སྤྲུལ་བརྒྱུད་རིམ་བྱོན་རྣམས་མདོ་རྒྱུད་དུ་མ་ནས་ལུང་བསྟན་ཚུལ་སོགས།
དེའང་གླེགས་བམ་རིན་པོ་ཆེའི་དཀོན་མཆོག་འབངས་ཀྱི་སྐྱེས་རབས་ལས། དེང་སང་ཨྱོན་ཡུལ་དུ་ཚོགས། །མ་འོངས་གངས་རིའི་ཁྲོད་དུ་འདུ། །ཞེས་རྒྱལ་སྲས་ཕྱག་ན་པདྨའི་རྣམ་པར་སྤྲུལ་པ་འགྲོ་བ་རྣམས་ཀྱི་ཁམས་དང་དབང་པོར་འཚམ་པར་སྟོན་པས་ཚད་གཟུང་བའི་ཡུལ་ལས་འདས་ནའང་བྱེ་བྲག་ཨྱོན་གྱི་ཡུལ་དུ་བླ་མ་དྲི་མ་མེད་པ་དང་མཁའ་འགྲོ་མ་
གསང་བ་ཡེ་ཤེས་སོགས་དཔའ་བོ་མཁའ་འགྲོའི་ཚོགས་ཆེན་པོ་ཆབས་གཅིག་ཏུ་བཞུགས་པ་དེར་ཆོས་རྒྱལ་དཀོན་མཆོག་འབངས་ཀྱང་བྱོན་ཞིང་མ་འོངས་པ་ན་དེ་དག་རྣམས་བོད་གངས་ཅན་གྱི་ལྗོངས་སུ་སྨོན་ལམ་གྱིས་འབྲེལ་བས་འདུས་པར་གསུངས་ལ། འདུ་ཚུལ་ནི། སྤྱིར་སེམས་ཅན་རྣམས་ཀྱི་མགོན་པོ་ཡིན། །སྒོས་གངས་རིའི་ཁྲོད་དུ་རྒྱལ་སྲིད་སྐྱོང་། །ཞེས་རྗེ་གཉའ་ཁྲི་བཙན་པོ་སོགས་རྒྱལ་བློན་བྱང་ཆུབ་སེམས་དཔའ་མང་པོ་དང་ལོ་པཎ་རྣལ་འབྱོར་པ་རབ་ཏུ་བྱུང་བས་མཚོན་པའི་སྤྲུལ་པ་མཆོག་དམན་མཐའ་ཀླས་པ་རིམ་གྱིས་འབྱོན་པར་གསུངས་ཤིང་། ཁྱད་པར་བླ་མ་དྲི་མ་མེད་པ་མཚོ་སྐྱེས་རྡོ་རྗེ་པདྨ་འབྱུང་གནས་ཀྱིས་རྗེ་དཀོན་མཆོག་འབངས་ལུང་བསྟན་པ་དང་བྱིན་གྱིས་བརླབས། དེ་དག་གི་སྐབས་མཁའ་འགྲོ་མ་གསང་བ་ཡེ་ཤེས་ཀྱི་གསུང་ལས།རྗེ་དཀོན་མཆོག་འབངས་འདི་བོད་དུ་འགྲོ། །བོད་གློ་བུར་རྒྱལ་པོ་ཆོས་ལ་སྤྱོད། །བོད་མཐའ་འཁོབ་ཡུལ་རྣམས་འདུལ་བར་བྱེད། །ང་རྒྱ་ནག་ཡུལ་ནས་དེས་དྲངས་ཏེ། །མི་ཁོ་ལ་ཉོན་མོངས་མི་མངའ་ཡང་། །ང་འཇིག་རྟེན་སྒྲོལ་མ་ཟག་མེད་ལ། །མི་ཁོ་ཡི་བཙུན་མོ་བྱེད་དོ་སྐད། །རྒྱ་ནག་པོའི་མཆོད་གནས་བོད་དུ་འདྲེན། །བོད་ཡུལ་གྱི་དབུས་སུ་བྱེད་དོ་སྐད། །ཅེས་བྱུང་བ་ལྟར་དཀོན་མཆོག་འབངས་ཆོས་སྐྱོང་བའི་རྒྱལ་པོ་སྲོང་བཙན་སྒམ་པོར་སྐྱེ་བ་བཞེས་པ་དང་དེ་ཉིད་རང་གི་དབོན་སྲས་ཁྲི་སྲོང་ལྡེའུ་བཙན་དང་རལ་པ་ཅན་སོགས་དུ་མའི་སྲིད་པ་བཟུང་པ་ནི། ལྷའི་རྒྱལ་པོའི་སྐྱེས་རབས་ལས། །རིགས་གསུམ་མགོན་པོས་ང་བསྐུལ་བའི། །ང་ལ་རིགས་གསུམ་མགོན་ཞེས་གྲགས། །ཀུན་ཏུ་བཟང་དང་སྒྲིབ་པ་སེལ། །ང་བསྐུལ་རྒྱལ་པོར་བསྟན་གྱུར་
