དུས་གསུམ་རྒྱལ་བའི་མཁྱེན་བརྩེ་ནུས་པའི་རང་གཟུགས་དཀྱིལ་འཁོར་རྒྱ་མཚོའི་གཙོ་བོ་ཁྱབ་བདག་རྡོ་རྗེ་སེམས་དཔའི་ངོ་བོ་མགོན་པོ་བསོད་ནམས་མཆོག་ལྡན་བསྟན་པའི་རྒྱལ་མཚན་དཔལ་བཟང་པོའི་རྣམ་པར་ཐར་པ་ངོ་མཚར་དད་པའི་རླབས་འཕྲེང་།
དུས་གསུམ་རྒྱལ་བའི་མཁྱེན་བརྩེ་ནུས་པའི་རང་གཟུགས་དཀྱིལ་འཁོར་རྒྱ་མཚོའི་གཙོ་བོ་ཁྱབ་བདག་རྡོ་རྗེ་སེམས་དཔའི་ངོ་བོ་མགོན་པོ་བསོད་ནམས་མཆོག་ལྡན་བསྟན་པའི་རྒྱལ་མཚན་དཔལ་བཟང་པོའི་རྣམ་པར་ཐར་པ་ངོ་མཚར་དད་པའི་རླབས་འཕྲེང་ཞེས་བྱ་བ་བཞུགས་སོ།།
ཨོཾ་སྭ་སྟི་སིདྡྷཾ། དུས་གསུམ་རྒྱལ་ཀུན་མཁྱེན་བརྩེ་ནུས་པའི་རང་གཟུགས་དཀྱིལ་འཁོར་རྒྱ་མཚོའི་གཙོ་བོ་ཁྱབ་བདག་རྡོ་རྗེ་སེམས་དཔའི་ངོ་བོ་མགོན་པོ་བསོད་ནམས་མཆོག་ལྡན་བསྟན་པའི་རྒྱལ་མཚན་དཔལ་བཟང་པོའི་རྣམ་པར་ཐར་པ་ངོ་མཚར་དད་པའི་རླབས་འཕྲེང་ཞེས་བྱ་བ་གདན་གསུམ་ཚང་བའི་དཔལ་ལྡན་བླ་མ་དམ་པའི་ཞབས་སེན་ཟླ་བའི་ཅོད་པན་བྱང་ཆེན་མཐར་ཐུག་གཙུག་ཏོར་རྩེ་མོར་འཆིང་བ་དེ་སྲིད་བརྩེ་བ་ཆེན་པོས་རྗེས་སུ་བཟུང་སྟེ་བྱིན་གྱིས་བརླབ་ཏུ་གསོལ། །རིགས་ཀུན་བདག་པོ་རྡོ་རྗེ་འཆང་ཆེན་མི་ཡི་གཟུགས་སུ་སོང་བའི་གར། །དང་པོའི་མགོན་པོ་བསོད་ནམས་ཞིང་དུ་ཨེ་ཝཾ་ཟུང་འཇུག་སྒྱུ་མའི་འཕྲུལ། །རྣམ་ཀུན་མཆོག་ལྡན་འགྲོ་ལ་རྗེས་བརྩེ་བསྟན་པའི་རྒྱལ་མཚན་ལེགས་འཛིན་པ། །དཔལ་ལྡན་བླ་མ་མཁས་བཙུན་བཟང་པོའི་འཁོར་ལོས་སྒྱུར་དེ་རྒྱལ་གྱུར་ཅིག །གདུལ་དཀའ་འདུལ་ལ་དཔའ་བའི་སྙིང་སྟོབས་ཀྱིས། །བརྒྱ་པའི་ཚེ་དུས་མཆོག་
གི་སྤྲུལ་བའི་གར། །ལེགས་བསྒྱུར་ཤཱཀྱ་སེང་གེ་དཀྱིལ་འཁོར་གཙོར། །རབ་བཞེངས་དགྱེས་མཛད་རྡོ་རྗེ་ཧེ་རུ་ཀཿ །མཁའ་ལ་མཁའ་ཡི་སྦྱོར་ལྟར་གཉིས་མེད་ཡུམ། །ཟག་མེད་བདེ་ཆེན་བསྐྱེད་པའི་བདག་མེད་མས། །རྗེས་བཟུང་རྣལ་འབྱོར་དབང་ཕྱུག་བིཪྺ་པ། །པཎ་གྲུབ་ཡོངས་ཀྱི་འཁོར་ལོས་སྒྱུར་བའི་རྒྱལ། །མགོན་དེའི་དབང་གི་མཐོ་རིས་ཆུ་བོའི་རྒྱུན། །ལོ་པཎ་སྐལ་ལྡན་ཤིང་རྟས་ཉེར་དྲངས་པ། །རྣམ་དཔྱོད་ལྟོ་བར་འཁྱིལ་བའི་དྲང་སྲོང་ཆེ། །ས་སྐྱའི་བླ་ཆེན་རྗེས་འབྲང་བཅས་ལས་སུ། །གང་གི་བསྟན་སྲོག་རྒྱུ་སྐར་འཕྲེང་བའི་དབུས། །སྙན་བརྒྱུད་ཚད་མ་བཞི་ཡི་སྣང་བའི་གཟི། །ཆེར་འབར་སློབ་བཤད་འཛིན་པའི་བདག་ཆེན་རྗེ། །རྡོ་རྗེ་འཆང་དབང་བློ་གྲོས་རྒྱལ་མཚན་དཔལ། །མགོན་དེའི་གདམས་པའི་བང་མཛོད་ཁའུ་པ། །ཀུན་སྤངས་བླ་མའི་སྙན་བརྒྱུད་ཟིལ་དངར་གྱིས། །ཐུགས་ཀྱི་ཟ་མ་ཏོག་གཏམས་ཚར་པ་རྗེའི། །དྲི་མེད་རིང་ལུགས་ཡིད་བཞིན་དབང་གི་
རྒྱལ། །དམར་སེར་དྷཱིཿཡིག་བཞི་བླུགས་མི་ཡི་གཟུགས། །འཁོར་ལོའི་མགོན་པོ་བསོད་ནམས་སྐལ་བཟང་དཔྱིད། །མཆོག་ཏུ་མི་འགྱུར་བདེ་བའི་བདག་ཉིན་ཅན། །དཔལ་ལྡན་བླ་མ་ཁྱབ་བདག་རྡོ་རྗེ་སེམས། །ཨ་ཧོ་འཕགས་བོད་རིས་མེད་གྲུབ་མཐའི་སྲོལ། །འཛིན་པའི་མཁས་གྲུབ་ཡང་སྲིད་མཐའ་ཀླས་ཀྱང་། །ཞིང་འདིར་མཇམ་མགོན་བླ་མ་ས་སྐྱ་པའི། །བསྟན་པའི་ཁུར་ཆེན་རྣམ་དཔྱོད་ཕྲག་པར་ལྕི། །དབང་ལུང་རྗེས་གནང་རིག་གཏད་རྒྱུད་བཤད་ཟླས། །གདུལ་བྱའི་བློ་ཡི་ཀུནྡ་བཞད་པའི་མོད། །གྲོལ་ལམ་ཀ་སྤུ་ར་ཡི་གཟེགས་མའི་རྡུལ། །བབས་པས་སྒྲིབ་གཉིས་ཚ་གདུང་སེལ་ལ་སྦྱོར། །གཅིག་ཏུ་རྣམ་གསུམ་མཁས་པའི་བྱ་བ་ལ། །རྟག་པར་འགྲུས་ཀྱང་རིམ་གཉིས་རྣལ་འབྱོར་གྱིས། །གང་ཐུགས་མཚན་དཔེས་ཡོངས་སྤྲས་ཧེ་རུ་ཀར། །བཞེངས་པའི་ཆོ་ག་རྫོགས་པ་འདི་ཀོ་མཚར། །དེ་ཕྱིར་མེས་པོས་བསྐལ་པར་བསམས་བྱས་ཀྱང་། །གཏིང་མཐའ་དཔག་པར་དཀའ་ན་བདག་འདྲ་བས། །རྟོགས་བརྗོད་སྨྲ་བ་འདབ་ཆགས་རྩེ་སྒྲོ་ཡིས། །མཐོན་པོའི་བྲག་རི་ཟད་པར་བྱེད་པ་བཞིན། །འོན་ཏེ་རྣམ་འདྲེན་དུས་མཁྱེན་རྒྱལ་པོ་ཡིས། །བདེ་གཤེགས་རྩྭ་མཆོག་བསྟོད་པའི་ལེགས་བྱས་བཞིན། །རྡོ་རྗེ་སློབ་དཔོན་བསྔགས་པའི་སྐལ་བཟང་འདི། །གྲངས་མེད་སྐྱེ་བར་ཆོས་དཀར་ཟོང་གིས་བསྒྲུབས། །དེ་ཕྱིར་རྣམ་པར་ཐར་པའི་པི་ཝང་རྒྱུད། །བཅད་ལྷུག་ཚིག་གི་སོར་མོས་ལེགས་བསྐུལ་སྒྲ། །དཔྱོད་ལྡན་རྣ་བར་འཇེབས་པ་རྡོ་རྗེའི་གླུ། །གཞོམ་མེད་ནཱ་དའི་དབྱངས་སུ་བླངས་འདི་ཉོན། །དེའང་འཇམ་མགོན་
ས་སྐྱ་པཎྜི་ཏས། །མཆོད་བསྟོད་འདུད་པའི་བདག་ཉིད་ཅན། །ཤིས་པ་བརྗོད་སོགས་མི་འགལ་ཏེ། །ཐམས་ཅད་དུ་ཡང་སྟོན་པ་ཡི། །ཆེ་བ་འབའ་ཞིག་སྟོན་ཕྱིར་རོ། ཞེས་པའི་དོན་ལྟར་ཚིགས་བཅད་དཔྱིད་ཀྱི་རྒྱལ་མོའི་གླུ་དབྱངས་སྔོན་དུ་འགྲོ་བའི་སྒོ་ནས་གླེང་བར་བྱ་བ་ནི། མཁས་པའི་གསུང་ལས། །གང་ཕྱིར་དགེ་ལེགས་ཐམས་ཅད་ནི། །རྟག་ཏུ་སྦྱིན་ཞིང་འཕེལ་འགྱུར་བའི། །ཐུབ་བསྟན་དཔག་བསམ་ལྗོན་ཤིང་གི །ངོ་མཚར་གླེང་ལ་སུ་མི་གུས། །ཞེས་བདག་ཅག་གི་རྣམ་འདྲེན་དམ་པ་རིགས་དང་དཀྱིལ་འཁོར་ཀུན་གྱི་བདག་པོ་བསོད་ནམས་མཆོག་ལྡན་བསྟན་པའི་རྒྱལ་མཚན་དཔལ་བཟང་པོ་འདི་ཉིད། །བྱོན་དང་བྱོན་འགྱུར་འབྱོན་བཞིན་པའི་སྲས་བཅས་རྒྱལ་བ་མཐའ་དག་གི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་ཀྱི་ངོ་བོ། དེ་དག་གི་མགུར་གྱི་བུམ་པ་ནས་དམ་པའི་ཆོས་ཀྱི་ཕུང་པོ་ཟད་མི་ཤེས་པ་ལྗགས་ཀྱི་དབང་པོ་ལེགས་པར་བཀྲམ་སྟེ་གདུལ་བྱ་རྣམས་ཀྱི་རྣ་བར་འཇེབས་པའི་སྒྲ་བོ་ཆེ་ཡོངས་ཀྱི་སྙིང་པོར་གྱུར་པ་ནང་རིག་པ་སྡེ་སྣོད་གསུམ་དང་རྒྱུད་སྡེ་བཞིའི་འབྱུང་གནས་དེ་རྣམས་ཀློག་པ་ཐོས་བསམ་དང་སྤོང་བ་བསམ་གཏན་གྱི་སྒོ་ནས་ཚུལ་བཞིན་འཛིན་པའི་ཐེག་གསུམ་སྐྱེས་འཕགས་འདུས་པའི་དབང་ཕྱུག །རིས་སུ་མ་ཆད་པའི་གྲུབ་པའི་མཐའ་རྒྱ་མཚོ་ཆེན་པོའི་ཕ་རོལ་ཏུ་སོན་པས་མཁས་པ། ཉིས་བརྒྱ་ལྔ་བཅུ་རྩ་གསུམ་སོགས་ཉེས་ལྟུང་གི་ཆ་ཕྲ་མོ་ཙམ་གྱིས་ཀྱང་མ་གོས་པར་ལས་འབྲས་ལ་ཞིབ་མོར་དཔྱོད་པས་བཙུན་པ། བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེ་ཐུགས་ལ་འཁྲུངས་པས་གཞན་དོན་ལྷུར་མཛད་པའི་བཟང་པོ། །
མ་ནུབ་དབང་གི་ཆུ་བོས་ཐུགས་རྒྱུད་སྨིན་པས་གྲོལ་བྱེད་བསྐྱེད་པ་དང་རྫོགས་པའི་རིམ་པ་ནི་ཟབ་ལམ་ལ་བརྟེན་ནས་གྲུབ་པའི་མཐའ་སྙོག་པར་ནུས་ལྡན་རིག་སྔགས་འཆང་བ་སོགས་གསང་བ་བསམ་གྱིས་མི་ཁྱབ་པའི་ཡོན་ཏན་གྱི་ཕུང་པོ་ཚངས་པ། དབང་ཕྱུག །ཁྱབ་འཇུག་སྟེ་འཇིག་རྟེན་གྱི་གཙོ་བོ་གསུམ་དང་ཉན་རང་བྱང་སེམས་སོ་སྐྱེའི་ཚོགས་ཀྱིས་གཞལ་བར་དཀའ་བ་འཕགས་པ་རྣམས་ཀྱི་ཡེ་ཤེས་ཁོ་ནའི་སྤྱོད་ཡུལ་ཉག་གཅིག་པ་བདག་འདྲའི་བློ་གྲོས་ཀྱི་ཆ་ཕྲ་བས་ལྟ་ག་ལ་ཞིག །སྐུ་ཚེའི་འཕྲེང་བ་དུ་མར་ཐུབ་བསྟན་རིན་པོ་ཆེ་གསལ་བར་བྱེད་པའི་མཁས་གྲུབ་ཀྱི་སྐྱེས་རབས་མུ་ཐི་ལའི་འཕྲེང་མཛེས་དང་། སྐུ་ཚེ་འདིར་ཡང་ལྷ་དང་བླ་མ་མང་པོ་ཞལ་གཟིགས་ཤིང་ལུང་བསྟན་ཐོབ་པ། རྡོ་རྗེ་ཆོས་སྐྱོང་བྲན་དུ་འཁོལ་བའི་འཕྲིན་ལས་སྒྲུབ་པ། ས་ལམ་གྱི་ཡོན་ཏན་ཕུལ་དུ་བྱུང་བ་ནི། ཞུ་ལན་ནོར་བུའི་འཕྲེང་བར། བདག་གི་ཡོན་ཏན་སྦ་བྱ་ཞིང་། །གཞན་གྱི་ཡོན་ཏན་བསྒྲག་པར་བྱ། །ཞེས་པའི་དོན་བཞིན་ཡོན་ཏན་མཐའ་དག་རྒྱ་མཚོའི་གཏིང་གི་རྡོ་བ་ལྟར་མི་མངོན་པ་གཙོ་བོར་འདོན་པས་བསྙེལ་ཐོ་དང་ཞལ་སློབ་ཀྱི་རིགས་ལ་གསུང་འཕྲོས་ཀྱི་ཟུར་ཙམ་ཡང་ཆེར་མ་གསུངས་ཤིང་། ཁོ་བོས་གསུང་ངག་རིན་པོ་ཆེ་ཞུས་སྐབས་མདང་རྨི་ལམ་དུ་པོ་ཏ་ལའི་ལི་མ་ལྷ་ཁང་ཡིན་རྒྱུ་བ་ལ་ཟེའུ་ལྷ་ཁང་འདྲ་རུང་བའི་གློ་སྐར་ནས་བལྟས་པས་རྗེ་བཙུན་ས་སྐྱ་པ་ཆེན་པོ་བཞུགས་འདུག་པ་ཞིག་བྱུང་བ་གསུང་ངག་རིན་པོ་ཆེ་འདིའི་འཆད་ཉན་ལ་དགྱེས་པ་འདྲ་གསུང་བ་ཞིབ་ཏུ་ཞུས་ཀྱང་དེ་ཙམ་ལས་མི་དྲན་ཞེས་ཐུགས་དཀྱེལ་ཆེ་བས་གསལ་བར་མི་མཛད་ནའང་དོན་དུ་མནལ་ལྟས་མ་ཡིན་པས་གཟིགས་
སྣང་ངོ་མཚར་བ་ཞིག་བྱུང་ཚོད་དུ་མཆིས།སྔ་ཕྱིར་མཇལ་བ་ཚོའི་སྐབས་ནན་ཏན་དུ་ཞུས་ན་ཐོར་བུ་ཙམ་མི་གསུང་བའི་ངེས་པ་མི་འདུག་ཀྱང་རང་ཉིད་རྟག་པར་འཛིན་པའི་འཆིང་བ་དམ་པོས་བཅིངས་པའི་དབང་གིས་རྗེ་བླ་མའང་སྐུ་ཚེ་མཐར་ཕྱིན་པར་བཞུགས་པ་གཞིར་བཅས་ཀྱི་སླར་རིམ་གྱིས་ཞུ་འདུན་ལ་ལུས་སོང་ཞིང་ཟུར་ཐམས་ཅད་མཁྱེན་པ་དང་། རྗེ་འདི་ཉིད་ཞལ་འདྲིས་ཡེ་མེད་པའི་སྐབས་མནལ་ལམ་ལ་གཟིམས་ཁང་ཤར་ཡིན་ཁུལ་དུ་ཁྲི་མཐོ་བར་ས་ལུགས་ཀྱི་བླ་མ་ཡིན་ཟེར་བ་སྐུ་བོང་ཆེ་ཞིང་གཟི་བརྗིད་ཕུན་སུམ་ཚོགས་པ་ཞིག་ལ་དབང་ཆོས་མང་པོ་གསན་པའི་མནལ་ལྟས་བྱུང་བ་ནས་ལོ་གཅིག་ཙམ་གྱི་ཐོག་ཡར་ཀླུངས་བཀྲ་ཤིས་རྩེ་ཆོས་སྡེར་ཟབ་ཆོས་གསན་པར་གློ་བུར་དུ་ཕེབས་པར་ཤར་བའི་སྒོ་དོད་ཅིང་ཞིང་སྐྱོང་དབང་པོའི་ཆོས་སྐོར་རྣམས་གསན་ནས་གུང་ཐང་དུ་ཕེབས་པའི་འོད་གསལ་ཞིག་ལ་རས་ལྗང་གུའི་ཨང་རག་ཙམ་ལས་གོས་གཞན་མེད་པ་སྐྲ་དང་སྨྲ་ར་དཀར་པོ་བྱས་པ་ལག་ཏུ་མི་རྐང་གི་གླིང་བུ་ཐོགས་པ་ཞིག་ན་རེ་མགོན་པོ་བསོད་ནམས་མཆོག་ལྡན་འདི་སློབ་དཔོན་དྷརྨ་པཱ་ལ། གཟིམས་ཁང་ཤར་གྱི་བླ་མ་ཞིག་དང་ཚར་པ་ཆོས་རྗེ་སོགས་ཀྱི་སྐྱེ་བ་ཡིན། ཁྱོད་ཀྱིས་ང་ལ་གཏོར་མ་རེའང་མ་ཆག་པ་གྱིས། ངའི་ཆོས་སྐོར་རྣམས་སུ་རུང་རུང་ལ་མ་སྟོན་ཟེར་བ་ཞིག་བྱུང་སྣང་བ་བདག་ཡིད་བཞག་ཆུངས་པས་ཁ་ཆེ་རིན་ཅེན་རྡོ་རྗེ་དང་དྷརྨ་པཱ་ལ་གཉིས་སོམ་ཉིར་གྱུར་རུང་སླར་དཔྱད་ཚེ་ཕྱི་མ་ཉིད་དུ་ངེས་ཤིང་བཀའ་ལས། རྗེས་སེར་གཟིམས་ཁང་ཤར་དུ་ཡུན་རིང་པོར་སྟན་ཆགས་པ་དང་མཛད་པའི་ཚུལ་རྣམས་ལ་རྗེས་སུ་དཔགས་ཚེ་ཚར་
ཆེན་ཆོས་ཀྱི་རྒྱལ་པོ་ཐུབ་བསྟན་སྤྱི་དང་བྱེ་བྲག་རང་བསྟན་ཁའུ་བྲག་རྫོང་པའི་རིང་ལུགས་འཛིན་པར་སྤྲུལ་པའི་ཟློས་གར་བསྟན་པ་འདྲ་ཕེབས་པ་རྡོ་རྗེའི་གསུང་བླ་ན་མེད་པར་གོ །གཞན་དུ་བསམ་གྱིས་མི་ཁྱབ་པའི་རྟོགས་པ་བརྗོད་པའི་རྔོ་མ་ཐོགས་ནའང་སྙིགས་དུས་ཀྱི་གདུལ་བྱ་སྨིན་པ་གསུམ་ཤས་ཆུང་། སྒྲིབ་པ་གསུམ་གྱི་བག་ཆགས་ཆེས་ཆེར་བདེ་བའི་གང་ཟག་རྣམས་ཀྱི་བློ་དང་འཚམ་པ་རྣམ་པར་ཐར་པ་རྒྱ་མཚོ་ལྟ་བུ་ལས་ཆེར་ལོང་ཙམ་དྲུང་དུ་འཁོད་པའི་རྒྱུས་ཡོད་འདྲས་ཟིན་བྲིས་སུ་བཏབ་ཅིང་། རིགས་ཀུན་ཁྱབ་བདག་ཞ་ལུ་མཁན་ཆེན་ཀུན་སྤངས་པ་ཆེན་པོའི་སྤྱན་རས་ཀྱིས་བཅའ་བར་མཛད་དེ་ལམ་ཙམ་ཞུས་དག་པའི་སྟེང་ནས་ཅུང་ཟད་འབྲི་བ་ནི། རིན་པོ་ཆེ་སྡུད་པ་ལས། འཛམ་བུའི་གླིང་འདིར་ཆུ་ཀླུང་ཇི་སྙེད་ཅིག་འབབ་ཅིང་། །མེ་ཏོག་འབྲས་ལྡན་སྨན་དང་ནགས་ཚལ་སྐྱེད་བྱེད་པ། །མ་དྲོས་གནས་པའི་ཀླུ་དབང་ཀླུ་བདག་བརྟེན་གནས་ཏེ། །དེ་ནི་ཀླུ་ཡི་བདག་པོ་དེ་ཡི་མཐུ་དཔལ་ཡིན། །རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང་། །འཆད་དང་རིག་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་འཛམ་བུའི་གླིང་གི་ཆུ་ཀླུང་སྨན་དང་ནགས་ཚལ་སོགས་ཀླུའི་རྒྱལ་པོའི་མཐུ་ལས་བྱུང་བ་བཞིན་ཐུབ་པའི་རྗེས་འཇུག་གི་ཚོགས་ཐོས་བསམ་སྒོམ་པའི་མཐུ་ལ་བརྟེན་ནས་འབྲས་བུ་ཐོབ་པ་རྣམས་དེ་བཞིན་གཤེགས་པའི་ཐུགས་རྗེ་ལས་བྱུང་བར་གསུངས་པ་སྤྱིར་སངས་རྒྱས་འཇིག་རྟེན་དུ་མི་འབྱོན་པའི་ཚེ་མུན་བསྐལ་དང་བྱུང་བའི་
དུས་སྒྲོན་བསྐལ་དུ་བཤད་པས་བསྐལ་པ་བཟང་པོ་འདི་ལ་སངས་རྒྱས་སྟོང་འབྱུང་བར་གསུངས་པའིའོ་སྐོལ་གྱི་སྟོན་པ་ཤཱཀྱ་སེང་གེའི་ལུང་རྟོགས་ཀྱི་བསྟན་པ་ཡུལ་དབུས་འགྱུར་འཆང་དུ་དར་རྒྱས་སུ་གྱུར་པ་ནས་ཡུན་རིང་ཞིག་ནས་བོད་དུ་དམ་པའི་ཆོས་འབྱུང་བར་ལྷ་མོ་དྲི་མ་མེད་པས་ཞུས་པའི་མདོ་ལས། ང་ཡོངས་སུ་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་གདོང་དམར་ཅན་གྱི་ཡུལ་དུ་དམ་པའི་ཆོས་དར་བར་འགྱུར་རོ། །ཞེས་སཱ་ལའི་ནགས་ཀྱི་སྨན་ལྗོངས་རི་ཁ་བ་ཅན་གྱི་ཁྲོད་དུ་རྒྱལ་བའི་བསྟན་པ་བྱུང་བའང་སྤྱིར་འགྲོ་བ་མིའི་བྱུང་ཚུལ་ལྷ་ལས་ཕུལ་བྱུང་གི་བསྟོད་འགྲེལ་དུ། སྐྱ་སེང་བུ་ལྔ་དང་དགྲ་ངན་དཔུང་ཚོགས་བཅུ་གཉིས་འཐབས་པའི་དུས་སུ་རྒྱལ་པོ་རཱུ་པ་ཏི་ཞེས་པ་དམག་སྟོང་ཕྲག་གཅིག་དང་བཅས་པ་བུད་མེད་ཀྱི་ཆས་སུ་ཞུགས་ཏེ། རི་གངས་ཅན་གྱི་གསེབ་ཏུ་བྲོས་པ་ལས་འཕེལ་ཚུལ་བྱུང་ཞིང་རྒྱལ་པོ་བཀའ་འབུམ་སོགས་ཐུགས་རྗེ་ཆེན་པོའི་ཆོས་སྐོར་རྣམས་སུ་སྤྱན་རས་གཟིགས་དང་སྒྲོལ་མའི་སྤྲུལ་པ་སྤྲེའུ་དང་བྲག་སྲིན་མོ་འདུས་པ་ལས་འཕེལ་བར་བཤད་པ་གདོང་དམར་ཤ་ཟན་གྱི་ཕྲུ་གུ་ཤིན་ཏུ་གདུལ་པར་དཀའ་བར་ཆོས་ལ་བློ་མི་འཇུག་པ་རྣམས་བཀའ་གདམས་གླེགས་བམ་རིན་པོ་ཆེར། བོད་ནི་རྒྱལ་པོ་དག་ལ་ཚད་མར་འཛིན། མི་དབང་མཛོད་ལ་བོད་ཁམས་བདེ་བར་སྐྱོངས། །ཞེས་ཐོག་མར་འབངས་མཐའ་དག་རྒྱལ་པོའི་ཆེན་པོ་ཞིག་གི་མངའ་འོག་ཏུ་བསྡུས་ཏེ་རིམ་གྱིས་སངས་རྒྱས་ཀྱི་འཕྲིན་ལས་འབྱུང་བར་མཁྱེན་ནས་བོད་སྤྱིའི་རྒྱལ་པོས་ལ་སྔ་བ་རྗེ་གཉའ་ཁྲི་བཙན་པོ་ནས་རྒྱལ་རབས་རིམ་པར་བྱུང་ལ་
དམ་པ་འདིའི་རིགས་ནི། བོད་རྒྱལ་པོའི་དབོན་དུ་གྱུར་པའི་འ་ཞ་ཞེས་བྱ་ཞིང་དེའང་ཟུར་མཁར་བློ་གྲོས་རྒྱལ་པོའི་ཤེས་བྱ་སྤྱིའི་ཁོག་དབུག་གཏན་པ་མེད་པའི་མཆོད་སྦྱིན་གྱི་སྒོ་འཕར་ཡངས་པོར་བོན་གྱི་གཏམ་རྒྱུད་དྲངས་པར། གྲི་གུམ་བཙན་པོའི་དུས་དམག་དྲངས་ནས་ཁ་ཆེའི་ཡུལ་བཅོམས་པའི་ཚེ་ཡུལ་བྱེ་བྲག་པ་པུཎྜ་སུར་བྲག་ཉུང་མ་ལྟར་གཤོག་པར་བྱེད་པའི་རྫུ་འཕྲུལ་ཅན་གྱི་མུ་སྟེགས་བྱེ་བྲག་པ་ཞིག་ལ་འ་ཞ་ཟེར་ཞེས་གང་ཟག་ཅིག་ལ་ངོས་བཟུང་ཞིང་མི་ཤི་བ་དང་ཕྱུགས་བསད་པ་རང་གི་མི་ཕྱུགས་སུ་སྐྱེ། ཕུང་པོ་དང་མཉམ་དུ་སྦས་པ་སྐྱེ་བ་ཕྱི་མ་དབང་བར་ལུང་སྟོན། ཤ་ཁྲག་གིས་མི་མ་ཡིན་བརྔན་ནས་སྨྲེང་གིས་དཀྲོལ་བས་ཕན་པར་བྱེད་པ་ལ་བོན་ནམ་ལིང་ཙེར་གྲགས་ལ། །དེས་མ་རུངས་ཏེ་རྒྱལ་པོའང་ལོང་ངམ་རྟ་རྫི་ཞེས་པས་བཀུམས་སྨྲ་བ་གྲི་གུམ་གྱི་དུས་བོད་དུ་འ་ཞ་བྱུང་བར་འདོད་པ་འདྲ་སྣང་བ་དང་། དཔའ་བོ་གཙུག་ལག་གིས་མཁས་པ་དགའ་བྱེད་དུ། གུ་རྞ་ཁ་ཏྲ་ཞེས་བྱའི་ཡུལ་ཁམས་ནས། །མུ་སྟེགས་བོན་པོ་འ་ཞ་ཞེས་པ་བྱུང་། །ཞེས་ངོས་བཟུང་བའི་རྫུ་འཕྲུལ་ཅན་དེས་རྒྱལ་པོའི་མཚན་གྲི་གུམ་ཞེས་བཏགས་པར་བརྟེན་ནས་རྒྱལ་པོ་གྲིར་བཀུམས་པར་བཤད། དེ་ནས་རྒྱལ་རབས་ཉི་ཤུ་རྩ་བཞི་པ་དམུས་ལོང་དཀོན་པ་བཀྲས་བྱུང་བར་ཡབ་འགྲོ་གཉེན་ལྡེའུས་འ་ཞའི་ཡུལ་ནས་སྨན་པ་བོས་ནས་མིག་ཕྱེ་གསུང་བ་བཞིན་ཕྱེ་བས་སྤྱན་བྱུང་སྟེ་ལྟག་རི་གཉན་གཟིགས་སུ་གྲགས་པ་ལྟར་ན་འ་ཞ་ཞེས་པ་ཡུལ་གྱི་མིང་དུ་བཤད། ཐམས་ཅད་མཁྱེན་པ་དགེ་འདུན་རྒྱ་མཚོའི་རྣམ་ཐར་ཞལ་གསུངས་མར། ཁྲི་སྲོང་
ལྡེའུ་བཙན་གྱི་སྐབས། རྗེ་སྲོག་པོ་ཁྱུང་བཞི་ལྷ་ཇོ་བོ་ལྕམ་དང་ལྔ། འབངས་ར་ཀློག་ཅན་དང་དྲུག །སེ་འ་ཞ་གཉིས་དང་བཅས་པ་རྣམས། ཆད་པ་མདོ་ཁམས་སྒང་ནས་ཆད། ཆགས་པ་གཡས་རུ་ཤངས་སུ་ཆགས་ཤེས་པ་རྣམས་གུངས་བསྒྲིགས་ན་གང་ཟག་རང་མཚན་པ་ཞིག་ལ་བཀར་ནས་རྒྱ་གར་ཕྱོགས་ན་ཡོད་ཚུལ་ཁུངས་དག་པར་མི་སེམས་ཏེ་བོན་དང་མུ་སྟེགས་མི་གཅིག་པས་ལོ་རྒྱུས་དེ་འདྲ་དྭགས་བརྒྱུད་པས་བོན་གྱི་རྗེས་སུ་འགྲངས་པའི་སྒྲུང་གི་བྱེ་བྲག་ཏུ་སྣང་། སྤྱིར་འཛམ་བུ་གླིང་པའི་མི་རིགས་ཕྱི་བར་ནང་གསུམ་ལས། རྒྱལ་རིགས། རྗེ་རིགས། བྲམ་ཟེའི་རིགས། དམངས་རིགས་ཏེ་ཕྱི་རིགས་བཞི། རྒྱ་གར་ལྷ། རྒྱ་ནག་ཀླུ། ཧོར་ལྷ་མ་ཡིན། བོད་སྤྲེའུ་དང་བྲག་སྲིན་མ་སྟེ་བར་གྱི་རིགས་བཞི། བཀའ་ཆེམསབཀའ་ཁོལ་མར། སྤྲེལ་ཕྲུག་སྤུན་བཞི་བརྒྱ་པོ་དེ་ཚན་པ་བཞིར་འཐབས་པ་དང་མེས་པོས་བར་མཚམས་བྱས་ཏེ་ཞིང་ལ་ཆ་བཞིར་བགོས། གཅིག་ལ་གཅིག་འཇིགས་ནས་ཚན་བཞིར་ཆད་པས་སེ་དང་། རྨུ་དང་། ལྡོང་དང་། སྟོང་སྟེ་ནང་མིའུ་རིགས་བཞི་རྣམས་བཅུ་གཉིས་པོ་རིགས་ཀྱི་ཕྱི་མོར་གྲགས། མིའུ་གདུང་དྲུག་ཏུ་དབྱེ་ན་བོད་མི་ཁྲི་ཐོ་ཆེན་པོ་བྱ་བ་དེ་ལ་དགྲ་འབྲུ་ལྡོང་ལྒ་དང་ནུ་བོ་དཔའ་རྡ་སྟེ་བུ་དྲུག་ཅེས་བཤད། སྤྱན་སྔ་ལྷ་གཟིགས་རས་པའི་ཡིག་ཚང་དུ། དགའ་ལྡོང་འབྲུ་གསུམ་དགྲ་དང་བཞི། ནུ་བོ་དཔའ་མདའ་གཉིས་ཏེ་དྲུག་ཏུ་གསུངས། ཚལ་པ་ཐམས་ཅད་མཁྱེན་པ་སི་ཏུ་དགེ་བའི་བློ་གྲོས་ཀྱི་ཧུ་ལན་དེབ་ཐེར་དུ་སྤྲེའུ་དང་བྲག་སྲིན་མོ་ལས་མཆེད་པ་
མ་སངས་སྤུན་དགུ། རྒྱན་ཕྲན་ཉི་ཤུ་རྩ་ལྔ། བཅུ་གཉིས། སིལ་མ་བཞི་བཅུས་རིམ་གྱིས་དབང་བྱས་པར་བཤད་པ་ཀུན་མཁྱེན་མཁྱེན་བརྩེའི་དབང་ཕྱུག་གི་རྣམ་ཐར་དུ་མིའུ་གདུང་དྲུག་གི་ནང་ཚན་དུ་གསུངས་པ་གོང་དུ་དངོས་མིང་ངོས་མ་འཕྲོད་ཀྱང་ཞྭ་དམར་ཐམས་ཅད་མཁྱེན་པ་བཞི་པས་མཛད་པའི་ཁྲུས་ཁང་ལོ་ཙཱ་བ་བསོད་ནམས་རྒྱ་མཚོའི་རྣམ་ཐར་དུ། ཕྱིའི་རུས་ཆེན་ལྡོང་ལ་ནང་ཚན་བཅོ་བརྒྱད་དུ་གྱེས་པའི་རོག་ཡིན་ཏེ། །ཞེས་ནང་གསེས་ཀྱི་ཁྱད་པར་དུ་ངོས་འཛིན་པ་རྣམ་དཔྱོད་དང་ལྡན་པའི་གསུང་འདི་བཞིན་ལྟར་རུས་སོ་སོར་དབྱེ་གཞི་གཅིག་ལ་དབྱེ་བའི་ཡ་གྱལ་མང་དུ་བྱུང་བའི་རུས་ཆེན་དྲུག་གི་དང་པོའི་ནང་གསེས་སུ་གཏོགས་པ་གོར་མ་ཆག །རྒྱལ་ཕྲན་སིལ་མའི་ཁྲོད་ཀྱི་རྒྱལ་པོར་གྱུར་པ་རྗེ་གཉའ་ཁྲི་བཙན་པོས་བོད་སྤྱི་ལ་དབང་སྒྱུར་བ་ནས་མངའ་འོག་ཏུ་གྱུར་ཅིང་རྗེ་དང་གཉེན་བསྲེས་པས་དབོན་དུ་སོང་། ལྷ་བཙན་པོས་བསྟན་པ་རིན་པོ་ཆེའི་ཆེད་དུ་ཆོས་ཀྱི་བཅའ་ཁྲིམས་མཛད་པའི་ཚེ་ན་རྗེར་གཏོགས་པས་རྡོ་རིང་གི་ཡི་གེར་ཡང་དབོན་འ་ཞ་ཞེས་རྒྱལ་རིགས་ཁུངས་བཙུན་དྲི་མ་མེད་པ་དེ་ལས་རིམ་པར་བརྒྱུད་དེ་གླང་དར་གྱིས་བསྟན་པ་བསྣུབས་རྗེས་སོ་ཐར་གྱི་བསྟན་པའི་མེ་རོ་སྨད་ནས་བསླང་བའི་ཚེ་འ་ཞ་མགོ་བོ་ཆེའི་སྲས་འ་ཞ་ཡེ་ཤེས་གཡུང་དྲུང་གིས་ཁམས་སུ་སྡོམ་པ་ལེན་པར་འབྱོན་པའི་ཞོར་དུ་ར་ས་འཕྲུལ་སྣང་གི་གཙུག་ལག་ཁང་དུ་མཇལ་དུ་བྱོན་པའི་དུས་སྟེང་ཁང་ལ་འགྲོ་བའི་སྐས་ཀྱི་མར་ཟུར་གདོང་ལ་དཔལ་ཡེ་ཤེས་མགོན་པོའི་སྐུ་གཟུགས་རི་མོར་བྲིས་པ་ཡར་འཛེག་སྐབས་ཡོད་པ་ལ་མར་ལམ་བྲིས་སྐུ་དེ་དཔལ་མགོན་པོ་དངོས་སུ་གྱུར་ཅིང་ཐོད་པའི་
ནང་ན་དགྲ་བོའི་སྙིང་ཁྲག་བླུག་པ་མི་རྩིབ་ཀྱིས་ཐུར་མ་བྱས་ཏེ་གསོལ་བ་མངོན་སུམ་དུ་བསྟན་ནས་རྗེས་སུ་བཟུང་བར་གསོལ་བ་བཏབ་པས། ཁྱོད་ཀྱི་མི་བརྒྱུད་དང་ཆོས་བརྒྱུད་བཅས་པའི་སྲུང་མ་ངས་བྱ། ཁྱོད་ཁམས་ན་ཟླ་བ་གཅིག་ལ་འཁོར་བར་གྱིས་ཞེས་གསུང་གི་གནང་བ་ཐོབ་པས་འ་ཞ་མཐུ་ཆེ་བར་གྲགས་ཤིང་མགོན་པོ་འདི་ཉིད་རྩིས་མགོན་ཡིན་པར་སེམས། ཁམས་སུ་བྱོན་ནས་བླ་ཆེན་གྱི་མཁན་བུ་ཏྲེ་བོ་མཆོག་བླ་ལ་སྡོམ་པ་དེར་བས་མའི་རྒྱུན་བླངས་ནས་སྣ་ནམ་འདྲེས་བརྡ། འོ་ཡུག །གནས་པོ་ཆེ་སོགས་དགེ་འདུན་གྱི་སྡེ་བཙུགས་པ་དེ་དག་ལས་གྱེས་ཏེ་མང་དུ་འཕེལ། ཀུན་མཁྱེན་བུའི་ཆོས་འབྱུང་དུ་སྡོམ་པ་ཆབ་གཏོར་མའི་རྒྱུན་བླངས་ཞེས་སྣང་། དེ་ནས་འ་ཞ་ལྷའི་བློ་གྲོས་ཀྱིས་ལྷ་ལྡན་གཙུག་ལག་ཁང་ལ་ཞིག་གསོས་དང་རྡོ་ཀོང་བཀྲ་ཤིས་འོད་འབར་ཕུལ། ཨ་མེས་ཇོ་སྲས་ཕུར་པ་འཕེལ་གྱིས་རྔོག་ལོ་རྒྱ་གར་དུ་འབྱོན་པའི་ཆ་རྐྱེན་ལ་གསེར་སྲང་བཅུ་བདུན་ཕུལ། གེགས་མེད་པར་ཕྱིར་བྱོན་ནས་ལོ་ཙཱ་བའི་ཆོས་འཁོར་གྱི་ཐོག་མ་ཡང་འདོལ་ཆུང་དུ་བསྐོར། དཔལ་ཨྱོན་ཆེན་པོས་བྱིན་གྱིས་རླབས་ཤིང་མ་ཧཱ་ཀཱ་ལ་དངོས་སུ་བཞུགས་པའི་གནས་དང་ཟུང་འབྲེལ་དུ་ཇོ་བོ་བློ་གྲོས་ཀྱིས་གནས་གཞི་བཏབ་པས་རྩིས་གནས་གསར་བར་གྲགས། དཔལ་ལྡན་ས་སྐྱ་པའི་མངའ་ཐང་སྒང་ལ་རྒྱག་པའི་དུས་ཆོས་ཀྱི་རྒྱལ་པོ་འཕགས་པ་རིན་པོ་ཆེ་དང་ཏི་ཤྲི་ཀུན་བློ་སོགས་ཀྱི་ཞབས་ལ། ནམ་མཁའ་རྒྱལ་མཚན། ནམ་མཁའ་བཟང་པོ། ཤཱཀྱ་སེང་གེ་ཅན་གྱིས་གཏུགས་པར་ཉང་གཞུང་མཐའ་དག་ཤེས་སུ་བཅུག་
པའི་འཇའ་ས་ལ་གསེར་གྱི་ཐམ་ཀ །ཤེལ་གྱི་ཉིན་ཤན། དངུལ་གྱི་སྒོར་མོ་ལུང་དང་བཅས་ལས་ཀ་གནང་བས་གནས་གསར་སྟོང་དཔོན་དུ་གྲགས། རྒྱལ་པོ། སྔགས་འཆང་། གེ་སར་གྱི་ཡོན་ཏན་ཚང་བའི་མི་བདག་རིམ་བྱོན་ལས་སྟོང་དཔོན་ཀུན་དགའ་རྡོ་རྗེའི་སྲས་ནང་སོ་ཆོས་ཀྱི་རྒྱལ་པོའི་ཁབ་ཏུ་སྙན་བརྒྱུད་ཀྱི་མངའ་བདག་འཇམ་དབྱངས་ཆོས་རྗེའི་ལྕམ་རྡོ་རྗེ་རྣལ་འབྱོར་མའི་སྤྲུལ་པ་དཔལ་ལྡན་འཛོམ་པ་བྱོན་པར་ལྕམ་སྲིད་བརྒྱད་བྱུང་བའི་བགྲེས་པ་ནང་སོ་རྣམ་རྒྱལ་དཔལ་བཟང་སློབ་དཔོན་ཆེན་པོ་པདྨའི་རྣམ་འཕྲུལ་སྐུ་ཞང་འཇམ་དབྱངས་ཆོས་རྗེ་ནམ་མཁའ་རྒྱལ་མཚན་ཡབ་སྲས་གསུམ་བསྟེན་ནས་འཁོན་གྱི་ཡབ་ཆོས་རྡོ་རྗེ་ཕུར་པས་གཙོས་གསར་རྙིང་གི་ཟབ་ཆོས་མང་པོ་ཞུས་ཤིང་བསྙེན་སྒྲུབ་བཟླས་སྒོམ་མཐར་ཕྱིན། སློབ་དཔོན་ཆེན་པོའི་བསྙེན་ཕུར་མེ་འབར་བཞིན་པ་རྩིས་ཀྱི་མཆོད་རྟེན་ནག་པོ་ནས་བཞེས། དགུང་ལོ་བརྒྱད་ཅུ་རྩ་ལྔར་ཕེབས་ནའང་སྐྱེས་དར་མའི་ཡང་རྩལ་དང་ལང་ཚོ་ལྟར་གྱུར་པའི་གྲུབ་མཚན་ངོ་མཚར་བ་སྟོན། རིན་ཅེན་སྒང་པ་སྒོས་དང་ཡོན་མཆོད་དུ་གྱུར་པའི་ཞལ་ངོ་ཕྱི་མ་རྣམས་ཀྱིས་རང་བསྟན་གྱི་སྲོག་འཐུད་པའི་རྟེན་འབྲེལ་གྱི་སྒོ་འགྲིག །དེ་འོག་ཕྱག་ན་རྡོ་རྗེའི་སྤྲུལ་པ་ནང་སོ་མགོན་པོ་རིན་ཅེན་གྱིས་མགོན་པོ་ཞལ་གཟིགས་ཤིང་ཐལ་རྡེབ་ཀྱིས་ལོག་འདྲེན་སྒྲོལ་བ། རི་དྭགས་སོགས་ལ་བྱ་གླག་གིས་འཚེ་བའི་ཚེ་སྔགས་རྒྱ་ཏིང་འཛིན་ཙམ་གྱིས་སར་ལྷུང་བ། མི་ཆོས་ལའང་སྒྱུ་རྩལ་འགྲན་ཟླ་དང་བྲལ་བར་གྲགས། དེ་འོག་འཇམ་དབྱངས་ཀུན་དགའ་བློ་གྲོས་ཞེས་གཞུང་ལུགས་རྒྱ་མཚོར་སྦྱངས་པ་ཆེ་ཞིང་དངོས་སྟོབས་
རིགས་པས་རྒོལ་བ་ཐམས་ཅད་ཞུམ་པར་ནུས་པའི་གནས་གསར་ཆོས་མཛད་ཅེས་སྙན་པའི་སྒྲ་བོ་ཆེ་ཀུན་ཏུ་བསྒྲགས། སྒྲོལ་དཀར་གྱི་སྤྲུལ་པར་རྒྱལ་དབང་པདྨའི་ལུང་གིས་ཟིན་པའི་ལྕམ་བགྲེས་པ་ཁྲོམ་གེ་སར་རྒྱལ་པོའི་མག་པའི་བརྒྱུད་པ་ཤར་ཁ་རྒྱལ་རྩེ་བའི་ཁབ་ཏུ་བྱོན་ནས་སྔ་འགྱུར་གྱི་རྒྱུད་འབུམ་བཞེང་བ་དང་བཀའ་གཏེར་བསྟན་པའི་སྦྱིན་བདག་ཟླ་མེད་དུ་མཛད། དེ་འོག་མར་པའི་ཡུམ་བདག་མེད་པའི་སྤྲུལ་པར་གྲགས་པ་ར་ལུང་དུ་ཞབས་དྲུང་འབྲུག་པ་དབོན་རིན་པོ་ཆེའི་ཇོ་མོར་ཕེབས། རྗེ་བཙུན་མ་གསུམ་གྱི་གཅིག་གིས་བདག་ཆེན་རྡོ་རྗེ་འཆང་ཆེན་པོར་གསུང་ངག་རིན་པོ་ཆེ་གསན་ནས་སྒྲུབ་པ་སྙིང་པོར་མཛད་པས་འདའ་ཁ་མའི་ཉམས་ལེན་གྱིས་གྲུབ་མཐའ་སྙོགས། རྣལ་འབྱོར་མ་ཀུན་དགའ་ཆོས་ལྡན་དང་ནི་གུ་ཆོས་སྒྲོན་མ་གཉིས་ཀྱིས་ཀ་ཐོག་པ་བཞག་བླ་ཡེ་ཤེས་འབུམ་དང་སྤྲུལ་པའི་གཏེར་སྟོན་པདྨ་གླིང་པ་གཉིས་ལ་བཏུགས་ནས་ཟབ་ལམ་རྫོགས་པ་ཆེན་པོའི་ཆོས་ཉིད་ཟད་པའི་སར་འཁྱོལ། ནང་སོ་སྐུ་མཆེད་གཉིས་ཀྱི་ཇོ་མོར་ས་སྐྱའི་ནང་ཆེན་ལྷ་ཁང་ཆེན་མོ་བའི་སྲས་མོ་དཔལ་འཛོམ་བསུས་པའི་སྲས་ནམ་མཁའ་རྡོ་རྗེ་ཚེ་བརྟན་དཔལ་འབྱོར་བཟང་པོ་ནི་ཡིག་རྩིས། བརྟག་པ་རྣམ་པ་བརྒྱད་ལ་སོགས་པ་ལུགས་ཀྱི་བསྟན་བཅོས་ལ་མཁས་པ། སྒམ་ཞིང་བརྟན་ལ་བློ་གྲོས་ཀྱི་མཐུ་ཕུལ་དུ་བྱུང་བ། བདག་ཆེན་ཆོས་རྗེ་ཡབ་སྲས་གསུམ། ལྕེ་སྟོན་སེང་གེ་སོགས་མཁས་གྲུབ་ཀྱི་དམ་པ་མང་དུ་བསྟེན། རང་གི་ཨ་ནེ་འཁྲུལ་ཞིག་ཀུན་དགའ་ཆོས་ལྡན་ལ་རྫོགས་པ་ཆེན་པོའི་ཁྲིད་གསན་
པས་ཉམས་གོང་འཕེལ་གྱི་རྟོགས་པ་ཀློང་དུ་གྱུར། ཐོས་གྲོལ་དང་གཅོད་ཡུལ་སོགས་ལ་བརྟེན་ནས་སྒྱུ་ལུས་རྨི་ལམ་ལ་རང་དབང་ཐོབ་པས་ལྕང་ལོ་ཅན་གྱིས་མཚོན་དག་པའི་ཞིང་ཕུལ། གམ་པ་རྫོང་དུ་ཕྱག་རྡོར་གྱི་བསྙེན་པའི་ཚེ་ཐུན་འཚམས་སུ་མར་མེ་ཤི་ཞིང་ཐུན་དངོས་ལ་རང་འབར་དུ་འགྲོ་བ། བྱང་ཆུབ་ཀྱི་སེམས་བཅོས་མིན་དུ་འཁྲུངས་ཤིང་ཀླུ་འབུམ་གཉན་ཁྲིའི་གདན་གསལ་པོར་གཟིགས་པ། མནལ་ལམ་དུ་ཁྱོད་ཁྱུང་འདི་ལ་ཞོན་ནས་རི་རབ་ལ་སྐོར་བ་ལན་གསུམ་བྱས་ཏེ་ལྕང་ལོ་ཅན་དུ་གཤེགས་པར་འགྱུར་རོ། །ཞེས་པའི་ལུང་བསྟན་རྙེད། གནོད་བྱེད་ཀྱི་ཀླུ་གདུག་པ་ཅན་བཏུལ་བ་སོགས་གསང་བདག་གིས་རྗེས་སུ་བཟུང་བར་བརྟེན། རྗེ་མཁྱེན་བརྩེའི་ཞབས་ཀྱིས། འདི་ནས་འཕོ་ཚེ་བྱང་ཕྱོགས་ལྕང་ལོ་ཅན། །ཞིང་དེར་ཕ་རྒན་དྲུང་དུ་ཐོག་མར་འགྲོ། །དེ་ནས་ཨྱོན་ཟངས་མདོག་དཔལ་རིའི་རྩེར། །སྐྱེ་བའི་རྟེན་འབྲེལ་བསྒྲིག་ལ་གསོལ་བ་འདེབས། །ཞེས་གསུང་བའི་དགོངས་གཞི་ཡང་དེ་ཡིན་ལ། སེང་གེ་རྩེ་བའི་བློན་པོ་མཛད་པ་སོགས་སྲིད་ཀྱི་རྣམ་གཡེང་དུས་འཁྲུག་ཆེ་སྐབས་ཀྱང་མཚན་བཅས་མཚན་མེད་ཀྱི་རྣལ་འབྱོར་ཡེ་མ་བཞག །སྙུན་དམ་པོས་བཏབ་པའི་དུས་ཁུ་བོ་གནས་གསར་ཆོས་མཛད་ཀྱི་སྒྲོལ་མའི་རྗེས་གནང་མཛད་པའི་ཚེ་སྒྲོལ་མ་རི་བོ་ཙམ་པའི་སྐུ་གཟིགས་པས་སྙུན་ལས་མྱུར་དུ་གྲོལ་བོ་དོང་དུ་ཇོ་ནང་མཁན་ཆེན། རྗེ་བཙུན་སྒོ་རུམ་པ་ཆེན་པོ་ཀུན་དགའ་ལེགས་པ་རིགས་ཀྱི་བདག་པོར་བསྟེན་ནས་བདག་ལུས་ལོངས་སྤྱོད་ཐམས་ཅད་མཆོད་སྤྲིན་དུ་ཕུལ། རྗེ་ཞིང་གཞན་དུ་གཤེགས་ཁར་རིགས་བརྒྱུད་དཀར་ནག་གི་འབྲེལ་པ་བཞག་
པས་མཐའ་བརྟེན་པ་ཀུན་རྗེས་སུ་འཛིན་པའི་ཞལ་བཞེས་ཞུས། རྡོ་རྗེ་འཆང་ཚར་པ་ཆོས་རྗེ་དང་ངོར་ཆེན་སངས་རྒྱས་སེང་གེ་ལ་ཟབ་རྒྱས་ཀྱི་ཆོས་མང་དུ་གསན། སྲས་གཉིས་ལ་སྲིད་ཀྱི་བྱ་བ་མ་ལུས་པ་གཏད་དེ་བསྐྱེད་རྫོགས་ཀྱི་རྣལ་འབྱོར་བསྙེན་སྒྲུབ་བསྐང་བ་མདོས་གཏོར་སོགས་ཐུགས་དམ་གྱིས་ཉིན་མཚན་དུས་འདའ། དེ་དག་གི་ཚེ་རྡོ་རྗེ་ཆོས་སྐྱོང་ཞལ་གཟིགས་པ། བསྲེག་མཁན་མེད་པར་ཤ་ཆེན་དྲི་ངད་འཐུལ་བ། དགུན་སྨན་རག་ཁོལ་བ། ལིངྒ་འགུལ་བ། ཟོར་གཏོར་འཕར་བ། མདོས་གཏོར་གྱི་གསེབ་ནས་བཙོ་རྒྱུག་པ། གམ་པ་རྫོང་དུ་ཐོག་སྡིགས་མཛུབ་ཀྱི་རྩེ་ལ་བླངས་ཏེ་གཞན་དུ་འཕངས་པ་དང་། བོ་དོང་རྫོང་དུ་བབས་ཀྱང་མ་གནོད་ཅིང་སྡིགས་མཛུབ་དང་ཤཱ་ས་ནཱའི་ནུས་པས་ཧོར་དམག་བྲོས་པ། རོང་ཆུང་དུ་རྦབ་དང་ཙག་ས་དཀར་གྲུར་ཆུ་རླབས་ཀྱི་འཇིགས་པ་སྡིགས་མཛུབ་དང་བཅས་པའི་ཕཊ་སྒྲས་བཟློག་པ། མནལ་ལམ་ལ་ཏི་པུ་པས་སྐུ་ཚེའི་ཚད་ལུང་བསྟན་པ་སོགས་ངོ་མཚར་རྣམས་ཆེས་དཔག་པར་དཀའ་ནའང་ཞང་སྟོན་ཆོས་འབར། རྗེ་མར་པ། མཁས་པ་གཡུ་ཐོག་པ་སོགས་ལའང་ལས་མ་དག་པའི་སྐྱེ་བོ་ཕལ་ཆེར་ཁྱིམ་པ་རང་བཞིན་པའི་མཐོང་ལས་མེད་འདུག་པ་ལྟར་འདི་སྐབས་ཀྱང་སྡེ་དཔོན་དཀྱུས་མའི་རྩིང་ཧྲལ་ཞིག་གི་ཉམས་ལས་མེད་པར་སྣང་། དེའང་མནལ་ལམ་དུ་རི་རབ་ལ་ལན་གསུམ་བསྐོར་ཞེས་པ་སྐྱེ་བ་གསུམ་བརྒྱུད་དགོས་རྒྱུར་ལམ་ཟབ་མོའི་ཉམས་ལེན་ལ་བརྟེན་ནས་དགུང་ལོ་རེ་བརྒྱད་པ་ཁྲུམས་ཟླའི་ཚེས་བཅུའི་ཉིན་གཤེགས་ཁར་ཚར་ཆེན་ལ་
རེ་ལྟོས་ཞུས་པས་སྐྱབས་འཇུག་ཤིན་ཏུ་རྒྱས་པ་དང་ཁྱད་པར་རྡོ་རིང་རིན་པོ་ཆེར་གསོལ་འདེབས་ཤུགས་དྲག་གནང་བས་མནལ་ལམ་དུ་རྡོ་རིང་པ་ཆེན་པོས་ཁོང་པ་ལས་ཀྱི་རྣམ་སྨིན་གྱི་འཕྲོ་ཞིག་གིས་རྒྱ་ནག་གི་མཐའ་འཁོབ་ཏུ་རུ་དྲ་མོའི་མངལ་དུ་ཟླ་བ་དྲུག་གནས་དགོས་པ་ཆོས་སྐྱོང་གིས་མ་དེ་བསྒྲལ་ནས་ལྕང་ལོ་ཅན་དུ་སྐྱེ་ནའང་ཆོས་རྗེ་པས་འབད་རྩོལ་མཛད་ན་ཟླ་བ་གཅིག་ཙམ་གྱིས་ཆོག་ཉེན་འདུག་ཅིང་གང་ལྟར་དོ་ནུབ་མཇལ་དུ་འོང་བ་ཡོད་གསུང་བ་ལྟར་སྔོན་དུས་ཀྱི་ཆ་ལུགས་ཇི་ལྟ་བ་ཛོ་ཀེའི་འཁོར་ལ་བརྟེན་ནས་བྱུང་བ་བདག་ཚེ་འཕོས་ཀྱང་བླ་མ་དང་ཆོས་སྐྱོང་གི་མཐུས་རྒྱལ་ཁ་བྱུང་། ཕྱག་རྡོར་གྱི་དབང་གནང་བར་གསོལ་བས་སང་ནས་བཟུང་ཕྱག་རྡོར་གྱི་དཀྱིལ་འཁོར་དུ་ལྷོ་སྒོའི་ཆོ་ག་ལན་གསུམ་མཛད་པས་ནུབ་ཅིག་འོད་གསལ་དུ་འབྲུག་སྒྲ་དིར་རིར་སྒྲོག་པར་གཟིགས་པ་ན་ནང་འོད་ཀྱི་རྣམ་པའི་ནོར་བུ་མིག་གསུམ་པས་གང་བ་གསལ་བས་སྡེ་པ་དེ་ལྕང་ལོ་ཅན་དུ་འབྲུག་གི་ཞོན་པ་ཅན་གྱི་གནོད་སྦྱིན་བདེ་ལྡན་འོད་ཟེར་དུ་སྐྱེས་ནས་དྲིན་ལན་འཇལ་དུ་འོངས་པར་མཁྱེན་ཅིང་གནོད་སྦྱིན་དེ་ཕྱག་ན་རྡོ་རྗེས་རྗེས་སུ་བཟུང་བར་བརྟེན་ཐུགས་བདེ་བར་གྱུར། འདི་པའི་ཡུམ་སྔ་མོ་ནས་གྲོངས་པས་ཆུན་མར་གཙང་ཚོང་འདུས་མགུར་མོའི་ཁྲི་དཔོན་གྱི་ལྕམ་སྲིང་བྱངས་སེམས་བུ་ཁྲིད་བླངས་པའི་སྲས་ནམ་མཁའ་རྒྱལ་བ་ལྕེ་སྟོན་པཎ་ཆེན་ལས་དགེ་བསྙེན་གྱི་སྡོམ་པ་ནོས། གོང་གི་ཡོངས་འཛིན་ཕལ་ཆེར་དང་། སྤྲུལ་སྐུ་ཤཱཀྱ་བཟང་པོ། གནུབས་ཆེན་རིན་ཅེན་དཔལ་བཟང་། ལྷ་བཙུན་ལེགས་ལྡན་བདུད་འཇོམས་རྡོ་རྗེ་སོགས་དམ་པ་མང་དུ་བསྟེན། ཚར་ཆེན་ཆོས་ཀྱི་རྒྱལ་
པོ་ལ་ཐུགས་སྒྲུབ་དྲག་པོ་རྩལ་གྱི་ཆོས་སྐོར་གསན་པ་གཙོ་བོར་གྱུར་པའི་བདེ་མཆོག །གཤེད་དམར། ཕུར་པ། སྒྲོལ་དཀར་སོགས་ཡི་དམ་གྱི་ལྷ་རྣམས་ཀྱི་བསྙེན་སྒྲུབ་དང་མཁའ་འགྲོ་ལྔའི་མཆོད་གཏོར་གྱིས་མཚོན་ཐུགས་དམ་ཤིན་ཏུ་སྨིན། སྐུ་ཚེའི་སྨད་ལ་ཚར་ཆེན་གྱི་དྲུང་དུ་རབ་ཏུ་བྱུང་ཞིང་དགུང་ལོ་དོན་གཉིས་པའི་ཚེ་ཚར་ཆེན་རྡོ་རྗེ་འཆང་སྤྱན་དྲངས་པ་སྔས་མགོར་བླ་མ་འདི་ལྟ་བུ་ཕེབས་ནས་འཆི་བ་སྐལ་བ་བཟང་ཚུལ་སོགས་དགྱེས་དགྱེས་དང་བར་དོར་ཡང་ཧཱུྃ་སྒྲ་དིར་རིར་འགྲོ་གསུང་། གཤེགས་ནས་དབུ་ཐོད་སོར་བཞི་ཙམ་འཕགས་ཤིང་མེ་ཏོག་གི་ཆར་གྱིས་མཚོན་ལྟས་ཡ་མཚན་གཤིས་རྟོག་གེ་པ་རྒན་པོ་འགའི་ང་རྒྱལ་ཆག་པ་སོགས་ལ་དཔགས་ན་གཅེན་དུ་མ་ཟད་འདི་ཉིད་ལའང་དིང་སང་གི་ཆོས་པ་བཟང་པོར་རྩི་བ་རྣམས་ཀྱིས་བསྒྲུན་དཀའ་བར་མཆིས། མཆེད་གཉིས་ཀྱི་ཇོ་མོར་སེ་སྟོན་དཔལ་ཆེན་འབུམ་དང་མཐུ་ཆེན་ཉི་མ་བཟང་པོ་སོགས་ཡང་ཕུར་གཤིན་རྗེས་གཙོས་ལྷའི་སྣང་བ་ཐོབ་ཅིང་ཆོས་སྐྱོང་བྲན་དུ་འཁོལ་བའི་རིགས་བརྒྱུད་རྗེ་བཙུན་ས་སྐྱ་པའི་དབོན་པོར་གྱུར་པ་འདར་ཆོས་རྫོང་པ་དོན་ཡོད་རྣམ་རྒྱལ་གྱི་སྲས་མོ་ཚེ་བརྟན་བུ་འདྲེན་ཞེས་བདག་ཆེན་རྡོ་རྗེ་འཆང་། རྗེ་སྒོ་རུམ་པས་མཚོན་དམ་པ་དུ་མའི་ཞབས་པད་བསྟེན་ཅིང་ཚར་ཆེན་ཆོས་ཀྱི་རྒྱལ་པོ་དང་འཁྲུལ་ཞིག་ཀུན་དགའ་ཆོས་ལྡན་ལ་གདམས་པའི་ཉིང་ཁུ་ནོས་ནས་མགོན་པོའི་ཡིག་བདུན་མ་ས་ཡ་གསུམ་དང་ནཱ་རོ་མཁའ་སྤྱོད་ཀྱི་ཆག་མེད་མཛད་པས་མནལ་ལམ་དུ་རྗེ་བཙུན་ཞལ་གཉིས་མ་གསེར་གྱི་མདོག་ལྡན་གཟིགས་ཤིང་ཕག་སྐད་ངུར་སྒྲས་ཁེངས་པ་སོགས་གྲུབ་པའི་མཚན་མ་བརྙེས་པ་བུད་མེད་ཕལ་
པའི་ངང་ཚུལ་ལས་འདས་པ་དེ་བསུས་པ་ལ་མཆེད་ཁ་ཡར་འཁྲུངས་པའི་དང་པོ་ཞབས་དྲུང་བསྟན་པའི་དྲུང་ངམ་བསོད་ནམས་རབ་བརྟན་དུ་གྲགས་པ། དེ་འོག་ཆོས་ཀྱི་རྒྱལ་མཚན། དེ་འོག་ཐམས་ཅད་མཁྱེན་པ་མཁྱེན་བརྩེའི་དབང་ཕྱུག །ཆུང་བ་ནོར་བུ་བཟང་པོ་རྣམས་ལས་གཅེན་དང་གཅུང་རྣམས་ནི་སྒྱུ་རྩལ་དྲུག་ཅུ་རྩ་བཞིས་གཙོས་ལུགས་དང་འབྲེལ་བའི་ཡོན་ཏན་གྱི་མཐུ་ཕུལ་དུ་བྱུང་ཞིང་རྗེ་བཙུན་སྒོ་རུམ་པ་ཆེན་པོ་དང་རྡོ་རྗེ་འཆང་ཚར་པ་ཆོས་རྗེ་སོགས་སྔགས་གསར་རྙིང་གི་མཁས་གྲུབ་དུ་མའི་ཞབས་རྡུལ་ཉེ་བར་བསྟེན་ནས་ཟབ་ཆོས་མང་དུ་གསན་ཅིང་དེའང་ཚིག་ཙམ་དུ་མ་ལུས་པར་བསྐྱེད་རྫོགས་ཀྱི་རྣལ་འབྱོར་བསྙེན་ཅིང་སྒྲུབ་པ་རྡོ་རྗེ་ཆོས་སྐྱོང་རྣམས་ཕྱི་ནང་གསང་བའི་མཆོད་པས་ཐུགས་དམ་སྐོང་བའི་མཛད་པ་སོགས་སྡེ་དཔོན་ཕལ་པའི་སྤྱོད་ཚུལ་དང་ཡེ་མི་འདྲ་བའི་གོང་མའི་ཞབས་རྗེས་ཟིན་པ་ཐུབ་པའི་རིང་ལུགས་འཛིན་ནོ་ཅོག་ལ་དག་པའི་སྣང་བ་དང་ལྡན་ནའང་རང་བསྟན་ཁའུ་བྲག་རྫོང་པའི་བླ་མ་དང་ཆོས་ལས་བསྟན་དང་སྟོན་པ་གཞན་ནས་མི་འཚོལ་བའི་དམ་བཅའ་བརྟན་པོ་སྤང་ལ་བེ་ཕུར་བཏབ་པའམ་རྡོ་ལ་རི་མོ་བྲིས་པ་ལྟ་བུའི་དམ་པའི་ངང་ཚུལ་དང་ལྡན་པ་ཤ་སྟག་ཡིན་ནོ། །ཨེ་མ་གངས་ཅན་དཔལ་མོའི་མངལ་ཡངས་པོར། །བསོད་ནམས་འབྲས་བུའི་ཁུར་གྱིས་རབ་ལྕི་བ། །རིགས་གསུམ་སྒྱུ་དྲའི་གར་མཁན་མི་ཡི་བདག །ཆད་མེད་མཐོ་རིས་ཆུ་བོའི་སྤུན་ཟླ་བཞིན། །དེ་དབོན་འོད་གསལ་ལྷ་བབས་འ་ཞའི་གདུང་། །ཆེ་གཉན་བཙུན་གསུམ་འཛོམ་པ་རྒྱལ་པོའི་བརྒྱུད། །མཐུ་སྟོབས་ནུས་པར་ལྡན་པ་རིག་སྔགས་འཆང་། །དཔའ་རྩལ་
གདོང་ངར་ཆེ་བ་གེ་སར་རིགས། །རླུང་གིས་མཐོན་པོར་བཏེག་པའི་འདབ་ཆགས་སྒྲོ། །འགྲོ་མངས་རལ་པའི་རྩེ་མོར་སྟེས་དབང་ལས། །གཡེངས་མིན་ཁུངས་འབྲེལ་ལུས་ཕྲའི་འགྲམ་ཆང་གིས། །དཔྱོད་ལྡན་བློ་ཡི་བ་ཀུ་ལ་དེ་བཞད། །རྡུལ་མང་ཕང་པར་ཉལ་བའི་ཁྲི་སྟན་སྟེང་། །ཆེན་པོར་བཀུར་བར་མི་བསྙེངས་བྱང་ཚན་ལ། །གཞོམ་པས་ཨིནྡྲ་བྷཱུ་ཏི་རྣ་རྒྱན་གྱིས། །ལྗོངས་འདིར་གཟུགས་ཅན་གཉིས་པ་བཟུང་བ་བཞིན། །དེའང་ཚིགས་གསུམ་པ། འཇམ་དབྱངས་མཁྱེན་རྩེའི་དབང་ཕྱུག་བསྟན་པའི་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་ཡོངས་གྲགས་ཀྱི་རྣམ་པར་ཐར་པ་དགུང་ལོ་སུམ་ཅུ་སོ་བརྒྱད་ཡན་གྱི་རྟོགས་བརྗོད་རང་ཉིད་ཀྱིས་མཛད་པའི་ངོ་མཚར་སྙེ་མར་གསུངས་པ་སྨོས་མ་དགོས། དེ་ནས་ཀྱང་ལོ་ཕྱེད་དྲུག་ཙམ་གྱི་བར་ཞིང་འདིར་བཞུགས་པས་འཕྲོ་འཐུད་ཐུབ་ན་ལེགས་པར་སྣང་ཡང་ཟིན་བྲིས་སོགས་ངེས་ཏིག་མ་འབྱོར་ལ། སྐུ་ཚེ་སྔོན་མ་སྣམས་སུ་གངྒཱའི་ཀླུང་གི་རྡུལ་སྙེད་ལས་འདས་པའི་ཞིང་ཁམས་རྒྱ་མཚོར་མཆོག་དམན་བར་པའི་ཚུལ་སྣ་ཚོགས་པས་འགྲོ་བའི་དོན་མཛད་པའི་མཐའ་ལ་རྟོགས། འོན་ཏེ་སྐྱེ་བ་རིམ་བརྒྱུད་དང་ཐུགས་རྒྱུད་གཅིག་པའི་སྤྲུལ་པ་སོགས་ཀྱིས་བསྟན་འགྲོའི་སྨན་ཡོན་དུ་གྱུར་པའི་རིམ་པ་ནི། རྗེ་ཉིད་ཀྱི་ཞལ་གསུངས་མར། ན་མོ་གུ་རུ་བྷྱཿརྒྱལ་བ་སྐུ་དངོས་ཨྱོན་ཆོས་ཀྱི་རྗེ། །རྡོ་རྗེ་འཆང་དབང་ཀུན་དགའ་ལེགས་པའི་ཞབས། །སྐུ་དྲིན་མཉམ་མེད་བློ་གསལ་རྒྱ་མཚོ་སོགས། །སྐྱབས་མཆོད་བླ་མ་རྣམས་ལ་གསོལ་བ་འདེབས། །ཨྱོན་དྲུང་ན་ལང་འགྲོ་དཀོན་ཅོག་འབྱུང་། །
དག་དང་མ་དག་སྐྱེ་བ་འགའ་ཡི་མཐར། །ཆོས་དབང་གསུང་སྤྲུལ་པདྨ་དབང་ཆེན་ཞེས། །མཁས་གྲུབ་དམ་པར་གྱུར་ལ་གསོལ་བ་འདེབས། །རྫོགས་ཆེན་རྣལ་འབྱོར་འོད་གསལ་རང་གྲོལ་དང་། །བཀའ་བརྒྱད་བཀའ་བབས་རྡོར་འཆང་བསོད་ནམས་བཟང་། །འཇམ་དབྱངས་སྒེག་པ་བསོད་ནམས་གྲུབ་ལ་སོགས། །དག་པའི་སྐྱེ་བར་གྱུར་ལ་གསོལ་བ་འདེབས། །རྒྱལ་བས་ལུང་བསྟན་ཟབ་གཏེར་བསྟན་པའི་བདག །འབྲེལ་ཚད་དོན་ལྡན་རྒྱལ་པོའི་བླ་མཆོད་དེ། །ཆོས་ཀྱི་རྒྱལ་པོ་རཏྣ་གླིང་པ་ཞེས། ཁམས་གསུམ་གྲགས་པས་ཁྱབ་ལ་གསོལ་བ་འདེབས། །ཉམས་རྟོགས་མཐར་ཕྱིན་ཨ་སེང་རྒྱལ་མོ་དང་། །འཕགས་ཡུལ་བྲམ་ཟེ་བྷྲ་མ་ནཱ་ཐ་ཉིད། །གངས་རིའི་ཁྲོད་འདིར་རྒྱལ་པོའི་རིགས་སུ་སྐྱེས། །མཁྱེན་བརྩེའི་དབང་ཕྱུག་ཉིད་ལ་གསོལ་བ་འདེབས། །དེ་ཡི་སྐུ་གསུང་ཐུགས་དང་ཡོན་ཏན་དང་། །འཕྲིན་ལས་སྤྲུལ་པ་ཤེས་རབ་སྙིང་རྗེ་ཅན། །རབ་བྱུང་རྒྱལ་ཆེན་རྣལ་འབྱོར་ཚུལ་ཅན་ཞེས། །པདྨས་ལུང་བསྟན་ཁྱོད་ལ་གསོལ་བ་འདེབས། །རྒྱལ་སྲས་གུ་རུ་ཆོས་ཀྱི་དབང་ཕྱུག་གིས། །ཡང་སྲིད་གཉིས་སུ་ཕ་བུའི་འབྲེལ་པ་བཞག །ད་དུང་འབྲལ་མེད་རྗེས་སུ་འཛིན་ནོ་ཞེས། །བྱིན་རླབས་ལུང་བསྟན་ཐོབ་ལ་གསོལ་བ་འདེབས། །དགྱེས་པ་རྡོ་རྗེ་འཁོར་ལོ་སྡོམ་པ་དང་། །རྡོ་རྗེ་ཕག་མོ་སྒྲུབ་ཆེན་བཀའ་བརྒྱད་ལྷ། །འཇམ་དཔལ་ཁྲོས་པ་འཇོམས་བྱེད་འབར་བ་ཡིས། །བྱིན་རླབས་མཚན་མ་ཐོབ་ལ་གསོལ་བ་འདེབས། །ལྷ་ཆེན་དཔལ་འབར་ལྕམ་བྲལ་ཕོ་ཉར་བཅས། །གུར་གྱི་མགོན་པོ་གཉན་མགོན་རྣམ་སྲས་སོགས། །དམ་ཅན་
རྒྱ་མཚོ་ཕལ་ཆེར་བྲན་དུ་འཁོལ། །འཕྲིན་ལས་ཐོགས་མེད་སྒྲུབ་ལ་གསོལ་བ་འདེབས། །འདི་ནས་འཕོ་ཚེ་བྱང་ཕྱོགས་ལྕང་ལོ་ཅན། །ཞིང་དེར་ཕ་རྒན་དྲུང་དུ་ཐོག་མར་འགྲོ། །དེ་ནས་ཨྱོན་ཟངས་མདོག་དཔལ་རིའི་རྩེར། །སྐྱེ་བའི་རྟེན་འབྲེལ་བསྒྲིག་ལ་གསོལ་བ་འདེབས། །དེ་ལྟར་ཁྱེད་ལ་གུས་པས་གསོལ་བ་འདེབས་ན། །དུས་འདི་ནས་བཟུང་ཚེ་རབས་ཐམས་ཅད་དུ། །ནམ་ཡང་འབྲལ་མེད་མཉེས་པ་ཀུན་བསྒྲུབས་ནས། །ཆམ་གཅིག་གདོད་མའི་ཀློང་དུ་གྲོལ་བར་ཤོག །ཅེས་པ་འདི་སྙིང་ནས་དད་ལྡན་གཉོས་དཀའ་བཅུ་པ་ཆོས་རྒྱན་གྱིས་བསྐུལ་བའི་ངོ་མ་ཆོགས་པར་ངེད་རང་གི་ཁོང་ཁྲག་ཤོག་བུའི་ལོགས་ལ་བཀོད་པ་ཡིན་པས། ཐམས་ཅད་ལ་བསྟན་ན་ངེད་ཀྱི་ཚེ་ལ་གནོད་པས་ཤིན་ཏུ་གསང་ཞིང་སྦས་པའི་ཚུལ་དུ་མཛད་པ་གལ་ཆེ་ཆེ། དམ་ཚིག་ལ་དགོངས་མཛོད་ཅིང་། དགེ་སློང་ཆོས་རྒྱན་ལ་བསྟན་ཀྱང་བཟོད། ཚ་བོ་བཙུན་ཆུང་རྣམས་སྣོད་ལྡན་ཡིན་ཀྱང་། ན་སོ་གཞོན་པས་གཞན་ལ་ཤོར་ཉེན་ཡོད་པས་ཐེང་གཅིག་ལ་མ་སྟོན་མཛོད། ས་མ་ཡ། ཞེས་པ་དང་ཤེས་རབ་རྒྱ་མཚོ། བུདྡྷ། སངས་རྒྱས་ལྷུན་གྲུབ། སྦྱིན་པ་དཔལ་བཟང་། དཀོན་ཅོག་ལེགས་པ་ལྔས་ཞུས་དེར་གནང་བའི་ཀུན་ཁྱབ་ཆོས་དབྱིངས་མ་གཉིས་འདུག་པ་རྒྱས་བསྡུས་ཙམ་དུ་མཐོང་བས་གཅིག་ཏུ་བྱས་ན་སྤྲུལ་གཞི་རྒྱལ་ཀུན་ཡབ་གཅིག་འཇམ་དབྱངས། འོ་སྐོལ་གྱི་སྟོན་པའི་དྲུང་དུ་ཤེས་རབ་ཅན་གྱི་མཆོག་ཤཱ་རིའི་བུ། ལྷ་སྲས་ཁྲི་སྲོང་ལྡེའུ་བཙན། རྫུ་འཕྲུལ་གྱིས་ཐོག་ཆེན་མདའ་ལྟར་འཕེན་པའི་ལང་འགྲོ་དཀོན་ཅོག་འབྱུང་གནས། མངའ་བདག་ཉང་གི་
སྲས་ཟབ་གཏེར་ཆོས་ཀྱི་བང་མཛོད་འགྲོ་མགོན་ནམ་མཁའ་དཔལ་ལྡན་ཞེས་བླ་མའི་བཀའ་བབས་ཤིང་ཐུགས་རྗེ་ཆེན་པོ་དངོས་སུ་འགྲུབ་པ། གཏེར་ཁ་འོག་མ་གུ་རུ་རིན་པོ་ཆེ་ཆོས་ཀྱི་དབང་ཕྱུག་གི་གདུང་ལས་བླ་རྫོགས་ཐུགས་གསུམ་གྱི་བཀའ་བབས་པ་རྒྱལ་སྲས་པདྨ་དབང་ཆེན། བདུད་འཇོམས་སྐྱེ་བ་རིགས་འཛིན་ཆེན་པོ་རྒོད་ཀྱི་ལྡེམ་ཕྲུས་རྗེས་སུ་བཟུང་ཞིང་སངས་རྒྱས་གཉིས་པ་ཨྱོན་ཆེན་པོ་ཞལ་གཟིགས་ནས་གདམས་པ་ཐོབ་པའི་ཟུར་ཚོ་རྡོར་འཆང་བསོད་ནམས་བཟང་པོ་ཞེས་བཀའ་བརྒྱད་ཀྱི་བཀའ་བབས་པ། འདི་ཉིད་ཀྱི་སྐུ་སྐྱེ་ཡིན་ཚུལ་གཏེར་ཆེན་ཆོས་ཀྱི་རྒྱལ་པོ་རིགས་འཛིན་མངའ་རིས་པ་ཆེན་པོས་ཡང་ཡང་གསུངས་པས་རྡོར་འཆང་པ་ཡན་ཁོང་རང་གི་རྣམ་ཐར་དུ་གསུངས་པ་ལ་ཐེ་མི་ཚོམ་པར་མ་ཟད་མངའ་བདག་ཡིན་པའི་ཁུངས། རིགས་འཛིན་ཡོངས་འདུས་ཀྱི་ཆོས་བདག་ལུང་བསྟན་སྐབས་སུ། ཆོས་རྒྱལ་ཁྱོད་སྤྲུལ་མེ་ཏོག་མིང་འཛིན་པ༔ དངོས་ལས་ལྷག་པའི་སྐྱེས་བུ་སྙིང་སྟོབས་ཅན༔ བཀའ་གཏེར་ཆོས་བདག་བོང་རིང་ལུག་སྤྲེལ་ལོ༔ རིན་ཅེན་ཕྱག་རྟེན་དགོངས་ཀྱི་དུས་སུ་འབྱུང་༔ ཞེས་ཤིན་ཏུ་གསལ། ཆོས་ཀྱི་རྒྱལ་པོ་ཀློང་ཆེན་པའི་ཐུགས་སྲས་འོད་ཆེན་གོ་ཆ་ཞེས་སྙིང་ཏིག་གི་བཀའ་བབས་པས་འོད་གསལ་ལོངས་སྐུའི་ཞིང་ཁམས་མྱུལ་ཞིང་ཚེ་དཔག་མེད་ཀྱིས་མངོན་སུམ་དུ་ཞལ་གཟིགས་པ། མངའ་བདག་ཁྲི་སྲོང་ལྡེའུ་བཙན་གྱི་ཐུགས་སྤྲུལ་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱིས་སྦྱོར་བ་ཡན་ལག་དྲུག་གི་ཟབ་མོས་གྲོལ་བར་མཛད་པ་འཇམ་དབྱངས་སྒེག་པ་ནམ་མཁའ་དཔལ། ཟབ་དོན་གདམས་པས་ཡོངས་
གྲོལ་བསོད་ནམས་གྲུབ་པ། སྲས་པདྨ་དབང་ཆེན་གྱི་ཡང་སྲིད་གཏེར་ཆེན་ཆོས་ཀྱི་རྒྱལ་པོ་རཏྣ་གླིང་པའམ་གཏེར་གནས་དང་ལུང་བསྟན་གྱི་དབང་གིས་འགྲོ་འདུལ་གླིང་པ་དང་ཞིག་པོ་གླིང་པ་སྟེ་གཏེར་སྟོན་གཅིག་ལ་གླིང་པ་གསུམ་དུ་གྲགས་ཤིང་གཏེར་ཁ་ཉེར་བརྒྱད་ཞལ་ཕྱེ་ནས་སྔ་འགྱུར་བསྟན་པའི་སྲོག་འཐུད་པར་མཛད་པ་པོ། ཆོས་ཀྱི་རྒྱལ་པོའི་རྣམ་པར་སྤྲུལ་པ་གྷ་ཏ་ནཱ་ཐས་བྱིན་གྱིས་བརླབས་ནས་དྲག་སྔགས་ནུས་པ་མཆོག་ཏུ་བརྙེས་ཤིང་ཨཽཌྜི་ཡ་ནའི་གནས་སུ་རྡོ་རྗེ་ཕག་མོས་དངོས་སུ་རྗེས་སུ་བཟུང་བ་བྷྲ་མ་ནཱ་ཐ། རྗེ་བཙུན་བརྩེ་པ་ཆེན་པོའི་རྣམ་འཕྲུལ་འཇམ་དབྱངས་དཀོན་ཅོག་བཟང་པོའི་ཟབ་དོན་ཆོས་ཀྱི་ཉིང་ཁུས་འོད་གསལ་ཕ་མཐར་ཕྱིན་པས་ཐོགས་བཅས་ཀྱི་བདུད་ལས་རྒྱལ་བ་ཨ་སེང་རྒྱལ་མོ། རཏྣ་གླིང་པ་དང་བསོད་ནམས་གྲུབ་པ་མ་གཏོགས་པའི་བཞི་པོ་དམ་པ་འགའི་ལུང་བསྟན་དང་བསྟུན། བཙུན་མ་འདི་བྱིས་པའི་དུས་ཝལ་གྱིས་དྲན་ཞེས་གསོལ་འདེབས་ཀུན་ཁྱབ་ཆོས་དབྱིངས་མའི་མཇུག་ན་གསུངས། ལང་འགྲོ་ལོ་ཙཱ་བ་ནི། ལས་འགྲོ་གླིང་པའི་ལུང་བསྟན་དུ། ལང་འགྲོའི་སྤྲུལ་པ་བཀའ་གཏེར་བདག་པོ་ནི༔ མཁྱེན་བརྩེའི་མིང་ཅན་རིག་གནས་ལྔར་མཁས་པ༔ གཙང་ཕྱོགས་འདི་ནས་འཁོར་གྱི་ཐོག་མར་འབྱུང་༔ དེ་ལ་གདམས་པ་གཏད་ན་བསྟན་པ་འཕེལ༔ ཞེས་གསལ་བར་ལུང་གིས་ཟིན་ཅིང་རཏྣ་གླིང་པ་ནི་ལང་འགྲོའི་སྐྱེ་བར་ཡོངས་སུ་གྲགས། བསོད་ནམས་གྲུབ་པ་ནི། གོང་དུ་གསོལ་འདེབས་བྲིས་པར་གསལ། འཇམ་སྒེག་ནི་འདར་དུ་ཞལ་གཏོར་ཆེན་གྱི་ཕྱག་ལེན་ཞུ་བ་གནང་སྐབས་ཚར་ཆེན་གྱི་མནལ་ལམ་དུ་རྡོ་རྗེ་རིང་པ་
དང་རྡོ་རྗེ་གདན་པ་གཉིས་ཞལ་སྤྲོད་དུ་བཞུགས་སར་བྱོན་པ་ན་རྡོ་རིང་རིན་པོ་ཆེས་ཆོས་རྗེ་པ་ཁ་སང་ནས་གར་བྱོན་གསུངས་པ་ཇོ་ནང་འཇམ་སྒེག་ཅེས་པར་ཆོས་ཤོད་ཀྱི་བསྡད་ཞུས་པའི་ཚེ་རྡོ་རྗེ་གདན་པས་རྫུན་མ་གསུང་གནས་གསར་ཆོས་རྗེ་ཡིན་གནང་བའི་ལན་རྡོ་རྗེ་རིང་པས་གཉིས་ཀ་མེད་ཁོང་ཡར་ཀླུངས་པའི་དུས་སུ་འཇམ་སྒེག་ད་ལྟ་གནས་གསར་ཆོས་རྗེ་ཡིན། ཞེས་དང་། གསུང་མགུར་དུ། ཨྱོན་ཐུགས་རྗེའི་སྨོན་ལམ་མཐུ་བཙན་པས། །རྡོ་རྗེ་འཆང་ཆེན་ཚར་པ་ཆོས་ཀྱི་རྗེས། །མི་ནས་མིར་གྱུར་སྐྱེ་བ་ལྔ་ཡི་བར། །རྗེས་བཟུང་བྱང་ཆུབ་མཆོག་གི་ས་བོན་བཞག །ཅེས་བྱུང་བ་ལྟར་ཚར་ཆེན་རྣལ་འབྱོར་དབང་ཕྱུག་ཡར་ཀླུངས་པར་འཁྲུངས་པའི་ཚེ་སྙན་བརྒྱུད་ཀྱི་གདམས་པ་གནང་བར་གསོལ་བཏབ་པས་བྲག་རྫོང་མའི་འཁྲིད་ཡིག་ཏུ། སྐྱེ་བ་གསུམ་གྱི་གོང་ནས་གསོལ་བཏབ་ཅིང་། །ཚེ་འདིར་ལོངས་སྤྱོད་སྒྲུབ་པས་མཉེས་པར་བྱས། །དད་དང་སྙིང་རྗེ་ཤེས་རབ་མི་དམན་ལ། །ཀུན་སྤངས་ཆོས་རྗེའི་བསྟན་ལ་ལྷག་པར་དད། །སྟོན་དང་བསྟན་པ་གཞན་ནས་མི་འཚོལ་བར། །ཅི་མཛད་ཁྱེད་ཤེས་མོས་གུས་ལྡེ་མིག་གིས། །གསང་ཆེན་ཐུགས་ཀྱི་བང་མཛོད་སྒོ་ཕྱེ་ནས། །སྙན་བརྒྱུད་ཡིད་བཞིན་ནོར་བུ་ཁོ་བོས་རྙེད། །ཅེས་པའང་འཇམ་སྒེག །བྷྲ་མ་ནཱ་ཐ། ཨ་སེང་རྒྱལ་མོ་གསུམ་རིམ་པར་བྱུང་བ་ལ་དགོངས་ལ། ཀུན་ཁྱབ་ཆོས་དབྱིངས་མ་ལས། བཅུ་གསུམ་སྐྱེ་བར་མཁས་དང་གྲུབ་པ་དང་། །ཞུ་བྱེད་སྒྱུར་བྱེད་རིག་སྔགས་འཆང་བའི་ཚུལ། །དུ་མར་སྤྲུལ་ནས་སེམས་ཅན་སྐྱོང་མཛད་པ། །ཞེས་པའི་བཅུ་གསུམ་པོ་ངོས་འཛིན་ཚུལ་ཁ་ཚོན་གཅོད་དཀའ་ནའང་
འདི་བཞིན་ཡིན་ནམ་སྙམ། ཞལ་གཟིགས་སོགས་ངོ་མཚར་བའི་མཛད་པ་རྣམས་ནི་ཚིག་གཅིག་ཙམ་ཡང་རླུང་ཕྱོགས་སུ་མ་གྲགས་པར་བསྙེལ་ཐོ་ཕྱག་བྲིས་མ་ཞིག་སྣང་བའི་ཁ་ཡིག་ཏུ། སྤྲང་བཙུན་འཁྱམས་པོའི་གསང་བའི་གཏམ་འདི་དག །ཇི་སྲིད་འཚོ་ཡི་བར་དུ་ཁ་ཐམ་རྒྱ། །སྙིང་ནས་དད་ལྡན་རེ་རེ་ཙམ་ལ་བསྟན། །དེས་ཀྱང་སྙིང་གི་དཀྱིལ་དུ་ཨ་ཐམ་རྒྱ། །བླ་མ་སངས་རྒྱས་དངོས་དང་མཇལ་བ་དང་། །མན་ངག་རྒྱུད་སྡེའི་སྙིང་པོ་ཟབ་ཆོས་པས། །སྙིང་རུས་མེད་ཀྱང་བླ་མའི་སྐུ་དྲིན་གྱིས། །རང་ལ་ངོ་མཚར་ཡིད་ཆེས་བྱུང་ཚུལ་ཡིན། །ཞེས་ཁ་བྱང་བཏབ་ནས་ཚེས་དང་བཅས་རྒྱ་འབྱར་དུ་ཞ་ལུ་ཤེལ་ཐམ་གྱི་སྒམ་མཁན་པོ་མ་བཞུགས་པར་ཁ་འབྱེད་སྲོལ་མེད་འདུག་པ་དེར་བཅུག་པ་དེའི་ངང་ལ་བོ་དོང་དུ་གཟུགས་སྐུ་ཆོས་དབྱིངས་སུ་བསྡུས་པས་རྗེས་སུ་མཁན་པོ་རྩིས་སྤྲོད་ཀྱིས་དུས་ཐམ་སྒམ་ནས་བྱུང་བར་ལུང་མེད་ཀྱང་རྡོ་རྗེ་འཆང་དབང་ཕྱུག་རབ་བརྟན་གྱིས་འགོ་མཇུག་གི་ཐུགས་རྩོམ་འགའ་ཞིག་མཛད་པར་ལུང་རྒྱུན་ཀྱང་འདུག་ལ། རྣམ་ཐར་འདི་དཔེ་རྒྱུན་དཀོན་གཤིས་རྒྱུན་མི་ནུབ་པར་བྱ་བའི་སླད་དུ་གསུང་དྲི་མ་མེད་པ་ཡི་གེར་བཀོད་པ་ནི། ན་མཿ བཛྲ་དྷཱ་ར་ཛྙཱ་ན་ད་ཡེ་ཤྭ་ར་པཱ་དཱ་ཡ། །འཕགས་ཡུལ་ཨཽཌྜི་ཡ་ནར་པདྨའི་མཚན། །བྱང་ཕྱོགས་བྷོ་ཊའི་གཉེན་གྱུར་ཁྲི་སྲོང་ཞབས། །སྙིགས་དུས་རྒྱལ་བའི་རྒྱལ་ཚབ་ཆོས་ཀྱི་རྗེ། །དབྱེར་མེད་མཁྱེན་བརྩེའི་ཞབས་པད་གཙུག་ན་རྒྱལ། །དེ་ལ་འདིར་ལྷ་དང་བཅས་པའི་འཇིག་རྟེན་པ་ཀུན་གྱི་གཙུག་གི་ནོར་བུ། སྙིགས་དུས་ཀྱི་འགྲོ་བ་མ་ལུས་པ་ཐར་པའི་གླིང་དུ་འདྲེན་པའི་ས་མཁན། དུས་གསུམ་རྒྱལ་བ་ཀུན་གྱི་མཁྱེན་བརྩེ་གཅིག་ཏུ་བསྡུས་པའི་སྤྱི་གཟུགས། སྲས་བཅས་རྒྱལ་བའི་ཡབ་
