དགུང་ལོ་ཞེ་དགུ་པར་གསན་ཡིག་གངྒཱའི་ཆུ་རྒྱུན་འབྲི་བའི་འགོ་ཚུགས་ཤིང་བོད་ཁམས་བདེ་ཐབས་ཀྱི་རིམ་གྲོ་མཛད་པ་སོགས་ཀྱི་སྐོར།
དུས་རིམ་ལེ་ཚན་དང་ཤིང་སྦྲུལ་ལོ་གསར་གྱི་བསྐང་གསོ་བཞུགས་གྲལ་རྣམས་སྔར་འཁྱུད་བཞིན་བཏང་། ཆོས་རྣམ་གྲངས་མང་བ་ཐོབ་པར་ཐོབ་ཡིག་གི་ཟིན་བྲིས་པོ་ཏི་ཆེ་ཚད་ཙམ་ཡོད་རུང་། གང་བྱུང་ནས་བྲིས་པའི་གོ་རིམ་འཚོལ་བདེ་བ་ཞིག་མེད་ཅིང་ཆོས་ཀྱི་རྒྱལ་པོ་འཕགས་པ། ཐམས་ཅད་མཁྱེན་པ་བུ་སྟོན། རྒྱལ་བ་གཉིས་པ་ཙོང་ཁ་པ་རྣམས་ཀྱིས་གཙོས་པའི་རིས་སུ་མ་ཆད་པའི་མཁས་གྲུབ་ཆེན་པོ་ཚོར་གསན་ཡིག་འདུག་པས་ཡིད་ཕྲོགས་མིག་ཡར་
བལྟའི་ཁུལ་གྱི་ཐོབ་ཡིག་ཆོས་ཀྱི་བཞུགས་ཚུལ་གྱི་གོ་རིམ་དང་སྡེ་ཚན་རང་བློས་གང་སྤོབས་ཀྱིས་འབྲི་བའི་འགོ་བཙུགས། ཡིག་མཁན་གོང་དཀར་གནས་གསར་བ་འཇམ་དབྱངས་བསྟན་འཛིན་གྱིས་བྱས།ལོ་འདི་ནང་དུ་གྲུབ་ལ་རེ་ཙམ་བྱུང་རུང་ཁུངས་འཚོལ་བ་དང་ཞིབ་ཏུ་དཔྱོད་དགོས་པ་རྩོམ་པ་དཀྱུས་མ་ལས་རྣམ་གྲངས་མང་བའི་མགོ་འཁྲུགས་པའི་སྟེང་དོན་མེད་ཀྱི་རྣམ་གཡེང་ཆུ་གཉེར་ལྟར་ཟད་པ་མེད་ཅིང་བསོད་ནམས་མ་ཡིན་པའི་འབྲས་བུ་ལན་མང་པོར་བྲོ་འཚལ་བ་སོགས་མི་མཐུན་པའི་ཕྱོགས་སྒོ་དུ་མས་བར་གསེངས་པར་བརྟེན་ཕྱོད་ཤིན་ཏུ་ཆུང་བས་ལྕགས་ཁྱིའི་སྟོན་མཇུག་སྦྱར་བྱང་ཐེབས་པ་ཙམ་ལ་ཡ་མཚན་དུ་བཟུང་། འབའ་དར་ཁན་དཀའ་བཅུས་བདོག་པའི་ཚན་གྲངས་དང་བཅས་གྲ་ཚང་ནས་གྲ་པ་བཅུ་གཉིས་ཀྱིས་རིང་འཚོའི་ཚིགས་བཅད་གསུངས། ཚེ་དབང་འཆི་མེད་དཔལ་སྟེར་ལོ་གྲངས་ཤིག་བསྐུར། བྲག་སྣ་ཆོས་རྗེ་བློ་བཟང་ངག་དབང་དང་དགེ་སློང་འཇམ་དབྱངས་གྲགས་པ་གཉིས་ཀྱིས་བཀའ་བརྒྱད། དགའ་གདོང་སྔགས་རམས་པ་དོན་གྲུབ་རྒྱ་མཚོས་ཕུར་པ། ཆོས་རྗེ་ཁ་རག་པ། སྐྱམ་པ་ངག་དབང་ཆོས་འཛིན། གྲམ་པ་བློ་བཟང་ངག་དབང་། ཡར་འབྲོག་པ་འཕྲིན་ལས་རྒྱ་མཚོ་བཞིས་ཕྱག་རྒྱ་ཟིལ་གནོན་གྱི་གཞི་བསྙེན་ལ་འཇུག་འདོད་པས་སོ་སོར་དམིགས་སྐོར་ཕྱག་ལེན་ཞིབ་ཏུ་བསླབས་པའི་ཟླ་བ་དྲུག་གི་བར་བཅད་རྒྱ་ཤིན་ཏུ་དམ་པ་ཚད་ལྡན་ཁ་སྐོང་གི་སྦྱིན་སྲེག་དང་འབྲེལ་བ་བྱེད་དུ་བཅུག །བོད་འབངས་བདེ་ཐབས་སུ་གསུང་སྒྲོག །ཁྲོ་རོལ། སྨན་བླས་མཚོན་པ་བན་སྔགས་བོན་གསུམ་གྱིས་སྒྲུབ་དགོས་དཀྱུས་ལྟར་དང་འཕར་མ། དབུས་དྭགས་ཀོང་གི་
དགོན་པ་ཚོར་མང་འགྱེད། མི་སེར་ལ་འབྲུ་འགྱེད་སྟར་ཆགས་སུ་གཏོང་བ། དེ་མཚུངས་གཡས་རུ་གཙང་གི་དེབ་རྣམས་ཀྱི་འགོ་བརྗོད། དགའ་ལྡན་འཕེལ་རྒྱས་གླིང་སློབ་དཔོན་པས་བསྐུལ་བའི་སྨོན་ལམ། ཐོན་ལེགས་ལྡན་དབང་པོས་གཡའ་མང་རྡོ་རྗེ་སྤུན་གསུམ་དང་ཇོ་བོ་གཉེར་པ་སེང་གདོང་གི་གསོལ་མཆོད་ཐོན་པ་ཐུ་རིགས་ཡིན་པའི་བརྗོད་བྱ་དང་བཅས་དགོས་ཚུལ་བྱུང་བ་ཡར་རྒྱབ་དང་གདུང་རུས་གཅིག་པའི་ཁུངས་མ་ཚོར་རུང་སྡེ་སྲིད་གཙང་པའི་དཔལ་ལྡན་གཉགས་ཀྱི་གདུང་དང་མཐུན་པར་བྲིས། བསམ་ཡས་ཆོས་སྐྱོང་ཆེན་པོ་དཔོན་བློན་གྱིས་ལུང་བསྟན་གནང་བར་དེ་ལན་དོགས་སེལ་གྱི་ཚིགས་བཅད་དང་བཅས་མཆོད་སྤྲིན་སྟོབ་པར་ཆང་ཁྱིམ་པ་ངག་དབང་མཁྱེན་བརྩེ་བཏང་། ཧོར་ཟླ་གཉིས་པའི་ཚེས་གཉིས་ལ་ཉེ་སྐོར་དུ་འཁོད་པའི་དྲུང་འཁོར་རྣམས་ཀྱིས་བདོག་པའི་སྐྱེས་སྤེལ་ཏེ་ཡུན་དུ་གནས་པའི་རྟེན་འབྲེལ་བསྒྲིགས་ཤིང་ངེད་རང་དང་སྡེ་པ་སོ་སོར་བརྟན་སྡོད་ཀྱི་ཚིགས་བཅད་དགོས་ཚུལ་བྱུང་བ་བྲིས། དེ་ནུབ་ས་གཡོས་མངོན་པ་ཞིག་བྱུང་འདུག་པ་སྤྱིར་ས་གཡོས་ལ་ལེགས་ཉེས་ཀྱི་རྣམ་གྲངས་མང་ཞིང་སངས་རྒྱས་ཀྱི་མཛད་པ་སོགས་ལ་ནི་མདོ་ལས་ལེགས་པར་བཤད་བྱ་སྐལ་བཟང་པ་བསྙེན་པ་རྫོགས་དུས་སྡོམ་པ་ཐོབ་ཅེས་བརྡ་སྤྲད་པ་དང་ལྷན་ཅིག་པར་ས་གཡོས་པས་ས་དང་པོ་ཐོབ་པར་མཁན་པོས་དབུགས་དབྱུང་བར་སྣང་། གང་ལྟར་དེ་ལོ་ཕྱི་ནང་ཀུན་ཏུ་མི་བདེ་བའི་རིགས་མ་བྱུང་བས་རྟེན་འབྲེལ་ལེགས་པར་གཏོགས་འདུག །དྲུང་འཁོར་སྤྱི་བསྡུས་ནས་ངེད་རང་དང་སྡེ་པའི་རིམ་གྲོར་འབྲས་སྤུངས་སུ་མང་ཇ་དྲུག །སེ་རར་གསུམ། རྒྱུད་པ་དང་གྲ་ཚང་ལ་གྲ་ཇ་ཁ་ཤས་ཀྱིས་བསྙེན་བཀུར། ཁྲོ་ཕུ་སློབ་
