ཤིས་བརྗོད་ཕྱག་བྱ་དང་། དངོས་པོ་ངེས་བསྟན་གྱི་སྒོ་ནས་རྩོམ་པར་དམ་བཅའ་བ།
མཚན་དཔེའི་སྣང་བརྙན་རྟག་པའི་རང་བཞིན་ཚེ་དང་ཡེ་ཤེས་དཔག་ཏུ་མེད་པས་སྐྱོབ་པ་གཞན་ལས་ཁྱད་པར་ཡོངས་བྱས་བདེ་ལྡན་མགོན། །དྲན་པས་མི་ཤིག་རྡོ་རྗེའི་སྲོག་གི་ཀ་བ་ཉེར་འཛུགས་འདྲེན་མཆོག་འོད་མཚན་སྟོང་དུ་འབར་བས་འཇིག་རྟེན་གསུམ་དུ་དགེ་ལེགས་སྩོལ། །ཤིས་པ་བརྗོད་པའི་སྒོ་གཉིས་པ། ཕྲ་རབ་རྡུལ་གྱི་གྲངས་ཀྱིས་མཚོན་མིན་ཐུབ་ཆེན་རྣམས་ཀྱི་མཁྱེན་དཔྱོད་ཕུང་པོའི་རང་གཟུགས་སིནྡྷུ་ཝཱ་རའི་ས་འཛིན་ལ། །རབ་བཀྲ་དབང་པོའི་གཞུ་རིས་ཀྱིས་ཀླུབས་བཅུ་དྲུག་ན་ཚོད་དར་དྲག་འདབ་སྟོང་ལྟེ་བར་ཟླ་བའི་གདན་ལ་འགྱིང་བག་སྐུ། །རྣམ་དཔྱོད་དཔུང་པས་ལེགས་བཏེག་ཤེས་རབ་རལ་གྲིའི་ཟེར་འཕྲེང་སྣང་བས་མི་ཤེས་མུན་པའི་དྲ་བ་མཐའ་དག་ཉེར་གཅོད་པ། །འཇམ་དཔལ་གཞོན་ནུའི་ངང་ཚུལ་འཛིན་ཀྱང་སྟོབས་བཅུ་མངའ་ཀུན་ཡབ་གྱུར་ཆེས་རྒན་ལྷ་ཁྱོད་ཞབས་
སེན་སྙིང་གི་ཟེའུ་འབྲུར་བསྟེན། །ཤིས་པ་བརྗོད་པའི་སྒོ་གསུམ་པ། རྨད་བྱུང་བདེ་ཆེན་བདུད་རྩིར་སྤྱོད་ལས་འཆི་མེད་རོ་བརྒྱའི་བཅུད་ཀྱིས་ཆེར་མྱོས་མཛེས་སྡུག་ལང་ཚོའི་གར་མཁན་མ། །མཚན་བཟང་སྣང་བའི་གཟི་བྱིན་འབུམ་འབར་བླ་མེད་ཡེ་ཤེས་མཆོག་གི་ལུས་ཕྲའི་མི་ཕྱེད་མཛའ་བས་དམ་འཁྱུད་པ། །ཚེ་ཡི་དངོས་པོ་མཐའ་ཀླས་སྦྱིན་མཁས་བསམས་པ་ཙམ་གྱིས་འདོད་པའི་རེ་སྐོང་ཡིད་བཞིན་འཁོར་ལོ་དབང་གི་རྒྱལ། །མཁྱེན་བརྩེ་ནུས་པའི་ཡོན་ཏན་སྡོང་པོ་མ་སྨད་ཐུགས་རྗེའི་གྲིབ་ཏུ་བསིལ་བར་རྟག་ཏུ་བདེ་བའི་ངལ་གསོར་མཛོད། །ཤིས་པ་བརྗོད་པའི་སྒོ་བཞི་པ། ཤེལ་དཀར་རྡུལ་མང་བརྩེགས་པའི་ལྷུན་པོ་ཟླ་གཞོན་གྱིས་བྱུག་མཛེས་སྡུག་ཉམས་ཀྱི་འཇོ་སྒེག་ཅན། །པདྨའི་རྩ་བ་ལྟ་བུར་མཉེན་ལྕུག་ཕྱག་སོར་རྩེ་ན་འགྱུར་ཁུགས་