གཅིག །དཀྱིལ་འཁོར་རྒྱ་མཚོའི་རིགས་བདག །རིག་པ་འཛིན་པ་དང་མཁས་དང་གྲུབ་པ་ཡོངས་ཀྱི་དེད་དཔོན། རྡོ་རྗེ་འཛིན་པ་ཀུན་གྱི་རལ་པའི་ཁྲི་ལ་ཞབས་ཀྱི་པདྨ་ངལ་གསོ་བ། རྗེ་བཙུན་རྡོ་རྗེ་འཆང་ཆེན་པོ་མཁྱེན་བརྩེའི་དབང་ཕྱུག་བསྟན་པའི་རྒྱལ་མཚན་དཔལ་ལྡན་སྐལ་པ་བཟང་པོའི་ཞལ་སྔ་ནས་དེ་ཉིད་ཀྱི་རྣམ་པར་ཐར་པ་ནི་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་མོད། འོན་ཀྱང་མདོ་ཙམ་ཞིག་བརྗོད་ན། རྗེ་དེ་ཉིད་ཀྱི་མཛད་པའི་ཚུལ་ཆེ་ལོང་ཙམ་ནི་རྣམ་ཐར་ཆེན་མོར་རྟོགས་པར་བྱ་ཞིང་། དེ་བས་ཀྱང་ཆེས་སྙིང་པོར་གྱུར་པའི་གསང་བའི་རྟོགས་བརྗོད། གདུལ་བྱ་སྣོད་ལྡན་པ་དད་པ་དང་དམ་ཚིག་ལ་གནས་པ་ལྷག་བསམ་ལ་ཉེས་པའི་དྲི་མ་དང་བྲལ་བ་རྣམས་ཀྱི་སྤྱོད་ཡུལ། ལོག་ལྟ་དང་ང་རྒྱལ་འཛིན་པ་ཀུན་གྱི་རྣ་བའི་ལམ་ཙམ་དུ་ཡང་མི་བསྒྲག་པའི་གསང་ཆེན་དཔའ་བོ་ཌཱ་ཀིའི་ཚོགས་ཀྱི་ཟབ་པ་བས་ཆེས་གསང་བའི་རྣམ་པར་ཐར་པ་གསང་ཆེན་བདུད་རྩིའི་ཆུ་རྒྱུན་ཞེས་པ་དེ་ལ། རྗེ་དེ་ཉིད་ཀྱིས། ས་ཁྱི་ཟླ་བ་དང་པོའི་ཚེས་བཅུའི་ནུབ་རྨི་ལམ་དུ། ངའི་མལ་སའི་འཁྲིས་ན་མགར་མོ་གཞོན་ནུ་མ་ཞིག་གཅེར་བུ་སྐྲ་བཤིག་ནས་འདོད་པ་བསྟེན་པའི་གྲབས་སུ་འདུག་པ་ང་སྙིང་ནས་ངོ་ཚ་ཞིང་འདི་འདྲ་བྱེད་དུ་མི་ཉན་སྙམ་ནས་དེ་ལ་འུར། ང་རང་འགྲོས་པའི་གྲབས་བྱས་པས་དེ་ཙུག་མ་བྱེད་འདི་ལ་སྐྱོན་མེད། ཁྱོད་ཀྱིས་ཡུན་རིང་པོ་ནས་ང་བོས་པ་ཡིན་མོད་ཟེར་བས། ངས་ནི་ཁྱོད་འབོད་པ་ལྟ་ཅི་ད་ལམ་ལས་མཐོང་ཡང་མ་མྱོང་། སྡོམ་པ་ཉམས་ནས་དམྱལ་བར་སྐྱེ་བ་ལས་སྐྱོན་ཆེ་བ་གར་ཡོད་བྱས། ང་ཐོང་བྱས་སྤྲུགས་པས། ཁྱོད་ལ་མི་དགོས་ན་ང་
འདོད་ཆགས་ཐམས་ཅད་དང་བྲལ་བ་ཞིག་ཡིན་ཟེར་ནས་ནམ་མཁར་འཕགས་སོང་བ་དང་། རྗེ་བཙུན་རྡོ་རྗེ་ཕག་མོ་ཞལ་གཉིས་མ་ཕག་ཞལ་གྱི་སྨིན་མཚམས་དང་། བྷ་གའི་ནང་ན་དགའ་འཁྱིལ་འཁོར་བ་ཞིག་ཏུ་གྱུར་སོང་བས་དེའི་ཞབས་ལ་འཇུས་གསོལ་བ་བཏབ་པས། ད་ཚེ་འདིར་རྗེས་སུ་འཛིན་པའི་སྐལ་བ་མེད། ཡི་གེ་སོ་གཉིས་པོ་འབྲུ་འབུམ་སྦྱིན་སྲེག་དང་བཅས་པ་བཟློས། རང་སེམས་ཕག་མོའི་རང་ཞལ་མ་ཡེངས་པར་སྐྱོངས། སྙིང་རྗེ་བྱང་སེམས་ཀྱིས་འགྲོ་བ་ལ་ཕན་ཐོགས། བར་དོར་རྗེས་སུ་འཛིན་ནོ་གསུངས་ནས་ཡལ་སོང་། གཉིད་སད་པ་ན་སྐྱོ་སྣང་དྲག་པོ་སྔར་ཡོང་མ་མྱོང་བ་ཞིག་གདའ་འོ། །མེ་ལུག་ཟླ་བ་བཅུ་གཉིས་པའི་ཉེར་ལྔའི་ནུབ་རྨི་ལམ་དུ། །ཨོ་ལོ་དགེ་བསྙེན་དང་བློ་གྲོས་བཟང་རོགས་ལ་ཁྲིད་དེ་རྫ་རི་དཀར་པོ་རྩེ་མོ་རྣོ་བ་རོང་ངེ་བ་ཞིག་གི་ལྡེབས་ལ་ཕྱིན་ནས་རྒྱ་གར་ནུབ་ཕྱོགས་ལ་འགྲོ་རྒྱུ་ཡིན་ཟེར་བསམ་འགྲུབ་ཡིན་སྙམ་པ་ཞིག་གིས་རྟ་སྔོན་པོ་སྒ་སྲབ་ཆབ་པ་བྱས་པ་ཞིག་གིས་གདོང་ལ་ཁྲིད་འགྲོ་གི་འདུག །ངས་བལྟས་པས་རིའི་ལོགས་ཐམས་ཅད་ལ་རྡོ་དང་བྱེ་མ་རླུང་གི་བཏབ་པ་འདྲ་བའི་སྐྱ་ཉོལ་ལས་གྲུབ་པའི་ཡི་གེ་ལཱཉྩ་དང་། དབུ་ཆེན་གྱི་དབྱངས་གསལ་དང་། ཨཥྚ་དང་། བདེ་མཆོག་གི་རྩ་སྔགས་སོགས་ཧྲམ་མེ་འདུག །རི་གདོང་དེ་ནས་མར་བབས་པའི་སྟེང་ཁ་ཞིག་ན། དབུས་ན་རྣམ་རྒྱལ་མཆོད་རྟེན་ཆེན་པོ་ཞིག་དང་། མཚམས་བཞི་ན་དེའི་ཕྱེད་ཙམ་གྱི་མཆོད་རྟེན་རེ་འདུག །ངའི་ཡིད་ལ་རྗེ་བཙུན་རྡོ་རྗེ་འཆང་གི་ཕྱི་རྟེན་ཡིན་པ་ལ། ད་ལོ་ཁོང་ཚོ་དམག་གིས་བྲེལ་ནས་སྐུ་དཀར་ཡང་མ་གསོལ་པ་
འདུག །ང་བླ་མ་མཆོད་རྟེན་ལ་རེ་བའི་དུས་བྱུང་སྙམ་ནས་མཆི་མ་མང་པོ་ཤོར། སྐོར་བ་དུ་མ་བྱས་གསོལ་འདེབས་བརྒྱ་ཕྲག་མང་པོ་བྱས་ཤིང་དད་གུས་ཀྱི་ཡུས་བརྣགས་ནས། མཆོད་རྟེན་དབུས་མ་དེ་ལ་འཇུས་ནས་བསྟན་པ་དང་སེམས་ཅན་སྤྱི་ལ་ཕན་པའི་སྨོན་ལམ་མང་པོ་བཏབ་ཁྱད་པར་སྐྱེ་བ་ཕྱི་མ་སེམས་ཅན་ཐམས་ཅད་རྗེ་བཙུན་རྡོ་རྗེ་འཆང་གི་ཞབས་དྲུང་དུ་སྐྱེ་བར་སྨོན་ལམ་དུངས་པར་བཏབ་པས། མཆོད་རྟེན་ལྔ་པོ་གཡོ་ཞིང་ལྡེག །དབུས་མའི་ཁེབས་གདུགས་ལྟར་གཡས་སུ་འཁོར་བ་ལས་འོད་ལི་ཁྲི་འདྲ་བ་མང་དུ་འཕྲོས་ནས་ངོ་མི་ཤེས་པའི་ལུང་པ་མང་པོ་གང་སོང་། དྲིལ་བུ་དུ་མ་འདུག་པ་རྣམས་ཀྱང་སྐད་སྙན་པ་འབྲུག་ཙམ་སྒྲོག །དེའི་གདངས་ལས། སུ་ཞིག་ཁ་ཙམ་མ་ཡིན་དད་པ་ཡིས། །བླ་མ་མཆོག་ལ་ཕྱག་འཚལ་གསོལ་འདེབས་པ། །དེ་ནི་མྱུར་དུ་མངོན་པར་འཚང་རྒྱ་སྟེ། །རང་ཉིད་གྲོལ་ནས་གཞན་ཡང་སྒྲོལ་བར་འབྱུང་། །ཞེས་ཐོས་པས་ཕན་ཡོན་འདི་ཙམ་ཡོད་པ་ཡིན་བྱས། །ཟླ་བོ་ཀུན་ཁྲིད་ནས་སྐོར་བ་གསོལ་འདེབས་མང་དུ་བྱས། ངས་རྟ་ལ་ཞོན་བློ་བཟང་གིས་བལ་དྲ་པོ་ཏིས་གང་བ་ཞིག་ཁྱེར་ནས་ཐུར་དེ་ལ་བབས་ཕྱིན་པས། ཉང་སྟོད་རྒྱལ་ཁང་ཡིན་སྙམ་པ་ཞིག་ཏུ་སླེབས་པ་ན། སྡེ་པ་ནོར་བཟང་དྲུང་གིས་སྤོས་སྣ་བྱས། ཁང་པ་གཡབས་སྒོར་ཉི་མ་དྲོ་བ་ཞིག་ཏུ་སླེབས་ཨ་ཇོ་ལགས་སྐུ་མཆེད་ཀྱིས་ཇ་བུར་སོགས་ཀྱི་བཀོད་པ་ཡང་བཤམས་བྱུང་། ཨ་ཇོ་ཆོས་ཀྱི་ཞལ་ནས་ཁྱོད་གང་ལ་འགྲོ་རྒྱུ་སོགས་དྲིས་བྱུང་བ་ལ་ལོ་རྒྱུས་རྣམས་ཞིབ་ཏུ་ཞུས་པས། ཁོང་ཚོའི་ཞལ་ནས། རྒྱ་གར་ནུབ་
ཕྱོགས་ན་འདུལ་ཞིང་ལེགས་པོ་ཡོད་པ་དང་ཆོས་ཧ་ཅང་མི་དར་བས་དེར་ཕྱིན་ན་ཕན་པ་རྒྱ་ཆེ་ནའང་། ད་ལམ་ལ་ཕར་ལ་མ་འབྱོན། ལོ་ཁ་ཡར་ཞིག་འདི་ཚོར་བཞུགས་ལ། ཆོས་བཀའ་ནུབ་ཉེ་བ་འདི་པ་གསོས་ཕན་སེམས་རྒྱ་བསྐྱེད་ནས་གཞན་ལ་ཆོས་མང་དུ་ཤོད། འདི་སྐད་བྱས་ན་རང་གཞན་ཀུན་ལ་ཕན་ཕྱིར་དཔེ་ཆ་མེད་པ་ཀུན་བྲིས། ཡོད་པ་ཀུན་ལྟོས།ཆོས་ཐོབ་པ་ཐམས་ཅད་བེད་མེད་ལ་མ་བཞག །ཆོས་བཀའ་དམ་པོ་བྱེད་ཟེར། ནོར་མེད་པ་ལ་མི་སྟེར་བ་དང་ཆོས་ལ་དཔེ་མཁྱུད་བྱེད་མི་ཉན་པས། སེམས་བསྐྱེད་རྒྱ་ཆེན་པོས་ཀུན་ནས་བླངས་པའི་ཆོས་ཉན་པ་དང་། དཔེ་གཞན་ལ་སྤེལ་བ་དང་། དེའི་དོན་རང་རྒྱུད་ལ་སྦྱོར་བ་རྣམས་མཛོད་ལ། རིམ་གྱིས་རྒྱ་གར་ནུབ་ཕྱོགས་སུ་བྱོན། ངེད་སྤུན་གསུམ་ཡང་ཁྱེད་གར་འབྱོན་སར་ཡོང་བ་ཡིན་གསུངས་པ་ལ། དེ་སྐད་ཞུ་སྟེ། ཆོས་ཉན་ས་ཡང་མི་རྙེད། རྙེད་ན་ཡང་ཞུས་ཡང་མི་ཡོང་། ངས་ཆོས་བཤད་ཀྱང་ཉན་མཁན་ནི་མི་ཡོང་སྟེ། ད་ལམ་ཐབས་མི་གདའ་བས་སྡོད་ལགས་ཞུས་པས། རྟ་རྫི་ངོ་ནག་ཐིང་བྱས་རྟ་དང་བཅས་པ་ནུབ་ཕྱོགས་ཕར་ལ་འུར་སྒྲ་དང་བཅས་ནས་འཕུར་སོང་བ་དང་གཉིད་སད་པ་མཉམ་དུ་བྱུང་ངོ་། །ས་སྤྲེལ་ཟླ་བ་དང་པོ་ནས་རྐང་པའི་ནད་དེ་ལངས་ནས། རེ་མིག་ལ་ཟླ་བ་གཉིས་པའི་ཚེས་བཞི་ལ་འགྲོ་སྨོན་ཅན་དུ་ཕྱིན། གཅོད་བཀའ་མ་དང་གསང་བ་རྨད་བྱུང་སྦྲགས་ནས་ཉམས་ལེན་གང་ལྕོགས་བྱས་པས་ཞག་གཅིག་ནས་རྐང་པ་ནས་འདྲུད་པ་དང་ཁྱི་ནག་པོས་རྨུགས་པ་སོགས་པ་སྡིགས་རི་དང་། བུད་མེད་མཛེས་མ་སྔར་མ་མཐོང་བའི་བྱད་བཞིན་དང་། གོས་རྒྱན་ཕུན་སུམ་ཚོགས་པས་
བསླུ་བྲིད་བྱེད་པ་སོགས་ལྷོངས་ཚད་བསམ་གྱིས་མི་ཁྱབ་པ་བྱུང་ནའང་། ཕུང་པོའི་གཅེས་འཛིན་བཏང་ནས་ཉལ་བསྡད་པས། ཞག་གསུམ་སོང་བ་ན་ཉམས་སྣང་ལ་བུད་མེད་བྱད་དམར་བྱང་ངེ་བ་བོང་ཆེ་ཞིང་སྐྲ་དམར་བ་ཞིག་ཕྱག་འཚལ་ཞིང་། །(ཊཀྲ)ཞེས་པའི་སྲོག་སྙིང་འབུལ་བ་སྙམ་བྱེད་པར་དམ་ལ་བཏགས། ཚེས་བཅུའི་ཐོ་རེངས་དགེ་སྦྱོར་རྣམས་བྱེད་འཕྲོ་ལ་གཉིད་དུ་སོང་བའི་རྨི་ལམ་དུ། གཡབས་ལྷོ་ཡིན་སྙམ་པ་ཞིག་ན་དར་སྨན་ཙེའི་ཡོལ་བ་རྒྱ་ཆེ་བར་བཏང་འདུག་པའི་ནང་ན། སྤྲུལ་སྐུ་གྲང་སོ་གཏེར་སྟོན་ཆེན་པོ་ལྕམ་སྔོན་སྡུད་མ་ཞིག་བསྣམས། རྡོ་རྗེ་དྲིལ་བུ་གསིལ་ཞིང་བཞུགས་འདུག །ཕྱག་འཚལ་ནས་འདིར་ཕེབས་པ་ཡིན་ནམ་ཞུས་པས། དྲུང་པ་འོག་གདོན་གྱིས་ཞབས་བསྙེལ་གྱི་འདུག་ཟེར་ཕྱག་རྡོར་གྱི་དབང་ཞིག་འབུལ་དུ་ཡོངས་པ་ལགས། སྒྲུབ་མཆོད་བདག་འཇུག་དང་བཅས་པ་ཚར་བདོག །ད་གསན་པས་ཆོག་པ་བདོག་གསུངས། ཕྱག་རྡོར་ཆེ་བ་བརྒྱད་སྐོར་གང་ལགས་ཞུས་པས། ཨུ་ཙ་དྲག་སྔགས་ཀྱིས་ཆེ་བའི་དབང་ཡིན་གསུང་། སྐུ་གཞོགས་གཡས་ན་ཨུ་ཙ་ལྷ་བཅུ་དགུ་དཀྱིལ་འཁོར་ཞིག་བཀྲམ། མར་མེ་ཆེན་པོ་མང་པོ་སྤར། སྐུ་མདུན་ན་ལྕོག་ཙེའི་ཁ་ན། རྡོ་རྗེ་དྲིལ་བུ། བུམ་པ། ཅོད་པན། མཆོད་རྟེན་སྔོན་པོ་མཐོ་གང་པ་ཞིག་དང་། ཕྱག་རྡོར་གྱི་སྐུ་ཤེལ་འདྲ་བ་ཞིག་དང་། གཞན་ཡང་ཕྱག་མཚན་གྱི་བྱེ་བྲག་མང་པོ་འདུག །གཡོན་ན་རྡུལ་ཚོན་གྱི་གཞལ་ཡས་ཁང་མཚན་ཉིད་ཚང་བ་ཞིག་གི་དབུས་ན། པདྨ་ཕྱོགས་མདོག་འདབ་བཞིའི་ལྟེ་བ་ལ་ཁྱུང་དཀར་པོ་གཟི་བརྗིད་འབར་བ། གཤོག་པ་སྔོན་པོ་རྡོ་རྗེའི་རང་བཞིན་མེ་འོད་འཕྲོ་བ། གཡས་རྡོ་རྗེ་འཕྱར་ཞིང་གཡོན་
སྦྲུལ་ནག་པོའི་མགོ་བོ་ཟ་བའི་རྐེད་པ་ནས་བཟུང་བ། འདབ་མ་ཤར་ན་སྦྲུལ་དཀར་པོ་གཉིས། ལྷོ་ན་སེར་པོ། ནུབ་ན་དམར་པོ། བྱང་ན་ལྗང་གུ་གཉིས་རྣམས་ཀྱི་མཇུག་མ་བསྣོལ་ནས་གདན་དུ་བྱས་པ། རྐེད་པ་ཡན་ལངས་ནས་ཁྱུང་གི་པུས་མོའི་ཙམ་ན་གདེང་ཀ་བྱས་པ་ཞིག་འདུག །འདི་གང་ཡིན་ཞུས་པས་རྡོ་རྗེ་མཆུའི་དཀྱིལ་འཁོར་ཡིན་གསུངས་ནས། ཕྱག་རྡོར་ལ་དབང་བཞི་རྫོགས་ཤིག་དང་། རྡོ་རྗེ་མཆུ་ལ་རྗེས་གནང་རྒྱས་པ་ཞིག་གནང་བའི་མཐར། འདི་རྣམས་ཀྱང་ཁྱེད་ལ་མཁོ་བ་ཡིན་གསུངས་ནས་པོ་ཏི་གླེགས་ཤིང་མེད་པ་མང་དུ་གཏད་བྱུང་། དེ་རྣམས་བདག་གིས་པང་དུ་བཞག་པས་མགོ་བོ་དང་མཉམ་པོར་སོང་། རེས་ང་རང་དཔེ་ཆར་འགྲོ། རེས་དཔེ་ཆ་རྣམས་ངའི་ལུས་སུ་འགྱུར། རེས་ངའི་རྒྱབ་མདུན་དུ་གླེགས་ཤིང་བཞག་ནས་སྐུད་པས་སྡེམ་པ་རྣམས་བྱེད་པ་བྱུང་བ་དང་གཉིད་སད་དོ། །ཚེས་བཅུ་བཞིའི་ནམ་ལངས་ཁར་གཉིད་དུ་སོང་བ་ན། དཔོན་ས་ཚེ་དབང་པ་ཡིན་སྙམ་པའི་བུད་མེད་དཀར་དམར་མཛེས་པ་ཞིག་གིས་ཆང་ཐོད་པ་གང་སྦྱིན་པ་འཐུང་གི་ཡོད་ཙ་ན། བློ་གྲོས་བཟང་གིས་སྐྱེས་པ་སློག་པ་གྱོན་པ་ཞིག་ཁྲིད་ནས་འདི་ལ་ཐོད་འཕྲེང་ལེགས་པོ་ཡོད་པས་མཇལ་བ་ཞུ་ཟེར། སྟོན་དང་བྱས་པས་ཐོད་འཕྲེང་བྱུ་རུ་ལྟར་དམར་བ་བརྒྱ་རྩ་གཅིག་བསྟན་ནས་འདི་ཁ་ཆེ་པཎ་ཆེན་གྱི་འཕྲེང་བ་ཡིན་ཟེར། ང་ལ་གནང་དགོས་བྱས་པས་ལག་ཏུ་སྤྲད་བྱུང་ཙ་ན་ཐོད་པ་ལེགས་པ་ཁྱིད་གང་ཙམ་ལ་འཁོར་ལོ་སྡོམ་པ་ཞལ་བཞི་ཕྱག་བཅུ་གཉིས་པ་ཡུམ་དང་བཅས་པའི་སྐུ་མེ་ལོང་ལ་གཟུགས་བརྙན་ཤར་བ་ལྟ་བུ་ཞིག་གསལ་བར་མཐོང་བ་དང་གཉིད་སད་དོ། །ཨྠྀི། སྔ་མོ་ཞིག་
རྙིང་མའི་གཤེད་དམར་ལ་ཐུགས་དམ་བྱས་ན་ཚེ་ལ་ཕན་ཟེར་བ་བྱུང་སྟེ་ཞུ་ས་མ་རྙེད། མྱུག་ཏུ་སླེབ་ནས་བཙལ་བས་ཉི་སྦུག་པ་ལ་བཞུགས་ཟེར། བྱ་ལོ་ཟླ་བ་ལྔ་པའི་ནང་དུ་ཉི་སྦུག་ལ་འགྲོ་ཁར། ཤངས་ཆུ་ཆེ་དྲགས་ཐར་ས་མི་འདུག་ཟེར་ནས་བཤོལ་བའི་ནུབ་རྨི་ལམ་དུ་ལུང་པ་ཁ་ལྷོ་བསྟན་རི་སྐྱ་ཧྲོབ་སེ་བ་ཞིག་གི་ལྡེབས་རབ་གསལ་ཉིས་བརྩེགས་ཡོད་པའི་ཁང་པ་ཞིག་ན་བླ་མ་འབེར་མོ་བྱིན་ཆགས་ཤིག་གི་དྲུང་ན་ང་འདུག་པ་ན་བླ་མ་དེའི་འཁྲིས་ན་ཨོ་ལོ་ནོར་བཟང་བ་ཡིན་སྙམ་པ་ཞིག་གི་ཕྱག་ན་རག་གི་འཕྲེང་བ་རྙིང་པ་ཞིག་བཟུང་ནས་འདི་ཨ་ཇོ་ལགས་རང་གི་ཐུགས་དམ་དང་ཐོག་མ་ནས་ཡིན་པས། ད་དུང་མཛད་ན་ཁེ་ཆེ་བ་འདུག་སྟེ་ཐེ་ཚོམ་ལས་མི་འདུག །དིང་སང་མ་བཟུང་ན་དེ་ནས་མི་ཡོང་ཟེར་བ་རྨིས་པ་ནས། སང་དེ་ག་ཆུ་ལ་མ་འཛེམས་པར་ཕྱིན་པས་ཁང་པ་སོགས་རྨི་ལམ་སོར་བཞག་གདའ། གཤེད་དམར་ནག་གི་དབང་ལུང་རགས་པ་ཐོབ། དབང་མ་ཐོབ་པ་ཞིག་གཤེད་དམར་གྱི་རྡུལ་ཚོན་གྱི་དྲུང་དུ་བཏང་བས་སྣ་ཁྲག་དར་འཕྱར་འཕྱར་བྱེད། ཤིན་ཏུ་གཉན་ལ་བྱིན་རླབས་ཆེ་བར་གོ་ལགས། དེ་རེས་ཞག་བཅུ་བསྡད། དབོན་པོ་དེས་ཆོས་གནང་བའི་སྤྱན་ཚབ་མི་ནུས་པར་གེགས་ཆེན་པོ་བྱས། རིན་པོ་ཆེའི་ཞལ་ཏ་ལ་མ་དང་ཞག་མནོས་པ་བཞིན་འབུལ་མི་ཐུབ་པ་འདུག་པས་ཕྱིར་བྱོན། ཁོང་ཚོ་མེ་ཏོག་ལ་སོང་ཤུལ་ལྟ་བུ་འགོལ་བ་ཞིག་ལ་ང་རང་གིས་གང་ཐོས་འདི་ཚང་ན་ཞིག་འབུལ་ཐུབ་བྱེད་དོ་གསུངས། ཟླ་བ་བདུན་པའི་ནང་དུ་རྨི་ལམ་ལ་ལྷོ་སྟེང་གི་ཁང་ཐོག་ཡིན་སྙམ་པ་ཞིག་ན། རིན་པོ་ཆེ་ཉི་སྦུག་པ་ཞལ་ནུབ་གཟིགས་བྱས་བཞུགས་པའི་དྲུང་ན་བདག་འདུག་པ་ལ། གཤེད་དམར་གྱི་སྐོར་པོ་ཏི་གཅིག་གི་ལུང་རྫོགས་
པར་གནང་། དཔེ་རིས་ཚོན་རྫོགས་བྱས་པའི་ལེགས་པོ་མང་པོ་བསྟན་ནས་མཛུབ་ཁྲིད་མཛད། ཁྱད་པར་ཐོད་པ་ཞལ་དབྱེ་དང་རུ་མཚོན་ལ་ཞི་རྒྱས་མང་པོ་གནང་བ་ཞིག་རྨིས། གཉིད་སད་ནས་ཀྱང་ཤིན་ཏུ་གསལ་བ་འདུག་པས་ཟིན་བྲིས་བྱས་ན་ཐུབ་ངེས་འདུག་སྟེ། དགའ་མོ་ཞིག་ཐོས་པའི་ལྟས་ཡིན་སྙམ་པ་ལས་མ་བྱུང་བས་ཡི་གེར་མ་བཏབ། དེ་ནས་མེ་ཏོག་རན་པ་དང་ཕར་འགྲོ་རྩིས་ཀྱིས་སྐོར་ཡང་ལ་བཏང་བ་དང་ཕ་གི་ནས་ཞི་བར་གཤེགས་པའི་གསང་བརྟོལ་གྱི་མི་གནང་བ་ལམ་དུ་འཕྲད་ལོག་བྱུང་། བར་དོ་ཡེ་ཤེས་ཀྱི་སྐུས་རྗེས་སུ་བཟུང་བར་གདའ་བས་བཀའ་དྲིན་ཆེ། ཆུ་ཕག་ས་ག་ཟླ་བའི་ཚེས་བཅུ་བཞིའི་ཉི་མ་དྲོས་ཆེན་ཙམ་ལ་ལམ་ཟབ་ཀྱི་དེ་ཁོ་ན་ཉིད་ལ་བློ་བཞག་པའི་ངང་ལ་གཉིད་དུ་སོང་བ་ན་ནང་ཐམས་ཅད་འོད་དམར་སེར་ལི་ཁྲི་འདྲ་བ་ཞིག་གིས་ཁེངས་ནས་ཕྱི་ནང་ཐམས་ཅད་གསལ་བའི་ཁྲོད་ནས་འཇའ་ཚོན་ཁ་དོག་ལྔ་ལྡན་ལས་གྲུབ་པའི་ཡི་གེ་དབུ་ཆེན་མཐོ་རེ་ཙམ་བྱས་པའི་རྗེ་ས་སྐྱ་པ་ཆེན་པོའི་རྣམ་ཐར་དིང་སང་ཡོངས་གྲགས་རྣམས་ལས་ཆེས་ཞིབ་པ་ཞིག་ཡིག་འཕྲེང་དུ་ཡོད་པ་སོ་སོའི་སྒྲ་སྒྲོག་པ་ཞིག་འདུག །དེ་ལ་དད་གུས་བྱས་ཚིག་རྣམས་སྒྲོགས། སྒྲ་དེའང་སྙན་བཞིན་པའི་ངང་ནས་ས་སྐྱ་པ་ཆེན་པོའི་ཞལ་རས་གདོང་དཀྱུས་རིང་པོ་ལ་ཤ་དཀར་ལ་སྣུམ་པ་ཞལ་ཆེན་པོ་འཛུམ་བག་ཅན་ག་ཐེར་བྱས་པ་ཞིག་ཡོད་དེ་སྙམ་མིག་སྔར་ལམ་ལན་ཡོང་བ་ལ། དད་གུས་ཀྱི་མཆི་མ་འཆོར་བ་ཞིག་གི་ངང་ནས་གཉིད་སད་དོ། །ཆུ་ཕག་ཟླ་བ་ལྔ་པའི་ཚེས་བཅུའི་ཐོ་རེངས་རྨི་ལམ་དུ་བོ་དོང་རྫོང་གི་ཉི་འོད་འཁྱིལ་པ་ཡིན་སྙམ་པ་ཞིག་ན་ཨ་ཕ་ལགས་དྲུང་ན་བཟའ་རིང་འགག་དཀར་པོ་གསར་པ་ཞིག་གི་སྟེང་ན་རས་སྔོན་
པོའི་འོད་དང་འཕྲོ་བཞིའི་སྐུ་གཟན་བཞེས་རཀ་ཤའི་འཕྲེང་བ་བསྣམས་ནས་བཞུགས་འདུག་པའི་དྲུང་དུ་སླེབས། སྔ་ཕྱིའི་ལོ་རྒྱུས་མང་པོ་ཞུས་པའི་མཐར་བདག་འཚམ་པོར་གནས་ཁྱེད་གར་ཐེགས་ད་ངེད་ཚོ་ཅི་ཙུག་བྱེད་ཟེར་ཞིང་མཆི་མ་གཏོང་གིན་ཞུས་པས་མ་བཤུམ་ཁྱེད་ཚོ་ཨ་ཕ་རྐྱེན་གྱིས་ཤི་བར་བྱེད་ཀྱི་གདའ་སྟེ་དེ་འདྲ་མིན། སྐུ་ཚེ་རྫོགས་ནས་ལོ་ལྔ་སོང་སྟེ་སྔགས་ཀྱི་དམ་བཅའ་ཞིག་མ་ཐེམས་པས་བསྡད་པ་ཡིན་པས་དེ་ཐུག་བསྡད་པའང་ཡ་མཚན་ཆེ། ད་ལམ་ཨ་ཕ་ལྕང་ལོ་ཅན་དུ་སླེབས་གསང་བའི་བདག་པོ་ལ་ཐེག་པ་ཆེན་པོའི་ཆོས་ཀྱི་དགའ་སྟོན་རྒྱུན་ཆད་མེད་པར་མྱོང་ནས་མྱུར་དུ་འཚང་རྒྱ་བར་ཡོད། ཁྱེད་རང་ཡང་ལྕང་ལོ་ཅན་དུ་སྐྱེས་ནས་སེམས་ཅན་དུ་མའི་དོན་བྱེད་པར་འགྱུར། དེའི་སླད་དུ་དགེ་སྦྱོར་འདི་གྱིས་གསུངས་ནས་ནམ་མཁའ་ལ་ཇེ་མཐོར་འོད་ཅིག་ལ་བཞུད་སོང་བས་དྲུང་ལགས་ཟེར་འབོད་འཕྲོ་ལ་གཉིད་སད་དོ། ལོ་དེའི་ཟླ་བ་དྲུག་པའི་ཉེར་གསུམ་ནས་རྗེ་བཙུན་རྡོ་རྗེ་འཆང་གི་དུས་ཆེན་སྒྲུབ་མཆོད་བཙུགས་པའི་ཚེ། བུག་སྒོའི་ནང་ན་ངེད་གཉིས་ལམ་མེད། ཐིག་སུས་ཀྱང་སློབ་མ་མྱོང་། ཕྱི་ནས་འབོད་ཀྱང་མ་བདེ་བར་གང་དྲག་ཅི་དྲག་ལ་སོང་སྐབས། ཐིག་ཀྱང་མི་ཤེས་པའི་རྡོ་རྗེ་སློབ་དཔོན་དུ་ཁས་ལེན་པའི་བླུན་པོ་སྙིང་ཁམ་ཅན་ང་འདྲ་སྙམ་དུས། གསོལ་བ་བཏབ་པས་ཐིག་རྩ་ཞིག་བློ་ལ་ལམ་ལམ་བྱེད་ནས་བརྒྱབ་པས་ཐིག་ཤིན་ཏུ་ལེགས། དེའི་དཀྱིལ་འཁོར་དེས་མར་མེ་བཟུང་། ཞག་བཅུ་གསུམ་བཞག་ཀྱང་རྡུལ་ཡེ་མ་བླངས་སོ། ཟླ་བ་བདུན་པའི་ཚེས་བརྒྱད་ནས་ཞིང་གཤེགས་ཀྱི་དུས་མཆོད་ལ། འཁོར་ལོ་ཆེན་པོའི་སྒྲུབ་མཆོད་སྦྱིན་སྲེག་དང་བཅས་བྱེད་ཀྱིན་ཡོད་དུས། སྦྱིན་སྲེག་གི་སྐབས་ན་དྭོགས་པ་འདྲ་
ཡོད་ཙ་ན་རྨི་ལམ་དུ། ང་སྦྱིན་སྲེག་ཅིག་བྱེད་ཀྱི་འདུག་པ་ལ། དེའི་ཕ་ཚད་ན་རྡོ་རྗེ་འཆང་ཆེན་པོ་དང་དྲུང་ལགས་གཉིས་བཞུགས་ནས་འཁོར་ཆེན་ལ་སྦྱིན་སྲེག་གི་ཡི་གེ་མང་པོ་ཡོད་དེ། གཉགས་སྙིང་པོ་རྒྱལ་མཚན་གྱིས་འདི་ལ་ཐུགས་གཙིགས་ཆེ། འདིའི་སྐབས་སུ་ཕྱག་ལེན་འདི་བཞིན་མཛད་གསུངས་ནས། འགྲིག་ཤིན་ཏུ་ཞིབ་པར་གསུངས། དཔེ་ཆ་དེའང་གདའ་བ་འདི་ཁྲོད་ན་གདའ་གསུངས་ནས་བསྟན། དེ་ནས་དྲུང་ལགས་ཀྱིས་ཞུ་མཁན་མཛད་ནས་འཁོར་ཆེན་གྱི་སྐོར་ལ་དཀའ་གནད་མང་པོ་ལ་བཤད་པ་མཛད་པའི་སྒང་ལ་གཉིད་སད་པ། བླ་མ་ཡབ་སྲས་གཉིས་ཀྱི་ཞལ་མིག་སྔར་ལམ་མེ་བའི་ངང་ནས་ཚིག་དེ་དག་ཀྱང་བློ་ལ་གསལ་པོར་འདུག །སང་ཉིན་མདང་ཕྱག་མཛུབ་བཙུགས་པའི་དཔེ་ཧྲུལ་བྲལ་བྲུལ་བསྡུས་པའི་པོ་ཏི་དེ་བལྟས་པས་སྦྱིན་སྲེག་གི་དཔེ་ཆ་ཡང་འདུག་ཅིང་། ཇི་སྐད་གསུངས་པ་ཞིག་འདུག་གོ །བྱི་ལོ་ཟླ་བ་དང་པོའི་ཉེར་ལྔ་ལ་སྡིང་མ་ནས་འཁོར་གདོང་དུ་གཏོར་མའི་རྒྱབ་ན་བཀྲམ་པའི་གུར་མེ་ཏོག་མའི་ཞལ་ཁེབས་འོད་འབར་བ་དང་བཅས་པ་ཇ་སྦྱོར་གཅིག་གི་བར་ལམ་མེ་འདུག །གྲལ་གྲོལ་རྗེས་ན་ཞལ་ཁེབས་སད་རྩས་ཁད་དེ་བཀབ་འདུག་པས་མིག་འཁྲུལ་བའམ་ཡ་མཚན་ཅན་ཞིག་གདའ་འོ། །ལྕགས་ཕག་ཟླ་བ་ལྔ་པའི་ནང་དུ་རྨི་ལམ་དུ། མངའ་རིས་སྤྲུལ་སྐུ་དང་མཇལ་དཔེ་ཆ་གནང་བདོག་གམ་ཞུས་པས། ན་ནིང་ཁྱེད་རང་གིས་བལྟས་པ་དེ་ནས་ཤོག་ལྡེབས་གཉིས་ལས་ནི་མ་བྲིས། དཔེ་ཆུང་དེ་གཉིས་བསྐུར་ཡོད་གསུངས། སྤ་གམ་ཞིག་ནས་ཞི་ཁྲོའི་དཔེ་ཆ་ཡིན་སྙམ་པའི་དཔེ་ཆུང་ཞིག་གནང་བྱུང་བས། འདི་ཐམས་ཅད་ལ་ངོམ་དགོས་སྙམ་དགའ་ཚོར་ཚད་མེད་པའི་ངང་ནས་
གཉིད་སད། སང་ཕྱག་དམ་དཔེ་ཆ་ཕེབས་པས་དེ་ག་སོར་བཞག་འདུག་གོ །ཡང་ནུབ་ཅིག་ཨ་ལྷུན་པ་ཡིན་སྙམ་པ་ཞིག་གིས་སྤྲུལ་སྐུས་སྐྱེལ་དུ་བཏང་བ་ཡིན་ཟེར་རག་བུམ་མགུལ་ཆིངས་དར་དཀར་ནོག་པོ་ཞིག་གིས་བྱས། ཁ་རྒྱན་རྨ་བྱ་དང་། ཤེལ་གྱིས་བྱས་པ་ཞིག་དང་། པོ་ཏི་བྲུ་ལེ་དཀོན་རྩོས་གྲིལ་བ་སྤྲད་པ་རྨིས་པས་སང་བཀའ་འདུས་ཀྱི་ཕྱག་དཔེ་སླེབས་ནམ་ལ་བྲིས་པའི་སྒང་ལ། རྨི་ལམ་སྤྲུལ་སྐུ་བྱོན་ནས་རིགས་འཛིན་གདུང་སྒྲུབ་ཀྱི་དབང་གནང་བ་བྱུང་ངོ་། །ཤིང་གླང་ཟླ་བ་བཞི་པའི་ཚེས་བཅུ་བདུན་ནས་བཀའ་བརྒྱད་སྒྲུབ་ཆེན་སྨན་སྒྲུབ་དང་བཅས་པ་མཛད་དུས་བཀའ་བརྒྱད་ཀྱི་དཀྱིལ་འཁོར་གསུམ་གྱི་ཐིག་འདེབས་ཤིང་། ནམ་མཁའ་ལའང་དཀྱིལ་འཁོར་གྱི་ཐིག་རྫོགས་པ་ཞིག་སྐྱ་ཏ་ལེ་འདུག་པ་རྨིས། ཡང་ནུབ་ཅིག་ནུབ་ཕྱོགས་ཀྱི་ནམ་མཁའ་ལ་མངའ་རིས་པཎ་ཆེན་བཞུགས་ནས། སྟོང་པ་སྟོང་པ་སྟོང་གསལ་འཛིན་མེད་ཡིན་གསུངས་ནས་ལི་སེར་པོའི་ཟ་མ་ཏོག་ནོར་བུ་མིག་གསུམ་པའི་དབྱིབས་ཅན་ཞིག་བདག་ལ་གནང་བྱུང་བ་དང་གཉིད་སད་དོ། །ནུབ་ཅིག་བཀའ་བརྒྱད་ཀྱི་དཔལ་དགུ་ཐོག་ཚད་ཙམ་འོད་འབར་བའི་མདུན་ན་སྤྲུལ་སྐུ་བཞུགས་ནས་བཀའ་བརྒྱད་ཀྱི་རྒྱུད་ལུང་མན་ངག་ཐམས་ཅད་འདིར་འདུས་ཤིང་ཁྱོད་རང་བདག་པོ་ཡིན་པས་ཡེ་གསུང་པོ་ཏི་གཅིག་ང་ལ་གནང་བྱུང་ངོ་། །སྟག་ལོ་ཆོས་ལུང་སྒང་གི་ཁང་ཆུང་དེ་མཚམས་དམ་པོའི་ཁོང་ནས་དཔོན་ས་ནམ་མཁའི་དྲུང་སོགས་ཁ་ཅིག་ལ་རོ་སྙོམས་སྒང་འབྲིལ་བུག་ཆོས་བྱས་བཤད་པའི་གྲོལ་ཁ་ཚེས་བཞིའི་སྔ་དྲོ་རྨི་ལམ་དུ། གཅུང་རིན་པོ་ཆེ་སྐུ་གཟི་འོད་ཤིན་ཏུ་འབར་ཞིང་། ན་བཟའ་ཀོང་གཟན་ངུར་ཁ་ཞིག་བཞེས། འཁོར་མང་ཆེན་དང་བཅས་
ཕྱོགས་ལ་ཐེགས་རྒྱུ་བའི་རྣམ་པས། རྫོང་ཞིག་གི་བརྒྱ་སྒོའི་ཕྱིར་ཕེབས་ཀྱི་འདུག་པའི་ཐེགས་སྐྱེལ་ལ་ཕྱིན་ཕྱག་འབུལ་བྱས་པས་ཕྱག་ལན་མཛད་རྗེས་མགུལ་ཕྲག་ནས་ཞྭ་དམར་ལེགས་ཚད་ཐུབ་ཡུག་ཅིག་གནང་བྱུང་ནས་ད་འཕྲིན་ལས་ཡང་འདི་ཆེ་བ་ཡོད་པ་འདུག་པས་ད་ཕྱིས་དབུ་ཞྭ་འདི་བཞེས་ལས་འགྲོ་དོན་མཛད་པ་ཞུ་གསུང་བ་དང་གཉིད་སད། ཞལ་རས་གསལ་ལ་དྲགས་མཆི་མ་མང་པོ་ཤོར། དང་པོ་སྒོམ་ཞྭ་གོན་གསུང་གནང་སྐབས་རྟེན་འབྲེལ་འཕྱུགས་དྭོགས་མི་མང་ས་ལ་མང་པོར་གྱོན། ཕྱིས་སུ་གྲོལ་ཆ་ཞིག་ཞུ་སྙམ་པ་མ་གྲུབ་པའི་ངང་ནས་ཞིང་བརྗེས། ད་ཅི་དྲག་སྙམ་སེམས་མ་བདེ་བའི་ངང་ལ་ཡོད་པ་བླ་མ་ཐུགས་རྗེ་ཆེ་བས་གྲོལ་ཆ་གནང་བར་འདུག་བསམ་མོས་གུས་བགྱིས་སོ། །ན་མོ་གུ་རུ་ཤྲཱི་བཛྲ་བྷཻ་ར་ཝཱ་ཡ། བདག་དང་པོ་ནས་དཔལ་རྡོ་རྗེ་འཇིགས་བྱེད་ལ་དད་པོ་ཞིག་ཡོད་དོ། །མན་ངག་མ་ཐོབ་པས་དགེ་སྦྱོར་བྱེད་ལུགས་ཇི་ལྟ་བ་ནི་མ་བྱུང་འདུག །མྱུག་དུ་སླེབ་འཕྲལ་བཅུ་གསུམ་མའི་ཐོག་ནས་ཡ་མ་རཱ་ཛ་འབུམ་ཕྲག་གཅིག་བཟླས་པའི་ཚེ་ནུབ་ཅིག །རྡོ་རྗེ་འཇིགས་བྱེད་ཆེན་པོ་ཞལ་ཕྱག་ཡོངས་རྫོགས་མི་ཙམ་ཞིག་གསལ་ལམ་སྟེ་མཐོང་མ་ཐག་གཉིད་སད། ས་རྟ་ཟླ་བ་དགུ་པའི་ནང་དུ། བླ་ཆེན་རིན་པོ་ཆེའི་དྲུང་དུ་གསུང་ཆོས་ཞུ་ཡིན་རྒྱ་ཆེན་ཡོད་པའི་ནུབ་ཅིག་རྨི་ལམ་དུ། བོ་དོང་བླ་བྲང་དཀར་པོའི་ཚོམས་ཆེན་གྱི་དབུས་ན་བཞུགས་གདན་ཤིན་ཏུ་མཐོ་བ་ཞིག་ལ། ལོ་ཆེན་བྱང་རྩེ་ཡིན་ཞུ་བའི་སྐུའི་རྣམ་པ་ད་ལྟ་བྲིས་ཡོད་པའི་སྐུ་འདྲ་འདི་རྣམས་སོར་བཞག་ལ། གོས་བེམ་དམར་སྨུག་ཉིས་བརྩེགས་བཞེས་པ་ཤིན་ཏུ་གཟི་བརྗིད་ཆེ་བ་ཞིག་དང་། དེའི་སྐུ་གཞོགས་གཡོན་ན་བླ་ཆེན་ཆོས་དཔལ་བཟང་པོ་ཡིན་ཞུ་བ་ཞིག་བཞུགས།
གཞན་གྲལ་པ་མང་པོ་བྱས་པ་ཞིག་གི་དྲུང་ན་བདག་འདུག་པ་ན། ལོ་ཆེན་རིན་པོ་ཆེ་བདག་ལ་ཆེད་དུ་གཟིགས་ཤིང་། བླ་ཆེན་པའི་རྣམ་ཐར་བསྔགས་བརྗོད་མང་པོ་གསུངས། དེ་ནས་ལོ་ཆེན་དང་ཡང་ཡང་མཇལ་བ་དཀའ་སྙམ་རྗེ་བླ་མ་དམ་པའི་རྣམ་ཐར་ལོ་ཆེན་རང་གིས་མཛད་པ་དེའི་ལུང་ཞིག་གནང་དགོས་ཞུས་པས་ཤིན་ཏུ་ལེགས་དེ་ག་བྱ་ཡིས་གསུང་། གཅིག་ལ་ཕྱག་དཔེ་ཁྱེར་ཤོག་གསུངས། ལེན་དུ་སོང་བ་མ་སླེབ་པ་ལ་གཉིད་སད། སེམས་འཕྲང་བའི་ཚད་ཐུབ་པ་ཞིག་བྱུང་། བླ་ཆེན་རིན་པོ་ཆེ་བླ་ཆེན་ཆོས་རིན་པའི་སྐྱེ་བ་ཡིན་འདུག་པས་དེའི་བྱིན་རླབས་ཡིན་ནམ་སྙམ།ལྕགས་སྤྲེལ་ཟླ་བ་བརྒྱད་པའི་ཚེས་གཅིག་ནས་གཞི་བསྙེན་གྱི་སྔོན་འགྲོ་བླ་མའི་རྣལ་འབྱོར་ཚུགས་པའི་ཚེས་བཞིའི་ནུབ་རྨི་ལམ་དུ། རྗེ་བཙུན་རྡོ་རྗེ་འཆང་ཕ་ཚར་པ་རྗེ་དང་མཇལ། རྟ་མགྲིན་ཡང་གསང་གི་དབང་རྫོགས་པར་གནང་། དཀྱིལ་འཁོར་གཏོར་མ་དབང་ཚིག་སོགས་ཀྱང་ཤིན་ཏུ་གསལ་བ་དང་། ཕྱག་ལེན་ལ་དོགས་གཅོད་འདྲ་ཞུ་རྒྱུ་ཡོད་པའང་ཞུས་ཤིང་། ལན་གནང་བ་ཞིག་བྱུང་ངོ་། །ནུབ་ཅིག་ཡང་ཕ་བླ་མ་བཞུགས་ཁྲི་ཐོག་རྩར་སྙོགས་པ་ཞིག་གི་སྟེང་ན་བེར་ཐུལ་ནེལ་ཆོ་གསར་པ་རང་ཞིག་བཞེས་ནས་བཞུགས་པའི་སྐུ་གཞོགས་གཡོན་ན་བདག་འདུག་པས། ཨ་སྐྱབས་ཀྱིས་གསོལ་ཇ་ཞུས་རྗེས་གསོལ་ཁ་ཞུ་ཡི་འདུག་པས། ངའི་དེ་ཁོང་ལ་དྲོངས་གསུངས། གསོལ་ཁ་དེ་བདག་ལ་དྲངས་པ་ཞིག་རྨིས། ཡང་ནུབ་ཅིག་དབུ་རྩེ་འོག་འདྲ་བ་ཞིག་ན་ཁྲི་སྔར་གྱི་དེ་ལས་མཐོ་བ་ཞིག་ལ་བཞུགས་ནས་ཚེ་ཁྲིད་ཀྱི་ཚར་ཆོས་དེ་གསུང་རྒྱུ་ཡིན་སྙམ་པ་བྱས། བདག་སྐུ་མདུན་ན་འདུག་པ་ལ་གསུང་ཆོས་ཧ་ཅང་གསལ་བ་ནི་མ་བྱུང་། རླུང་བུམ་
ཅན་བཟུང་སྤྱན་ལྟ་སྟངས་མཛད་ཧ་རེ་བཞུགས་པ་གསལ་པོ་ཞིག་རྨིས། །ཡང་ནུབ་ཅིག་བོ་དོང་རྫོང་དུ་བདེ་བ་ཅན་ཡིན་སྙམ་པ་ཞིག་ན་བཞུགས་གདན་མཐོ་པོ་ཞིག་ལ་རྡོ་རྗེ་འཆང་སྒོ་རུམ་པ་ཆེན་པོ་བཞུགས། དེའི་སྐུ་གཞོགས་གཡོན་ན་བདག །བདག་གི་གཡོན་ན་རྗེ་བཙུན་དཔོན་བཞུགས་པ་ལ་རིན་པོ་ཆེས་གཞི་ལེན་གཅིག་མཛད་རྒྱུ་བའི་སྟོན་ཤོམ་བཟང་པོ་བྱས་པ་ཞིག་རྨིས། ནུབ་ཅིག་དཔལ་སྦུག་བཞུགས་ཁྲིའི་སྟེང་ན་ཕ་བླ་མ་བཞུགས་གསུང་ངག་རིན་པོ་ཆེ་བསྐྱར་ནས་གནང་རྒྱུ་ཡིན་ཟེར་ཞུ་མཁན་མང་པོ་འཚོགས་འདུག་པ་ལ་བསླབ་གསུམ་པ་གསལ་པོ་འདུག་གཞན་ངོ་ཤེས་རང་ནི་མི་འདུག །ཁོག་ཕུག་ཡིན་སྙམ་པའི་དཔེ་ཆ་ཞིག་གི་ལུང་མཛད་བྱུང་བ་ན། ཐོད་ཕུའི་བློ་གསལ་རྒྱ་མཚོ་དེ། བིཪྺ་པ་ལགས་སམ་ཟེར་བ་ཞིག་འདུག་པ་ལ། དོན་འདི་ག་ཡིན་དེ་ཚིག་འདི་ཅུང་སྡེབ་མ་ཤེས་འདུག་གསུང་། བདག་གིས་ཐོད་ཕུའི་རྣལ་འབྱོར་དབང་ཕྱུག་དེ། ད་ལྟའི་བློ་གསལ་རྒྱ་མཚོ་ཡིན་བྱས་ན་བདེ་བ་འདྲ་ཞུས་པས་དེ་ག་བྲིས་པས་ཡོང་གསུང་། དེ་ནས་གཞུང་བཤད་ཅིག་ཀྱང་འགོ་བཙུགས།སྣང་གསུམ་ཀྱང་བཙུགས་བྱུང་ནས་ན་ནིང་གི་ཟིན་བྲིས་དེ་ལ་ཞུ་དག་བྱེད་དགོས་སྙམ་པ་དང་གཉིད་སད། བསམས་པས་ཐོད་ཕུར་བྱོན་པའི་རྗེ་གྷ་ཡ་དྷ་ར་རྣལ་འབྱོར་དབང་ཕྱུག་གི་ཐུགས་ཀྱི་སྤྲུལ་པར་མནལ་ལམ་བཀའ་རྒྱ་མ་ནས་བཤད། དེ་དང་ཕ་བླ་མ་ཐུགས་རྒྱུད་གཅིག་པའི་བརྡའ་རུ་འདུག་སྙམ་པ་བྱུང་ངོ་། ། ཨཥྚ་འབུམ་ཕྲག་གསུམ་སོང་བའི་ཉི་མ་ཤར་ལྷོར་བཟླས་པའི་སྒང་ལ། གཉིད་དུ་ཅུང་ཟད་སོང་བ་ན་མདུན་གྱི་ནམ་མཁའ་ལ་དཔལ་ཀྱེ་རྡོ་རྗེ་ཞལ་བརྒྱ་ཕྱག་བཅུ་དྲུག་པ་ཡབ་ཡུམ་གཉིས་ཀ་སྐུ་མདོག་གཡུ་དྲུག་དཀར་གྱི་མདོག་
ལྟ་བུ་དང་གསལ་རྙོག་མེད་འོད་ཀྱི་རང་བཞིན་ཞིག་ཇ་དཀར་ཡོལ་གང་ལྷོད་བྱས་འཐུང་བའི་ཡུན་ཙམ་གྱི་བར་ལ་འཛིན་མེད་ཀྱི་ངང་ལ་ཆམ་མེ་བ་ནས་མཐོང་། དེ་ནས་ཚོགས་པ་མང་པོས་ཕུན་ཚོགས་འདོད་དགུ་མ་འུར་དིང་གིས་གྱེར་བྱུང་བའི་སྐད་ཀྱིས་གཉིད་སད་ཀྱང་སེམས་བདེ་ཆམ་མེ་འདུག་གོ །ཡང་གཏུམ་ཆེན་གྱི་མངོན་དཀྱིལ་བསྒྲིག་པའི་སྒང་ལ་རྨི་ལམ་དུ་ཕ་རྡོ་རྗེ་འཆང་ཚར་པ་དང་མཇལ་ནས། གཏུམ་ཆེན་གྱི་དབང་རྫོགས་པར་གནང་། ཤེས་རབ་ཡེ་ཤེས་བླ་མེད་སྤྱི་དང་འདྲ་བ་དང་དབང་བཞི་པའི་སྐབས་སུ་བླ་མ་རྡོ་རྗེ་འཆང་གི་རྣམ་པ་སྤྱི་བོར་གསལ་བཏབ་ནས་སློབ་མ་ལ་བསྟིམ། དེ་དང་རང་སེམས་འདྲེས་པའི་གནས་ལུགས་ལ་ངོ་སྤྲོད་མཛད། དེ་ཙམ་མ་གཏོགས་དཀྱིལ་ཆོག་སོར་བཞག་མཛད། གཏང་རག་གི་མཎྜལ་ཚུན་ཚར་ནས་བརྒྱུད་པ་ཞུས་པས་ངས་ནི་རྡོ་རིང་རིན་པོ་ཆེ་ལ་ཐོབ། དེས་མཁྱེན་རབ་རིན་པོ་ཆེ་ལ་གསན་པ་ཡིན་ནམ་གསུང་། དེ་ནས་གཉིས་སད། ཡང་ནུབ་ཅིག་སྐུ་ནི་མ་མཐོང་། རྗེ་བཙུན་བསོད་ནམས་དཔལ་བའི་གསུང་ཡིན་སྙམ་པའི་སྐད་གོག་གེ་བ་ཞིག་གི་གཏུམ་ཆེན་འདི་སྲིའུ་ཆུང་བའི་ཕ་ཆོས་ཐུན་མོང་མ་ཡིན་པ་ཞིག་ཡིན་ཏེ། རྣམ་པར་ཉམས་ཤིང་འཐོར་བར་གྱུར། འདི་ཁྱོད་ཀྱི་ལེགས་པར་བསོས་ཤིག །ངས་བྱིན་གྱིས་བརླབས་ཀྱི་གསུང་བ་གསལ་བར་ཐོས། ཡང་ནུབ་ཅིག་སྤྲུལ་སྐུ་དབང་ཕྱུག་རྡོ་རྗེ་ཡིན་གསུང་བའི་སྔགས་པ་ཞལ་རས་དམར་ཆམ་མེ་བ་ལ། དབུ་སྐྲ་སིལ་བུ་རིང་ཤག་དཀར་པོ་དང་ལྕམ་སྨུག་སྡུད་མ་བཞེས་པ་ཞིག་མཇལ་ནས་ཞིབ་རྒྱས་མང་དུ་གསུངས། གཏུམ་ཆེན་ལ་གནང་བ་རྒྱས་པར་མཛད་པ་
ཞིག་བྱུང་བར་རང་དོན་མེད་པར་བསྟན་པར་བསམས་པའི་བྱིན་རླབས་ཡིན་ནམ་སྙམ། རིན་པོ་ཆེ་རོང་པའི་དྲུང་དུ་འཇོམས་བྱེད་ཀྱི་དབང་ཞུས་པའི་དུས། རྡུལ་ཚོན་གྱི་དཀྱིལ་འཁོར་གྱི་དབུས་ན་བཅོམ་ལྡན་འདས་འཇོམ་བྱེད་འབར་བ་སྐུ་མདོག་མུ་མེན་དྭངས་པའི་མདོག་ལྟ་བུ་རྩ་ཞལ་ཁྲག་སྐམ་པ་འདྲ་བའི་སྨུག་པོ་ཞལ་གསུམ་ཕྱག་དྲུག་ཕྱག་མཚན་སོགས་གམ་ལ་ཆེར་མ་ཟིན། སྐུ་ཁྲུ་གང་ཙམ་གསལ་ཞིང་དྭངས་ལ་རྙོག་པ་མེད་པ་ཞིག །མིག་ཕྱེ་བ་ནས་བཟུང་སྟེ། བུམ་དབང་མ་རྫོགས་བར་མིག་ཕྱེ་བཙུམ་མེད་པར་དངོས་སུ་གསལ་ལེར་མཐོང་། དེ་དུས་སྐུ་དང་རྩ་ཞལ་ཁ་དོག་སོ་སོ་བ་དེ་གང་ཡིན་ནམ་སྙམ་མོད། དེ་ནས་ཡུན་རིང་པོ་སོང་ནས་ལྕེ་བློ་ལྡན་སེང་གེའི་ཐུགས་དམ་བྲིས་སྐུ་མཐོང་བ་ལའང་ཁ་དོག་དེ་ག་འདུག་ཅིང་། འཕྲིན་ལས་ཀྱི་ཚིག་གི་གོ་བ་མྱངས་ན་དེ་ཁོ་ན་དགོས་རྒྱུར་འདུག་པས་ཡིད་ཆེས་རྙེད། རྗེ་བཙུན་རོག་པའི་ཞབས་དེ་ལྕེའི་གདུང་འཁྲུལ་མེད་སྤྱིར་བྱིན་རླབས་ཆེ་ཞིང་། སྒོས་ལྷ་འདི་ལ་མངའ་བརྙེས་པས་དེ་ཁོ་ནའི་བྱིན་རླབས་སུ་གདའ་འོ། ། ཁྱི་ལོ་མྱུག་ཆོས་སྡེའི་འདུ་ཁང་དུ་མངའ་རིས་རིགས་འཛིན་ཆེན་པོའི་ཕྱག་ཕྱི་བྱས་བཀའ་བརྒྱད་གསང་བ་ཡོངས་རྫོགས་ཀྱི་སྒྲུབ་ཆེན་མཛད་དུས་ཉིན་གཅིག་སྐོར་བ་བྱེད་འཕྲོ་ལ་ངལ་ནས་སྙེལ་བྱས་བསྡད་པས། གཉིད་དུ་ཧྲིབ་ཙམ་སོང་བ་ན་རིགས་འཛིན་ཆེན་པོ་ཕེབས་ནས་ཨྱོན་པདྨའི་བཀའ་ལུང་ལ་ཚེ་ཆུ་འདི་ཁོལ་ཞིང་འདུག་པས་དངོས་གྲུབ་ལེན་རན་གསུང་གི་འདུག །ད་ལྟ་ཚེ་དབང་བྱེད་གསུང་མ་ཐག་གཉིད་སད། སྐོར་བ་ལ་ཕྱིན་པས་མཆོད་དཔོན་བྱོན་ནས་དེ་རིང་བཀའ་དབང་ཞིག་ཡོད་པས་ཞལ་ངོ་ཚོ་གདན་འདྲེན་
ཐོང་གསུང་། དེ་འཕྲལ་བཀའ་བརྒྱད་བདེ་གཤེགས་འདུས་པའི་ཞི་བའི་ཚེ་དབང་གནང་བྱུང་ངོ་། །ཡང་སྒྲུབ་དབང་ཆེན་མོའི་ཆུ་དབང་གི་སྐབས་སུ་རིགས་འཛིན་ཆེན་པོས་བུམ་པ་ཐོགས་ནས་འདུར་དབྱངས་བཅས། བུམ་པ་མགོ་ལ་བཞག་པའི་ཚེ་ལུས་སྦྲིད་ཅིང་ཤེས་པ་ཀྱི་བུན་པའི་ཟིལ་ཆེན་པོ་ཞིག་བྱུང་སྐབས། ལྷོ་ནུབ་ཀྱི་ནམ་མཁའ་ན་ཚུར་གུ་རུ་ཆོས་ཀྱི་དབང་ཕྱུག་སྔགས་པ་སྒང་ཡོལ་དབུ་སྐྲའི་ཐོར་ཅོག་དར་དམར་པོས་བཅིངས་པ། སྐུ་ཤག་ཤམ་ཐབས་དཀར་པོའི་སྟེང་ན་ཚེམ་གེ་སྔོ་སང་བཞེས་པ། མགུལ་ལ་མེ་ལོང་འོད་ལམ་མེ་བཏགས་པ་ཞིག་ཕྱག་བུམ་པ་ཐོགས་ཏེ། འཛུམ་ཡེ་རེ་རེ་བྱོན་བྱུང་ནས་བུམ་པ་སྤྱི་བོར་བཞག །ངའི་ལོ་ཚད་ཀྱི་སྟེང་དུ་ལོ་བརྒྱད་བསྣན་པའི་ཚེ་ཐུབ་པར་འགྱུར། མི་ཉམས་པའི་སླད་དང་སེམས་ཅན་མང་པོའི་དོན་ལ་ལུང་བཞིའི་འདི་ལྟ་བུའི་སྒྲུབ་པ་ཆེན་པོ་མ་ཆགས་པ་གྱིས་ཤིག་གསུངས་ནས་འོད་དུ་ཡལ་སོང་། རེ་ཞིག་རྟོག་མེད་དུ་ཆམ་མེ་ལུས་འདུག །སད་པ་ན་མཆི་མ་བུན་པ་ཞིག་བྱུང་། འདི་ནས་བཟུང་སྟེ་ནམ་གསོལ་བ་བཏབ་རེས་ཀྱིས་ཉམས་ཀྱི་སྣང་བ་ལ་མཇལ་བྱུང་བ་ཡང་ཕ་རིགས་འཛིན་ཆེན་པོ་ཁོ་ནའི་ཐུགས་རྗེར་གདའ་འོ། །ཨོཾ་ཨཱཿཧཱུྃ་བཛྲ་གུ་རུ་པདྨ་སི་དྡྷི་ཧཱུྃ། ཕག་ལོ་ཟབ་ལུང་དུ་སྐུ་འདྲའི་སྒོ་དྲུང་དུ་ཞག་བདུན་མཚམས་བྱས་ནས་བླ་མ་བཀའ་འདུས་ཀྱི་སྤྱིའི་བསྙེན་པ་བྱས་པའི་དུས། དེ་བར་ལ་ནི་རྨི་ལམ་བརྡ་འདྲ་མོ་ཚེ་འདིའི་ལེགས་ཉེས་སྟོན་པ་ཤས་ཆེ་བར་བྱུང་། ཟབ་ལུང་ནས་ལམ་ཞག་གཉིས་བྱས་གཡང་དུ་བསྡད་པའི་ཐོ་རངས་མདུན་གྱི་ནམ་མཁའ་ལ་ཨྱོན་རིན་པོ་ཆེའི་སྐུ་བྱིས་པ་ལོ་བརྒྱད་པའི་ཚོད་ཙམ་སྐུ་མདོག་མི་ཤ་ཁ་དམར་མདངས་ཆེ་བ། སྤྱན་གཉིས་ཤིན་ཏུ་ཟླུམ་པ་ཧ་རེ་གཟིགས་
པ། ཕོད་ཀ་མཐིང་ཁ། ཆོས་གོས་དམར་པོ། པདྨ་མཐོང་གྲོལ་དམར་པོ་གསོལ་བ། སྐུ་ལྕམ་ཁ་ཐི་སྨུག་ཁྲ་འདྲ་བའི་པདྨ་ལྡུམ་རིས་ཁྲ་ཆིལ་ལེ་བ་བཞེས་པ་ཕྱག་མཚན་སྤྱི་དང་འདྲ་བ་ཞིག་གསལ་བར་མཐོང་ནས། དེའི་ཞབས་ཀྱི་ཐད་ཙམ་དུ་མགོ་བཙུགས་ནས། ཉི་མ་ལྟ་བུར་མ་རིག་མུན་པ་སེལ། །ཟླ་བ་ལྟ་བུར་ཉོན་མོངས་གདུང་བ་སེལ། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻཌཱུཪྻ་ཡི་འོད་ལ་ཕྱག་འཚལ་ལོ། །ཟེར་བ་འདི་ཁོ་ནས་སྟོན་མ་ཐག་གཉིད་སད། དེ་ནས་བཟུང་སྟེ་ཚེ་འདིའི་བྱ་བྱེད་འདུ་འགོད་ཐམས་ཅད་བུན་ལོང་ངེ་བ་འའི་ནམ་འཆིའམ། བྱང་ཆུབ་ཅིག་མ་བསྒྲུབ་ན་ན་མ་མི་འདུག་སྙམ་པའི་དུང་དུང་མ་གཏོགས་བློ་རྒྱ་ཡེ་མེད་ལ། ཆགས་ཞེན་འཇིགས་སྐྲག་ཅི་ཡང་མེད་པའི་ཟི་ཆོད་དེ་བ་ཞིག་རྒྱུན་དུ་བྱུང་བ་དེ། རིན་པོ་ཆེ་ལ་བདག་ཆེན་གྱིས་ངན་བྱས་པ་ལ་ཞེ་སྡང་དྲག་པོ་སྐྱེས་མ་ཐག་གཉིད་སད་པ་བཞིན་ཡལ་སོང་། བྱི་ལོ་བོ་དོང་ཀུན་ར་རྙིང་མར་སྐྱེ་བདུན་བསྒྲུབས་ཚེ་ཞལ་ངོ་རྣམས་ལ་འཁོར་བ་དོང་སྤྲུག་གི་ལམ་དབང་ཕུལ་བའི་སྤྱན་འདྲེན་གྱི་ཚེ། འཇའ་འོད་འཁྱིལ་བའི་ཀློང་ན་ཨྱོན་རིན་པོ་ཆེ་སྔར་མཐོང་བ་ལྟར་དང་།དེའི་གཡས་ན་གུ་རུ་རིན་པོ་ཆེ་ཆོས་དབང་བབས་དང་མོའི་དེ་ག་ལ། ཕོད་ཀའི་སྟེང་ན་ཆོས་གོས་ལི་ཁྲིའི་མདོག་འདྲ་བ་ཞིག་བཞེས། ཕྱག་ན་བུམ་པ་བསྣམས། གཡོན་ན་ཕ་མངའ་རིས་གཏེར་སྟོན་ད་ལྟའི་དབྱིབས་ཇི་ལྟ་བ་མདུན་གྱི་སྨད་ཙམ་ན་རྒྱ་མཚོ་དགེ་སློང་བ་དེ་མེ་ཏོག་དམར་པོ་ཞིག་ཐོགས་པ་རྣམས་ཡེ་རེ་རེ་བྱོན་བྱུང་ནས་མདུན་གྱི་ནམ་མཁའ་ལ་འོད་བུང་ངེ་བཞུགས། གུ་རུ་ཆོས་དབང་གི་ཕྱག་གི་བུམ་པ་ནས་བདུད་རྩི་འོ་མ་འདྲ་བ་རེ་སྐྱ་
ནར་ནར་ཞལ་ངོ་ཐམས་ཅད་ཀྱི་དབུ་གཙུག་ནས་བླུག །དབང་གི་སྤྲོ་བསྡུའི་སྐབས་སུ་ཡང་མདུན་ན་བཞུགས་པ་དེ་རྣམས་ཀྱི་གནས་གསུམ་གྱི་འོད་རང་གཞན་ཀུན་ལ་ཐིམ་པའི་སྣང་བ་དང་བཅས་དབང་དེ་མ་གྲོལ་རིང་ཉམས་ཀྱི་སྣང་བ་ལ་གསལ་འགྲིབ་མེད་པར་མཐོང་། དེ་སྐབས་ཁྲོམ་ཐམས་ཅད་དད་པ་འུར་ལངས། ས་འཕགས་གནམ་འཕགས་ལ་སོང་། ཞལ་ངོ་འདྲ་ལ་དེ་གོང་དུ་འཆི་བལྟས་འདྲ་གསལ་བར་འདུག་པ་དེ་ནུབ་ནས་གྲོལ་བྱིན་རླབས་ཡིད་ཆེས་པར་བྱུང་ངོ་། །དེ་སྐབས་ངན་སོང་ཀུན་སྦྱོང་ཀྱི་དབང་བྱས་པའི་ཚེ་ཡང་བབས་སྔ་མ་སོར་བཞག་ལ་རྒྱབ་ན་རྡོ་རྗེ་གླིང་པ་ལོ་ཆབ་སྤེལ་བའི་སྟེང་ན་པད་ཞྭ་སྔོན་པོ་བཞེས་པ། ཕོད་ཀ་སྔོན་པོ་བྱས་པའི་སྐམ་སེང་བ་ཕྱག་ན་ཐོད་པ་བསྣམས་པ་ཞིག་བཞུགས་འདུག་པ་ཉམས་སྣང་ལ་གསལ་བར་དབང་མ་གྲོལ་བར་དུ་བྱུང་། ལྕགས་མོ་གླང་ལོ་བདེ་གཟར་ཉེན་ཆེ་ལ་ཉམས་དམའ་བའི་སྒང་ལ། བོ་དོང་ཚོམས་ཆེན་དུ་དབོན་རིན་པོ་ཆེ་ལ་གདན་བཞུགས་ཀྱི་རྒྱབ་ཆོག་ཐུགས་སྒྲུབ་ཀྱི་ལས་ཀྱང་བགྱིས་པའི་སྤྱན་འདྲེན་གྱི་སྐབས་སུ། དྲིན་ཅན་ཨྱོན་ཆེན་པོ་སྔར་ཁོ་ན་འདྲ་བ་ཞིག་གི་ཞལ་ནས། འདི་འདྲ་རང་གི་སྲེད་པ་ཡང་བྱེད་མི་དགོས་གསུངས་ནས་ཡུད་ཀྱིས་ཡལ་སོང་། ཉམས་དགའ་ལ་ཤེས་པ་འུར་བ་ཞིག་བྱུང་། དེ་སྐབས་མགོན་པོ་གཡུལ་བཟློག་བྱས་པའི་བྱང་ཤར་གྱི་གྱེར་གྱི་སྐབས་སུ། སྔགས་སྲུང་ཨེ་ཀ་ཛ་ཏཱི་སྐུ་མདོག་སྨུག་ནག་རལ་པ་གཡུ་དྲུག་དམར་འདྲ་བ་གཅིག་སྐྱེས་ནམ་མཁའི་མཐོངས་སུ་བུན་ནེ་བ། དཔྲལ་བར་སྤྱན་གཅིག་ཨོང་ཀོང་ལྟར་དམར་བུང་ངེ་བ་། རྨ་བྱའི་སྒྲོ་ཐུལ་ཁྲ་བུན་བུན་གྱི་གསེབ་ནས་མེ་དམར་ལྷབ་ལྷབ་ཡོད་པ། གཡས་སྙིང་ཟ་ཞིང་
གཡོན་སྤྱང་ཀི་འགྱེད་པ་ཐོག་ཚད་ཙམ་ཞིག་གྱེར་མ་གྲོལ་བར་དངོས་སུ་མཐོང་། དེ་སྐབས་གཟའ་བདུད་ཆེན་པོ་བབས་སྔར་ཡོང་བ་དེ་ག་སོར་བཞག་ལ་མིག་ཐམས་ཅད་ཨོང་ཀོང་བཏང་བ་ཙམ་དམར་ཧུར་རེ་བ། ཁ་དགུ་ཅར་མི་རེ་ཁུར་ནས་ཁྱུ་རུ་རུ་ཟ་བ་ཞིག་ལན་ཁ་རེ་མཐོང་། འདི་ཡན་རྗེ་ཉིད་རང་གི་ཕྱག་བྲིས་དངོས་ལས་བཤུས་པ་ཡིན་ཅིང་། དེ་མན་ཁ་བསྐང་བ་ཡིན། ཡང་སྐབས་ཤིག་བྱང་ཕྱོགས་ནས་རྦོད་གཏོང་གི་ལྟས་ཤིག་གིས་མནལ་ལམ་དུ་མི་མང་པོས་ཕྱག་ཞབས་ནས་བཏེག་ནས་མཚོ་ཆེན་པོ་ཞིག་ལ་བསྐྱུར་གྲབས་བྱས་པ་ན། རྗེ་ཉིད་ཀྱི་ཞབས་གཉིས་ཀྱི་བར་དུ་མཚོ་བཅུག་ནས་ཏིང་ངེ་འཛིན་ལ་བཞུགས་པའི་ཚེ། དཔལ་མགོན་ཆེན་པོ་ཞལ་བཞི་ཡོངས་རྫོགས་གཟིགས་ནས་རྦོད་གཏོང་ཀྱང་རང་ས་ལ་ཞི། ཡང་སྐབས་ཤིག་ཐུགས་ཉམས་ལ་མྱུག་ཡིན་དགོངས་པའི་ལུང་པ་འཕྲ་ཤུར་བ་ཞིག་ན་མར་ཁྲག་གི་ཆུ་རྒྱུན་ཆེན་པོ་འབབ་པ་ནམ་མཁའ་ནས་དམག་ཟོར་རེ་མ་ཏཱི་ཞེས་པའི་སྒྲ་བྱུང་བ་ལ་བརྟེན། ཁྲག་གི་རྦ་ཀློང་འཚུབ་པའི་ཁྲོད་ནས་ཁྲོ་མོ་ཁྲག་གི་རལ་པ་ཅན་འཇིགས་སུ་རུང་བ་སྐུ་རྐེད་ཡན་འཐོན་པ་ཞིག་གཟིགས་གསུང་། སྟག་ལོ་ཚར་ཆེན་ཆོས་ཀྱི་རྒྱལ་པོ་སྐུ་མྱ་ངན་ལས་འདས་པའི་ཚུལ་བསྟན་ཚེ། རྗེ་ཉིད་ཀྱི་གཟིགས་སྣང་དུ་མདུན་གྱི་ནམ་མཁའ་ལ་དབུས་སུ་རྡོ་རྗེ་འཆང་བློ་གསལ་རྒྱ་མཚོ། གཡས་སུ་སྤྲུལ་སྐུ་ཤཱཀྱ་ཐུབ་པ། གཡོན་དུ་ཨྱོན་ཆོས་ཀྱི་རྒྱལ་པོ་རྣམས་དངོས་སུ་གཟིགས་གསུང་། ཡོས་ལོ་ཞ་ལུར་མ་ཧེ་མཆོད་པ་ལ་ཕེབས་སྐབས། ལས་ཀྱི་གཤིན་རྗེ་ཡབ་ཡུམ་གྱི་ཞལ་འབག་ལ་བཀའ་བསྒོ་གནང་བའི་ཚེ་ལས་ཀྱི་གཤིན་
རྗེ་ཡབ་ཡུམ་མདོག་ཁམ་ནག་ཤིན་ཏུ་འཇིགས་པ་སྤེལ་དཀར་དང་མཉམ་པ་ཞིག་ལ་དངོས་སུ་བཀའ་བསྒོ་གནང་གསུང་། རྗེ་ཉིད་ཞིང་འདིའི་མཛད་པ་ལེགས་པར་མཐར་ཕྱིན་ནས་གཟུགས་ཀྱི་སྐུའི་བཀོད་པ་ཆོས་ཀྱི་དབྱིངས་སུ་བསྡུ་བའི་ཚུལ་སྟོན་པར་མཛད་ཚེ། མདུན་གྱི་ནམ་མཁའ་ལ་ཨྱོན་ཆོས་ཀྱི་རྒྱལ་པོ། རྡོ་རྗེ་འཆང་ཀུན་དགའ་ལེགས་པ། རྗེ་བཙུན་བློ་གསལ་རྒྱ་མཚོ། སྤྲུལ་སྐུ་བདུད་འཇོམས་རྡོ་རྗེ། གུ་རུ་ཆོས་ཀྱི་དབང་ཕྱུག་རྣམས་ཕེབས་བྱུང་གསུང་བ་དང་། དེ་སྐབས་སུ་དྲུང་ན་བཞུགས་པའི་ཕྱག་ཕྱི་རྣམས་ལ་ཁྱེད་རྣམས་ཀྱིས་ཉི་མ་འདི་ཁ་དོག་ཇི་འདྲ་ཞིག་ཏུ་མཐོང་། ངས་ནི་ཉི་འོད་ཐམས་ཅད་འོད་ཟེར་ཁ་དོག་སྣ་ལྔར་འདུག་གསུངས། དེ་ཅི་ལགས་ཞུས་པས། སྦྱོར་དྲུག་བསྒོམས་པའི་ཡོན་ཏན་རྣམ་ཀུན་མཆོག་ལྡན་གྱི་སྟོང་གཟུགས་ཤར་བར་འདུག་གསུངས། ཡང་མཁའ་འགྲོ་མ་ཁ་དོག་སྣ་ལྔ་སོ་སོའི་སྐུ་མདོག་དང་མཐུན་པའི་སེང་གེ་ལ་ཆིབས་པ་རིགས་ལྔ་དངོས་སུ་བྱོན་ནས་སྤྱན་འདྲེན་པར་བརྩམས་པ་ན། དེ་ཉིན་བུ་སློབ་རྣམས་ཀྱིས་བརྟན་བཞུགས་ཕུལ་ནས་བཞུགས་གསོལ་གཏབ་པ་ན་མཁའ་འགྲོ་མ་རྣམས་ཀྱང་སླེབ་ཡོང་གསུངས་ནས་ཞག་བདུན་བར་བཞུགས་པའི་མཐར། འབྲུག་ལོ་ཟླ་བ་ལྔ་པའི་ཉེར་གཅིག་གི་མཁའ་འགྲོ་འདུ་བའི་དུས་ཀྱི་ཆ་ལ། གོང་དུ་བརྗོད་པའི་བླ་མ་རྣམས་དང་ཡི་དམ་ཞི་ཁྲོ་རབ་འབྱམས་ཀྱི་ལྷ་ཚོགས་མངོན་སུམ་དུ་བྱོན། དཔའ་བོ་དང་ཌཱ་ཀིའི་ཚོགས་ཀྱིས་གདུགས་དང་རྒྱལ་མཚན་ལ་སོགས་པ་མཆོད་པའི་ཚོགས་བསམ་གྱིས་མི་ཁྱབ་པ་དང་བཅས་པས་སྤྱན་དྲངས། ལྷ་
དང་རིག་པ་འཛིན་པ་ཀུན་གྱིས་མདུན་ནས་བདར། སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་སྔུན་ནས་བསུས། འཇིག་རྟེན་སྐྱོང་བ་རྣམས་ཀྱིས་ཞབས་ནས་བཏེག །ལྷ་དང་ལྷ་མོའི་ཚོགས་དཔག་ཏུ་མེད་པས་མེ་ཏོག་གི་ཆར་འབེབས་ཤིང་འཇའ་དང་འོད་ཀྱི་ལམ་ནས་དག་པའི་ཞིང་དུ་གཤེགས་པར་གྱུར་ཏོ། །ཀྱེ་མ་ཡབ་རྗེ་རྡོ་རྗེ་འཆང་དབང་དེ། །རྟག་པར་ཞེན་ཚེ་ཆོས་དབྱིངས་ངང་དུ་གཟིམས། །ཆད་པར་རློམ་ཚེ་སྒྱུ་མའི་གཟུགས་སྐུར་བཞེངས། །ཀྱེ་མ་ཀྱི་ཧུད་ཐུགས་རྗེའི་བདུད་རྩིས་སྐྱོངས། ཁྱོད་སྐུ་ཉིན་བྱེད་ཆོས་དབྱིངས་ནུབ་རིའི་རྩེར། །གཟིམས་ཚེ་འགྲོ་རྣམས་ལག་གི་ཀུ་མུ་ད། །འགྲམ་པའི་ཆུ་མཚོར་བརྟེན་པ་དལ་བའི་ལུས། །ཞིང་འདིར་ཁྱོད་སྐུའི་ངང་ཚུལ་བརྡས་བསྟན་ནས། །ད་ནི་སྲིད་ཞིའི་ཆོ་འཕྲུལ་སྒྱུ་མའི་གར། །གཉུག་མའི་ངང་ནས་རོ་སྙོམས་གཡོ་མེད་བདེ། ཁྱོད་སྐུ་དག་པའི་རང་ཞལ་དབྱིངས་སུ་མཇལ། །ཨ་ཧོ་སྙིང་ལ་བདུད་རྩིའི་ངལ་གསོ་བྱིན། །ཅེས་བརྗོད་ནས། དམ་པ་འདི་ཉིད་ཀྱི་གསང་བའི་རྟོགས་པ་བརྗོད་པའི་གཏམ། སོ་སོ་སྐྱེ་བོ་དག་གི་སྤྱོད་ཡུལ་མ་ཡིན་པ་གོང་དུ་བརྗོད་པ་དག་གིས་ཚད་མས་གྲུབ་པ་ཡིན་མོད། འོན་ཀྱང་འདི་ཙམ་གསང་ཚིག་ཀྱང་ཀུན་གྱི་བློར་མི་ཤོང་བའི་སྣོད་ལྡན་རེ་རེ་རྣམས་ཀྱི་སྤྱོད་ཡུལ་དུ་བྱ་ཞིང་། འདིས་མཚོན་པའི་གསང་བ་བསམ་གྱིས་མི་ཁྱབ་པ་ཞིག་ཡོད་མོད། འདིར་བརྗོད་པར་ག་ལ་ནུས་སོ། །དམ་པ་ཁྱོད་ཀྱི་ངོ་མཚར་གསང་བའི་གཏམ། །བགྲང་ཡས་རྒྱལ་བས་བསྐལ་བར་མ་གསུང་ན། །དེང་འདིར་
ཆ་ཤས་རྫོགས་པར་མི་སྤོབས་ཀྱང་། ཁྱོད་ཞལ་དྲན་ཚེ་ཡིད་ལ་དབང་མ་མཆིས། །དེ་ཕྱིར་དམ་པའི་རྟོགས་བརྗོད་ཆ་ཤས་ཀྱང་། །བརྗོད་པའི་དགེ་ཚོགས་བླ་ན་མེད་དོ་ཞེས། །རྒྱལ་རྣམས་བདེན་པའི་དབྱངས་ཀྱིས་ཡིད་དྲངས་ནས། །གསང་ཆེན་སྙིང་པོའི་གཏམ་འདི་ཕྱོགས་བརྒྱར་བསྒྲགས། །དམ་པའི་རྣམ་ཐར་ཟླ་ཤེལ་ཐིག་ལེར་བཻ་ཌཱུར་ཚོན་རིས་འཁྱིལ། །རྨད་བྱུང་གཏམ་གྱི་བདུད་རྩིའི་འོད་དཀར་སྙན་ཚིག་ལེགས་བཤད་ཆ་ཡི་གཏེར། །རྟོགས་བརྗོད་ཀུནྡའི་རྩེ་ལ་གར་བྱེད་དཔྱོད་ལྡན་མགྲིན་སྔོན་གཙུག་ཕུད་རྒྱན། །དེང་འདིར་སྐལ་བཟང་བློ་མུན་སེལ་ལ་ཨེ་མ་ཧོ་ཤར་གྱི་ཐིག་ལེ་མཚར། །ཨ་ཧོ་འདི་ན་གསང་བ་མི་ཟད་པའི། །སྙན་ཚིག་སྙིང་གི་གདུང་སེལ་མལླི་ཀཿ །ངོ་མཚར་རྟོགས་བརྗོད་ལི་ཤིའི་ལྗོན་པ་དག །སྐལ་བཟང་གཞོན་ནུའི་གྲིབ་བསིལ་འདི་ངོ་མཚར། །རིགས་བརྒྱའི་ཅོད་པན་རྡོ་རྗེ་འཆང་དབང་དེ། །གསང་ཆེན་ཡེ་ཤེས་གཟིགས་པའི་རྨད་བྱུང་གཏམ། །བདག་ལྟའི་བློ་ཆུང་ཟ་ཟིས་སེམས་མྱོས་ནས། །ཐུན་མོང་གཏམ་དུ་སྒྲག་ལ་གནང་བ་སྩོལ། །སྐྱེ་ཞིང་སྐྱེ་བ་དག་ནི་ཐམས་ཅད་དུ། །གང་གི་མཚན་ཡང་བགྲང་ཡས་བསྐལ་པའི་བར། །རྙེད་པར་དཀའ་བའི་རྗེ་བཙུན་ཆོས་ཀྱི་རྗེ། །མཁྱེན་བརྩེའི་དབང་ཕྱུག་ཞབས་པད་བསྟེན་པར་ཤོག །མཁྱེན་བརྩེའི་དཔལ་མངའ་དབང་ཕྱུག་བརྒྱད་དང་ལྡན། །བསྟན་པའི་རྒྱལ་མཚན་འཛིན་པའི་དཔལ་ཡོན་ཅན། །འདྲེན་མཆོག་བཟང་པོ་ཕ་རྒོད་བླ་མ་རྗེས། །སྐྱེ་བ་ཀུན་ཏུ་ཐུགས་རྗེས་འཛིན་པར་ཤོག །དཀྱིལ་འཁོར་རྒྱ་
མཚོའི་རིགས་བདག་རྡོ་རྗེ་འཆང་། །ངུར་སྨྲིག་ཟོལ་གྱིས་རོལ་བའི་བཀའ་དྲིན་ཅན། །མགོན་པོ་ཁྱོད་ལ་གསོལ་བ་བཏབ་པའི་དགེ །མ་གྱུར་མཁའ་མཉམ་འགྲོ་བའི་དོན་དུ་བསྔོ། །སྐྱབས་ཆེན་བླ་མ་རྣམས་ཀྱི་བྱིན་རླབས་དང་། གསང་ཆེན་རྒྱུད་སྡེ་ཟབ་མོའི་བདེན་ཚིག་དང་། །མཐུ་ཆེན་མཁའ་འགྲོ་སྲུང་མའི་མཐུ་སྟོབས་ཀྱིས། །རླབས་ཆེན་སྨོན་ལམ་འགྲུབ་པའི་བཀྲ་ཤིས་ཤོག །ཤུ་བྷ་མསྟུ་སརྦྦ་ཛ་ག་ཏཾ། འདི་ན་སྔོན་མེད་གསང་བའི་གཏམ། །མཁའ་འགྲོ་དཔའ་བོའི་ཕྱག་སོར་རྩེར། །བཞུགས་ནས་སྣོད་ལྡན་བུ་ལ་བྱིན། །སྐལ་མིན་རྣ་བར་ས་མ་ཡ། །ཞེས་བཀའ་རྒྱས་ཀྱང་བཏབ་བོ། །ས་མཱ་ཡ་གུ་ཧྱ། རྡོ་རྗེ་འཆང་དབང་རྗེ་བཙུན་མཁྱེན་བརྩེ་ཞབས། །བཀའ་དྲིན་མཚུངས་མེད་དྲན་མཆོག་བསླབ་གསུམ་རྗེ། །ཡབ་སྲས་ཞབས་རྡུལ་མཆོད་པའི་སྐལ་བཟང་ཅན། །ཐུགས་ཡིད་གཅིག་གྱུར་གང་དེས་སྦྱར་བ་དགེ །དཔེ་འདི་ཕ་བླ་མས་བདག་ལ་དགྱེས་བཞིན་དུ་གནང་བ་བྱིན་རླབས་ཆེའོ། །ཞེས་པའོ། །དབྱར་གྱི་ཆར་སྤྲིན་སྔོན་པོར་འཁྲིགས་པའི་རུམ། །གཡུ་འབྲུག་མགྲིན་རྔ་ཤུགས་ཀྱིས་སྒྲོག་བྱེད་ན། །དམ་པའི་རང་བཞིན་རྨད་དུ་བྱུང་བའི་གཏམ། །དངོས་པོའི་གཤིས་ལ་མཚར་འཛིན་བྱིས་པའི་བློ། །འཇམ་མགོན་བྱིན་རླབས་ཉ་གང་འོད་དཀར་ནས། །མཁས་གྲུབ་ག་པུར་གཟེགས་མས་སྒྲིབ་གཉིས་ཀྱི། །གདུང་སེལ་སྒྱུ་འཕྲུལ་ལྷ་ལམ་མཐའ་རྙེད་ན། །ཡོན་ཏན་འདི་ཙམ་རྡུལ་གྱི་ཆ་ལས་ཕྲ། །གང་ཐུགས་
བླ་མ་ཡི་དམ་ཆོས་སྲུང་དང་། །དབྱེར་མེད་མཁའ་ལ་མཁའ་ཡི་སྦྱོར་བ་བཞིན། །སོ་སོར་མེད་ཀྱང་སྣ་ཚོགས་གཟིགས་པའི་ཚོན། །ཀུན་རྫོབ་དྭངས་ཤེལ་དངོས་སུ་འཇའ་ལྟར་བཀྲ། །རྣལ་འབྱོར་དབང་མོས་རྗེས་བརྩེ་དྲིལ་བུའི་ཞབས། །སྐྱེངས་ནས་མཁའ་སྤྱོད་ཞིང་དུ་བྲོས་པ་དང་། །ལྷན་ཅིག་ཚངས་སྤྱོད་བརྟུལ་ཞུགས་བརྟན་པོ་ཡིས། །ཉེ་བར་འཁོར་གྱི་བསྙེམས་པ་ཆུང་ངུར་བྱས། །རྡོ་རྗེ་ཆོས་སྐྱོང་བྲན་འཁོལ་གནམ་ལྕགས་ཐོག །ཡིད་སྲུབས་བྲག་རི་བཏགས་ལ་མཚར་དུ་ཅི། །དབང་བཞིའི་ལམ་གྱི་བགྲོད་པས་ཚེ་གཅིག་ལ། །སྐུ་བཞིའི་གོ་འཕང་རྙེད་དེར་གང་གིས་བསྙོན། །འབུམ་ཕྲག་ལྕེ་ཡིས་བསྐལ་བར་བརྗོད་པའི་ཚད། །བཟུང་བར་ནུས་མིན་བདག་བློས་ག་ལ་སྲིད། །ཚངས་པས་ཟག་བཅས་བདེ་བའི་གཉིད་སྤངས་ཏེ། །བསམས་ཀྱང་རྟོགས་དཀས་སྙིང་ལས་ཆུང་ངུར་གྱུར། །འོན་ཀྱང་འདི་ཙམ་མཐོང་སྤེལ་སྨྲ་བ་ཡི། །འདབ་ཆགས་གྲིབ་ལྟར་རྗེས་འབྲེལ་ཡང་སྲིད་ཀུན། །ཚད་མ་བཞི་ལྡན་ཆོས་དང་དེ་སྟོན་པའ། །བླ་མས་རྗེས་འཛིན་སྐལ་བཟང་ཐོབ་བམ་སྙམ། །ཞབས་དྲུང་བརྟན་པའི་དྲུང་ངམ་བསོད་ནམས་རབ་བརྟན་དུ་གྲགས་པ་ལ་འདར་ཆོས་རྫོང་པའི་སྲས་མོ་དཔོན་ས་ནམ་མཁའི་དྲུང་བླངས་པར་སྲས་མོ་བྱུང་བའི་ཆུན་མར་ཚེ་དབང་དྲུང་བསུས་པའི་སྲས་འ་ཞ་ནམ་མཁའ་ཕུན་ཚོགས་ལ་རྭ་ལོའི་གདུང་བརྒྱུད་སྡེ་པ་བརྒྱ་ཚོ་བའི་ལྕམ་བསོད་ནམས་འབོལ་ཞེས་པར་སྲས་རྡོ་རྗེ་འཆང་དབང་ཕྱུག་རབ་བརྟན། ནམ་མཁའ་ཚེ་བརྟན་རྡོ་རྗེ། ནམ་མཁའ་མགོན་པོ། ནམ་མཁའ་
བཀྲ་ཤིས་དང་བཞི་བལྟམས་པའི་གཅེན་རྡོ་རྗེ་འཆང་དབང་ཕྱུག་རབ་བརྟན་གྱི་རྣམ་པར་ཐར་པ་ལོགས་སུ་འབྲི་བར་སྤྲོ་བས་འདིར་མ་བཀོད། ནམ་མཁའ་ཚེ་བརྟན་དང་ནམ་མཁའ་བཀྲ་ཤིས་གཉིས་ཀྱང་། ལེགས་བཤད་རིན་པོ་ཆེ་ལས། ཕལ་ཆེར་བུ་ཚའི་སྤྱོད་པ་ནི། །རིགས་བརྒྱུད་སྔ་མའི་རྗེས་སུ་འགྲོ །ཁུ་བྱུག་ཕྲུག་གུ་རྒྱ་ཁྲ་རུ། །འགྲོ་བ་རྒྱ་ལམ་སྲིད་པ་ཙམ། །ཞེས་ཡབ་མེས་གོང་མ་རྣམས་ཀྱི་ཆས་ཀྱིས་དཔའ་ཞིང་བསྒྲིགས་ཀྱིས་ཆེ་བ་སོགས་ལུགས་གཉིས་ཀྱི་སྤྱོད་ཚུལ་མཐའ་དག་ཡ་རབས་བཟང་པོའི་ངང་ཚུལ་ཁོ་ནར་བྱུང་ལ། ཁྱད་པར་འ་ཞ་ནམ་མཁའ་མགོན་པོའི་ཁབ་ཏུ་མངའ་རིས་གོང་མའི་བླ་སྨན་པའི་སྲས་མོ་ཚེ་དབང་བསོད་ནམས་དཔལ་མོ་བསུས་པའི་ཡབ་ཡུམ་གཉིས་ཀའང་ཆེ་བཙུན་གདུང་གིས་མཐོ་བའི་ངང་ཚུལ་དང་ལྡན་ཞིང་ཚེ་འདིའི་དོན་དུ་གཏན་མདུན་རྒྱབ་ཏུ་བསྐྱུར་བའི་གྱ་གྱུའི་ངན་སྤྱོད་ཡེ་མི་མཛད་པར་རྗེ་ལ་གུས་ཤིང་འབངས་ལ་བྱམས་པ་ངོ་ཚ་ཤེས་ཤིང་ཁྲེལ་གཞུང་གི་བག་ཡོད་པ། བསོད་ནམས་ཀྱི་ཞིང་དཀོན་ཅོག་གསུམ་ལ་མཆོད་པ་དང་མ་ནུས་པར་སྦྱིན་གཏོང་། དཔལ་ལྡན་བླ་མ་དམ་པ་རྣམས་ཀྱི་ཞབས་རྡུལ་བསྙེན་ནས་གསང་ཆེན་ཟབ་མོའི་ཉམས་བཞེས་ལ་ལྷོད་པ་མི་མངའ་བས་ཕྱིའི་ལྟར་སྣང་གི་ཆ་ལུགས་གཅིག་ཀྱང་དིང་སང་གི་སྡེ་དཔོན་དུ་གྲགས་པ་རྣམས་ཀྱིས་དཔེ་ཟླར་མི་འོས་པ་ཞིག་ཡིན་ལ། ཡབ་ཡུམ་དེ་གཉིས་ཀྱི་སྲས་སུ་ནམ་མཁའ་བསོད་ནམས་རབ་བརྟན་དང་གཅུང་ནམ་མཁའ་དོན་གྲུབ་དབང་པོ་
གཉིས་འཁྲུངས་པའི་གཅེན་དམ་པ་འདི་ཉིད་ལྷུམས་སུ་མ་ཞུགས་པའི་སྔོན་དུ་ཡུམ་གྱི་མནལ་ལམ་དུ་རྡོར་འཛོམ་ཟེར་པའི་ཞིང་གི་ཚིགས་ནས་གྲོང་ཆུང་དུང་གི་གང་བ་རྙེད་ཁྲོད་ནས་ལྕམ་གྱི་ཨ་ཇོས་དུང་དཀར་གཡས་འཁྱིལ་ལེགས་པོ་ཞིག་ཚེ་དབང་བསོད་ནམས་དཔལ་རང་གྱིས་ཞེས་གཏད་པ་སྐུ་ཕག་ཏུ་བཅུག་པ་རྨིས། ལྷུམས་སུ་ཞུགས་པའི་ཚེ་སྲིད་པ་འཁོར་བའི་ངང་ཚུལ་མཐའ་དག་མེ་འབར་བའི་རླུབས་ལྟར་སྡུག་བསྔལ་གྱི་རང་བཞིན་ཅན་ལྷ་མིའི་དབང་ཕྱུག་རྣམས་ཀྱང་ཟག་བཅས་ཀྱི་བདེ་བར་འགྱུར་བའི་སྡུག་བསྔལ་ཡིད་བརྟན་མི་རུང་བའི་ཆོས་ཅན་དང་། ཚུལ་དེས་དྲངས་ནས་རང་ཉིད་གཅིག་པུར་མ་ཟད་ཁམས་གསུམ་གྱི་སེམས་ཅན་ཐམས་ཅད་སྡུག་བསྔལ་གསུམ་ཅི་རིགས་ཀྱིས་མནར་བར་མི་བཟོད་པའི་སྙིང་རྗེ་དང་སྐྱོ་ཤས་ངེས་འབྱུང་བཅོས་མ་མ་ཡིན་པ་དང་། སྡུག་བསྔལ་དེ་དག་ལས་ཐར་པའི་སྐྱབས་གནས་དཀོན་ཅོག་རིན་པོ་ཆེ་རྣམ་པ་གསུམ་ཡིན་པར་རྒྱུ་མཚན་ཤེས་ནས་མི་འཕྲོག་པའི་དད་པ་བརྟན་པོ་གོང་དུ་འཕེལ་བ་སོགས་ཡུམ་གྱི་ཐུགས་ལ་འགྱུར་བ་སྔར་དང་མི་འདྲ་བ་འཁྲུངས་པར་བརྟེན་ནས་དེ་དག་ཀ་མད་སུམ་ཅུར་གྲས་པའི་ཚིགས་བཅད་ཀྱང་མཛད། མནལ་ལམ་དུ་བྲག་མཐོན་པོ་ཞིག་གི་རྩེ་ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་ཕྱག་ན་བུམ་པ་བསྣམས་ཏེ་བཞུགས་པའི་བྲག་རྩར་ཡུམ་ཉིད་འཁོད་པའི་དབུ་གཙུག་ནས་བུམ་ཆུ་སྐྱ་ནར་གྱི་བླུག་པས་ལུས་སེམས་བདེ་བ་ཁྱབ་པའི་ཉམས་ཤར། དེ་ཡང་སྐུ་བལྟམས་པའི་ཡུལ་ནི། ཁྲུས་ཁང་ལོ་ཙཱ་
བ་བསོད་ནམས་རྒྱ་མཚོས། ལར་དུས་གསུམ་རྒྱལ་བའི་ཐུགས་རྗེ་དང་། །རྒྱལ་སྲས་པད་དཀར་ཞབས་དྲིན་ལས། །བོད་ཀྱི་ཡུལ་ཁམས་འདི་ཉིད་ཀྱང་། །འཕགས་ཡུལ་དང་སྐལ་བ་མཉམ་པ་སྙམ། །ཞེས་སྲས་བཅས་རྒྱལ་བ་སྤྱི་དང་ལྷ་གཅིག་ཕྱག་ན་པདྨས་བྱིན་གྱིས་བརླབས་པས་དགེ་བ་བཅུའི་ཁྲིམས་དང་བཤད་སྒྲུབ་ཀྱི་བསྟན་པ་རྒྱ་གར་འཕགས་པའི་ཡུལ་ལས་མི་ཞན་པར་གསུངས་ཤིང་པཎྜི་ཏ་ཆེན་པོ་གྷ་ཡ་དྷ་རའི་ཞབས་ཀྱིས། ད་དགེ་སྦྱོར་བྱེད་པ་ལ་རྒྱ་གར་ལས་བོད་འདི་ཆུ་བཟང་ཞིང་བསིལ་དྲོད་སྙོམས། སྲོག་ཆགས་ཉུང་ལ་ཟས་བཅུད་ཆེ་བས་རྒྱ་གར་དུ་མི་འགྲོ་ང་བོད་དུ་སྡོད། ཅེས་འཁོར་འདས་དབྱེར་མེད་དག་པའི་སྣང་བས་འབྱམས་སུ་ཀླས་པའི་གྲུབ་པའི་འཁོར་ལོས་སྒྱུར་པ་དེས་ཀྱང་ཆེས་ཆེར་བསྔགས་པའི་བོད་ཡུལ་གྱི་སྟོད་སྤུ་རངས། མང་ཡུལ། ཟངས་དཀར་ཏེ་གསུམ་པོ་སྐོར་གཅིག །རྩེ་ལི། གྲུ་ཤ །སྦལ་སྡེ་སྟེ་གསུམ་པོ་སྐོར་གཅིག །ཞང་ཞུང་། ཁྲི་ཏེ་སྟོད་སྨད་དེ་གསུམ་པོ་སྐོར་གཅིག་རྣམས་མངའ་རིས་སྐོར་གསུམ། མདོ་ཁམས་ལ་སྨད་ཁམས་བཏགས་པ་ཁམས་གཅིག །མདོ་སྨད་གཡར་མོ་ཐང་བཏགས་པ་ཁམས་གཅིག །བཙོང་ཁ་ལ་གྱི་ཐང་བཏགས་པ་ཁམས་གཅིག་རྣམས་སྨད་ཁམས་སྒང་གསུམ་སྒང་དྲུག་ཟེར་བ་ནི་བར་ཁམས་རང་ལ་ནང་གསེས་ཀྱི་དབྱེ་བར་མངོན། བར་ན་དབུས་རུ་དང་གཡོ་རུ་གཉིས། གཡས་རུ་དང་རུ་ལག་གཉིས་ཏེ་དབུས་གཙང་རུ་བཞིར་གྲགས་པའི་གཡས་རུའི་ཆ་ཤར་གོང་མའི་ལུང་གིས་བོད་ཆོལ་
ཁ་གསུམ་ལ་དཔལ་ལྡན་ས་སྐྱ་པས་མངའ་སྒྱུར་བའི་ཚེ་ཤངས་ཁྲི་སྐོར་གྱི་ནང་ཚན་དང་གནམ་གྱིས་བསྐོས་པའི་དཔལ་ཕག་མོ་གྲུ་པའི་དུས་རྫོང་ཆེན་བཅུ་གསུམ་དུ་གྲགས་པ་ཕོ་བྲང་ཆེན་པོ་རིན་ཅེན་སྤུངས་པའི་ཆབ་འབངས་སུ་གཏོགས་པ་གནུབས་ཁུ་ལུང་ཞེས་སྔོན་དཔལ་བསམ་ཡས་མཆིམས་ཕུར་སློབ་དཔོན་ཆེན་པོ་པདྨ་སམ་བྷ་ཝས་སྒྲུབ་པ་བཀའ་བརྒྱད་ཀྱི་དབང་བསྐུར་བའི་དུས་རྗེ་འབངས་དགུར་གྲགས་པའི་སྐུ་འཇམ་དཔལ་གཤིན་རྗེའི་དཀྱིལ་འཁོར་དུ་མེ་ཏོག་ཕོག་པ་གནུབས་སངས་རྒྱས་ཡེ་ཤེས་རིན་པོ་ཆེ་སོགས་སྐྱེས་ཆེན་དུ་མ་འཁྲུངས་ཤིང་ཁྱད་པར་ཁུ་ལུང་པ་ཡོན་ཏན་རྒྱ་མཚོས་མཚོན་གནུབས་ཀྱི་སྔགས་འཆང་རིམ་པར་བྱོན་པའི་བསྟི་གནས་རྗེ་མི་ལས་ལྷ་རྗེ་གནུབས་ཆུང་པར་དྲགས་སྔགས་གཟའ་གདོང་དམར་ནག་ཞུས་ཧཱུྃ་ཤི་ཕགས་སྒྱེལ་གྱི་མཐུས་སྐུ་དགྲའི་ཚོགས་ཆམ་ལ་ཕབ་ཅིང་བྱང་ཁར་པཎ་ཆེན་རིན་པོ་ཆེ་ཤཱཀྱ་ཤྲཱིའི་བརྒྱུད་འཛིན་པའི་བསྟན་པའི་རྩ་བ་སོ་སོ་ཐར་པའི་འབྱུང་ཁུངས་ཆོས་ལུང་ཚོགས་པར་གྲགས་པའི་སྡེ་ཚུགས་པ། ལྷོ་བྱང་གི་ཡུལ་གྲུ་རྣམས་ཀྱང་། རྟོགས་བརྗོད་རིན་པོ་ཆེ་ལས། གསེར་གྱི་བ་གམ་གཞལ་ཡས་ཁང་། ཁང་པས་བསྐོར་བའི་གྲོང་ཁྱེར་ནི། །འོད་ལྡན་ཞེས་བྱ་བསོད་ནམས་ནས། །འོད་ལྡན་མཐོ་རིས་ལྟ་བུ་ཡོད། །ཅེས་མརྒད་གོས་སུ་ཀླུབས་པའི་སྤང་ལྗོངས་མེ་ཏོག་རྣམ་པར་བཀྲ་བ་སྣ་ཚོགས་པའི་འབྲུ་རིགས་ཀྱི་སྙེ་མས་ཡོངས་སུ་དུད་པའི་ཞིང་གི་ཕྱོགས་མཚམས་སུ་ལྗོན་ཤིང་གི་འཕྲེང་བས་ཀུན་ནས་དཀྲིས་པ། གྲོང་དང་གྲོང་བརྡལ་གྱིས་ཁྱབ་པ་འཆི་མེད་ཀྱི་
དགའ་ཚལ་ལ་ཅོ་འདྲི་བས། མེ་ལོང་མར། སྐྱེད་ཚལ་འཕྲེང་འདི་བུ་མོ་བཞིན། །མཛེས་ལྡན་སཱ་ལ་ཀཱ་ན་ན། །ཞེས་ཡིད་དུ་འོང་བར་གསུངས་ཤིང་ཐག་ཧ་ཅང་མི་རིང་བར་པཀྵུའི་ཀླུང་ཆེན་པོ་འབབ་པ་ནི། ཀླུ་ཀུན་ཏུ་དགའ་བའི་ཟློས་གར་དུ། ལི་ཤིའི་ཡལ་འདབ་དག་ནི་ཟོས་གྱུར་པའི། །ལག་ལྡན་ཆུ་ཡི་སྒྲེགས་པའི་དྲི་བཟང་གིས། །ཆུ་དང་ལྡན་པ་རྒྱ་མཚོའི་རྦ་རླབས་འདི། །རིན་ཅེན་འོད་ཟེར་དག་གིས་སྤྲས་ཏེ་མཛེས། །ཞེས་མཐོ་རིས་ལྷའི་ཆུ་བོ་མ་དག་པའི་དྲི་མ་འཁྲུ་བ་ལ་རིང་དུ་ཆས་པ་ལྟ་བུ། བ་ད་རའི་གླིང་བགྲོད་ཀྱི་རྟོགས་པ་བརྗོད་པའི་ཡལ་འདབ་ལས། །རྩེ་མོ་ཤིན་ཏུ་མཐོ་བ་ཡི། །ཤེལ་གྱི་ས་གཞི་མདུན་དུ་མཐོང་། །བྱ་རྣམས་ཀྱིས་ཀྱང་བགྲོད་དཀའ་ན། །འཇམ་པའི་བྲག་ནི་གཅིག་པུ་དེར། །ཞེས་ལྷོ་བྱང་གི་རི་བོ་རྣམས་མཁའ་ལ་བསྙེག་པ་ལྟར་མཐོ་ཞིང་ཤེལ་དཀར་གྱི་བྲག་རི་བཅལ་དུ་བཀྲམ་པ་དང་ལ་ལར་སྤང་དང་རྩི་ཤིང་ནགས་ཚལ་མངོན་པར་དཀྲིས་པའི་ཡུལ་གྱི་ཆ་ཁུ་ལུང་གཞིས་ཀར་ཡབ་དགུང་ལོ་ཉེར་བཞི་དང་ཡུམ་བཅོ་བརྒྱད་ཀྱི་བགྲང་བྱར་བབས་པའི་ཚེ་འཕགས་ཡུལ་དུ་སྟོད་འགྲེལ་བའི་ལུགས་ལ་ཤོ་བྷ་ན་ཞེས་ཕྱོགས་འདིར་མཛེས་བྱེད་དུ་གྲགས་ཤིང་འཇམ་དབྱངས་གོང་མའི་ཁབ་ཏུ་གུའི་མའུ་ཞེས་ཆུ་མོ་ཡོས་ཀྱི་ལོ་དུས་ནི། འཕགས་སྐྱེས་པོའི་རྟོགས་པ་བརྗོད་པའི་ཡལ་འདབ་ལས། དེ་ནས་ཡིད་སྲུབས་ལོངས་སྤྱོད་གྲགས། །སྦྲང་རྩི་འཐུང་བ་རྣམས་ཀྱི་གཉེན། །སྐལ་བཟང་འཁྲི་ཤིང་འཁྱུད་བྱེད་པ། །ལེགས་
ལྡན་དཔྱིད་ནི་མཐོང་བར་འགྱུར། །ཞེས་སྤྱིར་འདུལ་མངོན་དུས་འཁོར་ནག་རྩིས་རྒྱལ་པོ་ལོ་གསར་སོགས་ལོ་འགོ་འཛིན་ལུགས་མང་ནའང་རྒྱ་རྩིས་རྙིང་མ་ལ་བཅུ་གཅིག་པ་དཔྱིད་ཟླ་ར་བ་སྟག་ཏུ་ངོས་འཛིན་པས་ཀུན་ཡིད་དགའ་སྟོན་སྟེར་བ་ལེགས་ལྡན་དཔྱིད་ཀྱི་དུས་ལ་བབས་པ་མཱརྒ་ཤཱི་ར་ཞེས་པ་ཧོར་ཟླ་བཅུ་གཅིག་པའི་དམར་ཆའི་གང་བ་གསུམ་པ་མཁའ་འགྲོ་འདུ་བ་ཉེར་དགུ་རེས་གཟའ་ཟླ་བ། སྐར་མ་སོག་པ། ཉི་ཤར་བུམ་པའི་དུས་སྦྱོར་གྱི་ཚེ་ཡུམ་ལ་བསྙུན་མི་མངའ་བའི་ངང་ནས་ལྟེ་བའི་ག་ཤ་གསུམ་རིམ་དུ་དཀྲིས་ཏེ་ཨ་ཞེས་པའི་རང་སྒྲ་དང་བཅས་སྐུ་འཁྲུངས། དེའང་ཀུན་མཁྱེན་བུའི་གསུང་སྐྱོར་ལུང་པས་དྲངས་པར། དོན་དམ་གཤིས་ཀྱི་གནས་ལུགས་ལ། །རྩིས་དང་འབྲས་བུའི་སྤྲོས་པ་བྲལ། །ཐ་སྙད་ལས་འབྲས་མི་སླུ་བས། །དགེ་བའི་འབྲས་བུ་བདེ་བ་དང་། །སྡིག་པས་སྡུག་བསྔལ་སྦྱིན་པར་བྱེད། །གཟའ་སྐར་བདེ་སྡུག་བྱེད་པོ་མིན། །བྱེད་ཅན་བཅུ་གསུམ་མུ་སྟེགས་སྨྲ། །དེ་ནི་ལོག་པའི་ཀུན་རྫོབ་ཡིན། །ཐ་སྙད་སླུ་མེད་བདེན་པ་རུ། །རྩིས་ཚུལ་ངེས་པར་འཛིན་དགོས་ཏེ། །དཔེར་ན་ཐ་སྙད་དབང་བསྐུར་དང་། །ཆོ་ག་ལྷ་སྒྲུབ་བྱས་པ་ཡིས། །དོན་དེ་འགྲུབ་པར་སངས་རྒྱས་དང་། །པཎ་གྲུབ་རྣམས་ཀྱིས་གསུངས་པ་བཞིན། །རྩིས་ཚུལ་རྒྱུད་སྡེ་མདོ་མང་པོར། །རྩིས་ཚུལ་བྱེད་པར་གཅེས་པར་གདམས། །ཞེས་ཟླ་བ་བསོད་ནམས་ཀྱི་གཟའ་བཙན་ཕྱུག་དང་ལྡན་ཞིང་། སོག་པ་ཆོས་ལྡན་ཐོས་ཤིང་ལས་ཀུན་མཁས་པ་སོགས་རྟེན་འབྲེལ་གྱི་སྒོ་འཕར་འགྲིག་པ་ནི། མདོ་
སྡེ་རྒྱན་ལས། སྐྱེ་བ་སྐྱེད་མོས་ཚལ་འགྲོ་ལྟར་རྟོགས་ནས། །སྤྲོ་བའི་སེམས་དྲངས་དགའ་ཞིང་དེ་ལ་འཇུག །ཅེས་དམ་པ་རྣམས་ནི་འགྲོ་བའི་དོན་དུ་སྲིད་པར་སྐྱེ་བ་ལེན་པ་ལ་ཆགས་ལྡན་གྱི་སྐྱེས་བུ་སྐྱེད་མོས་ཚལ་དུ་འཇུག་པ་ལྟ་བུའི་སྤྲོ་བ་དང་ལྡན་པར་བཤད་པས་རྗེ་འདི་ཉིད་རྡོ་རྗེ་འཆང་ཚར་པ་ཆོས་རྗེའི་རྣམ་པར་སྤྲུལ་པར་གདོན་མི་ཟ་བས་སྤྱི་དང་བྱེ་བྲག་གི་བསྟན་པའི་བཙས་སུ་མཁའ་སྤྱོད་དག་པའི་ཞིང་ན་ཉི་མ་ལས་འོད་ཟེར་བཞིན་དུ་ཤར་ཡང་གདུལ་བྱ་ཐུན་མོང་བ་རྣམས་ཀྱི་སྣང་ངོ་དང་མཐུན་པར་བྱིས་པའི་རྣམ་པར་བསྟན་པ་དེ་ལ་རྡོ་རྗེ་འཆང་དབང་ཕྱུག་རབ་བརྟན་གྱིས་མཚན་ནམ་མཁའ་བསོད་ནམས་རབ་བརྟན་དུ་གསོལ། དེ་འཕྲལ་དུ་ཞུགས་སྐོངས་ཀྱི་ལྕི་ཤིང་དང་ན་བཟའི་རྒྱུའི་སྣམ་ཕྲུག་རྩོལ་མེད་དུ་གཞན་གྱིས་འབུལ་མི་བྱུང་ཞིང་། ཡུམ་གྱི་ཆབ་ཞོའང་ཤིན་ཏུ་མང་བས་བཞེས་པའི་ལྷག་མ་སྨན་གྱི་རྒྱུར་དཀྲོགས་པ་དང་ཉིན་མཚན་བར་མ་ཆད་པར་འཛག་པ་ན་དབང་ཐང་ཆེ་བའི་ལྟས་ལེགས་ཟེར། སྐུའི་དབྱིབས་དཔྲལ་བ་དབྱེས་ཆེ་ཞིང་ཞལ་ཁྱིམ་སྒོར་བ། དབུ་གདུགས་ལྟར་ཕུག་པ་སོགས་མཚན་དཔེ་རྗེས་མཐུན་པས་སྤྲས་ཤིང་། མདངས་དཀར་ལ་གསལ་བ། སྐུ་བོང་གཞན་ལས་ཆེ་ལ་ཀུན་གྱི་ཡིད་དུ་འོང་བ་སྙུན་ནད་གདོན་ཞུད་ཀྱི་འཚེ་བ་དང་བྲལ་བ་ཞིག་བྱུང་ཞིང་གསུང་མ་བྱེ་བའི་དུས་ཞལ་ངོ་ལྷན་རྒྱས་སུ་བཞུགས་པའི་ཚེ་ཡུམ་གྱི་སྐུ་པང་ན་གྲལ་མཇུག་ཏུ་ཡོད་པ་ལ་གསུང་གཙེར་བ་སོགས་མི་དགྱེས་པའི་རྣམ་འགྱུར་བསྟན་པ་རྨོ་མོས་གྲལ་གཤམ་
དུ་བཞུགས་མ་འདོད་པར་འདུག་གྲལ་འགོར་བཞུགས་ཆུག་ཟེར་བ་དེ་བཞིན་དུ་མཛད་པས་དགྱེས་པའི་རྣམ་འགྱུར་བསྟན་པ་ན་ཉེ་སྐོར་དུ་འཁོད་པ་རྣམས་བྱིས་པ་དཀྱུས་མའི་ངང་ཚུལ་དང་མི་ལྡན་པ་ཞིག་གོ་སྙམ་ངོ་མཚར་དུ་འཛིན། དགུང་ལོ་གཉིས་འགྲོ་བའི་ཚེ་དབང་ཕྱུག་རབ་བརྟན་གྱི་སྐུ་འགག་གསར་པ་བཞེས་ནས་བྱང་གཏེར་གྱི་ཚེ་དབང་ལྕགས་སྡོང་མ་སྩལ་བའི་སྐབས་སྐུའི་དབྱིབས་དང་ན་བཟའི་ཁྱད་པར་སོགས་ཐུགས་ལ་ངེས་ཏེ་སྐུ་ན་ཡར་ཕེབས་ནས་དྲན་ཞེས་སྐུ་འཁོར་བ་ཚོར་བཀའ་སྩལ་བ་ནི་ལོ་ངོ་གཉིས་ཀྱི་དུས་དེ་འདྲ་གང་ཟག་ཕལ་བར་འབྱུང་བ་མི་སྲིད་ཅིང་གལ་ཏེ་དུས་དེར་ངོ་འཕྲོད་པ་ལྟ་བུའི་དབང་དུ་བྱས་ནའང་རྗེས་སུ་དྲན་གསོས་པ་རང་ཅག་རྣམས་ལ་མི་འབྱུང་བ་མངོན་སུམ་དུ་གྲུབ་པས། མངོན་པ་ཀུན་ལས་བཏུས་སུ། དྲན་པ་གང་ཞེ་ན། འདྲིས་པའི་དངོས་པོ་ལ་སེམས་ཀྱིས་བརྗེད་པ་མེད་པ་སྟེ་རྣམ་པར་མི་གཡེང་བའི་ལས་ཅན་ནོ། །ཞེས་སྐུ་ཚེ་གཞན་དུ་ཞི་གནས་སམ་བསྐྱེད་པའི་རིམ་པའི་ཏིང་ངེ་འཛིན་ལ་གོམས་པའི་ནང་རྟགས་ཕྱིར་ཤར་ཏེ་བློ་ལྡན་ཞིག་གིས་དཔྱད་ན་འདི་གཅིག་པུའི་རྣམ་ཐར་ཡང་དཔག་པར་དཀའོ། །སྔོན་མེད་པའི་རྡོ་ཆུང་ངུ་དང་འཇིམ་པ་སྦྱིན་པོ་མང་པོ་ཁུ་ལུང་གི་གཞིས་ཀའི་ལྟག་ནས་རྙེད་པ་དང་། ཟན་སོགས་ལ་གཙུག་ལག་ཁང་དང་དགེ་འདུན་གྱི་སྡེའི་དབྱིབས། དཀོན་ཅོག་གི་སྐུ་གསུང་ཐུགས་རྟེན་གྱི་རྣམ་པར་བསྒྲིགས་པར་ཏིང་དང་ཀོང་བུ་སོགས་བཟོས་ནས་མཆོད་པ་འབུལ་བ། དུང་དཀར་བུས་ཏེ་དགེ་འདུན་ཚོགས་པ། ཆོས་འཆད་ཉན་གྱི་ཚུལ་དང་། དེ་བཞིན་དུ་རང་ཉིད་ཀྱི་བླ་མ་དང་
བྱིས་པ་གཞན་རྣམས་གྲྭ་པའི་ཚུལ་དུ་མཛད་དེ་ཆོས་འཆད་པའི་རྣམ་པ། ངའི་མིང་ལ་བཙུན་ཆུང་ཚུལ་ཁྲིམས་ཟེར་གསུང་བ། མདོས་གཏོར། ཆོ་ག །བསྐང་བས་མཚོན་པའི་ལད་མོ་སོགས་བསྐྲུན་པ་སྐུ་སྐྱེ་བ་མང་པོར་འཁོར་ལོ་གསུམ་གྱི་བྱ་བ་ལ་རྟག་འགྲུས་སུ་གནང་བའི་བག་ཆགས་ཀྱི་མཐུ་བརྟས་པ་ཡིན་ཅིང་དུས་ཕྱིས་སྐུ་རིམ་ལ་དགོས་པའི་འཇིམ་པ་སྔར་ཤུལ་ནས་བཙལ་ཀྱང་ལར་མ་རྙེད་པས་བཀའ་ལས་ངེད་ཆུང་ངུའི་དུས་སུ་བློ་བྲིད་ཀྱི་རྩེད་མོའི་ཆེད་དུ་གཞི་བདག་གིས་བྱིན་པ་ཡིན་འདྲ་གསུང་། མདོར་ན་ཀུན་སྤྱོད་མཐའ་དག་ཆོས་དང་མཐུན་པའི་རྣམ་འགྱུར་མ་གཏོགས་བྱིས་པ་ཐ་མལ་པའི་ངང་ཚུལ་ཡེ་མི་མཛད་པས་ཐུགས་སྒམ་པའི་ཚད་ཐུབ་པར་གླེང་། དགུང་ལོ་ལྔ་དྲུག་ཙམ་ལ་ཡུམ་གྱིས་སྙན་པད། ཀོང་ན། སོར་གདུབ་སོགས་ཕུལ་བར་མི་དགྱེས་ཤིང་འདོགས་པར་མི་མཛད་པ། རྡོ་རྗེ་འཆང་ཚར་པ་ཆོས་རྗེས། ལ་ལ་བ་ལང་ཇི་བཞིན་སྤྱོད། ཁ་ཅིག་བྲམ་ཟེའི་རྣམ་ཐར་སྐྱོང་། ཁོ་བོ་ཉན་ཐོས་སྤྱོད་པས་མཛེས། །ཤུག་འབྱུང་སྐྱོང་བ་བླ་མའི་དྲིན། །ཞེས་པའི་དོན་བཞིན་ཡང་སྲིད་དུ་མར་ཉན་ཐོས་ཀྱི་བསླབ་པ་ལ་གནས་པའི་བག་ཡོད་ཀྱི་ངང་ཚུལ་ཉམས་སད་པས་ཁྱིམ་པའི་རྟགས་དང་ཆ་ལུགས་སོགས་ལ་ཐུགས་མི་གཞོལ་བར་གནས་བརྟན་འདུལ་བ་འཛིན་པ་ཆེན་པོ་འབྱུང་བའི་སྔ་ལྟས་སོ། །དགུང་ལོ་བདུན་གྱི་སྟེང་དུ་གངས་རིའི་ལྗོངས་འདིར་ཐུབ་བསྟན་ཡོངས་སུ་རྫོགས་པའི་ཤིང་རྟ་པ་ཆེན་པོ་མ་བྱོན་སངས་རྒྱས་གསུམ་པ་རབ་གསལ་གྱི་རྣམ་པར་སྤྲུལ་པ་ཐམས་
ཅད་མཁྱེན་པ་བུ་སྟོན་རིན་པོ་ཆེའི་གདན་ས་ཞ་ལུ་རི་ཕུག་ཆོས་ཀྱི་ཕོ་བྲང་དུ་རིགས་བརྒྱའི་བདག་པོ་དབང་ཕྱུག་རབ་བརྟན་བཞུགས་པའི་སྤྱན་སྔར་ཕེབས་གཙུག་ཕུད་བཞེས་ཤིང་མཚན་མགོན་པོ་བསོད་ནམས་མཆོག་ལྡན་བསྟན་པའི་རྒྱལ་མཚན་དཔལ་བཟང་པོར་གསོལ། རྐྱེན་སེལ་རྗེས་གནང་ཅི་རིགས་གསན་ནས་གཞིས་སུ་ཐེགས། ཐུན་མོང་ཞེས་པ་ལྕགས་ཁྱིའི་ལོ་དགུང་ལོ་བརྒྱད་ཀྱི་ཐོག་སླར་ཞ་ལུ་རི་ཕུག་ཏུ་ཕེབས་པའི་ནུབ་སྔ་མ་རྗེ་བླ་མའི་འོད་གསལ་དུ་རྩིས་ཀྱི་མགོན་པོ་ཆོས་སྐྱོང་ཡིད་བཞིན་ནོར་བུའི་མངག་གཞུག་དམ་ཚིག་སྲོག་གི་བདག་པོ་ཟབ་བོར་དཀར་པོའི་གོས་དང་ཁྲབ་གསོལ་ཞིང་སེང་གེ་དཀར་པོར་ཞོན་པ་ལག་ན་རྒྱ་སྤོས་ཁྲེས་ཀྱི་ཆུན་པོ་དར་སྐུད་ཀྱིས་བཅིངས་པ་སྤར་བའི་ཐ་སྙད་མེད་པ་དྲི་ཞིམ་པ་ཕུན་སུམ་ཚོགས་པས་ཁྱབ་པ་ཞིག་ཁྱེར་ནས་ནམ་མཁར་ཡུད་ཡུད་འགྲོ་བ་བྱུང་བ་སང་ཉིན་བཀའ་ལས་མདང་དེ་བཞིན་བྱུང་བ་ཁྱེད་འབྱོན་པའི་ལྟས་སུ་འདུག་ཅིང་ཚུལ་ཁྲིམས་རྣམ་པར་དག་པ་ཡོང་བའི་བརྡར་གོ་གསུང་། རྗེ་ཉིད་ཀྱི་དྲུང་དུ་ཚིགས་སྔ་མ་དགེ་ཚུལ་གྱི་དངོས་པོར་བསྒྲུབས། མི་རིང་བར་རྗེ་རྡོ་རྗེ་འཆང་ལ་སྟོད་ལ་ཆིབས་ཁ་བསྒྱུར་བའི་ཞམ་འབྲིང་མཛད་ནས་གདན་ས་ཆེན་པོ་དཔལ་ལྡན་ས་སྐྱར་ཕེབས་འཇམ་དབྱངས་གཟི་འོད་འབར་བ་དང་ཆོས་སྐྱོང་མངོན་སུམ་དུ་བཞུགས་པའི་སྒོ་རུམ་མགོན་ཁང་སོགས་ལ་གནས་གཟིགས་རྒྱས་པར་མཛད། ཕྱིར་ལམ་ལྷ་རྩེ་དང་འདར་ཕྱོགས་སུ་ཐེགས་སྐབས། སྐུ་ན་གཞོན་པ་ལ་ངེས་ཤིང་མཛངས་པ་རྣམ་དཔྱོད་ཀྱི་མཐུ་ཕུལ་དུ་ཕྱིན་པ་ལ་ཕྱོགས་དེའི་སྐྱེ་བོ་རྣམས་ངོ་མཚར་ཞིང་ཡི་རང་བར་གྱུར།
དེ་ནས་སྡེ་པ་བཀྲ་ཤིས་རྩེ་བ་དང་ཆོས་སྡེ་བ་ཡོན་མཆོད་ནས་གདན་འདྲེན་བྱུང་བ་ལྟར་ཡབ་སྲས་ཆབས་ཅིག་པར་ཆིབས་ཁ་བསྐྱོད། བྱམས་ཆེན་དུ་རྗེ་བཙུན་ཞ་ལུ་པ་ཆེན་པོ་དང་ཐོག་མར་མཇལ། དེ་ནས་དབུས་འགྱུར་གྱི་ལྟེ་བ་ཡར་ཀླུངས་སྐྱིད་པའི་སྨན་ལྗོངས་སུ་ཕེབས། རྗེ་བཙུན་ས་སྐྱ་པའི་གསང་ཆེན་སློབ་བཤད་ཀྱི་སྔགས་གྲྭ་བཀྲ་ཤིས་རྩེ་ཆོས་སྡེར་སྟན་ཆགས། ལོ་ཤས་བཞུགས་རིང་རྗེ་རྡོ་རྗེ་འཆང་ཆེན་པོས་གཉུག་མར་གནས་པ་དང་ཕྱོགས་འདུས་ཀྱི་དམ་པའི་ཆོས་དོན་དུ་གཉེར་བ་ཆུའི་རླབས་འཕྲེང་བཞིན་ཡོལ་བ་མེད་པ་རྣམས་ལ་ཆོས་ཀྱི་འཁོར་ལོ་བསྐོར་བའི་ཞར་ཆོས་དང་། སྙིང་པོ་ཀྱེ་རྡོ་རྗེ་མན་ངག་ལུགས། འཇིགས་མཛད་རྡོ་རྗེ་སོགས་དཀྱིལ་འཁོར་དུ་མའི་དབང་བཞི། མཁའ་སྤྱོད་སྐོར་གསུམ། དམར་པོ་སྐོར་གསུམ། ཆོས་སྐྱོང་ཆེ་ཆུང་ནས་ཉེར་མཁོའི་རིགས་དང་གཞན་ཡང་རྒྱུད་སྡེ་བཞི་དང་འབྲེལ་བའི་དབང་། བྱིན་རླབས། རྗེས་གནང་། ལུང་ཁྲིད་མན་ངག་མང་དུ་གསན་ཅིང་དེ་དག་ཀྱང་གསན་ལོ་ཙམ་མ་ཡིན་པར་སྐུ་ན་ཕྲ་ཡང་ཐུགས་ལ་ངེས་ཤིང་བྱང་ཆུབ་པར་མཛད། རྗེ་རྡོ་རྗེ་འཆང་གི་དགོངས་པར་སྙན་བརྒྱུད་མངའ་བདག་རིན་པོ་ཆེ་བོད་མཁར་ནས་ཀྱི་ཞལ་སློབ་སྤྱན་སྔ་མི་ཕམ་ཆོས་ཀྱི་རྒྱ་མཚོའི་གདམས་ངག་བུམ་པ་གང་བྱོར་བཞུགས་པ་ཆོས་རྗེ་རབ་འབྱམས་པ་ཀུན་དགའ་ལྷུན་གྲུབ་གདན་སར་བསྐོས་ནས་ཡབ་སྲས་གཉིས་ཀ་གཙང་དུ་ཐེགས་བཞེད་དེ་རིན་པོ་ཆེ་ཆོས་སྐུ་བ་གདན་དྲངས་ཀྱང་ཆོས་སྡེ་བ་ཚོའི་བློར་བབས་རྒྱུ་མ་བྱུང་བར་བརྟེན་ངེད་ཀྱི་ཚ་བོ་འདི་ཆོས་བཀའ་འདྲ་ཞུ་རྩིས་ཡིན་ཚུལ་ལ་བསྙད་པའི་བཀའ་
ཆོས་ཆག་ལུགས་དང་ཛེ་ཏཱ་རིའི་ཚེ་དཔག་ལྷ་དགུ །ཁྲོ་ཕུའི་འཇམ་དཀར། ཕག་དཀར་ཤེས་རབ་གསལ་བྱེད། རྣམ་རྒྱལ་ལྷ་དགུ །རྣམ་འཇོམས་ལྗང་སྔོན། སེང་གེ་སྒྲ། ནོར་རྒྱུན་མ་སེར་མོ། ཁྲོ་བོ་སྨེ་བརྩེགས། ཁྲོ་མོ་སྨེ་བརྩེགས། ཛམ་སེར་ནག་རྣམས་ཀྱི་རྗེས་གནང་། དེ་དག་ལ་མཁོ་བའི་ཡིག་ཆའི་ལུང་། སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་དབང་། མགོན་པོད་མེ་འབར་མའི་ལུང་སོགས་མང་དུ་གསན་ནའང་སྐུ་ན་ཕྲ་བ་དང་ཕྱག་གཡོག་གྲུལ་ཐུབ་མེད་གཤིས་བརྒྱུད་ཡིག་གི་དྭོགས་གཅོད་གནང་རྒྱུ་མ་བྱུང་འདུག་རུང་འཆད་བཟང་པོ་ཡིན་ཞེས་ཐུགས་མོས་པར་མཛད། དགུང་ལོ་བཅོ་ལྔར་ཕེབས་པ་དམར་སེར་ཅན་ཞེས་མེ་མོ་སྦྲུལ་གྱི་ལོ། དེའང་མཉན་ཡོད་མཆོད་པ་སྔ་བསྣུར་བ་ལ་བརྟེན་ནས་བདེ་ལེགས་ཕུན་སུམ་ཚོགས་པ་བྱུང་བས་རྒྱ་བོད་ཀུན་ཏུ་རྟ་ཆེན་ཟླ་བར་མཛད་པར་གྲགས་ནའང་། རྩ་བའི་དུས་རྗེ་མར་པས། ཆོ་འཕྲུལ་ཁྲ་ཡི་ཟླ་བ་ལ། །མི་ཁོ་བོ་ལམ་དུ་ཞུགས་ཏེ་མཆིས། །ཞེས་ས་ཧོར་མཆོད་ཡོན་གྱི་ཟླ་བ་གཉིས་པའི་ཚེས་ལྔ་གཟའ་སྐར་འཕྲོད་སྦྱོར་དགེ་བར་དཔལ་ལྡན་ཤངས་པ་བཀའ་བརྒྱུད་ཀྱི་ཆིག་བརྒྱུད་རྡོ་རྗེའི་བརྒྱུད་པ་བདུན་ལྡན་གི་ནང་ཚན་སངས་རྒྱས་གཉན་སྟོན་ཆེན་པོའི་སྤྲུལ་པའི་ཟློས་གར་མཁན་རིན་པོ་ཆེ་གཞོན་ནུ་བློ་གྲོས་ཀྱི་བཞུགས་ཁྲིའི་ཐོག་ཏུ་བསྟན་པ་སྤྱི་དང་བྱེ་བྲག་རྡོ་རྗེ་འཆང་ཚར་པ་ཆོས་རྗེའི་རིང་ལུགས་རྒྱ་ཆེར་སྤེལ་བའི་ཆེད་དུ་འཁོར་ལོས་སྒྱུར་བའི་རྒྱལ་པོར་རིགས་ཀྱི་སྲས་སྟོང་ཕྲག་ཙམ་ཡོད་ནའང་ཐུ་བོར་གྱུར་པ་རྒྱལ་སར་དབང་བསྐུར་བ་བཞིན་དམ་པའི་
ཆོས་ཀྱི་རྒྱལ་ཚབ་ཆེན་པོར་ཁྱབ་བདག་བླ་མ་དབང་ཕྱུག་རབ་བརྟན་གྱིས་མངའ་གསོལ་བར་མཛད་ནས་ཤིས་པ་བརྗོད་པའི་མེ་ཏོག་ཆར་ཆེན་པོ་ཕྱོགས་ཀུན་ཏུ་བསྙིལ། དེའི་ཚེ་གཙང་སྡེ་སྲིད། སྡེ་པ་ཡར་སྟོད་པ། བཀྲ་ཤིས་རྩེ་གསུམ་ན་བསྐོ་འཇའ། གྲྭ་རིགས་སྦྱིན་བདག་རྣམས་ཀྱིས་ལེགས་སྐྱེས་རྒྱ་ཆེར་བསྟོད། ལྗགས་བསྔོ་གསུང་དཔངས་མཐོ་ཞིང་སྙན་ལ་བརྗོད་བྱ་རྗོད་བྱེད་ཀྱི་དོན་ཕུན་སུམ་ཚོགས་པས་དེ་འཁོར་ཐམས་ཅད་དགའ་མགུ་ཡི་རང་གི་སར་བཀོད། རྗེ་རྡོ་རྗེ་འཆང་གཙང་ཕྱོགས་སུ་ཆིབས་ཀྱི་ཁ་ལོ་བསྐྱོད་ནའང་དམ་པ་འདི་ཉིད་ཀྱིས་གྲྭ་སའི་ཁུར་བཞེས་སོ་བའི་བཏགས་མིང་ཙམ་མ་ཡིན་པར་སྒྲུབ་མཆོད་དང་བསྐང་བ་གཏོར་སྒྲུབ་སོགས་ཀྱི་རྡོ་རྗེ་སློབ་དཔོན་རྗེ་བླ་མའི་དུས་ཇི་ལྟ་བའི་ཕྱག་ལེན་ཕྲ་རགས་མཐའ་དག་ལ་ཐུགས་ཞིབ་ཅིང་འཕྱུགས་མེད་ཀྱི་དག་ཐེར་ཁོ་ན་བསྟར་བ་མ་གཏོགས་འཇིག་རྟེན་བྱ་བ་གཙོ་བོར་བཟུང་སྟེ་གལ་ཆུང་ཆོས་སུ་སྨྲ་བའི་ཐེབས་ཆག་ཡེ་མི་གནང་བས་རྗེ་བླ་མ་ཀུན་སྤངས་མཛད་པར་གྲྭ་རིགས་རྣམས་མྱ་ངན་གྱི་མེས་ཡིད་གདུངས་པའང་དམ་པ་འདིའི་མཛད་པའི་ཆར་ཆེན་པོས་བསིལ་བས་གསོས་སྨན་བླ་ན་མེད་པར་གྱུར་ཏོ། །ཆེས་བཙུན་འོད་གསལ་ལྷ་ཡི་གདུང་མ་འཆོལ། །མཁས་དང་གྲུབ་པའི་བྱིན་རླབས་རྒྱུན་མ་ཆད། །བསྟན་འགྲོའི་ཉེར་འཚོར་ལྷག་བསམ་མཐུ་མ་ཉམས། །རྒྱལ་སྲས་སློབ་མར་སྤྲུལ་བའི་མཐའ་མ་རྫོགས། །མ་དང་མཁའ་འགྲོའི་གྲོང་དུ་བདེ་ཆེན་ཀློང་། །གཟིམས་ལ་ཚད་མེད་ལྷ་མོས་ཡོངས་བསྐུལ་མཐུས། །ཞིང་འདིར་མཚན་དཔེའི་ཟློས་གར་མངོན་སུམ་དུ། །གསལ་འདི་ཡིད་ཅན་ལེགས་བྱས་བྱེ་
བས་ཉོས། །ན་ཚོད་གཞོན་ནུས་ཕལ་སྤྱོད་གླང་པོའི་མཆེ། །ཕྱུངས་ཏེ་དམ་པའི་རྣམ་ཐར་མདོངས་མཐའ་ལ། །ཞོན་ནས་རྒྱལ་བསྟན་མཐོ་རིས་མཛེས་པའི་རྒྱན། །གདོང་དྲུག་གཉིས་པའི་ལྷ་གཞན་གང་དུ་རྙེད། །སྲིད་པ་ཆུ་སྲིན་འབྱུང་གནས་སྡུག་བསྔལ་རླབས། །མི་ཡོལ་མཚང་རིག་མྱང་འདས་གྲུ་རྫིངས་ཀྱིས། །གཏན་བདེའི་ནོར་བུ་ལེན་ལ་ལེགས་ཞུགས་པའི། །ཉེས་མེད་དང་པོའི་ཕུན་ཚོགས་ཆོ་ག་རྫོགས། །ས་ལ་མངོན་སུམ་གནས་པའི་འོག་མིན་ཞིང་། །ས་ཆེན་བརྒྱུད་པ་རིམ་བྱོན་གཞལ་མེད་ཁང་། །ས་སྟེང་ཟླ་བྲལ་སྐུ་གསུང་ཐུགས་རྟེན་རྣམས། །ས་སྐྱའི་བསྟན་འཛིན་ཁྱོད་ཀྱི་གཟིགས་མོར་མཚར། །ཚར་ཆེན་གདུང་ཆོས་མཻ་ཏྲི་ཡབ་སྲས་ཀྱི། །མཐའ་ཀླས་སྙན་བརྒྱུད་བཀའ་བབས་ཀུན་ཏུ་དགའ། །ལམ་བཟང་སྟོན་ལ་སྤོབས་པ་ལྷུན་གྲུབ་རྗེ། །རྡོ་རྗེ་འཛིན་པའི་ཞབས་པད་ཡུན་དུ་བསྙེན། །མཆོག་གི་གདུལ་བྱར་གདམས་པ་གསང་ཆེན་ལམ། །སློབ་བཤད་བཀྲ་ཤིས་ཆོས་ཀྱི་འདུས་སྡེའི་ཁྲིར། །ཡབ་གཅིག་བླ་མས་བསྟན་པའི་བདག་པོ་རུ། །མངའ་གསོལ་གྲགས་སྙན་ཚངས་པའི་ཡུལ་སར་བསྒྲགས། །འདི་ནས་བཟུང་ལྕགས་སྤྲེལ་བར་ཕལ་ཆེར་བཀྲ་ཤིས་ཆོས་སྡེ་ཉིད་དུ་བཞུགས་ནས་ཆོས་སྡེའི་འཛིན་སྐྱོང་སྤེལ་གསུམ་བཅའ་བ་ཆོས་ཁྲིམས། ནང་གི་གྲྭ་རིགས་དང་ཕྱོགས་འདུས་ཀྱི་ཆོས་དོན་དུ་གཉེར་བ་རྣམས་ལ་དབང་། བྱིན་རླབས། རྗེས་གནང་། རིག་གཏད། ཉམས་ཁྲིད། ལུང་མན་ངག །ཕྱག་ཁྲིད་སོགས་བློ་དང་འཚམ་པའི་རེ་བ་སྐོང་ཞིང་སྦྱིན་བདག་སྐྱ་སེར་གྱིས་མཚོན་པའི་སྐྱེ་བོ་མཆོག་དམན་བར་པ་རྣམས་ལའང་རྐྱེན་སེལ་གྱི་བྱིན་རླབས་
རྗེས་གནང་། ཡན་ལག་བརྒྱད་པའི་ཁྲིམས་དང་ཡིག་དྲུག་གི་བཟླས་ལུང་སོགས་གང་ལ་གང་འཚམ་གྱི་སྒོ་ནས་མངོན་མཐོ་དང་ངེས་ལེགས་ཀྱི་ས་བོན་ཁྱད་པར་ཅན་བསྐྲུན། བར་འཚམས་མང་པོར་ཟླ་སྦྲེལ་དུ་རྡོ་རྗེ་འཇིགས་བྱེད་རྭ་ལུགས་ལྷ་བཅུ་གསུམ་མ་སོགས་དཀྱིལ་འཁོར་འགའ་དང་ལྷ་བྲན་དུ་མའི་ལྗགས་བསྙེན། བཅུ་ཆའི་སྦྱིན་སྲེག་གིས་མཚོན་ཕྲ་ཞིབ་ཕྱག་ལེན་བཞིན་ཐུགས་ཉམས་སུ་བསྟར། སྐུ་མཚམས་མིན་པའི་སྐབས་ཀྱང་བསྐྱེད་རྫོགས་ཀྱི་ཉམས་བཞེས་བཟླས་བརྗོད་གཏོར་བསྔོས་སོགས་མཚན་བཅས་མཚན་མེད་ཀྱི་ཐུགས་དམ་ལ་ལྷོད་པ་ཅུང་ཟད་ཙམ་ཡང་མི་མངའ་ཞིང་ཤི་གསོན་གྱི་ཆེད་དུ་བདོག་པ་འབུལ་བར་ཐུགས་བརྩེ་བ་ཆེན་པོས་ཀུན་ནས་བླངས་པའི་ནད་གདོན་ལས་གྲོལ་བ་དང་དུས་ཀྱི་ཆོས་ཉིད་དུ་གྱུར་བ་རྣམས་འཁོར་བ་དང་ངན་སོང་གི་འཕྲང་རིང་པོ་ལས་བསྒྲལ་ཏེ་ངེས་པར་ལེགས་པའི་སར་བཀྲི་བའི་སྐྱབས་འཇུག་ཆེད་དུ་གསོལ་བར་རིགས་དྲུག་གནས་འདྲེན་སོགས་གཤིན་པོ་རྗེས་འཛིན་གྱི་ཆོ་ག་རྒྱུད་སྡེ་རིན་པོ་ཆེ་ལས་ཇི་ལྟར་བྱུང་བ་བཞིན་མ་གཏོགས་སླ་ཆོས་ཀྱི་རིགས་མི་མཛད། དངོས་པོ་རྣམས་ཀྱང་དཀོན་ཅོག་ལ་སྲི་ཞུ། དགེ་འདུན་ལ་བསྙེན་བཀུར། ཉམ་ཐག་ལ་སྦྱིན་གཏོང་སོགས་རྣམ་དཀར་གྱི་ཆེད་ཁོ་ནར་འགྲོ་བའི་ཞལ་ཏ་དང་མདོར་ན་མགོན་པོ་བྱམས་པས། ཡི་གེ་འབྲི་མཆོད་སྦྱིན་པ་དང་། །ཉན་དང་ཀློག་དང་ལེན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པ་སྟེ། །སྤྱོད་པ་འདི་བཅུའི་བདག་ཉིད་ཀྱི། །བསོད་ནམས་ཕུང་པོ་གཞལ་དུ་མེད། །ཅེས་ཆོས་སྤྱོད་བཅུའི་
བྱ་བ་ལྷུར་མཛད་པས་ཡར་སྟོད་སྨད་ཤར་ནུབ་ཀྱིས་མཚོན་པའི་ལྷོ་བྱང་གི་སྐྱེ་རྒུ་ཕྱོགས་འཛིན་དྲག་པོའི་གདོན་གྱིས་མ་ཟིན་པ་མཐའ་དག་དད་པའི་ས་ལ་འགོད་བཞིན་པའི་ངང་ནས་གཙང་ཕྱོགས་སུ་བཏེག །ལྕགས་སྤྲེལ་ཁྱབ་བདག་དབང་ཕྱུག་རབ་བརྟན་མཇལ་བར་ཕེབས་པའི་ཚེ་གུར་མགོན་གྱི་གསང་འཁྲིད་ཟླ་བ་གསུམ་གྱི་བར་སྨིན་རྒྱས་དང་། གཞན་ཡང་ཟབ་ཆོས་མང་པོ་ལྕགས་བྱ་ཞབས་ཕྱིར་བཞུགས་མུ་ནས་ཀླུ་སྒྲུབ་ཆོས་ཀྱི་རྒྱལ་མཚན་སོགས་དུ་མ་དང་ལྷན་ཅིག་ཏུ་གསང་སྔགས་གསར་རྙིང་གི་ཆོས་རྒྱ་ཆེར་གསན། གཙང་སྡེ་སྲིད་ནས་རྗེ་རྡོ་རྗེ་འཆང་ཞ་ལུ་རི་ཕུག་གི་དབུ་མཛད་ཆེན་མོར་བསྐྱར་བསྐོས་གྲུབ་ནས་སྒྲུབ་ཆེན་དང་འབྲེལ་བའི་བཀའ་བརྒྱད་གསང་རྫོགས་ཀྱི་དབང་གིས་ཐུགས་ཀྱི་བུམ་བཟང་གཏམས་ནས་སྟོན་བཀྲ་ཤིས་རྩེ་ཆོས་སྡེར་ཕེབས་ཟླ་ཤས་ཀྱི་བར་བཞུགས་ནས་གཙང་དུ་ཆིབས་ཁ་བསྐྱོད། བླ་མ་དགོན་པ་སྒྱེ་ལུང་པས་རྡོ་རྗེ་འཆང་སྐྱེ་བདུན་སྒྲུབ་པར་གདན་དྲངས་པའི་ཕྱག་ཕྱི་མཛད། ཡང་འུག་གིས་གཙོས་པའི་སྔགས་པ་མང་པོར་བཀའ་བརྒྱད་སྒྲུབ་དབང་གནང་བ་དང་ལྷན་དུ་གསན། རྗེ་རྡོ་རྗེ་འཆང་ལ་བསྙེན་པར་རྫོགས་པའི་བསླབ་སྟོན་ཞུ་བ་གནང་བར་འདི་ཚོར་ལས་སློབ་གསང་སྟོན་ཁ་སྐོང་སོགས་ཆ་ཚང་བསྒྲིག་དཀའ་བར་འདུག་པས་ངོར་དུ་བསྙེན་རྫོགས་ཀྱི་གྲྭ་བཟང་བས་འགབ་ཚུལ་ཕེབས་པ་ལྟར་རྔ་ཆེན་ཞེས་པ་ཆུ་ཁྱིའི་ལོ་ཡང་དག་པར་རྫོགས་པའི་སངས་རྒྱས་ཤཱཀྱ་སེང་གེ་ཚེས་བདུན་ལ་སྐུ་བལྟམས་ཤིང་ཚེས་བཅོ་ལྔར་མངོན་པར་བྱང་ཆུབ་པ་དང་མྱ་ངན་ལས་འདས་པའི་དུས་ཆེན་ཁྱད་པར་ཅན་འབྱུང་བའི་ས་གའམ་ནམ་མཐོང་
ཟླ་བ་སྔོན་མར་གྲགས་པ་གཟའ་སྐར་སྦྱོར་བྱེད་ཕུན་སུམ་ཚོགས་པའི་སྐབས་ཡོན་ཏན་རིན་པོ་ཆེ་མ་ལུས་པ་འབྱུང་བའི་གནས་དཔལ་ཨེ་ཝཾ་ཆོས་ལྡན་གྱི་གཙུག་ལག་ཁང་དུ་མི་འཕྲོགས་པའི་མཁྱེན་རབ་དང་དམིགས་པ་མེད་པའི་ཐུགས་རྗེ་ཆེན་པོ་མངའ་ཞིང་བརྟན་མཁས་ཀྱི་ཡོན་ཏན་གཉིས་དང་ལྡན་པའི་གནས་བརྟན་འདུལ་བ་འཛིན་པ་ཆེན་པོ་བཅས་པ་ཕྲ་མོ་ལས་ཀྱང་མི་འདའ་བས་ཚུལ་ཁྲིམས་ཀྱི་དྲི་བསུང་ཕྱོགས་བརྒྱར་ཁྱབ་པས་འཕགས་པ་ཉེ་བ་འཁོར་ས་འདིར་འཕོས་པ་ལྟ་བུ་དོན་གྱི་སླད་དུ་མཚན་ནས་སྨོས་ཏེ་ཐམས་ཅད་མཁྱེན་པ་སྒྲུབ་ཁང་པ་དཔལ་ལྡན་དོན་གྲུབ་ཀྱིས་མཁན་པོ། སྔོན་རྗེ་མངའ་བདག་གི་དུས་རྒྱལ་པོའི་བླ་སྨན་སྟོད་ན་བི་ཇི་ཆེར་རྗེ་འུག་པ་གསུམ། བར་ན་མི་ཉག་བྲང་ཏི་གཡུ་ཐོག་གསུམ། སྨད་ན་གཉའ་དང་མཐའ་བཞི་སྟོང་དང་གསུམ་སྟེ་དགུའི་ནང་ནས་མཆོག་ཏུ་གྱུར་པ་བྲང་ཏིའི་རིགས་ལས་མཁས་བཙུན་གྲུབ་པའི་དབང་ཕྱུག་ཐར་པ་རྩེ་པ་ནམ་མཁའ་སངས་རྒྱས་པས་ལས་ཀྱི་སློབ་དཔོན། དཔལ་ལྡན་ས་སྐྱའི་ཤར་ནུབ་གུང་གསུམ་དུ་གྲགས་པའི་ཤར་པ་རྡོ་རྗེ་འོད་ཟེར། ཐམས་ཅད་མཁྱེན་པ་ཡེ་ཤེས་རྒྱལ་མཚན་སོགས་བསྟན་འཛིན་རིམ་པར་བྱོན་པའི་དབོན་གནས་བརྟན་འདུལ་བ་འཛིན་པ་ཤེས་རབ་འབྱུང་གནས་པས་གསང་སྟེ་སྟོན་པའི་སློབ་དཔོན།དུས་བསྒོ་བ་སྒྲུབ་ཁང་མངའ་རིས་པ་ནམ་མཁའ་དཔལ་ལྡན་སོགས་དད་པའི་དགེ་འདུན་གྲངས་ཚང་བའི་དབུས་སུ་ཆོས་རྗེ་ཐམས་ཅད་མཁྱེན་པ་བུ་སྟོན་རིན་པོ་ཆེའི་ལས་ཆོག་གི་ཕྱག་བཞེས་སླ་ཆོས་དང་རུང་མཐུན་
སྦྱར་བ་ཙམ་མ་ཡིན་པའི་ཕྲ་ཞིབ་ཀྱི་རྒྱུན་བཟང་པོ་མཛད་བཞིན་པའི་སྟེང་ནས་བསྟན་པར་ཞུགས་པ་ཡོངས་སུ་རྫོགས་པ་དགེ་སློང་གི་དངོས་པོ་རྣམ་དག་ཏུ་གྱུར་ནས་ཉེས་ལྟུང་གི་དྲི་མས་མ་གོས་པ་གནས་བརྟན་འདུལ་བ་འཛིན་པ་རྣམས་ཀྱི་མཆོག་ཏུ་གྱུར་ཅིང་འདི་ནས་བཟུང་ཇི་སྲིད་པར་ལུས་ངག་གི་སྡོམ་པ་ལས་ཅུང་ཟད་ཀྱང་མི་གཡོ་བས། ཐམས་ཅད་མཁྱེན་པའི་གསུང་མགུར་ལས། ཐུབ་དབང་དགེ་བའི་བཤེས་གཉེན་ཀུན་དགའ་ལེགས་པའི་ཞབས་ལས། སོ་ཐར་སྡོམ་པ་ཐོབ་པ་ཉམས་སུ་ལེགས་པར་བླངས་ནས། །ཉེས་ལྟུང་དྲི་མས་མ་གོས་ངོ་ལྐོག་མེད་པར་བསྲུངས་པས། །བཙུན་པ་ཚོགས་པའི་ཁྲོད་འདིར་མཁྱེན་བརྩེའི་དབང་ཕྱུག་སྐྱིད་དོ། །ཞེས་གསུངས་པའི་དོན་དང་མཐུན་ནོ། །བླ་མ་དམ་པ་འདི་གསུམ་ལ་ཟབ་རྒྱས་ཀྱི་ཆོས་སྔ་ཕྱིར་གསན་པ་ཆེར་ལོང་ཙམ་འདིར་ཕྱོགས་གཅིག་ཏུ་བསྡོམས་པ་ལ་མཁན་ཆེན་སྒྲུབ་ཁང་པ་དཔལ་ལྡན་དོན་གྲུབ་ཀྱི་དྲུང་དུ་འདུལ་བ་མདོ་རྩ། མེ་ཏོག་ཕྲེང་རྒྱུས། སུམ་བརྒྱ་པ། འགྲེལ་པ་འོད་ལྡན། ཀུན་མཁྱེན་བུའི་ལས་ཆོག །ངོར་དུ་གྲགས་ཆེ་བའི་མདོ་ཆུང་བཅུ་བདུན། རྡོར་གཅོད། སྡུད་པ། སྨན་མདོ་བརྒྱད་བརྒྱ་པ། མཁན་པོའི་མདོ་ཆོག །བྱམས་ཆོས་སྡེ་ལྔ། སྤྱོད་འཇུག་རྣམས་ཀྱི་ལུང་། ཀྱེ་རྡོར་ཌོམྦྷི། མཚོ་སྐྱེས། ནག་པོ་ལུགས། བདག་མེད་ལྷ་མོ་བཅོ་ལྔ། གུར་རིགས་བསྡུས། སམྦུ་ཊིའི་རྡོར་དབྱིངས། བདེ་མཆོག་ལོ་ནག་དྲིལ་གསུམ། འཇིགས་བྱེད་ས་ལུགས་དང་རྭ་ལུགས། སྒྲོལ་མ་ལྷ་བཅུ་བདུན་མ། རིགས་བྱེད་མ་ལྷ་ལྔ། ཕྱག་རྡོར་འཆི་བདག་འཇོམས་པ་
འཇམ་དབྱངས་ཨ་ར་པ་ཙ་ན་ལྷ་ལྔ། རིགས་གསུམ་སྤྱི། མི་འཁྲུགས་པ་ལྷ་དགུ །ཚེ་དཔག་མེད་ཛེ་ཏཱ་རི་ལུགས་རྣམས་ཀྱི་དབང་དང་དེ་རྣམས་ཀྱི་མངོན་དཀྱིལ་ཁ་ཤས། ཌོམྦྷི་པའི་བདག་མེད་མའི་སྒྲུབ་ཐབས་བདུད་རྩིའི་འོད་སོགས་ཀྱེ་རྡོར་གྱི་རྒྱ་གཞུང་མང་ཙམ། ཇོ་བོའི་ཆོས་ཆུང་བརྒྱ་རྩ། ཐོགས་མེད་བཀའ་འབུམ་རྣམས་ཀྱི་ལུང་། རྗེ་ཐར་པ་རྩེ་བའི་དྲུང་དུ་གསར་མ་རྒྱུད་འབུམ། འཕྲེང་བསྐོར་གསུམ། མངོན་དཀྱིལ་གྱི་ཆོ་ག་ཐར་རྩེ་པཎ་ཆེན་གྱིས་མཛད་པ། སྒྲུབ་ཐབས་རྒྱ་མཚོའི་རྗེས་གནང་ལུང་བཅས། གདོང་དྲུག་གི་དབང་དང་ཡིག་སྣ་ཁ་ཤས། ངོར་ཆེན་གྱིས་མཛད་པའི་མཁའ་འགྲོ་རྒྱ་མཚོའི་ཡིག་སྣ། ཀུན་མཁྱེན་གོ་བོ་རབ་འབྱམས་པའི་བཀའ་འབུམ། གནུབས་ལུགས་སྟག་ཞོན་གཉོས་ཏྲག །ཛམ་དཀར་གསུམ་གྱི་རྗེས་གནང་། རྗེ་ཤར་པ་ཤེར་འབྱུང་བའི་དྲུང་དུ་ཀྱེ་རྡོར་མན་ངག་ལུགས་ཀྱི་རྒྱུ་དབང་། ལམ་དབང་། བདེ་མཆོག་བོང་ཞལ་ཅན་དང་ཚེ་དཔག་མེད་ལྷ་དགུ་གཉིས་ཀྱི་དབང་། དཔའ་བོ་གཅིག་སྒྲུབ་ཀྱི་འཇམ་དབྱངས། ཕ་དམ་པའི་འཇམ་དབྱངས། ཆག་ལུགས་ཚེ་དཔག་མེད་དཀར་པོ། ཀླུ་དབང་རྒྱལ་པོ། ཨུ་ཙ་ཡ། སྨེ་བརྩེགས་ལྗང་ནག །ཁྱུང་ནག །དབྱངས་ཅན་མ་དཀར་དམར། རྣམ་འཇོམས་མཐིང་ཁ། སེང་གདོང་མ་སྔོ་དམར་རྣམས་ཀྱི་རྗེས་གནང་དང་ཡི་གེའི་ལུང་ཁ་ཡར་རྣམས་གསན་ནོ། །གསོལ་བཞིའི་ཆོ་ག་མ་ལ་ཡ་ཀླུང་ནས། །བག་ཡོད་ཁྲིམས་ཀྱི་དྲི་བསུང་རབ་འཐུལ་བའི། །འདུལ་འཛིན་ཙནྡན་སྡོང་པོ་དར་དྲག་པས། །ཕྲ་རྒྱས་ཚ་གདུང་བཅིལ་བའི་ཆོ་ག་མཁན། །རང་
རྒྱུད་ཞི་བྱེད་འཕགས་བོད་སྡོམ་པའི་ཆབ། རྩིང་སྤྱོད་དུག་བྲལ་ཉོན་མོངས་ནད་བརྒྱའི་སྨན། །རྒྱལ་ཀུན་དགྱེས་པའི་མཆོད་སྤྲིན་ཐུན་འཚམས་གོས། །འཆང་བའི་ཚུལ་ལ་མི་སྨོན་ཤེས་ལྡན་སུ། །ཐུབ་པས་ལུང་བསྟན་རྗེ་བཙུན་ཨེ་ཝཾ་པའི། །ལུགས་འཛིན་དཀྱིལ་འཁོར་སྤྲོ་བསྡུའི་བྱེད་པོ་འགས། །ངེས་གསང་ཆོས་སྒོ་བརྒྱ་ཕྲག་ཕྱེ་བའི་ཚེ། །ཨཽཌྜི་ཡ་ན་ས་འདིར་འཕོས་པ་བཞིན། །རིམ་གཉིས་ཆང་གིས་མྱོས་པའི་བདེ་སྟོང་ཟུང་། །འཇུག་པའི་མཛའ་མོར་རྩེ་དགས་རྟག་རོལ་ཡང་། །ལུས་ངག་སྡོམ་ལ་ཕྱི་ནང་མེད་བརྩོན་པའི། །རྣམ་འདྲེན་བསྟན་པའི་རྩ་བར་ད་གདོད་འཁུམས། །ཞ་ལུར་ཕེབས། ཆུ་ཕག་གི་དགུན་སྟོད་བར་ཞམ་འབྲིང་དུ་བསྙེན་ཏེ་མཁན་ཆེན་སྒྲུབ་ཁང་པ་བྱོན་པའི་དཔོན་སློབ་གཉིས་ཀར་ཐོས་བསམ་མང་དུ་མཛད། རྡོ་རྗེ་འཆང་དགུང་ལོ་རེ་ལྔར་ཕེབས་ཤིང་དབུས་གཙང་གི་བར་ས་ཁད་འགྱངས་པར་མ་ཟད་འདར་གྱི་མཁན་པོ་གནང་གཤིས་སྐུ་ན་དང་བཅས་འགྲུལ་བསྐྱོད་གནང་སྟབས་མ་བདེ་བའི་མཁན་ཆེན་གཞོན་ནུ་བློ་གྲོས་གྱི་གདུང་ཞུགས་འབུལ་དང་རྟེན་བཞེངས་སོགས་བསླབ་སྟོན་རྒྱས་པར་སྩལ་ནས་དབུས་སུ་བྱོན། ཧོར་ཟླ་བཅུ་གཉིས་པའི་ནང་དུ་རྗེ་བཙུན་གཞོན་ནུ་བློ་གྲོས་ཀྱི་སྐུ་པུར་དགྱེས་མཛད་རྡོ་རྗེའི་དཀྱིལ་འཁོར་ལ་བརྟེན་ནས་བཞུགས་སུ་ཕུལ་བའི་ཚེ་སྔར་ངེད་ཀྱི་བུར་སུ་ལའང་མ་སྟོན་གསུང་བའི་ཞལ་ཆེམས་ཡོད་པ་ལ་དཔགས་གྲྭ་དམངས་ཚོས་གོ་མེད་ཀྱིས་མཛད་དཀའ་ཞུས་དྭོགས་ཚོགས་པ་རྣམས་གདུགས་རོལ་ཆ་སོགས་མཆོད་རྫས་ཀྱི་ཕྱག་མཚན་དང་བཅས་
གསུང་ཆོག་མ་ཚར་བར་གཙུག་ལག་ཁང་ལ་སེར་སྦྲེང་གི་སྐོར་བ་དང་པུར་ཁང་གི་སྟེང་ཐོག་ཏུ་གདུགས་དང་གཡས་གཡོན་དུ་བཀྲ་ཤིས་ཁྲ་རིང་བཏང་ཞིང་སྦྱངས་ཟིན་ནས་ཞག་ཤས་བར་རྒྱས་བཏབ་པ་ཞལ་ཕྱེ་ནས། གདུང་རྟེན་བཞེང་བར་བལ་པོ་མཁས་པ་མི་གྲངས་བཅུ་གཅིག་འབོད་པ་གནང་བའི་གསེར་ཟངས་ཀྱི་རྣམ་རྒྱལ་མཆོད་རྟེན་ཟླ་གཉིས་ཁོངས་སུ་གྲུབ་པར་དྲི་མེད་ཀྱི་སྲོག་ཤིང་འཛུགས་པའི་ཆོ་ག །རིང་བསྲེལ་རྣམ་པ་བཞིའི་གཟུངས་འབུལ་དངོས་གཙང་བ་རྟེན་བཞེངས་སོའི་སྙན་གྲགས་ལྷུར་བླངས་པ་མ་ཡིན་པའི་ཁུངས་བཙུན་པའི་ཡིད་ཆེས་སུ་གྱུར་པར་བཅོམ་ལྡན་འདས་དཔལ་ཀྱེ་རྡོ་རྗེ་མན་ངག་ལུགས་ཀྱི་སྒྲུབ་མཆོད་དང་འབྲེལ་བའི་རབ་གནས་ཀྱི་ཆོ་ག་ཉིན་གཉིས་མའི་སྒོ་ནས་དམ་ཚིག་པ་ལ་ཡེ་ཤེས་ཀྱི་ཚོགས་དངོས་སུ་བཅུག་པས་ལྷ་རྣམས་ཀྱིས་མཆོད་པའི་སླད་དུ་འཇའ་ཚོན་སྣ་ལྔའི་གུར་དང་མེ་ཏོག་གི་ཆར། རྒྱ་སྤོས་བཟང་པོའི་དར་ཀྱིས་སྒྲུན་དུ་མེད་པའི་དྲི་བཟང་པས་ཕྱོགས་ཀུན་ཏུ་ཁྱབ་པ་ངོ་མཚར་བའི་ལྟས་ཡ་མཚན་པ་བྱུང་བ་ནི། རྗེ་བཙུན་བླ་མ་རིམ་པར་བྱོན་པ་མཐའ་དག་ལ་དད་པ་སྔར་མ་སྐྱེས་པ་རྣམས་གསར་དུ་སྐྱེ་ཞིང་། སྐྱེས་པའི་ཚོགས་གོང་འཕེལ་དུ་འགྱུར་བའི་ཐབས་ཁྱད་པར་ཅན་ཏེ། མཁས་མཆོག་དཔའ་བོས། གྲགས་པའི་མཚན་མར་གྱུར་པ་བཟང་པོ་འདི་རྣམས་ཀྱིས། །བདེ་བར་གཤེགས་གྱུར་ལམ་རྣམས་གང་ཡིན་བསྟན་པར་འགྱུར། །ཡིད་ལ་དད་པ་མེད་པ་རྣམས་ཀྱང་དད་པར་བྱེད། །ཆོས་དང་ལྡན་པའི་གཏམ་གྱིས་རབ་ཏུ་དགའ་བར་འགྱུར། །ཞེས་པའི་དོན་དུ་མངོན་ཞིང་། སྡེ་པ་བཀྲ་ཤིས་རྩེ་བས་གསུང་ངག་བརྒྱུད་པའི་ཞལ་ཐང་
ཐོག་ཚད་མ་སྐྱ་རིས་གྲུབ་ཅིང་ཚོན་འགོ་ཚུགས་ཙམ་ལ་ལུས་པར་ཁ་སྐོང་ཅུང་ཟད་དང་བཅས་གྲངས་སུམ་ཅུ་ཐམ་པ་གོང་གཤམ་ཞལ་ཁེབས་ཏོག་ལྡན་ལེགས་པར་བསྒྲུབས་པར་ཀྱེ་རྡོ་རྗེའི་དཀྱིལ་འཁོར་ལ་བརྟེན་ནས་རབ་ཏུ་གནས་པ་རྒྱས་པར་གནང་། དེ་ནས་གསུང་ངག་བརྒྱུད་པའི་ཞལ་ཐང་གྲ་ཚར་བསྣམས་ཏེ་གཙང་དུ་ཐེགས་པའི་ལམ་ནས་ངོར་དུ་མཁན་ཆེན་དཔལ་ལྡན་དོན་གྲུབ། བྲང་ཏི་པ་ནམ་མཁའ་སངས་རྒྱས། ཤར་པ་ཤེས་རབ་འབྱུང་གནས་གསུམ་དང་མཇལ་ཞིང་བྲིས་ཐང་ལ་ཕྱག་ནས་ཞུ་བ་མཛད། རིམ་གྱིས་འདར་སྟོད་བླ་མའི་གདན་སར་ཕེབས། རྗེ་རྡོ་རྗེ་འཆང་ལ་ཕྱི་ནང་ཕྱག་རྫས་ཡོད་དགུ་ལྟ་བུའི་འབུལ་ཆེན་དང་བཅས་གསུང་ངག་བརྒྱུད་པར་དམ་ཚིག་པ་ལ་ཡེ་ཤེས་པ་འཇུག་པའི་ཕྱག་ནས་ཞུས། དེ་ནས་བདག་ཚེ་དད་སྒྲུབ་པ་མཉམ་པའི་བུག་སྒོ་འདམ་སྦྱར་བྱས་ཆོག་པའི་གསོལ་པ་བཏབ་པར། ཁྱོད་ཀྱི་སྒོམ་སྒྲུབ་གཅིག་པུ་མཛད་པས་ག་ལ་ཁྱབ། ཐོས་བསམ་འཆད་ཉན་བྱ་བ་ལས་ཀྱི་འཁོར་ལོ་སོགས་ཚང་མ་མཛད་ན་བསྟན་འགྲོའི་དོན་རྒྱ་ཆེར་འགྲུབ་ཚུལ་བསླབ་བྱ་ལུང་བསྟན་གྱི་ཚུལ་དུ་གནང་བར་བརྟེན་བླ་མ་དམ་པས་ཇི་ལྟར་བཀའ་སྩལ་བ་བཞིན་སྙིང་སྟོབས་ཀྱི་མཐུ་ཕུལ་དུ་བྱུང་བའི་དམ་བཅའ་བརྟན་པོས་དེ་ལྟར་བསྒྲུབ་པར་ཞལ་གྱིས་བཞེས་སོ། །ཐོས་བསམ་སྒོམ་པའི་ནོར་བུ་གཞོན་ནུའི་དུས། །བློ་གྲོས་གདེངས་ཀའི་རྩེ་མོར་གཟི་འབར་བས། །མཁས་བཙུན་གྲུབ་མཆོག་ཀླུ་ཡི་དབང་པོའི་གདུང་། །རྒྱུད་སྡེའི་དགོངས་པ་ཇི་བཞིན་སྲི་ཞུར་བསྐྲུན། །རབ་མཛེས་ས་ཟླའི་འོད་འཕྲོ་མཆོད་སྡོང་ཆེ། །རབ་ཏུ་བརྩོན་པའི་མཐུ་
ལས་ཉེར་བསྟར་ཚེ། །རབ་འབྱམས་རྒྱལ་ཀུན་བཞུ་བླུགས་ཀྱིས་བསྟིམ་པས། །རབ་ཡངས་མཁའ་ལ་ངོ་མཚར་གཟིགས་མོར་ཆེ། །ཐུགས་གསང་དཔལ་གྱི་བེའུར་དབང་གི་ཆུ། །མ་ནུབ་གཡས་སུ་འཁྱིལ་བ་བརྒྱུད་པའི་འཕྲེང་། །སྣང་སྲིད་རི་མོར་འབྲི་ལ་ཟླ་མེད་པས། །བསྐྲུན་ཚེ་སྒྱུ་མའི་ཁེངས་པ་ཐུང་ངུར་བྱས། །དྲེགས་ལྡན་ལངྐའི་སྟོབས་ལས་མི་འཇིགས་པའི། །རྣམ་དཔྱོད་ཡངས་པའི་ཉག་ཕྲན་རྩལ་ཆེ་ཡང་། །ཡོངས་འཛིན་ར་གྷུའི་བཀའ་ལས་མི་འདའ་བའི། །རྒྱལ་སྲས་སྤྱོད་པའི་ཁུར་ཁྱེར་དགའ་བྱེད་ལྷ། །ཤིང་ཕོ་བྱ་བའི་ལོ་འགྲོ་བའི་བླ་མ་ཤཱཀྱ་སེང་གེས་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོར་ཆོས་ཀྱི་རྒྱལ་པོ་ཟླ་བ་བཟང་པོ་ལ་དང་པོའི་སངས་རྒྱས་དུས་ཀྱི་འཁོར་ལོའི་རྩ་བའི་རྒྱུད་སྟོང་ཕྲག་བཅུ་གཉིས་པ་བཀའ་སྩལ་བའི་དུས་ནག་པ་ཟླ་བའི་གཟའ་ཚེས་དུས་སྦྱོར་བཟང་བར་དབུ་བཙུགས་ཟླ་བ་བརྒྱད་ལ་ཉེ་བའི་བར་ལམ་མཐུན་མོང་བ་སྣང་བ་གསུམ་སེམས་བསྐྱེད་ཆེན་མོ། རྒྱུ་དབང་། ལྟ་བ་འཁོར་འདས་དབྱེར་མེད། ཕྱི་སྐྱེད་པའི་རིམ་པའི་འཁྲིད། ལམ་དབང་། ནང་ལུས་ཀྱི་བསྐྱེད་རིམ། ལམ། ལྟ་བ། གྲུབ་མཐའ། འདའ་ཀ་མ། བར་དོ། རྨི་ལམ། སྒྱུ་ལུས། དབང་ཕྱི་མ་གསུམ་གྱི་འཁྲིད། རྡོ་རྗེ་བདག་མེད་མ་ལྷ་བཅོ་ལྔའི་དབང་། ལམ་ཟབ། བིར་སྲུང་ཕྱི་ནང་། སྒྲུབ་པ་ལུང་སྦྱིན་གྱིས་མཐའ་བརྟེན་པ་ལ་དེ་དག་ལ་དགོས་པའི་སོ་སོའི་སྐབས་ཀྱི་རྒྱབ་བརྟེན་ལུང་དང་བཅས་པ་གསུང་ངག་རིན་པོ་ཆེ་སློབ་བཤད་ཚད་མ་བཞི་ལྡན་རྗེས་འབྲང་གི་མཁས་གྲུབ་ཕལ་ཆེར་ལ་མ་གྲགས་པའི་སྙན་ནས་སྙན་དུ་
བརྒྱུད་པའི་ཞལ་ཤེས་ཀྱིས་བརྒྱན་ཏེ་རྗེ་བཙུན་དམ་པ་འདི་ཉིད་ཀྱིས་དབུ་མཛད་སྣོད་ལྡན་གྱི་སློབ་མ་ཉི་ཤུ་རྩ་གསུམ་ལ་སྨིན་རྒྱས་སུ་སྩལ་བས་རྗེ་མཁྱེན་བརྩེའི་གསུང་མགུར་ལས། དུས་ད་རེས་དམ་ཆོས་སྒོར་ཞུགས་ཀྱང་། །ཆོས་ཚོགས་བཤད་སྦུན་པས་གཡེངས་པའི་ཚེ། །རྗེ་ཁྱོད་ཀྱི་ཐུགས་ཀྱི་རྒྱ་མཚོ་ལས། །ལམ་ཟབ་མོ་སྙན་བརྒྱུད་རིན་ཅེན་སྩལ། ད་ཁྱེད་ཀྱི་བྱིན་རླབས་ཁོ་ན་ཡིས། །བདག་རྩེ་གཅིག་དམ་ཆོས་སྒྲུབ་འདོད་ཤར། །ཚེ་འདི་ཕྱིར་སྐྱིད་པའི་གཏན་བརླིང་ཁེལ། །ཆོས་ཟབ་ཟབ་གཞན་ལ་སེམས་མ་ཤོར། །དོན་སྙན་བརྒྱུད་གདམས་པའི་བདུད་རྩིས་མྱོས། །ལར་ཤི་ཡང་མི་འགྱོད་གདེངས་ཤིག་ཐོབ། །ཅེས་གསུངས་པ་ལྟར་རོ། །གཞན་ཡང་སྔ་ཕྱིར་ཟབ་ཅིང་རྒྱ་ཆེ་བའི་ཆོས་མཐའ་ཀླས་པ་གསན་པའི་རགས་རིམ་ཙམ་འདིར་བསྡོམས་ཏེ་བརྗོད་ན། དུས་འཁོར། བདེ་མཆོག །མཁའ་འགྲོ་རྒྱ་མཚོ། སངས་རྒྱས་མཉམ་སྦྱོར། ཡང་དག་མར་མེ་དགུ་པ། མ་ཧཱ་མཱ་ཡ། ཕྱག་རྡོར་འཁོར་ཆེན། ཕག་མོ་ལྷ་སོ་བདུན། བཅུ་གསུམ། ལྷ་ལྔ་མ། ཀླུ་སྒྲུབ་ལུགས་ཀྱི་ཕྱག་རྡོར་གཏུམ་ཆེན་ལྷ་ཉེར་གཅིག་པ། གསང་འདུས་འཇམ་རྡོར། དགྲ་ནག་ཞང་ལུགས། གཙུག་ཏོར་དྲི་མེད། འོད་ཟེར་དྲི་མེད། གདུགས་དཀར་ལྷ་ཞེ་གཅིག །རྣམ་འཇོམས་མ་ཎི་ཀ་ལྷ་བཅུ་དགུ །དཀར་པོ་ས་བ་རི་ལུགས་ལྷ་བཅོ་ལྔ། འཆི་མེད་རྔ་སྒྲ། མགོན་པོ་སྔོན་འབྱུང་གི་ལེའུ་ང་གཉིས་པ་ནས་བཤད་པའི་མགོན་པོ་ཞལ་བཞི་ཕྱག་བཅུ་དྲུག་པ་ཡུམ་ལྷ་མོ་བརྒྱད་ཀྱིས་བསྐོར་བ། ཛེ་ཏཱ་རིའི་ཚེ་དཔག་མེད་རྣམས་ཀྱི་དབང་། གཤེད་དམར་ལྷ་ལྔའི་དབང་བྱིན་རླབས་
སྤྲོས་མེད་ཀྱི་འཁྲིད། དེ་དང་འབྲེལ་བའི་ཡིག་སྣ། བདེ་མཆོག་དཀར་པོའི་བྱིན་རླབས་དང་འཁྲིད། རྭ་ལུགས་འཇིགས་བྱེད་བཅུ་གསུམ་མ། དཔའ་བོ་གཅིག་པ་ཕྱག་མཚན་གྱིས་བསྐོར་བའི་དབང་། དཔའ་བོ་གཅིག་པའི་རྗེས་གནང་། སྔགས་བཏུ། རྭ་འཁྲིད། རྣལ་འབྱོར་བཞིའི་འཁྲིད། ལས་གཤིན་དཔའ་གཅིག །བཅུ་གསུམ་མ། ཁྲག་མདོག་དམར་པོ། བསེ་བྱ་བཞི་བསྐོར་རྣམས་ཀྱི་རྗེས་གནང་། གྲུབ་རྒྱལ་ལྷ་གཅིག་བུམ་གཅིག །རྟ་མགྲིན་སྐྱེར་སྒང་ལུགས་ཀྱི་བྱིན་རླབས་དང་འབའ་ར་ལུགས་ཀྱི་ཉམས་འཁྲིད། ཆག་ལུགས་ཚེ་དཔག་མེད་དཀར་པོ། འཇམ་དབྱངས་ཨ་ར་པ་ཙ་ན། འཇམ་དཔལ་ཡོན་ཏན་ཡེ་ཤེས་བཟང་པོ། མ་ཏི་ལུགས་ཀྱི་འཇམ་དཀར། འཇམ་ནག །སྐྱེར་སྒང་ལུགས་ཀྱི་ཐུགས་རྗེ་ཆེན་པོ། ཕྱག་རྡོར་ཨུ་ཙཪྻ་མེ་དབང་ཡོད་མེད་གཉིས། འབྱུང་འདུལ་མེ་དབང་ཡོད་མེད་གཉིས། གོས་སྔོན་ཅན། བ་རི་ལུགས་ཀྱི་རྣམ་འཇོམས། རྣམ་རྒྱལ་ལྷ་དགུ །གཙུག་ཏོར་འབར་བ། སྨན་བླ་བདེ་གཤེགས་བདུན། སྣ་ཚོགས་ཡུམ། ཁྱུང་ཁྲ། སོར་འབྲང་། འོད་ཟེར་ཅན་མ། ལོ་མ་གྱོན་མ། མི་གཡོ་བ་སྔོན་པོ། གཏུམ་པོ་དཀར་པོ། སྨེ་བརྩེགས་ལུགས་གཉིས། ཁྲོ་མོ་སྨེ་བརྩེགས། རྟ་མགྲིན་རས་ཆུང་དང་། ཟླ་རྒྱལ་ལུགས་ཀྱི་ལྕགས་རལ་ཅན། སེང་གདོང་མ། སྒྲོལ་དཀར་ཡིད་བཞིན་འཁོར་ལོ། སེང་ལྡེང་ནགས་སྒྲོལ་རྣམས་ཀྱི་རྗེས་གནང་དེ་དང་འབྲེལ་བའི་ཡིག་སྣའི་ལུང་། ནཱ་རོ་མཁའ་སྤྱོད་ཀྱི་བྱིན་རླབས་རྗེ་བཙུན་ཡབ་དང་
ཐུན་མོང་དང་ཐུན་མོང་མ་ཡིན་པ་རྩ་དབུ་མའི་ཉམས་འཁྲིད། ཨིནྡྲ་མཁའ་སྤྱོད་དང་། མཻ་ཏྲི་མཁའ་སྤྱོད་ཀྱི་བྱིན་རླབས། དེ་རྣམས་ཀྱི་ཆོས་སྐོར་གྱི་ལུང་། རྗེ་བཙུན་རིགས་བྱེད་མའི་ཐུང་མོང་དང་ཐུན་མོང་མ་ཡིན་པའི་རྗེས་གནང་། སིནྡྷུ་ར་ལྷ་ལྔའི་བྱིན་རླབས། ཚོགས་བདག་གི་བྱིན་རླབས་ཐུན་མོང་དང་ཐུན་མོང་མ་ཡིན་པ་ཁྱད་པར་བའི་རྗེས་གནང་། འདོད་རྒྱལ་གྱི་འདོད་པ་ལྷ་དང་གསང་སྔགས་སྒྲའི་རྗེས་གནང་། དམར་ཆུང་སྐོར་གསུམ། གསེར་ཆོས་ཛམ་དམར་དང་བཞིའི་རྗེས་གནང་། དེ་དག་རྣམས་དང་འབྲེལ་པའི་ལས་རབ་འབྱམས་སྐོར་གྱི་ལུང་། གུར་མགོན་གྲི་གུག་ལྷ་ལྔ། ལྷ་བརྒྱད། ལྷ་བཅུ་གཉིས། ལྷ་བཅུ་བདུན། སིནྡྷུ་ར་ལ་བརྟེན་པའི་དབང་། སྒྲུབ་ཐབས་ཀུན་ལས་བཏུས་པའི་མགོན་རྐྱང་། མགོན་པོ་ལྷ་གསུམ་མ། ལྷ་བརྒྱད་མ་དང་། ལྷ་བཅུ་གཉིས་མ་གཉིས་ལ་ཐུན་མོང་དང་ཐུན་མོང་མ་ཡིན་པ་རེ། མགོན་པོ་ཁྲོ་བཅུ། གསང་འཁྲིད། དུད་སོལ་མའི་ཐུན་མོང་དང་ཐུན་མོང་མ་ཡིན་པ། ཟངས་གྲི་ཅན་ཕྱི་ནང་། པུ་ཏྲ་མིང་སྲིད། བྲན་བདུད་གཤིན་རྗེ་ནག་པོ་རྣམས་ཀྱི་རྗེས་གནང་། བྲག་རྫོང་མ་ཕྱི་ནང་གསང་གསུམ། རྩ་གསུམ་འཁོར་ལོ་ལྔ་ལྡན་གྱི་ཉམས་འཁྲིད། མེ་འབར་གླེགས་བམ། ཁ་སྐོང་། གྱི་ལྗང་། སྙན་བརྒྱུད། དུད་སོལ་པོ་ཏི་རྣམས་ཀྱི་ལུང་མགོན་པོ་ཞལ་བསྙེན་པ་སྒྲུབ་དུས་ཐུན་མོང་དང་ཐུན་མོང་མ་ཡིན་པ། གདོང་བརྙན་ཅན། ལས་བཞིའི་མགོན་པོ། གསང་འཁྲིད། ཤི་ས་བསྟན་པ། བྲམ་ཟེའི་མངག་གཏད། ཁྱུང་ཞལ་ཅན། སེང་གེ་ནག་པོ་རྣམས་ཀྱི་རྗེས་