དཔོན་ངག་དབང་བསྟན་འཛིན་གྱིས་སྙན་ངག་ནས་དྲངས་པའི་ཡི་གེ་བྱུང་བ་དེ་ལན་བསྲིངས། ཐུགས་སྲས་སྤྲུལ་སྐུས་གསུང་སྤྲུལ་ཚུལ་ཁྲིམས་རྡོ་རྗེའི་སྤྲུལ་སྐུ་མྱུར་འབྱོན་གྱི་སྨོན་ལམ་དང་རི་མོ་བ་ཆོས་དབྱིངས་རྒྱ་མཚོས་ཤར་གླིང་ཆོས་སྡེའི་གནས་བཅུ་ཞིག་གསོས་བྱས་པའི་དགེ་བ་བསྔོ་བ་བརྩམས། བྲག་དམར་རོང་བཙན་གྱིས་ལུང་བསྟན་དང་སྤྱན་གཟིགས་དགོས་ཚུལ་བྱུང་བ་ལན་དང་བཅས་ཏེ་ཕུལ། སྒོ་མང་སློབ་དཔོན་འཕྲིན་ལས་རྒྱ་མཚོ་ཨོ་ཆིར་ཐུ་ཐའི་ཇིའི་བླ་མར་འགྲོ་དགོས་པའི་བསླབ་སྟོན་སྡེ་པས་མཛད་སོང་རུང་ཁོང་པའི་ནད་གཅོང་ལོད་གཤིས་མི་ཕེར་བའི་རྒྱུ་མཚན་ཞུས་ནས་དང་དུ་མ་བླངས། ཤ་ཁོག་བོ་ཁོག་རྒྱ་སོག་བོད་འབྲོག་ཚང་མ་འཛོམ་པའི་ལུང་པར་སོང་བླ་མ་བཙན་པོའང་འཆི་མེད་རྡོ་རྗེའི་སྐུ་བརྙེས་པ་སོགས་ཕྱོགས་དེར་སྐྱེ་རྒ་ན་འཆིའི་རིགས་ཡོང་གིན་མེད་འདུག་པས་འདེགས་པའི་རྟ་གོན་དུ་སྒོ་མངས་ཀྱི་ཁུར་བཞག་པར་བརྟེན་ཚེས་བཅུ་ལ་བདེ་ཡངས་སློབ་དཔོན་ངག་དབང་བློ་གྲོས་རྒྱ་མཚོ་སྒོ་མངས་སུ་བསྐོ་བ་དང་དུས་མཚུངས་པར་བདེ་ཡངས་ཀྱི་བླ་མར་འཕྱོས་པ་རབ་འབྱམས་པ་ངག་དབང་བསྟན་འཛིན་བསྐོས་པ་ར་བ་སྟོད་པའི་དཔའ་རྒན་པར་སོང་བས་ཤིང་སྟག་གི་བར་ཆོས་འཕེལ་བར་བྱུང་། བསམ་ཡས་ནས་ཆོས་རྒྱལ་ཆེན་པོ་དང་ལས་མཁན་གཉིས་ཀྱི་ལུང་བསྟན་ལྟར་བོད་ཁམས་བདེ་ཐབས་སུ་ལྷ་ས། བསམ་ཡས། ཁྲ་འབྲུག །ཀ་ཚལ། གཙང་འགྲམ་ལྷ་ཁང་། གྲུམ་པ་རྒྱང་། ལྷོ་བྲག་མཁོ་མཐིང་ལྷ་ཁང་། བྱང་པྲ་དུན་ཙེ། ཀོང་པོ་བུ་ཆུ། ཡང་རྫོང་། མཆིམས་ཕུ། མཁར་ཆུ། ཤེལ་བྲག །འོན་ཕུ་སྟག་ཚང་། ཞོ་སྟོད་གཏེར་སྒྲོམ། ཡེར་པ། ཕུང་པོ་རི་བོ་ཆེ། ཟབ་བུ་ལུང་། རི་བོ་བཀྲ་བཟང་
