དཔལ་འཁོར་ལོ་སྡོམ་པ་དྲིལ་བུ་ལུགས་ཀྱི་ཕྱི་དཀྱིལ་ཆོ་ག་དཔའ་བོའི་གྲོང་འཇུག
དཔལ་འཁོར་ལོ་སྡོམ་པ་དྲིལ་བུ་ལུགས་ཀྱི་ཕྱི་དཀྱིལ་ཆོ་ག་དཔའ་བོའི་གྲོང་འཇུག་ཅེས་བྱ་བ་བཞུགས་སོ།།
ན་མ་ཤྴཱི་པ་ར་མ་སུ་ཁསྱ་དཻ་ཝཱ་ཡ། དཔལ་ལྡན་ཁྲག་འཐུང་ཚོགས་ཀྱི་དབང་ཕྱུག་འཁོར་ལོ་སྡོམ་པ་གདན་གསུམ་ཚང་བའི་རྡོ་རྗེ་སློབ་དཔོན་གྱི་སྒྱུ་འཕྲུལ་དྲ་བའི་གར་མཁན་ཞ་ལུ་པ་ཆེན་པོ་རིན་ཆེན་བསོད་ནམས་མཆོག་གྲུབ་ཚེ་དབང་ལྷུན་གྲུབ་དཔལ་བཟང་པོར་བྱང་ཆུབ་མ་ཐོབ་ཀྱི་བར་དུ་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་གཟུང་དུ་གསོལ། །མ་ནུབ་མཐོ་རིས་དབང་གི་ཆུ་བོ་ཡིས། །བགྲངས་ཡས་གདུལ་བྱའི་སྒོ་གསུམ་དྲི་བཀྲུས་ནས། །སྐུ་བཞིའི་འབྲས་བཟང་སྨིན་མཛད་རིགས་བརྒྱའི་བདག །རིན་ཅེན་བསོད་ནམས་མཆོག་གྲུབ་གཙུག་ན་མཛེས། །མ་དང་མཁའ་འགྲོའི་ཞལ་ལུང་མངར་པོའི་ཆང་། །བཏུངས་པས་ཟག་མེད་བདེ་བས་ཆེར་མྱོས་པའི། གསང་ཆེན་སྙན་པའི་རྒྱང་གླུ་ལེན་མཁས་པ། །རྡོ་རྗེ་དྲིལ་བུ་པ་ཞེས་གྲགས་པ་འབར། །པཎ་གྲུབ་བཞེད་སྲོལ་མ་ཉམས་ལྷ་ཡི་སྐད། །ལྗོངས་འདིར་སྒྱུར་བྱེད་མལ་གྱོ་མར་དོ་སོགས། །ལོ་ཆེན་ཆོས་མིག་ལྡན་པའི་ལེགས་བཤད་རོར། །ཅི་དགར་(༢ན)
སྤྱོད་པའི་ཕྱག་ལེན་ཕ་མཐའ་ཡས། །ཁྱད་པར་རྡོ་རྗེ་འཆང་དབང་མི་ཡི་གཟུགས། །འཛིན་མཛད་ས་སྐྱའི་རྗེ་བཙུན་རྗེས་འབྲངས་དང་། །བུ་སྟོན་ལོ་ཙཱ་ཀུན་མཁྱེན་བཙོང་ཁ་པ། །སྐལ་བཟང་ཡོངས་ཀྱི་སྤྱི་བོས་བཏུད་བྱའི་གནས། །མཁྱེན་ལྡན་གསང་སྔགས་འཆང་རྣམས་ཧེ་རུ་ཀའི། །གྲོང་ཁྱེར་ཆེན་པོར་བདག་འཇུག་གཞན་ཁྲིད་ཀྱང་། །བློས་བྱས་རྗེས་གནང་བསྐུལ་ནས་རྨོངས་པའི་མགོ །བསྐོར་མཐོང་རྟགས་ཙམ་འཛིན་པའི་སྔོན་འགྲོ་བཞིན། །དེ་ཕྱིར་རྣམ་གཡེང་ཁོལ་པོར་དལ་འབྱོར་རྟེན། །འཛད་པར་འདོད་མིན་གཟུར་གནས་བློ་ལྡན་རྣམས། །ཡང་དག་ལམ་ལ་བཀྲི་ཆེད་དབང་ཆུའི་གཞུང་། །དཔའ་བོའི་གྲོང་ཁྱེར་འཇུག་པའི་སྒོ་འདི་དབྱེ། །དེ་ལ་འདིར་གྲུབ་པའི་དབང་ཕྱུག་རྡོ་རྗེ་དྲིལ་བུ་པའི་བཞེད་སྲོལ་དཔལ་འཁོར་ལོ་བདེ་མཆོག་ཕྱི་དཀྱིལ་ལྷ་ལྔའི་རྡུལ་ཚོན་གྱི་དཀྱིལ་འཁོར་དུ་དབང་བསྐུར་བར་བྱེད་པ་ལ་སའི་ཆོ་ག །སྟ་གོན་གྱི་ཆོ་ག །དངོས་གཞིའི་ཆོ་ག་དང་གསུམ། དང་པོ་ལ་ས་བརྟག་པ། བསླང་བ། སྦྱང་བ། གཟུང་བ་(༢བ)
དང་བཞིའི། དང་པོ་ནི། དགེ་འདུན་གྱི་ཀུན་དགའ་ར་བ་དང་རྒྱལ་པོའི་ཁབ་སོགས་གནས་ཁང་དུལ་མའི་རིགས་ལ་གནས་ཁང་དུ་ལོ་མའི་རིགས་ལ་མི་དགོས་ཤིང་སྔོན་ཆད་ལོངས་མ་སྤྱད་པའི་སར་བྱ་ན་དཀྱིལ་འཁོར་གྱི་ཆོ་ག་དུ་མ་ནས་འབྱུང་བ་ལས་ཤེས་པའི་དབང་དུ་བགྱིས་ནས་མ་སྤྲོས་སོ། གཉིས་པ་ས་བསླང་པ་ལ་སྣང་བ་དང་མི་སྣང་བ་གཉིས་ཀྱི། དང་པོ་ནི། ཁང་པའམ་ཡུལ་གྱི་བདག་པོ་ལ་རིན་བཙལ་ཏེ་བསླང་ངོ་། །གཉིས་པ་མི་སྣང་བ་ལས་བསླང་བ་ནི། དཀྱིལ་འཁོར་གང་དུ་བྱ་བའི་ས་གཞིར། གཏོར་མ་དང་ཆུ་གཉིས་སྔོན་དུ་འགྲོ་བའི་ཉེར་སྤྱོད་སྦྲེང་ཚར་ནང་མཆོད་དང་བཅས་བཤམ། གཏོར་མར་ཆང་ཆུ་ནང་མཆོད་སྤྲོ་ན། རང་ཉིད་སྐད་ཅིག་གིས་ཧེ་རུ་ཀཿ སྔོན་པོ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པ་ཡུམ་རྡོ་རྗེ་ཕག་མོ་དང་མཉམ་པར་སྦྱོར་བའི་སྐུ་ཅན་དུ་བསམ། མཆོད་པ་དང་གཏོར་མ་བྱིན་གྱིས་བརླབ། རྡོ་རྗེ་ཁུ་ཚུར་ལས་གཡོན་པའི་མཐེའུ་ཆུང་གཡས་པའི་མཛུབ་མོས་སྦྲེལ་བ་ལྕགས་ཀྱུའི་ཕྱག་རྒྱ་དང་བཅས། ཀྵེ་ཏྲ་པཱ་ལ་ས་པ་རི་ཝཱ་ར་ཨཱ་ཀརྵྱ་ཡ་ཛ༔ས་སྤྱན་དྲངས་ཞིང་ཕྱོགས་སྐྱོང་འཁོར་བཅས་སྐད་ཅིག་གིས་འོད་གསལ་དུ་ཞུགས། འོད་གསལ་གྱི་ངང་ལས་ཟུང་འཇུག་གི་སྐུ་འཁོར་ལོ་སྡོམ་པའི་ལྷན་ཐབས་དང་ཤེས་རབ་ལྷན་ཅིག་སྐྱེས་པའི་བདག་ཉིད་དུ་བསམ། །རྡོ་རྗེ་ཐལ་མོ་ཁ་ཕྱེ་ནས། ཀྵེ་ཏྲ་པཱ་ལ་ས་པ་རི་ཝཱ་ར་དཾ་བ་ལིཾ་གྲྀཧྞ་མ་མ་ཤནྟིཾ་ཀུ་རུ་སྭཱ་ཧཱ། །ཕྱག་རྒྱ་དང་བཅས་སེ་གོལ་གཏོག་ཅིང་ལན་གསུམ། ཀྵེ་ཏྲ་པཱ་ལས་པ་རི་ཝཱ་ར་ཨརྒྷཾ་ནས་ཤཔྟའི་བར་གྱིས་མཆོད། སྔགས་མཇུག་ཏུ་ཨོཾ་ཨཱཿ(༣ན)
ཧཱུྃ་གིས་ནང་མཆོད་མཐེབ་སྲིན་གྱིས་འཐོར། རྡོར་དྲིལ་སྤོས་བཅས་འཛིན་པས། གང་ཡང་འདིར་གནས་ལྷ་དང་ཀླུ། །གནོད་སྦྱིན་སྲིན་པོ་འམ་ནི་གཞན། །དེ་དག་རྣམས་ལ་ས་འདི་ནི། །བདག་ཞུ་ཁྱེད་ཀྱིས་སྩལ་དུ་གསོལ། ལན་གསུམ་བརྗོད། ཞེས་གསོལ་བཏབ་པས་གནང་བ་བྱིན་ནས་རང་གནས་སུ་གཤེགས་པར་བསམ། གསུམ་པ་སྦྱང་བ་ནི། དཀྱིལ་འཁོར་གྱི་སར་སློབ་དཔོན་ཧེ་རུ་ཀའི་ཆས་དང་ལྡན་པ་ཞལ་ཤར་དུ་ཕྱོགས་ནས་བཞེངས་པའི་ཕྱག་ཏུ་ལས་ཀྱི་རྡོ་རྗེས་རྫས་རྣམས་རིམ་བཞིན་ཕུལ་བ་དང་བསྟུན་སུམྦྷ་བཟླ་ཞིང་དཀྱིལ་འཁོར་བྲི་གཞིར་དབང་ལྡན་ནས་བརྩམས་ཏེ་ཡུངས། ཆུ། ཐལ་བ། བ་བྱུང་། དྲི་བཟང་བདུད་རྩི་དང་བཅས་པ་གཏོར་ཞིང་བྱུགས། ས་གཞིའི་དབུས་སུ་སློབ་དཔོན་སྐྱིལ་ཀྲུང་ས་གནོན་གྱིས་འཁོད་དེ། ས་གནོན་གྱི་ཕྱག་རྒྱ་ས་ལ་རེག་ལ། ཨོཾ་བྷུ་ཁཾ། ས་ནམ་མཁའི་རང་བཞིན་དུ་བསམ། ཧཱུྃ་ལཾ་ཧཱུྃ། ས་རྡོ་རྗེའི་རང་བཞིན་དུ་བསམ་མོ། །བཞི་པ་ས་གཟུང་བ་ལ་བློས་གཟུང་བ་དང་ཆོ་གས་གཟུང་བ་གཉིས་ཀྱི་དང་པོ་ནི། བདག་གིས་སེམས་ཅན་ཐམས་ཅད་ཀྱི་དོན་དུ་སའི་ཕྱོགས་འདིར་བཅོམ་ལྡན་འདས་དཔལ་འཁོར་ལོ་སྡོམ་པའི་དཀྱིལ་འཁོར་ཆེན་པོ་བྲི་བར་བྱའོ། །ཞེས་བརྗོད། གཉིས་པ་ཆོ་གས་གཟུང་བ་ནི། དཀྱིལ་འཁོར་གྱི་སའི་དབུས་སུ་སྔོན་འགྲོ་གཏོར་མ། མཆོད་པ་སོགས་མདུན་དུ་སྟེགས་མཛེས་པར་བཀོད་པ་དང་བཅས་པའི་གདན་བཤམས་པ་ལ་སློབ་དཔོན་དང་། སྒྲུབ་གྲོགས་རྣམས་ཕྱོགས་སོ་སོར་འཁོད། ལས་ཀྱི་རྡོ་རྗེས་གཏོར་མ་(༣བ)
ཆང་ཆུ་ནང་མཆོད་ཀྱིས་རིམ་གྱིས་སྦྱངས་ཏེ་ཕྱག་གསུམ་བཙལ་ནས་ལངས་ཐལ་མོ་འདུད་པ་དང་བཅས། །སྔོན་འགྲོ་གཏོར་མ་བྱིན་རླབས་མཛད་པ་ཞུ། ཞེས་བྱིན་གྱིས་བརླབ། ལྕགས་ཀྱུའི་ཕྱག་རྒྱ་དང་བཅས། ཨོཾ་མ་ཧཱ་བྷཱུ་ཏ་ག་ཎ་ས་པ་རི་ཝཱ་ར་ཨཱ་ཀརྵྱ་ཡ་ཛཿས་སྤྱན་དྲངས། ཕྱོགས་སྐྱོང་འཁོར་བཅས་སྐད་ཅིག་གིས་འོད་གསལ་དུ་ཞུགས་ནས་ལྷན་ཅིག་སྐྱེས་པའི་བདག་ཉིད་དུ་བསམ། རྡོ་རྗེ་ཐལ་མོ་ཁ་ཕྱེ་སྟེ། ཨོཾ་ཁ་ཁ་ཁཱ་ཧི་ཁཱ་ཧཱི་སོགས་ནས། ཡིད་ལ་འདོད་པ་ཀུན་འགྲུབ་ཤོག་གི་བར་སྒྲུབ་ཐབས་བཞིན་བྱ། དཔལ་ལྡན་བླ་མ་དམ་པ་རྣམས་ཀྱི་ཐུགས་དགོངས་རྫོགས་པ་དང་། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་དཔལ་འཁོར་ལོ་སྡོམ་པ་ལྷ་ལྔའི་གོ་འཕང་འཐོབ་པར་བྱ་བའི་ཕྱིར་དུ་དཔལ་འཁོར་ལོ་སྡོམ་པ་ལྷ་ལྔའི་རྡུལ་ཚོན་གྱི་དཀྱིལ་འཁོར་སྒྲུབ་ཅིང་མཆོད་པ་དང་། བདག་ཉིད་འཇུག་ཅིང་དབང་བླང་བར་འཚལ་ན་དཀར་ཕྱོགས་ལ་མངོན་པར་དགའ་བའི་སྲུང་མ་ཁྱད་པར་ཅན་ཁྱེད་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ་བར་ཆད་ཐམས་ཅད་བསྲུང་པ་དང་། དེ་ནས་ཀྱང་བདག་ཅག་རྣལ་འབྱོར་བ་འཁོར་དང་བཅས་པ་བྱང་ཆུབ་མ་ཐོབ་བར་གྱི་བར་ཆད་ཐམས་ཅད་བསྲུང་བ་དང་། བྱང་ཆུབ་སྒྲུབ་པའི་གྲོགས་མཛད་དུ་གསོལ། གང་དག་ནག་པོའི་ཕྱོགས་སུ་གྱུར་བའི་གསང་སྤྱོད་ལྟ་བར་མི་དབང་བའི་བགེགས་དང་ལོག་པར་འདྲེན་པ་ཐམས་ཅད་སའི་ཕྱོགས་འདིར་མ་(༤ན)
གནས་པར་གཞན་དུ་སོང་ཞིག །གཡས་པའི་ཁུ་ཚུར་གྱི་མཐེབ་མཛུབ་ཀྱིས་ཕྱིར་སེ་གོལ་གཏོག་ཅིང་། སརྦ་བིགྷྣཱ་ན་གཙྪ། ཞེས་གཏོར་མ་དོར། སུམྦྷ་བཟླ་ཞིང་རོལ་ཆེན་དྲག་ཏུ་བྱའོ། གནས་ཡོ་བྱིན་རླབས་དང་མཎྜལ་ཞུ་འབུལ་འོག་ནས་འབྱུང་བ་ལྟར་དང་སྐྱབས་འགྲོ་ནས་བཟླས་པའི་བར་རྫོགས་པར་བྱ། མདུན་གྱི་ནམ་མཁར་བཞུགས་པའི་རྒྱལ་བ་སྲས་བཅས་ཐམས་ཅད་ལ་གསོལ་བ་འདེབས་པ་ནི། རྡོར་དྲིལ་སྤོས་བཅས་འཛིན་པས། མ་ལུས་ཕྱོགས་ན་བཞུགས་པ་ཡི། །མགོན་པོ་བདག་ལ་དགོངས་སུ་གསོལ། །རྡོ་རྗེ་འཆང་ཆེན་ཧེ་རུ་ཀའི། །བདག་ནི་དཀྱིལ་འཁོར་འབྲི་བར་བྱེད། །བདག་གིས་བསྒྲུབ་བྱ་བསྒྲུབ་བྱའི་ཕྱིར། །དཀྱིལ་འཁོར་བྱིན་གྱིས་རླབས་ཏུ་གསོལ། ཞེས་ལན་གསུམ་བརྗོད་ལ། བདག་ཉིད་ངོ་བོ་ཉིད་ཀྱིས་དག་པའི་བདེ་མཆོག་གི་གཟུགས་སུ་རྡོར་དྲིལ་འཁྱུད་རྒྱ་དང་བཅས་གནས་པ་ལས། ས་གར་མཛད་ན་སློབ་མ་རྣམས་བཞེངས། སློབ་དཔོན་ས་ན་ཇ་ལའི་སྟེང་དུ་འཁོད་པར་ཕྱོགས་བཞི་ནས་སྒྲུབ་གྲོགས་མཁའ་འགྲོ་མའི་ང་རྒྱལ་འཛིན་པ་རྣམས་ཀྱིས། སློབ་དཔོན་གྱི་ཕྱོགས་བཞིའམ་མདུན་དུ་མཆོད་པ་ཚར་གཅིག་བཤམས། གོང་བཞིན་བརླབ། མཆོད་འཕྲེང་གི་ཚིགས་བཅད་རྣམས་ལ་ཐལ་མོ་སྦྱར་ཨོཾ་སརྦ་བཱི་ར་སོགས་ལ་པད་ཀོར། མཆོད་སྔགས་དང་བསྟུན་པའི་སོ་སོའི་ཕྱག་རྒྱའི་མཐར་སེ་གོལ་གཏོག་པ་ཐམས་ཅད་ལ་འདྲ། འཛམ་བུའི་གླིང་དང་གླིང་གཞན་ན། །མཆོད་ཡོན་ཚོགས་ཀྱིས་བཀང་བ་ཡང་། །བླ་མ་འཁོར་ལོ་སྡོམ་པ་ལ། །ཞུམ་པ་མེད་པར་བྱས་ཏེ་འབུལ། ཨོཾ་སརྦ་བཱི་ར་ཡོ་(༤བ)
གི་ནི་ཨརྒྷཾ་ནས་ཤཔྟའི་བར་འདོན་པ་བསྒྱུར། །ཨེ་མ་ཧོ་མཆོད་པ་བླ་ན་མེད། །རང་བྱུང་མཆོད་པ་ཆེན་པོ་སྟེ། །གཟུགས་ཀྱི་ལྷ་མོ་མེ་ལོང་འཛིན། །གཟུགས་ཀྱི་མཆོད་པ་སྤྱན་ལ་འབུལ། །ཨོཾ་བཛྲ་བཱི་ར་ཡོ་གི་ནི་རཱུ་པ། ཁྱད་པར་གཟུགས་ཀྱི་ལྷ་མོ་མེ་ལོང་གནས་སུ། །སྒྲ་ཡི་ལྷ་མོ་པི་ཝང་། དྲི་ཡི་ལྷ་མོ་དུང་ཆོས། རོ་ཡི་ལྷ་མོ་ཞལ་ཟས། རེག་བྱའི་ལྷ་མོ་ན་བཟའ་ལ་སྔགས་རིམ་པ་བཞིན། སྤར་ཤའི་བར་གྱིས་མཆོད། གཙོ་འཁོར་ལྔའི་སྔགས་མཇུག་ཏུ་འབྲུ་གསུམ་བཏགས་པས་ནང་མཆོད་དབུལ། ཨོཾ་བཅོམ་ལྡན་དཔའ་བོའི་དབང་ཕྱུག་ལ་ཕྱག་འཚལ། བསྐལ་པ་ཆེན་པོའི་མེ་དང་མཉམ་པའི་འོད། །རལ་པའི་ཅོད་པན་མི་བཟད་པ་དང་ལྡན། །མཆེ་བ་རྣམ་པར་གཙིགས་པ་འཇིགས་པའི་ཞལ། །སྟོང་ཕྲག་ཕྱག་ན་འབར་བའི་འོད་ཟེར་ཅན། དགྲ་སྟ་ཞགས་གདེངས་མདུང་དང་ཁ་ཊྭཱཾ་འཛིན། །སྟག་གི་པགས་པའི་ན་བཟའ་འཛིན་པ་ཅན། །སྐུ་ཆེན་དུད་ཁ་བགེགས་མཐར་མཛད་ལ་འདུད། ཧཱུྃ་ཧཱུྃ་ཕཊ། ཅེས་བསྟོད། ཤར་ཕྱོགས་པ་རྣམས་རྡོ་དྲིལ་མཎྜལ་ཐོགས་ཏེ་འདས་ནས་མཎྜལ་ཚོམ་བུ་བདུན་མ་ཁྱད་པར་བླ་མ་དང་། །དཀྱིལ་འཁོར་གྱི་གཙོ་བོ་ཐ་མི་དད་པ་ལ་དབུལ་བར་བགྱིས་ཞེས་གདང་དང་བཅས། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །ལན་གསུམ་འོག་མ་རྣམས་འགྲེ། ཨི་དམ་གུ་རུ་མཎྜལ་ཀཾ་ནིར་ཡ་མི། ཞེས་རྐང་པ་གཡོན་སྔོན་འགྲོའི་གཞི་བཅའ་དང་བཅས་པས་བླ་མ་ལ་མཎྚལ་དབུལ། སློབ་དཔོན་གྱི་མཎྜལ་(༥ན)
གྱི་དབུས་ནས་མེ་ཏོག་ཅུང་ཟད་བླངས་ཏེ་ཨི་དཾ་གུ་རུ་སོགས་བརྗོད་ཅིང་བླ་མ་དཀོན་ཅོག་ལ་འབུལ། མཎྜལ་ཁ་གསོས་ཏེ་རྟེན་གྱི་དྲུང་དུ་འཇོག །དེས་འོག་མ་རྣམས་ལ་འགྲེ། བྱང་ནས། མཎྜལ། མཚན་ཉིད་ཐམས་ཅད་ཡོངས་སུ་རྫོགས། །མཚན་མིན་ཐམས་ཅད་རྣམ་པར་སྤོངས། །ཀུན་ཏུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། ཨི་དཾ་སོགས། ནུབ་ནས། མཎྜལ། ཞི་བའི་ཆོས་ནི་མཆོག་ལས་བྱུང་། །ཡེ་ཤེས་སྤྱོད་པ་རྣམ་སྦྱོང་བ། །ཀུན་ཏུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། ཨི་དཾ་སོགས། ལྷོ་ནས། མཎྜལ། སེམས་ཅན་ཀུན་གྱི་སེམས་ཆེན་པོ། །རང་བཞིན་དག་ཅིང་དྲི་མ་མེད། །ཀུན་ཏུ་བཟང་པོ་ཐུགས་ཀྱི་མཆོག །དཀྱིལ་འཁོར་དམ་པ་བཤད་དུ་གསོལ། ཨི་དཾ་སོགས། སློབ་དཔོན་གཅིག་པུ་ཡིན་ན་སྒྲུབ་གྲོགས་མཁའ་འགྲོ་མའི་ང་རྒྱལ་འཛིན་པ་ཡིད་ཀྱིས་སྤྲུལ་ཞིང་སྤྲོས་པ་ཆུང་བར་འདོད་ན་ཕྱི་ནང་གི་མཆོད་པ་སྔགས་མཆོད། རྐང་བརྒྱད། མཎྜལ་ཚར་གཅིག་གི་མཐར་ཕྱོགས་བཞི་ནས་གསོལ་བ་གདབ་པར་བསམས་ནས་གསོལ་གདབ་ཚར་གསུམ་རེའི་གཤམ་དུ་ཨི་དཾ་གུ་རུ་སོགས་བརྗོད་པས་ཆོག་གོ ། སློབ་དཔོན་བཞེངས་ཏེ་འཁོར་རྣམས་ཀྱང་ཞལ་མཐུན་པར་ཕྱོགས་ནས། ཁྲོ་བོའི་ཁུ་ཚུར་ཁ་གྱེེན་དུ་བསྟན་པའི་མཐེའུ་ཆུང་སྦྲེལ་མཛུབ་རྩེ་སྤྲད་དེ་གྱེན་དུ་འདེགས་པར་རྡོ་རྗེ་སློང་བའི་ཕྱག་རྒྱས། ཧཱུྃ་བཛྲོ་ཏྟིཥྵ། བསྒོམས་པའི་དཀྱིལ་འཁོར་རྟེན་དང་བརྟེན་པར་བཅས་པ་ནམ་མཁར་གནས་པར་བསམ། རང་གཙོ་བོ་(༥བ)
ལས་གཙོ་བོ་གཉིས་པར་ཆད་ནས་སའི་སྟེང་དུ་བབས་ཏེ་མིག་གཉིས་སུ་མ་དང་ཊ་ལས་ཉི་མ་དང་ཟླ་བ། མིག་འབྲས་ཧཱུྃ་ཐུང་ལས་ཁྲོ་བོའི་རྡོ་རྗེ་འབར་བ། རྐང་མཐིལ་གཉིས་སུ་ཨཿལས་སྣ་ཚོགས་རྡོ་རྗེ་འབར་རེ་རེར་བསམ། རྡོ་རྗེ་ཁུ་ཚུར་གཡས་སྟེང་དུ་བཞག་པ་རྒྱབ་སྤྲད་པའི་མཐེའུ་ཆུང་སྦྲེལ་མཛུབ་མོ་གཉིས་བསྒྲེང་བ་རྡོ་རྗེ་ཧཱུྃ་མཛད་ཀྱི་ཕྱག་རྒྱ་ཐུགས་ཀར་བཅས་ཏེ། ཉོན་མོངས་པ་ལ་ཁྲོས་པའི་བསམ་པས་ཁྲོ་བའི་ལྟ་བས་བལྟ་ཞིང་། ཀྲོ་དྷ་དྲྀཥྚི་ཧཱིཿཧཱིཿ ལན་གཉིས་དབང་ལྡན་ནས་བརྩམས་ནས་གཡོན་སྐོར་དང་གཡས་སྐོར་དུ་བལྟས་པས་བགེགས་ཐམས་ཅད་ཚིག་ཅིང་བྲོས་པར་བསམ། རྡོ་རྗེའི་འགྲོས་སམ་ཧཱུྃ་ཞེས་པ་ཙམ་གྱིས་དབང་ལྡན་དུ་སོང་སྟེ། འཁྱུད་རྒྱ་ལ་གནས་པའི་གདངས་དང་བཅས། །ཨོཾ་ཨཱཿཧཱུྃ། ལུས་ངག་སེམས་ལ་གནས་པ་ཡི། །བགེགས་ཀྱི་ཚོགས་ཀུན་ང་ལ་ཉོན། །ང་ནི་དཔལ་ལྡན་རྡོ་རྗེ་འཆང་། སྲུང་བའི་འཁོར་ལོ་རབ་སྦྱོར་བྱེད། །རྡོ་རྗེ་འབར་བའི་གཟུགས་ཀྱིས་ནི། །ལུས་གསུམ་ལས་སྐྱེས་དག་པར་བྱ། །གལ་ཏེ་ང་ལས་བཀའ་འདས་ན། །འདི་དག་བཤིག་བྱ་གཞན་དུ་མིན། རྡོ་རྗེའི་གནས་སུ། འཁོར་ལོ། རིན་ཆེན། པདྨ། རལ་གྲི་རྣམས་འདོན་པ་བསྒྱུར་མཐར། སུམྦྷ་བཟླ་ཞིང་དལ་མོ་དྲག་པོ་དང་ཡུངས་ཀར་གྱིས་བྲབ། གུ་གུལ་གྱིས་བདུག་གོ །སྐབས་འདིར་གུར་རམ་འཕྲེང་བ་ལྟ་བུ་ནས་བླངས་ཏེ་ས་གར་རྒྱས་བསྡུས་ཅི་རིགས་དང་མི་སྤྲོ་ན། ཤར་དུ་གཡོན་བརྐྱང་། བྱང་དུ་གཡས་བརྐྱང་། ནུབ་ཏུ་ས་ག །ལྷོར་ཟླུམ་པོ། དབུས་སུ་མཉམ་པ། ཁ་སྦྱོར། རུས་སྦལ། རྩེ་གཅིག །བུང་བའི་དྲ་བ་སྟེ་སྟང་སྟབས་བརྒྱད་(༦ན)
བྱ། རྡོ་རྗེའི་འགྲོས་ཀྱིས་དབང་ལྡན་དུ་སོང་སྟེ། མ་འགྲུབ་ན། ཧཱུྃ། ཞེས་དཀྱིལ་འཁོར་གྱི་ས་གཞི་ལ་གཡོན་དུ་སྐོར་བ་གཅིག་བྱ། རྡོ་རྗེའི་ས་གཞི་དང་ར་གུར་དང་མེ་རིས་འཁོར་བར་བསམ། སྣོད་འབྲུས་བཀང་བར་སེང་ལྡེང་ཕུར་པ་བཅུ་བཙུགས་པ། ཁཎྚ་རོ་ཧེས་བསངས། སྭཱ་བྷཱ་ཝས་སྟོང་པར་བསམ། སྟོང་པའི་ངང་ལས། གཡས་སྐོར་གཡོན་སྐོར་དུ་སེ་གོལ་གཏོག་ཅིང་སུམྦྷ་ལན་གཉིས་བཟླ། ཞེས་བརྗོད་ཅིང་སྤྲོ་བ་དང་མཉམ་དུ་ཧཱུྃ་ལས་ཕུར་བ་བཅུར་གྱུར་པ་ནི་ཤར་དང་སྟེང་དུ་ཁྭ་གདོང་མ། ཞེས་པ་ནས། དེའི་ཕྱི་རོལ་དུ་རྡོ་རྗེའི་མེ་བསྐལ་པ་འཇིག་པའི་མེ་དཔུང་ལྟ་བུར་བསམ་པའི་བར་སྒྲུབ་ཐབས་བཞིན་ལ་ཁྱད་པར་སྒོ་མཚམས་མ་རྣམས་རྡོ་རྗེའི་ར་བ་ལ་ཐིམ་པས་ཞེས་པའི་ཚབ་ཏུ་ཕུར་བུ་ལ། ཞེས་བསྒྱུར་རོ། །གཉིས་པ་སྟ་གོན་ལ་ས་ལྷ། བུམ་པ། ལྷ། སློབ་མ་སྟ་གོན་དང་བཞིའི། དང་པོ་ནི། ས་གཞིའི་དབུས་སུ་དྲིའི་ཐིག་ལེ་དང་མེ་ཏོག་གི་ཚོམ་བུ་མཆོད་པ་དང་བཅས་པ་བཤམ། ཁཎྜ་རོས་བསངས། སྭ་བྷཱ་ཝས་སྟོང་པར་བསམ། སྟོང་པའི་ངང་ལས་པཾ་ལས་པདྨ་དཀར་པོའི་ལྟེ་བར་བཾ་ལས་མའི་ལྷ་མོ་དགའ་བ་དང་ལྡན་པའི་ཐུགས་ཅན། སེར་མོ་ན་བཟའ་དཀར་པོ་ཅན། རྒྱན་སྣ་ཚོགས་ཀྱིས་བརྒྱན་པ། གཡས་མི་འཇིགས་པ་སྤྱིན་པ། གཡོན་གསེར་གྱི་བུམ་པ་བསྣམས་པ། །རང་གི་ལག་པ་གཡས་སུ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་ཧཱུྃ་ཧཱུྃ། གཡས་པའི་མཐེ་བོས་མཐེའུ་ཆུང་མནན་པ། རྩེ་གསུམ་གྱི་ཕྱག་རྒྱ་ས་གནོན་གྱི་ཚུལ་དུ་ས་ལ་ལན་གསུམ་གདབ། ཊཀྐི་ན(༦བ)
ཧཱུྃ་ཧཾ༔ཨོཾ་ཧཾཿ དེའི་སྒྲ་དང་ཧཱུྃ་གི་འོད་ཟེར་གྱིས་བཀུག་པའི་ལྷ་མོ་ཡེ་ཤེས་པ་ཕཻཾ་ཕྱག་རྒྱ་བཅས་ལ། བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བཾ་ཧོཿས་བསྟིམ། དེའི་དཔྲལ་བར་ཨོཾ། །མགྲིན་པར་ཨཱཿ ཐུགས་ཀར་ཧཱུྃ། རང་གི་ཐུགས་ཀའི་འོད་ཟེར་གྱིས་སྤྱན་དྲངས་པའི་དབང་གི་ལྷས། ཨོཾ་བཛྲ་ཨ་བྷི་ཥཉྩ་མི། ཞེས་དབང་བསྐུར། སྐུ་གང་། དྲི་མ་དག །ཆུ་ལྷག་མ་ཡར་ལུད་པ་ལས་རྣམ་སྣང་གིས་དབུ་བརྒྱན་པར་བསམ། མཆོད་པ་བསངས་སྦྱངས་སྟོང་པར་བསམ། སྟོང་པའི་ངང་ལས་མཆོད་པའི་ཁྱད་པར་སའི་ལྷ་མོའི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཐལ་མོ་ཁོང་སྟོང་ཚིགས་བར་པ་བཅུག་པ་སྙིང་ག་ནས་རིམ་གྱིས་གཡོན་སྐོར་དུ་བཏེག་པ་མཐར་དཔྲལ་བར་འགྲོལ་ཞིང་སེ་གོལ་གཏོག་པ། །ནམ་མཁའ་མཛོད་ཀྱི་ཕྱག་རྒྱ་དང་སྔགས་བརྗོད། །ཨོཾ་པྲྀ་ཐི་ཝཱི་དེ་བྱཻ་ཨརྒྷཾ་ནས་ཤཔྟའི་བར་གྱིས་མཆོད། མགོན་པོ་བདག་གིས་ཅི་ཞིག་བགྱིད། །རྡོ་རྗེ་འཛིན་བཀའ་བདག་ལ་གསོལ། ཁྱེད་ཀྱི་བཀའ་ཡི་དོན་དུ་ནི། །བདག་ནི་བུམ་པ་འཛིན་པའོ། །ཞེས་བཀའ་ནོད་པ་ལ། །རྡོ་དྲིལ་སྤྲོས་བཅད་འཛིན་པས་སྐྱོབ་པ་སངས་རྒྱས་ཐམས་ཅད་ཀྱི། སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དབང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམས་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱ་ཕྱིར་དཀྱིལ་འཁོར་བྲི། ལན་གསུམ། ཞེས་གསོལ་བ་བཏབ་པས་ལྷ་མོ་དེ་མཉེས་ཏེ་གནང་བ་བྱིན་ནས་ས་དེ་ཉིད་ལ་ཐིམ་པར་བསམ། །རྡོར་བསྡམས་ནང་བཅིང་ས་དེར་རེག་ཅིང་། ཨོཾ་བཛྲི་བྷ་(༧ན)
