རྒྱུད་སྡེ་རྣམ་བཞིའི་ལྷ་ཚོགས་རྣམས་ཀྱི་སྒྲུབ་འཕྲིན་བསྙེན་པ་རྗེས་གནང་སོགས་ཀྱི་ཉམས་ལེན་མཆོག་ཐུན་དངོས་གྲུབ་འདོད་དགུའི་སྙེ་མ་གཡུར་ཟ།
རྒྱུད་སྡེ་རྣམ་བཞིའི་ལྷ་ཚོགས་རྣམས་ཀྱི་སྒྲུབ་འཕྲིན་བསྙེན་པ་རྗེས་གནང་སོགས་ཀྱི་ཉམས་ལེན་མཆོག་ཐུན་དངོས་གྲུབ་འདོད་དགུའི་སྙེ་མ་གཡུར་ཟ་ཞེས་བྱ་བ་བཞུགས་སོ།།
ན་མོ་གུ་རུ་ཤྩ་མྲྀ་དུ་ཤྲཱི་སྭ་རཱ་ཡསྟ་སྨཻ། གང་ལ་བརྟེན་ན་རྣམ་འབྱེད་ཤེས་རབ་མཆོག །འབད་མེད་ལག་རྩེར་སྩོལ་བའི་ཡིད་བཞིན་ནོར། །རྒྱལ་བའི་ཡབ་ཅིག་འཇམ་དབྱངས་བླ་མ་ལ། །གུས་པས་འདུད་དོ་ངག་གི་དངོས་གྲུབ་སྩོལ། །བློ་ཆེན་ཚངས་སོགས་རྒན་པོས་རྟོགས་དཀའ་བ། །སྐལ་བཟང་དགའ་བའི་ཐུབ་བསྟན་ཤིང་རྟ་ཆེ། །སྨད་བྱུང་གྲགས་པ་ཏམྦུ་ར་ཡི་རྒྱུད། །སྲིད་རྩེའི་བར་དུ་བརྡུང་མཁས་ཁྱོད་མིན་སུ། །གང་གི་ལེགས་པར་བཤད་པ་ཟབ་མོའི་དོན། །ཕན་ཚུན་གབ་དཀྲུགས་ཐོར་བུར་བཞུགས་པ་རྣམས། །ལག་ལེན་ཁྲིགས་སུ་བྱ་བའི་རིམ་པ་དག །འཁྲུལ་མེད་ཡི་གེའི་ཕྲེང་བར་དེང་འདིར་སྤེལ། །དེའང་རྗེ་བཙུན་འཇམ་དཔལ་དབྱངས་བསྒྲུབ་པར་འདོད་པའི་སྐྱེས་བུ་གང་ཞིག །གནས་ཡིད་དུ་འོང་བར་བྱི་དོར་ལེགས་པར་བྱས་ལ། རྗེ་བཙུན་གྱི་སྐུ་བྲིས་འབུར་རབ་གནས་ཅན་དང་། གཞན་ཡང་དཀོན་མཆོག་གི་རྟེན་གསུམ་གྱི་མདུན་དུ་ཅི་འབྱོར་བའི་མཆོད་གཏོར་རྣམས་བཤམ། རང་ཉིད་སྟན་བདེ་བ་ལ་འདུག་སྟེ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་སོགས་དང་། དཀོན་མཆོག་གསུམ་ལ་བདག་སྐྱབས་མཆི། ཞེས་པ་ནས། འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་པའི་བར་གྱི་སྐྱབས་སུ་འགྲོ་བ་དང་(༢ན)
སེམས་བསྐྱེད་པ་སྔོན་དུ་བཏང་ནས། རང་འཇམ་དབྱངས་སུ་གསལ་བའི་སྙིང་པདྨ་འདབ་མ་སྟོང་དང་ལྡན་པའི་དབུས་སུ། བྷྲཱུཾ་ལས་རིན་པོ་ཆེའི་གཞལ་ཡས་ཁང་གྲུ་བཞི་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་སེང་གེས་བཏེག་པའི་རིན་པོ་ཆེའི་ཁྲི། པདྨ་དང་ཉི་མའི་གདན་ལ་དྷཱིཿཧྲཱིཿཡོངས་སུ་གྱུར་པ་ལས། བླ་མ་དང་གཉིས་སུ་མེད་པའི་འཇམ་དབྱངས་དམར་པོ་རྡོ་རྗེ་དང་དྲིལ་བུ་འཛིན་པ། དབྱངས་ཅན་མ་དམར་མོ་གྲི་གུག་དང་ཐོད་པ་འཛིན་པས་འཁྱུད་པ་ཡབ་རྡོ་རྗེའི་སྐྱིལ་ཀྲུང་དང་ཡུམ་པདྨའི་སྐྱིལ་ཀྲུང་གིས་བཞུགས་པ། གཉིས་ཀའང་རིན་པོ་ཆེ་དང་རུས་པའི་རྒྱན་གྱིས་སྤྲས་པའི་སྤྱི་བོར་རྣམ་པར་སྣང་མཛད། མགྲིན་པར་འོད་དཔག་མེད། ཐུགས་ཀར་མི་བསྐྱོད་པ། མིག་ཏུ་སའི་སྙིང་པོ། རྣ་བར་ཕྱག་ན་རྡོ་རྗེ། སྣར་ནམ་མཁའི་སྙིང་པོ། ལྕེར་འཇིག་རྟེན་དབང་ཕྱུག །ལུས་སྒྲིབ་པ་རྣམ་སེལ། ཡིད་ཀུན་ཏུ་བཟང་པོ། ཕུང་པོ་ལྔ་སྐུ་ལྔ། འབྱུང་བ་བཞི་ཡུམ་བཞི། ཕྱག་ཞབས་ཀྱི་སོར་མོ་ཉི་ཤུ་ཁྲོ་བོ་ཁྲོ་མོ་བཅུ། སྒལ་ཚིགས་སེམས་དཔའ་སེམས་མ་བཅུ་དྲུག །ཡན་ལག་བཞི་སྒོ་མ་བཞི། ཚིགས་ཆེན་བཅུ་གཉིས་མཆོད་པའི་ལྷ་མོ་བཅུ་གཉིས་སུ་གྱུར་པ་རྣམས་ཀྱི་སྤྱི་བོར་ཨོཾ། །མགྲིན་པར་ཨཱཿ(༢བ)
ཐུགས་ཀར་དྷཱིཿཧཱུཾ་གིས་མཚན་པ་ལས་འོད་འཕྲོས། རང་བཞིན་གྱི་གནས་ནས། རྩ་བརྒྱུད་ཀྱི་བླ་མ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བ་ཨོཾ་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿ ཨོཾ་མཱུ་ལ་མཱ་ལ་སྱ་གུ་རུ་བུདྡྷ་བོ་དྷི་ས་པ་རི་ཝཱ་ར་ཨརྒྷཾ་ནས་ཤཔྡའི་བར་གྱིས་མཆོད། སྐུ་གསུམ་མངའ་བདག་མཚན་དཔེས་བརྒྱན། །སྐུ་གཅིག་ལ་སོགས་གྲངས་མེད་སྐུས། །རྣམ་ཀུན་འགྲོ་རྣམས་སྒྲོལ་མཛད་པ། །རྗེ་བཙུན་སྐུ་ཡི་བྱིན་རླབས་སྩོལ། །ཞེས་གསོལ་བ་དྲག་ཏུ་བཏབ་པས། སྤྱི་བོའི་ཨོཾ་ཡིག་དཀར་པོ་ལས་འོད་ཟེར་འཕྲོས། །རྒྱལ་བ་སྲས་བཅས་ཀྱི་སྐུའི་ཡོན་ཏན་ཐམས་ཅད་གཟུགས་སྐུའི་རྣམ་པར་སྤྱན་དྲངས། ཡབ་ཀྱི་ཞལ་དུ་ཞུགས། སྙོམས་པར་ཞུགས་པའི་སྦྱོར་མཚམས་ནས་བྱང་སེམས་སུ་གྱུར་པའི་བདུད་རྩིའི་རྒྱུན་བབས། ལུས་གང་། བུམ་པའི་དབང་ཐོབ། སྡིག་སྒྲིབ་དག །འབྲས་བུ་སྐུ་རྡོ་རྗེ་དང་། སྤྲུལ་པའི་སྐུ་འགྲུབ་པའི་ནུས་པ་ཁྱད་པར་ཅན་བཞག །གསུང་དབྱངས་རྫོགས་ནས་འགྲོ་བ་རྣམས། །ཇི་སྲིད་སངས་རྒྱས་མ་ཐོབ་པར། །ཆོས་ཀྱི་འཁོར་ལོ་བསྐོར་མཛད་པ། རྗེ་བཙུན་གསུང་གི་བྱིན་གྱིས་རློབས། ཞེས་གསོལ་བ་གཏབ་པས་མགྲིན་པའི་ཨཱཿཡིག་དམར་པོ་ལས་འོད་ཟེར་འཕྲོས། རྒྱལ་བ་སྲས་བཅས་ཀྱི་ཡོན་ཏན་ཐམས་ཅད་ཨཱ་ལི་ཀཱ་ལི་སོགས་ཡིག་འབྲུའི་རྣམ་པར་སྤྱན་དྲངས། ཞལ་དུ་ཞུགས་པ་སོགས་སྔར་ལྟར་རིགས་འགྲེ། མགྲིན་པར་ཐིམ། གསང་བའི་དབང་ཐོབ། ངག་སྒྲིབ་དག་འབྲས་བུ་གསུང་རྡོ་རྗེ་དང་། ལོངས་སྤྱོད་རྫོགས་སྐུ་འགྲུབ་པའི་ནུས་པ་ཁྱད་པར་ཅན་བཞག །བདུད་བཞི་གཏན་འཇོམས་ཡང་དག་མཐའ། །རྣམ་ཀུན་མངོན་གྱུར་ཐུགས་རྗེ་ཡིས། །འགྲོ་བ་མ་ལུས་སྒྲོལ་མཛད་པ། །རྗེབཙུན་ཐུགས་ཀྱི་བྱིན་རླབས་སྩོལ། །(༣ན)
