དགུང་ལོ་ཉེར་བརྒྱད་པར་ཕར་ཕྱིན་བློ་བཟང་དགོངས་རྒྱན་དང་། ཁྲི་ཆེན་དཀོན་མཆོག་ཆོས་འཕེལ་གྱི་རྣམ་ཐར་མཛད་པ་སོགས་ཀྱི་སྐོར།
ཤིང་སྤྲེལ་གྱི་ལོ་གསར་དུས་འདོད་དོན་ཡི་གེར་བཀོད་པའི་སྙན་དར་ཕུལ། གཉགས་བན་ནང་ར་བ་ངག་དབང་འཇམ་དཔལ་བློ་གྲོས་བས་པའི་འགྲེལ་བ་མཆོག་དགའི་སྟེང་ནས་དབྱངས་འཆར་དང་ནག་རྩིས་ཀྱིས་གཞུང་མང་དུ་སྦྱངས། ཟུར་འཇམ་དབྱངས་བླ་མའི་གསུང་ལན་དང་གླིང་སྨད་ཞབས་དྲུང་སྨོན་ལམ་ཚོགས་དབུར་ཕེབས་པར་ཞུ་ཡིག །སྐུ་མདུན་སྨོན་འགྲོ་ལོ་ཙཱ་བ་མ་ཆེན་ལ་སྲས་པོ་སྐབས་སྦྱར་ལ་སློབ་དཔོན་དུ་འབོད་དགོས་འདུག་པར་དཀའ་གནད་ལ་མཐའ་གཅོད་ཀྱི་བསླབ་དགོས་ཚུལ་དང་སྲས་པོར་ཡང་དེ་དང་དབྱིབས་མཚུངས་པ། ཨེར་ཏེ་ནི་ཧུང་ཐའི་ཇིས་སྐུ་འབུམ་མཆོད་སྡོང་དངུལ་གྱིས་གཏུམས་པར་ལེགས་སོའི་ཡིག་ལན་རྣམས་རྒྱན་གྱིས་སྤྲས་པ་བསྐུར། རིན་ཆེན་སྒང་གི་སྐུ་འདྲ་རིན་པོ་ཆེའི་མཆོད་ཁང་སྒོ་རྒྱན་དུ་སྙན་ངག་གིས་བརྒྱན་པའི་བསྟོད་པ་བརྩམས། སེ་ཆེན་དབོན་པོས་བསྐུལ་ནས་གཏོར་མ་བརྒྱ་རྩ་རྒྱས་བསྡུས་གཉིས་ཀ་ཐོན་པ་ཞིག་བྲིས་ཀྱང་ཚིག་མང་ལ་དོན་ཉུངས་པས་དག་ཡིག་སྨྲ་རྒྱན་གྱི་སྐུ་མཆེད་ཅིག་བྱུང་འདུག །འོལ་དགའ་ཚེས་བཅུ་པ་རྣམས་ཀྱིས་ཕུར་པའི་འཆམ་རྒྱས་པར་བྱས། རབ་བྱུང་བསྙེན་རྫོགས་བརྒྱ་སྐོར་བསྒྲུབས། དབོན་དྲུང་ཞི་བ་བཟང་པོ་ལ་ཚེ་དབང་སོགས་ཆོས་འབྲེལ་འདོད་བསྟུན་བཤད། དབེན་ས་སྐུ་སྐྱེ་བཀྲ་ཤིས་ལྷུན་པོར་གློ་བུར་དུ་གྲོངས་པའི་ཐོར་གོད་དའི་ཆིན་ཅན་འབྲུམ་པར་འཛེམ་སྟབས་འདམ་དུ་སླེབས། རྒྱལ་མོ་ཆེ་ཆུང་དང་དའི་ཆིན་སོགས་རང་ཡུལ་དུ་ལོག་རིངས་
