མཇུག་བྱང་།
སྨྲས་པ། འདི་སྣང་སྲིད་པའི་ཕུན་ཚོགས་སྐད་ཅིག་གཡོ་ལྡན་འདོད་པའི་རླབས་འཕྲེང་མངོན་པར་འཁྲུག་ལ་སྲེད་པ་ཡིས། །ཕ་མཐའ་ཡོངས་བྲལ་འཁོར་བའི་རྒྱ་མཚོར་རབ་ལྷུང་སྡུག་བསྔལ་གསུམ་གྱི་འཇིགས་རུང་ན་ཀྲས་མགྲིན་འཁྱུད་པས། །ཞི་བདེའི་མཆིང་བུ་འཐོབ་པ་ཙམ་གྱི་གོ་སྐབས་བྲལ་ན་རྙེད་དཀའ་དོན་གཉིས་ཡིད་བཞིན་ནོར་བུ་མཆོག །མངོན་སུམ་ལྟ་ཅི་མིག་ཙམ་ཐོས་པའི་སྐལ་པ་ཆེས་ཕྲ་མ་རིག་འཁྲུལ་པས་བསླད་པའི་འགྲོ་བ་རྣམས། །ཉོན་མོངས་པ་དང་ཤེས་བྱའི་སྒྲིབ་པའི་ནགས་ཀླུང་སྟུག་པོ་ཚོགས་གཉིས་ཞུགས་ཀྱིས་བསྲེགས་པ་ཡིས། །ཅུང་ཟད་བཟོད་དཀའ་ཉམ་པའི་
གནས་ཀྱི་འབྲོག་དགོན་ལས་ཐར་དམན་ལམ་གཅན་གཟན་འཚེ་བས་དབེན། །མཐོང་ཐོས་ཀྱིས་ཀྱང་ངལ་གསོའི་ཡུལ་གྱུར་གཞན་ཕན་འཕྲིན་ལས་སྨན་ལྗོངས་སྐྱིད་པའི་དགའ་ཚལ་དུ། །ཉེས་པའི་སྐྱོན་ལས་རྣམ་པར་གྲོལ་པའི་སྐུ་གཉིས་ཟུང་འཇུག་སངས་རྒྱས་ས་ལ་དགོད་པའི་ཆེད། །གང་དག་གཅིག་མིན་ཀུན་ལ་རྗེས་བརྩེའི་ཞལ་སྒོར་ཚེམས་དཀར་ཆུ་འཛིན་ལང་ལོང་དབུས། །སྲབ་འཇམ་ལྗགས་ཀྱི་གློག་དམར་ལེགས་འཁྱུག་ཐེག་གསུམ་ཆོས་ཀྱི་འབྲུག་སྒྲ་ཆེར་བསྒྲགས་པས། །མངོན་མཐོ་ངེས་ལེགས་མངལ་ཁུར་རབ་འཛིན་སྟོབས་བཅུའི་རྩལ་གྱི་སྒྲོ་གཤོག་རྣམ་བཀྲའི་གདུགས། །ཟླུམ་པོར་བྱས་ཏེ་ཕན་བདེའི་ཟློས་གར་སྒྱུར་མཛད་འགྲོ་བའི་བླ་མ་ཟས་གཙང་སྲས། །ཡན་ལག་བཅུ་གཉིས་ཐུབ་པའི་གསུང་རབ་བླ་ན་མེད་པའི་བདུད་རྩིའི་རོ། །ཐུགས་གསང་དཔའ་གྱི་བེའུར་ཡོངས་འཁྱིལ་རྒྱལ་ཚབ་གཉིས་ཀྱི་ཞལ་ལུང་གིས། །ཅི་ཡང་མྱོས་པའི་ལེགས་བཤད་གླུར་ལེན་ཀླུ་སྒྲུབ་ཐོགས་མེད་ཤིང་རྟ་ཆེའི། །གྲགས་དཀར་དུ་ཀཱུ་ལ་ཡི་གོས་ཀྱིས་འཕགས་ཡུལ་འཆི་མེད་འདུན་ས་མཛེས། །སྟོང་པའི་མེ་ལོང་གོས་སུ་ཕྱིན་དྲུག་སྤྱོད་པའི་གཟུགས་བརྙན་རྣམས། །འགག་མེད་འཆར་བའི་སྣང་བ་ཉི་མ་འབུམ་གྱི་འོད་པོ་ཆེ། །ལྷག་བསམ་རླུང་གིས་གངས་ཅན་མཁའ་ལ་འདྲེན་མཛད་ཨ་ཏི་ཤའི། །ལུགས་བཟང་ཚོགས་རྣམས་རིང་མོ་ཞིག་ནས་རྨོངས་པའི་སྤྲིན་གྱིས་བསྒྲིབས། །དེའི་ཚུལ་མ་བཟོད་བརྩེ་ཆེན་ཕྱག་སོར་གྱིས། །ལེགས་བཟུང་མཁྱེན་དཔྱོད་འཇམ་དཔལ་རྡོ་རྗེའི་མཚོན། །རྣོན་པོས་ལོག་རྟོག་འཁྲུལ་པའི་དྲ་བ་རྣམས། །གཅོད་མཛད་བློ་གསལ་སྐལ་བཟང་གྲགས་པའི་དཔྱིད། །ཐུབ་གསུང་མེས་པོའི་ཞལ་སྒོ་ལས་བབས་པའི། །བཀའ་དང་དགོངས་འགྲེལ་ཡན་ལག་བརྒྱད་ལྡན་ཆབ། །བཏུངས་པས་དྲང་ངེས་འབྱེད་མཁས་ཙོང་ཁ་པ། །སྔོན་མེད་ཛཧྣུ་ཞེས་ཀུན་གྱིས་གླེང་། །གང་གི་རིང་ལུགས་འཛིན་འདོད་ཀུན་བཟོད་འདིར། །ཆེས་མང་ལྕི་བར་རྡུལ་གྱི་འབབ་ལྡན་མས། །ནོར་འཛིན་བཞིན་རས་ཡོངས་སུ་བཀྲུས་བྱས་ཀྱང་། །ཚུལ་ལྡན་
ཤེས་པའི་མཁས་པ་ཉིན་སྐར་བཞིན། །འཆད་རྩོད་རྩོམ་ལ་སྤོབས་པའི་མགྲིན་མཐོན་པོ། །མ་རྨད་གཡས་སུ་འཁྱིལ་བའི་ཆོས་ཀྱི་དུང་། །སྐལ་བཟང་རྣ་བར་སྒྲོག་པའི་ཡོངས་འཛིན་ཚོགས། །ཐམས་ཅད་མཁྱེན་པར་ངེས་སོ་གཞན་ལས་ཅི། །ཕྱོགས་རེའི་སྨན་གྱིས་ལ་ལའི་དུག་འགྱུར་བའི། །ཟབ་རློམ་གཞན་གྱིས་འགྲན་མིན་བསྟན་པའི་གནད། མ་ལུས་ཚང་བས་སྐྱེས་བུ་རྣམ་པ་གསུམ། །ཡང་དག་ལམ་དུ་བཀྲི་པའི་དོན་ཆེན་ཡིན། །ལམ་རིམ་གཉིས་ཀྱི་ཚིག་དོན་ཟབ་བརླིང་མཁའ། །བློ་གྲོས་ཆུང་ངུའི་བུག་པར་ཤོང་མིན་ལ། །ཕན་འདོད་གསར་བསྐྲུན་མཐའ་གཉིས་ལྷུང་བའི་ཆུ། །དབང་པོའི་སྣོད་དུ་མི་ཁེངས་ལ་ལར་འབོ། །ཡང་དག་དོན་གྱི་འབྲས་བུ་སྨིན་པ་ལ། །གནད་འགག་མ་