ཝ་ཧཱུྃ། ལན་གསུམ། ས་གཞི་རྡོ་རྗེའི་རང་བཞིན་དུ་བསམ། ཨོཾ་བཛྲ་དྲྀ་ཌྷ་ཏིཥྠ། ལན་གསུམ། ས་རྡོ་རྗེའི་རང་བཞིན་དུ་བརྟན་པར་བསམ་མོ། །གཉིས་པ་བུམ་པ་སྟ་གོན་ནི། རྡོ་རྗེ་མཁའ་འགྲོ་ལས། །ཇི་ལྟར་རང་གི་མཚན་མ་ཡི། །མཚན་མ་དེ་དག་ཐམས་ཅད་ལ། །དེ་ལ་སྔགས་ནི་མངོན་པར་བསྔགས། །རང་རང་གི་ནི་སྣ་ཚོགས་སྤྲས། །གོས་བཟང་རྣམས་ཀྱིས་མགྲིན་པར་བཅིངས། ཁ་ནི་ལོ་མ་ཟུང་གིས་བཀབ། །ཀུ་ཤའི་ཆུན་པོ་འོག་ཏུ་སྦྱར། །ཚོན་གྱི་སྐུད་པས་རྣམ་པར་སྤྲས། །འཁོར་ལོའི་དབུས་སུ་བཞག་བྱ་སྟེ། །ཡང་དག་མཆོད་པའི་ཆོ་ག་ནི། །བདུག་པ་ཕུལ་ནས་ལྷག་གནས་བྱ། ཞེས་གསུངས་པ་ལྟར་རྣམ་རྒྱལ་བུམ་པའི་ཕྱོགས་བཞིར་མཁའ་འགྲོ་མ་བཞིའི་ཁ་དོག་དང་མཚུངས་པའི་གྲི་གུག་གི་ཡུ་བ་བྱས་པ། ཤར་གྱི་མཚན་མའི་སྟེང་དུ་གཙོ་བོའི་མཚན་མ་རྡོ་རྗེ་སྔོན་པོ། ལས་བུམ་ལ་གྲི་གུག་གི་ཡུ་བ་དམར་པོ་བྲིས་པའམ་འབུར་དུ་བྱས་པ་གདགས། མགྲིན་པར་རས་བཟང་པོའི་ཆིངས་སྲོག་བདུན་ལྡན་གྱིས་དཀྲིས། སུམྦྷ་བཟླས་ཏེ་ཡུངས་ཀར་བརྡེག །གུ་གུལ་གྱིས་བདུག །བུམ་རྫས་ཉེར་ལྔ་དང་བདུད་རྩི་ལྔ་བླུག །ཆུ་གཙང་མས་སུམ་གཉིས་དགང་། ཀུ་ཤས་ཁ་བརྒྱན། སྟེང་དུ་དུང་ཆོས་དང་གཟུངས་རྡོར་བཞག་ལ། བུམ་པ་གཉིས། ཁཎྜ་རོ་ཧེས་བསངས། སྭ་བྷཱ་ཝས་སྟོང་པར་བསམ། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བཾ་བཾ་ལས་བྱུང་བའི་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པ། ལྟོ་བ་ཡངས་པ། མཆུ་འཕྱང་པ། མགྲིན་པ་རིང་བ་(༧བ)
ཁ་ཁྱེར་དང་ལྡན་པ། རྩ་བ་དང་ནག་པོ་མེད་པ་མགྲིན་པར་རས་དཀར་པོ་ཟུང་གིས་དཀྲིས་པའི་བྲོ་བ་བདུན་ལྡན་བྱུ་རུ་དང་བཅས་པའི་ཁ་དོག་ལྔའི་སྲད་བུས་དཀྲིས་པ་མཚན་ཉིད་དང་ལྡན་པ་དེ་དག་གི་ནང་དུ་ཨོཾ་ཏཱཔྟེ་ཏཱཔྟེ་མ་ཧཱ་ཏཱ་པྟེ་སྭཱ་ཧཱ། ལྷའི་ཆུ་ཡན་ལག་བརྒྱད་དང་ལྡན་པ་དང་། རིན་པོ་ཆེ་ལྔ། སྨན་ལྔ། འབྲུ་ལྔ། དྲི་ལྔ། སྙིང་པོ་ལྔ། བདུད་རྩི་ལྔ་རྣམས་ཀྱིས་ཡོངས་སུ་གང་ཞིང་། ཨོཾ་ཀལྤ་བྲྀཀྵཱ་ཡེ་སྭཱ་ཧཱ། དཔག་བསམ་གྱི་ཤིང་གིས་ཁ་བརྒྱན་པར་བསམ། རྣམ་རྒྱལ་བུམ་པའི་སྟེང་གི་དུང་ཆོས་ཀྱི་ཆུ་ལ། ཨོཾ་བཛྲ་ཨ་མྲྀ་ཏ་ཨུ་ད་ཀ་ཥྭ་ཧཱུྃ། ལན་བདུན། དུང་ཆོས་ཀྱི་ཆུ་རྡོ་རྗེ་བདུད་རྩིའི་ཆུར་བསམ། དེ་རྣམས་ཕྱི་བུམ་པ་དང་དུང་ཆོས་ཀྱི་རྣམ་པ་ལ་ནང་བྷྲཱུཾ་ལས་གཞལ་ཡས་ཁང་གྲུ་བཞི་པ་ནས་གྲི་གུག་གི་འཕྲེང་བས་བསྐོར་བ། རྣམ་རྒྱལ་དང་རྣམ་རྒྱལ་ཆེན་པོའི་པདྨའི་ལྟེ་བར་དུས་མཚན་དང་ནས། ཟླ་བའི་གདན་རེ་རེ། ལས་བུམ་གྱི་ལྟེ་བར་རོ་དང་ཉི་མའི་གདན། རྣམ་རྒྱལ་དང་རྣམ་རྒྱལ་ཆེན་པོའི་ལྟེ་བར་ཨ་ཨཱ་ནས། མཉམ་ཉིད་ཡེ་ཤེས་དེའི་སྟེང་དུ་ཧཱུྃ་ལས་རྡོ་རྗེ་དཀར་པོ་ཞེས་པ་ནས། ཁ་བརྒྱན་པའོ། །ལས་བུམ་དུ་པདྨ་ཉི་མ་མི་རོའི་སྟེང་དུ་པཾ་དང་གྲི་གུག་ལས་སྐྱེས་པའི་དུམ་སྐྱེས་མ་དམར་མོ་ཞལ་གཅིག་ཕྱག་བཞི་མ་གཡས་གཉིས་གྲི་གུག་དང་ཌཱ་མ་རུ་གཡོན་གཉིས་ཐོད་པ་ཁྲག་གིས་གང་བ་དང་ཁ་ཊྭཱཾ་ག་བསྣམས་པ། གཡས་བརྐྱང་གིས་ཡེ་ཤེས་ཀྱི་མེ་འབར་བའི་ཀློང་ན་བཞུགས་པར་བསམ། བུམ་པའི་མཚན་མ་རྣམས་ཀྱང་ལྷ་སོ་སོའི་སྐུར་བསམ། ལྷ་ཐམས་ཅད་ཀྱི་མིག་ནས་རྒྱས་གདབ་ཀྱི་རྗེས་སུ་བརླབ། ཕྱི་མཆོད་ནས། དེ་(༨ན)
ཁོ་ན་ཉིད་ཀྱི་མཆོད་པའི་བར་སྒྲུབ་ཐབས་བཞིན་ལ། སྤྲོ་ན་མཆོད་འཕྲེང་ཚིགས་བཅད་མ་དང་མི་བསྐྱོད་རྡོ་རྗེ་སོགས་ཀྱིས་ཕྱག་རྒྱ་དང་བཅས་བསྟོད་ཀྱང་རུང་ལས་ཀྱི་རྡོ་རྗེས་བུམ་པ་ལ་ཕྱག་གསུམ་བཙལ་ཏེ་པད་ཀོར་དང་བཅས་མེ་ཏོག་འབུལ། སློབ་དཔོན་གྱིས་པད་ཀོར་སྔོན་དུ་འགྲོ་བས་གཟུངས་ཐག་བླངས་ནས། གཡོན་གྱིས་བཟུང་གཡས་ཀྱི་མིང་མེད་ཀྱི་སྟེང་དུ་འཕྲེང་བ་འཛིན་པས། བདག་གི་ཐུགས་ཀ་ནས་སྔགས་ཀྱི་འཕྲེང་བ་གཟུངས་ཐག་ལ་འཁྲིལ་ཏེ་སོང་བ་ལྷ་རྣམས་ཀྱི་སྐུ་ལ་ཕོག་པས་བ་སྤུའི་བུ་ག་ནས་བདུད་རྩིའི་ཆུ་རྒྱུན་བབས་པས་རྣམ་རྒྱལ་དང་རྣམ་རྒྱལ་ཆེན་པོ་ལས་བུམ་དང་བཅས་པ་ཡོངས་སུ་གང་བར་བསམ། རྣམ་རྒྱལ་གཉིས་ལ་ལྷ་སོ་སོའི་སྔགས་དང་ལས་བུམ་དང་མཆོད་ཡོན་གྱི་དུང་ཆོས་རྫས་བདུན་ལྡན་ལ་ཁཎྜ་རོ་ཧེ་བཟླ། ལས་ཀྱི་རྡོ་རྗེས་སློབ་དཔོན་ལ་ཕྱག་གསུམ་བཙལ་ཏེ་པད་ཀོར་སྔོན་དུ་སོང་བའི་སྙིམ་པར་སློབ་དཔོན་གྱི་མེ་ཏོག་དང་བཅས་པའི་གཟུངས་ཐག་གནང་བ་བསྡུ་ཞིང་རྣམ་རྒྱལ་གཉིས་དང་ལས་བུམ་ལ་སླར་ཡང་གོང་བཞིན་མཆོད་ཅིང་བསྟོད་ལ། བཅོམ་ལྡན་འདས་བུམ་པའི་ལྷ་ཚོགས་ཁྱེད་རྣམས་ཀྱིས་བདག་སོགས་རྣམས་ལ་མངོན་པར་དབང་བསྐུར་བ་དང་དཀྱིལ་འཁོར་གྱི་བྱ་བ་མཐར་མ་ཕྱིན་གྱི་བར་དུ་བགེགས་ཐམས་ཅད་བཟློག་པའི་འཕྲིན་ལས་མཛད་དུ་གསོལ་ཞེས་འདོད་དོན་ལ་གསོལ་བ་གདབ། ཡིག་བརྒྱ་དང་མ་འབྱོར་བ་དང་ཞེས་སོགས་ཀྱི་རྗེས་སུ་པད་ཀོར་གྱིས་མཆོད་ཡོན་རྣམ་རྒྱལ་ཆེ་ཆུང་དང་ལས་བུམ་དུ་ཨོཾ་བཛྲ་ཨརྒྷཾ་ཨཱཿཧཱུྃ། མཆོད་ཡོན་ཕུལ་པའི་རྐྱེན་གྱིས་ལྷ་རྣམས་ཆགས་པ་ཆེན་པོའི་མེས་ཞུ། (༨བ)
བྱང་ཆུབ་ཀྱི་སེམས་ཀྱི་ཆུར་བསམ། གཞལ་ཡས་ཁང་འོད་དུ་ཞུ་ནས་བུམ་པ་དང་དུང་ཆོས་ཀྱི་རྣམ་པར་བསམ་མོ། །རྣམ་རྒྱལ་ཆེ་ཆུང་གཉིས་ནས་ཀུ་ཤས་བླངས་ཏེ་ལས་བུམ་ལ་བླུག །ལས་བུམ་ནས་ཀུ་ཤས་རྣམ་རྒྱལ་ཆེ་ཆུང་གཉིས་ཀ་ལ་ལྡུགས། འཇུག་པ་བདེ་བར་འདོད་ན་མཆོད་པ་མན་ཆད་ལྷ་སྟ་གོན་དང་ཕྱོགས་གཅིག་ཏུ་མཛད་པའང་སྣང་ངོ་། །གསུམ་པ་ལྷ་སྟ་གོན་ལ་ལྷ་གནས་མི་འཆོལ་པའི་ཆེད་དུ་ལས་ཐིག་གདབ་ཅིང་ཆོ་གར་མི་གཏོགས་པའི་གཤོམས། ཆོ་ག་དངོས། གསོལ་བ་གདབ་དང་གསུམ་གྱི། དང་པོ་ནི། གནས་ཁང་ཕྱག་བདར་དང་གནམ་ས་བར་གསུམ་གྱི་རྒྱན་བཀོད་པས་མཛེས་པར་བྱེད་ཅིང་གང་དུ་བྱ་བའི་ས་དེར་དཀྱིལ་འཁོར་སྒོ་རྐྱང་། ནང་པདྨ་འདབ་བརྒྱད། རྟ་བབས་སྣམ་བུ་བཞི། ཕྱི་པད་ར། རྡོར་ར། མེ་རི། དུར་ཁྲོད་དང་བཅས་པ་སྤྱི་འགྲོ་ལྟར་གདབ། དེ་དག་གི་མཐའ་ཕྱི་རོལ་དུར་ཁྲོད་ཀྱི་ཐོད་ཙམ་ནས་བྱང་ཤར་དུ་མཚམས་འཛིན་གྱི་མེ་ཏོག །བྱང་དུ་མཆོད་ཡོན། ནུབ་བྱང་དུ་ཞབས་བསིལ། ནུབ་ཏུ་མེ་ཏོག ལྷོ་ནུབ་ཏུ་བདུག་སྤོས། ལྷོར་མར་མེ། ཤར་ལྷོར་དྲི་ཆབ། ཤར་དུ་ལྷ་བཤོས་རྣམས་གྲུ་བཞིར་བཤམ་པ་ནི་སྤྱི་མཆོད། དེའི་ནང་འདོད་སྣམ་གྱི་ཐོད་ཙམ་ནང་གི་ཤར་གྱི་མཆོད་པ་ནི་ཡབ། ནུབ་ནི་ཡུམ། ཤར་གྱི་ཕྱི་མ་ལ་ནི་མཁའ་འགྲོ་མ་ཡིན་པས། ལྷ་སོ་སོའི་གཡས་སུ་ཞལ་ཟས། མདུན་དུ་མར་མེ། གཡོན་དུ་སྤོས། རྩ་ཐིག་གི་བྱང་ཤར་དུ་སྔོན་འགྲོ་གཏོར་མ། དེ་དག་གི་མདུན་ངོས་དབང་ལྡན་ནས་བརྩམས་ཏེ་ཉེར་སྤྱོད་སྦྲེང་ཚར་དུ་ལས་ཐམས་ཅད་པའི་མཆོད་པ། བྱང་ཤར་དུ་འདས་གཏོར། མེར་འཇིག་རྟེན་པའི་གཏོར་མ་འཇོག །རྒྱས་པར་སྤྲོ་(༩ན)
ན་སྒོས་ཀྱི་ཆོས་སྐྱོང་རྣམས་པ་བདུན་ཚར་དུ་བཤམ། སློབ་མའི་གྲངས་དང་མཐུན་པའི་སོ་ཤིང་། ཀུ་ཤ །སྲུང་སྐུད། ཁྱོར་ཆུའི་དུང་ཕོར། ཉེར་སྤྱོད། ཀུ་ཤའི་འཐོར་ཡབ། དྲིའི་ལྡེ་གུ །ཞུ་འབུལ་གྱི་ཆས། མཎྜལ། མེ་ཏོག །སྤོས་རེང་སོགས་མཁོ་བའི་རྫས་དང་ཡོ་བྱད་ཐམས་ཅད་མངོན་པར་འདུ་བགྱིས། སློབ་དཔོན་གྱི་སྐུ་མདུན་དུ་བུམ་པ་གཉིས་རྡོར་དྲིལ་ནང་མཆོད་འཐོར་ནས་གོས་ཟུངས་དང་། སློབ་མ་རྣམས་ཀྱི་མདུན་དུ་རྡོར་དྲིལ། གོས་ཟུངས། ནང་མཆོད་ཀྱི་ཀ་པཱ་ལ་རྣམས་གཡོན་ནས་རིམ་པ་བཞིན་བཤམ་མོ། །གཉིས་པ་ལྷག་པར་གནས་པའི་ཆོ་ག་ལ་སྔོན་འགྲོ་དང་དངོས་གཞི་གཉིས་ཀྱི་དང་པོ་ནི། ལས་ཀྱི་རྡོ་རྗེས་མཉྫིའི་སྟེང་དུ་སྔོན་འགྲོ་གཏོར་མ་བཞག་ལ་ཆང་ཆུ་ནང་མཆོད་ཀྱིས་སྦྱངས་ཏེ། དཀྱིལ་འཁོར་ཆེན་པོ་སྒྲུབ་ཅིང་མཆོད་པ་སྔོན་དུ་འགྲོ་བའི་གཏོར་མ་བསང་སྦྱང་བྱིན་རླབས་མཛད་ནས་འབུལ་བ་ཞུ། ཞེས་བརྗོད། སྒྲུབ་པ་པོ་རྣམས་ཀྱིས་རྡོ་རྗེས་ནང་མཆོད་འཐོར་པའི་ཚུལ་བྱས་ནས་སྔོན་འགྲོ་གཏོར་མ་སྒྲུབ་ཐབས་བཞིན་འབུལ། ནང་མཆོད་འཐོར་བ་དང་ཁཎྜ་རོ་ཧིས་བསངས། སྭ་བྷཱ་ཝས་སྟོང་པར་བསམ། སྟོང་པའི་ངང་ལས་གནས་ཁང་ཧཱུྃ་ལས་རིན་པོ་ཆེ་ལས་གྲུབ་པའི་གཞལ་ཡས་ཁང་གྲུ་བཞི་པ་སྒོ་བཞི་པ། རྟ་བབས་བཞིས་མཛེས་པ། རྒྱན་ཐམས་ཅད་ཀྱིས་བརྒྱན་པ་མཚན་ཉིན་ཐམས་ཅད་ཡོངས་སུ་རྫོགས་པའི་ནང་དུ་ཧཱུྃ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་ཞུ་བ་ལས་བྱུང་པའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དྭངས་(༩བ)
ཤིང་ཐོགས་པ་མེད་པ་བཟང་ཞིང་རྒྱ་ཆེ་བ། འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པར་བསམ། སོ་སོའི་ཕྱག་རྒྱ་དང་བཅས་ཨོཾ་ཨརྒྷཾ་ཨཱཿཧཱུྃ་ནས་ཤཔྟའི་མཐར་གྷཎྜེ་ར་ཎི་ཚར་གསུམ་གྱིས་བྱིན་དབབ། ལྷའི་རྣལ་འབྱོར་ལ་གནས་པར་གསོལ་བ་གདབ་པ་ནི། ཕྱག་གསུམ་བཙལ་ནས་མཎྜལ་བཤམ། གསུམ་བཙལ་ནས་མེ་ཏོག་དགྲམ། གསུམ་བཙལ་ནས་ཞུ་འབུལ་བྱ། གསུམ་བཙལ་ནས་མེ་ཏོག་བསྡུ། གསུམ་བཙལ་ནས་མཎྜལ་དབུལ། གསུམ་བཙལ་ནས་གྲལ་ལ་འདུག །ཅེས་སྡོམ་ཚིག་ཏུ་བྱུང་བ་ལྟར་ལས་ཀྱི་རྡོ་རྗེས་མཎྜལ་མེ་ཏོག་དྲི་བཟང་གི་ཆུ་དང་བཅས་པ་གྲལ་གཤམ་དུ་ཁྱེར་ལ་ཕྱག་གསུམ་བཙལ་ནས། ཨོཾ་བཛྲ་བྷཱུ་མི་ཨཱཿཧཱུྃ། གཞི་དབང་ཆེན་དག་པ་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུྃ། ཕྱི་ལྕགས་རི་ཁོར་ཡུག་མུ་ཁྱུད་ཀྱིས་བསྐོར་བའི་དབུས་སུ་ཧཱུྃ་རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང་། ནུབ་བ་ལང་སྤྱོད། བྱང་སྒྲ་མི་སྙན། ཉི་མ། ཟླ་བ། དབུས་སུ་ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་འདི་ཉིད། དུས་གསུམ་སངས་རྒྱས་ཐམས་ཅད་ཀྱི་ངོ་བོ་དཔལ་ལྡན་བླ་མ་དམ་པས་གཙོ་མཛད། འདིར་འདུས་པའི་རིག་པ་འཛིན་པའི་དགེ་འདུན་རྣམས་ལ་རིམ་པ་གཉིས་ཀྱི་ཏིང་ངེ་འཛིན་ལ་གནས་པར་ཞུ་བའི་ཡོན་དུ་དབུལ་བར་བགྱིའོ། །ཞེས་སོགས་བརྗོད་ལ་དབུལ། ཕྱག་གསུམ་བཙལ་ལ་བླ་མའི་ཕྱག་ཏུ་མེ་ཏོག་གིས་གང་བའི་ཏིང་ཕོར་རེང་བུ་བཙུགས་པ་དབུལ། གཞན་རྣམས་ལ་གཡོན་སྐོར་དུ་མེ་ཏོག་སིལ་མ་དགྲམ། ཡང་སྔར་གྱི་ཤུལ་ནས་ཕྱག་གསུམ་བཙལ་སྙིམ་པ་(༡༠ན)
མེ་ཏོག་དང་བཅས་འགྲེངས་ཏེ་ཅུང་ཟད་འདུད་པས་ངག་ཏུ། ཀུན་བཟང་རྣམ་འཕྲུལ་མཆོད་པའི་སྤྲིན་ཕུང་གིས། །མཁའ་འགྲོ་ལྔ་ཡི་ཚོགས་རྣམས་མཆོད་པ་དང་། །ཡོན་བདག་བགེགས་ཞི་ཚོགས་གཉིས་གསག་བྱའི་ཕྱིར། །གཉིས་མེད་ཏིང་འཛིན་དག་ལ་གནས་པར་མཛོད། ཅེས་མེ་ཏོག་འཐོར་ཙམ་དང་བཅས་ལན་གསུམ་བརྗོད། །ཕྱག་གསུམ་བཙལ་ལ་བླ་མ་མ་གཏོགས་པའི་གཞན་རྣམས་ཀྱི་མེ་ཏོག་གཡས་སྐོར་གྱིས་བསྡུ། ཕྱག་གསུམ་བཙལ་ལ། ཀུན་གྱི་ཐུན་མོང་དུ་མཎྜལ་འབུལ་བར་ཞུ། ཞེས་བརྗོད་པས་ཚོགས་པ་ཐམས་ཅད་ཀྱིས་མཎྜལ་ཚོམ་བུ་བདུན་པ་ཁྱད་པར། མ་ཚང་བ་མེད་པ་འདི་ཉིད་དུས་གསུམ་སངས་རྒྱས་ཐམས་ཅད་ཀྱི་ངོ་བོ་དཔལ་ལྡན་བླ་མ་དམ་པ་ལ་ཚོགས་ཀྱི་རྡོ་རྗེ་སློབ་དཔོན་ཞུ་བའི་ཡོན་དུ་དབུལ་བར་བགྱིའོ། །ཞེས་སོགས་མཎྜལ་མེ་ཏོག་གིས་ཕྱུར་བུར་བཀང་བ་དེ་ཉིད་བླ་མའི་དྲུང་དུ་ཕུལ་བས་བླ་མས་ཀྱང་སྔར་གྱི་ཚོམ་བུ་རྣམས་ཁ་གསོ་བའི་ཚུལ་གྱིས་ཁྱད་པར། མ་ཚང་བ་མེད་པའི་འདི་ཉིད་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་རྣམས་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བདག་ཅག་རྣམས་ཀྱི་རྒྱུད་བྱིན་གྱིས་བརླབ་པ་དང་། ཆོ་གའི་སྐབས་དབྱེ་བར་མཛད་དུ་གསོལ། ཞེས་བརྗོད་ནས་མེ་ཏོག་གི་སྙེད་རེང་བུ་དང་བཅས་པ་མཎྜལ་གྱི་སྟེང་དུ་བཞག་སྟེ་བླ་མའི་སྐུ་བརྙན་ལ་སོགས་པའི་དྲུང་ངམ་དཀྱིལ་འཁོར་གྱི་མདུན་དུ་དབུལ་ལོ། དེ་ནས་ལས་ཀྱི་རྡོ་རྗེས་ཕྱག་གསུམ་(༡༠བ)
བཙལ་ཏེ་རང་གནས་སུ་འཁོད་དོ། །བདག་གི་རྣལ་འབྱོར་ནི། བླ་མས་སེམས་ཅན་དོན་དུ་སེམས་དགེ་བས། །རྣལ་འབྱོར་པ་ཡི་ཚོགས་བཅས་རྣམས། །ཚུལ་བཞིན་ཆོ་ག་ལ་གནས་པའི། །རྣལ་འབྱོར་ལ་ནི་ཉེར་གནས་མཛོད། །བཤགས་པ་དང་སྡོམ་པ་སྔོན་དུ་འགྲོ་བ་ཅན་གྱི་ལྷའི་རྣལ་འབྱོར་ལ་གནས་པ་ཞུ། ཞེས་བསྐུལ་ཏེ། སྐྱབས་འགྲོ་ནས་བཟུང་བཟླས་པའི་བར་སྒྲུབ་ཐབས་བཞིན་བརྗོད། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་དང་བཅས་པ་རྣམས་ཀྱིས་བདག་དང་སེམས་ཐམས་ཅད་ལ་བྱིན་གྱིས་བརླབ་ཏུ་གསོལ། ཕྱག་རྒྱ་ཆེན་པོ་མཆོག་གི་དངོས་གྲུབ་དཔལ་འཁོར་ལོ་སྡོམ་པའི་གོ་འཕང་ཚེ་འདི་ཉིད་ལ་ཐོབ་པར་མཛད་དུ་གསོལ། །ཞེས་འདོད་དོན་ལ་གསོལ་བ་གདབ། ཉེར་བསྡུ་བྱས་ཏེ་རང་ཧེ་རུ་ཀཿཞལ་གཅིག་ཕྱག་གཉིས་པའི་ང་རྒྱལ་ལ་གནས་པས། གཉིས་པ་སྟ་གོན་དངོས་ལ་མདུན་གྱི་མཎྜལ་བསངས་སྦྱངས། སྟོང་པར་བསམ། སྟོང་པའི་ངང་ལས་རི་རབ་ཀྱི་སྟེང་དུ་པཾ་ལས་སྣ་ཚོགས་པདྨའི་ལྟེ་བར་ཨོཾ་ལས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་ཕྱོགས་ཀྱི་མདོག་ཅན་ཞེས་པ་ནས། ཟླ་བའི་གདན་རེ་རེ། ཞེས་པའི་བར་སྒྲུབ་ཐབས་བཞིན་གཏོང་། ལས་ཀྱི་རྡོ་རྗེས་བདུད་རྩི་ལྔ་དང་བཅས་པའི་དྲི་བཟང་གི་ཆུས་གཙོ་བོའི་གནས་སུ་གྲུ་བཞི། འདབ་མ་བརྒྱད་ལ་ཟླུམ་པོའི་ཐིག་ལེ་བྱ་ཞིང་སློབ་དཔོན་གྱིས་སོ་སོའི་སྔགས་བརྗོད་པ་དང་བསྟུན་ཚོམ་བུ་དབུས་དང་། ཤར་ནས་རིམ་བཞིན་གཡོན་སྐོར་དུ་འགོད་ཅིང་མཚམས་བཞིར་གཡས་སྐོར་དང་ཨོཾ་ཨཱཿཧཱུྃ་སྟེ་སྔགས་རྣམས་ལན་གསུམ་རེ་བརྗོད། མེ་ཏོག་གི་ཚོམ་བུ་རྣམས་ལྷ་སོ་སོའི་ས་བོན་གྱི་(༡༡ན)
ཡི་གེར་བསམ། དེ་རྣམས་ཡོངས་སུ་གྱུར་པ་ལས་ལྷ་སོ་སོའི་ཕྱག་མཚན་དུ་བསམ། དེ་རྣམས་ཡོངས་སུ་གྱུར་པ་ལས་ལྷ་སོ་སོར་སྐུ་ཡོངས་སུ་རྫོགས་པར་གྱུར་པ་ནི་དབུས་སུ་བཅོམ་ལྡན་འདས་དཔལ་འཁོར་ལོ་བདེ་མཆོག །ཅེས་པ་ནས། ཁ་བརྒྱན་པའོ་ཞེས་བརྗོད། ཛཿཧཱུྃ་བཾ་ཧོཿ ནམ་མཁར་བཞུགས་པའི་དཀྱིལ་འཁོར་སྟ་གོན་གྱི་དཀྱིལ་འཁོར་ལ་གཉིས་སུ་མེད་པར་ཐིམ་པར་བསམ། ལྷ་ཐམས་ཅད་ཀྱི་མིག་གཏི་མུག་རྡོ་རྗེ་ནས། རིན་འབྱུང་གིས་དབུ་བརྒྱན་པར་བསམ། ཡབ་ཡུམ་གྱི་སྙིང་པོ། ཉེ་སྙིང་། ལྷ་མོ་བཞིའི་སྔགས་གྱིས་མཆོད། མཆོད་པ་བྱིན་གྱིས་བརླབ། བླ་མ་དང་གཙོ་བོ་ཐ་མི་དད་བར་མོས་ལ། མཆོད་ཕྲེང་ས་བཟུང་བ་ནས་ལེན་ཅིང་རྒྱས་པར་སྤྲོ་ན་མདུན་བསྐྱེད་ནས་བླང་། ནང་མཆོད་ནས། བཟླས་པའི་བར་ཕྲེང་བ་བརླབ་པ་མ་གཏོགས་སྒྲུབ་ཐབས་བཞིན་དང་། ཡི་དམ་ཆོས་སྐྱོང་རྣམས་ལ་གཏོར་མ་ཕུལ། འཇིག་རྟེན་པའི་གཏོར་མ་བརླབ་པ་ནས། ཡིད་ལ་འདོད་པ་ཀུན་འགྲུབ་ཤོག་གི་བར་རྣམས་སྒྲུབ་ཐབས་བཞིན་བྱའོ། །གསུམ་པ་གསོལ་བ་གདབ་པ་ནི། རྡོར་དྲིལ་སྤོས་དང་བཅས་པ་འཛིན་པས། ལྕེ་ཧཱུྃ་ལས་སྐྱེས་པའི་རྡོ་རྗེ་ཧཱུྃ་གིས་མཚན་པར་བསམ། བཅོམ་ལྡན་ཁྲག་འཐུང་རྡོ་རྗེ་མཆོག །དམ་པ་རིགས་རྒྱལ་ཁྱོད་ཕྱག་འཚལ། །ཐུགས་རྗེའི་བདག་ཉིད་དཀྱིལ་འཁོར་ནི། །མགོན་པོ་བདག་ནི་འདྲི་བར་འཚལ། །སློབ་མ་རྣམས་ལ་བརྩེ་ཕྱིར་དང་། །ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བདག་ནི་གུས་པ་ལ། ཆེ་བས་བཀའ་དྲིན་མཛད་པར་རིགས། །འགྲོ་བའི་ཚོགས་ནི་དོན་མཛད་པའི། །རྫོགས་སངས་རྒྱས་རྣམས་དགོངས་སུ་གསོལ། །འབྲས་(༡༡བ)
གནས་བྱང་ཆུབ་སེམས་དཔའ་དང་། །གང་གཞན་སྔགས་ཀྱི་ལྷ་ཉིད་དང་། །འཇིག་རྟེན་སྐྱོང་པའི་ལྷ་རྣམས་དང་། །འབྱུང་པོ་རྫོགས་བྱང་ཉེར་གནས་དང་། །བསྟན་ལ་མངོན་དགའི་སེམས་ཅན་ནི། །གང་ཞིག་རྡོ་རྗེའི་མིང་ཅན་རྣམས། །རྡོ་རྗེ་འཆང་ཆེན་ཧེ་རུ་ཀཿ ། དཔལ་ལྡན་ཁྲག་འཐུང་དཀྱིལ་འཁོར་ནི། །ཇི་ལྟར་འབྱོར་པའི་ཡོ་བྱད་ཀྱིས། །འགྲོ་བའི་དོན་ཕྱིར་འདྲི་ལགས་པས། །དེང་བདག་སློབ་མར་བཅས་པ་ལ། །ཐུགས་བརྩེ་བ་རུ་དགོངས་ནས་ནི། །དཀྱིལ་འཁོར་བཅས་པ་ཐམས་ཅད་ཀྱིས། །བྱིན་གྱིས་བརླབ་པར་མཛད་དུ་གསོལ། །ཞེས་ལན་གསུམ་གྱིས་གསོལ་བ་གདབ། །ཨོཾ་མེ་དཱི་ནི་སོགས་སྔགས་ཚན་ལྔ་དང་ཨོཾ་བཛྲ་ཛྭ་ལ་ཨ་ན་ལཱ་རྐ་ཧཱུྃ་ཧཱུྃ་ཧཱུྃ། ཞེས་བརྗོད་དོ། །བཞི་པ་སློབ་མ་སྟ་གོན་ལ། ཁྲུས་བྱས་ཕྱག་དང་མཎྜལ་དབུལ། །ངེས་འབྱུང་བློ་བསྐྱེད་ནང་དབང་བསྐུར། །གསོལ་གདབ་སྔགས་ལ་སྤྲོ་བ་བསྐྱེད། །རྒྱུན་བཤགས་སྡོམ་གཟུང་ཁཎྜས་བསྲུང་། །གནས་གསུམ་བྱིན་རླབས་མཆོད་པས་མཆོད། །སོ་ཤིང་ཁྱོར་ཆུ་སྲུང་སྐུད་དང་། །ཀུ་ཤ་སྦྱིན་ཞིང་ཆོས་ཟབ་བཤད། །རྨི་ལམ་བསྒོ་ཞིང་རབ་གནས་བཏང་། །ཞེས་པ་ལྟར་བཅོ་ལྔ་ལས། དང་པོ་ནི། དཀྱིལ་འཁོར་ཤར་དུ་སློབ་མ་མཚན་ཉིད་དང་ལྡན་པ་གཅིག་ནས་ཉེར་ལྔའི་བར་ཟུང་དུ་མ་གྱུར་པ་རྣམས་ཁྲུས་དང་གོས་གཙང་མ་བགོ་ཞིང་ཕྱག་དང་མཎྜལ་ཕུལ་ལག་ཏུ་མེ་ཏོག་ཐོགས་ཏེ། གཉིས་པ་ངེས་འབྱུང་གི་བློ་བསྐྱེད་དུ་བཞུག་པ་ནི། །རང་གི་བསླབ་ལྡན་འཁོར་བཞི་པོ། །ཐེག་ཆེན་བློ་ཅན་རྣམས་ལ་ནི། །དེ་བཞིན་གཤེགས་པས་གསུངས་པ་ཡི། །ཡང་དག་ཆོ་ག་རྗེས་སུ་གནང་། ཁ་ཅིག་གསང་སྔགས་སྒྲུབ་དོན་གཉེར། །དཀྱིལ་འཁོར་དུ་ནི་འཇུག་པར་འགྱུར། །དེ་བཞིན་གཞན་ནི་བསོད་ནམས་འདོད། །(༡༢ན)
གཞན་དག་འཇིག་རྟེན་ཕ་རོལ་གཞོལ། །བློ་བཟང་ཕལ་ཆེར་དད་བྱས་ནས། །འཇིག་རྟེན་ཕ་རོལ་དོན་གཉེར་འཇུག །འཇིག་རྟེན་འདི་འབྲས་དོར་ནས་ནི། །འཇིག་རྟེན་ཕ་རོལ་འབྲས་གཉེར་ན། །གང་ཕྱིར་ཚེ་འདིར་བདེ་བླག་འགྲུབ། །འདི་ཡིས་འཇིག་རྟེན་ཕ་རོལ་མིན། །དེ་ཕྱིར་འཇིག་རྟེན་ཕ་རོལ་གྱི། །དོན་དུ་ཡིད་ནི་བརྟན་པར་གྱིས། །ཞེས་པའི་དོན་བཤད་དོ། །གསུམ་པ་ནང་དབང་བསྐུར་བ་ནི། །ལས་ཐམས་ཅད་པས་སློབ་མ་བསངས། །བླ་མ་ཡབ་ཡུམ་སྙོམས་པར་ཞུགས་པའི་སྒྲས། ཞལ་དུ་ཞུགས་ཐུགས་ཀར་མེས་ཞུ་བ་རྡོ་རྗེའི་ལམ་ནས་ཡུམ་གྱི་པདྨར་ཧེ་རུ་ཀཿསྔོན་པོ་ཞལ་གཅིག་ཕྱག་གཉིས་པར་བསམས་པ་ལ་སློབ་དཔོན་གྱི་ཐུགས་ཀའི་ས་བོན་གྱི་འོད་ཟེར་གྱིས་སྤྱན་དྲངས་པའི་དེ་བཞིན་གཤེགས་པ་རྣམས་རང་གི་ཞལ་དུ་ཞུགས་ཤིང་བྱང་སེམས་ཀྱི་རང་བཞིན་དུ་ཞུ་བར་གྱུར་པ་རྣམས་ཀྱིས་དབང་བསྐུར་ཧཱུྃ་ཞེས་བརྗོད་པས་པདྨ་ནས་ཕྱིར་ཕྱུངས་ཏེ་རང་རང་གི་གྲལ་ལ་འཁོད་པར་བསམ་མོ། །བཞི་པ་གསོལ་བ་གདབ་པ་ནི། རྣལ་འབྱོར་མ་དང་ཞལ་སྦྱོར་བཞུགས། །དགའ་ཆེན་ཁྱོད་བདག་སྟོན་པའི་རྒྱལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་པོ་ནི་བདག་ལ་སྩོལ། །ཐར་པ་ཆེན་པོའི་ཕོ་བྲང་དུ། །མགོན་པོས་བདག་ནི་གཞུག་ཏུ་གསོལ། །ཞེས་ལན་གསུམ་གྱིས་གསོལ་བ་གདབ་བོ། །ལྔ་པ་སྤྲོ་བ་བསྐྱེད་པ་ནི། །བླ་མས་སློབ་མ་གཅིག་གཙོ་བོར་བྱས་ནས། །བུ་ཚུར་ཐེག་པ་ཆེན་པོ་(༡༢བ)
ཡི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་ཏེ། །སྐུ་གསུང་ཐུགས་ཀྱི་རྡོ་རྗེ་ཅན། །དུས་གསུམ་འབྱུང་བའི་སངས་རྒྱས་རྣམས། །རྡོ་རྗེ་སྔགས་ཀྱི་མཐུ་ཡིས་ནི། །ཡེ་ཤེས་མཉམ་མེད་ཡང་དག་བརྙེས། །གསང་སྔགས་སྦྱོར་བ་མཉམ་མེད་པ། །གང་གིས་ཤཱཀྱ་སེང་གེ་སོགས། །མཆོག་རྣམས་ཀྱིས་ནི་བདུད་ཀྱི་སྡེ། །མི་བཟད་ཆེན་པོ་སྟོབས་ཆེན་བཅོམས། །འཇིག་རྟེན་རྗེས་འཇུག་རྟོགས་ནས་ནི། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་འཐོབ་བྱའི་ཕྱིར། །བུ་ཡི་བློ་གྲོས་འདི་གྱིས་ཤིག །ཅེས་བརྗོད་དོ། །དྲུག་པ་བཤགས་པ་ནི་མགུར་ལས་བྱུང་པའི་རྒྱུན་བཤགས་ལན་གསུམ་བརྗོད་དོ། །བདུན་པ་སྡོམ་པ་བཟུང་བ་ནི། །ཐལ་མོ་སྦྱར་ཏེ་སློབ་དཔོན་ལ། །འཁོར་ལོ་ཕྱིར་མི་ལྡོག་པའི་དབང་། །སྩལ་ནས་མགོན་པོས་བདག་ལ་ནི། །འཁོར་ལོའི་ལྷ་ཡི་བདག་ཉིད་དང་། །སློབ་དཔོན་གྱི་ནི་ལས་རྣམས་དང་། །སངས་རྒྱས་ཀུན་གྱི་དམ་ཚིག་གི །སྡོམ་པ་གསང་བ་བླ་ན་མེད། །རྟག་ཏུ་སེམས་ཅན་ཀུན་དོན་དང་། །སློབ་དཔོན་དུ་འགྱུར་བདག་ལ་གསུངས། ཞེས་གསོལ་བ་གདབ། སློབ་དཔོན་གྱིས་དཀྱིལ་འཁོར་ལ་ཕྱོགས་ཏེ་རྡོར་དྲིལ་བཟུང་ནས་རྡོ་རྗེ་སློབ་མ་འདི་རྣམས་ནི། །བྱང་ཆུབ་སེམས་ནི་ཡོངས་འཛིན་ཅིང་། །དམ་ཚིག་སྡོམ་དང་གསང་བ་ཡི། །འཁོར་ལོ་འདིར་ཡང་འཇུག་པར་འཚལ། ཞེས་གསོལ་བ་བཏབ་ནས་བླ་མས་སློབ་མ་ལ། །དུས་གསུམ་སངས་རྒྱས་ཐམས་ཅད་ཀྱི། །གསང་བ་ཆེན་པོའི་རིགས་དག་པའི། །གསང་བ་ཡོངས་སུ་འཛིན་པར་ནི། །བདག་ཉིད་ཆེན་པོ་ཁྱོད་འདོད་དམ། །ཞེས་འདྲི། སློབ་མས་ཀྱང་། །བདག་ནི་རབ་ཏུ་དེ་འཚལ་ལོ། །ཞེས་བརྗོད་པ་ལ་སློབ་དཔོན་(༡༣ན)
གྱིས། །གོང་ནས་གོང་གི་སྡོམ་པ་ནི། །བུ་ཁྱོད་ཀྱིས་ནི་གཟུང་བར་བྱ། །འཁོར་བ་ལས་ནི་བསྒྲལ་བ་ཡི། །ཐབས་ནི་དེ་ལས་གཞན་མེད་པས། །དེ་བས་འབད་པ་ཐམས་ཅད་ཀྱིས། །སྡོམ་པ་རྟག་ཏུ་བསྐྱང་བར་གྱིས། །དེས་ནི་གནོད་པ་རྣམས་བསལ་ནས། །བྱང་ཆུབ་བདེ་ངེས་ཐོབ་འགྱུར་རོ། །ཞེས་སྡོམ་པ་བསྒྲགས་ཏེ་སློབ་མས་སློབ་དཔོན་གྱི་སྤྱན་སྔར་སྡོམ་པ་འཛིན་སྙམ་པས། སྲས་བཅས་སངས་རྒྱས་ཐམས་ཅད་དང་། །དཔའ་བོ་རྣལ་འབྱོར་མ་རྣམས་ཀུན། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བགྱི་བ་ཡིས། །དུས་འདི་ནས་ནི་བཟུང་ནས་ནི། །བྱང་ཆུབ་སྙིང་པོར་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་ཅོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་ཟུངས། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཅེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ནི་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་དང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་གཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་(༡༣བ)
ཅད་ལྡན་པ་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་པ་རྣམས་བདག་གིས་དགྲོལ། །དབུགས་མ་ཕྱུང་བ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་ལན་གསུམ་གྱིས་སྡོམ་པ་གཟུང་ངོ་། །བརྒྱད་པ་བསྲུང་ཞིང་གནས་གསུམ་བརླབ་པ་ནི། །ལས་ཐམས་ཅད་པའི་སྔགས་ཀྱིས་བསྲུངས་ལ། །སློབ་དཔོན་གྱིས་རྡོ་རྗེ་དང་བཅས་པའི་དྲིའི་ཆུས་གནས་གསུམ་དུ་རེག་ཅིང་ཧཱུྃ་ཨཱཿཨོཾ། ཞེས་བརྗོད་པས་སློབ་མའི་གནས་གསུམ་དུ་ཟླ་བ་ལ་གནས་པའི་སྙིང་གར་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ། མགྲིན་པར་ཨཱཿལས་པདྨ་དམར་པོ། དཔྲལ་བར་ཨོཾ་ལས་འཁོར་ལོ་དཀར་པོ་རེ་བསམས་ལ། ཡས་རིམ་གྱིས། ཨོཾ་ཨཱཿཧཱུྃ། ཞེས་བརྗོད་པས་ཕྱག་མཚན་དེ་རྣམས་ཡིག་འབྲུ་དེ་དག་གིས་མཚན་པར་བྱིན་གྱིས་བརླབས་པར་བསམ་མོ། །དགུ་པ་མཆོད་པ་ནི། ལས་ཐམས་ཅད་པ་བཟླ་ཞིང་། མགོ་བོར་མེ་ཏོག སྤྱན་ལ་མར་མེ། མདུན་དུ་སྤོས། སྙིང་གར་དྲི། ལག་པར་ཟས་མཆོག་རྣམས་རང་རང་གི་སྔགས་ཀྱིས་སྦྱིན་ནོ། །བཅུ་པ་སོ་ཤིང་ནི། ཨ་ཤྭ་ཏྠ་ལ་སོགས་པའི་སོ་ཤིང་སོར་བཅུ་གཉིས་པ་མ་གས་ཤིང་དྲང་བ་སྲོག་ཆགས་མེད་པ་དྲི་བཟང་པོས་བྱུགས་ཤིང་རྩེ་མོར་མེ་ཏོག་བཅངས་པ་དེ་ཉིད་ལས་ཐམས་ཅད་པའི་སྔགས་ཀྱིས་བསངས་པ་སློབ་མ་ལ་སྦྱིན། དེས་དཀྱིལ་འཁོར་གྲུ་བཞི་པར་བ་ལང་གི་ལྕི་བས་བྱུགས་པའི་ས་ཕྱོགས་སུ་ཁ་ཤར་རམ་བྱང་དུ་བལྟས་ལ་རྩེ་མོ་ནས་བཅའ་ཞིང་སྐྱུགས་སྨན་དྲངས་པ་ལྟར་སྐྱོན་དག་པར་བསམས་(༡༤ན)
ཏེ། ཨོཾ་བཛྲ་ཧཱ་ས་ཧཱ་ཞེས་བརྗོད་ནས་བལྟོས་པ་མེད་པར་དེའི་སྟེང་དུ་དོར་བས་རྩེ་མོ་བདག་ཉིད་ལ་བསྟན་ན་མཆོག གྱེན་དུ་མཁའ་སྤྱོད། ཐུར་དུ་ས་འོག ཕྱོགས་བཞིར་བལྟས་ན་ཞི་རྒྱས་དབང་དྲག་མཚམས་སུ་འཇིག་རྟེན་པའི་དངོས་གྲུབ་འགྲུབ་ཅེས་ངོ་སྤྲོད་དོ། །བཅུ་གཅིག་པ་ཁྱོར་ཆུ་ནི། ཧཱུྃ་ལན་གསུམ་བཟླས་པའི་དྲིའི་ཆུ་ཁྱོར་པ་གསུམ། ཨོཾ་ཧྲཱིཿབི་ཤུདྡྷ་སརྦ་ངྷ་རྨཱཿསརྦ་པཱ་པ་ནི་ཙཱ་ཨ་སྱ་ཤོ་དྷ་ཡ། སརྦ་བི་ཀཝཱ་ན་ཨ་བ་ན་ཡ་ཧཱུྃ། ཞེས་བརྗོད་ལ་བླུད་དོ། །བཅུ་གཉིས་པ་སྲུང་སྐུད་ནི། ཧཱུྃ་ལས་སྐྱེས་པའི་སྲད་བུ་དམར་པོ་ལས་ཚད་དང་མཉམ་པ་རང་གི་ལྷའི་སྔགས་བཟླས་པ་མདུད་པ་སུམ་ལྡན་དཔུང་པ་གཡས་པར་ལན་གཉིས་སུ་བསྐོར་ལ། །ཨོཾ་བུདྡྷ་མཻ་ཏྲི་རཀྵ་རཀྵ་སརྦཾ་སྭཱ་ཧཱ། ཞེས་དང་། ལས་ཐམས་ཅད་པ་དང་སུམ་བྷ་བརྗོད་པའི་ནང་མཆོད་ཀྱིས་ཀྱང་བསྲུང་ངོ་། བཅུ་གསུམ་པ་རྨི་ལམ་བརྟག་པ་ནི། ཧཱུྃ་དང་དྡྷཱིཿལས་སྐྱེས་པའི་ཀུ་ཤ་ལས་ཐམས་ཅད་པ་བཟླས་པ་ཆེ་བ་སྟན་དང་། ཆུང་བ་སྔས་ཀྱི་དོད་དུ། ཨོཾ་བཛྲ་ཏི་ཀྵྞ་བཾ། ཞེས་བརྗོད་ལ་སྦྱིན་ན། བཅུ་བཞི་པ་ཆོས་བཤད་ནས་སྤྲོ་བ་བསྐྱེད་པ་ནི། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་པ་ཡིན། །བསྐལ་པ་བྱེ་བ་དུ་མར་ནི། །སྔོན་ཆད་སྡིག་པ་བྱས་པ་གང་། །དཀྱིལ་འཁོར་འདིའང་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་(༡༤བ)
སྨོས་ཅི་དགོས། །སྐྱོབ་པའི་གསང་སྔགས་བཟླས་ནས་ནི། །གོ་འཕང་བླ་ན་མེད་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་གཅོད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་དུ། །བང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་པའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་སྐལ་པ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་ཉིད་དུ་འགྱུར། ཞེས་པའི་དོན་བཤད་ལ་སྤྲོ་བ་བསྐྱེད་དོ། །བཅོ་ལྔ་པ་རྨི་ལམ་བརྟག་པ་གདམས་པ་ནི། རྩ་སྔགས་ཀྱིས་བསྲུངས་ལ་ཁང་པའི་ནང་ངམ་དཀྱིལ་འཁོར་གྱི་མཐར་ཉོལ་ལ་ནང་པར་ང་ལ་རྨི་ལམ་སྨྲོས་ཤིག་ཅེས་བརྗོད། སློབ་དཔོན་གྱིས་ཀྱང་སྲུང་པའི་དོན་དུ་རྩ་སྔགས་བཟླའོ། །མཆོད་པ་རྣམས་ཁ་གསོས་ལ་བརླབ། ཕྱི་ནང་མཆོད་པས་མཆོད། རྣལ་འབྱོར་ར་གཅིག་མས་བསྟོད། ས་ཆོག་སྐབས་ཀྱི་སྔགས་རྒྱས་དཀྱིལ་འཁོར་ནམ་མཁར་བཏེག །སྟ་གོན་གྱི་ལྷ་རྣམས་མདུན་གྱི་ནམ་མཁར་བྱོན་ཏེ། ཇི་སྲིད་སྤྱན་མ་དྲངས་ཀྱི་བར་དུ་བརྟན་པར་བཞུགས་སུ་གསོལ། ཞེས་བརྗོད། སླར་ཡང་གོང་བཞིན་མཆོད་བསྟོད་བྱས་ལ་ཡིག་བརྒྱའི་རྗེས་སུ་མ་འབྱོར་བ་དང་། ཞེས་སོགས་ཀྱིས་བཟོད་པར་གསོལ། བྲིས་སྐུ་སོགས་རྟེན་ཡོད་ན་གཏོར་མགྲོན་རྣམས་ཕྱོགས་བཅུ་ན་སོགས་ཀྱིས་བརྟན་བཞུགས་བྱ་(༡༥ན)
མེད་ན་ཨོཾ་ཁྱེད་ཀྱི་སེམས་ཅན་དོན་ཀུན་མཛད། ཅེས་སོགས་ཀྱི་རྗེས་སུ། །ལག་པ་གཉིས་བསྣོལ་པའི་མཐེབ་སྲིན་གྱིས་སེ་གོལ་ཕྱིར་གཏོགས་ཏེ། བཛྲ་མུཿས རྟེན་མེད་པའི་ཡེ་ཤེས་པ་རྣམས་རང་གི་གནས་སུ་གཤེགས་པར་བསམ་ཞིང་། དམ་ཚིག་པ་རྣམས་བསྡུ་རྒྱ་དང་བཅས་ཛཿཧཱུྃ་བཾ་ཧོཿས་རང་ལ་གཉིས་སུ་མེད་པར་ཐིམ་པར་བསམ། གཡོན་པས་སེ་གོལ་གཏོགས་པ་དང་བཅས་སུམྦྷས་བསྲུངས་ལ་མཆོད་གཏོར་དམན་མ་རྣམས་བསྡུའོ། །དེ་ཡང་སའི་ཆོ་ག་ནི་སྤྲོས་པ་ཆུང་བར་འདོད་ན་གནས་ཁང་རྙིང་བར་མ་བྱས་ཀྱང་ཆོག་ཅིང་ས་མ་དུལ་བར་ནི་རས་བྲིས་ལའང་དགོས་ལ། རྡུལ་ཚོན་མི་སྤྲོ་ན་སྟེགས་བུ་ལྟ་བུའི་ཁར་མཎྜལ་ལ་དྲི་ཐག་གི་ཚོམ་བུ་དགོད་པ་ཙམ་མ་གཏོགས་མཆོད་པ་བསྡུ་བའི་བར་བཤད་མ་ཐག་པ་ལྟར་ལ། རྡུལ་ཚོན་གྱིས་འབྲི་བའི་ཚབ་ལ་རས་བྲིས་ཀྱི་དཀྱིལ་འཁོར་དགྲམ་པ་ཙམ་མོ། །རྒྱལ་བ་བཙོང་ཁ་པ་ཆེན་པོས་གསང་བ་འདུས་པ་མི་བསྐྱོད་པའི་དབང་དོན་དེ་ཉིད་རབ་གསལ་གྱི་པར་མའི་ཤོག་ལྡེབས་བཅུ་གཉིས་པའི་མདུན་འཕྲེང་གཉིས་འོག་ཏུ་ཐིག་གདབ་པ་མ་གཏོགས་པའི་ལྷག་གནས་རྣམས་ནི་རས་བྲིས་ཀྱི་ཆོ་ག་ལ་ཡང་བྱའོ། །ཞེས་བཀའ་སྩལ་བས་རྗེས་འབྲང་ལ་ལ་དག་བུམ་པ་དང་སློབ་མ་སྟ་གོན་མིན་པ་མི་དགོས་པར་བཞེད་པ་དྭགས་བརྒྱུད་པ་ལྟ་བུའི་སྤྱན་བལྟོས་ཡིན་མཆིས། དཀྱིལ་འཁོར་ཀ་བ་ལྟ་བུར་གཟར་ཐང་དུ་མཛད་པ་ཁོ་བོའི་བླ་མ་རྡོ་རྗེ་འཆང་དཔལ་འབྱོར་ལྷུན་གྲུབ་ནི་ནམ་ཡང་མི་བཞེད་པ་སོགས་ཀྱིས་ཀྱང་ར་ཕོ་དཀར་པོ་ལུག་ཁྱུར་མི་འགྲེ་བའི་རྒྱུར་སོང་ངོ་། གསུམ་པ་དངོས་གཞི་ལ་ཐིག་ཚོན་གྱི་ཆོ་ག བུམ་པ་འབུལ་ཞིང་དཀྱིལ་འཁོར་བརྒྱན་པ་(༡༥བ)
སྒྲུབ་ཅིང་མཆོད་ནས་དབང་བསྐུར་བ་དང་གསུམ་གྱི་དང་པོ་ཐིག་ཚོན་བྱིན་གྱིས་བརླབ་པ་ནི། ཐིག་ཚོན་བྱིན་རླབས་སོ་སོར་བཤད་ཀྱང་ཕྱོགས་གཅིག་ཏུ་བྱས་ན་འཇུག་པ་བདེ་བས་སྟེགས་ཀྱི་ཁར་རིན་པོ་ཆེ་དང་དྲི་བཟང་ཡུངས་ཀར་རྣམས་ཀྱི་ཕྱེ་མ་བསྲེས་པའི་རྡུལ་ཚོན་དབུས་སུ་སྔོན་པོ་ལ་ཧཱུྃ། ཤར་དུ་དཀར་པོ་ལ་ཨོཾ། བྱང་དུ་ལྗང་གུ་ལ་ཁཾ། ནུབ་ཏུ་དམར་པོ་ལ་ཨཾ། ལྷོར་སེར་པོ་ལ་ཏྲཾ་བྲིས། དཔའ་བོའི་རིན་གྱིས་ཉོས་པའི་རས་བལ་གཞོན་ནུ་མས་བཀལ་པའི་སྲད་བུར་ཚོན་དྲི་ཞིམ་པོ་དང་ཡུངས་ཀར་གྱིས་སྦགས་པ་ཁ་དོག་བསྒྱུར་པ་ཁ་དོག་རེ་རེ་ལའང་ལྔ་ལྔར་བྱས་པ། སློབ་དཔོན་དང་སློབ་མའི་ལག་པས་བཟུང་བའི་ཆ་མ་གཏོགས་ཚད་དཀྱིལ་འཁོར་ཉིས་འགྱུར། སྦོམས་སུ་ཀུན་དྲིལ་ན་སྒོའི་ཉི་ཤུ་ཆ་འབྱུང་བར་བྱས་པ་ཁ་དོག་དང་མཚུངས་པའི་ཚོན་སོ་སོའི་ཁར་བཞག །མདུན་དུ་ཆུ་གཉིས་ཉེར་སྤྱོད་བཤམ། ཐིག་ཚོན་བསངས་སྦྱངས། སྟོང་པར་བསམ། སྟོང་པའི་ངང་ལས་ཐིག་ཚོན་སྔོན་པོ་ཧཱུྃ་ལས་རྡོ་རྗེ་སེམས་དཔའ་སྔོན་པོ་ཕྱག་གཡས་རྡོ་རྗེ་བསྒྱིངས་པ་དང་བཅས་པས་ཐུགས་ཀར་གཏོད་པ། གཡོན་དྲིལ་བུ་བསྙེམས་པ་དང་བཅས་པས་དཀུར་འཛིན་པ། ཤར་དུ་དཀར་པོ་ཨོཾ་ལས་རྟག་པ་དཀར་པོ་གཡས་འཁོར་ལོ། གཡོན་དྲིལ་བུ་བསྙེམས་པ་དང་བཅས་པས་དཀུར་འཛིན་པ། བྱང་དུ་ལྗང་གུ་ཁཾ་ལས་རྡོ་རྗེ་རྒྱལ་པོ་ལྗང་གུ་གཡས་སྣ་ཚོགས་རྡོ་རྗེ་བསྒྱིངས་པ་དང་བཅས་པ་དཀུར་འཛིན་པ། གཡོན་དྲིལ་བུ་ཐུགས་ཀར་ཕྱོགས་པ། ནུབ་དུ་དམར་པོ་ཨཾ་ལས་པདྨ་གར་དབང་དམར་པོ་གཡས་པདྨ་བསྒྱིངས་པ་དང་བཅས་པས་དཀུར་འཛིན་པ། གཡོན་དྲིལ་བུ་ཐུགས་ཀར་ཕྱོགས་པ། ལྷོར་སེར་(༡༦ན)
པོ་ཏྲཾ་ལས་རྡོ་རྗེ་ཉི་མ་སེར་པོ་གཡས་རིན་པོ་ཆེ་བསྒྱིངས་པ་དང་བཅས་པས་དཀུར་འཛིན་པ། གཡོན་དྲིལ་བུ་ཐུགས་ཀར་ཕྱོགས་པ། ལྔ་གའང་མཚན་ཉིད་ཐམས་ཅད་ཡོངས་སུ་རྫོགས་པའི་སྐུར་བསམ། ཐལ་མོ་སྦྱར་ནས་ནམ་མཁར་བལྟ་ཞིང་། ཨོཾ་ཨཱཿཔྲ་ཡཙྪ་བཛྲ་སཏྭ་སཱུ་ཏྲ་སྭཱ་ཙཀྲ་ཎཱ་ཡ་ཧཱུྃ། བཛྲ་ས་ཏྭའི་གནས་སུ་ཤྭི་ཤྭ་ཧ། བཛྲ་རཱ་ཛ། པདྨ་མཱི་རྟཱི་ཤྭ་ར། བཛྲ་སཱུཪྻ་རྣམས་བཅུག །རང་གི་མིག་གཉིས་སུ་མ་དང་ཊ་ལས་ཉི་མ་དང་ཟླ་བ་མིག་འབྲས་རྡོ་རྗེ་ཧཱུྃ་གིས་མཚན་པར་བསམ། མིག་གི་རྫ་མ་འགུགས་པའི་འཁོར་བའི་ལྟ་སྟངས་བྱས་ལ། ཨོཾ་པྲ་པྟ་དྲིཥྚི་ཨཾ་ཀུ་ཤ་ཛཿ ལན་གསུམ་བརྗོད། སྟ་གོན་གྱི་ལྷའི་ཅོད་པན་གྱི་ཐུགས་ཀ་ནས་ཡེ་ཤེས་ཀྱི་ཐིག་ཚོན་བཀུག་སྟེ་དམ་ཚིག་གི་ཐིག་ཚོན་སོ་སོ་ལ་ཐིམ་པས་ངོ་བོ་རིགས་ལྔ་ལ་རྣམ་པ་ཐིག་ཚོན་སོ་སོར་བསམ། སློབ་དཔོན་རྡོར་དྲིལ་ཐོགས་པའི་ལག་གཉིས་རྡོ་རྗེ་ཁུ་ཚུར་གྱི་མཛུབ་མོ་གཉིས་ཀྱིས་ཚོན་སོ་སོ་ཧད་པ་དང་བཅས། །ཨོཾ་བཛྲ་ཙི་ཏྲ་ས་མ་ཡེ་ཧཱུྃ། ལན་བདུན་བཟླ་ཞིང་མཉེ། རྡུལ་ཚོན་སོ་སོ་ལ་ཧྲཱིཿརེ་བྲིས་ལ་སློབ་དཔོན་གྱིས་རྡོར་དྲིལ་དང་བཅས་རྡོ་རྗེ་ཐལ་མོ་ནང་བསྡམ་ཁ་ཕྱེ་བའི་སྲིན་ལག་དང་གུང་མོའི་བར་དུ་མཐེ་བོང་གཉིས་གཤིབས་ཏེ་བསྒྲེངས་པ་མེ་ལྟར་འབར་བའི་ཕྱག་རྒྱ་བཅས་ལ། །བདེན་པ་གང་གིས་སེམས་ཅན་རྣམས་རྡུལ་མང་ཞིང་སངས་རྒྱས་དང་བྱང་ཆུབ་སེམས་དཔའ་རྣམས་སེམས་ཅན་ལ་ཆགས་པ་དང་རྗེས་སུ་ཆགས་པའི་བདེན་པ་དེས་རྡུལ་ཚོན་རྣམས་འབར་བར་གྱུར་ཅིང་། ཧཱིཿཧཱིཿཧཱིཿ། ཆུ་གཉིས་ཉེར་སྤྱོད་རོལ་མོས་མཆོད། སློབ་དཔོན་ཧེ་རུ་ཀར་གསལ་བའི་ལག་ཏུ་ཐིག་སྐུད་རྣམས་བླངས་ནས་(༡༦བ)
སོ་སོར་བརྐྱང་སྟེ་བསྒྲིལ་ལ། སློབ་མ་ཕག་མོར་གསལ་བ་ལ་ཐིག་སྣེ་གཏད་དེ་བརྐྱང་ཞིང་གཉིས་ཀ་རྡོར་དྲིལ་འཛིན་པས། ཨོཾ་ཨཱཿཨ་ནྱོ་ནྱ་ཨ་ནུ་ག་ཏཱཿ སརྦ་དྷ་རྨཱཿཔ་ར་སྦ་རཿ ཨ་ནུ་པྲ་བིཥྚཿ སརྦ་དྷ་རྨཱཿ ཨ་དྱནྟ་ཨ་ནུ་པྲ་བིཥྚི་སརྦ་དྷརྨཱཿཧཱུྃ་ཞེས་ཕྱོགས་གཅིག་ཏུ་བསྒྲིལ་པ་རྡོ་རྗེ་ལ་དཀྲིས་ཏེ། ཨོཾ་བཛྲ་གནྡྷ་ཨཱཿཧཱུྃ། ཞེས་དྲིས་བྱུགས་གསེར་གྱི་སྣོད་དུ་བཞག་ལ་མཆོད། ཨོཾ་ཨཱཿ ཧཱུྃ། ཨོཾ་ཧྲཱིཿཧ་ཧ་ཧུཾ་ཧུཾ་ཕཊ། ཨོཾ་ས་མ་ཡ་སཱུ་ཏྲཾ་མ་ཏི་ཀྲ་མ་ཧཱུྃ། ཞེས་བརྒྱ་རྩ་བཟླ། སྔར་བཞིན་མཆོད། སྒྲུབ་གྲོགས་དང་བཅས་པ་ལངས་ཏེ། སློབ་དཔོན་རྡོར་དྲིལ་འཛིན་པས་ཐིག་སྐུད་ནས་བཟུང་སྟེ་བདེན་བྲལ་དང་སློབ་མ་དབང་ལྡན་དུ་གནས་པ་ལ། ཛྫཿཛྫཿཛྫཿ ཞེས་ཐིག་སྣ་བཏང་། སློབ་མས་ཀྱང་ཛྫཿཛྫཿཛྫཿཞེས་ཐིག་སྣ་དྲང་། གཉིས་ཀའི་གཡོན་པས་ཁུ་ཚུར་གྱིས་ལྟེ་བའི་ཐད་དུ་བཟུང་སྟེ་ཐིག་གི་སྒྲ། མ་ལུས་འཇིག་རྟེན་ཁམས་བཞུགས་པའི། །སངས་རྒྱས་ལ་སོགས་ཁྱེད་རྣམས་ཀྱིས། །འགྲོ་དོན་མཛད་པའི་དུས་ཡིན་ན། །དེ་ཕྱིར་ཁྱེད་རྣམས་འདིར་སྦྱོན་ཅིག །ཨོཾ་བཛྲ་ས་མ་ཡ་སཱུ་ཏྲཾ་མ་ཏི་ཀྲ་མ་ཧཱུྃ། སློབ་དཔོན་ཤར་དུ་མངོན་པར་ཕྱོགས་པས་ཚངས་ཐིག་དང་པོ་གདབ། དེ་བཞིན་དུ་ལྷོ་ནས་བྱང་དུ་ཕྱོགས་པས་ཚངས་ཐིག་གཉིས་པ། མེ་ནས་བྱང་ཤར་དུ་ཕྱོགས་པས་ཤར་གྱི་རྩ་ཐིག །རླུང་ནས་ལྷོ་ནུབ་ཏུ་ཕྱོགས་པས་ནུབ་ཀྱི་རྩ་ཐིག །དེ་ཉིད་ནས་དབང་ལྡན་དུ་ཕྱོགས་པས་བྱང་གི་རྩ་ཐིག །མེ་ནས་ལྷོ་ནུབ་ཏུ་ཕྱོགས་པས་ལྷོའི་རྩ་ཐིག །སྟེང་ཉིད་ནས་རླུང་དུ་ཕྱོགས་པས་ཟུར་ཐིག་དང་པོ། བདེན་བྲལ་ནས་དབང་ལྡན་དུ་ཕྱོགས་པས་ཟུར་ཐིག་གཉིས་པ་གདབ་ཅིང་ཐམས་ཅད་དུ་སློབ་མས་སློབ་དཔོན་ལ་རྒྱབ་མི་(༡༧ན)
བསྟན་པའི་ཚུལ་དུ་འགྲེ། །ཐིག་འདེབས་པའི་ཚེ་སློབ་དཔོན་གྱི་ལག་པ་གཡས་རྡོ་རྗེ་དང་བཅས་པའི་མཐེབ་མཛུབ་ཀྱིས་ཐིག་སྐུད་སྟེང་ནས་བཟུང་ལ་འོག་ནས་གཅུས་ཏེ་གྱེན་དུ་གདབ་པ་གནམ་ཐིག་དང་དེ་ནས་ས་ཐིག་གོང་ལྟར་གདབ་ཅིང་ལས་ཐིག་རྣམས་བྱིན་གྱིས་བརླབ་པར་བསམ། དེ་ནས་ཐིག་གཞན་རྣམས་སྤྱི་དང་འདྲ་བར་བཏབ་ལ། །དབུས་སུ་སེང་ལྡེང་གི་ཕུར་བུ་བཏབ་པ་ལ་ཐིག་སྐུད་ཉིས་བལྟབ་ཏུ་བྱས་པས་རྩ་ཐིག་ནང་ནས་པདྨ་འདབ་བརྒྱད་མུ་ཁྱུད་དང་བཅས་པ་དང་ཕྱིའི་སྣ་ཚོགས་རྡོ་རྗེའི་ར་རྩེ་ནས་དང་། དེ་ནས་ཆ་ཕྲན་གཉིས་ནས་དང་། དེ་ནས་བཞི་དང་ཡང་བཞི་ནས་བསྐོར་བ་རྣམས་ལས་ཐིག་གོ །མཐར་བདེན་བྲལ་དང་དབང་ལྡན་དུ་གནས་བཞིན་པས་ཆུ་གཉིས་ཉེར་སྤྱོད་རོལ་མོའི་བར་གྱིས་མཆོད། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སྟ་གོན་ཐུགས་ཀར་གཤེགས་ནས་ཀྱང་། སླར་ཡང་འབྱོན་པར་མཛད་དུ་གསོལ། བསྡུ་བརྒྱ་ཕྱིར་དགྲོལ་ཞིང་། བཛྲ་མུཿས། ཐིག་གི་ཡེ་ཤེས་པ་སྟ་གོན་གྱི་ལྷའི་ཐུགས་ཀར་གཤེགས་པར་བསམ། བསྡུ་རྒྱ་དང་བཅས་དམ་ཚིག་པ་བདག་ཉིད་ལ་ཐིམ་པར་བསམ་ཞིང་ཛཿཧཱུྃ་བཾ་ཧོཿས་རང་ལ་བསྡུ། ཐིག་སྐུད་རྡོ་རྗེ་ལ་དཀྲིས་ལ་འཇོག་གོ །རང་ཧེ་རུ་ཀར་གསལ་བའི་མིག་གཉིས་སུ་མ་དང་ཊ་ལས་ཉི་མ་དང་ཟླ་བ། མིག་འབྲས་ཧཱུྃ་ལས་རྡོ་རྗེའི་ལྟེ་བ་ལ་ཧཱུྃ་གིས་མཚན་པར་བསམ་ལ། རྡོ་རྗེ་ཁུ་ཚུར་གྱི་མཐེའུ་ཆུང་གཉིས་སྦྲེལ་མཛུབ་མོ་བརྐྱང་ནས་རྩེ་སྤྲད་ལ་རྡོ་རྗེ་ཤུགས་སམ་རྡོ་རྗེ་གཙུག་ཏོར་གྱི་ཕྱག་རྒྱ་སྤྱི་བོར་ལྡོག་སྟེ། ཨོཾ་བཛྲ་བེ་གཱ་ཀྲ་མ་ཧཱུྃ། ནུབ་ནས་དབུས་སུ་རྡོ་རྗེ་ཤུགས་ཀྱི་འཇུག་པས་ཞུགས་ཏེ་དྲི་ཆུས་སྒོ་(༡༧བ)
