དགུང་ལོ་ཞེ་དྲུག་པར་འབྲས་སྤུངས་ཀུན་དགའ་ར་བའི་ལྡེབས་བྲིས་གསར་བཞེངས་དང་། གསང་སྔགས་ཕོ་བྲང་གི་འབུར་སྐུ་བཞེངས་བསྐྲུན་བཅས་ཀྱི་སྐོར།
འཇམ་དཔལ་གཤིན་རྗེའི་དུས་རིམ། ཆུ་སྟག་གནམ་ལོ་གསར་པའི་སྲིད་གསུམ་དབང་མོ་མཆོད་ཅིང་ལོ་གསར་གྱི་དགའ་སྟོན་སྔར་འཁྱུད་བཞིན་རྒྱས་པར་བྱས། རྒོད་པོ་རྟ་ར་བས་བླང་དོར་བསྐུལ་བའི་འཕྲིན་ལན་ཚིགས་བཅད། སྡེ་དྲུག་མཁན་པོ་བློ་བཟང་དར་རྒྱས་ཀྱིས་བསྐུལ་བའི་སྨན་བླའི་མདོ་ཆོག་གི་མཇུག་ཏུ་འདོགས་རྒྱུའི་འདོད་གསོལ། མཆོད་དཔོན་དབུ་མཛད་གཉིས་ཀྱིས་བསམ་ཡས་ཀྱི་གཙུག་ལག་ཁང་སོ་སོར་གོས་འཕན་
སྙན་དར། དཀར་མེ། ཆོས་སྐྱོང་ཆེན་པོར་ཁྲབ་གདན་ཕུལ་བའི་དུས་ཀྱི་སྙན་དར་ཞལ་བྱང་རྣམས་བྲིས། ཚེས་བརྒྱད་ལ་བསྙེན་རྫོགས་བརྒྱ་ལྷག་དང་རབ་བྱུང་དྲུག་ཅུ་ཙམ་བསྒྲུབས། སྤོ་འབོར་བླ་མ་འཇམ་དབྱངས་ཀྱི་ཤུལ་འཛིན་སྔགས་རམས་པ་ཅན་ལ་ཚེ་རྟ་ཟུང་འབྲེལ་བསྐུར། གྲ་ཚང་དུ་ཕྱིར་བཟློག་འཁོར་ལོ་འབར་བ་དང་གཤིན་རྗེ་ཐམས་ཅད་འདུས་པའི་དྲག་སྔགས་བཟློག་པ་དང་བཅས་པ་བྱེ་བ་རེ་བཙུགས། བཅུ་དྲུག་ལ་རྒྱལ་ཁང་རྩེ་སྤྲུལ་སྐུར་ཚེ་རྟ་ཟུང་འབྲེལ་ཕུལ། བོད་ལུགས་ལ་བརྟེན་པའི་རྫོང་བ་བཟབས། ཁྲི་རིན་པོ་ཆེ་རྩེད་ཐང་པ་བློ་བཟང་རྒྱལ་མཚན་སྨོན་ལམ་ཆེན་མོའི་མགོན་དུ་ཆིབས་ཁ་བསྐྱོད་པའི་ཞར་ལ་པོ་ཏ་ལར་ཕེབས། ལམ་རིམ་གྱི་འཁྲིད་གསར་རྩོམ་གྱི་ལུང་ཕུལ། ཉེར་གཉིས་དང་གསུམ་ལ་སྡེ་པ་རི་བོ་ཆེ་པ། སྒོ་མང་སློབ་དཔོན་པ། བདེ་ཡངས་སློབ་དཔོན། སྤོ་འབོར་སྔགས་རམས་པས་གཙོས་ཉེར་ལྔའི་གྲངས་སུ་བཅད་པར་རས་བྲིས་ཀྱི་དཀྱིལ་འཁོར་དུ་འཇིགས་བྱེད་བཅུ་གསུམ་མའི་དབང་བསྐུར། སང་ཉིན་རྒྱལ་སྐོར་བ། ཨོ་རོད། སྒ་ཆག །བཅོས་མི། སྟོང་ཤོད། སྤྱང་གི་གྲོང་པ་སོགས་ཀོང་པོའི་དཔོན་ཁག་དང་མངའ་རིས་ཀྱི་མི་སྣ་ཁྱི་གུ་སྦྲེལ་པོར་དྲག་དམར་གྱི་བྱིན་རླབས་ལུ་གུ་རྒྱུད་བྱས། ཉེར་དྲུག་ནས་ཧོར་ཟླ་གཉིས་པའི་ཚེས་དྲུག་གི་བར་ཕྱི་མཚམས་བྱས་ཏེ་མཚན་བརྒྱད་གསེར་སྐུ་དང་སྔགས་སྐུ་སོགས་འབུར་སྐུ་ཉི་ཤུ་རྩ་འདྲེན་ལ་འབུལ་རྒྱུའི་བྱིན་རླབས་རྟེན་གྲ་བསྒྲིགས། ཚེས་བདུན་ལ་རྟ་བསུ་སེར་སྦྲེང་བྲོ་གཞས་ལྟད་མོ་བའི་ཁྲོམ་ཤིན་ཏུ་ཆེ་བ་བརྒྱུད་
སེ་ར་ཐེག་ཆེན་གླིང་དུ་ཕྱིན་སྤྱི་སོ་དང་བྱེས་སྨད་ནས་བསྙེན་བཀུར་བཟབས། རྟ་མགྲིན་ཁང་གི་སྐུ་བརྙན་ལ་དབང་བཞི་བླངས། ཚེས་བདུན་ལ་ཚོགས་ཆེན་དུ་མཚན་བརྗོད། གདུགས་དཀར། སྒྲོལ་མ། ཤེར་སྙིང་། བཟང་སྤྱོད། བྱམས་སྨོན། ལྟུང་བཤགས། བདེ་བ་ཅན། ཐོག་མཐའ་པ། ས་ལམ་སོགས་ཆོས་སྤྱོད་རགས་རིམ་གྱི་ལུང་ཕུལ། དགུ་ལ་ཕ་བོང་ཁ་བྱང་ཆུབ་ཤིང་གི་ནགས་ཁྲོད་དུ་ཕྱིན། གདན་ས་བ་འཇམ་དབྱངས་གྲགས་པས་དཀར་སྤྲོ་དམར་སྤྲོའི་གཞིས་ལེན་དང་སྟེར་སྦྱིན་བཟབས་པར་བསྟབས། ཁོང་གིས་གསར་བཞེངས་ཀྱི་རིགས་གསུམ་མགོན་པོས་གཙོས་པའི་རྟེན་རྣམས་ལ་མེ་ཏོག་གཏོར། དངུལ་གདུང་རིན་པོ་ཆེ་མཇལ་སྨོན་ལམ་བཏབ་ཅིང་དབང་བཞི་བླངས། གྲོང་སྨད་དུ་གུང་ཚིགས་བྱས་ནས་པོ་ཏ་ལར་འབྱོར། བསྙེན་རྫོགས་ཉི་ཤུ་དང་རབ་བྱུང་སུམ་ཅུ་ལྷག་ཙམ་བསྒྲུབས། རྒྱལ་མོ་ཆེ་བར་གྲུབ་རྒྱལ་ལུགས་ཀྱི་ཚེ་དབང་བསྐུར། བསམ་ཡས་དང་གནས་ཆུང་ཆོས་སྐྱོང་ཆེན་པོ་གཉིས་ཀྱིས་བསྐུལ་མ་བྱུང་བ་ལྟར་རྫོང་ཁག་བཅོ་ལྔ་ཆ་བགོས་ཀྱི་བཀའ་འགྱུར་ཚར་བརྒྱ་ཉི་ཤུ། མཚན་བརྗོད་འབུམ་ཐེར་དྲུག །གདུགས་དཀར་འབུམ་ཐེར་གཉིས། སྨན་བླ་དང་སྒྲོལ་མ། ཤེར་སྙིང་འབུམ་ཐེར་གསུམ་རེ། བཛྲ་གུ་རུ་བྱེ་བ། སཱ་ཙྪ་འབུམ་ཐེར་གཉིས། ལྷ་ས། བསམ་ཡས། ཡུམ་བུ་རྣམས་སུ་བརྒྱ་མཆོད་ཞལ་གསེར། སྤྱན་འབྱེད། ཁྲུས་གསོལ། གྲ་ས་ཕན་ཚུན་དུ་ཇ་ཚུལ་ཉི་ཤུ་རེ། དཔལ་རི་བས་ལྟ་སར་ཁྲོ་རོལ། གོང་དཀར་དུ་དཀོན་གཉེར་བས་གདུགས་དཀར། རྡོ་རྗེ་བྲག་པས་
པོ་ཏ་ལར་འཆར་ཀའི་མདོས། རྒྱལ་དུ་དམག་ཟོར་མའི་བསྐང་འབུམ་དང་ཆོས་སྐྱོང་སྤྱི་ལ་སྟོང་རྩ་བཏང་། མངའ་རིས་ཀྱི་མི་སྣ་རྫོང་བདའ་མཛད། འདི་སྐོར་ལ་བདེ་ཆེན་ཆོས་འཁོར་བ་སྡེ་པའི་སར་བྱོན་པའི་ཞར་བྱུང་དུ་ཕྲད། འབྲུག་ནང་མཚམས་མཛོ་ཁལ་གླང་ལ་འདོ་རེས་ཀྱིས་སྟོང་ཆེན་ཕྱག་རྒྱ་ཆེན་པོའི་རང་ཚུགས་འཇིག་པར་ཉེ་བའི་སྐབས་སུ་སྣང་། པཎ་ཆེན་ཆོས་ཀྱི་རྒྱལ་པོའི་གསུང་མགུར་དུ། གནས་འདི་ལས་དགའ་ལྡན་ལྷ་ཡུལ་སྐྱིད། །ཅེས་ཞལ་གྱིས་འཆེས་པ་ལྟར་ཟླ་བ་འདིའི་ཚེས་བཅུ་གཉིས་ལ་མཛད་པ་ཐ་མ་བསྟན་ཏེ་དགའ་ལྡན་གྱི་ཞིང་དུ་གཤེགས་པའི་ཐུགས་དམ་གསལ་འདེབས་ཀྱི་སྔན་མགྱོགས་པ་འབྱོར། དཔལ་ལྡན་བླ་མ་དམ་པ་སངས་རྒྱས་ཐམས་ཅད་འདུས་པའི་ངོ་བོ་བྱས་ཏེ་མཆོད་པ་རྒྱ་ཆེར་བཤམས། མཁའ་ཁྱབ་ཀྱི་འགྲོ་བ་རྣམས་འདྲེན་པར་མཛད་པའི་བཞེད་པ་ལྷུན་གྱིས་འགྲུབ་པའི་སྨོན་ལམ་ནན་ཏན་དུ་བཏབ། བསམ་ཡས་ནས་ཆོས་སྐྱོང་ཆེན་པོས་འཕྲལ་དུ་ཡོང་དགོས་ཚུལ་དང་ས་སྐྱོང་རྡོ་རྗེ་རྣམ་རྒྱལ་གྱིས་ཞིག་གསོས་ཕལ་ཆེར་གྲུབ་པར་རབ་གནས་ཅིས་ཀྱང་བྱེད་དགོས་གསུང་བར་གཟའ་སྐར་གྱིས་གཏུགས་པས་བརྒྱད་གཏོར་ཆེན་མོ་ཉེར་གསུམ་ལ་སྔ་བསྣུར། སྐུ་གདུང་རིན་པོ་ཆེར་སྨོན་ལམ་གྱི་ཚིགས་སུ་བཅད་པའི་སྙན་དར་དང་གདུང་འབུལ་དགོངས་རྫོགས་སུ་དམིགས་པའི་བཀྲ་ཤིས་ལྷུན་པོར་མང་འགྱེད་ཚ་ར་གཏོང་བར་ལྷ་ཁང་ཆོས་མཛད་དང་ཆེ་གསུམ་ནས་གཞོན་པ་གཉིས་བཏང་། སྤྲུལ་པའི་སྐུ་མྱུར་དུ་ཕེབས་པའི་སྨོན་ལམ་ཚིགས་བཅད་བྲིས་ཏེ་སེར་འབྲས་ཀྱི་ཚོགས་
ཆེན་དུ་བཙུགས། ཉེར་དགུ་ལ་པོ་ཏ་ལ་ནས་བཏེག །ལྷ་གདོང་ཤན་ཁར་ས་སྐྱོང་ཐོག་རྒོད་རྣམ་རྒྱལ་དཔོན་གཡོག་ཐབ་བསུ་ལ་ཕེབས། ཚལ་ཟུར་ཁང་དུ་བསྙེན་བཀུར་བཟབས། ཡང་དགོན་དབུས་གླིང་གཉིས་ནས་འཆམ་གྱི་རིམ་པ་ཅི་རིགས་བརྒྱབ། དེ་ནུབ་ཆོས་ལུང་མདར་བསྡད། གནམ་གང་གི་ཞོགས་བདེ་ཆེན་རྩེ་སྡེ་དགོན་གྱི་རྟ་རགས་དང་ཡུལ་མིའི་ཁྲོམ་གྱིས་བསུས་ཏེ་མདའ་རར་གུང་ཚིགས་ལ་འབྱོར། སྔགས་མཁར་ཚོགས་པར་བློ་སྦྱོང་དོན་བདུན་མའི་རྩ་བའི་ལུང་བཀླགས། དེ་ནུབ་རྒྱབ་ཡོལ་ཐང་དུ་བསྡད་ནང་པར་མཆོད་ཡོན་གཉིས་ལྷ་སར་ཕྱིར་ཐེགས། ངེད་རྣམས་ཀྱིས་གསེར་ལ་བརྒྱུད་མདོ་སྔགས་གླིང་པའི་སེར་སྦྲེང་གི་སར་བཙན་རྒོད་ཁ་ཆེ་དམར་པོའང་ཁོག་ཏུ་ཞུགས་འདུག་པར་སྙན་དར་ཕུལ་ཡས་ཕྱིན་གྱི་ལམ་ཚོར་ཆོས་རྗེ་བདེ་ཆེན་གླིང་པ་དང་མཐོངས་ཁ་རུ་བ་སོགས་ཕྲད་མི་ཁ་ཡར་དང་བྲོ་ཤོན་མང་ཙམ་སྣང་། ཕུན་ཚོགས་གླིང་དུ་ཞག་སྡོད་བྱས། གྲ་ཚང་གིས་དཀར་སྤྲོ་བཟབས། འདི་ནས་བཟུང་བཞུགས་གྲལ་ཚོར་གླང་བུ་བ་དགྲ་འདུལ་ཚེ་རིང་དང་ལྷ་ཁང་པ་རྡོ་རྗེ་ནོར་བུ་གཉིས་ཀྱིས་ཆོས་ཀྱི་འཕྲོས་གླེང་མོལ། ཧོར་ཟླ་གསུམ་པའི་ཚེས་གཉིས་ཀྱི་ཞོགས་རྟ་བསུར་ས་སྐྱོང་རྡོ་རྗེ་རྣམ་རྒྱལ་དཔོན་གཡོག་བརྒྱ་སྐོར། མངའ་རིས་གྲ་ཚང་དཔོན་སློབ་རྒྱལ་སྲས་ཤེར་འཕེལ་བའི་སྤྲུལ་སྐུ། དཀར་པོ་ཞབས་དྲུང་ཐུགས་སྲས་ཆེ་བ། དཔལ་རི་སྤྲུལ་སྐུ། རབ་བྱུང་པའི་བླ་མ། མཁན་ཚང་རབ་འབྱམས་པས་མཚོན་སྐྱ་སེར་གྱི་བཞུགས་གྲལ་ལ་གྲ་ཚང་ནས་ཚ་བཞེས་ཀྱིས་བསྙེན་བཀུར། འདི་ཕན་ཆད་བཀྲ་ཤིས་ལྷུན་པོའི་