སྟོང་གི་རྒྱུད་མངས་སྒྲ། །འཁྲོལ་དང་ཆབས་གཅིག་ཟབ་དང་རྒྱ་ཆེའི་དམ་པའི་ཆོས་ཀུན་གླུ་རུ་ལེན་པའི་ལུས་ཕྲ་མ། །ཚངས་པའི་བུ་མོ་དབྱངས་ཅན་མ་དེ་མགྲིན་པའི་དབུས་སུ་བཞུགས་ལ་ངག་གི་དངོས་གྲུབ་སྩོལ། །ཤིས་པ་བརྗོད་པའི་སྒོ་ལྔ་པ། ཨུཏྤལ་དམར་པོའི་ཞགས་པ་འཕངས་པས་བརྟན་དང་གཡོ་བའི་ཤེས་བྱའི་ཚོགས། །ཅིག་ཅར་འཆིང་དང་ལྷན་ཅིག་སྤྱན་དཀྱུས་འཁྱོག་པོར་གཟིགས་པའི་ཟུར་མདའ་ཡིས། ཁམས་གསུམ་མ་ལུས་མོད་ལ་འགུགས་མཛད་བཅོམ་ལྡན་ལྷ་མོ་རིག་བྱེད་ནས། །སྲིད་དང་ཞི་བའི་ཕུན་ཚོགས་ཀུན་ལ་དབང་ཐང་བླ་ནས་བླར་འབར་མཛོད། ཕྱག་བྱ་བའི་སྒོ་དང་པོ། ཐབས་དང་ཤེས་རབ་ཟུང་དུ་འཇུག་པའི་འཁོར་འདས་དངོས་ཀུན་ཁམས་ལས་ལེགས་གྲུབ་ཚོགས་གཉིས་རིན་ཆེན་སྐས་འཛེགས་ནས། །ངོ་མཚར་བཀོད་པ་ཞིང་གི་རྡུལ་སྙེད་འབྱམས་སུ་ཀླས་པའི་ཡེ་ཤེས་སྣང་བ་འཛད་མི་ཤེས་
པའི་ཁང་བཟང་དུ། །ལེགས་སོན་མཆོག་ཏུ་མི་འགྱུར་བདེ་བ་ཆེན་པོའི་རང་གཟུགས་དཔལ་ལྡན་སྐུ་བཞིའི་སྒྱུ་འཕྲུལ་དྲ་བའི་ཟློས་གར་མཁན། །སྲིད་གསུམ་འགྲོ་བའི་གཏན་གྱི་སྐྱབས་གཅིག་རྫོགས་པའི་སངས་རྒྱས་ཟས་ གཙང 
་སྲས་པོར་ཡན་ལག་མཆོག་གི་ཕྱག་བྱའོ། །ཕྱག་བྱ་བའི་སྒོ་གཉིས་པ། གང་གི་མགུར་ནས་གཞོམ་དུ་མེད་པ་ནཱ་དའི་སྒྲ་དབྱངས་མི་ཟད་རྒྱན་གྱིས་འཁོར་ལོ་མཛོད། །འགྲོ་བའི་ཁམས་དང་དབང་པོར་འཚམ་པའི་གྲངས་མེད་ཆོས་ཕུང་རྒྱ་མཚོར་ཡོངས་འཁྱིལ་ཀུན་དགའི་དཔྱིད། །སྙན་ཞིང་རབ་འཇེབས་ཚངས་གསུང་ཡན་ལག་དྲུག་ཅུའི་སྨན་གྱིས་སྒྲིབ་གཉིས་ནད་ཀུན་ངེས་འཇོམས་པ། །འཇིག་རྟེན་གསུམ་གྱི་རྒུད་པའི་སྨག་རུམ་མཐར་བསྐྲད་དམ་པའི་ཆོས་ཀྱིས་ཉིན་མོར་བྱེད་ལ་འདུད། །ཕྱག་བྱ་བའི་སྒོ་གསུམ་པ། གཟོད་མ་ཉིད་ནས་སྔོན་གོམས་རིག་གྲོལ་ཡོན་ཏན་མ་ལ་ཡ་ཡི་ནགས་ཀླུང་ནས། །གཞན་ཕན་འཕྲིན་ལས་དྲི་བསུང