དགུང་ལོ་ཞེ་བརྒྱད་པར་བསྒྲུབ་བྱ་མང་པོར་དགེ་ཚུལ་སློང་གི་སྡོམ་པ་སྩལ་པ་དང་། འབྲི་གུང་གཏེར་སྒྲོམ་ནས་ཆུ་ཚན་བླངས་ཏེ་འཕྲོད་བསྟེན་གནང་བ་བཅས་ཀྱི་སྐོར།
མཚམས་ཧ་ཅང་ཡུན་རིངས་པས་ཐག་རིང་དུ་མ་ཟད་ཉེ་སྐོར་རྣམས་ཀྱང་གསང་སྒོ་ལྟ་བུ་བྱས་པར་
དོགས་མཁན་ཡོད་འདུག་པ་ཤིང་འབྲུག་འདོད་ཁམས་དབང་ཕྱུག་མ་མཆོད་པའི་ཚོགས་དབུར་ཕྱིན་པར་ཐེ་ཚོམ་གྱི་མདུད་པ་གྲོལ། ཚོམས་ཆེན་དུ་དགའ་སྟོན་གྱི་བཞུགས་གྲལ་བཤམས། ཚེས་གསུམ་ལ་བྲག་དབར་གྲ་ཚང་སློབ་དཔོན་ངག་དབང་ནོར་བུ་གྲ་དམངས་དང་བཅས་པ་བརྟན་སྡོད་ཀྱི་སྨོན་ལམ་བཏབ་ཅིང་ཞལ་འདོན་གྱི་ཚིགས་བཅད་བསྐུལ་བའང་བྲིས། བསྙེན་རྫོགས་ང་དྲུག་དང་རྟ་ཚག་སྤྲུལ་པའི་སྐུས་གཙོས་དགེ་ཚུལ་དོན་བཞི། དགེ་བསྙེན་གཉིས་རྣམས་བསྒྲུབས། རྟ་ཚག་སྤྲུལ་པའི་སྐུར་གྲུབ་རྒྱལ་ལུགས་ཀྱི་ཚེ་དབང་། ཕྱག་རྡོར་འབྱུང་འདུལ། ཨ་ར་པ་ཙ་ན་གཙོ་རྐྱང་སྐྱེར་སྒང་ལུགས་ཀྱི་ཐུགས་རྗེ་ཆེན་པོ། བ་རི་ལུགས་ཀྱི་རྣམ་འཇོམས། སྣར་ཐང་བརྒྱ་རྩའི་ནང་གི་མི་འཁྲུགས་པའི་རྗེས་གནང་། ཕྱག་དྲུག་པའི་དབང་བཞི་བྱིན་རླབས་ཀྱི་ཚུལ། ཆོས་སྤྱོད་རགས་བསྡུས་ཀྱི་ལུང་། མཁའ་འགྲོར་ཕྱག་དྲུག་པའི་རྗེས་གནང་། རྒྱལ་བ་ཙོང་ཁ་པ་ལ་བརྟེན་པའི་བླ་མའི་རྣལ་འབྱོར། འབྲས་སྤུངས་ཀྱི་སློབ་དཔོན་རྣམས་ལ་སྤྱན་འདྲེན་ཁྲུས་གསོལ་གྱི་ལུང་རྣམས་ཕུལ། རྗེ་དྲུང་དཔོན་སློབ་ཁམས་སུ་འབྱོན་གདོང་རྫོང་བ་གང་ལེགས་བྱས། དགེ་པའི་རིགས་འདི་འདི་ཕྱིའི་འཁོར་བའི་འཁོར་ལོ་བསྐོར་བའི་རྒྱུར་མ་སོང་བ་གལ་ཆེ་འདུག་རུང་དེང་སང་ཆོས་བརྒྱད་འཆིང་བའི་རེ་དོགས་ཀྱིས་བྱང་ཆུབ་ཀྱི་ཆེད་དུ་སྒྲུབ་མཁན་རང་གཞན་ཀུན་ལ་དཀོན་པར་སྣང་། དེ་མཚུངས་སྟག་རུ་ནས་ཀྱིས་འཕྱོང་རྒྱས་ཡབ་གཞིས་སུ་སོང་བས་དེར་སྐུ་རིམ་བཙུགས་ན་འགྱུར་ཆེ་ཟེར་བ་བདག་གཅེས་འཛིན་གྱི་དབང་གིས་དེ་དོན་ལྷུར་བླངས་ལོ་སྟར་ཆགས་སུ་ཁད་ཉེ་འབྲེལ་མཚུངས་ཀྱི་དགོན་ཁག་ནས་རེས་སྐོར་གྱིས་དགེ་འདུན་བརྒྱ་དང་བརྒྱད་རེ་གདན་དྲངས་པའི་
ཟླ་བ་དང་པོར་ཐོས་བསམ་དར་རྒྱས་གླིང་པས་གདུགས་དཀར་འབུམ་ཐེར། གཉིས་པར་རི་བོ་བདེ་ཆེན་པས་འབུམ་བརྒྱ། གསུམ་པར་དཔལ་རི་བས་གཤིན་རྗེ་ནག་པོ་སུམ་དྲིལ། བཞི་པར་བཀྲ་ཤིས་བདེ་ཆེན་པས་མཚན་བརྗོད་འབུམ་ཐེར། ལྔ་པར་བཀྲ་ཤིས་རྩེ་ཆོས་སྡེ་བས་རྣམ་རྒྱལ་སྟོང་མཆོད། དྲུག་པར་རི་བོ་ཆོས་གླིང་པས་མཚན་བརྗོད་འབུམ་ཐེར། བདུན་པར་ཚ་མིག་ཚོགས་པས་སྨན་བླ། བརྒྱད་པར་རྩེད་ཐང་ལྔ་མཆོད་པས་ཤེར་སྙིང་། དགུ་པར་འབྲས་བུ་གླིང་པ། བསམ་གཏན་རྩེ་བ། སྤྱན་གཡས་དགོན་སྟོད་པ་གསུམ་དྲིལ་བས་ཚེ་གཟུངས། བཅུ་པར་ལམ་རིམ་པས་མཚན་བརྗོད་འབུམ་ཐེར། བཅུ་གཅིག་པར་མངའ་རིས་གྲ་ཚང་པས་འབུམ་བརྒྱ། བཅུ་གཉིས་པར་ཆད་དཀར་ཆོས་སྡེ་པ་ཡིན་ཀྱང་བར་སྐབས་སུ་རྫོང་དཔོན་དང་མ་མཐུན་པའི་རྗེས་སུ་གྲ་རི་བོ་རྣམ་རྒྱལ་བ་དང་འཕྱོས་ཆོས་འཁོར་སྟེང་པ་བསྡོམས་པས་གདུགས་དཀར་འབུམ་ཐེར་རྣམས་ལྷག་བཅས་བཏང་བའི་མཆོད་ཆས། ཇ་ཐུག །ཕོགས་ཡོན་སོགས་གཏོང་སྒོ་ཁྱོན་བསྡོམས་ལོ་རེར་འབྲུ་ཐོག་ཏུ་ཕབ་པར་མཁའ་རུའི་ཁལ་ཉི་ཁྲི་བདུན་སྟོང་སུམ་བརྒྱ་ལྷག་བཅས་འགྲོ་བར་སྣང་། ཨོ་རོད་ཤེས་རབ་སེང་གེས་ཟང་ཟིང་གི་བདོག་པ་བསྟབས་ཤིང་ཕྱག་དྲུག་པའི་རྗེས་གནང་དང་རྒྱལ་མོ་ཆེ་ཆུང་ལ་གྲུབ་རྒྱལ་ལུགས་ཀྱི་ཚེ་དབང་བསྐུར། བསྙེན་རྫོགས་ང་ལྔ། དགེ་ཚུལ་རེ་གཉིས། རབ་བྱུང་མ་གཉིས་རྣམས་བསྒྲུབས། འདི་ལོ་ནས་བཟུང་གྲ་ལྡུམ་པོ་ནས། འདར་པ་ལོ་ཙཱ། འཕྱོས་ཕུ་གུ་ལུང་པ་སྐྱ་སེར་རྣམས་ཀྱིས་ལོ་བརྒྱད་བར་ཀྱི་ཕུག་པ་མན་ངག་ལུགས་ལྟར་ལེའུ་ཐོ་བཟོས། ཚེས་བརྒྱད་ནས་བདུན་
གཅིག་གི་བར་འཕགས་པ་མཆེད་ཀྱི་དྲུང་དུ་མཆོད་པ་རྒྱས་པར་བཤམས། གསོལ་འདེབས་སྨོན་ལམ་སྡིག་བཤགས་ནན་ཏན་དུ་བྱས། བཅུ་བཞི་ལ་ཕན་བདེ་ལེགས་བཤད་གླིང་པས་བདོག་པ་མཎྜལ་གྱི་ཚུལ་དུ་བསྟར་ཏེ་འཆི་མེད་འོད་སྣང་གི་དཀྱིལ་འཁོར་ལ་བརྟེན་ནས་ཚེའི་རྟེན་འབྲེལ་བསྒྲིགས། ཡེར་པ་སློབ་དཔོན་ཟུར་པ་ཉང་རེ་རབ་འབྱམས་པ་དང་ཕུ་ལུང་སྐྱ་རྒྱལ་ནོར་བུ་གཉིས་ཀྱིས་བསྐུལ་བའི་བདག་བསྟོད་རེ། ར་ཁོ་ཆོས་རྗེའི་ངོར་སྨོན་ལམ། ཤམྦྷར་ཆོས་རྗེ་སྔགས་འཆང་བྲག་ལ་བས་བསྐུལ་བའི་རིང་འཚོའི་ཚིགས་བཅད། དཔོན་མཁའ་འགྲོས་ཇོ་བོ་རིན་པོ་ཆེར་དངུལ་ཀོང་ཕུལ་བའི་ཁ་བྱང་རྣམས་བརྩམས། ཚངས་པ་དུང་ཐོད་ཅན་གྱིས་ལྐོག་གྱུར་གྱི་ལུང་བསྟན་གསལ་བར་མཛད་པའི་ལན་ཚིགས་བཅད་དུ་ཕུལ། བཅུ་བདུན་ལ་མཆོད་དཔོན་པས་གཙོས་པའི་གྲ་པ་ཁ་ཤས་ཆོས་འཁོར་རྒྱལ་དུ་བྱམས་ཆེན་ལ་བརྒྱ་མཆོད། མགོན་ཁང་སོ་སོར་གཏོར་གསོ། སྤྱན་གཟིགས་འབུལ་བར་མངགས་པར་འདོད་གསོལ་སྨོན་ལམ་བྲིས་པའི་སྙན་ཤལ། མཆོད་དཔོན་པ་སྒེར་གྱིས་སྙན་དར་འགའ་ཞིག་འབུལ་བའི་ཁ་བྱང་དགོས་ཟེར་བ་བྲིས། དེ་ནུབ་ནས་བཟུང་བདུན་གཅིག་གི་བར་མཚམས་ཤིན་ཏུ་དམ་པས་བཅད་དེ་རྡོ་རྗེ་གྲོ་ལོད་བསྙེན། འབྱུང་པོའི་རྩུབ་ལྟས་རྣམས་མར་ལ་ལྕགས་བསྲེགས་བཞིན་གྱུར། སྔོན་ནས་མཚམས་ཁོག་ཏུ་བཅུག་པ་ལྟར་ཁྱབ་བདག་སྨན་ལུང་པ་དང་མཇལ་ཞིང་བདུད་རྩི་ཆོས་སྨན་གྱི་ཕུད་གནང་བ་རྟེན་འབྲེལ་འགྲིག །མཁའ་འགྲོས་ཆོས་སྡེ་ཚོར་འཛུགས་རྩིས་ཀྱིས་བསྟན་པ། བསྟན་འཛིན། སྦྱིན་བདག་
འགྲོ་བ་ཀུན་ལ་འཇུག་པའི་སྨོན་ལམ་གང་གིས་བཏོན་ཀྱང་རིས་བཅད་དུ་མི་འགྲོ་བ་ཞིག་དུས་ཀྱིས་གཏུགས་པས་མྱུར་དུ་དགོས་ཚུལ་བྱུང་བ་ཐུན་འཚམས་ཤིག་ལ་བརྩམས་པ་མཚམས་གྲོལ་ནས་གཏད། ཉེར་བཞི་ལ་མཁའ་འགྲོས་གསེར་དངུལ་ཇ་པགས་རིགས་སོགས་ཁྲི་འབུལ་བཏེག །སང་ཉིན་དགའ་ལྡན་ཁྲི་རིན་པོ་ཆེ། བྱང་རྩེ་བ། ནཱ་ལནྡཱ་བཅོ་བརྒྱད་པ། སྐྱོར་ལུང་མཁན་པོ་རྣམས་དང་མཇལ། བདེ་ཆེན་ཆོས་རྗེ་བློ་བཟང་ཆོས་རྒྱལ་དབང་ཕྱུག་ཡབ་སྲས་ལ་ཚེ་རྟ་དང་བཀྲ་ཤིས་ལྗོངས་ཆོས་རྗེར་སྤྱོད་འཇུག་གི་ལུང་ཕུལ། བསྙེན་རྫོགས་དོན་གཅིག །དགེ་ཚུལ་ཞེ་བདུན། དགེ་བསྙེན་གསུམ་རྣམས་བསྒྲུབས། སྦྱར་ར་ཨའོ་ངག་དབང་ཚེ་བརྟན་གྱིས་རིག་འཛིན་ཆེན་པོ་རཏྣ་གླིང་པའི་གཏེར་མའི་པདྨ་གུ་རུ་ཡབ་ཡུམ་ལྷུན་གྲུབ་ཕོ་བྲང་གི་ནང་རྟེན་ཁྱད་ཅན་དེ་བྱིན་བྱུང་བར་དེ་བཞིན་གཤེགས་པའི་འཕེལ་གདུང་གིས་ཐོག་དྲངས་བྱིན་རླབས་རྟེན་དང་དངུལ་སྲང་ལྔ་བཅུ་ལྷག་ཙམ་གྱི་སྟེར་སྦྱིན་བྱས། སྤྱིར་ཡང་གཏེར་བྱོན་གྱི་རིགས་ལ་སྲུང་མ་རྣམས་འཁྲེན་ཞིང་ཁྱད་པར་རྟེན་འདི་ལ་སྡེ་དགུ་འཁོར་ཉམས་ཆེ་བ་སྣང་བས་དེ་ནུབ་གསོལ་མཆོད་བཟབས་རྒྱས་དང་གསེར་སྐྱེམས་བཏང་བས་འཇམ་པ་བྱུང་། དགའ་ལྡན་གསང་སྔགས་གླིང་གི་སློབ་དཔོན་ངག་དབང་ཕུན་ཚོགས། རིག་འཛིན་སྟོབས་ལྡན་དབང་པོའི་སྲས་ཟིལ་གནོན་དབང་དྲག་རྡོ་རྗེ། རྡོ་རྗེ་བྲག་པའི་ཁམས་སུ་འགྲོ་བའི་འབུལ་དཔོན་ཞིག་དང་བཅས་པར་བྱང་གཏེར་ཐུགས་རྗེ་ཆེན་པོ་དང་རིག་འཛིན་གདུང་སྒྲུབ་ཀྱི་ཆོས་སྐོར་ཡོངས་རྫོགས་ཀྱི་ལུང་ཁམས་པ་འོད་ཟེར་བླ་མར་ཐུབ་པ་དམ་ཚིག་གསུམ་བཀོད་ཀྱི་རྗེས་གནང་བྱས། བསྙེན་