བཞིའི་ནང་གི་རྩ་ཐིག་ལག་གཉིས་ཁྲོ་བོའི་ཁུ་ཚུར་གྱི་མཛུབ་མོས་དབྱི་ལ། ཧཱུྃཿཧཱུྃཿཞེས་བརྗོད་ཅིང་ཁྲོ་བོའི་ལྟ་བས་བལྟས་པས་ཐར་པའི་སྒོའི་བར་ཆད་བཅོམས་པར་བསམ། ཐར་པ་དང་ཐམས་ཅད་མཁྱེན་པའི་གེགས་སུ་གྱུར་པ་ཐམས་ཅད་དབྱི་བར་བགྱིའོ། །ཞེས་བརྗོད། ཕུར་བུ་བཏོན་ལ་དབུས་སུ་འདུག་སྟེ། གཡོན་པའི་ཁུ་ཚུར་གྱིས་ཚོན་བཟུང་ནས། འདི་ནི་མེ་ལོང་དག་པ་སྟེ། །སེམས་ཅན་ཁམས་ནི་སྒྲོལ་བྱེད་པ། །དཔལ་ལྡན་བདེ་ཆེན་རྒྱལ་པོ་སྟེ། །དེ་བཞིན་གཤེགས་པ་ཀུན་གྱི་གནས། །ཉེས་པ་ཀུན་ལས་རྣམ་གྲོལ་བ། །འཁོར་ལོའི་ནང་དུ་ཡང་དག་གནས། །ཞེས་པས་ཚོན་དཀར་པོ་དང་། དེ་བཞིན་དུ་མེ་ལོང་གི་གནས་སུ་མཉམ་ཉིད་དང་སེར་པོ་སོགས་འདོན་པ་སྤོས་ལ་བུ་ག་བཀང་། དབང་ལྡན་དུ་རྩིག་པ་ལྔ་རིམ་པ་བཞིན་སྒོ་ཚད་གཅིག་བྲིས་པ་ཏིང་ངམ་ཐོད་པས་བཀབ་བོ། །དེ་ནས་རང་ངམ་རི་མོ་མཁན་ལ་སོགས་པས་ཕྱོགས་མདོག་ཤར་དཀར། བྱང་ལྗང་། ནུབ་དམར། ལྷོ་སེར། དབུས་སྔོ་བའི་སྟེང་དུ་སྣ་ཚོགས་པདྨ་འདབ་བརྒྱད། རྩིག་པ་ཕྱི་ནས་དཀར་སེར་དམར་ལྗང་ནག་པའི་རྩིག་པ་ལྔ་སྦྲེལ་རན་པ་ན་ཁེབས་ཕྱེ་སྟེ་སྦྲེལ། མཚན་མ་ངན་ན་སྟ་གོན་གྱི་ལྷ་ལ་མཆོད་གཏོར་ཕུལ་ནས་བསྲུང་ངོ་། །གཞན་རྣམས་སྤྱི་དང་མཐུན་པའི་སྲུང་འཁོར་གྱི་ཕྱིར་དུར་ཁྲོད་བརྒྱད། དཀྱིལ་འཁོར་གྱི་དབུས་སུ་པད་ཟླའི་ལྟེ་བར་རྡོ་རྗེ་སྔོན་པོ་དང་གྲི་གུག་པད་འདབ་ཀྱི་ཕྱོགས་བཞིར་ཟླ་བའི་སྟེང་དུ་གྲི་གུག མཚམས་བཞིར་ཟླ་བ་ལ་གནས་པའི་བུམ་པའི་སྟེང་དུ་ཀ་པཱ་ལ་བྲིའོ། དེ་ནས་སློབ་དཔོན་རྡོར་དྲིལ་འཛིན་པས་དཀྱིལ་འཁོར་ལ་ལན་གསུམ་བསྐོར། ཆད་ན་བསབ། ལྷག་ན་(༡༨ན)
དབྱི། མ་ཚོར་བ་རྣམས་ཡིག་བརྒྱ་བཟླས་པས་ཁ་བཀང་ཞིང་ཚོན་ལྷག་མ་ལ་ཆུ་གཉིས་ཉེར་སྤྱོད་རོལ་མོ་དང་བཅས་པས་མཆོད། ཨོཾ་བཛྲ་མུཿས་ཚོན་ལྷག་གི་ཡེ་ཤེས་པ་སྟ་གོན་གྱི་ཐུགས་ཀར་གཤེགས་པར་བསམ་ཞིང་དམ་ཚིག་པ་རང་ཉིད་ལ་ཐིམ་པར་བསམ་མོ། །གཉིས་པ་བུམ་པ་འབུལ་ཞིང་དཀྱིལ་འཁོར་བརྒྱན་པ་ནི། སློབ་དཔོན་གྱིས་སྤོས་དང་རོལ་མོར་བཅས་པས་རྣམ་རྒྱལ་དང་ལས་བུམ་ལས་ཀྱི་རྡོ་རྗེས་བཟུང་ལ་ཡིག་བརྒྱ་བརྗོད་དེ་དྲིལ་བུ་དཀྲོལ་ཞིང་དཀྱིལ་འཁོར་ལ་སྐོར་བ་ལན་གསུམ་བྱས་ནས་ལྷ་སོ་སོའི་སྔགས་མཐར། བདག་གམ་སློབ་མ་ལ་དབང་བསྐུར་དུ་གསོལ། ཞེས་བརྗོད། ལྷ་མཚན་སོ་སོའི་ཐད་ནས་བུམ་པ་འབུལ་པའི་སྟང་ཀ་བགྱིས་ཏེ་དཀྱིལ་འཁོར་གྱི་ཤར་དུ་ཇི་ལྟར་རིགས་པའི་སྟན་ལ་འཇོག །ལས་བུམ་ལ་ཁཎྜ་རོ་ཧི་བཟླས་ཏེ། དུམ་སྐྱེས་མས་དཔལ་འཁོར་ལོ་སྡོམ་པའི་དཀྱིལ་འཁོར་གྱི་ལས་རྣམས་བསྒྲུབ་པའི་བར་དུ་གཅོད་པ་ཐམས་ཅད་སྲུང་དུ་གསོལ། ཞེས་དབང་ལྡན་དུ་དགོད་དོ། །མཐའ་དྲིས་བྱུགས། སྤྱི་མཆོད་དང་སྒོས་མཆོད་ཐམས་ཅད་དཀྱིལ་འཁོར་གྱི་མཐར་ཟླུམ་པོར་བཀོད་པ་ཙམ་མིན་པ་མཆོད་གཏོར་གྱི་འགོད་ལུགས་ཕལ་ཆེར་སྟ་གོན་གྱི་སྐབས་སུ་བཤད་པ་དང་འདྲ། སྔོན་འགྲོ་དང་ཕྱི་རོལ་པའི་གཏོར་མ་མེ་ཏོག །མིག་དར། དབུ་རྒྱན། རྡོར་དྲིལ། མིག་ཐུར། མེ་ལོང་། མདའ་གཞུ། རིགས་ལྔའི་ཕྱག་མཚན། ཁཊྚཱཾ་ག །ཚངས་སྐུད། རྒྱན་དྲུག །ཌཱ་མ་རུ། ཐོད་པ། གསང་རྫས། སློབ་མའི་མཆོད་པ་སྦྱང་ཆས་སོགས་དེར་དགོས་པའི་རྫས་དང་ཡོ་བྱད་རྣམས་བརྒྱུད་ལྡན་བླ་མའི་ཕྱག་ལེན་ལྟར་བཀོད་པས་མཛེས་པར་བཤམ་མོ། །གསུམ་(༡༨བ)
བསྒྲུབ་ཅིང་མཆོད་ནས་དབང་བསྐུར་བ་ལ་སྒྲུབ་མཆོད་དངོས་དང་བདག་ཉིད་འཇུག་ཅིང་སློབ་མ་རྗེས་སུ་འཛིན་པ་གཉིས་ཀྱི་དང་པོ་ནི། སློབ་དཔོན་གྱི་གཡས་སུ་སྟེགས་ཀྱི་ཁར་གཡོན་ནས་བརྩམས་ཏེ་ནང་མཆོད་ཀ་པཱ་ལའི་སྟེགས་ཟུར་ཕྱིར་སྟོན། དྲིལ་བུའི་ཞལ་རྡོ་རྗེ་ལ་བསྟན་པ། ཌཱ་མ་རུ་ཟུར་བསློང་པ། མེ་ཏོག་ཕོར་པ། དེ་རྣམས་ཀྱི་ཕྱི་བུམ་པ་གཉིས་ཀྱི་ཕྱི་རོལ་ནས་རྟེན་ཁེབས་ཟུར་བལྟབ་བྱས་པ་མཛེས་པར་གཡོགས་པ་སོགས་ཚར་ལུགས་སོར་བཞག་བྲིས་པ་ཡིན་ཅིང་། བུ་ལུགས་དང་གོང་དཀར་བ་སོགས་ལ་འགོད་ལུགས་གཞན་ཡོད། སྔོན་འགྲོ་གཏོར་མ་དང་གནས་ཡོ་བྱིན་རླབས། མཎྜལ་ཞུ་འབུལ་ནས་བདག་བསྐྱེད་ཉེར་བསྡུའི་བར་བྱ། སྔར་གྱི་རྡོ་རྗེ་ཤུགས་ཀྱི་སྔགས་རྒྱས། རང་ཉིད་དཀྱིལ་འཁོར་གྱི་དབུས་སུ་ཞུགས་པ་ཧེ་རུ་ཀཿཡུམ་བཅས་ཀྱི་སྐུར་བསམ་རྡུལ་ཚོན་གྱི་དཀྱིལ་འཁོར་ལ། ལས་བུམ་གྱི་ཆུས་ཁཎྜ་རོ་ཧེ་དང་ནང་མཆོད་ཀྱིས་སུམ་བྷས་བསངས། སྭ་བྷཱ་ཝས། རྡུལ་ཚོན་གྱི་དཀྱིལ་འཁོར་རང་བཞིན་གྱིས་རྣམ་པར་དག་པ་ཞེས་པ་ནས་བཟུང་། ཁ་བརྒྱན་པའོ། །དེ་རྣམས་ལས་སྤྲུལ་པ་ནམ་མཁའི་ཁམས་ཁྱབ་པར་སྤྲོས། འཕགས་པ་མཆོད། སེམས་ཅན་གྱི་དོན་བྱས། ཐམས་ཅད་དཔལ་འཁོར་ལོ་སྡོམ་པའི་གོ་འཕང་ལ་བཀོད། ཚུར་འདུས་རང་རང་གི་གནས་སུ་འཁོད་པར་བསམ། སྟ་གོན་གྱི་དཀྱིལ་འཁོར་ལ་ཆུ་གཉིས་ཉེར་སྤྱོད་རོལ་མོས་མཆོད། ཛཿཧཱུྃ་བཾ་ཧོཿས་ནམ་མཁར་བཞུགས་པའི་དཀྱིལ་འཁོར་མདུན་བསྐྱེད་ཀྱི་དཀྱིལ་འཁོར་ལ་གཉིས་སུ་མེད་པར་ཐིམ་པར་བསམ། ལྷ་ཐམས་ཅད་ཀྱི་མིག་གཏི་མུག་རྡོ་རྗེ་ནས། རིན་འབྱུང་གིས་དབུ་བརྒྱན་(༡༩ན)
པར་བསམ། དེ་ནས་བུམ་པ་བསང་སྦྱང་ནས་རིན་འབྱུང་གིས་དབུ་བརྒྱན་པའི་བར་བྱ། ཡབ་ཡུམ་གྱི་སྙིང་པོ། ཉེ་སྙིང་། ལྷ་མོ་བཞིའི་སྔགས་ཀྱིས་མཆོད། མཆོད་པ་བྱིན་གྱིས་བརླབ། ཆུ་གཉིས་ཀྱི་རྫས་དང་འབུལ་ཚུལ་ཀུན་མཁྱེན་བུ་རིན་པོ་ཆེས་མཛད་པའི་བདེ་ཆེན་རྣམ་རོལ་ལས་ཤེས་ཤིང་མཆོད་ཕྲེང་གི་རིམ་པ་སྔ་ཕྱི་མང་དུ་འདུག་ཀྱང་ཐམས་ཅད་མཁྱེན་པ་བཙོང་ཁ་པ་ཆེན་པོའི་གསུང་ལས་བྱུང་བ་ལྟར། དག་ཅིང་དྲི་མེད་ཡིད་འོང་བའི། །སྔགས་ཀྱི་ཡོན་ཆབ་མཆོག་འདི་དག །བདག་གི་དད་པས་འབུལ་ལགས་ན། །བཞེས་ཏེ་བདག་ལ་བཀའ་དྲིན་སྩོལ། །ལག་པ་གཉིས་པད་ཀོར་སྙིང་ག །ནུ་མ་གཡས། ཡང་སྙིང་ག །ནུ་མ་གཡོན། ཡང་སྙིང་ག་རྣམས་སུ་རྣམ་ལྔ་འདོད་ཀོར་དུ་གྲགས་པ་དང་བཅས། ཨོཾ་སརྦ་ཏ་ཐཱ་ག་ཏ་ཤྲཱི་ཧེ་རུ་ཀ་པཉྩ་ཌཱ་ཀི་ནཱི་མཎྜཱ་ལ་བཱི་ར་ཡོ་གི་ནཱིའི་རྗེས་སུ་རྡོ་རྗེ་ཁུ་ཚུར་ལས་མཛུབ་མོ་གཉིས་རྩེ་སྤྲད་པའི་ཚུལ་གྱིས་བཛྲ་ཨརྒྷཾ་པྲ་ཏཱིཙྪ་ཨཱཿཧཱུྃ། ཞེས་པའི་ཨཱཿལ་ལག་པ་གཉིས་ལས་གཡས་ནང་དུ་བསྣོལ་བ་ཁ་ནང་དུ་བསྟན་པའི་སེ་གོལ་དང་ཧཱུྃ་ཞེས་གཡོན་ནང་དུ་བསྟན་པའི་སེ་གོལ་གཏོག་གོ །མཆོད་ཡོན་གྱི་གནས་སུ་ཞབས་བསིལ་བཅུག །པཱ་དྱཾ། ཕྱག་རྒྱ་གོང་བཞིན་ཞབས་བཀྲུ་བའི་ཚུལ། ཏིང་འཛིན་པིར་གྱིས་བྲིས་པའི་སྨིན་ལེགས་གཟུངས། །འཁྲི་ཤིང་གཞོན་ནུ་བཞིན་དུ་ལུས་ཕྲ་ཞིང་། །བཞིན་རས་རྒྱས་པས་ཟླ་བའི་མཛེས་པ་འཕྲོག །ཨུཏྤལ་སྔོན་པོའི་མིག་ཅན་མཆུ་སྒྲོས་དམར། །སྤེལ་ལེགས་མེ་ཏོག་ཕྲེང་བ་འཛིན་མཛད་མ། །འདོད་པའི་བདེ་ལ་ཆགས་པ་མང་སྤྲུལ་ཏེ། །དཀྱིལ་འཁོར་པ་རྣམས་དགྱེས་པ་བསྐྱེད་པའི་ཕྱིར། །ཉེར་སྤྱོད་ལྷ་མོའི་བདེ་(༡༩བ)
བས་མཆོད་པར་བྱ། །རྡོ་རྗེ་ཁུ་ཚུར་ཁ་གྱེན་དུ་བསྟན་ནས་གཏོར་བའི་ཕྱག་རྒྱ་དང་། བཛྲ་པུ་ཥྦེ་པྲ་ཏཱིཙྪ་ཨཱཿཧཱུཾ། ཞེས་མེ་ཏོག་དང་དེ་བཞིན་དུ་བདུག་སྤོས་ནས་ཞལ་ཟས་ཀྱི་བར་ལ་ཚིགས་བཅད་དང་སྔགས་སྔ་མ་བཞིན་དུ་བརྗོད་ལ། ཁྱད་པར་ནི། སྤེལ་ལེགས་མེ་ཏོག་ཕྲེང་བ་འཛིན་མཛད་མ། ཞེས་དང་། པུཥྤེ་ཞེས་པའི་གནས་སུ་རིམ་བཞིན། དྲི་ཞིམ་བདུགས་པའི་སྤོས་སྣོད་འཛིན་མཛད་མ་ཞེས་དང་། རྡོ་རྗེ་ཁུ་ཚུར་གཉིས་ཁ་ཐུར་དུ་བསྟན་ནས་སྤོས་བཏུལ་བའི་ཕྱག་རྒྱ་དང་། དྷཱུཔཻ་ཞེས་བདུག་སྤོས་དང་། རིན་ཆེན་འོད་འབར་སྣང་གསལ་འཛིན་མཛད་མ། རྡོ་རྗེ་ཁུ་ཚུར་གཉིས་ཀྱི་མཐེ་བོང་གཤིབས་ཏེ་བསྒྲེང་པའི་ཕྱག་རྒྱ་དང་དི་པེ། ཞེས་པས་མར་མེ་དང་། སྟོང་གསུམ་ངད་ལྡང་དྲི་མཆོག་འཛིན་མཛད་མ། །རྡོ་རྗེ་ཁུ་ཚུར་བརྐྱང་པའི་ཐལ་མོས་དྲི་བྱུག་པའི་ཕྱག་རྒྱ་དང་། གནྡྷེ། ཞེས་དྲི་དང་། རོ་བརྒྱ་ལྡན་པའི་ཞལ་ཟས་འཛིན་མཛད་མ། །རྡོ་རྗེ་ཁུ་ཚུར་གཉིས་ཁ་གྱེན་དུ་བསྟན་ནས་ཐལ་མོ་བརྐྱང་པའི་ཕྱག་རྒྱ་དང་། ནཻཝེདྱ་ཞེས་པ་རྣམས་བཅུག་ལ་ཞལ་ཟས་ཀྱི་བར་དབུལ། ཡིད་འོང་རོལ་མོའི་ཆ་བྱད་མཐའ་ཡས་ལས། །བྱུང་བའི་གདངས་སྙན་མི་འདྲ་དུ་མ་ཅན། །ཐོས་པས་ལུས་སེམས་གདུང་བ་ཞི་བྱེད་པ། །སྣ་ཚོགས་རོལ་མོའི་སྒྲ་ཡིས་མཆོད་པར་བྱ། །བཛྲ་ཤཔྟ་པྲ་ཏཱི་ཙྪ་ཨཱ་ཧཱུྃཿསྭ་ཧཱ་ཞེས་རོལ་མོ་དབུལ། ཕུལ་བྱུང་གཟུགས་མཛེས་ཡིད་འཕྲོག་རྒྱན་གྱིས་སྤྲས། །ལང་ཚོ་རབ་རྒྱས་གླུ་དང་གར་ལ་མཁས། །དབང་པོ་དྲུག་ལ་རྨད་བྱུང་བདེ་བ་སྟེར། །ཀུན་གྱི་དགའ་བསྐྱེད་མཆོད་པའི་ལྷ་མོ་ནི། །པི་ཝཾ་གླིང་བུ་རྔ་ལྡུམ་རྫ་རྔ་མས། །གདངས་(༢༠ན)
སྙན་སྒྲ་ཡིས་རྣ་བའི་དགའ་སྟོན་འགྱེད། །རབ་འབྱམས་མཆོད་པའི་སྤྲིན་གྱིས་བདག་མཆོད་ན། །དགྱེས་བཞིན་བཞེས་ཏེ་མཆོག་རྣམས་སྩལ་དུ་གསོལ། །རྡོ་རྗེ་ཁུ་ཚུར་གཉིས་ཀྱིས་པི་ཝང་བརྡུང་བའི་ཚུལ་དང་བཛྲ་བཱི་ཎ་ཧཱུྃ་ཧཱུྃ་ཕཊ། གླིང་བུ་བསྒྱུར་པའི་ཚུལ་དང་། བཛྲ་བཾ་ཤེ་ཧཱུྃ་ཧཱུྃ་ཕཊ། སོར་མོས་མཆན་ཁུང་གི་ཐད་དུ་རྔ་མྲྀ་ཏཾ་ག་བརྡུང་པའི་ཚུལ་དང་། ཨོཾ་བཛྲ་མྲྀ་ཏྀ་གེ་ཧཱུྃ་ཧཱུྃ་ཕཊ། སོར་མོ་འོག་ཏུ་རྡོ་རྗེ་ཆེན་པོའི་རྡུང་པའི་ཚུལ་དང་། །བཛྲ་མུ་ར་ཛེ་ཧཱུྃ་ཧཱུྃ་ཕཊ། པི་ཝང་ཞེས་པ་ནས་དགའ་སྟོན་འགྱེད་ཅེས་པའི་ཚིག་རྐང་གཉིས་ཀྱི་གནས་སུ། བཞིན་མཛེས་འཛུམ་དང་ལྡན་པའི་འགྱིང་བག་ཅན། །སྙན་པའི་གླུ་ལེན་མཛེས་པའི་གར་བསྒྱུར་མ། །ཞེས་བཅུག་ལ། གོང་གི་ཚིག་རྐང་བཞི་དང་མཐའི་ཚིག་རྐང་གཉིས་སྔ་མ་བཞིན་དུ་སྦྱར་བའི་རྗེས་སུ་རྡོ་རྗེ་ཁུ་ཚུར་གཉིས་ཁ་ཕྱིར་བསྟན་ཏེ་ཁ་འགྲམ་གཉིས་སུ་བཞག་པ་བཞད་པའི་ཚུལ་དང་། བཛྲ་ཧཱ་སྱ་ཧཱུྃ་ཧཱུྃ་ཕཊ། རྡོ་རྗེ་ཁུ་ཚུར་གཉིས་དཀུར་བཞག་སྟེ་བསྙེམ་པའི་ཚུལ་དང་། བཛྲ་ལཱ་སྱ་ཧཱུྃ་ཧཱུྃ་ཕཊ། ཏིང་ཤགས་དཀྲོལ་བའི་ཚུལ་དང་། བཛྲ་གཱི་ཏི་ཧཱུྃ་ཧཱུྃ་ཕཊ། གར་བསྐོར་བའི་ཚུལ་དང་། བཛྲ་ནྲི་ཏྱ་ཧཱུྃ་ཧཱུྃ་ཕཊ། ཅེས་བརྗོད། དེ་བཞིན་དུ་འོག་མ་གཉིས་ལའང་སྦྱར་ལ། ཁྱད་པར་ནི། མེ་ཏོག་སྡོང་བུ་དྲི་ཞིམ་བདུག་སྤོས་དང་། མར་མེའི་སྡོང་བུ་དྲི་ཡི་ཆོས་འཛིན། །སྔར་གྱི་མེ་ཏོག་ནས་དྲིའི་བར་གྱི་ཕྱག་རྒྱ་བཞི་རིམ་པ་བཞིན་བྱས་ལ། བཛྲ་པུཥྤེ་ཧཱུྃ་ཧཱུྃ་ཕཊ། བཛྲ་དྷཱུ་པེ་ཧཱུྃ་ཧཱུྃ་ཕཊ། བཛྲ་དཱི་པེ་ཧཱུྃ་ཧཱུྃ་ཕཊ། བཛྲ་གནྡྷེ་ཧུཾ་ཧཱུྃ་ཕཊ། དྲི་མེད་མེ་ལོང་སྦྲང་ཆར་སྣོད་དང་ནི། །སྣ་ཚོགས་གོས་དང་ཆོས་ཀྱི་(༢༠བ)
འབྱུང་གནས་འཛིན། །གཡོན་པའི་རྡོ་རྗེ་ཁུར་ཚུར་ཁ་ནང་དུ་བསྟན་པའི་སྟེང་དུ་གཡས་པའི་ལག་མཐིལ་བསྟན་ཏེ་བཞག་པ་མེ་ལོང་གི་ཕྱག་རྒྱ་དང་། རཱུ་པ་བཛྲི་ཧུཾ་ཧཱུྃ་ཕཊ། སྔར་གྱི་ཞལ་ཟས་ཀྱི་ཕྱག་རྒྱའམ། ཡང་ན་རྡོ་རྗེ་ཐལ་མོ་ཁ་གྱེན་དུ་ཕྱེ་བ་རོའི་ཕྱག་རྒྱ་དང་། རཱ་ས་བཛྲི་ཧུཾ་ཧཱུྃ་ཕཊ། རྡོ་རྗེ་ཁུར་ཚུར་གཉིས་ཀྱིས་གོས་འབུལ་བའི་ཚུལ་དང་། སྤཪྴ་བཛྲི་ཧུཾ་ཧཱུྃ་ཕཊ། རྡོ་རྗེ་བསྡམས་པ་ལས་མཐེའུ་ཆུང་རྩེ་སྤྲད་ལ་བརྐྱང་མཛུབ་མོ་གཉིས་དང་མཐེ་བོང་གཉིས་བརྐྱང་བསྐྱེད་པ་ཆོས་འབྱུང་གི་ཕྱག་རྒྱ་དང་། དྷ་རྨ་དྷཱ་ཏུ་བཛྲི་ཧུཾ་ཧཱུྃ་ཕཊ། ཅེས་རིག་མ་བཅུ་དྲུག་གིས་མཆོད། རབ་འབྱམས་ཞིང་ན་ཇི་སྙེད་གཟུགས་མཆིས་པ། །ཡོངས་སུ་གྱུར་པ་ལས་བྱུང་ལྷ་མོ་ནི། །བཞིན་རས་འཛུམ་ཞིང་སྐུ་ཡི་མཛེས་པ་སྟོན། །གཟུགས་ཀྱི་རྡོ་རྗེ་མ་ཡིས་མཆོད་པ་ཡིས། །གང་ཤར་གཟུགས་ཀྱི་སྣང་བ་ཐམས་ཅད་ནི། །གཟུགས་ཀྱི་རྡོ་རྗེ་མར་ནི་ཤར་བའི་མཐུས། །མི་འགྱུར་བདེ་བ་ཆེན་པོ་རབ་སྩལ་ཏེ། །བདེ་སྟོང་མཆོག་གི་ཏིང་འཛིན་རྫོགས་པར་ཤོག །སྔར་གྱི་མེ་ལོང་གི་ཕྱག་རྒྱ་དང་། རཱུ་པ་བཛྲི་ཧུཾ་ཧཱུྃ་ཕཊ། ཅེས་གཟུགས་དང་། དེ་བཞིན་དུ་ཚིགས་བཅད་གཞན་རྣམས་སྔ་མ་བཞིན་དུ་བརྗོད་ལ། ཁྱད་པར་ནི་གཟུགས་ཞེས་པ་འོག་མ་བཞི་ལ་རིམ་པ་བཞིན་སྒྲ་དང་དྲི་དང་རོ་དང་རེག་བྱ་ཞེས་པས་བརྗོད་ནས། བཞིན་རས་འཛུམ་ཞིང་སྐུ་ཡི་མཛེས་པ་སྟོན། །ཞེས་པའི་གནས་སུ། སྙན་པའི་པི་ཝང་བརྡུང་ཞིང་གླུ་ལེན་མ། །ཞེས་པ་གཅུག་པའི་རྗེས་སུ་སྔར་གྱི་པི་ཝང་བརྡུང་པའི་ཚུལ་དང་། ཤཔྟ་བཛྲི་ཧུཾ་ཧཱུྃ་ཕཊ། ཅེས་བརྗོད། དེ་བཞིན་དུ་འོག་མ་གསུམ་ལའང་ཤེས་པར་བྱའོ། །བཟང་པོའི་དྲི་ཡིས་ཕྱོགས་ཀུན་(༢༡ན)
རབ་འགེངས་མ། །བཛྲ་གནྡྷེ་བཛྲི་ཧུཾ་ཧཱུྃ་ཕཊཅེས་དང་། །བདུད་རྩིས་གང་བའི་རིན་ཆེན་སྣོད་འཛིན་མ། །བཛྲ་རཱ་ས་བཛྲི་ཧུཾ་ཧཱུྃ་ཕཊ། ཅེས་དང་། འཇམ་མཉེན་རེག་བྱ་མཆོག་གིས་ཡིད་འཕྲོག་མ། །སྤཪྴེ་བཛྲི་ཧུཾ་ཧཱུྃ་ཕཊ། ཅེས་འདོད་ཡོན་ལྔས་མཆོད་དོ། །དྲི་མེད་གསེར་གྱི་རྩིབས་སྟོང་འོད་འབར་བ། །རིན་ཅེན་ཨི་ནྟྲནཱི་ལའི་ཏོག་གིས་མཛེས། །སྣ་ཚོགས་ཕྲ་བཀོད་མུ་ཏིག་ཆུན་འཕྱང་གིས། ཁོར་ཡུག་བརྒྱན་པའི་གདུགས་ཀྱིས་མཆོད་པར་བྱ། །གཡོན་དེ་བཞིན་གཤེགས་པའི་ཁུ་ཚུར་བྱས་པའི་མཐེ་བོའི་སྟེང་དུ་གཡས་པ་ཁ་ཐུར་དུ་བསྟན་པ་བརྐྱང་ལ། བཛྲ་ཙྪ་ཏྲཾ་ག་པྲ་ཏཱི་ཙྪ་ཧཱུྃ་སྭཱཧཱ། ཞེས་གདུགས་དང་། དྲང་ཞིང་ལྡེམ་པའི་རིན་ཅེན་ཡུ་བ་ནི། །ཟླ་ཕྱེད་རྡོ་རྗེ་རིན་ཅེན་རྩེ་མོ་ཅན། །དར་ལྕེ་གསུམ་པ་རླུང་གིས་བསྐྱོད་པ་ན། །སིལ་སིལ་འཁྲོལ་བའི་དྲིལ་ཆུང་སྒྲ་སྒྲོག་ཅིང་། །སུམ་ཁུག་འཁྱོག་གི་འགྱིང་དང་རབ་ཏུ་ལྡན། །མཛེས་པའི་སྲོག་ཆགས་མཚན་མ་ཡོད་མོད་ཀྱིས། །མི་མཐུན་ཕྱོགས་ལས་རྒྱལ་བའི་རྒྱལ་མཚན་དང་། །རབ་མཛེས་བ་དན་རྣམས་ཀྱིས་མཆོད་པར་བྱ། །གཡོན་པའི་རྡོ་རྗེ་ཁུ་ཚུར་གྱི་སྟེང་དུ་གཡས་པའི་གྲུ་མོ་བཙུགས་པའི་རྡོ་རྗེ་ཁུ་ཚུར་ཕྲག་པ་གཡོན་གྱི་ཕྱོགས་སུ་འཁྱེར་བ་དང་། །ལག་པ་གཉིས་བརྐྱང་ལ་སྲིན་ལག་གི་ཚིགས་དབུས་མ་བཀུག་ནས། །བ་དན་རྩེ་གསུམ་པའི་ཚུལ་དུ་བསྒྲེངས་ཏེ་ལག་པ་གཉིས་བརྐྱང་ནས་སྟེང་དུ་བཏག་པ་ལྟར་བཞག་ལ། །ཨོཾ་བཛྲ་ཀེ་ཏུ་བ་ཏངྐ་པྲི་ཏཱཙྪ་ཧཱུྃ་སྭཱ་ཧཱ། ཞེས་རྒྱལ་མཚན་དང་བ་དན་དབུལ། །ནམ་མཁའི་རྒྱན་གྱུར་རིན་ཐང་མེད་པའི་གོས། །སྣ་ཚོགས་དར་གྱི་ཤམ་བུ་གཡོ་བ་ཅན། །ཙནྡན་(༢༡བ)
སྦྲུལ་གྱི་སྙིང་པོའི་དྲིས་བགོས་པ། །རབ་འབྱམས་བླ་བྲེའི་སྤྲིན་གྱིས་མཆོད་པར་བྱ། རྡོ་རྗེ་ཁུ་ཚུར་གཉིས་ཀྱིས་ནམ་མཁའ་ལ་བླ་བྲེ་འདོགས་པའི་ཚུལ་ལམ། ཡང་ན་གཡོན་པང་པར་མཉམ་གཞག་བྱས་གཡས་ཁ་ཐུར་དུ་བསྟན་ཏེ་བླ་བྲེ་བསྐྱེད་པའི་བསམ་པས་ནམ་མཁའ་ལ་ཡོངས་སུ་བསྐོར་ལ། །བཛྲ་བ་ཏཱ་ན་པྲ་ཏཱིཙྪཧཱུྃ་སྭཱ་ཧཱ། ཞེས་བླ་བྲེ་དབུལ་ལོ། །ཛམ་བུ་ཆུ་བོའི་གསེར་ལས་ལེགས་བྱས་ཤིང་། །རྩིབས་སྟོང་ལྡན་པའི་དཔག་ཚད་ལྔ་བརྒྱ་པ། །ཉི་མ་གཉིས་པ་ལྟ་བུར་མཁར་འཕགས་ཏེ། །དཔག་ཚད་འབུམ་ལམ་ཉི་མ་གཅིག་གིས་གཅོད། །དེའི་མཐུས་ནམ་མཁའི་ལམ་ནས་དཔུང་ཚོགས་བཞི། །གླིང་བཞི་ལྷ་གནས་དང་པོར་བགྲོད་བྱེད་པའི། །འཁོར་ལོ་རིན་ཅེན་ཕུལ་བས་འགྲོ་བ་ཀུན། །ཆོས་ཀྱི་སྲིད་ལ་དབང་སྒྱུར་ཐོབ་པར་ཤོག །ལག་པའི་མཁྲིག་མ་གཉིས་བསྣོལ་ཏེ་རྒྱབ་སྦྱར་ལ་སོར་མོ་རྣམས་གཅིག་ལ་གཅིག་འཁྱུད་དེ། མཐེ་བོང་གཉིས་ལག་མཐིལ་དུ་བཀུག་ལ། བཛྲ་ཙཀྲ་རཏྣ་པྲ་ཏཱི་ཙྪ་ཧཱུྃ་ཕཊ་ཞེས་འཁོར་ལོ། །རིན་ཅེན་བཻཌཱུ་ཪྻ་ཡི་ཟུར་བརྒྱད་ལས། །སྤྲོས་པའི་འོད་ཀྱིས་དཔག་ཚད་བརྒྱ་ཡི་བར། །མཚན་མོའང་ཉིན་མོ་བཞིན་དུ་སྣང་བྱེད་ཅིང་། །ཚ་བས་གདུངས་ཚེ་འོད་ཀྱིས་བསིལ་བ་སྟེར། །དེར་ནི་དུས་མིན་འཆི་དང་ནད་རྣམས་སེལ། །ཡིད་ལ་གང་བསམས་ཕལ་ཆེར་འབྱུང་འགྱུར་པའི། །ནོར་བུ་རིན་ཅེན་ཕུལ་བས་འགྲོ་ཀུན་གྱི། །ཆོས་ལྡན་རེ་བ་ཡིད་བཞིན་འགྲུབ་པར་ཤོག །ཁུ་ཚུར་གཉིས་ཀྱི་མཛུབ་མོ་གཉིས་ཚིགས་བཅག་སྟེ་མཐེ་བོང་གཉིས་རྩེ་སྤྲད་ལ་ཙཀྲ་རཏྣའི་གནས་སུ། མཎིརཏྣ་ཞེས་ནོར་བུ་དང་ཡིད་འོང་ལྟ་ན་སྡུག་པའི་བུད་མེད་ནི། །ལུས་དང་ཁ་ནས་དྲི་ཞིམ་རབ་ཏུ་(༢༢ན)
འབྱུང་། །གང་གིས་རེག་ལ་བདེ་བ་མཆོག་སྟེར་ཞིང་། །གླིང་དེར་བཀྲེས་སྐོམ་མྱ་ངན་སེལ་བར་བྱེད། །བུད་མེད་སྐྱོན་ལྔ་སྤངས་ཤིང་ཡོན་ཏན་ནི། །རྣམ་པ་བརྒྱད་དང་རབ་ཏུ་ལྡན་གྱུར་པའི། །བཙུན་མོ་རིན་ཆེན་ཕུལ་བས་འགྲོ་བ་ཀུན །ཟག་མེད་བདེ་བ་ཆེ་ལ་སྤྱོད་པར་ཤོག རྡོ་རྗེ་འབྱུང་བ་ལས། རྡོ་རྗེ་ཐལ་མོ་ལས། །མཛུབ་མོའི་རྩེ་མོ་བཀུག་ནས་ནི། །གུང་མོ་མཉམ་པའི་ཚིགས་སུ་སྦྱར། །རྡོ་རྗེ་དབྱིངས་ཀྱི་དབང་མོར་བཤད། །ཅེས་པའི་ཕྱག་རྒྱ་དང་། སྟྲི་རཏྣཾ། ཞེས་བཙུན་མོ། གཞན་ལ་མི་འཚེ་ཆོས་མ་ཡིན་པ་སྤངས། །ཡང་དག་ཐ་སྙད་ལས་ལ་སྐྱོ་བ་མེད། །ས་ཡི་བདག་པོའི་ཡིད་ལ་བསམས་པ་རྣམས། །མ་སྨྲས་པར་ཡང་ཤེས་ནས་བསྒྲུབ་པར་བྱེད། །དཔུང་རྣམས་འགྲོ་དང་གནས་དང་ལྡོག་པ་ཡི། །བྱ་བ་ཀུན་ལ་རབ་ཏུ་མཁས་གྱུར་པའི། །བློན་པོ་རིན་ཆེན་ཕུལ་བས་འགྲོ་བ་ཀུན། །རྒྱལ་བའི་དགོངས་པ་ཇི་བཞིན་སྐོང་བར་ཤོག །རྡོ་རྗེ་བསྡམས་པ་ལས་གུང་མོ་གཉིས་དང་། །ཐ་མ་བཞི་གཤིབས་ཏེ་བསྒྲེང་བའི་ཕྱག་རྒྱ་དང་། །པ་རི་ཎ་ཡ་ཀ་རཏྣ་ཞེས་བློན་པོ་དང་། །ཡན་ལག་བདུན་གནས་གངས་ཀྱི་རི་བོ་འདྲ། །རང་བཞིན་གླང་པོ་སྟོང་གི་སྟོབས་དང་ལྡན། །ཉི་མ་གཅིག་གིས་འཛམ་གླིང་ལན་གསུམ་འཁོར། །ཅང་ཤེས་སྐུད་པ་ཡིས་ཀྱང་བཀྲི་བར་ནུས། །གཞན་ལ་མི་གནོད་མི་འཁྲུག་དལ་གྱིས་འགྲོ། །ཕ་རོལ་སྡེ་ལས་རྒྱལ་བར་བྱེད་པ་ཡི། །གླང་པོ་རིན་ཆེན་ཕུལ་བས་འགྲོ་བ་ཀུན། །ཐེག་པ་མཆོག་གི་བཞོན་པས་འགྲོ་བར་ཤོག །ལག་པ་གཡོན་པའི་ཐིལ་དུ་གཡས་པའི་གྲུ་མོ་བཞག་སྟེ་བསྒྲེངས་ལ་གཡས་པའི་ཁུ་ཚུར་འོག་ཏུ་གླང་པོའི་རྣམ་པར་བྱས་པའི་(༢༢བ)
གུང་མོ་གླང་པོའི་སྣ་ལྟར་བྱས་ལ། ག་ཛ་རཏྣཾ། ཞེས་གླང་པོ་དང་། །མེ་ཏོག་ཀུ་མུད་བཞིན་དུ་རབ་ཏུ་དཀར། །ལྷ་ཡི་གཙུག་རྒྱན་ནོར་བུ་སོགས་ཀྱིས་བརྒྱན། །མདོག་དང་དབྱིབས་དང་བོང་ཚོད་ཕུན་སུམ་ཚོགས། །བསྒོ་ན་ཉིན་གཅིག་འཛམ་གླིང་ལན་གསུམ་འཁོར། །ལུས་ལ་ནད་མེད་གཟི་བརྗིད་ཆེན་པོ་ཅན། །ཡོངས་སུ་ངལ་བ་མེད་པའི་བཞོན་པ་ནི། །རྟ་མཆོག་རིན་ཆེན་ཕུལ་བས་འགྲོ་བ་ཀུན། །རྫུ་འཕྲུལ་མཆོག་གི་ཤུགས་དང་ལྡན་པར་ཤོག །ཁུ་ཚུར་གཅེར་པའི་གུང་མོ་གཉིས་དང་སྲིན་ལག་གཉིས་བརྐྱང་མཐེ་བོང་གཉིས་རྣ་བ་ལྟར་བྱས་ལ། ཨ་ཤྭ་རཏྣཾ། ཞེས་རྟ་མཆོག །རྡོ་རྗེ་རིན་ཆེན་མཐོན་ཁ་མ་རྒད་དང་། །གསེར་དང་དངུལ་དང་སྤུག་ལ་སོགས་པ་ནི། །ཟད་པ་མེད་པས་ས་ཕྱོགས་རབ་འགེངས་པ། །དེ་ཡི་འབྱོར་པ་ཤིན་ཏུ་བརྟན་པ་སྟེ། །གཡོ་དང་སྒྱུ་མེད་གཞན་ལ་གནོད་པ་མེད། །སྐྱེ་བོ་ཐམས་ཅད་རབ་ཏུ་དགའ་འགྱུར་བའི། །ཁྱིམ་བདག་རིན་ཅེན་ཕུལ་བས་འགྲོ་བ་ཀུན། །གསུང་རབ་རིན་ཅེན་མཛོད་ཀུན་འཛིན་པར་ཤོག །ཐལ་མོ་གཉིས་བཀན་ལ་སྙིམ་པའི་ཚུལ་དུ་བྱས་པ་ནམ་མཁའ་མཛོད་ཀྱི་ཕྱག་རྒྱ་དཔྲལ་བར་བཞག་ལ། གྲྀཧ་པ་ཏི་རཏྣཾ། ཞེས་ཁྱིམ་བདག་སྟེ་རིན་ཅེན་སྣ་བདུན་གྱིས་མཆོད་དོ། །འཁོར་ལོའི་སྐབས་ཀྱི་སྔགས་ཀྱི་ཐོག་མཐའ་ཕྱི་མ་དྲུག་ལའང་སྦྱར་རོ། །རིན་ཅེན་སྣ་བདུན་འབུལ་བའི་ཚིགས་བཅད་རྣམས་ནི་མདོ་དྲན་པ་ཉེར་གཞག་ལས་གསུངས་པའི་དོན་བསྡུས་པའོ། །བདུད་རྩིར་འགྲུབ་ན་ལག་མཆོད་ཀྱང་བྱ། གསང་མཆོད། དེ་ཁོ་ན་ཉིད་ཀྱི་མཆོད་པ། རྐང་བརྒྱད་བོད་སྐད་མའི་རྗེས་སུ་དྲིལ་སྟབས་སུམ་སྐོར་དང་བཅས། །མི་(༢༣ན)
བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོ་ཕྱག་འཚལ་ལོ། །རྣམ་པར་སྣང་མཛད་རབ་ཏུ་དག །རྡོ་རྗེ་ཞི་བ་དགའ་བ་ཆེ། རང་བཞིན་འོད་གསལ་མཆོག་གི་མཆོག །སངས་རྒྱས་མཁའ་འགྲོ་ཕྱག་འཚལ་ལོ། །དོན་ཡོད་རྒྱལ་པོ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དག་པ་ངོ་བོ་ཉིད་ལས་བྱུང་། །ལས་ཀྱི་མཁའ་འགྲོ་ཕྱག་འཚལ་ལོ། རྡོ་རྗེ་དཔག་མེད་རྒྱལ་པོ་ཆེ། མི་རྟག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོ་ཕྱག་འཚལ་ལོ། །རིན་ཅེན་མཁའ་འགྲོ་རབ་ཏུ་ཟབ། །རྡོ་རྗེ་མཁའ་འདྲ་དྲི་མ་མེད། །རང་བཞིན་དག་པ་གོས་པ་མེད། །རིན་ཅེན་མཁའ་འགྲོ་ཕྱག་འཚལ་ལོ། །ཞེས་བསྟོད། གཟུངས་ཐག་ནས་བཟུང་མདུན་བུམ་དམིགས་པ་ཕྱོགས་གཅིག་གིས། བཟླས་པ་བུམ་པ་དང་དུང་ཆོས་ཀྱི་རྣམ་པར་གྱུར་པའི་བར་སྔར་བཞིན། དེ་ནས་དབྱུག་པའི་རྩེ་རྡོ་རྗེ་བཅིངས་པ་ལག་ཏུ་གཙོ་བོ་ཡབ་ཡུམ་ནས་རིམ་བཞིན་མཚན་མ་སོ་སོའི་ཐད་དུ་འཛིན་ཅིང་ཤར་ནས་ནུབ་ཏུ་ཕྱོགས་པས་རང་རང་སྔགས་བརྒྱ་རྩ་སོགས་བཟླས་ལ་བྱིན་གྱིས་བརླབས་པར་བསམ་མོ། །ཆུ་གཉིས་ཉེར་སྤྱོད་རོལ་མོ་དང་གོས་ཟུངས་ཀྱིས་མཆོད། ཧཱུྃ། མཆེ་བ་གཙིགས་ཤིང་འཇིགས་པ་ཆེ། །སྒྱུ་མའི་མེ་ཏོག་ཕྲེང་བས་བརྒྱན། །ཤ་ཆེན་རབ་ཏུ་གསོལ་མཛད་པ། །ཁྲག་འབྱུང་དཔལ་ལ་ཕྱག་འཚལ་ལོ། །ཞེས་བསྟོད། ཡིག་བརྒྱས་བརྟན་པར་བྱ་ཞིང་གཏོར་མ་དང་པོ་དཀྱིལ་འཁོར་པ་དང་གཉིས་པ་དུར་ཁྲོད་ན་གནས་པའི་ཕྱོགས་(༢༣བ)
སྐྱོང་ལ་འཕྲིན་ལས་འཆོལ་བའི་བར་སྒྲུབ་ཐབས་བཞིན་ལ་མདུན་བསྐྱེད་ལ་འབུལ་རྒྱུ་ཡིན་པས་གསར་དུ་གདན་འཛོམས་པ་དང་གཤེགས་གསོལ་མི་དགོས་ཤིང་། སྒོས་ཀྱི་ཆོས་སྐྱོང་གང་ཡིན་གཞི་བདག་དང་བཅས་པ་རྣམས་ལ་འབུལ། སྒྲུབ་གྲོགས་དཀྱིལ་འཁོར་བསྲུང་དུ་བཅུག་དེ་ནས་གཙོ་བོ་ལས་གཉིས་པ་བྱེ་ན་སྒོ་ཁར་དུ་སྟེགས་ཀྱི་བར་གཏོར་མ་གཡས་ན་ཆུ་གཉེར་དང་གཡོན་ནས་ཉེར་སྤྱོད་ལྔ་བཀོད་པ་ཆང་ཆུ་སྦྲན། དཔོན་སློབ་ཐམས་ཅད་ཞྭ་གྱོན་རྡོར་དྲིལ་དང་བཅས་སྒྲུབ་ཁང་གི་ཕྱིར་ཐོན། དུས་གནས་ཀྱིས་ཕྱིར་འགྲོ་མ་ཐུབ་ན་ཡོལ་བས་གཡོབ། ཁྲིའུ་ཤིང་ལ་སློབ་དཔོན་བཞུགས་ཤིང་དམངས་རྣམས་དེ་ལ་ཁ་ཕྱོགས་ནས་རང་གཞན་གྱི་དཀྱིལ་འཁོར་བསྲུང་ཕྱིར་སུམྦྷ་ཁ་ཡར་བཟླ། རྡོ་རྗེས་ནང་མཆོད་འཐོར་བའི་ཚུལ་དང་བཅས། མཆོད་གཏོར་རྒྱས་བསྡུས་གང་རུང་གིས་བརླབ་པ་ནས་ཡིད་ལ་བདེ་བ་ཀུན་འགྲུབ་ཤོག་གི་བར་སྔོན་འགྲོ་གཏོར་མ་ལྟར་ལ། གང་དུ་བཅོམ་ལྡན་འདས་ལྷན་ཅིག །འོངས་པའི་ཕྱོགས་ཀྱི་བདག་པོ་རྣམས། །གང་ཡང་རྗེས་སུ་འབྲང་བཅས་འདིར། །འཁོད་པ་དེ་དག་ཐམས་ཅད་རྣམས། །བདག་ནི་རྗེས་སུ་བཟུང་པའི་ཕྱིར། །ཇི་ལྟར་རིགས་པར་གྱོན་པ་ཡི། །དྲི་དང་མེ་ཏོག་སོགས་གཏོར་མ། །སོ་སོར་བཞེས་ཏེ་སེམས་ཅན་རྣམས། །བྱམས་པའི་སེམས་ཀྱིས་བདག་ཅག་ལ། །གེགས་མེད་པར་ནི་མཛད་དུ་གསོལ། །ལས་ཀྱི་རྡོ་རྗེས་ཞལ་ཟས་ནས་གཡས་སྐོར་དུ་མཆོད་པ་རྣམས་གཏོར་སྣོད་ཀྱི་ནང་དུ་རིམ་བཞིན་བླུག །སློབ་དཔོན་གྱིས་ནང་མཆོད་ཀྱི་རྒྱུན་འཁྱེར་པའི་ཕྱེད་གཏོར་ནང་དུ་བླུག །ཕྱེད་(༢༤ན)
ཀྱིས་གཏོར་ལམ་ཕྱེ། མཆོད་ཡོན་གཏོར་སྣོད་ལ་བསྐོར་ཏེ་འགྲོ་ཕྱོགས་སུ་སྦྲེངས་ལ་སློབ་དཔོན་གྱིས་མཆོད་ཡོན་གྱི་ཕྱག་རྒྱ་དང་བཅས། ཧྲཱིཿམ་ཤུདྡྷ་སརྦ་དྷ་རྨ་ས་རྦ་པཱ་པཾ་ནི་ཙཱ་སྱ་སཾ་ཤོ་དྷ་ཡ་སརྦ་བི་ཀཝཱན་ཨ་པ་ན་ཡ་ཧཱུྃ། ཞེས་བརྗོད། ཡིག་བརྒྱའི་མཐར། སློབ་དཔོན་གྱིས་མཆོད་གཡོག་གི་གནས་གསུམ་དུ་བདུད་རྩི་རེག་ལ། ཨོཾ་ཨཱཿཧཱུྃ། ཞེས་གནས་གསུམ་བསྲུངས་ལ་ལག་པ་གཡས་པ་ས་ལ་བརྐྱང་སྟེ། ཨོཾ་བཛྲ་མུཿས་མགྲོན་རྣམས་སྒྲུབ་ཁང་གི་ཕྱོགས་མཚམས་སུ་གཤེགས། གསང་སྤྱོད་ལྟ་བར་མི་དབང་བའི་སོགས་བྱ། གཏོར་མ་རིང་དུ་དོར། སུམྦྷ་བརྗོད་རོལ་མོ་དྲག་ཏུ་བྱས་ནས་མཚམས་བཅད། ཁ་རྣ་མིག་སྣ་ཁ་ལག་མགོ་ལྟེ་བ་རྣམས་སུ་གཉིས་གསུམ་རེག །ཅེས་པ་ལྟར་ཉེ་རེག་བྱ། སློབ་དཔོན་གྱིས་རྗེས་མནན་ཏེ་ནང་དུ་ལོག །སྒོའི་ནང་དུ་ལས་བུམ་གྱི་ཆུས་བསངས། སྤོས་ཀྱིས་བདུགས། ཨོཾ་བཛྲ་བེ་གཱ་ཀྲ་མ་ཧཱུྃ། དཀྱིལ་འཁོར་ལ་ཡིག་བརྒྱ་རོལ་མོ་དང་བཅས་ནས་སྐོར་བ་གསུམ་མམ་བདུན་བྱ། ཤར་ནས་ཨོཾ་པྲ་ཏཱི་ཙྪ་བཛྲ་ཧོཿས་མེ་ཏོག་དབུལ། ཨོཾ་པྲ་ཏཱི་གྲྀ་ཧྞ་སྟྭཾ་མཾ་སཏྭ་མ་ཧཱ་བཱ་ལ། ཞེས་རང་གི་མགོ་བོར་བཅིངས། རྡོ་རྗེ་ཁུ་ཚུར་རྒྱབ་སྤྲད་པ་ལས་མཐེའུ་ཆུང་སྦྲེལ། མཛུབ་མོ་གཉིས་བསྒྲེངས་པ་ཧཱུྃ་མཛད་ཀྱི་ཕྱག་རྒྱའི་ལྟེ་བ་ལ་མཛུབ་མོ་དྲལ་ཞིང་ཞབས་གཡས་བརྐྱང་ནས་ཨོཾ་བཛྲོ་ཏྦྷ་ཊ་ས་མ་ཡ་པྲ་བེ་ཤ་ཡ་ཧཱུྃ། ཞེས་ནུབ། ལྷོ་རྣམས་སུ་གནས་ནས་སྒོ་དབྱེ། ཨོཾ་པྲ་ཎ་མཱ་མ་སརྦ་ཏ་ཐཱ་ག་ཏཱ་ན། ཞེས་ཕྱག་བྱ། ཤར་སྒོར་འགྲེངས་ཏེ་འཕུད་པ་དང་བཅས། བདག་ལས་དང་པོ་བའི་རྟེན་གྱི་གང་ཟག་(༢༤བ)
དུ་གྱུར་པས་ཏིང་ངེ་འཛིན་མ་གསལ་བ་དང་། བྱིང་བ་དང་། རྒོད་པའི་དབང་དུ་གྱུར་པ་དང་། ཆོ་ག་ལྷག་ཆད་དུ་གྱུར་བ་དང་། མཆོད་པའི་ཡོ་བྱད་མ་འབྱོར་བ་དང་། ཉམས་པ་ལ་སོགས་པ་དཀྱིལ་འཁོར་ཆེན་པོ་སྒྲུབ་པ་ལ་སྐྱོན་དུ་གྱུར་པ་གང་ལགས་པ་དེ་དག་ཐམས་ཅད་བཟོད་པར་མཛད་དེ་ལྷག་ཆད་ཁ་སྐོང་བར་མཛོད་ལ། བདག་སོགས་སེམས་ཅན་ཐམས་ཅད་ལ་དངོས་གྲུབ་ཀྱི་དཀའ་དྲིན་རྒྱ་ཆེན་པོ་སྩལ་དུ་གསོལ། ཞེས་སོགས་གསོལ་བ་གདབ་བོ། །གཉིས་པ་ལ་བདག་ཉིད་འཇུག་པ་དང་སློབ་མ་རྗེས་སུ་འཛིན་པ་གཉིས་ལས། དང་པོ་ལ་དཀྱིལ་འཁོར་དུ་གཞུག་པ་དང་ཞུགས་པ་ལ་དབང་བསྐུར་བ་གཉིས་ཀྱི་དང་པོ་ལ་ཕྱི་འཇུག་དང་ནང་འཇུག་གཉིས་ལས། དང་པོ་ནི། སློབ་དཔོན་གྱི་མདུན་སྟེགས་ཁར་མཎྜལ་མེ་ཏོག་སྣོད་བཅས། དབུ་རྒྱན་བཞི་སྒྲོམས་ཀྱི་རིན་འབྱུང་གི་ཞལ་རས་ལ་བསྟན་པའི་སྟེང་དུ་དར་དཔྱངས་ཀྱིས་མཛེས་པར་བྱས་པ་འཇོག་པ་བུ་ལུགས་ལ་མཛད། ལས་ཀྱི་རྡོ་རྗེས་ཚོགས་པ་ཐམས་ཅད་ལས་བུམ་གྱི་ཆུ་དང་མེ་ཏོག་བཀྱེ་ཞིང་བསྡུ། སློབ་དཔོན་གྱིས་སྣ་དྲངས་ཏེ་ཐམས་ཅད་ཀྱིས་བུམ་ཆུ་ཅུང་ཟད་འཐུང་ཞིང་ཀུ་ཤས་འཐོར་པའི་སྟང་ཀ་བྱས་ལ། ཁཎྜ་རོ་ཧེས་ཁྲུས་བྱ། དེ་ཡང་སྒོམ་དོན་ལ་རྩ་བའི་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ། ཆོ་ག་དཔོད་པ་སོགས་སློབ་དཔོན་གྱི་བྱ་བ་རྣམས་དཀྱིལ་འཁོར་གྱི་གཙོ་བོ་དང་། དབང་རྫས་འགྲེམ་མཁན་དེའི་ཐུགས་ཀ་ནས་བྱེ་བའི་ཧེ་རུ་ཀས་མཛད་པར་མོས་པ་དམ་པ་རྣམས་ཀྱི་ཕྱག་ལེན་དུ་གནང་བ་ལྟར་བྱ། མཎྜལ་དྲི་བཟང་གི་སྨན་དང་བཅས་ཚོམ་བུ་བདུན་མ་ལ་(༢༥ན)
ཁྱད་པར་མ་ཚང་བ་མེད་པ་འདི་ཉིད་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་དྲུང་དུ་འཇུག་པའི་ཆོས་ཟབ་མོ་ཞུ་བའི་ཡོན་དུ་དབུལ་བར་བགྱིའོ། ཞེས་སོགས་གྱིས་མཎྜལ་དབུལ། མེ་ཏོག་དང་བཅས་ཐལ་མོ་སྦྱར་ཏེ། །སངས་རྒྱས་ཀུན་གྱི་རང་བཞིན་སྐུ། །རྡོ་རྗེ་འཆང་ཆེན་ངོ་བོ་ཉིད། །དམིགས་མེད་བདེ་ཆེན་སྟོན་པ་པོ། །སློབ་དཔོན་ཆེན་པོ་ལ་ཕྱག་འཚལ་ལོ། །དོན་དམ་སྨྲ་བའི་སེང་གེ་རྣལ་འབྱོར་ཞེས་བྱ་བ། །ཉོན་མོངས་གཅོད་པའི་དོན་ལ་ཤིན་ཏུ་མཁས་གྱུར་པ། །སྲིད་པའི་ཉེས་བརྒྱ་བསྐྱེད་རྩ་ཉོན་མོངས་ཆོད་མཛོད་ལ། །རྣལ་འབྱོར་དོན་དམ་རྒྱལ་པོ་དེ་ཉིད་འགྲུབ་པར་མཛོད། །ཅེས་གསོལ་བ་གདབ། རང་ཉིད་དཔལ་འཁོར་ལོ་བདེ་མཆོག་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་འཛིན་པ། གཡས་བརྐྱང་གི་སྟབས་ཀྱིས་བཞུགས་པར་བསམ། ཁཎྜ་རོ་ཧེ་བཟླས་པའི་མིག་དར་དམར་པོ། ཨོཾ་ཙུཀྵ་བྷནྡྷ་བ་རཾ་ཨཱ་ན་ཡ་ཧཱུྃ། ཞེས་ལག་པ་གཡོན་པའི་རྡོ་རྗེ་ཁུ་ཚུར་ལས་གུང་མཛུབ་གཉིས་བརྐྱང་སྟེ་མིག་གཡས་ནས་གཡོན་གྱི་བར་སྒོར་ཙམ་བྱས་ཏེ་མིག་དར་འཆིང་བའི་སྟང་ཀ་བྱེད། ཨ་ཁཾ་ཝཱི་ར་ཧཱུྃ་གིས་མེ་ཏོག་ཕྲེང་བ་འཛིན་དུ་བཅུག་ལ་སློབ་དཔོན་གྱིས་ཁཎྚ་བཟླ་ཞིང་ལས་བུམ་གྱི་ཆུས་བསངས། ཀྱེ། དགའ་བ་ལ་དགའ་ཁྱེད་སུ་ཞིག སློབ་མས། བདེ་ཆེན་བདག་ནི་སྐལ་བཟང་ལགས། །ཞེས་རིགས་ངེས་པར་བྱས་ནས། །དཀོན་ཅོག་གསུམ་ལ་བདག་སྐྱབས་མཆི། །ལན་གསུམ། རྡོ་རྗེ་ཐལ་མོའི་བར་འཕྲེད་ལ་བཞག་ལ། སྲས་བཅས་སངས་རྒྱས་ཐམས་(༢༥བ)
ཅད་སོགས་ལན་གསུམ་གྱིས་སྡོམ་པ་བཟུང་། རང་གི་སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བ། དེའི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་རྩེ་ལྔ་པའི་རྣམ་པ་ཅན་དུ་བསམ། ཨོཾ་སརྦ་ཡོ་གཙིཏྟ་ཨུ་པ་ད་ཡཱ་མི། རྡོ་རྗེ་མེ་ཏོག་དང་བཅས་པ་སྙིང་གར་བཞག་སྟེ། ཨོཾ་སུ་ར་ཏེ་ས་མ་ཡ་སྟཾ་ཧོཿསིདྡྷི་བཛྲ་ཡ་ཐ་སུ་ཁཾ། རྡོ་རྗེ་མགོ་བོར་བཞག་ནས། དེང་ཁྱོད་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་གྱིས། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དཀྱིལ་འཁོར་འདི་དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱ་ཞིང་། མ་དད་པར་ཡང་མ་ཡིན་ནོ། ཞེས་གསང་བར་གདམས། ཁཎྜ་རོ་ཧེ་དང་། ཨ་ཁཾ་ཝཱི་ར་ཧཱུྃ་གིས་ཡོལ་བ་སློབ་མ་དབང་བསྐུར་པའི་དུས་ལྟར་བསམ་ན་ལེགས་སོ། །གཉིས་པ་ནང་འཇུག་ལ་དཀྱིལ་འཁོར་གསང་བའི་ཕན་ཡོན་བསྒྲག་པ་ནི། མགོ་བོར་རྡོ་རྗེ་བཞག་ལ། དེང་ཁྱོད་དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་ཞུགས་ཀྱིས། ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་བར་བྱ་ཡི། ཁྱོད་ཀྱིས་ཀྱང་དཀྱིལ་འཁོར་མ་མཐོང་བའི་མདུན་དུ་བརྗོད་པར་མི་བྱ་སྟེ། དམ་ཚིག་ཉམས་པར་འགྱུར་ཏ་རེ། མ་གསངས་པའི་ཉེས་དམིགས་བསྒྲག་པ་ནི། །རྡོ་རྗེ་མགོ་བོར་བཞག་སྟེ། །འདི་ནི་ཁྱོད་ཀྱི་དམ་ཚིག་གི་རྡོ་རྗེ་ཡིན་ཏེ། །ཚུལ་འདི་འགའ་ཞིག་ལ་སྨྲས་ན་མགོ་བོ་འགས་པར་བྱེད་དོ། །ཡེ་ཤེས་(༢༦ན)
བབས་པ་གསངས་མ་གསངས་ཀྱི་ཕན་ཡོན་དང་ཉེས་དམིགས་བསྒྲག་པ་ནི། སྙིང་གར་རྡོ་རྗེ་རེག་ལ། །ཧེ་རུ་ཀཿ་དཔལ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཐོད་པར་གནས་པའི་བདུད་རྩི་ལྔ་དྲི་བཟང་དང་འདྲེས་པ་ལ། ཨོཾ་ཨཱཿཧཱུྃ། བཟླས་པ་བྱིན་ལ་དམ་ཚིག་བསྲུངས་མ་བསྲུངས་ཀྱི་ཕན་ཡོན་དང་ཉེས་དམིགས་བསྒྲག་པ་ནི། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་ཡིས་འགྲུབ། །ཨོཾ་པཉྩ་ཨ་མྲྀ་ཏ་ཨུ་ད་ཀ་ཋ་ཋ་ཋ་ཧཱུྃ། ཞེས་འཐུང་། བླ་མ་བཀའ་གཉན་པར་གདམས་པ་ནི། རྡོ་རྗེ་མགོ་བོར་བཞག་སྟེ། དེང་ནས་བརྩམས་ཏེ་ཁྱོད་ཀྱི་དཔལ་ཧེ་རུ་ཀཿང་ཡིན་གྱི། ངས་འདི་གྱིས་ཤིག་ཅེས་བསྒོ་བ་གང་ཡིན་པ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་ཡང་མི་བྱ་སྟེ། མི་བདེ་བ་མ་སྤངས་པར་དུས་བྱས་ནས་དམྱལ་བར་ལྟུང་བར་འགྱུར་ཏ་རེ། ཞེས་དམ་ལ་བཞག་གོ །མཎྜལ་གླིང་བཞི་རི་རབ་ནས། ཡེ་ཤེས་དབབ་པ་ཞུ་བའི་ཡོན་དུ་དབུལ་བར་བགྱིའོ། །ཞེས་སོགས་བརྗོད། ཐལ་མོ་སྦྱར་ཏེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ་དཔལ་རྡོ་རྗེ་སེམས་དཔའ་བདག་ལ་དབབ་ཏུ་གསོལ། ཞེས་ལན་གསུམ་གྱིས་གསོལ་བ་གདབ་རང་སྐད་ཅིག་གིས་ཧེ་རུ་ཀར་གྱུར་པའི་སྤྱི་བོར་བཾ་ལས་ཆུའི་དཀྱིལ་འཁོར་དཀར་པོ་བུམ་པས་མཚན་པ་ལ་ཡི་གེ་ཧ་དཀར་པོ། སྙིང་གར་ལཾ་ལས་སའི་དཀྱིལ་(༢༦བ)
འཁོར་གྲུ་བཞི་པ་སེར་པོ་རྡོ་རྗེ་རྩེ་གསུམ་པས་མཚན་པ་ལ་ཧཱུྃ་སྔོན་པོ། ལྟེ་བར་རཾ་ལས་མེའི་དཀྱིལ་འཁོར་གྲུ་གསུམ་པ་དམར་པོ་རྣོ་ཞིང་འབར་བ་ལ་ཨ་དམར་པོ། རྐང་པའི་འོག་ཏུ་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་གཡོ་བའི་བ་དན་གྱིས་ཟུར་དུ་མཚན་པ་ལ་ཛྷེཿདམར་པོ་དྲག་ཅིང་བཟོད་པར་དཀའ་བ་འབར་བའི་གཟུགས་ཅན་དུ་བསམ་ལ། བླ་མ་དང་གཙོ་བོ་ཐ་མི་དད་པའི་ཐུགས་ཀ་ནས་འོད་ཟེར་འཕྲོས། རླུང་གི་བ་དན་ལ་ཕོག །རླུང་གཡོས་པས་མེ་སྦར། དྷཻཿརྐང་མཐིལ་ནས་ཞུགས། སུམ་མདོའི་མེ་དང་འདྲེས། དེའི་འོད་ཀྱིས་སྙིང་གའི་སའི་དཀྱིལ་འཁོར་བསྲེགས། དེའི་བདེ་དྲོད་ཀྱིས་དཔྲལ་བའི་ཆུ་ཁོལ་སྙིང་གར་མེ་ཆུ་འཐབས་པའི་བདེ་དྲོད་ཀྱིས་ཉམས་དཔག་ཏུ་མེད་པ་སྐྱེས། གཞན་ཡང་ཐུགས་ཀའི་ཧཱུྃ་གི་འོད་ཟེར་གྱིས་ཕྱོགས་བཅུའི་སངས་རྒྱས་དང་བྱང་སེམས་གདོད་མ་ནས་གྲུབ་པའི་དཔའ་བོ་དང་རྣལ་འབྱོར་མའི་ཚོགས་དཔག་ཏུ་མེད་པ་སྤྱན་དྲངས་ཏེ་རང་གི་ལུས་ལ་ཐིམ་པར་བསམ། ཡབ་ཡུམ་གྱི་སྙིང་པོ་ཉེ་སྙིང་དང་། ཨ་བེ་ཤ་ཡི། །སྟཾ་བྷ་ཡ། ར་ར་ར་ར། ཙཱ་ལ་ཡ། ཙཱ་ལ་ཡ། ཧཱུྃ། ཨཱཿཛྷཻཿབརྒྱ་འམ་ཉེར་གཅིག །བདུད་རྩི་ལྔ། ཤ་ལྔ། བུད་མེད་ཀྱི་འདོམ་དཀྲིས་ཀྱི་རས་ཟླ་མཚན་གོས་པ་གཏུབས་ལ། བྱི་ལའི་བྲུན། གུ་གུལ་རྣམས་བསྲེས་ཏེ་ཐོད་པར་རོ་སོལ་གྱི་དུད་པ་བཏང་ལངས་ཏེ་གཡས་བརྐྱང་བྱ། གཡས་ཌཱ་མ་རུ་གཡོན་དྲིལ་བུ་གསིལ་ཞིང་རོལ་མོ་དྲག་ཏུ་དཀྲོལ་བ་སློབ་མ་ལ་དབང་བསྐུར་དུས་ཀྱང་བྱ། རྡོ་རྗེ་མགོ་བོར་རྒྱ་གྲམ་དུ་བཞག་སྟེ། ཏིཥྛ་བཛྲ་(༢༧ན)
ཞེས་བརྗོད། མགོན་པོ་རྡོ་རྗེ་ཆོས་ཆེན་པོ། འོད་དཔག་མེད་པ་བདེ་བ་ཆེ། །འདོད་ཆགས་ཆེན་པོ་ཆོས་སྲུངས་ཤིག །དགེ་དང་མི་དགེ་གང་ཡིན་དྲི། ཐལ་མོ་སྙིང་ག །མགྲིན་པ། དཔྲལ་བར་འཇོག་ཅིང་། ཨོཾ་ན་མ་ཏེ་ཧཱུྃ། ན་མ་མི་ཧཱུྃ། ན་མོ་ན་མ་ཧཱུྃ་སྭཱ་ཧཱ། ཤར་སྒོ་ནས་ཕྱག་བྱས་པར་མོས་ལ་ཐལ་མོ་སྙིང་གའི་གཡོན་དུ་སྦྱར་ནས། སརྦ་བཱི་ར་ཡོ་གི་ནཱི་བྷྱཿ། པཱུ་ཛ་ཨུ་པསྠཱ་ན་ཡཱ། ཨཱ་ཧྨ་ནཱི་ནིཪྻཱ་ཏ་ཡཱ་མི། ཨོཾ་སརྦཏ་ཐ་གཱ་ཏ་བཱི་ར་ཡོ་ནཱི་ནཾ་ཌཱ་ཀི་ནྱཱ་དྱཱ་ཨ་དྷི་ཏི་ཥྛནྟ་མཾ། མཁའ་འགྲོ་མ་མར་མེ་གཅིག་ལས་གཉིས་མཆོད་ཀྱི་ཚུལ་དུ་བྱུང་ནས་སྙིང་གར་མ་མེ་ཧས་རང་མཁའ་འགྲོ་མར་གྱུར་བར་བསམ། །ཁྱད་ནས་དཔྲལ་བར། ཨོཾ་སརྦབཱི་རི་ཡོ་གི་ནཱི་བྷྱཿཔཱཛ་ཡཛ་ཨཱ་དྨནཱི་ནི་ཪྻཱཧ་ཡཱ་མི། སརྦ་ཏཐཱ་ག་ཏ་ཝཱི་ར་ཡོ་གེ་ནཱི་མཱ་མ་དྱཱ་ཨབྷི་ཥིཉྩ་ཏུ་མཾ། ལཱ་མ་གཉིས་ལ་སོགས། ནུབ་ནས་ལྐོག་མར། ཨོཾ་སརྦ་བཱི་ར་ཡོ་གེ་ནཱི་བྷྱཿ པཱུ་ཛ་པྲ་བ་རྟ་ན་ཡ་ཨཱ་ཏཱི་ནིཪྻ་ཏ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གེ་ནཱི་ཁཎྜ་རོ་ཧི་དྱ་པྲ་བརྟ་ཡནྟུ་མཾ། དུམ་སྐྱེས་མ་གཉིས་པ་སོགས། ལྷོ་ནས་སྤྱི་བོར། ཨོཾ་སརྦ་བཱི་ར་ཡོ་གེ་ནཱི་བྷྱཿ པཱུ་ཛ་ཀརྨ་ཎེ་ཨཱ་ཏྨཾ་ནཱཾ་ནིཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནི་རཱུ་པི་ནྱ་དྱཱ་ཀརྨ་ཀཪྻནྟུཾ་མཾ། གཟུགས་ཅན་མ་གཉིས་པ་སོགས་ཞེས་ཕྱག་བྱ། བླ་མས་གསུང་བར་བསམས་ཏེ། དེ་བཞིན་གཤེགས་པ་ཀུནགྱི་གནས། །ལྷ་མོ་རྣམས་ཀྱི་ཆོས་འབྱུང་ཉིད། །རིན་ཅེན་སྣ་ཚོགས་ཁང་བརྩེགས་མ། །ཧེ་རུ་ཀཿ དཔལ་ཕོ་བྲང་མཆོག །སྙིང་པོའི་དཀྱིལ་འཁོར་འདི་ཉིད་དུ། །བདག་གི་སློབ་མ་(༢༧བ)
