དགུང་ལོ་བཞི་བཅུ་པར་རྒྱལ་བའི་བཀའ་འགྱུར་གསར་བཞེངས་ཀྱི་རབ་གནས་དང་། དཔུང་ཆེན་ལྷོ་མོན་དུ་དྲངས་པ་བཅས་ཀྱི་སྐོར།
མེ་སྤྲེལ་ཧོར་ཟླ་དང་པོ་ཉིས་བརྩེགས་ཀྱི་གནམ་ལོའི་ཐོག་མར་དཔལ་ལྡན་རེ་མ་ཏཱིའི་མཆོད་གཏོར་དང་འཕྲིན་འཆོལ་སྤེལ་བའི་སྙན་ཤལ་ཕུལ། ཚེས་བཞིའི་བར་ལོ་གསར་བཞུགས་གྲལ་ཀྱི་དགའ་སྟོན། ལྔ་ནས་བཅུའི་བར་མཚམས་ཤིན་ཏུ་དམ་པར་སྒྲོལ་ལྗང་གི་བཟླས་བརྗོད་དང་སྦྲགས་སྒྲོལ་མདོས་བཏང་། ཐུན་མཚམས་ཤིག་ལ་བྱིང་པ་བདེ་ལེགས་ཀྱིས་བསྐུལ་བའི་ཚིགས་བཅད་ཅིག་བརྩམས། ལེགས་བཤད་ཆོས་འཁོར་གླིང་པའི་གྲ་ཁང་དུ་གཞིས་ལེན་དང་གྲ་དམངས་རྣམས་ཀྱིས་སྨོན་ལམ་ཤིས་བརྗོད་ཀྱིས་མཐའ་བརྟེན་པ་མཛད། ཚེས་བཅུ་གཉིས་ལ་འབྲས་སྤུངས་སྤྱི་ཁང་དུ་ལོ་གསར་གྱི་དུས་སྟོན་བསྟར་ནས་ལམ་བརྐྱངས་ཏེ་ཆོས་འཁོར་ལྷ་སར་ཕྱིན། སྨོན་ལམ་ཆེན་མོ་སྔར་རྒྱུན་ལྟར་ཚུགས་པའི་ཐོག་དབེན་ས་སྤྲུལ་སྐུ་དང་ཐོར་གོད་མགོན་པོ་ཡེལ་དེང་སོགས་གསར་འགྲུལ་རྣམས་ཀྱིས་བསྙེན་བཀུར་ཞིང་བརྒྱ་འབུལ་སྟོང་འབུལ་ཁ་ཡར་བླངས། གསར་འགྲུལ་ཚོར་རིགས་གསུམ་མགོན་པོའི་རྗེས་གནང་། ཚེ་རྟ་ཟུང་འབྲེལ་གྱི་བྱིན་རླབས་དང་། ཉེ་ལྡིང་ཏྲེ་བོ་སྐུ་སྐྱེར་ཚེ་མགོན་གྱི་བྱིན་རླབས་བྱས། ཉེར་དྲུག་ལ་ལྷ་ས་ནས་བཏེག་ལྷ་གདོང་ཤན་ཁར་གུར་གཡབས་ཕུབ་པའི་ས་སྐྱོང་དགའ་ལྡན་པ་ཐོག་རྒོད་རྣམ་རྒྱལ་ཡབ་སྲས་ཐབ་བསུར་བྱོན། ཚལ་གུང་པ་རྣམས་ཀྱི་བསུ་བ་དང་བཅས་ཟུར་ཁང་དུ་གུང་གི་དྲོ་བསྟབས། སྔགས་མཁར་བའི་སེར་སྦྲེང་སྐྱེ་བོའི་ཁྲོམ་ཆེན་པོའི་མདུན་བདར་ཏེ་བདེ་ཆེན་རྩེར་འབྱོར། རྒྱལ་བའི་བཀའ་འགྱུར་རོ་ཅོག་གསར་བཞེངས་མཛད་པར་ཉེར་བདུན་གྱི་ཉིན་གྲ་ཚང་དང་བཅས་འཇིགས་བྱེད་བཅུ་གསུམ་མ་ལ་བརྟེན་ནས་རབ་གནས་འབྲིང་པོ་ཆ་ལག་ཚང་བ་ཤིས་པ་
བརྗོད་པའི་མེ་ཏོག་སིལ་མ་ཕྱོགས་ཀུན་ཏུ་བཀྲམ། རབ་སྟོན་གྱི་བཞུགས་གྲལ་དགའ་སྟོན་རྒྱས་པར་མཛད། ཞལ་ངོ་རྣམས་དང་དྲུང་འཁོར་དྲག་རིམ་ཚོར་གྲུབ་རྒྱལ་ལུགས་ཀྱི་ཚེ་དབང་། ཉང་ལུགས་ཀྱི་དྲག་པོ་མེའི་སྤུ་གྲིའི་དབང་། ཕྱག་རྡོར་གོས་སྔོན་ཅན་དང་ཕྱག་དྲུག་པའི་རྗེས་གནང་བར་ཆད་ཀུན་སེལ་རྣམས་ཕུལ། ཉེར་དགུ་ལ་ལམ་ཞོར་སྔགས་མཁར་དུ་ཁྲི་རིན་པོ་ཆེ་མངའ་རིས་པས་ཡོང་དགོས་ཚུལ་ཕེབས་པ་ལྟར་ཕྱིན་པའི་གདན་བཞེས་དང་ཚོགས་ལ་དམིགས་བརྩེ་མའི་ལུང་། རན་ཛབ་བྱམས་པར་སྨོན་ལམ་བཏབ་ཅིང་ཟུར་ཁྱབ་བདག་བླ་མས་ཤོག་གསུང་བ་ལྟར་གུང་ཚིགས་ལ་ཚལ་ཆོས་ཁྲི་བླ་བྲང་དུ་ཕྱིན། མཆོད་ཁང་རྣམས་མཇལ་ཞིང་ཚལ་ཡང་དགོན་དུ་བླ་མ་དགེ་དར་བས་དཀར་སྤྲོ་བཤམས། ཆོས་སྐྱོང་ཆེན་པོས་རྒྱལ་ཁང་དུ་མེ་ཏོག་འཐོར་དགོས་ཚུལ་ལྟར་བགྲོད། ཧོར་ཟླ་གཉིས་པའི་ཚེས་གཅིག་ལ་ཁྲིམས་ལྡན་འདུས་པ་རྒྱ་མཚོའི་བསུ་བ་དང་བཅས་སེ་ར་ཐེག་ཆེན་གླིང་དུ་སླེབས། སྤྱི་སོ་དང་གྲ་ཚང་ཁག་གིས་གཞིས་ལེན་དང་ཟང་ཟིང་གི་དངོས་པོ་གྱ་ནོམ་པ་བསྟར། བདེ་གཤེགས་མཆོད་རྟེན་བརྒྱད་གསར་བཞེངས་ལ་གྲ་ཚང་དང་བཅས་འཇིགས་མཛད་རྡོ་རྗེའི་སྒོ་ནས་རབ་ཏུ་གནས་པ་བྱས། སོག་པོ་ཁ་ཤས་ལ་གྲུབ་རྒྱལ་ལུགས་ཀྱི་ཚེ་དབང་། སེང་གེ་སྒྲ་དང་སེང་ལྡེང་ནགས་སྒྲོལ་གྱི་རྗེས་གནང་བསྐུར། བསྙེན་རྫོགས་པ་ལྔ་དང་རབ་བྱུང་བཅོ་ལྔར་སྡོམ་པ་ཕབ། ཚེས་ལྔ་ལ་དཔལ་ལྡན་འབྲས་སྤུངས་སུ་སླེབས། བསྙེན་རྫོགས་ཉེར་གཉིས་དང་དགེ་ཚུལ་སུམ་ཅུ་བསྒྲུབས། སོག་པོ་རི་ཁྲོད་པ་ཞིག་ལ་འཇམ་དབྱངས་
