སྤྱན་རས་གཟིགས་ཀྱི་སྒྲུབ་ཐབས་རི་བོ་གྲུ་འཛིན་དུ་བགྲོད་པའི་ཐེམ་སྐས།
སྤྱན་རས་གཟིགས་ཀྱི་སྒྲུབ་ཐབས་རི་བོ་གྲུ་འཛིན་དུ་བགྲོད་པའི་ཐེམ་སྐས་ཞེས་བྱ་བ་བཞུགས་སོ། །ན་མོ་ལོ་ཀེ་ཤྭ་རཱ་ཡ། ཐུགས་རྗེའི་འོད་ཀྱིས་ཕན་བདེའི་ཀུ་མུད་ཚལ། །རྒྱས་མཛད་ཕྱག་ན་པདྨ་ཆུ་ཤེལ་དབང་། ཁྱོད་ཀྱི་སྒྲུབ་ཐབས་ག་བུར་ཐིགས་པའི་རྒྱུན། །དམིགས་མེད་འགྲོ་བའི་ཉེར་འཚོར་འདི་ན་སྤེལ། །དེ་ཡང་ཐུགས་རྗེ་ཆེན་པོ་སྤྱན་རས་གཟིགས་ཕྱག་བཞི་པའི་སྒོམ་བཟླས་ཉམས་སུ་ལེན་པར་འདོད་པས། སྐྱབས་འགྲོ་སེམས་བསྐྱེད་ཚོགས་ཞིང་ཚད་མེད་བཞི་བསྒོམ་པ་སྤྱི་ལྟར་བྱེད། སྭ་བྷཱ་ཝས་སྟོང་པར་སྦྱངས། །སྟོང་པའི་ངང་ལས་པཾ་ལས་པདྨ་དཀར་པོ་འདབ་མ་བརྒྱད་པའི་ལྟེ་བར། ཨ་ལས་ཟླ་བའི་དཀྱིལ་འཁོར་དཀར་བསིལ་ཉ་གང་བའི་སྟེང་དུ། རང་གི་སེམས་ཉིད་ཡི་གེ་ཧྲཱིཿདཀར་པོ་རིང་ཆ་ཚེག་དྲག་དང་བཅས་པ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། རང་ཉིད་རྗེ་བཙུན་སྤྱན་རས་གཟིགས་སྐུ་མདོག་ཤེལ་དཀར་ལྟར་དྭངས་པ། ཞལ་གཅིག་ཕྱག་བཞི་བ་རྩ་བའི་ཕྱག་གཉིས་ཐུགས་ཀར་ཐལ་མོ་སྦྱར་ཞིང་། གཡས་འོག་མས་ནོར་བུ་ཆུ་ཤེལ་གྱི་ཕྲེང་བ་བརྒྱ་རྩ་བརྒྱད་པ་དང་། གཡོན་འོག་མས་མེ་ཏོག་པད་མ་དཀར་པོའི་ཡུ་བ་ནས་འཛིན་པའི་འདབ་མ་སྙན་གྱི་ཐད་དུ་ཁ་བྱེ་བ། ཞབས་རྡོ་རྗེ་སྐྱིལ་ཀྲུང་གིས་བཞུགས་པ། རིན་པོ་ཆེའི་རྒྱན་དང་དར་གྱི་ན་བཟའ་གསོལ་བ། ཞི་ཞིང་འཛུམ་པ་སྒེག་པའི་ཉམས་ལྡན་(༣༣བ)
མཐོན་མཐིང་རལ་པའི་ཐོར་ཚུགས་ཀྱི་ལྷག་མ་སིལ་བུར་འཕྱང་བས་སྐུ་རྐེད་ཡན་ཆད་ཁེབས་པ་མཚན་དཔེ་གསལ་རྫོགས་ཀྱི་བདག་ཉིད་ཅན། འཇའ་ཚོན་ལྟར་རྣམ་པར་བཀྲ་བའི་གུར་ཁྱིམ་གྱི་དབུས་ན་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས། ལྷོ་ཕྱོགས་གྲུ་འཛིན་རི་བོའི་སྤོ་ནས་བསྒོམས་པ་དང་འདྲ་བའི་ཡེ་ཤེས་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿས་སྤྱན་དྲངས། སྤྲོས་བྲལ་ཉེར་ཞིའི་ངང་ལས་མ་གཡོས་ཀྱང་། །གྲངས་མེད་ལུས་ཅན་ཐར་པའི་ཁང་བཟང་དུ། །འཁྲིད་ཕྱིར་ཕྱག་ན་པདྨའི་རྣམ་རོལ་གྱིས། །ཐོགས་པ་མེད་པར་བརྩེ་བས་གནས་འདིར་གཤེགས། །ཨོཾ་ཨཱརྱ་ལོ་ཀཱི་ཤྭ་ར་ས་པ་རི་ཝཱ་ར་ཨ་ཧྱེ་ཧི། ཛཿཧཱུཾ་བཾ་ཧོ༔ གཉིས་སུ་མེད་པར་གྱུར། སླར་ཡང་ཐུག་ཀའི་ཧཱུཾཿལས་འོད་འཕྲོས། དབང་གི་ལྷ་རྣམས་སྤྱན་དྲངས། ཁྱེད་རྣམས་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། དེ་རྣམས་ཀྱིས་བུམ་པ་བདུད་རྩིས་གང་བ་ཐོགས་ནས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་དབང་བསྐུར་ལུས་གང་། དྲི་མ་དག །ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས། འོད་དཔག་མེད་ཀྱིས་དབུ་བརྒྱན་པར་གྱུར། སྭ་བྷཱ་ཝས་སྦྱངས། སྟོང་པའི་ངང་ལས། ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་འོད་དུ་ཞུ་བ་ལས་བྱུང་བའི་མཆོད་རྫས་རྣམས་དངས་ཤིང་ཐོགས་པ་མེད་པ། ངོ་བོ་ཟག་པ་མེད་པའི་བདུད་རྩི་ལ་རྣམ་པ་རང་རང་གི་བྱེད་ལས་ཁྱད་པར་ཅན་དུ་གྱུར། ཨོཾ་ཨཱཿཧཱུཾ་(༣༤ན)
ཡན་ལག་བརྒྱད་ལྡན་རྫིང་བུར་འཁྱིལ་འདྲ་བའི། །མཆོད་ཡོན་ཞབས་བསིལ་ལྷག་པའི་ལྷ་ལ་འབུལ། །འཆི་མེད་དགའ་བའི་ཚལ་ལ་ཅོ་འདྲི་བའི། །རྣམ་བཀྲ་མེ་ཏོག་ལྷག་པའི་ལྷ་ལ་འབུལ། །ཆུ་འཛིན་གསར་པའི་ལང་ལོང་ལྟར་འཁྲིགས་པའི། །དྲི་ཞིམ་བདུག་སྤོས་ལྷག་པའི་ལྷ་ལ་འབུལ། །ཉི་མ་ཟླ་བའི་འོད་ལྟར་རབ་གསལ་བའི། །མར་མེའི་ཚོགས་རྣམས་ལྷག་པའི་ལྷ་ལ་འབུལ། །སྨན་བཟང་སྣ་ཚོགས་འཐུལ་བའི་ཉལ་འགྲོའི་རྒྱུན། །དྲི་ཆབ་མ་ལུས་ལྷག་པའི་ལྷ་ལ་འབུལ། །ལྷ་མིའི་བཟའ་དང་བཏུང་བ་ཀུན་བསྡུས་པའི། །བཤོས་བཟང་དམ་པ་ལྷག་པའི་ལྷ་ལ་འབུལ། །དྲི་ཟའི་པི་ཝང་ལྟ་བུར་སྙན་པ་ཡི། །རོལ་མོའི་ཚོགས་རྣམས་ལྷག་པའི་ལྷ་ལ་འབུལ། །སྔགས་ཀྱི་མཐར་ཨརྒྷཾ་ནས་ཤབྡའི་བར་བརྗོད། རབ་དཀར་ཆུ་སྐྱེས་བཞད་པའི་ལྟེ་བ་ལ། །ཟླ་བ་ཞུན་མར་འཁྱིལ་པའི་གདན་སྟེང་དུ། །མཚན་དཔེའི་ལང་ཚོ་རྒྱས་པའི་ཟློས་གར་ཅན། །འཇིགས་མེད་རྡོ་རྗེའི་སྐུ་ལ་ཕྱག་འཚལ་བསྟོད། །འགག་པ་མེད་པ་ཚངས་པའི་དབྱངས་ཀྱི་གདངས། །ཟབ་དོན་དམ་པའི་ཆོས་སུ་ཉེར་འཆར་བའི། །སྐལ་བཟང་རྣ་བའི་བདུད་རྩི་བླ་ན་མེད། །ཡན་ལག་དྲུག་ཅུའི་གསུང་ལ་ཕྱག་འཚལ་བསྟོད། །སྐྱེ་འགག་གནས་བྲལ་གདོད་ནས་སྟོང་པའི་དབྱིངས། །འགྱུར་པ་མེད་པ་བདེ་ཆེན་ཆོས་སྐུའི་ཀློང་། །མ་བསྒྲིབས་ཤེས་བྱ་ཐམས་ཅད་ཀུན་གཟིགས་པའི། །ཟག་མེད་ཡེ་ཤེས་ཐུགས་ལ་ཕྱག་འཚལ་བསྟོད། །རང་གི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་སེམས་ཀྱི་ངོ་བོ་ཧྲཱིཿདཀར་པོ་གྱེན་དུ་ལངས་པ། དེའི་མདུན་ནས་བརྩམས་ཏེ་གཡས་སྐོར་དུ་ཡི་གེ་དྲུག་པའི་སྔགས་ཀྱིས་བསྐོར་བ་ལས་འོད་དང་བདུད་རྩིའི་རྒྱུན་དཀར་པོ་བྱུང་། རང་གི་ལུས་ཐམས་ཅད་གང་། སྒོ་གསུམ་གྱི་སྡིག་སྒྲིབ་ཐམས་(༣༤བ)
ཅད་དག །འོད་ཟེར་བ་སྤུའི་སྒོ་ནས་ཕྱིར་འཕྲོས། རིགས་དྲུག་གི་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཁྱད་པར་ཨོཾ་ལས་འོད་འཕྲོས། ལྷའི་གནས་སུ་ཕོག །ལྷ་རྣམས་འཆིའམ་ལྟུང་བྱེད་ཀྱི་སྡུག་བསྔལ་སྦྱངས། འཕགས་པ་མཆོག་གི་གོ་འཕང་ལ་བཀོད། དེ་བཞིན་དུ་མ་ལ་སོགས་པའི་ཡི་གེ་ལྷག་མ་ལྔ་པོས་ཀྱང་། ལྷ་མ་ཡིན། མི། དུད་འགྲོ། ཡི་དྭགས། དམྱལ་བ་རྣམས་རིམ་པ་བཞིན་འཕྲོས་པས། འཐབ་རྩོད། སྐྱེ་རྒ་ན་འཆི། གླེན་ལྐུགས། བཀྲེས་སྐོམ། ཚ་གྲང་བཙོ་སྲེག་གི་སྡུག་བསྔལ་རྣམས་སྦྱངས་ཏེ། ཐམས་ཅད་ཀྱང་འཕགས་པའི་གོ་འཕང་ལ་བཀོད་པར་བསམ་པའི་དམིགས་པའི་སྤྲོ་བསྡུ་དང་། མིག་གི་ཡུལ་དུ་སྣང་བ་ཐམས་ཅད་ཐུགས་རྗེ་ཆེན་པོའི་སྐུའི་རྣམ་རོལ། རྣ་བའི་ཡུལ་དུ་ཐོས་པ་ཐམས་ཅད་ཡི་གེ་དྲུག་པའི་གདངས་ཀྱི་སྒྲ། ཡིད་ཀྱི་ཡུལ་དུ་སྣང་བ་ཐམས་ཅད་འཁྲུལ་བའི་སེམས་ཀྱིས་བཏགས་པ་ཙམ་མ་གཏོགས། དོན་དམ་པར་གྲུབ་པ་ཅུང་ཟད་ཙམ་ཡང་མེད་པར་བསམ་པ་སྟེ། འཁྱེར་སོ་གསུམ་དང་ལྡན་པའི་ངང་ནས་ཡེ་ཤེས་དྲུག་པ་བཟླ་ཞིང་། ཐུན་འཇོག་ཁར་པདྨ་སཏྭ་ས་མ་ཡ་ཞེས་སོགས་ཡི་གེ་བརྒྱ་པ་བརྗོད། མདུན་བསྐྱེད་ནི། རང་གི་སེམས་ཉིད་ཅེས་པ་དང་། རང་ཉིད་ཅེས་པ་དང་རྗེས། བདག་བསྐྱེད་ལྟར་མཆོད་པ་ཡན་ཆད་དཀྱུས་བཞིན་བྱས། དེ་ནས། ལྗགས་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་དམར་པོ་འོད་ཀྱི་སྦུ་གུ་ཅན་གྱིས་གཏོར་མའི་བཅུད་དྲངས་ཏེ་གསོལ་བར་གྱུར། སྔགས་ཀྱི་མཐར་ཨོཾ་དཾ་བཾ་ལིཾ་ཏ་ཁ་ཁ་ཁཱ་ཧི་ཁཱ་ཧི། བདུན་ནམ་ཉེར་གཅིག་དང་། སྔགས་མཆོད་ཀྱང་ཕུལ་རྗེས། རྒྱལ་ཀུན་སྙིང་རྗེ་ཆེན་པོའི་ཟློས་གར་ནི། །རྒྱལ་སྲས་(༣༥ན)
གཞོན་ནུའི་ཚུལ་དུ་ལེགས་ཤར་བའི། །འགྲོ་བའི་སྐྱབས་གཅིག་རྗེ་བཙུན་པད་དཀར་འཛིན། །བདག་ལ་སྐུ་གསུང་ཐུགས་ཀྱི་བྱིན་གྱིས་རླབས། །སྲིད་པའི་ཕུན་ཚོགས་ཚ་སྲེག་མེ་འོབས་དང་། །གཉེན་གྲོགས་འཁོར་བར་འཆིང་བའི་ལྕགས་སྒྲོག་ཏུ། །མངོན་སུམ་སྣང་ཡང་མ་མཐོང་ཞེན་ཆགས་ཅན། །རབ་རྨོངས་བདག་ལ་ཐུགས་རྗེའི་སྤྱན་གྱིས་གཟིགས། །ཡང་དག་དགེ་བའི་བཤེས་ལ་རྒྱབ་ཀྱིས་ཕྱོགས། །མི་དགེའི་གྲོགས་ཀྱི་རྗེས་སུ་ནན་ཏར་སློབ། །ངན་སོང་གཡང་སར་གོམ་པ་འདོར་བྱེད་པའི། །བླང་དོར་མིག་བྲལ་བདག་ལ་ཐུགས་རྗེས་གཟིགས། །རང་ཉིད་ལེགས་འདོད་སེམས་ཀྱིས་ཉེར་དྲངས་ཀྱང་། །རྟག་ཏུ་ཉེས་བྱེད་མི་དགེར་སྤྱད་པའི་མཐུས། །གཏན་མདུན་རླུང་ལ་བསྐུར་བའི་སྨྱོན་པ་ལ། །ཐུགས་རྗེས་གཟིགས་དང་འཕགས་མཆོག་འཇིག་རྟེན་དབང་། །དལ་འབྱོར་རྙེད་དཀའ་དོན་ཆེ་འཇིག་པར་སླ། །ཚེ་འདིའི་བདེ་བ་འགྲུབ་ཀྱང་སྡུག་བསྔལ་རྒྱུ། །དགྲ་གཉེན་ངེས་མེད་འགྱུར་བའི་ཆོས་ཅན་དུ། །རྟོགས་ནས་མི་དགེ་སྤོང་བར་བྱིན་གྱིས་རློབས། །ལྷ་མིའི་དཔལ་འབྱོར་མ་ལུས་ཡོངས་ཐོབ་ཀྱང་། །སླར་ཡང་ངན་སོང་གནས་སུ་ལྷུང་བྱེད་པས། །སྲིད་པའི་ཕུན་ཚོགས་གློག་གི་གར་མཁན་དུ། །རྟོགས་ནས་ངེས་འབྱུང་སྐྱེ་བར་བྱིན་གྱིས་རློབས། །གྲངས་མེད་སྐྱ་བར་ཕན་བཏགས་གནོད་པས་སྐྱབས། །དྲིན་ལན་གཞལ་དཀའི་མར་གྱུར་འགྲོ་བ་རྣམས། །འདོར་བ་དམན་པའི་ལམ་དུ་རབ་ཤེས་ནས། །རྒྱལ་སྲས་སྤྱོད་ལ་བསླབ་པར་བྱིན་གྱིས་རློབས། །གྲངས་རིང་བསྐལ་ཆེན་གསུམ་དུ་སྐྱེ་དགུ་རྣམས། །སྡུག་བསྔལ་ཟོ་ཆུན་འཁྱུད་མོ་ལྟར་འཁོར་བ། །བཟོད་(༣༥བ)
མིན་བསམ་པ་མཆོག་གིས་ཉེ་བའི་ལམ། །གསང་ཆེན་རྡོ་རྗེའི་ཐེག་པར་འཇུག་པར་ཤོག །མཐའ་ཡས་གདུལ་བྱ་འདུལ་བ་རྒྱུད་སྡེ་བཞིའི། །ལྷ་ཚོགས་ཀུན་གསལ་མཐའ་ལྟར་བརྗོད་བྲལ་ཡང་། །གངས་ཅན་འགྲོ་བའི་ལྷ་སྐལ་སྤྱན་རས་གཟིགས། །དེ་བསྒྲུབ་དེ་ཡི་གོ་འཕང་ཐོབ་པར་ཤོག །ཕྱི་རོལ་གཟུགས་ཀུན་ལྷ་དང་ལྷ་མོའི་སྐུ། །སྒྲ་རྣམས་མ་ལུས་གྲག་སྟོང་སྔགས་ཀྱི་གདངས། །སེམས་ཉིད་མ་བཅོས་གཉུག་མའི་ངོ་བོ་རུ། །རྗེན་པར་རྟོགས་ནས་ཆོས་སྐུར་གྲོལ་བར་ཤོག །མདོར་ན་བདག་ལ་དེང་ནས་བྱང་ཆུབ་བར། །རེ་ས་གཞན་དུ་མེད་ན་ཚེ་འདི་ཡི། །སྣང་བ་འགགས་ཚེེ་མགོན་ཁྱོད་དངོས་བྱོན་ནས། །གྲུ་འཛིན་གནས་དེར་འཁྲིད་ལ་སྲས་སུ་མཛོད། གནས་སྐབས་ལུགས་གཉིས་བསམ་པའི་དོན་རྣམས་གྲུབ། མཐར་ཐུག་བསོད་ནམས་ཡེ་ཤེས་ཚོགས་གཉིས་རྫོགས། །དུས་རྣམས་ཀུན་ཏུ་བཀྲ་ཤིས་དགའ་སྟོན་གྱིས། ཁྱབ་པར་མཛོད་ཅིག་འཇིག་རྟེན་དབང་ཕྱུག་ཞབས། ཞེས་དང་། གཞན་ཡང་དཔལ་ལྡན་ཟླ་བ་གྲགས་པས་མཛད་པའི་བསྟོད་པ་གསོལ་འདེབས་སོགས་གང་ཤེས་ཀྱི་སྒོ་ནས་གསོལ་བ་དྲག་ཏུ་བཏབ་པས། མདུན་བསྐྱེད་ཀྱི་སྤྱི་བོའི་ཨོཾ་ཡིག་དཀར་པོ་ལས། འོད་དང་བདུད་རྩིའི་རྒྱུན་དཀར་པོ་བྱུང་། རང་གི་སྨིན་མཚམས་སུ་ཐིམ། ལུས་ཀྱི་སྡིག་སྒྲིབ་དག །སྐུའི་དངོས་གྲུབ་ཐོབ་པའི་ནུས་པ་བཞག །དེ་བཞིན་དུ་མགྲིན་པའི་ཨཱཿཡིག་དམར་པོ། ཐུགས་ཀའི་ཧཱུཾ་ཡིག་མཐིང་ཁ། ལྟེ་བའི་སྭཱ་ཡིག་སེར་པོ། གསང་གནས་ཀྱི་ཧཱ་ཡིག་ལྗང་གུ་རྣམས་ལས་འོད་དང་བདུད་རྩིའི་རྒྱུན་དམར། མཐིང་། སེར། ལྗང་རྣམས་རིམ་པ་བཞིན་བྱུང་། རང་གི་མགྲིན་པ་སོགས་(༣༦ན)
བཞིར་ཐིམ། ངག་ཡིད་ཀྱི་སྒྲིབ་པ་དང་ཡོན་ཏན་འཕྲིན་ལས་ཀྱི་མི་མཐུན་ཕྱོགས་རྣམས་དག །གསུང་གི་དངོས་གྲུབ་སོགས་ཐོབ་པར་བསམ། དེ་ནས། སྐྱོན་གྱིས་མ་གོས་སྐུ་མདོག་དཀར། སོགས། སྐྱབས་གནས་ཀུན་འདུས་འཕགས་མཆོག་སྤྱན་རས་གཟིགས། །བདག་གི་སྙིང་གའི་དབུས་སུ་རྟག་བཞུགས་ལ། བྱང་ཆུབ་མ་ཐོབ་བར་དུ་འབྲལ་མེད་དུ། །བརྩེ་བས་རྗེས་སུ་འཛིན་པར་མཛད་དུ་གསོལ། ཞེས་གསོལ་བ་བཏབ་པས། མདུན་བསྐྱེད་ཀྱི་ལྷ་རང་གི་སྤྱི་བོར་བྱོན། རྩ་དབུ་མའི་ལམ་བརྒྱུད། རང་གི་སྙིང་གའི་སེམས་ཀྱི་ངོ་བོ་ཧྲཱིཿཡིག་དང་གཅིག་ཏུ་འདྲེས། སླར་ཡང་རང་གི་ཐུགས་ཀ་ལས་འོད་ཟེར་འཕྲོས། སྣོད་བཅུད་རྣམས་ལ་ཕོག །སྣོད་བཅུད་རྣམས་ལྷར་གསལ་བ་འོད་དུ་ཞུ། རང་ལ་ཐིམ། རང་ཐུགས་ཀའི་ཧྲཱིཿ ཧྲཱིཿ ཚིག་དྲག །དེའང་འཇའ་ཡལ་བ་ལྟར་བསམས་ལ་ཅུང་ཞིག་མཉམ་པར་བཞག །དེ་གའི་ངང་ནས་ཐུགས་རྗེ་ཆེན་པོའི་སྐུར་བཞེངས་ཏེ་རྒྱུན་གྱི་སྤྱོད་ལམ་ལ་འཇུག་གོ །རྗོད་བྱེད་ལོ་འདབ་ཁུར་གྱིས་མི་ལྕི་ཞིང་། །བརྗོད་དོན་ཨ་མྲའི་འབྲས་བུ་རབ་སྨིན་པའི། །སྔོན་མེད་སྒྲུབ་ཐབས་རྐང་འཐུང་དབང་པོ་འདི། བློ་གྲོས་དགའ་བའི་ཚལ་ལས་རྣམ་པར་འོངས། །ཞེས་ཐུགས་རྗེ་ཆེན་པོ་སྤྱན་རས་གཟིགས་ཀྱི་སྒྲུབ་ཐབས་རི་བོ་གྲུ་འཛིན་དུ་བགྲོད་པའི་ཐེམ་སྐས་ཞེས་བྱ་བ་བླ་མ་གངས་རས་དབང་ཕྱུག་དང་། ནང་སོ་དངོས་གྲུབ་གཉིས་ཀྱིས་བསྐུལ་བའི་ངོར་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་ངག་དབང་དགེ་ལེགས་སོ། །ན་མ་ྉྤ་ཎཽ་པདྨ་ཤུཀླ་དྷ་རཱ་ཡ། བདེ་གཤེགས་ཞི་ཁྲོའི་དཀྱིལ་འཁོར་(༣༦བ)
འཁོར་ལོ་ཡི། །གསང་གསུམ་མི་ཤིགས་སྒྱུ་འཕྲུལ་དྲ་བའི་གར། །འཇིག་རྟེན་དབང་ཕྱུག་ཕྱག་ན་པདྨ་དཀར། ཁྱོད་ཀྱི་སྒྲུབ་པའི་རིམ་པ་འདིར་བཤད་བྱ། །འདིར་ཐུགས་རྗེ་ཆེན་པོ་སྤྱན་རས་གཟིགས་ཡི་གེ་དྲུག་པའི་སྒོམ་བཟླས་ཉམས་སུ་བླང་བ་ལ་སྔོན་འགྲོ། དངོས་གཞི། རྗེས་ཀྱི་རིམ་པ་དང་གསུམ་ལས། དང་པོ་ནི། སྐྱབས་འགྲོ་སེམས་བསྐྱེད་སྤྱི་ལྟར་བྱ། ཚོགས་ཞིང་ནི། རང་ཉིད་སྐད་ཅིག་གིས་ཐུགས་རྗེ་ཆེན་པོར་གསལ་བའི་ཐུགས་ཀའི་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་ཐུགས་རྗེ་ཆེན་པོ་གཙོ་འཁོར་གསུམ་ལ་བླ་མ་འོད་དཔག་མེད་ཀྱིས་དབུ་བརྒྱན་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར། ཨོཾ་བཛྲ་ས་མཱ་ཛཿས་སྤྱན་དྲངས། ཨོཾ་ལོ་ཀེ་ཤྭ་ར་ས་པ་རི་ཝཱ་ར་བཛྲ་པུཥྤེ་ཨཱཿཧཱུཾ་ནས་ཤབྡའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། ཞེས་པ་ནས། འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག་གི་བར་ལན་གསུམ་དང་། ཚད་མེད་བཞི་བསྒོམ་པ་སྤྱི་ལྟར་བྱ། གཉིས་པ་དངོས་གཞི་ནི། ཨོཾ་སྭ་བྷཱ་ཝས་སྟོང་པར་སྦྱངས་སྟོང་པའི་ངང་ལས་རང་གི་སྙིང་གར་པདྨ་དཀར་པོ་དང་ཟླ་བའི་དཀྱིལ་འཁོར་གྱི་སྟེང་དུ། ཡི་གེ་ཧྲཱིཿདཀར་པོ་རིང་ཆ་ཚེག་དྲག་དང་བཅས་པ་དེ་ལས་འོད་འཕྲོས། སེམས་ཅན་ཐམས་ཅད་ཀྱི་འཁོར་བའི་སྡུག་བསྔལ་མཐའ་དག་ཞི་བར་བྱས། སླར་འདུས་ཡོངས་སུ་གྱུར་པ་ལས། རང་ཉིད་ཐུགས་རྗེ་ཆེན་པོ་སྤྱན་རས་གཟིགས་འཇིག་རྟེན་དབང་ཕྱུག་སྐུ་མདོག་གངས་རི་ལ་ཉི་མ་ཤར་བ་ལྟར་དཀར་བ། ཞལ་གཅིག་ཕྱག་བཞི་པ། རྩ་བའི་ཕྱག་གཉིས་ཐུགས་ཀར་ཐལ་མོ་སྦྱར་བ། གཡས་འོག་མས་བགྲང་འཕྲེང་(༣༧ན)
དང་། གཡོན་འོག་མས་མེ་ཏོག་པདྨ་དཀར་པོའི་ཡུ་བ་ནས་འཛིན་པ། རལ་པའི་ཅོད་པན་ཅན་རིན་པོ་ཆེའི་རྒྱན་སྣ་ཚོགས་ཀྱིས་སྤྲས་ཤིང་ལྷ་རྫས་ཀྱི་གོས་ལས་གྲུབ་པའི་ན་བཟའ་གསོལ་བ། འགྲོ་ལ་རྗེས་སུ་ཆགས་པའི་ཞི་ཞིང་འཛུམ་བག་ཅན། ཞབས་རྡོ་རྗེ་སྐྱིལ་ཀྲུང་གིས་བཞུགས་པ། དེའི་གཡས་སུ་སྲས་ནོར་བུ་འཛིན་པ་དང་། གཡོན་དུ་ཡུམ་ཡི་གེ་དྲུག་མ་གཉིས་སྐུ་མདོག་དཀར་པོ་ཞལ་གཅིག་ཕྱག་བཞིའི་དང་པོ་གཉིས་ཐལ་མོ་སྦྱར་ཞིང་ལྷག་མ་གཉིས་ཀྱིས་བགྲང་འཕྲེང་དང་པདྨ་འཛིན་པ། དར་གྱི་ན་བཟའ་དང་རིན་པོ་ཆེའི་རྒྱན་ཅན། ཞབས་སྐྱིལ་མོ་ཀྲུང་གིས་བཞུགས་པ། གཙོ་འཁོར་གསུམ་གྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་འཕྲོས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་འཇིག་རྟེན་དབང་ཕྱུག་གཙོ་འཁོར་གསུམ་གྱི་རྣམ་པར་ཨོཾ་བཛྲ་ས་མཱ་ཛཿས་སྤྱན་དྲངས། ཨོཾ་ལོ་ཀེ་ཤྭ་ར་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཛཿཧཱུཾ་བཾ་ཧོཿས་གཉིས་སུ་མེད་པར་བསྟིམ། སླར་ཡང་ཐུགས་ཀའི་ཧཱུཾ་ལས་འོད་འཕྲོས། དབང་གི་ལྷ་དེ་བཞིན་གཤེགས་པ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲངས། ཨོཾ་པཉྩ་ཀཱུ་ལ་ས་པ་རི་ཝཱ་ར་ཨརྒྷཾ་ནས། ཤབྡའི་བར་གྱིས་མཆོད། དབང་གི་ལྷ་དེ་བཞིན་གཤེགས་པ་རྣམས་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་(༣༧བ)
ས་མ་ཡ་ཤྲཱི་ཧཱུཾ། ཞེས་གསུངས་ཞིང་བུམ་པའི་ཆུས་སྤྱི་བོ་ནས་དབང་བསྐུར། ལུས་ཐམས་ཅད་བདུད་རྩིའི་ཆུས་གང་། ལུས་ངག་ཡིད་གསུམ་གྱི་དྲི་མ་དག ཆུའི་ལྷག་མ་ཡར་ལུད་པ་ལས་འོད་དཔག་མེད་ཀྱིས་དབུ་བརྒྱན་པར་བསམ། ཨོཾ་ལོ་ཀེ་ཤྭ་ར་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཡ་སྭཱཧཱ། དེ་བཞིན་དུ་གོང་གི་སྔགས་སོ་སོའི་མགོར་སྦྱར་ཏེ། པཱ་དྱ་ནས་ཤབྡའི་བར་གྱིས་མཆོད། སྐྱོན་གྱིས་མ་གོས་སྐུ་མདོག་དཀར། ཞེས་སོགས་ཀྱིས་བསྟོད། བཟླས་པ་བྱ་བ་ནི། རང་གི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿཡིག་གི་མཐར་ཡི་གེ་དྲུག་པའི་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། རྒྱལ་བ་སྲས་བཅས་ལ་མཆོད་པ་ཕུལ་ཞིང་དངོས་གྲུབ་རྣམས་ཚུར་འདུས་བདག་ལ་ཐིམ། འོད་ཟེར་ཁམས་གསུམ་གྱི་སེམས་ཅན་ལ་ཕོག་པས། འགྲོ་བ་རིགས་དྲུག་གི་སྡུག་བསྔལ་སྦྱངས་ཏེ་ཐུགས་རྗེ་ཆེན་པོའི་གོ་འཕང་ལ་བཀོད་པར་བསམ་པའི་ངང་ནས་ཡི་གེ་དྲུག་པ་ཅི་ནུས་སུ་བཟླ་ཞིང་། ཐུན་འཇོག་པར་འདོད་ན། ཐལ་མོ་སྦྱར་ཏེ། འཕགས་པ་ཐུགས་རྗེ་ཆེན་པོའི་ལྷ་ཚོགས་རྣམས་ཀྱིས་བདག་དང་སེམས་ཅན་ཐམས་ཅད་ལ་དངོས་གྲུབ་ཀྱི་བཀའ་དྲིན་མ་ལུས་པ་སྩལ་དུ་གསོལ། ཞེས་གསོལ་བ་བཏབ། ཡི་གེ་བརྒྱ་པ་བརྗོད། ནོངས་པ་བཟོད་པར་གསོལ། བསྔོ་བ་སྨོན་ལམ་ཅི་རིགས་པ་བྱ། རང་གི་སྙིང་ག་ནས་འོད་ཟེར་འཕྲོས་པས་འཁོར་དང་གདན་འོད་ཟེར་གྱི་རྣམ་པར་རང་ལ་ཐིམ་པར་བསམ་ཞིང་ཤིས་པ་བརྗོད་ལ་གནས་གསུམ་དུ་ཨོཾ་ཨཱཿཧཱུཾ་གིས་མཚན་པར་བསམ་མོ། །གསོལ་འདེབས་དང་སྨོན་ལམ་རྒྱས་པར་སྤྲོ་ན། འཇམ་མཉེན་པད་དཀར་བཞད་པའི་ཟེའུ་འབྲུའི་སྟེང་། །ཆ་ཤས་(༣༨ན)
ཡོངས་སུ་གང་བའི་ཟླ་གདན་ལ། །ལེགས་བཞུགས་ལྟ་བས་མི་ངོམས་མཛེས་པའི་སྐུ། །མིག་གི་བདུད་རྩིར་གྱུར་ལ་གསོལ་བ་འདེབས། །འཛུམ་ལྡན་ཞལ་གྱིས་འགྲོ་ཀུན་ཐད་པར་བསུ། །དཀྱུས་རིང་སྤྱན་གྱིས་དུས་དྲུག་གཡེལ་མེད་གཟིགས། །ཆོས་དབྱིངས་མཚོན་པའི་དབུ་སྐྲའི་ཐོར་ཚུགས་ཅན། །འོད་དཔག་མེད་ཀྱིས་བརྒྱན་པར་གསོལ་བ་འདེབས། །རྩ་ཕྱག་ཐལ་སྦྱར་གཡས་པས་ཤེལ་དཀར་གྱི། །འཕྲེང་བས་ངན་སོང་འགྲོ་རྣམས་མཐོ་རིས་འདྲེན། །གཡོན་པས་སྲིད་ཞིར་ཆགས་པས་གོས་མིན་པའི། །པུཎྜ་རཱི་ཀ་འཛིན་ལ་གསོལ་བ་འདེབས། །མི་ཕྱེད་ཞབས་གཉིས་རྡོ་རྗེའི་སྐྱིལ་ཀྲུང་ཅན། །རིན་ཆེན་རྒྱན་དང་དར་ཟབ་ན་བཟས་མཛེས། །མཐོང་བས་དོན་དང་ལྡན་པའི་མཚན་བཟང་གིས། །ངོ་མཚར་དཔལ་ཀུན་འཛིན་ལ་གསོལ་བ་འདེབས། །ཐོས་པ་ཙམ་གྱིས་སྲིད་ཞིའི་གདུང་བ་ཀུན། །མ་ལུས་ཞི་མཛད་ཚངས་དབྱངས་ཆོས་ཀྱི་སྒྲ། །རི་མོ་གཡས་སུ་འཁྱིལ་བར་མགྲིན་པ་ནས། །སྐལ་བཟང་རྣ་བར་སྒྲོག་ལ་གསོལ་བ་འདེབས། །ནམ་མཁའ་ལྟ་བུར་ཟབ་གསལ་ཐུགས་ཀྱི་དབྱིངས། བདེ་སྟོང་གཉིས་སུ་མེད་པའི་ཡེ་ཤེས་ཀྱིས། །གྲངས་མེད་གདུལ་བྱའི་རེ་བ་ཡོངས་སྐོང་བའི། །ཡིད་བཞིན་དབང་གི་རྒྱལ་པོར་གསོལ་བ་འདེབས། །ཆོས་དབྱིངས་བདེ་སྟོང་ཀློང་དུ་རོ་གཅིག་ཀྱང་། །ཡུམ་དང་སྲས་སུ་སྣང་བའི་སྒྱུ་མའི་འཕྲུལ། །ཐབས་ཤེས་ཟུང་དུ་འཇུག་པའི་བདག་ཉིད་ཅན། རྗེ་བཙུན་གཙོ་འཁོར་གསུམ་ལ་གསོལ་བ་འདེབས། །ལུས་ན་ལྷར་གསལ་ངག་གི་བཟླས་བཇོད་དང་། །གསོལ་བ་འདེབས་ཤིང་ཡིད་ཀྱིས་ཏིང་ངེ་འཛིན། །འབད་པས་བསྒོམས་པའི་རྣམ་དཀར་དགེ་བའི་མཐུས། །ཚེ་རབས་ཀུན་ཏུ་དལ་བའི་རྟེན་ཐོབ་ཤོག དགེ་(༣༨བ)
བའི་ཤེས་ཀྱིས་རྗེས་བཟུང་ཐེག་པ་ཆེའི། །གདམས་པའི་ཆོས་ཀྱི་སྙིང་པོ་ཉམས་བླངས་པས། །སྲིད་མཚོ་སྒྲོལ་བའི་གྲུ་གཟིངས་ལ་བརྟེན་ནས། ། འགྲོ་རྣམས་འདྲེན་པའི་དེད་དཔོན་བྱེད་པར་ཤོག །རང་དོན་སྤངས་ནས་གཞན་དོན་ཁུར་ཁྱེར་བས། །དོན་གཉིས་ལྷུན་གྲུབ་སྟོབས་བཅུ་མངའ་བའི་རྩལ། །རབ་རྫོགས་རྣམ་པ་ཐམས་ཅད་མཁྱེན་པ་ཡི། །ཡེ་ཤེས་མཆོག་གི་གོ་འཕང་མངོན་གྱུར་ཤོག །མ་གྱུར་རྒྱུད་ལྔའི་སྐྱེ་རྒུ་མཐའ་དག་དང་། །ཁྱད་པར་གངས་ཅན་བོད་ཀྱི་རྒྱལ་ཁམས་སུ། །འཐབ་རྩོད་མུ་གེ་ནད་ཡམས་རྒུད་པའི་ཚོགས། །རབ་ཞི་ཕན་བདེའི་དཔལ་ལ་སྤྱོད་པར་ཤོག །ཐུབ་བསྟན་བཤད་དང་སྒྲུབ་པས་ལེགས་འཛིན་པའི། །བཤེས་གཉེན་ཁྲིམས་ལྡན་འདུས་པའི་སྡེར་བཅས་ཀུན། །རྣམ་གསུམ་འཁོར་ལོའི་བྱ་བ་རབ་འཕེལ་ཞིང་། །མཐུན་པའི་རྐྱེན་རྣམས་མ་ལུས་ཚང་བར་ཤོག །ནོར་འཛིན་སྐྱོང་བའི་རྗེ་བློན་འབངས་འཁོར་རྗེ། །ཚེ་དང་བསོད་ནམས་མངའ་ཐང་འབྱོར་པ་ཀུན། །རབ་རྒྱས་མི་མཐུན་ཕྱོགས་ལས་རྣམ་རྒྱལ་ཞིང་། །སྡེ་བཞིའི་དགའ་སྟོན་དཔལ་ལ་སྤྱོད་གྱུར་ཅིག །མ་འདྲིས་ཀུན་ལ་མཛའ་བའི་བཤེས་གྱུར་ཀྱང་། །གངས་ཅན་བོད་ཀྱི་ལྷ་སྐལ་འཇིག་རྟེན་དབང་། །ཁྱོད་ཀྱི་ཐུགས་རྗེས་གནས་སྐབས་མཐར་ཐུག་ཏུ། །བདེ་ཞིང་སྐྱིད་པའི་དཔལ་ལ་སྤྱོད་པར་ཤོག །ཅེས་གསོལ་འདེབས་སྨོན་ལམ་དུ་བྱའོ། །ཐུགས་རྗེ་ཆེན་པོ་སྤྱན་རས་གཟིགས་ཡི་གེ་དྲུག་པའི་སྒྲུབ་ཐབས་ཕན་བདེའི་གཏེར་མཛོད་ཅེས་བྱ་བ་འདི་ནི། ར་ས་འཁྲུལ་སྣང་གི་བྱ་འདབས་སུ་དུས་བཟང་པོ་ལ་ཡི་གེ་དྲུག་པའི་ཉམས་ལེན་བྱེད་པ་པོ་རྣམས་ལ་ཕན་པའི་ཆེད་དུ་སྒྲུབ་ཐབས་གསོལ་འདེབས་(༣༩ན)
སྨོན་ལམ་དང་བཅས་པ་ཞིག་དགོས་ཞེས་བྱང་གླིང་བསམ་གྲུབ་རྒྱལ་པོས་བསྐུལ་བའི་ངོར། སློབ་དཔོན་ཆེན་པོ་ལྷན་སྐྱེས་རོལ་པའི་རྒྱ་གཞུང་གི་རྗེས་སུ་འབྲངས་ཏེ་ཟ་ཧོར་གྱི་བནྡེས་དགའ་ལྡན་ཕོ་བྲང་དུ་སྦྱར་བའི་ཡི་གེ་པ་ནི་འཇམ་དཔལ་ལོ། ། བསྐལ་པར་བསགས་པའི་བརྣག་དཀའ་ཉེས་ཚོགས་ཀུན། །བྱིན་རླབས་མཐོ་རིས་ཆུ་བོས་ཉེར་འཁྲུད་པའི། །གངྒའི་ཡབ་གཅིག་ཁྱབ་བདག་རྡོ་རྗེ་སེམས། །ཛ་ལནྡྷ་རར་རྟག་བཞུགས་དངོས་གྲུབ་སྩོལ། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །ཞེས་སོགས་ཚིགས་བཅད་གཅིག་པོ་གསུམ་མམ་བདུན། ཚིག་ཙམ་མིན་པར་སྐྱབས་འགྲོ་སེམས་བསྐྱེད་པ། །ཉམས་སུ་བླངས་རྗེས་དངོས་གཞི་འདི་ལྟར་རོ། །རང་གི་སྤྱི་བོར་པཾ་ལས་པདྨ་དཀར། །ཨ་ལས་ཆ་ཤས་གང་བའི་ཟླ་དཀྱིལ་གདན། །ཧཱུཾ་དཀར་ལས་གྲུབ་བཅོམ་ལྡན་རྡོ་རྗེ་སེམས། །ཞལ་གཅིག་ཕྱག་གཉིས་ཞི་ཞིང་འཛུམ་པའི་ཞལ། །གནག་སྣུམ་དབུ་སྐྲ་རལ་པའི་ཐོར་ཚུགས་ཅན། །ཕྱག་གཡས་རྡོ་རྗེ་རྩེ་ལྔ་ཐུགས་ཀར་འཛིན། །ཕྱག་གཡོན་དྲིལ་བུ་དཀུ་ལ་བརྟན་ནས་བསྣམས། །དབུ་རྒྱན་སྙན་རྒྱན་མགུལ་རྒྱན་གདུ་བུ་དང་། །དོ་ཤལ་དཔུང་རྒྱན་འོག་པག་སེ་མོ་དོ། །རིན་ཆེན་རྒྱན་མཛེས་སྲབ་འཇམ་ལྷ་རྫས་ལས། །ལེགས་གྲུབ་སྟོད་གཡོགས་པཉྩ་ལི་ཀའི་གོས། །ཞབས་གཉིས་སྐྱིལ་ཀྲུང་གནས་གསུམ་ཡི་གེས་མཚན། །འོད་འཕྲོས་ཡེ་ཤེས་དབང་ལྷ་ཉེར་བྱོན་ནས། །གཉིས་མེད་དབང་བསྐུར་མི་བསྐྱོད་དབུ་བརྒྱན་གྱུར། །ཐུགས་ཀར་ཟླ་སྟེང་ཧཱུཾ་ཡིག་དངུལ་ཆུའི་མདོག །མཐའ་སྐོར་ཡི་གེ་བརྒྱ་བའི་སྔགས་ཀྱིས་བསྐོར། །དེ་ལས་(༣༩བ)
བདུད་རྩིའི་ཆུ་རྒྱུན་ཞབས་གཡས་ཀྱི། །མཐེ་བོང་ནས་བབས་རང་གི་སྤྱི་བོར་བཞུགས། །སྡིག་སྒྲིབ་ཉེས་ལྟུང་དྲི་ཚོགས་ནད་གདོན་ཀུན། །རྣམ་པ་རྣག་ཁྲག་དུད་ཁུ་བཤང་གཅི་སོགས། །མི་གཙང་རྫས་ཀྱི་གཟུགས་ཅན་རྐང་མཐིལ་དང་། །འོག་གི་དབང་པོའི་སྒོ་གཉིས་ལམ་ནས་ཐོན། །ཤྭ་འོད་དྲག་པོའི་སྣེ་ཡིས་སྤུར་མ་བཞིན། །ཐོགས་མེད་དེད་པས་རང་ལུས་དངས་ཤེལ་ལྟར། །ཕྱི་ནང་གསལ་སྒྲིབ་མེད་པར་གྱུར་བསམ་ཞིང་། །རྩེ་གཅིག་ཏིང་འཛིན་ངང་ནས་སྔགས་འདི་ཡི་གེ་བརྒྱ་པ་བཟླ། །བདག་ནི་མི་ཤེས་ཉོན་མོངས་རྨོངས་ཆེན་གྱིས། །མི་བཟད་དཀར་མིན་ལས་ཀྱིས་རབ་མནར་བ། །མགོན་པོ་བཅོམ་ལྡན་རྡོ་རྗེ་སེམས་ཁྱོད་ཀྱིས། །བྱང་ཞིང་དག་པར་བྱིན་གྱིས་བརླབ་ཏུ་གསོལ། །རྩེ་གཅིག་གསོལ་བ་བཏབ་པས་དེ་དོན་ལྟར། རྣམ་སྨིན་ནག་པོའི་འབྲས་ཀུན་རབ་དག་པར། །གྱུར་ཞེས་ཞལ་གྱིས་བཞེས་ནས་འོད་ཕུང་དུ། །མངོན་པར་ཞུ་སྟེ་རང་དང་གཉིས་མེད་གྱུར། །དགེ་བ་འདི་ཡིས་བདག་སོགས་འགྲོ་བ་ཀུན། ཁྱབ་བདག་རྡོ་རྗེ་སེམས་དཔས་རྗེས་བཟུང་སྟེ། །སྒྲིབ་གཉིས་དེ་རྒྱུ་བཅས་པ་དྲུངས་ཕྱུང་ནས། །ཚེ་འདིར་སྐུ་གསུམ་གོ་འཕང་ཐོབ་གྱུར་ཅིག །ཅེས་རྡོ་རྗེ་སེམས་དཔའི་སྒོམ་བཟླས་ཀྱི་ཉམས་ལེན་ཁྱེར་བདེ་བ་འདི་ནི་ཨེར་ཏི་ན་དཱ་ལས་ཧོང་ཐའི་ཇིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་པ་འཇམ་དབྱངས་སོ། ། ཕྱག་ན་པད་དཀར་འཆང་བས་མངོན་སུམ་དུ། །རྗེས་བཟུང་གྲུབ་བརྙེས་དཔལ་ལྡན་དཔལ་མོའི་ཞབས། །རྣལ་འབྱོར་དབང་པོའི་ཕྱག་བཞེས་ཇི་བཞིན་དུ། །སྨྱུང་བར་གནས་པའི་ཕྱག་ལེན་ཟུར་རྒྱན་འདི། །དེའང་ཐུགས་རྗེ་ཆེན་པོ་(༤༠ན)
སྤྱན་རས་གཟིགས་ཀྱིས་མངོན་སུམ་དུ་རྗེས་སུ་བཟུང་བའི་དགེ་སློང་མ་དཔལ་མོ་ནས་ཉེ་བར་བརྒྱུད་པའི་སྨྱུང་བར་གནས་པའི་རིམ་པ་འདི་ཉིད་རྒྱ་བོད་ཀུན་ཏུ་གྲགས་ཆེ་ཞིང་། ཁྱད་པར་བོད་ཡུལ་འདིར་མཁས་གྲུབ་མང་པོས་ཐུགས་ཉམས་སུ་བསྟར་བའི་ཕྱག་ལེན་གྱི་རྒྱུན་མ་ཉམས་པ་གཉགས་དབོན་རིན་ཆེ་བསོད་ནམས་བཟང་པོ་སོགས་མཁས་པས་མཛད་པའི་ཁུངས་ཐུབ་ཀྱི་ཡིག་ཆ་མང་ནའང་། དུས་ཀྱི་དབང་གིས་གོང་མའི་གསུང་རབ་རྣམས་ལ་ཐོས་བསམ་བྱེད་པ་ཆེས་ཉུང་ཞིང་། སྨྱུང་གནས་རས་པར་གྲགས་པ་སོགས་མདོ་རྒྱུད་ཀྱི་གསུང་རབ་གང་ལའང་མ་སྦྱངས་པའི་བླུན་པོ་སྙིང་ཁམས་ཅན་མང་པོས་རྙེད་བཀུར་ཙམ་གྱི་ཆེད་དུ་སྤེལ་བའི་ལོག་ཆོས་མ་དག་པའི་རྒྱུན་ལ་སྨྱུང་གནས་ལེན་པའི་ཚེ་ཐེག་པ་ཆེན་པོའི་གསོ་སྦྱོང་ལེན་དགོས་པའི་དེའི་ཚིག་ལ་སང་ཉི་མ་མ་ཤར་གྱི་བར་དུ་ཞེས་པའི་བརྗོད་བྱ་དང་། དེང་ནས་སྲོག་གཅོད་མི་བྱ་ཞིང་ཞེས་སོགས་ཀྱི་སྤང་བྱ་བསྙེན་གནས་དང་ཆ་མཐུན་ཡོད་པས་དེ་ལ་འཁྲུལ་ནས་སྨྱུང་གནས་ཀྱི་ཉི་མ་བརྐྱང་བའི་སྐབས་བསྙེན་གནས་ཀྱི་སྡོམ་པ་འབོགས་ཞིང་། བསྙེན་གནས་ཀྱི་མིང་དུ་འདོགས་པ་སོགས་ནི་ཤིན་ཏུ་མི་རིགས་ཏེ། སྒྲ་བཤད་ཀྱི་དབང་དུ་བྱས་ན། བསྙེན་གནས་འདི་གང་ཟག་ཐ་མལ་པ། འདོད་པ་དང་ཉེས་པར་སྤྱོད་པ་གཉིས་ཀ་ལས་དབེན་པར་སྤྱོད་མི་ནུས་པ་དེ་དབེན་པ་གཉིས་ལ་སྦྱར་བའི་དོན་དུ་གསུངས་པ་ཡིན་ལ། འདིས་དགྲ་བཅོམ་པ་དང་ཉེ་བར་གནས་པར་བྱེད་པའི་ཕྱིར་རམ། ཇི་སྲིད་འཚོ་བའི་སྡོམ་པ་དང་ཉེ་བར་གནས་པར་བྱ་བའི་ཕྱིར་བསྙེན་གནས་ཞེས་བཤད་ལ། སྨྱུང་གནས་ནི་ཁུག་པའི་སྐབས་ཟས་སུ་མ་ཟད་མཆིལ་མ་ཙམ་ཡང་མི་མིད་པས་སྨྱུང་བ་ནི་ལྟོགས་པའི་དོན་ཡིན་པས་ཕྱོགས་མི་(༤༠བ)
