གཏོར་མ་བརྒྱ་རྩ་བཀླགས་པས་དོན་འགྲུབ།
གཏོར་མ་བརྒྱ་རྩ་བཀླགས་པས་དོན་འགྲུབ་ཅེས་བྱ་བ་བཞུགས། །
ན་མ་ཤྴིརསཱཏིརཏྣབྷྱཾ། རང་བཞིན་ཡོངས་དག་ཀུན་གསལ་མཛེས་མའི་འདྲེན་བྱེད་དཀྱུས། །དབང་གཞུ་ལྟར་འཁྱུག་མ་འདྲེས་འཁྱོག་པོའི་མཚར་སྡུག་གིས། །སྣ་ཚོགས་བློ་ཡི་འདོད་ལྡན་དགའ་བའི་དཔལ་སྟེར་ཅན། །ཟས་གཙང་སྲས་ཀྱི་སྲིད་འདིའི་དུཿ ཁའི་ཚ་གདུང་བཅིལ། །ཏིང་འཛིན་ལྕགས་ཀྱུའི་རྫས་ཀྱིས་ལག་ལྡན་སྣར། །བཏབ་པས་རང་དགར་འཕྱན་མིན་སྦྱིན་པའི་ཁུར། །རླབས་ཆེན་ཐེག་པའི་བསོད་ནམས་གོམ་སྟབས་ཀྱིས། །བྱང་གྲོལ་མྱུར་དུ་བགྲོད་པའི་བྱེད་པོ་མཆོག །སྔོན་རབས་དམ་པའི་ལམ་སྲོལ་སྐྱེད་ཚལ་ནས། །རྒྱས་བསྡུས་སྐབས་ཀྱིས་ཕྱེ་བའི་ཕྲ་ལྡེམ་ཅན། །ཀླགས་པས་དོན་ཀུན་འགྲུབ་པའི་ཨུཏྤལ་གྱི། །མེ་ཏོག་ཕོན་པོ་རྣ་བའི་རྒྱན་དུ་དངར། །དབུས་འགྱུར་(༢ན)
སྣ་ཚོགས་རྟ་ཅན་གྱི། །གྲོང་ཁྱེར་ཀ་པི་ལ་ཝརྟུའི། །ཕུག་ཅན་ངོས་ན་གཅུང་དགའ་བོ། །མྱང་འདས་ཚུལ་ལ་ཡིད་ཕྱོགས་ཚེ། །སྔོ་བསངས་དུས་སུ་འཇུངས་པའི་འབྲས། །ཉེར་གྲུབ་ཞིག་གིས་དགའ་བོ་ཁྱོད། །ཞག་བདུན་ཚུན་དུ་ཉི་བུ་ཡི། །མཆེ་བའི་ཕྲག་འགྲོ་བདག་ཅག་གི །ངང་ཚུལ་བསྐལ་པ་བརྒྱད་ཁྲིར་མྱོང་། །ཞེས་པའི་མཚོན་ཆ་ཐོས་འཛིན་དུ། །བསྣུན་པས་ཡིད་ལ་རྨ་ཕྱུང་བའི། །ཟུག་རྔུ་འཁུན་སྒྲས་སྨན་པ་མཆོག །ཉི་མའི་གཉེན་དྲུང་གསོལ་བའི་མཐུས། །སྔགས་དང་དམིགས་པ་ཉལ་འགྲོ་ཟན། །རོ་ནུས་སྟོབས་ལ་ཚེགས་ཆུང་ངུས། །དོན་བཟང་འགྲུབ་པ་སྩལ་བ་གང་། །ལག་ཏུ་བསྟར་བས་ཉམ་ང་བའི། །ཚུལ་ལས་བཟློག་པའི་བདེ་བ་ཐོབ། །རིམ་བཞིན་བརྒྱུད་དེ་སཱ་ལའི་ལྗོངས། །ལྷ་གཅིག་དཱི་པཾ་ཀ་ར་སོགས། །དཾ་པ་དུ་མའི་རྗེ་བཙུན་གྲགས་པ། ཕྱག་སྲོལ་རྒྱུན། །མཆོག་དམན་འགའ་ཡིས་ཉམས་བླངས་པས། །ཚེ་ནོར་མངོན་མཐོ་ངེས་ལེགས་རྣམས། །ཐོབ་ཅེས་སྔོན་རབས་སྒྲོས་སུ་སྣང་། །དེ་ཡང་འཚེ་བའི་སྣོད་པའི་རིམས་ཆག་གྲུམས་བམ་ཤིན་ཏུ་ཆུང་བ་བསེ་ལྕགས་ཕོར་བ་སྣོད། བཞི་པོ། ཕྱིར་དོར་མཐུན་པའི་བྷཎྜ་བརྒྱད། ཞེ་སར། དངུལ། ཟངས་གར་ག ཁ་བར་དུག་ཤིང་རྫ་རྣམས་ཀྱི་སྣོད་གང་(༢བ)
རུང་ནང་དུ་ལོག་པའི་རྫས། དྲུག་གི་གྲངས་སྤངས་ཅིག་ཤོས་རྣམས། །འབྱོར་པའི་འཁོས་དང་བསྟུན་པའི་ཚད། །བཀོད་པས་ཁྱད་པར་འཕགས་བཤམས་ཏེ། །མཆོད་གནས་ཀུན་ལ་ལེགས་བྱས་ཀྱི། །གྲངས་མེད་དངོས་པོ་བསྐྲུན་ཤ་ཆང་། ལ་ཕུག དུག་གི་མེ་ཏོག བན་མཐོ་བ་རྣམས། དཀར་གསུམ་མངར་གསུམ་འབྲུ་རིགས། ཟན། མེ་ཏོགཆུ་གཙང་། སླད་དུ། འབུལ་ཞིང་སྦྱིན་པའི་ཡུལ་རྣམས་ལ། །ལོངས་སུ་སྤྱོད་ཅིང་མི་ཟད་པའི། །གཏེར་དུ་འགྱུར་ཞིང་གནོད་པ་ཡིས། །འཕྲོག་ཏུ་མེད་པའི་དཔལ་སྟེར་བའི། །ཤཱཀ་ཐུབ་རིགས་གསུམ་མགོན་པོ་བཞིའི། །མཚན་གྱི་དབྱངས་སྙན་སྒྲོག་པ་སོགས། །ཚིག་དོན་མ་འདྲེས་ཇི་བཞིན་དུ། །གཏོར་མ་སྒུལ་བསྐྱོད་དང་བྲལ་བ། །མ་ཐོབ་པར་འབྱུང་པོ་ཀུན་ལོག་འགྲོ་བས་སྡིག་པ་ཆེ། །མི་ཁྱིའི་སྒྲ་མང་སར་ཡི་དགས་རྣམས་སྐྲག །དབེན་ཞིང་གཙང་སར་ངེས་འཕོངས་པ་ལ་ཟས་ནི་བྱིན་ཀྱང་དགའ་བ་ལྟར། །མེད་དུས། །སོ་སོར་ཐར་པའི་སྡོམ་དྲང་སྲོང་རྣམས་གཙང་སྒྲ་མེད་པའི་ཟས་མི་ཟ། ལྡན་རབ། །མིན་ཡང་རོ་དང་ཤ་ཆང་སྒོག་ཙོང་སོགས་དྲི་ངན་པ་མཐའ་དག །དྲི་ང་བའི། །ཟས་སྤངས་སྐྱབས་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་སོགས་དང་། སངས་རྒྱས་ཆོས་ཚོགས་མ། འགྲོ་སེམས་བསྐྱེད་རྣམས། སྤྱི་ལྟར་བྱས་ཏེ་དཀྱུས་ལ་འཇུག སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨའི་འདབ་མ་དཀར་འཇམ་མཉེན་ལྕུག་རྒྱས་པའི་ལྟེ་བར། ཨ་ལས་བཅུ་དྲུག་ཆ་ཤས་ཡོངས་སུ་རྫོགས་པའི་ཟླ་བའི་དཀྱིལ་འཁོར་གྱི་སྟེང་དུ། རང་གི་སེམས་(༣ན)