ཞེས་གསོལ་བ་བཏབ་པས། ཐུགས་ཀའི་ཧཱུཾ་ཡིག་མཐིང་ཁ་ལས་འོད་ཟེར་འཕྲོས། རྒྱལ་བ་སྲས་བཅས་ཀྱི་ཐུགས་ཀྱི་ཡོན་ཏན་ཐམས་ཅད། རྡོར་དྲིལ་རལ་གྲི་གླེགས་བམ་སོགས་ཕྱག་མཚན་གྱི་རྣམ་པར་སྤྱན་དྲངས། ཞལ་དུ་ཞུགས་སོགས་སྔར་ལྟར་རིགས་འགྲེ། །སྙིང་གར་ཐིམ། ཤེས་རབ་ཡེ་ཤེས་ཀྱི་དབང་ཐོབ། ཡིད་སྒྲིབ་དག་འབྲས་བུ་ཐུགས་རྡོ་རྗེ་དང་། ཆོས་ཀྱི་སྐུ་འགྲུབ་པའི་ནུས་པ་ཁྱད་པར་ཅན་བཞག །ཇི་ལྟར་མགོན་པོ་ཁྱེད་ཀྱི་ནི། །སྐུ་གསུང་ཐུགས་ཀྱི་ཡོན་ཏན་རྣམས། །གཞན་ཕྱིར་མངོན་དུ་མཛད་པ་ལྟར། །མགོན་པོས་བདག་ལ་སྩལ་དུ་གསོལ། །ཞེས་གསོལ་བ་བཏབ་པས། །སྙིང་གའི་བླ་མ་ཡབ་ཡུམ་གྱི་ཡུམ་ཡབ་ལ་ཐིམ། །ཡབ་ཐུགས་ཀའི་དྷཱི་ལ་ཐིམ། དྷཱིཿཚེག་དྲག་ལ་ཐིམ། ཚེག་དྲག་ནམ་མཁའ་ལ་འཇའ་ཡལ་བ་ལྟར་གྱུར་པའི་ངང་ལ་མཉམ་པར་བཞག །ཚིག་དབང་ཐོབ། ལུས་ངག་ཡིད་གསུམ་གྱི་སྒྲིབ་པའི་ས་བོན་དག །འབྲས་བུ་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པའི་སྐལ་བ་ཅན་དུ་བྱས་སོ། །ཨོཾ་སྭ་བྷཱ་ཝས་སྦྱངས། སྟོང་པ་ཉིད་དུ་གྱུར། སྟོང་པའི་ངང་ལས། རཾ་ལས་མེ། ཧཱུཾ་ལས་སྣ་ཚོགས་རྡོ་རྗེའི་ལྟ་བུའི་ནང་དུ། ཨ་ལས་རལ་གྲིའི་འཁོར་ལོ་ཉིས་བརྩེགས་ཁ་དོག་སྔོན་པོ་གོ་སྐབས་མེད་པ་རྩིབས་དྲུག་པ་ཕྱོགས་ཀུན་ཏུ་ཁྱབ་པའི་བར་མཚམས་རྣམས་སུ་རལ་གྲིས་གཏམས་ཤིང་། ཡེ་ཤེས་ཀྱི་མེ་འབར་བའི་བསྲུང་བའི་འཁོར་ལོའི་དབུས་སུ། པཾ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ། དྷཱིཿལས་རལ་གྲི་དྷཱིཿས་མཚན་པ་དེ་ལས་འོད་འཕྲོས། འཕགས་པ་མཆོད། འགྲོ་བའི་མི་ཤེས་པའི་མུན་པ་བསལ། ཚུར་འདུས་ཡོངས་སུ་གྱུར་པ་ལས། རང་ཉིད་རྗེ་བཙུན་འཇམ་དཔལ་དམར་སེར་ཞལ་གཅིག་ཕྱག་གཉིས་པ་གཡས་ཤེས་(༣བ)
རབ་ཀྱི་རལ་གྲི་འཕྱར་ཞིང་། གཡོན་ཨུཏྤལའི་ཡུ་བ་མཐེབ་སྲིན་གྱིས་ཐུགས་ཀར་བཟུང་བའི་འདབ་མ་སྙན་གྱི་ཐད་ཀར་ཁ་ཕྱེ་བའི་སྟེང་ན་ཤེར་ཕྱིན་གྱི་གླེགས་བམ་བསྣམས་པ། རལ་པའི་ཟུར་ཕུད་ལྔ་དང་ལྡན་པ། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། དཔུང་རྒྱན། ཕྱག་གདུབ། ཞབས་གདུབ་སོགས་ཀྱིས་སྤྲས་ཤིང་། དར་གྱི་ན་བཟའ་གསོལ་བ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་ཐུགས་ཀར་ཟླ་བའི་དཀྱིལ་འཁོར་གྱི་གདན་ལ་དྷཱིཿསྔོན་པོ་ལས་ཐུགས་ཀྱི་འཇམ་དབྱངས་སྐུ་མདོག་སྔོན་པོ་ཞལ་གཅིག་ཕྱག་གཉིས་ཀྱིས་རལ་གྲི་དང་གླེགས་བམ་འཛིན་པ་རྒྱན་ཆ་ལུགས་གཙོ་བོ་དང་མཚུངས་པའི་ཐུགས་ཀར་པད་མ་འདབ་མ་བཞིའི་དབུས་སུ་རང་དང་འདྲ་བའི་འཇམ་དབྱངས་སྔོན་པོ། ཤར་དུ་དཀར་པོ། ལྷོར་སེར་པོ། ནུབ་ཏུ་དམར་པོ། བྱང་དུ་ལྗང་གུ །གཙོ་བོའི་མགྲིན་པར་ཟླ་བའི་གདན་ལ་དྷཱིཿདམར་པོ་ལས་གསུང་གི་འཇམ་དབྱངས་དམར་པོ་རལ་གྲི་དང་གླེགས་བམ་འཛིན་པ། རྒྱན་ཆ་ལུགས་གཙོ་བོ་དང་མཚུངས་པའི་ཐུགས་ཀར་པད་མ་འདབ་མ་བཞིའི་དབུས་སུ་རང་དང་འདྲ་བའི་སྣ་ཚོགས་མཁའ་འགྲོ་དམར་མོ། ཤར་དུ་རྡོ་རྗེ་མཁའ་འགྲོ་སྔོན་མོ། ལྷོར་རིན་ཆེན་མཁའ་འགྲོ་སེར་མོ། ནུབ་ཏུ་པདྨ་མཁའ་འགྲོ་དམར་མོ། བྱང་དུ་ལས་ཀྱི་མཁའ་འགྲོ་ལྗང་གུ །སྤྱི་བོར་ཟླ་བའི་གདན་ལ་དྷཱིཿདཀར་པོ་ལས་སྐུའི་འཇམ་དབྱངས་དཀར་པོ་རལ་གྲི་དང་གླེགས་བམ་འཛིན་པ། རྒྱན་ཆ་ལུགས་གཙོ་བོ་དང་མཚུངས་པའི་ཐུགས་ཀར་པདྨ་འདབ་མ་བཞིའི་དབུས་སུ་རྣམ་སྣང་དཀར་པོ། ཤར་དུ་མི་བསྐྱོད་པ་སྔོན་པོ། ལྷོར་རིན་འབྱུང་སེར་པོ། ནུབ་ཏུ་འོད་དཔག་མེད་དམར་པོ། བྱང་དུ་དོན་གྲུབ་ལྗང་གུ །བདག་ཉིད་ཀྱི་ལྕེ་པདྨ་འདབ་མ་བཞི་པའི་དབུས་སུ་རལ་གྲིའི་ཡུ་བ་དྷཱིཿས་མཚན་པ་ནང་དུ་བསྟན་ལ། རྩེ་མོ་(༤ན)
ལ་ཨས་མཚན་པ་ཕྱིར་བསྟན། དེའི་ཤར་དུ་འཇམ་དབྱངས་དཀར་པོ་མཆོག་སྦྱིན་གྱི་ཕྱག་རྒྱ་དང་ཨུཏྤལ་དཀར་པོ་འཛིན་པ། ལྷོར་འཇམ་དབྱངས་སེར་པོ་རལ་གྲི་དང་གླེགས་བམ་འཛིན་པ། ནུབ་ཏུ་འཇམ་དབྱངས་དམར་པོ་ནོར་བུ་དང་རྒྱལ་མཚན་འཛིན་པ། བྱང་དུ་འཇམ་དབྱངས་ལྗང་གུ་གྲི་གུག་དང་ཐོད་ཁྲག་འཛིན་པ། ལྷ་ཉེར་གསུམ་པོ་རྣམས་ཀྱི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་འཕྲོས་པས་རང་བཞིན་གྱིས་གནས་ནས། འཇམ་དཔལ་དབྱངས་ལུས་དཀྱིལ་གྱི་དཀྱིལ་འཁོར་ལྷ་ཚོགས་དང་བཅས་པ་བཛྲ་ས་མཱ་ཛཿས་སྤྱན་དྲངས། ཇི་ལྟར་མཁའ་ལ་ཟླ་བའི་དཀྱིལ་འཁོར་གཅིག །གྲངས་མེད་རྫིང་བུར་འཆར་བ་ཇི་བཞིན་དུ། །འཇམ་མགོན་ལྷ་ཡི་འཁོར་ལོའི་ཚོགས་རྣམས་ཀུན། །ཐུགས་རྗེའི་དབང་གིས་གནས་འདིར་གཤེགས་སུ་གསོལ། །ཨོཾ་མཉྫུ་གྷོ་ཥ་ཀཱ་ཡེ་བྷི་རྨཎྜ་ལཱ་ནཱི་དེ་ཝི་བཛྲ་ས་མ་ཡ་ཛཿ ཐུགས་ཀའི་འོད་ཀྱིས་དབང་གི་ལྷ་ཨོཾ་བཛྲ་ས་མཱ་ཛཿས་སྤྱན་དྲངས། ཇི་ལྟར་མགོན་པོ་ཁྱོད་ཀྱིས་ནི། །སྔོན་ཚེ་འགྲོ་ལ་དབང་བསྐུར་ལྟར། །དེ་བཞིན་ཐུགས་རྗེས་བདག་ལ་ཡང་། །དབང་བསྐུར་དམ་པ་སྩལ་དུ་གསོལ། །ཞེས་ལན་གསུམ་གྱིས་གསོལ་བ་བཏབ་པས། ཇི་ལྟར་སྔོན་ཚེ་འགྲོ་རྣམས་ལ། །དབང་བསྐུར་དམ་པ་མཛད་ཇི་བཞིན། །དེ་རིང་ཡེ་ཤེས་བདུད་རྩིའི་ཆུས། །བུ་ཁྱོད་ལ་ནི་དབང་བསྐུར་རོ། །ཨོཾ་ཨཱརྱ་མཉྫུ་ཤྲི་ཡེ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་རིན་པོ་ཆེའི་བུམ་པ་བདུད་རྩིའི་ཆུས་གང་བས་སྤྱི་བོ་ནས་དབང་བསྐུར། ལུས་གང་། དྲི་མ་དག །ཆུའི་ལྷག་མ་སྤྱི་གཙུག་ཏུ་གནས་པ་ལས། གཙོ་བོ་ལ་རིན་འབྱུང་། ཐུགས་ཀའི་ལྷ་རྣམས་ལ་མི་བསྐྱོད་པ། མགྲིན་པའི་ལྷ་རྣམས་ལ་འོད་དཔག་མེད། སྤྱི་བོའི་(༤བ)
