ལམ་གྱི་གཙོ་བོ་རྣམ་གསུམ་གྱི་དགོངས་འགྲེལ་ལུང་རིགས་གཏེར་མཛོད།
ལམ་གྱི་གཙོ་བོ་རྣམ་གསུམ་གྱི་དགོངས་འགྲེལ་ལུང་རིགས་གཏེར་མཛོད་བཞུགས་སོ། །
ཐུགས་བསྐྱེད་ས་བོན་ཚོགས་གཉིས་དྲོད་གཤེར་གྱིས། །སྨིན་པའི་བླ་མེད་ཡེ་ཤེས་ཛམྦུའི་ལྗོན། །འཕྲིན་ལས་སྙེ་མ་གདུལ་དཀའ་འགྲོ་བའི་མཚོར། །ཕན་བདེའི་གསར་བསྒྱུར་
ཉི་མའི་གཉེན་ཁྱོད་བསྔགས། །བདེན་གསུམ་མཁའ་ཁྱབ་ཆོས་ཕུང་སྙིང་པོའི་དོན། །སྟོན་ལ་གངས་ཅན་བསོད་ནམས་ལུས་ཕྲའི་ལྟོར། །དྷཱིཿཡིག་ཞུན་འཁྱིལ་ལེགས་སྦྲུམ་བཙོང་ཁ་པའི། །ཞབས་སེན་ཟླ་ཚེས་གཙུག་ཏོར་རྩེར་ཤར་རྒྱན། །འཇམ་མགོན་མགྲིན་པར་འཁྱུད་པའི་བློ་གྲོས་གོམ། །ཤེས་བྱའི་ས་གསུམ་གཞལ་ཚེ་མིག་སྔོན་བསྙེམས། །རབ་འཕྲོག་རྒྱ་མཚོའི་གོས་སྟེང་གྲིབ་མ་ལས། །གྲོགས་གཞན་རྙེད་མིན་སྟག་ལུང་བྲག་པ་རྒྱལ། །རང་བསྟན་ཆུ་བོར་བསྲེ་བསླད་ཞེན་པའི་དུག །དགག་བསྒྲུབ་དཀྱིལ་འཁོར་མཐོང་མོད་དྲུང་ཕྱུངས་ཏེ། །ལེགས་བཤད་ཡན་ལག་བརྒྱད་བསྒྱུར་ཨཱ་གསྟྱ། །དཀོན་ཅོག་ཆོས་འཕེལ་སྔོན་མེད་དྲང་སྲོང་ཆེ། ཁྱོད་གསུང་རིན་ཅེན་འབྱུང་གནས་འཁྱིལ་བ་ལས། །བདག་བློ་ཨ་མྲའི་ཚི་གུས་བཅུས་པའི་ཆུས། །གཟུར་གནས་ཡིད་ཀྱིརྩེ་དགའ་དགོད་པའི་ཆེད། །མཆོད་ཡོན་སྦྲེང་བའི་སྤོབས་མཐོང་འདི་ཆགས་སོ། །འདི་ཡང་འོ་སྐོལ་གྱི་སྟོན་པ་ས་གསུམ་གྱི་སྒྲོན་མེ་གཅིག་པུ་བ་ཐུབ་པ་སངས་
རྒྱས་བཅོམ་ལྡན་འདས་ཞེས་སྙན་པའི་རྔ་བོ་ཆེ་སྲིད་པའི་རྩེ་མོའི་མཐར་ཐུག་པར་སྒྲོག་པ་གང་གིས་མཐའ་ཀླས་པའི་འགྲོ་བའི་རྒྱུད་ཀྱི་གདུལ་བྱ་ཉོན་མོངས་པ་དང་ཤེས་བྱའི་སྒྲིབ་པ་ཇི་སྙེད་པའི་གཉེན་པོར་འདུལ་བྱེད་དམ་པའི་ཆོས་ཀྱི་ཕུང་པོ་གྲངས་མེད་པ་ཞིག་བཀའ་སྩལ་བ་རྣམས་ཀྱི་ནང་ནས་དོན་གྱི་ཡང་སྙིང་ལམ་གྱི་གཙོ་བོ་རྣམ་པ་གསུམ་དུ་དྲིལ་ཏེ། ཇི་ལྟ་ཇི་སྙེད་ཀྱི་ཆོས་ཀུན་འཁྲུལ་པའི་དྲི་མ་ཙམ་ཡང་མེད་པར་མཁྱེན་པའི་སྤྱན་རས་ཀྱི་མངོན་སུམ་དུ་གཟིགས་པའི་རྒྱལ་བ་གཉིས་པ་ཤར་བཙོང་ཁ་པ་བློ་བཟང་གྲགས་པའི་དཔལ་གྱིས་རང་གི་གམ་དུ་ཉེ་བར་གནས་པའི་རིམ་གྲོ་པ་རྒྱལ་མོ་རོང་གི་ཚ་ཁོ་དབོན་པོ་ངག་དབང་གྲགས་པར་ཞལ་གདམས་སུ་མཛད་པ་འདི་ཉིད་འཆད་པ་ལ། ཀླད་ཀྱི་དོན། གཞུང་གི་དོན། མཇུག་གི་དོན་དང་གསུམ་ལས། དང་པོ་ལ་མཆོད་པར་བརྗོད་པ། རྩོམ་པར་དམ་བཅའ་