་ཆེས་དངར་ཕུལ་བྱུང་ཐུགས་རྗེ་རླུང་གིས་ཉེར་དྲངས་ཏེ། །མཐའ་ཀླས་སྐྱེ་དགུའི་ལས་ཉོན་ཚ་རེག་གདུང་འཕྲོག་ཕན་དང་བདེ་བའི་གྲིབ་བསིལ་ཅན། །བསོད་ནམས་བྱེ་བའི་ཞིང་གྱུར་འཕགས་ཚོགས་དགེ་འདུན་ཙན་དན་ལྗོན་པ་གཙུག་ན་མཛེས། །ཕྱག་བྱ་བའི་སྒོ་བཞི་པ། གངས་ཅན་ནོར་འཛིན་དཔལ་མོའི་ལྟེ་བར་དགའ་སྐྱིད་སྡོང་པོ་དར་དྲག་ལེགས་སྤེལ་ཆོས་རྒྱལ་མེས་དཔོན་རིམ་བྱོན་དང་། །བསླབ་གསུམ་དེ་དོན་བརྗོད་བྱར་སྟོན་པའི་རྒྱལ་བའི་གསུང་རབ་ཡལ་འདབ་རྒྱས་མཛད་གནས་ལྔ་མཁྱེན་པ་ཞི་བ་འཚོ། །ལྷ་སྲིན་གདུག་པའི་ཚ་ངར་དཔལ་བཅག་ཐེག་དགུའི་བགྲོད་ལམ་ཚུལ་བཞིན་སྟོན་མཁས་སངས་རྒྱས་གཉིས་པ་ཐོད་ཕྲེང་རྩལ། །པདྨའི་ངང་ཚུལ་རྗེ་འབངས་ཉི་ཤུ་རྩ་ལྔར་གྲགས་སོགས་གྲུབ་བརྙེས་ལོ་པཎ་རྣམ་པར་ཐར་ལ་སྙིང་
ནས་རང་། །ཕྱག་བྱ་བའི་སྒོ་ལྔ་པ། དཱི་པཾ་ཀཱ་རའི་ཐུགས་རྗེའི་འོད་ཀྱིས་ལྷ་ཆོས་བདུན་ལྡན་འདབ་བརྒྱ་ཡོངས་བཞད་རོ་བདའི་བཅུད། །ལེགས་མྱངས་འབྲོམ་སྟོན་སྐུ་མཆེད་རྣམ་གསུམ་གླང་ཤར་ལ་སོགས་བཀའ་གདམས་བཤེས་གཉེན་བྷྲ་མ་རཿ། །རིན་བཟང་འབྲོག་མི་མར་མལ་ས་རྔོག་ཤོང་དཔང་བུ་སོགས་མཁས་གྲུབ་རིན་ཆེན་ཕྲེང་མཛེས་ཀྱི། །མ་སྨད་རྟོགས་བརྗོད་དབྱར་གྱི་རྔ་གསང་ཐོས་པའི་མོད་ལ་ཡིད་ཀྱི་རྨ་བྱ་གར་གྱིས་བྲེལ། །ཕྱག་བྱ་བའི་སྒོ་དྲུག་པ། ཐུབ་བསྟན་ཆོས་བཟང་འདུན་ས་ཆེན་པོར་བློ་གསལ་མཁས་མང་ཉེ་དབང་དབུས། །རྣམ་དཔྱོད་གསེར་གྱི་དྲ་བས་གདོང་གཡོགས་འཆད་རྩོད་རྩོམ་པའི་ས་སྲུང་སྟེང་། །ཆོས་ཀུན་གཟིགས་པའི་སྤྱན་སྟོང་རབ་ལྡན་མང་ཐོས་ནོར་བུའི་ཅོད་པན་འཆང་། །ཀུན་མཁྱེན་བླ་མ་བཙོང་ཁ་པ་ཞེས་སྔོན་མེད་ལྷ་དབང་གཙུག་ན་རྒྱལ། །ཕྱག་བྱ་བའི་སྒོ་བདུན་པ། རྟོག་གེ་ཐ་སྙད་རིག་པ་གཅིག་སྟོན་ནས། །ཟབ་རྒྱས་སྨིན་གྲོལ་ཆོས་ཀྱི་ནམ་མཁའ་མཛོད། །སྒོ་འབྱེད་སློབ་དཔོན་ཚོགས་རྣམས་རྒྱལ་བ་དང་། །དེ་སྲས་སྤྲུལ་པའི་ངོ་བོ་དང་བས་འདུད།། དངོས་པོ་ངེས་བསྟན་གྱི་སྒོ། སྔོན་རབས་དམ་པའི་ངང་ཚུལ་ཟླ་ཤེལ་ལ། །བཟང་པོའི་རི་བོང་སྣང་བརྙན་བཀྲ་བ་དང་། །དཀར་ནག་འདྲེས་མའི་རྡོ་ཐལ་གྱིས་བྱུགས་ངོས། །ཀུན་རྟོག་རི་མོར་འབྲི་བ་ཅི་ཞིག་མཚུངས། །དེང་དུས་སྒོ་གསུམ་མི་དགེའི་དོར་ར་ན། །གྱ་གྱུའི་གར་མཁན་ཚུལ་འཆོས་གོས་གྱོན་པའི། །ཆེར་རློམ་མང་པོའི་རྣམ་ཐར་འཁྱོག་པོའི་ཚིག །མཐོང་ཚེ་དཔྱོད་ལྡན་ཕལ་ཆེར་བསྟིང་ཚིག་སྨྲ། །སྤངས་རྟོགས་ཡོན་ཏན་ནོར་བུས་གང་མིན་ཡང་། །དུག་གསུམ་བརླང་པོའི་ཆུ་སྲིན་མི་གྱུ་བར། །དག་པའི་སྤྱོད་ཚུལ་ཡོལ་མེད་རླབས་འཕྲེང་ཅན། །རྟོགས་བརྗོད་ཟླ་བའི་མ་མ་
དེང་འདིར་བསྐྲུན། །སྒྲོ་བཏགས་གླེང་མོའི་མི་
གཙང ་ཕུང་པོའི་ལུས། །སྒྲ་དོན་སྙན་འགྱུར་རིན་ཆེན་རྒྱན་སྤུད་ནས། །རྫུན་གྱི་གར་བསྒྱུར་ལྕེ་བདེའི་བརྗོད་པ་ལ། །སྙིང་པོར་རློམ་ཡང་ཨེ་ར་ཎ་ཡི་འབྲས། །གཞན་ངོར་བཟང་བརྫུའི་སྤྲུལ་པའི་རི་དྭགས་ཀྱིས། །འགྲེང་མང་ལོག་པའི་ཐང་ལ་ཉེར་ཁྲིད་ནས། །ཕན་བདེའི་སཱི་ཏ་འཕྲོག་པའི་ཆོ་ག་དག །རྫོགས་པའི་བཤེས་གཉེན་འབོད་སྒྲོགས་མང་ཞིག་མཆིས། །དང་པོར་བརྡུངས་པའི་འཁྱོག་ཚིག་རྒྱུད་མངས་སྒྲས། །འཁོར་བའི་རྒྱ་མཚོར་འགྲོ་བའི་བདེ་སྐྱིད་གྲུ། །བཤིག་ཀྱང་གཞན་ལ་ཁ་འཕངས་གཡོ་ཟོལ་མཁན། །དམ་པར་རློམ་འགས་ཁྱབ་འཇུག་ཁེངས་པ་ཕྲོགས། །མ་དག་བཅོས་མའི་ར་གན་ལྷད་ཀྱི་ཟོང་། །འཁྲུལ་མེད་ཡང་དག་ཆོས་ཀྱི་གསེར་སྦྱངས་ཞེས། །རྨོངས་པའི་ཚོང་འདུས་བཞི་མདོར་བྲིན་མཐོང་ཚེ། །ཐུབ་པའི་བསྟན་ཡང་རྟགས་ཙམ་འཛིན་པའི་དུས། །ཐོས་བསམ་སྒོམ་པའི་དཀའ་ཐུབ་རབ་ཞིག་ཀྱང་། །ངན་སྤྱོད་དུག་རླངས་འཁྱིལ་བའི་མགྲིན་པ་ལ། །བསྔགས་བརྗོད་ཡུལ་དུ་བྱེད་པའི་