ན། །ཅི་སྟེ་ང་ལ་དེར་མི་སྨྲ། །ཞེས་ལུང་བསྟན་གསལ་བར་བྱུང་ལ། འབྲོམ་རྒྱལ་བའི་འབྱུང་གནས་ནི། མེས་དབོན་དེ་དག་གི་རྣམ་འཕྲུལ་དུ་གདོན་མི་ཟ་བའི་ཁུངས། གླེགས་བམ་ལེའུ་བཅུ་དགུ་པར། ད་ཧྲིལ་ཏེ་སྒྲིལ་ན་སྔོན་གྱི་རྒྱལ་བློན་བྱང་ཆུབ་སེམས་དཔའ་དེ་དག་རིགས་གསུམ་མགོན་པོའི་སྤྲུལ་པར་གྲགས་ཏེ་རལ་པ་ཅན་ལ་སོགས་པ་གཅིག་གཉིས་རིགས་གཞན་གཉིས་ཀྱི་རིགས་ཡིན་ལ། ཕལ་ཆེ་བ་ནི་མགོན་པོ་སྤྱན་རས་གཟིགས་ཀྱི་སྤྲུལ་པ་རྒྱལ་བའི་འབྱུང་གནས་ཉིད་ཡིན་ལ། མཁན་བརྒྱུད་བྱང་ཆུབ་སེམས་དཔའ་དེ་རྣམས་ནི་ང་ཁོ་ན་ཡིན་གྱི་གཞན་དུ་མ་སེམས་ཤིག །ཅེས་པའི་ལུང་རིགས་ཀྱིས་གྲུབ་ཅིང་། འབྲོམ་སྟོན་ཆོས་ཀྱི་རྒྱལ་པོ་ཉིད་ནས་སྐྱེ་བ་རིམ་བརྒྱུད་དང་དུས་མཚུངས་སུ་བྱོན་པ། ཁ་ཆེ་དགོན་པ་བ། རྗེ་བཙུན་ས་སྐྱ་པ་ཆེན་པོ་སྙིང་པོའི་ཞབས། དེ་དག་གི་རྗེས་སུ་དུས་མཚུངས་པར་བྱུང་བ། འགྲོ་མགོན་གཡུ་བྲག་པ། མངའ་བདག་ཉང་རལ་པ་ཅན། ང་ལས་ཅུང་ཟད་ཕྱི་བར་ལྷ་རྗེ་དགེ་བ་འབུམ་སོགས་བྱོན་པ་རྣམས་ཐུགས་བརྒྱུད་གཅིག་པ་ལས་སྐྱེ་བ་རིམ་བརྒྱུད་ཀྱི་འཁྲུངས་རབས་མིན་པ་རྣམ་ཐར་ཆོས་འབྱུང་ལོ་རྒྱུས་ཀྱིས་ཤེས་ནུས། བལ་ཡུལ་དུ་པཎྜིཏ་པདྨ་བཛྲ་ཞེས་པར་འཁྲུངས་པའི་སྐྱེ་བ་རྗེས་མ་ནི་ཐམས་ཅད་མཁྱེན་པ་དགེ་འདུན་གྲུབ་ཡིན་པར་རང་ཉིད་ཀྱིས་ཞལ་གྱིས་འཆེས་ཤིང་། རྗེ་དགེ་འདུན་གྲུབ་གོང་དུ་བཤད་པ་དེ་དག་གི་སྐྱེས་རབས་ཀྱི་ཕྲེང་བར་འབྱུང་བའི་རྒྱུ་མཚན་གླེགས་བམ་གྱི་ཐོར་བུའི་ཚོམས་ལས།གལ་ཏེ་གཞན་སྣང་མ་དག་པས། །འཕེལ་འགྲིབ་འབྱུང་བ་ལྟར་མཐོང་ཡང་། །ཤར་ནས་ཟླ་བའི་དཀྱིལ་འཁོར་མཛེས། །ཞུན་མའི་ཁྱེའུས་སྤྲུལ་པ་འགྱེད། །འཇིག་རྟེན་ཐམས་ཅད་གསལ་
བྱེད་ཅིང་། །ལྷ་དག་བཅས་པ་གསལ་བར་བྱེད། །ཅེས་གསུངས་པའི་ཟླ་བའི་དཀྱིལ་འཁོར་ནི་རྒྱལ་བ་ཙོང་ཁ་པ་ཆེན་པོ་དང་ཞུན་མའི་ཁྱེའུ་ནི་སྤྱན་རས་གཟིགས་ཏེ། དེའི་སྤྲུལ་བ་རྗེ་དགེ་འདུན་གྲུབ་ཏུ་གསལ་བར་བསྟན་ཅིང་། དཀོན་མཆོག་འབངས་ཀྱི་སྐྱེས་རབས་ལས། །ང་ཁྲིམས་ལྡན་མཁན་པོའི་སྐུར