ཆོས་སྐོར་ནས་ཁྲོས་ནག་གི་བྱིན་རླབས་དང་མགོན་པོ་ཡེལ་དེང་དཔོན་གཡོག་ལ་ཚེ་དབང་གྲུབ་རྒྱལ་མ། སེང་གེ་སྒྲ། གོས་སྔོན་ཅན་གྱི་རྗེས་གནང་རྣམས་བསྐུར། དེ་དང་ལྷན་དུ་འདུལ་བ་ཟུར་པ་ཨོ་རོད་ཆོས་རྗེ་འདེངས་སོང་བར་རྫོང་བ་བསྟབས་ཧོར་ཟླ་གསུམ་པའི་བརྒྱད་གཏོར་སྔར་འཁྱུད་བཞིན་བཏང་། གཡས་རུ་གཡོན་རུའི་དོན་སྐོར་ལ་སེ་ཆེན་དབོན་པོ་མཚོ་ཁར་རྫོང་བདའ་བྱས། ཆོས་འཁོར་རྒྱལ་དུ་བྱམས་ཁང་དང་ནུབ་རྒྱུད་མ་གཏོགས་པའི་བླ་བྲང་སྐོར་རྣམས་ཀྱི་བཤུ་འབུབ་དང་གསར་བརྒྱབ་ཤིང་ལུག་གྲུབ་པའི་འདི་ལོ་སྡེ་པའི་ཐུགས་བཞེད་ལྟར་འདུ་ཁང་ཆེན་མོའི་ལྡེབས་བྲིས་ལ་ཆོ་འཕྲུལ་བཀོད་པ། རྒྱལ་ཆེན་བཞི། སེང་གཡབས་ལ་རྗེ་དགེ་འདུན་རྒྱ་མཚོའི་འཁྲུངས་རབས། ཆོས་སྐྱོང་སྐོར་གྱི་བླ་བརྒྱུད། འདུ་ཁང་ཐོག་མགོན་ཁང་ལ་ནག་པོ་སྐོར་གསུམ། གུར་ཞལ། དམག་ཟོར་མ། བེག་ཙེ། ཇོ་བོ་རྒྱལ་མཚན་པ། རྟ་རྒོད་ཤེལ་ལྕགས། རྒྱ་ལ་རིགས་བཟང་། རྒྱལ་མོ་ཕྱུག་མོ་རྣམས་བྲིས་པའི་ཨར་པོ་དང་རི་མོ་གཉིས་ཀའི་དོ་དམ་སྟག་རུ་བ་ནོར་བུ། རི་མོའི་དོ་དམ་གྱི་སྦྲེལ་ཟླ་ཀ་བཞི་སྨད་པ། རི་མོ་པ་དབུ་མཛད་དཔལ་མགོན་གྱིས་གཙོས་པའི་དྲུག་ཅུ་རེ་དྲུག་གིས་བསྒྲུབས། བཟད་དུ་གང་ཚང་ནས་པུ་ཎྱ་བྷ་དྲས་དོ་དམ་བྱས་པའི་སྙེ་ཐོན་ཁུལ་གྱི་བྲིས་པ་ཕྱེད་ཉིས་བརྒྱས་བཀའ་འགྱུར་སྐྱ་པོད་ཚར་གཅིག་བཞེངས་པའི་ཕོགས་གླ་ཡོན་འབྲུ་ཐོག་ཏུ་དྲིལ་བར་མཁར་ཁལ་ཆིག་ཁྲི་བདུན་སྟོང་བརྒྱད་བརྒྱ་སོང་། པཎ་ཆེན་ནགས་རིན་གྱི་དབུ་ཞྭ་སྣ་དཀར་རྩེའི་ནང་རྟེན་གླིང་སྟོད་ཆོས་རྗེ་བློ་བཟང་རྒྱ་མཚོས་སྟེར་སྦྱིན་མཛད། དོལ་གནས་གསར་བས་སེང་ལྡེང་ལས་གྲུབ་པའི་ཕུར་པ་ལྷ་
ནག་གི་ཕུར་ཆ་ཡོངས་རྫོགས་ཤིན་ཏུ་དངོས་གཙང་བ་བརྐོས། འདི་མུས་ནས་ལས་ཀ་གཞན་འདྲའང་བྱུང་བ་དང་བཅས་བསྐྱིལ་རྩིས་ལ་སྡེ་པ་ནོར་བུས་ལྷོ་དམག་གི་སྒྱོགས་བཟོ་བར་ཁྲིད་པ་དགྲ་ལ་ནུས་པ་མེད་པའི་བཟོ་བོ་མཁས་པ་དེ་མེད་པ་ཞིག་འཆོས་ཐུབ་འདུག །ཚེས་བཅུ་གཉིས་ནས་ཉེར་གསུམ་གྱི་བར་གཟིམས་ཁང་གོང་སྤྲུལ་སྐུ། དཔལ་འཁོར་ཆོས་སྡེའི་མཁན་པོ། འབྲས་སྤུངས་ཀྱི་སློབ་དཔོན་ཁྲི་གདན་ཟུར་གྱིས་ཐོག་དྲངས་དགེ་འདུན་བརྒྱ་སྐོར་ལ་གུང་ཚིགས་གྲོལ་ནས་ཐམས་ཅད་མཁྱེན་པ་དགེ་འདུན་རྒྱ་མཚོའི་གསུང་འབུམ་གྱི་ཆོས་ཐུན་རེའི་ལུང་ཕུལ། སྔ་དགོངས་བྱང་འགྲུལ་གྱི་ཕྲད་མི་མང་ཞིང་འདོད་ཆོས་ཀྱི་རྗེས་གནང་དང་རབ་བྱུང་བསྙེན་རྫོགས་ཁ་ཡར་བསྒྲུབས། མངའ་རིས་མདོང་པོ་སྐུ་སྐྱེས་ཚོགས་ཆེན་དུ་མང་ཇ་དང་གསེར་ཞོ་བརྒྱའི་བསྐུར་མ་བཏང་བ་འབྱོར། ཉེར་ལྔ་ལ་གཟིམས་ཁང་གོང་དུ་སྔ་མགྲོན་ལ་ཕྱིན། ཉེར་དགུ་ལ་བྱམས་པ་སྤྲུལ་སྐུ། དཔལ་འཁོར་ཆོས་སྡེའི་མཁན་པོ། གཅོད་པ་བཱ་ཐུར་ཅན་གྲངས་བཅད་ལ་འཇིགས་བྱེད་བཅུ་གསུམ་མའི་དབང་། སང་བྱམས་པ་སྤྲུལ་སྐུར་ཉང་ལུགས་དྲག་དམར་མེའི་སྤུ་གྲིའི་དབང་། ཞལ་བྲམ་ནག་བཤན་པ་དྲུག་སྐོར་དང་སེང་གདོང་མ་སྔོན་མོའི་རྗེས་གནང་རྣམས་ཕུལ། གཅོད་པ་བཱ་ཐུར་དང་མ་གདྷ་སོ་སོས་བསྐུལ་ངོར་གསོལ་འདེབས་ཚིགས་བཅད་བརྩམས། ཟླ་བ་བཞི་པའི་ཚེས་གཅིག་ནས་ཉིན་གཉིས་ཀྱི་བར་གཟིམས་ཁང་གོང་སྤྲུལ་སྐུས་གཙོས་པ་རྣམས་ལ་སྔར་གྱི་ཆོས་འཕྲོ་ཕུལ། བྱམས་པ་སྤྲུལ་པའི་སྐུས་དབུ་བྱས་བསྙེན་རྫོགས་བཅོ་ལྔ་དང་དགེ་ཚུལ་སུམ་ཅུ་བསྒྲུབས། བསྟན་