གནས་གཤིས་སྟབས་ཀྱིས་རྒྱས་རྒྱས་མ་བདེ་རུང་སྔོན་ནས་གནོད་སྦྱིན་ཆེན་པོ་དང་གནས་ཆུང་ཆོས་རྒྱལ་གཉིས་ཀས་རྡོ་མཆོད་ཐང་གི་ཐད་དུ་ཆོས་རྒྱལ་ཁྲི་སྲོང་ལྡེ་བཙན་གྱི་དུས་དྲན་ཐུབ་པའི་སྤྲོས་པ་ཆེ་བ་དགོས་ཚུལ་གསུང་བ་རྟེན་འབྲེལ་གྱི་སྒོ་ནས་གདུགས་རྒྱལ་མཚན་གྱིས་མཚོན་པའི་དར་ཆ་རྣམས་བསླངས། རྒྱ་དཀར་ནག་གི་རོལ་མོ་དང་བཅས་སྐྱ་རགས་རྣམས་དལ་འགྲོས་ཀྱིས་ཕྱིན་པའི་ཙེ་དམར་ཐང་གི་རྟེན་མཁར་ཡོད་སར་གསེར་སྐྱེམས་རྒྱས་པར་བསྔོས། མངའ་རིས་གྲ་ཚང་། དཔལ་རི་སྒྲུབ་སྡེ། རབ་བྱུང་པ་གསུམ་གྱི་སེར་སྦྲེང་། རྔ་ཤོན། བྲོ་ཤོན། འབག་ཤོན། གཞས་མ་སོགས་རྣམ་གྲངས་ཤིན་ཏུ་མང་བ་དང་བཅས་པས་མདུན་བསུས་ཕོ་བྲང་འོག་ཏུ་འབྱོར། ཚོམས་ཆེན་དུ་གུང་གི་བཞུགས་གྲལ་རྒྱས་པར་བཤམས། ཕྱི་དྲོ་དབུ་རྩེ་རིགས་གསུམ། མཁན་ཆེན་ཐམས་ཅད་མཁྱེན་པ་ཞི་བ་འཚོའི་དབུ་ཐོད། གཡུའི་ཐུབ་པ་རྣམས་མཇལ། དངུལ་གྱི་མཎྜལ། མཐོངས་གཞི་ནག་ལ་གནས་བཅུའི་སིའུ་ཡོད་པའི་བླ་བྲེ། གོས་ཡུག །འཁོར་གྱི་ལྷ་ཀུན་ལ་བཀྲས་བཏགས་ཀྱི་སྙན་ཤལ་བཅས་ཕུལ། འདི་ནས་བཟུང་ལྷ་ཁང་སོ་སོར་ཕྱིན་སྐབས་བསྟན་འགྲོའི་ཕན་བདེ་རྒྱས་པའི་སྨོན་ལམ་ཚིགས་སུ་བཅད་པ་བྲིས་པའི་ལྷ་རྫས་ཀྱི་མཆོད་སྤྲིན་སྤྲོས་བྱང་ཆུབ་ཆེན་པོའི་དྲུང་དུ་ཡན་ལག་བདུན་པ་སྔོན་དུ་འགྲོ་བའི་བཟང་པོ་སྤྱོད་པའི་སྨོན་ལམ་གྱིས་མཚམས་སྦྱར། བསམ་པ་ལྷུན་གྲུབ་མའི་གསོལ་འདེབས་བྱས། ཚེས་གསུམ་གྱི་སྔ་དྲོ་པེ་ཧར་ལྕོག་ཏུ་གནོད་སྦྱིན་ཆེན་པོ་སྐུ་ཕེབས་ཞུས།
ལྕོག་གི་རྡོ་གཅལ་དུ་ཁྲབ་གདན་དབུ་སྡོམ་དང་བཅས་བསུ་བར་བྱོན། གཙང་ཁང་གི་མདོའི་དཀར་ཕིབས་སུ་སྒམ་གཤིབས་པའི་ཁྲི་ཁྲུ་དོ་ཙམ་བརྒྱབ་འདུག་པའི་ཁར་བསྡད། སྤྱན་གཟིགས་མཐུན་རྫས་སུ་བཀྲས་བཏགས་གསུམ། གསེར་སྐྱེམས་ཞོ་སུམ་ཅུ། དཀར་ཡོལ་ཉིན་མོ་བདེ་ལེགས་དངུལ་སྟེགས་དང་བཅས་པ། གན་གོས་གསེར་མ་དམར་པོའི་དབུ་སྡོམ། ཉ་ཇུས་ཀྱི་ཁྲབ་གདན། གོས་དམར་གྱི་ཞབས་དོར། རྒྱ་སྦུག་ལེགས་པ། བླ་བྲེ། སྨན་ཙེ་ཡུག་གཉིས། ལིང་ཚོས་ན་ལྔ་སོ་སོར་ཡུག །ཁྲབ་རྨོག །རལ་གྲི། སག་ཐག །རྟ་ར་མ་ལུག་གི་སྒ་བཅས། རས་ཡུག་གཉིས་སོགས་ཕུལ། མཁའ་འགྲོ་ཡེ་ཤེས་མཚོ་རྒྱལ་གྱི་ཕྱག་གི་རྡོ་རྗེ་ཆོས་རྒྱལ་བྱང་པའི་བླ་རྡོ་ཁྱད་ཅན་དེ་དབུ་གཙུག་ཏུ་བཞག་ཆོས་སྨན་བཏབ་པའི་བདུད་རྩི་སྦྲེངས་ཏེ་དཔལ་ཨྱོན་སངས་རྒྱས་གཉིས་པ་ནས་རིམ་པར་བརྒྱུད་རིག་འཛིན་མངའ་རིས་པ་ཆེན་པོ་ལེགས་ལྡན་བདུད་འཇོམས་རྡོ་རྗེ་ཡབ་སྲས། གདམས་པའི་བཀའ་བབས་དྲིན་ཅན་བླ་མ་དམ་པ་དང་བཅས་པའི་བར་གྱི་མཚན་བརྗོད་དེ་བསྟན་འགྲོའི་ཕན་བདེ་སྤེལ་བ་དང་འཕྲིན་ལས་རྣམ་བཞི་སྒྲུབ་པའི་དམ་ཚིག་བསྒྲགས་པས་དམ་ལས་འདས་ན་རྡོ་རྗེ་དམྱལ་བར་སྐྱེ་བའི་འཇིགས་པ་ཡོད་སྔར་ཡང་འདའ་མ་མྱོང་གསུང་བ་དང་སྦྲགས་བདུད་རྩི་ཞལ་དུ་གསོལ། སྔོན་གསང་བའི་བདག་པོ། དཔལ་རྟ་མགྲིན། ཨྱོན་པདྨ་འབྱུང་གནས་ཀྱི་སྤྱན་སྔར་སྲོག་སྙིང་ཕུལ་བ་ནས་བཟུང་སྔར་ནས་ད་བར་གྱི་ལོ་རྒྱུས་ཤིན་ཏུ་རྒྱས་པར་མཛད། གསོལ་འདེབས་བསམ་པ་ལྷུན་གྲུབ་མ་ཞིག་ཐོན་གསུང་བ་ལྟར་
གྲྭ་ཚང་ནས་གདངས་དང་བཅས་ཏེ་གསུངས། ཆོས་སྐྱོང་ཆེན་པོས་ཚུར་བུ་རམ་ཟས་སྣ་སོགས་བཞེས་སྤྲོའི་རྣམ་གྲངས་ཁ་ཤས། ཁ་བཏགས་གཉིས། ཇུས་སྔོ་དམར་དཀར་གསུམ་ཡུག་རེ། གོས་ལུ་ཧང་ཡུག །མ་ཧཱཉྩེ་ཡུག །རས་ཡུག་གཉིས་རྣམས་གཞིས་ལེན་གྱི་ཚུལ་དུ་སྟེར་ཆ་མཛད། ལྷོ་ནུབ་ཀྱི་རབ་གསལ་གསར་པ་བླ་མ་ལྷ་ཁང་དུ་གྲགས་པ་དེར་མཆོད་དཔོན་པ་མ་གཏོགས་ཟླ་བོ་གཞན་མ་ཚོ་ཕྱིར་བསངས་ནས་ལུང་བསྟན་ཞིབ་རྒྱས་ཇ་ཡུན་གཅིག་གི་བར་གསུངས། དེར་བྱང་ཆུབ་གླིང་སྐུ་སྐྱེས་བཙུགས་པ་ཡིན་ཟེར་བའི་མདོས་འདུག་པ་ཕྱག་ལེན་ལྟ་ཞོག་མདོས་མིག་གིས་ཀྱང་མཐོང་མ་མྱོང་བ་ཞིག་གིས་འོལ་ཚོད་བྱས་པ་ཡིན་འདྲ། ཚེས་བཞིའི་ཉིན་མངའ་རིས་གྲ་ཚང་པ་དཔོན་སློབ་ལ་བླ་མའི་རྣལ་འབྱོར་ཕུལ། རས་ཆུང་ཕུག་སྤྲུལ་སྐུ། བྱེ་རྫིང་ཚོགས་མཁན་པོ་སངས་རྒྱས་དཔལ་བཟང་། ཚོགས་པ་དང་གྲ་ཐང་པའི་གྲ་པ་རགས་བསྡུས། ལྗངས་དབོན་པོ་སོགས་ཕྲད་མི་མང་དུ་བྱུང་། དར་རྒྱས་ཆོས་སྡིངས་ནས་རིག་འཛིན་འཕྲིན་ལས་ལྷུན་གྲུབ་གྲོངས་པའི་བསྔོ་རྟེན་སྐྱེལ་བར་གདུང་བརྒྱུད་བགྲེས་པ་དང་རྩིས་རིག་སྨྲ་བའི་དབང་ཕྱུག་ལྡུམ་པོ་བ་དོན་གྲུབ་དབང་རྒྱལ་བྱུང་བའི་དྲི་མལ་ལ་བསླབ་བྱ་སྟེར་སྦྱིན་དང་བཅས་འཕྲལ་དུ་ཐོན། ཚེས་ལྔ་ལ་རབ་བྱུང་པ་རྣམས་ཀྱིས་གདན་ས་གོང་གི་ཕྱག་ལེན་པུ་ཏྲ་མིང་སྲིང་དང་རུ་འདྲེན་སྡེ་བཞིའི་འཆམ། དྲུག་ལ་དཔལ་རི་སྒྲུབ་སྡེ་བ་ཚོས་ཚེས་བཅུའི་གར་འཆམ་བྱས། དེའང་པཎ་ཆེན་ཆོས་ཀྱི་རྒྱལ་པོ་དེ་ཉིད་དགུང་ལོ་གོ་གསུམ་དུ་ཕེབས་ནའང་རེ་ཞིག་གཟུགས་
སྐུའི་དཀྱིལ་འཁོར་མ་བསྡུས་ན་བསྟན་འགྲོའི་སྨན་ཡོན་ཆེན་པོར་འགྱུར་བ་བདུད་སྡེའི་ཚོགས་ཀྱིས་མ་བཟོད་པའི་བཀྲ་ཤིས་ལྷུན་པོའི་གྲ་པ་དཀྱུས་ཤར་བ་ཞིག་གི་རྨི་ལམ་དུ་རྗེ་བཙུན་ཙོང་ཁ་པའི་སྣང་བརྙན་ཐང་སྐུར་བྲིས་པ་ཇི་ལྟ་བར་བརྫུས་པས་བརྟན་བཞུགས་ཤླཽ་ཀ་ལྔ་པ་ཞིག་ཤར་མར་བཏོན་ནས་འདི་ཚུགས་ན་བར་ཆད་ཐམས་ཅད་སེལ་ཟེར་བ་གཉིད་སད་ཚེ་ཚིག་རྣམས་བློར་ངེས་ཀྱང་དགེ་རྒན་གྱིས་གཞན་ལ་བསྒྲག་ཏུ་མ་བཅུག་པ་ཞག་ཁ་ཡར་ནས་རྨི་ལམ་དུ་གླེགས་རལ་མེད་པ་ཞིག་གིས་ད་ཆ་དུས་ལ་བབས་ཡོད་ཚུལ་བྱུང་བར་བརྟེན་དགེ་རྒན་གཞོན་གཉིས་ཀྱི་བློས་མ་བཟོད་པར་བླ་བྲང་དུ་རྒྱུ་མཚན་ཞུས་པར་དེ་གའི་ལོ་རྒྱུས་དང་བཅས་རུང་ཁང་གི་གོ་ལ་སྦྱོར་བའི་བསླབ་སྟོན་གནང་བ་བཞིན་བྱས་པ་ན་ཚང་མའི་ཁ་ཏོན་དུ་མཆེད་པའི་དེ་ག་གཅིག་པུས་ཆོག་པ་ལྟ་བུས་སྐུ་རིམ་གྱི་ལེ་དབར་ཤོར་ཏེ་ཚོགས་པ་ཕལ་ཆེར་ཆམ་ཡམས་ཀྱིས་མནར་བའི་ཐོག་གློ་བུར་དུ་བསྙུན་པའི་སྐུ་རིམ་ལ་འཚོག་མི་མེད་པ་ལྟ་བུ་བྱུང་འདུག །དེ་ནས་བཟུང་ཡམས་དེ་མངའ་རིས་ནས་བར་ཁམས་ཀྱི་བར་ལྷོ་བྱང་ཀུན་ཏུ་ཁྱབ་པ་དང་ཐུག་པའི་བསམ་ཡས་སུ་ཕལ་ཆེར་ཆམ་རིམས་ཀྱིས་ཟིན་ནའང་དཀོན་མཆོག་གི་ཐུགས་རྗེས་ཧ་ཅང་ལྕི་བ་མ་བྱུང་བས་རབ་གནས་ཀྱི་གེགས་སུ་མ་གྱུར་པའི་ལྷ་བྲག་གཏེར་བྱོན་ཕུར་པ་དྲག་སྔགས་ཀྱི་རས་བྲིས་ཀྱི་དཀྱིལ་འཁོར་ལ་བརྟེན་ནས་ཚེས་བདུན་ལ་རྣམ་པར་རྒྱལ་བའི་ཕན་བདེ་ལེགས་བཤད་གླིང་པ་རྣམས་དང་ཆབས་ཅིག་པས་སྟ་གོན་དང་ཐོ་རེངས་ནས་འཛུགས་དགོས་ཀྱང་ཆོས་སྐྱོང་སྤྱན་འདྲེན་གྱི་དགོས་དབང་སྟབས་ནམ་ཕྱེད་ཡོལ་ནས་དངོས་
གཞིའི་དབུ་བཙུགས། ཚེས་བརྒྱད་ཀྱི་ཚ་རྟིང་སྔ་ཕྱོགས་ཚེ་བརྟན་བཞུགས་ལ་ཐུག་པའི་བར་བྱས། དེ་ནས་ཚ་རྟིང་ཁར་ལྕོག་ཏུ་ཆོས་རྒྱལ་ཆེན་པོ་དང་ལས་མཁན་གཉིས་ཀ་ཕེབས་པའི་འབོད་མི་བྱུང་བ་ལྟར་ཕྱིན། གནམ་ལྷ་བྱང་ཆུབ་དང་རྡོ་རྗེ་ཕག་མོའི་སྐུ་གསོབ་གཉིས་ལ་རན་པའི་གན་གོས་ཀྱི་ཕོད་ཀ་དང་དར་ཚོན་སྣ་ལྔའི་སྙན་དར་ཕུལ། སྔར་བཞིན་གནམ་ལྕགས་ཀྱི་རྡོ་རྗེ་དང་བདུད་རྩིར་བཅས་ཆོས་རྒྱལ་ཆེན་པོར་དམ་ཚིག་བསྒྲགས་པས་སྐུ་ཁོག་བུད་མེད་ཡིན་ཀྱང་ཙེའུ་དམར་པའི་དུས་ལས་ཟིལ་ཅུང་ཟད་ཆེ་བར་སྣང་། ཁྲོམ་ཚོགས་ཀྱི་དབུས་སུ་དགྱེས་པའི་རྣམ་འགྱུར་གྱི་གསུང་ཅུང་ཟད་བྱོན། གཙང་ཁང་སྦུག་ཏུ་མཆོད་དཔོན་པ་བརྒྱུད་ནས་བླང་དོར་གྱི་བསླབ་བྱ་འགའ་ཞིག་གསུངས། ལས་མཁན་གྱིས་སྔར་བྲག་ཁ་རྙིང་དུས་སྐུ་ཁོག་སྒྲོ་སྡོང་འོག་པའི་སྐབས་སྒར་གཙང་མཆོད་ཡོན་ལ་དུས་འགྱུར་ཡོང་བའི་ལུང་བསྟན་ལྕོག་པ་བའི་ལག་ནས་བླངས་ཏེ་ངེས་ཤེས་བསྐྱེད་ཕྱིར་སྟོན་པར་མཛད། སློབ་དཔོན་ཆེན་པོའི་ཕྱག་མཚན་ཛྷཻ་ཀྵིམ་གྱི་རྡོ་རྗེ་རྩེ་གསུམ་པ་དེ་དེར་ཡོད་ཁྲོམ་པ་ཀུན་ལ་མཇལ་ཁ་གནང་། བསེ་འབག་སྨུག་ཆུང་ཞལ་འབྱེད་སྐབས་བྷ་ད་ཧོར་ནས་བྱོན་ཚུལ་གྱི་བསྐུལ་ཞིག་ཀྱང་གཏོང་གིན་འདུག །བཀའ་གཉན་པས་དར་གྱིས་གྲིལ་ཏེ་དམངས་ཀྱིས་མ་མཐོང་བ་གྱིས་གསུང་ངེད་ལ་གཏད། བན་ཆུང་རྣམས་ལ་སྟོན་གསུང་ཡང་གྲ་ཚང་གི་གྲ་པ་དང་ཁྲོམ་པ་འདྲེས་པའི་དབྱེ་བ་མ་ཐུབ་པར་ལུས། ས་སྐྱོང་རྡོ་རྗེ་རྣམ་རྒྱལ་དང་མཆོད་དཔོན་པ་གཉིས་ལ་ལས་མཁན་རང་གིས་བྱིན་རླབས་
