དགུང་ལོ་སོ་བརྒྱད་པར་ཟུར་ཆོས་དབྱིངས་རང་གྲོལ་གྱི་དྲུང་ནས་གསང་སྔགས་གསར་རྙིང་གི་ཟབ་ཆོས་གསན་པ་དང་།
སླར་ཡང་གཙང་ཕྱོགས་སུ་ཕེབས་པ་བཅས་ཀྱི་སྐོར།ཤིང་ཕོ་རྟ་ལོའི་གནམ་ལོ་གསར་ཚེས་ཀྱི་འདོད་ཁམས་དབང་ཕྱུག་མའི་མཆོད་གཏོར། རྟེན་འདོགས་གཟབ་རྒྱས་སུ་བསྟར་ཞིང་ཚིགས་བཅད་བཀོད་པའི་ལྷ་རྫས་ཕུལ། བཞུགས་གྲལ་གྱི་དུས་སྟོན་སྔར་འཁྱུད་ལྟར་བྱས། བསྟན་འཛིན་ཆོས་ཀྱི་རྒྱལ་པོ་ལ་འཆི་མེད་དཔལ་སྟེར་གྱི་ཚེ་དབང་བརྒྱ་རྩ་དང་གུར་མགོན་གྱི་རྗེས་གནང་ཕུལ། གནས་ཆུང་ཆོས་རྒྱལ་ཆེན་པོ་སྐུ་ཕེབས་ཞུས་ཏེ་དགའ་ལྡན་ཕོ་བྲང་དུ་གདན་དྲངས་གཏང་རག་གི་སྤྱན་གཟིགས་གྱ་ནོམ་པ་བསྟར་ཁྲབ་དེ་དམ་ཉམས་ཀྱི་ཡིན་ཞེས་བི་རིའི་ཡིན་པར་ངོས་བཟུང་། རྒྱལ་པོ་ལོ་ཤས་སྐུ་ཚེ་བརྟན་པར་ཨེ་ཡོང་གསོལ་བར་བདུན་ཅུ་དོན་གསུམ་ཐེ་ཚོམ་མེད་པའི་སྐག་ཅེས་ཞལ་གྱིས་མ་བཞེས། རྡོ་དགའ་ལྡན་རྣམ་རྒྱལ་གྱི་ཀླུ་འཛིན་པ་ལག་མངས་ཁོག་ཞུགས་ཀྱིས་བསྐུལ་བ་བཞིན་གསོལ་མཆོད་བརྩམས། ཚེས་བརྒྱད་ལ་མཆོད་དཔོན་པ་ཆུ་ཚན་ལ་འགྲོ་ཞོར་བསམ་ཡས་དང་ཐང་པོ་ཆེ་ཆོས་སྐྱོང་ལ་རྒྱ་ནག་ནས་གེགས་མེད་འཁོར་བའི་གཏང་རག་གི་ཞུ་འཕྲིན་ཚིགས་བཅད་སྤྱན་གཟིགས་དང་བཅས་པ་བསྐུར། བྱང་ཆུབ་ཆེན་པོར་འཕན་འབུལ་བའི་ཁ་བྱང་དགོས་ཚུལ་བྱུང་བའང་བྲིས། ཟླ་བ་དང་པོའི་ཚེས་ལྔ་ནས་གསུམ་པའི་
ཟླ་སྨད་བར་ཕལ་ཆེར་ཕྱི་མཚམས་ངོས་ཟུར་ཐམས་ཅད་མཁྱེན་པ་ཕེབས་ཏེ་བླ་མ་དགོངས་འདུས་ཀྱི་ལུང་དང་རྭ་པོད་སོགས་གསང་སྔགས་གསར་རྙིང་གི་དབང་ལུང་ཁྲིད་མང་དུ་ཞུས། བར་འཚམས་ཚོར་ཉི་མ་གཉིས་གསུམ་ཙམ་མཚམས་ཀྱི་བར་གསེངས་ཏེ། གོང་ནས་སྒར་ཆེན་བོད་དུ་སྐྱེལ་བ་དང་བསྟན་འཛིན་ཆོས་ཀྱི་རྒྱལ་པོར་ལུང་ལས་གནང་བར་ཁི་ཡ་བླ་མ། དར་ཁན་ཆོས་རྗེ། གཙང་པ་དཀའ་བཅུ། ནང་ནུག་དོག་གེ་ཨམ་པ། ཤུ་ཤི་ཐར་དོར་གེ་ཨམ་པ་མང་ཁས་རྗར་གོ་ཆི། ནོ་རས་རྗར་གོ་ཆི། རྦི་ཆི་ཡ་ཆི། རྗེ་རེད་ཅན་མི་སྣ་རྣམས་རྫོང་བདའི་སྟ་གོན་གྱི་རྗེས་གནང་གི་རིགས་དང་ལུང་བཀླགས། རབ་བྱུང་བསྙེན་རྫོགས་འདོད་སྦྱར་བསྒྲུབས། གོང་དུ་ཞུ་ཡིག་རྟེན་སྦྲགས་འབུལ་བར་ལྕང་ལོ་ཅན་དཀའ་བཅུ་བ་ངག་དབང་ནོར་བཟང་དང་རྟ་འབུལ་དབོན་ཆུང་གཉིས་རྫོང་བདའ་བྱས། ཁེ་ཤིང་གེ་ཆིན་དབང་ལ་སྨོན་ལམ་ཆེན་མོར་འགྲེམ་རྒྱུའི་ཇོ་བོ་ཤཱཀྱ་མུ་ནིར་སྣམ་སྦྱར་མངགས་བཏགས་ཤིག་ཕུལ་ན་ལེགས་མོལ་བ་ཐུགས་ལ་བབས་འདུག་པ་བཞིན་ཁ་བྱང་ཐགས་སུ་བསྐྲུན་རྒྱུའི་ཚིགས་བཅད་མི་སྣ་གཉིས་ལ་བསྐུར་ཁྱད་ཀྱིས་བྲིས། དེས་མཚོན་ཕྱོགས་འདུས་ནས་བྱོན་པ་རྣམས་དང་ཕྲད་ལེན་གྱི་བྲེལ་བ་བཅད། ཟླ་བ་གཉིས་པའི་ཟླ་སྟོད་དུ་སྒམ་སྨྱོན་སྤྲུལ་སྐུ་ཕྱག་རྡོར་ནོར་བུར་ཚེ་དབང་གྲུབ་རྒྱལ་མ། ཕན་བདེ་སྐུ་སྐྱེ་དང་འབྲུ་ལ་བླ་མ་བྱེད་མི་ཚོགས་ཆེན་དབུ་མཛད་ཟུར་པ་གཉིས་ལ་ཕྱག་དྲུག་པའི་རྗེས་གནང་བར་ཆད་ཀུན་སེལ། ཨོ་རོང་། སྒ་ཆག །བཅོས་མི་སོགས་ཀོང་པོ་སྐྱ་སེར། རྟ་ནག་ཆོས་རྗེ་སྒྲོལ་མ་བ། མདོང་མཁར་ལྕམ་རྣམས་དང་ཕྲད། དེ་སྐབས་འཚུབ་ཀྱི་རྣམ་པ་ཆེ་བའི་
ལྟས་བྱུང་བས་གྲ་ཚང་དུ་གཤིན་རྗེའི་སྒྲུབ་པ་དང་ཨྱཻ་རིང་བྱེ་བ། རྒྱལ་ལྷུན་གྲུབ་དགའ་ཚལ་དུ་དམག་ཟོར་མའི་བསྐང་བ་ཁྲི། འབྲས་སྤུངས་སྔགས་ཁང་དུ་རྒྱུད་སྟོད་པས་ཡ་མ་རཱ་ཙ་འབུམ་ཚོ་བཅུ་དང་ཆོས་སྐྱོང་གི་བཀང་བ་སྟོང་རྩ། གནས་ཆུང་ལྕོོག་ཏུ་བཀང་བཤགས་ཁྲི་ཚར། གོང་དཀར་རྫོང་དུ་ཆོས་སྡེ་བ་གྲངས་བཅད་ཀྱིས་གུར་མགོན་དང་དཀོན་གཉེར་ནང་མ་རྣམས་ཀྱིས་ཞལ་གྱི་བསྐང་བཤགས་སྟོང་རྩ་བཏང་བའི་གོང་གསལ་མགོན་ཁང་སོ་སོར་འཕྲིན་བཅོལ་གྱི་ཚིགས་བཅད་བཀོད་པའི་སྙན་དར་ཕུལ། ཡེར་པར་སཱ་ཙྪ་འབུམ་ཐེར། སེར་འབྲས་གཉིས་སུ་སྒྲོལ་མ་ཤེར་སྙིང་གདུགས་དཀར་སོ་སོར་འབུམ་ཐེར། དབུས་གཙང་གི་ཆོས་སྡེ་ཁག་རགས་རིམ་ལ་མང་འགྱེད་བསྒྲུབས། འཇམ་དཔལ་མེའི་སྤུ་གྲིའི་སྲུང་བཟློག་གི་སྒྲུབ་པ་བཙུགས། རྒྱ་གར་ཝ་ར་ཎཱ་སིའི་བྲམ་ཟེའི་པཎྜི་ཏ་གོ་ཀཱུ་ལ་མི་ཤྲའི་དྲུང་དུ་སྡེ་པ་འདར་པ་ངག་དབང་ཕུན་ཚོགས་ལྷུན་གྲུབ་སྒྲ་བསླབ་ཏུ་བཅུག་པ་ངག་རིག་པ་རིམ་བྱོན་གྱི་བརྒྱུད་དང་བརྩོན་དཔྱོད་ཟུང་དུ་འཇུག་པས་ཟླ་བ་བཅུའི་བར་ལ་མཁས་པར་ཤེས་ཤིང་ཞར་ལ་རྒྱ་གར་ཕལ་སྐད་ཀྱང་ཤིན་ཏུ་བྱང་བ་བྱུང་འདུག །ཟླ་བ་གསུམ་པའི་འགོར། ལྷ་སར་རྟེན་རྣམས་ལ་གསེར་ཆབ་དང་མཆོད་པ་བརྒྱ་རྩ་སྙན་དར་ཞལ་ཡིག་དང་བཅས་བསྟར། མཆོད་དཔོན་བློ་བཟང་མཐུ་སྟོབས་དང་དབུ་མཛད་བློ་བཟང་ཡོན་ཏན་གཉིས་ཀྱིས་ཕན་བདེ་ལེགས་བཤད་གླིང་པའི་འདུ་ཁང་དུ་གོས་ཆེན་གྱི་གནམ་རྒྱན་ཡོངས་རྫོགས་ཕུལ་བའི་ཁ་བྱང་དགོས་ཚུལ་བཞིན་བྲིས། འབྲས་སྤུངས་འདུ་ཁང་གསར་བསྐྱེད་ཀྱི་ཞིག་གསོས་མཛད་པའི་སྟེང་ཤོད་རྣམས་ཀྱི་ཤིང་རྩི་བཟབས་རྒྱས། འདུ་ཁང་ཀ་བ་བརྒྱ་
དང་བརྒྱད་ཀྱི་ལྡེབས་བྲིས་ལ་རྟེན་གཙོ་ཐུབ་དབང་ཉན་ཐོས་གཉིས། སྦྱིན་བདག །ཆོས་སྐྱོང་གི་སྐུ་དང་གཙོ་བོར་རྟོགས་བརྗོད་རིན་པོ་ཆེ་དཔག་བསམ་འཁྲི་ཤིང་། གནམ་ཡངས་ལ་ལམ་རིམ་བླ་བརྒྱུད། སྒོ་ཁང་ལྷོ་ལ་རྒྱལ་ཆེ་བཞི། ཤར་ལ་སྲིད་པ་འཁོར་ལོ། དངུལ་གདུང་ཁང་གི་ལྡེབས་བྲིས་རྙིང་པའི་འཕྲོ་འཐུད་ལ་སངས་རྒྱས་སུམ་རྩ་ལྔ། ཕྱག་འཚལ་ཉེར་གཅིག །དེའི་སྟེང་རབ་གསལ་ལ་སྣར་ཐང་བརྒྱ་རྩ་དང་འཇམ་དབྱངས་ཆོས་སྐོར། མཆོད་ཁང་གསར་པའི་ཞལ་རས་ལྷ་ཁང་ལ་གནས་བཅུ། གསང་བདེ་འཇིགས་གསུམ། གཟིམས་ཆུང་ཧོར་ཕིབས་ལ་ཐམས་ཅད་མཁྱེན་པ་བསོད་ནམས་རྒྱ་མཚོའི་རྣམ་ཐར་ཞིང་བཀོད། རྡོ་གཅལ་གྱི་ཁྲི་རྒྱབ་ལ་རྒྱལ་བ་ཙོང་ཁ་པ་ཡབ་སྲས། བདེ་ཡངས་གྲ་ཁང་ལོ་སྔ་མ་ནས་གསར་དུ་བསྒྲུབས་པའི་སྟེང་ཤོད་ཀྱི་ཤིང་རྩི། ལྡེབས་བྲིས་ལ་རྒྱལ་བ་ཙོང་ཁ་པ། སངས་རྒྱས་སུམ་ཅུ་སོ་ལྔ། གནས་བརྟན་བཅུ་དྲུག །རྗེ་དགེ་འདུན་གྲུབ་ཀྱི་འཁྲུངས་རབས། དམག་ཟོར་མ། དྲག་མོ་རྒྱལ། གནས་ཆུང་ཆོས་རྒྱལ་རྣམས་དང་སྟག་རུ་བའི་འཆར་སྟོན་བཞིན་དགའ་ལྡན་ཕོ་བྲང་གི་རབ་གསལ་རྙིང་པར་ཤིང་རྩི། ཇོ་བོའི་ལམ་ཡིག་བཀོད་པའི་གོང་གསལ་ལ་སྨན་ཐང་པའི་དབུ་ཆེན་སྟག་ལུང་དཔལ་མགོན། ལྷ་ས་སྐལ་ལྡན། འབྲོང་རྩེ་བློ་བཟང་། མཁྱེན་བརྩེ་བའི་དབུ་མཛད་གོང་དཀར་གསང་སྔགས་མཁར་བ། ཞོ་ར་དགོས་དགོས་ཀྱིས་གཙོས་སྨན་མཁྱེན་བསྡོམས་པ་དྲུག་ཅུ་རེ་བརྒྱད་ཀྱིས་ཟླ་བ་དྲུག་ལ་གྲུབ་པའི་དོ་དམ་སྟག་རུ་བ་ནོར་བུ་དང་རོང་དཔལ་གླིང་པས་བྱས། རྭ་སྒྲེང་དུ་སྤྲུལ་སྐུ་ཧོར་དར་ཅན་མི་གྲངས་