ཙ་རི་སོགས་ཆོས་རྒྱལ་ཨྱོན་ཆེན་པོའི་གནས་སུམ་ཅུ་སོ་གཅིག་བསྡོམས་པར་བཀའ་འགྱུར་ཚར་ཉིས་བརྒྱ་དང་བཅུ། འབུམ་དཀོན་མཆོག་བརྩེགས་པ། ཟ་མ་ཏོག་གསུམ་སོ་སོར་བརྒྱ་རྩ། བརྒྱད་སྟོང་པ་དང་བསྐལ་བཟང་སྟོང་རྩ་རེ། མཚན་བརྗོད་སུམ་འབུམ། གདུགས་དཀར་ཆིག་འབུམ། སྨན་བླ་བདུན་སྟོང་ཆིག་བརྒྱ། སྒྲོལ་མ་ས་ཡ་གཅིག །ཤེར་སྙིང་ས་ཡ་གཉིས་དང་དགུ་འབུམ། འཇམ་དབྱངས་ཕྱག་རྡོར་གཉིས་ཀྱི་གཟུངས་སོ་སོར་ས་ཡ་གསུམ་རེ། མ་ཎི་དུང་ཕྱུར་གཉིས་བྱེ་བ་གཉིས་ས་ཡ་བཞི། བཛྲ་གུ་རུ་དུང་ཕྱུར་གཅིག་བྱེ་བ་གཅིག་ས་ཡ་གཅིག་སུམ་འབུམ། བསམ་པ་ལྷུན་གྲུབ་མ་བརྒྱ་རྩ། སཱ་ཙྪ་སུམ་འབུམ། ལྷ་ས་བསམ་ཡས་དང་མཐའ་འདུལ་ཡང་འདུལ་གྱི་གཙུག་ལག་ཁང་བརྒྱད་ལ་བརྒྱ་མཆོད། དར་པོ་ཆེ་བཞི། དར་ལྕོག་བཅུ་དྲུག །ཁྲོ་རོལ་བཅོ་ལྔ། འཆར་ཀའི་མདོས། མགོན་པོ་གཡུལ་བཟློག །གུར་མགོན་གྱི་དམར་ཆེན་གཏོར་བཟློག །དགྲ་མནན་ཁག་བཅུ་གཉིས། ཚེ་དཔག་མེད་ལྷ་དགུའི་སྒྲུབ་མཆོད་བཞི། ཞི་བའི་སྦྱིན་སྲེག་ཆིག་སྟོང་ཆིག་བརྒྱ། རྒྱས་པའི་སྦྱིན་སྲེག་ཆིག་བརྒྱ། ཚོགས་བརྒྱ་བཅུ་དྲུག །ཞི་ཁྲོའི་སྐོང་བཤགས་བཅུ་གཉིས། ཕྱུགས་ལུག་བརྒྱ་དང་ཉ་འབུམ་གྱི་སྲོག་བླུ། ཡུལ་སོ་སོར་རྡོ་རྗེ་རྣམ་འཇོམས་ཀྱི་ཁྲུས་གསོལ་རྣམས་བཏང་། ངག་དབང་རབ་བརྟན་དང་ངག་དབང་སྨོན་ལམ་གཉིས་ཆོས་འཁོར་རྒྱལ་དུ་གཏོར་གསོ་ལ་བརྫངས། རྟ་ནག་རྡོ་རྗེ་གདན་ཐམས་ཅད་མཁྱེན་པ་དགེ་འདུན་རྒྱ་མཚོའི་ཡབ་གཞིས་ཀྱི་དགོན་གནས་ཁྱད་ཅན་ཡིན་ཀྱང་སྔར་ཕན་བདག་རྐྱེན་བཞིན་མ་བྱུང་འདུག་པས་འདི་ལོ་ནས་བཟུང་མཐུན་རྐྱེན་དུ་མཁའ་རུའི་ཁལ་བརྒྱ་ཐམ་པ་རེ་ཐོན་པའི་ཤས་ཞིང་། དར་ཁན་