རྫོགས་སུམ་ཅུ་དང་དགེ་ཚུལ་རེ་བདུན་བསྒྲུབས། མཁའ་འགྲོར་ཚེ་དབང་བརྒྱ་རྩ་དང་སྟག་རྩེ་ཐའི་ཇིར་ཚེ་དབང་ཕུལ། གདན་ས་འོག་གི་བཙུན་མོ་ནོར་བུ་བུ་ཁྲིད་གཤེགས་པའི་བསྔོ་རྟེན་དུ་ཕྲོམ་རྫར་འབྱོར་ཞིང་བདོག་པའི་སྐྱེས་ཀྱི་ལན་བསྲིངས། ཧོར་ཟླ་གཉིས་པའི་ཚེས་གཅིག་ལ་རྭ་བསྒྲེང་མཁན་པོ། བྱམས་གླིང་མཁན་པོ། མཁའ་འགྲོའི་གྲ་ཚང་རྣམས་ལ་ཆོས་སྤྱོད་རབ་གསལ་ནས་ལུང་གང་ཐོབ་བཀླགས། གཉིས་ལ་དཔོན་མཁའ་འགྲོས་རིང་འཚོའི་རྟེན་འབྱུང་བསྒྲིགས་ཐོག་རྒྱལ་པོ་དཔོན་གཡོག་ཀྱང་ཕེབས། གསུམ་ལ་ཁྱབ་བདག་ཁྲ་ཚང་བའི་དྲུང་དུ་ཤེར་ཕྱིན་སྟོང་ཕྲག་བརྒྱ་པའི་ལུང་གི་དབུ་བཙུགས་ཤིང་མུ་འཐུད་དུ་ཉི་ཁྲི་སོགས་ཀྱང་ཞུས། རི་སྒོ་གཟིམས་ཤག་ལྷོ་པའི་བན་བཙུན་གཉིས་ཀྱིས་བསྐུལ་བའི་བདག་བསྟོད་དང་། དྲུག་བརྒྱ་བ་དཀོན་མཆོག་ཚེ་དབང་གི་ངོར་འཁྲུངས་རབས་གསོལ་འདེབས་བྲིས། ངམ་རིང་མཁན་ཆེན་མང་ཡུལ་ལོ་ཙཱ་བ་དང་ཆོས་ཀྱི་རྒྱལ་པོ་དཔལ་ལྡན་གྲགས་པའི་བསྟི་གནས་འོལ་དགའ་རིན་ཆེན་སྒང་གི་བླ་མ་མང་ཐོས་བློ་བཟང་མཁས་བཙུན་གཉིས་ཀྱིས་བདོག་པའི་ཚན་གྲངས་སྤེལ་ཏེ་ཡུན་དུ་འཚོ་བའི་ཁས་ལེན་དགོས་ཚུལ་བྱུང་བ་སྒྲིབ་པའི་ལུས་ཅན་གྱིས་ཚེ་བྱིན་གྱིས་བརླབས་ཞེས་སྨྲ་བ་གཞན་ཁྲེལ་གྱི་རྫུན་ཟོག་ག་ལ་ནུས་ཀྱང་ཚེ་རིང་བ་མི་འདོད་པ་ཆེར་མི་འབྱུང་བས་ཡུན་དུ་འཚོ་བའི་ཐབས་ལ་གང་བརྩོན་བྱེད་ཚུལ་སྙན་ངག་གི་ལམ་ནས་དྲངས་པ། དེ་མཚུངས་བྱིང་པ་བདེ་ལེགས་ཀྱི་རྩོམ་ལན། རུ་ཐོག་དབང་པོའི་དཔེ་ཆ་གཡར་པོ་རྣམས་སྐྱེལ་བར་འཕྲིན་ཡིག་ཚིགས་བཅད་རྣམས་བསྲིངས། འབྲོག་བྲག་ར་བས་རྒྱལ་མཁར་རྩེའི་ནང་རྟེན་མཽངྒལ་གྱི་ཚེམས། ལྷོ་བྲག་རཏྣའི་དབོན་བརྒྱུད་
དུ་གྲགས་པ་ཞིག་གིས་སློབ་དཔོན་ཆེན་པོས་ཉིན་གཅིག་ལ་ཆང་ཁལ་ལྔ་བརྒྱ་བཞེས་པའི་ཞལ་སྐྱོགས་དུང་ཤ་ཁྲ་ཅན། སྲིན་མོའི་སེན་མོ་ཕན་བདེ་བའི་ནང་རྟགས་ཕྱིར་ཤར་ལ་བརྟེན་གཉེར་པ་ཐོས་བསམ་གྱིས་གཞུང་ཆིངས་རས་སུ་བོར་བའི་གནམ་གོང་དགོན་རང་འཚམས་ཀྱིས་ཧབ་ལེན་བྱས་པར་ཇོ་མོ་རྫོང་མི་རྟག་སྒྱུ་མའི་རང་མཚང་གིས་ཐོས་བསམ་ཕྲད་པར་ཡོང་དུས་སངས་རྒྱས་གླིང་པས་མཆིམས་ཡུལ་འོར་ཤོད་རླུང་སྒྲོམ་འབར་བ་ནས་གདན་དྲངས་པའི་རིག་འཛིན་ཧཱུྃ་དགའི་སྲས་མོ་དཔལ་མོ་འཛོམ་པ་སྐྱིད་ཀྱི་དབུ་ཐོད། ཐང་ཡིག་ནས་བཤད་པའི་བྲམ་ཟེ་སྐྱེ་བ་བདུན་པ་དྲི་མེད་སྙིང་པོའི་དབུ་ཐོད་དྭགས་པོ་སྒྱེར་བྱེ་མ་དཀར་པོ་ནས་སངས་རྒྱས་གླིང་པས་སྤྱན་དྲངས་པ་དང་། ལོང་པོ་བྱང་དེ་འབུམ་པའི་མཆོད་རྟེན་ཁྲི་འཕང་བདུན་པའི་ཤར་ཕྱོགས་ནས་བཏོན་པའི་སངས་རྒྱས་ཀྱི་འཕེལ་གདུང་། འཛམ་བུ་གླིང་གི་ས་སྣ་རྡོ་སྣ་ལ་བརྟེན་པའི་ཨྱོན་རིན་པོ་ཆེའི་ཕྱག་བཟོ་ཟིལ་གནོན་སེང་གེ་གནས་ཆེན་མང་པོར་ཡོད་པའི་ནང་ནས་བུ་ཆུ་གཟི་ཁྱི་གུར་གྲགས་པ། ཁྱབ་བདག་ཞ་ལུ་པ་ཆེན་པོས་རིང་པོར་གནས་པའི་རྟེན་འབྲེལ་དུ་ཚར་ཆེན་གྱི་སྨན་སྐུ་ཕྱག་ནས་མ་བྱིན་རླབས་ཅན། འདར་པ་ལོ་ཆེན་གྱིས་ཚར་ཆེན་གྱི་ཕྱག་ནས་མའི་སྒྲོལ་དཀར་གྱི་སྐུ་ཐང་རྣམས་རིམ་གྱིས་ལག་ཏུ་སོན། འབྲི་ཁུང་སྤྲུལ་པའི་སྐུ་དང་ལྕོག་གྲ་བ་གཉིས་ཀྱིས་ཡུན་དུ་གནས་པའི་ཤིས་བརྗོད་ཀྱི་རྩོམ་པ་མཛད། མཆོད་དཔོན་དབུ་མཛད་གཉིས་ཀྱིས་གསེར་ཚགས་རྒྱུའི་གསེར་རྣམས་བཏོན་དོ་དམ་གཉེར་པ་སྦྱིན་པས་བྱས་ནས་ཕན་བདེ་ལེགས་བཤད་གླིང་པའི་སྤོས་ཕོར་ར་མ་ལུག་གཉིས་བཟོས་པའི་ཁ་ཡིག་དང་། ཕོ་བྲང་
པོ་ཏ་ལའི་ལི་མ་ལྷ་ཁང་གི་དེབ་ཀྱི་མཆོད་བརྗོད་བརྩམས། ཤངས་བཀྲ་ཤིས་རྩེ་པས་དད་རྟེན་དུ་རྗེ་བཙུན་ཙོང་ཁ་པ་ཆེན་པོའི་བྲིས་ཐང་བཞེངས་པའི་རྒྱབ་ཡིག་ལག་བྲིས་སུ་བཀོད། རྒྱལ་པོ་དང་མཁའ་འགྲོ་དཔོན་གཡོག་ཁ་ཤས་ལ་བཅུ་གཅིག་ཞལ་གྱི་རྗེས་གནང་ཕུལ་ཞིང་བཅུ་བཞིའི་ཞོགས་སྨྱུང་གནས་ཀྱི་གསོ་སྦྱོང་ཕབ། ཉེར་བརྒྱད་ནས་ལོ་སྔ་མའི་རྐང་པའི་ནད་རོ་ཅུང་ཞིག་འཕར་བའི་ཁར་ལག་གཡས་གཡོན་གྱི་གྲུ་མོར་སྐྲངས་ཆེ་བ་ཞིག་བྱུང་བ་དཔོན་ཚང་བྱང་ངོས་ནས་ཀྱི་ཕྱག་གཡོག་འཚོ་བྱེད་ལྷག་བསམ་གྱིས་བྱས་པའི་སྨན་བྱུག་དང་ཁོང་སྨན་བཏང་ལྷ་རྗེ་དང་ཟླ་བོ་ཚང་མས་རྣག་ཅིག་བརྡོལ་ཡོང་བ་འདྲ་ཞེས་གླེང་ཡང་ཟླ་བ་གསུམ་པ་སྔ་མའི་ཚེས་གཅིག་ལ་ཁྱབ་བདག་སྨན་ལུང་པས་གདོན་འགྲོལ་དང་འཆི་བླུའི་རིམ་གྲོ་གནང་། ཚེས་བརྒྱད་ལ་གྲ་ཚང་ནས་ཞིང་སྐྱོང་དབང་པོར་མཆོད་གཏོར་རྒྱས་པར་བཏང་བ་སོགས་ཀྱིས་ཞག་གསུམ་བཞི་ནས་སྐྲངས་པོ་རྣམས་རང་ཞིར་སོང་། བྱང་ངོས་ནས་ཀྱིས་མི་རྣམས་ཀྱི་སར་བརྡབས་ཆག་དང་ལྷོག་སྐྲངས་མ་གཏོགས་ལག་པ་ན་མཁན་ཆེར་མི་ཡོང་འདི་འདྲ་སྐུ་རིམ་འདོད་པའི་རྐང་འཐེང་ལག་འཐེང་ཡིན་འདུག་གསུང་བ་སྡེ་པས་གསན་པའི་མ་མཉེས་པ་བྱུང་འདུག །དངོས་གཞི་རྒྱུད་ལས། རྐང་པའི་མཐེབ་མོ་ལག་པའི་གྲུ་མོར་གནས། དང་པོ་ཁོལ་བུ་རྙིངས་ནས་མཆེད་པར་འགྱུར། །ཞེས་པའི་ལག་པའི་དེ་ཡང་དྲེག་ནད་ཡིན་སྣང་བས་སྔར་མ་གྲགས་པ་ལྟ་བུའི་བརྡབས་ཞོགས་ཀྱང་དགོས་རྒྱུར་མི་འདུག །ནད་གཡོག་རྐང་མ་མཆོད་དཔོན་པ་དང་མ་ལྕོགས་དུས་དབུ་མཛད་ཀྱིས་བྱས། རྫོང་གཞིས་ཁག་བཅུ་གཉིས་བསྡོམས་པར་བཀའ་འགྱུར་ཚར་ཆིག་བརྒྱ་བརྒྱད་ཅུ། མཚན་བརྗོད་ཆིག་འབུམ། ལྷ་ས་
བསམ་ཡས། ཁྲ་འབྲུག་རྣམས་སུ་བརྒྱ་མཆོད་སྣ་ལྔའི་ཐོག་དགེ་འདུན་ཚུལ་ལྡན་བཅུ་སྐོར་གྱིས་སྨན་བླའི་མདོ་ཆོག་ཆེན་མོ། འཇམ་དཔལ་ཟིལ་གནོན་གྱི་གཏོར་བཟློག་གཉིས། ལས་གཤིན་དུག་སྡོང་ནག་པོ་གཅིག །འཇོམས་བྱེད་འཆར་ཀ་ནག་པོའི་མདོས་ཆེན་གསུམ། ཕུར་བཟློག་གཉིས། གྲ་ས་ཚུན་དུ་ཇ་ཚུལ་ཉི་ཤུ་སྐོར། གྲ་ཚང་དུ་འཁོར་ལོ་འབར་བ་དང་འགོང་པོ་ཨར་ལ་གཏད་པ་སོ་སོར་བྱེ་བ། དགོན་ཁག་རྣམས་ཀྱི་འགྱེད་ཀྱང་གསེར་དངུལ་གྱི་དངོས་པོ་སྤམས་ཆེ་བ་སྲེ་བས་ཐུགས་ཁུར་ཆེ་བཞེས་ཀྱིས་བཏང་བས་རིམ་གྲོས་ངོ་བླངས་པ་ལྟ་བུའི་བྱང་ངོས་ནས་ཀྱིས་སྨན་དཔྱད་མཛད་པ་རྣམས་ཀྱང་འཕྲོད་ལམ་ཆེ་བའི་ཟླ་མཚམས་ནས་ནད་མཇུག་ཕྲན་བུ་ཙམ་མ་གཏོགས་གཞི་མེད་དུ་སོང་། མདའ་དཔོན་བསམ་དར་བས་བསྐུལ་བའི་ཞང་བློན་གྱི་ལས་བྱང་དང་གོང་དཀར་རྫོང་སྡོད་གེར་སྒོམ་གཉིས་ཀྱིས་བསྐུལ་བའི་རིང་འཚོའི་ཚིགས་བཅད་སྨོན་ལམ་བྲིས། ཚེས་བཅུ་བདུན་ནས་སངས་རྒྱས་ཕལ་པོ་ཆེའི་ལུང་ཞུ་བའི་དབུ་བཙུགས། རྟོགས་བརྗོད་རིན་པོ་ཆེ་དཔག་བསམ་འཁྲི་ཤིང་འདི་རྗོད་བྱེད་ཀྱི་ཚིག་སྙན་ངག་ཀུན་གྱི་ནང་ནས་འགྲན་ཟླ་དང་བྲལ་ཞིང་བརྗོད་བྱའི་དོན་དེ་བཞིན་གཤེགས་པའི་སྐུ་ཚེ་འདི་དང་སྔ་མའི་རྣམ་པར་ཐར་པ་ཡིན་ནའང་རྒྱ་གར་ཁ་སྤུ་ཅན་གྱི་རྒྱན་གྱི་སྒོ་ལྕགས་དམ་པས་བོད་རྒན་རྣམས་ཀྱི་ལྡེ་མིག་གིས་མ་ཁྲོལ་བ་ཕལ་ཆེར་གསན་གཟིགས་མེད་པ་མང་ཞིང་རྒྱལ་ཚབ་དྲུང་པ་གྲགས་པ་དོན་གྲུབ་སོགས་བླ་ཆེན་མང་པོས་རྒྱལ་པོས་བརྩམས་པའི་བསྟན་བཅོས་ལ་བྱིན་རླབས་མི་འབྱུང་གསུང་བ་རང་ཉིད་ཀྱིས་མ་དགོངས་པའི་སྒྲིབ་གཡོགས་ལས་དེ་ལྟར་ན་རྒྱལ་པོ་ཨིནྡྲ་བྷཱུ་ཏིས་མཚོན་