འཛིན་ཆོས་ཀྱི་རྒྱལ་པོའི་སྐུ་རུས་ལ་རུས་ཆོག་བྱས་ནས་སཱ་ཙྪ་དང་སྐུ་པར་ལག་དར་དུ་བཏབ། ཐོན་ཟིལ་གནོན་པས་རྒྱལ་བ་ཙོང་ཁ་པའི་ཚེམས་འཁྲུལ་མེད་ཅིག་བྱིན། བསོད་ནམས་དབང་རྒྱལ་སྙན་ངག་ལ་ཤེས་འདོད་ཆེ་བ་འདུག་པར་མེ་ལོང་ལེའུ་གསུམ་གའི་བཤད་པ་དང་རྩོམ་པ་ལ་གྲས་བརྒྱབ་པར་ཧ་ཅང་གི་འཆར་ཆེ་བ་མི་སྣང་རུང་རྩོམ་རྒྱུགས་གཏོང་ཐུབ་ངེས་ཤེས་པ་བྱུང་སོང་།སྐྱིད་གྲོང་དུ་བལ་བོད་ཀྱི་བདེ་གཟར་ལ་བརྟེན་སླར་ཇོ་བོ་གོར་གྷས་གདན་དྲང་དོགས་པས་སྡེ་པའི་བསླབ་སྟོན་དང་བསྟུན་སྡེ་པ་ནོར་བུ་དང་མགྲོན་གཉེར་དྲུང་པ་སོགས་ཀྱིས་འཕགས་པ་ཝ་ཏི་གདན་དྲངས་པ་ཉེར་གསུམ་ལ་འབྲས་སྤུངས་སུ་ཕེབས། དར་རྒྱས་ཆོས་སྡིངས་ཀྱི་ཐུགས་སྲས་ཆེ་བའི་གཙུག་ཕུད་བླངས་ཏེ་མཚན་ངག་དབང་པདྨ་བསྟན་འཛིན་དུ་འདོགས་པ་དང་འཕགས་པ་གཟིམས་ཆུང་དུ་ཕེབས་པ་དུས་འགྲིག་པ་དེང་སང་གི་གནས་ཚུལ་ལ་དཔགས་ན་རྟེན་འབྲེལ་ལེགས་པར་མངོན། ཞག་གསུམ་གྱི་བར་མཆོད་པ་རྒྱས་པར་བཤམས་ཤིང་སྨོན་ལམ་ནན་ཏན་དུ་བཏབ། དེ་ནས་པོ་ཏ་ལའི་མཆོད་ཁང་དུ་བཞུགས། དེའང་རིག་འཛིན་རཏྣ་གླིང་པའི་བསྟན་པ་སྤྱི་ལུང་དུ། སྐྱིད་གྲོང་ཇོ་བོ་དབུས་གཡོར་ཕྱོགས་སུ་འབྱོན༔ ཞེས་པའི་དུས་ལ་བབས་པས་བཟློག་མ་ནུས་ཀྱང་སོ་སོའི་བཞུགས་གནས་བཀའ་བབས་དེ་ལས་འཕོས་པ་ཐམས་ཅད་དུ་ཤིས་པ་ཞིག་དཀའ་བར་འདུག །དེའི་མུས་ལས། དགེ་བའི་མིང་ཅན་བྱང་ཆུབ་སེམས་དཔའ་ཞིག༔ དམ་སེལ་གྲིབ་ཀྱིས་མངོན་དགའི་ཞིང་དུ་གཤེགས༔ ཞེས་པ་ཇོ་བོ་བྱོན་པའི་དུས་གང་ཟག་དེ་འདྲ་ཞིག་གཞན་དུ་གཤེགས་པར་དོགས་
པ་བྱེད་མཁན་འདུག་རུང་བྱང་སེམས་དེ་གཤེགས་པའི་དུས་རྟགས། སྣེ་ཡི་སྡོང་པོ་སྟར་ཐོགས་གཅོད་པ་འབྱུང་༔ ཞེས་སོགས་ལ་མར་སྦྱོར་རྒྱུ་ཡིན་པས་ཕག་མོ་གྲུ་པའི་བསྟན་པ་ཉམས་པར་ཉེ་བའི་དུས་སྔ་ཐོག་ཡིན། མཚོ་ཁ་ཕྱོགས་ཀྱི་གཡས་རུ་གཡོན་རུའི་ནང་ལབ་ཀྱི་དོན་སྐོར་ལ་སླར་ཡང་གསར་འགྱུར་གྱི་འཚུབ་ཆ་བྱུང་ཟེར་བའི་མི་ཞིག་འབྱོར་བར་བརྟེན་དཔལ་འཁོར་ཆོས་སྡེའི་མཁན་པོ་ཨེར་ཏི་ནི་རྫོང་བདའ་བྱས་ཉེར་ལྔ་ནས་གཟིམས་ཁང་གོང་སྤྲུལ་པའི་སྐུ་གཉན་ཚད་ཀྱིས་གློ་བུར་དུ་བསྙུན་པར་རྐྱེན་སེལ་གྱི་རྗེས་གནང་ལ་ཡོང་དགོས་ཚུལ་བྱུང་བ་ལྟར་གཏོར་ཆས་གྲ་བསྒྲིགས་པའི་འགྲོ་རྩིས་ཡོད་ཐོག །ལྷ་ས་ནས་སྡེ་པས་མི་གནང་པའི་འགོ་ནད་ཡིན་འདུག་པས་ད་ལམ་མི་འགབ་ཅེས་གཟིམས་ཁང་དུའང་བཀའ་བསྒྱུར་བའི་བཤོལ་སོང་བ་ནད་རིམས་ཀྱི་རིགས་ལ་བར་བཀབ་འཛེམ་གྱིན་མེད་ཀྱང་གསུང་དང་བསྟུན། ཉེར་དྲུག་ནས་སྤྲུལ་པའི་སྐུ་བསྙུན་ནའང་སློབ་དཔོན་རྣམ་པ་སོགས་དམངས་མར་ལས་ཆེན་ཀུན་རྒྱལ་བས་མཛད་པའི་བཀའ་གདམས་ཆོས་འབྱུང་གི་འཕྲོ་ཡོངས་རྫོགས་དང་མཁས་གྲུབ་ནོར་བཟང་རྒྱ་མཚོའི་དུས་འཁོར་སྤྱི་དོན་གྱི་དབུ་ཚུགས་ཙམ་ལ་ཆོས་མཚམས་བྱས། ལྕགས་ཟམ་སྤྲུལ་སྐུ་དང་ངོར་ཀླུ་སྡིངས་པའི་དཔོན་པོ་ཅན་ཕྱོགས་འདུས་མང་བ་དང་ཕྲད། ཟླ་བ་ལྔ་པའི་ཚེས་གཅིག་ལ་ནཱ་ལནྡཱ་ཆོས་རྗེ་བཅོ་བརྒྱད་པ་བྱམས་པ་ངག་དབང་ལྷུན་གྲུབ་ལ་ཕྱག་དྲུག་པའི་དབང་བཞི་བྱིན་རླབས་གྱི་ཚུལ། གླིང་སྟོད་ཆོས་རྗེ་གསོ་རིག་འཛིན་པ་བློ་བཟང་རྒྱ་མཚོ། དཔོན་ཚང་བྱང་ངོས་པ། སྤྱན་གཡས་རབ་
འབྱམས་པ་བསྟན་འཛིན་སོགས་ལ་ཞང་བློན་ཕྱི་སྒྲུབ། སྤྱང་ར་ནས་སྒེར་དུ་བདེ་མཆོག་དཀར་པོའི་ཚེ་སྒྲུབ། ཕྱག་རྡོར་གོས་སྔོན་ཅན། དབྱངས་ཅན་མ་དཀར་མོ། གནོད་སྦྱིན་བེག་ཙེ། འདར་པ་ལོ་ཙཱ་བར་མ་ཏི་ལུགས་ཀྱི་འཇམ་དཀར་གྱི་རྗེས་གནང་རྣམས་བསྐུར། ཚེས་བཅོ་ལྔ་ལ་གཟའ་འཛིན་འདུག་པ་དང་བསྟུན་མ་ཤའི་ལས་སྦྱོར་བྱེད་རྩིས་ཀྱིས་ཚེས་བཅུ་གཅིག་ནས་བསྙེན་མཚམས་ཤིན་ཏུ་དམ་པ་བཅད་དེ་འཇམ་དཀར་གྱི་བཟླས་བརྗོད་བཙུགས་པ་ཚ་རྟིང་ཁར་རང་དབང་དང་བྲལ་བའི་གཉིད་ཀྱིས་ནོན་པ་རེ་ཞིག་ཐུན་བཞག་སྟེ་ཁམས་གསེང་བའི་ཐབས་འདྲ་བྱས། ཇའི་སང་སྡེ་པར་ཕྱི་དྲོ་ད་ལྟའི་འདི་འདྲ་མིན་ཙམ་བྱུང་ན་མ་གཏོགས་དགེ་སྦྱོར་ཚད་ལྡན་མི་ཡོང་བ་སྣང་ཞེས་གླེང་བརྗོད་ཀྱང་བཏང་། དེའང་སྤྲུལ་པའི་སྐུ་གཉན་ཚད་ཀྱིས་བསྙུང་བར་གླིང་སྟོད་ཆོས་རྗེ་དང་བྱང་ངོས་ནས་གཉིས་ཀྱིས་འཕྲོད་བསྟེན་མཛད་པས་གཞི་མེད་དུ་གདངས་པའི་སོག་ཡུལ་དུ་ཙ་ན་ཐོན་གྱི་ཉེ་ལེན་ལ་སྡེ་པའི་སྐུ་གཞོགས་ནས་སྡེ་པ་ནོར་བུ་བཏང་བའི་བཀའ་ལུང་བསྒྱུར་སྐབས་སྐྱོན་མེད་དེ་ག་ཡོད་འདུག་ཀྱང་ཚ་རྟིང་ཁར་གློ་བུར་དུ་བསྙུན་པའི་ཚོགས་ཆེན་དུ་མང་ཇ་དང་གནས་ཆུང་ལྕོག་ཏུ་སྐུ་ཕེབས་ཚ་གྲུལ་ཞིང་དེ་པར་འཕྲོས་ཕུལ་བར་བརྟེན་ལྷ་ས་ནས་ཉིན་མཚམས་ལ་ཕེབས་པའི་ཁ་སང་རྗེས་གནང་ངེད་རང་གིས་བཤོལ་བས་མཚེར་བ་བྱུང་། ད་ལམ་ཅིས་ཀྱང་འགྲོ་དགོས་ཞེས་ཇའི་སང་སྡེ་པ་བརྒྱུད་དེ་གསུང་བ་མཚམས་ལ་ཧར་འདོན་བྱས་ཏེ་གཟིམས་ཁང་གོང་དུ་ཕྱིན་མགོན་པོའི་རྗེས་གནང་བར་ཆད་ཀུན་སེལ་ཕུལ་ཀྱང་འབྱུང་པོ་ཞིག་གིས་བརླམས་པའི་ཐུགས་དྲན་མི་ཟིན་འདུག་པས་ཕན་ཐོགས་མེད་པའི་ཚེས་བཅུ་གསུམ་གྱི་ཚ་རྟིང་
ཁར་ཞིང་བརྗེས་སྣང་། སྔ་དྲོ་སྔར་མ་གྲགས་ཀྱི་གཉིད་ལ་འགྲོ་བའང་དེ་ནུབ་རྗེས་གནང་བྱེད་དགོས་པའི་གདོན་གྲིབ་ཀྱི་ལྷོངས་སུ་འདུག །འཇམ་དཀར་གྱི་བསྙེན་པ་བར་ཆད་ཀྱི་དབང་དུ་སོང་བས་འཕྲོ་བཤོལ། རེ་ཞིག་ཟིལ་གནོན་ཚེ་བདག་ནག་པོའི་བསྙེན་པའི་ཁ་གསོ་དང་སྦྲགས་གཟའ་འཛིན་ཐོག་གནམ་ལྕགས་ཨུར་མོའི་བྱས་པ་བཤིག་པའི་ལས་ལ་སྦྱར། ཟླ་བ་ལྔ་པའི་ནང་དུ་སྡེ་པ་གོང་དཀར་དུ་གོ་བརྩི་སོགས་ཀྱི་ཐུགས་བྲེལ་གཅོད་པར་ཕེབས་ཐོག་ཉིན་གཅིག་གཟིམས་ཆུང་ནང་དུ་ཐུགས་དྲན་མེད་ལ་ཇ་ཡུན་གཅིག་ཙམ་སོང་བའི་ཐོག་མར་བྱང་ངོས་ནས་ཀྱིས་གཙོས་ཚང་མ་རྡབས་འུར་གྱི་རྣམ་པས་སྐུ་མི་འཚོ་བར་ཐག་བཅད་པའི་གནས་ཚུལ་སྐྱེལ་བའི་སྟ་གོན་གྱི་སྐབས་སླར་སྐུ་བསོས་པས་དེ་གའི་གཏམ་སྙན་གྱི་ཕྱག་བྲིས་དང་བཅས་སྲུང་བ་ལེན་མི་བྱུང་བར་ཟ་ཡིག་དང་སྐུ་ལ་འདོགས་རྒྱུ་གང་ཟབ་ཕུལ། དེ་སྐབས་གོང་དཀར་གཟིམས་ཆུང་མགོན་ཁང་སྤོ་བ་གནང་གྲུབ་ཅིང་ལྕང་ལོ་ཅན་གྱི་མགོན་ཁང་ཡང་སྤོ་བར་ཐུགས་ཐག་བཅད་པ་ཡིན་འདུག་པས་ཞལ་གྱི་སྐུ་དེ་གཉན་དྲགས་པའི་འཚུབ་ལྷོངས་སུ་སྣང་། ཧོར་ཟླ་དྲུག་པའི་ནང་དུ་ཟུ་པོ་ནས་གཞོན་ནུ་སྐལ་བཟང་གིས་སྐུ་རྟེན། རོལ་མོ། གོས་དར། དཀར་སྤྱད། གོ་ཁྲབ་སོགས་དཔྱད་དོན་གྱི་རིམ་པ་དང་རྩིས་ཀྱི་གནད་འགག་མང་པོ་ཁྲིད་ཅིང་ཞིབ་ཏུ་ཉན། ཟངས་རིན་དཔོན་ས་ཨ་ནེ་དྲུང་དང་སྦྱོར་ར་སྤྲུལ་སྐུ་རྡོ་རྗེ་སྙིང་པོའི་བཞེད་པ་བཞིན་གདམས་པ་ཚིགས་བཅད་མ། འབྲུག་པ་སྤྲུལ་སྐུ། འཇམ་དབྱངས་སྤྲུལ་སྐུ། དཔོན་ས་ཨ་ནེ་དྲུང་། དཔོན་མོ་བློ་གྲོས་སྒྲོལ་མ་རྣམས་ཀྱིས་བསྐུལ་བའི་གསོལ་འདེབས། གོང་
ནས་གནང་བའི་གསེར་ཐམ་ཧ་ཅང་ལྕི་དྲགས་གཤིས་ཐམ་གཡོག་བརྐོས་པའི་ཐམ་ཕུད་ཀྱི་ཚིགས་བཅད། ཆོས་འཁོར་གླིང་སློབ་དཔོན་ངག་དབང་བཀྲ་ཤིས་ཀྱི་གསོལ་འདེབས། སྤྱི་གཉེར་བླ་མ་བསྟན་པ་ཡར་འཕེལ་ཅན་གྱིས་ཚོགས་ཁྲོ་གསར་བླུག་དང་མཆོད་དཔོན་དབུ་མཛད་གཉིས་ཀྱིས་ཕན་བདེ་ལེགས་བཤད་གླིང་པའི་གསེར་གྱི་དུང་གཤོག་ཕྲ་མང་གསར་བཟོས་ཀྱི་ཁ་བྱང་རྣམས་བྲིས། ཚེས་བདུན་ནས་དཔལ་ལྡན་རེ་མ་ཏཱིའི་མདོས་བསྐང་བཙུགས་པའི་རྡོ་རྗེ་སློབ་དཔོན་ལ་ཕྱིན། ཆོས་སྐྱོང་ཆེན་པོའང་ཁོག་ཏུ་ཞུགས་ཏེ་ཕེབས། གསོལ་ཇ་ཁང་གི་ནང་དུ་གདོན་གྱི་འཚུབ་ཅིག་འདུག་གསུང་བ་མཚམས་ཀྱི་སྐབས་ཚེས་བཅུ་བདུན་ནས་བཟུང་ཉམས་སྣང་གི་འཁྲུལ་ངོར་ཆ་དཀར་ཆོས་མཛད་དང་ལྷན་དུ་སྤྲེའུ་བྱིས་པ་ལོ་བརྒྱད་པ་ཙམ་དོམ་ལྤགས་ལྟ་བུའི་ཁ་དོག་ནག་ཅིང་མིག་དམར་སེར་དུ་འཁྱིལ་བ་ཞིག་རེས་རྗེས་སུ་འབྲང་སྐབས་འགར་མཇིང་པར་ཞོན་ནས་འོང་བ་ཞིག་བྱུང་བ་དང་མཐུན་པ་འདྲ། ཤིང་ལུག་དུས་དགྲའི་དབང་པོའི་ཟོར་སྒྲུབ་སྐབས་སྡེ་པས་གཡུལ་གསར་བ་བསྟན་འཛིན་འབྲུག་གྲགས་ལ་དམིགས་སུ་བཀར་བ་ཞིག་དགོས་ཚུལ་གསུང་བ་འཁོར་ལིང་རྣམས་ཟིན་པའི་འཕྱིས་སྐྱོན་ཙམ་བྱུང་རུང་གྲ་ཚང་ལའང་སྤྱན་དམིགས་མཛད་དགོས་པའི་ཚོགས་གཏམ་བཏང་དེ་དོན་བཞིན་གཡུལ་གསར་པ་གཙོ་བོར་བྱས་ཏེ་ཟོར་ཁ་བསྒྱུར་བས་སྟབས་འགྲིག་པ་བཞིན་ཡིན་ནམ་ཇི་ལྟར་ཡང་རིང་པོར་མ་ལོན་པར་དམར་བཤལ་བཏབ་ནས་ཚེའི་དུས་བྱས་པ་གནས་རྙིང་དཀའ་ཆེན་གྱི་མིག་མཐོང་ལག་ཟིན་བྱུང་བའི་གནས་ཚུལ་ཕག་རི་རྫོང་སྡོང་གནམ་གང་འབྲུག་རྒྱལ་གྱིས་སྡེ་པར་ཕུལ་བར་
བརྟེན་གཏང་རག་བཏང་ཞིང་ཚིགས་བཅད་བྲིས་པའི་སྙན་དར་ཕུལ། ཚེས་བཅོ་བརྒྱད་ལ་བསྙེན་རྫོགས་ཉི་ཤུ་ལྷག་ཙམ་བསྒྲུབས། རྒྱ་གར་གྱི་ཡུལ་ཕལ་ཆེར་ལ་དབང་སྒྱུར་བ་ཤཱཀྱ་རཱ་ཛའི་སྲས་འབྲིང་པོ་བྷངྒ་ལའི་རྒྱལ་སྲིད་ཀྱི་བདག་པོ་ཤ་ཧ་སུ་ཛས་མ་ཧཱ་མ་དྷ་ཤ་པི་མངགས་ཏེ་རྒྱ་གར་དང་སྟོད་ཟོག་གི་སྐྱེས་མང་དུ་བསྐུར། མི་ཆེད་དུ་འོངས་དོན་རྒྱལ་པོའི་ཁྲི་ལ་ཤེལ་གྱི་རྒྱན་མང་པོ་དགོས་ཀྱིན་ཡོད་འདུག་པ་ཤུན་གྱི་ལྟག་ན་ཤེལ་དཀར་བྲག་ཁུང་ཟེར་བའི་ཕུག་སྟོང་ཡན་པ་ཨྱོན་རིན་པོ་ཆེའི་སྒྲུབ་གནས་སུ་རི་བོང་ཅལ་སྒྲོག་ལ་བརྟེན་གནས་མཇལ་མི་མང་བས་ཤེལ་གྱི་ཀ་བ་དང་གདུང་མ་ཡོད་ཅེས་རྫུན་ལབ་བྱས་པ་གཏམ་བྱི་ཁུང་དང་ས་མཐའི་དཔེ་བཞིན་རྒྱ་གར་དུ་གྲགས་པས་ལེན་འདོད་ཡིན་འདུག །འགྲོ་བ་རྣམས་འཁོར་བར་འཁྱམས་པའི་རྩ་བ་འཁྲུལ་སྣང་བདེན་འཛིན་འདི་རིགས་ཁོ་ནའི་རྐྱེན་དུ་གདའ། ཆབ་མདོ་རྣམ་སྲས་སོགས་ཀྱི་འཕྲུལ་དང་མཁའ་འགྲོ་རང་གི་སྒོས་དབང་ལ་བརྟེན་པའི་གཟེར་ཆེན་ནས་སྡོད་མ་བདེ་བར་འབའི་རྫོང་སྡོད་ལ་དར་ཁན་དཀའ་བཅུ་རྫོང་བདའ་དང་སྦྲགས་འབར་ཆོས་སྡེ་གསར་དུ་འཛུགས་པའི་བསླབ་སྟོན་མཛད། ཆོས་སྐྱོང་ཆེན་པོས་སྤྲུལ་པའི་སྐུའི་པུར་བཞུའི་དུས་ཉེ་སྐོར་དུ་བསྡད་པ་མི་འགབ་པས་པོ་ཏ་ལར་སོང་གསུང་བ་བཞིན་ཉེར་གཉིས་ལ་འོངས་ཞག་བདུན་གྱི་བར་འཕགས་པ་མཆེད་ཀྱི་དྲུང་དུ་མཆོད་པ་སྨོན་ལམ་བཟླས་བརྗོད་སོགས་དགེ་སྦྱོར་ལ་བརྩོན་པར་བྱས། ལས་སྒྲིབ་ལ་ཕན་པའི་ལྟས་བཟང་བ་འདྲ་འོང་དུ་རེའང་ནུབ་ཅིག་རྨི་ལམ་དུ་བཙུན་པ་ཞིག་གིས་ཟན་ཧྲིལ་མོ་སྦོམ་ཕྲ་མཛུབ་མོ་ཙམ་ཁྱིད་གང་གི་ཚད་
རྩ་རྩེའི་རྣམ་པ་ཡོད་ཁུལ་ཞིག་མདུན་དུ་བཞག་སྟེ་འདི་སྡེ་པ་སྐྱིད་རུ་བ་ཡིན་ཟེར་བའི་མུས་ལ། ཟན་དེ་སྲོག་ཆགས་ལྟར་འགྲོ་བ་དང་ཡང་རྫོང་གི་རྟ་ལམ་དུ་དམག་གིས་འཚངས་པས་ཇའི་སང་སྡེ་པ་དང་ལྷན་ཅིག་ཆར་འབབ་པའི་མུན་ཁྲོད་ལ་མཆིལ་ལྷམ་ཡང་མ་གྱོན་པར་ལྟག་སྒོ་ནས་ཐོན་ཏེ་བྲོས་འགྲོ་བ་སོགས་ངན་པ་འགའ་ཞིག་བྱུང་། ཟླ་བ་བདུན་པའི་ཚེས་གཅིག་ལ་མ་ཅིག་ཧུང་ཐའི་ཇི་དང་ཕྲད་ནས་འབྲས་སྤུངས་སུ་ཕྱིན། ཚེས་ལྔ་ལ་འདུ་ཁང་ཆེན་མོར་འདུས་པའི་ཚོགས་ཀྱིས་ལྔ་པའི་གཡུལ་ལས་རྒྱལ་བའི་བདེན་ཚིག་རྒྱས་པར་བརྗོད། དེ་སྐབས་ལྷོར་དཔུང་འདེགས་གནང་བར་འགྲོ་ལྡིང་བའི་སྐབས་ནས་ཚེས་དྲུག་གི་ཉིན་སྡེ་པས་ཟུར་ཁྱབ་བདག་བླ་མ་དང་ཐུན་མོང་དུ་བརྟག་པ་མོ་རྩིས་གྱིས་གསུང་བ་རྗེ་བླ་མས་དགོངས་འདུས་ཀྱི་མཁའ་འགྲོའི་མོ་དང་དེ་ནུབ་ཐུགས་དམ་གསལ་སྣང་གི་བརྟག་པའང་མཛད་པར་མངོན། ངེད་ཀྱིས་དབྱངས་འཆར་གྱི་དམག་རྩིས་བྱས་པ་གཉིས་ཀ་མཐུན་པར་ཤིན་ཏུ་ལོད་པ་བབས་པས་དེ་གའི་རྒྱུ་མཚན་གྱི་སཾ་ཊ་ཕུལ་བར་མ་མཉེས་པའི་མོ་ངག་རྣམ་ངེས་ཚུལ་གྱི་ལན་ཞིག་བྱུང་། འདི་དང་དབྱིབས་མཚུངས་པ་དཔུང་འདེགས་གདོང་བསམ་ཡས་ནས་གནོད་སྦྱིན་ཆེན་པོས་ཀྱང་སྡེ་པར་བཀའ་ཤོག་གནང་འདུག །ཚར་ཆེན་ཆོས་ཀྱི་རྒྱལ་པོའི་སྐུ་ཐང་ཕྱག་ནས་མ་དང་ཐུགས་དམ་རྟེན་གྱི་མགོན་པོ་ཤིང་དྲུང་མ་གཉིས་དཔོན་ཆེན་རྒྱལ་བ་བཟང་པོའི་རིགས་བརྒྱུད་ཨུ་བཞི་ལྷ་གཤོངས་པས་ལྷོའི་དམག་གྲབས་ཀྱི་དགོས་ཆའི་ཞུ་རྟེན་དུ་བྱུང་བ་ལྟར་བློའི་རེ་བ་བཀང་། ནང་སོ་དངོས་གྲུབ་དང་དཔོན་ཚང་བྱང་ངོས་དྲུང་འཚོ་གཉིས་ལ་སྟེང་གྲིབ་ཀྱི་དོགས་པ་ཞིག་སྣང་བས་ཁྱབ་འཇུག་དུག་དབྱུང་
