དགུང་ལོ་ཞེ་བདུན་པར་འབམ་དྲེག་གི་སྙུན་ལྕི་བཞེས་པ་དང་། བོད་ཁམས་བདེ་ཐབས་ཀྱི་རིམ་གྲོ་དང་གཞན་ཕན་འཕྲིན་ལས་བསྐྱངས་ཚུལ་སོགས་ཀྱི་སྐོར།
ཆུ་ཡོས་གནམ་ལོ་ཚེས་པའི་འདོད་ཁམས་དབང་ཕྱུག་མའི་མཆོད་གཏོར་དང་དགའ་སྟོན་སྔར་འཁྱུད་བཞིན་བྱས། ཚེས་བཞི་ལ་ཨ་པ་ལའི་བན་ཆུང་གིས་གཙོས་པའི་བསྙེན་རྫོགས་སོ་གཉིས་དང་དགེ་ཚུལ་སུམ་ཅུ་བསྒྲུབས།
བསམ་ཡས་ཆོས་སྐྱོང་ཆེན་པོས་གཟུགས་མེད་ཀྱང་གཟུགས་ཅན་ལ་བརྟེན་དགོས་པས་ད་ལྟའི་ཁོག་པ་འདི་ཆོས་ལ་དཀར་ཞིང་གཙང་སྦྲ་ཆེ་བ་བྱུང་བས་དགེ་བཤེས་ཀྱིས་དཀྱིལ་འཁོར་ཞིག་ཏུ་དབང་བསྐུར་དགོས་ཚུལ་གསུངས་པ་བཞིན་རིག་འཛིན་རཏྣ་གླིང་པའི་གཏེར་བྱོན་རྟ་ནག་ལྕགས་རལ་ཅན་གྱི་དཀྱིལ་འཁོར་དུ་སྨིན་པར་བྱས་ཤིང་ཕུབ་སྒོར་ལེགས་ཙམ་ཞིག་ཀྱང་བྱིན། ལྔ་ལ་ཡར་འབྲོག་ཞབས་དྲུང་ལྷུན་པོ་རྫོང་པ་ཕེབས། ཨེར་ཁེ་དང་མན་ཇིས་གཙོས་པའི་སོག་པོ་ཁ་ཤས་ལ་ཕྱག་དྲུག་པའི་རྗེས་གནང་བར་ཆད་ཀུན་སེལ་བསྐུར། ཀླུ་འབུམ་མེརྒན་ཆོས་རྗེ། བསྟན་དར་སྐུ་སྐྱེ། རི་ཁྲོད་དགའ་ལྡན་བླ་མ་བྱམས་པ་རིན་ཆེན། མངའ་རིས་འོད་མཆོད་སྐུ་སྐྱེ། ཀླུ་འབུམ་རབ་འབྱམས་པ་ལུང་རིགས་སོགས་ཉི་ཤུ་ཙམ་ལ་འཕགས་པ་བརྒྱད་སྟོང་པ། རྒྱུད་རྟོག་པ་བདུན་པ་ཕྱག་མཚན་སོ་བཞིའི་ལས་ཚོགས། སྨན་བླའི་མདོ་ཆོག་གི་ལུང་རྣམས་བྱས། མཆོད་དཔོན་པས་བསྐུལ་བའི་རི་བོ་ཆོས་གླིང་གི་བསྟན་མ་དང་ཀླུ་བདུད་གསོལ་མཆོད། ཐོན་ལེགས་ལྡན་དབང་པོའི་ངོར་སློབ་དཔོན་ཆེན་པོ་པདྨ་དང་རྩ་བའི་བླ་མ་ཐུན་མོང་དུ་གསོལ་བ་འདེབས་པ་བརྩམས། དགའ་ལྡན་ཁྲི་རིན་པོ་ཆེ་སྨོན་ལམ་ཚོགས་དབུའི་ཞར་ནས་ངོས་ཕྲད་ལ་ཕེབས། བརྒྱད་ལ་གྲ་ཚང་གིས་ཟང་ཟིང་གི་སྐྱེས་དང་བཅས་འཆི་མེད་འོད་སྣང་གི་དཀྱིལ་འཁོར་ལ་བརྟེན་པའི་ཚེའི་རྟེན་འབྲེལ་བསྒྲིགས། ཞག་གསུམ་བཅད་རྒྱ་བསྡམས་པའི་བསྙེན་མཚམས་བྱས། བཅུ་གཅིག་ལ་ད་ལའི་ཧུང་ཐའི་ཇིར་འཆི་མེད་དཔལ་སྟེར་གྱི་ཚེ་དབང་བརྒྱ་རྩ། མཁའ་འགྲོའི་མ་དང་ཨ་ག་དགེ་ཚུལ་ལ་གྲུབ་རྒྱལ་ལུགས་ཀྱི་ཚེ་དབང་། ཁལ་ཁའི་གསར་འགྲུལ་ཡོན་མཆོད་རྣམས་ལ་སྐྱེར་སྒང་
ལུགས་ཀྱི་ཐུགས་རྗེ་ཆེན་པོ། ཨ་ར་པ་ཙ་ན་གཙོ་རྐྱང་། ཛེ་ཏཱ་རི་ལུགས་ཀྱི་རྣམ་རྒྱལ་མ། འོད་ཟེར་ཅན་མ། དུར་ཁྲོད་བདག་པོ། འཇམ་དབྱངས་ཆོས་སྐོར་གྱི་བདེ་མཆོག་དཀར་པོའི་ཚེ་དབང་རྣམས་བསྐུར། ཀོང་པོ་ཨེམ་ཆི་སྒེར་དུ་ཕྱག་རྡོར་འགྲོ་བཟང་ལུགས་ཀྱི་རྗེས་གནང་དང་རྣམ་འཇོམས་གྱི་བྱབ་ཁྲུས་བྱས། མེརྒན་ཆོས་རྗེས་བཀའ་འགྱུར་ཞིག་གསར་བཞེང་གི་མ་དཔེར་དགོས་ཚུལ་ནན་ཆེ་བར་བསྟན་རྒྱུན་ལ་ཕན་དུ་རེ་བས་སྐྱ་ཆོས་དངོས་གཙང་ཞིག་བསྐུར། འགྲུལ་པ་རྣམས་ལ་བྱིན་རླབས་རྟེན་དང་ཟང་ཟིང་གི་དངོས་པོ་གྱ་ནོམ་པའི་རྫོང་བ་བྱས། བསྙེན་རྫོགས་སོ་གསུམ་དང་དགེ་ཚུལ་ཉེར་བརྒྱད་བསྒྲུབས། བཅུ་བཞི་ལ་ཀོང་པོ་ཕན་བདེ་བས་བབ་ཁ་ཕུལ་བའི་གནས་ཚུལ་འབྱོར། བཅུ་བཞི་བཅོ་ལྔ་གཉིས་ལ་འཕགས་པ་མཆེད་ལ་བརྒྱ་མཆོད་ཕུལ། ཉེར་བདུན་ནས་ཉིན་བཞིའི་བར་གྲ་ཚང་དུ་གཡུལ་ལས་རྣམ་པར་རྒྱལ་བའི་གཏང་རག་གི་མཆོད་གཏོར་བཟབས་རྒྱས་ཕུལ་ཞིང་ཆོས་སྐྱོང་སོ་སོར་ལེགས་གསོལ་གྱི་ཚིགས་བཅད་བྲིས་པའི་སྙན་ཤལ་སྒྲོན། ཧོར་ཟླ་གཉིས་པའི་ཚེས་གཅིག་ལ་རྒྱགས་རྔན་རྒྱས་པར་བཏང་ནས་གཏང་རག་གྲོལ། རིགས་ཀུན་བདག་པོ་ཁྲ་ཚང་པ་བློ་གྲོས་མཆོག་གི་རྡོ་རྗེའི་དྲུང་དུ་མདོ་སྡེ་དཀོན་མཆོག་བརྩེགས་པ་དང་ཐང་ཡིག་སྡེ་ལྔ་སོགས་ཟབ་ཆོས་མང་དུ་ཞུ་བའི་དབུ་བཙུགས། ཚེས་བཞིའི་དམག་དཔོན་ཐ་སྐར་གྱི་འགྲུབ་སྦྱོར་ཐོག་གྲ་ཚང་དུ་གཤིན་རྗེ་ཐམས་ཅད་འདུས་པའི་དྲག་སྔགས་ཟློག་པ་དང་བཅས་པ་གྲངས་བཅད་ལ་གཤིན་རྗེ་མེའི་སྤུ་གྲིའི་སྒྲུབ་པ་བཙུགས། ས་ཁྱི་ནས་ཆུ་སྟག་གི་བར་མང་འགྱེད་གཏོང་བའི་ཐོ་སྡེ་པ་བསོད་ནམས་
རབ་བརྟན་གྱི་དུས་ཐོར་ཆགས་གནང་འདུག་པར་གཞི་བྱས་པ་གན་པ་ལ་ཡན་རྩ་ཁུ་ནས་དང་སྐྱོང་ང་ནས་གཉིས་ཀྱིས་སྤྲད་པ་ཡིན་འདྲ་ཟེར་བ་གང་ལྟར་ཁ་ཅུང་ཞིབ་པ་ཙམ་བྱུང་སྣང་། དབུས་ཁུལ་རགས་རིམ་ལས་མེད་ཅིང་དེའང་བན་རྩའི་ཁྱད་ཀྱིས་གྲ་མི་གཙང་བ་དང་གཙང་བའི་དབྱེ་གསལ་མེད་པའི་འདྲེས་མ་ལ་དྲག་ཞན་གྱི་གོ་རིམ་བཞིན་ཡང་མི་འདུག་ཅིང་ལ་ལ་དག་སེར་ཁྱིམ་པ་ཚུགས་ཁ་ཤིན་ཏུ་ངན་པ་དང་སྒྲུབ་པ་ཕོ་མོའི་གླིང་ཟུང་དུ་འབྲེལ་བ་སོགས་ལས་མི་སེར་ཁྱེར་ཞན་པ་རྣམས་ཞིང་ས་དག་ཅིང་ཕན་ཡོན་ཆེ་བར་གླེང་བ་རྣམ་པ་གཅིག་ཏུ་མི་བདེན་པའི་ངེས་པ་མ་མཆིས་རུང་འདི་ལོ་ནས་བཟུང་དགོན་པའི་རིགས་སུ་གཏོགས་ཚད་ཐོར་བཀོད། གྲ་གཙང་ཞན། གནས་བཟང་ངན། ཐོས་བསམ་འཕེལ་མི་འཕེལ་ཞིབ་ཏུ་དཔྱད། ས་ཁྱི་ཕན་སྔགས་སྡེའི་རིགས་ལ་མང་འགྱེད་བཞིན་ཡེ་མ་བྱུང་འདུག་པ་རྒྱུད་སྡེའི་དགོངས་པའང་དགེ་སློང་མཆོག །དགེ་ཚུལ་འབྲིང་། ཁྱིམ་ན་གནས་པ་ཐ་མ་ཞེས་ཁྱིམ་པའི་རྡོ་རྗེ་འཛིན་པ་གསུངས་ཤིང་། རྗེ་ཁྲི་སྲོང་ལྡེའུ་བཙན་གྱི་དུས། རབ་བྱུང་ངུར་སྨྲིག་དབུ་ཟླུམ་དང་། །སྔགས་པ་གོས་དཀར་ལྕང་ལོ་ཅན། ཞེས་མཆོད་གནས་དེ་གཉིས་སུ་མཛད་པས་ཡང་འུག་སོགས་སྔགས་སྡེ་རྣམས་ངེས་པར་དགོས་གྲས་སུ་འདུག་གཤིས། ཨངྐི་དང་པོར་དགེ་ལུགས་གཙོ་བོར་གྱུར་པའི་གཙང་དགོན་ཤས་ཆེ་བ་དགོན་ཁག་ཕྱེད་བརྒྱད་བརྒྱ་སྐོར་ལ་དགེ་འདུན་གྲངས་ཁྲི་ཚོ་ལྔར་བཅར་པ། ཨངྐི་གཉིས་པར་གཙང་ཞན་འདྲེས་མ་དགོན་ཁག་བཞི་བརྒྱ་སྐོར། ཨངྐི་གསུམ་པ་བཙན་བཙུན། སྒྲུབ་པ་ཕོ་མོ་སོགས་དགོན་ཁག་ཕྱེད་བདུན་བརྒྱ་སྐོར། གྲ་བཙུན་བྱ་བྲལ་བསྡོམས་པ་ཁྲི་ཚོ་གཉིས་ལ་བཅར་བ། ཁྱོན་བསྡོམས་དགོན་ཆིག་སྟོང་བརྒྱད་བརྒྱ་ལྷག་
གྲ་གྲངས་འབུམ་དུ་ཉེ་བ་བྱུང་བའི་ཨངྐི་དང་གཉིས་གཉིས་ལ་འགྱེད་དྲག་ཞན་གྱི་མཐོ་དམའ་ཡོད་ཙམ་གྱི་ངོས་དགུན་དཔྱིད་གཉིས་མང་ཇ་སྦྱོར་སྦྲེལ་དང་འགྱེད་གསེར། དངུལ། ཇ། འབྲུ། རྟ། བུ་རམ། ལྕགས། རས་ཀྱིས་མཚོན་པའི་སྤུས་ཆ་ངེས་མེད་སྒྲིགས་ཆུག །བྱང་ཆུབ་ལམ་རིམ་དུ་ལྷན་པ་སེར་པོ་རེ་ཙམ་གྱོན་པའང་དགེ་འདུན་དཀོན་མཆོག་ཏུ་གསུངས་ཤིང་ཁྲིམས་ཁང་ལོ་ཙཱ་བ་སོགས་མཁས་པ་མང་པོས་གཙུག་ལག་གི་ཚིགས་སུ་བཅད་པའི་ཤློ་ཀ་རེ་བློར་ཡོད་པའང་མཆོད་པའི་ཡུལ་དུ་གསུངས་པས་ཨངྐི་གསུམ་པ་རྣམས་ལ་ལོ་གཞེས་ཆག་གི་མང་འགྱེད། ཨངྐི་དང་གཉིས་ཀྱི་ཁྲོད་ནས་དམིགས་བསལ་རགས་བསྡུས་དགོན་སུམ་བརྒྱ་ཚུན་སྤར་གཅོག་ཅི་རིགས་པར་སྟོན་མང་ཇ་སྦྱོར་སྦྲེལ་འགྱེད་བཅས་བཏང་བ་ཤས་ཆེ་བ་ཡོད། ཚེས་བཅུ་ལ་རྒྱལ་པོ་དཔོན་གཡོག་དམག་ཐོག་ནས་ཕེབས་པའི་བསུ་བར་སྡེ་པ་ལྷ་ས་ནས་བཏེག །ཉེར་གཅིག་ནས་གྲ་ཚང་དུ་ཀཱི་ལཱ་ཡ་ས་ཡ་བཙུགས། སང་ཉིན་མཆོད་ཡོན་ལྷན་དུ་ཕེབས་པའི་རྒྱལ་པོ་དཔོན་གཡོག་རྣམས་དང་ཇ་སྦྱོར་སྦྲེལ་གྱི་རིང་མོལ་མཆིད་ཞིབ་པར་བྱུང་། གནམ་གང་ལ་སྟག་ལུང་ཞབས་དྲུང་ངག་དབང་རྣམ་རྒྱལ་ལེགས་གྲུབ་ཕེབས། བཀུར་གཟོས་སྔར་རྒྱུན་ལྟར་ཞུས། སིལ་སྙན། ཇུས་བསྒྲིལ་བཏགས་ཀྱི་བླ་བྲེ་སོགས་སྟེར་སྦྱིན་ཆེ་བ་གནང་། མི་སྡེ་དང་ལྷ་སྡེའི་གྲ་རིགས་ཚོར་ཐུགས་ཁ་མ་གྱང་བའི་གསུང་གཅོང་སྤྱན་ཆབ་བསིལ་བ་དང་བཅས་ཞིབ་ཏུ་གསུང་། དགུང་སྐག་གི་རྐྱེན་སེལ་དགོས་ཚུལ་ཕེབས་པ་བཞིན་འཆི་མེད་དཔལ་སྟེར་གྱི་ཚེ་དབང་དགུང་གྲངས། བ་རི་ལུགས་ཀྱི་རྣམ་འཇོམས་ཀྱི་བྱབ་ཁྲུས། ཕྱག་དྲུག་བའི་དབང་བཞི་བྱིན་
རླབས་ཀྱི་ཚུལ་རྣམས་ཕུལ། ཤིང་བཟོ་གྲ་ཕྱི་འཛོམ་འཛོམ་དང་བྱེ་མདའ་ལྷ་ཕུག་པ་གཉིས་ཀྱིས་བཀའ་བརྒྱད་གསང་བ་ཡོངས་རྫོགས་ཀྱི་ཕུར་ཆ་དངོས་གཙང་བར་བརྐོས། ཧོར་ཟླ་གསུམ་པའི་ཚེས་གཅིག་ལ་རྒོད་ཚང་བླ་མ་མངའ་རིས་རྒྱལ་ཚབ་པ། ལྷ་པ་སྐུ་སྐྱེ། གཅེན་ལུང་བླ་མས་གཙོས་རི་ཁྲོད་པ་བཞི་བཅུ་སྐོར་བྱུང་བར་ཐམས་ཅད་མཁྱེན་པ་དགེ་འདུན་རྒྱ་མཚོའི་གསུང་འབུམ་ནས་སྨོན་ལམ་བདུན་ཅུ་པའི་ཊཱིཀྐ། ཞལ་གདམས་མགུར་མའི་སྐོར། འདུལ་འཛིན་བློ་གྲོས་སྦས་པའི་ཉམས་མགུར་ཊཱིཀྐ། གཏོར་མ་བརྒྱ་རྩ་རྣམས་དང་གསར་རྩོམ་ལམ་རིམ་གྱི་འཁྲིད་ཀྱི་ལུང་བྱས། བསྙེན་རྫོགས་ཞེ་གཉིས་དང་དགེ་ཚུལ་གོ་གཉིས་བསྒྲུབས། སྟག་ལུང་ཞབས་དྲུང་ལ་ཕེབས་རྫོངས་ཞུས། ཁྱབ་བདག་མཁན་ཆེན་ཞ་ལུ་པ་ཆེན་པོས་ལུགས་གཉིས་དང་འབྲེལ་བའི་བསླབ་བྱ་དགོས་ཚུལ་བྱུང་བའང་བཞེད་པ་དང་སྦྱར་ཏེ་བྲིས། ཞལ་གྱི་ཕྱག་མཚན་འབུལ་ཚིག་གཉན་ལོ་དང་ཚར་ཆེན་གྱིས་མཛད་པ་གང་རུང་འཛུགས་པར་ཐེ་ཚོམ་པའི་དུས་བྱ་རོག་ཅིག་ཉེ་སྐོར་གྱི་ཐོག་ཏུ་བབས་ནས་ཡུན་རིང་པོར་སྐད་སྙན་ལ་སྒྲ་དྲག་པོ་བསྒྲགས་པར་བརྟེན་ཁྱབ་བདག་ཁྲ་ཚང་པས་གསར་རྩོམ་གྱིས་ཤིག་པར་གསུང་བ་ལྟར་བྲི་བའི་དབུ་བཙུགས་པ་དང་དུས་མཉམ་དུ་འཕུར་སོང་བ་ངོ་མཚར་རམ་སྙམ། མངའ་རིས་གྲ་ཚང་སློབ་དཔོན། དགའ་ལྡན་ཕུན་ཚོགས་གླིང་སློབ་དཔོན། འབྲི་གུང་ཕྱག་མཛོད། ཆག་བྱང་ཆུབ་གླིང་གི་སྐུ་སྐྱེ་སོགས་ཕྲད་མི་ཤིན་ཏུ་མང་། རྒྱལ་པོ་སྐུ་མཆེད་ལ་ཚེ་དབང་། ཁལ་ཁ་ཇ་མ་ཇའི་སང་ལ་ཚེ་དབང་དང་སེང་ལྡེང་ནགས་སྒྲོལ་གྱི་རྗེས་གནང་བསྐུར། རྫོང་གཞིས་བཅུ་གཅིག་བསྡོམས་པར་བཀའ་འགྱུར་ཚར་བརྒྱ་དང་སུམ་ཅུ། འབུམ་
