གཏེར་སྟོན་ཆོས་རྒྱལ་རཏྣ་གླིང་པས་གཏེར་ནས་བཞེས་པའི་གཏེར་ཆོས་ཁག་གི་སྐོར།
རཏྣ་གླིང་པ་ནི། མངའ་བདག་ཉང་གི་ཐུགས་གཏེར་གྱི་ལུང་བསྟན་གཏད་རྒྱ་ལས། ལོ་ནི་ལྔ་བཅུ་ཁར་ལ་དུས༔ ཉི་མ་ཤར་ལྷོའི་ཕྱོགས་དག་ཏུ༔ ཆོས་ཀྱི་རྒྱལ་པོ་རཏྣ་གླིང་༔ འཕྲིན་ལས་བཞི་ལ་མངའ་བརྙེས་པ༔ འཚོ་རྒྱལ་ཁྱོད་ཀྱི་སྤྲུལ་པའམ༔ བྱིན་གྱིས་བརླབས་པའི་
སྐྱེས་བུ་འབྱུང་༔ ཞེས་དང་། གཏེར་ཁ་འོག་མའི་སྐུ་གསུམ་སྒུབ་པའི་ལུང་བྱང་ལས། འདི་ནས་བྱང་ཕྱོགས་ཤིང་སྒོའི་མཚམས༔ རི་བོ་ཁྱུང་ཆེན་འདྲ་བའི་བར༔ ལུག་ལོ་པདྨ་དབང་ཆེན་རྩལ༔ བསྐྱེད་རྫོགས་དོན་ལ་མཁས་པ་འབྱུང་༔ ཞེས་དང་། གུ་རུ་ངོ་རྩེའི་གཏེར་ལུང་ལས༔ མོན་བུ་སྤྱི་རིང་སྐྲ་ཡི་ལ་བ་ཅན༔ རི་བོ་ཁྱུང་ཆེན་ལྡིང་པའི་ཞོལ་དུ་འབྱུང་༔ ཞེས་སོགས་གཏེར་ཁ་མང་པོ་ནས་ལུང་གིས་ཟིན་པའི་གཏེར་སྟོན་རིན་ཅེན་དཔལ་བཟང་ཞེས་ལང་འགྲོ་ལོ་ཙཱ་དཀོན་ཅོག་འབྱུང་གནས་ཀྱི་སྐྱེ་བ་འདི་ཉིད་ནི། རང་གཏེར་བསྟན་པ་སྤྱི་ལུང་ལས། ལྔ་བཅུ་ཁ་རལ་དུས་ཀྱི་མཐའ་མ་ལ༔ ད་ལྟའི་ལོ་ཙཱ་ལང་འགྲོ་དཀོན་ཅོག་འདི༔ སྨོན་ལམ་དབང་གིས་སྐྱེ་བ་འགའ་བརྒྱུད་ནས༔ དེ་དུས་རི་བོ་ཁྱུང་ཆེན་ལྡིང་བའི་ལྷོར༔ ལྕགས་ཁམས་ལུག་ལོ་པདྨའི་རིགས་ཅན་འབྱུང་༔ ཁྱུང་ཆེན་རི་དང་མཁར་ཆུའི་ཟབ་གཏེར་འདོན༔ གསང་བའི་མཚན་ཡང་ཞིག་པོ་གླིང་པ་ཡིན༔ གུང་ཐང་དགེ་རེ་རྫོང་གསུམ་གཏེར་ཁ་འདོན༔ གསང་བའི་མཚན་ཡང་རཏྣ་གླིང་པར་གྲགས༔ བསམ་ཡས་གནས་སྐས་བུམ་ཐང་གཏེར་ཁ་འདོན༔ གསང་བའི་མཚན་ཡང་འགྲོ་འདུལ་གླིང་པར་གྲགས༔ སྟོབས་ལྡན་སྐྱེས་བུ་ཤེས་རབ་བློ་གྲོས་ཅན༔ དོན་གྱི་རྟགས་ལྡན་གདུལ་བྱའི་བཀའ་བབས་པ༔ འབྲེལ་ཚད་དོན་ལྡན་པདྨའི་རིགས་ཅན་དེ༔ བུ་མཆོག་དེ་ཡིས་དོན་གཉིས་སྤྱོད་པར་འགྱུར༔ ཞེས་གཏེར་གནས་སོ་སོའི་དབང་གིས་གཏེར་སྟོན་གཅིག་ལ་གླིང་པ་གསུམ་གྱི་མཚན་དུ་ལུང་གི་ཟིན་ཞིང་རྟེན་འབྲེལ་མ་འགྲིག་པའི་བར་གཅོད་ཀྱི་དབང་དུ་སོང་ན་སྤྲུལ་སྐུ་ཚུལ་རྡོར་ལྟར་གླིང་པ་སོ་སོའི་མཚན་ཅན་གྱི་སྐྱེ་བ་རིམ་པར་བརྒྱུད་དགོས་རྒྱུ་ལ། ལུང་བསྟན་བཀའ་རྒྱ་ཆུང་བ་ལས། བློ་གྲོས་དོན་ལྡན་
སྐྱེས་བུ་དེ༔ སོ་བདུན་སྐེག་ལ་མ་འདས་ན༔ གཏེར་ཁ་ཉི་ཤུ་རྩ་ལྔ་དབང་༔ ཞེས་སོགས་ཀྱི་ཚེ་འཕྲེང་རྣམས་གྲོལ་ཏེ་སྐུ་ཚེ་མཐར་ཕྱིན་པས་གཏེར་ཁ་ཉི་ཤུ་རྩ་ལྔ་པ་ཞེས་པའི་གཏེར་སྟོན་རྒྱལ་པོ་ཆོས་རྒྱལ་རཏྣ་གླིང་པས་རོང་གསུམ་འདུས་པའི་ར་བ་གུང་ཐང་མཁར་རམ་བཙན་མཁར་རི་མོ་ཅན་ནས་གདན་དྲངས་པའི་ཟབ་གཏེར་བོད་ཡུལ་ས་འོག་ཀུན་གྱི་གཏེར་གཅིག་མ་ཐེག་མཆོག་སྙིང་པོའི་ཡང་ཞུན། ཐེག་པ་རིམ་དགུའི་རྩེ་རྒྱལ། རྒྱུད་སྡེ་འབུམ་ཕྲག་དྲུག་ཅུ་རྩ་བཞིའི་རྩ་བ། རྒྱུད་ལུང་མན་ངག་ཀུན་གྱི་ཁོང་བཅུད། སྙིང་ཏིག་ཀུན་གྱི་ནང་ནས་ཟབ་ཏིག །གཞི་ལམ་འབྲས་བུའི་གནད་འགག །ལྟ་སྒོམ་སྤྱོད་པའི་མཐར་ཐུག །དུས་གསུམ་རྒྱལ་བའི་དགོངས་བཅུད། མ་མོ་མཁའ་འགྲོའི་སྲོག་སྙིང་། གྲུབ་ཐོབ་ཡོངས་ཀྱི་གསང་ལམ། འོད་གསལ་རྫོགས་པ་ཆེན་པོ་ཀློང་གསལ་སྙིང་ཏིག་གི་སྐོར་ལ། ཐོག་མར་གཏོར་མ་ལ་བརྟེན་ནས་དབང་བཞི་རྫོགས་སུ་༼ཀ༽བསྐུར་བ་ཆོས་སྒོ་འབྱེད་པའི་དབང་། རས་བྲིས་ཀྱི་དཀྱིལ་འཁོར་དུ་རིན་པོ་ཆེ་དབང་གི་༼ཕ༽འཁོར་ལོའི་སྟེང་ནས་སྟ་གོན་དང་འཇུག་པ་སྔོན་དུ་འགྲོ་བའི་དག་བྱེད་ཉན་ཐོས་ཀྱི་དབང་། གསང་སྔགས་ནང་གི་དབང་ཞེས་པ་རྒྱལ་བ་རིགས་ལྔ་ཡབ་ཡུམ་ལ་བརྟེན་ནས་གསང་བ་ཡེ་ཤེས་ལྔ་རྫོགས། ཀུན་བཟང་ཡབ་ཡུམ་ལ་བརྟེན་ནས་ཡེ་རྫོགས་ལྷུན་གྲུབ་ཀྱི་དབང་། རིགས་ལྔ་ཡབ་ཡུམ་གྱི་སྤྲོས་མེད་དམ་རྫས་གསང་དབང་། བྲིས་སྐུ་ལ་བརྟེན་ནས་བརྡ་དབང་ངོ་སྤྲོད། དབང་ཕྱི་མ་གཉིས་ཀྱི་ཡི་གེའི་སྟེང་ནས་ངག་སྒྲིབ་འདག་པ་གསང་དབང་། ཡིད་སྒྲིབ་འདག་པ་ཤེར་དབང་། གཏོར་དབང་བཞིན་ནོར་བུའི་མཇུག་ལས་འབྱུང་བའི་རིག་པའི་རྩལ་དབང་། བླ་མ་ཚེ་དཔག་མེད་རྟ་མགྲིན་གསུམ་གྱི་སྟ་གོན་
སྔོན་དུ་འགྲོ་བའི་བླ་མའི་གཏོར་མ་བརྟེན་ནས་ཕྱི་སྒྲུབ་པདྨ་ཐོད་འཕྲེང་རྩལ་༼ཀ༽གྱི་དབང་བཞི་ཡིད་བཞིན་ནོར་བུ། གཏོར་མ། གསང་རྫས། གཟུང་མ། ངོ་སྤྲོད་ལ་བརྟེན་ནས་ནང་༼ཀ༽སྒྲུབ་རྟ་ཕག་ཡབ་ཡུམ་གྱི་དབང་བཞི། བུམ་པ། ཚེ་ཆང་། སྔགས། ཚེ་དགུག་བསྟིམ་རྒྱས་བཏབ་བཅས་པར་བརྟེན་ནས་གསང་བ་ཚེ་དཔག་༼ཟུར༽མེད་ཀྱི་ཚེ་དབང་། བླ་མའི་སྐུ་གཏེར་ཁ་འདི་གའི་དངོས་བསྟན་དང་རྟ་མགྲིན་ཚེ་དཔག་མེད་ཀྱི་སྐུ་གཞན་ལ་བརྟེན་ནས་ཁྲུས་གསོལ་བ་སོགས་སྐུ་རྟེན་གསུམ་༼ཀ༽གྱི་དབང་། ཉི་ཟེར་དང་མན་ཤེལ་ལ་བརྟེན་ནས་ཞིང་ཁམས་ངོ་སྤྲོད་དང་། ཤེལ་དང་ཉི་ཐིག་ལ་བརྟེན་ནས་༼ཀ༽ཐོད་རྒལ་གྱི་སྒོས་དབང་། ཤེལ་དང་སྐུ་ལ་བརྟེན་ནས་རྡོ་རྗེ་སེམས་པའི་གསང་ལམ་༼ཀ༽ངོ་སྤྲོད་བར་དོའི་སྒོས་དབང་། གླེགས་བམ་ལ་བརྟེན་ནས་སྐུ་གསུང་༼ཀ༽ཐུགས་ཡོན་ཏན་འཕྲིན་ལས་སུ་གྲོལ་བར་བྱེད་པ་བཏགས་གྲོལ་གྱི་དབང་རྣམས་སྨིན་རྒྱས་དང་། གྲོལ་བྱེད་ཐུན་མོང་གི་སྔོན་འགྲོ་བརྒྱད། ཐུན་མོང་མ་ཡིན་པའི་སྔོན་འགྲོ་ཕྱི་ནང་གསང་བའི་རུ་ཤན་འབྱེད་པ། འབྱུང་ཁམས་འཁྲུགས་པ་སེལ་བ་ལ་རྣལ་དུ་དབབ་ཅིང་གསོར་གཞུག་པ། གསོལ་གདབ་བཀའ་བབས། བསྲེ་བ། རང་རིག་དོན་གྱི་བླ་མ་དང་མཇལ་ཐབས་བཞིའི་སྒོ་ནས་བླ་མའི་རྣལ་འབྱོར། འབྱུང་གནས་འགྲོ་གསུམ་རྩད་གཅོད། ངོ་སྤྲོད་བཙན་ཐབས། རླུང་རིག་དབྱེ་ཞིང་མཚང་བཙལ་བ། ཞི་གནས་ཀྱིས་ཁྲེགས་ཆོད་ཀྱི་གཞི་བརྩམས། ལྷག་མཐོང་གིས་གནས་ལུགས་ཀྱི་ངོ་བོ་བལྟ། རྗེས་སྤྲོས་བྲལ་མཐར་སྐྱེལ་བ་སྟེ་དོན་དྲུག་ལ་བརྟེན་ནས་ཁྲེགས་ཆོས་ཀྱི་ངོ་སྤྲོད། རྩ་བ་དང་ཡན་ལག་གི་འདུག་སྟངས་ཀྱིས་ལུས་གནད་གཟིར་བ། ལྐུགས་པ་དང་མི་སྨྲ་བས་ངག་གནད་གཟིར་བ། ཕྱི་ནང་གསང་བའི་
ནམ་མཁའ་ལ་བརྟེན་ནས་ཡིད་གནད་ཟིར་བ། མཐའ་རྟེན་མི་འགུལ་བ། སྡོད་པ། ཐོབ་པ་གསུམ་གྱི་ཐོད་རྒལ་གྱི་ངོ་སྤྲོད་བཅས་ཉམས་འཁྲིད་དུ་བསྟན་ནས། རྒྱབ་རྟེན་ལུང་ལ། རྒྱ་མཚོ་མུན་འཁྲིད་ལས། མཁའ་འགྲོའི་གསང་གཏེར་སྙིང་པོའི་བཅུད་འདི་ལ༔ སྙིང་དང་སྙིང་ཁྲག་དངས་མའི་སྐོར་གསུམ་མཆིས༔ གློང་གསལ་སྙིང་ཐིག་ཐུགས་སྲོག་སྙིང་གི་ཚུལ༔ ཐེམས་ཡིག་མེད་རྣམས་གསང་བའི་སྙིང་ཁྲག་སྟེ༔ སྦས་ཆོས་ལྔ་པོ་སྲོག་གི་དངས་མའི་ཚུལ༔ ཞེས་སྙིང་དང་སྙིང་ཁྲག་དངས་མའི་ཚུལ་གསུམ་དུ་གསུངས་པ་ལྟར། ཡིད་ཆེས་ཁུངས་བཙུན་པ་ཁ་བྱང་ལོ་རྒྱུས་དང་ཐེམས་ཀྱི་སྐོར་སྐུ་རྟེན་གསུམ་དང་འབྲེལ་བ་བླ་མ་ཕྱི་ནང་གསང་གསུམ་གྱི་སྒྲུབ་སྐོར། སྙིང་དང་འདྲ་བ་ཀློང་གསལ་སྙིང་ཏིག་གདམས་པ་གཞུང་གི་སྐོར། སྙིང་ཁྲག་དང་འདྲ་བ་བརྗོད་པར་དཀའ་བ་ཡང་ཟབ་ཐེམས་མེད་ཀྱི་སྐོར། སྲོག་གི་དངས་མ་ལྟ་བུ་སྦས་ཆོས་གསང་བ་ཡང་ཏིག་སྐོར། གདམས་སྐོར་ཡོངས་རྫོགས་སྤྱིའི་ཁ་སྐོང་བ་ཡིག་ཕྲན་གྱི་སྐོར། བཀའ་དང་བསྟན་པ་བསྲུང་བ་ཆོས་སྐྱོང་སྐོར་དང་བདུན། དང་པོ་ལ། མངའ་བདག་ཉང་གིས་སྲིན་པོ་སྤར་རྗེས་ནས་སྤྱན་དྲངས་པའི་ཀློང་གསལ་སྙིང་ཏིག་ཁ་༼པ༽བྱང་ལྡེ་མིག་འདི་ལྟ་སྟེ་ལུང་ཕྲན་གྲོ་ཤུལ་ཞེས་སོགས་ཁ་བྱང་ལས་བྱུང་བ་བཞིན་གདན་དྲངས་པའི་མཐའ་ཅན། ཡང་གཏེར་ཁ་དེ་ཉིད་ལས་གཟེར་འདེབས་ཀྱི་ཊཱི་ཀ་༼ཕ༽ནི་བྲག་མཐའ་རྒྱ་ཡིག་འབྲུ་གསུམ་ཞེས་སོགས་ཡུལ་ཕྱོགས་བཀྲ་ཤིས་པའི་མཐའ་ཅན་འདི་དར་སྡིངས་པའི་གསན་ཡིག་ན་གོང་གི་ཁོངས་སུ་བསྡུས་ནས་བཀོད་པ་ལས་ཟུར་དུ་མེད། རང་གཏེར་མཐའ་མཚམས་མོན་གྱི་རོང་གསུམ་མདོ་བྲག་དམར་བཙན་མཁར་རི་མོ་ཅན་གྱི་གནས་༼ཕ༽ཡིག་ལུང་བྱང་གསལ་བ་སྨོན་ལམ་བཙན་པས་དེ་ལ་གཏོད་
པའི་མཐའ་ཅན། གློང་གསལ་སྐོར་གསུམ་གྱི་སྤྱི་ཐེམས་གསང་བ་བཀའ་རྒྱ་ཅན་ལོ་ལྔ་༼ཀ༽འགྲོགས་ནས་བརྟག་ཐུབ་སྙིང་གི་བུ་མ་གཏོགས་ཀུན་ལ་མི་སྤེལ་བ། བསྟན་པ་རིན་པོ་ཆེའི་བརྒྱུད་པའི་ལོ་རྒྱུས་ཞེས་༼ཕ༽པ་རྒྱལ་བ་དགོངས་བརྒྱུད། རིགས་འཛིན་བརྡ་བརྒྱུད་གང་ཟག་སྙན་བརྒྱུད་གསུམ་གྱི་བྱང་ཚུལ་རྫོགས་སོའི་མཐའ་ཅན། ལོ་རྒྱུས་ཆུང་བ་བརྒྱུད་པ་རིམ་༼ཕ༽པར་བབས་ཚུལ་སྟོང་ཐུན་ཁོག་འབུབ། གློང་གསལ་ཉི་མའི་རྒྱུད་ཀྱི་སྙིང་པོའི་ལོ་རྒྱུས་ཞེས་པ་༼ཕ༽སློབ་དཔོན་ཆེན་པོས་ཤྲཱི་སིངྷ་ལ་རྒྱུད་བཅུ་྄བདུན་གྱི་ཁོང་སྙིང་གློང་གསལ་ཉི་མའི་རྒྱུད་ཞུས་པའི་བྱུང་ཁུངས་མནྡྷ་ར་བས་ཡི་གེར་བཏབ་པ་རྒྱ་བོད་ཀྱི་སྐད་ཤན་སྦྱར་ལས་ཅན་ལ་ཕྲད་ཤོག་གི་མཐའ་ཅན། ཟབ་གཏེར་གཉན་གྱི་ཐེམས་༼ཕ༽ཡིག་སྙིང་གི་དུམ་བུ་ཉི་མའི་སྙིང་པོ། འདིའི་སྐེད་པར་ཕྲད་ཤོག་གི་མཐར་ཡང་གཅིག་བཀའ་རྩིས་ཐེམས་བྱང་བསྟན་ཞེས་མ་གཅིག་པ་གསལ་བར་འདུག་ཀྱང་དེ་རྣམས་སྦྲེལ་ནས་གཅིག་ཏུ་བྱས་པ་ལྟ་བུ་ཡོད་པ། དེ་ནས་ཤོག་ལོག་གཅིག་ཙམ་ན་འདི་ཡིས་ཟབ་གཏེར་གཉན་གྱི་ཐེམས་བྱང་རྫོགས་ཞེས་པའི་ཚིག་ནུས་ཤིག་བྱུང་རུང་དོན་དུ་ཐེམས་བྱང་གསུམ་ཞེས་བྱུང་བའི་སྐབས་འདི་གཉིས་སོ་སོར་བརྩི་ཞིང་། ད་ནས་ཀྱང་འཕྲོ་འཐུད་དེ་སྐུ་གསུང་ཐུགས་རྟེན་སྒྲུབ་པའི་ཆ་རྐྱེན་དང་བཅས་བསེ་སྐམ་དམར་པོར་སྦས་པ་གཏེར་སྟོན་གྱིས་ཆོས་བཀའ་འཆལ་བར་མི་སྟོན་པ། ལ་བསེ་ནག་པོའི་གའུ་འཆི་མེད་ལྕགས་སྲོག་འགྲུབ་པའི་རིལ་བུ་སྦས་ཚུལ་དང་བཅས་པ་མཐར་ལས་དང་སྐལ་བ་ལྡན་པར་གཏད་དོ་ཞེས་དོན་མི་གཅིག་པ་ཡོད་པས་ཀྱང་ཤེས་ནུས་སོ། །ཐེམས་བྱང་ལས་བྱུང་བའི་ས་བཅད་གཉིས་པ་སྐུ་རྟེན་གསུམ་དང་འབྲེལ་བའི་བླ་མ་ཕྱི་ནང་གསང་གསུམ་གྱི་སྒྲུབ་པ་ནི། སྐུ་རྟེན་པདྨ་མཐོང་གྲོལ་ནོར་བུའི་སྐུ༔ སྐུ་རྟེན་
དེ་དང་ཐུགས་སྒྲུབ་ཆ་རྐྱེན་ཚང་༔ གང་ཟག་གཅིག་གི་ཆ་རྐྱེན་འདི་ཡིས་རྫོགས༔ ཤིན་ཏུ་ཡང་ཟབ་སྐལ་ལྡན་སྙིང་ལ་གཏད༔ ཅེས་པ་ལྟར། དངོས་གྲུབ་ཀུན་འདུས་བླ་མ་ཕྱི་སྒྲུབ་པདྨ་འབྱུང་གནས་ཀྱི་གཏོར་དབང་༼ཕ༽ཡིད་བཞིན་ནོར་བུ་འགྲོ་དོན་རྒྱས་པར་འགྱུར་གྱི་མཐའ་ཅན། འགོར་ཀྱེ་ཧོ་མ་འོངས་ཆོས་འདིའི་དཀའ་བབས་ཞེས་ཡོད་པའི་ཆོས་བདག་ལུང་བསྟན་སྙིང་རྗེ་ཅན་དང་ཕྲད་ཤོག་གི་མཐའ་ཅན། གུ་རུའི་ཐུགས་སྒྲུབ་ཆེན་མོ་ཕྱི་ལྟར་པདྨ་ཐོད་འཕྲེང་རྩལ་དུ་༼ཕ༽སྒྲུབ་པ་བཀའ་འདི་ཆེད་དུ་གཉེར་རོ་སྲུངས་ཀྱི་མཐའ་ཅན། གསུང་རྟེན་རྟ་ཕག་གསང་སྒྲུབ་ནང་གི་སྐུ༔ སྐུ་རྟེན་འདི་དང་གསང་སྒྲུབ་ཆ་རྐྱེན་ཚང་༔ བློ་ལྡན་གཅིག་གི་ཉམས་ལེན་འདི་ཡིས་རྫོགས༔ ཞེས་པ་ལྟར་རྟ་ཕག་གསང་བའི་དབང་ཆོག་༼ག༽པདྨའི་འཕྲེང་བ་གནུབས་ནམ་མཁའི་སྙིང་པོས་ཡེ་གེར་བཀོད་པ། གདུལ་བྱའི་རེ་བ་བསྐོང་ཕྱིར་བླ་མ་ནང་ལྟར་སྒྲུབ་པ་རྟ་མགྲིན་གསང་བའི་ཐུགས་༼ཕ༽སྒྲུབ་སྤྱི་བོར་སློབ་དཔོན་པདྨ་རྟ་མགྲིན་ཡབ་ཡུམ་གྱི་རྣམ་པར་བཞུགས་པར་མཚན་བརྒྱད་ཀྱི་སྒོ་ནས་གསོལ་བ་གདབ་པ་ལས་ཅན་ལ་ཕྲད་ཤོག་གི་མཐའ་ཅན། སློབ་དཔོན་ཆེན་པོའི་དགོངས་པའི་བཞི་ཕུགས་རྟ་ཕག་ཡང་གསང་༼ཕ༽གནད་ཀྱི་སྒྲུབ་ཐབས་གཟེར་བཞིས་གནདལ་འབེབས་པ་ལས་འཕྲོ་ཅན་རྣམས་སྨིན་པར་བྱེད་པར་ཤོག་གི་མཐའ་ཅན་འདི་དར་སྡིངས་པའི་གསན་ཡིག་ན་གོང་གི་ཁོངས་སུ་བསྡུས་འདུག །རྟ་མགྲིན་གསང་བ་དབང་གི་ལས་༼ཕ༽བྱང་སྔོན་འགྲོ་དངོས་གཞི་རྗེས་གསུམ་གྱིས་བསྟན་པ་རྒྱུན་སྤྱོད་བྱའོའི་མཐའ་ཅན་མོན་ཁ་ནེ་རིང་གསང་ཕུག་ནས་སྤྱན་དྲངས་པ། ཐུགས་རྟེན་རིགས་བདག་མགོན་པོ་ཚེ་ཡི་སྐུ༔ སྐུ་རྟེན་འདི་དང་ཚེ་སྒྲུབ་ཆ་རྐྱེན་ཚང་༔ ལས་ཅན་རེ་རེའི་ཆ་རྐྱེན་འདི་ཡིས་
འགྲུབ༔ དེ་ལྟར་ཕྱི་ནང་གསང་བའི་སྒྲུབ་སྐོར་ལ༔ བྱིན་རླབས་ཐོག་འབེབས་ཏིང་འཛིན་དམིགས་པའི་གནད༔ ལམ་ཟབ་དབང་གི་ཊཱིཀ་རེ་རེ་བཞུགས༔ དམ་ལྡན་རྣམས་ཀྱི་ལམ་འདི་གས་བགྲོད༔ ཅེས་པ་ལྟར། བླ་མ་གསང་བ་ལྟར་སྒྲུབ་པ་མགོན་པོ་ཚེ་དཔག་ཏུ་མེད་པའི་དབང་༼ཕ༽ཆོག་བདུད་རྩིའི་བུམ་པ་ཞེས་པ་ཨྱོན་ཆེན་པོས་ནང་གི་སྙིང་པོར་བསྐུར་བ་རྫོགས་སོའི་མཐའ་ཅན། དེའི་བུ་ཡིག་ཚེ་བྱང་བཀོལ་པའི་དབང་༼ཕ༽སྒྲུབ་ཤོག་གི་མཐའ་ཅན། ཨྱོན་མཁན་པོ་པདྨའི་དགོངས་པའི་བཞེད་ཕུགས་ཚེ་དཔག་མེད་ཀྱི་གསང་༼ཕ༽སྒྲུབ་འཆི་མེད་རིགས་འཛིན་ཐོབ་པར་ངེས་ཤེས་སྐྱེད་དོའི་མཐའ་ཅན་ཞར་བྱུང་དུ་རྒྱུན་འཁྱེར་ཚེ་སྒྲུབ་༼ཕ༽སྐལ་ལྡན་ལག་ཏུ་གཏད་རྒྱ་ཅན། ཕྱི་ནང་གསང་བ་གསུམ་པའི་དབང་གི་སྔོན་འགྲོ་དང་ཡེ་ཤེས་༼ཀ༽དབབ་པའི་ཡིག་ཆུང་བཀོལ་བ་རྗེས་རིམ་དང་བཅས་པའི་དབང་འཁྲིད་མཁར་ཆེན་བཟས་བཀོད་པ། དབང་གསུམ་གྱི་དཀྱིལ་འཁོར་གྱི་དཔེའུ་ཆུང་༼ཀ༽བསྟན་པ་ཕུག་རིང་དུ་བཀོད་པ། བླ་མའི་གཏོར་ཆེན་རིན་ཅེན་འབར་བའི་སྤྲ་༼ཕ༽འཁྲིད་ལག་ལེན་གི་བྱང་བུ་ཅན། སྟེང་འཁོར་སྐུ་གསུམ་སྲོག་འཁོར་ཆེན་མོ་ལ༔ འོག་འཁོར་གནད་འབེབས་བར་གཅོད་ཀུན་སེལ་ཡིན༔ རྒྱལ་ཆེན་སྒོ་བ་ཕྱོགས་བསྲུང་སྒྲོམ་གྱི་ཚུལ༔ སྒྲུབ་ཐབས་གོང་མ་གསུམ་གྱི་ཆ་རྐྱེན་ཡིན༔ རྡོ་རྗེའི་གུར་ཆེན་གནམ་ལྕགས་མཁར་དང་འདྲ༔ ཤིན་ཏུ་ཡང་ཟབ་སྐལ་ལྡན་སྙིང་ལ་གཏད༔ ཅེས་པ་ལྟར། སྐུ་གསུམ་གའི་སྟེང་འཁོར་༼ཕ༽བླ་རེ་བྲིས་ཡིག་ཟབ་གཏེར་གཉན་གྱི་ཆ་རྐྱེན་དུ་སྦས་པ། བར་གཅོད་ཀུན་སེལ་འོག་གི་གནད་༼ཕ༽འཁོར་འདྲེན་པའི་དཔལ་དུ་ཤོག་གི་མཐའ་ཅན། སྒྲུབ་ཐབས་གསུམ་གྱི་ཁ་སྐོང་གི་མེ་༼ཀ༽མཆོད་སྙིང་རྗེ་ཅན་དང་ཕྲད་ཤོག་གི་མཐའ་ཅན་རྣམས། གསུམ་པ་སྙིང་དང་འདྲ་བ་གློང་གསལ་སྙིང་ཐིག་གདམས་པ་
གཞུང་གི་སྐོར་ལ། རྩ་བ་དང་རྒྱབ་ཆོས་གཉིས། དང་པོ་ནི། མཁའ་འགྲོའི་ཟབ་གཏེར་གློང་གསལ་སྙིང་ཐིག་ལ༔ སྔོན་འགྲོའི་ཆོས་སྐོར་བླ་མའི་གཏོར་དབང་དང་༔ ལུས་ངག་སྒྲིབ་སྦྱོངས་འཁོར་འདས་རུ་ཤན་འབྱེད༔ ཁྲེགས་ཆོད་དམར་འཁྲིད་ནོར་བུའི་སྙིང་པོ་དང་༔ ཐོད་རྒལ་ལམ་འཁྲིད་མུན་སེལ་སྒྲོན་མེ་སྟེ༔ དེ་ལྟར་མ་བཞི་རྩ་བའི་སྒྲོམ་ཤིང་ཡིན༔ ཞེས་པ་ལྟར། ཆོས་སྒོ་འབྱེད་པ་བྱིན་རླབས་བླ་མའི་གཏོར་དབང་༼ཕ༽ནོར་བུའི་སྙིང་པོ་ཚིག་དབང་རིན་པོ་ཆེ་བསྐུར་ཐབས་བཅས་པ་རྫོགས་སོའི་མཐའ་ཅན། འཁྲིད་ཀྱི་སྔོན་འགྲོ་འཁོར་འདས་རུ་ཤན་འབྱེད་པ་གང་ཟག་སྒྲོམ་དུ་འཇུག་༼ཀ༽པའི་གདམས་པ་ལས་འཕྲོ་ཅན་དང་སྤྲོད་ཅིག་པའི་མཐའ་ཅན། མངོན་སུམ་རང་ཐོག་ཏུ་ངོ་སྤྲོད་པ་གཅེར་མཐོང་རིག་པའི་མན་ངག་སྙིང་གི་ནོར་བུའི་དོན་༼ཕ༽འཁྲིད་དམ་དམར་འཁྲིད་ནོར་བུའི་སྙིང་པོ་ཞེས་རྫོགས་བྱང་བཀའ་འདི་སྲུངས་ཤིག་པའི་མཐའ་ཅན། མངོན་སུམ་རང་ཐོག་ཏུ་དབབ་པའི་མན་ངག་ཐོད་རྒལ་གྱི་འཁྲིད་༼ཕ༽ཡིག་མུན་སེལ་སྒྲོན་མེའམ་དོན་འཁྲིད་ནོར་བུ་རྩ་བ་རྫོགས་སོའི་མཐའ་ཅན། སྙིང་ཏིག་གི་མཐའ་རྟེན་རྗེས་ཀྱི་མན་ངག་ཅེས་༼ཕ༽པ་གཞི་བཅའ་ཚད་བཟུང་། གཟེར་བཏབ། རྟགས་བཅུ་གཉིས། དེས་ཐོབ་གསུམ་རྣམས་སྟོན་པ་གློང་གསལ་སྙིང་བཅུད་ལག་འཁྲིད་གསལ་བའི་སྒྲོན་མེ། ལུས་ཀྱི་འདུག་སྟངས་གསུམ། གོང་མ་དང་འདི་གཉིས་ཆོས་ཚན་སོ་སོ་དང་གཅིག་པ་གང་དུ་བརྩིས་ཀྱང་ཆོག་པའི་འཐེན་ཕྱོགས་ཤིག་འདུག་པ་ཐེ་ཚོམ་གྱི་གཞིར་སྣང་བ་ཁྲ་ཚང་པ་དང་ཆོས་རྗེ་དབང་ཆེན་ལྷུན་གྲུབ་གཉིས་ཀའི་ཕྱག་དཔེར་སྦྲེལ་འདུག་གོ །སྤྱན་གྱི་གཟིགས་སྟངས་གསུམ། གནད་བཅུ་དགུ། བརྡ་གསུམ། བོགས་འདོན་གསུམ་དང་བཅས་སྟོན་པ་ཨྱོན་སྙིང་བཅུད་བླ་མེད་ཕྲད་ཤོག་གི་མཐའ་ཅན། འཁྲིད་ཡིག་ཡིད་བཞིན་ནོར་བུ་༼ཀ༽གཏེར་སྟོན་
གྱི་སྨན་རྩེའི་རི་ཁྲོད་དུ་མཛད་པ། ཐེམས་མེད། དེས་མཛད་པའི་ཆོས་སྤྱོད་ཡིད་བཞིན་ནོར་བུ་འགོར་བླ་མ་ལ་སྐྱབས་སུ་འཆིའོ་ཞེས་ཡོད་པ། དེས་མཛད་ཐེམས་མེད། པའི་གསོལ་འདེབས་ཡིད་བཞིན་ནོར་བུ་དམིགས་མེད་སྤྲོས་བྲལ་མ་རྣམས། གཉིས་པ་རྒྱབ་ཆོས་ལ། རང་རིག་བླ་མའི་རྣལ་འབྱོར་༼ཀ༽གསང་སྒྲོགས་སུ་འགྱུར་བས་སྦས་པར་བྱའོའི་མཐའ་ཅན། ཐེམས་མེད། ངོ་སྤྲོད་བཙན་ཐབས་འཛུབ་༼ཀ༽བཙུགས་སུ་གདབ་པ་སྙིང་རྗེ་ཅན་དང་ཕྲད་ཤོག་གི་མཐའ་ཅན། ཐེམས་མེད། རླུང་བུམ་པ་ཅན་ལ་བརྟེན་ནས་ཞི་གནས་ལྷག་མཐོང་གི་ངོ་སྤྲོད་གང་ཟག་གི་ཤེས་རྒྱུད་བླ་མའི་རྟོགས་པས་དམིགས་པ་འཁྲིད་པ། ཐེམས་མེད། མཁས་པ་ཤྲཱི་སིངྷ་ལ་སློབ་དཔོན་ཆེན་པོ་པདྨས་ཞུས་ལན་སྙིང་གི་མེ་ལོང་༼ཕ༽གློང་གསལ་སྙིང་ཏིག་ཁྲེགས་ཆོད་ཀྱི་རྒྱབ་ཆོས་ཚུལ་དུ་བཀོད་པ་ཕྲད་ཤོག་གི་མཐའ་ཅན། ཐེམས་མེད། སྐལ་ལྡན་སྨིན་བྱེད་བུམ་པའི་དབང་ཆོག་རིན་པོ་ཆེའི་དབང་༼ཕ༽གི་འཁོར་ལོ་ཡིད་བཞིན་ནོར་བུ་ཕྲད་ཤོག་གི་མཐའ་ཅན། དེ་དག་ཀུན་ལ་བུ་ཡིག་རྒྱབ་ཆོས་ནི༔ གཏོར་ཆེན་སྤྲ་འཁྲིད་སྒྱུ་མའི་གར་མཆོད་དང་༔ སྤྱུགས་པ་ཀླུ་མཆོད་བདུད་བཞི་མནན་པའི་བྲོ༔ ཕྱི་ནང་སྒྲུབ་ཐབས་གསུམ་གྱི་རྒྱབ་ཆོས་ཡིན༔ ཞེས་པ་ལྟར། དབང་དང་སྒྲུབ་པའི་ཆ་རྐྱེན་གར་མཆོད་༼ཕ༽མཁའ་འགྲོའི་འགྱིང་གླ྄ུ་ཕྲད་ཤོག་གི་མཐའ་ཅན། སྤྱུགས་པ་བརྡའི་གླུ་༼ཕ༽མཆོད་དངོས་གྲུབ་བརྙེས་པའི་མཐའ་ཅན། ངག་སྒྲིབ་དག་བྱེད་སྤྲོས་མེད་༼ཕ༽གསང་བའི་དབང་ཆོག་མཐའ་རྒྱས་ཤོག་གི་མཐའ་ཅན། ཡིད་སྒྲིབ་དག་བྱེད་བདེ་སྟོང་དགའ་བཞིས་སྐྱེད་པ་༼ཕ༽ཤེས་རབ་ཡེ་ཤེས་ཀྱི་དབང་ཆོག་སྒྲོལ་བར་ཤོག་གི་མཐའ་ཅན། ཡོངས་སུ་སྤྲོས་མེད་ཚིག་དབང་ནི་ཆོས་སྒོ་འབྱེད་པའི་བླ་མའི་གཏོར་དབང་གི་གཤམ་ན་ཡོད་པ་དེ་
འདིར་ལེན་པ་ཕྱག་ལེན་ནོ། །སྐུ་རྟེན་གསུམ་གྱི་དབང་དང་དེའི་འཕྲོས་ལས་དེ་ཁོ་ན་ཉིད་ཀྱི་རིག་པའི་རྩལ་༼ཕ༽དབང་ཁྲིགས་ཆོ་ག་ཀ་དག་ཕྱག་རྒྱ་ཆེན་པོར་བསྐུར་ཐབས་ཕྲད་ཤོག་གི་མཐའ་ཅན། དབང་ལྔ་པ་མངོན་སུམ་ཐོད་རྒལ་ལྷུན་གྲུབ་ཀྱི་སྒོས་༼ཕ༽དབང་ངོ་སྤྲོད་གནད་ཀྱི་མན་ངག་ཕྲད་ཤོག་གི་མཐའ་ཅན། དབང་བཞིའི་བསྙེན་ཡིག་ནོར་བུའི་འཕྲེང་བ་ཞེས་པ་དབང་སྒྲུབ་ཀྱི་རྩ་བ་༼ཕ༽ཕྱི་ནང་གསང་བ་ཡང་གསང་བླ་མེད་དང་བཅས་པའི་གནད་ཡིག་ཤིན་ཏུ་ཟབ་པ་ཆོས་བདག་བུ་ལ་གཏད་པའི་མཐའ་ཅན། དབང་གསུམ་པ་ཉམས་ལེན་གསང་སྔགས་བླ་མེད་ཨ་ཏིའི་ཡང་ཞུན་བདེ་སྟོང་ཟུང་འཇུག་ཉི་ཟླ་ཁ་སྦྱོར་ཆགས་ཅན་ཆགས་པས་འགྲོལ་བ་ཡིད་བཞིན་ནོར་བུ་ལྟ་བུ་དྲི་མེད་བདུད་རྩིའི་ཐིགས་པ་རྫོགས་བྱང་ཕྲད་ཤོག་གི་མཐའ་ཅན། དེའི་ཡིག་ཆུང་འཁྲུལ་འཁོར་རྩ་༼ཕ༽ཚིག་གནད་ཀྱི་ཟིན་བྲིས་ཕྲད་ཤོག་གི་མཐའ་ཅན། རྡོ་རྗེ་ལུས་ཀྱི་ཀ་བ་རང་བྱུང་དབུ་མའི་སྦས་བཤད་ཀྱི་གསང་༼ཕ༽ཚིག་བསྟན་པ་སྙིང་གི་དུམ་བུ་ཡི་གེར་བཀོད་པ་ཕྲད་ཤོག་གི་མཐའ་ཅན། ཐེམས་མེད། མཚན་ལྡན་རིག་མ་བརྟག་ཐབས་མཚན་བྱང་བདེ་ལེགས་འདུས་པ་མཁོ་མཐིང་ལྷ་༼ཀ༽ཁང་གི་ཀ་བའི་བསམ་ལེ་ནས་སྤྱན་དྲངས་པ། འཚོ་རྒྱལ་གྱི་གནད་ཀྱི་ཞུས་ལན་མན་ངག་༼ཕ༽ཟབ་མོ་སངས་རྒྱས་ལ་ཉིན་ཁུགས་ཐུབ་པར་གདའ་བར་གསུངས་པ། ལམ་ཟབ་གློང་གསལ་འཁྲིད་ཀྱི་རྒྱབ་ཆོས་ལ༔ གནད་གྱི་མན་ངག་ཞུས་ལན་ཆེན་མོ་དང་༔ སྐུ་གསུམ་ངོ་སྤྲོད་གནད་ཀྱི་ཞལ་གདམས་ཡིན༔ ངེས་ཤེས་ཅན་ལ་བཏགས་གྲོལ་བཏགས་ཆོག་དང་༔ ལས་འཕྲོ་ཅན་ལ་འོད་གསལ་བར་དོའི་ཆོས༔ འཁྲིད་རྒྱབ་ཆེན་མོ་མུན་སེལ་སྒྲོན་མེ་དང་༔ འཆི་བ་བརྟག་བླུ་བརྩོན་
འགྲུས་བསྐུལ་བའི་ཆོས༔ དེ་ལྟར་མ་བུའི་རྐང་གྲངས་ཆེ་ལོང་ཙམ༔ གློང་གསལ་སྙིང་ཐིག་གསང་བའི་ཁ་བྱང་རྫོགས༔ ཞེས་པ་ལྟར། འཚོ་རྒྱལ་དང་ནམ་མཁའ་སྙིང་པོས་མཆིམས་ཕུ་དང་མཁར་ཆུར་ཞུས་པའི་༼ཕ༽འཁྲིད་ཀྱི་རྒྱབ་ཆོས་ཟབ་པའི་མཐར་ཐུག་ཐུགས་ཀྱི་ཞུས་ལན་སྙིང་གི་མེ་ལོང་འགྲོ་དོན་འཕེལ་བར་འགྱུར་རོའི་མཐའ་ཅན། ངོ་བོ་ཀ་དག་དང་ཀུན་གཞི་དྲི་བཅས་ཀྱི་ངོ་སྤྲོད་ཅེས་༼ཕ༽པ་མ་དག་པ་ཉོན་མོངས་པའི་གནས་ཚུལ། དག་པ་སྐུ་བཞི་ཡེ་ཤེས་འདུ་འབྲལ་མེད་པའི་གནས་ཚུལ་སྟོན་པ་ལེའུ་བཞི་ལྔ་དྲུག་གསུམ་ཡོད་པ་རིན་ཅེན་སའི་འོག་ཏུ་གཏེར་སྦས་པའི་མཐའ་ཅན། ངོ་སྤྲོད་མཛུབ་བཙུགས་སངས་རྒྱས་ལག་བཅང་མ་༼ཕ༽ཞེས་པ་འདུག་གསུམ་ལམ་ལོང་། སྐུ་གསུམ་ངོ་སྤྲོད། འདོད་ཡོན་རྒྱན་ཤར། འདའ་ཁ་འཆི་བྲོད། འབྲས་བུ་ཕྱོགས་ལྷུང་མེད་པ་སྟེ་ལྔས་སྟོན་པ་ཤྲཱི་སིངྷའི་ཐུགས་བཅུད་ཕྲད་ཤོག་གི་མཐའ་ཅན། ལེ་ལོ་ཅན་སྒོམ་མི་དགོས་པ་བཏགས་པས་གྲོལ་བའི་མན་ངག་ངོ་མཚར་ཅན་བསྟན་པ་༼ཕ༽ཐམས་ཅད་ཀྱི་བུ་གཅིག་པུའི་རྒྱུད་གཏེར་སྟོན་གྱིས་གུ་རུ་ཆོས་དབང་དང་རང་གི་ཤོག་སེར་ལས་འབྲུ་ལན་གྱིས་ཞུས་དག་པ་ཚེ་འདིར་གཡེང་བས་ཁྱེར་ནས་སྙིང་ཏིག་ཉམས་སུ་མ་ལོན་ན་བར་དོར་སྐད་༼ཕ༽ཅིག་མའི་ཤེས་པ་ངོས་བཟུང་སྟེ་འཚང་རྒྱ་བའི་གདམས་པ་བར་དོ་མུན་སེལ་སྒྲོན་མེ་གཏད་རྒྱའི་མཐའ་ཅན། དེའི་བུ་ཡིག་བར་དོ་གནད་ཀྱི་ཉམས་༼ཕ༽འཁྲིད་དབང་པོ་ཐ་མའི་འོའི་མཐའ་ཅན། ཐེམས་མེད། གློང་གསལ་སྤྱིའི་རྒྱབ་ཡིག་གེགས་སེལ་༼ཕ༽གྱི་མན་ངག་བདུད་རྩིའི་བུམ་པ་སྒྲོན་མེར་ཤོག་གི་མཐའ་ཅན། ཐོད་རྒལ་གྱི་འཁྲིད་རྒྱབ་མུན་སེལ་ལུང་གི་སྒྲོན་མེ་ཞེས་པ་༼ཕ༽གཞི་ལམ་འབྲས་གསུམ་ལ་ལྔ་ལྔར་ཕྱེ་སྟེ་གཞུང་དོན་བཅོ་ལྔར་བཤད་པ་བཀའ་འདི་སྲུངས་ཤིག་གི་
མཐའ་ཅན། བརྩོན་འགྲུས་བསྐུལ་ཕྱིར་འཆི་བ་བརྟག་པ་དང་བླུ་༼ཀ༽བའི་གདམས་པ་འགྲོ་དོན་མཐར་ཕྱིན་ཤོག་གི་མཐའ་ཅན་རྣམས། བཞི་པ་སྙིང་ཁྲག་དང་འདྲ་བ་བརྗོད་པར་དཀའ་བ་ཡང་ཟབ་ཐེམས་མེད་ཀྱི་སྐོར་ལ། ས་བཅད་གསུམ་པ་ཡན་ཐེམས་ཡིག་ཉི་མའི་སྙིང་པོ་གཙོ་ཆེ་བར་བྱས། འདིར་སྤྱི་ཐེམས་གསང་བ་དཀའ་རྒྱ་ཅན་ལས། མ་འོངས་དུས་ན་གདམས་པ་འཐོར་དོགས་ནས༔ ཐེམས་ཡིག་མེད་ཀྱང་འདི་རུ་གུད་དུ་བཀོལ༔ ཐོག་མར་ཆོས་སྡེ་སྐྱེད་པར་བྱེད་པའི་མ༔ གློང་གསལ་འབར་མ་ཉི་མའི་གསང་རྒྱུད་འདི༔ ཤིན་ཏུ་གཉན་པས་བཀའ་རྒྱ་དམ་དུ་བྱ༔ ཞེས་པ་ལྟར། དོན་རྒྱུད་ཀུན་གྱི་སྙིང་པོ་ཆོས་འདི་སྐྱེད་པར་བྱེད་པའི་མ་ལྟ་བུ་ཀུན་ཏུ་བཟང་༼ཕ༽མོ་གློང་གསལ་ཐིག་ལེ་སྙིང་པོ་གསང་བའི་རྒྱུད་ལེའུ་བཅོ་བརྒྱད་པ་རྫོགས་བྱང་ཕྲད་ཤོག་གི་མཐའ་ཅན། དེའི་གསང་རྒྱུད་ཀྱི་འགྲེལ་པ་ཆེན་པོ་གློང་གསལ་༼ཀ༽སྒྲོན་མའམ་ལམ་འབྲས་གསེར་གྱི་མེ་ལོང་པདྨ་འབྱུང་གནས་ཀྱིས་མཛད་དར་རྒྱས་ཆོས་སྡིངས་པའི་གསན་ཡིག་ན་སྤྲུལ་སྐུ་དགའ་རབ་རྡོ་རྗེ་ཟེར་བ་འདུག་པ་དཔྱད། པ་རྫོགས་སོའི་མཐའ་ཅན། ཐེམས་མེད། འོད་གསལ་གསང་ལམ་འཕོ་བའི་གདམས་པ་གཉིས༔ དད་ལྡན་གཏོང་ཕོད་ངེས་ཤེས་ཅན་ལ་བྱིན༔ ཟབ་པའི་མཐར་ཐུག་ཚེ་སྒྲུབ་བཀའ་རྒྱ་འདི༔ བུ་ལ་སྟེར་ཡང་བཀའ་རྒྱ་ལན་གསུམ་ཐོབ༔ ཅེས་པ་ལྟར། མངོན་སུམ་གྱི་གནད་ལ་བརྟེན་ནས་རྡོ་རྗེ་སེམས་དཔའི་འོད་གསལ་གསང་༼ཕ༽ལམ་འོད་ཀྱི་སྣ་ཐག་སྐད་ཅིག་མའི་མཐུས་འཚང་རྒྱ་བར་བྱེད་པའི་ངོ་སྤྲོད་བར་དོའི་སྒོས་དབང་ཕྲད་ཤོག་གི་མཐའ་ཅན། གཡེང་བས་ཁྱེར་བའི་རྣལ་འབྱོར་བ་སྙིང་ཏིག་འདི་ཉམས་སུ་ལེན་ལོང་མ་བྱུང་ན་སྐད་ཅིག་གིས་འཚང་རྒྱ་༼ཕ༽བ་རྡོ་རྗེ་སེམས་དཔའི་གསང་ལམ་འཕོ་བའི་མན་