ལྷ་རྣམས་ལ་རྡོ་རྗེ་སེམས་དཔའ། ལྕེ་སྟེང་གི་ལྷ་བཞི་ལ་རིམ་བཞིན་རྣམ་སྣང་། རིན་འབྱུང་། འོད་དཔག་མེད། དོན་གྲུབ་རྣམས་ཀྱིས་དབུ་བརྒྱན་ཅིང་། དབང་གི་ལྷ་རང་ཉིད་ལ་ཐིམ་པར་གྱུར། རིན་ཆེན་སྣོད་དུ་འཁྱིལ་བའི་རྙོག་བྲལ་མཚོར། །ཆུ་སྐྱེས་ལང་ཚོ་རྒྱས་པའི་གེ་སར་ལྡེམ། རྨད་བྱུང་དྲི་བསུང་མངར་བའི་བདུག་སྤོས་དང་། །མུན་པའི་གོ་སྐབས་འཕྲོག་པའི་མར་མེའི་ཕྲེང་། །བཟང་པོའི་སྨན་གྱི་དྲི་ཆབ་ཆལ་ཆིལ་གཡོ། །རོ་མཆོག་བརྒྱ་དང་ལྡན་པའི་ལྷ་ཡི་བཤོས། །སྣ་ཚོགས་སྙན་པའི་རོལ་མོའི་བྱེ་བྲག་རྣམས། །འཇམ་མགོན་ལྷ་ཡི་འཁོར་ལོའི་ཚོགས་ལ་འབུལ། །གོང་གི་སྔགས་གཤམ་དུ་ཨརྒྷཾ་ནས་ཤཔྟའི་བར་དང་། གཟུགས་མཛེས་འགྱིང་བག་ལྡན་པའི་ལུས་ཕྲ་མས། །སྙན་འགྱུར་པི་ཝང་བརྡུང་ཞིང་དྲི་མཆོག་དང་། །བཟའ་དང་བཅའ་བའི་ཁྱད་པར་ཅི་ཡང་ཐོགས། །ཟག་མེད་བདེ་བ་ཆེན་པོའི་རེག་བྱར་བཅས། །རྒྱལ་སྲིད་རིན་ཆེན་བདུན་དང་བཀྲ་ཤིས་ཀྱི། །རྟགས་བརྒྱད་རྫས་བརྒྱད་ལ་སོགས་མཆོད་པའི་ཚོགས། །དངོས་བཤམས་ཡིད་ཀྱིས་སྤྲུལ་པའི་མཆོད་སྤྲིན་འདི། །འཇམ་མགོན་ལྷ་ཡི་འཁོར་ལོའི་ཚོགས་ལ་འབུལ། །གོང་གི་སྔགས་གཤམ་དུ་རཱུ་པ་ནས། སྤཪྴའི་བར་དང་། སབྷ་རཏྣཱཥྚཱ་ཐ་བྷ་ཝ་ཨཱཿཧཱུཾ། དེ་ནས་གཏོར་མ་སྤྱི་འགྲོ་ལྟར་བྱིན་གྱིས་བརླབས་ཏེ་ཕུལ། གཞོན་ནུའི་སྐུ་ལུས་འཆང་བ་པོ། །སོགས་དང་། རྒྱས་པར་སྤྲོ་ན་བསྟོད་སྤྲིན་རྒྱ་མཚོས་བསྟོད། གཞན་ཡང་སྐབས་སུ་འོས་པས་དེ་ལྟར་བྱའོ། །མཚམས་སྤྲིན་ལང་ཚོ་རྒྱས་པའི་མཚན་དཔེའི་སྐུ། །གྲངས་མེད་འགྲོ་ལ་རྗེས་སུ་ཆགས་པའི་ཉམས། །རྒྱལ་སྲས་གཞོན་ནུར་སྟོན་པའི་ངག་གི་ལྷ། །རྗེ་བཙུན་མཁྱེན་པའི་གཏེར་ལ་གསོལ་བ་འདེབས། །དྲི་མེད་རབ་དཀར་ཤེལ་གྱི་ཕུང་པོ་ལ། །(༥ན)
སྣ་ཚོགས་ཚོན་གྱིས་ཁ་དོག་བསྒྱུར་བ་ལྟར། །གཅིག་ལས་དུ་མར་སྣང་བའི་སྤྲུལ་བསྒྱུར་མཁན། །ཐུགས་ཀྱི་ལྷ་ཚོགས་རྣམས་ལ་གསོལ་བ་འདེབས། །ཆགས་བྲལ་ཆགས་པའི་ཉམས་ལྡན་ནུ་འབུར་རྒྱས། །རྐེད་སྐབས་རྐེད་མེད་བཞིན་དུ་རྣམ་པར་ཕྲ། །དངོས་གྲུབ་དངོས་སུ་སྟེར་བའི་མཁའ་འགྲོ་ལྔ། །གསུང་གི་ལྷ་ཚོགས་རྣམས་ལ་གསོལ་བ་འདེབས། །གྲངས་མེད་གདུལ་བྱའི་ལྕགས་ཁམས་ཇི་སྙེད་པ། །རིགས་དང་འཕྲིན་ལས་སྣ་ཚོགས་དུ་མའི་རྩིས། །ཁྱབ་བདག་འཁོར་ལོའི་གསེར་དུ་སྒྱུར་བྱེད་པ། །སྐུ་ཡི་ལྷ་ཚོགས་རྣམས་ལ་གསོལ་བ་འདེབས། །ཞི་རྒྱས་དབང་དང་དྲག་པོའི་འཕྲིན་ལས་ཀྱིས། །ཉེས་པའི་སྐྱོན་སེལ་མཐུན་པའི་ཡོན་ཏན་སྤེལ། །ལྗགས་སྟེང་རིགས་བཞིའི་ཟུར་ཕུད་ལྔ་པ་ལ། །གུས་པས་ལུས་བཏུད་སྙིང་ནས་གསོལ་བ་འདེབས། །རྒྱལ་ཀུན་མཁྱེན་བརྩེའི་དབང་ཕྱུག་དམ་པ་ལ། །གདུང་ཤུགས་དྲག་པོས་ཐུགས་དམ་རྒྱུད་བསྐུལ་ཞིང་། །མི་ཕྱེད་དང་བའི་ཡིད་ཀྱིས་གསོལ་འདེབས་ན། །སྒྲིབ་མེད་ཡེ་ཤེས་སྤྱན་གྱིས་ལེགས་པར་གཟིགས། །དུག་གསུམ་ཉོན་མོངས་ཆུ་གཏེར་ཆེན་པོར་བྱིང་། །ལས་ངན་མི་མཐུན་རླུང་ཤུགས་དྲག་པོས་དེད། །ཉེས་བརྒྱའི་ཆུ་སྲིན་གདུག་པས་རབ་གཙེས་པ། །བདག་འདྲའི་ཉམ་ཐག་འགྲོ་ལ་ཐུགས་རྗེས་གཟིགས། །མི་ཤེས་རྨོངས་པའི་རྒྱུ་ཚོགས་ཆར་སྤྲིན་གཏིབས། །ཡང་དག་ལྟ་བའི་གོ་སྐབས་མུན་པས་བསྒྲིབས། །ངན་འགྲོའི་གཡང་ལ་འཕྱན་པའི་འགྲོ་རྣམས་ལ། །ཚད་མེད་ཐུགས་རྗེས་གཟིགས་ཤོག་འཇམ་དཔལ་དབྱངས། །དུཿཁས་མནར་བའི་འགྲོ་རྣམས་ཡལ་དོར་ན། །རིང་ནས་འགྲོ་རྣམས་སྒྲོལ་བའི་ཐུགས་བསྐྱེད་ཀྱིས། །རླབས་ཆེན་སྤྱོད་པའི་ཁུར་ཆེན་ཁྱེར་རོ་ཞེས། །སྙན་པའི་གྲགས་པ་བརྗོད་པའང་གཏམ་དུ་(༥བ)