པ་ལའང་བྱིན་རླབས་མི་འབྱུང་ཞིང་རབ་བྱུང་དུ་ཁས་འཆེ་བ་ཙམ་གྱིས་འགངས་ཆེ་ན་དགེ་སློང་ལྷ་ཆེན་པོའི་ལོ་རྒྱུས་ཀྱིས་ཀྱང་རྟོགས་པར་ནུས་པས་གསུང་རིགས་མཐའ་དག་ལ་ངེས་གཟུང་ག་ལ་ཡོད། འཇམ་དབྱངས་ས་སྐྱ་ལོ་ཙཱ་བས་ཞལ་ཆེམས་སུ་བཞག་པ་ལྟར་ཆོས་ཀྱི་རྒྱལ་པོ་འཕགས་པའི་བདག་རྐྱེན་ལ་བརྟེན་ཤོང་ལོས་བསྒྱུར་བ་ནས་བཟུང་འཇིག་རྟེན་གྱི་མིག་གཅིག་པུ་རིམ་པར་བྱོན་པ་རྣམས་ཀྱིས་ཐུགས་གཙིགས་སུ་མཛད་པ་དེང་སང་རྡུལ་དང་མུན་པས་བསྒྲིབས་པ་མ་བཟོད་པས་རྟོགས་བརྗོད་རིན་པོ་ཆེ་སྐད་ཤན་སྦྱར་པར་དུ་བརྐོ་བའི་སྟ་གོན་གྱིས་དཔེ་རྙིང་ཁུངས་བཙུན་མང་པོ་གོ་བསྡུར། རྒྱ་སྐད་མ་ཚང་བ་དང་སཾ་སྐྲྀ་ཏའི་སྐད་ཡོད་པ་ལ་བོད་སྐད་དུ་མ་འགྱུར་བ་ཐོར་བུ་སྣང་བ་རྒྱ་དཔེ་མ་རྙེད་ཅིང་བོད་དཔེ་རྣམས་ཀྱང་ཆད་མཉམ་ལས་མི་འདུག་པས་ངེད་རང་དང་འདར་པ་ལོ་ཙཱ་བ་ངག་དབང་ཕུན་ཚོགས་ལྷུན་གྲུབ་གཉིས་ཀྱིས་བློའི་ནུས་པ་གང་ཡོད་ཀྱིས་སྡེབ་སྦྱོར་བསྒྲིག་པ་དང་འགྱུར་བྱས་པར་སླར་དཔེ་ཚང་བ་རྙེད་ན་ཞུས་དག་བཏང་ཆོག་རྩིས་ཀྱིས་མཆན་བུ་བཏབ། མ་དཔེ་པར་བྱང་དང་བཅས་ཧོརཟླ་གསུམ་པ་རྟིང་མའི་ཚེས་བཞི་ལ་དགའ་ལྡན་ཕུན་ཚོགས་གླིང་དུ་བརྫངས། ལྔ་ལ་མཆོད་དཔོན་དབུ་མཛད་གཉིས་ཀྱིས་སྦྱིན་བདག་བྱས་ཏེ་གྲ་ཚང་གིས་རྡུལ་ཚོན་གྱི་དཀྱིལ་འཁོར་ལ་བརྟེན་ནས་ཚེ་ཆོག་བཏང་། བེར་གཉིས་ཀྱིས་གཙོས་པའི་གོས་སྣ་ཆ་འགྲིག་ཚར་གསུམ་གྱིས་ཐོག་དྲངས་པའི་སྟེར་སྦྱིན་བྱས། འགྲོ་འདུག་མར་ལམ་ཅུང་ཟད་འཁྱོག་པ་ཙམ་ལ་ཡར་ལམ་དེ་རིགས་མི་འདུག་ཅེས་གྲ་ཚང་གི་གྲ་པ་འགའ་ཞིག་གླེང་། ངེད་རང་ལ་རྣམ་རྟོག་ཆུག་པ་ནི་མ་བྱུང་། སང་ནས་ཉིན་བཞི་ཙམ་གྱི་བར་གྲ་ཚང་
གིས་མཁའ་འགྲོ་སྡེ་ལྔ་ལ་བརྟེན་པའི་རིང་འཚོའི་སྨོན་ལམ་མཛད། དེ་ནས་ཉིན་གསུམ་གྱི་བར་མཚམས་བྱས། བླ་མ་མཆོད་པ་སྔར་རྒྱ་ནག་ཏུ་འགྲོ་སྐབས་བྲིས་པ་དེ་ཚིག་དོན་གཉིས་ཀ་ལེགས་པོ་ཡོད་པས་དེའི་འགྲོ་དོན་ལ་གནོད་པ་འདུག་ཀྱང་གསོལ་དཔོན་གེ་ར་བས་གོ་སླ་ཞིང་འཛིན་བདེ་ལ་ཚིག་ཉུང་བ་ཞིག་དགོས་ཚུལ་བྱུང་བ་ལྟར་བླ་མ་མཆོད་པ་དངོས་གྲུབ་འདོད་འཇོ་བྲིས། གླིང་སྨད་ཆོས་རྗེ་བསྟན་འཛིན་རྒྱ་མཚོ། བྲ་ཡག་སྤྲུལ་སྐུ། མི་ཉག་འགྲི་བ་ཁ་པ་སོགས་ཀྱིས་གསང་ཕུའི་ཆོས་སྐྱོང་བསེ་ཁྲབ་པའི་མཆོད་གཏོར་འབུལ་ཚིག་བསྐུལ་བར་ཡིག་རྙིང་གི་ཁུངས་ཤིག་དགོས་ཞེས་གླེངས་པས་ཡེར་པའི་གཏེར་མ་ཡིན་ཟེར་བ་ཡིད་བརྟན་དུ་མི་རུང་བའི་འགོ་རྩེ་མེད་པ་ཞིག་ལས་མ་བྱུང་བས་ཡོངས་གྲགས་ཀྱིས་བྲིས་ཐང་དང་ཕྱོགས་མཚུངས་པ་ཞིག་འོལ་ཚོད་ཀྱིས་བཀོད། སྲུང་མ་འདི་བཙན་རྒོད་འབར་བ་སྤུན་བདུན་གྱི་ཁྲོད་དུ་མི་གཏོགས་པའི་ངེས་པ་ནི་མི་འདུག །ད་ལྟར་ན་དགོངས་འདུས་སོགས་ཀྱིས་སྲུང་མའི་སྒྲུབ་སྐོར་ལ་ཁུངས་བཅོལ་ཀྱང་མི་འགལ་བར་སེམས། གཞན་དུ་ལོ་ཙཱ་བ་ཆེན་པོས་རྒྱ་གར་ནས་གདན་དྲངས་པས་དཔང་ལོའི་རྗེས་སུ་འབྲངས་པའི་བོ་དོང་པའི་ཆོས་བདག་བཀྲ་ཤིས་འོད་འབར་བ་དང་དབྱིབས་མཚུངས་སུ་སྣང་བས་གཏེར་མའི་ཡིག་ཆ་ཡོད་རིགས་སུ་མི་འདུག །གསང་ཕུ་བ་དཔོན་སློབ་ནི་རྣམ་སྲས་མདུང་དམར་ཅན་དང་རྒྱུད་གཅིག་ཏུ་མཛད་པ་བདག་ཆེན་སྔགས་འཆང་བས་ཡེ་ཤེས་ཀྱི་མགོན་པོ་གུར་དང་རྒྱལ་བོ་པེ་ཀར་རྒྱུད་གཅིག་ཏུ་གསུངས་པ་དང་འདྲའམ་སྙམ། ཀ་བརྒྱད་སྤུག་པས་དཀའ་བཅུ་བསོད་ནམས་ཕུན་ཚོགས་ཀྱི་དོན་དུ་རྨི་རུར་ལྡེབས་བྲིས་བྱས་པའི་སྨོན་ལམ་ཚིགས་བཅད་
བྲིས་གོང་ནས་མི་སྣ་མཆོད་རྟེན་བླ་མ་དང་དགེ་སློང་ཆོས་འཕེལ་གཉིས་ཀྱིས་གཙོས་འགྲུལ་པ་མང་བར་འབྱོར། ཚེས་བཅུ་གསུམ་ལ་ཕྲད་པའི་བཀའ་ཤོག་གནང་སྦྱིན་སྔར་རྒྱུན་ལྟར་གྱི་སྟེང་དུ་ཧོར་དུས་ཀྱི་མཛོད་ནས་བཏོན་པའི་གོས་ཆེན་གྱི་རུ་དར་ཁྱད་མཚར་སུམ་བརྒྱ་སྐོར་གྱི་གནང་ཆ་དང་བཅས་སྤྲད། དར་ལྕོག་རྣམས་དམ་ཅན་སྲུང་མའི་མཐུན་རྫས་ལ་ཤིན་ཏུ་མཁོ་བར་བྱུང་། མཆོད་རྟེན་བླ་མས་དངུལ་སྲང་སྟོང་ཕྲག་གིས་གཙོས་པའི་བདོག་པ་དང་དགེ་སློང་བསམ་གྲུབ་ཆོས་འཕེལ་གྱིས་གོས་དར་ཤས་ཆེ་བའི་དངོས་པོ། བང་རིམ་ཚེ་བརྟན་དབང་གི་བླ་མས་གསེར་དངུལ་དར་ཟབ་ཀྱི་བརྒྱ་འབུལ་སོགས་རྒྱ་ཟོག་གི་སྟེར་ཆ་མང་དུ་བྱུང་། སྤྲུལ་པའི་ཆོས་སྐྱོང་ཆེན་པོས་འབྲས་སྤུངས་ཚོགས་ཆེན་གྱི་ཞལ་འདོན་དུ་རིང་འཚོའི་ཚིགས་བཅད་རྩོམ་དགོས་པའི་གསུང་འཕྲིན་སྐྱེལ་བར་སློབ་དཔོན་རྣམས་འབྱོར་དོན་བཞིན་བྲིས། བཅུ་བཞིའི་ཞོགས་རྒྱལ་མོ་ཆེ་བར་སྨྱུང་གནས་ཀྱི་གསོ་སྦྱོང་ཕབ། རྫོང་སྡོད་གེར་སྒོམ་གཉིས་ཀྱིས་བརྡ་འགྲེམས་བྱས་པའི་གོང་དཀར་མངའ་ཁུལ་གྱི་ལྷ་སྡེ་མི་སྡེ་སྤྱི་ཚོགས་ཀྱིས་རིང་འཚོའི་རྟེན་འབྱུང་བསྒྲིག་པར་ལྕགས་ཟམ་སྤྲུལ་པའི་སྐུ། དགའ་ལྡན་ཆོས་འཁོར་ཡང་རྩེ་བ། གསུང་རབ་གླིང་པ། བཤད་སྒྲུབ་གླིང་པ་གསུམ་གྱི་སློབ་དཔོན། ཆོས་རྗེ་དཀོན་གཉེར་དཔོན་པ། གོང་དཀར་ཆོས་སྡེ། རྒྱལ་གླིང་ཚོགས། བྱེ་རྫིང་ཚོགས་བྱམས་པ་གླིང་། གྲ་ཐང་། རི་བོ་རྣམ་རྒྱལ། བདེ་ཆེན་ཆོས་འཁོར། སྡིངས་པོ་ཆེ་པ་སོགས་དགོན་ཆེ་ཆུང་། ཞལ་ཕུ་ལྕམ་དང་སྡེ་པ་བྱིང་པས་གཙོས་དྲུང་འཁོར་རགས་རིམ་གྱི་དོ་དམ་སྒོམ་བུ་ནས་ཀྱིས་བྱས་ཏེ་འཇམ་ཕྲུག་གཙོ་བོར་གྱུར་པའི་བདོག་པའི་དངོས་པོ་སྤམས་
ཆེ་བ་བསྟར་ཞིང་དགོན་ཁག་སྤྱི་བསྡུས་ཀྱི་གྲ་པ་ཕྱེད་ཉིས་བརྒྱ་ཙམ་གྱིས་སྨོན་ལམ་བཀྲ་ཤིས་ཀྱི་ཚིགས་བཅད་གསུངས། གསུང་རབ་གླིང་གི་དབུ་མཛད་ཕུག་རོན་གདོང་པས་མཎྜལ་གྱི་སྔོན་དུ་བརྟན་བཞུགས་ཀྱི་ཕན་ཡོན་དང་གྲ་བསྒྲིགས་ཚུལ་གི་གཏམ་རྒྱས་པར་བཏང་། དེ་ཉིན་ཕྱོགས་མཚུངས་སུ་ཡུན་དུ་གནས་པའི་སྐྱེས་སྤེལ་བར་སྤྱན་གཡས་མཁན་པོ། བཀྲ་ཤིས་ལྷུན་པོའི་ལྷན་པ་གསོལ་དཔོན་དང་མགྲོན་གཉེར་ཆོས་འཕེལ། ངོས་ཕྲད་དུ་འོངས་པ་ཆོས་འཁོར་ལྷུན་པོའི་མཁན་པོ། ལམ་པ་སྤྱན་སྔའི་བརྒྱ་འབུལ་སོགས་མི་ཚོགས་ཤིན་ཏུ་ཆེ། སང་ཉིན་ལྕམ་དབྱངས་ཅན་བསྟན་འཛིན་ཡན་ལག་བརྒྱད་པའི་སྡོམ་པར་བཀོད། གོང་དཀར་སྐྱ་སེར་རྣམས་དང་ཆོས་རྗེ་ཆུ་མིག་པ། སྡེ་པ་ས་ལུང་པ། བཀྲ་ཤིས་རྩེ་ནས། བསམ་གྲུབ་གླིང་ནས་རྣམས་ལ་སྐྱེར་སྒང་ལུགས་ཀྱི་ཐུགས་རྗེ་ཆེན་པོའི་བཟླས་ལུང་དང་བརྟན་སྡོད་གསར་རྙིང་གི་ལུང་བྱས། དེ་སྐབས་མེ་ཏོག་གི་ཆར་པ་བབས་ཟེར། སྤོས་ཁང་མཁན་པོ་སྒང་འགོ་རབ་འབྱམས་པ་དང་ཕྲད། འབྲི་གུང་སྤྲུལ་པའི་སྐུས་སྨོན་ལམ་ཚིགས་བཅད་དགོས་ཚུལ་བྱུང་བ་ཕུལ། ད་ལའི་ཧུང་ཐའི་ཇི་དང་ཨེར་ཏེ་ནི་དའི་ཆིན་གཉིས་ཀྱི་མི་སྣ་སླེབས། མགོན་པོ་ཚེ་དབང་གི་དགེ་རྩ་གཏོང་མི་རྣམས་འབྱོར་ཞིང་དཀོན་མཆོག་མཆོད་པ་དང་དགེ་འདུན་བསྙེན་བཀུར་བ་སོགས་ལེགས་བྱས་ཀྱི་འབྲས་བུ་ཆུད་མི་འཛའ་བའི་སྨོན་ལམ་བྱས། ཨོ་རོད་ནས་ཚ་བ་སྐུ་སྐྱེ་དང་རྭ་བསྒྲེང་མཁན་པོ་བསྟན་པ་དར་རྒྱས་ཀྱི་མི་སྣ་སླེབས་པའི་ཟང་ཟིང་གི་རྙེད་པ་བསྟབས། གོང་དཀར་ཆོས་སྡེའི་སློབ་དཔོན་རྣམ་མཁྱེན་གྲོང་པ་ཅན་བཅོ་ལྔ་སྐོར་ལ་གཉན་སྒྲོལ་ཡན་ལག་དྲུག་པའི་
