སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱོང་ཚུལ།
སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱོང་ཚུལ།ཕྲ་ཞིང་རྣམ་པར་དག་པའི་མཚོན་རྣོན་པོས། །རྨོངས་པའི་དྲ་བ་མ་ལུས་གཅོད་མཛད་པ །འཇམ་དཔལ་རྡོ་རྗེའི་སྒྱུ་འཕྲུལ་ཙོང་ཁ་པ། ཁམས་གསུམ་འགྲོ་བའི་བླ་མའི་ཞལ་ལུང་ལས། །སྡུག་ཀུན་ཉེས་དམིགས་ཚུལ་ལས་ངེས་འབྱུང་བའི། །རིན་ཆེན་ཡུ་བས་བཏེགས་པའི་བསླབ་གསུམ་གདུགས། །མྱང་འདས་ནོར་བུའི་ཏོག་གིས་རབ་མཛེས་པའི། །ལེགས་བཤད་སྲིད་རྩེའི་བར་དུ་འཁོར་ཟིན་ནས། །མ་སྨད་སྙིང་རྗེའི་མ་དྲོས་ཀླུང་ཆེན་ལས། །རླབས་ཆེན་སྤྱོད་པའི་ཆུ་གཏེར་རྣམ་པ་བཞི། །ནམ་ཡང་ཆད་པ་མེད་པར་འབབ་པའི་རྒྱུན །ཀུན་མཁྱེན་རྒྱ་མཚོར་འཇུག་ཚུལ་འདི་ན་བཤད། །
གསུམ་པ་སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱོང་ཚུལ་ལ་ལམ་སྒྲོན་ལས། རང་རྒྱུད་རྟོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་སྐྱེས་བུ་འབྲིང་གི་སྐབས་སུ་སྲིད་པ་འཁོར་བའི་སྡུག་བསྔལ་ལ་འཇིགས་ཏེ་དེ་ལས་ཐར་འདོད་ཀྱི་བློ་བཅོས་མ་མ་ཡིན་པ་སྐྱེས་ནས། སྐྱེས་བུ་འབྲིང་གི་ལམ་ཁོ་ནས་བློ་སྦྱོང་བ་རྣམས་རང་ཉིད་གཅིག་པུ་ཞི་བ་དོན་དུ་གཉེར་བ་ཡིན་མོད། སྐབས་འདིར་འབྲིང་དང་ཐུན་མོང་བའི་ལམ་ལ་བློ་སྦྱོང་བ་ནི་རང་རྒྱུད་ཀྱི་སྡུག་བསྔལ་ལ་རྗེས་སུ་དཔགས་ཏེ་སེམས་ཅན་གཞན་རྣམས་ཀྱང་དེ་བཞིན་དུ་སྡུག་བསྔལ་བ་མ་བཟོད་པར་དེ་དག་སྡུག་བསྔལ་ལས་ཐར་བར་འདོད་ནས་དེའི་ཐབས་སྒྲུབ་པ་པོ་དེ་ནི་སྐྱེས་བུ་ཆེན་པོ་ཡིན་ལ། ཐབས་གང་གི་སྒོ་ནས་སྒྲུབ་ན། ཕར་ཕྱིན་བསྡུས་པ་ལས། འཇིག་རྟེན་དོན་སྒྲུབ་ཚུལ་ལ་མཐུ་མེད་པའི། །ཐེག་པ་གཉིས་པོ་གཏན་དུ་སྤངས་བྱས་ཤིང་། །ཐུབ་རྒྱལ་ཐེག་པ་སྙིང་རྗེས་བསྟན་པ་ལ། །གཞན་ཕན་རོ་གཅིག་རང་བཞིན་དེ་དག་འཇུག །ཅེས་བདེན་བཞི་ལ་འཇུག་ལྡོག་གི་ལམ་ཉམས་སུ་བླངས་པས་ཐར་པ་ཐོབ་ཀྱང་རང་དོན་ཡོངས་སུ་མ་རྫོགས་པས་གཞན་དོན་རྒྱ་ཆེན་པོ་མི་འབྱུང་བས་དེ་ལྟར་ན་གཞན་དོན་རྒྱ་ཆེན་སྒྲུབ་པའི་མཐུ་མེད་པའི་ཉན་རང་གི་ལམ་ལ་མི་འཇུག་པར་ཐེག་པ་ཆེན་པོ་ལ་ཞུགས་ཏེ་སེམས་ཅན་གྱི་དོན་སྒྲུབ་དགོས་པ་ནི་སློབ་སྤྲིངས་ལས། ཤིན་ཏུ་རྙེད་སླའི་རྩྭ་ཁམ་འགའ་ལྟ་ཕྱུགས་ཀྱང་རང་ཉིད་ཟ། །ཤིན་ཏུ་སྐོམ་པས་གདུངས་པའང་ཆུ་ཞིག་རྙེད་ན་དགའ་མགུར་འཐུང་། །འདི་ན་སྐྱེས་བུ་གཞན་དོན་བྱེད་པར་བརྩོན་པ་གང་ཡིན་པ། །དེ་འདིའི་བརྗིད་བག་ཡིན་ཏེ་དེ་བདེ་སྐྱེས་བུའི་རྩལ་དེ་
འཕགས། ཉི་མ་རླབས་ཆེན་རྟ་ཞོན་རྒྱུ་བ་སྣང་བྱེད་གང་ཡིན་དང་། ཁུར་ལ་མི་རྩེག་ས་ཡིས་འཇིག་རྟེན་འདེགས་པ་གང་ཡིན་དེ། །རང་དོན་འགའ་མེད་ཆེན་པོ་རྣམས་ཀྱི་རང་བཞིན་དེ་འདྲ་སྟེ། །དེ་དག་འཇིག་རྟེན་ཕན་དང་བདེ་བའི་རོ་ལ་གཅིག་ཏུ་གཞོལ། །ཞེས་ཚེ་འདིའི་བདེ་བ་སྒྲུབ་པ་ཙམ་ནི་དུད་འགྲོ་ལ་ཡང་ཡོད་པས་ན་སྐྱེས་བུ་མཆོག་རྣམས་ཀྱི་ནུས་པའམ་རྩལ་ནི་ཉི་ཟླས་མུན་པ་སེལ་བ་དང་ས་ཆེན་པོས་འཇིག་རྟེན་འདེགས་པ་ལྟར་སྙིང་སྟོབས་ཆེན་པོས་གཞན་ཕན་གྱི་ཁུར་འཁྱེར་བར་བྱེད་པ་ཡིན་པས་དེ་ལ་མེད་དུ་མི་རུང་བ་སྤྱོད་འཇུག་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་འཁོར་བར་སྡུག་བསྔལ་བའི་འགྲོ་བ་ཞིག་ཀྱང་སེམས་བསྐྱེད་མ་ཐག་པ་ནས་བྱང་ཆུབ་སེམས་དཔར་འགྱུར་བར་གསུངས་ཤིང་། བྱང་ཆུབ་ཀྱི་སེམས་དང་མི་ལྡན་ན་ལྷག་པའི་བསླབ་པ་རིན་པོ་ཆེ་སོགས་ཡོན་ཏན་ཇི་ཙམ་ཡོད་ཀྱང་ཐེག་པ་ཆེན་པོ་བའི་གྲལ་དུ་མི་ཚུད་པ་རྒྱུད་བླ་མ་ལས། ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་སྐྱེད་མ་དང་བསམ་གཏན་གྱི། །བདེ་བའི་མངལ་གནས་སྙིང་རྗེའི་མ་མ་ཅན། གང་ཡིན་དེ་དག་ཐུབ་པའི་རྗེས་སྐྱེས་སྲས། །ཞེས་ཆུ་ལུད་ནི་འབྲུ་སྣ་ཚོགས་བསྐྱེད་པའི་ཐུན་མོང་གི་རྒྱུ་དང་། རྗེའུའི་རིགས་ཅན་གྱི་མ་ནི་བུ་རིགས་རྒྱུད་མི་གཅིག་པ་སྣ་ཚོགས་སྐྱེད་པར་བྱེད་པ་ཡིན་ལ། ཐུན་མོང་མ་ཡིན་པའི་རྒྱུ་ས་བོན་ནས་དང་། ཕ་བྲམ་ཟེ་ལྟ་བུ་རིགས་གཅིག་ཏུ་ངེས་པ་ཞིག་དགོས་ཀྱི། ནས་བཏབ་པའི་མྱུ་གུ་གྲོ་སྐྱེ་བ་དང་། ཕ་བྲམ་ཟེའི་བུ་ལ་གདོལ་བའི་རིགས་མི་འབྱུང་
བ་བཞིན་དུ་ཐེག་པ་ཆེ་ཆུང་གང་གི་སྒོ་ནས་འཁོར་བ་ལས་སྒྲོལ་བར་བྱེད་པ་ལ་བདག་མེད་རྟོགས་པའི་ཤེས་རབ་སོགས་གཉིས་ཀ་ལ་དགོས་པའི་མ་ལྟ་བུ་ཡིན་ནའང་། བྱང་ཆུབ་ཀྱི་སེམས་ནི་སངས་རྒྱས་ཀྱི་རྒྱུ་ཐུན་མོང་མ་ཡིན་པ་ཕ་ལྟ་བུ་འདི་ཉིད་སྲིད་ཞིའི་རྒུད་པ་མཐའ་དག་སེལ་བར་བྱེད་པའི་རྡོ་རྗེ་རིན་པོ་ཆེ་དང་མཚུངས་པས་དམན་པའི་རྒྱན་མཐའ་དག་ཟིལ་གྱིས་གནོན་པར་བྱེད་པའི་སྐྱེས་བུ་ཆེན་པོའི་ལམ་གྱི་རིམ་པ་ཉམས་སུ་ལེན་པ་ལ་བྱང་ཆུབ་ཀྱི་སེམས་ཇི་ལྟར་བསྐྱེད་པའི་ཚུལ། སེམས་བསྐྱེད་ནས་སྤྱོད་པ་ལ་སློབ་པའི་ཚུལ་གཉིས། དང་པོ་ལ་བྱང་ཆུབ་ཀྱི་སེམས་སྦྱོང་བའི་རིམ་པ་དང་། སེམས་བསྐྱེད་ཆོ་གས་འཛིན་པའི་ཚུལ་གཉིས། དང་པོ་ནི་སྤྱིར་སེམས་སྐྱེད་པར་བྱེད་པའི་རྐྱེན་ནི་སངས་རྒྱས་དང་བྱངཆུབ་སེམས་དཔའ་རྣམས་ཀྱི་ཡོན་ཏན་དངོས་སུ་མཐོང་བ་དང་། དངོས་སུ་མ་མཐོང་ཡང་བྱང་ཆུབ་སེམས་དཔའི་སྡེ་སྣོད་ཐོས་པ་དང་། དེ་དག་ཕྲ་ཞིང་ཞིབ་པར་ཐོས་པ་མིན་ནའང་སངས་རྒྱས་འཐོབ་པ་ལ་ཆོས་དེ་མེད་དུ་མི་རུང་བ་སོགས་ཀྱི་རྒྱུ་མཚན་འོལ་སྤྱི་ཙམ་ཐོས་པས་ཐེག་ཆེན་གྱི་བསྟན་པ་ནུབ་པ་མ་བཟོད་པ་དང་། བསྟན་པ་ནུབ་པ་ལ་མངོན་དུ་ཕྱོགས་པ་མིན་ཡང་སྙིགས་མའི་དུས་ཆེས་ངན་པ་འདིར་ཉན་རང་གི་བྱང་ཆུབ་ཏུ་སེམས་བསྐྱེད་པ་ཡང་རྙེད་དཀའ་ན་བླ་ན་མེད་པའི་བྱང་ཆུབ་ལྟ་ཅི་སྨོས་སྙམ་དུ་སངས་རྒྱས་ཐོབ་འདོད་ཀྱི་སེམས་བསྐྱེད་པ་དང་། རིགས་དང་དགེ་བའི་བཤེས་གཉེན་དང་སྙིང་བརྩེ་བ་དང་སྐྱོ་ངལ་མེད་པ་སྟེ་རྒྱུ་བཞི་ལ་བརྟེན་ནས་སེམས་བསྐྱེད་པ། རང་གི་སྟོབས་དང་། གཞན་གྱི་སྟོབས་དང་། ཚེ་རབས་སྔོན་མ་ལ་ཐེག་པ་ཆེན་པོར་གོམས་པ་རྒྱུའི་སྟོབས་དང་། ཚེ་འདིར་དགེ་བ་ལ་གོམས་པ་སྦྱོར་པའི་སྟོབས་ཏེ་རྒྱུ་བཞི་དང་སྟོབས་བཞི་སོགས་སེམས་བསྐྱེད་
པའི་རྒྱུ་རྐྱེན་མང་དུ་བཤད་ལ། དེང་སང་ཕྱག་ལེན་གྱི་སྙིང་པོར་ཇོ་བོ་ཆེན་པོ་ཨ་ཏི་ཤ་ནས་བརྒྱུད་པར་མན་ངག་བདུན་པ་དང་། རྒྱལ་བའི་སྲས་པོ་ཞི་བ་ལྷ་ནས་བརྒྱུད་པའི་མན་ངག་གཉིས་ལ་བརྟེན་པའི་ཇོ་བོ་ཆེན་པོའི་ལུགས་ཀྱི་དང་པོ་རྒྱུ་འབྲས་མན་ངག་བདུན་ལ་བློ་སྦྱོང་དགོས་པའི་རྒྱུ་མཚན་སངས་རྒྱས་ཀྱི་གོ་འཕང་ནི་བྱང་ཆུབ་ཀྱི་སེམས་ལས་འབྱུང་། དེ་ལྷག་བསམ་ལས་འབྱུང་། དེ་སྙིང་རྗེ་ལས་འབྱུང་། དེ་བྱམས་པ་ལས་འབྱུང་། དེ་དྲིན་དུ་གཟོ་བ་ལས་འབྱུང་། དེ་དྲིན་དྲན་པ་ལས་འབྱུང་། དེ་མར་ཤེས་པ་ལས་འབྱུང་བའི་གོ་རིམ་གྱི་གནད་དེ་ལྟར་ཡོད་ནའང་། སྙིང་རྗེ་ཆེན་པོ་ལྷག་བསམ་དང་བྱམས་པའི་བར་ཁོ་ནར་འབྱུང་བ་ལས་གཞན་དུ་མི་འབྱུང་བའི་ངེས་པ་ནི་མེད་དེ། འཇུག་པ་ལས། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདིའི། །ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ། །ལོངས་སྤྱོད་གནས་ལ་སྨིན་པ་ལྟ་བུར་འདོད་གྱུར་པ། །དེ་ཕྱིར་བདག་གིས་ཐོག་མར་སྙིང་རྗེ་བསྟོད་པར་བགྱི། །ཞེས་ཐོག་མར་འགྲོ་བ་རྣམས་ལ་འཁོར་བ་ལས་བསྒྲལ་བའི་ཕྱིར་དུ་དམ་བཅའ་བ་ཡང་སྙིང་རྗེ་ལ་རག་ལུས་པར་མ་ཟད། བར་དུ་བྱ་དཀའ་བས་སྒྱིད་ལུག་སྟེ་ལམ་དམན་པར་མི་གོལ་བ་དང་། མཐར་སངས་རྒྱས་ནས་ཀྱང་ཉན་རང་ལྟར་ཞི་བར་མི་གནས་པར་སེམས་ཅན་མཐའ་དག་གི་དོན་མཛད་པར་ངལ་བ་མེད་པ་ཡང་སྙིང་རྗེ་ཆེན་པོ་ལ་རག་ལུས་མོད། དེ་ལྟར་སྙིང་རྗེ་ཆེན་པོ་སྐྱེ་བ་ལ་ཡང་ཡིད་དུ་འོང་བ་ཞིག་དགོས་པས་སེམས་ཅན་ཐམས་ཅད་མར་ཤེས་དགོས་ལ། ལམ་འདི་དག་ལ་མ་སྦྱངས་པའི་སྐྱེ་བོ་རྣམས་ཀྱང་རང་གི་མ་ལ་སོགས་པའི་གཉེན་རྣམས་ལ་དྲིན་བསམ་པ་དང་དྲན་པའི་སྒོ་ནས་བྱམས་པ་དང་སྙིང་རྗེ་ཉི་ཚེ་བ་སྐྱེ་ནའང་། མི་མཛའ་བའི་དགྲ་སོགས་ལ་མི་སྐྱེ་བར་མ་ཟད་དེའི་ལྡོག་ཕྱོགས་སྡུག་བསྔལ་
དང་ཕྲད་འདོད་དང་བདེ་བ་དང་འབྲལ་འདོད་ཀྱི་བློ་འབྱུང་བའི་ཕྱིར་ན་རང་རེ་རྣམས་ཀྱང་ཐོག་མར་བཏང་སྙོམས་ཤིག་མ་བསྒྲུབས་ན་ལམ་སྒོམ་བློ་བྱས་ཀྱང་བྱམས་སྙིང་རྗེ་ཕྱོགས་རིས་ཅན་དུ་འགྲོ་བས་དེའི་གཉེན་པོར་ཐོག་མར་བཏང་སྙོམས་སྒོམ་དགོས་མོད། འོ་ན་མ་སོགས་ལ་ཡིད་འོང་གི་བྱམས་པ་སྒྲུབ་དགོས་ན་ད་ལྟ་ཡིད་འོང་གི་བློ་ཡོད་པ་དེ་བཀག་ནས་ཅི་བྱ་སྙམ་ན། རྒྱུ་འབྲས་བདུན་གྱི་ཡིད་འོང་ལ་ཆགས་པ་ཅུང་ཟད་ཀྱང་མ་འདྲེས་པ་དགོས་ལ། ད་ལྟ་རང་ཅག་ཚོའི་བློ་ལ་ཡོད་བཞིན་པའི་བྱམས་པ་ནི་ཆགས་པས་བསླངས་པ་ཡིན་པས། དཔེར་ན་ས་སྒང་གཤོངས་མི་སྙོམས་པ་ལ་གནས་མལ་མི་བདེ་བ་བཞིན་ཆགས་སྡང་གི་མཐོ་དམའ་ཅན་ལ་བྱམས་པ་འོང་བའི་སྐབས་མེད་དོ། །དེ་ཡང་ཚོར་བ་བཏང་སྙོམས་ལྟ་བུ་མ་ཡིན་པའི་སེམས་ཅན་རྣམས་ལ་རང་བློ་ཆགས་སྡང་དང་བྲལ་བའི་ཚད་མེད་བཏང་སྙོམས་ཤིག་སྒོམ་པར་བྱེད་པ་ལ་ཐོག་མར་དགྲ་གཉེན་གང་ཡང་མིན་པའི་སེམས་ཅན་ཞིག་གི་ལེགས་པར་གསལ་བཏབ་པས་དེའི་བྱད་དབྱིབས་དང་སྤྱོད་ཚུལ་སོགས་ཡིད་ལ་ཤར་བ་དང་དེ་ལ་དམིགས་ནས་སྡང་བ་དང་བྱམས་པའི་རྟོག་པ་སྐྱེ་བཅུག་པ་ན་དེ་ལ་མི་མཐུན་པར་བལྟ་བའི་ཞེ་སྡང་དང་མཐུན་པར་བལྟ་བའི་འདོད་ཆགས་གཉིས་ཀ་ཧ་ཅང་ཆེ་བ་མི་འབྱུང་ཡང་། ཆེ་ཆུང་ཅུང་ཟད་འདུག་ན་གང་ཆེ་བ་དེའི་གཉེན་པོ་བསྟེན་ནས་སེམས་སྙོམས་པ་མ་བྱུང་གི་བར་དུ་བསྒོམ་གསུང་། ཐོག་མར་བར་མ་ལ་སྒོམ་པ་ཡུལ་དེ་ལ་བཏང་སྙོམས་ཤས་ཆེ་བས་སྐྱེ་བ་སླ་བའི་དབང་དུ་བཏང་བ་ཡིན་ཞིང་། དེ་ནས་ཚེ་འདིར་སྙིང་ན་བའི་དགྲ་ཞིག་དང་ཤིན་ཏུ་མཛའ་བའི་གཉེན་ཞིག་དམིགས་ཡུལ་དུ་བྱས་ཏེ་དེ་དག་ལ་ཆགས་སྡང་གི་རྟོག་པ་མངོན་གྱུར་སྐྱེས་བྱུང་བ་དང་། དགྲ་རྣམས་ཀྱང་ཚེ་སྔོན་
མའི་གྲོགས་བྱས་ནས་ཕན་མང་དུ་བཏགས་པ་དང་གྲོགས་རྣམས་ཀྱང་ཚེ་སྔོན་མའི་དགྲར་གྱུར་ནས་རང་བསད་པ་སོགས་གནོད་པ་བྱས་ཚུལ་ལེགས་པར་བསམས་པའི་སྒོ་ནས་ཆགས་སྡང་གི་རྟོག་པ་མགོ་སྙོམས་པ་ཡིན་ལ། འོན་ཀྱང་སྐྱེས་བུ་འབྲིང་གི་སྐབས་ཀྱི་དགྲ་གཉེན་ལ་ངེས་པ་མེད་ཚུལ་གྱི་སྐོར་ལ་མྱོང་བ་ཐོན་ན་སྐབས་འདིར་དམིགས་པ་སྐྱོང་ཤིན་ཏུ་སླ་བར་སྣང་ངོ་། །དམིགས་ཡུལ་གསུམ་པོ་འདི་གས་བྱ་བརྒྱ་འུར་རྡོ་གཅིག་གིས་འདེད་པ་ལྟར་འགྲོ་བ་རྣམས་ལ་འབད་མེད་སྙོམས་པའི་བློ་བྱུང་ན་དེས་ཆོག་ལ། ད་དུང་སྐྱེ་དཀའ་སེ་བ་བྱུང་ཚེ་རིགས་མི་གཅིག་པ་མང་པོ་ལ་སྤོས་ཀྱིན་སྒོམ་པ་གནད་ཡིན་ནོ། །དེ་ལྟར་དགྲ་གཉེན་བར་མའི་འགྲོ་བ་མཐའ་དག་ལ་གཅིག་ཏུ་སྡང་བ་གཅིག་ཏུ་ཆགས་པའི་བློ་འགོ་སྙོམས་ཟིན་ནས་ཐོག་མར་གཞན་དོན་དོན་གཉེར་གྱི་བློའི་གཞི་སྒྲུབ་པར་བྱེད་པ་ལ་སེམས་ཅན་ཐམས་ཅད་མར་ཤེས་པའི་སླད་དུ་འདི་ལྟར་བསམ་སྟེ། འཁོར་བ་ལ་མཐའ་མེད་པ་བཞིན་དུ་བདག་གི་སྐྱེ་བ་ལ་མཐའ་མེད་པས་སེམས་ཅན་ཐམས་ཅད་ཀྱི་མངལ་དུ་བདག་ཉིང་མཚམས་སྦྱར་ནས་སྐྱེ་བ་མ་བླངས་པ་ག་ལ་ཡོད་སྙམ་དུ་བསམས་པ་ན་མོས་པའི་དབང་གིས་འཆར་ཡང་། སྤྱི་ལྡོག་ཏུ་བསྒོམས་པས་ངེས་ཤེས་འདྲོངས་དཀའ་བས་ན་རང་གི་མདུན་དུ་ད་ལྟའི་མ་དེ་ཉིད་རྒན་གཞོན་དབྱིབས་ཆ་བྱད་སྤྱོད་ཚུལ་ཇི་ལྟར་ཡོད་པ་གསལ་བཏབ། དེས་ཚེ་འདིའི་མ་བྱས་པ་དངོས་སུ་གྲུབ་པ་འདི་ག་འདྲ་བ་ཞིག་སྐྱེ་བ་གཞན་མང་པོར་ཡང་བྱས་ཡོད་དེ། དཔེར་ན་མདོ་ལས་དེ་བཞིན་གཤེགས་པའི་སྐུ་ཚེ་དེའི་ཡུམ་གྱི་སྔོན་སློབ་པ་ལམ་གྱི་གནས་སྐབས་ཀྱི་མ་མང་དུ་བྱས་ཚུལ་དང་། གང་ཟག་གཞན་གྱི་སྔོན་དང་ཕྱི་མའི་མཐའ་གསུངས་པ་ཚད་མའི་སྐྱེས་བུའི་བཀའ་བསླུ་
བ་མེད་པ་ཡིན་སྙམ་པའི་སྒོ་ནས་རྗེས་སུ་དཔགས་ཏེ་བསྒོམས་ན་གཏིང་ཕྱིན་པའི་ངེས་ཤེས་ཁྱད་པར་ཅན་ཞིག་རྙེད་འོང་། དེ་ནས་ཚེ་འདིའི་ཕ་དང་ཉེ་དུ་བར་མ་དགྲ་དམྱལ་བ་སོགས་འགྲོ་བ་རིགས་གཞན་ལའང་བསྒོམས་པས་མཐར་སེམས་ཅན་ཐམས་ཅད་མར་ཤེས་པའི་བློ་རང་གིས་ཕར་བཅོས་པ་མ་ཡིན་པའི་ཚེ་འདིའི་མ་དང་འདྲ་བའི་སྣང་བ་འཆར་བ་ཞིག་འོང་། དེ་ལ་མྱོང་བ་ཐོན་ནས་དྲིན་དྲན་པ་ནི་སྔར་ལྟར་རང་གི་མའི་སྣང་ཚུལ་མཐའ་དག་གསལ་བཏབ། མ་འདིས་བདག་ཟླ་བ་བཅུའི་བར་དུ་མངལ་དུ་བཟུང་། རང་གི་བདེ་བ་དང་ལྟོགས་སྐོམ་སོགས་ཁྱད་དུ་བསད། ཕན་གནོད་ཀྱི་སྤྱོད་ལམ་ཐམས་ཅད་བུའི་ཆེད་དུ་བྱས་ཏེ་དལ་འབྱོར་གྱི་ལུས་སྲོག་འདི་ཉིད་བྱིན་པ་ཡིན་པས་ཐོག་མར་དྲིན་ཆེ། མངལ་ནས་བཙས་ཟིན་ནས་འཇམ་པའི་གོས་སྟན་ལ་བཞག །བརྩེ་བའི་སེམས་ཀྱིས་བསྐྱངས། བྱམས་པའི་མིག་གིས་བལྟས། དགའ་བའི་འཛུམ་གྱིས་བསུས། སྙན་པའི་མིང་ནས་བོས། མངར་བའི་ནུ་ཞོ་བསྣུན། ཟས་ལྕེས་བསྙོད། སྣབས་ཁས་ཕྱིར། མི་གཙང་བ་ལག་པས་ཕྱིས། ཤའི་དྲོད་ལ་བཅར། མེ་ཆུ་གཡང་སའི་འཇིགས་པ་ལས་བསྐྱབས། བུ་ན་བ་ལས་རང་ན་བ་དང་བུ་ཤི་བ་ལས་རང་ཤི་བ་ལ་སྙིང་ཐག་པ་ནས་འདེམ་པ་སོགས་ཀྱི་སྒོ་ནས་བསྐྱངས་པས་བར་དུ་དྲིན་ཆེ། ནར་སོན་ནས་ཟ་ལུགས་འགྲོ་ལུགས་སོགས་ཀྱིས་མཐའ་རྟེན་པའི་ཡོན་ཏན་རང་གིས་བསླབ་པ་དང་གཞན་སློབ་ཏུ་འཇུག་པ། སྡིག་སྡུག་གཏམ་ངན་ཁྱད་དུ་བསད་དེ་ཤ་ཐང་ཐང་དུ་འབད་པས་བཙལ་བའི་ས་ཁང་ནོར་རྫས་སྙིང་ལྟར་གཅེས་པ་མཐའ་དག་བྱིན་པས་ཐ་མར་དྲིན་ཆེ་ཚུལ་རྣམས་བསམས་པས་མིག་ནས་མཆི་མ་འཁྲུག་པ་དང་ལུས་ཀྱི་བ་སྤུ་ལྡང་བ་
སེམས་རྩད་ཡམ་ཡམ་བློང་བློང་བ་མ་བྱུང་གི་བར་དུ་བསྒོམ། དེ་ནས་རིམ་གྱིས་ཕ་ནས་བཟུང་དགྲའི་བར་དང་རིགས་དྲུག་གི་འགྲོ་བ་གཞན་རྣམས་ལ་ཚེ་སྔོན་མའི་མར་གྱུར་པ་གྲངས་ཀྱིས་མི་ཆོད་པ་བྱས་པའི་གནས་སྐབས་སུ་ཚེ་འདིའི་མས་འདི་ལྟར་བྱས་པ་ལྟ་བུ་དང་ཚུལ་མཚུངས་པའི་སྒོ་ནས་བསམ། དེ་ཡང་བཤད་མ་ཐག་པ་ཐམས་ཅད་དུད་འགྲོ་སོགས་ལ་མི་ཚང་ཡང་མིར་གྱུར་དུས་ཀྱི་མ་མ་བྱས་པ་མེད་པ་ལ་དགོངས་པར་སྣང་། དྲིན་དྲན་པ་ལ་མྱོང་བ་སྐྱེས་པའི་རྗེས་སུ་དྲིན་གཟོ་བ་ནི་སློབ་སྤྲིངས་ལས། ཉེ་དུ་འཁོར་བའི་རྒྱ་མཚོའི་ཁོངས་སུ་ཆུད་གྱུར་པ། །ཀློང་གི་ནང་དུ་ལྷུང་བ་ལྟ་བུར་སྣང་བཞིན་དུ། །སྐྱེ་ཤི་འཕོས་པས་ངོ་མ་ཤེས་པ་དེ་བོར་ནས། །གལ་ཏེ་གཅིག་ཐར་བྱེད་ན་དེ་ལས་ཁྲེལ་པོར་མེད། །ཅེས་མར་གྱུར་སེམས་ཅན་རྣམས་ཉོན་མོངས་པའི་གདོན་གྱིས་རྒྱུད་དཀྲུགས། བླང་དོར་ལ་བལྟ་བའི་མིག་གཏི་མུག་གིས་ལྡོངས། ཟབ་མོ་དམ་པའི་ཆོས་ཀྱི་འཁར་བ་དང་བྲལ། ཐར་པའི་གྲོང་དུ་འཁྲིད་པའི་དགེ་བའི་བཤེས་གཉེན་གྱི་དམིགས་བུས་བོར། མཐོ་རིས་དང་ཐར་པའི་ངལ་སྟེགས་ལ་བརྡེག་འཆོས་ཏེ་འཁོར་བའི་གཡང་དུ་ལྷུང་། སྡུག་བསྔལ་གསུམ་གྱི་བཙོན་རར་འཁྱམས་པ་འདི་དག་སྐྱེ་ཤི་འཕོས་པས་ངོ་མ་ཤེས་པ་མ་གཏོགས་ཚེ་རབས་མང་པོར་རང་ལ་ཕན་བཏགས་པའི་དྲིན་ཅན་གྱི་ཕ་མ་ཤ་སྟག་ཡིན་པས་མ་དེ་རྣམས་ཀྱིས་ཀྱང་བུ་བདག་ལ་མི་རེ་ན་སུ་ལ་རེ། བུ་བདག་ལ་མ་དེ་རྣམས་སྐྱོང་བའི་ཁུར་མ་བབ་ན་གཞན་སུ་ལ་བབ། དཔེར་ན་འདི་སྣང་གི་ཕ་མ་མཛའ་གྲོགས་ཤིག་བཙོན་རའམ་འབྲོག་དགོན་པ་ཆོམ་རྐུན་དང་གཅན་གཟན་གྱི་འཇིགས་པ་ཡོད་པར་ཆུད་པ་ལས་ཐར་བའི་ཐབས་ཤིག་རང་ལ་ཡོད་བཞིན་དུ་བློས་བོར་ནས་བདེ་བར་
བསྡད་ན་དེ་ལས་ངོ་ཚ་དང་ཁྲེལ་ཆུང་བ་མི་འོང་བ་ཀླུའི་རྒྱལ་པོ་རྔ་སྒྲའི་ཚིགས་བཅད་ལས། རྒྱ་མཚོ་དང་ནི་རི་རབ་དང་། །ས་རྣམས་བདག་གི་ཁུར་མིན་གྱི། །བྱས་པ་མི་གཟོ་གང་ཡིན་པ། དེ་ནི་བདག་གི་ཁུར་ཆེན་ཡིན། །ཞེས་པ་ལྟར་ཡིན་པས་བདག་གིས་དྲིན་ཅན་གྱི་མ་རྣམས་སྐྱོབ་པའི་ནུས་པ་ཡོད་བཞིན་དུ་དོར་ནས་རང་གཅིག་པུ་ཞི་བ་དོན་དུ་གཉེར་བའི་དམན་པའི་ལམ་དུ་བཞུགས་ན་དམ་པ་རྣམས་ཐུགས་གཏིང་ནས་ཁྲེལ་བར་འདུག་པས་དེ་སྤངས་ཏེ་འགྲོ་བ་ཀུན་ལ་ཕན་པ་བསྒྲུབ་པར་བྱ་སྙམ་དུ་བསམ། འོ་ན་ཕན་ཇི་ལྟ་བུའི་ཚུལ་གྱིས་འདོགས་ན་བཀྲེས་པ་ལ་ཟས། སྐོམ་པ་ལ་བཏུང་བ། ནད་ཀྱིས་མནར་བ་ལ་སྨན། ཕོངས་པ་ལ་ཟང་ཟིང་གི་ནོར་སོགས་ཀྱང་གནས་སྐབས་སོ་སོའི་སྡུག་བསྔལ་སེལ་ཞིང་། རང་གི་ཚོགས་གསོག་པའི་རྒྱུ་ཡིན་པས་མི་བྱ་བ་མ་ཡིན་མོད། སྲིད་པའི་སྟོབས་འབྱོར་ལ་སྦྱར་བ་ཉིད་འགྲོ་བ་རྣམས་ལ་ཕན་བཏགས་པའི་གཙོ་བོར་བཟུང་ཚེ། དེ་དག་གིས་ཚངས་པ་དང་འདོད་པའི་ལྷ་དགའ་རབ་དབང་ཕྱུག་དང་འཁོར་ལོས་སྒྱུར་རྒྱལ་ཀྱང་གྲངས་མེད་བྱས་པས་བརྟན་པ་མ་ཐོབ་བར་དབུལ་ཕོངས་ཚ་གྲང་གི་སྡུག་བསྔལ་གྱི་གནས་སྐབས་འདི་ལྟར་གྱུར་ན། བདག་གིས་ཀྱང་འདི་དག་ཟག་བཅས་ཀྱི་བདེ་བ་ལ་གཙོ་བོར་སྦྱར་ན་སྟོབས་འབྱོར་ཇི་ཙམ་ཆེ་བ་ཙམ་གྱིས་བདེ་བ་དེ་སྡུག་བསྔལ་དུ་འགྱུར་ཚབས་ཆེ་བ་རྨ་འབྲས་ལ་འགྱུར་བྱེད་ཀྱི་རྫས་ཚ་བ་ལྟ་བུ་བཏབ་པ་ལྟར་སྡུག་བསྔལ་ཇེ་འཕེལ་དུ་འགྲོ་བ་དང་འདྲ་བར་འདུག་པས་སེམས་ཅན་ཐམས་ཅད་ཐར་པ་དང་ཐམས་ཅད་མཁྱེན་པའི་གོ་འཕང་གང་རུང་ལ་དགོད་པར་བྱ་སྙམ་པའི་ཡིད་འཁུལ་ངེས་སུ་བསམ་མོ། །དེ་ལྟར་གཞན་དོན་དོན་གཉེར་གྱི་བློ་
བསྐྱེད་པའི་གཞི་བསྒྲུབས་པ་ཙམ་གྱིས་མི་ཆོག་པས་བློ་དངོས་སྐྱེ་བ་ལ་བྱམས་སྙིང་རྗེ་ལྷག་བསམ་གསུམ་སྒོམ་དགོས་པའི་བྱམས་པ་དང་སྙིང་རྗེ་གཉིས་ལ་བདེ་བ་ལ་སྦྱོར་འདོད་དང་སྡུག་བསྔལ་དང་འབྲལ་འདོད་ཀྱི་བློ་གང་མངོན་དུ་གྱུར་པ་དང་རྗེས་སུ་འབྲེལ་བ་ལས་རྒྱུ་འབྲས་ཀྱི་གོ་རིམ་ངེས་ཅན་དུ་མེད་ཀྱང་། སྤྱིར་བཏང་ཕྱག་ལེན་དུ་བྱམས་པ་སྔོན་དུ་མཛད་པས། རིན་ཆེན་ཕྲེང་བ་ལས། རྫེའུ་ཚོས་སུམ་བརྒྱའི་ཁ་ཟས་དག །ཉིན་རེ་དུས་གསུམ་བྱིན་པས་ཀྱང་། །བྱམས་པ་ཡུད་ཙམ་ཐང་གཅིག་གི །བསོད་ནམས་དག་ལ་ཆེ་མི་ཕོད། །ལྷ་མི་བྱམས་པར་འགྱུར་བ་དང་། །དེ་དག་ཀྱང་ནི་སྲུང་བ་དང་། །ཡིད་བདེ་བ་དང་བདེ་མང་དང་། །དུག་དང་མཚོན་གྱིས་གནོད་མེད་དང་། །འབད་པ་མེད་པར་དོན་འཐོབ་དང་། །ཚངས་པའི་འཇིག་རྟེན་སྐྱེ་འགྱུར་ཏེ། །གལ་ཏེ་གྲོལ་བར་མ་གྱུར་ཀྱང་། །བྱམས་ཆོས་ཡོན་ཏན་བརྒྱད་འཐོབ་བོ། །ཞེས་ཕན་ཡོན་མཐའ་ཡས་པའི་བྱམས་པ་སྒོམ་པ་ནི་ཚེ་འདིའི་མ་ལ་ནད་དང་དབུལ་ཕོངས་སོགས་སྡུག་བསྔལ་མངོན་གྱུར་ཡོད་དམ་མེད་ནའང་འགྱུར་བའི་སྡུག་བསྔལ་དང་ཁྱབ་པ་འདུ་བྱེད་ཀྱི་སྡུག་བསྔལ་ཙམ་ཡིན་པས་བདེ་བ་དང་མི་ལྡན་ཚུལ་བསམས་ལ། བདེ་བ་དང་མི་ལྡན་པའི་མ་འདི་ཉིད་བདེ་བ་ལ་དགོད་འདོད་ཀྱི་བློ་ཤུགས་དྲག་པོར་བསྐྱེད་ནས་ངག་ཏུ། བདེ་བས་ཕོངས་པའི་མི་རྒན་འདི་རྣམས་བདེ་བ་དང་ཕྲད་ན་ཅི་མ་རུང་། བདེ་བ་དང་ཕྲད་པར་གྱུར་ཅིག །ཅི་ནས་ཀྱང་བདེ་བ་དང་ཕྲད་པར་བྱའོ། །ཞེས་ལན་མང་པོ་བརྗོད་ཅིང་དེ་ལྟར་བསམ་མོ། །དེ་བཞིན་དུ་དགྲ་གཉེན་སོགས་འགྲོ་བ་རིས་མེད་རྣམས་ལ་ཡང་སྔར་གྱི་གོ་རིམ་ལྟར་སྒོམ་དགོས་པས། ངན་སོང་གསུམ་ལ་སྡུག་བསྔལ་མངོན་གྱུར་དང་བདེ་
འགྲོ་ལ་སྡུག་བསྔལ་ཡོད་མེད་ཅི་རིགས་ཀྱང་སྐབས་དང་སྦྱར་རོ། །འོན་ཀྱང་དགྲས་གནོད་པ་འདི་ཞེས་བྱ་བ་བྱས་པས་ཕན་བཏགས་ཤན་འདྲ་སྙམ་ན་རང་གིས་སྐྱེ་བ་སྔོན་མ་ཕར་གནོད་པ་བྱས་པའི་ལེ་ལན་ཚུར་ལ་འཁོར་བ་ཡིན་ནམ། རྣམ་པ་གཅིག་ཏུ་ན་ཁོ་རང་ལ་རང་དབང་མེད་པར་ཉོན་མོངས་པ་དེས་རྒྱུད་བསྐུལ་བར་འདུག །ཚེ་འདིའི་མའམ་ཉེ་དུ་ལྟ་བུ་ཞིག་གདོན་གྱིས་སྨྱོས་ཏེ་བདག་ལ་མཚོན་ཆ་སོགས་རྡེག་ཏུ་བྱུང་ན་དེ་ལ་ཞེ་སྡང་མི་སྐྱེ་བའི་ཁར་གདོན་དང་འབྲལ་བའི་ཐབས་ལ་བརྩོན་པ་བྱེད་པ་བཞིན་ཚེ་སྔོན་མའི་མ་རྒན་འདི་སྣང་གི་འཁྲུལ་ངོར་དགྲར་བཏགས་པ་འདི་ཡང་ཉོན་མོངས་པའི་གདོན་གྱིས་སྨྱོས་འདུག་པས་ཉོན་མོངས་པའི་གདོན་འདི་དང་བྲལ་ཏེ་བདེ་བ་དང་ལྡན་ན་ཅི་མ་རུང་སྙམ་པ་སོགས་སྔར་ལྟར་ཉམས་སུ་ལེན་པ་ནི་གནད་དམ་པ་ཡིན། འོ་ན་གོང་དུ་དགྲ་རྣམས་ཀྱང་མར་བསྒོམས་ཟིན་པས་བྱམས་པ་སྐྱེ་དཀའ་བ་ཞིག་མི་འོང་ངམ་སྙམ་དུ་དོགས་ན། ཤིན་ཏུ་མ་བརྟགས་པ་སྟེ། ཁྲེལ་ཆུང་གི་སྐྱེ་བོ་ལ་ལ་ཚེ་འདིའི་མ་ཡང་གསོད་པ་དང་དགྲར་བལྟས་ཏེ་གནོད་པ་སྣ་ཚོགས་བྱེད་པ་མངོན་སུམ་དུ་གྲུབ་པས་སོ། །སེམས་ཅན་རྣམས་ལ་བྱམས་པ་བསྒོམས་ནས། སྙིང་རྗེ་ནི་སྔར་ལྟར་ཚེ་འདིའི་མ་སྡུག་བསྔལ་གསུམ་པོ་གང་རུང་གིས་མནར་བ་ལ་དམིགས་ནས་ཀྱེ་མ་བདག་གི་ཚེ་འདིའི་མ་ལ་སྡུག་བསྔལ་གྱིས་དངོས་སུ་གནོད། ཀུན་འབྱུང་གིས་བརྒྱུད་ནས་གནོད་པས་བདེ་བའི་གོ་སྐབས་ཅུང་ཟད་ཀྱང་མི་འདུག །སྡུག་བསྔལ་འདི་ལས་ཐར་ན་ཅི་མ་རུང་བསམས་ཏེ་ངག་ནས། སྡུག་བསྔལ་གྱིས་མནར་བའི་མ་རྒན་སེམས་ཅན་འདི་ཐམས་ཅད་སྡུག་
