སྤྲུལ་པའི་གཏེར་སྟོན་འགྲོ་འདུལ་གླིང་པས་སྤྱན་དྲངས་པའི་གཏེར་ཆོས་ཁག་གི་སྐོར།
གནམ་སྐས་ཀླུ་བདུད་མགོ་དགུའི་བྲག་སྟག་ལྤགས་བརྒྱངས་འདྲའི་ངོས་ནས་སྤྲུལ་པའི་གཏེར་སྟོན་འགྲོ་འདུལ་གླིང་པས་ཁྲོམ་གཏེར་དུ་སྤྱན་དྲངས་པའི་རྟ་མགྲིན་གསང་འདུས་ནི། ཐེམས་བྱང་ལས། ཁྱད་པར་ཡང་ཟབ་ང་ཡི་ཐུགས་དམ་བསྐོང་༔ གསང་བ་འདུས་པ་ཞི་དང་ཁྲོ་བོའི་སྐོར༔ གཉིས་ལས་རྟ་མགྲིན་
གསང་བ་འདུས་པ་ནི༔ པདྨ་ང་ཡི་ཐུགས་དམ་རྩ་བ་ཡིན༔ བོད་ཡུལ་ས་འོག་ཀུན་གྱི་གཏེར་གཅིག་མ༔ ཐུགས་བཅུད་སྙིང་པོ་འདི་ཉིད་མིན་རེ་སྐན༔ ཞེས་མཆོག་གི་དངོས་གྲུབ་མྱུར་དུ་བསྒྲུབ་པའི་ཞར་ལ་ཐུན་མོང་གི་དངོས་གྲུབ་འབད་མེད་སྩོལ་བ། ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པའི་དབང་ཆེན་རྟ་མགྲིན་གསང་བ་འདུས་པའི་ཆོས་སྐོར་ལ། རས་བྲིས་ཀྱི་དཀྱིལ་འཁོར་དུ། དབང་ཆོག་ཆེན་མོ་དྲེགས་པ་སྲོག་གི་རྒྱ་ཅན་གྱི་སྟེང་ནས་དཔལ་རྟ་མགྲིན་གསང་བ་འདུས་པའི་དབང་ལ། སྟ་གོན་དང་འཇུག་པ་སྔོན་དུ་འགྲོ་བའི་དབུ་རྒྱན་གྱིས་རྡོ་རྗེ་འཆང་དང་སྐལ་བ་མཉམ་པ། ཅོད་པན་གྱི་ཆོས་ཀྱི་རྒྱལ་པོར་འགྱུར་བ། གཏོར་མས་སྐུ་གསུང་ཐུགས། བུམ་པས་སྐུ་བཞིའི་སངས་རྒྱས་ཐོབ་པའི་དབང་། དུར་ཁྲོད་ཆས་ཀྱིས་ཟིལ་གནོན་རང་རྟགས་ཆེ་བཙན་དྲེགས་པ་ཀུན་འདུལ་མངོན་རྫོགས་རྒྱལ་པོའི་དབང་། ཕྱག་མཚན་གྱི་འཕྲིན་ལས་རྫོགས་ཤིང་ཉོན་མོངས་འཇོམས་པ་བདུད་བཞི་ཚར་གཅོད་པ། གཟིག་ཤམ་དང་རྒྱན་དྲུག་གིས་སྣང་སྲིད་ཟིལ་གྱི་གནོན་ཅིང་ཐེག་དགུ་ཡོངས་རྫོགས་ཀྱི་དབང་། ཕུར་པས་བསྒྲལ་དབང་། བྱང་སེམས་ཀྱིས་བདེ་སྟོང་། སྐུ་འབག་གིས་བསྐྱེད་རིམ། བཟླས་པ། རྫོགས་རིམ། ཞལ་ཟས་ཚེ་དང་གལ་གྱི་དབང་། དབང་མཆོག་ཡིད་བཞིན་ནོར་བུའི་སྟེང་ནས་བྱང་ཆུབ་སེམས་ཀྱི་དཀྱིལ་འཁོར་དུ་གསང་དབང་། བྷ་གའི་དཀྱིལ་འཁོར་དུ་ཤེར་དབང་། བརྡ་སྤྲོད་པ་ལ་བརྟེན་ནས་ཚིག་དབང་དོན་གྱི་ངོ་བོ། དབང་ཆོག་རིན་ཅེན་གཏེར་བུམ་གྱི་སྟེང་ནས་གཏོར་མ་རིན་ཅེན་དབང་གི་རྒྱལ་པོ་ལ་བརྟེན་ནས་དབང་བཞི་སྟན་ཐོག་གཅིག་ཏུ་བསྐུར་བ། སྐུ་གཟུགས་སྒྲུབ་ཡིག་ཕྱག་མཚན་ལ་བརྟེན་ནས་
སྐུ་གསུང་ཐུགས་དབང་། རས་བྲིས་ཀྱི་དཀྱིལ་འཁོར་དུ། དབང་ཆོག་ཡིད་བཞིན་ནོར་བུའི་སྟེང་ནས་འཇིགས་བྱེད་མེའི་སྤུ་གྲིའི་དབང་ལ། འཇུག་པ་སྔོན་དུ་འགྲོ་བའི་བུམ་པས་དབང་བཞི། བདུད་རྩི་མེ་ལོང་གིས་གསང་དབང་། རྡོར་དྲིལ་གྱིས་ཡེ་ཤེས་ལྔའི་དབང་། མེ་ལོང་དང་སྐུ་གཟུགས་ཀྱི་ཡེ་ཤེས་རྩལ་དབང་། ཕྱག་མཚན་གྱིས་འཕྲིན་ལས་བཞི་ཁམས་གསུམ་ཡོངས་སྒྲོལ་མངོན་རྫོགས་རྒྱལ་པོའི་དབང་། དུར་ཁྲོད་ཆས་ཀྱི་རབ་འབྱམས་རྒྱལ་པོའི་དབང་། སྒྲུབ་གཏོར་སྐུ་འབག་རྟེན་གཏོར་བཅས་པས་སྐུ་གསུང་ཡོངས་རྫོགས་དང་འཕྲིན་ལས་གང་འཚམ་གྲུབ་པའི་དབང་རྣམས། རས་བྲིས་ཀྱི་དཀྱིལ་འཁོར་དུ་དབང་ཆོག་འོད་ཟེར་འཕྲེང་བའི་སྟེང་ནས་གསང་བདག་རྡོ་རྗེ་གཏུམ་པོའི་དབང་ལ། འཇུག་པ་སྔོན་དུ་འགྲོ་བའི་བུམ་པས་ལྷ་དབང་། ཅོད་པན་གྱིས་ལྷ་དང་སྐལ་བ་མཉམ་པ། བདུད་རྩིས་གསང་ངག་ལ་ནུས་པ་བསྐྱེད་པ། ས་བོན་རྡོལ་དྲིལ་གྱིས་ཐུགས་དབང་། ཕྱག་མཚན་གྱིས་རྩལ་ཆེན་འགྲོ་བ་འདུལ་ཞིང་འཕྲིན་ལས་རྫོགས་པའི་དབང་། གཏོར་མ་སྐུ་འབག་དང་བཅས་པས་དབང་བཞི་ཡོངས་རྫོགས། ཁྱུང་དང་ཁྲོ་བཅུའི་ལྷ་དབང་གིས་འཕྲིན་ལས་དང་མཐུ་རྩལ་ཡོངས་རྫོགས། བརྡ་སྤྲད་པ་རབ་འབྱམས་བཀའི་དབང་རྣམས། རས་བྲིས་ཀྱི་དཀྱིལ་འཁོར་དུ་དབང་ཆེན་དྲག་པོ་ལས་དྲག་པོར་ཁྲོས་པ་རྟ་ནག་ལྕགས་རལ་ཅན་གྱི་སྨིན་བྱེད་ལ། འཇུག་པ་སྔོན་དུ་འགྲོ་བའི་བུམ་པ་དང་གཏོར་མས་ཡོངས་རྫོགས་ཆེན་མོའི་དབང་བཞི། འཕྲིན་ལས་རྣམ་བཞི་འགྲུབ་པ་ཕྱག་མཚན་གྱི་དབང་། དཔལ་གྱི་ཆས་ཀྱི་རང་རྟགས་དྲེགས་པར་
དབང་སྒྱུར་སྲིད་གསུམ་བྲན་འཁོལ་གྱི་དབང་། སྐུ་འབག །སྔགས། ཕྱག་མཚན། གླེགས་བམ་གྱིས་སྐུ་གསུང་ཐུགས་ཡོན་ཏན་འཕྲིན་ལས་ཀྱི་རྗེས་གནང་དངོས་གྲུབ་ཀྱི་མཐའ་ཅན་བཅས་པ་རྣམས་ལེགས་པར་མནོས་ནས། ལུང་ལ། ཐེམས་བྱང་རིན་ཅེན་གཏེར་མཛོད་དེ་ལས་བྱུང་བའི་གདམས་སྐོར་ལ། ཀུན་གྱི་རྩ་བ་རྒྱུད་ཀྱི་སྐོར། བསྐྱེད་རིམ་སྒྲུབ་པ་དབང་འཕྲིན་ལས་དང་བཅས་པའི་སྐོར། ཁ་བསྒྱུར་སྐུ་གསུང་ཐུགས་ཡོན་ཏན་འཕྲིན་ལས་ཀྱི་ལས་ཚོགས་སྐོར། སྐུ་གསུང་ཐུགས་ལས་སྤྲུལ་པའི་ཡི་དམ་སྒེར་སྒྲུབ་སྐོར། མ་ཚང་བ་ཁ་སྐོང་བའི་གདམས་ཕྲན་སྣ་ཚོགས་སྐོར། ཡིད་ཆེས་བསྐྱེད་པ་ཞལ་གདམ་ཁ་འཐོར་སྐོར། ཐེམས་མེད་ཡུམ་བཀའ་ཟབ་ཁྱད་ཅན་གྱི་སྐོར། སྒོས་ཀྱི་བཀའ་སྐྱོང་སྔགས་སྲུང་ཨེ་ཀ་ཛ་ཊིའི་སྐོར། སྤྱིའི་སྲུང་མ་གནོད་སྦྱིན་དྲག་པོ་བཤན་པ་དམར་ནག་སྐོར། ནོར་གྱི་དབང་ཕྱུག་རྒྱལ་ཆེན་རྣམ་སྲས་སྐོར། ངན་ཐབས་ལས་ཕྲན་སྐོར་དང་བཅུ་གཅིག །དང་པོ་ནི། ཐོག་མར་ཆོས་འདི་བསྐྱེད་པ་མ་ཡི་ཚུལ༔ དབང་ཆེན་གསང་བ་འདུས་པའི་རྒྱུད་ཆེས་ཡིན༔ ཞེས་པ། ཡང་གསང་སྤུ་གྲིའི་རྒྱུད་སྟོང་ཕྲག་ལྔའི་ནང་ནས་ཕྱུང་བའི་ཆོས་འདི་སྐྱེད་པར་བྱེད་པའི་མ་ལྟ་བུ་དབང་ཆེན་ཡང་གསང་ཁྲོས་པའི་དྲག་སྔགས་གནམ་ཐོག་མེའི་སྤུ་གྲི་གསང་བ་འདུས་པའི་རྒྱུད་ཆེན་ལེའུ་ཉེར་གཉིས་པ། གཉིས་པ་བསྐྱེད་རིམ་སྒྲུབ་པ་དབང་འཕྲིན་ལས་དང་བཅས་པའི་སྐོར་ནི། སྤྱི་སྒྲུབ་འཁོར་ལོ་རྣམ་གསུམ་སྒྲུབ་པ་དང་༔ ཡང་གསང་ནང་སྒྲུབ་བླ་མ་དབྱེར་མེད་སྒྲུབ༔ གསང་སྒྲུབ་ཁྱད་པར་ཡང་ཟབ་སྒྲུབ་པ་དང་༔ གཏོར་དབང་རིན་ཅེན་གཏེར་གྱི་བུམ་པ་དང་༔ དབང་ཆོག་རྒྱས་པ་དྲེགས་པའི་སྲོག་རྒྱ་ཅན༔ གསང་དབང་