ངག་འདི་ཁོ་ནའོའི་མཐའ་ཅན། ཟབ་པའི་མཐར་ཐུག་ཚེ་སྒྲུབ་བཀའ་རྒྱ་༼ཕ༽མ་གསང་བའི་སྙིང་པོ་ཙིཏྟའི་གའུར་སྤོས་ཤིག་པའི་མཐའ་ཅན། ཞར་བྱུང་ཚེ་སྒྲུབ་ཤིན་ཏུ་༼ཕ༽ཟབ་པའི་ཡང་ཟབ་དང་བཅས་པ། ཡེ་ཤེས་དབབ་རྫས་རྩ་ཡི་སྦས་བཤད་དང་༔ ཟབ་ལམ་རྒྱབ་ཡིག་བཅུད་སྐྱེད་ཤ་སྦྱོར་དང་༔ རྡོ་རྗེ་ཐེམ་སྐས་རིགས་བརྒྱུད་བརྟགས་ཐབས་དང་༔ དབང་བསྐུར་སྙིང་བསྒུལ་གསང་བ་ཡང་གཅེས་དང་༔ བདེ་སྐྱིད་རྫས་སྦྱོར་སྲིད་གཅོད་བཀའ་རྒྱ་རྣམས༔ ལོ་བདུན་འགྲོགས་པའི་བརྟག་ཐུབ་སྙིང་གི་བུ༔ ཚེ་འདི་བློས་བཏང་སྙིང་ནས་ཆོས་བྱེད་པའི༔ སྙིང་གི་བུ་ཆེན་ལྔ་ལས་སྤེལ་མི་རུང་༔ ཞེས་པ་ལྟར། ཡེ་ཤེས་དངོས་སུ་དབབ་པའི་མན་ངག་མཁའ་འགྲོ་གསང་བའི་རྫས་༼ཕ༽སྦྱོར་བརྒྱུད་འཛིན་གཅིག་ལས་མི་སྤེལ་བའི་མཐའ་ཅན། ཟབ་ལམ་ཉི་ཟླ་ཁ་སྦྱོར་གྱི་རྒྱབ་ཡིག་སྦས་ཆོག་གསང་བའི་མན་ངག་༼ཕ༽རྩ་རིགས་ལྔའི་སྒོ་ནས་མཚན་ལྡན་ཕྱག་རྒྱ་བརྟག་པ་ཕྲད་ཤོག་གི་མཐའ་ཅན། བདེ་བ་ལམ་དུ་བྱེད་པ་ཤ་སྦྱོར་རྡོ་རྗེ་གསོ་ཐབས་གཅིག་ལས་མང་དུ་མ་སྤེལ་ཞིག་གི་མཐའ་ཅན། རང་ལུས་ཐབས་ལྡན་གྱི་བདེ་སྟོང་ཉམས་སུ་བླང་བ་༼ཕ༽ཚེ་གཅིག་རྡོ་རྗེའི་སྐུ་འགྲུབ་ཟབ་ལམ་རྡོ་རྗེའི་ཐེམ་སྐས་སྙིང་གི་ཡང་ཞུན་རྒྱ་ལྔའི་མཐའ་ཅན། དབང་སྡུས་སྙིང་བསྒུལ་གྱི་གདམས་པ་སྙིང་ལ་བཅང་བའི་༼ཀ༽མཐའ་ཅན། ཞར་བྱུང་མོ་གདོན་བསྲུང་བ་དང་བུད་མེད་ཀྱིས་སྐྱེས་པ་དབང་དུ་བསྡུ་ཐབས། གསང་བའི་ཡང་འཁོལ་༼ཀ༽འཁོར་ལོ་གསུམ་གྱི་དྲི་ཐབས། ཟབ་ལམ་ཡིད་བཞིན་ནོར་བུ་མཁས་པ་རྣམ་ལྔས་༼ཀ༽ཉམས་སུ་བླངས་ཚུལ་དྲ་མིག་འཁོར་ལོ། འཁོར་བ་རྩད་གཅོད་རྫས་སྦྱོར་ཟབ་༼ཀ༽མོ་སྲི་གཅོད་ཡིད་བཞིན་ནོར་བུ་ཕྲད་ཤོག་གི་མཐའ་ཅན། སྦྲུལ་ཤ་སོགས་རྫས་ལ་བརྟེན་པའི་སྲིད་གཅོད་
བཀའ་རྒྱ་མ། ལུས་གྱི་དྲོད་སྐྱེད་རྫས་ཀྱི་སྦྱོར་བ་དང་༔ སྟོབས་སྐྱེད་པ་དང་ས་རྡོའི་བཅུད་ལེན་དང་༔ ཚེ་འདིར་ལྟོ་གོས་གཡེང་བ་སེལ་བའི་ཕྱིར༔ སྙིང་ནས་ཆོས་བྱེད་དད་ལྡན་དགའ་ལ་སྦྱིན༔ ཚེ་ཡི་བཅུད་དུ་རླུང་གི་སྦྱོར་བ་དང་༔ མཆོག་ཏུ་ཟབ་པ་འབྱུང་བའི་འཆི་བླུ་གཉིས༔ དམ་ཆོས་ཚུལ་བཞིན་སྤྱོད་པ་འགའ་རེ་ལས༔ མང་དུ་མ་སྤེལ་རང་གི་སྙིང་ལ་ཆོངས༔ ཞེས་པ་ལྟར། གཏུམ་མོའི་རྒྱབ་ཡིག་ལུས་ཀྱི་དྲོད་སྐྱེད་རྫས་༼ཀ༽སྦྱོར་རིགས་མི་གཅིག་པ་ལྔས་གོས་ཀྱི་གཡེང་བ་སེལ་བ་ཞར་བྱུང་ཞབས་རྗེན་བྱ་ཐབས། ལུས་སྟོབས་བསྐྱེད་ཅིང་ཟས་ཀྱི་སྲེད་པ་སྤོང་བ་རིན་ཅེན་སའི་བཅུད་ལེན་༼ཀ༽གཏེར་ཁ་གསུམ་ལས་རི་མོ་ཅན་དུ་སྦས་པ། ཅུང་ཞི་སོགས་རྡོའི་བཅུད་ལེན་ལ་༼ཀ༽བརྟེན་ནས་ཚེ་འདིར་རྡོ་རྗེ་འཛིན་པར་འགྱུར་པ། ཚེ་བཅུད་བསྡུ་བའི་ཚེ་སྒྲུབ་བཀའ་འདི་གོང་མ་དང་ཕལ་ཆེར་འདྲ་འདུག་པས་གཞན་ཡོད་མེད་བརྟག །རྒྱ་ཤིན་ཏུ་ཟབ་པའི་མཐར་ཐུག་པ། ཤིན་ཏུ་ཟབ་༼ཀ༽པ་འབྱུང་པའི་འཆི་བླུ་བསེ་སྒམ་ནག་པོར་གཏམས་པ། ལུང་བསྟན་བཀའ་རྒྱ་གཏེར་བདག་སྤྲུལ་སྐུའི་ལུང་༔ ལུང་བྱང་སྐོར་གསུམ་ཆོས་བདག་སློབ་མའི་ལུང་༔ བསྟན་པ་སྤྱི་ལུང་གང་ཟག་སྒོས་ལུང་དང་༔ མཐའ་དབུས་འཁྲུགས་ཚུལ་གཏེར་སྟོན་སློབ་མའི་ལུང་༔ ལུང་སྐོར་དེ་རྣམས་རབ་ཏུ་གཅེས་ན་ཡང་༔ བརྟག་ཐུབ་སྙིང་གི་བུ་རྣམས་མ་གཏོགས་པ༔ མང་དུ་སྤེལ་ན་གཤེ་སྐུར་སྒྲོག་གཞི་དང་༔ ལོག་ལྟ་ཅན་རྣམས་སྡིག་གསོད་རྐྱེན་དུ་འགྱུར༔ ཞེས་པ་ལྟར། གཏེར་བདག་སྤྲུལ་སྐུའི་སྐྱེས་རབས་ལུང་བསྟན་༼ཕ༽གསལ་བའི་སྒྲོན་མའམ་ལུང་བསྟན་བཀའ་རྒྱ་མ་ཕྲད་ཤོག་གི་མཐའ་ཅན། ལུང་བསྟན་བཀའ་རྒྱ་ཆུང་བ་༼ཕ༽སྙིགས་དུས་འགྲོ་བའི་དཔལ་དུ་ཤར་བའི་མཐའ་ཅན། བསྟན་པ་སྤྱི་དང་གང་ཟག་སྒོས་
ལུང་མཐའ་དབུས་འཁྲུག་པ་གཏེར་བརྫུས་ཟོག་པོ་བརྟག་ཚུལ་སོགས་རྒྱས་པར་གསལ་བར་༼ཟུར༽སྟོན་པའི་ལུང་བསྟན་ཆེན་མོ་ཕྲད་ཤོག་གི་མཐའ་ཅན་རྣམས། ལྔ་པ་སྲོག་གི་དངས་མ་ལྟ་བུ་སྦས་ཆོས་གསང་བ་ཡང་ཏིག་སྐོར་ལ། རྒྱུད་བཅུ་བདུན། གློང་གསལ་ཉི་མའི་རྒྱུད་མཉམ་སྦྱོར་རྒྱུད་རྣམས་ཀྱི་བཅུད་དྲིལ་༼ཕ༽བ་ཟབ་ཆོས་གསང་བ་ཡང་ཏིག་ཐེམས་ཡིག་བཀའ་རྒྱ་མ་ཕྲད་ཤོག་གི་མཐའ་ཅན། ཐབས་ཕ་དང་འདྲ་བ་ཁྲེགས་ཆོད་ཀ་དག་གི་ངོ་སྤྲོད་དོན་གསལ་སྙིང་པོའི་གསང་འཁྲིད་༼ཕ༽ལོ་གསུམ་གྱི་གོང་ནས་ཞུ་བ་ཕུལ་ཏེ་གསེར་དང་སྨན་གྱི་མཎྜལ་ཚོགས་འཁོར་དང་བཅས་དགོས་པ་བཀའ་འདི་ཐུབ་པར་སྲུངས་ཤིག་གི་མཐའ་ཅན། ཤེས་རབ་མ་དང་འདྲ་བ་རྒྱ་མཚོ་འོད་གསལ་མུན་འཁྲིད་༼ཕ༽གསེར་གྱི་མཎྜལ་ཚོགས་འཁོར་ཞུ་བ་ལན་གསུམ་རེ་ཕུལ་རྗེས་སྟོན་པ་ཕྲད་ཤོག་གི་མཐའ་ཅན། གཅེས་པ་བུ་དང་མཚུངས་པ་དུས་བཞི་མཉམ་སྦྱོར་༼ཕ༽དང་འབྲེལ་བར་ཁོར་ཡུག་ཏུ་ཉམས་སུ་ལེན་པ་ཕྱི་ནང་གསང་གསུམ་གྱི་གདམས་པ་འགྲོ་བ་དཔག་མེད་གྲོལ་བར་ཤོག་གི་མཐའ་ཅན། མཐོང་བས་གྲོལ་བའི་གདམས་པ་བར་དོའི་ངོ་སྤྲོད་སངས་རྒྱས་ལག་བཅངས་སྤྲ་འཁྲིད་སྲོག་གཟེར་དུ་བསྟན་པའི་སྦས་༼ཕ༽ཆོས་དོན་བཞི་པ་ཡང་གཅེས་སྲོག་གི་དངས་མ་ཇོ་མོ་འཚོ་རྒྱལ་དང་གནུབས་ནམ་སྙིང་ལ་གནང་བ་ཚོགས་འཁོར་དང་གསེར་དང་འབྲུའི་མཎྜལ་ལན་གསུམ་རེ་དབུལ་དགོས་པ། དཔྲལ་བའི་མིག་ལས་གཅེས་པ་སྤྲ་འཁྲིད་བར་དོའི་ཞལ་༼ཕ༽གདམས་ཉམས་སུ་བླང་ཐབས་གསུམ་གྱི་སྒོ་ནས་བར་དོ་བཞིའི་ལམ་འཁྱེར་བསྟན་པ་ཕྲད་ཤོག་གི་མཐའ་ཅན། མཐོང་བས་གྲོལ་བའི་གདམས་པ་གསང་བ་ཐིག་ལེའི་ཡང་ཞུན་༼ཕ༽མངོན་སུམ་སྙིང་ཏིག་
གི་མན་ངག་བར་དོ་གནད་ཀྱི་མེ་ལོང་དམ་མེད་ལ་ཤོར་ར་རེའི་མཐའ་ཅན། དེའི་བུ་ཡིག་ཡང་གཅེས་སྦས་པ་ཞི་ཁྲོའི་ངོ་སྤྲོད་༼ཕ༽ཐུག་ཕྲད་སངས་རྒྱས་ལག་འཁྲིད་སྙིང་གི་དུམ་བུ་བསྟན་པ་མཐའ་རྒྱས་ཤོག་གི་མཐའ་ཅན། རྒྱལ་བ་རྡོ་རྗེ་སེམས་དཔའི་དགོངས་པ་བསྟན་པ་ཐམས་ཅད་ཀྱི་བུ་གཅིག་པའི་༼ཕ༽རྒྱུད་རྫོགས་བྱང་ཕྲད་ཤོག་གི་མཐའ་ཅན། རྒྱུད་ཀྱི་རྒྱལ་པོ་གཏེར་གྱི་ཡང་སྙིང་༼ཕ༽མངོན་ཤེས་རང་བྱུང་རིག་པ་རྒྱལ་པོའི་རྒྱུད་རྫོགས་སོའི་མཐའ་ཅན། སངས་རྒྱས་ཐམས་ཅད་ཀྱི་སྲས་གཅིག་པ་གསང་བ་སྤྱོད་པ་ས་བོན་གཅིག་ཤེས་༼ཕ༽ཀུན་གྲོལ་གྱི་རྒྱུད་རྫོགས་སོའི་མཐའ་ཅན་ཞར་བྱུང་དུ་གླེགས་བམ་བྲི་བ། བཅང་པ། བཀླག་པ། ཕན་ཡོན་བཅས་བསྟན་པ། མངོན་ཤེས་རིག་པ་རྒྱལ་པོའི་རྒྱུད་ཀྱི་དོན་འགྲེལ་ཆེན་༼ཕ༽མོ་གཏེར་གྱི་ཡང་སྙིང་སྲོག་གི་དང་མ་ཐུགས་ཀྱི་སྒྲོན་མེ་གནུབས་ནམ་མཁའི་སྙིང་པོས་མཁར་ཆུ་གསང་ཕུག་ཏུ་བྲིས་པ། རིག་པ་གནད་དགུའི་བཏགས་གྲོལ་ཤིན་ཏུ་ཟབ་༼ཕ༽པ་ཞལ་གདམས་དང་བཅས་པ་བསྟན་པ་དར་བ་དང་ཕྲད་ཤོག་གི་མཐའ་ཅན། བཏགས་གྲོལ་རབ་ཏུ་གནས་ཤིང་རྒྱུད་བཅང་༼ཕ༽བ་དབང་བསྐུར་དང་བཅས་པ་ལས་ཅན་མང་པོ་གྲོལ་བར་ཤོག་གི་མཐའ་ཅན། རྒྱུད་བཅངས་པ་ཙམ་གྱིས་གང་ཟག་རབ་འབྲིང་མཐའ་དག་༼ཕ༽གྲོལ་བྱེད་རང་བྱུང་གི་རྒྱུད་བཅང་ཐབས་པདྨའི་བཀའ་རྟགས་མེ་ཡིག་མ། རྒྱུད་བཅངས་པའི་སྐྱེས་བུ་དེ་འདས་ཚེ་གདུང་འབྱུང་བ་༼ཕ༽དང་འབྲས་བུ་ཐོབ་ཚུལ་ཕྲད་ཤོག་གི་མཐའ་ཅན། འགྲོ་དོན་རྒྱ་ཆེན་བྱ་བའི་ཕྱིར་ཇི་ལྟར་བཀླག་པའི་ཐབས་༼ཕ༽བསྟན་པ་གསང་བར་གྱིས་ཀྱི་མཐའ་ཅན་ཞར་ལ་དགའ་རབ་རྡོ་རྗེས་ཤྲཱི་སིངྷ་ལ་རྒྱུད་ཆེ་བ་བདུན་དང་བཅས་གཏད་ཚུལ། མུན་འཁྲིད་གསང་བ་མངོན་སུམ་འོད་
གསལ་གྱི་མཆོག་སྒོམ་པའི་གནད་ལ་༼ཕ༽ཟབ་པ་བཙན་ཐབས་སུ་རྩ་བཅིང་བ་དང་རླུང་། བཅིང་བ་གུད་དུ་ཕྱུང་སྟེ་སྦེད་པར་བྱའོའི་མཐའ་ཅན། སུ་ཡིས་མཐོང་ཡང་གདོད་མའི་རང་བཞིན་མངོན་དུ་རྟོགས་པ་སྣོད་བཅུད་༼ཕ༽གསལ་བ་མུན་པར་སྒྲོན་མེ་འདེགས་པ་དང་འདྲ་བ་ཕྲད་ཤོག་གི་མཐའ་ཅན། ངེས་ཤེས་འཕྲལ་དུ་སྐྱེ་བ་རྟགས་༼ཕ༽ཡིག་གསལ་བའི་སྒྲོན་མེ་སྲིད་མཚོ་སྒྲོལ་བའི་གྲུར་ཤོག་གི་མཐའ་ཅན། ལམ་དང་འབྲས་བུའི་གསད་གཟེར་དུས་ཚོད་མི་འགྱུར་བ་༼ཕ༽ཚད་ཀྱི་ཡི་གེ་མ་ནོར་གསལ་བའི་སྒྲོན་མེ་ལེགས་པར་དཔྱད་དགོས་ཡོད་དོའི་མཐའ་ཅན། ཡང་གཅེས་སྦས་པའི་ཡང་སྙིང་ཚ་བ་དམར་ཐག་གི་གདམས་པ་ཀ་དག་ལྷུན་གྲུབ་ཟུང་༼ཕ༽འཇུག་གི་ངོ་སྤྲད་སངས་རྒྱས་ལག་བཅངས་སུ་སྟོན་པའམ་སྐུ་གསུམ་གཞི་ལམ་འབྲས་གསུམ་དུ་ངོ་སྤྲོད་པ་ཐུགས་ཀྱི་ཡང་ཞུན་མཁར་ཆེན་ཐེམས་མེད། བཟས་བྲིས་པའི་མཐའ་ཅན། ཆོས་སྐུ་འོད་མི་འགྱུར་གཏན་ལ་དབབ་པ་༼ཕ༽གསལ་བྱེད་མིག་གི་ལག་ལེན་ཕྲད་ཤོག་གི་མཐའ་ཅན། ཞར་བྱུང་མ་འོངས་ཆོས་འདི་བཀའ་བབས་ཀྱི་ལས་ཅན་རྗེས་འཇུག་སློབ་མའི་ཞལ་གདམས་ཕྱོགས་དང་ལོ་རྟེན་འབྲེལ་དུས་ཚོད་བརྟག་པ། ཉིན་མཚན་ཁ་སྦྱོར་འོད་དཀར་ཨར་གཏད་དང་། གནད་འབེབས་དང་འཇུག་སྒྲ་ཡི་ཆོས་དང་ལྔ༔ དམ་གཙང་བཀའ་ཉན་ལུས་དང་ལོངས་སྤྱོད་དབུལ༔ ཉམས་ལེན་སྒྲུབ་ལ་མནའ་རྒྱ་ནུས་པ་ཡི༔ བུ་མིན་གཞན་ལ་བསྟན་ན་དམ་ཚིག་ཉམས༔ གསང་བའི་གནད་ཡིག་འོད་གསལ་འཁོར་ལོ་འདི༔ དམ་མེད་ལུས་ཀྱི་བུ་ལ་སྦྱིན་མི་རུང་༔ ཞེས་པ་ལྟར། ཟབ་པའི་ནང་ནས་ཡང་ཟབ་ཐུགས་ཀྱི་བཅུད་སྦས་པའི་ནང་ནས་སྦས་པ་སྙིང་གི་ནང་ནས་ཀྱང་སྙིང་སྲོག་ཐིགས་པ་གསང་བའི་གཟེར་ཐིག་ཡང་༼ཕ༽གཅེས་བདུན་པ་ཕྲད་
ཤོག་གི་མཐའ་ཅན་ཆིག་བརྒྱུད་ལས་མི་སྤེལ་ཞིང་སྒྲུབ་པའི་དམ་བཅའ་ལོ་གསུམ་གསེར་གཡུའི་མནྜལ་ལན་གསུམ་ཕུལ་ནས་རྟེན་འབྲེལ་བརྟག་དགོས་པ། མཚན་མ་རྨི་ལམ་སྦུབས་སུ་འཇུག་པའི་གསང་བའི་གནད་༼ཕ༽ཡིག་འོད་གསལ་འཁོར་ལོ་གབ་པ་གསལ་བྱེད་བདེ་ཆེན་སར་བགྲོད་པར་ཤོག་གི་མཐའ་ཅན། གསང་བའི་གེགས་སེལ་བདུད་རྩིའི་རྒྱ་མཚོ་དང་༔ བོགས་འདོན་ཟབ་མོ་གནད་ཀྱི་ཡིག་ཆུང་རྣམས༔ བུ་ལ་སྟེར་བར་མནའ་རྒྱ་ལན་གསུམ་ཐོབ༔ ཅེས་པ་ལྟར། རྒྱ་མཚོ་མུན་འཁྲིད་གསང་བའི་གཅེས་གནད་༼ཕ༽གེགས་སེལ་བདུད་རྩིའི་རྒྱ་མཚོ་རྒྱ་ལྔའི་མཐའ་ཅན། མུན་འཁྲིད་ཀྱི་ཡང་གཅེས་བོགས་འདོན་གནད་༼ཕ༽ཀྱི་ཡིག་ཆུང་ཕྲད་ཤོག་གི་མཐའ་ཅན་རྣམས། དྲུག་པ་གདམས་སྐོར་ཡོངས་རྫོགས་སྤྱིའི་ཁ་སྐོང་ཡིག་ཕྲན་གྱི་སྐོར་ལ། སྐུ་གསུང་ཐུགས་ཀྱི་རྟེན་གསུམ་གྱི་ལོ་རྒྱུས་མདོར་བསྡུས་དང་བྲག་དམར་རི་མོ་ཅན་དུ་༼ཀ༽སྦས་ཚུལ་གྱི་ལོ་རྒྱུས་གསལ་སྒྲོན་ཆུ་ཡིག་ཅན། ཞལ་གདམས་སྙིང་གི་དུམ་༼ཀ༽བུ་ཞེས་པ་ཆོས་རྒྱལ། འཚོ་རྒྱལ། བཻ་རོ་ཙ་ན། གནུབས་ནམ་སྙིང་། གནུབས་སངས་རྒྱས་ཡེ་ཤེས། ངན་ལམ་རྒྱལ་བ་མཆོག་དབྱངས། རླངས་དཔལ་གྱི་སེང་གེ །དཔལ་གྱི་ཡེ་ཤེས། སྐ་བ་དཔལ་བརྩེགས། ཅོག་རོ་ཀླུའི་རྒྱལ་མཚན། ལང་འགྲོ་དཀོན་ཅོག་འབྱུང་གནས་རྣམས་ལ་གདམས་པ། སྐུ་རྟེན་པདྨ་ཐོད་གྲོལ། གསུང་རྟེན་རྟ་ཕག །ཐུགས་རྟེན་ཚེ་དཔག་མེད་གསུམ་གྱི་ལོ་རྒྱུས་༼ཀ༽རྒྱས་པ་གསལ་བའི་སྒྲོན་མེ་ཁྱད་པར་ཅན། ཚེའི་བར་གཅོད་པ་བཟློག་ཕྱིར་གསང་བ་སྲོག་༼ཕ༽གི་ཙཀྲའི་བྲི་ཡིག་ཕྲད་ཤོག་གི་མཐའ་ཅན། ལྟ་སྒོམ་སྤྱོད་འབྲས་དབང་དམ་ཚིག་གི་ངོ་སྤྲོད་ཉི་མའི་སྙིང་པོ་ཞེས་པ་སྤྲོས་གཅོད་ཞུས་ལན་གྱི་གདམས་པ། ཛམྦྷ་