ཆེན་པོ་འགའ། །གཙུག་ན་ཟླ་བ་ས་འདིར་འོངས་པ་བཞིན། །ཤེས་རབ་རི་དྭགས་རྟུལ་པོའི་རྒྱར་ཆུད་པས། །མཁས་གྲུབ་སྤྱོད་ཚུལ་སྲོག་དང་ཉེར་བྲལ་ཡང་། །སྟོབས་འབྱོར་ཤ་ཡིས་གཞན་སྣང་བསྒྱུར་ནུས་པའི། །ཤི་ལུས་གསོན་པའི་ཐལ་དུ་བསྒྲིག་འདི་ཅི། །གྲགས་འདོད་ཉི་ཟེར་གྱིས་ཕྱེ་པདྨའི་སྒོར། །མུ་ཅོར་བུང་བའི་སྒྲ་དབྱངས་སྒྲོག་པ་ལ། །མངོན་ཤེས་ཟེའུ་འབྲུ་རྒོད་པའི་གཡུར་ཟ་མཁན། །རྫུན་ཕུགས་བགྲང་བྱའི་མཚན་མོའི་ཐུན་མཐར་རྡིབ། །གཞོན་ནུའི་ལང་ཚོ་དར་བའི་དཔྱིད་ཀྱི་དུས། །ཤེས་བྱའི་ཕ་མཐར་གོམས་པའི་ས་བོན་དང་། །མ་བཏབ་ན་ཚོད་སྨིན་པའི་སྟོན་གྱི་ཚེ། །གྲུབ་བརྙེས་འབྲས་
བུར་སྤྱོད་དེ་དོན་གྱིས་སྟོངས། །མང་ཐོས་བཅུད་དང་མི་ལྡན་བུམ་པ་ལ། །བསྟོད་བསྔགས་པ་ཉྩ་ལི་ཀའི་མགུལ་ཆིངས་ཅན། །མཛེས་ཆོས་རྨ་བྱའི་མདོངས་ཀྱིས་ཁ་བརྒྱན་པ། །རིང་པོར་ཚར་དུ་བསྒྲིགས་འདིའི་བྱེད་པོ་སུ། །ཀྱེ་མ་སྔོན་བྱོན་དམ་པའི་རྣམ་ཐར་དང་། །དེང་དུས་སྐྱེ་བོའི་བག་ཡངས་སྤྱོད་ཚུལ་རྣམས། །མ་འདྲེས་རླུང་གི་རྒྱལ་མཚན་ལྟར་མཐོང་ཚེ། །དགའ་དང་སྐྱོ་བའི་ཀུན་རྟོག་འགྲན་པ་བཞིན། །སྔོན་གོམས་མི་དགེའི་ས་འཛིན་མཐོན་པོ་ནས། །དུག་གསུམ་བག་ཆགས་ཆུ་བོ་དྲག་འབབ་པ། །འདིར་སྣང་དགེ་ལ་གཞོལ་པ་ཕྲ་མོའི་བློའི། །རགས་ཀྱིས་གྱེན་དུ་ལྡོག་ནུས་ག་ལ་ཡིན། །དེ་ལྟ་ན་ཡང་ལྔ་བརྒྱའི་ནགས་ཀླུང་ཁྲོད། །སྐྱེས་མོད་གཞན་ལ་འཚེ་བ་ལྷུར་ལེན་པའི། །མ་རུངས་ཡལ་ག་འཁྱོག་པོ་མི་ལྡན་པ། ཁོ་བོའི་རང་བཞིན་འཁྲི་ཤིང་གཞོན་ནུ་འདྲ། །དགེ་སྡིག་ལས་ཀྱིས་ཐགས་སུ་ཉེར་བཏགས་པའི། །ཚེ་འདིའི་ཟ་འོག་བདེ་སྡུག་རི་མོ་ཅན། །མཐའ་དག་ཡི་གེར་འབྲི་ན་ཚངས་པ་ཡང་། །ངལ་བའི་དཀའ་ཐུབ་བསྟེན་ལས་གཞན་དུ་ཅི། །འོན་ཀྱང་རྣམ་དཀར་ལས་ཀྱི་འབྲུག་སྒྲ་ཡིས། །རབ་བསྐུལ་ཐོས