བའི་སྒོ་ནས་ལུས་མདོར་བསྟན་པ། སྣོད་ལྡན་གྱི་གདུལ་བྱ་ལ་མཉན་པར་བསྐུལ་བ་དང་གསུམ་གྱི། དང་པོ་ལ་ཚིག་དོན་དང་། སྤྱི་དོན་གཉིས། དང་པོ་ནི། རྗེ་བདག་ཉིད་ཆེན་པོས་བསྟན་བཅོས་འདི་ཉིད་མཛད་པའི་ཐོག་མར་རྗེ་བཙུན་བླ་མ་དམ་པ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་རྣམས་ལ་ཕྱག་འཚལ་ལོ་ཞེས་བཙལ་བ་ལ་ཆོས་ཅན། རྒྱུ་མཚན་ཡོད་དེ། སྔོན་གྱི་ལོ་པཎ་རྣམས་ཀྱིས་ཀྱང་བྱ་བ་ཁྱད་པར་ཅན་ལ་འཇུག་པའི་ཚེ་ཡུལ་ཕུན་སུམ་ཚོགས་པར་ཕྱག་མཛད་པས་སྔོན་བྱུང་གི་རྣམ་ཐར་དང་མཐུན་ཅིང་གནས་སྐབས་དང་མཐར་ཐུག་གི་དོན་བདེ་བླག་ཏུ་གྲུབ་པའི་དགོས་པ་ཡོད་པའི་ཕྱིར། གཉིས་པ་སྤྱི་དོན་ནི། དེའང་རྗེ་བཙུན་བཙོང་ཁ་པ་དངོས་ཀྱི་བཀའ་དྲིན་ནོད་པའི་བླ་མ་རྣམས་ལ་ཕྱག་མཛད་པ་ཡིན་ནམ་སྙམ་ན། ཡོངས་སུ་གྲགས་
པའི་བཤེས་གཉེན་ཙམ་ལ་ཕྱག་མཛད་པ་མ་ཡིན་པའི་རྒྱུ་མཚན་གཙོ་བོར་རྒྱལ་བའི་གསུང་རབ་མཐའ་དག་གི་དྲང་བ་དང་ངེས་པའི་དོན་གྱི་དཀའ་བའི་གནད་གཞན་དག་གིས་འགྲོལ་བར་མ་ནུས་པ་རྣམས་བླ་མ་འཇམ་དཔལ་དབྱངས་ཀྱི་བཀའ་དྲིན་ལ་བརྟེན་ནས་རྙེད་པ་ཡིན་པས་བླ་མ་རྣམས་ཀྱི་ནང་ནས་དངོས་བསྟན་བསྟན་བྱའི་གཙོ་བོ་འཇམ་དབྱངས་ལ་ངོས་འཛིན་དགོས་ཏེ། ལེགས་བཤད་སྙིང་པོ་ལས། གཞུང་ལུགས་མང་ཐོས་རིག་པའི་ལམ་དུའང་། ངལ་བ་མང་བསྟེན་མངོན་པར་རྟོགས་པ་ཡིས། །ཡོན་ཏན་ཚོགས་ཀྱི་མི་དམན་དུ་མས་ཀྱང་། །འབད་ཀྱང་རྟོགས་པར་མ་གྱུར་གནས་དེ་ནི། །འཇམ་མགོན་བླ་མའི་དྲིན་གྱིས་ལེགས་མཐོང་ནས། །ཤིན་ཏུ་བརྩེ་བའི་བསམ་པས་བདག་གིས་བཤད། །ཅེས་གསུངས་པའི་འཇམ་མགོན་དེ་མིའི་བླ་མ་ལ་སྒྲོ་བཏགས་པ་མ་ཡིན་པར་རྗེ་བཙུན་བསྟན་པའི་འཁོར་ལོ་ཁོ་ནར་ཐུགས་རྩེ་བསྟད་པས་ཀྱང་རྟོགས་ནུས་པའི་ཕྱིར་རོ། །གཉིས་པ་རྩོམ་པར་དམ་བཅའ་བའི་སྒོ་ནས་ལུས་མདོར་བསྟན་པ་ལ། ཚིག་དོན་དང་། སྤྱི་དོན་གཉིས་ལས། དང་པོ་ནི། ཤེས་བྱ་ཆོས་ཅན། ལམ་གྱི་གཙོ་བོ་རྣམ་གསུམ་བློ་བཟང་གྲགས་པ་བདག་གིས་རང་གི་བློས་ཇི་ལྟར་དཔོག་པར་ནུས་པ་བཞིན་དུ་སྣོད་ལྡན་གྱི་སློབ་མ་ངག་དབང་གྲགས་པ་ཁྱོད་ལ་བཤད་པར་བྱ་བ་ཡིན་ཏེ། གང་འཆད་ན་བདུད་བཞི་ལས་རྣམ་པར་རྒྱལ་བའི་ཐུབ་པ་བཅོམ་ལྡན་འདས་ཀྱིས་གསུངས་པ་རབ་དང་ཕུལ་དང་ཀུན་གྱི་གཙོ་བོ་སྟེ་ཐོག་མཐའ་བར་གསུམ་དུ་དགོས་པའི་སྙིང་པོའི་དོན་མེད་དུ་མི་རུང་བ་ངེས་འབྱུང་གི་བསམ་པ། རྒྱལ་བའི་སྲས་པོ་དམ་པའི་སྐྱེས་བུ་རྣམས་ཀྱིས་རྒྱ་ཆེར་བསྔགས་པར་མཛད་པའི་ལམ་བྱང་ཆུབ་ཀྱི་སེམས་སྐལ་བ་དང་ལྡན་པའི་