ལ་ཕྱི་ནང་གསང་གསུམ་དུ་སྒྲུབ་པ་ཙིཏྟ་རིན་པོ་ཆེ་སྲོག་གི་སྒྲུབ་ཐབས་ཞེས་པར་ནང་གསེས་ཀྱི་ཕྱི་ཆུ་སྦྱིན་ལ་བརྟེན་ནས་ཛཾ་སེར་དུ་བསྒྲུབ་པ། ནང་རྫས་ལ་འཁོར་ལོ་བསྙེན་སྒྲུབ་ལ་བརྟེན་ནས་ཛཾ་དམར་དུ་སྒྲུབ་པ། གསང་བ་བཅས་གོང་ལྟར་གྱིས་ལས་ལ་བཀོལ་བ་ཛཾ་ནག་དུ་བསྒྲུབ་པ། དབང་སྡུད་ལས་ཀྱི་ཡང་ཁོལ་ཞར་བྱུང་ཐབས་ལམ་པདྨ་བཅུད་བསྡུས་ཀྱི་དབང་སྡུད་དང་བཅས་པ་རྣམས། བདུན་པ་བཀའ་དང་བསྟན་པ་བསྲུང་བ་ཆོས་སྐྱོང་གི་སྐོར་ལ། ཐེམས་བྱང་དུ་གསལ་བ་དཔལ་མགོན་མ་ནིང་ནག་པོ། གཟའ་རྒོད་དུག་གི་སྤུ་གྲི །དམ་ཅན་སྐྱེས་བུ་ཆེན་པོ་བཛྲ་ཐིག་ལེ་རྩལ། ཕུང་བྱེད་ལས་ཀྱི་རླུང་དམར། སྲིད་གསུམ་དབང་སྡུད་ལྷ་ཆེན་གུ་ལང་རླུང་གི་ཞགས་པ། ཕན་གནོན་གདམས་པ་ཁ་འཐོར་སྐོར་དང་དྲུག །དང་པོ་ནི། སངས་རྒྱས་བསྟན་པ་འཛིན་སྐྱོང་བསྲུང་བའི་ཕྱིར༔ བཀའ་བསྲུང་དམ་ཅན་ཕན་གནོད་ལས་ཚོགས་སྐོར༔ མ་འོངས་དོན་དུ་ཨྱོན་བདག་གི་སྦས༔ མ་ནིང་ནག་པོ་དྲིལ་སྒྲུབ་སྤུ་གྲི་འདི༔ གཏེར་ཁ་འདི་ཡི་སྤྱི་སྲུང་ཆེན་པོ་སྟེ༔ བཀའ་རྫོགས་ལུང་ཟིན་བུ་མཆོག་མ་གཏོགས་པ༔ སྤེལ་དུ་མི་རུང་གཅེས་པའི་སྲོག་བཞིན་བཅང་༔ ཞེས་པ་ལྟར་གཏེར་ཁ་འདིའི་ཆོས་བཀའ་སྤྱིའི་སྲུང་མ་ཡེ་ཤེས་ཀྱི་མགོན་པོ་མ་ནིང་དྲིལ་སྒྲུབ་སྤུ་གྲིའི་སྐོར་གཏེར་གནས་ཀྱི་དབང་དུ་བྱས་ཐུགས་སྒྲུབ་ཡང་སྙིང་འདུས་པའི་ཆོས་སྡེར་འོས་ནའང་། ཐེམས་ཀྱི་ཟིན་སོས་སྐབས་འདིར་གཙོ་ཆེ་བར་སྣང་བས་འདམ་ཁར་འདུག་པ་ནས་རྫོགས་ཆེན་འདི་རཏྣའི་གཏེར་ཆོས་ཀྱི་ཡང་རྩེའི་དབང་དུ་བྱས་ཏེ་བཀོད་པ་ནི། སྤྲུལ་སྐུ་རཏྣ་གླིང་པས་གཉལ་སྨད་དག་རི་སྤྱང་དམར་ཆོས་རྫོང་ནས་སྤྱན་དྲངས་པའི་མཐུ་སྟོབས་ནུས་པ་འགྲན་ཟླ་བྲལ་བའི་བསྟན་བསྲུང་
དཔལ་མགོན་མ་ནིང་དྲིལ་སྒྲུབ་སྤུ་གྲིའི་སྐོར་ལ། རས་བྲིས་ཀྱི་དཀྱིལ་འཁོར་དུ། ཞུ་འབུལ། གནང་བ་བྱིན་ནས། གོང་གནོན་ཕྱག་རྡོར་གྱི་དབང་། བུམ་པར་བརྟེན་པའི་དབང་བཞི། སྐུ་བདུད་རྩི། རྡོ་རྗེ་གྲི་གུག །དར་སྐུ་བླ་རྡོ། ཕྱག་མཚན་དང་བཅས་པས་སྐུ་གསུང་ཐུགས་ཡོན་ཏན་འཕྲིན་ལས་ཀྱི་དབང་། བསྒྲལ་དབང་། གཏོར་དབང་། བྱིན་འབེབས། རྩལ་དབང་། སྔགས་དབང་། ཞལ་གདམས་ལུང་དབང་རྣམས་དང་བཅས་པ། གཏོར་མ་ལ་བརྟེན་པའི་སྲོག་དབང་བསྡུས་པ་དབང་བཞིའི་ཚུལ་དུ་མནོས་ནས། ལུང་ལ། དབང་སྒྲུབ། མཆོད་འཕྲིན། ཡང་གཅེས་སྐོར་དང་གསུམ། དང་པོ་ལ། མ་ནིང་དྲེགས་པའི་སྲོག་དབང་དཀྱིལ་འཁོར་བུམ་པ་སོགས་ལ་བརྟེན་ནས་རྒྱས་པར་བསྐུར་བ་སྔོན་འགྲོ་དངོས་གཞི་རྗེས་གསུམ་གྱིས་བསྟན་པའི་ཡི་གེ །དེའི་དཀྱིལ་འཁོར། བུམ་པ། དབང་གཏོར། བདུད་རྩི། ཐུགས་ཡིག །དར་ནག །བླ་རྡོ། ཕྱག་མཚན། ལིངྒ། གཏའ་གཏོར། རྒྱུན་གཏོར་རྣམས་ཀྱི་དཔེ་རིས། སྲོག་དབང་གཏོར་མར་བརྟེན་ནས་བསྡུས་པར་བསྐུར་བའི་ཡི་གེ །དཔལ་མགོན་མ་ནིང་ནག་པོའི་ཕྱི་སྒྲུབ་དར་ནག་ལ་བརྟེན་ནས་སྣང་སྲིད་ཟིལ་གནོན་ལྷ་འདྲེ་མི་གསུམ་དབང་སྡུད་དགྲ་བགེགས་ཚར་གཅོད་པའི་གདམས་པ་དར་ནག་རྟེན་སྐུའི་དཔེ་རིས་དང་བཅས་དཔལ་མགོན་སྲོག་བདུད་ནག་པོའི་གསང་བ་རྩ་བའི་སྒྲུབ་ཐབས་སྲོག་གི་སྤུ་གྲི་ཡང་གཅེས་གནད་ཡིག་དང་བཅས་པ། འཇིགས་བརྒྱད་ཞི་ཞིང་དགོས་འདོད་ཆར་ལྟར་དབབ་པ་སྐུའི་མགོན་པོ་དཀར་པོ་ཞི་བར་སྒྲུབ་པ་བར་གཅོད་ཀུན་སེལ། སྣང་སྲིད་དབང་སྡུད་གསུང་གི་མགོན་པོ་དམར་པོ། དབང་དུ་སྒྲུབ་པའི་གསང་བའི་ཡང་བཅུད། ཚེ་བསོད་ནམས་དཔལ་འབྱོར་སྤེལ་བ་ཡོན་ཏན་གྱི་
མགོན་པོ་སེར་པོ་རྒྱས་པར་སྒྲུབ་པ་ཡིད་བཞིན་ནོར་བུ། བསྟན་པའི་རུ་ཏྲ་སྒྲོལ་བ་འཕྲིན་ལས་ཀྱི་མགོན་པོ་ལྗང་གུ་དྲག་པོར་སྒྲུབ་པ་སྲོག་རྩ་དམར་འབྱིན། གཅེས་པའི་ནང་ནས་ཡང་གཅེས་མ་ནིང་གསང་བའི་དྲིལ་སྒྲུབ་སྦྱོར་དངོས་མཇུག་གསུམ་གྱིས་བསྟན་པ། རྣལ་འབྱོར་པའི་དབུལ་བ་སེལ་ཞིང་དགོས་འདོད་ཆར་ལྟར་དབབ་པ་མ་ནིང་ཛཾ་ནག་ནོར་སྒྲུབ་ཤིན་ཏུ་ཟབ་ཅིང་གནད་ཆེ་བ། དེའི་དཀྱིལ་འཁོར། གཏོར་མ་རིན་ཅེན་འབར་བའི་དཔེ་རིས་བཅས་པ་རྣམས། གཉིས་པ་མཆོད་འཕྲིན་ལ། དཔལ་མགོན་མ་ནིང་གཙོ་འཁོར་གསུམ་པ་ཕྱིའི་ཡང་ཁོལ་བརྒྱད་དང་བཅས་པའི་ལས་བྱང་དད་པ་དམ་ཚིག་མ་འགྲུབ་པའི་མཐའ་ཅན། དཔལ་ལྡན་མགོན་པོའི་ཐུགས་དམ་བཀང་བའི་རིམ་པ་བདག་ནི་རྣལ་འབྱོར་དམ་ཚིག་མ། སྲོག་བདུད་མ་ནིང་ནག་པོའི་དམ་བདར་བཅོལ་དམ་དགོངས་གསོལ་མ་ཚིག་ལྷུག་ཕུན་ཚོགས་མཛོད་ཀྱི་མཐའ་ཅན། བསྐུལ་བྱང་ལོགས་སུ་བཀོལ་བ་ལྷ་ཆེན་དཔལ་འབར་མ་བདེན་པ་བདར་དང་བཅས་པ་རྣམས། གསུམ་པ་ཡང་གཅེས་སྐོར་ལ། གསང་ཏིག་བླ་རྡོའི་མན་ངག་ཁོང་ནང་གི་སྙིང་དང་འདྲ་བ། ནང་འགྲས་རྦོད་གཏོང་ལྷ་སྲིན་གནད་ལ་འབེབས་པ་སྟོབས་ལྡན་ཟབ་མོའི་འཁོར་ལོ། དམ་ཉམས་ཀྱི་ཚེ་བསོད་ནམས་ནུས་པ་རྫུ་འཕྲུལ་འཕྲོག་པ་སྟག་པའི་སྒམ་བུ་སོར་བཞི་པར་བརྟེན་པ་གསང་བ་གནད་ཀྱི་ཡང་གཅེས། རྒྱ་ཡིག་འབྲུ་བདུན་ཅུ་དོན་གསུམ་མར་བརྟེན་པའི་འཁུ་ལྡོག་བསྲུང་བ་གསང་བའི་ཡང་གཅེས། ཡང་གཅེས་གནད་ཀྱི་ལྡེ་མིག་དྲག་པོ་རང་གཤེད་གནད་ལ་དབབ་པའི་མན་ངག །སྔགས་ཀྱི་འབྲུ་ཐེམས་ཞར་བྱུང་སྔགས་ཀྱི་འབྱིན་འཇུག་དང་བཅས་པ་འཆི་ཐེབས་གཅིག་ལས་སྤེལ་མི་རུང་བ། དཔལ་མགོན་མ་ནིང་གནས་ལ་ཆགས་པ་དང་གཏའ་རུ་བརྟེན་ཅིང་གཟུང་བའི་ཐབས། དཔལ་
མགོན་མ་ནིང་གི་ཕྱི་ནང་གསང་བའི་རྟེན་བཅའ་ཐབས་ལང་འགྲོ་ལོ་ཙྭ་བར་གཏད་པ། ཡང་གཅེས་གནད་ཀྱི་ཞལ་གདམས་ཆིག་བརྒྱུད་བཀའ་རྒྱ་མ། ཡང་གཅེས་གནད་ཡིག་སྙིང་དང་འདྲ་བ་ཆིག་བརྒྱུད་གཅིག་ལས་མི་སྤེལ་བ་པདྨའི་ཞལ་གདམས་ཤིན་ཏུ་ཟབ་པ། ཡང་གཅེས་གནད་ཀྱི་སྤྱི་རྒྱུད་སྦས་པའི་ཟབ་གནད་ཅེས་པར་ནང་གསེས་ཀྱི་རྒྱ་ཡིག་གིས་བསྲུང་བ། བླ་རྡོ། གནད་འབེབས། ལས་མི་འགྲུབ་པའི་དོགས་པ་མ་མཆིས་པའི་གནད་ཡིག །རྦད་པའི་གནད་ཡིག །སྤོས་སྦྱོར། གཤེད་འབེབས་ཀྱི་དམོད་པ། གསང་སྔགས་ཀྱི་གནད་རྣམས་སྟོན་པ་དཔྲལ་བའི་མིག་དང་ཁོང་པའི་སྙིང་ལྟ་བུ། ཙནྡན་གྱི་བེང་ལ་བརྟེན་ནས་ལྷ་སྲིན་འཁུ་ལྡོག་སྤོང་བ་དང་སྙིང་དང་འདྲ་བའི་མན་ངག་རྟེན་འབྲེལ་གནད་ཡིག་བཅུ་གཉིས་མར་གྲགས་པ། མ་ནིང་བཤན་ནག་སྤུ་གྲི་ཕུང་བྱེད་ལས་ཀྱི་རླུང་དམར་གནམ་སྐས་བྲག་ནས་གདན་དྲངས་པ་འབྲུབ་ཁུང་། སྤྱང་ཐོག །ཐུན་སྣོད། ཕུར་པ། ལིངྒའི་དཔེ་རིས་དང་བཅས་པ། སྲོག་བདུད་མ་ནིང་ནག་པོའི་ལས་མཐའ་དམ་སྲི་ཁ་བཅིང་ཤིན་ཏུ་ཟབ་ཕྱིར་གུད་དུ་སྦས་པ་རྣམས། གཉིས་པ་གཟའ་རྒོད་དུག་གི་སྤུ་གྲིའི་སྐོར་ནི། གཟའ་རྒོད་ནག་པོ་དུག་གི་སྤུ་གྲི་འདི༔ ཡང་གསང་སྙིང་གི་བཀའ་ཡི་སྲུང་མ་ལས༔ ཁྱད་པར་གློང་གསལ་རྒྱུད་ཀྱི་བཀའ་སྲུང་ངོ་༔ ཞེས་པ་ལྟར། སྲོག་དབང་གི་ཡི་གེ་ལས་བྱུང་བ་ལྟར་གཏོར་མའི་རྗེས་གནང་ཕྱག་མཚན། སྐུ། བླ་རྡོ། མེ་ལོང་། རྟག་གཏོར། བཀའ་སྡོད། རྩལ་དབང་། དམ་བསྲེ། ཞལ་གདམས་ལུང་དབང་དང་བཅས་པ་ལེགས་པར་མནོས་ནས། ལུང་ལ། རྩ་བའི་སྒྲུབ་པ་རང་བསྲུང་གནད་འབེབས༔ སྲོག་ཏིག་ཨོལ་དགག་འཁོར་གྱི་ཐེའུ་བྲང་གསུམ༔ དུག་འབྱིན་གསོལ་ཁ་བཀང་
གསོ་ལ་སོགས་པ༔ བརྒྱུད་འཛིན་བུ་མཆོག་བསྟན་པ་བསྲུང་བ་ལ༔ འགའ་རེ་ཙམ་ལས་མང་དུ་སྤེལ་མི་རུང་༔ དེ་ལས་གསལ་ཁ་བཀང་གསོ་རང་བསྲུང་རྣམས༔ ཆོས་བཀའ་འདི་ཡིས་བརྒྱུད་འཛིན་འགའ་ལ་སྤེལ༔ ཞེས་པ་ལྟར་གཟའ་བདུད་ཆེན་པོའི་གསང་༼བྱང༽སྒྲུབ་དུག་གི་སྤུ་གྲི་དྲག་པོ་ལས་ཀྱི་མཐར་ཐུག་པ། རང་ལུས་ཚགས་སུ་གཞུག་པ་རང་བསྲུང་༼བྱང༽ཟབ་པའི་མཐར་ཐུག་འདི་མེད་སྡིག་པའི་ཕྲུ་གུ་གསོ་བ་འདྲ་བ། རང་གཤེད་གནད་ལ་དབབ་པའི་ཡང་གཅེས་སྲོག་ལས་༼བྱང༽གཅེས་པ་ས་མཱ་ཡའི་མཐའ་ཅན། ཡང་གཅེས་གུད་དུ་སྦས་པ་གསང་བའི་གནད་ཡིག་གཅེས་པ་དམ་ཚིག་གི་དམིགས་གནད། སྟོད་མནན། གནད་དབབ་ཤིས་བཞིའི་སྲོག་ཏིག་སློབ་དཔོན་རོམ་བུ་གུ་ཧྱའི་ཐུགས་བཅུད། ཡང་གཅེས་སྙིང་གི་གདམས་པ་ཨོལ་དགག་གི་མན་ངག་ལོངས་སྤྱོད་ལྡན་ཞིང་བཀྲ་ཤིས་པའི་མཐའ་ཅན། དམ་ཅན་སྲོག་ཕུར་བཅའ་ཐབས་ཙིཏྟར་ས་མཱ་ཡའི་མཐའ་ཅན། སྒབ་འདྲེ་ཐེའུ་བྲང་ལྔའི་མནན་ཐབས་གཅེས་འཕང་རྒྱས་བཏབ་ས་མཱ་ཡའི་མཐའ་ཅན། ཞུད་སེལ་གྱི་གནད་༼བྱང༽ཡིག་ཤིན་ཏུ་གསང་བའི་མཐའ་ཅན། གཅེས་གནད་དུག་དབྱུང་གི་ཐབས་༼བྱང༽བུ་མཆོག་གཅིག་ལས་མི་སྤེལ་བའི་མཐའ་ཅན། གཟའ་བདུད་ཆེན་པོའི་བཀང་བ་དབྱིངས་དང་ཡེ་ཤེས་མ་མཚོན་ཆར་ཤོག་གི་མཐའ་ཅན། མཆོད་བསྟོད་ཁྲག་མཚོ་ཁོལ་མའི་རྒྱུད་ལས་ཕྱུང་བ་སངས་རྒྱས་བསྟན་སྐྱོང་མ། བླ་རྡོ་ཡང་གཅེས་སྟོད་གནོན་ཤི་ས་བསྟན༔ གནད་ཐིག་ལས་སྦྱོར་ཡང་གཅེས་ནོར་སྒྲུབ་དང་༔ ཁྱད་པར་གཅེས་གནད་སྲོག་དབང་བཀའ་ཐེམས་བཅས༔ པང་དུ་སྦྲུལ་བྱུང་ཁ་ནས་མེ་འབར་ཡང་༔ ཆིག་བརྒྱུད་ཡིན་ཕྱིར་ཤི་བའི་ཁ་བཞིན་སྡོམས༔ ཚུལ་བཞིན་མ་བཤད་རང་
སྲོག་ངེས་པ་གཅོད༔ ལས་ཅན་བུ་མཆོག་ལྔ་ཡིས་འདི་བཟུང་ལ༔ སངས་རྒྱས་བསྟན་པའི་དོན་དུ་བག་ཡོད་སྤྱོད༔ ཅེས་པ་ལྟར། ལུས་དང་གྲིབ་བཞིན་འགྲོགས་པ་བླ་༼བྱང༽རྡོའི་མན་ངག་ཤིན་ཏུ་གསང་བའི་མཐའ་ཅན། སྟོད་ལ་གནོན་པ་༼བྱང༽སྙིང་འདྲ་གཅིག་ལས་མང་བ་རིའི་མཐའ་ཅན། གཅེས་པ་སྙིང་དང་འདྲ་བ་ལོག་གནོན་ཤི་ས་བསྟན་པའི་གདམས་པ་སྙིང་ལ་ཆོངས་ཤིག་ས་མཱ་ཡའི་མཐའ་ཅན། གཡང་དུ་བཀུག་སྟེ་ནོར་སྒྲུབ་པའི་ཟབ་གནད་ཙིཏྟའི་གའུར་ས་མཱ་ཡའི་མཐའ་ཅན། མཆོག་ཏུ་གཅེས་པའི་ཟབ་གནད་སྲོག་དབང་ཆེན་མོ་བཀའ་ཐེམས་གནད་ཡིག་དང་བཅས་པ་ཆིག་བརྒྱུད་བཀའ་རྒྱ་མ་སྙིང་ཁྲག་གི་དངས་མ་ལྟ་བུ། སྔགས་ཀྱི་འབྱིན་འཇུག་ཤི་ས་བསྟན་པ་ལས་ཅན་གཅིག་ལ་གཏད་རྒྱའི་མཐའ་ཅན། འབྱིན་འཇུག་སྔགས་ཀྱི་འབྲུ་ཐམས་གུད་དུ་བཀོལ་བ་ཆིག་བརྒྱུད་བཀའ་རྒྱ་མ། མདོས་ཆེ་༼བྱང༽ནག་མོ་དགུ་སྐོར་རྣམས། གསུམ་པ་དམ་ཅན་སྐྱེས་བུ་ཆེན་པོ་བཛྲ་ཐིག་ལེའི་སྐོར་ནི། དམ་ཅན་སྐྱེས་བུ་རྡོ་རྗེ་ལེགས་པ་འདི༔ རྣོ་མྱུར་དྲག་རྩལ་ཐོག་དང་འདྲ་བའི་ཕྱིར༔ སྒྲུབ་ཐབས་མན་ངག་ལས་ཚོགས་སྤྱི་སྲུང་ལས༔ ཁྱད་པར་ཡང་ཏིག་སྙིང་པོའི་བཀའ་བསྲུང་ཡིན༔ ཞེས་པ་ལྟར། སྒོས་ཐེམས་ནས་ཟིན་པའི་སྒྲུབ་སྐོར་ལ། སྤྱི་ཐེམས་ལས། རྩ་བའི་སྒྲུབ་ཐབས་གསོལ་ཁ་བསྟོད་བསྐུལ་དང་༔ བཀང་གསོ་ལ་སོགས་ལས་ལྡན་འགའ་ལ་སྤེལ༔ ཞེས་པ་ལྟར། རྡོ་རྗེ་ལེགས་པའི་གསང་སྒྲུབ་སྲོག་གི་སྤུ་གྲི་ཞེས་པ་དང་པོར་འབོད་པ། བར་དུ་རྦད་པ། མཐའ་མར་ལས་ལ་སྦྱོར་བ་གསུམ་བསྟན་པ་ཞར་བྱུང་ཤི་ས་གནད་དབབ་བཅས་པ་གནུབས་ནམ་སྙིང་གིས་ཡི་གེར་བཀོད་པ། བཀང་གསོ་གསོལ་ཁ་ཆེན་མོ་ཕུད་སྐོང་