སྐོར་གསུམ་ཡིད་བཞིན་ནོར་བུ་དང་༔ ལས་བྱང་བསྐྱེད་རིམ་བསྟོད་པ་འགེབས་དང་བཅས༔ དེ་དག་སྒྲུབ་སྐོར་རྩ་བའི་ཆོས་རྣམས་ཚང་༔ དེ་ཡི་ཁ་སྐོང་མེ་མཆོད་ཆེན་མོ་སྟེ༔ མཐར་ཐུག་ཡིན་ནོ་སྙིང་གི་དཀྱིལ་དུ་ཆོངས༔ ཞེས་པ་ལྟར་ལང་འགྲོ་ལོ་ཙཱ་བས་སློབ་དཔོན་ཆེན་པོ་ལ་རྟ་མགྲིན་གྱི་ཞལ་མངོན་སུམ་དུ་མཐོང་བའི་གདམས་པ་ཞུས་ཚེ་གནང་བ་སྤྱི་སྒྲུབ་འཁོར་ལོ་རྣམ་གསུམ་ཞེས་པ་ཕྱི་རྟ་ཐོད་ལྷ་ཞལ་ལ་བརྟེན་ནས་དྲེགས་པ་ཅན་དབང་དུ་བསྡུ་བ། ནང་ཐོད་པ་ལྷ་ཞལ་ལ་བརྟེན་ནས་རང་ལུས་ལྷར་བསྒོམ་པ། གསང་བ་འཁོར་ལོ་ལྷ་ཞལ་ལ་བརྟེན་ནས་དགྲ་བགེགས་ཚར་གཅོད་པ་གསུམ་བསྟན་པ། རྟ་ཐོད། ཐོད་པ་ལྷ་ཞལ། གསང་བའི་འཁོར་ལོ་རྣམས་ཀྱི་དཔེ་རིས། ཐེམས་མེད། རྟ་ཕག་ཡབ་ཡུམ་ནང་བླ་མ་དང་དབྱེར་མེད་སྒྲུབ་པ་བདག་བྱིན་གྱིས་བརླབ་པའི་རིམ་པ་བླ་མ་ཡི་དམ་མཁའ་འགྲོ་སྤྱི་སྒྲུབ་བྱིན་རླབས་ཀྱི་རྩ་བ་འཚོ་རྒྱལ་གྱིས་སློབ་དཔོན་ལ་ལུང་ཞུས་ནས་ཡི་གེར་བཏབ་པ། ཡང་ཐེམས་མེད། གསང་གནས་ཀྱི་སྒྲུབ་ཐབས་དགོངས་པའི་ཞེ་ཕུགས་སྦྱོར་དངོས་རྗེས་གསུམ་གྱིས་བསྟན་པ་གསུམ་ལས་མི་སྤེལ་བ། ཡང་གསང་གནད་ཡིག་ཐེམས་སུ་མ་བསྟན་༼གཏེར༽གུད་དུ་སྦས་པ་རང་གི་བཅང་བར་བྱའོའི་མཐའ་ཅན། ཐེམས་མེད། དཔལ་རྟ་མགྲིན་གསང་བའི་སྒྲུབ་ཐབས་འཛབ་དགོངས་དམིགས་པ་རྟགས་དང་བཅས་པ་སློབ་དཔོན་ཆེན་པོའི་གསུང་བཞིན་ཤེལ་དཀར་བཟས་ལ་ཡག་མོ་མཁར་སྟེང་དུ་བྲིས་པ། རྟ་ཕག་ཡང་གསང་ལྟར་བསྒྲུབ་པའི་སྤྱི་༼༽སྒྲུབ་དམར་ནག་སྲོག་ཏིག་གུད་དུ་སྦས་པའི་ཆིག་བརྒྱུད་ལས་སྤེལ་མི་རུང་བ། ཡང་གསང་བསྒྲུབ་པའི་འཁོར་ལོ་སྙིང་༼༽བྱང་ལྐོག་ཡིག་ཅེས་པ་སྲོག་
འཁོར་བླ་རྡོའི་མན་ངག །ཐེམས་མེད། ཐོད་སྐུ། བླ་རྡོའི་སྣོད་དང་སྦ་ལྕགས་ཚིགས་གསུམ་དར་སྣ་ལྔ་པ། འཁོར་ལོ་སྙིང་བྱང་གི་དཔེ་རིས་དང་བཅས་པ། ཐེམས་མེད། དཔལ་རྟ་མགྲིན་གྱི་སྒྲུབ་ཐབས་ཀྱི་འགྲེལ་པ་གསལ་བའི་མེ་ལོང་ཤིན་ཏུ་ཟབ་པ་སྤྱི་དོན་གསུམ་གྱིས་བསྟན་པ། གཏོར་མ་རིན་པོ་ཆེ་དབང་གི་རྒྱལ་པོ་ལ་བརྟེན་ནས་དབང་བཞི་སྟན་ཐོག་གཅིག་ཏུ་བསྐུར་བ་རིན་ཅེན་གཏེར་བུམ་སློབ་དཔོན་གསུང་བཞིན་རྒྱལ་བ་མཆོག་དབྱངས་ཀྱིས་བྲིས་པ། དབང་མཆོག་ཆེན་མོ་དྲེགས་པ་སྲོག་གི་རྒྱ་ཅན་ཞེས་པ་སྔོན་འགྲོ་དངོས་གཞི་རྗེས་རྐྱང་པ་དང་རྗེས་ཀྱི་ཟབ་རྒྱ་དམ་ཚིག་བཅས་པའི་དོན་བཞིས་བསྟན་པ། དབང་གོང་མ་གསུམ་བསྐུར་ཐབས་ཡིད་བཞིན་ནོར་བུ་ཆིག་བརྒྱུད་མ། དཀྱིལ་འཁོར་རྒྱས་བསྡུས། གཏོར་མ། བནྡྷ། ཅོད་པན། ཚེ་རིལ། བུམ་པ། དབུ་རྒྱན། དུར་ཁྲོད་ཆས་རྒྱན། རྒྱན་དྲུག །ཕུར་པ། ཚེ་བུམ། གསང་རྫས་ཁེབས་བཅས་རྣམས་ཀྱི་དཔེ་རིས། ཐེམས་མེད། གཏེར་སྟོན་གྱིས་མཛད་པའི་ལས་བྱང་རིན་ཅེན་འཕྲེང་བ་ཞེས་པ་གཏེར་བྱོན་གཞིར་བཞག་ལ་གསང་སྒྲུབ་དང་ཡང་གསང་ཁྲོས་པ་སོགས་ནས་ཁ་བསྐངས་པའི་མང་ཉུང་རན་ཞིང་སྐྱོང་བདེ་བ་ཤིན་ཏུ་ལེགས་པ། ཐེམས་མེད། ལྷ་བསྐྱེད་སྤྱན་འདྲེན་བསྟོད་པ་སོགས་ལས་བྱང་འགེབས་ཀྱི་རིམ་པ་གུ་རུའི་གསུང་བཞིན་བཙུན་པ་མཆོག་དབྱངས་ཀྱིས་བྲིས་པ། སྒྲུབ་པའི་ཁ་སྐོང་གི་ལས་བྱང་ནི་གློང་གསལ་སྙིང་ཏིག་ན་ཡོད་དེ་བཀོལ་དུ་རུང་ཟེར་བ་འདུག །དེ་དག་གི་ཁ་སྐོང་མེ་མཆོད་༼གཏེར༽སྦྱིན་སྲེག་ཕོ་ཉ་མྱུར་མགྱོགས་རྣམས། གསུམ་པ་ཁ་བསྒྱུར་སྐུ་གསུང་ཐུགས་ཡོན་ཏན་འཕྲིན་ལས་ཀྱི་ལས་ཚོགས་སྐོར་ནི། དེ་ཡི་ལས་ཚོགས་མན་ངག་བསྟན་པ་ནི༔ རྩ་བའི་ལས་ཚོགས་ཁྱུང་ལྔའི་སྒྲུབ་པ་དང་༔ སྐུ་སྒྲུབ་
ལས་ཚོགས་དགོས་འདོད་ཀུན་འབྱུང་དང་༔ གསུང་སྒྲུབ་ལས་ཚོགས་ཀུན་ཐུབ་བསྲུང་བའི་རྒྱལ༔ ཐུགས་སྒྲུབ་ལས་ཚོགས་བདུད་ཟློག་ཅོག་བརྡུང་དང་༔ ཡོན་ཏན་ལས་ཚོགས་ཡང་ཟློག་སྤུ་གྲི་དང་༔ འཕྲིན་ལས་ལས་ཚོགས་རྫས་སྦྱོར་རྭ་བསྲུང་བཅས༔ དབང་ཆེན་ཕྱི་ནང་གསང་གསུམ་སྐུ་གསུང་ཐུགས༔ ཡོན་ཏན་འཕྲིན་ལས་མ་ལུས་ཐམས་ཅད་ཚང་༔ དེ་ལས་མང་ཉུང་བྱུང་ན་ལྷག་ཆད་དེ༔ མཐར་ཐུག་ཡིན་ནོ་སྙིང་གི་དཀྱིལ་དུ་ཆོངས༔ ཟབ་ཅིང་གཉན་པས་གདམས་པ་འཚོ་ཤེས་གཅེས༔ ཞེས་པ་ལྟར་རྩ་བའི་ལས་ཚོགས་དྲག་པོ་ཁྱུང་ལྔའི་སྒྲུབ་པ་གུ་རུའི་གསུང་བཞིན་ཨཱ་ཙཪྻ་ཡེ་ཤེས་ཀྱིས་བྲིས་པ། སྐུ་སྒྲུབ་ལས་ཚོགས་དགོས་འདོད་ཀུན་འབྱུང་ལས་ནང་གསེས་ཀྱི་རྨི་ལམ་ངན་པ་ཟློག་པ། ཁྱིམ་ནང་དམ་སྲི་གདོན་པ། གཏོར་མར་མེ་འབར་བ། སྨྱོ་འབོག་གདུལ་བ། ཁྱིམ་ནས་གདོན་ཆེན་གདོན་པ། རྫས་ཀྱི་གཏུམ་མོ། མི་ཕྱུགས་ཀྱི་ཕྲུག་གུ་ཁོང་པར་ཤི་བ་གདོན་པ། ཞོ་ཆང་བསྲུང་བ། ཕྱུགས་ཀྱི་གློ་གོར། ཆང་བསྲུང་ཟབ་པའི་མཐར་ཐུག །དེས་ཀྱང་མ་ཐུབ་ན་བསྲུང་བའི་ཟབ་གནད་ཅན་དང་བཅས་པ། གསུང་སྒྲུབ་ལས་ཚོགས་རིན་ཅེན་གཏེར་བུམ་ཀུན་ཐུབ་བསྲུང་བའི་རྒྱལ་པོ་ལ་སྔགས་དམིགས་ཀྱིས་འགོ་ནད་ཐམས་ཅད་བསྲུང་བ། ཙནྡན་དཀར་པོ་སོགས་སྨན་དྲུག་དང་སྔགས་ཀྱིས་རྒྱུ་གཟེར་བསྲུང་བ། ག་བུར་སོགས་སྨན་བཞི་དང་སྔགས་ཀྱི་རིམས་བསྲུང་བ། ཕག་རྒོད་ལ་བརྟེན་པའི་གཉན་སྔགས། ལྷོག་པ་གསོད་པ་བྲམ་ཟེ་སྤུན་དགུའི་མན་ངག །རྫས་བཞི་དང་གསང་སྔགས་ཀྱིས་རིམས་ཐམས་ཅད་བསྲུང་བ། གཉན་ལྷོག་འཆི་ངེས་པའི་སྔགས་དམིགས་ཟབ་མོ། ལིང་ཏོག་འཕྱག་པ། ཁྲག་
གཅོད། སྲིན་ནད་གསོ་བ། སོ་སྲིན་སྔགས་དང་སྔགས་རྫས་གཉིས་ཀས་གསོད་པ། མེས་ཚིག་པ་གསོ་བ། སྔགས་དང་རྫས་གཉིས་ཀྱིས་མི་ཕྱུགས་ཀྱི་ཕྲུ་གུ་དང་ཤ་མ་འདོན་པ་དང་སྔགས་དང་རྫས་གཅིག་གི་གདོན་པ། དུག་སྔགས། སྲིན་གང་ལ་ཡང་སླེབས་ཆོག་མ། ལུས་ཀྱི་སྲོག་ཆགས་བསྲུང་བ་ལན་ཆགས་སྦྱང་བ་སྔགས་རྫས་དང་རྫས་རྐྱང་གིས་བསྲུང་བ། འབྲུམ་བསྲུང་། གློ་ཆམ་བསྲུང་བ། དྲག་ལས་ཐམས་ཅད་གྱི་རང་བསྲུང་རྫས་སྔགས་ཀྱི་སྦྱོར་བ་ཁྱད་པར་ཅན། ཤུ་བ་གསོ་བ། གག་ལྷོག་གཟེར་གསུམ་གྱི་སྨན་སྦྱོར་ཁྱད་པར་ཅན་ལ་གག་ལྷོག་གཟེར་གསུམ་འཇོམས་པ། མཁའ་འགྲོའི་མེ་མདའ། རྡོ་རྗེ་གསུམ་སྦྱོར། མཉམ་སྦྱོར་སྟག་སེང་། སྨན་སྦྱོར་ཤིན་ཏུ་རྣོ་བ། ཐོག་ལྟར་འབིགས་པ། ནག་པོ་དགུ་སྦྱོར། ཐོག་འབིགས་དགུ་སྦྱོར་ཏེ་བརྒྱད་དང་བཅས་པ། ཐུགས་ཀྱི་ལས་ཚོགས་བདུད་བཟློག་ཅོག་བརྡུང་ནག་པོ་སློབ་དཔོན་རོམ་བུ་གུ་ཧྱའི་ཐུགས་ཀྱི་བརྣག་པ། ཡོན་ཏན་གྱི་ལས་ཚོགས་བྱད་མ་མཁན་རང་གཤེད་རང་ལ་དབབ་པ་ཡང་བཟློག་སྤུ་གྲི་ཕུར་ཐོགས་སྟོང་དང་འགྲས་ཀྱང་ཚུར་མི་གནོད་པ་རྡོ་རྗེའི་བྲག་དང་འདྲ་བ་རོམ་བུ་གུ་ཧྱ་ཙནྡྲའི་ཐུགས་བཅུད། འཕྲིན་ལས་ཀྱི་ལས་ཚོགས་དུག་ཁྲག་གི་སྒྲུབ་པ་གནམ་ལྕགས་རྡོ་རྗེའི་རྫས་རྒོད་སྦྱོར་བ་རྭ་བསྲུང་༼གུང༽ཞེས་པ་དྲག་པོའི་ལས་སྦྱོར་རྩུབ་སྤྱོད་ཅི་བྱས་ཀྱང་ཉམ་མི་ང་བའི་འཛམ་གླིང་བོད་ཀྱི་བསྲུང་མཆོག་གཅིག་པུ་མ་རྣམས། བཞི་པ་སྐུ་གསུང་ཐུགས་ལས་སྤྲུལ་བའི་ཡི་དམ་སྒྲུབ་སྐོར་ནི། ཀུན་འདུས་ཡི་དམ་པདྨ་ཧེ་རུའི་ཀའི༔ སྐུ་ནི་འཇམ་དཔལ་གཤིན་རྗེར་བསྒྲུབ་པ་སྟེ༔ འཇིགས་བྱེད་ནག་པོ་མེ་ཡི་སྤུ་གྲི་འདི༔ བྱིན་རླབས་མཐུ་སྟོབས་འགྲན་དང་བྲལ་བའི་ཡིན༔ འདི་ཡི་ལས་ཚོགས་ཚེ་བདག་ནག་པོ་ཡི༔
བསྲུང་བཟློག་གསང་མནན་རྒྱས་བསྡུས་རིམ་པར་བཅས༔ སྣ་རེས་འཇིག་རྟེན་ཕུང་འཚེངས་ནུས་པའི་ཕྱིར༔ སྣོད་དང་མི་ལྡན་འཚོ་ཤེས་རབ་ཏུ་གཅེས༔ དེ་ཡི་དབང་མཆོག་ཡིད་བཞིན་ནོར་བུ་སྟེ༔ ཡང་ཟབ་མཐར་ཐུག་སྙིང་ལ་ཆོངས་ཤིག་རྒྱ༔ ཞེས་པ་ལྟར་བྱིན་རླབས་མཐུ་སྟོབས་འགྲན་ཟླ་དང་བྲལ་བ་ཚེ་བདག་ནག་པོའི་ཐུགས་བཅུད་སྐུ་མཆོག་འཇམ་དཔལ་གཤིན་རྗེའི་སྒྲུབ་ཐབས་རྡོ་རྗེ་༼འཁོན༽འཇིགས་༼གུང༽བྱེད་མའི་སྤུ་གྲི་ཞེས་པ་མངོན་རྟོགས། ལས་བྱང་། བསྙེན་པ། རྟགས། སྦྱིན་སྲེག །བསྟོད་པ་བཅས་ཚང་བ། ཨོ་རྒྱན་གསུང་བཞིན་གནུབས་སངས་རྒྱས་ཡེ་ཤེས་ཀྱིས་ལ་ཡག་མོན་མཁར་སྟེང་དུ་བྲིས་པ། དཀྱིལ་འཁོར། བུམ་པ། བླ་མ། གཤིན་རྗེ། བཀའ་བསྲུང་གི་གཏོར་མ། ཕུར་བ། ཐུན་དོང་། རལ་གྲི། ཐོ་བ། ལིང་ག་རྣམས་ཀྱི་དཔེ་རིས། ཐེམས་མེད། དེའི་ལས་མཐའ་བསྲུང་བཟློག་གསད་མནན་གྱི་མན་༼འཁོན༽ངག་དྲེགས་༼གུང༽པ་བཅད་ཆམ་ལ་འབེབས་པའི་སྐོར་གསུམ། མཚན་བཞི། གནད་གསུམ་དང་བཅས་པའི་ཡང་ཟློག་མེའི་སྤུ་གྲི །གུད་དུ་སྦས་པའི་མན་༼འཁོན༽ངག་ལ་ནང་༼གུང༽འགྲས། ཐེམས་མེད། ཐུན་ཞབས་ཀྱི་དམིགས་པ། ཙཀྲའི་གནད། ཤིང་བྱང་རླུང་འཁོར་དང་བཅས་པ། དཀྱིལ་འཁོར། པུ་རི་དཀར་ནག །ཐུན་གཏོར། རཀྟ། བསྲུང་བཟློག་གསད་པའི་འཁོར་ལོ། སྒོ་གསུམ་གནོན་འཁོར། རླུང་འཁོར་གྱི་བཅས་རྣམས་ཀྱི་དཔེ་རིས། འཇིགས་བྱེད་མེའི་སྤུ་གྲིའི་དབང་ཆོག་ཡིད་བཞིན་༼འཁོན༽ནོར་བུ་༼གུང༽ཨོ་རྒྱན་གསུང་བཞིན་གནུབས་སངས་རྒྱས་ཡེ་ཤེས་ཀྱིས་ཡི་གེར་བཀོད་པ། ལས་ཚོགས་སྡིག་པ་སྙིང་འཛིངས་༼གུང༽ཞེས་པ་གྲོང་ཁྱེར་བཤིག་པ། ཕ་ཚན་སྤུན་ཟླ་འབྱེད་པ། དམེ་འཁྲུག་གཏོང་བ་གསུམ་སྟོན་པ་ཟབ་ཁྱད་ཅན་མུ་སྟེགས་སྒྲོལ་བྱེད་ནག་པོའི་
མན་ངག ། ཐེམས་མེད། དཀྱིལ་འཁོར། ཐེམས་མེད། ཕག་ཐོད། ཕུང་བཤིག །འབྱེད་པ། དམེ་འཁྲུགས་གསུམ་དང་བཅས་པའི་དཔེ་རིས། ཕ་རོལ་གྱི་རིགས་སྔགས་ཀྱི་སྦྱོར་བ་བཟློག་༼གུང༽༼རྡོ་རྗེ༽པ་ཏིང་འཛིན་རྫས་སྔགས་གསུམ་ལ་བརྟེན་པའི་གདམ་པ་སེང་གཟུགས་མ། ཐེམས་མེད། གཤིན་རྗེ་ཀིང་ཀང་གི་དགྲ་མནན་ལས་ཀྱི་རླུང་དམར་གནད་༼གུང༽ཐེམས་༼རྡོ་རྗེ༽གཤེད་བཞིའི་མན་ངག་བསྲུང་བཟློག་གསད་མནན་ཁ་བཅིང་། མནན་ལིང་། བྱེ་བྲག་ངག་མནན་ལིང་ག །འབྲུབ་ཁུང་། མཆོད་རྟེན། ཐོད་པ། རྭ་རུ། ཉི་ཟླའི་དཔེ་རིས་དང་བཅས་པ། ཐེམས་མེད། ཕྲ་མེན་རང་བསྲུང་གནམ་ལྕགས་རྡོ་རྗེའི་གོ་ཁྲབ།༼གུང༽ཅེས་པ་༼སྣང༽བསྲུང་འཁོར་ལུས་༼རྡོ་རྗེ༽ལ་གདོགས་པ། ཐེམས་མེད། ཕྲ་མེན་ཟས་སུ་ཟ་བ། སྐོམ་དུ་འཐུང་བ། གདན་དུ་གདིང་བ། ཞྭ་ལྟར་གྱོན་པ། རྒྱན་དུ་འདོགས་པའི་ཟབ་ཁྱད་ཅན་དཔེ་རིས་བཞི་དང་བཅས་པ་རྣམས། ཐེམས་མེད། ཐུགས་ནི་འགྱུར་མེད་གསང་བའི་བདག་པོ་སྟེ༔ འདི་ཡི་ཐུགས་སྒྲུབ་མེ་ཡི་འཁོར་ལོ་དང་༔ བྱིན་རླབས་དབང་མཆོག་འོད་ཟེར་འཕྲེང་བ་དང་༔ སྐུ་གསུང་ཐུགས་འཁོར་ཀུན་ཐུབ་ཆེན་པོ་སྟེ༔ མཐར་ཐུག་ཡིན་ནོ་སྙིང་གི་དཀྱིལ་དུ་ཆོངས༔ ཟབ་ཅིང་གཉན་པས་གདམས་པའི་ཚོ་ཤེས་ཀྱིས༔ ཞེས་པ་ལྟར་ཐུགས་མཆོག་འགྱུར་མེད་གསང་བདག་ཕྱག་ན་རྡོ་རྗེ་གཏུམ་པོའི་གསང་སྒྲུབ་མེའི་འཁོར་ལོ་ཡི་དམ་སྒྲུབ་ཐབས། བྱེ་བ་དཔག་མེད་ཀྱི་སྙིང་པོ་གཅིག་ཏུ་དྲིལ་བའི་གསང་བདག་གཏུམ་པོའི་ཡང་སྙིང་ཞེས་པ་དཀྱིལ་འཁོར་རྫས་དང་བསྙེན་སྒྲུབ་ལས་སྦྱོར། དངོས་གྲུབ་བླང་བ་གསུམ་གྱིས་བསྟན་པ། དེའི་དབང་ཆོག་འོད་ཟེར་འཕྲེང་བ་སློབ་དཔོན་གསུང་བཞིན་བཙུན་པ་རྒྱལ་བ་མཆོག་དབྱངས་ཀྱིས་བྲིས་པ། དབང་གི་དཀྱིལ་འཁོར་དང་བུམ་པའི་དཔེ་རིས། ཐེམས་མེད། ལས་ཚོགས་གསང་བདག་