རྗེས་གནང་དང་ཚར་ཆེན་ཆོས་ཀྱི་རྒྱལ་པོ་ལ་བརྟེན་པའི་བླ་མའི་རྣལ་འབྱོར་གྱི་ལུང་། ལྕམ་དབྱངས་ཅན་མ། ཞང་སྟོན་ལྷུན་གྲུབ་ཡབ་སྲས། རྒྱལ་པོའི་སྲས་རྡོ་རྗེ། སྡེ་པ་ས་ལུང་པ། མངའ་རིས་ལྭ་དགས་པའི་མི་སྣ་ཁྱི་གུ་རྣམས་ལ་ཚེ་དབང་གྲུབ་རྒྱལ་མ། ཆོས་འཁོར་ལྷུན་པོའི་མཁན་པོ་དང་ཡར་འབྲོག་བྲག་ར་སྐུ་སྐྱེ་ལ་ཁྱུང་ཁྲའི་རྗེས་གནང་། ཤངས་བཀྲ་ཤིས་རྩེ་པ་ཕ་བུ་ལ་ཚེ་དབང་འཇམ་ལུགས་བརྒྱ་རྩ། མཁའ་འགྲོ་དགེ་ཚུལ་མར་དཔོན་སློབ་པཎ་ཆེན་རིན་པོ་ཆེའི་ཐུགས་རྩོམ་བླ་མའི་རྣལ་འབྱོར། གསར་རྩོམ་སྤྱན་རས་གཟིགས་ལ་བརྟེན་པའི་བླ་མའི་རྣལ་འབྱོར་གྱི་ལུང་རྣམས་བྱས། ཆོས་རྒྱལ་བཀྲ་ཤིས་སྟོབས་རྒྱལ་གྱི་སྐུ་གདུང་རིན་པོ་ཆེ་གྲ་བྱམས་པ་གླིང་གི་མཆོད་རྟེན་ནང་དུ་བཞུགས་པ་གཙང་སྡེ་སྲིད་ཕུན་ཚོགས་རྣམ་རྒྱལ་ལྕགས་ཁྱི་བདེ་གཟར་ལངས་པའི་ཡར་རྒྱབ་ཏུ་བྱོན་སྐབས་སྔར་གྱི་ཞེ་འཁོན་ལ་བསྙད་པའི་ཡར་འབྲོག་དཔལ་དེ་བས་གཙོས་པའི་དྲུང་གཟིམས་ཁ་ཤས་མངགས་པའི་དངུལ་གདུང་ནས་སྐུ་གདུང་གདན་དྲངས་ཏེ་ཆུ་ལ་གཤེགས་པའི་རྗེས་མེད་བྱེད་ཁུལ་གཙང་པ་རྣམས་ཀྱིས་འཆང་མ་ནུས་པར་བྱམས་གླིང་ས་མཆོད་པ། དཀའ་བཅུ་ངག་དབང་དཔལ་
བཟང་གིས་ཁུར། དཔལ་དེ་བ་སོགས་ཀྱིས་ཆུ 
་འགྲམ་དུ་མ་ཕྱིན་པར་བརྟེན་དཀའ་བཅུ་བས་དབུ་ཐོད་ཞུས་པའི་ངོ་བོ་ཁོ་རང་གིས་ཁྱེར། དཔལ་དེ་བས་ངན་དོགས་སེལ་བྱེད་ལ་གཉེར་པར་ཐོན་ཡན་ཚལ་པ་ཞིག་གཏད། དབུ་ཐོད་གཙང་དུས་སུ་ཡོད་པའི་འཕྲོས་ཡེ་གཏོང་མ་ནུས་པར་སྦས་ནས་བཞག་པ་དཀའ་བཅུ་པའི་ཚ་བོ་དགེ་སློང་མཁས་མཆོག་བརྟན་པས་དད་རྟེན་དུ་བྱིན་བྱུང་བར་ཇ་ནས་སོགས་ཀྱིས་སྟེར་ཆ་སྤམས་མཐོ་བ་བྱས། བསྙེན་རྫོགས་བརྒྱ་དང་བཅུ་དགུ། དགེ་ཚུལ་ཕྱེད་སུམ་
བརྒྱ་རབ་བྱུང་བཅུ་གསུམ། དགེ་བསྙེན་གསུམ་རྣམས་བསྒྲུབས། ཆོས་རྗེ་ཆུ་མིག་པ་དང་རིགས་འཛིན་སྟོབས་ལྡན་དབང་པོའི་སྲས་ཟིལ་གནོན་དབང་དྲག་རྡོ་རྗེ་གཉིས་ལ་བྱང་གཏེར་ཐུགས་རྗེ་ཆེན་པོ་འགྲོ་བ་ཀུན་སྒྲོལ་གྱི་རས་བྲིས་ཀྱི་དཀྱིལ་འཁོར་དུ་དབང་བསྐུར། དར་ཁན་དཀའ་བཅུའི་ཚ་བོ་ངག་དབང་ནམ་མཁའ་དྲུང་འཁོར་དུ་བསྡད་པ་ཡིག་རྩིས་ལེགས་སྦྱར་སོགས་ལ་བརྩོན་པ་ཆེ་ཞིང་ལག་གཡོག་ཏུ་འགྱུར་བ་བྱུང་། ཉི་ཤུ་ལ་མཆོད་རྟེན་རབ་འབྱམས་པས་ཆུ་ཞུགས་ཀྱི་ཉེར་སྤྱད་ལ་དམིགས་ནས་གོས་ཆེན་གྱི་གུར་ཡོལ་སྒོར་དང་བཅས་པ། ཐུགས་རྗེ་ཆེན་པོ་རང་བྱོན་ལྔ་ལྡན་གྱི་གསེར་ཐོག་ཐེབས་སུ་གསེར་སྲང་བརྒྱ། དངུལ་ལྔ་བཅུ་མ་བདུན། གོས་ཡུག་དགུ །ལ་སྟོད་བྱང་པའི་ཁྱད་ནོར་གྱི་དུང་ཆོས་རྣམས་བསྟར། ཉེར་གཅིག་ལ་ཐོན་ལེགས་ལྡན་དབང་པོར་ཚེ་རྟ་ཟུང་འབྲེལ། མཁའ་འགྲོ་གྲ་ཚང་དང་བཅས་པར་འཇིགས་བྱེད་གྱི་སྒྲུབ་ཐབས་ཟ་མ་ཏོག །ཕྱག་དྲུག་པ་དང་ལས་གཤིན་གྱི་རྗེས་གནང་། གཏོར་ཆོག་བསྐང་བ་གཉིས། གསར་རྩོམ་བསངས་དཔེ་རྣམས་ཀྱི་ལུང་བཀླགས། ཉེར་གཉིས་ལ་ཁྱབ་བདག་སྨན་ལུང་པ་དཔོན་སློབ་ཀྱི་བདོག་པ་སྤེལ་ཞིང་ཚེ་དཔག་མེད་བདུད་རྩི་འཁྱིལ་བའི་སྒོ་ནས་ཚེའི་རྟེན་འབྲེལ་བསྒྲིགས། ཧོར་ཟླ་བཞི་པའི་ཚེས་གཅིག་ལ་མདོས་བསྐང་བཙུགས་པའི་འདོད་ཁམས་དབང་ཕྱུག་མ་མདོས་མཆོད་འབུམ་ཐེར་གཉིས་ཀྱིས་མཉེས་པར་བྱས་ཤིང་འཕྲིན་བཅོལ་གྱི་ཞལ་བྱང་བཀོད་པའི་སྙན་དར་ཕུལ། ཚེས་བཞི་ལ་དཔལ་ལྡན་འབྲས་སྤུངས་པ་སློབ་དཔོན་གྲ་བཅས་ཉིས་བརྒྱ་སྐོར་བྱོན་པའི་བདོག་པ་སྤམས་མཐོ་བ་བཏེག་སྟེ་འཕགས་པ་
ལོ་ཀེ་ཤྭ་ར་གདན་དྲངས་པར་སྤྱན་འདྲེན་ཁྲུས་གསོལ་སྔོན་དུ་འགྲོ་བའི་གསོལ་འདེབས་སྨོན་ལམ་བཀྲ་ཤིས་ཀྱི་སྒོ་ནས་བདེན་ཚིག་གསུངས། ཞར་བྱུང་འཕྲུལ་སྣང་གཙུག་ལག་ཁང་རྟེན་བརྟེན་པར་ཁྲུས་གསོལ་མཛད་སོང་བ་དེ་སྐབས་ཐན་པས་ཚང་མ་ཆར་པའི་རེ་བ་བྱེད་སྐབས་ཡིན་གཤིས་ཕྱི་དྲོ་ས་སྦང་ངེས་ཤེས་པ་བབས་པ་དགེ་འདུན་གྱི་བྱིན་རླབས་སུ་སྣང་། དྲུག་ལ་རྒྱལ་པོར་འཆི་མེད་དཔལ་སྟེར་གྱི་ཚེ་དབང་བརྒྱ་རྩ་ཕུལ། བྱང་དུ་ལོག་མིའི་སོག་དམངས་རྣམས་ལ་བྱིན་རླབས་བྱས། ཇོ་བོས་འབྲོམ་ལ་གནང་བའི་སྒྲོལ་མའི་སྒྲུབ་ཐབས་སྲས་དོན་མའི་བཤད་ཁུངས་ལ་བརྟེན་ཁྱབ་བདག་ཞ་ལུ་པ་ཆེན་པོའི་བསླབ་སྟོན་བཞིན་སྒྲོལ་དཀར་ཡིད་བཞིན་འཁོར་ལོའི་ཉིན་ཐང་ཚེས་བརྒྱད་ལ་བྲིས། འདི་ནས་བརྩམས་ཟླ་རེ་བཞིན་ཆག་མེད་དུ་སྔགས་འཆང་གཞིས་ཀ་ཤར་པ་བཞེང་བཅུག་བསྙེན་རྫོགས་གསུམ་བསྒྲུབས། ཚེས་བཅུ་དགུ་ནས་འདུལ་བ་ལུང་ཞུ་བའི་དབུ་བཙུགས། གོང་ནས་བོད་དུ་ཡོན་ཏན་བསླབ་པར་མངགས་པའི་ཁྲོད་ནས་སན་ཆག་བཤིར་ཤེས་རབ་བསྐྱེད་པ་ལ་ཕན་པའི་ངག་འདོན། མདའ་དཔོན་གཟེར་ཆེན་པ། སྟོད་རྒྱུད་སློབ་དཔོན་བྱམས་པ་བཀྲ་ཤིས། གསང་ཕུ་མཁན་སློབ་སྤྱི་ཚོགས་གསུམ་གྱིས་བསྐུལ་བའི་ངེད་རང་དང་རྒྱུད་པ་སློབ་དཔོན་པས་སྒེར་དུ་སྡེ་པའི་བརྟན་བཞུགས། སྟག་རུ་ནས་རྒན་པས་ཡར་ཀླུངས་དང་འོལ་དགའི་གཙུག་ལག་ཁང་ཁ་ཤས་དང་གླིང་སྟོད་ཆོས་རྗེ་བློ་བཟང་རྒྱ་མཚོའི་ཕྱི་རྟེན་སྨན་བླར་དྲུང་འཚོ་བ་ངག་དབང་ལྷག་བསམ་གྱིས་སྙན་དར་ཕུལ་བའི་ཁ་ཡིག །འདར་པ་གཞོན་པ་ངག་དབང་འཕྲིན་ལས་ཀྱིས་བསྐུལ་བའི་མགོན་པོ་ཆེ་ཆུང་ལས་མཁན་གཉིས་དང་བཅས་པའི་བསྐང་བ། བྷྲུཾ་
པ་མི་དབང་གི་ཁ་ཏོན་དུ་གསོལ་འདེབས་རྣམས་བརྩམས། བསམ་ཡས་ནས་ཆོས་སྐྱོང་ཆེན་པོས་བོད་འབངས་བདེ་ཐབས་སུ་རབ་གནས་ལ་སྤྲུལ་སྐུ་གསུང་སྤྲུལ་རང་འབོད་དགོས་ཚུལ་གསུང་བར་དེ་གའི་རྒྱུ་མཚན་མོལ་བ་ན་སྤྲུལ་སྐུ་བད་ཀན་གྱི་སྙུན་དམ་པོ་ཞིག་གིས་བཏབས་ཏེ་འབྱོན་བཞུད་ཤིན་ཏུ་དཀའ་ནའང་ཆོས་སྐྱོང་གི་གསུང་མ་བཟློག་པས་གོམ་རེ་ཞག་རེ་ལྟ་བུས་འབྱོན་ཐུབ་པ་བྱེད་ཚུལ་གྱི་ལན་བྱུང་བ་ལྟར་ལྷོ་བྲག་ནས་བསམ་ཡས་བར་གྱི་གཟན་ཤིང་ས་རིམ་གྱི་མཐུན་རྐྱེན་བསྐུལ་བར་སྡེ་པས་མི་ཆེད་བསྟད་བཏང་། བསམ་ཡས་སུ་ཕོགས་ཞབས་ཏོག་དངོས་གཞི་སྟག་རྩེ་ནས་མཛད་རྒྱུ་ཡིན་འདུག་རུང་ཧོར་ཟླ་ལྔ་པའི་ཚེས་གསུམ་ལ་ཟུར་གསོས་དུ་ཇ་ཁོར་དྲུག་མ་བདུན་སྤྲད། ཆུ་ལམ་སྡིངས་གསུམ་དང་ལྷ་ས་རུ་བཞིས་བསྐུལ་བའི་ངོར་རིང་འཚོའི་ཚིགས་བཅད། མཁའ་འགྲོའི་རྟ་ཐུག་དཀར་པོ་ལ་བརྟེན་པའི་དགྲ་ལྷའི་གསོལ་མཆོད། དམིགས་བརྩེ་མ་དང་འབྲེལ་བའི་བླ་མའི་རྣལ་འབྱོར་རྣམས་བྲིས། བཅུ་གསུམ་ལ་གསང་ཕུ་གླིང་སྟོད་སྨད་ཀྱི་ཆོས་རྗེ་རྣམ་གཉིས། ཆོས་འཆད་སྤྱི་ཚོགས་དང་ལྷ་ལྡན་རུ་བཞི་རྣམས་ཀྱིས་ཟང་ཟིང་གི་རྙེད་པ་དང་བཅས་སོ་སོས་ཚོམས་ཆེན་དུ་ཉི་བུའི་གཡུལ་ལས་རྒྱལ་བའི་སྨོན་ལམ་ནན་ཏན་ཏུ་བཏབ་ཅིང་ཤིས་པ་བརྗོད། གསང་ཕུ་བ་དཔོན་སློབ་ཀྱིས་སྒྲོལ་མའི་རྗེས་གནང་གློ་བུར་དུ་དགོས་གསུང་བ་གུང་ཚིགས་ལ་རྡོར་དམར་སོང་གཤིས་བྱ་རྒྱུད་ཀྱི་རིགས་སྟབས་མ་འགྲིག་པས་གཉན་སྒྲོལ་ཡན་ལག་དྲུག་པའི་རྗེས་གནང་དང་བརྟན་སྡོད་ཚིགས་བཅད་ཀྱི་ལུང་ཕུལ། བཅུ་དྲུག་ལ་བསྙེན་རྫོགས་ཞེ་གཅིག །དགེ་ཚུལ་ང་གསུམ་རབ་བྱུང་བཞི་རྣམས་