དགོས་འདོད་རེ་སྐོང་འཕྲིན་ལས་ཀྱི་སྤུ་གྲི་ལ་༼ཟུར༽ནང་གསེས་ཀྱི་གསོལ་ཁ་དགོས་གསོལ། བཀང་བ་ཀྱེ་གསན་མ། བསྟོད་པ་རྒྱལ་བ་ཤཱཀ་ཐུབ་མ། བསྐུལ་ལྷོ་ནུབ་མདངས་བཅས་པ་གནུབས་ནས་སྙིང་གི་ཡི་གེར་བཀོད་པ། གནད་འབབས་ཤི་ས་ཨར་ལ་གཏད་པ་དང་༔ ནོར་སྒྲུབ་མངོན་ཤེས་ནད་པ་བརྟག་པ་དང་༔ སློབ་མ་དང་ནི་ཡོན་བདག་དམ་འགལ་བསྒྲལ༔ དམར་ནག་ལ་སོགས་ཤིན་ཏུ་ཟབ་པའི་ཕྱིར༔ སྙིང་གི་བུ་ལ་ཆིག་བརྒྱུད་སྤེལ་བ་ལས༔ དམ་མེད་ལུས་ཀྱི་བུ་ལ་འདི་མི་བསྟན༔ སྙིང་ཀྱི་དཀྱིལ་དུ་སྦོས་ཤིག་ས་མཱ་ཡ༔ ཁྱད་པར་ཡང་ཟབ་གསང་བའི་ནོར་སྒྲུབ་དང་༔ ཆོ་འཕྲུལ་ལ་སོགས་ཟབ་ཆོས་མཐར་ཐུག་པ༔ བུ་ལ་ཆིག་བརྒྱུད་ཡིན་ཕྱིར་ཨ་ཐཾ་རྒྱ༔ ཞེས་པ་ལྟར། དམ་ཅན་སྲོག་གི་གནད་འབེབས་ཤི་ས་ཨར་ལ་གཏོད་ཐབས་༼ཟུར༽སྙིང་གི་བུ་གཅིག་ལས་སྤེལ་མི་རུང་བ། དམ་ཅན་གྱི་ནོར་སྒྲུབ་རིན་ཅེན་གཏེར་མཛོད་༼ཟུར༽ཕྲད་ཤོག་གི་མཐའ་ཅན། པྲ་མོ་ལ་བརྟེན་པའི་མངོན་ཤེས་༼ཟུར༽སྒྲུབ་པ་དང་དགྲ་ལ་༼ཟུར༽རྟགས་ནམ་ཡོང་གསལ་སྟོན། ནད་པ་འཚོ་འཆི་བརྟག་པ། སློབ་མ་སྙིང་རིང་བསྒྲལ་༼ཟུར༽བ། ཡོན་བདག་དམ་ལོག་༼ཟུར༽བསྒྲལ་བ། ཐག་རིང་དུ་འགྲོ་ན་དོན་ཆེན་འགྲུབ་མི་འགྲུབ་བརྟག་པ། ཐེམས་མེད། དགྲ་ལ་ཁྲག་གཟེར་དམར་༼ཟུར༽ནད་གཏོང་བ། ནོར་སྒྲུབ་སྙིང་གི་དུམ་བུ་ཅི་བསམ་གྲུབ་པར་ཐེ་ཚོམ་མེད་པའི་མཐའ་ཅན། ཐེམས་མེད། ནོར་སྒྲུབ་གནད་ཡིག་ཡང་གཅེས། ཐེམས་མེད། ཇག་འཆིང་ཟབ་མོ། ཐེམས་མེད། མདོས་གཞུང་ཆེན་༼ཟུར༽མོ་ཞེས་པ་སྲིའུ་གསོ་བ། ཐེམས་མེད། རྦོད་གཏོང་བཟློག་པ། དགྲ་ལ་རྦད་པ་སོགས་ཀྱི་ཁ་བསྒྱུར་དང་བཅས་པ་རྫོགས་སོའི་མཐའ་ཅན་སྒོས་ཐེམས་དང་བཅས་པ་རྣམས། བཞི་པ་ངན་སྔགས་ཀུན་གྱི་མཐར་ཐུག་ཕུང་
བྱེད་ལས་ཀྱི་རླུང་དམར་ནི༔ ཐེམས་ཡིག་ལས། ཀྱེ་མ་ཕུང་བྱེད་ལས་ཀྱི་རླུང་དམར་འདི༔ ངན་སྔགས་ཀུན་གྱི་མཐར་ཐུག་འདི་ཡིན་ཏེ༔ རྒྱུད་དང་གདམས་པ་སྤྲ་འཁྲིད་མན་ངག་བཞི༔ འབྱེད་པའི་ལས་དང་དཀྲུག་བྱེད་མཛེ་རྐང་མ༔ བསྐྲད་པ་དང་ནི་སོ་སོའི་དཔེ་ཆུང་དང་༔ གནད་ཀྱི་མན་ངག་བསྲུང་བ་ལ་སོགས་ཏེ༔ སྣ་རེས་འཇིག་རྟེན་ཕུང་ལས་འགྲུབ་པའི་ཕྱིར༔ སྙིང་བུ་ལྔ་ལས་འདི་ཉིད་སྤེལ་མི་རུང་༔ ཐམས་ཅད་རྫོགས་ན་རྒྱལ་ཁམས་རླུང་ལ་བསྐུར༔ སྙིགས་མའི་སེམས་ཅན་ཉལ་ཐག་འདིས་གཅོད་པས༔ བསམ་མེད་ཞེ་སྡང་ཅན་ལ་འདི་སྤེལ་ན༔ པདྨ་ང་བསླུས་བཀའ་ཆད་སྣ་དགུ་འབྱུང་༔ བསྟན་འཛིན་སྙིང་གི་བུ་གཅིག་མ་གཏོགས་པ༔ སྤེལ་དུ་མི་རུང་དམ་ཚིག་ས་མཱ་ཡ༔ ཞེས་པ་ལྟར། རླུང་དམར་གྱི་སྒོས་ཐེམས་བཀའ་རྒྱ་ཅན། དེ་ལས་བྱུང་བའི་གདམས་སྐོར་ལ། ཕུང་བྱེད་ནག་པོ་འཁྲུགས་བྱེད་ལས་ཀྱི་རླུང་དམར་གྱི་རྒྱུད་ལེའུ་གསུམ་པ། འཁྲུགས་བྱེད་ལས་ཀྱི་རླུང་དམར་གྱི་གདམས་པ་འཁོར་ལོ་ཆེན་པོ་རྒྱལ་ཁམས་ཕུང་བྱེད། འཁོར་ལོ་འབྲིང་པོ་གྲོང་ཁྱེར་དཀྲུག་བྱེད། འཁོར་ལོ་ཆུང་བ་བཟའ་ཚང་དཀྲུག་བྱེད། དུས། སྦྱོར་ལུགས། སྲོག་ཤིང་། སྔགས་བྱང་སྐད། ཐུན། ལྟས་རྣམས་སྟོན་པའི་ཞལ་གདམས་སྤྲ་འཁྲིད་གསལ་བ། བསྲུང་འཁོར། མི་རྡུག་པ། ཁྱད་པར་གྱི་རྫས་རྣམས་སྟོན་པ་ཡང་གཅེས་གབ་སྦས་གནད་ཀྱི་མན་ངག །ལྷ་དབྱེ་གཏོར་སྔགས་དམོད་བཅོལ་བཅས་པ་ཟུར་དུ་བཀོལ་བ། སྤྱན་འདྲེན་ནུབ་བྱང་མ། བསྐུལ་རི་རབ་ཆེན་མོ། འཁོར་ལོའི་བསྐུལ་ཤར་ནས་ནུབ་བསྐྱོད་མ་རྣམས་བསྡོམས་པར་རླུང་ལྷའི་ལས་བྱང་སྤུ་གྲིར་གྲགས་པ། གནམ་ཐེ་དང་འགོང་པོའི་བསྐུལ་ཨོ་རྒྱན་ཐུགས་ཀྱི་བརྣག་པ། འདི་ཡན་གྱིས་ཀྱང་སྒྲུབ་ནུས་
པས་སྒོམ་ཐེམས་སུ། རྒྱུད་དང་གདམས་པ་སྤྲ་འཁྲིད་མན་ངག་དང་༔ སོ་སོའི་དཔེ་ཆུང་འབྱེད་པའི་ལས་ལྔ་ཡིས༔ ཕུང་ལས་འགྲུབ་པོ་སྙིང་གི་དཀྱིལ་དུ་ཆོངས༔ ཞེས་པས་སོ། །ལོག་གནོན་གབ་པའི་སྤྲ་འཁྲིད་ཁྱད་པར་ཅན། ཁ་བསྒྱུར་ལས་ཚོགས་ལ་ནང་གསེས་ཀྱི་ཕོ་རོག་འུག་པའི་ཉེ་འབྱེད་ཉི་ཟླ་ཐལ་རྡེབ་བམ་རྒྱལ་པོ་ཉེ་འབྱེད་འབྲུ་བརྒྱད་མ། གྲོང་ཁྱེར་ཕུང་བྱེད་གཙོ་བོ་ཉེ་འབྱེད་གཟོང་མཆུ་མ། གཟའ་ཚང་ཉེ་འབྱེད་ཉིན་གཅིག་མ། མཛའ་གཉིས་འབྱེད་པ་འཐབ་འཛིངས་མ། དཀྲུག་བྱེད་མཛེ་རྐང་ནག་པོ་བསྐྲད་པ་རྟ་རྒྱུགས་མ། བསྐྲད་པ་མཁའ་ལྡིང་ནག་པོ་རྣམས་ནི་ཤིན་ཏུ་གསང་བའི་གནས་ཡིན་པས། འཁྲུག་བྱེད་བསྐྲད་པ་གནད་ཀྱི་མན་ངག་གསུམ༔ གབ་པའི་གནད་ཡིག་གཅེས་གནད་བཞི་འཛོམ་ན༔ འདི་རྣམས་ཡོངས་རྫོགས་རྒྱལ་ཁམས་རླུང་ལ་བསྐུར༔ ཞེས་སོ། །དཔེའུ་རིས་ལ། གནམ་ས་ཆུ་རླུང་མེའི་འཁོར་ལོ། ཕོ་རྒྱུད་མོ་རྒྱུད། སྡེ་བརྒྱད། ལྷ་སྲིན་ཙིཏྟ་དཀྲུག་པ། འཁྲུག་བྱེད་བསྐྲད་པ་ནག་པོ། ཡབ་ཡུམ། བུ། བུ་མོ། ཕོ་ཉའི་འཁོར་ལོ། རང་བསྲུང་། མཛེ་རྐང་། བསྐྲད་པ། ཉི་ཟླ་ཐལ་རྡེབ། དོམ་དྲེད་འདྲེའི་ཁང་བུ། རླུང་སྒོམ་དང་བཅས་པ་རྣམས། ལྔ་པ་སྲིད་གསུམ་དབང་བསྡུད་ལྷ་ཆེན་གུ་ལང་རླུང་གི་ཞགས་པ་ནི། ལྷ་ཆེན་གུ་ལང་སྲིད་པ་གསུམ་ལ་དབང་༔ དབང་སྒྲུབ་ལ་སོགས་མ་བུར་བཅས་པ་རྣམས༔ བསྟན་འཛིན་སྙིང་གི་བུ་མཆོག་རེ་འདོད་མེད༔ བྱམས་དང་སྙིང་རྗེ་འབྲེལ་ཚད་དོན་ལྡན་པའི༔ བུ་ལ་ཆིག་བརྒྱུད་ཡིན་ཕྱིར་ཨུ་ཁ་ཐམ༔ ཞེས་པ་ལྟར་ལས་སྤྱི་ཐེམས་དང་སྒོས་ཐེམས་སུ་ཆོས་སྡེ་གསལ་ཁ་མི་འདུག་ཅིང་། དེ་ལ་བརྟེན་ནས་ཕྱི་ནང་གསང་གསུམ་གྱི་སྒྲུབ་པ་དང་རྟེན་གསུམ་བཅའ་ཐབས་སོགས་ལས་འབྲེལ་
རྩལ་གྱི་གཏེར་མ་ནས་ཁ་བསྐངས་པའི་བསྲེ་བསླད་རྣམ་གྲངས་མང་བས་མཐུན་མི་མཐུན་སྣ་ཚོགས་ཡོང་འདུག་པ་དོན་ལ་སྐྱོན་ཆེ་བ་མི་སྣང་ཡང་། ལྷ་རི་བ་ལྕེ་བཙུན་ངག་དབང་བསོད་ནམས་རྒྱ་མཚོས་མཛད་པའི་དཀར་ཆག་ནང་བཞིན་ཕལ་ཆེར་ཐོབ་པ་ལ། སྲིད་མེད་ཀྱི་སྣང་སྲིད་དབང་དུ་སྡུད་པའི་སྐུ་དབང་། ཕྱག་མཚན་གྱིས་རིག་པས་ཁྱབ་ཚད་དབང་དུ་འདུ་བའི་ཐུགས་དབང་། བདུད་རྩིས་སྙན་གྲགས་ཁམས་གསུམ་ཁྱབ་པའི་གསུང་དབང་། ཞགས་པས་ལྷ་འདྲེ་མི་གསུམ་སྡུད་པའི་འཕྲིན་ལས་ཀྱི་དབང་གླེགས་བམ་གྱིས་མི་ནོར་ཟས་གསུམ་གྱི་དངོས་གྲུབ་ཐོབ་པའི་ཡོན་ཏན་གྱི་དབང་རྣམས་ལེགས་པར་མནོས་ནས། ལུང་ལ། ལྕེ་བཙུན་ངག་དབང་བསོད་ནམས་རྒྱ་མཚོས་ཐུགས་སྲས་ངག་དབང་གྲགས་པར་གསན་དུས་ལྟར་བཀོད་པའི་དཀར་ཆག །ཆག་ལོ་རིན་ཅེན་ཆོས་རྒྱལ་གྱིས་གཏེར་ཁ་འདི་དང་ལས་འབྲེལ་རྩལ་གྱི་རླུང་ཞགས་གཉིས་ཞུས་དག་ཐུབ་པར་སྣང་གསུངས་པར་བརྟེན་ནས་དཔྱད་པའི་ཡི་གེ་ལྕེ་བཙུན་གྱིས་མཛད་པ། ལྷ་ཆེན་མ་ཧཱ་དེ་ཝའི་རྗེས་སུ་གནང་བའི་དབང་གི་ཆོ་ག་སྦྱོར་དངོས་མཇུག་གསུམ་གྱིས་བསྟན་པ། ཡང་གསང་གི་སྒྲུབ་པ་འཁོར་ལོ་རླུང་གི་ལས་ཚོགས་ཞེས་པ་ནང་གསེས་ཀྱི་སྲིད་པའི་མེས་པོའི་རྟེན་གཅིག་ལ་བརྟེན་ནས་བསྙེན་པ་བྱ་ཐབས་དང་རྟགས་ཡིག་གསང་རྟེན་གྱི་ནང་བཞུགས་བཅའ་ཐབས་བཅས་པ་སྣོད་མིན་ལ་ཤོར་ན་ས་མཱ་ཡའི་མཐའ་ཅན། དེའི་གནད་ཀྱི་ཡི་གེ་གཅེས་པ་རྟེན་གྱི་ཡོན་ཏན། ལས་ལ་སྦྱོར་ལུགས། གཏོར་མ། དཀྱིལ་འཁོར། བཟླས་པའི་གྲངས། རྟེན་གྱི་གནད། དམ་ཚིག་བཅས་བསྟན་པ་སྙིང་གི་བུ་ལ་ཕྲད་ཤོག་གི་མཐའ་ཅན། བསྙེན་པ་ཐེངས་པས་ཞག་ཉེར་གཅིག་ཏུ་སྒྲུབ་པ་
སྙིང་དང་འདྲའོ་སེམས་ལ་བརྣག་གི་མཐའ་ཅན། ཐུགས་ཀའི་འཁོར་ལོ་ལ་བརྟེན་ནས་བསོད་ནམས་རྒྱས་པར་བྱེད་པ། འཁོར་ལོ་དེའི་བཅའ་ཐབས་ཡིག་ཆུང་། འཕྲིན་ལས་ཁ་བསྒྱུར་ལ་བརྟེན་ནས་མི་མཐུན་ཕྱོགས་ཞི་ཞིང་ཚེ་བསྲུང་བ། ཐོད་པ་རྒྱ་གྲམ་ལ་བརྟེན་ནས་ཚེ་བསོད་ནམས་རྒྱས་པ། སེང་ལྡེང་གི་ཌཱ་མ་རུ་ལ་བརྟེན་ནས་དབང་དུ་བྱ་བ། སྔགས་ཀྱི་ཁ་བསྒྱུར་ཏེ་རླུང་འཁོར་གྱི་རྩ་བ་ལྟ་བུའི་གདམས་པ་ཉུང་ངུ་། གལ་ཏེ་མ་འགྲུབ་འགྱངས་ན་གནད་ལ་དབབ་པ། རླུང་འཁོར་ཙཀྲའི་བྲི་ཡིག་ཡང་གསང་ཙཀྲ་དབང་ཕྱུག་ལྟོ་འཁོར་གྱི་བྲི་ཡིག་རྣམས་དབང་ཕྱུག་མཐར་ཐུག་སྲོག་རྩ་སྙིང་གི་མེ་ལོང་ཞེས་པར་ནང་གསེས་ཀྱི་སྔགས་ཐེམས་གསང་བའི་མན་ངག་གབ་པའི་གནད་ཡིག་འདུ་ལོང་འདོད་ན་འདི་ཉིད་སྒྲུབ་པའི་མཐའ་ཅན། ཕྱི་ཉི་ཟླ་རླུང་ཞགས་ཀྱིས་རྒྱལ་ཁམས་བསྡུ་བའི་སྔགས་རྒོད། མོ་ཆགས་དབང་སྡུད་ཀྱི་རྫས་སྔགས་ཏིང་ངེ་འཛིན། གསང་བ་ལག་བསྒུལ་གྱི་འཁོར་ལོ་ལ་བརྟེན་ནས་ལག་པ་བསྒུལ་བ། གསང་བ་སྙིང་བསྒུལ་གྱི་སྒྲུབ་པ། ལས་མཐའ་ཤིན་ཏུ་ཟབ་པའི་སྐོར་ལ། རྒྱལ་བུ་ཕུ་འདེབས་ལ་བརྟེན་ནས་དྲག་པོའི་སྔགས་རྒོད་དམ་ཉམས་བསྒྲལ་བའི་མཚོན་ཆ། བཟའ་མི་འབྱེད་པའི་ཤོག་དྲིལ། བུད་མེད་ཟླ་མཚན་འཛག་ཐབས། དགྲ་བོ་བུ་ཆུང་བསྒྲལ་བ། བུད་མེད་ཀྱི་སྟུ་མཐུ། ནོར་ལ་མེ་སྤར་ནས་བསྲུང་བ། འཇིག་རྟེན་གསལ་མཐོང་། བུད་མེད་ཟླ་མཚན་འགུགས་པ་རྣམས་གཏེར་ཁ་གཞན་ནས་འདིའི་ཆ་ལག་ཏུ་མཛད་པ། བསྟོད་བསྐུར་རྒྱ་མཚོ་གློང་དཀྱིལ་མ། སྒབ་འདྲེ་མནན་ཐབས། དཔེ་དཀར་བསྲུང་བ་ཆུ་གླང་རྩེ་མོའི་གཏེར་མ་རྣམས། དཔེ་རིས་ལ། སྒྲུབ་རྟེན་གྱི་བཅང་གཞི། སྒོམ་པའི་དབང་སྡུད་འཁོར་ལོ། གནད་
འབེབས་འཁོར་ལོ་རླུང་འཁོར། རླུང་ཁང་རླུང་གཡབ། གསང་བའི་འཁོར་ལོ་བཅས་པ་རྣམས། དྲུག་པ་ཕན་གནོད་གདམས་པ་ཁ་འཐོར་སྣ་ཚོགས་ཀྱི་སྐོར་ནི། སྐྱིན་ཐང་སེར་བ་དབབ་དང་བསྲུང་བ་དང་༔ ཆར་པ་འབེབས་བསྲུང་མི་རྒོད་ཇག་འཆིང་དང་༔ ཛཾ་ལའི་ནོར་སྒྲུབ་ལག་བསྒུལ་སྒྲུབ་པ་དང་༔ རྣལ་འབྱོར་ལུས་བསྲུང་རྫས་རྒོད་སྦྱོར་བ་རྣམས༔ ཤིན་ཏུ་ཟབ་ཕྱིར་སྣོད་ལྡན་བུ་ལ་གཏད༔ ཅེས་པ་ལྟར། དམར་འཐབ་སྐྱིན་ཐང་གི་དྲག་སྔགས་སེར་བ་འབེབས་ཐབས་གཟའ་བདུད་ལ་གཉེར་དུ་གཏད་བ། སེར་བ་བསྲུང་པའི་གདམས་པ་སྤུ་གྲི་ཐོག་གཅོད་གནད་ཀྱི་གདམས་པ་དོན་བདུན་པ། ཆར་འབེབས་ཡིད་བཞིན་ནོར་བུ་ཞར་བྱུང་ཡང་ཟབ་ཆར་བསྲུང་གོང་གི་ཆར་འབེབས་ཞལ་ཤེས་དང་བཅས་པ། ཕུང་བྱེད་ཁ་འཆིང་ཇག་པ་འཆིང་བའི་མན་ངག་བསྟན་པ་འཛིན་པའི་བཙས་སུ་བཞག་པ། གནོད་སྦྱིན་ཛམྦྷ་ལ་སེར་པོ་ནོར་སྒྲུབ་རིན་ཅེན་གཏེར་བུམ་རྣམས། རྫས་སྦྱོར་དང་གཞན་ཡང་མཛེ་པོའི་ཁ་གཏད་སོགས་ཡིག་སྣ་ལྔ་ཙམ་ཐེམས་ཀྱིས་ཟིན་ཀྱང་རྒྱུན་མ་རྙེད་པ་སླར་ཡང་ཕྱོགས་འདི་ལ་མཁས་ཤིང་གྲུབ་པ་བརྙེས་པ་དག་ལས་འབད་པས་བཙལ་བར་བྱའོ། །དེ་ཡང་ཐེམས་ཡིག་རྣམས་དང་ཞིབ་ཏུ་བསྟུན་པ་ནི། དེ་ལྟར་བླ་མེད་བརྗོད་དཀའ་གདམས་པའི་ཚོགས༔ བརྗོད་པར་འཕང་ཡང་གསང་ཐེམས་འདི་རུ་བཀོད༔ ཅི་ཕྱིར་མ་འོངས་ལས་ཅན་བུ་ཉིད་དང་༔ དེ་ཡི་བརྒྱུད་འཛིན་བཀའ་བབས་བུ་རྣམས་དོན༔ ཟབ་གཏེར་གཉན་གྱི་བཀའ་རྒྱ་འཇིགས་པ་དང་༔ མན་ངག་ཟབ་མོ་འཁྲུགས་ཤིང་འཐོར་དོགས་ནས༔ གཞན་དུ་གབ་ནས་འདི་རུ་སྦས་ཏེ་བཞག༔ ཅེས་སོ། །དེ་ལྟར་རྩ་བའི་དབང་བཞི་
དབང་ཕྲན་བརྒྱད་དང་ས་བཅད་དྲུག་པ་ཡན་གྱི་ལུང་ཡོངས་སུ་རྫོགས་པའི་བརྒྱུད་པ་ནི། ཆོས་སྐུ་ཀུན་ཏུ་བཟང་པོ། དྲུག་པ་རྡོ་རྗེ་འཆང་ཆེན། ལོངས་སྐུ་རྡོ་རྗེ་སེམས་དཔའ༔ སྤྲུལ་སྐུ་དགའ་རབ་རྡོ་རྗེ། རིགས་འཛིན་ཤྲཱི་སིངྷ། དྲན་མཆོག་ཨྱོན་ཆེན་པོ། ཇོ་མོ་ཡེ་ཤེས་འཚོ་རྒྱལ། ལང་འགྲོ་ལོ་ཙཱ་བ་དཀོན་ཅོག་འབྱུང་གནས། གཏེར་སྟོན་ཆོས་རྒྱལ་རཏྣ་གླིང་པ། དེས་རྒྱལ་སྲས་ཚེ་དབང་གྲགས་པ་དང་འཁྲུལ་ཞིག་དོན་གྲུབ་རྒྱལ་པོ་གཉིས་ལ་གནང་། དེ་གཉིས་ལ་མཚུངས་མེད་ངག་དབང་གྲགས་པ། དེ་ནས་རྟོགས་ལྡན་སངས་རྒྱས་གྲགས་པ། རྗེ་ངག་དབང་ནོར་བུ། མཚུངས་མེད་ནོར་བུ་ཡོངས་འདིའི་མཚན་ལ་ནོར་བུ་ཚེ་དབང་ཡོངས་གྲགས་དང་ཡོངས་གྲགས་རྣམ་རྒྱལ་ཡང་ཟེར། གྲགས། དེ་སྲས་འཕྲིན་ལས་རྒྱ་མཚོ། འཁྲུལ་ཞིག་ནོར་བུ་ཆོས་བརྟན། རིགས་འཛིན་འཕྲིན་ལས་ལྷུན་གྲུབ། རྩ་བའི་བླ་མ་སྤྲུལ་སྐུ་གཏེར་བདག་གླིང་པ། དེས་བདག་ཟ་ཧོར་བནྡེ་ལ་བཀའ་དྲིན་དུ་སྩལ་ཏོ། །ཡང་ཀའི་རྟགས་ཡོད་པའི་དབང་ལུང་གི་བརྒྱུད་པ་ལུགས་གཅིག་ནི། རིགས་འཛིན་འཕྲིན་ལས་ལྷུན་གྲུབ་ནས། རང་གྲོལ་ཀརྨ་གསང་སྔགས། ཁྱབ་བདག་བློ་མཆོག་རྡོ་རྗེ། དེས་བདག་ལའོ། །ཡང་ན་ཡོངས་གྲགས་རྣམ་རྒྱལ་ནས། རྫོགས་ཆེན་པ་ནམ་མཁའ་འབྲུག་སྒྲ། ཀརྨ་གསང་སྔགས་མན་འདྲ། ཡང་ཕའི་རྟགས་ཡོད་པའི་དབང་ལུང་གི་བརྒྱུད་ལུགས་གཅིག་ནི། རྗེ་ངག་དབང་གྲགས་པ་ནས། རྗེ་བཙུན་སངས་རྒྱས་བརྩོན་འགྲུས། མཚུངས་མེད་སངས་རྒྱས་བདེ་ཆེན། ནམ་མཁའི་སྙིང་པོའི་སྤྲུལ་པ་ཉི་ཟླ་སངས་རྒྱས། རྡོ་རྗེ་འཆང་ཕ་བོང་ཁ་པ་དཔལ་འབྱོར་ལྷུན་གྲུབ། དེས་བདག་ཟ་ཧོར་བནྡེ་ལ་བཀའ་དྲིན་དུ་རྩལ་བ་ཐེག་མཆོག་ཨ་ཏིའི་ཟབ་ཆོས་དང་