ཟད། །རབ་འབྱམས་རྒྱལ་བ་ཀུན་གྱི་གསང་བ་གསུམ། །ཐམས་ཅད་ལུས་པ་མེད་པར་གཅིག་བསྡུས་པ། །ངག་གི་རྒྱལ་པོ་འགྲུབ་པའི་མགོན་ཁྱོད་ལ། །རྣམ་འདྲེན་ཀུན་གྱི་ཡབ་ཅེས་གྲགས་མིན་ནམ། །དེ་ཕྱིར་ཐུགས་རྗེ་ཆེན་པོའི་མཚོན་རྣོན་གྱིས། །མི་ཤེས་རྨོངས་པའི་དྲ་བ་རབ་ཆོད་ལ། །ཤེས་བྱ་ཐམས་ཅད་གཟིགས་པའི་གོ་འཕང་མཆོག །འབད་མེད་ལག་རྩེར་སྩོལ་ཅིག་ལྷག་པའི་ལྷ། །ཞེས་གསོལ་བ་དྲག་ཏུ་འདེབས། དེ་ནས་བཟླས་པ་བྱ་བ་ནི། སྤྱི་བོའི་སྐུ་གསུང་ཐུགས་ཀྱི་ཟླ་བ་ལ་གནས་པའི་སྐུ་གསུང་ཐུགས་ཀྱི་ལྷ་ལྔ་ཕྲག་གསུམ་དང་། ལྗགས་སྟེང་གི་ལྷ་བཞི་སྟེ། ལྷ་བཅུ་དགུའི་ཐུགས་ཀར་འཁོར་ལོ་དཀར་པོ་རྩིབས་དྲུག་པ་ལྟེ་བ་བཅས་པའི་དབུས་སུ་དྷཱིཿ རྩིབས་ལ་ཨ་ཨ་ར་པ་ཙ་ན་ཞེས་པས་བསྐོར་བ་ལ་དམིགས་པ་གཏོད་དགོས་ཏེ། རྒྱས་པར་འཁོར་ལོ་བཅུ་དགུ་སྟེ་ཞེས་པའི་ལུགས་སོ། །དེའང་ཞི་བའི་ལས་བསྒྲུབ་ན། གོང་གི་མངོན་རྟོགས་ཀྱི་སྐབས་སུ་དྷཱིཿདཀར་བ་ལས་ཐུགས་ཀྱི་འཇམ་དབྱངས་དཀར་པོ་ཞེས་པ་དང་། འདབ་མ་བཞིའི་དབུས་དང་ཕྱོགས་བཞིར། རང་དང་འདྲ་བའི་འཇམ་དབྱངས་ཞེས་ལྔ་ཀ་དཀར་པོར་བསྐྱེད་ལ། གསུང་དང་སྐུ་ལ་ཡང་འདོན་པ་བསྒྱུར་ལུགས་རིགས་འགྲེ་ཞིང་། ལྗགས་ཀྱི་སྐབས་སུ། དེའི་ཕྱོགས་བཞིའི་འཇམ་དབྱངས་དཀར་པོ་ཞེས་བརྗོད། སྤྱན་འདྲེན་མཆོད་བསྟོད་སོགས་དངོས་གཞི་དང་འདྲ་ལ། གསོལ་འདེབས་ཀྱི་མཇུག་ཏུ། ཁྱད་པར་རྨོངས་པའི་མུན་པ་སྟུག་པོ་དང་། ནད་གདོན་བགེགས་དང་ཉེ་བར་འཚེ་བ་ཀུན། །མ་ལུས་བྱང་ཞིང་ཞི་བའི་དངོས་གྲུབ་རྣམས། །ཐོགས་མེད་འགྲུབ་པའི་དངོས་གྲུབ་སྩལ་དུ་གསོལ། །ཞེས་གསོལ་བ་བཏབ་སྔགས་མཇུག་ཏུ་མ་མ་སརྦ་ཛྭ་ར་ཤྩ་བི་ན་ཡ་ཀ་ཤནྟིཾ་ཀུ་རུ་ཡེ་སྭཱཧཱ། ཞེས་བཟླས་པ་བྱ་ཞིང་། ཐུགས་རྒྱུད་བསྐུལ་བས། ལྷ་ཚོགས་རྣམས་ཀྱི་ཐུགས་(༦ན)
ཀ་ལས་འོད་ཟེར་འཕྲོས། རང་འདྲ་དཔག་ཏུ་མེད་པ་སྤྱན་དྲངས། བུམ་པའི་ཆུ་སྤྱི་བོ་ནས་བླུག་པས། མི་མཐུན་པའི་ཕྱོགས་གང་ཡིན་པ་དེ་དག་པར་བསམ། རྒྱས་པའི་སྐབས་སུ་ས་བོན་དང་ལྷ་རྣམས་སེར་པོར་བསྒྱུར་བ་སོགས་རིགས་འགྲེ་སྔར་ལྟར། ཕྱག་མཚན་རིན་པོ་ཆེ་དང་རྒྱལ་མཚན་འཛིན་པ། གསོལ་འདེབས་ཀྱི་སྐབས། འཆད་རྩོད་རྩོམ་དང་ཐོས་བསམ་སྒོམ་པ་ཡི། །ཆོས་ཀུན་རྣམ་པར་འབྱེད་པའི་ཤེས་རབ་དང་། །ཚེ་དང་བསོད་ནམས་དཔལ་འབྱོར་ལ་སོགས་པ། །རྣམ་པར་རྒྱས་པའི་དངོས་གྲུབ་སྩལ་དུ་གསོལ། །ཞེས་གསོལ་བ་གདབ་ཅིང་། སྔགས་ཀྱི་མཇུག་ཏུ། མ་མ་ཛྙཱ་ནཱ་ཡུཿཔུཎྱ་པུཥྚིཾ་ཀུ་རུ་སྭཱཧཱ། ཞེས་བཟླས་པ་བྱ་ཞིང་། ཐུགས་རྒྱུད་བསྐུལ་བས་གང་འདོད་པའི་དོན་འགྲུབ་པར་བསམ། དེའང་ཤེས་རབ་གཙོ་བོར་འདོད་ན་ཕྱག་མཚན་གླེགས་རལ། ནོར་ལྷ་ནོར་བུས་མཚན་པའི་རྒྱལ་མཚན། ཏིང་འཛིན་འཕེལ་བར་རྡོར་དྲིལ་སོགས་སྐབས་ཐོབ་ཀྱིས་འདོན་པ་སྤོ། དབང་གི་སྐབས་སུ། ཚེ་དང་། ལོངས་སྤྱོད། གང་ཟག་གསུམ་ལས། ས་བོན་སོགས་དཀར་པོར་བསྒྱུར་བ་རིགས་འགྲེ་ཞིང་། དུད་པའི་ཕྱག་མཚན་བུམ་པ་དམར་པོའི་འཆི་མེད་ཀྱི་བདུད་རྩིས་གང་བ་ལྟེ་བར་རལ་གྲིས་མཚན་པ་དང་། གཉིས་པ་ལ་རྒྱལ་མཚན་གྱི་རྩེ་ནོར་བུས་བརྒྱན་པ་དང་། བུམ་པ་བདུད་རྩིས་གང་བ། གསུམ་པ་ལ་ལྕགས་ཀྱུ་འཛིན་པར་འདོན་པ་བསྒྱུར། གསོལ་འདེབས་ཀྱི་མཇུག་ཏུ། བྱུ་རུའི་རྡུལ་མང་བརྩེགས་པའི་ལྷུན་པོ་ལ། །ཉིན་བྱེད་འབུམ་གྱིས་འཁྱུད་པའི་མདངས་འཛིན་པས། །བདག་ལ་འཆི་བ་མེད་པ་ཚེའི་དངོས་གྲུབ། མ་ལུས་དབང་དུ་བསྡུ་བའི་དངོས་གྲུབ་སྩོལ། ཞེས་དང་། གཞན་(༦བ)
གཉིས་ལ་ཚིག་རྐང་གསུམ་པ་འདོན་པ་བསྒྱུར་ཏེ་གསོལ་བ་གདབ་སྔགས་མཇུག་ཏུ་ཨ་སུ་ཀ་ཝ་ཤ་ཀུ་རུ་སྭཱཧཱ། ཞེས་བཟླས་པ་བྱ་ཞིང་ཐུགས་རྒྱུད་བསྐུལ་བས། གང་འདོད་པའི་དངོས་གྲུབ་དབང་དུ་བསྡུས་པར་བསམ་མོ། །མཇུག་ཏུ་མཆོད་བསྟོད་བྱ། ཐུགས་ཀའི་ལྷ་རྣམས་འཇམ་དབྱངས་སྔོན་པོ་ལ་ཐིམ། མགྲིན་པའི་རྣམས་དམར་པོ་ལ་ཐིམ། སྤྱི་བོའི་རྣམས་དཀར་པོ་ལ་ཐིམ། ལྗགས་སྟེང་གི་རྣམས་རལ་གྲི་ལ་ཐིམ། དེ་བཞི་ཡང་གཙོ་བོ་ལ་ཐིམ། གཙོ་བོ་ཡང་ཐུགས་ཀའི་དྷཱིཿལ་ཐིམ། དེ་ཚེག་དྲག་ལ་ཐིམ། དེ་མི་དམིགས་པ་སྟོང་པའི་ངང་ལ་མཉམ་པར་བཞག །བསྔོ་བ་སྨོན་ལམ་ཅི་རིགས་པ་བྱའོ། །མན་ངག་དཔག་བསམ་ལྗོན་པ་ལས། །འཁྲུགས་སྡེབས་མེ་ཏོག་རབ་རྒྱས་ཤིང་། །དོན་བཟང་འབྲས་བུ་སྨིན་པ་འདི། །དོན་གཉེར་ལེགས་བྲིས་དགའ་སྟོན་མཚར། །ཞེས་འཇམ་དབྱངས་ལུས་དཀྱིལ་གྱི་སྒྲུབ་ཐབས་འདོད་འཇོའི་གཏེར་ཞེས་བྱ་བ་འདིའང་། བཀའ་བཅུ་པ་བསྟན་པ་དར་རྒྱས་ཀྱིས་ནན་གྱིས་བསྐུལ་བ་ལ་བརྟེན་ནས་ངག་དབང་བློ་བཟང་རྒྱ་མཚོས། འཇམ་དབྱངས་བླ་མའི་གསུང་ངག་གབ་འཁྲུགས་ཐོར་བུར་ཡོད་པ་རྣམས་བསྡེབས་ཏེ་སྦྱར་བའི་ཡི་གེ་པ་ནི་རིག་སྔགས་འཆང་བའི་བནྡེ་ཝཱ་གིནྡྲའི་མིང་ཅན་ནོ། །རབ་སྔོན་འབྲས་ལྡན་དུས་ཀྱི་ལྷ་ལམ་ངོས། །ཟླ་གཞོན་དཀྱིལ་འཁོར་རྒྱས་ལྟའི་ན་ཆུང་མ། །རྨད་བྱུང་ལང་ཚོའི་དཔལ་ལས་མཛེས་སྡུག་གི །ཆ་ཤས་ཡོངས་རྫོགས་དབྱངས་ཅན་ལྷ་དེར་འདུད། །བདག་སོགས་གྲངས་མེད་ལུས་ཅན་ཚོགས་རྣམས་ཀུན། །དེང་ནས་རྣམ་འདྲེན་གོ་འཕང་མ་ཐོབ་པར། །སླུ་མེད་རིན་ཆེན་གསུམ་ལ་སྐྱབས་སུ་འགྲོ། །དངོས་གྲུབ་དགའ་སྟོན་རྒྱ་མཚོ་སྩལ་དུ་གསོལ། །བདག་ཉིད་ངག་དབང་ལྷ་(༧ན)