ཤིག་མཛད་སོང་བ་དེ་སྐབས་ནི་དོགས་པ་ཆེར་མ་བྱུང་ཡང་རྟིང་སོར་བསམས་ཚེ་ཁྲི་འདོན་ཡོང་རྒྱུར་སྟག་རྩེ་བར་ཕན་ལ་རེའམ་ཡང་ན་ཚེ་རབས་མང་པོའི་སྐྱེ་བརྒྱུད་ཅིག་ལ་དགོངས་པ་འདྲའོ། །གུང་ཚིག་གྲོལ་འཕྲལ་སྡེ་པ་ལྷ་རྒྱ་རི་བའི་སྲས་ཆུང་བའི་གཙུག་ཕུད་བླངས། ཕྱི་དྲོ་དབུ་རྩེ་རིགས་གསུམ་ནས་བཟུང་གླིང་བཞི་གླིང་ཕྲན་ཉི་ཟླའི་གླིང་སོགས་ལ་རབ་གནས་ཀྱི་གཙོ་བོ་བརྟན་བཞུགས་ཀྱི་མེ་ཏོག་འཐོར་བར་ཚོགས་པ་རྣམས་ཀྱིས་རྡོར་དྲིལ་ཐོགས། དུང་དཀར་གྱིས་སྣ་དྲངས་རོལ་མོ་སྣ་ཚོགས་དང་བཅས་རིམ་པར་ཕྱིན་པའི་གངས་ཅན་ཕན་བདེའི་རྩ་ལག་ཏུ་རིང་པོར་བཞུགས་པའི་གསོལ་བ་བཏབ། ཞར་ལ་གནས་རྟེན་རྣམས་མཇལ་ཞིང་སྨོན་ལམ་གྱིས་མཚམས་སྦྱར། གཙོ་འཁོར་སོ་སོར་སྙན་ཤལ་སྒྲོན། དེ་ནུབ་དཔལ་ལྡན་འདོད་ཁམས་ཀྱི་དབང་ཕྱུག་གཙོ་བོར་གྱུར་པའི་ཆོས་སྐྱོང་གཏེར་སྲུང་གི་བསྐང་གསོ། ཁྱད་པར་རྒྱལ་པོ་པེ་ཧར་དང་གནོད་སྤྱིན་ཙེའུ་དམར་བས་ཐོག་དྲངས་གཙུག་ལག་ཁང་གི་སྲུང་མ་རྙིང་པ་ཀུན་ལ་གཏོར་མ་ཕུལ་ཞིང་ཆོས་འཁོར་སྐྱོང་བར་ཡང་སྐྱོར་དུ་དམ་བསྒྲགས། ཚེས་དགུའི་སྔ་དྲོ་དཀར་ཆལ་ཐང་ན་གཙུག་ལག་ཁང་དང་ཞལ་སྤྲོད་དུ་གུར་ཕུབ་ཅིང་ཁྲི་བརྩིགས་པའི་གཞུང་གྲལ་གཡས་གཡོན་ལ་གྲ་ཚང་། གུང་དང་རྒྱབ་ཀྱི་གཡོན་གྲལ་ལ་དྲུང་འཁོར་སྐྱ་སེར། གཡས་སུ་ཚོགས་ཆས་དང་ས་སྐྱོང་རྡོ་རྗེ་རྣམ་རྒྱལ་དཔོན་གཡོག །མཐའ་སྐོར་དུ་ཁྲོམ་ཤིན་ཏུ་ཆེ་བས་བསྐོར་བའི་དབུས་སུ་ཐོག་མར་སྦྱིན་བདག་བསྐོ་བའི་ཆོ་ག་རྒྱས་པར་བཏང་། ཚོགས་ཀྱི་འཁོར་ལོའི་ལོངས་སྤྱོད་ཀྱི་དགའ་སྟོན་ལ་རོལ། གོས་
ཡུག་སུམ་ཅུ་ཙམ་དང་རྟ་བཞི་བཅུ་ལྷག །སོག་ཆས་ཀྱི་ན་བཟའ་ཆ་འགྲིག་གིས་གཙོས་པའི་སྟེར་ཆ་དཔངས་མཐོ་བ། གྲ་ཚང་ལ་རབ་ཡོན། དྲུང་འཁོར་ལ་གནང་ཆ་སོགས་ལྷ་མཆོད་མི་མཆོད་རྒྱ་ཆེར་མཛད་ལྕགས་ཡོས་ཡོང་སྐབས་ཀྱང་སྔར་དང་མི་འདྲ་བའི་ཞིག་གསོས་རེ་མང་ཟིན་པའི་མཇལ་ཉམས་སྤྲོ་བ་ཞིག་ཡོད་རུང་འདིའི་དུས་ཕལ་ཆེར་གྲུབ་འདུག་པས་ངོ་མཚར་ཆེ་སྙམ་པའི་རྗེས་སུ་ཡི་རང་ཤར། ཕྱི་དྲོ་མཁན་སློབ་གཉིས་ཀྱི་བཞུགས་འཁྲིའི་སྟེང་ནས་ཁྲོམ་ལ་བྱིན་རླབས་བྱས། གུ་རུ་མཚོ་སྐྱེས་རྡོ་རྗེ་སྔར་མཇལ་དུས་ཆུ་ལྟེ་རི་གསུམ་ཙམ་ལུགས་དགོས་བྱུང་བར་ད་ལམ་ལྟེ་རི་ཆུང་ངུ་ཞིག་བླུགས་མཚམས་པདྨའི་སྤུབས་བྱེ་སྟེ་ཕེབས་སླ་བ་རྟེན་འབྲེལ་ལེགས་ཚུལ་དཀར་པོ་ཐུགས་སྲས་གསུང་། ཚེས་བཅུ་ལ་གཞིས་ཀའི་ནུབ་ཀྱི་ཀླུ་སྡིངས་སུ་གུར་ཕུབ་སྟེ་ས་སྐྱོང་རྒྱ་རི་བའི་སྲས་སྐུ་མཆེད་སྐྱ་སེར་གཉིས། ཟངས་རི་དཔོན་སའི་ཞབས་དྲུང་། འབྲས་ཡུལ་སྐྱེད་ཚལ་གྱི་མཁན་ཟུར་པ་རྩེད་ཐང་ཆེན་མོ་བྱང་མ་བ། རི་བོ་བདེ་ཆེན་མཁན་པོ་མང་ཐོས་བློ་བཟང་མཁས་བཙུན། སྤྱན་གཡས་མཁན་པོ། བཀྲ་ཤིས་བདེ་ཆེན་བླ་མ་ལས་ཆེན་པ། བྱམས་གླིང་རྨི་རུ་ཟུར་བ། རྫོགས་ཆེན་པ་ནམ་མཁའ་འབྲུག་སྒྲའི་སྐུ་སྐྱེ། ཕོ་བྲང་སྣེའུ་སྡོང་རྩེའི་མི་སྣ། བྱིང་རྣམ་གཉིས། སྨྱུང་གནས་རས་པ། རབ་བརྟན་ཤར་པ། འཕྱོས་གྲོང་སྟེང་པ། རྡོ་དགོན་པ་བ། ཕུ་གུ་ལུང་པ་སོགས་ཡར་ཀླུངས་ཤར་ནུབ་མཐིལ་གསུམ་བྱང་ཁ་དང་བཅས་པའི་སྐྱ་སེར་ཤིན་ཏུ་མང་བ་བྱུང་བར་དྲག་ཞན་
དང་བསྟུན་པའི་ཇ་གྲལ་བྱིན་རླབས་སྟེར་སྦྱིན་གྱིས་རེ་བ་བཀང་། མདོ་སྔགས་གླིང་གི་སྲུང་མ་ཁ་ཆེ་དམར་པོས་སྤྱན་གཟིགས་དགོས་ཚུལ་བྱུང་བ་འཕྲིན་ཡིག་དང་བཅས་སྐྱེལ་བར་བཏང་། འཕྱོང་རྒྱས་ནས་མ་མ་འབྱོར་བར་སྟེར་སྦྱིན་ཁ་ལག་གི་བདག་རྐྱེན་བཟབས། རྫིང་ཕྱི་མཁན་པོ་རིན་ཆེན་བློ་གྲོས་ལམ་ནས་བསྙུང་བའི་བསམ་ཡས་སུ་འགྲོ་ཁར་དེ་བཞིན་གཤེགས་པའི་འཕེལ་གདུང་དང་དམ་རྫས་ཀྱི་ཕན་པ་བསྒྲུབས། འདི་སྐབས་ཡར་ཀླུངས་ཚོར་ཆམ་རིམས་ཀྱིས་མ་སླེབས་པས་རྩེད་ཐང་ལྔ་མཆོད། ས་མཆོད། བཀྲ་ཤིས་ཆོས་སྡེ། རི་བོ་ཆོས་གླིང་། བཀྲ་ཤིས་བདེ་ཆེན། དར་རྒྱས་གླིང་པ་རྣམས་ཀྱི་ཚོགས་པ་ཕལ་ཆེར་བྱུང་བར་བླ་མའི་རྣལ་འབྱོར་དང་མཚན་བརྗོད་ཀྱི་ལུང་སོགས་འདོད་ཆོས་ཕྲན་བུ་ཕུལ། འོན་ཀྱང་ཆམ་རིམས་དེ་གྲེ་བར་བབས་ནས་སྐད་འགགས་པས་དབང་ཆོས་ཀྱིས་འགྲོ་ཕན་ཆེར་མ་ཐུབ། གྲ་ཚང་དང་དགོན་ཁག་ཚོར་མང་འགྱེད་ཀྱང་བཏང་། སློབ་དཔོན་རིན་པོ་ཆེས་གུང་ཐང་ལ་ཁར་བཞག་པའི་ཞབས་རྗེས་དང་བཻ་རོའི་ཕྱག་བཟོའི་རྟ་མགྲིན་གྱིས་མཚོན་གཟིམས་ཆུང་དེ་གར་ཡོད་པའི་ནང་རྟེན་རྣམས་ཡང་ཡང་མཇལ་ཞིང་གཙུག་ལག་ཁང་ཡོངས་རྫོགས་ཀྱི་རྟེན་ལ་གསེར་ཆབ། དཀར་མེ། སྲུང་མ་སོ་སོར་མདའ་དར། དབུ་རྩེ་རིགས་གསུམ་ལ་བརྒྱ་མཆོད། བསམ་ཡས་མཆིམས་ཕུར་གསེར་ཆབ། སྙན་དར། མཆོད་པ། གནས་སྲུང་ལ་མདའ་དར་རྣམས་ཕུལ། སྔར་རྒྱ་ནག་ཏུ་འགྲོ་གདོང་བྱས་པའང་ལེགས་པ་བྱུང་བས་ཚེས་བཅུ་གཅིག་ལ་ཧས་པོ་རིར་ཕྱིན་རྒྱགས་རྔན། བག་ཆགས་སྟོབས་
འཇོམས་ཀྱི་ཁྲུས་སྔོན་དུ་འགྲོ་བའི་སློབ་དཔོན་ཆེན་པོའི་ཆས་སུ་ཞུགས་ཏེ་བྱང་ཆུབ་གླིང་པའི་གཏེར་བྱོན་བཞིན་བཀའ་ནན་རབ་བརྗིད་ཀྱི་སྒོ་ནས་ལྷ་སྲིན་སྡེ་བརྒྱད་རྣམས་དམ་ལ་བཏགས་ཤིང་ཕན་བདེ་སྐུ་སྐྱེ་སྤུན་གཉིས་ཀྱི་བྱེད་བབས་བལ་པོས་སིའུའི་དཔེར་མཐོང་བས་སྤུན་སྡེ་བྲན་གཡོག་བཅས་པ་ཡལ་བར་མི་འདོར་བའི་དྲེགས་པའི་སྡེ་དཔོན་སུམ་ཅུར་གཉེར་གཏད་ཀྱང་དྲག་ཏུ་བྱས། ཐོག་མར་འཚུབ་ལྷོངས་ཅུང་ཟད་ལ་གཟི་བྱིན་དང་བག་དྲོ་ཉམས་ཆེ། མེ་ཏོག་གི་ཆར་སོགས་ལྟས་ལེགས་པའང་བྱུང་ཟེར། ལམ་ཞོར་ལ་ཇོ་མོའི་གླིང་གསུམ་མཇལ་ཞིང་མེ་ཏོག་གཏོར། བྲག་དམར་རོང་བཙན། རྒོད་པོ་རྟ་ར་གཉིས་ཀྱི་འཕྲིན་ལན་མཐུན་རྫས་ཀྱི་སྤྱན་གཟིགས་གྱ་ནོམ་པ་ཕུལ། ཐའི་ཇི་ཡབ་སྲས་ལ་སྒྲོལ་དཀར་ཚེ་སྦྱིན་མའི་རྗེས་གནང་དང་སྡེ་པ་རྒྱ་རི་བའི་སྲས་པོ་གཞོན་པ་རབ་བྱུང་བསྒྲུབས། ཚེས་བཅུ་གཉིས་ཀྱི་གུང་ཚིགས་ཐོག་གཞིས་ལེན་གྱི་བཞུགས་གྲལ་བཤམས། ས་སྐྱོང་རྡོ་རྗེ་རྣམ་རྒྱལ་དཔོན་གཡོག་གི་སྐྱེས་ལན་གྱི་བདོག་པ་བསྟར། ཚེས་བཅུ་གཉིས་རྟིང་མ་ལ་བསམ་ཡས་ནས་བཏེག །ཟུང་མཁར་མདར་གུང་གི་དྲོ་བྱས། སྐྱིད་ཤོད་ཞབས་དྲུང་ཡབ་སྲས། རྒྱ་རི་བའི་སྲས་ཞབས་དྲུང་བགྲེས་པ། དཀར་པོ་ཐུགས་སྲས། དཔལ་རི་སྐུ་སྐྱེ། རབ་བྱུང་བའི་བླ་མ་ཅན་སྐྱེལ་མི་ཀུན་ཕྱིར་བྱོན། ལ་ལ་ཁ་བ་ཆེས་པས་ཀླུངས་བརྒྱུད་སྒྲགས་མདར་འབྱོར། རྒྱལ་གླིང་ཚོགས་པ། སྔགས་ལྕོག་རྣམས་ཀྱིས་སེར་སྦྲེང་བསྟར། བྱམས་པ་གླིང་པ་དང་ལྕོག་གྲ་བ་ཕལ་ཆེར་ཆམ་རིམས་ཀྱིས་བཏབ་
པས་མང་བ་མ་སླེབས་འདུག །རྒྱལ་གླིང་མཁན་པོ་མཁས་བཙུན། སྡིངས་པོ་ཆེ་སྐུ་སྐྱེ། སྔགས་ལྕོག་བླ་མ་སོགས་དྲག་རིགས་རྣམས་དང་ཕྲད། རྡོ་རྗེ་བྲག་སྤྲུལ་པའི་སྐུ་ཡང་རྫོང་དུ་ལོ་གསུམ་གྱི་བཅད་རྒྱ་དང་འགྲིག་པའི་ཇ་འདྲེན་དུ་མི་ཆེད་བསྟད་མངགས་ཏེ་ཆབ་ཤོག་རྟེན་སྐྱོང་གླིང་པའི་སྙིང་ཐིག་གི་ཤོག་སེར་ཞིག་བསྐུར་བར་མཛད། གྲ་ཕྱི་ནང་གི་དྲུང་འཁོར་ཕལ་ཆེར་ཕྲད་པར་འོངས། བཅུ་གསུམ་གྱི་ཞོགས་བསམ་དར་ནས་ཀྱིས་གྲ་ཚང་དྲུང་འཁོར་ཚང་མར་ཚ་བའི་ཐོག་བཞུགས་གྲལ་བཤམས། སྔ་དྲོ་དགའ་ལྡན་གླིང་གཞི་བ་དང་ལྷ་ལུང་གྲ་ཚང་པ་གཉིས་ཀྱི་སེར་སྦྲེང་དང་བཅས་འཕྲང་འགོ་གཞིས་ཀའི་ཀླུ་སྡིངས་སུ་སླེབས། མགྲོན་གཉེར་དྲུང་པས་སྒར་པ་ཚང་མར་གུང་གི་དྲོ་དྲངས། རོང་པ་སྐུ་མདུན་ལ་དོགས་གཅོད་ཀྱི་མོལ་མཆིད་དང་བདག་རྐྱེན་གང་ལེགས་བྱས། ཞབས་དྲུང་དབྱངས་ཅན་སོགས་དོལ་ཕྱོགས་ཀྱི་སྐྱ་སེར་ཁ་ཡར་འབྱོར། བཅུ་བཞི་ལ་ཨེ་ཝཾ་ལྕོག་སྒར་པས་མདུན་བསུས་ཐུབ་བསྟན་རྡོ་རྗེ་བྲག་གིས་འདུ་ཁང་དུ་བསྙེན་བཀུར། ལུམ་པ་ལྕང་གསེབ་ཏུ་བདེ་ཆེན་ཆོས་འཁོར་བ། ཆོས་རྗེ་དཀོན་གཉེར་དཔོན་པ། བཤད་སྒྲུབ་གླིང་སློབ་དཔོན་པ། གོང་དཀར་ཆོས་སྡེའི་ནམ་མཁའ་མཛོད་པ་དང་རྣམ་མཁྱེན་གྲོང་པ། གོང་དཀར་ཁུལ་གྱི་དྲུང་འཁོར་ཁ་ཤས་རྣམས་དང་ཕྲད། བཤད་སྒྲུབ་གླིང་པ་ཡོངས་རྫོགས་ཀྱིས་གསོལ་འདེབས་དང་སྨོན་ལམ་ཁ་ཡར་གསུངས། དཀོན་གཉེར་དཔོན་དགེ་སྟེང་པ་དང་སྒེར་གྱི་འཕྲོས་པ་ཞིབ་པར་བྱུང་། བཅོ་ལྔ་ལ་བྱེ་ལ་བརྒྱབ། ལ་གཤམ་དུ་མཆོད་ཡོན་
