གཞི་གསུམ་ཆོ་གའི་ཆ་རྐྱེན་གཏོར་མ་ཆ་བཞི་དང་གཞི་བདག་གཏོར་བསྔོ།
གཞི་གསུམ་ཆོ་གའི་ཆ་རྐྱེན་གཏོར་མ་ཆ་བཞི་དང་གཞི་བདག་གཏོར་བསྔོ་བཞུགས་སོ། །
སྭ་སྟི་པྲ་ཛ་བྷྱཿཆེར་སྙིགས་ལྔ་བདོའི་སྨག་རུམ་སྟུག་པོ་རུ། །མཁྱེན་བརྩེ་ནུས་པའི་མཐུ་དཔུང་ཉིན་བྱེད་དབང་། །འཆར་ནུབ་དང་བྲལ་སྣང་བཀྲག་འོད་པོ་ཆེ། །དོན་ཀུན་གྲུབ་པའི་ཐུགས་བསྐྱེད་བསེར་བུས་གཡོས། །དེའང་གཞི་གསུམ་གྱི་ཆོ་གའི་གཏོར་མ་ཆ་བཞི་གཏོང་ཚུལ་ལ་མཁས་རློམ་འགས་རང་གི་སྣང་བར་གང་དྲན་གྱི་སྔགས་ལུགས་བཞིན་རང་ལྷར་བསྐྱེད་ཅིང་གཏོར་མ་བརླབ་བསྔོས་མཚོན་པ་སྦྱར་བ་མདོ་ལུགས་ལ་མི་འཐད་པར་མ་ཟད་དབང་རྗེས་གནང་ཐོབ་པའི་སྔོན་ལ་མིང་ཡང་མ་ཐོས་པར་བྱེད་པ་རྣམ་སྨིན་མི་བཟད་པ་མྱོང་དགོས་པ་གཞུང་མང་པོར་འབྱུང་བས་སྐབས་སུ་གང་བབ་ལག་ཏུ་བསྟར་ན་ཉེན་ཆུང་ལ་ཁེ་ཆེ་བས་རེ་ཞིག་འདི་ལྟར། དཀོན་མཆོག་གསུམ་གྱི་བདེན་པ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་ཆ་བཞིའི་གཏོར་མ་རྣམས་ལྷ་མིའི་ཡོ་བྱད་དམ་པ་ཞལ་ཟས་ཕུལ་དུ་ཕྱིན་པ་སྣ་ཚོགས་ཀུན་ཏུ་བཟང་པོའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱན་ཀླུབས་པ་དང་ལྡན་པར་གྱུར་ཅིག །མཆོད་སྦྱིན་གྱི་ཡུལ་དུ་གྱུར་པའི་མགྲོན་རྣམས་ཀྱང་གཤེགས་ཤིང་གདན་འཛོམ་ནས་དེ་བཞིན་དུ་བཞེས་ཏེ་ལོངས་སྤྱོད་པར་ཅི་གནང་། གཏོར་མ་དང་པོ། འདོད་ཡོན་ལྔ་ལྡན་ཟས་མཆོག་དམ་པ་འདི། །དཀོན་མཆོག་གསུམ་དངོས་རྩ་བརྒྱུད་བླ་མ་དང་། ཡི་དམ་རྒྱལ་བ་སྲས་བཅས་ཐམས་ཅད་ལ། །དབུལ་ལོ་མཆོག་(༢ན)
ཐུན་དངོས་གྲུབ་སྩལ་དུ་གསོལ། །གཉིས་པ། འདོད་ཡོན་ལྔ་ལྡན་ཟས་མཆོག་དམ་པ་འདི། །བསྟན་འགྲོའི་ཕན་བདེ་བླ་ནས་བླར་སྤེལ་བའི། །སྲུང་མ་དམ་ཅན་རྒྱ་མཚོའི་ཚོགས་རྣམས་ལ། །འབུལ་ལོ་འཕྲིན་ལས་མཐའ་དག་སྒྲུབ་པར་མཛོད། །གསུམ་པ། འདོད་ཡོན་ལྔ་ལྡན་ཟས་མཆོག་དམ་པ་འདི། །གདོན་བགེགས་འབྱུང་པོ་ལན་ཆགས་རྒྱུད་ལྔའི་འགྲོ། །སྙིང་རྗེའི་ཡུལ་དུ་གྱུར་པ་མ་ལུས་པར། །བསྔོས་ཚིམ་སྒྲིབ་བྱང་སངས་རྒྱས་མྱུར་ཐོབ་ཤོག །བཞི་པ། འདོད་ཡོན་ལྔ་ལྡན་ཟས་མཆོག་དམ་པ་འདི། །ཡུལ་གཞིས་གནས་མལ་འཚོ་བ་ཉེར་སྦྱོར་བའི། །བསྟན་མ་བཅུ་གཉིས་ལྷ་ཀླུ་ལ་སོགས་པར། །འབུལ་ལོ་ཆོས་ལྡན་འཕྲིན་ལས་ཐོགས་མེད་སྒྲུབས། བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །འཕགས་པ་རྣམས་ལ་མཆོད་པ་དང་། །སེམས་ཅན་རྣམས་ལ་བྱིན་པ་ཡིས། །དོན་རྣམས་གང་དག་བསམས་པ་ཀུན། །དེ་དག་ཐམས་ཅད་ཅི་རིགས་པ། །འཇིག་རྟེན་ཁམས་འདིར་མ་ལུས་པར། །ཐོགས་པ་མེད་པར་འབྱུང་གྱུར་ཅིག །ཆོས་འཁོར་རྒྱལ་དུ་ཐམས་ཅད་མཁྱེན་པ་དགེ་འདུན་རྒྱ་མཚོའི་ཕྱག་བཞེས་ལ་སོ་ཐར་བྱང་སེམས་གསང་སྔགས་ཀྱི་ཕྱིར་བཅོས་མཛད་པ་དེ་གསུམ་ཐོབ་པའི་གང་ཟག་གི་ཕུན་སུམ་ཚོགས་པའི་བླང་བྱར་དགོངས་ནས་གསུངས་ནའང་མ་ཐོབ་པ་རྣམས་ཀྱི་སྤང་བྱར་བཤད་པས་གང་ཐོབ་ཀྱི་ཕྱིར་བཅོསལེགས་པ་བཞིན་དུ་ཆ་བཞིའི་གཏོར་མ་འབུལ་ཚུལ་ཡང་སོ་ཐར་གྱི་སྐབས་མདོ་དང་འབྲེལ་བ་ལེགས་པར་མཐོང་(༢བ)
ཞིང་ཚིག་སྣ་ཐུང་བར་ཕལ་ཆེར་དགའ་བ་ལྟར་བཀོད། གཞི་བདག་གཏོར་མ་ཅུང་ཟད་རྒྱས་པ་ནི། དཀོན་མཆོག་གསུམ་གྱི་བདེན་པ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་ཚོགས་གཉིས་ཡོངས་སུ་རྫོགས་པའི་མཐའ་ཐང་ཆེན་པོ་དང་ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་གཏོར་མ་ལྷ་མིའི་ཡོ་བྱད་དམ་པ་ཞལ་ཟས་ཕུལ་དུ་ཕྱིན་པ་སྣ་ཚོགས་ཀུན་ཏུ་བཟང་པོའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱན་ཀླུབས་པ་དང་ལྡན་པར་གྱུར་ཅིག །བསྟན་སྐྱོང་ཡུལ་ལྷ་གཞི་བདག་གི་ཚོགས་དང་བཅས་པ་ཐམས་ཅད་གཤེགས་ཤིང་གདན་འཛོམ་ནས་དེ་བཞིན་དུ་བཞེས་ཏེ་ལོངས་སྤྱོད་པར་ཅི་གནང་། མཆོད་སྦྱིན་གྱི་གཏོར་མ་འདོད་པའི་ཡོན་ཏན་ལྔ་དང་ལྡན་པ་འདི་ཉིད་སའི་ལྷ་མོ་བསྟན་མས་གཙོ་བྱས་ས་གཞི་ཀུན་ལ་དབང་བའི་གཉུག་མར་གནས་པ་རྣམས་དང་ཁྱད་པར་བོད་ཁ་བ་ཅན་གྱི་