རྡོ་རྗེ་གཏུམ་པོའི་ཚིག་ཆོག་ཐུགས་ཀྱི་འཁོར་ལོ་ཀུན་ཐུབ་ཆེན་པོ་དཔེ་རིས་དང་བཅས་པ། ཐེམས་མེད། ཀླུ་འཆི་བདག་ནག་པོའི་སྲོག་འཁོར་ཞེས་པ་ལོ་རྒྱུས། ཐེམས་མེད། འཁོར་ལོ། གནས་ཀྱི་ཡིག་ཆུང་གསུམ་གྱིས་བསྟན་པ། དེའི་དཔེ་རིས། ཐེམས་མེད། ཡང་གསང་ཁྲོས་པ་རྟ་མགྲིན་ནག་པོ་འདི༔ ནུས་མཐུ་བྱིན་རླབས་གློག་ལྟར་མྱུར་བའི་ཕྱིར༔ ལྕགས་རལ་སྒྲུབ་པ་མེ་ཡི་འཕྲེང་བ་དང་༔ ལས་ཚོགས་དུག་གྲི་སྲོག་གི་འཁོར་ལོ་དང་༔ ལས་མཐའ་ཕུང་གཏད་ཧུར་ཐུམས་ནག་པོ་སྟེ༔ ཞེས་པ་ལྟར་ནུས་མཐུ་བྱིན་རླབས་གློག་ལྟར་མྱུར་བ་རྟ་མགྲིན་ནག་པོ་ལྕགས་རལ་ཅན་གྱི་སྒྲུབ་ཐབས་མེའི་འཕྲེང་༼སྣང༽བ་ཞེས་པ་༼གུང༽རྫས་གསང་སྒྲུབ་པ་ལས་སྦྱོར་གསུམ་བསྟན་པ་རྗེ་འབངས་གྲོགས་ལྔ་ལོ་ཙཱ་བ་ཆེན་པོ་བཞིས་དབང་ཆེན་དམར་ནག་རྒྱུད་དང་མན་ངག་ཏུ་བྱས་པའི་མཐར་ཐུག་ཨཱ་ཙཪྻ་ཡེ་ཤེས་ཀྱིས་ཡིག་མཁན་བྱས་ཏེ་གནམ་སྐས་བྲག་ལ་སྦས་པ། དབང་མཆོག་དྲེགས་པའི་སྲོག་གི་རྒྱ་༼སྣང༽༼གུང༽གུ་རུའི་གསུང་བཞིན་བཙུན་པ་རྒྱལ་བ་མཆོག་དབྱངས་ཀྱིས་ཕ་བོང་གཡུའི་སྒྲོམ་གྱི་ཤར་དུ་ཡི་གེར་བཀོད་པ། ཐེམས་མེད། དཀྱིལ་འཁོར། གཏོར་མ། ཐེམས་མེད། བུམ་པ། མདའ། རལ་གྲི་རྣམས་ཀྱི་དཔེ་རིས་དང་བཅས་པ། ལས་ཚོགས་དུག་གྲི་སྲོག་གི་འཁོར་ལོ་༼སྣང༽༼གུང༽ཞེས་པ་རྒྱལ་བསེན་རྩད་ནས་གཅོད་པ། སེང་ཕུང་ལ་བརྟེན་ནས་ནད་གདོན་བསྲུང་བ། ནད་རིམས་ཐམས་ཅད་ཁྱད་པར་གྲིབ་དང་མི་གཙང་བ་བསྲུང་བ། སེར་རྒོད་ཕྲལ་བཟློག །རྒྱལ་པོ་མི་བསྲུན་བ་སུས་ཀྱང་ཐུལ་དཀའ་བ་གདུལ་བའི་མན་ངག་སྲོག་ཏིག་གུད་དུ་སྦས་པ་བཀའ་རྒྱ་དང་བཅས་པ། ལིང་ག །ཁྱི་ཐོད། ཕུར་པ། གུད་དུ་སྦས་པའི་འཁོར་ལོ་ཁ་སྦྱོར་དང་བཅས་པའི་དཔེ་རིས། ཐེམས་མེད། རྟ་
མགྲིན་ནག་པོའི་ལས་ཚོགས་གུད་དུ་སྦས་༼སྣང༽༼གུང༽པ་ནང་གསེས་ཀྱི་སྲིའུ་གསོ་བ། ཐེམས་མེད། བསྲུང་འཁོར་ཆེན་མོ། བཀྲུ་བ་ཁྲུས། དགྲ་བགེགས་སྲེག་པ། བདུག་ཅིང་གཟེར་བ། དགྲ་བགེགས་གནོན་པ། གདོན་ངོས་གཟུང་བ། རྟ་བྲོ་དང་བཅས་པ་རྟ་མགྲིན་ནག་པོའི་ཡིག་ཆུང་ཟབ་ཁྱད་ཐེམས་མེད། ༼སྣང༽༼གུང༽ཅན་ལ་ནང་གསེས་ཀྱི་དྲག་པོ་རྫས་ཀྱི་བསྲུང་བ། བསྐྱེད་པ་ཏིང་འཛིན་གྱི་བསྲུང་བ། དྲག་པོ་སྔགས་ཀྱི་བསྲུང་བ། དངོས་ཉམས་ཀྱི་རྟགས་ལ་བརྟེན་ནས་སྔགས་ཀྱི་ཁ་བསྒྱུར། གཏེར་འབུལ་བསྟོད་པ་མཐིང་ནག་གྲུ་གསུམ་མ་དང་བཅས་པ། རཀྵ་ནག་པོའི་རྒྱུད་ལས་སློབ་དཔོན་ཤནྟིཾ་གརྦྷས་ཕྱུང་བའི་ཕུང་གཏད་ཧུར་ཐུམས་ནག་པོ་དོན་གསུམ་གྱིས་བསྟན་༼སྣང༽༼གུང༽པ་ཤི་ཐེབས་སྙིང་གི་བུ་གཅིག་ལས་མི་སྤེལ་བ་དཔེ་རིས་དང་བཅས་པ། ཐེམས་མེད། ཕུང་བྱེད་ཁང་༼༽སེལ་ནག་པོ། ཐེམས་མེད། དུས་ཀྱི་སྙིགས་མ་ལ་དགྲ་སྲི་གནོན་པའི་མན་༼སྣང༽༼གུང༽ངག །ཐེམས་མེད། དེའི་ལིང་ག །ར་ཁྱི་ཕག་གསུམ་གྱི་ཐོད་པ། མཛོ་རུ་བཅས་པའི་དཔེ་རིས། ཐེམས་མེད། གཏད་གཅིག་གི་ནང་དུ་དགྲ་བོ་བརྒྱ་ཐམས་༼དར༽པ་ཤོང་པའི་འཇིག་རྟེན་ཕུང་ལས་ཀྱི་མེས་པོ་སྲོག་གི་སྤུ་གྲི། ཐེམས་མེད། དེའི་གནད་ཀྱི་མན་༼དར༽ངག་ཡིག་ཆུང་ཟུར་དུ་གབ་པ། ཐེམས་མེད། དགྲ་རུ་ཡོད་ལྷོག་པ་ནག་པོས་བཙན་ཐབས་༼དར༽གསད་པའི་ཟབ་པའི་མཐར་ཐུག་པ། དགྲ་བོ་འདྲེས་གནོན་པའི་མན་ངག་རྫས་བཅའ་གཞི་སྔགས་དང་གསུམ་གྱིས་བསྟན་པ། ཐེམས་མེད། པེ་དཀར་པེ་ནག་པེ་དམར་གསུམ་༼གཏེར༽གྱི་ཟ་ཡིག་སྙིང་ནང་གི་དངས་མ་རྣམས། ལྔ་པ་མ་ཚང་བ་ཁ་སྐོང་བ་གདམས་ཕྲན་སྣ་ཚོགས་སྐོར་ནི། སྤྱི་ཡི་ལས་ཚོགས་བཟློག་པ་དུག་གྲི་མ༔ མན་ངག་གཏེར་བུམ་གཟོ་ན་པ་ཏྲའི་སྐོར༔ ཐོད་
པ་རྫས་ངན་ཡིག་སྣ་ཀུན་ཐུབ་སྐོར༔ མན་ངག་གཏེར་བུམ་དར་སོགས་ཆོས་ཀྱི་གནད༔ ཆར་འབེབས་ཡིད་བཞིན་ནོར་བུས་མ་བུ་ཚང་༔ ཞེས་པ་ལྟར་མཁའ་འགྲོ་སེང་གེ་གདོང་ཅན་གྱི་ལས་ཚོགས་བཟློག་པ་དུག་གྲི་ནག་པོ་ཞེས་པ་ལོ་རྒྱུས། བསྙེན་པ། གང་འདུལ་ལས་ཚོགས་ལ་ནང་གསེས་ཀྱི་ཡམས་ནད་དང་རྩུབ་སྦྱོར་ཀྱི་ཚེ་རང་བསྲུང་། རྨི་ལམ་ངན་བཟློག །ཕྱོགས་ངན། གདོན། ཕྱུགས་ཀྱི་གློག་གོར་བསྲུང་བ། བསྲུང་བཟློག་དང་བཅས་པ། མན་ངག་རིན་ཅེན་གཏེར་བུམ་ལ་ནང་གསེས་ཀྱི་ཞྭ་ཆོས་རིན་ཅེན་འབར་བ་གུ་རུའི་གསུང་བཞིན་རྒྱལ་བ་མཆོག་དབྱངས་ཀྱིས་བཀོད་པ། རྫས་དྲུག་ལ་བརྟེན་པའི་རིན་ཅེན་གསེར་གྱི་པ་ཏྲ་བཟོ་བ། རྫས་དགུ་ལ་བརྟེན་ནས་བཟོ་བ། །ཙི་མ་གི་ཏ་སོགས་དྲུག་ལ་བརྟེན་ནས་བཟོ་བ། གཡུ་རྙིང་འཆོས་པའི་པ་ཏྲ་དང་། གསར་པ་འཆོས་པའི་པ་ཏྲ། ཤེལ་བུམ་བཟོ་པའི་པ་ཏྲ། མུ་མེན་གྱི་བུམ་པ་བཟོ་བའི་པ་ཏྲ། དཀར་ཡོལ་གྱི་པ་ཏྲ། ཀོ་བསེད་དང་ཤིང་བསེའི་པ་ཏྲ། ཤིང་ཀུན། རྒྱ་ཚྭ་བཟོ་བ། ཁ་རུ་ཚྭ་རྫས་བཞིས་བཟོ་བ། རྫས་བདུན་གྱིས་བཟོ་བའི་སྨན་གྱི་པ་ཏྲ་དང་བཅས་པ། གཙུག་ལག་ཁང་དང་སྒྲུབ་གནས་སོགས་ལ་ཉེ་བར་༼གཏེར༽མཁོ་བའི་ཞལ་བའི་གདམས་པ། ཐེམས་མེད། ཀུན་ཐུབ་ལ། ངན་སྔགས་ཡིག་སྣ་ཀུན་ཐུབ། ངན་སྔགས་འཁོར་ལོ་ཀུན་ཐུབ། ཐོད་ངན་ཀུན་ཐུབ། སྣ་ཚོགས་རྫས་ངན་ཀུན་ཐུབ་རྣམས་གཤིན་རྗེ་གསལ་ཤིང་གི་རྒྱུད་ནས་བཏུས་པ། ཞྭ་ཆོས་ཀྱི་ཆ་ལག་དར་རས་ལ་ཚོས་དམར་སེར། སྔོན་པོ། ནག་པོ། ལྗང་ཁུ། ལྕགས་ནག་རྒྱག་ཐབས། འགྲོ་བའི་དགོས་འདོད་སྐོང་ཕྱིར་ཆར་འབེབས་ཡིད་བཞིན་ནོར་བུ་དོན་གསུམ་གྱིས་བསྟན་པ་
ཕུང་བྱེད་ཤནྟིཾ་གརྦྷའི་མན་ངག་ཟབ་པའི་མཐར་ཐུག །གཞན་སྣང་དབང་དུ་སྡུད་༼གཏེར༽པ་ཚངས་དབྱངས་གསུང་གི་བཅོས་ཐབས། ཐེམས་མེད། རྔ་འཆོས་ཚངས་པའི་འབྲུག་སྒྲ་སྦྱོར་དངོས་མཇུག་གསུམ་གྱི་བསྟན་པ་ཐེམས་མེད། གུ་རུའི་གསུང་བཞིན་རྒྱལ་བ་མཆོག་དབྱངས་ཀྱི་བཀོད་པ། བསམ་ཡས་ཨཱཪྻ་པ་གླིང་དུ་གསུངས་༼གཏེར༽པའི་དབང་སྡུད་ལས་ཀྱི་ཡང་ཁོལ། དཔལ་རྟ་མགྲིན་གྱི་བཀའ་སྲུང་ལྕམ་དྲལ་གྱི་ལས་ཀྱི་མདེ་ཁ་ལ་བསྣོལ་གྲིའི་ཐོད་པ་བརྟེན་ནས་དགྲ་གསོད་པ། འབྲུབ་ཁུང་དམར་ནག་ཏུ་གསོད་པ། ཐུན་གྱི་གསོད་པ། ལྟས་ངན། རྨིན་ལམ་ངན་པ། སྨྱོ་བོག་གསུམ་གཏོང་བ། སེར་བ་དང་ཐོག་དབབ་པ། རང་བསྲུང་། ཆར་འབེབས། ཐོག་སེར་ཁ་ཆར་གཅོད་པ། རྦོད་གཏོང་རྦད་འདྲེ། རྨི་ལམ་ངན་པ། དུས་མིན་འཆི་བ་བཟློག་པ། ཚེ་བསྲིང་བ། ལོངས་སྤྱོད་དང་རིགས་བརྒྱུད་སྤེལ་བ། ཕས་ཀྱི་རྦོད་གཏོང་བཟློག་པ། ངག་གནོན་པ། ངག་འགྲོལ། ཀླུ་གཏད། ཅོག་འགྱེལ་དུ་གསོད་པ། ཇག་འཆིང་། ལྷ་དབྱེ། ཉེ་འབྱེད། ལྷ་འདྲེ་མི་གསུམ་དབང་སྡུད། དགྲ་ལ་ཁང་སེལ། ཞིང་སེལ། དུར་སེལ་གཏོང་བ་དང་བཅས་པ་སློབ་དཔོན་པདྨས་རྗེ་འབངས་ལ་གཏད་པ་རྣམས། དྲུག་པ་ཡིད་ཆེས་བསྐྱེད་པའི་ཞལ་གདམས་ཁ་འཐོར་སྐོར་ནི། གུ་རུའི་རྣམ་ཐར་གསེར་གྱི་འཕྲེང་བ་དང་༔ ཞལ་གདམས་ལུང་འཕྲེང་གནད་ཀྱི་ཞུ་ལན་རྣམས༔ ཡིད་ཆེས་བསྐྱེད་པ་སྤྱི་ཡི་ཁ་སྐོང་ཡིན༔ ཞེས་པ་ལྟར་གུ་རུའི་རྣམ་ཐར་མཐའ་༼གཏེར༽མ་ཞལ་གདམས་གསེར་ཀྱི་འཕྲེང་བ། ཞལ་གདམས་ལུང་གི་འཕྲེང་བ་ཞེས་པ་གཏེར་སྟོན་གྱི་སྐུ་ཚེའི་ཚད། གདུལ་བྱ། མཛད་ཚུལ། གསང་ཡུམ་ཕྱོགས་གང་ནས་འབྱུང་སོགས་ལང་འགྲོ་ལོ་ཙཱ་བར་གསུངས་པའི་གཏེར་བདག་ལས་
ཅན་ལུང་བསྟན་དུ་གྲགས་པ། ཞལ་གདམས་ཡང་ཞུན་གསལ་བའི་སྒྲོན་མེ་ཞེས་པ་ཐུགས་སྲས་ཉེ་བའི་འཁོར་བརྒྱད་ཀྱིས་སློབ་དཔོན་ལ་ཞུས་ལན་མ་འོངས་མཁས་བཙུན་བཟང་གསུམ་འཛོམ་པ་ཚུལ་ལྡན་དང་ལྟར་སྣང་འབྱུང་ཚུལ་དང་བསྙེན་སྒྲུབ་སྔགས་ཀྱི་རིང་ཐུང་དང་ཚད་སོགས་བསྟན་པ་མཁར་ཆེན་བཟས་ཤོག་སེར་ལ་བཏབ་པ། ཆོས་རྗེ་ཀརྨ་པའི་གང་ཟག་༼གཏེར༽སྒོས་ལུང་རྣམས། བདུན་པ་ཐེམས་མེད་ཡུམ་བཀའ་ཟབ་ཁྱད་ཅན་གྱིས་སྐོར་ལ། རས་བྲིས་དང་སིནྡྷུ་རའི་དཀྱིལ་འཁོར་ལ་བརྟེན་ནས་བུམ་པས་ཡེ་ཤེས་ལྔའི་དབང་། ཐོད་པས་མཁའ་འགྲོ་ལྔའི་དབང་། མེ་ལོང་གིས་གསལ་སྟོང་རིག་པའི་དབང་སྐུ་སྔགས་ངོ་སྤྲོད་གསུམ་གྱིས་སྐུ་གསུང་ཐུགས་ཀྱི་དབང་རྣམས་མནོས་ཤིང་། ལུང་ལ། ཤེལ་དཀར་བཟའ་དང་མོན་མོ་བཀྲ་ཤིས་ཁྱེ་འདྲེན་གཉིས་ཀྱི་ཇོ་མོ་ལ་ཞུས་པའི་ཕྱི་ལྟར་ཡེ་ཤེས་འཚོ་རྒྱལ་ལཱ་སྱའི་སྐུར་སྒྲུབ་པ་ཤིན་ཏུ་བྱིན་རླབས་ཀྱི་རྟགས་མཚན་ཆེ་བ་མཁའ་འགྲོ་དངོས་ཀྱི་གསུང་ཤེལ་དཀར་བཟས་བཀོད་པ། མ་གཅིག་ཡེ་ཤེས་འཚོ་རྒྱལ་ནང་ལྟར་རྗེ་བཙུན་སྒྲོལ་མར་སྒྲུབ་པ་ལེའུ་བཅོ་བརྒྱད་པ་མོན་མོ་བཀྲ་ཤིས་ཁྱེ་འདྲེན་གྱིས་ཞུས་པའི་སྒྲུབ་མཆོག་ཡིད་བཞིན་ནོར་བུ། གསང་བ་ཡེ་ཤེས་འཚོ་རྒྱལ་རྡོ་རྗེ་ཕག་མོ་ཁྲོས་མ་ནག་མོར་སྒྲུབ་པ་ཡིད་བཞིན་ནོར་བུ་དོན་གསུམ་གྱིས་བསྟན་པ། གཅེས་གནད་སྲོག་གི་བླ་རྡོ་ཚིག་གསང་བ་སྙིང་གི་ཡང་ཞུན་མཁའ་འགྲོ་འཚོ་རྒྱལ་ཕག་མོར་སྒྲུབ་པའི་དབང་ཡིད་བཞིན་ནོར་བུ་དཀར་བཟས་ཟིན་བྲིས་སུ་བཏབ་པ། བུམ་པ། དཀྱིལ་འཁོར་བདུད་རྩི། ཁ་ཁེབས། ཅང་ཏེའུ། རཀྟ། མཁའ་འགྲོ། ཡི་དམ། མ་མོ། ཆོས་སྐྱོང་གི་གཏོར་མ། བླ་རྡོ་དང་བཅས་པའི་དཔེ་
རིས་རྣམས། བརྒྱད་པ་སྒོས་ཀྱི་བཀའ་སྐྱོང་སྔགས་སྲུང་ཨེ་ཀ་ཛ་ཊིའི་སྐོར་ལ། གཏོར་མ་སྐུ་འབག་ཕྱག་མཚན་ལ་བརྟེན་པའི་མངོན་སྤྱོད་དྲག་པོའི་ལྷ་དབང་ལུས་ལ་བསྐུར་བ། གཏོར་མ་དང་བདུད་རྩི་བརྟེན་ནས་དམ་བསྲེ་ཞིང་གཉེར་གཏད་དམ་ཚིག་བསྒྲག་བཅས་མནོས་ནས། ལུང་ལ། ཐེམས་བྱང་ལས། རྟ་མགྲིན་དབང་ཆེན་སྒོས་ཀྱི་བཀའ་སྲུང་ནི༔ སྔགས་སྲུང་གསང་སྒྲུབ་སྤུ་གྲི་བསལ་རྒལ་དང་༔ དབང་དང་ལས་བྱང་བསྐང་གསོ་གནད་ཡིག་གིས༔ མ་བུ་ཚང་བས་བྱིན་ཆེན་ཟབ་མཐར་ཐུག༔ ཅེས་པ་ལྟར་སྔགས་སྲུང་མའི་གསང་སྒྲུབ་༼གཏེར༽མ་མོ་སྲིན་པའི་ཐོག་རྒོད་སྲོག་རྩ་དམར་འབྱིན་སྤུ་གྲི་གསལ་རྒལ་མ། སྐལ་ལྡན་སྐྱེས་བུ་ལུང་རྫོགས་ཀྱི་བུ་༼གཏེར༽ལ་རྗེས་སུ་གནང་བའི་ཡི་གེ །དཔལ་སྔགས་ཀྱི་སྲུང་མའི་མཆོད་བསྟོད་བཀང་ཐབས་༼གཏེར༽གསང་འདུས་ཁྲོ་བོའི་བཀའ་སྲུང་དུ་མནམ་སྐས་བྲག་ལ་སྦས་པ་རྣམས། དགུ་པ་སྤྱིའི་སྲུང་མ་གནོད་སྦྱིན་དྲག་པོ་བཤད་པ་དམར་ནག་སྐོར་ལ། དབང་གི་ཡི་གེར་སྟེང་ནས་གཏོར་མ་ལ་བརྟེན་ནས་དགྲ་བགེགས་སྒྲོལ་བའི་མཐུ་དབང་། བགོ་བའི་གོས་གསུམ། ཕྱག་མཚན། ཐུན་རྫས་ཟོར་དབང་དང་བཅས་པ། རྗེས་གནང་གི་ཡི་གེ་ལྟར་དཔལ་གཏོར་སྐུ་འབག་ཕྱག་མཚན་ལ་བརྟེན་པའི་སྐུ་གསུང་ཐུགས་ཀྱི་དབང་། དབང་གཏོར། མཆོད་གཏོར། བདུད་རྩི་ལ་བརྟེན་པའི་བཀའ་གཏད་དམ་བསྲེ་རྣམས་མནོས་ནས། ལུང་ལ། དབང་ཆེན་ཐེམས་བྱང་ལས། ཨེ་མ་གནོད་སྦྱིན་དྲག་པོ་བཤན་པ་དམར་ནག་འདི༔ གཏེར་ཁ་འདི་ཡི་སྤྱི་སྲུང་ཆེན་པོ་སྟེ༔ རྣོ་མྱུར་དྲག་རྩལ་ཐོག་དང་འདྲ་བའི་ཕྱིར༔ པདྨ་ང་ཡི་བསྟན་བསྲུང་མཐར་ཐུག་སྟེ༔ ཞེས་རགས་རིམ་ཙམ་བསྟན་ཅིང་སྒོས་ཀྱི་ཐེམས་བྱང་བཀའ་
རྒྱ་མ་ལས། རྩ་བའི་སྲོག་སྒྲུབ་སྲོག་རྩ་དམར་ལན་དང་༔ དྲག་པོའི་སྲོག་དབང་བརྟེན་གྱི་བཅའ་ཐབས་དང་༔ གནད་འབེབས་ཡང་གཅེས་ཤི་ས་བསྟན་པ་དང་༔ རྦད་བསྐུལ་བཅོམ་དམ་སྔགས་ཀྱི་འབྱིན་འཇུག་དང་༔ གཉེར་གཏད་བཅོལ་དམ་ནོར་སྒྲུབ་གཏེར་བུམ་དང་༔ ལྟས་ངན་བསྐུལ་བྱང་གནན་སྲེག་འཕྲང་གསུམ་དང་༔ རྟགས་ཡིག་བླ་རྡོ་ལས་བྱང་བཀང་གསོ་དང་༔ བཀང་མདོས་དག་གིས་ལྷག་ཆད་མེད་པར་ཚང་༔ ཞེས་པ་ལྟར་ཐེམས་བྱང་བཀའ་རྒྱ་མ་ཤིན་ཏུ་གཅེས་པའི་སྙིང་བྱང་། འགོར་ཨྱོན་བདག་གིས་བདུད་བློན་བསྒྲལ་ཏེ་ཞེས་ཡོད་པའི་ལོ་རྒྱུས། ཐེམས་མེད། ཕྱི་ལྷ་སྲིན་སྡེ་བརྒྱད། ནང་རྣམ་ཐོས་སྲས། གསང་བ་གཟའ་རྒོད་མིག་དམར་ཏེ་གནོད་སྦྱིན་༼གཏེར༽དམར་ནག་རྩ་བའི་སྲོག་སྒྲུབ་སྲོག་རྩ་དམར་ལེན། གནོད་སྦྱིན་དྲག་པོའི་སྲོག་དབང་སྤུ་གྲིའི་རྒྱ་ཅན་༼གཏེར༽ཤི་ཐེབས་སྙིང་གི་བུ་གཅིག་ལས་སྤེལ་དུ་མི་རུང་བ། གཏོར་མ་དང་ཕྱག་མཚན་ལ་བརྟེན་པའི་གནོད་༼གཏེར༽སྦྱིན་བཤན་པ་དམར་པོའི་དབང་ཤིན་ཏུ་གཉན་པར་གྲགས་པ་རྗེས་གནང་གི་ཡི་གེ ། ཐེམས་མེད། གསང་བ་གནས་ཁང་ལ་ཆགས་པ་ཕོ་བྲང་རྟེན་གྱི་བཅའ་ཐབས་༼གཏེར༽འཁུ་ལྡོག་མེད་ཅིང་ལས་འགྲུབ་པ། དམ་ཚིག་བསྲེ་བའི་མན་ངག་༼གཏེར༽ཤིན་ཏུ་གནད་ཆེ་བ། ཐེམས་མེད། ཤིན་ཏུ་མི་བསྲུན་པས་མ་འཆུན་ན་གནད་འབེབས་སྙིང་གི་བུ་གཅིག་ལས་བསྟན་དུ་མི་རུང་བ། དེ་དང་འདྲ་མིན་ཞིག །ཐེམས་མེད། ཡང་གཅེས་རྟེན་འབྲེལ་སྟོད་ལ་གནོན་པ་སྒྲུབ་པ་ཆུད་མི་ཟ་བ། ལྷ་དགྲ་རང་གསུམ་ཤི་ས་བསྟན་པ་ཆིག་བརྒྱུད་མ། རྦད་བསྐུལ་སྲོག་གི་སྤུ་གྲི་༼གཏེར༽དམ་ཚིག་ཆེན་པོ་མ། གསང་རྟགས་ཡིད་ཆེས་མ་བྱུང་ན་སྔགས་
ཀྱིས་འབྱིན་འཇུག་སྔགས་སྒྲོལ་བསྣལ་དཀྲུག་མཐའ་བསྒྱུར་ཅན། གཉེར་གཏད་བཅོལ་དམ་ཆེན་༼གཏེར༽མོ་ཚངས་པའི་དམག་དཔོན་མ། ནོར་སྒྲུབ་གཏེར་གྱི་བུམ་པ་འཛམ་གླིང་གི་ནོར་བདག་ཏུ་འགྱུར་པ། ལྟས་ངན་གཏོང་བ་ཐོག་རྒོད་འབར་བ་༼གཏེར༽ལྟས་ངན་རྒྱུན་མི་ཆད་དུ་འབྱུང་བ། ལས་མཐའ་སྡུད་པ་མནན་སྲེགས་འཕང་གསུམ་བརྣག་པའི་མཐར་ཐུག །བོད་རྦད་གསད་གསུམ་གྱི་ཡང་༼གཏེར༽ཟབ་རྟགས་ཡིག་གུད་སྦས། ཡང་གཅེས་བླ་རྡོའི་མན་༼གཏེར༽ངག་སྲོག་འཕྲོག་བཙོན་དུ་བཟུང་བ་ལྟ་བུ། ལས་བྱང་གསོལ་ཁ་༼གཏེར༽སྔོན་བསྐལ་མ། བཀང་གསོ་འཕྲིན་ལས་སྤུ་༼ཉང༽གྲི་སྟེང་ཕྱོགས་ནམ་མཁའ་མ། བཀང་མདོས་འཕྲིན་ལས་གཏེར་མཛོད་༼ཉང༽བཀྲ་ཤིས་ཡོན་ཏན་དཔག་ཏུ་མེད་དེ་རྣལ་འབྱོར་པས་བརྩོན་པར་བྱའོའི་མཐའ་ཅན་རྣམས། བཅུ་པ་ནོར་གྱི་དབང་ཕྱུག་རྒྱལ་ཆེན་རྣམ་སྲས་སྐོར་ལ། གཏོར་མ་ལ་བརྟེན་ནས་འཕྲིན་ལས་བཞི་ལ་མངའ་བརྙེས་ཤིང་ཁམས་གསུམ་ལ་དབང་སྒྱུར་བའི་དབང་། ཕྱག་མཚན་བཞིའི་དབང་། གྲི་རྙིང་བླ་རྡོའི་དབང་། གཏོར་མ་དང་སྒྲུབ་ཡིག་ལ་བརྟེན་ནས་དམ་བསྲེ་བ། ཚེའི་དབང་། ཡིད་བཞིན་ནོར་གྱི་དབང་རྣམས་མནོས་ནས། ལུང་ལ། ཐེམས་བྱང་ལས། ནོར་གྱི་མངའ་བདག་རྒྱལ་ཆེན་རྣམ་སྲས་འདི༔ རྣལ་འབྱོར་ཆོས་དང་འཇིག་རྟེན་གང་སྒྲུབ་ཀྱང་༔ ལོངས་སྤྱོད་དགོས་པས་གསང་གཏེར་འདི་རུ་སྦས༔ གསང་བའི་སྒྲུབ་པ་རྗེས་གནང་ལས་གཞི་བཅས༔ སྙིང་དང་འདྲའོ་སྤེལ་ཚོང་ཞབས་ཏོག་ལྟོས༔ ཞེས་པ་ལྟར། གསང་སྒྲུབ་ཡིད་བཞིན་ནོར་བུ་ཞར་བྱུང་ཁྱད་པར་གནད་ཀྱི་ཞལ་གདམས་དང་བཅས་པ་ཡང་གསང་སྙིང་གི་སྒྲུབ་པ། དབང་ཆོག་ཡིད་བཞིན་
གཏེར་མཛོད། ལས་བྱང་བཀང་གསོའི་རིམ་པ་དད་པ་དམ་ཚིག་མ། བླ་རྡོ་ཅེས་པའི་མན་ངག་བསམ་པ་ཡིད་བཞིན་འགྲུབ་པ། ཐེམས་མེད། ཁོང་པའི་སྙིང་དང་འདྲ་བ་ལུས་དང་གྲིབ་མ་བཞིན་འགྲོགས་ཐབས། སྲོག་རྩ་གནད་ཀྱི་འཁོར་ལོ་ཞར་བྱུང་སྒབ་འདྲེ་བསེ་རག་གནོན་ཐབས་དང་བཅས་པ། སྒབ་འདྲེ་བསེ་རག་གནོད་སྦྱིན་གཞན་གྱི་མི་ཐུབ་པ་དང་རྫི་བྷི་ཏྲིའུ་གནོད་པའི་ལག་ལེན་སྒྲུབ་པ་ཆུད་མི་ཟ་བར་བྱ་བ། ཙཀྲའི་བྲི་ཡིག་༼ཉང༽ཤེས་པར་གྱིས་ཀྱི་མཐའ་ཅན། ཐེམས་མེད། ཁྱད་པར་གནད་༼ཉང༽ཀྱི་ཞལ་གདམས། རྣམ་སྲས་རྟ་བདག་བརྒྱད་དང་བཅས་པའི་ཚེ་སྒྲུབ། ཐེམས་མེད། དེའི་ལས་ཚོགས་ཀྱི་ཆར་གཏོགས་པའི་ཛཾ་ནག་སྲོག་འཁོར་ཡིད་བཞིན་ནོར་བུ་ཞེས་པའི་ཡིད་ཆེས་ཀྱི་ཆེ་བ་ལོ་རྒྱུས། ཐེམས་མེད། རྟེན་འབྲེལ་གྱི་ཆེ་བ་རྫས། གནད་ཀྱི་ཆེ་བ་འཁོར་ལོ། ལག་ལེན་གྱི་ཆེ་བ་བཅོས་ཐབས་དང་རབ་གནས། མཐའ་རྒྱས་ཀྱི་ཆེ་བ་གཟུངས་དང་བཅོལ་བསྐུལ་ཏེ་ལྔས་བསྟན་པ། སྟེང་འཁོར་འདོད་པ་ཆར་འབེབས། ཐེམས་མེད། འོག་འཁོར་དངོས་གྲུབ་མཚོ་འཁྱིལ༔ ཛམྦྷ་ལ་ནག་པོའི་སྲོག་གི་འཁོར་ལོའི་གཟུངས། ཐེམས་མེད། གནོད་སྦྱིན་གཞན་གྱིས་མི་ཐུབ་པའི་གཟུངས་དང་བཅས་པ་རྣམས། ཐེམས་མེད། བཅུ་གཅིག་པ་ངན་ཐབས་ལས་ཕྲན་སྐོར་ནི། གཞན་ཡང་བསྟན་སྲུང་མན་ངག་ཟབ་མོའི་སྐོར༔ ཡང་བཟློག་ཟབ་མོ་རྡོ་རྗེའི་ཕ་ལམ་འདི༔ འཇིག་རྟེན་དཀོན་པས་སྤེལ་ན་རང་གཤེད་འོང་༔ མྱུར་བྱེད་མུ་སྟེགས་ཤ་ཟ་ཧོར་མོ་དང་༔ ངན་སྔགས་མཐར་ཐུག་བསེ་ཡི་ལྷ་མོ་དང་༔ སྲོག་རྩ་དམར་འབྱིན་ཁབ་མཐུ་རེག་མཆོད་དང་༔ ཕུང་བྱེད་ལས་སྦྱོར་རླུང་རྟ་ཁ་སྦུབ་ཐབས༔ འཁོར་ལོ་བཅས་མཆོག་རླུང་རྟ་རྟ་ཁོག་མ༔ མི་
རྒོད་ཁ་འཆིང་གཅན་གཟན་ཁ་འཆིང་དང་༔ ཕུང་བྱེད་སྦྱོར་ནག་ཕུང་བྱེད་སྤུ་གྲིའི་སྐོར༔ ཕུང་བྱེད་སྦྱོར་བ་རཀྵ་ཧུར་ཐུམས་དང་༔ བྱ་རོག་འུག་པའི་ཉེ་འབྱེད་ཡུལ་སེལ་མ༔ ཆོ་འཕྲུལ་ལྟས་ངན་མྱུར་བྱེད་ལ་སོགས་པ༔ སྣ་རེས་བསྟན་བསྲུང་འཇིག་རྟེན་ཕུང་ལས་ནུས༔ ཞེས་པ་ལྟར་ཡང་བཟློག་རྡོ་རྗེ་ཕ་ལམ་༼གུང༽འཇིག་རྟེན་དུ་དཀོན་པའི་མན་ངག་བསྲུང་བའི་ཙཀྲ་འདྲི་ཐབས། ཟླ་བ་གཅིག་ནས་དགྲ་བོ་འཆི་བའི་རྣོ་མྱུར་དྲག་སྔགས་སྤུ་གྲི་འདྲ་བ་དང་བཅས་པ། དེའི་ཞལ་ཤེས་སྙན་བརྒྱུད་བཀའ་༼དར༽རྒྱ་མ་དམིགས་པའི་ཡང་གཅེས་གུད་དུ་སྦས་པ། ཐེམས་མེད། མུ་སྟེགས་ཤ་ཟ་༼དར༽ཧོར་མོའི་གསད་ལས། དེའི་སྒོ་ནས་ལྟས་༼དར༽ངན་གཏང་བ། བསེ་མོའི་དྲག་སྔགས་སྤུ་གྲི་སོ་གལ་༼དར༽རྡོ་རྗེའི་སྲོག་ཡོད་ཀྱང་ཐེ་ཚོ་མེད་པ། མི་ངན་བསོད་ནམས་དྲེགས་པས་ཁེངས་པ་བསོད་ནམས་བསྣབ་པའི་གདམས་པ་༼གུང༽ཕུང་གཏད་རྟ་དམར་འཁོར་ལོ། དྲེགས་པ་ཅན་གྱི་རླུང་རྟ་བསྣུབ་༼གུང༽ཐབས་ཞེས་པར་མི་མཉམ་མཉམ་དུ་གཞུག་པ། མཐོན་པོ་འབེབས་པ། དྲེགས་པ་བསྣུབ་པ། ནུས་པ་སྔོན་དུ་འབྱིན་པའི་ཟབ་ཁྱད་ཅན་རྣམས། དེའི་འཁོར་ལོ་ལིངྒའི་དཔེ་རིས་དང་བཅས་པ། ཐེམས་མེད། གཟའ་རྒོད་རེངས་བྱེད་ནག་པོའི་མན་ངག་༼དར༽མི་རྒོད་ཇག་འཆིང་ཞ་རེངས་མ། གདམས་པ་ཁྱད་པར་ཅན་གྱི་ཤོག་དྲིལ་བཀའ་རྒྱ་༼གུང༽མ་ཕུང་བྱེད་སྤུ་གྲི་ལ་མུ་སྟེགས་འདྲེ་འདུལ་ནག་པོའི་ངན་སྔགས་སེལ་ནག་ནག་པོ་དགུ་སྦྱོར་ཞེས་པ་མཁར་འཇིག་པ། སྟོན་ཐོག་གཏན་མི་སྐྱེ་བ། ཕ་ཚན་ཕུང་བ། ཕྱུགས་ཁ་དག་པ། རྟ་འཆིང་བ། བག་མ་བཀྲ་མི་ཤིས་པ། རབས་གཅོད་པ། ཁྱི་ཚོགས་ནས་ངུ་བ། བྱ་ཚོགས་ནས་སྐད་འདོན་པ། ཝ
ཐམས་ཅད་འདུས་ནས་བརྒྱལ་བ། མི་ཐམས་ཅད་འཐབ་པ། ནོར་དང་དབྲལ་བ། ཁྲག་ཆར་ཞག་བདུན་འབབ་པ། ལྷ་དང་འབྲལ་བ། མཐུ་བྱད་ཁོ་རང་ལ་བཟློག་པ། དམག་བུབ་པར་བྱེད་པ་དང་བཅས་པ། མུ་སྟེགས་ཨ་ཚ་ཁ་ཆེའི་སེལ་རྒོད་དུག་མདའ་ནག་པོ་ཞེས་པ་ཁྱིམ་རི་རུལ་དུ་གཏོང་བ། མུ་སྟེགས་རིན་ཅེན་གོ་ཆའི་གདམས་པ་ཁང་རྨང་མི་ཕྱུགས་ཐལ་བ་རླུང་ཁྱེར། ངན་སྔགས་འཛུལ་ཁུང་གཏན་བརླག །ཕོ་མོ་འབྱེད་པ། བཟའ་མི་འཐབ་པ། ཐོག་སེར་དབབ་པ། ཕོ་མོར་གཏོང་བ། མི་ལྡང་བ། ན་བ། འཆི་བ་གསུམ་ཁ་བསྒྱུར་ཆོག་པའི་མཛེ་གཏད། སྟུ་གཏད་དམར་མོ་ཁྲག་འཛག །དམ་ཉམས་འདྲེས་གནོན་ཐབས་རང་བསྲུང་དང་བཅས་པ། ནཱ་ག་ཀླུའི་ཅོག་རྡུང་ཞེས་པ་བཟའ་ཚང་འབྱེད་པ། གསོད་པ། ངག་གནོན། མཛེས་ཁྱེར་གཏད་དུ་ཕུང་བ། ལྷ་བདུད་འབབ་དང་བཅས་པ། རྒྱའི་ཕུང་བྱེད་བཞིའི་གདམས་པ་ཁྱིམ་ཕུང་ནོར་གྱི་ཁྲོ་ཚགས། མེ་འབར་བའི་རྫུ་འཕྲུལ། ཆང་བསྲུང་། ཆང་གཏད། ཆར་བསྲུང་། ཞིང་གི་འབུ་བསྲུང་བ་རྣམས། བྱ་རོག་འུག་པའི་ཉེ་འབྱེད་ཕུང་སེལ་༼དར༽མ་ཇི་ལྟར་མཐུན་ཡང་མི་འགྱངས་པ། ཝ་ཐོད་ལ་བརྟེན་པའི་ལྟས་ངན་༼དར༽དམག་གི་རྒྱལ་པོ་སྤུན་གསུམ་གྱི་ཆོ་འཕྲུལ། འཇིག་རྟེན་ཕུང་བྱེད་བཟན་ཐབས་༼དར༽ཀྱི་སེར་པ་འབེབས་པ། ཐེམས་མེད། དེའི་ཆ་ལག་གསང་བ་༼དར༽རྫས་ཀྱི་དུད་པས་ཡུལ་ལྷ་བསྐྲད་པ། ཁྲག་འཐུང་ནག་པོ། གཙུག་ལག་དཔལ་དགེ སྤྲིན་གྱི་ཤུགས་འཆང་། ཤནྟིཾ་གརྦྷ་བཞིའི་ངན་སྔགས་ལས་སྦྱོར་སུམ་སྟོང་དྲུག་བརྒྱ་རྒྱ་གར་མཁས་པ་པདྨས་མཁྱེན་པས་མ་འོངས་སྔགས་ཆུང་གསར་བའི་དོན་དུ་སྤྱི་ལ་གཅེས་༼གུང༽པའི་སྲོག་ཁྱིམ་ཐེམས་མེད། ཟབ་མོ།
དགྲ་བགེགས་ཚར་གཅོད་ཕྱིར་ཕོ་བརྒྱུད་མོ་བརྒྱུད་སྒྲུབ་པར་གཅེས་པའི་༼གུང༽ཕོ་གནད་ཟབ་མོ། ཐེམས་མེད། དགྲ་བོའི་རང་གཤེད་སྐོར་པ་༼གུང༽ལོ་ཟླ་ཞག་དུས་ཚོད་ཀྱི་ཁ་བྱང་གསལ་བའི་སྒྲོན་མེ་ཐེམས་མེད། དགྲ་བོའི་བླ་༼གུང༽ཁུགས་ཚད་བསྟན་པ་ཟླ་བ་དང་དུས་ཚོད་ནག་པོའི་ངོས་༼གུང༽འཛིན་དང་བཅས་པ་རྣམས་ཐོབ་པ་ལས། ཐེམས་མེད། རྟ་མགྲིན་གསང་བ་འདུས་པའི་དབང་བཞི་གཏོར་དབང་དང་བཅས་པའི་བརྒྱུད་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ་གསང་བ་འདུས་པ། སྤྲུལ་སྐུ་པདྨ་ཐོད་འཕྲེང་རིགས་ལྔ། ཇོ་མོ་ཡེ་ཤེས་འཚོ་རྒྱལ། མངའ་བདག་ཁྲི་སྲོང་ལྡེ་བཙན། གནུབས་ནམ་མཁའི་སྙིང་པོ། གནུབས་སངས་རྒྱས་ཡེ་ཤེས། ངན་ལམ་རྒྱལ་བ་མཆོག་དབྱངས། ལང་འགྲོ་ལོ་ཙཱ་བ་དཀོན་ཅོག་འབྱུང་གནས། ལོ་ཆེན་བཻ་རོ་ཙ་ན། ལེགས་སྦྱིན་ཉི་མ། སྐ་བ་དཔལ་བརྩེགས། ཅོག་རོ་ཀླུའི་རྒྱལ་མཚན། ཤེལ་དཀར་རྡོ་རྗེ་འཚོ། གཏེར་སྟོན་ཆོས་ཀྱི་རྒྱལ་པོ་འགྲོ་འདུལ་གླིང་པ། རྒྱལ་སྲས་ཚེ་དབང་གྲགས་པ། མཚུངས་མེད་ངག་དབང་གྲགས་པ། གཙུག་རྒྱན་ངག་དབང་ནོར་བུ། བི་མའི་རྣམ་སྤྲུལ་ནོར་བུ་ཡོངས་གྲགས། ཆོས་སྡིངས་སྔགས་འཆང་དབང་ཆེན་ལྷུན་གྲུབ། སྤེལ་ལྕོག་རཏྣ་སངས་རྒྱས་ཕུན་ཚོགས། ཉང་ཆོས་ལྡན་པ་རཏྣ་འཕྲིན་ལས་བསྟན་འཛིན། དྲིན་ཅན་སྤྲུལ་པའི་སྐུ་མཆོག་གཏེར་བདག་གླིང་པ། དེས་བདག་ཟ་ཧོར་བནྡེའི་ཡི་དམ་གྱི་ལྷར་སྩལ་ཏོ། །འཇིགས་བྱེད་མེའི་སྤུ་གྲིའི་དབང་གི་བརྒྱུད་པ་ནི། ཀུན་བཟང་། རྡོ་རྗེ་འཆང་། འཇམ་དཔལ་གཤིན་རྗེ་གཤེད། སློབ་དཔོན་འཇམ་དཔལ་བཤེས་གཉེན། ཨྱོན་སངས་རྒྱས་གཉིས་པ། བལ་མོ་བ་སུ་དྷ་ར། གནུབས་ཆེན་སངས་རྒྱས་
ཡེ་ཤེས། ལང་འགྲོ་དཀོན་ཅོག་འབྱུང་གནས། ཆོས་རྒྱལ་རཏྣ་གླིང་པ་མན་གོང་ལྟར་རོ། །གསང་བདག་རྡོ་རྗེ་གཏུམ་པོའི་དབང་བརྒྱུད་ནི། ཀུན་བཟང་ཧེ་རུ་ཀ །གསང་བདག་ཕྱག་ན་རྡོ་རྗེ། སློབ་དཔོན་པདྨ་འབྱུང་གནས། མཁར་ཆེན་བཟའ་འཚོ་རྒྱལ། ཆོས་རྒྱལ་ཁྲི་སྲོང་ལྡེ་བཙན། ལྷ་སྲས་མུ་ཏིག་བཙན་པོ། ལང་འགྲོ་ལོ་ཙཱ་བ། གཏེར་སྟོན་མན་འདྲ། རྟ་ནག་གི་དབང་གི་བརྒྱུད་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁར་ཆེན་བཟའ། ཁྲི་སྲོང་ལྡེ་བཙན། ནམ་མཁའ་སྙིང་པོ། སངས་རྒྱས་ཡེ་ཤེས། རྒྱལ་བ་མཆོག་དབྱངས། བཻ་རོ་ཙ་ན། སྐ་བ་དཔལ་བརྩེགས། ཅོག་རོ་ཀླུ་རྒྱལ་མཚན། ལང་འགྲོ་ལོ་ཙཱ་བ། སྤྲུལ་སྐུ་རཏྣ་གླིང་པ་ནས་ནོར་བུ་ཡོངས་གྲགས་བར་གོང་ལྟར་ལ། དེ་ནས་རྒྱལ་སྲས་ཀརྨ་འཕྲིན་ལས་རྒྱ་མཚོ། ཆོས་ལྡན་པ་རཏྣ་འཕྲིན་ལས་བསྟན་འཛིན་མན་འདྲ། ཡང་ན་རྒྱལ་སྲས་ཚེ་དབང་གྲགས་པ་ནས། བླ་མ་བསོད་ནམས་རྒྱལ་མཚན། གྲུབ་ཆེན་རིགས་འཛིན་དཔལ་འབར། སྔགས་འཆང་ཀུན་དགའ་རྡོ་རྗེ། མཁས་གྲུབ་མདོ་སྔགས་བསྟན་འཛིན། རྗེ་འཕྲིན་ལས་ལྷུན་གྲུབ། རིགས་འཛིན་གཏེར་བདག་གླིང་པ། དེས་བདག་ལའོ། ། ཡང་ན་ནོར་བུ་ཡོངས་གྲགས། ཡུག་རྫོགས་པ་མ་ནི་ཨིནྡྲ་རཱ་ཛ། ཟུར་དར་མ་པ་བསྟན་འཛིན་འགྱུར་མེད། མདོ་སྔགས་བསྟན་འཛིན་མན་འདྲ། ཡང་ན་རིགས་འཛིན་འཕྲིན་ལས་ལྷུན་གྲུབ་ནས། ཀུན་མཁྱེན་ཆོས་དབྱིངས་རང་གྲོལ། དེས་བདག་ལའོ། །ཡང་ན་གཏེར་སྟོན་ནས། གཏེར་སྟོན་ནས་མི་འགྱུར་ཀུན་དགའ་དཔལ་བཟང་བར་ལ་དགེ་སློང་དཔལ་གྱི་རིན་ཅེན་ཟེར་བ་ལས་མེད་པ་གསན་ཡིག་འགར་སྣང་བ་སྟག་མགོ་ཡོན་ཏན་དཔལ་བའི་མཚན་གྱི་