གང་ཟག་ཐར་པ་འདོད་པ་རྣམས་ཀྱི་འཇུག་ངོགས་ཀྱི་མཆོག་སྟོང་ཉིད་རྟོགས་པའི་ཤེས་རབ་རྣམ་པ་གསུམ་པོ་དེ་ནི་བསྟན་བྱའི་ཆོས་དངོས་ཡིན་པའི་ཕྱིར་རོ། །གཉིས་པ་སྤྱི་དོན་ནི། རྒྱུད་ཐམས་ཅད་ཀྱི་རྒྱལ་པོ་དཔལ་གསང་བ་འདུས་པ་ནས་བཟུང་སྟེ་དམ་པའི་ཆོས་ལུང་སྡེ་བཞིའི་བར་གྱི་སྡེ་སྣོད་གསུམ་དང་རྒྱུད་སྟེ་བཞིའི་དོན་འགྲོ་བ་རྣམས་འཁོར་བའི་སྡུག་བསྔལ་ལས་ཐར་པར་བྱས་ཏེ་མྱ་ངན་ལས་འདས་པ་ཐོབ་པའི་ཐབས་སུ་གསུངས་པ་ཤ་སྟག་ཡིན་ལ། མྱང་འདས་དོན་དུ་གཉེར་བའི་གང་ཟག་དེས་ཚངས་པ་དང་འཁོར་ལོས་སྒྱུར་བའི་དཔལ་ཡང་མེ་འབར་བའི་རླུབས་ལྟར་སྡུག་བསྔལ་གྱི་རང་བཞིན་དུ་མཐོང་དགོས་པས། སྨན་གཞི་ལས། རྒྱལ་པོ་ཆེན་པོ་འཇིག་རྟེན་འདི་ཐམས་ཅད་ནི་རྒ་བ་ལས་ཉེ་བར་འཁྲིད་པ་ཡིན། འཇིག་རྟེན་འདི་ནི་རྗེས་སུ་འགྲོ་བ་མེད་པས་སྐྱབས་མེད་པ་ཡིན། འཇིག་རྟེན་འདི་ནི་ཐམས་ཅད་བོར་ཏེ་འགྲོ་བར་འགྱུར་བས་བདོག་པ་མེད་པ་ཡིན། འཇིག་རྟེན་འདི་ནི་ངོམས་མི་ཤེས་ཏེ་སྲེད་པ་ལ་འཁོལ་བས་ཆོག་མི་ཤེས་པར་བདག་གིས་ཤེས་མཐོང་ཐོས་རྟོགས་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །ཞེས་གསུངས་པས་སོ་ཐར་གྱི་དུས་མ་ཟད་ངེས་འབྱུང་གིས་བསམ་པ་ནི་ཐེག་པ་ཆེ་ཆུང་གང་གི་སྐབས་སུའང་དགོས་པའི་ཕྱིར་གསུང་རབ་ཀུན་གྱི་སྙིང་པོར་བསྟན་པ་ཡིན་པས། འཁོར་བའི་སྡུག་བསྔལ་ལ་ཡིད་འབྱུང་བའི་ཕན་ཡོན་ནི། སྤྱོད་འཇུག་ལས། གཞན་ཡང་སྡུག་བསྔལ་ཡོན་ཏན་ནི། །སྐྱོ་བས་དྲེགས་པ་སེལ་བར་བྱེད། །འཁོར་བ་པ་ལ་སྙིང་རྗེ་སྐྱེ། །སྡིག་ལ་འཛེམ་ཞིང་དགེ་ལ་དགའ། །ཞེས་རྒྱ་ཆེར་བཤད་པས་གདུལ་བྱ་རིགས་ཅན་གསུམ་གྱི་ཐུན་མོང་གི་རྒྱུ་ཡིན་ཀྱང་
རང་གཞན་ཐམས་ཅད་ཀྱི་དོན་བདེ་བླག་ཏུ་འགྲུབ་པར་ནུས་པ་སངས་རྒྱས་ཀྱི་གོ་འཕང་ཐོབ་པར་བྱེད་པའི་རྒྱུའི་གཙོ་བོ་སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་ཀྱི་མཆོག་ཏུ་སེམས་བསྐྱེད་པ་ཡིན་པའི་ཕྱིར། དཀོན་མཆོག་བརྩེགས་པ་ལས། འོད་སྲུངས་འདི་ལྟ་སྟེ། དཔེར་ན་ཟླ་བ་ཚེས་པ་ལ་ཕྱག་འཚལ་བ་ལྟར་ཉ་བ་ལ་མ་ཡིན་ནོ། །འོད་