གཉིས་བསུ་བ་ལ་བྱོན། ར་བ་སྟོད་པའི་སེར་སྦྲེང་། སྙེ་འཕྲེང་ཕུ་མདའི་བྲོ་ཤོན་རྣམས་ཀྱིས་བསུས་ཏེ་འཕྲང་གོང་ལྕང་གསེབ་ཏུ་བསྡད། གེ་རེ་ལྷ་པ་ཡབ་སྲས་དང་མཇལ། བཅུ་དྲུག་ལ་ལམ་དུ་རྣམ་རྒྱལ་གསེར་ཁང་པ་དང་ཟུལ་ཕུ་བ། སྣོན་དུ་སྦེ་སེར་ཉི་ཐང་གི་སེར་སྦྲེང་། གླིང་སྟོད་ཆོས་རྗེ། གྲ་ཚང་གཉིས་ཀྱི་བླ་མ། འབྲུག་ཕྱག་མཛོད་ངག་དབང་ཡེ་ཤེས་ཅན་ཕྲད་མི་མང་། སྟར་སྡོང་ནས་ཀྱིས་གུང་ཚིགས་ཀྱི་བཞུགས་གྲལ་བཤམས་གླིང་སྟོད་ཆོས་རྗེ་བློ་བཟང་རྒྱ་མཚོ་ཕྲད་པར་བྱོན་ཞིང་དཔོན་སློབ་པཎ་ཆེན་རིན་པོ་ཆེའི་དགོངས་རྫོགས་སུ་ཁ་བཏགས་འདོམ་འཁོར་མ་ཞིག་བྱུང་། དེ་དགོངས་སྣེའུ་གླིང་ཁར་ཞག་ས་བྱས། བཅུ་བདུན་ལ་དཔལ་ལྡན་འབྲས་སྤུངས་པའི་རྟ་བསུ་བར་རིན་ཆེན་སྒང་དུ་ཇ་སྦྱོར་སྦྲེལ་ཞིག་བཏང་སྟེ་གུང་ཚིགས་ལ་པོ་ཏ་ལར་སླེབས། རྡོ་རྗེ་རྒྱལ་མཚན་དཔོན་སློབ་ཞབས་དྲུང་གི་དགོངས་རྫོགས་གཏོང་བ་སླེབས་འདུག་པའི་ཐུགས་དམ་གསལ་འདེབས་རྟེན་རྣམས་ཟག་མེད་ཀྱི་དགོངས་པ་ཁྱད་པར་ཅན་རྫོགས་པའི་རྒྱུར་བསྔོས། བཀྲ་ཤིས་ལྷུན་པོ་སྤྱི་ཚོགས་ནས་སྤྲུལ་པའི་སྐུ་མྱུར་འབྱོན་གྱི་ཚིགས་བཅད་དགོས་ཚུལ་བྱུང་བ་བྲིས། ད་ལའི་ཧུང་ཐའི་ཇིས་མཚོ་ཁྲི་ཤོག་རྒྱལ་མོའི་ཁུལ་གྱི་ལྷ་ཀླུ་རྣམས་ཀྱི་བསངས་མཆོད་བསྐུལ་བ་བཞིན་བསྐུར། ཉེར་གཉིས་ནས་ཟླ་བ་བཞི་པའི་ཚེས་བཅུའི་བར་ཕྱི་མཚམས་ཁོག་ནས་གསང་སྔགས་ཕོ་བྲང་གི་མགོན་ཁང་བསིལ་བའི་ཚལ་གྱི་འབུར་སྐུ་སོ་སོའི་སྲོག་འཁོར་དང་གུར་ཞལ་ལ་མན་ངག་ཟུར་པའི་ཁྱད་ཆོས་ཀྱི་དགོས་
བྱེད་ཚོ་གྲ་བསྒྲིགས། གྲ་པ་ཁ་ཤས་ཀྱིས་བདུན་ཕྲག་གཅིག་གི་རིང་འཁོར་ལོ་རྣམས་བསྒྲུབས། དེ་སྐབས་འགོང་པོའི་ཆོ་འཕྲུལ་ཆེ་བར་གྲ་ཚང་གིས་ཞག་ཁ་ཡར་ཨར་ལ་གཏད་པས་འཚུབ་ཞི། འཕྱོས་རྫོང་བཙན་བཤན་པ་དམར་པོས་རིམ་གྲོའི་བསྐུལ་མ་དང་མཐུན་རྫས་དགོས་ཚུལ་བྱུང་བ་འཕྲིན་ལས་དང་བཅས་བསྐུར། ཚེས་བཅུ་གཅིག་གི་སྔ་དྲོ་འབྲས་སྤུངས་སུ་ཕྱིན། ཉི་མ་མེ་བཞིའི་འགྲུབ་སྦྱོར་ལ་གསང་སྔགས་ཕོ་བྲང་སྟེང་གི་ཉི་འོད་དུ་རྡོ་རྗེ་གཞོན་ནུ། ཕྱག་དྲུག་པ། ལས་གཤིན་ནང་སྒྲུབ། དམག་ཟོར་ལྷ་མོ། གུར་ཞལ། རྣམ་སྲས་སེར་ཆེན། གནོད་སྦྱིན་བེག་ཙེ་རྣམས་ཀྱི་རུ་ཤིང་བསླངས་ཏེ་མན་ངག་ཟུར་པའི་རིགས་འབྲི་དགོས་མཐའ་དག་འཁྲུལ་མེད་དུ་བཀོད། སྦྱང་གསུམ་སྔོན་དུ་འགྲོ་བའི་ཁྲུས་གསོལ། སྤྱི་འགྲོའི་རྒྱས་བཀབ་མ་ཡིན་པའི་སོ་སོའི་གཞུང་མན་ངག་ནས་བཤད་པའི་ཕྱག་ལེན་བཞིན་གཟུངས་རྣམས་མ་ནོར་བར་ངེད་རང་གིས་བཀོད་པ་བྱས། མཆོད་དབོན་པ། དགེ་སློང་དོན་གྲུབ་པ། བྱིང་པ་སྔགས་རམས་པ་ཅན་གྲ་པ་རྒན་པ་ཁ་ཤས་ཀྱིས་ལག་དར་ཏེ་རིམ་གྱིས་ཕུལ། ཆར་ཆེན་པོ་ཞིག་ཀྱང་གློ་བུར་དུ་བབས། འདི་ནས་བརྩམས་ཏེ་གཟུངས་པར་རབ་གནས་དང་བཅས་པའི་ཕྱག་ལེན་སྔགས་རམས་པ་དཀོན་མཆོག་རིན་ཆེན། དགེ་སློང་འཇམ་དབྱངས་གྲགས་པ། སྔགས་རམས་པ་བསོད་རྣམས་རྒྱལ་མཚན། ཆོས་རྗེ་ཁ་རག་པ། སྔགས་རམས་པ་དགའ་བ་གདོང་པ། སྔགས་རམས་པ་བློ་བཟང་སྐྱེས་མཆོག་རྣམས་ཀྱིས་གྲ་ཚང་གི་གྲ་པ་ཁ་ཤས་ཀྱི་འགོ་པ་བྱས་ཏེ་རིམ་པར་བསྟར། གཟིམས་ཁང་གོང་བཤིག་ཤུལ་དུ་ལོ་སྔ་མའི་ནང་ལྷ་
ཁང་གསར་དུ་བཞེངས་པར་ཐུབ་པའི་དབང་པོ་ནས་བཟུང་འཇམ་དབྱངས་དཀོན་མཆོག་ཆོས་འཕེལ་བར་གྱི་ལམ་རིམ་བཤད་བརྒྱུད་ལྔ་བཅུ་རྩ་དྲུག །བྱམས་ཁང་དུ་བསྒྲིག་རྩིས་ཀྱིས་མཁན་བརྒྱུད་བཅུ་བཞི་རྣམས་ཀྱི་གཟུངས་འབུལ་གྱི་སྔོན་འགྲོའི་སྦྱང་བ་དང་མེ་ཏོག་འཐོར་བ་ངེད་ཀྱིས་བྱས་ཤིང་གཟུངས་བཞུགས་ཞལ་སྔ་ནས་ཕ་བོང་ཁ་པ་འཇམ་དབྱངས་གྲགས་པ། རི་ཁྲོད་དགའ་ལྡན་ཟུར་པ་བྱམས་པ་རིན་ཆེན། གྲ་ཚང་གི་གྲ་པ་འགའ་ཞིག་དང་བཅས་པས་ཕུལ། བཅུ་གསུམ་གྱི་ཉིན་སྤེན་སྡོམས་མ་བྱས་གོང་དུ་མན་ངག་ལུགས་ཀྱི་རབ་གནས་དང་གཏོར་བསྔོས་འཕྲིན་ལས་བཅོལ། ཞལ་བཞི་ཡོངས་རྫོགས་ཀྱི་བྲིས་འབུར་ཇི་མི་སྙམ་པར་བཞེང་བ་གནད་མ་གོ་བའི་རང་མཚང་ལས་གཞན་དུ་མ་མཆིས་ཤིང་ལ་ལ་འཚུབ་ཆ་མ་བྱུང་ཟེར་བ་ནི་ཆོས་སྐྱོང་མ་འཁོར་བའི་ནང་རྟགས་ཕྱིར་ཤར་བར་སྣང་། འདིར་བདག་ཆེན་རྡོ་རྗེ་འཆང་གི་ཞལ་གཟིགས་མའི་བྲམ་ཟེ་སྔོན་པོ་དེ་བཀྲ་ཤིས་པས་བཞེང་བའི་བཀོད་པ་བྱས། སྔགས་སྐུ་དང་ལམ་རིམ་བརྒྱུད་པ་སོགས་སྔ་ཕྱིའི་ལྷ་བཟོ་བ་སྤྲུལ་སྐུ་ཧོར་དར་ཅན་དང་དོ་དམ་ལ་དབུ་མཛད་ངག་དབང་བཀྲ་ཤིས་བསྐོས་ཤིང་སྐུ་རྒྱུ་བཟོ་བོ་ལག་ཆ་སོགས་ལ་རྒྱུད་ནས་བཤད་པ་ལྟར་བྱིན་རླབས་བགྱིས། བཅུ་བཞི་ལ་པོ་ཏ་ལར་འོངས། ས་སྐྱོང་ཐོག་རྒོད་རྣམ་རྒྱལ་བགྲེས་པ་ཁྱིམ་བདག་དཔལ་སྐྱེས་ཀྱི་བརྟུལ་ཞུགས་ཅན་དེ་བསྙེན་པར་རྫོགས། དཔོན་ས་ཧོར་མོ་བཙུན་མར་བསྒྱུར་བའི་སྐྲ་ཕུད་བླངས། གོང་ར་བར་ཤམ་བྷར་འཇགས་འོས་མ་བྱུང་བ་ཆོས་རྗེ་བྲག་ལ་བར་ཆོད་བར་བརྟེན་
ངེས་གསང་རྡོ་རྗེ་གླིང་པ་རྣམས་ཀྱི་ཕོགས་ཐེབས་སུ་གནས་རྙིང་ཤོལ་ར་བས་བཟུང་ཤུལ་རྒྱལ་མཁར་ནས་ལག་འབབ་བཞི་བརྒྱ་སྐོར། དབེན་ས་དགོན་པར་མཆོད་གཞིས་ཁ་འཐོར་བ་སྡེབ་མཚུངས་ནས་ས་བརྗེས་སྣོན་མ་བཅས་པར་མཐོང་སྨོན་སྒོ་བཞིའི་གཞིས་ཆུང་། བྲམ་ཟེ་གོང་པ་རྐང་གཅིག །ཐེམ་འཛིན་གསུམ། པན་རྟ་ཚོ་བ་དང་བྲག་དམར་ཁུངས་ཀྱི་ཤས་བོགས་བཅད་ལག་ཡོང་ཕྱེད་དྲུག་བརྒྱ་སྐོར། ཤེལ་དཀར་ཆོས་སྡེའི་དགོན་ལག་བྲང་སོ་ཟེར་མཁར་བར་ཞོ་ལུང་གཞིས་ཀ་ཐེམ་འཛིན་ལྔ། ལག་ཡོང་བརྒྱ་སྐོར། གེ་རེ་ལྷ་པའི་དོན་གྲུབ་བཀྲ་ཤིས་ལ་ལྕང་ར་གཞོན་ཚང་ཁུངས་བརྒྱ་གྲོང་སྤྱིལ་མཁར་གཞིས་ཀ་ཐེམ་འཛིན་བཞི། ལག་ཡོང་ལྔ་བརྒྱ། ཡར་ཀླུངས་སྡེ་པ་བྱིང་པ་གྲུབ་མཐའ་གཙང་ཞིང་གཙང་དུས་ནས་གུས་ཞབས་ཆེ་བར་བདེ་གཟར་གྱི་རྗེས་སུ་ས་སྣོན་དྲག་ཙམ་ཡོང་འོས་འདྲའང་ཤན་དང་ཆུ་ཁ་ཏ་སྦད་ཆོད་དུ་སོང་བར་འདི་ལོ་སྐྱིད་རུ་གཞིས་ཀ །ཐེམ་འཛིན་བཅུ་བཞི། ལག་འབབ་སྟོང་ལ་ཉེ་བ། གྲི་མཛོད་པའི་བུས་སྡེ་པ་སྲས་པོའི་ཟི་བུན་དུས་བྱ་གདོང་ཁུལ་བྱས་པར་དམ་རྩི་ཞིག་ཀྱང་བྱུང་འདུག་པས་ལྷོ་བྲག་ཡུག་བ་ཐེམ་འཛིན་ལྔ། ལག་ཡོང་ཉིས་བརྒྱ་སྐོར་རྣམས་སྦྱོར་འཇགས་བྱས། གསོ་བ་རིག་པའི་གཙུག་ལག་འདི་རིག་པའི་གནས་ལྔའི་ནང་གི་ཡ་གྱལ་གཅིག་ཡིན་པར་མ་ཟད། ལུས་ཅན་ཀུན་ལ་རིས་སུ་མ་ཆད་པའི་སྤྱི་ནོར་བླ་ན་མེད་པ་ཡིན་ཡང་བྱང་པ་རིགས་ལྡན་དང་ཟུར་མཁར་བ་ལུགས་ཐ་དད་པའི་ནང་ནས་སྨད་ལུགས་ལ་གྲ་ཐང་གི་པར་ཁུངས་བཙུན་དེ་འཕྲིན་ལས་ཆེས་སྐྱོན་གྱིས་མི་གསལ་ཞིང་