གི་དབང་བསྐུར་ཞིང་རྣམ་འཇོམས་ཀྱི་སྒྲུབ་ཐབས་ཆུང་ངུ་དགོས་ཚུལ་བཞིན་བྲིས། ནང་སོ་དངོས་གྲུབ་ཀྱི་ཟླར་བྲག་དབར་བའི་གྲ་པ་ཉན་པོ་བྱང་ཆུབ་སེམས་དཔའ་ཟེར་བ་གཟའ་བཅོས་ལ་མཁས་ཉམས་དང་ཟབ་མདོག་བྱེད་འདུག་པའི་དཔེ་ཆའི་མཇུག་གི་བརྒྱུད་པར་རྗེ་བཙུན་ཙོང་ཁ་པ་ཆེན་པོ་དག་ཞིང་དུ་གཤེགས་ནས་ལོ་མང་སོང་རྗེས་བྱུང་བའི་སེ་བ་མཁན་པོ་ཆོས་བཟང་ཉི་མར་རྗེ་རིན་པོ་ཆེ་ནས་གསན་ཚུལ་བྲིས་པའི་ཟག་ཟོག་མངོན་མཚན་ཆེ་བར་གདའ། རྗེ་བཙུན་ཙོང་ཁ་པ་ཤེས་བྱ་ཐམས་ཅད་མཁྱེན་པས་གང་ལའང་ཆགས་ཐོགས་ཅི་ལ་མངའ་རུང་ཚུར་མཐོང་གི་སྣང་ངོར་རྙིང་ལུགས་ཀྱི་རྟ་མགྲིན་གསང་སྒྲུབ་དང་གཟའ་བཅོས་སོགས་གསན་པ་རྣམ་ཐར་གསན་ཡིག་ཚོར་མི་གསལ་བས་རྫུན་གྲོགས་པོ་ཕུ་རྡུགས་སུ་འགྲོ་མཆིས། ཟུར་ཁྱབ་བདག་བླ་མའི་དྲུང་དུ་ཆོས་རྒྱལ་བྱང་པའི་གཏེར་གསར་རྒྱུད་སྙིང་པོ་དོན་གསུམ་གྱི་དབང་ལུང་རྣམས་ཞུས། ད་ལའི་བཱ་ཐུར་དང་མ་ཅིག་ཐའི་ཇི་གཉིས་ལ་གྲུབ་རྒྱལ་ལུགས་ཀྱི་ཚེ་དབང་དང་མགོན་པོའི་རྗེས་གནང་བར་ཆད་ཀུན་སེལ་ཕུལ། རབ་བྱུང་བསྙེན་རྫོགས་བཅོ་ལྔ་སྐོར་བསྒྲུབས། བྱམས་པ་ཀུན་བཟང་གིས་གཟིམས་ཁང་གོང་སྤྲུལ་པའི་སྐུའི་སྐུ་སྐྱེ། ཏྲེ་བོ་སྐུ་སྐྱེ་དང་དཔོན་པོ་རྒྱ་མཚོ་གཉིས་ཀྱིས་སེམས་དཔའ་ཆེན་པོའི་སྐུ་སྐྱེ་མྱུར་འབྱོན། གྲ་རིགས་འགས་བ་སོ་སྤྲུལ་སྐུའི་སྐུ་སྐྱེ་གསལ་འབྱོན་གྱི་སྨོན་ལམ། དགེ་སློང་གྲགས་འོད་ཀྱིས་རྒྱལ་སྲས་ཤེར་འཕེལ་སྤྲུལ་སྐུའི་སྐྱེས་རབས་བསྟོད་པ་རྣམས་བསྐུལ་བ་དང་ས་སྐྱོང་བསོད་ནམས་རབ་བརྟན་གྱིས་ལོ་ཀེ་ཤྭ་རར་ཐམ་ཕུད་ཕུལ་བའི་ཚིགས་བཅད་
བརྩམས། ཚེས་བཅུ་ལ་གྲ་ཚང་གི་ཚོགས་དབུར་ཕྱིན་པའི་ཐུགས་སྒྲུབ་འབྲིང་པོའི་འཕྲིན་ལས་གྱེར་ཏེ་རིག་འཛིན་བླ་མ་མཆོད་ཅིང་གསོལ་བ་རྒྱས་པར་བཏབ། བཅུ་གཉིས་ལ་ཕན་བདེ་ལེགས་བཤད་གླིང་པས་འཆི་མེད་འོད་སྣང་གི་རྡུལ་ཚོན་གྱི་དཀྱིལ་འཁོར་ལ་བརྟེན་ནས་ཚེ་སྤེལ་པའི་རྟེན་འབྲེལ་བསྒྲིགས། སྟག་ལུང་ཞབས་དྲུང་ངག་གི་དབང་ཕྱུག །རྡོ་རྗེ་བྲག་སྤྲུལ་སྐུ། སྐྱིད་ཤོད་ཡས་ཕྱིན་སོགས་ཆེ་གཉན་མང་དང་མཇལ། ཤེལ་དཀར་ཆོས་སྡེའི་གྲ་པ་ཞིག་གིས་གསར་རྩོམ་དབུ་མ་དང་གོང་དཀར་སྨོན་གོང་དྲུང་འཚོ་བའི་བུས་གསོ་རིག་གི་རྒྱུད་བཞིའི་རྒྱུགས་སྤྲད། ཉེར་གཉིས་ནས་ཞག་བདུན་གྱི་བར་ཉིན་ལྟར་ཀྱིས་དན་འབག་གླིང་ཁར་ཕྱིན་ཏེ་ཡན་ལག་བརྒྱད་ལྡན་གྱི་ཆུ་ལ་ཞུགས། འདི་སྐབས་མོན་དུ་དཔུང་ཆེན་ཁྱོགས་ཤིང་སྡེ་པ་དཔོན་གཡོག་ཀྱང་ཞལ་བཀོད་ལ་གཙང་དུ་ཕེབས་པའི་དྲག་ཞན་ཐམས་ཅད་འཚུབ་ལིང་ངེ་བའི་སྐབས་སུ་ཡོད། ཧོར་ཟླ་བརྒྱད་པ་ཚེས་མཚམས་ཉིན་གསུམ་གྱི་བར་ཁམས་འདན་མའི་འགྲུལ་པ་འགའ་ཞིག་བྱུང་བར་ཕྱག་དྲུག་པའི་དབང་བཞི་བྱིན་རླབས་ཀྱི་ཚུལ་དུ་བསྐུར་ཅིང་ཕྲད་མི་སྣ་ཚོགས་ཀྱི་རེ་བ་བཀང་། ཚེས་བཞི་ནས་ཕྱི་མཚམས་བསྡམས་པའི་སངས་རྒྱས་བྱང་སེམས་ཀྱི་སྐུ་བརྙན་དུ་མ་དང་སཱཙྪ་མང་དུ་བཏབ། གྲ་ཚང་དུ་ཨྱཱཻ་རིང་བྱེ་བ་མཇུག་ཏུ་ཚེ་འཆར་གཉིས་ཀྱི་ཟོར་ལས་ཀྱི་རིམ་གྲོ་དང་དགྲ་སྲི་མནན། སྡེ་པ་ཉི་རུ་ཆུ་མཚམས་སུ་ཕེབས་ཐོག་ནང་སོ་བྱང་ངོས་པས་ས་མཐོས་པའི་སྐྱོན་དུ་ངོས་བཟུང་ཞིང་ཚ་རོང་ནས་ཀྱིས་དབུགས་མི་བདེར་ཁ་དམར་བཏགས་པའི་སྟེན་བབས་ལྕི་བ་ཞིག་བྱུང་བའི་སྡེ་པ་ནོར་བུས་ལྐོག་ཏུ་གནས་ཚུལ་དང་