སྲུངས་དེ་བཞིན་དུ་གང་དག་ང་ལ་རབ་ཏུ་དད་པ་དེ་དག་གིས་བྱང་ཆུབ་སེམས་དཔའ་རྣམས་ལ་ཕྱག་བྱའི། དེ་བཞིན་གཤེགས་པ་རྣམས་ལ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་ནི་དེ་བཞིན་གཤེགས་པ་རྣམས་འབྱུང་ངོ་། །དེ་བཞིན་གཤེགས་པ་རྣམས་ལས་ནི་ཉན་ཐོས་དང་རང་སངས་རྒྱས་ཐམས་ཅད་འབྱུང་ངོ་། །ཞེས་དང་། འཇུག་པ་ལས། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང་། སྙིང་རྗེའི་སེམས་དང་གཉིས་སུ་མེད་བློ་དང་། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་སེམས་འདི་དང་བྲལ་བའི་ཐབས་གཞན་གང་གིས་ཀྱང་འཚང་རྒྱ་བར་མི་ནུས་མོད། འོ་ན་སེམས་བསྐྱེད་པ་ཙམ་གྱིས་ཆོག་གམ་སྙམ་ན། མ་ཡིན་ཏེ། དོན་གཉིས་མཐར་ཕྱིན་པ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལྟ་ཅི་སྨོས། འཁོར་བ་ལས་གྲོལ་བའི་ཉན་རང་གི་ཐར་པ་ཐོབ་པ་ཙམ་ལའང་སྟོང་ཉིད་ཕྲ་མོ་ངེས་པར་རྟོགས་དགོས་པས། འཕགས་པ་ཡུལ་འཁོར་སྐྱོང་གིས་ཞུས་པའི་མདོ་ལས། སྟོང་པ་ཞི་བ་སྐྱེ་བ་མེད་པའི་ཚུལ། །མི་ཤེས་པས་ནི་འགྲོ་བ་འཁྱམས་གྱུར་པ། །དེ་དག་ཐུགས་རྗེ་མངའ་བས་ཐབས་ཚུལ་དང་། །རིག་པ་བརྒྱ་དག་གིས་ནི་
འཛུད་པར་མཛད། །ཅེས་གསུངས་པ་ལྟར། ཤེས་རབ་ཀྱི་ཕ་རོལ་ཏུ་ཕྱིན་པའི་དོན་མཐའ་གཉིས་དང་བྲལ་བའི་ཟབ་མོ་རྟེན་ཅིང་འབྲེལ་པར་འབྱུང་བའི་གནད་འདི་ཁོང་དུ་མ་ཆུད་ན་སྡུག་བསྔལ་བདེན་པ་དང་ཀུན་འབྱུང་བདེན་པ་གཉིས་ཀྱི་འཆིང་བ་ལས་ནམ་ཡང་གྲོལ་མི་ནུས་པས་སྐྱེས་བུ་ཆེ་འབྲིང་ཆུང་གསུམ་གྱི་ལམ་ཐམས་ཅད་གནད་འདི་གསུམ་དུ་འདུས་པ་ཡིན་ནོ། །དེ་ཡང་འོག་ནས་འབྱུང་བའི་བརྗོད་བྱའི་དོན་ཐམས་ཅད་རྩོམ་པ་དམ་བཅའི་སྐབས་འདིར་ཚང་བར་བསྟན་པས་ན། སློབ་དཔོན་དཎྜིས། ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ། །ཞེས་གསུངས་པས་ཚུལ་དེ་ལྟ་བུ་ལ་དངོས་པོ་ངེས་བསྟན་དུ་འཆད་དོ། །གསུམ་པ་སྣོད་ལྡན་གྱི་སློབ་མ་ལ་མཉན་པར་བསྐུལ་བ་ནི། ཤེས་བྱ་ཆོས་ཅན། ཚ་ཁོ་དབོན་པོ་ལ་སོགས་པ་སྔོན་ནས་དམ་པའི་ཆོས་ཀྱི་བག་ཆགས་བཟང་པོའི་མཐུ་བརྟས་པ། ལས་དང་སྐལ་བར་ལྡན་པའི་གཟུར་གནས་ཀྱི་གདུལ་བྱ་དེ་དག་སྣོད་ཀྱི་སྐྱོན་གསུམ་སྤངས། འདུ་ཤེས་དྲུག་རབ་ཏུ་བསྟེན་པ་སོགས་ཡིད་ཀྱི་ཀུན་སློང་གི་ཁྱད་ཆོས་རབ་ཏུ་དང་བའི་དད་པའི་སྒོ་ནས་ཉོན་ཅིག་པར་བསྐུལ་བ་ལ་དགོས་པ་ཡོད་དེ། བསྐུལ་ཡུལ་གྱི་གདུལ་བྱ་གང་ཡིན་པ་དེ་དག་ལྷ་དང་མི་ལ་སོགས་པའི་སྲིད་པ་འཁོར་བའི་བདེ་བ་ཐམས་ཅད་འགྱུར་བའི་སྡུག་བསྔལ་དུ་རིག་པར་གྱུར་པ་ལ་བརྟེན་ནས་མ་ཆགས་ཤིང་དལ་བ་བརྒྱད་དང་འབྱོར་པ་བཅུ་ཚང་བའི་མིའི་ལུས་རྟེན་བཟང་པོ་མཚན་མོ་མུན་པའི་སྨག་ཏུ་གློག་འགྱུར་ལྟར་ལན་ཅིག་ཙམ་ཐོབ་པ་འདི་སྟོང་ལོག་ཏུ་མ་གྱུར་པར་དོན་ཡོད་པ་བསྒྲུབ་པར་བྱ་བའི་ཕྱིར་དུ་ལེ་ལོ་དང་གཡེང་བའི་དབང་དུ་མ་སོང་བའི་བརྩོན་འགྲུས་དྲག་པོ་བརྩམས་པ་ཡི་མཐུ་ལ་བརྟེན་ནས་དུས་གསུམ་གྱི་རྒྱལ་པ་ཐམས་ཅད་
དགྱེས་པ་བླ་ན་མེད་པའི་བྱང་ཆུབ་ཀྱི་ལམ་བཟང་པོ་ལ་ཡིད་རྟོན་པར་བྱེད་བའི་གང་ཟག་ཡིན་པའི་ཕྱིར་རོ། །རྩ་བའི་ས་བཅད་གཉིས་པ་གཞུང་གི་དོན་ལ་ངེས་འབྱུང་གི་བསམ་པ། བྱང་ཆུབ་ཀྱི་སེམས། སྟོང་ཉིད་ཀྱི་ལྟ་བ་བསྟན་པ་དང་གསུམ་ལས། དང་པོ་ལ་ཐོག་མར་ངེས་འབྱུང་འཚོལ་དགོས་པའི་རྒྱུ་མཚན། བཙལ་བའི་ངེས་འབྱུང་དངོས་བསྟན་པ་གཉིས་ཀྱི་དང་པོ་ནི། ལམ་གྱི་གཙོ་བོ་རྣམ་གསུམ་གྱི་ནང་ནས་ཐར་འདོད་རྣམས་ཀྱིས་མྱོང་བ་ཐོན་པའི་ངེས་འབྱུང་གི་བསམ་པ་ཐོག་མར་བཙལ་བ་ལ་ཆོས་ཅན། དགོས་པ་ཡོད་དེ། སྲིད་པའི་བདེ་བ་སྤུ་གྲི་རྣོན་པོའི་རྩེར་སྦྲང་རྩི་བྱུགས་པ་ལྟ་བུའི་རོ་ལ་བརྐམ་པ་སྟེ་སྲེད་པ་ཆེས་ཆེར་འཕེལ་བ་ཡིས་ཀྱང་རིགས་དྲུག་ཏུ་འཁྱམས་པའི་ལུས་ཅན་རྣམས་སྲིན་བུའི་ཁ་ཆུས་རང་ལུས་ཀུན་ནས་འཆིང་བ་དང་འདྲ་བ་དེའི་ཕྱིར་ན་ཟོ་ཆུན་གྱི་འཁྱུད་མོ་ལྟར་རྒྱུན་ཆད་མེད་པར་རྟེན་འབྲེལ་ལུགས་འབྱུང་དུ་འཁོར་ནས་ཉིང་མཚམས་མུ་མཐའ་མེད་པར་སྦྱོར་བ་དེ་རྟོགས་པར་བྱ་བའི་ཆེད་ཡིན་པའི་ཕྱིར། ཤེས་བྱ་ཆོས་ཅན། བཤད་མ་ཐག་པ་ལྟར་འཁོར་བར་རྒྱུན་ཆད་མེད་པར་འཁོར་ཏེ། སྲིད་པ་འཁོར་བའི་སྡུག་བསྔལ་གྱི་རྒྱ་མཚོ་ཆེན་པོ་འདིར་གནས་སྐབས་སུ་སྡིག་པ་མི་དགེ་བ་སོགས་ཐབས་སྣ་ཚོགས་པ་ཡི་སྒོ་ནས་བསྒྲུབས་པའི་ཟག་བཅས་ཀྱི་ཚོར་བ་བདེ་བའི་འབྲས་བུ་ཉམས་སུ་མྱོང་བ་དོན་དུ་གཉེར་བའི་ཕྱིན་ཅི་ལོག་གི་བློ་འདི་རྒྱུ་མཚན་ཤེས་ན་ཞི་བ་སྟེ་ལྡོག་པའི་ཐབས་མེད་པ་ལ་སྟེ་མ་རྙེད་པའི་ཕྱིར། རྟགས་གྲུབ་སྟེ་སྙིང་ཐག་པ་ནས་བཅོས་མ་མ་ཡིན་པའི་ངེས་འབྱུང་གི་བསམ་པ་རྣམ་པར་དག་པ་ཤུགས་དྲག་པོ་རང་རྒྱུད་ལ་སྐྱེས་པ་མེད་པར་གྱུར་པ་དེའི་ཕྱིར། གཉིས་པ་བཙལ་བའི་ངེས་འབྱུང་དངོས་བསྟན་
པ་ལ་ཚེ་འདིའི་བདེ་བ་ཙམ་དོན་དུ་གཉེར་བའི་སྣང་ཤས་ལྡོག་པ། ཕྱི་མའི་བདེ་བ་ཙམ་དོན་དུ་གཉེར་པའི་སྣང་ཤས་ལྡོག་པ། ངེས་འབྱུང་སྐྱེས་པའི་ཚད་བསྟན་པ་དང་གསུམ་ལས། དང་པོ་ལ་ཚིག་དོན་དང་སྤྱི་དོན་གཉིས་ཀྱི་དང་པོ་ནི། ཚེ་འདིར་བདེ་སྐྱིད་འདོད་པའི་འཇིག་རྟེན་ཆོས་བརྒྱད་ཀྱི་སྣང་ཤས་དེ་ནི་ཆོས་ཅན། ཁྱོད་རང་རྒྱུད་ལ་རས་ལ་སྣུམ་ཞུགས་པ་བཞིན་དུ་ཞེན་པ་དེ་ཕྱིར་ལྡོག་པའི་ཐབས་ཡོད་དེ། དལ་བ་བརྒྱད་དང་འབྱོར་པ་བཅུ་ཚང་བའི་མི་ལུས་འདི་ཡང་ཡང་རྙེད་པར་དཀའ་ཞིང་ལན་ཅིག་ཙམ་རྙེད་པའི་རྟེན་དེ་ཡང་ཚེ་ལ་སྣོན་པ་མེད་ཅིང་འགྲིབ་བྱེད་བར་མ་ཆད་དུ་ཡོད་པས་ཡུན་རིང་དུ་གནས་པའི་ལོང་མེད་ཚུལ་གྱི་རྒྱུ་མཚན་རྣམས་སྙིང་ཐག་པ་ནས་ཡིད་ལ་ཡང་ཡང་བསམས་ཤིང་གོམས་པར་བྱེད་པ་དེ་ལ་བརྟེན་ནས་འགྲུབ་ནུས་པའི་ཕྱིར་རོ། །གཉིས་པ་སྤྱི་དོན་ལ་དལ་འབྱོར་རྙེད་དཀའ་བ་དང་། ལོང་མེད་པར་བསྟན་པ་གཉིས་ལས། དང་པོ་ནི། དལ་འབྱོར་གྱི་ཆོས་བཅོ་བརྒྱད་ཅེས་པ་དཔེ་ཆོས་རིན་ཆེན་སྤུངས་པའི་འགྲེལ་པ་ལྕེ་སྒོམ་ཤེས་རབ་རྡོ་རྗེས་མཛད་པ་ལས། འོ་ན་དལ་འབྱོར་རང་ཅི་ལ་ཟེར་ན། དལ་བ་འདི་ནི་མི་ཁོམ་པའི་གནས་བརྒྱད་སྤངས་པ་ཞིག་ལ་ཟེར་བ་ཡིན། དེ་ལ་མི་ཁོམ་བའི་གནས་བརྒྱད་ནི་ཕྱི་མི་ཁོམ་པའི་གནས་བཞི། ནང་མི་ཁོམ་པའི་གནས་བཞི་སྟེ་བརྒྱད་དོ། །ཕྱི་མི་ཁོམ་པའི་གནས་བཞི་ནི། དམྱལ་བ། ཡི་དྭགས། དུད་འགྲོ། འདུ་ཤེས་མེད་པའི་ལྷའོ། །ནང་མི་ཁོམ་པ་བཞི་ནི། མི་ལུས་ཐོབ་ཀྱང་ཡུལ་མཐའ་འཁོབ་ཏུ་སྐྱེས་པ། དབང་པོ་མ་ཚང་བ། ལྟ་བ་ལོག་པའི་རིགས། སངས་རྒྱས་མི་འབྱུང་བའི་སར་སྐྱེས་པའོ། །འབྱོར་པ་ནི། ཆོས་བྱེད་པའི་མཐུན་རྐྱེན་མ་ཚང་བ་མེད་པ་ཞིག་ལ་ཟེར་བས། དེ་ལ་བཅུ་སྟེ་རང་གི་འབྱོར་པ་ལྔ་དང་། གཞན་གྱི་འབྱོར་པ་ལྔའོ། །དེ་
ལ་རང་འབྱོར་ལྔ་ནི། རང་བསྟན་པ་དང་ཁ་ཐུག་ཏུ་མིར་སྐྱེས་པ། དབང་པོ་ཚང་བ། ཡུལ་དབུས་སུ་སྐྱེས་པ། དད་པའི་གནས་ལ་དད་པ། ལས་ཀྱི་མཐའ་མ་ལོག་པའོ། །གཞན་འབྱོར་ལྔ་ནི། སངས་རྒྱས་འཇིག་རྟེན་དུ་འབྱོན་དཀའ་བ་ལས་བྱོན་པ། ཆོས་གསུང་བར་དཀའ་བ་ལས་གསུངས་པ། བསྟན་པ་ཡུན་རིང་དུ་གནས་པར་དཀའ་བ་ལས་གནས་པ། སྒྲུབ་པའི་གྲོགས་ཁྱད་པར་ཅན་