་སྟོན་ཀྱང་། །ང་ཐུགས་རྗེ་ཆེན་པོ་སུ་ཡིས་ཤེས། །ཞེས་པའང་ཐེ་ཚོམ་གྱི་ཡུལ་དུ་མ་གྱུར་ཅིང་། ཕ་ཆོས་ཀྱི་ལུང་བསྟན་ཆེན་མོ་ལས། ཆོས་དགེ་བ་བཅུ་ཡི་ཁྱད་འཕགས་པའི། །གླིང་ཕུན་སུམ་ཚོགས་པ་འཛམ་བུའི་གླིང་། །སྒོས་ཉང་ཤབ་ས་ཡི་ལྟེ་བ་ཡིན། །ས་དེ་ཡི་ནང་ནས་ཁྱད་འཕགས་པ། །མཐོ་བཀྲ་ཤིས་བརྟན་པ་ལྷུན་པོའི་འདབས། །ནོར་པདྨ་རཱ་ག་ལྟ་བུའི་མདུན། །གནས་གཡེང་མེད་བསམ་གཏན་འཕེལ་པ་ཡི། །དཔལ་ཆོས་ཀྱི་ཐང་ཞེས་གྲགས་པ་འབྱུང་། །ཞེས་པས་ཀྱང་གནས་དང་གང་ཟག་ཤིན་ཏུ་ངོ་འཕྲོད་པ་ཡིན། དེའི་འཕྲོས་ལས། ང་གནས་ལྔ་མཁྱེན་པའི་པཎྜི་ཏ། །རྒྱུད་གང་ལ་གང་ཕན་སྟོན་གྱུར་ཀྱང་། །མི་མཁས་པར་རློམ་ལ་ཅི་བྱར་ཡོད། །ཅེས་པཎ་ཆེན་དགེ་འདུན་རྒྱ་མཚོ་དང་། རི་གངས་ཀྱི་ར་བས་བསྐོར་བ་ཡི། །ཐང་སེར་པོ་གསེར་གྱི་མཎྜལ་ལ། །རྩིབས་མུ་ཁྱུད་སྟོང་གིས་རབ་བརྒྱན་ཏེ། །རྗེ་རྒྱལ་བ་སྟོང་གིས་བྱིན་བརླབས་པའི། །གསེར་དྲི་མ་མེད་པའི་མཆོད་རྟེན་ཡོད། །ངེད་མཁའ་འགྲོ་འབུམ་གྱི་དགའ་བའི་ཚལ། །ཉམས་བག་ཕེབས་དགའ་བར་སྐྱོང་བའི་ས། །ཞེས་རྒྱལ་མེ་ཏོག་ཐང་བསྟན་ལ། དེ་ཡང་རྭ་སྒྲེང་གི་ཤུག་པ་ལ་ཤུན་པ་རིམ་པ་བདུན་བྱུང་བ་རྒྱལ་བའི་འབྱུང་གནས་ཀྱི་སྤྲུལ་པ་རིམ་པ་བདུན་འབྱུང་བར་གསུངས་ཤིང་། ཐམས་ཅད་མཁྱེན་པ་
དགེ་འདུན་རྒྱ་མཚོའི་གསུང་ལས།སྐྱེ་བ་བདུན་དུ་འགྲོ་དོན་ལེགས་བྱས་ནས། །ཟག་མེད་ཆོས་ཀྱི་དབྱིངས་སུ་སྡུ་བར་བྱེད། །ང་ལ་དད་ཅིང་མོས་པའི་སྐྱེ་བོ་རྣམས། །དགའ་ལྡན་གནས་སུ་སྐྱེ་བར་གདོན་མི་ཟ། །ཞེས་ཞལ་གྱིས་བཞེས་པ་ལྟར། །ཐམས་ཅད་མཁྱེན་པ་བསོད་ནམས་རྒྱ་མཚོ་ནི། མི་ང་ཡི་སྤྲུལ་པ་ཕྱོགས་རིས་མེད། །ཆོས་ལམ་དུ་འགྲོ་ན་བསྒྲུབ་བྱ་ཡིན། །ཞེས་དང་། ཐམས་ཅད་མཁྱེན་པ་ཡོན་ཏན་རྒྱ་མཚོ་བདེ་ཆེན་ཆོས་ཀྱི་རྒྱལ་པོ་ནི། མི་ང་ཡི་བསྟན་པ་བཤིག་པ་རྣམས། །ཚེ་འདི་ལ་ཚེ་སྲོག་ཐུང་ནའང་། །མི་ང་ཡི་ལ་ཡོགས་ཤེས་མི་འགྱུར། །ཞེས་ལུང་གིས་ཟིན་པ་ཡན་ཆད་ནི་སོམ་ཉི་དང་བྲལ་བའི་ལུང་རིགས་ཀྱིས་སྒྲུབ་ནུས་པར་གོར་མ་ཆག །དེ་རྗེས་གོང་མའི་གདན་སར་མགྲིན་བཟང་གཟིག་ཤུན་གྱོན་པའམ་སྤུ་མེད་ཀོ་གདན་གྱི་ཚུལ་དུ་ངེད་རང་བསྡད་པ་ནི། རྒྱ་གར་དང་མི་འདྲ་བའི་བོད་ཡུལ་འདིར་བླ་མ་ལ་གདུང་བརྒྱུད་དང་སྐྱེ་བས་འཛིན་པ་གཉིས་སུ་འདུག་པའི་སྔ་མ་ནི་ལུགས་གཉིས་ཀའི་ཡོན་ཏན་རྣམས་ཕ་ཤུལ་བུ་འཇགས་ལྟ་བུའི་བར་གསེང་མེད་ཅིང་བུ་སློབ་འཁོར་འབངས་རྣམས་ཀྱང་བག་ཕེབས་པར་སྣང་ལ། ཕྱི་མ་ནི་གོང་མ་ལས་གོ་ལྡོག་ཅིང་ཤི་གསོན་གྱི་དཀོར་ནག་སོགས་ཟང་ཟིང་གི་འབུལ་པ་མ་ཎི་བའི་རྟེན་སྒམ་ལྟར་ལེན་རྒྱུ་རྣམས་རྒྱུན་ཆད་པའི་དབང་གིས་རྗེས་འཇུག་ཚོ་བླ་མ་གྲོངས་པ་ལས་སྐྱེ་བ་མ་བྱུང་བ་སེམས་ལས་ཆེ་ཞིང་དེ་གའི་རྦ་ཚད་ཀྱིས་ཡུལ་གྲུ་ཆེ་གེ་མོ་ན་བྱིས་པ་ཕ་མ་སོགས་ཀྱིས་གཡོ་སྒྱུས་བཟོས་པ་འདྲ་ལ་ཚམ་ཚོམ་མེད་པར་བདག་ཏུ་བཟུང་བའི་བཞུགས་གྲལ་ལ་ཆུད་ངེས་ཀྱི་ཐག་ཁྲ་ལ་སྦྲུལ་དུ་མཐོང་བ་ལྟར་སྐྱེ་བོ་དུ་མའི་རི་བོང་ཅལ་སྒྲོག་ལ་བརྟེན་ཝ་སྐྱེས་སེང་
གེར་བརྫུ་བའི་སྣང་ཚུལ་ཁོ་ན་སྟེ། རྒྱུ་མཚན་གོང་དུ་སྨོས་པ་རྣམས་ཀྱི་རྣམ་ཐར་ནི་འཕགས་ཆེན་དམ་པའི་ངང་ཚུལ་དུ་བཤད་འདུག་པས་དེ་འདྲའི་སྤངས་རྟོགས་ཀྱི་ཡོན་ཏན་ལྟ་ཞོག་ཉན་རང་བྱང་སེམས་སོ་སྐྱེ་ལམ་ཞུགས་ཙམ་གྱི་བག་ཆགས་དང་ཡང་མི་ལྡན་པ་རང་ལ་ལྐོག་ཏུ་མ་གྱུར་པའི་ཕྱིར་ན་ཚེ་འདིར་དུག་གསུམ་མི་དགེ་བས་ཀུན་ནས་བླངས་པའི་བྱ་བྱེད་སྣ་ཚོགས་ཡི་གེར་བྲིས་པ་ལ་དགོས་པ་མེད་ཅིང་མཁས་པ་མགུ་བ་བསྐྱེད་པའི་རྣམ་ཐར་ནི་ཤིན་ཏུ་དཀོན་པས་ན། སྔ་མོ་ནས་ཉེ་སྐོར་དུ་གནས་པའི་ཟླ་གྲོགས་འགས་རྟོགས་བརྗོད་འབྲི་བར་འོས་པའི་གླེང་མོ་བྱུང་ཡང་། ལྷོ་བྲག་མཁན་ཆེན་ཕྱག་རྡོར་པའི་ནང་ཏིང་ངེ་འཛིན་གྱི་ཉམས་སྣང་རྣམ་ཐར་དུ་བཀོད་པ་སྙན་བརྒྱུད་ཀྱི་ལྡེ་མིག་ལས།སྙིགས་དུས་མཐའ་འཁོབ་ཡུལ་དུ་སྐྱེས་པ་ཡི། །སྙོམ་ལས་དགེ་སློང་ནམ་མཁའ་རྒྱལ་མཚན་གྱིས། །སྙིང་ནས་ལྷ་ཆོས་ཚུལ་བཞིན་མ་ནུས་པས། །ཡི་གེར་འདྲི་འོས་རྣམ་ཐར་བདག་ལ་མེད། །ཅེས་གསུངས་པས་དངོས་པོའི་གནས་ཚོད་ཀྱི་དོན་དེ་སྐབས་འདིར་ཐོག་ཏུ་བབས་པར་བརྟེན་རྣམ་ཐར་འབྲི་བའི་འདུན་པ་བོར་ཏེ་ཇི་མི་སྙམ་པར་བཏང་སྙོམས་སུ་བཞག་ནའང་། སླར་ཉི་སྒྲོལ་བྱེད