མཆོད་བརྗོད་དང་རྩོམ་པར་དམ་བཅའ་བ།
མཆོད་བརྗོད་དང་རྩོམ་པར་དམ་བཅའ་བ།ཐབས་དང་ཤེས་རབ་ཟུང་དུ་འཇུག་པའི་ཚོགས་གཉིས་ཟླ་བའི་མ་མ་ལས། །ལེགས་འཁྲུངས་མཐོང་ན་མི་མཐུན་མེད་པའི་མཚན་དཔེའི་ཡལ་འདབ་རབ་རྒྱས་རྩེར། །
རྣམ་པ་ཐམས་ཅད་མཁྱེན་པར་བྱེད་པའི་བླ་མེད་རོ་བརྒྱའི་འབྲས་སྨིན་པ། །འགྲོ་བའི་བླ་མ་ཉི་མའི་གཉེན་གྱུར་ཡོངས་འདུའི་དབང་པོས་དགེ་ལེགས་སྩོལ། །
ཟབ་རྒྱས་ཆོས་ཚུལ་ཀུན་བཟང་དམན་པའི་མཚོར། །བྱིང་ཚེ་འཆད་རྩོད་རྩོམ་པའི་རུས་སྦལ་གྱིས། །འདེགས་མཁས་ཤིང་རྟ་ཆེན་པོ་རྣམ་གཉིས་ཞེས། །གྲགས་དཀར་སྲིད་པའི་ཁོང་ལས་བརྒལ་དེ་བསྔགས། ཁོར་ཡུག་གངས་ཀྱི་ར་བའི་བསིལ་ལྡན་ལྗོངས། །ཐེག་ཆེན་ཆོས་ཀྱི་ཉི་མ་འོད་པོ་ཆེས། །ལོག་རྟོག་མུན་པ་སེལ་དང་ལྷན་ཅིག་པར། །ཐུབ་བསྟན་སྣང་བས་ཁྱབ་མཛད་ཨ་ཏི་ཤ །གང་གི་གསུང་རབ་ཡིད་བཞིན་ནོར་བུ་མཆོག །ཐོས་བསམ་སྒོམ་པའི་རྒྱལ་མཚན་རྩེར་བཀོད་ནས། །གཏན་འདུན་འདོད་པའི་རེ་སྐོང་བཀའ་གདམས་ཞེས། །ཕྱོགས་ཀུན་ཁྱབ་པའི་རིང་ལུགས་འདི་ཀོ་མཚར། །ཕྲ་ཞིབ་རྣམ་པར་དཔྱོད་པའི་བློ་གྲོས་རབ་ཏུ་ཡངས་པའི་རྡོ་རྗེ་རྩེ་བརྒྱ་གདེངས་ཙམ་གྱིས། །དྲི་བཅས་འཁྲུལ་ལྡན་གཞུང་ལུགས་བྱེ་བའི་ལོག་སྨྲའི་ཉེས་བཤད་ས་འཛིན་བགྲོད་པ་བཅོམ་པ་དང་། །ལྷན་ཅིག་རྒོལ་ངན་སྤོབས་པའི་སྦྱིན་སྐྱེས་ལུས་ཕྲ་མ་ཡི་མངལ་ཁུར་མཐའ་དག་ལྟུང་བྱེད་པའི། །སྔོན་མེད་ལྷ་དབང་མཁས་བཙུན་བཟང་པོའི་གྲགས་པ་རབ་འབར་ཀུན་མཁྱེན་བཙོང་ཁ་པ་དེ་རྒྱལ། །རྒྱལ་བའི་ཉི་