བཅུ་གཅིག་གིས་མི་གཡོ་བ། མགོན་པོ་དམར་ནག་སོགས་འབུར་སྐུ་ཁ་ཡར་བཞེངས། སྣེའུ་སྡོང་རྩེ་ནས་ཞབས་དྲུང་རིན་པོ་ཆེ་ཡབ་སྲས་ཕེབས། སྒྲོལ་དཀར་ཡིད་བཞིན་འཁོར་ལོའི་རྗེས་གནང་ཕུལ། ཕྱག་ཕྱིར་རིན་པོ་ཆེ་སྨན་ལུང་པ་བྱོན་སྣང་བ་སྒྲོལ་དཀར་ལ་བཀའ་བབས་ཀྱི་བརྒྱུད་ལུགས་མང་པོ་ཡོད་ཚུལ་དང་ད་ལམ་གྱི་འདི་ཚར་ཆེན་ཆོས་ཀྱི་རྒྱལ་པོའི་ཕྱག་ལེན་ཡིན་འདུག་པ་ཐམས་ཅད་མཁྱེན་པ་དགེ་འདུན་གྲུབ་ཀྱིས་བོ་དོང་ཕྱོགས་ལས་རྣམ་རྒྱལ་ལ་གསན་པའི་ཚེ་རིལ་ཚེ་ཆང་གནང་རྒྱུན་ཡོད་པ་ཞིག་མཐོང་བ་དེང་སང་རྒྱུན་ཡོད་མེད་ཀྱི་དྲི་མལ་ཞིབ་ཏུ་མཛད། ཟང་ཟིང་གི་དངོས་པོ་ཚུར་གནང་ཕར་འབུལ་གྲུབ་ནས་ཕོ་བྲང་ཆེན་པོར་ཕྱིར་ཕེབས། སྔ་ཐོག་གུ་གེ་ཆོས་རྗེ་སྙིང་སྟོབས་རྒྱ་མཚོས་ས་བོན་རྒྱས་པ་བྲིས་ཏེ་བསྐུལ་ཡང་བྲེལ་བ་གཞན་གྱིས་འགྱངས་པ་ཉེ་ལམ་གསར་བསྐུལ་བ་མེད་རུང་དཔོན་སློབ་པཎ་ཆེན་རིན་པོ་ཆེའི་གསང་བའི་རྣམ་ཐར་བྲིས། ཚངས་པ་དུང་ཐོད་ཅན་གྱིས་རིམ་གྲོའི་བསྐུལ་མའི་ལུང་བསྟན་བྱུང་བའི་འཕྲིན་ལན་གྱི་ཚིགས་བཅད་སྙན་ཤལ་དང་སྦྲགས་པ་ཕུལ་བླ་མ་བཙན་པོའི་དགོན་པ་དགའ་ལྡན་དམ་ཆོས་གླིང་དཔལ་ལྡན་དམག་ཟོར་མར་གཉེར་གཏད་ཀྱི་ཚིགས་བཅད། རྒྱལ་གཉེར་པ་རྙིང་པ་སྒེར་ལོགས་དབོན་དར་གྱིས་བསྐུལ་བའི་རྟ་རྒོད་ཤེལ་ལྕགས་ཀྱི་གསོལ་མཆོད་བྲིས། ཟླ་མཇུག་ཏུ་རྗེ་བླ་མ་ཟུར་ཆེན་གུང་ཐང་དུ་ཕེབས། དེ་སྐབས་སྲུང་མའི་འཚུབ་ཀྱི་རྣམ་པས་ཞབས་ལ་སྐྲངས་འབུར་ཅུང་ཟད་བྱུང་བའི་རྐྱེན་གྱིས་ཟླ་ལྷག་ཙམ་བསྙུན་ཚུལ་བསྟན་པའི་ཚེ་བརྟན་བཞུགས་དང་བཅས་བར་གཅོད་ཀྱི་གཡུལ་ལས་རྒྱལ་བའི་སྨོན་ལམ་ཚིགས་བཅད་འབུལ་བར་བཏང་། ཇའི་སང་
སྡེ་པས་བསྐུལ་ནས་སཱཙྪ་འདེབས་པའི་ཡི་གེ་དང་དོན་གཉེར་ཅན་དུ་མའི་ངོར་ཀླུ་གཏོར་བྲིས་ཤིང་ལྗང་རམས་པ་ངག་དབང་དོན་གྲུབ་སོགས་ཆོས་འཁོར་གླིང་པའི་གྲ་པ་ཁ་ཤས་ཀྱིས་ཉིན་གྲངས་མང་བར་བཏང་ཆར་ཡང་ལེགས་པོ་བབས་པ་དེའི་ཕན་ཡོན་ཡིན་ནམ་ཟེར། ངེད་ཀྱིས་ཟླ་བ་བཞི་པ་ནས་ལྔ་པའི་ཟླ་སྟོད་བར་ལྷ་བྲག་གཏེར་བྱོན་ལས་ཁྱུང་གི་བསྙེན་མཚམས་མཚན་ཉིད་དང་ལྡན་པ་བྱས། རྒྱ་ནག་གི་ས་ཆུ་མ་འཕྲོད་པས་གསངས་པ་མ་གཏོགས་མེད་འདུག་ཅེས་ཕྱོགས་མཐའ་མང་པོར་གྲགས་པས་དགའ་སྡུག་གི་རྣམ་འགྱུར་སྣ་ཚོགས་བསྟན་ཚོད་དུ་སྣང་། མཚམས་སྔ་མའི་མུ་འཐུད་ནས་གནམ་ལྕགས་དྲག་པོ་རྫས་རྒོད་ཀྱི་སྒྲུབ་པ་བདུན་གཅིག་མུན་མཚམས་ཤིན་ཏུ་དམ་པའི་སྐབས་གཞུང་ནས་བཤད་པའི་རྟགས་མཚན་ཀྱང་ལེགས་པ་བྱུང་། ཉེར་གཉིས་ལ་ནང་མཚམས་གྲོལ་བའི་སྲིད་གསུམ་བདག་མོ་མཆོད་པའི་མདོས་བསྐང་གི་རྡོ་རྗེ་སློབ་དཔོན་དུ་ཕྱིན་རུང་ཉེར་གཅིག་གི་ནུབ་མོ་གློ་བུར་དུ་རྐང་པ་གཡས་པའི་མགོ་ན་བའི་ཞོགས་པའི་ཚོགས་ལ་ཕྱིན་པས་ཀྱང་འཁྲུགས་ཉམས་ཀྱིས་ཚ་རྟིང་ཁ་ནས་འགྲོ་མ་ཐུབ་པར་ཟུར་འཕྱོང་དུ་བསྡད་པའི་ནད་གཡོག་ཇའི་སང་སྡེ་པ་དང་མཆོད་དཔོན་གཉིས་ཀྱིས་བྱས། དཔོན་ཚང་བྱང་ངོས་པ་གདན་དྲངས་པའི་འཕྲོད་བསྟེན་གྱིས་ཞག་བཅུ་སྐོར་ནས་རིམ་བདེར་སོང་རུང་སྡེ་པ་གཙང་ལ་ཐེགས་པའི་རིང་ཁྱད་ཀྱིས་བསྐུལ་མ་ཚ་དྲག་པས་བྱང་ངོས་ནས་ཀྱི་ཐུགས་དང་མཐུན་པའི་འཇམ་སྲོངས་ཀྱི་བཅོས་ཀ་བྱེད་ལོང་མ་བྱུང་ཞིང་གཏར་ཁ་བྱས་ན་ནད་གསར་པར་སོང་བས་རྗེས་སུ་འཁྲུན་ཆོད་པ་ཡོད་འདུག་རུང་ཐུགས་གཟོ་དྲགས་པས་
ཕན་ངོ་ཆེའང་གནངས་ཆེ་སར་དེ་འདྲ་མི་འགབ་གསུང་མཛད་མ་ཉན། རྒྱུན་དུ་ནད་འདི་ལ་བཅོས་ཀ་འདི་ཟེར་བ་ལས་མི་དྲག་ཞན་གྱི་དབྱེ་བ་ནི་མི་འདུག་རྐང་པ་གཡས་པའི་མགོའི་དྲག་འདི་ཡང་ཡང་འཕར་བ་ནད་དྲག་ལོང་མ་བྱུང་བར་འགྲུལ་བརྒྱབ་པའི་རོ་ལུས་པར་མངོན། འོན་ཀྱང་སྡེ་པ་ཐུགས་ངང་ཐུང་བའི་ཚད་པ་ཁ་སེལ་དུ་རྭ་བརྒྱབ་པས་འགྲོ་བར་མི་གནོད་ཙམ་བྱུང་། མཆོད་དཔོན་པ་གནས་ཆུང་ལྕོག་ཏུ་རྟེན་མདོས་གཉིས་འཛུགས་པར་བཏང་། ཤངས་བཀྲ་ཤིས་རྩེ་བ་མངའ་རིས་སུ་འགྲོ་གདོང་ཚེ་དབང་གྲུབ་རྒྱལ་མ། ཕྱག་དྲུག་པ་དང་ལས་གཤིན་གྱི་རྗེས་གནང་བྱས། ཞབས་དྲུང་ཡིད་བཞིན་ལའང་ཚེ་དབང་ཕུལ། རབ་བྱུང་བསྙེན་རྫོགས་ཁ་ཤས་བསྒྲུབས། ཆོས་རྗེ་བཅོ་བརྒྱད་པ་དང་ངོར་པ་ཤར་པ་གཉིས་ཕྲད་པར་བྱོན། ཕྱོགས་ཀྱི་དྲུང་འཁོར་རྣམས་ཀྱང་བསྡུས་ཤིང་གོང་གིས་གནང་བའི་གདུགས། རྒྱལ་མཚན། བ་དན། དར་ཆ་སོགས་སྐྱ་རགས་ཀྱི་སྔོན་དུ་འགྲོ་དགོས་རྣམས་བཟབས་གཤོམས་སུ་བསྟར་བའི་ཟླ་བ་དྲུག་པའི་ཚེས་བཅུ་གསུམ་ལ་འབྲས་སྤུངས་ནས་བཏེག་མར་ལམ་གནས་ཆུང་ལྕོག་ཏུ་ཕྱིན། དེ་སྐབས་དཔོན་སློབ་པཎ་ཆེན་རིན་པོ་ཆེ་རིན་སྤུངས་སུ་ཕེབས་པའི་ས་བཅད་ཡོད་པ་ལྟར་ཆོས་སྐྱོང་ཆེན་པོར་གེགས་ཡོད་མེད་དྲི་བ་ཞུས་པར་རིན་ཆེན་སྤུངས་པ་མ་བསྒྲལ་ན་བར་ཆད་མི་ཡོང་བ་སྡུག་འདྲེས་ཁག་ཐེག་བྱེད་ཅེས་ཞལ་གྱིས་བཞེས། སྒང་དུ་ཤུན་པའི་དྲུང་འཁོར་རྣམས་ཀྱིས་བསྙེན་བཀུར། དེ་ནུབ་སྙེ་ཐང་འོར་དུ་བསྡད་ནས་མཉམ་མེད་ཇོ་བོ་ཆེན་པོའི་མཆོད་སྡོང་སོགས་མཇལ་ཞིང་སྨོན་ལམ་བཏབ། དགོན་ཁག་ཚོས་སེར་སྦྲེང་ཡང་བསྒྲིགས་འདུག །སང་ལྗང་དུ་གུང་གི་དྲོ་འདེབས་སར་འབྲུག་པ་སྤྲུལ་སྐུ་