ཚང་སྐམ་པོའི་ཡལ་ག་དང་། །དོན་མེད་ཚིག་གི་ལོ་མའི་ཕང་ཕུང་ཡང་། །རི་མོའི་མར་མེ་ཇི་བཞིན་གསལ་ཆས་སྟོང་། །དེ་ཕྱིར་དོན་གྱི་ཆ་ཤས་ཀུན་ཚང་ཞིང་། །རྒྱ་ཆེན་ཚིག་གི་རི་དྭགས་གཟུགས་བྲལ་བའི། །སྔོན་མེད་བསྟན་བཅོས་ཟླ་བ་གསར་པ་འདི། །བདག་བློའི་རྫིང་ལས་སྐྲུན་ནུས་ག་ལ་སྲིད། འོན་ཏེ་གཞུང་དོན་རྟོགས་དཀའི་གནད་ཀྱི་རྒྱུད། །མང་ཐོས་སོར་མོའི་རྩལ་གྱིས་བཀུག་པའི་མདས། །ཕྲ་ཞིང་ལེགས་བཤད་རྒྱང་མའི་ཚད་བཞག་ཚེ། །མཁས་རློམ་འཕོངས་སྐྱེན་རྣམས་ཀྱི་ཁེངས་པ་ཕྲོགས། །ལུང་དོན་རིགས་པས་དཔྱོད་པའི་ཕ་མཐའ་ལ། །གཟིགས་པའི་སྤྱན་གྱི་དཀྱུས་དེ་ཆེས་ཐུང་ཡང་། །མི་དགེའི་གཏམ་གྱི་གར་སྒྱུར་ལྗགས་ཀྱི་རྩེ། །སྲིད་པའི་རྩེ་མོར་སྙེག་རྣམས་ངལ་གསོ་མཛོད། །གུར་ཀུམ་ཚོས་ཀྱང་བཙོས་པའི་ལ་བའི་ཞྭས། །རང་རིགས་བསྟན་པ་ཟིན་ན་ཆེས་ལེགས་ཀྱི། །ཕ་མེས་ལུང་དང་རྟོགས་པའི་ཁྱད་ནོར་ཚོགས། །རྣམ་གཡེང་རྐུན་པོར་ཤོར་བའི་ལག་སྟོང་མང་། །གཏི་མུག་གོམས་པའི་དབང་རྟུལ་རག་གན་ལ། །བསྟན་འཛིན་དམ་པའི་གསེར་སྦྱངས་བཙོ་མ་ཞེས། །མཁས་མང་ཚོང་འདུས་ཆེན་པོའི་སར་འགྲིམས་ཚེ། །མི་ཤེས་ངན་པའི་རང་མདོག་བསྟན་པས་ནོངས། །ན་ཚོད་ཆེས་ཕྲའི་སྒོ་ངའི་
སྦུབས་རྒྱ་ནས། །རྣམ་དཔྱོད་རྩལ་ཀུན་རྫོགས་པར་རབ་དཀའ་མོད། །ལང་ཚོའི་སྒྲོ་གཤོག་རྒྱས་ཀྱང་བཤད་སྒྲུབ་ཀྱི། །ནམ་མཁར་འཕུར་ནུས་མིན་པའི་བྱ་དེས་ཅི། ཁོ་བོ་མ་བསླབས་མཁྱེན་པའི་སྙན་གྲགས་ཀྱི། །ཅལ་སྒྲོག་མང་པོའི་ཡིད་དབང་མ་འཕྲོག་ཀྱང་། །ཕོངས་པའི་ནོར་བཞིན་འབད་པས་སྒྲུབ་པ་ཡི། །ལྔ་རིག་ཕྱོགས་ཙམ་ཤེས་འདིས་གཟེངས་སུ་མཐོ། །མཛད་མཆོག་གསུང་གི་སྙིང་པོ་དཀའ་བའི་མདུད། །རྣམ་པར་འགྲོལ་བའི་བསོད་ནམས་སུ་ཝརྞའི། །འཁོར་ལོ་རྩིབས་སྟོང་འབར་བས་མི་འཇིགས་བཞིའི། །བང་རིམ་རྩེ་མོའི་ཁང་པར་བགྲོད་གྱུར་ཅིག །ཞྭ་སེར་མནབས་པའི་ལུགས་འཛིན་སྐྱོང་པའི་ལྷ། །ཕྱག་དྲུག་ལས་གཤིན་ལྷ་ཆེན་མིག་གི་མེས། །འདོད་ལྟ་སྡེ་བཅས་སྲེག་དང་ཆབས་ཅིག་པར། །ལུང་རྟོགས་བ་དན་སྲིད་རྩེར་སྒྲེང་གྱུར་ཅིག །རང་བློའི་དྲོད་ཀྱིས་འཁྲིད་གཞུང་གསེར་སྒོང་དག །སྨིན་པའི་འབྲས་བཟང་སྐུ་བཞིའི་ཞལ་སྒོ་ཅན། །མི་ཟད་རྒྱན་གྱི་འཁོར་ལོའི་བྱེད་པ་པོ། །ཀུན་མཁྱེན་མེས་པོར་འགྲོ་རྣམས་གྱུར་ཅིག་གུ། དེ་ལྟར་བྱང་ཆུབ་ལམ་གྱི་རིམ་པའི་འཁྲིད་གཞུང་སྤྱན་སྔ་བློ་གྲོས་རྒྱལ་མཚན་གྱིས་མཛད་པ་སོགས་འགའ་ཞིག་སྣང་བ་སྟོད་ཆ་རྣམས་བཤད་ཡམས་སུ་སོང་བས་དམིགས་པའི་ཐོག་ཏུ་མི་འདྲིལ་ལ། སྨད་ཆ་རྣམས་ཧ་ཅང་བསྡུས་པས་གང་ཟག་ལས་དང་པོ་རྣམས་ལ་ཉེ་བར་མི་མཁོ་ཞིང་། བློ་གྲོས་ཀྱི་རྩལ་དང་ལྡན་པ་རྣམས་ནི་ཐམས་ཅད་མཁྱེན་པ་ཙོང་ཁ་པ་ཆེན་པོའི་གསུང་རབ་ལ་བལྟ་བའི་བློ་གྲོས་ཀྱི་མིག་དང་ལྡན་བཞིན་དུ་ཡི་གེ་གཞན་ལ་བརྟེན་པ་ཡན་ལག་བརྒྱད་ལྡན་གྱི་མཚོ་འགྲམ་དུ་བ་ཚྭའི་ཁྲོན་པའི་དཔེར་སོང་མོད། བརྒྱུད་པའི་བཀའ་སྲོལ་འདི་པར་ཐམས་ཅད་མཁྱེན་པ་བསོད་ནམས་རྒྱ་མཚོ་ཡན་ཆོད་དུ་ལམ་རིམ་གཉིས་དང་། བླ་མ་བརྒྱུད་པའི་ཞལ་ལུང་ཉམས་པ་མེད་པ་ཉིད་ལས་ཟིན་བྲིས་ཀྱི་ཡི་གེ་འདི་ལ་བརྟེན་གྱི་སྒྲོས་མི་འདུག་ཅིང་། སྤྱན་སྔ་རིན་པོ་ཆེ་གཞོན་ནུ་ཆོས་དཔལ་བཟང་པོ་ཡན་ཆོད་དུ་བདུད་རྩི་གསེར་གྱི་ཡང་ཞུན་ལ་རྩ་བར་མཛད། ལམ་རིམ་ཆེ་ཆུང་གཉིས་ནས་ཁ་བཀང་སྟེ་