རྒྱལ་ཁམས་བསྲུང་ཞིང་སྐྱོང་བའི་སྲུང་མ་བསྟན་མ་བཅུ་གཉིས། ལྷ་ཀླུ་སོགས་མི་མ་ཡིན་མཐུ་བོ་ཆེ་སྤྱི་དང་བྱེ་བྲག་ཡུལ་ཕྱོགས་ས་ཕྱོགས་འདི་དག་གི་དགོན་གྲོང་གནས་མལ་བསྲུང་བའི་བསྟན་སྐྱོང་རྡོ་རྗེ་དྲག་མོ་རྒྱལ། པེ་ཧར་དགྲ་ལྷ་ཆེན་པོ་གནས་ཆུང་ཆོས་ཀྱི་རྒྱལ་པོ་སོགས་དཀར་ཕྱོགས་ལ་མངོན་པར་དགའ་བ་མ་ལྟར་བྱམས་ཤིང་སྲིང་ལྟར་དུངས་པ་མགོན་སྐྱབས་དཔུང་གཉེན་མཛད་པའི་ཚོགས་རྣམས་ལ་འབུལ་ལོ། །སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་། བསྟན་པའི་རྩ་ལག་དམ་པ་རྣམས་ཞབས་པད་བརྟན་པ་དང་འཇིག་རྟེན་ཁམས་སུ་མི་འདོད་པའི་ཉེར་འཚེ་ཞི་ཞིང་དགེ་ལེགས་རྒྱ་ཆེན་པོ་འབྱུང་བ་དང་། བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་གཞིས་ལམ་བྱེས་གསུམ་ཐམས་ཅད་མཐུན་རྐྱེན་མཐའ་དག་སྦྱོར། ཆོས་ལྡན་(༣ན)
གྱི་འཕྲིན་ལས་ཐམས་ཅད་སྒྲུབས། སྔོན་གྱི་ལས་དང་འཕྲལ་གྱི་རྐྱེན་ལས་གྱུར་པའི་བྱ་སྤྱོད་ངན་པར་རུ་ང་ཕྲག་དོག་མ་མཛད་པར་ཕྱི་ནང་གི་ནད་གདོན་བར་གཅོད་མི་མཐུན་པའི་ཕྱོགས་ཐམས་ཅད་ཞི་བར་མཛད་དུ་གསོལ། བདག་གི་བསམ་པའི་སྟོབས་དང་ནི། ཞེས་སོགས་བརྗོད། དེང་དུས་ཁྱད་འཕགས་སྐོམས་གདུངས་སྨིག་རྒྱུའི་ཆུས། །སེལ་འདོད་སྙན་གྲགས་རྗེས་བསྙེག་རིང་སྤོངས་ལ། །ཐུབ་གསུང་ཇི་བཞིན་བསྟར་ནས་རང་གཞན་ཀུན། །རྣམ་མཁྱེན་གོ་འཕང་སྒྲུབས་ཤིག་ཤེས་ལྡན་ཚོགས། །ཞེས་ཆོས་སྡེ་ཆེན་པོ་དཔལ་ལྡན་འབྲས་སྤུངས་ཀྱི་དགེ་སྐོས་རྒན་པ་གསུང་རབ་སྨྲ་བ་རབ་འབྱམས་པ་ཐོགས་མེད་དཔལ་བཟང་གིས་ཁ་བཏགས་ཉིན་བདེ་མ། དངུལ་གྱི་སྲང་ག་བརྒྱ་ཕྲག་གོས་ཡུག་དང་བཅས་ཆ་བཞི་དང་གཞི་བདག་གཏོར་མ་གཉིས་སྔར་ཡོད་རིང་ཐུང་ཞུགས་ནས་འདོན་མི་བདེ་བར་ཆ་ཐམས་ཅད་ཀྱིས་མཐུན་པར་གསུངས་ཆོག་པ་ཞིག་དགོས་ཚུལ་ལྟར་ཟ་ཧོར་གྱི་བཎྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །
༦༢༧
༦༢༨
༦༢༩
༦༣༠
༦༣༡
༦༣༢
༦༣༣
༦༣༤
༦༣༥
༦༣༦
༦༣༧
༦༣༨
༦༣༩
༦༤༠