སཱཙྪ་འདེབས་པའི་གསལ་བྱེད་ལེགས་ཚོགས་ལྷུན་གྲུབ།
སཱཙྪ་འདེབས་པའི་གསལ་བྱེད་ལེགས་ཚོགས་ལྷུན་གྲུབ་བཞུགས་སོ།།
སྭ་སྟི་པྲ་ཛ་བྷྱཿ བསམས་པ་ཙམ་གྱིས་ཕན་བདེ་ཀུན་སྩོལ་བའི། །བསླུ་མེད་དཀོན་མཆོག་གསུམ་ལ་གུས་བཏུད་དེ། །བསོད་ནམས་རླབས་ཆེན་བསྐྲུན་པ་སཱཙྪ་ཡི། །འདེབས་བྱེད་ལག་ལེན་རིམ་པ་གསལ་བར་དགོད། ས་གསར་དུ་རྐོ་ན། གནས་དེར་གཞི་བདག་ལ་གཏོར་མ་སྦྱིན་ཞིང་། ཨོཾ་བཛྲ་ཁ་ན་ཁ་ན་ཧཱུཾ། ཞེས་བརྗོད་ཅིང་རིན་ཆེན་སྣ་བདུན་གྱི་ས་གཞིར་བསམས་ལ། འོག་ནས་འབྱུང་བའི་གཟུང་སྔགས་འདོན་ཞིང་བརྐོ་བར་བྱའོ། །དེ་ནས་ལག་པ་གཡོན་པའི་མཐེ་བོང་མཐེ་ཆུང་མནན་པ་ཁ་ཡར་བསྟན། གཡས་པ་དེ་བཞིན་དུ་བྱས་ལ་ཁ་ཕུའི་པའི་བར་དུ་འཇིམ་པ་བཞག་ལ། རང་གང་མོས་ཀྱི་ལྷར་གསལ་བའི་ངང་ནས། སྭ་བྷཱ་ཝས་འཇིམ་པ་སྟོང་པར་སྦྱངས། སྟོང་པའི་ངང་ལས་པད་ཟླའི་སྟེང་དུ། བྷྲུཾ་ལས་འཇིམ་པ་རིན་པོ་ཆེའི་ཕུང་པོར་བསམ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས། འོག་མིན་རྣམ་པར་སྣང་མཛད་ཀྱི་ཐུགས་རྒྱུད་བསྐུལ་ཏེ། དེའི་ཐུགས་ཀ་ནས་འོད་ཟེར་དཔག་ཏུ་མེད་པ་བྱུང་འཇིམ་པ་ལ་ཐིམ་པས་དེ་ཉིད་སངས་རྒྱས་ཐམས་ཅད་ཀྱི་རང་བཞིན་དུ་གྱུར་པར་བསམས་ལ། ཨོཾ་ན་མོ་བྷ་ག་ཝ་ཏེ་བཻ་རོ་ཙ་ནཱ་ཡ་པྲ་བྷ་རཱ་ཛཱ་ཡ་ཏ་ཐཱ་ག་ཏཱ་ཡ་ཨརྷ་ཏེ་སཾ་མྱཀྶཾ་བུད་དྷཱ་ཡ། ཏདྱ་ཐཱ། ཨོཾ་སུཀྵྨེ་སུཀྵྨེ། ས་མེ་ས་མེ་ཡེ། ཤཱནྟེ་དཱནྟེ། ཨ་ས་མཱ་རོ་པེ། ཨ་ན་ལམྦྷེ། ཏ་རམྦྷེ། ཡ་ཤོ་ཝ་ཏི་མ་ཧཱ་ཏེ་ཛེ། ནིར་ཀཱུ་ལེ། ནི་རི་ཝ་ཎེ། སརྦ་བུད་དྷ། ཨ་དྷིཥྛཱ་ན་ཨ་དྷིཥྛི་ཏེ་སྭཱཧཱ། ཞེས་ལན་ཉེར་གཅིག་བཟླ། འཇིག་པ་གཅད་(༢ན)
པའི་སྔགས་ནི། ན་མ་སྶ་མནྟ་བུད་དྷཱ་ནཱཾ། ཨོཾ་བཛྲ་ཨཱ་ཡུ་ཥེ་སྭཱཧཱ། ཨོཾ་བ་སུ་དྷ་སྭཱཧཱ། འབི་འབི་བྱ་བའི་སྔགས་ནི། ཨོཾ་བཛྲོད་བྷ་ཝཱ་ཡ་སྭཱ་ཧཱ། ཞེས་བརྗོད་ཅིང་ཡེ་ཤེས་ལྔའི་རང་བཞིན་རྒྱས་པར་བསམ། སྣུམ་འབྱུག་པའི་སྔགས་ནི། ཨོཾ་ཨ་ར་ཛེ་བི་ར་ཛེ་སྭཱཧཱ། ཞེས་བརྗོད་ཅིང་བྱང་ཆུབ་ཀྱི་སེམས་ཀུན་ཏུ་བཟང་པོར་བསྒོམ། འབི་འབི་བར་དུ་འཇུག་པའི་སྔགས་ནི། ཨོཾ་བཛྲ་དྷ་ཏུ་གརྦྷེ་སྭཱཧཱ། ཨོཾ་དྷརྨ་དྷ་ཏུ་གརྦྷེ་སྭཱཧཱ། ཞེས་བརྗོད་ཅིང་ཐབས་ཤེས་ཟུང་དུ་ཆུད་པར་བསམ། བརྡུང་པའི་སྔགས་ནི། ཨོཾ་བཛྲ་མུད་ག་རི་ཨ་ཀོ་ཊ་ཡ་ཨ་ཀོ་ཊ་ཡ་ཧཱུཾ་ཕཊ་སྭཱཧཱ། ཞེས་པ་དང་། རྟེན་འབྲེལ་སྙིང་པོ་བརྗོད་ཅིང་ཡེ་ཤེས་ཆེན་པོའི་ངོ་བོར་གྱུར་པར་བསམ། གཟུངས་སྔགས་སམ་མེ་ཏོག་འབུལ་བའི་སྔགས་ནི། ཨོཾ་སརྦྦ་བིདྱ་སྭཱཧཱ། བར་ནས་འདོན་པའི་སྔགས་ནི། ཨོཾ་དྷརྨྨ་ར་ཏེ་སྭཱཧཱ། ཞེས་བརྗོད་ཅིང་རྒྱུ་འབྲས་ཀྱི་ཆོས་རྣམས་ཡོངས་སུ་རྫོགས་པར་བསམ། བཞུགས་སུ་གསོལ་བའི་སྔགས་ནི། ཨོཾ་སུ་པྲ་ཏིཥྛི་བཛྲེ་སྭཱཧཱ། ཞེས་བརྗོད་ཅིང་ཐབས་ཤེས་ཟུང་དུ་འབྲེལ་བས་ཆོས་སྐུ་འགྲུབ་པར་བསམ་མོ། །རབ་གནས་བྱ་བ་ནི། རྟེན་རྣམས་གྲལ་ལ་བསྒྲིགས། མཆོད་པ་དང་བུམ་པ་འབྱོར་ན་དང་། མ་འབྱོར་ན་ཡིད་ཀྱིས་སྤྲུལ། སུམྦྷ་ནིས་འགེགས་བསངས། ཇི་ལྟར་བལྟམས་པ་སོགས་ཤོ་ལོ་ལ་ཀ་གཅིག་དང་། སརྦྦ་ཏ་ཐཱ་ག་ཏས་ཁྲུས་གསོལ། སྭ་བྷཱ་ཝས་སྦྱངས། སྟོང་པའི་ངང་ལས་རིན་པོ་ཆེའི་ཁྲི་དང་པད་ཟླའི་གདན་ལ། བྷྲུཾ་དང་འཁོར་ལོ་ལས་བྱུང་བའི་རྣམ་སྣང་འོད་དུ་ཞུ་བ་ལས། མཆོད་རྟེན་(༢བ)
མཚན་ཉིད་ཚང་པའི་བུམ་པའི་ནང་དུ། སེང་གེ །གླང་ཆེན། རྟ། རྨ་བྱ། མཁའ་ལྡིང་གིས་བཏེག་པའི་ཁྲི་དང་པད་ཟླའི་གདན་ལ། ཨོཾ་ཧཱུཾ་ཏྲཱཾ་ཧྲཱིཿཨཱཿལས། དབུས་སུ་རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་ཅན། ཤར་དུ་མི་སྐྱོད་པ་སྔོན་པོ་ས་གནོན་མཉམ་གཞག་གི་ཕྱག་རྒྱ་ཅན། ལྷོར་རིན་འབྱུང་སེར་པོ་ས་གནོན་མཆོག་སྦྱིན་གྱི་ཕྱག་རྒྱ་ཅན། ནུབ་ཏུ་འོད་དཔག་མེད་དམར་པོ་ཏིང་ངེ་འཛིན་གྱི་ཕྱག་རྒྱ་ཅན། བྱང་དུ་དོན་གྲུབ་ལྗང་གུ་སྐྱབས་སྦྱིན་མཉམ་བཞག་གི་ཕྱག་རྒྱ་ཅན། སྐུ་འདྲའི་རིགས་རྣམས་སེང་ཁྲི་པད་ཟླའི་སྟེང་དུ་ཧཱུཾ་ལས་རྡོ་རྗེ་འཆང་དཀར་པོ་རྡོ་རྗེ་དང་དྲིལ་བུ་ཐུགས་ཀར་བསྣོལ་ཏེ་འཛིན་པ། ཐམས་ཅད་ཀྱང་ལོངས་སྤྱོད་རྫོགས་སྐུའི་ཆ་ལུགས་ཅན། གནས་གསུམ་ཡི་གེ་གསུམ་གྱིས་མཚན་པར་གྱུར། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ། སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་བཛྲ་ས་མཱ་ཛ་ཛཿཧཱུཾ་བཾ་ཧོཿགཉིས་སུ་མེད་པར་ཐིམ། ཡང་འོད་འཕྲོས་དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས། ཁྱེད་རྣམས་ཀྱིས་འདི་ལ་དབང་བསྐུར་དུ་གསོལ་ཞེས་གསོལ་བ་བཏབ་པས། ཨོཾ་བཛྲཱི་བྷཱ་ཝ་ཨ་བྷི་ཥིཉྩ་ཧཱུཾ། ཞེས་དབང་བསྐུར་ནས། རྡོ་རྗེ་སེམས་པས་དབུ་བརྒྱན་པར་གྱུར། ཨོཾ་སརྦ་ཏ་ཐཱ་ག་ཏ་བཛྲ་པུཥྤེ་ནས་ཤཔྟའི་བར་གྱིས་མཆོད། ཕྱག་བྱར་འོས་པ་སོགས་ཀྱིས་བསྟོད། ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ནི་སྭཱཧཱ། ཞེས་སྤྱན་དབྱེ། ཨོཾ་ཨཱཿཧཱུཾ། ཏིང་ངེ་འཛིན་གྱིས་བསྐྱེད་པ་རྣམས་འོད་དུ་ཞུ་བ་ལས། ལྷ་དང་མཆོད་རྟེན་སོ་སོའི་རྣམ་པར་གྱུར། ཕྱོགས་བཅུ་ན་བཞུགས་(༣ན)
པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། །ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ། རྒྱལ་བ་རྣམས་བརྟན་པར་བཞུགས་སུ་གསོལ། བྱེ་བྲག་ཏུ་ཡང་རྟེན་འདི་ལ་སྤྱན་དྲངས་པའི་ཡེ་ཤེས་པ་རྣམས་རྟེན་འདི་འབྱུང་བ་བཞིས་མ་ཞིག་གི་བར་དུ་བརྟེན་པར་བཞུགས་ནས། བདག་སོགས་རྣམས་ལ་མཆོག་ཐུན་གྱི་དངོས་གྲུབ་སྩལ་དུ་གསོལ། ཨོཾ་སུ་པྲ་ཏིཥྛ་བཛྲེ་སྭཱཧཱ། ཞེས་མེ་ཏོག་ལན་གསུམ་གཏོར། སླར་ཡང་སྔར་བཞིན་མཆོད་བསྟོད་བྱ། དེ་ནས་རྟེན་འབྲེལ་སྙིང་པོ་གང་འགྲུབ་དང་། ཕུན་སུམ་ཚོགས་པ་སོགས་བཀྲ་ཤིས་པའི་ཚིགས་བཅད་ཅི་རིགས་བརྗོད་པར་བྱའོ། །རབ་གནས་གོང་གི་འདི་མ་འགྲུབ་ན། ཨོཾ་སརྦྦ་ཏ་ཐཱ་ག་ཏ་མ་ཎི་ཤ་ཏ་དཱི་བ་ཏེ་ཛྭ་ལ་ཛྭ་ལ་དྷརྨྨ་དྷཱ་ཏུ་རྦྷ་སྭཱ་ཧཱ། སྔགས་འདི་བརྗོད་པས་ཀྱང་རབ་ཏུ་གནས་པའི་གོ་ཆོད་དོ། །དེ་ལྟར་སཱཙྪ་འདེབས་པའི་ལག་ལེན་གྱི། །རིམ་པ་ལེགས་ཚོགས་ལྷུན་འགྲུབ་ཅེས་བྱ་འདི། །རང་གཞན་མང་པོར་ཕན་འདོད་ལྷག་བསམ་གྱིས། །བསྐྲུན་འདོད་བློ་ཡི་ཞིང་ས་གཤིན་པོ་ལ། །ཉེ་ཆར་གྲོང་སྨད་འཕྲིན་ལས་རྒྱ་མཚོ་ཡིས། །བསྐུལ་ཚིག་ས་བོན་ཡི་གེའི་དྲོད་གཤེར་ལས། །དོན་བཟང་མྱུ་གུ་གཡུར་དུ་ཟ་བའི་འབྲས། །སྩོལ་བའི་བྱེད་པོ་ཟ་ཧོར་བནྡེའོ། །མངྒ་ལཾ། །ཤིང་རྟ་ལོར་༸ལྔ་པ་ཆེན་པོའི་གསུང་པར་ཉམས་གསོའི་སྐབས་གསར་བརྐོས།