དཀའ་བཅུ་བར་རྒྱལ་མོ་གཞིས་ཀ །རྒྱལ་མོ་སླར་བརྩམ་དྲིལ་བར་དུད་འཛིན་བཅོ་ལྔ། ལག་འབབ་ཆིག་སྟོང་ཕྱེད་སུམ་བརྒྱ། ཤིང་བཟོ་གྲ་ས་བས་ཀུན་དགའ་ར་བ་སོགས་ལ་ཁུར་བསམ་ཆེ་བར་བརྟེན་གདོང་སྣ་བ་ཅན་དུད་འཛིན་བཞི། ཞིང་འཁྱར་ཤས་བཅས་ཀྱི་ལག་ཡོང་ཁལ་ཕྱེད་ཉིས་བརྒྱ། འབྲེང་ཁུད་པའི་རྟོལ་རྡོ་རྗེ་ཚེ་བརྟན་ལ་ལྡིང་དཔོན་གྱི་རྟེན་སོ་དང་གྲུབ་མཐའ་ཁ་ཕྱོགས་མ་ལོག་པར་བར་སྡིངས་ཤར་གྱི་ཁང་པ། ལྷུན་རྩེ་ཆོས་སྡེའི་གྲ་ཁང་། ཐེམ་འཛིན་གཅིག །ལག་ཡོང་ལྔ་བརྒྱ་སྐོར། བསོད་ནམས་དབང་རྒྱལ་ལ་བ་དེ་ཁྲི་སྨད་ཀྱི་ས་རིས་རྒྱ་མི་ཆུང་ཙམ་ཡོད་རུང་ས་ཆ་གཉན་པར་དོགས་པའི་སྡོད་གནས་ལ་སྙེ་ཐང་རྒྱལ་གྲོང་ནས་ནག་ཚང་རྐང་གཅིག་གི་ས་ཞིང་ཁང་། ཆུ་ཤུར་ཨ་རྒྱ་བསྟན་འཛིན་ལ་བོགས་ཁལ་ཉི་ཤུའི་གསར་འཇགས། ཕྱི་འགྲོ་མར་ཁལ་དྲུག་གི་ཆག་ཆ། འོར་སྦུག་པར་སྡེ་པ་བསོད་ནམས་རབ་བརྟན་གྱིས་སེ་ཐོག་ལྕགས་ཕུར་བ་དང་ཤུག་ར་ཁང་གསར་གཉིས་གནང་བ་མ་འཆམ་པར་བརྟེན་ས་ཆ་འོར་སྦུག་པར་འཇགས་པའི་བདག་པོ་གཉིས་ལ་ས་ཚབ་ཞོལ་ནས་སྤྲད། ཧོར་ཟླ་གསུམ་པའི་ཚེས་གཅིག་ལ་དར་མོ་བ་བློ་བཟང་ཆོས་གྲགས་ཀྱིས་ཕྱི་རོལ་ཏུ་རྒྱུད་བཞི་ཡོངས་རྫོགས་རྒྱུགས་ཕུལ་ན་གནང་སྦྱིན་ཞུས་པ་འདྲ་ཞིག་ཡོང་འདུག་པས་སྐལ་བ་བཟང་ཕྱིར་ངེད་རང་གི་འཁྲིས་སུ་བྱེད་ཅེས་རྩ་རྒྱུད་ཡོངས་རྫོགས་དང་རྒྱུད་གཞན་རྣམས་ཤོག་བུ་ཁ་ཡར་ཁ་ཡར་སྐྱུར་མཚམས་ནས་ཡིག་འཕྲེང་གཉིས་གསུམ་རེའི་རྒྱུགས་དང་གཞུང་དོན་ས་བཅད་རྩེད་ཐང་དུ་འདི་ལོ་གྲ་སྐོར་བྱེད་པའི་བཤད་ཕུད་བྱུང་། ཚེས་གསུམ་ལ་ར་བ་སྟོད་པས་ཚན་
གྲངས་དང་བཅས་ཚེར་གསེབ་དགོན་པ་བ་ལུགས་ཀྱི་རྟེན་འབྱུང་མཛད་སོང་བ་ཞལ་འདོན་ཀྱང་ཆད་གྲབས་དང་གཏོར་མ་སོགས་རྣམ་དབྱེ་ཡེ་མི་འདུག །རང་ལ་བབ་ཐོབ་གང་ཡོད་དེ་ག་གནད་ཆེ་བར་སྣང་། བཀྲ་ཤིས་ལྷུན་པོ་ནས་གྲ་ཚང་གསུམ་གྱི་སློབ་དཔོན། བླ་བྲང་གི་སྐུ་ཚབ་རྡོ་རྗེ་རྒྱལ་མཚན། སྡེ་པ་སྲད་པ། རྩེ་ནས། ཇོ་མོ་རྫོང་པ། ལྷུན་གྲུབ་རྩེ་བ་སོགས་ཀྱིས་སྦྱིན་བདག་བྱས་ཚོགས་ཆས་སྟེར་ཆ་འགྱེད་སྤམས་བསྟོད་པ་དང་བཅས་གྲ་ཚང་གིས་རྡུལ་ཚོན་གྱི་དཀྱིལ་འཁོར་ལ་བརྟེན་ནས་ཚེ་ཆོག་བཏང་། བཀྲ་ཤིས་ལྷུན་པོ་བ་ཚོར་ཕྱག་རྡོར་འབྱུང་འདུལ་གྱི་རྗེས་གནང་བྱས། བོ་དོང་མེ་ལོང་དགོན་པ་བ་ཆོས་རྗེ་པདྨ་གར་དབང་དེ་མཁའ་འགྲོ་སེང་གདོང་མས་རྗེས་སུ་བཟུང་ཞིང་གདམས་པ་གནང་བའི་གྲགས་ཆེ། དེའི་སྐུ་སྐྱེ་བསྟན་འཛིན་ངག་དབང་དཔལ་བཟང་མཁྱེན་དཔྱོད་ཡངས་ཤིང་དཔལ་ལྡན་དམག་ཟོར་མའི་གདམས་སྐོར་ལ་མངའ་བརྙེས་པས་འབྲུག་པ་སྤྲུལ་སྐུ་པདྨ་དཀར་པོ་དང་ཁལ་ཁ་ཨ་ས་ལང་སོགས་ལ་མངོན་སྤྱོད་མཛད་པ་རྟགས་ཐོན་བྱུང་བར་སྣང་། ཁོང་པ་མེ་གླང་གཤེགས་ནས་སྐུ་སྐྱེ་ངེད་འདྲོངས་མ་བྱུང་འདུག་རུང་གཡག་སྡེ་ནས་པོ་ཏ་ལའི་ཨར་པོར་འོངས་པའི་འུ་ལག་ཞིག་རྒྱབ་འདེད་པས་རྒྱུག་རྡེག་བཏང་བའི་རྐྱེན་གྱིས་བྲོས་ཏེ་ཆུ་ཤུར་ཕག་གདོང་དུ་བཙུན་པ་བྱས། དེར་རྐུན་མ་བརྐུས་པས་དབྱུང་སྟེ་ས་སྐྱར་ཕྱིན་དེར་ཡང་ལག་མི་གཙང་བ་བྱུང་བར་བརྟེན་སྡོད་མ་ཐུབ་པར་ཧོར་ལ་བྱོན་པའི་འབྲོག་ཁྲི་ལྕམ་གྱི་ཨ་དྲུང་རྒད་བུ་སྡུག་ཆོས་བྱས་པ་ཞིག་གི་གཡོག་ལ་ཕྱིན་མཚམས་ནས་སེམས་ལ་འབྱུང་པོ་ཞུགས་ཉམས་ཀྱིས་པདྨ་གར་དབང་གི་སྐྱེ་བ་ཡིན་ཞེས་གླེང་ཞིང་མིག་འཕྲུལ་ལྟ་བུའི་རྟགས་མཚན་འདྲས་མི་མགོ་བསྐོར་བའི་ཟོག་པོ་དེ་འོངས་པ་ཐོག་མར་དེ་འདྲའི་རྒྱུ་མཚན་མ་
ངེས་པས་ཕྲད་ནའང་ཇ་གྲལ་གྱི་སར་དཔལ་འཁོར་ཆོས་སྡེའི་སློབ་དཔོན་པ་འགའ་ཞིག་ཡོད་པ་ལ་འཕྲོས་པར་གཡེངས་ནས་ཁོ་པ་དང་གཏམ་མ་འདྲེས་པ་རྗེས་སུ་བསམ་ཚེ་བདུད་སྤྲུལ་དེ་རིགས་ལ་བག་ཟོན་ཆུད་པ་རང་གནད་དུ་ཆེ་བར་མངོན། ལྷ་ས་རྡོ་ཁང་དུ་སྤྲུལ་སྐུ་དཔལ་མགོན་ཅན་མཁས་བསྒྲུགས་བཅུས་གསོལ་འདེབས་ཀྱི་རྟེན་མདོ་ཆོག་ལས་ཇི་ལྟར་འབྱུང་བའི་སྨན་བླ་བདེ་གཤེགས་བརྒྱད་ཀྱི་ལྷ་ཚོགས་ཡོངས་སུ་རྫོགས་པ་གཙོ་ཐང་བཟང་པོ་སྤྱོད་པ་ལས་བྱུང་བའི་ཉལ་སྒོམ་དང་འབྲེལ་བའི་བདེ་བ་ཅན་གྱི་ཞིང་བཀོད་དང་བཅས་ཚོན་ཐང་དགུ་དེང་སང་སླ་ཆོས་ཀྱི་ནག་ཐང་ཚོན་ཐོར་རེ་བ་ལས་མེད་པའི་རི་མོ་བ་རྣམས་ཀྱི་ཆང་རིན་དང་མི་འདྲ་བའི་སྨན་ཐང་པའི་ཕྱག་སྲོལ་གྱི་ནག་ཐང་ཚོན་ཐང་ལས་ཀྱང་བཀྲག་ཆེ་བའི་ལུགས་ལྟར་ཡི་དམ་ཆོས་སྐྱོང་གི་སྐུ་བརྙན་ཉེར་མཁོ་བདུན་ཚར་ཟླ་བ་ཕྱེད་བརྒྱད་ཙམ་གྱི་ཁོངས་སུ་གེགས་མེད་དུ་གྲུབ་པའི་སྐྱ་རིས་སྤྱན་འབྱེད་ཀྱི་རབ་གནས་དགེ་སློང་འཇམ་དབྱངས་གྲགས་པས་བྱས། བདེ་གཤེགས་བརྒྱད་ཀྱི་གཙོ་ཐང་རྒྱབ་ཏུ་ཆེ་བརྗོད་སྨོན་ལམ། གཞན་བརྒྱད་པོའི་རྒྱབ་ཏུ་ཚིགས་བཅད་ཤློ་ཀ་རེ་བི་ཝརྟ་དང་བཅས་པ། གོང་དཀར་ཆོས་སྡེ་ནས་རི་མོ་བ་མཁས་པ་ཁ་ཤས་ཀྱིས་བྲག་སྒོ་ཀཀྞིའི་གནམ་རྒྱན་ལ་ངན་སོང་སྦྱོང་རྒྱུད་ཀྱི་དཀྱིལ་འཁོར་བཅུ་གཉིས་དང་དབུས་སུ་ཚེ་དཔག་མེད་ལྷ་དགུའི་དཀྱིལ་འཁོར་རྣམས་བྲིས། དེ་མུས་ནས་འབྲས་སྤུངས་མཚམས་ཁང་གསར་པར་ཕན་བདེ་ལེགས་བཤད་གླིང་པའི་ཞལ་འདོན་དང་མཐུན་པའི་སྔགས་སྐུ་འབྲི་བ་དང་ཤིང་རྩི་གཏོང་བའི་དོ་དམ་འདར་གཞོན་
ངག་དབང་འཕྲིན་ལས་ཀྱིས་བྱས། སྔར་ཟུར་ཁྱབ་བདག་བླ་མའི་དྲུང་དུ་གསར་མ་རྒྱུད་འབུམ་གྱི་པོ་ཏི་ལྔ་ཙམ་ཅིག་ལས་མ་ཐོབ་པས་རྒྱུད་འབུམ་གྱི་ལུང་རྒྱུན་ངོར་ལུགས་ཁུངས་བཙུན་པའི་གཤིས་སྔར་ཐོབ་པ་རྣམས་དང་བརྒྱུད་པ་གཅིག་ཁྱད་ནས་རིགས་ཀུན་བདག་པོ་ཁྲ་ཚང་པ་ཆེན་པོས་གོང་དཀར་རྡོ་རྗེ་གདན་དུ་རབ་འབྱམས་ཆོས་རྗེ་ལ་རྫོགས་པར་གསན་ཏེ་ཚེས་བཅོ་ལྔ་ནས་རྒྱུད་འབུམ་ལྗགས་ལུང་གི་དབུ་བཙུགས། སྟག་རུ་བ་ནོར་བུ་སྤུན་གྱིས་ཡིག་དྲུག་དུང་ཕྱུར་བཙུགས་སྐབས་སྨོན་ལམ་ཚིགས་བཅད་དགོས་ཚུལ་བཞིན་བརྩམས། བསྙེན་རྫོགས་དོན་བཞི་དང་དགེ་ཚུལ་སོ་བདུན་བསྒྲུབས། ཧོར་ཟླ་བཞི་པའི་ཚེས་གསུམ་ལ་ཕན་བདེ་ལེགས་བཤད་གླིང་པས་སྤྱི་སྒེར་གྱི་ཚོགས་ཆས་ཟང་ཟིང་གི་སྐྱེས་དང་བཅས་འཆི་མེད་འོད་སྣང་གི་དཀྱིལ་འཁོར་ལ་བརྟེན་ནས་ཚེ་ཆོག་བཏང་ཞིང་རྟེན་འབྲེལ་བསྒྲིགས། སེ་ཆེན་དབོན་པོས་ཁོ་རང་གི་གོན་པར་བཟོས་པའི་ལྷ་ས་དང་ར་མོ་ཆེར་ཕྱེ་ཕུར་ཕུལ་བའི་ཁ་བྱང་བཀོད། རྒྱ་རག་གི་ཡ་མགུ་མ་མགུ་གཏོར་ཆ་ལྔ་ཚར་ལེགས་པ་ཞིག་གྲ་ཚང་གི་ཉེར་སྤྱད་དུ་སྤྲད། ཚེས་བཅུ་བཅུ་གཅིག་སྐོར་ལ་གྲ་ས་ཕན་ཚུན་གཉིས་སོ་སོ་ནས་དགེ་འདུན་ཉིས་བརྒྱ་ལྷག་བཅས་ཕེབས་པའི་བདོག་པ་གཟེངས་སྟོད་དེ་འཆི་བདག་གི་གཡུལ་ལས་རྒྱལ་བའི་བདེན་པ་བརྗོད། རྒྱལ་བ་སྲས་བཅས་སྤྱན་དྲངས་པར་ཁྲུས་གསོལ་མཛད་པའི་ཕན་ཡོན་གྱིས་ཆར་དབའ་ཐོན་པ་བབས། འཕྱོང་རྒྱས་ལྐོག་པ་ཕུན་ཚོགས་དབང་པོ་དང་དགའ་མགུ་བ་བཀྲ་ཤིས་དབང་ཕྱུག་གཉིས་སྡོམ་གཅོད་པར་བསྡད། ལྐོག་པ་བས་རྒྱ་བོད་ཀྱི་ཡིག་རིགས་
དང་རྩིས་སོགས་ཡོན་ཏན་ལ་བརྩོན་པ་བྱས་པས་ལག་གཡོག་ཏུ་འགྱུར་བ་བྱུང་། བསྙེན་རྫོགས་སོ་བདུན་དང་དགེ་ཚུལ་ང་དྲུག་བསྒྲུབས། གངས་ཅན་ཆོས་འཕེལ་གྱི་མཁན་པོ་སྐྱོང་ང་བ་བློ་བཟང་ཕུན་ཚོགས་བདོག་པ་ཚན་གྲངས་བཅད་རིང་འཚོའི་རྟེན་འབྲེལ་བསྒྲིག་པ་དང་སྦྲགས་ངོས་འཕྲད་ལ་བྱོན། ཉེར་གསུམ་ལ་མཁས་གྲུབ་སྨན་ལུང་པ་ཆེན་པོས་སྐྱེས་དང་བཅས་བསུ་བཟློག་དང་འབྲེལ་བའི་ཚེའི་རྟེན་འབྲེལ་བསྒྲིགས། འཆི་བླུའི་རིམ་གྲོ་མཛད་ནས་བདུད་རྩི་འཁྱིལ་བའི་སྒྲུབ་མཆོད་ལ་ཆུ་བོ་རིར་ཕེབས། རྒྱལ་པོ་འདམ་དུ་འབྱོན་ཁར་ཚེ་དབང་བརྒྱ་རྩ་ཕུལ། རི་བོ་ཆེ་ནས་སྟག་ལུང་ཞབས་དྲུང་མ་ཆེན་གྱི་ཞུ་ལན་ཚིག་ལྷུག་གི་བི་ཝརྟ། གླང་བུ་བ་དགྲ་འདུལ་ཚེ་རིང་གིས་བསྐུལ་བའི་སྨོན་ལམ། འབྲས་སྤུངས་ཀུན་དགའ་ར་བའི་རྟེན་དེབ་ཀྱི་འགོ་བརྗོད་རྣམས་བྲིས།། །