མཚུངས་པར་མ་ཟད། བསྙེན་གནས་ནི་སོ་སོ་ཐར་པ་རིགས་བརྒྱད་ཀྱི་ནང་ཚན་ཁྱིམ་པའི་ཕྱོགས་ཀྱི་སྡོམ་པ་གཅིག་ཡིན་པས་བྱང་ཆུབ་ཏུ་སེམས་བསྐྱེད་པ་ལ་མ་བལྟོས་པའི་ངེས་འབྱུང་གི་བསམ་པ་ཙམ་ལ་བརྟེན་ནས་སྡོམ་པ་ཐོབ་ཅིང་། དེའི་ཉིན་སྤང་བྱ་བརྒྱད་པོ་སྤོང་བ་ལས་གཞན་པའི་ཁ་ཏོན་དགེ་སྦྱོར་སོགས་རང་བློ་དང་འཚམ་པར་བྱེད་པ་ལས་འདི་བྱེད་ཀྱི་པར་བཀབ་དང་ཁྱད་པར་གསང་སྔགས་ཀྱི་ཆོ་ག་བཟླས་བརྗོད་སོགས་བྱེད་པའི་བཤད་ཚོད་མེད་ལ། སྨྱུང་གནས་ཀྱི་གསོ་སྦྱོང་ནི་ཐེག་པ་ཆེན་པོའི་ལུགས་ཡིན་པས་སེམས་བསྐྱེད་དགོས་ཤིང་། བརྐྱང་ཁུག་གཉིས་ཀ་ལ་སྤྱན་རས་གཟིགས་ཀྱི་ཆོ་ག་བདག་མདུན་གཉིས་ཀ་ཚར་གསུམ་རེ་གཏོང་དགོས་པ་ཚད་ཐུབ་ཡིག་ཆ་རྣམས་ལས་བཤད་ཅིང་ཕྱག་ལེན་ལ་ཡོད་པས་སོ། །ཐེག་པ་ཆེ་ཆུང་མདོ་སྔགས་ཀྱི་དབྱེ་བས་ཕྱེད་པའི་ཚུལ་བདག་ལ་རྣམ་པ་གཅིག་ཏུ་ཞིབ་མོར་དཔྱད་དེ་དགག་བཞག་གི་གནས་ཡིན་ནའང་། སྨྱུང་གནས་རས་པ་འགྲོ་བ་རིགས་དྲུག་གི་སྡུག་བསྔལ་འཆད་པའི་སྐབས་སུ་ལ་ཕུག་སེམས་ལྡན་གྱི་ཁྲོད་དུ་བྱས་ཏེ་སྨྲ་བ་པོ་ཡིན་འདུག་པས་ལེགས་ཉེས་རྟོག་དཔྱོད་བྱ་བའི་ཡུལ་ལས་འདས་པའི་ཕྱིར་བཏང་སྙོམས་སུ་བཞག་སྟེ། དངོས་དོན་གྱི་ཕྱག་ལེན་སྨྱུང་བར་གནས་པར་འདོད་པ་རྣམས་རབ་བཅུ་གཅིག་ཞལ་གྱི་དབང་། འབྲིང་ལུགས་སྲོལ་འདི་ཀའི་རྗེས་གནང་རྒྱས་པ། ཐ་མའང་བཅུ་གཅིག་ཞལ་གྱི་རྗེས་གནང་གང་རིགས་ནོས་པར་བྱས་ནས་རབ་ས་ག་ཟླ་བ། དེ་མིན་ཟླ་བ་གང་ཡང་རུང་བའི་ཡར་ངོ་མར་ངོའི་ཚེས་བཅུ་བཞིའི་ནམ་གསེང་སྔ་བར་བཅུ་གཅིག་ཞལ་གྱི་བྲིས་འབུར་གྱི་སྐུ་དང་མཆོད་པ་གྱ་ནོམས་པ་བཤམས་པའི་དྲུང་དུ། སློབ་དཔོན་རང་ཉིད་ཁྲུས་དང་གཙང་སྦྲ་སྔོན་དུ་འགྲོ་བས་(༤༡ན)
སྐྱབས་འགྲོ་སེམས་བསྐྱེད་རྒྱས་བསྡུས་གང་ཡང་རུང་བ་སྤྱི་འགྲོ་ལྟར་བྱས་ཏེ། ཐེག་པ་ཆེན་པོའི་གསོ་སྦྱོང་གི་ཆོ་ག་ཚར་གསུམ་བརྗོད་ནས་གསོ་སྦྱོང་བླངས། །དེང་ནས་སྲོག་གཅོད་མི་བྱ་ཞིང་ཞེས་སོགས་ཚར་གཅིག་དང་ཚུལ་ཁྲིམས་རྣམ་པར་དག་པའི་གཟུངས་ཉེར་གཅིག་བརྗོད། དེ་ནས་སློབ་དཔོན་སྟན་མཐོ་བ་ལ་འཁོད། སློབ་མ་རྣམས་ཀྱིས་སློབ་དཔོན་ལ་ཕྱག་གསུམ་བཙལ་ནས་མདུན་དུ་འཁོད། སྔོན་འགྲོའི་ཕན་ཡོན་དང་བརྡ་སྤྲོད་རྒྱས་བསྡུས་སྐབས་དང་སྦྱར་ནས་སློབ་དཔོན་རང་ཉིད་ཀྱིས་ཇི་ལྟར་བླངས་པ་བཞིན་སློབ་མ་རྣམས་རྗེས་ཟློས་བྱེད་དུ་འཇུག །ཉིན་ཕྱི་མའི་ཞོགས་སློབ་མ་རང་གིས་རྟེན་གྱི་དྲུང་དུ་ལེན་ཞིང་། རྗེས་སུ་སློབ་དཔོན་ལ་མ་བལྟོས་པར་རང་གིས་བརྐྱང་ཁུག་གཉིས་ཀ་རྟེན་གྱི་དྲུང་དུ་ལེན་ནོ། །བདག་མདུན་གྱི་ཆོ་ག་དང་མིད་པ་རྒྱུན་གཅོད་སོགས་བྱེད་ཚུལ་གྱི་ཕྱག་ལེན་ཞིབ་ཆ་མཐའ་དག་གཉགས་དབོན་རིན་པོ་ཆེ་དང་ཐམས་ཅད་མཁྱེན་པ་དགེ་འདུན་རྒྱ་མཚོ་སོགས་མཁས་པ་རྣམས་ཀྱི་གསུང་རབ་ལས་ཤེས་པར་བྱའོ། །སྨྱུང་བར་གནས་པའི་ཕྱག་ལེན་ལ་ཉེ་བར་མཁོ་བའི་ཟུར་རྒྱན་འདི་ནི་ཤེས་བྱ་རིག་པའི་གནས་སྤྱི་དང་ཁྱད་པར་སྔ་འགྱུར་བཀའ་གཏེར་གྱི་ཚུལ་ལ་མཁས་ཤིང་གྲུབ་པ་བརྙེས་པའི་རིགས་འཛིན་ཆེན་པོ་ཉང་བློ་མཆོག་རིག་པའི་རྡོ་རྗེའི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། ། ཕྱག་ན་པད་དཀར་འཛིན་པས་རྗེས་བཟུང་བའི། །གྲུབ་དབང་དཔལ་མོའི་བཞེད་གཞུང་ལས་འོངས་པ། །སྨྱུང་བར་གནས་པའི་ཆོ་གའི་གཞུང་དངོས་ལས། །ཉུང་ངུ་དང་པོའི་ལས་ཅན་དོན་དུ་སྤེལ། དེའང་དཀྱིལ་འཁོར། རྟེན། བུམ་པ་སོགས་མཐོང་བརྒྱུད་ཀྱི་(༤༡བ)
ཕྱག་ལེན་ལྟར་མངོན་པར་འདུ་བྱས། ཉམས་ལེན་དངོས་ལ་སྦྱོར་དངོས་མཇུག་གསུམ་ལས། དང་པོ་ནི་ཕྱག་རྒྱ་བཅས་ཏེ། ཨོཾ་པདྨ་ཨུ་ད་བྷ་ཝ་ཡ་སྭཱ་ཧཱ། ཞེས་བརྗོད་ཁྲུས་བྱ། གསོ་སྦྱོང་བླང་བ་ནི། བླ་མའི་དྲུང་དུ་ལེན་ན་དེས་ཁྱབ་ཅིང་། རྟེན་གྱི་དྲུང་དུ་ལེན་ཚེ་བླ་མ་ཐུགས་རྗེ་ཆེན་པོ་ལ་རྒྱལ་བ་སྲས་བཅས་ཀྱིས་བསྐོར་བར་ལེན་པའི་མོས་པས་ཕྱག་བཙལ། མཎྜལ་འབུལ། གསོ་སྦྱོང་གི་ཆོ་ག་རང་གི་བློའམ། ཐ་ནའང་གྲོགས་ཤིག་གི་ལད་མོ་བྱས་ཏེ་ལེན་དགོས་པས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟ་ཅང་ཤེས་ལྟ་བུ། གླང་པོ་ཆེན་པོ། བྱ་བ་བྱས་ཤིང་བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་བཀའ། ལེགས་པར་རྣམ་པར་གྲོལ་བའི་ཐུགས། ལགས་པར་རྣམ་པར་གྲོལ་བའི་ཤེས་རབ་ཅན་དེ་དག་གིས་སེམས་ཅན་ཐམས་ཅད་ཀྱི་དོན་གྱི་ཕྱིར་དང་། ཕན་པར་བྱ་བའི་ཕྱིར་དང་། གྲོལ་བར་བྱ་བའི་ཕྱིར་དང་། མུ་གེ་མེད་པར་བྱ་བའི་ཕྱིར་དང་། ནད་མེད་པར་བྱ་བའི་ཕྱིར་དང་། བྱང་ཆུབ་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ངེས་པར་རྟོགས་པར་བྱ་བའི་ཕྱིར་གསོ་སྦྱོང་ཡང་དག་པར་མཛད་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་སང་ཉི་མ་མ་ཤར་གྱི་བར་དུ་གསོ་སྦྱོང་ཡང་དག་པར་བླང་བར་བགྱིའོ། །ཞེས་ལན་གསུམ་དང་། དེང་ནས་སྲོག་གཅོད་མི་བྱ་ཞིང་། གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་སྤྱད་ཅིང་། །རྫུན་གྱི་ཚིག་ཀྱང་མི་སྨྲའོ། །སྐྱོན་(༤༢ན)
ནི་མང་པོ་ཉེར་བརྟེན་པའི། །ཆང་ནི་ཡོངས་སུ་སྤང་བར་བྱ། ཁྲི་སྟན་ཆེ་མཐོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་རྒྱན་དང་ནི། །གར་དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི་སྲོག་གཅོད་ལ་སོགས་མི་བྱེད་ལྟར། །དེ་བཞིན་སྲོག་གཅོད་ལ་སོགས་སྤང་། །བླ་མེད་བྱང་ཆུབ་མྱུར་ཐོབ་ཤོག །སྡུག་བསྔལ་མང་འཁྲུག་འཇིག་རྟེན་འདི། །སྲིད་པའི་མཚོ་ལས་སྒྲོལ་བར་ཤོག །ཅེས་ལན་གཅིག་བརྗོད་ལ། ཨོཾ་ཨ་མོ་གྷ་ཤཱི་ལ་སཾ་བྷ་ར་བྷ་ར་བྷ་ར། མཧཱ་ཤུདྡྷོ་སཏྭ། པདྨ་བི་བྷཱ་ཥི་ཏ་བྷུ་ཛ། དྷ་ར་དྷ་ར། ས་མནྟ་ཨ་ཝ་ལོ་ཀི་ཏེ་ཧཱུཾ་ཕཊ། ཅེས་ཚུལ་ཁྲིམས་རྣམ་དག་གི་སྔགས་ཉེར་གཅིག་བཟླའོ། །དེ་ནས་མཆོད་པ་རྣམས། ཨོཾ་སརྦ་བིད་པཱུ་ར་པཱུ་ར། སཱུ་ར་སཱུ་ར། ཨ་ཝརྟ་ཡ་ཨ་ཝརྟ་ཡ་ཧོ། །བཛྲ་སྥ་ར་ཎ་ཁཾ། ལན་གསུམ་གྱིས་མཆོད་པ་རྣམས་བྱིན་གྱིས་བརླབ། སྐྱབས་འགྲོ་སེམས་བསྐྱེད་ནི། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ་བརྗོད། ཚོགས་ཞིང་ནི། རང་ཐུགས་རྗེ་ཆེན་པོར་གསལ་བའི་ཐུགས་ཀའི་འོད་ཟེར་གྱིས་ཚོགས་ཞིང་ཐམས་ཅད་བཛྲ་ས་མཱ་ཛཿས་སྤྱན་དྲངས། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཕྱིར་བསྔོའོ། །བདག་གིས་ཚེ་རབས་སྔོན་ནས་ད་ལྟའི་བར། །བསགས་པའི་སྡིག་པ་མི་དགེའི་ཚོགས་རྣམས་ཀུན། །འགྱོད་སྡོམ་(༤༢བ)
སེམས་ཀྱིས་སྙིང་ནས་བཤགས་བགྱིད་ན། །སྟོབས་བཞིའི་མཐུ་ཡིས་བྱང་ཞིང་དག་གྱུར་ཅིག །ཅེས་བརྗོད། བདག་བསྐྱེད་ནི། ཨོཾ་སྭ་བྷཱ་ཝ་ཤུདྡྷྭཿ སརྦྦ་དྷརྨཱཿསྭ་བྷཱ་ཝཱ་ཤུདྡྷ྅ཧཾ། ཆོས་ཐམས་ཅད་སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཧྲཱིཿདཀར་པོ་ཡོངས་སུ་གྱུར་པ་ལས། རང་ཉིད་ཐུགས་རྗེ་ཆེན་པོ་བཅུ་གཅིག་ཞལ་རྩ་ཞལ་དཀར། གཡས་ལྗང་། གཡོན་དམར། དེའི་སྟེང་མ་དབུས་ལྗང་། གཡས་དམར། གཡོན་དཀར། དེའི་སྟེང་མ་དབུས་དམར། གཡས་དཀར། གཡོན་ལྗང་། དེའི་སྟེང་ན་ཁྲོ་ཞལ་ནག་པོ། །དེའི་སྟེང་ན་ཞི་ཞལ་དམར་པོ་གཙུག་ཏོར་ཅན། ཕྱག་དང་པོ་གཉིས་ཐལ་མོ་སྦྱར་བ། གཉིས་པ་གཉིས་ཕྲེང་བ་དང་པདྨ། གསུམ་པ་གཉིས་མཆོག་སྦྱིན་དང་སྤྱི་བླུགས། བཞི་པ་གཉིས་འཁོར་ལོ་དང་མདའ་གཞུ་འཛིན་པ། ཕྱག་ལྷག་མ་དགུ་བརྒྱ་དང་དགུ་བཅུ་རྩ་གཉིས་ཐམས་ཅད་མཆོག་སྦྱིན་མཛད་པའི་མཐིལ་ན་སྤྱན་རེ་ཡོད་པ། ཞབས་གཉིས་མཉམ་པའི་སྟབས་ཀྱིས་བཞེངས་པ། དར་རས་ཀྱི་ན་བཟའ་དང་རིན་པོ་ཆེའི་རྒྱན་གྱིས་བརྒྱན་པ། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་བཛྲ་ས་མཱ་ཛཿ། ཛཿཧཱུཾ་བཾ་ཧོཿ སླར་ཡང་ཐུགས་ཀའི་ས་བོན་ལས་འོད་འཕྲོས་རིགས་ལྔ་འཁོར་བཅས་བཛྲ་ས་མཱ་ཛཿ། ཁྱེད་རྣམས་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། བུམ་པའི་ཆུས་དབང་བསྐུར། ལུས་གང་དྲི་མ་དག །ཆུའི་ལྷག་མ་སྤྱི་གཙུག་ཏུ་འཁྱིལ་བ་ལས་རྒྱལ་བ་རིགས་ལྔས་དབུ་བརྒྱན་པར་གྱུར། རང་གི་ཐུགས་ཀར་ཟླ་(༤༣ན)
བའི་སྟེང་དུ་ཡེ་ཤེས་སེམས་དཔའ་དཀར་པོ་ཞལ་གཅིག །ཕྱག་གཉིས་པ། དེའི་ཐུགས་ཀར་ཟླ་གདན་ལ་ཏིང་ངེ་འཛིན་སེམས་དཔའ་ཧྲཱིཿདཀར་པོ། །དེའི་མཐའ་ཡི་གེ་དྲུག་པས་བསྐོར་བར་བསམས་ལ་བཟླས་པ་བྱའོ། །མདུན་བསྐྱེད་ནི། ཨོཾ་སྭ་བྷཱ་ཝ་ཤུདྡྷཱཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་རང་གི་ཐུགས་ཀའི་ས་བོན་ལས་མདུན་དུ་བྷྲཱུཾ་དཀར་པོ་ཞིག་འཕྲོས། དེ་ཡོངས་སུ་གྱུར་པ་ལས་རིན་པོ་ཆེའི་གཞལ་ཡས་ཁང་མཚན་ཉིད་ཐམས་ཅད་དང་ལྡན་པའི་དབུས་སུ་རིན་པོ་ཆེའི་ཁྲིའི་སྟེང་དུ་པད་ཟླའི་གདན་ལ། ཧྲཱི༔དཀར་པོ་ཡོངས་སུ་གྱུར་པ་ལས་ཐུགས་རྗེ་ཆེན་པོ་ཞེས་པ་ནས་བཟུང་སྟེ་རིན་པོ་ཆེའི་རྒྱན་གྱིས་བརྒྱན་པའི་བར་གོང་བཞིན་བརྗོད། ཤར་དུ་ཧཱུཾ་ལས་མི་བསྐྱོད་པ། ལྷོར་ཏྲཾ་ལས་རིན་འབྱུང་། ནུབ་ཏུ་ཨོཾ་ལས་རྣམ་སྣང་། བྱང་དུ་ཨཱཿལས་དོན་གྲུབ་རྣམས་རང་རང་གི་སྐུ་མདོག་དང་ཕྱག་རྒྱ་ཅན། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས། ཞེས་པ་ནས་རྒྱལ་བ་རིགས་ལྔས་དབུ་བརྒྱན་ཞེས་པའི་བར་ལས་བདག་ལ་ཞེས་པ་འདི་ལ་ཞེས་ལབ་འདོན་པ་བསྒྱུར་བ་མ་གཏོགས་གོང་བཞིན་བརྗོད། ཨོཾ་སརྦ་ཏ་ཐཱ་ག་ཏ་ལོ་ཀ་ཤྭ་ར་ས་པ་རི་ཝཱ་ར་ཨརྒྷཾ། པཱ་དྱཾ། པུབེ། དྷཱུ་པེ། ཨཱ་ལོ་ཀེ །གནྡྷེ། ནཻ་ཝི་དྱེ། ཤབྡ་པྲ་ཏཱིཙྪ་ཧཱུཾ་སྭཱ་ཧཱ། སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱིས་དབུ་ལ་བརྒྱན། །ཐུགས་རྗེའི་སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ་ཕྱག་འཚལ་ལོ། །བདག་མདུན་གཉིས་ཀའི་ཕྱག་མཛུབ་ལས་བདུད་རྩིའི་རྒྱུན་བབས་བུམ་པ་ཡེ་ཤེས་ཀྱི་ཆུས་གང་བར་གྱུར་བར་བསམས་ལ་ཡིག་དྲུག་ཅི་ནུས་བཟླ། མཇུག་ཆོག་ལ། འཕགས་མཆོག་ཐུགས་རྗེའི་ཕྱག་རྐྱང་བདག་སོགས་རྣམས། །(༤༣བ)
ཕྱི་མ་བདེ་བ་ཅན་གྱི་ཞིང་སྐྱེས་ནས། །ཚེ་རབས་ཀུན་ཏུ་དགེ་བའི་བཤེས་མཛོད་ལ། །མྱུར་དུ་སངས་རྒྱས་ཐོབ་པར་བྱིན་གྱིས་རློབས། །ཞེས་གསོལ་བ་དྲག་ཏུ་གདབ། །གཏོར་མ་ཨོཾ་ཨཱཿཧཱུཾ་གིས་བྱིན་གྱིས་བརླབས། ཨཱཪྻ་ལོ་ཀེ་ཤྭ་ར་ས་པ་རི་ཝཱ་ར་བ་ལིཾ་པྲ་ཏཱིཙྪ་ཡེ་སྭཱཧཱ། ཞེས་གསུམ་གྱི་འཕགས་པ་ལ་འབུལ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུ་ཏྤནྣ་ཏྭཱ་ཏ། ཨོཾ་ཨཱཿཧཱུཾ་ཕཊ་སྭཱཧཱ། ལན་གསུམ་གྱིས་ཆོས་སྐྱོང་དང་གཞི་བདག་ལ་འབུལ། མེ་ལོང་ལ་ལྷའི་གཟུགས་བརྙན་ཤར་བར་བུམ་པའི་ཆུས། འགྲོ་བའི་སྒྲོན་མེ་སྤྱན་རས་གཟིགས་མགོན་ལ། །དྲི་ཞིམ་བདུད་རྩིའི་རྒྱུན་གྱིས་ཁྲུས་གསོལ་བས། །འགྲོ་བའི་སྒྲིབ་གཉིས་དྲི་མ་ཀུན་བསལ་ནས། །དྲི་བྲལ་སྐུ་གསུམ་བརྙེས་པའི་བཀྲ་ཤིས་ཤོག །ཅེས་ཁྲུས་གསོལ། ཨོཾ་བཛྲ་ས་ཏྭ་ཧཱུཾ་བདག་གིས་ཉེས་པ་བགྱིས་པ་མཐའ་དག་ཐུགས་རྗེ་ཆེན་པོ་ཁྱེད་ལ་བཟོད་པར་གསོལ་གྱི་བདག་ལ་སྒྲིབ་པར་མི་འགྱུར་བ་མཛད་དུ་གསོལ། ཨོཾ་མ་ཎི་པདྨེ་ཧཱུཾ། ཞེས་བརྗོད་པས་འཕགས་པ་མདུན་གྱི་ནམ་མཁར་བྱོན་ནས་ཁྲུས་གསོལ་བས་སྒྲིབ་གཉིས་དག་པར་བསམས་ལ། བུམ་ཆུ་འཐུང་། ཉལ་བའི་དུས་རང་ལྷར་གསལ་བའི་དམ་ཚིག་སེམས་དཔའ་ཡེ་ཤེས་སེམས་དཔར་ཐིམ། དེ་ཉིད་དེ་འཛིན་སེམས་དཔར་ཐིམ། དེ་ཡང་མི་དམིགས་པར་བསམས་ཏེ་ཉལ་ལོ། །བརྐྱང་ཁུག་གི་དམིགས་བསལ་དང་ལག་ལེན་རྣམས་ཡིག་ཆ་གཞན་དག་དང་མཐོང་བརྒྱུད་ཀྱི་ལག་ལེན་ལྟར་བྱ། ཚེས་བཅུ་དྲུག་གི་སྐྱ་རེངས་ཤར་ནས་རྗེས་ཆོག་ལ་གསོ་སྦྱོང་བཞག་པའི་ཆོ་ག་ཚར་གཅིག་བཏང་། དེ་ནས་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་པས་ཡེ་ཤེས་པ་མདུན་གྱི་རྟེན་ལ་བརྟན་པར་བཞུགས་སུ་གསོལ། བཛྲ་མུཿ ཚོམ་བུའི་ལྷ་རྣམས་རང་གནས་སུ་གཤེགས། ཉིན་མོ་(༤༤ན)
བདེ་ལེགས་མཚན་བདེ་ལེགས། །ཉི་མའི་གུང་ཡང་བདེ་ལེགས་ཤིང་། །ཉིན་མཚན་རྟག་ཏུ་བདེ་ལེགས་པའི། །དཀོན་མཆོག་གསུམ་གྱི་བཀྲ་ཤིས་ཤོག །ཅེས་ཤིས་པ་བརྗོད་པར་བྱའོ། །སྙིང་ནས་མོས་ཀྱང་འཇིག་རྟེན་བྱ་བས་གཡེང་། །མང་ཚིག་ཁུར་གྱིས་འཇིགས་ལ་བདུད་རྩི་ཡི། །རྒྱ་མཚོའི་གཟེགས་མ་ཙམ་གྱི་བཅུད་འདིས་ཀྱང་། །གཏན་བདེའི་འཆི་མེད་བསྒྲུབ་པ་ཨེ་མ་མཚར། །ཞེས་སྟོབས་ཀྱི་དཔུང་པས་སའི་དཀྱིལ་འཁོར་ཀུན་ལ་དབང་སྒྱུར་བའི་བསྟན་འཛིན་དཱ་ཡན་རྒྱལ་པོས་སྨྱུང་བར་གནས་པ་ལ་ཉེ་བར་མཁོ་བའི་ཡི་གེ་ཤིན་ཏུ་ཁྱེར་བདེ་བ་འདི་ལྟ་བུ་ཞིག་དགོས་ཞེས་བསྐུལ་བ་ལ་བརྟེན་ནས་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། ། ལྷག་བསམ་སྟོན་ཟླ་ལྟ་བུར་ཆེས་དཀར་བས། །ལུས་ཅན་ཕན་བདེའི་ས་མོས་བཞད་བྱེད་པ། །ཕྱག་ན་པད་དཀར་འཆང་བའི་ཐུགས་རྗེ་ཡིས། །ལྔ་བརྒྱའི་ལུས་ཅན་མ་ལུས་རྗེས་འཛིན་མཛོད། །དེ་ཡང་ཐུགས་རྗེ་ཆེན་པོ་སྤྱན་རས་གཟིགས་ཀྱི་སྐོར་ལ་དཔལ་མོ་ལུགས། ཚེམ་བུ་ལུགས། སྐྱེར་སྐང་ལུགས། ཁྲོ་ལོ་ལུགས། དོན་ཞགས་སོགས་ཟུར་བཀའི་སྨོན་གྲོལ་རིག་གཏད་རྗེས་གནང་སོགས་དང་། བརྒྱ་རྩ་ཆེ་འབྲིང་ཆུང་གསུམ། དཔལ་སྣར་ཐར་པའི་མངོན་རྟོགས་བརྒྱ་རྩར་གྲགས་པ་སོགས་སྤྱི་བཀའི་རིགས་ལས་བྱུང་བ་དང་། གཞན་ཡང་གསར་མ་རྒྱུད་འབུམ་དུ་བཞུགས་པའི་ཐུགས་རྗེ་ཆེན་པོའི་རྒྱུད་དང་། ཟ་མ་ཏོག་བཀོད་པའི་མདོ་སོགས་ལས་ཀྱང་རིལ་བུ་བསྒྲུབ་ཚུལ་གྱི་ཁ་གསལ་མ་བྱུང་ཞིང་། སྔགས་གསར་མའི་ཐུགས་རྗེ་ཆེན་པོའི་དཀྱིལ་འཁོར་དང་འབྲེལ་བའམ་མིན་ཀྱང་བདག་མདུན་གྱི་(༤༤བ)
མངོན་པར་རྟོགས་པ་བཟླས་བརྗོད་སོགས་ལ་བརྟེན་པའི་ཆོ་ག་ལ་གསང་སྔགས་རྙིང་མ་ནས་བཤད་པའི་སྐྱེ་བདུན་སྒྲུབ་ཆེན་གྱིས་རྒྱས་འགེབས་པ་ནི། རྒྱུད་བླ་མ་ལས། གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པ། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་འཁྲུག །ཐུབ་ཚུལ་བཤིག་ཕྱིར་དེ་ཡང་དམ་ཆོས་ལ་ནི་གནོད་པ་བྱེད་པར་འགྱུར། །ཞེས་དང་། སྡོམ་པ་ཉི་ཤུ་པར། དམ་ཆོས་འདྲར་སྣང་སྟོན་པ་དང་། ཞེས་པ་ལྟར་ཧ་ཅང་བློས་བྱས་ཀྱི་རང་བཟོ་དམ་པའི་ཆོས་ལ་དབང་ཟ་བའི་ཉེས་པ་ཆེན་པོར་མཐོང་བས་སྙིང་ཁམ་གྱི་འདྲི་བར་མ་ནུས་ལ། འོན་ཀྱང་དེང་སང་སྟོད་སྨད་ཀུན་ཏུ་རིལ་སྒྲུབ་དར་སོ་ཆེ་བར་འདུག་པ་བཤད་ཁུངས་དང་ཆོས་རྒྱུན་གྱི་རྣམ་དབྱེ་མེད་པར་གཞན་གྱི་ལད་མོ་ལྷུར་བླངས་པའི་ལག་ལེན་འདྲ་མཐོང་ཚོར་ནི། བྱིན་རླབས་རྟེན་གྱི་ཕབས་རྒྱུན་ཅི་འབྱོར་དང་བག་ཕྱེ་བསྲེས་པའི་རིལ་བུ་བསྒྲིལ་བར་མཚལ་གྱི་ན་བཟའ་གསོལ། གཤེར་ཐག་ཆོད་ནས་རིན་པོ་ཆེའི་བུམ་པའི་ནང་དུ་བླུག །སྟེགས་སོགས་བཀོད་པས་མཛེས་པར་བྱས་པའི་སྟེང་དུ་བཀང་། ཅི་འབྱོར་པའི་མཆོད་པ་བཤམ། རང་ཉིད་མོས་པའི་ཐུགས་རྗེ་ཆེན་པོའི་བདག་བསྐྱེད་སྔོན་འགྲོ་བ་ཅན་གྱི་སྒོ་ནས་མདུན་གྱི་བུམ་པ་བསངས་སྦྱངས། བྷྲཱུཾ་ལས་བྱུང་བའི་ཕྱི་བུམ་པ་ལ་ནང་ལྷའི་གཞལ་ཡས་ཁང་གི་དབུས་སུ་རིལ་བུ་རྣམས་ཐུགས་རྗེ་ཆེན་པོ་ཆོ་ག་གསུམ་བསྐྱེད་ཀྱིས་དམ་ཚིག་པ་བསྐྱེད། ཡེ་ཤེས་པ་དགུག་ཅིང་དབང་བསྐུར་རྒྱས་གདབ་མཆོད་བསྟོད་རྣམས་བདག་བསྐྱེད་ལྟར་བྱ། རང་གི་ཐུགས་ཀ་ནས་འཕྲོས་པའི་འོད་ཟེར་གཟུངས་ཐག་ལ་འཁྲིལ་ཏེ་སོང་བས་བུམ་པའི་ལྷ་(༤༥ན)
རྣམས་ཀྱི་ཐུགས་རྒྱུད་བསྐུལ། དེ་དག་རྣམས་ཀྱི་ཐུགས་ཀ་ནས་འཕྲོས་པའི་འོད་ཟེར་གྱིས་རྒྱལ་བ་སྲས་བཅས་ཀྱི་བྱིན་རླབས་ནུས་མཐུ་རྣམས་བསྡུས་ཏེ་བུམ་ནང་གི་ལྷ་ཚོགས་ལ་ཐིམ་པར་མོས་པ་སོགས་སྤྲོ་བསྡུ་དང་བཅས་ནས་ཡི་གེ་དྲུག་པའི་བཟླས་བརྗོད་རྒྱུན་མི་ཆད་དང་། རིལ་སྒྲུབ་ཟིན་མཐར་ལྷ་ཚོགས་རྣམས་འོད་དུ་ཞུ་ནས་རིལ་བུའི་རྣམ་པར་གྱུར་པར་མོས་ཏེ་རང་གཞན་གྱིས་ལོངས་སྤྱོད་ཀྱི་འདུག་པ་གཞན་བློ་བྲིད་པའི་སྒྲུབ་ཐབས་མ་ཡིན་པའི་སེམས་བསྐྱེད་ཀྱིས་ཟིན་ན། སྡོམ་པ་ཉི་ཤུ་པར་སེམས་དགེ་བ་ལ་ཉེས་པ་མེད། །ཅེས་པ་ལྟར་དེ་ཙམ་བགྱིས་པ་ལ་རང་བཟོའི་ཉེས་སྒྲིབ་ཀྱིས་ཆེར་མི་སྤགས་སོ་སྙམ་མོ། །གསང་སྔགས་ཕྱི་འགྱུར་གྱི་ཐུགས་རྗེ་ཆེན་པོའི་ཚིག་ལ་བརྟེན་ནས་རིལ་བུ་སྒྲུབ་ཚུལ་རྒྱུད་རྒྱ་གཞུང་དང་སྔོན་བྱོན་གྱི་བླ་མ་ཚད་ཐུབ་རྣམས་ཀྱི་ཡིག་ཆ་མ་མཐོང་ཞིང་། སྔ་འགྱུར་ཕྱོགས་ཀྱི་རྒྱས་འགེབས་ཀྱང་ཞྭ་དཔེ་ལྷམ་འགེབས་ལྟ་བུའི་ཧ་ཅང་གུ་ཡངས་པར་སོང་དོགས་ཆོས་ལ་བརྟེན་པའི་རང་བཟོའི་སྡིག་པ་ལ་འཇིགས་ནས་མ་ནུས་མོད། འོན་ཀྱང་གཞུང་ལུགས་རབ་འབྱམས་སྨྲ་བ་ཆོས་རྗེ་དོན་གྲུབ་རྒྱ་མཚོའི་ངོ་མ་ཆོག་པར་ཟ་ཧོར་གྱི་བནྡེས་རང་གཞན་མང་པོའི་ལག་ལེན་མཐོང་ཚོར་སྐྱོར་ཟློས་ཀྱི་ཚུལ་དུ་སྦྱར་བའི་ཡི་གེ་པ་ནི་གནས་གསར་འཇམ་དབྱངས་སོ། ། བདེ་གཤེགས་ཀུན་གྱི་མཁྱེན་པའི་ཆ་ཤས་ཉ། །ཡོངས་གང་བློ་གྲོས་ག་བུར་ཟེར་འཕྲེང་གིས། །འགྲོ་ཀུན་མི་ཤེས་མུན་སེལ་འཇམ་པའི་དབྱངས། །རྣམ་དཔྱོད་ཀུནྡ་བཞད་པའི་གཉེན་དུ་མཛོད། །མགོན་ཁྱོད་རབ་དཀར་མཛེས་སྐུ་སྒྲུབ་པའི་ཐབས། །གསེར་གདུགས་ཅན་དང་ནོར་བུ་གླིང་པ་ཞེས། །འཕགས་ཡུལ་པཎ་ཆེན་ཉི་ཟླ་ཟུང་གི་ལུགས། །ཚད་ལྡན་(༤༥བ)
མཁས་པའི་ཚོགས་ལ་རླུང་ལྟར་གྲགས། །དེ་ཕྱིར་མ་ཏིའི་བཞེད་སྲོལ་ཀསྨི་རའི། །པཎ་ཆེན་ཤཱཀྱ་ཤྲཱིའི་གསུང་རྒྱུན་བཞིན། །ཆད་མེད་བརྒྱུད་ལྡན་དམ་པའི་བཞེད་པ་ལྟར། །ཡི་གེར་འགོད་ལ་ཤེས་ལྡན་རྣ་བ་ལྷོགས། །དེའང་པཎྜི་ཏ་ཆེན་པོ་མ་ཏིའི་ལུགས་ཀྱི་རྗེ་བཙུན་འཇམ་དབྱངས་དཀར་པོ་བསྒྲུབ་ཐབས་ཉམས་སུ་བླང་བ་ལ། སྐྱབས་སུ་འགྲོ་བ་སྔོན་དུ་བཏང་ནས། བདག་གིས་སེམས་ཅན་ཐམས་ཅད་ཀྱི་གཏི་མུག་གི་མུན་པ་བསལ་ནས་ཤེས་རབ་ཀྱི་སྣང་བ་ལ་འགོད། དེའི་ཆེད་དུ་འཕགས་པ་འཇམ་དཔལ་དབྱངས་དཀར་པོ་བསྒྲུབ་པར་བྱ་སྙམ་དུ་བྱང་ཆུབ་ཀྱི་སེམས་བསྐྱེད། རང་སྐད་གཅིག་གིས་རྗེ་བཙུན་འཇམ་དབྱངས་དཀར་པོར་གསལ་བའི་སྙིང་དབུས་སུ་འཁོར་ལོ་དཀར་པོ་རྩིབས་དྲུག་པའི་ལྟེ་བར་ཨ་དཀར་པོ་ལས་འོད་ཟེར་ལྕགས་ཀྱུ་ལྟ་བུ་འཕྲོས་རང་བཞིན་གྱི་གནས་ནས་རྗེ་བཙུན་འཇམ་དབྱངས་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿས་སྤྱན་དྲངས། ན་མ་ཨཱཪྻ་མཉྫུ་ཤྲཱི་ས་པ་རི་ཝཱ་ར་མཎྜ་ལ་བྷྱཿས་ཕྱག་བྱ། ཨཱཪྻ་མཉྫུ་ཤྲཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཡ་སྭཱཧཱ། ནས། ཤབྡ་ཨཱཿཧཱུཾ་གི་བར་གིས་མཆོད། གུར་ལས་བྱུང་བའི་རྒྱུན་བཤགས་ལན་གསུམ་བྱ། ཚད་མེད་པ་བཞི་བསྒོམ། སྭ་བྷ་ཝས་སྟོང་པར་སྦྱངས། སྟོང་པའི་ངང་ལས་བཾ་ལས་བདུད་རྩིའི་མའི་རྒྱ་མཚོ་དཀར་ཞིང་དངས་པ་མཐའ་ནེའུ་གསིང་གིས་ཁོ་ར་ཁོར་ཡུག་ཏུ་བསྐོར་བར་མཉེན་ལྕུག་འཁྲིལ་ལྡེམ་པདྨ་འཚལ་གྱིས་ཁྱབ་པ། གླང་པོ་ཆེ་ཐལ་ཀར་མཆེ་བ་དྲུག་ལྡན་དལ་གྱིས་རྒྱུ་ཞིང་པདྨའི་རྩ་བ་ཟ་བ། མཚོའི་སྟེང་ན་མེ་ཏོག་སྣ་ཚོགས་པ་བཀྲམ་པའི་སྟེང་ན་ཆུ་བྱ་སྐད་སྙན་པར་སྒྲོགས་པས་བརྒྱན་པ། དེའི་དབུས་སུ་པཾ་ལྗང་སེར་ལས་པདྨའི་སྡོང་པོ་ཡལ་འདབ་ལོ་མ་གསེར་ལས་བྱས་(༤༦ན)
པ། འདབ་མ་བརྒྱད་པ་གེ་སར་དམར་སེར་ལྟེ་བ་ལྗང་སེར་དུ་མཐོ་བའི་སྟེང་ན། ཨ་ལས་ཟླ་བའི་དཀྱིལ་འཁོར་ལ་ཡོངས་སུ་གང་བ། དེའི་དབུས་སུ་རང་གི་སེམས་ཉིད་ཨ་དཀར་པོ་གསལ་ཞིང་དྭངས་པ་དེ་ལས་དཔག་ཏུ་མེད་པའི་འོད་ཟེར་འཕྲོས། འཕགས་པ་རྣམས་མཆོད། སེམས་ཅན་ཐམས་ཅད་ཀྱི་གཏི་མུག་གི་སྒྲིབ་པ་སྦྱངས་ཤེས་རབ་ཀྱི་སྣང་བ་ལ་བཀོད། འོད་ཟེར་ཚུར་འདུས་ཡོངས་སུ་གྱུར་པ་ལས། བདག་ཉིད་འཕགས་པ་འཇམ་དཔལ། ནོར་བུ་ཆུ་ཤེལ་དྲི་མ་མེད་པ་ལྟར་དཀར་ཞིང་མཚན་དང་དཔེ་བྱད་འབར་བ། གཞོན་ནུ་བརྒྱད་གཉིས་བཅུ་དྲུག་ལོན་པའི་ན་ཚོད་ཅན། ཞལ་གཅིག་ཕྱག་གཉིས་པ། ཕྱག་གཡས་ལེགས་པར་བརྐྱང་པའི་མཆོག་སྦྱིན་གྱི་ཕྱག་རྒྱ་དང་། གཡོན་ཨུཏྤལི་ཡུ་བ་ཐུགས་ཀར་བཟུང་བའི་འདབ་མ་སྙན་གྱི་ཐད་ཀར་ཁ་བྱེ་བའི་སྟེང་ན་སྟོང་ཕྲག་བརྒྱ་པའི་གླེགས་བམ་འཛིན་པ། རལ་པའི་ཟུར་ཕུད་ལྔ་དང་ལྡན་ཞིང་ཐོར་ཚུགས་ཀྱི་རྩེ་མོར་རིན་པོ་ཆེའི་ཏོག་དང་། སྙན་གོང་ན་དྲི་ངད་ཕུན་སུམ་ཚོགས་པའི་ཨུཏྤལ་དར་དཔྱངས་གཡོ་བ་དང་བཅས་པ་རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། དཔུང་རྒྱན། ཕྱག་གདུབ། ཞབས་གདུབ། སྐ་རགས། དོ་ཤལ་གྱིས་མཛེས་པར་བརྒྱན་པ། དར་སྣ་ཚོགས་ཀྱི་སྟོད་གཡོགས་དང་སྨད་གཡོགས་ཀླུབས་པ། ཞབས་རྡོ་རྗེ་སྐྱིལ་མོ་ཀྲུང་གིས་བཞུགས་པ། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ་གི་མཚན་པ། ཐུགས་ཀའི་འཁོར་ལོ་དཀར་པོའི་ལྟེ་བའི་ཨ་ལས་འོད་ཟེར་འཕྲོས་པས་རང་བཞིན་གྱི་གནས་ནས། འཕགས་པ་འཇམ་དཔལ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་བཛྲ་ས་མཱ་ཛཿས་སྤྱན་དྲངས། གོང་བཞིན་(༤༦བ)
མཆོད་ཡོན་ཉེར་སྤྱོད་རོལ་མོས་མཆོད། ཛཿཧཱུཾ་བཾ་ཧོཿས་གཉིས་སུ་མེད་པར་བསྟིམ། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས། དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲངས། གོང་ལྟར་མཆོད་ནས། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བསྩལ་དུ་གསོལ། ཞེས་གསོལ་བ་བཏབ་པས། དེ་རྣམས་ཀྱིས། ཇི་ལྟར་བལྟམས་པ་ཙམ་གྱིས་ནི། །ཞེས་སོགས་ཀྱི་བུམ་པའི་ཆུ་རྒྱུན་གྱིས་དབང་བསྐུར་བས་ལུས་ཐམས་ཅད་གང་། །དྲི་མ་ཐམས་ཅད་དག །ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པར་བསམས་ལ། གོང་བཞིན་མཆོད། རི་བོང་འཛིན་པ་ལྟར་དཀར་གླེགས་བམ་རལ་གྲིས་ཕྱག་མཚན་ཞིང་། །རབ་མཛེས་ཤིན་ཏུ་ཞི་བའི་གཞོན་ནུ་ཟུར་ཕུད་ལྔ་པ་ཅན། །དགའ་བ་རྒྱ་ཆེན་ཐར་མཆོག་སྤྱན་ནི་པདྨའི་འདབ་ལྟར་ཡངས། །བློ་གྲོས་ངན་པ་བསྲེག་མཁས་འཇམ་པའི་དབྱངས་ལ་རབ་ཏུ་འདུད། ཅེས་བསྟོད། རང་གི་སྙིང་རྩེ་མོ་གྱེན་དུ་བསྟན་པའི་དབུས་སུ་འཁོར་ལོ་དཀར་པོ་རྩིབས་དྲུག་པའི་ལྟེ་བར་ཨ། རྩིབས་ལ་སྔགས་འཕྲེང་གཡས་སྐོར་དུ་འཁོར་བར་དམིགས་ལ་ཨོཾ་ཝཱ་ཀྱེ་དཾ་ན་མཿ ཞེས་དུས་གྲངས་རྟགས་ཀྱི་བསྙེན་པ་གཞུང་བཞིན་ཉམས་སུ་བླངས། ཐུན་མཚམས་སུ་ཡེ་ཤེས་པ་མདུན་གྱི་ནམ་མཁར་བྱུང་བ་ལ་གོང་བཞིན་མཆོད་པ་དང་། མཎྜལ་ཚོམ་བུ་བདུན་པ་བཤམས་ལ། འཛམ་བུའི་གླིང་དང་གླིང་གཞན་རྣམས། །ནོར་བུ་རིན་ཆེན་གྱིས་བཀང་སྟེ། །སྟོང་གསུམ་ལ་སོགས་མ་ལུས་པ། །ཞུམ་པ་མེད་པར་བྱས་ཏེ་འབུལ། །ཞེས་བརྗོད་ལ་མཎྜལ་དབུལ། མཚན་བརྗོད་འདོད་ན། །གོང་བཞིན་བསྟོད། རང་ཐ་མལ་པའི་ང་རྒྱལ་གྱིས། བཅོམ་ལྡན་འདས་མགོན་པོ་འཇམ་དཔལ་དབྱངས་ཀྱིས་བདག་(༤༧ན)
ལ་ཤེས་རབ་ཕུན་སུམ་ཚོགས་པ་བསྐྱེད་དུ་གསོལ། ཞེས་གསོལ་བ་གདབ། ཡི་གེ་བརྒྱ་པས་ལྷག་ཆད་ཁ་བཀང་། ནོངས་པ་བཟོད་པར་གསོལ། བཛྲ་མུཿས་ཡེ་ཤེས་པ་རང་བཞིན་གྱི་གནས་སུ་གཤེགས། བསྔོ་བ་སྨོན་ལམ་ཤིས་བརྗོད་བྱའོ། །དེ་ལྟར་དལ་བ་དོན་དང་ལྡན་པའི་ཆེད། །དཔལ་ལྡན་སྟོབས་བཅུའི་གོ་འཕང་བསྒྲུབ་འདོད་ན། །ཆོས་ཀུན་རྣམ་པར་འབྱེད་པའི་ཤེས་རབ་དེ། །མེད་ཐབས་མེད་ཕྱིར་ལྷག་པའི་ལྷ་འདི་བསྟེན། །ཁུངས་དང་བརྒྱུད་པ་བྲལ་བའི་རང་བཟོ་ཡིས། །འགལ་དུམ་འཕྲེང་བར་སྤེལ་བ་མ་ཡིན་པར། །རྒྱ་གར་པཎ་ཆེན་བོད་ཡུལ་མཁས་རྣམས་ཀྱི། །ཕྱག་ལེན་འཁྲུལ་མེད་ནོར་བུའི་འཕྲེང་འདི་ལོང་། །པད་རྩ་ལྟར་དཀར་དགེ་བའི་སྐྱ་རེངས་ཀྱིས། །འགྲོ་ཀུན་མི་ཤེས་གཉིད་ལས་རབ་བསླང་སྟེ། །བློ་གྲོས་ཉི་མའི་དངོས་བརྒྱ་འབར་བའི་ལུས། །འཇིག་རྟེན་གསུམ་གྱི་སྒྲོན་མར་བདག་འགྱུར་ཤོག །ཅེས་མ་ཏི་ལུགས་ཀྱི་འཇམ་དབྱངས་དཀར་པོའི་སྒྲུབ་ཐབས་ཤེས་རབ་གསལ་བྱེད་ཅེས་པ་འདི་ནི་གོང་གི་རྒྱལ་ཁབ་ནས་ཆོས་བསྒྱུར་བའི་ལོ་ཙཱ་སློབ་པ་སོགས་མང་དུ་ཐོས་པའི་ཆེད་འོངས་པ་སྤོར་ཁོ་པཎྜིས་བསྐུལ་པ་ལ་བརྟེན་ནས། དཔལ་ལྡན་བླ་མ་ཁྱབ་བདག་རྡོ་རྗེ་སེམས་དཔའི་ངོ་བོ་དཔལ་འབྱོར་འཕྲིན་ལས་རབ་རྒྱས་སོགས་ཡོངས་འཛིན་ཆོས་བཞིན་དུ་སྤྱོད་པ་དུ་མའི་བཀའ་དྲིན་ལ་བརྟེན་ནས་ཚུལ་འདི་ལ་བློ་གྲོས་ཀྱི་སྣང་བ་ཡངས་པ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་བློ་བཟང་དངོས་གྲུབ་བོ། ། ཁྲག་འཐུང་དབང་ཆེན་ཡང་གསང་ཁྲོས་པ་དང་། །དབྱེར་མེད་དྲིན་ཅན་བླ་མ་ཟུར་ཆེན་རྗེ། །ཆོས་དབྱིངས་རང་གྲོལ་སྙིང་གི་ཟེའུ་འབྲུའི་དབུས། །བྱང་ཆུབ་བར་དུ་བཞུགས་ལ་བདག་བྱིན་རློབས། །(༤༧བ)
འདིར་གཏེར་སྟོན་སུམ་ཚོགས་ཀྱི་གཏེར་ཆོས་གྲུབ་པའི་དབང་ཕྱུག་འདར་ཕྱ་རུ་བའི་ཕྱག་ཏུ་བབས་ཤིང་སློབ་དཔོན་ཆེན་པོ་ལའང་དངོས་སུ་གསན་པའི་དབང་ཆེན་ཡང་གསང་ཁྲོས་པའི་སྒྲུབས་ཐབས་རྒྱས་པ་ཁྲག་འཐུང་ལྷ་དགུའི་དཀྱིལ་འཁོར། འབྲིང་པོ་ཡབ་ཡུམ་རྐྱང་སྒྲུབ། བསྡུས་པ་དཔའ་བོ་གཅིག་པ་གསུམ་ལས། འབྲིང་པོའི་དབང་དུ་བྱས་པའི་རྣལ་འབྱོར་གྱི་རིམ་པ་ཉམས་སུ་ལེན་པར་འདོད་པས། ཐོག་མར་སྔགས་གསར་མའི་རྒྱས་འགེབས་ལྷུར་ལེན་མ་ཡིན་པའི་ལུགས་འདི་ཀའི་ཐུན་མོང་མ་ཡིན་པའི་ཕྱག་ལེན་འཕྱུགས་མེད་ཀྱི་དབང་མཚན་ཉིད་དང་ལྡན་པ་ནོས་ཤིང་དམ་ཚིག་དང་སྡོམ་པ་ལ་གཅེས་སྤྲས་སུ་བྱེད་པའི་སྒྲུབ་པ་པོས་ཉམས་སུ་བསྟར་བྱའི་ངག་འདོན་མདོར་བསྡུས་ལ། སྐྱབས་སེམས་ནི། པདྨ་དབང་ཆེན་དཀྱིལ་འཁོར་ལ༔ སྒོ་གསུམ་གུས་པས་སྐྱབས་སུ་མཆི༔ རང་གཞན་དོན་ནི་རབ་བསྒྲུབ་ཕྱིར༔ བྱང་ཆུབ་སེམས་ནི་བསྐྱེད་པར་བགྱི༔ པདྨ་དབང་ཆེན་སྒོམ་བཟླས་ནིཿ བདག་གིས་སེམས་ཅན་དོན་དུ་བགྱིཿ ཞེས་ཚར་གསུམ་བརྗོད། ཚད་མེད་ནི། སེམས་ཅན་ཐམས་ཅད་བདེ་དང་ལྡན༔ སེམས་ཅན་སྡུག་བསྔལ་མེད་གྱུར་ཅིག༔ སེམས་ཅན་བདེ་ལ་རྟག་པར་གནས༔ འགྲོ་རྣམས་སངས་རྒྱས་ཐོབ་གྱུར་ཅིག༔ མཆོད་རྫས་རྣམས་བརླབ་པ་ནི། རང་ཉིད་ཐུན་མཚམས་ཀྱི་ལྷར་གསལ་བས། ཨཱོཾ་རཾ་བཛྲ་ཀྲོ་ཏ་རཀྵ་ཛྲ་ལ་རཾ། ཏིཀྞ་བི་ཤྭ་ཛྭ་ལ་ཕཊ་རི་རཾ། རི་ཨ། ཨཱོཾ་ཨ་ཧ་ར་ཨ་ཧ་ར་ཧཱུཾ། ཨཱོཾ་བཛྲ་དྷཱུ་པ་ཧཱུཾ། ཐོག་མཐའ་འདྲ་བ་ལ། ཨཱ་ལོ་ཀེ །གནྡྷེ། ནཻ་ཝི་དྱེ། ཤབྡ། ཨཱོཾ་སརྦ་པཉྩ་ཨ་མྲྀ་ཏ་ཧཱུཾ། ཨཱོཾ་མ་ཧཱ་བ་ལིཾ་ཏ་པཱུ་ཛ་ཏེ་ཛྭ་ར་ཧཱུཾ། ཨཱོཾ་མ་ཧཱ་པདྨ་རཀྟ་ཧཱུཾ། དངོས་གཞིའི་རྣལ་འབྱོར་ནི། ཨཱོཾ་སྭ་བྷཱ་ཝ་བི་ཤུདྡྷཱཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅ཧཾ། པཾ་པདྨ་མཎྜ་(༤༨ན)