མཇལ་བའི་ཐོག་མའོ། །ཟུར་གྱི་རྟགས་ཡོད་པའི་དབང་ལུང་གི་བརྒྱུད་ལུགས་གཅིག་དང་ཉམས་འཁྲིད་ཀྱི་བརྒྱུད་པ་ནི། རྡོ་རྗེ་འཆང་ཕ་བོང་ཁ་པ་ནས། ཟུར་ཀུན་མཁྱེན་ཆོས་དབྱིངས་རང་གྲོལ། དེས་བདག་ལའོ། །དཔལ་མགོན་མ་ནིང་ནག་པོའི་སྲོག་དབང་བསྡུས་པ་གཏོར་མ་ལ་བརྟེན་པ་དང་ལུང་ཡོངས་རྫོགས་ཀྱི་བརྒྱུད་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་ཐོད་འཕྲེང་རིགས་ལྔ། ཐུགས་སྲས་རྗེ་འབངས་གྲོགས་ལྔ། ཆོས་རྒྱལ་རཏྣ་གླིང་པ། རྒྱལ་སྲས་ཚེ་དབང་གྲགས་པ། ཐུགས་སྲས་ངག་དབང་གྲགས་པ། གུ་རུ་ཀུན་དགའ་གྲགས་པ། བརྒྱུད་འཛིན་ཀུན་དགའ་བསྟན་འཛིན། ཀ་ཐོག་པ་དབང་གྲགས་རྡོ་རྗེ། རིགས་འཛིན་དུ་མ་རང་གྲོལ། ངག་དབང་ཡེ་ཤེས་གྲུབ་པ། དྲིན་ཅན་ཆོས་དབྱིངས་རང་གྲོལ། དེས་བདག་ལའོ། །སྲོག་དབང་རྒྱས་པའི་བརྒྱུད་པ་ནི། ནོར་བུ་ཡོངས་གྲགས་ནས། མཁས་གྲུབ་འཕྲིན་ལས་རྒྱ་མཚོ། ཉང་ཆོས་ལྡན་པ་རཏྣ་འཕྲིན་ལས་བསྟན་འཛིན། རྩ་བའི་བླ་མ་གཏེར་བདག་གླིང་པ། དེས་བདག་ལའོ། །གཟའ་རྒོད་དུག་གི་སྤུ་གྲིའི་དབང་ལུང་ཡོངས་རྫོགས་ཀྱི་བརྒྱུད་པ་ནི། ཀུན་ཏུ་བཟང་པོ། རྡོ་རྗེ་འཆང་། རྡོ་རྗེ་སེམས་དཔའ། གསང་བའི་བདག་པོ། དགའ་རབ་རྡོ་རྗེ། ཤྲཱི་སིངྷ། ཨོ་རྒྱན་རིན་པོ་ཆེ། ཡེ་ཤེས་འཚོ་རྒྱལ། ལང་འགྲོ་ལོ་ཙཱ་བ། གཏེར་སྟོན་རཏྣ་གླིང་པ། རྒྱལ་སྲས་ཚེ་དབང་གྲགས་པ། ཐུགས་སྲས་ངག་དབང་གྲགས་པ། རྗེ་ངག་དབང་ནོར་བུ། མཚུངས་མེད་ནོར་བུ་ཡོངས་གྲགས། སྔགས་འཆང་དབང་ཆེན་ལྷུན་གྲུབ། སྤེལ་ལྕོག་སངས་རྒྱས་ཕུན་ཚོགས། ཆོས་ལྡན་པ་འཕྲིན་ལས་བསྟན་འཛིན། གཏེར་སྟོན་རིགས་འཛིན་འགྱུར་མེད་རྡོ་རྗེ་རྩལ། དེས་བདག་ལའོ། །ཡང་བྱང་གི་རྟགས་ཡོད་པའི་ལུང་
བརྒྱུད་ལུགས་གཅིག་ནི་རྒྱལ་སྲས་ཚེ་དབང་གྲགས་པ་ནས། དཔའ་བོ་མཐའ་ཡས་གྲགས་པ། མཆོག་སྤྲུལ་ལེགས་ལྡན་རྡོ་རྗེ། ཆོས་རྒྱལ་བཀྲ་ཤིས་སྟོབས་རྒྱལ། རིགས་འཛིན་ངག་གི་དབང་པོ། ཀུན་མཁྱེན་ཆོས་དབྱིངས་རང་གྲོལ། དེས་བདག་ལའོ། །རྡོ་རྗེ་ལེགས་པའི་ཆོས་སྐོར་ཡོངས་རྫོགས་ཀྱི་བརྒྱུད་པ་ནི། ཀུན་ཏུ་བཟང་པོ། གསང་བའི་བདག་པོ། དགའ་རབ་རྡོ་རྗེ། ཤྲཱི་སིངྷ། པདྨ་ཐོད་འཕྲེང་། མཁར་ཆེན་བཟའ། ལང་འགྲོ་ལོ་ཙཱ་བ། སྤྲུལ་སྐུ་རཏྣ་གླིང་པ། གཅེན་ཚེ་དབང་གྲགས་པ། གཅུང་ངག་དབང་གྲགས་པ། གར་དབང་ལས་འཕྲོ་གླིང་པ། གུ་རུ་འཇིག་རྟེན་མགོན་པོ། སྤེལ་ལྕོག་སངས་རྒྱས་ཕུན་ཚོགས། བྱ་བཏང་ནོར་བུ་ཆོས་བརྟན། རིགས་འཛིན་འཕྲིན་ལས་ལྷུན་གྲུབ། ཐུགས་སྲས་གཏེར་བདག་གླིང་པ། དེས་བདག་ལའོ། །ཡང་ན་རྗེ་འཕྲིན་ལས་ལྷུན་གྲུབ་ནས། རང་གྲོལ་ཀརྨ་གསང་སྔགས། ཁྱབ་བདག་བློ་མཆོག་རྡོ་རྗེ། དེས་བདག་ལའོ། །ཟུར་གྱི་རྟགས་ཡོད་པའི་བརྒྱུད་པ་ལུགས་གཅིག་ནི། རྒྱལ་སྲས་ཚེ་དབང་གྲགས་པ་ནས། དཔའ་བོ་མཐའ་ཡས་གྲགས་པ། རྗེ་ངག་དབང་ལྷུན་གྲུབ། མི་འགྱུར་ལས་འཕྲོ་གླིང་པ། སྣང་གསལ་བ་བཀྲ་ཤིས་རྒྱ་མཚོ། རྗེ་ཀུན་དགའ་ཚེ་མཆོག །སྔགས་འཆང་གཞོན་ནུ་དོན་གྲུབ། དྲིན་ཅན་ཆོས་དབྱིངས་རང་གྲོལ། དེས་བདག་ལའོ། །གསོལ་ཁ་ནི་ཀུན་དགའ་ཚེ་མཆོག་ནས། ངག་དབང་ཡེ་གྲུབ། ཟུར་རྩ་བའི་བླ་མ་ལས་བརྒྱུད་དོ། རླུང་དམར་གྱི་བརྒྱུད་པ་ནི། ཀུན་བཟང་ཧེ་རུ་ཀ །གསང་བདག་དྲེགས་པ་ཀུན་འདུལ། མཁའ་འགྲོ་ལས་ཀྱི་དབང་མོ་ཆེ། སློབ་དཔོན་རོམ་བུ་གུ་ཧྱ། གུ་རུ་པདྨ་འབྱུང་གནས། ལང་འགྲོ་ལོ་ཙཱ་བ་དཀོན་ཅོག་འབྱུང་གནས། གཏེར་སྟོན་རཏྣ་གླིང་པ། དེ་སྲས་ཚེ་དབང་གྲགས་པ།
གཅུང་ངག་དབང་གྲགས་པ། རྗེ་ངག་དབང་ནོར་བུ། མཚུངས་མེད་ནོར་བུ་ཡོངས་གྲགས། ཆོས་སྡིངས་སྔགས་འཆང་དབང་ཆེན་ལྷུན་གྲུབ། རཏྣ་སངས་རྒྱས་ཕུན་ཚོགས། ཆོས་ལྡན་པ་རཏྣ་འཕྲིན་ལས་བསྟན་འཛིན། རྩ་བའི་བླ་མ་གཏེར་བདག་གླིང་པ། དེས་བདག་ལའོ། །ལྷ་ཆེན་གུ་ལང་རླུང་ཞགས་སྐོར་གྱི་དབང་། གསང་བ་སྙིང་བསྐུལ་ཡན་གྱི་ལུང་དང་བཅས་པའི་བརྒྱུད་པ་ནི། ཡེ་ཤེས་མཁའ་འགྲོ་མ། མགོན་པོ་ཀླུ་སྒྲུབ། སློབ་དཔོན་པདྨ་འབྱུང་གནས། མཁར་ཆེན་བཟའ། ལང་འགྲོ་ལོ་ཙཱ་བ། སྤྲུལ་སྐུ་རཏྣ་གླིང་པ། སྲས་ཚེ་དབང་གྲགས་པ། རྗེ་ངག་དབང་གྲགས་པ། ལྕེ་བསོད་ནམས་རྒྱ་མཚོ། བླ་མ་པདྨ་གར་དབང་། གཉག་གི་སྤྲུལ་པ་ཀུན་དགའ་བཀྲ་ཤིས། ངག་དབང་ཡེ་ཤེས་གྲུབ་པ། ཟུར་རྩ་བའི་བླ་མ། དེ་བདག་ལའོ། །མེ་ལོང་དགོན་པ་པདྨ་གར་དབང་གིས་ལྷ་རི་བ་བསོད་ནམས་རྒྱ་མཚོ་ལ་ལྷ་ཆེན་གྱི་སྐོར་ཞུས་ནས་ཚུར་བྱོན་པས་འབྲི་གུང་ཞབས་དྲུང་ཆོས་རྒྱལ་ཕུན་ཚོགས་ཀྱི་གཟིགས་སྣང་ལ་མི་མ་གིས་ཟངས་ཀྱི་སྲིད་མེས་ཐོག་ཚད་ཅིག་ཁུར་འགྲོ་གྱི་འདུག་ཅེས་གསུངས་ཤིང་བླ་མ་དེ་ལ་ལྷ་ཆེན་ཤིན་ཏུ་འགོ་བ་ཡིན་སྐད། དེའི་རྗེས་སུ་བཀྲ་ཤིས་རྒྱ་མཚོ་དང་། དུ་མ་རང་གྲོལ་སོགས་གསན་ཡིག་མང་པོར་འདུག་པ་ནི། དཔྱད་པ་མ་བྱུང་བའི་དཀྱུས་ཤོར་མ་གཏོགས་འདིའི་བརྒྱུད་པར་མེད། པདྨ་གར་དབང་ལ་ཀུན་མཁྱེན་ཆོས་དབྱིངས་རང་གྲོལ་གྱི་སྐུ་སྐྱེ་གོང་མ་ཀུན་དགའ་བཀྲ་ཤིས་སམ་དྲུང་པ་དཀོན་ཅོག་པར་གྲགས་པས་གསན་པ་ཡིན་ནོ། །ལུང་ཡོངས་སུ་རྫོགས་པའི་བརྒྱུད་པ་ནི། རྗེ་ངག་དབང་གྲགས་པ་ནས། མཚུངས་མེད་ངག་དབང་ནོར་བུ། བི་མཱའི་སྤྲུལ་པ་ནོར་བུ་ཡོངས་གྲགས། དེ་སྲས་ཀརྨ་འཕྲིན་ལས་རྒྱ་མཚོ།
རཏྣ་འཕྲིན་ལས་བསྟན་འཛིན། གཏེར་སྟོན་མི་འགྱུར་རྡོ་རྗེ་རྩལ། དེས་བདག་ལའོ། །ཡང་ན་རྒྱལ་སྲས་ཚེ་དབང་གྲགས་པ་ནས། འཁྲུལ་ཞིག་དོན་གྲུབ་རྒྱལ་པོ། རྗེ་ངག་དབང་གྲགས་པ་མན་འདྲ། ཡང་ན་ངག་དབང་གྲགས་པ་ནས། རྟོགས་ལྡན་སངས་རྒྱས་གྲགས་པ། དྲིན་ཅན་ངག་དབང་ནོར་བུ་མན་གོང་བཞིན་ནོ། །ཡང་སྤྲུལ་པའི་སྐྱེས་མཆོག་རིགས་འཛིན་ཞིག་པོ་གླིང་པས་དགུང་ལོ་སུམ་ཅུ་པ་ལ་རི་བོ་ཁྱུང་ཆེན་ལྡིང་བ་ནས་ཟབ་གཏེར་ཀུན་གྱི་ཐོག་མར་སྤྱན་དྲངས་པའི་སྐུ་གསུམ་ཡོངས་རྫོགས་རྩ་བ་གསུམ་གྱི་གདམས་པ་འབྲས་བུའི་དོན་འཁྲིད་ཀྱི་སྐོར་ལ། ཐང་ཡིག་གི་ཁྱུང་ཚང་བྲག་ལ་སྦས་པའི་གཏེར་ཁ་ནི་ཞེས་པའང་འདི་ཉིད་དོ། །གཏོར་མ་ལ་བརྟེན་ནས་བླ་མའི་དབང་། བུམ་པ་ལ་བརྟེན་ནས་ཡི་དམ་གྱི་དབང་། མེ་ལོང་ལ་བརྟེན་ནས་མཁའ་འགྲོའི་དབང་། བདུད་རྩི་ལ་བརྟེན་ནས་རྩ་བ་གསུམ་གྱི་བྱིན་རླབས་ཀྱི་དབང་རྣམས་ལེགས་པ་མནོས་ནས། རྒྱབ་རྟེན་ལུང་ལ། ཟབ་གཏེར་སྙིང་གི་གདམས་པའི་ཁ་བྱང་ཐེམས་ཀྱི་ལྡེ་མིག །དེ་ལས་བྱུང་བའི་ཆོས་སྡེ་ལ་ཡང་གཏེར་རྩ་གསུམ་སྒྲུབ་པའི་སྐོར། རང་གཞན་གྲོལ་བྱེད་དོན་འཁྲིད་ཀྱི་སྐོར། ཀུན་ལ་གཅེས་པ་རྒྱབ་ཆོས་ཀྱི་སྐོར་དང་གསུམ་ལས། དང་པོ་ནི། རྩ་གསུམ་ཡང་གཏེར་གདམས་སྐོར་དང་པོ་ལ༔ སྲོག་གི་དངས་མ་བླ་མའི་གསང་སྒྲུབ་དང་༔ ཀུན་གྱི་མཐར་ཐུག་ཡི་དམ་བུམ་སྒྲུབ་དང་༔ འགྲོ་འདུལ་དབང་སྡུད་དྷ་ཀི་གནད་དྲུག་དང་༔ དབང་སྒྲུབ་ལག་ལེན་བཞི་ཡིས་གདམས་པ་ཚང་༔ སྐུ་གསུམ་རྒྱ་ཡིས་བཏབ་ཡོད་ས་མཱ་ཡ༔ ཞེས་པ་ལྟར། དངོས་གྲུབ་ཀུན་འབྱུང་སྲོག་གི་དངས་མ་ཕ་དང་འདྲ་བ་བླ་མའི་ཐུགས་སྒྲུབ་དོན་བཅུ་གཅིག་གིས་བསྟན་པ་ཐུགས་སྲས་ཁྱོད་དང་འདི་ཕྲད་ཤོག་གི་མཐའ་ཅན།
ཀུན་གྱི་མཐར་ཐུག་བདག་གཞན་ཀུན་གྲོལ་ཐུགས་རྗེ་ཆེན་པོའི་ཆོས་ཡི་དམ་བུམ་སྒྲུབ་སྦྱོར་དངོས་རྗེས་གསུམ་གྱིས་བསྟན་པ་ཐང་ལ་ཕོ་ཞིག་རྡོ་རྗེ་ལེགས་ཞེས་པའི་མཐའ་ཅན། འགྲོ་འདུལ་དབང་སྡུད་མ་དང་འདྲ་བ་ཌཱ་ཀི་ཐོད་རྒལ་གནད་ཀྱི་སྒྲུབ་ཐབས་རྣལ་འབྱོར་གསུམ་ལྡན་སྒོ་ནས་སྒྲུབ་པ་ཁྱུང་ཆེན་བྲག་ལ་ཨ་ཐམ་རྒྱའི་མཐའ་ཅན། གདུལ་བྱ་སྨིན་པར་བྱེད་པ་དབང་ཆོག་བདུད་རྩི་བུམ་པ། དེའི་རྣམ་པ་ཉི་ཤུས་བྱང་ཆུབ་པའི་དབང་དོན་དུ་དྲིལ་བའི་ལག་ལེན་གནད་ཡིག་ཕྲད་ཤོག་གི་མཐའ་ཅན་རྣམས། གཉིས་པ་རང་གཞན་གྲོལ་བྱེད་དོན་འཁྲིད་ཀྱི་སྐོར་ནི། རང་གཞན་གྲོལ་བྱེད་འབྲས་བུའི་དོན་འཁྲིད་ལ༔ མཐའ་རྟེན་ཉམས་ལེན་གོལ་ས་བཅད་ཐབས་དང་༔ དཀྱིལ་འཁོར་གསུམ་དང་རྣལ་འབྱོར་བཞི་ལ་སོགས༔ ལམ་མཆོག་འཁྲིད་ཀྱི་གདམས་པ་དེ་ཡིས་ཚང་༔ ཞེས་པ་ལྟར། དབང་པོ་རབ་འབྲིང་ཐ་མ་གསུམ་ག་ཚེ་གཅིག་གིས་མངོན་འཚང་རྒྱ་བ་ལམ་མཆོག་སྐུ་གསུམ་འབྲས་བུའི་དོན་འཁྲིད། མཐའ་རྟེན་གྱི་མན་ངག་ཇི་ལྟར་ཉམས་སུ་བླང་བའི་གོལ་ས་གཅོད་ཐབས་སངས་རྒྱས་ལག་བཅང་མཁར་ཆེན་བཟས་སློབ་དཔོན་ལ་ཞུས་པ། སྐལ་ལྡན་ཡང་རབ་ཐུག་ཕྲད་ཐེམས་མེད། དུ་འཚང་རྒྱ་བའི་དོན་འཁྲིད་ལག་བཅང་ཞེས་པ་བུ་ཚལ་གསེར་ཁང་དུ་ལྷ་སྲས་ཀྱིས་ཞུས་ཏེ་གནང་བ་འཚོ་རྒྱལ་གྱིས་དཀར་ཆག་ཡི་གེར་བཏབ་པ། རྫོགས་ཆེན་འབྲས་བུ་དོན་གྱི་འཁྲིད་གཞུང་ཚེ་གཅིག་སངས་རྒྱས་ལག་བཅང་གཏེར་བདག་གཙང་བཙན་བྲག་བཙན་ལ་གཏད་པ། ཡང་བཅུད་སྙིང་པོ་སྒྲིལ་བ་དོན་བསྡུས་ནོར་བུའི་གསང་ཐེམས་མེད། འཁྲིད་བཅུད་ཀྱི་ཡང་བཅུད་སྙིང་པོ་ཕྱུང་བ་གཏེར་སྟོན་གྱི་མཛད་པ། དེས་མཛད་པའི་
བརྒྱུད་པའི་གསོལ་འདེབས་བྱིན་རླབས། ཐེམས་མེད། ཆུ་རྒྱུད་ནང་དམིགས་མེད་སྤྲོས་བྲལ་མ། དཀྱིལ་འཁོར་གསུམ་གྱི་སྒྲུབ་ཐབས་ཟབ་མོ་སྲོག་གི་དངས་མ། ལྟ་སྒོམ་སྤྱོད་འབྲས་རྣལ་འབྱོར་བཞིའི་ཞལ་གདམས་འཕྲད་ཆོག་མཐོང་བས་རང་གྲོལ་ཨོ་རྒྱན་ངའི་སྙིང་ཚོགས་ཆུང་དོན་ཆེ་ཚིག་ཚོགས་ཉུང་ངུར་བསྡུས་པ་རྣམས་ནི། གསུམ་པ་ཀུན་ལས་གཅེས་པ་རྒྱབ་ཆོས་ཀྱི་སྐོར་ནི། དེ་དག་ཀུན་ལ་གཅེས་པའི་རྒྱབ་ཆོས་ནི༔ ཚེ་སྒྲུབ་འཕོ་བ་བར་དོ་ངོ་སྤྲོད་དང་༔ སྤྱི་གནད་བླ་རྡོ་ལ་སོགས་གནད་འབེབས་དང་༔ ལག་ལེན་ཐོ་ཡིག་གཏེར་སྟོན་སྐྱེས་རབས་དང་༔ དམ་ཅན་རྡོར་ལེགས་དུག་གི་རེག་གཅོད་དང་༔ བྲག་བཙན་དམར་པོ་ཅོག་བརྡུང་སྤུ་གྲི་སོགས༔ གདམས་སྐོར་བཅོ་བརྒྱད་དག་གིས་ཆོས་ཀ་ཚང་༔ ཞེས་པ་ལྟར། གཤིན་རྗེའི་ཟིན་ཀྱང་བཟློག་པར་ནུས་པ་ཚེ་སྒྲུབ་གཤིན་རྗེའི་གདོང་བཟློག་འདི་ལས་ཟབ་པ་ཡོད་རེ་རྐན་ཞེས་བྲོ་བོར་བ་གསེར་ཁང་གླིང་དུ་ཡི་གེ་བཏབ་པ། དྲན་པས་འཚང་རྒྱ་བ་འོད་གསལ་འཕོ་བའི་གདམས་པ་འཁོར་བ་ལྡོག་མེད། གཏེར་སྟོན་གྱིས་མཛད་པའི་འཕོ་བའི་ཡེ་ཤེས་གསང་ལམ། ལེ་ལོ་ཅན་གྲོལ་བར་བྱེད་པ་བར་དོ་གནད་ཀྱི་ཞལ་གདམས། ཌཱ་ཀི་སྤྱི་གནད་བླ་རྡོའི་འཁོར་ལོ་པདྨའི་སྙིང་ཁྲག །མཁའ་འགྲོའི་གནད་འབབས་བཅུད་ཀྱི་དུམ་བུའི་ཐིགས་པ། མ་འོངས་སྐལ་ལྡན་འདྲེན་ཕྱིར་ཡང་གཏེར་ཞལ་གདམས་སྙིང་གི་དུམ་བུ། ཞལ་གདམས་ཐོར་བུ་འཚོ་རྒྱལ་གྱིས་ཞུས་པའི་ཚིག་གསུམ་མ། ཐེམས་མེད། ཞལ་གདམས་གནད་ཀྱི་ཐོར་བུ་སྨོན་ལམ་འཆལ་བའི་མཐའ་ཅན། ཐེམས་མེད། སྙིང་གཏམ་བཅས་སུ་བཞག་པ་རིགས་ཀྱི་བུ་ལ་དང་དུ་ལོང་ཞིག་པ། ཐེམས་མེད། མཐོང་བས་ཡིད་ཆེས་བསྐྱེད་པ་གཏེར་སྟོན་གྱི་སྐྱེས་རབས་གསལ་བའི་སྒྲོན་མེ་ལུང་བསྟན་ལྡེ་མིག །