དང་ཡོངས་འཛིན་སྤྲུལ་སྐུ་གཉིས་བྱོན་པ་དང་མཇལ། བཅོ་ལྔའི་ཉིན་དགོན་པའི་མདར་དགའ་ལྡན་གསང་སྔགས་གླིང་པ་རྣམས་ཀྱིས་འཆམ་རྒྱས་པར་བྱས། ཆུ་ཤུར་དུ་བཅག་མལ་ཐོག་ཐར་པ་གླིང་པས་བཙོས་པའི་སྐྱ་སེར་ལ་སྔགས་རིམ་ཆེན་མོའི་དབུ་ནས་ཆོས་ཐུན་གཅིག་དགོས་ཚུལ་བྱུང་བ་བྱས། ཆོས་འཁོར་ཡང་རྩེར་བཅག་མལ་བསྡད་པའི་ཚོགས་སུ་རིང་འཚོའི་རྟེན་འབྱུང་དང་ཕར་ཕྱིན་གསར་རྩོམ་གྱི་འགོ་ནས་ཆོས་ཐུན་གཅིག་གི་ལུང་འདོད་པ་དང་སྦྱར། དེ་ཉིན་ཕྱི་དྲོ་རབ་གསལ་དུ་བསྡད་སྐབས་ཆུ་བོ་རིའི་ཐང་དུ་འཇའ་ཚོན་སྣ་ལྔ་གུར་ཕུབ་པ་འདྲ་བ་ཞིག་འདུག་པ་མཆོད་དཔོན་པ་འཁྲིས་ན་ཡོད་པར་བསྟན་པས་དེ་ལ་སྒྲོ་བཏགས་ཞལ་གཟིགས་ཀྱི་གྲགས་པ་བྱུང་བ་ལ་འཇའི་ཞལ་ནི་གཟིགས་ངེས་རང་ཡིན། ཉང་ཟབ་ཀྱི་གྲུ་བཏོན་ཟླའུ་ལ་བརྒྱུད་དཔལ་དེ་བས་གུང་གི་དྲོ་དྲངས་ཏེ་ལུང་བཟང་དུ་བསྡད། དེར་སྣ་དཀར་རྩེ་ཞབས་དྲུང་སྐུ་མཆེད་དང་ཨྱོན་མཚོ་མོའི་སྤྲུལ་སྐུ་བདེ་ཆེན་འཕྲིན་ལས་མཚོ་མོ་རྣམས་བྱོན། རྩེ་ནས་གཞིས་ལེན་དང་རྙེད་པ་རྒྱས་པར་མཛད། ཞབས་དྲུང་མ་ཆེན་དེ་ཆོས་ཕྱོགས་ཀྱི་མཁྱེན་པ་རྒྱས་དྲགས་པས་ཁོང་མཆོད་ཡོན་གོ་ལྡོག་པ་ཞིག་སྣང་། རྩྭ་ཐང་རྒྱ་ཐང་དུ་ཉ་ཤུལ་ཐབས་མཁས་ཀྱིས་སྒར་སྟོན་རྒྱས་པར་བཏང་། ཧོར་གྱི་སྡེ་དམངས་ལ་སྤྱན་རས་གཟིགས་གཙོ་འཁོར་གསུམ་པའི་རྗེས་གནང་བྱས། ཉེར་གཉིས་ལ་རྒྱ་ཆུ་ཚན་ཁར་སླེབས། འདི་ཕན་རྐང་པར་ན་ཚ་ཆེར་མེད་པ་ལ་སྐྲངས་པོ་མ་ཞི་བའི་བོད་ལྷམ་ཐར་གྱིན་མེད་ཀྱང་བཅག་མལ་བྱས་ཏེ་ཆུ་ཚན་བརྒྱབ་པས་གཞི་མེད་དུ་བདེ་བའི་ཉེར་བཞི་ལ་དགའ་ལྡན་བྱམས་པ་གླིང་དུ་འབྱོར། ཚོགས་པས་ཡུན་
འཚོའི་སྨོན་ལམ་བཏབ་ཅིང་ལམ་རིམ་ཆུང་བ་ནས་ཆོས་ཐུན་གཅིག་བཤད། ཉེར་དྲུག་ལ་རིན་ཆེན་སྤུངས་པའི་རྫོང་དུ་དྲུང་འཁོར་རྣམས་ཀྱིས་རྟ་བསུ། ཆོས་ལུང་ཚོགས་པ་དང་སྐྱེད་ཚལ་བ་སོགས་ཆོས་སྡེ་ཁག་གི་སེར་སྦྲེང་གི་མདུན་བསུས་ཏེ་འབྱོར། སྐྱ་སེར་གྱི་ཕྲད་མི་ཤིན་ཏུ་མང་བ་བྱུང་། གཤིན་རྗེའི་མཆོད་རྟེན་བཅས་ཆོག་དང་འཆི་བདག་ཞལ་དབྱེ་ཟུར་པ་ཞིག་འདུག་པ་མཆོད་དཔོན་པ་དང་སྔགས་བན་ངག་དབང་འཕྲིན་ལས་གཉིས་ལྟར་བཏང་བ་སྔར་རིན་སྤུངས་པ་དང་འབྲི་གུང་པ་ཟློས་པའི་དུས་ཀྱི་འཁོར་ལིང་ལས་ཕྱི་སྐོར་རོང་ཕྱོགས་སུ་སྔགས་འཆང་ཚད་ལྡན་མེད་པའི་ཉམས་ཀྱིས་འབྱིན་འཇུག་གང་ཡང་མ་བྱས་སྣང་། སྐྱེད་ཚལ་བ་རྣམས་ཀྱིས་ཆོས་འབྲེལ་དགོས་ཚུལ་བླ་མ་མ་ཎི་བ་བརྒྱུད་ཟེར་བར་ཚར་གསུམ་ཁུག་པའི་བྱིན་རླབས་ཤིག་བྱེད་རྩིས་ཡིན་རུང་སྡེ་པས་མགྲོན་གཉེར་ལ་སྒྱུར་སྦྱང་གནང་བས་སྒོ་འགགས། དེའི་གྲགས་པས་ཆོས་འབྲེལ་ཉན་འདོད་ཡོད་པ་མང་པོ་ཞིག་གིས་འཐེན་སྐད། དཔོན་སློབ་པཎ་ཆེན་རིན་པོ་ཆེ་ཚུར་ཆིབས་ཁ་བསྒྱུར་བའི་མཆོད་ཡོན་རྣམས་རིན་སྤུངས་བསྒྲལ་ནས་འབྱོན་མི་དགོས་པའི་ས་བཅད་ལྟར་བཀྲ་ཤིས་ལྷུན་པོ་བླ་བྲང་གི་སྐུ་ཆས་ཀྱང་ཕྱིར་བསྐྱེད་པའི་ཕེབས་མ་རག་ཡིན་འདུག་རུང་ཆར་ཞོད་ཆེ་ཞིང་གཙང་ཆུ་རྒྱས་པའི་གཞུང་ཀོ་ལ་སྐུ་ཉེན་དང་པཎ་ཆེན་རིན་པོ་ཆེ་སྐུ་ན་ཧ་ཅང་ཕེབས་ཆེས་པས་སྡེ་པ་ཐུགས་འགྱུར་བས་མཆོད་ཡོན་རྣམས་ཡར་ཕེབས་པར་ཐག་བཅད་པའི་ཞུ་ཡིག་སྐྱེལ་བར་ཨ་དྲུང་རྟ་ཞོན་ཞིག་འཕྲལ་དུ་གནང་སོང་། ཟླ་བ་བདུན་པའི་ཚེས་གསུམ་ལ་རིན་སྤུངས་ནས་བཏེག །ལྷན་དུ་འབྱོར། པ་སྣམ་བརྒྱུད་ཚེས་དྲུག་གི་ཉིན་བཀྲ་ཤིས་ལྷུན་པོ་ཚོགས་ཆེན་དགོན་ལག་
དང་བཅས་པའི་སེར་སྦྲེང་། ཞ་ལུ་བའི་མཆོད་གར། སྤྱི་བླ་བྲང་དང་གཞིས་རྩེ་ཁུལ་དྲུང་འཁོར་གྱི་རྟ་བསུ། སྐྱེ་བོའི་ཁྲོམ་གྲངས་མེད་པའི་མདུན་བཏར་ཏེ་ཆོས་གྲ་ཆེན་པོ་བཀྲ་ཤིས་ལྷུན་པོ་དཔལ་གྱི་སྡེ་ཆེན་པོར་འབྱོར། དེ་ནུབ་བླ་བྲང་རྒྱལ་མཚན་མཐོན་པོའི་ཚོམས་ཆེན་དུ་དཀར་སྤྲོའི་ཐོག་པཎ་ཆེན་ཆོས་ཀྱི་རྒྱལ་པོ་དང་མཇལ་ཏེ་བཀའ་མཆིད་ཞིབ་རྒྱས་སུ་སྩལ། སྤྱི་བླ་བྲང་སོ་སོས་གཞིས་ལེན་དང་སྟེར་སྦྱིན་ཉིན་གཉིས་སུ་རྒྱས་པར་བཤམས། པཎ་ཆེན་རིན་པོ་ཆེའི་བཀའ་ཕེབས་དང་བསྟུན་ཚོགས་ཆེན་ལ་ལམ་རིམ་ཆེན་མོའི་ཆོས་ཐུན་གཅིག་དང་གླེགས་བམ་ཕ་ཆོས་ནས་ཆོས་ཐུན་གཉིས་ལ་ཞིབ་བཤད་ཕུལ། བྱམས་ཆེན་གྱིས་གཙོས་མཆོད་ཁང་གསར་རྙིང་རྣམ་གྲངས་མང་བ་འདུག་པ་རྣམས་ཞིབ་པར་མཇལ། ཚེས་བཅུ་གཅིག་ལ་གཞིས་ཀ་རྩེར་ཕྱིན། བཅུ་གསུམ་ལ་དཔོན་སློབ་པཎ་ཆེན་རིན་པོ་ཆེ་ཕེབས་པའི་ཉེར་དགུའི་བར་སྟན་ཆགས། གནངས་ཆགས་ཀྱིས་མཇལ་ཞིང་ཚེ་དབང་འཇམ་ལུགས་ལྷ་ལྔ་མ་བརྒྱ་རྩ་ཞུས། བླ་མ་ཡི་དམ་ཆོས་སྐྱོང་མཐའ་དག་ཚང་བའི་དབེན་ས་སྙན་བརྒྱུད་དུ་གྲགས་པ་གནང་ཞིང་བརྗེད་ཐོ་བཏབ། རྒོད་ཚང་རི་ཁྲོད་པ་སོགས་ཕྱོགས་འདུས་བརྒྱ་སྐོར་ལ་སྙིང་པོ་དོན་གསུམ། དབུ་མའི་ལྟ་འཁྲིད །བླ་མའི་རྣལ་འབྱོར། གཏོར་མ་བརྒྱ་རྩ། བློ་སྦྱོང་དོན་བདུན་མ་རྣམས་ཀྱི་བཀླགས་ལུང་། ཤངས་དགའ་ལྡན་ཆོས་འཁོར་བར་འཇུག་པ་དང་བསྟོད་པ་བརྟན་བཞུགས་ཐོར་བུའི་ལུང་། རྟག་བརྟན་ཚོགས་པར་བྱང་ཆུབ་ལམ་གྱི་རིམ་པ་ནས་ཆོས་ཐུན་གཅིག་ལ་ཞིབ་བཤད། ལྷ་རིན་པོ་ཆེ་དང་རྟ་ནག་མཁན་པོར་ཚེ་རྟ་ཟུང་
འབྲེལ་ཕུལ་གངས་ཅན་མཁན་པོ་གནས་རྙིང་ཞབས་དྲུང་སྐུ་འབྲིང་གིས་གཙོས་གཞིས་རྩེ། ཤངས། འུ་ཡུག །པ་སྣམ་སོགས་ཀྱི་ལྷ་སྡེ་མི་སྡེ་ཚོས་ཟང་ཟིང་གི་བདོག་པ་དང་བཅས་ཕྲད་མི་ཉིན་སྟར་ཟིང་ལོང་ངེ་བས་གཡེངས། རྒོད་ཚང་རི་ཁྲོད་པ་རྣམས་ཀྱིས་བསྐུལ་བའི་དཔོན་སློབ་པཎ་ཆེན་རིན་པོ་ཆེའི་གསོལ་འདེབས། གྲ་ལྡུམ་པོ་བ་དང་དཀའ་ཆེན་དགེ་འདུན་ཚུལ་ཁྲིམས། སྐུ་འབུམ་སྔགས་གྲ་སློབ་དཔོན་བསོད་ནམས་རིན་ཆེན་གསུམ་གྱི་ངོར་བདག་བསྟོད། དགེ་སློང་གྲགས་རྒྱན་གྱིས་བསྐུལ་ཏེ་སྙིང་པོ་དོན་གསུམ་གྱི་དམིགས་འཁྲིད་ཚིགས་བཅད་མ། རྒྱུ་མཚན་ཤེས་ཏེ་བུ་སྟོན་ཐམས་ཅད་མཁྱེན་པར་དད་པས་ཀུན་ནས་བླངས་ཏེ་བསྟོད་པ་རྣམས་བྲིས། ལྕང་ར་བ་མགོན་པོ་ཚེ་བརྟན་གྱིས་སྙན་ངག་གི་ཡི་གེ་བྱུང་བ་དེ་ལན་ཀྱང་བསྐུར། སྔོན་གྱི་བླ་མ་མང་པོའི་རྣམ་ཐར་བཞིན་གནས་གང་བཟང་མཇལ་མོས་ཡུལ་གྱི་བླ་མར་ཆོས་ཞུ་ཞིང་སྣོད་ལྡན་ལ་ཕར་སྟོན་པའི་རང་དབང་ནི་གཅིག་ཏུ་ཆེན་པོའི་སྟོང་འུར་གྱི་སྒྲོབ་འདི་དང་གཉིས་སུ་གང་ཡང་བྱེད་མི་བདེ་བའི་ལས་ཀྱིས་གཞན་དབང་དུ་གྱུར་པས་བྲེལ་བ་ཆེར་མ་བྱུང་གཤིས་མི་དམངས་འདི་ཚེ་དབང་ལ་དགའ་བ་ནས་སྤྱི་དབང་ཞིག་བྱས་ན་ཡོད་འདྲ་ཞེས་སྡེ་པར་ཞུས་པས་དེ་རྩིས་ཀྱི་སྡེ་པ་ནོར་བུས་ནང་སོ་རྣམ་པ་དྲུང་གཟིམས་དྲག་ཞན་དང་བསྟུན་པའི་དབང་ཡོན་གྱི་ཐོ་སྒྲིགས་བྱེད་འདུག་པར་བརྟེན་དེ་རིགས་ཟ་འདོད་ཀྱི་ཁྲལ་བཀལ་བའི་གཏམ་ངན་ལ་བག་ཚ་སྟེ་དབང་བཤོལ། ཆུ་རྟ་གཙང་ཕྱོགས་སུ་ཡོང་སྐབས་དུས་ཟིངས་ཀྱི་མཇུག་ཏུ་སོང་བའི་ཤིན་ཏུ་རང་དབང་མ་འདུས་པས་ད་ལམ་གངས་ཅན་ཆོས་འཕེལ། སྣར་ཐང་། ཁྲོ་ཕུ། བོ་དོང་ཨེ།