སྒམ་པོ་སྤྲུལ་སྐུ་ནོར་རྒྱན་པས་མཆན་བུ་ལོགས་སུ་བཀོད་དེ་གསར་བརྐོས་དེས་ཀྱང་གོ་དཀར་སོང་། རྟག་བརྟན་དུ་གྲ་ཐང་གི་བུ་དཔེ་ཡིན་ཁུལ་ལ་བྱང་པ་རིགས་ལྡན་ཆེན་པོའི་ལུགས་དང་བསྲེས་ཏེ་དོན་དུ་ཕན་ཚུན་གཉིས་ཀར་ཐེ་བའི་སྤྲུལ་སྐུ་རང་གི་ཆོས་ལུགས་དང་མཚུངས་པ་འཚོ་བྱེད་ལྷུན་སྡིངས་པས་དོ་དམ་བྱས་ཏེ་རྗེས་སུ་བརྐོས་པ་ནོར་བཏུབ་པ་ཞིག་མི་འདུག་པར་བརྟེན་བརྐོ་བའི་འདུན་པ་ཡོད་སྟེང་དྲང་སྲོང་བྱང་ངོས་པ་ནང་སོ་དར་རྒྱས་ཀྱིས་བསྐུལ་བས་མཚམས་སྦྱར་ཏེ་ཧོར་ཟླ་གཉིས་པའི་ནང་དུ་རྒྱུད་བཞིའི་མ་དཔེ་བསྐུར་ཟིན་པའི་པར་བྱང་ཆེ་ཆུང་རྣམས་བྲིས། ཚེས་བཅུ་དྲུག་ནས་ཧོར་ཟླ་ལྔ་པའི་ཚེས་བརྒྱད་ཀྱི་བར་ཕྱི་མཚམས་ཁོག་ཏུ་གཞིས་ཀ་ཤར་པ་ཨ་གུར་དང་ངག་དབང་འཕྲིན་ལས་གཉིས་ཀྱིས་ཤོག་ཁྲའི་རི་མོ་བ་བྱས་ཏེ་ཀུན་དགའ་ར་བའི་ཉི་འོད་ལྡེབས་རིས་ལ་རྒྱལ་རབས་དང་མཁས་གྲུབ་ལོ་པཎ་གྱི་རྣམ་པར་ཐར་པ་ཆེ་ལོང་ལས་བཏུས་པའི་གཞི་མི་ཆོས་སྐྱེ་བོའི་བྱུང་ཚུལ། རྒྱན་དམ་པ་ཆོས་འབྱུང་གི་ལོ་རྒྱུས་རགས་རིམ་གྱི་དཔེ་དོན་ཙམ་བཀོད་པའི་དོ་དམ་སྡེ་པ་འདར་གཞོན་ངག་དབང་འཕྲིན་ལས་དང་སྡིངས་ཆེན་ནས། རི་མོ་བ་དབུ་ཆེན་སྐུ་མདུན་སྨན་ཐང་པ་དང་སྤྲུལ་སྐུ་དཔལ་མགོན་གཉིས་ཀྱིས་གཙོས་པའི་དྲུག་ཅུ་རེ་གཅིག་གིས་ཤིན་ཏུ་དངོས་གཙང་བ་སྒྱུ་མའི་ཁེངས་པ་འཕྲོག་ནུས་པ་བྲིས། གོང་གི་ཤོག་ཁྲ་འབྲི་མུས་ནས་ཕན་བདེ་ལེགས་བཤད་གླིང་པའི་འདུ་ཁང་གསང་སྔགས་ཕོ་བྲང་དུ་འགྲེམ་རྒྱུར་རེ་གཉིས་མ་གཏོགས་གྲ་ཚང་གི་ཞལ་འདོན་དུ་རྒྱུན་ཚུགས་དང་བསྟུན་
པའི་སྔགས་གསར་རྙིང་གི་ཡི་དམ་སྲུང་མའི་བྲིས་ཐང་སོ་གཅིག་བཞེང་རྩིས་ཀྱིས་བླ་མ་དང་མངོན་རྟོགས་ཀྱིས་མི་ཐོན་པའི་ལྷའི་རིགས་ཀྱི་ཤོག་ཁྲ། ཡི་གེས་འཐུས་པ་རྣམས་ཀྱི་མངོན་རྟོགས་ཤོག་དྲིལ། མ་དཔེར་འོས་པའི་ཐང་རྙིང་འཚོལ་བ་སོགས་གྲབས་སུ་ཆུད་པར་བྱས། བཙུན་མོ་ཚལ་གྱི་དགོན་པ་ཆུས་ཞིག་པས་གསར་དུ་སྤོས་པ་གྲུབ་པའི་གཙུག་ལག་ཁང་གི་རྩེར་རྒྱལ་མཚན་དགོས་ཚུལ་ཚངས་པ་ཆེན་པོས་གསུང་བ་འཛུགས་རྒྱུ་བཀྲ་ཤིས་པའི་འཕྲིན་ཡིག་དང་ལྷན་དུ་ཕུལ། ཚེས་དགུ་ལ་མཚམས་གྲོལ་བའི་བསྙེན་རྫོགས་བཅུ་དགུ་དང་དགེ་ཚུལ་ཉིས་བརྒྱ་བསྒྲུབས། ཚེས་བཅུ་གཉིས་ཀྱི་གཟའ་སྐར་ལེགས་པའི་ཐོག །དངུལ་སྲང་དྲུག་བརྒྱ། གསེར་ཞོ་སུམ་བརྒྱ་སྐོར་གྱི་དངོས་པོ་ལས་ཉེ་བར་བསྐྲུན་པའི་མཎྜལ་རི་རབ་དུས་འཁོར་ལུགས་སུ་བྱས་ཚིག་བཅད་ལྷུག་མུ་རན་སྟོད་སྨད་ལ་གཟོང་བརྐོས་བརྒྱབ་པ་བཞེངས་པའི་དོ་དམ་ལྷ་ཁང་ནས། མཁར་ལྡན་ནས། ལྷ་སྦུག་པ། ཛྱེ་དྷ་ན་ཅན་བལ་པོ་མཁས་པ་བཅུ་བཞི་རྣམས་ཀྱིས་ཧོར་ཟླ་བཅུ་པའི་ཚེས་ཉི་ཤུའི་རྒྱལ་ཕུར་གྱི་འགྲུབ་སྦྱོར་ཐོག་གྲུབ་པ་དེ་ཉིན་ཕུལ་བའི་སྨོན་ལམ་གྱི་མཚམས་སྦྱོར་སྐྱོར་ལུང་གསུང་སྒྲོགས་པ་བརྒྱ་ལྷག་གིས་མཛད་རྒྱུར་ཞལ་འདོན་གྱི་ཚིགས་བཅད་ཀྱང་བཀོད། དེ་ཐོག་བརྒྱ་མཆོད་བཤམས། ལྷ་ས། ར་མོ་ཆེ། པོ་ཏ་ལའི་མཆོད་ཁང་ཚོར་གསེར་ཆབ་ཀྱང་སྒྲོན། ཇོ་ཤཱཀ་སོགས་ཀྱི་དབུ་རྒྱན་དང་མཎྜལ་རྣམས་འགྲུབ་ན་ཅི་མ་རུང་སྙམ་པའི་སྐོམ་པ་ཆུ་འདོད་ལྟར་ཡོད་རུང་ལག་ཐོག་ཏུ་མ་ཁེལ་བ་སྡེ་པ་གླེགས་བམ་མང་པོ་མཐོང་ཐོས་ཀྱིས་ཆོས་ཉམས་ཅུང་ཟད་
དྲག་པ་འདུག་པས་དང་སྤྲོ་བའི་ཁུར་ལེན་ཆེ་བ་མཛད། བསྙེན་རྫོགས་དང་དགེ་ཚུལ་སོ་སོར་བཞི་བཅུ། དགེ་བསྙེན་གཉིས་རྣམས་བསྒྲུབས། ཁྱབ་བདག་སྨན་ལུང་པའི་དྲུང་དུ་རྒྱ་ཆེ་རོལ་པས་ཐོག་དྲངས་གསུང་རབ་ཁ་ཡར་གྱི་ལུང་དང་སངས་རྒྱས་མཉམ་སྦྱོར་གྱི་འཁྲིད་ཞུ་བའི་དབུ་བཙུགས། རྒྱལ་པོ་སྔར་ནས་ཕྱག་དཔེ་འཛིན་མ་མྱོང་ཞིང་ལྷག་པར་སྐུ་ན་ཕེབས་པའི་དཔེ་ཆ་མང་བ་ཐུགས་སུ་ཆུད་དཀའ་བས་བཞེད་པ་དང་བསྟུན་སྨྱུང་གནས་ཀྱི་ཆོ་ག་ཤོག་ལྡེབས་གསུམ་ལ་ཚང་བ་ཞིག་དང་ཁྱབ་བདག་སྨན་ལུང་ནས་ཀྱིས་སྨྱུང་གནས་ཀྱི་ལྷན་ཐབས་དགོས་ཚུལ་ཕེབས་པའང་བརྩམས། མེ་བྱ་བྲིས་འབུར་བསླབས་ནའང་ཉུང་སྐྱོན་བྱུང་གཤིས་འདི་ལོ་སྤྲུལ་སྐུ་ཧོར་དར་ཅན་ལ་འབུར་དང་ལགས་ཨ་གུར་ལ་བྲིས་གྲ་པ་ཁ་ཤས་བསླབ་བཅུག་ཅིང་བྲིས་ཏིག་འཆམ་དབྱངས་གཏོར་མདོས་སོགས་ཡོན་ཏན་གྱི་རིགས་གསར་བུ་བ་བྱུང་རིམ་གྱིས་བསླབ་སྦྱོངས་བྱེད་བཅུག་པ་སྔགས་པའི་རིགས་ལ་གྱོལ་ལེ་བཅུ་གསུམ་ཤེས་ན་གནད་ཆེན་པོ་ཡོད་དོ། ། ཧོར་ཟླ་དྲུག་པའི་ཚེས་གཅིག་ལ་དཔལ་ལྡན་ལྷ་མོ་དུང་སྐྱོང་མར་གསེར་ཟངས་ལས་གྲུབ་པའི་འཁོར་ལོ་རྩིབས་སྟོང་ཅན་འཕྲིན་བཅོལ་གྱི་ཚིགས་སུ་བཅད་པའི་སྙན་ཤལ་བཟབས་གསོལ་རྒྱས་པའི་ཐོག་ཕུལ། སྔགས་སྐུ་གཉན་པའི་སྟབས་ཚེས་བརྒྱད་ལ་སྤྲུལ་སྐུ་བ་རྣམས་ལ་རྡོ་རྗེ་དྲག་པོ་རྩལ་གྱི་བྱིན་རླབས་ཐུགས་རྗེའི་དབང་དང་མགོན་པོ་ཕྱག་དྲུག་པའི་དབང་བཞི་བྱིན་རླབས་ཀྱི་ཚུལ་དུ་བསྐུར། བཟོ་བོའི་ཚོན་རས་ལག་ཆ་ལ་རྒྱུད་སྡེ་རིན་པོ་ཆེའི་ཕྱག་ལེན་ལྟར་བསྐྱེད་ཆོག་བྱས། སྨན་ཐང་ནས་དང་སྟག་ལུང་དཔལ་མགོན་གྱིས་
གཙོས་དབུ་ཆེན། དབུ་ཆུང་མཁས་བསྒྲུགས་ཉི་ཤུས་ཀུན་དགའ་ར་བའི་ཞིང་བཀོད་ཀྱི་སྐྱ་རིས་ཐེབས་ཐོག །སྔགས་ཐང་ལ་གཙོ་ཆེར་དྲིལ་ཏེ་ཚེས་བཅུ་དྲུག་ཟླ་བ་གྲོ་བཞིན་གྱི་འགྲུབ་སྦྱོར་ནས་སྐྱ་རིས་ཀྱི་དབུ་བཙུགས། སྐྱ་རིས་ལམ་ཙམ་དོད་པའི་ཚེ་ཚོན་འོག་ཏུ་འགྲོ་རྒྱུའི་གནས་ཡིག་གཟུངས་སྔགས་ཁྱད་པར་ཆོས་སྐྱོང་རྣམས་ཀྱི་སྲོག་འཁོར་འཁྲུལ་མེད་བརྒྱུད་པའི་ཕྱག་བཞིན་བཀོད། དམ་རྫས་དང་མཐུན་རྫས་སོགས་ཀྱང་མན་ངག་བཞིན་ཚང་བས་ཆེན་པོ་རྣམས་ཀྱིས་ཐང་གྲལ་དུ་ནི་ཆུང་རིགས་སུ་མི་འདུག །གཙོ་ཐང་གི་རྒྱབ་ཏུ་ཆེ་བརྗོད་སྨོན་ལམ་ཚིགས་བཅད། བཟོ་རིགས་སོ་སོའི་མིང་ཚིག་ལྷུག་བཅས་པ་ཐང་ཁ་རྣམས་སྡེ་ཚན་གསུམ་དུ་ཕྱེ་བའི་སོ་སོའི་བརྒྱུད་པའི་བཀའ་བབས་ཀྱི་དམ་རྫས་དཀར་ཆག །སྡེ་ཚན་གང་ཡིན་གྱི་ཐོག་མའི་རྒྱབ་ཏུ་འདྲི་བའི་ཚིག་ལྷུག་ཐོག་མཐའ་གཉིས་སུ་ཚིགས་བཅད་ཀྱིས་མཐའ་བརྟེན་པ། རེ་མ་ཏཱི་ལ་ཟུར་གསལ་ཚིགས་བཅད་དང་བཅས་པ་རྣམས་བྲིས། འཛུགས་པ་འཕྱིས་ཤིང་བྲིས་པ་རྣམས་ཐང་ཁ་དང་ལྡེབས་བྲིས་གཉིས་ཀ་སྦྲགས་པས་ཟླ་བ་དགུ་པའི་ཉེར་བདུན་ལ་མཚམས་བཞག །སླར་ཆུ་ཡོས་ཧོར་ཟླ་བཞི་པའི་ཚེས་བཅུ་གཅིག་ནས་དབུ་བཙུགས་བརྒྱད་པའི་ཉེར་དྲུག་ནམ་ལངས་རྒྱལ་ཕུར་འཛོམ་པའི་འགྲུབ་སྦྱོར་ལ་ཟིན་ཞིང་ངོས་ཀྱིས་ཕུར་བའི་དཀྱིལ་འཁོར་ལ་བརྟེན་ནས་རབ་གནས་ཀྱང་ནན་ཏན་དུ་བྱས། བསྙེན་རྫོགས་ཉེར་བརྒྱད་དང་དགེ་ཚུལ་བཅོ་བརྒྱད་བསྒྲུབས། ཚེས་བཅུ་བདུན་ལ་དུ་རི་ཡལ་གྱི་དཔོན་མོ་གཉིས་འཕྱོར་དཔོན་པོའི་དགེ་རྩར་དམིགས་པའི་ཆས་ཀ་སྔོན་སླེབས་ཀྱི་སྟེང་ནས་གྲ་ས་ཕན་ཚུན་དུ་མང་
འགྱེད་དང་སྨོན་ལམ་རྟེན་རྒྱས་པར་བསྟར་ཞིང་དགེ་བ་རྫོགས་བྱང་དུ་བསྔོས། དཔོན་མོ་གཉིས་ཀྱིས་རབ་བྱུང་དང་མི་བཟང་ཁ་ཤས་ཀྱིས་བསྙེན་རྫོགས་བསྒྲུབས། དཔོན་པོའི་དགེ་རྩར་ཁེབས་ཆེ་བ་ཞིག་བྱེད་འདོད་འདུག་པ་ལྟར་དབུས་ཁུལ་གྱི་དགེ་ལུགས་ཆོས་སྡེ་ཁག་རྣམས་སུ་མང་འགྱེད་གཏོང་བའི་འཆར་སྟོན་དང་ཞལ་འདོན་དམིགས་བསལ་གང་ལ་གང་འཚམ་བསླབ་སྟོན་བྱས་ཤིང་མང་སྐོལ་བ་རྣམས་ཐོན་གདོང་སྡེ་པ་གོ་བརྩིར་བྱོན་པའི་གཤིས་དགོན་སོ་སོར་ཡིག་རྒྱ་བསྐུར། ཕན་བདེ་སྐུ་སྐྱེ་སྤུན་ཁམས་ཀོང་རྩེ་བསྟུན་གྱི་བྱེད་ངན་རྩད་མ་ཆོད་པའི་རང་ཕྱོགས་ནང་ཁུལ་དུ་དཔུང་འཇུག་གནང་བ་མི་འགབ་ཞུ་མཁན་ཡང་མང་ཞིང་ཕལ་ཆེར་ནི་ཚག་པ་རྡོ་རྗེ་རྣམ་རྒྱལ་གྱིས་སྣེའུ་སྡོང་རྩེར་འོག་གཞི་ཆུ་དཀྱིལ་གྱི་དཔེ་ཁོ་ནའི་ཁེ་ཉེན་མངས་པར་བརྟེན་སྡེ་པའང་ཐེ་ཚོམ་དུ་གྱུར་པ་དཔྱིད་ཀ་ངེད་ལ་བརྟག་པ་དགོས་ཚུལ་བྱུང་བ་རང་ལ་ཐུགས་དམ་མེད་པའི་བརྟག་པ་དེ་བྱེད་ཁུལ་བྱས་ཀྱང་རང་གཞན་གཉིས་ཀ་བསླུ་བ་ལས་མི་འདུག་པས་དབྱངས་འཆར་གྱི་མོ་ཆེན་བརྒྱབ་པས་ད་ལོ་དཔུང་འཇུག་བཏང་ན་བཏང་རྒྱལ་ཡིན་ལོ་ཕྱི་མ་ཚོར་འགྱངས་ན་མོན་འདྲ་རུང་བ་ཞིག་ཡོང་བའི་དཔྱད་དང་མོ་ཟུར་དུ་དགོན་པ་དང་བླ་མའི་རིགས་ལ་ནང་ཞིག་ཡོང་བ་སོགས་རྣམ་གྲངས་ཁ་ཡར་ཤར་བའང་རྗེས་སུ་མངོན་ཤེས་འདྲ་བའི་ངེས་པ་རྙེད་པ་བྱུང་། ལོ་སྔ་མ་མགྲོན་གཉེར་དྲུང་པ་གནས་ཆུང་ལྕོག་ཏུ་བཏང་སྐབས་ཤིག་ཆོས་སྐྱོང་ཆེན་པོས་བསླབ་སྟོན་མང་དུ་གནང་བའི་ཟུར་ཞིག་ལ་ཀོང་པོ་ཕྱོགས་ལ་བཤེར་ཙམ་བྱེད་དགོས་ཡོང་གསུང་བ་ཞིབ་ཏུ་དཔྱད་ན་ད་ལམ་གྱི་འདི་ལ་དགོངས་