གཞུག་པར་བགྱི། །ལྷ་ཡི་རིགས་ཀྱི་རིམ་པ་དགུ །བསོད་ནམས་ཇི་ལྟར་དེ་བཞིན་ཤོག །འདི་ཡི་དངོས་གྲུབ་གང་འགྲུབ་དང་། །རིགས་ནི་གང་གི་སྣོད་དུ་འགྱུར་། །འདི་ཡི་བསོད་ནམས་ཅི་ཡོད་པ། །དཀྱིལ་འཁོར་འདིར་ནི་དེ་བཞིན་ཤོག །དེ་ནས་སྔར་གྱི་མེ་ཏོག་ཕྲེང་བ་དེ་ཏྲཾ་ལས་སྐྱེས་པའི་རིན་པོ་ཆེའི་མེ་ཏོག་ཏུ་བསམ། གཙོ་བོའི་དབུ་ལ་མེ་ཏོག་ཕུལ་བར་བསམས་ལ། ཨོཾ་པྲ་ཧཱི་ཙྪ་བཛྲ་ཧོཿ ཞེས་དབུལ། ཨོཾ་པྲ་ཏི་གྲྀཧྞ་སྟྭཾ། ཨི་མཾ་ས་ཏྭ་མ་ཧཱ་བཱ་ལ། ཞེས་མེ་ཏོག་མགོ་བོར་འཆིང་། སྙིང་གར་ཉི་མ་ལ་ཧཱུྃ། དཔྲལ་བར་རཾ། མིག་གཉིས་ལ་ཨོཾ་རེ་རེ་བསམས། ཧཱུྃ་གིས་བསྐུལ། སྔར་གྱི་སྡིག་སྒྲིབ་བསྲེགས། ཨོཾ་གྱིས་འོད་གསལ་བར་བྱས་ནས་མ་རིག་པའི་བསྒྲིབས་གཡོགས་དང་མིག་དར་ལྷན་ཅིག་བསལ་བར་བསམས་ཏེ། ཨོཾ་ཧེ་རུ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་ཏེ། །རྡོ་རྗེའི་མིག་ནི་བླ་ན་མེད། །ཨོཾ་ཛྙཱ་ན་ཙཀྵུ་བཛྲ་ཧཱུྃ་སྭཱ་ཧཱ། ཞེས་མིག་དར་འགྲོལ་པའི་ཕྱག་རྒྱ་སྔ་མ་ལས་ལྡོག་སྟེ་བྱ་ཞིང་སློབ་མ་ལ་དངོས་སུ་འགྲོལ། དཀྱིལ་འཁོར་ལྟ་བར་བསྐུལ་བ་ནི། ཨོཾ། དཀྱིལ་འཁོར་བཟང་པོ་འདི་ལ་ལྟོས། །དེ་ནི་དད་པ་རབ་ཏུ་བསྐྱེད། ཁྱེད་ནི་རྣལ་འབྱོར་མ་རིགས་སྐྱེ། །སྔགས་དང་ཕྱག་རྒྱས་བྱིན་གྱིས་བརླབས། །འགྲོ་བ་ཕུན་སུམ་ཚོགས་ཀུན་དང་། །གྲུབ་ཀུན་ཁྱོད་ལ་མངོན་དུ་གྱུར། །དམ་ཚིག་ཐམས་ཅད་བསྐྱངས་པ་དང་། །སྔགས་ཀྱི་དངོས་གྲུབ་བརྩོན་པར་གྱིས། །དཔལ་འཁོར་ལོ་སྡོམ་པ་ལྷ་ལྔའི་དཀྱིལ་འཁོར་ཆེན་པོ་རྟེན་དང་བརྟེན་པར་བཅས་པ་མངོན་སུམ་ལྟར་མཐོང་བར་(༢༨ན)
བསམ། དེའང་སློབ་མ་རྗེས་འཛིན་གྱི་དུས་དཀྱིལ་འཁོར་ཡོངས་རྫོགས་སྒྲུབ་ཐབས་ལྟར་བརྗོད་ནས་བསྟན་ཏེ་བུ་ལུགས་ཀྱི་རྣལ་འབྱོར་རྒྱུད་ལ་ལུགས་ལྡོག་དང་བླ་མེད་ལ་ལུགས་འབྱུང་། ས་ལུགས་རྒྱུད་སྡེ་ཐམས་ཅད་ལ་ལུགས་འབྱུང་དུ་མཛད་པས་སྐབས་འདིར་དགོངས་པ་གཅིག་གོ །དེའི་ནང་ནས་ཁྱོད་ཀྱི་ལྷ་འདི་ལ་མེ་ཏོག་ཕོག་པས་དེའི་རིགས་ཡིན་ནོ། །ཞེས་ངོ་སྤྲོད། གཉིས་པ་ཞུགས་པ་ལ་དབང་བསྐུར་བར་བུམ་དབང་། གསང་དབང་། ཤེར་དབང་། ཚིག་དབང་དང་བཞི་ལས། དང་པོ་ཐུན་མོང་བ་རྡོ་རྗེ་སློབ་མའི་དབང་དང་ཐུན་མོང་མ་ཡིན་པ་རྡོ་རྗེ་སློབ་དཔོན་གྱི་དབང་གཉིས་ཀྱི་དང་པོ་ནི། མཎྜལ་བསྡུས་པའི་མཇུག་ཏུ་རྡོ་རྗེ་སློབ་མའི་དབང་ཞུ་བའི་ཡོན་དུ་ཞེས་སོགས་སྦྱར་ནས་དབུལ། ཇི་ལྟར་སངས་རྒྱས་མཁས་རྣམས་ཀྱིས། །རྡོ་རྗེ་སེམས་དཔའ་དབང་བསྐུར་ལྟར། །བདག་ཀྱང་མགོན་པོས་དབང་བསྐུར་ཞིང་། མཆོག་ཀྱང་བདག་ལ་སྩལ་དུ་གསོལ། ཞེས་ལན་གསུམ་གྱིས་གསོལ་བ་གདབ། ཨོཾ་བཛྲ་ཌཱ་ཁ་ཁ་ཁཱ་ཧི་ཁཱ་ཧཱིསརྦ་པཱ་པཾ་ད་ཧ་ན་བྷ་སྨིན་ཀུ་རུ་སྭཱ་ཧཱ། ཞེས་ལན་གསུམ་གྱིས་ཕྱག་རྒྱ་དང་བཅས་ཏིང་ངེ་འཛིན་གྱི་སྦྱང་བ་བྱ། ཁཎྜ་རོ་ཧེས་བསངས། ཤཱུ་ནྱ་ཏཱས། རང་དང་རྣམ་རྒྱལ་བུམ་པའི་ཆུ་གཉིས་ཀ་མི་དམིགས་པ་སྟོང་པར་བསམས། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་དང་རྡོ་རྗེ་ལས་སྐྱེས་པའི་ཐུགས་ཀྱི་བདེ་མཆོག་འཁོར་ལོ། སྐུ་མདོག་སྔོན་པོ་ཕྱག་གཡས་རྡོ་རྗེ་བསྒྲེངས་པ་དང་བཅས་པས་ཐུགས་ཀར་གཏོད་ཅིང་གཡོན་དྲིལ་བུ་བསྣམས་པ་དང་བཅས་པས་དཀུར་འཛིན་པ་ལ་རང་འདྲའི་ཤེས་(༢༨བ)
རབ་མས་འཁྱུད་པ། ཕྱག་རྒྱ་དང་བཅས། ཕཻཾ། ཐུགས་ཀ་ནས་འོད་ཟེར་འཕྲོས། བསྒོམས་པ་དང་འདྲ་བའི་ཡེ་ཤེས་པ་ཕྱག་རྒྱ་དང་བཅས་ཨོཾ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བཾ་ཧོཿས་བསྟིམ། ཕཻཾ། སླར་ཡང་འོད་ཟེར་འཕྲོས །དབང་གི་ལྷ་རྣམས་ཨོཾ་བཛྲ་ས་མཱ་ཛཿས་སྤྱན་དྲངས། ཨོཾ་སརྦ་ཏ་ཐཱ་ག་ཏ་ཨབྷི་ཥིཙྪ་ཏུ་མཾ། ཞེས་གསོལ་བ་བཏབ་པས་ཡུམ་རྣམས་ཀྱི། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་དབང་རྫས་ཀྱི་ལྷ་ལ་དབང་བསྐུར། རིགས་བདག་གིས་དབུ་བརྒྱན་པར་བསམས། ཆུ་གཉིས་ཉེར་སྤྱོད་རོལ་མོས་མཆོད། ཐབས་ཤེས་རབ་སྙོམས་པར་ཞུགས་པས་བྱང་སེམས་ཀྱི་རང་བཞིན་དུ་ཞུ་བ་ལས་བྱུང་བའི་བུམ་ཆུར་བསམས། ཕྱག་རྒྱ་དང་བཅས། ཕཻཾ། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་ཐུགས་ཀ་ནས་འོད་འཕྲོས་པས་གཤེགས་པ་དང་གཤེགས་མ། སེམས་དཔའ་དང་སེམས་དཔའ་མ། ཁྲོ་བོ་དང་ཁྲོ་མོའི་ཚོགས། ཕྱག་རྒྱ་དང་བཅས། ཨོཾ་བཛྲ་ས་མཱ་ཛཿས་སྤྱན་དྲངས། །ཐལ་མོ་སྦྱར་ཏེ། །རྡོ་རྗེ་ཅན་གྱིས་འགྲོ་སྐྱོབ་ཕྱིར། །སངས་རྒྱས་རྣམས་ཀྱིས་དབང་བསྐུར་བ། །ཡོན་ཏན་འབྱུང་གནས་ཇི་ལྟར་སྩལ། །དེ་བཞིན་འདི་ལའང་སྩལ་དུ་གསོལ། །ཞེས་གསོལ་བ་བཏབ་པས། དེ་བཞིན་གཤེགས་པས་དབང་བསྐུར་བའི་དགོངས་པ་མཛད། ཡུམ་བཞི་ཕག་མོ་དང་ལྔས་མེ་ཏོག་དང་གུར་ཀུམ་ལ་སོགས་པའི་ཆར་འབེབས་བཞིན་པས་བུམ་པའི་ཆུས་ཁྲུས་གསོལ། སེམས་དཔའ་རྣམས་ཀྱིས་བཀྲ་ཤིས་བརྗོད། ལྷ་མོ་རྣམས་ཀྱིས་མཆོད་པར་བསམ། མེ་ཏོག་འཐོར་བ་དང་བཅས། བཀྲ་ཤིས་གང་ཞིག་ཆོས་ཀྱི་དབྱིངས་ལས་ངེས་འབྱུང་བ། ཧེ་རུ་ཀཿདཔལ་འཇིགས་(༢༩ན)
བྱེད་རྒྱལ་པོ་འབར་བའི་སྐུ། །ཤེས་རབ་ཕག་མོའི་པདྨར་རྡོ་རྗེ་རོལ་མཛད་པའི། །བདེན་པ་འདིས་ཀྱང་བདེ་མཆོག་ལ་གནས་བཀྲ་ཤིས་ཤོག །བུམ་པ་མགོ་བོར་བཞག་སྟེ། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱི་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་པཉྩ་ཌཱ་ཀིནཱི་བཱི་ར་སྟཾ། ཨ་བྷི་ཥིཉྩ་མཾ། ཨོཾ་ཤྲཱི་བཛྲ་ཧེ་ཧེ་སོགས་ལྷ་སོ་སོའི་སྔགས་མཐར། ཨོཾ་བཛྲ་ཨུ་ད་ག་ཨ་བྷི་ཥིཉྩ་ཧཱུྃ། སུ་ར་སྟྭཱཾ། ཨ་ཧཾ། ཞེས་རྣམ་རྒྱལ་བུམ་པ་ནས་རྡོ་རྗེ་དང་བཅས་པའི་ཁུ་ཚུར་གྱིས་ཆུ་བླངས་ལ་འཐུང་། ཞེས་དབང་བསྐུར། ལུས་གང་། སྒོ་གསུམ་གྱི་དྲི་མ་དག །ཆུ་ལྷག་མ་ཡར་ལུད་པ་ལས་སྤྱི་བོར་མི་བསྐྱོད་པས་དབུ་བརྒྱན་པར་བསམ། དབང་གི་ལྷ་རྣམས་མི་བསྐྱོད་པའི་རྣམ་པས་རང་གི་ལུས་ལ་ཐིམ་པར་བསམ། ལུས་ངག་ཡིད་གསུམ་མི་བསྐྱོད་པའི་རང་བཞིན་དུ་བསམས་པ་ལ། ཆུ་གཉིས་ཉེར་སྤྱོད་རོལ་མོས་མཆོད། དབང་རྣམ་པ་ལྔ་ལས་མི་བསྐྱོད་པ་ཆུའི་དབང་ཐོབ། ཞེ་སྡང་གི་དྲི་མ་སྦྱངས་རྣམ་པར་ཤེས་པའི་ཕུང་པོ་གནས་བསྒྱུར། ཆོས་ཀྱི་དབྱིངས་ཀྱི་ཡེ་ཤེས་མངོན་དུ་བྱས། མི་བསྐྱོད་པའི་ས་བོན་དང་བག་ཆགས་བཞག །མི་བསྐྱོད་པ་ལ་བརྟེན་པའི་དངོས་གྲུབ་དང་འཕྲིན་ལས་སྒྲུབ་ལ་དབང་ངོ་། །ཁཎྜས་བསངས། ཤཱུནྱ་ཏཱས་རང་དང་དབང་རྫས་རིན་པོ་ཆེའི་ཅོད་པན་གཉིས་ཀྱི་མི་དམིགས་པ་སྟོང་པར་བསམ། སྟོང་པའི་ངང་ལས། པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་སྟེང་དུ་ཧཱུྃ་དང་རིན་པོ་ཆེ་ལས་སྐྱེས་པའི་ཡོན་ཏན་བདེ་མཆོག་འཁོར་ལོ་སྐུ་མདོག་སེར་པོ་གཡས་རིན་པོ་ཆེ་བསྒྱིངས་པ་དང་བཅས་པའི་སྐུར་འཛིན་ཅིང་(༢༩བ)
གཡོན་དྲིལ་བུ་ཐུགས་ཀར་ཕྱོགས་པ་ལ་རང་འདྲའི་ཤེས་རབ་མས་འཁྱུད་པ། ཕཻཾ། ཐུགས་ཀ་ནས་འོད་ཟེར་འཕྲོས། ཞེས་པ་ནས། རང་བཞིན་དུ་ཞུ་བ་ལས་བྱུང་པའི་དབང་རྫས་དབུ་རྒྱན་དུ་བསམ། ཕཻཾ། བླ་མ་དང་དཀྱིལ་འཁོར་ནས། ས་མཱ་ཛཿས་སྤྱན་དྲངས་པའི་བར་དང་རིན་ཅེན་ཅན་གྱིས་འགྲོ་སྐྱོབ་ཕྱིར། སངས་རྒྱས་ནས། གནས་ལས་བྱུང་བ་སྦྱིན་པར་བྱ། ཞེས་དབུ་རྒྱན་མགོ་བོར་བཅིངས་ལ། ཡོན་ཏན་དཔག་མེད་འབྱུང་བར་གནས། །ཡིད་བཞིན་རིན་ཆེན་སྣ་ཚོགས་རྒྱལ། །ངོ་མཚར་གཟི་བརྗིད་ཆེན་པོའི་མཆོག །ཅོད་པན་གྱིས་ནི་དབང་བསྐུར་རོ། ཨོཾ་ཨཱཿབཛྲ་མུ་ཀུ་ཊ་ཨ་བྷི་ཥིཉྩ་ཧཱུྃ། སུ་ར་ཏ་སྟཾ། ཨ་ཧཾ། ཀུ་ཤ་སྤྱི་བོར་རེག་ལ། ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏ་སྟྭཱཾ། ཨ་ཧཾ། བུམ་ཆུ་འཐུང་། ཞེས་དབང་བསྐུར། ལུས་གང་། སྒོ་གསུམ་གྱི་དྲི་མ་དག །ཆུ་ལྷག་མ་ཡར་ལུད་པ་ལས་རྣ་ལྟག་གཡས་སུ་རིན་ཆེན་འབྱུང་ལྡན་གྱིས་དབུ་བརྒྱན་པར་བསམ། དབང་གི་ལྷ་རྣམས་རིན་ཆེན་འབྱུང་ལྡན་གྱིས་རྣམ་པས་རང་གི་ལུས་ལ་ཐིམ་པར་བསམས། ལུས་ངག་ཡིད་གསུམ་རིན་ཅེན་འབྱུང་ལྡན་གྱི་རང་བཞིན་དུ་བསམས་པ་ལ་གོང་ལྟར་མཆོད། དབང་རྣམ་པ་ལྔ་ལས་རིན་ཅེན་འབྱུང་ལྡན་དབུ་རྒྱན་གྱི་དབང་ཐོབ། ང་རྒྱལ་དང་སེར་སྣའི་དྲི་མ་སྦྱངས། ཚོར་བའི་ཕུང་པོ་གནས་བསྒྱུར། མཉམ་པ་ཉིད་ཀྱི་ཡེ་ཤེས་མངོན་དུ་བྱས། རིན་ཅེན་འབྱུང་ལྡན་གྱི་ས་བོན་དང་བག་ཆགས་བཞག །དེ་ལ་བརྟེན་པའི་དངོས་གྲུབ་དང་འཕྲིན་ལས་སྒྲུབ་པ་ལ་དབང་ངོ་། །ཁཎྜས་བསངས། ཤཱུརྱ་ནྱ་ཏཱས་རང་དང་དབང་རྫས་རྡོ་རྗེ་གཉིས་ཀ་མི་དམིགས་པའི་སྟོང་པར་བསམ། སྟོང་པའི་ངང་ལས་པཾ་(༣༠ན)
ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཨཾ་དང་འཁོར་ལོ་ལས་སྐྱེས་པའི་གསུང་གི་བདེ་མཆོག་འཁོར་ལོ་སྐུ་མདོག་དམར་པོ་གཡས་པདྨ་བསྒྱིངས་པ་དང་བཅས་པས་དཀུར་འཛིན་ཅིང་། གཡོན་དྲིལ་བུ་ཐུགས་ཀར་ཕྱོགས་པ་ལ་རང་འདྲའི་ཤེས་རབ་མས་འཁྱུད་པ། ཕཻཾ། ཐུགས་ཀ་ནས་འོད་ཟེར་འཕྲོས་ནས་ཞུ་བ་ལས་བྱུང་བའི་རྡོ་རྗེར་བསམ། ཕཻཾ། བླ་མ་ནས་ས་མཱ་ཛཿས་སྤྱན་དྲངས་པའི་བར་དང་། །པདྨ་ཅན་གྱིས་འགྲོ་སྐྱོབ་ཕྱིར། སངས་རྒྱས་ནས། གནས་ལས་བྱུང་བ་སྦྱིན་པར་བྱ། །སངས་རྒྱས་རྡོ་རྗེའི་དབང་བསྐུར་བས། །དེང་ནི་ཁྱོད་ཉིད་དབང་བསྐུར་བྱ། །འདི་དེ་སངས་རྒྱས་ཐམས་ཅད་དེ། །རབ་ཏུ་གྲུབ་ཕྱིར་རྡོ་རྗེ་ལོང་། བཛྲ་ཨ་བྷི་ཥིཉྩ་མི། ཞེས་རྡོ་རྗེ་སྙིང་ག་མགྲིན་པ་དཔྲལ་བར་གཏུགས་ནས་ལག་པ་གཡས་སུ་སྦྱིན་པ་ཐུགས་ཀར་བཟུང་། སྤྱི་བོར་ཀུ་ཤ་རེག་ལ་ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏ་སྟཾ་། ཨ་ཧཾ། ཞེས་དབང་བསྐུར་ལུས་གང་། སྒོ་གསུམ་གྱི་དྲི་མ་དག །ཆུ་ལྷག་མ་ཡར་ལུད་པ་ལས་ལྟག་པར་འོད་དཔག་མེད་ཀྱིས་དབུ་བརྒྱན་པར་བསམ། དབང་གི་ལྷ་རྣམས་འོད་དཔག་མེད་ཀྱི་རྣམ་པས་རང་གི་ལུས་ལ་ཐིམ་པར་བསམ། ལུས་ངག་ཡིད་གསུམ་འོད་དཔག་མེད་ཀྱི་རང་བཞིན་དུ་བསམས་པ་ལ་གོང་ལྟར་མཆོད་ལ་དབང་རྣམ་པ་ལྔ་ལས་འོད་དཔག་མེད་རྡོ་རྗེའི་དབང་ཐོབ། འདོད་ཆགས་ཀྱི་དྲི་མ་སྦྱངས་འདུ་ཤེས་ཀྱི་ཕུང་པོ་གནས་བསྒྱུར་སོ་སོར་རྟོག་པའི་ཡེ་ཤེས་མངོན་དུ་བྱས། འོད་དཔག་མེད་ཀྱི་ས་བོན་དང་བག་ཆགས་བཞག །དེ་ལ་བརྟེན་པའི་དངོས་གྲུབ་དང་འཕྲིན་ལས་སྒྲུབ་པ་(༣༠བ)
ལ་དབང་ངོ་། །ཁཎྜས་བསངས། ཤཱུནྱ་ཏཱས། རང་དང་དབང་རྗས་དྲིལ་བུ་གཉིས་ཀ་མི་དམིགས་པ་སྟོང་པར་བསམ། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཁཾ་དང་རྡོ་རྗེ་ལས་སྐྱེས་པའི་དམ་ཚིག་བདེ་མཆོག་འཁོར་ལོ་སྐུ་མདོག་ལྗང་གུ་གཡས་སྣ་ཚོགས་རྡོ་རྗེ་བསྒྱིངས་པ་དང་བཅས་པས་དཀུར་འཛིན་ཅིང་གཡོན་དྲིལ་བུ་ཐུགས་ཀར་ཕྱོགས་པ་ལ་རང་འདྲའི་ཤེས་རབ་མས་འཁྱུད་པ། ཕཻཾ །ཐུགས་ཀ་ནས་འོད་ཟེར་འཕྲོས་ནས། ཞུ་བ་ལས་བྱུང་བའི་དྲིལ་བུར་བསམ། ཕཻཾ ། བླ་མ་ནས། ས་མཱ་ཛས་སྤྱན་དྲངས་པའི་བར་དང་། སྣ་ཚོགས་ཅན་གྱིས་འགྲོ་སྐྱོབ་ཕྱིར། སངས་རྒྱས་ནས། གནས་ལས་བྱུང་བ་སྦྱིན་པར་བྱ། དྲིལ་བུ་སྤྱི་བོར་དཀྲོལ་ཞིང་། ཨོཾ ། དྲིལ་བུ་རྡོ་རྗེ་རབ་ལྡན་པ། ཤིན་ཏུ་དཔའ་བོ་ཉིད་དབང་བསྐུར། རྡོ་རྗེ་དམ་ཚིག་གནས་པ་ཁྱོད། བདག་པོའི་དབང་བསྐུར་རྒྱལ་མནོས་ཤིག །ཨོཾ་བཛྲ་གྷཎྜ་ཨཱཿཨཱཿ །འཁྱུད་རྒྱ་བྱ། བཅོམ་ལྡན་བཟུང་ངོ་བདག་ལ་ནི། ཡང་དག་ཉེ་བར་གྱུར་བར་མཛོད། སྤྱི་བོར་ཀུ་ཤ་རེག་ལ་ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏ་སྟྭཱཾ། ཨ་ཧཾ། ཞེས་དབང་བསྐུར། ལུས་གང་། སྒོ་གསུམ་གྱི་དྲི་མ་དག །ཆུ་ལྷག་མ་ཡར་ལུད་པ་ལས་རྣ་ལྟག་གཡོན་པར་དོན་ཡོད་གྲུབ་པས་དབུ་བརྒྱན་པར་བསམ། དབང་གི་ལྷ་རྣམས་དོན་ཡོད་གྲུབ་པའི་རྣམ་པས་རང་གི་ལུས་ལ་ཐིམ་པར་བསམ། ལུས་ངག་ཡིད་གསུམ་དོན་ཡོད་གྲུབ་པའི་རང་བཞིན་དུ་བསམས་པ་ལ། གོང་ལྟར་མཆོད། དབང་རྣམ་པ་ལྔ་ལས་དོན་ཡོད་གྲུབ་པ་དྲིལ་བུའི་དབང་ཐོབ། ཕྲག་དོག་གི་དྲི་མ་སྦྱངས་འདུ་(༣༡ན)
བྱེད་ཀྱི་ཕུང་པོ་གནས་བསྒྱུར། མཉམ་པ་ཉིད་ཀྱི་ཡེ་ཤེས་མངོན་དུ་བྱས། དོན་ཡོད་གྲུབ་པའི་ས་བོན་དང་བག་ཆགས་བཞག །དེ་ལ་བརྟེན་པའི་དངོས་གྲུབ་དང་འཕྲིན་ལས་སྒྲུབ་པ་ལ་དབང་ངོ་། ཁཎྜ་བསངས། ཤཱུནྱ་ཏཱས། རང་ཉིད་མི་དམིགས་པ་སྟོང་པར་བསམ། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་ཀྱི་སྟེང་དུ་ཨོཾ་དང་འཁོར་ལོ་ལས་སྐྱེས་པའི་སྐུའི་བདེ་མཆོག་འཁོར་ལོ་སྐུ་མདོག་དཀར་པོ་གཡས་འཁོར་ལོ། གཡོན་དྲིལ་བུ་བསྒྱིངས་པ་དང་བཅས་པས་དཀུར་འཛིན་པ། རང་འདྲའི་ཤེས་རབ་མས་འཁྱུད་པ། ཕཻཾ། ཐུགས་ཀ་ནས་འོད་ཟེར་འཕྲོས་ནས། ས་མཱ་ཛཿས་སྤྱན་དྲངས་པའི་བར་དང་། འཁོར་ལོ་ཅན་གྱིས་འགྲོ་སྐྱོབ་ཕྱིར། སངས་རྒྱས་ནས། གནས་ལས་བྱུང་བ་སྦྱིན་པར་བྱ། རྡོར་དྲིལ་བསྣོལ་ཏེ་སྤྱི་བོར་དཀྲོལ། ཨོཾ་ཤྲཱི་ཧེ་རུ་ཀ་ཨ་ཏི་པ་སྟྭི་ཨ་བྷི་ཥིཉྩ་མི། ཧེ་རུ་ཀ་ན་མ་ཨ་བྷི་ཥི་ག་ཏ། ཀྱེ་དཔལ་ཆེ་གེ་མོ་ཞེས་གསང་མཚན་ཤུབ་བུར་བརྗོད། སློབ་མ་ལ་དབང་བསྐུར་དུས་མིང་གདགས་སྤྱི་བོར་ཀུ་ཤར་རེག་ལ། ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ག་སྟྭཾ། ཨ་ཧཾ། ཞེས་དབང་བསྐུར། ལུས་གང་། སྒོ་གསུམ་གྱི་དྲི་མ་དག །ཆུ་ལྷག་མ་ཡར་ལུད་པ་ལས་དཔྲལ་བར་རྣམ་པར་སྣང་མཛད་ཀྱིས་དབུ་བརྒྱན་པར་བསམ། དབང་གི་ལྷ་རྣམས་རྣམ་པར་སྣང་མཛད་ཀྱི་རྣམ་པས་རང་གི་ལུས་ལ་ཐིམ་པར་བསམ། ལུས་ངག་ཡིད་གསུམ་རྣམ་པར་སྣང་མཛད་ཀྱི་རང་བཞིན་དུ་བསམས་པ་ལ། སྔར་བཞིན་མཆོད། དབང་རྣམ་ལྔ་ལས་རྣམ་པར་སྣང་མཛད་མིང་གི་དབང་ཐོབ། གཏི་མུག་གི་དྲི་མ་སྦྱངས། གཟུགས་ཀྱི་ཕུང་(༣༡བ)
པོ་གནས་བསྒྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས། རྣམ་པར་སྣང་མཛད་ཀྱི་ས་བོན་དང་བག་ཆགས་བཞག །དེ་ལ་བརྟེན་པའི་དངོས་གྲུབ་དང་འཕྲིན་ལས་སྒྲུབ་པ་ལ་དབང་ངོ་། །ཞེས་དག་པ་སྦྱིན་ནོ། །གཉིས་པ་ཐུན་མོང་མ་ཡིན་པ་རྡོ་རྗེ་སློབ་དཔོན་གྱི་དབང་ལ་དངོས་དང་མཐའ་བརྟེན་གཉིས་ཀྱི། དང་པོ་ནི། མཎྜལ་བསྡུས་པ་ལ་ཁྱད་པར་མ་ཚང་བ་མེད་པ་འདི་ཉིད་རྡོ་རྗེ་སློབ་དཔོན་གྱི་དབང་ཟབ་མོ་ཞུ་བའི་ཡོན་དུ་ཞེས་སོགས་ཀྱིས་དབུལ། ཀྱེ་ཧོ་སྙིང་རྗེའི་གཏེར་བདག་ལ། ཁྱེད་ཀྱི་བཀའ་དྲིན་གང་གིས་བདག །བདག་དང་གཞན་དོན་ནུས་གྱུར་པའི། །རྡོ་རྗེ་སློབ་དཔོན་དབང་བསྐུར་སྩོལ། །ཞེས་ལན་གསུམ་གྱིས་གསོལ་བ་གདབ། རྩ་བའི་དཀྱིལ་འཁོར་གྱི་ཕྱི་རོལ་གྱི་ལྷོ་སྒོ་ལ་མངོན་དུ་ཕྱོགས་པའི་དཀྱིལ་འཁོར་གྲུ་བཞི་སྒོ་བཞི་པའི་དབུས་སུ་པདྨ་འདབ་མ་བརྒྱད་པའི་ཤར་དུ་འཁོར་ལོ། ལྷོར་རིན་ཆེན། ནུབ་ཏུ་པདྨ། བྱང་དུ་རལ་གྲིས་མཚན་པའི་དབུས་སུ་རིན་པོ་ཆེའི་ཁྲིའི་སྟེང་དུ་རང་ཉིད་འཁོད་པའི་གཡས་སུ་གདུགས། གཡོན་དུ་རྒྱལ་མཚན། སྟེང་དུ་བླ་བྲེ། མདུན་དུ་མཆོད་རྫས། མཆན་ཁུང་དུ་ཁ་ཊྭཱཾ་ག་དང་བཅས་པར་བསམས་པ་ཡིད་ཀྱིས་བསྒོམ་ཞིང་སློབ་མར་དབང་བསྐུར་དུས་དབང་སྟེགས་དང་བཅས་པ་འགྲུབ་ན་དངོས་སུ་བྱ། ཁཎྜས་བསངས། ཤཱུ་ནྱ་ཏཱས། སྟོང་པར་བསམ། སྟོང་པའི་ངང་ལས་རང་ཉིད་ཧཱུྃ་དང་རྡོ་རྗེ་ལས་སྐྱེས་པའི་དཔལ་བདེ་མཆོག་ནས། གཉིས་ཀའང་ཡེ་ཤེས་ཀྱི་མེ་འབར་པའི་དབུས་ན་བཞུགས་པའོ། །ཞེས་པའི་བར་སྒྲུབ་ཐབས་བཞིན་རྒྱས་པར་བསྐྱེད། ཕཻཾ །ཐུགས་ཀ་ནས་འོད་ཟེར་འཕྲོས་བསྒོམས་པ་དང་(༣༢ན)
འདྲ་བའི་ཡེ་ཤེས་པ་ཨོཾ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བཾ་ཧོཿས་བསྟིམ། ཕཻཾཿ བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་ཐུགས་ག་ནས་འོད་ཟེར་འཕྲོས། གཤེགས་པ་དང་གཤེགས་མ། །སེམས་དཔའ་དང་སེམས་མ། ཁྲོ་བོ་དང་ཁྲོ་མོའི་ཚོགས་ཨོཾ་བཛྲ་ས་མཱ་ཛཿས་སྤྱན་དྲངས། བདེ་གཤེགས་ཅན་གྱིས་འགྲོ་སྐྱོབ་ཕྱིར། ནས། བཱ་ར་སྟྭཱཾ། ཨ་བྷི་ཥིཉྩ་མི། ཨོཾ་ཤྲཱི་བཛྲ་ཧེ་ཧེ་སོགས། ལྷ་སོ་སོར་སྔགས་མཐར། ཨོཾ་བཛྲ་ཨུ་ད་ག་ཨ་བྷི་ཥིཉྩ་ཧཱུྃ། སུ་ར་ཏ་སྟྭཾ། ཨ་ཧཾ། སྤྱི་བོར་བུམ་ཆུ་ཀུ་ཤས་གཏོར། ཞེས་དབང་བསྐུར། ལུས་གང་། སྒོ་གསུམ་གྱི་དྲི་མ་དག །ཆུ་ལྷག་མ་ཡར་ལུད་པ་ལས་རྡོ་རྗེ་སེམས་དཔས་དབུ་བརྒྱན་པར་བསམ། དབང་གི་ལྷ་རྣམས་ཡེ་ཤེས་སེམས་དཔའི་ངོ་བོར་རང་གི་ལུས་ལ་ཐིམ་པར་བསམ། སྔར་བཞིན་མཆོད། ཨོཾ་སུ་པྲ་ཏིཥྛ་བཛྲེ་སྭཱ་ཧཱ། ཞེས་མེ་ཏོག་འཐོར། དམ་ཚིག་གསུམ་སྦྱིན་པ་ནི། རྡོ་རྗེ་གཡས་སུ་བཟུང་ལ། ཁཎྜས་བསངས། ཤཱུནྱ་ཏཱས་རྡོ་རྗེ་མི་དམིགས་པ་སྟོང་པར་བསམ། སྟོང་པའི་ངང་ལས་ཧཱུྃ་དང་རྡོ་རྗེ་ལས་སྐྱེས་པའི་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པའི་སྐུར་བསམ། དེ་ཉིད་ཞུ་བ་ལས་བྱུང་པའི་རྡོ་རྗེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག །བཅོམ་ལྡན་འདས་དཔལ་མཆོག་དང་པོའི་སྐྱེས་བུའོ། ཨོཾ་མཧཱ་བཛྲ་ཧཱུྃ། ཞེས་རྡོ་རྗེ་ལན་གསུམ་གསོར། དྲིལ་བུ་གཡོན་དུ་བཟུང་ལ། ཁཎྜས་བསངས། ཤཱུནྱ་ཏཱས་དྲིལ་བུ་མི་དམིགས་པ་སྟོང་པར་བསམ། སྟོང་པའི་(༣༢བ)
ངང་ལས་ཨཱཿདང་དྲིལ་བུ་ལས་སྐྱེས་པའི་རྡོ་རྗེ་བསྙེམས་མ་སྐུ་མདོག་དཀར་མོ་གྲི་ཐོད་འཛིན་པའི་སྐུར་བསམ། དེ་ཉིད་ཞུ་བ་ལས་བྱུང་བའི་དྲིལ་བུར་བསམ། འདི་ནི་རྣལ་འབྱོར་མ་ཀུན་གྱི། །ཤེས་རབ་དབྱངས་ཀྱི་རྗེས་འགྲོར་བཤད། ཁྱོད་ཀྱིས་ཀྱང་ནི་རྟག་ཏུ་གཟུང་། །བྱང་ཆུབ་མཆོག་ཏུ་རྒྱལ་བ་བཞེད། །ཨོཾ་བཛྲ་གྷཎྜ་ཨཱཿཞེས་དྲིལ་བུ་གསིལ། རྡོ་རྗེ་བཅས་པས་འཁྱུད་རྒྱ་བྱས་ལ་། །ཡིད་ཀྱི་ལུས་སུ་རྟེན་བྱེད་པ། །དམ་ཚིག་ཕྱག་རྒྱར་གྲགས་པ་ཡི། །དཀུར་ནི་ཉེ་བར་གནས་གྱིས་ལ། །ཕྱག་རྒྱ་རྟག་ཏུ་བརྟན་པར་གྱིས། །ཡེ་ཤེས་ཕྱག་རྒྱར་བྱིན་བརླབས་ནས། །འདོད་པ་ཐམས་ཅད་ལོངས་སྤྱད་དེ། །དངོས་གྲུབ་ཐམས་ཅད་སྒྲུབ་པར་གྱིས། །སྔར་བཞིན་མཆོད། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོ་ཕྱག་འཚལ་ལོ། །ཤློཀ་གཅིག་གམ་ལྔས་བསྟོད། གཉིས་པ་མཐའ་བརྟེན་ལ་དཀྱིལ་འཁོར་གྱི་དེ་ཉིད་ནི། ཐམས་ཅད་དངོས་པོ་གཅིག་ཉིད་དུ། །སྤྲུལ་སྐུའི་མཛད་པ་རྫོགས་གྱུར་པ། །དུར་ཁྲོད་ཡིན་ཏེ་ལུས་སུ་དག །ཡེ་ཤེས་སྣང་བས་ཀུན་ཁྱབ་ཅིང་། །བདུད་བཅོམ་འོད་དང་རྡོ་རྗེ་ལྡན། །མི་མཉམ་མེད་པས་ཟུར་བཞི་པ། །འཕགས་པའི་བདེན་པ་ངོས་བཞི་ཉིད། །དྲན་པ་དབང་པོ་སྒོ་བཞི་སྟེ། །བསམ་གཏན་རྣམས་ཀྱིས་བབ་ས་ཉིད། །ཚོན་སྣ་ལྔ་པོ་སངས་རྒྱས་ཏེ། །དགེ་བའི་སྤྱོད་པ་ཤཱིཪྴཀ །དྲ་ཚོགས་བྱང་ཆུབ་ཡན་ལག་བདུན། །བ་དན་དྲིལ་བུ་གསུང་རབ་སྒྲ། །ཏིང་ངེ་འཛིན་གྱི་ཁ་ཁྱེར་ཏེ། །གཟུངས་ནི་འདོད་པའི་ལྷ་མོའོ། །པདྨ་འདམ་གྱིས་མ་གོས་ཏེ། །རྣམ་(༣༣ན)
ཐར་བརྒྱད་ཀྱི་ཀ་བ་རྣམས། །སྣ་ཚོགས་ཆོས་འཁོར་རྒྱལ་པོའི་གནས། །འཁོར་ལོ་གདུགས་ཀྱི་རྣམ་པར་མཛེས། །ཆོས་ཀྱི་དབྱིངས་སུ་རོ་གཅིག་ཕྱིར། །རྩེ་མོ་རྡོ་རྗེས་བརྒྱན་པ་ཉིད། ཅེས་དང་། ལྷའི་དེ་ཉིད་ནི་ལུས་དྲན་པ་ཉེ་བར་བཞག་པ་ནི་མཁའ་འགྲོ་མ་སོགས་སྒྲུབ་ཐབས་བཞིན། སློབ་དཔོན་གྱི་དེ་ཉིད་ནི ། དཀྱིལ་འཁོར་ཏིང་འཛིན་ཕྱག་རྒྱ་དེང་། །སྟང་སྟབས་འདུག་སྟངས་བཟླས་བརྗོད་དང་། །སྦྱིན་སྲེག་མཆོད་པ་ལས་སྦྱོར་བ། །སླར་བསྡུ་བ་ཡི་རྣམ་པ་སྟེ། །ཕྱི་ཡི་དེ་ཉིད་བཅུ་ཡིན་ནོ། །ཞེས་བརྗོད། མིག་དབྱེ་བ་ནི། རང་གི་མིག་གཉིས་སུ་པྲ་མི་ཤེས་པའི་རབ་རིབ་འདུས་པ་ལ། པྲ་ལས་སྐྱེས་པའི་གསེར་གྱི་ཐུར་མ་མར་དང་སྦྲང་རྩི་འདུས་པའི་མིག་སྨན་བསྙུགས་པའམ་རྡོ་རྗེ་མིག་སྨན་འབྱུག་ཚུལ་བྱེད་ཅིང་། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནཻ་ཏཱ་ཨ་པ་ཧ་ར་པ་ཏུ་ལཾ་ཧྲི༔ ཞེས་ཕར་རབ་རིབ་བསལ། ཚུར་མིག་སྨན་བྱུགས་པས་ཡེ་ཤེས་ཀྱི་སྤྱན་དབྱེ་བར་བསམ། མེ་ལོང་བསྟན་པ་ནི། ཨཱ་ལས་སྐྱེས་པའི་མེ་ལོང་ཨཱཿཡིས་བསྔགས་པ་བསྟན་པའམ། ལག་མཐིལ་ལ་ལྟ་ཚུལ་བྱས་ལ། ཨཱཿལས་སྐྱེས་པའི་མེ་ལོང་། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མང་། །རྒྱུ་དང་ལས་ལ་ཀུན་ཏུ་བྱུང་། །རང་བཞིན་མེད་ཅིང་གནས་མེད་པ། །དེ་ལྟར་ཆོས་ནི་ཤེས་གྱིས་ལ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། ཞེས་བརྗོད་ལ་ཆོས་(༣༣བ)
ཀྱི་མཚན་ཉིད་བསྟན་ནོ། །ཨཱ་ལས་སྐྱེས་པའི་དྲིལ་བུ་ཨཱ་བཟླས་པ་དཀྲོལ་ཞིང་། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ནི་མཚན་ཉིད་མེད། །ནམ་མཁའ་དང་མཉམ་སྦྱོར་བ་ཡི། །ཀུན་མཆོག་མཉམ་པ་ཉིད་དུ་གསལ། །ཞེས་སྒྲ་ཐམས་ཅད་ནམ་མཁའ་ལྟར་ཤེས་པར་གྱིས་ཤིག །ཧོཿལས་སྐྱེས་པའི་མདའ་གཞུ་ལ་ཧོཿབཟླས་པ་བཟུང་སྟེ། ཆོས་ཉིད་གཞུ་ཡི་ཡེ་ཤེས་མདའ། །ཕྱོགས་མཚམས་སྟེང་འོག་ཀུན་ཏུ་ཕོངས། །བདུད་སོགས་བཅོམས་པས་དེ་བཞིན་གཤེགས། །ཐམས་ཅད་རྗེས་སུ་མཉེས་པར་གྱིས། །ཞེས་ཕྱོགས་མཚམས་སྟེང་འོག་ཏུ་མདའ་འཕེན་ཚུལ་བྱེད། སྤྱིར་ཆོས་བཤད་པའི་རྗེས་གནང་ནི། ཨོཾ་བཛྲ་ཧེ་ཏུ་མཾ་རྐང་པ་གཉིས་ཀྱི་བར་དུ་མཾ་ལས་སྐྱེས་པའི་འཁོར་ལོ། ཨོཾ་བཛྲ་བྷ་ག་རཾ། ལག་པ་གཡས་སུ་རཾ་ལས་སྐྱེས་པའི་དུང་ལག་པ་གཡོན་དུ་ཨ་ལས་སྐྱེས་པའི་དྲིལ་བུ་དང་པོ་ཉི། དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་ཀྱི་འཁོར་ལོ་བསྐོར། །ཁྱོད་ཀྱིས་ཐེ་ཚོམ་དོགས་མེད་པར། །ཡིད་གཉིས་པ་ཡི་སེམས་ཀྱིས་སུ། །ཆོས་ཀྱི་དུང་ནི་བླ་མེད་པ། །དྲི་མེད་ཀུན་ཏུ་གང་བར་གྱིས། །གསང་སྔགས་སྤྱོད་ཚུལ་ཆོ་ག་ནི། །སྐྱེ་བོ་ཡོངས་ལ་རྟག་ཏུ་གཤོད། །དེ་ལྟར་བྱས་ན་སེམས་ཅན་ལ། ཕན་ཐོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཀྱང་། །ཁྱོད་ལ་རྟག་ཏུ་བསྲུང་བར་བྱེད། །དེ་རིང་རྡོ་རྗེ་སློབ་དཔོན་གྱུར། །སྔགས་དང་རྒྱུད་ནི་འཛིན་གྱུར་པས། །སངས་རྒྱས་བྱང་ཆུབ་སེམས་རྣམས་དང་། །ལྷ་རྣམས་ཀྱིས་ཀྱང་མཐུན་པར་བསྲུངས། སེམས་ཅན་ཀུན་ལ་རྗེས་བརྩེ་བས། ཁྱོད་ཀྱིས་དཀྱིལ་འཁོར་ཆོ་ག་བཞིན། །ནན་ཏན་བསྐྱེད་དེ་བྲི་བར་བྱ། སྒྲུབ་(༣༤ན)
པ་པོ་རྣམས་རྒྱུད་ལ་སྦྱོར། ཞེས་བརྗོད། དཀྱིལ་འཁོར་འདྲི་བའི་རྗེས་གནང་ནི། ཁཎྜས་བསངས། ཤཱུནྱ་ཏཱས་འཁོར་ལོ། རྡོ་རྗེ། རིན་པོ་ཆེ། པདྨ། རལ་གྲི་རྣམས་སྟོང་པར་བསམ། སྟོང་པའི་ངང་ལས་རྣམ་སྣང་མི་བསྐྱོད་པ། རིན་འབྱུང་། འོད་དཔག་མེད། དོན་གྲུབ་རྣམས་ཞུ་བ་ལས་བྱུང་བའི་ཕྱག་མཚན་དེ་དག་གི་རྣམ་པར་བསམས་ལ་རང་ཉིད་རིགས་ལྔ་སོ་སོའི་སྐུར་བསམས་ཏེ། སེམས་ཅན་ཀུན་ལ་ཕན་པའི་ཕྱིར། །འཇིག་རྟེན་ཁམས་ནི་ཐམས་ཅད་དུ། །ཇི་ལྟར་སྣ་ཚོགས་འདུལ་འགྱུར་པའི། །ཆོས་ཀྱི་འཁོར་ལོ་རབ་ཏུ་སྐོར། །ཆོས་ཀྱི་གནས་སུ། རྡོ་རྗེ། རིན་ཅེན། པདྨ། ལས་ཀྱི་འཁོར་ལོ། ཞེས་བསྒྱུར། དངོས་གྲུབ་སྒྲུབ་པའི་རྗེས་གནང་ནི། ཞི་རྒྱས་དབང་དང་དགུག་པ་དང་། །སྡང་བར་བྱེད་དང་རེངས་སོགས་དང་། །བསད་དང་བསྐྲད་པ་ཐམས་ཅད་དང་། །ལས་དེ་རྣམས་ནི་སྒྲུབ་པར་གྱིས། རལ་གྲིས་མིག་སྨན་ས་འོག་དང་། །རྐང་མགྱོགས་བཅུད་ལེན་མཁའ་ལ་བགྲོད། །མི་སྣང་ལ་སོགས་གྲུབ་པའི་ཚོགས། །ཅི་དགའ་བ་ནི་བསྒྲུབ་པར་གྱིས། ཞེས་བརྗོད། ཁས་བླང་བ་ནི། བླ་མའི་ཞབས་ལ་ཕྱག་བཙལ་ཏེ། གཙོ་བོས་ཇི་ལྟར་བཀའ་སྩལ་པ། དེ་ལྟར་བདག་ནི་བགྱིད་པར་འཚལ། །ཞེས་བརྗོད། རྡོ་རྗེའི་བརྟུལ་ཞུགས་ནི། ཁཎྜས་བསངས། ཤཱུནྱ་ཏཱས་རང་དང་རྡོ་རྗེ་མི་དམིགས་པ་སྟོང་པར་བསམ། སྟོང་པའི་ངང་ལས་ཧཱུྃ་དང་རྡོ་རྗེ་ལས་སྐྱེས་པའི་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པ་མཚན་ཉིད་ཐམས་ཅད་ཡོངས་སུ་རྫོགས་པའི་སྐུར་བསམ། དེ་ཞུ་བ་ལས་བྱུང་བའི་རྡོ་རྗེར་བསམས་ལ་རྡོ་རྗེ་བསླང་པ་གསོར་ཞིང་། འདི་དེ་སངས་(༣༤བ)
རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ཕྱག་ན་བསྣམས། །ཁྱོད་ཀྱིས་ཀྱང་ནི་རྟག་ཏུ་གཟུང་། ཕྱག་ན་རྡོ་རྗེའི་བརྟུལ་ཞུགས་བརྟན། །རྡོ་རྗེ་སྤྱི་བོའམ་སྙིང་གར་བཟུང་ལ། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ། ཏིཥྭཨེཀསྟྭཾ་དྷ་ར་ཡཱ་མ་བཛྲ་ས་ཏྭ་ཧཱིཿཧི་ཧི་ཧི་ཧཱུྃ། ཞེས་བརྗོད། ཁཎྜས་བསངས། ཤཱུནྱ་ཏཱས་སྟོང་པར་བསམ། སྟོང་པའི་ངང་ལས་དབང་རྫས་རྣམས་ཧཱུྃ་དང་རྡོ་རྗེ་ལས་སྐྱེས་པའི་གཙོ་བོ་ཡབ་ཡུམ་གྱི་སྐུ་རྒྱན་ཆ་ལུགས་ཐམས་ཅད་ཡོངས་སུ་རྫོགས་པར་བསམ། དེ་རྣམས་ཞུ་བ་ལས་བྱུང་བའི་དབང་རྫས་སོ་སོར་བསམ། ཁ་ཊྭཱཾ་ག་དང་ཌཱ་མ་རུ། ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་ཡི་སྐྲ། ཁ་ཊྭཱཾ་རྡོ་རྗེ་དང་བཅས་ཤིང་། །དྲིལ་བུ་སིལ་སིལ་སྒྲ་སྒྲོག་པ། །ཚངས་པའི་སྐུད་ཐོགས་རྣལ་འབྱོར་བདག །ཁ་ཊྭཱཾ་ག་དང་རྣལ་འབྱོར་སྣོད། །དཔའ་བོ་ཆེན་པོས་བླང་བར་གྱིས། །ཨོཾ་ཤཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ། ཌཱ་ཀི་ནི་ཛཱ་ལ་ཤཾ་ཝ་རཾ་སྭཱ་ཧཱ། ཞེས་བདུད་རྩི་འཐུང་། མཆོད་པའི་རྗེས་གནང་ནི། པད་ཀོར་སྔོན་དུ་འགྲོ་བས་སྒེག་མོ་སོགས་བརྒྱད་ཀྱི་ལས་རྒྱ་བྱེད་ཅིང་དེ་དག་ཏུ་བསྒོམ་པ་ནི། །དེང་ནས་བརྩམས་ཏེ་རྫོགས་སངས་རྒྱས། སྲས་དང་བཅས་པ་རྣམ་རོལ་ཅིང་། །རྡོ་རྗེ་བསྙེམས་པའི་རྣལ་འབྱོར་གྱི། །དགའ་སྟོན་བདེ་བའི་མཆོད་པ་གྱིས། སྒེག་མོ། ཨ། སྒེག་དང་བཅས་པས་ཕྲེང་བ་འཕང་། །སངས་རྒྱས་ཐམས་ཅད་མཆོད་པར་བྱ། །ངས་ནི་བཅོམ་ལྡན་འབྲལ་མི་འགྱུར། །ཕྲེང་བ་དེ་ཡི་རྒྱན་ཡིན་ནོ། ཕྲེང་བ་མ། ཨོཾ། ལུས་ཅན་ཀུན་ལ་དམ་ཆོས་ཀྱི། ཁྱོད་ཀྱིས་གླུ་ནི་བླང་བར་གྱིས། དེ་ཡིས་བདེ་གཤེགས་དངོས་གྲུབ་ཀྱི། །བདེ་བ་མྱུར་དུ་མྱོང་བར་འགྱུར། གླུ་(༣༥ན)
མ། གཱི །དེ་ཉིད་ཐལ་མོ་གར་གྱིས་ནི། །སངས་རྒྱས་ཐམས་ཅད་མཉེས་པར་བྱས། །སངས་རྒྱས་འདུལ་བའི་འཕྲིན་ལས་ཀྱིས། གར་མཁན་ཚུལ་དུ་བསྒྱུར་བར་གྱིས། གར་མ། ཧོཿ རྫོགས་སངས་རྒྱས་ལ་སྤོས་ཕུལ་པས། །བརྟུལ་ཞུགས་བཟང་པོས་ལེགས་ཚོམ་གྱིས། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱིས་ནི་ཚིམ་པར་གྱིས། བདུག་སྤོས་མ། ཨཱཿ། སངས་རྒྱས་རྣམས་ལ་མེ་ཏོག་གཏོར། །བྱང་ཆུབ་ཡན་ལག་ཚོགས་གྱུར་ནས། །མཚན་དང་དཔེ་བྱད་ལྡན་པར་ནི། །བདེ་གཤེགས་སྐུ་ནི་ཐོབ་པར་གྱིས། །མེ་ཏོག་མ། བྷྲུཾ། སེམས་ཅན་མ་རིག་ལྡོངས་པ་ལ། །ཆོས་ཀྱི་མེ་ནི་ལེགས་སྤར་ནས། རྡོ་རྗེ་ཆོས་དང་འདྲ་བ་རུ། །ཆོས་ཀྱི་རྣམ་པར་འབར་བར་གྱིས། །མར་མེ་མ། པྲ། ཁྱོད་ཀྱིས་རྒྱལ་ལ་དྲི་ཕུལ་བས། །ཚུལ་ཁྲིམས་ཏིང་འཛིན་ཤེས་རབ་དང་། །རྣམ་གྲོལ་ཡེ་ཤེས་མཐོང་བ་ཡི། །བྱང་ཆུབ་ལུས་ཅན་རྣམས་ལ་བགོས། དྲི་ཆབ་མ། ཞེས་བརྗོད། ལུང་བསྟན་པ་ནི། བླ་མ་ཤཱཀྱ་ཐུབ་པའི་རྣམ་པར་འཕོས་ནས་གཡོན་པའི་ཁུ་ཚུར་གྱིས་ཆོས་གོས་ཀྱི་དྲྭ་རི་དྭགས་ཀྱི་རྣ་བ་ལྟར་འཛིན་པས་དྲིལ་བུ་འཆང་། གཡས་མཆོག་སྦྱིན་པའི་ཕྱག་རྒྱས་རྡོ་རྗེ་བསྣམས་ཏེ་རང་གི་གསང་མཚན་ནས་ལུང་སྟོན་པར་བསམས་ལ། ཨོཾ། འདིར་ནི་ཁྱོད་ལ་ངས་ལུང་བསྟན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་དག་པའི་ཕྱིར། །སྲིད་དང་ངན་འགྲོ་རྣམས་ལས་བཏོན། །ཀྱེ། ཆེ་གེ་མོ་ཞེས་བྱ་བའི་དེ་བཞིན་གཤེགས་པ་སིདྡྷི་ས་མ་ཡ་སྟྭཾ་བྷུ་རྦྷུ་ཝ་སྭཿ གང་ལ་ཚིག་འདིས་ལུང་བསྟན་པ། །དེ་ལ་སངས་རྒྱས་བྱང་ཆུབ་སེམས། (༣༥བ)
འཁོར་དང་བཅས་པ་མགྲིན་གཅིག་ཏུ། །བྱང་ཆུབ་ཆེན་པོར་ལུང་སྟོན་ཏེ། །ཕྱག་རྒྱ་སྔགས་འདིའི་མཐུ་ཡིན་ཞེས། །སློབ་མ་དད་པ་རབ་ཏུ་བསྐྱེད། ཅེས་བརྗོད། ཉན་རང་ཡིད་བྱེད་ཀྱི་སེམས་སྤང་བར་གདམས་པ་ནི། འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་པས། །དེ་བས་འདོད་ལ་ཆགས་བྲལ་བ། ཁྱོད་ཀྱིས་ནམ་ཡང་མི་བྱའོ། །མ་ཧཱ་ས་མ་ཡ་ཧ་ན་ཧཱུྃ་ཕཊ། སྔགས་ཀྱི་རྗེས་གནང་ནི། ཨོཾ་ཧྲཱིཿཧ་ཧ་ཧུཾ་ཧུཾ་ཕཊ། མེ་ཏོག་མགོ་བོར་བཞག་ལ། བཅོམ་ལྡན་འདི་ལ་སྦྱན་ལགས་ཀྱིས། །འདི་ལ་ཉེ་བར་མཛད་དུ་གསོལ། །ཞེས་བརྗོད། ལན་དུ། བཅོམ་ལྡན་གཟུང་ངོ་བདག་ལ་ནི། །ཡང་དག་ཉེ་བར་གྱུར་བར་མཛོད། །ཨོཾ་ཧྲཱིཿཧ་ཧ་ཧུཾ་ཧུཾ་ཕཊ། ཅེས་བརྗོད། སློབ་མ་ལྷ་ལ་དབུལ་བ་ནི། །གདུགས་བཟུང་ནས་དཀྱིལ་འཁོར་ལ་སྐོར་བ་བྱེད་ཅིང་། །སྔགས་དང་རྒྱུད་རྣམས་འཛིན་གྱུར་པའི། །སློབ་མ་འདི་ནི་ཕུལ་བ་ལགས། །ཞེས་བརྗོད། །གཟེངས་བསྟོད་ཅིང་དབུགས་དབྱུང་བ་ནི། །བླ་མས་མཆོག་གསང་དཀྱིལ་འཁོར་དམ་པ་འདིར། །ཞུགས་པ་དང་ནི་མཐོང་བ་ཡིས། །སྡིག་པ་ཀུན་ལས་རྣམ་གྲོལ་ནས། །དེ་རིང་ཁྱེད་རྣམས་བདེ་བར་གནས། །བདེ་ཆེན་ཐེག་པ་འདི་ལ་ནི། །ཕྱིན་ཆད་འཆི་བ་ཡོད་མེད་དེ། །མི་ཐུབ་ཆུགས་པ་ཡོད་མིན་པས། །ཅིས་ཀྱང་མ་འཇིགས་དགའ་བར་གྱིས། །སྲིད་པ་ཤིན་ཏུ་དག་པའི་ཕྱིར། སྲིད་པའི་དུཿཁ་ལས་ཁྱོད་འདས། །གང་ཞིག་སྐྱེས་པ་ཙམ་གྱིས་ནི། །སངས་རྒྱས་ཉིད་དུ་དོགས་མེད་པའི། །བྱང་ཆུབ་སེམས་ནི་སྤང་མི་བྱ། །དམ་ཆོས་སྨད་པར་མི་བྱ་སྟེ། །ནམ་ཡང་དོར་བར་མི་བྱའོ། །མི་ཤེས་པའམ་(༣༦ན)
རྨོངས་པ་ལ། །གསང་བ་དེ་ཉིད་བསྟན་མི་བྱ། །རྡོ་རྗེ་དྲིལ་བུ་ཕྱག་རྒྱ་ཡང་། །སངས་རྒྱས་ཀུན་དང་མཚུངས་གྱུར་པའི། །སློབ་དཔོན་སྨད་པར་མི་བྱ་སྟེ། །རང་བདག་ཡོངས་སུ་སྤངས་པ་ཡི། །དཀའ་ཐུབ་ཀྱིས་ནི་གདུང་མི་བྱ། །ཇི་ལྟར་བདེ་བར་བདེ་བཟུང་ནས། །འདི་ནི་མ་བྱོན་རྫོགས་སངས་རྒྱས། །ཞེས་ཐལ་མོ་སྦྱར་ཏེ། གཙོ་བོས་ཇི་ལྟར་བཀའ་སྩལ་པ། །དེ་བཞིན་དུ་ནི་བདག་གིས་བགྱི། །ཞེས་ཁས་བླང་ངོ་། །དེ་ལྟར་དབང་བཞི་ལས་ཕྱི་རྡུལ་ཚོན་གྱི་དཀྱིལ་འཁོར་དུ་བུམ་པའི་དབང་ཐོབ། གཙོ་བོར་ལུས་ཀྱི་དྲི་མ་འཁྲུད། བསྐྱེད་རིམ་ཁྱད་པར་ཅན་སྒོམ་པ་ལ་དབང་བར་བྱས། འབྲས་བུ་སྤྲུལ་སྐུ་འགྲུབ་པའི་ནུས་པ་ཁྱད་པར་ཅན་བཞག་པ་ཡིན་ནོ། །ཞེས་དག་པ་བརྗོད་དོ། །གཉིས་པ་གསང་བའི་དབང་ནི། རིག་མ་མཚན་ལྡན་དང་མཎྜལ་བསྡུས་པ་ལ་ཁྱད་པར་གསང་བའི་དབང་བསྐུར་ཟབ་མོ་ཞུ་བའི་ཡོན་དུ་དབུལ་བར་སོགས་ཀྱིས་འབུལ། །སྐྱོབ་པ་སྐྱབས་མེད་རྣམས་ཀྱི་སྐྱབས། །འཁོར་ལོ་སྡོམ་པ་བདག་ལ་སྐྱོབས། །རྒྱུ་མེད་པར་ནི་ཐུགས་རྗེ་ཆེ། །མགོན་མེད་བདག་ལ་མགོན་མཛོད་ཅིག །ཅེས་ལན་གསུམ་གྱིས་གསོལ་བ་གདབ། །སྔོན་ཆད་བྷ་གའི་དཀྱིལ་འཁོར་མ་མཐོང་བ་མཚོན་བྱེད་དུ། ཨོཾ་ཙཀྵུ་བྷནྡྲ་ཝ་ར་མ་ན་ཡ་ཧཱུྃ། ཞེས་མིག་དར་བཅིངས་ཏེ། བླ་མ་ཡབ་ཡུམ་སྒྲུབ་ཐབས་ལས་བྱུང་བའི་ཚིག་བརྗོད་དེ་གསལ་གདབ། བཅོམ་ལྡན་འདས་ཀྱི་སྙིང་གར་ཨོཾ་ཧ་དཀར་པོ་ནས། ཡན་ལག་ཐམས་ཅད་ལ་ཕཊ་ཕཊ་དུང་ཁ་ཞེས་པའི་བར་དང་། ཡབ་ཡུམ་གཉིས་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་(༣༦བ)
མཁའ་གསེང་སྒྲུབ་ཐབས་ལྟར་བརླབ། འཁྱུད་རྒྱ་དང་བཅས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭཱ་བྷཱ་ཝ་ཨཱ་ཏྨ་ཀོ྅ཧཾ། སྙོམས་པར་ཞུགས་པའི་དགའ་བའི་སྒྲ་དང་ཐུགས་ཀའི་ས་བོན་གྱི་འོད་ཟེར་གྱིས་རིགས་ལྔ་ཡབ་ཡུམ་སྤྱན་དྲངས་སྤྱི་བོ་ནས་ཞུགས། ཆགས་པའི་མེས་བྱང་ཆུབ་ཀྱི་སེམས་སུ་ཞུ། སྐུའི་དབྱིབས་བརྒྱུད་དེ། རྡོ་རྗེ་ནོར་བུར་ལྷན་ཅིག་སྐྱེས་པའི་བདེ་བ་བརྟན་པར་བྱས་པའི་བྱང་སེམས། རང་ཉིད་འོད་དཔག་མེད་དུ་གྱུར་པ་ལ། །འདས་པའི་རྡོ་རྗེ་སོགས་ཀྱིས། །ཇི་ལྟར་སངས་རྒྱས་སྲས་དབང་བསྐུར། །དེ་བཞིན་དུ་ནི་བྱང་ཆུབ་སེམས། །མཛེས་པས་བུ་ཁྱོད་དབང་བསྐུར་རོ། །ཨོཾ་ཧྲཱིཿཧ་ཧ་ཧུཾ་ཧུཾ་ཕཊ། ཅེས་བདུད་རྩི་སྦྱིན། དེས་ཀྱང་སངས་རྒྱས་ཐམས་ཅད་འདུས་པའི་བློས། ཨ་ཧོ་མ་ཧཱ་སུ་ཁཾ། ཞེས་མྱང་། རིག་མས་ཀྱང་གཅེར་བུར་པདྨ་ན་གནས་པའི་བྱང་སེམས། འདི་དེ་དཔའ་བོ་དཔའ་མོ་རྣམས། །དམ་ཚིག་རྨད་བྱུང་ཆེན་པོ་སྟེ། །ཁམས་ལྔ་ལྡན་པའི་རོ་རྟོགས་བྱེད། །བདེ་བ་དེ་གང་མྱང་བར་བྱ། །ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧུཾ་ཧུཾ་ཕཊ། ཅེས་བདུད་རྩི་སྦྱིན། དེས་ཀྱང་ཨ་ཧོ་མ་ཧཱ་སུ་ཁཾ། དེ་ལྟར་མྱངས་པས་མགྲིན་པར་རྩ་སྟོང་ཕྲག་བདུན་ཅུ་རྩ་གཉིས་འདུས་པའི་རྩ་འདབ་བཅུ་དྲུག་བྱང་ཆུབ་སེམས་ཀྱིས་གང་། དེ་ནས་བརྒྱུད་དེ་ལུས་ཐམས་ཅད་གང་བས་གསལ་སྟོང་བདེ་བས་བརྒྱན་པའི་ཏིང་ངེ་འཛིན་སྐྱེས་པར་བསམ། ཨོཾ་ཨཱཿཧཱུྃ་ཞེས་མིག་དར་བཀྲོལ། དེ་ལྟར་དབང་བཞི་ལས་བྷ་གའི་དཀྱིལ་འཁོར་དུ་གསང་བའི་དབང་ཐོབ། གཙོ་བོར་ངག་གི་དྲི་མ་འཁྲུད། བདག་བྱིན་བརླབས་(༣༧ན)
ཀུན་རྫོབ་སྒྱུ་མའི་རྫོགས་རིམ་སྒོམ་པ་ལ་དབང་། འབྲས་བུ་སངས་རྒྱས་ཀྱི་ལོངས་སྤྱོད་རྫོགས་པའི་སྐུ་འཐོབ་པའི་སྐལ་བ་དང་ལྡན་པར་བྱས་སོ། །ཞེས་དག་པ་བརྗོད་དོ། །གསུམ་པ་ཤེས་རབ་ཡེ་ཤེས་ཀྱི་དབང་ནི། མཎྜལ་ཁྱད་པར། ཤེས་རབ་ཡེ་ཤེས་ཀྱི་དབང་ཟབ་མོ་ཞུ་བའི་ཡོན་དུ་ཞེས་སོགས་ཀྱིས་དབུལ། བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་སྐྱོང་བའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་གསོལ། ཞེས་ལན་གསུམ་གྱིས་གསོལ་བ་གདབ། ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་མ་མཐོང་བའི་བརྡར། ཙཀྵུ་བྷནྡྷས་མིག་དར་འཆིང་། རང་ཉིད་ཐུགས་ཀྱི་བདེ་མཆོག་འཁོར་ལོ་བུམ་དབང་གི་སྐབས་ལྟར་གསལ་བའི་སྙིང་གར་ཨོཾ་ཧ་དཀར་པོ་ནས། ཡན་ལག་ཐམས་ཅད་ལ་ཕཊ་ཧཾ་ལྗང་གུ །སྐུ་གསུང་ཐུགས་གོང་ལྟར་བརླབ། ཕཻཾ། བསྒོམས་པ་དང་འདྲ་བའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བཾ་ཧོཿས་བསྟིམ་པ་དེའི་ལག་ཏུ་རིག་མ་གཏད། །བླ་མས་སངས་རྒྱས་ཐམས་ཅད་དཔང་པོར་བྱས་ཏེ་རིག་མའི་སྤྱི་བོར་རྡོ་རྗེ་བཞག་ནས། ལྷ་མོ་འདི་ནི་ཕྱག་རྒྱ་ཆེ། །མཐའ་ཡས་བདེ་བ་སྦྱིན་པ་མོ། །རྣམ་པ་ཀུན་ཏུ་ཕྱག་རྒྱའང་། །བུ་ཡིས་བླ་མེད་མཆོད་པར་གྱིས། །ཞེས་ཕྱག་རྒྱ་གཏད་པས། རིག་མ་དེས་སྐྲ་བཤིག་གོས་དང་བྲལ་བར་བྱས་ནས་དྲི་བ་ནི། བཤང་གཅི་ལ་སོགས་ཟ་བ་དང་། ཁྲག་དང་ཁུ་བ་དེ་བཞིན་ཤ །རྟག་པར་བུད་མེད་མཆོག་གུས་པས། །བྷ་གའི་པདྨར་འོ་བྱེད་པ། །བུ་ཁྱོད་སྤྲོ་བར་བྱེད་དམ་ཅི། །བུ་ཡིས་ཇི་ལྟར་བདེ་བར་སྨོས། ལན་དུ། བཤང་(༣༧བ)
གཅི་ལ་སོགས་བཟའ་བ་དང་། །བུད་མེད་ལ་ཡང་རྟག་གུས་བགྱི། །བྷ་ག་ཉིད་ལ་འོ་བྱེད་པས། །ལྷ་མོ་ཅི་ཕྱིར་བདག་མི་སྤྲོ། །ཞེས་བརྗོད་པས་ལྷ་མོ་དེ་མཉེས་ནས་གཅེར་བུར་པདྨ་རྒྱས་པ་ཁ་ཕྱེ་སྟེ་བསྟན་ལ། ཨེ་མ་ང་ཡི་པདྨ་འདི། །བདེ་བ་ཀུན་དང་ཡང་དག་ལྡན། །ཅི་སྟེ་ཆོ་ག་བཞིན་བསྟེན་ན། །དེ་ཡི་མདུན་ན་ང་གནས་ཏེ། །སངས་རྒྱས་བསྙེན་པ་ལ་སོགས་པ། །བྱ་བ་ཐམས་ཅད་པདྨས་བྱེད། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ན་ཡང་དག་གནས། བྷཉྫ་མོཀྵ་ཧོཿ། ཞེས་གསུངས་པར་བསམས་ལ། རང་ཉིད་འཁོར་ལོ་བདེ་མཆོག་དང་རིག་མ་ཕག་མོར་གསལ་བ། ཕུང་ཁམས་སྐྱེ་མཆེད། གོ་བགོ་བ། གསང་གནས་བྱིན་བརླབ་འདུ་བྱ་བ་རྣམས་སྒྲུབ་ཐབས་བཞིན་བྱེད། །ཡུམ་གྱི་གཡོན་གྱི་ཆར་སོང་བའི་རྩའི་རྩེ་མོ་ཧྲཱིཿདམར་པོ་དང་ལྡན་པ། །མཛུབ་མོ་དང་ལྕེས་མིད་ཅེས་བྱ་བས་བསྐུལ་ནས། །པད་གོར་དང་བཅས། །ཨོཾ་ཥི་ཤི་ཤི་ཧ་ཧ་ཧ་སྭཱ་ཧཱ། །འཁྱུད་རྒྱ་བཅས་ལ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་གཎ་བཛྲ་སྭ་བྷཱ་ཝ་ཨཱ་ཏྨ་ཀོ྅ཧཾ། ཞེས་བརྗོད། སྙོམས་འཇུག་གི་དགའ་བའི་སྒྲ་དང་རང་དང་བླ་མའི་ཐུགས་ཀ་ནས་འོད་ཟེར་འཕྲོས། གཤེགས་པ་དང་གཤེགས་མའི་ཆོ་ག་ཨོཾ་བཛྲ་ས་མཱ་ཛཿས་སྤྱན་དྲངས་ལུས་ལ་ཐིམ་པས་སྙོམས་འཇུག་གི་དགའ་བཞི་ཉམས་སུ་མྱོང་སྟེ། གང་ལ་ཐོག་མ་དབུས་མཐའ་མེད། །བདག་མེད་གཞན་ཡང་མེད་པ་སྟེ། །སྲིད་མེད་མང་ན་འདས་པ་མེད། །འདི་ནི་མཆོག་ཏུ་བདེ་ཆེན་ཉིད། ཅེས་འོད་གསལ་གྱི་བདེ་བ་མྱོང་ནས་ཡང་ཧཱུྃ་ཞེས་བཙན་ཐབས་ཀྱིས་གྱེན་དུ་དྲངས་(༣༨ན)