གནང་། ཚེ་སྒྲུབ་སྲུང་འཁོར་མ་དང་། རྩ་གསུམ་འཁོར་ལོ་བཞིའི་ཉམས་འཁྲིད། བེའུ་བུམ་ཡོངས་རྫོགས། གནོད་སྦྱིན་བེག་ཙེའི་རྗེས་གནང་དང་ལུང་། ཚར་ཆེན་གྱི་བཀའ་འབུམ། རྣམ་སྲས་སེར་ཆེན་སོགས་རིགས་གསུམ་ཙམ། ཕྱག་བཞི་པ། བེང་དམར། ལེགས་ལྡན་མཆེད་གསུམ། དུར་ཁྲོད་བདག་པོ། དཀར་བདུད། རྡོ་རྗེ་རབ་བརྟན་མ། དམག་ཟོར་མ་རྣམས་ཀྱི་རྗེས་གནང་། བཀའ་བརྒྱད་བདེ་གཤེགས་འདུས་པའི་དབང་ཆེན་ཉང་གི་གཏེར་མའི་དྲག་དམར་རྡོ་རྗེ་སྤྱི་བླུགས་ཀྱི་དབང་དང་ཆོས་སྐོར་ཡོངས་རྫོགས་ཀྱི་ལུང་། གཏེར་མགོན་ཕྱག་བཞི་བའི་དབང་། བཀའ་བརྒྱད་གསང་རྫོགས་ཀྱི་སྒྲུབ་དབང་དང་འགྱོགས་དབང་། ཕུར་པ་སྤུ་གྲིའི་དབང་དང་ཆོས་སྐོར་རྣམས་ཀྱི་ལུང་། འཁོར་བ་དོང་སྤྲུག །ནཱ་ག་རཀྴའི་དབང་། མ་ནིང་དང་བསྟན་མ་བཅུ་གཉིས་ཀྱི་སྲོག་དབང་། ཇོ་མོའི་ཉམས་ལེན་སྐོར་དགུའི་ལུང་། གནུབས་ལུགས་འཆར་ཀ་འཇོམས་བྱེད་འབར་བ་དང་། སྟག་ཞོན་གྱི་དབང་སྟག་པོད་ཀྱི་ལུང་། གྲྭ་པའི་ཛམ་དམར། བྱང་གཏེར་ཐུགས་སྒྲུབ་རྣམ་གསུམ། ཚེ་དཔག་མེད་འཆི་མེད་འོད་སྣང་རྣམས་ཀྱི་དབང་། ཨེ་ཀ་ཛ་ཏཱི། རེ་མ་ཏཱི། ཐང་ལྷ། རྡོར་ལེགས་བཞིའི་སྲོག་དབང་དེ་རྣམས་དང་འབྲེལ་བའི་ཡིག་སྣ་ཐོར་བུའི་ལུང་། པདྨ་དབང་ཆེན་ཡང་གསང་ཁྲོས་པ། རྫོང་ཆུང་ཚེ་དབང་དང་བཅས་པ་རྟ་པོད་ཡོངས་རྫོགས་ཀྱི་དབང་ལུང་། རཏྣ་གླིང་པའི་ཕུར་པ་ཡང་གསང་བླ་མེད་ཀྱི་དབང་། པདྨ་གླིང་པའི་ཚེ་དཔག་མེད་རྡོ་རྗེ་འཕྲེང་
བ་དང་དྲག་དམར་གྱི་དབང་ཆེན། རྣམ་སྲས་མདུང་དམར་ཅན། ཕྱག་རྡོར་དྲེགས་འདུལ། འཇམ་དབྱངས་བླ་མའི་རྩ་གསུམ་རྣམས་ཀྱི་དབང་། རིགས་འཛིན་ཡོངས་འདུས་ཀྱི་རྩ་དབང་སྒོས་དབང་དང་ཐོར་བུ། ཚེ་དཔག་མེད་ཡེ་ཤེས་འོད་མཆོག །དྲག་པོ་དབུ་དགུ་རྣམས་ཀྱི་དབང་དང་ཆོས་སྐོར་ཡོངས་རྫོགས་ཀྱི་ལུང་། རིན་ཅེན་གླིང་པའི་ནཱ་ག་རཀྴའི་བྱིན་རླབས། ཨོ་རྒྱན་གླིང་པའི་སྟག་ཞོན་གྱི་དབང་ལུང་ཡོངས་རྫོགས། གསང་འདུས་མི་བསྐྱོད་རྡོ་རྗེའི་རིམ་ལྔའི་ཉམས་འཁྲིད་ཐུགས་རྗེ་ཆེན་པོ་ཚེམ་བུ་ལུགས། བློ་སྦྱོང་དོན་བདུན་མ། སུམ་པ་ལོ་ཙཱ་བའི་བློ་སྦྱོང་རྣམས་ཀྱི་འཁྲིད། རྗེ་ཐང་སྟོང་པའི་ཚེ་དཔག་མེད་དཔལ་སྟེར་གྱི་ཚེ་དབང་སོགས་ཟབ་རྒྱས་ཀྱི་ཆོས་ཇི་སྙེད་པ་གསན་པ་དེ་དག་ཀྱང་གསན་པ་ཙམ་མ་ཡིན་པའི་སྔགས་གསར་རྙིང་། རྒྱུད་སྡེ་ཕྱི་ནང་གིས་གཙོས་པར་སོ་སོའི་ལུགས་ཀྱི་གནད་འགག་མཐའ་དག་ཐུགས་སུ་ཆུད་པར་མཛད། ཁྱད་པར་གསུང་ངག །གསེར་ཆོས་བཅུ་གསུམ། མགོན་པོ་ཆེ་ཆུང་སོགས་འཇམ་མགོན་ས་སྐྱ་པའི་ཡབ་ཆོས་ཐུན་མོང་མ་ཡིན་པ་རྣམས་ཀྱི་ཞལ་ཤེས་མན་ངག་ཡི་གེར་མ་འཁོད་པ་དང་ཡི་གེ་ཙམ་གྱིས་རྟོགས་མི་ནུས་པ་ཐམས་ཅད་ལ་ཕྱག་ལེན་དམར་འཁྲིད་མཛུབ་བཙུགས་སུ་ཞིབ་མོར་དཔྱད་པས་ཐེ་ཚོམ་ཅུང་ཟད་ཀྱང་མི་དགོས་པར་འདི་ནི་འདིའོ་ཞེས་ཐུགས་ཀྱིས་བསྐྱུད་པ་ནི་ནམ་ཡང་མི་མངའ། ཆོས་ཕྱིར་དཀའ་སྤྱད་བྱང་ཆུབ་སེམས་དཔའ་རྟག་ཏུ་ངུའི་རྗེས་སུ་འགྲོ་ཞིང་། ཇི་སྐད་དུ། སྦྲང་རྩི་འཛིན་པ་སྦྲང་རྩིའི་བརྟུལ་ཞུགས་ཅན། །
སྦྲང་བུ་མིན་པས་སྦྲང་རྩིའི་བཅུད་མ་མྱོང་། །གཞུང་ལུགས་སྨྲ་བ་ཀུན་དགའ་རྒྱལ་མཚན་དཔལ། །བཟང་པོ་མིན་པས་ཤེས་བྱའི་བཅུད་མ་མྱོང་། །ཞེས་འཇམས་དབྱངས་ས་པཎ་གྱི་གསུང་ལྟར་རྗེ་བླ་མ་ལ་སློབ་མ་སྐར་ཚོགས་ལྟར་མང་ན་ཡང་སྙན་བརྒྱུད་གདམས་པ་ཡོངས་སུ་རྫོགས་པའི་ཐུགས་ཀྱི་ཉིང་ཁུ་བུམ་པ་གང་བྱོའི་ཚུལ་དུ་གསན་པ་ནི་བླ་མ་དམ་པ་འདི་ཉིད་དང་། དེ་དང་ཆ་མཐུན་པ་ནི་གླང་ཕུ་ནས་ཆོས་རྗེ་ཙམ་དུ་མངོན། འདར་གྲང་མོ་ཆེར་ཁའུ་བྲག་རྫོང་པའི་ལུགས་སྲོལ་ཐུན་མོང་མ་ཡིན་པའི་ཤིང་རྟའི་སྲོལ་ཕྱེ་ནས་འཛིན་པར་མཛད་པའི་རྗེ་བཙུན་བརྩེ་བ་ཆེན་པོའི་རྣམ་སྤྲུལ་བདག་ཆེན་རྡོ་རྗེ་འཆང་བློ་གྲོས་རྒྱལ་མཚན། གྲུབ་པའི་དབང་ཕྱུག་བྲམ་ཟེ་མཆོག་སྲེད་ཀྱི་ཟློས་གར་རྗེ་བཙུན་རྡོ་རིང་པ་ཆེན་པོ། མཁས་དང་གྲུབ་པའི་དབང་ཕྱུག་སྒོ་རུམ་པ་ཆེན་པོ། མ་བྱོན་སངས་རྒྱས་གསུམ་པ་ཁ་ཆེ་པཎ་ཆེན་གྱི་རྣམ་སྤྲུལ་ཚར་ཆེན་ཆོས་ཀྱི་རྒྱལ་པོ། འཕགས་མཆོག་ཤཱ་རིའི་བུའི་སྒྱུ་འཕྲུལ་རོལ་པ་ཀུན་མཁྱེན་མཁྱེན་བརྩེའི་དབང་ཕྱུག །སྙན་བརྒྱུད་རྒྱ་མཚོའི་དེད་དཔོན་མཁན་ཆེན་བསླབ་གསུམ་རྒྱལ་མཚན། གྲུབ་ཆེན་ཀུ་ཀུ་རི་བའི་ཡང་སྲིད་ཁྱབ་བདག་དབང་ཕྱུག་རབ་བརྟན་རྣམས་ཀྱི་བྲིས་སྐུ་བཞེངས་པ་རྡོ་རྗེ་འཆང་ལ་ཕྱག་ནས་ཞུ་བ་གནང་། མྱུག་བཀྲ་ཤིས་རྒྱལ་ཁང་གི་གཙུག་ལག་ཁང་དུ་ཐམས་ཅད་མཁྱེན་པ་མཁྱེན་བརྩེའི་ཞབས་ཀྱིས་ཞལ་བཀོད་དང་སྦྱིན་བདག་སྡེ་པ་གནས་གསར་བས་མཛད་པའི་གསུང་ངག་བླ་མ་བརྒྱུད་རིམ་སྨན་སྐུ་མདའ་ཚད་མ་ཞེ་མཚུངས་བཞེངས་ནས་བཞུགས་
པ་དུས་འགྱུར་གྱི་དབང་གིས་ཞ་ལུར་གདན་དྲངས། དེ་ནས་རིམ་གྱིས་ཆོས་འཁོར་ཡང་རྩེར་ཕེབས་པའི་ཁ་སྐོངས་མཁན་ཆེན་བསླབ་གསུམ་རྒྱལ་མཚན། མཐུ་སྟོབས་ཀྱི་དབང་ཕྱུག་བསོད་ནམས་ཆོས་འཕེལ། རྗེ་རྡོ་རྗེ་འཆང་དབང་ཕྱུག་རབ་བརྟན་གསུམ་བཞེངས་ཏེ་གྲང་མོ་ཆེར་ལམ་འབྲས་ལྷ་ཁང་གི་ཞལ་བཀོད་སོགས་བྲིས་འབུར་གྱི་སྐུ་བརྙན་རྣམས་ལ་རྡོ་རྗེ་འཆང་གིས་རབ་ཏུ་གནས་པར་མཛད་དེ་ངོ་མཚར་བའི་ལྟས་དུ་མ་བྱུང་ཞིང་ལྷ་མཆོད་མི་མཆོད་ཀྱི་དགའ་སྟོན་རྒྱ་ཆེར་གནང་། རྗེ་བླ་མའང་དགྱེས་པའི་རྩེར་སོན་ནོ། །དབུས་འགྱུར་མཁས་བཙུན་རྩེར་སོན་ཆོས་སྐྱོང་ཞབས། །བདག་མེད་རྡོ་རྗེ་བཙུན་མོས་རྗེས་བཟུང་མཐུས། །ཚེ་གཅིག་ཟུང་འཇུག་སྐུ་བཞི་མངོན་གྱུར་པས། །གྲུབ་པའི་འཁོར་ལོས་སྒྱུར་བ་བི་རཱུ་པ། །གང་གི་ཐུགས་བཅུད་གསང་ཆེན་དབྱར་སྐྱེས་སྒྲ། །ཐོས་པས་འཕགས་བོད་སྐལ་བཟང་རྨ་བྱ་ཀུན། །བཅུ་གསུམ་རྡོ་རྗེའི་ས་ལ་གྲུབ་པའི་མཐའ། །རབ་སྙོག་མངལ་ཁུར་འཛིན་ལ་གཅིག་ཏུ་བྲེལ། །ཕྱོགས་རེ་ཙམ་མིན་ཐུབ་བསྟན་ཡོངས་རྫོགས་ཆོས། །ཚོགས་སློབ་བཤད་སྲོལ་བཞེད་པ་ཆེས་མང་བའི། །སྙིང་པོའི་ཡང་ཤུན་སྙན་བརྒྱུད་བདུད་རྩིའི་བཅུད། །སྣོད་ལྡན་ལེགས་བྲིས་ལས་གཞན་སྐལ་བ་ཕྲ། །རིན་ཅེན་སྒང་དང་རྒྱལ་ཚ་ལུང་མང་པོའི། །གདུང་རིགས་རིམ་བྱོན་ཞལ་བརྒྱུད་གསེར་གྱི་ཆོས། །མགོན་ཟུང་མན་ངག་མཁའ་འགྲོའི་ཁ་རླངས་ཅན། །འཛིན་ཁྱོད་ཟླ་མེད་ནམ་མཁའི་ཟླ་བ་འདྲ། །རྒྱུད་སྡེའི་ཐིག་ལེ་ཀུན་བསྡུས་ལུང་རྟོགས་བཞིན། །མཐོང་མོད་
ཆེས་སྒམ་ཚངས་པའི་ཡིད་འཕྲོག་ཚེ། །ལྷ་རྣམས་བ་སྤུ་ལྡང་བར་ཆུན་པོའི་ཐོད། །མེ་ཏོག་འདབ་མ་འཛུམ་དབུས་གེ་སར་རྒོད །ཚོགས་གཉིས་སྡོང་པོ་དར་དྲག་ཨ་མྲའི་ལྗོན། །ཐོས་བསམ་འབྲས་བུའི་རོ་བདའ་སྨིན་པའི་ཞར། །བྱ་བ་ལས་ཀྱི་གྲིབ་མར་སྐྱེ་རྒུ་ཀུན། །བདེ་བའི་ངལ་གསོ་བསོད་ནམས་གཟུགས་ཅན་བཞིན། །དེ་ནས་སླར་བསྟི་གནས་ཡར་ཀླུངས་བཀྲ་ཤིས་རྩེར་ཕེབས། ཆོས་སྡེ་ལྕགས་སྟག་བཏབ་པ་ནས་ལོ་སོ་དྲུག་ལས་མ་སོང་ཡང་བར་སྐབས་སུ་སྡེ་པ་དངོས་གྲུབ་རྡོ་རྗེ་བསམ་སྡིངས་ནས་དབེན་བཅོས་པའི་གྲུབ་མཐའི་འཛིན་སྟངས་གཞན་དུ་གཞོལ་བའི་བསྟན་སེལ་ཆེན་པོའི་རྐྱེན་གྱིས་ཆོག་གྲྭ་སོགས་མང་བ་མ་ཚུགས་པ་ད་ལམ་གཉིས་སུ་མེད་པའི་རྒྱུད་ཀྱེ་རྡོར་མན་ངག་ལུགས། བདག་མེད་ལྷ་མོ་བཅོ་ལྔ། གུར་རིགས་བསྡུས། རྡོ་རྗེ་སྒྲོལ་མ། ཀུ་རུ་ཀུལླེ། ཕ་རྒྱུད་གསང་བ་འདུས་པ་འཕགས་ལུགས་དང་ཡེ་ཤེས་ཞབས་ལུགས། འཇིགས་བྱེད་རྭ་ལུགས། ཕྱག་རྡོར་འཁོར་ཆེན། མ་རྒྱུད་ལོ་ནག་གཉིས། ནཱ་རོ་མཁའ་སྤྱོད། མཁའ་འགྲོ་རྒྱ་མཚོ། སངས་རྒྱས་མཉམ་སྦྱོར། རྡོ་རྗེ་གདན་བཞི། སམྦུ་ཊི། གུར་ལྷ་བརྒྱད། རྣལ་འབྱོར་རྒྱུད། ཀུན་རིག །བྱ་རྒྱུད་རིགས་གསུམ་སྤྱི། མི་འཁྲུགས་པ་ལྷ་དགུ །ཛེ་ཏཱ་རིའི་ཚེ་དཔག་མེད། འོད་ཟེར་ཅན་མ་རྣམས་དཀྱིལ་འཁོར་ལ་བརྟེན་པ། རྣམ་རྒྱལ་སྟོང་མཆོད་རྣམས་ཀྱི་ཆོ་ག་ནག་འགྲོས་སུ་བཀོད་ནས་འཛུགས་པའི་སྟ་གོན་དུ་རྒྱུགས་བཞེས། རྣམ་བཅད་དང་པོ་ས་ཆོག །གཉིས་
པ་སྟ་གོན། གསུམ་པ་སྒྲུབ་མཆོད་དངོས་རྣམས་ལ་དགོས་པའི་གར་ཐིག་དབྱངས་གསུམ་ཕྱག་ལེན་ཆེ་ཕྲ་མཐའ་དག་སྐུ་ངོས་ཀྱི་ཕྱག་ཁྲིད་དུ་མཛད། དཀྱིལ་འཁོར་སོ་སོའི་དབང་ལུང་། རྣམ་རྒྱལ་མའི་རྗེས་གནང་རྣམས་ནས་དབང་ཆ་གྲངས་སུ་བཅད་པར་ཤིན་ཏུ་འགྲུས་ཤིང་དངོས་གཙང་བའི་སྒོ་ནས་རྒྱས་པར་བསྟར། མེ་ཡོས་ཧོར་ཟླ་དང་པོའི་ཆོ་འཕྲུལ་མཆོད་པའི་དུས་ཆོག་གྲྭ་རྣམས་བཙུགས་ཏེ་འཛུགས་སྟོན་དང་བསྙེན་བཀུར་སོགས་ལྷ་མཆོད་མི་མཆོད་ལྷག་པར་རྒྱ་ཆེ་བར་སྤེལ། ལོ་ཕྱི་མ་རྣམས་སུ་རྒྱུན་མི་ཉམས་པར་བྱ་བའི་སླད་དུ་སྒྲུབ་མཆོད་ཐེབས་ཀྱི་མཐུན་རྐྱེན་སྦྱར་བས་མཚོན་གསང་ཆེན་རྡོ་རྗེ་ཐེག་པའི་བསྟན་པ་རིན་པོ་ཆེ་སྲིད་མཐའི་བར་དུ་ཉམས་པ་མེད་པའི་ཐབས་ཚུལ་འདི་ནི། རྒྱལ་བ་གཉིས་པ་བུ་སྟོན་རིན་པོ་ཆེ། བྱམས་པའི་རྣམ་སྤྲུལ་བདག་པོ་ཀུན་བཟང་འཕགས། ཀུན་མཁྱེན་རྡོ་རྗེ་གདན་པ་དང་གསུམ་གྱི་མཛད་པའི་རྗེས་སུ་འཇུག་པའི་ངོ་མཚར་གྱི་གནས་ཆེ་བ་ཞིག་ཏུ་སྣང་། འཕགས་པ་གང་པོས་ཞུས་པའི་མདོ་ལས། བྱང་ཆུབ་སེམས་དཔས་མ་ཐོས་ཆོས། །ཐོས་ན་དོན་དུ་ཚུལ་བསམ་བྱའི། །བདག་གིས་སྔོན་ཆད་མ་ཐོས་ཞེས། །དེ་སྐད་དུ་ནི་སྨྲ་མི་བྱ། །མ་ཐོས་ཆོས་ནི་ཐོས་གྱུར་ན། །ཡང་དག་དྲན་པས་སེམས་བྱེད་ན། །རྒྱ་མཚོར་འབབ་ཆུ་ཤོང་བ་བཞིན། །དེ་ཕྱིར་ཤེས་རབ་འཕེལ་བར་འགྱུར། །ཞེས་དམ་པ་རྣམས་ནི་ཐོས་པས་ནམ་ཡང་མི་ངོམས་པས་སྔོན་ཆད་གསན་བསམ་རྒྱ་ཆེར་མཛད་ནའང་དེ་ཙམ་གྱི་ཁོ་བོས་མང་དུ་ཐོས་སོ་སྙམ་པའི་མངོན་པའི་ང་རྒྱལ་གྱི་ཆོག་ཤེས་ཤིང་འདོད་ཡོན་ལ་སྐོམ་
པ་བ་ཚའི་ཆུ་བཞིན་ངོམས་པ་མེད་པར་བྱེད་པའི་བཤེས་གཉེན་དུ་རློམས་པ་དུ་མ་དང་ཕྱོགས་ཙམ་ཡང་མི་འདྲ་བར་བོད་འདིར་ཆོས་རྒྱུན་ཡོད་པ་རྣམས་མི་ནུབ་པ་ཐུགས་ལ་བརྣག་པ་ཡང་། རྗེ་མཁྱེན་བརྩེའི་གསུང་མགུར་ལས། སྟེང་ནས་གནམ་རྡེབ་འོག་ནས་ས་རུབ་ཀྱང་། །བོད་འདིར་ཡོད་པའི་ལམ་བཟང་འཁྲུལ་མེད་རྣམས། །མ་ལུས་ལེན་པའི་བརྩོན་འགྲུས་མི་རྩོམ་རི། །ཞེས་པའི་དོན་ལྟར་ཡིན་ཅིང་། འོ་སྐོལ་གྱི་སྟོན་པ་སློབ་པ་ལམ་གྱི་གནས་སྐབས་སུ་ཆོས་ཚིགས་བཅད་གཅིག་གི་ཆེད་དུ་སྐུ་ལུས་ལ་ལྕགས་གཟེར་སྟོང་བཏབ་པ་དང་། རྒྱ་བོད་ཀྱི་པཎ་གྲུབ་མང་པོས་ཆོས་ཕྱིར་ལུས་སྲོག་ཐེད་ལ་བོར་བའི་རྣམ་པར་ཐར་པ་ལ་རྗེས་སུ་འཇུག་པས་རྗེ་རྡོ་རྗེ་འཆང་ལ་ཆོས་འཕྲོ་དོན་དུ་གཉེར་བར་མ་ཟད་སྐུ་ན་སྨིན་པ་ལ་སྲི་ཞུའི་སླད་དུ་ས་འབྲུག་གཙང་ལ་ཆིབས་བསྐྱོད་པའི་ཞར་དུ་རྗེ་མར་པ་ལོ་ཙཱའི་དངོས་སློབ་རྔོག་ཆོས་སྐུ་རྡོ་རྗེ་ནས་བཟུང་མཁས་པ་དང་གྲུབ་པའི་བླ་མ་ཟམ་མ་ཆད་པ་བྱུང་བའི་གདུང་ལས་བྱོན་ཅིང་རིགས་ཙམ་ལྷུར་ལེན་པ་མ་ཡིན་པའི་ཡབ་སྲས་ཆོས་མཐའ་དག་ལ་མཁྱེན་པའི་སྤྱན་ཡངས་པ་རྔོག་སྟོན་འཇམ་དབྱངས་འོད་ཟེར་གྱི་ཞབས་ཀྱི་རྡུལ་དམར་དབུའི་གཙུག་ཏོར་དུ་བསྟེན་ནས། དགྱེས་རྡོར་ལྷ་དགུ །བདག་མེད་ལྷ་མོ་བཅོ་ལྔ། རྡོ་རྗེ་གུར་ལྷ་ཞེ་དགུ །རྣལ་འབྱོར་ནམ་མཁའ་ལྷ་དགུ་བཅུ་རྩ་བདུན། གདན་བཞི་ཡུམ་བཀའ་ལྷ་བཅུ་གསུམ། སྒྱུ་འཕྲུལ་ཆེན་མོ་ལྷ་ལྔ། འཇམ་དཔལ་གསང་ལྡན་ལྷ་ང་གསུམ་མ་སྟེ་རྔོག་དཀྱིལ་བདུན་གྱི་དབང་
མན་ངག་གི་ཡི་གེ་འགའ་ཞིག་འཁྲིད་བཅས། མཻ་ཏྲི་པའི་ཕྱག་ཡིག་དགུ་ཕྲུགས་ཀྱི་བྱིན་རླབས། དུད་སོལ་མའི་གསང་སྒྲུབ་ཀྱི་རྗེས་གནང་། གཏེར་སྟོན་ཉི་ཟླ་སངས་རྒྱས་ཀྱི་འཕོ་བ་འཇག་ཆུགས་མ། ཚེ་དཔག་མེད་གྲུབ་རྒྱལ་མའི་བྱིན་རླབས་རྣམས་གསན། རིམ་གྱིས་འདར་དུ་རྡོ་རྗེ་འཆང་གི་ཞབས་དྲུང་དུ་ཕེབས་ནས་དབང་ཆོས་ཅི་རིགས་གསན། ལོ་པ་སྤྱན་སྔ་ཀུན་དགའ་དོན་གྲུབ་དགེ་བའི་བཤེས་གཉེན་སྤྱན་སྔ་ཚུལ་ཁྲིམས་འབར་གྱི་རིགས་དབོན་བཀའ་གདམས་ཀྱི་བསྟན་འཛིན་ཆེན་པོར་མ་ཟད་ཕྱིས་སུ་ཁའུ་བྲག་རྫོང་པའི་བསྟན་སྲོག་མཐུད་པའི་མཁས་གྲུབ་ཀྱི་སྙན་པས་གདན་ས་གོང་འོག་གཉིས་ཀྱི་རིགས་ཀྱི་བདག་པོར་བཞེས་ཏེ། གཙང་ཕྱོགས་སུ་ལན་ཁ་ཡར་ཕེབས་པའི་སྐབས་ཤིག་དམ་པ་འདི་དང་གདན་འཛོམ་ནས་བཀའ་གདམས་ལྷ་བཞིའི་འཁྲིད། སྒྲོལ་དཀར་ཡིད་བཞིན་འཁོར་ལོ། མིའུ་ཐུང་གསོད་བྱེད། ཞང་བློན་དང་བཞིའི་རྗེས་གནང་། དེ་དག་གི་ཡིག་ཆ་ཐོར་བུའི་ལུང་སོགས་ཁ་ཡར་གསན་ཅིང་། སླར་ཡང་བཀའ་གདམས་སོགས་མ་གསན་པའི་རིགས་ལ་ཐུགས་རྩོལ་གནང་བཞེད་ཆེ་ཞིང་ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ་ཡང་སྤྱན་སྔ་རིན་པོ་ཆེར་བཀའ་གདམས་སྐོར་གསན་མ་ཐུབ་པ་ལ་ཐུགས་འགྱོད་ཆེ་ཞིང་ཁོ་བོའང་དེ་ལྟར་སེམས་མོད་ཀྱང་ཡིད་སྲུབས་བརླང་སྤྱོད་ཀྱི་ལྷོངས་ཆེན་པོས་གནས་ངེས་མེད་དུ་གཤེགས་པའི་འོ་བརྒྱལ་བའི་ཆོས་གེགས་སུ་གྱུར་ཏེ་བླ་མ་དམ་པ་རྣམས་ཀྱི་ཐུགས་བཞེད་ཇི་བཞིན་བྱུང་མ་སོང་། ཀུན་མཁྱེན་ཀླུ་སྒྲུབ་རྒྱ་མཚོ་དབྱངས་ཅན་མས་རྗེས་སུ་
བཟུང་ནས་ཤེས་བྱའི་གནས་མཐའ་དག་ལ་ཆགས་ཐོགས་མི་མངའ་ཞིང་ཁྱད་པར་གསུང་ངག་རིན་པོ་ཆེ་སློབ་བཤད་ཀྱི་སྐོར་ལ་རྩལ་དུ་བཏོན་པའི་བདག་ཆེན་རྡོ་རྗེ་འཆང་ཡབ་སྲས་ཀྱི་རིང་ལུགས་སྲོལ་འཛིན་བླ་ན་མེད་པ་ཡིན་རུང་། སྐུའི་སྐྱེ་བ་ཀླུ་སྒྲུབ་ཆོས་ཀྱི་རྒྱལ་མཚན་དུ་གྲགས་པ་སྤྲུལ་སྐུ་ཀུན་སྙིང་པར་ཐུགས་དད་དེ་ལོག་པའི་བཤེས་ཀྱི་མཐུས་རང་བསྟན་སྤེལ་བའི་གོང་མའི་རྣམ་ཐར་མ་འཁྱོངས་ཀྱང་མ་ནས་མདོ་སྔགས་ཀྱི་གསན་པ་རྒྱ་ཆེར་མཛད་ཅིང་། ཁྱད་པར་སྤྲུལ་པའི་སྐུ་མངའ་རིས་པ་ཆེན་པོ་དང་ཁྲི་སྲོང་རྣམ་སྤྲུལ་དཔལ་བཀྲ་ཤིས་སྟོབས་རྒྱལ་གྱིས་གཙོས་དམ་པ་དུ་མའི་ཞལ་སློབ། བླ་ཆེན་སྔགས་འཆང་ཚེ་རིང་དབང་པོ་ཡོངས་འཛིན་དུ་བསྟེན་པས་སྔགས་རྙིང་མའི་ཕྱོགས་ལ་གསན་རྒྱ་ཆེ་གཤིས་སྔ་འགྱུར་གཙོ་བོར་བཏོན་པའི་ཟབ་ཆོས་མང་དུ་གསན་པ་ནི་བྱང་གཏེར་རིག་འཛིན་གདུང་སྒྲུབ་ཀྱི་ཆོས་སྐོར། གཏེར་སྟོན་གྱི་རྣམ་ཐར། ཐུགས་སྒྲུབ་དྲག་པོ་རྩལ་གྱི་དབང་ལུང་། རྫོགས་པ་ཆེན་པོ་རང་བྱུང་རང་ཤར་གྱི་ཉམས་འཁྲིད་ལུང་བཅས། བཀའ་བརྒྱད་རང་བྱུང་རང་ཤར་གྱི་ཆོས་སྐོར། ཕུར་པ་ཆེ་མཆོག་དང་དྲག་སྔགས་གཉིས་ཀྱི་དབང་། ལུགས་གསུམ་གའི་ལུང་། ལྷ་ཆེན་སྟོབས་འདུལ་གྱི་ཆོས་སྐོར། སྟག་ཞོན་གྱི་ཆོས་སྐོར་བཀའ་གཏེར། ཞལ་ཆེམས་ལུང་བསྟན་གྱི་སྐོར། རྡོར་ལེགས་ཀྱི་སྲོག་དབང་ལུང་བཅས། གཏེར་སྟོན་བལ་པོ་ཨ་ཧུང་གི་ཛམ་ལ་ནག་པོའི་ཆོས་སྐོར། སྤྲུལ་སྐུ་ཚེ་བརྟན་རྒྱལ་མཚན་གྱི་བླ་མ་རྡོ་རྗེ་འཆང་གི་དབང་ལུང་། ཡང་
གསང་ཡཀྴ་མེ་དབལ་དབུ་དགུ་ཕྱག་བཅོ་བརྒྱད་པའི་དབང་ལུང་། གཞན་ཡང་ལས་ཕྲན་ཐོར་བུ། ཀུན་སྐྱོང་གླིང་པའི་རྡོར་སེམས་སྙིང་ཏིག་གི་ཆོས་སྐོར། པདྨ་ལས་འབྲེལ་རྩལ་གྱི་མཁའ་འགྲོ་སྙིང་ཏིག་གི་དབང་ལུང་། པདྨ་གླིང་པའི་ཚེ་དཔག་མེད་རྡོར་ཕྲེང་གི་ཆོས་སྐོར་གྱི་ལུང་། ཕྱག་རྡོར་དྲེགས་འདུལ་གྱི་ཆོས་སྐོར། གུ་རུ་དྲག་དམར་ཐེམས་མེད་ཀྱི་སྐོར། རཏྣའི་རྟ་མགྲིན་གསང་འདུས་ཀྱི་ཆོས་སྐོར་ནས་ཐོར་བུ། བསྟན་གཉིས་གླིང་པ་པདྨ་ཚེ་དབང་རྒྱལ་པོའི་འཇམ་དཔལ་གཤིན་རྗེ་དྲག་སྔགས་ཀུན་འདུས་ཀྱི་དབང་ལུང་ལ་སོགས་པས་ཐུགས་རྒྱུད་ཡོངས་སུ་གཏམ། རྗེ་འདི་ཉིད། གླང་ཕུ་ཆོས་རྗེ། ཞ་ལུ་མཁན་རིན་པོ་ཆེ་གསུམ་ཞ་ལུ་རི་ཕུག་དང་འདར་དུ་སྔ་ཕྱིར་རྡོ་རྗེས་འཆང་གི་སྐུ་ཞབས་སུ་ཆབས་ཅིག་པར་བཞུགས་ནས་དམ་པའི་ཆོས་ཀྱི་གསན་བསམ་རྒྱ་ཆེར་མཛད་པའི་དུས་ཁྱེད་གསུམ་རྡོ་རྗེའི་མཆེད་པོ་ཟླ་མེད་པ་ཡིན་པས་དབོན་གྱིས་ས་ལུགས། གླང་ཕུ་རྗེ་དྲུང་གིས་རྙིང་ལུགས། སྨན་ཁང་ནས་ཀྱིས་བུ་ལུགས་རྣམས་གཙོ་བོར་བཏོན་པའི་ཐོས་བསམ་བྱས་པ་སོགས་ཆོས་རྒྱུན་གཅིག་ལ་མེད་པ་རྣམས་གཅིག་གིས་བསབས་པའི་ཉན་བཤད་བྱེད་དགོས་ཞེས་གསུངས་པ་ལྟར་གླང་ཕུ་ནས་ཆོས་རྗེ་རིན་པོ་ཆེ་འཇམ་དབྱངས་ཆོས་སྐྱོང་དབང་ཕྱུག་ཞལ་ངོ་གོང་མ་རྣམས་ཀྱི་དུས་ནས་ཁའུ་སྐྱེས་ལྷས་པའི་རིང་ལུགས་ལ་དབང་རྣོན་ཆོས་རྗེས་འབྲང་བའི་དད་པ་བརྟན་པོས་སྦྱིན་བདག་ལྷུར་ལེན་པའི་རྒྱུན་དང་ཆོས་རྗེ་ཉིད་ས་སྐྱ་པའི་བསྟན་འཛིན་ཆེན་པོ་འགྲན་ཟླ་མེད་པས་ཆོས་གསན་པའི་ཡུལ་དུ་གྱུར་པ་ནས་ཐོག་མར་ཆོས་འབྲེལ་ཅི་རིགས་གསན་ཅིང་རྟིང་སོར་གསན་པ་
རགས་རིམ་སྨོས་ན་བླ་མ་དགོངས་འདུས་ཀྱི་ཆོས་སྐོར་ནས་ཉེར་མཁོ་དང་ཀརྨ་གླིང་པའི་ཞི་ཁྲོ་དགོངས་པ་རང་གྲོལ་ནས་ཐོར་བུའི་ལུང་། བསྟན་གཉིས་གླིང་པའི་རྫོགས་ཆེན་ཀློང་གསལ་སྙན་བརྒྱུད་ཀྱི་ཆོས་སྐོར། འོད་གསལ་ཐིག་ལེ་ཉག་གཅིག་གི་ཆོས་སྐོར། ཕག་མོ་ཟབ་རྒྱའི་ཆོས་སྐོར། དཔྱལ་ཕུར་གྱི་དབང་ལུང་། ཀློང་ཆེན་པའི་བླ་མ་ཡང་ཏིག་དང་ཟབ་མོ་ཡང་ཏིག་གཉིས་ཀྱི་ལུང་སོགས་མང་དུ་གསན། རྗེ་བཙུན་རྡོ་རྗེ་འཛིན་པ་ཆེན་པོ་བྱང་གླིང་བཀྲ་ཤིས་རྒྱལ་མཚན་དཔལ་བཟང་པོའི་ཡང་སྲིད་ཞ་ལུ་མཁན་ཆེན་རིན་ཅེན་བསོད་ནམས་མཆོག་གྲུབ་ལ་རྗེ་བླ་མས་ཚིག་བཀྲའི་ཁྱད་ནས་ཕུན་ཚོགས་དངོས་གྲུབ་མའི་ལུང་ཞུས་ཕེབས་པ་ལྟར་དང་རྡོར་དབྱིངས་ཀྱི་དབང་གསན་ཅིང་རྗེས་སོར་རིམ་གྱིས་ཐུགས་རྩོལ་གནང་བར་འཁོར་ལོ་སྡོམ་ཆེན་། བདེ་མཆོག །པདྨ་དྲ་བ། དྲིལ་བུ་ལྷ་ལྔ། ཆོས་དབྱིངས་གསུང་དབང་། དཔལ་མཆོག་རྡོར་སེམས། མི་འཁྲུགས་པ་ལྷ་བཅུ་གསུམ། ཕྱག་རྡོར་འཆི་བདག་འཇོམས་པ། ཤཱཀྱ་སེང་གེ་གཙུག་ཏོར་དགུ་པ། རྣམ་སྣང་མངོན་བྱང་། ཕྱག་རྡོར་འགྲོ་བཟད་དང་བཅས་པའི་དབང་། རྣམ་སྲས་བཀའ་མི་འདྲ་བ་བཅོ་ལྔ། ཛམ་ལ་དམར་པོ་སོགས་རྗེས་གནང་དང་ལུང་གི་རིགས་ཁ་ཡར་གསན། རྗེ་རྡོ་རྗེ་འཆང་དགུང་ལོ་ཕེབས་པར་མ་ཟད་སྐུ་གཅོང་གིས་མ་ལྕོགས་པའི་གཙང་སྡེ་སྲིད་དུ་དགོངས་ཁྲོལ་ཞུ་བ་མཛད་པ་གྲྭ་རིགས་སྦྱིན་བདག་གི་འདོད་སྦྱར་བཞིན་དབོན་རིན་པོ་ཆེ་ནང་བསྐོས་ཀྱི་བཅའ་གཞི་ཤར་བ་དཀར་པོ་ཞེས་པ་ས་སྦྲུལ་གྱི་ལོའི་དུས་ཚེས་དགེ་བར་རྒྱལ་བ་ཀུན་
དངོས་ཚར་ཆེན་ཆོས་ཀྱི་རྒྱལ་པོའི་སློབ་བཤད་འཇིགས་མེད་སེང་གེའི་རྒྱུད་ཀྱི་ང་རོ་སྒྲོག་པའི་ཆོས་ཀྱི་ཁྲི་ཆེན་པོར་གདན་ས་གོང་དང་གཞིས་ཀ་རྩེ་ནས་བསྐོ་འཇའི་གནང་སྐྱེས་འདར་ནས་སོགས་སྦྱིན་བདག་གྲྭ་རིགས་རྣམས་ཀྱིས་འབུལ་འགྱེད་ཚ་རའི་ཐོག་རྡོ་རྗེ་འཛིན་པ་ཆེན་པོ་དབང་ཕྱུག་རབ་བརྟན་གྱིས་བཀྲ་ཤིས་མེ་ཏོག་གི་ཆར་ཆེན་པོ་ཕབ་ནས་མངའ་གསོལ་ལོ། །ལྕགས་མོ་ལུག་གི་ལོ་ལ་སྟོད་ལྷོ་ནས་སྤྲུལ་སྐུ་འཇམ་དབྱངས་པ་ཞེས་པར་ཐོགས་དབང་པོ་སྨན་ཐང་པའི་སློབ་རྒྱུན་མཁས་པ་ཞིག་བཀུག་ནས་ཐམས་ཅད་མཁྱེན་པའི་རྣམ་ཐར་ཞིང་བཀོད་ཐང་ཁ་གསུམ་ལ་ཚང་བ་དེ་ཞོར་དུ་གུར་མགོན། དུད་སོལ་མ། ལས་གཤིན་གསུམ་གྱི་སྐུ་བརྙན་བཞེངས་ཏེ་རྡོ་རྗེ་འཆང་ལ་རབ་གནས་ཞུ་བ་མཛད་པ་བྲིས་བཀོད་ཕུན་སུམ་ཚོགས་པ་བྱུང་ཞེས་དགྱེས་པའི་རྩེར་སོན་འདི་གྲས་ལྕགས་སྟག་ལོ་སྐྱིད་ཤོད་གུང་ཐང་དུ་བཞུགས་ཡུལ་གནང་སྐབས། གཉན་མགོན་ཞལ་བཞི་པ་དང་གནོད་སྦྱིན་བེག་ཙེ་ལྕམ་དྲལ་གཉིས་ཟུར་ཀུན་མཁྱེན་ཆེན་པོས་ཕྱག་བྲིས་གནང་ཞིང་བེག་ཙེའི་སྐྱ་བྲིས་ཀྱི་དུས་ཟུར་ཆེན་གྱི་འོད་གསལ་དུ་དུར་ཁྲོད་སོགས་ཀྱི་བཀོད་པ་སྣ་ཚོགས་བྱུང་བ་མུས་སྲད་པའི་ཐང་རྙིང་ཁུངས་བཙུན་ཞིག་གཟིགས་འདུག་པ་དེ་ཁོ་ན་ལྟར་སྣང་ཞེས་ཐུགས་ངེས་མཛད། ཆུ་ཕོ་སྤྲེལ་ལོ་གསོལ་འདེབས་གནང་བས་རྡོ་རྗེ་འཕྲེང་བའི་དབང་བསྐུར་བར་ཞལ་གྱིས་འཆེས་སྐབས་གདན་ས་འོག་གི་བདག་ཆེན་ཁྲི་ཐོག་པ་འཇམ་དབྱངས་ཀུན་དགའ་བསོད་ནམས་ལྷུན་གྲུབ་བཀྲ་ཤིས་གྲགས་པ་རྒྱལ་མཚན་དཔལ་བཟང་པོའི་དྲུང་དུ་མཁན་རིན་པོ་ཆེ་ངག་དབང་ཆོས་གྲགས་ཀྱིས་ཕྲེང་བ་གསན་པའི་
གནས་ཚུལ་བྱུང་བར་བརྟེན་བདག་རྒན་པོའི་དགེ་སྦྱོར་བཅག་པ་ལས་རིན་པོ་ཆེ་བ་སྐུ་ན་གཞོན་ཞིང་མཁྱེན་པའི་ཀློང་ཡངས་པས་དེར་ཞུས་ཤིག་པའི་སྐབས་དབྱེ་བ་བཀའ་བཞིན་སྒྲུབ་པའི་ཆེད་དུ་གྲང་མོ་ཆེའི་གཙང་པོ་བྱང་ཁ་བླ་བྲང་རྫོང་དུ་ཡོངས་རྫོགས་གནས་ལྔ་རིགས་པའི་པཎྜི་ཏ་ཆེན་པོ་ཐམས་ཅད་མཁྱེན་པ་ངག་དབང་ཆོས་ཀྱི་གྲགས་པའི་ཞབས་དྲུང་ཉེ་བར་བསྙེན་ཏེ་རྗེ་བཙུན་རྡོ་རྗེ་བཙུན་མོའི་གནང་བ་ཐོབ་པར་བརྟེན་ནས་སློབ་དཔོན་འཇིགས་མེད་འབྱུང་གནས་ཞབས་ཀྱིས་རྒྱུད་སྡེ་བཞིའི་དཀྱིལ་འཁོར་མཐའ་དག་སྤྱི་བཀའི་ཚུལ་དུ་དགོངས་པ་བཀྲལ་བ་ཕྲེང་བ་སྐོར་གསུམ་མཛད་པ་དང་ཕྱོགས་མཚུངས་པར་སློབ་དཔོན་ཆེན་པོ་དཪྦན་ཨཱ་ཙཪྻས་ཀྲྀ་ཡས་མུཉྩ་མཛད་པ་གཉིས་ཀྱི་དབང་གི་ཆུ་བོ་ས་བཟང་འཕགས་པ་ནས་གཅིག་ཏུ་འདྲེས་པ་རྡོ་རྗེ་འཆང་ཨེ་ཝཾ་པ་ཀུན་དགའ་བཟང་པོ་བརྒྱུད་པར་བཅས་པའི་ཕྱག་བཞེས་ཉམས་པ་མེད་པ་ཕྲེང་བ་ཞེ་ལྔ་མའི་དབང་། ཀུན་རིག་དང་བསྲུང་བ་ལྔའི་དབང་། ས་སྐྱ་པ་ཆེན་པོ་དང་སློབ་དཔོན་རིན་པོ་ཆེའི་བཀའ་འབུམ། གླང་རི་ཐང་པས་མཛད་པའི་བློ་སྦྱོང་གི་རྩ་བ་རིན་པོ་ཆེ་རྟ་ར་བའི་རྣམ་ཐར་སྔགས་འཆང་ཉིད་ཀྱིས་མཛད་པ་སོགས་སྔ་ཕྱིར་ཆོས་མང་དུ་གསན་ནོ། །གྲངས་མེད་འགྲོ་ངོར་གཅིག་ལ་དུ་མའི་གར། །སྣང་ཚུལ་རྒྱུད་སྡེ་བཞི་ཡི་ལྷར་ཤར་འགའ། །ལོ་པཎ་བཞེད་པ་མ་ནོར་སྒྲུབ་མཆོད་སྲོལ། །ལེགས་བཏོད་སྙིང་པོའི་རིང་ལུགས་སྲོག་གི་ཟུངས། །ཕག་མོའི་བྱིན་རླབས་ཙམ་ལ་དབང་བསྐུར་དུ། །རེ་བའི་དུག་བྲལ་ནཱ་རོ་མཻ་ཏྲི་ཡི། །བཞེད་གཞུང་སྨན་གྱི་ཆུ་བོ་ཨརྒའི་རྒྱུན། །སྦྲེང་བའི་རྔོག་སྟོན་ཨ་ག་སྟྱ་ཡི་སྤུན། །འགྲོ་ཀུན་བདེ་བའི་དགའ་
སྟོན་ལ་སྦྱར་ནས། །འདི་ཕྱིའི་དོན་གཉིས་ཡོངས་གྲུབ་བཀའ་གདམས་ཀྱི། །ཟབ་ཆོས་ཇོ་འབྲོམ་ཉིང་ཁུ་ལྷ་བཞིའི་ཁྲིད། ཁྱོད་ཐུགས་རིན་ཅེན་ཟ་མ་ཏོག་ཏུ་བསྐྱིལ། །ཀླུ་སྒྲུབ་སྙན་གྲགས་གཡུ་དམར་འདབ་འཕྲེང་རྒྱན། །སྒྲ་འཛིན་མུན་པའི་མལ་ནས་སློང་བ་ལ། །བལྟོས་མིན་སྔ་འགྱུར་སྒྲོན་མེ་ལམ་བཟང་གཟུགས། །གཟིགས་ལ་དགྱེས་པའི་ཞལ་འཛུམ་ཚར་དུ་དངར། །འཇམ་དབྱངས་འཁོན་སྟོན་ཆོས་ཚུལ་ཀུནྡའི་ཚལ། །སྐྱོང་ལ་ཐོས་བསམ་སྒོམ་པར་དབང་ཕྱུག་ཟླས། །མགོན་ཁྱོད་མཉེས་བྱེད་ཐེག་མཆོག་མཆོད་པའི་སྤྲིན། །ཀུན་བཟང་རྣམ་པར་ཐར་དེ་ངལ་གསོར་འགྱུར། །མཐའ་ཀླས་རྒྱུད་སྡེ་རྒྱ་མཚོའི་བང་མཛོད་སྒོ། །རྣམ་དཔྱོད་ཡངས་པའི་ལྡེ་མིག་འཕྲུལ་པོ་ཆེས། །འབྱེད་ལ་ཕུར་བུའི་བློར་འགྲན་ཞ་ལུ་པས། །བཞེད་པའི་རེ་བཀང་ཡོངས་འདུ་ས་བརྟོལ་བཞིན། །ཚོགས་བཤད་གཅན་གཟན་དྲེགས་པའི་ངར་སྐད་ལྟར། །རབ་གནོན་སློབ་བུ་མཆོག་ལ་གདམས་བྱའི་འཁྲིད། །འཇིགས་མེད་སེང་གེའི་ང་རོ་སྒྲོག་པའི་འཁྲིད། །ཕྱོགས་བཅུའི་རྒྱལ་བས་དབང་བསྐུར་ལེགས་སོ་བྱིན། །ངག་གི་དབང་ཕྱུག་དབྱངས་ཅན་ངང་མོ་དཀར། །རབ་འབྱམས་མཁྱེན་པའི་ཐུགས་མཚོར་རྟག་རོལ་བས། །ཆོས་ཕུང་མགྲིན་པའི་དྲིལ་ཆུང་སྒྲོག་པའི་གླུ། །ལེན་པའི་གྲགས་སྙན་སྲིད་པའི་རྩེ་ལས་བརྒལ། །མཐའ་ཡས་འགྲོ་ཁམས་དང་འཚམ་ཐུབ་གསུང་དོན། །འཆད་མཁས་གཏམ་གྱི་སྦྱོར་བ་ལག་པའི་རྗེས། །གཙུག་ལག་བྱེ་བའི་རྩིག་པར་ལེགས་བཞག་པའི། །རི་མོ་མིག་གསུམ་པས་ཀྱང་དབྱེ་ནུས་མིན། །རིན་ཅེན་སྒང་པའི་གདུང་བརྒྱུད་རིམ་བྱོན་གྱི། །རང་བསྟན་ས་ཆེན་གྱེན་དུ་རབ་བཏེག་པའི། །སྙིང་སྟོབས་ཁྱབ་འཇུག་ཁེངས་འཕྲོག་ཡོངས་འཛིན་འདིས། །ཡབ་རྗེ་བླ་མའི་བཞེད་པ་ཅི་ཡང་བཀང་། །
རྗེ་རྡོ་རྗེ་འཆང་གཞན་སྣང་དུ་སྐུ་ན་ཆེར་སྨིན་ཅིང་སྤྱན་མི་གསལ་བ་སོགས་ནས་དཔལ་དཱི་པཾ་ཀཱ་ར་ཤྲཱི་ཛྙཱ་ན་དང་འབྲོམ་སྟོན་ཆོས་ཀྱི་རྒྱལ་པོ་དཔོན་སློབ་ཀྱི་རྣམ་ཐར་བཞིན་ཡར་ཀླུངས་བཀྲ་ཤིས་ཆོས་སྡེར་ཕེབས་དགོས་སོགས་ཐུགས་བྲེལ་གཞན་རྣམས་ཁྱད་དུ་བསད་དེ། བླ་མའི་སྲི་ཞུའི་ཞམ་འབྲིང་ལ་གལ་ཆེ་བར་དགོངས་ནས་བཅར་བཞུགས་གནང་བའི་ལོ་སྔོན་མ་རྣམས་སུ་རྡོ་རྗེ་འཆང་གཞན་དོན་དུ་གཤེགས་གྲབས་ཁ་ཡར་བྱུང་བར་རྗེ་འདི་ཉིད་ཀྱིས་གསོལ་འདེབས་བརྟན་བཞུགས་གནང་བས་ཞལ་ངོ་མ་བཟློག་པར་བཞུགས་ཤིང་ཁྱད་པར་ཕ་དམ་པ་ལུགས་ཀྱི་འཆི་མེད་མགོན་པོའི་སྒོ་ནས་བརྟན་བཞུགས་འབུལ་བ་གནང་བས་ཚེ་གཏོར་དགུ་འདྲེན་སྒང་ལ་བདུད་རྩིར་ཞུ་བ་སོགས་རྟགས་མཚན་ལེགས་པར་བྱུང་། ཆོས་སྡེའི་གྲྭ་པ་འཕྱོས་པ་འཕྲིན་ལས་རྒྱ་མཚོ་ཟེར་བ་ཞིག་ལ་སེམས་སྐྱོན་མ་ཆགས་རུང་རྗེ་བཀའ་འགྱུར་པ་དབུས་ལ་ཕེབས་པར་ཡིད་གདུངས་ནས་རྡོ་རྗེ་འཆང་ལ་ད་ཆ་རྡོའི་ངོས་རང་ཡིན་འདུག་ཡང་ན་ནི་སྐུ་ཁམས་གཞི་མེད་དུ་གདངས་ན་ལེགས་ཤིང་། དེ་མིན་ཞིང་གཞན་གཤེགས་ན་ཞེས་གླེང་མོ་བཏང་བ་བྱམས་པས་སྙན་དུ་གསོལ་པ་ན་ཁོ་བདེན་དཔོན་དྲུང་གིས་ནན་ཆགས་གསུངས་པ་མ་བཟློག་པར་བསྡད་པ་མ་གཏོགས་སྡོད་འདོད་ཀྱང་མེད་ཅིང་གཞན་དོན་མི་ནུས་པའི་ལུས་འདི་དེ་ག་རང་དུ་འདུག་གསུང་ཆུ་བྱ་ཚེས་བཅུ་ཞིག་ལ་རྗེ་བླ་མ་ཕྱི་རོལ་ཏུ་མངོན་པའི་སྙུན་སོགས་ཡེ་མེད་པའི་ངང་ནས་དྲུང་ཆེན་བྱམས་པ་བསྟན་འཛིན་པར་ཁོ་བོ་འགྲོ་བ་ཡིན་ཚུལ་གསུངས་པ་བྱམས་པས་རྗེ་ཉིད་ལ་ཞུས་པར་བརྟེན་དྲུང་དུ་ཕེབས་ཤིང་ནན་ཏར་གསོལ་འདེབས་གནང་བས་ཞལ་གྱིས་བཞེས་ཏེ་སྐུ་ཚེ་བྱིན་གྱིས་
བརླབས་ནས་ལོ་གསུམ་བཞུགས་པའི་བར་མཚམས་སུ་སྐུ་ཅུང་ཟད་དྭངས་སྐབས་ཚོར་དབང་རྗེས་གནང་འཁྲིད་ཀྱི་རིགས་འགའ་གསན་ཅིང་། རྭ་པོད། དཔལ་འཛིན་པོད་ཆུང་གིས་མཚོན་པའི་ལུང་དུ་མ་སྤྱན་ཆབ་བཅུག་ནས་གནང་། སྙན་བརྒྱུད་ཞལ་བཞེས་གལ་ཆེ་བའི་རིགས་སོགས་ཆོས་ཀྱི་འཁོར་ལོ་བསྐོར་བཞིན་པར་བཞུགས། འཇམ་དབྱངས་རྡོ་རྗེས་དགེ་སློང་རབ་འཛིན་བསད་པའི་རྐྱེན་གྱིས་རྗེ་བཙུན་བཀའ་འགྱུར་བ་ཤིང་ཕག་ཧོར་ཟླ་བཅུ་གཅིག་པའི་ནང་དུ་དགོན་པའི་དོན་སྐོར་ལ་གཞིས་ཀ་རྩེར་ཕེབས་དེ་དུས་ཡར་འབྲོག་ཏུ་སོག་པོ་ཨ་ས་ལང་གི་དམག་རྒྱུགས་པས་དབུས་གཙང་ཐམས་ཅད་ཟི་ཆོད་དེ་བའི་སྐབས་དང་འགྲིག་པའི་གཙང་སྡེ་སྲིད་ནས་སོག་བཟློག་ལ་དམིགས་པའི་སྐུ་རིམ་གནང་དགོས་ཚུལ་ཕེབས་པ་ལྟར་མགོན་པོ་ཁྲོ་བཅུའི་གཏོར་བཟློག་མཛད། རྫོང་གི་གཏོར་རྒྱག་པ་ཕལ་ཆེར་འཆམས་སོགས་སྤྲོས་བཅས་ལྷུར་ལེན་ཅིང་གཟིགས་མོའི་ཁྱད་ཀྱིས་ཆོ་ག་རྫོགས་མ་རྫོགས་ལ་མི་བལྟོས་པར་གཅིག་རྗེས་སུ་གཅིག་འདོན་པ་ཞིག་ཡོད་འདུག་པ་དྲུང་ཡིག་བདེ་རྒྱས་པ་འོངས་ནས་དོན་དགོས་ཚུལ་དང་འཆམས་སོགས་ཇི་ཙམ་ཡོད་ཀྱི་དྲི་བ་བྱུང་བར་རྡོ་རྗེ་སློབ་དཔོན་གྱི་ཆས་ཞུགས་ཙམ་ལས་འཆམས་བྱེད་ཀྱིན་མེད་ཆོ་གའང་ཉིན་འཚམས་ལས་མི་གྲུབ་འདུག་གསུངས་པས་གཞན་ཚོའི་པད་ལས་དང་མ་མཐུན་པས་དགོངས་པ་ལ་འཐད་རྒྱུ་རང་མ་བྱུང་འདུག །འོན་ཀྱང་ཆོས་སྐྱོང་བྲན་དུ་འཁོལ་བའི་སྙན་གྲགས་ལ་བརྟེན་མཐོངས་ལྕགས་རྫོང་དུ་སྐུ་རིམ་ལ་རྫོང་བདའ་གནང་བའི་ཕེབས་ཞོར་ནང་སོ་དགེ་འདུན་རྒྱ་མཚོའི་ཇོ་ཇོ་ཐར་པའི་གཉེར་པས་གདན་དྲངས་ཀུན་མཁྱེན་དཔྱལ་བའི་གདན་ས་ཐར་པ་དགོན་གྱི་རྟེན་བརྟེན་པ་རྣམས་ཞིབ་མཇལ་
གྱི་ཚེ་སྟག་ཞོན་ཡབ་ཡུམ་གྱི་འཆམས་སྐུའི་ཞལ་རས་ལས་བདུད་རྩི་བབས། ལོ་ལོ་བཞིན་ཚོགས་བརྒྱའི་དུས་འཆམས་སྐུ་ཕྱིར་འདོན་ཁར་སྣུམ་ཕྱིས་སོགས་བྱེད་དགོས་པ་ལ་དེ་ནས་ལོ་ཤས་དགོས་པ་མ་བྱུང་ཟེར། འདར་དུ་ཡུལ་སར་ནང་པར་བྱོན་པའི་སྟག་སྣ་ནང་པའི་སྲས་མོ་ཚར་ཆེན་ཆོས་ཀྱི་རྒྱལ་པོའི་སྣང་དཔོན་བྱང་སེམས་ལགས་ཀྱིས་རྡོ་རྗེ་འཆང་གི་དྲུང་དུ་མཆི་མ་དང་བཅས་མཐོང་ལྕགས་རྫོང་ཤིན་ཏུ་གཉན་པ་ཡོད་འདུག་པས་སྲུང་འཁོར་གནང་དགོས་ཞུས་པས་དེ་ལྟ་བུ་བསམས་པ་དགའ་རབ་ཡིན། དཔོན་རིན་པོ་ཆེ་གཞན་དང་མི་འདྲ་བས་སྐྱོན་མི་ཡོང་གསུངས། མཐོངས་ལྕགས་རྫོང་བདག་ཆེན་རྡོ་རྗེ་འཆང་གི་སྙན་སྒྲུབ་ལས་སྦྱོར་གནང་ས་གསང་བའི་མགོན་ཁང་བོད་ཡུལ་ན་གཉན་པ་དེར་ལས་སྦྱོར་གྱི་བཅའ་གཞི་རྣམས་ཀྱང་ཤིན་ཏུ་འགྲིག་པ་ནས་གསང་བ་ཡིད་བཞིན་ནོར་བུ་ནས་བཤད་པ་ལྟར་གྱི་མངོན་སྤྱོད་རྒྱས་པར་གནང་སྐབས་བདག་ཆེན་རིན་པོ་ཆེའི་གསོལཕོད་རེ་ནག་དང་དབུ་ཞྭ་ཡང་མཆོད་ཅིང་རྫས་ལ་རྟ་དང་བྱ་རོག་གི་སྙིང་དགོས་པ་ཆེད་དུ་གསོད་པ་མ་འགབ་པའི་རྙེད་དཀའ་ཚེ་མགོན་ཁང་སྟེང་གི་ནམ་མཁར་བྱ་རོག་སྡེར་འཛིངས་བྱས་པས་གཅིག་ཤི་ནས་ལྷུང་བ་དང་རྒྱལ་རྩེའི་ལྟག་ཏུ་མི་ཞིག་གི་རྟ་ནག་ལ་གློ་བུར་དུ་བཙན་རྒྱབ་སྟེ་འབད་མེད་དུ་རྙེད་གདབ་ལས་ཀྱི་དུས་ཤ་ཚིལ་དྲི་ཆེན་སྤོས་སོགས་ཀྱི་དྲི་ངེས་མེད་བསྲེག་མཁན་མེད་པར་འཐུལ་བ་དང་མགོན་ཁང་མདོའི་བར་འཁྱམས་སུ་སྐད་ངན་འཁུན་བུ་འདོན་ཞིང་བཤུག་གླུ་ལེན་པ་སོགས་ཚུབ་ཆ་ཆེ་བས་གསོལ་དཔོན་དང་མཆོད་དཔོན་གཅིག་པུར་འགྲོ་མི་ནུས་པ་བྱུང་ཞིང་། དམིགས་བྱ་ཨས་ལང་ཧུང་ཐའི་ཇི་བློན་པོ་དང་བཅས་པ་ལོ་གཅིག་ཙམ་ནས་ནང་འཁྲུགས་ཀྱི་
དམིགས་མེད་དུ་སོང་རྟགས་མཚན་ཆེ་ཡང་རྣམ་ཤེས་འོག་མིན་དུ་རྒྱལ་བའི་སྲས་སུ་བསྐྲུན་པ་རྒྱུད་སྡེའི་དགོངས་པ་བླ་ན་མེད་པ་ཡིན་པས། ཀུན་མཁྱེན་མཁྱེན་བརྩེའི་གསུང་མགུར་ལས། ཨེ་མ་རྒྱུ་འབྲས་རྟེན་འབྲེལ་དགོད་རེ་བྲོ། །དལ་མེད་སྔགས་སྨྱོན་འདྲེན་པའི་སྔགས་འཆང་ལ། །འབད་རྩོལ་མེད་པར་ནུས་མཐུ་ཤུགས་ལ་འབྱུང་། །ཆང་འཐུང་འུར་གོག་འཐག་པའི་སྔགས་འཆང་རྣམས། །བན་ལིང་རྔ་བརྡུང་དྲག་ཀྱང་ངལ་བའི་རྒྱུ། །ཞེས་པའི་དོན་ཐོག་ཏུ་ཁེལ་བར་བསམ་མོ། །འདར་དུ་ཕེབས་གདུལ་བྱ་རྟག་པར་འཛིན་པའི་དངོས་ཞེན་ལྡོག་སྟེ་གཏན་མདུན་སྒྲུབ་ལ་བརྩོན་པའི་སྙིང་སྟོབས་ཀྱི་གོ་བགོ་བ་དང་སྐལ་ལྡན་རྗེས་སུ་འཛིན་པའི་འཕྲིན་ལས་ཀྱི་སྒོ་འཕར་ཞིང་ཁམས་གཞན་དུ་འབྱེད་པར་དུས་བབས་ཀྱི་འཛིན་བྱེད་ཅེས་པ་མེ་ཕོ་བྱི་བའི་ལོ་སྨིན་དྲུག་ཟླ་བའི་དཀར་ཕྱོགས་ཀྱི་བཟང་པོ་དང་པོར་རྟ་བདུན་རྒྱལ་པོ་ནུབ་རིའི་ཕག་ཏུ་ཞུགས་པར་ཉེ་བའི་ཚེ་ཞིང་བརྗེ་བའི་རྣམ་པ་བསྟན་པ་ན་རྗེ་འདི་ཉིད་ཀྱིས་གསོལ་འདེབས་ཤུགས་དྲག་པོར་མཛད་པས་སྤྱན་ཧུར་གྱིས་གཟིགས་ནས་རྡོ་རྗེ་འཆང་ཚར་པ་ཆོས་རྗེ་དང་ཐམས་ཅད་མཁྱེན་པ་གཉིས་ཕེབས་ནས་དེ་ལ་རིག་པ་ཞུགས་པ་བཞིན་དུ་བདེ་ཆམ་མེར་ཡོད་པ་དེ་སད་པ་ཞིག་བྱུང་། སྔར་ཁྱེད་ཀྱིས་ནན་ཏན་མཛད་པར་བརྟེན་དེ་ཙམ་བསྡད་ཡོད་ད་ཆ་དེ་འདྲ་མཛད་ནས་ཅི་གནང་ཁྱེད་རང་ལ་བལྟོས་བཅས་ཐམས་ཅད་རྗེས་སུ་འཛིན་ཞེས་ཞལ་གྱིས་འཆེས་པ་ནི། ཚར་ཆེན་གྱི་གསུང་མགུར་ལས། ལར་ང་རང་ཐ་མལ་སྙོམས་ལས་ཅན། །ཚེ་འདི་ཕྱི་གང་འགྲོའི་གདེངས་མེད་ཀྱང་། །མི་ང་ལ་བློ་གཏད་བྱས་པ་ཀུན། །ཕ་ཀུན་སྤངས་ཆོས་རྗེས་མཁའ་དབྱིངས་ནས། །དུས་རྟག་ཏུ་སྐྱོང་
པའི་བཀའ་བཞེས་ཡོད། །ཅེས་གསུངས་པའི་དོན་དང་མཐུན་པར་སྣང་། །གཟུགས་སྐུ་ཆོས་དབྱིངས་སུ་བསྡུས་སྐབས་བྱམས་པའང་གླིང་གསེབ་ཏུ་སོང་བ་དང་འགྲིག་པའི་རྗེ་ཉིད་ལས་ཕྱག་གཡོག་གཞན་སུའང་མེད་པས་མདོར་ཕེབས་ཏེ་སྒྲུབ་རྙིང་སློབ་དཔོན་འཇམ་དབྱངས་རྒྱལ་མཚན་རྡོ་རྗེ་འཆང་གི་སྐུ་བེར་གྱི་གོང་བ་ལ་འདྲ་སྐུ་འདྲི་ཡིན་ཡོད་སྣང་བར་སྐོར་ཅིག་ལས་མཚམས་ཞོག་ལ་བྱམས་པ་བོས་ཤོག་གསུང་། དེའང་དམ་པ་གང་དེ། མ་ཕམ་པས། །དེ་བཞིན་འཁོར་བ་ཇི་སྲིད་པར། །ལས་ནི་རྒྱུན་མི་འཆད་པར་འདོད། །ཅེས་གསུངས་པ་དང་མཐུན་པར་དམ་པའི་ཆོས་ཀྱི་འཕྲིན་ལས་ནམ་མཁའི་མཐའ་ལྟར་མཉམ་མོད། མཆོད་སྦྱིན་བརྒྱ་ཕྲག་གཅིག་གིས་ལྷའི་བདག་པོར་འགྱུར་བ་བཞིན་ཚེ་རབས་གཞན་དུ་སྦྱིན་ཤུགས་ཀྱི་འབྲས་བུ་ཚེ་འདིར་སྨིན་པར་བླུན་པོ་རྣམས་ཀྱི་ངོར་འཕྲིན་ལས་འཕྲིན་ལས་ཞེས་འབོད་པའི་ཆེན་པོར་གྲགས་པ་རྣམས་དང་མཚུངས་པའི་འབྱོར་བ་མི་མངའ་ནའང་བླ་ཆུང་འགམ་ཁུམས་འཇུགས་པའི་ངང་ཚུལ་ཅན་ཅི་རིགས་ལྟར་བྲེ་གསོག་ཕུལ་གསོག་མཛད་ན་དེ་འདྲར་མ་བལྟོས་པའི་དད་འབུལ་ལ་བརྟེན་ཕྱག་རྫས་འཁྱིལ་ཡོང་ཚོད་དུ་སྣང་ཡང་། ཐམས་ཅད་མཁྱེན་པའི་གསུང་མགུར་དུ། ནོར་ལོངས་སྤྱོད་འབད་པས་བསགས་ན་ཡང་། །ཚེ་ཕྱི་མར་མི་ཕན་ལུས་སེམས་སྡུག །དེ་བསགས་པ་སྙིང་པོ་མ་མཆིས་ཀྱི། །ད་ཟས་ནོར་ཅི་ཡོད་གང་དགར་ཞོག །ཅེས་སྙིང་པོ་མེད་པ་དང་། ཆོས་ཐམས་ཅད་སྒྱུ་མ་ལྟ་བུར་གཟིགས་པས་འདོད་སྲེད་ཀྱི་འཆིང་བ་དང་བྲལ་ཏེ་དཀོན་ཅོག་གི་མཆོད་པ་དང་དབུལ་ཕོངས་ལ་གཏོང་བ་སོགས་འཕྲལ་དག་མཛད་པའི་གཤིས། ཡབ་སྲས་གཉིས་ཀར་གནང་བདེའི་བདོག་
པའི་མཐུ་དམན་པས་དགོངས་རྫོགས་ཀྱི་མཐུན་རྐྱེན་སྒྲུབ་རྩོལ་ཁྱད་ཞག་བདུན་པར་གསང་བའི་ཚུལ་མཛད། ཞག་གཅིག་གི་བར་འོད་གསལ་གྱི་ངང་དུ་མཉམ་པར་བཞག་ནས་མཁའ་སྤྱོད་རྡོ་རྗེ་བཙུན་མོའི་ཞིང་དུ་གཤེགས་པའི་གདུང་ཡིད་བཞིན་གྱི་ནོར་བུ་གདན་གསུམ་ཚང་བའི་རྡོ་རྗེ་དཔོན་དགྱེས་མཛད་རྡོ་རྗེའི་དཀྱིལ་འཁོར་གྱི་གཙོ་བོར་གྱུར་པར། དངོས་སུ་བཤམས་པ་དང་ཡིད་ཀྱིས་སྤྲུལ་པའི་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་ཀུན་ཏུ་བཟང་པོའི་རྣམ་པར་ཐར་པ་བཞིན་ནམ་མཁའ་མཛོད་ཀྱི་སྒོ་འཕར་ཡོངས་སུ་ཕྱེ་སྟེ་བསོད་ནམས་ཀྱི་ཚོགས་རླབས་པོ་ཆེ་བསྐྲུན་པའི་མཆོད་པ་སྣ་ལྔ་བརྒྱ་རྩ་ཚར་རེ་ཉིན་ཞག་རེར་བརྗེ་དགོས་ལ་གྲོགས་གཞན་མེད་པས་བླ་མ་འཇམ་དབྱངས་རྒྱལ་མཚན་གཉིད་ལོག་ལོང་མེད་པ་ལྟ་བུ་བྱུང་སྐད། གྲང་མོ་ཆེར་ཀྱེ་རྡོར་མན་ངག་ལུགས་དང་རྡོ་རྗེ་འཇིགས་བྱེད། འདར་བསམ་གྲུབ་དགོན་གསར་བས་ཀུན་རིག །མང་མཁར་ཆ་ལུང་པས་པདྨ་ཡང་གསང་ཁྲོས་པ། ཤིང་མངས་པས་དཔལ་མོ་ལུགས་ཀྱི་ཐུགས་རྗེ་ཆེན་པོ་རྣམས་ཀྱི་ཆོག་གྲྭ་ཞག་བདུན་གྱི་བར་བཙུགས། གནས་དེ་གར་དགེ་འདུན་འདུས་པའི་སེར་ཚོགས་ཀྱི་གྲལ་དབུར་ཡོངས་རྫོགས་གནས་ལྔ་རིག་པའི་པཎྜི་ཏ་མཁན་ཆེན་ངག་དབང་ཆོས་གྲགས་གདན་དྲངས་པའི་མང་ཇ། འབུལ་འགྱེད། ཚ་ར་སོགས་ཀྱིས་བསྙེན་བཀུར། ཉེ་སྐོར་ཕུ་མདའ་བར་གསུམ་གྱི་སྐྱེ་བོའི་ཚོགས་ལ་རྩམ་ནས་སྣམ་རས་ཟངས་ལྕགས་ཁྲོ་ཇ་མར་རྟ་དྲེལ་གྱིས་མཚོན་པའི་ཟང་ཟིང་གི་བདོག་པས་ཚིམ་པར་མཛད། ཧོར་ཟླ་བཅུ་གཉིས་པའི་ཚེས་བརྒྱད་ཀྱི་མཚན་མོའི་ཆར་ཀྱེ་རྡོར་མན་ངག་ལུགས་ཀྱི་དཀྱིལ་འཁོར་ཞལ་ཕྱེ་ནས་རྗེ་བཙུན་ཉིད་ཀྱིས་ཕྱག་དར་ཏེ་སྐུ་གདུང་རིན་
པོ་ཆེ་དཀྱིལ་འཁོར་གྱི་གཙོ་བོ་དང་ཐ་མ་དད་པར་མཆོད་པའི་ཚུལ་དུ་ཞུགས་སུ་ཕུལ་བའི་ཚེ་ཡེ་ཤེས་ཀྱི་མེ་རང་འབར་ཞིང་སང་ཉིན་ལྷ་རྣམས་ཀྱིས་མཆོད་པའི་ཕྱིར་མེ་ཏོག་གི་ཆར་དང་འཇའ་ཚོན་སྣ་ལྔའི་གུར་ཁྱིམ་ཟ་འོག་རིས་སུ་ཕུབ་པ་སོགས་ངོ་མཚར་བའི་ཆོ་འཕྲུལ་བསམ་གྱིས་མི་ཁྱབ་པར་མཆིས། དེ་ནས་གདན་ས་ཆེན་པོ་དཔལ་ལྡན་ས་སྐྱར་ཕེབས་ཏེ་བཞི་ཐོག་ཏུ་ཁྲི་རིན་པོ་ཆེ་འཇམ་མགོན་གྲུབ་པའི་དཔའ་བོ་ངག་དབང་ཀུན་དགའ་བསོད་ནམས་བཀྲ་ཤིས་གྲགས་པ་རྒྱལ་མཚན་དཔལ་བཟང་པོར་ཐུགས་དམ་འདོགས་རྟེན། ཆོས་དུང་དཀར་པོ་རྒྱང་གྲགས་བཏང་བའི་དགེ་འདུན་ཚོགས་ཆེན་ལ་མང་འགྱེད། ལྷ་ཁང་ཚོར་མཆོད་པ་སྙན་ཤལ་བཟབས་རྒྱས་དང་བཅས་རྡོ་རྗེ་སློབ་དཔོན་དཔལ་ལྡན་བླ་མ་དམ་པ་བསྟན་འགྲོའི་ཕན་བདེ་རླབས་པོ་ཆེ་བསྐྲུན་པར་མཛད་བཞེད་ཀྱི་སྨོན་ལམ་གྱི་རྒྱས་འདེབས། མགོན་ཁང་རྣམས་སུ་མཆོད་གཏོར་བསྐང་བཤགས་བསྟོད་འཕྲིན་རྒྱས་པར་གནང་བའི་དམ་བསྒྲགས་ཤིང་ཁྱད་པར་བས་འབག་ནག་པོ་འཕུར་ཤེས་ཀྱི་དབུ་དཔྲལ་ནས་ཟིལ་པ་ཁྲོམ་ཁྲོམ་བྱུང་བ་ཇེ་འཕེལ་དུ་སོང་བ་ཤངས་རྩེར་བབས་པ་ཞལ་དུ་མཆོད་ཅིང་སྐུ་འཁོར་བ་བྱམས་པ། མཁན་ཆེན་གཞོན་ནུ་བློ་གྲོས་ཀྱི་སྣག་དབོན་ནང་སོ་དགེ་འདུན་རྒྱ་མཚོ། མཆོད་དཔོན་གསུམ་ལ་གནང་བ་ཟས་གང་དང་ཡང་མི་འདྲ་བའི་ཞིམ་ལ་བཅུད་ཆེ་བ་དྲི་བཟང་ཆགས་པ་བྱུང་ཞིང་དེའི་ཤར་གཡུ་ཐོག་ཏུ་བཞུགས་པའི་མགོན་པོའི་སྐུ་ལས་བདུད་རྩིའི་རྒྱུན་གོང་དང་འདྲ། ས་བཟང་སྐུ་འབུམ་མཆོད་ཁང་ན་མགོན་པོའི་སྐུ་ཐལ་བའི་རྡུལ་གྱིས་ཆེར་གོས་པའི་ལྟ་སྣང་མི་སྤྲོ་བ་ཞིག་ལ་སྙན་དར་འབུལ་གྲབས་མཛད་པའི་ཚེ་སྐུ་འཁོར་
བ་འདྲས་འདི་ལ་ཕུལ་ནས་ཅི་གནང་ཞུས་པར་ཡེ་ཤེས་པ་གང་ན་བཞུགས་མི་ཤེས་ཞེས་ལྷ་གོས་སྒྲོན་པ་དང་དུས་མཉམ་དུ་བདུད་རྩི་བབས་པ་གསུམ་ག་མཆོད་དཔོན་འཇམ་དབྱངས་རྒྱལ་མཚན་གྱིས་ཐོག་མར་ངོས་ཟིན། བདུད་རྩི་བབས་པར་བློ་ཆུང་བ་རྣམས་ཡ་མཚན་གྱི་གནས་སུ་བྱེད་ནའང་སྐུ་ཚེ་མང་པོར་ཆོས་སྐྱོང་བྲན་དུ་འཁོལ་བར་མ་ཟད་གསང་རྟེན་ལུས་ལ་སྦ་བའི་རྣལ་འབྱོར་དང་ལྡན་ན་དམ་ཅན་གྲིབ་མ་བཞིན་འཁོར་བར་དཔལ་བརྩེ་བ་ཆེན་པོ་ལ་དགག་མཁན་མེད་པའི་དབུ་སྙུང་བཞེས་པར་དཔགས་ན་མཚར་འཛིན་གྱི་ཆེན་པོར་མི་སེམས་སོ། ། ཁའུ་སྐྱེས་ལྷས་སུ་ཕེབས་སྐབས་དགོན་པའི་འོག་ཙམ་དུ་ཆིབས་གཤོལ་ནས་སྤྱན་ནམ་མཁའ་ལ་ཧུར་རེར་གཟིགས་ཏེ་རྒྱང་ཙམ་བཞུགས་པ་འཕྲལ་དུ་འདི་ཡིན་མི་གསུང་ཡང་རྗེས་སུ་རྡོ་རིང་རིན་པོ་ཆེ་མན་ཆད་ཀྱི་བླ་མ་རྣམས་ཕེབས་དུས་གཉན་མགོན་བྲམ་ཟེའི་གཟུགས་ཀྱི་བསུ་བ་རེ་ངེས་པར་བྱུང་འདུག་ཅེས་དྲུང་དུ་འཁོད་པར་བཀའ་སྩལ་བ་ལ་དཔགས་ན་དེ་དུས་གཟིགས་སྣང་ཁྱད་པར་ཅན་བྱུང་བ་གོར་མ་ཆག །སྐྱེས་ལྷས་ཀྱི་དགེ་འདུན་རྣམས་ལ་སྒེར་དུ་མང་ཇ་མི་རེར་ཞྭ་འགྱེད། རྟེན་གྱི་ཚོགས་ལ་མཆོད་པ་སྙན་ཤལ་བསྐང་བ་འཕྲིན་བཅོལ་དམ་བསྒྲགས། ཞབས་དྲུང་བདག་ཆེན་རིན་པོ་ཆེ་མཇལ་ཞིང་དགྱེས་པའི་གསུང་གླེང་མང་དུ་སྩལ། བཀའ་ཆོས་ཀྱི་སྙན་གསན་གནང་བས་འབྲུམ་ནད་ལས་གྲོལ་ནས་ཡུན་རིང་ཙམ་སོང་རུང་དཔོན་ཚང་རྣམས་ཀྱིས་སྐོར་ཅིག་དཔེ་ལྟ་སོགས་མི་འགབ་ཟེར་བས་ད་ལམ་མི་ཐུབ་འདུག་སླར་ལོང་དང་བསྟུན་པའི་བྱེད་ཅེས་དགྱེས་པའི་ཞལ་གྱིས་བཞེས། ཞ་ལུར་མང་ཇ་ཚ་ར་དང་། ངོར་ཨེ་
ཝཾ་ཆོས་ལྡན་གཙོ་བོར་གྱུར་པའི་ས་ལུགས་དང་། གཞན་ཡང་གྲུབ་མཐའ་རིས་མེད་རགས་བསྡུས་དབུས་གཙང་གི་སྡེ་དགོན་མང་དག་ལ་མང་ཇ་བསྔོ་རྟེན་རྒྱ་ཆེར་སྤེལ། རྗེ་རྡོ་རྗེ་འཆང་ཞི་བའི་དབྱིངས་སུ་གཞོལ་བར་ཉེ་ཚེ་སྐུ་ཅུང་ཟད་ཧྲེབ་པའི་ཚུལ་བསྟན་པར་ཉིན་མཚན་ཀུན་ཏུ་སྐྱོ་ངལ་མེད་པར་གནང་བས་ཐུགས་དམ་ཆག་མེད་རྣམས་ལ་ཐང་ལྷོད་ཅི་རིགས་བྱུང་བར་བརྟེན་མེ་གླང་དབུས་སུ་ཕེབས་ཞོར་ངོར་ཨེ་ཝཾ་ཆོས་ལྡན་དུ་མཁན་ཆེན་ཐར་པ་རྩེ་བ་ནམ་མཁའ་སངས་རྒྱས་ལ་ལམ་དུས་སོགས་ཆག་མེད་གསོ་བ་མཛད། རིམ་གྱིས་ཡར་ཀླུངས་བཀྲ་ཤིས་ཆོས་སྡེར་ཕེབས་ནས་རྩེ་ཚོགས། རྩེས་དང་ས་དགེ །དཀོན་གཉེར་ཕྱི་ནང་། རི་བོ་ཆོས་གླིང་། བཀྲ་ཤིས་ཆོས་སྡེ། ལམ་རིམ། བཀྲ་ཤིས་བདེ་ཆེན། རས་ཆུང་ཕུག་སོགས་ཀྱི་སེར་ཚོགས་གྲལ་དབུར་ཐུབ་བསྟན་རྡོ་རྗེ་བྲག་ནས་དུས་གསུམ་སངས་རྒྱས་དཔལ་ཨོ་རྒྱན་ཆེན་པོའི་རྒྱལ་ཚབ་བྱང་པ་ངག་དབང་རིགས་འཛིན་རྡོ་རྗེ་ཆོས་རྒྱལ་བསྟན་པའི་རྒྱལ་མཚན་དཔལ་བཟང་པོ་སྤྱན་དྲངས་འབུལ་འགྱེད་མང་ཇ་ཚ་ར་ལ་བརྟེན་པའི་རྙེད་བཀུར་ཡང་དག་བསྒྲུབས། རིགས་འཛིན་ངག་གི་དབང་པོའི་དྲུང་དུ་རྡོ་རྗེ་དྲག་པོ་རྩལ་གྱི་བྱིན་རླབས་ཐུགས་དབང་། ལྕགས་སྡོང་མ་དང་ཚེ་གུར་སྦྲགས་མ། ཉང་གི་དྲག་པོ་མེའི་སྤུ་གྲི་རྣམས་ཀྱི་དབང་། རིག་འཛིན་ཆེན་པོའི་འཁོར་བ་དབྱིངས་སྒྲོལ་གྱི་ཆོས་སྐོར། གུ་རུ་ཡོན་ཏན་གཏེར་མཛོད་ཀྱི་དབང་ལུང་། སྔགས་སྡེབས་སྙིང་གཟེར་ནག་པོ་དང་གཏེར་སྟོན་བརྒྱ་རྩའི་གསོལ་འདེབས་ཀྱི་ལུང་། གྲུ་གུ་ཡང་ཝཾ་གི་འཇོམས་བྱེད་ཉི་ཟླ་ནག་པོའི་ཆོས་སྐོར། པདྨ་གླིང་པའི་གུར་ཕུར་ཞབས་ཅན་དང་རཀྴའི་ཞལ།
གཟི་ལྡན་དབང་ཕྱུག་གི་སྒྲུབ་ཐབས། གདོང་བཞི་པའི་བསྙེན་སྒྲུབ་ལས་གསུམ་གྱི་ལུང་སོགས་སྔ་ཕྱིར་དམ་པའི་ཆོས་ཀྱི་བཀའ་དྲིན་མང་དུ་གསན་པར་གནང་། དགོངས་པ་རིན་པོ་ཆེ་ཆོས་ཀྱི་དབྱིངས་སུ་རྫོགས་པ་དང་ཕྱི་རབས་གདུལ་བྱ་རྣམས་ཀྱི་ལེགས་བྱས་རྒྱ་མཚོའི་ཞིང་གི་ཆེད་དུ་ཨེ་ནས་སྤྲུལ་སྐུ་མཁས་པ་ཆོས་འཕེལ་ཅན་ལྔ་བཀུག་སྟེ་བཟོ་གྲ་བཙུགས་ཤིང་རྡོ་རྗེ་འཆང་གི་སྐུ་ཚབ་མགུལ་པ་ཡན་རྗེ་བླ་མ་དམ་པས་ཕྱག་བཟོ་གནང་བས་ཞལ་ཁྱིམ་མངོན་སུམ་ལྟ་བུ་མཐོང་ཐོས་དྲན་དང་རེག་པས་རྣམ་པར་གྲོལ་བའི་བྱིན་རླབས་ཀྱི་གཟི་བྱིན་འོད་དུ་འབར་བ་གཙོ་བོར་བཞུགས་པའི་མཐའ་སྐོར་དུ་སངས་རྒྱས་རྡོ་རྗེ་འཆང་། རྡོ་རྗེ་བདག་མེད་མ། གྲུབ་ཆེན་བི་རཱུ་པ། བརྩེ་ཆེན་སྙིང་པོའི་ཞབས། སློབ་དཔོན་རིན་པོ་ཆེ། རྗེ་བཙུན་རིན་པོ་ཆེ། ཆོས་རྗེ་པཎྜི་ཏ། ཆོས་ཀྱི་རྒྱལ་པོ་འཕགས་པ། ཚོགས་སྒོམ་རིན་པོ་ཆེ། ཉན་ཆེན་བསོད་ནམས་བརྟན་པ། རྒྱལ་བ་བྲག་ཕུག་པ། དཔལ་ལྡན་བླ་མ་དམ་པ། ཆོས་རྗེ་དཔལ་ལྡན་ཚུལ་ཁྲིམས། གྲུབ་ཆེན་བུདྡྷ་ཤྲཱི། ངོར་ཆེན་རྡོ་རྗེ་འཆང་། མུས་ཆེན་འཁོར་ལོ་སྡོམ་པ། བདག་ཆེན་རྡོ་རྗེ་འཆང་། རྗེ་བཙུན་ཁའུ་པ་ཆེན་པོ། ཚར་ཆེན་ཆོས་ཀྱི་རྒྱལ་པོ། ཐམས་ཅད་མཁྱེན་པ་མཁྱེན་བརྩེའི་དབང་ཕྱུག །མཚུངས་མེད་གཞོན་ནུ་བློ་གྲོས་མཁན་ཆེན་བསླབ་གསུམ་རྒྱལ་མཚན་བར་གྱི་ལམ་ཟབ་བརྒྱུད་པའི་སྣང་བརྙན་གྱི་ཞལ་ཁྱིམ་བཟོ་བོས་དཔེ་མ་ལོན་པ་མི་འཕྱུགས་པའི་ཁྱད་ནས་ཕྱག་སོར་གྱིས་བསྐྲུན་པ་དང་བཅས་པར་གནས་ཆེན་དུ་མའི་ས་སྣ་རྡོ་སྣ། དམ་རྫས་ཁྱད་པར་ཅན། སྨན་སྣ། དར་སྣ་སོགས་བསྲེས་པའི་སྐུ་རྒྱུ་ལ་བྱད་དབྱིབས་བགྲེས་གཞོན་བཞུགས་སྟངས་ན་བཟའ་ཁ་དོག་རྣམས་དཔེ་ཁུངས་
བཙུན་དང་གསུང་རྒྱུན་ལས་བྱུང་བ་ལྟར་ལ་དེ་བཞིན་གཤེགས་པའི་འཕེལ་གདུང་གིས་གཙོས་ཡུངས་འབྲུ་ལྟ་བུའི་རིང་བསྲེལ། བླ་མ་གོང་མ་དེ་དག་གིས་མཚོན་པའི་དམ་པ་དུ་མའི་སྐུ་བལ་དང་སྐུ་གདུང་གི་རིང་བསྲེལ། རྒྱུད་སྡེ་རྣམ་བཞིའི་གཟུངས་ཆོས་སྐུའི་རིང་བསྲེལ་གནོད་སྦྱིན་འཁོར་ལོ་སོགས་གཟུངས་བཞུགས་ཀྱི་རིམ་པ་རྟེན་བཞེངས་སོ་བྱས་སོ་བའི་འཇིག་རྟེན་ཆོས་བརྒྱད་ལྷུར་ལེན་པ་དང་མི་འདྲ་བར་དམ་པའི་ཕྱག་བཞེས་འཁྲུལ་པ་མེད་པར་ཐུགས་རུ་ཤིན་ཏུ་ང་བ་རྣམས་ཀྱི་བཞུགས་ཁྲི་ན་བཟའ། མདུན་ལྕོག །ཅང་ཏེ། རྡོར་དྲིལ། ནང་མཆོད་ཀ་པཱ་ལ། བུམ་པ། ཞལ་དཀར། སྤྱི་བླུགས། བཟེད་ཞལ་སོགས་རུང་མཐུན་མཁོ་བའི་ཡོ་བྱད་རྣམས་སླ་ཆོས་སུ་མ་སོང་བའི་ལེགས་པར་བསྒྲིག་པ་གནང་སྟེ་བཀྲ་ཤིས་ཆོས་ཀྱི་འདུས་གྲྭ་ཆེན་པོར་ལམ་ཟབ་བླ་མ་ལྷ་ཁང་ངོ་མཚར་བ་གྲུབ་པར་གཉིས་སུ་མེད་པ་དཔལ་དགྱེས་མཛད་རྡོ་རྗེ་མན་ངག་ལུགས་ལྷ་དགུའི་དཀྱིལ་འཁོར་དང་རྗེས་སུ་འབྲེལ་བའི་རབ་གནས་ཉིན་གསུམ་མའི་སྒོ་ནས་འོག་མིན་ཞིང་ཁམས་རྒྱ་མཚོ་ནས་ཡེ་ཤེས་པ་གངྒཱའི་ཀླུང་གིས་བགྲང་བར་མི་ནུས་པ་སྤྱན་དྲངས་ཏེ་དམ་ཚིག་པ་དང་རོ་གཅིག་ཏུ་བརླབས་པ་དེའི་ཚེ་འཆི་མེད་ཀྱི་ལམ་ཀུན་གུར་གྱི་དབྱིབས་ལྟ་བུའི་འཇའ་རིས་སྣ་ལྔ་བཀྲག་ཏུ་འཚེར་ཞིང་གསོལ་གདབ་སེམས་བསྐྱེད་ཀྱི་དུས་མེ་ཏོག་གི་ཆར་བབས་པ་ཐམས་ཅད་ཀྱི་མངོན་སུམ་པའི་སྤྱོད་ཡུལ་དུ་གྱུར། བཟོ་བོ་རྣམས་ཀྱང་ཡོན་ཏན་གྱིས་ཚིམ་པ་སོགས་ལྷ་མཆོད་མི་མཆོད་རྒྱས་པར་མཛད། ས་སྟག་ཧོར་ཟླ་བཅུ་གཅིག་པའི་དམར་ཆེན་གཏོར་བཟློག་གི་རྡོ་རྗེ་སློབ་དཔོན་དུ་ཕེབས་སྐབས་དགེ་སློང་ཡེ་ཤེས་བློ་གྲོས་ཀྱི་མཐོང་སྣང་ལ། གསོལ་ལྕོག་གི་ཁར་