དཔལ་ལྡན་ས་སྐྱ། ཁའུ་སྐྱེད་ལྷས། གྲང་མོ་ཆེ། ཐུབ་བསྟན་དགེ་འཕེལ། ངོར། ཐར་པ། ཞ་ལུ་སོགས་དགོན་གནས་མང་ཙམ་ཞིག་མཇལ་བར་འདོད་པ་སྡེ་པའི་ཐུགས་ལའང་མི་བབས་པ་མི་འདུག་པས་ས་སྐྱ་ཞབས་དྲུང་རིན་པོ་ཆེ་གདན་སར་མཇལ་མཆོག་རྩིས་དང་ལ་སྟོད་པ་རྣམས་གཞིས་རྩེར་མི་ཡོང་བའི་རྒྱུ་མཚན་གནང་སོང་རུང་འདི་ལོ་བྱང་ནས་ཁུན་འདུ་ལེན་ཨོ་པ་ཤི། ཨོ་ཆིར་ཐུ་ཐའི་ཇི། དཔོན་མོ་སའི་ཁན་ཇུས་གཙོས་ཡོང་མི་མང་བར་རྒྱལ་པོ་ཐུགས་འཁོལ་བས་གནས་མཇལ་བཤོལ་ཏེ་མྱུར་དུ་དབུས་ཕྱོགས་སུ་འདེགས་དགོས་ཚུལ་གསུང་བ་ལ་བརྟེན་གདན་ས་གོང་གིས་དབུ་གནང་ལ་སྟོད་ལྷོ་བྱང་རྣམས་གཞིས་རྩེར་འཛོམ་དགོས་པའི་སྔ་མའི་བསླབ་སྟོན་ཨར་ཁྱ་སློག །ཟླ་བ་བརྒྱད་པའི་ཚེས་འགོ་ལ་གདན་ས་གོང་ནས་ཞབས་དྲུང་རིན་པོ་ཆེ་ཕེབས་པ་དང་མཇལ། དམ་པའི་ཆོས་དང་འབྲེལ་བའི་གསུང་གླེང་ཞིབ་རྒྱས་ཤིན་ཏུ་སྨར་བ་བྱུང་། ཞབས་དྲུང་འདི་ཉིད་ཆོས་ཕྱོགས་སུ་མཁྱེན་པ་དང་གསན་གཟིགས་ཆེ་བའི་རྣམ་དཔྱོད་བླ་ཆེན་ཀུན་གྱི་ནང་ན་འགྲན་ཟླ་དང་བྲལ་བ་ལྟ་བུར་སྣང་། གདན་ས་ཆེན་པོ་དགའ་ལྡན་ཤར་པ་འཇམ་དབྱངས་བྱམས་པ་རྣམ་རྒྱལ་གེགས་མེད་དུ་ཁྲིར་ཕེབས་ཐུབ་ན་བསྟན་པའི་གསལ་བྱེད་དུ་འགྱུར་བ་ཡོང་འདུག་རུང་སྔར་ཤར་ཆེན་ནམ་མཁའ་རྒྱལ་མཚན་ཀྱང་གེགས་དབང་དུ་སོང་བའི་སྲི་ངན་ལྟ་བུས་དགའ་ལྡན་ཡིད་དགའ་ཆོས་འཛིན་དུ་གཤེགས་པའི་ཐུགས་དམ་གསལ་འདེབས་པ་འབྱོར་དོན་བཞིན་དགོངས་པ་ཆོས་དབྱིངས་སུ་རྫོགས་པའི་སྨོན་ལམ་ཡང་དག་དང་དངོས་བཤམས་ཀྱི་མཆོད་པ་བྱས། ཚེས་བདུན་ལ་སྲད་རྒྱུད་པ། རིན་
ཆེན་རྩེ་པ་ཆོས་སྡེ་བ་དང་བཅས་པས་རྙེད་པ་བསྟར་ཞིང་། མཁན་ཆེན་ལོ་ཙཱ་བ་ཆེན་པོས་དབུ་མཛད་ངམ་རིང་ཆོས་སྡེའི་སློབ་དཔོན་ངམ་རིང་ཁུལ་གྱི་དྲུང་འཁོར་ཚོ་དང་ཕྲད། བྱང་ལྷ་རྩེ། སྟག་རྩེ། ལྷོ་ཤེལ་དཀར་གྱི་ལྷ་སྡེ་མི་སྡེ་རྣམས་ཀྱང་འཇལ་བར་བྱུང་ཞིང་བྱང་གཙང་གི་དུས་འདར་གདོང་གཉིས་ནང་སོ་རྣམ་པ་ཆེ་བ་ཡིན་འདུག་ཀྱང་འདི་སྐབས་སྡེ་པ་ནོར་བུའི་བན་རྩས་འདར་པ་བསོད་ནམས་ལྷུན་གྲུབ་རྡོ་རྗེའི་གྲལ་འགོར་ས་ལུང་པ་སྡོད་པར་སྣང་། ཁམས་གཞི་རྩ་སྡེ་པ་དང་ཤངས་བཀྲ་ཤིས་རྩེ་པ་མ་བུ་ཅན་ལ་གྲུབ་རྒྱལ་ལུགས་ཀྱི་ཚེ་དབང་། དཔལ་འཁོར་ཆོས་སྡེའི་མཁན་སློབ། རྒྱལ་རྩེའི་དྲུང་འཁོར་སྐྱ་སེར་བསྡོམས་པར་སྙིང་པོ་དོན་གསུམ་གྱི་འཁྲིད་ལུང་དང་རྒྱལ་སྲས་ཐོགས་མེད་པས་མཛད་པའི་བླ་མ་སྤྱིི་བསྟོད་ཀྱི་ལུང་བཀླགས། སྐྱར་པོ་བ་མགོན་པོ་རབ་བརྟན་གྱི་ཁ་ཏོན་དུ་ཨྱོན་རིན་པོ་ཆེ་ལ་བརྟེན་པའི་བླ་མའི་རྣལ་འབྱོར་བྲིས། དེ་སྐབས་ཡ་མ་འགྲམ་འགྲིག་གི་ནད་རོ་ཞིག་འཕར་བའི་ཇའི་སང་སྡེ་པ་དང་མཆོད་དཔོན་པ་གཉིས་ཀྱིས་ནད་གཡོག་དང་དཔོན་ཚང་བྱང་ངོས་པས་སྨན་པ་མཛད་དེ་འགོལ་སྡོད་ཀྱི་འཕྲོད་བསྟེན་ངོས་འགའ་ཞིང་རབ་འབྱམས་པ་གྲགས་པ་རྒྱལ་མཚན་གྱི་ཡིག་ལན་སྙན་ངག་གི་ལམ་ནས་དྲངས་པ། དཔོན་སློབ་པཎ་ཆེན་རིན་པོ་ཆེའི་བརྟན་བཞུགས་དང་ཞ་ལུ་རི་མཐིལ་སྤྱི་སོས་བསྐུལ་ནས་ངེད་རང་ཡུན་འཚོའི་ཚིགས་བཅད་ཀྱི་སྨོན་ལམ་རྣམས་བྲིས། ལྷ་རྩེ་ཆོས་སྡེའི་སྐྱི་ལུང་རབ་འབྱམས་པ། རྟ་ར་བ་སོགས་ལྔས་གསར་རྩོམ་ཕར་ཕྱིན་དང་དབུ་མ། རྣམ་འགྲེལ་གྱི་ཡིག་ཆ་ཞིག་གི་རྒྱུགས་སྤྲད། ཉེ་སྐོར་དུ་ས་བཟང་པོ་ཞིག་འདུག་པས་སྐུ་པར་མང་པོ་ལག་བསྟར་དུ་བཏབ།
མཆོད་ཡོན་གཉིས་ལྷན་རྒྱས་ཉེར་གཅིག་ལ་བཀྲ་ཤིས་ལྷུན་པོར་ཕེབས། དཔོན་སློབ་ཞབས་དྲུང་གདན་དྲངས་པའི་ཚོགས་ཆེན་དུ་བརྟན་བཞུགས་རྒྱས་པ་ཕུལ། འབྲས་སྤུངས་སྤྱི་སོས་བསུ་བར་ཤག་སྐོར་སློབ་དཔོན་མདོ་སྡེ་རྒྱ་མཚོ་བཏང་། ཉེར་གསུམ་ལ་ངམ་རིང་དང་དཔལ་འཁོར་ཆོས་སྡེའི་མཁན་པོ་གཉིས་དང་ཞིབ་ཏུ་མོལ། བཟང་ལྡན་མཁན་པོ་ཞབས་དྲུང་རྒྱལ་རྩེ་བ་སྲད་རིན་ཆེན་རྩེ་པ་གཉིས་ལ་གྲུབ་རྒྱལ་ལུགས་ཀྱི་ཚེ་དབང་། ཕྱག་དྲུག་པའི་རྗེས་གནང་། ཆོས་རྗེ་འུག་བྱ་ལུང་པ་ཡབ་སྲས། སྒྲོལ་མ་ནས་སྐུ་མཆེད། སྙིང་རི་ཆོས་རྗེ་སོགས་ལ་ཆོས་རྒྱལ་བྱང་བའི་གཏེར་གསར་ཀརྨ་གུ་རུའི་སྲོག་དབང་སྒྲུབ་སྐོར་གྱི་ལུང་དང་བཅས་པ། རྒོད་ཚང་རི་ཁྲོད་པ། ཐོན་དམག་དཔོན་པ་གཞི་རྩ་བ། རིན་ཆེན་རྩེ་ནས་ཅན་བརྒྱ་སྐོར་ལ་བཅུ་གཅིག་ཞལ་གྱི་རྗེས་གནང་དང་ལྷ་རྩེ་ཆོས་སྡེའི་གྲ་པ་སུམ་ཅུ་སྐོར་གྱིས་རབ་བྱུང་བསྒྲུབས། ཉེར་བདུན་ལ་རྒྱལ་པོ་མ་འཇུ་བའི་སྙུན་ནད་ཀྱིས་བཏབ་སྟེ་རྐྱེན་སེལ་གྱི་ཚེ་རྟ་བྱབ་ཁྲུས་ཕུལ། གནས་ཆུང་ཆོས་རྒྱལ་གྱིས་རིན་ཆེན་སྤུངས་པ་མ་བསྒྲལ་ན་ཞེས་གསུངས་པ་ཐོག་ཏུ་བབས། རྒྱལ་པོ་སྐུ་ཁམས་ཅུང་ཞིག་བདེ་བ་བྱུང་བས་ཧོར་ཟླ་དགུ་པའི་ཚེས་གསུམ་ལ་ཆས་པའི་བཀྲ་ཤིས་ལྷུན་པོའི་མདུན་དུ་རྒྱལ་མཚན་མཐོན་པོ་ནས་གྲ་སྒྲིག་གནང་འདུག་པ་བཞིན་གུང་གི་དྲོ་དང་བཅས་དཔོན་སློབ་པཎ་ཆེན་རིན་པོ་ཆེ་དང་མཇལ་ཏེ་གཟིམས་གུར་ནང་དུ་ཇ་འདེབས་བཞི་ཙམ་གྱི་རིང་བཞུགས་པའི་གསུང་གླེང་འཕེལ། དེ་ནུབ་ཞ་ལུ་གསེར་ཁང་དུ་སྐྱ་སེར་གྱིས་མདུན་བསུས་ཏེ་འབྱོར། སང་སྔ་དྲོ་
རི་སྦུག་ཏུ་ཕྱིན་རྣལ་འབྱོར་དབང་ཕྱུག་བིཪྺ་པའི་བུམ་པར་ཐམས་ཅད་མཁྱེན་པ་བུ་སྟོན་རིན་པོ་ཆེས་རྒྱུད་སྡེ་བཞིའི་དབང་གི་ཆུ་བོ་རྣམས་གཅིག་ཏུ་བསྡུས་པའི་བུམ་ཆུ་ཉམས་མེད་ཀྱི་རྒྱུན། ཀུན་མཁྱེན་བུའི་པྲོོག་ཞུ་རྡོར་དྲིལ། རྒྱ་དཔེ། གསལ་བྱེད། ནང་རྟེན། དབང་ཁང་རྣམས་ཞིབ་པར་མཇལ་ཞིང་། རི་སྦུག་དབུ་མཛད་རིན་ཆེན་བསོད་ནམས་མཆོག་གྲུབ་ཀྱིས་ཕྱག་ཆེན་མཛད་ནས་གསུང་བཤད་ཞིབ་ཏུ་བྱུང་། ནང་རྟེན་ནས་བྱིན་རླབས་རྟེན་ཁ་ཡར་ཞུས། ཕྱི་དྲོ་གསེར་ཁང་གི་རྡོ་གཅལ་ཆེན་མོར་རྣམ་སྲས་རྟ་བདག་བརྒྱད་ཀྱི་འཆམ་སྐུ་ཆོ་ག་དང་འབྲེལ་བར་སྤྱན་དྲངས་པའི་ལྟད་མོ། ཐུགས་རྗེ་ཆེན་པོ་རང་བྱོན། བཀའ་འགྱུར། ཇོ་མོ་རྒྱ་གར་མ། སྟེང་གི་དཀྱིལ་འཁོར་དང་མགོན་ཁང་སོགས་གནས་རྣམས་ཞིབ་པར་མཇལ་སྨོན་ལམ་གྱིས་མཚམས་སྦྱོར་བྱས། མ་ཧེ་ཡབ་ཡུམ་གྱི་ཞལ་འབག་དུས་མིན་དུ་ཞལ་འབྱེད་སྲོལ་མི་འདུག་ཀྱང་ཞལ་ཕྱེ་བའི་སྙན་དར་དམོད་ནས་གཏོར་ཏེ་འཕྲིན་ལས་བཅོལ། རི་མཐིལ་གྱི་ཚོགས་པ་ལ་ཐམས་ཅད་མཁྱེན་པ་བུའི་སྐུ་བསྟོད་གསར་རྩོམ་དང་ཁོང་རང་དཔོན་སློབ་ཀྱིས་བསྐུལ་བའི་སྨོན་ལམ་ཚིགས་བཅད་ཀྱི་ལུང་ཕུལ། དེ་ནུབ་པ་རྣམ་དུ་འབྱོར་བའི་གླིང་ཁར་སྒར་ཕབ། སྤོས་ཁང་མཁན་པོ་མཚན་སྒྲོ་མཁན་པོ། པ་རྣམ་ཁུལ་གྱི་དྲུང་འཁོར་སོགས་ཕྲད་མི་མང་དུ་བྱུང་། ཚེས་དྲུག་བདུན་ལ་བཅག་ཞག་བྱས་པའི་ནཱ་རོའི་ཐུགས་དམ་ཀྱེ་རྡོར་དཀྱིལ་ཐང་། ཁ་ཆེ་པཎ་ཆེན་དང་དཔྱལ་ལོ་གཉིས་ཀྱི་བཞེས་ལྷུང་། པཎ་ཆེན་གྱི་འཁར་བསིལ། དུང་རང་སྐད་མ། རྒྱ་དཔེས་གཙོས་པའི་ཐར་པའི་ནང་རྟེན་འགངས་ཆེ་བ་རྣམས་གདན་དྲངས་ནས་མཇལ་ཞིང་སྨོན་
ལམ་བཏབ། ཀྱེ་རྡོར་རྒྱ་རིས་མའི་དུར་ཁྲོད་དེ་སྲུང་འཁོར་གྱི་ཕྱི་ནང་གཉིས་ཀར་ཚར་རེ་སྣང་ཞིང་ཡབ་ཀྱི་བཞུགས་ཚུལ་བླ་མ་དམ་པའི་ཡན་ལག་དྲུག་པ་དང་མཐུན། ཚེས་བརྒྱད་ལ་པ་རྣམ་ནས་བཏེག །བཅུ་ལ་རིན་སྤུངས་མཁའ་རུ་སྟེང་དུ་སླེབས་རྒྱལ་པོ་སྐུ་ངལ་གསོ་བ་དང་སྦྲགས་ཞག་ལྔ་བསྡད། ཚོགས་ཆོས་ལུང་པའི་ནང་རྟེན་འཕགས་པ་མཆེད་བཞིའི་ནང་ཚན་ཡིན་ནམ་ཟེར་བའི་ལྡེམ་སྐུ་ཞིག །རྣམ་སྲས་ལྗངས་ཡུལ་མ་གཏེར་བྱོན་འཁྲུལ་མེད། ཤཱ་རིའི་བུའི་ཚེམས། པཎ་ཆེན་རྫ་སྐུ་གཉིས། ཀླུ་སྒྲུབ་ཀྱི་ཕྱག་བཟོའི་ཤིང་ཤ་ཁ་ལའི་སྤྱན་རས་གཟིགས་སེང་གེ་སྒྲ། ཁ་ཆེ་པཎ་ཆེན་གྱི་སྣམ་སྦྱར། ལྷུང་བཟེད། ཞབས་ཕྱགས། ཞང་སྟོན་བསོད་ནམས་གྲགས་པ་དང་སེམས་དཔའ་ཆེན་པོ་བཟང་པོ་དཔལ་གྱི་སྣམ་སྦྱར། གཙང་པ་རྒྱ་རས་ཀྱི་སྐུ་ཚིགས་ལས་གྲུབ་པའི་སྤྱན་རས་གཟིགས། ཞུན་ཐིགས་ཀྱི་གསང་འདུས། བདེ་མཆོག །སྤྱན་རས་གཟིགས། ཛམ་བྷ་ལ། ཇོ་བོ་ཆེན་པོའི་རྒྱ་དཔེ་སོགས་ནང་རྟེན་དངོམས་ཆེ་བ་འདུག་པ་རྣམས་ཞིབ་ཏུ་མཇལ་ཞིང་སྨོན་ལམ་ནན་ཏན་དུ་བཏབ། རྒྱལ་རྩེ་རྫོང་སྡོད་སྒོ་མ་ཤག་སྲས་པོ་དངོས་གྲུབ་དང་རིན་སྤུངས་རྫོང་སྡོད་དྭགས་པོ་བཀྲ་ཤིས་གཉིས་ལ་ཚེ་རྟ་ཟུང་འབྲེལ་བསྐུར། གོང་ར་ལོ་ཙཱ་བ་འདས་པའི་གདན་སར་རིན་པོ་ཆེ་སྨན་ལུང་ནས་བསྐོས་པའི་སྣང་རྩེ་བ་ཕྱོགས་ཀྱི་གཏེར་ཆོས་རྣམས་མི་བྱེད་པའི་སྡེ་པས་བསླབ་སྟོན་ཞིབ་རྒྱས་གནང་བའི་སྟབས་རིན་པོ་ཆེས་དེ་དོན་ལྷུར་ལེན་ལས་སྤྲོས་པ་མཛད་ཐེབས་མི་འདུག་རུང་གྲ་པ་རྣམས་གངས་རི་སྔོ་སྣང་གི་ལོག་ཤེས་ཁོ་ནས་དུས་འདའ་བ་ཞིག་བྱུང་ཚོད་དུ་གདའ། ཆོས་རྒྱལ་བྱང་པའི་གཏེར་
གནས་ཁམ་བུ་ལུང་དུ་དར་ལྕོག་འཛུགས་ཤིང་བསངས་གཏོང་བར་དགེ་སློང་ཆོས་འཕེལ་བཟང་པོ་དང་ངག་དབང་བཟང་པོ་དང་ངག་དབང་འཕྲིན་ལས་གཉིས་བཏང་། ཚེས་བཅུ་བཞི་ལ་བཏེག་པའི་བྱམས་ཆེན་དུ་གུང་གི་དྲོ་བབས། དེ་ཞོར་གསེར་མགོན་མཇལ་བ་ལ་འཕགས་པ་རིན་པོ་ཆེའི་དུས་ཀྱི་གུར་མགོར་རྒྱ་ནག་མ་ཡིན་ཟེར་ཡང་སྤྲུལ་སྐུ་སྣ་ཚོགས་རང་གྲོལ་གྱིས་བལ་པོ་མཁས་པ་བཀུག་ནས་བཞེངས་པའི་ཞལ་བཞི་པ་དངོས་ཤིན་ཏུ་གཙང་བ་ཞིག་ཡིན་འདུག་པ་དོན་ལ་གནས་ཀྱང་འདི་སྐབས་བལ་ལྷ་ཤིན་ཏུ་དངོས་མི་གཙང་བའི་མགོན་པོ་ཞལ་ཁྲ་ཅན་གྱི་སྐུ་ཞིག་སྣང་བའི་རྟིང་སོར་མཁན་པོ་དོགས་བདེ་བ་ངག་དབང་རྣམ་རྒྱལ་དང་འཕྲོས་གླེང་བྱུང་བར། བླ་མ་རྒྱ་མ་བའི་དུས་རྔན་པ་བཟས་ནས་གཟིམས་ཁང་གོང་གི་སྐུ་གསར་བ་ཞིག་དང་བརྗེ་འཁྲུལ་བྱས་ཟེར་བ་ད་ལྟའི་སྐུ་དེ་དང་གཟིམས་ཁང་གོང་དུ་དགེ་སློང་བསམ་རྒྱལ་གྱིས་དོ་དམ་བྱས་བལ་པོ་མི་མཁས་པ་ཞིག་གིས་སྐུ་ཁ་ཤས་བཞེངས་སོང་བའི་དབྱིབས་དང་ཞུས་དག་ཕེར་བ་ལྟ་བུར་འདུག་པས་བདེན་པ་འདྲ། ཚེས་བཅུ་བདུན་ལ་ལུང་བཟང་དུ་སྣ་དཀར་རྩེ་ཞབས་དྲུང་སྐུ་མཆེད་གཉིས་དང་བསམ་སྡིངས་སྤྲུལ་སྐུ་ཅན་འབྲོག་ཕྱོགས་ཀྱི་དྲག་ཞན་མང་དུ་བྱོན་པ་རྣམས་དང་མཇལ། ཞབས་དྲུང་སྐུ་མཆེད་ནས་ལུགས་ཟུང་དང་འབྲེལ་བའི་གསུང་འཕྲོས་ནི་ཤིན་ཏུ་འཕེལ། སྒར་སྟོན་ཀྱང་ཡུལ་ལུགས་དང་བསྟུན་པའི་བཟབས་རྒྱས་སུ་མཛད་སོང་རུང་སྤྱང་ཀི་རྟ་ཟན་རྣམས་ལུག་རོས་འགྲངས་པའི་གསུང་འཕྲོས་མི་མཛད་འདུག །དཔོན་གཡོག་བརྒྱ་སྐོར་ལ་ཆག་ལུགས་ཀྱི་ཚེ་དཔག་མེད་དཀར་པོའི་རྗེས་གནང་ཕུལ། ཚེས་བཅུ་དགུ་ལ་གན་པ་ལ་བབས་མཚམས་སུ་
བསྟན་འཛིན་དཔོན་པོ་དང་ཨོ་ཆིར་ཐུ་ཐའི་ཇིའི་མི་སྣ་ཇའི་སང་འབྱོར། སང་གུང་ཚིགས་ཐོག་བདེ་ཆེན་ཆོས་འཁོར་བ་དང་གྲུ་ཁར་རིན་པོ་ཆེ་ལྕགས་ཟམ་པ་གཉིས་བྱོན། གྲུ་ཐོན་པའི་ཆུ་འགྲམ་དུ་རྒྱུགས་ཇ་བྱུང་བར་བརྟེན་དེར་ཚོགས་གྲལ་བསྒྲིགས་པའི་ཐོག་རྒྱལ་པོ་གྲུ་བཏོན་ནས་ཕེབས་པ་ཞལ་དབུགས་སྟོད་དུ་འཚངས་པའི་རྐྱེན་གྱིས་བྱིན་རླབས་ཞུ་བ་དང་སྦྲགས་ངེད་རང་གི་པུས་མོ་ལ་དབུ་བཙུགས་ནས་དྲན་མེད་ལྟ་བུར་སོང་བར་མི་ཚོགས་ཆེས་པ་དང་བཅས་ཚང་མ་ཧ་ལས་ཤིང་དེ་རིང་ལམ་སོ་ཁ་འདིར་ཤིན་ཏུ་མི་མཛེས་པ་ཞིག་ཡོང་བ་འདྲ་སྙམ་པའི་འཇིགས་སྐྲག་གི་མུར་རྡོ་རྗེ་དྲག་པོ་རྩལ་གྱི་བསྐྱེད་རིམ་ཞིག་བྱས་པར་གསལ་བ་བྱུང་བ་དང་ལྷན་དུ་བཀའ་སྒོ་ཕུལ་བའི་ཚེ་དབུ་བཏེག་ནས་སྤྱན་གྱིས་གཟིགས་ཤིང་གསུང་འཕྲོས་མཛད་པས་ཚང་མ་བློ་ལྷོད་པའི་ཚད་དུ་སོང་། ཆུ་ཤུར་དུ་བཅག་མལ་ཐོག་གོང་དཀར་དཀོན་གཉེར་དཔོན་པ་དང་ཆོས་སྡེའི་སློབ་དཔོན་གཉིས་དང་ཆུ་ཤུར་སྐོར་གྱི་གྲ་ཚང་ཁག་སོགས་ཕྲད་མི་མང་དུ་བྱུང་། ལམ་ཞོར་དུ་ཁོལ་མ་གཞིས་ཀའི་མགོན་ཁང་མཇལ་བར་ཕྱིན། བྱང་ཆུབ་གླིང་པ་རྣམས་ཀྱིས་བདག་རྐྱེན་མ་སྤྲད་པའི་གཞིས་ཀ་རྗེ་བཙུན་མི་ལའི་ཕ་གཞིས་ལྟར་ཞིག་རལ་དུ་སོང་། ཤོད་ཀྱི་གཤིན་རྗེ་ཁང་དེ་སྔགས་འཆང་ནུས་པ་ཅན་གྱིས་བསྒྲུབས་པའི་ཚིམ་རྔམས་དང་བྱིན་ཆགས་པར་སྣང་། མཆོད་རྟེན་གྱི་ཕྱག་ལེན་ནི་རྙིང་མ་བ་སྤྱི་དཔེ་འགྲེ་ལས་ཆོས་རྒྱལ་བྱང་པ་ཡབ་སྲས་ཀྱི་ཕྱག་བཞེས་དང་བསྟུན་ན་ཕྱོགས་དུས་ཐམས་ཅད་མདོར་བསྡུས་པ་ཞིག་འདུག །སྟེང་ན་གཤེད་དམར་རུ་མཚོན་དམར་པོའི་སྒྲུབ་ཁང་ཡོད་ཟེར་ཡང་ཞིག་རལ་གྱི་སྟབས་འགྲོ་