པས། གསང་བར་དགའ་བ། སྙིང་གར་མཆོག་དགའ། དཔྲལ་བར་ཁྱད་དགའ། གཙུག་ཏོར་དུ་ལྷན་ཅིག་སྐྱེས་དགའ་བརྟན་པར་བསམ། ཤེས་རབ་མ་མཉེས་ཏེ་དེའི་མགོ་བོར་ལག་པ་བཞག་ནས། དེང་ནས་གཟུང་སྟེ་བུ་ཁྱོད་ཀྱིས། །ཇི་སྲིད་བྱང་ཆུབ་སྙིང་པོའི་བར། །རྨི་འདྲར་སེམས་ཅན་ཐམས་ཅད་ཀྱི། །དོན་ནི་བདག་ཉིད་ཀུན་གྱིས་བྱོས། ཞེས་རྗེས་སུ་གནང་བ་སྦྱིན་ལ་འབྲུ་གསུམ་བརྗོད་ཅིང་མིག་དར་ཕྱེ། དེ་ལྟར་དབང་བཞི་ལས་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། གཙོ་བོར་ཡིད་ཀྱི་དྲི་མ་འཁྲུད། ཕྱག་རྒྱ་ཆེན་པོ་དོན་དམ་འོད་གསལ་གྱི་རྫོགས་རིམ་བསྒོམ་པ་ལ་དབང་། འབྲས་བུ་སངས་རྒྱས་གྱི་ཆོས་སྐུ་འཐོབ་པའི་སྐལ་པ་དང་ལྡན་པར་བྱས་སོ། །ཞེས་དག་པ་བརྗོད་དོ། །བཞི་པ་ཚིག་དབང་ནི། མཎྜལ་ཁྱད་པར། དབང་བཞི་པ་ཞུ་བའི་ཡོན་དུ་ཞེས་སོགས་ཀྱིས་དབུལ། ཐལ་མོ་སྦྱར་ཏེ། ཁྱོད་ཀྱི་ཞབས་ཀྱི་བཀའ་དྲིན་གྱིས། །གཙོ་བོའི་དབང་བསྐུར་རྣམ་གསུམ་ཐོབ། དེ་རིང་རིན་ཅེན་བཞི་པ་ཡང་། །བདག་ལ་བཀའ་དྲིན་རབ་ཏུ་གསོལ། །ཞེས་ལན་གསུམ་གྱིས་གསོལ་བ་གདབ། དོན་དམ་བྱང་ཆུབ་སེམས་ཀྱི་དཀྱིལ་འཁོར་མ་མཐོང་བ་མཚོན་བྱེད་དུ། ཙཀྵུ་བྷནྡྷས་མིག་འཆིང་། དབང་བཞི་པ་བླ་མའི་ཞལ་ལས་ཤེས་པར་བྱ་བ་ནི། འདི་སྐད་དུ། འགྲོ་བ་མ་ལུས་པའི་དོན་ཕུན་སུམ་ཚོགས་པར་བྱེད་པ། རྟོག་པའི་རྙོག་པ་དང་བྲལ་བ་ཉིད་ཀྱིས་བླ་ན་མེད་པ་ཡང་དག་པར་རིག་པ་དང་ཐ་མི་དད་པ། ཐུབ་པའི་ཚོགས་དཔག་ཏུ་མེད་པའི་འོད་ཟེར་འཕྲོ་བའི་(༣༨བ)
དཀྱིལ་འཁོར་གྱི་བདག་ཉིད་ཡིད་བཞིན་གྱི་ནོར་བུ་ལྟ་བུ་བསྟན་པའི་ངོ་བོ་ཉིད་ཀྱི་ཚིག་གིས་སྦྱིན་པར་བྱའོ། །ཞེས་གསུངས་པ་གང་ཡིན་པ་སྟེ། ཟབ་པ་དང་རྒྱ་ཆེ་བ་ལ་མོས་པ་ལ་ནི་བློས་མཚན་མས་ཤེས་པ་ནི། དུ་བ་ལས་ནི་མེར་ཤེས་ཤིང་། །ཆུ་སྐྱར་ལས་ནི་ཆུར་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། ཞེས་གསུངས་པས། དགའ་བ་ནི་སྣང་བའི་ཡེ་ཤེས་ཏེ་བུམ་དབང་། མཆོག་དགའ་སྣང་བ་མཆོད་པ་སྟེ་གསང་དབང་། ཁྱད་དགའ་སྣང་བ་ཉེར་ཐོབ་སྟེ་ཤེས་རབ་ཡེ་ཤེས་ཀྱི་དབང་། ལྷན་ཅིག་སྐྱེས་དགའ་ནི་ཐམས་ཅད་སྟོང་པ་འོད་གསལ་བ་སྟེ་དབང་བཞི་པ། དེ་ཡང་དྲི་མ་དང་བཅས་པ་ཡིན་ཅིང་། དེ་དཔེར་བྱས་ནས། དོན་གྱི་དབང་བཞི་པ་ནི། རྗེ་ཐམས་ཅད་མཁྱེན་པའི་ལུས་དཀྱིལ་འཁོར་གྱི་དབང་ཆོག་ལས། །དབང་གསུམ་པའི་སྐབས་སུ་ལུས་འདོད་ལྷ་ཡབ་ཡུམ་དུ་སྣང་བཞིན་པ་དང་། སེམས་དེ་ཁོ་ན་ཉིད་ལ་ཞུགས་པའི་བདེ་བ་ཆེན་པོ་གཉིས་ཡོད་པ་དེ་བཞིན་དུ། དོན་གྱི་དབང་བཞི་པ་ཡང་ཕྱི་ནང་གི་ཆོས་བརྟན་གཡོ་ཀུན་གྱི་བདག་ཉིད་བདག་མེད་པའི་དེ་ཁོ་ན་ཉིད་ཀྱི་བདག་ཉིད་དུ་གནས་པ་ལ། ཡུལ་ཅན་བདེ་བ་ཆེན་པོ་ཆུ་ལ་ཆུ་བཞག་པ་བཞིན་དུ་རོ་གཅིག་ཏུ་ཞུགས་པས་གཉིས་སྣང་ཕྲ་མོ་ཡང་མེད་པའི་ཐུགས་ལྷན་ཅིག་སྐྱེས་པའི་ཡེ་ཤེས་མི་ཟད་པ་བསམ་གྱིས་མི་ཁྱབ་པ་མཐའ་ཡས་པ་དང་། སོགས་ཀྱི་དོན་ལུས་ཡོངས་སུ་དག་པའི་སྒྱུ་མའི་སྐུར་སོང་ཞིང་དེ་གཉིས་པོ་ངོ་བོ་གཅིག་ཏུ་ཚོགས་པའི་ཟུང་འཇུག །རྫོགས་རིམ་གྱི་རིམ་པ་ལྔ་པ་བསམ་མི་(༣༩ན)
ཁྱབ་ཀྱི་རིམ་པ་དེ་ཉིད་དོན་གྱི་དབང་བཞི་པ་ཡིན་ལ། དེ་ཉིད་ཚིག་དབང་གིས་ངོ་སྤྲད་པའི་ཐབས་ཀྱི་ལམ་གོམས་པར་བྱས་པ་ལས་མངོན་དུ་འགྱུར་རོ། །ཞེས་ཚིག་གིས་བརྡ་སྤྲད་པའི་ལུས་རྣམ་སྣང་གི་ཆོས་བདུན་དང་ལྡན་པས་ཕྱིའི་སྣོད་བཅུད་ཐམས་ཅད་རྟེན་དང་བརྟེན་པ་རིམ་གྱིས་བསྡུས་ཏེ་དེ་ཉིད་འོད་གསལ་སྟོང་པ་ཉིད་དང་བདེ་བ་ཆེན་པོ་གཉིས་དབྱེར་མ་མཆིས་པའི་སྤྲོས་བྲལ་གྱི་ངང་ལ་ཅུང་ཟད་ཅིག་མཉམ་པར་བཞག་ལ་འབྲུ་གསུམ་བརྗོད་ཅིང་མིག་དར་ཕྱེ། །དེ་ལྟར་དབང་བཞི་ལས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཚིག་དབང་རིན་པོ་ཆེ་ཐོབ། ལུས་ངག་ཡིད་གསུམ་གྱི་སྒྲིབ་པའི་བག་ཆགས་འཁྲུད་པའི་ནུས་པ་བཞག །བདེན་གཉིས་དབྱེར་མེད་ཟུང་འཇུག་གི་རྫོགས་རིམ་བསྒོམ་པ་སོགས་ལ་དབང་བར་བྱས། འབྲས་བུ་ཟུང་འཇུག་རྡོ་རྗེ་འཆང་གི་སྐུ་མངོན་དུ་འགྱུར་བའི་སྐལ་བ་ཅན་དུ་བྱས་སོ། །ཞེས་དག་པ་བཤད་དོ། །དོན་བསྡུས་ཏེ་ཁས་བླང་བ་ནི། གཙོ་བོས་ཇི་ལྟར་སོགས་དང་མཎྜལ་ཁྱད་པར། དབང་བཞི་ཡོངས་སུ་རྫོགས་པར་ཐོབ་པའི་བཀའ་དྲིན་གཏང་རག་གི་ཡོན་དུ་ཞེས་སོགས་ཀྱིས་དབུལ་དེང་ནས་བརྩམས་ཏེ་བདག་བྲན་དུ། །ཁྱོད་ལ་བདག་ནི་འབུལ་ལགས་ཀྱི། ཁྱོད་ཀྱི་སློབ་མར་གཟུང་བ་དང་། །ཆུ་ཡིས་ཀྱང་ནི་སྤྱད་དུ་གསོལ། །ཞེས་ལན་གསུམ་བརྗོད་དོ། །གཉིས་པ་སློབ་མ་རྗེས་སུ་འཛིན་པ་ནི། །རྡོར་དྲིལ་དང་བཅས་པས་དེ་ཁོ་ན་ཉིད་བསྐུལ་བ་དང་བདེན་སྟོབས་བརྗོད་པ་ནི། ཨོཾ། ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་(༣༩བ)
མ་མེད་པའི་མཆོག །སེམས་དཔའི་རྡོ་རྗེ་ཚེ་རང་བཞིན། །བདེ་མཆོག་འཁོར་ལོ་བདག་གྲུབ་མཛོད། །ཀུན་མཆོག་ཡོན་ཏན་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཉེས་པ་མི་མངའ་རྟག་པ་སྟེ། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛོད། །ཤིན་ཏུ་དག་པ་ཀུན་གྱི་མཆོག །འདོད་ནས་གྲོལ་བ་དེ་བཞིན་བཤེགས། །ཀུན་ཏུ་བཟང་པོ་ཀུན་བདག་ཉིད། །བྱང་ཆུབ་སེམས་དཔར་བདག་གྲུབ་མཛོད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ཕྱག་རྒྱ་མཆོག །གྲུབ་པའི་རྡོ་རྗེ་ཆེར་བསྟོད་པ། །རྡོ་རྗེ་བསྙེམས་བདག་བདག་གྲུབ་མཛོད། །སེམས་ཅན་ཀུན་གྱི་ཡིད་ཁྱབ་པ། །སེམས་ཅན་ཀུན་གྱི་ཡིད་ལ་གནས། །སེམས་ཅན་ཀུན་གྱི་ཡབ་ཉིད་དང་། །འདོད་ཆགས་མཆོག་གི་དམ་ཚིག་མཆོག །ཤེས་རབ་ཐབས་བདག་དཀྱིལ་འཁོར་གྱི། །བདེན་པ་གང་གིས་ཡེ་ཤེས་མཆོག །བདེན་པ་དེ་ཡིས་མགོན་ཁྱོད་ཀྱིས། །བདག་གི་འདོད་པ་ཡོངས་རྫོགས་མཛོད། །འདི་རྡོ་རྗེ་འཆང་མཁྱེན་རབ་རྗེ་སོགས་ཀྱི་ཕྱག་བཞེས་ལ་བདག་འཇུག་ལའང་མཛད། ཐམས་ཅད་མཁྱེན་པ་ཡེ་ཤེས་རྒྱ་མཚོ་སོགས་སློབ་མ་ལ་དབང་བསྐུར་པའི་དུས་མིན་པ་མི་མཛད། འཇམ་དབྱངས་དཀོན་ཅོག་ལྷུན་གྲུབ་ཀྱིས་མཛད་པའི་ཀྱེ་རྡོར་དབང་གི་མཚམས་སྦྱོར་སོགས་བླ་མེད་དཀྱིལ་ཆོག་གི་བཤད་པ་ཁུངས་བཙུན་པའི་ཡིག་ཆར་བརྟེན་(༤༠ན)
ནས་སྦྱང་གཞི་སྦྱོང་བྱེད་ངོ་སྤྲོད་པ་སོགས་དབང་དོན་ལམ་གྱི་རིམ་པར་དྲིལ་ཞིང་རང་ཉིད་དང་སློབ་མ་འདོན་པ་ཁ་སྤོས་ལ་དབང་རྣམས་བསྐུར་ཏེ། མེ་ཏོག་འབུལ་བའི་སྔོན་དུ་བར་སྣང་གི་ཁ་དོག་དྲི་བ། དཀར་སེར་དམར་ལྗང་གི་དབྱེ་བས་ཞི་རྒྱས་དབང་དྲག་གི་དངོས་གྲུབ་འགྲུབ་ཚུལ། མེ་ཏོག་དོར་བས་རང་གི་ལྷས་རྗེས་སུ་འཛིན་ཚུལ། དཀྱིལ་འཁོར་དུ་ཞུགས་པ་ལ་དབང་སྟེགས་ཀྱི་དཀྱིལ་འཁོར་གྲུ་བཞི་སྒོ་བཞི་པའི་དབུས་སུ་པདྨ་འདབ་བརྒྱད་གྱིས་ཤར་དུ་འཁོར་ལོ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲི་བྲིས་པའི་ཁར་སློབ་མ་བཞག་ལ། ཧཱུྃ་བཟླས་པའོ། ཡུངས་ཀར། ཆུ། ཁམ་ཕོར། གཙོ་བོའི་སྙིང་པོ་བཟླ་ཞིང་ཉེ་རེག་ཧཱུྃ་བཟླས་པའི་སྤོས་མར་བསྲེགས་པས་བདུགས་པའི་སྦྱང་བ་བྱ་བ་སྤྱི་དང་འདྲ་བར་དབང་རྣམས་བསྐུར་རོ། །མཆོད་པ་ཁ་གསོས་ལ་བྱིན་གྱིས་བརླབ། ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་རྐང་བརྒྱད་ཀྱི་བསྟོད་པའི་བར་སྒྲུབ་ཐབས་བཞིན་བྱ་ལ་བླ་མ་དང་དཔལ་འཁོར་ལོ་སྡོམ་པའི་དཀྱིལ་འཁོར་ཆེན་པོའི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པས་བདག་སོགས་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཧེ་རུ་ཀའི་ཡིག་བརྒྱ་ལན་གསུམ། མ་འབྱོར་བ་དང་ཉམས་པ་དང་སོགས་དང་། བདག་ལས་དང་པོ་པའི་ཞེས་པ་ནས། མ་ཚང་བ་ཐམས་ཅད་བཟོད་པར་མཛད་དུ་གསོལ། ཞེས་པའི་བར་གྱི་བཟོད་པར་གསོལ། ཕྱོགས་བཅུ་ན་བཞུགས་པའི་(༤༠བ)
སངས་རྒྱས་ནས། མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། བྱེ་བྲག་ཏུ་ཡང་རྡུལ་ཚོན་གྱི་དཀྱིལ་འཁོར་འདི་ཉིད་ལ་བསྐྱེད་ཅིང་སྤྱན་དྲངས་པའི་ལྷ་ཚོགས་རྣམས་ཇི་སྲིད་གཤེགས་གསོལ་གྱི་ཆོ་ག་མ་བྱས་ཀྱི་བར་དུ་བརྟན་པར་བཞུགས་སུ་གསོལ་ནས། བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཨོཾ་སུ་པྲ་ཏིཥྛ་བཛྲེ་སྭཱ་ཧཱ། ཞེས་དཀྱིལ་འཁོར་ལ་མེ་ཏོག་འཐོར་ཚུལ་བྱ། །དགེ་བ་འདི་ཡིས་མྱུར་དུ་བདག །བདེ་མཆོག་འཁོར་ལོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཆེ་བའི་ཆེ་མཆོག་མ་ཤློཀ་གསུམ། །འབྱུང་པོ་གང་དག་འདིར་ནི་ལྷགས་གྱུར་ཏམ་སོགས། འདིར་ནི་རྒྱལ་བ་དགྲ་རྒྱལ་བདེན་གང་གིས་སོགས། དེང་འདིར་རྣལ་འབྱོར་པ་བདག་ཅག་སོགས་བྱའོ། །སང་ནང་པར་སྔོན་འགྲོ་གཏོར་མ་ནས་བཟུང་། བདག་བསྐྱེད་གཙོ་བོ་ལ་བསྡུ་བའི་བར་གཏོང་། མདུན་བསྐྱེད་ཀྱི་དཀྱིལ་འཁོར་ལ་ཆུ་གཉིས་ཉེར་སྤྱོད་རོལ་མོ་དང་བདུད་རྩིས་མཆོད། ཕྱག་རྒྱ་དང་བཅས། ཧཱུྃ་བཛྲོ་ཏྟིཥྛ། མདུན་བསྐྱེད་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ནམ་མཁར་བཞུགས་པར་བསམ། སླར་ཡང་གོང་བཞིན་མཆོད། རྡུལ་ཚོན་གྱི་དཀྱིལ་འཁོར་སྦྱང་ནས་གཟུང་། བཀྲ་ཤིས་ཀྱི་བར་སྔར་བཞིན་བྱ། གྲོལ་རྒྱུའི་ཉིན་ལྟ་བུ་འདས་གཏོར་མིན་པ་གཞན་རྣམས་སྟེང་དུ་ཁྱེར་ཏེ་རོལ་མོ་དབྱངས་དང་བཅས་པས་སྤྱི་སྟོབ་ཕྱག་ལེན་བཞིན་ལག་ཏུ་བསྟར་རོ། །གསུམ་པ་རྗེས་ཀྱི་ཆོ་ག་(༤༡ན)
ལ། ལྷག་ཆད་སྐོང་ཕྱིར་འགྲུབ་ན་ཞི་བའི་སྦྱིན་སྲེག་འབུལ། ཚོགས་འཁོར་བྱ་བར་གསུངས་པ་རྒྱུད་སྡེ་རིན་པོ་ཆེའི་དགོངས་པ་དང་མཐུན་པ་ཞིག་བྱུང་ན་ལུགས་འདི་ལ་གལ་ཆེ་བར་སྣང་མོད་སྒྲུབ་པ་པོ་ཡིན་མིན་ལ་མ་བལྟོས་པའི་གྲིད་པའི་གསོན་དགེ་ལྟ་བུའི་ཐམས་ཅད་ཚོགས་ནས་ལོངས་སྤྱོད་པ་སོགས་རྣམ་པར་མ་དག་པའི་ལག་ལེན་ལ་ཕན་ཡོན་ལས་ཉེས་དམིགས་ཆེ་བར་མངོན་པས་རྡོ་རྗེ་འཆང་ཨེ་ཝཾ་པ་ཡབ་སྲས་ཚུལ་དེ་ལ་དགོངས་ཏེ་བཏང་སྙོམས་སུ་འཇོག་པ་གནང་བར་བདེན་ཁ་འབུལ་ལོ། །གཤེགས་གསོལ་གྱི་ཚེ། བསྟོད་པའི་རྗེས་སུ་ཕྱི་རོལ་པ་བཏང་། ནང་དུ་ཞུགས། མཆོད་ཡོན་དབུལ། བུམ་པ་གཉིས་དཀྱིལ་འཁོར་གྱི་ཤར་སྒོའི་ཁྱམས་གཡས་གཡོན་དུ་སྤྱན་དྲངས། ཧེ་རུ་ཀའི་ཡིག་བརྒྱ་བཟླ་ཞིང་། རོལ་ཆེན་དང་བཅས་དཀྱིལ་འཁོར་བུམ་པ། ནང་གཏོར་དང་བཅས་པར་སྐོར་བ་བདུན་ནམ་གསུམ་བྱ། སློབ་དཔོན་རྡོར་དྲིལ་འཛིན་པས་ཤར་སྒོའི་ཐད་དུ་འགྲེངས། སློབ་མ་རྣམས་ཀྱི་མཐའ་བསྐོར་ལ། བླ་མ་དང་ཞེས་སོགས་འདོད་གསོལ་དང་བདག་ལས་དང་པོ་པ་ཞེས་སོགས་བཟོད་གསོལ་རྒྱས་པར་བྱ། རྡུལ་ཚོན་དང་བུམ་པའི་ལྷ་ལ་དམིགས་ཏེ་གདངས་དང་བཅས་ནས། ཨོཾ། །ཁྱོད་ཀྱིས་སེམས་ཅན་དོན་ཀུན་མཛད། སོགས་ཀྱི་མཐར་བཛྲ་ནུཿས །བདག་མདུན་བུམ་གསུམ་གྱི་ཡེ་ཤེས་པ་རང་བཞིན་གྱི་གནས་སུ་གཤེགས་པར་བསམ། དམ་ཚིག་པ་རང་ཉིད་ལ་ཛཿཧཱུྃ་བྷཾ་ཧོ་གཉིས་སུ་མེད་པར་བསམ། ལྷའི་ང་རྒྱལ་བརྟན་པོས། ཆོས་ཐམས་ཅད་ནི་སྐྱེ་བ་མེད་(༤༡བ)
པའོ། ཆོས་ཐམས་ཅད་ནི་དངོས་པོ་མེད་པའོ། །ཞེས་དེ་ཁོ་ན་ཉིད་ཀྱི་དོན་དྲན་བཞིན་པས་ཐོག་མར་བྲིས་པའི་དབང་ལྡན་གྱི་རྩེ་གང་ནས་བརྩམས་ཏེ་རྡོ་རྗེའི་རྩེས་འཁོར་ཡུག་ཏུ་ཁཊྣ་རོ་བརྗོད་ཅིང་བཤིག །ཤར་སྒོ་ནས་གཙོ་བོའི་མཚན་མའི་བར་མས་རིམ་གྱིས་བསྡུ་ཞིང་གཙོ་བོའི་མཚན་མ་ནས་སྤྱི་བོར་འཇོག །ཚོན་རྣམས་ལས་ཀྱི་རྡོ་རྗེས་ཕྱགས་ཏེ་བྱིན་རྟེན་དང་དོན་དུ་གཉེར་བ་ཡོད་ན་ཅུང་ཟད་སྟེར་རུང་། རྒྱས་པར་སྤྲོ་ན་རྡུལ་ཚོན་སྤྱན་འདྲེན་པའི་ཆོ་ག་དང་བཅས་ཆུ་བོ་ཆེན་པོར་དོར། ཐིག་རྗེས་ཆུས་བཀྲུས་ཏེ་མི་མངོན་པར་བྱེད། ཧཱུྃ་མཛད་ཀྱི་ཕྱག་རྒྱ་ལས་མཛུབ་མོ་གཉིས་བསྣོལ་པའི་སྐམ་པའི་ཕྱག་རྒྱས། ཨོཾ་བཛྲ་ཀཱི་ལཱ་ཡ། ཨུཏྐི་ལཱ་ཡ། སརྦ་བི་གྷྣཱན་བཛྲ་དྷ་ར་ཨཱ་ཛྙ་པ་ཡ་ཏཱཾ་ཧཱུྃ་ཕཊ་ཕཊ་ཧཾ༔ཞེས་ཕུར་བུ་བཏོན། རྡོ་རྗེ་བསྡུ་རྒྱས། ཕུར་བུའི་ལྷ་རྣམས་རང་གི་ལག་གི་རྡོ་རྗེ་ལ་ཐིམ་པར་བསམ། ཨོཾ་རུ་རུ་སྤུ་རུ་ཛཱ་ལ་ཏིཥྛ་སིདྡྷ་ལོ་ཙ་ན་སརྦ་ཨརྠ་སཱ་དྷཱ་ནི་སྭཱ་ཧཱ། ཞེས་དཔལ་དང་ཕུར་ཁུང་འོ་མས་བཀྲུ་ཞིང་ཁུང་བུ་དགང་། བགེགས་ཐམས་ཅད་ཀྱི་རྨ་དང་ཟུག་རྔུ་ཐམས་ཅད་ཞི་ནས་སྒྲིབ་པ་དག་སྟེ། མྱུར་དུ་མངོན་པར་རྫོགས་པར་འཚང་རྒྱ་བར་བསམ། །ཕུན་སུམ་ཚོགས་པ་ལ་སོགས་པའི་ཤིས་བརྗོད་རྒྱས་པར་བྱ་ཞིང་དཀྱིལ་འཁོར་གྱི་ས་གཞི་ཀུན་མེ་ཏོག་སིལ་མ་གཅལ་དུ་དགྲམ་མོ། །མ་དང་མཁའ་འགྲོ་བྱེ་བའི་དཀྱིལ་འཁོར་གྱི། །དབང་ཕྱུག་རིགས་ཀྱི་ཁྱབ་བདག་ཧཱེ་རུ་ཀཿ། །དཔལ་ལྡན་འཁོར་ལོ་སྡོམ་པའི་གསང་ཆེན་ལས། །ཤེས་རབ་རྒྱུད་དོན་སྙིང་པོའི་ཡང་རྩེར་སོན། །བསྐྱེད་དང་རྫོགས་(༤༢ན)
པའི་ཐེམ་སྐས་ལ་འཛེགས་ནས། །ཟུང་འཇུག་ཞིང་ཁམས་གཤེགས་པ་རབ་མང་ཡང་། །མངོན་སུམ་མཁའ་སྤྱོད་གནས་བྱོན་དྲིལ་བུ་བ། །གྲུབ་དབང་ཡོངས་ཀྱི་འཁོར་ལོས་སྒྱུར་པའི་དཔལ། །ལྗོངས་འདིར་བདེ་མཆོག་མཁན་པོར་ཁས་འཆེ་བ། །དྭགས་ཤངས་རྣལ་འབྱོར་པར་རློམས་མང་ན་ཡང་། །གསང་མཐའི་སྨིན་གྲོལ་རྒྱུད་བཤད་འཁྲུལ་མེད་དུ། །སྲོལ་འབྱེད་ས་སྐྱའི་འཇམ་དབྱངས་རིམ་བྱོན་ཙམ། ཐུབ་བསྟན་མཁའ་ལ་གསལ་བྱེད་ཉི་ཟླ་བཞིན། །མ་ཕམ་མགོན་པོ་བུ་སྟོན་རིན་ཅེན་གྲུབ། །བརྟན་པའི་འཁོར་ལོ་བློ་བཟང་གྲགས་པ་ཞེས། །མ་རྒྱུད་རིང་ལུགས་སྣང་བ་འོད་དུ་འབར། །སྔོན་བྱོན་དམ་པས་སྤེལ་པའི་འཆད་ཉན་གྱི། །བཤད་སྒྲུབ་ནོར་བུ་རྒྱལ་མཚན་རྩེར་འཆང་བ། །དེང་དུས་འཆལ་པའི་ལག་ལེན་འདམ་རྫབ་ཏུ། །ཆུད་པས་སྔར་གཞུང་ཕལ་ཆེར་དྲི་མས་སྦགས། །ཅི་ཕྱིར་སྤྱི་དང་ཟུར་བཀའི་རྣམ་དབྱེ་བྲལ། །སྟ་གོན་སྒྲུབ་མཆོད་མེད་པར་དབང་བསྐུར་བྱེད། །བཀླགས་ལུང་ངང་ནས་བུམ་ཆུ་སྦྱིན་ལ་བརྩོན། །ཐིག་ཚོན་ཆོ་གས་དབེན་ཞིང་གང་དྲན་འདྲི། །རས་བྲིས་ཤར་གྱི་ལྷ་རྣམས་དབུ་མཇུག་ལྡོག །སྒོ་མེད་གྲུ་བཞིའི་དཀྱིལ་འཁོར་དབྱིབས་ཅན་བཞེངས། །རྩམ་པའི་པདྨ་འདབ་བརྒྱད་ཚོམ་བུ་སོགས། །རྡོ་རྗེ་ཐེག་པ་མིང་ཙམ་གྱུར་པར་ལྟོས། །བསྟན་རྗེས་མ་ཞུགས་སྐྱེ་བོས་མི་དགེའི་ལས། །བསགས་ཀྱང་བཤགས་སླ་ཆོས་ལ་ཉན་བརྟེན་ནས། །སྡིག་ལྟུང་ལྕགས་ཀྱུས་རྡོ་རྗེ་དམྱལ་བ་རུ། །འཁྲིད་པའི་བློ་ངན་ཚུལ་ལ་སུ་ཞིག་དགའ། ཁྲག་(༤༢བ)
འཐུང་ལྷ་ལྔའི་དཀྱིལ་འཁོར་འདིར་འབད་མཐུས། །གདན་གསུམ་ཚང་བའི་རྡོ་རྗེ་སློབ་དཔོན་གྱིས། །སྐྱེ་བར་རྗེས་བཟུང་ཉེ་བའི་ལམ་བཟང་པོར། །ཐོས་བསམ་སྒོམ་པ་ཚུལ་བཞིན་སྒྲུབ་ནུས་ཤོག །གྲངས་མེད་བསྐལ་བ་གསུམ་སྒུག་དུས་རིང་གིས། སྒྱིད་ལུག་བྱ་དཀའི་སྤྱོད་པ་རླབས་ཆེན་ལ། །བལྟོས་མིན་སྙིགས་མའི་ཚེ་གཅིག་ཐུང་ངུའི་ཡུན། ཁ་སྦྱོར་བདུན་ལྡན་ས་དེར་གོམ་འགྲོད་ཤོག །བདེ་ཆེན་གར་གྱི་རྣམ་རོལ་ཧེ་རུ་ཀཿ །སྟོང་ཉིད་སྙིང་རྗེའི་ཉམས་ཅན་ཕག་མོ་ཡུམ། །ཟུང་འཇུག་གདོད་ནས་སྙིང་དབུས་རྡོ་རྗེ་སེམས། །ཞུགས་ཏེ་མཁའ་ཁྱབ་འགྲོ་བ་འདྲེན་གྱུར་ཅིག །ཅེས་དཔལ་འཁོར་ལོ་སྡོམ་པ་དྲིལ་བུ་ལྷ་ལྔའི་དཀྱིལ་འཁོར་གྱི་ཆོ་ག་དཔའ་བོའི་གྲོང་འཇུག་འདི་ནི་དབུ་མཛད་བློ་བཟང་ཡོན་ཏན་གྱིས་དོན་གཉེར་ཆེན་པོས་བསྐུལ་བའི་ངོར་སློབ་དཔོན་རྡོ་རྗེ་དྲིལ་བུ་བའི་བཞེད་གཞུང་མལ་གྱོ་ལོ་ཙཱ་བ་ལ་བརྟེན་ནས་ས་སྐྱའི་རྗེ་བཙུན་གོང་མ་རྡོ་རྗེ་འཆང་དང་ཞལ་མི་གཉིས་པ་རྣམས་དང་ཡར་ངོའི་རྗེས་སུ་འབྲངས་ནས་གཟེ་བ་བློ་ལྡན་སོགས་ཀྱིས་བཀྲལ་བའི་ལེགས་བཤད་ཀྱི་དགོངས་དོན་ཐམས་ཅད་མཁྱེན་པ་བུའི་ཐུགས་སྲས་སྒྲ་ཚད་པ་རིན་ཅེན་རྣམ་རྒྱལ་གྱིས་མཛད་པའི་དཀྱིལ་ཆོག་སྙིང་པོ་དོན་གསལ་གཞིར་བཟུང་སྟེ་རྩ་བའི་བླ་མ་ཁྱབ་བདག་ཞ་ལུ་པ་ཆེན་པོ་རིན་ཅེན་བསོད་ནམས་མཆོག་གྲུབ་བསྟན་པའི་རྒྱལ་མཚན་དཔལ་བཟང་པོས་མཛད་པའི་དཀྱིལ་ཆོག་མི་འགྱུར་བདེ་ཆེན་དཔལ་སྟེར་གྱི་ཕྱག་ལེན་གཙོ་བོར་བྱས་ཞ་ལུ་ཤར་ཆེན་ཡེ་ཤེས་རྒྱ་མཚོས་མཛད་པའི་(༤༣ན)
དཀྱིལ་ཆོག་བདུད་རྩིའི་ཆར་རྒྱུན་དང་རྒྱལ་བ་བཙོང་ཁ་པ་ཆེན་པོས་མཛད་པའི་ལུས་དཀྱིལ་རིན་ཅེན་བང་མཛོད་ལཱུ་ཨི་པའི་མཆོད་ཕྲེང་རྣམས་ནས་ལེགས་ཆ་བླངས་ཏེ་རྡོ་རྗེ་འཆང་དཔལ་འབྱོར་ལྷུན་གྲུབ་སོགས་ཡོངས་འཛིན་དམ་པ་ཆོས་བཞིན་དུ་སྤྱོད་པ་དུ་མའི་ཞབས་རྡུལ་སྤྱི་བོར་བསྟེན་པའི་བཀའ་དྲིན་གྱིས་རྡོ་རྗེ་ཐེག་པའི་ཆོས་ཚུལ་ལ་སྨྲ་བའི་སྤོབས་པ་ཅུང་ཟད་རྙེད་པ་ཟ་ཧོར་གྱི་བནྡེ་འཇམ་དབྱངས་དགའ་བའི་བཤེས་གཉེན་གྱིས་ཀུན་དགའ་ཞེས་པ་ཤིང་སྟག་དབྱུ་གུ་ཟླ་བའི་དཀར་ཕྱོགས་ཀྱི་དགའ་བ་གསུམ་པའི་ཚེས་ལ་རང་བྱུང་འཕགས་པ་འཇིག་རྟེན་དབང་ཕྱུག་གི་ཞིང་ཁམས་དམར་པོ་རིར་སྦྱར་བའི་ཡི་གེ་པ་ནི་སྡོམ་བརྩོན་འཇམ་དབྱངས་གྲགས་པས་བགྱིས་པ་སརྦྦ་དཱ་ཝ་རྔྷ་བྷ་ཝནྟུ། །མངྒ་ལཾ།།