དང་ཏིང་འཛིན་རྒྱལ་པོ་བརྒྱ་རྩ། མཚན་བརྗོད་ཉིས་འབུམ། གདུགས་དཀར་དང་ཤེར་སྙིང་སྒྲོལ་མ་གསུམ་ཆིག་འབུམ་རེ། གྲ་ཚང་གིས་ཨྱཱཻ་རིང་བྱེ་བ་དང་བརྒྱ་བཞི། རྒྱུད་སྟོད་པས་དྲུག་ཅུ་པ། རྒྱལ་ནས་དམག་ཟོར་མ་དང་བེག་ཙེའི་གཏོར་བཟློག་བཏང་། དཔོན་ཚང་ཚ་རོང་ནས་ཚེ་བརྟན་རྡོ་རྗེས་རྒྱུད་བཞིའི་རྒྱུགས་སྤྲད་པའི་རྩ་རྒྱུད་འདི་ག་ནས་བླངས་པ་ཡེ་ནོན་རྒྱུ་མེད་པ་ལྟ་བུའི་བྱང་བ་འདུག་ཅིང་ལྷག་མ་འཕགས་པའི་སྐུ་གཞོགས་སུ་ཆོས་རྗེ་ན་བཟའ་གླིང་པ་ལེན་བཅུག །ཚེས་ལྔ་ལ་སྤྲུལ་སྐུ་གསུང་སྤྲུལ་ལ་དགོས་ཚུལ་མོལ་བ་ལྟར་རྡོ་རྗེ་གླིང་པའི་གཏེར་མའི་ཙནྡན་སྦྲུལ་སྙིང་གི་སྒྲོལ་མ་ཁྱད་འཕགས་དང་། ཆོས་དབང་ཡབ་སྲས་ཀྱི་སྐུ་ཤ་བསྐུར་བའི་འཕྲོད་ལན་གོས་ཡུག་གི་རྟེན་ལྡན་བསྲིངས། གཟུངས་བསྡུས། འདུས་པ་རིན་པོ་ཆེའི་ཏོག་གཟུངས་གཉིས་དགའ་ལྡན་ཕུན་ཚོགས་གླིང་དུ་བརྐོས་པ་འབྱོར་ཞིང་གསར་རྩོམ་སྨོན་ལམ། སྙན་དར། དཀར་ཆག་གསུམ་དང་དྲི་མེད་གཤགས་རྒྱུད་པར་གྱི་མ་དཔེ་བསྐུར། བརྒྱད་ལ་ལེགས་ལྡན་ནག་པོ་གདོང་བཞི་པ་རྒྱ་ཆེར་མཆོད་ཅིང་སང་ནས་མུ་འཐུད་གྲ་ཚང་གིས་བསྐང་བ་ཁྲི་ཚར་བསགས། དགུ་ལ་གོང་དཀར་ནས་ཆོས་རྗེ་དཀོན་གཉེར་དཔོན་པ་ཅན་གྱིས་མཁའ་འགྲོ་མ་འགྲོ་བ་བཟང་མོ་ལུགས་ཀྱི་བསུ་བཟློག་དང་འབྲེལ་བའི་རྟེན་འབྲེལ་ཚན་གྲངས་དང་བཅས་བསྒྲིགས། ཁྱབ་བདག་སྨན་ལུང་པ་ཚེ་ཆོག་གནང་བར་ཆུ་བོ་རིར་ཕེབས། རྒྱལ་པོ་ལ་འཆི་མེད་དཔལ་སྟེར་གྱི་ཚེ་དབང་བརྒྱ་རྩ་ཕུལ། སྡིངས་ཆེན་པ་ཚོང་འདུས་སུ་ཕྱིན་སྐབས་ཆོས་སྐྱོང་གིས་མཚམས་བྱེད་དགོས་པའི་བསླབ་བྱ་མཛད་པ་ལྐུགས་མའི་རྨི་ལམ་འདྲ་བ་ཞིག་ལས་གསལ་
གསལ་ཤོད་རྒྱུ་མི་འདུག་པས་བསྐྱར་ཏེ་ཆང་ཁྱིམ་པ་བཏང་བ་འཁོར་བར་བརྟེན་བཅུ་དྲུག་ལ་འབྲས་སྤུངས་སུ་ཕྱིན། བཅུ་བདུན་ནས་གཟིམས་ཆུང་མངོན་དགར་འཕགས་པ་ལོ་ཀི་ཤྭ་ར་གདན་དྲངས་ཏེ་མཆོད་པ་བཤམས། ཉང་གི་ཐུགས་རྗེ་ཆེན་པོ་འགྲོ་འདུལ་གྱི་བསྙེན་མཚམས་བྱེད་པའི་སྟ་གོན་གྱི་དུས་རྩེ་གདོང་ཞབས་དྲུང་རིན་པོ་ཆེས་ཚེ་དཔག་མེད་ཀྱི་སྐུ་རྒྱ་ནག་མ་དང་རྡོ་རྗེའི་རི་མོ་ཅན་གྱི་གདན་གྱིས་གཙོས་པའི་ཚན་གྲངས་དང་བཅས་བཀའ་ཤོག་གནང་བ་འབྱོར་པས་རྟེན་འབྲེལ་ལེགས་པར་མངོན། ས་ག་ཟླ་བའི་ཚེས་བདུན་གྱི་བར་བདུན་ཕྲག་གསུམ་གྱི་རིང་བསྐྱེད་རྫོགས་ཀྱི་ཉམས་ལེན་གཏོར་བསྔོ་སོགས་ཆག་མེད་དང་རྒྱུན་གྱི་བཟླས་བརྗོད་བརྒྱ་སྟོང་དགོས་པ་རྣམས་བདུན་རེ་ཙམ་དུ་བསྡུས། སྲོད་དང་ཐོ་རངས་ཀྱི་ཐུན་ཚད་ལྡན་སྔ་དགོང་གི་ཐུན་གུང་ཚིགས་ཟ་བས་མཚམས་བཅད་པ་ལས་སྦྲེལ་མ་ལྟ་བུར་ཡིག་དྲུག་གི་བཟླས་པར་འབུངས་པས་ཉིན་སྟར་ཁྲི་ཚོ་ལྔ་རེ་སོང་བ་ནས་བྱེ་ཆུང་ཞིག་འགྲོ་ཉན་ཙམ་བྱུང་། གུང་གསེང་སོགས་རྣམ་གཡེང་གི་ངང་ནས་ཉིན་རེ་མ་ཎི་ཁྲི་ཚོ་ལྔ་དྲུག་ཙམ་སོང་ཟེར་བ་ནི་མ་པད་ཧཱུྃ་ཞེས་བཏོན་ཚོད་དུ་འདུག །སྔར་ཟུར་ཁྱབ་བདག་བླ་མའི་དྲུང་དུ་རྒྱལ་པོ་ལུགས་ཀྱི་ཐུགས་རྗེ་ཆེན་པོའི་ཉམས་འཁྲིད་ཞུས་སྐབས་ཕྱག་སྲོལ་ལྟར་ཡིག་དྲུག་འབུམ་ཚོ་བཅུ་རེའི་དམ་བཅའ་འབུལ་དགོས་ཀྱིན་འདུག་པའང་ད་ལམ་འགྲུབ། སྡེ་པས་དགའ་ལྡན་ཕོ་བྲང་དང་ཀུན་དགའ་ར་བའི་ཚོམས་ཆེན་དུ་ལི་མ་ཆེ་གྲ་དང་ཕོ་བྲང་གསར་རྙིང་གི་གཟིམས་ཆུང་ཚོར་བླ་མ་ལི་སྐུ། རྒྱ་ནག་མ་སོགས་ཆུང་འབྲིང་གི་རྟེན་མཆོད་གྲ་བསྒྲིགས། དོ་དམ་གླང་བུ་བ་དགྲ་འདུལ་ཚེ་རིང་ཅན་གྱིས་བྱས། མཚམས་ཀྱི་རིང་ཚོགས་ཆེན་དུ་ཇ་ཚུལ་བཙུགས་
པར་ཡིག་དྲུག་དུང་ཕྱུར་ཕྱེད་གཉིས་ཙམ་སོང་། གྲ་ཚང་གིས་རྣམ་འཇོམས་ཞག་བཞི་དང་ཆོས་སྐྱོང་རྣམས་ཀྱི་བསྐང་བཤགས་ཉིན་བཞི་བཏང་། དེ་ཉིན་འདུ་ཁང་དུ་ཕྱིན་པའི་དགེ་འདུན་ཚོགས་པས་བདེན་ཚིག་གི་སྨོན་ལམ་དང་ཤིས་བརྗོད་མཛད། སྤྲུལ་པའི་ཆོས་སྐྱོང་ཆེན་པོའང་ཁོག་ཏུ་ཞུགས་ཏེ་ཕེབས། ཀུན་དགའ་ར་བའི་ཚོམས་ཆེན་དུ་གུང་ཚིགས་ཀྱི་བཞུགས་གྲལ་བཤམས། དེ་གྲོལ་ནས་ཚོགས་ཆེན་དུ་ལམ་རིམ་གྱི་ཆོས་ཐུན་གཅིག་ཕུལ་ཏེ་རྟེན་འབྲེལ་བསྒྲིགས། བརྒྱད་ལ་སྤྱི་སོས་ཀུན་དགའ་ར་བར་བསྙེན་བཀུར། བཅུ་གཅིག་ལ་གསང་སྔགས་དགའ་ཚལ་གྱི་འབུར་སྐུ་ཚོར་རབ་གནས་བསྡུས་ཙམ་ཞིག་བྱས། སྔགས་པ་སེ་ཆེན་ཞབས་དྲུང་གི་ཕྱི་རྟེན་དུ་བྱམས་པའི་དངུལ་སྐུ་གསར་བཞེངས་སྒོ་མང་གྲ་ཚང་དུ་བཞུགས་པར་བྱིང་པ་སྔགས་རམས་པས་གཙོས་པའི་གྲ་ཚང་གི་གྲ་པ་འགས་གཟུངས་འབུལ་དང་རབ་གནས་བྱས་ཤིང་བསྟོད་པ་སྨོན་ལམ་དང་རྟེན་ལ་བརྟན་བཞུགས་བཅས་སྒོ་མང་ཟུར་པ་ག་རུ་བས་དགོས་ཚུལ་བྱུང་བ་བཞིན་བྲིས། བཅུ་བཞི་ལ་པོ་ཏ་ལར་འཁོར། སང་ཉིན་སེམས་དཔའ་སྤྲུལ་སྐུ་ཅན་དགེ་ཚུལ་དུ་བསྒྲུབས། སེང་གདོང་མ་སྔོན་མོའི་རྗེས་གནང་བསྐུར། གསེར་མདོག་ཅན། ཐར་པ། ལྷུན་རྩེ་ཆོས་སྡེའི་མཁན་པོ་རྣམས་དང་ཆོས་རྗེ་གནས་གཞི་བ། བྱ་བ་དང་མདོ་མཁར་བའི་ལེགས་སྐྱེལ་བ་སོགས་ཕྲད་མི་མང་། བསྙེན་རྫོགས་ལྔ་དང་དགེ་ཚུལ་གོ་གཅིག་བསྒྲུབས། བཅུ་དྲུག་ལ་ཟངས་རི་དཔོན་སར་ཚེ་དབང་འཆི་མེད་དཔལ་སྟེར་དང་ཁྱུང་ཁྲའི་རྗེས་གནང་ཕུལ། ཀོང་པོ་ནས་འོར་སྟར་གཉིས་འཁོར་བའི་