མ་ཐུབ། དེ་ནུབ་བཀྲ་ཤིས་རྩེར་རྒྱལ་པོ་ལ་ཚེ་དབང་ཕུལ། ཉེར་བཞི་ལ་སྙེ་ཐང་དུ་འབྱོར། ཉེར་ལྔའི་ཉིན་དགའ་གདོང་སྐྱོར་ལུང་པའི་བསུ་བ་དང་བཅས་ཁྲི་ཟམ་ཐོན་ཙམ་དེར་གུང་གི་དྲོའི་ཐོག་གཟིམས་ཁང་གོང་སྤྲུལ་པའི་སྐུས་གཙོས་སེར་འབྲས་ཀྱི་རྟ་བསུ་བ་རྣམས་འབྱོར། དགའ་གདོང་ཆོས་སྐྱོང་མིར་བརླམས་ཏེ་ཁོག་ཏུ་མཚོན་ལེན་པ་སོགས་འཚུབ་པ་མཛད་འདུག །སྙན་ཤལ་གྱིས་སྣེ་ལེན་ཙམ་མཛད་ན་སྙམ་ཡང་སྡེ་པ་ཐུགས་འུར་བ་ཞིག་དང་འགྲིག་ནས་བྱུང་མ་སོང་། ཆོས་སྡེ་ཆེན་པོ་དཔལ་ལྡན་འབྲས་སྤུངས་ཀྱི་སེར་སྦྲེང་དང་ལྷན་ཅིག་པར་སྤྲུལ་པའི་ཆོས་རྒྱལ་ཆེན་པོའང་ཁོག་ཏུ་ཕེབས་པའི་སྐྱེ་བོའི་ཁྲོམ་བརྒྱུད་དགའ་ལྡན་ཕོ་བྲང་དུ་སླེབས། ཨོ་ཆིར་ཐུ་ཐའི་ཇི་ཅན་འགྲུལ་པ་སྔོན་མ་རྣམས་རིམ་གྱིས་འབྱོར་པའི་ཐའི་ཇི་དཔོན་གཡོག་རགས་བསྡུས་ལ་ཕྱག་རྡོར་གོས་སྔོན་ཅན་གྱི་རྗེས་གནང་། གནམ་གང་གི་ཉིན་དགའ་ལྡན་ཁང་གསར་དུ་ཉིན་འཁོར་ལ་ཕྱིན་པའི་རྒྱལ་པོར་ཚེ་དབང་ལྕགས་སྡོང་མ། ཉང་ལུགས་ཀྱི་དྲག་པོ་མེའི་སྤུ་གྲིའི་དབང་ཕུལ་ཞིང་བྱད་འགྲོལ་ཞིག་བྱས། ཡང་ཧོར་ཟླ་བཅུ་པའི་ཚེས་གཅིག་ལ་དགའ་ལྡན་ཁང་གསར་དུ་ཕྱིན་རྒྱལ་པོའི་སྐུ་རིམ་ལ་པད་གླིང་བྲག་དམར་གྱི་གཏོར་བཟློག་ཞག་གསུམ་བསྒྲུབས་ཏེ་ཟོར་འཕངས་པའི་ནུབ་ནང་པ་ནུབ་པ་བའི་ཁང་པར་མེ་ཤོར་ཚན་ཆེ་ཙམ་བྱུང་བ་ནག་རྩིས་ལྟར་ན་ལྟས་ཤིན་ཏུ་ལོད་པ་འདུག་པས་སྐུ་རིམ་གྱིས་མི་བཟློག་པའི་མཚན་མར་གོ །ཚེར་གསེབ་ནས་ཚངས་པ་དུང་ཐོད་ཅན་གྱིས་ཚེ་དབང་སྟོང་ཚར་ཞིག་ཞུ་དགོས་པར་ལུང་བསྟན་པའང་སྐུ་ཚེ་ལ་བར་ཆད་ཆེན་པོ་ཡོད་པའི་བརྡ་སྟོན་དུ་སྣང་། མོ་ལུང་སེལ་བྱེད་དུ་དབེན་ས་བའི་འཇམ་ལུགས་
སུ་གྲགས་པའི་ཚེ་དབང་ལ་རྒྱུན་དུ་ལྷ་གྲངས་དང་བསྟུན་པའི་ཉེར་གཅིག་གིས་བརྒྱ་རྩ་འགྲོ་བར་འདུག་ཅིང་གསུང་རྒྱུན་དུ་རིང་ཁྱད་ཡོད་ན་བུམ་ནང་དུ་ལྷ་བརྒྱའམ་ལྔ་བཅུ་གང་འོས་བསྐྱེད་ནས་ཚེ་རིལ་གྲངས་མ་ཆད་ཕྱིན་ཚར་གཅིག་གཉིས་ལ་བརྒྱ་རྩ་འགྲོ་བ་གནང་རྒྱུན་ལྟར་སྟོང་རྩའི་ལུགས་ཤིག་ཕུལ། མཆོད་གཡོག་ཚེ་རིལ་བསྒྲིལ་བར་དཀའ་ཚེགས་ཆེ་བ་མ་གཏོགས་བླ་མ་ཟོར་ཡང་བའི་དཔེར་འོས་པ་ཞིག་ཡིན། མགོན་པོའི་རྗེས་གནང་བར་ཆད་ཀུན་སེལ་ཀྱང་བྱས། རྒྱལ་པོ་དངོས་འཛིན་ཆུང་ཞིང་རྒྱལ་མོ་མེད་པའི་སྟབས་ཕྱག་རྫས་ཀྱི་འཁྱིལ་ཆེ་བ་མི་འདུག་རུང་སྡེ་པས་ཐུགས་ཁུར་བཞེས་པའི་སེར་འབྲས་སོགས་སུ་སྐུ་རིམ་རྒྱ་ཆེར་མཛད། ཚོགས་ཆེན་གྱི་ཞལ་འདོན་དུ་རྗེ་བཙུན་སྒྲོལ་དཀར་ལ་གསོལ་འདེབས་སྐུ་ཚེ་སྤེལ་པའི་སྨོན་ལམ་གྱི་ཚིགས་བཅད་གཅིག་བྲིས། ལམ་ཞོར་དུ་པོ་ཏ་ལའི་མཆོད་ཁང་རྣམས་མཇལ་ཞིང་བཀའ་འགྱུར་གསར་བཞེངས་ལ་མེ་ཏོག་གཏོར། བྱང་རྩེ་ཆོས་རྗེ་གུ་གེ་བ་ངག་དབང་རྡོ་རྗེ་གདན་ས་ཆེན་པོའི་ཁྲིར་འཛེག་མ་རེག་གི་ཐུགས་སྤྲོ་སག་གེ་བྱོན་པ་དང་མཇལ། སྔར་རྗེ་ཞལ་སྔ་ནས་མངའ་རིས་པ་བྱང་རྩེར་འབྱོན་གདོང་ད་ལམ་བྱང་རྩེ་རྩིས་ལེན་ཙམ་བྱས་ངོས་རང་སྐལ་གྱི་ཁྲི་ཐོག་འབུལ་གསུང་བར་ཐམས་ཅད་མཁྱེན་པ་ཙོང་ཁ་པའི་བཞུགས་ཁྲིའི་སྟེང་དུ་འགྲོ་བཞིན་པ་ཡིན་པས་དེ་འདྲའི་པར་བཀབ་དགོས་རྒྱུ་མེད། རི་བོ་དགའ་ལྡན་གྱི་སྒྲིགས་མ་ཞིག་པ་ལེགས་པས་ཉིད་བྱོན་པ་རང་འགབ་ཚུལ་ནན་ཏན་དུ་མོལ་བ་ཡིན། རྗེ་ཞལ་སྔ་ནས་ཀྱི་དེ་ཐུགས་ཐག་པ་ནས་མཛད་པར་སྣང་། སྤྱན་གཡས་རབ་འབྱམས་པ་བསྟན་འཛིན་རྒྱ་
མཚོས་ཁོང་པའི་རང་སྐལ་གླིང་སྨད་ཀྱི་ཁྲི་ཐོག་ཞལ་སྔ་ནས་དམ་ཆོས་རྣམ་རྒྱལ་ལ་འབུལ་ཟེར་བ་ནི་འགྲོ་སྒོ་མེད་པའི་མཛེས་པོ་སོ་དཀར་པོས་སྤྱན་ཕྱིད་ཉེན་ཆེ། ལྷོ་བྲག་གདང་དགོན་གསར་གྱི་བླ་མ་བློ་གྲོས་དོན་གྲུབ་ཀྱི་བསྔོ་རྟེན་སྐྱེལ་བ་དང་བླ་མ་གསར་པ་ཞུ་བ་བསྡོམས་པའི་གྲ་པ་འགའ་ཞིག་ཆེད་བསྟད་དུ་འབྱོར། དེ་ནུབ་འབྲས་སྤུངས་སུ་སླེབས་པའི་ཉིན་ཁ་ཤས་ཀྱི་རིང་ཨོ་ཆིར་ཐུ་ཐའི་ཇི་དང་དཔོན་མོ་ཕྱག་ན་རྡོ་རྗེ་གཉིས་ཀྱིས་གཙོས་པའི་གསར་འགྲུལ་མང་བར་སྤྱན་རས་གཟིགས། ཕྱག་རྡོར། ཕྱག་དྲུག་པ། གཟིམས་ཁང་གོང་སྤྲུལ་པའི་སྐུ་དང་ཚ་བ་སྐུ་སྐྱེ་གཉིས་ལ་ཚེ་དབང་བརྒྱ་རྩ། གུང་རུ་སྐུ་སྐྱེར་ཕྱག་དྲུག་པའི་དབང་བཞི་བྱིན་རླབས་ཀྱི་ཚུལ་རྣམས་བསྐུར། ཐའི་ཇིའི་དཔོན་མོར་མིང་སྒྱུར་དགོས་ཚུལ་བྱུང་བར་ཕུན་ཚོགས་སྒྲོལ་མར་བཏགས། ཚེས་བཅུ་གཅིག་ལ་ཚོགས་ཆེན་དང་ལྷན་དུ་འདུ་ཁང་ཆེན་མོའི་ལྡེབས་བྲིས་ལ་ཤིས་བརྗོད་མེ་ཏོག་གཏོར་བའི་ཐོག་ཨོ་ཆིར་ཐུ་ཐའི་ཇིས་གོས་དར་གསེར་དངུལ་གྱིས་སྣ་དྲངས་པའི་སྟོང་འབུལ། ཚོགས་ཆེན་དུ་ཇ་དངུལ་སྨན་ཙེའི་འགྱེད་བཏང་། གུང་གི་དྲོ་ལ་གཟིམས་ཁང་གོང་དུ་ཕྱིན། ཕྱིར་ལམ་སྔགས་ཁང་གི་གནས་མཇལ་བྱས། ཤག་སྐོར་སློབ་དཔོན་མདོ་སྡེ་རྒྱ་མཚོས་རིགས་གྲའི་སྐལ་བ་འདྲེན་པར་བླ་བྲང་དུ་བོས། དཔག་བསམ་འཁྲི་ཤིང་གི་ཁ་བྱང་རྣམས་གཙང་ལ་འགྲོ་བའི་གཞིས་བྱེས་ཚོར་ལོང་གང་བྱུང་ལ་བརྩམས་པའི་བྲིས་གྲུབ་རུང་བླ་མ་དང་ཆོས་སྐྱོང་གི་ཞལ་བྱང་མ་གཏོགས་དམངས་མ་ཡིག་མཁན་བཞད་པ་མ་ཁོམ་པར་ལུས་འདུག །གང་ཟིན་ལ་ཡོང་ཞོར་དུ་ཞུས་དག་ཅིག་བཏང་ཞིང་ཕོ་བྲང་རབ་གསལ་གྱི་ཁ་ཡིག་རྣམས་