བསྒྲུབས། བཅུ་བདུན་ལ་ཁྱབ་བདག་བཀའ་འགྱུར་བ་ཆེན་པོའི་རིགས་ཀྱི་དབོན་ནམ་མཁའ་བསོད་ནམས་དབང་གི་རྒྱལ་པོ་དགེ་བསྙེན་དུ་བསྒྲུབས། གནས་གསར་དབོན་མོ་མཁྱེན་རབ་བློ་ལྡན་དང་དབོན་མཁྱེན་རབ་རྣམ་རྒྱལ་སྲས་བཅས་ལ་གསར་རྩོམ་ཚར་ཆེན་ཆོས་ཀྱི་རྒྱལ་པོ་ལ་བརྟེན་པའི་བླ་མའི་རྣལ་འབྱོར་གྱི་ལུང་། འཕྱོང་རྒྱས་ལྕམ་ནོར་བུ་ཁྲ་སྒོར་དང་གཟེར་ཆེན་པ་རྣམ་རྒྱལ་ཚེ་རིང་ལ་སྒྲོལ་དཀར་སྤྱན་བདུན་མའི་རྗེས་གནང་དང་གསར་རྩོམ་ཨྱོན་རིན་པོ་ཆེ་ལ་བརྟེན་པའི་བླ་མའི་རྣལ་འབྱོར་གྱི་ལུང་རྣམས་ཕུལ། ཕོ་བྲང་སྣེའུ་སྡོང་རྩེ་ནས་ལྷ་གཟིགས་གོང་མ་ཆེན་པོའི་མི་སྣ། རྩེ་ཚོགས་པ། བཀྲ་ཤིས་ཆོས་སྡེ། བཀྲ་ཤིས་བདེ་ཆེན། རི་བོ་ཆོས་གླིང་སོགས་ནས་བདོག་པའི་ཚན་གྲངས་དང་བཅས་ཏེ་རིང་འཚོའི་རྟེན་འབྱུང་འབྱོར། མཁའ་འགྲོ་དགེ་ཚུལ་མར་ཚེ་དབང་དང་མཁའ་འགྲོར་རིག་འཛིན་རྒོད་ལྡེམ་གྱི་གཏེར་མའི་དུག་དབང་རྡོ་རྗེ་ཕ་ལམ་བསྐུར་བར་གསེར་ཞོ་བརྒྱའི་ཡོན་བྱིན། ཨོ་ཆིར་ཐུ་ཐའི་ཇིའི་སྲས་དགའ་ལྡན་པའི་དཔོན་མོའི་བསྔོ་རྟེན་དུ་དངུལ་སྲང་སྟོང་ཕྲག་གིས་གཙོས་པའི་བདོག་པ་དང་ཚ་བ་སྐུ་སྐྱེའི་བསྐུར་མ་འབྱོར། ཁྱབ་བདག་སྨན་ལུང་པ་སྐུ་ན་སྨིན་ཞིང་སྤྱན་ཤས་ཀྱང་ཧ་ཅང་བཟང་རྒྱུ་མི་འདུག་པས་མདོ་མང་ནས་ཐོར་བུ་ལས་མི་ཐུབ་འདྲ་སྙམ་པའི་སྒྱིད་ལུག་སྐབས་མཆོད་དཔོན་པས་ད་ཆ་བཀའ་འགྱུར་ནས་རྒྱུད་ཀྱི་ཁ་གསོ་ཙམ་མ་གཏོགས་ཚང་མ་འདྲིལ་འགྲོ་བ་འདུག་པས་ཅིས་ཀྱང་ཞུས་པ་འགབ་ཅེས་བསྐུལ་བས་སྤོབས་པ་རྙེད་པ་ལྟ་བུར་སྔར་ཞུས་གྲུབ་པ་རྣམས་མ་གཏོགས་པའི་ཉེར་དགུ་ལ་མདོ་མང་བྱིངས་ཀྱི་དབུ་བཙུགས། ས་ཁྱིའི་ནང་དུ་བཞེངས་པའི་ཐུབ་དབང་། ཚེ་དཔག་མེད། མཚན་
བརྒྱད། རྒྱལ་བ་ཙོང་ཁ་པའི་གསེར་སྐུ་རྣམས་སྐུ་ཚད་ཆུངས་པས་གཟུངས་འབུལ་ནད་ཆེ་རུ་ང་དགོས་གཤིས་རིམ་འགྱངས་སུ་ལུས་པ་ཧོར་ཟླ་དྲུག་པའི་ཚེས་དྲུག་ནས་བཟུང་ཉིན་གསུམ་གྱི་བར་ཞིབ་རྒྱས་སུ་ཕུལ། ལོ་སྔོན་མར་སྡེ་པས་ཇོ་བོ་རིན་པོ་ཆེའི་ཞབས་ཏོག་ལ་དམིགས་ནས་ལྷ་ས་བར་སྐོར་ལ་ཞིག་གསོས་ཤིན་ཏུ་དངོས་གཙང་བ་མཛད་པ་འདི་ལོ་ཧོར་ཟླ་དྲུག་པའི་ཟླ་སྟོད་ནས་འགོ་བརྩམས་རི་མོ་བ་དབུ་ཆེན་སྨན་ཐང་ནས་དང་སྟག་ལུང་དཔལ་མགོན་གཉིས་ཀྱིས་ཐོག་དྲངས་དབུ་འབྲིང་དབུ་ཆུང་བསྡོམས་པ་བཅུ་བཞི། བྱིངས་གྱ་དྲུག །སློབ་མ་བཅུ་རྣམས་ཀྱིས་ལས་རྒྱུན་ཟླ་བ་ཕྱེད་བཞིའི་བར་འབད་པར་བསྒྲུབས་པའི་དོ་དམ་སྡེ་པ་འདར་གཞོན་དང་སྒོ་སྤེ་རབ་འབྱམས་པ་ཆོས་གྲགས་རྒྱ་མཚོ་གཉིས་ཀྱིས་བྱས་པའི་བྱང་ངོས་སུ་སངས་རྒྱས་ཕལ་པོ་ཆེའི་ཞིང་ཁམས་རྒྱ་མཚོ། ཤར་དུ་འབུམ་གྱི་གླེང་གཞི། བྱམས་པའི་མཛད་བཅུ། བྲིས་སྐུ་མཐོང་བ་དོན་ལྡན། བདེ་བ་ཅན་གྱི་ཞིང་བཀོད། ལྷོར་ཆོ་འཕྲུལ་གྱི་བཀོད་པ་རྣམས་བྲིས་པའི་སོ་སོར་དོན་བསྡུའི་ཞལ་བྱང་སྙན་ངག་གི་ལམ་ནས་དྲངས་པ་བི་ཝརྟ་དང་བཅས་པ་བཀོད། སྟག་ལུང་དཔལ་མགོན་རི་མོ་མཁས་པར་མ་ཟད་བློ་གཟུ་བོར་གནས་པའི་ཉམས་ཀྱིས་བཀོད་པ་ལེན་པས་ཞིང་བཀོད་ཚོགས་ཆེ་ཞིང་དངོས་གཙང་བའི་དཔེར་འོས་པས་ཕྱི་ནང་གོ་ལྡོག་པ་ཙམ་བྱུང་སོང་། འདི་ལོ་དབུ་མཛད་མཆོད་དཔོན་གཉིས་ཀྱིས་ངག་བཀོད་བྱས་པའི་གསེར་རྔ་ཆེ་བ་དང་ཆུང་བ་སོ་སོ་ནས་དྲུག་ཅུ་རེ། གིང་རྔ་བཅུ་དྲུག་བཟོས་པའི་ཤིང་བཟོ་བ་སྤུས་སྡེ་ཚེར་གསེབ་པ་ཅན། ཚོན་རྩི་མཁན་རྣམ་རྒྱལ་ཚེ་རིང་བཀྲ་ཤིས། དོ་དམ་ལྷ་ཁང་ཆོས་མཛད་དང་སྡིངས་
ཆེན་པ། པགས་པ་བློ་བཟང་ངག་དབང་། སྤྱན་གཡས་ལེགས་ལྡན། ངག་དབང་འཇམ་དབྱངས། བློ་བཟང་བསོད་ནམས་བཞི་བཏང་། ཁྱམས་རའི་གཞུང་སྒོ་ཕྱི་ནང་གི་བར་དུ་རྒྱལ་ཆེན་བཞི་བཞེང་འདུན་སྡེ་པར་འདུག་པ་བཀོད་པ་ལེགས་པར་མངོན་ཞིང་ཧོར་དར་དང་བག་དྲོ་ཅན་འབུལ་སྐུ་བ་བརྒྱད་ཀྱིས་བཞེང་བའི་དོ་དམ་བློ་བཟང་ཚེ་རིང་གིས་བྱས། དེ་ཞོར་ཉང་བྲན་ ཆུ་བཟང ་དུ་སྡེ་པས་ལྷ་ཁང་གསར་པ་བརྩིགས་པར་སྤྲུལ་སྐུ་ཧོར་དར་ཅན་གྱིས་བཞེངས་པའི་ཐུབ་དབང་ལྷ་ཁང་དུ་སངས་རྒྱས། ཀླུ་དབང་གི་རྒྱལ་པོ། སྨན་རྒྱལ། སྤྱན་རས་གཟིགས་ཡབ་ཡུམ་སྲས་གསུམ། སེང་གེ་སྒྲ། སེམས་ཉིད་ངལ་གསོ། འདི་གའི་འདྲ་འབག།འཆི་མེད་ལྷ་ཁང་དུ་ཚེ་དཔག་མེད་ལྷ་དགུ། སྒྲོལ་མ་ལྷ་ཁང་དུ་ཚེ་སྦྱིན་ཡིད་བཞིན་འཁོར་ལོ་ལ་འཇིགས་པ་བརྒྱད་སྐྱོབ་ཀྱིས་བསྐོར་བ་རྣམས་ལ་ལོ་འདིའི་དགུན་སྨད་ངེད་རང་གི་འགོ་བྱས་གྲ་ཚང་གི་གྲ་པ་ཁ་ཤས་ཀྱིས་མི་ལག་བགྱིས་ཏེ་གཟུངས་བཞུགས་རྒྱས་པར་ཕུལ་ཞིང་རབ་ཏུ་གནས། འབའ་རྫོང་སྡོད་དར་ཁན་དཀའ་བཅུས་བསྐུལ་བའི་ལི་ཐང་ཐུབ་བསྟན་བྱམས་ཆེན་གླིང་དང་འབའ་དགའ་ལྡན་ཕན་བདེ་གླིང་། མཁའ་འགྲོའི་ངོར་དགའ་ལྡན་ཐུབ་བསྟན་རབ་རྒྱས་གསུམ་གྱི་བཅའ་ཡིག །གོང་ར་ངེས་གསང་རྡོ་རྗེ་གླིང་པའི་ཚོགས་འདོན་དུ་ཁྱབ་བདག་སྨན་ལུང་པའི་བརྟན་བཞུགས་རྣམས་བྲིས། མཁའ་འགྲོ་བློ་བཟང་བསྟན་སྐྱོང་ལ་ཐམ་ཀ་དམར་པོ་བྱིན་པ་ཇོ་བོ་རིན་པོ་ཆེར་ཐམ་ཕུད་ཕུལ་བའི་ཁ་བྱང་དགོས་ཚུལ་བྱུང་བ་བྲིས། ཚེས་བཅུ་ལ་རྒྱ་ནག་མི་སྣ་ཚོས་སྟེར་ཆ་འགྱེད་ཚོགས་འཁོར་སྤམས་བསྟོད་པའི་སྦྱིན་བདག་བྱས་ཏེ་གྲ་ཚང་གིས་རྡུལ་ཚོན་དང་འབྲེལ་བའི་ཚེ་ཆོག་བཏང་། མི་སྣ་གཉིས་ཀྱིས་བསྐུལ་བ་
ལྟར་ཚིགས་བཅད་ཀྱང་བརྩམས། ལྷོ་བྲག་ཉི་ལྡེ་བ་དྷཱི་ཚ་སྤྲུལ་པའི་སྐུ་དགེ་ཚུལ་དུ་བསྒྲུབས་པའི་མཚན་སྔ་སོར་བློ་བཟང་གར་དབང་ཆོས་གྲགས་དབང་པོར་ཕུལ་ཟིན་པ་བཞིན་གསར་དུ་བསྒྱུར་བཀོད་མ་དགོས། བཟང་སྤྱོད། བྱམས་སྨོན། ཕུང་པོ་གསུམ་པའི་མདོ་རྣམས་ཀྱི་ལུང་ཕུལ། བར་ཁམས་ནས་འཕགས་པ་ལྷའི་སྤྲུལ་པའི་སྐུ་ཕེབས་པ་དང་ཚེས་བཅུ་གཅིག་ལ་མཇལ། ཕྱི་དྲོ་བསྙེན་རྫོགས་ཉེར་གཅིག་དང་དགེ་ཚུལ་བཅུ་གསུམ་བསྒྲུབས། ཝ་ར་ཎཱ་སིའི་པཎྜི་ཏ་གོ་ཀུ་ལ་བྱོན་པའི་ལམ་ཞོར་དུ་གོར་གྷས་འཇོན་དམར་གྱི་ག་ཊུ་བུམ་པའི་རྟེན་བཅས་བྱས་པའི་ཡི་གེ་བསྐུར་འདུག་པའི་ནང་དུ་ཁ་བ་ཅན་ན་འགྲོ་མགོན་འབྲུག་པ་ཞེས་སོགས་ཀྱི་ཚིགས་བཅད་དང་ངེད་རང་གཉིས་ཕྱོགས་གཅིག་བྱེད་ཟེར་བའི་བརྗོད་བྱ་སྣང་བ་རང་ཕྱོགས་ཀྱི་སྟེང་དུ་ཁོང་གཉིས་ལག་སྦྲེལ་རྒྱུའི་ལུགས་ཡིན་འདུག་པ་པཎྜི་ཏས་མ་ཧཱ་གུ་རུའི་སར་འགྲོ་གསུངས་པ་འབྲུག་པ་ཡིན་སྙམ་ནས་ནོར་བ་འདྲ། དབུས་གཙང་གཉིས་ཀར་གསོ་དཔྱད་ཀྱི་བཤད་གྲྭ་ཚུགས་པ་གཙང་པ་ཚོ་བློ་གསལ་བའམ་བརྩོན་འགྲུས་ཆེ་བ་གང་ཡིན་ཡང་ཚ་རོང་ནས་ཀྱི་སློབ་མ་བསྟན་འཛིན་དང་དར་རྒྱས་ཅན་གྱིས་རྒྱུད་བཞིའི་རྒྱུགས་སྤྲད། ཚེས་བཅུ་གཉིས་ལ་འཕགས་པ་ལྷའི་སྤྲུལ་སྐུ་ཡོངས་སུ་རྫོགས་པ་དགེ་སློང་གི་དངོས་པོར་བསྒྲུབས། བཅུ་དྲུག་གི་ཉིན་ཕུར་པའི་དཀྱིལ་འཁོར་ལ་བརྟེན་ནས་མཚན་བརྒྱད་སོགས་ཀྱི་གསེར་སྐུ་རྣམས་ལ་རབ་གནས་རྒྱས་པར་བྱས། དེའང་སྟག་ལོ་བསམ་ཡས་སུ་ཕྱིན་སྐབས་མཆིམས་ཕུ་གསུང་གི་གནས་ཀྱི་སྲུང་མ་ཨེ་ཀ་ཛཱ་ཏིས་མཆིམས་ཕུ་གསང་ཕུག་ཏུ་རབ་ཞག་བདུན། འབྲིང་ལྔ། ཐ་མ་གསུམ་བཅད་རྒྱ་ཞིག་ཐུབ་ན་ཚེའི་རྟེན་
འབྲེལ་འགྲིག་ཅིང་དམངས་ཀྱི་བདེ་ཐབས་ལ་ཕན་ཚུལ་གསུངས་པ་ཚང་མ་གཡེང་བས་ཁྱེར་ནས་ངེད་རང་གི་རྣ་བར་མ་བྱུང་བས་འགྲོ་བར་མ་ཤར། དེའི་དབྱར་མེ་ཏོག་མཆོད་པའི་དུས་ལྷ་མོ་རིག་འཛིན་མས་ཁ་སང་རྟེན་འབྲེལ་མ་འགྲིག་པས་སྦྲུལ་ལམ་རྟའི་ནང་དུ་དགེ་བཤེས་ཀྱི་ཚེ་ལ་བར་ཆད་ཡོང་ཞིང་དེ་རྗེས་ནད་འཁྲུག་མུ་གེ་སོགས་འཇིག་རྟེན་མི་བདེ་ཞིང་བསྟན་སྲིད་ལ་རྒྱར་འཕོ་འགྱུར་བྱུང་དོགས་འདུག་པས་སྐུ་ཚབ་ཏུ་འདྲ་འབག་གཅིག་གསང་ཕུག་ཏུ་བཞུགས་ན་དེས་ཉེས་པ་རྣམས་སེལ་བའི་གོ་ཆོད་མི་ཆོད་བརྟག་པས་སྲུང་མ་རྣམས་བཀའ་བགྲོས་ཏེ་དར་དམར་པོ་ཁ་གང་རྡོ་ཛམ་བུ་ཏི་བའི་ཞལ་ཟས་ཀྱི་དབྱིབས་འདྲ་བ་ལག་པ་ཙམ་ཞིག་ལ་དཀྲིས་ཏེ་གསེར་འབུམ་མཐིལ་དུ་སྦས་པ་མི་ཁ་ཤས་ཀྱིས་མཐོང་ཐོས་བྱུང་འདུག །འདི་ལོ་མེ་ཏོག་མཆོད་པའི་ཉིན་སྲུང་མ་རྣམས་ཁོག་ཞུགས་ཀྱིས་གསེར་འབུམ་མཐིལ་གྱིས་བརྐོས་པའི་འོག་ནས་མི་ཕལ་ཆེར་ལ་རྒྱུས་མེད་པའི་དར་དམར་པོ་ཞིག་བཏོན་བྱུང་བས་དེར་འཁོད་ཀུན་ཧ་ལས། ངར་དེ་ཉམས་པ་དང་རུལ་ཚེ་རྟེན་འབྲེལ་མི་འགྲིག་པ་ཡོད་སྣང་ཡང་ཁ་དོག་མ་ཉམས་པའི་སྐྱོན་མེད་དུ་བྱུང་བར་བརྟེན་ཆོས་སྐྱོང་ཚོས་དཔལ་རི་སྤྲུལ་སྐུ་དང་སྒྲོམ་པ་འཇམ་དབྱངས་དབང་པོར་བསླབ་སྟོན་མཛད་ནས་སྒྲོམ་པས་རྒྱུ་མཚན་གྱི་ཡི་གེ་ཆེད་གཉེར་འབྱོར་བ་ལྟར་བལ་པོ་མཁས་པ་སིདྡྷི་དང་དྷ་ན་སོགས་ཉི་ཤུས་དངོས་གཙང་ཞིང་མགྱོགས་རྩོལ་གྲུབ་རྩིས་ཀྱིས་བཟོ་ཐབ་བཙུགས། ཧོར་ཟླ་བདུན་པའི་ཚེས་བཞི་ལ་འཕགས་པ་ལྷ། དཔོན་མཁའ་འགྲོ། ལྷོ་པ་རབ་འབྱམས་པ་གསུམ་ལ་རས་བྲིས་ཀྱི་དཀྱིལ་འཁོར་དུ་འཇིགས་བྱེད་བཅུ་གསུམ་མའི་དབང་། ལྔ་ལ་མཁའ་འགྲོ་གྲ་ཚང་བཅས་པས་རྡོ་རྗེ་
སེམས་དཔའི་སྒོམ་བཟླས། རྣམ་འཇོམས་དང་སེང་གདོང་མའི་གཟུངས་སྔགས། སྦྱིན་སྲེག་དངོས་གྲུབ་རྒྱ་མཚོ། ཆ་གསུམ། གསར་རྩོམ་གྱི་ཀླུ་གཏོར་དང་གཏོར་མ་བརྒྱ་རྩ་རྣམས་ཀྱི་ལུང་། སྐྱེས་པ་ཚོར་ཐུགས་རྗེ་ཆེན་པོ་གཙོ་འཁོར་གསུམ་པ་དང་བུད་མེད་ཀྱི་རིགས་ལ་སེང་ལྡེང་ནགས་སྒྲོལ་གྱི་རྗེས་གནང་བསྐུར། རྫོང་བ་བཟབས་པར་བྱས་ནས་བར་ཁམས་སུ་ཐོན། དྲུག་ལ་གོང་གི་མི་སྣ་ཚོར་གྲུབ་རྒྱལ་ལུགས་ཀྱི་ཚེ་དབང་དང་གསང་འདུས་རྩ་རྒྱུད་ལེའུ་བཅུ་བདུན་ཕྱི་མ་རྒྱུད་དང་བཅས་ལེའུ་བཅོ་བརྒྱད་ཀྱི་ལུང་། བརྒྱད་ལ་བསྙེན་རྫོགས་ལྔ་བཅུ། དགེ་ཚུལ་བཞི་བཅུ་ཞེ་གསུམ། རབ་བྱུང་མ་གསུམ། དགེ་བསྙེན་བཅུ་རྣམས་བསྒྲུབས། ཞ་ལུར་མཁན་ཆེན་ཁྱབ་བདག་རིན་ཆེན་བསོད་ནམས་མཆོག་གྲུབ་སྐུ་ཅུང་ཞིག་བསྙུན་པར་བརྟན་བཞུགས་ཀྱི་བདེན་ཚིག་བརྗོད་པ་བྲིས་ཤིང་རིང་པོར་གནས་པའི་སྨོན་ལམ་དགོས་ཕེབས་པའང་ལྷན་དུ་ཕུལ། དགུ་ལ་གསེར་ཡིག་པ་ཚོར་གཞིས་ལེན་དང་རྫོང་བ་བཟབས། གོང་དུ་ཞུ་ཡིག་དང་འབུལ་ཆས་སྔར་འཁྱུད་ཀྱི་ཐོག་དར་ལྕོག་ཁྱད་ཅན་གནང་བའི་ལན་དང་བཅས་དབུལ་བར་ཨེར་ཏེ་ནི་གུ་ཤྲིའི་ཚ་བོ་དཀའ་བཅུ་བློ་བཟང་བཀྲ་ཤིས་དང་སེ་ཆེན་དར་རྒྱས་གཉིས་རྫོང་བདའ་བྱས། ཆ་ཁར་དབང་གི་བླ་མར་རྩེད་ཐང་ལས་ཆེན་པ་བཏང་བ་ཁོང་པ་དགེ་བཤེས་བཟང་བས་འདོད་ཡོན་ཆེ་རབ་བྱུང་འདུག་ནའང་ཆ་ཁར་དབང་དང་ལུགས་ལེགས་རྒྱུ་མེད་པ་དང་སེར་མོ་བ་མང་པོ་རྒྱལ་པོས་ཕྱིར་ཕུད་པ་སོགས་ཀྱི་རྩ་རྐྱེན་བྱས་པའི་བརྗོད་རིགས་སྣ་ཚོགས་སྣང་། པོ་ཏ་ལའི་གཉེར་ཚང་སྡེར་སྤྱད་དེབ་ཀྱི་འགོ་བརྗོད་དང་འབྲོང་རྩེ་ལྷུན་གྲུབ་གླིང་པ་བློ་བཟང་ནོར་བུའི་སྙན་ངག་གི་འཕྲིན་ལན་
དང་སྨོན་ལམ་དགོས་ཟེར་བ་ལྟར་བྲིས། སང་ཉིན་བསམ་བློ་སེ་ཆེན་ཆོས་རྗེར་རིགས་གསུམ་མགོན་པོའི་རྗེས་གནང་། རྒྱལ་སྲས་རཏྣ་ལ་འཆི་མེད་དཔལ་སྟེར་གྱི་ཚེ་དབང་བརྒྱ་རྩ་དང་ཕྱག་རྡོར་འབྱུང་འདུལ་གྱི་རྗེས་གནང་། རཏྣ་དང་སེ་བུ་སུན་དཔོན་པོ་གཉིས་ལ་གྲུབ་རྒྱལ་ལུགས་ཀྱི་ཚེ་དབང་། ཆབ་ནག་བླ་མ་མཚོ་སྨད་བློ་བཟང་ཆོས་འཕེལ་ལ་ཐམས་ཅད་མཁྱེན་པ་དགེ་འདུན་རྒྱ་མཚོའི་གསུང་འབུམ་ཁྲོད་ནས་རྗེས་གནང་གི་ཡི་གེ་དང་གསོལ་མཆོད་ཐོར་བུའི་ལུང་རྣམས་བྱས། སྣ་དཀར་རྩེའི་ཡུམ་ལྕམ་བསོད་ནམས་བུ་ཁྲིད་གཤེགས་པའི་སྨོན་ལམ་རྟེན་ཤལ་དཀར་པོ་སྤུས་གཙང་ཞིག་བྱུང་བ་ལྟར་དེ་ལན་ཀྱང་བསྲིངས། ཧོར་ཟླ་བརྒྱད་པའི་ཚེས་གཉིས་ཀྱི་འགྲུབ་སྦྱོར་ཐོག་འཕགས་པ་ལྷས་ཚོགས་ཆས་སྟེར་ཆ་དང་འགྱེད་གྱ་ནོམ་པའི་སྦྱིན་བདག་མཛད་དེ་གྲ་ཚང་གིས་འཆི་མེད་འོད་སྣང་གི་ཚེ་ཆོག་བཏང་། རཏྣ་ལ་རྫོང་བ་ཟླ་བ་སྔ་མའི་མཇུག་ལ་གྲུབ་ཀྱང་གཟའ་སྐར་ཁྱད་ཀྱིས་འདི་ཉིན་ཐམ་ཀ་དམར་པོ་སྤྲད། སྒམ་སྨྱོན་སྤྲུལ་སྐུ་ཕྱག་རྡོར་ནོར་བུ་ཞིང་གཞན་དུ་གཤེགས་པའི་ཐུགས་དམ་འདོགས་རྟེན་དུ་ཟ་ཧོར་རྒྱལ་པོ་གཙུག་ལག་འཛིན་གྱི་ཡབ་གཙུག་ལག་དཔལ་ཆེན་གྱི་དབུ་ཐོད་མངའ་རིས་གུང་ཐང་ཆོས་ཀྱི་རྒྱལ་པོའི་ནང་རྟེན་ཡོལ་མོ་སྤྲུལ་སྐུའི་ཕྱག་ཏུ་བྱུང་བ་དེས་གཙོས་པའི་བདོག་པ་འབྱོར་དོན་བཞིན་ས་ལམ་གྱི་བར་ཆད་སེལ་བའི་བསྔོ་སྨོན་གྱིས་མཚམས་སྦྱར་ཞིང་བླ་མ་མངའ་བདག་པ་དང་སྐྱི་སྟོན་པ་གཉིས་ཀྱིས་བསྐུལ་བ་ལྟར་སྤྲུལ་སྐུ་མྱུར་འབྱོན་གྱི་སྨོན་ལམ་བརྩམས། ཚེས་གསུམ་ནས་བཅུ་བདུན་གྱི་བར་མཚམས་དམ་པར་བཅད་དེ་མདོ་མངས་ཀྱི་འཕྲོས་ནམ་ལངས་ས་རུབ་ལྟ་བུར་གནང་བས་ཚང་བར་འདྲིལ། གོང་ར་ངེས་གསང་རྡོ་རྗེ་གླིང་པ་སྤྱི་ཚོགས་ཀྱིས་བསྐུལ་བའི་བཅའ་ཡིག་དང་། སྣེའུ་རྫོང་སྡོད་མངའ་ཁུལ་བཅས་པའི་
ངོར་རིང་འཚོའི་ཚིགས་བཅད་བྲིས། ཚེས་དགུ་ནས་ཞག་བདུན་གྱི་བར་གྲ་ཚང་གིས་མདོས་བསྐང་སྒྲིགས་ཆུག་བཏང་། བཅུ་དགུ་ལ་ཁྱབ་བདག་ཁྲ་ཚང་པས་གྲིབ་སེལ་དང་འཆི་བླུ། ཉེར་གཅིག་ལ་མཁའ་འགྲོ་བསུ་བཟློག་དང་སྦྲག་པའི་བརྟན་སྡོད་བདོག་པའི་སྐྱེས་བཅས་མཛད། དེ་ཕན་ནམ་མཁའ་འཚུབ་པར་ཡོད་ཀྱང་འདི་ཉིན་ནས་བཟུང་གནམ་གཤིས་འཇམ་ཞིང་རྟེན་འབྲེལ་འགྲིག་པར་བྱུང་། ཉེར་གསུམ་ལ་ཆོས་ཀྱི་ཡོན་དུ་གོས་དར་ཡུག་ཁ་ཤས། རྒྱ་སིལ། རྒྱ་རྔ། གསེར་ཞོ་སུམ་ཅུ་དང་དངུལ་ལྔ་བཅུ་མ། ཇ་ཀོ་དྲ་དང་ཁོར་དྲུག་མ་འགའ་ཞིག །རྟ་སྒ་བཅས། བླ་བྲེ། རྟེན་ཁེབས། རས་ཆ། འབྲུ་འཛིན་སོགས་སྤམས་མཐོ་བར་ཕུལ་ཏེ་གཙང་དུ་ཐེགས། དེ་ཉིན་མཆིམས་ཕུར་འཇོག་རྒྱུའི་འདྲ་འབག་ལ་གཟུངས་བཞུགས་ཕུལ། སང་ཟླ་བ་རྒྱལ་གྱི་གཟའ་སྐར་ཐོག་མཚམས་བཅད་དེ་དཔལ་ཆེན་ཕུར་པའི་དཀྱིལ་འཁོར་ཞལ་ཕྱེ་སྟེ་རབ་ཏུ་གནས། ཕྱི་ཉིན་ནས་བཟུང་བདུན་གཅིག་གི་བར་འཆི་མེད་དཔལ་སྟེར་གྱི་བསྙེན་པ་དང་བཅས་སྔ་ཐུན་གྱི་འགོར་རབ་གནས་བསྡུས་པའི་སྒོ་ནས་དམ་ཚིག་པ་ལ་ཡེ་ཤེས་པ་བསྟིམས། ཧོར་ཟླ་དགུ་པའི་ཚེས་གཉིས་ནས་ཉིན་གསུམ་གྱི་བར་མེའི་སྤུ་གྲི་གཤིན་རྗེ་དམར་པོ་སོགས་ཀྱི་འཁོར་ལོ་བྲིས་ཏེ་གྲ་ཚང་གི་གྲ་པ་གྲངས་བཅད་ལ་རིམ་གྲོ་རྣམས་རིམ་པར་བཙུགས། བཞི་ལ་ཆང་ཁྱིམ་པ་ངག་དབང་མཁྱེན་བརྩེ་དང་སྡེ་པ་ཞང་མཁར་རྫོང་པ་དབང་འཛིན་ནོར་བུ་གཉིས་མཆིམས་ཕུར་རྟེན་སྐྱེལ་བར་བཏང་། དེ་མོ་སྤྲུལ་པའི་སྐུ་བར་ཁམས་ནས་བྱོན་པ་དང་མཇལ། ཇ་ཁོར་དྲུག་མ་ལྔ་བརྒྱ། དྲེའུ་བརྒྱ། རྟ་སུམ་ཅུ་སྐོར་གྱི་སྟེར་ཆ་གྱ་ནོམ་པ་བྱས། དྲུག་ལ་ཨ་རིག་