བར་སྡེ་པས་དབྱར་འོང་གསེབ་ལ་མི་གནོད་པའི་ཁྱད་ཀྱིས་འཕན་ཡུལ་ནས་བརྫངས་ན་འགབ་འདུག་པས་ཟ་དམ་དུ་ཤོག་གནང་བ་ལྟར་མལ་གྲོ་བརྒྱུད་ལམ་དུ་འདེགས་གདོང་རྒྱལ་དུ་དཔལ་ལྡན་དམག་ཟོར་མར་འདོད་དོན་གསོལ་བའི་སྙན་དར་འབུལ་མི་མངགས། ཇའི་སང་སྡེ་པ་འོལ་དགར་བད་སྨུག་གིས་མ་བདེ་བ་དཔོན་ཚང་བྱང་ངོས་པས་སྦྱོངས་འབེབས་མ་ནུས་པའི་སྐྱོན་ལ་བརྟེན་འོད་ཟེར་གྱང་ནས་ལོད་དུ་སོང་བས་ཞག་གསུམ་ཙམ་བཅག་མལ་དང་རྗེས་གནང་བསྲུང་བ་རིམ་གྲོ་གང་ཟབ་བྱས་པས་བདེ་སྐྱིད་ཆེ་ཞིང་འཕྲོད་བསྟེན་མཇུག་སྐྱོང་ལ་དཔོན་ཚང་ནང་སོ་དར་རྒྱས་དང་བསྲུང་འཁོར་བར་བྲག་སྣ་ཆོས་རྗེ་བཅས་རིན་ཆེན་གླིང་དུ་བཞག །ངེད་རྣམས་ཐང་སྐྱ་ལྕགས་ཟམ་ཁ་ནས་བྱང་ཁར་དོན་པོ་ཏོ་ཤར་སོགས་བཀའ་གདམས་ཀྱི་གནས་མང་པོ་མཇལ་འདོད་ཀྱང་རང་དབང་མ་འདུས། ཨ་མེས་ཀྱི་བསྟན་སྲུང་གཙོ་བོ་ཡིན་པས་ཟིང་པ་སྟག་མགོའི་ཁྱབ་འཇུག་གི་དམ་ཤིང་ལ་སྙན་དར་སྤྱན་གཟིགས་འབུལ་མི་བཏང་ཞིང་འཕྲིན་ལས་བཅོལ། ཟ་དམ་གྱི་དགོན་རྫོང་རྣམས་བཀོད་པས་ཁྱད་དུ་ཐོན་པའི་ལེགས་ཀྱང་གཙང་ཁང་གི་ཐུབ་ཆེན་དེ་མཐོང་བ་ཙམ་གྱིས་སྐྲག་ཚོམ་ཚོམ་མགོན་ཁང་དེ་ཤིན་ཏུ་འཇམ་ཞིང་གཏོར་མ་རྣམས་ཀྱང་བསེ་དང་འཇིམ་པ་ལ་བཟོས་པའི་ཕྱག་རྒྱ་བ་རྒན་པོའི་ནང་རྟགས་ཕྱིར་ཤར་ཞིག་སྣང་། དབེན་ས་སྤྲུལ་སྐུའི་ཚབ་མར་ཀྲེ་པ་རྗེ་དྲུང་ཟེར་བའི་ཚེ་བློས་བཏང་གི་རི་ཁྲོད་པར་རློམ་པ་ལ་ཁོང་གི་གྲ་རིགས་མངའ་ཐང་ཐམས་ཅད་མིག་འོག་ཏུ་བཅུག་པ་ཞིག་འདུག་པ་གྲ་པ་རྣམས་དང་མ་འཆམ་པར་ཕྱིར་ལྡོག་གོས་ཤར་སོང་། ཆོས་རྗེ་བཅོ་བརྒྱད་པ་ཁུ་དབོན་དང་སྔགས་ཕྱོགས་ཀྱི་གླེང་མོ་མང་དུ་བྱུང་བ་དབང་ཁྲིད་ལུང་གསུམ་ལ་
གསན་རྒྱ་ཆེ་བའི་ཚད་ཅིག་ཏུ་སྣང་། སྐྱིད་ཤོད་ཐའི་ཇི་སྐུ་མཆེད་ནས་གཞིས་རྩེ་སོགས་བཟུང་བ་རྒྱལ་པོའི་དགོངས་པར་མ་བབས་པ་མཁྱེན་པས་ཚུར་རྩིས་སྤྲོད་མཛད། གཞིས་རྩེ་རྫོང་དཔོན་ལ་ཉེ་གནས་སྟག་ལུང་པའི་རྣམ་ཐར་མ་ཁྱོངས་དོགས་ནང་སོ་ནོར་བུ་བཏང་སོང་། འདི་ནས་བཟུང་ཕལ་ཆེར་གྱིས་སྡེ་སྲིད་དང་སྡེ་པ་ཞེས་འབོད་ཅིང་ཁོ་རང་ཡང་སྡེ་པ་དང་རུས་གཅིག་གི་གཅུང་པོ་ཡིན་པའི་ཉམས་ཙམ་བྱེད་པ་འདུག །སོག་པོ་རྣམས་སྐྱིད་ཤོད་དུ་ཕེབས་བསྟུན་རྫོང་བདའ་གནང་དགོས་ཞུས་པར་བརྟེན་ཟ་དམ་ནས་ཐོན་པའི་ལམ་ཞོར་སྲུང་མ་རང་བཞིན་གྱི་འདུ་གནས་དཔལ་ལྡན་རྩེ་མཇལ་བར་འདོད་ཀྱང་སྟབས་མ་འགྲིག །སྐམ་ལ་བརྒྱུད་འབྲས་སྤུངས་སུ་འབྱོར། གཞིས་ཀ་རྩེའི་རིན་ཆེན་རྒྱན་ཆ་གཏོར་དུས་ཀྱི་ཤ་བ་སྐྱ་རིང་གི་གཡུ་རྣམས་ཀུན་ཅི་རྒྱལ་མོས་ཇོ་བོ་ཤཱཀྱ་མུ་ནིའི་དབུ་རྒྱན་ལ་སྦྱར་བ་སོགས་ཇོ་བོ་རྣམ་གཉིས་ཀྱི་དབུ་རྒྱན་ཞིག་གསོས་དང་ཇོ་འདྲར་དབུ་རྒྱན་གསར་དུ་བཟོས་པའི་ཁ་ཡིག་བརྩམས། རྒྱལ་མོ་ཆེ་ཆུང་དང་དའི་ཆིན་གྱིས་གཙོས་པ་རྣམས་ལ་གང་འདོད་ཀྱི་ཆོས་འབྲེལ་དང་དངོས་པོའི་རྫོང་བ་བཟབས། སྔགས་ཁང་དུ་བསྐང་གསོ་བཙུགས་ཐོག་ཆོས་སྐྱོང་རྣམས་ལ་འཕྲིན་བཅོལ་བྲིས་པའི་སྙན་ཤལ་ཕུལ། ཆུ་རྟ་ཀོང་དམག་གིས་རྫིང་ཕྱིའི་གཙུག་ལག་ཁང་མེས་བསྲེགས་པར་འགྱངས་མེད་དུ་ཞིག་གསོས་གྲུབ་པའི་འདུ་ཁང་གི་ལྡེབས་བྲིས་ལ་དབུ་མཛད་འབྲོང་རྩེ་བློ་བཟང་དང་འབྲས་སྤུངས་དགོས་ནོར་གཉིས་ཀྱིས་གཙོས་བཞི་བཅུ་ཞེ་བརྒྱད། དོ་དམ་དཔོན་ཚང་ཚ་རོང་བ། སྟག་རུ་བ་ནོར་བུ། གཙང་པ་གསེར་སྡིངས་ནས་རྣམས་ཀྱིས་བྱས་པའི་གཙོ་བོར་རྒྱལ་བ་ཙོང་ཁ་པ་འཁོར་དག་པ་
རྣམ་བརྒྱད་ཀྱིས་བསྐོར་བ། ཐམས་ཅད་མཁྱེན་པ་དགེ་འདུན་གྲུབ་ཀྱི་འཁྲུངས་རབས་སྔ་ཕྱི། སངས་རྒྱས་སུམ་ཅུ་སོ་ལྔ། གནས་བརྟན་བཅུ་དྲུག །ནག་པོ་སྐོར་གསུམ། བེང་ཕྱག །ཐུགས་ཀྱི་རྒྱལ་པོ། སེང་གཡབས་ལ་བཀའ་གདམས་ལྷ་བཞི་རྣམས་བྲིས། ལོ་པ་ཆོས་རྗེས་རྫིང་ཕྱིའི་བྱམས་པར་སྣམ་སྦྱར་ཕུལ་བའི་སྨོན་ལམ་དང་དགེ་བཤེས་དགེ་དར་བས་བསྐུར་བའི་བདེ་བ་ཅན་དུ་སྐྱེ་བའི་སྨོན་ལམ་བྲིས། ཁྱབ་བདག་ཆོས་དབྱིངས་རང་གྲོལ་གྱིས་སྙན་ངག་གི་