མདའ་དཔོན་འོར་པས་ཕན་བདེ་བའི་རྟེན་གྲལ་གྱི་ཟངས་ཐང་མ་ཞིག་རྫོང་དུ་ཁྱེར་ཡོང་བའི་རྐྱེན་གྱིས་སེར་བ་ཤིན་ཏུ་ཆེ་བ་གློ་བུར་དུ་བབས། གསང་ཕུའི་ཆོས་རྗེ་གཉིས་ཀྱིས་གཙོས་ཆོས་འཆད་རྣམས་ཀྱིས་གྱ་ནོམ་པའི་དངོས་པོ་མཎྜལ་གྱི་ཚུལ་དུ་བསྟར་ནས་ཡུན་འཚོའི་རྟེན་འབྱུང་མཛད་ཅིང་ཐུགས་རྗེ་ཆེན་པོ་གཙོ་འཁོར་གསུམ་པའི་བཟླས་ལུང་བཞེད་པ་དང་སྦྱར། སྟོད་རྒྱུད་གྲ་ཚང་དང་ཀོང་པོར་འགྲོ་མིའི་མོན་པ་སོགས་བྱིན་རླབས་ཞུ་མི་མང་དུ་བྱུང་། ལྕགས་ཟམ་སྤྲུལ་སྐུར་གཏེར་ཁ་འོག་མའི་གུ་རུ་དར་ནག་བེར་ཆེན་དང་མཚོ་རྒྱལ་སྐོར་གསུམ་གྱི་ལུང་ཕུལ། ཉི་ཤུ་ལ་རྡོ་རྗེ་བྲག་སྤྲུལ་པའི་སྐུས་བདོག་པའི་ཚན་གྲངས་བསྟར་ཏེ་ཚེའི་རྟེན་འབྲེལ་བསྒྲིག་པ་མཛད། བཞེད་པ་དང་བསྟུན་པའི་ཆོས་ཕྲན་བུ་ཕུལ། བསྙེན་རྫོགས་བཅུ་དང་དགེ་ཚུལ་སུམ་ཅུ་ལྷག་པ་བསྒྲུབས། ཉེར་གསུམ་ལ་ཁྱབ་བདག་སྨན་ལུང་པ་དཔོན་སློབ་ཀྱིས་རིག་འཛིན་རཏྣ་གླིང་པའི་ཕྱག་ནས་མའི་གུ་རུ་ཞི་དྲག་མ་ནིང་གསུམ་གྱི་ཐང་ཁ་བྱིན་རླབས་ཅན་གྱིས་ཐོག་དྲངས་པའི་སྐྱེས་དང་བདུད་རྩི་འཁྱིལ་བའི་སྒོ་ནས་ཉི་བུའི་གཡུལ་ལས་རྒྱལ་བའི་ཆོ་ག་མཛད་ཅིང་མདོ་སྡེ་དཀོན་མཆོག་བརྩེགས་པའི་འཕྲོ་མུས་ནས་བཙུགས། ཟླ་སྨད་དུ་རྒྱལ་པོ་སྐུ་མཆེད་ལ་གྲུབ་རྒྱལ་ལུགས་ཀྱི་ཚེ་དབང་། དབེན་ས་སྤྲུལ་པའི་སྐུར་འཇམ་དབྱངས་ཆོས་སྐོར་གྱི་རྗེས་གནང་ཁ་ཤས། ཕྱག་དྲུག་པ། ལས་གཤིན། རྣམ་སྲས་གསུམ་གྱི་རྗེས་གནང་། དཔོན་སློབ་པཎ་ཆེན་རིན་པོ་ཆེའི་ཐུགས་རྩོམ་གྱི་དྲུག་ཅུ་པའི་ལུང་ཕུལ། སོག་ཡུལ་ནས་སྐྱིད་ཤོད་ཆོས་རྗེའི་སྤྲུལ་སྐུ་ངག་དབང་བསྟན་འཛིན་འཕྲིན་ལས་ཀྱི་བསླབ་བྱ་དང་སྨོན་ལམ་བསྐུལ་མ་མཛད་པ་ལྟར་བསྐུར། ལྷོར་ཟླ་ལྔ་པའི་ཚེས་
གཅིག་ལ་དགའ་ལྡན་ཁྲི་གདན་ཟུར། རྩེ་ཤར། རྒྱུད་སྟོད་སྨད། སློབ་ཆུང་གཉིས། ལྔ་མཆོད་པ། བཀྲ་ཤིས་ལྷུན་པོའི་གྲ་ཚང་གསུམ་གྱི་སློབ་དཔོན། མགྲོན་གཉེར་དཀའ་ཆེན་དགེ་འདུན་ཚུལ་ཁྲིམས་ཅན་འབྱོར་བའི་སོ་སོ་ནས་དངོས་པོ་གྱ་ནོམ་པ་བཏེག་སྟེ་ལྷན་ཅིག་ཏུ་བརྟན་སྟོད་དང་འབྲེལ་པའི་སྨོན་ལམ་རྒྱས་པར་གནང་། སང་ཉིན་བཀྲ་ཤིས་ལྷུན་པོ་བ་ཚོར་གྲུབ་རྒྱལ་ལུགས་ཀྱི་ཚེ་དབང་ཕྱག་དྲུག་པའི་དབང་བཞི་བྱིན་རླབས་ཀྱི་ཚུལ་དུ་བསྐུར། དགའ་ལྡན་དོན་གཉིས་གླིང་གྲ་ཚང་ལ། སྨོན་ལམ་རྣམ་གསུམ། མཚན་བརྗོད། གདུགས་དཀར། སྒྲོལ་མ། ཤེར་སྙིང་སོགས་ཆོས་སྤྱོད་རགས་རིམ་གྱི་ལུང་ཕུལ། བསྙེན་རྫོགས་ཉེར་དྲུག་དང་དགེ་ཚུལ་སོ་བཞི་བསྒྲུབས། ཚེས་བཞི་ནས་གྲ་ཚང་དུ་མདོས་བསྐང་འབུམ་ཐེར་བཙུགས། ལྔ་ལ་སྒོ་མང་ཟུར་པ་ག་རུ་བས་ཐོག་དྲངས་སེ་ཆེན་ཞབས་དྲུང་གི་གྲ་རིགས་རྣམས་ཀྱིས་སྦྱིན་བདག་བྱས་མདོས་བསྐང་མ་ཆག་ཙམ་གྱི་སྒོ་ནས་ཚེ་ཆོག་རྒྱས་པར་བཏང་། གོས་དཀར་ཐོག་ལྷན་ཐབས་ཀྱི་མཆོད་ལྷ་བཅུ་གཉིས་ཡོད་པའི་ཁ་ཅིག་ལ་གསེར་ལྗང་བརྡུངས་ཀྱི་པྲོག་ཞུ་མགུལ་རྒྱན་སྙན་རྒྱན་གདུ་བུར་མུ་ཏིག་བྱུ་རུ་གཡུའི་ཕྲས་བརྒྱན་པ་དཀྱུས་ལ་འདོམ་ཕྱེད་དྲུག་ལྷག་ཙམ་ཞེང་ལ་ཁྲུ་དོ་སོར་བརྒྱད་པ་གཅིག །ཡང་དབྱིབས་གོང་དང་མཚུངས་པའི་རྒྱལ་སྲིད་སྣ་བདུན་ཡོད་པ་མདོས་ཀྱི་སྤྱན་གཟིགས་ལ་ཕུལ་ཞིང་གྲྭ་ཚང་གི་སྤྱི་རྫས་སུ་སྤྲད། སྤྲུལ་སྐུ་བ་དགོས་སྐྱེས་དང་དགོས་ནོར་ཕ་བུ་གཉིས་ཀྱིས་ཆོ་འཕྲུལ་མཆོད་པའི་ཞིང་བཀོད་བཟབས་བྲིས་སུ་བཞེངས་པའི་རྒྱབ་ཡིག་དཀར་ཆག །འདར་པ་ལོ་ཙཱ་བ་ངག་དབང་ཕུན་ཚོགས་ལྷུན་གྲུབ་
ཀྱིས་བསྐུལ་བའི་ཚར་ཆེན་ཆོས་ཀྱི་རྒྱལ་པོ་ལ་བརྟེན་པའི་བླ་མའི་རྣལ་འབྱོར་མ་དྲོས་ཆུ་ཀླུང་། མཆོད་དཔོན་དབུ་མཛད་གཉིས་ཀྱིས་གསང་སྔགས་ཕོ་བྲང་གི་ཀ་གླིང་གཅིག་གི་གནམ་རྒྱན་དང་འཕན་སུམ་ཅུ། ཕྱེ་ཕུར་གཅིག་རྣམས་ཕུལ་བའི་ཁ་ཡིག །གྲ་ནང་བླ་མཁྱེན་ལྷུན་གྲུབ་ཀྱིས་བསྐུལ་བའི་གསོལ་འདེབས། ཇོ་རིག་ཐུ་དབོན་པོ་ངག་དབང་བློ་གྲོས་དང་འབྲི་ལུང་པ་བློ་བཟང་དཔལ་འབྱོར་གཉིས་ཀྱི་ཁ་ཏོན་གྱི་སྨོན་ལམ་རྣམས་བྲིས། ཁྲ་འབྲུག་ཆོས་སྐྱོང་ཚངས་པ་ཆེན་པོས་མེ་ཏོག་མཆོད་པའི་དུས་འཕན་གདུགས་བླ་བྲེ་དགོས་ཚུལ་བྱུང་བའི་འཕྲིན་གསོལ་ཚིགས་བཅད་དུ་སྤེལ། དགའ་ལྡན་གསང་སྔགས་ཡང་རྩེའི་སློབ་དཔོན་ཟུར་པ་ཉང་རེ་བློ་བཟང་རྣམ་རྒྱལ་གྱིས་བླ་མ་རྒྱང་འབོད་དགོས་ཟེར་བ་བསྲིངས། བསམ་ཡས་ནས་དྲེགས་པའི་སྡེ་དཔོན་ཙེའུ་དམར་པོས་བོད་ཁམས་བདེ་ཐབས་སུ་བྱང་ཆུབ་ཆེན་པོར་དཀར་མེའི་རྒྱུན་བཙུགས་པའི་མཐུན་རྐྱེན་དུ་མར་གྱི་ཁལ་དང་བཅས་པའི་དྲེའུ་གསུམ་སྐུར་གསུང་བ་བཞིན་ལན་ཚིགས་བཅད་སྤེལ་ཏེ་བླ་མ་མ་ཎི་བ་རྫོང་བདའ་བྱས། ཙནྡན་གྱི་ཐམ་ཤུའི་ཕུད་ཁ་བྱང་བྲིས་པ་མ་ལུས་བཀང་སྐབས་ཕུལ། བདེ་ཡངས་སློབ་དཔོན་ཕུན་ཚོགས་ཆོས་ལྡན་མིག་ལ་འགྲིབ་སྐྱོན་སླེབས་པའི་འཆད་ཉན་མ་ཐུབ་པས་ཁྲོལ་ཆ་དགོས་ཚུལ་ནན་ཆེས་པར་བརྟེན་རབ་འབྱམས་པ་དངོས་གྲུབ་རྒྱ་མཚོ་ཚེས་བཅུ་གསུམ་གྱི་ཉིན་བླ་མར་བསྐོས་པ་འཆད་ཉན་ལ་དཀའ་གནས་མེད་པའི་ཡོན་ཏན་དང་ལྡན་ཡང་རིགས་གྲའི་འཇིགས་པས་དཔའ་ཞུམ་སྟེ་ཟླ་བ་དྲུག་ཙམ་ལས་ཁུར་ལེན་བྱེད་མ་ཉན་པའི་ཚ་རན་བལྟས་རྗེས་ལོ་འདི་གའི་ཟླ་བ་བཅུ་གཉིས་པའི་ཉེར་གསུམ་ལ་ཀླུ་འབུམ་རབ་འབྱམས་པ་ངག་དབང་བློ་གྲོས་རྒྱ་མཚོ་བསྐོ་དགོས་