་བསམ་སྒོམ་པའི་གཙུག་ཕུད་ཅན། །སྤྱོད་ཚུལ་ལེགས་པའི་ཆ་ཀུན་བསགས་པའི་སྒྲོ། །རྣམ་བཀྲ་དཔྱོད་ལྡན་གཟིགས་མོར་འདི་ན་མཚར། །རང་ལ་ལྐོག་ཏུ་མ་གྱུར་བློ་ཡི་མཚོར། །རང་གི་ངང་ཚུལ་གཟུགས་བརྙན་འཆར་བཞིན་དུ། །རང་ཉིད་ཟོག་པོར་གཏོང་བའི་རྙོག་མ་ཅན། །རང་འདོད་ཕུགས་འཚངས་རྣམས་དང་འདི་མི་འདྲ། །མེད་ལ་ཡོད་དང་ཡོད་ལ་མེད་པ་སོགས། །གཡོ་སྒྱུའི་ཚུལ་ལ་དམ་པ་རྣམས་ཀྱང་བྲལ། །དྲང་པོའི་ཉག་ཕྲན་རྒྱུད་ལས་འཕོས་པ་ཡི། །ཚད་མའི་གཏམ་གྱི་སྲིད་
སྒྲུབ་འདི་ན་མཆིས། །ཨེ་མ་འདི་སྣང་མེ་ལོང་དུ། །སྣ་ཚོགས་སྐྱོན་དང་ཡོན་ཏན་གཟུགས། །ཅི་ཡང་འཆར་བའི་གླེགས་བམ་འདི། །ཀུན་གྱི་གཟིགས་མོར་མཚར་བའི་གནས། །རིགས་རུས་འཆི་མེད་དགའ་ཚལ་ན། །དལ་བརྒྱད་འབྱོར་བཅུ་ལྡན་པའི་ཤིང་། །སོ་ཐར་ཁྲིམས་ཀྱི་རྩ་བ་བརྟན། །གཞན་ཕན་ལྷག་བསམ་ཡལ་ག་ཅན། །གནས་ལྔ་རིག་པའི་ལོ་འདབ་རྒྱས། །ཐོས་བསམ་སྒོམ་པའི་མེ་ཏོག་བཀྲ། །ཚུལ་བཞིན་བསྒོམས་པའི་འབྲས་བུ་སྨིན། །དོན་ཀུན་གྲུབ་པའི་དཔག་བསམ་དབང་། །དེ་ཕྱིར་ཁོ་བོའི་རྟོགས་བརྗོད་ལ། །ལྟ་བར་དྲང་སྲོང་ཕུར་བུ་དང་། །གཞོན་ནུ་མདོངས་མཐའ་ལ་ཞོན་ཏེ། །ལྷ་ལམ་ངོས་སུ་ཡང་ཡང་རྒྱུ། །གསེར་མངལ་ཐིག་ལེ་མཆོག་མ་ལ། །གཟིགས་པའི་ཟོལ་གྱིས་ཞལ་བཞི་སྤྲུལ། །དྲང་སྲོང་དམོད་པར་སྒྲོ་བཏགས་ཏེ། །བརྒྱ་བྱིན་འདྲེན་བྱེད་སྟོང་ཕྲག་བགྲད། །ཕུན་ཚོགས་བཀྲ་ཤིས་སྣང་བའི་འོད། །སྟེར་བྱེད་ཉི་མ་ཟླ་བ་ཟུང་། །རླུང་གི་ཤིང་རྟས་ཉེར་དྲངས་ནས། །གཟིགས་མོར་ཕྱོགས་འདིར་ཡང་ཡང་འཁོར། །དེས་ན་དོན་གྱི་ཤ་ཚུགས་ཀུན། །ངོ་མཚར་གཏམ་གྱི་དུ་ཀཱུ་ལས། །མ་བསྒྲིབས་བློ་གསལ་མི་དབང་གིས། །གསལ་བར་མཐོང་ངོ་ཤེས་ལྡན་ཀྱེ། །ཞེས་ཚིགས་སུ་བཅད་པ་ཏམྦུ་རའི་རྒྱུད་ལས་ཉེ་བར་དྲངས་པའི་དབྱངས་ཀྱིས་སྔུན་བསུས་ཏེ།