མ་ལས་ཉོན་སྒྲིབ་པ་ཡི། །ནུབ་རིར་བག་ལ་ཞ་ཚེ་དམན་པའི་བློའི། །ཤར་ཕྱོགས་ས་འཛིན་ལས་ཐོན་ཡོངས་འཛིན་རྗེ། །འཁོན་སྟོན་ཀུན་དའི་གཉེན་ཁྱོད་གཙུག་གི་རྒྱན། །ཐོག་མཐའ་བར་དུ་དགེ་བའི་དཔལ་ལྡན་པའི། །དམ་པའི་ཆོས་ཀྱི་འཛད་མེད་འབྱོར་བ་ལ། །འཇམ་དབྱངས་མགྲིན་པར་ཞུགས་པས་དབང་སྒྱུར་བར། །ལྷུན་གྲུབ་སྐུ་བཞིའི་འབྱུང་གནས་དགེ་བའི་བཤེས། །གང་གི་རྣམ་དཀར་ཕྲིན་ལས་བསིལ་ཟེར་གྱིས། ལེགས་བཤད་ཟླ་བའི་མ་མ་རབ་རྒྱས་ལས། །འདི་ཕྱིའི་ཕན་བདེའི་རིན་ཆེན་དབང་གི་རྒྱལ། །སྲིད་ཞིའི་དབུལ་ཕོངས་སེལ་བའི་མཆོད་སྦྱིན་མཁན། ཁྱད་པར་ལྔ་བརྒྱའི་དཔུང་གཉེན་མར་མེ་མཛད། །ཡབ་སྲས་མ་དྲོས་ཆུ་བོ་ལས་འོངས་པའི། །སྣེ་ཟུར་པུ་ཏོ་སྤྱན་སྔ་རྣམ་གསུམ་གྱི། །གདམས་པའི་ཀླུང་ཆེན་བློ་ཡི་རྒྱ་མཚོར་བབས། །དེའི་ཚུལ་རྣམ་པར་ལྕི་བའི་བཀའ་དྲིན་ཁུར། །ཡིད་བྱེད་གཞལ་ནུས་བྱང་ཆུབ་སྙིང་པོ་ཡི། ཕ་མཐའ་རྙེད་པ་དེ་སྲིད་ཆེས་དཀའ་བ། །བསམས་ཀྱིན་ལག་པད་སྙིང་གའི་ངོས་སུ་ཟུམ། །རྒྱལ་སྲས་སྤྱོད་པའི་ངང་
ཚུལ་མཁའ་ལྟར་ཡངས། །གནས་ལུགས་དགོངས་དོན་རྡུལ་ཕྲན་བཞིན་དུ་ཕྲ། །དེ་ཕྱིར་བདག་འདྲས་བརྗོད་པའི་ཁུར་འཁྱེར་བ། །ཨ་མྲའི་ཚི་གུས་ཆུ་གཏེར་འཇལ་བ་བཞིན། །འོན་ཏེ་དཔེ་མཐོང་ཙམ་དང་ཀློག་ལུང་ལ། །འཁྲིད་དུ་བཏགས་མིན་བརྒྱུད་ལྡན་དམ་པའི་གསུང་། །རང་གི་ཉམས་མྱོང་ཚད་མའི་བདུད་རྩིའི་བཅུད། །གླེགས་བམ་རིན་ཆེན་ཟ་མ་ཏོག་ཏུ་འཁྱིལ། །དེ་ལ་འདིར་བདེ་བར་གཤེགས་པའི་གསུང་རབ་མཐའ་དག་གི་གནད་མ་ལུས་པ་གཅིག་ཏུ་བསྡུས་ཏེ་སྐལ་པ་དང་ལྡན་པའི་གང་ཟག་རྣམས་སངས་རྒྱས་ཀྱི་སར་འཁྲིད་པར་བྱེད་པའི་སྐྱེས་བུ་གསུམ་གྱི་ལམ་གྱི་རིམ་པའི་འཁྲིད་འདི་ཉིད་ཉམས་སུ་ལེན་པར་བྱེད་པ་ལ་ཉམས་སུ་ལེན་པ་པོའི་གང་ཟག་དེས་ཀྱང་བརྒྱུད་པ་བར་མ་ཆད་པའི་དགེ་བའི་བཤེས་གཉེན་ཞིག་ལས་ཐོས་དགོས་པའི་རྒྱུ་མཚན་གྱིས་ཇི་སྐད་དུ། ཤིང་རྟ་ཆེན་པོ་གཉིས་ལས་ལེགས་བརྒྱུད་པའི། །ཟབ་མོ་ལྟ་བ་རྒྱ་ཆེན་སྤྱོད་པའི་ལམ། །ཞེས་དང་། ཆོས་ཁུངས་བཙུན་པར་བསྟན་པའི་ཕྱིར་མཛད་པ་པོའི་ཆེ་བ་བསྟན་པ་ཞེས་དང་། ཡང་དག་པར་རྫོགས་པའི་སངས་རྒྱས་ནས་བཟུང་སྟེ་དམ་པ་བར་མ་ཆད་པ་ལས་བརྒྱུད་པའི་མན་ངག་དང་ལྡན་པ་ཞེས་གསུངས་པའི་ཚིག་འདི་དཔྱད་ན་ནུས་པ་ཤིན་ཏུ་ཆེ་བ་ཡིན་ནོ། །དེ་ཡང་བདག་ཅག་གི་སྟོན་པ་ཟས་གཙང་གི་སྲས་པོ་ནས་བཟུང་སྟེ་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་བར་དུ་བརྒྱུད་པའི་རིམ་པ་རྣམས་ལམ་རིམ་གསོལ་འདེབས་སུ་གསལ་བ་ལྟར་འཁྲུལ་མེད་ཀྱི་གོ་རིམ་དུ་བཞུགས་པ་དེ་ལྟར་ཡིན་ལ། དེ་ཕྱིན་ཆད་ནས་རྗེ་བླ་མའི་ལུང་རྟོགས་ཀྱི་བསྟན་པ་ཕྱོགས་ཀུན་ཏུ་སྤེལ་པའི་མཁས་གྲུབ་ཀྱི་སློབ་མ་གནམ་གྱི་སྐར་མ་དང་སའི་དྲེག་པ་ལྟ་བུར་ཁྱབ་པར་གྱུར་པས་བརྒྱུད་ཚུལ་ཡང་དེ་སྙེད་དུ་
འོང་བའི་ཚོད་ཙམ་དུ་གདའ་ནའང་། དེང་སང་ནི་རང་རང་གི་དགོན་པའི་བླ་རབས་འདྲེན་པ་ཙམ་དང་། བར་སྐབས་ཀྱི་བརྒྱུད་པའི་ཁུངས་མེད་པར་གཞན་ལ་སྟོན་པ་སོགས་སྣང་ཚུལ་མཐའ་ཡས་སོ། །འོན་ཏེ་ཆོས་འདིའི་ཚིག་དོན་གྱི་ཆ་ལ་སྒྲོ་འདོགས་གཅོད་པའི་བཤད་བཀའ་དང་། དམར་འཁྲིད་དུ་ཉམས་སུ་བླང་པའི་ཚུལ་སོགས་ལ་ཁོ་བོས་འབད་པ་ཆེན་པོས་ཐོས་བསམ་བྱས་པའི་བརྒྱུད་ཚུལ་སོ་སོར་ཡོད་པའི་འཁྲིད་ཀྱི་སྐོར་རྗེ་བཙུན་ཤེས་རབ་སེང་གེ་ནས་རྩ་བའི་བླ་མའི་བར་དུ་བྱོན་པའི་ཕྱག་བཞེས་སུ་གཙང་ཞིང་ཡིད་དུ་འོང་བའི་ས་ཕྱོགས་ཞེས་བཤད་པ་ལྟར་ཡུལ་དུས་དང་བསྟུན་པའི་གནས་ཁང་སོགས་བྱི་དོར་ལེགས་པར་བྱས། རྒྱལ་བའི་ཡུམ་ལས་སྟོན་པ་དང་ཆོས་ལ་རིམ་གྲོ་བསྐྱེད་པར་གསུངས་པ་ལྟར་ཆོས་སྟོན་པ་པོ་ལ་སེང་གེའི་ཁྲི་ལ་སོགས་པའི་སྟན་མཐོན་པོ་བཤམ་པ་སོགས་སངས་རྒྱས་དང་འདྲ་བར་བསྙེན་བཀུར་པའི་འདུ་ཤེས་བསྐྱེད་དགོས་ཏེ། སའི་སྙིང་པོའི་མདོ་ལས། གཅིག་ཏུ་དད་ཅིང་གུས་པས་ཆོས་མཉན་གྱི། །དེ་ལ་འཕྱ་ཞིང་སྐུར་བར་མི་བྱའོ། །ཆོས་སྨྲ་བ་ལ་མཆོད་པ་བྱ་བ་ནི། །སངས་རྒྱས་འདྲ་བར་དེ་ལ་འདུ་ཤེས་བསྐྱེད། །ཅེས་པའི་དོན་ཡིན་པས་རྟེན་འབྲེལ་གྱི་སྒོ་དང་པོ་འདི་ནས་མ་འཕྱུགས་ཤིང་བརྙས་སྟབས་སུ་མ་སོང་བ་ཞིག་དགོས་གསུང་། ཐོག་མར་བདུད་ཚར་གཅོད་པའི་སྔགས་བཏོན་ནས་དཔག་ཚད་བརྒྱ་ཚུན་ཆད་དུ་བདུད་རིགས་ཀྱིས་གླགས་ལྟ་བར་མི་ནུས་པར་བློ་གྲོས་རྒྱ་མཚོས་ཞུས་པའི་མདོ་ལས་བཤད་ལ། སྔགས་དེ་གདོན་པ་འགྲུབ་མི་འགྲུབ་འབྱུང་བས་དེའི་ཚབ་ཏུ་མདོ་ཚར་གསུམ་ངེས་པར་གསུང་། དེ་རྗེས་སངས་རྒྱས་ནས་བཟུང་རྩ་བའི་བླ་མའི་བར་ཡོངས་སུ་ཚང་བའི་ལམ་རིམ་བརྒྱུད་པའི་
གསོལ་འདེབས་དག་མཎྜལ་འབུལ་བའི་བར་རྣམས་གོ་རིམ་ཕྱུགས་མེད་དུ་བྱ། བློ་གསར་པ་རྣམས་ལ་སྦྱོར་གཞུང་གི་མཛུབ་འཁྲིད་དགེ་རྒན་གྱིས་གཏོང་བ་ལྟ་བུའི་བཅས་བདེ་དང་སླ་ཆོས་ཀྱིས་མི་འོང་གསུང་བས་ཐོག་མཐའ་བར་གྱི་ཕྱག་ལེན་ཆེ་ཕྲ་མཐའ་དག་ལ་རང་བཟོའི་དྲི་མས་མ་སྦགས་པའི་བློ་གྲོས་ཀྱིས་ཞིབ་མོར་དཔྱོད་པ་གནད་དུ་ཆེའོ། །ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་བའི་ཆེད་དུ། སྟོན་པ་བདེ་བར་གཤེགས་པས་གསུངས་པའི་ཟབ་པ་དང་རྒྱ་ཆེ་བའི་དམ་པའི་ཆོས་ཀྱི་ཕུང་པོ་ཀུན་རྒྱལ་ཚབ་རྣམ་པ་གཉིས་ཀྱི་བཀའ་དྲིན་ལ་བརྟེན་ནས། སློབ་དཔོན་གཞན་ལ་ལྟོས་པ་མེད་པར་རང་སྟོབས་ཀྱིས་ཤིང་རྟའི་སྲོལ་ལེགས་པར་ཕྱེ་བའི་མགོན་པོ་ཀླུ་སྒྲུབ་དང་འཕགས་པ་ཐོགས་མེད་གཉིས་ཀྱི་གདམས་པའི་ཆུ་བོ་གཅིག་ཏུ་འདྲེས་པ་དཔལ་མར་མེ་མཛད་ཀྱི་གསུང་རབ་ཐེག་པ་ཆེན་པོའི་ཆོས་ཀྱི་ཚུལ་ཐོས་བསམ་སྒོམ་གསུམ་གྱི་སྒོ་ནས་གཏན་ལ་འབེབས་པ་ནི་སྲིད་ཞིའི་རྒུད་པ་ཐམས་ཅད་སེལ་བར་བྱེད་པའི་ཕན་པ་དང་བདེ་བའི་འབྱུང་གནས་ཡིན་ལ། དེ་ཡང་ཐོས་པའི་ཚོམས་ལས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་ལྡོག་པར་བྱེད། །ཐོས་པས་དོན་མ་ཡིན་པ་སྤོང་། །ཐོས་པས་མྱ་ངན་འདས་པ་འཐོབ། །ཅེས་པ་ལྟར་ཐོག་མར་ཐོས་པས་གཏན་ལ་འབེབས་པར་བྱེད་པ་ལ་མདོ་ལས། ལེགས་པར་རབ་ཏུ་ཉོན་ལ་ཡིད་ལ་ཟུང་ཞིག །ཅེས་ཁ་བུབ་པ་དྲི་མ་ཅན་ཞབས་རྡོལ་བ་ལྟ་བུའི་སྣོད་ཀྱི་སྐྱོན་གསུམ་སྤངས་ཏེ། རང་ལ་ནད་པ། ཆོས་སྨྲ་བ་པོ་ལ་སྨན་པ། རྗེས་སུ་བསྟན་པ་ལ་སྨན། ནན་ཏན་ཉམས་སུ་ལེན་པ་ལ་
ནད་གསོ་བ། དེ་བཞིན་གཤེགས་པ་ལ་སྐྱེས་བུ་དམ་པ། ཆོས་ཀྱི་ཚུལ་ལ་རིང་དུ་གནས་པའི་འདུ་ཤེས་དྲུག་སོགས་མདོར་ན་ཆོས་ཉན་པའི་ཀུན་སློང་ཀུན་སྤྱོད་སོགས་སྤྱི་བྱེ་བྲག་མཐའ་དག་གསལ་བཏབ་ནས་གསན་པར་འཚལ། གསན་བྱ་དམ་པའི་ཆོས་ནི་ཉམས་མགུར་ལས། འཛམ་གླིང་མཁས་པ་ཡོངས་ཀྱི་གཙུག་གི་རྒྱན། །སྙན་པའི་བ་དན་འགྲོ་ན་ལྷང་ངེ་བ། །ཀླུ་སྒྲུབ་ཐོགས་མེད་གཉིས་ལས་རིམ་བཞིན་དུ། །ལེགས་བརྒྱུད་བྱང་ཆུབ་ལམ་གྱི་རིམ་པ་འདི། །སྐྱེ་རྒུའི་འདོད་དོན་མ་ལུས་སྐོང་བས་ན། །གདམས་པ་རིན་ཆེན་དབང་གི་རྒྱལ་པོ་སྟེ། །གཞུང་བཟང་སྟོང་གི་ཆུ་བོ་འདུ་བའི་ཕྱིར། །དཔལ་ལྡན་ལེགས་པར་བཤད་པའི་རྒྱ་མཚོའང་ཡིན། །བསྟན་པ་ཐམས་ཅད་འགལ་མེད་རྟོགས་པ་དང་། །གསུང་རབ་མ་ལུས་གདམས་པར་འཆར་བ་དང་། །རྒྱལ་བའི་དགོངས་པ་བདེ་བླག་རྙེད་པ་དང་། །ཉེས་སྤྱོད་ཆེན་པོའི་གཡང་ས་ལས་ཀྱང་སྲུང་། །དེ་ཕྱིར་རྒྱ་བོད་མཁས་པའི་སྐྱེ་བོ་ནི། །སྐལ་ལྡན་དུ་མས་བསྟེན་པའི་གདམས་པ་མཆོག །སྐྱེས་བུ་གསུམ་གྱི་ལམ་གྱི་རིམ་པ་ཡིས། །ཡིད་རབ་མི་འཕྲོག་དཔྱོད་ལྡན་སུ་ཞིག་ཡོད། །