མང་དུ་འོངས་པའི་རྟ་ཉིས་བརྒྱ་ཙམ་བྱུང་། ཆོས་སྐྱིད་དང་མགོན་པོ་ཚེ་དབང་གི་དགེ་རྩ་གཏོང་བར་ཆོག་ཐུ་ཇའི་སང་དང་མེརྒན་པ་ཤིས་གཙོས་པ་སླེབས། དགེ་བ་རྣམས་རྫོགས་བྱང་དུ་བསྔོས། རས་ཆུང་ཕུག་སྤྲུལ་སྐུ། བདེ་ཆེན་ཆོས་རྗེ་བློ་བཟང་ཆོས་རྒྱལ་དབང་ཕྱུག་སྟག་རྩེ་ཐའི་ཇི་རྡོ་རྗེ་རྣམ་རྒྱལ་ཅན་མཇལ། ནཱ་ལནྜཱ་ཆོས་རྗེ་བཅོ་བརྒྱད་པར་གུར་གྱི་མགོན་པོ་ལ་བརྟེན་པའི་བཀའ་བསྒོ་ཕུལ། ལ་མོ་ཚེར་གསེབ་དགོན་པ་བས་ཕུར་པའི་འཆམ་ཕུད་དང་སྣེའུ་ཁུལ་མི་སེར་རྣམས་ཀྱིས་ཟང་ཟིང་གི་བདོག་པ་དང་བཅས་ཡུན་དུ་གནས་པའི་རྟེན་འབྱུང་བསྒྲིགས། བརྒྱད་ལ་སྟག་རྩེ་ཐའི་ཇིས་ཚོགས་ཆས་བདོག་པ་སྤམས་བསྟོད་པའི་སྦྱིན་བདག་མཛད་དེ་གྲ་ཚང་གིས་རྡུལ་ཚོན་གྱི་དཀྱིལ་འཁོར་ལ་བརྟེན་པའི་ཚེ་ཆོག་བཏང་། ཆང་ཁྱིམ་པ་ཅན་ཚེས་བཞི་ལ་ཐོན་པ་ནས་བཟུང་མཆིམས་ཕུ་གཞིས་ཀར་མ་སླེབས་པར་སྔུན་དུ་རླུང་གི་འཚུབ་མ་ཞིག་བྱུང་འདུག་པ་སྲུང་མ་རྣམས་ཀྱིས་བསུ་བ་བྱས་ཞེས་ལྷ་མོ་རིག་འཛིན་མ་ཁོག་ཞུགས་ཀྱི་དུས་ཞལ་གྱིས་འཆེས་པར་སྣང་། ཚེས་བདུན་གྱི་ཞོགས་གཞིས་ཀ་ནས་བཏེག་པའི་གནས་ཀྱི་གཤམ་དུ་སླེབས་པ་དང་དཔལ་རི་སྒྲུབ་སྡེ་བ་རྣམས་ཀྱིས་རོལ་མོ། འཕན་གདུགས། སྤོས་ཕོར་སོགས་ཐོགས་ཏེ་སེར་སྦྲེང་བསྟར། སྤོས་དང་བསངས་དུད་བསུ་བའི་ཚུལ་ཐུར་དུ་དལ་གྱིས་ཆགས་པ་བརྟེན་དང་ཕྲད་མཚམས་ནས་གྱེན་དུ་ལྡོག་པ་དེ་འཁོད་ཀུན་གྱིས་མཐོང་བས་ཡ་མཚན་གྱི་གནས་སུ་གྱུར། ཚེས་བརྒྱད་ཀྱི་ཟླ་བ་གྲོ་བཞིན་འཛོམ་པའི་འགྲུབ་སྦྱོར་གྱི་ཐོག་གསང་ཕུག་བྲག་དམར་ཀེའུ་ཚང་དུ་འདྲ་འབག་བསྒྲིགས་པ་གསེར་མདངས་ཀྱི་ཕན་ཡོན་ཡིན་ནམ་རྟེན་གཞན་རྣམས་ཟིལ་གྱིས་གནོན་པ་ལྟ་བུའི་
གཟི་བརྗིད་དང་ཕུག་པའི་ནང་འོད་དུ་གསལ་ཞིང་མཁའ་ལ་འཇའ་སྤྲིན་འཁྲིགས་པ། རླུང་བསེར་བུ་མི་ལྡང་བས་ས་ལ་དྲོད་སོས་ཀའི་དུས་ལྟར་ཕེབས་པ་བྱུང་ཞེས་གླེང་། དེ་འཕྲལ་དུ་དཔལ་རི་སྤྲུལ་སྐུ་ཅན་དགེ་འདུན་བརྒྱད་ཅུ་སྐོར་གྱི་སྤྱན་འདྲེན་ཁྲུས་གསོལ་བརྟན་བཞུགས་སྨོན་ལམ་བཀྲ་ཤིས་ཚིགས་སུ་བཅད་དེ་མེ་ཏོག་གཏོར། ཕྱི་དྲོ་གསེར་འབུམ་མཐིལ་དུ་ཚོགས་ཀྱི་འཁོར་ལོ་རྒྱས་པར་བཤམས་ཏེ་ཚེས་བཅུའི་གར་འཆམ་གྱིས་རོལ། གནས་སྲུང་གཙོ་མོ་རིག་འཛིན་མ། གནམ་ལྷ་བྱང་ཆུབ། ནོར་བུ་འཛིན་པ། གེ་གོང་ཆེན་པོ་རྣམས་ཁོག་ཏུ་ཞུགས་ཐོག་ཆས་ཕྱག་མཚན་སྙན་ཤལ་ཕུལ་ཞིང་དམོད་ནས་གཏོར་བས་རིག་འཛིན་མས་སྐུ་འདི་ཁྱེད་གཟུགས་ཅན་ཁོ་ནས་དྲངས་པ་མིན། ངེད་གཟུགས་མེད་ཚོ་དང་ལྷན་ཅིག་པའི་མཐུ་ལས་བྱུང་། རྟེན་གནས་སུ་ཕེབས་པའི་ཚེ་རྩི་ཤིང་ནགས་ཚལ་རྣམས་ཀྱང་མགོ་ཕྱོགས་པ་མ་མཐོང་ངམ་གསུང་། དེར་འཁོད་ཀུན་ཀྱང་རྣམ་རྟོག་ཏུ་དེ་འདྲ་བ་ཞིག་བྱུང་ཟེར་སྐད། བོད་འབངས་བདེ་བའི་རྟེན་འབྲེལ་འགྲིག་ཚུལ་གསུངས་པའི་རམ་ཆོས་སྐྱོང་གཞན་ཚོས་བཏེག་པའི་ལེགས་ཚོགས་ཀྱི་སྙན་པ་དང་བཅས་ཆང་ཁྱིམ་པ་འཁོར་ཞིང་ཞང་མཁར་པ་ཚེ་ཆོག་གི་དོ་དམ་ལ་རྗེས་སུ་བསྡད། བརྒྱད་ཀྱི་དགོངས་མོ་ནས་བཟུང་དཔལ་རི་བ་དཔོན་སློབ་ཁ་ཤས་ཀྱིས་གསང་ཕུག་ཏུ་བདུན་གཅིག་གི་རིང་འཆི་མེད་སྐུ་གསུམ་འདུས་པའི་སྒྲུབ་པ་དང་གྲ་དམངས་ཀྱིས་ཞག་གསུམ་གྱི་བར་དྲི་མེད་བཤགས་རྒྱུད་སྒྲོགས། ཚེས་བཅུ་གཅིག་ལ་སྡེ་པ་བྱ་བ་ཡབ་ཡུམ་སྲས་བཅས་བྱོན། རས་ལྕགས་ཁྲོ་བཙོང་། གསེར་རྔ་ཉི་ཤུས་ཐོག་དྲངས་པའི་སྟེར་ཆ་དཔངས་མཐོ་བར་མཛད། ཞལ་ངོ་རྣམས་ལ་འཆི་མེད་
དཔལ་སྟེར་གྱི་ཚེ་དབང་བརྒྱ་རྩ་ཕུལ། བསྙེན་རྫོགས་ཉིས་བརྒྱ་དོན་བདུན་དང་། དགེ་ཚུལ་ཉིས་བརྒྱ་དྲུག་བཅས་བསྒྲུབས། ལྷ་ཁང་པ་རྡོ་རྗེ་ནོར་བུ་དང་ཁལ་ཁ་སྐུ་སྐྱེ་བློ་བཟང་བསྟན་འཛིན་གཉིས་ཀྱིས་བསྐུལ་བའི་སྨོན་ལམ། དགེ་འཕེལ་དབོན་པའི་ངོར་བརྟན་སྡོད། འཕགས་པ་ལྷའི་སྤྲུལ་སྐུའི་བཞེད་པ་ལྟར་བདག་བསྟོད། གྲ་དམངས་ཀྱིས་བསྐུལ་ནས་སྒོ་མང་སློབ་དཔོན་འཕྲིན་ལས་རྒྱ་མཚོའི་གསོལ་འདེབས་རྣམས་བྲིས། འཕགས་པ་ལྷའི་སྤྲུལ་པའི་སྐུར་རྒྱལ་བ་ཙོང་ཁ་པའི་གསུང་འབུམ་ནས་ལམ་རིམ་ཆུང་བ། འདུས་པ་དང་བཅུ་གསུམ་མ་གསུམ་གྱི་དཀྱིལ་ཆོག །འཇིགས་བྱེད་ཟ་མ་ཏོག །སྦྱིན་སྲེག་དངོས་གྲུབ་རྒྱ་མཚོ། བདེ་མཆོག་ལུས་དཀྱིལ། མཆོད་འཕྲེང་། ཐམས་ཅད་མཁྱེན་པ་དགེ་འདུན་རྒྱ་མཚོའི་གསུང་འབུམ་ནས་བླ་མའི་རྣལ་འབྱོར་དང་མཆོད་པ། སྙིང་པོ་དོན་གསུམ། ཚེམ་བུ་དམར་འཁྲིད་དང་ལྟ་འཁྲིད་ཚིགས་བཅད། མཁའ་སྤྱོད་དཀར་མོ་དང་མགོན་པོ་སྙིང་ཞུགས་ཀྱི་འཕོ་བ། འདུས་པའི་དཀའ་གནད། བྱང་ཆུབ་ཀྱི་སེམས་སྒོམ་ཚུལ་རྣམས་དང་བདག་ཆེན་རྡོ་རྗེ་འཆང་གིས་མཛད་པའི་དྲུག་ཅུ་པའི་ལུང་། སྐྱེར་སྒང་ལུགས་ཀྱི་ཐུགས་རྗེ་ཆེན་པོ་གཙོ་འཁོར་གསུམ་པ། བ་རི་ལུགས་ཀྱི་སྒྲོལ་དཀར། སྒྲུབ་ཐབས་རྒྱ་མཚོའི་ནང་གི་སེང་གེ་སྒྲ་དང་ཤེར་ཕྱིན་དཀར་མོ། སྣར་ཐང་བརྒྱ་རྩའི་བཅུ་གཅིག་ཞལ་རྣམས་ཀྱི་རྗེས་གནང་ཕུལ། ཆོས་གྲལ་དུ་སྨན་རྒྱུད་དབུ་མཛད་ཨེ་པ་བློ་བཟང་མཁས་གྲུབ་ཡོད་པར་བཅུ་གསུམ་མ་གསུམ་གྱི་དཀྱིལ་ཆོག་ན་ས་ཆོག་གི་སྔོན་དུ་བདག་བསྐྱེད་སྒོམ་པར་བཤད་པའི་དུས་བདག་མདུན་འཇུག་པ་ཨེ་གཅིག་དྲིས་པ་ལ་གཅིག་ཟེར་བར་མདུན་
བསྐྱེད་སྒྲུབ་མཆོད་ཀྱི་ཆེད་དུ་ས་ཆོག་བྱས་པ་ཡིན་པས་ཐོག་མ་ནས་འཇུག་པ་གཅིག་ཕྱིན། ས་ཆོག་གི་ངལ་བ་མི་དགོས་འདྲ་གླེངས་པས་དབུ་ཡོན་ལ་ཟིན་ནས་ལབ་རྒྱུ་མི་སྣང་། རྗེ་བཙུན་ཙོང་ཁ་པའི་གསུང་རབ་ལས་ལྷག་པ་རང་གཞན་ཀུན་ལ་དཀའ་རུང་ཡིག་ནག་གི་དཔེ་ཆས་སྨྲ་མི་ཤེས་པས་ཕ་པདྨའི་རྫིང་བུར་བུ་སྟག་མའི་མེ་ཏོག་འདི་མང་བར་སྣང་། སྐྱེས་དང་བསྟུན་པའི་གསེར་དངུལ་གོས་དར་གྱིས་མཚོན་པའི་བདོག་པ་དང་བཅས་རྫོང་བདའ་ཞུས། དགའ་ལྡན་གསང་སྔགས་གླིང་སློབ་དཔོན་གྲ་པ་བཅོ་ལྔ་སྐོར་གྱིས་སྟེར་ཆ་དང་བཅས་མཁའ་འགྲོ་སྡེ་ལྔ་ལ་བརྟེན་པའི་རིང་འཚོའི་རྟེན་འབྱུང་བསྒྲིགས། བཀྲ་ཤིས་ལྷུན་པོའི་དངུལ་གདུང་གི་དཀར་ཆག་དགོས་ཚུལ་སྨེད་པར་ཚ་རོང་དགེ་སློང་དེབ་དང་བཅས་པ་འབྱོར། དེ་ནང་དུ་བཻ་ཌཱུཪྻ་སྔོན་པོ་མཐོ་ཚད་དུ་ཉེ་བ་ལྟ་བུ་ཞིག་སྣང་བ་ཞིབ་ཏུ་དཔྱད་པས་བླུག་ཤེལ་སྔོན་པོའི་བུམ་པ་ཡིན་འདུག་པ་དང་ལྷ་བྲིས་པ་ཆོས་དབྱིངས་ཀྱིས་ཕུལ་བའི་ནོར་བུ་ཁྱུང་མིག་ཟེར་བ་དཔྱད་དོན་དང་མཁས་པ་རྣམས་ཀྱི་གསུང་རྒྱུན་ལ་མ་གྲགས་ཤིང་གཟི་ཡིན་པ་འདྲ་ཟེར་བས་དེ་རིགས་ཀྱི་མིང་གསལ་རྒྱག་མ་བདེ་བའི་གཤིས་ཚང་མ་ཚིགས་བཅད་དུ་བསྡེབས་པའི་བསྔགས་བརྗོད་སྨོན་ལམ་དང་འབྲེལ་བ་བརྗོད་བྱ་གང་ལེགས། ཞར་བྱུང་དེབ་ཀྱི་འགོ་བརྗོད་འཕྲལ་དུ་བྲིས་པའི་དཔོན་ཚང་ཕྱིར་སློག །ཉེར་དགུ་ལ་རྒྱལ་པོ་དཔོན་གཡོག་འདམ་ནས་ཕེབས་པ་དང་མཇལ། སྟག་ལུང་ཞབས་དྲུང་ཁྲི་ཐོག་པ་ངག་དབང་རྣམ་རྒྱལ་ལེགས་གྲུབ་ཀྱིས་གནམ་གང་གི་ཉིན་ལེགས་སྐྱེས་སྔོན་དུ་འགྲོ་བའི་སྟག་ལུང་ཐང་པའི་ཕྱག་ལེན་གྱི་བརྟན་བཞུགས་ཕྱོགས་སོ་སོ་ནས་གསུང་ཆོག་
མཛད་སྲོལ་ཡོད་འདུག་པ་བཞིན་བསྟར་བའི་ཚིགས་བཅད་ཀྱི་ཐུགས་རྩོམ་གསར་པ་ཞིག་ཀྱང་འདུག །སླར་སྒེར་དུ་མཇལ་ཞིང་བཀའ་བསྒོ་དགོས་ཚུལ་ཕེབས་པ་ཕུལ་ནས་ཐེགས་རྫོངས་ཞུས། ཧོར་ཟླ་བཅུ་པའི་ཚེས་གསུམ་ལ་ལྷ་ཁང་ཆོས་མཛད་ཀྱིས་མཁོ་མཐིང་ལྷ་ཁང་དུ་འབུལ་རྒྱུའི་སྙན་དར་ཞལ་ཡིག་བྲིས། འབྲི་གུང་གཏེར་སྒྲོམ་ནས་ཆུ་ཚན་དྲངས་ཏེ་ཞག་བདུན་ཙམ་གྱི་བར་འཕྲོད་བསྟེན་བྱས། ནད་ཀྱི་རིགས་གང་ལའང་མི་གནོད་ཅིང་ཕལ་ཆེར་ལ་ཕན་པའི་ཡ་མཚན་ཅན་ཞིག་འདུག །འདི་སྐབས་དང་སྦྲུལ་ལོ་གཉིས་ཀར་སྐར་མ་དུ་བ་མཇུག་རིང་ཞག་མང་ཙམ་ཤར་བར་འཕྲལ་ལྟར་སྣང་དུ་སེམས་ལ་གཟན་ཞིང་ཕུགས་རྒྱལ་ཁམས་མི་བདེ་བའི་དུས་རྟགས་སུ་མངོན། ཚོགས་གསོག་ཏུ་རྫོང་གཞིས་ཁག་བཅུ་བདུན་བསྡོམས་པར་བཀའ་འགྱུར་ཚར་སུམ་བརྒྱ་མཚན་བརྗོད་ཉིས་འབུམ། ཡིག་དྲུག་དང་བཛྲ་གུ་རུ་སོ་སོར་དུང་གཉིས་རེ། སྒྲོལ་མ་ཤེར་སྙིང་སོ་སོར་འབུམ། གོང་དཀར་ཆོས་སྡེ་དང་བཀྲ་ཤིས་ཆོས་སྡེ་གཉིས་སུ་ཚེ་ཆོག །རྒྱལ་དུ་དམག་ཟོར་མ་དང་ཕྱག་དྲུག་པ་ལས་གཤིན་གསུམ་གྱི་བསྐང་གསོ་ཁྲི་ཚར། སྤྱི་བསྐང་སྟོང་རྩ། ལྷ་ས། བསམ་ཡས། ཁྲ་འབྲུག་གསུམ་གྱིས་གཙོས་པའི་གཙུག་ལག་ཁང་བཅུ་ལ་བརྒྱ་མཆོད་སྣ་ལྔ། སྙན་དར་རེ། འཕན་ཆ་རེ། དགྲ་མནན་ཁག་བདུན་སྨན་བླ་དང་བཅས་པ། གསང་སྔགས་གླིང་དུ་ཟླ་གཅིག་གི་བར་གཤིན་རྗེ་ཐམས་ཅད་འདུས་པའི་སྔགས་རིང་། ལྷ་ས་སྤྱི་པར་སྒོ་འགྱེད་བཏང་། དེ་མོ་བ་དཔོན་སློབ་ཀྱིས་ཚོགས་འཁོར་སྟེར་ཆ་འགྱེད་བཅས་གཟེངས་བསྟོད་པའི་སྦྱིན་བདག་མཛད་ནས་གྲ་ཚང་གིས་འཆི་མེད་འོད་སྣང་གི་ཚེ་ཆོག་རྒྱས་པར་གསུངས། ཚེས་