བསྔལ་དང་བྲལ་ན་ཅི་མ་རུང་སྡུག་བསྔལ་དང་བྲལ་བར་གྱུར་ཅིག །ཅི་ནས་ཀྱང་སྡུག་བསྔལ་དང་བྲལ་བར་བྱའོ། །ཞེས་མང་དུ་བརྗོད་ཅིང་ཡིད་ལ་བསམ་པར་བྱའོ། །དེ་ཡང་དགྲ་གཉེན་བར་མ་མཐའ་དག་ལ་ཁ་སྤོས་ཏེ་བསམ། འདི་དག་ཀྱང་སྐྱེས་བུ་ཆུང་འབྲིང་གི་ཉམས་ལེན་ཉམས་འོག་ཏུ་ཆུད་ན་རང་ཉམས་ལ་དཔགས་ཏེ་སྒོམ་སླ་བར་ལམ་རིམ་ཆེན་མོ་ལས་གསུངས་སོ། །སེམས་ཅན་བདེ་བ་དང་ལྡན་འདོད་དང་སྡུག་བསྔལ་དང་འབྲལ་འདོད་ཀྱི་བློ་ཙམ་ཐེག་པ་དམན་པ་ལའང་ཡོད་པས། བཤད་མ་ཐག་པའི་བྱམས་སྙིང་རྗེ་གཉིས་ལ་དེ་ཙམ་གྱིས་མི་ཆོག་པར་དེ་ལྟར་བྱའོ་སྙམ་པའི་ལྷག་བསམ་རྣམ་དག་འདྲེན་ནུས་པའི་བྱམས་སྙིང་རྗེ་ཡིན་པས་དེ་གཉིས་ཀྱིས་དྲངས་པའི་ལྷག་བསམ་རྣམ་དག་ནི་འགྲོ་བ་རྣམས་སྡུག་བསྔལ་ལས་ཕྲལ་ཅིང་བདེ་བ་ལ་དགོད་བློ་ཙམ་མིན་པའི་ངེས་པར་བདག་གིས་བྱ་སྙམ་པའི་དམ་བཅའི་ཚུལ་གྱིས། ཀྱེ་མ་ཡིད་དུ་འོང་བའི་སེམས་ཅན་འདི་རྣམས་བདེ་བ་ལ་སྦྱོར་བ་དང་སྡུག་བསྔལ་ལས་ཐར་བར་བྱེད་པའི་ཁུར་དེ་ཡང་བདག་གིས་འཁྱེར་རོ་སྙམ་པའི་བསམ་པ་དང་བཅས་ཏེ་ངག་ཏུ། བདེ་བ་དང་མི་ལྡན་པའི་མ་རྒན་སེམས་ཅན་འདི་རྣམས་བདེ་བ་དང་ལྡན་པ་ཞིག་བདག་གིས་བྱའོ། །སྡུག་བསྔལ་གྱིས་མནར་བའི་སེམས་ཅན་འདི་རྣམས་སྡུག་བསྔལ་དང་བྲལ་བ་ཞིག་བདག་གིས་བྱའོ། །ཞེས་ལན་གྲངས་མང་པོར་བརྗོད་ནས་ཡི་དམ་བཅས་པའི་ལྷག་བསམ་རྣམ་དག་བསྐྱེད་པའི་མཐུས། སྐྱབས་འགྲོའི་སྐབས་སུ་བཤད་པའི་སྐུ་གསུང་ཐུགས་དང་འཕྲིན་ལས་ཀྱི་ཡོན་ཏན་དྲན་པའི་སྒོ་ནས། ཡོན་ཏན་ཁྱད་པར་ཅན་འདི་དང་ལྡན་པའི་གོ་འཕང་འདི་ཐོབ་ན་སེམས་ཅན་རྣམས་ཀྱང་འདྲེན་ནུས་པར་འདུག་སྙམ་སྟེ་
སྨོས་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པས་གྲངས་མེད་གསུམ་གྱི་འགོ་རྩོམ་པའི་སེམས་བསྐྱེད་དང་མཚུངས་པ་ཡིན་ནོ། །འོ་ན་དྲིན་གཟོའི་སྐབས་ཀྱང་འགྲོ་བ་རྣམས་མྱང་འདས་ལ་དགོས་པར་བྱ་བསམ་པ་ཡོད་པས་ལྷག་བསམ་རྣམ་དག་ལ་ལྷག་པོ་མེད་དོ་སྙམ་ན། དཔེར་ན་དངོས་པོ་འདི་བདག་གིས་ཉེ་བར་བྱ་བསམ་པ་དང་། འཚོང་ཐག་བཅད་པ་མི་འདྲ་བ་ལྟར་དྲིན་གཟོ་དག་ལྷག་བསམ་ལ་ཡང་ཁྱད་པར་དེ་བཞིན་དུ་ཡོད་པས་སྤུ་རིས་ཕྱེད་དགོས། དེ་ལྟར་རྒྱུ་འབྲས་མན་ངག་བདུན་གྱི་སྒོ་ནས་བློ་ལེགས་པར་སྦྱངས་ནས་འཁྲིད་ཚུལ་མ་གཏོགས་ཞི་བ་ལྷའི་ལུགས་ཀྱང་དོན་གྱིས་ཚང་བས་སོ་སོར་དགོས་པའི་ངེས་པ་མེད་ནའང་། ལམ་རིམ་ཆེ་ཆུང་དུ་ལུགས་གཉིས་ཀ་གསུངས་པ་དང་། གདུལ་བྱ་བློ་སྣ་ཚོགས་པའི་དབང་གིས་ཕྱག་ལེན་དུ་མཛད་པས་རྒྱལ་བའི་སྲས་པོ་ཞི་བ་ལྷའི་གཞུང་ལ་བརྟེན་ནས་བདག་གཞན་བརྗེ་བ་ནི་སྤྱོད་འཇུག་ལས། གང་ཞིག་བདག་དང་གཞན་རྣམས་ནི། །མྱུར་དུ་བསྐྱབ་པར་འདོད་པ་དེས། །བདག་དང་གཞན་དུ་བརྗེ་བྱ་བ། །གསང་བའི་དམ་པ་སྤྱད་པར་བྱ། །ཞེས་དང་། འཇིག་རྟེན་བདེ་བ་ཇི་སྙེད་པ། །དེ་ཀུན་གཞན་བདེ་འདོད་ལས་བྱུང་། །འཇིག་རྟེན་སྡུག་བསྔལ་ཇི་སྙེད་པ། །དེ་ཀུན་བདག་བདེ་འདོད་ལས་བྱུང་། །མང་དུ་བཤད་ལྟ་ཅི་དགོས་ཏེ། །བྱིས་པ་རང་གི་དོན་བྱེད་དང་། །ཐུབ་པ་གཞན་གྱི་དོན་མཛད་པ། །འདི་གཉིས་ཀྱི་ནི་ཁྱད་པར་ལྟོས། །བདག་བདེ་གཞན་གྱི་སྡུག་བསྔལ་དག །ཡང་དག་བརྗེ་བར་མ་བྱས་ན། །སངས་རྒྱས་ཉིད་དུ་མི་འགྲུབ་ཅིང་། །འཁོར་བ་ན་ཡང་བདེ་བ་མེད། །ཅེས་བདག་གཅེས་འཛིན་རྒུད་པ་ཀུན་གྱི་
གཞི་དང་། གཞན་གཅེས་འཛིན་ཕན་བདེ་ཀུན་གྱི་གཞི་ཡིན་པས་ཉམས་སུ་ལེན་པ་གལ་ཆེ་ལ། ད་ལྟ་རང་ལ་སྣང་ཚུལ་ཕྲ་མོ་ཙམ་མི་བཟོད་པའི་ངང་ཚུལ་འདི་ལ་དཔགས་ན་བདག་གཞན་བརྗེ་བ་ཙམ་གྱི་བློ་མི་སྐྱེ་སྙམ་དུ་མི་སེམས་ཏེ། དཀའ་ལས་ཕྱིར་བཟློག་མི་བྱ་སྟེ། །འདི་ལྟར་གོམས་པའི་མཐུ་ཡིས་ནི། །གང་གི་མིང་ཐོས་འཇིགས་པ་ཡང་། །དེ་ཉིད་མེད་ན་མི་དགར་འགྱུར། །ཞེས་མི་མཛའ་བའི་དགྲ་མཐོང་བ་ཙམ་གྱིས་འཇིགས་ཤིང་སྙིང་དུ་མི་སྡུག་པ་ཞིག །སླར་མཐུན་པར་བྱས་ན་སྔར་མི་དགའ་བའི་སེམས་དེ་ཕྱིས་ཤིན་ཏུ་ཡིད་དུ་འོང་བ་ཞིག་ཏུ་འགྱུར་འགྲོ་བ་ལྟར་གོམས་པའི་དབང་གིས་བདག་གཞན་ཡང་བརྗེ་བར་ནུས་པས་ཉམས་སུ་ལེན་པ་ལ། བདག་གཞན་བརྗེ་ཞེས་པའི་དོན་དཔེར་ན་ལྷས་བྱིན་ལྟ་བུའི་ངོས་ནས་མཆོད་སྤྱིན་ལ་ངའོ་སྙམ་དུ་སེམས་པ་མིན་གྱི། རང་ལྷས་བྱིན་ལ་གཅེས་འཛིན་གྱི་བློ་དེའི་ཚབ་ཏུ་གཞན་མཆོད་སྦྱིན་ལ་གཅེས་པར་འཛིན་ཞིང་། གཞན་མཆོད་སྦྱིན་ཡལ་བར་འདོར་བའི་ཚབ་ཏུ་རང་ལྷས་བྱིན་ཡལ་བར་འདོར་བའི་བློ་སྐྱེད་པ་དེ་ལ་བདག་གཞན་བརྗེ་བར་མིང་གིས་བཏགས་པ་ཡིན་པས། བདག་གཞན་བརྗེ་བའི་དམིགས་སྐོར་དངོས་ལ་སྔར་ཕན་ཆད་བདག་གཅེས་པར་བཟུང་སྟེ་རང་དོན་བསྒྲུབས་པས་སྡུག་བསྔལ་གྱི་རྒྱུ་ཁོ་ནར་སོང་སྙམ་ནས་གཞན་ལ་འཆར་བའི་བློ་དེ་རང་ལ་བཀབ་ནས་སྦྱོང་། རང་ལ་གཅེས་པའི་བློ་དེ་འགྲོ་བ་གཞན་ལ་སྤོས་ནས་སྦྱངས་པས་གོམས་པའི་དབང་གིས་ད་ལྟའི་ཡལ་བར་འདོར་བ་དང་གཅེས་འཛིན་གྱི་བློ་གཉིས་གོ་ས་འཕོ་ཐུབ་པ་འོང་གསུང་། དེ་ཡང་འཆར་སླ་བའི་ཆེད་དུ་བློ་སྦྱོང་དོན་བདུན་མ་ལས་ཇི་ལྟར་བཤད་པ་བཞིན་རིན་ཆེན་འཕྲེང་
བ་ལས། བདག་ལ་དེ་དག་སྡིག་སྨིན་ཞིང་། །བདག་དགེ་མ་ལུས་དེར་སྨིན་ཤོག །ཅེས་པ་ལྟར་གཏོང་ལེན་གཉིས་གཙོ་བོར་མཛད་པ་ཕྱག་ལེན་དུ་སྣང་བས་སྔར་ལྟར་རང་གི་མདུན་དུ་གསལ་བཏབ་སྟེ་དེ་ལ་མི་དམིགས་པའི་སྙིང་རྗེ་དྲག་པོ་དང་བཅས་པའི་སྒོ་ནས། རང་གི་སྣ་བུག་གཡས་ནས་རླུང་སངས་ཀྱིས་བུས་པ་དང་མཉམ་དུ་རང་རྒྱུད་ལ་ཡོད་པའི་ཟག་བཅས་ཀྱི་དགེ་བ་དང་བདེ་བ་ཐམས་ཅད་རླུང་གི་རྟ་ལ་ཞོན་ཏེ་མདུན་གྱི་མ་དེའི་སྣ་བུག་གཡོན་པ་ནས་ཞུགས་ལུས་སེམས་ཅན་ཐམས་ཅད་ཁྱབ་པས་བདེ་བ་ཁྱད་པར་ཅན་དང་ལྡན་པར་བསམ། ཡང་རང་གི་སྣ་བུག་གཡོན་པ་ནས་རླུང་རྔུབ་པ་དང་མཉམ་དུ་མ་དེའི་སྡིག་སྒྲིབ་དང་སྡུག་བསྔལ་ཐམས་ཅད་རླུང་གིས་དྲངས་ཏེ་སྙིང་གི་ནང་དུ་ནག་ཕུང་ངེ་བྱུང་བ་དང་། མ་དེ་སྡུག་བསྔལ་ཐམས་ཅད་དང་བྲལ་བའི་བདེ་བ་དང་ལྡན་པར་བྱས་སོང་སྙམ་པ་སྤེལ་མའི་ཚུལ་དུ་ཡང་ཡང་སྦྱང་། དེ་ནས་ཚེ་འདིའི་ཕ་དང་ཉེ་དུ་བར་མ་དགྲ་བོ་སོགས་འགྲོ་བ་རིགས་དྲུག་སོ་སོར་སྦྱོང་། ད་ལྟར་རང་རེ་ལ་དེ་ཙམ་གྱི་བློ་ནུས་ཆེ་བ་མེད་ཀྱང་གོམས་པའི་དབང་གིས་ཟས་གོས་གནས་མལ་ནས་བཟུང་མགོ་བོ་རྐང་ལག་སོགས་གཏོང་བ་ལ་ཡང་འཇིགས་པ་མེད་པ་ཞིག་འོང་བ་ཡིན་གསུངས་སོ། །སྨྲས་པ། མཐའ་མེད་སྲིད་པའི་སྡུག་བསྔལ་རྒྱ་མཚོ་ཆེར། །སྙིང་ནས་ཞེན་པ་ལོག་པའི་བརྩོན་འགྲུས་ཀྱིས། །བསླབ་གསུམ་རིན་ཆེན་ཐེམ་སྐས་ལ་འཛེགས་ཏེ། །རང་ཉིད་ཞི་བདེའི་ཁང་པར་འཇུག་པ་རྣམས། །སྐྱེ་བར་ཕན་པ་བསྒྲུབས་པའི་མར་གྱུར་འགྲོ། །འཁོར་བ་སྡུག་བསྔལ་དྲག་པོའི་བཙོན་ར་རུ། །ཆུད་ནས་ཉམ་
ཐག་ཆོ་ངེ་འདེབས་མཐོང་བཞིན། །བོར་ནུས་ཁྱོད་ལས་ཁྲེལ་གཞུང་ཆུང་བ་སུ། །འགྲོ་ཀུན་ཕ་མར་ཤེས་པའི་དྲིན་དྲན་པས། །བྱམས་དང་སྙིང་རྗེའི་རླུང་ཤུགས་དྲག་པོ་ཡིས། །གཞན་ཕན་ཁུར་ཆེན་འཁྱེར་བའི་ལྷག་བསམ་གྲུ། །ཀུན་མཁྱེན་ནོར་བུའི་གླིང་དུ་ཐོགས་མེད་འགྲོ། །སྙིང་ལ་ཚེར་ལྟར་རྩུབ་པའི་དགྲ་བོ་ཡང་། བདག་གཞན་མཉམ་དང་བརྗེ་བའི་སེམས་བཟང་པོས། །གཉེན་བཤེས་མཛའ་གྲོགས་ཡིན་པར་རང་ངོ་འཕྲོད། །ཕྱོགས་འཛིན་འཁྲུལ་བའི་བློ་ཡི་གཞི་རྩ་ཆོད། །རང་ལ་གཅེས་པར་འཛིན་པའི་བློ་དོར་ནས། །གནོད་ལན་ཕན་པས་འཇལ་བའི་ལྡེ་མིག་གིས། །དོན་གཉིས་ལྷུན་གྱིས་གྲུབ་པའི་ཕན་བདེའི་སྒོ། །ཅིག་ཅར་འབྱེད་པའི་སྐལ་བཟང་འདི་རྨད་བྱུང་། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་སེམས་བསྐྱེད་ཆོ་གས་བཟུང་བ་ནི། སྔར་བཤད་པའི་གཞན་དོན་དོན་གཉེར་དང་བྱང་ཆུབ་དོན་གཉེར་གཉིས་ཀྱི་བློ་ལེགས་པར་སྦྱངས་པས་ཆོ་ག་ལ་མ་ལྟོས་པར་སེམས་བསྐྱེད་པའི་ངོ་བོ་ཙམ་ཞིག་སྐྱེ་ཡང་། ཡང་དག་པའི་ལམ་དུ་ཆུད་པ་ལ་ཆོ་ག་ཕུན་སུམ་ཚོགས་པ་གལ་ཆེ་བས་དེའི་ལག་ལེན་སྦྱོར་བ་སྐྱབས་འགྲོ་ཚོགས་བསག་སེམས་སྦྱོང་བ། དངོས་གཞི་སྨོན་སེམས་ཆོ་གས་འཛིན་པ། མཇུག་ཚེ་འདི་དང་སྐྱེ་བ་གཞན་དུ་སེམས་བསྐྱེད་མི་ཉམས་པའི་སླད་དུ་བསླབ་པ་བརྗོད་པ་རྣམས་ལམ་གྱི་རིམ་པ་ཆེ་ཆུང་ལས་ཤེས་དགོས་ཤིང་། ཞིབ་ཆའི་ཕྱག་ལེན་མཐའ་དག་མཐོང་བ་བརྒྱུད་པ་ལ་རག་ལས་པས་རང་བཟོ་དང་སླ་ཆོས་སུ་མ་སོང་བར་བྱའོ། །དེ་ཡང་བྱམས་པའི་རྣམ་པར་ཐར་པའི་མདོ་ལས། རྒྱལ་སྲས་ཀྱི་སྤྱོད་པ་ལ་སློབ་མ་ནུས་ཀྱང་སེམས་བསྐྱེད་པ་ཙམ་
ལ་ཕན་ཡོན་ཆེན་པོ་འབྱུང་བར་གསུངས་མོད། འོན་ཀྱང་རྣམ་འགྲེལ་ལས། བརྩེ་ལྡན་སྡུག་བསྔལ་གཞོམ་པའི་ཕྱིར། །ཐབས་རྣམས་ལ་ནི་མངོན་སྦྱོར་མཛད། །ཐབས་བྱུང་དེ་རྒྱུ་ལྐོག་གྱུར་པ། །དེ་འཆད་པ་ནི་དཀའ་བ་ཡིན། །ཞེས་སྙིང་རྗེ་ཆེན་པོས་དྲངས་པའི་ལྷག་བསམ་གྱི་སྒོ་ནས་སྨོན་སེམས་བསྐྱེད་པའི་དགོས་པ་སེམས་ཅན་སྡུག་བསྔལ་དང་བྲལ་ན་སྙམ་པའི་སེམས་བཟང་བ་ཙམ་མ་ཡིན་པར་ཐབས་ལ་འཇུག་དགོས། དེ་ལ་རང་ཉིད་ཐོག་མར་སངས་རྒྱས་ཀྱི་གོ་འཕང་འཐོབ་པའི་ཐབས་སུ་བྱང་ཆུབ་སེམས་དཔའི་བསླབ་བྱ་རྣམས་ལ་སྒྲུབ་པ་སྙིང་པོར་བྱེད་དགོས་པས་སྤྱོད་འཇུག་ལས། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་ཡུལ་ཞིག་ཏུ་འགྲོ་བར་འདོད་པ་དང་འགྲོ་བ་ལ་བརྩོན་པ་གཉིས་དཔེར་བཟུང་སྟེ་སྨོན་སེམས་དང་འཇུག་སེམས་ཀྱི་བྱེ་བྲག་གསུངས་པའི་དབང་དུ་བྱས་ནས་སྨོན་སེམས་ལ་ལེགས་པར་སྦྱངས་པའི་མྱོང་བ་སྣ་ཟིན་རྒྱུད་ལ་སྐྱེས་པ་ན་བྱང་སྡོམ་གྱི་བསླབ་བྱ་རྣམས་ཉན་ཏེ་ཕྱིན་དྲུག་སོགས་ལ་བསླབས་པའི་ཕན་ཡོན་མ་བསླབས་པའི་ཉེས་དམིགས་རྩ་ལྟུང་དང་ཉེས་བྱས་སོགས་ལེགས་པར་ཤེས་ནས་བླང་དོར་དེ་ལ་སྤྲོ་བ་ཤུགས་དྲག་པོ་བཅོས་མ་མ་ཡིན་པ་སྐྱེས་པ་དང་། ཤིང་རྟ་ཆེན་པོ་གཉིས་ཀྱི་ལུགས་སྲོལ་གཅིག་ཏུ་འདྲེས་པའི་རྒྱལ་སྲས་ཀྱི་སྡོམ་པ་ཆོ་གའི་སྒོ་ནས་ཕོག་སྟེ་རྩ་ལྟུང་དང་ཉེས་བྱས་སྲུང་ཚུལ་ཕྱིར་བཅོས་དང་བཅས་པའི་ལག་ལེན་རྗེ་བདག་ཉིད་ཆེན་པོས་ཚུལ་ཁྲིམས་ལེའུའི་རྣམ་བཤད་དུ་རྒྱས་པར་བཀའ་སྩལ་པ་ལམ་རིམ་ཆེ་ཆུང་དུ་ཞལ་འཕངས་
མཛད་ཅིང་གསེར་ཞུན་དུ་ཡང་བྱུང་མོད། དེང་སང་ཕྱག་ལེན་དུ་འཇུག་སྡོམ་ལེན་པའི་སྐོར་འདི་བཞག་ནས་ཕྱིན་དྲུག་སོགས་ཀྱི་ཉམས་འཁྲིད་མཛད་པ་ཡིན་ལ། དེ་ལྟར་ན་གཞུང་ཆེན་མོ་དག་ནས་སྨོན་འཇུག་དང་ཕྱིན་དྲུག་གི་གོ་རིམ་མཛད་པ་ལས་འགལ་བའི་སྐྱོན་ཡོད་དམ་སྙམ་ན། གོ་རིམ་དེ་ལྟ་བུའི་ཚུལ་གྱིས་སྐྱེ་བ་ཡོད་པ་ལ་དགོངས་ཀྱི། ཐམས་ཅད་ལ་དེ་ལྟར་མ་ངེས་པ་ལམ་དུ་མ་ཞུགས་པའི་གང་ཟག་གིས་འཇུག་སྡོམ་བླངས་ཏེ་དེའི་རྗེས་སུ་སྨོན་པ་བྱང་ཆུབ་མཆོག་ཏུ་སེམས་བསྐྱེད་ནས་ཚོགས་ལམ་ཆུང་ངུ་ཐོབ། ཚོགས་ལམ་འབྲིང་དུ་སླེབ་པ་དང་སྨོན་སེམས་དེ་འཇུག་སེམས་སུ་གནས་འགྱུར་བའི་ཚུལ་གྱིས་འཇུག་སེམས་སྐྱེས་པ་ཡོད། ཡང་འཇུག་སྡོམ་ལེན་མ་མྱོང་བ་ཞིག་གིས་སྨོན་སེམས་བསྐྱེད་ནས་ཚོགས་ལམ་ལ་ཞུགས། ཚོགས་ལམ་འབྲིང་དུ་སླེབ་པ་དང་འཇུག་པའི་སེམས་བསྐྱེད། འབྲིང་གི་ཐ་མར་འཇུག་སྡོམ་བླངས་པའང་འོང་བས་མཐའ་གཅིག་ཏུ་གོ་རིམ་གྱི་ངེས་པ་མེད་པ་དེའི་ཕྱིར་ན་བསླབ་བཏུས་ལས། དེ་བས་ན་རང་གི་མཐུ་དང་འཚམ་པར་དགེ་བའི་རྩ་བ་གཅིག་ཙམ་ཡང་ཡང་དག་པར་བླངས་ཏེ་བསྲུང་བར་བྱ། ཞེས་སྨོན་སེམས་བསྐྱེད་ནས་རིང་པོ་མ་ལོན་པ་དེས་བསླབ་བྱ་མཐའ་དག་ལ་སློབ་མི་ནུས་པས་ཐོག་མར་དགེ་བའི་རྩ་བ་གཅིག་ཙམ་འཛིན་པ་སོགས་རང་བློ་དང་བསྟུན་ནས་རིམ་གྱིས་བློ་སྦྱངས་ཏེ་མཐར་སྤྱོད་པ་མཐའ་དག་ལ་སློབ་ནུས་པར་གསུངས་པས་དེའི་དབང་དུ་བྱས་ཏེ་སྨོན་སེམས་ཆོ་གས་བཟུང་བའི་རྗེས་སུ་ཕྱིན་དྲུག་ལ་འཁྲིད་པ་ཡིན་ནོ། །འོ་ན་སྐབས་འདིར་ཞི་ལྷག་གི་བར་གྱི་དམིགས་པ་མཐའ་དག་རྫོགས་པར་གཏོང་བས་ན། འཇུག་སྡོམ་མ་བླངས་པ་རང་ཚིག་དངོས་སུ་འགལ་ལོ་སྙམ་
ན། སྔར་རྒྱུ་འབྲས་མན་ངག་བདུན་སོགས་ཀྱི་སྒོ་ནས་དམིགས་རིམ་འཁྲིད་པ་མཐའ་དག་ཉམས་མྱོང་ཚད་མ་རྒྱུད་ལ་སྐྱེ་བའི་གཞིར་གྱུར་པའི་མྱོང་བ་རྗེས་མཐུན་པ་ཙམ་ལས་མཚན་ཉིད་པ་མིན་པས་འཆད་པར་འགྱུར་བའི་ཕྱིན་དྲུག་གི་སྐོར་ཡང་རྒྱལ་སྲས་ཀྱི་སྤྱོད་པ་ལ་སློབ་པའི་ཉམས་མྱོང་ལ་བག་ཆགས་འཇོག་པའི་གཞི་རྟེན་ཙམ་དུ་དགོངས་ནས་སྔོན་གྱི་བཤེས་གཉེན་རྣམས་ཀྱིས་སྐྱེས་བུ་གསུམ་གྱི་ཉམས་འཁྲིད་རིང་བ་ལོ་དང་ཐུང་བ་ཟླ་བའི་བར་ཙམ་དུ་མཛད་པ་ཡིན་གྱི། དེ་ལྟ་མིན་པར་ལྷག་བསམ་རྣམ་དག་འདྲེན་ནུས་ཀྱི་སྙིང་རྗེ་ཆེན་པོ་མཚན་ཉིད་པ་རྒྱུད་ལ་སྐྱེས་སྐྱེས་ཀྱི་བར་དུ་བསྒོམས་པ་ལྟ་བུས་མཚོན་ཏེ། བཤེས་གཉེན་བསྟེན་ཚུལ་ནས་བཟུང་ཞི་ལྷག་གི་ཉམས་ལེན་མཐའ་དག་དེ་ལྟར་བྱས་པ་ཞིག་ལ་ཉམས་འཁྲིད་དུ་ངོས་འཛིན་དགོས་ན། ཡུན་རིང་པོར་ཚེགས་ཆེན་པོས་སྒྲུབ་དགོས་པ་དག་སྙིགས་དུས་ཀྱི་ཚེ་ཐུང་གཅིག་ལ་འབད་མེད་དུ་འགྲུབ་པར་འགྱུར་པ་མི་སྲིད་དོ། །དེས་ན་གོང་དུ་རྒྱུ་འབྲས་མན་ངག་བདུན་གྱི་མཐར་སེམས་བསྐྱེད་པ་དེ་ལ་གྲངས་མེད་གསུམ་གྱི་འགོ་རྩོམ་པའི་བྱང་ཆུབ་ཏུ་ཐོག་མར་སེམས་བསྐྱེད་པ་ལ་དེ་ལྟ་བུ་དགོས་ཞེས་སེམས་བསྐྱེད་མཚན་ཉིད་པའི་དབང་དུ་བྱས་ནས། ལམ་གྱི་གོ་རིམ་ལྟར་འཁྲིད་དམིགས་སུ་ངོ་སྤྲད་པར་འཁྲུལ་ཏེ། དམིགས་སྐོར་དང་སེམས་བསྐྱེད་ཆོ་གས་བཟུང་བ་སོགས་ནས་རང་ཉིད་བྱང་སེམས་ཚོགས་ལམ་པར་ཁས་བླངས་ཤིང་རློམ་ན་དེ་ལས་ཤིན་ཏུ་རྨོངས་པ་མེད་པས་གོ་བར་བྱ་འཚལ། རྒྱུ་མཚན་དེ་དག་གི་ཕྱིར་ན་ལམ་དུ་མ་ཞུགས་པ་ནས་འཇུག་སྡོམ་ལ་རིངས་པར་བྱས་ཀྱང་ཉོན་མོངས་པ་མང་ཞིང་གཉེན་པོ་ཆུང་
བའི་དུས་འདིར་རྩ་ལྟུང་སོགས་སྲུང་མ་ནུས་ན་སངས་རྒྱས་སྲས་དང་བཅས་པ་དང་ལྷ་དང་བཅས་པའི་འཇིག་རྟེན་ཐམས་ཅད་བསླུས་པར་འགྱུར་བ་སོགས་ཉེས་དམིགས་མཐའ་ཀླས་པ་བཤད་པས་དགག་བྱ་ཆེ་ཞིང་དགོས་པ་ཆུང་བ་ལ་དགོངས་ཏེ་དངོས་བརྒྱུད་ཀྱི་བླ་མ་དམ་པ་རྣམས་ཀྱིས་གདུལ་བྱའི་བློ་དང་བསྟུན་ཏེ་མཛད་པ་ཡིན་ནོ། །སྨྲས་པ། ཉམས་མྱོང་གོ་ཡུལ་ཤར་བའི་མྱུ་གུ་དག །དཀའ་སྤྱད་རླན་གཤེར་དྲོད་ཀྱིས་ཉེར་སྨིན་པས། །རྟོགས་པ་ཚད་མའི་འབྲས་བུ་གཡུར་ཟ་བ། །ཐེག་གསུམ་སྐྱེ་འཕགས་བགྲོད་པ་གཅིག་པའི་ལམ། །རྐྱེན་ངན་ཐོག་ཏུ་བབ་པའི་མཚོན་རྣོན་པོས། །འགྲོ་རྣམས་ཕ་མར་ངེས་བློའི་སྲོག་བྲལ་ཡང་། །སྙིང་རྗེའི་བདུད་རྩིས་ལྷག་བསམ་འཆི་བ་མེད། །བསྒྲུབས་ཟིན་རྒྱལ་སྲས་ནམ་མཁའི་པདྨོ་བཞིན། །ཐེག་ཆེན་ལམ་གྱི་བགྲོད་ཚུལ་མཁའ་ལྟར་ཡངས། །རྒྱ་བོད་མཁས་པའི་གསུང་རབ་མཚོ་ལྟར་ཟབ། །དེང་དུས་སྐྱེ་བོའི་བློ་གྲོས་མུན་ལྟར་གནག །མཁས་རློམ་ཕལ་གྱི་རྣམ་དཔྱོད་རྩྭ་ལྟར་ཕྲ། །དེ་ཕྱིར་བློ་དམན་རྣམས་ལ་དཀའ་བའི་མདུད། ལེགས་བཤད་སོར་མོའི་འཕྲུལ་གྱིས་རབ་འགྲོལ་བའི། །མགྲིན་པ་ལོངས་སྤྱོད་འཁོར་ལོའི་བང་མཛོད་ནས། ཤེས་ལྡན་འདོད་འཇོའི་དངོས་པོ་འཛད་དུ་མེད། །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་སེམས་བསྐྱེད་ནས་སྤྱོད་པ་ལ་སློབ་པའི་ཚུལ་ལ་མདོ་སྡེ་རྒྱན་ལས། ལོངས་སྤྱོད་དང་ལུས་ཕུན་སུམ་ཚོགས་པ་དང་། །འཁོར་རྩོམ་ཕུན་སུམ་ཚོགས་པ་མངོན་མཐོ་དང་། །རྟག་ཏུ་ཉོན་མོངས་དབང་ཉིད་མི་འགྲོ་དང་། །བྱ་བ་རྣམས་ལ་ཕྱིན་ཅི་མ་ལོག་པའོ། །ཞེས་རྒྱལ་
བའི་སྲས་ཀྱི་སྤྱོད་པ་རླབས་པོ་ཆེ་རྫོགས་པ་ལ་ཚེ་རབས་མང་པོ་བརྒྱུད་དགོས། དེ་ལ་ཡང་ཕྱོགས་རེ་ཙམ་མ་ཡིན་པའི་ལོངས་སྤྱོད་ལུས་འཁོར་ལས་ཀྱི་མཐའ་གང་བརྩམས་འགྲུབ་པ་སོགས་ཕུན་སུམ་ཚོགས་པ་ན་ཉོན་མོངས་མི་འཕེལ་བའི་འཇུག་ལྡོག་གི་གནད་ཤེས་ན་ལམ་གྱི་ས་ཆོད་ཤིན་ཏུ་ཆེ་བ་འོང་བ་ནི་མངོན་མཐོ་ལ་ལྟོས་པའི་གྲངས་ངེས། རྟེན་དེ་ལ་བསྒྲུབ་པར་བྱ་བ་སྦྱིན་པ་ཚུལ་ཁྲིམས་བཟོད་པ་གསུམ་གྱིས་གཞན་དོན་དང་། ཤེས་རབ་བསམ་གཏན་བརྩོན་འགྲུས་གསུམ་གྱིས་རང་དོན་ཏེ་དོན་གཉིས་སྒྲུབ་པ་ལ་ལྟོས་པའི་གྲངས་ངེས། ཟང་ཟིང་གིས་ཕོངས་པ་སེལ་བ། གཞན་གནོད་སྤངས་པས་འཚེ་བ་མེད་པ། གནོད་ལན་གནོད་པ་མི་འཇལ་བ། གཞན་དོན་གྱི་དཀའ་སྤྱད་ལ་མི་སྐྱོ་བ། རྫུ་འཕྲུལ་སོགས་ཀྱིས་གཞན་ཡིད་འདུན་པ། ལེགས་པར་བཤད་པས་ཐེ་ཚོམ་འགྲོལ་བ་སྟེ་གཞན་དོན་རྫོགས་པར་སྒྲུབ་པ་ལ་བལྟོས་པའི་གྲངས་ངེས། ལོངས་སྤྱོད་ལ་ཆགས་པ་མེད་པས་བསླབ་པ་ལ་གུས་པ། གཞན་སྐྱོན་ལ་བརྟེན་པའི་སྡུག་བསྔལ་ལ་བཟོད་པས་དགེ་བ་ལ་ཡིད་སྤྲོ་བ། ཞི་གནས་ཀྱིས་ལུས་སེམས་ལས་སུ་རུང་བས་ལྷག་མཐོང་གི་ཤེས་རབ་འཕེལ་བ་སྟེ་ཐེག་ཆེན་ཐམས་ཅད་སྡུད་པ་ལ་བལྟོས་པའི་གྲངས་ངེས། གཏོང་བ་ལ་གོམས་པ་ནི་ལོངས་སྤྱོད་ལ་མི་ཆགས་པའི་ཐབས། བག་མེད་ལས་སྲུང་བ་ནི་ཐོབ་འདོད་ཀྱི་གཡེང་བ་སྡོམ་པའི་ཐབས། སྡུག་བསྔལ་དང་དུ་ལེན་པ་ནི་སེམས་ཅན་མི་གཏོང་བའི་ཐབས། སྐྱོ་ངལ་མེད་པའི་བརྩོན་པ་ནི་དགེ་བ་འཕེལ་བའི་ཐབས། ལུས་སེམས་ཤིན་ཏུ་སྦྱངས་པ་ནི་ཉོན་མོངས་པ་སེལ་བའི་ཐབས། ཕྲ་ཞིབ་ཀྱི་རྣམ་པར་དཔྱོད་པ་ནི་ཤེས་སྒྲིབ་
སྦྱོང་བའི་ཐབས་ཏེ་ཐབས་ཀྱི་རྣམ་པ་ཐམས་ཅད་པའི་དབང་དུ་མཛད་པ་ལ་ལྟོས་པའི་གྲངས་ངེས། ཚུལ་ཁྲིམས་དང་དེའི་འཁོར་གྱི་ཚུལ་དུ་སྦྱིན་པ་དང་བཟོད་པ་ནི་ཚུལ་ཁྲིམས་ཀྱི་བསླབ་པའི་ངོ་བོ། ཕར་ཕྱིན་ཐ་མ་གཉིས་ནི་བསླབ་པ་གཞན་གཉིས་ཀྱི་ངོ་བོ། བརྩོན་འགྲུས་ནི་གསུམ་ག་ལ་དགོས་པས་བསླབ་པ་གསུམ་ལ་ལྟོས་པའི་གྲངས་ངེས། ལོངས་སྤྱོད་ལ་མི་བལྟ་བའི་སྦྱིན་པ་ཡོད་ན་མ་ཆགས་པའི་རྒྱུ་ལས་ཚུལ་ཁྲིམས་སྐྱེ། ཚུལ་ཁྲིམས་ཡོད་ན་ཉེས་སྤྱོད་བསྡོམས་པའི་རྒྱུ་ལས་བཟོད་པ་སྐྱེ། བཟོད་པ་ཡོད་ན་དཀའ་བ་ལ་མི་སྐྱོ་བའི་རྒྱུ་ལས་བརྩོན་འགྲུས་སྐྱེ། བརྩོན་འགྲུས་ཡོད་ན་ཉིན་མཚན་དུ་འབད་པའི་རྒྱུ་ལས་བསམ་གཏན་སྐྱེ། བསམ་གཏན་ཡོད་ན་ལུས་སེམས་ལས་སུ་རུང་བའི་རྒྱུ་ལས་ཤེས་རབ་སྐྱེ་བས་ཕར་ཕྱིན་དྲུག་པོ་དེ་དག་ཀྱང་སྔ་མ་སྔ་མ་དམན་ཞིང་ཕྱི་མ་ཕྱི་མ་མཆོག་ལ། རགས་པ་དང་ཕྲ་བའང་དེ་བཞིན་ཏེ། མདོ་སྡེ་རྒྱན་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། །ཞེས་གྲངས་ངེས་དེ་ལྟ་བུ་དང་ལྡན་པའི་ཐེག་པ་ཆེན་པོའི་ལམ་རྒྱལ་སྲས་ཀྱི་སྤྱོད་པ་ལ་བསླབ་པ་ལ་རང་རྒྱུད་སྨིན་པར་བྱེད་པ་ཕར་ཕྱིན་དྲུག་ལ་བསླབ་པ། གཞན་རྒྱུད་སྨིན་པར་བྱེད་པ་བསྡུ་པའི་དངོས་པོ་བཞི་ལ་བསླབ་པ་གཉིས། དང་པོ་ལ་སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་དང་དྲུག །དང་པོ་ནི། རང་གི་ལུས་དང་ལོངས་སྤྱོད་ལ་མི་བལྟ་བར་བྱང་ཆུབ་སེམས་དཔའི་མ་ཆགས་པ་དང་ལྷན་ཅིག་སྐྱེས་པའི་སེམས་པ་གང་ཡིན་པ་དང་དེས་ཀུན་ནས་བསླང་སྟེ་སྦྱིན་བྱའི་དངོས་པོ་ཡོངས་སུ་གཏོང་བའི་ལུས་