པའི་གྲ་རིས་ཚོར་བརྡབས་གསིགས་ཕྲན་ཚེགས་བྱུང་སྣང་། བླ་མ་ཕུན་ཚོགས་ཆོས་ལྡན་རྗེས་སུ་ར་བ་སྟོད་པའི་འཆད་ཉན་བྱས་སོང་བ་གསར་དུ་ཡེ་ཤེས་ཀྱི་སྤྱན་ཞིག་ཐོབ་ཚོད་དུ་འདུག་འཇིག་རྟེན་གྱི་སྐྱེ་བོ་ཡ་རབས་ཀྱི་གདོང་པ་ལའང་ཁྲག་ཅུང་ཟད་ཡོད་མོད། ཆོས་པར་རློམ་པ་ལ་ལ་ནི་རྗེས་སུ་ཐུ་གཤམ་བསྲེ་དགོས་བསམ་པ་མི་གདའ། སེ་ཆེན་ཞབས་དྲུང་གི་གྲ་པ་རྣམས་ལ་ཚེ་དབང་། བཅུ་གཅིག་ཞལ་དང་སྤྱན་རས་གཟིགས་ཕྱག་བཞི་པ། མགོན་པོ་ཕྱག་དྲུག་པ་གསུམ་གྱི་རྗེས་གནང་བསྐུར། དེ་ཁྲོད་ནས་ཁ་ཤས་ལ་བཅུ་བཞིའི་ཞོགས་སྨྱུང་གནས་ཀྱི་གསོ་སྦྱོང་དང་སང་ཉིན་ཧུང་ཐའི་ཇི་དཔོན་གཡོག་བཅོ་ལྔ་སྐོར་ལ་བསྙེན་གནས་ཀྱི་སྡོམ་པ་ཕབ། ཧུང་ཐའི་ཇིས་བསྐུལ་ངོར་བླ་མའི་རྣལ་འབྱོར་ལུས་དཀྱིལ་གྱི་ལྷ་ཚོགས་གསལ་བར་བཀོད་པ་ཤིན་ཏུ་རྒྱས་པ་དང་རྡོ་རྗེ་སེམས་དཔའི་སྒོམ་བཟླས་བྲིས། ཚེ་དབང་བརྒྱ་རྩ། མདོ་སྡུད་པ། བཀྲ་ཤིས་བརྩེགས་པ། རྡོ་རྗེ་གཅོད་པ། རྒྱལ་མཚན་རྩེ་མོའི་དཔུང་རྒྱན། དཔང་སྐོང་ཕྱག་བརྒྱ་པ། གཙུག་ཏོར་རྣམ་རྒྱལ་རྣམས་ཀྱི་ལུང་། མི་བཟང་ཚོར་ཚེ་དབང་། དམངས་མར་སྤྱན་རས་གཟིགས་ཀྱི་རྗེས་གནང་། རྡོ་རྗེ་སེམས་དཔའི་སྒོམ་བཟླས། སྐྱབས་འགྲོའི་དམིགས་པ་ཕབ། མཚོ་སྔོན་པོ་འདི་རྒྱ་བོད་ཧོར་གསུམ་ཐམས་ཅད་འདུ་བའི་ས་གནས་ཡིན་པས་ཉེ་ལེན་དང་ཁུར་འཁུར་གལ་ཆེ་གཤིས་རྫོང་བ་བཟབས་རྒྱས་སྟབས་ཏེ་ཧུང་ཐའི་ཇི་ཉེར་གསུམ་ལ་ཐོན། བདེ་ཆེན་ཡངས་པ་ཅན་མཁན་པོ་གསར་བསྐོས་ལ་ཤིས་པ་བརྗོད། ལྷུན་གྲུབ་སྒང་ཆེན་པས་ལྕགས་གླང་གོར་གྷས་སྐྱིད་གྲོང་ལ་བསྐོར་དུས་འཁྲ་བཟུང་ལས་ཚན་
སྤྱིའི་མིག་ལྟོས་ལ་ཕན་པའི་མཚར་ཁར་ཕ་དྲུག་ནས་བོར་བོག་ཁི་ཡས་བཟུང་ཤུལ་གཞིས་ཀ །ཐེམ་འཛིན་བདུན། ལག་ཡོང་སུམ་བརྒྱ་སྐོར། ཀོང་པོ་ཕན་བདེ་བ་རྣམས་ཀྱིས་རང་ཉེས་ཀྱི་བྱེད་པར་བབ་འབྲེལ་མི་འདུག་རུང་དགེ་ལུགས་ཀྱི་གྲས་སུ་སོང་བས་འོར་ཤོད་ཆུ་སྐོར་གཞིས་ཀ །ཐེམ་འཛིན་དྲུག་ཅུ་སྐོར། ལག་ཡོང་སྟོང་ཕྲག་ཕྱེད་གཉིས། སྣོན་ཉི་མ་ཐང་པ་བྱ་བྲལ་གྲ་ས་མཆོད་ཐེབས་ཆེར་མེད་པ་ཕྱིས་སུ་གྲ་ཚོགས་འཕེལ་བ་དང་བཅས་གླིང་སྟོད་ཆོས་རྗེ་ལྷ་རྗེ་བློ་བཟང་རྒྱ་མཚོས་ཞུ་རྟེན་གྱི་མཐུན་རྐྱེན་མཛད་པས་མཚམས་སྦྱར། མགོན་པོ་གདོང་ཁུལ་ནས་ཕག་གདོང་ཁུངས་ཀྱི་བོགས་ཤས་ཀྱི་ལག་ཡོང་ལྔ་བརྒྱར་ཉེ་བ། དྭགས་པོ་བང་རིམ་སྔ་ཕྱིར་བྱས་པ་ཆེ་གྲས་ཀྱིས་ཀོང་སྟོད་དཔོན་ཚོ་བས་བཟུང་ཤུལ་གཞིས་ཀ །ཐེམ་འཛིན་བཅུ། ལག་ཡོང་སྟོང་དང་བརྒྱ་སྐོར་རྣམས་སྦྱོར་འཇགས་བྱས། བསྙེན་རྫོགས་བཅུ་གཉིས་དང་དགེ་ཚུལ་ཉི་ཤུ་བསྒྲུབས། སྟག་ལུང་ཞབས་དྲུང་རིན་པོ་ཆེ་མ་ཆེན་རི་བོ་ཆེའི་ཞིག་གསོས་ལ་ཕེབས་བཞེད་ཆེ་བ་ཧུང་ཐའི་ཇི་འབྱོར་བ་དང་བཅས་མཆོད་ཡོན་བཀའ་གྲོས་ཐོག་ནས་ལོ་གྲངས་བཅད་ཀྱི་ཁྲོལ་ཆ་གནང་བར་བརྟེན་ཟླ་བ་དྲུག་པའི་ཚེས་བདུན་ལ་ཞབས་དྲུང་མ་ཆེན་ཕེབས་པ་དང་མཇལ། ཉིན་ཁ་ཤས་ཀྱི་བར་གསུང་འཕྲོས་ཞིབ་མོལ་དུ་བྱུང་། རྗེ་བཙུན་ཙོང་ཁ་པ་ཆེན་པོས་མཛད་པའི་བདེ་མཆོག་འདོད་འཇོའི་ལུང་། ཞང་བཀའ་རྒྱའི་ནང་གི་ཡང་དག་གི་བྱིན་རླབས། ཐང་སྟོང་རྒྱལ་པོ་ལུགས་ཀྱི་ཚེ་དབང་འཆི་མེད་དཔལ་སྟེར་ཚར་བདུན་བཅས་ཕུལ། བར་ཁམས་སུ་ཆིབས་ཁ་བསྒྱུར་བའི་ཕེབས་རྫོངས་བཟབས་རྒྱས་ཀྱི་ལུགས་ཚེས་བཅུ་གཉིས་ལ་གྲུབ་པ་ཞུས། གྲ་ཁང་བཀྲ་
ཤིས་ཁང་གསར་གྱི་བཀྲ་ཤིས་ཀ་བཞིར་མཆོད་དཔོན་དབུ་མཛད་གཉིས་ཀྱིས་རྟེན་མཆོད་བསྒྲིགས་པའི་དེབ་ཀྱི་འགོ་བརྗོད། བྱེས་པ་དཀའ་བཅུ་མཁས་བཙུན་གྱི་ངོར་ཚོགས་ཚ་མིག་མཁན་པོ་བསོད་ནམས་རྒྱལ་མཚན་གྱི་བསྟོད་པ། སྤྱན་གཡས་མཁན་པོ་དམ་ཆོས་རིན་ཆེན་གྱིས་བསྐུལ་བའི་བདག་བསྟོད་རྣམས་བརྩམས། བཅུ་གསུམ་ལ་དབེན་ས་སྤྲུལ་སྐུ་སོགས་བསྙེན་རྫོགས་བཅུ་གསུམ་དང་དགེ་ཚུལ་བཅུ་གཅིག་བསྒྲུབས། མངའ་བདག་སྨྲ་བོ་ལྕོག་པ། བདེ་ཆེན་གླིང་པ། ཟུར་རི་བླ་མ། འབོག་གོང་ནས། མདོ་མཁར་ནས། ལྕང་ར་ནས། བླ་མ་ཞང་སྟོན་པ་སོགས་ཕྲད་མི་མང་དུ་བྱུང་། དར་རྒྱས་ཆོས་སྡིངས་ཀྱི་རྒྱལ་སྲས་བསྟན་པའི་ཉི་མར་བརྡ་དོན་ལམ་ཟབ་ཀྱི་བླ་མའི་རྣལ་འབྱོར། བཻ་རོ་ཙ་ན་དང་ལྕང་ར་ནས་ལ་ཚེ་མགོན་གྱི་བྱིན་རླབས་བྱས། ལྷ་ས་རུ་བཞི་སྤྱི་ཚོགས་ཀྱིས་བསྐུལ་བའི་ངེད་རང་དང་སྡེ་པ་ཐུན་མོང་དུ་བཏོན་ཆོག་པའི་བརྟན་བཞུགས་ཀྱི་ཚིགས་བཅད་དང་། དཔལ་གྲོང་ཤག་བློ་བཟང་རྣམ་རྒྱལ་མི་དཔོན་བྱེད་རིང་དུང་སྐྱོང་རྒྱལ་མོར་སྙན་དར་འབུལ་རེས་ཀྱི་བྲིས་ཆོག་པའི་ཞལ་ཡིག་བྱ་བརྒྱ་འུར་གཅིག་མ་ཞིག་དགོས་ཟེར་བ་བྲིས། གནམ་གང་ལ་ལྷ་སའི་བསྙེན་གནས་མ་ཚོར་ཡན་ལག་བརྒྱད་པའི་སྡོམ་པ་ཕབ། ཟླ་བ་བདུན་པའི་ཚེས་བཞི་ལ་སྡེ་པ་དང་ལྷན་བརྒྱས་སུ་ལྷ་ས་སྤྱི་སོས་ཚེའི་རྟེན་འབྲེལ་བསྒྲིགས། འདི་ནས་བཟུང་རིང་འཚོའི་རྟེན་འབྱུང་སྡེ་པ་དང་ཕྱོགས་མཐུན་དུ་བྱས་པ་དང་སོ་སོར་བགྱིས་པ་སྣ་སོགས་སུ་ཡོད། དུར་བོད་དཔོན་མོར་གྲུབ་རྒྱལ་ལུགས་ཀྱི་ཚེ་དབང་དང་སྐྱེར་སྒང་ལུགས་ཀྱི་ཐུགས་རྗེ་ཆེན་པོའི་རྗེས་