མོར་གསལ་བ་ཡི། །ཆོས་ཀྱི་འཁོར་ལོའི་ཧྲཱིཾ་ལས་འོད་འཕྲོས་པས། །སྐྱབས་གསུམ་ཀུན་འདུས་ཚངས་སྲས་ངག་གི་ལྷ། །ཐོགས་མེད་སྤྱན་དྲངས་མདུན་གྱི་མཁའ་ལ་བཞུགས། །ཨོཾ་སྭ་ར་སྭསྟཱི་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། དེ་བཞིན་དུ་ཤབྡའི་བར་གྱི་མཆོད། སྐྱབས་གསུམ་ལ་འདུད་སྡིག་བཤགས་དག་ལ་སྨོན། །གཞན་ཕྱིར་འཇུག་པ་བྱང་ཆུབ་སེམས་མཆོག་བསྐྱེད། །འགྲོ་རྣམས་སྡུག་བསྔལ་དེ་རྒྱུ་རབ་བཅོམས་ནས། །གནས་སྐབས་མཐར་ཐུག་བདེ་བའི་དཔལ་ཐོབ་ཤོག །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཆོས་ཀུན་རང་བཞིན་གྲུབ་པས་སྟོང་ཉིད་དང་། །པཾ་ལས་རབ་དཀར་སྦྲང་རྩིའི་རྒྱལ་མཚན་ཅན། །འདབ་བརྒྱད་ལྟེ་བར་ཨ་ཡི་འཕྲོ་འདུ་ལས། །བསིལ་སྦྱིན་མཁན་པོའི་དཀྱིལ་འཁོར་ཉ་གང་སྟེང་། །ཤེལ་དཀར་མདངས་འཕྲོག་བདག་གི་སེམས་ཉིད་ཧྲཱིཾ། །འོད་ཀྱིས་འཕགས་ཚོགས་མཆོད་ཅིང་འགྲོ་རྣམས་ཀྱི། །ཆོས་ཀུན་ལྟ་ལ་རྨོངས་བྱེད་མུན་ཚོགས་བཅོམས། །ཤེས་རབ་འོད་རྒྱས་ཚུར་འདུས་ཡོངས་གྱུར་ལས། །རང་ཉིད་རྒྱལ་བ་ཀུན་ཡུམ་དབྱངས་ཅན་ལྷ། །ཟླ་གཞོན་འབུམ་གྱི་ཁེངས་པ་འཕྲོག་བྱེད་པའི། །དཀར་འཇམ་རྒྱུ་རྩལ་ཀུན་རྫོགས་སྒེག་མོའི་ལུས། །བཻ་ཌཱུར་དཀར་པོའི་ལྕུག་ཕྲན་གཞོན་ནུ་དེ། །བྱེད་པོས་སུག་པར་བྱས་སྙམ་ཟུང་གི་ཕྱག །ཚངས་དབྱངས་འབུམ་སྡེ་ཟིལ་གྱིས་གནོན་བྱེད་པའི། །སྟོང་གི་རྒྱུད་ལྡན་དྲི་ཟའི་པི་ཝང་དེ། །གཡོན་ཕྱོགས་དཀུར་བརྟེན་གཡས་པའི་སོར་མོས་བརྡུང་། །བགྲོད་བྱེད་ཕན་ཚུན་ཡིད་གཅུགས་མཛའ་བོ་ལྟར། །མི་ཕྱེད་དམ་བཅིངས་ཙོག་པུའི་ཚུལ་དུ་བཞུགས། །གྲངས་མེད་རིན་ཆེན་དར་གྱིས་ལེགས་བརྒྱན་པས། མིག་སྐྱའི་ནོར་ཀུན་སྡུས་སྙམ་ཡིད་ལ་གྲང་། །ཨིནྡྲ་ནཱི་(༧བ)
ལའི་ཕུང་པོ་དུས་མཐའི་མེས། །ལན་བརྒྱར་བཞུ་བའི་ཁུ་བ་མངོན་བྱུགས་ལྟའི། །ཟུར་ཕུད་སྤྱི་བོར་བཅིངས་པའི་ལྷག་མ་ནི། །སིལ་བུར་འཕྱང་བས་སྐུ་སྟོད་རབ་ཏུ་ཁེབས། །ཆུ་ཤེལ་དབང་པོ་མཁའ་དབྱིངས་ལ་འོངས་ཚེ། །འདི་བས་ལྷག་པའི་རབ་སྔོན་ཀུན་གསལ་ཞིག །ཡོད་སྙམ་བལྟ་ཕྱིར་མགོ་སྐྱེས་རྩེར་འོངས་བས། །ཐོར་ཚུགས་རྣམ་པར་མཛེས་པའི་དཔལ་དུ་གྱུར། །ཆོས་ཀྱི་འཁོར་ལོ་གྱེན་དུ་བསླང་བའི་ནང་། །སྲོག་གི་ངོ་བོ་ཨཾ་དཀར་ནཱ་ད་ལས། །འོད་ཟེར་སྣ་བུག་གཡས་ནས་ལྕགས་ཀྱུའི་དབྱིབས། །འཕྲོས་པས་ལྷོ་ཕྱོགས་ཆུ་གཏེར་ཆེན་པོའི་འགྲམ། །སྤང་ལྗོངས་མར་གད་ཞུན་མ་བཀྲམ་འདྲའི་དབུས། །རྐང་འཐུང་ཕྲེང་འཁྲིགས་འདབ་སྟོང་རྣམ་པར་བཞད། །དྲི་ཟའི་ཚོགས་ཀུན་གར་བསྒྱུར་སྒྲ་སྙན་སྒྲོག །ཡིད་འོང་དགའ་བའི་ཚལ་དེར་ལེགས་བཞུགས་པ། །ཐོགས་པ་མེད་སྤྱོན་དམ་ཡེ་དབྱེར་མེད་དང་། །སླར་མཆོད་ངག་དབང་ཤངས་བུག་ལམ་བརྒྱུད་དེ། །འཁོར་ལོ་ཁབ་ལེན་རྡོ་དང་ལྕགས་ཕྲད་བཞིན། །རང་གི་སྣ་བུག་གཡོན་དྲངས་ཧཱུཾ་ལ་ཐིམ། །དེ་ལས་སྙིང་གར་ཤེས་རབ་འཁོར་ལོ་ནི། པད་དཀར་འདབ་བརྒྱད་ཀུན་ཕན་དཀྱིལ་འཁོར་སྟེང་། །སེམས་ཉིད་ཧྲཱིཾ་གིས་ཐ་མར་བཅུ་དྲུག་དབྱངས། །མར་མེའི་ཕྲེང་ལྟར་དཀར་གསལ་འོད་མདངས་ཀྱིས། །ལུས་ཀྱི་ནང་ཁེངས་མི་ཤེས་མུན་པ་བསལ། ཧྲཱིཾ་ལས་ཧྲཱིཾ་འཕྲོས་ཞལ་ཐོན་ལྟེ་བར་ཞུགས། །མགལ་མེ་ལྟར་འཁོར་གྲངས་མེད་འོད་ཟེར་གྱིས། །སྲིད་གསུམ་གནས་རྣམས་ཀུན་ཏུ་འཕྲོས་པ་ཡིས། །ཕུན་ཚོགས་ཡོན་ཏན་ཤེས་བྱའི་གནས་ཀུན་དང་། ཁྱད་པར་རིག་གནས་བཅུ་ཕྲག་མ་ལུས་པའི། །འཆད་རྩོད་རྩོམ་དང་གཞུང་མང་འཛིན་པ་སོགས། །ཀུན་བསྡུས་སྙིང་གར་ཐིམ་པས་དོན་རྣམས་འགྲུབ། །ཅེས་(༨ན)
བསྙེན་པ་བྱ་ཞིང་དེ་ནས་སྣོད་གཙང་མར་དཀར་གཏོར་བཤམས་ལ། །ཐུགས་ཀའི་འོད་ཀྱིས་ངག་དབང་དབྱངས་ཅན་ལྷ། །སྤྱན་དྲངས་ཟག་མེད་བདུད་རྩིས་ཚིམ་པར་གྱུར། །སྭ་ར་སྭསྟཱི་ཧྲཱིཾ་ཨཱ་ཀཱ་རོ་སོགས་ཀྱིས་འབུལ་ལོ། །མཛེས་སྡུག་ལང་ཚོ་རྨད་བྱུང་ཚངས་སྲས་ལྷ། །འཆད་རྩོད་རྩོམ་དང་གཞུང་མང་འཛིན་པ་སོགས། །ཕུལ་བྱུང་ངག་གི་དངོས་གྲུབ་མ་ལུས་པ། །ཐོགས་མེད་འགྲུབ་པའི་དགའ་སྟོན་སྩལ་དུ་གསོལ། །ལྷག་པའི་ལྷ་མོ་དབྱངས་ཅན་མའི་སྒྲུབ་ཐབས་ཤེས་རབ་ཀུན་ཕན་གསར་པ་ཞེས་བྱ་བ་འདི་ཡང་། རང་དང་སྐལ་མཉམ་འགའ་ལ་ཕན་པའི་ཕྱིར་དུ། བཅུ་ཕྲག་རིག་གནས་འཛིན་པའི་ཚངས་སྲས་བཞད་པའི་རྡོ་རྗེས་བྲིས་པའོ། ། རབ་དཀར་ཁ་བའི་ས་འཛིན་དཀར་པོའི་འོད། །རྟ་བདུན་གོས་སུ་གྱོན་ཚེ་མཚན་དཔེའི་མདངས། ཡིད་ལ་དཔྱང་ཐག་རི་མོ་འདྲི་བྱེད་པའི། །འཕགས་མཆོག་ཕྱག་ན་པདྨས་དགེ་ལེགས་སྩོལ། །གང་གི་སྒྲུབ་ཐབས་ལྕུག་ཕྲག་གཞོན་ནུ་ཡིས། །དངོས་གྲུབ་གེ་སར་བདུད་རྩིའི་ཟིལ་མངར་ཅན། །དྲི་བཟུང་ཟད་མི་ཤེས་པའི་ལྕགས་ཀྱོ་ཡིས། །ཤེས་ལྡན་གཉིས་འཐུང་སྣ་ཡི་ཞགས་པ་འབིགས། །སྐྱབས་འགྲོ་སེམས་བསྐྱེད་སྤྱི་དང་མཐུན་པར་བྱས་ལ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ་འདབ་མ་བརྒྱད་པའི་ལྟེ་བར། ཨ་ལས་ཟླ་བའི་དཀྱིལ་འཁོར་དཀར་བསིལ་ཉ་གང་བའི་སྟེང་དུ། རང་གི་སེམས་ཉིད་ཡི་གེ་ཧྲཱིཿདཀར་པོ་ཡོངས་སུ་གྱུར་པ་ལས། རང་ཉིད་ཐུགས་རྗེ་ཆེན་པོ་སྤྱན་རས་གཟིགས་བཻཌཱུརྱའི་ལྷུན་པོ་ཉི་མ་བྱེ་བའི་འོད་ཀྱིས་འཁྱུད་པ་ལྟ་བུའི་དཀར་གསལ་འོད་ཀྱི་གཟི་མདངས་ཅན། ཞལ་གཅིག་ཕྱག་བཞི་དང་པོའི་སྙིམ་པ་ཐུགས་ཀར་ཟུམ་ཞིང་།(༨བ)