གནང་བ་ལས་འཁྲིད་ཡིག་ནག་འགྲོས་སུ་བཀོད་པ་མེད་ཀྱང་། ཡུལ་ཉང་སྟོད་དཔལ་འཁོར་བདེ་བ་ཆེན་པོའི་སྒྲུབ་སྡེ་རི་ཁྲོད་དགའ་ལྡན་གྱི་སློབ་དཔོན་པ། ཨེ་རིག་པའི་འབྱུང་གནས་ཀྱི་ཡུལ་གྲུར་སྐྱེས་པའི་མདོ་སྔགས་རབ་འབྱམས་སྨྲ་བ་བྱམས་པ་རིན་ཆེན་གྱིས་འབད་པ་ཆེན་པོས་ཟླ་བ་ཕྱེད་གཉིས་ཀྱི་བར་དུ་ཉམས་འཁྲིད་སྨིན་རྒྱས་སུ་མནོས་ཏེ། འཁྲིད་དམིགས་ཡི་གེར་འཁོད་པ་ཞིག་དགོས་ཞེས་ནན་གྱིས་བསྐུལ་བ་ལ་བརྟེན་ནས། སྤྱིར་ཉམས་འཁྲིད་ཀྱི་རིགས་བརྒྱུད་ལྡན་བླ་མའི་ཞལ་སྒོ་ལས་ཉེ་བར་མནོས་པ་ཞིག་མ་བྱུང་ན། ཀླག་ལུང་དང་དཔེ་ཙམ་གྱི་སྟེང་ནས་ཉམས་སུ་ལེན་པ་བརྒྱུད་པ་མེད་པས་རང་གཞན་ལ་ཕན་པར་མི་འགྱུར་བར་མ་ཟད། །ཆོས་ལ་དབང་ཟ་བའི་སྐྱེ་བོ་སྙིང་ཁམས་ཅན་འདྲས་རང་གིས་ཉམས་འཁྲིད་མ་ཐོབ་བཞིན་དུ་གཞན་ལ་འཆད་པ། ཇོ་བོ་བཀའ་གདམས་པ་རྣམས་ཀྱིས་རང་ལ་ཉམས་ལེན་མེད་པར་གཞན་ལ་སྟོན་པ་བུམ་སྟོང་གཅིག་ནས་གཅིག་ཏུ་འབྱོ་བར་གསུངས་པ་ལས་ཀྱང་དམན་པའི་དུས་ཚོད་འདིར། ལག་ལེན་དམར་འཁྲིད་དུ་གསལ་བར་ཡི་གེར་འབྲི་བ་གཅིག་ཏུ་བསྟན་པའི་རྒྱུན་ལ་མི་ཕན་པར་འདུག་ནའང་། སྙིགས་མར་སྤྱོད་པའི་སྐྱེ་རྒུ་བློ་གྲོས་དམན་པ་རྣམས་ཀྱིས་བླ་མའི་གསུང་སྒྲོས་ཚུལ་བཞིན་དུ་མ་ཟིན་པར་ལོག་བཤད་ཀྱི་ཉེས་པའང་འབྱུང་བས་གཉིས་སུ་བསྟན་པ་ལ་ཕན་པའང་སྲིད་སྙམ་པའི་བློས། བྱང་ཆུབ་ལམ་གྱི་རིམ་པའི་འཁྲིད་གཞུང་འཇམ་དཔལ་དབྱངས་ཀྱི་ཞལ་ལུང་ཞེས་བྱ་བ་འདི་ནི། རྒྱལ་བའི་གསུང་རབ་མཐའ་དག་ལ་གཞན་དྲིང་མི་འཇོག་པའི་རྩོད་དུས་ཀྱི་ཀུན་མཁྱེན་ཆེན་པོ་འཁོན་སྟོན་ཆོས་ཀྱི་རྒྱལ་པོའི་ཞལ་ལུང་དྲི་མ་མེད་པ་འཇམ་དབྱངས་བླ་མའི་དྲིན་ལས་ལེགས་པར་ཐོས་ཤིང་སྨྲ་མཁས་ངག་གི་དབང་ཕྱུག་རྗེ་བཙུན་བླ་མ་དཀོན་མཆོག་ཆོས་འཕེལ་བའི་དྲུང་དུ་ལམ་གྱི་རིམ་པ་ཆེན་མོ་ཚིག་གཅིག་ཀྱང་མ་ལུས་པའི་ཟབ་བཤད་ལན་གཉིས་ཀྱི་བར་དུ་མནོས་པའི་བཀའ་དྲིན་ལས་ཆོས་ཚུལ་འདི་ཉིད་སྨྲ་བ་ལ་སྤོབས་པའི་མགྲིན་པ་
