དབྱུ་གུ་དྲུག་ཅུ་རྩ་བཞིའི་གཏོར་ཆོག་སྲིད་གསུམ་རྣམ་རྒྱལ།
དབྱུ་གུ་དྲུག་ཅུ་རྩ་བཞིའི་གཏོར་ཆོག་སྲིད་གསུམ་རྣམ་རྒྱལ་བཞུགས་སོ། །
ན་མོ་བཛྲ་ཀིརྟ་ཡེ། །འཇམ་དཔལ་དཔའ་བོ་མ་རུངས་བདུད་སྡེའི་དཔུང་། །འདུལ་ཕྱིར་དྲག་པོའི་སྐུར་བསྟན་གཤིན་རྗེ་གཤེད། །བཀའ་སྡོད་ལས་ཀྱི་གཤིན་རྗེར་བཅས་པ་ཡི། །གཏོར་མ་ལ་བརྟེན་མངོན་སྤྱོད་དྲག་པོའི་ལས། །མཐུ་སྟོབས་དབང་ཕྱུག་རྗེ་བཙུན་རྭ་ལོ་ཡི། །ཐུགས་ལ་གབ་པའི་མཚོན་ཆ་ཟབ་མོ་གང་། །འཁོན་སྟོན་ཆོས་རྗེའི་ཕྱག་བཞེས་ཇི་བཞིན་དུ། །ཡི་གེར་འགོད་ལ་ཤེས་ལྡན་རྣ་བ་ཉོན། །འདི་ལ་སྦྱོར་དངོས་རྗེས་གསུམ་ལས། སྦྱོར་བ་ལ། དུས་ཕྱོགས་ཀྱི་ཁྱད་པར་དང་། མཆོད་གཏོར་བཤམ་ཚུལ་གཉིས། དང་པོ་ནི། ཉེར་དགུ་དང་གནམ་གང་། ཉིན་ཕྱེད་མཚན་ཕྱེད། གཟའ་སྐར་གདུག་པ་ཅན་དང་། སྒྲ་གཅན་དང་བསྟུན་དགོས་ཏེ། མར་ངོའི་བཅུ་བཞི་འམ་བཅོ་ལྔ་ཡི། །དགྲ་བོ་ལ་ནི་མཚན་ཕྱེད་དམ། །བགེགས་ལ་ཉི་མ་ཕྱེད་ཀྱི་དུས། །སྲེག་ཚེས་འཆི་སྦྱོར་དག་དང་ལྡན། །ལྷ་སྲིན་ལྟོ་འགྲོའི་ལྟ་བ་དང་། །མཐུན་པའི་ཕྱོགས་སུ་ཁ་བལྟས་ཏེ། །ལས་སྦྱོར་འདི་དག་བརྩམ་པར་བྱ། །ཞེས་གསུངས་སོ། །གཉིས་པ་ནི། འཕུང་གསུམ་གྱི་ས་ལས་བྱས་པའི་སྟེགས་བུའི་ཁར། །དུག་ཁྲག་དང་རོ་སོལ་གྱིས་བྱུགས་པའི་སྟེང་དུ། །རོ་སྐྲའི་(༢ན)
ཐིག་སྐུད་དང་མི་རུས་ཀྱི་རྡུལ་ཚོན་སོགས་ཚོགས་པར་བྱས་ནས་དཀྱིལ་འཁོར་བྲིས་ཏེ། །ཅི་འཚམ་འོས་པའི་ས་སྟེགས་ནི། །གྲུ་གསུམ་པ་ལ་དུག་ཁྲག་དང་། །རོ་སོལ་གྱིས་ནི་བྱུགས་པའི་སྟེང་། །ཆོས་འབྱུང་རྩེ་མོ་དགྲའམ་ལྷོ། །ཡང་ན་ལྷ་མིན་གདོང་ཕྱོཊ་བསྟན། །ཕྱི་རོལ་རྡོ་ར་མེ་རི་ནི། །ཆོས་འབྱུང་དབྱིབས་བཞིན་དེ་ནང་དུ། །གདུང་ཟླུམ་པ་དང་གདུང་བཞི་ཡིས། །མིག་མངས་རིས་སུ་ལིང་ཚེ་དགུ །གདུང་རྣམས་ནག་པོ་ལིང་ཚེ་རྣམས། །ཕྱོགས་མདོག་ཆོས་འབྱུང་ནག་པོ་རྣོ། །རྡོ་ར་མེ་རི་སྣ་ཚོགས་སོ། །ལིང་ཚེ་དགུར་ནི་ཚོམ་བུ་དགུ །དབུས་ཀྱི་མདུན་རྒྱབ་གཉིས་སུ་རེ། །ཕྱོགས་སྐྱོང་མདོག་དང་མཐུན་པར་དགོད། ཅེས་གསུངས་སོ། །དྲུག་ཅུ་པ་རྩི་ཚུལ་ནི། ལྕགས་སླང་སོགས་ཀྱི་ནང་དུ་ནི། །ཟན་ལ་ཐིག་གིས་བགོས་པ་ཡི། །དྲུག་ཅུ་རྩ་བཞི་བགོད་པར་བྱ། །ཕྱི་ནི་ལྕགས་མཁར་ཟུར་དགུ་པ། །ནང་དུ་གཤིན་རྗེའི་དོང་གསུམ་མོ། །བཞིའམ་ཆོས་འབྱུང་རྩེ་མོ་ལྷོ། །དོང་གསུམ་རྩེ་མོ་རང་ལ་བསྟན། །དྲུག་ཅུ་རྩ་བཞི་རྩིག་ཚུལ་ནི། །ཕྱི་ཡི་ཟུར་དགུ་ཉིས་བརྩེགས་དང་། །བང་རིམ་དགུ་ལ་བཞི་བརྩེགས་དང་། །ཀུན་གྱི་དབུས་མར་བདུན་བརྩེགས་སོ། །གསུམ་ནི་དོང་གི་ཁ་གཅོད་དོ། །དོང་གསུམ་(༢བ)
ནང་དུ་དགྲ་བགེགས་ཀྱི། །ལིང་ག་མི་རུས་མགོ་མཇུག་ལོག །གཏོར་མའི་ཕྱོགས་མཚམས་བརྒྱད་དང་ནི། །དབུས་ཀྱི་རྒྱབ་དང་མདུན་རྣམས་སུ། །འཇིགས་བྱེད་དཔའ་བོ་གཅིག་པ་ནི། །ཕྱོགས་སྐྱོང་ཁ་དོག་དང་མཐུན་པ། །དབུས་སུ་འཇིགས་བྱེད་ཞལ་དགུའམ། །ཡང་ན་དཔའ་གཅིག་སྔོན་པོ་རྣམས། །དར་གྱི་ཤམ་བུས་བརྒྱན་པ་འཛུགས། །ཆོས་འབྱུང་རྩེ་མོར་ལས་གཤིན་གྱི། །གཏོར་མ་ཟུར་གསུམ་ཤ་ཁྲག་དང་། །དར་ནག་གིས་ནི་བརྒྱན་པ་བཞག །ཅེས་གསུངས་པའི་ཕྱག་ལེན་ལྟར་བཤམས། །མདུན་དུ་ཁྲག་སྣའི་མཆོད་པ་དང་ཞེས་སོགས་གསུངས་པ་ལྟར། །མདུན་དུ་ཁྲག་གི་ཨརྒྷཾ། དབང་པོའི་མེ་ཏོག །གསུར་ཆེན་གྱི་དུད་པ། ཞུན་ཆེན་གྱི་མར་མེ། ཤ་རུས་ཀྱི་ཞལ་ཟས། ནང་མཆོད་གཙོ་བོར་དང་ལས་གཤིན་གྱི་མཆོད་གཏོར་ལིངྒ་དང་བཅས་པ་བཤམ་མོ། །གཉིས་པ་དངོས་གཞི་ནི། ནང་མཆོད། མཆོད་པ། གཏོར་མ་བྱིན་རླབས་པ། སྔགས་དྲུག་ཕྱག་རྒྱ་དྲུག་གིས་བྱིན་རླབས་རྣམས་བྱ། སྭ་བྷཱ་ཝས་སྦྱངས་སྟོང་པའི་ངང་ལས། མདུན་དུ་སྲུང་བའི་འཁོར་ལོ་ཡངས་ཤིང་རྒྱ་ཆེ་བའི་དབུས་སུ། གནམ་ལྕགས་ལ་གྲུབ་པའི་ལྕགས་མཁར་ནག་པོ་ཟུར་དགུ་པ་འཇིགས་སུ་རུང་བའི་ལྟེ་བར་བྷྲཱུཾ་ལས་གཞལ་ཡས་ཁང་གྲུ་བཞི་སྒོ་བཞི་བ། མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། པདྨ་དང་ཉི་མའི་གདན་ལ་ཧཱུཾཿ ལས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས། དཔལ་རྡོ་རྗེའི་འཇིགས་བྱེད་ཆེན་པོ་ཞེས་པ་ནས་བཟུང་སྟེ། ཀློང་དཀྱིལ་ན་བཞུགས་པ། དེའི་མདུན་དུ་པདྨ་དང་ཉི་མ་ཞེས་སོགས་ལས་གཤིན་ཡབ་ཡུམ་གྱི་མངོན་རྟོགས་བསྐྱེད། ཨོཾ་ཧྲཱིཿཥྚྲི་ཝི་ཀྲཱི་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧཱུཾ་སརྦ་དུ་ཥྚ་ན་ཞེས་པ་ནས། འབྱུང་པོའི་ཚོགས་དང་བཅས་པ་ལྷགས་པར་གྱུར། ཛཿ འཇམ་(༣ན)
དཔལ་རང་བཞིན་ཆོས་རྣམས་ཀུན་གྱི་དངོས། །ཞེས་པ་ནས། འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །ཛཿའཇམ་དཔལ་གཤིན་རྗེ་གཤེད་ཀྱི་བཀའ་སྡོད་མཆོག །ཅེས་པ་ནས། གཉིས་སུ་མེད་པར་གྱུར། རང་གི་ཐུགས་གའི་ཧ྄ཱུཾ་གི་འོད་ཟེར་ཞེས་པ་ནས། ཡོངས་སུ་གྱུར་པ་ལས། གཙོ་བོ་ལ་མི་བསྐྱོད་པ་དང་། ལས་ཀྱི་གཤིན་རྗེ་ལ་རྡོ་རྗེ་ནག་པོ་རྩེ་ལྔ་པས་དབུ་བརྒྱན་པར་གྱུར། ཨོཾ་ཧྲཱིཿཥྚི་ཞེས་པ་ནས། ས་མ་ཡ་སྟྭཾ། རྒྱས་པར་སྤྲོ་ན། རྒྱལ་བ་རྣམས་ནི་གཙང་གྱུར་ཅིང་དང་། སྟོང་གསུམ་ཁྱོན་ལྟར་ཡངས་པ་སོགས་བྱེད། བསྡུ་ན་སྔགས་མཆོད་འབུལ། ནང་མཆོད་བླ་མ་བརྒྱུད་པའི་མཚན་ནས་བརྗོད་པའམ། བསྡུ་ན་སྔགས་ཀྱིས་འབུལ། གཏོར་མ་འབུལ་བ་ནི། གཙོ་བོ་ལ་ཡུམ་དང་འཁོར་སྔགས་དོར