ཉིད་གངས་རིའི་དུམ་བུ་ཆད་པ་ལྟ་བུའི་ཧྲཱིཿ དཀར་པོ་ལས་དཔག་ཏུ་མེད་པའི་འོད་ཟེར་འཕྲོས་པས། དུས་གསུམ་གྱི་རྒྱལ་བ་རྣམས་ཀུན་ཏུ་བཟང་པོའི་མཆོད་པའི་སྤྲིན་གྱིས་མཉེས་པར་བྱས། །གཞལ་དུ་མེད་པའི་སེམས་ཅན་གྱི་དོན་རླབས་པོ་ཆེས་འགྲོ་བ་ཀུན་འཕགས་པ་མཆོག་གི་གོ་འཕང་ལ་བཀོད། །དོན་གཉིས་ལྷུན་གྱིས་གྲུབ་པར་གྱུར་པ་ལས། བདག་ཉིད་ཐུགས་རྗེ་ཆེན་པོ་འཕགས་མཆོག་སྤྱན་རས་གཟིགས་ཤེལ་དཀར་གྱི་ལྷུན་པོ་ཉིན་བྱེད་འབུམ་གྱིས་འཁྱུད་པ་ལྟ་བུའི་སྐུ་མདོག་རབ་དཀར་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བརྒྱད་ཅུ་གསལ་རྫོགས་ཀྱིས་བརྒྱན་པའི་རྩ་བའི་ཕྱག་གཉིས་ཀུནྡའི་ཕོན་པོ་འགྲོ་ལ་རྗེས་ཆགས་ཀྱིས་ཐུགས་ཀར་འཛིན་པའི་ཉམས་ཀྱིས་སྦྱར་ཞིང་། ལྷག་མ་གཡས་མན་ཤེལ་གྱི་འཕྲེང་བ་བརྒྱ་རྩས་ལུས་ཅན་མཐའ་དག་ཐར་པའི་ཁང་བཟང་དུ་འདྲེན་པའི་བརྡ་དང་། གཡོན་འོག་མས་པདྨ་དཀར་པོའི་སྡོང་པོ་ཡལ་འདབ་རྒྱས་པའི་གྲིབ་བསིལ་གྱིས་སྡུག་བསྔལ་གསུམ་གྱི་ཚ་གདུང་སེལ་བའི་ཚུལ་གྱིས་འཛིན་པ། ལྷ་རྫས་དར་གྱི་ན་བཟའི་སྟོད་གཡོགས་དང་ཤམ་ཐབས་མཛེས་པར་ཀླུབས་ཤིང་། རིན་པོ་ཆེའི་དབུ་རྒྱན་སྙན་རྒྱན་མགུལ་རྒྱན་ཕྱག་གདུབ། ཞབས་གདུབ་སོགས་ཀྱིས་སྤུད་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུྃ་སྔོན་པོས་མཚན་པ་ལས། ལྕགས་ཀྱུ་(༣བ)
ལྟ་བུའི་འོད་ཟེར་གྲངས་མེད་པ་འཕྲོས་པས། ལྷོ་ཕྱོགས་གྲུ་འཛིན་རི་བོའི་སྤོ་ནས། རང་འདྲའི་ཡེ་ཤེས་སེམས་དཔའ་འཕྲིན་ལས་ཀྱི་འཇུག་པ་དུས་ལས་མི་གཡེལ་བས་སྐར་མདའ་འཕངས་པ་བཞིན་དུ་སྤྱན་དྲངས། གྲངས་མེད་རྒྱལ་བའི་མཁྱེན་བརྩེའི་འོད་དཀར་ཅན། །གངས་ལྡན་འགྲོ་བློའི་ཆུ་མཚོར་ཤར་བའི་གཟུགས། །ཕན་བདེའི་ག་བུར་གསར་པའི་ཐིགས་པ་གང་། །སྩོལ་ཕྱིར་འདིར་གཤེགས་ཕྱག་ན་པདྨ་ཀྱེ། །ཨོཾ་ཨཱཪྻཱ་ཨཝ་ལོ་ཀི་ཏེ་ས་པ་རི་ཝཱ་ར་ཨེ་ཧྱེ་ཛཿཧཱུྃ་བཾ་ཧོཿདམ་ཚིག་པ་དང་གཉིས་སུ་མེད་པར་གྱུར། །སླར་ཡང་འོད་ཟེར་འཕྲོས་པས། །དབང་གི་ལྷ་རྣམས་སྤྱན་དྲངས། ཁྱེད་རྣམས་ཀྱིས་འདི་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། བདུད་རྩིས་གང་བའི་བུམ་པ་ཐོགས་ནས། ཨོཾ་སརྦ་ཏ་ཐཱ་ག་ཏ་ཨ་བྷི་ཥ་ཀ་ཏ་ས་མ་ཡ་ཤྲཱི་ཨཱཿཧཱུྃ། ཞེས་སྤྱི་བོ་ནས་དབང་བསྐུར། ལུས་གང་། དྲི་མ་དག །ཆུའི་ལྷག་མ་སྤྱི་གཙུག་ཏུ་གནས་པ་ལས་འོད་དཔག་མེད་ཀྱིས་དབུ་བརྒྱན་པར་གྱུར། མཆོད་གཏོར་ཨ་མྲྀ་ཏ་བསང་། སྭ་བྷཱ་ཝས་སྦྱངས། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་དུ། ཨོཾ་ལས་མཆོད་གཏོར་རྣམས་འདོད་ཡོན་ལྔས་ཁྱད་པར་དུ་བྱས་པའི་མཆོད་པའི་སྤྲིན་ཟད་མི་ཤེས་པར་གྱུར། ཨོཾ་ཨཱཿཧཱུྃ། དངོས་བཤམས་ཡིད་སྤྲུལ་ཕུལ་བྱུང་མཆོད་པའི་ཚོགས། །ངོ་མཚར་སྤྱན་དང་རོ་མཆོག་ལྗགས་ཀྱི་ཡུལ། །ཟག་མེད་བདེ་བའི་ཀློང་དུ་དགྱེས་(༤ན)
པའི་ཆེད། །འཇིག་རྟེན་དབང་ཕྱུག་འཁོར་དང་བཅས་ལ་འབུལ། །ཨོཾ་ཨརྱ་ལོ་ཀེ་ཏེ་ས་པ་རི་ཝཱ་ར་ཨརྒྷཾ་ནས་། ཤཔྟའི་བར་བརྗོད། མི་ཟད་སྙིགས་མ་ལྔ་བདོ་ན་ཀྲའི་གྲོང་། །ལེགས་ལམ་ནོར་བུ་ལེན་ལ་དཀའ་བའི་འཕྲང་། །ཐུགས་རྗེའི་རྫིངས་ཀྱིས་སྒྲོལ་བའི་འཕགས་མཆོག་ལྷ། །འཇིག་རྟེན་དབང་ཕྱུག་གང་དེར་ཕྱག་འཚལ་ལོ། །ཡིག་དྲུག་ལོང་བསྟུན་བགྲངས་རྗེས་སྨོན་ལམ་བྱ། མགྲོན་སྤྱན་འདྲེན་པ་ནི། དཔག་ཡས་རྒྱལ་བའི་གསང་བ་གསུམ་གྱི་དངོས། །མི་འགྱུར་བདེ་ཆེན་ངང་དུ་རྟག་འཆེལ་ཡང་། །དངོས་གྲུབ་འབྱུང་གནས་བྱེད་པོར་སྟོན་པའི་ཕྱིར། །མཆོག་གསུམ་དམ་པའི་ཚོགས་རྣམས་གཤེགས་སུ་གསོལ། །གང་དེའི་སྐུ་གསུང་ཐུགས་ཀྱི་རྣམ་རོལ་ལས། །བགྲང་ཡས་ཟླ་སྣང་ཆུ་མཚོར་ཤར་བ་བཞིན། །ཁྲོས་པའི་གར་མཛད་མགོན་ཆེན་སྡེ་བཞི་སོགས། །ཆོས་སྐྱོང་སྲུང་མའི་ཚོགས་རྣམས་གཤེགས་སུ་གསོལ། །མངོན་ཤེས་རྫུ་འཕྲུལ་ལྡན་པའི་བསིལ་སྦྱིན་དང་། །སྣག་ཚ་ཡང་དག་ཤེས་དང་མདུན་དུ་བདར། །གྱ་གྱུ་ཁྱུང་མིང་ཨ་འགུར་གཡོག་འདོར་སོགས། །དྲང་སྲོང་བྲམ་ཟེའི་ཚོགས་རྣམས་༝། །འདོད་ཡོན་ནོར་དང་དོན་ཀུན་སྒྲུབ་མཛད་པའི། །རྨུགས་འཛིན་ནོར་རྒྱུན་མ་དང་ཚོགས་ཀྱི་བདག །གནོད་སྦྱིན་ཨ་པརྩ་ཏ་ལ་སོགས་པའི། ནོར་བདག་ལྷན་ཅིག་སྐྱེས་ལྷ་༝། །ཆོས་འཁོར་གཙུག་ལག་བ་གཾ་གྲོང་ཁྱེར་དང་། །རི་དང་ནགས་ཚལ་ལ་སོགས་ནོར་འཛིན་ཀུན།(༤བ)
སྲུང་ཞིང་སྐྱོང་བ་ས་ཡི་ལྷ་མོ་སོགས། །ཡུལ་ལྷ་གཞི་བདག་ཚོགས་རྣམས་༝། །སྔོན་ཚེ་སྣང་བྱེད་ཡུལ་གྱི་དགའ་སྟོན་དུ། སྟོབས་བཅུ་མངའ་བ་གྱུར་ཅིང་ཚངས་དབྱངས་ཀྱིས། དབུགས་དབྱུང་མཐུ་དང་ལྡན་པའི་མི་མ་ཡིན། སྡེ་དཔོན་རྟ་བདག་འཕྲོ་མ་༝། །རིང་པོ་ཉིད་ནས་བསགས་པའི་ནག་པོའི་འབྲས། མངོན་པར་བདོ་བའི་མི་བསྲུན་བསམ་སྦྱོར་གྱིས། །ལུས་ཅན་རྣམས་ལ་འཚེ་བའི་མི་མཐུན་ཕྱོགས། །བགེགས་ཚོགས་འབྱུང་པོ་མ་ལུས་འདིར་འདུས་ཤིག ཀུན་གསལ་ལུས་ཕྲའི་ཚད་ཀྱི་ཞགས་པས་ཀྱང་། །ཕ་མཐའ་འཆིང་བར་ནུས་པའི་གོ་སྐབས་ལས། །མི་འགྱུར་བརྩེ་བས་བསྐྱངས་པའི་ཇི་སྙེད་མ། །རིགས་དྲུག་སྐྱེ་དགུའི་ཚོགས་རྣམས་༝། །མི་མཉམ་འདུ་བ་འཁྲུགས་དང་གློ་བུར་དུ། །དུག་མཚོན་ལྕེབས་སོགས་རྐྱེན་གྱིས་འདི་སྣང་ལུས། །བོར་ཞིང་ཕྱི་མ་མ་ཐོབ་འཁྱམས་པ་ཡི། །བར་དོར་གནས་པའི་འགྲོ་རྣམས་༝། །སེར་སྣ་ལ་སོགས་ལས་ངན་རླུང་ཤུགས་ཀྱིས། །བཀྲེས་སྐོམ་སྡུག་བསྔལ་རྒྱ་མཚོར་ལྷུང་བ་ཡི། ཕྱི་ནང་སྒྲིབ་ཅན་བྱིངས་གནས་ཁ་འཐོར་སོགས། །ཡི་དྭགས་རྒྱལ་མོ་ལ་སོགས་༝། །སྔོན་ནས་བཅད་གཏུབས་འཕྲོག་འཇོམས་ལ་སོགས་པས། །བུ་ལོན་ཆགས་པའི་མི་དང་མི་མ་ཡིན། །མདོར་ན་རིགས་དྲུག་གང་དུ་གནས་གྱུར་པའི། །ལན་ཆགས་ཤ་འཁོན་གཉེར་རྣམས་འདིར་འདུས་ཤིག །མདོར་ན་བདེ་ལེགས་ཞིང་དུ་སྤྱན་དྲངས་ཤིང་། །འདོད་དོན་བསྒྲུབ་པའི་ཕྱིར་དུ་བཀུག་པ་དང་། །སྙིང་རྗེའི་དབང་གིས་བོས་པའི་མགྲོན་ལ་སོགས། །མཐའ་དག་རང་(༥ན)