པར་སྣང་། བདེ་གཟར་གྱི་སྒོ་དོད་སོང་བའི་སྟབས་ཀྱིས་གྲ་ཚང་གིས་གཤིན་རྗེ་དམར་པོའི་ལས་སྦྱོར། རྫོང་གཞིས་ཁ་ཤས་ནས་བཀའ་འགྱུར་ཚར་ལྔ་བཅུ། ཤེར་སྙིང་འབུམ་ཐེར་ཉི་ཤུ། རྡོ་རྗེ་བྲག་དཔལ་རི་བ་ཅན་གྱིས་ཁྲོ་རོལ་འཆར་ཀའི་གཏོར་མདོས་བཏང་། ངེད་རང་ནས་ཕ་རོལ་གྱི་བསོད་ནམས་དབང་རླུང་བསྣུབ་པའི་ལས་སྤྱོར་སྡེ་པ་ཡུག་སྔགས་འཆང་གི་རལ་གྲི་ཕྱུང་བརྡེག་དེའང་བྱས། ཉེར་དགུ་ལ་སྡེ་པ་དཔལ་འབྱོར་ལྷུན་པོར་དམག་གི་སྐར་འཛིན་ལ་བྱོན། ཧོར་ཟླ་བདུན་པའི་ཚེས་གཅིག་གི་ཉིན་སྡེ་པ་དཔོན་གཡོག་ལྷ་ས་ནས་བཏེག །རྒྱལ་པོར་བཀའ་བགྲོས་དང་དམག་དཔོན། རུ་དཔོན། ལས་པ་ཚོར་བསླབ་སྟོན་གོ་བརྩི་མཛད་པ་རྣམས་སྦྲགས་ཏེ་གཟི་ཆེན་ཐང་བར་བྱོན། ལུ་མ་འགོ་པ་ངག་དབང་། སྤང་རྩ་བ་ཕུན་ཚོགས། དགོས་དགོས་ནོར་བུ། ཐོག་ལེགས་པ། ཟླ་བ། བློ་བཟང་ཚངས་ལྡན་རྣམས་ཀྱིས་འདར་པ་ལོ་ཙཱ་བའི་རྩར་རྩིས་བསླབས་ཤིང་ལྕགས་ཁྱི་ནས་བཟུང་རྩིས་པ་ངག་དབང་གིས་སློབ་དཔོན་ལྷུན་གྲུབ་དང་ལྷན་དུ་སྐག་མྱུལ་དང་གཏོ་བཅོས་བྱས། ཚེས་ལྔ་ལ་དུ་ཡི་ཡལ་གྱི་གཞི་མ་རྟིང་མ་ཚོ་སླེབས་པའི་གོས་ཡུག་བརྒྱས་ཐོག་དྲངས་པའི་སྟེར་སྦྱིན་སྤམས་མཐོ་བ་བཏེག །དཔོན་མོ་གཉིས་དང་མི་བཟང་རྣམས་ལ་གྲུབ་རྒྱལ་ལུགས་ཀྱི་ཚེ་དབང་། སྤྱན་རས་གཟིགས་གཙོ་རྐྱང་དང་ཕྱག་དྲུག་པའི་རྗེས་གནང་བྱས། གསེར་མདོག་ཅན་མཁན་པོ་གཏིང་སྐྱེས་པ་ཀུན་དགའ་བསོད་ནམས་ལེགས་པ་དང་ཆོས་རྗེ་འུག་བྱ་ལུང་པ་གཉིས་ཀྱིས་ནན་ཏན་དགོས་ཚུལ་བྱུང་བ་ལྟར་ཁོང་དཔོན་སློབ་གཉིས་ཀྱི་ཟླར་ཁྱབ་བདག་སྨན་ལུང་པ་དང་གྲ་ཚང་གི་གྲ་པ་གསར་
སླེབས་དབང་མ་ཐོབ་པ་རྣམས་ལ་བསྡེབས་སུ་རས་བྲིས་ཀྱི་དཀྱིལ་འཁོར་ལ་བརྟེན་ནས་བྱང་གཏེར་ཐུགས་སྒྲུབ་རྡོ་རྗེ་དྲག་པོ་རྩལ་གྱི་དབང་རྒྱས་འབྲིང་བསྡུས་གསུམ་དང་ཉིན་ཕྱི་མ་གཉིས་དཔོན་སློབ་ཉུང་བསྡུས་ལ་ཆོས་ཚན་ཉེར་ལྔའི་ལུང་ཡོངས་རྫོགས་ཕུལ། བྲག་སྣ་ཆོས་རྗེ་བློ་
བཟང་ངག་དབང་གིས་རྡོ་རྗེ་སློབ་དཔོན་བྱས་གྲ་གྲངས་ཀྱིས་ཆུ 
་གཏད་ཀྱི་སྒྲུབ་པ་བཙུགས། བརྒྱད་པའི་ཚེས་གཉིས་ལ་གྲོལ་བའི་རྡོ་རྗེ་བྲག་གི་རགས་ཟུར་དུ་རྒྱག་པར་མཆོད་དཔོན་པ་དང་མཚམས་པ་བ་རྣམས་བཏང་བར་དེ་ཉིན་སྔར་མ་གྲགས་ལྟ་བུའི་རླུང་འཚུབ་ཀྱིས་ཤིང་སྡོང་ཡང་ཁ་ཤས་བསྒྱེལ། རོང་པ་སྐུ་མདུན་གྱིས་མཆོད་དཔོན་པར་ཁྱེད་དཔོན་སློབ་ཀྱི་ཕྱག་ལས་དེ་བྱང་པ་བདག་པོའི་འཇིགས་འཇིགས་མ་ཞིག་ཡོད་པ་དེ་ཡིན་པ་འདྲ་ཞེས་ཉམས་འཆར་གྱི་འཕྲོས་པའང་མཛད་འདུག །ཕུང་པོ་རི་བོ་ཆེ་དང་ཕག་རི་སོགས་སུའང་འཇམ་དཔལ་དམར་པོའི་སྒོ་ནས་དགྲ་སྲི་མནན། སྐྱར་པོ་ཆོས་མཛད་མཚོ་ཁ་ནས་ཚེས་བཅུ་ལ་འབྱོར། དོན་རིགས་རྣམས་ཕལ་ཆེར་ཐོག་ཏུ་འཁྱོལ་སྣང་། བསྙེན་རྫོགས་ལྔ་དང་དགེ་ཚུལ་དགུ་བསྒྲུབས། ཐང་པོ་ཆེའི་དགག་དབྱེའི་དུས་རིགས་ཀྱི་སྲུང་མ་བཤན་པ་ལག་དམར་ལ་གསེར་སྐྱེམས། གོས་ཆེན་གྱི་ཁྲབ་གདན། གོ་མཚོན། གོས་ཕྱི་ནང་། རྟ་རྣམས་འཕྲིན་བཅོལ་ཚིགས་སུ་བཅད་པའི་རི་མོ་དང་བཅས་སྐྱེལ་བར་ཆང་ཁྱིམ་པ་ངག་དབང་མཁྱེན་བརྩེ་བཏང་། སྐྱོར་མོ་ལུང་ཆོས་སྡེ་སྤྱི་སོས་རིང་འཚོའི་རྟེན་འབྱུང་བསྒྲིག་པ་དང་ལྷན་དུ་གནས་སྲུང་ཁྱི་མཇུག་རྒྱལ་པོས་ཆེད་དུ་བཟོས་པའི་གདན་གྱི་རྟེན་དང་བཅས་
འཕྲིན་ཡིག་བྱུང་བའི་ལན་ཚིགས་བཅད་དུ་བྲིས། སྡེ་པ་དཔོན་གཡོག་ཀྱང་ཕྱིར་ཕེབས། ཉེར་བརྒྱད་ནས་བཟུང་ཉིན་གསུམ་གྱི་བར་རྀ་ཥྀའི་ཆུ་ཞུགས་བྱས། ཧོར་ཟླ་བརྒྱད་པའི་ཚེས་གཅིག་ལ་གོང་ནས་མི་སྔར་བསམ་བློ་མེརྒན་ཆོས་རྗེ་དང་ཨེར་ཁེ་དཀའ་བཅུས་གཙོས་འགྲུལ་པ་གཏོས་ཆེ་བ་འབྱོར། འཇམ་དབྱངས་གོང་མ་ཤུན་ཙི་གནམ་གྱི་མཐོངས་ནས་མཐོ་རིས་ཀྱི་སྐས་ལ་འཛེགས་པའི་མང་པོས་བཀུར་བའི་ཁྲི་ཆེན་པོར་རིགས་ཀྱི་སྲས་ཁང་ཤི་རྒྱལ་པོ་ཕེབས་པའི་ཐོག་མའི་བཀའ་ཤོག་གནང་སྦྱིན་བསྩལ་བ་རྣམས་སྤྲད། མེརྒན་ཆོས་རྗེས་གོས་དར་དངོས་གཙང་བའི་བདོག་པ་དངོམ་ཆེ་བ། ཡེར་བ་ཆོས་རྗེ། བྱ་ཁྱུང་ཆོས་རྗེ་གཉིས་ཀྱིས་བརྒྱ་འབུལ། ཆ་གན་བླ་མ་དང་མཁར་སྔོན་ཐ་ཡན་ཆེ་ཁག་གིས་མངགས་པའི་དགེ་རྩ་བྱེད་མིས་ཟང་ཟིང་གི་བདོག་རྒྱས་པར་བསྟབས། གོང་མའི་དགོངས་རྫོགས་སུ་མཛོད་ནས་གསར་དུ་བཏོན་ཏེ་སེར་མོ་བ་ཚོར་བཏང་བའི་ནན་ཅིང་ཁ་བཏགས་སུ་གྲགས་པའི་ཁྱད་ཅན་ཞིག་ཀྱང་འདི་ལོ་ནས་དོན་པའི་བྱ་ཁྱུང་ཆོས་རྗེས་གཏོས་ཆེ་བ་བྱིན། གསེར་ཡིག་པ་རྣམས་ཀྱི་ཟླར་པ་ཤི་སན་ཆག །སྦོར་ཁོན། བནྡེ། མི་གལ་ཐུ། ཀརྨ་ཤི། སྲི་ཡན། ཨུལ་ཇེའི། སྦོ་རོས་རྣམས་བོད་ཀྱི་སྐད་དང་བརྡ་དག་ལོ་ཙཱ་བསྒྱུར་ལུགས་བསླབ་པར་རྫོང་བདའ་གནང་འདུག་པ་བཞིན་ཕོགས་མཐུན་རྐྱེན་རྒྱལ་རྩེ་ནས་སྤྲད་དཔལ་འཁོར་ཆོས་སྡེའི་མཁན་པོ་ཨེར་ཏེ་ནི་སོག་བོད་ཀྱི་ལོ་ཙཱ་ལ་ཤིན་ཏུ་མཁས་པས་སློབ་དཔོན་མཛད། རྗེས་སུ་སྙན་ངག་ལ་ཤེས་འདོད་འདུག་པ་ངམ་རིང་མཁན་ཆེན་ལོ་ཙཱ་བའི་སློབ་མ་
འབྲོང་རྩེ་བ་བློ་བཟང་ནོར་བུས་འཁྲིད་པའི་བཀོད་པ་བྱས། རོང་བྱམས་ཆེན་པའི་གྲ་པ་བརྒྱད་ཀྱིས་ཚད་མ་སོགས་ཡིག་ཆ་ཁ་ཡར་དང་གསར་རྩོམ་དབུ་ཕར་མཛོད་གསུམ་ཅི་རིགས་པ། དགའ་ལྡན་གསུང་རབ་གླིང་གི་གྲ་པ་ཆོས་བཀྲ་ཤིས་ཅན་ལྔས་གསར་རྩོམ་རྣམས་གོང་དང་འདྲ་བ་རྒྱུགས་སྤྲད། ཟླ་བ་གསུམ་པའི་ནང་དུ་ཚོང་འདུས་ཆོས་སྐྱོང་གིས་ད་ལོའི་གོ་གསོལ་དུས་སྡེ་བརྒྱད་ཐམས་ཅད་འཚོག་རྒྱུ་ཡིན་པས་དགོས་གསུང་བ་བཞིན་ཚེས་ལྔ་ལ་བཟང་གོས་དམར་པོའི་ཁྲབ་གདན། ཐོད། ཞབས་དོར། ལྷམ། གོས་ཕྱི་ནང་། གསེར་སྐྱེམས། འཁོར་གསུམ། མདུང་དམར། རྟ། བཟང་ཇ་སོགས་ཀྱི་སྤྱན་གཟིགས་དང་འཕྲིན་བཅོལ་གྱི་རི་མོ་འབུལ་བར་ལྕང་ལོ་ཅན་པ་བསྟན་འཛིན་དཔལ་བཟང་བཏང་། ཚངས་པ་དུང་ཐོད་ཅན་གྱིས་རིམ་གྲོའི་བླང་དོར་གྱི་གསུང་འཕྲིན་བྱུང་བའི་ལན་ཚིགས་བཅད་དུ་ཕུལ། ཆོས་འཁོར་སྟེང་ལྷ་བཙན་གྱིས་རྟ་སོགས་དགོས་ཚུལ་བྱུང་བ་ལན་དང་བཅས་ཏེ་མཐུན་རྫས་བསྲིངས། ཨར་དགེ་རྒྱལ་པོས་མོན་བུ་ཀླུ་བཙན་གྱི་ཁོག་པ་གཡར་ནས་ཐོག་བབས་ཡིན་ཚུལ་གྱི་གསོལ་མཆོད་གསར་རྩོམ་དང་མཐུན་རྫས་དགོས་ཟེར་བ་དེ་དོན་བཞིན་བསྲིངས་པའི་འཕྲིན་ལན་བསྐུར། བསྙེན་རྫོགས་བརྒྱད་ཅུ་གྱ་གཅིག་དང་དགེ་ཚུལ་དགུ་བཅུ་གོ་དྲུག་བསྒྲུབས། གསང་སྔགས་ཕོ་བྲང་གི་སྔགས་སྐུ་རྣམས་ལ་ཚོན་འབྱུག་གོང་དུ་ཟླ་བ་སྔ་མར་རབ་གནས་གསང་པའི་རྫས་འབྱུག་དང་ད་ལམ་སྤྱན་འབྱེད་རབ་གནས་ལ་མཆོད་དཔོན་པས་རྡོ་རྗེ་སློབ་དཔོན་བྱས་པའི་དབུ་མཛད་བློ་བཟང་བསྟན་འཛིན་སོགས་གྲ་པ་བཅོ་ལྔ་བཏང་ཞིང་
བྲིས་འབུར་བ་རྣམས་གླ་ཡོན་གྱིས་ཚིམ་པར་བྱས། ཁྱབ་བདག་སྨན་ལུང་པས་ཇུས་རིམ་ལ་དམིགས་པའི་འཆར་ཀ་སེང་ཞོན་མའི་མདོས་ཆེན་མཛད་པ་ལུང་རྟགས་དང་ཟོར་བཀྲ་ལེགས་པ་བྱུང་། བཅུ་བདུན་ལ་མ་མ་མཚོ་སྨན་འདས་པའི་བསྔོ་རྟེན་སྐྱེལ་མི་བྱུང་བས་འཕགས་པ་མཆེད་ཀྱི་དྲུང་དུ་ཐུགས་རྗེ་ཆེན་པོ་འགྲོ་བ་ཀུན་སྒྲོལ་གྱི་དཀྱིལ་འཁོར་ལ་བརྟེན་ནས་རིགས་དྲུག་གནས་འདྲེན་བྱས་ཤིང་། ཕུན་ཚོགས་རབ་བརྟན་དགོས་པ་དཔུང་ཐོག་ཏུ་འདས་འདུག་པའི་བྱང་བུའང་ལྷན་དུ་བསྲེགས། བསྙེན་རྫོགས་བཞི་བཅུ་དང་དགེ་ཚུལ་བརྒྱད་ཅུ་གྱ་གསུམ་བསྒྲུབས། ཞ་ལུ་སྤྱི་སོས་འཕགས་པ་རིན་པོ་ཆེའི་ཐུགས་དམ་པའི་མི་གཡོ་པ་ཐགས་གྲུབ་མས་གཙོས་བདོག་པ་དང་རིང་འཚོའི་རྟེན་འབྱུང་། བྱམས་ཆེན་གཉེར་པ་བར་ཚོ་བས་ཆོས་དབང་རིན་པོ་ཆེའི་གཏེར་མའི་བྱེ་མ་ཨ་ཀྲོང་གི་ཨྱོན་རིན་པོ་ཆེའི་སྐུ་ཚབ་པདྨ་མཐོང་གྲོལ་གུ་རུ་ལྷ་ཁང་ནས་ཆོས་མཛད་རྒྱལ་པོ་དོན་གྲུབ་བརྒྱུད་པའི་ཁུངས་བཙུན། ཁའུའི་རྡོ་ལ་ས་པཎ་གྱི་ཕྱག་བརྐོས་མའི་ཞལ་གྱི་སྐུ་ཐམས་ཅད་མཁྱེན་པ་བསོད་ནམས་རྒྱ་མཚོས་གོང་དཀར་ཞབས་དྲུང་ངག་དབང་གྲགས་པའི་སྐུ་བསྲུང་དུ་ཕུལ་བ་བདེ་ཆེན་ཆོས་འཁོར་ནས་སྡེ་པ་ཞུ་ཡིག་རྟེན་དུ་མཛད་པའི་འགངས་ཆེ་བ་རིམ་གྱིས་འབྱོར། ཁྱབ་བདག་སྨན་ལུང་པར་སྙན་བརྒྱུད་རྡོར་ཟམ་གྱི་སྨིན་བྱེད་སོགས་དབང་ཁ་ཤས་ཞུས། གྲིབ་སེལ་བསུ་བཟློག་གིས་མཚོན་པའི་རིམ་གྲོ་ཅི་རིགས་གནང་ཞིང་ཕེབས་རྫོངས་བཟབས་ཏེ་ཆུ་བོ་རི་ཕྱོགས་སུ་དལ་འགྲོས་ཀྱིས་གཤེགས། བསྙེན་རྫོགས་དང་དགེ་ཚུལ་ཉི་ཤུ་རེ་བསྒྲུབས།