ལ། མ་སཱུཪྻ་མཎྜ་ལ། ཨ་ཙནྡྲ་མཎྜ་ལ། རུ་ཏྲ་བ། པདྨ་ཉི་ཟླ་བདུད་ནག་ཕྱི་ཆིངས་སུ། །བསྣོལ་སྟེང་རང་སེམས་ཧྲཱིཿདམར་མཾ་སྔོན་པོ། སྭ་ར་ཎ་ཕཊཿ འོད་འཕྲོས་འཕགས་མཆོད་སེམས་ཅན་དོན་ཀུན་བྱས། བདེ་གཤེགས་སྐུ་གསུང་ཐུགས་ཀྱི་བྱིན་རླབས་རྣམས། སཾ་ཧ་ར་ན་ཧཱུཾ། ཚུར་འདུས་ཡིག་འབྲུར་ཐིམ་པས་པདྨ་དམར། །བནྡྷ་ཁྲག་གིས་གང་བའི་རྣམ་པར་གྱུར། །ཏིཥྛ་བཛྲ། ཧྲཱིཿམཧཱ་ཀྲོ་ཏ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུཾ་ཕཊ། པདྨ་ཡོངས་གྱུར་བདག་ཉིད་དབང་ཆེན་སྐུ། །དམར་ནག་ཞལ་གསུམ་ཕྱག་དྲུག་ཞབས་བཞི་པ། །གཡས་དཀར་གཡོན་ལྗང་དབུས་དམར་རེ་རེ་ལ། །སྤྱན་གསུམ་ཞལ་བགྲད་མཆེ་གཙིགས་ལྗགས་འདྲིལ་པ། །ཁྲོ་གཉེར་རབ་བསྡུས་ཁམ་ནག་དབུ་སྐྲའི་ཚོགས། །གྱེན་འཁྱིལ་རྩ་ཞལ་སྤྱི་བོར་རྟ་མགོ་ལྗང་། །རྔོག་མ་དམར་པོ་ཕྲུམ་ཕྲུམ་སེར་པོ་དང་། །ཞུར་དཀར་རྟ་སྐད་དྲག་པོ་ལྷང་ལྷང་འཚེར། །སྨིན་མ་སྨ་ར་ཨག་ཚོམ་མེ་ལྟར་འབར། །གཡས་གསུམ་པད་དམར་ལྕགས་ཀྱུ་བེ་ཅོན་འཛིན། །གཡོན་གསུམ་བྷན་དམར་རྒྱུ་ཞགས་རལ་གྲི་འཕྱར། །ཐོད་སྐམ་དབུ་རྒྱན་ཚལ་བུས་དཔུང་པར་བརྒྱན། །སྐམ་རློན་རྙིང་པའི་དོ་ཤལ་གསུམ་རིམ་ཅན། །སྐུ་སྟོད་ཞིང་ལྤགས་གླང་ཆེན་ཀོ་རློོན་གསོལ། །སྟག་ཤམ་སྦྲུལ་རིགས་བཞི་དང་རིན་ཆེན་རྒྱན། །བྱུགས་པའི་རྫས་གསུམ་སྐུ་ཡི་རྒྱན་དུ་བཀོད། ཁམས་གསུམ་རྣམ་རྒྱལ་རྡོ་རྗེའི་ཁྱུང་གཤོག་གདེངས། །གར་དགུའི་ཉམས་ལྡན་གཡས་བསྐུམ་གཡོན་བརྐྱང་བཞུགས། །ཨཱོཾ་མ་ཧཱ་ཀྲོ་ཏ་ཤྭ་རི་ཧཱུཾ་ཕཊ༔ བནྡྷ་ཁྲག་བཀང་ཡོངས་སུ་གྱུར་པ་ལས། །ཡུམ་ཆེན་པདྨ་གར་དབང་སྐུ་མདོག་མཐིང་། །ཞལ་གཅིག་ཕྱག་གཉིས་གཡས་པས་མི་ཡི་སྙིང་། །རློན་པ་(༤༨བ)
བཟུང་བས་ཡབ་ཀྱི་མགུལ་ནས་འཁྱུད། །གཡོན་པས་དུད་ཆེན་དམར་འཁྱིལ་ཞལ་དུ་སྟོབ། །ཁྲག་མིག་སྤྱན་གསུམ་ཞལ་བགྲད་མཆེ་བ་གཙིགས། །རལ་པ་མུན་གཏིབས་སྐུ་རྐེད་ཡན་ཆད་ཁྱབ། །ཐོད་སྐམ་དབུ་རྒྱན་དོ་ཤལ་རིན་ཆེན་རྒྱན། །དུར་ཁྲོད་ཆས་སྤྲས་གཡས་བརྐྱང་གཡོན་བསྐུམ་པས། །ཡབ་ཀྱི་རྐེད་འཁྲིལ་ཡབ་ཡུམ་གཉིས་ཀ་ཡང་། །ཉི་མ་སྟོང་ལས་ལྷག་པའི་གཟི་འོད་འཕྲོ། །བསྐལ་པའི་མེ་ལྟར་འབར་བའི་ཀློང་ན་བཞུགས། །སྤྱན་འདྲེན་གནས་གསུམ་བྱིན་རླབས་དབང་བསྐུར་རྒྱས་གདབ་ནི། ཨཱོཾ་བཛྲ་ས་མ་ཡེ་ཛཿ ཨཱོཾ་སརྦ་ཏ་ཐཱ་ག་ཏ་མ་ཧཱ་པདྨེ་ཤྭ་རི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཡེ་སྭཱཧཱ། ནས། ཤབྡ་པྲ་ཏཱིཙྪ་ཡེ་སྭཱཧཱའི་བར། མཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། ཛཿཧཱུཾ་བཾ་ཧོཿ ཨཱོཾ་ཨཱཿཧཱུཾ། ཧཱུཾ་བཛྲ་ཧེ་རུ་ཀ་ཨ་བྷི་ཥིཉྩ་ཧཱུཾ། ཨཱོཾ་བུདྡྷ་ཧེ་རུ་ཀ་ཨ་བྷི་ཥིཉྩ་ཨཱོཾ། སྭཱ་རཏྣ་ཧེ་རུ་ཀ་ཨ་བྷི་ཥིཉྩ་ཧཱུཾ། པཾ་པདྨ་ཧེ་རུ་ཀ་ཨ་བྷི་ཥིཉྩ་ཧྲཱིཿ ཧཱ་ཀརྨ་ཧེ་རུ་ཀ་ཨ་བྷི་ཥིཉྩ་ཨཱཿ མཆོད་པ་ནི། གོང་གི་སྔགས་གཤམ་དུ་མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་བ་ལིནྟ་ཁཱ་ཧི། བསྟོད་པ་ནི། ཧྲཱིཿ དམར་ནག་གྲུ་གསུམ་དབང་གི་དཀྱིལ་འཁོར་ནས། །པདྨ་ཉི་ཟླ་བདུད་བསྣོལ་གདན་སྟེང་དུ། །རྣམ་ཤེས་གནས་གྱུར་པདྨ་ཧེ་རུ་ཀ །ཞེ་སྡང་རྣམ་དག་ཆོས་དབྱིངས་ཡེ་ཤེས་ངང་། །རྒྱུད་དྲུག་ཉོན་མོངས་ཞེ་སྡང་འཇོམས་མཛད་པ། །ཁྲོ་རྒྱལ་རྟ་མགྲིན་དཔལ་ལ་ཕྱག་འཚལ་ལོ། །ཕྱི་ནང་གསང་བའི་མཆོད་པ་འདི་བཞེས་ལ། །རྨད་བྱུང་རོལ་པའི་དངོས་གྲུབ་སྩལ་དུ་གསོལ། །དགའ་བཞི་བདེ་བ་ཆེན་པོའི་དཀྱིལ་འཁོར་ན། །དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ། །བདེ་སྟོང་ཟུང་འཇུག་ཤེས་རབ་ཐབས་དང་རོལ། །དབྱིངས་དང་ཡེ་ཤེས་དབྱེར་མེད་ཁྲོ་མོའི་སྐུ། །རྒྱུད་དྲུག་(༤༩ན)
ལས་དང་ཉོན་མོངས་འཇོམས་མཛད་མ། ཁྲོ་མོ་གར་དབང་ཡུམ་ལ་ཕྱག་འཚལ་ལོ། །ཕྱི་ནང་གསང་བའི་མཆོད་པ་འདི་བཞེས་ལ། །རྨད་བྱུང་རོལ་པའི་དངོས་གྲུབ་སྩལ་དུ་གསོལ། །བཟླས་པ་ནི། ཧྲཱིཿ བདག་ཉིད་ཁྲོ་རྒྱལ་རྟ་མཆོག་དཔལ། །ཐུགས་ཀར་པདྨ་འདབ་བརྒྱད་ཀྱི། །གེ་སར་ལ་ནི་སྙིང་པོ་ཧྲཱིཿ འདབ་མ་བརྒྱད་ལ་སྔགས་ཀྱིས་བསྐོར། །འོད་འཕྲོས་བདེ་གཤེགས་རྣམས་ལ་ཐིམ། །ཕྱི་ནང་གསང་བའི་མཆོད་པ་འབུལ། །སྐུ་གསུང་ཐུགས་ཀྱི་དངོས་གྲུབ་བསྡུ། །སེམས་ཅན་སྒོ་གསུམ་སྒྲིབ་པ་སྦྱངས། །རྣལ་འབྱོར་ལུས་ངག་ཡིད་ལ་ཐིམ། །ཧྲཱིཿབཛྲ་ཀྲོ་དྷ་ཧ་ཡཾ་གྷྲཱི་ཝ་ཧུ་ལུ་ཧུ་ལུ་ཧཱུཾ་ཕཊཿ ཨཱོཾ་མ་ཧཱ་ཀྲོ་ཏི་ཤྭ་རི་ཧཱུཾ་ཕཊཿ འཛབ་བསྟོད་ནི། ཧྲཱིཿ པདྨ་རིགས་ཀྱི་ཁྲོ་རྒྱལ་མཆོག །དཔལ་ཆེན་པདྨ་ཧེ་རུ་ཀ །མི་བཟད་ཁྲོ་རྒྱལ་རྟ་མཆོག་དཔལ། །དབང་དྲག་སྟོབས་ཆེན་རྔམ་བརྗིད་གཏུམ། །སྐུ་མདོག་དམར་ནག་འགྱིང་ཞིང་བརྗིད། །དབུ་གསུམ་རྣམ་ཐར་གསུམ་ཡང་སྟོན། །ཕྱག་དྲུག་རྒྱུད་དྲུག་རྩད་ནས་གཅོད། །ཞབས་བཞི་འཁོར་བའི་ཆོས་བཞི་སྒྲོལ། །དུར་ཁྲོད་ཆས་བརྒྱད་སྐུ་ལ་རྫོགས། །རྟ་མགོ་ལྗང་ཁུ་རྟ་སྐད་འཚེར། །མེ་དཔུང་འབར་བའི་ཀློང་ན་བཞུགས། །རྔམ་པའི་ང་རོ་འབྲུག་སྟོང་སྒྲོག །དྲེགས་པ་ཕོ་མོ་དབང་དུ་སྡུད། །དབང་ཆེན་སྐུ་ལ་ཕྱག་འཚལ་བསྟོད། ཅེས་དང་། འཛབ་ཀྱི་དངོས་གྲུབ་བླང་བ་ནི། ཧྲཱིཿ ཁྲོ་རྒྱལ་དབང་ཆེན་རྟ་མཆོག་དཔལ། །དཔལ་གྱི་སྐུ་གསུང་ཐུགས་མཆོག་ལས། །མཆོག་གི་དངོས་གྲུབ་ཡེ་ཤེས་དབྱིག །དུས་འདིར་རྣལ་འབྱོར་བདག་ལ་སྩོལ། །ཨཱོཾ་པདྨཱཾ་ཏ་ཀྲྀ་ཏ་པདྨེ་ཤྭ་རི་མ་ཧཱ་ཀྲོ་ཏ་ཧ་ཡཾ་གྷྲཱི་ཝ་མ་མ་ཏྲ་ག་མོ་དུནྟིཾ་ཧྲིཾ་ཧྲིཾ་ཧཱུཾ་ཛཿ ཞེས་པ་ཉེར་གཅིག་ཙམ་དང་། ཨཱོཾ་པདྨ་ཀྲོ་ཏ་ཀཱ་ཡ་ཝཱ་ཀ་ཙིཏྟ་སིདྡྷི་ཨ་ལ་ལ་ཧོ། (༤༩བ)
ཞེས་བརྗོད། ཐུན་མཐར་ལྷག་ཆད་ཁ་བཀང་། ཡིག་བརྒྱས་བྱིན་རླབས་བརྟན་པར་བྱས། མཆོད་བསྟོད་བྱ། ཧ་ཡ་གྷྲཱི་ཝ་ཧྲིཿགབ། བ་མོ་དྷ་ཡ་ཧྲིཿགབ། པདྨ་བན་དྷ་ཧྲིཿགབ། ཙནྡྲ་རཀྵ་ཧྲིཿགབ། རུ་ལུ་རུ་ལུ་ཧཱུཾ་བྷྱོ་ཧཱུཾ། གནས་ལྔར་ཕྱག་རྒྱ་དང་བཅས་ཏེ་ལུས་བསྲུང་། སྣོད་བཅུད་རྣམས་ཡབ་ཡུམ་ལ་ཐིམ། དེ་ཡུམ་ཡབ་ལ། ཡབ་ཧྲཱི༔ དེ་གུ་གུའི་བར་རིམ་གྱིས་ཐིམ་མཐར་འཇའ་ཡལ་བ་ལྟར་རིག་སྟོང་གི་ངང་དུ་མཉམ་པར་བཞག་ནས། ཨཱོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཨཱཏྨ་ཀོ་ཧཾ་བརྗོད་སླར་ཡང་ལྷར་གསལ་བའི་ངང་ནས་སྔགས་བཟླ་ཞིང་། དགེ་བ་འདི་ཡིས་བདག་སོགས་སེམས་ཅན་རྣམས། །པདྨ་རྒྱལ་པོའི་གོ་འཕང་མཆོག་ཐོབ་ནས། །མ་རིག་ལྡོངས་བའི་སྐྱེ་ཚོགས་ཐམས་ཅད་ལ། །རོལ་བའི་རྟ་སྐད་ཕྱོགས་བཅུར་སྒྲོག་པར་ཤོག །ཅེས་སོགས་བསྔོ་བ་སྨོན་ལམ་བྱའོ། །དེའང་བསྐྱེད་རྫོགས་འཛབ་ཚར་གཅོད་རྟགས་སོགས་ཀྱི་ཟབ་མོའི་གནད་འགག་རྣམས་ནི་བརྒྱུད་ལྡན་དམ་པའི་ཞལ་ལུང་ལས་བླང་བར་བྱ་ཞིང་། ཡང་གསང་ཁྲོས་པའི་བཀའ་སྲུང་གིང་ལྔ་གཟའ་གདོང་གནོད་སྦྱིན་ཆེན་པོ་རྣམས་ཡིན་པས་བྱུང་རྒྱལ་དུ་ཉམས་སུ་བླངས་ན་རང་གཞན་ཐམས་ཅད་འཕུང་བའི་རྒྱུར་འགྲོ་བས་ན་བག་ཡོད་པར་བྱའོ། །སྒྲུབ་སྡེ་བརྒྱད་ལས་པདྨ་གསུང་གི་སྐོར། །ཨོ་རྒྱན་བླ་མའི་ཞལ་ལུང་བདུད་རྩིའི་རྒྱུན། །སྐད་གཉིས་སྨྲ་བ་ལོ་ཆེན་བཻ་རོ་དང་། །གྲུབ་པའི་དབང་ཕྱུག་འདར་ཕྱར་གདམས་པའི་བཅུད། །བཀའ་གཏེར་ཟུང་འཇུག་མ་དྲོས་མཚོ་ཆེན་ལས། །སྙན་བརྒྱུད་མན་ངག་གངྒཱ་ཧུབ་གཅིག་གིས། །འཐུང་མཁས་རྒྱལ་བ་ཀུན་དངོས་ཚར་པ་རྗེ། །ཡབ་སྲས་ལས་བརྒྱུད་རིམ་བཞིན་ཁོ་བོས་ཐོས། །དང་པོར་མཚན་ཉིད་ཀུན་ལྡན་བླ་མའི་དྲུང་། །སྨིན་གྲོལ་གདམས་པའི་སྒྲོ་འདོགས་(༥༠ན)
ལེགས་བཅད་ནས། །ཡི་གེར་བཀོད་ལས་རྒྱུན་མེད་རང་བཟོ་ཡི། །ཧམ་ཅན་བརྩམས་ཆོས་རྣམས་དང་འདི་མི་འདྲ། །མཁའ་ལ་རྡོ་རྗེ་སྲུང་བའི་གུར་མ་ཞིག །ས་ལ་དཀྱིལ་འཁོར་བྲིས་པའི་བཀྲག་མ་ཡལ། །བར་དུ་མཁའ་འགྲོའི་ཁ་རླངས་ཐུལ་ལེ་བ། བྱིན་རླབས་ན་བུན་ཟིལ་དངར་ཅི་ཡང་གཡོ། །རང་ལ་ཆ་རྒྱུས་ཡོད་པའི་གདེངས་ལྡན་པས། །ཡང་གསང་ཁྲོས་པ་ཡབ་ཡུམ་རྒྱན་སྒྲུབ་ཀྱི། །ལས་བྱང་བདུད་ལས་རྒྱལ་བའི་བཞད་སྒྲ་ཅན། །བཀོད་པས་འགྲོ་ཀུན་བྱང་ཆུབ་མཆོག་ཐོབ་ཤོག །ཅེས་པ་འདིའང་སེར་བྱེས་སློབ་དཔོན་འཕྲིན་ལས་ལྷུན་གྲུབ་ཀྱི་སྐྱེ་བ་ངག་དབང་བསོད་ནམས་ལྷུན་གྲུབ་ཀྱིས་བསྐུལ་བའི་ངོར་གཉགས་ཛྙཱ་ན་ཀུརྨ་རའི་སྤྲུལ་པའི་ཟློས་གར་ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ་གྱི་བཀའ་དྲིན་ལ་བརྟེན་ནས་ཆོས་ཚུལ་འདི་ལ་མི་འཇིགས་པའི་སྤོབས་པ་དགེ་བ་ཟ་ཧོར་གྱི་བནྡེས་བརྒྱུད་ལྡན་གོང་མའི་ཡི་གེ་དང་མན་ངག་ལ་གཞི་བྱས་མངོན་རྟོགས་ཚིག་ལྷུག་ཚིགས་བཅད་དུ་བསྡེབས་ཤིང་གཞན་མ་སྐྱབས་སེམས་བསྟོད་འཛབ་དངོས་གྲུབ་བླང་བ་སོགས་ཡིག་རྙིང་རང་སོར་བཞག་སྟེ་མེ་རྟ་ཆུ་སྟོད་ཀྱིས་ཉ་བའི་ཡར་ཚེས་དགེ་བར་དཔལ་ལྡན་འབྲས་སྤུངས་སུ་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །གཏན་གྱི་སྐྱབས་མཆོག་མཆོག་གསུམ་རིན་ཆེན་ལ། །བྱང་ཆུབ་དེ་སྲིད་སྲིད་མཚོ་ལས་བསྒྲལ་ཕྱིར། །སོམ་ཉི་རབ་སྤངས་སྤངས་རྟོགས་ཡོན་ཏན་རྣམས། །ཐོབ་ཕྱིར་སྐྱབས་འགྲོ་འགྲོ་རྣམས་སྒྲོལ་བར་མཛོད། །སྡུག་བསྔལ་གསུམ་གྱིས་མནར་བའི་ལུས་ཅན་ཀུན། །ཀུན་མཁྱེན་ཡེ་ཤེས་རྙེད་ཆེད་བྱང་ཆུབ་སེམས། །སེམས་མཆོག་རིན་ཆེན་བསྐྱེད་དེ་རྒྱལ་སྲས་སྤྱོད། །སྤྱོད་ཚུལ་རླབས་ཆེན་ཕྱིན་དྲུག་ལམ་དུ་འཇུག །རང་ཉིད་འཇིག་རྟེན་དབང་ཕྱུག་གསལ་བ་(༥༠བ)
ལ། །ཐུགས་ཀའི་ཧཱུཾ་ལས་འོད་ཟེར་རབ་འཕྲོས་པས། །རང་བཞིན་གནས་ནས་ཕྱག་ན་པད་དཀར་འཆང་། །བླ་མ་འོད་དཔག་མེད་ཀྱི་དབུ་བརྒྱན་པ། །རྒྱལ་བ་སྲས་བཅས་ཚོགས་ཀྱིས་ཡོངས་བསྐོར་བ། །ཐོགས་པ་མེད་པར་བཛྲ་ས་མཱ་ཛཿ། །ཨོཾ་བཛྲ་པུཥྤེ་ཨཱ་ཧཱུྃ་ནས་ཤ་བྷ་ཨཱཿཧཱུཾ་བར་གྱིས་མཆོད། །རྒྱུན་བཤགས་དང་ཚད་མེད་བཞི་སྤྱི་ལྟར་བསྒོམ། །ཨོཾ་ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་ཉ་གང་སྟེང་། །ཡཾ་ལས་བདག་ཉིད་འཇིག་རྟེན་དབང་ཕྱུག་ནི། །སྐུ་མདོག་དཀར་པོ་ཞལ་གཅིག་ཕྱག་གཉིས་པ། །ཤེལ་དཀར་རྡུལ་མང་བརྩེགས་པའི་ལྷུན་པོ་ལ། །ཉི་མ་འབུམ་གྱིས་འཁྱུད་པའི་གཟི་བྱིན་ཅན། །ཞི་འཛུམ་དགྱེས་པའི་སྤྱན་རས་འགྲོ་ལ་གཟིགས། །དབུ་སྐྲ་མཐོན་མཐིང་རལ་པའི་ཐོར་ཚུགས་མཛེས། །ལྷག་མའི་ཟར་བུ་དཔུང་པའི་སྟེང་དུ་འཕྱང་། །ཕྱག་གཡས་འགྲོ་བའི་དབུགས་འབྱིན་མཆོག་སྦྱིན་དང་། །གཡོན་པ་པདྨའི་ཡུ་བ་ནས་བཟུང་བའི། །འདབ་མ་སྙན་གྱི་ཐད་ཀར་རྣམ་པར་རྒྱས། །ལྷ་རྫས་དར་གྱི་སྟོད་གཡོགས་ཤམ་ཐབས་ཀླུབས། །ཞབས་གཉིས་མི་ཕྱེད་སྐྱིལ་མོ་ཀྲུང་གིས་བཞུགས། །དེ་ཡི་གནས་གསུམ་ཡི་གེ་འབྲུ་གསུམ་གྱིས། །མཚན་པའི་ཐུགས་ཀའི་ཧཱུཾ་ལས་འོད་འཕྲོས་པས། །རང་བཞིན་གནས་ནས་བསྒོམས་པ་དང་འདྲ་བའི། །སྤྱན་རས་གཟིགས་དབང་བཛྲ་ས་མཱ་ཛཿ། ཛཿཧཱུཾ་བཾ་ཧོཿདམ་ཚིག་པ་ཡི་ལྷར། །ཡེ་ཤེས་སེམས་དཔའ་གཉིས་སུ་མེད་པར་བསྟིམ། །སླར་ཡང་འོད་འཕྲོས་རིགས་ལྔ་འཁོར་བཅས་རྣམས། །མདུན་གྱི་ནམ་མཁར་བཛྲ་ས་མཱ་ཛཿ། །བདག་ལ་དབང་བསྐུར་སྩལ་དུ་གསོལ་ཞེས་པའི། །ཚིག་དང་མོས་པས་ཐུགས་རྒྱུད་སྐུལ་བའི་མཐུས། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ལ་ཤྲཱི་ཧཱུཾ། (༥༡ན)
།དབང་སྐུར་སྐུ་གང་དྲི་མ་མ་ལུས་དག །ཆུ་ལྷག་ཡར་ལུད་སྣང་མཐས་དབུ་བརྒྱན་གྱུར། །གོང་བཞིན་ཉེར་སྤྱོད་ཀྱིས་མཆོད་ལ། །སྐྱོན་གྱིས་མ་གོས་སོགས་ཀྱིས་བསྟོད། །རང་གི་ཐུགས་ཀར་ཟླ་བའི་དཀྱིལ་འཁོར་སྟེང་། །ལ་ཡིག་ཐ་མར་ཡིག་འབྲུ་དྲུག་གིས་བསྐོར། །དེ་ལས་འོད་འཕྲོས་རྒྱལ་བ་སྲས་བཅས་མཆོད། །འགྲོ་བ་རིགས་དྲུག་སྡུག་བསྔལ་མ་ལུས་སྦྱངས། །ཚུར་འདུས་བདག་ལ་ཐིམ་པས་སྡིག་སྒྲིབ་དག །འཕགས་པའི་བྱིན་རླབས་མ་ལུས་ཐོབ་པར་གྱུར། །ཡི་གེ་དྲུག་པ་ཅི་ནུས་སུ་བཟླ། ཡེ་ཤེས་སེམས་དཔའ་བདག་ལས་ཕྱིར་ཕྱུང་སྟེ། །མདུན་གྱི་ནམ་མཁའ་མངོན་སུམ་བཞུགས་པར་གྱུར། སྔར་བཞིན་མཆོད། །བླ་མ་མཆོག་དང་འཕགས་པའི་ལྷ་ཚོགས་ལ། །མི་ཕྱེད་གདུང་ཤུགས་དྲག་པོས་གསོལ་བ་འདེབས། །སྐུ་གསུང་ཐུགས་ཀྱིས་བདག་རྒྱུད་བྱིན་བརླབས་ནས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཐུབ་བསྟན་རྒྱས་ཤིང་དེ་འཛིན་ཚོགས་རྣམས་བརྟན། །མཁའ་མཉམ་མ་རྒན་འགྲོ་རྣམས་བདེ་ལ་སྤྱད། །བདག་སོགས་རྣམས་ཀྱི་ཚེ་དཔལ་འབྱོར་པ་ཀུན། །ཡར་ངོའི་ཟླ་ལྟར་རྒྱས་པར་བྱིན་གྱིས་རློབས། །འདི་སྣང་འགགས་ཚེ་བདེ་བ་ཅན་ཞིང་དུ། །མགོན་པོ་ཁྱོད་ཀྱིས་ཐོགས་མེད་རབ་དྲངས་ཏེ། །རྒྱལ་བའི་སྲས་གྱུར་ཐེག་ཆེན་ཆོས་ལ་སྤྱད། །རྫོགས་པའི་བྱང་ཆུབ་མྱུར་དུ་ཐོབ་པར་མཛོད། ཁྱོད་ཀྱིས་སེམས་ཅན་དོན་ཀུན་མཛད་སོགས་དང་། །བཛྲ་མུཿས་ཡེ་ཤེས་པ་གཤེགས་པར་བསམ་མོ། །དགེ་བའི་ཆུ་རྒྱུན་རྒྱུན་ཆད་མེད་བབས་པ། །བྱང་ཆུབ་མཚོ་ཆེན་ཆེན་པོར་རོ་གཅིག་ཅིང་། །དུས་ཀུན་ཕུན་ཚོགས་ཚོགས་པའི་བཀྲ་ཤིས་ཀྱིས། །བདག་གཞན་འགྲོ་ཀུན་ཀུན་ལ་ཁྱབ་པར་ཤོག །ཅེས་སྒྲུབ་བརྒྱ་ནས་གསུངས་པའི་ཐུགས་རྗེ་ཆེན་པོ་འཇིག་རྟེན་དབང་ཕྱུག་ལ་བརྟེན་(༥༡བ)