རང་གདན་ལ་བརྟན་པར་བཞུགས། །བཛྲ་ས་མཱ་ཛཿཔདྨ་ཀ་མ་ལ་ཡེ་སྟྭཾ། ཕ་མཐའ་ཡོངས་བྲལ་ཡེ་ཤེས་ཆུ་གཏེར་ལས། །དངོས་གྲུབ་རྣམ་མང་ཡིད་བཞིན་ནོར་བུའི་གཏེར། །རིས་མེད་ཀུན་ལ་སྙིལ་བའི་མཛད་པ་པོ། །མཆོག་གསུམ་བླ་མ་ཡིད་མ་ལ་ཕྱག་འཚལ། །རྣམ་འདྲེན་བསྟོད་པའི་རྟ་ལྗང་དཀྱིལ་འཁོར་ཅན། །ཕན་བདེའི་འོད་སྒྲིབ་དགྲ་བགེགས་ནམ་མཁའི་གོས། །མཐུ་སྟོབས་ནུས་པའི་རླུང་གིས་གཏོར་མཛད་པའི། །ཆོས་སྐྱོང་བསྲུང་མའི་ཚོགས་ལ་ཕྱག་འཚལ་ལོ། །མདོར་ན་དད་པའི་ཡིད་ཀྱིས་སྙིམ་པ་ཟུང་། །སྙིང་ཁར་ཟུམས་ཏེ་འདུད་པའི་ཡུལ་གྱུར་པ། །དགེ་ལེགས་དཔལ་གྱི་སྒོ་འཕར་འབྱེད་མཁས་པ། །ཀུན་ལ་གུས་པའི་ཡིད་ཀྱིས་ཕྱག་འཚལ་ལོ། །རྙོག་བྲལ་དྭངས་པའི་ཆུ་ཀླུང་འཁྱིལ་བའི་མཚོར། །རྒྱུན་ཆད་མེད་འབབ་པཀྵུའི་སྙེམས་པ་འཕྲོག །རྣམ་བཀྲའི་ཕང་ཕུང་གཡོ་བའི་ཆུ་སྐྱེས་ཀྱིས། །དུས་ཀུན་དབྱར་དུ་བསྒྱུར་བའི་ངལ་བ་བསྟེན། །མ་ལ་ཡ་ཡི་ཚལ་ལས་འོངས་མིན་པའི། །རྨད་བྱུང་དྲི་བསུང་ནམ་མཁའི་གླང་པོར་འགྲན། །མུན་པའི་གོ་སྐབས་འཕྲོག་པའི་མར་མེའི་འཕྲེང་། །བཅུ་གཉིས་བདག་པོ་ཕམ་སྙམ་འགོག་མེད་རྒྱུ། །སྣ་ཚོགས་སྨན་གྱིས་སྦགས་པའི་ཆལ་ཆིལ་དྲི། །རྦ་རླབས་སྲིད་པའི་རྩེ་མོའི་བར་དུ་འཁྲུག །ཆོག་མི་ཤེས་པའི་ཕུན་ཚོགས་བཤོས་བཟང་རོ། །ལེགས་བྲིས་བདུད་རྩི་ཇི་བཞིན་བླ་ན་མེད། །དབྱར་སྐྱེས་རྔ་གསང་སྒྲ་ལ་རྒྱུད་མང་གླུ། །སྙན་བརྗིད་རྣམ་མང་གདངས་ཀྱི་རོལ་མོ་སོགས། །དངོས་བཤམས་ཡིད་ཀྱིས་སྤྲུལ་པའི་མཆོད་པ་(༥བ)
འབུལ། །ཐུགས་རྗེས་བརྩེར་དགོངས་བཞེས་ལ་དངོས་གྲུབ་སྩོལ། །ཨོཾ་མཱུ་ལ་མཱུ་ལ་སྱ་གཽ་རི་ཀ་ཤྩ་བུདྡྷ་བོ་དྷི་ས་ཏྭེ་བྷྱཿ ས་པ་རི་ཝཱ་ར་ཨརྒྷཾ་ནས་ཤཔྟའི་བར་བརྗོད། ཉོན་མོངས་བག་ཆགས་དབང་གི་ས་བོན་གྱིས། །ལུས་ངག་ཡིད་གསུམ་སྒོ་ནས་རབ་བསགས་པའི། །སོ་ཐར་བྱང་སེམས་སྔགས་ཀྱི་ལྟུང་བ་སོགས། །ཇི་སྙེད་སྡིག་པའི་ཚོགས་རྣམས་སྙིང་ནས་བཤགས། །རྒྱལ་བས་འགྲོ་ཀུན་མྱང་འདས་སར་འགོད་ཅིང་། །སྲས་བཅས་རྣམས་ཀྱིས་རླབས་ཆེན་སྤྱོད་པ་སྤྱད། །ཐོས་སྒྲོག་ཞི་བདེ་གཉེར་སོགས་མཆོག་དམན་གྱི། །གྲངས་མེད་དགེ་བའི་ཚོགས་ལ་རྗེས་ཡི་རང་། །མཛད་མེད་ཟོ་ཆུན་ཁྱུད་མོའི་འཁོར་ལོ་བཞིན། །མ་རིག་དྲ་བས་འཆིང་བྱེད་འཁོར་བ་འདི། །སྟོངས་མིན་དེ་སྲིད་བར་དུ་མཐའ་ཀླས་པའི། །འགྲོ་བའི་མགོན་དང་སྐྱབས་སུ་བརྟན་པར་བཞུགས། །ཇི་སྙེད་ཁམས་དང་བསམ་པའི་བྱེ་བྲག་གིས། །རྒྱུ་འབྲས་མཐོ་དམན་ཐེག་པར་མོས་པའི་བློ། །མ་འདྲེས་འཚམ་པར་སྟོན་པའི་གསུང་རབ་མཆོག །དམ་ཆོས་ཆད་པ་མེད་པར་བསྟན་དུ་གསོལ། །ཆུ་ཤེལ་ཁ་བའི་རྡུལ་བརྩེགས་རི་བོང་ཅན། །སྦྲང་རྩིའི་རྒྱལ་མཚན་རྩ་བས་བསྐྲུན་མིན་པའི། །རང་གཞན་རྣམས་ཀྱིས་མ་ལུས་བསགས་པ་ཡི། །རྣམ་དཀར་དགེ་ཚོགས་ཀུན་མཁྱེན་ཐོབ་ཕྱིར་བསྔོ། །རབ་འབྱམས་རྒྱལ་བ་རྒྱ་མཚོའི་ཚོགས་རྣམས་ལ། །རབ་ཏུ་དྲི་བཟང་བསྟར་བའི་བདུད་རྩིའི་རྒྱུན། །རབ་མཛེས་སྣོད་དུ་བསྐྲུན་ཏེ་ཁྲུས་གསོལ་བས། །རབ་རྨོངས་(༦ན)
འགྲོ་བའི་སྒྲིབ་པ་བྱང་གྱུར་ཅིག །ཨོཾ་སརྦ་ཏ་ཐ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཨཱཿཧཱུྃ། འཇིག་རྟེན་དབང་ཕྱུག་ཕྱག་སོར་ལས་བབས་པའི། །མུ་ཏིག་འཕྲེང་ལྟར་འོངས་པའི་འོ་མའི་རྒྱུན། །བབས་པས་ཡི་དྭགས་ཀུན་ཚིམ་སྡུག་བསྔལ་གྱིས། །ནད་ལྟར་མནར་བའི་ཚོགས་ཀུན་ཞི་གྱུར་ཅིག །ཨོཾ་ཨཱཿཧྲཱིཿཧཱུྃ། ཨོཾ་མ་ཎི་པདྨེ་ཧཱུྃ། ཨོཾ་ཛཱ་ལ་མ་ཏེཾ་སརྦྦ་པྲེ་ཏེ་བྷྱཿསྭཱ་ཧཱ། །སྤྱན་རས་གཟིགས་དབང་ཕྱག་མཐིལ་དུ། །རབ་དམར་ཡེ་ཤེས་སྐར་མདའ་ནི། །ཕྱོགས་གཉིས་མཉམ་གཞག་མཆོད་སྦྱིན་ལས། །བབ་པའི་བདུད་རྩིས་འགྲོ་ཚིམ་ཤོག །ཨོཾ་ཛྙཱ་ན་ཨ་ཝ་ལོ་ཀི་ཏེ་ས་མནྟ་སྭ་ར་ཎཱ་སསྨི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛཱ་ལ་ནི་སྭཱ་ཧཱ། །སླར་ཡང་དེ་ཉིད་གནས་གྱུར་ཏེ། །བཅོམ་ལྡན་རྡོ་རྗེ་མི་འཁྲུག་པ། །ཕྱག་སོར་ལས་བབས་ཆུ་རྒྱུན་གྱིས། །ཉམ་ཆུང་འགྲོ་རྣམས་དབུགས་འབྱིན་ཤོག །ན་མོ་རཏྣ་ཏྲ་ཡཱ་ཡ། །ཨོཾ་ཀཾ་ཀ་ན་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲ་ས་ནི། པྲ་ཏི་ཧ་ན་པྲ་ཏི་ཧ་ན། སརྦྦ་ཀརྨ་པ་རི་པ་ར་ཎི་མེ་སརྦྦ་ས་ཏཱ་ནཱ་ཉྩ་སྭཱ་ཧཱ། པད་ཟླའི་གདན་སྟེང་ཛ་ཡིག་ལས། ཛམ་སེར་པི་ཛ་པུ་ར་གཡས། གཡོན་པ་ནེའུ་ལེ་འཛིན་པ་ཡི། །སྐུ་ལ་མི་འཁྲུག་གནས་གྱུར་བའི། །སྤྱན་རས་གཟིགས་གྱི་ཕྱག་སོར་ལས། །བྱུང་བའི་མི་ཟད་ཉལ་འགྲོའི་རྒྱུན། །སྦྱིན་པས་རྨ་སོགས་ཟུག་རྔུ་ཀུན། །སོས་ནས་བདེ་བས་ཚིམ་གྱུར་ཅིག །ཨོཾ་ཛམ་བྷ་ལ་ཛ་ལེནྡྲ་ཡེ་སྭཱ་ཧཱ། །གོང་གི་ཆུ་སྦྱིན་གསུམ་པོ་འདིའི་སྐབས་ཆུ་སྦྱོང་བ་སོགས་(༦བ)
ཕྱག་ལེན་ལྟར་བྱ། །མདོར་ན་རྙོག་བྲལ་རབ་བསིལ་བ། །རེག་པས་ཀླུ་སོགས་འགྲོ་ཀུན་རྒྱུད། །སྦྱིན་པ་སེམས་ཀྱི་རྒྱན་གྱུར་ཅིང་། །རྫོགས་པའི་སངས་རྒྱས་ཐོབ་གྱུར་ཅིག །དེ་ནས་གཏོར་མ་བྱིན་རླབས་གོང་ལྟར་བྱས་ལ། མགྲོན་རྣམས་རང་རང་གི་མོས་པ་དང་མཐུན་པའི་འདོད་ཡོན་གྱིས་ཚིམ་པར་བསམས་ལ། ན་མཿ སརྦྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུྃ། ལན་གསུམ་མཾ་བདུན་ཉེར་གཅིག་སྐབས་དང་སྦྱར་ལ། ཨོཾ་གུ་རུ་ཏ་ཐཱ་ག་ཏ་དེ་ཝི་ཀ་མ་ཏྲ་ལ་ཏྲི་རཏྣ་ས་པ་རི་ཝཱ་ར་ཨརྒྷཾ། སོགས་ཀྱིས་མཆོད། མགྲོན་ཆེན་པོ་ནི། ཕུལ་དུ་བྱུང་བའི་འདོད་པའི་ཡོན་ཏན་རྣམས་ཀྱིས་སྤྲས་པའི་བདུད་རྩིའི་རོ་མཆོག་བརྒྱ་དང་ལྡན་པའི་གཏོར་མ་འདི་ཉིད། འདི་ཡན་མགྲོན་ཚན་འོག་མ་གསུམ་ལ་འགྲེ །དངོས་དང་བརྒྱུད་པའི་སྒོ་ནས་ཕན་བདེ་རབ་འབྱམས་ཀུན་གྱི་སྒོ་འཕར་འབྱེད་པའི་དཔལ་ལྡན་བླ་མ་དམ་པ་རྣམས་དང་། བཅོམ་ལྡན་འདས་མི་བསྐྱོད་རྡོ་རྗེ། །དཔལ་ལྡན་རྒྱུ་སྐར་གྱི་དཀྱིལ་འཁོར་བདེ་དགྱེས། །དམར་ནག་འཇིགས་གསུམ་གྱིས་མཚོན་པའི་རྒྱུད་སྡེ་ཆེན་པོ་བཞི་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས། དུས་གསུམ་གྱི་སྟོབས་བཅུ་མངའ་བ་སོགས་མཆོག་གསུམ་དམ་པའི་ངོ་བོར་བཞུགས་པ་སྲས་དང་བཅས་པ་རྣམས་ལ་འབུལ་གྱིས། མཁྱེན་བརྩེ་ནུས་གསུམ་གྱི་ཐོགས་པ་མེད་པའི་མཐུས་ཕན་བདེའི་རྩ་ལག་རྒྱལ་བའི་བསྟན་པ་རིན་པོ་ཆེ་ཡར་ལྡན་དུ་འགྱུར་བ་དང་། ལུས་ཅན་ཀུན་ལ་(༧ན)
གནས་སྐབས་སུ་ཚེ་དང་བསོད་ནམས་དཔལ་འབྱོར་ལོངས་སྤྱོད་སོགས་རྒྱས་ཤིང་། །མཐར་ཐུག་གི་དོན་ཁ་སྦྱོར་བདུན་ལྡན་རྡོ་རྗེ་འཆང་གི་གོ་འཕང་འགྲུབ་པར་མཛད་དུ་གསོལ། འདི་ནས་གཟུང་སྟེ་མགྲོན་ཚན་འོག་མ་ཀུན་ལ་སྨོན་ལམ་ཚིགས་བཅད་སྐབས་ཏོབ་ཀྱིས་ཕྱེ་སྟེ་འདོན། མགྲོན་ཚན་གཉིས་པ་ནི། སཾ་བྷ་ཝའི་མཇུག་ཏུ། ཨོཾ་སརྦྦ་བཛྲ་དྷརྨཱ་པཱ་ལི་ཀ་ཨརྒྷཾ་སོགས་ཀྱིས་མཆོད། མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ། ཕྱག་བཞི་པ། གུར་གྱི་མགོན་པོ་རྣམ་ཐོས་སྲས། སྟོབས་འཕྲོག་ཞལ་བཞི་པ། དམ་ཅན་ཆོས་ཀྱི་རྒྱལ་པོ། །ལྷ་མོ་རེ་