ངག་གི་ལས་དེ་སྦྱིན་པའི་ངོ་བོ་ཡིན་ལ། དེ་བཏང་བས་སྦྱིན་པའི་ཕར་ཕྱིན་ཇི་ལྟར་རྫོགས་པར་འགྱུར་ན། ལུས་ངག་ལས་སེམས་གཙོ་ཆེ་ཞིང་དེ་ཡང་ལོངས་སྤྱོད་སོགས་ལ་སེར་སྣ་བཅོམ་པ་ཙམ་གྱིས་མི་ཆོག་སྟེ་དེ་ཙམ་ནི་ཉན་རང་དགྲ་བཅོམ་ལ་ཡང་ཡོད་པས་འདིར་ཕན་ཡོན་དང་ཉེས་དམིགས་བསམས་པའི་སྒོ་ནས་སྙིང་ཐག་པ་ནས་གཏོང་སེམས་དགོས་པས་སྐྱེས་རབས་ལས། བདག་མེད་འཇིག་སླ་སྙིང་པོ་མེད་པའི་ལུས། །སྡུག་བསྔལ་དྲིན་མེད་རྟག་ཏུ་མི་གཙང་བའི། །ལུས་ཀྱིས་གཞན་ལ་ཕན་ཐོགས་འགྱུར་བ་ལ། །དགའ་བར་མི་འགྱུར་དེ་ནི་མཁས་མ་ཡིན། །ཞེས་པ་ལྟར་ལགས། འོ་ན་སྦྱིན་པ་བཏང་བས་འགྲོ་བ་རྣམས་ཀྱི་དབུལ་བ་བོར་བ་ལ་བརྟེན་ནས་སྦྱིན་པའི་ཕར་ཕྱིན་རྫོགས་སམ་སྙམ་ན། སྤྱོད་འཇུག་ལས། གལ་ཏེ་འགྲོ་བ་དབུལ་བོར་བ། །སྦྱིན་པའི་ཕ་རོལ་ཕྱིན་ཡིན་ན། །ད་དུང་འགྲོ་བཀྲེན་ཡོད་ན་སྔོན། །སྐྱོབ་པ་ཇི་ལྟར་ཕ་རོལ་ཕྱིན། །ཞེས་དེ་ལྟ་ན་ད་དུང་སེམས་ཅན་ཕོངས་པ་དཔག་ཏུ་མེད་པ་ཡོད་པའི་ཕྱིར་སྔོན་གྱི་སངས་རྒྱས་རྣམས་ཀྱིས་སྦྱིན་པའི་ཕར་ཕྱིན་མ་རྫོགས་པར་འགྱུར་བར་གསུངས་པས་རང་གི་ལོངས་སྤྱོད་དང་དགེ་བ་ཐམས་ཅད་ལ་སེར་སྣ་མེད་པར་སྙིང་ཐག་པ་ནས་བཏང་བའི་འབྲས་བུ་དང་བཅས་པ་གཞན་ལ་གཏོང་བའི་བློ་གོམས་པ་ཡོངས་སུ་རྫོགས་པ་སྦྱིན་པའི་ཕར་ཕྱིན་ཏེ། བདོག་པ་ཐམས་ཅད་འབྲས་བཅས་ཏེ། །སྐྱེ་བོ་ཀུན་ལ་བཏང་སེམས་ཀྱིས། །སྦྱིན་པའི་ཕ་རོལ་ཕྱིན་གསུངས་ཏེ། །དེ་ལྟས་དེ་ནི་སེམས་ཉིད་དོ། །ཞེས་སོ། །དེ་ལྟ་བུའི་སྦྱིན་པའི་ཕར་ཕྱིན་ཉམས་སུ་ལེན་པར་བྱེད་པ་ལ། །དགེ་བའི་བཤེས་གཉེན་ཤ་ར་བས། ང་ནི་
ཁྱེད་ལ་གཏོང་བའི་ཕན་ཡོན་མི་བརྗོད་ཀྱི་འཛིན་པའི་ཉེས་དམིགས་བརྗོད་པ་ཡིན། ཞེས་རབ་བྱུང་གི་བྱང་སེམས་རྣམས་ཀྱིས་ཐོས་བསམ་སྒོམ་གསུམ་གྱི་བར་ཆད་དུ་འགྱུར་བཞིན་དུ་ཤ་ཐང་ཐང་གི་སྒོ་ནས་འབད་པས་ཟང་ཟིང་གི་དངོས་པོ་ཙམ་རེ་སྦྱིན་པ་བྱ་མི་རིགས་པས་ཆོས་ཀྱི་སྦྱིན་པ་ཉིད་གཙོ་བོར་བྱ་དགོས་ཤིང་འབད་མེད་ལྷུན་གྲུབ་ཏུ་རྙེད་པ་བྱུང་བ་རྣམས་ཆགས་པ་མེད་པར་གཏོང་དགོས་ནའང་གཙོ་བོར་ཟང་ཟིང་སྦྱིན་པ་ནི་ཁྱིམ་པའི་བྱང་སེམས་རྣམས་ཀྱིས་བྱ་དགོས་པའི་ཕྱིར་རྟེན་གྱི་སྒོ་ནས་སྦྱིན་པ་གཏོང་ཚུལ་སྤྱིར་བཏང་དམིགས་བསལ་ལེགས་པར་ཕྱེད་པར་བྱས་ཏེ་ཆོས་དང་མི་འཇིགས་ཟང་ཟིང་གི་སྦྱིན་པ་ལག་ཏུ་བསྟར་བ་ལ། སྦྱིན་པ་གསུམ་པོ་དེ་བྱས་པ་ལ་འབྲས་བུ་མེད་དོ་སྙམ་པ་དང་ཆོས་ལོག་དང་གཅིག་གི་ཆེད་དུ་འགྲོ་བ་གྲངས་མེད་པ་ཡལ་བར་དོར་ནས་དེ་སྐྱོབ་པ་དང་། སྲོག་བཅད་པའི་ཤ་ཁྲག་གི་སྦྱིན་པ་ཆོས་སུ་འགྱུར་རོ་སྙམ་པ་སོགས་ལྟ་ངན་མཆོག་ཏུ་འཛིན་པའི་བསམ་པ་དང་། སྦྱིན་ཡུལ་རྣམས་ལ་བརྙེས་པ་དང་། གཞན་ལ་འགྲན་འདོད་དང་། ཆོས་ཀྱི་ཚིག་དོན་བཟང་བ་འདི་ལྟ་བུ་དང་། སེམས་ཅན་འདི་ཙམ་གྱི་སྲོག་བསྐྱབས་པ་དང་། དངོས་པོ་ཁྱད་པར་ཅན་འདི་ཙམ་བདག་མིན་པ་གཞན་གྱིས་བྱར་མེད་དོ་སྙམ་པའི་ཁེངས་སེམས་དང་། སྦྱིན་པ་གསུམ་པོ་འདི་ལྟར་བྱས་ཞེས་སྙན་གྲགས་འོང་དུ་རེ་བ་དང་། སྦྱིན་པ་དེ་ཙམ་བྱར་མི་ནུས་སྙམ་པའི་ཞུམ་པ་དང་། བྱས་པ་ལ་འགྱོད་པའི་སེམས་དང་། གཉེན་རྣམས་ལ་སྦྱིན་པ་གསུམ་པོ་གང་འགྲུབ་བྱེད་ཅིང་དགྲ་སོགས་ལ་མི་བྱེད་པའི་ཕྱོགས་རིས་ཅན་དང་། ཆོས་བཤད་པ་དང་སྲོག་བསྐྱབས་པ་སོགས་ལ་གཏང་རག་དང་། ཕར་དངུལ་བྱིན་ན་ཚུར་གསེར་འོང་དུ་རེ་བ་ལྟ་བུ་དང་། ཕྱི་མ་རྣམ་
སྨིན་གྱི་འབྲས་བུ་རང་མཁས་པ་དང་འཇིགས་པ་མེད་པ་དང་ལོངས་སྤྱོད་ཕུན་སུམ་ཚོགས་པ་འོང་རེ་བ་སོགས་ཀྱི་བསམ་པ་མཐའ་དག་སྤངས་ཏེ། ཕར་ཕྱིན་བསྡུས་པ་ལས། སློང་བ་མངོན་དུ་འོངས་ན་རྒྱལ་སྲས་དེས། །རྫོགས་པའི་བྱང་ཆུབ་ཚོགས་ནི་སྤེལ་བའི་ཕྱིར། །དེས་གཞན་འདུ་ཤེས་བདག་ལ་བཞག་བྱས་ཤིང་། །དགེ་བའི་བཤེས་གཉེན་འདུ་ཤེས་དེ་ལ་བསྐྱེད། །ཅེས་འདི་ལ་བརྟེན་ནས་སྦྱིན་པའི་ཕར་ཕྱིན་རྫོགས་པར་བྱའོ་སྙམ་པ་དགོས་པ་ལ་དམིགས་པ་དང་། དང་པོ་ནས་བདག་གི་ཆོས་དང་གཞན་སྐྱོབ་པའི་ནུས་པ་དང་བདོག་པ་ཐམས་ཅད་གཞན་ལ་བཏང་ཟིན་པ་ཡིན་པས་བཅོལ་བའི་རྫས་ལེན་པ་དང་མཚུངས་པ་ཡིན་སྙམ་དུ་དངོས་པོ་ལ་དམིགས་པ་དང་། འདི་རྣམས་བདག་གི་སྦྱིན་པའི་ཕར་ཕྱིན་རྫོགས་པར་བྱེད་པའི་དགེ་བའི་བཤེས་གཉེན་ཡིན་ནོ་སྙམ་པའི་ཞིང་ལ་དམིགས་པ་སྟེ་བསམ་པ་ཁྱད་པར་གསུམ་ལྡན་གྱི་སྒོ་ནས་ཇི་ལྟར་གཏོང་ན། ཆོས་ཟབ་པ་སྦས་ནས་མི་ཟབ་པ་སྟོན་པ་དང་། འཇིགས་པ་ཐམས་ཅད་སེལ་ནུས་བཞིན་དུ་ཕྱོགས་རེ་ཙམ་སྐྱོབ་པ་དང་། དངོས་པོ་ངན་པ་དང་གྲངས་ཉུང་བ་དང་གཞན་གྱི་ལག་ནས་ཕྲོགས་ཏེ་སྟེར་བ་སོགས་ཁ་ན་མ་ཐོ་བའི་ཉེས་པས་མ་གོས་ཤིང་། བཞིན་མདངས་གསལ་ཞིང་འཛུམ་པ། ངག་སྙན་པར་སྨྲ་བ། གཞན་ལ་འཚེ་བ་མེད་ཅིང་རང་གི་དཀའ་སྤྱད་ཁུར་དུ་བཟོད་པའི་སྒོ་ནས་སྦྱིན་བྱའི་ཡུལ་དགྲ་གཉེན་བར་མ་ཡོན་ཏན་ཅན་སྐྱོན་ཅན་མཐོ་དམའ་མཉམ་གསུམ་སྐྱེད་པ་དང་སྡུག་པ་སྟེ། བཅུར་བཤད་པའི་དགོས་པ་དགྲ་ལ་བྱམས་པ་ཡོན་ཏན་ཅན་ལ་དང་བ་སོགས་སོ་སོར་ངོས་ཟིན་པའི་ཆེད་དེ་དོན་དྲིལ་ན་དེར་སེམས་ཅན་ཐམས་ཅད་འདུས་པས་སྐབས་དང་
བསྟུན་ནས་ཆོས་ཀྱི་སྦྱིན་པ་ནི་ཐེག་པ་ཆེ་ཆུང་གི་དམ་པའི་ཆོས་གསུང་རབ་དགོངས་འགྲེལ་དང་བཅས་པ་དང་། སྒྲ་ཚད་བཟོ་གསོ་ལ་སོགས་པ་ཐུན་མོང་བའི་རིག་གནས་སོགས་ལྷག་བསམ་དག་པའི་སྒོ་ནས་རང་གིས་ཇི་ལྟར་ཤེས་པ་བཞིན་སྟོན་ཅིང་བསླབ་པའི་གཞི་འཛིན་དུ་འཇུག་པ་སོགས་ཉན་པ་པོའི་བློ་དང་སྦྱར་ནས་འདི་དག་རྣམས་ཀྱིས་ཐོས་བསམ་སྒོམ་གསུམ་བྱས་ནས་རང་གཞན་གྱི་དོན་རྒྱ་ཆེན་པོ་འགྲུབ་པར་གྱུར་ཅིག་སྙམ་དུ་བསམ་ཞིང་ངག་ཏུ་ཡང་བརྗོད་དགོས་ཏེ། ཆོས་བཤད་པའི་རྗེས་སུ་དགེ་བ་བསྔོ་བ་མཚན་ཉིད་དང་ལྡན་པའི་བཤེས་གཉེན་རྣམས་ཀྱི་ཕྱག་ལེན་དུ་སྣང་ངོ་། །དེར་མ་ཟད་རང་ཉིད་ཆོས་འཆད་པ་པོའི་མིང་དུ་བཏགས་པ་མིན་ཡང་གྲོགས་སྐྱེ་བོ་གཞན་དག་སྡིག་པ་མི་དགེ་བར་འཇུག་པར་འདུག་ན་གླེང་མོའི་ཚུལ་གྱིས་བླང་དོར་བསྟན་ཏེ་དེ་ལས་བཟློག་ནས་དགེ་བ་ལ་སྦྱོར་བ་སོགས་བསམ་པ་ཁྱད་པར་གསུམ་ལྡན་གྱི་སྒོ་ནས་ཆོས་སྦྱིན་ལ་དངོས་སུ་འབད་ཅིང་། དངོས་སུ་སྦྱིན་པར་བྱ་བའི་ཡུལ་མ་རྙེད་ན་སྙིང་ཐག་པ་ནས་སེམས་ཅན་ཐམས་ཅད་ལ་དམ་པའི་ཆོས་བསྟན་པར་མོས་ཤིང་ཆོས་ཀྱི་སྦྱིན་པ་དེའི་མཐུས་ཕན་པ་རྒྱ་ཆེན་པོ་བྱུང་པར་བསམ་པ། དཔེར་ན་ཆོས་ཀྱི་སྒྲ་ཐོས་པས་དམྱལ་བ་པ་རྣམས་གནས་ངན་ལེན་སྡུག་བསྔལ་ལས་ཐར་བར་མོས་པ་སོགས་ཀྱི་སྒོ་ནས་སྨོན་ལམ་ཁྱད་པར་ཅན་གདབ། དེ་བཞིན་དུ་སེམས་ཅན་རྣམས་ལ་རྒྱལ་པོའི་ཆད་པས་ནག་ཅན་ཁྲིམས་ལ་སྦྱོར་བ། གཅན་གཟན་དང་དགྲ་ལ་སོགས་པས་ལུས་སྲོག་ལོངས་སྤྱོད་ལ་རྒོལ་བ། མེ་དང་ཆུ་ལ་སོགས་པའི་འཇིགས་པ་རྣམས་ལས་དངོས་སུ་རང་སྟོབས་ཀྱིས་ནུས་ན་བསྐྱབ། མི་ནུས་ན་དེ་ལས་ཐར་བའི་ཐབས་བསྟན། འཇིག་རྟེན་གྱི་ཁམས་གཞན་དུ་སྡུག་
བསྔལ་འདི་དག་གིས་མནར་བ་དཔག་ཏུ་མེད་པ་ཡོད་པས་དེ་དག་རྣམས་ལ་མི་འཇིགས་པའི་སྦྱིན་པ་བཏང་བ་དང་དེའི་མཐུས་འཇིགས་པ་ལས་གྲོལ་བར་སྙིང་ཐག་པ་ནས་བསམ། རང་བྱང་ཆུབ་ཏུ་སེམས་བསྐྱེད་པའི་མཐུ་ལྡན་དུ་གྱུར་པར་མོས་བློས་སྤྲུལ་ཏེ་ཚ་བའི་དམྱལ་བར་ཆར་ཆེན་པོ་ཕབ་ནས་མེ་བསད་པ་སོགས་དམིགས་པ་དང་སྨོན་ལམ་འདེབས། ཟང་ཟིང་གི་སྦྱིན་པ་ཡང་བཟའ་བཏུང་གནས་མལ། ན་བའི་གསོས་སྨན། དར་ཟབ་རིན་ཆེན། རྟ་གླང་པོ། ས་མཁར་ཡུལ་ཞིང་། མགོ་བོ་མིག་ཡན་ལག་ཉིང་ལག་སོགས་ལུས་ལོངས་སྤྱོད་ཐམས་ཅད་བསམ་པ་ཁྱད་པར་གསུམ་ལྡན་གྱི་སྒོ་ནས་སྦྱིན་ཞིང་། རང་ཉིད་བཀྲེས་ཤིང་ཕོངས་པས་དེ་ལྟར་བྱར་མེད་ཚེ། དཔེར་ན་ཟས་གཡོས་སུ་བྱས་པ་དང་མ་བྱས་པ་དཔག་ཏུ་མེད་པ་སྤྲུལ་ནས་ཡི་དྭགས་སོགས་བཀྲེས་པས་ཉེན་པའི་འགྲོ་བ་རྣམས་ལ་སྦྱིན་པས་སྡུག་བསྔལ་དེ་ལས་ཐར་བར་བསམ་པ་སོགས་ཡུལ་དང་རྫས་སྐབས་ཐོབ་སྦྱར་ཏེ་རྒྱ་ཆེན་པོར་སྤྲོ་བ་ནི་བྱང་སེམས་ཤེས་རབ་ཅན་གྱི་སྦྱིན་པ་ཡིན་པས་བཤད་མ་ཐག་པའི་སྦྱིན་པའི་ཉམས་ལེན་གསུམ་པོ་དེ་ཡང་འདི་ནས་བཟུང་སྟེ་ཆོས་ཚིགས་བཅད་བཞི་པ་ཡན་ཆད་སྟོན་པ། ཚ་བས་གདུངས་པ་ལ་བསིལ་བའི་གནས་ཁང་སྟོན་པ། ངན་སློང་ལ་ཟས་གོས་སྟེར་བ་སོགས་ནུས་པ་རྣམས་དངོས་སུ་བྱ་དགོས་ཀྱི། ནུས་བཞིན་དུ་དམིགས་པས་བྱེད་པ་ནི་རང་མགོ་རང་གིས་གཡོགས་པར་གསུང་དེ་ལྟར་སྔར་བཤད་པ་རྣམས་ངེས་པར་བྱས་ནས་སྦྱིན་པ་གཏོང་བའི་དངོས་པོ་ལ་ཡིད་ཆགས་པའི་སེར་སྣ་དང་། བདག་ལ་ལོངས་སྤྱོད་མེད་པས་སྟེར་མི་ནུས་སྙམ་པ་དང་། དངོས་པོ་ཡིད་དུ་
འོང་བ་ལ་དམིགས་བསལ་གྱི་ཆགས་སེམས་གང་འདུག་པ་དེ་ལེགས་པར་བརྟག །བདག་སྔར་ཡི་དྭགས་དང་རྣམ་ཐོས་ཀྱི་བུ་སོགས་མཐོ་དམའ་བགྲང་གིས་མི་ལང་བར་སྐྱེས་འདུག་ནའང་ད་ལྟའི་སྣང་ཚུལ་ནི་འདི་ལྟར་འདུག །དངོས་པོ་འདི་ལས་ལྷག་པ་ཡིད་བཞིན་ནོར་བུ་ཐོབ་ནས་དེ་དང་བྲལ་བ་བསམ་གྱིས་མི་ཁྱབ་སྙམ་ཡང་ཡང་བསམས་ཏེ་མི་མཐུན་ཕྱོགས་འགོ་གནོན། གཏོང་སེམས་མངོན་གྱུར་སྐྱེས་ཀྱང་ལན་དང་རྣམ་སྨིན་ལ་རེ་བའི་བསམ་པ་ཤས་ཆེ་བ་འདུག་ན། སྔར་མཆོད་སྦྱིན་གྲངས་མེད་པ་ཞིག་བྱས་ཏེ་བརྒྱ་བྱིན་དང་ཚངས་པ་སོགས་ཀྱི་གོ་འཕང་ཐོབ་ཀྱང་དོན་མེད་དུ་སོང་འདུག་པས་ད་རེས་ཟས་ཁམ་གཅིག་སྦྱིན་པར་བཏང་བ་ཡན་ཆད་བླ་ན་མེད་པའི་བྱང་ཆུབ་ཀྱི་རྒྱུར་བསྔོ་སྙམ་པའི་འདུན་པ་དུ་རེ་བ་དང་བཅས་ཐུན་དངོས་གཞི་ལ་ཡིད་ཀྱིས་སྤྲུལ་དེ་སྦྱིན་པ་གསུམ་པོ་གཏོང་བའི་དམིགས་པ་ནན་ཏན་དང་། ཐུན་མཚམས་སུ་དངོས་སུ་གཏོང་བ་དང་ཡིད་གོམས་པ་ལ་འབད་པར་བྱ། དེས་ན་སྦྱིན་པ་གསུམ་པོ་དེ་བྱ་ནུས་ཚད་ཉམས་སུ་བླང་བར་བྱའམ་སྙམ་ན། མཐའ་གཅིག་ཏུ་མ་ངེས་ཏེ། སྤྱོད་འཇུག་ལས། སྙིང་རྗེའི་བསམ་པ་མ་དག་པར། །ལུས་ནི་བཏང་བར་མི་བྱ་སྟེ། །ཅི་ནས་འདི་དང་གཞན་དུ་ཡང་། །དོན་ཆེན་འགྲུབ་པའི་རྒྱུར་བཏང་ངོ་། །ཞེས་སྙིང་རྗེ་ཆེན་པོས་ལུས་ཀྱི་ཤ་གཅོད་པ་སོགས་ཀྱི་དཀའ་སྤྱད་བསྒྲིབས་ཏེ་ཡིད་མི་འབྱུང་བ་མ་རྙེད་ཀྱི་བར་དང་། དགོས་པ་ཆུང་ངུའི་ཆེད་དང་། བདུད་རིགས་ཀྱིས་མཐོ་འཚམས་པ་དང་སྨྱོན་པ་སོགས་ཀྱིས་སློང་བ་ལ་ལུས་ཀྱི་སྦྱིན་པ་དུས་དང་དགོས་པ་དང་སྦྱིན་ཡུལ་གྱི་སྒོ་ནས་སྟེར་དུ་མི་རུང་བ་ནི་ལུས་ཀྱི་དངོས་པོ་གཏོང་མི་གཏོང་གི་ཁྱད་པར་དང་། ཕྱིའི་དབང་དུ་བྱས་ན་བློ་ཤིན་ཏུ་
དམན་པ་ལ་ཐེག་པ་ཆེན་པོའི་ཆོས་སྟོན་པ་དང་། རབ་ཏུ་བྱུང་བ་ལ་ཕྱི་དྲོའི་ཁ་ཟས་དུས་ཀྱི་སྒོ་ནས་སྟེར་དུ་མི་རུང་། སྡོམ་བརྩོན་ལ་ཤ་ཆང་སྒོག་བཙོང་ལྷག་མ་མི་གཙང་བས་སྦགས་པ། ཕ་རོལ་གྱིས་གནོད་པ་བྱེད་ངེས་པའི་སྲོག་ཆགས་ནད་པ་ལ་མི་འཕྲོད་པའི་ཟས། ཚོད་བགམ་པ་དང་ནོར་གྱི་འདུ་ཤེས་ཅན་ལ་གླེགས་བམ་ལྟ་བུ་ཡུལ་གྱི་སྒོ་ནས་སྦྱིན་དུ་མི་རུང་བ། མི་འདོད་པས་སྡུག་བསྔལ་བཞིན་དུ་བྲན་སྟེར་བ་ལྟ་བུ་དངོས་པོའི་སྒོ་ནས་སྦྱིན་དུ་མི་རུང་བ། མི་རུང་བ་ཞིག་རྒྱལ་པོའི་ཕྱག་སྦལ་ནས་འཐོན་ན་འགྲོ་བ་གྲངས་མེད་པ་སྡུག་བསྔལ་ལ་སྦྱོར་བ་བཙོན་རའི་འཇིགས་པ་ལས་སྐྱོབ་པའི་སྦྱིན་པ་དང་། གནོད་སེམས་ཀྱིས་སློང་བ་ལ་དུག་མཚོན་སོགས་སྦྱིན་པ་ནི་དགོས་པའི་སྒོ་ནས་སྦྱིན་དུ་མི་རུང་བས་སྤྱིར་བཏང་དམིགས་བསལ་ལེགས་པར་ཕྱེད་པར་བྱས་ནས་བདག་ཀྱང་མྱུར་དུ་འཆི་བའི་ཆོས་ཅན་ཡིན་པས། བཏང་བྱའི་དངོས་པོ་འདི་རྣམས་ཀྱིས་ཀྱང་བདག་འདོར། བདག་གིས་ཀྱང་འདི་རྣམས་འདོར་བས་གང་ལ་ཡང་སྙིང་པོ་མེད་སྙམ་དུ་སྙིང་ཐག་པ་ནས་གཏོང་སེམས་ལ་གོམས་པར་བྱ་བ་ལགས་སོ། །སྨྲས་པ། ཡིད་གཏོང་སེམས་དྲག་པོས་ལུས་ལོངས་སྤྱོད། །དྲིན་འཁོར་ཐབས་མེད་པའི་འགྲོ་བ་ལ། །དུས་གྲངས་མེད་བྱིན་པས་གཏན་བདེའི་ནོར། །གཏེར་འཛད་མེད་བང་མཛོད་དེང་འདིར་གྲུབ། །ལར་མི་བཟད་དབུལ་ཕོངས་སྡུག་བསྔལ་འདི། །རང་གཅིག་པུའི་ཐོག་ཏུ་བབ་མིན་པའི། །མ་འགྲོ་བ་ཀུན་གྱི་སྣང་ཚུལ་ཏེ། །འདི་བརྟགས་ན་བློ་ཡིས་བཟོད་ཐབས་མེད། །སྔར་དཀར་མིན་ལས་མང་བསགས་པའི་མཐུས། །དུས་ད་ལྟའི་སྣང་
ཚུལ་འདི་ལྟར་ན། །ད་སྦྱིན་པའི་ཕར་ཕྱིན་རྫོགས་བྱས་ནས། །མཐའ་མི་མངོན་སེམས་ཅན་སྒྲོལ་བར་སྨོན། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་ཚུལ་ཁྲིམས་ཀྱི་ཕར་ཕྱིན་ནི་སྤྱོད་འཇུག་ལས། ཉ་ལ་སོགས་པ་གང་ཞིག་ཏུ། །དེ་དག་གསོད་མི་འགྱུར་བར་བསྐྲད། །སྤོང་བའི་སེམས་ནི་ཐོབ་པ་ལས། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་གཞན་ལ་གནོད་པ་གཞི་དང་བཅས་པ་ལས་ཡིད་ཕྱིར་ལོག་པའི་སྤོང་སེམས་ནི་ཚུལ་ཁྲིམས་ཡིན་ཞིང་། སེམས་དེ་ལ་གོམས་པ་གོང་ནས་གོང་དུ་ཡོངས་སུ་རྫོགས་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པར་འགྱུར་བ་ཡིན་པས་སེམས་ཅན་ཐམས་ཅད་གནོད་འཚེ་དང་བྲལ་མ་བྲལ་ལ་ལྟོས་མི་དགོས་སོ། །དེ་ཡང་ཉེས་སྤྱོད་སྡོམ་པའི་ཚུལ་ཁྲིམས་ལ་ལམ་སྒྲོན་དུ། སོ་སོར་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་པ་ཡོད་ཀྱི་གཞན་དུ་མིན། །ཞེས་པའི་ཚིག་ལ་འཁྲུལ་ནས་སོ་སོ་ཐར་པའི་ཚུལ་ཁྲིམས་དངོས་བསྟན་ལ་ཁས་བླངས་ཚེ་བྱང་སེམས་ཀྱི་བསླབ་པ་ལ་སློབ་པའི་རྟེན་ཅན་དུ་གྱུར་པའི་ལྷ་ཡོད་པས། ལམ་སྒྲོན་འགྲེལ་པར། ད་ནི་ཚུལ་ཁྲིམས་ཀྱི་སྡོམ་པའི་རྟེན་ཁྱད་པར་ཅན་བསྟན་པར་འདོད་ནས་ཞེས་བཤད་པས་ཁྱད་པར་ཅན་མ་ཡིན་པའི་ཐུན་མོང་བ་ཞིག་བཤད་པ་མི་རིགས་མོད། འོ་ན་གང་ལ་ངོས་འཛིན་སྙམ་ན་སོ་ཐར་གྱི་སྡོམ་ལྡན་བྱང་སེམས་ཀྱི་བསླབ་པ་ལ་སློབ་པ་ཞིག་ཡིན་ན་སོ་ཐར་གྱི་སྡོམ་པ་དངོས་དེ་དང་ཐུན་མོང་བའི་སྤོང་སྡོམ་ནི་སྐབས་འདིའི་སྡོམ་པའི་ཚུལ་ཁྲིམས་ལ་ངོས་འཛིན་ལ། སོ་ཐར་གྱི་སྡོམ་ལྡན་མིན་ན་སོ་ཐར་དང་ཐུན་མོང་
བ་མི་དགེ་བཅུ་སྤོང་བའི་སྤོང་སྡོམ་དེ་ལ་ཉེས་སྤྱོད་སྡོམ་པའི་ཁྲིམས་སུ་ངོས་འཛིན་པའི་ཕྱིར་ན་ཕར་ཕྱིན་བསྡུས་པ་ལས། མཐོ་རིས་ཐར་བའི་བདེ་ལམ་གྱུར་པ་སྟེ། །ལས་ལམ་བཅུ་པོ་འདི་ལས་ཉམས་མི་བྱ། །འདི་ལ་གནས་པས་འགྲོ་ལ་ཕན་སེམས་པའི། །བསམ་པའི་ཁྱད་པར་འབྲས་བུ་ཡོད་པར་འགྱུར། །ཞེས་རབ་བྱུང་ཡིན་ན་མཁན་སློབ་ཀྱི་དྲུང་དུ་ཁས་བླངས་པའི་རྩ་བ་དང་ཡན་ལག་གི་ཉེས་པས་གོས་མ་གོས་དང་། སོ་ཐར་གྱི་སྡོམ་པ་དང་མི་ལྡན་ན་སྔར་སྐྱེས་བུ་ཆུང་ངུའི་སྐབས་སུ་བཤད་པའི་མི་དགེ་བ་བཅུའི་དབང་དུ་སོང་མ་སོང་ཡང་ཡང་དྲན་ཤེས་ཀྱིས་བརྟག་ཅིང་། བཀའ་གདམས་གོང་མ་རྣམས་ཀྱི་ཕྱག་ལེན་ལྟར་ཉིན་རེ་ཞིང་དགེ་སྡིག་གང་བྱས་ལ་རྡེའུ་དཀར་ནག་བཏང་ནས། བརྩིས་པས་དཀར་པོ་མང་བ་ལ་སྤྲོ་བ་དང་ནག་པོ་མང་བ་ལ་འགྱོད་སེམས་དྲག་པོའི་སྒོ་ནས་ཐུན་དངོས་གཞི་ལ་ཐོག་མར་རྡེའུ་ནག་པོའི་གྲངས་ཇི་ཙམ་བྱུང་གི་སྡིག་པ་དྲན་ཤེས་ཀྱིས་ཟིན་པ་རྣམས་ལ་ཕྱིར་འཆོས་དང་། བཤགས་སྡོམ་གཉེན་པོ་སྟོབས་བཞི་ཚང་བའི་སྒོ་ནས་བྱ་བ་དང་བདག་གི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཅིག་སྙམ་དུ་བསམ་པ་དང་ངག་ནས་ཀྱང་བརྗོད་ཅིང་། ཆགས་སེམས་ཀྱི་ཡུལ་ལ་ཆགས་པ་དྲག་པོ་སྐྱེས་པ་ཁ་རྒྱལ་དུ་མ་བཏང་བར་ཁ་ན་མ་ཐོ་བའི་ཉེས་པ་དང་མི་སྡུག་པ་དྲན་པའི་སྒོ་ནས་འགོ་གནོན་པ་སོགས་ཉོན་མོངས་གང་ཆེ་བ་དེ་ལ་རྣམ་སྨིན་སོགས་བསམས་ནས་གཉེན་པོ་བསྟེན་ཏེ་བསྒོམས་པས་ཚུལ་ཁྲིམས་དག་པ་ཞིག་འོང་། མི་དགེ་བ་བཅུ་སྤོང་བའི་ཚུལ་དེ་སྐྱེས་བུ་གསུམ་གང་བྱུང་བ་ངོ་བོ་འདྲ་ཡང་བསམ་པའི་ཁྱད་པར་གྱིས་དབྱེ་དགོས་སོ། །དགེ་བ་ཆོས་
སྡུད་ཀྱི་ཚུལ་ཁྲིམས་ནི་བྱང་སེམས་ཀྱི་ཚུལ་ཁྲིམས་དང་ལྡན་པས་ལུས་ངག་གི་དགེ་བ་བྱས་པ་རྣམས་ཡིན་ལ། དེ་ཡང་བསླབ་པ་གསུམ་དང་ཞིང་ཁྱད་པར་ཅན་བླ་མ་སོགས་ལ་རིམ་གྲོ་བྱེད་པ། དཀོན་ཅོག་གསུམ་ལ་བསྔགས་པ་བརྗོད་ཅིང་གཞན་གྱི་དགེ་བ་ལ་ཡི་རང་བའི་ཚིག་སྨྲ་བ། ཚུར་གནོད་པ་ལ་སྔོན་ལས་སུ་བལྟ་བ། དགེ་བ་རྣམས་བསྔོ་སྨོན་རྒྱས་འདེབས་པ། དཀོན་ཅོག་ལ་མཆོད་པ་འབུལ་བ། བག་ཡོད་པས་དགེ་བ་རྒྱུན་མི་གཅོད་པ། དབང་པོའི་སྒོ་ཉོན་མོངས་པའི་ཕྱོགས་ལས་སྲུང་བ། ཟས་ཀྱི་ཚོད་རིག་པ། ནམ་གྱི་ཆ་སྟོད་སྨད་ལ་རྣལ་འབྱོར་ལ་བརྩོན་པ། དགེ་བའི་བཤེས་གཉེན་ནམ་མ་རྙེད་ན་རང་གིས་བཤེས་གཉེན་བྱས་ཏེ་གཉེན་པོ་བསྟེན་པ། ཉེས་པ་རྣམས་ཡུལ་ཁྱད་པར་ཅན་ལ་བཤགས་པ་རྣམས་ལས། ཏིང་ངེ་འཛིན་སྒོམ་པ་ལྟ་བུ་ཐུན་དངོས། དཀོན་ཅོག་གི་མཆོད་པའི་སྟ་གོན་སོགས་ཐུན་མཚམས། བག་ཡོད་བསྟེན་པ་དང་ཤེས་བཞིན་གྱི་བྱ་ར་སོགས་ནི་གཉིས་ཀ་ལ་དགོས་ཤིང་བླ་མ་ལ་བསུ་བ་དང་སྟན་བསྟབ་པ་སོགས་ནི་དུས་ཀྱི་ངེས་པ་མེད་མོད། ད་ལྟ་ཕྱག་ལེན་ལ་ཐུན་དངོས་གཞི་ལ་བཤད་མ་ཐག་པ་མཐའ་དག་དཔྱད་འཇོག་སྐབས་དང་སྦྱར་ཏེ་དམིགས་པ་སྐྱོང་བ་ལགས། སེམས་ཅན་དོན་བྱེད་ཀྱི་ཚུལ་ཁྲིམས་ནི་བྱང་ཆུབ་སེམས་དཔའ་སེམས་ཅན་ལ་ཕན་འདོགས་པ་སྟེ། དེ་ལ་ཡང་རྣམ་པ་བཅུ་གཅིག་ཏུ་བཤད་པའི། ཁ་ན་མ་ཐོ་བ་མེད་པའི་སྒོ་ནས་ལོངས་སྤྱོད་རྐུན་པོས་མི་འཁྱེར་བའི་ཐབས་བསྟན་པ་ནི་བྱ་བ་བྱེད་པའི་གྲོགས་ཀྱི་དོན་བྱེད་པ་དང་ནད་པ་ལ་སྨན་དང་རྐང་པ་ཉམས་པ་ལ་གཞོན་པས་གནས་སུ་སྐྱེལ་བ་ལྟ་བུ་ནི་སྡུག་བསྔལ་གྱི་གྲོགས་ཀྱི་དོན་བྱེད་པ། ཆོས་བསྟན་ནས་
ཉེས་སྤྱོད་ལས་ལྡོག་པའི་ཐབས་སྟོན་པ་ལྟ་བུ་ཐབས་ལ་རྨོངས་པའི་དོན་བྱེད་པ། བསྙེན་བཀུར་སོགས་བྱེད་པ་ལྟ་བུ་ཕན་འདོགས་པས་དོན་བྱེད་པ། སེངྒེ་དང་སྟག་ལ་སོགས་པའི་གནོད་པ་ལས་སྐྱོབ་པ་ལྟ་བུ་འཇིགས་པས་ཉེན་པའི་དོན་བྱེད་པ། ཕ་མ་དང་བྲལ་བའམ་ཆོམ་རྐུན་གྱིས་ནོར་འཕྲོགས་པ་སོགས་མྱ་ངན་གྱིས་ཟིན་པ་ལ་མི་རྟག་པའི་གཏམ་གྱི་སྒོ་ནས་སེལ་བ་ལྟ་བུ་མྱ་ངན་གྱིས་གཟིར་བའི་དོན་བྱེད་པ། ཁ་ཟས་ཀྱིས་དབུལ་བ་ལ་ཡིད་དུ་འོང་བའི་ཟད་སྟེར་བ་ལྟ་བུ་ཕོངས་པའི་དོན་བྱེད་པ། ཆོས་དང་མཐུན་པའི་གོས་སྟེར་བ་དང་འདོད་ཆགས་ཅན་ལ་མི་སྡུག་པ་སྟོན་པ་སོགས་གནས་འཆའ་བར་འདོད་པའི་དོན་བྱེད་པ། ཕ་རོལ་པོ་དགེ་བ་ལ་སྦྱོར་མི་ནུས་པར་མཐོང་ན་མི་འདོད་པའི་ལུས་ངག་གི་སྤྱོད་ལམ་སྤངས་ཏེ་སེམས་ལ་ཕན་པར་བྱ་བ་ནི་བློ་མཐུན་པར་འདོད་པའི་དོན་བྱེད་པ། ཚུལ་ཁྲིམས་སོགས་ཀྱི་ཡོན་ཏན་ལ་གཟེངས་བསྟོད་པ་ནི་ཡང་དག་པར་ཞུགས་པའི་དོན་བྱེད་པ། སྡིག་པ་བྱས་པ་ལ་ཆད་པ་གཅོད་པ་ལྟ་བུ་ནི་ལོག་པར་ཞུགས་པའི་དོན་བྱེད་པ། དམྱལ་བ་སྤྲུལ་ནས་གཞན་སྡིག་པ་ལས་ལྡོག་པ་ལྟ་བུ་དང་ཆོ་འཕྲུལ་ཡ་མ་ཟུང་བསྟན་ནས་གཞན་འདུན་པར་བྱེད་པ་ལྟ་བུ་ནི་རྫུ་འཕྲུལ་གྱི་སྒོ་ནས་གདུལ་བྱའི་དོན་བྱེད་པ་སྟེ་བཅུ་གཅིག་པོ་འདི་དག་ལ་དངོས་སུ་བྱ་ནུས་མི་ནུས་དང་དུས་ལ་ངེས་མི་ངེས་སྣ་ཚོགས་ཀྱང་། ཐུན་དངོས་ལ་དཔྱད་སྒོམ་གྱི་ཚུལ་གྱིས་ཉམས་སུ་ལེན་དགོས་པས་ཚིག་བཤད་ཙམ་དུ་མ་སོང་བ་གནད་དུ་ཆེ། དེ་ཡང་ཕར་ཕྱིན་བསྡུས་པ་ལས། ཚུལ་ཁྲིམས་ཉམས་པས་རང་དོན་མི་ནུས་ན། །གཞན་དོན་ཚུལ་ལ་མཐུ་ཡོད་ག་ལས་
འོང་། །དེ་ཕྱིར་གཞན་དོན་ལེགས་པར་བརྩོན་པ་ཡིས། །འདི་ལ་རིམ་གྲོ་གློད་པར་རིགས་མ་ཡིན། །ཞེས་དོན་གཉིས་སྒྲུབ་པ་ལ་ཚུལ་ཁྲིམས་འདི་རྩ་བ་ལྟ་བུར་གསུངས་པས། གཞན་གནོད་གཞི་བཅས་སྤོང་བའི་ཚུལ་ཁྲིམས་ལ་གོམས་པ་གོང་ནས་གོང་དུ་འཕེལ་བའི་ཐབས་བྱ་འཚལ་ལོ། །སྨྲས་པ། ཕུན་ཚོགས་དལ་འབྱོར་རྟེན་གྱི་སྐྱེད་ཚལ་དུ། །རྣམ་གསུམ་ཚུལ་ཁྲིམས་ཡོངས་འདུ་ས་བརྟོལ་ལ། །མྱང་འདས་འབྲས་བུའི་ཁུར་ཆེན་གྱིས་དུད་པར། །ཕན་བདེའི་རོ་བརྒྱའི་སྙིང་པོ་ཅི་ཡང་འཛག །གྲངས་མེད་བསྐལ་པར་བསགས་པའི་སྦྱིན་པ་ཡི། །ཕུང་པོ་གཅིག་ཏུ་དཀར་བའི་ལོངས་སྤྱོད་ཀྱང་། །ལྷ་མིའི་རྟེན་ལ་ཉམས་སུ་མྱོང་མི་མྱོང་། །བྱེད་པོ་ཚུལ་ཁྲིམས་ཁོ་ནར་རག་ལུས་ན། །ལན་ཅིག་ཐོབ་པའི་རྟེན་བཟང་ཤིང་རྟ་འདི། །བག་མེད་ལྷུང་བའི་འདམ་དུ་ཉེར་བྱིང་བ། །ཕྱིར་བཅོས་འཕྲུལ་གྱིས་བདེ་བའི་ཐང་ཡངས་པོར། །མི་འདོན་དལ་བར་འདུག་རྣམས་གདོན་གྱིས་བརླམས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གསུམ་པ་བཟོད་པའི་ཕར་ཕྱིན་ནི་སྤྱོད་འཇུག་ལས། སེམས་ཅན་མི་བསྲུན་ནམ་མཁའ་བཞིན། དེ་དག་གཞོམ་གྱིས་ཡོངས་མི་ལང་། ཁྲོ་བའི་སེམས་འདི་གཅིག་བཅོམ་ན། །དགྲ་དེ་ཐམས་ཅད་ཆོམས་དང་འདྲ། །ས་སྟེང་འདི་དག་ཀོས་གཡོག་ཏུ། །དེ་སྙེད་ཀོ་བས་ལ་ལངས། །ལྷམ་མཐིལ་ཙམ་གྱི་ཀོ་བས་ནི། །ས་སྟེང་ཐམས་ཅད་གཡོགས་དང་འདྲ། །དེ་བཞིན་ཕྱི་རོལ་དངོས་པོ་ཡང་། །བདག་གིས་ཕྱིར་བཟློག་མི་ལངས་གི །བདག་གི་སེམས་འདི་ཕྱིར་བཟློག་བྱའི། །གཞན་རྣམས་བཟློག་གོ་ཅི་ཞིག་དགོས། །ཞེས་རང་གིས་
འགྲོ་བ་རྣམས་ལ་ཁོང་ཁྲོ་བ་ལ་སོགས་པ་འགོག་པའི་སེམས་ཀྱི་གོམས་པ་ཡོངས་སུ་རྫོགས་པ་དེ་བཟོད་པའི་ཕར་ཕྱིན་རྫོགས་པ་ཡིན་གྱི་སྐྱེ་རྒུ་མཐའ་དག་མི་སྲུན་པའི་བློ་དང་འབྲལ་མི་དགོས་པ་ཡིན་པས། ཞི་བ་ལྷས། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང་། ཁོང་ཁྲོ་གཅིག་གིས་འཇོམས་པར་བྱེད། །ཅེས་ཡུལ་དམ་པ་ལ་ཁོང་ཁྲོ་བྱས་པས་དགེ་བའི་རྩ་བ་འཇོམས་པར་ཐམས་ཅད་ཡོད་སྨྲ་བའི་གཞུང་ལས་ཀྱང་བྱུང་ཞིང་། དམིགས་བསལ་འཇུག་པར། གང་ཕྱིར་རྒྱལ་སྲས་རྣམས་ལ་ཁྲོས་པ་ཡིས། །སྦྱིན་དང་ཁྲིམས་བྱུང་དགེ་བ་བསྐལ་པ་བརྒྱར། །བསགས་པ་སྐད་ཅིག་གིས་འཇོམས་དེ་ཡི་ཕྱིར། །མི་བཟོད་ལས་གཞན་སྡིག་པ་ཡོད་མ་ཡིན། །ཞེས་བྱང་སེམས་སྟོབས་ཆུང་བས་བྱང་སེམས་སྟོབས་ཆེ་བ་ལ་ཁྲོས་པས་དགེ་བ་བསྐལ་བརྒྱར་བསགས་པ་འཇོམས་ནུས་ལ་བྱང་སེམས་མིན་པའི་སོ་སྐྱེས་བྱང་སེམས་ལ་ཁྲོས་ན་བསྐལ་བ་སྟོང་གི་དགེ་བའི་འབྲས་བུ་མི་འབྱིན་པ་སོགས་ཤིན་ཏུ་ལྕི་བར་གསུངས། རང་རེ་རྣམས་ཀྱིས་ཁོང་ཁྲོ་ནི་རྐྱེན་ཆུང་ངུ་རེ་ལ་ཡང་འབད་མེད་དུ་གསོག །ཡུལ་བྱང་སེམས་ནི་གང་ཟག་མེ་དོང་ཐལ་བས་གཡོགས་པ་ལྟར་གང་ན་ཡོད་ཆ་མེད་པས་སྔར་བྱས་ཀྱི་དགེ་བ་ནི་གཏན་བརླག་ལྟ་བུར་སོང་ཟིན་འདུག་པས་རྒུད་པ་ཀུན་གྱི་རྩ་བར་ངེས་ཤིང་། ཞི་བ་ལྷས། གང་ཞིག་བསྒྲིམས་ཏེ་ཁྲོ་འཇོམས་པ། །དེ་ནི་འདི་དང་གཞན་དུ་བདེ། །ཞེས་ཁྲོ་བ་སྤངས་ན་ཚེ་འདིར་ལུས་སེམས་མི་མནར་བར་མ་ཟད། སྐྱེ་བ་མཐའ་དག་ཏུ་བདེ་བའི་རྒྱུར་སྣང་བས་བཟོད་པའི་ཕ་རོལ་ཏུ་ཕྱིན་པ་ལ་བསླབ་སྙམ་པའི་ཡིད་དུ་རེ་བ་དང་བཅས་
ཏེ། ཐོག་མར་གནོད་བྱེད་ཀྱིས་གནོད་པ་བྱེད་བཞིན་པ་ཡིན་ན་དང་མིན་ན་སྔར་བྱས་པ་ཞིག་གསལ་བཏབ་ནས་ཞེ་སྡང་དམར་ལམ་པ་སྐྱེས་བྱུང་བའི་ཚེ་དེའི་ངོ་བོ་ལ་བལྟས་ནས། སྤྱོད་འཇུག་ལས། གང་ཚེ་ཉོན་མོངས་དབང་གྱུར་པས། །བདག་སྡུག་ཉིད་ཀྱང་གསོད་བྱེད་པ། །དེ་ཚེ་དེ་དག་གཞན་ལུས་ལ། །གནོད་མི་བྱེད་པར་ཇི་ལྟར་འགྱུར། ཞེས་དཔེར་ན་ལ་ལ་གཞན་ལ་མི་དགའ་བའི་ཉོན་མོངས་དྲག་པོ་སྐྱེས་པ་ན་རང་ལྕེབ་པ་དང་མཚོན་འདེབས་པ་གཡང་ལ་མཆོང་བ་སོགས་རང་སྲོག་རང་གིས་གཅོད་པ་མངོན་སུམ་གྱིས་གྲུབ་པས་བདག་གཅེས་འཛིན་གྱིས་རང་ལ་རང་གིས་གནོད་པ་བྱ་མི་ནུས་བཞིན་དུ་ཉོན་མོངས་པའི་གཞན་དབང་གིས་དེ་ལྟར་བྱེད་པ་ལ་ཁྲོ་བའི་གོ་སྐབས་མེད་ན། འགྲོ་བ་གཞན་ཉོན་མོངས་པའི་ཤུགས་དྲག་པོས་རང་དབང་དང་བྲལ་ཏེ་གནོད་པ་བྱེད་པ་ལ་ཅིའི་ཕྱིར་ཁྲོ་སྙམ་དུ་བསམ། འོ་ན་གནོད་བྱེད་དེར་རང་དབང་ཡོད་པས་ཁོ་རང་གི་གཉེན་སོགས་ལ་གནོད་པ་མི་བྱེད་དོ་སྙམ་ན། གཉེན་ལ་ཕན་འདོགས་པ་དེ་ག་འདོད་ཆགས་ཀྱི་གཞན་དབང་དུ་སོང་བར་འདུག །སེམས་ཅན་རྣམས་ལ་རང་དབང་དང་ལྡན་ན་ཐམས་ཅད་སྡུག་བསྔལ་མི་འདོད་པས་སྡུག་བསྔལ་གྱིས་མནར་བའི་སེམས་ཅན་མེད་པར་ཐག་ཆོད་སྙམ་དུ་བསྒོམས་པས་རྒྱལ་པོ་ལྟ་བུས་དབང་མེད་དུ་གནོད་པ་བྱེད་པར་བཏང་བའི་མི་དེ་ལ་འཆར་བའི་སྣང་བ་ལྟ་བུ་ཞིག་འོང་གསུང་། གཞན་ཡང་འགྲོ་བ་ཁོ་རང་གི་རང་བཞིན་ལ་གནོད་པ་དེ་གྲུབ་ན་མེ་ཚ་ཞིང་སྲེག་པ་དང་འདྲ་ལ། གལ་ཏེ་གློ་བུར་དུ་བྱུང་བ་ཞིག་ཡིན་ན་ཉི་མ་སྤྲིན་གྱིས་བསྒྲིབས་པར་ནམ་མཁའ་ལ་ཁྲོ་མི་རིགས་པ་ལྟ་བུ། དེ་བཞིན་དུ་དངོས་སུ་ནད་བསྐྱེད་པ་ནི་དབྱུག་པ་ལྟ་བུའི་མཚོན་དང་། བརྒྱུད་ནས་
ཞེ་སྡང་གིས་རྦད་པས་གང་ཟག་དེས་བྱས་པ་ཅི་ཞིག་ཡོད། གནོད་པ་བྱེད་པའི་རྩ་བའི་རྒྱུ་ལ་ཁྲོ་ན། རང་གིས་སྔོན་ཆད་གཞན་ལ་གནོད་པ་འདི་ལྟ་བུ་བྱས་པ་ལས་བྱུང་བའི་ཚུལ་སྤྱོད་འཇུག་ལས། བདག་གིས་སྔོན་ཆད་སེམས་ཅན་ལ། །འདི་འདྲ་བ་ཡི་གནོད་པ་བྱས། །དེ་བས་སེམས་ཅན་འཚེ་བྱེད་པ། །བདག་ལ་གནོད་པ་འདི་འབྱུང་རིགས། །ཞེས་སོ། །དེར་མ་ཟད་བདག་ལ་གནོད་བྱེད་འདིས་ངན་སྨྲས་དང་རྨ་ཕྱུང་བ་སོགས་གནོད་པ་ཕྲ་མོ་ཡང་མི་བཟོད་པ་འདི་ལྟར་ན། ད་ལྟ་ངན་འགྲོའི་རྒྱུ་མང་དུ་བསྒྲུབས་པས་དམྱལ་བར་སྐྱེས་ན་སྡུག་བསྔལ་ཇི་ལྟར་བཟོད་སྙམ་དུ་རང་ལ་ཞེ་ཁྲེལ་ཡང་ཡང་འདེབས། གཞན་ཡང་ཆུ་ཐོག་ཏུ་ཆར་བབས་ན་གཉིས་ཀ་རླན་གཤེར་ཡིན་པ་ལས་མ་འདས་པ་ལྟར། བདག་ལུས་དང་མཚོན་ཆ་གཉིས་ཀ་སྡུག་བསྔལ་གྱི་རྒྱུ་ཡིན་པས་ཟུག་རྔུ་བསྐྱེད་པ་ལས་འོས་ཅི་ཡོད། རང་དོན་སྒྲུབ་པའི་ཉན་ཐོས་ཀྱང་ཁྲོ་བར་མི་བྱེད་ན་བདག་སེམས་ཅན་ཐམས་ཅད་ཕ་མར་ཤེས་ཏེ་གཞན་ཕན་སྒྲུབ་པར་སེམས་བསྐྱེད་ནས་འདི་ལྟར་བྱ་ག་ལ་རིགས་སྙམ་དུ་བསྒོམས་པས་ལུས་སེམས་བདེ་འབོལ་གྱི་འགྲོ་བ་ཡིན་གསུང་ད་དུང་གཞན་གྱིས་བསྟོད་པ་བྱས་པ་ལ་དགའ་བར་འདུག་ན་སྨད་པ་ལ་མི་དགའ་བ་ཤུགས་ཀྱིས་འོང་བས། སྤྱོད་འཇུག་ལས། བསྟོད་དང་གྲགས་པའི་རིམ་གྲོ་ནི། །བསོད་ནམས་མི་འགྱུར་ཚེར་མི་འགྱུར། །བདག་སྟོབས་མི་འགྱུར་ནད་མེད་མིན། །ལུས་བདེ་བར་ཡང་མི་འགྱུར་རོ། །ཞེས་བསྟོད་པ་དང་སྙན་གྲགས་ཀྱིས་ཕྱི་མར་མ་ཟད་འདིའི་བདེ་བ་ཡང་འཕེལ་བར་མི་བྱེད་པའི་སྟེང་དུ་རང་ཉིད་དོན་མེད་ཀྱི་གཡེང་བར་འཇུག་པ་དང་། གཞན་གྱིས་
ཕྲག་དོག་བྱེད་པའི་ཉེས་པ་དུ་མ་བསྐྱེད་ལ། སྙན་གྲགས་ཉམས་པའི་རྒྱུར་སོང་ནས་དེས་གནས་སྐབས་གཞན་རྐྱེན་གྱི་འཚེ་བ་དང་མཐར་ཐུག་གཡེང་བ་མེད་པས་བྱང་ཆུབ་བསྒྲུབས་ཏེ་བདེ་བ་མང་པོ་ཞིག་འཕེལ་བར་འདུག་པ་དེ་སངས་རྒྱས་ཀྱི་བྱིན་རླབས་ཡིན་སྙམ་དུ་དགའ་བ་སྒོམ་པ་དང་། མཚོན་ལྟ་བུ་ཕོག་ན་སེམས་ལ་མ་གནོད་ཀྱང་ལུས་ལ་ཅུང་ཟད་གནོད་མོད་ངན་སྨྲས་སོགས་ཀྱིས་ལུས་སེམས་གང་ལ་ཡང་མི་གནོད་པའི་ཚུལ་བསམ། དེ་ལྟར་བསྒོམ་པས་ཀྱང་རང་ལ་བསྟོད་སྨད་བྱས་པ་མགོ་སྙོམས་པ་བྱུང་ནའང་། ད་དུང་དགྲ་ལ་ཕུན་སུམ་ཚོགས་པ་འདུག་པ་མི་བཟོད་པའི་བློ་ཐོལ་གྱི་ཤར་བྱུང་ན། སྤྱོད་འཇུག་ལས། གལ་ཏེ་དགྲ་ཞིག་དགའ་ནའང་། །དེ་ལ་ཁྱོད་དགར་ཅི་ཞིག་ཡོད། ཁྱོད་ཀྱི་ཡིད་སྨོན་ཙམ་གྱིས་ནི། །དེ་ལ་གནོད་པའི་རྒྱུར་མི་འགྱུར། ཁྱོད་ཀྱི་འདོད་པས་སྡུག་བསྔལ་དེ། །གྲུབ་ནའང་ཁྱོད་དགར་ཅི་ཞིག་ཡོད། གལ་ཏེ་འཚེངས་པར་འགྱུར་ཞེ་ན། །དེ་ལས་ཕུང་པའང་གཞན་ཅི་ཡོད། །ཉོན་མོངས་ཉ་པས་བཏབ་པ་ཡི། །མཆིལ་བ་འདི་ནི་མི་བཟད་གཟེ། །དེས་བཟུང་སེམས་དམྱལ་བུམ་པར་ནི། །དམྱལ་བའི་སྲུང་མས་བདག་འཚེད་ངེས། །ཞེས་སེམས་ཅན་ཁོ་རང་གིས་རྙེད་པའི་བདེ་བ་ལ་ཁྲོ་བའི་དོན་མེད་ལ་ཁྲོས་ཀྱང་གནོད་པར་ཅི་ལ་འགྱུར། གལ་ཏེ་གནོད་དུ་ཟིན་ཀྱང་རང་གཞན་གཉིས་ཀ་དམྱལ་བར་སྲེག་པའི་ལས་ཡིན་པ་འདུག་སྙམ་དུ་སྡོམ་སེམས་དྲག་པོ་བྱ། དེ་ལྟར་གནོད་པ་བྱེད་པ་པོ་རྣམས་ལ་དམིགས་པའི་ཁོང་ཁྲོའི་གཉེན་པོ་བསྟེན་པར་ནུས་ནའང་། རང་སྡུག་བསྔལ་ཐོག་ཏུ་བབས་པ་འདི་མི་བཟོད་པར་འདུག་སྙམ་ན། སྡུག་བསྔལ་དེ་ལ་བཅོས་སུ་མེད་ན་མི་དགའ་བ་
བྱས་པས་དགོས་ནུས་མེད་ཅིང་། བཅོས་སུ་ཡོད་ན་བཅོས་པས་ཆོག་པས་མི་དགའ་བ་བྱ་ཡང་མི་དགོས་ལ། ད་ལྟ་མི་འདོད་པའི་སྡུག་བསྔལ་འབབ་པ་འདི་ཚེ་སྔོན་མ་མི་དགེ་བ་བྱས་པའི་འབྲས་བུ་ཡིན་པས་ཚེ་འདིར་སྡུག་བསྔལ་གྱི་ཚོར་བ་འདི་ལྟ་བུ་ཞིག་མ་མྱོང་ན་བླང་དོར་མི་འགྲུབ་པར་འཁོར་བའི་འཁོར་ལོ་འཁོར་བ་ཁོ་ནར་ཟད། ད་རེས་སྡུག་བསྔལ་འདིས་རྐྱེན་བྱས་ནས་འཁོར་བ་ལས་ཡིད་འབྱུང་སྟེ་ཐར་པ་མྱ་ངན་ལས་འདས་པ་སྒྲུབ་པའི་རྩ་བ་བྱས་པས་བཀའ་དྲིན་ཆེ། གཏར་སྲེག་སོགས་དཔྱད་རྩུབ་མོའི་སྡུག་བསྔལ་བསྟེན་པས་ནད་ཀྱི་གདུང་བ་ཞི་བ་ལྟར་ཕྱི་མ་མནར་མེད་དུ་སྐྱེ་དགོས་པའི་སྡུག་བསྔལ་གྱི་ཚབ་ལ་ཚེ་འདིར་ནད་ཀྱིས་ཐེབས་པ་ལ་སོགས་པའི་སྡུག་བསྔལ་བྱུང་བས་གོ་བཅད་སྙམ་དུ་བསམ། བཤད་མ་ཐག་པ་དེ་རྣམས་ཐུན་དངོས་གཞི་ལ་མྱོང་བ་ཐོན་པར་བྱས་ནས། ཐུན་མཚམས་ལ་གོས་ཕྱག་དར་ཁྲོད་པ་སོགས་ཚངས་སྤྱོད་འཕེལ་བའི་གནས་ལ་བརྟེན་པའི་སྡུག་བསྔལ་དང་ལེན། བསྟོད་སྨད་སོགས་འཇིག་རྟེན་གྱི་ཆོས་ལ་བརྟེན་པའི་སྡུག་བསྔལ་དང་ལེན། སྟན་ལ་གློ་མི་འབེབས་པའི་སྤྱོད་ལམ་གྱི་སྡུག་བསྔལ་དང་ལེན། དཀོན་ཅོག་མཆོད་པ་སོགས་ཆོས་ཡོངས་སུ་འཛིན་པ་ལ་བརྟེན་པའི་སྡུག་བསྔལ་དང་ལེན། གཟུགས་མི་སྡུག་པ་དང་གོས་ངན་པ་སོགས་ཉམས་སུ་བླང་ཞིང་གླུ་གར་སོགས་འདོད་ཡོན་ལས་ལྡོག་པའི་སློང་མོས་འཚོ་བ་ལ་བརྟེན་པའི་སྡུག་བསྔལ་དང་ལེན། དགེ་བའི་ཕྱོགས་ལ་མངོན་པར་བརྩོན་པས་དུབ་པ་ལ་བརྟེན་པའི་སྡུག་བསྔལ་དང་ལེན། གཞན་གྱི་སྲོག་སྐྱོབ་པ་སོགས་སེམས་ཅན་དོན་བྱེད་ལ་བརྟེན་པའི་སྡུག་བསྔལ་དང་ལེན། ཚོང་
སོགས་སྤངས་པ་འཕྲལ་གྱི་བྱ་བ་ལ་བརྟེན་པའི་སྡུག་བསྔལ་རྣམས་དངོས་སུ་དང་དུ་ལེན་ཞིང་མི་ནུས་པ་རྣམས་ཀྱང་དང་དུ་ལེན་པ་ལ་ཡིད་ཀྱི་གོམས་པ་ནན་ཏན་དུ་བྱས་པས། སྤྱོད་འཇུག་ལས། གོམས་ན་སླ་བར་མི་འགྱུར་པའི། །དངོས་དེ་གང་ཡང་ཡོད་མ་ཡིན། །དེ་བས་གནོད་པ་ཆུང་གོམས་པས། །གནོད་པ་ཆེན་པོའང་བཟོད་པར་བྱ། །ཞེས་རིམ་གྱིས་གོམས་ན་མཐར་གང་ལའང་ཇི་མི་སྙམ་པའི་བཟོད་པའི་ཕར་ཕྱིན་ཡོངས་སུ་རྫོགས་པར་འགྱུར་བ་ལགས་སོ། །སྨྲས་པ། སྐྱེ་བར་བསགས་པའི་དགེ་ཚོགས་ནགས་ཀྱི་ཀླུང་། ཁོང་ཁྲོའི་མེ་ཕུང་གཅིག་གིས་རབ་བསྲེགས་ནས། །མི་དགེའི་སྡོང་དུམ་སྲིད་པའི་རྩེར་སྤུངས་པའི། །མི་བཟོད་དགྲ་འདི་སྡུག་བསྔལ་ཀུན་གྱི་གཞི། དབང་མེད་ལས་ཉོན་རི་གཟར་རྩེ་མོ་ནས། །དཀར་མིན་འབྲས་བུ་ཐུར་དུ་རྒྱུག་པའི་རྦབ། །འཁོར་བའི་གཅོང་རོང་ཁྲོད་དུ་གནས་པ་རྣམས། །བཅོམ་པའི་གཤིས་ལུགས་འདི་ལ་སུ་ཞིག་གཤུང་། །ཀུན་འབྱུང་དཔུང་ཚོགས་བཤམས་པའི་གཡུལ་ངོ་ན། །བཟོད་པའི་གོ་ཆ་བཙན་པོ་ལེགས་བགོས་ཚེ། །རྡེག་རྡུང་ཚིག་རྩུབ་མཚོན་གྱིས་འབིགས་མིན་པའི། །མྱང་འདས་གནས་སུ་བགྲོད་པར་བྱེད་འདི་མཚར། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །བཞི་པ་བརྩོན་འགྲུས་ཀྱི་ཕར་ཕྱིན་ནི་སྤྱོད་འཇུག་ལས། བརྩོན་གང་དགེ་ལ་སྤྲོ་བའོ། །ཞེས་དགེ་བ་བསྡུ་བ་དང་སེམས་ཅན་གྱི་དོན་བྱ་བའི་ཕྱིར་དུ་སེམས་མངོན་པར་སྤྲོ་བ་ཕྱིན་ཅི་མ་ལོག་པ་གོང་ནས་གོང་དུ་ཡོངས་སུ་རྫོགས་པ་མཐར་ཕྱིན་པ་དེ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡིན་ལ། དེ་ཡང་མདོ་སྡེ་རྒྱན་ལས། དགེ་བའི་ཚོགས་ཀྱི་ནང་ན་བརྩོན་
འགྲུས་མཆོག །འདི་ལྟར་དེ་ལ་བརྟེན་ནས་དེ་རྗེས་འཐོབ། །བརྩོན་འགྲུས་ཀྱིས་ནི་མོད་ལ་བདེ་གནས་མཆོག །དངོས་གྲུབ་འཇིག་རྟེན་འདས་དང་འཇིག་རྟེན་གཏོགས། །བརྩོན་འགྲུས་ཀྱིས་ནི་སྲིད་སྤྱོད་འདོད་པ་འཐོབ། །བརྩོན་འགྲུས་ཀྱིས་ནི་དག་པ་རབ་འགྱུར་ལྡན། །བརྩོན་འགྲུས་ཀྱིས་ནི་འཇིག་ཚོགས་འདས་ན་འགྲོ། །བརྩོན་འགྲུས་ཀྱིས་ནི་བྱང་ཆུབ་མཆོག་འཚང་རྒྱ། ཞེས་འཇིག་རྟེན་དང་འཇིག་རྟེན་ལས་འདས་པའི་ཕན་བདེ་ཐམས་ཅད་ཀྱི་འབྱུང་གནས་ནི་བརྩོན་འགྲུས་ཡིན་པས་དེ་ཉམས་སུ་ལེན་པར་བྱེད་པ་ལ་ཐོག་མར་གོ་ཆའི་བརྩོན་འགྲུས་ལ། བསྐལ་པ་ཆེན་པོ་སྟོང་ཕྲག་རེ་ལ་ཞག་གཅིག །དེ་སུམ་ཅུ་ལ་ཟླ་བ། དེ་བཅུ་གཉིས་ལ་ལོར་བྱས་པའི་བསྐལ་པ་ཆེན་པོ་གྲངས་མེད་པ་གསུམ་བྱེ་བ་ཕྲག་འབུམ་འགྱུར་གྱི་བར་དུ་སེམས་ཅན་གཅིག་གི་སྡུག་བསྔལ་བསལ་བའི་ཆེད་དུ་དམྱལ་བ་ཁོ་ནར་གནས་པ་ལ་བརྟེན་ནས་སངས་རྒྱས་སྒྲུབ་དགོས་པ་བྱུང་ཡང་བརྩོན་འགྲུས་མི་གཏོང་ན་དེ་ལས་ཐུང་བ་ལྟ་ཅི་སྨོས་སྙམ་པ་གོ་ཆའི་བརྩོན་འགྲུས་དང་། འཁོར་བ་ཐོག་མ་མེད་པ་ནས་ད་ལྟ་ཡན་ཆད་ལ་ཞག་གཅིག་ཏུ་བྱས་པའི་རིམ་པ་བཞིན་ཟླ་བ་དང་ལོར་བརྩིས་ནས་ལོ་འབུམ་སོང་བ་ན་བྱང་ཆུབ་ཀྱི་སེམས་གཅིག་སྐྱེ་ཞིང་སངས་རྒྱས་གཅིག་མཐོང་བ་ལྟ་བུ་གངྒཱའི་ཀླུང་གི་བྱེ་མ་སྙེད་ཀྱི་གྲངས་དང་མཉམ་པ་ན་སེམས་ཅན་གཅིག་གི་སེམས་དང་སྤྱོད་པ་ཤེས་ཤིང་། དེ་འདྲ་བའི་ཡུལ་སེམས་ཅན་རེ་རེ་བཞིན་ནས་བྱེད་དགོས་པ་བྱུང་ཡང་དེ་དག་ལ་ཡུན་རིང་བར་མི་སེམས་པར་སྤྲོ་བར་བྱེད་པ་ནི་གོང་ན་མེད་པའི་བརྩོན་འགྲུས་སུ་བཤད་པས་རང་རེ་རྣམས་ཀྱིས་སྔར་སྦྱིན་པའི་སྐབས་ཀྱང་ཐོག་
མར་ཟན་ཁམ་གཅིག་ལས་བརྩམས་ནས་བསམ་སྦྱོར་གཉིས་ཀས་སྦྱིན་པ་ལ་གོམས་པར་བྱས་པས་མཐར་ལུས་དང་མགོ་བོ་གཏོང་བ་ལ་ཡང་ཞུམ་པ་མེད་པར་བྱུང་ཚུལ་བཞིན་འདིར་ཡང་ཐོག་མར་བདག་གིས་སྔ་དྲོ་འདིའི་ཡུན་གྱི་བར་དགེ་བའི་བྱ་བ་འདི་ཙམ་ཞིག་བྱེད་སྙམ་དུ་བསམ་པ་དང་། བསམས་པ་བཞིན་དུ་སྦྱིན་སོགས་ཀྱི་དགེ་བ་གང་ཡིན་པ་དེ་ལ་བརྩོན་འགྲུས་ཆེན་པོས་འབད་ཅིང་། རིམ་གྱིས་ཞག་གྲངས་ཟླ་བ་ལོ་ཇི་སྲིད་འཚོའི་བར་ལྟ་བུའི་དམ་བཅའ་དང་བཅས་ཏེ་བརྩོན་འགྲུས་བརྩམས་ཀྱང་དེ་ལ་ཡུན་རིང་བ་དང་དཀའ་བའི་སྣང་བ་མི་འཆར་བ་དང་སྤྲོ་བ་ཆེར་འཕེལ་བས་སྔར་བཤད་པའི་གོ་ཆའི་བརྩོན་འགྲུས་དེ་དག་ཀྱང་སྒྲུབ་ནུས་པ་ཞིག་འོང་བ་ཡིན་ལ། ཐུན་དངོས་གཞིའི་སྐབས་དཀོན་ཅོག་རྗེས་སུ་དྲན་པས་དུག་གསུམ་གྱི་གཉེན་པོ་བསྟེན་པ་སོགས་ཇི་ལྟར་རིགས་པའི་དཔྱད་འཇོག་གི་དམིགས་པ་ཐུན་དེ་མ་རྫོགས་ཀྱི་བར་དུ་གཞན་གྱིས་བར་མ་བཅད་པར་བྱེད་སྙམ་པའི་འཕེན་པ་བཏང་ཞིང་། སྙོམ་ལས་དང་དམན་པའི་བདེ་བ་ལ་སྲེད་པ་བཀག་ནས་བརྩོན་འགྲུས་ཆེན་པོས་བྱས་པས་ཐུན་སྔ་མ་རྣམས་ལ་དཀའ་སེ་འོང་ཡང་། རིམ་གྱིས་བསྒོམ་པ་ན་དཀའ་བ་མེད་ཅིང་སྤྲོ་བ་ཆེར་འཕེལ་བ་ཡིན་གསུང་། དེ་ཡང་ད་དུང་ལོངས་ཡོད་སྙམ་པའི་ཕྱི་ཤོལ་གྱི་ལེ་ལོ་ཞིག་བློ་ལ་ཐོལ་གྱི་ཤར་བྱུང་བ་ན། སྤྱོད་འཇུག་ལས། སྙོམ་ལས་བདེ་བའི་རོ་མྱང་དང་། །གཉིད་ལ་བརྟེན་པའི་སྲེད་པ་ཡི། །འཁོར་བའི་སྡུག་བསྔལ་མི་སྐྱོ་ལས། །ལེ་ལོ་ཉེ་བར་སྐྱེ་བར་འགྱུར། །ཞེས་དགེ་བ་ལ་ཞག་འཕུལ་ཉིན་འཕུལ་གྱི་ཕྱི་བཤོལ་བྱེད་པའི་ལེ་ལོའི་རྒྱུ་གཉིད་རྨུགས་སོགས་དམན་པའི་རོ་ལ་ཆགས་པ་ལས་འབྱུང་བར་
བཤད་པས། ལུས་ཀྱི་སྤྱོད་ལམ་རླུང་འོང་ས་དང་གོས་སྲབ་ཏུ་གཏོང་བ་ཁམས་གསེང་བ་ཡང་བྱེད་ཅིང་དམིགས་པ་ནི་རྒན་གཞོན་མེད་པར་ཤི་བ་མིག་གིས་མཐོང་བ་བཞིན་བདག་ཀྱང་མྱུར་དུ་འཆི། ཤི་བའི་འོག་ཏུ་རྟེན་བཟང་འདི་འདྲ་རྙེད་པ་དཀའ་སྙམ་དུ་བསམ་པས་སྐོམ་འཐུང་བའི་ལོངས་ཡང་མེད་པ་ལྟ་བུའི་ཤེས་པ་ཙབ་ལིང་ངེ་བ་ཞིག་མ་སྐྱེས་བར་བསྒོམ། ད་དུང་གཉེན་པོ་མཐར་མ་ཕྱིན་པས་བྲེ་མོའི་གཏམ་སོགས་དམན་པའི་བདེ་བ་ལ་སྲེད་པའི་སྣང་བ་བྱུང་བ་ན། སྤྱོད་འཇུག་ལས། དགའ་བའི་རྒྱུ་ནི་མཐའ་ཡས་པའི། །དམ་ཆོས་དགའ་བའི་མཆོག་སྤངས་ནས། །སྡུག་བསྔལ་རྒྱུ་ཡི་གཡེང་བ་དང་། །རྒོད་སོགས་ལ་ཁྱོད་ཅི་ཕྱིར་དགའ། །ཞེས་གནས་སྐབས་ཀྱི་བདེ་བ་ཕྲ་མོ་འདི་དག་ལ་རྣམ་པར་གཡེངས་པས་དམ་པའི་ཆོས་ཀྱི་སྒོ་འགགས་ཏེ་བདག་ངན་སོང་དུ་སྐྱེ་བ་འདུག་སྙམ་དུ་བསམ། དེ་བཞིན་བསྒོམས་པས་བདག་གིས་ཐོབ་བྱ་སངས་རྒྱས་བཅོམ་ལྡན་འདས་འདི་ནི་སྐྱོན་ཀུན་ཟད་ཡོན་ཏན་ཀུན་ལྡན་ཡིན་པས་འཐོབ་པར་དཀའ་སྙམ་པའི་བློ་ཞུམ་པ་ཞིག་འབྱུང་བས་དེའི་ཚེ་འདི་སྙམ་དུ། སྤྱོད་འཇུག་ལས། བདག་གིས་བྱང་ཆུབ་ག་ལ་ཞེས། །སྒྱིད་ལུག་པར་ནི་མི་བྱ་སྟེ། །འདི་ལྟར་དེ་བཞིན་གཤེགས་པ་ནི། །བདེན་པ་གསུང་བས་བདེན་འདི་གསུངས། སྦྲང་བུ་ཤ་སྦྲང་བུང་བ་དང་། །དེ་བཞིན་སྲིན་བུར་གང་གྱུར་བ། །དེས་ཀྱང་བརྩོན་པའི་སྟོབས་བསྐྱེད་ན། །བྱང་ཆུབ་འཐོབ་དཀའ་བླ་མེད་འཐོབ། །བདག་ལྟ་རིགས་ཀྱི་མིར་སྐྱེས་པ། །ཕན་དང་གནོད་པ་ངོ་ཤེས་པས། །བྱང་ཆུབ་སྤྱོད་པ་མ་བཏང་ན། །བདག་གིས་བྱང་ཆུབ་ཅིས་
མི་འཐོབ། །ཅེས་ཡོན་ཏན་ཁྱད་པར་དང་ལྡན་པའི་བཅོམ་ལྡན་འདས་དེས་སེམས་ཅན་ཐམས་ཅད་སངས་རྒྱས་འཐོབ་པར་གསུངས་ན་བདག་ཅིའི་ཕྱིར་སངས་རྒྱས་ཐོབ་པར་མི་འགྱུར་སྙམ་གཟེངས་བསྟོད་པའི་ཚུལ་གྱིས་བསྒོམ། སངས་རྒྱས་ཐོབ་པར་འགྱུར་སྙམ་པའི་གཟེངས་བསྟོད་ཀྱང་རྐང་ལག་ལ་སོགས་པའི་ལུས་གཏོང་བ་ཞིག་མི་ནུས་སོ་སྙམ་ན། སྤྱོད་འཇུག་ལས། གསོ་དཔྱད་ཕལ་བ་འདི་འདྲ་བ། །སྨན་པ་མཆོག་གིས་མ་མཛད་དེ། །ཆོ་ག་ཤིན་ཏུ་འཇམ་པོ་ཡིས། །ནད་ཆེན་དཔག་མེད་གསོ་བར་མཛད། ཚོད་མ་ལ་སོགས་སྦྱིན་པ་ལའང་། འདྲེན་པས་ཐོག་མར་སྦྱོར་བར་མཛད། །དེ་ལ་གོམས་ནས་ཕྱི་ནས་ནི། །རིམ་གྱིས་རང་གི་ཤ་ཡང་གཏོང་། །གང་ཚེ་རང་གི་ལུས་ལ་ནི། །ཚོད་སོགས་ལྟ་བུའི་བློ་སྐྱེས་པ། །དེ་ཚེ་ཤ་ལ་སོགས་གཏོང་བ། །དེ་ལ་དཀའ་བ་ཅི་ཞིག་ཡོད། །ཅེས་མགོ་དང་མིག་ལ་སོགས་པ་གཏོང་བ་ལ་ཚོད་མའི་ཚ་བ་འདྲེན་པ་ཙམ་གྱི་བློ་སྐྱེ་བའི་ཚེ་གཏོང་བ་ཡིན་པས་དཀའ་བ་མི་འདུག་སྙམ་པའི་སྤྲོ་བ་ཆེན་པོ་བསམ། དེ་ལྟར་རྒྱལ་སྲས་ཀྱི་སྤྱོད་པ་ལ་སློབ་པའི་ཚེ་འཁོར་བར་སྐྱེ་བ་ལེན་པ་མི་བཟོད་དོ་སྙམ་ན། སྤྱོད་འཇུག་ལས། །སྡིག་པ་སྤངས་ཕྱིར་སྡུག་བསྔལ་མེད། །མཁས་པའི་ཕྱིར་ན་མི་དགའ་མེད། །འདི་ལྟར་ལོག་པར་རྟོག་པ་དང་། །སྡིག་པས་སེམས་དང་ལུས་ལ་གནོད། །བསོད་ནམས་ཀྱིས་ནི་ལུས་བདེ་ལ། །མཁས་པ་ཡིས་ནི་སེམས་བདེ་ན། །གཞན་དོན་འཁོར་བར་གནས་ཀྱང་ནི། །སྙིང་རྗེ་ཅན་དག་ཅི་སྟེ་སྐྱོ། །ཞེས་བྱང་སེམས་ཀྱིས་སྡིག་པ་སྤངས་པས་རྒྱུ་མེད་པའི་ཕྱིར་ན་འབྲས་བུ་སྡུག་བསྔལ་མི་འབྱུང་ངོ་སྙམ་དུ་བསྒོམ། དགེ་བ་ཆོས་
སྡུད་ནི་དཀོན་ཅོག་མཆོད་པ་སོགས་ལ་བརྩོན་པ་དང་། སེམས་ཅན་དོན་བྱེད་ནི་གཞན་གྱི་ནོར་རྐུན་པོས་མི་འཁྱེར་བའི་ཐབས་སྟོན་པ་ལ་བརྩོན་པ་སོགས་ཚུལ་ཁྲིམས་ཀྱི་སྐབས་ལྟར་ལ་མི་འདྲ་བའི་ཁྱད་པར་སྐབས་ཐོབ་ཕྱེ་སྟེ་དམིགས་པ་བསྐྱང་ངོ་། བཤད་མ་ཐག་པའི་ཡོན་ཏན་དེ་དག་ཀྱང་སྣ་རེ་ཙམ་སྐྱེས་པ་ལ་ཆོག་མི་ཤེས་པར་རྒྱལ་སྲས་ཀྱི་སྤྱོད་པ་ལ་བསླབ་པ་དང་མ་བསླབས་པའི་ཕན་ཡོན་དང་ཉེས་དམིགས་དྲན་པའི་སྒོ་ནས་མོས་པའི་སྟོབས་བརྩོན་འགྲུས་རྩོམ་པ་ལ་ཕྱིར་མི་ལྡོག་པ་བརྟན་པའི་སྟོབས། སྤྲོ་བ་ཆེན་པོ་དང་བཅས་ཏེ་འཕྲོ་མི་གཅོད་པ་དགའ་བའི་སྟོབས། དུབ་ན་ངལ་གསོ་བའི་གནད་ཤེས་པ་དོར་བའི་སྟོབས་རྣམས་ཀྱི་སྒོ་ནས། སྤྱོད་འཇུག་ལས། འཐབ་རྙིང་དགྲ་དང་ལྷན་ཅིག་ཏུ། །གཡུལ་ངོར་རལ་ཁ་ལྷགས་པ་བཞིན། །ཉོན་མོངས་མཚོན་ལས་གཟུར་བྱ་ཞིང་། །ཉོན་མོངས་དགྲ་རྣམས་འཇེབས་པར་བཏབ། །ཅེས་དགྲ་འཐབ་ལ་མཁས་པས་ཕར་དགྲ་ལ་མཚོན་བསྣུན་པ་དང་ཚུར་བརྡེག་པ་ལ་ཟོན་བྱེད་པ་ལྟར། འདིར་ཡང་ཉོན་མོངས་པ་མངོན་གྱུར་འཇོམས་པ་དང་། བག་ལ་ཉལ་གྱི་ཉོན་མོངས་པས་ཚུར་སེམས་ལ་རྨ་ཕྱུང་བ་ལ་ཟོན་བྱེད་པ་གཉིས་ཀའི་ཚུལ་གྱིས་བརྩོན་འགྲུས་བསྐྱེད་ཅིང་ཉམས་སུ་ལེན་འཚལ་ལོ། །སྨྲས་པ། གཏི་མུག་གཉིད་དང་རྨུགས་སོགས་བདེ་བའི་རོ། །དོན་མེད་རྣམ་པར་གཡེང་བའི་རྒོད་བག་ལ། །ཇི་ཙམ་སྤྱད་ཀྱང་ངོམས་པ་མེད་པ་འདི། །སྐོམ་པས་བ་ཚྭའི་ཆུ་ལས་འཐུང་བ་བཞིན། །ཞེ་སྡང་དབང་གིས་སྟོབས་ལྡན་དགྲ་བོ་ལ། །མི་ནུས་བཞིན་དུ་གཟེངས་བསྟོད་མཐོ་བརྩམས་ན། །ངེས་པར་སྒྲུབ་ནུས་སངས་རྒྱས་གོ་འཕང་ལ། །ཞུམ་པར་
བྱེད་པའི་བློ་ངན་འདི་ཀོ་ནོར། །ལོང་མེད་ཚེ་འདིའི་སྣང་ཚུལ་ཤེས་བཞིན་དུ། །གཏན་གྱི་བདེ་བ་སྒྲུབ་པའི་དམ་ཆོས་ལ། །ཞག་འཕུལ་ཉིན་འཕུལ་མེད་པར་བརྩོན་པའི་ལྕག །བྲབས་ན་ཐར་པའི་གླིང་དེར་བགྲོད་པར་ངེས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །ལྔ་པ་ལ་བསམ་གཏན་གྱི་ཕར་ཕྱིན་ནི་སྤྱོད་འཇུག་ལས། །དེ་ལྟར་བརྩོན་འགྲུས་བསྐྱེད་ནས་ནི། །ཡིད་ནི་ཏིང་ངེ་འཛིན་ལ་བཞག །ཅེས་སེམས་དམིགས་པ་ལས་གཞན་དུ་མི་གཡེང་བར་གནས་པས་སེམས་རྩེ་གཅིག་པ་ལ་སྒོམ་པ་མཐར་ཕྱིན་པ་ན་བསམ་གཏན་གྱི་ཕ་རོལ་ཏུ་ཕྱིན་པར་འགྱུར་ལ། དེ་ཡང་ལམ་རིམ་ཆེ་ཆུང་སོགས་གོང་མ་རྣམས་ཀྱི་གསུང་རབ་ཏུ་བསམ་གཏན་དང་ཤེས་རབ་ཀྱི་སྐོར་ལ་མདོར་བསྟན་རྒྱས་བཤད་ཀྱི་ཚུལ་དུ་ཞི་ལྷག་གཉིས་ལོགས་སུ་མཛད་ནའང་། དངོས་དོན་གཅིག་གི་ཉམས་ལེན་སྙིང་པོར་བསྒྲིལ་བའི་ཚེ་ཞི་གནས་ཀྱི་དམིགས་པ་ས་བཅད་ལྔ་པ་དང་། ལྷག་མཐོང་གི་དམིགས་པ་ས་བཅད་དྲུག་པར་མཛད་ནས་མཇུག་ཏུ་བསྡུ་བའི་དངོས་པོ་བཞིས་དོན་བསྡུ་བ་ལགས་པས་དེ་ལྟར་ན་བསམ་གཏན་ནམ་ཏིང་ངེ་འཛིན་གྱི་ཉམས་ལེན་ཞི་གནས་བསྒོམ་པ་ལ། དགོངས་འགྲེལ་ལས། སྐྱེ་བ་པོ་ཡིས་ལྷག་མཐོང་དང་། །ཞི་གནས་བསྒོམ་པར་བྱས་ན་ནི། །གནས་ངན་ལེན་གྱི་འཆིང་བ་དང་། མཚན་མའི་འཆིང་ལས་རྣམ་གྲོལ་འགྱུར། །ཞེས་གནས་ངན་ལེན་གྱི་འཆིང་བ་མྱོང་བ་ས་བོན་དང་བཅས་པ་རྩ་བ་ནས་དྲུངས་ཕྱུང་བ་ཤེས་རབ་དང་། །མཚན་མའི་འཆིང་བ་མྱོང་བ་མངོན་གྱུར་འགོ་གནོན་པ་བསམ་གཏན་ཡིན་པས་དེ་གཉིས་ལ་ཞི་ལྷག་གི་མིང་དུ་བཏགས་ཏེ་ཐེག་པ་གསུམ་གྱི་ཏིང་ངེ་འཛིན་མིང་