གནང་བྱས། བསྙེན་རྫོགས་བཞི་དང་དགེ་ཚུལ་དགུ་བསྒྲུབས། སྤྱི་སྒོས་ཀྱི་རིམ་གྲོར་རྫོང་གཞིས་ཁག་བཅུ་བསྡོམས་པར་བཀའ་འགྱུར་ཚར་ཆིག་བརྒྱ། བརྒྱད་སྟོང་པ་ཆིག་སྟོང་། མཚན་བརྗོད་ཉིས་འབུམ། གདུགས་དཀར་ཆིག་འབུམ། སཱ་ཙྪ་འབུམ། ལྷ་ས། བསམ་ཡས། ཁྲ་འབྲུག །ཡུམ་བུ་བཅས་པར་བརྒྱ་མཆོད། གསེར་ཆབ། སྙན་ཤལ་ཁ་ཡིག་དང་བཅས་པ། གསང་སྔགས་གླིང་དུ་གཤིན་རྗེ་ཐམས་ཅད་འདུས་པའི་སྔགས་རིང་བྱེ་བ་གཉིས། སེར་འབྲས་དགེ་གསུམ་དུ་ཟླ་ཕྱེད་བར་ཇ་ཚུལ། རྒྱལ་དུ་དམག་ཟོར་མའི་བསྐང་བ་ཆིག་འབུམ། ཞལ་དང་བེག་ཙེ་སོ་སོར་ཁྲི་ཚར། ཕྱུགས་ལུག་ཉིས་བརྒྱའི་སྲོག་བླུ་རྣམས་བཏང་། དཔོན་པོ་བཻ་རོ་ཙ་ནའི་ཁ་ཏོན་ཚིགས་བཅད། ལྕོག་སྦུག་པ་ཚེ་བརྟན་རྡོ་རྗེས་བསྐུལ་བའི་བདག་བསྟོད། མཁན་ཆེན་བསམ་སྒང་པ་བློ་བཟང་ངག་དབང་གི་ཕྱི་རྟེན་དུ་སྟོང་ཕྲག་བརྒྱ་པ་རིགས་རྒྱུད་ཕུན་ཚོགས་དར་རྒྱས་དང་ཉེ་གནས་བློ་བསྟན་གཉིས་ཀྱིས་བཞེངས་པའི་དཀར་ཆག །དགེ་སློང་འཇམ་དབྱངས་དཔལ་བཟང་གིས་བསྐུལ་བའི་ཟུར་རྡོ་རྗེ་འཆང་དང་ཕ་བོང་ཁ་གདན་ས་འཇམ་དབྱངས་གྲགས་པ་གཉིས་ཀྱི་གསོལ་འདེབས། མཆོད་དཔོན་དང་གཉེར་པ་བློ་བཟང་སྦྱིན་པ་གཉིས་ཀྱི་ངོར་བཀྲ་ཤིས་ཁང་གསར་དུ་འབྲི་རྒྱུའི་ངེད་རང་གི་རྟོགས་བརྗོད་ལས་བརྩམས་པའི་ཀུན་བཟང་འཁོར་ལོ་རྣམས་བྲིས། ཀུན་འཁོར་གྱི་རིགས་འབྲི་བར་སྙན་ངག་མཁན་པོ་རྣམས་དཀའ་དཀའ་ལྟར་མཛད་ཀྱང་ད་ལམ་ཇ་ཡུན་གཉིས་ལ་འཕྲལ་དུ་གྲུབ་པ་བྱས། ཁྱབ་བདག་སྨན་ལུང་པར་རྫོགས་ཆེན་ཀློང་གསལ་གྱི་དབང་བཞི། ཚེ་དབང་བདུད་རྩིའི་བུམ་པ། ལུང་རགས་རིམ། ནཱ་ག་རགྴའི་ཆོས་
སྐོར་གྱི་ལུང་། རྣམ་སྲས་སེར་ཆེན། དྲག་པོ་སྲིན་པོ་བཞི་བསྐོར། ལས་མཁན་མདུང་དམར་ཅན་གསུམ་གྱི་རྗེས་གནང་། རྣམ་སྲས་བཀའ་བཅོ་ལྔའི་ཆོག་ཁྲིགས་ཁྱབ་བདག་བཀའ་འགྱུར་བས་མཛད་པ་རྣམས་ཀྱི་ལུང་ཕུལ་གྲིབ་སེལ་དང་བསུ་བཟློག་གི་རིམ་གྲོ་གནང་ནས་ཉི་ཤུ་ལ་ཆུ་བོ་རིར་ཕེབས། རབ་བྱུང་བསྙེན་རྫོགས་ཁ་ཤས་བསྒྲུབས། བསམ་ཡས་དཀར་པོ་བའི་ཐུགས་སྲས་གཞོན་པར་མཚན་ཀུན་དགའ་ཆོས་དབང་རྒྱ་མཚོར་བཏགས། ཉེར་ལྔ་ནས་ཞག་བཅུ་ལྷག་གི་བར་གནས་གསར་མཁྱེན་རབ་རྣམ་རྒྱལ་ལ་ཚེམ་བུ་ལུགས་ཀྱི་དམར་ཁྲིད་ཕབ། ཁོང་པ་ཤེས་རབ་དང་བརྩོན་འགྲུས་གཉིས་ཀ་ཆེ་བ་འདུག་པས་ཉིན་མཚན་ལ་བལྟོས་མེད་ལྟ་བུའི་སྡུག་རུས་ཐུབ་པར་བསྒོམས་པས་སྣང་ཉམས་ལེགས་པའང་ཅི་རིགས་བྱུང་འདུག །བཀའ་བརྒྱད་གསང་རྫོགས་ཀྱི་ལས་བྱང་རྩེ་ལེའི་པར་མ་ལ་ལྷན་ཐབས་ཀ་ཐོ་སྤྲད་ཆོག་པ་དངོས་གཞི་གཏེར་བྱོན་བཅོས་ལྷད་མེད་པ་ལ་ཚིག་ལྷུག་འདོན་མི་བདེ་བའི་རིགས་རྣམས་ལ་བཟོ་བསྐྱར་བྱས་པའི་མ་བུ་བསྡེབས་པ་ཧོར་ཟླ་བརྒྱད་པའི་ཚེས་ལྔ་ལ་གྲ་ཚང་དུ་བཙུགས།སང་ནས་ཉིན་གསུམ་གྱི་བར་ཆུ་ཞུགས་ལ་ཕྱིན། བཅུ་གཅིག་ལ་སྡེ་དྲུག་མཁན་པོ་བློ་བཟང་དར་རྒྱས་ཅན་དང་ཕྲད། གཉལ་ཆོས་ཉིད་གླིང་གི་བཻ་རོ་ཙ་ནའི་ཡབ་ཡུམ་གཉིས་ཀྱི་དབུ་ཐོད་གཙང་དུ་ཡར་གདན་འདྲེན་རྩིས་ལ་འཚུབ་བྱུང་ནས་བཞག་པ་ཡིན་ཟེར་བ་དེ་རྫོང་སྡོད་རྣམ་སྲས་གླིང་པ་ཕུན་ཚོགས་དབང་པོས་དོ་དམ་བྱས་སྡེ་དྲུག་མཁན་པོར་བསྐུར་འདུག་པ་རྗེས་འབྲང་བཞིན་ཡོད་པ་ཡིན་ནམ་སླེབས་གདོང་སེར་དྲག་ཆེ་བའི་འཚུབ་ཀྱི་རྣམ་པ་ཞིག་བྱུང་། ཡུམ་གྱི་དབུ་ཐོད་གཞིས་ཀ་རྩེའི་གནྡྷོ་ལའི་ཁྲོད་དུའང་
ཡོད་པས་ཙ་རིའི་མཚན་ལྡན་དབུ་ཐོད་བཞིན་མང་དྲགས་ནས་ཐེ་ཚོམ་གྱི་གཞི་ཆེ། བདེ་ཆེན་གྱི་ཞལ་ངོ་ནང་མཚམས་སུ་ཐུགས་མ་མཐུན་པར་སྐུ་ཉེ་དང་དྲུང་འཁོར་འགས་ནང་ལབ་ཀྱི་གཟུ་བཏང་བའི་རྒྱུ་མཚན་སོགས་གསུང་བར་སྟག་རྩེ་ཐའི་ཇི་སྡེ་པའི་སར་བྱོན་ཞོར་དང་ཚེས་བཅུ་གཉིས་ཀྱི་སྔ་དྲོ་མཇལ་ཞིང་ནང་སོ་དཀོན་མཆོག་དར་རྒྱས་ཅན་དང་ཡང་ཕྲད། རྐང་པ་གཡས་པར་འབམ་དཀར་པོའི་རིགས་ཡང་བ་ཞིག་ཞུགས་པའི་དེ་ཉིན་ནས་འཕྲོད་བསྟེན་གྱི་མཚམས་བྱས་ཤིང་ནད་གཡོག་མཆོད་དཔོན་དབུ་མཛད་གཉིས་ཡིན། དྲང་སྲོང་ཆེན་པོ་བྱང་ངོས་ནང་སོ་དར་རྒྱས་ལ་རྩ་ཆུ་རྣམས་གཟིགས་སུ་ཕུལ་བས་འབམ་མ་ཡིན་པའི་ཆུ་སེར་གྱི་ནད་དཀྱུས་མ་ཞིག་ཏུ་ངོས་བཟུང་བའི་ཁོང་སྨད་དང་འབྱུག་སྨན་མཛད་པ་འཕྲོད་ངོ་ཆེ་བའི་ཞག་བཅུ་སྐོར་ལ་ལམ་ཙམ་བདེ་བས་ཁྲོ་རོལ་གྱི་ཆོག་ཁྲིགས་བཀོད། བཀྲ་ཤིས་ལྷུན་པོའི་ཕྱག་མཛོད་ཐོན་པ་འདས་པའི་ཚབ་མ་སུ་བསྐོའི་སྐོར་ལ་མགྲོན་གཉེར་གཞོན་པ་བྱུང་བར་འོས་ཐོ་ལྟར་ད་ལྟའི་ཕྱག་མཛོད་ཕུན་ཚོགས་རབ་བརྟན་བསྐོས་ན་ལེགས་པའི་རྒྱུ་མཚན་ངེད་རང་དང་སྡེ་པ་གཉིས་ཀས་བྱས། ཧོར་ཟླ་དགུ་པའི་ཚེས་གཉིས་ལ་ཁྱབ་བདག་ཞ་ལུ་མཁན་ཆེན་ལ་རྭ་ལུགས་ཀྱི་དུག་དབང་སོགས་ཆོས་བཀའ་ཅི་རིགས་ཞུས། ཕར་འཇིགས་བྱེད་ཀྱི་སྔགས་བཏུ་དང་ཚེ་དབང་འཆི་མེད་དཔལ་སྟེར་ཕུལ། འདི་ལོ་མ་ཧེའི་མཆོད་པ་ཡིན་པར་མཁན་རིན་པོ་ཆེ་བསྐྱེད་རྫོགས་ཀྱི་རྣལ་འབྱོར་ལ་ནང་བྱན་ཆུད་ཅིང་ལྗགས་བསྙེན་མཐར་ཕྱིན་པའི་སྟབས་དམ་བཞག་གནང་རྩིས་འདུག་རུང་བསམ་ངན་སྦྱོར་རྩུབ་འཆང་བའི་མ་རུངས་པ་འདྲས་མང་ཇ་ཉུང་ཇ་སྐོལ་བ་བྱུང་ཚེ་དམ་སེལ་གྱིས་འཚུབ་ལྷོངས་ཅི་ཡོང་ཐིངས་དཀའ་བས་དེ་
ལས་བསྟན་པའི་བཙས་སུ་སྨིན་གྲོལ་རྒྱུད་བཤད་མན་ངག་གི་འཆད་ཉན་ཡུན་རིང་པོའི་བར་དུ་གནང་བར་རང་ཕན་ཆེ་བར་གོ་ནས་ད་ལམ་རེས་མི་མཛད་པར་ནན་དུ་གསོལ་བ་བཞིན་ཞལ་གྱིས་འཆེས། ཞ་ལུའི་མ་ཧེའི་སྐད་གཏོང་གི་ལམ་ཡིག་བྲིས་ཤིང་ལས་གཤིན་ཡབ་ཡུམ་གྱི་ཞལ་འབག་ལ་འཕྲིན་བཅོལ་གྱི་ཚིགས་སུ་བཅད་པའི་སྙན་དར་འདོགས་རྒྱུ་ཕུལ་བ་མཆོད་པའི་དུས་ཞལ་བརྙན་ཅུང་ཟད་འཆུས་པ་སྙན་དར་བཏགས་པ་དང་འདྲོངས་ཞེས་གླེང་། ཝ་ར་ཎཱ་སི་ནས་པཎྜི་ཏ་གོ་ཀཱུ་ལས་རྒྱ་ནག་ཏུ་ཚོང་པ་བཏང་བའི་འཕྲིན་ལན་བི་ཝརྟ་བཀོད། འཕྲོད་བསྟེན་མཇུག་སྐྱོང་སྟབས་ཚེས་ལྔ་ལ་སྣེའུ་སྡོང་ཞབས་དྲུང་གདུང་བརྒྱུད། རྒྱལ་པོའི་སྲས་རྡོ་རྗེ་དང་ནོར་བུ་རྒྱ་མཚོ། དྲུག་ལ་སྒམ་པོ་སྤྲུལ་སྐུ། རྟ་ཚག་སྤྲུལ་སྐུ། མཁའ་འགྲོ་བློ་བཟང་བསྟན་སྐྱོང་རྣམས་སྐུ་རྐྱང་དང་མཇལ། རྟ་ཚག་རྗེ་དྲུང་གིས་རྒྱལ་བ་ཙོང་ཁ་པའི་ཕྱག་དྲིལ་གྱིས་གཙོས་པའི་སྟེར་སྦྱིན་མཛད། གཏེར་སྒྲོམ་གྱི་ཆུ་ཚན་ལ་འགྲོ་བའི་གྲབས་ཡུལ་གྲུབ་རུང་གློ་བུར་དུ་བློ་ལ་སྦུབས་འཐུམས་ཤར་བས་གནས་ཆུང་ཆོས་སྐྱོང་ཆེན་པོར་ཞུས་པས་བཤོལ་འདེབས་མཛད་པར་བརྟེན་ཚུར་ཆུ་ཚན་ལེན་པའི་སྒོ་ཤར་བ་སྔར་རྒྱུན་བཞིན་རོང་ནས་བླངས། ཆུ་ཚན་སླེབས་པ་དང་རྐང་པ་གཡོན་པའི་མཐིལ་ཡང་ཅུང་ཟད་ན་བའི་འགོ་ཚུགས། བྱང་ངོས་ནང་སོས་སྐྱོན་མི་ཡོང་གསུང་བ་ལྟར་ཆུ་ཚན་བརྒྱབ་པ་གཡོན་མར་གཉན་ཁ་ཞིག་ཞུགས་ཚོད་ནས་ཇེ་ལོད་དུ་སོང་ཞིང་སྔར་དང་མི་འདྲ་བའི་ལུས་རིལ་པོ་བཅུག་པ་ཁྲག་ལ་བརྒྱབ་སྐྱོན་གྱིས་གཡས་པའི་འབམ་དྲག་ཟིན་པའང་སླར་བལྡབས་ཏེ་ཁམས་ནན་ཏར་མི་བདེ་བ་ཞིག་བྱུང་བས་ཆོས་སྐྱོང་ཆེན་
པོའི་གསུང་བཙན་པའི་ཐོག་ཁོ་ནར་སོང་། ཆུ་ཚན་རྒྱག་སྐབས་མགྲོན་གཉེར་དྲུང་པས་བག་སྟོན་གྱི་སྐལ་བའི་གཞིས་ལེན་བཟབས། དེ་སྐབས་ནོར་བུ་རྒྱ་མཚོ་དང་འཕྲལ་དུ་ཕྲད་པའི་སྐྱོན་ཡིན་ནམ་ཞེས་ལབ་མི་མང་བ་འདུག་རུང་རང་ངོས་ནས་སྨྱོན་པ་མི་ཁྱུར་འཇུག་པ་ཞིག་ཡོང་ལ་རེའི་རྒྱལ་པོ་གོང་འོག་ལ་གོང་བརྒྱབ་པའི་ཤེར་སྙིང་ཚར་གཅིག་བཏོན་པ་ཙམ་ཡང་མེད་པས་དམ་སེལ་གྱི་དོགས་པ་མེད། འོན་ཀྱང་བསམ་ངན་སྦྱོར་རྩུབ་ཅེས་པའི་ཚིག་འདི་ཁྱབ་ཆེས་པས་ཁ་མཚོན་ནི་ཆོད་དཀའོ། བླ་མ་དགེ་སྟེང་པས་གཙོས་གོང་དཀར་དཀོན་གཉེར་རྣམས་ཀྱིས་གདུགས་དཀར་གྱི་མདོས་ཆེན་པོ་ཏ་ལ་ཚོམས་ཆེན་དུ་བཙུགས་པའི་ཉེར་དགུ་ལ་བཏང་། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་གྱི་ཞལ་ཐང་ཕྱག་ཞབས་ཀྱི་རྗེས་འོན་མདའ་གསས་ཁང་རྩེར་གནང་བ་རྣལ་འབྱོར་དབང་ཕྱུག་ཡར་ཀླུངས་པའི་ཐུགས་དམ་རྟེན་ཡར་ཀླུངས་བསམ་གཏན་གླིང་གི་ནང་རྟེན་ཁྱད་འཕགས་གོང་དཀར་ནས་ཆོས་རྗེ་དཀོན་གཉེར་དཔོན་པར་བྱུང་འདུག་པ་དེ་སྟེར་སྦྱིན་མཛད། བླ་མ་དམ་པའི་སྣམ་སྦྱར་རིན་སྤུངས་པའི་ནང་རྟེན་འོད་མཆོག་པས་དབུ་མཛད་བློ་བཟང་ཡོན་ཏན་ལ་བསྐུར་བ་ལག་ཏུ་འབྱོར། ཧོར་ཟླ་བཅུ་པའི་ཚེས་གཅིག་ལ་དཀོན་གཉེར་གྲ་ཚང་པས་ཞལ་གྱི་བསྐང་མདོས་དང་གྲ་ཚང་དུ་འགོང་པོ་ཨར་གཏད་བྱེ་བ། གྲངས་བཅད་ཀྱིས་དྲི་ཟའི་རྒྱལ་པོར་མདོས་མཆོད་ཕུལ། རྫོང་གཞིས་ཁག་བཅུ་གཅིག་བསྡོམས་པར་བཀའ་འགྱུར་ཚར་བརྒྱ་དང་སོ་གཅིག །བརྒྱད་སྟོང་པ། བསྐལ་བཟང་། གཟུངས་བསྡུས་གསུམ་སྟོང་རྩ་རེ། མཚན་བརྗོད་ཉིས་འབུམ། ཤེར་སྙིང་འབུམ་ཐེར་བཅུ་གཅིག །ཚེ་ཆོག་བཞི། སཱཙྪ་འབུམ། ལྷ་ས། བསམ་ཡས།