སྐྲ་ལོ་དང་ཀོང་རྣ་བཏགས་པའི་མགོ་ཞིག་མི་ནག་པོ་ཞིག་གིས་ཁྱེར་ནས་བཞག་སོང་བ་རིང་པོར་མ་ལོན་པར་སྡེ་པའི་ནང་ཟན་ཆོས་སྡེར་ཤིན་ཏུ་བརྣག་པ། ཁྱབ་འཇུག་གཟའི་གདོང་ཐུག་གིས་སྐད་ཅིག་ལ་འཇིག་རྟེན་ཕ་རོལ་ཏུ་སོང་བའི་མི་ནག་པོ་དེ་ནི་འཆི་བདག་གཤིན་རྗེའི་རྒྱལ་པོ་པུ་ཏྲ་ནག་པོར་ངེས་སོ། །དྭགས་པོ་ཕྱོགས་སུ་བཀག་པོའི་ཟི་བུན་ལ་བརྟེན་པའི་འཁྲུག་ཟིང་ཆེར་སོང་བ་གྲ་དོལ་ཡར་ཀླུངས་ལྷོ་བྱང་གི་དམག་དཔོན་བཀྲས་སྒང་ནས་ཀྱིས་བྱས་ནས་ཕྱིན་སྐབས་སྡེ་པ་བཀྲ་ཤིས་རྩེ་བའི་སྐུ་རིམ་དུ་འཇམ་དཔལ་གཤིན་རྗེ་དམར་པོ་རླུང་སྒྲུབ་ཀྱི་དགྲ་མནན་གྱི་ལས་སྦྱོར་གཞིས་ཀར་གནང་བའི་ཚེ་གཏོར་མ་ལས་ཁྲག་རྒྱུན་མང་དུ་འཛགས་པས་ལྕགས་སླང་ཁེངས་ཤིང་མཆོད་དཔོན་འཇམ་དབྱངས་རྒྱལ་མཚན་གྱི་རྨི་ལམ་དུ་ས་དོང་རིང་པོར་སྲོག་ཆགས་མང་པོ་འཇུག་པ་དང་འགྲོ་བ་རྨིས་ཚུལ་ཞུས་པ་ན་ལས་སྦྱོར་འདི་རིགས་ལ་རྨིི་ལྟས་དེ་བཞིན་འོང་གསུང་། ནུབ་ཅིག་སྟོབ་པའི་གཏོར་མ་ཕུལ་དུས་མཆོད་དཔོན་གྱི་རྒྱབ་དང་མདུན་སྟེང་དུ་གཟུགས་མི་མཐོང་བའི་ཧབ་ཤ །ཅག་ཅག །ཤབ་བེ་ཤོབ་བེ་སོགས་ཀྱི་སྒྲ་ཐོས་པས་འཇིགས་ཞུམ་ཞུམ་བྱེད་པ་སོགས་ལྟས་ལེགས་པ། བྲག་ཁ་བའི་དམག་དཔོན་སྐྱེར་པོ་གོང་འོག་གིས་མཚོན་ཤོར་ཐལ་ཆེ་བ་བྱུང་ཡང་བཀྲ་ཤིས་རྩེ་བ་དཔོན་གཡོག་ཉེས་སྐྱོན་མེད་པའི་དགེ་མཚན་དུ་གྱུར། རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོ་རྭ་འབྲོ་ཤོང་གསུམ་གྱི་འགྱུར་དང་ཇོ་ཞལ་སོགས་མཁས་པ་དུ་མའི་བཞེད་སྲོལ་མང་བའི་ནང་ནས་གཙོ་བོར་གྱུར་པ་རྩོད་དུས་ཀྱི་རྒྱལ་བ་གཉིས་པ་ཐམས་ཅད་མཁྱེན་པ་བུ་སྟོན་རིན་པོ་ཆེའི་ཡིག་ཆ་སོར་བཞག་གི་དཀྱིལ་འཁོར་སྒྲུབ་མཆོད་འཛུགས་པར་བཞེད་དེ་ས་ཡོས་ཧོར་ཟླ་དང་པོར་དཔེ་རྣམས་
གྲྭ་པ་ཚོར་བཀྲམ་པའི་བློ་འཛིན་བྱེད་དུ་བཅུག །ཞ་ལུ་ནས་བླ་ཆེན་མཁྱེན་རབ་པ་བོས་པའི་དཔོན་སློབ་ཚང་མས་གར་ཐིག་སྦྱོང་བསྟར་གནང་། རྗེས་སོར་སློབ་དཔོན་འཕེལ་ཁྱད་ནས་དེང་སང་གི་སྒྲུབ་རྙིང་བླ་མ་འཇམ་དབྱངས་རྒྱལ་མཚན། གཟིམས་ཁང་ཤར་བླ་མ་དཔལ་ལྡན་རྒྱལ་མཚན། ནང་སོ་ཚེ་འཕེལ་གསུམ་ཡང་བསྐྱར་སྦྱོང་བདར་བྱེད་དུ་འཇུག་པར་མཛད། གར་པ་ཉི་ཤུའི་གར་གོས། པང་ཁེབས། རུས་རྒྱན། སྐྲ་ཞྭ། རྩེ་ཕྲན། རྡོ་དྲིལ། བསྡུས་རྒྱུད་ཀྱི་བཤད་ཁུངས་དང་འབྲེལ་བའི་རྣམ་བུམ་ཆེ་ལེགས་བཅུ་རྣམས་ཐུགས་རྩོལ་བ་ཆེན་པོས་ལེགས་པར་བསྒྲིག་པར་གནང་སྟེ་གྲྭ་པ་རྣམས་སྐུ་གསུང་ཐུགས་ཡོངས་སུ་རྫོགས་པའི་དཀྱིལ་འཁོར་དུ་སྨིན་པར་མཛད་ནས་ནམ་མཐོངས་ཟླ་བ་ཕྱི་མ་སྣོན་གྱིས་ཉ་བའི་དུས་ཚེས་གཟའ་སྐར་སྦྱོར་བྱེད་བཟང་པོར་བཙུགས་པའི་ས་གར་གྱི་སྐབས་རྗེ་ཉིད་གར་དཔོན་དུ་ཕེབས་པའི་སྐུ་རྒྱབ་ཀྱི་བར་སྣང་ལ་ཡི་གེ་དབུ་ཅན་གྱི་ཚིགས་བཅད་འདུག་པ་ཞ་ལུ་བླ་ཆེན་གྱིས་མཐོང་ཞིང་བློར་ཟིན་ནའང་རྗེས་སུ་མ་དྲན། སྦྱིན་སྲེག་གནང་བའི་སར་མཆོད་གར་བ་རྣམས་འགྲོས་དང་བཅས་འབྱོར་བ་དང་དུས་མཉམ་དུ་ནམ་མཁའ་གཡའ་དག་པ་ལས་མེ་ཏོག་གི་ཆར་བབས། ཞག་སྦྲེལ་གྱི་བར་དཔལ་ལྡན་རྒྱུ་སྐར་གྱི་འཁོར་ལོའི་གཙོ་བོར་ཁྱབ་བདག་བླ་མ་དབང་ཕྱུག་རབ་བརྟན་བཞུགས་པར་སྒྲུབ་མཆོད་ཀྱི་དགའ་སྟོན་ཆ་བསགས་ཀྱི་གྲོང་ཁྱེར་ལ་འགྲན་པར་གྱུར། འདི་ལོ་གྲབས་གཤོམས་སྟབས་ཀྱིས་སྣོན་ཟླར་མཛད་ཀྱང་ལོ་ཕྱི་མ་ནས་ནག་ཟླར་བཙུགས་སོ། ། ཨེ་ནས་དཔོན་ཡིག་མཁས་པ་ཁ་ཤས་བཀུག་ནས་མཁན་ཆེན་ཐམས་ཅད་མཁྱེན་པ་ཚར་པ་ཆོས་རྗེའི་གསུང་
འབུམ་པོ་ཏི་བཞི། བཀྲ་ཤིས་རྩེའི་དཔོན་ས་དབང་འདུས་རྒྱལ་མོས་སྦྱིན་བདག་མཛད་དེ་འཇམ་དབྱངས་མཁྱེན་བརྩེའི་དབང་ཕྱུག་གི་གསུང་འབུམ་གསང་བསྒྲིགས་ཀྱི་གླེགས་བམ་གསུམ་དང་རྡོ་རྗེ་འཆང་དབང་ཕྱུག་རབ་བརྟན་གྱི་བཀའ་འབུམ་པུ་སྟི་ཀཿགཅིག་རྣམས་བསྟན་པ་རིན་པོ་ཆེའི་བཅས་སུ་དགོངས་ཏེ་བླ་མ་གོང་མ་རྣམས་ཀྱི་བཀའ་བསྡུའི་ཚུལ་དུ་ལེགས་པར་བསྒྲུབ་པར་གནང་ངོ་། །ཞིང་མང་སྐལ་ལྡན་དོན་ལ་དགྱེས་པའི་ཞལ། །འཛུམ་པའི་གཟུགས་བརྙན་སྡུད་ལ་ཉེར་གཞོལ་ཚེ། །གསོལ་བའི་རེ་སྐོངས་འཇའ་ལུས་རྡོ་རྗེའི་སྐུ། །གྲུབ་དེ་ལྷར་བཅས་འགྲོ་ལ་སྟོན་པ་བཞིན། །སྤུར་རྒྱལ་བདེ་འཕྲོག་ཆོམ་རྐུན་དུ་རུཥྐ། །སྡེ་དཔུང་མངོན་སྤྱོད་ལས་ཀྱིས་ཕྱེར་བཏགས་ནས། རྣམ་ཤེས་མི་བསྐྱོད་ཞིང་དུ་རབ་འཕངས་པས། །ཀུན་ལ་བརྩེ་ཡང་ཁྱད་པར་ཁྱོད་ཀྱི་གཉེན། །རྟག་བརྟན་གཡུང་དྲུང་ཆོས་སྐུ་མངོན་གྱུར་ཀྱང་། །རྟག་འཛིན་སྲིད་ཞེན་འཆིང་རྒྱ་ལས་གྲོལ་ཆེད། །རྟག་མིན་ཞིང་འདིར་མཛད་པའི་མཐའ་བཏུལ་ཡང་། །རྟག་ཏུ་ཕྱོགས་འདིའི་བསྟན་འགྲོར་གཅིག་ཏུ་བརྩེ། །འཆི་བ་འོད་གསལ་དོན་གྱི་ཧེ་བཛྲ། །སོ་སོར་སྣང་བའི་ཆོ་འཕྲུལ་ཐ་མི་དད། །འོག་མིན་ཞིང་ཁམས་ཞིང་གི་གཙོར་གཤེགས་པ། །ངོ་མཚར་མཆོད་སྤྲིན་སྤྲོ་ལ་ལྷ་རྣམས་བྲེལ། །གྲངས་མེད་འགྲོ་འདྲེན་སེམས་བསྐྱེད་དམ་བཅའི་ཁུར། །ནམ་ཡང་གཏོང་བའི་གོ་སྐབས་མི་སྲིད་མོད། །ཐུགས་རྗེ་བསྐུལ་བའི་ལེགས་བྱས་ཕུང་པོ་རུ། །སོང་ན་སྣོད་དུ་འཇིག་རྟེན་ཁམས་འདི་ཆུངས། །འོན་ཏེ་བསྟན་སྲུང་བྱེ་བའི་འཁོར་ལོས་སྒྱུར། །བྱིན་རླབས་མཛོད་སྤུའི་ཐིགས་ཕྲེང་གཟུགས་ཅན་དུ། །གྲུབ་ཚེ་བདུད་རྩིའི་བུམ་པ་ཆུ་གཏེར་ནས། །ལེན་པའི་ལྷ་རྣམས་བྱ་
དཀའི་འབྲས་བུར་ཟད། །སྔ་འགྱུར་བསྟན་པའི་བདག་པོར་མཁྱེན་བརྩེ་དང་། །ནུས་པས་དབང་སྒྱུར་སྔགས་འཆང་བྱང་པ་རྗེ། །ཉི་ཟླ་འོད་ཟེར་སྤྲུལ་པར་ཆོས་རྗེས་སུ། །འབྲངས་ཏེ་རིགས་ཀྱི་བདག་པོར་ཐོད་དུ་བཅིངས། །མཁས་གྲུབ་གཞན་གྱི་སྤྱོད་ཡུལ་མ་གྱུར་པ། །ས་སྐྱའི་བླ་ཆེན་ཁོ་ནའི་ཁྱད་པར་ཆོས། །ལམ་ཟབ་བཀའ་བབས་བརྒྱུད་པ་ནོར་བུའི་འཕྲེང་། །ངོ་མཚར་བཀོད་པའི་སྲད་བུར་གཅིག་ཏུ་རྒྱུས། །རྣམ་ཀུན་མཆོག་ལྡན་སྟོང་ཆེན་ཕྱག་རྒྱ་ཆེ། །ཨེ་ཝཾ་ཟུང་འཇུག་དང་པོའི་སངས་རྒྱས་ཀྱི། །འཁོར་ལོའི་མགོན་དུ་བཞེངས་པའི་རྡོ་རྗེའི་འགྲོས། །ཚངས་པའི་ཡུལ་ས་སོར་མོའི་རྡུལ་གྱིས་གནོན། །དུས་གསུམ་འདྲེན་པ་གསུང་གི་ཡང་སྙིང་དཔྱིད། །བརྗོད་པ་རྣམ་དག་ཀ་འཕྲེང་གླེགས་བམ་དུ། །ལེགས་བསྡུས་སྲིད་མཐར་རྨ་མེད་བསྟན་པའི་སྲོག །བཙུགས་པས་འོད་སྲུངས་བགྲེས་པོའི་སྙན་པ་ཕྲོགས། །རེ་ཞིག་གདན་སར་སྟན་ཆགས་མུར་གཉུག་མར་གནས་པ་དང་ཕྱོགས་འདུས་ཀྱི་གདུལ་བྱ་རྣམས་ལ་ཁམས་དང་དབང་པོར་འཚམ་པར་རྒྱུད་སྡེ་རྣམ་བཞིའི་དབང་ཁྲིད་རྗེས་གནང་རིགས་གཏད་ལུང་བློ་སྦྱོང་བའི་རིམ་པ་སོགས་ཐེག་ཆེན་ཐུན་མོང་བ་དང་ཁྱིམ་པ་དང་རབ་ཏུ་བྱུང་བ་རྣམས་སོ་སོའི་རིགས་ཀྱི་བསླབ་པ་ལ་འགོད་པས་མཚོན་རྣམ་པར་དཀར་པའི་འཕྲིན་ལས་དབྱར་མཚོ་ལྟར་འཕེལ་ནའང་དོན་མེད་ཟང་ཟིང་གི་འདུ་འཁོད་ཀྱི་དབང་དུ་ནམ་ཡང་མི་འགྲོ་བར་མཚན་བཅས་མཚན་མེད་ཀྱི་ཉམས་བཞེས་དུས་གཏོར་སོགས་ཐུགས་དམ་ཟབ་མོའི་རིམ་པ་བླ་ནས་བླར་འཕེལ་བཞིན་པའི་ངང་ནས་བཀའ་ཆོས་མང་དུ་གསན་པར་མ་ཟད་སྔར་ས་སྟག་དང་ཞ་ལུའི་ལོ་གསུམ་མའི་རྗེས་ཐུགས་རྩོལ་གནང་བ་འགའ་ཞིག་ཕྱོགས་གཅིག་
ཏུ་བཀོད་པར། ཀུན་མཁྱེན་ཡེ་བཟང་རྩེ་པས། དེ་ལྟར་འདུལ་བའི་བསྟན་པར་འཕེལ་འགྲིབ་ཆེར་བྱུང་མོད་ཀྱི་ཐེག་པ་ཆེན་པོ་གསང་སྔགས་ནི་དེང་སང་གི་བར་ནུབ་མ་མྱོང་ཞེས་གསུང་བ་གླང་དར་གྱི་བསྟན་པ་བསྣུབས་ཞེས་པའང་སོ་ཐར་ལ་དགོངས་པས། ཇི་སྐད་དུ། ཇི་ལྟར་འདི་ནི་ཤིང་རྩའི་གཙོ་བོར་སྟེ། །རྣམ་པར་འཕེལ་དང་ཀུན་འཛིན་གཉིས་ཀྱི་རྒྱུ། །དེ་བཞིན་དམ་ཆོས་ཚོགས་རྣམས་ཐམས་ཅད་ཀྱི། །གཞི་དང་རྩ་བ་འདུལ་བ་ཡིན་པར་གསུངས། །ཞེས་ཐུབ་པ་སངས་རྒྱས་བཅོམ་ལྡན་འདས་ཀྱི་རིང་ལུགས་འཇིག་རྟེན་གསུམ་གྱི་སྒྲོན་མེ་ཡོད་མེད་ཆོས་འདུལ་བ་ལ་རག་ལུས་ཤིང་ལྷག་ཏུ་དམ་པ་འདི་ཉིད་ཚུལ་ཁྲིམས་མིག་གི་འབྲས་བུ་ལྟར་གཅེས་པར་འཛིན་པས་སྔ་མོ་ནས་ལུང་སྡེ་བཞི་གསན་བཞེད་ཡོད་པ་ལྟར་སྣ་ནམ་པ་ཆེན་པོ་རྡོ་རྗེ་བདུད་འཇོམས་དང་སྲིད་གསུམ་འགྲན་ཟླ་བྲལ་བ་ཆོས་རྗེ་བླ་མ་དམ་པའི་རྣམ་འཕྲུལ་མཐུ་སྟོབས་ཀྱི་དབང་ཕྱུག་ཀུན་དགའ་རྣམ་རྒྱལ་གྱི་བསྟི་གནས་གོང་དཀར་རྡོ་རྗེ་གདན་གྱི་ཆོས་གྲྭ་ཆེན་པོའི་དཔལ་འབྱོར་གླིང་དུ་ཁུ་སྟོན་ངག་དབང་རྣམ་རྒྱལ་ལ་འདུལ་བ་ལུང་སྡེ་བཞི་དང་གཞན་ཡང་ཆོས་བཀའ་ཅི་རིགས་གསན་ཅིང་སྔ་ཕྱི་མང་པོར་ཉི་མ་གླིང་དུ་མཐུ་སྟོན་འཇིགས་མེད་དཔའ་བོའི་རིང་ལུགས་འཛིན་པ་ལ་འགྲན་ཟླ་མེད་པ་མཁས་བཙུན་གྲུབ་པའི་དབང་ཕྱུག་ཆེན་པོ་བླ་ཆེན་ཚུལ་ཁྲིམས་བཀྲ་ཤིས་པར་དུས་ཀྱི་འཁོར་ལོའི་སྐུ་གསུང་ཐུགས་ཡོངས་སུ་རྫོགས་པའི་དབང་། གོང་དཀར་བ་ལུགས་ཀྱི་ལམ་འབྲས་ཀྱི་འཁྲིད་ཡོངས་རྫོགས། བྱིན་རླབས་དང་ལུང་ཁ་ཤས། ལམ་སྐོར་ཕྱི་མའི་ལུང་། ཡི་གེ་མེད་པ་དང་མཆོད་རྟེན་དྲུང་ཐོབ་ཀྱི་བྱིན་རླབས། ཡོ་ག་ཁམས་གསུམ་རྣམ་རྒྱལ། དཔལ་མཆོག་རིགས་བསྡུས། རྡོར་དབྱིངས་ཕྲེང་བའི་
ནང་གི་བདུད་རྩི་གསུམ། ས་ཕུར་སྟོད་ལས་གསུམ་གྱི་དབང་། སྨད་ལས་དྲག་པོ་སྒྲོལ་བའི་རྗེས་གནང་པཎ་ཆེན་ཀུན་བཀྲས་པར་བདེ་ཆེན་རལ་གཅིག །རྡོ་རྗེ་རྩེ་མོ་རིགས་བསྡུས་ཀྱི་དབང་སོགས་ཟབ་ཆོས་རྒྱ་ཆེ་བས་ཐུགས་ཀྱི་བུམ་བཟང་ཡོངས་སུ་གང་བར་མཛད། སླར་ཡང་བཀྲ་ཤིས་ཆོས་སྡེར་ཕེབས། དེའང་བསྟན་པ་སྤྱི་དང་བྱེ་བྲག་རྗེ་བཙུན་ས་སྐྱ་བའི་བསྟན་པ་དང་སྟོན་པ་ལས་གཞན་དུ་མི་འཚོལ་བའི་ཐུགས་ཀྱི་དམ་བཅའ་བརྟན་པོ། ཚར་ཆེན་ཆོས་ཀྱི་རྒྱལ་པོའི་ལམ་ཡིག་ཏུ། རྗེ་བཙུན་རྡོ་རིང་པ་ཆེན་པོ་དང་མཇལ་ནས་གསུང་ངག་རིན་པོ་ཆེ་ཐོབ་པ་མན་གཞན་བླ་མ་དང་གདམས་ངག་གང་ལའང་བྱང་ཆུབ་སྒྲུབ་པའི་ཆེད་དུ་མི་སྨོན་ཞིང་འགྲམ་ཆུ་མི་ལྡང་བའི་ངེས་ཤེས་གཏིང་ཚུགས་པ་ཞིག་ཡོད། ཅེས་གསུངས་པ་ལྟར་འགྱུར་བའི་གོ་སྐབས་ག་ལ་སྲིད་ཀྱང་། རྗེ་བཙུན་གྲོལ་མཆོག་གིས། དམ་ཆོས་ཀུན་གདུལ་བྱའི་བློ་བྲིད་ལས། །ཕྱོགས་འཛིན་གྱི་གྲུབ་མཐའ་སྐྱོང་མ་མྱོང་། །ཆོས་དུ་མ་རོ་གཅིག་གི་རྣལ་འབྱོར་པ། །གྲུབ་མཐའ་རྐང་མཚུགས་ཟེར་ཀྱང་འགྱོད་རྒྱུ་མེད། །ཅེས་པ་བཞིན་བདག་ཅག་གི་སྟོན་པས་ཀྱང་ལ་ལར་གང་ཟག་གི་བདག་ཡོད་པར་བསྟན་པ་སོགས་གདུལ་བྱ་རྗེས་སུ་འཛིན་པ་ལ་ཐབས་སྣ་ཚོགས་ཤིག་དགོས་པས་རིས་མེད་པའི་ཆོས་ལུགས་ལ་གསན་བསམ་འཆད་ཉན་མཛད་པའང་གདུལ་བྱ་རྗེས་སུ་འཛིན་པར་དགོངས་ཤིང་ཁྱད་པར། ཀུན་མཁྱེན་མཁྱེན་བརྩེའི་གསུང་མགུར་ལས། ངས་སྦྱངས་པ་དེ་ས་སྐྱ་པའི་གཞུང་ལུགས་ལ་སྦྱངས་ཀྱང་། མཁས་པ་དེ་གསང་སྔགས་རྙིང་མ་ལ་མཁས་པ། འདི་ཀོ་སྔོན་གྱི་ལས་འཕྲོ་ཞིག་ཡིན་ནམ། །ཨ་ཧོ་ངོ་མཚར་དུ་ཆེ་བྱུང་། ངས་བསྒོམས་པ་དེ་གསུང་ངག་ལམ་འབྲས་བསྒོམས་ཀྱང་། རྟོགས་
པ་དེ་རྫོགས་པ་ཆེན་པོ་ལ་ཤར་བ། འདི་ཀོ་སྔོན་གྱི་ལས་འཕྲོ་ཞིག་ཡིན་ནམ། ཨ་ཧོ་ངོ་མཚར་དུ་ཆེ་བྱུང་། ངས་གསོལ་བ་དེ་རྣལ་འབྱོར་དབང་ཕྱུག་ལ་བཏབ་ཀྱང་། བྱིན་རླབས་དེ་ཨྱོན་པདྨ་ཁོས་གནང་བ། འདི་ཀོ་སྔོན་གྱི་ལས་འཕྲོ་ཞིག་ཡིན་ནམ། ཨ་ཧོ་ངོ་མཚར་དུ་ཆེ་བྱུང་། ངས་བཤད་པ་དེ་དམ་ཆོས་ཕྱོགས་མེད་ཅིག་བཤད་ཀྱང་། འགྲོ་ཕན་དེ་གསང་སྔགས་རྙིང་མ་ལ་བྱུང་བ། འདི་ཀོ་སྔོན་གྱི་ལས་འཕྲོ་ཞིག་ཡིན་ནམ། ཨ་ཧོ་ངོ་མཚར་དུ་ཆེ་བྱུང་། ཞེས་གསུངས་པ་བློ་ཆུང་ཅི་རིགས་ཀྱི་ཁོང་པར་མི་ཤོང་ཡང་འཁོན་ཀླུ་དབང་སྲུངས་ནས་དཀོན་ཅོག་རྒྱལ་པོ་ཡན་ལ་རྙིང་མ་བཀའ་མའི་སྔགས་འཆང་ཤ་སྟག་ཏུ་བྱོན་ཞིང་། དེ་ནས་ཀྱང་ཡི་དམ་ཡང་ཕུར་དང་ཆོས་སྐྱོང་དཀར་བདུད་ལ་མཛད་ལ། མཉམ་མེད་བསམ་གཏན་གླིང་པའི་ཨ་ཏི་ཡང་ཕུར་གྱི་རྫོགས་རིམ་ཁྱད་པར་ཅན་དང་རྗེ་བཙུན་རྡོ་རིང་པ་ཆེན་པོ་སྐུ་ཐོག་ཏུའང་རྙིང་མ་བའི་སྔགས་འཆང་འཇའ་ལུས་གྲུབ་པ་གཉིས་ཙམ་བྱུང་ཚུལ་བླ་ཆེན་རུ་ཐོག་པ་ནམ་མཁའ་གཟི་བརྗིད་ཀྱིས་གསུངས་པ་ལྟར་ཚར་ཆེན་ཡབ་སྲས་བཀའ་གཏེར་ཆོས་ཀྱི་གནད་མཁྱེན་པའི་ཐུགས་གཙིགས་ཆེ་ཙམ་གནང་བའི་རྒྱུན་བཞིན་རྗེ་བླ་མ་འདི་ཉིད་ཀྱིས་ཀྱང་ཀླུ་སྒྲུབ་རྗེར་གསན་པ་ཙམ་དུ་མ་ཟད་ཉང་ཏིང་འཛིན་བཟང་པོ་དང་མངའ་བདག་ཉི་མ་འོད་ཟེར་སོགས་གྲུབ་བརྙེས་ཉང་རིགས་སྟོད་སྨད་མང་པོར་གྱེས་པའི་ཉང་སྟོན་སྨན་ལུང་པ་མི་བསྐྱོད་རྡོ་རྗེའི་གདུང་རིགས་ལས་སོན་ཅིང་བླ་མ་མངའ་བདག་གི་བྱང་ལས་ཀྱི་མཁའ་འགྲོའི་བཀའ་བབས་གཉོས་ཞིག་ཆེན་པོ་ནས་རིམ་བརྒྱུད་ཁྲ་ཚང་པའི་སྣག་དབོན་རྗེ་ཁྱབ་བདག་བློ་མཆོག་རིག་པའི་རྡོ་རྗེ་ཞེས་པཎ་ཆེན་བི་མཱ་ལ་མི་ཏྲའི་སྤྲུལ་པར་ལུང་གིས་ཟིན་པ་དེ་ལ་
གཏེར་ཁ་འོག་མ་བླ་མ་ཡོངས་རྫོགས་ཀྱི་དབང་ལུང་། བཀའ་བརྒྱད་གསང་བ་ཡོངས་རྫོགས་ཀྱི་ཆོས་སྐོར། རྟ་མགྲིན་དབུ་དགུ་ཕྱག་བཅོ་བརྒྱད་པའི་སྒྲུབ་སྐོར། རྟ་མགྲིན་ནག་པོ་ལྕགས་རལ་ཅན་གྱི་དབང་ལུང་། འཆར་ཀ་གནམ་སྐས་མའི་སྒྲུབ་སྐོར། ཐུགས་སྒྲུབ་དྲེགས་པ་ཚར་གཅོད་དུ་གྲགས་པའི་དྲག་དམར་གྱི་དབང་ལུང་། ཕྱག་རྡོར་གཏུམ་པོའི་སེང་གེ་སྒྲ་སྒྲོག་དབང་ལུང་། དྲེགས་པ་དབུ་དགུའི་སྲོག་དབང་ལུང་བཅས། ཛམ་བྷ་ལ་དམར་པོའི་ཆོས་སྐོར། གྲྭ་པའི་འཛམ་དམར་གྱི་སྒྲུབ་སྐོར། དུང་ཚོ་རས་པའི་རྫོགས་ཆེན་ཡང་ཏི་ནག་པོ་གསེར་གྱི་འབྲུ་གཅིག་མའི་དབང་ལུང་ཁྲིད་བཅས། རཏྣ་གླིང་པའི་ཐུགས་སྒྲུབ་ཡང་སྙིང་འདུས་པའི་དབང་ལུང་། གུ་རུ་དྲག་པོའི་དབང་ཆེ་འབྲིང་ཆུང་གསུམ་སྒྲུབ་སྐོར་ལུང་བཅས། ཉང་གི་བླ་མ་དམར་འཁྲིད་ཀྱི་ཆོས་སྐོར། གཏེར་རྒྱུད་སྙིང་པོའི་དབང་ལུང་། རྟ་མགྲིན་ནག་ཆུང་ལྷ་བརྒྱད་གྱི་དབང་ལུང་། སྣང་རྩེ་བའི་རྟ་ནག་གི་དབང་ལུང་། གདུགས་དཀར་ལྷ་བཅུ་བདུན་མའི་དབང་། ཕ་དམ་པའི་འཇམ་དབྱངས་ཆོས་སྐོར། སྒྲོལ་མའི་མཚན་བརྒྱ་རྩ་བརྒྱད་དང་མཐུན་པའི་རྗེས་གནང་། འཁྲུངས་རབས་སོ་བཞི་པའི་ལུང་སོགས་མང་དུ་གསན། ཆོས་དབང་རིན་པོ་ཆེའི་གདུང་འཛིན་ལྷ་བྲོ་སྤྲུལ་སྐུ་ཀརྨ་གུ་རུ་ཞེས་ལོ་ཆེན་བཻ་རོ་ཙ་ནའི་སྤྲུལ་པར་ལུང་གིས་ཟིན་ཅིང་བཀའ་གཏེར་ཆོས་ཀྱི་སྲོག་ཤིང་ཆེན་པོ་གང་དེའི་གདམས་པའི་བཀའ་བབས་སྒྲུབ་མཆོག་ཆོས་དབང་བསམ་གྲུབ་ཀྱི་གདམས་པས་ཐུགས་རྒྱུད་ཡོངས་སུ་གང་བའི་མཐུས་སྲིད་པའི་ཕུན་ཚོགས་མཐའ་དག་ཆུ་ཤིང་གི་འབྲས་བུ་དང་མེ་འོབས་ལྟ་བུར་གཟིགས་ནས་ཆོས་བརྒྱད་ཀྱི་བུན་ལོང་ཐམས་ཅད་རྒྱབ་
ཏུ་བསྐྱུར་ཉེ་བས་མཐའི་དབེན་གནས་སུ་ལྷུན་གྲུབ་སྣང་བ་བཞི་ཁོར་ཡུག་ཏུ་འདའ་བའི་མཚུངས་མེད་ཆོས་དབང་ཀུན་བཟང་ལ་ཆོས་དབང་གི་བླ་མ་གསང་འདུས་ཀྱི་དབང་ལུང་། བླ་མ་སྐུ་གསུམ་གྱི་སྒྲུབ་པ། པདྨ་ལམ་ཟབ་ཀྱི་གུ་རུ་ཁྲོ་བོ་རིགས་གསུམ་གྱི་དབང་ལུང་། ཚེ་དཔག་མེད་རྫོང་ཆེན་མའི་ཚེ་དབང་། རྫོགས་ཆེན་སངས་རྒྱས་མཉམ་སྦྱོར་གྱི་ཆོས་སྐོར། ཐུགས་རྗེ་ཆེན་པོ་ཡང་སྙིང་འདུས་པའི་དབང་ལུང་། རྟ་མགྲིན་ནག་པོའི་དབང་ལུང་། བླ་མ་གསང་འདུས་ཀྱི་ཆ་རྐྱེན་པདྨ་བཅུད་བསྡུས་ཀྱི་ཆོས་སྐོར་དོན་ཚན་བཅུ་གཉིས་པ། དཔལ་མགོན་མ་ནིང་གི་ཆོས་སྐོར། མངའ་རིས་པཎ་ཆེན་པདྨ་དབང་རྒྱལ་གྱི་པདྨ་སྙིང་ཏིག་གི་ཆོས་སྐོར། རྫོགས་པ་ཆེན་པོ་ཀུན་བཟང་སྙིང་ཏིག་གི་ཆོས་སྐོར། རྫོགས་པ་ཆེན་པོའི་རྒྱུད་བཅུ་བདུན་སོགས་ཀྱིས་མཚོན་པའི་ཟབ་ཆོས་མང་དུ་གསན། གངས་ཅན་གྱི་ལྗོངས་འདིར་བསྟན་པ་དབུ་བསྙེངས་པའི་གནས་ཆེན་ཕོ་བྲང་ཡུམ་བུ་བླ་མཁར་མཇལ་བར་ཕེབས་ཏེ། ཆོས་རྒྱལ་ཐོ་ཐོ་རི་སྙན་ཤལ་གྱི་མཁར་བྱིན་རླབས་ཅན་དེར་བསྟན་པ་རྒྱས་པའི་ཕྱག་མཆོད་སྨོན་ལམ་མཛད་ཞོལ་དེར་ཚལ་དུས་བཞེངས་པའི་གྱང་ལོགས་ཤིག་ལ་མགོན་པོ་གུར་གྱི་བལ་བྲིས་རྙིང་པ་བྱིན་རླབས་ཅན་ཞིག་ཡོད་པར་འདི་བབས་ཆགས་ཤིང་ཟིལ་ཆེ་ཞེས་སྙན་ཤལ་སྒྲོན་པའི་ཚེ་དེ་འཕྲལ་ཞལ་ནས་བདུད་རྩི་ཟིལ་པ་ཁྲོམ་ཁྲོམ་བྱུང་བའི་ཤུལ་ད་ལྟ་ཡང་ཡོད། དེའི་ཤར་ཕྱོགས་ཀྱི་བང་སོ་དེར་གཏེར་མང་པོ་ཡོད་པ་འདྲ་ཞེས་གཟིགས་རྟོག་གནང་བས་གྱང་ཧྲབ་ཙམ་བརྐོས་ཤུལ་ཀྱི་སྟེང་ན་གཡམ་པའི་གནམ་སྒོ་ཞིག་འདུག་པར་ཕྱག་རེག་པས་ཁྲལ་ཁྲོལ་བྱེད་པར་འདི་རྔོགས་ན་གཏེར་ཡོད་ངེས་རུང་རེ་ཞིག་གཞོག་གསུངས་པ་ཞམ་
འབྲིང་པ་སོགས་དེར་ཡོད་ཐམས་ཅད་ཀྱིས་ངེས་ཤེས་སུ་གྱུར་ནའང་རྗེས་སུ་བལྟས་པས་ཤུལ་ཙམ་ཡང་མ་བྱུང་སྣང་། བསྟན་པ་སྤྱི་སྒོས་ཀྱི་ཆེད་དུ་འཇིགས་བྱེད་དྲུག་ཅུ་པའི་གཏོར་བཟློག་གནང་། སྐབས་ཤིག་གཟིམས་ཆུང་གི་ནང་ཤ་ཆེན་གྱི་གསུར་དུད་ཆེན་པོས་ཁེངས་པ་བཀའ་ལས་ཁྱོད་ཚོས་ཤ་བསྲེགས་པའི་དྲིས་ངའི་གྲེ་བ་འགགས་གསུངས་པར་མཆོད་དཔོན་གྱི་ངེད་ཚོའི་ཁྲོད་ན་བསྲེག་མཁན་མེད་གཟིམས་ཆུང་ནང་རང་ནས་དྲི་མ་བྱུང་ཞུས་པས་ཅང་མི་གསུང་། དེ་ནུབ་བླ་བྲང་ཐོག་ནས་གཏོར་མ་འཕེན་པ་གནང་བས་སྨན་ལུང་གི་མདའ་ན་ཆོས་སྡེ་ལ་ཤིན་ཏུ་བརྣག་པའི་མ་རུངས་པ་ཞིག་ཡོད་པ་དེ་སྲོད་འཁོར་ལ་གྲིར་གུམ། བླ་བྲང་གི་རྒྱབ་ཏུ་སྔར་ནས་བཙན་ཞིག་ཡོད་པ་གཏོར་ཟོར་བབས་པ་དཔལ་ལྡན་དུས་ཀྱི་དགྲ་བོའི་གཟི་བྱིན་མ་བཟོད་པར་སྣེ་མོ་ཁང་གསར་གྱི་རྒྱ་ལམ་ཁར་སྤོས་པ་ད་ལྟའང་ཡོད་དོ། །ཆགས་བྲལ་ཚངས་པར་སྤྱོད་ཀྱང་འདོད་ཡོན་ཀུན། །ལམ་ཁྱེད་རྡོ་རྗེ་གདན་མཚུངས་ཆོས་ཀྱི་སྡེར། །ཐུབ་བསྟན་དགོངས་པ་གཅིག་པའི་འགལ་མེད་གར། །བསྒྱུར་ཚེ་ཀླུ་སྒྲུབ་སྙིང་པོ་གཟུགས་གཞན་བཟུང་། །དཔལ་ལྡན་ཆོས་ཀྱི་འབྱོར་པ་གླིང་ཡངས་པོར། ཁུ་སྟོན་སྨྲ་ལ་ངག་གི་དབང་ཕྱུག་པ། །རྣམ་དཔྱོད་ཡིད་བཞིན་རྒྱལ་མཚན་རྩེར་བཀོད་ལས། །སྡེ་བཞིའི་ལུང་གི་འདོད་རྒུ་ཆར་དུ་བསྙིལ། །ཚུལ་ལྡན་ཁྲིམས་གནས་མཁྱེན་པའི་ལྷ་ལམ་ངོས། །སྨིན་གྲོལ་གཞུང་བཤད་འཇའ་ཚོན་རབ་བཀྲ་བ། །ཤིས་བརྗོད་གླུ་ཡི་ཉི་མས་ཡོངས་ཁྱབ་པའི། །གླིང་འདིར་ངེས་གསང་བསྟན་པའི་བདག་པོར་བསྐོས། །གཞོམ་མེད་བློ་མཆོག་ཡངས་པ་རྡོ་རྗེའི་ཁམས། །རྣམ་དཔྱོད་གཡས་
འཁྱིལ་མགྲིན་ལས་ལེགས་བཤད་སྒྲ། །འདྲེན་པའི་སྙན་གྱི་དབང་པོར་ཆེས་དངར་བས། །དབྱངས་བདུན་ཚང་བའི་གླུ་ལ་ཡི་རང་བཅད། །ཆོས་བརྒྱད་ཚ་ཟེར་སྤངས་པའི་རྟ་ལྡན་སྣར། །ཀུན་བཟང་ཆོས་ཀྱི་ས་བོན་ཡོངས་ཞུགས་འབྲས། །འོད་གསལ་སྣང་བཞིའི་ལུས་རྫོགས་ཐ་སྐར་སྐྱེས། །འཇམ་མགོན་མཐོ་རིས་དབང་པོའི་བླ་ཡི་སྨན། །གངས་ཅན་འཛིན་མའི་མངལ་དུ་བསྟན་པའི་དབུ། །ཐོག་མ་སྦྲུམས་པའི་ཕོ་བྲང་ཡོམ་བུ་རུ། །ཀུན་ཡིད་ཚར་དུ་མངར་བའི་བརྗོད་པའི་མཐའ། །འཚོལ་ལ་ཁྱབ་འཇུག་གོམ་པས་མ་བགྲོད་ངལ། །རིས་བྲལ་འགྲོ་ལ་རང་བདེ་གཏོང་ནུས་པའི། །རྒྱལ་སྲས་སྤྱོད་ལ་བསླབ་པའི་སེམས་དཔའ་ཆེ། ཁྲག་འཐུང་ཡེ་ཤེས་རྡོ་རྗེའི་མཚོན་རྣོན་པོས། །བརྩེ་མེད་དགྲ་བགེགས་དོན་སྙིང་འབིགས་འདི་ཅི། །ཧོར་ཟླ་དྲུག་པའི་ནང་དུ་ཆིབས་ཁ་བསྐྱོད་དེ་གོང་དཀར་རྡོ་རྗེ་གདན་གྱི་ལྷ་གླིང་སྤྱིལ་པོར་ཕྱི་རོལ་རྣམ་པར་གཡེང་བའི་འདུ་འཛི་ཐམས་ཅད་རྒྱང་དུ་བསྲིངས་ནས་སྐུ་གསུང་ཐུགས་ལྷ་སྔགས་ཡེ་ཤེས་ཀྱི་རོལ་པས་ཁོར་ཡུག་ཏུ་འདའ་བའི་བཅད་རྒྱ་ཟླ་བ་བརྒྱད་ཀྱི་རིང་མཛད་པའི་སྐབས་དམ་བཅའི་ཕྱག་བྲིས་སུ་གནང་བ་སྐུའི་བཀོད་པ་བསྡུས་རྗེས་རྙེད་པ་ལས་འདི་ལྟར། ཨོཾ་བདེ་ལེགས་སུ་གྱུར་ཅིག །རང་བྱུང་ལྷུན་གྲུབ་ཡེ་ཤེས་ཁྱབ་བརྡལ་ལས། །མ་འགགས་རང་རྩལ་སྤྲུལ་པའི་སྐུ་རུ་བྱོན། །འགྲོ་བ་ཀུན་གྱི་སྐྱབས་གཅིག་པདྨ་འབྱུང་། ཁྱད་པར་བདག་གི་འདི་ཕྱིའི་མགོན་གཅིག་པུ། ཁྱེད་ལ་གསོལ་འདེབས་སྙིང་ནས་སྐྱབས་སུ་མཆི། །རྒྱལ་བ་གང་དེའི་ཡེ་ཤེས་རྣམ་རོལ་ལས། །སྤྲུལ་པའི་ཟློས་གར་བཤེས་གཉེན་དམ་པའི་ཚུལ། །མདོ་སྔགས་གསར་རྙིང་བཀའ་གཏེར་མ་ལུས་པ། །ཉི་ལྟར་
གསལ་མཛད་མཁྱེན་བརྩེའི་དབང་ཕྱུག་མཁྱེན། །དེ་ཡི་རྡོ་རྗེ་ཡེ་ཤེས་རྣམ་གསུམ་གྱིས། །བསྐྲུན་པའི་རྒྱལ་ཚབ་གྲུབ་དབང་རྡོ་རྗེ་འཆང་། །བཀའ་དྲིན་མཉམ་མེད་དབང་ཕྱུག་རབ་བརྟན་གྱི། །ཞབས་ལ་ཕྱག་འཚལ་གསོལ་འདེབས་སྐྱབས་སུ་མཆི། །ཆོས་དབྱིངས་བདེ་ཆེན་མཐའ་བྲལ་རང་ཉིད་ལས། །གང་འདུལ་ཐབས་ཀྱིས་འགྲོ་བ་རྗེས་གཟུང་ཕྱིར། །ཞི་དང་ཁྲོ་དང་ཞི་མ་ཁྲོ་ཡི་ཚུལ། །རབ་འབྱམས་ལྷ་ཚོགས་བདག་གིས་བསྙེན་ཅིང་སྒྲུབ། །རྡོ་རྗེ་འཆང་དབང་ཐུགས་ལས་རྣམ་སྤྲུལ་པའི། །རྒྱལ་བའི་བསྟན་སྲུང་མ་རུངས་ཚར་གཅོད་པ། །དྲག་ཤུལ་མཐུ་ལྡན་དམ་ཅན་ཚོགས་རྣམས་ཀྱིས། །བྱང་ཆུབ་བསྒྲུབ་པའི་གྲོགས་མཛོད་བར་ཆད་སོལ། །ཇི་ལྟར་འདབ་བཟང་དབང་པོ་མཁའ་ལ་བགྲོད། །དེ་ལ་འགྲན་མིན་ཉམ་ཆུང་བུང་བའི་ཚོགས། །རང་རྩལ་འབད་ནས་ནམ་མཁར་འཕུར་བ་ལྟར། །སྔོན་བྱོན་དམ་པ་རྣམས་ལ་འགྲན་མིན་ཡང་། །རང་ཉིད་འཁོར་བའི་འདམ་ལས་རབ་བརྒལ་ནས། །མ་རྒན་འགྲོ་བ་སྨིན་གྲོལ་ལ་འགོད་ཕྱིར། །དམ་པའི་རྗེས་ཞུགས་གོ་ཆ་ཆེར་གྱོན་ནས། །ཉོན་མོངས་དགྲ་ཚོགས་གཡུལ་ལས་རྣམ་རྒྱལ་ཏེ། །སྐུ་བཞིའི་རྒྱལ་སྲིད་འཐོབ་ཕྱིར་ངས་འདིར་འབད། ། དེ་ལ་འ་ཞའི་རྒྱལ་རིགས་ལས་བྱུང་བའི་བཙུན་པ་མཁས་གྲུབ་དམ་པ་མང་པོའི་དབོན་དུ་གྱུར་ཅིང་རྗེས་སུ་བཟུང་བ། དམ་པའི་ཆོས་ཚུལ་མང་དུ་ཐོས་པ། རྒྱུ་འབྲས་ཀྱི་ཆོས་ལ་བདེན་པའི་དད་པ་ཐོབ་པ། བླ་མ་རྒྱལ་བ་སྲས་དང་བཅས་པ་ལ་མི་ཕྱེད་དད་པས་ཕྱུག་པ་མིང་གནས་གསར་དབོན་པོ་མགོན་པོ་བསོད་ནམས་མཆོག་ལྡན་ཞེས་བགྱི་བ་བདག་ཡོངས་འཛིན་བླ་མ་མང་པོས་ཐུགས་རྗེས་
བསྐྱངས་པའི་དབང་འཁྲིད་གདམས་པ་མང་དུ་ཐོབ་ཀྱང་རང་ཉིད་ཀྱི་རྒྱུད་ལ་ནི་མ་འབྱོར། ལུང་རྟོགས་དང་སྦྱངས་པའི་ཡོན་ཏན་ནི་མེད། ཤེས་རབ་དང་བརྩོན་འགྲུས་ནི་ཞན། དཀའ་སྤྱད་སྡུག་རུས་ནི་ཆུང་། ལེ་ལོ་དང་སྙོམ་ལས་ནི་ཆེ། སྦྱིན་སྟོབས་དང་བསྒོམས་སྟོབས་ནི་ཉུང་། གཉིད་རྨུགས་དང་རྣམ་གཡེང་ནི་མང་། དེ་ལ་སོགས་པའི་སྐྱོན་དང་ཉེས་པ་ནི་བརྗོད་པས་མི་ལང་། ཡོན་ཏན་དང་དགེ་བ་ནི་བཙལ་བས་མི་རྙེད་པའི་ཚོད་ཙམ་དུ་འདུག །མི་ཚེ་ནི་ཕྱེད་ལྷག་སོང་འདུག །འཚང་རྒྱ་བར་ནི་སྤུ་ཙམ་མི་ཉེ་བའི་ཁར་ཉེས་ལྟུང་མང་པོ་ཞིག་གིས་མར་ལ་ཨེན་ཙམ་ཉེ་རུ་སོང་འདུག་སྙམ་པའི་བློ་ལ་བདེ་བའི་སྐབས་མ་བྱུང་བས་སླར་ཡང་ཡང་བསམས་པས་མཚམས་མེད་པའི་སྡིག་པོ་ཆེ་ཡང་གསང་སྔགས་ཀྱི་གནད་གསང་ཤེས་ན་མྱུར་དུ་འཚང་རྒྱ་བར་གསུངས་འདུག །སྙིང་རུས་དང་ལྡན་ན་ཟླ་བ་དྲུག་རྩེ་གཅིག་བསྒོམས་པས་ཕུང་པོ་ལྷག་མེད་འགྲུབ་པར་ཡང་གསུངས། ཚུལ་བཞིན་དུ་བསྒོམས་ན་ཞག་བདུན་གྱིས་བདེན་པ་མཐོང་བར་དུས་འཁོར་ལས་གསུངས་པ་སོགས་ཀྱིས་སྤྲོ་བ་སླར་རྙེད། ད་ཆ་རང་ལོ་སོ་བརྒྱད་པ་འབྲུག་ལོ་ཟླ་བ་དང་པོ་ནས་བཟུང་ཇི་སྲིད་འཚོའི་བར་ཚེ་འདིའི་བདེ་སྐྱིད་སྙན་གྲགས་ཆེད་དུ་མི་སྒྲུབ་ཟས་སྟེར་མི་བྱུང་ན་བྱོལ་ཉོག་ཏུ་མ་སོང་བར་ལོངས་སྤྱོད། མ་བྱུང་ན་བཅུད་ལེན་ལ་སོགས་པའི་ངན་ངོན་ལ་བརྟེན་གོས་སྟེར་མི་བྱུང་ན་གྱོན། མ་བྱུང་ནའང་ཆོས་གོས་རྣམ་གསུམ་ངན་རྙིགས་དག་གཏུམ་མོ་ལ་བརྟེན་པ་བྱེད། ཆོས་བཀའ་གཏེར་མདོ་སྔགས་རྣམ་དག་ཞུ་ས་གང་ན་ཡོད་ཀྱང་ཞུ། ཁྱད་པར་ཁེ་དང་རྒྱལ་ཁ་གཞན་ལ་བསྐུར་ཞིང་གྱོང་རང་གིས་ལེན་པ་གང་ཡོང་ཡོང་བྱེད། ལྷག་
པར་ལྷའི་བསྙེན་པ་རིགས་མི་གཅིག་པ་བརྒྱ་ཕྲག་བྱེད། རྟགས་དང་མཚན་མ་ཡོད་རེ་མེད་ཀྱང་གྲངས་བསྙེན། དུས་བསྙེན། གཙོ་འབུམ། འཁོར་ཁྲིར་ལོངས་པ་བརྒྱ་ཕྲག་གཅིག་ལོ་ཞེ་དགུ་ཚུན་ལ་གྲུབ་པ་བགྱིད། དེ་ནས་ཀྱང་མ་ཤི་ན་ཅི་འགྲུབ་བྱེད། དེ་དག་གིས་ཁས་ལེན་དང་དམ་བཅའ་ལ་རྟ་ཟི་བ་དང་ཉམས་ལེན་ལག་ཐོག་ཡོད་པ་ལ་ཁྱི་མི་རི་བ་བྱུང་གི་དོགས་འདུག་པས་ཡང་ཡང་ཞུས་དག་བྱེད། གྲུབ་ན་ཁེངས་རློམས་སྤངས་ཏེ་ཆོས་ཆོས་སུ་སོང་བ་བྱེད། དེ་དག་འགྲུབ་མ་འགྲུབ་བལྟ་ཕྱིར་ཡི་གེ་བྲིས་པ་ཡིན། སྤྲང་བན་བདག་གི་དམ་བཅའི་ཚིག་འདི་དག །བྱས་བྱུང་ཡི་གེར་འདྲི་བའང་མི་འོས་མོད། །འོན་ཀྱང་ཁེངས་དྲེགས་བཟང་འདོད་མ་ཡིན་པའི། །མ་འགྲུབ་ཚེ་ན་རང་ག་རང་ཁྲེལ་འདེབས། །ཚུལ་བཞིན་འགྲུབ་ན་ཞེན་མེད་དགའ་བ་སྒོམ། །དེས་ན་བླ་མ་ཡི་དམ་ཆོས་སྐྱོང་ཚོགས། །བདག་གི་དམ་བཅའ་ཚུལ་བཞིན་འགྲུབ་པ་དང་། །བསྒྲུབས་པའི་འབྲས་བུ་ཚུལ་བཞིན་འཐོབ་པར་མཛོད། །ཅེས་གསུངས་པ། རྗེ་མཁྱེན་བརྩེའི་གསུང་མགུར་ལས། དུས་དང་པོར་འཇིག་རྟེན་བྱ་བ་ཐོང་། །དུས་བར་དུ་ཚེ་འདིའི་བྱ་བ་ཐོང་། །དུས་ཐ་མར་ཆོས་ཀྱི་བྱ་བ་ཐོང་། །ང་ཅི་ནུས་བྱ་བཏང་རྣལ་འབྱོར་བགྱིད། །ལུས་སྣ་ཚོགས་རྒྱན་གྱིས་རབ་བརྒྱན་ཀྱང་། །རུས་ཤ་དང་པགས་པས་གཡོགས་པ་འདིས། །གོས་མཛེས་པས་བརྒྱན་ཀྱང་སྣང་ཤས་རྒྱུ། །ང་ཆ་ལུགས་ངན་ངོན་ཙམ་ལ་བརྟེན། །ཞེས་པའི་དོན་དང་མཚུངས་པར་མ་ཟད་ལྗོངས་འདིའི་མཁས་གྲུབ་ཆེན་པོའི་རྣམ་ཐར་ངོ་མཚར་བའི་གནས་འགངས་ཆེ་ཤོས་སུ་འདུག་ཅིང་ཞིབ་ཏུ་བརྟགས་ཚེ་ཞལ་གྱིས་འཆེས་པ་ཁོ་ན་མཛད་པར་ཡིད་ཆེས་ཀྱི་ངེས་པ་རྙེད་
པས་དད་པའི་གསོས་བླ་ན་མེད་པའོ། །དེ་ནས་དྲང་སྲོང་སྲིན་པོ་རིའི་གནས་མཇལ་ལ་བྱ་བྲལ་འགྲོས་ཀྱིས་ཕེབས། དེང་ང་འབྲི་གུང་པས་པཎ་ཆེན་ཤཱཀྱ་གདན་དྲངས་པའི་ཚེ་པཎྜི་ཏའི་བྷཱུ་ཏི་ཙནྟྲས་ཕྱག་རྒྱ་བ་རྫུན་ཆེ་ཞེས་སྐུར་པ་བཏབ་པའི་སྒྲིབ་སྦྱོང་དུ་རྗེ་བཙུན་མའི་ལུང་བསྟན་ལྟར་བདེ་མཆོག་གི་ལྷ་ཁང་བཞེངས་པའི་སྐུ་ཁྱད་པར་ཅན་དེའི་ཞབས་འོག་ཏུ་དར་སྐུད་འདྲོངས་པ་སོགས་བར་སྣང་མར་གྲགས་པ་དེ་ལམ་ཁྱུད་གང་ཙམ་ས་ལ་མ་རེག་པའི་ངོ་མཚར་གྱི་བཀོད་པ་དཀོན་གཉེར་དང་ཞམ་འབྲིང་བས་མཚོན་དེར་འཁོད་ཀུན་གྱི་འདྲེན་བྱེད་ཀྱི་ཡུལ་དུ་གྱུར། སྙན་དར་དང་ལྷ་བཤོས་མར་མེ་སོགས་མཆོད་སྤྲིན་སྤྲོས་ཏེ་བླ་མ་དང་དཔལ་འཁོར་ལོ་སྡོམ་པ་དབྱེར་མེད་ངོ་བོ་གཅིག་པའི་རྣལ་འབྱོར་གྱི་དབང་བཞི་བཞེས་པ་དང་བསྟན་འགྲོ་རྒྱས་པའི་སྨོན་ལམ་རྒྱ་ཆེར་འདེབས་པར་མཛད། དེ་ནས་གོང་དཀར་ཆོས་སྡེ་བརྒྱུད་རིམ་གྱིས་ཧོར་ཟླ་བཅུ་གཉིས་པ་ཉིས་བརྩེགས་ཀྱི་ལྕགས་འབྲུག་ཧོར་ཟླ་དང་པོར་རོང་ཁུ་ལུང་དུ་ཕེབས། རྗེ་བཙུན་མི་ལས་ལྷ་རྗེ་གནུབས་ཆུང་པར་དྲག་སྔགས་གཟའ་གདོང་དམར་ནག་གསན་ནས་ལས་སྦྱོར་གྱི་མཐུ་ཁང་ལག་མཐུས་གླགས་མི་རྙེད་པའི་ཆེད་དུ་བྲུས་པའི་ཕུག་པ་དེར་བྱོན་ཏེ་ནམ་ཟླ་ཟད་དུས་ཡིན་རུང་བྲག་ལས་སྒྲུབ་ཆུ་གློ་བུར་དུ་བབས་པ་ཕྱག་ཕྱི་བ་རྣམས་ཀྱིས་ལྕེ་ཐོག་ཏུ་མྱོང་ཞིང་ཡིད་ཆེས་ཀྱི་གནས་སུ་གྱུར། ཡུམ་བགྲེས་མོས་གསོལ་བ་བཏབ་པར་བརྟེན་གཞིས་ཀར་ཟླ་བ་ལྔ་ཙམ་གྱི་རིང་ལྗགས་བསྙེན་ཁ་གསོའི་སྐུ་མཚམས་དང་ཕྱོགས་འདུས་ཀྱི་སྣོད་ལྡན་རྣམས་ལ་དབང་འཁྲིད་ལུང་མན་ངག་སོགས་ཆོས་འཁོར་མཐའ་ཡས་པ་བསྐོར། དེ་ནས་བཀྲ་ཤིས་རྩེ་ཆོས་སྡེར་བྱོན། ཐུབ་གསུང་རིན་པོ་ཆེ་བཀའ་འགྱུར་རོ་ཅོག་ཡོངས་རྫོགས་ཀྱི་ལུང་
རྒྱུན་ཉག་ཕྲ་བ་ཐུགས་ཀྱིས་མ་བཟོད་པའི་ཕྱོགས་གང་དང་གང་དུ་ཡོད་ཅེས་རྩད་གཅོད་གནང་ཡང་ངེས་ཁུངས་མ་ཆོད་པའི་མུར་ཀོང་པོ་གཏེར་སྟོན་འཇའ་ཚོན་སྙིང་པོར་ཡོད་པའི་གནས་ཚུལ་གསན་པར་བརྟེན་འདེགས་རྩིས་མཛད། མེ་བྱི་བྱར་དྭགས་རྣམས་ཀྱིས་གཙང་སྡེ་སྲིད་ཀྱི་ཞབས་འདྲེན་བྱས་པ་ནས་བཟུང་བཀག་པོ་མང་དུ་འཕེལ་བའི་དྭགས་ཀོང་ཕྱོགས་སུ་རྒྱུ་འགྲུལ་མི་བདེ་བ་ཡོད་པས་ཕེབས་པ་མི་འགབ་པ་ཞུ་མི་མང་བ་བྱུང་ནའང་གསན་འཇོག་མ་གནང་བར་ཆོས་ཀྱི་གདུང་ཤུགས་དྲག་པོས་བལྟོས་མེད་དུ་ཕེབས་པའི་དྭགས་པོ་རུའི་གྲུ་བཏོན་སྒམ་པོའི་གཞིས་ཀ་ཀླུ་མཁར་ཞོལ་དུ་བཞུགས་ནུབ་སྔར་ཞལ་འདྲིས་མེད་ཀྱང་གདུང་བརྒྱུད་ནས་སྣེ་ལེན་དང་བཀག་པོའི་ཉེས་སེལ་ལ་སྡེ་པ་བཀྲ་ཤིས་རྩེ་བའི་སྐུ་སྐྱེ་ཡིན་ཟེར་བའི་བཙུན་པ་དྲག་པ་ཞིག་གིས་འགོ་བྱས་མི་བཅུ་གཉིས་ཙམ་ཕེབས་སྐྱེལ་དུ་བཏང་བའི་དྭགས་ལ་སྒམ་པོའི་ཕུ་གཉལ་ལ་མ་ཐེབས་ཙམ་གྱི་བྱང་སྟོངས་ན་ཆུ་ཆེན་པོས་བཅད་ནས་མི་ཐར་བར་ཐུག་ཚེ་བཀའ་ལས་ཡས་མས་ཚོར་འཁྱགས་ཟམ་ཡོད་འདྲ་ལྟོས་དང་གསུངས་པ་ལྟར་བྱ་རོག་ཅིག་གིས་སྣ་དྲངས་པའི་སྙེད་ནས་ཕ་རིར་བྱོན་པ་དང་འཁྱགས་ཟམ་བརྡེབ་པ་ན་སྣ་མོ་ཤག་གྲུབ་ཆེན་པས་མཆི་མ་འདོན་ཞིང་ཕྱག་མང་དུ་བཙལ་བླ་མ་ཁྱེད་ལ་ཐུགས་རྗེ་ཡོད་ཀྱང་ཡོད་བྱུང་ཡང་བྱུང་། ཞུས་ཤིང་ཇག་པ་ཁ་ཤས་འོང་བའང་ཆུར་མ་ཐར་པ་སོགས་ཆོམ་རྐུན་གྱི་འཇིགས་པ་ལས་གྲོལ་ཏེ་ཀུན་ཡ་མཚན་དུ་གྱུར། ཞབས་སྐྱེལ་བ་དམངས་ལ་ལ་འགྲོ་མ་འདོད་པའི་བྲོས་ཤིང་རྒད་བུ་ཞིག་ལུས་པས་ལམ་རྒྱུས་ཞུས་གཉལ་ལ་དེ་ཁ་བ་ཆེས་པས་ཁལ་རྣམས་དབང་སྐྱེལ་དང་རྐང་ལག་འཕྱིད་པ་ཁ་ཡར་སོགས་ཚང་མ་འོ་བརྒྱལ་བའི་ངང་ནས་ཕེབས་པའི་གནས་མལ་དུ་
བཞུགས་ནུབ་ཕྱག་གཡོག་ཚོ་སྡོད་སའི་ཐོག་བརྡིབ་སྟེ་འུར་ཞོགས་ཆེའང་ཉེས་སྐྱོན་མ་བྱུང་བས་གཏེར་གསར་གྱི་སྲུང་མ་རྣམས་གཉན་པའི་འཚུབ་ཏུ་ངོས་འཛིན་མཛད། སང་ཉིན་བཤུལ་དུ་བཞུགས་སྐབས་ཕར་གནས་ཚུལ་གྱི་སྔན་ཕར་གནང་བ་མདའ་རྒྱང་དེ་ཙམ་ནས་མི་ཞིག་དང་འཕྲད་དེ་གླེང་མོ་བྱས་ཡར་སླེབས་བྱུང་བ་གཏེར་སྟོན་གྱིས་ཕེབས་བསུར་བརྫངས་པའི་ང་ལ་དབོན་པོ་ཡིན་ཟེར་བས་ཁ་བཏགས་ཀྱི་ཕྱག་མཇལ་དང་སྤོས་ཆག་སྤར་བཞིན་པས་སྤྱན་དྲངས། ཁྱེད་དཔོན་སློབ་ལ་སུས་ཞུས་གནང་བས་སྐད་ཆ་མི་དགོས་ཁོ་རང་གིས་ཤེས་ཡོང་ཟེར་སྐད། གཏེར་སྟོན་དཔོན་སློབ་དགུན་ཚང་དུ་ཆོས་ཐོག་ལ་ཕེབས་པ་དང་འགྲིག་པར་དངོས་པོ་བརྒྱ་ཕྲག་ཏུ་ལོངས་པའི་འབུལ་བ་དང་བཅས་མཇལ། གཏེར་སྟོན་གྱིས་བཀའ་འགྱུར་ཐོག་མཐའ་བར་གསུམ་གྱི་ལུང་ལས་མཚན་ཉིད་པ་གསན་ཚོད་ཀྱང་མིན་འདུག །གཏེར་སྟོན་རང་གི་ཕྱག་གཡས་གཡོན་མཛུབ་མོ་གཉིས་སྦྲེལ་བའི་ཕྱག་རྒྱ་མཛད་ནས་ངེད་རང་དཔོན་སློབ་གཉིས་འདི་ག་བྱུང་བ་བཀའ་འགྱུར་གྱི་ལུང་ཡིན། ཕྱག་སོར་རྣམས་ཟླུམ་པོ། ཟླ་གམ། གྲུ་བཞི། གྲུ་གསུམ་དུ་མཛད་དེ་སྤོས་ཕོར་ནང་དུ་ཏིལ་བཏབ་པའི་ཞི་རྒྱས་དབང་དྲག་གི་སྦྱིན་སྲེག་ཅིག་ཅར་དུ་གྲུབ་པ་སོགས་སྣང་ཚུལ་དང་གནས་ཚོད་མི་གཅིག་པའི་གྲུབ་ཐོབ་ཞིག་པོའི་རྣམ་ཐར་རྟོགས་དཀའ་བ་དང་མ་ནས་ཚད་ཐུབ་ཀྱི་གཏེར་སྟོན་དུ་ཐུགས་ངེས་ཤེས་འདྲོངས་པའི་གཏེར་གསར་ཡང་ཟབ་དཀོན་ཅོག་སྤྱི་འདུས། ཚེ་དཔག་མེད་གནམ་ལྕགས་རྡོ་རྗེ་དངོས་གྲུབ་ཀུན་འབྱུང་། ཐུགས་རྗེ་ཆེན་པོ་ངན་སོང་རང་གྲོལ། ཞི་ཁྲོ་ངེས་དོན་སྙིང་པོ། རྟ་ཕག་ཡིད་བཞིན་ནོར་བུ་ཀརྨ་གླིང་པའི་ཞི་ཁྲོ་དགོངས་པ་རང་གྲོལ་རྣམས་
ཀྱི་དབང་ལུང་། སྒྲུབ་ཐབ་གསེར་ཆོས་མའི་ལུང་། བི་མཱ་ལའི་སྙིང་ཏིག་གི་ཆོས་སྐོར། ཡང་རྫོང་སྙིང་ཏིག་གི་ཆོས་སྐོར། མཁའ་འགྲོ་སྙིང་ཏིག་གི་ཆོས་སྐོར་རྣམས་གསན། ཕར་ས་ལུགས་ཀྱི་ཆོས་སྐོར་ཁ་ཤས་འབུལ་བ་གནང་། གཏེར་སྟོན་གྱི་རྣམ་ཐར་དུ་ལམ་འབྲས་དགོང་བསྟད་མ་གསན་གསུང་བ་དགོངས་བསྟད་དང་ཐོག་མཐའ་བར་གསུམ་བྱེད་པ་ས་ལུགས་ལ་མངོན་སུམ་མི་དགོངས་རྨི་ལམ་དུའང་མི་སྲིད་ཅིང་རྗེ་འདི་ཉིད་ཀྱི་ཐུགས་ལ་ཡང་ག་ནས་ཤོང་ཕལ་ཆེར་ཀྱེ་རྡོར་གྱི་དབང་དང་ཟབ་ལམ་གྱི་རྣལ་འབྱོར་ལྟ་བུ་གནང་བར་ལམ་འབྲས་སུ་མིང་བཏགས་པའི་རྟག་བརྟན་སྤྲུལ་སྐུའི་རྣམ་ཐར་ཞིག་དེ་རུ་ཕེབས་པ་འདྲའོ། །གསུང་གླེང་ཞིག་ལ། གཏེར་གསར་ལུང་བསྟན་དུ། ནུབ་ནས་བྱང་སེམས་འགྲོ་འདུལ་ཉི་ཤུ་གཅིག༔ སྟག་ཡོས་ལོ་པ་རང་རྟགས་དཔྲལ་སྨེ་ཅན༔ ཞེས་པ་ཉིད་ཡིན་པར་འདུག་ཅེས་ངོས་འཛིན་མཛད་པ་ལྟར་དགུང་ལོ་ཡོས་དང་དབུ་དཔྲལ་ལ་སྨེ་བ་ཉིས་བརྩེགས་ཡོད་པར་དེར་ཚོགས་རྣམས་ངེས་པ་རྙེད་ཀྱང་རྗེ་བླ་མ་བདག་གིར་ཆེར་མི་མཛད། གཞན་ཡང་གཏེར་སྟོན་རྗེ་ལྕགས་ཟམ་པར་འཁྲུངས་པའི་དུས་ལྕགས་ཟམ་ཐེན་པའི་སྤྲུལ་པའི་གྱད་དུ་གྱུར་པ་དང་རྗེ་འབངས་ཉེར་ལྔའི་ནང་ཚན་ཞིག་ཡིན་ཚུལ་ཁྲོམ་བསྒྲགས་སུ་གསུངས་པ་སོགས་ཐུགས་ཡིད་གཅིག་ཏུ་འདྲེས། གཏེར་སྟོན་གྱི་དུས་ཚོད་འདི་གང་འདྲ་ཡོད་མི་ཤེས་པས་ཡར་མགྱོགས་ཙམ་ཕེབས་གསུང་བ་ཟླ་ཤས་ནས་གཙང་སོག་གི་བདེ་གཟར་ལངས་པ་སོགས་མཁྱེན་པར་སྣང་། ཡར་ལམ་ཡང་འདུལ་གྱི་གཙུག་ལག་ཁང་བུ་ཆུར་ཐུགས་རྗེ་ཆེན་པོ་དང་རྟ་མགྲིན་སོགས་གནས་རྟེན་མཇལ་ཞིང་མཆོད་འབུལ་དང་སྨོན་ལམ་གནང་། དུང་མཚོར་ཚོང་དཔོན་བཀྲ་ཤིས་ཀྱིས་
གཙོས་པ་རྣམས་ཀྱིས་ཇ་སྣམ་ཐུག་གི་འབུལ་བ་དང་བཅས་བྱིན་རླབས་དང་ཆོས་འབྲེལ་ཞུས། གཏེར་སྟོན་སངས་རྒྱས་གླིང་པའི་གདུང་བརྒྱུད་ཀྱི་ཇོ་མོ་སྒམ་པོའི་ལྕམ་གྱིས་གཞིས་ཀར་མཇལ་ནས་གཞིས་ལེན་བསྟབ། སང་ཉིན་ཕུའི་གནས་སུ་བྱོན་ཤོག་སེར་དམ་རྫས་སོགས་རྟེན་རྣམས་ཞིབ་ཏུ་མཇལ། ང་ལར་ཕེབས་མཚམས་དྭགས་པོ་གྲོ་ལུང་གི་ཨྱོན་ཟེར་བའི་རྩུབ་སྤྱོད་ཅན་དེའི་མ་རུངས་པའི་བློ་ཞི་སྟེ་ཞབས་འདྲེན་མ་ཞུས་པར་མ་ཟད་བྱིན་རླབས་ཞུ་བས་མཚོན་གུས་པའི་རྣམ་འགྱུར་བྱས། ཉེར་འཚེ་ཅུང་ཟད་ཀྱང་མེད་བཞིན་པ་ནས་ཡར་ཀླུངས་སུ་བདེ་བར་ཕེབས་ཏེ་གདན་ས་ཆེན་པོ་ཉིད་དུ་སྟན་ཆགས། བླ་མ་བཀའ་བརྒྱད་ཡོངས་འདུས་ཀྱི་སྤྱི་ལུང་མདོར་བསྡུས་སྙིང་པོ་ལས། ཁྱད་པར་གདུག་པ་སྦྲུལ་གྱི་ལོ་ཤར་དུས༔ གནམ་རྟགས་འོད་དཀར་སྐྱ་རེངས་ཡང་ཡང་འཆར༔ གཟའ་སྐར་འཁྲུག་ཅིང་བྱང་དུ་ཧོར་སོག་གཡོ༔ འོལ་དགའི་ཕྱོགས་སུ་ཆོས་པས་རྐྱེན་བྱས་འཁྲུག༔ དབུས་གཙང་སྡེ་འཁྲུག་འགྲོ་རྣམས་ཉམ་ཐག་འགྱུར༔ ས་གཡོས་ནད་རིམས་ལོ་གསུམ་ལོ་ཉེས་འབྱུང་༔ ལོ་དགུའི་བར་དུ་དབུས་གཙང་དབུ་རུར་འཚོག༔ ཅེས་པ་དང་། ཡོལ་མོ་སྤྲུལ་སྐུ་གཏེར་སྟོན་བསྟན་འཛིན་ནོར་བུའི་གཏེར་གསར་དུ། ཡོས་ཀྱི་ལོ་ལ་ངལ་གསོ་བྱེད༔ འབྲུག་གི་ལོ་ལ་འབྲུག་ལྟར་ལྡིར༔ སྤྲུལ་པ་སྤྲུལ་ཤུན་ལྟ་བུར་འཐོར༔ དེ་ཕྱིར་ཡོས་བུའི་ལོ་ལ་ལོང་༔ ཞེས་པའི་ལུང་བསྟན་དུས་ལ་བབ་པའི་གཙང་སོག་གི་དུས་འཁྲུག་ཆེན་པོ་ལངས་པར་ཉེ་བ་མཆོག་དམན་མཐའ་དག་བློ་འཚུབ་པར་བརྟེན་གཙང་སྡེ་སྲིད་ནས་ས་རྙིང་གི་སྔགས་སྡེ་ཕལ་ཆེར་ལ་སོག་བཟློག་གི་སྐུ་རིམ་བཙུགས་པའི་རྣམ་གྲངས་མང་ཙམ་བྱུང་སོང་བ་དང་ཕྱོགས་མཐུན་དུ་བསླབ་སྟོན་དང་བསྟུན་པའི་དམར་ཆེན་
གཏོར་བཟློག་གི་ཚེ་ཟངས་གྲི་ཅན་གྱི་གཏོར་མ་སྒོ་ཕྱོགས་སུ་འཆུས་ཤིང་ཡུངས་ཀར་གང་བཟང་རྣམས་རང་བཞིན་གྱི་སིལ་སྒྲ་ཆད་མེད་སྒྲོགས། གཏོར་མ་འཕེན་སར་གཏོར་མ་ལས་མེ་ལྷབ་ཀྱི་འབར་ཏེ་རྩེ་མོ་ནས་བཙོ་བྱད་ཤར་ཕྱོགས་སུ་རྒྱུགས་པ་སོགས་རྡོ་རྗེ་ཆོས་སྐྱོང་རྣམས་བྲན་དུ་བཀོལ་བའི་མཐུ་སྟོབས་རྫུ་འཕྲུལ་བསམ་གྱིས་མི་ཁྱབ་ཅིང་དེ་ལོ་ལྷོ་བྱང་ཀུན་ཏུ་དུས་ཀྱི་ཆད་པའི་བརྡབས་གསིགས་སྣ་ཚོགས་བྱུང་ནའང་ཡར་ཀླུངས་སྟོད་སྨད་ཀྱི་སྡེ་དགོན་ཡུལ་གྲུ་ཚོར་གནོད་པ་ཆེར་མ་བྱུང་བའི་ཁར་སྒོས་སུ་དམིགས་མེད་ཀྱི་དབྱིངས་སུ་རྒྱས་འདེབས་པའི་གྲ་བསྒྲིག་ཀླུངས་སུ་མ་རྒྱུགས་པའི་ཉེས་པ་རྣམས་རིམ་གྱིས་ཞི་བས་ནུས་མཐུའི་གཟི་བྱིན་འོད་དུ་འབར། འོན་ཀྱང་ལོ་འདི་དང་ཆུ་རྟའི་བར་སྟོད་སྨད་ཀྱི་བདེ་གཟར་གཅིག་མཇུག་གཅིག་ནོན་ལྟ་བུའི་རྒྱ་མཚོའི་རླབས་ལྟར་ཡོལ་བ་མེད་པས་འཁོར་ལོ་གསུམ་གྱི་མཛད་འཕྲིན་ཧ་ཅང་གི་རྒྱ་ཆེ་བ་གནང་མ་ཐུབ་རུང་གདན་ས་ཉིད་དུ་སྟན་ཆགས་ཤིང་། གོང་དཀར་ཆོས་སྡེར་ཡང་ཉི་མ་གླིང་དུ་ཆོས་ཀྱི་གསན་པ་མཛད། ཁྲ་འབྲུག་གི་ལི་མ་རྣམས་བྱིན་རླབས་ཞུ་མི་མངས་པར་བརྟེན་དྲེག་པས་ནོགས་པ་ཆུ་ལུག་སྡེ་པ་བཀྲ་ཤིས་རྩེ་པས་སྦྱིན་བདག་མཛད་དེ་སྟར་བུ་སོགས་ཀྱིས་བཀྲུས་ནས་གསར་པ་ལྟ་བུར་སོང་བར་ཞལ་གསེར་སྤྱན་འབྱེད་དབུ་མཐིང་གི་ཞིག་གསོས། རྗེ་ཉིད་ནས་རས་ལས་གྲུབ་པའི་སྟོད་སྨད་ཀྱི་གོས་ཟུངས་འབུལ་བ་གནང་། ལྕགས་སྦྲུལ་བདེ་གཟར་སྐབས་རྒྱལ་ཁང་བཤིག་པར་བརྟེན་གནས་རྙིང་རྒྱལ་པོ་རྟེན་མེད་དུ་སོང་བའི་ཨེ་གཉལ་ཡར་ཀླུངས་ལྷོ་ཁ་ཕྱོགས་སུ་འཁྱར་བའི་གནོད་པ་སྣ་ཚོགས་བྱས་པ་འདི་དུས་ཁྲ་འབྲུག་གི་ཕྱག་བཞི་པའི་མགོན་ཁང་མདོར་ཡོད་པ་སྣ་མོ་ཤག་གྲུབ་ཆེན་པས་རབ་གནས་ཀྱི་
སྦྱིན་བདག་ཞུས་ཏེ་རྗེ་ཉིད་ཕེབས་རྒྱུའི་སྔ་ནུབ་ལྷ་འདྲེའི་དམག་སྒར་རྣམས་འུར་བའི་ཆུ་བྱང་ཁར་སོང་བ་ལེགས་བཤད་གླིང་པའི་གྲ་པ་དགེ་སློང་རྗེ་བཙུན་ཟེར་བའི་མིག་མཐོང་ཤིན་ཏུ་གསལ་བས་ངེས་ཤེས་འདྲོངས་པའི་ཡ་མཚན་དུ་བྱེད་པ་བཅོམ་ལྡན་འདས་ཧེ་བཛྲ་གྱི་རྣམ་པར་རོལ་པའི་གཟི་བྱིན་མ་བཟོད་པར་སྣང་། དེའང་གཏེར་ཁ་མང་པོར་གནས་ཆེན་རྣམས་ལ་རབ་གནས་བསྐྱར་ན་བོད་འབངས་ཀྱི་བདེ་ཐབས་ལ་ཕན་པར་གསུངས་བཞིན་མཆོད་ཡོན་ཐམས་ཅད་ཐུགས་རྩེ་མཐུན་ཏེ་ཐོག་མར་སྡེ་བརྒྱད་ཆ་མཉམ་པའི་ཕྱིར་བསངས་དང་གསེར་སྐྱེམས། དངོས་གཞི་དགྱེས་མཛད་རྡོ་རྗེའི་དཀྱིལ་འཁོར་ལ་བརྟེན་ནས་རབ་ཏུ་གནས་ཤིང་མེ་ཏོག་གི་ཆར་ཆེན་པོ་ཕབ་པའི་ཚེ་ལྷ་སྲས་ཀྱི་ཕྱག་བཟོའི་དཔལ་ཨྱོན་ཆེན་པོའི་སྐུ་ལ་རང་ཉིད་ཀྱིས་ང་འདྲ་གསུངས་ཏེ་མཁུར་ཆོས་ལ་ཕྱག་མཛུབ་བཙུགས་ཤུལ་རྒྱལ་བློན་གྱི་དུས་ནས་ཀྱོང་ཙམ་ཡོད་པའི་ནང་དུ་སྔར་མེད་པའི་ཨ་འབུར་དོད་གསལ་བ་དཀོན་གཉེར་གྱིས་མཐོང་བ་སོགས་གངས་ཅན་བདེ་ལེགས་སྤེལ་བའི་རྩ་ལག་ཏུ་གྱུར། སྦྲུལ་ལོ་བསྟན་པ་སྤྱི་རིམ་སོགས་མཛད་པར་བསྙད་གཞན་སྦྱོར་ཕུན་ཚོགས་མི་བཟོད་པར་ཕྲག་དོག་ཅན་འདྲས་སྙན་ཕྲ་སྣ་ཚོགས་ཕུལ་བར་བརྟེན་ས་སྐྱོང་བསོད་ནམས་རབ་བརྟན་ཀྱང་ཐུགས་ཀྱི་འཛིན་སྟངས་གཞན་དུ་གཞོལ་བའི་གནང་སྒོ་ལ་ཞོགས་དྲུད་དེ་དགོན་གནས་ལ་འཕོ་ལེན་སོགས་བཀའི་ལུང་ལྕི་བའི་ཆད་པ་འདྲ་འོང་ངམ་ཞེས་བརྗོད་རིགས་དུ་མས་ཕྱོགས་དེའི་སྐྱ་སེར་ཕལ་ཆེར་རེ་དོགས་དང་སོམ་ཉིར་གྱུར་པ་སྡེ་པ་བཀྲ་ཤིས་རྩེ་པས་དག་སངས་ཀྱི་རྒྱུ་མཚན་ཕུལ་བ་འགབ་ཚུལ་ཞུས་ཚོད་དུ་འདུག་རུང་ཧ་ཅང་དབྱིངས་ཆེས་པས་མཛུབ་མོས་གནམ་མི་ཐེག་པའི་དཔེ་བཞིན་ཞུ་འབུལ་སྣ་ཕིབས་ཡོང་བ་
དཀའ་བ་དང་རྗེ་ཉིད་ཀྱི་དགོངས་པ་ནི། ཐམས་ཅད་མཁྱེན་པའི་གསུང་མགུར་དུ། སྡུག་མི་འདོད་ཅི་དང་ཅི་བྱུང་ཡང་། །དེ་བྱུར་ངན་རང་གི་ཉེས་པ་ཡིན། །མི་གཞན་ལ་སྡུག་ཡུས་མི་འཚོང་བ། །ང་ཅི་ནུས་ཀུན་གྱི་སྡུག་བསྔལ་འཁུར། །སྐྱིད་བདེ་བ་ཅི་དང་ཅི་བྱུང་ཡང་། །རྗེ་མཉམ་མེད་བླ་མའི་བཀའ་དྲིན་བསམ། །བདག་རང་གི་བསོད་ནམས་མི་བགྱིད་པར། །ད་འགྲོ་དྲུག་ཀུན་ལ་མཉམ་པར་འབུལ། །ཞེས་གསུངས་པ་ལྟར། སྐྱིད་ན་དཀོན་ཅོག་གི་ཐུགས་རྗེ་དང་སྡུག་ན་ལས་ངན་འཛད་པའི་ཆོས་ཐོག་ཏུ་འཇོག་བཞེད་ཁོ་ནས་ལྷ་བཙུན་བོ་དྷི་རཱ་ཛས། ཇོ་བོ་ཆེན་པོ་བསམ་ཡས་སུ་བཞུགས་པར་མ་འདོད་པའི་ཚེ། གང་ན་འཐབ་ཅིང་རྩོད་པ་བས། །དཔག་ཚད་བརྒྱ་ཡི་ཕ་རོལ་འགྲོ། །ཞེས་གཞན་དུ་ཕེབས་པའི་ལོ་རྒྱུས་དང་མཚུངས་པའི་འཕྲལ་རྐྱེན་བསྐུལ་མ་ལྟ་བུའི་དོན་ལོ་གསུམ་གྱི་བཞེད་པ་འགྲུབ་པའི་དུས་བབ་ཀྱི་རིང་པོར་མ་ལོན་པར་ཞ་ལུར་ཕེབས་ཏེ་ལོ་གསུམ་གྱི་བར་རི་ཕུག་གི་རྣམ་གྲོལ་ཡང་རྩེར་ཤིང་སྤྲེལ་ཧོར་ཟླ་བདུན་པའི་ཚེས་བཅུ་གསུམ་ནས་ཕྱི་རོལ་གྱི་རྣམ་གཡེང་མཐའ་དག་རྒྱང་དུ་བསྲིང་བར་མཛད་པའི་ཀྱེ་རྡོར་བསྙེན་ཆེན། རིགས་འཛིན་གདུང་སྒྲུབ། ནཱ་རོ་མཁའ་སྤྱོད། མ་ཧཱ་མཱ་ཡ། དགྲ་ནག །བདེ་ཆེན་རལ་གཅིག །གསང་འདུས་མི་བསྐྱོད་པ། དུས་འཁོར་སོགས་རྒྱུད་སྡེ་བཞིའི་དཀྱིལ་འཁོར་དང་ལྷ་ཕྲན་གྱི་རིམ་པ་སྐུ་ན་ཕྲ་བའི་དུས་གནང་བ་ནས་བཟུང་ད་ལམ་སྟན་ཐོག་གཅིག་ཏུ་གྲུབ་པ་ཡན་ཆད་བསྡོམས་པར་ལྕགས་འབྲུག་དམ་བཅའ་གནང་བའི་བརྒྱ་རྩ་བརྒྱད་པོ་ལྷག་དང་བཅས་པ་ལེགས་པར་སོང་བར་གོང་གི་ལྷ་གྲངས་ཀྱི་ལྗགས་བསྙེན་ཞིབ་ཆའི་ཐོ་མ་རྙེད་ཅིང་དམ་བཅའི་ལྗགས་བསྙེན་བརྒྱ་
པོ་དང་རྒྱུན་བཟླས་མི་ཐེ་བའི་སྔ་ཕྱིར་མང་ཙམ་མཛད་པའི་བསྙེལ་ཐོའི་སྙིང་པོ་བསྡུས་པ་འདི་ལྟ་སྟེ། སྐྱབས་འགྲོ་བཞི་ཁྲི་བཞི་སྟོང་བཞི་བརྒྱ། སེམས་བསྐྱེད་སུམ་བརྒྱ། ཡིག་བརྒྱ་ཉིས་འབུམ་ཆིག་ཁྲི་དགུ་སྟོང་བརྒྱད་བརྒྱ། བཛྲ་སཏྭ་དྲུག་འབུམ་ཆིག་ཁྲི་མཎྜལ་ཉིས་སྟོང་ཉིས་བརྒྱ། བཛྲ་གུ་རུ་ས་ཡ་གཉིས་དགུ་ཁྲི་བདུན་སྟོང་། ཚིག་བདུན་མ་བཞི་ཁྲི་བདུན་སྟོང་བདུན་བརྒྱ། སྔགས་འཆང་བསོད་ནམས་ཆོས་འཕེལ་གྱི་སྐུ་བསྟོད་སྐྱབས་གནས་མ་སུམ་ཁྲི་བརྒྱད་སྟོང་བདུན་བརྒྱ། རྡོ་རྗེ་འཆང་གི་སྐུ་བསྟོད་མཁྱེན་ལྡན་མ་ཆིག་འབུམ་བརྒྱད་ཁྲི་བཞི་སྟོང་བདུན་བརྒྱ། འཇིགས་བྱེད་ཀྱི་སྙིང་པོ་ས་ཡ་གསུམ་སུམ་འབུམ་སུམ་ཁྲི། ཉེ་སྙིང་བདུན་འབུམ་དྲུག་ཁྲི་དྲུག་སྟོང་དྲུག་བརྒྱ། ཀཱ་ལ་རཱུ་པ་བཞི་འབུམ་བཞི་ཁྲི་བཞི་སྟོང་བཞི་བརྒྱ། གསང་འདུས་ཀྱི་སྔགས་ཆིག་འབུམ། མི་གཡོ་བའི་སྔགས་བཞི་འབུམ། ཨོཾ་གསུམ་མའི་སྔགས་དྲུག་ཁྲི། རྣམ་རྒྱལ་མའི་གཟུངས་རིང་ཐུང་སྟོང་ཕྲག་རེ། དུན་ཉིས་སྟོང་། སརྦ་རཱུ་པ་ཆིག་ཁྲི་ཉིས་སྟོང་། པདྨ་སཾ་བྷ་བའི་སྔགས་འབྲུ་བཅོ་བརྒྱད་པ་སུམ་འབུམ་སུམ་སྟོང་། ཡིག་དྲུག་བྱེ་བ་གཅིག་ས་ཡ་གཅིག་ཉིས་འབུམ་དྲུག་ཁྲི་ལྔ་སྟོང་། འཆི་མེད་འོད་སྣང་གི་གཟུངས་དྲུག་སྟོང་། དྲག་སྔགས་སོ་ལྔ་པ་ཆིག་འབུམ་སུམ་སྟོང་། རྡོ་རྗེ་གྲོ་ལོད་ཀྱི་སྔགས་བྱེ་བ་གཉིས་དང་ཆིག་སྟོང་། དྲག་སྔགས་བཅུ་གཉིས་པ་ས་ཡ་གཅིག་དང་བཞི་འབུམ། བཀའ་བརྒྱད་བདེ་འདུས་ཀྱི་ཆེ་མཆོག་གི་གཟུངས་ས་ཡ་གཅིག་དང་ཉིས་འབུམ། མགོན་པོའི་ཡིག་བདུན་ས་ཡ་གཅིག་དང་ཉིས་འབུམ་སུམ་ཁྲི་བདུན་སྟོང་། ལྷ་མོའི་སྔགས་བརྒྱད་ཁྲི། བོད་རྦད་ཁྲི་ཚོ་ལྔ། ཕྱག་རྡོར་གཏུམ་པོའི་སྔགས་ས་ཡ་གཅིག་དང་བདུན་འབུམ། །
སྒྲུབ་མཆོད་ཁ་ཐོར་ལྗགས་ཐོག་ནས་སོང་བ་ལ། ཀྱེ་རྡོར་བདུན་ཅུ་དོན་བཞི། བདག་མེད་མ་ལྔ། བདེ་མཆོག་ཉི་ཤུ་རྩ་དགུ །དུས་འཁོར་བཅོ་བརྒྱད། འཇིགས་བྱེད་ཉིས་བརྒྱ་དང་ལྔ། གཤེད་དམར་གཉིས། གསང་འདུས་བདུན་ཅུ་དོན་དགུ །མ་ཧཱ་མཱ་ཡ་གཉིས། མཁའ་འགྲོ་རྒྱ་མཚོ་བཅུ་བཞི། སངས་རྒྱས་མཉམ་སྦྱོར་ལྔ། སཾ་བུ་ཊི་ལྔ། ནཱ་རོ་མཁའ་སྤྱོད་བདུན། ཨིནྡྲ་མཁའ་སྤྱོད་གཉིས། མཻ་ཏྲི་མཁའ་སྤྱོད་གཉིས། ཕྱག་རྡོར་གཏུམ་ཆེན་བཅོ་བརྒྱད། བཀའ་བརྒྱད་བཅུ་དྲུག །ཐུགས་རྗེ་ཆེན་པོ་ཉིས་བརྒྱ་བཅུ་བཞི། ཚེ་དཔག་མེད་ཛེ་ཏཱ་རིའི་ལུགས་བརྒྱད། ཀུན་རིག་ལྔ། སྒྲོལ་དཀྱིལ་བརྒྱད། འོད་ཟེར་ཅན་མ་བཅུ་གཅིག །རིག་བྱེད་མ་བརྒྱད། མི་འཁྲུགས་པ་ཉི་ཤུ་རྩ་བཞི། བླ་མ་དྲག་པོ་གསུམ། རྣམ་རྒྱལ་སྟོང་། འཆི་མེད་འོད་སྣང་བཅུ་དགུ། བསྐང་གསོ་ཁ་ཐོར་ལ་གུར་མགོན་ལ་སྟོང་དང་ལྔ་བརྒྱད་བཅུ་གསུམ། ལྷ་མོ་ལ་སྟོང་དང་སུམ་བརྒྱ་དོན་གཉིས། ཞལ་ལ་སྟོང་དང་བཞི་བརྒྱ་ང་གསུམ། ལས་མགོན་པུ་ཏྲ་དང་བཅས་པར་བརྒྱ། བེག་ཙེ་ལ་སུམ་བརྒྱ་སོ་བཞི། ལས་གཤིན་ལ་དྲུག་བརྒྱ་རེ་གཅིག །རྩིས་མགོན་ལ་སོ་གཅིག །བེང་ལ་བརྒྱ་དང་ཞེ་བརྒྱད་རྣམས་ཆ་ཤས་ཙམ་ཡིན་འདུག་རུང་རྗེས་འཇུག་རྣམས་ཀྱི་མིག་རྒྱན་ལ་ཕན་ནམ་སྙམ་གྱིས་བྲིས་སོ། །ད་ལྟའི་ཞ་ལུ་མཁན་ཆེན་ཀུན་སྤངས་པ་དེ་སྐབས་རི་ཕུག་གི་དབུ་མཛད་ཆེན་མོ་ཡིན་པ་ཐུན་འཚམས་སུ་གསུང་གླེང་དང་བཅས་འཕྲལ་འཕྲལ་ཕེབས་ཤིང་དཀྱིལ་འཁོར་རེའི་ལྗགས་བསྙེན་རྫོགས་འཚམས་ཆོས་བཀའ་ཕར་གསན་ཚུར་གསན་ཀྱང་ཅུང་ཟད་གནང་ངོ་། །འཚོ་བ་ཆོག་ཤེས་རྒྱལ་
སྲས་ཕུ་ཆུང་པ། །བདག་གཞན་མཉམ་པར་བརྗེ་ནུས་འཆད་ཀ་བ། །རབ་འཁུ་དམ་ཆོས་འཚོལ་ལ་བག་སྟོན་རྗེ། །རྩེ་གཅིག་སྒྲུབ་ལ་གཞོལ་བ་བྲག་ཕུག་པ། །ཧཱུྃ་འོད་ཉང་བན་ཐུགས་ལས་ཉེར་འཕྲོས་པས། །ཧཱུྃ་སྒྲའི་ང་རོ་ཆེར་སྒྲོག་གཏེར་སྟོན་གྱིས། །ཧཱུྃ་ནག་ཆོས་ཀྱི་བདག་པོར་བཀའ་བབས་ཞེས། །ཧཱུྃ་མཚན་ཐུགས་དགྱེས་ངང་ནས་ལྗགས་རིང་བརྐྱང་། །ཡོམ་ཡོམ་གླིང་དགུའི་རྒྱལ་ཁམས་འདར་བའི་ཚེ། །རྔམ་རྔམ་རྡོ་རྗེ་སྲིན་པོའི་བརྟུལ་ཞུགས་ཀྱིས། །ཐིབས་ཐིབས་བསམ་ངན་འཆང་བའི་སྦྱོར་རྩུབ་མུན། །འཇིགས་འཇིགས་མངོན་སྤྱོད་རྟ་ལྗང་ཅན་དེས་སངས། །ཀུན་བཟང་བླ་མའི་ཆོས་ཀྱི་གདུང་གསོབ་ཆེད། །ཀུན་མཁྱེན་བུ་སྟོན་ཞབས་ཀྱི་དབེན་གནས་སུ། །ཀུན་དགའི་མཛའ་བ་སྟེར་བའི་བསྙེན་སྒྲུབ་ལ། །ཀུན་ཏུ་ལྷོད་མེད་ལོ་གསུམ་བཅད་རྒྱས་བཅིངས། །ལྷ་སྔགས་ཡེ་ཤེས་རྣལ་འབྱོར་མཐར་ཕྱིན་པས། །ལྷ་ཚོགས་རང་ཞལ་གཟིགས་སོགས་ངོ་མཚར་ལྟས། །ལྷ་མིའི་བློར་འདས་ཆོ་འཕྲུལ་དཔག་ཡས་ཀྱང་། །ལྷར་བཅས་འགྲོ་ཁྱོད་མི་མངོན་བརྫུ་ལ་བརྟེན། །ཆེར་རློམ་མང་ཞིག་རྡུལ་ཕྲའི་ཡོན་ཏན་ལ། །ལའུར་ལྟོས་ཞེས་མཁའ་ལ་འཕྱར་མཐོང་ཚེ། །ཚེ་རབས་དུ་མར་གོམས་པའི་དམ་པའི་ཚུལ། །ཚུལ་མིན་རྐུན་པོའི་ནོར་ལྟར་སྦ་འདི་མཚར། །མེ་ཁྱིའི་དབྱར་སྡེ་པ་བཀྲ་ཤིས་རྩེ་པ་མཆོད་ཡོན་མཇལ་ཐོག་ལྷ་སར་གྲོངས་པ་ཡར་འདྲེན་ལ་གདན་དྲངས་ཆོག་པ་དགོས་ཚུལ་དཔོན་སས་སྡེ་པ་བསོད་ནམས་རབ་བརྟན་ལ་སྙན་འབུལ་ཞུས་པ་ཁྲོལ་བར་བརྟེན་གདན་འདྲེན་གདོས་དྲག་གཤིས་ལོ་གསུམ་མཐེངས་པ་དང་འགྲིག་པའི་དེ་