ཧོར་ཟླ་དགུ་པའི་ཚེས་གསུམ་ལ་བདེ་མཆོག་བླ་མས་སྦྱིན་བདག་བྱས་ནས་གྲ་ཚང་གིས་དཀྱིལ་འཁོར་དང་འབྲེལ་བའི་ཚེ་ཆོག་གི་སྒོ་ནས་རྟེན་འབྲེལ་བསྒྲིགས། ཡན་ལག་བདུན་པ་དང་འབྲེལ་བའི་བསག་སྦྱང་བྱེད་པའི་རིམ་པ་དགོས་ཚུལ་བྱུང་བ་བརྩམས། སྔགས་པ་སེ་ཆེན་ཞབས་དྲུང་ལམ་དུ་གྲོངས་པའི་ཕྱག་མཛོད་འབྲས་མོ་ནམ་མཁའ་རིན་ཆེན་གྱིས་གཙོས་གྲ་རིགས་རྣམས་འབྱོར་ཏེ་འདོད་སྦྱར་བཞིན་ཆུ་སྐོར་སྨད་གླིང་ཁར་ཕྱིན། དངུལ་སྲང་སྟོང་ཕྲག་བདུན། གོས་ཡུག་ཉིས་བརྒྱ། དར། ཇ། རས། བལ་གཟར་གྱི་ས་གདན། རྟ། རྔ་མོང་གཙོས་རྒྱ་སོག་སྟོད་ཧོར་གྱི་བདོག་པ་དངོམ་ཆེ་བའི་ཁྲི་འབུལ་བཏེག །ཆོས་རྗེའི་དགོངས་པ་རྫོགས་པའི་བསྔོ་སྨོན་གྱིས་རྒྱས་བཏབ། གླིང་སྟོངས་དེ་ཅ་པོས་ཁེངས་པ་ལྟ་བུའི་ཚང་མ་ཧ་ལས་ལས་སུ་བྱེད་འདུག །ཆ་གན་ཨུའི་ཆིང་གི་བུ་རབ་འབྱམས་པ་དགེ་འདུན་བསྟན་པ་དར་རྒྱས་ཀྱི་སྐུ་སྐྱེ་དེ་སོག་ཡུལ་ནས་འབྱོར་བའི་གོས་ཡུག་བརྒྱ་སྐོར་བྱུང་། ཕྱག་དྲུག་པའི་དབང་བཞི་བྱིན་རླབས་ཀྱི་ཚུལ་དུ་བསྐུར། ཚེས་དྲུག་ལ་བསྙེན་རྫོགས་བརྒྱ་སུམ་ཅུ་དང་དགེ་ཚུལ་དགུ་བཅུ་གོ་གཅིག་བསྒྲུབས། བདེ་ཆེན་ནས་ཞབས་དྲུང་ཆོས་རྗེ་མ་ཆེན་བློ་བཟང་ཆོས་རྒྱལ་དབང་ཕྱུག་དང་དཔོན་ས་ཧོར་མོ་དཔོན་གཡོག་པོ་ཏ་ལར་བྱོན་ཞག་བཅོ་ལྔ་སྐོར་བཞུགས། སྤྱན་རས་གཟིགས་ཚེམ་བུ་ལུགས་ཀྱི་དམར་འཁྲིད་ཉམས་འཁྲིད་དུ་ཕབ། ཆོས་རྗེ་བློ་བཟང་ཆོས་རྒྱལ་བ་དཔོན་གཡོག་གི་ཐོག་སྡེ་པ་གྲགས་པ་དང་རྒྱལ་སྲས་ཤེར་འཕེལ་བ་སོགས་མི་ཉེར་ལྔ་ལ་རས་
བྲིས་ཀྱི་དཀྱིལ་འཁོར་དུ་འཇིགས་བྱེད་བཅུ་གསུམ་མའི་དབང་བཞི་ཕུལ། དཔོན་ས་ཧོར་མོས་དགེ་ཚུལ་བསྒྲུབས། ཕུད་ཀྱུ་དང་སྤོས་ཤེལ་གྱི་སྒེར་འབུལ་མཛད། བཀྲ་ཤིས་བདེ་ཆེན་གྱི་དགེ་སློང་རིན་ཆེན་རྒྱ་མཚོས་ལྟ་བ་ལ་སྦྱར་བའི་ཚིགས་བཅད་དགོས་ཚུལ་བཞིན་རྡོ་རྗེ་འཆང་ཕ་བོང་ཁ་པའི་གསུང་ལྟ་བ་སྤྱི་ཁྱབ་ངོ་སྤྲོད་ཀྱི་དགོངས་པ་དང་མཐུན་པར་བྲིས། དཔུང་འཇུག་གི་ཇུས་རིམ་དང་བཅས་རྫོང་གཞིས་ཁག་བཅུ་གསུམ་བསྡོམས་པར་བཀའ་འགྱུར་ཚར་དྲུག་ཅུ། འབུམ་བརྒྱ་གཉིས་དཀོན་བརྩེགས། ཏིང་འཛིན་རྒྱལ་པོ། གཟུངས་བསྡུས་རྣམས་བརྒྱ་རྩ། བརྒྱད་སྟོང་པ་དང་གསེར་འོད་སུམ་བརྒྱ། མཚན་བརྗོད་ཁྲི། ཤེར་སྙིང་འབུམ་ཐེར་ཉི་ཤུ། གོང་དཀར་དུ་དཀོན་གཉེར་གྲ་ཚང་གིས་གདུགས་དཀར་མདོས་ཆེན། ཆོས་སྡེ་བས་གུར་གྱི་དམར་ཆེན་གཏོར་བཟློག །རྒྱུད་སྟོད་པས་དྲུག་ཅུ་པ། གསང་སྔགས་གླིང་པས་ཟླ་གཅིག་པར་གཤིན་རྗེའི་སྔགས་བཟློག །བཀྲ་ཤིས་ཆོས་སྡེ་བས་ཞལ་གྱི་གཏོར་ཆེན། རྡོ་རྗེ་བྲག་པས་འཆར་ཀའི་མདོས། དཔལ་རི་བས་ཁྲོ་རོལ། རྒྱལ་དུ་དམག་ཟོར་མའི་བསྐང་འབུམ་དང་སྤྱི་བསྐང་སྟོང་རྩ། ཕྱུགས་ལུག་བརྒྱའི་སྲོག་བླུ་རྣམས་བྱས། ཚེས་བཅུ་གཅིག་ལ་བསྙེན་རྫོགས་དྲུག་དང་དགེ་ཚུལ་དགུ་བསྒྲུབས། བཅུ་གཉིས་ལ་སྨད་རྒྱུད་གྲ་ཚང་གིས་ཚན་གྲངས་བསྟར་ཞིང་། ཚེའི་རྟེན་འབྲེལ་དུ་དམིགས་པའི་ཚིགས་སུ་བཅད་པའི་ཞལ་འདོན་གྱི་སྨོན་ལམ་མཛད། ཚོགས་པ་ལ་བླ་མའི་རྣལ་འབྱོར་ཕུལ། གསང་སྔགས་ཕོ་བྲང་དང་དེའི་སྦུག་མགོན་ཁང་ཞི་ཁྲོ་རྣམ་རོལ་གཉིས་ཀྱི་མིང་ཡིག་ཤིང་བཟང་ལ་སྦྱོར་རྒྱུའི་
ཚིགས་བཅད་བྲིས། ཁལ་ཀ་འཇམ་དབྱངས་སྤྲུལ་སྐུའི་མི་སྣ་སྤྱན་གཡས་ལྷ་བྲིས་པ་ཅན་སླེབས། ཡེར་པ་གྲ་ཚང་ལ་སྣར་ཐང་བརྒྱ་རྩའི་ནང་ཚན་གྱི་མི་འཁྲུགས་པའི་རྗེས་གནང་ཕུལ། སེ་ཆེན་ཆོས་རྗེ་རྒྱལ་བའི་འཕྲིན་ལས་པའི་བླ་ཚབ་ཨེར་ཏེ་ནི་གུ་ཤྲི་དང་ནོ་ཡོན་དབོན་པོ་ཅན་འབྱོར། དངུལ་སྲང་སྟོང་ཕྲག་གིས་གཙོས་པའི་དངོས་པོ་བསྟར། བསྙེན་རྫོགས་དགུ་བཅུ་གོ་དྲུག་དང་དགེ་ཚུལ་གྱ་བཞི་བསྒྲུབས། རྨི་རུ་བ་དང་ནེའུ་ཆུང་རི་པ་གཉིས་དྲིལ་བས་ཟང་ཟིང་གི་སྐྱེས་དང་བཅས་ཡུན་དུ་འཚོ་བའི་སྨོན་ལམ་བཏབ། ཉེར་གཅིག་ལ་བསྙེན་རྫོགས་སོ་གཉིས་དང་དགེ་ཚུལ་ཉི་ཤུ་སྐོར་བསྒྲུབས། ཁལ་ཁ་གཡས་རུའི་རྒྱལ་པོ་བི་ཤི་རེལ་ཐུ་སྟོང་འཁོར་བའི་དགོན་པར་གློ་བུར་དུ་གྲོངས་པའི་རྒྱལ་ས་ཚོ་པ་བདུན་ལ་གྲོས་མེད་པ་དེ་གའི་གཅུང་པོས་འོས་མེད་རིག་པ་མཛད་པ་ལ་བསྙད་སྟོང་འཁོར་བ་ཕྱོགས་ཀྱི་གཡོ་འཕྲུལ་ལ་བརྟེན་སན་ཧུང་ཐའི་ཇིས་གཞུང་བཤིག་པའི་གནས་ཚུལ་ནོ་མོན་ཨེ་ཇེན་མཚོ་ཁ་འབྱོར་ཐོག་བྱུང་བས་དཔོན་པོ་རང་ཡུལ་ལ་ལོག་པའི་མེརྒན་ཆོས་རྗེ་དང་དགེ་ཚུལ་མ་རྒན་པ་ཡོན་མཆོད་གཉིས་བོད་དུ་དགེ་རྩ་བྱེད་པར་འབྱོར། བསྙེན་རྫོགས་དགུ་བཅུ་གོ་གཉིས་དང་དགེ་ཚུལ་བཞི་བཅུ་ཞེ་དགུ་བསྒྲུབས། ཧོར་ཟླ་བཅུ་པའི་ཚེས་གསུམ་ལ་བསམ་བློ་མེརྒན་ཆོས་རྗེས་སྦྱིན་བདག་བྱས་ཏེ་གྲ་ཚང་གིས་འཆི་མེད་འོང་སྣང་གི་དཀྱིལ་འཁོར་དང་འབྲེལ་བའི་ཚེ་ཆོག་བཏང་། ཞག་གསུམ་བཅད་རྒྱ་བགྱིས་པའི་ཚེས་དྲུག་ལ་ད་ལའི་ཧུང་ཐའི་ཇི་མཚོ་ཁ་ནས་འབྱོར་བ་དང་ཕྲད།
བསྙེན་རྫོགས་བརྒྱ་བཅུ་གཅིག་དང་དགེ་ཚུལ་བརྒྱ་བཞི་བཅུ་སྐོར་བསྒྲུབས། ལྷ་ས་སྤྱི་ཚོགས་ཀྱིས་ངེད་རང་དང་སྡེ་པའི་རིང་འཚོའི་ཚིགས་བཅད་དགོས་ཚུལ་བྱུང་བ་བྲིས། མཆོད་དཔོན་དབུ་མཛད་གཉིས་ཀྱིས་རིགས་ལྔ། སངས་རྒྱས་སུམ་ཅུ་སོ་ལྔ། ཐུགས་རྗེ་ཆེན་པོ་རྣམས་ཀྱི་གསེར་ཐང་གྲ་ཚར་བཞེངས་པའི་དཀར་ཆག་བསྐུལ་བ་ལྟར་བཀོད། ཚེས་བརྒྱད་ལ་མེརྒན་ཆོས་རྗེ་ཉང་ལུགས་དྲག་དམར་གྱི་བྱིན་རླབས་ལུ་གུ་རྒྱུད། བྲམ་ནག་བཤན་པ་དྲུག་སྐོར། རྣམ་སྲས་སེར་ཆེན་སྨད་ལུགས་རྣམས་ཀྱི་རྗེས་གནང་བྱས། གཏོར་སྒྲུབ་དུས་རྣམ་སྲས་ཀྱི་ཁང་བརྩེགས་དེ་མ་ཆག་ཀྱང་མཉྫིའི་སྟེང་ནས་ལྷུངས་པ་ཁོ་རང་གི་ཨ་ཞང་ཆོས་རྗེར་བཀའ་བཀྱོན་ཡོང་བར་བལྟ་བ་འདྲ། སང་ཉིན་རྒྱ་ནག་གི་འགྲུལ་པ་སྐྱ་སེར་བསྡོམས་པར་གྲུབ་རྒྱལ་ལུགས་ཀྱི་ཚེ་དབང་། སྐྱེར་སྒང་ལུགས་ཀྱི་ཐུགས་རྗེ་ཆེན་པོ། ཕྱག་དྲུག་པའི་དབང་བཞི་བྱིན་རླབས་ཀྱི་ཚུལ་རྣམས་བསྐུར། སེ་ཆེན་ཧུང་ཐའི་ཇིའི་བུ་རྡོ་རྗེ་ཕའི་དགེ་རྩ་གཏོང་བར་འབྱོར། དངུལ་སྲང་སྟོང་ཕྲག་དང་གོས་དར་ཁ་ཤས་ཀྱི་བསྔོ་རྟེན་བྱུང་བ་དགེ་བ་རྫོགས་བྱང་དུ་བསྔོས། དངུལ་སྲང་ཉིས་བརྒྱའི་ཡོ་བྱད་ལ་བརྟེན་ཕན་བདེ་ལེགས་བཤད་གླིང་པས་ཕྱག་ལེན་ཚད་ལྡན་གྱི་རུས་ཆོག་དང་འབྲེལ་བས་སཱཙྪ་བཏབ། སྐྱེ་རྟགས་དགོས་ཚུལ་ཟེར་བ་རང་བྱུང་འཕགས་པའི་དྲུང་དུ་འགྲོ་བ་ཀུན་སྒྲོལ་གྱི་དཀྱིལ་འཁོར་ལ་བརྟེན་ནས་བྱང་བུ་བཞུ། ཀླུ་འབུམ་མེརྒན་ཆོས་རྗེས་གོས་ཡུག་བརྒྱ་དང་ཇ་ཀོ་དྲ་བརྒྱས་གཙོས་པ། དཔོན་མོས་གོས་དར་ཇ་དངུལ་གྱིས་སྣ་དྲངས་