གི་འདོགས་ཕྱོགས་རྣམ་གྲངས་མང་བ་མཐའ་དག་དོན་ཞི་ལྷག་གཉིས་སུ་མ་འདུས་པ་མེད་ཅིང་། ཞི་གནས་ནི་དམིགས་པ་གཅིག་ལ་དྲན་ཤེས་རྒྱུན་ཆགས་སུ་གཏད་པས་སེམས་དམིགས་པ་ལ་ངང་གིས་གནས་ཏེ་ལུས་སེམས་ཤིན་སྦྱངས་ཀྱི་དགའ་བདེ་སྐྱེས་པ་ན་ཏིང་ངེ་འཛིན་ཁྱད་པར་ཅན་དུ་འགྱུར་བའི་ཕྱིར་ན་ཤེས་རབ་ཀྱིས་མཚན་འཛིན་གྱི་འཆིང་བ་གཅོད་པར་བྱེད་པ་ལ་ཡང་ཟླ་བ་སྒྲོན་མེའི་མདོ་ལས། ཞི་གནས་སྟོབས་ཀྱིས་གཡོ་བ་མེད་པར་འགྱུར། །ལྷག་མཐོང་གིས་ནི་རི་དང་འདྲ་བར་འགྱུར། །ཞེས་དཔེར་ན་ཆུའི་བྱ་བ་བྱེད་པ་ལ་ཆུ་དེ་སྡོད་པའི་སྣོད་གཅིག་དགོས་པ་བཞིན་དུ་དམིགས་པ་ལ་འཇུག་པར་འཇུག་མཁན་གྱི་སེམས་མི་གཡོ་བ་དགོས་པས་གནས་ལུགས་ཀྱི་དོན་རི་མོ་སྣ་ཚོགས་ཀྱི་བཀོད་པ་མ་འདྲེས་པར་སོ་སོར་མཐོང་བར་བྱེད་པ་ལ་མ་རིག་པའི་མུན་པས་བསྒྲིབས་ན་ཤེས་རབ་ཀྱི་མར་མེ་སྤར་ཏེ་བལྟ་དགོས་པར་རྣམ་གཡེང་གི་རླུང་གིས་བསྐྱེད་དེ་མི་གསལ་བས་ན་དེ་ཉིད་སྒོ་དགག་པའི་ཏིང་འཛིན་མེད་དུ་མི་རུང་བ་སྟེ། ཞི་གནས་ལ་བརྟེན་ནས་གཞན་དུ་མི་གཡེལ་བ་མ་བྱུང་ན་གནས་ལུགས་ཀྱི་དོན་དུ་མ་ཟད་ལས་འབྲས་བྱམས་སྙིང་རྗེ་བཟླས་བརྗོད་སོགས་དགེ་བ་གཞན་རྣམས་ཀྱང་འབྲས་བུ་ཆུང་བའི་ཕྱིར། སྤྱོད་འཇུག་ལས། སེམས་ནི་རྣམ་པར་གཡེངས་པའི་མི། །ཉོན་མོངས་མཆེ་བའི་ཕྲག་ན་གནས། །ཞེས་དང་། བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྤྱད་བྱས་ཀྱང་། །སེམས་གཞན་གཡེང་བས་བྱས་པ་ནི། །དེ་ཉིད་རིག་པས་དོན་མེད་གསུངས། །ཞེས་པ་ལྟར་རོ། །དེ་ཡང་ཞི་བ་ལྷས། ཞི་གནས་རབ་ཏུ་ལྡན་པའི་ལྷག་མཐོང་གིས། །
ཉོན་མོངས་རྣམ་པར་འཇོམས་པར་ཤེས་བྱས་ཏེ། །ཐོག་མར་ཞི་གནས་བཙལ་བྱ། །ཞེས་བདག་འཛིན་གྱི་རྩ་བ་ཆོད་པར་བྱེད་པ་ལ་བདག་མེད་རྟོགས་པའི་ཤེས་རབ་སྒོམ་དགོས། དེའི་སྔོན་དུ་ཞི་གནས་སྒོམ་པ་ལ། མདོ་སྡེ་རྒྱན་ལས། བློ་ལྡན་གང་དུ་བསྒྲུབ་པའི་ཡུལ ། ལེགས་པར་རྙེད་དང་གནས་བཟང་དང་། །ས་བཟང་པ་དང་གྲོགས་བཟང་དང་། །རྣལ་འབྱོར་བདེ་བའི་ཡོ་བྱད་ལྡན། །ཞེས་ཟས་གོས་སོགས་ཆོས་སྒྲུབ་པའི་མཐུན་རྐྱེན་རྙེད་སླ་ཞིང་། །གཅན་གཟན་དང་ཆོམ་རྐུན་དགྲ་གདོན་གྱི་འཚེ་བ་མེད་པ། ནད་མི་བསྐྱེད་པའི་ས་བཟང་བ། ཆོས་ལྡན་གྱི་གྲོགས་དང་ལྡན་པ། དོན་མེད་ཀྱི་གཡེང་བའི་འདུ་འཛི་མཐའ་དག་གིས་དབེན་པ་ནི་ཆོས་འདི་ཉམས་སུ་ལེན་པའི་གནས་ཀྱི་ཁྱད་པར་ཡིན་ལ། གནས་དེ་དང་ལྡན་ཡང་གང་ཟག་རང་ངོས་ནས་རྣམ་གཡེང་གི་རྒྱུ་བསྒྲུབས་ན་ཐབས་ཤེས་ཡ་བྲལ་དུ་འགྲོ་བས་ཟས་གོས་བཟང་པོ་དང་མང་བ་ལ་དགའ་བ་སྤངས་ཏེ་འདོད་པ་ཆུང་བ། ཟས་བསོད་སྙོམས་དང་གོས་ཕྱག་དར་ཁྲོད་པས་ཆོག་ཤེས་པ། ཚོང་ཁེ་སྤོགས་སྨན་དཔྱད་དང་སྐར་རྩིས་སོགས་བྱ་བ་མང་པོ་ལ་མི་འཇུག་ཅིང་ཚུལ་ཁྲིམས་དག་པ། འདོད་པའི་ཉེས་དམིགས་དང་མི་རྟག་པའི་ངང་ཚུལ་ལེགས་པར་བསམ་པའི་ཆོས་དྲུག་ལ་བརྟེན་ནས་ཉམས་སུ་བླང་བར་བྱ་བ་ཡིན་ནོ། །དེའི་ཚུལ་ལ། དམིགས་པ་གཏད་པར་བྱ་བའི་ཡུལ་དེ་བཞིན་གཤེགས་པས་རྣལ་འབྱོར་པའི་དམིགས་པ་བཞི་གསུངས་པའི་འདོད་ཆགས་ཀྱི་གཉེན་པོར་མི་སྡུག་པ་དང་། ཞེ་སྡང་གི་གཉེན་པོར་བྱམས་པ་དང་། གཏི་མུག་གི་གཉེན་པོར་རྟེན་འབྲེལ་དང་། འབྱུང་བ་ལྔ་དང་རྣམ་ཤེས་ཀྱི་ཆ་རྣམས་སོ་སོར་དམིགས་པ་དང་། དབུགས་ཕྱི་ནང་དུ་འགྲོ་བ་བགྲང་
བ་ལྟ་བུ་རྣམས་དཔྱད་པ་རྣམ་སྦྱོང་གི་དམིགས་པ། གཟུགས་ལ་སོགས་པའི་ཕུང་པོ་ལྔ་དང་མིག་ལ་སོགས་པའི་ཁམས་བཅོ་བརྒྱད་དང་། སྐྱེ་མཆེེད་བཅུ་གཉིས་དང་། རྟེན་འབྲེལ་ཡན་ལག་བཅུ་གཉིས་དང་། དགེ་མི་དགེའི་ལས་འབྲས་ཀྱི་རྒྱུ་རྐྱེན་ལ་དམིགས་པ་ལྟ་བུ་རྣམས་མཁས་པའི་དམིགས་པ། འདོད་པའི་ས་ནས་ཅི་ཡང་མེད་པའི་སྐྱེ་མཆེད་ཀྱི་བར་གྱི་གོང་མ་ལ་ཞི་བ་དང་འོག་མ་ལ་རགས་པའི་ཞི་རགས་ཀྱི་རྣམ་པ་ཅན་དུ་བལྟ་བ་ལྟ་བུ་ཉོན་མོངས་རྣམ་སྦྱོང་གི་དམིགས་པ། ཁྱབ་པའི་དམིགས་པ་དེ་ཐམས་ཅད་ཀྱི་ཁོངས་སུ་འདུ་བ་ཡིན་ལ། དེ་ཡང་། ནམ་གྲུས་ཞུས་པ་ཉན་སར་དྲངས་པ་ལས། ནམ་གྲུ་གལ་ཏེ་དགེ་སློང་རྣལ་འབྱོར་པ་རྣལ་འབྱོར་སྤྱོད་པ་དེ་འདོད་ཆགས་སྤྱོད་པ་ཁོ་ན་ཞིག་ཡིན་ན་ནི་དམིགས་པ་མི་སྡུག་པ་ལ་སེམས་ཉེ་བར་གཏོད་པར་བྱེད་དོ། །ཞེ་སྡང་སྤྱོད་པ་ཞིག་ཡིན་ན་ནི་བྱམས་པ་ལའོ། །གཏི་མུག་སྤྱོད་པ་ཞིག་ཡིན་ན་རྐྱེན་འདི་ཉིད་རྟེན་ཅིང་འབྲེལ་བར་འབྱུང་བ་ལའོ། །ང་རྒྱལ་སྤྱོད་པ་ཞིག་ཡིན་ན་ནི་ཁམས་ཀྱི་རབ་ཏུ་དབྱེ་བ་ལ་སེམས་ཉེ་བར་གཏོད་པར་བྱེད་དེ། ཞེས་སྐྱེ་བ་སྔོན་མ་ནས་ཆགས་སོགས་ཉོན་མོངས་པ་ལ་ཤས་ཆེར་གོམས་པས་ཡུལ་ཆུང་ངུ་ལ་ཡང་དུག་གསུམ་ཆེ་ཞིང་ཡུན་རིང་དུ་སྐྱེ་བ་རྣམས་ཀྱི་གཉེན་པོར་འདོད་ཆགས་སོགས་ཉོན་མོངས་པ་གང་ཤས་ཆེ་བ་དེ་ཉིད་འཇོམས་པར་བྱེད་དགོས་པ་ཡིན་ཞིང་། ཚེ་སྔོན་མ་ནས་གོམས་འདྲིས་ཆུང་བ་དང་། ཚེ་འདིར་ཉོན་མོངས་ཆ་མཉམ་དུ་སྤྱོད་པ་རྣམས་ལ་རང་ཉིད་གང་འདོད་པའི་དམིགས་པ་ཞིག་ལས་དམིགས་ཀྱིས་བཀར་མི་དགོས་པ། དཔེར་ན་རླུང་ནད་དང་མ་འདྲེས་པའི་ཚད་པས་ན་བར་ཚ་བའི་
བཅོས་ཁོ་ནས་ཆོག་ལ་ཚད་རླུང་འདྲེས་མ་ཡིན་ན་ཚ་བའི་སྨན་སྟེང་དུ་རླུང་གི་སྨན་གྱི་ཁ་ཚར་བསྣན་དགོས་པ་བཞིན་ནོ། །ལ་ལ་དག་མདོ་ལས་ཏིང་ངེ་འཛིན་གྱི་དམིགས་པ་བཞིར་གསུངས་པས་ན་དམིགས་པ་དེ་དག་ཐམས་ཅད་སྒོམ་དགོས་སོ་སྙམ་པའི་ལོག་རྟོག་སྐྱེ་སྲིད་མོད། དེ་ལྟར་བྱས་ན་སེམས་གནས་པའི་གྲོགས་སུ་མི་འགྱུར་བར་མ་ཟད་གཡེང་བའི་རྒྱུ་བྱེད་པས་དཔལ་ལྡན་དཔའ་པོས། དམིགས་པ་གཅིག་ལ་བརྟན་ཚུལ་དུ། །ཡིད་ཀྱི་བསམ་པ་བརྟན་པར་བྱ། །དམིགས་པ་མང་པོ་བརྒྱུད་པ་ལས། །ཡིད་ནི་ཉོན་མོངས་འཁྲུག་པར་འགྱུར། །ཞེས་གསུངས་པ་ལྟར་ཡིན་པས་གནད་དུ་འགྲོ་བའི་དམིགས་པ་སློབ་དཔོན་བྱང་ཆུབ་བཟང་བོས། ལུས་ཁ་ཊྭཱཾ་གར་སྒོམ་པ་དང་ལུས་ལ་བརྟན་པའི་ཐིག་ལེ་ལ་དམིགས་པ་ལྟ་བུ་ཁ་ནང་བལྟས་ཀྱི་ཞི་གནས་དང་། སྐུ་དང་གསུང་ལ་དམིགས་པ་ཁ་ཕྱིར་བལྟས་ཀྱི་ཞི་གནས་ཞེས་གསུངས་པའི་ཕྱག་ལེན་ཕྱི་མ་ཉིད་གཙོ་ཆེ་བར་གནང་མོད། སྐུ་གཟུགས་མདུན་དུ་བཞག་པ་ལ་མིག་གིས་བལྟས་པའི་ཧར་སྒོམ་བྱེད་པར་མི་རིགས་པར་སློབ་དཔོན་ཡེ་ཤེས་སྡེས་བཀག་པའི་ཤུགས་ལ། རྟེན་ཅན་རྡེའུ་ཤིང་བུ་ཞེས་སོགས་སྒོམ་ཆེན་པ་མཐའ་དག་གི་ངག་ལས་རླུང་ལྟར་གྲགས་པ་ཀུན་ཤུགས་ཀྱིས་ཁེགས་འགྲོ་བས། ལུགས་འདི་ལ་ཏིང་ངེ་འཛིན་ཡིད་ཤེས་ལ་སྒྲུབ་པ་ཉིད་ཐོག་མ་ནས་བྱེད་དགོས་མོད། དེ་ཡང་ཉེས་པ་ལྔ་སྤོང་བའི་འདུ་བྱེད་བརྒྱད་ཀྱི་སྒོ་ནས་ཞི་གནས་སྒྲུབ་པར་གོང་མ་མཐའ་དག་བཞེད་ཅིང་། ལམ་རིམ་ཆེ་ཆུང་རྣམས་སུ་རྒྱས་པར་གསུངས་པས། དབུས་མཐའ་ལས། དེར་གནས་ལས་སུ་རུང་བ་ཉིད། །དོན་རྣམས་ཐམས་ཅད་འབྱོར་བར་འགྱུར། །ཉེས་པ་ལྔ་སྤོང་
འདུ་བྱེད་བརྒྱད། །བསྟེན་པའི་རྒྱུ་ལས་བྱུང་བའོ། ལེ་ལོ་དང་ནི་གདམས་ངག་རྣམས། །བརྗེད་དང་བྱིང་དང་རྒོད་པ་དང་། །འདུ་མི་བྱེད་དང་འདུ་བྱེད་དེ། །འདི་དག་ཉེས་པ་ལྔར་འདོད་དོ། །ཞེས་ཞི་གནས་སྒོམ་པ་ལ་མི་སྤྲོ་ཞིང་དེའི་མི་མཐུན་ཕྱོགས་ལ་དགའ་བ་ནི་ལེ་ལོ། གང་དམིགས་པར་བྱ་བའི་ཡུལ་མི་གསལ་བར་དམིགས་པ་སྟོར་པ་ནི་བརྗོད་པ། དམིགས་པ་མ་བརྗེད་ཀྱང་བྱིང་རྒོད་གང་རུང་གི་དབང་དུ་ཤོར་བ། དེའི་དབང་དུ་ཤོར་བ་ངོས་ཟིན་ཀྱང་དེ་སྤོང་བའི་གཉེན་པོ་འདུ་མི་བྱེད་པ། བྱིང་རྒོད་དང་བྲལ་བའི་ཚེ་དམིགས་པ་གནད་དུ་མི་བསྣུན་པར་བྱིང་རྒོད་ཀྱི་གཉེན་པོ་
ཧ་ཅང་འདུ་བྱེད་པ 
་སྟེ་ཉེས་པ་ལྔ་པོ་འདི་བཅར་གྱིས་ངོས་ཟིན་པ་བྱས་ནས་དེའི་གཉེན་པོ་ནི་དབུས་མཐའ་ལས། གནས་དང་དེ་ལ་གནས་པ་དང་། །རྒྱུ་དང་འབྲས་བུ་ཉིད་དུའོ། །དམིགས་པ་བརྗེད་པར་མ་གྱུར་དང་། །བྱིང་དང་རྒོད་པ་རྟོགས་པ་དང་། །དེ་སྤོང་མངོན་པར་འདུ་བྱེད་དང་། །ཞི་ཚེ་རྣལ་དུ་འཇུག་པའོ། །ཞེས་པ་ཏིང་ངེ་འཛིན་ལ་བརྩོན་འགྲུས་རྒྱུན་ལྡན་དུ་རྩོམ་ནུས་པ་ནི་གནས་པ་པོ་ཡིན་ལ་དེ་གང་ལ་གནས་ན། ཏིང་ངེ་འཛིན་ལ་དོན་གཉེར་གྱི་འདུན་པ་ལས་བྱུང་ཞིང་གནས། འདུན་པ་དེ་ཏིང་ངེ་འཛིན་གྱི་ཡོན་ཏན་མཐོང་བས་ཡིད་ཕྲོགས་པའི་དད་པ་ལས་བྱུང་། བརྩོན་འགྲུས་བརྩམས་པའི་འབྲས་བུ་ཤིན་སྦྱངས་བཞིས་ནི་ལེ་ལོ་འཇོམས་པར་བྱེད། བརྗེད་པའི་གཉེན་པོ་ནི་ཀུན་ལས་བཏུས་ལས། དྲན་པ་གང་ཞེ་ན། འདྲིས་པའི་དངོས་པོ་ལ་སེམས་ཀྱི་བརྗེད་པ་མེད་པ་སྟེ་རྣམ་པར་མི་གཡེང་བའི་ལས་ཅན་ནོ། །ཞེས་སྔར་ནས་ཡང་ཡང་འདྲིས་པར་བྱས་
པའི་དམིགས་པའི་ཡུལ་གང་ཡིན་པ་དེ་མ་དོར་བར་ཐུ་རེ་དྲན་པ་ནི་མ་བརྗེད་པ་ཡིན་ལ། དམིགས་པ་དེ་ལས་སེམས་གཞན་དུ་མི་འཕྲོ་བའི་ཁྱད་ཆོས་གསུམ་ལྡན་གྱི་དྲན་པས་ནི་བརྗེད་པ་འཇོམས་པར་བྱེད་དོ། །བྱིང་རྒོད་ཀྱི་གཉེན་པོ་ནི་དབུ་མ་སྙིང་པོ་ལས། ཡིད་ཀྱི་གླང་པོ་ལོག་འགྲོ་བ། །དམིགས་པའི་ཀ་བ་བརྟན་པོ་ལ། །དྲན་པའི་ཐག་པས་ངེས་བཅིངས་ནས། །ཤེས་རབ་ལྕགས་ཀྱུས་རིམ་དབང་བྱ། ཞེས་དྲན་པས་སེམས་དམིགས་པ་ལ་གནས་པ་དེ་བྱིང་རྒོད་ཀྱི་དབང་དུ་སོང་ན་གླང་པོ་ཆེ་མ་དུལ་བ་ལྕགས་ཀྱུས་འདུལ་བ་བཞིན་ཤེས་བཞིན་གྱིས་བྱིང་རྒོད་ཀྱི་བྱ་ར་བྱས་ནས་དེའི་དབང་དུ་མི་གཏོང་པ་སྤྱོད་འཇུག་ལས། ལུས་དང་སེམས་ཀྱིས་གནས་སྐབས་ལ། །ཡང་དང་ཡང་དུ་བརྟག་བྱ་བ། །དེ་དེ་ཁོ་ན་མདོར་ན་ནི། །ཤེས་བཞིན་བསྲུང་བའི་མཚན་ཉིད་དོ། །ཞེས་སེམས་བཟུང་སྟེ་དམིགས་པའི་རྒྱུན་བསྐྱངས་པས་བྱིང་བ་དང་རྒོད་པ་སེལ། དེ་ལྟ་བུའི་བྱིང་རྒོད་སེལ་བ་ལ། ད་ལྟའི་བྱིང་རྒོད་ཅེས་སྒོམ་ཆེན་ཀུན་གྱི་ངག་ལས་རླུང་ལྟར་གྲགས་ནའང་། ཕལ་ཆེར་ནི་མིང་ཙམ་ལས་ངོས་འཛིན་རྒྱུ་མེད་ཅིང་། ངོས་ཟིན་པའི་ལུགས་སུ་བྱས་པ་རྣམས་བྱིང་རྨུགས་ཀྱི་དབྱེ་བ་མ་ཕྱེད་པར་གཅིག་ཏུ་བྱས་ཏེ་བྱིང་བ་མཐའ་དག་ཏིང་ངེ་འཛིན་རྣལ་མར་ངོས་བཟུང་ནས་རི་སུལ་དུ་མི་ཚེ་སྟོང་པར་འཛད་པ་ཆེས་མང་ངོ་། །ཇི་ལྟར་ན། ཀུན་ལས་བཏུས་ལས། རྒོད་པ་གང་ཞེ་ན། སྡུག་པའི་མཚན་མའི་རྗེས་སུ་འཇུག་པའི་འདོད་ཆགས་ཀྱི་ཆར་གཏོགས་པའི་སེམས་རྣམ་པར་མ་ཞི་བ་སྟེ་ཞི་གནས་ཀྱི་བར་དུ་གཅོད་པའི་ལས་ཅན་ནོ། །ཞེས་ཡུལ་ཡིད་དུ་འོང་བ་ལ་འདོད་ཆགས་ཀྱིས་སེམས་མ་ཞི་བ་ཞིག་ལ་བཤད་པས་ཞེ་སྡང་བའི་
དབང་གིས་དགྲ་ལ་རྣམ་རྟོག་འཕྲོ་བ་རྣམས་ནི་རྒོད་པ་མ་ཡིན་ཡང་། ཞི་གནས་ལ་བར་དུ་གཅོད་པའི་སེམས་གཞན་དུ་འཕྲོ་བའི་རྣམ་རྟོག་མཐའ་དག་ཞི་གནས་ཀྱི་གེགས་སུ་བྱས་ཏེ་དགག་དགོས་སོ། །དེ་བཞིན་དུ་སྒོམ་རིམ་བར་པ་ལས། གང་གི་ཚེ་དམུས་ལོང་ལྟ་བུའམ་མི་མུན་པར་ཞུགས་པ་ལྟ་བུའམ། མིག་བཙུམས་པ་ལྟ་བུར་སེམས་ཀྱིས་དམིགས་པ་གསལ་བར་མི་མཐོང་བ་དེའི་ཚེ་བྱིང་བར་གྱུར་པར་རིག་པར་བྱའོ། །ཞེས་དམིགས་པ་གང་ལ་གཏད་པ་དེ་ལ་དྭངས་ཆ་ཙམ་ཡོད་ཀྱང་དམིགས་པའི་འཛིན་སྟངས་ཀྱི་ངར་ཆ་དམ་སྦྲིང་ངེ་བ་མེད་ན་མི་གསལ་ཞིང་འཛིན་སྟངས་དམའ་རུ་སོང་བའི་ཤེས་པ་ཞིག་ལ་བྱིང་བར་ངོས་འཛིན། རྨུགས་པ་ནི་གཏི་མུག་གི་ཆ་ཤས་ལུས་སེམས་ལྕི་ཞིང་ལས་སུ་མི་རུང་བའི་རྣམ་པ་ཅན་གྱི་ཤེས་པ་སྒྲིབ་ལུང་མ་བསྟན་ནམ་མི་དགེ་བ་ཞིག་ཡིན་པས་རྨུགས་པ་ལ་དགེ་བ་མེད་ལ་བྱིང་བ་ལ་དགེ་བ་ཡང་ཡོད་དོ། །བྱིང་རྒོད་བྱུང་ཚེ་སྤོང་པའི་གཉེན་པོ་འདུ་མི་བྱེད་པའི་ལྡོག་ཕྱོགས་སུ་ཀུན་ལས་བཏུས་ལས། སེམས་པ་གང་ཞེ་ན། སེམས་མངོན་པར་འདུ་བྱེད་པ་ཡིད་ཀྱི་ལས་ཏེ་དགེ་བ་དང་མི་དགེ་བ་དང་ལུང་དུ་མ་བསྟན་པ་རྣམས་ལ་སེམས་འཇུག་པར་བྱེད་པའི་ལས་ཅན་ནོ། །ཞེས་སེམས་དགེ་མི་དགེ་ལུང་མ་བསྟན་གང་རུང་ལ་སྐུལ་བའི་སེམས་བྱུང་དེ་སེམས་པ་ཡིན་པས་སྐབས་འདིར་ཤེས་བཞིན་གྱིས་བྱིང་རྒོད་ངོས་ཟིན་ན་དབུ་མ་སྙིང་པོ་ལས། ཞུམ་པ་དམིགས་པ་རྒྱ་ཆེན་དང་། །བསྒོམས་པས་ཡངས་པ་ཉིད་དུ་བྱ། །ཞེས་སེམས་ནང་དུ་བསྡུས་དྲགས་པའི་སྐྱོན་ཡིན་པས་ན་དམིགས་པ་ཅུང་ཟད་སྤྲོས་པས་བཟློག །དེས་ཀྱང་མ་སེལ་བར་བྱིང་བ་ཤུགས་ཆེར་སོང་ན་རེ་
ཞིག་དམིགས་པ་གློད་ནས་དཀོན་མཆོག་གསུམ་དང་གཏོང་བ་ཚུལ་ཁྲིམས་ལྷ་རྗེས་སུ་དྲན་པ་དྲུག་དང་། དལ་འབྱོར་ཐོབ་པའི་ཕན་ཡོན་སོགས་བསམ་པ། སྤྱོད་ལམ་འཆག་པ། སྣང་བའི་མཚན་མ་ཡིད་ལ་བྱེད་པ། གདོང་ཆུས་འཁྲུ་བ། བསིལ་བར་གནས་པ་སོགས་ཀྱི་སྒོ་ནས་བཟློག་པ་དང་། དབུ་མ་སྙིང་པོ་ལས། རྒོད་པ་མི་རྟག་ལ་སོགས་པ། །ཡིད་ལ་བྱེད་པས་ཞི་བར་བྱ། །ཞེས་འདོད་ཆགས་ཀྱི་ཡུལ་ལ་རྒོད་པ་ན་མི་རྟག་པ་དང་སྡུག་བསྔལ་སོགས་སྐྱོ་ཤས་དྲག་པོ་བསྒོམས་པས་བཟློག་པ་ཡིན་ནོ། དེས་མཚོན་པའི་ཞེ་སྡང་སོགས་རྟོག་པ་སྣ་ཚོགས་གང་འཕྲོ་བ་དེ་གའི་གཉེན་པོ་སྒོམ་པ་གནད་དུ་ཆེ། མདོར་ན་དབང་པོའི་སྒོ་མི་སྲུང་བ། ཟས་ཀྱི་ཚོད་མི་རིག་པ། ནམ་གྱི་ཆ་སྟོད་ཆ་སྨད་ལ་ཉལ་བ། གཉིད་རྨུགས་དང་འདོད་པའི་ཡུལ་ཧ་ཅང་བསྟེན་དྲགས་པ་སོགས་ཐུན་མོང་གི་རྒྱུ་རྣམས་ཀྱང་སྤང་བའོ། །བྱིང་རྒོད་ཀྱི་གཉེན་པོ་ ཧ་ཅང་འདུ་བྱེད་པ ་སེལ་བ་ནི། སྒོམ་རིམ་ཕྱི་མ་གཉིས་ལས། གལ་ཏེ་སེམས་མཉམ་པར་ཞུགས་པ་ལ་རྩོལ་བ་བྱས་ན་དེའི་ཚེ་སེམས་རྣམ་པར་གཡེང་བར་འགྱུར་རོ། །ཞེས་སེམས་གནས་བརྒྱད་པའི་མཐར་བྱིང་བ་དང་རྒོད་པས་གང་རུང་གི་དབང་དུ་མི་འགྲོ་བའི་སེམས་མཉམ་པའི་དུས་ཡིན་པས་དེའི་ཚེ་སེམས་གཟེངས་བསྟོད་པ་དང་ནང་དུ་འགུགས་པ་སོགས་བྱིང་རྒོད་ཀྱི་ཟོན་ཆེན་པོ་འདུ་བྱེད་པའི་རྩོལ་བ་ཆེས་ན་ཏིང་ངེ་འཛིན་གྱི་སྐྱོན་ཡིན་པས་གློད་ཤེས་པའི་འདུ་བྱེད་བཏང་སྙོམས་བྱེད་པ་ནི་བྱིང་རྒོད་ཀྱི་གཉེན་པོ་བསྟེན་དྲགས་པ་དེའི་གཉེན་པོ་ཡིན་ལ། གློད་ཟེར་བའི་མིང་ཙམ་རྣ་བར་ཐོས་པས་གློད་རབ་ལ་སྒོམ་རབ་ཅེས་སྨྲ་མོད། དེ་ནི་བྱིང་བའི་དབང་དུ་སོང་བའི་སེམས་ཀྱི་དྭངས་ཆ་ཙམ་ལ་སྒོམ་རྣལ་མར་ངོས་བཟུང་
བའི་རང་མཚང་སྟེ། སྐབས་འདིར་གློད་ཤེས་པ་ནི་རྩོལ་བ་གློད་པ་ཡིན་གྱི། འཛིན་སྟངས་ཀྱི་ངར་གཏོང་བ་ནི་མིན་ཞིང་། དུས་ཀྱང་སྒོམ་ཆེན་ཕལ་ཆེར་ཉམས་མྱོང་ཅུང་ཟད་སྐྱེས་པ་ན་གློད་ལ། རང་རེའི་ལུགས་བྱིང་རྒོད་ཀྱི་དཔལ་ཆགས་པ་ཞེས་སེམས་གནས་དགུ་པའི་དུས་ཡིན་པས་མི་འདྲའོ། །དེ་ལྟར་ཉེས་པ་ལྔ་དང་། དེའི་གཉེན་པོ་སྤོང་པའི་འདུ་བྱེད་བརྒྱད་ཀྱིས་ཉམས་སུ་ལེན་ཚུལ་རྣམས་ཉམས་འོག་ཏུ་ལེགས་པར་ཆུད་པར་བྱས་ནས་ཉམས་སུ་ལེན་དགོས་པས། ལེན་ཚུལ་བཤད་མ་ཐག་པའི་ཚིག་རིས་དེ་འདྲ་ཞིག་བློ་ལ་བྱང་བར་བྱས་པས་ཆོག་གི་སྙམ་ན། དོན་དེ་དག་ཐོས་པར་བྱས་པའི་སྒོ་ནས་ཉམས་ལེན་སེམས་ཐོག་ཏུ་འདྲིལ་མ་ཤེས་ན་ཁ་ཕྱིར་བལྟས་ཀྱི་བཤད་ཡམ་གྱིས་ཆོས་དང་གང་ཟག་སོ་སོར་སོང་བ་མང་ཞིང་། བླུན་པོ་ལ་མན་ངག་གི་སྙིང་པོ་ཞིག་གིས་ཆོག་མོད་སྔར་བཤད་པའི་གཞུང་ཆེན་པོ་ནས་བཤད་པ་དེ་དང་ངལ་བ་ཙམ་གྱི་འབྲས་བུར་ཟད་དོ་སྙམ་དུ་སེམས་པ་ནི། དཔེར་ན་ཡུལ་ཐག་རིང་པོ་ཞིག་ཏུ་འགྲོ་ན་འགྲོ་བའི་ལམ་གྱི་གནས་ཚུལ་མཐའ་དག་རང་སྟོབས་སམ་གཞན་ལ་བརྟེན་པ་གང་རུང་གིས་རྒྱུས་ཡོད་པ་ཞིག་ངེས་པར་དགོས་ཀྱི། ཐམ་ཐོམ་དུ་ཕྱིན་པས་དོན་མི་འགྲུབ་པ་ལྟར། སྒོམ་གྱི་སྐྱོན་སེལ་བོགས་འདོན་གྱི་གནད་མི་ཤེས་པར་ལུས་གནད་བསྲངས་པ་དང་མིག་བཙུམས་ནས་སྡོད་པའི་སྙིང་རུས་ལ་གྲུབ་པའི་དབང་ཕྱུག་ཆེན་པོར་རེ་བ་མཐའ་དག་སྡོམ་གསུམ་དུ། བླུན་པོས་ཕྱག་རྒྱ་ཆེ་བསྒོམས་པ། །ཕལ་ཆེར་དུད་འགྲོའི་རྒྱུ་རུ་གསུངས། །ཞེས་པའི་དོན་ཐོག་ཏུ་བབ་པར་སྣང་མོད། །དེང་དུས་ནི་རང་གཞན་ཀུན་ལ་ངང་ཚུལ་འདི་དག་གིས་དབྱར་
གྱི་སྲིན་བུའི་གྲངས་བཞིན་ཁྱབ་ཅིང་འཕེལ་པའི་ཕྱིར་ཐམས་ཅད་མཁྱེན་པ་བུས། བདག་གིས་ཆོས་མིན་སྨྲ་རུ་ཆོས་དང་འགལ། །ཆོས་བཞིན་སྨྲས་ན་བོད་རྣམས་དགྲ་རུ་ལྡང་། །ཞེས་བགྲོས་གླེང་མང་བ་རང་ཉིད་བྱ་རོག་ལུས་དཀར་སྒྲུབ་པར་ཟད་དོ། །སྔར་བཤད་པ་དེ་དག་ངེས་པར་བྱས་ནས་དམིགས་པ་གཅིག་ལ་སྒྲིལ་ཚུལ།ལམ་སྒྲོན་ལས། དམིགས་པ་གང་རུང་གཅིག་དག་ལ། །ཡིད་ནི་དགེ་ལ་བཞག་པར་བྱ། །ཞེས་སྐབས་སུ་བབ་ཅིང་རང་ཉིད་དམིགས་པ་གཅིག་ལ་གཏོད་པའི་ཡུལ་ནི་སྤྱིར་བཏང་ལ་སྐུ་གཟུགས་ལྟ་བུ་འོས་ཤིང་། དེའི་ནང་ནས་ཏིང་འཛིན་རྒྱལ་པོ་ལས། གསེར་གྱི་ཁ་དོག་ལྟ་བུའི་སྐུ་ལུས་ཀྱི། །འཇིག་རྟེན་མགོན་པོ་ཀུན་ཏུ་མཛེས་པ་སྟེ། །དམིགས་པ་དེ་ལ་གང་གི་སེམས་འཇུག་པ། །བྱང་ཆུབ་སེམས་དཔའ་དེ་མཉམ་གཞག་ཅེས་བྱ། །ཞེས་དེ་བཞིན་གཤེགས་པའི་སྐུ་གཟུགས་ལ་དམིགས་པས་ཞར་བྱུང་དུ་སངས་རྒྱས་རྗེས་དྲན་གྱི་བསོད་ནམས་རྒྱ་ཆེར་གསོག་པ། དཔེར་ན་ཟུར་རྡོ་གཅིག་གིས་རྩིག་པ་གཉིས་ཀྱི་གོ་ཆོད་པ་དང་། མི་གཅིག་གིས་ཚོང་ལྟ་བུའི་དོན་གཅོད་པའི་ཞོར་ལ་བྲེལ་བ་གཞན་ཆོད་འགྲོ་བ་དང་མཚུངས་པས། ཐོག་མར་སྐུ་གཟུགས་བྲིས་འབུར་སོགས་ལ་བལྟ་བ་དང་བསམ་པ་མང་དུ་བྱས་པས་གཙུག་ཏོར་ཞལ་ཁྱིམ་སྤྱན་ཕྱག་ཞབས་ན་བཟའ་སོགས་ཀྱི་དབྱིབས་དང་། སྤྱན་གྱི་དཀར་ནག་གིས་མཐའ་རྟེན་པ་ཚུལ་གྱི་ཁ་དོག་ཀྱང་མ་འདྲེས་པ་སོ་སོར་བསམ། བཞུགས་པ་ལ་བཞེངས་པའི་རྣམ་པ་དང་སྔོན་པོ་ལ་དཀར་པོར་འཆར་བ་ལྟ་བུ་ལྡོག་ཕྱོགས་སྣ་ཚོགས་ཀྱི་རྗེས་སུ་མི་འབྲང་ཞིང་། ཐོག་མ་ཉིད་ནས་སངས་རྒྱས་དངོས་ཀྱི་རྣམ་པ་དང་སྤྱན་གྱི་དཀར་ནག་ཚུན་མ་འདྲེས་པར་མི་འབྱུང་ཡང་།
དང་པོ་སྐུ་གཟུགས་མཐོང་བའི་དབྱིབས་དང་སྐུའི་རྣམ་པ་རགས་པ་ཙམ་འཆར་བ་ལ་རྒྱུན་བསྐྱངས་ནས་བསྒོམས་པས་མཐར་ཇི་ལྟར་བཤད་པ་ལྟར་འབྱུང་གི །ཉམས་ལེན་བྱས་ཙམ་ནས་ཇི་ལྟ་བ་འབྱུང་དུ་རེ་བའི་ཤ་ཐང་ཐང་བྱས་ནས་སྒོམ་གྱི་གེགས་སུ་འགྲོ་བས་མཚམས་ཟིན་པས་བྱས་ཏེ། སྟན་འཇམ་ཞིང་བདེ་བ་ལ་རྐང་པ་སྐྱིལ་ཀྲུང་ངམ་ཕྱེད་སྐྱིལ། མིག་འབྱེད་འཛུམ་རན་པར་སྣ་རྩེར་ཕབ། ལུས་དྲང་པོར་བསྲངས། ལག་པ་མཉམ་གཞག་མགོ་ཐད་ཀར་སྣ་རྩེ་དང་ལྟེ་བ་དྲང་པོར་བྱས། སོ་དང་མཆུ་རང་བབས། ལྕེ་རྩེ་རྐན་ལ་རེག་པ། དབུགས་དལ་བུས་རྒྱུ་བ་སྟེ་ལུས་ཀྱི་སྤྱོད་ལམ་བརྒྱད་དང་ལྡན་པའི་སྒོ་ནས་རླུང་གི་འགྲོ་འོང་ཉེར་གཅིག་བགྲང་བ་སོགས་བྱ་བ་ནི་ཕྱི་རོལ་ཏུ་གཡེང་བ་བཟློག་པའི་ཐབས་ཡིན་གསུང་། དེ་ནས་ཏིང་ངེ་འཛིན་གྱི་ཡོན་ཏན་ལ་དད་པས་དྲངས་པའི་འདུན་པ་ཤུགས་དྲག་པོའི་སྒོ་ནས་དགེ་སྦྱོར་ལ་སྤྲོ་སིང་ངེ་བའི་བརྩོན་འགྲུས་དང་བཅས་ཏེ་སྔར་གོམས་འདྲིས་སུ་བྱས་པའི་སངས་རྒྱས་ཀྱི་སྐུ་གཟུགས་དེ་ཉིད་སངས་རྒྱས་དངོས་ཀྱི་རྣམ་པར་སྨིན་མཚམས་ཀྱི་ཐད་ཀྱི་ནམ་མཁར་ཆེ་ཆུང་བློ་དང་འཚམ་པ་ཞིག་གསལ་བཏབ། དམིགས་ཡུལ་དེ་ཉིད་མ་བརྗེད་པར་དྲན་པའི་སེམས་དམིགས་པ་ལ་དུ་རེར་གནས་པའི་གསལ་ཆའི་ངར་དང་ལྡན་ཞིང་། གཞན་དུ་མི་འཕྲོ་བའི་གནས་ཆ་བརྟན་པོ་གཉིས་ཟུང་ལྡན་གྱི་སྒོ་ནས་སྟོང་དུ་ལྷགས་པ་སོགས་ཀྱི་སྐྱོན་མི་འབྱུང་ཙམ་གྱི་ངོས་བསྒྲིམས་ཏེ་བསྒོམ། དེ་ལ་ཅུང་ཟད་གནས་པ་སྙམ་བྱེད་པ་ན་དམིགས་པ་དྲན་པས་མ་བརྗེད་པའི་མུ་ནས་ཤེས་བཞིན་གྱིས་བྱ་ར་བྱས་པས་དམིགས་པའི་གསལ་ཆ་དང་འཛིན་སྟངས་ཀྱི་ངར་ཆའི་ཤུགས་དམ་སྦྲེང་སྦྲེང་བ་དེ་ཅུང་ཟད་ཞན་དུ་སོང་བ་