མ་ཏི་སོགས་ལུང་དང་རྟོགས་པའི་བསྟན་པ་སྲུང་བར་བྱེད་པའི་ཆོས་སྐྱོང་སྲུང་མའི་ཚོགས་ལ་འབུལ་གྱིས། འཕྲིན་ལས་རྣམ་བཞི་ཐོགས་པ་མེད་པའི་རྫུ་འཕྲུལ་གྱིས་སངས་རྒྱས་ཀྱི་བསྟན་པ་རིན་པོ་ཆེ་སྐྱོང་བ་དང་། བདག་ཅག་འཁོར་དང་བཅས་པ་རྣམས་ཀྱི་མི་མཐུན་པའི་ཕྱོགས་མཐའ་དག་ཞི་ཞིང་། བསམ་པའི་དོན་རྣམས་ཡིད་བཞིན་དུ་གྲུབ་པར་མཛད་དུ་གསོལ། །མགྲོན་ཚན་གསུམ་པ་ནི། སཾ་བྷ་རའི་མཇུག་ཏུ། ཨོཾ་མ་ཧཱ་ཝ་རཱཥྚ་ཪྵི་བྲཱ་ཧྨ་ཎ་ས་པ་རི་ཝཱ་ར། སོགས་བརྗོད། དྲང་སྲོང་ཆེན་པོ་མེས་བྱིན། སྣག་ཚ་ཡང་དག་ཤེས། མདུན་དུ་བར་ར། གྱ་གྱུར་ཁྱུར་མིང་། ཨ་འགུར་གཡོག་འདོར་ཏེ་དྲང་སྲོང་ཆེན་པོ་མཆོག་བརྒྱད། གཞན་ཡང་སྨན་གྱི་དྲང་སྲོང་བཅོ་ལྔ་རིག་པའི་གནས་བཅོ་བརྒྱད་ལ་མཁས་པའི་དྲང་སྲོང་། བྲམ་ཟེ་གཞོན་ནུ་སྤྲིན་རིན་པོ་ཆེ་(༧བ)
འགིའུ་ཧ་ལ་གཞོན་ནུ་མཆོག་སྲེད་འགྲོ་སྐྱབས་རྩིབས་ཀྱི་མུ་ཁྱུད་ལ་སོགས་པ་མདོར་ན་དྲང་སྲོང་དང་བྲམ་ཟེ་བདེན་ཚིག་གྲུབ་ཅིང་དམོད་པ་དང་སྨོན་ལམ་གྱི་མཐུ་ལ་དབང་བ་རྣམས་ལ་འབུལ་གྱིས། །ཐོགས་པ་མེད་པའི་རྫུ་འཕྲུལ་གྱིས། བསྟན་པ་དང་འགྲོ་བའི་བདེ་སྐྱིད་འཕེལ་ཞིང་། །བདག་ཅག་འཁོར་བཅས་ཀྱི་ནད་གདོན་རྐྱེན་དང་བར་ཆད་ཐམས་ཅད་ཞི་བར་མཛད་དུ་གསོལ། །མགྲོན་ཚན་བཞི་པ་ནི༵། སཾ་བྷ་རའི་མཇུག་ཏུ། ཨོཾ་བཛྲ་ཡཀྵ་དྷ་ན་དེ་ཝཿས་པ་རི་ཝཱ་ར་སོགས་བརྗོད། ནོར་གྱི་དབང་ཕྱུག་ཛམ་བྷ་ལ་ཡབ་ཡུམ། ལྷ་ཆེན་ཚོགས་ཀྱི་བདག་པོ། གནོད་སྦྱིན་ཨ་པ་ར་ཙི་ཏ། ཆུ་བདག་ཝ་རུ་ཎ། རླུང་ལྷ་ཡ་བེ། རིའི་ལྷ་རབ་ཏུ་མནན་པའི་བློ་གྲོས། ནགས་ཚལ་གྱི་ལྷ་མོ་རྨ་བྱའི་མདོངས་ཅན། ཤིང་གི་ལྷ་ཀུན་ནས་འོད་ཟེར། རྩི་ཐོག་གི་ལྷ་མོ་གྲུབ་པའི་བློ་གྲོས་སོགས་གནོད་སྦྱིན་ལྷའི་ཚོགས་དང་། འཚོ་བའི་ལྷ་སྲུང་བའི་ལྷ་སྐྱོབ་པའི་ལྷ། འགྲོགས་པའི་ལྷ། འགོ་བའི་ལྷ་སྟེ། ལྷན་ཅིག་སྐྱེས་པའི་ལྷ་སོགས་ཕན་གྲོགས་སྲུང་སྐྱོབ་བྱེད་པ་རྣམས་ལ་འབུལ་གྱིས། བདག་ཅག་འཁོར་དང་བཅས་པ་རྣམས་ལ་ཁ་ན་མ་ཐོ་བས་དབེན་པའི་ཟས་གོས་རྟ་གླང་པོ། བང་མཛོད་སོགས་འབྱོར་པ་ཀུན་འབད་རྩོལ་མེད་པར་འབྱུང་བར་མཛད་དུ་གསོལ། །མགྲོན་ཚན་ལྔ་པ་ནི། སཾ་བྷ་རའི་མཇུག་ཏུ། རང་གི་མདུན་དུ་ཆུ་སྐྱེས་འདབ་བཞིའི་དབུས། རྒྱལ་བ་ཤཱཀ་ཐུབ་གཏོར་མའི་རྫས་རྣམས་(༨ན)
ཀུན། མང་པོར་སྤེལ་ཕྱིར་དེ་བཞིན་གཤེགས་པ་མཆོག །རིན་ཆེན་མང་ལ་གུས་པས་ཕྱག་འཚལ་ལོ། །མདུན་ངོས་ཕྱག་ན་པདྨ་མི་སྡུག་པའི། །ངན་པའི་གཟུགས་འཆང་མཐའ་དག་ཡིད་འོང་བར། །མངོན་པར་གྲུབ་མཛད་དེ་བཞིན་གཤེགས་པ་མཆོག །གཟུགས་མཛེས་དམ་པ་དེ་ལ་ཕྱག་འཚལ། །གཡས་སུ་ཟུར་ཕུད་ལྔ་པ་བཟའ་བཏུང་ལ། །བརྟེན་པའི་འཚེ་བ་ཞི་ཞིང་བཟང་པོའི་རོ། །རབ་ཏུ་མྱོང་མཛད་དེ་བཞིན་གཤེགས་པ་སྐུ། །འཇམ་ཀླས་གང་ལ་གུས་པས་ཕྱག་འཚལ་ལོ། །གཡོན་དུ་ལག་ན་རྡོ་རྗེ་ཕན་ཚུན་ཀུན། །འཐབ་རྩོད་འཕྲོག་བརྡུང་འཇིགས་པ་ལས་སྐྱོབ་པའི། །དེ་བཞིན་གཤེགས་པ་འཇིགས་པ་ཐམས་ཅད་དང་། །ཡོངས་སུ་བྲལ་བ་གང་ལ་ཕྱག་འཚལ་ལོ། །འདི་རྣམས་མགྲོན་ཚན་འོག་མ་ཀུན་ལ་སྦྱོར། །མགྲོན་རྣམས་སོ་སོའི་ཡིད་དང་མཐུན་པའི་ཁ་དོག་དྲི་རོ་རྨད་དུ་བྱུང་བའི་གཏོར་མ་འདི་ཉིད། འོག་མ་ཀུན་ལ་རིགས་འགྲེ །སའི་ལྷ་མོ་བསྟན་མ། གཞན་ཡང་ཡུལ་ཕྱོགས་དང་ས་ཕྱོགས་དགོན་གནས་སྲུང་ཞིང་སྐྱོང་བའི་ཡུལ་ལྷ་གཞི་བདག་རྣམས་ལ་དབུལ་གྱིས། བདག་ཅག་འཁོར་དང་བཅས་པ་རྣམས་འགྲོ་བའི་ཚེ་ན་མ་བཤོལ། འདུག་ན་མ་གཏོང་། འཚོ་བ་སྦྱོར། བྱ་བ་དང་སྤྱོད་པ་ཉེས་པ་ལ་ཀོ་ལོང་རུ་ང་ཕྲག་དོག་མ་བྱེད་པར་འདོད་པའི་དོན་ཀུན་ཡིད་བཞིན་དུ་འགྲུབ་པར་མཛད་དུ་གསོལ། མགྲོན་ཚན་དྲུག་པ་ནི་༝།(༨བ)