ཞོར་ལ་བྲིས་སྣང་། ཤག་སྐོར་སློབ་དཔོན་དང་ཀོང་པོ་རིན་ཆེན་རྒྱལ་མཚན་གཉིས་ཀྱི་ངོར་རང་གང་མོས་ཀྱི་བླ་མ་ལ་སྦྱར་ཆོག་པའི་བླ་མའི་རྣལ་འབྱོར། ཉི་ཐང་བླ་མས་བསྐུལ་བའི་བདག་བསྟོད་དང་གླིང་སྟོད་ཆོས་རྗེ་ལྷ་རྗེ་བློ་བཟང་རྒྱ་མཚོའི་གསོལ་འདེབས། ཟུར་ཁྱབ་བདག་བླ་མའི་བཀའ་སྩལ་བཞིན་བྱང་པ་རིག་འཛིན་ཆེན་པོ་ངག་གི་དབང་པོའི་རྣམ་ཐར་དང་རྒྱལ་པོ་ལུགས་ཀྱི་ཐུགས་རྗེ་ཆེན་པོའི་བརྒྱུད་འདེབས་རྣམས་བྲིས། ཉེར་བཞི་ལ་དགའ་ལྡན་ཁང་གསར་དུ་ཕྱིན་རྒྱལ་པོར་འཆི་མེད་དཔལ་སྟེར་གྱི་ཚེ་དབང་བརྒྱ་རྩ། གདོན་འགྲོལ། ཆུ་བཟློག་གི་སྐུ་རིམ་གྱི་རིགས་སྣ་གང་མང་བྱས་ཀྱང་ངོ་སོ་ཡོད་པ་ནི་མ་བྱུང་། གླིང་སྟོད་ཆོས་རྗེ་དང་དཔོན་ཚང་བྱང་ངོས་པ་གཉིས་བཅར་བཞུགས་མཛད་པའི་གསོལ་སྨན་གྱི་འཕྲོད་ངོའང་མ་བླངས་ཤིང་དགུང་ལོ་མཐོ་བ་ནས་སྐུ་གཟུགས་ཇེ་ཞན་དུ་འགྲོ་ཡིན་འདུག་པས་བླ་མ་སྔགས་བོན་སྨན་པ་མཐའ་དག་གི་ཟོག་མཐིལ་འདི་རིགས་ཀྱིས་འདོན་པར་མཆིས། ལྔ་མཆོད་ཆེན་མོའི་གླིང་མེ་རྒྱལ་ཁམས་བྱིངས་ཀྱི་ལོ་ལེགས་ཉེས་ལ་བལྟ་བར་གྲགས་པ་དོན་ལ་ཇི་ལྟར་གནས་ཀྱང་རང་རེ་ཞྭ་སེར་ཅོད་པན་འཛིན་པ་རྣམས་ཀྱི་ལེགས་ཉེས་ངེས་པར་སྟོན་པ་ཞིག་སྣང་བས་སེར་འབྲས་སོགས་རིའི་སྒུར་དུ་ཡོད་པ་ཚོར་ཡང་རླུང་འཚུབ་ཀྱིས་སྤར་མ་ཐུབ་ཅིང་དགའ་ལྡན་ཁང་གསར་དུ་མར་མེ་ལྟ་ཞོག་ཀོང་བུ་རྣམས་ཀྱང་རླུང་གིས་ཁྱེར་བའི་རྟེན་འབྲེལ་ཤིན་ཏུ་ལོད་པ་བྱུང་། ཉེར་དྲུག་ལ་འབྲས་སྤུངས་སུ་འབྱོར། ཁལ་ཁ་ཨ་ཁའི་དའི་ཆིན་གྱི་བུ་ཆ་གན་བར་དང་ཕྲད་ཅིང་ཚེ་མགོན་གྱི་རྗེས་གནང་ཕུལ། དགའ་ལྡན་གསང་སྔགས་གླིང་པར་བྱང་གཏེར་ཐུགས་སྒྲུབ་རྣམ་གསུམ་གྱི་
ཆོས་སྐོར་དང་ཚེ་བདག་ལྕགས་འདྲ་ནས་ལུང་གི་དབུ་ཚུགས་ཙམ། ཐོས་བསམ་དར་རྒྱས་གླིང་པར་སྐྱབས་སེམས། སྤྱན་འདྲེན་ཁྲུས་གསོལ། ས་ལམ་གསུམ། རྣམ་དག་གངས་རི་མ། ཡོངས་རྫོགས་མ། ལོ་བསྟོད། ཉི་གཞོན་འཆར་ཀ་མ། བདེ་ཆེན་ལྷུན་གྲུབ་མ། རབ་དཀར་དགེ་ཚོགས་མ། རྒྱ་ཆེན་བསོད་ནམས་མ་ཚོགས་བསགས་མ་སྔོན་བསགས་མ། རྟེན་འབྲེལ་བསྟོད་པ། སྐབས་གསུམ་པ། གསར་རྩོམ་རྗེ་བཙུན་ཙོང་ཁ་པའི་བསྟོད་པ་དཔྱིད་ཀྱི་རྒྱལ་མོའི་གླུ་དབྱངས་རྣམས་ཀྱི་ལུང་ཕུལ། སྤོང་རོང་དཀའ་བཅུ་གྲགས་པ་ཅན་བསྙེན་རྫོགས་ཉེར་གསུམ་དང་རབ་བྱུང་ལྔ་བཅུ་སྐོར་བསྒྲུབས། ཟླ་བ་བཅུ་གཅིག་པའི་ཚེས་གསུམ་ལ་ཁུན་འདུ་ལེན་ཨོ་པ་ཤི་དཔོན་གཡོག་འབྱོར་བ་དང་ཕྲད། ཚེས་ལྔ་ནས་ཉི་ཤུའི་བར་བཅད་རྒྱའི་ཁོག་ཏུ་ཟུར་ཁྱབ་བདག་བླ་མ་གདན་དྲངས་ཏེ་དགོངས་འདུས་ཀྱི་དབང་སོགས་ཟབ་ཆོས་མང་དུ་ཞུས། སྐུ་འབུམ་ཆོས་རྗེ་དཔལ་ལྡན་རྒྱ་མཚོས་ལྷག་བསམ་རབ་དཀར་གྱི་དྲི་ལན་ཞིག་བསྐུལ་བའི་ཡིག་ལན་ཚིགས་བཅད་དུ་བསྲིངས། ཉེར་གཉིས་ལ་ཚོགས་ཆེན་དུ་ཨོ་པ་ཤིས་བརྒྱ་འབུལ་བཏེག་ཅིང་གྲུབ་རྒྱལ་ལུགས་ཀྱི་ཚེ་དབང་། སྤྱན་རས་གཟིགས་དང་ཕྱག་དྲུག་པ་གཉིས་ཀྱི་རྗེས་གནང་དང་། ཡང་དགོན་སྤྱན་སྔ་ཤ་ར་ཧོར་སྐུ་སྐྱེ། གཞི་རྩ་སྡེ་པ། བསྟན་འཛིན་གསུམ་ལ་ཉང་ལུགས་དྲག་པོ་མེའི་སྤུ་གྲིའི་དབང་བསྐུར། མེའི་སྤུ་གྲི་དང་ལས་གཤིན་རླུང་སྒྲུབ་ཀྱི་སྒྲུབ་པ་བཙུགས་ཤིང་གཞན་གྱི་མནན་གཏད་སྨིན་ནས་རྒྱལ་པོ་སྐུ་མི་འཚོ་བའི་ལྟས་ཁ་ཡར་བྱུང་སྣང་། ལོ་འདིིའི་དཔྱིད་ཀ་ཕན་ཆད་སྒྲུབ་ཁག་ཕལ་ཆེར་གྱི་རྡོ་རྗེ་སློབ་དཔོན་བྲག་
སྣ་ཆོས་རྗེ་ཨྱོན་བསྟན་འཛིན་གྱིས་མཛད་ཅིང་། འདི་ནས་བཟུང་མཚམས་ལེ་ཚན་དང་ས་ཕག་མན་གྱི་ཕུར་སྒྲུབ། ཁྲོ་རོལ། ཚེ་འཆར་སོགས་ཀྱི་རྡོ་རྗེ་སློབ་དཔོན་ཞལ་སྔ་ནས་བློ་བཟང་དར་རྒྱས། བྱིང་པ་སྔགས་རམས་པ་བློ་བཟང་དོན་གྲུབ། དགེ་སློང་བློ་བཟང་རྒྱ་མཚོ། དབུ་མཛད་བློ་བཟང་བསྟན་འཛིན། བྲག་སྣ་ཆོས་རྗེ་བློ་བཟང་ངག་དབང་། དགེ་སློང་བྱམས་པ་བློ་བཟང་། དགེ་སློང་བློ་བཟང་དོན་གྲུབ། སྔགས་རམས་པ་དཀོན་མཆོག་རིན་ཆེན། དགེ་སློང་འཇམ་དབྱངས་གྲགས་པ། ཆོས་རྗེ་རྐན་བུ་བ་ཟིལ་གནོན་རྡོ་རྗེ། རྫོང་རི་ཆོས་རྗེ་བློ་བཟང་པདྨ། སྔགས་རམས་པ་ནོར་བུ་ཆོས་འཕེལ། དགའ་གདོང་སྔགས་རམ་པ་དོན་གྲུབ་རྒྱ་མཚོ། ཡར་འབྲོག་པ་བློ་གྲོས་རྒྱལ་བ། སྐྱམ་པ་ངག་དབང་ཆོས་འཛིན། གྲམ་པ་བློ་བཟང་ངག་དབང་། རྡོ་པ་བློ་བཟང་མཐུ་སྟོབས། གནང་བྱུང་བ་བློ་བཟང་མཁྱེན་བརྩེ་སོགས་བསྙེན་སོང་རྣམས་ཀྱིས་སྐབས་དང་སྦྱར་ཏེ་བྱས། ཉེར་ལྔ་ནས་ཞག་གསུམ་གྱི་བར་སླར་ཡང་གོང་གི་ཆོས་འཕྲོ་ཞུས། རྒྱལ་པོ་ལ་མངོན་གྱུར་གྱི་སྙུན་ནད་མེད་ཅིང་སྐུའི་ཟུངས་རིམ་ལོད་དུ་སོང་བ་སྡེ་པ་དང་དྲུང་འཚོ་བ་རྣམས་ཀྱིས་མ་མཁྱེན་པའི་རེ་ཞིག་སྐྱོན་མེད་ཡོད་ཁུལ་རེ་དོགས་ཀྱི་ངང་ཧོར་ཟླ་བཅུ་གཉིས་པའི་ཚེས་བདུན་གྱི་སྲོད་ལ་གནམ་སའི་དབང་ཕྱུག་བློན་པོ་འགར་གྱི་སྣང་བརྙན་འདྲ་བ་དེ་རང་བསྟན་གྱི་སྐུ་ཆགས་བདོ་བ་ལྟ་བུས་གཟིམས་ཁྲི་མཐའ་ཅན་དུ་མཛད་དེ་འདུས་བྱས་ཀྱི་ངང་ཚུལ་རྗེས་སུ་བསྟན། འཕྲོས་བྱུང་འཕྲལ་ལྷ་ས་ནས་སྡེ་པ་རྟབ་རྟབ་པོར་ཕེབས་པའི་ནམ་ཕྱེད་ཡོལ་ཙམ་ལ་འབྲས་སྤུངས་སུ་བྱོན། དེ་འཕྲལ་གྲབས་ཡུལ་
བྱས་པའི་ཕྱིན་པ་ནམ་སེང་ལ་དགའ་ལྡན་ཁང་གསར་དུ་སླེབས། འཕོ་བ་ཞུས་འཕྲལ་གྱི་མགར་ལག་མ་ལྟ་བུ་ཡོད་པ་བཏབ་པས་འཕྲལ་དུ་ཐེབས་རྟགས་མ་བྱུང་རུང་རྗེས་སུ་ཚངས་བུག་ནས་ཆུ་སེར་འཛག་པ་ཆུ་མིག་ཁ་པ་ཆོག་ཐུས་མཐོང་ཟེར་གང་ལྟར་གཟུངས་སྔགས་ཟབ་མོའི་རིགས་དང་སྨོན་ལམ་རྣམ་གསུམ། ཞི་ཁྲོ་དགོངས་པ་རང་གྲོལ་གྱི་ཐོས་གྲོལ་སོགས་ཁ་ཏོན་རྒྱས་པར་བྱས། ཕྱི་དྲོ་དགོན་པར་ལོག་ལྔ་པ་ནོ་མོན་ཁན་དགེ་ལེགས་དཔལ་ལྡན། ཨ་པ་ལའི་གྱི་དཔོན་མོ་སའི་ཁན་ཇུས་གཙོས་གསར་འགྲུལ་མང་དུ་སླེབས་པ་རྣམས་དང་ཕྲད། ཆོས་རྗེ་དགེ་ལེགས་དཔལ་ལྡན་གྱིས་སོག་ཡུལ་ཕྱོགས་སུ་རང་བསྟན་ལ་ཕན་པ་ཆེ་བའི་ངས་བྱས་ཀྱི་ཁ་པོ་འབྲུག་ལྟར་སྒྲོག་འདུག་པ་དོན་ལ་གནས་པར་སྣང་། སྡེ་པས་ཐུགས་ཁུར་བཞེས་ཏེ་བདེ་ཆེན་གི་ཞབས་དྲུང་ཡིད་བཞིན་གཙོ་བོར་གྱུར་པའི་སོག་བོད་ཀྱི་དོ་དམ་མང་པོ་དང་བཅས་དགའ་ལྡན་ཁང་གསར་དུ་དགོངས་རྫོགས་ཀྱི་གྲ་སྒྲིག་བཙུགས་པའི་མང་འགྱེད་བསྔོ་རྟེན་གཏོང་ལུགས་སོག་ལུགས་ལ་གཞི་མཛད་བོད་ལུགས་ཀྱི་མཛེས་རྒྱན་དང་བཅས་རྒྱ་ཆེར་གནང་བའི་རྒྱུད་སྟོད་སྨད་བསྡོམས་པར་དགེ་འདུན་ཕྱེད་དྲུག་བརྒྱས་ཟླ་གཅིག་ཞག་བདུན་གྱི་བར་གསང་འདུས། ཕ་བོང་ཁ་པ་དཔོན་སློབ་བཅུ་བདུན་གྱིས་ཐུགས་རྗེ་ཆེན་པོ། དབང་བསྐུར་ཁྲུས་ཆོག་པ་ཐར་གླིང་བླ་མ་གྲ་བཅས་ལྔ། ཇོ་ཤཱཀ་གིས་གཙོས་པའི་མཆོད་ཁང་རྣམས་སུ་གསེར་ཆབ་དཀར་མེ། སྙན་ཤལ། གདན་ས་གོང་འོག །འབྲི་སྟག་སོགས་གཞན་ཕྱོགས་པ་ཁ་ཤས་དང་གཙོ་བོར་དཔོན་སློབ་པཎ་ཆེན་རིན་པོ་ཆེ་དང་དགའ་ལྡན་ཁྲི་གདན་ཟུར་གྱིས་མཚོན་པའི་རང་ཕྱོགས་ཀྱིས་བླ་མ་རགས་རིམ་ལ་བསྔོ་
རྟེན། སྐྱིད་འཕན། དབུར་སྟོད། འོལ་དགའ། ཡར་ཀླུངས། ཡར་རྒྱབ། གཙང་རོང་། ལ་སྟོད་ལྷོ་བྱང་། ལྷོ་ཕྱི་ནང་། ཡར་འབྲོག །ཨེ་དྭགས་གཉལ་གསུམ་གྱི་ཆོས་སྡེ། རིས་མེད་ཀྱི་དགེ་འདུན་བསྡོམས་པར་དྲུག་ཁྲི་བདུན་བརྒྱ་ལ་མང་ཇ་འགྱེད་བཅས། ལྷ་ས་སྨོན་ལམ་ཆེན་མོར་དགེ་འདུན་དྲུག་སྟོང་སྐོར་ལ་ཁ་བཏགས། དངུལ། རྩམ་པ། མར། ནས། བུ་རམ། དར། འུ་ཟི། ཟི་ལིང་གི་ཇ་དང་བཅས་པའི་འགྱེད་དགུ། ཟླ་མཆོད་ལ་དབུས་གཙང་གི་དགོན་པ་གསུམ་བཞི་རེར་མང་ཇ། ལོ་མཆོད་ལ་ལྷ་སར་སེར་འབྲས་གཉིས་ཚོགས་པར་མང་འགྱེད་རྣམས་བཏང་བའི་སྐམ་ཟོག་བསྡོམས་པར་གསེར་སྲང་ཉི་ཤུ། གསེར་བསིལ་མ་ཞོ་དྲུག་སྟོང་སུམ་བརྒྱ། བཏུལ་མ་ཞོ་ལྔ་བཅུ། དངུལ་སྤྱད་ཉིས་བརྒྱ་ང་བདུན། དངུལ་ཧྲུག་སྲང་ཉི་ཁྲི། མུ་ཏིག་ཞོ་བཞི་བརྒྱ་སུམ་ཅུ། མ་ན་ཧོ་གཡང་ཊི་ཤེལ་སྤྱད་བསྡོམས་པ་གྱ་གཅིག །དཀར་ཡོལ་ཡུ་རིང་ཡུ་ཐུང་བསྡོམས་པ་དྲུག་ཅུ་རེ་དྲུག །སྦུག་སིལ་སོ་ལྔ། ཁ་བཏགས་སུམ་ཁྲི་སུམ་སྟོང་ཉིས་བརྒྱ། གོས་ཡུག་ཕྱེད་བདུན་བརྒྱ། ཁ་འཁྱར་བརྒྱད་སྟོང་བཞི་བཅུ། སྨན་ཙེ་ཆོར་འདྲེས་པ་ཡུག་ལྔ་བརྒྱ་དོན་གཅིག །ཁ་འཁྱར་ཆིག་ཁྲི་ལྔ་སྟོང་བདུན་བརྒྱ། བླ་བྲེ། སྣམ་སྦྱར། རྟེན་ཁེབས། གོས་བེར། རྒྱ་གོས། གོས་དར་གྱི་ཡོལ་བ་བསྡོམས་པ་སུམ་བརྒྱ་གྱ་བདུན། གོས་ཆེན་གྱི་སློག་པ་ཉེར་བདུན། ཝ་ནག་གི་ཞྭ་མོ་གསུམ། སྦུ་ལ་གའི་གཉིས། སོག་ལྷམ་གཉིས། སྐ་རགས་གཅིག །རྒྱ་མོན་གྱི་རས་ཡུག་པ་རི་འབན་ཁྲ་བཅས་པ་སུམ་སྟོང་ཉིས་བརྒྱ་གོ་གཉིས། ཇ་ཀོ་དྲ་དང་ཁོར་དྲུག་འདྲེས་པ་ཆིག་སྟོང་རེ་གཅིག་བུར་ལྟང་ཆིག་སྟོང་ཆིག་བརྒྱ་
དགུ་བཅུ། ཁྲོ་གཅིག །སྒམ་ཅོག་མུ་ཏིག་གིས་བརྒྱན་པ་གཅིག །སྤོས་ཆག་ཞེ་གསུམ། བསིལ་གཡབ་གཅིག །སྟན་དམར་ས་གདན་བསྡོམས་པ་ང་གསུམ། གྲུམ་ཙེ་སུམ་བརྒྱ་གྱ་དགུ། གསེར་སྒ་ཐག་ཆས་ཡོབ་གདན་ཆ་འགྲིག་བཅོ་བརྒྱད། དེ་མཚུངས་ར་མ་ལུག་ཆ་འགྲིག་བདུན་ཅུ། དངུལ་སྦྱིབ་གཡོགས་ཀྱི་སྒ་ཆ་འགྲིག་བཅུ་གསུམ། དངུལ་ཤན་མ་གཉིས། གསེར་དངུལ་ར་མ་ལུག་སྒ་དམར་སོགས་སྣ་ཚོགས་བསྡོམས་པ་བརྒྱ་དང་བཞི། སག་ཐག་གཞུ་བཅས་བཅུ། རྟ་བཞི་བརྒྱ་དང་བཞི་བཅུ་ཞེ་བཞི། ཇ་མར་ཚྭ་འོ་རིན་རྩམ་པ། འབྲུ། ཤ་ཚང་མ་འབྲུ་ཐོག་ཏུ་བསྡོམས་པར་མཁར་ཁལ་ལྔ་འབུམ་བརྒྱད་ཁྲི་བཞི་སྟོང་ལྔ་བརྒྱ་ལྷག་བཅས། ལོ་རྟིང་མའི་ནང་དུ་ཕྱི་རྟེན་གསེར་བཙོ་མ་ཞོ་སུམ་སྟོང་ལས་གྲུབ་པའི་བཀའ་འགྱུར། རྨི་རུ་ལྷ་ཁང་དུ་སྨན་འདམ་གྱི་རྒྱལ་བ་རིགས་ལྔ་དང་རྗེ་བཙུན་ཙོང་ཁ་པའི་སྐུ། སྨན་བླ་བདེ་གཤེགས་བརྒྱད་ཀྱི་སྐུ་རྒྱུར་དངུལ་ལྔ་བཅུ་མ་བརྒྱད་ཅུ་སོང་བའི་སྐུ་རྒྱུ་རྣམས་བསྡོམས་ཚོད་མ་ཟིན་ཞིང་བཟོ་རིགས་ཀྱི་ཕོགས་གླ་ཡོན་གཟུངས་འབུལ་རབ་གནས་ཀྱི་དགོས་ཆ་འབྲུ་ཐོག་ཏུ་དྲིལ་བར་ཁལ་ཉི་ཁྲི་ཆིག་སྟོང་ལྔ་བརྒྱར་སླེབས། རི་སྦུག་དབུ་མཛད་རིན་ཆེན་བསོད་ནམས་མཆོག་གྲུབ་བྱོན་པར་སྙིང་པོ་དོན་གསུམ་དང་གྲུབ་རྒྱལ་ལུགས་ཀྱི་ཚེ་འཁྲིད། རས་ཆེན་པ་ནས་བརྒྱུད་པའི་འཕོ་འཁྲིད་རྣམས་སོ་སོར་ཉམས་འཁྲིད་དང་ཐམས་ཅད་མཁྱེན་པ་དགེ་འདུན་རྒྱ་མཚོས་མཛད་པའི་སྙིང་པོ་དོན་གསུམ་གྱི་འཁྲིད། འཇམ་དབྱངས་མཁྱེན་བརྩེས་མཛད་པའི་ཚེ་འཁྲིད་ཀྱི་ལུང་རྣམས་སྨིན་རྒྱས་སུ་ཕུལ་ཞིང་སྙིང་པོ་དོན་གསུམ་གྱི་བརྒྱུད་འདེབས་དང་འཕོ་འཁྲིད་
ཀྱི་ཡི་གེ་ཞིག་ཀྱང་དགོས་གསུང་བ་འཕྲལ་དུ་བྲིས། བཀའ་གདམས་ཐིག་ལེ་བཅུ་དྲུག་གི་དབང་འཁྲིད་རྭ་སྒྲེང་དུ་རྟེན་གྱི་སྤྱན་སྔར་བླངས་པ་སྤེལ་བར་མི་རིགས་འདྲའང་བཞེད་པ་དང་བསྟུན། འདི་སྐབས་ཆོས་བཀའི་རིགས་ཉན་གྱིན་མེད་ཀྱང་རབ་གནས་སྦྱིན་སྲེག་སོགས་ཀྱི་ཕྱག་ལེན་ཞིབ་ཏུ་ཞུས་པས་མོས་པ་ཆེར་འཕེལ། དྷརྨ་ཤྲཱིའི་ཚ་བོ་དའི་སང་ཁོ་ཤོ་ཆི་ཅན་ཁ་ཤས་ལ་གྲུབ་རྒྱལ་ལུགས་ཀྱི་ཚེ་དབང་བྱས། ཞག་བདུན་གྱི་བར་ཐུགས་རྗེ་ཆེན་པོ་འགྲོ་བ་ཀུན་སྒྲོལ་གྱི་དཀྱིལ་འཁོར་ལ་བརྟེན་པའི་རིགས་དྲུག་གནས་འདྲེན་གྱི་ཆོ་ག་རྒྱལ་པོར་དམིགས་ནས་ནན་ཏན་དུ་བགྱིས་པ་ཉིན་སྔ་མ་ཚོར་ཧ་ཅང་གི་ལྟས་ལེགས་པར་མ་བྱུང་ཡང་མཇུག་ཏུ་གནས་ངན་ལེན་གྱི་འཆིང་བ་ལས་གྲོལ་བའི་མཚན་མ་གསལ་བ་ཡིན་འདྲ་བསམ་པ་ཤར། ཟེར་ཆེན་པ་རྣམ་རྒྱལ་ཚེ་རིང་གིས་བར་ཁམས་ནས་དགོས་ཚུལ་བཞིན་ཨྱོན་རིན་པོ་ཆེའི་བླ་མའི་རྣལ་འབྱོར། སའི་ཁན་ཇུའི་ཁ་ཏོན་དུ་བདུན་རྣམ་དག་སྨོན་ལམ་དང་བཅས་པ། ཨ་ཡོ་ཤིས་བསྐུལ་བའི་གསོལ་འདེབས་རྣམས་བྲིས་ཉེར་གཉིས་ལ་གྲ་ཚང་གི་གྲ་པ་རགས་རིམ་དང་བཅས་དགའ་ལྡན་ཁང་གསར་དུ་ཕྱིན་པའི་རྒྱལ་པོའི་སྐུ་པུར་ལ་འཇིགས་བྱེད་བཅུ་གསུམ་མའི་རས་བྲིས་ཀྱི་དཀྱིལ་འཁོར་དུ་དབང་བསྐུར་ཁྲུས་ཆོག་ལྷོ་སྒོ་རྒྱས་པར་བྱས། ལོ་མཇུག་འཇམ་དཔལ་ཕྱག་རྒྱ་ཟིལ་གནོན་གྱི་ཟོར་ལས་སོགས་དུས་རིམ་དང་།