མཐོང་ཚེ་བྱིང་བ་ཕྲ་མོ་བྱུང་སྙམ་སྟེ་བཀག །གསལ་ཆའི་ངར་ཆ་ཧད་ཀྱི་ཤོར་ནས་དྭངས་ཆ་ཙམ་ལས་མི་འདུག་ན་བྱིང་བ་རགས་པར་ངོ་ཤེས་པར་བྱེད། འདོད་པའི་ཡུལ་ཡིད་དུ་འོང་བའི་རྣམ་པ་འཆར་ལ་ཁད་བྱུང་བ་ན་རྒོད་པ་ཕྲ་མོ་དང་འདོད་ཆགས་ཀྱི་རྣམ་པ་ཧད་ཀྱི་སྐྱེས་པ་རྒོད་པ་རགས་པར་རྟོགས་ནས་དེ་དག་གི་གཉེན་པོའི་སྒོ་ནས་བྱིང་རྒོད་བཅད་དེ་རྩ་བའི་དམིགས་པའི་སྟེང་དུ་གསལ་ལེ་ཧྲིག་གེར་ཐུན་ཚད་ཆུ་ཚོད་གཅིག་གི་རིང་འཇོག་གང་ཐུབ་བྱེད་དགོས་ཀྱང་བསྒྲིམས་དྲག་ན་རྒོད་ཤས་དང་། གློད་དྲག་པ་ན་བྱིང་ཤས་སྐྱེ་བའི་ཕྱིར་གྲིམས་ལྷོད་རན་པའི་མཚམས་ཤིན་ཏུ་དཀའ་བས་མཁས་པ་ཙན་དྲ་གོ་མིས། བརྩོན་པ་བསྟེན་ན་རྒོད་པ་འབྱུང་འགྱུར་ཞིང་། །དེ་སྤངས་ན་ནི་ཞུམ་པ་སྐྱེ་བར་འགྱུར། །འདི་ཡིས་རིགས་པར་མཉམ་འཇུག་རྙེད་དཀའ་ན། །བདག་གིས་སེམས་དཀྲུགས་པས་ནི་ཅི་ཞིག་བགྱི། །ཞེས་ལས་དང་པོ་བ་ལ་ཉེས་པ་ལྔ་སྤོང་འདུ་བྱེད་བརྒྱད་ལྡན་གྱི་ཉམས་ལེན་གནད་དུ་དྲིལ་བ་དེ་ཉིད་སྒྲ་ཇི་བཞིན་པ་མི་སྐྱེ་ནའང་། སེམས་གནས་དགུའི་ནང་ཚན་སེམས་འཇོག་པའི་དམིགས་པ་ཞེས་དམིགས་རྟེན་ལ་ཡུན་དུ་མི་གནས་ཀྱང་ཉམས་དང་སྦྱར་ཏེ་བསྒྲིམས་ནས་སྒོམ་པ་ལ་ཚུལ་ཇི་ལྟར་བྱ་ན། སེམས་གནས་དང་པོའི་ཚེ་དམིགས་པ་ཁོ་ན་ལ་སེམས་ཀྱི་གནས་ཆ་མི་སྡོད་པར་རྣམ་རྟོག་རི་གཟར་གྱི་འབབ་ཆུ་ལྟ་བུར་འོང་བས། དེ་ཉམས་ལེན་བྱས་པས་རྟོག་པ་མང་དུ་སོང་སྙམ་པ་འབྱུང་མོད། དེ་ནི་སྔར་ཉམས་ལེན་གྱི་གནད་མེད་པའི་དུས་དཔེར་ན་ལམ་ཆེན་ཞིག་ལ་འགྲུལ་པ་རྒྱུན་མི་འཆད་དུ་འགྲོ་ཡང་དེ་ལ་ཆེད་དུ་བལྟ་བའི་འདུན་པ་མེད་པའི་དབང་གིས་མང་ཉུང་གི་རྟོག་དཔྱོད་མི་འབྱུང་ལ། འབད་པས་བལྟས་ནས་མི་ཁལ་སོགས་མང་
པོ་འདི་འདྲ་བྱུང་སྙམ་པ། སྔོན་ཆད་རྟོག་པ་འོག་འགྱུའི་འཁོར་ལོ་བསྐོར་ཡང་ངོས་མ་ཟིན་པ་ལ་སྐབས་འདིར་སེམས་ཀྱི་ཉམས་ལེན་བྱས་པ་ལ་བརྟེན་ནས་རྣམ་རྟོག་ངོས་ཟིན་གྱི་ཉམས་ཤིག་འོང་བས་མགོན་པོ་བྱམས་པས་མདོ་སྡེ་རྒྱན་དུ་སེམས་གནས་པའི་ཐབས་དགུ་པོ་དེ་སྟོབས་དྲུག་གིས་འགྲུབ་ལུགས་ཡིད་ལ་བྱེད་པ་བཞིར་བཤད་པའི་སྐབས་ཀྱི་སྟོབས་དྲུག་གི་ནང་ཚན་ཐོས་པའི་སྟོབས་ཀྱིས་འགྲུབ་པའི་སེམས་གནས་དང་པོ་སེམས་འཇོག་པ་ཞེས་བྱ་བ་དམིགས་པའི་གདམས་པ་ཐོས་པ་ཙམ་གྱི་རྗེས་སུ་འབྲངས་ནས་དམིགས་པ་ལ་སེམས་གཏད་པ་ཙམ་གྱི་སྐབས་ཡིན་ནོ། །དེ་ནས་རིམ་གྱིས་བསྒོམས་པ་ན་གཅོང་རོང་དོག་མོའི་འབབ་ཆུ་ལྟར་རེས་རྣམ་རྟོག་ཞི་ཞིང་རེས་ཐོ་ལེར་སྐྱེ་བའི་རྣམ་རྟོག་ངལ་གསོ་བའི་ཉམས་ཤིག་འོང་། དེའི་ཚེ་སྟོབས་གཉིས་པ་བསམ་པས་འགྲུབ་པའི་སེམས་གཉིས་པ་རྒྱུན་དུ་འཇོག་པ་ཞེས་བྱ་བ་དམིགས་པ་ལ་རྒྱུན་ཅུང་ཟད་མཐུད་ནུས་པ་ཡིན། སེམས་གནས་འདི་གཉིས་ལ་བྱིང་རྒོད་ཆེས་མང་ཞིང་ཏིང་ངེ་འཛིན་ཉུང་ངུ་ལས་མི་འོང་བས་ཡིད་བྱེད་བཞིའི་ནང་གི་དང་པོ་བསྒྲིམས་ཏེ་འཇུག་པའི་སྐབས་སོ། །དེ་ནས་ཅུང་ཟད་གོམས་པ་ན་ལུང་པ་ཕུ་གསུམ་གྱི་རྫིང་ཆུ་ལྟ་བུ་འགལ་རྐྱེན་གྱིས་མ་དཀྲུགས་པའི་ཚེ་སེམས་གནས་པ་སྙམ་བྱེད་ལ། རྐྱེན་བྱུང་ཚེ་མི་གནས་པའི་རྣམ་རྟོག་ཐང་ཆད་པའི་ཉམས་ཤིག་འོང་། དེའི་ཚེ་སྟོབས་གསུམ་པ་དྲན་པས་འགྲུབ་པའི་སེམས་གནས་གསུམ་པ་གླན་ཏེ་འཇོག་པ་ཞེས་བྱ་སེམས་གཡེང་བ་མྱུར་དུ་རྟོགས་ནས་སླར་དམིགས་པ་ལ་གློན་པ་དང་། སེམས་གནས་བཞི་པ་ཉེ་བར་འཇོག་པ་ཞེས་བྱ་བ་རྒྱ་ཆེན་པོ་ལས་བསྡུས་ཏེ་ཕྲ་བར་བྱེད་པ་དང་སྟོབས་
བཞི་པ་ཤེས་བཞིན་གྱིས་འགྲུབ་པའི་སེམས་གནས་ལྔ་པ་དུལ་བར་བྱེད་པ་ཞེས་བྱ་བ་ཏིང་ངེ་འཛིན་གྱི་ཡོན་ཏན་ལ་དགའ་བ་དང་། སེམས་གནས་དྲུག་པ་ཞི་བར་བྱེད་པ་ཞེས་བྱ་བ་རྣམ་གཡེང་གི་ཉེས་དམིགས་རིག་ནས་འགོག་པ་དང་། སྟོབས་ལྔ་པ་བརྩོན་འགྲུས་ཀྱིས་འགྲུབ་པའི་སེམས་གནས་ལ་བདུན་པ་དང་བརྒྱད་པ་གཉིས་ཡོད་པའི་བདུན་པ་རྣམ་པར་ཞི་བར་བྱེད་པ་ཞེས་བྱ་བ་ཆགས་སེམས་ཉོན་མོངས་རྩོལ་བས་སྤངས་ཏེ་ཞི་བར་བྱེད་སེམས་གནས་གསུམ་པ་ནས་བདུན་པའི་བར་གྱི་ལྔ་པོ་འདི་ལ་བྱིང་རྒོད་ཀྱིས་བར་དུ་གཅོད་པས་ཡིད་བྱེད་བཞིའི་ནང་གི་གཉིས་པ་སྐབས་སུ་ཆད་ཅིང་འཇུག་པའི་དུས་སོ། །དེ་ནས་རིམ་གྱིས་བསྒོམས་པས་རྒྱ་མཚོ་རླབས་དང་བཅས་པ་ལྟ་བུ་རྣམ་རྟོག་ཅི་བྱུང་ཡང་གཉེན་པོ་དྲན་འཛིན་ཅུང་ཟད་བསྟེན་པས་རང་མལ་དུ་ཞི་འགྲོ་བས་རྣམ་རྟོག་འདུ་བྱེད་པ་ཞེས་བྱ་བའི་ཉམས་འོང་། དེའི་ཚེ་སྔར་བཤད་པའི་སྟོབས་ལྔ་པས་འགྲུབ་པའི་སེམས་གནས་བརྒྱད་པ་རྩེ་གཅིག་ཏུ་བྱེད་པ་ཞེས་བྱ་བ་ཏིང་ངེ་འཛིན་རྒྱུན་ཆགས་སུ་འགྲུབ་པ་ཡིན་ནོ། །སེམས་གནས་བརྒྱད་པ་ལ་བྱིང་རྒོད་ཀྱིས་བར་དུ་མི་གཅོད་པར་ཡིད་བྱེད་བཞིའི་ནང་གི་གསུམ་པ་སྐབས་སུ་ཆད་པ་མེད་པར་འཇུག་པའི་དུས་སོ། །དེ་ནས་རིམ་གྱིས་བསྒོམས་པས་རྒྱ་མཚོ་རླབས་དང་བྲལ་བ་ལྟ་བུ་ཡུལ་རྐྱེན་ཅི་བྱུང་ཡང་གཉེན་པོ་དྲན་འཛིན་གྱི་འབད་རྩོལ་ལ་མ་ལྟོས་པར་ཏིང་འཛིན་རང་བབས་སུ་འཆར་བས་རྣམ་རྟོག་མངོན་པར་འདུ་མི་བྱེད་པའི་ཉམས་ཀྱི་མཉམ་གཞག་འོང་། དེའི་ཚེ་སྟོབས་དྲུག་པ་ཡོངས་སུ་འདྲིས་པ་ལས་འགྲུབ་པའི་སེམས་གནས་དགུ་པ་མཉམ་པར་འཇོག་པ་ཞེས་བྱ་བ་རྩོལ་མེད་དུ་དམིགས་པ་ལ་འཇོག་པས་ཡིད་བྱེད་བཞིའི་ནང་གི་བཞི་པ་ལྷུན་གྱིས་གྲུབ་པར་འཇུག་པའི་
དུས་སོ། །འདིའི་སྐབས་སུ་བྱིང་རྒོད་འགོག་པའི་རྩོལ་བ་སྐྱོན་དུ་འགྱུར་བར་དགོངས་ནས་གོང་མ་རྣམས་གློད་རབ་ཅེས་གསུང་བ་མ་གོ་བར་འཛིན་སྟངས་ཀྱི་ངར་ཆ་གློད་པར་གོ་བའི་སྐྱོན་འབྱུང་བས་གནད་འགག་འདི་དག་ལེགས་པར་ཤེས་དགོས་ཀྱི། པུས་འཁྱུད་སྒོམ་ཞྭ་དྲ་ཕད་ཙམ་ཡོད་པས་སྒོམ་རྒྱུད་ལ་སྐྱེ་བ་ནི་མིན་ནོ། །དེ་ལྟར་སེམས་གནས་དགུ་ལ་ཡིད་བྱེད་བཞིར་བཤད་པའི་དང་པོ་གཉིས་ལ་བསྒྲིམས་ཏེ་འཇུག་པ་དང་བར་པ་ལྔ་ལ་ཆད་ཅིང་འཇུག་པའི་ཐ་སྙད་བྱས་ན་དང་པོ་གཉིས་ལའང་ཆད་ཅིང་འཇུག་པ་དང་བར་པ་ལྔ་ལ་ཡང་བསྒྲིམས་ཏེ་འཇུག་པ་དགོས་པས་མི་རིགས་སོ་སྙམ་པའི་ལོག་རྟོག་སྐྱེས་ན་སྐྱོན་མེད་དེ། བར་པ་ལྔ་ལ་བསྒྲིམས་པ་དང་ཆད་པའི་འཇུག་ཚུལ་གཉིས་ཀ་ཡོད་ཀྱང་དང་པོ་གཉིས་ལ་ཆད་པའི་ཐ་སྙད་བྱར་མེད་དེ། བྱིང་རྒོད་ཤིན་ཏུ་མང་བའི་བར་བར་ལ་གནས་པ་ཅུང་ཟད་ལས་མི་སྐྱེ་ལ། བར་པ་ལྔའི་སྐབས་ཏིང་ངེ་འཛིན་ཤས་ཆེར་སྒོམ་པའི་བར་བར་ལ་བྱིང་རྒོད་ཀྱིས་ཡང་ཡང་གཅོད་པའི་ཕྱིར། །དཔེར་ན་མི་གསུམ་གྱི་དང་པོ་ལ་ཤ །བར་བ་ལ་ཐུད་དང་ཤ་གཉིས་ཀ །ཐ་མ་ལ་དེའི་སྟེང་དུ་མར་ཁུ་དང་བཅས་གསུམ་དྲངས་ན་དང་པོ་ལ་ཤ་བྱིན་པའི་ཐ་སྙད་དང་། བར་པ་ལ་ཤ་ཡོད་ཀྱང་ཤ་བྱིན་མི་ཟེར་བར་ཉིས་སྤེལ་གྱི་ཐ་སྙད་འདོགས་ཤིང་། གསུམ་པ་ལ་ཉིས་སྤེལ་ཚང་ཡང་སུམ་སྤེལ་ཡོད་པའི་དབང་གིས་ཉིས་སྤེལ་བྱིན་ཞེས་བྱར་མི་རུང་བ་ལྟ་བུ་ཡིན་ནོ། །དེ་ལྟར་སེམས་གནས་དགུ་པ་བྱིང་རྒོད་ཕྲ་མོ་དང་བྲལ་བར་ཡུན་རིང་དུ་སྐྱོང་ནུས་པའི་རྩོལ་མེད་ཀྱི་ཏིང་ངེ་འཛིན་སྐྱེས་པ་དེ་ཞི་གནས་ཡིན་ནམ་སྙམ་ན། མདོ་སྡེ་རྒྱན་ལས། དེ་གོམས་པ་ལས་འདུ་མི་བྱེད། །དེ་ནས་དེ་ཡི་ལུས་དང་
སེམས། །ཤིན་ཏུ་སྦྱངས་པ་ཆེ་ཐོབ་ནས། །ཡིད་ལ་བྱེད་དང་བཅས་ཞེས་བྱ། །ཞེས་སྐབས་འདི་ནས་བཟུང་སྟེ་ཡིད་ལ་བྱེད་པ་ཞེས་བཤད་པའི་ཞི་གནས་རྗེས་མཐུན་པ་ཡིན་ཏེ། ཞི་གནས་མཚན་ཉིད་པ་འཐོབ་པ་ལ་ལུས་སེམས་ཤིན་སྦྱངས་ཀྱི་དགའ་བདེ་ཁྱད་པར་ཅན་ཐོབ་དགོས་སོ། །དེ་ལྟར་ན་སེམས་གནས་དགུ་པའི་ཏིང་ངེ་འཛིན་ཐོག་མར་སྐྱེས་པའི་དུས་ཤིན་སྦྱངས་མེད་པར་དོགས་ན། ཤིན་སྦྱངས་ཕྲ་མོ་སྐྱེས་པ་ཆུང་བས་རིག་དཀའ་ཡང་། འདི་དག་གི་སྐབས་ཞི་གནས་རྗེས་མཐུན་པའི་ཡིད་བྱེད་དུ་འཆད་པའི་རྒྱུ་མཚན། དཔེར་ན་ཚེས་བཅོ་ལྔའི་ཟླ་བའི་ཆ་ཤས་ཡོངས་སུ་རྫོགས་པ་ལ་ཚེས་གཉིས་ནས་རིམ་གྱིས་ཆ་ཤས་གསོག་དགོས་ནའང་། ཚེས་གཉིས་ཀྱི་ཟླ་བའི་ཚེ་ཕྲ་མོ་དེ་ཟླ་བ་ཡིན་ཡང་བཅོ་ལྔའི་ཟླ་བ་མིན་པ་ལྟར། ཤིན་སྦྱངས་ཀྱི་ཆ་ཕྲ་མོ་དེ་གོང་དུ་འཕེལ་བ་ལས་མཐར་ཉོན་མོངས་པའི་ཕྱོགས་སུ་གྱུར་པ་དགེ་བ་ལ་གང་འདོད་དུ་བཀོལ་མི་རུང་བའི་གནས་ངན་ལེན་ཞི་ནས་སེམས་ཀྱི་ཤིན་སྦྱངས་སྐྱེ། དེའི་མཐུས་ལས་རུང་གི་རླུང་ལུས་ལ་རྒྱུ་བས་ལུས་ཀྱི་གནས་ངན་ལེན་དང་བྲལ་ནས་བལ་ལྟར་ཡང་བའི་ལུས་ཀྱི་ཤིན་སྦྱངས་སྐྱེ། དེ་ལ་བརྟེན་ནས་ལུས་ལ་བདེ་བའི་ཉམས་ཆེན་པོ་སྐྱེ། དེའི་མཐུས་ཡིད་བདེ་ཉམས་ཀྱི་སེམས་ཤིན་སྦྱངས་ཀྱི་བདེ་བ་སྐྱེ། དེ་ཡང་ལུས་ཤིན་སྦྱངས་སྐྱེས་མ་ཐག་ཏུ་སེམས་དགའ་ཡལ་ཡལ་བ་བྱུང་བ་དེའི་ཚེ་ཞི་གནས་ཅུང་ཟད་མ་ཐོབ་ལ། དགའ་ཡལ་བ་དེ་ཆུང་དུ་སོང་ནས་སེམས་དམིགས་པ་ལ་ལྷན་ནེ་སྡོད་པའི་ཏིང་ངེ་འཛིན་དང་རྗེས་སུ་མཐུན་པའི་ཤིན་སྦྱངས་མི་གཡོ་བ་ཐོབ་པ་དང་དུས་མཉམ་དུ་ཞི་གནས་འགྲུབ་པས་ད་ལྟའི་གྲུབ་ཆེན་དུ་རློམ་པ་རྣམས་ཀྱིས་གཞུང་ཆེན་པོ་འདི་དག་དང་བསྟུན་ན་གར་ཡང་མ་ཕྱིན་པར་སྣང་ངོ་། །འོན་ཀྱང་དགའ་
ཡལ་བ་དེ་ཆུང་དུ་སོང་བས་ཤིན་སྦྱངས་ཟད་པ་མ་ཡིན་ཏེ། དཔེར་ན་གཏམ་སྙན་ཐོས་མ་ཐག་ཏུ་སེམས་དགའ་གཡེང་ངེ་བ་དེ་ཡུན་ཞིག་སོང་བ་ན་ཞི་འགྲོ་ཡང་། གཏམ་སྙན་མི་བདེན་པ་མ་ཡིན་པ་དང་འདྲ་གསུང་། ལུས་སེམས་ཤིན་སྦྱངས་ཀྱི་བདེ་བ་ཁྱད་པར་ཅན་གྱི་ཞི་གནས་དེ་མངོན་དུ་བྱས་པ་དང་བསམ་གཏན་དང་པོའི་ཉེར་བསྡོགས་ཐོབ་པ་ཡིན་ཡང་། འདི་ག་ཙམ་གྱིས་ཉོན་མོངས་པ་མངོན་གྱུར་ཡང་འགོ་གནོན་མི་ནུས་མོད། འོ་ན་སྔར་ལྷག་པ་ཏིང་ངེ་འཛིན་གྱི་བསླབ་པ་དང་ཞི་གནས་ཀྱིས་ཉོན་མོངས་པ་མངོན་གྱུར་མགོ་གནོན་པར་བཤད་པ་དང་འགལ་ལམ་སྙམ་ན་དེ་ནི་ཞི་རགས་ཀྱི་རྣམ་པ་ཅན་གྱི་ལྷག་མཐོང་སོགས་ཀྱང་ཞི་གནས་སུ་བསྡུས་པ་ལ་དགོངས་པ་ཡིན་གསུང་། དེས་ན་ད་དུང་ལམ་ལ་སློབ་དགོས། སློབ་ཚུལ་འཇིག་རྟེན་པའི་ལམ་ཞི་རགས་ཀྱི་རྣམ་པ་ཅན་གྱི་ལྷག་མཐོང་བསྒོམས་པས་འདོད་པ་ན་སྤྱོད་པའི་བསྒོམས་པས་སྤང་བར་བྱ་བའི་ཉོན་མོངས་ཕལ་ཆེར་ནུབ། དགའ་བདེ་དང་བཅས་པའི་བསམ་གཏན་དང་པོའི་དངོས་གཞི་འཐོབ། མངོན་ཤེས་རྫུ་འཕྲུལ་ཡང་མཚན་ཉིད་པ་འབྱུང་རིམ་གྱིས་བསྒོམས་པས་ཅི་ཡང་མེད་མན་ཆད་ཀྱི་ཉོན་མོངས་པ་མངོན་གྱུར་ཐམས་ཅད་སྤངས་ཏེ་སྲིད་རྩེའི་སེམས་འཐོབ་པ་ཡིན་ལ། བསམ་གཏན་དང་པོའི་ཉེར་བསྡོགས་ཐོབ་པའི་སྟེང་ནས་བདག་མེད་གཉིས་ཀྱི་དོན་ལ་དཔྱོད་པའི་ལྷག་མཐོང་བསྒོམས་པས་ཉན་ཐོས་ཀྱི་མཐོང་ལམ་ལྟ་བུ་ཐོབ་ན་ཞི་རགས་ཀྱི་རྣམ་པ་ཅན་གྱིས་བསམ་གཏན་དང་པོའི་དངོས་གཞི་ཡན་ཆད་དངོས་སུ་མ་བསྒོམས་ཀྱང་དེ་དག་གི་ཡོན་ཏན་ཤུགས་ཀྱིས་འཐོབ་ཅིང་། ཐེག་པ་གསུམ་པོ་གང་རུང་གི་སྒོམ་ལམ་བར་ཆད་མེད་ལམ་གྱིས་ཉོན་མོངས་པའི་གཉེན་པོ་བྱས་ཏེ་རྩ་བ་ནས་
སྤོང་བ་ལགས་སོ། །སྨྲས་པ། ལེ་ལོ་ལ་སོགས་ཉེས་པའི་རང་མཚང་རིག །དད་སོགས་འདུ་བྱེད་བརྒྱད་ཀྱི་ཕན་ཡོན་མཐོང་། །སེམས་གནས་དགུ་པས་ཉེར་དྲངས་ཤིན་སྦྱངས་ཀྱི། །བདེ་གསལ་མི་རྟོག་ཞི་གནས་ཏིང་འཛིན་མཚར། །སྔོན་ཆད་ཅུང་ཟད་བསྒོམས་བློའི་ཉམས་ལེན་གྱིས། །ཉོན་མོངས་དུག་གསུམ་མ་བྲིད་བག་ལ་ཞ། །བདེར་གནས་ཆོས་པའི་བཟང་བརྫུ་རྐྱེན་ངན་གྱི། །ཕྲ་མོའི་གནོད་པས་ཐ་མལ་རང་མཚང་སྟོན། །མུ་སྟེགས་བྱེད་དང་ཐུན་མོང་སེམས་གནས་ལ། །མ་དུལ་ཡིད་འདི་ཅུང་ཟད་མི་གནས་ཀྱང་། །སྲིད་ཞིའི་མཐའ་ལས་འདས་པའི་སངས་རྒྱས་སུ། །ཞལ་གྱིས་འཆེས་རྣམས་མཛུབ་མོ་ནང་དུ་ཁུག །དཀའ་གནད་འདི་འདྲས་མངོན་ཤེས་རྫུ་འཕྲུལ་སོགས། །འགྲུབ་པར་གསུང་རབ་དགོངས་འགྲེལ་ལས་བཤད་ན། །ལྟོ་འགྲངས་ཉི་མས་དྲོས་པའི་འགྱིང་བག་ལ། །གྲུབ་རྟགས་བྲག་ལས་ཆུ་བོ་རྡོལ་བ་བཞིན། །ཀྱེ་མ་སྔོན་ཆད་བློ་བྲེད་རྣམ་གཡེང་གིས། །དོན་མེད་སྟོང་པའི་ངང་དུ་མི་ཚེ་ཟད། །ད་ནི་འདུ་འཛིས་དབེན་པའི་གནས་མཆོག་ཏུ། །ཚུལ་འདི་ཉམས་སུ་ལེན་ལ་རྣམ་པར་སྤྲོ། །སེམས་དང་ལུས་ལ་ཁྱབ་པའི་བདེ་བ་ཡིས། །ཅི་བྱས་དགེ་བའི་ཕྱོགས་སུ་བཀོལ་ནུས་པའི། ས་ཆོད་འདི་ལྟའི་གནད་འགག་ཤེས་གྱུར་ན། གྲགས་ཅན་སངས་རྒྱས་དེ་ཡང་མི་རིང་ཉེ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དྲུག་པ་ཤེས་རབ་ཀྱི་ཕར་ཕྱིན་ནི། དེ་ཁོ་ན་ཉིད་ཀྱི་དོན་འཇལ་བ་དོན་དམ་རྟོགས་པའི་ཤེས་རབ། རིག་པའི་གནས་ལྔ་ལ་མཁས་པ་ཀུན་རྫོབ་རྟོགས་པའི་ཤེས་རབ། སེམས་ཅན་གྱི་འདི་ཕྱིའི་དོན་ཁ་ན་མ་ཐོ་བ་མེད་པ་སྒྲུབ་ཚུལ་ཤེས་པའི་ཤེས་རབ་རྣམས་ཀྱི་སེམས་ཀྱི་གོམས་པ་མཐར་ཕྱིན་པ་ན་ཤེས་རབ་ཀྱི་ཕ་རོལ་ཏུ་ཕྱིན་པ་
ཡོངས་སུ་རྫོགས་པ་ཡིན་ནོ། །ཤེས་རབ་བརྒྱ་བ་ལས། མཐོང་དང་མ་མཐོང་ཡོན་ཏན་འདི། །ཀུན་གྱི་རྩ་བ་ཤེས་རབ་ཡིན། །དེ་ལྟར་གཉིས་ཀ་བསྒྲུབ་པའི་ཕྱིར། ཤེས་རབ་ཡོངས་སུ་བཟུང་བར་བྱ། །ཞེས་རང་གི་ཤ་བྱིན་ཡང་སྨན་གྱི་སྡོང་པོ་ལས་བླངས་པ་ལྟར་ང་རྒྱལ་དང་ཞུམ་པ་མེད་པའི་སྦྱིན་པ་སོགས་ཕར་ཕྱིན་དང་པོ་ལྔ་རྣམ་པར་དག་པ་དང་། འཁོར་ལོས་སྒྱུར་བའི་རྒྱལ་པོ་བྱང་ཆུབ་སེམས་དཔའ་འདོད་ཡོན་གྱི་དབང་དུ་མི་འགྲོ་བ་ཡང་ཤེས་རབ་ལ་རག་ལུས་ཤིང་མདོར་ན་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་མཐའ་དག་ཤེས་རབ་ལ་བརྟེན་ནས་འབྱུང་བའི་ཕྱིར་ན་འདི་ཉིད་དོན་དུ་གཉེར་དགོས་ལ། གཉེར་བྱའི་ཤེས་རབ་དེ་ལ་རིགས་མང་དུ་ཡོད་པའི་ནང་ནས་ཉོན་མོངས་པ་ཕྲ་རགས་ཞི་བར་བྱེད་པར་ལྷག་མཐོང་སྒོམ་པ་གལ་ཆེ་ཞིང་། དེ་ཡང་ཉོན་མོངས་པ་མངོན་གྱུར་མགོ་གནོན་པའི་འཇིག་རྟེན་པའི་ཞི་རགས་ཀྱི་ལྷག་མཐོང་དོན་དུ་གཉེར་བྱ་ཡིན་ནམ་སྙམ་ན། བསྔགས་འོས་བསྔགས་བསྟོད་ལས། ཁྱོད་ཀྱི་ཆོས་ལ་མི་ཕྱོགས་པའི། །སྐྱེ་བོ་གཏི་མུག་གིས་ལྡོངས་པ། །སྲིད་རྩེའི་བར་དུ་སོང་ནས་ཀྱང་། །སྡུག་བསྔལ་ཡང་འབྱུང་སྲིད་པ་བསྒྲུབ། །ཅེས་ཕྱི་རོལ་པ་སོགས་ཅི་ཡང་མེད་མན་ཆད་ཀྱི་ཉོན་མོངས་པ་མངོན་གྱུར་ཐམས་ཅད་སྤངས་ཏེ་སྲིད་རྩེའི་སེམས་ཐོབ་ཀྱང་འཁོར་བ་ལས་མི་གྲོལ་བས་ཏིང་འཛིན་རྒྱལ་པོ་ལས། ཏིང་ངེ་འཛིན་དེ་སྒོམ་པར་བྱེད་མོད་ཀྱི། །དེས་ནི་བདག་ཏུ་འདུ་ཤེས་འཇིག་མི་བྱེད། །དེ་ཡིས་ཉོན་མོངས་ཕྱིར་ཞིང་རབ་འཁྲུག་སྟེ། །ལྷག་སྤྱོད་འདི་ན་ཏིང་འཛིན་སྒོམ་པ་བཞིན། །ཞེས་བདག་འཛིན་མ་སྤངས་པའི་མཐུས་མུ་སྟེགས་ལྷག་སྤྱོད་བཞིན་ཉོན་མོངས་འཁྲུགས་ཏེ། སླར་ཡང་གནས་འོག་མའི་སེམས་སུ་
ལྷུང་བས་ན་སྐྱེས་བུ་ཆེན་པོའི་གདུལ་བྱ་རྣམས་ཀྱི་དོན་དུ་གཉེར་བྱ་ག་ལ་ཡིན། འོ་ན་སྔར་འབད་པས་བསྒོམས་པའི་ཞི་གནས་དེ་ལ་དོན་མེད་དམ་སྙམ་ན། ཁྱོད་ཀྱི་བསྟན་པའི་རྗེས་འགྲོ་བ། །བསམ་གཏན་དངོས་གཞི་མ་ཐོབ་ཀྱང་། །བདུད་ཀྱི་མིག་རས་བཙའ་བཞིན་དུ། །སྲིད་པ་དག་ནི་བཟློག་པར་བགྱིད། །ཅེས་བསམ་གཏན་དང་པོའི་ཉེར་བསྡོགས་ཐོབ་པའི་རྗེས་སུ་བསམ་གཏན་དང་པོའི་དངོས་གཞི་སྒྲུབ་པ་སོགས་ཀྱི་རྩོལ་བ་བཞག་ནས་འཇིག་རྟེན་ལས་འདས་པའི་ལྷག་མཐོང་བདག་མེད་པའི་དོན་བསྒོམས་པས་འཁོར་བ་ལས་གྲོལ་བའི་ཐར་པ་ཐོབ་པར་འགྱུར་རོ། །དེ་ལྟར་ན་ཕར་ཕྱིན་ཐ་མའི་ཉམས་ལེན་འདིས་ཐམས་ཅད་མཁྱེན་པ་ཐོབ་པར་མི་འགྱུར་ན་སྐྱེས་བུ་འབྲིང་ལས་ལྷག་པའི་ལྷག་ཆོས་གང་ཡང་མ་བྱུང་བར་དོགས་ཆེ། དེ་ལྟར་ལོག་རྟོག་ཤར་བ་ནི་གཡག་ཞར་བའི་རྩྭ་ལྟར་ཕྱོགས་རེའི་མིག་ཅན་དུ་སོང་བའི་ཉེས་པས་ནོངས་པས་སྐྱེས་བུ་འབྲིང་དང་མི་འདྲ་བའི་ཁྱད་པར་གོང་དུ་བྱང་ཆུབ་ཀྱི་སེམས་དང་རྒྱལ་སྲས་ཀྱི་སྤྱོད་པར་སློབ་ཚུལ་རྒྱས་པར་སོང་ཡང་། རྗེ་བླ་མས། གནས་ལུགས་རྟོགས་པའི་ཤེས་རབ་མི་ལྡན་ན། །ངེས་འབྱུང་བྱང་ཆུབ་སེམས་ལ་གོམས་བྱས་ཀྱང་། །སྲིད་པའི་རྩ་བ་གཅོད་པར་མི་ནུས་པས། །དེ་ཕྱིར་རྟེན་འབྲེལ་རྟོགས་པའི་ཐབས་ལ་འབད། །ཅེས་བྱང་ཆུབ་ཀྱི་སེམས་ཡོད་པར་མ་ཟད་དེ་དང་ཟུང་དུ་འབྲེལ་བའི་ལམ་ལྷག་པ་ཤེས་རབ་ཀྱི་བསླབ་པའི་ལམ་སྒོམ་པ་ཡིན་གྱི་སྐྱེས་བུ་འབྲིང་མན་ཆད་ལྟར་ཕྱོགས་རེ་བའི་ལམ་མིན་ནོ། །འོ་ན་ཞི་ལྷག་གཉིས་སྐྱེས་བུ་འབྲིང་གི་སྐབས་ཀྱི་ཏིང་འཛིན་དང་ཤེས་རབ་ཀྱི་བསླབ་པའི་ཉམས་ལེན་དུ་གཏོགས་ཚེ་རྒྱལ་སྲས་ཀྱི་སྤྱོད་པ་རྣམས་དང་ཟུང་དུ་འབྲེལ་དགོས་པ་ཅི་དགོས་པ་ཅི་ཡིན་སྙམ་ན། །རིགས་པ་དྲུག་ཅུ་པ་
ལས། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བ། དམ་པ་གཉིས་ནི་ཐོབ་པར་ཤོག །ཅེས་སངས་རྒྱས་འགྲུབ་པ་ལ་གཟུགས་ཀྱི་སྐུ་དང་ཆོས་ཀྱི་སྐུ་གཉིས་ཐོབ་དགོས་ལ། དེ་གང་ལ་བརྟེན་ནས་བསྒྲུབ་ན། དཔལ་ལྡན་ཟླ་བས། ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། །དེ་གཉིས་རྣམ་དབྱེ་གང་གིས་མི་ཤེས་པ། །དེ་ནི་རྣམ་རྟོག་ལོག་པའི་ལམ་ངན་ཞུགས། །ཞེས་པའི་ཤུགས་ལ། དེ་གཉིས་རྣམ་དབྱེ་གང་གིས་ལེགས་ཤེས་པ། །དེ་ནི་ཕྱིན་ཅི་མ་ལོག་ལམ་བཟང་ཞུགས། །ཞེས་གཞིའི་ལྟ་བ་ཀུན་རྫོབ་བདེན་པ་སྣང་བའི་ཆ་ཆོས་ཐམས་ཅད་ཐ་སྙད་དུ་གྲུབ་ཅིང་རྒྱུ་འབྲས་མ་འཆོལ་བར་འབྱུང་བའི་རྟེན་ཅིང་འབྲེལ་བར་འབྱུང་བ་དང་། དོན་དམ་བདེན་པ་སྟོང་པའི་ཆ་ཆོས་ཐམས་ཅད་རང་གི་ངོ་བོས་གྲུབ་པ་ཅུང་ཟད་ཙམ་ཡང་མེད་པ་གཉིས་ཕྱིན་ཅི་མ་ལོག་པར་ཤེས་ན་ལམ་གྱི་གནས་སྐབས་སུ་སྦྱིན་སོགས་ཀྱི་སྤྱོད་པ་རླབས་པོ་ཆེས་ཚོགས་གསོག་པ་དང་སྟོང་པ་ཉིད་ཀྱི་ལྟ་བ་ཟབ་མོ་ཟུང་འབྲེལ་དུ་ཉམས་སུ་བླངས་པ་ལ་བརྟེན་ནས་འབྲས་བུ་གཟུགས་ཀྱི་སྐུ་དང་ཆོས་ཀྱི་སྐུ་གཉིས་ཐོབ་པར་འགྱུར་བས་སྐྱེས་བུ་ཆེན་པོ་བ་རྣམས་ཀྱི་ཐོབ་བྱ་མཐར་ཐུག་པ་ཡིན་པས། ཐོབ་བྱེད་ཀྱི་ཐབས་བསོད་ནམས་ཀྱི་ཚོགས་གསོག་ཚུལ་གྱི་ཉམས་འཁྲིད་སྔོན་དུ་སོང་ཟིན་ནས། ཡེ་ཤེས་ཀྱི་ཚོགས་གསོག་པའི་ཉམས་ལེན་གྱི་རིམ་པ་ལ་སྤྱིར་འཕགས་པའི་ཡུལ་དུ་གྲུབ་མཐའ་སྨྲ་བ་བཞི་སོ་སོར་ཡོད་པ་ནས་ལྟ་བ་མི་མཐུན་ཡང་གཙོ་བོ་ནི་དབུ་སེམས་གཉིས་ཀྱི་ལུགས་འདི་གྲགས་ཆེ་ཞིང་།
དེ་ཡང་རིན་ཆེན་འཕྲེང་བ་ལས། ཆོས་འདི་ཟབ་ཕྱིར་སྐྱེ་བོ་ཡིས། །ཤེས་པར་དཀའ་བ་ཐུགས་ཆུད་དེ། །དེས་ན་ཐུབ་པ་སངས་རྒྱས་ནས། །ཆོས་བསྟན་པ་ལས་ལོག་པར་གྱུར། །ཅེས་ལས་འབྲས་དང་སྟོང་ཉིད་ཀྱི་རྣམ་གཞག་མི་འགལ་བར་འཇོག་ཤེས་པའི་གནད་འདི་གཞན་གྱིས་རྟོག་དཀའ་བས་སངས་རྒྱས་ཀྱིས་ཆོས་ཀྱི་འཁོར་ལོ་བསྐོར་བར་ཞལ་གྱིས་བཞེས་པ་དཀའ་དཀའ་ལྟར་མཛད་ལ། དཀའ་བའི་གནད་དེ་འཁྲུལ་བ་མེད་པར་སྟོན་པ་པོ་ནི་རྒྱལ་བས་ལང་ཀར་གཤེགས་པའི་མདོ་ལས་ལུང་བསྟན་པའི་དཔལ་མགོན་འཕགས་པ་ཀླུ་སྒྲུབ་ཡིན་ཞིང་། དེ་ཉིད་ཀྱི་རྗེས་སུ་འབྲང་བར་ཁས་འཆེ་བ་མང་ན་ཡང་ཆོས་ཐམས་ཅད་རང་བཞིན་གྱིས་གྲུབ་པར་ཁས་ལེན་པའི་ལྟ་བ་ཙམ་གྱིས་ཐར་པའང་འཐོབ་པའི་སྐབས་མེད་པས་དཔལ་ལྡན་ཟླ་བས། སློབ་དཔོན་ཀླུ་སྒྲུབ་ཞབས་ཀྱི་ལམ་ལས་ནི། །ཕྱི་རོལ་གྱུར་ལ་ཞི་བའི་ཐབས་མེད་དོ། །དེ་དག་ཀུན་རྫོབ་དེ་ཉིད་བདེན་ལས་ཉམས། །དེ་ལས་ཉམས་པས་ཐར་པ་འགྲུབ་ཡོད་མིན། །ཞེས་གསུངས་པའི་ཕྱིར་ན་མགོན་པོ་ཀླུ་སྒྲུབ་ཀྱི་དགོངས་པ་འཁྲུལ་པ་མེད་པར་རྟོགས་དགོས་པ་དེ་འགྲེལ་བྱེད་གང་གི་རྗེས་སུ་འབྲང་ན། ཇོ་བོ་ཆེན་པོས། །སྟོང་ཉིད་གང་གིས་རྟོགས་ཤེ་ན། །དེ་བཞིན་གཤེགས་པས་ལུང་བསྟན་ཅིང་། །ཆོས་ཉིད་བདེན་པ་གཟིགས་པ་ཡི། །ཀླུ་སྒྲུབ་སློབ་མ་ཟླ་གྲགས་ཡིན། དེ་ལས་བརྒྱུད་པའི་མན་ངག་གིས། །ཆོས་ཉིད་བདེན་པ་རྟོགས་པར་འགྱུར། །ཞེས་དཔལ་ལྡན་ཟླ་བ་གྲགས་པས་བཀྲལ་བའི་རྗེས་སུ་འབྲངས་ཏེ་ཉམས་སུ་ལེན་པ་ལ་བཞི་བརྒྱ་པའི་འགྲེལ་པ་ལས། དེ་ལ་བདག་ཅེས་བྱ་བ་ནི་གང་ཞིག་དངོས་པོ་རྣམས་ཀྱི་གཞན་ལ་རག་མ་ལས་པའི་ངོ་བོ་རང་བཞིན་ཏེ་དེ་མེད་པ་ནི་བདག་མེད་པའོ། །དེ་ནི་ཆོས་དང་གང་ཟག་