ལམ་ནས་དྲངས་པའི་ཕྱག་བྲིས་བྱུང་བ་དེ་ལན་ཕུལ། བྱང་ཆུབ་ལམ་གྱི་རིམ་པ་ལ་རྗེ་བླ་མ་ནས་འཇམ་དབྱངས་སྟག་ལུང་བྲག་པའི་བར་དུ་བཤད་རྒྱུན་ཉམས་པ་མེད་པ་གླིང་སྨད་ཞབས་དྲུང་ལ་མངའ་ཞིང་དུས་ཐོག་དེར་ལམ་རིམ་ལ་དེ་ལས་མཁས་པ་མེད་པར་ངེས་པ་རྙེད་དེ་གསང་སྔགས་མཁར་ནས་གདན་དྲངས། ལམ་རིམ་ཆེན་མོའི་སྤྱོད་པ་སྤྱི་བསླབ་ཡན་ལ་ཞིབ་བཤད། ཞི་ལྷག་ལ་དོན་བསྡུ། ལམ་རིམ་ཆུང་བའི་ཞི་ལྷག་ལ་ཞིབ་བཤད་དང་དེ་ཕྱིན་ལ་ལྗགས་ལུང་གནང་ཞིང་གསུང་བཤད་རྣམས་ལ་རྒྱུགས་འབུལ་ཀྱང་ཞུས། ལར་སྣམ་བུ་འདོམ་རེ་ཙམ་རྙེད་པ་ལ་དཀའ་ཚེགས་མི་འདུག་ཀྱང་པཎ་ཞྭ་སེར་པོ་སྣེ་རིང་ཚད་ཀྱིས་ལམ་རིམ། ས་ཞུ་འབྱོར་ཚད་ཀྱིས་ལམ་འབྲས། ཨྱོན་པཎ་ཞུ་དམར་ཟིང་ཚད་ཀྱིས་རྫོགས་ཆེན སྒོམ་ཞྭ་བུས་འཁྱུད་ཡོད་ཚད་ཀྱིས་ཕྱག་ཆེན་འཆད་ག་ལ་ཤེས། ཆོས་འདི་ཤེས་པ་ཞིག་ལ་གཏུགས་པ་གནད་ཆེ་བར་སྣང་། གཞན་ཡང་རིམ་ལྔ་གསལ་སྒྲོན། དྲང་ངེས་རྣམ་འབྱེད། ཐར་ལམ་གསལ་བྱེད། སྙིང་པོ་རྒྱན་རྣམས་ཀྱི་དཀའ་གནས་མང་པོར་དོགས་གཅོད་ཞུས། ཟླ་བ་བདུན་པའི་གནམ་གང་གི་ཚ་རྟིང་ཁར་ཉི་མ་གཟའ་
འཛིན་འོང་བའི་ལྷ་སའི་རྡོ་རིང་ལ་བི་ཝརྟ་དང་བཅས་ཡི་གེ་སྦྱར། བོད་འབངས་ཀྱི་ལེགས་བྱས་མཐུ་དམན་པས་རིགས་འཛིན་ཡོལ་མོ་པ་ཆེན་པོ་ལུང་བསྟན་བཞིན་གཏེར་བཞེས་པའི་གེགས་བྱེད་ཀྱི་མཐུ་ཟངས་མདོག་དཔལ་རིར་ཞིང་ཁམས་འཕོས་པའི་དགོངས་རྫོགས་སུ་བྲམ་ཟེ་མཆོག་སྲེད་ཀྱི་ཐུགས་དམ་རྟེན་མགོན་པོ་ཕུར་ཞབས་མས་ཐོག་དྲངས་པ་དང་གདུང་ཆོག་སེར་ཚོགས་ཀྱི་དགོས་ཆ་ཡང་མི་སྲུན་སྒྱུ་འཕྲུལ་དྲ་བས་མངའ་བདག་ཕྱག་མཛོད་བྱེད་དཀར་གྱུར་བར་སློབ་དཔོན་ཆེན་པོའི་སྐུ་དང་བཀའ་བརྒྱད་གྲ་ཚར་གྱི་ཞུ་རྟེན་བྱུང་བ་ལྟར་འདོད་པའི་རེ་བ་བཀང་། དཔོན་སློབ་རིན་པོ་ཆེས་གསང་སྔགས་མཁར་དུ་རྒྱལ་བ་ཙོང་ཁ་པའི་གོས་སྐུ་གསར་བཞེངས་གནང་བར་སྨོན་ལམ་ཞིག་རྩོམས་ཕེབས་པ་ལ་དེ་འཕྲལ་དུ་སཾ་ཊར་བྲིས་ནས་སྤྱན་འབེབས་ཞུས་པས་སྔར་དབྱངས་ཅན་མའི་བསྟོད་པའི་ཐུགས་རྩོམ་སྐབས་དཀའ་ལས་ཆེན་པོ་ཡོང་བ་འདྲ་རྗེ་དགེ་འདུན་རྒྱ་མཚོ་དེ་དབྱངས་ཅན་མས་རྗེས་སུ་བཟུང་བའི་ཐོགས་མེད་དུ་མཛད་པ་ཡོད་འདུག་པས་དེ་འདྲ་ཞིག་བྱུང་ན་སྙམ་པ་ཡིད་ལ་ངུར་ངུར་ཤར་ཡང་ད་ཆ་རེ་བ་བཞིན་བྱུང་ཞེས་དགྱེས་དགྱེས་གནང་། པཎ་ཆེན་བསོད་ནམས་གྲགས་པ་དང་ལས་ཆེན་དངོས་གྲུབ་པའི་མཛོད་གཉིས་པོ་ལེགས་རྒྱུ་མི་འདུག་པས་ཡིག་ཆ་འབྲི་དགོས་པའི་བསླབ་སྟོན་ཕེབས། དྲང་སྲོང་ཆུ་ལྷའི་བུས་ཉལ་འགྲོ་ཐམས་ཅད་བདུད་རྩིར་བསྒྱུར་བའི་ཞག་བདུན་གྱི་རིང་དན་འབག་གླིང་ཁར་ནད་སེལ་སྨན་གྱི་དགའ་སྟོན་ལ་སྒར་བྱས་ནས་བསྡད། འདི་ལོ་ནས་བཟུང་ཆུ་ཞུགས་ལ་ཕྱིན་རེས་ཀྱི་གྲོང་སྨད་ནས་བཞེས་སྤྲོད་གཟབ་རྒྱས་བསྟར། ར་བ་སྟོད་པར་དོལ་བརྒྱད་གྲའི་མཆོད་གཞིས་དང་གསང་ཕུ་སྤྱི་སོར་ཟུལ་ཕུའི་དབྱར་
ཆོས་ཕྱི་མས་མཚོན་བསྟན་རྒྱུན་ལ་ཕན་པའི་སྡེ་པར་བཀའ་འཕྲོས་གནང་། ཁལ་ཁ་ཕྱོགས་དུས་འཇམ་པ་འདུག་རུང་ཨོ་རོད་དུ་གཞུང་དོན་ལ་འདུལ་བ་བླ་མ་ངག་དབང་ཆོས་འཕེལ་རྫོང་བདའ་བྱས། བོད་ཀྱི་བདེ་ཐབས་སུ་གཙང་འགྲམ་ལྷ་ཁང་ཞིག་གསོས་དང་གནས་འཛིན་སྒྲོལ་མ་ནས་ལྟ་བུས་བྱས་ན་ཡོང་ཚུལ་སྡེ་པར་ཞུས་པ་ཐུགས་ལ་བབས་པའི་ཕྱག་ཏུ་བཀལ། དབེན་ས་དགོན་པས་གོ་ཆོད་པས་ལྷ་ཁང་འདི་མེད་ཀྱང་ཡོང་ཞུ་མཁན་བྱུང་གསུང་བ་མཐའ་འདུལ་གྱི་ལྷ་ཁང་དེ་ཐོག་མ་ནས་དབེན་སའི་ཐད་དེར་བརྩིགས་ན་ཡོང་རྒྱུར་ཆོས་རྒྱལ་སྲོང་བཙན་སྒམ་པོར་མངོན་མཁྱེན་མེད་པའི་སྐྱོན་ཡིན་པ་འདྲ། ལུག་སྤྲེལ་གྱི་མཚམས་སུ་ཆོས་འཁོར་གླིང་ཞལ་སྔ་ནས་དཀར་པོ་བ་འབྲུམ་ནད་ཀྱིས་གྲོངས་པས་འཆད་ཉན་དུ་མངའ་རིས་གྲ་ཚང་སློབ་དཔོན་གཉལ་པ་བསྟན་འཛིན་འཕྲིན་ལས་བསྐོས། ཁོང་པ་འཛིན་ཤེ་ཡངས་པས་པཎ་ཆེན་གྱི་ཡིག་ཆ་རྣམས་གཏོང་རྩིས་འདུག་རུང་། སྡེ་པས་དཔེ་ཆ་རྣམས་དམ་འབྱར་གྱིས་མནན་པའི་སེ་ར་བྱེས་པའི་ལུགས་ཐོང་གསུངས་པར་གྲ་དམངས་རྣམས་བླ་མ་བྱེས་པའི་རྩ་གྲར་སོང་བས་བྱས་སོ་སྙམ་པའི་ལོག་རྟོག་གིས་ལུགས་མི་ལེགས་པ་ཆེན་པོ་ཡོང་གྲབས་བྱུང་། ཞལ་སྔ་ནས་མཛད་བསྟད་པས་གཉེར་པ་རབ་འབྱམས་པ་བློ་བཟང་ཆོས་གྲགས་སྦྲན་ནས་ཕར་ཕྱིན་གྱི་ཡིག་ཆ་རྩོམ་དགོས་ཚུལ་བྱུང་བ་ལྟར་གླིང་སྨད་ཞབས་དྲུང་སྐུ་ཞབས་སུ་མཛོད་ཀྱི་སྔོན་དུ་ཕར་ཕྱིན་འབྲི་བའི་དགོས་དོན་འདི་བཞིན་བྱུང་ཚུལ་སྙན་འབུལ་ཞུ་བར་བཏང་། འདི་ལོ་ཕར་ཕྱིན་གྱི་ཊཱིཀྐ་ཐལ་འཕྲེང་ཟུང་འབྲེལ་གྱི་སྐབས་གསུམ་པ་ཡན་བྲིས། དྲུང་རམས་པ་བསོད་ནམས་ཆོས་བཟང་ཞེས་དོམ་བསྙག་ཏུ་གྲགས་པས་ཞུས་དག་མཛད་ཅིང་མཁས་བཙུན་བཟང་གསུམ་
འཛོམ་པའི་དགེ་བཤེས་འགྲན་ཟླ་དང་བྲལ། ཁོང་གི་ཞལ་འདོན་དུ་སྒྲོལ་དཀར་གྱི་བསྟོད་པ། ཆོས་འཁོར་གླིང་སྤྱི་ཚོགས་ཀྱིས་བསྐུལ་བའི་རིང་འཚོའི་ཚིགས་བཅད། བཱ་ཐུར་ཧུང་ཐའི་ཇིའི་རྒྱུན་ཁྱེར་དུ་ཕྱག་དྲུག་པའི་གཏོར་འབུལ་རྣམས་བྲིས། འཇམ་དབྱངས་བླ་མ་དཀོན་མཆོག་ཆོས་འཕེལ་གྱི་རྣམ་ཐར་ཞིག་ཀྱང་བརྩམས་པའི་སྤྱན་ལམ་དུ་ཕབ། སྣེའུ་སྡོང་རྩེ་ནས་ཞབས་དྲུང་རིན་པོ་ཆེ་མ་ཆེན་ཕེབས་པའི་སྤྲུལ་སྐུ་སྦྱིན་པ་བའི་ཕྱག་བྲིས་སྔགས་ཐང་གྲ་ཚང་གྱིས་གཙོས་གནང་སྦྱིན་བཟབས་ཤིང་ཕར་ཡང་ཆེན་པོའི་བཀུར་གཟོས་ཀྱིས་གུས་འདུད་ལྷུར་བླངས། ཚེ་དབང་གྲུབ་རྒྱལ་མ་དང་བྱང་གཏེར་ཕུར་པ་ལྕགས་ཁང་མའི་ལས་བྱང་གསར་བསྒྲིགས་ཀྱི་ལུང་ཕུལ། མ་ན་ཧོ་ལས་གྲུབ་པའི་ཆིབས་ཆས་ཀྱིས་གཙོས་བདོག་པ་གྱ་ནོམ་པའི་འབུལ་བ་བཟང་དུ་བསྟར། ལྕགས་འབྲུག་ལོ་དཔོན་སློབ་པཎ་ཆེན་རིན་པོ་ཆེས་སེ་ཆེན་ཆོས་རྗེ་ལ་ཇུར་ཆིད་རྒྱལ་པོ་འདི་སྟོབས་ཤིན་ཏུ་ཆེ་བ་ཞིག་ཡོད་འདུག་པས་རང་ཕྱོགས་ཀྱི་སྦྱིན་བདག་ལ་ཨེ་ཁུགས་ལྟོས་གསུང་རྫོང་བདའ་གནང་སོང་བའི་ཞབས་མཐུན་བྱས་ཏེ་བོག་ཏོ་རྒྱལ་པོར་ཡི་གེ་རྟེན་སྦྲགས་བསྐུར་བ་རྒྱལ་པོའི་གམ་ནས་གེགས་མེད་དུ་ཕྱིར་འཁོར། དེ་དང་ལྷན་ཅིག་པར་ཆ་གན་བླ་མ་ཅན་གསེར་ཡིག་པ་ཕོན་ཆེ་བ་འབྱོར། བོག་ཏོ་རྒྱལ་པོས་བོད་ཀྱི་བླ་མ་མང་པོ་ལ་ཡི་གེ་གོས་དར་གསེར་དངུལ་གྱི་རྟེན་དང་བཅས་པ་འདུག །དེའི་མཇུག་ཟིན་པ་ཁལ་ཁ་གཡོན་རུ་ནོ་མོན་ཨེ་ཇེན་དང་འཕྱོང་རྒྱས་པཎྜི་ཏ་སོགས་འགྲུལ་པ་གཏོས་ཆེ་བ་སླེབས། འགྲུལ་པ་ཕན་ཚུན་རྣམས་བསྡོམས་པའི་ཚོགས་ཆེན་དུ་ཞག་ཉི་ཤུ་ལྷག་གི་བར་མང་འགྱེད་དང་དེ་མཚུངས་བརྒྱ་འབུལ་སྟོང་འབུལ་མང་དུ་བླངས་དགེ་བ་རྣམས་རྫོགས་བྱང་དུ་བསྔོས་ཤིང་
འདོད་སྦྱར་གྱི་ཆོས་འབྲེལ་དང་རབ་བྱུང་བསྙེན་རྫོགས་ཀྱང་བརྒྱ་སྐོར་བསྒྲུབས། ལྕོག་གྲ་སྤྲུལ་སྐུས་རེའུ་མིག་རྒྱ་མཚོ་མ་ཚང་བ་ཞིག་གསར་བཤུས་ཀྱི་བསྲིངས་པའི་འཕྲོད་ལན་བི་ཝརྟ་དང་བཅས་པ་བྲིས། མཆོད་ཡོན་ལྷོ་བྲག་ཕྱོགས་སུ་ཕེབས་པའི་གདོང་དུ་སྟག་ལུང་ཞབས་དྲུང་བར་ཆིངས་ལ་ཐེགས་ཀྱང་སྒར་པ་དཔོན་སློབ་བཞུགས་མ་ནུས་པར་བྲོས་ཐབས་ཀྱིས་ཁམས་ལ་ཕེབས། བོད་སོག་གི་དམག་བདུན་བརྒྱ་སྐོར་མོན་དུ་རྟབ་འགྲོས་ཀྱིས་གནང་འདུག་པ་དཔུང་ཆུང་བས་ཁ་ཉེས་ཀྱི་རྣམ་པའི་ནང་སོ་དངོས་གྲུབ་འབྲོང་རྩེ་ནས་དང་འདུས་བྱུང་ནས་ཀྱིས་གཙོས་པ་ཁ་ཤས་བཙོན་ལ་ཤོར། སོག་དམག་དུམ་བུ་དེ་ཚུར་ཐར་ཡང་ཀླད་ཤོར་བ་ལྟ་བུས་མ་ལེགས་ཙམ་བྱུང་འདུག །ལོ་དུས་ཀྱི་སྒྲུབ་ཁག་ལེ་ཚན་རྣམས་གྲུབ་ནས་གྲ་ཚང་ལ་ཚེ་བདག་དང་ཕུར་པའི་དབང་། དཔལ་ལྡན་དམག་ཟོར་མའི་རྗེས་གནང་སོགས་ཉེར་མཁོའི་དབང་ལུང་ཁ་ཤས་ཕུལ། མེའི་སྤུ་གྲི་དང་བཤོར་སང་ཉི་མ་ཁྲོས་པའི་སྒྲུབ་ཁག་གཉིས་དང་བོད་ཁམས་བདེ་ཐབས་སུ་དམིགས་ནས་ཕུར་སྒྲུབ་བཙུགས།