བཅུ་གསུམ་ནས་ལྕགས་ཟམ་སྤྲུལ་སྐུ་དང་རྡོ་རྗེ་བྲག་སྤྲུལ་སྐུ་གཉིས་ལ་རྡོར་འབུམ་ཆོས་གྲགས་ཀྱི་གཏེར་མའི་བདུད་རྩི་བུམ་པའི་དབང་ལུང་ཡོངས་རྫོགས། རིག་འཛིན་ལེགས་ལྡན་རྗེའི་གཏེར་གསར་ཐུགས་རྗེ་ཆེན་པོ་འཁོར་བ་དབྱིངས་སྒྲོལ་གྱི་དབང་ལུང་ཆ་ཚང་། དྲི་མེད་བཤགས་རྒྱུད། གཏེར་སྟོན་ཚེ་བརྟན་རྒྱལ་མཚན་གྱི་སྤྱན་མང་ཞི་དྲག་ཕྱེད་གསུམ་གྱི་ལུང་རྣམས་ཕུལ། གྲོང་སྨད་པ་སངས་རྒྱམ་པར་བདུད་རྩི་བུམ་པའི་དབང་བསྐུར། རིན་པོ་ཆེ་ལྕགས་ཟམ་པ་ཐེགས་རྗེས་རྡོ་རྗེ་བྲག་སྤྲུལ་སྐུར་རཏྣ་གླིང་པའི་འཚོ་རྒྱལ་སྐོར་གསུམ། གསར་རྩོམ་གྱི་ཚེ་བདག །དྲག་དམར། དྲེགས་འདུལ་གསུམ་གྱི་བསྙེན་ཡིག་སོགས་ཐོར་བུ་ཕུལ། མགར་བའི་ཁོག་ཏུ་དམ་ཅན་དངོས་སུ་ཞུགས་ནས་ཆོས་དབང་རིན་པོ་ཆེའི་ཐུགས་དམ་རྟེན་དུ་བརྡུངས་པའི་ཕུར་པ་དུས་གསུམ་མཆོག་དད་རྟེན་དུ་སྟེར་བ་མཛད། ནཱ་རོ་པའི་ཕྱག་གི་རྡོར་དྲིལ་མར་པས་བོད་དུ་བསྣམས་ནས་མེས་སྟོན་ཚོམ་པོར་གནང་། དེའི་གདུང་བརྒྱུད་ཐོབ་རྒྱལ་སྡེ་པ་ནས་གཙང་སྡེ་སྲིད་ལ་བྱུང་། གཙང་པའི་སྐྱས་ཁྲོད་ནས་བོར་བ་རིམ་པར་བརྒྱུད་ཞ་ལུ་མཁན་རིན་པོ་ཆེས་ཕྱག་བྲིས་རྟེན་དུ་བསྩལ། དེ་མོ་སྤྲུལ་བའི་སྐུར་བཀའ་གདམས་ཐིག་ལེ་བཅུ་དྲུག །རྡོ་རྗེ་དྲག་པོ་རྩལ་གྱི་བྱིན་རླབས་ཐུགས་རྗེའི་དབང་། གཏེར་ཁ་གོང་མའི་དྲག་དམར་གྱི་ཆོས་སྐོར་ཡོངས་རྫོགས་ཀྱི་ལུང་། གཤིན་རྗེ་ཁ་ལ་རྒྱས་འདེབས་ཀྱི་ཕྱག་ལེན་དང་བཅས་པ། རྒྱལ་པོ་བྱེས་ཆས་ཀྱི་ལུང་ཕྱག་འཁྲིད་རྣམས་ཞིབ་རྒྱས་སུ་ཕུལ། བོད་ཁམས་བདེ་ཐབས་སུ་ཁམས་ཕྱོགས་ཀྱི་ས་གནད་འཆོས་པའི་ཁུར་བཞེས་མཛད་གསུང་བ་བཞིན་དེ་གའི་བྱེད་ལུགས་
ཀྱི་རྒྱུ་མཚན་ཞིབ་པར་མོལ། ཐུགས་བརྩོན་པ་ཆེས་པས་མ་འགྱངས་པར་ཚང་མ་གྲུབ་པའི་གནས་ཚུལ་བྱུང་། སྙིགས་མ་ལྔ་ཆེས་ཆེར་བདོ་བའི་དུས་འདིར་བོད་འབངས་བདེ་ཐབས་བསྒྲུབ་པ་ལ་བར་ཆད་ཆེ་བ་འོང་འདུག་པར་སྐུ་ཚེར་མ་གནོད་པའི་ངེས་པ་མི་སྣང་བས་འདི་རིགས་ཀྱི་སྐབས་རང་གི་བར་ཆད་སེལ་བྱེད་ཀྱི་རིམ་གྲོའང་གལ་ཆེ་བར་གདའ། ཀོང་པོ་བུ་ཆུའི་ཇོ་བོ་ལ་པྲོག་ཞུ་ཞིག་སྒྲོན་ཡོད་ཚུལ་གྱི་གསུང་གླེང་བྱུང་བར་བརྟེན་འཕགས་པ་ལྷའི་ཕྱག་གི་སྦོོ་ཆབ་ལ་གཡུ་ཕྲ་རྒྱག་མཁན་གྱི་བལ་པོ་མཁས་པ་ཞིག་ཡོད་འདུག་པ་དེ་མོ་བས་གཡུ་པད་ཅིག་འཕྲལ་དུ་བཟོ་བཅུག་པའི་མར་ལམ་བུ་ཆུའི་ཇོ་བོར་དབུ་རྒྱན་ཀྱང་འབུལ་བའི་ཞལ་ལེན་མཛད་སོང་། ཚུར་བྱུང་དང་བསྟུན་པའི་བདོག་པའི་དངོས་པོ་བསྟར། སྣ་དཀར་རྩེའི་ཞབས་དྲུང་ཕེབས་པ་ཞབས་འབམ་བསྙུང་བ་དང་ཐུག་པས་ཟླ་གཅིག་ལྷག་གི་བར་བཞུགས་མཚེར་དུ་སྟན་ཆགས་ངོས་ཕྱིར་ཐེགས་གདོང་རྐྱེན་སེལ་གྱི་རྗེས་གནང་འདྲ་ཕུལ། ཧོར་ཟླ་བཅུ་གཅིག་པའི་ཚེས་དྲུག་ལ་བསྙེན་རྫོགས་ཉི་ཤུ་དང་དགེ་ཚུལ་སུམ་ཅུ་བསྒྲུབས། དཔལ་འཁོར་ཆོས་སྡེ་ནས་མཁན་པོ་ཤེས་རབ་ཡོན་ཏན་གཤེགས་པའི་བསྔོ་རྟེན་དཔངས་བསྟོད་པར་བསྟར་བར་ས་ལམ་གྱི་བར་གཅོད་སེལ་བའི་བསྔོ་སྨོན་དང་དགེ་བའི་ཐེབས་ཀྱི་མཐུན་རྐྱེན་གྱ་ནོམ་པ་བྱས། བསམ་ཡས་ནས་ཆོས་སྐྱོང་ཆེན་པོས་སྤོ་བོ་གཏེར་སྟོན་བདུད་འདུལ་རྡོ་རྗེ་འབོད་པར་གཏོང་དགོས་ཚུལ་སྟག་རྩེ་ཐའི་ཇི་བརྒྱུད་ཕེབས་པར་ངེད་རང་དང་སྡེ་པ་སྟག་རྩེ་ཐའི་ཇི་གསུམ་གྱིས་ཡི་གེ་དོན་གཉེར་ཆེན་པོས་ལན་གསུམ་ཙམ་ལོ་རིམ་ཙར་གྱིས་བཏང་བར་སྔ་མར་ང་ལ་བོད་ན་གཏེར་གྱི་སྐལ་བ་མེད་ཟེར། བར་པར་གཏེར་འདོན་
རྒྱུའང་ཡོད་ལ་ཡོང་རྩིས་ཀྱང་བྱེད་ཟེར། རྟིང་མ་ང་བོད་དུ་ཤོར་ན་རི་བོ་དགའ་ལྡན་པའི་བསྟན་པ་ཉི་མ་ཤར་པ་ལྟར་ཡོང་འདུག་ཅེས་རྩེ་ལྷ་སྒང་པ་སོགས་བཀག་པོ་རྣམས་ཀྱིས་དུག་བཏང་ནས་ད་ཆ་ཡོང་མི་ཐུབ་པའི་ཡིག་ལན་བྱུང་བ་ཆོས་སྐྱོང་ཆེན་པོར་སྤྱན་འབེབས་ཞུས། གྲ་ཚང་ནས་གྲངས་བཅད་ཀྱིས་སྒྲུབ་ཁག་ཀྱང་སྔར་རྒྱུན་བཞིན་བཙུགས། འཕྱོང་རྒྱས་པ་བོན་པོ་ཐོག་ལེགས་བཀྲ་ཤིས་ཚེ་བརྟན། ལྡུམ་ར་བ་ཟླ་བ་རྒྱལ་མཚན། སྤྱན་གཡས་དགོན་པ་བ་བློ་བཟང་ཚང་ལྡན་གསུམ་གྱིས་བོན་གྱི་གཏོ་འཆོས་རྣམས་ལོ་རིམ་ཙར་གྱིས་བྱས། བཅུ་གཅིག་ནས་བཟུང་ཧོར་ཟླ་བཅུ་གཉིས་པའི་སྨད་བར་བཅད་རྒྱ་དམ་ཙམ་གྱི་ངོས་སྔ་དགོངས་དགེ་སྦྱོར་དང་ཉིན་མོ་དཔེ་ཆ་བལྟས། འཕྱོང་རྒྱས་རབ་འབྱམས་པ་ཀུན་དགའ་བསྟན་འཛིན་གྱིས་ཆོས་སྐྱོང་སྤྱི་བྱེ་བྲག་ལ་འབུལ་རྒྱུའི་སྙན་དར་ཞལ་ཡིག །འཕྱོས་ཆོས་འཁོར་སྟེང་གི་ཆོས་སྐྱོང་གིས་བསྐུལ་བའི་རྒྱལ་གསོལ། ཚངས་པ་དུང་ཐོད་ཅན་ལ་དོགས་སེལ་གྱི་ལུང་བསྟན་ཞུ་བའི་ཆེད་དུ་གསོལ་བའི་འཕྲིན་ཤོག་སྤྱན་གཟིགས་ཚོགས་ཆས་འབུལ་བར་མདའ་དཔོན་གྱང་གྲོང་པ་བཏང་། སྨད་རྒྱུད་དབུ་མཛད་དགེ་སྐོས་གཉིས་ཀྱིས་བསྐུལ་བའི་སློབ་དཔོན་བློ་བཟང་དོན་ཡོད་དང་བདེ་ཡངས་གྲ་དམངས་ཀྱི་ངོར་འཆད་ཉན་པ་རིམ་བྱུང་གི་གསོལ་འདེབས། ར་བ་སྟོད་སྤྱི་ཚོགས་དང་ཉ་ཤུར་སྐྱ་རིལ་གྱིས་དགའ་ལྡན་ལྷུན་པོར་འཛུགས་རྒྱུར་ཡུན་འཚོའི་ཚིགས་བཅད་རྣམས་བརྩམས། པད་ཚལ་བས་གད་སྒོ་ཞང་ཚན་གྱི་བདེ་གཟར་སྐབས་ཁ་ཕྱོགས་མ་ལོག་པར་བརྟེན་རྟ་ནག་གུང་རྒྱལ་མ་ཟིན་པའི་ས་བརྗེས་འཕར་ཁ་བཅས་པར་ཕོད་དཀར་བའི་ས་ལག་དལ་འབྱོར་ཀུན་རའི་
ཤས་བོགས། དར་རྒྱས་ཆུ་བཏགས་ཀྱི་གཞིས་ཀ །ཐེམ་འཛིན་དགུ །ལག་འབབ་བརྒྱད་བརྒྱ་སྐོར། འཕྱོང་རྒྱས་ལྕང་གླིང་པ་བདེ་སྐྱིད་གླིང་སོགས་ཀྱི་ཞུ་ཧམ་ཆེ་བར་འདུག་ཀྱང་རྫོང་སྟོང་དུ་བཞག་པ་མ་འགབ་པས་ཁེ་རུ་རྒྱ་ཕུ་བསྡོམས་པའི་ཐེམ་འཛིན་དྲུག །ལག་འབབ་དྲུག་བརྒྱ་སྐོར་འཇགས་གནས་བྱས། བདེ་ཆེན་ཆོས་རྗེ་བློ་བཟང་ཆོས་རྒྱལ་དབང་ཕྱུག་གཤེགས་པའི་བསྔོ་རྟེན་རྣམས་བླ་མེད་བྱང་ཆུབ་མཆོག་ཏུ་རྒྱས་བཏང་། དགོངས་རྫོགས་ཀྱི་མཐུན་རྐྱེན་དུ་གོས་དར་གསེར་དངུལ་སོགས་བདོག་པ་སྤེལ་བར་ཆང་ཁྱིམ་པ་བློ་བཟང་མཁྱེན་བརྩེ་དང་པུ་ཤུད་པ་བློ་བཟང་དར་རྒྱས་བཏང་། ཐམས་ཅད་མཁྱེན་པ་དགེ་འདུན་གྲུབ་ཀྱི་དབུ་ཞྭ། རྗེ་བསོད་ནམས་རྒྱ་མཚོའི་ཚེམས་ཞྭ་ཐུལ་གསོལ་པང་། མཁས་གྲུབ་ནོར་བཟང་རྒྱ་མཚོའི་ཚེམས། ཐམས་ཅད་མཁྱེན་པ་ཡོན་ཏན་རྒྱ་མཚོའི་དབུ་ཞྭ་སོགས་བྱིན་རླབས་རྟེན་ཁུངས་བཙུན་པ་ཁ་ཤས་རྟ་ནག་ས་པའི་ལག་ནས་དགེ་སློང་བློ་བཟང་རྣམ་རྒྱལ་གྱིས་དོ་དམ་བྱས་བྱུང་བར་བླུས་མ་བཟབས་བར་བྱིན། དངོས་གྲུབ་སྡིངས་པས་གྲུབ་ཐོབ་ཞི་བ་བཟང་པོས་སྤྱན་རས་གཟིགས་བསྒྲུབས་པའི་མཎྜལ་བྱུང་།