ཁྲ་འབྲུག་རྣམས་སུ་བརྒྱ་མཆོད། ཕྱུགས་ལུག་བརྒྱ། ཉ་འབུམ་ཚོ་གཅིག་གི་སྲོག་བླུ། སྟར་ཆགས་ཀྱི་མང་འགྱེད་དུ་མི་ཐེ་བའི་གྲ་ས་ཕན་ཚུན་དུ་ཇ་ཚུལ་ཐོག་སྤོང་དག་བཏང་། གྲ་ཚང་ནས་གྲངས་བཅད་ཀྱིས་འབྱུང་བ་རིན་ཆེན་ཀུན་འདུས་ལ་བརྟེན་པའི་སྲི་འབྲས་སྤུངས་དང་འཕྱོང་རྒྱས་སོགས་འགའ་ཞིག་ཏུ་མནན། སྤྲུལ་སྐུ་པདྨ་གླིང་པས་བུམ་ཐང་སྨད་ཀྱི་སྐྱིར་ཚོགས་སེང་གེ་ཁྲི་ཙོག་བྲག་ནས་འགྲོ་བ་ཀུན་འདུལ་གྱི་ཆོས་སྐོར་དང་ལྷན་དུ་གདན་དྲངས་པའི་དྲག་དམར་གྱི་སྐུ་ཁྱད་ཅན་དེ་ལྷོ་བྲག་བྷཉྫ་དགོན་པ་ནས་བླུས་མི་བཏང་བྱུང་བ་བླུ་ཡོན་གང་ལེགས་བྱིན་བར་ཆད་ཞི་བའི་རྟེན་འབྲེལ་གྱི་སྒོ་འགྲིག །ཚངས་པ་དུང་ཐོད་ཅན་གྱིས་ཚེར་གསེབ་བླ་མ་མངགས་ཏེ་ཡུན་དུ་གནས་པའི་རྟེན་འབྲེལ་དུ་སྟག་གདན་ལེགས་པ་ཞིག་གི་རྟེན་དང་བཅས་པའི་གསུང་འཕྲིན་བྱུང་བའི་ལན་དུ་རྒྱལ་ཁམས་སྤྱིའི་ལུང་བསྟན་དགོས་པའི་རྒྱུ་མཚན་གསོལ། ཆོས་སྐྱོང་གི་རིགས་ཀྱིས་གདན་འདིང་བ་ལ་རྣམ་རྟོག་བྱེད་ཟེར་གྱིན་འདུག་ཀྱང་སྟག་ལོ་བསམ་ཡས་གནོད་སྦྱིན་ཆེན་པོར་བྱུང་བ་དང་འདི་གཉིས་ཀ་བཏིང་བས་མ་འཕྲོད་པ་མ་བྱུང་། ཚོང་འདུས་ཆོས་སྐྱོང་ཆེན་པོ་བྱ་ཁྲིད་མིག་གཅིག་པས་གསོལ་མཆོད་འཁྱེར་བདེ། སྦུག་ཆོལ། རྔ་གཉིས་རྣམས་དགོས་གསུང་བ་དེ་དོན་ཕུལ་ཞིང་རྒྱལ་ཁམས་སྤྱིའི་ལུང་བསྟན་དགོས་ཚུལ་འཕྲིན་ལན་དང་བཅས་ཆང་ཁྱིམ་པ་བཏང་། གདོད་ཁ་ཆོས་མཛད་ཕ་མེས་ས་ལུགས་ཀྱི་སྦྱིན་བདག་ཏུ་སོང་བས་ཁ་ཏོན་དུ་མགོན་པོ་ཆེ་ཆུང་གི་གཏོར་ཆོག་འཁྱེར་བདེ་དགོས་ཚུལ་བཀོད། ཟུར་ཁྱབ་བདག་བླ་མ་དག་ཞིང་དུ་གཤེགས་རྗེས་སྐྱིད་ཤོད་ཕྱོགས་སུ་ཁྲོ་རོལ་ཚད་ལྡན་གཏོང་མཁན་མ་རྙེད་པས་དཔལ་རི་སྒྲུབ་
སྡེ་པའི་གྲ་གྲངས་བོས་པ་ཡིན་རུང་ལ་ཆུ་བགྲོད་དཀའ་བ་དང་བཅས་དཔལ་རི་བས་འཕྱོང་རྒྱས་རྫོང་དུ་བཏང་བའི་རྒྱབ་ཆོས་རི་བོ་བདེ་ཆེན། བཀྲ་ཤིས་བདེ་ཆེན། ལམ་རིམ་པ་གསུམ་རེས་སྐོར་བྱས་ཏེ་ད་ལམ་གྱི་ཁྲོ་རོལ་འདི་ནས་བཟུང་ཕན་བདེ་ལེགས་བཤད་གླིང་པ་གྲ་པ་བཞི་བཅུ་སྐོར་གྱིས་ཕོ་བྲང་པོ་ཏ་ལ་ནས་སྟར་ཆགས་སུ་བཏང་ཞིང་དམངས་མས་འཇམ་དཔལ་ཟིལ་གནོན་གྱི་ཟོར་སྒྲུབ་མཛད། བླ་མ་མངའ་བདག་ཆེན་པོའི་གཏེར་བྱོན་མགོན་པོ་གཡུལ་བཟློག་དེ་ཟུར་འཇམ་དབྱངས་བླ་མས་ཕྱག་ལེན་དུ་གནང་གིན་འདུག་ཀྱང་དེང་སང་འུག་བྱ་ལུང་པ་ཙམ་ལས་མཛད་མི་གཞན་དཀོན་པས་འདི་ལོ་ནས་སྟར་ཆགས་སུ་འུག་བྱ་ལུང་པ་དཔོན་སློབ་སྒྲུབ་ཞག་ཁྲོ་རོལ་དང་དབྱིབས་མཚུངས་པ། རྒྱབ་ཆོས་དཔལ་འཁོར་ཆོས་སྡེ་བ་རེས་སྐོར་གྱིས་ཤེར་སྙིང་གསུངས། རིམ་གྲོ་ཚན་ཆེས་པ་དང་བྱང་ངོས་ནས་ཀྱིས་འཕྲོད་བསྟེན་མུ་འཐུད་མཛད་པས་ཧོར་ཟླ་བཅུ་གཅིག་པ་ཚེས་ནས་འབམ་དྲེག་གི་ནད་གཉིས་ཀ་རིམ་བདེ་བྱུང་། འོན་ཀྱང་སྨན་དཀར་དང་བཙོང་བཅོས་སོགས་འབམ་གྱི་འཕྲོད་བསྟེན་སོར་བཞག་རྗེས་གཅོད་གཏར་ཁ་དང་བཅས་པ་ཞིག་མཛད་ན་དྲག་སླ་ཞིང་ནད་གསར་པར་སོང་བས་རྗེས་སུ་མི་བལྡབས་པ་འོང་ཚོད་དུ་འདུག་རུང་བཙུན་མོ་ཆེ་བས་ཀྱང་སྤྲང་པོའི་བུ་ཆུང་ཞིག་ཉོས་ནས་ཤ་ལ་སྦྱར་ཏེ་ང་ལའང་མདང་འདི་སྐྱེས་པ་ཡིན་ནོ་ཟེར་བར་བློན་པོ་རྣམས་ན་རེ་མདང་སྐྱེས་པའི་བུ་ཆུང་ལ་སོ་མི་འབྱུང་སྟེ་ཡུམ་གྱི་བཀའ་བཙན་དུ་ཆུག་བྱས་པས་མངའ་བདག་ཡུམ་བརྟན་ཞེས་ཟེར་བའི་དཔེ་ལྟར་ད་ལྟའི་བར་དུ་ནད་རོ་ལུས་པར་དོགས་ཀྱང་རང་ཉིད་ཀྱིས་ཚེ་རབས་མང་པོར་གཞན་གྱི་ཡན་ལག་བཅད་གཏུབས་སོགས་བསོད་ནམས་མ་ཡིན་པ་བསགས་པའི་ལས་ནད་གཙོ་ཆེ་བ་ཞིག་
མིན་པའི་ངེས་པ་ཅི་ལ་ཡོད། སྒོ་མང་གྲ་ཚང་གི་གྲ་པ་དགོན་ལུང་པ་ཞིག་གིས་གསར་རྩོམ་མཛོད་ཀྱི་རྒྱུགས་སྤྲད། དཔོན་མཁའ་འགྲོ་བློ་བཟང་བསྟན་སྐྱོང་གིས་བསྟན་འཛིན་ཆོས་རྒྱལ་གྱི་དགོངས་རྫོགས་ལ་དམིགས་ནས་ཇོ་ཤཱཀ་གི་སྤྱན་སྔར་དངུལ་གྱི་མཎྜལ་ཆེ་ལེགས་ཀྱི་ཁ་བྱང་ལ་འབྲི་རྒྱུའི་སྨོན་ལམ། རྒྱལ་ལེགས་བཤད་གླིང་སློབ་དཔོན་པས་བསྐུལ་བའི་མི་འགྱུར་བར་གནས་པའི་ཚིགས་བཅད། ངམ་རིང་མཁན་ཆེན་ལོ་ཙཱ་བའི་སློབ་མ་འབྲོང་རྩེ་ལྷུན་གྲུབ་གླིང་པ་བློ་བཟང་ནོར་བུས་སྙན་ཚིག་གི་ཡི་གེ་བསྐུར་བའི་འཕྲིན་ལན་རྣམས་བྲིས། གྲ་ཚང་ནས་གྲངས་བཅད་ཀྱིས་གཤིན་རྗེ་མེའི་སྤུ་གྲིའི་ལས་སྦྱོར་དང་ཉི་ལྡོག་གི་རིམ་གྲོ་རྣམས་དཀྱུས་བཞིན་བཙུགས། བཀྲ་ཤིས་ལྷུན་པོའི་དངུལ་གདུང་གྲུབ་པའི་བླ་བྲེ། བརྒྱ་མཆོད། གོས་ཡུག་དམར་སེར་སྨོན་ལམ་གྱི་འདོད་གསོལ་དང་བཅས་འབུལ་བར་གདོང་ཁ་ནས་ཉེར་བདུན་ལ་ཐོན། བདག་ཏུ་མ་བཟུང་བའི་རི་རྒྱ་ཀླུངས་རྒྱ་རྒྱུན་ལྡན་དུ་ཡོད་པར་མ་ཟད་འདི་ལོ་སོ་སོས་བདག་ཏུ་བཟུང་བའི་སྲོག་ཆགས་རྣམས་ཀྱང་མི་གསོད་པའི་དབུས་གཙང་ཀུན་ཏུ་བསྡམ་ར་བྱས་ཏེ་མི་འཇིགས་པ་སྐྱབས་ཀྱི་སྦྱིན་པ་སྤེལ། ཧོར་ཟླ་བཅུ་གཉིས་པའི་ཚེས་ལྔ་ནས་གྲ་ཚང་གི་གྲངས་བཅད་ལ་སྲི་གནོན་བཙུགས། དགའ་ལྡན་ཆོས་འཁོར་ཡང་རྩེའི་གྲ་པ་བརྒྱད་དང་དགའ་ལྡན་གསུང་རབ་གླིང་གི་གྲ་པ་གཅིག་དང་བཅས་པས་དབུ་ཕར་མཛོད་སོགས་ཀྱི་རྒྱུགས་སྤྲད། ལོ་མཇུག་གི་དུས་རིམ་ལེ་ཚན་རྣམས་དེབ་ཤར་བཞིན་བཏང་། ཆོས་དབང་རིན་པོ་ཆེའི་ཚེམས་ལྷ་བྲོ་གདུང་བརྒྱུད་པའི་བསྔོ་རྟེན་དུ་འབྱོར།