་ཅེས་པ་ཤིང་ཕོ་སྤྲེའུའི་ལོར་བཀའ་དྲིན་མཚུངས་པ་མ་མཆིས་པའི་དཔལ་ལྡན་བླ་མ་དམ་པ་འཇམ་དབྱངས་དཀོན་མཆོག་ཆོས་འཕེལ་ཞེས་རང་རེ་ཞྭ་སེར་ཅོད་པན་འཛིན་པ་རྣམས་ཀྱི་བསྟན་པའི་ཉི་མ་ཆེན་པོ་དེས་རྟོགས་བརྗོད་འབྲི་དགོས་པའི་ཆབ་ཤོག་དགེ་སློང་བཀྲ་ཤིས་བཟང་པོ་ལ་ངག་མ་དང་ལྷན་ཅིག་པར་བོ་དོང་འཇིགས་བྲལ་གྱི་རྣམ་ཐར་ཞིག་ཀྱང་གནང་སྟེ་འདི་ཚིག་རྩོམ་ལེགས་པར་འདུག་པས་དཔེ་
ཡོང་ཚུལ་དང་བཅས་བྱུང་བ་དགོས་པ་ཆེ་བར་མ་མཐོང་ཡང་བླ་མའི་བཀའ་མི་གཅག་པའི་ཕྱིར་དུ་ད་ལྟ་ཆོས་ལྡན་གྱི་བྱ་བ་འདི་བྱས་མང་བ་རང་འབྲི་རྒྱུ་མི་འདུག་ཅིང་ཕར་ཕྱིན་གྱི་ཡིག་ཆ་ཞིག་ཀྱང་རྩོམ་ཁུལ་དུ་ཡོད་པས་འཕྲལ་དུ་བསྒྲུབ་མི་དགོས་པའི་རྒྱུ་མཚན་ཕུལ་བར་ད་ལོ་དོ་ཞག་རང་ལ་རིང་ཁྱད་མི་འདུག་ཀྱང་སླད་རིམ་གྱིས་མ་གཡེལ་བ་དགོས་ཚུལ་བཀའ་ཕེབས།ས་མོ་གླང་ལོ་ཕོ་བྲང་ཆེན་པོ་པོ་ཏཱ་ལར་བསྡད་སྐབས་སློབ་དཔོན་སངས་རྒྱས་གཉིས་པ་པདྨ་འབྱུང་གནས་ཀྱི་དངོས་སློབ་རྒྱ་སྔགས་འཆང་འཇམ་དཔལ་གསང་བའི་གདུང་འཛིན་གནས་རྙིང་ཞབས་དྲུང་ཀུན་དགའ་བདེ་ལེགས་རིན་ཆེན་རྒྱལ་མཚན་དཔལ་བཟང་པོ་དང་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་གི་ཁྲི་ཐོག་བཞི་པ་བ་སོ་ཆོས་རྒྱལ་བའི་སྤྲུལ་སྐུ་ངག་དབང་ཆོས་ཀྱི་དབང་ཕྱུག་གཉིས་ཀྱིས་ནན་ཏན་ཆེན་པོའི་གསུང་གིས་བསྐུལ་བར་མཛད། ཁྱབ་བདག་རྡོ་རྗེ་སེམས་དཔའི་ངོ་བོར་བཞུགས་པའི་དྲིན་ཅན་བླ་མ་དམ་པ་བཀའ་འགྱུར་བ་མགོན་པོ་བསོད་ནམས་མཆོག་ལྡན་དང་ཟུར་ཀུན་མཁྱེན་ཆོས་དབྱིངས་རང་གྲོལ་གཉིས་ནས་ཀྱང་ལེགས་གསོའི་གནང་བ་བསྩལ།བོད་དང་བོད་ཆེན་པོ་ཧོར་གྱི་ཡུལ་གྲུ་སོགས་ཀྱི་ཆེ་གཉན་གྲ་རིགས་དུ་མས་ཀྱང་ཡི་གེའི་ལམ་ནས་བསྐུལ་ཞིང་བོད་སོག་གི་ལོ་ཙཱ་བ་མེརྒན་དཀའ་བཅུ་ཤེས་རབ་རྒྱ་མཚོ་དང་སེ་ཆེན་དབོན་པོ་བློ་ བཟང་ཆོས་འཕེལ་གཉིས་ཀྱིས་དངོས་སུ་ནན་ཏན་གྱིས་གླེངས་ཤིང་། ཆུ 
་བྱི་ད་ལའི་ཧུང་ཐའི་ཇིའི་ལན་བསྐུར་ཡིན་ཟེར་བ་ཞིག་བྱ་ཁྱུང་མཁན་པོས་བསྐྱལ་བྱུང་། ཁྱད་པར་མེ་རྟ་དཔལ་ལྡན་འབྲས་སྤུངས་ཀྱི་བཀྲ་ཤིས་སྒོ་མང་པའི་སློབ་དཔོན་ཟུར་པ་ག་རུ་ཞལ་སྔ་ནས་ངག་དབང་དཔལ་འབྱོར་གྱིས་