གནོད་སྦྱིན་གྱི་སྡེ་དཔོན་ཆེན་པོ་རྟ་བདག་བརྒྱད་དང་། འཕྲོག་མ་མ་བུ་ལྔ་བརྒྱ། རྨུ་བདུད་བཙན་རྒྱལ་པོ་མ་སྲིན་ཀླུ་གནོད་སྦྱིན་ཏེ་སྡེ་བརྒྱད་མཐུ་བོ་ཆེ་སོགས། ཡང་དག་པར་རྫོགས་པའི་སངས་རྒྱས་ཀྱི་ཞལ་མཐོང་ཞིང་། གསུང་གི་བདུད་རྩིས་དབུགས་དབྱུང་བའི་མི་མ་ཡིན་མཐུ་བོ་ཆེ་རྣམས་ལ་འབུལ་གྱིས། གྲངས་མེད་པའི་སེམས་ཅན་རྣམས་ལ་བྱམས་པའི་སེམས་དང་ལྡན་ཞིང་། བདག་ཅག་འཁོར་དང་བཅས་པ་རྣམས་ཀྱི་བསམ་དོན་ཆོས་བཞིན་འགྲུབ་པར་མཛད་དུ་གསོལ། མགྲོན་ཚན་བདུན་པ་ནི་༝། །བགེགས་རིགས་སྟོང་ཕྲག་བརྒྱད་ཅུ། གདོན་རིགས་སུམ་བརྒྱ་དྲུག་ཅུ། བྱིས་པའི་གདོན་ཆེན་བཅོ་ལྔ་སོགས། ཚེ་ལ་བརྐུ་བ། སྲོག་ལ་འཇབ་པ། མི་འདོད་པ་སྟེར་བ་སོགས་གནོད་བྱེད་གདོན་བགེགས་འབྱུང་པོ་རྣམས་ལ་བྱིན་ནོ། །ཡུལ་ཕྱོགས་དང་ས་ཕྱོགས་རྣམས་སུ་འཐབ་རྩོད་འཁྲུག་ལོང་ནད་ཡམས་མུ་གེ་སད་སེར་ཐན་པ་མི་ནད་ཕྱུགས་ནད་སོགས་མ་གཏོང་བར། ཕན་པའི་སེམས་དང་ལྡན་པར་བྱོས་ཤིག །མགྲོན་ཚན་བརྒྱད་པ་ནི་༝། འགྲོ་བ་རིགས་དྲུག་ལ་རྒྱུད་ལྔ་སྐྱེ་གནས་བཞིས་བསྡུས་པའི་མར་གྱུར་སེམས་ཅན་ཐམས་ཅད་ལ་བྱིན་ནོ། །ཚ་གྲང་བཀྲེས་སྐོམ། གླེན་ལྐུགས། སྐྱེ་རྒ་ན་འཆི་འཐབ་རྩོད་འཆི་འཕོ་ལྟུང་བྱེད་སོགས་མདོར་ན་སྡུག་བསྔལ་གསུམ་ལས་གྲོལ་ཏེ། ཕ་རོལ་ཏུ་ཕྱིན་པ་དྲུག་རྫོགས་ནས་མྱུར་དུ་མངོན་པར་རྫོགས་པར་སངས་རྒྱ་བར་གྱུར་ཅིག །མགྲོན་ཚན་དགུ་པ་ནི་༝། །མདང་ད་ནང་ཤི་བ་བསད་པ་(༩ན)
ལྕེབས་པ་སོགས་འཇིག་རྟེན་འདི་སྣང་གི་སྣང་བ་ཐམས་ཅད་འགགས་ཤིང་། ཕྱི་མའི་ལུས་མ་རྙེད་པར་ཤིང་བལ་རླུང་གིས་བསྐྱོད་པ་བཞིན་དུ་ལས་ཀྱིས་རང་དབང་མེད་པར་འཕྱན་པའི་བར་དོའི་སེམས་ཅན་རྣམས་ལ་བྱིན་ནོ། །མི་སྡུག་པའི་གཟུགས་དང་སྒྲ་འོད་སོགས་འཇིགས་ཤིང་སྐྲག་པའི་སྡུག་བསྔལ་མཐའ་དག་མ་འཁྲུལ་བར་རང་ངོ་ཤེས་ཏེ་མྱུར་དུ་མཐོ་རིས་ཀྱི་སྲིད་པ་འགྲུབ་པར་གྱུར་ཅིག །མགྲོན་ཚན་བཅུ་པ་ནི་༝། །ཡི་དྭགས་ཀྱི་རྒྱལ་མོ་ཁ་ལ་མེ་འབར་མས་གཙོ་བྱས། ཡི་དྭགས་ཕྱིའི་སྒྲིབ་པ་ཅན། ནང་གི་སྒྲིབ་པ་ཅན 
། ཟས་སྐོམ་གྱི་སྒྲིབ་པ་ཅན། བྱིངས་ན་གནས་པ་དང་། ཁ་འཐོར་བ་སོགས་བཀྲེས་སྐོམ་དབུལ་འཕོངས་ཀྱིས་གདུང་བ་རྣམས་ལ་སྦྱིན་ནོ། །ཟས་སྐོམ་མི་རྙེད་པ་དང་། རྙེད་ཀྱང་གཞན་གྱིས་བསྲུངས་ཏེ་སྤྱོད་དུ་མེད་པ་དང་། ཕུན་སུམ་ཚོགས་པའི་ཟས་ཀྱང་མི་གཙང་བར་མཐོང་བ་སོགས་སྔོན་བསགས་ཀྱི་ལས་སྟུག་པོ་ལས་བྱུང་བའི་བཀྲེན་པའི་སྡུག་བསྔལ་མཐའ་དག་བྱང་ནས་ཟས་སྐོམ་འདོད་དགུའི་གཏེར་ལ་ལོངས་སྤྱོད་པར་གྱུར་ཅིག །མགྲོན་ཚན་བཅུ་གཅིག་པ་ནི་༝། །སྔོན་ནས་ད་ལྟའི་བར་དུ་སྲོག་བཅད་པ། ནོར་རྫས་རྐུ་འཕྲོག་བརྡེག་བཅོམ་སོགས་གནོད་པ་བྱས་པ་ལ་བརྟེན་ནས་ལན་ཆགས་པ་རྣམས་ལ་བྱིན་ནོ། །ལན་ཆགས་བྱང་བུ་ལོན་འཁོར་ཤ་འཁོན་ཞི་སྟེ། (༩བ)