དམ་ཅན་རྡོ་རྗེ་ལེགས་པའི་སྒྲུབ་ཐབས་རེག་གཅོད་དུག་གི་སྤུ་གྲི །བྲག་བཙན་དམར་པོ་སྲོག་གི་ཅོག་བརྡུང་། ཡབ་ཡུམ་གསང་བ། ཐེམས་མེད། བཅུད་ཐིག་གི་རིལ་བུའི་དཀར་ཆག་རྣམས་ལེགས་པར་མནོས་ལ་ལས་དབང་གི་བརྒྱུད་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་ཡེ་ཤེས་འཚོ་རྒྱལ། ལང་འགྲོ་ལོ་ཙཱ་བ་དཀོན་ཅོག་འབྱུང་གནས། ཆོས་རྒྱལ་ཞིག་པོ་གླིང་པ། རྒྱལ་སྲས་ཚེ་དབང་གྲགས་པ། གཅུང་ངག་དབང་གྲགས་པ། རྗེ་ངག་དབང་ནོར་བུ། རིགས་འཛིན་ནོར་བུ་ཡོངས་གྲགས། མཚུངས་མེད་ནོར་བུ་ཡོངས་གྲགས། པདྨ་གསུང་གི་སྤྲུལ་སྐུ་ཚུལ་ཁྲིམས་རྡོ་རྗེ། རིགས་འཛིན་ཆེན་པོ་འཕྲིན་ལས་ལྷུན་གྲུབ། གྲུབ་ཆེན་ཀརྨ་གསང་སྔགས། ཁྱབ་བདག་བློ་མཆོག་རྡོ་རྗེ། དེས་བདག་ཟ་ཧོར་བནྡེ་གང་ཤར་རང་གྲོལ་ལ་བཀའ་དྲིན་དུ་སྩལ་ཏོ། །ཡང་ན་ནོར་བུ་ཡོངས་གྲགས། ཆོས་སྡིངས་དབང་ཆེན་ལྷུན་གྲུབ། སྤེལ་ལྕོག་སངས་རྒྱས་ཕུན་ཚོགས། ཆོས་ལྡན་འཕྲིན་ལས་བསྟན་འཛིན། དྲིན་ཅན་གཏེར་བདག་གླིང་པ། དེས་བདག་ལའོ། །ལུང་གི་བརྒྱུད་པ་ནི། རིགས་འཛིན་འཕྲིན་ལས་ལྷུན་གྲུབ་ནས། ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ། དེས་བདག་ལའོ། །རིགས་འཛིན་ཆེན་པོ་ཞིག་པོ་གླིང་པས་མཁར་ཆུ་དཔལ་གྱི་ཕུག་རིངས་ཀྱི་བྱང་ངོས་ཟླ་གམ་སྟེང་ནས་ཡར་གཞལ་བའི་གཡས་ཕུག་བྲག་ནས་གདན་དྲངས་པའི་ཕྱག་རྒྱ་ཆེན་པོ་མུན་སེལ་ཉི་མའི་སྙིང་པོ་ཆོས་སྐོར་ལ། ཐེམས་ཡིག་གསེར་གྱི་ཐུར་མ་ཞེས་པ་གབ་འཁྲུགས་མེད་པའི་བཀའ་རྩིས་ཐེམས་བྱང་། དེ་ལས་བྱུང་བའི་ཆོས་སྐོར་ལ་སྔོན་འགྲོ་དངོས་གཞི་རྗེས་ཀྱི་རིམ་པ་དང་གསུམ། དང་པོ་ལ། ལོ་རྒྱུས་
གསལ་བའི་སྒྲོན་མེ་འཚོ་རྒྱལ། ཤེལ་དཀར་རྡོ་རྗེ་འཚོ། ཤེལ་དཀར་མགོན་སྐྱིད། ལྷ་སྲས་རྣམས་ལ་ཆོས་འདི་གདམས་པའི་མཐའ་ཅན། བརྒྱུད་པའི་གསོལ་འདེབས་ཆོས་ཉིད་སྤྲོས་བྲལ་མ། ཐེམས་མེད། སྔོན་འགྲོ་རིན་པོ་ཆེའི་སྒྲོན་མེ་ཞེས་པ་བླ་མ་སློབ་མ་མན་ངག་གི་མཚན་ཉིད་གསུམ་དང་ལས་འབྲས། སྐྱབས་འགྲོ་སེམས་བསྐྱེད། མནྜལ། བླ་མའི་རྣལ་འབྱོར་དབང་སྟེ་སྤྱི་དོན་དྲུག་གིས་གཏན་ལ་དབབ་པའི་མན་ངག་རྣམས། གཉིས་པ་དངོས་གཞི་ལ་དུས་གསུམ་སངས་རྒྱས་ནམ་མཁའི་སྐར་ཚོགས་ལྟ་བུའི་དགོངས་པ་གཅིག་ཏུ་དྲིལ་བ་ཉི་མ་དང་ཟླ་བ་ལྟ་བུ་ཕྱག་རྒྱ་ཆེན་པོར་མུན་སེལ་ཉི་མའི་སྙིང་པོའི་འཁྲིད་གཞུང་ཆེན་མོ་ཨོ་རྒྱན་པདྨའི་ཐུགས་བཅུད་ཡང་དག་པ། གནད་ཀྱི་གེགས་སེལ་ལྷན་ཐབས་གསལ་སྒྲོན་ཞལ་གྱི་གདམས་པ་དོན་གསུམ་མ་རྣམས། ཐེམས་མེད། གསུམ་པ་རྗེས་ལ། འཁྲིད་ཡིག་གི་རྗེས་ཀྱི་གདམས་པ་ཞེས་པ་སྐྱོང་ཐབས། དམ་ཚིག །བཀའ་རྒྱ། བསྔོ་བ་སྟེ་དོན་བཞིས་སྟོན་པ་རིན་ཅེན་རྒྱན་འཕྲེང་། ཞུ་ལན་ལུང་བྱང་གསལ་བ་འམ་ཟབ་མོ་སྙིང་བྱང་ཞལ་གདམས་རྣམས་ཐོས་པའི་བརྒྱུད་པ་ནི། ཆོས་སྐུ་ཀུན་ཏུ་བཟང་པོ། ལོངས་སྐུ་རྡོ་རྗེ་འཆང་ཆེན། སྤྲུལ་སྐུ་ཡེ་ཤེས་མཁའ་འགྲོ། སློབ་དཔོན་སངས་རྒྱས་གཉིས་པ། ཇོ་མོ་མཁར་ཆེན་བཟའ། ཤེལ་དཀར་རྡོ་རྗེ་འཚོ། ཤེལ་དཀར་རྡོ་རྗེ། ཤེལ་དཀར་མགོན་སྐྱིད། ལྷ་སྲས་མུ་ནེ་བཙན་པོ། ལང་འགྲོ་ལོ་ཙཱ་བ་དཀོན་ཅོག་འབྱུང་གནས། སྤྲུལ་སྐུ་ཞིག་པོ་གླིང་བ། རྒྱལ་སྲས་ཚེ་དབང་གྲགས་པ། མཉམ་མེད་ངག་དབང་གྲགས་པ། དེ་སྲས་ངག་དབང་ནོར་བུ། མཚུངས་མེད་ནོར་བུ་ཡོངས་གྲགས། ཀརྨ་འཕྲིན་ལས་རྒྱ་མཚོ། སྤྲུལ་སྐུ་ཚུལ་ཁྲིམས་རྡོ་རྗེ། དར་སྡིངས་རིག་འཛིན་འཕྲིན་ལས་ལྷུན་གྲུབ། ཟུར་ཁྱབ་
བདག་ཆོས་དབྱིངས་རང་གྲོལ། དེས་བདག་ཟ་ཧོར་བནྡེ་ལའོ། །ཆོས་རྒྱལ་རཏྣ་གླིང་པས་གཉལ་སྨད་དགེ་རི་སྤྱང་དམར་ཆོས་རྫོང་གི་གསང་ཕུག་དམར་པོ་གླང་རུའི་དབྱིབས་འདྲ་བ་ནས་སྤྱན་དྲངས་པའི་ཟབ་ཆོས་ནི། བཀའི་རྒྱ་ཐེམས་རིན་ཅེན་སྒྲོམ་བུ་ལས། འདི་ནི་རྗེས་འཇུག་སུ་དང་སུས་བསྒྲུབས་ཀྱང་རྔ་ཡབ་གནས་ནས་གུ་རུ་པདྨ་ཡིས༔ རྒྱུན་ཆད་མེད་པར་ཐུགས་རྗེས་མི་འཛིན་རེ༔ ཐེ་ཚོམ་མེད་དང་དམ་ཚིག་གཙང་བ་གཅེས༔ གསོལ་བ་ཐོབ་ཅིག་རྗེས་འཇུག་རིགས་ལྡན་རྣམས༔ བུ་ལ་དུངས་པའི་མ་ལྟར་བདག་གིས་སྐྱོབ༔ ཉམས་དང་རྨི་ལམ་དངོས་ཀྱི་ཚུལ་དུ་ཡང་༔ ཚུལ་བཞིན་སྒྲུབ་པའི་བུ་དང་ཞལ་མཇལ་ནས༔ ངོ་སྤྲོད་དབང་བསྐུར་ཆོས་འཆད་ལུང་ཡང་སྟོན༔ བསླུས་ན་པདྨ་ཞལ་ནོ་རྗེས་འཇུག་རྣམས༔ ཞེས་པའི་བརྗོད་དོན་ལྟར་ཐུགས་སྒྲུབ་ཀུན་གྱི་ནང་ནས་ཟབ་ཅིང་རྒྱ་ཆེ་བ་དོན་འདྲིལ་བ་བཀའ་གསང་སྙིང་པོའི་ཡང་ཞུན། རིགས་འཛིན་གྲུབ་ཐོབ་རྣམས་ཀྱི་ཐུགས་བཅུད། བོད་ཡུལ་ས་འོག་ཀུན་གྱི་གཏེར་གཅིག་མ། ཐུགས་སྒྲུབ་ཡང་སྙིང་འདུས་པ་ཡིད་བཞིན་གྱི་སྙིང་པོ་བསམ་འཕེལ་ལྟ་བུའི་ཆོས་སྐོར་ལ། ཐོག་མར་རས་བྲིས་ཀྱི་དཀྱིལ་འཁོར་སྟ་གོན་དང་འཇུག་པ་སྔོན་དུ་འགྲོ་བའི་མེ་ཏོག་འཕྲེང་བ། རྩ་བའི་དབང་ལྔ་རྣམ་པ་ཉི་ཤུས་བྱང་ཆུབ་པ། རྗེས་གནང་གི་དབང་རིམ་བརྒྱད། རིགས་ལྔ་སྐུའི་དབང་། ལྷ་དབང་། སྐུ་གསུང་ཐུགས་ཀྱི་རྗེས་གནང་། རང་ལུས་ནང་གི་དཀྱིལ་འཁོར་ལ་བརྟེན་ནས་གསང་དབང་། བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་། སེམས་ཀྱི་དཀྱིལ་འཁོར་དུ་རྡོ་རྗེ་ཚིག་གི་དབང་། རྗེས་སུ་གནང་བ་འཕྲིན་ལས་བརྒྱད་ཀྱི་དབང་། དམ་ཚིག་བསྒྲགས་ཅིང་ཐེ་ཚོམ་
གཅོད་པ་དང་བཅས་སོ། །དབང་ཆོག་ཡིད་བཞིན་ནོར་བུའི་སྟེང་ནས་༼ཁྲ༽བརྒྱུད་འཛིན་འགྲོ་དོན་ནུས་པའི་བུ་ལ་གདམས་པ་གཏད་རྒྱའི་དབང་རྣམས་སྨིན་རྒྱས་སུ་མནོས་ནས། རྒྱབ་རྟེན་ལུང་ལ། ཐུགས་སྒྲུབ་ཡོངས་རྫོགས་ཡང་སྙིང་འདུས་པའི་བཀའ་རྒྱ་ཐེམས་བྱང་རིན་ཅེན་སྒྲོམ་བུ། དེ་ཉིད་ལས། གདམས་པ་འདི་ལ་ཆོས་སྐོར་རིམ་གསུམ་སྟེ༔ སྒྲུབ་བ་སྒྲུབ་ཆེན་ཁ་སྐོང་ལས་ཚོགས་སྐོར༔ ཞེས་གསུངས་པ་ལྟར། སྤྲོས་མེད་རང་དོན་ཚེ་གཅིག་སངས་རྒྱས་སྒྲུབ་པ་བླ་མ་སྐུ་གསུང་སྒྲུབ་པའི་སྐོར། སྤྲོས་བཅས་གཞན་དོན་དུ་འཁོར་ཚོམ་བུ་དང་བཅས་བྱང་ཆུབ་བསྒྲུབ་པ་སྒྲུབ་པ་ཆེན་པོའི་སྐོར། དེ་དག་གི་མ་ཚང་བའི་ཁ་སྐོང་ཞིང་འཕྲིན་ལས་གཞན་ཕན་སྒྲུབ་པ་ལས་སྣ་ཚོགས་པའི་སྐོར་དང་གསུམ། དང་པོ་ལ། བསྙེན་སྒྲུབ་དམར་འཁྲིད་སྒྲུབ་པའི་ཁོག་འབུབས་དང་༔ སྐུ་གསུམ་རང་རང་སྒྲུབ་པའི་སྐོར་ལ་གསུམ༔ སྙིང་པོའི་གདམས་པ་གསང་འཁྲིད་རིམ་ལྔ་དང་༔ སྐུ་གསུམ་ཐུགས་འཁོར་སྒྲུབ་པའི་ཁ་སྐོང་ཡིན༔ དེ་བས་མང་ཉུང་བྱུང་ན་ལྷག་ཆད་དེ༔ མཐར་ཐུག་སྙིང་པོའི་དོན་ཡིག་སྙིང་ལ་ཆོངས༔ ཞེས་པ་ལྟར། བླ་མ་སྐུ་གསུམ་སྒྲུབ་པའི་ཁོག་ཕུབ་སྦྱོར་བ་སྤྲ་འཁྲིད་ཆེན་མོ་དོན་གསུམ་གྱིས་བསྟན་པ་བསྙེན་སྒྲུབ་ཁོ་ནའི་སྒྲུབ་ཁོག །བླ་མ་སྤྲུལ་སྐུར་སྒྲུབ་པ་བསྙེན་སྒྲུབ་ལས་སྦྱོར་གསུམ་ཚང་བ་ཟབ་པའི་མཐར་ཐུག །བླ་མ་ལོངས་སྐུའི་སྒྲུབ་པ་བསྙེན་སྒྲུབ་ལས་སྦྱོར་ཚང་བ་མཐར་ཐུག་དོན་གྱི་སྙིང་པོ་ཨོ་རྒྱན་གསུང་བཞིན་ནམ་མཁའི་སྙིང་པོས་བྲིས་པ། བླ་མ་ཆོས་སྐུའི་སྒྲུབ་ཐབས་སྒྲུབ་པ་ཀུན་གྱི་སྙིང་མཆོག་ཨོ་རྒྱན་ཐུགས་ཀྱི་ཡང་བཅུད་གསང་སྒྲུབ་རྗེས་ཀྱི་ལས་སྦྱོར་དང་བཅས་པ། གུ་རུ་སྐུ་ལྔའི་གསང་འཁྲིད་རིམ་པ་ལྔ་པ་ཞེས་པ་འདོད་ཆགས་ཀྱི་ངོ་བོ་སྦྱང་བ་བདེ་སྟོང་གཏུམ་མོའི་འཁྲིད། ཞེ་སྡང་
གི་ངོ་བོ་སྦྱང་བ་སྒྱུ་ལུས་བར་དོའི་འཁྲིད། གཏི་མུག་གི་ངོ་བོ་སྦྱང་བ་རྨི་ལམ་འོད་གསལ་གྱི་འཁྲིད། ང་རྒྱལ་གྱི་ངོ་བོ་སྦྱང་བ་མཉམ་ཉིད་ཕྱག་ཆེན་གྱི་འཁྲིད། ཕྲག་དོག་གི་ངོ་བོ་སྦྱང་བ་བོགས་འདོན་གསང་སྤྱོད་ཀྱི་འཁྲིད་རྣམས་སྟོན་པ་མཁར་ཆེན་བཟས་ཡི་གེར་བཀོད་པ། སྒྲུབ་པ་ལ་བར་གཅོད་མི་འབྱུང་ཞིང་དངོས་གྲུབ་ཆར་ལྟར་འབེབས་པ་སྟེང་འཁོར་གསང་འོག་འཁོར་རྣམས་ཀྱི་བྲི་ཡིག །རྩ་གསུམ་རང་དང་འདུ་འབྲལ་མེད་པའི་གཅེས་གནད་བླ་རྡོ་སྲོག་འཁར་བྲི་ཡིག་དང་བཅད་ཐབས་བསྟན་པ། གསང་འཁྲིད་གཏུམ་མོའི་ཆ་ལག་ལུས་སྦྱོར་འཁྲུལ་འཁོར་རྩ་ཚིག ། ཐེམས་མེད། རྩ་རླུང་ཐིག་ལེའི་ཟབ་མོའི་གནད་ཀྱི་གེགས་སེལ་ཆིག་བརྒྱུད་མ་གཏོགས་མི་སྤེལ་བར་པདྨའི་ཤངས་ཚལ་ལས་སྣག་ཚ་བྱས་ཏེ་བྱིན་རླབས་ཀྱི་ཡི་གེར་བཀོད་པ། ཐེམས་མེད། ཟབ་མོ་ཐབས་ལམ་ཟུང་འཇུག་རྡོ་རྗེ་གསང་བའི་ཐེམ་སྐས་སྤྱི་དོན་ལྔས་བསྟན་པ་རིགས་འཛིན་པདྨས་སྦྱར་བ། ཐེམས་མེད། དེའི་བུ་ཡིག་མཚན་ལྡན་ཕྱག་རྒྱའི་མཚན་དཔྱད་དྲི་མེད་ཤེལ་གྱི་མེ་ལོང་ཨྱོན་པདྨ་སམ་བྷ་ཝས་བཀོད་པ་རྣམས། ཐེམས་མེད། གཉིས་པ་སྤྲོས་བཅས་གཞན་དོན་དུ་འཁོར་ཚོམ་བུ་དང་བཅས་བྱང་ཆུབ་བསྒྲུབ་པ་སྒྲུབ་པ་ཆེན་པོའི་སྐོར་ལ། རྩ་བ་ཡན་ལག །ཁ་སྐོང་དང་གསུམ། དང་པོ་ལ། གསང་སྒྲུབ་ཆེན་པོའི་ཐེམས་བྱང་བསྟན་པ་ནི༔ སྒྲུབ་ཁོག་ཆེན་མོ་ཀུན་གྱི་སྐྱེ་བྱེད་མ༔ དབང་གི་རྫོང་ཆེན་གསང་དབང་སྐོར་དང་གསུམ༔ དབང་བྱང་བཀའ་བ་དེ་བཞི་མ་ཡིག་ཡིན༔ དེ་ཡི་བུ་ཡིག་འཛབ་དགོངས་མེ་མཆོད་དང་༔ གཞལ་ཡས་དོན་བསྟོད་དེ་གསུམ་བུ་ཡིག་གོ༔ ཞེས་པ་ལྟར། སྒྲུབ་པ་ཆེན་པོའི་ཁོག་འབུབས་སྤྲ་འཁྲིད་དབང་གི་གྲུ་བོ་ཞེས་པ་ཇོ་མོ། གནུབས་ནམ་སྙིང་
མངའ་བདག །གནུབས་སངས་རྒྱས་ཡེ་ཤེས། ལང་འགྲོ་དཀོན་ཅོག་འབྱུང་གནས་ལྔའི་དོན་དུ་མཛད་པ། ཐུགས་སྒྲུབ་ཆེན་མོའི་དབང་གི་རྫོང་ཆེན་དོན་བདུན་གྱི་སྒོ་ནས་བསྟན་པ། དབང་གོང་མ་གསུམ་གྱི་བསྐུར་ཐབས་གསང་དབང་གསེར་གྱི་ཐེམ་སྐས་ཨྱོན་གྱིས་མཛད་པ། སྟ་གོན་གྱི་ལྷན་ཐབས་མན་ངག་དབང་བྱང་བཀོལ་བ་ཨོ་རྒྱན་ཆེན་པོས་མཛད་པ་རྣམས། གཉིས་པ་ཡན་ལག་ལ། འཛབ་བསྟོད་གསལ་བའི་འཕྲེང་བ། འཕྲིན་ལས་བཞི་མྱུར་འགྲུབ་མེ་མཆོད་སྦྱིན་སྲེག་གི་ཆོ་ག་ཟབ་མོ་ཨོ་རྒྱན་གསུང་བཞིན་གནུབས་བན་ནམ་མཁའི་སྙིང་པོས་བཀོད་པ། གཞལ་ཡས་དོན་བསྟོད་མ་བཅོས་རང་བཞིན་མ་འཚོ་རྒྱལ་གྱིས་བཀོད་པ་རྣམས། གསུམ་པ་ཁ་སྐོང་ལ། འཁོར་བ་དོང་སྤྲུག་མྱོང་གྲོལ་སྐྱེ་བདུན་ཀྱི་སྒྲུབ་པའི་མན་ངག་བསམ་ཡས་དབུ་རྩེ་བྱང་ཆུབ་ཆེན་པོ་སྐུ་རྒྱབ་ནས་སྤྱན་དྲངས་པ། ཐེམས་མེད། བདུད་རྩི་སྨན་གྱི་ཕོ་བྲང་ལ་རིགས་འཛིན་བྱིན་འབེབས་ཆེན་པོ་ཨྱོན་གསུང་བཞིན་མཁར་ཆེན་བཟས་བཀོད་པ། གྲུབ་ཆེན་གསང་བའི་ལས་སྦྱོར་གཏོར་མ་ཟོར་དུ་འཕང་བའི་བསྐུལ་བྱང་དམ་བདར་འོག་མིན་ཆོས་དབྱིངས་མ་ལན་ཅིག་ནི་ཐེམས་མེད། བརྗོད་པས་དམ་ཅན་ལས་ལ་རྒྱུགས་པ་བསྟན་པ་བསྲུང་བའི་མཚོན་ཆ་རྣམས། གསུམ་པ་དེ་དག་གི་མ་ཚང་བ་ཁ་སྐོང་ཞིང་འཕྲིན་ལས་གཞན་ཕན་སྒྲུབ་པ་ལས་ཚོགས་ཀྱི་སྐོར་ལ། གསང་སྔགས་སྤྱི་སྡོམ། སྒྲུབ་དབང་ཀུན་གྱི་ཁ་སྐོང་རྣལ་འབྱོར་མནོག་ཆོས་སྒྲུབ་པའི་རང་གཞུང་། གདམས་སྐོར་ཡོངས་རྫོགས་ཀྱི་ཁ་སྐོང་། རྣལ་འབྱོར་རྐྱེན་བཟློག་ཉམས་ཆག་ཀྱི་ཁ་སྐོང་། གསང་སྔགས་བརྒྱུད་འཛིན་སྤྱི་ལ་གཅེས་པའི་ཆོས། འཕྲིན་ལས་ཁ་བསྒྱུར། གང་འདུལ་གདུལ་བྱའི་རེ་བ་སྐོང་བའི་ཆོས། སྒྲུབ་པ་མཐར་འདོན་