པའི་ཉམས་ལེན་འདི་ནི་ཆང་ཁྱིམ་པ་ངག་དབང་མཁྱེན་བརྩེས་བསྐུལ་ཞིང་སླར་ཡང་པུ་ཤུད་པ་བློ་བཟང་དར་རྒྱས་ཀྱིས་ཀྱང་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། ། སངས་རྒྱས་ཆོས་ཚོགས་མ་ལྟ་བུའི་སྐྱབས་སེམས་སྔོན་དུ་འགྲོ་བའི་སྒོ་ནས། རང་གི་སྤྱི་གཙུག་ཏུ་པཾ་ལས་ཆུ་སྐྱེས་འདབ་མ་བརྒྱད་པའི་གེ་སར་གྱི་སྟེང་དུ། ཨཾ་ལས་ཆུ་ཤེལ་དབང་པོའི་དཀྱིལ་འཁོར་ཉ་གང་བའི་སྟེང་དུ་ཧཱུཾ་དཀར་པོ་ལས་འོད་འཕྲོས་དོན་གཉིས་བྱས་ཚུར་འདུས་ཡོངས་སུ་གྱུར་པ་ལས། དཔལ་རྡོ་རྗེ་སེམས་དཔའ་སྐུ་མདོག་སྟོན་མཚན་གྱི་ཟླ་བ་ལྟར་དཀར་ཞང་དྲི་མ་མེད་པའི་ཤེལ་ལྟར་འཚེར་བ། ཞལ་གཅིག་ཕྱག་གཉིས་པ། ཞི་ཞིང་འཇམ་ལ་ཆགས་པའི་ཉམས་དང་ལྡན་པ། མཐོན་མཐིང་དབུ་སྐྲ་གཙུག་གཏོར་གྱི་རྩེར་བཅིངས་ཤིང་ལྷག་མའི་ལན་བུ་རིང་དུ་འཕྱང་བ། རྡོ་རྗེ་དང་དྲིལ་བུ་འཛིན་པའི་ཕྱག་གཉིས་རང་སྣང་གི་ཤེས་རབ་མ་རྡོ་རྗེ་སྙེམས་མ་དཀར་མོར་འཁྱུད་པ་ཡབ་རྡོ་རྗེའི་སྐྱིལ་ཀྲུང་དང་ཡུམ་པདྨའི་སྐྱིལ་ཀྲུང་གིས་བཞུགས་པ། གཉིས་ཀའང་ལྷ་རྫས་ཀྱི་ན་བཟའ་དང་རིན་པོ་ཆེའི་རྒྱན་སྣ་ཚོགས་ཀྱིས་མཛེས་པར་སྤྲས་པ། གནས་གསུམ་དུ་ཨོཾ་ཨཱཿཧཱུཾ་དཀར་དམར་མཐིང་གསུམ་གྱིས་མཚན་པའི་ཧཱུཾ་ལས་འོད་འཕྲོས་བསྒོམས་པ་དང་འདྲ་བའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་བསྟིམ་མོ། །ཡང་འོད་འཕྲོས་དབང་ལྷ་རིགས་ལྔ་བཛྲ་ས་མཱ་ཛཿས་སྤྱན་དྲངས། ཨོཾ་པཉྩ་ཀཱུ་ལ་ས་པ་རི་ཝཱ་ར་སྔོན་དུ་འགྲོ་བའི་ཆུ་གཉིས་ཉེར་སྤྱོད་རོལ་མོ་དང་བཅས་པས་མཆོད། དེ་བཞིན་གཤེགས་པ་རིགས་ལྔས་མངོན་པར་དབང་བསྐུར་བསྩལ་དུ་གསོལ། ཞེས་གསོལ་བ་བཏབ་པས་བུམ་པའི་ཆུས་སྤྱི་བོ་ནས་དབང་བསྐུར་ལུས་ཐམས་ཅད་གང་། དྲི་མ་ཐམས་ཅད་དག་ཆུའི་ལྷག་མ་ཡར་ལུད་པ་ལས་མི་བསྐྱོད་(༥༢ན)
པས་དབུ་བརྒྱན་པར་བསམ། བཅོམ་ལྡན་འདས་རྡོ་ཇེ་སེམས་དཔས་བདག་གཞན་སེམས་ཅན་རྣམས་ཀྱི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ་ཞེས་གསོལ་བ་བཏབ་པས། ཐུགས་ཀའི་ཟླ་གདན་གྱི་སྟེང་དུ་ཧཱུཾ་ལ་སྔགས་འཕྲེང་གིས་བསྐོར་བ་ལས་བདུད་རྩིའི་རྒྱུན་བབས། ཡབ་ཡུམ་གྱི་སྦྱོར་མཚམས་ནས་ཐོན། རང་གི་སྤྱི་བོ་ནས་ཞུགས་ཏེ། ཉམས་ཆགས་སྡིག་སྒྲིབ་ནད་གདོན་ཐམས་ཅད་ཤྭ་འོད་ཀྱི་སྣེ་ལ་སྦུར་བ་མི་ཆགས་པ་བཞིན་ཕྱིར་ཐོན་པར་བསམས་པའི་དམིགས་པ་དང་བཅས་ཏེ་ཡི་གེ་བརྒྱ་པ་ཅི་ནུས་སུ་བཟླ། བདག་ནི་མི་ཤེས་རྨོངས་པ་ཡིས། ཞེས་སོགས་དང་། བཅོམ་ལྡན་རྡོ་རྗེ་སེམས་དཔའ་ཡིས། །ཚད་མེད་ཐུགས་རྗེ་ཆེན་པོའི་མཐུས། །བདག་གིས་བསགས་པའི་སྡིག་ལྟུང་ཀུན། །བྱང་ཞིང་དག་པར་བྱིན་གྱིས་རློབས། །མཁའ་མཉམ་མ་གྱུར་འགྲོ་རྣམས་ལ། །ཆགས་སྡང་གཏི་མུག་དབང་གྱུར་ཏེ། །ལོག་པར་སྤྱད་པའི་ཉེས་ཀུན་དྲི། །བཟླས་བརྗོད་ཆུ་བོས་འཁྲུད་པར་ཤོག །ཉམས་ཆགས་མིག་སྨན་ལྟར་གནག་མུན། །བཅོམ་ལྡན་ཐུགས་རྗེའི་ཟླ་ཟེར་གྱིས། །སྐད་ཅིག་ཉིད་ལ་སངས་བྱས་ནས། །ཕན་བདེའི་སྣང་བ་དཀར་བར་ཤོག །ཉེས་ལྟུང་ས་མཁྲེགས་ཐ་རྒོད་དང་། ། རང་རྒྱུད་ཞིང་ས་ལྷན་ཅིག་ཏུ། །མི་གནས་ཆེས་དཀར་གཤིན་པོ་ལ། །གཏན་བདེའི་མྱུ་གུ་སྐྱེ་བར་ཤོག །རིགས་ཀུན་བདག་པོ་རྡོ་རྗེ་སེམས། ཁྱོད་ཞལ་མངོན་སུམ་ལེགས་མཐོང་ནས། །ཡིད་ཅན་འདྲེན་པའི་དེད་དཔོན་དུ། །འགྱུར་བར་བྱིན་གྱིས་རླབ་ཏུ་གསོལ། །ཞེས་གསོལ་བ་བཏབ་པས། ཇི་ལྟར་གསོལ་བ་བཞིན་ཞལ་གྱིས་འཆེས་ཏེ། ཡབ་ཡུམ་གཉིས་ཀ་འོད་དུ་ཞུ་ནས་ཐིམ་པས་རང་སེམས་དང་ངོ་བོ་དབྱེར་མེད་དུ་གྱུར་པར་བསམས་ཏེ། བསྔོ་བ་སྨོན་ལམ་ཅི་རིགས་(༥༢བ)
པའང་བྱའོ། །ཞེས་རྡོ་རྗེ་སེམས་དཔའི་སྒོམ་བཟླས་ཚིག་ལྷུག་མཇུག་ཏུ་སྨོན་ལམ་ཤློ་ཀ་གསར་པ་ལྔ་ཡོད་པ་ཞིག་དགོས་ཞེས། གདོང་ཁ་བ་བློ་བཟང་བསྟན་འཛིན་དབང་རྒྱལ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་ངག་དབང་མཁྱེན་བརྩེའོ། ། རིན་ཆེན་ཡེ་ཤེས་བསོད་ནམས་མཆོག་གྲུབ་པའི། །ཁྱབ་བདག་འཁོར་ལོའི་མགོན་པོ་ཞ་ལུ་པ། །བློ་མཆོག་རིག་པའི་རྡོ་རྗེ་ཉང་སྟོན་རྗེ། །བྱང་ཆུབ་བར་དུ་རིགས་ཀྱི་བདག་པོར་བཞུགས། ཁྱོད་མཚན་ཐོས་པའི་མོད་ལ་དབུལ་ཕོངས་ཀྱི། །གདུང་སེལ་འདོད་འཇོ་བསིལ་བའི་རེག་བྱ་མཁན། །རབ་དཀར་རྨུགས་འཛིན་འབྲུག་གི་བཞོན་པ་ཅན། །དགྱེས་ཞལ་འཛུམ་གྱིས་འགྲོ་འདི་རྟག་ཏུ་བསུས། །སྣང་བ་མཐའ་ཡས་མར་མེ་མཛད་དཔལ་གྱི། །བཞེད་སྲོལ་དམ་པའི་ཕྱག་ལེན་འཁྲུལ་མེད་བཞིན། །རྒྱུན་འཁྱེར་སྒྲུབ་ཐབས་རིམ་པ་ཉམས་བསྟར་བ། །གོ་སླའི་ངག་གི་ཉུང་ངུ་རྣམ་གསལ་འདྲི། །དེ་ལ་འདིར་ལྷ་གཅིག་མཉམ་མེད་ཇོ་བོ་ཆེན་པོའི་ཟབ་ཆོས་འཕགས་པ་ཛམྦྷ་ལ་དཀར་པོ་འབྲུག་ཞོན་མ་བསྙེན་པར་བྱ་བའི་སྒྲུབ་ཐབས་དང་ཞར་བྱུང་ཆུ་སྦྱིན་དང་ནང་གཏོར་མ་ལ་བརྟེན་ནས་སྒྲུབ་པར་བྱེད་པ་ལ་གཞན་མའི་རྒྱས་བཀབ་ཀྱི་རང་བཟོ་མ་ཡིན་པར་རྩ་བའི་ཡིག་རྙིང་དང་ཤེའུ་ལོ་ཙཱ་བའི་ཡིག་ཆ་སོགས་ལ་བརྟེན་ནས་རྗེས་སུ་གནང་བ་ལེགས་པར་ནོས། །གནས་ཁང་ཡིད་དུ་འོང་བར་སྐྱེད་ཁུལ་བྱ། །ཐུགས་རྗེ་ཆེན་པོ་དང་འདིའི་བྲིས་སྐུ་སོགས་ཡོད་ན་དགྲམ། །སྟེགས་གཙང་མའི་ཁར་དཀར་གཏོར་དང་། བུམ་པ་ཟངས་གཞོང་། སྐུ་རབ་གནས་ཅན་སོགས་སྟ་གོན་བྱ། ཆུ་གཉིས་སྔོན་དུ་འགྲོ་བའི་མཆོད་པ་བཤམ། སྟན་བདེ་བ་ལ་འདུག་སྟེ་སྐྱབས་སུ་འགྲོ་བ་དང་སེམས་བསྐྱེད་པ་སྤྱི་ལྟར་བྱ། ཚོགས་ཞིང་ནི། རང་སྐད་ཅིག་གིས་ཛམྦྷ་ལར་གསལ་བའི་ཐུགས་ཀའི་ཧཱུཾ་ལས་འོད་ཟེར་འཕྲོས། (༥༣ན)
རང་བཞིན་གྱི་གནས་ནས་འཕགས་པ་ཛམྦྷ་ལ་ལ་བླ་མ་འོད་དཔག་མེད་ཀྱིས་དབུ་བརྒྱན་པ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་སྤྱན་དྲངས། ན་མོ་གུ་རུ་བྷྱཿ ན་མ་ྉྤདྨ་ཀྲོ་དྷ་ཨཱརྱ་ཛམྦྷ་ལ་ས་པ་རི་ཝཱ་ར་མཎྜ་ལེ་བྷྱཿས་ཕྱག་བྱ། གོང་གི་སྔགས་གཤམ་དུ་ཨརྒྷཾ་སོགས་བཏགས་ནས་མཆོད། གུར་ནས་འབྱུང་བའི་རྒྱུན་བཤགས་བྱ། ཚད་མེད་པ་བཞི་བསྒོམ། དངོས་གཞི་ནི། སྭ་བྷཱ་ཝས་སྦྱངས། སྟོང་པའི་ངང་ལས་བཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་རང་གི་སེམས་ཉིད་ཡི་གེ་ཛཾ་དཀར་པོ། དེ་ལས་འོད་འཕྲོས་འཕགས་པ་མཆོད། སེམས་ཅན་རྣམས་ཀྱི་དབུལ་ཕོངས་ཀྱི་སྡུག་བསྔལ་བསལ། ཚུར་འདུས་ཡོངས་སུ་གྱུར་པ་ལས་རང་ཉིད་འཕགས་པ་ཛམྦྷ་ལ་སྐུ་མདོག་གངས་རིའི་མདོག་ལྟར་དཀར་བ། ཞལ་གཅིག་ཕྱག་ཉིས་པ། ཞི་ཞིང་འཛུམ་ལ་ཆགས་པའི་ཉམས་ཅན་ཡིད་ཙམ་ཁྲོས་པ། སྤྱན་གསུམ་པ། དབུ་སྐྲ་ཁམ་སེར་གྱེན་དུ་བརྫེས་ཤིང་། སྨ་ར་དང་སྨིན་མ་ཁམ་སེར་དུ་འཁྲིལ་བ། ཕྱག་གཡས་ཁ་ཊྭཱཾ་རྩེ་གསུམ་དང་། གཡོན་པ་རིན་པོ་ཆེའི་བེ་ཅོན་བསྣམས་པ། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། སེ་མོ་དོ། འོག་པག །ཕྱག་གདུབ། ཞབས་གདུབ་རྣམས་ཀྱིས་སྤྲས་ཤིང་། དར་གྱི་ཡུག་གོན་སྟོད་གཡོགས་ཀྱི་ཚུལ་དུ་འཕྱང་བ། པཉྩ་ལི་ཀའི་ཤམ་ཐབས་ཅན། གཡུ་འབྲུག་གི་སྟེང་ན་ཞབས་གཉིས་ཕྱེད་སྐྱིལ་གྱི་ཚུལ་དུ་བཞུགས་པ། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་དབུས་སུ་ཟླ་གདན་ལ་ཛཾ་དཀར་པོ་འོད་ཟེར་འཕྲོ་བ། དེ་ལས་འོད་འཕྲོས་པས་རང་བཞིན་གྱི་གནས་ནས་ཛམྦྷ་ལ་དཀར་པོར་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿས་སྤྱན་དྲངས། གོང་ལྟར་མཆོད། ཛཿཧཱུཾ་བཾ་ཧོཿས་གཉིས་སུ་མེད་པར་(༥༣བ)
བསྟིམ། སླར་ཡང་འོད་འཕྲོས། དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿས་སྤྱན་དྲངས། ཨཱོཾ་པཉྩ་ཀླཱུ་ལ་ས་པ་རི་ཝཱ་ར་ཨརྒྷཾ་ནས་ཤབྡའི་བར་གྱིས་མཆོད། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། ཨོཾ་བཛྲ་བྷཱ་ཝ་ཨ་བྷི་ཥིཉྩ་ཧཱུཾ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས། འོད་དཔག་མེད་ཀྱི་དབུ་བརྒྱན་པར་བསམ། ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པས་མཆོད། ཤེལ་དཀར་ཞུན་མའི་ཕུང་པོ་དབང་བཞི་ཡིས། །རབ་དཀྲིས་གར་དགུའི་ཉམས་ལྡན་གནོད་སྦྱིན་དབང་། །འདོད་དགུའི་དངོས་གྲུབ་ཆར་ལྟར་འབེབས་མཛད་པ། །དཔལ་ལྡན་ཛམྦྷ་ལ་ལ་ཕྱག་འཚལ་ལོ། །ཞེས་བསྟོད། བཟླས་པ་བྱ་བ་ནི། རང་གི་སྙིང་གར་ཟླ་གདན་ལ་ཛཾ་ཡིག་དཀར་པོའི་མཐར་སྔགས་ཀྱི་ཕྲེང་བས་བསྐོར་བ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཁྱད་པར་ཁམས་གསུམ་གྱི་དཔལ་འབྱོར་ལོངས་སྤྱོད་ཐམས་ཅད་བསྡུས་ཏེ་ཇི་ལྟར་འདོད་པའི་དངོས་གྲུབ་ཐོབ་པར་བསམས་ལ། ཨོཾ་པདྨ་ཀྲོ་དྷ་ཨཱརྱ་ཛཾ་བྷ་ལ་ཧྲི་ད་ཡ་ཧཱུཾ་ཕཊ། ཅེས་པ་མི་ཚིག་གིས་བར་མ་ཆད་པར་ཐུན་དུ་བཅད་དེ། རབ་འབྲིང་མཐའ་གསུམ་གྱི་རྟགས་མ་བྱུང་གི་བར་དུ་བཟླ། ཐུན་མཚམས་སུ་མཆོད་བསྟོད་བྱ། ཡེ་ཤེས་པ་མདུན་གྱི་ནམ་མཁར་ཕྱུང་བ་ལ་མཆོད་བསྟོད་དང་། ཡིག་བརྒྱ་བརྗོད་ཅིང་ནོངས་པ་བཟོད་པར་གསོལ། བཛྲ་མུཿས་ཡེ་ཤེས་པ་རང་གནས་སུ་གཤེགས། རང་ཉིད་དམ་ཚིག་པའི་ང་རྒྱལ་ལ་གནས་པས་བསྔོ་བ་སྨོན་ལམ་གྱིས་རྒྱས་འདེབས། ཕྱི་ཆུ་སྦྱིན་ལ་བརྟེན་ནས་བསྒྲུབ་ན། མདུན་དུ་ཟངས་གཞོང་གཙང་མའི་ནང་དུ་བརླན་གྱིས་མི་གནོད་པའི་སྐུ་རབ་གནས་ཅན་བཞག །རང་ཉིད་ཐུགས་རྗེ་ཆེན་པོ་ཁ་སར་པ་ཎིར་ལམ་གྱིས་གསལ་བཏབ། མདུན་གྱི་(༥༤ན)
རྟེན་བསངས་སྦྱངས་སྒྲུབ་ཐབས་བཞིན་བསྐྱེད་པའི་ཤར་གྱི་འདབ་མ་ལ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས་རྡོ་རྗེ་ཌཱ་ཀི་མ་ནམ་མཁའི་མདོག་ཅན་ཞལ་གཅིག་ཕྱག་གཉིས་མ། གཡས་གསེར་གྱི་རྡོ་རྗེ་དང་གཡོན་པས་རྟེན་འབྲེལ་གྱི་ནོར་རྫས་བསྣམས་པ། བྷ་ར་ཧཱུཾ་ལས་རིན་པོ་ཆེ་ཧཱུཾ་གིས་མཚན་པ་ལས། རིན་ཆེན་ཌཱ་ཀི་མ་སེར་མོ་གཡས་ནོར་བུ་རིན་པོ་ཆེ་དང་གཡོན་བུམ་པ་འཛིན་པ། ནུབ་ཏུ་པཾ་ལས་པདྨ་པཾ་གྱིས་མཚན་པ་ལས། པདྨ་ཌཱ་ཀི་མ་དམར་མོ་གཡས་པདྨ་དང་གཡོན་ལྕགས་ཀྱུ་བསྣམས་པ། བྱང་དུ་ཁཾ་ལས་རལ་གྲི་ཁཾ་གིས་མཚན་པ་ལས། ལས་ཀྱི་ཌཱ་ཀི་མ་ལྗང་གུ་གཡས་རྡོ་རྗེ་རྒྱ་གྲམ་དང་། གཡོན་ནེའུ་ལེ་ནོར་བུ་སྐྱུག་པ་བསྣམས་པ། ཐམས་ཅད་ཀྱང་རིན་པོ་ཆེའི་རྒྱན་དང་དར་གྱི་ན་བཟའ་གསོལ་བ། ཞབས་གཡས་བསྐུམ་པའི་དར་སྟབས་ཀྱིས་བཞུགས་པ། གཙོ་འཁོར་རྣམས་ཀྱི་དཔྲལ་བར་ཨོཾ། ཞེས་པ་ནས་ཆུའི་ལྷག་མ་ཡར་ལུད་པ་ལས་ཞེས་པའི་བར་གོང་ལྟར་ལ། གཙོ་བོ་ལ་འོད་དཔག་མེད་དང་འཁོར་རྣམས་ལ་རང་གི་རིགས་ཀྱི་བདག་ལས་དབུ་བརྒྱན་པར་བསམ། དེ་ནས་སྔགས་བརྒྱ་རྩ་བཟླ་ཞིང་། སྐུ་གཟུགས་ལ་ཆུ་སྦྱིན་དབུལ་བའི་ཆུ་མུ་ཏིག་གི་ཕྲེང་བར་གྱུར་ནས་གཙོ་འཁོར་རྣམས་ཀྱི་སྐུ་ལུས་གང་བས་ཟུག་རྔུ་ཞི་ཞིང་བདེ་བ་དང་ལྡན། ཞལ་ནས་མུ་ཏིག་གི་ཆར་བབས་པས་དངོས་གྲུབ་ཐོབ་པར་བསམས་ལ་མཆོད་བསྟོད་བྱ། རྟེན་ཡོད་ན་ཡེ་ཤེས་པ་ལ་བརྟན་བཞུགས་འབུལ། ཆུ་མཐེབ་སྲིན་གྱིས་རང་གི་ལྕེ་ཐོག་ཏུ་བཞག་ནས་དངོས་གྲུབ་ཞུ་བཅོམ་ལྡན་འདས་བདག་དང་སེམས་ཅན་ཐམས་ཅད་ཀྱི་དབུལ་ཕོངས་ཀྱི་སྡུག་བསྔལ་ཞི་ནས། དཔལ་འབྱོར་ལོངས་སྤྱོད་ཟད་མི་ཤེས་པ་འབྱུང་བ་དང་ཕྱི་མ་བདེ་བ་ཅན་དུ་སྐྱེ་བར་བྱིན་གྱིས་བརླབ་ཏུ་གསོལ། ཞེས་འདོད་པའི་དོན་ལ་གསོལ་བ་བཏབ། ཆུ་ཅུང་ཟད་རེ་ཕྱོགས་བཞིར་གཏོར་ཞིང་ཡིག་བརྒྱ་བཟླ། (༥༤བ)
ལྷག་མ་གཞན་དུ་མ་འཁྱར་བར་ལོངས་སྤྱད་དོ། །ནང་གཏོར་མ་ལ་བརྟེན་ནས་བསྒྲུབ་ན། རང་ཐུགས་རྗེ་ཆེན་པོར་གསལ་བའི་ཐུགས་ཀའི་ཧཱུཾ་ལས་འོད་འཕྲོས། རང་བཞིན་གྱི་གནས་ནས་ཛམྦྷ་ལ་གཙོ་འཁོར་ལྔ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛ་ས་སྤྱན་དྲངས། པདྨ་ཀ་མ་ལ་ཡེ་སྟྭཾ་གྱིས་གདན་དབུལ་གཏོར་མ་བསངས་སྦྱངས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་པར་གཏོར་མ་འདོད་དགུ་འབྱུང་བའི་བདུད་རྩིའི་རྒྱ་མཚོར་བསམས་ལ། ཨོཾ་ཨཱཿཧཱུཾ་གིས་བྱིན་གྱིས་བརླབ། སྔགས་གཤམ་དུ་དཾ་བ་ལྱཱ་དེ་ཁ་ཁ་ཁཱ་ཧི་ཁཱ་ཧི། ཞེས་པ་ལྔའམ་བདུན་གྱིས་དབུལ། མཆོད་བསྟོད་བྱ། ནོངས་པ་བཟོད་པར་གསོལ། ཁྱོད་ཀྱིས་སེམས་ཅན་དོན་ཀུན་མཛད། ཅེས་སོགས་ཀྱི་མཐར་བཛྲ་མུ༔ས་ཡེ་ཤེས་པ་གཤེགས། དམ་ཚིག་པ་རང་ཉིད་ལ་བསྡུ། མཐར་བསྔོ་བ་སྨོན་ལམ་ཅི་རིགས་པ་བྱའོ། །འདི་ན་དམ་པའི་ཞལ་ལུང་དྲི་མ་མེད། །དཔྱད་གསུམ་དག་པས་ཡི་གེར་ལེགས་བཀོད་ཚེ། །རྒྱུན་མེད་རང་བཟོ་མུན་པའི་མདའ་འཕེན་རྣམས། །བག་ཡང་བསྟེན་ལ་ཚུལ་ཆོས་ར་བར་ཉོལ། །དགེ་བས་འདི་སྣང་ཕོངས་པའི་དུཿཁ་དང་། །ལྷན་ཅིག་ས་ལམ་ཡོན་ཏན་གྱིས་དབུལ་བའི། །ཉམ་ཐག་འགྲོ་ཀུན་དེ་རྒྱུ་དང་བྲལ་ནས། །སྐུ་གསུམ་ནོར་བུའི་བང་མཛོད་ཐོབ་པར་ཤོག །ཅེས་དཔལ་མཉམ་མེད་ཇོ་བོ་ཆེན་པོ་དཱི་བཾ་ཀ་རའི་བཞེད་སྲོལ་ཛཾ་ལ་དཀར་པོ་འབྲུག་ཞོན་མའི་ཉམས་ལེན་འཁྱེར་བདེ་བ་ཞིག་དགོས་ཞེས་གསོལ་དཔོན་གར་བ་བློ་བཟང་མཁྱེན་བརྩེས་བསྐུལ་བའི་ངོར་མཁན་ཆེན་ཞ་ལུ་པ་རིན་ཆེན་བསོད་ནམས་མཆོག་གྲུབ་དང་། ཉང་སྟོན་ཁྲ་ཚང་བ་བློ་གྲོས་མཆོག་གི་རྡོ་རྗེ་ཞེས་ཁྱབ་བདག་རྡོ་རྗེ་སེམས་དཔའི་ངོ་བོར་བཞུགས་པའི་དཔལ་ལྡན་བླ་མ་རྣམས་ཀྱི་བཀའ་དྲིན་ལ་བརྟེན་ནས་ཆོས་ཚུལ་འདི་ལ་བློ་གྲོས་ཀྱི་སྣང་བ་དཀར་བའི་ཟ་ཧོར་གྱི་བནྡེས་(༥༥ན)
སྦྱར་བའི་ཡི་གེ་པ་ནི་རིག་བྱེད་འཛིན་པ་ཏྲེ་བོ་ངག་དབང་ནམ་མཁའོ། ། ན་མོ་གུ་རུ་བཛྲ་གཱ་ཎ་ཡེ། ཕྱག་ན་རྡོ་རྗེ་གོས་སྔོན་ཅན་བསྒོམ་པར་འདོད་པས་སྐྱབས་སེམས་སྔོན་དུ་བཏང་། སངས་རྒྱས་ཆོས་ཚོགས་མ་ལྟ་བུ། སྭ་བྷཱ་ཝས་སྦྱངས། སྟོང་པའི་ངང་ལས་པད་ཟླའི་གདན་སྟེང་དུ། རང་ཉིད་གསང་བདག་སྔོན་པོ་གཡས་རྡོ་གསེར་གྱི་རྡོ་རྗེ་རྩེ་ལྔ་པ་རྗེ། །གཡོན་པ་ཐུགས་ཀ་སྡིགས་མཛུབ་དར་སྟོད་གཡོགས། ཤམ་ཐབས། སྔོན་སྟག་ལྤགས་གསོལ། །ཀླུ་བརྒྱད་སྦྲུལ་གྱི་རྣམ་པ་ཀྱིས་བརྒྱན་གཡོན་བརྐྱང་མི་དཔུང་དབུས། ལེགས་བཞུགས་མི་བསྐྱོད་སྤྲུལ་སྐུས་དབུ་ལ་བརྒྱན། སྐུ་ལས་མེ་འབར་གནས་གསུམ་སྤྱི་བོ་མགྲིན་པ་སྙིང་ག་ཡི་གེས་ཨོཾ་ཨཱཿཧཱུཾ་མཚན། །ཧཱུཾ་ལས་འོད་འཕྲོས་རང་འདྲའི་ཡེ་ཤེས་པ། ཐོགས་པ་མེད་པར་བཛྲ་ས་མཱ་ཛཿ། ཛཿཧཱུཾ་བཾ་ཧོཿས་གཉིས་སུ་མེད་པར་གྱུར། །བསྙེན་སྔགས་ཀྱི་མཐར་ཨརྒྷཾ་ནས་ཤབྡའི་བར་གྱིས་མཆོད། བསྟོད་པ་ལྕང་ལོ་ཅན་གྱི་གནས་མཆོག་དམ་པ་ནས་ལྟ་བུར་བསྟོད་བྱ། སྙིང་གར་ཟླ་སྟེང་གསེར་རྡོར་རྩེ་ལྔ་ཡི། །ལྟེ་བར་ཧཱུཾ་མཐར་སྔགས་ཀྱིས་བསྐོར་བར་དམིགས། །ཨོཾ་ནཱ་ལ་ཝ་ར་དྷ་བཟླས་པ་ཅི་འགྲུབ་བྱ་ར་བཛྲ་པཱ་ཎི་ཧཱུཾ་ཧཱུཾ་ཕཊ། སྨོན་ལམ་ཤིས་བརྗོད་ཅི་དགེ་བ་འདི་ཡིས་མྱུར་དུ་བདག་ཅེས་སོགས་སྐབས་དང་སྦྱར་རིགས་བྱའོ། །ཕྱག་རྡོར་གོས་སྔོན་ཅན་གྱི་མངོན་རྟོགས་ཤིན་ཏུ་བསྡུས་པ་འདི་ནི་ས་སྐྱོང་བློ་བཟང་མཐུ་སྟོབས་ཀྱི་ཞལ་འཛིན་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཀར་བྲག་པ་ངག་དབང་བྱམས་པའོ། །ཆོས་དྲུག་མི་གཡོའི་གདམས་པ་ཟབ་མོའི་གནད། །རྗེས་གནང་ཟབ་འཁྲིད་སྟོན་པའི་རྡོ་རྗེ་འཆང་། །རིན་ཆེན་གསུམ་དངོས་བསོད་ནམས་མཆོག་གི་ཞིང་། །མཁས་གྲུབ་བསྟན་པའི་རྒྱལ་མཚན་ཞལ་ལུང་འདྲི། །དེའང་རྗེ་བཙུན་མི་གཡོ་བ་འདི་ལ་གཏུམ་མོ་དཀར་པོ། བཀའ་གདམས་ལྷ་བཞིའི་ནང་ཚན་གྱི་སྔོན་པོ། །ཆུ་(༥༥བ)
སྲུང་སོགས་མང་དུ་བཞུགས་པ་ལས་འདིར་བཀའ་གདམས་ལྷ་བཞིའི་ནང་ཚན་གྱི་མངོན་པར་རྟོགས་པ་ཉམས་སུ་བླང་བ་ལ། སྐྱབས་འགྲོ་སེམས་བསྐྱེད་སྔོན་དུ་བཏང་ནས། རང་ཉིད་མི་གཡོ་བ་སྔོན་པོར་གསལ་བའི་ཐུགས་ཀའི་ཧཱུཾ་ལས་འོད་ཟེར་འཕྲོས་པས། བཅོམ་ལྡན་འདས་མི་གཡོ་མགོན་པོ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ། ཐལ་མོ་སྦྱར་ལ། ཡེ་ཤེས་རལ་གྲིས་མི་ཤེས་མ་ལུས་གཅོད། །སྡིགས་མཛུབ་ཞགས་པས་བདུད་ཀུན་འདར་ཞིང་འཆིང་། །བགེགས་ལ་མཆེ་གཙིགས་རྔམ་པ་ཁྲོ་བོའི་རྒྱལ། །རྗེ་བཙུན་མི་གཡོ་མགོན་ལ་ཕྱག་འཚལ་ལོ། །ཞེས་པས་ཕྱག་བྱ། རང་གི་སྙིང་ག་ནས་མཆོད་པའི་ལྷ་མོ་སྤྲོས་ནས་མཆོད་པར་བསམས་ལ། ཨོཾ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཡེ་སྭཱ་ཧཱ་ནས། ཤབྟ་ཨཱཿཧཱུཾ་གི་བར་བརྗོད། རྒྱུན་བཤགས་ལན་གསུམ་བྱ་ཞིང་ཚོགས་ཞིང་རང་ལ་བསྟིམ། ཚད་མེད་བཞི་བསྒོམ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་སྣ་ཚོགས་པདྨ་དང་ཉི་མའི་སྟེང་དུ་རང་སེམས་ཀྱི་ངོ་བོ་ཡི་གེ་ཧཱུཾ་མཐིང་ཁ། དེ་ལས་འོད་འཕྲོས་འཕགས་པ་མཆོད་སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་རང་ཉིད་བཅོམ་ལྡན་འདས་མི་གཡོ་བ་སྐུ་མདོག་ཟར་མའི་མེ་ཏོག་ལྟར་སྔོ་བ་ཞལ་གཅིག་ཕྱག་གཉིས་པ་མི་གཡོ་མཉམ་པའི་སྤྱན་གསུམ་དང་ལྡན་པ། མཆེ་བ་གཙིགས་པས་མས་མཆུ་མནན་ཞིང་ཁྲོ་གཉེར་བསྡུས་པ། སྨ་ར་དང་སྨིན་མ་མེ་ལྟར་འབར་ཞིང་དབུ་སྐྲ་ཁམ་སེར་གྱེན་དུ་བརྫེས་པ་ཕྱག་གཡས་རལ་གྲི་ནམ་མཁའ་ལ་འཕྱར་བ། གཡོན་པ་རྡོ་རྗེའི་ཞགས་པ་དང་བཅས་པའི་སྡིགས་མཛུབ་ཐུགས་ཀར་མཛད་པ། མི་མགོ་སྐམ་པོ་ལྔའི་དབུ་རྒྱན་དང་རློན་པ་ལྔ་བཅུའི་དོ་ཤལ་ཅན། སྦྲུལ་དཀར་པོའི་མཆོད་ཕྱིར་ཐོགས་པ། སྟག་གི་པགས་པའི་ཤམ་ཐབས་ཅན། རིན་པོ་ཆེའི་རྒྱན་སྣ་ཚོགས་(༥༦ན)
ཀྱིས་སྤྲས་པ། ཞབས་གཉིས་གཡས་བསྐུམ་ཞིང་གཡོན་བརྐྱང་བས་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོ། ཐུགས་ཀའི་ས་བོན་ལས་འོད་ཟེར་འཕྲོས་པས། རང་བཞིན་གྱི་གནས་ནས་བཅོམ་ལྡན་འདས་མི་གཡོ་བ་འཁོར་བཅས་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་གཉིས་སུ་མེད་པར་བསྟིམ། ཡང་འོད་འཕྲོས་དབང་གི་ལྷ་ཨོཾ་བཛྲ་ས་མཱ་ཛཿས་སྤྱན་དྲངས་པ་ལ་ཨོཾ་པཉྩ་ཀཱུ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། བདག་ལ་མངོན་པར་དབང་བསྐུར་དུ་གསོལ་ཞེས་གསོལ་བ་བཏབ་པས་རིགས་ལྔའི་ཐུགས་ཀ་ནས་སྤྲུལ་པའི་ལྷ་མོ་བཞིའི་ཕྱག་གི་བུམ་པ་བདུད་རྩིས་གང་བ་ཐོགས་ནས་ཇི་ལྟར་བལྟམས་པ་སོགས་དང་ཨོཾ་སརྦ་ཏ་ཐཱ་ག་ཏ་སོགས་ཀྱིས་དབང་བསྐུར་བས་སྒོ་གསུམ་གྱི་དྲི་མ་དག །ཡེ་ཤེས་ཀྱི་བདུད་རྩིས་ལུས་ཐམས་ཅད་གང་། ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པར་བསམ། ཐུགས་ཀ་ནས་འོད་སྤྲོས་མཆོད་ལྷས་མཆོད་བསྟོད་བྱས་པར་མོས་ནས་ཨཱརྱ་ཨ་ཙ་ལེ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཀྱེ་ཀྱེ་མཐའ་གཉིས་རྣམ་པར་མི་གཡོ་ཞིང་། མཐའ་བྲལ་བདེ་ཆེན་ཁྲོ་བོ་རྒྱལ་པོའི་སྐུ། །སྤྲུལ་པའི་གཟུགས་ཀྱིས་འགྲོ་དོན་དཔག་མེད་མཛད། །འཇིགས་བྱེད་ཆེན་པོ་འགྲོ་བ་ཀུན་སྒྲོལ་ཞིང་། །སྲིད་པ་གསུམ་ན་དགྱེས་པའི་གར་མཛད་པ། །སྲིད་པའི་ཆུ་བོ་སྐེམས་ཤིང་མི་མཐུན་བདུད་རྣམས་འཇོམས། སྲིད་པའི་རླུང་གིས་མི་གཡོ་ཐུགས་རྗེའི་མགོན། །རབ་བརྗིད་མི་གཡོ་མགོ་ལ་ཕྱག་འཚལ་ལོ། ཞེས་པས་བསྟོད། ཐུགས་ཀར་ཉི་མའི་སྟེང་དུ་ཧཱུཾ་ཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས་པས་སེམས་ཅན་གྱི་མི་ཤེས་པའི་མུན་པ་ཚར་བཅད་པར་བསམས་ལ། ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཅི་ནུས་(༥༦བ)
བཟླ། རྗེ་བཙུན་མི་གཡོ་མགོན་པོས་བདག་དང་སེམས་ཅན་ཐམས་ཅད་ཀྱི་བདུད་བཞིའ་བར་གཅོད་ཐམས་ཅད་ཞི་ནས་འཇིག་རྟེན་ལས་འདས་པའི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་བཏབ་ཅིང་མཇུག་ཏུ་དགེ་བ་བསྔོ། གཏོར་མ་འབུལ་བར་འདོད་ན་དཀར་ཆ་བཞི་ལས་ཇི་ལྟར་འབྱུང་བ་བཞིན་དབུལ་ལོ། །སྲིད་ཞིའི་འཇིགས་ལས་བསྐྱབ་པའི་སླུ་མེད་མགོན། །བཅོམ་ལྡན་གཏུམ་པོ་མི་གཡོ་བསྒྲུབ་པའི་ཐབས། །མཉམ་མེད་དྷཱི་པཾ་ཀ་རའི་བཞེད་པའི་སྲོལ། །བརྒྱུད་ལྡན་ཕྱག་ལེན་མ་ཉམས་འདི་ན་བཀོད། །མཁས་གྲུབ་སོ་སོའི་ལུགས་སྲོལ་མི་ཤེས་པར། །གཅིག་དཔེ་ཀུན་ལ་འགེབས་པའི་བློས་བྱས་མཁན། །ཆེར་རློམ་སྟོང་པའི་འུར་སྐད་ཅན་རྣམས་ཀྱི། །དོན་མང་ཟ་ཟིའི་སྐྱོན་ཟློས་ག་ལ་ཡིན། །དགེ་དེས་བདུད་བཞིའི་འཇིགས་པས་མི་ཚུགས་ཤིང་། །རབ་འབྱམས་ཤེས་བྱའི་གནས་ལ་བློ་རྒྱས་པས། །མི་གཡོ་ཆོས་དྲུག་ཟབ་ལམ་ཉམས་བླངས་ནས། །རང་གཞན་དོན་གཉིས་འགྲུབ་པའི་བཀྲ་ཤིས་ཤོག །ཅེས་རྗེ་བཙུན་མི་གཡོ་མགོན་པོའི་སྒྲུབ་ཐབས་འདི་ནི་གདོང་ཁ་ཆོས་མཛད་བློ་བཟང་བསྟན་འཛིན་དབང་རྒྱལ་གྱིས་བསྐུལ་བ་ལ་བརྟེན་ནས་དཀྱིལ་འཁོར་རྒྱ་མཚོའི་ཁྱབ་བདག་རིན་ཆེན་བསོད་ནམས་མཆོག་གྲུབ་བསྟན་པའི་རྒྱལ་མཚན་དཔལ་བཟང་པོའི་བཀའ་དྲིན་ལས་ཆོས་ཚུལ་འདི་ལ་བློ་མིག་ཡངས་པའི་ཟ་ཧོར་གྱི་བནྡེས་ཁྲིད་ཡིག་དང་པཎ་ཆེན་ངག་དབང་ཆོས་གྲགས་ཀྱི་ཡི་གེ་ལ་བརྟེན་ནས་བཀོད་པའི་ཡི་གེ་པ་ནི་རིག་བྱེད་པ་ངག་དབང་ནམ་མཁའོ། །འཆི་མེད་ཚེ་དབང་རིགས་འཛིན་ཐོད་ཕྲེང་རྩལ། །གང་དེས་རྗེས་བཟུང་གྲུབ་དབང་ཐང་སྟོང་པའི། །ཟབ་གཏེར་དག་སྣང་ཆུ་བོ་ཉིས་འདྲེས་ཀྱི། །ཚེ་སྒྲུབ་རྒྱུན་ཁྱེར་ཉམས་ལེན་འདི་ལྟར་རོ། །དེ་ལ་འདིར་ཚེ་དཔག་མེད་འཆི་མེད་དཔལ་སྟེར་གྱི་སྒོ་ནས་བདག་དོན་དུ་ཚེ་བསྒྲུབ་པའི་རིམ་པ་ལ། སྐྱབས་འགྲོ་(༥༧ན)
སེམས་བསྐྱེད་ནི། བདག་དང་ནམ་མཁའི་མཐའ་མཉམ་སེམས་ཅན་ཀུན། །དེང་ནས་བྱང་ཆུབ་སྙིང་པོ་མ་ཐོབ་པར། །སངས་རྒྱས་ཆོས་དང་དགེ་འདུན་མ་ལུས་པ། །ཀུན་འདུས་རྩ་བ་གསུམ་ལ་སྐྱབས་སུ་མཆི། །འཆི་བདག་བདུད་ཀྱ་ིགཡུལ་ངོ་ཕམ་བྱའི་ཕྱིར། །འགྱུར་མེད་ཚེ་ཡི་རིགས་འཛིན་རབ་བསྒྲུབས་ནས། །ལུས་ཅན་མཐའ་དག་ཀུན་བཟང་གདོད་མའི་སར། །འགོད་ཕྱིར་བྱང་ཆུབ་སེམས་མཆོག་བསྐྱེད་པར་བགྱི། །ཚོགས་ཞིང་ནི། རང་ཉིད་ཚེ་དཔག་མེད་དུ་གསལ་བའི་ཐུགས་ཀའི་ཧྲཱིཿལས་འོད་འཕྲོས། བདེ་བ་ཅན་ནས་བླ་མ་དང་དབྱེར་མ་མཆིས་པའི་བཅོམ་ལྡན་འདས་ཚེ་དཔག་མེད་ལ་བརྒྱུད་པའི་བླ་མ་དང་སངས་རྒྱས་བྱང་སེམས་ཀྱིས་བསྐོར་བ་ཨོཾ་བཛྲ་ས་མཱ་ཛཿས་སྤྱན་དྲངས། ན་མོ་གུ་རུ་ཨཱ་ཡུརྫྙཱ་ན་པཱ་ར་མི་ཏ་ས་པ་རི་ཝཱ་ར་མཎྜ་ལེ་བྷྱཿ ཞེས་ཕྱག་བྱ། གུ་རུ་ཨཱ་ཡུ་རྫྙཱ་ན་པཱ་ར་མི་ཏ་ས་པ་རི་ཝཱ་ར་ཨརྒྷཾ་སོགས་ཆུ་གཉིས་ཉེར་སྤྱོད་རོལ་མོས་མཆོད། གུར་ནས་བྱུང་བའི་རྒྱུན་བཤགས་ལན་གསུམ་དང་ཚད་མེད་པ་བཞི་བསྒོམ། དངོས་གཞི་ནི་སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་སྐད་ཅིག་གིས་རྨ་བྱས་བཏེག་པའི་རིན་པོ་ཆེའི་ཁྲི། སྣ་ཚོགས་པདྨ་དང་ཟླ་བའི་གདན་གྱི་སྟེང་དུ་རང་གི་སེམས་ཀྱི་ངོ་བོ་ཧྲཱི༔དམར་པོ་རིང་ཆ་ཚེག་དྲག་དང་བཅས་པ་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པ་སྐུ་མདོག་པདྨ་རཱ་གའི་ལྷུན་པོ་ལྟར་དམར་བ། ཞལ་གཅིག་ཕྱག་གཉིས་མཉམ་གཞག་གི་སྟེང་ན་འཆི་མེད་ཀྱི་བདུད་རྩིས་གང་བའི་བུམ་པ་འཛིན་པ། དབུ་སྐྲ་གནག་སྣུམ་རལ་པའི་ཐོར་ཚུགས་ཅན། དར་སྣ་ཚོགས་ཀྱི་ན་བཟའ་དང་རིན་པོ་ཆེའི་རྒྱན་རྣམས་ཀྱིས་སྤྲས་པ། མཚན་དང་དཔེ་བྱད་ཀྱི་གཟི་འོད་འབར་བ། སྣང་ལ་རང་བཞིན་མེད་པ་འོད་ཀྱི་དཀྱིལ་འཁོར་གྱི་དབུས་སུ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་(༥༧བ)
ཐུགས་ཀར་ཧྲཱིཿཡིག་གིས་མཚན་པ། རང་ཚེ་དཔག་མེད་མགོན་དུ་གསལ་བའི་སྤྱི་བོར། རྩ་བའི་བླ་མ་ཟུར་ཆེན་རྡོ་རྗེ་འཆང་ཆོས་དབྱིངས་རང་གྲོལ། དེའི་དབུ་གཙུག་ཏུ་རིགས་ཀུན་ཁྱབ་བདག་མགོན་པོ་བསོད་ནམས་མཆོག་རབ་བྱུང་ཆས་ས་ཞུ་ལྡན། དེའི་དབུ་གཙུག་ཏུ་རྡོ་རྗེ་འཆང་དབང་ཕྱུག་རབ་བྱུང་ཆས་ས་ཞུ་རབ་བརྟན་དེའི་དབུ་གཙུག་ཏུ་རྗེ་བཙུན་བསྟན་འཛིན་ཉི་ཟླ་རབ་བྱུང་ཆས་ས་ཞུ་བཟང་པོ། །དེའི་དབུ་གཙུག་ཏུ་འཇམ་དབྱངས་ཀུན་དགའ་གྲོལ་རབ་བྱུང་ཆས་ས་ཞུ་མཆོག །དེའི་དབུ་གཙུག་ཏུ་རྗེ་བཙུན་རྡོ་རིངས་པ་ཆེན་པོ་ཀུན་བཟང་རབ་བྱུང་ཆས་ས་ཞུ་ཆོས་ཀྱི་ཉི་མ། དེའི་དབུ་གཙུག་ཏུ་གྲུབ་པའི་དབང་ཕྱུག་ཐང་སྟོང་རྒྱལ་པོ། །དེའི་དབུ་གཙུག་ཏུ་དུས་གསུམ་སངས་རྒྱས་པདྨ་ཐོད་ཕྲེང་རྩལ། དེའི་དབུ་གཙུག་ཏུ་དཔལ་རྟ་མཆོག་རོལ་པ། དེའི་དབུས་གཙུག་ཏུ་མགོན་པོ་ཚེ་དཔག་མེད། དེའི་དབུ་གཙུག་ཏུ་སངས་རྒྱས་སྣང་བ་མཐའ་ཡས་རྣམས་རེག་ལ་མ་འབྱར་བ་མཐོ་བརྩེགས་ཀྱི་ཚུལ་དུ་བཞུགས་པ། རང་གི་ཐུགས་ཀའི་ཧྲཱིཿལས་འོད་ཟེར་འཕྲོས་པས་བརྒྱུད་པའི་བླ་མ་ཡི་དམ་ཞི་ཁྲོ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཨོཾ་བཛྲ་ས་མཱ་ཛཿས་སྤྱན་དྲངས། སྤྱི་བོའི་བླ་མ་རྣམས་ལ་ཐིམ་པར་མོས་ནས། གསོལ་བ་འདེབས་པ་ནི། ཧྲཱིཿཧྲཱིཿ སྣང་བ་མཐའ་ཡས་འགྲོ་ཀུན་རྗེས་སུ་འཛིན། །ཚེ་དཔག་མེད་མགོན་སྒྲུབ་ལ་འཆི་མེད་སྟེར། །རྟ་མགྲིན་དབང་རྒྱལ་འགྲོ་བའི་བར་ཆད་སེལ། །པདྨ་འབྱུང་གནས་སྙིགས་དུས་འགྲོ་བའི་སྐྱབས། །ཐང་སྟོང་རྒྱལ་པོ་གསོལ་བཏབ་བསླུ་བ་མེད། །གསོལ་བ་འདེབས་སོ་འགལ་རྐྱེན་བར་གཅོད་སོལ། །བྱིན་གྱིས་རློབས་ཤིག་འཆི་མེད་དངོས་གྲུབ་སྩོལ། །མཁས་བཙུན་གྲུབ་པའི་སར་བཞུགས་ཀུན་སྤངས་རྗེ། །འཇམ་མགོན་གྲུབ་པའི་དཔའ་བོ་གྲོལ་མཆོག་ཞབས། །དཔལ་ལྡན་གྲུབ་རིགས་(༥༨ན)