སློབ་དཔོན་ལས་ཐོག་པ་རྣམས་སྦྲན། གནས་ཆུང་ལྕོག་ནས་སྤྲུལ་བའི་ཆོས་སྐྱོང་ཆེན་པོས་ཀྱང་རྟོགས་བརྗོད་བྲིས་ཤིག་པའི་རྡོ་རྗེའི་གསུང་འཕྲིན་དང་བཅས་དོ་གལ་ཤིན་ཏུ་ཆེ་བས་མྱུར་དུ་བྱེད་དགོས་ཚུལ་བྱུང་བར་རང་ལ་རྣམ་ཐར་རྔོ་ཐོགས་པ་གཞན་ནི་འབྲི་རྒྱུ་མེད། དེང་སང་ཐོབ་ཡིག་ཅིག་འབྲི་ཡིན་ཡོད་པ་འདི་ག་དོན་གྱི་རྣམ་ཐར་དུ་འདུག་རུང་དྲག་གཞན་ཚང་མའི་ཐུགས་ལ་འདུག་གཤིས་གྲུབ་བསྟུན་མི་འགྱངས་པར་འབྲི་ཞེས་ཁས་བླངས། སླར་ཡང་མེ་ལུག་གྲ་ཚང་གི་གནས་ཆུང་དུས་གསོལ་ཐོག་ཁྲོམ་བསྒྲགས་སུ་མྱུར་དུ་བྱེད་དགོས་ཚུལ་གྱི་བསྐུལ་མ་གསུངས་འདུག་པ། སྔོན་བྱོན་གྱི་དགེ་བའི་བཤེས་གཉེན་ཕུ་ཆུང་པ། རྗེ་མི་ལ་རས་པ། ལྕེ་བཙུན་སེང་གེ་དབང་ཕྱུག །རྒྱལ་བ་བྲག་ཕུག་པ་བསོད་ནམས་དཔལ་སོགས་སྲིད་པའི་ཕུན་ཚོགས་མཐའ་དག་ཆུའི་ལྦུ་བ་ལྟར་གཟིགས་ཏེ་སྒྲུབ་པ་སྙིང་པོར་མཛད་པ་རྣམས་དང་ལོ་པཎ་མཁས་གྲུབ་བཤེས་གཉེན་མང་པོས་ཐོས་བསམ་སྒོམ་གསུམ་གྱི་སྒོ་ནས་རང་གཞན་གྱི་དོན་རྒྱ་ཆེན་པོ་མཛད་པའི་རྟོགས་པ་བརྗོད་པ་དང་མཚུངས་པའི་ཆ་ཤས་ཙམ་ཡང་བདག་ལ་ཡོང་བའི་རེ་བ་མེད། འོན་ཀྱང་སྔོན་བསགས་ཀྱི་ལས་འཕྲོ་བཟང་པོ་ལ་བརྟེན་ཡོངས་འཛིན་དམ་པ་ཆོས་བཞིན་དུ་སྤྱོད་པའི་བཤེས་གཉེན་དུ་མ་དང་རིག་པའི་གནས་མང་དུ་མཁྱེན་པའི་མཁས་པ་འགའ་བསྟེན་ནས་ཐོས་བསམ་ཅུང་ཟད་བྱས་པ་རྣམས་ཡི་གེའི་ཚེགས་ལ་མ་རྩེགས་པར་སོ་སོའི་ཁོག་ཕུག་ངེས་ཤེས་པའི་ཐོབ་ཡིག་གངྒཱའི་ཆུ་རྒྱུན་ཞེས་པ་པོ་ཏི་བཞིར་ལོངས་པ་ཞིག་བསྒྲིགས་ཡོད་པར་རྣམ་དཔྱོད་དང་ལྡན་པའི་བློ་ལྡན་གཟུར་གནས་རྣམས་ཀྱིས་གཟིགས་ན་ཐུགས་ཅུང་ཟད་མགུ་
བར་འགྱུར་རམ་སྙམ། དེ་ལས་གཞན་པའི་བྱ་བྱེད་ནི་འཇིག་རྟེན་པའི་རྒན་པོ་རྣམས་ལའང་སོ་ནམ་དང་ཚོང་ཁེ་སྤོགས་དགྲ་འདུལ་གཉེན་སྐྱོང་སོགས་བཀོད་ན་པོ་ཏིར་ལོངས་པ་གཞིར་བཅས་པས་དེ་དང་དབྱིབས་འདྲ་བ་འདུག་རུང་། རྣམ་པ་གཅིག་ཏུ་གྲགས་པ་དོན་ལྡན་གྱི་པཎྜིཏ་ཆེན་པོ་སྟག་ཚང་ལོ་ཙཱ་བའི་རྣམ་ཐར་དུ། རང་ཉིད་མཆོག་ཏུ་རློམ་པའི་ང་རོ་ཡིས། །བདག་བསྟོད་གཞན་སྨོད་དམ་པའི་ཚུལ་མིན་ཡང་། །སྒྲོ་སྐུར་མེད་པར་རང་གི་ངང་ཚུལ་རྣམས། །འཁོར་དུ་སྒྲོགས་པ་སངས་རྒྱས་ཚུལ་ལུགས་ཡིན། །ཞེས་པ་ལྟར་རང་གི་བྱ་བྱེད་རང་ལ་ལྐོག་ཏུ་མ་གྱུར་པར་མངོན་སུམ་དུ་སྣང་བ་རྣམས་ལ་མེད་ལ་ཡོད་དང་ཡོད་ལ་མེད་ཅེས་པའི་གཡོ་སྒྱུའི་ཚིག་དང་བྲལ་བའི་སྒོ་གསུམ་བདེ་སྡུག་བར་མའི་ཟློས་གར་འདི་ལྟར་བསྒྱུར་ཞེས་དྲང་པོའི་གཏམ་གྱིས་གླེང་བར་ཉེས་པ་མེད་ཅིང་ཚིག་སྦྱོར་ཡང་ཟློས་གར་གྱི་བསྟན་བཅོས་ལྟར་སྙན་དངགས་ཀྱིས་ལམ་ནས་དྲངས་པ་དང་བར་སྐབས་ཀྱི་ཚིགས་སུ་བཅད་པ་སོགས་བྱས་ན་ཕྱོགས་དེ་ལ་སྦྱངས་པ་རྣམས་མགུ་བར་འགྱུར་ནའང་མཁས་པ་རྣམས་ནི་འཆད་རྩོད་རྩོམ་གསུམ་ལ་བྲེལ་བས་འདི་ལ་གཟིགས་པའི་གོ་སྐབས་དཀའ་ཞིང་། མཁས་བླུན་བར་མ་མཐའ་དག་གིས་གོ་བདེ་བ་སོས་ཀྱི་ཉི་མ་རིང་པོ་འཕུལ་བར་བྱེད་པའི་ཐབས་མིག་དང་རྣ་བའི་དགའ་སྟོན་དུ་འགྱུར་བ་ཞིག་དགོས་པ་ལ། རྩོམ་གཞི་ཡང་ཇའི་སང་སྡེ་པས་བསྐུལ་བ་ལ་བརྟེན་ནས་ཟུར་ཆེན་རྡོ་རྗེ་འཆང་ཆོས་དབྱིངས་རང་གྲོལ་གྱིས་གནང་བའི་བྱིན་རླབས་ཕན་བདེའི་སྙིང་པོ་ཅན་དང་འཇམ་དབྱངས་བླ་མ་དཀོན་མཆོག་ཆོས་འཕེལ་གྱིས་བཀས་བསྐུལ་བ་ལ་བརྟེན་ནས་སྨོན་འགྲོ་པཎྜི་ཏ་འཇམ་དབྱངས་དབང་
རྒྱལ་རྡོ་རྗེས་མཛད་པའི་མཐོང་བས་དོན་ལྡན་མཆོག་ཏུ་དགའ་བའི་སྒྲ་དབྱངས་གཉིས་ཚིག་སྦྱོར་ཤིན་ཏུ་འཇེབས་ནའང་། ས་བོན་ནོར་བ་དང་མ་ཚང་བ་དག་ཐུགས་རྒྱུས་ཞིབ་པར་མི་མངའ་བ་སོགས་ཀྱི་འཁྲུལ་གཞི་ལ་བརྟེན་ཧ་ཅང་ཁུངས་དག་པར་མི་འདུག །སྔར་འཇམ་དབྱངས་དཀོན་མཆོག་ཆོས་འཕེལ་ནས་གནང་བའི་བོ་དོང་བའི་རྣམ་ཐར་དེ་ནི་དངོས་སློབ་ཤཱཀྱའི་དགེ་བསྙེན་འཇིགས་མེད་འབངས་ཀྱིས་བརྩམས་པའི་བསྟོད་བསྔགས་ཆེ་བས་རང་གིས་རང་ལ་བསྟོད་ན་རྫི་མེད་ཀྱི་གྲལ་དུ་ཆུད་གཤིས་དཔེར་མ་འོས། སློབ་མ་ལ་ལས་སྒྲོ་བཏགས་པའི་དམ་པ་ཞིག་གི་སྤྲུལ་པ་ཡིན་ནམ་ཞེས་བརྗོད་གཞིར་བྱས་པ་ལ་དེའི་འཁྲུངས་རབས་སོགས་ལ་བསྙད་དེ་བླ་མ་མང་པོའི་རྣམ་ཐར་མཐར་ཆགས་སུ་བཀོད་ནས་རང་ཉིད་ཚམ་ཚོམ་མེད་པར་ཁས་འཆེ་བ་འདྲའང་འོང་འདུག་པ་སྔོན་གསལ་པོར་དྲན་ན་ནི་དེར་ཟད་གཞན་དུ་མིའི་ཆོས་བླ་མ་སྡོམ་པ་འཇིག་པའི་རྒྱུ་ཡིན་པས་ཡ་ང་བར་མཐོང་། བླ་མ་ལ་ལའི་རྣམ་ཐར་སྙན་དངགས་ཀྱི་ལམ་ནས་དྲངས་ཆེས་པ་དང་འགའ་ཞིག་གནག་རྫི་རྒན་པོའི་ཚིག་འདྲ་བའི་ཕལ་རྟགས་ཅན། རྣམ་པ་དྲང་ལ་ངོ་བོ་གཞན་འབིགས་པ་སྲིད་སྒྲུབ་ཀྱི་མདའ་ལྟ་བུ། རང་གི་ཉེས་པ་ཐབས་ཀྱིས་གཞན་ལ་འགེལ་བ་འཕྱོན་མའི་གཏམ་ལྟ་བུ། བག་ཚ་བའི་གནས་ཁོ་ན་ངོ་མཚར་གྱི་གཏམ་དུ་བྱེད་པ་གཞན་གྱི་བློར་ཆུད་པར་མི་ནུས་པའི་གྲུབ་པའི་དབང་ཕྱུག་ཆེན་པོའི་རྣམ་ཐར་ལྟ་བུ། མཆོག་དམན་གང་གིས་མཐོང་ཡང་སྤྲོ་བ་སྐྱེད་པའི་ལམ་ཡིག་རྟོགས་བརྗོད་སོགས་བཟང་ངན་འབྲིང་གསུམ་མང་པོ་ཞིག་མཐོང་ཡང་། དེ་དག་གི་རྗེས་སུ་འབྲང་བའི་
པར་བཀབ་མ་བྱས་པར་རང་ལོ་བཅོ་ལྔར་སླེབས་པ་ཡན་བློ་ལ་གང་གསལ་དང་དེའི་ཕྱིན་ཇའི་སང་སྡེ་པ། འཇམ་དབྱངས་སྨོན་འགྲོ་ལོ་ཙཱ་བ། སྐྱར་པོ་བ་བློ་བཟང་ལེགས་ལྡན། འཕྱོས་ཆང་ཁྱིམ་པ་ངག་དབང་མཁྱེན་བརྩེ། ཏྲེ་བོ་སྤོས་འཛིན་པ་ངག་དབང་ནམ་མཁའ། འདར་པ་ལོ་ཆེན་ངག་དབང་ཕུན་ཚོགས་ལྷུན་གྲུབ་རྣམས་ཀྱིས་རེག་ཟིག་ཏུ་བཀོད་པར་གཞི་བྱས། དེར་མི་གསལ་བའི་ཁ་འགེང་དགོས་པའི་གསར་རྩོམ་གྱི་རིགས་རྣམས་འདར་ལོ། གནས་གསར་དཔོན། ཏྲེ་བོ་ངག་དབང་ནམ་མཁའ། དཀར་བྲག་པ་ངག་དབང་བྱམས་པ་བཞི་པོས་སོ་སོ་ནས་ཕྱུང་བའི་ལོ་ཚིགས་ཤོག་རིལ་མ། བྱ་བ་ལས་ཀྱི་འཁོར་ལོ་སྟག་རུ་ནས་བློ་བཟང་དངོས་གྲུབ་ཀྱིས་ཐོ་ཡིག་རིགས་ལས་བཏུས་པ་ཚོར་ཞིབ་ཏུ་དཔྱད། གཞན་ཡང་སྣང་ལ་མ་ངེས་པའི་ཐེ་ཚོམ་པ་རྒྱུས་ཅན་གྱི་རིགས་གང་འདུག་ལ་དོགས་བཅད། འཆད་ཉན་དང་རྩོམ་པ་ཚོགས་གསོག་འགངས་ཆེ་བ་བྱས་རིགས་ཀུན་དུས་ཐོག་དང་གཞན་མ་རྣམས་ཚིག་ཉུང་ཞིང་བརྗོད་བདེ་བའི་ཁྱད་ཀྱིས་ལོ་ཁོངས་དེར་བྱུང་ཕྱིན་ཟླ་ཚེས་ལ་མ་བལྟོས་པའི་ཕྱོགས་མཚུངས་སུ་བསྡེབས་ནས་ཡི་གེའི་འདུ་བྱེད་མཁན་རིག་བྱེད་པ་ངག་དབང་ནམ་མཁའ། དཀར་བྲག་པ་ངག་དབང་བྱམས་པ། གནས་བརྟན་འཇམ་དབྱངས་གྲགས་པ། དཔལ་གྲོང་སྔགས་རམས་པ་ངག་དབང་དགེ་ལེགས་རྣམས་ཅི་རིགས་སུ་བགྱིས་ཏེ་ཡིད་ལ་གང་ཤར་ཤུགས་འབྱུང་ལྷུན་པོའི་ཚུལ་དུ་བཀོད་པ་ལ།