གིས་དབྱེ་བས་གཉིས་སུ་རྟོགས་ཏེ། ཆོས་ཀྱི་བདག་མེད་པ་དང་གང་ཟག་གི་བདག་མེད་པའོ། །ཞེས་བདག་མེད་པའི་ཚུལ་གཉིས་པོ་གོ་རིམ་ཇི་ལྟ་བུ་སྙམ་ན། བསོད་ནམས་མིན་པ་དང་པོར་བཟློག །བར་དུ་བདག་ནི་བཟློག་པ་དང་། །ཐ་མར་ལྟ་ཞིག་ཀུན་བཟློག་པ། །གང་གིས་ཤེས་དེ་མཁས་པ་ཡིན། །ཞེས་ལས་རྒྱུ་འབྲས་མེད་པར་བལྟ་བའི་ལྟ་ངན་སོགས་ནི་སྔར་སྐྱེས་བུ་ཆུང་འབྲིང་གི་སྐབས་ནས་བཟློག་ཟིན་པས། རེ་ཞིག་ཉེས་ཀུན་འབྱུང་བའི་གནས། །མེད་ཉིད་རྣམ་པར་བཟློག་ཟིན་གྱི། །ཞེས་གསུངས་ནས། བར་དུ་གང་ཟག་གི་བདག་དང་ཐ་མར་ཆོས་ཀྱི་བདག་བཟློག་དགོས་པའི་གོ་རིམ་ཉམས་ལེན་མན་ངག་གི་དབང་དུ་མཛད་ལ། གཞུང་ཆེན་པོ་རྣམས་སུ་ཆོས་ཀྱི་བདག་མེད་ཐོག་མར་བྱུང་ནའང་ཕྱག་ལེན་དུ་སྤྱིར་བཏང་དམིགས་བསལ་ཕྱེད་པའི་གོ་རིམ་མ་ནོར་བ་ནི་གནད་དམ་པ་སྟེ། ལས་འབྲས་ལ་ཡིད་མི་ཆེས་པའི་གང་ཟག་གི་རྒྱུད་ལ་བདག་མེད་པའི་ལྟ་བ་མི་སྐྱེ་ཞིང་། གང་ཟག་གི་བདག་ཏུ་འཛིན་པ་མ་བཟློག་ན་ཆོས་ཀྱི་བདག་འཛིན་བཟློག་པར་མི་ནུས་སོ། །དེས་ན་སྔར་ཆགས་སོགས་ཉོན་མོངས་པ་སོ་སོའི་གཉེན་པོ་རེ་རེས་རང་གི་ངོ་སྐལ་གྱི་ཉེས་པ་སེལ་ཀྱང་། ཉེས་པ་མཐའ་དག་མི་སེལ་བ་ནི་ཉེས་པ་ཐམས་ཅད་ཀྱི་རྩ་བ་མ་རིག་པ་མ་བསལ་བའི་རྐྱེན་ཡིན་པས་བཞི་བརྒྱ་པ་ལས། ལུས་ལ་ལུས་དབང་ཇི་བཞིན་དུ། །གཏི་མུག་ཀུན་ལ་གནས་གྱུར་ཏེ། །དེ་ཕྱིར་ཉོན་མོངས་ཐམས་ཅད་ཀྱང་། །གཏི་མུག་བཅོམ་པས་བཅོམ་པར་འགྱུར། །རྟེན་ཅིང་འབྲེལ་བར་འབྱུང་བ་ནི། །མཐོང་ན་གཏི་མུག་འབྱུང་མི་འགྱུར། །དེ་ཕྱིར་འབད་པ་ཀུན་གྱིས་འདིར། །གཏམ་དེ་ཁོ་ན་བསྙད་པར་བྱ། །ཞེས་དཔེར་
ན་ཤིང་གི་རྩ་བ་ནས་བཅད་ན་ཡལ་ག་དང་མེ་ཏོག་མཐའ་དག་བསྐམས་འགྲོ་བ་ལྟར། བདག་འཛིན་སྤངས་ན་ཉོན་མོངས་པ་ཐམས་ཅད་ཞི་བར་གསུངས་པའི་ཕྱིར་ན་འཇུག་པ་ལས། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བར་བློ་ཡིས་མཐོང་། ཅེས་དང་། རིན་ཆེན་ཕྲེང་བ་གྱུར་ཅིང་། །བདག་ནི་འདི་ཡི་ཡུལ་དུ་རྟོགས་བྱས་ནས་། །རྣལ་འབྱོར་པ་ཡིས་བདག་ནི་འགོག་པར་བྱེད། ལས། ཇི་སྲིད་ཕུང་པོའི་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །ལས་ལས་ཀྱང་ནི་སྐྱེ་བ་ཡིན། །ཞེས་བདག་མེད་གཉིས་གཏན་ལ་འབེབས་པ་ནི་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་མགོན་པོ་འཇམ་དཔལ་དབྱངས་ལ་གསོལ་བ་བཏབ་པས་ལྟ་བ་རྣམ་དག་ཐུགས་རྒྱུད་ལ་སྐྱེ་བའི་ཐབས་བསྟེན་པ་བཞིན་མངོན་དུ་གྱུར་ནས་སློབ་མ་རྣམས་འཁྲིད་པའི་ཕྱག་བཞེས་ལ་རྒྱུད་པའི་རྣམ་གྲངས་སོ་སོར་ཡོད་པའི་མཁས་གྲུབ་དགེ་ལེགས་དཔལ་བཟང་ནས་བརྒྱུད་པ་ལ་སྔོན་འགྲོ་དང་དངོས་གཞི་གཉིས་ཀྱི་སྒོ་ནས་འཁྲིད་པ་དང་། མཁས་གྲུབ་ཤེས་རབ་སེང་གེ་ནས་བརྒྱུད་པ་ལ་དྲན་པ་བཞི་ལྡན་གྱི་སྒོ་ནས་འཁྲིད་པའི་ཚུལ་གཉིས། དེ་གཉིས་གང་བྱས་ཀྱང་ཁྱད་པར་མེད་ནའང་། སྐབས་འདིར་བྱང་ཆུབ་ལམ་གྱི་རིམ་པའི་ཤེར་ཕྱིན་གྱི་ཉམས་འཁྲིད་ཀྱི་སྐབས་ཡིན་པས་སྔོན་འགྲོ་རྣམས་གོང་དུ་སོང་ཟིན་པའི་ཉམས་ལེན་རྣམས་གོ་རིམ་ལྟར་འབྱུང་བའི་དོན་གྱིས་བཏང་སྙོམས་སུ་བཞག་སྟེ་དངོས་གཞིའི་ཉམས་ལེན་ལ་གང་ཟག་གི་བདག་མེད་ཉམས་སུ་ལེན་པ་དང་། ཆོས་ཀྱི་བདག་མེད་ཉམས་སུ་ལེན་པ་གཉིས། དང་པོ་ནི་རྟེན་འབྲེལ་གྱི་རིགས་པ་ལྟ་བུ་ལ་གནད་གསུམ་དང་། རྣམ་བདུན་གྱི་རིགས་པ་ལ་གནད་དགུ་ལ་སོགས་པ་རྣམ་གྲངས་
མང་ཞིང་། ལྷག་མཐོང་ཆེ་ཆུང་སོགས་རྗེ་བདག་ཉིད་ཆེན་པོའི་གསུང་རབ་རྣམས་སུ་རྒྱ་ཆེར་གསུངས་ཀྱང་གཙོ་བོར་གནད་བཞི་ལ་བརྟེན་ནས་དཔྱད་པ་མཛད་པ་འདི་ཉིད་ལུགས་འདིའི་ཤིང་རྟ་བ་ཆེན་པོ་ཐམས་ཅད་མཁྱེན་པ་ནོར་བཟང་རྒྱ་མཚོ་ཡབ་སྲས་ཀྱིས་ཐུགས་ཉམས་སུ་མྱོང་བ་ཞལ་ནས་ཞལ་དུ་བརྒྱུད་པའི་ཉམས་འཁྲིད་ལ་གནད་དང་པོ་ངར་འཛིན་ལྷན་སྐྱེས་ཀྱིས་ང་ཇི་ལྟར་བཟུང་པའི་ཚུལ་ངེས་པའི་གནད་ནི་བུདྡྷ་པཱ་ལི་ཏ་ལས། ཆོས་ཐམས་ཅད་བདག་མེད་དེ་ཞེས་པའི་བདག་དང་མེད་རྒྱུའི་དགག་བྱ་གཉིས་པོ་དེ་བཅར་གྱིས་ངོས་མ་ཟིན་ན་དགྲ་གང་དུ་ཡོད་མ་ཤེས་པར་དམག་འདྲེན་པ་དང་འབེན་རྩད་མ་ཆོད་པར་མདའ་འཕེན་པ་དང་འདྲ་བས་སྤྱོད་འཇུག་ལས། བཏགས་པའི་དངོས་ལ་མ་རེག་པར། །དེ་ཡི་དངོས་མེད་འཛིན་མ་ཡིན། །ཞེས་དགག་བྱའི་དོན་སྤྱི་ལེགས་པར་བློ་ལ་མ་ཤར་ན་དེ་བཀག་པའི་བདག་མེད་ཀྱི་དོན་མི་ངེས་པར་གསུངས་པས་གང་ཟག་ཅེས་བྱ་བ་ནི་འགྲོ་བ་རིགས་དྲུག་དང་ཐེག་པ་གསུམ་གྱི་སྐྱེ་འཕགས་ལ་སོགས་པའི་གང་ཟག་རྣམས་ཡིན་ལ། དེ་བློས་བཏགས་པ་མ་ཡིན་པར་རང་ངོས་ནས་ཚུགས་ཐུབ་ཏུ་གྲུབ་པའི་སྡོད་ལུགས་དེས་བདག་གམ་རངབཞིན་ཞེས་བྱ་བ་དེ་ཡིན་ནོ། །དེ་ཡང་གཞི་གང་ཟག་གི་སྟེང་དུ་ངའམ་བདག་ཏུ་འཛིན་པའི་ངར་འཛིན་ལྷན་སྐྱེས་དེ་ལ་གདགས་གཞིའི་སྟེང་དུ་རྟོག་པས་བཏགས་ཙམ་གྱིས་ཁྱད་པར་དུ་བྱས་ནས་ངར་འཛིན་པ་དང་རང་བཞིན་གྱིས་གྲུབ་པས་ཁྱད་པར་དུ་བྱས་ནས་ངར་འཛིན་པ་དང་དེ་གཉིས་གང་གིས་ཀྱང་ཁྱད་པར་དུ་མ་བྱས་པའི་ངར་འཛིན་པ་དང་གསུམ་ཡོད་པའི་དང་པོ་ནི་དབུ་མའི་ལྟ་བ་རྒྱུད་ལ་སྐྱེས་
པའི་གང་ཟག་གི་ངར་འཛིན་པའི་བློ། གཉིས་པ་ནི་སྐབས་འདིར་གཉེན་པོས་འཇོམས་པར་བྱེད་རྒྱུའི་ངར་འཛིན་ལྷན་སྐྱེས་མཚན་ཉིད་པ། གསུམ་པ་ནི་གྲུབ་མཐས་རྒྱུད་མ་བསླད་པའི་སོ་སྐྱེ་རྣམས་ལ་མིང་གིས་བཏགས་པ་དང་རང་བཞིན་གྱིས་གྲུབ་པའི་དབྱེ་བ་མེད་པས་དེ་རྣམས་ཀྱི་རྒྱུད་ཀྱི་ང་འཇོག་པའི་ཐ་སྙད་པའི་ཚད་མ་ཡིན་ལ། དེ་ཡང་རང་ཅག་རྣམས་ཀྱི་རྒྱུད་ལ་གཉིད་ལོག་པ་དང་མ་ལོག་པའི་གནས་སྐབས་ཐམས་ཅད་དུ་ངའོ་སྙམ་པའི་བློ་དམ་སྦྲིང་སྦྲིང་བ་ཞིག་ཡོད་ཀྱང་། མེ་ལོང་དང་བྱད་བཞིན་གྱི་གཟུགས་བརྙན་ལྟར་བདེ་སྡུག་གི་རྐྱེན་དང་ཕྲད་པ་ན་བློ་མངོན་གྱུར་ཤུགས་ཤིན་ཏུ་ཆེ་ཞིང་། རྐྱེན་དང་མ་ཕྲད་པའི་གནས་སྐབས་སུ་ཅུང་ཟད་མི་གསལ་བའི་ཚུལ་དུ་འོང་བས་ད་ལྟའི་ལྟ་འཁྲིད་པ་ཕལ་ཆེར་དག་དེ་ལྟ་བུའི་བློ་མངོན་གྱུར་ཡིན་མིན་གྱི་རྟོག་དཔྱོད་མེད་པར་ངར་འཛིན་ལྷན་སྐྱེས་ཀྱིས་ང་ཇི་ལྟར་བཟུང་ཚུལ་སོགས་ཚིག་སྐམ་རེ་ལ་བརྟེན་ནས་ཉམས་སུ་ལེན་པ་སྐད་བྱེད་པ་ནི་མིའི་བྱད་དབྱིབས་འོལ་ལེ་བ་ཞིག་མཐོང་བ་ལ་འདི་ནི་ཁ་སང་གི་རྐུན་མ་ཆེ་གེ་མོའོ་ཞེས་མཛུབ་མོ་འཛུགས་པ་ལྟར་གནད་དུ་ཡེ་མི་འགྲོ་བས་ཐོག་མར་རང་ཉིད་ལ་དངོས་སུ་གཞན་གྱིས་ཕན་གནོད་བྱས་པའི་བདེ་སྡུག་གི་རྟོག་པ་མངོན་གྱུར་ཡོད་ན་དང་། མེད་ན་སྔར་བྱུང་ཟིན་པ་ཞིག་བློས་ཡང་ཡང་གསལ་བཏབ་པས། དཔེར་ན་རང་ལ་མི་ཞིག་གིས་བརྐུས་ཁག་ལྟ་བུ་གཙུགས་པའམ་རང་འདོད་པའི་དོན་ཞིག་འགྲུབ་པར་བྱས་པ་ལྟ་བུ་ལ། ངས་རྐུན་མ་བརྐུ་སྙམ་པ་ཡིད་ཀྱི་དགུ་ལའང་མེད་ན་བརྐུས་པའི་ཁག་འདི་ལྟ་བུ་འཛུགས་པ་སྙམ་དུ་ཕ་རོལ་གྱི་མི་དེ་ལ་ཞེ་སྡང་དྲག་པོ་དང་བཅས་ཏེ་བརྐུས་ཁག་འཛུགས་ཡུལ་གྱི་ང་ཞིག་སྙིང་གི་དཀྱིལ་
ནས་དམ་སྦྲིང་སྦྲིང་བ་མིག་གིས་མཐོང་རྒྱུ་དང་ལག་པས་འཛིན་རྒྱུ་ཡོད་པ་ལྟ་བུ་འཆར་ལ། དེ་བཞིན་དུ་ཕན་འདི་ལྟ་བུ་བཏགས་བྱུང་སྙམ་པའི་ཕན་འདོགས་ཡུལ་གྱི་ང་ཞིག་སྙིང་གི་དཀྱིལ་ནས་ལྷང་ལྷང་འཆར་བས་ཚུལ་དེ་གཉིས་པོ་གང་ཡང་རུང་བ་ལ་བརྟེན་པའི་བློ་མངོན་གྱུར་ཞིག་གིས་ཀུན་རྟོག་རགས་པ་གཞན་རྣམས་བག་ལ་ཞ་བའི་ངར་འཛིན་ལྷན་སྐྱེས་ཇེ་འཕེལ་ལ་འགྲོ་བཅུག་པའི་མཚམས་ནས་བློ་དེས་ང་ཇི་ལྟར་བཟུང་བའི་ཚུལ་ཞིག་བརྟག་དགོས་པས། སེམས་གཅིག་ཏུ་འདི་གའི་སྟེང་ནས་ངར་འཛིན་པ་དང་དེའི་འཛིན་ཚུལ་གཉིས་ཀ་བརྟག་པ་ཤིན་ཏུ་དཀའ་ཞིང་། འཛིན་ཚུལ་གྱི་བློ་ཤུགས་ཆེས་ན་འཛིན་སྟངས་ཀྱི་ངར་ཆ་ཞིག་ནས་མི་གསལ་བ་ཞིག་འོང་བས་ཇི་ལྟར་བྱེད་ན། ཞི་གནས་ལ་གོམས་པའི་མཐུས་དཔྱད་འཇོག་གི་དམིགས་པ་གང་ཡིན་གྱི་ཐོག་ཏུ་འདྲིལ་བ་ཞིག་འོང་བས། སངས་རྒྱས་ཀྱི་སྐུ་གཟུགས་སོགས་ལ་དམིགས་པ་གཏོད་པ་ལྟ་བུའི་ཚབ་ལ་ངའོ་སྙམ་པའི་བློ་མངོན་གྱུར་དེ་འཆར་བཅུག་ནས་སེམས་བྱིངས་པོ་དེ་ལ་གསལ་བའི་ངར་ཆ་དང་བཅས་པའི་སྒོ་ནས་གནས་བཞིན་དུ་བློའི་ཟུར་ཞིག་གིས་འཛིན་ཚུལ་དང་གང་དུ་བཟུང་བ་ལྟ་བ་ནི་མི་གཉིས་ལམ་ལ་གཤིབས་ནས་འགྲོ་བའི་ཚེ་མིག་དངོས་གཞིས་ལམ་ལ་བལྟ་བ་དང་མིག་ཟུར་གྱིས་གྲོགས་ལ་བལྟ་བ་ལྟ་བུ་ཡིན་གསུང་། འདི་ཕན་ཆད་ལ་ངའོ་སྙམ་པའི་ང་དེ་སྙིང་གི་དཀྱིལ་དུ་ཡོད་པ་འདྲ་བ་ཞིག་ལས་གང་གི་སྟེང་དུ་གྲུབ་མ་ངེས་ལ། འདི་ནས་བཟུང་བློའི་ཟུར་གྱིས་ལེགས་པར་བརྟགས་པས་རེས་ལུས་ཀྱི་སྟེང་དུ་ཡོད་པ་འདྲ་བ། རེས་སེམས་ཀྱི་སྟེང་དུ་ཡོད་པ་འདྲ་བ། རེས་ཕུང་པོ་གཞན་
རྣམས་སོ་སོའི་སྟེང་དུ་ཡོད་པ་འདྲ་བ་སོགས་འཆར་ཚུལ་སྣ་ཚོགས་པ་ཞིག་བྱུང་བའི་མཐར་ལུས་སེམས་གཉིས་པོ་འདི་ཆུ་དང་འོ་མ་འདྲེས་པ་ལྟ་བུ་དབྱེར་མི་ཕྱེད་པ་ཞིག་གི་སྟེང་ནས་ང་དེ་ངའི་ངོས་ནས་ཡོད་པའི་རང་བཞིན་གྱིས་གྲུབ་པའི་ཚུགས་སེ་བ་གདོད་མ་ནས་གྲུབ་པ་ཞིག་ངོས་ཟིན་འོང་བས་དེ་ནི་གནད་དང་པོ་དགག་བྱ་ངེས་པ་ཡིན་པས་འདི་ལ་མྱོང་བ་གཏིང་མ་ཕྱིན་གྱི་བར་ལ་དཔྱད་དོ། །དེ་ལྟར་རྒྱུད་ལ་སྐྱེས་པ་ནས་ངར་འཛིན་ལྷན་སྐྱེས་ཀྱིས་བཟུང་བའི་ང་དེ་དང་རང་གི་ཕུང་པོ་ལྔ་པོ་རྣམས་ཆུ་ལ་ཆུ་བཞག་པ་ལྟ་བུའི་ཚུལ་གྱིས་ཚུགས་ཐུབ་ཏུ་གྲུབ་པར་ངོས་བཟུང་བ་དེ་ངེས་པ་ཡིན་ན་དཔྱད་པ་བྱས་པ་ཙམ་གྱིས་ངེས་ཤེས་རྙེད་དུ་འགྲོ་ལ། མིན་ན་རང་ཚུགས་མི་ཐུབ་པར་ཞིག་འགྲོ་བས་ཚིག་གསལ་ལས། བདག་ཏུ་འཛིན་པའི་ཡུལ་དེ་ཡང་ཕུང་པོའི་རང་བཞིན་ཅན་ནམ་ཕུང་པོ་ལས་ཐ་དད་པ་ཞིག་ཏུ་འགྱུར་གྲང་། ཞེས་ང་དེ་ཕུང་པོ་ལྔ་སོ་སོར་མ་ཕྱེ་བའི་སྟེང་དེ་ནས་དབྱེར་མེད་པའི་ཚུལ་གྱིས་གྲུབ་པ་འདྲ་བ་ཞིག་བྱུང་ཡང་། དཔེར་ན་བུམ་པ་ལྟ་བུ་གཞི་གཅིག་ལ་སོ་སོ་བ་དང་དབྱེར་མེད་པ་ཞེས་བྱ་བའི་ཐ་སྙད་བྱར་མེད་ལ། འདིར་ང་དང་ཕུང་པོ་ཞེས་གདགས་གཞི་དང་བཏགས་ཆོས་ཀྱི་རྣམ་པ་ཞིག་བྱུང་བས་ཕུང་པོ་ལྔའི་སྟེང་དུ་ང་རང་བཞིན་གྱིས་ཚུགས་ཐུབ་ཏུ་གྲུབ་པ་འདི། ང་དང་ཕུང་པོ་ལྔ་པོ་དེ་གཅིག་དང་ཐ་དད་གང་རུང་དུ་མེད་པའི་ཕུང་གསུམ་པ་ཞིག་ཡིན་ནམ་སྙམ་དུ་རྩད་བཅད་པ་ན། ཆོས་གཞན་གྱི་དངོས་པོ་ལ་དཔེར་བྱས་པས་མཐར་ཕུང་གསུམ་པ་མེད་པར་རྟོགས་ནས་གཅིག་དང་ཐ་དད་གང་རུང་ལས་མེད་པར་ཐག་ཆོད་པ་ནི་ཁྱབ་པ་ངེས་པའི་གནད་ཡིན་པས་སྔར་གདགས་གཞི་ཕུང་པོའི་སྟེང་དུ་བཏགས་ཆོས་ང་དེ་ཚུགས་ཐུབ་ཏུ་དབྱེ་བ་མེད་པར་ཡོད་ཡོད་
འདྲ་བ་དེ་གནད་གཉིས་པ་འདིའི་ཉམས་ལེན་བྱས་པས་སྔོན་མའི་ངེས་ཤེས་དེས་ཚོ་མ་ཐུབ་པར་གཅིག་དང་ཐ་དད་གང་རུང་དུ་ཐེ་ཚོམ་པ་ཡིན་པ་དེ་ག་མྱོང་བ་ཅུང་ཟད་ཐོན་པ་ཡིན་ནོ། །དེ་ནས་གཅིག་དང་ཐ་དད་གང་རུང་དུ་ཐེ་ཚོམ་པས་མི་ཆོག་པར་ཐག་གཅོད་དགོས་པས། བདེན་འཛིན་ལྷན་སྐྱེས་ཀྱིས་བཟུང་བའི་ང་དེ་ལུས་སེམས་གཉིས་དང་གཅིག་ཏུ་གྲུབ་བམ་སྙམ་དུ་བརྟགས་པ་ན་ལུས་དང་གཅིག་གམ་སེམས་དང་གཅིག་གང་རུང་ཞིག་ལས་འོས་མ་འདས། ལུས་དང་གཅིག་ན་ངའི་ལུས་ཞེས་ཁྱད་གཞི་ཁྱད་ཆོས་སྦྱར་བའི་སྒོ་ནས་སྨོས་མི་རིགས་པར་ངའི་ང་ཞེས་པའམ་ལུས་ཀྱི་ལུས་ཞེས་བརྗོད་དགོས་ལ། དེ་བཞིན་དུ་སེམས་ལ་ཡང་མཚུངས་པར་ངེས་ཤེས་བསྐྱེད། དེ་ལྟར་བསམས་པ་ན་ངག་གི་བརྗོད་ཚུལ་ཙམ་དུ་སོང་བས་ཧ་ཅང་ངེས་པ་མ་རྙེད་ན་འདི་སྙམ་དུ། རྩ་ཤེ་ལས། ཉེ་བར་ལེན་པ་མ་གཏོགས་པའི། །བདག་ཡོད་མ་ཡིན་བྱས་པའི་ཚེ། ཉེ་བར་ལེན་ཉིད་བདག་ཡིན་ན། ཁྱོད་ཀྱི་བདག་ནི་མེད་པ་ཡིན། །ཞེས་ང་དང་ཕུང་པོ་རྣམས་རང་བཞིན་གྱིས་གཅིག་པས་ན་དབྱེ་བ་གཏན་མེད་པའི་ཆ་ཐམས་ཅད་ནས་གཅིག་པར་འགྱུར། དེས་ན་ཆ་མེད་པ་ལས་འོས་མེད་པས་ཆ་མེད་ཅིག་གི་སྟེང་ནས་ང་ཞེས་ཕུང་པོ་ལྔའི་ཉེ་བར་ལེན་པ་པོ་ཞིག་དང་དེའི་བླང་བྱར་གྱུར་པའི་ཕུང་པོ་ལྔ་ཞེས་ཐ་དད་པ་གཉིས་སུ་འཇོག་ཏུ་མེད་པས་བདག་གི་ལུས་དང་བདག་གི་ཕུང་པོ་ཞེས་ཁས་བླངས་པ་དོན་མེད་དུ་འགྱུར་རོ་སྙམ་དུ་བསམ། དེས་ཀྱང་རྡོ་རུས་འཕྲོད་པ་ཞིག་མ་བྱུང་ན་ང་དང་ལུས་གཉིས་གཅིག་ཡིན་པའི་རྒྱུ་མཚན་གྱིས་ཤི་བའི་འོག་ཏུ་ལུས་མེར་སྲེག་པའི་ཚེ་ང་ཡང་མེར་སྲེག་དགོས་པའམ། ང་ཡང་སྲིད་ཕྱི་མར་ཉིང་མཚམས་སྦྱོར་བ་བཞིན་
དུ་ལུས་ཀྱང་ཉིང་མཚམས་སྦྱོར་དགོས། ཡང་ན་ལུས་དེ་ཉིང་མཚམས་སྦྱོར་རྒྱུ་མེད་པ་བཞིན་དུ་ང་ཡང་ཉིང་མཚམས་སྦྱོར་རྒྱུ་མེད་པའི་གནོད་བྱེད་འབབ་པར་བསམ། དེ་ལྟར་བསྒོམས་པས་ལུས་དང་གཅིག་པ་ཞིག་མིན་ནམ་སྙམ་འོང་བས་དེས་ན་སེམས་དང་གཅིག་གམ་སྙམ་དུ་སེམས་ན་ང་གོས་མེད་ན་འཁྱགས་པ་དང་ཟས་སྐོམ་མེད་ན་ལྟོགས་སྐོམ་གྱི་སྡུག་བསྔལ་འབྱུང་བས་ཤི་བའི་འོག་ཏུ་སེམས་གཟུགས་མེད་ཁམས་སུ་སྐྱེས་ན་དེའི་ཚེ་ཡང་ང་དང་གཅིག་པའི་ཕྱིར་ཟས་གོས་སོགས་གཟུགས་རགས་པ་ལ་ལོངས་སྤྱོད་དགོས་པའི་ཉེས་པ་བསམ་མོ། །འདི་ཙམ་ལས་དང་པོ་པ་ལ་སྐྱོང་བདེ་ཞིང་འཚམ་མོད། ཤེས་རབ་ཀྱིས་འཆུན་ན་ཅུང་ཟད་སྤྲོས་པ་མཐའ་ཆོད་པས་འཇུག་པ་ལས། གལ་ཏེ་ཕུང་པོ་བདག་ན་དེ་ཕྱིར་དེ། །མང་བས་བདག་དེ་དག་ཀྱང་མང་པོར་འགྱུར། །ཞེས་ཕུང་པོ་ལྔ་ཡོད་པ་བཞིན་དུ་ང་ཡང་ལྔར་འགྲོ་བའམ། ང་གཅིག་ལས་མེད་པ་ལྟར་ཕུང་པོ་ལྔར་མི་འཐད་པའི་རིགས་པས་བདག་མང་པོར་ཐལ་བའི་གནོད་པ་རྣམས་བསམ། དེ་བཞིན་དུ་རྩ་ཤེ་ལས། གལ་ཏེ་ཕུང་པོ་བདག་ཡིན་ན། །སྐྱེ་དང་འཇིག་པ་ཅན་དུ་འགྲུབ། ཞེས་ཕུང་པོ་ལྔ་རང་བཞིན་གྱིས་སྐྱེ་འཇིག་བྱེད་པས་ང་ཡང་དེ་ལྟར་སྐྱེ་འཇིག་བྱེད་པར་ཁས་ལེན་དགོས། དེས་ན་སྐྱེ་བ་སྔོན་མའི་ང་དང་ཚེ་འདིའི་ང་གཉིས་གཅིག་དང་ཐ་དད་གང་རུང་ལས་མ་འདས་ལ། གཅིག་ན་རང་བཞིན་གྱིས་གཅིག་པའི་ནུས་པས་སྐྱེ་བ་སྔོན་མའི་ང་དུད་འགྲོར་གྱུར་པའི་གླེན་ལྐུགས་དང་བཀོལ་སྤྱོད་ཀྱི་སྡུག་བསྔལ་རྣམས་སྐྱེ་བ་འདིའི་ང་མིར་གྱུར་པའི་གནས་སྐབས་སུ་ཡང་མྱོང་དགོས་ལ། ཚེ་འདིའི་མིའི་བདེ་བ་རྣམས་ཀྱང་སྔོན་མའི་དུད་འགྲོ་ལ་མྱོང་དགོས་པ་ཧ་ཅང་ཐལ་བ་སོགས་བསམ། དེ་བཞིན་དུ་འཇུག་
པ་ལས། གང་དག་རང་མཚན་ཉིད་ཀྱིས་སོ་སོ་བ། །དེ་དག་རྒྱུད་གཅིག་གཏོགས་པ་རིགས་མ་ཡིན། །ཞེས་སྐྱེ་བ་སྔོན་མའི་ང་དང་རྗེས་མའི་ང་རང་བཞིན་གྱིས་ཐ་དད་པ་ཡིན་ན་གཏན་ནས་འབྲེལ་མེད་པའི་ཐ་དད་པ་ཡིན་པས། དེས་ན་བདག་སྐྱེ་བ་སྔོན་མ་འདི་ལྟ་བུར་སྐྱེས་ཞེས་དྲན་པ་ཡང་མི་རིགས་ཏེ། ལྷས་བྱིན་གྱིས་སྐྱེ་བ་སྔོན་མ་མཆོད་སྦྱིན་དུ་སྐྱེས་པ་མི་དྲན་པ་བཞིན་ནོ། །གཞན་ཡང་བདག་ཉིད་བདེ་འགྲོར་སྐྱེ་བའི་ལས་བསགས་པ་ཡང་བྱས་པ་ཆུད་ཟོས་པར་འགྱུར་ཏེ། དེའི་འབྲས་བུ་མངོན་མཐོའི་རྣམ་སྨིན་རྣམས་གཞན་གྱིས་ལོངས་སྤྱོད་ནས་རང་ལ་མྱོང་རྒྱུ་མེད་པས་སོ། །ཅིའི་ཕྱིར་ན་ལས་བྱེད་པ་པོ་དང་འབྲས་བུ་མྱོང་བ་པོ་གཉིས་གཞི་ང་ཙམ་གཅིག་གི་སྟེང་དུ་མ་འདུས་པར་འབྲེལ་བ་མེད་པའི་ཕྱིར་རོ། །དེས་ན་ཚེ་སྔོན་མར་མ་བསགས་པའི་ལས་དེས་ཚེ་འདིར་ཕན་གནོད་འབྱུང་ན་ལས་མ་བྱས་པ་དང་ཕྲད་པར་འགྲོ་ཞིང་ཕན་གནོད་མི་འབྱུང་ན་ཚེ་འདིར་དགེ་སྡིག་ལ་སྤང་བླང་བྱས་པར་དགོས་པ་མེད་དེ་དེའི་འབྲས་བུ་ཕྱི་མའི་ང་ལ་མི་སྨིན་པ་སོགས་བསམས་པས་གནད་གསུམ་པ་བདེན་པའི་གཅིག་བྲལ་ངེས་པའི་གནད་ལ་ངེས་པ་རྙེད་ནས། ད་ང་དང་ཕུང་པོ་ལྔ་ཐ་དད་པ་ལས་འོས་མི་འདུག་སྙམ་པ་ན། འཇུག་པ་ལས། དེ་ཕྱིར་ཕུང་པོ་ལས་གཞན་བདག་མེད་དེ། །ཕུང་པོ་མ་གཏོགས་དེ་འཛིན་མ་གྲུབ་ཕྱིར། །ཞེས་རང་བཞིན་གྱིས་གྲུབ་པའི་ཐ་དད་དེ་ལ་འབྲེལ་མེད་ཅིག་དགོས་པས། ཕུང་པོ་ལྔ་པོ་ནང་ཕན་ཚུན་ནས་འདི་ནི་གཟུགས་ཀྱི་ཕུང་པོའོ་ཞེས་སོགས་སོ་སོར་ངོས་འཛིན་རྒྱུ་ཡོད་པ་ལྟར་ཕུང་པོ་ལྔ་བསལ་བའི་འོག་ཏུ་འདི་ནི་ངའོ་ཞེས་ངོས་འཛིན་རྒྱུ་དགོས་པ་ལ་ཕྲ་ཞིབ་གང་ལ་དཔྱད་ཀྱང་ཡེ་ནས་མི་རྙེད་ལ། མི་རྙེད་པའི་ཚུལ་དེ་ཡང་མི་རྙེད་ཅེས་པའི་ཚིག་སྐམ་ཙམ་གྱིས་རྗེས་
ཟློས་བྱས་པས་མི་ཆོག་པར། དཔེར་ན་བ་ལང་ལྟ་བུ་ཞིག་བོར་བའི་ཚེ་ལུང་པ་ཆེ་གེ་མོ་འདིའི་ནང་དུ་མེད་དོ་ཞེས་པའི་ཚིག་ཙམ་ལ་བདེན་པར་བཟུང་བ་མ་ཡིན་པའི་རང་གིས་ལུང་པ་འདིའི་ཕུ་མདའ་བར་གསུམ་ལ་བཙལ་བས་མ་རྙེད་པ་ཁོ་ཐག་ཆོད་པ་ལྟ་བུར། འདིར་ཡང་མཐའ་མ་ཆོད་ཀྱི་བར་དུ་བསྒོམས་པས་ངེས་པ་རྙེད་དེ། འཇུག་པ་ལས། །གང་ཕྱིར་བྱེད་པོ་མེད་ཅན་ལས་མེད་པ། །དེ་ཕྱིར་བདག་གི་བདག་མེད་པར་ཡོད་མིན། །དེ་ཕྱིར་བདག་དང་བདག་གི་སྟོང་ལྟ་བས། །རྣལ་འབྱོར་པ་དེ་རྣམ་པར་གྲོལ་བར་འགྱུར། །ཞེས་དེ་ཕན་ཆད་དུ་ང་ཞེས་བདེན་པར་གྲུབ་པའི་མིག་གིས་མཐོང་རྒྱུའམ། ལག་པས་འཛིན་རྒྱུ་ཡོད་པ་འདྲ་བ་དེ་མ་རྙེད་པར་སྟོང་ཆམ་གྱིས་སོང་བ་ན་དབུ་མའི་ལྟ་བ་དང་པོར་རྙེད་པ་ཡིན་གསུང་། འདིར་ཡང་ཐོས་བྱུང་གི་བློས་དང་པོར་རྙེད་པ་དེ་བསམ་བྱུང་གི་བློས་ཉམས་སུ་བླངས་པས་སྒོམ་བྱུང་གིས་འཐོབ་ཚུལ་སྔར་ཞི་གནས་ཀྱི་སྐབས་ལྟར་ལྷག་མཐོང་མཚན་ཉིད་པ་མ་ཡིན་ཡང་། ཚེས་གཉིས་ཀྱི་ཟླ་བ་ལྟར་ཕྲ་མོ་རྙེད་པ་དེའོ། །འདིའི་དུས་ཚེ་སྔོན་མ་ནས་སྟོང་ཉིད་ལ་བག་ཆགས་མེད་པ་ཞིག་ཡིན་ན་ལག་ཏུ་ཡོད་པའི་དངོས་པོ་གློ་བུར་དུ་སྟོར་བ་ལྟ་བུའི་སྣང་བ་དང་། བག་ཆགས་ཡོད་པ་ཞིག་ཡིན་ན་ལག་ཏུ་ཡོད་པའི་ནོར་སྟོར་བ་གློ་བུར་དུ་རྙེད་པ་ལྟ་བུའི་ཉམས་འཆར་རོ། །དེ་ལྟར་བདག་མེད་པའི་ལྟ་བ་གཏན་ལ་ཕབ་ཟིན་པའི་རྗེས་སུ་ཇི་ལྟར་སྐྱོང་བའི་ཚུལ་ནི་སྔར་ཞི་གནས་ཀྱི་སྐབས་ལྟར་སྦྱོར་བའི་ཆོས་དྲུག་བསྟན་པ་ལུས་ཀྱི་སྤྱོད་ལམ་དང་དྲན་ཤེས་རྣམས་འདིར་ཡང་བླངས་ཏེ་སྒོམ་པའི་ཚུལ་ལ། ལ་ལ་དག་ལྟ་བའི་དཔྱད་པ་ཚར་རེ་སྔོན་དུ་བཏང་བའི་མཐར་ཅི་ཡང་ཡིད་ལ་མི་བྱེད་པའི་དེ་ཁོ་ན་ཉིད་སྐྱོང་བ་དང་། འགའ་ཞིག་སྔར་དཔྱད་པ་བྱས་པའི་ལྟ་བ་དེ་དྲན་པ་ཙམ་གྱི་སྟེང་དུ་
འཇོག་པ་སོགས་རྣམ་གྲངས་མང་དུ་བྱུང་ནའང་། ཞི་གནས་སྐྱོང་ཚུལ་ལས་དམིགས་པ་ཁྱད་པར་བ་མ་བྱུང་ཞིང་། པོ་ཏོ་བའི་བེའུ་བུམ་ལས། ཁ་ཅིག་ཐོས་བསམ་དུས་ན་རིགས་པས། །རང་བཞིན་མེད་པ་གཏན་ལ་ཕབ་ལ། །སྒོམ་དུས་མི་རྟོག་འབའ་ཞིག་བསྒོམ་ཟེར། །དེ་ལྟ་ན་ནི་འབྲེལ་མེད་སྟོང་ཉིད། །ལོགས་སུ་བསྒོམས་ཕྱིར་གཉེན་པོར་མི་འགྱུར། །དེ་ལྟ་བས་ན་སྒོམ་དུས་ཉིད་ནའང་། །གཅིག་དང་དུ་བྲལ་རྟེན་འབྲེལ་ལ་སོགས། །གང་ལ་གོམས་པས་སོ་སོར་བརྟག་ཅིང་། ཅུང་ཟད་མི་རྟོག་ཉིད་དུའང་གནས་བྱ། །དེ་ལྟར་བསྒོམ་ན་ཉོན་མོངས་གཉེན་པོ། །ལྷ་གཅིག་རྗེས་སུ་འབྲང་བར་འདོད་ཅིང་། །ཕ་རོལ་ཕྱིན་ལུགས་སྤྱོད་པར་འདོད་པས། །ཤེས་རབ་སྒོམ་པའི་ལུགས་ནི་འདི་ཡིན། །དེ་ཡང་གང་ཟག་བདག་མེད་གོམས་པས། །དེ་ནས་དེ་ལྟར་རྗེས་སུ་འཇུག་བྱ། །ཞེས་སྒོམ་ཆེན་དུ་རློམ་པ་མང་པོ་ཞིག་གིས་རིགས་པས་དཔྱད་ན་ལྟ་བ་གཏན་ལ་ཕབ། སྒོམ་པའི་དུས་སུ་མི་རྟོག་པ་འབའ་ཞིག་བསྒོམ་ཟེར་བ་ནི། གཞིས་ལ་སྡོད་དུས་རྟ་ལེགས་པར་གསོས་ནས་བྱེས་ལ་འགྲོ་དུས་རྐང་ཐང་ལ་འགྲོ་ཟེར་བ་དང་ཁྱད་པར་ཅི་ཡང་མེད་པས་ཞི་གནས་ལ་བརྟེན་ནས་ལྷག་མཐོང་སྒྲུབ་ཚུལ་གྱི་གནད་ཅུང་ཟད་མ་གོ་བའི་རང་མཚང་དུ་ཟད་དོ། །དེས་ན་ཞི་གནས་ཀྱི་སྐབས་སུ་མི་རྟོག་པ་དགོས་ཤིང་རྟོག་པ་དགག་ཅེས་པའི་དོན་སྐུ་གཟུགས་ལྟ་བུ་དམིགས་པ་གཏོད་པའི་ཡུལ་དེ་ག་ལས་གཞན་པའི་རྟོག་པ་གཞན་དུ་མི་འཕྲོ་བའི་དོན་ཡིན་གྱི། རྟོག་པ་ཡིན་ཚད་དགག་དགོས་ན་དེ་བཞིན་གཤེགས་པའི་སྐུའི་རྣམ་པ་ཡིད་ལ་བྱེད་པ་དེ་ག་རྟོག་པ་ཡིན་པས། དེ་ཡང་བཀག་ན་དམིགས་པ་སྟོར་བར་གྱུར་པ་ཡིན་མོད། མི་རྟོག་པའི་འཁྲུལ་གཞིའི་ལོག་རྟོག་དེས་
དྲངས་ནས་བདག་མེད་པའི་དོན་ལ་སོ་སོར་དཔྱོད་པ་ཐམས་ཅད་རྟོག་པ་ཡིན་པས་སྒོམ་གྱི་དུས་སུ་མི་བྱེད་སྙམ་པ་ཞི་གནས་ཀྱི་དོན་མ་གོ་བར་སོང་བའི་རྒྱུ་མཚན། ཞི་གནས་ཀྱི་རྩིས་ཟིན་པའི་སྒོ་ནས་ཤེས་རབ་ཀྱིས་སོ་སོར་དཔྱད་པ་ལ་བརྟེན་ནས་ཆགས་སོགས་ཉོན་མོངས་པའི་རྟོག་པ་གཞན་དུ་མི་འཕྲོ་བར་གང་ཉམས་སུ་ལེན་རྒྱུའི་དཔྱད་སྒོམ་དེ་ཤིན་ཏུ་གསལ་བ་ཞིག་འོང་ལ། ཞི་གནས་བརྟན་པ་ཙམ་གྱིས་ལྷག་མཐོང་གི་ཤེས་རབ་སྟོབས་ཆེའོ། །དེ་ཡང་ཞི་གནས་མ་གྲུབ་གོང་དུ་དཔྱད་འཇོག་སྤེལ་མར་བྱས་ན་ཞི་གནས་ཀྱི་གེགས་བྱེད་ནའང་ཞི་གནས་ཐོབ་ཟིན་པའི་འོག་ཏུ་དཔྱད་དྲགས་པས་གནས་ཆ་ལ་ཅུང་ཟད་གནོད་པའི་ཉམས་བྱུང་ན་འཇོག་སྒོམ་དང་། འཇོག་སྒོམ་མངས་པས་དཔྱོད་སྙིང་མི་འདོད་པ་བྱུང་ན་དཔྱད་སྒོམ་སྤེལ་མར་བྱ་ཞིང་། དཔྱོད་པའི་ཚེ་བདག་མེད་པའི་དོན་དང་འཇོག་པའི་ཚེ་མི་རྟོག་པ་དང་ལྷ་སྐུ་ལྟ་བུར་འཇོག་པའི་གང་དྲན་དྲན་གྱིས་གོ་མ་ཆོད་པར། དཔྱད་སྒོམ་གྱི་དུས་བདག་མེད་པའི་དོན་ལ་བསམས་པ་དེ་འཇོག་སྒོམ་གྱི་དུས་སུ་བདག་རང་བཞིན་གྱིས་གྲུབ་པ་མེད་པ་ལས་གཞན་དུ་མི་རྟོག་པའི་རྩེ་གཅིག་ཏུ་མཉམ་པར་བཞག་པ་ཞིག་དགོས་ཀྱི། མི་རྟོག་པ་གང་བྱུང་གིས་མི་ཆོག་སྟེ། སྒོམ་རིམ་ཐ་མ་ལས། དེ་ལྟ་བས་ན་དམ་པའི་ཆོས་ལ་ཡང་དྲན་པ་མེད་པ་དང་ཡིད་ལ་བྱེད་པ་མེད་པ་དེ་ཡང་ཡང་དག་པར་སོ་སོར་རྟོག་པ་སྔོན་དུ་འགྲོ་བ་ཡིན་པར་བལྟ་བར་བྱ་སྟེ། གང་གི་ཕྱིར་ཡང་དག་པར་སོ་སོར་རྟོག་པ་ཉིད་ཀྱིས་དྲན་པ་མེད་པ་དང་ཡིད་ལ་བྱེད་པ་མེད་པར་བྱེད་ནུས་ཀྱི། གཞན་དུ་མ་ཡིན་ནོ་ཞེས་སོ། །དེ་ལྟར་ན་མཁས་གྲུབ་དགེ་ལེགས་དཔལ་བཟང་པོའི་རྗེས་འབྲངས་རྣམས་གནད་བཞིའི་དཔྱད་པས་དྲངས་ཏེ་ང་མེད་པར་ལྷང་གི་ངེས་པ་ན་ངེས་ཤེས་དེ་ཁའི་རྒྱུན་འཐུད་ཅིང་གནད་བཞིའི་