མྱུར་དུ་རྡོ་རྗེ་འཛིན་པའི་ས་ཐོབ་པར་གྱུར་ཅིག །མགྲོན་ཚན་བཅུ་གཉིས་པ་ནི་༝། །གློ་བུར་དུ་ལྷགས་ཤིང་སྐལ་བ་ཆད་པ། ཁ་ཞན་ཞིང་དབང་ཆུང་བ། ལྷག་ལ་རེ་བའི་མགྲོན་རྣམས་ལ་བྱིན་ནོ། །ཟས་སྐོམ་བདུད་རྩིའི་ཆར་ཆེན་པོས་ཚིམ་ནས་ཆགས་སྡང་འཚེ་བའི་བསམ་པ་ཐམས་ཅད་སྤངས་ཏེ། མྱུར་དུ་སྟོབས་བཅུ་མངའ་བའི་གོ་འཕང་ཐོབ་པར་གྱུར་ཅིག །དེ་ལྟར་དངོས་གཞིའི་རིམ་པ་རྣམས། ལེགས་པར་གྲུབ་ནས་མཇུག་གི་རིམ། །བདེན་བདག་གི་བསམ་པའི་སྟོབས་དང་ནི། ཞེས་སོགས་དང་ཆོས་རྣམས་ཐམས་ཅད་རྒྱུ་ལས་བྱུང་ཞེས་སོགས། སྟོབས་བརྗོད་སོགས་སྤྱི་འགྲོ་ལྟར། བྱས་རྗེས་གཤེགས་གསོལ་དགེ་བ་བསྔོ། །ཕུན་ཚོགས་དགའ་སྟོན་ལ་རོལ་བའི། །མེ་ཏོག་འཐོར་ཞིང་ཤིས་བརྗོད་རྣམས། །གོ་རིམས་བཞིན་དུ་འདི་ལྟར་བརྗོད། །བདེ་གཤེགས་རྒྱལ་བ་སྲས་དང་སློབ་མར་བཅས། །སྤྱན་དྲངས་ཡེ་ཤེས་སེམས་དཔའ་བདག་ལ་ཐིམ། །འཇིག་རྟེན་མགྲོན་རྣམས་ཟང་ཟིང་ཆོས་སྦྱིན་གྱིས། །སྨིན་གྲོལ་གྱུར་ནས་རང་རང་གནས་སུ་གཤེགས། །རབ་དཀར་ལྷག་བསམ་གསེར་མངལ་ཐོད་ཡངས་ལས། །མཆོད་སྦྱིན་ཡན་ལག་བརྒྱད་ལྡན་དྲངས་པའི་མཐུས། །འགྲོ་འདིའི་ཁྱབ་འཇུག་རྐང་པའི་དུཿ ཁའི་དྲི། །སྦྱངས་ཏེ་ཕན་བདེའི་དཔལ་ལ་སྤྱོད་གྱུར་ཅིག །རྒྱལ་བ་རྒྱ་མཚོའི་ཐུགས་རྗེའི་གྲུ་ཆར་གྱིས། །རིགས་དྲུག་ཉམ་ངའི་སྡུག་བསྔལ་མེ་འོབས་ཆེ། །ལྷག་མར་བཅོམ་པའི་བདེ་ལེགས་པད་དཀར་(༡༠ན)
ཚལ། །ལུས་ཅན་རྐང་དྲུག་དཔལ་དུ་རྒྱས་གྱུར་ཅིག །གཏན་པ་མེད་པར་འབུལ་དང་སྦྱིན་སོགས་ཀྱི། །དགེ་ཚོགས་ཤུགས་དྲག་རྟ་ལྗང་གིས་དྲངས་པའི། །རྣམ་འདྲེན་གོ་འཕང་ནམ་མཁའི་ནོར་བུ་ཡིས། །གཏན་བདེའི་འོད་སྟོང་སྲིད་འདིར་རྒྱས་གྱུར་ཅིག །དབྱངས་སྙན་འཆི་མེད་རྒྱུད་མང་ལས་དྲངས་པའི། །རྒྱལ་བ་སྲས་བཅས་ཆོས་སྲུང་ལྷ་ཚོགས་ཀྱི། །མགྲིན་པའི་ལམ་ལས་འོངས་པའི་ཤིས་བརྗོད་སྒྲ། །སྲིད་འདིར་རྣམ་པར་འབར་བའི་བཀྲ་ཤིས་ཤོག །སྨྲས་པ། སྔོན་བྱོན་དམ་པའི་ཕྱག་སྲོལ་མ་ཉམས་ལྗོན་ཤིང་ལས། །མ་འདྲེས་ཚིག་གི་ལྕུག་ཕྲན་གཞོན་ནུའི་དཔྱང་ཐག་རྩེར། །དོན་བཟང་ལོ་མའི་ཕང་ཕུང་འཁྲིགས་པའི་མགོ་ལྕོག་ལྡེམ། །བློ་གྲོས་འདབ་ལྡན་ཁུ་བྱུག་ཡོང་ན་ཚུལ་འདིས་མཛེས། །སྦྱོར་དངོས་རྗེས་ཚང་ཆོག་སྒྲིགས་གཅིག་པུ་ལས། །རྒྱས་བསྡུས་འབྱེད་དང་བསྟུན་ན་གཉིས་འགྱུར་བའི། །ངོ་མཚར་སྒྱུ་མའི་སྣང་བརྙན་སྟོན་མཁས་པ། །བྱེད་པོ་འདི་འདྲ་ཚངས་པས་སྤྲུལ་ལམ་ཅི། །ལྷག་བསམ་དཀར་པོའི་རྔ་ཡབ་ཀྱིས། །བསྐུལ་བའི་དགེ་ཚོགས་དྲི་བཞོན་དེས། །མཐའ་མེད་མར་གྱུར་གཉིས་འཐུང་ལ། །རེག་པའི་དགའ་བདེ་འཕེལ་གྱུར་ཅིག །གཏོར་མ་བརྒྱ་རྩ་རྒྱས་བསྡུས་གཉིས་ཀ་ཡོད་པ་ཞིག་དགོས་ཞེས། སེ་ཆེན་དབོན་པོས་བསྐུལ་བ་ལ་བརྟེན་ནས། སྤྲོས་པར་འདོད་ན་དཀྱུས་དང་བསྟུན། རྒྱ་ཆོས་(༡༠བ)
ཀྱིས་ཕྱེ་བ་རྣམས་ཀྱིས་མདོར་བསྡུས་སུ་འགྱུར་ཞིང་། རྒྱས་བསྡུས་གཉིས་ཀའི་འདོན་ཆ་མིན་པ་རྣམས་སེར་གྱིས་ཕྱེ་སྟེ། ཚིག་སྦྱོར་རྣམས་གོ་སླ་བར་བྱས་པའི་ཀླགས་པས་དོན་འགྲུབ་ཅེས་པ་འདི་ཡང་། ཚངས་སྲས་བཞད་པའི་རྡོ་རྗེས་དབུས་འགྱུར་སྨན་ལྗོངས་སའི་ལྟེ་བའི་ཤར་ཕྱོགས་འཛིན་མའི་སྤོ་ལས་མངོན་པར་འཕགས་ཤིང་། ལངྐའི་གྲོང་ཁྱེར་ས་ལ་འཕོས་པའི་ཕོ་བྲང་འོལ་ཁ་སྟག་རྩེར་སྦྱར་བའི་ཡི་གེ་པ་ནི་ངག་དབང་དགེ་ལེགས་སོ། །