གཡས་འོག་མས་མན་ཤེལ་གྱི་འཕྲེང་བ་དང་། གཡོན་འདབ་སྟོང་དཀར་པོ་རྣམ་པར་བཞད་པའི་འཁྲི་ཤིང་འཛིན་པ། དབུ་སྐྲ་རལ་པའི་ཐོར་ཚུགས་ལྷག་མ་སིལ་བུར་འཕྱང་བ། རིན་པོ་ཆེ་སྣ་ཚོགས་ཀྱི་ཕྲས་ལེགས་པར་སྤུད་པའི་རྒྱན་གྱིས་དབུ་དང་ཕྱག་ཞབས་རབ་ཏུ་སྤྲས་ཤིང་། ལྷ་རྫས་ཀྱི་སྟོད་གཡོགས་དང་སྨད་གཡོགས་ལྷབ་ལྷུབ་ཏུ་མཛེས་པར་ཞབས་རྡོ་རྗེའི་སྐྱིལ་མོ་ཀྲུང་གིས་དབང་གཞུ་ལྟར་བཀྲ་བའི་གུར་ཁྱིམ་གྱི་དབུས་ན་བཞུགས་པར་བསམ་པར། པོ་ཊ་ལ་ནས་ཐུགས་རྗེ་ཆེན་པོ་འཁོར་བཅས་སྤྱན་དྲངས་ལ། རྣམ་པར་དག་པའི་བདེ་བ་ཆེན་པོའི་ཞིང་། གྲུ་འཛིན་སྤོ་ན་འཕགས་མཆོག་ཐུགས་རྗེའི་ལྷ། །མི་ཕྱེད་དད་དང་མོས་པས་སྤྱན་འདྲེན་ན། །བརྩེ་བས་དགོངས་ལ་གནས་འདིར་གཤེགས་སུ་གསོལ། །ཛཿཧཱུཾ་བཾ་ཧོཿ གཉིས་སུ་མེད་པར་གྱུར། སླར་ཡང་འོད་ཟེར་ལྕགས་ཀྱུ་ལྟ་བུ་འཕྲོས་པས། དབང་གི་ལྷ་རྣམས་སྤྱན་དྲངས། བདུད་རྩིའི་ཆུས་སྤྱི་བོ་ནས་དབང་བསྐུར། ལུས་གང་། དྲི་མ་དག །ཆུའི་ལྷག་མ་སྤྱི་གཙུག་ཏུ་གནས་པ་ལས། འོད་དཔག་མེད་ཀྱིས་དབུ་བརྒྱན་པར་གྱུར། རྨད་བྱུང་བཟང་པོའི་སྨན་གྱི་མངར་བའི་རོ། །ཆུ་གཏེར་ཆེན་པོ་ཁྲོད་དུ་བྲོ་བ་ལྷའི། །མཆོད་ཡོན་ཞབས་བསིལ་དབའ་རླབས་འཕྱོ་བ་འདི། །ཛ་ཧུའི་བུ་མོའི་རྒྱུན་བཞིན་རྣམ་པར་འབུལ། །མཆོད་སྦྱིན་བརྒྱ་པའི་ཁྲུས་ཀྱི་རྫིང་བུ་ལ། །ལྷ་མིའི་འདམ་སྐྱེས་ཚོགས་ཀུན་བྱེད་པོ་ཡིས། །གཅིག་ཏུ་བསྡུས་སམ་ཀུན་གསལ་ཞུ་བའི་དབུས། །མི་ལྟུང་འཕྲེང་བ་བརྒྱུས་ལྟར་རྣམ་པར་འབྲེལ། །བྲང་འགྲོས་འཁྱུད་པའི་རྐང་འཐུང་དབང་པོ་སོགས། །གྲངས་མེད་ལྗོན་པའི་ཕུང་པོ་རྒོད་མ་ཁས། །མངོན་པར་བསྲེགས་པའི་དུད་པ་གླང་པོའི་གྲོགས། །སྣ་ཡི་ལམ་དུ་དགྱེས་པ་བསྐྱེད་ཕྱིར་(༩ན)
འབུལ། །གསེར་མངལ་ཅན་གྱིས་དུས་ཀྱི་མེ་དཔུང་ཕྲེང་། །ནོར་འཛིན་ཁྱོན་འདིར་བསྒྲིགས་སྙམ་བཅུ་གཉིས་བདག །ལྷ་ལས་བསྐོར་བའི་ཟོལ་གྱིས་བྱེད་པ་ལྷའི། །མུན་ཚོགས་སྟུག་པོའི་དགྲ་ལས་རྒྱལ་འདི་འབུལ། །གང་ཞིག་མྱངས་ཚེ་བདུད་རྩིའི་ཟ་མ་ཏོག །འཆི་མེད་གནས་ནས་གླིང་འདིར་འཕོས་འདྲ་བའི། །རོ་བརྒྱའི་བཅུད་ཀྱི་མ་མ་འདོད་དགུའི་དཔྱིད། །བཤོས་བཟའ་ཚར་དུ་དངར་བའི་ཕྲེང་འདི་འབུལ། །སྣ་ཚོགས་གླུ་དང་གྲངས་མེད་རོལ་མོ་ཡི། །སྙན་འགྱུར་རྣ་བའི་བཅུད་ལེན་ལང་ཚོའི་དཔལ། །དབྱངས་བདུན་རྒྱུད་ལས་ཉེར་དྲངས་མཆོད་པའི་ཚོགས། །དངོས་བཤམས་ཡིད་སྤྲུལ་བློ་ཡིས་བླངས་ཏེ་འབུལ། །དེ་ནས་ཐུགས་རྗེ་ཆེན་པོར་གསལ་བའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿཡིག་གི་མཐར་ཡི་གེ་དྲུག་གིས་བསྐོར་བ་ལས་འོད་ཟེར་འཕྲོས། འཕགས་པ་མཆོད། རིགས་དྲུག་གི་སྡུག་བསྔལ་སྦྱངས། ཐུགས་རྗེ་ཆེན་པོའི་གོ་འཕང་ལ་བཀོད་པར་མོས་ནས་འཁྱེར་སོ་གསུམ་དང་ལྡན་པས། ཨོཾ་མ་ཎི་པདྨེ་ཧཱུཾ་ཧྲཱིཿ ཞེས་བཟླས་བརྗོད་བྱའོ། །མཐར། དགེ་བ་འདི་ཡིས་མྱུ་དུ་བདག །ཅེས་སོགས་བརྗོད་ཅིང་སྨོན་ལམ་གདབ་པ། །ཞེས་པ་འདི་ཡང་ཨེར་ཁེ་ཐའི་ཇིའི་གསུང་གིས་བསྐུལ་བ་ལ་བརྟེན་ནས། ཨ་ཝ་དྷཱུ་ཏི་པ་ཝཱ་གཱི་ཤྭ་ར་སུ་དྷཱི་སཱ་ག་རས་སྦྱར་བའོ། །ན་མ་ཨཱརྱཱ་ཙ་ལ་ནཱི་ལཱ་ཡ། རིན་ཆེན་བཻ་ཌཱུར་བརྩེགས་པའི་ལྷུན་པོ་ལ། །ཉི་མ་འབུམ་གྱིས་འཁྱུད་པའི་གཟི་མདངས་ཅན། །རྒུད་པའི་དཔུང་འཇོམས་བཅོམ་ལྡན་མི་གཡོ་བའི། །སྒྲུབ་ཐབས་ཨུཏྤལ་ཆུན་པོ་དེང་འདིར་སྤེལ། །དེ་ལ་འདིར་བཅོམ་ལྡན་འདས་མི་གཡོ་བ་སྔོན་པོའི་སྒྲུབ་ཐབས་ཉམས་སུ་བླང་བར་བྱ་བ་ལ། (༩བ)
གནས་ཡིད་དང་མཐུན་པར་སྟན་བདེ་བ་ལ་འདུག་སྟེ་སྐྱབས་འགྲོ་སེམས་བསྐྱེད་སྤྱི་ལྟར་བྱ། ཚོགས་ཞིང་ནི། རང་སྐད་ཅིག་གིས་བཅོམ་ལྡན་འདས་མི་གཡོ་བར་གསལ་བའི་ཐུགས་ཀར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་སྔོན་པོ་ལས་འོད་ཟེར་འཕྲོས་པས་བཅོམ་ལྡན་འདས་མི་གཡོ་བ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་བཛྲ་ས་མཱ་ཛཿས་སྤྱན་དྲངས། ན་མ་གུ་རུ་བྷྱཿ ན་མ་ཨཱརྱ་ཨ་ཙ་ལ་མཎྜ་ལ་ས་པ་རི་ཝཱ་རི་བྷྱཱཿ ཞེས་ཕྱག་བྱ། གོང་གི་སྔགས་མཐར་ཨརྒྷཾ་ནས་ཤབྡའི་བར་གྱིས་མཆོད། རྒྱུན་བཤགས་བྱ་ཞིང་ཚད་མེད་བཞི་བསྒོམ་པ་སྤྱི་ལྟར་རོ། །དངོས་གཞི་ནི། ཨོཾ་སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་པད་མ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ། རང་གི་སེམས་ཀྱི་ངོ་བོ་ཡི་གེ་ཧཱུཾ་མཐིང་ནག །དེ་ལས་འོད་ཟེར་འཕྲོས་འཕགས་པ་མཆོད། སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་མི་གཡོ་བ་སྐུ་མདོག་མཐིང་ནག །ཞལ་གཅིག་ཕྱག་གཉིས་པ་སྤྱན་གསུམ་དམར་ལ་ཟླུམ་པ་ཞལ་མཆེ་བ་གཙིགས་པ། སྨིན་མ་དང་སྨ་ར་དམར་སེར་འབར་ཞིང་དབུ་སྐྲ་ཁམ་སེར་གྱེན་དུ་བརྫེས་པ། ཕྱག་གཡས་ཡེ་ཤེས་ཀྱི་མེ་འབར་བའི་རལ་གྲི་ནམ་མཁའ་ལ་འཕྱར་ཞིང་། གཡོན་ཐུགས་ཀར་སྡིགས་མཛུབ་བསྒྲེང་བ། དར་སྔོན་པོའི་སྟོད་གཡོགས་དང་སྟག་གི་པགས་པའི་ཤམ་ཐབས་ཅན། རིན་པོ་ཆེ་དང་སྦྲུལ་གྱི་རྒྱན་གྱིས་བརྒྱན་པ། བགེགས་ཀྱི་རྒྱལ་པོ་གན་རྐྱལ་དུ་སྒྱེལ་བའི་སྟེང་དུ་ཞབས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་བསམས་ལ། དེའི་ཐུགས་ཀར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་(༡༠ན)
