ཀླུ་གཏོར་རྒྱུན་ཁྱེར།
ཀླུ་གཏོར་རྒྱུན་ཁྱེར་བཞུགས་སོ། །
གདེངས་ཅན་ཚོགས་རྣམས་དགའ་བ་བསྐྱེད་པ་ལ། །བརྟེན་ནས་འགྲོ་ལ་ཕན་བདེའི་དཔལ་སྟེར་བ། །ཚེགས་ཆུང་ཙམ་གྱིས་སྒྲུབ་ནུས་ངོ་མཚར་གཏམ། །འཁྲུལ་མེད་དམ་པའི་གསུང་རྒྱུན་འདི་ན་སྤེལ། །དེ་ཡང་གཏོར་མ་ཕྱག་ལེན་ལྟར་བཤམས། རྡོ་རྗེ་གནོད་སྦྱིན་གྱིས་ཕྱག་རྒྱས། ཨོཾ་བཛྲ་ཡཀྵ་ཧཱུཾ། ཞེས་པས་མ་དག་པ་བསངས། རྡོ་རྗེ་མེའི་ཕྱག་རྒྱས། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷ་ཉྩ་ར་ཎ་ཧཱུཾ་ཕཊ། ཅེས་པས་གཟི་བྱིན་བསྐྱེད། རྡོ་རྗེ་བསྡམ་པའི་ཕྱག་རྒྱ། ཨོཾ་ཨ་ཁ་རོ་མུ་ཁཾ་སརྦ་དྷ་རྨཱ་ཎཱཾ་ཨཱདྱ་ནུ་ཏྤནྣ་ཏྭཱ་ཏ་ཨོཾ་ཨཱཿཧཱུཾ་ཕཊ་སྭཱཧཱ། ཞེས་པས་རིན་པོ་ཆེའི་སྣོད་དུ་བདུད་རྩིའི་རྒྱ་མཚོ་འདོད་པའི་ཡོ་བྱད་ཀྱིས་གང་བར་བསམ། འདོད་རྒྱལ་གྱི་ཕྱག་རྒྱས་རང་གི་སྙིང་ག་ནས་འོད་ཟེར་འཕྲོས་པས་ཀླུའི་རྒྱལ་པོ་འཁོར་དང་བཅས་པ་དང་། བྱེ་བྲག་ཏུ་བདག་ཅག་ལ་གནོད་པའི་ཀླུའི་རིགས་ཐམས་ཅད་བཛྲ་ས་མ་ཛཿས་སྤྱན་དྲངས་ཨོཾ། ཀླུ་རྒྱལ་མཐའ་ཡས་ནོར་རྒྱས་བུ། །འཇོག་པོ་དང་ནི་སྟོབས་ཀྱི་རྒྱུ། །པདྨ་པདྨ་ཆེན་པོ་དང་། །དུང་སྐྱོང་དང་ནི་རིག་ལྡན་ནོ། །ལྷ་(༢ན)
མོ་ལྷ་མོ་ཆེན་པོ་དང་། ཟླ་བའི་སྤྱི་གཙུག་སྤྱི་གཙུག་ཆེ། །དབྱུག་འཛིན་དབྱུག་འཛིན་ཆེན་པོ་དང་། །སོག་མ་མེད་དང་ཧུ་ལུནྟ། །དགའ་བོ་དང་ནི་ཉེར་དགའ་བོ། །རྒྱ་མཚོ་རྒྱ་མཚོ་ཆེན་པོ་དང་། །ཚ་བ་ཚ་བ་ཆེན་པོ་དང་། དཔལ་གྱི་འོད་དང་འོད་པོ་ཆེ། །རིན་ཅེན་འོད་དང་གཟུགས་མཛེས་དང་། གཟུགས་མཛེས་ཆེན་པོ་སྦྲུལ་བཟང་དང་། །ལྟོ་འཕྱེ་ཆེན་པོ་ཙི་ལི་དང་། ཙི་ལི་ཆེན་པོ་རྣམ་དག་ནི། །མཆོད་པའི་གནས་འདིར་གཤེགས་སུ་གསོལ། །ཨོཾ་ཨཱ་གཙྪ་ཨཱ་གཙྪ་མ་ཧཱ་ནཱ་ག་ཨདྷི་པ་ཏ་ལེ་སརྦ་བྷུ་རྦྷུ་ཝ་ཕྲུཾ་ཕུ་སྭཱཧཱ། ཞེས་པས་མདུན་དུ་བྱོན་པར་བསམ་ལ། པདྨ་ཀ་མ་ལ་ཡེ་སྟྭཾ་གྱིས་གདན་ཕུལ། མཧཱ་ནཱ་ག་ཨ་དྷི་པ་ཏ་ཡེ་གྲྀ་ཧྣ་དཾ་ཨརྒྷཾ་སྭཱཧཱ། དྷཱུ་པྀ་སྭཱཧཱ། དཱི་པཾ་སྭཱཧཱ། གནྡྷཾ་སྭཱཧཱ། ཞེས་པས་མཆོད་ལ། ཀླུ་དགའ་བར་བྱེད་པའི་ཕྱག་རྒྱ་དང་། ཨོཾ་ཧི་ལི་ཧི་ལི་མཧཱ་ཧི་ལི་ཕྲུཾ་བུ་སྭཱཧཱ། ཞེས་ལན་གསུམ་པ། ཨོཾབྷཀྵ་ཡ་བྷ་ཀྵ་ཡ་ས་མ་ཡ་ཏིཥྛ་ཕྲུཾ་ཕུ་ཧཱུཾ་སྭཱཧཱ། ཞེས་ལན་གསུམ་ལ་སོགས་པས་ཕུལ་ནས། ཡེ་དྷ་རྨཱ་ཧེ་ཏུ་པྲ་བྷ་ཝཱ་ཧེ་ཏུ་ཏེཥཱ་ནྟ་ཐཱ་ག་ཏོ་ཧྱ་ཝད་ཏ། ཏེ་ཥྦ་ཉྩ་ཡོ་ནི་རོ་དྷ་ཨེ་ཝཾ་བཱ་དཱི་(༢བ)
མཧཱ་ཤྲ་མཎཿ སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཞེས་ཆོས་ཀྱི་སྦྱིན་པ་བྱིན་ལ། ཀླུའི་རྒྱལ་པོ་བརྒྱད་ཀྱིས་གཙོ་བྱས་པའི་ཀླུའི་རིགས་སུ་གྱུར་བ་ཐམས་ཅད་དང་། བྱེ་བྲག་ཏུ་བདག་ཅག་འཁོར་དང་བཅས་པ་ཐམས་ཅད་ལ། གནོད་ཅིང་ལན་ཆགས་པའི་ཀླུ་དང་ས་བདག་ཐམས་ཅད་གཏོར་མ་འདིས་ཚིམ་ཞིང་མཉེས་པར་གྱུར་ཅིག །གནོད་པ་དང་གདུག་པའི་བསམ་པ་ཞི་ཞིང་ཕན་པ་དང་ཞི་བས་བྱང་ཆུབ་ཀྱི་སེམས་ལྡན་པར་གྱུར་ཅིག་ཅེས་དང་། ཨོཾ་ནཱ་ག་ཨ་དྷི་པ་ཏ་ཡེ་གཙྪ་ཞེས་པས་གཤེགས་སུ་གསོལ། བྱ་ཁྱུང་གི་ཕྱག་རྒྱས། ཨོཾ་ག་རུ་ཌ་ཧེ་ཙ་ལེ་ཙ་ལེ་སྭཱཧཱ། ཞེས་པས་ནག་པོའི་ཀླུ་རྣམས་བསྐྲད་པར་བསམ། བདག་གི་བསམ་པའི་སྟོབས་དང་ནི། དེ་བཞིན་གཤེགས་པའི་སྦྱིན་སྟོབས་དང་། ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པར། །ཐོགས་པ་མེད་པར་འབྱུང་གྱུར་ཅིག །ཅེས་བདེན་སྟོབས་བརྗོད། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །ཅེས་སོགས་བསྔོ་སྨོན་བྱའོ། །སྤྱིར་ཀླུ་གཏོར་ནི་ཐེབས་ཡོད་མེད་ལ་ལྟོས་ན་དཔལ་ལྡན་ས་སྐྱ་བའི་ཕྱག་ལེན་གྱི་དཀར་ཆ་བཞི་པའི་ནང་གི་ཀླུ་གཏོར་འདི་རྒྱུན་དུ་མཛད་ཅིང་ཕན་ཡོན་ཆེ་བས། འཕགས་པ་རིན་པོ་ཆེ་དང་རྒྱལ་སྲས་ཐོགས་(༣ན)
མེད་བཟང་པོ་དཔལ་སོགས་གོང་མ་རྣམས་ཀྱིས་ཡིག་ཆ་ནས། རྗེ་ཤར་ཁང་པ་ཤེས་རབ་རྒྱལ་མཚན་གྱིས་གསལ་བར་མཛད་པའི་ཡི་གེ་ལས་ཕྱུང་སྟེ་རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་རྒྱུན་ཁྱེར་དུ་ཟ་ཧོར་གྱི་བནྡྷེས་བཀོད་པའི་ཡི་གེ་པ་ནི་གནས་བན་འཇམ་དབྱངས་སོ། །