས་གྲུབ་བྱང་འཛིན་པ། རྗེ་དཀོན་ཅོག་རྒྱལ་མཚན། མཁས་གྲུབ་བསོད་ནམས་བཟང་པོ། དཔང་སྟོན་ཆོས་ཀྱི་རྒྱལ་པོ། དཔང་སྟོན་བསོད་ནམས་རྒྱལ་མཚན། དཔང་སྟོན་བློ་གྲོས་རྒྱལ་མཚན། ནེ་རིང་མཁན་ཆེན་མཚོ་སྐྱེས་རྡོ་རྗེ། སྤྲུལ་སྐུ་ཤཱཀྱ་བཟང་པོ། མཆོག་སྤྲུལ་ལེགས་ལྡན་རྡོ་རྗེ། ཆོས་རྒྱལ་དབང་པོའི་སྡེ། རྗེ་གཞོན་ནུ་སྟོབས་ལྡན། སྐྱི་སྟོན་ཚེ་རིང་དབང་པོ། རང་གྲོལ་ཀླུ་སྒྲུབ་དབང་པོ། ཟུར་ཆེན་ངག་དབང་ཕུན་ཚོགས། ཁྱབ་བདག་བློ་མཆོག་རྡོ་རྗེ་
དེས་བདག་ཟ་ཧོར་བནྡེ་ལའོ། །ཆོས་རྒྱལ་རིན་ཅེན་གླིང་པས་འབྲིན་ཐང་ཀོ་རོ་ཆོས་འབྱུང་བྲག་ནས་གདན་དྲངས་པའི་འཇམ་དཔལ་ཁྱབ་བདག་ནཱ་ག་རཀྵའི་ཆོས་སྐོར་ལ་ཆོས་རྒྱལ་བཀྲ་ཤིས་སྟོབས་རྒྱལ་གྱི་གསན་ཡིག་ན་ཕ་བོང་རུས་སྦལ་ནག་པོ་ནས་ཆེན་པོ་བཞིའི་ནང་ཚན་ཞི་ཁྲོ་བདེ་བ་ཆེན་པོའི་བཀའ་བསྲུང་ཀླུ་བདུད་ཀྱི་སྐོར་ཟེར་བ་འདུག་པས་གཏེར་གནས་ལ་དཔྱད་དོ། །སྨིན་བྱེད་སྐུ་གསུང་ཐུགས་ཀྱི་བྱིན་གསར་མའི་དབང་འདྲ་རུང་བ་ཀླུ་ཆེན་བརྒྱད་ཀྱི་ཙཀ་ལི་སོགས་འདུག་པ་དེ་ནི་བོ་དོང་པདྨ་གར་དབང་གི་བརྩམས་ཆོས་ལས་གཏེར་གཞུང་གི་ཁུངས་དང་ཟིན་སོ་མེད་སྐད་དོ། །རླབས་མཐའ་རྟེན་གཏོར་དབང་དང་བཅས་པ་མནོས་ནས། ལུང་ལ་མལ་གྲོ་གཟི་ཆེན་དང་མངའ་བདག་གྲགས་མཛད་ཚུལ་སོགས་ལོ་རྒྱུས་གཏེར་སྲུང་རྣམས་ཀྱིས་མགོ་བོ་ཁོས་ཀྱི་མཐའ་ཅན། ཀླུ་རྒྱུད་འབུམ་གྱི་ཏི་ཀ་གསང་བའི་རྒྱུད་ལེའུ་དགུ་པ་རྫོགས་སོའི་མཐའ་ཅན། ཀླུ་བདུད་ནཱ་ག་རཀྴའི་རྗེས་གནང་གི་ཡི་གེ་ཉམ་བག་ཚ་མེད་པར་ལོངས་སྤྱོད་པའི་མཐའ་ཅན། བརྟག་པ་རིན་ཅེན་ཉི་མའི་སྒྲོན་མ་ལེའུ་བཅུ་གཅིག་པ་རྫོགས་བྱང་གྲོལ་ཤོག་གི་མཐའ་ཅན། ཁྱུང་ནག་མེའི་འཁོར་ལོ་འདི་ལས་ཟབ་པ་ཡོད་རི་སྐན་གྱི་ཆེ་བ་ཅན། བྱུག་པ་རྒྱན་གྱི་འཁོར་ལོ་ས་བདག་ཀླུའི་གཤེད་མ། མཛེ་གསོ་བའི་མན་ངག་ནག་པོ་འདྲེན་སྐེམས་སྨན་གྱི་འཁོར་ལོ། གསང་བ་སྒོམ་བཟླས་ཀྱི་སེལ་བ་ཞེས་པ་སྒྲུབ་ཐབས། བསྙེན་པ་དང་གསང་བའི་རྒྱས་ཐེམས་རྣམས་སྟོན་པ་སློབ་དཔོན་གྱིས་རྒྱལ་པོར་གདམས་ཤིང་མངའ་བདག་སྙུན་ནད་ལས་གདངས་ནས་སྐུ་ཁམས་བདེ་བ་དང་ལྡན་པ་བསྟོད་པ་འཁོར་འདས་མ་དང་བཅས་པ་རྫོགས་བྱང་ཕྲད་ཤོག་གི་མཐའ་ཅན། སྲིན་པོ་ནཱ་ག་རཀྴ་ཏི་པ་ཙ་ཤིན་ཏུ་དྲག་པོ་ཀླུ་བདུད་མགོ་དགུའི་སྒྲུབ་ཐབས། ལས་ཚོགས་དགུ་པ་ཞེས་པ་སྨན་གྱི་སྦྱོར་བས་ནད་ཞི་བ། བྷནྡྷའི་སྦྱོར་
བས་ནོར་འཕེལ་བ། རྐུན་མའི་ལག་པས་དབང་དུ་སྡུད་བ། མཛེ་ཐོད་ཀྱིས་བསྟན་དགྲ་ཉམ་ཐག་གཅོད་པ་དུམ་པའི་སྔགས་ཀྱིས་ཆར་འབེབས་པ། རྫས་ངན་སྦྱོར་བས་སྐྱིད་ཐང་དྲག་པོ་འབེབས་པ། ཁྱུང་ལ་བརྟེན་ནས་སེར་བ་བསྲུང་བ། ཆེ་འབེབས་ཀྱི་སྔགས་བྱང་། གཙང་མ་ཁྲུས་ཀྱི་བརྟག་པ་རྣམས། སྤྲུལ་དཀར་དམར་ཕོ་མོ་ལ་བརྟེན་པའི་ཆར་དབབ་ཐབས། ཆིངས་གསུམ་ཕྱག་རྒྱ་དགྲ་དང་བགེགས་ལ་སྤྲོད་ཐབས། གཏད་ཀྱི་ཚེ་སྔགས་དང་རྫས་ལ་བརྟེན་པའི་རང་བསྲུང་སྒྲིབ་ཤིང་ཟབ་མོ། གཏད་ཀྱི་ཚེ་ཕོ་འཁོར་མོ་འཁོར་ལ་བརྟེན་པའི་བསྲུང་བ། རབ་གནས། སྔགས་བྱང་། ལྷ་བསྒོམ་སྔགས་བཟླས་པ་འཁོར་ལོ་འདོགས་པ་གསུམ་གྱི་ཞལ་གདམས། རྒྱ་མཚོ་དུག་རི་ཀླུའི་སྲིན་པོ་ཞེས་བྱ་བའི་སྒྲུབ་པ་ཙཀྲ་བསྐོར་བའི་ལེའུ་རྫོགས་བྱང་གི་མཐའ་ཅན་རྣམས་ཐོབ་པ་ལས་ཀླུ་བདུད་མགོ་དགུའི་སྒྲུབ་ཐབས་མ་གཏོགས་པའི་དབང་ལུང་ཡོངས་རྫོགས་ཀྱི་བརྒྱུད་པ་ནི། སངས་རྒྱས་འོད་སྲུངས། འཇམ་དཔལ་ཡེ་ཤེས་སེམས་དཔའ། བཅོམ་ལྡན་འདས་ནཱ་ག་རཀྵ། གསང་བའི་བདག་པོ། དགེ་སློང་རྨི་ལམ་མཐར་གཟིགས། རྒྱལ་པོ་རཏྣ་འབར་བ་གཙུག་གི་ནོར་བུ། སྲས་རྒྱལ་པོ་མཐའ་ཡས་འོད། སློབ་དཔོན་པདྨ་འབྱུང་གནས། མངའ་བདག་ཁྲི་སྲོང་ལྡེ་བཙན། གཏེར་སྟོན་རིན་ཅེན་གླིང་པ། བླ་མ་ནམ་མཁའ་འོད་ཟེར། རྗེ་ཆོས་དབྱིངས་པ། བླ་མ་དཔལ་བཟང་པ། རིན་པོ་ཆེ་ནམ་མཁའ་ལེགས་པ། སློབ་དཔོན་ཕུན་ཚོགས། བླ་མ་རྡོ་རྗེ་རིན་ཅེན། རྗེ་ཡོན་ཏན་རྡོ་རྗེ། རིགས་འཛིན་གཡང་དྲུང་རྒྱལ་མཚན། ཏེ་སེ་བ་བསོད་ནམས་བློ་གྲོས། རྩེ་ལེ་རིགས་འཛིན་ལྷ་དབང་རྣམ་རྒྱལ། དཔལ་ཀརྨ་གུ་རུ། གྲུབ་མཆོག་ཆོས་དབང་བསམ་གྲུབ། བྱ་བཏང་ཆོས་དབང་ཀུན་བཟང་། རིགས་
འཛིན་འཕྲིན་ལས་ལྷུན་གྲུབ། གྲུབ་ཆེན་ཀརྨ་གསང་སྔགས། ཁྱབ་བདག་བློ་མཆོག་རྡོ་རྗེ། དེས་བདག་ལའོ། །ཡང་ན་རྩེ་ལེ་རིགས་འཛིན་ཆེན་པོ་ནས། བྱང་སེམས་ཆོས་དཔལ། བླ་མ་ཆོས་ཀྱི་རྒྱལ་མཚན། རྗེ་བཙུན་ནམ་མཁའ་དཔལ་འབྱོར། མཚུངས་མེད་དྲན་འཛིན་རྒྱ་མཚོ། མང་ཡུལ་བ་གུ་རུ་རྡོ་རྗེ། སྤ་གྲོ་བ་ཆོས་དབང་ལྷུན་གྲུབ། དར་སྡིངས་འཕྲིན་ལས་ལྷུན་གྲུབ་མན་གོང་ལྟར་རོ། །ཡང་ན་ཀརྨ་གུ་རུ་ནས། སྔགས་འཆང་ཀུན་བཟང་དཔལ་འབྱོར། སྦ་གྲོ་བ་ཆོས་དབང་ལྷུན་གྲུབ་མན་གོང་བཞིན། ཡང་ན་སློབ་དཔོན་ཕུན་ཚོགས་ནས་བླ་མ་རིན་ཅེན་རྒྱལ་མཚན། ཡོན་ཏན་དཔལ། ནམ་མཁའ་རྒྱལ་པོ། བླ་མ་རིན་ཅེན། འཇམ་དབྱངས་ཆོས་རྗེ། ཟུར་མཁར་མཉམ་ཉིད་རྡོ་རྗེ། གནམ་གོང་བཀྲ་ཤིས་དབང་ཕྱུག །མཚུངས་མེད་བསོད་ནམས་བཟང་པོ། རྗེ་དབུས་པ་རྟོགས་ལྡན། བཀྲ་ཤིས་མཚན་ཅན། སྔགས་འཆང་རྡོ་རྗེ། རིགས་འཛིན་འཇའ་ཚོན་སྙིང་པོ། རྩེ་ལེ་སྤྲུལ་སྐུ་པདྨ་ལེགས་གྲུབ། གྲུབ་ཆེན་ཀརྨ་གསང་སྔགས་མན་གོང་བཞིན། ཀླུ་བདུད་མགོ་དགུའི་སྒྲུབ་ཐབས་ཀྱི་རྒྱུད་པ་ནི། ཀརྨ་གུ་རུ་ཡན་གོང་ལྟར་ལ། དེ་ནས་བྲག་སྣ་བ་ཀུན་མཁྱེན་དབང་ཕྱུག །ཁྲ་ཚང་པ་ཆེན་པོ། དེས་བདག་ལའོ། །ཡང་རྗེས་གནང་གི་བརྒྱུད་པ་ལུགས་གཅིག་ལ། གཏེར་སྟོན་ནས་རིམ་པར་རྡོ་རྗེ་འཆང་དཔལ་འབྱོར་ལྷུན་གྲུབ། ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ། དེས་བདག་ལའོ། །