དཔྱད་པ་ཡང་ཡང་དྲན་ཙམ་བྱས་ནས་ཉམས་སུ་ལེན་དགོས་ཀྱི། ང་སྣང་ཚུལ་ལྟར་མེད་སྙམ་དུ་སྒོམ་པ་དང་། སྣང་ཚུལ་དེ་ལྟར་གྲུབ་པ་མེད་སྙམ་དུ་སྒོམ་པ་ནི་ཕྱིན་ཅི་ལོག་ཡིན་པར་འཆད་ལ། མཁས་གྲུབ་ཤེས་རབ་སེང་གེའི་བརྒྱུད་འཛིན་ལ་ལ་ངེས་པ་དྲངས་ཟིན་ནས་སྣང་ཚུལ་དེ་ལྟར་གྲུབ་པ་མེད་སྙམ་དུ་སྒོམ་པར་བཞེད་པའི་ལུགས་སྲོལ་མང་དུ་བྱུང་མོད། སྙིང་པོར་དྲིལ་ན་སྔར་གནད་བཞིའི་དཔྱད་པ་ཐོས་བསམ་གྱིས་གཏན་ལ་ཕབ་ཟིན་ནས་སྒོམ་པའི་ཚེ་ངའོ་སྙམ་པའི་སྙིང་གི་དཀྱིལ་ནས་དམ་སྦྲིང་སྦྲིང་འཛིན་པའི་བློ་ངོས་བཟུང་བ་ལྟར་གྱི་ང་དེ་ཕུང་པོའི་སྟེང་དུ་རང་བཞིན་གྱིས་གྲུབ་པ་མེད་པར་ལྷང་གིས་ངེས་བྱུང་བ་ན་དེ་ཉིད་དམིགས་པ་དངོས་ཡིན་པས་དྲན་པས་མ་བརྗེད་པར་བྱས། ཤེས་བཞིན་གྱིས་ངར་འཛིན་པའི་རྟོག་པ་བཅད་མ་བཅད་ཀྱི་བྱ་ར་བྱེད་ཅིང་ང་རང་བཞིན་གྱིས་མ་གྲུབ་པའི་ཚུལ་ལ་གསལ་འདེབས་དགོས་པ་བྱུང་ན་ཅུང་ཟད་དཔྱད་པའི་སྒོ་ནས་ཚུལ་དེ་ལྟར་དུ་གྲུབ་པ་མེད་སྙམ་དུ་མཉམ་པར་བཞག །དེའི་ཚེ་སྔར་ནས་བདག་འཛིན་གྱི་རྟོག་པ་ལ་གོམས་ཆེས་པའི་ཤུགས་ཀྱིས་ཞི་གནས་ཀྱི་སྐབས་ཀྱི་སེམས་གནས་དགུ་ལྟར་བསྒྲིམས་ཏེ་ཉམས་སུ་བླངས་ཀྱང་ངར་འཛིན་པའི་བློ་ཤུགས་ཆེ་ཞིང་མང་བས། དེའི་བར་བར་ལ་ང་བདེན་པར་མེད་སྙམ་པ་ཅུང་ཟད་རེ་ལས་མི་འོང་། དེ་ནས་རིམ་གྱིས་གོམས་པ་ན་ང་བདེན་མེད་དུ་བལྟ་བའི་བློའི་བར་ཐམས་ཅད་བདེན་འཛིན་གྱི་ཡང་ཡང་གཅོད་པས་ཆད་པའི་ཚུལ་དུ་འོང་། དེ་ནས་བདེན་འཛིན་གྱི་བློ་སྐྱེས་མ་ཐག་ནས་དྲན་འཛིན་ཅུང་ཟད་ཙམ་གྱིས་བཟློག་ནུས་པས་ཆད་པ་མེད་པའི་ཚུལ་དུ་འོང་། དེ་ནས་སེམས་གནས་དགུ་པ་ལྟར་མངོན་པར་འདུ་བྱེད་པ་ལ་མ་ལྟོས་པར་འབད་རྩོལ་གློད་དེ་སྒོམ་པ་འདི་ནས་
ཞི་ལྷག་ཟུང་འབྲེལ་རྗེས་མཐུན་པའམ་ཆ་ཕྲ་མོ་ཡིན་ལ། དེའི་ཚེ་དཔེར་ན་ནམ་མཁའ་ཞེས་པ་བར་སྣང་གི་སྐྱ་སེང་སེང་བའི་སྟེང་དུ་དགག་བྱ་ཐོགས་རེག་དང་བྲལ་བ་ཙམ་ལ་བཞག་པ་ལྟར་དགག་བྱ་བདེན་གྲུབ་བཀག་ཙམ་གྱི་སྟོང་སང་མེད་དགག་ལ་ཆོས་གཞན་གྱིས་བར་མ་ཆོད་པར་རྩེ་གཅིག་ཏུ་མཉམ་པར་འཇོག་པ་ནི་མཉམ་གཞག་ནམ་མཁའ་ལྟ་བུའི་སྐྱོང་ཚུལ་རྣལ་མ་ཡིན་ལ། སོ་སོར་དཔྱད་པ་ལ་བརྟེན་པའི་རང་སྟོབས་ཀྱིས་ཞི་གནས་དྲངས་ཏེ་ཡིད་ལ་བྱེད་པ་མེད་པའམ་མི་རྟོག་པ་ཡང་འདི་ཉིད་ལ་ངོས་འཛིན་ནོ། །འོ་ན་མི་རྟོག་པ་སྣ་ཚོགས་སུ་འཕྲོ་ཞིང་དཔྱད་པ་དེས་མི་འོང་ངམ་སྙམ་ན། འོད་སྲུང་ལེའུ་ལས་འོད་སྲུང་འདི་ལྟ་སྟེ། དཔེར་ན་ཤིང་གཉིས་རླུང་གིས་དྲུད་པ་དེ་ལས་མེ་བྱུང་སྟེ། བྱུང་ནས་ཤིང་གཉིས་སྲེག་པ་དེ་བཞིན་དུ་འོད་སྲུང་ཡང་དག་པར་སོ་སོར་རྟོག་པ་ཡོད་ན་འཕགས་པའི་ཤེས་རབ་ཀྱི་དབང་པོ་སྐྱེ་སྟེ། དེ་སྐྱེས་པས་ཡང་དག་པར་སོ་སོར་རྟོག་པ་ཉིད་སྲེག་པར་བྱེད་དོ། །ཞེས་ཤིང་དང་འདྲ་བའི་རྟོག་པ་སྣ་ཚོགས་ཕན་ཚུན་དུ་དྲུད་པ་ལྟར་དཔྱད་པས་མེ་ལྟ་བུའི་སྟོང་ཉིད་ཀྱི་ལྟ་བ་སྐྱེས་ནས་རྣམ་རྟོག་གི་ཤིང་མ་ལུས་པ་བསྲེགས་ཏེ་ཤིང་མེད་པར་བྱེད་པ་བཞིན་དུ་མི་རྟོག་པར་གསུངས་སོ། །མངོན་པར་འདུ་བྱེད་མེད་པའི་མཚམས་དེ་ནས་ལྷག་མཐོང་རྗེས་མཐུན་པ་ཐོབ་པ་དེ་རྒྱུན་བསྐྱངས་ནས་བསྒོམས་པས་ལུས་ཤིན་སྦྱངས་ཀྱི་བདེ་བ་སྔར་ཞི་གནས་ཀྱི་དུས་སུ་མཉམ་པར་བཞག་སྟོབས་ཀྱིས་དྲངས་པ་དེ་ལས་ཆེས་ལྷག་པའི་དཔྱད་སྒོམ་གྱིས་དྲངས་པའི་ལུས་སེམས་ལས་རུང་གི་ཤིན་སྦྱངས་ཁྱད་པར་དུ་འཕགས་པ་ཞིག་འཐོབ་སྟེ། དེ་ཐོབ་པ་ན་ལྷག་མཐོང་དངོས་ཐོབ་ཅིང་། འདི་ནས་བཟུང་སྟེ་ཞི་ལྷག་ཟུང་འབྲེལ་དངོས་ཀྱི་ལམ་
ཞེས་ཉ་དང་ཉུང་མ་ཕན་ཚུན་མི་བསྲེ་བར་ལུགས་སྲོལ་གཙང་མ་འཛིན་པའི་མཁས་པ་རྣམས་ཀྱི་བཞེད་པ་ཡིན་པར་མགྲིན་པ་བཏེགས་ནས་སྨྲའོ། །ས་དྭགས་སོགས་མཁས་བླུན་མང་པོས། །རྟོག་པ་ཡོད་ན་ལྟ་བ་མིན། །ཞེས་ལྟ་བ་སྒོམ་པར་རྟོག་པའི་འཕྲོ་འདུ་མེད་པ་ཞིག་དགོས་པ་ལ། དགེ་ལུགས་པ་རྣམས་ཀྱིས་ཞི་གནས་ཆུ་མི་གཡོ་བ་ལ་ལྷག་མཐོང་ཉེའུ་ཆུང་འཕར་པ་མི་རིགས་ཞེས་དགག་ཅིང་། རང་ཕྱོགས་ཀྱི་རྗེས་འབྲང་མང་པོ་ཡང་ཕྱོགས་སྔ་དེ་ལམ་གྱི་གནད་མཐར་ཐུག་པར་སྐད་གསངས་མཐོན་པོས་སྒྲོག་པར་བྱེད་མོད། མཉམ་གཞག་ནམ་མཁའ་ལྟ་བུའི་ལྟ་བ་རྣལ་མ་ཞིག་མ་རྙེད་བར་དུ་ཞི་གནས་ཀྱི་རྩི་མ་ཞིག་པའི་ངང་ནས་ལྷག་མཐོང་རྗེས་མཐུན་པའི་དཔྱད་པ་མེད་ན་ལྷག་མཐོང་དང་བྲལ་བའི་ཞི་གནས་ཁོ་ནའི་ལམ་དུ་འགྲོ་བ་མང་བས་ལམ་གྱི་ས་ཕྱོད་མི་འོང་ཞིང་། རྩོལ་བ་ལ་མ་ལྟོས་པའི་ཞི་ལྷག་ཟུང་འབྲེལ་གྱི་འགོ་བརྩམས་པ་ནས་བཟུང་ཞི་གནས་ཆུ་མི་འགུལ་བ་ལ་ལྷག་མཐོང་ཉེའུ་ཆུང་འཁྱུག་པ་དེ་འདྲ་རང་ལུགས་སུ་མི་འདོད་པས་ཕྱོགས་སྔའི་ནམ་མ་ལངས་པ་ནས་དགག་སྒྲུབ་ཀྱི་ཉི་མ་ཤར་བའི་དཔེར་སོང་ཞིང་། རྗེས་འབྲང་རྣམས་ཀྱང་ལམ་རིམ་ཆེ་ཆུང་གི་དགོངས་པ་མ་རྙེད་པའི་རི་བོང་ཅལ་སྒྲོགས་ཀྱིས་བསླུས་པར་ཟད་མོད། ལམ་སྒོམ་པའི་ཐོག་མཐའ་བར་གྱི་ཉམས་ལེན་བྱེད་ཚུལ་དང་རྒྱུད་ལ་འཆར་ཚུལ་གྱི་ཕྲ་ཞིབ་ཀྱི་དབྱེ་བ་མ་ཕྱེད་པར་གཅིག་ཏུ་ཞེན་པ་ནི་བྱིས་པ་བཙས་མ་ཐག་པ་དང་ལོ་བརྒྱ་ཙམ་ལོན་པ་གཉིས་ལ་ལུས་ཀྱི་ལང་ཚོ་དར་རྒུད་ལ་ཁྱད་པར་མེད་དོ་ཞེས་སྨྲ་བ་དང་འདྲ་བས་ལེགས་པར་སོམས་ཤིག །དེ་ལྟར་མཉམ་གཞག་ནམ་མཁའ་ལྟ་བུའི་ཉམས་ལེན་བྱས་པས་རྗེས་ཐོབ་ཏུ་ཇི་ལྟར་འབྱུང་ན།
ཏིང་འཛིན་རྒྱལ་པོ་ལས། ཇི་ལྟར་སྨིག་རྒྱུ་དྲི་ཟའི་གྲོང་ཁྱེར་དང་། །སྒྱུ་མ་ཇི་བཞིན་རྨི་ལམ་ཇི་ལྟར་བུར། །མཚན་མ་སྒོམ་པ་ངོ་བོ་ཉིད་ཀྱིས་སྟོང་། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་རྗེས་ཐོབ་ཀྱི་གནས་སྐབས་སུ་དགག་བྱ་བཀག་པའི་ཤུལ་དུ་ལུས་པའི་ངའི་མིང་ཙམ་ཞིག་སྣང་བ་དེ་སྒྱུ་མ་ལྟ་བུར་འཆར་དགོས་ལ། འཆར་ཚུལ་སྒྱུ་མའི་རྟ་གླང་དང་རྨི་ལམ་གྱི་སྣང་བ་བདེན་མེད་དུ་རྟོགས་པ་དེ་ལུགས་འདིའི་འཆར་ཚུལ་མ་ཡིན་ཏེ། དེ་ལྟར་ན་སྒྱུ་མ་མཁན་དང་རྒན་པོ་བརྡ་ལ་བྱང་བ་རྣམས་ཀྱིས་ཀྱང་འཆར་ཚུལ་དེ་ཤེས་དགོས་ཤིང་། སྔར་གྱི་ལྟ་བའི་དཔྱད་པ་དེ་ཉམས་ལེན་བྱས་པས་འདི་ཡིན་འདི་མིན་གྱི་ངོས་བཟུང་མེད་པའི་སྣང་བ་བན་བུན་དུ་སོང་བ་དག་ཀྱང་སྐབས་འདིའི་སྒྱུ་མ་མིན་ནོ། །འོ་ན་ཇི་ལྟ་བུ་ཞིག་དགོས་སྙམ་ན། སྒྱུ་མས་སྤྲུལ་པའི་རྟ་གླང་རྟ་གླང་མ་ཡིན་པར་རྟོགས་པས་རྟ་གླང་རང་བཞིན་གྱིས་གྲུབ་པ་ལ་གནོད་པ་མི་འབྱུང་བའི་རྒྱུ་མཚན། དཔལ་ལྡན་ཆོས་གྲགས་ཀྱིས། འདི་ཡུལ་སུན་ཕྱུང་མེད་པར་ནི། །དེ་སྤོང་པར་ནི་ནུས་མ་ཡིན། །ཡོན་ཏན་སྐྱོན་དང་རྗེས་འབྲེལ་བའི། །འདོད་དང་སྡང་སོགས་སྤོང་བ་ནི། །དེ་དག་ཡུལ་ལ་མ་མཐོང་བས། །ཡིན་གྱི་ཕྱི་ཚུལ་དག་གིས་མིན། །ཞེས་ཚེར་མ་དབྱུང་བ་ལྟ་བུས་མི་ཆོག་པར་གཟུང་བྱའི་ཡུལ་སུན་ཕྱུང་བ་ཞིག་དགོས་པས། སྒྱུ་མའི་རྟ་གླང་འཕྲལ་གྱི་འཁྲུལ་རྒྱུས་བསླད་པའི་དབང་གིས་མིག་ཤེས་ལ་བསྙོན་མེད་མཐོང་ཡང་། མཐོང་བ་ལྟར་གྱི་རྟ་གླང་མེད་པར་འཇིག་རྟེན་རྒན་པོས་ཀྱང་ཤེས་པ་བཞིན། རྟ་དང་གླང་པོ་རྣམས་ཀྱང་ཕུགས་ཀྱི་འཁྲུལ་རྒྱུས་བསླད་པའི་མཐུས་ཐ་སྙད་པའི་ཤེས་པ་ལ་བསྙོན་མེད་དུ་སྣང་ཡང་། ཁོ་རང་གི་ངོ་བོའི་སྒོ་ནས་རང་བཞིན་གྱིས་སྟོང་པ་སྒྱུ་མ་ལྟ་བུ་ཤེས་
དགོས་པས། སྒྱུ་མས་སྤྲུལ་པའི་སེང་གེ་དེ་དོན་དུ་མེད་པར་ཤེས་བཞིན་དུ། སེང་གེ་དེས་སྒྱུ་མའི་གླང་པོ་གསོད་པ་སོགས་མངོན་སུམ་དུ་མཐོང་ནས་ངེས་ཤེས་འདྲོངས་པ་ལྟར། གང་ཟག་རང་བཞིན་གྱིས་མ་གྲུབ་པ་སྒྱུ་མ་ལྟ་བུར་སྣང་བ་དེས་དཀར་ནག་གི་ལས་གསོག་ཅིང་རྣམ་སྨིན་མྱོང་བ་ལ་ངེས་པ་གཏིང་ནས་འདྲོངས་པ་ནི་ཆོས་འདིའི་ཁྱད་ཆོས་ཡིན་ཞེས་བདག་གི་བླ་མ་གསུང་ངོ་། །རྟ་གླང་རང་བཞིན་གྱིས་གྲུབ་པ་རིགས་པས་འགོག་པའི་ཚེ་དེ་ལྟ་བུའི་ཐ་སྙད་པའི་ཤེས་ངོ་དེར་རྟ་གླང་ཡང་དག་པར་འཛིན་པའི་ཤེས་པ་དེ་འཁྲུལ་ཤེས་ཡིན་པ་སྒྱུ་མའི་རྟ་གླང་དང་མཚུངས་ཤིང་། འཇིག་རྟེན་ཤེས་ངོ་ལ་ལྟོས་ན་རྟ་གླང་ཡང་དག་ཏུ་འཛིན་པའི་ཤེས་པ་ནི་མ་འཁྲུལ་པ་དང་། སྒྱུ་མའི་རྟ་གླང་འཛིན་པའི་ཤེས་པ་འཁྲུལ་ཤེས་ཡིན་པའི་ཞིབ་ཆའི་སྤུ་རིས་ཕྱེ་བའི་སྒོ་ནས་དཔེར་བསྟན་པ་ཡིན་གྱི། རྟ་གླང་རང་བཞིན་གྱིས་མ་གྲུབ་པར་བསམས་ཏེ། རྟ་གླང་དང་སྒྱུ་མའི་རྟ་གླང་ཐ་སྙད་ཙམ་དུ་འདྲ་བར་བྱས་ན་འཇུག་པ་ལས། གནོད་པ་མེད་པའི་དབང་པོ་དྲུག་རྣམས་ཀྱིས། །བཟུང་བ་གང་ཞིག་འཇིག་རྟེན་གྱིས་རྟོགས་དེ། །འཇིག་རྟེན་ཉིད་ལས་བདེན་ཡིན། །ཞེས་པའི་དོན་དང་འགལ་བས་ཀུན་རྫོབ་ལ་སྐུར་བ་བཏབ་པར་འགྲོ་ཞིང་། འཇམ་དཔལ་དབྱངས་ཀྱིས་རྗེ་བླ་མ་ལ་སྣང་ཕྱོགས་ལ་གཙིགས་སུ་བྱེད་དགོས་པར་གསུངས་པ་ཡང་མ་འོངས་པ་ན་གནད་འདི་འདྲ་མ་གོ་བའི་གདུལ་བྱ་རྣམས་ཆད་ལྟར་ལྷུང་གིས་དོགས་པ་ལ་དགོངས་ལ། ལམ་རིམ་ཆེ་ཆུང་དང་རྩ་འཇུག་གི་ཊཱིཀ་ཆེན་རྣམས་སུ་སྣང་ཕྱོགས་ཀྱི་སྒྲུབ་ཚུལ་མང་བས། སྨྲ་བའི་སེང་གེ་སྟག་ཚང་ལོ་ཙཱ་བས། མ་དག་འཁྲུལ་པའི་སྣང་བ་ཚད་གྲུབ་ཏུ། །རིགས་པ་
དུ་མས་དཔྱད་ནས་ཁས་ལེན་པ། ཞེས་གསུངས་པ་ཡང་འཁྲུལ་གཞི་འདི་འདྲ་ལས་བྱུང་བར་སྣང་ངོ་། །གཉིས་པ་ཆོས་ཀྱི་བདག་མེད་བསྒོམ་ཚུལ་ནི། དཔེར་ན་སྤྱི་གཙུག་ནས་རྐང་མཐིལ་ཡན་གྱི་ཡན་ལག་ལྔ་ཚང་བ་འདིའི་སྟེང་དུ་ལུས་ཞེས་ཕར་མིང་གིས་བཏགས་པ་མ་ཡིན་པའི་ཁོ་རང་གི་ངོས་ནས་ཚུགས་ཐུབ་ཏུ་གྲུབ་པ་ལྟར་སྣང་བའི་ལུས་དེ་དགག་བྱ་ངོས་ཟིན་པའི་གནད། དེ་ལྟར་གྲུབ་པའི་ལུས་དེ་དང་ལུས་ཀྱི་སྟོད་སྨད་ཡན་ལག་སོགས་གཅིག་གམ་ཐ་དད་གང་རུང་དུ་ཐག་གཅོད་པ་ནི་ཁྱབ་པ་ངེས་པའི་གནད། གཅིག་ཏུ་གྲུབ་ན། ལུས་ཀྱི་མགོ་བོ་དང་རྐང་ལག་ཤ་རུས་པགས་པ་ཞེས་གདགས་གཞི་དང་བཏགས་ཆོས་ཀྱི་དོན་དུ་སོ་སོ་ཐ་དད་དུ་སོང་བར་ངེས་པས་བདེན་པའི་གཅིག་བྲལ་ངེས་པའི་གནད། དེ་གཉིས་ཐ་དད་ཡིན་ན། སྤྱི་གཙུག་ནས་རྐང་མཐིལ་གྱི་བར་གྱི་ལུས་ཀྱི་ཆ་ཤས་རེ་རེ་ནས་བློས་བསལ་བའི་འོག་ཏུ་ལུས་ཞེས་ངོས་འཛིན་རྒྱུ་མེད་པས། ཡན་ལག་ལྔ་ཚང་གི་ལུས་ཀྱི་སྟེང་དུ་རྟོག་པས་ཕར་བཏགས་པའི་ལུས་ཙམ་ལས་ཁོ་རང་གི་ངོས་ནས་ཚུགས་ཐུབ་ཏུ་གྲུབ་པའི་ལུས་མེད་པ་བདེན་པའི་དུ་བྲལ་ངེས་པའི་གནད། དེ་ལ་ངེས་པ་ལྷང་གི་ཤར་བ་ན་ཆོས་ཀྱི་བདག་མེད་ཀྱི་ལྟ་བ་ཐོག་མར་རྙེད་པ་ཡིན་ནོ། །རྟོག་པས་བཏགས་པ་ལ་ལྟོས་པར་ཡན་ལག་ལྔ་ཚང་བའི་གཟུགས་ཀྱི་སྟེང་ནས་ལུས་རང་བཞིན་གྱིས་གྲུབ་པ་ཡིན་ནོ། །ཤིང་གི་ར་བ་ན་ཡོད་པའི་དུས་ཀྱི་ཡལ་ག་ལོ་མ་དང་ལྡན་པའི་ཤིང་དང་། ཤིང་དེ་བཟོ་བོས་གདུང་འདེགས་ཀྱི་བྱ་བ་བྱས་ཟིན་པའི་སྐབས་གཉིས་ལ་འདི་ནི་ཀ་བའོ་སྙམ་པའི་བློ་འཆར་མཉམ་དགོས་ཤིང་། དེ་བཞིན་དུ་ཟླ་བ་སྔོན་མ་མིང་མེད་པའི་བྱིས་པ་ཞིག་ལ་ཟླ་བ་རྗེས་མ་བཀྲ་ཤིས་ཞེས་བཏགས་ན་དུས་གཉིས་
ཀ་ལ་བྱིས་པ་དེ་མཐོང་བའི་ཚེ་བཀྲ་ཤིས་སོ་སྙམ་པའི་སྣང་བ་འཆར་དགོས་པ་ལ་མི་འཆར་བ་བཞིན་ནོ། །གཞན་ཡང་། རྣམ་པར་ཤེས་པ་འདི་ཁ་སང་གི་ཤེས་པ་དང་དེ་རིང་གི་ཤེས་པ་སོགས་ཆ་མང་པོ་ཞིག་ཚོགས་པའི་གདགས་གཞིའི་སྟེང་ནས་བཏགས་པ་དང་། དུས་ཞེས་པ་ལོ་ཟླ་བ་ཞག་ལ་སོགས་པ་ཚོགས་པའི་སྟེང་ནས་བཞག་པ་དང་། འདུས་མ་བྱས་ཀྱི་ནམ་མཁའ་ལྟ་བུ་བུག་པ་སྟོང་ཕྲག་གཅིག་ལྟ་བུ་ལ་མཚོན་ན་བུག་པ་རེ་ལ་ནམ་མཁའི་ཆ་ཤས་རེ་ཡོད་པས་དེ་རྣམས་ཚོགས་པའི་སྟེང་ནས་ནམ་མཁར་བཞག་པ་སོགས་ཆོས་གང་ལ་ཡང་གནད་བཞིའི་དཔྱད་པ་བྱས་པའི་སྒོ་ནས་ལྟ་བ་གཏན་ལ་འབེབས་པ་ཡིན་མོད། འོན་ཀྱང་ཚིག་གསལ་དུ། ཤིང་རྟ་འཚིག་ན་ཤིང་རྟའི་ཡན་ལག་འཚིག་པ་དཔེར་མཛད་པ་བཞིན། བདག་རང་བཞིན་མེད་པར་རྟོགས་པ་ན་དེའི་གདགས་གཞི་ཕུང་པོ་ལྔ་ཡང་རང་བཞིན་གྱིས་ཡོད་པར་འཛིན་པ་ལྡོག་པར་འགྱུར་བའི་ཤུགས་ཀྱིས་ཆོས་ཀྱི་བདག་མེད་ཀྱང་རྟོགས་འགྲོ་བས། གང་ཟག་གི་བདག་མེད་པར་ལེགས་པར་གཏན་ལ་ཕབ་སྟེ་ཉམས་སུ་བླངས་པའི་ནུས་པས་ཆོས་ཀྱི་བདག་མེད་གཏན་ལ་འབེབས་པ་མི་དཀའ་ཞིང་། ཆོས་ཀྱི་བདག་མེད་ཀྱང་། བཞི་བརྒྱ་པ་ལས། དངོས་པོ་གཅིག་གི་ལྟ་པོ་གང་། །དེ་ནི་ཀུན་གྱི་ལྟ་པོར་བཤད། །གཅིག་གི་སྟོང་ཉིད་གང་ཡིན་པ། །དེ་ནི་ཀུན་གྱི་སྟོང་ཉིད་ཡིན། །ཞེས་དང་། འཕགས་པ་ལྷས། གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་དངོས་ཀུན་དེ་བཞིན་ཉིད་དུ་མཐོང་། །ཞེས་དངོས་པོ་གཅིག་སྟོང་པ་ཉིད་དུ་རྟོགས་ན་གཞན་རྣམས་ཀྱང་རྟོགས་ནུས་པ། །གཟུགས་ལྟ་བུ་གཅིག་ལ་
སྔར་གང་ཟག་གི་བདག་མེད་ཀྱི་སྐབས་བཞིན་ཉམས་སུ་བླངས་པས་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་རང་བཞིན་གྱིས་མ་གྲུབ་པར་ཤར་འོང་བས་ན། གོང་མ་རྣམས་ཀྱི་ཕྱག་ལེན་ལ་དཔེར་བརྗོད་འགའ་ཞིག་མཛད་པ་ཡིན་ལ། ཆོས་ཐམས་ཅད་རེ་རེ་བཞིན་ནས་སྒོམ་དགོས་ན་སྒོམ་པ་པོ་ཐོག་མར་འཆི་བ་མེད་པའི་ཚེའི་རིག་འཛིན་སྒྲུབ་དགོས་པར་འགྱུར་ཞིང་། ཐོས་བསམ་གྱི་ཚེ་དཔེར་བརྗོད་ཀྱང་འགའ་ཞིག་བྱས་པས་མ་གྲོལ་ན། རེ་དོགས་མཛུབ་རྩིས་ཀྱི་གཡེང་བ་བཤོལ་ནས་བེམ་པོ་ཞལ་བྲིས་གྱི་ཏིང་ངེ་འཛིན་ལ་མཉམ་པར་འཇོག་པ་ཞུ། སྨྲས་པ། གཏི་མུག་མུན་པ་འཐུག་པོའི་རབ་རིབ་ཀྱིས། །ལུས་སེམས་ཐག་ཁྲར་འཁྱིལ་པའི་སྣང་ཚུལ་ལ། །ངའོ་སྙམ་པའི་དུག་སྦྲུལ་འཇིགས་རུང་གིས། །སྡུག་བསྔལ་གསུམ་གྱི་དངངས་སྐྲག་ཅི་ཡང་མྱོང་། །ངར་འཛིན་སྒྱུ་མའི་རྟ་ལ་བདེན་ཞེན་གྱིས། །མཐའ་མེད་འཁོར་བའི་ཡུལ་ཀུན་དབང་མེད་དུ། །བགྲོད་ནས་རྨི་ལམ་ཡུལ་གྱི་བདེ་སྡུག་ལྟར། །མྱང་བའི་རང་མཚང་མ་རིག་ཤིན་ཏུ་བླུན། །ཡོད་ཡོད་དམ་དུ་གཅེས་པར་བཟུང་པའི་ང་། །ཇི་ཙམ་བཙལ་བས་མ་རྙེད་སྟོང་པའི་གཤིས། །ནམ་མཁའི་བྱ་ལམ་ལྟ་བུའི་རྗེས་མེད་འདིས། །ཆོས་ཀུན་གདོད་ནས་སྟོང་པའི་གནད་ཅིག་རིག །མེད་བཞིན་དམྱལ་བར་སྲེག་པའི་སྡུག་བསྔལ་དང་། །ལྷ་མིའི་འབྱོར་བར་སྤྱོད་པའི་བདེ་བ་སོགས། །སྒྱུ་མ་ལྟ་བུར་ཉམས་སུ་མྱོང་བ་འདི། །རྟེན་འབྲེལ་མི་བསླུ་སྣང་བའི་གནད་ཅིག་རྟོགས། །གདོད་ནས་སྟོང་པ་ཙམ་གྱིས་ཐ་སྙད་དུ། །འཇོག་ཚུལ་བསྙོན་མེད་ཤེས་པ་དབུ་མའི་ལམ། །ཤེས་རབ་རྣོན་པོའི་མཚོན་ཆ་འཁོར་བའི་ཚེ། ཉོན་མོངས་བདག་འཛིན་དམ་པོའི་འཆིང་བ་གཅོད། །
ཚུལ་འདི་ཐེག་གསུམ་འཕགས་པ་ཐམས་ཅད་ཀྱི། །བགྲོད་པ་གཅིག་པའི་གཤེགས་ཤུལ་ཡིན་གྱུར་ཀྱང་། །ད་ལྟའི་བླུན་རྨོངས་བསྟན་འཛིན་གཟུགས་བརྙན་ཚོའི། །མུན་ནང་འདོམས་པར་བཅའ་བའི་ཉམས་མྱོང་བཞིན། །འོན་ཀྱང་མཚོ་ལྟར་གཏིང་ཟབ་ཟབ་མོའི་གནད། །འཁྲུལ་མེད་སྨྲ་བའི་མགྲིན་པ་གཟེངས་མཐོ་བ། །ཟླ་མེད་ཡོངས་འཛིན་མཆོག་གི་བཀའ་དྲིན་དེ། །བསམས་ཀྱིན་ལེགས་བཤད་ཀུན་བཟང་མཆོད་སྤྲིན་སྤྲོ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་གཞན་རྒྱུད་སྨིན་པར་བྱེད་པ་བསྡུ་བའི་དངོས་པོ་བཞི་ལ་བསླབ་པ་ནི་མདོ་སྡེ་རྒྱན་ལས། སྦྱིན་མཚུངས་དེ་སྟོན་ལེན་འཇུག་དང་། །བདག་ཉིད་རྗེས་སུ་འཇུག་རྣམས་ཀྱིས། །སྙན་པར་སྨྲ་དང་དོན་སྤྱོད་དང་། །དོན་མཐུན་ཉིད་དུ་འདོད་པ་ཡིན། །ཞེས་བྱང་ཆུབ་སེམས་དཔའ་རྒྱལ་སྲས་ཀྱི་སྤྱོད་པ་ལ་བསླབས་ནས་སེམས་ཅན་གྱི་དོན་བྱེད་པར་བསྡུ་བའི་དངོས་པོ་བཞི་ལ་བརྟེན་ནས་གཞན་རྒྱུད་སྨིན་པར་བྱེད་པ་ལ་གདུལ་བྱ་སོ་སོའི་ཁམས་དང་འཚམ་པར་ཟང་ཟིང་མི་འཇིགས་ཆོས་ཀྱི་སྦྱིན་པས་འཁོར་རྣམས་བསྡུས། །འདུས་པ་དེ་དག་ལ་བཞིན་མདངས་གསལ་ཞིང་འཛུམ་པའི་སྒོ་ནས་ཁམས་དྲི་བ་སོགས་འཇིག་རྟེན་གྱི་ཚུལ་དང་མཐུན་པས་སྙན་པར་སྨྲ་བ་དང་། དེ་ཉིད་གང་ལ་ཆོས་པའི་ཆོས་ཀྱི་ཕན་ཡོན་བརྗོད་ཅིང་ཁྱད་པར་དབང་པོ་རྟུལ་པོ་དང་སྡིག་པ་སྣ་ཚོགས་བྱེད་པ། ཚེ་འདི་འབའ་ཞིག་དོན་དུ་གཉེར་བ། རབ་ཏུ་བྱུང་བ་བག་མེད་ཅན་སོགས་ལའང་ཡང་དག་པའི་ལམ་ལ་བཀྲི་བའི་ཆེད་དུ་ཆོས་ཀྱི་འབེལ་གཏམ་སྙན་པར་སྨྲའོ། །དེ་
ལྟར་བློ་དགེ་བའི་ཕྱོགས་སུ་སྤྲོ་བར་བྱས་པ་རྣམས་ལ་རིགས་མང་བས་གཏན་གྱི་བདེ་བ་བློར་མི་ཆུད་པ་རྣམས་ལ་ཐར་པའི་ལམ་དང་། ཐེག་དམན་ཐེག་ཆེན་དུ་བཙན་འཁྲིད་བྱེད་པ་ལྟ་བུ། དཔེར་ན་ཚད་པའི་ནད་ཐང་གིས་སྨིན་པར་མ་བྱས་པར་ག་བུར་གྱི་སྦྱོར་བ་བཏང་བས་ནད་འཐོར་ཏེ་གནོད་པ་འབྱུང་བ་བཞིན་གདུལ་བྱ་ལ་མི་ཕན་པས། ཚེ་རིང་བ་དང་ནད་མེད་པ་ལ་དགེ་བ་འདི་ལྟ་བུ་སྒྲུབ་དགོས་ཞེས་པས་མཚོན་པའི་དགེ་བ་ཕྲ་མོ་ནས་རིམ་གྱིས་བྱང་བར་བྱས་ཏེ་མཐར་མྱ་ངན་ལས་འདས་པའི་ཕྱོགས་སུ་བཀྲི་བ་ནི་དོན་སྤྱོད་པ་དང་། དེ་གཞན་གྱིས་སྤྱོད་དུ་འཇུག་པ་ལ་ཡང་རང་ཉིད་ཀྱིས་དོན་དེ་ལ་འཇུག་པར་མ་བྱས་ན། ངེད་རྣམས་ཀྱི་རྒྱུད་འདུལ་བ་ལ་ཐོག་མར་ཁྱོད་རང་དུལ་དགོས་སོ་ཟེར་བ་ལྟ་བུ་འོང་བས། གཞན་གྱིས་ཇི་ལྟར་སྤྱོད་པ་དེ་ལས་ལྷག་པའམ་མ་མཐའ་མཚུངས་པ་ཙམ་ཞིག་ཉམས་སུ་ལེན་པ་ནི་དོན་མཐུན་པ་ཡིན་ནོ། །གསུམ་པ་རྗེས་ཀྱི་རིམ་པ་ནི། བསྔོ་སྨོན་གྱི་རྒྱས་འདེབས་པའང་དེར་གཏོགས་མོད། གཙོ་ཆེར་སྔར་གྱི་ཉམས་ལེན་རྡོ་རུས་ཐུག་པར་བྱས་རྗེས་རྒྱུན་དུ་སྙིང་པོར་དྲིལ་ནས་ཇི་ལྟར་བྱ་སྙམ་ན། སྐྱབས་སེམས་ཀྱི་དུས་སྐྱེས་བུ་ཆུང་འབྲིང་གི་སྡུག་བསྔལ་རྣམས་བསམ། དེ་རྗེས་བླ་མའི་རྣལ་འབྱོར་དང་འབྲེལ་བའི་སྡིག་བཤགས་ཚོགས་བསག་ལ་ནན་ཏན་བྱས་ནས། དངོས་གཞི་གཏོང་ལེན་སྤེལ་བའི་བྱང་ཆུབ་ཀྱི་སེམས་དང་། ཞི་ལྷག་ཟུང་འབྲེལ་གྱི་དམིགས་པ་སྐྱོང་བ་ཡིན་ནོ། །སྨྲས་པ། སྙིང་ལ་རུས་པ་བཅུག་པའི་བརྩོན་འགྲུས་དང་། །རང་བཞིན་ལྷུན་གྱིས་གྲུབ་པའི་ཤེས་རབ་ཀྱིས། །ཕྱིན་དྲུག་ཟབ་དོན་གནད་རིག་ཉམས་བླངས་པས། །རང་དོན་ཐོགས་མེད་གྲུབ་པའི་རྩེ་མོར་ཕྱིན། །ཉན་རང་ལྟ་བུར་ཞི་བདེའི་དམན་ལམ་དུ། །གྲོལ་མིན་གཞན་རྒྱུད་སྨིན་
བྱེད་བསྡུ་དངོས་བཞི། །རྣམ་དཀའ་འཕྲིན་ལས་ཆད་པ་མེད་པའི་རྒྱུན། །ཡན་ལག་བརྒྱད་ལྡན་ཆུ་བོའི་རྗེས་སུ་འགྲོ། །ཐབས་ཤེས་གཤོག་ཟུང་འབྲེལ་བའི་སྒྱུ་རྩལ་གྱིས། །སྲིད་ཞིའི་ནམ་འཕང་ཡོངས་སུ་བཅད་པའི་མཐར། །སྐུ་གསུམ་འཆི་མེད་འདུན་སར་ཡོངས་རྩེན་པས། །སྔོན་མེད་མཁའ་ལྡིང་དབང་པོ་དིང་འདིར་གྲུབ། །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ལྟར་ཕ་རོལ་ཏུ་ཕྱིན་པ་དྲུག་གི་ལམ་ལ་བརྟེན་ནས་བསོད་ནམས་དང་ཡེ་ཤེས་ཀྱི་ཚོགས་རླབས་པོ་ཆེ་བསགས་ཏེ་རང་གི་རྒྱུད་སྨིན་ནས་སངས་རྒྱས་ཀྱི་གོ་འཕང་མངོན་དུ་བྱེད། བསྡུ་བའི་དངོས་པོ་བཞི་ལ་བརྟེན་ནས་གཞན་གྱི་རྒྱུད་སྨིན་པར་བྱས་ཏེ། རྣམ་པ་ཐམས་ཅད་མཁྱེན་པའི་སར་འཁྲིད་པར་བྱེད་པའི་ཐབས་མ་ནོར་པ་ལེགས་པར་སྟོན་པའི་སྐྱེས་བུ་གསུམ་གྱི་ལམ་གྱི་རིམ་པ་རྒྱལ་བ་དགྱེས་པའི་གདམས་ངག་དམར་འཁྲིད་ལག་ལེན་དུ་སྟོན་པའི་རིམ་པ་བརྒྱུད་ལྡན་དམ་པའི་གསུང་གི་ཉིང་ཁུ་ནི་དེ་ཙམ་མོ། །མ་ཚང་བ་མེད་པར་ཉམས་སུ་བླངས་པས་འགྲོ་བའི་རེ་བ་སྐོང་བ་ལ་ཡིད་བཞིན་གྱི་ནོར་བུ་རིན་པོ་ཆེ་དབང་གི་རྒྱལ་པོ་དང་ཆོས་མཚུངས་པའི་ཕྱིར་ན། སྐྱེ་རྒུའི་འདོད་དོན་མ་ལུས་སྐོང་བས་ན། །གདམས་པ་རིན་ཆེན་དབང་གི་རྒྱལ་པོ་སྟེ། །ཞེས་སོགས་བསྔགས་པ་རྒྱ་ཆེར་མཛད་པ་ལགས་སོ། །