ཧཱུཾ་མཐིང་ནག་ལས་འོད་ཟེར་འཕྲོས། རང་བཞིན་གྱི་གནས་ནས་ཡེ་ཤེས་སེམས་དཔའ་མདུན་གྱི་ནམ་མཁར་བཛྲ་ས་མ་ཛཿས་སྤྱན་དྲངས་སྔར་ལྟར་མཆོད། ཛཿཧཱུཾ་བཾ་ཧོཿས་གཉིས་སུ་མེད་པར་བསྟིམ། རང་གི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོས་མཚན་པར་མོས་ཏེ། ཐུགས་ཀའི་ཧཱུཾ་ལས་འོད་ཟེར་འཕྲོས་པས། རང་བཞིན་གྱི་གནས་ནས་རིགས་ལྔ་འཁོར་དང་བཅས་པ་བཛྲས་ས་མཱ་ཛཿས་སྤྱན་དྲངས། པཉྩ་ཀཱུ་ལའི་སྔགས་ཀྱི་མཐར་མཆོད། ཁྱེད་རྣམས་ཀྱིས་བདག་ལ་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས་དེ་རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ཏེ་ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་གསུང་ཞིང་དབང་བསྐུར་བས་སྡིག་སྒྲིབ་ཐམས་ཅད་དག་ལུས་ཐམས་ཅད་བདུད་རྩིའི་རྒྱུན་གྱིས་གང་། ཆུའི་ལྷག་མ་ཡར་ལུད་པ་ལས་རྡོ་རྗེ་སེམས་དཔས་དབུ་བརྒྱན་པར་བསམ། བཟླས་པ་བྱ་བ་ནི། རང་གི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། དོན་གཉིས་བྱས་ཚུར་འདུས། སླར་ཡང་འོད་ཟེར་འཕྲོས། བཅོམ་ལྡན་འདས་མི་གཡོ་བའི་སྐུ་གསུང་ཐུགས་ཀྱི་བྱིན་རླབས་ཀྱི་ནུས་པ་ཐམས་ཅད་བསྡུས་ཏེ། ས་བོན་སྔགས་འཁོར་དང་བཅས་པ་ལ་ཐིམ་པས། བདག་བྱིན་གྱིས་བརླབས་པར་བསམ་ལ། ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཅེས་མ་ཡེངས་པར་འབུམ་ཕྲག་བཅུ་སོགས་བཟླ་བར་བྱའོ། །ཐུན་མཚམས་སུ་བདག་བསྐྱེད་ཀྱི་ཡེ་ཤེས་བ་མདུན་གྱི་ནམ་མཁར་བྱོན་པར་གྱུར། ཞེས་བརྗོད་ལ་སྔར་བཞིན་མཆོད། བཅོམ་ལྡན་འདས་བདག་དང་སེམས་(༡༠བ)
ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། བཛྲ་མུས་རང་གནས་སུ་གཤེགས། ཉེར་བསྡུ་ནི་རང་ཉིད་ལྷར་གསལ་བ་འོད་དུ་ཞུ་ནས་སྔགས་འཁོར་ལ་ཐིམ། དེ་ཧཱུཾ་ལ་ཐིམ། དེའང་ཞབས་ཀྱུ་ཁོག་པ། ཁོག་པ་མགོ་བོ། དེ་ཀླད་ཀོར། དེ་ནཱ་ད། དེའང་མི་དམིགས་པའི་ངང་དུ་མཉམ་པར་བཞག །དེ་ལས་ལངས་ཏེ་བསྔོ་བ་སྨོན་ལམ་ཅི་རིགས་པ་གདབ། ཡི་གེ་བཅུ་པའི་བསྙེན་པ་ཐེམ་ནས་དམིགས་པ་སྐོར་གསུམ་གྱི་ཏིང་ངེ་འཛིན་དང་སྔགས་ཀྱི་ཉམས་ལེན་བརྒྱ་རྩའི་ནང་བཞིན་བྱའོ། །གོང་འོག་རྒྱུད་སྡེའི་མན་ངག་བདག་མདུན་སོགས། །འཁྲུལ་མེད་གནད་ཀྱི་ཉམས་ལེན་མི་ཤེས་པར། །སྤྲོས་འདོད་འབྲེལ་མེད་གཞན་གྱི་རྒྱས་འགེབས་སོགས། །ངལ་བའི་དཀའ་ཐུབ་ལྷུར་ལེན་ཙམ་དུ་ཟད། །དེ་ཕྱིར་ཉམས་ལེན་ཚར་ཞིང་ཁྱེར་བདེ་བ། །མཁས་གྲུབ་དམ་པའི་ཕྱག་ལེན་ཇི་བཞིན་དུ། །བཀོད་པའི་དགེ་འདིས་འགྲོ་བ་མ་ལུས་པ། །རྡོ་རྗེ་གཏུམ་པོས་རྗེས་སུ་འཛིན་གྱུར་ཅིག །ཅེས་བཅོམ་ལྡན་འདས་མི་གཡོ་བ་སྔོན་པོའི་སྒྲུབ་སྐོར་ལ། མཉམ་མེད་ཇོ་བོ་ཆེན་པོ་དང་། ལོ་ཆེན་བ་རིའི་བཀའ་སྲོལ་གཉིས་ལས། དཔལ་སྣར་ཐང་པའི་མན་ངག་བརྒྱ་རྩའི་ལུགས་ཀྱི་རྗེས་སུ་འབྲངས་པའི་སྒྲུབ་ཐབས་ཨུཏྤལ་ཆུན་པོ་ཞེས་བྱ་བ་འདི་ནི་བཀྲ་ཤིས་སྒོ་མངས་གྲ་ཚང་གི་འཆད་ཉན་པ་འཕྲིན་ལས་ཀྱིས་བསྐུལ་བའི་ངོར་འཇམ་མགོན་གྲུབ་པའི་དབང་པོ་དཔལ་འབྱོར་ལྷུན་གྲུབ་ཀྱི་ཕྱག་ལེན་ཇི་ལྟ་བར། ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་གདོང་ཁ་པ་དབང་རྒྱལ་ལོ། །ན་མོ་གུ་རུ་ཤྩ་ཝཱ་གཱི་ཤྭ་རཱ་ཡ། ཐུན་མཚམས་ལང་ཚོའི་རང་བཞིན་དྷཱིཿཡིག་གཟུགས། །ཐབས་ཤེས་ལུས་(༡༡ན)
ཕྲའི་མངལ་དུ་ལྕི་བའི་དཔལ། །མཚན་དཔེའི་སྣང་བ་མི་ཡི་སྲིད་པ་ཅན། །འཇམ་མགོན་བཙོང་ཁ་པ་དེར་གུས་བཏུད་ནས། །གང་དེར་བརྟན་པའི་འཁོར་ལོས་དཔལ་མགྲིན་ནས། །དངོས་སུ་སྩལ་བའི་ཟབ་དོན་ཆོས་ཀྱི་རིའི། །དགོངས་དོན་ཇི་བཞིན་འཇམ་དབྱངས་དམར་སེར་གྱི། །སྒྲུབ་པའི་ཐབས་ཀྱི་རིམ་པ་དེང་འདིར་འགོད། །དེའང་སྐྱབས་འགྲོ་སེམས་བསྐྱེད་ཚོགས་ཞིང་ཚད་མེད་བཞི་བསྒོམ་པ་སྤྱི་འགྲོ་ལྟར་སྔོན་དུ་བཏང་། རང་ཉིད་ཐ་མལ་དུ་གནས་པའི་སྙིང་སྒོ་ང་ལྟ་བུའི་རྩེ་མོ་གྱེན་དུ་བསྟན་པའི་ནང་དུ་ཟླ་བའི་དཀྱིལ་འཁོར་ཆ་ཤས་ཡོངས་སུ་རྒྱས་པའི་སྟེང་ན་ཡི་གེ་དྷཱིཿདམར་སེར་ཚེག་དྲག་དང་བཅས་པ་ལས་འོད་ཟེར་གྱི་ཚོགས་དཔག་ཏུ་མེད་པ་འཕྲོས། ལུས་ཀྱི་ནང་ཐམས་ཅད་གང་བས་ཐོག་མེད་ནས་བསགས་པའི་སྡིག་སྒྲིབ་ཐམས་ཅད་དག །འོད་ཟེར་བ་སྤུའི་སྒོ་ནས་ཕྱིར་འཕྲོས་པས། རྒྱལ་བ་སྲས་བཅས་ལ་མཉེས་པའི་མཆོད་པ་འབུལ། དེ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་རྣམས་བསྡུས་ནས་རང་ལ་ཐིམ། སེམས་ཅན་ཐམས་ཅད་ཀྱི་མི་ཤེས་པའི་མུན་པ་བསལ། ཤེས་རབ་ཀྱི་སྣང་བ་ལ་བཀོད། ཚུར་འདུས་ཡོངས་སུ་གྱུར་པ་ལས། སྐད་ཅིག་གིས་རང་ཉིད་ཐ་མལ་གྱི་སྣང་ཞེན་དག་ནས། རྗེ་བཙུན་འཇམ་དཔལ་དབྱངས་དམར་སེར་ཞལ་གཅིག་ཕྱག་གཉིས་ཀྱི་གཡས་ཤེས་རབ་ཀྱི་རལ་གྲི་མཁའ་ལ་འཕྱར་ཞིང་། གཡོན་མེ་ཏོག་ཨུཏྤལ་ལའི་ཡུ་བ་མཐེབ་སྲིན་གྱིས་ཐུགས་ཀར་བཟུང་བའི་འདབ་མ་སྙན་གྱི་ཐད་དུ་ཁ་ཕྱེ་བའི་སྟེང་ན་ཤེས་རབ་ིཀྱི་ཕ་རོལ་ཏུ་ཕྱིན་པའི་གླེགས་བམ་བཞུགས་པ། ཞབས་རྡོ་རྗེའི་སྐྱིལ་ཀྲུང་ཅན། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། དཔུང་རྒྱན། ཕྱག་གདུབ་(༡༡བ)
ཞབས་གདུབ་རྣམས་ཀྱིས་སྤྲས་ཤིང་། ལྷ་རྫས་ཀྱི་དར་གྱི་སྟོད་གཡོགས་དང་སྨད་གཡོགས་ལྷབ་ལྷུབ་ཏུ་འཕྱང་བ། རལ་པའི་ཟུར་ཕུད་གཡོན་དུ་སྤུད་པ། ཞི་འཛུམ་སྒེག་པའི་ཉམས་ལྡན། སྐུ་ལས་སྐྱེས་པའི་འོད་ཀྱི་ཕུང་པོའི་དབུས་ན་བཞུགས་པར་གྱུར། དེའི་སྤྱི་བོར་ཨོཾ། མགྲིན་པར་ཨཱཿ། ཐུགས་ཀར་ཧཱུཾ། དེ་ལས་འོད་འཕྲོས། རང་བཞིན་དག་པའི་གཞལ་ཡས་ཁང་ནས་བསྒོམས་པ་དང་འདྲ་བའི་ཡེ་ཤེས་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་སྤྱན་དྲངས། ཛཿཧཱུཾ་བཾ་ཧོཿས་གཉིས་སུ་མེད་པར་གྱུར། ཨོཾ་ཨཱརྱ་ཝཱ་གཱི་ཤྭ་ར་ས་པ་རི་ཝཱ་ར་ཨརྒྷཾ་ནས། ཤབྡའི་བར་གྱིས་མཆོད། བསྟོད་པ་ནི། རབ་དཀར་ཆུ་སྐྱེས་རྒྱས་པའི་ལྟེ་བ་ལ། །ཆུ་ཤེལ་དབང་པོའི་དཀྱིལ་འཁོར་རྫོགས་པའི་སྟེང་། །བཅུ་དྲུག་ལང་ཚོའི་གཟི་ལྡན་འགྱིང་བག་ཅན། །འཇམ་མགོན་གཞོན་ནུའི་སྐུ་ལ་ཕྱག་འཚལ་ལོ། །ཇི་སྙེད་འགྲོ་འདིའི་ཡིད་ངོར་འཆར་བའི་གདངས། །མ་འདྲེས་སོ་སོར་སྣང་བའི་ཚངས་པའི་དབྱངས། །སྐལ་བཟང་རྣ་བའི་རྒྱན་གྱུར་ངག་གི་ཚོགས། །འདོད་འཇོའི་དབང་ཕྱུག་གསུང་ལ་ཕྱག་འཚལ་ལོ། ཀུན་གསལ་ཞགས་པའི་ཚད་ཀྱིས་གཞལ་དཀའ་བའི། །ཕུལ་བྱུང་མཁྱེན་པའི་རྙོག་བྲལ་ཆུ་གཏེར་ངོས། །རབ་འབྱམས་ཤེས་བྱའི་སྣང་བརྙན་མ་ལུས་ཀུན། །གསལ་བར་འཆར་བྱེད་ཐུགས་ལ་ཕྱག་འཚལ་ལོ། ཞེས་དང་། གཞན་ཡང་། གཞོན་ནུའི་སྐུ་ལུས་འཆང་བ་པོ། ཞེས་སོགས་ཀྱིས་བསྟོད། དེ་ནས་བཟླས་པ་བྱ་བ་ནི། ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་དྷཱིཿདམར་སེར་ཚེག་དྲག་དང་བཅས་པའི་མཐའ་སྐོར་དུ་ཨ་ར་པ་ཙ་ནའི་སྔགས་འཕྲེང་གིས་བསྐོར་བ་ལས་འོད་(༡༢ན)
ཟེར་འཕྲོས། སངས་རྒྱས་བྱང་སེམས། ཉན་ཐོས་རང་རྒྱལ། ཕྱི་ནང་གི་མཁས་པ་པཎྜི་ཏ་སོགས་ཀྱི་ཐོས་བསམ་སྒོམ་གསུམ་འཆད་རྩོད་རྩོམ་གསུམ་གྱི་ཤེས་རབ་རྣམས་བསྡུས་ཏེ། རང་ཉིད་ལ་ཐིམ་པར་བསམ་ལ་བཟླས་པ་བྱ། མཐར་ཡི་གེ་བརྒྱ་པས་ལྷག་ཆད་བསྐང་། དགེ་བ་འདི་ཡིས་མྱུར་དུ་བདག །ཅེས་སོགས་ཀྱི་སྨོན་ལམ་དང་བཀྲ་ཤིས་ཅི་རིགས་པ་བརྗོད་པར་བྱའོ། །འཇམ་དབྱངས་དམར་སེར་གྱི་སྒྲུབ་ཐབས་འདིའང་། བཀའ་བཅུ་དར་རྒྱས་ཀྱིས་བསྐུལ་བའི་ངོར་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོས་སྦྱར་བའོ། །ན་མོ་མུ་ནཱིནྡྲཱ་ཡ། གསེར་གྱི་ལྷུན་པོ་མཚམས་སྤྲིན་གཞོན་ནུ་ཡིས། །ལན་བརྒྱར་འཁྱུད་པའི་དཔལ་ལ་དགྲན་བཟོད་པའི། །ཀུན་མཁྱེན་ཉི་མའི་གཉེན་ལ་ཕྱག་བཙལ་ནས། །གང་གི་སྒྲུབ་ཐབས་ཅུང་ཟད་སྤེལ་བར་བྱ། །ཡིད་དང་མཐུན་པའི་གནས་སུ་བྲིས་སྐུ་དང་ཅི་འབྱོར་པའི་མཆོད་པ་བཤམས་ཏེ། སྐྱབས་འགྲོ་སེམས་བསྐྱེད་ཚོགས་ཞིང་ཚད་མེད་བཞི་བསྒོམ་པ་སྤྱི་ལྟར་བྱ། སྭ་བྷཱ་ཝས་སྦྱངས། སྟོང་པའི་ངང་ལས་བཾ་ལས་པདྨ་དང་ཨ་ལས་ཟླ་བའི་གདན་གྱི་སྟེང་དུ། རང་སེམས་ཡི་གེ་མུཾ་སེར་པོ་ཡོངས་སུ་གྱུར་པ་ལས། རྒྱལ་བ་ཤཱཀྱ་ཐུབ་པ་དབུ་གཙུག་ཏོར་དང་ལྡན་པ། ཞལ་འཛུམ་བག་ཅན། ཕྱག་གཉིས་མཉམ་གཞག །ཞབས་རྡོ་རྗེའི་སྐྱིལ་ཀྲུང་ཅན། མཚན་དཔེ་གསལ་རྫོགས་ཀྱི་བདག་ཉིད་དུ་གྱུར་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ་གིས་མཚན་པ་ལས་འོད་འཕྲོས། བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཛཿཧཱུྃ་བཾ་ཧོཿ གཉིས་སུ་མེད་པར་གྱུར། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤབྡའི་(༡༢བ)
བར་གྱིས་མཆོད། མཚན་མཆོག་ལྡན་པ་དྲི་མེད་ཟླ་བའི་ཞལ། །གསེར་མདོག་འདྲ་བ་ཁྱོད་ལ་ཕྱག་འཚལ་ལ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཅན་ཁྱོད་ལ་ཕྱག་འཚལ་བསྟོད། །ཐུགས་ཀར་ཟླ་བའི་སྟེང་དུ་སྔགས་ཀྱི་འཕྲེང་བ་ལས་འོད་ཟེར་གྱི་སྤྲོ་བསྡུ་དང་བཅས་ཏེ། །ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭཱཧཱ། །ཞེས་བཟླ་བར་བྱ། མཇུག་ཏུ་སྨོན་ལམ་ཅི་རིགས་པ་གདབ་བོ། །ཞེས་པ་ཡང་མགོན་པོ་སྐྱབས་ཀྱིས་བསྐུལ་བའི་ངོར། དཔལ་སྣར་ཐང་པའི་བཀའ་སྲོལ་ལྟར་སྦྱར།། །།