གཡེང་བ་འདོར་བའི་ཆོས། ངོ་མཚར་བསྐྱེད་པ་དང་གནས་སྐབས་ཉེར་མཁོའི་ལས་ཕྲན་དང་བཅུ། དང་པོ་ནི། ཁ་སྐོང་ལས་ཚོགས་སྐོར་ལ་རྒྱ་ཐེམས་ནི༔ ཆོས་སྤྱོད་ལམ་རིམ་གསང་སྔགས་སྤྱི་ཡི་སྡོམ༔ ཞེས་པ་ལྟར། གསང་སྔགས་སྤྱི་ཆིངས་ཆོས་སྤྱོད་ལམ་གྱི་རིམ་པ་ཆེན་མོ་ཨྱོན་ཆེན་པོས་མཛད་པ། གཉིས་པ་སྒྲུབ་དབང་ཀུན་གྱི་ཁ་སྐོང་ནི། ལས་བྱང་སྒྲུབ་མཆོད་ཀུན་གྱི་ཁ་སྐོང་ཡིན༔ ཞེས་པ་ལྟར། བསོད་ནམས་ཚོགས་ཆེན་རྫོགས་ཤིང་བླ་མེད་འབྲས་བུ་ཐོབ་པར་བྱེད་པ་ལས་བྱང་རིན་ཅེན་འཕྲེང་བ་སློབ་དཔོན་གྱིས་གསུང་བཞིན་གནུབས་ནམ་མཁའི་སྙིང་པོས་བཀོད་པ། ལས་བྱང་སྒོམ་ཁོག་འབྲུ་འགྲེལ་མུན་སེལ་སྒྲོན་མེ་གཏེར་སྟོན་གྱིས་མཛད་པ། ཐེམས་མེད། ལས་བྱང་གི་ཁ་སྐོང་བླ་སྒྲུབ་ཕྱི་ནང་གསང་གསུམ་གྱི་མཆོད་འཕྲེང་གནུབས་ནམ་སྙིང་གིས་བཀོད་པ་རྣམས། ཐེམས་མེད། གསུམ་པ་རྣལ་འབྱོར་མནོག་ཆོས་སྒྲུབ་པའི་རང་གཞུང་ནི། བདུད་རྩི་སྨན་སྒྲུབ་དྲག་པོའི་ཧཱུྃ་སྒྲུབ་གཉིས༔ རྣལ་འབྱོར་མནོག་ཆོས་སྒྲུབ་པའི་རང་གཞུང་ཡིན༔ ཞེས་པ་ལྟར། ཡོན་ཏན་ཀུན་འབྱུང་བདུད་རྩི་སྨན་གྱི་གསང་སྒྲུབ་ཆེན་མོ་མདོ་དོན་རིམ་པ་གསུམ་གྱིས་བསྟན་པ་ཨྱོན་མཁན་པོ་པདྨ་འབྱུང་གནས་ཀྱིས་མཛད་པ། ཐུགས་བཅུད་གསང་བ་བླ་ན་མེད་པ་དྲག་པོ་ཐུགས་ཀྱི་ཧཱུྃ་སྒྲུབ། རྩ་བརྒྱད་ཡན་ལག་སྟོང་གི་རྣམ་པར་དབྱེ་བའི་ལྡེ་མིག་བདུད་རྩི་སྨན་གྱི་སྒྲུབ་པའི་ཡིག་ཆུང་སློབ་དཔོན་ཉིད་ལ་ཞུས་ཏེ་འཚོ་རྒྱལ་གྱིས་ཡི་གེར་བཀོད་པ། ཐེམས་མེད། བདུད་རྩི་སྨན་སྒྲུབ་ཀྱི་གནད་བྱང་སྤྲ་འཁྲིད་ལག་ལེན་ཡིག་ཆུང་བཀོལ་བ། དམ་སྲི་མྱུལ་ལེ་བརྟག་པ་དང་འདུལ་རྫས་སྨན་གྱི་སྲུང་མ་ཀུན་ཐུབ་རྒྱལ་མོའི་བསྐུལ་དང་བཅས་པ། ཐེམས་མེད། སྲུང་མ་རྣམས་ཀྱིས་དངོས་གྲུབ་སྐྱེལ་བའི་རྟགས་དང་དངོས་གྲུབ་བསྐུལ་ཆོག་
གནད་འཕྱོང་ཟབ་མོ་སིདྡྷི། ཐེམས་མེད། བདུད་རྩི་སྨན་གྱི་མན་ངག་ཡིག་ཆུང་བཀོལ་བ་ལྷ་དང་རྨུ་ཐག་སྦྲེལ་བའི་ལག་ལེན་ཟབ་མོ། ཐེམས་མེད། སྒྲུབ་པའི་ཡོ་བྱད་ཕུན་སུམ་ཚོགས་པ་གསོག་ཐབས་ལེའུ་གསུམ་པ་གུད་དུ་བཀོལ་བ་རྣམས། ཐེམས་མེད། བཞི་པ་གདམས་སྐོར་ཡོངས་རྫོགས་ཀྱི་ཁ་སྐོང་ནི། ས་དཔྱད་གཏེར་ལུང་གཏད་རྒྱ་གསང་བ་གསུམ༔ གདམས་སྐོར་ཡོངས་རྫོགས་ཀུན་གྱི་ཁ་སྐོང་ཡིན༔ ཞེས་པ་ལྟར། སྒྲུབ་པའི་གནས་ཀྱི་ས་དཔྱད་འཕྲིན་ལས་བཞི་སྤྱི་མཐུན་དང་བྱེ་བྲག་ཏུ་རྒྱས་པར་བསྟན་པ་གསེར་གྱི་ལྡེ་མིག་པདྨས་མ་འོངས་དོན་དུ་བརྩམས་པ། གཏེར་ལུང་གསལ་བའི་མེ་ལོང་ཞེས་པ་བྲམ་ཟེ་པྲ་ཆེན་ཧསྟིའི་ཐུགས་ཀྱི་ཞུན་ཐིགས་གནུབས་སངས་རྒྱས་ཡེ་ཤེས་ཀྱི་སྤྱན་དྲངས་པ་སོགས་ངོ་མཚར་རྟེན་དང་དམ་རྫས་ཀྱི་ལོ་རྒྱུས། ཐུགས་སྒྲུབ་སྤེལ་བའི་གསང་བའི་ཞལ་གདམས་རྒྱ་ཐེམས་གཏད་རྒྱ་གསང་བ་རྣམས། ལྔ་པ་རྣལ་འབྱོར་རྐྱེན་བཟློག་ཉམས་ཆགས་ཀྱི་ཁ་སྐོང་ནི། བཀང་བཤགས་དང་ནི་གཏོར་བཟློག་ཆེན་མོ་གཉིས༔ རྣལ་འབྱོར་རྐྱེན་བཟློག་ཉམས་ཆགས་བཀང་མདོས་ཡིན༔ ཞེས་པ་ལྟར། བླ་མ་ཡི་དམ་མཁའ་འགྲོའི་བཀང་བཤགས་དྲི་མེད་རབ་གསལ་སློབ་དཔོན་ཆེན་པོས་མཁར་ཆེན་བཟའ་ལ་གདམས་པ། མཁའ་འགྲོ་གསང་བའི་གཏོར་བཟློག་ཆེན་མོ་ཟོར་ཅོག་༼སྤེ༽དང་བཅས་པ་ཤིན་ཏུ་ཟབ་པ་སྙིང་ཁྲག་གི་དངས་མ་ལྟ་བུ། མཁའ་འགྲོ་གསང་བའི་ལས་བྱང་ཆེན་མོ་ཚོགས་མཆོད་དང་༼ཀ༽བཅས་པ་སྦྱོར་དངོས་འཇུག་གསུམ་གྱིས་བསྟན་པ། མཁའ་འགྲོ་འབུམ་ཚོ་ཉི་ཤུའི་བསྐུལ་དུར་ཁྲོད་རབ་༼ཀ༽འཇིགས་མ་བྲོ་བརྡུང་དང་བཅས་པ། མཁའ་འགྲོ་གླིང་བཞི་སྲིད་པ་སྤྱི་མདོས་རྫས་བསག་པ། འཕྲིན་ལས་གྱེར་པ་ཟོར་འཕང་སྟེ་གསུམ་གྱིས་བསྟན་པ་ཤིན་ཏུ་བཀའ་གཉན་པ་སློབ་དཔོན་ཆེན་པོ་པདྨ་ཐོད་འཕྲེང་གིས་མཛད་པ། མཁའ་འགྲོ་གསང་བའི་གཏེར་
བཟློག་གི་ལས་ཚོགས་ཞེས་པ་དལ་ཡམས། དམག་འཁྲུག་བཟློག་པ། གདོན་ཆེན། སྨྱོ་བོག་འདུལ་བ། ལྟས་ངན་བཟློག་པ། རུ་ཏྲ་བསྒྲལ་བ། རྦོད་གཏོང་བཟློག་པ་སྟེ་ཁ་བསྒྱུར་བདུན་གྱིས་བསྟན་པ། མཁའ་འགྲོ་བསུ་བཟློག་གི་ལག་ལེན་འཕྱོང་དང་བཅས་པ། མཁའ་འགྲོའི་བསུ་བཟློག་དར་ལམ་ཞུས་ལན་བདུན་པ་གོང་མ། སློབ་དཔོན་གྱི་བྱ་བའི་ཞུས་ལན་བདུན་རྟིང་མ་ཞར་བྱུང་མཁའ་འགྲོ་རྣམས་ཀྱིས་མགྲིན་གཅིག་ཏུ་བཞུགས་པར་གསོལ་བ། བསུ་བཟློག་གི་མདོས་གཞུང་འོག་མ་བཟློག་བསྒྱུར་རྣམས། དྲུག་པ་གསང་སྔགས་བརྒྱུད་འཛིན་སྤྱི་གཅེས་ཀྱི་ཆོས་ནི། ཞལ་ཐེམས་གསང་བ་རྒྱུད་གཏད་ཆོ་ག་གཉིས༔ གསང་སྔགས་བརྒྱུད་འཛིན་སྤྱི་ལ་གཅེས་པ་ཡིན༔ ཞེས་པ་ལྟར། རྗེ་འབངས་ལྔས་གསང་འཁྲིད་རིམ་ལྔ་ཞུས་དུས་གསུངས་པའི་བསྐྱེད་རྫོགས་གཉིས་ཀའི་ཞལ་གདམས་གནད་ཀྱི་འཕྲེང་བ་མཁར་ཆེན་བཟས་ཡི་གེར་བཀོད་པ། སྐལ་ལྡན་གྱི་བུ་ལ་བརྒྱུད་པ་གཏད་པའི་རྗེས་གནང་ངམ་གདམས་པ་གཏད་རྒྱའི་དབང་ཆོག་ཡིད་བཞིན་ནོར་བུ་པདྨ་ཐོད་འཕྲེང་གིས་དགེ་བ་མཐའ་རྒྱས་ཀྱི་གཙུག་ལག་ཁང་དུ་མཛད་པ། བདུན་པ་འཕྲིན་ལས་ཁ་བསྒྱུར་ནི། སྟོབས་ལྡན་རླུང་འཁོར་འཕྲིན་ལས་སྒྲུབ་པའི་སྐོར༔ ཞེས་པ་ལྟར། འབྱུང་བ་རླུང་ལ་ལས་བཅོལ་ནས་འཕྲིན་ལས་བཞི་མྱུར་དུ་འགྲུབ་བྱེད་སྟོད་ལྡན་དྲག་པོ་རླུང་གི་འཁོར་ལོ། དེའི་ཆ་རྐྱེན་འབྱུང་བ་རླུང་གི་འཁོར་ལོའི་གནད་ཐེམས་སམ་མན་ངག་ཞལ་ཤེས་ལས་བྱེད་རླུང་འཁོར། ཐེམས་མེད། གཞུང་དུ་མ་ཐུས་པའི་སྔགས་བྱང་རླུང་འཁོར་གྱི་མན་ངག་ཞལ་ཤེས་གུད་དུ་སྦས་པ་བཅུ་བཞི་རྣམས། ཐེམས་མེད། བརྒྱད་པ་གང་འདུལ་གདུལ་བྱའི་རེ་བ་སྐོང་བའི་ཆོས་ནི། རྟེན་གསུམ་རབ་གནས་བདུན་ཚིགས་གཤིན་དོན་སོགས༔ གང་འདུལ་རེ་སྐོང་
གདུལ་བྱའི་དོན་ཆེན་ཡིན༔ ཞེས་པ་ལྟར། རྟེན་གསུམ་རབ་ཏུ་གནས་པའི་ཆོ་ག་དྲི་མེད་རབ་ཏུ་གསལ་བའི་སྒྲོན་མེད་སློབ་དཔོན་པདྨ་སཾ་བྷ་ཝས་མཛད་པ། གཤིན་དོན་བདུན་ཚིགས་ཀྱི་རིམ་པ་འཁོར་བ་དོང་སྤྲུག་སློབ་དཔོན་ཆེན་པོ་པདྨས་མཛད་པ། དེས་མཛད་པའི་རོ་བསྲེག་གི་ཆོ་ག་མདོར་བསྡུས་གནས་ངན་བག་ཆགས་ཕྱིར་མི་ལྡོག་པ། སྐུ་གདུང་སཱཙྪའི་རིམ་པ་ཞེས་པར་ནང་གསེས་ཀྱི་དངོས་གཞི་དང་ལས་ཚོགས་ལ་འབྱུང་བཞིའི་སཱཙྪ། བྱང་ཆུབ་སྒྲུབ་པ། སྒྲིབ་སྦྱོང་། ཚེ་སྒྲུབ། ནོར་སྤེལ། སྲིའུ་གསོ་བ། ཕུར་ཁ་ཟོར་ཁ་བཟློག་པ། འདུལ་ཁྲིམས་ཉམས་གསོ། དམ་ཚིག་ཉམས་གསོ། ཞི་རྒྱས་དབང་དྲག་གི་ཁ་བསྒྱུར་བསྟན་པ་ཨྱོན་ཆེན་པོའི་གསུང་བཞིན་མཁར་ཆེན་བཟའ་ཆོས་འབྱུང་ཀོ་རོ་བྲག་ཏུ་བཀོད་པ་རྣམས། དགུ་པ་སྒྲུབ་པ་མཐར་འདོན་གཡེང་བ་འདོར་པའི་ཆོས་ནི། བཅུད་ལེན་ཟབ་མོ་སྟོབས་བསྐྱེད་ཚེ་སྒྲུབ་རྣམས༔ སྒྲུབ་པ་མཐར་འདོན་གཡེང་བ་འདོར་ཆོས་ཡིན༔ ཞེས་པ་ལྟར། ཤིན་ཏུ་ཟབ་པ་འོད་ལྡན་རྟག་ཏུ་ངུའི་བཅུད་ལེན་ཞེས་པ་རྟག་ཅིང་འཐུ་བ། བསྐམས་ཏེ་འཐག་པ། བརྡུང་ཞིང་བྱིན་གྱིས་བརླབ་པ་རིལ་བུ་སྦྱར་བ། ལས་སྣ་ཚོགས་ཀྱི་སྒོ་ནས་ཟ་ཐབས་ཏེ་དོན་ལྔས་བསྟན་པ། ཚེ་སྒྲུབ་གསང་བའི་བཀའ་རྒྱ་མ་ཞེས་པ་ཕྱག་རྒྱ་མ་ཚེ་ལམ་ཅན་མཚན་ལྡན་ལ་བརྟེན་ནས་བསྒྲུབ་པ་དང་དམིགས་བཟླས་ལ་བརྟེན་ནས་བསྒྲུབ་པ། བྱ་སླ་ཚེགས་ཆུང་ཡོན་ཏན་ཆེ་བ་གསང་ཆེན་བདུད་རྩིའི་བཅུད་ལེན་རྣམས་ཐེམས་མེད། བཅུ་པ་ངོ་མཚར་བསྐྱེད་པ་དང་གནས་སྐབས་ཉེར་མཁོའི་ལས་ཕྲན་ལ། དཔལ་བསམ་ཡས་སུ་རྗེ་འབངས་ལྔས་ཐུགས་སྒྲུབ་ཞུས་དུས་ལང་འགྲོ་དཀོན་ཅོག་འབྱུང་གནས་ཀྱིས་གསེར་གྱི་མནྜལ་གཡུའི་ཕྲ་ཅན་ཕུལ་ནས་ཞུས་པའི་ཞུ་ལན་ཆེན་མོ་གནད་ཀྱི་ལྡེ་མིག་ཞལ་གདམས་
བཀའ་རྒྱ་མ་ཐེམས་མེད། ཇོ་མོ་དང་ལོ་ཙཱ་བ་གཉིས་བསྡུར་ནས་བསམ་ཡས་དབུ་རྩེ་བར་མའི་ཤར་སྒོར་ཡི་གེར་བཀོད་པ། སྔོན་འགྲོ་ཐོད་པ་བརྟག་ཅིང་བཅས་བཤམ་པ། དངོས་གཞི་སྒྲུབ་ཅིང་རྟགས་དང་ལས་སྦྱོར་དམ་ཚིག །ལོ་རེ་བཞིན་བསྐྱར་སྒྲུབ་ཕན་ཡོན། རྗེས་འབྲས་བུ། ཞར་བྱུང་འཁོར་ལོའི་བྲིས་ཡིག་བསྟན་པའི་ཐོད་སྒྲུབ་རིན་ཅེན་འབར་བ། ཐེམས་མེད། གུད་དུ་སྦས་པའི་ལས་ཚོགས་བཅོ་ལྔ་ཞེས་པ་སྒྲིབ་ཤིང་། ཐེམས་མེད། རྫས་ཀྱི་རས་རྐྱང་བྱ་བ། ཕྱག་རྒྱ་དབང་བསྡུད། གདོན་ཆེན་འདོན་པ། རིམས་ནད་དྲག་པོ་དམར་ནད་རྒྱུ་གཟེར། ཞོ་ཆང་། ཕྱུགས་ནད་གློ་གོར་བསྲུང་བ། མེ་ཏོག་ནམ་མཁར་སྡོད་པ། གཏོར་མ་དང་བུམ་ཆུ་ཁོལ་བ། མངོན་ཤེས་བསྒྲུབ་པ། བསྐྲད་པ་དང་དཀྲུག་པ། རྦོད་གཏོང་བྱད་བཟློག་དང་བཅས་པ་རྣམས་རྫོགས་པར་ཐོབ་པ་ལས་སྤེལ་ཀ་ཁྲའི་རྟགས་ཡོད་པ་མ་གཏོགས་པའི་དབང་ལུང་གཉིས་ཀའི་བརྒྱུད་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་ཐོད་འཕྲེང་རྩལ། མཁའ་འགྲོ་ཡེ་ཤེས་འཚོ་རྒྱལ། གནུབས་ནམ་མཁའི་སྙིང་པོ། གནུབས་སངས་རྒྱས་ཡེ་ཤེས། བཙུན་པ་རྒྱལ་བ་མཆོག་དབྱངས། མངའ་བདག་ཁྲི་སྲོང་ལྡེ་བཙན། ལང་འགྲོ་དཀོན་ཅོག་འབྱུང་གནས། ཤེལ་དཀར་རྡོ་རྗེ་འཚོ། གཏེར་སྟོན་ཆོས་ཀྱི་རྒྱལ་པོ་རཏྣ་གླིང་པ། རྒྱལ་སྲས་ཚེ་དབང་གྲགས་པ། ཐུགས་སྲས་ངག་དབང་གྲགས་པ། མཚུངས་མེད་ངག་དབང་ནོར་བུ། རིགས་འཛིན་ཚེ་དབང་ཡོངས་གྲགས། ཀརྨ་འཕྲིན་ལས་རྒྱ་མཚོ། མང་ཐོས་དྷརྨའི་མཚན་ཅན། རིགས་འཛིན་འཕྲིན་ལས་ལྷུན་གྲུབ། ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ། དེས་བདག་ཟ་ཧོར་གྱི་བནྡེའི་མནོག་ཆོས་སུ་སྩལ་བའི་བཀའ་དྲིན་ནི་བྱང་ཆུབ་
ཀྱི་བར་དུ་ཡང་གཞལ་བར་དཀའོ། །དབང་། ལས་བྱང་། ཆོས་སྤྱོད་ལམ་རིམ་ཆེན་པོ་གསུམ་གྱི་བརྒྱུད་ལུགས་གཅིག་ནི། ཐུགས་སྲས་ངག་དབང་གྲགས་པ་ནས། རྗེ་སངས་རྒྱས་བརྩོན་འགྲུས། རྗེ་སངས་རྒྱས་བདེ་ཆེན། མཁས་གྲུབ་ཉི་ཟླ་སངས་རྒྱས། རྡོ་རྗེ་འཆང་ཕ་བོང་ཁ་པ་དཔལ་འབྱོར་ལྷུན་གྲུབ། དེས་བདག་ལའོ། །སྟོབས་ལྡན་རླུང་འཁོར་གྱི་གཞུང་། དེའི་ཞལ་ཤེས་ལས་བྱེད་རླུང་འཁོར། ཕོ་འཁོར་མོ་འཁོར་བར་འཁོར། ཞི་དྲག་གི་སྒྲོ་འདབ། རླུང་ཁང་གི་དཔེ་རིས་དང་ཕྱག་ལེན་ཞལ་ཤེས་དམར་འཁྲིད་བཅས་ཐོབ་པའི་བརྒྱུད་པ་ནི། རིགས་འཛིན་ཚེ་དབང་ཡོངས་གྲགས་ནས། སྡེ་བ་ཡུག་པ་ནོར་བུ་དབང་རྒྱལ། ཟུར་བླ་མེད་རྡོ་རྗེ་རྩལ། རླུང་མི་འགྱུར་རྡོ་རྗེ། དབྱངས་དཔོན་པ་མཐུ་སྟོབས་གསང་བའི་དབང་ཕྱུག །ཟུར་ཀུན་མཁྱེན་ཆོས་དབྱིངས་རང་གྲོལ། དེས་བདག་ལའོ། །ཡང་ན་ཐུགས་སྲས་ངག་དབང་གྲགས་པ་ནས་བླ་མ་བསོད་ནམས་རྒྱ་མཚོ། མེ་ལོང་དཀོན་པ་པདྨ་གར་དབང་། སྣང་གསལ་བ་དྲུང་དཀོན་ཅོག་པ། རྗེ་ངག་དབང་ཡེ་ཤེས་གྲུབ་པ། ཟུར་ཀུན་མཁྱེན་རྩ་བའི་བླ་མ། དེས་བདག་ལའོ། །ཀའི་རྟགས་ཡོད་པའི་བརྒྱུད་པ་ནི། དར་སྡིངས་རིགས་འཛིན་འཕྲིན་ལས་ལྷུན་གྲུབ་ནས། གྲུབ་ཆེན་ཀརྨ་གསང་སྔགས། ཁྱབ་བདག་ཁྲ་ཚང་བ་ཆེན་པོ། དེས་བདག་ལའོ། །སྤེའི་རྟགས་ཡོད་པའི་བརྒྱུད་པ་ནི། ཀརྨ་འཕྲིན་ལས་རྒྱ་མཚོ་ནས། སྤེ་ལྕོག་བླ་མ་དགེ་སློང་སངས་རྒྱས་ཕུན་ཚོགས། ཐུགས་སྲས་ཆོས་རྗེ་ཆོས་བཟང་། ཁྲ་ཚང་པ་ཆེན་པོ། དེས་བདག་ལའོ། །ཁྲའི་རྟགས་ཡོད་པའི་གདམས་གཏད་དབང་བརྒྱུད་ནི། རྒྱལ་སྲས་ཚེ་དབང་གྲགས་པ་ནས། བླ་མ་ཀུན་དགའ་གྲགས་པ། རྗེ་ཀུན་དགའ་བསྟན་འཛིན། གུ་རུ་ཨྱོན་བསྟན་འཛིན། རིགས་འཛིན་
འཇའ་ཚོན་སྙིང་པོ། རྩེ་ལེ་སྤྲུལ་སྐུ་པདྨ་ལེགས་གྲུབ་རྩལ། སྔགས་འཆང་ཀརྨ་གསང་སྔགས། ཁྲ་ཚང་པ་ཆེན་པོ། དེས་བདག་ལའོ། །