སྦྲགས་ད་ཆ་དམག་བཤོལ་བའི་སྡེ་བར་རྒྱུ་མཚན་ཟེར་དགོས་ལུགས་བྱུང་རུང་དམག་གི་ཆ་མོ་རྩིས་ལུང་བསྟན་གང་ལའང་མ་བབས་ཤིང་དེར་མ་ཟད་མི་དམངས་ཀྱི་བློར་ཡང་མི་འཐད་པ་ནས་བཤོལ་བཏབ་ཀྱང་ཐུགས་ལ་མ་སག་གཤིས་ཡང་བསྐྱར་ལ་དགོས་པ་མི་འདུག་ཀྱང་དེ་པའི་སྐུ་རིམ་གྱི་བསྐུལ་མར་བྱུང་བས་བང་ཆེན་དེས་གོ་བཅད། ནང་སོ་ཨ་སུག་གཞིས་རྩེར་ཟབ་ཁོག་ནས་ཟས་ངན་ཤིན་ཏུ་ལོད་པ་ཞིག་བྱུང་བའི་སྟབས་ཇའི་སང་སྡེ་པ་གྲོང་སྨད་དུ་ཡོད་པས་ཇ་དངུལ་སོགས་འདོན་པའི་རོགས་ལ་ལྷ་ས་གཉེར་པ་འཕྱོས་གྲོང་སྟོད་པ་བོས། དབུས་ཕྱོགས་ཀྱི་ས་དགེའི་ཆོས་སྡེ་གྲ་གཙང་བ་རྣམས་གཙོ་བོར་གྱུར་པའི་རགས་རིམ་ལ་མང་འགྱེད་རྒྱས་པར་བཏང་བས་སྐུ་ཁམས་ཀྱང་རིམ་བདེར་སོང་འདུག །ཨ་སུག་གི་བྱང་བུ་བཞུས་པའི་སྐྱེ་གནས་གསལ་བར་ཤར་བ་བཞིན་རྗེས་སུ་ངོས་ཀྱང་འཕྲོད་ཅིང་སྐྲ་དང་རུས་པ་ལ་རུས་ཆོག་བྱས་ནས་སཱཙྪའང་མང་དུ་བཏབ། དབྱར་ཐོག་འདིར་འགོང་པོའི་འཚུབ་སྔར་དང་མི་འདྲ་བའི་ཆེ་བ་འདུག་པར་ཧོར་ཟླ་དགུ་པའི་ཚེས་དགུ་ནས་བདུན་གཅིག་གི་བར་ཡང་ཟབ་ཀྱི་རྡོ་རྗེ་གྲོ་ལོད་བསྒྲུབས་པས་ཚ་ངར་གྱི་དབལ་གཅོག་པ་ལ་ཕན་པར་བྱུང་། ཟུར་རྡོ་རྗེ་འཆང་གི་མནལ་ལམ་དུ་རྐྱང་ཐང་སྒང་དུ་སྤྲེའུ་མོ་མི་ཙམ་ཞིག་ལ་སྤྲེལ་ཕྲུག་བརྒྱ་སྐོར་སྐྱེས་པའི་ཕལ་ཆེར་ཤི་ཞིང་ལྷག་ལུས་མ་དང་བཅས་པ་ན་ནས་ཉལ་སྡོད་པ་ཤར་བས་ཕོ་བྲང་ནང་གི་འབྱུང་པོའི་ཆོ་འཕྲུལ་བཟློག་པའི་དབུགས་ཕྱུང་། བློ་ཤིན་ཏུ་མི་བསྲུན་པ་ཅི་རིགས་ལ་རླུང་རྟ་ཁ་སྦུབ་ཀྱི་ལས་སྦྱོར་བྱས་པ་ལྕགས་སྦྲུལ་བདེ་
གཟར་སྐབས་ཀྱང་བྱེད་མྱོང་གི་ཆོས་དང་ཡོན་གྱི་དཔེ་བཞིན་ཡུན་རིང་མ་སོང་བར་འབྲས་བུ་མངོན་དུ་གྱུར། ཉེར་གསུམ་ནས་ཟླ་འཕྲོས་ཀྱི་བར་སྲུང་བཟློག་གི་མཚམས་དམ་དུ་བཅད། ཧོར་ཟླ་བཅུ་པའི་ཚེས་གསུམ་ལ་གོང་གི་གསེར་ཡིག་པར་བྱམས་གླིང་ཨེམ་ཆི་སངས་རྒྱས་འབྱུང་གནས་དང་མཁར་སྔོན་པོའི་དེམ་ཆི་དར་ཁན་ཆོས་རྗེ་གཉིས་ཀྱིས་གཙོས་འགྲོགས་ཟླའི་འགྲུལ་པ་ཁ་ཡར་དང་བཅས་འབྱོར། གོང་མ་རྒྱལ་པོའི་བཀའ་ཤོག་གནང་སྦྱིན་བླངས་ཤིང་གཞིས་ལེན་བདག་རྐྱེན་དེབ་གསལ་བཞིན་བྱས། ཁེ་ཤིང་གེ་ཆིན་དབང་གི་དགོངས་རྫོགས་སུ་ཁེས་སེ་ཅན་འབྱོར་བའི་དངོས་པོ་སྟོབས་ཆེ་བ་བྱུང་བ་རྣམས་དགེ་བ་རྫོགས་བྱང་དུ་བསྔོས་ཤིང་བྱང་བཞུ་དང་བསྔོ་སྨོན་ནན་ཏན་དུ་བསྟར། ཁལ་ཁ་གཡོན་རུའི་དཔོན་པོ་ཆེ་བ་ནོ་མོན་ཨེ་ཇེན། ཐང་གི་རི་ཐོ་ཡོན་གྱིས་གཙོས་གསར་འགྲུལ་མང་བར་སླེབས། རྒྱ་སོག་ཚོས་གྲ་ས་ཕན་ཚུན་དུ་རྙེད་བཀུར་དང་གོས་དར་གསེར་དངུལ་ཇ་པགས་རིགས་རས་ཆའི་བདོག་པ་རྒྱ་ཆེར་བསྐྲུན། ཨེམ་ཆི་ལ་སྣར་ཐང་བརྒྱ་རྩའི་ནང་གི་བཀའ་གདམས་ལྷ་བཞི། དར་ཁན་ཆོས་རྗེ་དང་དགའ་ལྡན་ཁའུ་ཁན་གྱི་མི་སྣ་ལ་ཕྱག་དྲུག་པ། ནོ་མོན་ཨེ་ཇེན་ལ་གྲུབ་རྒྱལ་ལུགས་ཀྱི་ཚེ་དབང་། གཙང་པ་སྐུ་སྐྱེ་ལ་རྟ་མགྲིན་ཤངས་ལུགས། ཨ་རིག་བརྒྱ་སྐོར་ལ་ཐུགས་རྗེ་ཆེན་པོ་གཙོ་འཁོར་གསུམ་པའི་རྗེས་གནང་དང་ཕྱག་དྲུག་པའི་གཏོར་དབང་བར་ཆད་ཀུན་སེལ་རྣམས་བྱས། འདུལ་བ་སློབ་དཔོན་བློ་གྲོས་རྣམ་རྒྱལ། རྣམ་རྒྱལ་སློབ་དཔོན་བློ་བཟང་དར་རྒྱས། རྒྱལ་བའི་རི་ཁྲོད་པ་གཉིས། ཙ་རིའི་ཁམས་པ་གསུམ་ལ་བློ་སྦྱོང་དོན་བདུན་མའི་ཉམས་