འཛིན་པ་ཉི་ཟླའི་མཚན། །གསོལ་བ་༝། བྱིན་གྱིས༝། རྡོ་རྗེ་འཆང་དངོས་དབང་ཕྱུག་རབ་བརྟན་དཔལ། །ཁྱབ་བདག་མགོན་པོ་བསོད་ནམས་མཆོག་ལྡན་ཞབས། །རིགས་ཀུན་བདག་པོ་ཆོས་དབྱིངས་རང་གྲོལ་རྗེ། །གསོལ་བ༝། བྱིན་གྱིས༝། བསྟན་འཛིན་ཉི་ཟླ་བཟང་པོ་ནས་སླར་ཡང་སྒེར་པ་ངག་དབང་རབ་བྱུང་ཆས་ཨོ་རྒྱན་པད་ཞུ། ཉི་མ་བཟང་། ལྕགས་ཟམ་འདི་ལ་ཁྱབ་བདག་མགོན་པོ་བསོད་ནམས་མཆོག་ལྡན་གྱིས་གསན། སྤྲུལ་སྐུ་བསོད་ནམས་རབ་བྱུང་ཆས་པད་ཞུ། དབང་ཕྱུག་དང་། །གཞན་བསྟན་འཛིན་ཉི་བཟང་ནས། ཡང་སྔགས་འཆང་ཆེན་པོ་ཚ་དཀར་ཆས་པ། རིང་པ། རང་གྲོལ་རབ་བྱུང་ཆས་ས་ཞུ། ཀླུ་སྒྲུབ་ཆོས་ཀྱི་རྒྱལ་འདི་ལ་མགོན་པོ་བསོད་ནམས་མཆོག་ལྡན་གྱིས་གསན། མཚན་རྗེ། གསོལ་བ༝། བྱིན་གྱིས༝། ཁྲི་སྲོང་རྣམ་སྤྲུལ་བཀྲ་ཤིས་སྔགས་འཆང་དཀར་ཆས་སྟོབས་ཀྱི་རྒྱལ། བྱང་བདག་རིགས་འཛིན་ཆེན་པོ་ངག་གི་དབང་གསང་གོས་དང་གངས་ཞུ་གསོལ་བ། ཁྱབ་བདག་སྨན་ལུང་བློ་མཆོག་རབ་བྱུང་སངས་རྒྱས་གླིང་པ་ལུགས་ཀྱི་པད་ཞུ་རྡོ་རྗེའི་ཞབས། །བརྒྱུད་པ་ཀུན་འདུས་དྲིན་ཅན་བླ་མ་ལ། །གསོལ་བ༝། བྱིན་གྱིས༝། ཨོཾ་ཨཱཿཧཱུཾ་ཧྲཱིཿཧྲཱིཿ བཛྲ་གུ་རུ་པདྨ་སིདྡྷི་པུཎྱ་ཛྙཱ་ན་ཨཱ་ཡུ་སིདྡྷི་ཛཿ ཞེས་གསོལ་བ་བཏབ་པས། བདག་གི་བླ་ཚེ་ཡར་བ་དང་། རྒྱུ་འབྱུང་བ་བཞི། འབྲས་བུ་འབྱུང་བ་ལས་གྱུར་པའི་སྣོད་བཅུད་འཁོར་འདས་ཀྱི་ཚེ་དབང་བསོད་ནམས་མཁྱེན་བརྩེ་ནུས་མཐུ་ཐམས་ཅད་བསྡུས། བླ་མ་བརྒྱུད་པ་རྣམས་ལ་ཐིམ། དེ་རྣམས་ཀྱི་སྐུ་ལས་བདུད་རྩིའི་རྒྱུན་དཔག་ཏུ་མེད་པ་བབས། རང་གི་ཚངས་རུ་གནས་ཞུགས་ལུས་ཐམས་ཅད་གང་བར་འཆི་མེད་ཚེའི་དངོས་གྲུབ་ཐོབ་པར་བསམ་སྟེ་བཟླས་པ་ཅི་ནུས་སུ་བྱ། མཇུག་ཏུ། འཆི་མེད་ཚེ་ཡི་དཔལ་ལ་ལོངས་སྤྱོད་ཅིང་། །རིག་པའི་བློ་དང་རྣམ་(༥༨བ)
དཔྱོད་ཤེས་རབ་དང་། །སྲིད་དང་ཞི་བའི་དཔལ་འབྱོར་གང་ལགས་པ། །དེ་ཀུན་ལྷུན་གྱིས་གྲུབ་པར་མཛད་དུ་གསོལ། །རྩ་བརྒྱུད་བླ་མ་ཡི་དམ་ལྷ་ཚོགས་ཀྱིས། །མཐུ་དང་ནུས་པ་བྱིན་རླབས་དཔུང་སྐྱེད་ལ། །ནད་གདོན་འགལ་རྐྱེན་བར་ཆད་ཞི་བ་དང་། །འཆི་མེད་ཚེ་ཡི་དངོས་གྲུབ་ཐོབ་པར་ཤོག །དཔོན་སློབ་མི་འབྲལ་ལྷན་ཅིག་གནས། །སྐུ་ཚེ་མི་འགྱུར་སྲ་ཞིང་བརྟན། །ཇ་ཆང་བཞེས་སྤྲོ་རྒྱུན་མི་ཆད། །སྐྱིད་ལ་ཚེ་འཕེལ་བཀྲ་ཤིས་ཤོག ཅེས་སོགས་ཀྱིས་འདོད་དོན་ལ་གསོལ་བ་བཏབ་པས། །སྣང་བ་མཐའ་ཡས་ནས་བཟུང་། བརྒྱུད་པ་རྣམས་འོད་དུ་ཞུ། །རང་ཉིད་ལ་ཐིམ་པས་འཆི་མེད་ཀྱི་དངོས་གྲུབ་ཐོབ་པར་བསམས་ནས། བླ་མ་དང་རང་སེམས་བསྲེས་པའི་ཀ་དག་གི་ངང་དུ་མཉམ་པར་བཞག །དེ་ལས་ལངས་ཏེ། དགེ་བ་འདི་ཡིས་མྱུར་དུ་བདག །ཅེས་སོགས་ཀྱིས་བསྔོ་སྨོན་ཤིས་བརྗོད་ཅི་རིགས་པ་བྱའོ། །དེ་ལྟར་དུས་མིན་འཆི་བདག་མུན་པའི་སྨག །མཐར་བྱེད་ཚེ་སྒྲུབ་ཉི་མའི་དངོས་བརྒྱའི་ལུས། ཁོ་བོའི་བློ་གྲོས་དབང་ཕྱོགས་ས་འཛིན་ལས། །ཤར་ཚེ་སྐལ་ལྡན་འདབ་སྟོང་ཅི་ཡང་བཞད། །དཔེ་འཁྱམས་ལག་ཏུ་སོན་པའི་རྒྱུན་མེད་ཆོས། །བུམ་སྟོང་གཅིག་ནས་གཅིག་བཇོའི་རྣམ་པར་ཐར། །མ་ཡིན་རིགས་འཛིན་ཞལ་ལུང་ལས་ཐོས་པ། །མཁའ་འགྲོའི་ཁ་རླངས་འཐུལ་བའི་གདམས་པ་ཡིན། །དགེ་འདིས་འགྲོ་རྣམས་ལྔ་པའི་འཇིགས་པ་དང་། །ལྷན་ཅིག་སྲིད་ཞིའི་ཉེས་བརྒྱ་ལས་ཐར་ནས། །རང་རིག་དོན་གྱི་བཅོམ་ལྡན་ཚེ་དཔག་མེད། །མངོན་སུམ་རང་ངོ་འཕྲོད་པའི་བཀྲ་ཤིས་ཤོག །ཅེས་སློབ་དཔོན་ཆེན་པོ་པདྨ་འབྱུང་གནས་ཀྱིས་གྲུབ་ཆེན་ཐང་སྟོང་རྒྱལ་པོར་དངོས་སུ་གནང་བ་དང་། བསམ་ཡས་མཆིམས་ཕུའི་གསང་ཕུག་ནས་ཟབ་གཏེར་དུ་ཡང་སྤྱན་དྲངས་པའི་ཚེ་སྒྲུབ་འཆི་མེད་དཔལ་སྟེར་གྱི་རྒྱུན་འཁྱེར་(༥༩ན)
འདི་ནི། འོད་གསལ་ལྷ་ཡི་རིགས་ལས་ནོར་འཛིན་སྐྱོང་བ་མིའི་དབང་པོ་ངག་དབང་རབ་བརྟན་གྱི་གསུང་གིས་བསྐུལ་པ་ལྟར། ཐུགས་དམ་སྤེལ་བའི་ཆེད་དུ་ཟ་ཧོར་གྱི་བནྡེ་གང་ཤར་རང་གྲོལ་གྱིས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། ། འོད་དཔག་མེད་ཀྱི་ཉམས་ལེན་རྒྱུན་ཁྱེར་ནི། །སངས་རྒྱས་ཆོས་ཚོགས་མ་ལན་གསུམ་མམ་བདུན་གྱིས་རྒྱུད་དག་པར་བྱས། སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་རང་གི་སེམས་ཉིད་ཡི་གེ་ཧྲཱིཿདམར་པོ་རིང་ཆ་ཚེག་དྲག་དང་བཅས་པ། དེ་ལས་འོད་འཕྲོས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས་རང་ཉིད་སྣང་བ་མཐའ་ཡས་སྐུ་མདོག་དམར་པོ་སྤྲུལ་སྐུའི་ཆ་བྱད་ཅན། ཕྱག་གཉིས་མཉམ་གཞག་གི་ཕྱག་རྒྱ་མཛད་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། མཚན་དཔེ་གསལ་རྫོགས་ཀྱི་བདག་ཉིད་ཅན་དུ་གྱུར། དེའི་གནས་གསུམ་ཡི་གེ་གསུམ་གྱིས་མཚན་པའི་ཧཱུཾ་ལས་འོད་འཕྲོས་བསྒོམས་པ་དང་འདྲ་བའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་གཉིས་སུ་མེད་པར་བསྟིམ། ཐུགས་ཀར་ཟླ་གདན་གྱི་དབུས་སུ་ཧྲཱིཿཡིག་ལ་སྔགས་འཕྲེང་གིས་བསྐོར་བ་དམིགས་ལ། ཨོཾ་པདྨ་དྷ་ར་ཧྲཱིཿསྭཱ་ཧཱ། ཞེས་པའི་གཟུངས་ཅི་ནུས་བཟླ། སླར་ཡེ་ཤེས་པ་ཕྱུང་སྟེ་མདུན་གྱི་ནམ་མཁར་རང་ཉིད་ལ་ཞལ་ཕྱོགས་ནས་བཞུགས་པར་བསམས་ལ། ཇི་སྙེད་སུ་དག་སོགས་ཀྱི་ཡན་ལག་བདུན་པ་སྔོན་དུ་འགྲོ་བའི་བཟང་པོ་སྤྱོད་པའི་སྨོན་ལམ་གྱིས་བདེ་བ་ཅན་དུ་སྐྱེ་བའི་མཚམས་སྦྱོར་བྱེད་པ་ནི་གནད་དམ་པའོ། །ཞེས་འོད་དཔག་མེད་ཀྱི་སྒྲུབ་ཐབས་འདི་ལྟ་བུ་ཞིག་དགོས་ཞེས་དཀོན་མཆོག་ཚེ་རིང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་(༥༩བ)
བཙུན་འཇམ་དབྱངས་སོ། །མདུན་གྱི་ནམ་མཁར་པད་སྡོང་ཟླ་བའི་སྟེང་། །ཧྲཱིཿཡིག་ལས་འཁྲུངས་འཕགས་མཆོག་སྤྱན་རས་གཟིགས། །ཞལ་གཅིག་ཕྱག་བཞི་འཛུམ་ལྡན་སྤྱན་དཀྱུས་རིང་། །རྩ་ཕྱག་ཐལ་སྦྱར་ལྷག་མ་ཆུ་ཤེལ་གྱི། །འཕྲེང་བ་བརྒྱ་རྩ་པདྨ་དཀར་པོ་འཛིན། །བུང་བ་ལྟར་ནག་རལ་པའི་ཐོར་ཚུགས་བཅིངས། །གར་དབང་འོད་མཐའ་ཡས་པའི་ཅོད་པན་ཅན། །རིན་ཆེན་རྒྱན་དང་དར་གྱི་ན་བཟའ་གསོལ། །ཀྲྀཥྞ་སཱ་རའི་པགས་པས་ནུ་མ་བཀབ། །ཞབས་གཉིས་མེ་ཕྱེད་རྡོ་རྗེ་སྐྱིལ་མོ་ཀྲུང་། །མཚན་དཔེ་གསལ་རྫོགས་མཐོང་ན་མི་མཐུན་མེད། །ཡེ་ཤེས་འོད་ལྔའི་འཇའ་ཚོན་གུར་དབུས་བཞུགས། །གྲངས་མེད་ལུས་སུ་སྤྲུལ་ནས་ཕྱག་འཚལ་ཞིང་། །བདག་པོས་བཟུང་དང་མ་བཟུང་དངོས་ཀུན་འབུལ། །སྔར་བསགས་སྡིག་ལྟུང་སྟོབས་བཞིའི་སྒོ་ནས་བཤགས། །རྣམ་དཀར་བགྱིས་སོ་ཅོག་ལ་བདག་ཡི་རང་། །རྒྱལ་སྲས་སློབ་བཅས་ཆོས་འཁོར་བསྐོར་བར་བསྐུལ། །འགྲོ་བའི་དོན་དུ་བསྐལ་བརྒྱར་མི་འདར་གསོལ། །སྟོན་ཟླ་ལྟར་དཀར་བསྐྲུན་པའི་དགེ་བ་ཡི། །ཕུང་པོ་བྱང་ཆེན་འཐོབ་པའི་རྒྱུ་རུ་བསྔོ། །ཞེས་པ་འདིའང་མང་བཀུར་རྒྱལ་ཁབ་ཀྱི་ཉེ་འདབས་སུ་འཁོད་པའི་ཡེ་ཤེས་རྒྱ་མཚོའི་ཁ་ཏོན་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། ། ཁྱོད་མཚན་ཐོས་པ་ཡིས་ཀྱང་ཉམས་གྲིབ་ཚོགས། །བ་མོར་ཉི་མ་ཇི་བཞིན་དག་བྱེད་ན། །མངོན་སུམ་ཉམས་སུ་བསྟར་བས་འདོད་པའི་དོན། །འགྲུབ་མཛད་ཁྲོ་བོའི་དབང་པོ་ལ་བཏུད་ནས། །གང་གི་མན་ངག་ལོ་ཆེན་བེ་རོ་ཡི། །རྣམ་སྤྲུལ་པྲཛྙཱ་ར་སྨིའི་ཟབ་གཏེར་ལས། །རྒྱུན་ཁྱེར་ཉུང་ངུའི་ཉམས་ལེན་སྐྱོང་བདེ་བ། །རིགས་འཛིན་མགུལ་རྒྱན་མེ་ཏོག་ཕྲེང་མཛེས་སྤེལ། །(༦༠ན)
སྐྱབས་སེམས་ནི། རང་རིག་ཀུན་བཟང་རང་ངོ་འཕྲོད་མིན་པར། །རྩ་གསུམ་ལྷ་ཚོགས་རྣམས་ལ་སྐྱབས་སུ་མཆི། །འགྲོ་བའི་དོན་དུ་མི་གཙང་དྲི་མའི་ཚོགས། །དག་བྱེད་སྨེ་བརྩེགས་ཁྲོ་རྒྱལ་བསྒོམ་པར་བྱ། །དངོས་གཞི་ནི། སྭ་བྷཱ་ཝས་སྦྱངས། ཆོས་ཀུན་ཀ་དག་སྟོང་པའི་ངང་ཉིད་ལས། །པཾ་ལས་པདྨ་རཾ་ལས་ཉི་མའི་སྟེང་། །རང་རིག་མཐིང་ནག་ཧཱུཾ་ལས་འོད་འཕྲོས་པས། །འཕགས་ཚོགས་མཆོད་ཅིང་འགྲོ་ཀུན་སྡིག་སྒྲིབ་སྦྱངས། །ཚུར་འདུས་ཡོངས་སུ་གྱུར་ལས་སྐད་ཅིག་གིས། །བདག་ཉིད་སྨེ་བརྩེགས་མཐིང་ནག་ཞལ་གཅིག་པ། །ཕྱག་གཉིས་ཐུགས་ཀར་སྡིགས་མཛུབ་མཛད་པའི་ཚུལ། །རབ་ཁྲོས་མཆེ་གཙིགས་སྨ་ར་དམར་སེར་འཁྱུག སྦྲུལ་སྔོན་ལྟོ་སེར་གྱིས་དཀྲིས་ཁམ་ནག་སྐྲ། །གྱེན་བརྫེས་དབུ་ལ་ཐོད་སྐམ་ལྔ་ཡིས་བརྒྱན། །ཐོད་རློན་འཕྲེང་བའི་དོ་ཤལ་སེ་རལ་ཁ། །སྦྲུལ་གྱིས་ཡན་ལག་ཀུན་བརྒྱན་སྟག་ཤམ་གསོལ། །ཞབས་བགྲད་ཡེ་ཤེས་མེ་དཔུང་དབུས་ན་བཞུགས། །དེ་ཡི་གནས་གསུམ་འབྲུ་གསུམ་གྱིས་མཚན་པའི། །ཧཱུཾ་ལས་འོད་འཕྲོས་རང་བཞིན་གནས་མཆོག་ནས། །ཡེ་ཤེས་སེམས་དཔའ་བཛྲ་ས་མཱ་ཛཿ། ཛཿ་ཧཱུཾ་བཾ་ཧོཿས་གཉིས་སུ་མེད་པར་གྱུར། །མཆོད་བྱ་མཆོད་བྱེད་མཆོད་པའི་དངོས་པོ་ཀུན། །རིག་པའི་རྩལ་དུ་ངེས་པའི་ཆོ་འཕྲུལ་གྱིས། །དབྱེར་མེད་ངོ་བོ་གཅིག་པའི་ཚུལ་གྱིས་འབུལ། ཨོཾ་ཨུཙྪུ་སྨ་ཀྲོ་ཏ་བཛྲ་ཨརྒྷཾ་ནས་ཤཔྟའི་བར་དང་། མ་ཧཱ་པཉྩ། མཧཱ་བ་ལིཾ་ཏ། མ་ཧཱ་རཏྐས་མཆོད་ཁྲོ་བོ་ཀུན་གྱི་མཐུ་སྟོབས་མ་ལུས་པ། །གཅིག་བསྡུས་རྩལ་གྱིས་བདུད་སྡེའི་དཔུང་ཚོགས་རྣམས། །ཐལ་བར་བརླག་མཛད་དཔལ་ལྡན་ཁྲོ་བོའི་དབང་། །བཅོམ་ལྡན་སྨེ་བ་བརྩེགས་ལ་ཕྱག་འཚལ་བསྟོད། འཛབ་བསྙེན་ནི། ཐུགས་ཀར་ཉི་སྟེང་ཧཱུཾ་མཐར་འཛབ་སྔགས་ཀྱི། །(༦༠)
བཕྲེང་བ་མགལ་མེའི་འཁོར་ལོ་ལྟར་འཁོར་ལས། །འོད་ཟེར་མེ་དཔུང་ཚ་ཚ་རབ་འཕྲོས་པས། །ནད་གདོན་མི་གཙང་གྲིབ་ཚོགས་བསྲེག་པར་གྱུར། །ཨོཾ་ས་ཙ་ཊ་ཡ་ཏོར་ཡ་ཏོར་ཡ་སྭཱཧཱ། ཨུ་ཊ་མི་ཊ་ཏ་ཡ་ཏར་ཡ་སྭཱ་ཧཱ། མོནྶ་ཊ་ཀྲོ་ཏ་ཡ་ཏ་ར་ཡ་ཏོ་ར་ཡ་སྭཱཧཱ། ཨ་ཀ་ཀྲོ་ཏ་ཡ་ཏ་ར་ཡ་ཏོ་ར་ཡ་སྭཱཧཱ། ཨ་བྷུ་ཀྲོ་ཏ་ཡ་ཏོར་ཡ་ཏོར་ཡསྭཱཧཱ། ཨུ་བ་ཤ་ཏ་ཡ་ཏོར་ཡ་ཏོར་ཡ་སྭཱཧཱ། ཨེ་ལིང་ཨེ་ཊ་ཡ་ཏ་ར་ཡ་ཏོ་ར་ཡ་སྭཱཧཱ། ལ་མན་ཏར་ཡ་ཏོར་ཡ་སྭཱཧཱ། ཨས་ནི་པིས་ནི་ཊ་ཡ་ཏོར་ཡ་ཏོར་ཡ་སྭཱཧཱ། ཨོཾ་བྷུར་ཀུཾ་མ་ཧཱ་པྲ་ན་ཡེ། བྷུར་ཙིབྷི་ཀི་བི་མ་ལེ། ཨུཏྪུ་སྨཿཀྲེ་ཙཱ་ཧཱུཾ་ཕཊ་ཏོར་ཡ་ཏོར་ཡ་སྭཱཧཱ། གསོལ་གདབ་ནི། ལྷག་པའི་ལྷ་མཆོག་ཁྱོད་ཀྱིས་རིགས་འཛིན་བདག །རང་གཞན་དོན་གཉིས་བསྒྲུབ་ལ་གེགས་བྱེད་པའི། །ཉམས་གྲིབ་མི་གཙང་དྲི་མ་ཀུན་སྦྱངས་ཏེ། །མཆོག་ཐུན་དངོས་གྲུབ་འགྲུབ་པར་བྱིན་གྱིས་རློབས། །སྨོན་ལམ་ནི། སྟོན་ཟླ་ལྟར་དཀར་བསོད་ནམས་ཕུང་པོའི་རྒྱུན། །ཚད་མེད་སྐུ་གསུམ་རྒྱ་མཚོ་ཆེར་བབས་ནས། །འགྲོ་ཀུན་ཚེ་འདིར་སྣང་བཞི་ཟད་སར་འཁྱོལ། །འཇའ་ལུས་རྡོ་རྗེའི་སྐུ་མཆོག་འགྲུབ་པར་ཤོག །ཅེས་གྲོལ་ཏིག་གི་ཆོས་སྡེའི་ཁྲོ་བོ་སྨེ་བ་བརྩེགས་པའི་ཉམས་ལེན་རྒྱུན་ཁྱེར་མེ་ཏོག་ཕྲེང་མཛེས་འདི་ནི་ཟབ་གཏེར་ཆོས་ཀྱི་སྒོ་འབྱེད་སྤྲུལ་སྐུ་གཏེར་བདག་གླིང་པ་ངག་དབང་པདྨ་བསྟན་འཛིན་གྱི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། ། སྒྲོལ་དཀར་ཡིད་བཞིན་འཁོར་ལོ་ཉམས་སུ་བླང་བར་འདོད་པས། སངས་རྒྱས་ཆོས་ཚོགས་མ་ལན་གསུམ་གྱིས་རྒྱུད་དག་པར་བྱས་ནས། སྭ་བྷ་བས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་གདན་གྱི་སྟེང་དུ་རང་(༦༡ན)
ཉིད་རྗེ་བཙུན་སྒྲོལ་མ་སྐུ་མདོག་དཀར་མོ་སྤྱན་བདུན་མ་གཡས་མཆོག་སྦྱིན་དང་གཡོན་དུས་གསུམ་སངས་རྒྱས་མཚོན་པའི་ཨུཏྤལ་རྩེ་མོ་གསུམ་པ་འཛིན་པ། དབུ་སྐྲ་མཐོན་མཐིང་ཐོར་ཚུགས་ཀྱི་ལྷག་མ་རིང་དུ་འཕྱང་བ། རིན་པོ་ཆེའི་རྒྱན་དང་དར་གྱི་ན་བཟའ་ཟླ་བའི་རྒྱབ་ཡོལ་ཅན་སྐྱིལ་མོ་ཀྲུང་གིས་བཞུགས་པ། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་བཛྲ་ས་མཱ་ཛཿཛཿཧཱུཾ་བཾ་ཧོཿ ཡང་འོད་འཕྲོས། དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲངས། བདག་ལ་དབང་བསྐུར་བསྩལ་དུ་གསོལ་ཞེས་གསོལ་བ་བཏབ་པས་དབང་བསྐུར། སྐུ་གང་དྲི་མ་དག་ཆུའི་ལྷག་མ་ཡར་ལུད་པ་ལས་སྣང་བ་མཐའ་ཡས་ཀྱིས་དབུ་བརྒྱན་པར་བསམས། ཨོཾ་ཨཱཪྻ་ཏཱ་རེ་ས་པ་རི་བཱ་ར་ཨརྒྷཾ་ནས་ཤབྡའི་བར་གྱིས་མཆོད། ལྷ་དང་ལྷ་མིན་ཅོད་པན་གྱིས་ཞེས་སོགས་ཀྱིས་བསྟོད། རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཏཱཾ་ཡིག་གི་མཐར་སྔགས་འཕྲེང་གིས་བསྐོར་བ་ལས་འོད་འཕྲོས། སྤྱི་བོའི་རིགས་བདག་ཚེ་དཔག་མེད་ཀྱི་ཐུགས་རྒྱུད་བསྐུལ། ཐུགས་ཀ་ནས་འཕྲོས་པའི་འོད་ཟེར་གྱིས་ཚེའི་བཅུད་ཐམས་ཅད་བཀུག་ནས་བུམ་པའི་ནང་དུ་ཞུ་བའི་རྒྱུན་གྱིས་རང་གི་ལུས་ཐམས་ཅད་གང་སྟེ་འཆི་མེད་ཀྱི་དངོས་གྲུབ་ཐོབ་པར་བསམས་ལ། ཨོཾ་ཏཱ་རེ་ཏུ་ཏཱ་རེ་ཏུ་རེ་མ་མ་ཨཱ་ཡུརྦུ་ཎྱ་ཛྙཱ་ན་པུཥྚིཾ་ཀུ་རུ་སྭཱཧཱ། ཞེས་པ་ཅི་ནུས་སུ་བཟླ། དགེ་བ་འདི་ཡིས་མྱུར་དུ་བདག ཅེས་སོགས་སྨོན་ལམ་བྱ། །སྔགས་འཁོར་དང་འོད་ཟེར་དྲུག་སྦྲགས་སོགས་སྤྲོ་ན་མངོན་རྟོགས་གཞུང་ནས་ལེན་ནོ། །སྒྲོལ་དཀར་ཚེ་བྱིན་ཡིད་བཞིན་འཁོར་ལོའི་རྒྱུན་ཕྱིར་ཤིན་ཏུ་ཉུང་ངུ་འདི་ནི་བྱང་གླིང་བསམ་གྲུབ་རྒྱལ་པོའི་འདོད་པ་བཞིན་ཟ་ཧོར་གྱི་བནྡེས་སྦྱར་བའི་(༦༡བ)
ཡི་གེ་པ་ནི་དཀར་བྲག་པ་ངག་དབང་བྱམས་པའོ།། །།