འཕྲལ་དུ་ཆིབས་ཁ་བསྒྱུར་ཏེ་བཀྲ་ཤིས་རྩེ་ཆོས་སྡེར་ཕེབས། སེར་ཚོགས་ཀྱི་གྲལ་དབུ་གནང་ནས་དགེ་སྒྲུབ་ཀྱི་དངོས་པོ་ཐམས་ཅད་དོན་ལྡན་སྙིང་པོར་སྨིན་པའི་འབྲས་བུ་སྦྱིན་བདག་འཁོར་བཅས་གནས་སྐབས་ལྷ་མི་དང་རིང་མིན་འཁོར་བ་མཐའ་ཅན་དུ་མཛད་པའི་རེ་བ་ཡོངས་སུ་བཀང་། རྟ་ལུག་ཚོར་མཆོད་ཡོན་དུ་ཞུ་འབུལ་མ་གནང་བའང་གནས་སྐབས་སུ་ཐུགས་སུ་མ་ཆུན་པའི་རྣམ་པ་འདྲ་ཞིག་ཏུ་མཆིས་རུང་མ་འོངས་པའི་འབྱུང་འགྱུར་མཁྱེན་ནས་རེ་ཞིག་བཏང་སྙོམས་སུ་བཞག་པ་གོར་མ་ཆག །དེ་ཡང་བོད་དུ་འགྱུར་རོ་ཅོག་གི་རྒྱལ་བའི་བཀའ་རྣམས་ལས་རྒྱུད་ཤེར་ཕྱོགས་མདོ་ལུང་སོགས་ཀྱི་རྒྱུན་སྔོན་ནས་དར་ནའང་མདོ་མང་གི་ལུང་ཤིན་ཏུ་དཀོན་པར་གྲོ་ལུང་པ་བློ་གྲོས་འབྱུང་གནས་ཀྱིས་སྟེངས་པ་ལོ་ཙཱ་བ་རྒྱ་གར་དུ་འཚོལ་བར་བཏང་བ་དང་ཆོས་ཀྱི་རྒྱལ་པོ་འཕགས་པ་རིན་པོ་ཆེས་སྤྱིལ་བུ་བ་སྟག་སྟོན་ཤེས་རབ་འོད་ཟེར་ལ་མདོ་མང་གི་ལུང་དག་པ་ཞིག་འཚོལ་བཀའ་གནང་བ་སོགས་ལུང་རྒྱུན་མཐའ་དག་ཤབ་པ་བག་སྟོན་གཞོན་ནུ་ཚུལ་ཁྲིམས་ཀྱིས་གསན་ཞིང་བར་སྐབས་སུ་རིན་པོ་ཆེ་གྲགས་དོན་པ། བཀའ་འགྱུར་བ་ཤཱཀྱ་རྒྱལ་མཚན། ཀུན་མཁྱེན་རྡོ་རྗེ་གདན་པ་སོགས་རྒྱལ་བའི་བསྟན་པ་རིན་པོ་ཆེ་གཅེས་པར་འཛིན་པའི་སྔོན་བྱོན་དམ་པ་དུ་མའི་བཀའ་དྲིན་ལས་དར་རྒྱས་སུ་གྱུར་པ་དུས་དབང་གིས་རིམ་གྱིས་འགྲིབ་ཅིང་གྲུབ་མཐའ་སོ་སོར་ཡང་རང་རང་གི་ཆོས་ལུགས་ཀྱི་ཁ་འཛིན་ཙམ་ལས་སངས་རྒྱས་ཀྱི་བཀའ་རྣམས་སྤྱི་རྟ་སྒལ་རལ་བཞིན་དུ་ལུས་པ་རྗེ་བཙུན་བླ་མ་འདི་ཉིད་ཀྱིས་བདེ་བར་གཤེགས་པའི་རིང་ལུགས་
ཀྱི་སྲོལ་འཆད་ཉན་རྩི་སྨན་ལྗོན་པས་འཐུད་པའི་སྙིང་སྟོབས་ཀྱིས་ཁུར་ཕྲག་པར་བཞེས་པའི་རྒྱུད་འབུམ་དང་འདུལ་ལུང་གཉིས་ངོར་དང་གོང་དཀར་དུ་གསན་ཟིན་ཀྱང་། ཤེར་ཕྱོགས་དང་མདོ་མང་གཉིས་ཕྱོགས་ཀུན་ཏུ་འཚོལ་བ་གནང་བར། འཐོར་ཀློག་ལྕགས་རི་མ། དབའ་བཤུར་མ། ཐོག་མཐའ་བར་གསུམ་སོགས་ཉན་བཤད་ཀྱི་གཟུགས་བརྙན་ཙམ་ལས་མཚན་ཉིད་དང་ལྡན་པ་མ་བྱུང་བ་སྡེ་པ་རྣམ་གླིང་པ་སྡོམ་བརྩོན་ཚོགས་གཉིས་དཔལ་གྲུབ་ལ་མཐར་ཆགས་སུ་ཆད་མེད་ཀྱི་ཀློག་ལུང་ཡོད་པའི་ཁུངས་ཆོད་པར་བརྟེན་ཁྲ་ཚང་པ་ཆེན་པོ་མཁས་གྲུབ་བློ་མཆོག་རྡོ་རྗེར་གཡུ་པད་གསེར་དངུལ་སོགས་སྐུ་ཆས་ཀྱི་མཐུན་རྐྱེན་གྱ་ནོམ་པ་དང་བཅས་ལྷོ་བྲག་ཕྱོགས་སུ་རྫོང་བདའ་གནང་བ་དྷཱི་ཚ་སྤྲུལ་པའི་སྐུར་བླ་མ་ཚོགས་གཉིས་དཔལ་གྲུབ་ཀྱིས་ལུང་ཕུལ་བའི་ཤེར་ཕྱོགས་རྫོགས་མཚམས་དང་འགྲིག་པའི་སྐོར་གཅིག་གསན་མ་ཐུབ་རུང་མདོ་མང་རྣམས་རྫོགས་པར་བྱུང་བ་དམ་པའི་ཆོས་ཀྱི་སྐྱེས་བཟང་པོ་དང་བཅས་བྱོན་པར་ས་བྱི་ལོ་གསན། དེའང་ངེད་རང་ཚར་ལུགས་སྙན་བརྒྱུད་ཚད་མ་བཞི་ལྡན་གྱི་ཆོས་ལ་ཤིན་ཏུ་མོས་ནའང་ཡུལ་དུས་གནས་སྐབས་ཀྱི་མོས་པ་ལམ་བྱེད་དུ་ལུས་ཤིང་ཟུར་ཐམས་ཅད་མཁྱེན་པ་ཟབ་ལམ་ནཱ་རོ་མཁའ་སྤྱོད་གསན་བཞེད་པ་ཉེ་སྐོར་ཚོར་གསན་ཡུལ་གཞན་མ་རྙེད་པའི་ཆོས་རྗེ་རབ་འབྱམས་པ་ཀུན་དགའ་ལྷུན་གྲུབ་ཀྱི་ཞལ་སློབ་དགེ་སློང་རི་ཁྲོད་པ་ཞིག་ལ་ཡོད་པ་ཁུངས་ཆོད་རུང་། དེ་ལ་ཉམས་ལེན་ལས་སྤྲོས་པའི་འཆད་ཉན་ཚད་ལྡན་ཡོང་མི་ཡོང་སོམ་ཉིར་གྱུར་པའི་ངང་ལ་ལུས་པའི་མུར་འ་ཞའི་རྡོ་རྗེ་འཛིན་པ་ཞ་ལུ་ནས་སྐུ་མཚམས་
གྲོལ་འཕྲལ་ཕེབས་ལམ་དུ་བཤད་དྲགས་པས་སྐྱ་བབས་ཀྱི་སྐུ་མ་བདེ་བ་ལ་རོང་ནས་དྲུང་འཚོ་དབོན་པོ་གདན་དྲངས་པའི་སྐུའི་འཕྲོད་བསྟེན་དང་མཆོད་ཡོན་གྱི་དགོངས་བབས་ཐུགས་ལྷུས་མ་ཐིངས་པའི་མངོན་ཆུང་ལྟ་བུར་བཞུགས་གཤིས་མེ་ཕག་གི་དབྱར་བར་གནས་ཚུལ་ཞིབ་པ་མ་ཐོས་ཤིང་སྟོན་མཇུག་ཉེ་ལེན་གྱི་ཡི་གེ་ཕུལ་བར་ལན་ཚིགས་བཅད་མ་ཞིག་བྱུང་བས། འདི་ག་ནས་བསྐུལ་མ་དང་རྗེ་བླ་མའང་ཕེབས་བཞེད་འདོམ་པའི་ས་བྱི་ཟླ་བ་དང་པོ་ཉིས་བརྩེགས་ཀྱི་སྔོན་མར་ཡར་ཀླུངས་སུ་ཐེགས་ནས་ཟླ་གཅིག་གི་བར་ཆོས་སྡེར་བཞུགས། དཔོན་སློབ་གཉིས་སྔར་ནས་འདྲིས་པ་ལྟ་བུའི་ཐུགས་ནང་དག་ཅིང་དགྱེས་རྩེར་སོན་པའི་ཟུར་ཀུན་མཁྱེན་ཆེན་པོར་ཀྱེ་རྡོར་མན་ངག་ལུགས་རས་བྲིས་ལ་བརྟེན་པའི་དབང་། ནཱ་རོ་མཁའ་སྤྱོད་ཀྱི་བྱིན་རླབས། ཉམས་ཁྲིད་ཤིན་ཏུ་ཞིབ་པ་ཆོས་སྐོར་ཡོངས་རྫོགས། ཨིནྡྲ་དང་མཻ་ཏྲི་མཁའ་སྤྱོད་གཉིས་ཀྱི་ལུང་། རིག་བྱེད་མའི་ཐུན་མོང་བ་དང་ཐུན་མོང་མ་ཡིན་པའི་རྗེས་གནང་ལྷ་ལྔའི་བྱིན་རླབས། ཚོགས་བདག་གི་ཐུན་མོང་བའི་རྗེས་གནང་། དམར་པོ་སྐོར་གསུམ་གྱི་ལུང་། དམར་ཆུང་སྐོར་གསུམ་གྱི་རྗེས་གནང་དང་། ཆོས་སྐོར་ཡོངས་རྫོགས་ཀྱི་ལུང་། ཞལ་བསྙེན་དུས་ཀྱི་རྗེས་གནང་། གསང་ཁྲིད་མ་གཏོགས་རྗེ་ཚར་ཆེན་གྱི་དཀར་ཆག་ལྟར་གྱི་བེའུ་བུམ་དང་ཧ་ལ་ནག་པོའི་སྐོར་སོགས་ཆོས་འཁོར་རྒྱ་ཆེར་བསྐོར། གསེར་ཆོས་ཀྱི་དམར་པོ་སྐོར་གསུམ་གྱི་གདམས་པ་ཟབ་གྲགས་ཆེས་པས་མཁས་གྲུབ་ཆེན་པོ་བོད་མཁར་བ། སྤྱན་སྔ་རིན་པོ་ཆེ། ཆོས་རྗེ་ཀུན་
དགའ་ལྷུན་གྲུབ་གསུམ་སྡེ་པ་དགའ་ལྡན་པའི་བླ་མར་གྱུར་པ་སོགས་འཕྲིན་ལས་ཆེས་པ་ལ་སྐྱིད་ཤོད་ཕྱོགས་སུ་ངན་དོགས་ཀྱི་དབང་སྡུད་ཡོད་ཟེར་བའི་སྒྲོ་སྐུར་ཐུགས་ལ་མངའ་བ་དང་། ཕག་མོ་གྲུ་པ་དང་ཤེན་རྡོར་སེང་གཉིས་ཀྱི་ལོ་རྒྱུས་ལྗགས་ལུང་གི་དུས་གསན་པས་ཀྱང་རྐྱེན་བྱས་རྗེ་འདིའི་མཆོད་གྲལ་དུ་འཕེལ་གདུང་བཞུགས་པའི་བ་སོའི་ཟེའུ་ཞིག་ཡོད་འདུག་པ་དེར་དབང་སྡུད་ཀྱི་འཁོར་ལོ་མེད་དམ་དགོངས་པའི་ཐུགས་རྟོག་འཕྲོས་པ་མཁྱེན་ཏེ་གཟིགས་འབུལ་དགོས་འདུག་གསུངས་ནས་ཟ་མ་ཏོག་ཁ་ཕྱེ་ནས་སྤྱན་འབེབས་ཕུལ་བས་མངོན་མཁྱེན་ལ་ཐུགས་ཡིད་ལྷག་པར་ཆེས། ཚུར་སྣང་གསལ་བ་བཀྲ་ཤིས་རྒྱ་མཚོ་ལ་དག་སྣང་དུ་སློབ་དཔོན་ཆེན་པོས་གནང་བའི་ཚེ་དབང་ཧྲཱིཿགཅིག་མ་གསན་ཅིང་འདོད་ཆོས་མང་ཙམ་ཞུ་བའི་སྙན་གསན་མཛད། ཧོར་ཟླ་དྲུག་པའི་ནང་དུ་ཁྱབ་བདག་བཀའ་འགྱུར་བ་སྐྱིད་ཤོད་དུ་ཆིབས་ཁ་བསྐྱོད་དེ་འབྲས་སྤུངས་སུ་ཞག་ཤས་སུ་བཞུགས་རིང་ངོས་མཇལ་ཁ་ཡར་བྱུང་བའི་ཐོག་མའི་ཉིན་ཆོས་ཀྱི་གསུང་གླེང་གནང་བ་ཙམ་ནས་མོས་གུས་ཀྱི་དད་པ་ལྷག་པར་འཕེལ། ཆོས་འབྲེལ་དགོས་ཚུལ་ཕེབས་པ་བཞིན་ཐམས་ཅད་མཁྱེན་པ་བསོད་ནམས་རྒྱ་མཚོར་གྲུབ་ཆེན་དཔལ་ལྡན་རྡོ་རྗེས་གནང་བའི་ཚེ་དབང་ཉེ་བརྒྱུད། བཀའ་གདམས་ཐིག་ལེ་བཅུ་དྲུག་གི་ཡིག་རྙིང་། ཕ་ཆོས་ནས་ཆོས་ཐུན་གསུམ་ཙམ། ཤ་བ་རི་པའི་ལུགས་ཀྱི་ཞལ་གྱི་ལས་ཚོགས་གང་ཐོབ་ཀྱི་ལུང་རྣམས་ཕུལ། དེ་ནས་ཞང་བདེ་བའི་རྡོ་རྗེའི་བསྟི་གནས་གུང་ཐང་དུ་ཕེབས་པའི་གཟིམས་ཁང་ཤར་དུ་བཞུགས་རིང་གི་གསོལ་ཕོགས་དང་དགོས་
ཆ་མཐའ་དག་གཞུང་ནས་བསྐྲུན། ཟུར་ཐམས་ཅད་མཁྱེན་པ་ལ་ཨིནྡྲ་མཁའ་སྤྱོད་མཻ་ཏྲི་མཁའ་སྤྱོད་ཀྱི་བྱིན་རླབས། གུར་མགོན་ལྷ་བརྒྱད། བཅུ་གཉིས་མ། ལྔ་མ། བཅུ་བདུན་མ་དང་བཞིའི་དབང་། མགོན་པོ་ལྷ་གསུམ། བརྒྱད་མ། བཅུ་གཉིས་མ་དང་གསུམ་གྱི་ཐུན་མོང་བ། མགོན་པོ་ཁྲོ་བཅུ་རྣམས་ཀྱི་རྗེས་གནང་། ཕྱི་འཁྲིད་རྡོ་རྗེ་བྲག་རྫོང་ལ་ཕྱི་ནང་གསང་གསུམ་གྱི་ཉམས་འཁྲིད། རྩ་གསུམ་འཁོར་ལོ་ལྔ་ལྡན་གྱི་གསང་བའི་ཉམས་འཁྲིད། མེ་འབར་ཁ་སྐོང་། གྱི་ལྗང་། སྙན་བརྒྱུད། དུད་སོལ་དང་བཅས་པའི་པོ་ཏི་རྣམས་ཀྱི་ལུང་མན་ངག །ཞལ་སྒྲུབ་དུས། ཐུན་མོང་བ། ལས་བཞི། བྲམ་ནག་ཤན་པ་དྲུག་སྐོར་རྣམས་ཀྱི་རྗེས་གནང་། ཕྱི་འཁྲིད་སྲུང་འཁོར་ཚེ་སྒྲུབ། ནང་གི་ཉམས་འཁྲིད། དེའི་རྒྱབ་བརྟེན་ལུང་གི་སྐོར། མགོན་པོ་ཕུར་ཞབས་མའི་སྒྲུབ་ཐབས། རྡོ་རྗེ་གདན་པའི་གཏོར་སྐྱོང་དང་གཏོར་ཆེན་སོགས་ཆོས་སྐྱོང་ཆེ་ཆུང་གི་ལས་ཚོགས་ཐོར་བུའི་ལུང་། བདག་ཆེན་རྡོ་རྗེ་འཆང་གི་བདུད་རྩི་རིལ་བུའི་སྒྲུབ་ཐབས། གནོད་སྦྱིན་བེག་ཙེའི་རྗེས་གནང་དང་ཆོས་སྐོར། འཇམ་དཔལ་ནག་པོའི་རྗེས་གནང་དང་ཆོས་སྐོར། འདོད་རྒྱལ་གྱི་འདོད་པ་ལྷའི་རྗེས་གནང་།སེང་ལྡེང་ནགས་སྒྲོལ། དཔལ་ལྡན་དམག་ཟོར་མ། ཁྲོ་མོ་སྨེ་བརྩེགས། གནས་བཅུ་རྣམས་ཀྱི་རྗེས་གནང་དང་སྒྲུབ་ཐབས་སོགས་ཡིག་སྣའི་ལུང་ཁ་ཤས། གཏེར་ཁ་འོག་མའི་བླ་མ་གསང་འདུས་ཀྱི་ཟླུམ་པོ་བཞི་དབང་དང་ལུང་། བཀའ་བརྒྱད་གསང་རྫོགས། ཕུར་པ་སྤུ་གྲི། བསྟན་མ་བཅུ་གཉིས། པདྨ་ཡང་གསང་ཁྲོས་པ་རྣམས་ཀྱི་དབང་
ལུང་ཡོངས་རྫོགས། མངའ་རིས་སྐུ་མཆེད་ཀྱི་བླ་མ་བཀའ་བརྒྱུད་ཡོངས་འདུས་ཀྱི་རྩ་དབང་དང་སྒོས་དབང་ཐོར་བུ་དེ་དག་དང་འབྲེལ་བའི་ཆོས་སྐོར། ལེགས་ལྡན་རྗེའི་དྲག་པོ་དབུ་དགུའི་ཆོས་སྐོར། ཉང་གི་དྲག་དམར་དབང་ཆོག་རྡོ་རྗེ་སྤྱི་བླུགས་ཀྱི་དབང་རྫོགས་པ། དུམ་པ་བརྒྱའི་འཆར་ཀ་སྒྲོམ་བུ་མ་དང་བཀའ་མ་སྤྲིན་ཤུགས་མ་ཉིས་འདུས་གཤིན་རྗེ་འཇོམས་བྱེད་འབར་བའི་དབང་། ཆོས་སྐོར་ཐོར་བུ། རྣམ་སྲས་སྤྲིན་གསེབ་པའི་རྗེས་གནང་དང་སྒྲུབ་སྐོར། བྱང་གཏེར་གྱི་ཚེ་དབང་ལྕགས་སྡོང་མ་བཀྲ་བཟང་པ་ཆོས་སྐྱོང་བསོད་ནམས་ཀྱི་ཕྱག་བཞེས། ཐང་ལྷའི་སྲོག་གཏད། ཐང་སྟོང་པའི་ཚེ་དབང་འཆི་མེད་དཔལ་སྟེར་སོགས་ཟབ་ཆོས་མང་དུ་ཕུལ། །དེ་ཡང་ཟུར་ཀུན་མཁྱེན་ཆེན་པོས་སྔོན་ཆད་གསང་སྔགས་གསར་རྙིང་གི་ཆོས་བཀའ་མང་དུ་གསན་མོད་ཀྱང་ཉེ་ལམ་ཤིན་ཏུ་དགྱེས་པའི་ངེད་ལའང་སྐུ་ཞབས་ཐུགས་རྩོལ་གྱིས་ཁྱབ་པར་བརྟེན་ད་ཆ་གཞན་ལ་འགྲམ་ཆུ་ལྡང་མི་དགོས་པའི་ཐོབ་རྒྱ་བྱུང་ཞེས་བཀའ་ཕེབས་པ། འཇམ་དབྱངས་མཁྱེན་བརྩེའི་གསུང་མགུར་དུ། སྨིན་བྱེད་དབང་གི་ཆུ་བོ་མཐའ་དག་ལེགས་པར་ཐོབ་ནས། །དེ་དག་རྗེས་སུ་འབྲེལ་བའི་རིམ་གཉིས་ཉམས་སུ་བླངས་ཤིང་། །དམ་ཚིག་སྡོམ་པ་སྐྱོན་མེད་སྲོག་བཞིན་གཅེས་པར་བསྲུངས་པས། །རྡོར་འཛིན་ཚོགས་པའི་ཁྲོད་ནས་མཁྱེན་བརྩེའི་དབང་ཕྱུག་སྐྱིད་དོ། །རྒྱ་བོད་མཁས་གྲུབ་བླ་མ་མཚན་ལྡན་མང་དུ་བསྟེན་ནས། །མདོ་སྔགས་གསར་རྙིང་སྨིན་གྲོལ་བཤད་བཀའ་མང་དུ་ཐོས་ཤིང་། །རྣམ་ཐར་ཐོས་པའི་དོན་མང་ཚུལ་བཞིན་ཅུང་ཟད་རྟོགས་པས། །མང་ཐོས་ཚོགས་པའི་
དབུས་ན་མཁྱེན་བརྩེའི་དབང་ཕྱུག་སྐྱིད་དོ། །ཞེས་པའི་དོན་འདི་ཉིད་ཀྱི་རྣམ་ཐར་དུ་སོང་ངོ་། །གུང་ཐང་པ་རྣམས་གཙོ་བོར་གྱུར་པའི་ཁྲོམ་ལ་གྲུབ་རྒྱལ་ལུགས་ཀྱི་ཚེ་དབང་དང་། མ་ཎི་བ་རྣམས་ལ་ཐུགས་རྗེ་ཆེན་པོ་གཙོ་འཁོར་གསུམ་པའི་རྗེས་གནང་སྩལ། བར་དེར་མོང་བཟའ་ཁྲི་བཙུན་གྱིས་བཏབ་ཅིང་སློབ་དཔོན་ཆེན་པོ་པདྨ་སཾ་བྷ་ཝ་དང་མཉམ་མེད་ཇོ་བོ་ཆེན་པོ་དཱི་པཾ་ཀ་ར་སོགས་དམ་པ་དུ་མས་བྱིན་གྱིས་བརླབས་པ་ཡེར་པའི་གནས་མཇལ་བར་ཕེབས་ཏེ་རྟེན་བརྟེན་པ་རྣམས་ལ་ཡན་ལག་བདུན་པ་རྒྱས་པར་ཕུལ། འཚོ་རྒྱལ་ཕུག་ཏུ་གསོལ་འདེབས་ལེའུ་བདུན་མའི་སྐབས་སྐུ་ཆོས་ལ་ཚེ་ཆུ་ཐིགས་པ་རེ་གཉིས་བབས་པ་ཇེ་འཕེལ་ལ་སོང་བ་ནས་དཔོན་སློབ་ཐམས་ཅད་ལ་མཆོད་རྒྱུ་བྱུང་ཞིང་སྣོད་དུ་བླུག་སྟེ་བསྣམས་ཕེབས་རྒྱུ་སོགས་ཡེ་ཤེས་མཁའ་འགྲོའི་གཙོ་མོ་དེས་རྗེས་སུ་བཟུང་བའི་མཚན་མ་ཁྱད་པར་ཅན་དུ་གདའོ། །ཟུར་ཀུན་མཁྱེན་ཆེན་པོར་གསན་པ་བླ་མ་ནོར་བུ་རྒྱ་མཚོའི་སྒྲུབ་དབང་། བཀའ་བརྒྱད་བདེར་གཤེགས་འདུས་པའི་དབང་། རཏྣའི་ཀློང་གསལ་སྙིང་ཐིག་གི་ཆོས་སྐོར། དམ་ཅན་སྐྱེས་བུའི་སྲོག་དབང་ལུང་བཅས། གཤིན་རྗེ་ཚེ་བདག་ལྕགས་འདྲ་དང་ལྕགས་སྡིག །ཁྲོ་ཆུ། དྲི་མེད་ལྷུན་པོའི་དོན་ཏིག་འགྲོ་བ་ཀུན་སྒྲོལ་རྣམས་ཀྱི་དབང་ལུང་ཡོངས་རྫོགས། རླུང་དམར་གྱི་སྐོར། རྡོར་འབུམ་ཆོས་གྲགས་ཀྱི་བདུད་རྩི་བུམ་པ་དང་། གཡུ་ཐོག་སྙིང་ཐིག་གཉིས་ཀྱི་དབང་ལུང་། བྲང་ཏིའི་གདམས་ངག་དངུལ་བྲེའི་དྲང་སྲོང་སེར་སྐྱའི་སྒྲུབ་ལུང་། སངས་རྒྱས་གླིང་པའི་རྣམ་སྲས་སེར་ཆེན་
གྱི་སྲོག་དབང་ལུང་བཅས། གྲྭ་པའི་ཞང་བློན་ལས་ཚོགས་ཀྱི་ལུང་། ལས་འབྲེལ་རྩལ་གྱི་བདུད་མགོན་གྱི་བཀའ་གཏད་དྲེགས་དབང་ལུང་བཅས། འབྲོ་ལོའི་ཁམས་གསུམ་འཁྲུག་བྱེད་རླུང་ནག་གི་སྐོར། བྲམ་ཟེ་སྡོམ་བཟང་གི་རླུང་འཁོར་བླ་མ་ཞང་གི་བཀའ་འབུམ་པོད་བཞི་བཀའ་རྒྱ་མ་དང་བཅས་པ། སྣར་ཐང་བརྒྱ་རྩའི་རྗེས་གནང་ལུང་བཅས་སོགས་ཆོས་བཀའ་མཐའ་ཀླས་པ་གསན། འདི་དང་ལྕགས་སྟག་གི་ཆོས་འཁོར་གྱི་འདུས་པ་དང་གཉིས་ཀྱི་གཙོ་བོ་སྐྱེད་ཚལ་མཁན་ཆེན་བྱམས་པ་ངག་དབང་བསྟན་འཛིན་ཡོད་པར་སྣང་ངོ་། །ཧོར་ཟླ་དགུ་པའི་ནང་དུ་ཁྱབ་བདག་བཀའ་འགྱུར་བ་འབྲས་སྤུངས་སུ་ཕེབས་ནས་ཕ་དམ་པའི་འཆི་མེད་མགོན་པོར་བརྟེན་པའི་རིང་པོར་འཚོ་བའི་རྟེན་འབྱུང་གི་གསུང་ཆོག་རྒྱས་པར་གནང་། རྗེ་མཁྱེན་བརྩེའི་གསུང་མགུར་དུ། ཡོངས་བླ་མ་བསྟེན་པ་མང་ན་ཡང་། ཁོང་སློབ་འཁོར་རྒྱས་པའི་འུར་རྒྱང་ཅན། །སྒྲོབ་གང་ཆེའི་རྗེས་སུ་རྒྱུག་པ་ལས། །རྗེ་མཚན་ལྡན་བསྟེན་པ་དཀོན་ན་ཡང་། །དཔལ་རྒྱལ་བ་ཀུན་དངོས་སྒོ་རུམ་པ། །སྲས་ཚར་པའི་ཞབས་པད་བསྟེན་ལགས་པས། །བདག་སྤྲང་པོ་བསམ་བཞིན་སྐྱིད་དུ་ཚོར། ཁྱེད་མཆེད་གྲོགས་ཚོའི་ཐུགས་ལ་ཇི་ལྟར་གདའ། །ཞེས་པའི་དོན་ལྟར་སྐུ་གསུང་ཐུགས་ཀྱི་མཛད་པ་ལ་གུས་པར་བྱུང་བས། ཚར་ཆེན་ཆོས་ཀྱི་རྒྱལ་པོས་ཟབ་ལུང་བདེར་གཤེགས་འདུས་པའི་སྐུ་བརྙན་དྲུང་དུ་མཛད་པའི་ཨྱོན་རིན་པོ་ཆེའི་གསོལ་འདེབས་ཀྱི་ལུང་དང་ཚར་ཆེན་གྱི་ཕྱག་དཔེ་ངོས་མའི་ཧ་ལ་ནག་པོའི་བེའུ་བུམ་མགོ་ཐོག་ཏུ་འཇོག་པ་གནང་བའི་བཀའ་བསྒོ་ཞིག་ཞུས་ཕེབས་རྫོངས་གཟབས་
རྒྱས་དང་བཅས་ཡར་ལམ་ཟུར་ཀུན་མཁྱེན་བླ་མ་དང་ཞལ་རྒྱས་ངོས་རྒོད་དཀར་ལ་བརྒྱུད་དཔལ་ཟན་གཡང་ལྷུན་གྱིས་གྲུབ་པའི་གཙུག་ལག་ཁང་ཆེན་པོར་ཕེབས་ཏེ་དབུ་རྩེ་རིགས་གསུམ་ཡཀྴ་བླ་འོག །གླིང་བཞི། གླིང་ཕྲན། ཇོ་མོའི་གླིང་གསུམ་དང་བཅས་པའི་རྟེན་བརྟེན་པ་རྣམས་ལ་དཀར་མེ་སྙན་ཤལ་སོགས་ཀྱི་ཚོགས་གསོག །བཤད་སྒྲུབ་ཀྱི་རིང་ལུགས། སྐྱེ་རྒུའི་ལེགས་བྱས་འཕེལ་བའི་སྨོན་ལམ་གྱིས་མཚམས་སྦྱར་བའི་དུས་མཁན་ཚང་པ་དང་རབ་བྱུང་བ་རྣམས་ཀྱིས་ཞབས་དྲུང་སྒར་ཆེན་ཞིང་ཁམས་གཞན་དུ་གཤེགས་ནས་ལྕོག་ཏུ་རང་ལུགས་ཀྱི་བླ་མ་ཕེབས་མཁན་གཞན་མ་བྱུང་གཤིས་ད་ལམ་ཆོས་སྐྱོང་ཆེན་པོ་སྐུ་ཕེབས་དང་འགྲིག་པས་ངོས་མཇལ་འགབ་ཞུས་རུང་སྙན་དར་དང་དམོད་ནས་ཙམ་ཕུལ་བས་འཐུས་རྩིས་ལ་སྨོན་གྲོང་གི་དྲེའུ་གཡར་པོར་བཙད་འབངས་པའི་མཛོས་བརྡུངས་པ་མ་མཇལ་ན་འཁྲེན་པའི་བརྡར་དགོངས་ཏེ་ལྕོག་ལ་ཕེབས་པ་དྲེགས་པ་ཡོངས་ཀྱི་སྡེ་དཔོན་གནོད་སྦྱིན་ཙེའུ་དམར་པོ་ཁོག་ཏུ་བརླམས་པ་རྡོ་སྐྱགས་མགོར་བསུ་བར་ཕེབས་ནས་ཁྲོམ་པ་རྣམས་ལྷ་རྒྱལ་ལན་གསུམ་ཐེན་བཅུག་ཅིང་དགྱེས་པའི་རྣམ་འགྱུར་མཛད།སྡེ་པ་སྟག་རྩེ་བས་དུང་ཆེན་གསར་བརྡུངས་སྤྱན་འབེབས་ཞུས་པ་ད་རེས་མཁན་པོ་བྱོན་པ་དང་འགྲིག་པ་རྟེན་འབྲེལ་གྱི་སྒོ་ཡོད་པས་ཕྱོགས་བཞི་ནས་འབུད་དུ་བཅུག་པ། ཇི་སྐད་དུ། སྔོན་གྱི་རྒྱལ་པོ་གྲགས་པའི་གཟུགས། །ངག་གི་རང་བཞིན་མེ་ལོང་ཐོབ། །དེ་ཉིད་ཉེ་བར་མི་གནས་ཀྱང་། །རང་ཉིད་ཉམས་པ་མེད་ལ་ལྟོས། །ཞེས་པ་ལྟར་རྗེ་བླ་མ་དག་ཞིང་དུ་གཤེགས་ནས་ལོ་བཅོ་བརྒྱད་ཙམ་སླེབས་ཀྱང་སྐུ་གསུང་ཐུགས་ཀྱི་རྣམ་པར་ཐར་པའི་
གྲགས་སྙན་ཕྱོགས་བྲལ་གྱི་རྣ་བའི་རྒྱན་དུ་ཇེ་ཆེར་འཕེལ་བའི་བརྡར་མངོན། སྔོན་དགེ་སློང་ནག་པོ་སོགས་ཀྱི་སྐྱེ་རྒྱུས་བྷ་ཏ་ཧོར་གྱི་སྒོམ་གྲྭ་ནས་བྱོན་ཏེ་གུ་རུ་པདྨས་གཙུག་ལག་ཁང་གི་སྲུང་མར་བསྐོས་པ་ནས་ད་བར་མ་ཉམས་པར་མཛད་ལུགས་ཀྱི་རྒྱུ་མཚན་རྒྱས་པར་གསུངས་པའི་ཚེ་རྗེ་ཉིད་ཀྱིས་ཤིན་ཏུ་ལེགས་ཚུལ་དང་དགེ་རྒྱས་འདི་བྱེ་མའི་གནོད་པས་འཇིག་པར་ཉེ་བ་ཆོས་སྐྱོང་ཆེན་པོའི་རྫུ་འཕྲུལ་གྱིས་ཞི་བ་བྱུང་ན་ཞེས་ཞུས་པའི་ལན་དུ་སྤྱིར་འགྲོ་བའི་ལས་གཙོ་ཞིང་སྒོས་སུ་གཟུགས་ཅན་གྱི་མིས་མ་བྱས་ན་ངེད་གཟུགས་མེད་ཀྱིས་དཀའ་གསུང་། དམོད་ནས་དང་བཅས་བསྟན་འགྲོའི་ཕན་བདེ་སྒྲུབ་པའི་འཕྲིན་བཅོལ་དང་འགྲོ་བ་རྣམས་ཀྱང་མི་དགེ་བར་སྤྱོད་པ་ཤས་ཆེ་བས་མི་ལུས་ཐོབ་པའང་དཀའ་མོར་མཆིས་པ་ཞིང་བཅུ་ཚང་བའི་རིགས་མ་གཏོགས་སྐྱེ་འགྲོའི་སྲོག་དབུགས་ལ་གནོད་པ་མཛད་ན་མི་ལེགས་ཚུལ་ཞུ་བ་གནང་བར་སངས་རྒྱས་ཀྱི་བསྟན་པ་སྲུང་བའི་བྱ་ར་བྱེད་ཅིང་བསྟན་འགྲོའི་བདེ་སྐྱིད་འཕྲོག་པའི་དགྲ་བགེགས་ནི་སྔར་ཡང་ཚར་བཅད་ད་རུང་གུ་རུ་པདྨའི་བཀའ་ལས་མི་འདའ་དེ་མིན་སྡུག་འདྲེས་སེམས་ཅན་ཚོར་གནོད་པ་ག་ལ་བྱེད། འགྲོ་བ་རྣམས་ཀྱིས་སྡིག་པ་མི་དགེ་བ་བསགས་པའི་འབྲས་བུ་སྡུག་འདྲེའི་རྣམ་པར་ཤར་བ་ཡིན་པས་བྱ་ཐབས་ག་ལ་ཡོད་གསུངས་པར་རྗེས་སུའང་ཐུགས་ངེས་ཤེས་འདྲོངས་པར་སྣང་།སྔར་ཁྱེད་ཀྱིས་མཛད་ཟེར་རྒྱུ་མིན་ཀྱང་སྡུག་འདྲེར་དམིགས་པའི་སྲུང་མདུད་མངས་ན་བར་ཆད་ཀྱི་རྒྱུར་འགྲོ་བས་མི་འགབ་ཚུལ་གསུང་བའི་ཤུགས་བསྟན་ཆེད་དུ་དམིགས་ནས་བསྐྱེད་ཆོག་མཛད་པ་རེ་གཉིས་ལ་སྔོན་རྗེ་བཙུན་རྡོ་རིང་པ་ཆེན་པོར་གནས་རྙིང་རྒྱལ་པོས་ཁས་བླངས་པ་དང་འདྲ་
བར་སེམས་ཤིང་སླར་སྐུ་རིམ་སོགས་བླང་དོར་གྱི་ལུང་བསྟན་ཞིབ་ཏུ་མཛད། རྡོ་སྐྱགས་མགོའི་བར་ཕེབས་སྐྱེལ་ཞུས་ཤིང་མཆོད་རྟེན་དམར་པོ་བའི་བཙུན་པས་སྟག་ལུང་ཞབས་དྲུང་ཕེབས་པ་ལས་འཚུབ་པ་དང་ད་རེས་ལས་འཇམ་པ་མ་དྲན་ཟེར་བ་ནི། རྗེ་མཁྱེན་བརྩེའི་གསུང་མགུར་ལས། ཕྱི་རོལ་གྱི་དྲེགས་པ་རྒྱུད་གསུམ་པོ། །རང་སེམས་ཀྱི་རྩལ་དུ་རང་ངོ་འཕྲོད། །ཡིན་ལུགས་ཀྱི་ཤེས་པ་ལྷུག་པ་ལ། །བཟོ་བཅོས་མེད་པ་བླ་མའི་དྲིན། །ཞེས་པའི་དོན་བཞིན་གསང་ལས་ཡང་གསང་སྙིང་པོའི་མན་ངག་གི་ཆེ་བའོ། །རིམ་གྱིས་བཀྲ་ཤིས་ཆོས་ཀྱི་སྡེ་ཆེན་པོར་ཕེབས། ཞོལ་ནས་ནང་པ་ཤོད་པ་བས་སྤྱན་དྲངས་ཏེ་ནང་མི་དམངས་ལ་ཚེ་དབང་གྲུབ་རྒྱལ་མ་དང་སྐྱེར་སྒང་ལུགས་ཀྱི་རྟ་མགྲིན་གྱི་བྱིན་རླབས། ཚོང་དཔོན་ཕུན་ཚོགས་ཁྱོ་ཤུགས་གཉིས་ལ་ལྕག་སྡོང་མའི་ཚེ་དབང་བརྒྱ་རྩ་དང་། རྣམ་སྲས་སེར་ཆེན་གྱི་རྗེས་གནང་སྩལ། དབང་གཏོར་གྱི་ཁང་བརྩེགས་དེ་ལོ་འཁོར་དུ་བཞག་པ་སོས་ཀའི་ཚ་བ་དང་གཏོར་མ་བཞག་པའི་ནང་དེར་ལོ་རོ་བ་ལྔ་ཙམ་གྱིས་མཆོད་ཀོང་དང་ཏིང་སོགས་བླུག་པའི་མེ་དུགས་རྣམས་འདོམས་ནའང་རྒྱན་སྤྲོད་ཀྱི་མར་མ་ཞུ་ཞིང་བག་རྡུལ་གྱིས་བཀྲག་མ་ཉམས་པས་མཚོན་སྐྱོན་གང་ཡང་མ་བྱུང་གནོད་སྦྱིན་ངལ་བསོས་པོ་འདོད་རྒྱལ་གྱི་ལྕགས་ཀྱུས་བཅུག་པའི་རྟགས་མཚན་མངོན་སུམ་དུ་གསལ་བ་དེའོ། །ས་མོ་གླང་ལོར་ཁྱབ་བདག་ཁྲ་ཚང་བ་ཆེན་པོ་ལྷོ་བྲག་ཉི་ལྡེར་དྷཱི་ཚ་སྤྲུལ་སྐུ་འཇིག་རྟེན་དབང་ཕྱུག་གི་དྲུང་དུ་ཤེར་ཕྱོགས་སྐོར་གསན་པར་རྫོང་བདའ་གནང་། ཕེབས་སྒོ་བཞིན་གསོལ་ཆས་རྣམས་དོ་བོ་རྫོང་ནས་འཚེམས་མེད་དུ་བསྟར། དབྱར་ཟུར་ཀུན་
མཁྱེན་ཆེན་པོས་ཡར་ཀླུངས་སུ་ཕེབས་པར་མགོན་པོ་ལྷ་བརྒྱད་དང་བཅུ་གཉིས་མ་ཐུན་མོང་མ་ཡིན་པ། དུད་སོལ་མའི་རྗེས་གནང་ནན་ཆགས་མ། པུ་ཏྲ། བེར་ནག་ཟངས་གྲི་ཅན་ཕྱི་ནང་། བྲན་བདུད་ཐུན་མོང་བ། ལས་སྦྱོར་གྱི་མགོན་པོ་གླང་གདོང་མ། ཕྱག་རྡོར་གོས་སྔོན་ཅན། རྣམ་སྲས་སེར་ཆེན་སྨད་ལུགས། དཀར་བདུད་ལྕམ་བྲལ་རྣམས་ཀྱི་རྗེས་གནང་། ཡང་གསང་ཁྲོས་པའི་རྫོང་ཆུང་ཚེ་དབང་། བྱང་གཏེར་འཆི་མེད་འོད་སྣང་གི་དབང་། དྲག་པོ་དབུ་དགུའི་རྩ་དབང་། ཚེ་དཔག་མེད་གྲུབ་རྒྱལ་ལྷ་གཅིག་བུམ་གཅིག་མ། ཚེ་སྦྱིན་དཀར་པོ་ཞག་བདུན་མ། ཚར་ཆེན་གྱི་བཀའ་འབུམ། བླ་མ་དམ་པ་དང་མུས་ཆེན་གྱི་ཀྱེ་རྡོར་མངོན་རྟོགས། དཀྱིལ་ཆོག་བྱ་བྲལ་མ། སྒོ་རུམ་པའི་རྣམ་ཐར་རྗེ་མཁྱེན་བརྩེས་མཛད་པ་སོགས་དགོངས་བཞེད་ཀྱི་ཆོས་བཀའ་མང་དུ་འབུལ་བ་གནང་། རྗེ་ཁྲ་ཚང་བ་ཆེན་པོ་ལྷོ་བྲག་ནས་ཕྱིར་ཕེབས་པ་ལ་བརྒྱད་སྟོང་པ་མ་གཏོགས་པའི་ཤེར་ཕྱོགས་ཡོངས་རྫོགས་ཀྱི་ལུང་གསན་དུས་གསུང་ངག་ལམ་འབྲས་དང་རྡོ་རྗེ་ཕྲེང་བ་སོགས་སྤྱི་བཀའ་ཟུར་བཀའ་མང་ཙམ་ཞུ་བའི་སྙན་གསན་འབེབས་པར་སྡེ་པ་བསོད་ནམས་རབ་བརྟན་གྱིས་ཐུགས་ཁུར་བཞེས་ནས་རྒྱལ་རྩེ་སྨན་གྲོང་ཚེ་དབང་དར་རྒྱས་རྫོང་བདའ་མཛད། ཤེར་ཕྱོགས་ཀྱི་ལྗགས་ལུང་འཕྲོ་གསན་དགོས་དང་ཕྱག་དཔེ་གཟིགས་རྟོག་སྦྲགས་པའི་ཐུགས་བྲེལ་ཁྱད་ཀྱི་ཟླ་བ་ཕྱེད་གཉིས་ཙམ་ནས་འབྱོན་པའི་དུས་ཚེས་བསྒྲིགས། ཧོར་ཟླ་བཅུ་པའི་འགོར་རྒྱལ་ཁབ་ཆེན་པོ་ཕོ་བྲང་པོ་ཏ་ལར་ཕེབས་ཏེ་ཐོག་མར་རྟེན་འབྲེལ་གྱི་ཁྱད་ནས་ཚེ་དཔག་མེད་གྲུབ་རྒྱལ་མའི་བསྐྱེད་རྫོགས་ཀྱི་ཉམས་འཁྲིད་དང་ཚེ་དཔག་མེད་དཀར་པོ་ཆག་ལུགས་ཀྱི་རྗེས་གནང་སྩལ་བའི་སྔ་དྲོ་ལི་མ་ལྷ་ཁང་དུ་
གསུང་ངག་གི་ཁྲིད་དང་དགོངས་ཇ་ཁར་རང་བྱུང་འཕགས་པའི་ལྷ་ཁང་དུ་དབང་རྗེས་གནང་གི་རིགས་རིམ་གྱིས་གནང་བར་གསུང་ངག་རིན་པོ་ཆེ་སློབ་བཤད་ཀྱི་ཉམས་ཁྲིད་སྨིན་རྒྱས། རྒྱུ་དབང་། ལམ་དབང་། བདག་མེད་ལྷ་མོ་བཅོ་ལྔའི་དབང་བྱིན་རླབས་ཀྱི་སྐོར་རགས་རིམ། ནཱ་རོ་མཁའ་སྤྱོད་ཀྱི་བྱིན་རླབས། རྒྱབ་རྟེན་གྱི་ལུང་། རྡོ་རྗེ་ཕྲེང་བ་ཞེ་ལྔ་མ། བདེ་མཆོག་ལཱུ་ཨི་པའི་དབང་བཀའ་བབས་བདུན་ལྡན། ནག་པོ་པ། མཁའ་འགྲོ་རྒྱ་མཚོའི་དབང་བཀའ་བབས་བཞི་ལྡན། གཤིན་རྗེ་དགྲ་ནག་ར་ལུགས་བཅུ་གསུམ་མ། གདན་བཞི་ལྷ་དགུ་བཅུ་རྩ་བདུན་མ། བདེ་མཆོག་བོང་ཞལ་ཅན་ལྷ་སོ་བདུན་མའི་དབང་། གསང་བ་འདུས་པ་ས་ལུགས་ལྷ་བཅུ་དགུ་མའི་དབང་། གཤེད་དམར་ལྷ་ལྔའི་དབང་བརྒྱུད་པ་སུམ་ལྡན། འཇིགས་བྱེད་ལྷ་ཞེ་དགུ་མ་དང་རོ་ལངས་བརྒྱད་སྐོར། ཀུ་རུ་ཀུལླེ་ལྷ་ལྔ། གུར་མགོན་ལྷ་ལྔ་སིནྡྷུ་རའི་དཀྱིལ་འཁོར་ལ་བརྟེན་པ། དམ་པ་ལུགས་ཀྱི་འཇམ་དབྱངས་སྨྲ་སེང་གི་དབང་། ཛེ་ཏཱ་རི་ལུགས་ཀྱི་ཚེ་དཔག་མེད་ལྷ་དགུ་རྣམས་ཀྱི་དབང་དེའི་སྒྲུབ་ཐབས་དབང་ཆོག་བསྟོད་པ་ཛེ་ཏཱ་རིས་མཛད་པ། དཀོན་ཅོག་ལྷུན་གྲུབ་ཀྱི་དཀྱིལ་ཆོག་དབང་བཅས་པའི་ལུང་། འདོད་རྒྱལ་གསང་སྔགས་སྒྲའི་རྗེས་གནང་། བྲམ་ཟེ་ནག་པོའི་མངག་གཏད་ཐུན་མོང་མ་ཡིན་པ། འཇམ་དབྱངས་ཨ་ར་པ་ཙ་ནའི་རྗེས་གནང་། དེའི་སྒྲུབ་ཐབས་ས་པཎ་གྱིས་མཛད་པ་དང་རྗེས་གནང་གི་ཡི་གེ་ངོར་ཆེན་གྱིས་མཛད་པ། བརྟག་གཉིས། ཚེ་མདོ་ལེ་ཚན་གཉིས། མི་འཁྲུགས་པའི་རྒྱུད་རྣམས་ཀྱི་ལུང་། གཉན་སྒྲོལ་ཡན་ལག་དྲུག་པའི་རྗེས་གནང་། མཚན་བརྒྱ་རྩ་བརྒྱད་པའི་ལུང་དང་བཅས་པ།
ནཱ་རོ་མཁའ་སྤྱོད་ཀྱི་བྱིན་རླབས་ཀྱི་ཆོ་ག་ཚར་ཆེན་གྱིས་མཛད་པ་དང་རྗེ་ཉིད་ཀྱིས་མཛད་པའི་གུར་མགོན་གྱི་སྐུ་རྟེན་བཞེངས་ཚུལ་རབ་གནས་དང་བཅས་པའི་ལུང་། ཚེ་དཔག་མེད་གྲུབ་རྒྱལ་ལུགས་ཀྱི་ཉམས་འཁྲིད། སྒྲོལ་དཀར་ཡིད་བཞིན་འཁོར་ལོ་འོད་ཟེར་དྲུག་སྦྲགས་ཐུན་མོང་མ་ཡིན་པའི་རྗེས་གནང་རྣམས་ཐུགས་དགྱེས་པ་ཆེན་པོའི་སྒོ་ནས་སྩལ་ཞིང་གསེར་དངུལ་གོས་དར་ཇ་རས་འབྲུ་སོགས་ཟང་ཟིང་གི་མཎྜལ་ཆོས་ཡོན་ཏུ་བཏེག །དེ་ཡང་། ཀུན་མཁྱེན་མཁྱེན་བརྩེའི་གསུང་མགུར་ལས། སྤྲང་པོ་ལས་ངན་གྱི་དབང་གིས་སྙིགས་དུས་མཐའ་འཁོབ་ཏུ་སྐྱེས་ཀྱང་། །ཚེ་སྔོན་དག་པའི་སྨོན་ལམ་གྱིས་མཚན་ལྡན་བླ་མ་དང་མཇལ་ནས། །ཐོས་དཀའ་རྟོགས་པར་དཀའ་བའི་ཟབ་ལམ་དུ་མ་ཞིག་ཐོབ་པས། །ཤི་ཡང་འགྱོད་མེད་ཀྱི་བློ་བདེ་གཞན་ལས་ལྷག་པ་ཞིག་གདའ་བས། །དགའ་དགའ་སྐྱིད་སྐྱིད་མོ་གཞན་ལ་ཡིད་སྨོན་མེད་པ་ཞིག་གདའོ། །ཞེས་པའི་དོན་བཞིན། སྔོན་ཆད་རྡོ་རྗེ་སློབ་དཔོན་མང་དུ་བསྟེན་པའི་སྐལ་པ་ཕྲ་ཞིང་ཅུང་ཟད་རྙེད་པའང་ཞབས་པད་བསྟེན་ཡུན་ཐུངས་པ་དང་གཞན་རྐྱེན་གྱི་འཇིགས་པས་གསང་ཐབས་རྐུན་ནོར་ལྟར་སྤྱོད་དགོས་པ་ལ་ཉེ་ལམ་དེ་རིགས་ཀྱི་སྐྱོན་དང་བྲལ་ཞིང་ཐོས་བསམ་གྱི་ཆ་སྤྱོད་ཡུལ་ཡངས་པ་སྔོན་བསགས་ལེགས་བྱས་ཀྱི་འབྲས་བུ་དུས་སུ་སྨིན་པར་མ་ཟད་དམ་པ་འདི་ཉིད་ཀྱི་སྐུ་གསུང་ཐུགས་ཀྱི་མཛད་པ་མཐའ་དག་སྔར་དམ་བཅའ་གནང་འདུག་པའི་དོན་དང་ཆ་མཚུངས་པའི་ཞལ་གྱིས་འཆེས་པ་ལ་དཔའ་བ་ཙམ་མ་ཡིན་པར་དོན་མཐུན་ཁོ་ནར་སྣང་བ་ཤ་སྟག་ཏུ་མཐོང་བ་དཔེར་ན་འཕྱོང་རྒྱས་ཞབས་དྲུང་དམག་དཔོན་ལྷའི་དབང་ཕྱུག་གིས་བཀའ་ཤོག་གཏན་ཚིགས་ཐམས་ཅད་
རས་སུ་བོར་བའི་འཕྱོས་ལམ་རིམ་པས་བཀྲ་ཤིས་ཆོས་སྡེ་བའི་དཀོར་སའི་གྲལ་ཁུངས་སོགས་ཕྲོགས་པ་ཆོས་སྡེ་བ་རྣམས་ཀྱང་རེ་བ་ཆེ་ཞིང་ཕྱི་ཡུལ་ནས་བལྟས་པར་ཡང་བབས་འབྲེལ་འདུག་རུང་ཕེབས་སྒོར་ཁོ་རང་ཚོར་དཀོར་སྐལ་ཟ་རྒྱུ་ནི་འདུག་གྲལ་གྱི་རྒྱབ་མདུན་གང་དུ་བསྡད་ཀྱང་ཁྱད་ཅི་ཡོད་ཅེས་ཞུ་བའི་རྩོམ་པ་ཙམ་ཡང་མི་མཛད་ཅིང་སྐུ་སྒེར་དོན་དུ་གཏོགས་པ་རྗེ་སྨན་ལུང་པ་ཤེར་ཕྱོགས་གསན་པའི་གསོལ་ཕོགས་དང་དབོན་མཁྱེན་རབ་རྣམ་རྒྱལ་ཕྱག་ཕྱིར་བསྡད་ཆོག་པའི་དགོངས་ཁྲོལ་ཙམ་མ་གཏོགས་ཞུ་དོན་མཛད་པ་མ་མཐོང་ཞིང་དགོན་གྲ་རིགས་སྦྱིན་བདག་སོགས་རེ་བ་མཁན་པོ་དུ་མར་ཡང་ངེད་རང་ཕེར་ཕེར་དང་ཡོང་ཡོང་བ་དེ་འདྲ་ལར་མི་དགའ་ཞེས་ཞུ་དོན་གྱི་སྣ་ལེན་ཡེ་མི་གནང་། བསྟན་པ་འཕེལ་བ་དང་འགྲོ་བའི་བདེ་སྐྱིད་སོགས་སྤྱི་ལ་ཕན་པའི་ཞལ་ཏ་ལྷུར་བཞེས་ཤིང་། ཤེས་རབ་སྡོང་བུ་ལས། འགྲོ་བ་ཤིན་ཏུ་གྲངས་མེད་ཀྱང་། །སེམས་ཅན་ཡོན་ཏན་ལྡན་པ་དཀོན། ཡུལ་ལྗོངས་དཔག་ཏུ་མེད་མོད་ཀྱི། །རིན་པོ་ཆེ་དག་འབྱུང་བ་དཀོན། །ཞེས་གསུངས་པ་ལྟར། ཁྱད་པར་དབང་བྱིན་རླབས་རྗེས་གནང་རིག་གཏད་ཉམས་འཁྲིད་ལ་ད་ལམ་ལོང་ཆུངས་པའི་དགག་བྱ་དགོས་པ་ཡིན་ཞེས་མཚོན་དོན་ཙམ་གྱི་བསྡུ་བ་དང་འདིའི་ཚབ་འདིས་འོང་འདིའི་དོད་འདིས་བྱེད་ཅེས་ཆོས་ལ་དབང་མི་ཟ་བར་སོ་སོའི་ལུགས་བཞིན་མ་འདྲེས་པ་ཁོ་ན་དང་ལྗགས་ལུང་གི་སྐབས་དཔེ་རྣམ་གྲངས་ཕྲ་མོ་མང་དུ་ཡོད་པའི་རིགས་ལ་བསྙེལ་ཐོ་དང་བསྟུན་ནས་གསན་མ་གསན་གྱི་དབྱེ་བ་འབྱེད་པ་ལས་ཡི་གེ་ལྷོགས་པ་རྒྱུ་མཚན་དུ་བྱས་ཏེ་བྱུང་ཚད་ལྗགས་སྒྲོག་མི་གནང་། ཕྱག་ལེན་གྱི་རིགས་གང་ལ་
དོགས་གཅོད་ཞུས་ཀྱང་འདི་ནི་འདིའོ་ཞེས་ཤིག་མཛུབ་སྤྲད་པའི་ངེས་ཤེས་ཁོ་ན་ལས་མུན་ནག་འདོམ་འཇལ་གྱི་ཟོལ་སྦྱོར་ཅི་ཡང་མི་སྲིད་པས་དབང་རྣོན་ཆོས་རྗེས་འབྲང་བའི་དད་པ་བརྟན་པོའི་གཏིང་ཚུགས་སོ། །ཐུགས་རྗེ་འོད་ཀྱི་སྤུབས་གུར་བདེ་བའི་ལམ། །ས་སྤྱོད་རིག་པའི་ཁྱེའུ་ཆུང་དག་ཞིང་དུ། །དྲངས་ཚེ་དགེ་སྡིག་གཅིག་ཏུ་དཀར་རོ་ཞེས། །ལས་ཀྱི་མེ་ལོང་ལྟ་བའི་ངལ་བ་བཏང་། །མཁས་པའི་གཞུང་ལུགས་ས་ཧ་ཀ་ར་ཡི། །སྙེ་མ་ནམ་མཁའི་ཕ་མཐར་ཡོངས་དུད་ཀྱང་། །ས་བོན་ཐུབ་པའི་གསུང་རབ་གཅེས་པའི་ནོར། །བསྟན་འཛིན་ཕལ་གྱིས་དོར་བས་དགུན་ཆུ་བཞིན། །དེ་ཚུལ་བཟོད་མིན་སྙིང་སྟོབས་རི་རྩེའི་ཆབ། །བརྩོན་འགྲུས་ཤུགས་ཀྱིས་འབབ་པ་ལེ་ལོའི་རགས། །སྡིག་ཏོའི་འཕྲུལ་གྱིས་མི་ལྡོག་ཆོས་འཚོལ་བར། །མི་ཞུམ་རྒྱལ་སྲས་སྤྱོད་པ་འདི་རྨད་བྱུང་། །བཅོས་མིན་ངེས་པར་འབྱུང་བའི་ཆོས་བརྒྱད་ལས། །ལོག་པའི་ཐུགས་ཀྱི་སྣ་དེ་རབ་ཐུང་ཡང་། །ཤཱཀྱ་སེང་གེའི་རིང་ལུགས་སྤེལ་བའི་བློའི། །ཞགས་རིང་བརྐྱངས་མཐའ་བསྐལ་པར་རྫོགས་ནུས་མིན། །ཉང་སྟོན་རིག་སྔགས་འཆང་བའི་དབང་ཕྱུག་དེ། །དམ་པའི་བཞེད་པ་སྐོང་བའི་མཎྜ་ལ། །བཏེག་ཚེ་སྲིད་ཞིའི་ཡོན་ཏན་ནོར་བུའི་དཔྱ། །ཕྱུར་བུར་སྤུངས་ཏེ་ཆོས་བཟང་མདུན་སར་གླེང་། །གསར་རྙིང་ཉི་ཟླ་ཟུང་འབྲེལ་འོད་པོ་ཆེས། །འཁོར་མུན་མཐར་བྱེད་ལས་སྨོན་མཐུ་བཙན་པོས། །ཟུར་ཆེན་རྗེ་དང་སྟབས་ཅིག་སྟན་འཛོམ་པ། །ཕན་བདེའི་སྣང་བ་འདྲེན་པའི་ཤིང་རྟ་བཞིན། །མ་རིག་ལས་འཁོན་འཇམ་མགོན་རིམ་བྱོན་ཆོས། །མ་དག་འཁྲུལ་བའི་དྲ་བ་གཅོད་པའི་མཚོན། །མ་ལུས་
འགྲོ་གཉེན་ས་སྐྱའི་བླ་ཆེན་གྱིས། །མ་སྨད་སྙན་བརྒྱུད་གསེར་འཁོར་མཁའ་ལ་འཕགས། །གཉགས་བན་ཛྙཱ་ནའི་སྤྲུལ་པའི་ཟློས་གར་དེས། །མགོན་ཁྱོན་པདྨཱ་ཀ་རའི་གདུང་འཚོབ་ཁྲིར། །ཐེག་མཆོག་ནོར་བུའི་ཅོད་པན་དབུར་བཅིངས་ནས། །བཀོད་ཚེ་ཕྱོགས་བཅུའི་རྒྱལ་ཀུན་མེ་ཏོག་གཏོར། །བདེ་ཆེན་འདྲེན་པའི་ལས་རྒྱ་མཁར་ཆེན་བཟས། །འཆི་མེད་བདུད་རྩིའི་རྒྱུན་གྱི་བཅུད་བྱིན་ཚེ། །གནས་འདི་ལས་གཞན་ཌཱི་ཀ་ཌཱ་ཀྐིའི་ཚོགས། །འདུ་བའི་ཨྱོན་ཡུལ་དེ་འཚོལ་རྣམས་ངལ། །སྣང་སྲིད་དྲེགས་པའི་སྡེ་དཔོན་ཙི་དམར་བས། །མགོན་ཁྱོད་འཕྲིན་ལས་སྒྲུབ་པར་ཞལ་འཆེས་པ། །ལྷུན་གྲུབ་རྟེན་ཅིང་འབྲེལ་འབྱུང་དུང་ཆེན་སྒྲ། །ཕྱོགས་བྲལ་བུ་མོའི་རྣ་ལུང་མཛེས་པ་བཞིན། །བཤེས་གཉེན་མངལ་དུ་མ་སྦྲུམས་སྟོང་པའི་སྒྲ། །གྲང་དྲོད་ལས་བཙས་ཁྱེའུ་དཀར་མིན་འབྲས། །དྲང་སྲོང་ཨུ་པའི་རེ་སྐོང་རྒོད་མ་ཁ། །གཏན་མདུན་རྒྱ་མཚོ་སྐམ་པའི་ཆོ་ག་ལྟར། །འོན་ཏེ་སྲིད་མང་འཕྲང་བགྲོད་དཀའ་སྤྱད་ཀྱི། །བསོད་ནམས་ཛམ་བུའི་ཤིང་འབྲས་མཚོར་ལྷུངས་པ། །དལ་རྟེན་དོན་ལྡན་གསེར་གྱི་ཕུང་པོ་ལ། །སྤྱོད་པའི་སྐལ་བཟང་འདི་ལ་གཅིག་ཏུ་རངས། །སྙན་བརྒྱུད་རིམ་བཞིའི་རྟེན་འབྲེལ་ཡོངས་འགྲིག་པ། །མ་ནུབ་དབང་བཞིའི་ལམ་ལས་འབྲས་བུར་སྨིན། །རྒྱུད་སྡེ་རྣམ་བཞིའི་ཆོས་ཀྱི་ཐེམས་སྐས་ལ། ཁྲིད་ནས་སྐུ་བཞིའི་གྲོང་དུ་བཅུག་འདི་མཚར། །ཁུ་ལུང་དུ་ཡུམ་བསྙུན་པའི་གདན་འདྲེན་བྱུང་བར་བརྟེན་ལྕགས་སྟག་གི་ལོ་གསར་གདོང་རོང་ཕྱོགས་སུ་ཐེགས་ནས་ཟླ་གཅིག་གི་བར་བྱིན་རླབས་སྐུ་རིམ་དང་འཕྲོད་བསྟེན་གྱི་ཞལ་བཀོད་དང་བཅས་ཞལ་ངོ་རྣམས་ཀྱི་དགོངས་པ་བཀང་སྟེ་
ཞང་འགྲོ་བའི་མགོན་པོའི་བསྟི་གནས་སུ་ཕེབས་པའི་དབྱར་སྟོན་གྱི་རིངས་བཞུགས། གསོལ་ཆས་དགོས་ཆ་རྣམས་བྱི་ལོའི་སྐབས་ལྟར་ཕུལ་ཞིང་ཟུར་ཀུན་མཁྱེན་ཆེན་པོས་དབུ་མཛད་དོན་གཉེར་ཅན་དུ་མ་ལ་གང་བློ་མ། དབང་གི་སྒྲོལ་མ་དམར་མོ། དུས་འཁོར་གྱི་ཐུན་མོང་སྒྲུབ་པའི་ལྷ་གསུམ། སྨན་བླ་བདེར་གཤེགས་བདུན། ཕྱག་རྡོར་ཨུ་ཙཪྻ། བ་རིའི་རྣམ་འཇོམས། སྨེ་བརྩེགས། མི་གཡོ་བ་དཀར་སྔོན། རྟ་མགྲིན་རས་ཆུང་ལུགས། རྟ་ནག་ལྕགས་རལ་ཅན། སེང་གདོང་ནག་པོ། ཛམ་སེར་ནག །སྤྱན་རས་གཟིགས་གཙོ་འཁོར་གསུམ་པ། དུར་ཁྲོད་བདག་པོ། རྣམ་སྲས་དྲག་པོ་བཀའ་ཤིན་ཏུ་གཉན་པ། གསང་སྒྲུབ་ལྗང་སེར་བེ་ཅོན་ཅན། དྲག་བྱེད་རྟ་སྔོན་སྲིན་མོ་བཞི་སྐོར། ནང་གསང་ལྟར་སྒྲུབ་པ་ལྷ་དགུ། དྲག་བྱེད་སེང་ཞོན་ཀླུ་བརྒྱད་ཀྱིས་བསྐོར་བ། དྲག་བྱེད་རྐང་ཐང་ལྷ་བརྒྱད། མདུང་དམར་ཅན་ལྷ་བཅུ་གསུམ། ཡང་གསང་དྲག་པོ་སྲིན་པོ་བཞི་སྐོར། མཐིང་ཁ་ཞལ་གསུམ་ཕྱག་དྲུག་པ་ལས་མཁན་མདུང་དམར་ཅན་དང་བཅས་པའི་གཙོ་འཁོར་གཉིས་གར་མཁན་མཆོག་ལྗང་གུ་ཞལ་གསུམ་ཕྱག་བཅོ་བརྒྱད་པ་ལྷ་བརྒྱད། གར་མཁན་མཆོག་དམར་སྨུག་ཞལ་གསུམ་ཕྱག་བཅོ་བརྒྱད་པ། དཀར་པོ་ཚེ་འཕེལ་ལྷ་དགུ། ཡང་གསང་མདུང་དམར་ཅན་ཕྱག་མཚན་བཞི་པ། གུར་གསང་འཁྲིད་རྣམས་ཀྱི་རྗེས་གནང་། བྲན་བདུད་ཀྱི་རྗེས་གནང་ཐུན་མོང་མ་ཡིན་པ། ཞལ་སྒྲུབ་དུས་ཐུན་མོང་མ་ཡིན་པ། ཁྱུང་ཞལ་ཅན། སེང་གདོང་ནག་པོ། ལྷ་མོ་རྡོ་རྗེ་རབ་བརྟན་མ་རྣམས་ཀྱི་རྗེས་གནང་། ཕག་དཀར་ཤེས་རབ་གསལ་བྱེད་དང་རྟ་མགྲིན་སྐྱེར་སྒང་
ལུགས་ཀྱི་བྱིན་རླབས། རྡོ་རྗེ་ནམ་མཁའ་ལྡིངས་གསེར་མིག་འཁྱིལ་བའི་རྗེས་གནང་ལུང་བཅས་སྒྲུབ་ཐབས་རྒྱ་མཚོ་ལས་སྐུའི་རྣམ་འགྱུར་དང་སྔགས་མི་འདྲ་བ་བརྒྱ་བཞི་བཅུའི་རྗེས་གནང་དང་རྒྱ་གཞུང་གི་ལུང་། དུས་འཁོར་གྱི་བདག་པོ་ཆེན་པོ་མ་གཏོགས་སྐུ་གསུང་ཐུགས་ཡོངས་རྫོགས། གཤིན་རྗེ་གདོང་དྲུག །རྣམ་སྣང་མངོན་བྱང་། རྣམ་འཇོམས་མཐིང་ནག་ལྷ་བཅུ་དགུ །རིགས་གསུམ་སྤྱི། གདུགས་དཀར་ལྷ་བཅུ་བདུན། སྲུང་བ་ལྷ་ང་གཅིག །མི་འཁྲུགས་པ་ལྷ་མོ་བརྒྱད་ཀྱིས་བསྐོར་བ། ས་ཕུར་ལྷ་ཁྲའི་སྟོད་ལས་རྣམས་ཀྱི་དབང་དང་སྨད་ལས་དྲག་པོའི་རྗེས་གནང་། ཨེ་ཛ་ཀ་ཏཱིའི་སྲོག་གཏད་དང་ལུང་། མ་ཎི་ཀ་ནཱ་ཐས་འཇམ་དབྱངས་མཁྱེན་བརྩེར་གནང་བའི་གསར་འགྱུར་ཨྱོན་སྐུ་གསུམ་སྒྲུབ་པ་རྒྱ་འགྱུར་དེའི་ལོ་རྒྱུས་འགྲེལ་པ་དང་བཅས་པ་འཇམ་དབྱངས་མཁྱེན་བརྩེའི་ཟིན་བྲིས་ཀྱི་ལུང་། དཀར་བདུད་ལྕམ་དྲལ་གྱི་སྒྲུབ་སྐོར། ལམ་སྐོར་ཕྱི་མ་བརྒྱད་ཀྱི་ལུང་ཡོངས་རྫོགས། ཚར་གསུམ་ཁུག་པའི་བྱིན་རླབས། གསུང་ངག་སློབ་བཤད་ཀྱི་ཆོས་འབྱུང་ཟིན་བྲིས་འཇམ་དབྱངས་མཁྱེན་བརྩེས་མཛད་པ། ཚར་ཆེན་གྱི་ཀྱེ་རྡོར་བསྐྱེད་རིམ་སོགས་ཆོས་སྦྱིན་རྒྱ་ཆེར་མཛད་ཅིང་རྗེ་བླ་མ་ཟུར་ཆན་ལ་སྔ་འགྱུར་གཙོ་བོར་གྱུར་པའི་ཟབ་ཆོས་མང་དུ་གསན། དྲན་པ་ནམ་མཁའ་དང་གནུབས་ཆེན་གྱི་རྣམ་པར་སྤྲུལ་པ་དར་རྒྱས་ཆོས་སྡིངས་པ་འཕྲིན་ལས་ལྷུན་གྲུབ་བྱོན་པར་དཔོན་སློབ་གཉིས་ཀས་ལྷན་དུ་པཎ་ཆེན་པདྨ་དབང་རྒྱལ་གྱི་རིག་འཛིན་ཡོངས་འདུས་ཀྱི་དབང་ལུང་། ལྷོ་བྲག་གུ་རུ་ལྷ་ཁང་ནས་ཡང་གཏེར་གྱི་སྐོར། རཏྣའི་ཕུར་པ་ཡང་གསང་
བླ་མེད། རྟག་ཕག་གསང་སྒྲུབ། ཐུགས་རྗེ་ཆེན་པོ་ཞི་དྲག་ལམ་གྱི་ཆ་རྐྱེན་གསང་བ་སྙིང་པོ་འདུས་པ། སྐུ་གསུམ་ཡོངས་རྫོགས་རྩ་གསུམ་འབྲས་བུའི་དོན་འཁྲིད། ཕྱག་རྒྱ་ཆེན་པོ་མུན་སེལ་ཉི་མའི་སྙིང་པོ། སྐྱེས་རབས་ལུང་གི་ལྡེ་མིག་སོགས་ཟབ་གཏེར་ཁ་ཐོར་བའི་སྐོར། མནལ་ལམ་དག་སྣང་གི་སྐོར། རིག་འཛིན་རྒོད་ལྡེམ་གྱི་གུ་རུ་མཐིང་ཁ་སྤྱན་མངས་ཀྱི་སྒྲུབ་ལུང་། ལས་འབྲེལ་རྩལ་གྱི་དྲེགས་འདུལ་སྒྲུབ་ཐབས་ཆིག་བརྒྱུད་མའི་ལུང་། ཀུན་མཁྱེན་ཀློང་ཆེན་པའི་ཡིད་བཞིན་མཛོད། ཤེས་རབ་མེ་འབར་གྱི་རྫོགས་ཆེན་འཁོར་འདས་རང་གྲོལ་གྱི་དབང་ལུང་། སྤ་གྲོ་གཏེར་སྟོན་ཚེ་རིང་རྡོ་རྗེའི་རྫོགས་ཆེན་ཅི་ཏིའི་གསལ་བྱེད་ནོར་བུའི་དབང་ལུང་། དྲི་མེད་ཀུན་དགའི་ཐུགས་རྗེ་ཆེན་པོ་ཡེ་ཤེས་འོད་མཆོག །ལྷོ་ལས་འཕྲོ་གླིང་པ་ནམ་མཁའ་རྡོ་རྗེའི་རྡོ་རྗེ་སེམས་དཔའི་ཐུགས་སྒྲུབ་ཀྱི་དབང་ལུང་། ཨེ་སྤེེལ་ལྕོག་ལས་འཕྲོ་གླིང་པའི་བླ་སྒྲུབ་ཕྱི་ནང་གསང་གསུམ་གྱི་དབང་ལུང་། གཏེར་སྟོན་འཇམ་དཔལ་རྡོ་རྗེའི་ཚེ་སྒྲུབ་ཐུགས་ཀྱི་ཡང་སྙིང་གི་ཆོས་སྐོར། སྣང་རྩེ་བའི་ཚེ་འཁྲིད་ཡང་སྙིང་འདུས་པ། འཇམ་དཔལ་ནག་པོའི་ཡིག་སྣ་གཉིས། གཏེར་སྟོན་ཤེས་རབ་འོད་ཟེར་གྱི་འཆི་མེད་སྐུ་གསུམ་འདུས་པ། སྤོ་བོ་གཏེར་སྟོན་པདྨ་རིག་འཛིན་རྩལ་གྱི་ནོར་བུ་པདྨའི་འཕྲེང་བའི་གསང་སྒྲུབ་ཀྱི་སྐོར། ཟླ་བན་གཟི་བརྗིད་འབར་གྱི་སྔགས་སྡེབས་སྙིང་གི་མེ་ལོང་ཟུང་གི་ལུང་། རྒྱ་བན་རྡོ་རྗེ་དབང་ཕྱུག་གི་བཅུད་ལེན་གྱི་གདམས་སྐོར། སྤྲུལ་སྐུ་དམ་པ་དམར་པོའི་བདུད་རྩི་བུམ་པའི་བཅུད་ལེན་སྐོར། བལ་པོ་བཛྲ་མ་ཏིའི་རིམ་སྲུང་། གུ་རུ་ཁྱུང་ནག་གི་གཤིན་རྗེའི་སྐུ་གསུང་ཐུགས་ཀྱི་ཟ་ཡིག །གཏེར་སྟོན་བོན་པོ་དྲག་རྩལ་གྱི་རཱ་ཧུ་
ལ་ཤིས་བསྟན་པ་དང་རུས་སྦལ་སེར་སྲུང་། ལྕང་སྨན་དོན་གྲུབ་དར་གྱི་དུག་སྨན་གྱི་གདམས་པ། གཡུ་ཐོག་སྙིང་ཐིག་གི་སྨན་ལྷ་མཆེད་གསུམ་ཡེ་ཤེས་ཁྱེའུ་དང་བཅས་པའི་རྗེས་གནང་། དེ་བཞིན་དུ་གསུང་སྤྲུལ་ཚུལ་ཁྲིམས་རྡོ་རྗེ་ལ་བླ་མ་སྙིང་ཏིག་གི་དབང་ལུང་སོགས་གསན་ཞིང་ཁོང་དཔོན་སློབ་གཉིས་ལ་ཕར་ཡང་བཀའ་ཆོས་ཅི་རིགས་སྩལ། ཆར་འབེབས་ལ་ཟུར་ཀུན་མཁྱེན་ཆེན་པོ་དང་ཆབས་ཅིག་པར་ཚལ་ཡང་དགོན་དུ་ཕེབས། ཞང་རིན་པོ་ཆེའི་གཟིགས་སྣང་དང་ཕྱག་བཟོར་གྲགས་པའི་ཡེ་ཤེས་མགོན་པོ་ཕྱག་བཞི་པའི་སྐུ་ལ་ཁྲུས་གསོལ་དང་བཅོལ་དམ་གནང་བས་མགོན་པོའི་ཞལ་ལས་བདུད་རྩི་བབས་པ་དེར་འཁོད་རྣམས་ཀྱིས་མཐོང་ནས་རྒྱུ་མཚན་གསོལ་བ་ན་དཔོན་སློབ་རིན་པོ་ཆེ་ཕེབས་པས་ཡིན་གསུང་། སྐྱིད་ཤོད་པ་ལམ་ནུབ་ཤེ་མ་མཁར་བའི་བུ་ནད་ཚབས་ཆེན་པོས་བཏབ་སྟེ་སྨན་པས་མི་འཚོ་བར་ཐག་བཅད་པའི་དུས་བྱིན་རླབས་གནང་བས་ནད་ལས་གྲོལ། ལྷ་གདོང་ཤན་ཁ་བའི་མ་འཆི་བར་ཐུག་པར་སྔོན་གྱི་ཕ་མེས་ཚེས་གཅིག་དཔལ་འབྱོར་གྱིས་བསྒྲུབས་པའི་དུར་ཁྲོད་ཀྱི་བདག་མོ་འདྲེ་མོ་ངན་ནེ་མའི་སྒྲུབ་ཁང་ཡོད་པ་དེའི་འཁྲེན་དོགས་སུ་མཁྱེན་ནས་དུར་ཁྲོད་བདག་མོ་ལ་ཐུན་རྫས་དང་བཅས་བཀའ་བསྒོ་གཉེར་གཏད་གནང་བས་དེ་འཕྲལ་གཞི་མེད་དུ་བདེ། གཟིམས་ཁང་ཤར་དུ་རྩིས་མགོན་གྱི་འཛིན་གཏོར་བཙུགས་པ་འཇིག་པར་ཉེ་བར་གསར་དུ་བརྗེ་བའི་སྟ་གོན་གྱི་རྙིང་པ་བཏོན་པའི་ཤུལ་གྱི་གཏོར་སྣོད་བདུད་རྩིས་ཁེངས་པ་མཆོད་དཔོན་འཇམ་དབྱངས་རྒྱལ་མཚན་དང་ཞ་ལུ་ཤེར་རིན་པ་གཉིས་ཀྱིས་ལོངས་སྤྱོད་རྒྱུ་བྱུང་བས་མཚོན་ཡ་མཚན་གྱི་ལྟས་མང་པོ་ཞིག་བྱུང་ཚོད་དུ་མཆིས། བཀྲ་ཤིས་རྩེའི་
དཔོན་ས་བསམ་ཡས་ཆོས་སྐྱོང་གི་འཁོར་དུ་སྐྱེས་པ་མཁྱེན་པའི་ཚེ་བྱང་བཞུ་གནང་བས་ཁུགས་ཟིན་ནས་རྗེས་སྙེགས་ལ་བཙུན་པ་དང་ཨ་ཙར་འདྲ་བ་འོངས་ཏེ་ཕྱིར་ཁྲིད་སོང་བ་ཨ་ལགས་བསོད་ནམས་ཀྱིས་ཞུས་པས་སང་ཉིན་གླུད་སྔོན་དུས་ཀྱི་སྲིད་པའི་དབྱིབས་ཇི་ལྟ་བ་བཟོས་པ་བྱིན་གྱིས་བརླབས། རྣམ་ཤེས་ཁུགས་འཕྲལ་གླུད་སྔགས་རྒྱ་ཏིང་ངེ་འཛིན་གྱིས་བསྔོས་པའི་མཐུས་ལྷ་འདྲེའི་ཕོ་ཉ་རྣམས་རབ་ཏུ་ཚིམས་ནས་ལོག་རྗེས་ལམ་སྟོན་རྒྱས་པར་མཛད་དེ་དག་ཞིང་དུ་བསྐྱལ་ལོ། ། གུང་ཐང་གི་བཀའ་ཆོས་རྣམས་གྲོལ་བའི་རྗེ་བཀའ་འགྱུར་བ་ཆེན་པོས་འབྲས་སྤུངས་སུ་ཕེབས། རིང་འཚོའི་རྟེན་འབྱུང་གི་གསུང་ཆོག་གནང་། རྗེ་བཙུན་རྡོ་རིང་པས་མཛད་པའི་གུར་གྱི་གསང་འཁྲིད། ཚར་ཆེན་གྱི་བྲག་རྫོང་དང་གསང་འཁྲིད་རྒྱུན་ཁྱེར་གཉིས། རབ་གནས་དོན་གསལ་སོགས་ཀྱི་ལྗགས་ལུང་དང་། རྒྱལ་སྲས་རིན་པོ་ཆེའི་བློ་སྦྱོང་དོན་བདུན་མའི་སྟེང་ནས་ཉམས་འཁྲིད་མདོར་བསྡུས། དཀྱིལ་འཁོར་གྱི་ཆོ་ག་མང་པོའི་ཕྱག་ལེན་དང་ཕྱག་རྒྱ་འཆིང་ཚུལ་གྱི་སྐོར་སོགས་ལ་དོགས་གཅོད་ཞིབ་ཏུ་ཞུས། བསམ་གཏན་པར་རློམ་པའི་ཚུལ་འཆོས་མཁན་འདྲས་གཞན་འབྱོར་ཕུན་ཚོགས་མ་བཟོད་པར་བྱད་རྦོད་ཀྱིས་རྗེའི་སྐུ་ལ་སྡོ་བའི་སྦྱོར་ངན་ཡོད་འཕྲོས་ཐོས་པས། བྲག་རྫོང་མའི་སྲུང་བཟློག་གི་ཐུགས་དམ་གཙོ་བོར་གནང་དགོས་ཚུལ་ཞུས་པར་སྔ་སོར་གནད་བསྣུན་ཁ་ཡར་བྱས་པར་བསམ་སྦྱོར་ངན་པ་ཡོད་འདྲ་བསམ་པ་འགའ་ཞིག་འདས་སོང་བས་རྣམ་ཤེས་འདྲེན་པའི་ནུས་པ་དཀའ་བས་དེ་རིགས་ཀྱང་ལས་གསག་པར་སོང་དོགས་བྱེད་འདུན་མེད་གསུང་། དགུན་ཡར་ཀླུངས་ཕྱོགས་སུ་ཐེགས།བོང་བུ་ཞེས་
པ་ལྕགས་ཡོས་ཀྱི་དཔྱིད་གོང་དཀར་རྡོ་རྗེ་གདན་དུ་ཕེབས་ནས་སྐུ་མཚམས་ཀྱི་བཅད་རྒྱ་ཡུན་རིང་དུ་བསྡམས། ངེད་རྡོ་རྗེ་ཕྲེང་བའི་དབང་ཚོགས་ཆེན་ལ་འབུལ་བའི་གྲབས་ཡུལ་གྱི་སྐབས་སུ་སླེབས་པ་སྔར་ཕྱག་ལེན་རྣམས་ལ་རྟོག་འཇུག་དང་དོགས་གཅོད་ཞིབ་པར་ཞུས་ཁུལ་ཡིན་ནའང་གསང་སྔགས་ཀྱི་ཕྱག་བཞེས་ཆེས་ཞིབ་ཅིང་ཕྲ་བ་དང་རང་རེ་བློ་གྲོས་དམན་པའི་གཤིས་ཀུན་རྟོག་གི་སྤྲོས་པ་བན་བུན་དུ་ཤར་བའི་ཡིད་གཉིས་རྣམས་ལ་དོགས་སེལ་གྱི་ཤོག་དྲིལ་ཕུལ་བར་བཀའ་མཆན་ཞིབ་པར་སྩལ། འདི་ལོ་ཆར་དཀོན་པའི་ལོ་ཏོག་རྣམས་ཐན་པའི་འཇིགས་པས་ཉེན་པ་ཐུགས་ཀྱིས་མ་བཟོད་པར་རྫས་སྔགས་ཏིང་ངེ་འཛིན་ལ་བརྟེན་པའི་ཆར་འབེབས་ཀྱི་ཕྱག་ལེན་གནང་ཡང་ལྷ་འདྲེའི་ཚུབ་ལྷོངས་ལྟ་བུས་ཕེབས་དཀའ་བར་དཔལ་ཨྱོན་ཆེན་པོ་ལ་གདུང་ཤུགས་དྲག་པོས་གསོལ་འདེབས་གནང་བས་ཀླུ་དབང་གླིང་གི་རྒྱ་དང་མཉམ་པའི་སྤྲིན་ལས་ཆར་བབས་ཤིང་གཞན་དུ་སྤྲིན་མ་འཁྲིགས་པས་དེ་ལོ་ཚོས་ལས་ཀྱི་བུད་ཤིང་ལ་ཁ་རེག་གི་ནགས་བཅད་པས་ཁྱུང་བཙུན་ཁྲོས་པའི་དེ་ཕྱོགས་སུ་ཡམས་དང་ལྕེ་འབབ་པ་སོགས་བྱུང་སྣང་བས་དེ་དང་དབྱིབས་མཚུངས་པར་དགོངས་ཏེ་རྡོ་རྗེ་དཔལ་གྱི་ཡུམ་ལ་གཏོར་བསྔོས་དང་བཅས་དམ་བསྒྲགས་པས་ཁ་རེག་གི་རི་རྩེ་ལས་ཆུ་འཛིན་དཀར་པོ་ལང་ལོང་དུ་གཡོས་ཤིང་ཐོག་མར་དྲག་ཆར་གྱི་ལྷོངས་ཆེ་ཙམ་དང་བཅས་རིམ་གྱིས་སྤྲིན་ཕྱོགས་ཀུན་ཏུ་ཁྱབ་པའི་ཆར་གྱི་རྒྱུན་ཆེན་པོས་མྱུ་གུའི་ཚོགས་ཀྱི་བསྐྱེད་རབ་ཏུ་བསྲིངས་ནས་ཡུལ་ཁམས་མང་པོར་འབྲུའི་མཆོད་སྦྱིན་དོན་གྱིས་སྩལ་ལོ། །ཆོས་སྡེ་འདི་ག་དང་ཕྱོགས་འདུས་ཀྱི་དོན་གཉེར་ཅན་ཁ་ཤས་
ལ་གཤིན་རྗེ་གདོང་དྲུག །སངས་རྒྱས་མཉམ་སྦྱོར། འཇིགས་བྱེད་བཅུ་གསུམ་མ། མི་འཁྲུགས་པ་ལྷ་དགུ་རྣམས་ཀྱི་དབང་། ཚེ་དཔག་མེད་ལྷ་དགུའི་དབང་བརྒྱ་རྩ། གུར་ལྷ་བཅུ་བདུན། བཅུ་གཉིས། བརྒྱད་མ་གསུམ་གྱི་དབང་། བྲག་རྫོང་མའི་ཕྱི་འཁྲིད་དང་ཞལ་གྱི་གསང་འཁྲིད་གཉིས་ཀྱི་ཉམས་འཁྲིད། རིན་ཅེན་གླིང་པའི་ནཱ་ག་རཀྴའི་རིག་གཏད། དབྱུ་གུ་སྤུན་གསུམ་གྱི་སྒྲུབ་སྐོར། མགོན་པོད་ནས་ཁ་ཤས་ཀྱི་ལུང་། མགོན་པོ་མ་ནིང་གི་ཆར་འབེབས། དབུ་མ་ལུགས་ཀྱི་སེམས་བསྐྱེད། སྤྱན་རས་གཟིགས་ཀྱི་དམར་འཁྲིད། རབ་འབྱམས་སྨྲ་བ་རིན་ཅེན་རྒྱ་མཚོར་གཡུ་ཐོག་སྙིང་ཏིག་གི་དབང་ལུང་། ཁྲོ་བོ་སྨེ་བརྩེགས་དང་ཁྲོ་མོ་སྨེ་བརྩེགས་ཀྱི་རྗེས་གནང་། དམར་ཆེན་སྐོར་གསུམ། སྐྱེས་རབས་སོ་བཞིའི་ལུང་སོགས་ཆོས་བཀའ་སྔ་ཕྱིར་དུ་མར་གནང་།དགའ་བ་ཞེས་པ་ཆུ་འབྲུག་ཧོར་ཟླ་གཉིས་པའི་ནང་དུ་ངེད་རྒྱ་ནག་ལ་འགྲོ་བའི་ངོས་འཕྲད་ལ་ཕེབས་ནས་གཟིམས་ཆུང་མགོན་ཁང་ལྕང་ལོ་ཅན་དུ་རིང་པོར་གནས་པའི་རྟེན་འབྲེལ་གྱི་ཆོ་ག་རིགས་མི་གཅིག་པ་གསུམ་ཙམ་ཞིག་གནང་། ཚེ་དབང་ཁ་ཤས་དགོས་ཚུལ་ཕེབས་པ་བཞིན་འཆི་མེད་དཔལ་སྟེར་གྱི་སྒོ་ནས་ཕུལ་བཅས་དེ་ཀའི་སྟེང་ནས་ངེད་རང་གིས་ཀྱང་ཚར་གཅིག་ཞུས་ཤིང་འཕྲལ་ཡུན་གྱི་བསླབ་སྟོན་མང་དུ་གནང་བར་རྒྱ་ནག་ནས་རིང་པོར་མི་ཐོགས་པར་ལྡོག་པའི་འདུན་པ་ཡོད་པས་དེ་བར་རྡོ་རྗེའི་རྣལ་འབྱོར་མཆོག་ལས་མི་གཡེལ་བའི་སྲུང་འཁོར་དང་འཆད་ཉན་ལ་ཐུགས་རྩོལ་གང་ཆེའི་ངོས་གཙོ་བོར་བསྟན་འགྲོའི་གཉེན་དུ་འཚོ་གཞེས་ཀྱི་ཐབས་ཚུལ་ལྷོད་མེད་དགོས་པའི་སྙན་འབུལ་དང་བརྟན་བཞུགས་ཕུལ། དེ་ནས་གུང་ཐང་དུ་ཐེགས་པའི་ཟླ་བ་ཕྱེད་གཉིས་ཙམ་གྱི་བར་ཟུར་
ཆེན་ཆོས་ཀྱི་རྒྱལ་པོར་གཤེད་དམར་ལྷ་ལྔའི་དབང་དང་སྤྲོས་མེད་ཀྱི་ཉམས་འཁྲིད། རྭ་ཆེན་གྱི་སྒྲུབ་དཀྱིལ་ལ་འཇམ་དབྱངས་མཁྱེན་བརྩེའི་ལྷན་ཐབས་སྦྱར་བའི་རྭ་ལུགས་ཐུན་མོང་མ་ཡིན་པ་ལྷ་བཅུ་གསུམ་མའི་དབང་། རྭ་ཁྲིད་མཁའ་འགྲོ་སྙན་བརྒྱུད་ཀྱི་ཉམས་འཁྲིད། རྭ་ཆེན་ཤེས་རབ་རྒྱལ་མཚན་གྱི་དཀར་ཆག་ཏུ་གསལ་བ་དང་དེར་མ་འདུས་པའི་ཁ་སྐོང་བཅས་པའི་རྭ་པོད། འབྲི་གུང་དཔལ་འཛིན་གྱི་པོད་ཆུང་། བུ་སྟོན་ཐམས་ཅད་མཁྱེན་པའི་གསང་འདུས་མི་བསྐྱོད་པའི་འཁྲིད་ཡིག་ཟ་མ་ཏོག་ལ་འཇམ་དབྱངས་མཁྱེན་བརྩེའི་ཁ་འབྱེད་ལྷན་ཐབས་སྦྱར་བའི་རིམ་ལྔའི་དམར་འཁྲིད། ཁ་ཆེ་པཎ་ཆེན་ལུགས་ཀྱི་བདེ་མཆོག་དཀར་པོའི་ཉམས་འཁྲིད། རིག་འཛིན་ཆེན་པོ་ལེགས་ལྡན་རྡོ་རྗེས་ཆུ་བོ་རི་ནས་གདན་དྲངས་པའི་བླ་མ་སྐུ་གསུམ་གྱི་ཉམས་འཁྲིད། འཁྲིད་ཡིག་སོ་སོའི་ལུང་། གཙུག་ཏོར་དྲི་མེད་ལྷ་ལྔའི་དབང་། བིར་སྲུང་ནང་མའི་བྱིན་རླབས། ཇོ་བོའི་ཆོས་ཆུང་བརྒྱ་རྩ། རྟོགས་བརྗོད་དཔག་བསམ་འཁྲི་ཤིང་། གསར་མ་རྒྱུད་འབུམ་ནས་རྒྱུད་ཆེ་ཆུང་བསྡོམས་པ་རེ་ལྔ་དང་བཅས་པའི་ལྗགས་ལུང་འབུལ་བ་གནང་། དེ་ནས་ལ་མོར་ཚངས་པ་དུང་གི་ཐོར་ཚུགས་ཅན་གྱི་གནས་ཁང་དུ་ཕེབས། ཆོས་སྐྱོང་ཁོག་ཏུ་བརླམས་པས་བསུ་བ་མཛད། ཚོགས་འཁོར་སྤྱན་གཟིགས་གྱ་ནོམ་པ་བསྟབ། སྤྱི་སྒོས་ཀྱི་དྲི་བ་གནང་བར་མཁན་པོ་རང་གི་ཐུགས་ལ་ལྐོག་གྱུར་གྱི་ཆོས་ཀུན་གསལ་བཞིན་དུ་དྲི་བ་མཛད་སྤྱི་སྒོས་སོགས་བསྟོད་བསྔགས་དང་བཅས་སྐུ་རིམ་གྱིས་མཚོན་པའི་བླང་དོར་གནང་རྒྱུའི་ལན་ཞིབ་ཏུ་ཕུལ་ཞིང་ཁྱེད་སྔོན་རྗེ་འབངས་ཉེར་ལྔའི་ནང་ནས་
གནུབས་ནམ་མཁའི་སྙིང་པོའི་རྣམ་འཕྲུལ་ཡིན་ཞེས་ངོས་འཛིན་མཛད་པ་གཏེར་སྟོན་འཇའ་ཚོན་སྙིང་པོས་རྗེ་འབངས་ཉེར་ལྔའི་ཁྲོད་ནས་གཅིག་ཡིན་གསུང་བའི་རྒྱབ་ཆོས་སུ་སོང་བས་ཡིད་ཆེས་ཀྱི་གནས་སུ་ངེས། བཀའ་འགྱུར་གྱི་ལྗགས་ལུང་གནང་བའི་སྦྱིན་བདག་སྡེ་པ་སྲས་གླིང་པས་མཛད་པའི་ས་དཔྱད་གྲུབ་ནའང་། མཚུངས་མེད་ཉི་མ་གླིང་ནས་ཀྱིས་གོང་དཀར་རྡོ་རྗེ་གདན་རང་དུ་བཙུགས་ན་གནས་བཟང་ཞིང་ཚོགས་འདུ་ཆེ་བ་དང་། བསྟན་པ་ཕྱོགས་མཐར་རྒྱས་པའི་རྟེན་འབྲེལ་ཡོད་ཚུལ་གསུངས་པ་ལྟར་ནམ་མཐོངས་ཟླ་བའི་ཚེས་བཅུ་སྐོར་ལ་ཀུན་མཁྱེན་འཇིགས་མེད་དཔའ་བོའི་གདན་ས་གསང་སྔགས་ཀྱི་ཆོས་སྡེ་ཆེན་པོར་ཐེགས། ཐུགས་སྲས་ཀུན་དགའ་རྒྱལ་པོའི་གཟིམས་སྤྱིལ་ཀླུ་དབང་གླིང་དུ་རྡོ་རྗེ་བྲག་ནས་རིག་འཛིན་སྤྲུལ་པའི་སྐུ་མཆོག །སྐྱེད་ཚལ་གོང་འོག་གི་མཁན་པོ། སྣ་མོ་ཤག་གྲུབ་ཆེན་མི་ཕམ་ཀརྨ་སངས་རྒྱས་སོགས་ཕྱོགས་འདུས་ཀྱི་དོན་གཉེར་ཅན་དུ་མ་དང་རྡོ་རྗེ་གདན་གྱི་གྲྭ་ཚང་ཁག་གི་སློབ་དཔོན་འགའ་ཞིག་བྲེལ་བས་མ་འབྱོར་ཞིང་། རིན་པོ་ཆེ་ཉི་མ་གླིང་པས་བསྐལ་བཟང་། དཀོན་བརྩེགས། འཇམ་དབྱངས་རྣམ་པར་རོལ་པ། རྣམ་པར་འཕྲུལ་པ། པད་དཀར་རྣམ་གསུམ་སོགས་ཁ་ཤས་ལས་ཚང་མར་བསྙུན་ནས་འབྱོན་མ་ཐུབ། དེ་ཕྱིན་ཆོས་འཆད་པ་རྣམས་ཀྱིས་གཙོས་པའི་གྲྭ་པ་རགས་བསྡུས་ལ་འོ་སྐོལ་གྱི་སྟོན་པ་རྒྱལ་བ་ཟས་གཙང་གི་སྲས་པོ་རྡོ་རྗེ་གདན་གྱི་སྤོར་བདུད་བཞི་ལས་རྣམ་པར་རྒྱལ་བའི་བྱང་ཆུབ་བརྙེས་པའི་ཚུལ་བསྟན་ཏེ་མཆོག་གི་སྤྲུལ་པའི་སྐུའི་རྣམ་པར་རོལ་བའི་དུས་ཆེན་ཚེས་བཅོ་ལྔ་ལ་ཐོག་མར་རྟེན་འབྲེལ་ཁྱད་ཀྱི་མདོ་སྡེ་བསྐལ་པ་བཟང་པོ་ནས་
རིམ་པ་བཞིན་དབུ་འཛུགས་པ་གནང་བ་དེའི་ཚེ་ནམ་མཁའ་ཐམས་ཅད་དྲི་མ་དང་བྲལ་བའི་གཡའ་དག་པར་ཆོས་སྡེའི་ཁྱོན་དང་མཉམ་པར་ཆུ་འཛིན་གྱི་ཉི་འོད་མི་སྒྲིབ་པ་ཞིག་ནས་རྒྱ་གར་སྐད་དུ་གསུང་བ་དང་ལྷན་ཅིག་པར་ས་སྦངས་པའི་ཆར་ཤར་གྱིས་བབས་ཤིང་སྔར་ཕན་ཆར་དཀོན་པ་ཡོད་པ་དེ་ཉིན་ནས་དཀར་ཕྱོགས་ཀྱི་ལྷ་རྣམས་དགའ་བའི་ཆོས་ཡོན་གྱི་ཆེད་དུ་ཕབ་ཅིང་ཐག་རིང་བ་ཚོས་མཐོང་བ་ན་ཀླུ་དབང་གླིང་ལ་འཇའ་ཟུག་པ་སོགས་བླ་མ་དང་ཆོས་ཀྱི་ཆེ་བས་གཟུར་གནས་རྣམས་མི་ཕྱེད་པའི་དད་པ་ལ་བཀོད། མདོ་སྡེ་ཟ་མ་ཏོག་གི་སྐབས་ཚོགས་པ་རྣམས་ལ་ཡིག་དྲུག་གསུང་བ། ཡེ་ཤེས་རྒྱས་པའི་མདོའི་དུས་སངས་རྒྱས་ཀྱི་མཚན་རེ་འཛིན་དགོས་ཚུལ་གྱི་བསླབ་བྱ་དང་བཀའ་འགྱུར་ལྕེ་ཐོག་ནས་ཚར་རེ་སྒྲོག་པའི་དམ་བཅའ་འབུལ་མི་ཁ་ཤས་བྱུང་། དེ་བཞིན་གཤེགས་པ་ཤཱཀྱ་ཐུབ་པ་ལ་ཐུབ་པ་འོད་སྲུངས་ཀྱིས་གདུལ་བྱ་རྣམས་གཏད་པ་བཞིན་དུ་ངའི་བསྟན་པ་ལ་རབ་ཏུ་བྱུང་བ་ལ་སོགས་པ་བྱམས་པར་ཡོངས་སུ་གཏད་པ་ཡིན་ནོ་སོགས་གསུང་སྐབས་བདག་ཅག་ལ་སྟོན་པ་བདེ་བར་གཤེགས་པ་ཐུགས་བརྩེ། ཞེས་སྤྱན་ཆབ་རྒྱུན་རིང་བར་སྣང་། དེས་མཚོན་ཁྱིམ་པ་བྱིན་རླབས་ཞུ་མཁན་གྱི་རྣ་བར་བྱམས་པས་དམ་བཅས་པའི་གཟུངས་ཚར་རེ་སྒྲོག་པར་མཛད། ས་སྐྱོང་བསོད་ནམས་རབ་བརྟན་ལ་གཡར་པོ་ཞུས་པའི་བཀའ་འགྱུར་མཚལ་པར་མ་དང་། ཆོས་སྡེའི་བཀའ་འགྱུར་གཉིས་ལ་ཞར་བྱུང་དུ་ཞུས་དག་པའི་ཡི་གེའི་འདུ་བྱེད་དགེ་སློང་འཕྲིན་ལས་རྣམ་རྒྱལ་དང་། གོང་དཀར་གྱི་གླེགས་
བམ་ཁྲོད་དུ་མ་བཞུགས་པ་འདྲ་མཚལ་པར་མའི་སྟེང་ནས་ལུང་གནང་བ་ཞལ་སྔ་ནས་བྲག་སྣ་བས་སྡེ་པར་སྙན་ཕྲ་ཕུལ་ནའང་ཡར་བཞེས་རྒྱུ་ཐུགས་ཀྱིས་བསྙེལ་ནས་ལྗགས་ལུང་གི་བགེགས་སུ་མ་སོང་བར་གདའ། མདོ་མངས་ཐོར་བུ། དཀོན་བརྩེགས། ཕལ་ཆེན། ཤེར་ཕྱོགས་སྐོར་གྲུབ་ནས། དེ་ཡང་སྔར་ངོར་དུ་བསྒྲུབས་པ་གནང་བ་དེ་ཕྱག་ལེན་མཁན་སློབ་ཁ་སྐོང་ཚང་མ་ཁུངས་བཙུན་ནའང་ཤར་ཆེན་ཡེ་ཤེས་རྒྱལ་མཚན་གྱིས་ཡར་ཀླུངས་རྣམ་རྒྱལ་དུ་ཚག་མིག་མཁན་ཆེན་དཀའ་བཞི་ཚུལ་ཁྲིམས་རིན་ཅེན་ལ་བསྒྲུབས་པའི་སྡོམ་རྒྱུན་ཡིན་ལ། གོང་དཀར་རྡོ་རྗེ་གདན་གྱི་སྡོམ་རྒྱུན་ལ་ས་པཎ་བརྒྱུད་པར་བཞུགས་པ་དང་། ཕྱོགས་དེའི་གདུལ་བྱ་རྗེས་འཛིན་ལ་དགོངས་ཏེ་སྨིན་དྲུག་ཟླ་བའི་ཚེས་ཉི་ཤུའི་གཟའ་ལྷག་པ་དང་སྐར་མ་རྒྱལ་འཛོམ་པའི་ཉིན་སྔ་དྲོ་སྡོམ་པ་འབུལ་བ་གནང་བའི་བརྡ་ཆད་ཙམ་དུ་ཙར་མོའི་སྟེང་ན་བཟའ་དཀར་པོ་ཞིག་བཞེས། ཕྱི་དྲོ་གནས་བརྟན་འདུལ་བ་འཛིན་པ་ཆེན་པོ་ཚུལ་ཁྲིམས་བཀྲ་ཤིས་པས་མཁན་སློབ་སྦྲགས་མ། གསང་སྟོན་སྐྱིད་ཚལ་འོག་མཁན་པོ་ངག་དབང་བསྟན་འཛིན། དུས་སྒོ་བ་རབ་འབྱམས་ཆོས་རྗེ་རིན་ཅེན་རྒྱ་མཚོ། ཁ་སྐོང་བ་བྲག་ཐོག་པ་ཤཱཀྱ་མཆོག་ལྡན་སོགས་དད་པའི་དགེ་འདུན་གྲངས་ཚང་བའི་དབུས་སུ་ཚིགས་སྔ་མ་དགེ་བསྙེན་ནས་བཟུང་སྟེ་སྡོམ་གསུམ་རིམ་གྱིས་མནོས་པའི་ཉི་མ་རི་རྐེད་ལ་ཡོད་དུས་བསྙེན་པར་རྫོགས་པའི་སྡོམ་པ་ཐུགས་རྒྱུད་ལ་བསྟར། དེ་ནས་ཞག་ལྔ་ཙམ་ན་འདུལ་ལུང་ཁྱིམ་པའི་སྤྱོད་ཡུལ་དུ་མ་འོས་ཤིང་རབ་བྱུང་ཤ་སྟག་དགོས་པ་ཆོས་སྡེ་གཉིས་ཀྱི་གྲྭ་རིགས་ཉི་ཤུ་སྐོར་གྱིས་
ཉི་མ་གླིང་དུ་སྐུ་ངོ་སྦྲན་པས་རྗེ་ཚུལ་ཁྲིམས་བཀྲ་ཤིས་ཀྱིས་ད་ལམ་བསྐྱར་བཞེས་གནང་ནས་ཡུན་རིང་མ་སོང་ཡང་མཁན་པོའི་བྱ་བ་མཛད་དགོས་པར་གསོལ་བ་བཞིན་རྗེ་ཉིད་ཀྱིས་མཁན་པོ། མཚུངས་མེད་ཉི་མ་གླིང་པས་ལས་སློབ་བསྟར་ཏེ་རྩེས་དང་ཆེན་མོ་བྱང་མ་བ་ངག་དབང་བསྟན་འཛིན་གྱིས་གཙོས་པའི་བསྙེན་རྫོགས་པ་ཁ་ཤས་དང་རྡོ་རྗེ་བྲག་སྤྲུལ་སྐུ་རིན་པོ་ཆེ་དཔོན་སློབ་ལྔ་དགེ་ཚུལ་དུ་བསྒྲུབ་པ་གནང་བའི་ཆེན་མོ་བྱང་མ་པའི་མཚན་ལ་སླར་བྱམས་པ་བསྣན་ཏེ་འདོགས་པར་མཛད། ཆོས་ཞུ་བ་པོ་རྣམས་ཀྱིས་དཀྱིལ་འཁོར་ལ་བརྟེན་པའི་དབང་ཐོབ་གཤིས་གསང་སྒྲོག་གི་ཉེས་པ་མི་འབྱུང་ཡང་རྒྱུད་དང་འབྲེལ་བའི་ལྷའི་རིག་གཏད་ལྟ་བུ་བྱུང་ན་ཕྱག་ལེན་གཙང་བའི་དབང་དུ་མཛད་ཟུར་བཀའི་དཀྱིལ་འཁོར་རྗེས་གནང་གི་སྲོལ་མི་འདུག་རུང་། སྒྲུབ་ཐབས་རྒྱ་མཚོའི་ཀྱེ་རྡོར། གསང་འདུས་འཇམ་རྡོར། ཧེ་རུ་ཀཿཕྱག་གཉིས་པ། བདག་མེད་མ། གཤིན་རྗེའི་གཤེད་དམར་ནག །ཕག་མོ་ལྷ་ལྔ་ཕྱག་རྡོར་། མི་གཡོ་བ། སྤྱན་རས་གཟིགས་གཙོ་འཁོར་གསུམ་པ། གུར་མགོན། མགོན་པོ་ཕྱག་བཞི་པ། ཟུར་བཀའ་སྣ་ཚོགས་ཡུམ། ཁྲོ་ཕུའི་འཇམ་དཀར། ཕྱག་རྡོར་འགྲོ་བཟང་སོགས་སྤྱི་བཀའ་ཟུར་བཀའ་སྐབས་སུ་གང་བབས་ནས་རྒྱུད་སྡེ་ཚན་དུ་ཕྱེ་བ་ཕལ་ཆེར་དང་འབྲེལ་བར་སྔོན་དུ་རྗེས་གནང་རེ་མཛད་པའི་རྒྱུད་འབུམ་ནས་བདེ་མཆོག་མཁའ་འགྲོ་རྒྱ་མཚོ་ལ་སོགས་པའི་སྔགས་ཡས་མས་དཀྲུགས་པ་རྣམས་བསྡེབས་པས་མཚོན་མདོར་ན་ཆོས་བཤད་པའི་དུས་ཚོད་སྔ་ཕྱི་སོགས་གང་ལའང་ཐུགས་བྲེལ་གྱི་རྗེས་སུ་མི་འབྲང་ཞིང་དཔོན་སློབ་རྣམས་
ཀྱི་ཀུན་ཏུ་སྤྱོད་པ་ཡང་མདོ་རྒྱུད་ལས། ཇི་ལྟར་བྱུང་བ་ལྟར་བསྟན་རྒྱུན་ལ་དགོངས་པའི་ཐུགས་རུ་ཤིན་ཏུ་ང་བའི་སྒོ་ནས་ཆོས་སྡེའི་རིགས་གྲ་དང་རྣལ་འབྱོར་རྒྱུད་ཀྱི་སྒྲུབ་མཆོད་སོགས་ལ་རྟ་མ་ཆག་ཙམ་དང་གཞན་མ་ཉི་ཁྱོངས་སུ་གནང་བ་ཧོར་ཟླ་བཅུ་གཉིས་པའི་ཚེས་བཅོ་ལྔ་ལ་ལེགས་པར་གྲུབ་ཅིང་རྟེན་འབྲེལ་ཁྱད་ཀྱིས་བསྟན་འགྱུར་གསན་ཁྲོད་ནས་པོ་ཏི་གསུམ་ཙམ་དང་། ཆོས་ཞུ་བའི་ཚོགས་ལ་ཉིན་རེ་བཞིན་མང་ཇ་གཉིས་རེ་ཆད་མེད་དང་། ཀུན་མཁྱེན་བུ། རྗེ་རྡོ་རྗེ་གདན་པ། ཚར་ཆེན། འཇམ་དབྱངས་མཁྱེན་བརྩེ་ཁུ་དབོན་རྣམས་ཀྱི་དུས་དྲན་ལ་བཀའ་འགྱུར་རིན་པོ་ཆེར་བརྒྱ་མཆོད། ཚོགས་སུ་མང་ཇ་འཕར་མ། སྐབས་འགར་ཆོས་སྟོན་མཇུག་ཏུ་གྲོལ་སྟོན་གྱི་ཚིམ་པ་སོགས་བསྡུ་བ་རྣམ་པར་བཞིའི་སྒོ་ནས་རྗེས་སུ་བཟུང་ཞིང་གཉུག་མར་གནས་པ་དང་གློ་བུར་དུ་ལྷགས་པའི་ཁོང་ནས་རྡོ་རྗེ་བྲག་སྤྲུལ་སྐུ་རིན་པོ་ཆེའི་ཡབ་གཞིས་ནས་བསྙེན་བཀུར་གཟབས་རྒྱས་ལན་གཉིས། གཞན་ཕལ་ཆེར་གྱིས་མང་ཇའི་ཐོག་འབྱོར་པ་དང་བསྟུན་པའི་ཟང་ཟིང་གི་བདོག་པ་མཎྜལ་དུ་བཏེག །མཚོ་སྔོན་པོའི་སྒར་ཐོག་ནས་དྷརྨ་ཁེ་ཡ་ཐའི་ཇི་བོད་དུ་བཏང་སྐབས་ངེད་རང་ནས་འཕྲིན་གསོལ་དངུལ་གྱི་རྟེན་ལྡན་བརྟན་བཞུགས་ཀྱི་ཚིགས་བཅད་དང་བཅས་ཕུལ་བ་ཆོས་ཞུ་བ་རྣམས་ཀྱིས་ཤེས་ནས་འཕྲལ་དུ་བཙུགས་ཏེ་ཉིན་སྟར་གྱིས་གསུང་བ་སོགས་རྟེན་འབྲེལ་འགྲིག་ཅིང་གཞན་དོན་དུ་དགོངས་ནས་བརྟན་བཞུགས་གསོལ་འདེབས་སུ་བསྒྱུར་ཏེ་དེང་སང་ཡང་ཚོགས་འདོན་ཆག་མེད་དུ་ཡོད་སྣང་། ཆོས་གྲོལ་རྗེས་རྟེན་འབྲེལ་གྱི་ཁྱད་ནས་སྐྱ་སེར་གྱི་ཁྲོམ་ཆེན་པོ་ཚོགས་པར་ཕྱི་རོལ་གྱི་རྡོ་ཅལ་བཞུགས་ཁྲིའི་ཐོག་ཏུ་ཕེབས་ཤིང་འཇམ་དབྱངས་ས་པཎ་གྱི་
དབུ་ཞྭས་ཞུ་མཆོད། གྲུབ་རྒྱལ་ལུགས་ཀྱི་ལྷ་གཅིག་བུམ་གཅིག་ལ་བརྟེན་པའི་ཚེ་དབང་། ད་ལམ་གྱི་ཆོས་འཁོར་འདི་ལ་བརྟེན་པའི་འཆད་ཉན་ཞབས་ཏོག་མཐུན་རྐྱེན་སྒྲུབ་སོ་ཅོག་ཀུན་གྱི་དགེ་བའི་རྩ་བ་རྣམས་བྱང་ཆུབ་ཆེན་པོར་བསྔོ་བའི་ཡོན་བཤད། བཀྲ་ཤིས་ཀྱི་མཐའ་བརྟེན་དང་བཅས་རྒྱས་པར་སྩལ་བ་ནི། ཀུན་མཁྱེན་མཁྱེན་བརྩེའི་གསུང་མགུར་ལས། གང་འདིའི་ཐུབ་བསྟན་ཐ་མར་གྱུར་པའི་མཐུས། །ཇི་སྙེད་ཆོས་ཀྱི་བཀའ་བབས་ཆད་གྱུར་ཅིང་། །ཅུང་ཟད་ལུས་རྣམས་འཆད་ལ་ཉེ་བ་འདི། །བསམས་བཞིན་སྙིང་ནས་མ་དགའ་ཤེས་པར་འཕྱོ། །རྒྱལ་བའི་བསྟན་པ་མཆོག་ལ་དད་པ་དང་། །མར་གྱུར་འགྲོ་ལ་བརྩེ་བའི་ལྷག་བསམ་གྱིས། །ཕན་བདེའི་འབྱུང་གནས་ཐུབ་བསྟན་རིན་ཅེན་སྒྲོན། །སྤེལ་བའི་ཐབས་ལ་སྙིང་ནས་སྤྲོ་བར་གྱུར། །ཞེས་པའི་དོན་དང་མཐུན་པར་མཆིས་སོ། ། རིན་ཅེན་ཚུལ་ཁྲིམས་བཀྲ་ཤིས་དང་གསུང་གླེང་ལ་རི་ཕུག་ཏུ་ལོ་གསུམ་མའི་སྐབས་སྒྲུབ་ཐབས་རྒྱ་མཚོའི་ལྷ་རྣམས་ཀྱི་བསྙེན་པ་ཚད་དུ་འཁྱོལ་བ་ཁྱད་པར་བྱ་རྒྱུད་ལ་ལེགས་གྲུབ་ཀྱི་དགོངསཔ་བཞིན་གཡལ་དང་སྦྲིད་པ་སོགས་བྱུང་ན་ཕྲེང་སྐོར་གཅིག་པུ་དེ་གྲངས་སུ་མི་བརྩི་བས་མཚོན་ཕྲ་མོ་རྣམས་ལའང་ཐུགས་རུ་ང་ཚུལ་གསུངས་པ་དཔྱོད་ལྡན་འཕྲིན་ལས་རྣམ་རྒྱལ་གྱི་ཐོས་འཛིན་དུ་གྱུར་པར་ཡ་མཚན་དུ་འཛིན་ཞིང་ཁོ་བོའང་རྗེས་སུ་ཡི་རང་ངོ་། །ཉེ་སྐོར་ནས་ཞིང་འཁྱར་ཁ་ཤས་གཟིགས་པ་ཧོར་ཟླ་བདུན་པའི་རྣལ་འབྱོར་རྒྱུད་ཀྱི་སྒྲུབ་མཆོད་ཐེབས་སུ་ཉིན་གཅིག་འཕར་བའི་སྦྱོར་འཇགས་གནང་། དེ་ནས་མི་རིང་བར་རྣམ་སྣང་མངོན་བྱང་ལ་
ཉེར་ལྔར་གཅོད་མི་དགོས་པ་རྒྱུད་ཀྱི་དགོངས་པ་དང་དམ་པའི་ཕྱག་བཞེས་བཞིན་ཆོས་སྡེ་ཡས་མས་ཀྱི་གྲྭ་པ་བཞི་བཅུར་དབང་། གཙུག་དགུའི་དབང་ཆ། གྲངས་བཅོ་ལྔར་དྲིལ་བུ་ལུས་དཀྱིལ་གྱི་དབང་། རྣམ་སྲས་སྤྲིན་གསེབ་མ་དང་ཛམ་ལ་དམར་པོ་ཡུམ་བཅས་ཀྱི་རྗེས་གནང་། སྐྱེད་ཚལ་འོག་གཞི་བ་སློབ་དཔོན་པ་སོགས་ལ་སྤྱན་རས་གཟིགས་ཚེམ་བུ་ལུགས་ཀྱི་དམར་འཁྲིད་ཀྱིས་མཚོན་འདོད་ཆོས་ཁ་ཤས་སྩལ། སྔོན་ཆད་ཡོངས་འཛིན་མང་པོར་མདོ་རྒྱུད་གྱི་གདམས་པ་རྒྱ་ཆེར་གསན་ཡང་ལོ་ཆེན་རཏྣ་བྷ་དྲས། ཆོས་པའི་སོ་ནམ་ཡིན་པས་ཐོས་བསམ་བྱས། །ཆོས་ཀྱི་རྩ་བ་ཡིན་པས་གནས་ལུགས་བསྒོམས། །ཆོས་ལ་འབྲས་བུ་དགོས་པས་སྨོན་ལམ་བཏབ། །སྒོ་གསུམ་ཐ་མལ་ནམ་ཡང་བཞག་མ་མྱོང་། །སྔོན་ཆད་གདམས་ངག་བརྒྱ་ཕྲག་དུ་མ་བསླབས། །འོན་ཀྱང་ད་དུང་གཞན་ལ་འཚོལ་བར་འདོད། །ཅེས་པ་ལྟར་སླར་ཡང་ངོམས་པ་མེད་པར་ཐོས་བསམ་མཛད་བཞེད་ཀྱི་ཆུ་མོ་སྦྲུལ་ལོ་ཤར་ནས་གཙང་ཕྱོགས་སུ་གཤེགས་ཞོར་ལྕགས་ཟམ་སྤྲུལ་བའི་སྐུ་ཀུན་དགའ་བསོད་ནམས་དབང་ཕྱུག་གི་དྲུང་དུ་འཁྲིད་བརྒྱ་སོགས་ཟབ་ཆོས་ཁ་ཡར་གསན་ཞིང་། ངོར་ཨེ་ཝཾ་ཆོས་ལྡན། གདན་ས་ཆེན་པོ་དཔལ་ལྡན་ས་སྐྱ། སློབ་དཔོན་ཆེན་པོའི་སྒྲུབ་གནས་རི་བོ་བཀྲ་བཟང་སོགས་སུ་ཞབས་པད་ཀྱི་ཕྲེང་བ་བཀོད་ནའང་། རྗེ་མཁྱེན་བརྩེའི་གསུང་མགུར་དུ། བདུད་ཀྱིས་དབང་སྒྱུར་སྐལ་ངན་ཆེས་མང་བས། །དམ་ཆོས་འཚོལ་ལ་འགལ་རྐྱེན་ཆར་བཞིན་འབབ། །མཐུན་རྐྱེན་མི་འབྱུང་བྱུང་ཡང་སྟོབས་ཞན་པས། །ཇི་ལྟར་བསམས་པ་བཞིན་དུ་གྲུབ་མ་གྱུར། །ཞེས་གསུངས་པ་ལྟར། ངོར་མཁན་
ཆེན་ཤར་པ་ཤེས་རབ་འབྱུང་གནས་དང་། བཀྲ་བཟང་པ་ཆེན་པོ་ནམ་མཁའ་རིག་འཛིན་གཉིས་སྐུ་ན་ཧ་ཅང་སྨིན་པར་མ་གྱུར་རུང་བསྟན་པའི་གེགས་ཆགས་ལྟ་བུས་དག་ཞིང་གཞན་དག་ཏུ་སྒྱུ་འཕྲུལ་གྱི་བཀོད་པ་བསྡུས་པ་དང་འགྲིག་ཅིང་སྔགས་འཆང་བླ་མ་སེམས་དཔའ་ཆེན་པོ་ཁྲི་ཆེན་འཇམ་དབྱངས་ངག་དབང་ཀུན་དགའ་བསོད་ནམས་རྩ་དཀར་གྱི་བསྟེན་བབས་ལྕི་བ་སོགས་གཞན་འཕྲུལ་དབང་བྱེད་ཀྱི་བདག་པོ་ཉི་མའི་གཉེན་གྱི་རིང་ལུགས་ལ་པི་ནཱ་ཡའི་ཆོ་འཕྲུལ་ཅུང་ཟད་ནུས་པའི་དུས་དང་འགྲིག་པས་ཆོས་གསན་རྩིས་རྣམས་བཞེས་པ་དང་མཐུན་པ་མ་བྱུང་ན་ཡང་བཞི་ཐོག་ཏུ་བདག་ཆེན་ཁྲི་རིན་པོ་ཆེ་ནས་བདག་རྐྱེན་ཚད་མེད་པ་དང་བཅས་ལུགས་གཉིས་དང་འབྲེལ་བའི་བཀའ་མཆིད་ཀྱི་རིམ་པ་ཞིབ་རྒྱས་སུ་སྩལ། མཆོད་ཁང་དང་མགོན་ཁང་ཆེས་མང་བ་མཐའ་དག་མཇལ་བར་ཕེབས་པའི་ཚེ་དངོས་བཤམས་ཡིད་སྤྲུལ་གྱི་མཆོད་པ་དང་། འཇིག་རྟེན་ཁམས་སུ་བདེ་སྐྱིད་རྒྱ་ཆེར་འབྱུང་བའི་སྨོན་ལམ་མཛད། ངེད་གོང་ནས་ཕྱིར་འཁོར་བའི་ཧོར་ཟླ་བཅུ་གཅིག་པའི་ནང་དུ་ངོས་འཕྲད་ལ་དགའ་ལྡན་ཕོ་བྲང་དུ་ཕེབས་ཐུགས་དགྱེས་པའི་གསུང་གླེང་བག་ཕེབས་པར་མཛད། བྱེས་ལམ་དུ་ཡུལ་དུས་གནས་སྐབས་ཀྱི་རང་དབང་འདུ་མི་འདུ་དང་གཙོ་བོར་ལེ་ལོ་དང་སྙིང་རུས་གཉིས་ཚོང་ཐེབས་པའི་ཁ་ཏོན་དགེ་སྦྱོར་བྱེད་བློ་རྣམས་མོས་འདུན་ཙམ་དུ་ལུས་གཤིས་ཆག་མེད་བཞི་གསོས་ཤིང་། བསམ་མི་ཁྱབ་ཀྱི་བྱིན་རླབས། དེ་བཞིན་གཤེགས་པའི་ཡི་གེ་བརྒྱ་པ། ཕྱག་བཙལ་བའི་ཕན་ཡོན་འགའ་ཞིག །གདུགས་དཀར་གཞན་གྱི་མི་ཐུབ་པ། འཇམ་
དབྱངས་མཁྱེན་བརྩེས་མཛད་པའི་དྲི་མེད་ཀྱི་སྲོག་ཤིང་འཛུགས་ཆོག་རྣམས་ཀྱི་ལུང་དང་། སྔར་གུང་ཐང་དུ་གནང་རྩིས་ཀྱི་གཏོར་གཤོམས་གྲུབ་མཚམས་གནམ་ངོ་ཆེན་པོ་གློ་བུར་དུ་བྱུང་བ་འོང་གསེབ་ཏུ་བཤོར་ན་དཔོན་སློབ་གཉིས་ཀར་སྐུར་འདེབས་བྱུང་དོགས་ཀྱི་གཤོལ་བ་གནང་འདུག་པ་ད་ལམ་ཞལ་གསང་འཁྲིད་དང་ཤིས་བསྟན་པའི་རྗེས་གནང་ཡང་ཞུས། རྗེ་བླ་མ་དམ་པར་བྱང་ལུགས་ཕྱག་ལེན་གྱི་ཚེ་དཔག་མེད་ལྕགས་སྡོང་བརྒྱ་རྩ། །རིག་འཛིན་རཏྣ་གླིང་པ་ཀློང་གསལ་གྱི་ཚེ་དབང་། ཆོས་རྒྱལ་བཀྲ་ཤིས་སྟོབས་རྒྱལ་གྱི་མཚོ་སྐྱེས་རྡོ་རྗེ་སྐུ་གསུམ་རིགས་འདུས་ཀྱི་དབང་ལུང་རྣམས་ཕུལ་ཞིང་གཏེར་གསར་གྱི་ཚེ་མདའ་རྩེ་སོར་གསུམ་ཙམ་འཕེལ་བས་སྐུ་ཚེའི་རྟེན་འབྲེལ་འགྲིག །རྒྱ་ནག་ནས་འཁོར་བའི་སྐྱེས་མ་དང་ཆོས་ཡོན་སྔགས་པའི་མཎྜལ་རྒྱས་པར་བཏེག་ཅིང་ཡར་ལམ་གུང་ཐང་དུ་ཞག་ཤས་བཞུགས་ཏེ་རིམ་གྱིས་བཀྲ་ཤིས་རྩེ་ཆོས་སྡེར་ཐེགས། ད་དུང་ཚེ་འདིའི་ཆེ་ཐབས་བསྒྲུབས་ཀྱང་འགྲུབ་པར་དཀའ་ཞིང་། གྲུབ་ཀྱང་སྐྱིད་མོད་ངང་ནས་གནས་ངན་དུ་མར་འཁྲིད་པས། ཅི་བྱས་དམ་པའི་ཆོས་དང་ཡང་ཡང་རྗེས་སུ་བསྟུན་ནས། ཆོས་བརྒྱད་སྤོང་བའི་ཐབས་ལ་འབད་པ་བགྱིད་པ་མ་གཏོགས། ཚེ་འདིའི་མདུན་མ་སྒྲུབ་པའི་ཞེ་འདོད་མེད་པ་ཞིག་གདའོ། །ཞེས་རྗེ་ཐམས་ཅད་མཁྱེན་པའི་གསུང་མགུར་ལས་བྱུང་བ་ལྟར། ལོ་སྔོན་མ་འབྲས་སྤུངས་སུ་ཕེབས་སྐབས་གསུང་གླེང་ལ་ད་ཆ་ལོའང་མང་དུ་ལོན་ཅིང་དེ་བར་སྡེ་དགོན་གྱི་ཁ་འཛིན་སོགས་བན་བུན་གྱི་གཡེང་བའི་ངང་དུ་ཟད་པ་ཞིག་བྱུང་བ་ཚེ་མཇུག་འདི་ལ་དབེན་པ་བསྟེན་ནས་དགེ་སྦྱོར་ལ་ཆིག་སྒྲིལ་བྱེད་
འདུན་ཡོད་གནང་བར་ད་དུང་དགུང་ལོ་སོགས་ཧ་ཅང་གི་མཐོ་བར་མ་ཟིན་ཅིང་སྐུ་གཟུགས་ཀྱིས་རྐྱེན་མི་ཐེག་པའང་མི་འདུག་པས་རེ་ཞིག་སྤྱི་སྒོས་ཀྱི་ཆོས་རྒྱུན་སྤེལ་བས་མཚོན་པར་ཐུགས་ལས་ཆུང་ངུར་མ་སོང་བ་དགོས་ཚུལ་ཞུས་ཤིང་ཤིང་རྟ་ཆོས་སྡེ་པ་ཚོར་དེ་མཚུངས་ཀྱི་བསླབ་སྟོན་གནང་བ་གྲྭ་རིགས་སྦྱིན་བདག་སྐྱ་སེར་ཐམས་ཅད་ཀྱིས་མགྲིན་གཅིག་ཏུ་གསོལ་བ་བཏབ་པ་སོགས་གང་ཅི་ནས་ཐུགས་དབང་མ་འདུས་པར་བརྟེན་ད་ཆ་ཚེ་དང་སྒྲུབ་པ་མཉམ་པ་མ་ཐུབ་ཚེ་གཡེང་བ་བྱེད་རིན་ཆོག་པ་བགྱིད་གསུང་ཐོག་བབས་སུ་བཀའ་འགྱུར་བཞེང་བའི་དགོངས་པ་བསྟད་ནས་ཤོག་བུ་སྒྲུབ་པའི་སྟ་གོན་དུས་སྡེ་པ་བློ་བཟང་མཐུ་སྟོབས་ཀྱི་གཅུང་གསུང་རབ་རྒྱ་མཚོས་སྣག་ཚ་དང་སྨྱིག་རྒྱུའི་སིག་ཕུལ་བས་རྟེན་འབྲེལ་འགྲིག་ཅེས་དགྱེས་པར་གྱུར། ཤོག་བུ་སྒྲུབ་མི་སླེབས་པ་དང་མོན་ནས་ཤོག་ཚོང་བ་གཏོས་ཅན་ཡོངས་པ་འགྲིག་པས་གནས་པོ་ཡང་དུས་གཅིག་ལ་བཀའ་འགྱུར་ལྡངས་པ་འདི་འདྲ་ཡོང་བ་ཐུགས་རྗེ་རང་དུ་གོ་བའི་དད་པ་ལྷག་པར་སྐྱེས་ཏེ་འབྲས་ཀྱི་སྐྱེས་ཕུལ་ཞིང་སྲུང་བ་ཞུས། ལ་ལ་དག་ཐུགས་རིག་ལ་སྟེང་ཤོད་མེད་དམ་ཕྱག་རྫས་སྟོབས་ཆེ་བ་མེད་པར་ཐུགས་གྲ་འདི་བསྒྲིག་པ་ཞེས་ཐུགས་ལྷུས་མ་ཐིངས་པའི་སྐུར་ཞུས་བྱེད་པ་བྱུང་ནའང་རྒྱལ་བ་བཙོང་ཁ་པ་ཆེན་པོས་རྫིང་ཕྱིའི་ཞིག་གསོས་ཀྱི་ཚེ་དཔོན་སློབ་བཅུ་གཉིས་ཀྱི་སྐུ་ཆས་ལ་ཟི་གོང་བརྒྱབ་པར་གསེར་ཞོ་བཅུ་གཉིས་ལས་མ་བྱུང་བ་དེ་ནུབ་རྣམ་སྲས་ལ་འཛིན་གཏོར་ཞིག་གནང་བས་སང་ནས་ཡོ་བྱད་འབད་མེད་དུ་བྱུང་ཞིང་ཐམས་ཅད་མཁྱེན་པ་དགེ་འདུན་གྲུབ་པ། ངོར་ཆེན་རྡོ་རྗེ་འཆང་། པཎ་ཆེན་
ཤཱཀྱ་མཆོག་པ་ལྟ་བུའང་སྙོམས་ཆུང་བྱ་བྲལ་གྱི་ངང་ནས་བཀྲ་ཤིས་ལྷུན་པོ། ཨེ་ཝཾ་ཆོས་ལྡན། གསེར་མདོག་ཅན་གྱི་སྡེ་བཏབ་པས་མཚོན་འཕགས་བོད་ཀྱི་གང་ཟག་ཁྱད་པར་ཅན་རྣམས་གནས་སྐབས་སུ་འདོད་ཡོན་ལ་མི་དགྱེས་པས་གསོག་འཇོག་མི་མཛད་ཀྱང་ཆོས་ལྡན་གྱི་མཛད་པ་རྒྱ་ཆེན་པོའི་དུས་ནམ་མཁའ་མཛོད་ལ་མངའ་འབྱོར་བའི་ཤུགས་ཀྱིས་འབད་རྩོལ་ལ་མི་བལྟོས་པའོ། །འཇིག་རྟེན་མཐུན་འཇུག་ཟང་ཟིང་བདོག་པ་ལ། །ཕན་ཚུན་སྐྱེས་སུ་བསྟར་བ་དོན་ལྡན་དུ། །བྱེད་པའི་ངང་ཚུལ་མཐོང་ན་དམ་ཆོས་ནོར། །གཏོང་ལེན་འདི་ཀོ་དམ་པའི་རྣམ་པར་ཐར། །སྔོན་དུ་ལོ་པཎ་མཁས་གྲུབ་མང་བྱོན་ནས། །རྒྱལ་བསྟན་དར་ཚེ་རྩོལ་བར་ཅི་ཞིག་བལྟོས། །འཆད་ཉན་དགུན་གྱི་ཆུ་བྲན་ལྟར་གྱུར་དིང་། །ཐོས་བསམ་ཁུར་གྱི་ལྗིད་ལ་ལྷག་པར་རངས། །སྔ་ཕྱིར་འགྱུར་བའི་སྨོན་གྲོལ་མན་ངག་ལུང་། །པདྨའི་སྐུད་པར་རྡོ་རྗེ་བཞུ་བླུགས་པས། །སྲོག་འཚོའི་རིག་བྱེད་དྲན་པའི་མཁྱེན་དཔྱོད་ཀྱི། །ཚངས་རིས་གྲུབ་པའི་ལྷ་དེ་གཞན་མིན་དྲང་། །སྤྲུལ་ཞིང་ལྟ་ན་སྡུག་ནས་འོངས་མིན་པར། །སྐྱེ་རྒུའི་སྲོག་འཚོ་སྨན་གྱི་བླ་མ་དངོས། །གིང་ཆེན་ཚངས་པས་བསྙེམས་བཏང་གང་གི་ཞབས། །ནམ་མཁའི་སྙིང་པོར་ངེས་ཏེ་གཙུག་ཏུ་བླངས། །ལྷ་མིན་དམོད་པའི་ལྕགས་ཏིམ་མ་སྐྱེས་པར། །གཟུར་གནས་བློ་ཡི་དཔལ་བེའུ་སྙིང་ག་རུ། །རི་མ་རབ་བཀྲའི་སྐལ་ལྡན་ནབས་སོ་སྐྱེས། ཁྱོད་ཞལ་བདུད་རྩི་འཐུང་ལ་ལྷག་པར་རིངས། །རྣམ་གསུམ་ཆོས་འཁོར་དུས་གཅིག་ཡོངས་བསྐོར་བར། །དཀར་ཕྱོགས་ལྷ་རྣམས་དགའ་མགུར་ལྟ་བ་ལ། །མཎྡ་ར་ཡི་སྨིན་ལེགས་ཕྲེང་མཛེས་དང་། ཁོར་
ཡུག་དབང་གཞུའི་དྲ་བས་སྦྲེལ་ཕྱིར་བརྫུ། །གཡས་རུའི་འཛིན་མར་འཁྲུལ་མེད་ལམ་སྟོན་ཤེས། །ཉུང་ཟད་ཙམ་ཡང་མ་བཟོད་ལུས་མེད་མདས། །རེ་ཞིག་བཞེད་པའི་དཀའ་ཐུབ་འཇིག་ནུས་པ། །ཆེས་ཆེར་ལྔ་བདོའི་ཤུགས་དེ་གང་གིས་བཟློག །འདམ་སྐྱེས་འདམ་གྱིས་མ་གོས་པདྨ་ལྟར། །འཁོར་གནས་འཁོར་བའི་རྒྱ་ལས་ཡོངས་གྲོལ་ཡང་། །སློབ་ལམ་སློབ་པའི་ཆེད་དུ་ཞི་བདེ་ལ། །ངེས་པར་ངེས་འབྱུང་ཚུལ་གྱིས་འདྲིད་དེ་ཅི། །ནམ་མཁའི་སྐ་རགས་མ་ངེས་འཆིང་དཀའ་བའི། །གྲངས་མེད་འགྲོ་འདྲེན་ཐུགས་བསྐྱེད་རྡོ་བའི་ངོས། །བྲིས་པའི་རི་མོ་སེམས་ཅན་ཟད་པའི་མཐའ། །དེ་སྲིད་མི་ཡལ་རྒྱལ་སྲས་སྤྱོད་པའི་གཤིས། །མྱོས་བྱེད་ཅེས་པ་ཤིང་ལུག་ཟླ་བ་གསུམ་པའི་ཚེས་དགུ་ལ་ཆོས་སྡེ་ཆེན་པོ་དཔལ་ལྡན་འབྲས་སྤུངས་སུ་ཕེབས་པའི་ཞར་བྱུང་དུ་གྲ་དར་རྒྱས་ཆོས་སྡིངས་སུ་གདན་གྲངས་ཡབ་རྗེ་གནུབས་ཆེན་སྤྲུལ་པའི་ཟློས་གར་དང་གདུང་བརྒྱུད་བགྲེས་པ་ཆོས་རྒྱལ་གཏེར་བདག་གླིང་པ་གཉིས་ལ་དཔལ་ཀྱེ་རྡོ་རྗེ་མན་ངག་ལུགས་དང་ཛེ་ཏཱ་རིའི་ཚེ་དཔག་མེད་ལྷ་དགུའི་དབང་གནང་། ཚུར་རིག་འཛིན་ཕྲིན་ལས་ལྷུན་གྲུབ་ལ་གཏེར་ཆོས་ཅི་རིགས་པ་གསན་ཏེ་རིམ་གྱིས་དགའ་ལྡན་ཕོ་བྲང་དུ་ཞག་དགུའི་བར་སྟན་ཆགས་པའི་དུས་འཁོར་བདག་པོ་ཆེན་པོའི་དབང་། སིནྡྷུ་ར་ལ་བརྟེན་པའི་བདག་མེད་ལྷ་མོ་བཅོ་ལྔ། །བདེ་མཆོག་དཀར་པོ། ཏོག་ཙེ་བའི་བསམ་མི་ཁྱབ་གསུམ་གྱི་བྱིན་རླབས། ཨཥྚའི་བཟླས་ལུང་། གུར་སྤྲིན་གསེབ་མའི་རྗེས་གནང་། སུམ་པ་ལོ་ཙཱའི་བློ་སྦྱོང་དང་ཚེམ་བུ་ལུགས་ཀྱི་དམར་འཁྲིད་གཉིས་འཇམ་དབྱངས་མཁྱེན་བརྩེའི་ཟིན་བྲིས་སྟེང་ནས་ཉམས་འཁྲིད་སྔ་དགོངས་སོ་སོར་སྨིན་རྒྱས། རྗེ་བཙུན་གྲོལ་མཆོག་གི་འཁྲིད་བརྒྱའི་སྐོར་ཡོངས་རྫོགས། དམ་ཆོས་དགོངས་པ་ཡང་ཟབ་ཀྱི་ཆོས་སྐོར་ཕལ་ཆེར། བསྟན་གཉིས་གླིང་པའི་རྟ་གླུད། ཀྱེ་རྡོར་དབང་ཆོག་གི་ལྷན་ཐབས་ཚར་ཆེན་གྱིས་མཛད་པ། དེའི་སྦྱིན་སྲེག་དང་སཱ་ཙྪཱ་འདེབས་ཆོག་ཀུན་མཁྱེན་མཁྱེན་བརྩེས་
མཛད་པ། རྗེ་ཉིད་ཀྱིས་མཛད་པའི་བྱང་གཏེར་སྐྱེས་བདུན་སྒྲུབ་ཐབས། སམྦྷུ་ཊ་རྒྱུད་ཕྱི་མ་དང་བཅས་པ། གསང་བ་རིང་བསྲེལ། བྱང་ཆུབ་རྒྱན་འབུམ། ལས་སྒྲིབ་རྣམ་སྦྱོང་། རྟེན་འབྲེལ་སྙིང་པོ། འོད་ཟེར་ཅན་མ། དུག་སེལ་མ། གདུགས་དཀར་མཆོག་གྲུབ། རྣམ་རྒྱལ་མའི་གཟུངས་རྟོག་པ་དང་བཅས་པ། ངན་འགྲོ་སྦྱོང་བའི་རྣམ་རྒྱལ། གཙུག་ཏོར་དྲི་མེད། མཆོད་པའི་སྤྲིན་གྱི་གཟུངས། རྒྱལ་མཚན་རྩེ་མོའི་དཔུང་རྒྱན། མིག་ནད་སྦྱོང་བ། གཞང་འབྲུམ་ཞི་བ། ནད་ཐམས་ཅད་རབ་ཏུ་ཞི་བ། མི་རྒོད་རྣམ་འཇོམས། བྱམས་པས་དམ་བཅས་པའི་གཟུངས། གཟའ་ཡུམ། ནོར་རྒྱུན་མ། ཚེ་དཔག་མེད་ཀྱི་སྙིང་པོ། མི་འཁྲུགས་པའི་རྒྱུད། སྟོབས་པོ་ཆེ། རྒྱལ་པོ་མདོ་ལྔ་སོགས་མདོ་ཕྲན་ཁ་ཤས་རྣམས་ཀྱི་ལུང་ཞུས་ཤིང་འཕྲང་འགོ་གཏེར་སྟོན་གྱི་ཚེ་དཔག་མེད་སྐུ་གསུམ་རིགས་འདུས་ཀྱི་དབང་ཕུལ། རིམ་གྱིས་གུང་ཐང་བརྒྱུད་དེ་བཀྲ་ཤིས་ཆོས་ཀྱི་སྡེ་ཆེན་པོར་ཕེབས་པའི་ཨེ་རིག་པའི་འབྱུང་གནས་ཆོས་ལུང་དཀར་པོ་ནས་དཔོན་ཡིག་མཁས་པ་དོན་བདུན་བོས་པར་དབུ་མ་ལུགས་ཀྱི་སེམས་བསྐྱེད་དང་ཐོས་གྲོལ་གྱི་ལྗགས་ལུང་། ས་ག་ཟླ་བ་སྐུ་བལྟམས་པའི་དུས་ཆེན་ཡར་ཚེས་བདུན་གྱི་རེས་གཟའ་ལྷག་པ་དང་སྐར་མ་རྒྱལ་གྱི་འཕྲོ་དགེ་བར་བཀའ་འགྱུར་རིན་པོ་ཆེ་བཞེང་བའི་དབུ་བཙུགས་པའི་ཚུགས་སྟོན་རྩེས་དང་ནས་སྣ་མོ་ཤག་གྲུབ་ཆེན་ཀརྨ་སངས་རྒྱས་ཀྱིས་བསྙེན་བཀུར་བརྒྱ་འབུལ་བཟབས་རྒྱས་སུ་བསྟར། དེ་སྐབས་ཡར་ཤར་ནུབ་ཚོར་བཤལ་རིམས་མཆེད་པའི་ཤི་ཆད་ཁ་ཡར་བྱུང་བར་ཤ་བརྒྱ་ཟན་བརྒྱ་གཏོང་བ་གནང་བས་ཡམས་ནད་རྣམས་
རིང་པོར་མ་ལོན་པར་ཆད་ཅིང་ལྷག་པར་བཀྲ་ཤིས་རྩེ་ཞོལ་དུ་ནད་པ་མངས་པར་ཡིག་མཁན་རྣམས་ཚབ་ཚུབ་ཏུ་གྱུར་ཚེ་སྲུང་བ་གནང་བས་འཛེམ་མེད་དུ་ཕྱིན་ཀྱང་འགོ་བ་གཏན་མ་བྱུང་བས་མོས་པ་ལྷག་པར་འཕེལ། ཧོར་ཟླ་ལྔ་བའི་ནང་དུ་ཁྱབ་བདག་ཞ་ལུ་པ་ཆེན་པོ་སློབ་བཤད་ཞུ་བ་ལ་ཕེབས་པར་བཀའ་འགྱུར་མ་གྲུབ་པས་འཛུགས་པ་གནང་མ་ཐུབ་པའི་དེའི་རིང་སྒྲུབ་ཐབས་རྒྱ་མཚོ། གསར་མ་རྒྱུད་འབུམ། གཤེད་དམར་སྤྲོས་མེད་ཀྱི་འཁྲིད་སོགས་འབུལ་བ་གནང་ཞིང་། ཚུར་ཡང་འཁོར་ལོ་སྡོམ་ཆེན་སོགས་དབང་ལུང་མང་དུ་གསན། རྣམ་སྲས་གླིང་པས་གཙོས་སྦྱིན་བདག་སྐྱ་སེར་རྣམས་ཀྱིས་དུས་སྟོན་གྱི་ཐོག་ལེགས་འབུལ་གྱི་བདོག་པ་རྒྱ་ཆེར་བསྟབས་པའི་ཚོགས་གསོག་ལ་བརྟེན་ཕོགས་ཇ་ཐུག་གི་གཏོང་ཆས་མཚོན་དགོས་ཆེ་མཐའ་དག་ངང་གིས་འགྲུབ་པའི་སྒོ་ནས་ཟླ་བ་ཕྱེད་བདུན་དུ་ཉེ་བ་ཧོར་ཟླ་བཅུ་པའི་ཚེས་བཅོ་བརྒྱད་ལ་ཞལ་ཁེབས་གདོང་དར་གླེགས་ཤིང་གླེགས་ཐག་གླེགས་ཆབ་སོགས་ཆ་འགྲིག་ལེགས་པར་གྲུབ། གོང་དཀར་དུ་ལྗགས་ལུང་གནང་སྐབས་བཀའ་འགྱུར་གྱི་ནང་ནས་བྱུང་བའི་སངས་རྒྱས་ཀྱི་མཚན་ཟུར་དུ་ཕྱུང་བ་ཁྲི་ལྷག་བཅས་ཐོར་བཀོད་པ་འདི་དང་དུས་མཚུངས་སུ་ས་ལེ་སྦྲམ་ཞུན་མའི་ཁུ་བས་བྲིས་ལེགས་ཕུན་སུམ་ཚོགས་པ་གོང་གཤམ་ཞལ་ཁེབས་ཏོག་བཅས། ཤིང་པར་ལ་བརྟེན་ནས་ཞལ་བཀོད་གནང་བའི་བྱང་ཆུབ་མཆོད་རྟེན་བཅུ་ཚར་མི་ཚད་ཙམ། ནང་བཞུགས་གཟུངས་སྔགས་སཱཙྪ་ཕྱག་དར་བའི་འབུམ་ཕྲག་གནང་སྟེང་ནས་གང་འགྲོ་དང་གསོལ་ཕུད་དུ་སཱཙྪ་སོགས་ཀྱིས་གཏམས་པར་ལྷང་
ཙེར་བཏུལ་མའི་ན་བཟའ་གསོལ་ཏེ་བླ་གཡེའི་སྒོའི་གཡས་གཡོན་གྱི་ཐོག་འོག་ཏུ་བཞུགས་སུ་གསོལ་བ་རྣམས་ཀྱི་སྨོན་ལམ་གསུང་རྩོམ་འདི་ལྟ་སྟེ། ལྷ་རིགས་འ་ཞའི་དགེ་སློང་བྱང་ཆུབ་སེམས། །གསང་སྔགས་ཀུན་འཛིན་མགོན་པོ་བསོད་ནམས་ཀྱིས། །སྔོན་བྱོན་མཁས་གྲུབ་རྣམས་ཀྱི་རྗེས་ཞུགས་ནས། །རྒྱལ་བའི་བསྟན་ལ་ཡུན་རིང་རྒྱས་ཕྱིར་དང་། །མཐའ་ཡས་འགྲོ་ལ་ཕན་པ་ལྷུར་ལེན་ཕྱིར། །རྒྱལ་བའི་གསུང་རབ་དམ་ཆོས་འགྱུར་རོ་འཚལ། །དཀའ་བ་དུ་མས་ཀུན་ནས་ལུང་ནོས་ཤིང་། །བསྟན་འགྲོར་ཕན་ཕྱིར་ལུང་ཡང་འབད་པས་བགྱིས། །གླེགས་བམ་ཐམས་ཅད་དུས་གཅིག་འབད་པས་བསྒྲུབས། །བཀའ་འགྱུར་ནས་བསྟན་རྫོགས་སངས་རྒྱས་པའི་སྐུ། ཁྲི་ཕྲག་བརྒལ་བའི་གསེར་གྱི་བྲིས་སྐུ་དང་། སཱཙྪ་འབུམ་ཕྲག་བྱང་ཆེན་མཆོད་རྟེན་བཅུ། །དེ་སོགས་རྣམ་དཀར་དྲི་མེད་དགེ་བའི་མཐུས། །བདག་དང་ཕ་མ་སྤུན་ཟླ་མིང་སྲིང་དང་། །བྲན་གཡོག་ལས་བྱེད་ཁལ་ཁུར་དུད་འགྲོར་བཅས། ཕན་ཐོགས་ཡི་རང་དཀར་ནག་འདྲེས་པ་ཀུན། །སྒྲིབ་བྱང་ཚོགས་རྫོགས་རྣམ་མཁྱེན་མྱུར་ཐོབ་ཤོག །ཅེས་པ་མཛད། དེ་ལྟར་སྐུ་གསུང་ཐུགས་རྟེན་རྣམས་ལ་རྒྱུད་ཐམས་ཅད་ཀྱི་རྒྱལ་པོ་གཉིས་སུ་མེད་པ་དཔལ་དགྱེས་པ་རྡོ་རྗེ་མན་ངག་ལུགས་ཀྱི་སྒྲུབ་མཆོད་དང་འབྲེལ་བའི་སྒོ་ནས་རབ་གནས་བཀྲ་ཤིས་རྒྱ་མཚོ་ལ་རྗེ་རྡོ་རྗེ་འཆང་དབང་ཕྱུག་རབ་བརྟན་གྱི་ཕྱག་བཞེས་ཀྱིས་བརྒྱན་ཏེ་རབ་ཏུ་གནས་པ་ཉིན་གསུམ་མ་མངའ་དབུལ་གྱི་དུས་རྒྱས་པ་དང་ཆོ་གའི་མཐར་ལྷག་ཆད་ཁ་སྐོང་བའི་ཞི་བའི་སྦྱིན་སྲེག་དང་བཅས་རྒྱལ་ཀུན་གསང་བ་རབ་འབྱམས་ཀྱི་འཁོར་ལོ་མ་ལུས་པ་རྟེན་
བརྟེན་པ་ལྷའི་ཚོགས་ཆུ་དང་འོ་མ་བཞིན་རོ་གཅིག་ཏུ་མཛད་པས་ཕྱོགས་ཀུན་བཀྲ་ཤིས་དང་བདེ་ལེགས་ཀྱིས་ཁྱབ་པར་གྱུར། བྲིས་པས་གཙོས་བཟོ་བོའི་ཚོགས་ཡོན་རྫོངས་སུ་གསེར་གོས་དར་ཇ་རས་གཡུ་བྱུ་རུ་སྤོས་ཤེལ་གོ་ཁྲབ་ཁྲོ་ཟངས་རྟ་དྲེལ་ཕོ་མོའི་གོས་སྣ་སྣམ་ཕྲུག་སོགས་ཀྱི་རྙེད་པས་བློའི་རེ་བ་ཡོངས་སུ་བཀང་སྟེ་ཚིམ་པར་མཛད། ཟླ་བ་དེ་ཀའི་ཚེས་ཉི་ཤུའི་རྒྱལ་ཕུར་གྱི་འགྲུབ་སྦྱོར་ནས་བཟུང་མཁན་ཆེན་ཞ་ལུ་པ་ཁྱབ་བདག་རིན་ཅེན་བསོད་ནམས་མཆོག་གྲུབ། འབྲས་ཡུལ་སྐྱེད་ཚལ་མཁན་པོ་བྱམས་པ་ངག་དབང་བསྟན་འཛིན། རྩེ་ཚོགས་དུམ་བུ་ཆོས་འཁོར་སོགས་ཕྱོགས་ནས་འདུས་པ་དང་། གཉུག་མར་གནས་པ་བཅས་དགེ་འདུན་དུ་མའི་ཚོགས་ལ་དུས་གསུམ་བདེར་གཤེགས་རྣམས་ཀྱི་བགྲོད་པ་གཅིག་པའི་ལམ་མདོ་རྒྱུད་མན་ངག་ཀུན་གྱི་ཡང་བཅུད། འཕགས་ཡུལ་གྲུབ་དབང་བིཪྺ་པ་ཆེན་པོ་ལ་རྗེ་བཙུན་རྡོ་རྗེ་བཙུན་མོས་མངོན་སུམ་དུ་གནང་བའི་ལམ་འབྲས་བུ་དང་བཅས་པ། འབྲས་བུ་ལམ་དང་བཅས་པ། གཅིག་ཤེས་པས་མང་པོ་གྲོལ་བ། སྐྱོན་ཡོན་ཏན་དང་བར་ཆད་དངོས་གྲུབ་ཏུ་བླང་བ། ལྟས་ངན་གཡང་དུ་ལེན་པ། ཏིང་ངེ་འཛིན་ངོ་ཤེས་པས་བསམ་གཏན་གྱི་གེགས་སེལ་བ། བར་ཆད་ངོ་ཤེས་པས་བདུད་ཀྱི་གེགས་སེལ་བ། སྡེ་སྣོད་གསུམ་གྱི་དེ་ཉིད་ཤེས་པས་གསེར་འགྱུར་གྱི་རྩི་ལྟ་བུ། མཆོག་མཐུན་གྱི་དངོས་གྲུབ་མ་ལུས་པ་འབྱུང་བའི་གསུང་ངག་རིན་པོ་ཆེའི་འཁྲིད་བོད་ཡུལ་འདིར་འཇིག་རྟེན་གྱི་མིག་གཅིག་པུ་འབྲོག་མི་ལོ་ཙཱ་བ་ཆེན་པོས་ལེགས་པར་བསྒྱུར་ནས་བཟུང་བཤད་སྲོལ་མི་འདྲ་བ་མང་དུ་བྱུང་བའི་གཙོ་
བོ་རྡོ་རྗེ་འཆང་དང་ཞལ་གཉིས་པ་རྗེ་བཙུན་ས་སྐྱ་པ་ཡབ་སྲས་ལ་བཀའ་བབས་པ་ཚོགས་བཤད་དང་སློབ་བཤད་གཉིས་ལས་རྗེས་འབྲངས་མཁས་གྲུབ་ཕལ་ཆེར་ལ་མ་གྲགས་པ་རིན་ཅེན་སྒང་པ་གདུང་བརྒྱུད་སྒོས་ཀྱི་ཟབ་ཆོས་ལྟ་བུ་གསང་ཆེན་སློབ་བཤད་ཀྱི་ཉམས་འཁྲིད་ཟབ་མོ་དབང་བྱིན་རླབས་རྒྱབ་བརྟེན་ལུང་དང་བཅས་པ་མཐའ་དག་ཟླ་བ་ཕྱེད་བཞི་ལྷག་ཙམ་གྱི་བར་གནང་རྗེས་དགྱེས་པ་རྡོ་རྗེའི་རྒྱ་གཞུང་སོ་གཉིས་གནང་བའི་དུས་ཁོ་བོས་ངོར་རྫོང་ཚར་ལུགས་གསུམ་གའི་ལམ་འབྲས་ཐོབ་པས་རྒྱུན་གསུམ་ག་ཡོད་གཤིས་གང་འདོད་ཀྱི་རྗེས་སུ་འབྲངས་ཆོག་ཅེས་བཀའ་སྩལ་ཞིང་། མེ་སྤྲེལ་ཧོར་ཟླ་གཉིས་པའི་ཚེས་བརྒྱད་ལ་གེགས་མེད་དུ་གྲུབ་པ་ནི། །སྦྱང་གཞི་དཀྱིལ་འཁོར་རྣམ་བཞིའི་ཞིང་ས་མཆོག་ཏུ་གཤིན་པོ། །སྦྱོང་བྱེད་སྨིན་གྲོལ་རྣམ་བཞིའི་ཆུ་ལུང་རྐྱེན་གྱིས་སྦྱངས་ཏེ། །སྦྱངས་འབྲས་སྐུ་བཞིའི་ས་བོན་གང་བཏབ་མཆོག་ཏུ་ལེགས་པའི། །ས་ཞིང་མཆོག་དེའི་འདུལ་སྦྱོང་བདག་རང་མཁས་སྙམ་བགྱིད་པས། །ཐ་རངས་ཐུལ་མེད་ཀྱི་ཞིང་ལ་ཡིད་སྨོན་མེད་པ་ཞིག་གདའོ། །ཞེས་ཐམས་ཅད་མཁྱེན་པའི་གསུང་མགུར་ལས་བྱུང་བ་ལྟར་ཤིན་ཏུ་སྨིན་པའི་གྲོལ་སྟོན་དང་རྡོ་རྗེ་ཆོས་སྐྱོང་རྣམས་ལ་གཏང་རག་གི་བསྐང་བསྟོད་གནང་བའི་མཇུག་ཙམ་དུ་གཞན་གྱིས་བསྲེགས་པ་པོ་མེད་པར་ཤ་ཆེན་གྱི་དྲིས་བླ་བྲང་སྟེང་ཤོད་མེད་པ་ཁྱབ་པའི་དམ་ཅན་དགྱེས་པའི་ཆོ་འཕྲུལ་ཅི་ཡང་མཛད། ཞ་ལུ་མཁན་རིན་པོ་ཆེ་ཡང་ཞག་ཤས་བཞུགས་པར་བླ་མ་བཀའ་བརྒྱད་ཡོངས་འདུས་ཀྱི་དབང་སོགས་ཁ་ཡར་འབུལ་བ་གནང་ཞིང་རྗེ་བླ་མས་ཀྱང་ཉེར་མཁོའི་དབང་ལུང་
ཅི་རིགས་གསན། ཚོགས་ལ་བཀའ་གདམས་ཀྱི་ཆོས་སྐོར་འགའ་ཞིག་གནང་སྐབས་མེ་ཏོག་སེར་པོ་དང་དམར་པོ་ལག་པས་ཟིན་ལ་ཁད་པའི་ཆར་བབས། སྒོ་ཁང་དུ་ཁྲ་འབྲུག་ཆོས་སྐྱོང་གི་རྟེན་གཏོར་ཡོད་པ་ལྷ་མིའི་བར་དུ་སེལ་ཅུང་ཟད་བྱུང་བ་། རྡོ་རྗེ་འཆང་དབང་ཕྱུག་རབ་བརྟན་གྱི་རྟེན་ཁྲ་འབྲུག་རྒྱལ་ཁང་རང་དུ་སྐྱེལ་བ་མཛད་པ་རྗེ་འདི་ལ་ཆོས་སྐྱོང་གིས་སྔར་ལྟར་དགོས་ཞུས་པའི་ལན་རས་གཞིར་ཁོ་རང་ཇི་ལྟར་བཞེད་པའི་རྟ་གླང་པགས་རིགས་སོགས་བྲིས་པ་སྔགས་དྲུག་ཕྱག་རྒྱ་དྲུག་གིས་བརླབ་པ་གནང་བར་དགྱེས་ཏེ་མཁན་པོས་འདི་ལྟར་བྱུང་ཞེས་མི་ཐམས་ཅད་ལ་སྟོན་པར་མཛད། སྡེ་པ་བློ་བཟང་མཐུ་སྟོབས་འོལ་དགའ་ཆུ་ཚན་ཁར་འདྲེད་བརྡབས་ལ་གེགས་ཀྱི་རྣམ་པའི་ཡར་ཀླུངས་སུ་འབྱོར་ནས་ཀྱང་སྐྱེད་ཆེ་བ་མ་བྱུང་བ་དམ་པ་འདི་ཉིད་ཀྱིས་དབང་བྱིན་རླབས་མང་དུ་མཛད་པས་ཚེར་མ་དབྱུང་བ་ལྟར་གཞི་མེད་དུ་བདེ། ནུབ་ཅིག་མཆོད་དཔོན་གྱིས་ཞབས་བྱུག་ཞུ་སྐབས་ཙིང་སྒྲ་ཆེན་པོ་བྱུང་བ་གང་ཡིན་ནམ་གསུང་བར་ཁྱི་ལྟ་བུ་སྲོག་ཆགས་ཤིག་གི་སྐད་ཡིན་ནམ་ཞུས་པ་ན་མིན་པ་འདྲ་ཐུག་གི་སྐད་ཡིན་ནམ་གསུང་བ་ལྟར་ཕྱིན་པས་གཟིམས་ཆུང་སྟེང་དུ་ཐུག་གསུམ་ཡོད་པའི་དཀྱིལ་མ་རྩིས་མགོན་གྱི་ཐུག་དེ་ཙིང་སྒྲ་ཆེན་པོ་རྒྱག་གིན་འདུག་རུང་མུན་པས་སྒྲ་ཙམ་ལས་གཞན་མ་མཐོང་སང་ཞོགས་ལྟས་ཙ་ན་རྫ་མ་ནས་ཁྲག་འཛགས་པས་ས་གཞི་ལ་འཐོར་ཞིང་རྩ་བར་ཁྲག་སྙིམ་པ་གང་ཙམ་འཁྱིལ་བ་ཆོས་སྐྱོང་འདི་ཤིན་ཏུ་འགོ་ཞིང་བཀའ་གཉན་པ་ཡོད་འདུག་པ་ནས་བསྟན་པ་སྤྱི་སྒོས་ཀྱི་དགྲ་བོ་ཞིག་བསྒྲལ་བའི་རྟགས་སུ་འཆིས། སྣ་མོ་ཤག་གྲུབ་ཆེན་པས་བསམ་
གཏན་གླིང་གི་སྤྱིལ་པོར་སྲི་ཞུའི་ཆེད་དུ་སྤྱན་དྲངས་པའི་ཕེབས་ཞོར་ཚེ་ཆུང་འབུམ་པ་མཇལ་བ་གནང་དུས་ཚེ་ཆུ་ཆེར་བབས་པ་ཟླ་བ་བརྒྱད་པ་ཡིན་པས་དེ་དུས་ཡོང་བའི་སྐབས་མིན་རུང་བྱུང་བར་ཡ་མཚན་དུ་འཛིན། མེ་བྱ་གཙང་ཕྱོགས་སུ་ཆིབས་ཁ་བསྒྱུར་ཏེ་གདན་ས་ཆེན་པོ་དཔལ་ལྡན་ས་སྐྱར་ཕེབས། སྔགས་འཆང་བླ་མ་སེམས་དཔའ་ཆེན་པོའི་ཞབས་རྡུལ་དབུ་གཙུག་ཏུ་བཞེས་ནས་སྒྲུབ་ཐབས་བརྒྱ་རྩའི་རྗེས་གནང་། ཞབས་དྲུང་ཉིད་ཀྱིས་མཛད་པའི་ཕུར་བའི་ཆོས་འབྱུང་སོགས་ལྗགས་ལུང་མང་དུ་སྩལ། གཙོ་བོར་གསན་བྱ་རྣམ་སྲས་ཀྱི་བེའུ་བུམ་ཡིན་ནའང་བསམ་ཡས་ཀྱི་སྡིག་ཁྲབ་སྒྲོག་པར་ཕེབས་རིངས་པའི་སླར་ཡོང་བའི་བཀའ་བཞེས་གནང་། ཞབས་དྲུང་ཁྲི་ཐོག་པ་ངག་དབང་བསོད་ནམས་དབང་ཕྱུག་དང་རྗེ་བཙུན་མ་གཉིས་ལའང་བཀའ་ཆོས་ཁ་ཡར་གསན། གདན་ས་དང་ཁའུ་བསམ་བརླིང་སོགས་ཀྱི་གནས་གཟིགས་གནང་། རིགས་འཛིན་ལྷ་ཁང་གི་འགག་ཏུ་ངོར་ཟུར་འཆད་ཆོས་རྗེ་དཔལ་གླིང་པ་དང་ལྷན་ཅིག་ཏུ་འཛོམ་པ་ད་རེས་རྡོ་རྗེ་འཆང་ཀུན་དགའ་བཟང་པོའི་ཁྲིར་འབྱོན་པའི་རྟེན་འབྲེལ་བྱེད་དགོས་པ་འདུག་པས་ཇ་སྔོན་ལ་མཆོད་གསུང་བ་དེ་སྐབས་མཁན་པོ་ཡོང་བའི་དོགས་པ་ཙམ་ཡང་མེད་པས་ཐུགས་ཁྲེལ་བཞིན་མིན་ནམ་བསམ་རུང་དེ་ནས་མ་འགྱངས་པར་མཁན་པོ་བྱེད་དགོས་བྱུང་བ་མངོན་མཁྱེན་དུ་འདུག་ཅེས་ཐུགས་ཡིད་ཆེས་པའི་དཔེར་འཛིན། བཞི་ཐོག་ཏུ་ཞབས་དྲུང་རིན་པོ་ཆེར་མཁའ་འགྲོ་བསུན་བཟློག་དང་འབྲེལ་བའི་བརྟན་བཞུགས་རྒྱས་པར་ཕུལ་ནས་དགུང་ལོ་བརྒྱད་ཅུ་རྩ་ལྔའི་བར་དུ་བཞུགས་པའི་བཀའ་བཞེས་ཞུས་པར་མཁན་པོ་རང་བསྟན་དོན་ལ་དགོངས་ནས་དེ་ཙམ་བཞུགས་
ན་ནི་ང་ཡང་ད་ག་བགྱིད་དེ་མིན་ངེད་རང་གཉིས་ལྷན་དུ་འགྲོ་བ་ཡིན་ཕེབས་པའི་གནས་ཚུལ་རྗེ་བླ་མ་འབྲས་སྤུངས་སུ་ཕེབས་དུས་གསུང་འཕྲོས་གནང་འདུག་ཅིང་ས་ཕག་ཧོར་ཟླ་དགུ་པའི་ཚེས་བཅུ་བཞི་ལ་དམ་པ་འདི་དང་བཅུ་གཉིས་པའི་ཚེས་བཅོ་བརྒྱད་ལ་བདག་ཆེན་རིན་པོ་ཆེ་མེ་ཏོག་འཐོར་བ་ལ་དཔགས་ན་བླ་མ་རྣམ་གཉིས་སྤྲུལ་གཞི་གཅིག་ལས་བསྟན་འགྲོའི་ཆེད་དུ་སྤྲོ་བསྡུ་མཛད་དགོས་པར་སེམས། ངོར་མཁན་ཆེན་རྒྱལ་རྩེ་ཞབས་དྲུང་བྱམས་པ་ངག་དབང་བསོད་ནམས་རྒྱལ་མཚན་གྱི་དྲུང་དུ་ནེ་གུ་ནས་བརྒྱུད་པའི་དབང་བྱིན་རླབས། རྩ་བ་ནེ་གུ་ཆོས་དྲུག་སྡོང་པོ་ཕྱག་རྒྱ་ཆེན་པོ། ཡལ་ག་ལམ་ཁྱེར་རྣམ་གསུམ། མེ་ཏོག་མཁའ་སྤྱོད་དཀར་དམར། འབྲས་བུ་འཆི་མེད་རང་གྲོལ་རྣམས་ཀྱི་འཁྲིད་ལུང་སོགས་ཚང་བ་གསན། དེ་ནས་རིམ་བཞིན་ཁུ་ལུང་དུ་ཕེབས། དེ་ཡང་བླ་མ་སོག་བཟློག་པ་ནས་བརྒྱུད་པའི་མདོ་དབང་ཆེས་དར་ནའང་། སོག་བཟློག་པའི་ཞུ་ས་རིགས་འཛིན་གཡུ་འབྲུག་རྡོ་རྗེ་ཤངས་རྟ་ནག་པའི་ཡུལ་མི་རྣམས་ལ་རྒྱུས་མེད་པའི་དཔྱོད་ལྡན་ཚོ་ཐེ་ཚོམ་གྱི་གཞིར་མཛད་གཤིས་རིགས་འཛིན་ཆེན་པོ་མངའ་རིས་པ་ནས་བརྒྱུད་པ་བླ་ཆེན་ཆོས་རྒྱལ་རྡོ་རྗེ་ལ་ཁྱབ་བདག་སྨན་ལུང་པས་གསན་པའི་བསྐུལ་མའང་བླ་མ་དམ་པ་འདི་ཉིད་ཀྱིས་གནང་ཞིང་ཉེ་ཆར་རྗེ་སྨན་ལུང་པ་གདན་དྲངས་ཏེ་རྡུལ་ཚོན་གྱི་དཀྱིལ་འཁོར་ལ་བརྟེན་ནས་གསན་ལ་སྤེལ་བའི་བཞེད་པ་མ་གྲུབ་རུང་རྗེས་སུ་རྡོ་རྗེ་བྲག་ནས་རིགས་འཛིན་སྤྲུལ་སྐུ་རིན་པོ་ཆེས་ཁྱབ་བདག་ཁྲ་ཚང་པ་ཆེན་པོར་གསན་ནས་དབུས་གཙང་ཁམས་གསུམ་དུ་དར་རྒྱས་ཀྱི་བསྟན་པའི་མེ་རོ་བསླང་བ་ཡང་རྗེ་
འདིའི་བདག་རྐྱེན་ལས་བྱུང་བར་སེམས་སོ། །ཟུར་ཐམས་ཅད་མཁྱེན་པ་ཧོར་ཟླ་བདུན་པའི་ཉེར་ལྔ་ལ་པདྨ་འོད་ཀྱི་ཞིང་ཁམས་སུ་སྐུའི་བཀོད་པ་བསྡུས་པའི་ཐུགས་དམ་འདོགས་བཅས་འབུལ་བ་དང་རྟེན་བཞེངས་ཀྱི་གཟུངས་བཞུགས་རབ་གནས་ལ་ཕེབས་དགོས་པའི་སྙན་གསན་ཕུལ་ཞིང་ཞལ་གྱིས་འཆེས་ནའང་ས་སྐྱོང་བསོད་ནམས་རབ་བརྟན་གྱིས་བྱུང་ན་དགེ་ལུགས་པ་ཞིག་རབ་དེ་མིན་རྙིང་མ་བ་ཞིག་བྱུང་ན་མངོན་ཆུང་བ་ཡོང་། ས་སྐྱ་པའི་རིགས་བོས་ན་མི་ཡོང་བའི་བཀག་ཆ་མཛད་པར་བརྟེན་སྐོར་ཅིག་ཕེབས་མི་དགོས་པའི་རྒྱུ་མཚན་འབུལ་མི་མངགས་པ་གམ་པ་ལར་མཇལ་བས་བཀའ་ལས་ངེད་དཔོན་སློབ་གཉིས་སྔོན་ལ་སུ་སོང་ཡང་རྗེས་ཀྱི་བྱ་བ་བྱེད་པའི་ཆ་དོན་ཡོད་པ་ནས་ད་ལམ་ང་ལ་བབས་ཐོབ་ཡོད་ཀྱང་རྟེན་འབྲེལ་འཕྱུགས་གསུངས་ནས་མ་མཉེས་པའི་ཚུལ་མཛད། རྔོག་ཞབས་དྲུང་མཁའ་སྤྱོད་ཀྱི་གནས་སུ་གཤེགས་པའི་གཞུང་སྦྲེལ་ཤིང་དུ་ཤར་མར་ཕེབས། རྗེ་བཙུན་འཇམ་དབྱངས་འོད་ཟེར་གྱི་སྐུ་གདུང་དཀྱིལ་འཁོར་གྱི་གཙོ་བོར་གྱུར་པ་ལ་མེ་མཆོད་དང་གདུང་ཚ་བཞུགས་པའི་ཐུགས་རྟེན་གྱི་ལྗགས་བཀོད་དང་བཅས་སྐོར་ཅིག་སྟན་ཆགས། ངོར་པའི་ཁམས་པ་བསྙེན་ཆེན་ཉེར་གཅིག་སོང་ཟེར་བ་གནམ་རབ་བསམ་གཏན་སྒྲུབ་སྡེ་བ་དགེ་སློང་ཤེས་རབ་དཔལ་བཟང་མཇལ་བར་འོངས་པ་ཁྱོད་ཀྱི་གའུའི་ནང་དུ་ཅི་ཡོད་ཀྱི་དྲི་བ་གནང་བར། བྱིན་རླབས་མིན་པ་གཞན་མེད་ཞུས་པས། སྤྱན་ཆེར་གཟིགས་ནས་དེ་མིན་པ་ཞིག་ཡོད་པས་གའུ་སྟོན་དང་གསུངས་ནས་ཁ་ཕྱེ་བས་ཁོ་རང་ལ་གནག་པའི་དགྲ་ལ་ལས་སྦྱོར་བྱེད་བསམས་པའི་དུག་ཁྲག་གི་རྫས་ཐུམ་ཡོད་པ་བཏོན་ནས་མེར་བསྲེགས་
པ་གནང་བ་དགེ་སློང་གི་བསམ་པར་ངན་སེམས་དེ་མཁྱེན་སོང་སྙམ་པའི་བློ་འཇིགས་ཞུམ་པ་བྱུང་སྐད། མར་ལམ་རྒྱལ་གྲུབ་གླིང་འོག་གི་འོབས་རགས་བསམ་གྲུབ་སྒངས་བའི་བུ་མོ་འཇིག་རྟེན་ཕ་རོལ་ཏུ་འགྲོ་བ་ཉེ་བར་བྱིན་རླབས་གནང་བས་ནད་གདོན་ལས་གྲོལ་ཏེ་གཞི་མེད་གྱུར་པའི་མིང་ཤི་ལྷོགས་སུ་འདོགས་པར་མཛད་དོ། །བདག་རྒྱུད་ཐ་རེངས་ཞིང་སར་བློ་སྦྱོང་དང་། །དམར་འཁྲིད་གདམས་པའི་མྱུ་གུ་ཅི་ཡང་བསྐྱེད། །ངེས་གསང་བྱིན་རླབས་རྗེས་གནང་བཀླག་ལུང་གི །བཀའ་དྲིན་བྱང་ཆེན་དེ་སྲིད་འཁོར་ནུས་མིན། །ཟས་གཙང་སྲས་ཀྱི་རྣམ་གསུམ་འཁོར་ལོའི་བཀའ། །རྒྱལ་བློན་ལོ་པཎ་མཐུ་ལས་འགྱུར་རོ་ཅོག །བསྐྲུན་ལ་བྱ་དཀའི་ཀུན་བཟོད་ཁུར་མཐོང་ཚེ། །མི་སྔོན་རུས་སྦལ་གཟུགས་སྤྲུལ་གཏམ་དུ་ཟད། །ཐུབ་གསུང་ལས་རྙེད་ཁྲི་ཁྲག་བརྒལ་བའི་སྐུ། །བྱང་ཆུབ་མཆོད་རྟེན་བཅུ་ཕྲག་གཟུངས་བཞུགས་ཅན། །སྨན་ལྗོངས་ཡར་ཀླུངས་སྐྱེ་རྒུའི་ལེགས་བྱས་སུ། །གྲུབ་འདི་ཚངས་པ་མིན་པ་བྱེད་པོ་སུ། །ལུས་མེད་ཐུལ་དང་དེ་སྲས་སློབ་མར་བཅས། །དག་ཞིང་རྒྱ་མཚོའི་གནས་ཀྱི་ཡེ་ཤེས་སེམས། །སྤྱན་དྲངས་མཆོད་བསྟོད་མེ་ཏོག་ཆར་བབས་པར། །ལྷུན་པོས་ཉི་ཟླའི་སྒྲོན་མེ་བཏེག་ནས་ལྟ། །བཟོ་རིག་གཙུག་ལག་ཡངས་པོར་སྦྱངས་པའི་མིག །དྲི་མེད་གསལ་བའི་དཔྱོད་ལྡན་དེར་ཚོགས་ལ། གཏོང་བའི་ཕྱག་རིང་བརྐྱང་ཚེ་ངལ་གསོས་བུའི། །བང་མཛོད་ཕྱེ་ཞེས་ལེགས་བྲིས་མདུན་སར་སྒྲོག །བཀྲ་ཤིས་རྒྱལ་མཚན་འཆང་བ་བྱང་གླིང་པའི། །ཡང་སྲིད་རིན་ཅེན་བསོད་ནམས་མཆོག་གྲུབ་སོགས། །སྣོད་ལྡན་དུ་མའི་སྒྲ་འཛིན་དབང་པོ་རུ། །ཚད་མ་བཞི་ལྡན་
སྙན་བརྒྱུད་པི་ཝཾ་བརྡུངས། །ཚུལ་འདིའི་ཆེད་དུ་དགོངས་རྩེ་ཉེར་གཏོད་པ། །མ་འོངས་བརྩེ་ཆེན་བླ་མའི་ཁྱད་པར་གྱི། །ཟབ་དོན་བཀའ་བབས་ཆུ་བོ་མི་ནུབ་པའི། །དྲི་བྲལ་ཡེ་ཤེས་གཟིགས་པར་ད་གདོད་ཁུམས། །ལེགས་ལྡན་དགྲ་སྲོག་ལ་རྔམ་ཁུས་སྒྲ་དང་། །ལྷན་ཅིག་དམར་ཆེན་ཨརྒྷཾ་ཆལ་ཆིལ་འཛག །རབ་སྨིན་འབྲས་བུ་ཁུར་དུ་དུད་པའི་ཚེ། །འཛད་མེད་བདུད་རྩིའི་ཆུ་རྒྱུན་ཅི་ཡང་འབབ། །འཁོན་རིགས་འཇམ་དཔལ་དཔའ་བོའི་ཞལ་གྱི་ལུང་། །རོ་མངའི་བུ་རམ་སྙན་གྱི་བཅུད་དུ་མངར། །བསོད་ནས་རྒྱལ་མཚན་རྗེ་བཙུན་ཨེ་ཝཾ་པའི། ཁྲིར་འབྱོན་ལྐོག་གྱུར་གནས་དེ་མངོན་སུམ་མཁྱེན། །བསྐལ་བརྒྱར་ཚེ་བྱིན་བརླབས་ནུས་ས་ཆེན་གྱི། །ཡོན་ཏན་ཁྱོད་ཀྱིས་གཞན་ལ་དངོམ་པའི་ཚེ། །སྔགས་འཆང་ཆེ་དེས་སྤངས་རྟོགས་མཉམ་མོ་ཞེས། །གང་གི་སྦས་པའི་རྣམ་ཐར་སྒྲོག་ལ་བརྩོན། །མཁའ་འགྲོའི་དབང་ཕྱུག་ནེ་གུའི་ཐུགས་ཀྱི་བཅུད། །ཟུང་འཇུག་གར་མཁན་ཁྱུང་པོའི་ཆོས་དྲུག་ལམ། རྡོར་འཛིན་བྱེ་བའི་གཙུག་རྒྱན་རྒྱལ་རྩེ་བས། །ལེགས་བཤད་མཆོད་ཡོན་སྦྲེངས་པས་ཞལ་སྒོ་འཛུམ། །ཐེག་པ་རིམ་དགུ་ཚང་བའི་དཀྱིལ་འཁོར་དུ། །ཐེག་ཚུལ་འཁྲུལ་པ་མེད་པ་ཉང་རིགས་རྗེས། །ཐེག་ཆེན་བྱང་སེམས་འབྱོངས་པ་གནས་གསར་བ། །ཐེག་མཆོག་བསྟན་པའི་བདག་པོར་མངའ་གསོལ་མཛད། །མཁས་གྲུབ་ཆད་མེད་གདུང་བྱོན་རྔོག་པའི་ཞབས། །དཔའ་བོའི་གྲོང་དུ་ཞུགས་ཚེ་རགས་པའི་པུར། །སྲི་ཞུ་བསྐྲུན་པའི་བཞུགས་གནས་མཆོད་སྡོང་ཆེ། །རབ་བཞེངས་ཆོས་སྐུའི་ཀློང་དུ་ཐུགས་དགོངས་རྫོགས། །དེ་ནས་བཀྲ་ཤིས་ཆོས་ཀྱི་འདུས་
པའི་གླིང་ཆེན་པོར་ཕེབས་ནས་ས་ཁྱི་མ་རྫོགས་པར་སྟན་ཆགས། དེ་ཡང་རྣམ་ཐར་གྱི་ས་བོན་ལ་ལོ་ཚིགས་ཞིབ་ཆ་ཡོད་མེད་སྣ་ཚོགས་དང་ཡོད་པ་ལའང་སྣང་ལ་མ་ངེས་ཀྱི་དཔྱད་མི་བཟོད་པ་འགའ་མཐོང་ནའང་བླ་མ་རགས་རིམ་གོང་སྨོས་ལྟར་ཡིན་ལ། ཞིབ་ཏུ་མ་འཚལ་བར་ཕྱོགས་གཅིག་ཏུ་བསྡོམས་པར་རྩེ་གདོང་ཁྲི་ཆེན་ཀུན་དགའ་བསོད་ནམས་ལྷུན་གྲུབ་བཀྲ་ཤིས་གྲགས་པ་རྒྱལ་མཚན། ས་སྐྱ་སྒར་ཆེན་མཐུ་སྟོབས་དབང་ཕྱུག །ས་སྐྱ་ཁྲི་ཆེན་ངག་དབང་ཀུན་དགའ་བསོད་ནམས་བཀྲ་ཤིས་གྲགས་པ་རྒྱལ་མཚན་དཔལ་བཟང་པོ། དེ་སྲས་ཀུན་དགའ་བསོད་ནམས་དབང་ཕྱུག །ལྕམ་རྗེ་བཙུན་མ། ཞྭ་དམར་མཆོག་གི་སྤྲུལ་སྐུ། ར་ལུང་ཞབས་དྲུང་མི་ཕམ་བསྟན་པའི་ཉི་མ། སྒེར་པའི་རིན་པོ་ཆེ་ཉི་མ་པ། སྔགས་འཆང་ཚེ་རིང་དབང་པོ། ཆོས་རྗེ་འོད་མཆོག་པ། ཆོས་སྡེའི་ཟུར་འཆད་པ་ཀུན་བཟང་རྩེ་བ་ཀུན་དགའ་བཀྲ་ཤིས། ཆོས་རྗེ་མི་ཕམ་བློ་གྲོས་སོགས་ཀྱིས་མཚོན་པ་རྣམས་ལ་སྔགས་གསར་རྙིང་གི་དབང་རྗེས་གནང་འཁྲིད་ལུང་སྡེ་སྣོད་གསུམ་གྱི་ཆོས་ཚུལ་མང་དུ་གསན་པ་དང་ཆེས་ཉུང་བ་ལ་ལར་བླ་མའི་རྣལ་འབྱོར་ཚེ་དབང་ཚིགས་བཅད་རེ་གསན་པ་ཡན་ཆད་ལ་འབྲོམ་གྱིས་སེ་བཙུན་དང་མི་ལས་མར་པ་བསྟེན་པའི་རྣམ་ཐར་བཞིན་མཉེས་པ་གསུམ་གྱི་སྒོ་ནས་གུས་པ་ལྷུར་ལེན་པ་ལས་ལོག་སྒྲུབ་དང་བླ་མའི་སྐྱོན་ཕྲ་མོ་ཙམ་ཡང་མི་འཚོལ་ཞིང་ཐམས་ཅད་ཡོན་ཏན་དུ་འཆར་བ་ལོ་ཆེན་འབྲོག་མིས་གསང་སྔགས་ཀྱི་ཆོས་ཟབ་པའི་བརྡར་བདག་མེད་མའི་དབང་རྫོགས་རེ་ལ་འབྲི་བཅོ་ལྔ་དང་ལྷ་མོ་རལ་གཅིག་མའི་རྗེས་གནང་རེ་ལ་འབྲི་གཡག་རེ་དགོས་ཀྱི་ཡོད་ཚུལ་མར་པའི་
རྣམ་ཐར་དུ་གསལ་བ་ལྟར། བླ་མ་དང་ཆོས་ཀྱི་ཆེ་བ་འདོན་སླད་དུ་སྲི་ཞུ་ཁོ་ན་མཛད་ཅིང་ཆོས་གསན་པ་ཚོར་ཡང་ཐོས་ལོ་བྱུང་ལོའི་མིང་ཙམ་ལ་མི་འཆེལ་བར་རྒྱ་བོད་ཀྱི་གྲུབ་མཐའ་སོ་སོའི་བཞེད་ཚུལ་གྱི་ཕྱག་ལེན་དང་བཤད་ཐབས་མཐའ་དག་ཡོང་རྒྱུ་བ་དང་ཤེས་རྒྱུ་བའི་ཟག་ཟོག་སྦུབ་ལྡིར་གྱི་རྫོང་གོག་ཡེ་མི་འཛིན་པར་མཁྱེན་དཔྱོད་རྣམ་པར་དག་པས་དཔྱད་བཟོད་ཁོ་ནར་གནང་སྟེ་དཔེར་ན་རྔོག་ལུགས་དང་ས་ལུགས་ཀྱི་དབང་གིས་དྲིལ་བུ་དཀྲོལ་ལུགས་ཀྱི་མཐའ་བརྟེན་པ་སྤུ་རིས་ཕྲ་མོ་ཙམ་ཡང་མ་འདྲེས་པ་སོ་སོར་དབྱེ་ལ། རིས་མེད་པའི་ཆོས་ཀྱི་རྒྱུན་དང་གདུལ་བྱའི་ཁམས་དང་བསམ་པ་ཐ་དད་པའི་དབང་གིས་གསན་པ་རྒྱ་གང་ཆེར་གནང་བ་ལས་གཙོ་བོར་ཐུགས་ཉམས་བཞེས་སུ་དགོངས་པ་དག་བྱས་སོ་བྱུང་ངོ་ཙམ་མ་ཡིན་པའི་ཡི་དམ་ལྷའི་ཞལ་མཐོང་པ། གསུང་གིས་གནང་བ་ཐོབ་པ། དམ་ཅན་བྲན་དུ་བཀོལ་བ། རྫོགས་རིམ་གྱི་ལམ་ལ་དྲོད་ཐོབ་པ་མཛད་ཅིང་གཞན་དག་ཀྱང་གསན་པ་ཙམ་དུ་མ་ལུས་པར་སོ་སོར་བློ་དང་འཚམ་པར་རྒྱ་ཆེར་སྤེལ་བའི་ཞལ་སློབ་ཀྱི་གྲངས་ཐམས་ཅད་བརྗོད་པར་ལྟ་བ་ཞིག་བསྟན་པ་འཛིན་པའི་བཤེས་གཉེན་རགས་བསྡུས་ཙམ་བརྗོད་ན། དཔལ་ཞ་ལུ་གསེར་བཀང་གི་གདན་ས་པ་ཁྱབ་བདག་རིན་ཅེན་བསོད་ནམས་མཆོག་གྲུབ། གླང་ཕུ་ཆོས་རྗེ་འཇམ་དཔལ་ཆོས་སྐྱོང་དབང་ཕྱུག །ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ། ཁྲ་ཚང་པ་ཆེན་པོ་ཁྱབ་བདག་བློ་མཆོག་རིག་པའི་རྡོ་རྗེ། རྡོ་རྗེ་བྲག་ནས་རིགས་འཛིན་མཆོག་སྤྲུལ་པདྨ་འཕྲིན་ལས། རྒྱ་རྩེ་བདག་པོ་བྱམས་པ་ངག་དབང་བསོད་ནམས་རྒྱལ་མཚན། ངོར་མཁན་པོ་ཐར་རྩེ་ནམ་མཁའ་རིན་ཅེན།
ཨེ་ཝཾ་མཁན་ཆེན་དཔལ་གླིང་པ་བསོད་ནམས་རྒྱལ་མཚན། བྱེ་རྫིང་ཚོགས་མཁན་པོ་སངས་རྒྱས་དཔལ་བཟང་། གསུང་སྤྲུལ་ཚུལ་ཁྲིམས་རྡོ་རྗེ། བང་རི་གཏེར་སྟོན་ཧཱུཾ་ནག་མེ་འབར། སྐྱེད་ཚལ་གོང་མཁན་པོ་བྱམས་པ་ངག་དབང་བསྟན་འཛིན། སྐྱེད་ཚལ་འོག་མཁན་པོ་ངག་དབང་བསྟན་པ། དར་རྒྱས་ཆོས་སྡིངས་པ་རིགས་འཛིན་འཕྲིན་ལས་ལྷུན་གྲུབ། དེ་སྲས་སྤྲུལ་སྐུ་གཏེར་སྟོན་ཆེན་པོ་འགྲོ་འདུལ་གཏེར་བདག་གླིང་པ། རིགས་འཛིན་ཆོས་དབང་ཀུན་བཟང་། རྗེ་དཔལ་འབྱོར་གླིང་པ་ངག་དབང་རྣམ་རྒྱལ། མཚུངས་མེད་ཉི་མ་གླིང་པ་རིན་ཅེན་ཚུལ་ཁྲིམས་བཀྲ་ཤིས། ཀུན་བཟང་རྩེ་པ་པཎ་ཆེན་བསོད་ནམས་མཆོག་ལྡན། རྗེ་ཀུན་དགའ་བཀྲ་ཤིས། རབ་འབྱམས་ཆོས་རྗེ་རིན་ཅེན་རྒྱ་མཚོ། མདོ་བ་ཆོས་རྗེ་དགེ་བའི་དབང་པོ།ཤར་ལུང་རབ་འབྱམས་པ། དགེ་སློང་འཕྲིན་ལས་རྣམ་རྒྱལ་སོགས་རྡོ་རྗེ་གདན་སློབ་དཔོན་དང་ཟུར་འཆད་པ་ཚང་མ། དེ་སྔོན་ཆོས་སྡེའི་སློབ་དཔོན་པཎ་ཆེན་ལུང་རིགས། རིགས་འཛིན་ཀརྨ་གསང་སྔགས། སྣ་མོ་ཤག་གྲུབ་ཆེན། སྨན་སྒོམ་འབྲང་རྒྱས་པ། ཀྲེ་བོ་བླ་མ། སྒྲུབ་རྙིང་བླ་མ་འཇམ་དབྱངས་རྒྱལ་མཚན་སོགས་མང་དུ་བྱུང་བ་ཕལ་ཆེར་གྱིས་གསུང་རྒྱུན་བཟུང་བའི་ཕྱོགས་ཀུན་ཏུ་སྤེལ་ནས་བསྟན་པ་རིན་པོ་ཆེའི་སྲོག་ལེགས་པར་འཐུད་ཅིང་ལ་ལས་ཚེ་འདིའི་རྣམ་གཡེང་མཐའ་དག་རྒྱང་དུ་བསྲིངས་ཏེ་བསམ་གཏན་གྱི་རོ་མྱང་བ། འགའ་ཞིག་གིས་འཕྲིན་ལས་རྣམ་བཞིའི་སྒོ་ནས་འགྲོ་བའི་དོན་མཛད་པ་ཤ་སྟག་བྱུང་ཞིང་ཆོས་ཞུ་བ་པོ་མཆོག་དམན་སུ་འདྲ་ཞིག་གིས་ཀྱང་ན་ཡམ་ཙམ་མ་ཡིན་པའི་དོན་
དུ་གཉེར་བ་རྣམས་ལ་དམར་འཁྲིད་བཤད་བཀའ་ཕྱག་ལེན་གང་ལའང་བློར་མ་ཆུད་བར་དུ་སྐྱོ་ངལ་མེད་པར་ཡང་ཡང་བསྐྱར་ནས་ཅི་ཆུད་མཛད། དམ་པ་འདིའི་ཡོན་ཏན་གྱི་ཁྱད་པར་ནི་སྐུ་མཐོང་ན་མི་མཐུན་པ་མེད་པའི་མཛེས་ཤིང་བརྗིད་ཆགས་པ་གཞན་སྣང་ཟིལ་གྱིས་གནོན་ཅིང་གང་ཟག་གཅིག་ལའང་མཐོང་ཚུལ་མ་ངེས་པ་སྣ་ཚོགས་སུ་ཤར་བ་མཐོང་བ་ཙམ་གྱིས་ཉོན་མོངས་པ་དང་སྡུག་བསྔལ་གྱི་རྟོག་པ་ཐམས་ཅད་རང་ཤུགས་ཀྱིས་འགགས་པ། ཡིད་བདེ་ཞིང་བག་ཕེབས་ལ་དགེ་བ་དང་མངོན་པར་རྟོགས་པའི་ཡོན་ཏན་ངང་གིས་འཕེལ་བ། རང་གི་མངའ་ཐང་དང་ལོངས་སྤྱོད་ཀྱི་ཆེད་དུ་གདམས་ངག་མི་མཛད་ནའང་སེམས་ཅན་གྱི་དོན་དུ་འགྱུར་ན་དེར་མ་ཟད་ལུས་ལོངས་སྤྱོད་ལ་ཆགས་པ་མེད་པར་གཞན་དོན་སྒྲུབ་པ་ལ་མི་སྐྱོ་བ་རྒྱལ་སྲས་འཕགས་པ་ངན་འགྲོའི་གནས་ཀྱང་མཐོ་རིས་ཀྱི་དགའ་ཚལ་དུ་གཟིགས་པའི་ངང་ཚུལ་ཅན། ཆོས་ཞུ་བའི་ཚོགས་ལ་ཕོགས་ཟུར་གསོས་མཐུན་རྐྱེན་འཚེམས་མེད་དང་རང་གནས་སུ་འགྲོ་བའི་ཚེ་གནང་སྦྱིན་དང་ཐོས་བསམ་སྒོམ་སྒྲུབ་ཀྱི་བསླབ་སྟོན་བློ་དང་འཚམ་པར་གནང་བས་དཔོན་སློབ་འབྲལ་མི་ཕོད་པ་ལྟ་བུ་བྱུང་། ཚུལ་ཁྲིམས་ཀྱི་དྲི་ངད་འཐུལ་ཞིང་གཤེགས་བཞུད་དལ་བྲེལ་རན་པ་སོགས་སྤྱོད་ལམ་རྣམས་ལྷུན་ཆགས་པ། གསུང་གི་གདངས་ཆེ་ཆུང་སྙོམས་ཤིང་ཧ་ཅང་དལ་བ་དང་ཕུལ་བ་མ་ཡིན་པའི་སྙན་ཞིང་འཇེབས་ལ་ཚིག་འབྲུ་གསལ་བས་ཆོས་གསུངས་པ་མཐའ་དག་ཉན་པ་པོའི་ཚོགས་ཀྱིས་ཚིག་དོན་རྟོགས་པར་སླ་ཞིང་བློ་འཁུལ་བས་ཐོས་པའི་མོད་ལ་ཐ་མལ་གྱི་སྣང་བ་འགགས་ཤིང་མི་ཕྱེད་པའི་དད་པ་ཐོབ་སྟེ་རང་དབང་མེད་པར་རྗེ་ཉིད་མ་གཏོགས་མི་
རེ་བའི་གུས་པ་སྐྱེས་པས་འབྲེལ་ཚད་དོན་ལྡན་གྱི་སྒོ་ནས་ཐར་པའི་ལམ་དུ་འདྲེན། རང་བཞིན་གྱི་གསུང་གླེང་རྣམས་ཀྱང་བསྟན་པ་འཛིན་པའི་བཤེས་གཉེན། གྲྭ་པ་ཆོས་བྱེད་ཀྱི་རིགས་སུ་མ་ཟད་སྡེ་དཔོན་སྦྱིན་བདག་ཐ་ན་སྐྱེས་པ་བུད་མེད་རང་བཞིན་པ་ཚུན་ལ་ཡང་སོ་སོའི་བློ་དང་འཚམ་པའི་ངོས་དགེ་བ་ལ་བཀྲི་བའི་ཐབས་མིན་པ། དམག །ཚོང་། གཤགས། གྲུབ་མཐའ་སྣ་ཚོགས་ཀྱི་ཆོས་དང་བླ་མ་སུན་འབྱིན། འབྲེལ་མེད་ཀྱི་ཉོག་གཏམ། རྫུན། ཕྲ་མ། ཚིག་རྩུབ། ངག་ཀྱལ་སོགས་མི་གནང་། ཆོས་གང་གསུང་ཡང་རང་ལུགས་མ་འདྲེས་པ་སྟོན་པ་ལས་གཞན་གྱི་ལུགས་ལ་ཟུར་མི་ཟ། གསོལ་བ་འདེབས་མཁན་མ་བྱུང་བར་བསྟན་ན་ཆོས་བཙོངས་པ་ལྟ་བུར་འགྲོ་ཞེས་འདི་བཞིན་ཡོད་པས་ཉོན་ཅིག་ཅེས་བསྐུལ་མ་མི་གནང་ཐོས་བསམ་སྒོམ་པ་འཆད་ཉན་སྐུ་གསུང་ཐུགས་རྟེན་བཞེངས་པ་དགོན་པའི་འཛིན་སྐྱོང་ནད་པ་དབུལ་ཕོངས་ལ་ཕན་བཏགས་པས་མཚོན་མཛད་པ་གང་ལའང་ངས་འདི་བྱས་སོ་བའི་ཡུས་མི་འདྲེན། བསྙེན་སྒྲུབ་ལས་སྦྱོར་གྱི་རྟགས་མཚན་བླ་མ་ཡི་དམ་ཆོས་སྐྱོང་གི་ཞལ་གཟིགས་ལུང་བསྟན་དབུགས་དབྱུང་མངོན་ཤེས་གྲུབ་རྟགས་སོགས་ཡོན་ཏན་ཁྱད་པར་ཅན་བྱུང་བ་སྐད་མི་གསུང་ཞིང་གཞན་ནས་དེ་འདྲའི་དོགས་གནས་ཀྱི་དྲི་བ་ཞུས་པར་མི་དགྱེས་པ་སྣེ་ཙམ་ཡང་མི་ལེན་ཞིང་དམན་ཆ་ཁོ་ན་གནང་། ཐུགས་དམ་ཞལ་གཟིགས་ངོ་མཚར་བའི་བསྙེལ་ཏོ་འདི་ས་བོན་ཙམ་ལས་དངོས་སུ་ཞལ་ལུང་ཞུ་ཐུབ་ན་ཟབ་ཅིང་རྒྱ་ཆེ་བ་ཞིག་ཡོད་རིགས་སུ་སྣང་ནའང་ད་སྒོས་འདིའི་དོན་འགྲོལ་བར་མ་ནུས་ཤིང་རྟོག་བཟོའི་ན་ཡམས་བྱས་ན་སྐབས་སུ་མ་ཆེ་
བས་གང་འདུག་བཀོད་པར། ཚེས་བཅུ་བཞི་ལ་བདེ་མཆོག་ནག་པོ་པའི་སྟ་གོན་ཚུགས་སྒྲུབ་ཅིང་མཆོད་པ་ཐེངས་གཅིག་དང་གཞན་སྒྲུབ་མཆོད་བདག་འཇུག་བཅས་པར་རྡུལ་ཚོན་སྟེང་ནས་ཚར་བཅུ་གསུམ་དབང་ཚར་གཉིས་ཡིད་ཆེས་པར་སོང་། ཚུགས་པའི་ནུབ་ཞལ་བཞི་པ་ལི་མའི་སྐུ་དང་། གྲོལ་བའི་ནུབ་ས་ཆེན། སེམས་དཔའ་ཆེན་པོ། ཞ་ལུ་བ། བུདྡྷ་བྷ་དྲ་སོགས་ཀྱི་བྲིས་སྐུ་དང་སྐད་ཆ་ཟ་ཟིར་མང་བ་ལེགས་པ་ཙམ་ཡིན་རྗེ་བླ་མ་གསུང་བས་ཚེ་གཅིག་ཉམས་ལེན་བྱས་ན། བྱིན་རླབས་ཡོང་བ་ཨེ་ཡིན་ནམ་གཞན་ནམ་རིང་གི་རྨི་ལམ་ལ་ཏིག་ཏིག་མེད། མེད་རང་མེད། རྗེ་བཙུན་གྲགས་པའི་ཐུགས་དམ་མཚོ་སྐྱེས། མི་གཡོ་བ་ཕྱག་གཡོན་རང་མགོ་བག་དྲོ་ལྟས་བཟང་། ཆུ་སྤྲེལ་པདྨ་སཾ་བྷའི་བསྙེན་པ་ཡིད་ཆེས་པར་སོང་། གཞུང་གི་རྟགས་ཅུང་ཟད་དངོས་རྨིར་མཐོང་། ཁྱེའུ་བླ་མ་ཤེལ་མཆོད་རྟེན། བྱ་ཟླ་བ་བརྒྱད་པའི་ཚེས་གསུམ་བཞི་དེ་པ་ལ། དབང་ཕྱུག་རབ་བརྟན་བཀའ་གཏེར་ཆོས་ཀྱི་མཛོད། ཧཱུྃ་ནག་མེ་འབར་ཐུགས་སྲས་དམ་པ་དང་། སོགས་དང་ཤོག་དྲིལ་གཏེར་གནས་དང་རས་ཐུམས་གསོལ་འདེབས་ལ་བརྩོན་ན་ལོ་གཅིག་གི་ནང་དུ་མཇལ་ཟེར་བ་དང་། སྤྲེལ་ལོ་དཔྱིད་ཟླའི་ཚེས་བཅུར་ཡང་ཟེར། ཚེས་བཅུ་གཅིག་ལ་མཁའ་འགྲོས་གདན་འདྲེན། དབང་ལུང་མན་ངག་སྟོན་པ་ཡིན་ཟེར་བ་དང་། དྲག་པོའི་ཞལ་གྱི་སངས་རྒྱས་བསྟན་པ་ལ་དགྱེས་སོགས་མང་དག་གོ་སྲིན་པོའི་འཇིགས་པས་སྔགས་པ་ལས་གུ་རུ་མེ་ཏོག་དམར་པོ་ལ་བདག་དང་སེམས་ཅན་ཐམས་ཅད་དུ་བདུད་དང་གཤིན་རྗེའི་འཇིགས་པ་ལས་སྐྱོབ་ཏུ་གསོལ་བས་ཇེ་བདེར་སོང་
བ་དང་། ཡིད་ཀྱིས་ནས་བུར་ཐུད་སོགས་ཕུལ་བ་དང་། བླ་མ་རིན་པོ་ཆེའི་ཐུགས་དམ་ཞལ་སྔོ་སྐྱ་དང་། དེ་རྗེས་མགྲིན་སྙིང་སྒྲུབ་དུས་མཐེབ་ཚིགས་ཙམ་བདུན། གཞི་ནས་ཙམ་ལ་གཡུང་རྒྱལ་སྔོ་སྐྱ་ནས་ཙམ་གསལ་བ་མི་རྟོག་ཏིང་འཛིན་ལ་གནས་ནས། ར་ཏྲི་ཏ་ཧཱུཾ་ཕཊ། ཌོམྦྷི་ནི་ཧཱུཾ་ཕཊ་སོགས་དང་། གདོང་བརྙན་ཅན་ནག་པོ་བདག་ཆེན་ཐུགས་དམ་དང་། རྡོ་རྗེ་གདན་པའི་ཐུགས་དམ་སྒྲུབ་དུས་མདའ་གང་ཙམ་མོ། །མཁའ་སྔོ་སངས་རང་དུ་བུད་མེད་སྔོ་ནག་དཔྲལ་བར་འགྲོན་བུ་བཏགས་པ་ཞིག་གིས་ད་དུང་སྒྲིབ་པ་མ་བྱང་བ་འདུག་ཟེར་སྡིགས་མཛུབ་ནམ་མཁའ་ལ་བསྟད་དོ། །བི་རཱུ་པ་ཤིན་ཏུ་ཆེ་གསལ་བ་དང་། ས་ཆེན་ན་བཟའ་འོད་འཕྲོ་བ་སྔོན་པོ་ཞལ་རས་དམར་མདངས་ཆེ་བ་གྭ་དང་བཅས་པ། ཤངས་སུ་ཚེ་དཔག་མེད་དང་། དྲག་དམར་ཡོངས་རྫོགས། བསམ་གྲུབ་ཏུ་དབུ་དགུ་པ་ཤིན་ཏུ་གསལ་བ། འདར་མགོན་ཁང་དུ་ནཱ་རོ་པ་མི་ཚད་ཙམ། ཡང་ཨྱོན་གྱི་ཐུགས་ཀར་ཀྱེ་རྡོར་ལྷ་དགུ །མཁའ་སྤྱོད་དྲུག །ཟླ་བ་བརྒྱད་པའི་ཚེས་བཅུའི་ཐོ་རངས་ཨྱོན་ད་ལྟ་ཇི་ལྟ་བ་རག་ལ་ཡང་གཏེར་སོགས་ཡིན་སྙམ། སྒམ། བག་ཤི །འཇའ་གུར་འཇའ་སྐྱ་འདུག །ས་སྐྱ་བ་ཆེན་པོ་གོས་སྔོན་དྭངས་གསལ་རྙོག་མེད། ཤངས་སུ་ལྷན་སྐྱེས། འཇམ་དཔལ་བཤེས་གཉེན་ལས་གུ་རུ་རྒྱ་དང་བཅས་པའི་གྲུ་བཞི་སྒོར་མོ་གསལ། འདར་དུ་ཚེ་དཔག་མེད། སྐྱེ་བདུན་གྲོལ་འཕྲལ་ཨྱོན་ཆེ་ཞིང་གསལ། པདྨ་ནི་མི་གསལ། ཐུགས་རྗེ་ཆེན་པོ་ཞལ་བཅུ་གཅིག་དང་བཅས་ཤིན་ཏུ་གསལ། ཡང་ས་ཆེན་གྱི་རྣམ་ཐར་ཡིན་ཡང་ཟེར་ཨྱོན་རྣམ་ཐར་ཡིན་པའི་
ཁུལ་གྱི་བྱང་ཤིང་། དཀར་ཐལ་སྲབ་མོ་ཡོད་པ་ལ་ཡིག་འཕྲེང་བཞི་བྲིས་པ་རྟེན་ཁེབས་ཀྱིས་གྲིལ་བ་ཞིག་བྱུང་། དེའི་སང་ཟབ་བརྒྱའི་པོ་ཏི་དྭགས་པོ་ནས་འབྱོར་ཡང་ལན་གཅིག་གཏོར་བསྔོས་ཀྱི་སྐབས་ཆོས་སྐྱོང་ཐམས་ཅད་ཟང་ངེ་དང་ཟིང་ངེ་ཉམས་སྣང་དུ་བྱུང་། ཆོས་རྗེ་ཚར་པ་ཞ་ཐུལ་སེར་པོ་བཞེས་པ་ཞིག་ཀྱང་བྱུང་། གཏེར་སྒོ་གཏེར་རྟགས་ཁ་བྱང་བཏབ་འདུག་བྲག་ཕུག་འདི་བཞིན་ལ་དཔགས་ན་ཟབ་གཏེར་བཞེས་རྒྱུ་ཞིག་ཀྱང་ཡོད་པར་མངོན། ཀུན་མཁྱེན་བུས། རང་ཉིད་རྒྱལ་འདོད་ཕ་རོལ་དམའ་དབབ་འདོད། །གཡོ་སྒྱུའི་རྩོད་པ་ཚིག་རྩུབ་ངན་སེམས་ཅན། །ངག་ཀྱལ་སྣ་ཚོགས་སྨྲ་ཞིང་གཞན་རྒྱུད་བསྲེག །ད་ལྟའི་རྩོད་པ་འདི་ཡང་དམྱལ་བའི་རྒྱུ། །ཞེས་པའི་དོན་ལྟར་རྩོད་པ་འདི་གཞན་དག་རང་གི་ཉེས་པ་ཁས་བླངས་ནས་སྤང་བླང་མི་བྱེད་པས་ཕྲག་དོག་དང་ཀུན་སློང་ངན་པ་འཕེལ་ཏེ་བསྟན་སེལ་གྱི་རྒྱུ་ལས་མེད་ཅེས་མི་མཛད། ཐུགས་རབ་ཀྱི་ཀློང་ཤིན་ཏུ་ཡངས་པས་ཚིག་བཅད་ལྷུག་གང་ལའང་ཕུན་སུམ་ཚོགས་ཤིང་དཔེར་ན་དུས་ཀྱི་འཁོར་ལོའི་མངོན་དཀྱིལ་དང་རྣམ་སྲས་ལྔ་ཕྲག་ལྔའི་ཆོག་སྒྲིགས་ལྟར་ཆོས་རྒྱུན་མི་ནུབ་པའི་བཙས་སུ་ངེས་པར་འགྲོ་ན་ཡང་མི་དགོས་ཁ་མེད་རེ་གཉིས་མ་གཏོགས་གསར་པ་མངས་པ་དམ་པ་གོང་མ་རྣམས་ཀྱི་གསུང་རབ་ནུབ་པའི་རྒྱུར་འགྲོ་ཞེས་བརྩམས་ཆོས་པོ་ཏི་དུ་མར་ལོངས་པ་ཡོད་སྐད་ཀྱི་རང་ཆེ་མི་འབྱིན།སྐྱ་སེར་མང་པོ་ཚོགས་པའི་སར་རང་ཉིད་མཁས་སོའི་གྲགས་པ་སྒྲོག་ཆེད་དགོས་མེད་དུ་བཤད་པ་མཁས་ཉམས་མི་གནང་ཞིང་ཁྱད་པར་གསང་སྔགས་ཀྱི་ཆོས་སྣོད་ལྡན་མ་གཏོགས་ནོར་དང་ངོ་བསྲུང་གི་སླད་དུ་སྟོན་པ་དང་
ཁྲོམ་སྒྲགས་མཛད་པར་ཡ་ཤིན་ཏུ་ང་བའི་གླེང་བརྗོད་དང་དེ་དང་མཐུན་པར་བཀའ་དམ་པར་མཆིས། ཐུགས་ཕྲ་རགས་ཀྱི་བསྐྱེད་རིམ་ལ་བརྟན་པ་ཐོབ་ཅིང་རྫོགས་རིམ་གྱི་ལམ་བཟང་པོའི་གྲུབ་མཐའ་སྙོགས་པ་རྣལ་འབྱོར་དབང་ཕྱུག་དང་ལོ་ཆེན་འབྲོག་མི་ལྟ་བུའི་བསམ་གྱིས་མི་ཁྱབ་པའི་གནས་རྣམས་བརྗོད་པའི་ཡུལ་ལས་འདས་མོད་མདོ་རྒྱུད་ཀྱི་ཆོས་ཚུལ་གང་ལའང་ཚེགས་ཆུང་ངུ་ཙམ་གྱིས་ཐུགས་སུ་ཆུད་པས་དུས་འཁོར་དང་མཁའ་འགྲོ་རྒྱ་མཚོ་སོགས་དཀྱིལ་འཁོར་ཤིན་ཏུ་ཆེ་བ་ལ་ཉིན་བཞི་ལྔ། བདེ་མཆོག་ལོ་ནག་གུར་རིགས་བསྡུས་ཀྱིས་མཚོན་པར་ཉིན་གཉིས་ཙམ། དཀྱིལ་འཁོར་ཆུང་བའི་རིགས་ལ་ཉིན་རེའི་བསྙེལ་གསོས་མཛད་པས་སློབ་མ་རྗེས་སུ་འཛིན་པའི་དུས་ཚིག་ཟུར་ཕྲ་བ་ལ་ཡང་སྐྱོན་མེད་པའི་རྒྱུན་གྱི་ཞལ་འདོན་ལྟར་བྱང་ཆུབ་པ་དང་ཐུགས་འཛིན་གསར་དུ་གནང་དགོས་ལའང་ས་གླང་འཕྲེང་བའི་སྙན་གསན་ཕུལ་བ་ཟླ་བ་གསུམ་ཙམ་གྱི་ཁོངས་སུ་ཤེར་ཕྱོགས་ཀྱི་ལུང་གསན་པ་སོགས་དང་འདོམ་པའི་སྲུབས་དབར་ལ་པཎ་ཆེན་ཐར་རྩེ་པས་མཛད་པའི་ཕྲེང་བའི་མངོན་དཀྱིལ་ཤོག་བུ་ཉིས་བརྒྱ་ལྷག་ཙམ་དེ་ཤིན་ཏུ་བྱང་བ་ཐོས་ལོ་ཟེར་ལོ་མ་ཡིན་པར་ཁོ་བོའི་མངོན་སུམ་དུ་གྱུར་ཅིང་མདོར་ན་བྱིན་རླབས་རྗེས་གནང་། རིག་གཏད། འཁྲིད། མན་ངག་གང་གི་སྐབས་སུའང་ཆགས་ཐོགས་མི་མངའ་བ་བློ་ཆེན་ཚངས་པ་རྒན་པོས་ཀྱང་འགྲན་པར་ག་ལ་ནུས། ཆོས་མཐུན་འཚོ་བ་མེད་པ། ཡ་རབས་དམངས་སུ་བབས་པ། རྒས་ཤིང་ཁོགས་པ། ངན་སོང་། ནད་པ། དབུལ་འཕོངས་ཉམ་ཐག་གི་རིགས་རྣམས་ལ་རང་
གི་བུ་གཅིག་པུ་ལྟར་རྗེས་སུ་བརྩེ་ཞིང་སྐུ་ལ་བསྡོ་བའི་དགྲ་བོར་ཆོས་སྐྱོང་གིས་འཕྲིན་ལས་རང་ཤུགས་ཀྱིས་བསྒྲུབས་ན་མིན་པ་འཁོན་འཛིན་དང་ལས་སྦྱོར་དམིགས་སུ་ཕུག་པ་མི་གནང་བར་ཐེག་པ་ཆེན་པོའི་བློ་སྦྱོང་བ་འབའ་ཞིག་གིས་ལྟས་ངན་གཡང་དུ་ལེན། སྐྱེ་བ་དང་འཇུག་པ་ལ་དབང་ཐོབ་པས་བྱང་གཙང་རོང་གསུམ། གྲ་དོལ་ཡར་ཤར་ནུབ་ནས་རྒྱལ་ནད་སྨྱོ་འབོག་སོགས་གདོན་དྲག་པོས་ཟིན་ཏེ་སྨན་པས་བོར་བ་དུ་མའང་བཀའ་བསྒོ་རྗེས་གནང་བྱིན་རླབས་ཙམ་གྱིས་ནད་གདོན་རྣམས་ཕྱིར་འཕོ་བ་དང་རྩ་ལོག་ལུང་ལོག་གི་གེགས་སེལ། འདུ་བ་རྣམ་བཞི་འཁྲུགས་པ་སྨན་གྱིས་མ་སྙོམས་པ་དག་ཀྱང་གཞིལ་ཏེ་འཆི་བདག་གི་ཁ་ནས་ཕྱིར་སློག་པ་གྲངས་མང་བ་ཐུགས་རྡོ་རྗེའི་ཏིང་འཛིན་ལས་སུ་རུང་བའི་མཐུར་སེམས། དབང་གི་ཡེ་ཤེས་འབེབས་པ་གནང་ཚེ་ལུས་ཀྱི་བུད་བྱེད་ཅིང་འཕར་གཡོ། ངག་གལ་ཞིང་སྨྲ་ཉམས། སེམས་བདེ་སྟོང་གི་ངང་དུ་ལྷན་ནོར་འགྲོ་བ་སྣ་རེ་ངེས་པར་འོང་གཤིས་ད་ལྟ་རང་ཡེ་ཤེས་ཕེབས་བྱུང་སྙམ་པའི་དགའ་སྤྲོ་མོས་གདུང་ཚད་མེད་པ་འབྱུང་། སྒམ་ཞིང་དུལ་ལ་ངོ་ལྐོག་ཆུང་བས་ལན་ཅིག་མཇལ་བ་དང་རྒྱུན་དུ་འདྲིས་པ་གཉིས་ལ་ཁྱད་པར་མེད་པ་བཀའ་གདམས་ཇོ་བོ་ཡབ་སྲས་ཀྱི་རྣམ་ཐར་དང་མཚུངས། ཕྱོགས་ཕེབས་ཀྱི་འཆད་ཉན་གྱིས་གཙོས་པའི་གཞན་ཕན་གྱི་འཕྲིན་ལས་སྐྱོང་དགོས་པའི་སྐབས་མ་གཏོགས་དོན་མེད་ཀྱི་འདུ་འཛིའི་རྗེས་སུ་མི་འབྲང་བར་སོ་སོད་ལྐོག་ཉལ་གྱི་ཅི་བདེར་གནས་པ་ལ་མཚམས་ཀྱི་མིང་བཏགས་པའི་ཆེན་པོ་རྣམས་ཀྱི་སྤྱོད་ཚུལ་བུག་སྒོ་འདག་འབྱར་གྱི་ཁོངས་ནས་ཡིག་འགྲུལ་དང་མདུན་གཤོམས། མཚམས་ཡུན་རིང་དུ་བཅད་ཀྱང་ད་ལམ་
དམིགས་བསལ་གྱི་གལ་ཆེན་བྱུང་ཟེར་བ་ཚོ་དང་མི་འདྲ་བའི་ཐོག་མར་ཇི་ཙམ་བཅད་པ་ནས་བཟུང་གྲོལ་བའི་དུས་ལ་མ་སླེབ་ཀྱི་བར་དུ་དམ་བཅའ་ལས་མི་གཡེལ་བ་ལྷུར་མཛད། ཐུགས་བྲེལ་དང་སྐུ་བསྙུན་པ་གང་གིའང་རྗེས་སུ་མི་འགྲོ་བར་བསྐྱེད་རྫོགས་ཀྱི་རྣལ་འབྱོར་ཐེག་པ་ཆེན་པོའི་བློ་སྦྱོང་སོགས་ཀྱི་སྤྲོས་མེད་དང་ཆོ་ག །ལྗགས་བཟླས། གཏོར་ཆོག །དུས་གཏོར་བླ་མ་རྣམས་ཀྱི་དུས་དྲན་གྱིས་མཚོན་པ། ཞག་རེ་དང་ཟླ་རེའི་སྟར་ཆགས་རྣམས་ལ་ཐང་ལྷོད་མ་ཤོར་བའི་ཅི་མཛད་རྒྱ་བོད་ཀྱི་པཎ་གྲུབ་ཀྱི་རྣམ་པར་ཐར་པ་དང་མཐུན་པར་སྣང་ངོ་། །འདི་ལོའི་དབྱར་སྔར་དང་མི་འདྲ་བའི་མེ་ཏོག་ལ་ཤིན་ཏུ་མཉེས་ཤིང་དེའང་རྟེན་གྱི་དྲུང་དུ་མི་བསྒྲིག་པར་སྐུའི་རྒྱབ་མདུན་གཡས་གཡོན་ཁོར་ཡུག་བསྐོར་བ་ལ་སྤྲོ་བར་མཛད་པ་ནི་འོག་མིན་སོགས་ཀྱི་གནས་རྣམས་སུ་མེ་ཏོག་གིས་བརྒྱན་པའི་བཀོད་པ་བཤད་པ་དང་མཐུན་པའི་ཞིང་ཁམས་གཞན་དག་ཏུ་གཤེགས་པའི་བརྡར་སྣང་། མཆོད་དཔོན་འཇམ་དབྱངས་ལ་ཉིན་གཅིག་ཀྱལ་ཀའི་ཚུལ་དུ་ང་ཤི་ན་སྐྱེ་བ་བླངས་དགའ་འམ། མ་བླངས་པ་དགའ་གསུང་བར་དེ་འདྲ་མི་གནང་བ་ཞུ། རྣམ་རྟོག་ཀྱང་ཟ་དེ་བཞིན་བྱུང་ན་སྐྱེ་བ་བཞེས་པ་རང་ལས་དགའ་ཞུས་པས་ཁྱེད་རང་ཚོ་བསམ་བློ་ལེགས་པོ་ཞིག་ཐོང་དང་བསམས་བཞིན་སྲིད་པར་སྐྱེ་བ་བཞེས་པ་ནི་ངོ་མཚར་ཆེ་ཤས་ཁ་གཞན་མ་སྐྱེ་བ་ཟེར་ཚད་ནི་ཡ་མཚན་རྒྱུ་རང་ཅི་མཆིས་འཁོར་བ་ཐོག་མ་མེད་པ་ནས་འཁོར་བཞིན་པར་འདུག་ཁྱོ་ག་ཁྱེད་ཚོ་དང་ང་མི་འདྲ་བས་ལྟོས་ཤིག་གསུང་བ་དང་གཞན་ཡང་ཐེངས་འགའ་རེ་དེ་དང་དབྱིབས་མཚུངས་པ་ཁ་ཡར་གནང་བ་ལོ་རྟིང་མ་གཟུགས་
སྐུ་རགས་པའི་ཟ་མ་ཏོག་བསྡུ་བའི་བརྡར་སྣང་ཡང་ཕྱག་ཕྱི་རྣམས་ལ་རྟོག་པ་འཕྲོས་ཚོད་དུ་མི་གདའོ། ། རང་ཆེ་ཁེངས་པའི་རི་བོ་མཐོན་པོའི་རྩེར། །ལེགས་བཤད་གཏམ་གྱི་ཆུ་བོ་ག་ལ་འདྲོངས། །གཟུར་གནས་ཐུགས་ཀྱི་གཤོང་བུར་མདོ་རྒྱུད་ཀྱི། །མཁའ་གླང་གཟེགས་མ་ཕྱོགས་བརྒྱ་ནས་འབབ་འཁྱིལ། །འཇིག་རྟེན་མཐུན་འཇུག་གཏན་བདེའི་དོན་པོ་ཆེར། །རློམས་ན་ཆོས་ཉིད་བདེན་སྟོན་ཐུབ་པ་ཡི། །བཞེད་འབྲས་གསུང་ལས་སྐྱེས་པའི་སློབ་བུའི་ཚད། །རྒྱུ་སྐར་གྲངས་ཀྱིས་གཞལ་ཡང་རྟོགས་ནུས་མིན། །མཐོང་བས་མཚན་དཔེའི་མཛེས་སྐུ་མི་མཐུན་བྲལ། །ཐོས་པས་དྲུག་ཅུའི་དབྱངས་སྙན་རྣ་བའི་དཔྱིད། །དྲན་པས་སྲིད་ཞིའི་འཇིགས་སྐྱོབ་ཆོས་ཀུན་གཟིགས། །རྣམ་འདྲེན་ཡོན་ཏན་ཚོགས་རྣམས་གཅིག་བསྡུས་འདྲ། །ཆགས་བྲལ་ཚུལ་ཁྲིམས་དྲི་ལྡང་ཉན་ཐོས་གཟུགས། །གཞན་ཕྱིར་ལུས་སྲོག་གཏོང་ཕོད་རྒྱལ་བའི་སྲས། །བདག་མེད་གཙོ་མོས་མགྲིན་པར་རྟག་འཁྱུད་པའི། །སྒྱུ་མའི་རོལ་རྩེད་འདི་ཀོ་སུ་ཡིས་བསྐྲུན། །འཇིག་རྟེན་སྤྱོད་པའི་རྗེས་འགྲོ་ཆོས་བརྒྱད་གདོན། །ཕྲ་མོའི་ཤས་ཀྱང་གང་ཐུགས་མ་གོས་པས། །ཅི་མཛད་དམ་པའི་ཆོས་སུ་ཉེར་འགྲོ་བར། །ཤཱཀྱ་སེང་གེའི་རྣམ་ཐར་དཔེ་ཟླར་འོས། །མཐོན་པོའི་གྲུབ་མཐའ་སྙོགས་ཏེ་ཟུང་འཇུག་སྐུར། །བཞེངས་པར་ངེས་ཀྱང་ད་དུང་སློབ་ལམ་ལ། །སྦྱོངས་ཞེས་དམན་ཆ་འཛིན་པའི་ཟོལ་སྦྱོར་འདི། ཆེར་སྙིགས་གདུལ་བྱའི་སྣང་ངོར་དགོས་སམ་སྙམ། །ཞིང་གཞན་བཟང་པོའི་སྐལ་བ་ཅན་གྱི་འགྲོ། །འདྲེན་ལ་སྤྲོ་བའི་རྩེ་འཇོ་རྒོད་པའི་བརྡ། །རྟོགས་མིན་ཡིད་སྲུབས་མཐུ་ལས་ཀུན་དགའ་བོའི། །གསོལ་གདབ་
རྟོག་ཚོགས་རགས་པ་འགགས་པའི་སྤུན། །སྒྱུར་བྱེད་ཅེས་པ་ས་ཕག་ཧོར་ཟླ་དང་པོའི་ནང་དུས་དཔལ་ལྡན་འབྲས་སྤུངས་སུ་གདན་དྲངས་ཏེ་མདོ་དབང་གིས་གཙོས་པའི་གསང་སྔགས་གསར་རྙིང་གི་ཟབ་ཆོས་མང་དུ་ཞུ་བའི་རྩིས་ཡིན་ནའང་གནས་ཆུང་ཆོས་སྐྱོང་ཆེན་པོ་ཁོག་ཏུ་བརླམས་ཏེ་ད་ལམ་ཆོས་བཀའ་སོགས་རྒྱས་པར་ཚུགས་ན་ཁྱེད་དཔོན་སློབ་སུ་རིགས་ལ་གེགས་ཆེ་བ་འདུག་པས་སྐོར་ཅིག་འཐེན་པའི་སླར་རིམ་གྱིས་བཙུགས་ཆོག་ཚུལ་གྱི་ཞིབ་ཆ་སྡེ་པ་བློ་བཟང་མཐུ་སྟོབས་ལ་གསུངས་འདུག་པ་བཞིན་རྗེ་བླ་མར་ཡང་དེ་གའི་རྒྱུ་མཚན་ཕུལ་ཞིང་ཞག་བདུན་ཙམ་བཞུགས་རིང་ལྗགས་ལུང་ཐང་ཐུང་འདྲ་དང་ཆོས་དང་འབྲེལ་བའི་གླེང་མོ་གང་འཕེལ་ཞུས་ལེགས་ལྡན་རྗེའི་ཤངས་མཚལ་གྱི་ཁུ་བས་བརྫིས་པའི་ཚེ་དཔག་མེད་ཀྱི་སྐུ་ཁྱད་ཅན་དེ་གནང་། ད་ལོ་སྐུ་དོག་ཡོད་པར་སྐུ་རིམ་དང་ཆོས་སྡེར་སྐུ་མཚམས་གནང་རྒྱུ་ཡང་ཚེ་སྒྲུབ་དང་བསུན་བཟློག་ལ་ཆེད་གཉེར་མཛད་དགོས་ཚུལ་གསོལ་བ་ན། རྗེ་མཁྱེན་བརྩེའི་གསུང་མགུར་དུ། ཚེ་རིང་ལོ་བརྒྱ་ཐུབ་པ་དང་། ཚེ་ཐུང་ད་ལྟ་ཤི་བ་གཉིས། །རྣམ་པའི་སྒོ་ནས་ཁྱད་པར་ཆེ། །ངོ་བོའི་སྒོ་ནས་བཟང་ངན་མེད། །ཐམས་ཅད་སྒྱུ་མ་རྨི་ལམ་ཡིན། ཚེ་རིང་ཐུང་གང་དགའ་མ་དགར་ཞོག །ད་འཆི་བ་ལ་འཇིགས་པ་མི་གདའོ། །ཞེས་པའི་དོན་དང་མཚུངས་པར་དཀའ་ལས་ད་ཆ་བློ་སྦྱོང་བའི་ལུགས་ཡིན་པས། ན་བ་དགའ་ན་ན་བ་བྱིན་གྱིས་བརླབ་ཏུ་གསོལ། ཞེས་སོགས་ལུང་འདྲེན་དང་བཅས་ན་ཤི་གསོན་བདེ་ཅི་བྱུང་ཡང་དཀོན་ཅོག་ལ་བློ་བཀལ་ནས་ཤི་དོགས་པའི་རིམ་གྲོ་བྱས་ན་དཀོན་ཅོག་ལ་ཡིད་མ་ཆེས་
པར་འགྲོ་བ་འདྲ་གསུང་བར་གཅིག་ཏུ་དེ་བཞིན་ཡིན་ཀྱང་རྒྱ་བོད་ཀྱི་དམ་པ་ཚོའི་རྣམ་ཐར་ལ་བརྟགས་ཚེ་དགག་བྱ་དགོས་དབང་གིས་ངེས་པ་མི་འདུག་པས་རེ་ཞིག་གི་བར་དུ་འཚོ་ཞིང་གཞེས་ན་སྤྱི་སྒོས་མཐའ་དག་གི་བསྟན་པའི་སྲོག་ཤིང་ཏུ་འགྱུར་ངེས་པས་ཐུགས་སྣ་བསྟུངས་པ་དེ་ལྟར་མི་ལེགས་ཚུལ་ནན་ཏར་གསོལ་བ་ན་བཀའ་བཞིན་བསྒྲུབ་གསུང་བ་རྗེས་སུ་བྱས་ཚེ་གཞན་ངོ་བསྲུང་བར་འདུག །རྗེ་རྡོ་རྗེ་གདན་པའི་དུས་ཀྱི་མཁྱེན་བརྩེ་ཆེན་མོའི་ཕྱག་བྲིས་མདོ་དབང་གི་ཙ་ཀ་ལི་རྣམས་རས་བསེ་ལས་གྲུབ་པའི་ལྗིད་ཆེ་བ་ནས་སླར་བཀའ་དབང་ལ་ཕེབས་དགོས་ཕྱིན་ད་ལམ་འདི་གར་བཞག་པ་འགབ་འདྲ་ཞམ་རིང་པ་རྣམས་ཀྱིས་ཞུས་ཚེ་ཁོང་དཔོན་སློབ་མཐོང་ཆེན་པོ་ཡོད་པས་ད་རེས་ཁྱེད་ནས་རྩིས་འབུལ་ཞུ་གསུང་། ཆུ་ཁ་བར་སྨན་སྒོམ་འབྲང་རྒྱས་པས་གདན་འདྲེན་ལ་ཕྱིན་སྐབས་བཀའ་ལས་ད་ཆ་རྒྱུན་རིང་པོ་རང་སྡོད་པ་མི་འཆར་ངེས་ཡིན་པས་སླར་ཆོས་སྡེ་ནས་འཕྲོས་ཤིག་གཏོང་བས་དེ་དུས་ཅིས་ཀྱང་ཡོང་ཐུབ་པ་དགོས་ཚུལ་གནང་བར་ད་དུང་བསྟན་དོན་ལ་རྒྱུན་གང་རིང་བཞུགས་དགོས་ཞུས་པས་ཟངས་མདོག་དཔལ་རིར་ཨྱོན་ཆེན་པོའི་གཡས་གཡོན་དུ་བཞུགས་ཁྲི་རིམ་པར་བཤམས་འདུག་པ་ལ་རྗེ་རྡོ་རིང་པ་ཆེན་པོ་ནས་རྡོ་རྗེ་འཆང་དབང་ཕྱུག་རབ་བརྟན་ཡན་བཞུགས་པའི་མཐར་ཁྲི་སྟོང་པ་ཞིག་མཆིས་པ་བདག་གི་ཡིན་འདུག་ཅེས་ཞལ་གྱིས་མ་བཞེས། དེས་ན་སྐུ་སྐྱེ་ཕེབས་དགོས་ཞུས་པར་རྗེ་བཙུན་ཀུན་སྤངས་པ་ཆེན་པོ་དང་སྒོ་རུམ་པ་གཉིས་ཟངས་མདོག་དཔལ་རི་ཁོ་ནར་བཞུགས་པ་ལ་ཚར་ཆེན་སོགས་བླ་མ་ཡབ་སྲས་གཅིག་ལ་གཅིག་ཐུགས་ཆགས་པའི་འབྲལ་
མི་ཕོད་པ་ལྟ་བུར་ཡོད་གཤིས་བདག་ཀྱང་དེ་མཚུངས་སུ་སྡོད་པས་སྐྱེ་བ་མི་ལེན། འཕྲོས་འདི་རྣམས་བདག་མ་ཤི་བར་སུ་ལའང་བཤད་ན་མི་ཡོང་བའི་དཔང་པོར་དཔལ་མགོན་འཁོར་བཅས་དང་རང་གཉིས་ཀའི་མདུན་ན་ཡོད་དོ། །ཞེས་ལྷག་པར་སྩལ་སྣང་། དེ་ནུབ་སྣེའུ་ཞོལ་གྱི་བཞུགས་འཚེར་གྱི་ཐོག་ནས་འབྲས་སྤུངས་ཕྱོགས་སུ་ཞལ་གཟིགས་ཏེ་རིང་འཚོའི་སྨོན་ལམ་དང་མཆོག་གསུམ་དམ་པར་གསོལ་འདེབས་གནང་། སང་ཉིན་སེ་མོ་དོའི་ཐང་ལ་ཕྱག་གཡོག་དམངས་མ་རྣམས་སྔོན་དུ་བརྫངས། ཆིབས་ཤོལ་ནས་མཆོད་དཔོན་དང་བྱམས་པ་གཉིས་ཀྱིས་ཕྱག་ཕྱི་ཞུས་ནས་སྐུ་ངལ་གསོས་ཤིང་དེ་ནས་ཆིབས་ཐོག་ཏུ་ཁྱོན་པ་དང་ལྷན་དུ་ལམ་ཁྱོད་ལ་ད་ལམ་ཙམ་མིན་པ་ཡོང་མི་དགོས་པ་འདུག་གསུང་བ་བྱམས་པས་སླར་སྐུ་མཚམས་གྲོལ་ནས་ཕེབས་དགོས་པས་དེ་འདྲ་མི་གསུང་བ་ཞུ་ཞེས་ཞུས་སོང་བ་བཀའ་ལས་ཁྱེད་ཚོ་མི་གླེན་པར་འདུག་ད་ལོ་ང་རང་གི་སྣང་རྟགས་དང་སྐུ་ཞབས་ཆེན་མོའི་བཀའ་གང་ལ་དཔགས་ཀྱང་མི་སྡོད་པར་འདུག་གསུང་ཞིང་དེར་མ་ཟད་ཞ་ལུ་མཁན་རིན་པོ་ཆེ་སྨན་ཁང་ནས་ལ་ཡང་གཙང་དུ་རྗེས་མ་ཕེབས་དུས་གསུང་བགྲོས་བྱུང་ཚོད་དུ་མཆིས། ཆོས་སྡེར་ཕེབས་ནས་ངེད་རང་གིས་རྒྱུ་མཚན་གསོལ་བ་དང་ཕྱག་གཡོག་སོགས་ཕྱི་ནང་མང་པོ་ནས་བསྐུལ་མ་ཞུས་པ་ངོ་མ་བཟློག་པའི་གོང་དཀར་ཆོས་སྡེར་མང་ཇ་སྦྱོར་སྦྲེལ་ཐོག་ཚེ་གཟུངས་ཤེར་སྙིང་གི་བཟློག་པ། བཀྲ་ཤིས་རྩེ་ཆོས་སྡེའི་མགོན་ཁང་སོ་སོར་བསྐང་གསོ་བརྒྱ་རྩ། བཀའ་འགྱུར་སྒྲོག་པ། སཱཙྪཱ་འབུམ་ཐེར་སོགས་བསྒྲུབ་པ་གནང་། རྡོ་རྗེ་གསུམ་མི་འདའ་བའི་སྐུ་མཚམས་དམ་པའི་ངང་ནས་ཐུན་འཚམས་ཚོར་གསན་ཡིག་གི་ཟིན་བྲིས་
ཕྱག་དཔེར་འབེབས་པའི་ཡིག་མཁན་ཆོས་སྡེ་བའི་གྲ་པ་ཆོས་མཛད་རྒྱལ་མཚན་བཟང་པོས་བྱས་པ་ཆིག་དྲིལ་དུ་གནང་མ་ཐུབ་གཤིས་པོ་ཏི་ཐུང་ངེ་བ་ཞིག་གི་རྩིས་ལས་ལྷག་མ་རྣམས་འཕྲོར་ལུས་པས་ད་ལམ་རྣམ་ཐར་སྐབས་སུ་ཞིབ་པར་འདྲི་བའི་རྔོ་མ་ཐོགས། སྐུ་ཅུང་ཟད་མ་བདེ་བའི་རྣམ་པ་ལ་སྨན་སྒོམ་འཚོ་བྱེད་འབྲང་རྒྱས་པ་སྐུའི་འཕྲོད་བསྟེན་དུ་འབོད་པ་གནང་སོང་བ་རྗེ་བཙུན་ཡབ་དང་ཐུན་མོང་བའི་རྩ་དབུ་མའི་ཉམས་འཁྲིད་སོགས་ཟབ་ཆོས་འགའ་ཞིག་གནང་བཞེས་པའི་བསྙད་བཏགས་ལས་འཕྲོད་བསྟེན་འགངས་ཅན་འབུལ་མ་དགོས་ཤིང་གསོལ་སྨན་ཁ་ཡར་ཕུལ་ནས་གཞི་མེད་དུ་སོང་ནའང་ཞིང་འདིར་བཞུགས་བཞེད་མེད་པའི་མདངས་ཀྱི་གསུང་གླེང་འགའ་ཞིག་བྱུང་ཚོད་དུ་འདུག་ཀྱང་ཡར་འབྱོར་ནས་སྐུ་ཁམས་བདེ་བའི་གནས་ཚུལ་ལས་དེ་རིགས་ཀྱི་ཞིབ་ཆ་མ་བྱུང་། ལྷ་རྗེ་འབྲང་རྒྱས་པ་རྫོང་བདའ་གྲུབ་རྗེས་ནས་བཟུང་སྐུ་ཟོ་མདོག་སྔར་ལས་བཟང་ཞིང་ཡང་ཟོར་ཆེ་བའི་ཚུལ་མཛད་ནའང་། གངས་ཅན་གྱི་ལྗོངས་འདིར་བསྟན་པ་རིན་པོ་ཆེ་འཆད་ཉན་བསམ་སྒོམ་གྱི་སྒོ་ནས་སྤེལ་བའི་འཕྲིན་ལས་རྒྱ་ཆེར་གྲུབ་པ་དང་སྙིགས་མར་སྤྱོད་པའི་འགྲོ་བའི་ངང་ཚུལ་ལ་གཞན་སྣང་ཙམ་དུ་ངེས་པར་འབྱུང་བའི་ཐུགས་སུན་སྣང་སྐྱོ་ཤས་ཆེ་ཞིང་གྲངས་མེད་པའི་ཞིང་ཁམས་རྒྱ་མཚོར་ཡིད་ཅན་རྣམས་ཀྱི་དོན་རླབས་པོ་ཆེ་འགྲུབ་པའི་དུས་བབས་ལ་གཟིགས་ཏེ་ལོ་སྔོན་མའི་ཧོར་ཟླ་བཅུ་གཅིག་པ་གཤོལ་བའི་དབང་དུ་བྱས་ན་ཧོར་ཟླ་དགུ་པ་དང་བ་དེད་ཀྱི་སྨིན་དྲུག་ཟླ་བའི་འཇམ་མགོན་ས་སྐྱ་པཎྜི་ཏ་མངོན་དགའི་ཞིང་དུ་གཤེགས་པའི་དུས་ཆེན་ཡར་ཚེས་བཅུ་བཞིའི་ཉིན་ཕན་སྙུན་དུ་མངོན་པ་ཅི་ཡང་མེད་བཞིན་པའི་ངང་ནས། རྗེ་མཁྱེན་བརྩེའི་གསུང་མགུར་ལས་
སྐལ་ལྡན་རྣམས་ལ་ཁོ་བོ་སྙིང་ནས་མགུ། །དེ་ཕྱིར་དུས་དང་རྣམ་པ་ཐམས་ཅད་དུ། །མ་བརྗེད་སྙིང་གི་དཀྱིལ་ནས་གསོལ་བ་ཐོབ། ཁོ་བོས་སྙིང་ནས་བརྩེ་བའི་བསམ་སྦྱོར་གྱིས། །དུས་ཀུན་རྗེས་སུ་འཛིན་ནོ་སྐལ་ལྡན་ཚོ། །བརྒྱུད་པ་བཟང་པོ་ས་སྐྱ་པ་ཡིས་ཟིན། །མེས་པོ་མཚན་ལྡན་ཚར་པ་ཆོས་རྗེ་བསྐྱངས། །བན་རྒན་ང་རང་བསླུ་མེད་ཡིན་ནམ་སྙམ། །བུ་ཀུན་ཙབ་ཙོབ་མ་མང་གསོལ་བ་ཐོབ། །འདི་ཕྱི་བར་དོར་བསླུས་ན་ཁོ་བོ་ཞན། །བྱིན་རླབས་ཆེ་ཆུང་ཚར་པ་ཆོས་རྗེས་ཤེས། །འདི་སྐྱིད་ཕྱི་མར་ཨ་སྐྱིད་ང་རང་ཤེས། །ང་རང་གང་འགྲོ་ཨྱོན་པདྨས་ཤེས། །ཆུ་འགོ་གངས་ལ་ཐུག་པའི་ཚུལ་ཡིན་པས། །ཇི་སྐད་སྨྲས་པའི་དགེ་སྦྱོར་ཉམས་ལེན་མཛོད། །ཅེས་པའི་དོན་བཞིན་དེ་ནུབ་དྲུང་དུ་འཁོད་པ་རྣམས་ལ་སྔར་དང་མི་འདྲ་བའི་དགྱེས་པ་ཆེན་པོའི་སྒོ་ནས་བླ་མ་རྣམས་ཀྱི་རྣམ་ཐར་ཐོར་བུ་གསུངས། ཆོས་དང་འབྲེལ་བའི་བསླབ་སྟོན་ཤུགས་འབྱུང་དང་ངེད་རང་ལ་ཐུགས་མཉེས་པའི་བཀའ་འཕྲོས་ཀྱང་ཁ་ཡར་གནང་ཞིང་སོ་སོའི་མགོ་ལ་ཕྱག་གིས་བྱིལ་བྱིལ་དང་དབུ་ཐུག་གིས་བྱིན་གྱིས་བརླབས་ཏེ་གནས་སོ་སོར་བཏང་། གཏོར་གཞིས་རྣམས་ཡུན་རིངས་པས་གསར་དུ་སྤོ་དགོས་འདུག་ཅེས་བསྟབ་པ་དང་ཚང་མ་ཆབས་ཅིག་པར་སྤལ་གྱི་ཡང་ཐོག་ཏུ་རྒྱས་པར་འབུལ་བ་མཛད་ནས་བྱམས་པར་སང་ཞོགས་ཐོར་ཇ་མི་དགོས་ད་དུང་ཇ་ཞིམ་པོ་སྐོལ་གསུངས་བྱམས་པས་སྙུང་བ་བཞིན་མེད་དམ་ཆབ་སྐོལ་ཨེ་བཞེས་ཞུས་པར་ན་ཚ་མེད་པར་ཆུ་སྐོལ་ག་ལ་དགོས་ཞེས་བཞད། དེ་ནས་སྲོད་ཐུན་ལ་ཚུགས་པའི་སྒང་མཇུག་ཙམ་
ལ་འདའ་ཁ་བའི་མའི་རྣལ་འབྱོར་གྱིས་མཚམས་སྦྱར་ཏེ་དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་མེ་ཏོག་གི་ཆར་གདུགས་དང་བ་དན་རོལ་མོ་སོགས་མཆོད་སྤྲིན་དཔག་ཏུ་མེད་པས་སྣ་དྲངས་ནས་བདེ་ཆེན་དག་པའི་ཞིང་ཁམས་གདན་གསུམ་ཚང་བའི་དཀྱིལ་འཁོར་ཆེན་པོའི་རིགས་ཀྱི་བདག་པོར་གདན་དྲངས། དེའི་དུས་བྱམས་པ་གཟིམས་ཆུང་དུ་ཉེར་ལེན་ལ་བསྡད་པའི་གཉིད་ཐུམ་པ་ཞིག་གི་གསེང་ལ་ཧིག་གི་སྒྲ་བྱུང་ནས་བལྟས་ཙ་ན་སྐུ་གཤེགས་ཟིན་འདུག་ཟེར། དེ་སྐབས་སྡེ་པ་བརྒྱ་ཚོ་བའི་ཆོས་རྗེ་བཀྲ་ཤིས་ལྷུན་པོའི་སྔགས་གྲ་བའི་སྒྲིགས་འགྲིམ་པ་དེ་གསུང་ཆོས་ཞུ་བར་འོངས་པ་དེ་ནུབ་ཀྱི་རྨི་ལམ་ལ་སྟན་དཀར་སྟེང་དུ་རྗེ་ཉིད་བཞུགས་པའི་ཟུར་བཞི་ནས་བུད་མེད་བརྒྱད་ཀྱིས་བཟུང་སྟེ་ནམ་མཁར་ཡེར་རེར་བཏེག་པ་ཐར་ཇ་འདྲེན་མི་ལ་མདང་ང་ལ་རྨི་ལམ་འདི་འདྲ་བྱུང་བ་ཅི་ཡིན་ཞེས་བློ་མ་བདེ་བའི་རྣམ་པ་བྱེད་ཅིང་། དུས་མཚུངས་སུ་ཞ་ལུར་ཁྱབ་བདག་རིན་ཅེན་བསོད་ནམས་མཆོག་གྲུབ་ཀྱི་འོད་གསལ་དུ་རྗེ་འདི་ཉིད་དགྱེས་པའི་ཚུལ་དུ་ཕེབས་རཀྴའི་ཕྲེང་བ་འདི་ཐུགས་ཆགས་གནང་བ་ཞུ་ད་ངེད་ལ་མི་དགོས་པ་འདུག་གསུང་བར་བྱུང་གནང་། ཞག་ཁ་ཡར་གྱི་སྔོན་ཙམ་ལ་སྟོང་ར་བའི་མནའ་མ་སྡེ་པ་འཕྲང་འགོ་བའི་ཚ་མོར་གཏོགས་པ་རྩ་སྒོ་ཡངས་པ་དེའི་རྨི་ལམ་དཀྱུས་མ་དང་མི་འདྲ་བའི་གསལ་པོར་བྱེད་པ་ཞིག་ལ་རྨི་ལམ་དུ་ཉི་མ་བཞུད་ལ་ཁད་ལྷོ་ནུབ་ཀྱི་ནམ་མཁར་བླ་མ་རྡོ་རྗེ་གདན་པ་ཡིན་ཟེར་བ་ལེགས་པར་བཏགས་ཚེ་རྡོ་རྗེ་འཆང་གི་སྐུའི་དབྱིབས་ལ་ས་ཞུ་བཞེས་ནས་
བདེན་བྲལ་གྱི་མཚམས་སུ་འཇའ་འོད་དང་བཅས་ཡེར་གྱིས་ཕེབས་སོང་རྗེ་ཉི་མའང་བཞུད་དེ་ནག་ཐུམ་བྱེད་པ་རྨིས་ཚུལ་དེ་གའི་མ་རྒན་མོ་འཕྲང་འགོ་བའི་སྤྱིལ་པོར་སྡོད་མིར་བཤད་པ་ཞིང་བརྗེས་པའི་སྐད་ཆ་ཚོར་བས་ངའི་བུ་མོའི་རྨི་ལམ་དེ་ལ་ལྟ་བ་འདྲ་ཟེར་སྐད། སྐུ་མཚམས་དང་འགྲིག་པའི་ཕྱག་གཡོག་ཉུང་གཤིས་ཉི་མ་གཉིས་གསུམ་གསངས་པའི་བཀྲ་ཤིས་ཆོས་སྡེ་ནས་མཆོད་དཔོན་འཇམ་དབྱངས་རྒྱལ་མཚན་དང་ཤེར་རིན་པ་སོགས་འབོད་མི་བཏང་། ཚེས་བཅོ་ལྔ་ནས་ནམ་མཁའ་གཡའ་དག་པར་འཇའ་སྤྲིན་རི་མོས་བྲིས་པ་ལྟ་བུ་ལྷ་ས་ནས་གོང་དཀར་ཕྱོགས་སུ་ཞག་ཤས་ཀྱི་བར་རྒྱུགས་པ་ཀུན་གྱིས་མཐོང་ཞིང་གཞིས་ཀ་རྩེར་གད་སྒོ་ཞང་ཚན་གྱི་ཟི་བུན་དང་ཐུག་པའི་ཟླ་མཇུག་ངེད་ཇུས་རིམ་གྱི་འཁོར་ལོ་འདྲི་བར་དགའ་ལྡན་ཡང་རྩེའི་སྒོ་མངས་ཕྱེ་སྟེ་ཡོད་དུས་ཀྱང་གོང་དཀར་ཕྱོགས་ནས་འཇའ་སྤྲིན་པིར་གྱིས་བྲིས་པ་འདྲ་བ་མང་དུ་མཐོང་བས་དེ་མཚུངས་ཟླ་ཕྱེད་ཙམ་གྱི་བར་དུ་བྱུང་བར་མངོན། དཔོན་སློབ་ཀྱི་སྐུ་ཞབས་ནས་འོངས་ཟེར་བའི་བང་ཆེན་བྱུང་བའི་རྟེན་གྱི་དྲིལ་ཁ་བཤིག་པའི་ནང་དུ་ལི་སྐུ་བཏགས་སྨན་ཙེ་དང་བཅས་སུམ་ཚན་ཡོད་པ་ལ་ཕྱག་བྲིས་མི་འདུག་པས་ཅི་ཡིན་ནམ་སྙམ་པའི་ཐེ་ཚོམ་དུ་གྱུར་པ་རྗེས་སུ་བྱས་ཚེ་ཞམ་འབྲིང་པ་རྣམས་ཀྱིས་འགྱོགས་བསྔོར་བཏང་བ་ཡིན་འདུག །ཞག་གསུམ་ཙམ་ན་ཤེར་རིན་པ་ཐུགས་དམ་གསལ་འདེབས་ཀྱི་རྟེན་ཁྱེར་ནས་བྱུང་འཕྲལ་བླ་མ་དགྱེས་མཛད་རྡོ་རྗེའི་དཀྱིལ་འཁོར་གྱི་གཙོ་བོར་གྱུར་པ་ལ་མཆོད་འབུལ་གསོལ་འདེབས་རྒྱས་པར་བྱས། སྐུ་
གདུང་རིན་པོ་ཆེར་སྙན་དར་ལ་སྨོན་ལམ་ཚིགས་བཅད་བྲིས་པ་དཀར་མེ། དགོངས་རྫོགས་ཀྱི་ཐེབས་སུ་གོས་དར་ཤ་མར་འབྲུ་ཆ་སོགས་བདོག་པ་གྱ་ནོམ་པ་ཕུལ་ཞིང་དབུས་གཙང་སྟོད་སྨད་ཀུན་ནས་གདུང་འབུལ་གྱི་མཆོད་སྤྲིན་རྒྱས་པར་སྤྲོས། གོང་དཀར་དུ་གདུང་ཆོག་དང་བཀྲ་ཤིས་ཆོས་སྡེར་ཆོག་གྲའི་རིགས་མང་དུ་བཙུགས། དྲུང་ཆེན་བྱམས་པ་དང་མཆོད་དཔོན་འཇམ་དབྱངས་གཉིས་གདན་ས་གོང་དུ་མངགས་པའི་དཔལ་ལྡན་ས་སྐྱར་ཆོས་དུང་དཀར་པོ་རྒྱང་གྲགས་བུས་ཏེ་མང་འགྱེད་བཏང་། བཞི་ཐོག་ཏུ་བདག་ཆེན་རིན་པོ་ཆེར་འབུལ་བར་རྣ་རོའི་བནྡེ་གཤིན་རྗེ་གྲགས་ཀྱིས་བཞེངས་པའི་རྗེ་བཙུན་རིན་པོ་ཆེའི་སྐུ་བརྙན་གཞིས་ཀ་སྣེའུར་བཞུགས་པ་རྗེས་སོར་ཕྱག་ཏུ་ཕུལ་བ་དེས་གཙོས་ཟང་ཟིང་གི་དངོས་པོ་རིང་པོར་བརྐྱངས། གཞན་ཡང་ཞ་ལུ་ངོར་ཆོས་འཁོར་ཡང་རྩེ་གསུམ་གྱིས་ཐོག་དྲངས་དབུས་གཙང་གི་ཆོས་སྡེ་དུ་མར་མང་ཇ་བསྔོ་རྟེན། ཡར་ཀླུངས་སུ་སེར་ཚོགས་སོགས་དག་པ་དང་མ་དག་པའི་ཞིང་གི་གདུལ་བྱ་རྗེས་འཛིན་གྱི་དགོངས་པ་ཡོངས་སུ་རྫོགས་པའི་རིམ་པ་ཁུ་ལུང་ནས་སྡེ་པ་ནམ་མཁའ་དོན་གྲུབ་དབང་པོ་ཡབ་སྲས་ལྕམ་སྲིང་ཞམ་འབྲིང་བ་རྣམས་ཀྱིས་ལེགས་པར་བསྒྲུབས། དགུང་ཞག་ཞེ་དགུའི་བར་ལྷོ་ནུབ་མཚམས་ནས་ཉིན་རེ་བཞིན་འཇའ་དཀར་ཀུ་ཤ་བཀྲམ་པ་ལྟར་བྱུང་ནས་སྐུ་གདུང་རིན་པོ་ཆེའི་ཐད་ཀྱི་ནམ་མཁར་གདུགས་ཕུབ་པ་བཞིན་གྱུར་པ་ལ་ཀུན་ཡ་མཚན་དུ་འཛིན། དེ་སྐབས་གཙང་ཕྱོགས་སུ་བདེ་གཟར་
གྱིས་ལམ་ཧ་ཅང་བདེ་བ་མེད་ཀྱང་འདི་ག་ནས་ཕེབས་དགོས་པའི་ཧུང་རྒྱ་ལམ་ཡིག་དང་བཅས་ཞ་ལུ་ནས་མཁན་ཆེན་རྡོ་རྗེ་འཛིན་པ་ཆེན་པོ་ཕེབས་ཏེ་ཧོར་ཟླ་བཅུ་གཅིག་པའི་ཚེས་གཉིས་དགུང་ཞག་རྫོགས་པ་དང་བསྟུན་བླ་མ་ན་རིམ་གྱི་ཐུགས་དམ་རྣལ་འབྱོར་དབང་ཕྱུག་བིཪྺ་པའི་བཞེད་གཞུང་གཤེད་དམར་ལྷ་ལྔའི་དཀྱིལ་འཁོར་གྱི་གཙོ་བོ་བླ་མ་འཇམ་པའི་རྡོ་རྗེ་སྦྱིན་སྲེག་གི་མཆོད་པས་མཉེས་པར་མཛད་པའི་ཚེ་ཆེད་དུ་རྩོལ་བ་ལ་མ་བལྟོས་པའི་གདུང་ཡིད་བཞིན་ནོར་བུར་ཡེ་ཤེས་ཀྱི་མེ་རང་འབར་ལྟ་བུར་གྱུར། །དེའི་སང་མེ་ཏོག་གི་ཆར་འདྲ་བ་ཉི་མའི་འོག་ནས་འོད་སྐྱ་སིམ་སིམ་གདུང་ཁང་དུ་ཉེ་བར་མང་དུ་བབས་པ་དམངས་ལ་ཆེར་མི་ཡོང་བའི་རྟགས་ཡ་མཚན་པ་བྱུང་། པུར་ཁང་ཞལ་ཕྱེ་ནས་གདུང་སྐལ་བགོ་བའི་དུས་རིང་བསྲེལ་ཤེལ་ལྟར་འཚེར་བ་ཁ་ཡར་ཕེབས། ཁྱབ་བདག་ཞ་ལུ་པ་ཆེན་པོ་ཐུགས་བྲེལ་ཆོད་དེ་འདིར་བྱོན་དུས་ལྟས་ཡ་མཚན་པ་བྱུང་ཚུལ་ཙམ་ལས་བདེ་གཟར་སོགས་ཀྱི་གཡེང་བ་དང་རྗེ་ཉིད་ཀྱང་ཡར་ཐེགས་པར་རིང་ཁྱད་འདུག་གཤིས་ཞག་མང་དུ་སྦྲེལ་བའི་འདི་དུས་ཞིབ་ཆ་མ་འཚལ། དངུལ་གདུང་ཐེབས་ཀྱི་གསེར་དངུལ་གཡུ་ཤེལ་གྱིས་མཚོན་པའི་མཐུན་རྐྱེན་གྱི་བདོག་པ་གྱ་ནོམ་པ་བསྟབ་ཅིང་བཀའ་འགྱུར་དང་དགོངས་རྫོགས་ལ་སོང་བའི་ལྷག་མ་རྣམས་དང་བཅས་གཞིས་བྱེས་རྣམས་ཀྱིས་ཁུར་བླངས་ཏེ་བཀྲ་ཤིས་རྩེ་ཆོས་སྡེར་ཧོར་ཟླ་གསུམ་པའི་ཚེས་བཅུ་ནས་བརྩམས་པའི་སྐུ་རྟེན་སྨན་འདམ་ལས་གྲུབ་
པའི་མཐོང་གྲོལ་ཡིད་བཞིན་ནོར་བུ་སྐུ་ཚད་དང་མཉམ་པ། གསུང་རྟེན་གླེགས་བམ་ཡུམ་རྒྱས་པ་དུམ་པོ་བཅུ་དྲུག་མཆོད་དཔོན་འཇམ་དབྱངས་ཀྱིས་ཐིག་རྩ་བགྱིས་པའི་ཐུགས་རྟེན་གསེར་དངུལ་ལས་གྲུབ་པའི་བྱང་ཆུབ་མཆོད་རྟེན་ཐོག་ཚད་ཕྲ་འཕུལ་སོགས་བཀོད་པས་ཁྱད་པར་འཕགས་པ། རིང་བསྲེལ་རྣམ་པ་བཞི་དང་གནོད་སྦྱིན་འཁོར་ལོ་ཁྱད་པར་དྲི་མེད་ནས་གསུངས་པའི་སྲོག་ཤིང་འཛུགས་པའི་ཆོ་ག་ཐམས་ཅད་མཁྱེན་པ་མཁྱེན་བརྩེ་དབང་ཕྱུག་གི་ཕྱག་བཞེས་ལྟར་དབོན་མཁྱེན་རབ་བློ་ལྡན། མཆོད་དཔོན་འཇམ་དབྱངས་རྒྱལ་མཚན། དགེ་སློང་སངས་རྒྱས་དབང་ཕྱུག་གསུམ་གྱིས་ལག་བསྟར། བཞུགས་གནས་གཙུག་ལག་ཁང་ཞིག་གསོས་ལ་བརྟེན་པའི་རྒྱ་དང་དཔངས་བསྟོད་པར་བཞུགས་སུ་གསོལ་སྐུ་རྟེན་ལ་བླ་ཆས་ཆ་འགྲིག །གསུང་རྟེན་དང་གདུང་རྟེན་ལ་ཁྲི། ཐུན་མོང་དུ་ས་རྒྱན། གནམ་རྒྱན། མཆོད་རྫས་ཀྱི་རིམ་པ་ཚར་དུ་དངར་བ་ཟླ་བ་བཞིའི་ཁོངས་སུ་ལེགས་པར་གྲུབ་པ་ལ་གོང་དཀར་ཆོས་སྡེའི་ཆོས་འཆད་པ་རབ་འབྱམས་སྨྲ་བ་རིན་ཅེན་རྒྱ་མཚོས་རྡོ་རྗེ་སློབ་དཔོན་མཛད་དེ་གཉུག་མར་གནས་པའི་དགེ་འདུན་གྱི་ཚོགས་དང་ལྷན་ཅིག་པར་ཀྱེ་རྡོ་རྗེ་མན་ངག་ལུགས་ཀྱི་རས་བྲིས་ཀྱི་དཀྱིལ་འཁོར་ལ་བརྟེན་པའི་རབ་ཏུ་གནས་པ་དང་རྟེན་བཞེངས་གནྡྷོ་ལའི་རྨང་འདིང་བ་ཚང་མའི་དུས་སུ་འཇའ་སྤྲིན། ཐན་པའི་ཚེ་ཆར་གྱི་རྒྱུན་འབབ་པ་སོགས་རྒྱལ་ཀུན་ངོ་བོ་དཔལ་ལྡན་བླ་མ་དམ་པའི་ཐུགས་དགོངས་ཆོས་དབྱིངས་སུ་རྫོགས་པའི་ངོ་མཚར་མཐའ་
ཀླས་པ་བྱུང་། གནས་གསར་སྡེ་པ་ནམ་མཁའ་དོན་དབང་དང་དབོན་མཁྱེན་རབ་རྣམ་རྒྱལ་ཡབ་སྲས་གཉིས་ཀྱིས་གོང་དཀར་རྡོ་རྗེ་གདན་དུ་གཟིམས་མལ་སྐུ་འདྲ་རིན་པོ་ཆེ་གོང་མཚུངས་བཞེངས་ཏེ་བླ་ཆས་མཆོད་རྫས་རབ་ཏུ་གནས་པས་མཐའ་བརྟེན་ནས་བླ་མ་ལྷ་ཁང་དུ་བསྒྲིགས། འཇམ་དབྱངས་མཁྱེན་བརྩེ་ཡབ་སྲས་ཀྱི་གདུང་རིན་པོ་ཆེ་དབང་གི་རྒྱལ་པོ་བཞུགས་པའི་མཆོད་རྟེན་ཞིག་དཔལ་ལྡན་བླ་མ་དམ་པ་དེ་ཉིད་ཀྱིས་དགོངས་པར་ཡོད་བཞིན་པའི་ངང་དུ་ལུས་པ་ཁུ་ལུང་གཞིས་ཀར་གསེར་དངུལ་ལས་གྲུབ་པའི་ཁྲུ་ཕྱེད་གསུམ་ཙམ་བཞེངས་པར་རིགས་ཀུན་ཁྱབ་བདག་རིན་ཅེན་བསོད་ནམས་མཆོག་གྲུབ་ཀྱིས་གཟུངས་འབུལ་དང་གསུང་རམ་པ་དང་བཅས་རྣལ་འབྱོར་རྒྱུད་དང་འབྲེལ་བའི་སྒོ་ནས་རབ་ཏུ་གནས་ཏེ་བཀྲ་ཤིས་ཀྱི་དགེ་མཚན་ཕྱོགས་ཀུན་ཏུ་ཁྱབ་པར་གྱུར་ཏོ། །ཟབ་ཆོས་དྭངས་མ་དཀར་མིན་མེ་ལྷའི་མཐུས། །ཉེར་སྤྱོད་བློ་ཡིས་མངལ་ལས་ཕྱིར་འཕངས་པས། །སླར་བརྩོན་གངྒཱའི་ལྟོར་སྨིན་ཀརྟི་ཀཿ །ཐོས་བསམ་སྨྱུག་མའི་ཚལ་རྒྱུ་རིང་ཞིག་འགྱངས། །ཐུབ་བསྟན་སྲོག་གི་ཟུངས་སུ་འཚོ་གཞེས་པར། །བསྐུལ་གསོལ་གཞན་ངོ་བསྲུང་བའི་གཡར་ཁྲལ་ལས། །མ་དག་ཞིང་ལ་ཉེར་སུན་ཐུགས་ཀྱི་རྩེ། །བདེ་ཆེན་ས་ལ་སྤྲོ་དགའ་སུ་ཡིས་བཟློག །འབྲས་དཀར་སྤུངས་པའི་ཆོས་སྡེར་ཞལ་ཕྱོགས་ནས། །རྨད་བྱུང་རྣམ་པར་དག་པའི་སྨོན་ལམ་གྱིས། །མཚམས་སྦྱོར་བདག་སོགས་བླ་མེད་བྱང་ཆུབ་བར། །མི་གཏོང་བཤེས་
སུ་ཞལ་འཆེས་དམ་བཅར་ངེས། །ཐོས་དོན་མཚོར་འཕངས་རྡོ་བ་བྱ་ལམ་རྗེས། །དལ་བའི་འབྲས་བུ་ཙམ་དུ་མ་འཇོག་ཅེས། ཕྱི་རབས་དཔྱོད་ལྡན་བསྐུལ་ཆེད་གང་གསན་ཆོས། །ངོ་མཚར་པུ་སྟ་ཀཿ །བསྒྲིག་ཆོ་ག་བསྟར། ཁྲི་སྟན་ཟུར་བཞི་ཌཱ་ཀིས་ཉེ་བར་བཏེག །དཔའ་བོ་མཁའ་འགྲོའི་བསུན་མས་མཆོད་སྤྲིན་བཅས། །འོག་མིན་ཞིང་ཁམས་ཞིང་གི་རིགས་བདག་ཏུ། །དཔལ་ལྡན་རྡོ་རྗེ་སེམས་དཔར་བཞེངས་དེ་ཅི། །ཐུབ་བསྟན་ཆ་ཤས་བཅུ་གཉིས་ཡོངས་རྫོགས་ཤིང་། །མཁྱེན་བརྩེ་ནུས་པའི་ཚ་ཟེར་སྟོང་འཕྲོ་བའི། བཤེས་གཉེན་ཆོས་དབྱིངས་མཐུན་འཚམས་གཞོན་ནུའི་ཕག །གཟིམས་པའི་དུས་ཀྱི་སྒལ་ངན་ཀྱེ་མ་ཧུད། །བཻཌཱུར་ཞུན་མ་ལྟར་འཕོས་མཁའ་ངོས་ལ། །སྣ་ཚོགས་འཇའ་སྤྲིན་འོད་དྲའི་རི་མོའི་མདངས། །ལེགས་བྲིས་བཀོད་པ་བསྐྲུན་པའི་སྒྱུ་མ་ཡིས། །རྗེས་འཇུག་མྱ་ངན་གདུང་མ་གཞིལ་ལམ་ཅི། །འོན་ཏེ་གངྒཱའི་ཀླུང་གི་རྡུལ་སྙེད་ཀྱིས། །བགྲང་བར་ནུས་མིན་དག་པའི་ཞིང་ཁམས་སུ། །མཐའ་ཀླས་སྤྲུལ་པ་སྟོན་པའི་ཐུགས་རྗེའི་སྤྱན། །བདག་སོགས་གདུལ་བྱར་གཟིགས་ཚེ་ཡིད་དབང་སྤྲོ། །ཚོགས་གཉིས་ཉལ་འགྲོའི་ཕུང་པོའི་ཆུ་གཏེར་ལ། །དགེ་བའི་ཀླུང་གིས་གང་བར་བལྟོས་མིན་ཀྱང་། །རྗེས་འབྲང་ལེགས་བྱས་ཞིང་གི་སོ་ནམ་དུ། །འཛད་མེད་རྣམ་དཀར་ཆར་རྒྱུན་ཆལ་ཆིལ་ཕོབ། །རིགས་བརྒྱའི་ཁྱབ་བདག་རྗེ་བཙུན་ཞ་ལུ་པས། །དུས་དགྲ་འཇམ་དཔལ་དམར་པོ་ལྷ་ལྔ་དང་། །སྐུ་གདུང་རིན་ཅེན་དབང་གི་རྒྱལ་པོ་གཉིས། །དབྱེར་མེད་ངོ་མཚར་མཆོད་པ་དེ་རྨད་བྱུང་། །དེ་ལྟར་དུས་གསུམ་རྒྱལ་བ་ཐམས་ཅད་ཀྱི་སྤྱི་གཟུགས་བཀའ་དྲིན་མཚུངས་མེད་དཔལ་ལྡན་བླ་མ་དམ་པ་ཁྱབ་བདག་རྡོ་
རྗེ་སེམས་དཔའ་དང་གཉིས་སུ་མེད་པ་གང་གི་རྣམ་པར་ཐར་པ་ཆེས་ཕྲ་བ་ནི་སྤྱན་དང་མངོན་པར་ཤེས་པ་ལ་ཆགས་ཐོགས་མེད་པ་རྣམས་མ་གཏོགས་འཇིག་རྟེན་གྱི་བྱེད་པོ་ཚངས་པ་ལྟ་བུས་ཀྱང་བརྗོད་པར་མི་ནུས་ན་གཞན་དག་གིས་ལྟ་ག་ལ་ཞིག་ཐུན་མོང་བའི་གདུལ་བྱའི་སྤྱོད་ཡུལ་དུ་གྱུར་པའི་མཛད་པ་རགས་པའི་ལོ་ཟླ་ཚེས་གྲངས་ཡུལ་དང་གནས་སོགས་རྗེས་འཇུག་རྣམས་ལེ་ལོའི་མལ་དུ་འདུ་འཛིའི་གཉིད་ལ་གཡུར་བས་ཞིབ་པར་མ་རྟོགས་ཀྱང་རྒྱུས་ཡོད་ཀྱི་ཐོ་ཐོར་བུ་དང་ཡིད་གཉིས་སུ་གྱུར་པ་མང་དག་ཁྱབ་བདག་མཁན་ཆེན་ཞ་ལུ་པ་ཆེན་པོ། སྒྲུབ་རྙིང་སློབ་དཔོན་འཇམ་དབྱངས་རྒྱལ་མཚན། གོང་དཀར་ཆོས་སྡེའི་ཟུར་འཆད་པ་དཔྱོད་ལྡན་འཕྲིན་ལས་རྣམ་རྒྱལ་སོགས་འགའ་ཞིག་ལ་དཔྱད་ཅིང་གསན་ཡིག་དང་དམ་པ་གཞན་གྱི་རྣམ་ཐར་ལོ་རྒྱུས། དུས་དང་ལོ་ཟླ་ལུང་རིགས་ཀྱིས་བསྒྲུབ་ནུས་པ་དང་ལ་ལར་རུང་མཐུན་ཀྱང་འགའ་ཞིག་སྦྱར་བའི་གོ་རིམ་བསྒྲིགས་པར་སོ་སྐྱེའི་སྣང་ལ་མ་ངེས་ཀྱི་འཁྲུལ་པར་ཚད་བཟུང་དཀའ་ནའང་ཕྱོགས་འགྲོ་ཙམ་ལ་ཡིད་བརྟན་དུ་རུང་བའི་ལུགས་སུ་བགྱིས་ཏེ་རྟོགས་བརྗོད་ཀྱི་རིམ་པ་ཆེར་ལོང་ཙམ་བཤད་ཟིན་ཏོ། །བློ་ཆེན་མེས་པོས་རིག་བྱེད་གཏམ་གྱི་སྦྱོར་བ་མ་ལུས་གཅིག་ཏུ་བསྡུས། །དབྱངས་ཅན་ལྷ་མོ་མགྲིན་པར་བྱོན་ཏེ་བརྗོད་པ་རྣམ་དག་ཚིག་འཕྲེང་སྤེལ། །བརྟན་པའི་འཁོར་ལོས་གསང་གསུམ་མི་ཟད་ཡོན་ཏན་བང་མཛོད་སྒོ་ཕྱེ་ནས། །བླ་མ་མཆོག་གི་རྟོགས་པ་བརྗོད་ལས་བདག་འདྲའི་བློ་གྲོས་མཐུ་ཡིས་ཅི། །ལྷ་ལམ་གསེར་ལྡན་རི་བོ་མཐོན་པོའི་ཁྱོན། །རབ་ཕྲ་བུག་པའི་ནང་ནས་ལྟ་བ་བཞིན། །འཕགས་ཆེན་དམ་པའི་རྣམ་ཐར་ཆེས་བརླིང་ཡང་། །རང་བློ་དང་འཚམ་བརྗོད་ལ་ཀླན་ཀ་སུ། །ཟས་གཙང་སྲས་ཀྱི་བརྒྱ་ཕྲག་མཛད་པ་ལ། །བསྔགས་པའི་དཔལ་ལྡན་མ་ཁོལ་བསོད་ནམས་ཀྱིས། །ཕུང་པོ་སྲིད་རྩེར་འཕྱུར་དེས་ཡིད་དྲངས་ནས། །ངལ་བའི་དཀའ་
ཐུབ་ལེན་ལ་གཅིག་ཏུ་སྤྲོ། །རྒྱལ་སྲས་སྤྱོད་པའི་སྤངས་རྟོགས་མཚོ་ལྟར་ཟབ། །ལྡུགས་སྣོད་ཚིག་དོན་ཨ་མྲའི་ཚིག་གུ་ཙམ། ཁོ་བོའི་བློ་གྲོས་ཀུ་ཤའི་རྩེ་བཞིན་ཕྲ། །དེ་ཕྱིར་མ་རྟོགས་འཁྲུལ་པས་ནོངས་ཀུན་འཆགས། །དེ་ལྟ་ན་ཡང་རྗེ་བཙུན་བཀའ་འགྱུར་བའི། །མཛད་པའི་ཆ་ཤས་མཐོང་བའི་ཤིང་རྟ་ཡིས། །མི་ཕྱེད་དད་པའི་ནོར་གྱི་དཔྱ་དྲངས་ཚེ། །སྲིད་ཞིའི་དབུལ་ཕོངས་གདུང་བ་ཕ་མཐར་བྱེད། །འདི་ལ་སྒོ་གསུམ་འབད་ཆེན་ངལ་བསྟེན་ཚོགས། །མགོན་པོ་ཁྱོད་ཀྱི་དཔལ་ཆེན་ཧེ་རུ་ཀའི། །གྲོང་དུ་ཉེར་ཁྲིད་ཁ་སྦྱོར་བདུན་ལྡན་སྐུ། །རིང་པོར་མི་ཐོགས་འགྲུབ་པར་བདག་བྱིན་རློབས། སྤྱི་དང་ཁྱད་པར་ཚར་ཆེན་ཡབ་སྲས་ཀྱི། །སྙན་བརྒྱུད་ཚད་མ་བཞི་ལྡན་རིང་ལུགས་བསྟན། །མ་ཕམ་དབུས་འགྱུར་འཆང་དུ་འབྱོན་མིན་བར། །ཐོས་བསམ་སྒོམ་པ་དར་ཞིང་རྒྱས་གྱུར་ཅིག །དེ་ལྟར་འ་ཞ་རྒྱལ་པོའི་གདུང་ལས་བཀའ་དྲིན་མཚུངས་པ་མ་མཆིས་པའི་དཔལ་ལྡན་བླ་མ་དམ་པ་ཁྱབ་བདག་རྡོ་རྗེ་སེམས་དཔའི་ངོ་བོ་མགོན་པོ་བསོད་ནམས་མཆོག་ལྡན་བསྟན་པའི་རྒྱལ་མཚན་དཔལ་བཟང་པོའི་རྣམ་ཐར་དད་པའི་རླབས་འཕྲེང་འདི་ནི་རྡོ་རྗེ་འཆང་ཆེན་པོ་མཁན་ཆེན་ཞ་ལུ་བ་རིན་ཅེན་བསོད་ནམས་མཆོག་གྲུབ་ཀྱིས་རིང་པོ་ཞིག་ནས་བཀའ་གནང་ཞིང་དབོན་མཁྱེན་རབ་རྣམ་རྒྱལ་དང་མཁྱེན་རབ་བློ་ལྡན་གཉིས་ཀྱིས་རེག་ཟིག་དང་བཅས་སྔ་མོ་ནས་བསྐུལ་བ་དང་རྡོ་རྗེ་བྲག་ནས་རིག་འཛིན་སྤྲུལ་པའི་སྐུ་མཆོག་སོགས་དད་འདུན་ཅན་དུ་མས་མཚམས་སྦྱར་བ་ལྟར་འདུན་པ་རྩེ་གཅིག་པ་ཡོད་ནའང་ཁོ་བོ་དོན་མེད་རྣམ་གཡེང་གི་ཡང་བྲན་དུ་གྱུར་པས་མོས་པ་ལམ་བྱེད་དུ་སོང་བ་ཉེ་ལམ་རྡོ་རྗེ་འཆང་མཁྱེན་རབ་རིན་པོ་ཆེའི་དབོན་རིགས་རྒྱུད་སྡེ་རྒྱ་མཚོའི་མངའ་བདག་བཅོ་བརྒྱད་ཆོས་རྗེ་བྱམས་པ་ངག་དབང་ལྷུན་གྲུབ། ཁྱབ་བདག་བཀའ་འགྱུར་བ་ཆེན་པོའི་དབོན་རིན་པོ་ཆེ་ནམ་མཁའ་བསོད་ནམས་དབང་གི་རྒྱལ་པོ། ཐུབ་པའི་དབང་ཕྱུག་ལྕགས་ཟམ་
པ་ཆེན་པོའི་གདུང་རིགས་རྗེ་དྲུང་ངག་དབང་བསྟན་འཛིན་ཕུན་ཚོགས་གསུམ་གྱིས་ཐོག་དྲངས་སྐལ་ལྡན་གྱི་གདུལ་བྱ་ཉི་ཤུ་སྐོར་ལ་ཞ་ལུ་མཁན་ཆེན་ཀུན་སྤངས་པ་ཆེན་པོས་སྐྱིད་ཤོད་དོགས་བདེ་ལྷོ་མོས་གཞིས་ཀར་མདོ་རྒྱུད་རྒྱ་མཚོའི་ཡང་སྙིང་ངེས་དོན་སྙིང་པོའི་དམ་ཆོས་གསུང་ངག་སློབ་བཤད་རིན་པོ་ཆེ་རྫོགས་པར་སྩལ་པའི་ཚེ་དཔོན་སློབ་གསུམ་གྱིས་བླ་མ་བརྒྱུད་པའི་ཁ་སྐོང་དུ་ཅིས་ཀྱང་རྩོམས་ཤིག་པར་གསུང་གིས་བསྐུལ་བ་ལ་བརྟེན་ནས་སློབ་བཤད་འཛིན་པའི་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་ཨཱ་ན་ལ་ཞེས་པ་མེ་འབྲུག་ནག་པ་ཟླ་བའི་ཚེས་བཅུ་བདུན་ལྷག་པ་ལྷ་མཚམས་ཀྱི་འགྲུབ་སྦྱོར་ནས་དབུ་བཙུགས་ནའང་ཟིན་བྲིས་ལ་དོགས་གནས་མངས་པའི་ཕྱོགས་ཀུན་ཏུ་དྲི་མལ་གྱི་སྒུགས་སྡོད་ལ་བརྟེན་དལ་འགྲོས་ཀྱི་ངོས་སྣྲོན་གྱི་ཟླ་བའི་ཡར་ངོའི་ཚེས་གཉིས་རྡོ་རྗེ་འཆང་དབང་ཕྱུག་རབ་བརྟན་གྱི་དུས་དྲན་གྱི་ཉིན་རྒྱལ་ཁབ་ཆེན་པོ་དམར་པོ་རིར་སྦྱར་བའི་ཡི་གེ་པ་ནི་གནས་བརྟན་རིག་པ་འཛིན་པ་འཇམ་དབྱངས་གྲགས་པས་བགྱིས་པ་སློབ་བཤད་ཟབ་མོའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །མངྒ་ལཾ།། །།
ཤོག་སྟོང་།