འཁྲིད་ཞག་བཅོ་ལྔ་སྐོར་ཕབ། བསྙེན་རྫོགས་སུམ་ཅུ་དང་དགེ་ཚུལ་བཞི་བཅུར་ཉེ་བ་བསྒྲུབས། ཚེས་བཅོ་ལྔ་ལ་དར་ཁན་ནོ་ཡོན་གྱིས་ཟང་ཟིང་གི་དངོས་པོ་བརྒྱ་ཕྲག་ཏུ་ལོངས་པ་བྱུང་། ཚེས་བཅུ་བདུན་ལ་འབྲི་གུང་ཞབས་དྲུང་རིན་པོ་ཆེ་ཕེབས་ཞག་གསུམ་བཞུགས་ཉིན་སྟར་གསོལ་ཇ་ལྔ་དྲུག་བར་གསང་སྔགས་སྔ་འགྱུར་གཙོ་བོར་གྱུར་པའི་གསུང་གླེང་ཞིབ་ཏུ་བྱུང་། ཁྱད་པར་འཇམ་དཔལ་གཤིན་རྗེའི་སྐོར་ལ་གཞན་ལས་ཁྱད་ཞུགས་པའི་མཁས་ཉམས་ཆེ་བ་འདུག་པས་དོགས་གང་ཆོས་ཞུས་ཤིང་རྗེས་སུ་ཤོག་དྲིལ་མང་རབ་ཕུལ་བ་ལའང་བློ་ཁ་ཁེངས་པའི་མཆན་བུ་གནང་། ཚེ་བདག་ལས་བྱང་གསར་རྩོམ་གྱི་ལུང་དགོས་གསུང་བ་ལྟར་བཀླགས་ཕན་ཚུན་གཞིས་ལེན་ཤངས་ལེན་བཟབས་རྒྱས་ཀྱིས་ཐུགས་ཡིད་གཅིག་འདྲེས་ལྟ་བུར་གྱུར། གནུབས་ལུགས་བཀའ་གཏེར་གྱི་གདམས་པའི་གླེགས་བམ་ཡང་སྦ་བསྲི་མེད་པ། ཁྱབ་འཇུག་གི་མན་ངག་དང་རྗེ་ཟུར་པའི་རྣམ་ཐར་གཡར་པོ་རྩལ་བར་ཕེབས་ལན་གྱི་སྙན་ངག་མཆིམས་ཕུ་ནས་ཀརྨ་པ་རང་བྱུང་རྡོ་རྗེས་བཞེས་པའི་ཕུར་བ་དང་དངུལ་ལྔ་བཅུ་མའི་གཟིགས་རྟེན་ཕུལ། སྲུང་བཟློག་བསད་མནན་གྱི་སྒྲུབ་ཁག་རྣམས་དཀྱུས་བཞིན་བཙུགས། ཉེར་གཅིག་ནས་བཟུང་ཧོར་ཟླ་བཅུ་གཅིག་པའི་ཚེས་དགུའི་བར་སྲུང་བཟློག་གི་མཚམས་དམ་དུ་བཅད། ཁྱབ་བདག་གནས་གསར་བ་མགོན་པོ་བསོད་ནམས་མཆོག་ལྡན་ལ་སྙན་ངག་གི་ལམ་ལས་དྲངས་པའི་ཞུ་མཆིད་དང་མང་ཐོས་རུ་ཐོག་དབང་པོ་ཕུན་ཚོས་རྣམ་རྒྱལ་གྱི་སྙན་ངག་གི་འཕྲིན་ལན་བྲིས། རུ་ཐོག་པ་འདི་མདོ་རྒྱུད་ཐ་སྙད་
ཀུན་ལ་མཁས་པའི་རྒྱལ་པོ་པཎྜི་ཏར་འདུག །ལྔ་མཆོད་གདོང་དུ་བཱ་ཐུར་ཐའི་ཇི་དཔོན་གཡོག །དཔལ་འཁོར་ཆོས་སྡེའི་མཁན་པོ། སེ་ཆེན་དབོན་པོ་རྣམས་ལྷན་དུ་འབྱོར་པ་ཚེས་བརྒྱད་དགུ་ཚོར་ངོས་ཕྲད་དང་སྟོན་མོ་བྱས། ཟླ་མཇུག་ལ་བཱ་ཐུར་ཐའི་ཇི་དཔོན་གཡོག་གཙང་དུ་བཏེག །ཁྱད་པར་ཚེས་བདུན་གྱི་ཉི་ལྡོག་ལ་དམར་ནག་གཤིན་རྗེའི་ཡང་སྙིང་ལག་ཏུ་བསྟར། ཚེས་བཅུ་སྐོར་ནས་རྐང་པ་གཡས་པའི་ནད་རོ་དང་སྟོད་དུ་ཚ་བ་ཞིག་ཞུགས་པ་ཉིས་འདོམས་ལ་གཅིག་བཅོས་ན་ཅིག་ཤོས་ལ་གནོད་པའི་བྱ་དཀའ་བ་འཚོ་བྱེད་དཀྱུས་མའི་རིགས་ཀྱི་གཉིད་གཅོག་མཁན་དུ་འདུག་རུང་དྲུང་འཚོ་བྱང་ངོས་ནས་ཕྱོགས་དེར་སྦྱངས་སྟོབས་ཆེ་བས་མཁས་ཉམས་ཀྱི་བཅོས་ཀ་མཛད་ལུགས་ཡ་མཚན་པར་སྣང་། འོན་ཀྱང་ཆིགས་བཤལ་ཞིག་བཏང་བ་མཁས་ཉམས་དཔའ་ཐལ་གྱིས་སྨན་རྣོ་བ་རྣམས་ཆེར་མ་བཏང་བའི་ཤུགས་ཀྱིས་ཚ་ཟུག་མ་བྱུང་བས་ནང་པར་ཆུ་བུར་ཕྲན་ཚེགས་རྡོལ་རྒྱུ་ཡོད་པའི་སོ་མི་གསོད་པ་ལས་ཆུ་སེར་མ་འདྲོངས་པའི་སྟབས་ནད་ལ་ཕན་རྒྱུ་མ་བྱུང་བས་ཆུ་ཤུར་བླ་རི་རྫོང་གི་དཔེར་སོང་ཞིང་། ཇའི་སང་སྡེ་པ་དང་མཆོད་དཔོན་པ་གཉིས་ཀྱིས་ནད་གཡོག་བྱས། སྟག་ལུང་ཞབས་དྲུང་ངག་གི་དབང་ཕྱུག་གིས་ཆོས་ཀྱི་རྒྱལ་པོ་འཕགས་པའི་ཕྱག་འཕྲེང་གི་རྟེན་དང་བཅས་པའི་ཕྱག་བྲིས་བྱུང་བའི་ལན་དགོངས་བཞེད་དང་མཐུན་པར་ཕུལ། ཚེས་བཅོ་ལྔ་ལ་ཟླ་བ་གཟའ་འཛིན་གྱི་ཡི་གེ་འབྲས་སྤུངས་འདུ་ཁང་ཆེན་མོའི་སྒོ་ལ་སྦྱར། འདི་རེས་ངོས་ཕྲད་མ་ཐུབ་པས་གོང་གི་གསེར་ཡིག་པ་སོགས་འགྲུལ་པ་རྣམས་ལྷ་
ས་ནས་རྫོང་བདའ་མཛད། གོང་དུ་ཞུ་ཡིག་དང་འབུལ་སྐྱེལ་ལ་མི་སྣ་དྲག་པ་ཞིག་གཏོང་དགོས་རྒྱུར་སླ་ཆོས་ཀྱི་རྣམ་པས་ལོ་སྔ་མ་རབ་འབྱམས་པ་དངོས་གྲུབ་ཡོན་ཏན་གྱི་སྒེར་གཡོག་ལ་ཕྱིན་པའི་སྙེ་ཐང་ཇོ་རིག་ཐུ་དབོན་པོ་གནང་སོང་བ་མི་སྣའི་རྒྱུན་ལ་གནོད་ལ་ཁད་ཙམ་བྱུང་ཞེས་གླེང་། ཟུང་ཆུ་རབ་འབྱམས་པ་འཕྲིན་ལས་ཀྱིས་རི་བོ་རྩེ་ལྔར་ལྷ་ཁང་བཞེངས་པའི་རྡོ་རིང་ལ་བརྐོ་རྒྱུའི་ཁ་ཡིག་དང་རྒྱ་ནག་ཏུ་བི་ལིག་ཐུ་ནང་སོའི་ཡིག་ལན་པི་ཝརྟ་བྱམས་པས་དམ་བཅས་པའི་གཟུངས་དང་བཅས་པ་བསྲིངས། གཞིས་ཀ་ཤར་པ་ཨ་གུར་སྤུན་གྱིས་བསྐུལ་བའི་རྩིས་སྐར་ནག་གི་དྲིས་ལན་བྲིས་ཟིན་ཀྱང་འདི་སྐབས་ཞུས་དག་པར་བྱས་ཏེ་པར་གྱི་མ་དཔེར་བསྐུར།