རྣམ་གྲངས་སུ་བྱས་པའི་ཉེ་བརྒྱུད་རིང་བརྒྱུད་ཀྱི་ཁྱད་ཡིན་ནམ་དཔྱད། སྟག་མགོ་ཡོན་ཏན་དཔལ། གུ་རུ་སངས་རྒྱས་ཡེ་ཤེས། བླ་མ་སངས་རྒྱས་རྒྱལ་མཚན། མི་འགྱུར་ཀུན་དགའ་དཔལ་བཟང་། མཚུངས་མེད་བཀྲ་ཤིས་རྒྱ་མཚོ། རིགས་འཛིན་དུ་མ་རང་གྲོལ། རྗེ་ངག་དབང་ཡེ་ཤེས་གྲུབ་པ། ཟུར་རྩ་བའི་བླ་མ་ཆོས་དབྱིངས་རང་གྲོལ། དེས་བདག་ཟ་ཧོར་བནྡེ་ལའོ། །རྡོ་རྗེ་དང་གཏེར་གྱི་རྟགས་ཡོད་པ་མ་གཏོགས་པའི་ས་བཅད་དྲུག་པ་ཡན་གྱི་ལུང་ཡོངས་རྫོགས་ཀྱི་བརྒྱུད་པ་ནི། ནོར་བུ་ཡོངས་གྲགས་ཡན་གོང་གི་སྲས་བརྒྱུད་ལྟར་ལ། དེ་ནས་རྗེ་བཙུན་ནོར་བུ་དབང་རྒྱལ། སྤྲུལ་སྐུ་ཚུལ་ཁྲིམས་རྡོ་རྗེ། དར་སྡིངས་རིག་འཛིན་འཕྲིན་ལས་ལྷུན་གྲུབ། ཟུར་ཁྱབ་བདག་ཆོས་དབྱིངས་རང་གྲོལ། དེས་བདག་ཟ་ཧོར་བནྡེལ་བཀའ་དྲིན་དུ་སྩལ་ཏོ། །དར་གྱི་རྟགས་མེད་པའི་རྟ་ནག་གི་ལུང་ལ་སྤྱི་བརྒྱུད་དུ་མ་ཟད་རྟ་ནག་སྒོས་དབང་གི་བརྒྱུད་ཚུལ་རིགས་མི་འདྲ་བ་བཞི་པོ་ཡང་ཚང་བར་ཡོད་དོ། །འཁོན་གྱི་རྟགས་ཡོད་པའི་ལུང་བརྒྱུད་ལུགས་གཅིག་ནི། ནོར་བུ་ཡོངས་གྲགས་ནས། ཡུག་སྔགས་འཆང་ནོར་བུ་དབང་རྒྱལ། དེ་སྲས་མི་འགྱུར་རྡོ་རྗེ། གསང་བདག་གཉིས་པ་རྗེ་དྲུང་བསྟན་པ་རྒྱ་མཚོ། རྡོ་རྗེ་འཆང་ཕ་བོང་ཁ་པ་དཔལ་འབྱོར་ལྷུན་གྲུབ། དེས་བདག་ལའོ། །གཡུང་དྲུང་གི་རྟགས་ཡོད་པའི་ལུང་བརྒྱུད་ལུགས་གཅིག་ནི། རྗེ་འཕྲིན་ལས་ལྷུན་གྲུབ་ནས། དེ་སྲས་གཏེར་བདག་གླིང་པ། དེས་བདག་ལའོ། །ས་བཅད་དྲུག་པ་ཡན་གྱི་གཏེར་གྱི་རྟགས་ཡོད་པའི་ལུང་བརྒྱུད་ནི། གསུང་སྤྲུལ་ནས། རྗེ་འཕྲིན་ལས་ལྷུན་གྲུབ། སྤྲུལ་སྐུ་གཏེར་བདག་གླིང་པ། དེས་བདག་ལའོ། །ས་བཅད་དྲུག་པ་ཡན་གྱི་གུང་དང་རྡོ་རྗེ་བཅུ་གཅིག་
པའི་གུང་གི་རྟགས་ཡོད་པའི་ལུང་བརྒྱུད་ནི། ཡུག་རྫོང་མི་འགྱུར་རྡོ་རྗེ་ནས། གུང་རུ་དབྱངས་དཔོན་པ་མཐུ་སྟོབས་གསང་བའི་དབང་ཕྱུག །ཟུར་དྲིན་ཅན་རྩ་བའི་བླ་མ། དེས་བདག་ལའོ། །སྡིག་པ་སྙིང་འཛིངས་ཀྱི་ལུང་བརྒྱུད་ལུགས་གཅིག་ནི། ཚེ་དབང་གྲགས་པ་ནས་མཐའ་ཡས་གྲགས་པ། གྲགས་པ་མཆོག་ལེགས། ཀུན་བཟང་དཔལ་འབྱོར། མདོ་སྔགས་བསྟན་འཛིན། འཕྲིན་ལས་ལྷུན་གྲུབ་མན་སྔར་བཞིན་ནོ། །ས་བཅད་དྲུག་པ་ཡན་གྱི་དར་དང་བཅུ་གཅིག་པའི་དར་གྱི་རྟགས་ཡོད་པའི་བརྒྱུད་པ་ནི། གུ་རུ་དབྱངས་དཔོན་པ་ཡང་གོང་ལྟར་ལ། དེ་ནས་ཁྱབ་བདག་ཆོས་དབྱིངས་རང་གྲོལ། རིགས་འཛིན་འཕྲིན་ལས་ལྷུན་གྲུབ། སྤྲུལ་སྐུ་གཏེར་བདག་གླིང་པ། དེས་བདག་ལའོ། །ས་བཅད་བདུན་པ་འཚོ་རྒྱལ་སྐོར་གསུམ་གྱི་དབང་བརྒྱུད་ནི། ཆོས་སྐུ་རྡོ་རྗེ་ཕག་མོ། ལོངས་སྐུ་རྡོ་རྗེ་སྒྲོལ་མ། སྤྲུལ་སྐུ་ཡེ་ཤེས་འཚོ་རྒྱལ། ཤེལ་དཀར་རྡོ་རྗེ་འཚོ། མོན་མོ་བཀྲ་ཤིས་ཁྱེ་འདྲེན། ལང་འགྲོ་དཀོན་ཅོག་འབྱུང་གནས། གཏེར་སྟོན་མན་ས་བཅད་དྲུག་པ་ཡན་གྱི་བརྒྱུད་པ་དངོས་གཞིའི་དར་སྡིངས་པ་ཡན་འདྲ་བ་ལ། དེ་ནས་གྲུབ་ཆེན་ཀརྨ་གསང་སྔགས། ཁྱབ་བདག་ཁྲ་ཚང་པ་ཆེན་པོ། དེས་བདག་ལའོ། །ལུང་གི་བརྒྱུད་པ་ནི། དར་སྡིངས་པ་ནས། ཟུར་དྲིན་ཅན་བླ་མ། དེས་བདག་ལའོ། །ས་བཅད་བརྒྱད་པ་སྔགས་སྲུང་མའི་ལུང་གི་བརྒྱུད་པ་ནི། ཀུན་བཟང་ཡབ་ཡུམ་ཁྲོས་མ་ནག་མོ། པདྨ་ཐོད་འཕྲེང་། མཁའ་འགྲོ་འཚོ་རྒྱལ། ལང་འགྲོ་ལོ་ཙཱ་བ། ཆོས་རྒྱལ་རཏྣ་གླིང་པ། རྒྱལ་སྲས་ཚེ་དབང་གྲགས་པ། གར་དབང་ལས་འགྲོ་གླིང་པ།
སྲས་འཇིག་རྟེན་མགོན་པོ། སྤེལ་ལྕོགས་སངས་རྒྱས་ཕུན་ཚོགས། དབོན་རིགས་འཛིན་ཆོས་བཟང་། རྗེ་འཕྲིན་ལས་ལྷུན་གྲུབ། སྤྲུལ་སྐུ་གཏེར་བདག་གླིང་པ། དེས་བདག་ལའོ། །ལུང་བརྒྱུད་ལུགས་གཅིག་ནི། ཚེ་དབང་གྲགས་པ་ནས། ངག་དབང་ནོར་བུ། ནོར་བུ་ཡོངས་གྲགས། སྲས་ནོར་བུ་དབང་རྒྱལ། གསུང་སྤྲུལ། འཕྲིན་ལས་ལྷུན་གྲུབ་མན་འདྲ། ས་བཅད་དགུ་པ་གནོད་སྦྱིན་བཤན་པ་དམར་ནག་གི་རྗེས་གནང་དང་ཉང་གི་རྟགས་ཡོད་པ་མ་གཏོགས་པའི་དབང་ལུང་གཉིས་ཀའི་བརྒྱུད་པ་ནི་གསང་བའི་བདག་པོ། གུ་རུ་པདྨ། ཡེ་ཤེས་འཚོ་རྒྱལ། ལང་འགྲོ་ལོ་ཙཱ་བ། འགྲོ་འདུལ་གླིང་པ། རྒྱལ་སྲས་ཚེ་དབང་གྲགས་པ། ངག་དབང་གྲགས་པ། ངག་དབང་ནོར་བུ། ནོར་བུ་ཡོངས་གྲགས། ཡུག་རྫོང་མ་ནི་ཨིནྡྲ་ཛ། སྲས་མི་འགྱུར་རྡོ་རྗེ། དབྱངས་དཔོན་པ་མཐུ་སྟོབས་གསང་བའི་དབང་ཕྱུག །ཟུར་ཐམས་ཅད་མཁྱེན་པ། དེས་བདག་ལའོ། །ཡང་དབང་རྗེས་གནང་དང་གཏེར་དང་ཉང་གི་རྟགས་ཡོད་པའི་ལུང་བརྒྱུད་ནི། ནོར་བུ་ཡོངས་གྲགས་ཡན་གོང་ལྟར་ལ། དེ་ནས་རྒྱལ་སྲས་ཀརྨ་འཕྲིན་ལས་རྒྱ་མཚོ། ཉང་ཆོས་ལྡན་པ་རཏྣ་འཕྲིན་ལས་བསྟན་འཛིན། གྲུབ་པའི་དབང་ཕྱུག་ཀློང་ཡངས་འོད་གསལ་དམ་པ་འཛམ་གླིང་ཡང་ཟེར། སྤྲུལ་པའི་སྐུ་མཆོག་གཏེར་བདག་གླིང་པ། དེས་བདག་ལའོ། །བཅུ་པ་རྒྱལ་ཆེན་རྣམ་སྲས་ཀྱི་ཉང་གི་རྟགས་མ་གཏོགས་པའི་དབང་ལུང་གཉིས་ཀའི་བརྒྱུད་པ་ནི། ཀུན་བཟང་། རྡོ་རྗེ་འཆང་། གསང་བའི་བདག་པོ། ཨོ་རྒྱན་ཡབ་ཡུམ། ལང་འགྲོ་ལོ་ཙཱ་བ། འགྲོ་འདུལ་གླིང་པ། ཚེ་དབང་གྲགས་པ། ངག་དབང་གྲགས་པ། ཀུན་དགའ་གྲགས་པ། ཀུན་དགའ་
བསྟན་འཛིན། ཀ་ཐོག་པ་དབང་དྲག་རྡོ་རྗེ། ཕ་ཇོ་ལྷུན་གྲུབ་རྡོ་རྗེ། ཟུར་གཞོན་ནུ་དོན་གྲུབ། དེས་སྲས་རྩ་བའི་བླ་མ། དེས་བདག་ལའོ། །ཡང་ན་ངག་དབང་གྲགས་པ་ནས། ངག་དབང་ནོར་བུ། ནོར་བུ་ཡོངས་གྲགས། ཡུག་རྫོང་བ་ཡབ་སྲས། དབྱངས་དཔོན་པ། ཟུར་རྩ་བའི་བླ་མ། དེས་བདག་ལའོ། །ཉང་གི་རྟགས་ཡོད་པའི་ལུང་བརྒྱུད་ནི། ནོར་བུ་ཡོངས་གྲགས་ནས། ཆོས་སྡིངས་པ་དབང་ཆེན་ལྷུན་གྲུབ། སྤེལ་ལྕོག་པ་སངས་རྒྱས་ཕུན་ཚོགས། ཆོས་ལྡན་པ་རནྟ་འཕྲིན་ལས་དྲིན་ཅན་གཏེར་བདག་གླིང་པ། དེས་བདག་ལའོ། །ཛཾ་ནག་སྲོག་འཁོར་གྱི་ལུང་བརྒྱུད་ནི། གསང་བདག །ཌཱ་ཀི་མ་ག་ག་ན་སིདྡྷི། དྷ་ན་ཀོ་ཀ །རྒྱལ་པོ་པུཪྵ་དེ་ཝ། ཨོ་རྒྱན་ཆེན་པོ་མན་བརྒྱུད་པ་གོང་མ་གཉིས་ལྟར་རོ། །ས་བཅད་བཅུ་པའི་རྡོ་རྗེ་ཕ་ལམ་གྱི་ལུང་བརྒྱུད་ལུགས་གཅིག་ནི། ཟུར་བསྟན་འཛིན་འགྱུར་མེད་ཡན་རྟ་ནག་གི་ལུང་བརྒྱུད་ལྟར་ལ། དེ་ནས་གྲུབ་ཆེན་ཀུན་དགའ་རྡོ་རྗེ། བླ་མ་འཇམ་དཔལ་འོད་ཟེར། དར་སྡིངས་འཕྲིན་ལས་ལྷུན་གྲུབ། ཟུར་རྩ་བའི་བླ་མ། དེས་བདག་ལའོ། །