། གཞན་དངོས་གཞི་དང་མཐུན། ལས་གཤིན་གྱི་གཏོར་མ་འབུལ། གཉིས་མེད་ཐུན་མོང་མ་དང་། འཇམ་དཔལ་བཀའ་ཉན་མས་བསྟོད། ཕྱོགས་སྐྱོང་འཁོར་དང་བཅས་པ་ཞེས་པ་ནས། རང་གནས་སུ་གཤེགས་པར་གྱུར། བླ་མ་མཆོག་དང་དཀྱིལ་འཁོར་ལྷ་ཚོགས་དང་། ཞེས་སོགས་ཀྱི་བཤགས་པ་དང་། བདེ་ཆེན་ལྷུན་གྲུབ་མའི་བསྐང་གསོ། གཙོ་བོ་དང་ལས་གཤིན་གྱི་བཟླས་པ་ཅི་རིགས་པ་བྱས་རྗེས། གཏོར་མ་སྔར་བཞིན་འབུལ། གཞི་བདག་གཏོར་མ་བཏང་། འཇམ་དཔལ་གསེར་མདོག་མ་དང་། ལས་གཤིན་གྱི་བསྟོད་པ་གང་འོས་བྱ། འཆི་བདག་མའམ། བཅོམ་ལྡན་གཤིན་རྗེ་གཤེད་ཀྱི་བཀའ། ཞེས་སོགས་བསྐུལ་གང་རིགས་ཀྱི་རྗེས་སུ་གསེར་སྐྱེམས་བཏང་། ལིངྒ་དགུག་གཞུག་བྱ། སྡང་བའི་དགྲ་དང་གནོད་པའི་བགེགས། ཞེས་པ་ནས། ཀཱ་ལ་རཱུ་པ་དགྲ་བགེགས་མཱ་ར་ཡ་ཧཱུཾ་ཕགས། ཅེས་ཆ་དགུར་གཏུབས་ལ་ཆ་གཅིག་གཏོར་མ་(༣བ)
ཆ་བརྒྱད་དྲུག་ཅུ་པ་ལྟར་བཤམས། གཙོ་བོ་དང་ལས་གཤིན་ལ་གཏོར་མ་ལྟར་འབུལ། ཕྱོགས་སྐྱོང་ལ་བྷུ་ཙ་ར་བརྒྱད་ཚན་བརྒྱད་དུ་བསྔོས་རྗེས་བཟློག་པ་བྱའོ། །གསུམ་པ་མཇུག་གི་ཆོ་ག་ནི། གཏོར་མ་བྱིན་རླབས་དང་སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབས། གཙོ་བོ་དང་ལས་གཤིན་ལ་འབུལ་བ་དང་། དྲུག་ཅུ་རྩ་བཞི་བསྔོ་བ་སྔར་ལྟར་བྱ། དེ་ནས། རྣལ་འབྱོར་དབང་ཕྱུག་ཟོར་འཕེན་ནོ། །སོགས་ཀྱི་སྒོ་དབྱེ་དང་། རྒྱལ་བ་སྤྱི་བསྐུལ་འདི་བཀའ་བརྒྱད་ཁྲོ་རོལ་གྱི་ཚིག་ཡིན་པས་གསར་མ་ལ་ཧ་ཅང་འབྲེལ་མི་ཆགས་ཀྱང་དིང་སང་མཛད་སྲོལ་འདུག་པ་དང་། སྐད་འཛུད་ཆེ་བ་སོགས་ནས་བྱས་ཀྱང་འགལ་བ་མེད། དེ་རྗེས་གོམ་པ་ཞེ་དགུའི་སར་ཁྱེར་ཏེ། གསེར་སྐྱེམས་དང་བཟློག་བསྐུལ་སྐབས་ཐོབ་སྦྱར་ནས་གཏོར་ཟོར་འཕེན། ནང་དུ་ལོག་སྟེ་སྲུང་འཁོར་དང་མངའ་གསོལ། གཏང་རག་ཤིས་བརྗོད་དཀྱིལ་འཁོར་བསྡུ་བ་སོགས་ལས་ཀྱི་རྗེས་མི་མངོན་པར་བྱའོ། །ལས་གཤིན་ཁོ་ན་ལ་བརྟེན་ན་ཕྱོགས་སྐྱོང་རྣམས་འོད་གསལ་དུ་འཇུག་པ་མི་རིགས་པས། ཕྱོགས་སྐྱོང་རང་གི་ཙཀླི་འཛུགས་དགོས་ལ་དེ་ཡང་རྩ་བ་རྣམས་སེར་གྱིས་གསལ་བར་བྱས་ཤིང་། བསྡུས་པ་ལས་གཤིན་ཁོ་ན་ལ་བརྟེན་པར་འདོད་ན། རྒྱ་ཚོས་ཀྱིས་ཕྱེ་བ་རྣམས་དོར་བས་འགྲུབ་བོ། །གང་ཞིག་ཐུབ་བསྟན་དབྱར་གྱི་པདྨོའི་ཚལ། །ཞིང་བཅུའི་དགྲ་བགེགས་གླང་པོས་ཉེར་འཇོམས་ཚེ། །མངོན་སྤྱོད་དྲག་པོས་འདུལ་བའི་མཚོན་ཆ་འདི། །རྗེ་བཙུན་རྭ་ལོའི་ཐུགས་བཅུད་ཆེས་ཟབ་ཀྱང་། །ཚུལ་འདི་ཇི་བཞིན་འཛིན་པའི་རིག་སྔགས་འཆང་། །ཨུ་དུམ་ཝ་ར་ལྟ་བུར་ཆེས་དཀོན་པས། །བསྟན་དང་འགྲོ་ལ་ཕན་པའི་བསམ་པ་ཡིས། །བཀླགས་ཆོག་འཁྱེར་བདེའི་ཚུལ་དུ་གསལ་བར་བཀོད། །དགེ་ཚོགས་ཉིན་མོར་བྱེད་པའི་འོད་ཟེར་གྱིས། །མི་མཐུན་མུན་པའི་(༤ན)
སྨག་རུམ་དྲུངས་ཕྱུང་ནས། །ཕན་བདེའི་འདབ་བརྒྱ་བཞད་པའི་རྣམ་དཔྱོད་ཀྱིས། །རྫོགས་ལྡན་གསར་པའི་དགའ་སྟོན་རྒོད་པར་ཤོག །ཅེས་རྗེ་བཙུན་རྭ་ལོའི་ཐུགས་ཀྱི་ཟབ་གནད། དབྱུ་གུ་དྲུག་ཅུ་རྩ་བཞི་ལ་བརྟེན་པའི་གཏོར་ཆེན་གྱི་རིམ་པ་ཁྲིགས་སུ་བསྡེབས་པ་སྲིད་གསུམ་རྣམ་རྒྱལ་ཞེས་པ་འདི་ཡང་ཕོ་བྲང་གུང་རི་དཀར་པོའི་སྐུ་གཉེར་དཔོན་དགེ་སྟེང་བླ་མ་བྱམས་པ་ཀུན་དགའ་འབྱུང་གནས་ཀྱིས་བསྐུལ་བ་དང་། རང་གི་བརྗེད་བྱང་དུ་ཆོས་ཀྱི་རྒྱལ་པོ་བཙོང་ཁ་པ་ཆེན་པོའི་རིང་ལུགས་འཛིན་པ་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོས་རྭ་ལུགས་ཀྱི་ཡིག་ཆ་དང་བླ་མའི་མན་ངག་ལ་བརྟེན་ནས་སྦྱར་བའི་ཡི་གེ་བ་ནི་ངག་དབང་དགེ་ལེགས་སོ། །སརྦ་མངྒ་ལཾ།། །།