པའི་ཟང་ཟིང་རྒྱ་ཆེར་བྱུང་། བསྙེན་རྫོགས་ཉི་ཤུ་རྩ་བཞི་དང་དགེ་ཚུལ་བཅུ་གསུམ་བསྒྲུབས། གྲ་ཚང་དུ་གཤིན་རྗེ་དམར་པོ་རླུང་གི་སྒྲུབ་པ་བཙུགས། སྤྱི་སྒོས་ཀྱི་རིམ་གྲོར་རྫོང་གཞིས་ཁག་བཅུ་དྲུག་བསྡོམས་པར་བཀའ་འགྱུར་ཚར་བརྒྱ་དང་སུམ་ཅུ་སོ་ལྔ། འབུམ་བརྒྱ། བརྒྱད་སྟོང་པ་སྟོང་རྩ་གསུམ། བསྐལ་བཟང་སྟོང་རྩ་གཉིས། དཀོན་མཆོག་བརྩེགས་པ་སྟོང་རྩ། ཏིང་འཛིན་རྒྱལ་པོ། གསེར་གཟུངས་རྣམས་བརྒྱ་རྩ། མཚན་བརྗོད་འབུམ་ཐེར་ལྔ། གདུགས་དཀར་འབུམ་ཐེར་གཉིས། སྒྲོལ་མ་འབུམ་ཐེར་གཅིག །ཤེར་སྙིང་འབུམ་ཐེར་གསུམ། རྣམ་རྒྱལ་འཇོམས་གྱི་གཟུངས་འབུམ་ཐེར་རེ། གཤིན་རྗེ་ཐམས་ཅད་འདུས་པའི་གཟུངས་རིང་བྱེ་བ་གསུམ། མ་ཎི་དུང་ཕྱུར་ལྔ། སཱཙྪ་འབུམ་ཐེར་གཅིག །ལྷ་ས། བསམ་ཡས། ཁྲ་འབྲུག །ཡུམ་བུ་བཞིར་བརྒྱ་མཆོད་ཞལ་གསེར། སྤྱན་འབྱེད། ཕྱུགས་ལུག་བརྒྱའི་སྲོག་བླུས། རྒྱུད་བཞི་གསར་དུ་བརྐོས་པའི་པར་ཕུད་འབྱོར། གསང་སྔགས་ཕོ་བྲང་གི་འབུར་སྐུ་རྣམས་གྲུབ་བསྟུན་བྲག་སྣ་ཆོས་རྗེ་བློ་བཟང་ངག་དབང་ཅན་གྲ་པ་ཁ་ཤས་ཀྱིས་རོ་གདན་འོག་ཏུ་མནན་པ་བརྒྱབ་ནས་དེ་སྟེང་སྣང་བརྙན་རྣམས་བསྒྲིགས་པའི་སྔོན་འགྲོ་བརྟན་བཞུགས་ཀྱི་རབ་གནས་དང་ཀུན་དགའ་ར་བར་བགེགས་སྐྲོད་ཀྱི་མེ་ཏོག་འཐོར་བར་མཆོད་དཔོན་པས་རྡོ་རྗེ་སློབ་དཔོན་བྱས་པའི་དབུ་མཛད་བློ་བཟང་བསྟན་འཛིན་ཅན་གྲ་པ་བཅོ་ལྔ་སྐོར་བཏང་། སྡེ་པས་དོན་གལ་པོ་ཆེར་མཛད་དེ་ཁུར་བཞེས་དོ་དམ་ལྷ་རྩེ་ལྷུག་པ། བལ་པོ་སིདྡྷི་ཅན་ལྔས་ཉེར་ལྔ་ལ་འགོ་བཙུགས་ས་སྤྲེལ་ཟླ་བ་དྲུག་པའི་ཚེས་ཉི་
ཤུ་ལ་གྲུབ་པའི་སངས་རྒྱས་སྟོང་སྐུའི་རྒྱུར་ཟངས་མཁར་རྒྱའི་ཁལ་སུམ་བརྒྱ་ཉི་ཤུ། ཏི་ཚ་སོ་གཉིས། བཤའ་དཀར་བཅུ། གསེར་བཙོ་མ་ཞོ་སུམ་བརྒྱ་བརྒྱད། གྲང་གསེར་ཞོ་ཉི་ཤུ། དངུལ་སྲང་བཅུ་གསུམ་སོང་བའི་ཕོགས་གླ་ཡོན་སྟོན་མོ་རྣམས་ཀྱི་དགོས་ཆ་འབྲུ་ཐོག་ཏུ་དྲིལ་བར་མཁར་ཁལ་ཆིག་ཁྲི་དགུ་བརྒྱ་སོང་། ཉེར་དྲུག་ལ་བསྙེན་རྫོགས་བདུན་ཅུ་དོན་གཉིས་དང་དགེ་ཚུལ་ཞེ་ལྔ་བསྒྲུབས། ཨེར་ཏེ་ནི་ཐ་ཡན་ཆིས་བསྐུལ་བའི་གསོལ་འདེབས་སྨོན་ལམ་གོ་བདེ་བ། མགོན་ཁང་དགེ་སློང་དཔལ་འབྱོར་རྒྱ་མཚོའི་ངོར་སྨོན་ལམ། ཡངས་པ་ཅན་སྤྱན་སྔ་ཀརྨ་ཉི་མ་བསྙུན་པའི་དུས་བར་ཆད་སེལ་བའི་ཚིགས་བཅད། ལྷ་ས་བྱམས་རྒྱབ་བཞི་དགའི་ཁ་ཏོན་དུ་སྨོན་ལམ་རྣམས་བྲིས། ཧོར་ཟླ་བཅུ་གཅིག་པའི་ཚེས་གཉིས་ལ་ཨེར་ཏེ་ནི་གུ་ཤྲི་ཅན་གྱིས་སྦྱིན་བདག་བྱས་གྲ་ཚང་གིས་རྡུལ་ཚོན་གྱི་དཀྱིལ་འཁོར་ལ་བརྟེན་པའི་འཆི་མེད་ཚེའི་ཆོ་ག་བཏང་། རྒྱལ་པོ་ཀོང་པོར་དཔུང་ཐོག་ཏུ་བཞུགས་པའི་སྟབས་གོང་གི་བཀའ་ཤོག་གནང་སྦྱིན་སྐྱེལ་བར་མི་སྣ་གཞོན་པ་ཨེར་ཁེ་དཀའ་བཅུ་བས་ཀོང་པོར་ཕྱིན། ཚེས་བཞི་ནས་དུས་ཀྱི་དགྲ་བོ་མེའི་སྤུ་གྲིའི་སྒྲུབ་པ་བཙུགས། ཁྲི་འབེབས་གཤིན་རྗེའི་ལས་སྦྱོར་ཀྱང་བྱས། ཆབ་མདོ་བ་རོད་ལྗིས་པའི་སྟབས་ཀྱིས་དཀར་གཡེང་སོགས་ཁ་མཆུ་ཡོ་གལ་བྱས་པ་འགབ་མི་འགབ་རབ་འབྱམས་པ་ཅན་གྱིས་བློ་ཐག་མ་ཆོད་པར་དྲི་བ་ཞུ་བར་སྟོན་ཀ་བཏང་འདུག་པ་གླེང་གཞི་མང་དུ་བྱུང་སོང་རུང་དོན་བར་ཁམས་ཀྱིས་ཁྲིམས་བདག་མཛད་མི་མཛད་ལ་རག་ལུས་འདུག་པས་དཀར་ས་ནག་ཁུང་གང་ཡིན་དུ་སྐྱེལ་
བ་འགབ་ཚུལ་མོལ་བ་ལྟར་ཐག་གཅོད་ཀྱི་བསླབ་སྟོན་མཛད་སོང་བ་ལྟར་དཔོན་མཁའ་འགྲོ་དགུ་གཏོར་དང་བཅས་ཚོགས་ཐོག་དབོན་དྲུང་ཞི་བ་བཟང་པོས་རྡོ་མ་ལོན་པར་བརྟེན་ཁོ་རང་སྒོར་ཏེ་ལག་སྦྲེལ་སྲིད་ཚོ་མཐའ་དག་གདོང་དམད་པས་མདོ་ཁམས་དར་འཇམ་ཡུག་གཅིག་ལ་སོང་བའི་གནས་ཚུལ་འབྱོར་བས་གྲ་ཚང་གིས་ཚེས་བརྒྱད་ནས་ཉིན་གསུམ་གྱི་བར་སྲུང་མ་སྤྱི་དང་ཁྱད་པར་ཟིལ་གནོན་རེ་མ་ཏཱི། འཆི་བདག་བྷེ་བ་ས་ཏྭ། ཁྱབ་འཇུག །རྒྱལ་བཙན་རྣམས་ལ་གཏང་རག་བཟབས་རྒྱས་རྒྱགས་རྔན་ལྷ་བསངས་དང་བཅས་པ་བཏང་། ཉི་ལྡོག་གི་ལས་སྦྱོར་ཡང་ཕན་བདེ་བ་ལ་གཙོ་བོར་བྱས། སེར་འབྲས་གཉིས་ནས་ཚོགས་ཆེན་གྱིས་ཕན་བདེ་བའི་ཐོག་ཏུ་མདོ་སྒྲུབ་དང་ཚོགས་ཁྲོ་ཁ་སྤུབ། དེ་ནུབ་ཕན་བདེ་སྤྲུལ་སྐུ་སྡོད་སའི་སྒོ་མང་ནང་དུ་ལོག་སྟེ་རྡབས་འུར་རེ་ཆེ་བྱུང་འཕྲོས་ཟེར། རྩེད་ཐང་རྒྱ་ཕྲུག་རབ་འབྱམས་པས་གཙོས་པའི་བསྙེན་རྫོགས་སོ་གཉིས་དང་ཏྲེ་པོ་ཧོར་ཚང་ས་སྐྱོང་སོགས་དགེ་ཚུལ་ཉེར་བདུན་བསྒྲུབས། དགེ་ཚུལ་དང་བསྙེན་རྫོགས་བསྒྲུབས་པའི་སྒང་ལ་མེ་ཏོག་གི་ཆར་བབས་སོང་བ་དེ་ཁྲོད་དུ་གང་ཟག་སྦས་པའི་རྣལ་འབྱོར་བ་ཞིག་ཡོད་པ་འདྲ། ད་ལའི་ཧུང་ཐའི་ཇིར་ཚེ་དབང་། ཕྱག་དྲུག་པའི་རྗེས་གནང་། རྣམ་འཇོམས་ལྗང་སྔོན་གྱི་སྒོ་ནས་བྱབས་ཁྲུས་ཕུལ། བཅུ་དགུ་ཉི་ཤུ་སྐོར་ལ་ཨ་པ་ལའི་བན་ཆུང་དང་རྡོ་རྗེ་ཅན་དབང་ཆ་གཅིག་ལ་རས་བྲིས་ཀྱི་དཀྱིལ་འཁོར་དུ་འཇིགས་བྱེད་བཅུ་གསུམ་མའི་དབང་བསྐུར། ཉེར་གཉིས་ལ་པཱ་རས་ཀྱིས་སྡེའི་བགོས་འགྲེམས་སོགས་འཁྲུན་གཅོད་རྣམས་ལ་ཁུར་ཆེན་
བྱུང་བའི་ལེགས་བྱར་ད་ལའི་ཧུང་ཐའི་ཇི་ལ་གོན་པ། ཤལ་དཀར་དམར། སྣམ་ཕྲུག་གིས་སྣ་དྲངས་པའི་སྟེར་ཆ་བྱས། དངོས་པོ་དེ་མཚུངས་ཀྱི་སྒོ་ནས་རྡོ་རྗེ་ལ་མེརྒན་ཧུང་ཐའི་ཇིའི་ཆོ་ལོ་བྱིན། དེས་བསྐུལ་ཏེ་བསངས་མཆོད་ཅིག་བྲིས། མེརྒན་ཧུང་ཐའི་ཇི་དང་ངོར་སྒྲུབ་ཁང་དབོན་པོ་ཅན་ཁ་ཤས་བཟང་སྤྱོད་དང་སྒྲོལ་མ་ཉེར་གཅིག་གི་ལུང་བཀླགས། གཉགས་ཛྙ་ན་ཀུ་མཱ་རས་གངས་ལྗོངས་བསྟན་འགྲོའི་ཕན་བདེ་སྤེལ་བའི་སྨོན་ལམ་གྱི་མཐའ་མ་རྫོགས་པས་ཟུར་རྡོ་རྗེ་འཆང་ཆོས་དབྱིངས་རང་གྲོལ་གྱི་སྤྲུལ་སྐུ་དུས་བབས་ཤིག་ལ་འབྱོན་པ་ལས་འོས་མེད་རུང་རེ་ཞིག་པདྨ་འོད་ཀྱི་ཞིང་ཁམས་སུ་མི་བཞུགས་པའི་ངེས་པ་མི་འདུག །དགོན་གཞིས་འཛིན་པའི་ས་སྟོང་དགོག་པར་རིངས་པའི་གཟུགས་མེ་ལ་གཟུགས་འཆོས་མ་དགོས་རུང་སྨན་སྒོམ་འབྲང་རྒྱས་པ་དད་གདུངས་ཧ་ཅང་ཆེས་པས་ཡར་ཀླུངས་ཤེལ་བྲག་ཏུ་སྤྲུལ་སྐུ་མྱུར་འབྱོན་གྱི་རྟེན་འབྲེལ་བསྒྲིགས་པའི་དུས་ཐུགས་རྗེ་བསྐུལ་བའི་ཚིགས་བཅད་དགོས་ཚུལ་བརྩམས། ཧོར་ཟླ་བཅུ་གཉིས་པའི་ཚེས་གསུམ་ལ་གསེར་ཡིག་པ་སོགས་འགྲུལ་པ་རྣམས་ཐོན་པ་དང་ལྷན་ཅིག་གོང་དུ་ཞུ་ཡིག་རྟེན་སྦྲགས་འབུལ་བར་བསམ་བློ་ལམ་པ་སྤྱན་སྔ་དང་རྒྱ་ཚེ་རིང་གཉིས་བཏང་། སྔར་རྒྱུན་གྱི་འབུལ་བར་མི་ཐེ་བའི་རྒྱལ་པོ་ཁྲིར་གསར་ཕེབས་ཀྱི་ལེགས་བྱའི་ཞུ་ཡིག །ཤལ་དཀར་དམར། མུ་མེན་གྱི་འཕྲེང་བ། ཝ་མོ་ནག་པོའི་ད་ཁོ། སྣམ་ཕྲུག་རྣམས་ཀྱི་རྟེན་ཕུལ། ཚེས་བརྒྱད་ལ་ཚུགས་པའི་ཕུར་སྒྲུབ་སྔར་རྒྱུན་བཞིན་དང་བཅུ་བདུན་ནས་བཟུང་
ཉིན་གསུམ་གྱི་བར་ཇུས་རིམ་ལ་དམིགས་གྲ་ཚང་ནས་གཤིན་རྗེའི་རང་གཤེད་འབེབས་པའི་སྦྱོར་བ་མཛད། དེ་མཚུངས་ངེད་ཀྱིས་བན་བོན་གྱི་ངན་སྦྱོར་གཤེད་འབེབས་དང་རེ་མ་ཏཱི། བསྟན་མ་བཅུ་གཉིས། འཆི་བདག་རྒྱལ་པོ་པེ་ཧར་རྣམས་ཀྱི་ཟས་སུ་བསྟབས་དྲག་སྔགས་དམོད་པའི་མཚོན་ཆར་ཕབ། ཉི་ཤུ་དང་ཉེར་གཅིག་ལ་རང་བྱུང་འཕགས་པ་མཆེད་ལ་མཆོད་པ་ཕུལ་ཞིང་གསོལ་འདེབས་བྱས། སྦེ་སེར་ཉི་ཐང་གཉིས་ཀྱིས་བརྒྱད་སྟོང་པ་ཀློག་སྒྲོགས་སྟོང་ཚར་མཛད། འཇམ་དཔལ་གཤིན་རྗེའི་ཟོར་ལས་ཀྱི་དུས་རིམ་གྱི་རྡོ་རྗེ་སློབ་དཔོན་བྱིང་པ་སྔགས་རམས་པས་བྱས། ཟོར་ལམ་ཐེབས་དང་ཡང་འགྲིག་པས་ཀོང་པོ་ཕྱོགས་སུ་ཁ་བསྒྱུར་བ་གཏོར་མ་བཏོན་པ་དང་ལྷན་དུ་བཙོ་བན་ཙམ་པ་འགའ་ཞིག་བརྒྱུགས་ཤིང་མེ་ལྕེ་རྣམས་ཀྱང་དུམ་བུར་ཆད་དེ་མཆོང་བའི་ལྟས་ཤིན་ཏུ་ལེགས་པ་བྱུང་། ཨོ་རོད་ཨོ་ཆིར་ཐུ་ཐའི་ཇིའི་མི་སྣ་ཆེད་བསྟད་མངགས་པ་འབྱོར། རྒྱལ་པོ་པཎྜི་ཏའི་རྣམ་ཐར་འཛིན་པ་མངའ་རིས་རུ་ཐོག་དབང་པོ་ཕུན་ཚོགས་རྣམ་རྒྱལ་གྱིས་མདོ་སྡུད་པ། བྱམས་ཆོས་བཞི་རྣམས་སྐད་ཤན་སྦྱར་ཐམས་ཅད་མཁྱེན་པ་ཞ་ལུ་ལོ་ཙཱ་བའི་ཞུས་དག་མ། གསོ་དཔྱད་ཀྱི་གཅེས་བསྡུས་རིན་ཆེན་འཕྲེང་བ། མཁྱེན་བརྩེ་ལོ་ཙཱ་བའི་སྡེ་ཚན་བདུན་པ་རྣམས་མ་ཕྱིར་བསྲིངས་པའི་སྙན་ངག་གི་འཕྲིན་ཡིག་བྱུང་བའི་ལན་དེ་དང་མཐུན་པར་བསྐུར།