ཅུང་ཟད་འདེགས་ནུས་པའི་སྐལ་བ་ཅན་དུ་གྱུར་པའི་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེ་མིང་གཞན་འཇམ་དབྱངས་དགའ་བའི་བཤེས་གཉེན་དུ་འབོད་པས། འཕགས་པའི་ཡུལ་དུ་བི་ལམྦྷ་ཞེས་ཕྱོགས་འདིར་རྣམ་འཕྱང་དུ་འབོད་ཅིང་། འཇམ་དབྱངས་གོང་མའི་རྒྱལ་ཁབ་ཏུ་ཝུ་ཟུའི་ཞེས་པ་ས་ཕོ་ཁྱིའི་ལོ། ལེགས་སྦྱར་གྱི་སྐད་དུ་ཤྲ་ཎར་གྲགས་པ་བྱ་སྦོ་ཟླ་བ། རྒྱ་ནག་པ་ཆཱི་ཡོལ་ཞེས་ཧོར་ཟླ་བདུན་པ། དུས་འཁོར་བའི་མུན་པའི་མུན་པ་གསལ་བ་འབྲིང་པོའི་དགའ་བ་ཡོན་ཏན་གྱི་དབྱངས་ཨཱ་ལ། གསལ་བྱེད་མཱ་ལ། དབྱངས་འཆར་བའི་དམར་ཕྱོགས་དགའ་བ་གཉིས་པ། དབྱངས་ཨཱ། གསལ་བྱེད་ཚ། ན་ཚོད་བྱིས་པ། ཁམས་ས། འདོད་ཡོན་དྲི། ཉི་མ་མེ་བཞིའི་འགྲུབ་སྦྱོར་གྱི་ཏཏྐཱ་ལ་སེང་གེའི་དུས་སྦྱོར་ལ། བཀའ་དང་བསྟན་བཅོས་འགྱུར་རོ་ཅོག་གི་ཚལ་ཆེན་པོ་དཔལ་ལྡན་འབྲས་སྤུངས་ཆོས་ཀྱི་སྡེ་ཆེན་པོར་སྦྱར་བའི་ཡི་གེ་པ་ནི་གྲོང་སྨད་པ་འཕྲིན་ལས་རྒྱ་མཚོས་བྲིས་པ་སུ་དྷི་ཤཱ་ས་ནཱ་ནཱཾ་བ་སནྟེ་ཥཱ་ད་ཡནྟུ། མངྒ་ལ་བྷ་ཝནྟུ། །ཨོཾ་སྭ་སྟི། རྣམ་འདྲེན་ཡོངས་ཀྱི་གསུང་རབ་སྙིང་པོའི་དོན། །དུས་གསུམ་རྒྱལ་བ་སྲས་བཅས་བགྲོད་གཅིག་ལམ། །འཕགས་ཡུལ་ཤིང་རྟ་ཆེ་ལས་བརྒྱུད་པའི་སྲོལ། །ཆེ་བ་བཞི་ལྡན་བྱང་ཆུབ་ལམ་རིམ་འཁྲིད། །ཀུན་ལ་གྲགས་པའི་བཀའ་གདམས་ལུང་བསྟན་བཞིན། །ཀུན་གྱི་ཕན་བདེའི་འབྱུང་གནས་ཡིད་བཞིན་ནོར་། །ཀུན་མཁྱེན་ཕྱག་ན་པདྨོ་ལྔ་པའི་གསུང་། །ཀུན་ནས་ཚིག་དོན་ཕུན་ཚོགས་ལེགས་བཤད་འདི། །པར་དུ་བསྐྲུན་པའི་རྣམ་དཀར་ཟླ་འོད་ཀྱི། །རྗེས་འགྲོ་འདིས་མཚོན་དུས་གསུམ་དགེ་བའི་མཐུས། །མཁའ་དང་མཉམ་པའི་མ་རྒན་ཡིད་ཅན་རྣམས། །ཐེག་མཆོག་དགེ་བའི་བཤེས་དང་འབྲལ་མེད་ཤོག །ཞིང་མཆོག་བླ་མ་རྒྱལ་བ་སྲས་བཅས་ལ། །ནམ་ཡང་སྐྱོན་རྟོག་སྤངས་ནས་རབ་གུས་ཤིང་། །འདི་དང་ཕྱི་མའི་འཁོར་བའི་ཕུན་ཚོགས་ལ། །ཡིད་ཀྱི་རེ་བ་མ་ཚང་མ་མེད་པར་
ཤོག །འགྲོ་རྣམས་བསྒྲལ་འདོད་བྱང་ཆུབ་སེམས་བསྐྱེད་དང་། །ཕ་རོལ་ཕྱིན་དྲུག་ལམ་བཟང་གོམས་པའི་མཐུས། །རང་གཞན་དོན་གཉིས་ཕུན་ཚོགས་མཐར་ཕྱིན་པའི། །བདེ་གཤེགས་གོ་འཕང་མྱུར་དུ་ཐོབ་པར་ཤོག །ལྷ་མཆོག་འཇམ་དཔལ་དགྱེས་པའི་ཞལ་ལུང་སོགས། །འཁྲུལ་མེད་དགའ་ལྡན་བསྟན་པའི་ཆོས་ཚུལ་རྣམས། །བཤད་སྒྲུབ་རྣམ་པར་དག་པས་ལེགས་འཛིན་པའི། །སྐལ་ལྡན་སྐྱེས་བུས་ས་སྟེང་ཁྱབ་གྱུར་ཅིག །འདིར་འབད་ཚོགས་ཀྱང་ཚེ་ལས་ཐམས་ཅད་དུ། །མདོ་སྔགས་ལམ་བཟང་རྣམས་དང་མི་འབྲལ་ཞིང་། །དེ་ཡི་འགལ་རྐྱེན་མ་ལུས་ཞི་བ་དང་། །མཐུན་རྐྱེན་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་པ་འདི་ནི་རྗེ་རྒྱལ་བ་གཉིས་པའི་བསྟན་པའི་གསལ་བྱེད་ཡོངས་ཀྱི་དགེ་བའི་བཤེས་གཉེན་ཆེན་པོ་ངག་དབང་བྱམས་པས་བྱང་ཆུབ་ལམ་རིམ་གྱི་འཁྲིད་ཡིག་འཇམ་དཔལ་ཞལ་ལུང་དང་། བློ་སྦྱོང་དོན་བདུན་མའི་འཁྲིད་ཡིག་གཉིས་པར་བགྲེས་སྐྱོན་ཆེ་ངེས་འདུག་པས་གསར་བསྐྲུན་དགོས་ཞེས། ཁ་བཏགས་ནང་མཛོད། སྨན་ཡུག །གོས་ཡུག །གསེར་སྲང་ལྔ། དངུལ་སྲང་ལྔ་བཅུ་བཅས་བསྐུལ་མ་གནང་བ་བཞིན་གསར་དུ་བརྐོས་པའི་པར་བྱང་དུ་ཤཱཀྱའི་དགེ་སློང་སྐལ་བཟང་རྒྱ་མཚོས་སྦྱར་པའོ།། །།ཤུ་བྷཾ།།
ཤོག་སྟོང་