དཀའ་བ་ལས་གྲོགས་ཡོད་པ། གཞན་བརྩེ་བ་དང་ལྡན་པས་རྗེས་སུ་འཛིན་པ་དཀའ་བ་ལས་འཛིན་པའོ། །ཞེས་འབྱུང་བ་ལྟར་ཡིན་ལ། དེ་ལྟ་བུའི་ཆོས་བཅོ་བརྒྱད་དང་ལྡན་པའི་མིའི་ལུས་རྟེན་དེ་ཡང་དཔེའི་སྒོ་ནས་རྙེད་དཀའ་བའི་རྒྱུ་མཚན། དཔེ་ཆོས་འགྲེལ་པ་ལས། མཁར་ཐོག་རྩ་ཞེས་པ་ནི། པོ་ཏོ་བ་མཁར་ཐོག་ན་བཞུགས་ཙ་ན། དགོངས་ཆོས་ཀྱི་དུས་སུ་ཁྲི་ཁར་བྱོན་ནས་འདི་སྐད་གསུང་། མཁར་ཐོག་གི་རྩ་ཤིང་འདི་རྣམས་ཀྱི་གསེབ་ནས་རྩ་ཉག་མ་གཅིག་གི་ཚོད་དུ་དལ་འབྱོར་ཐོབ་པ་རྣམས་སུ་འདུག་ལ། འགྲོ་བ་གཞན་རྣམས་རྩྭ་བྱིངས་པོའི་ཚོད་དུ་འདུག་གསུང་། དེས་ཁོང་གིས་དལ་འབྱོར་རྙེད་པར་དཀའ་བ་དགོངས་པ་ཡིན་ཞེས་དང་། ཆུ་བོའི་གྲུ་འདྲ་ཞེས་པ་ནི། དཔེར་ན་ཆུ་བོ་ཆེན་པོ་བརྒལ་པ་ལ་གྲུ་ཡོད་ཙ་ན་བརྒལ་དགོས། གྲུ་མེད་ན་བརྒལ་ཐབས་མེད། དེ་བཞིན་དུ་འཁོར་བ་སྡུག་བསྔལ་གྱི་རྒྱ་མཚོ་ལས་བརྒལ་བ་ལ་ཡང་དལ་འབྱོར་གྱི་གྲུ་ཡོད་པ་ལ་བརྒལ་དགོས། དེ་མེད་ན་བརྒལ་ཐབས་མེད་དེ། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱིས་ནས་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་གསུངས། དེས་ན་འཁོར་བ་རྒྱ་མཚོ་དང་འདྲ། མི་ལུས་གྲུ་དང་འདྲ། རིག་པ་མགྲོན་པོ་དང་འདྲ།
དགེ་བའི་བཤེས་གཉེན་སྐྱ་བ་འཛིན་པའི་མཉན་པ་དང་འདྲ་བས། ད་རེས་རྟེན་འབྲེལ་འཛོམ་ཐོག་ལ་ཅི་གྲོལ་བྱེད་དགོས་གསུང་བ་སོགས་རྣམ་གྲངས་མང་ཞིང་དེར་མ་ཟད་རྒྱུའི་སྒོ་ནས་རྙེད་དཀའ་བའི་ཚུལ། འཇུག་པ་ལས། སོ་སོ་སྐྱེ་བོ་རྣམས་དང་གསུང་སྐྱེས་དང་། །རང་བྱང་ཆུབ་ལ་བདག་ཉིད་ངེས་རྣམས་དང་། །རྒྱལ་སྲས་རྣམས་ཀྱི་ངེས་པར་ལེགས་པ་དང་། །མངོན་མཐོའི་རྒྱུ་ནི་ཚུལ་ཁྲིམས་ལས་གཞན་མེད། །ཅེས་མངོན་མཐོའི་རྟེན་ཐོབ་པ་ལ་ཚུལ་ཁྲིམས་སྣ་རེ་ཙམ་ངེས་པར་བསྲུང་དགོས་ཤིང་ཁྱད་པར་དལ་འབྱོར་གྱི་རྒྱུར་ཚུལ་ཁྲིམས་ཕུན་སུམ་ཚོགས་པ་གལ་ཆེ། དེར་མ་ཟད་བཞི་བརྒྱ་པ་ལས། ཕལ་མོ་ཆེ་ན་མི་རྣམས་ནི། །དམ་པ་མ་ཡིན་ཕྱོགས་ཡོངས་འཛིན། །དེས་ན་སོ་སོ་སྐྱེ་བོ་རྣམས། །ཕལ་ཆེར་ངེས་པར་ངན་འགྲོར་འགྲོ། །ཞེས་དང་། སྤྱོད་འཇུག་ལས། བདག་གི་སྤྱོད་པ་འདི་འདྲས་ནི། །མི་ཡི་ལུས་ཀྱང་འཐོབ་མི་འགྱུར། །མི་ལུས་ཐོབ་པར་མ་གྱུར་ན། །སྡིག་པ་འབའ་ཞིག་དགེ་བ་མེད། །གང་ཚེ་དགེ་སྤྱད་སྐལ་ལྡན་ཡང་། །དགེ་བ་བདག་གིས་མ་བྱས་ན། །ངན་སོང་སྡུག་བསྔལ་ཀུན་རྨོངས་པ། །དེ་ཚེ་བདག་གིས་ཅི་བྱར་ཡོད། །དགེ་བ་དག་ཀྱང་མ་བྱས་ལ། །སྡིག་པ་དག་ཀྱང་ཉེར་བསགས་ན། །བསྐལ་པ་བྱེ་བ་བརྒྱར་ཡང་ནི། །བདེ་འགྲོའི་སྒྲ་ཡང་ཐོས་མི་འགྱུར། །ཅེས་པ་ལྟར་འགྲོ་བ་རྣམས་ཕལ་ཆེར་མི་དགེ་བ་ལ་སྤྱོད་པའི་རྒྱུས་འབྲས་བུ་ངན་འགྲོ་ལས་མ་འདས་པས་དལ་འབྱོར་ལྟ་ཅི་མངོན་མཐོ་ཙམ་ཡང་རྙེད་པར་དཀའོ། །དེ་བཞིན་དུ་ངོ་བོའི་སྒོ་ནས་རྙེད་པར་དཀའ་བ་ནི། དཔེ་ཆོས་འགྲེལ་པ་ལས། ཉིན་སྐར་ཞེས་པ་ནི། དཔེར་ན་འོ་སྐོལ་མི་ལུས་ཐོབ་པ་ནི། ཉིན་མོའི་སྐར་མ་ཙམ་ཡིན་ལ། དུད་འགྲོ་ནི་ནུབ་མོའི་སྐར་མ་ཙམ། ཡང་དུད་འགྲོ་ནི་ཉིན་སྐར་ཙམ། ཡི་དྭགས་ནི་ནུབ་མོའི་སྐར་མ་ཙམ། ཡང་ཡི་དྭགས་ནི་ཉིན་སྐར་ཙམ། དམྱལ་བ་ནི་ནུབ་མོའི་སྐར་མ་ཙམ་ཡིན། ཅེས་འབྱུང་
བ་ལྟར་ས་འདོམ་གང་གྲུ་བཞི་ཙམ་གྱི་རྒྱར་དབྱར་དུས་སུ་ས་གུ་ཙི་བགྲང་བར་དཀའ་ནའང་མི་བཅུ་ལས་མང་བ་མི་ཤོང་བ་མངོན་སུམ་གྱིས་གྲུབ་ཅིང་། ལུང་གཞི་ལས་ཀྱང་། ངན་འགྲོ་དང་བདེ་འགྲོ་ནས་ཤི་འཕོས་ཏེ་ངན་འགྲོར་འགྲོ་བ་ནི་ས་ཆེན་པོ་དང་། དེ་ནས་བདེ་འགྲོར་སྐྱེ་བ་ནི་ཕྱག་སེན་གྱི་རྩེ་མོས་བཞེས་པའི་རྡུལ་དང་འདྲ་བར་གསུངས་པས་ཀྱང་ཤེས་ནུས་སོ། །དེའང་རྙེད་དཀའ་བའི་རྟེན་འདི་ཐོབ་ནས་ཆོས་བསྒྲུབ་ཏུ་ཡོད་པ་ནི་སྐལ་བ་ཤིན་ཏུ་བཟང་བས། དཔེ་འགྲེལ་ལས། སྲིན་བུས་ཕྱག་འཚལ་ཞེས་པ། པོ་ཏོ་བ་དཔེའི་གངས་རྒྱ་མོ་ན་བཞུགས་ཙ་ན། ད་ལྟ་འོ་ཅག་གི་མདུན་འདི་ནས་སྲིན་བུ་ཞིག་གངས་གསེབ་ནས་འཐོན་ཏེ་ཐལ་མོ་སྦྱར་ནས་སངས་རྒྱས་ལ་ཕྱག་འཚལ་ཟེར་བ་ཞིག་བྱུང་ན་དེ་ངོ་མཚར་ཆེའམ་ཆུང་། དེ་ངོ་མཚར་ཆེ་ན། དེ་བཞིན་དུ་འོ་སྐོལ་ཡང་ངན་སོང་གསུམ་དུ་གཏན་དུ་འཁྱམས་འཁྱམས་པ་ཞིག་ད་རེས་དལ་འབྱོར་ཐོབ་ཐོབ་ནས་ཆོས་བསྒྲུབ་ཏུ་ཡོད་པ་འདི་དེ་བས་ཀྱང་ངོ་མཚར་ཆེ་གསུང་བ་ལྟར་དམ་པའི་ཆོས་ཉམས་སུ་བླང་བྱར་ཡོད་པའི་ཡ་མཚན་ཅན་དེ་ཚེ་འདིའི་ལྟོ་རྒྱབ་ཀྱི་ཁོལ་པོར་སོང་ནས་དོན་མེད་དུ་བྱར་མི་རུང་བའི་རྒྱུ་མཚན། དེ་ཉིད་ལས། རྐྱང་ལ་ཞོན་ཅེས་པ། བྱང་གི་གྲུ་གུ་ཞུ་པོ་ཆེ་བྱ་བ་རྐྱང་ལ་ཞོན་ནས་གླུ་ཁོ་ན་ལེན་པ་ལ། གཞན་ཀུན་གྱིས་ཁྱོད་འདི་ག་ཙམ་གྱི་གླུ་ཞིག་ལེན་པ་བྱས་པས། ང་རྐྱང་ལ་བཞོན་ནས་གླུ་མི་ལེན་ན་ནམ་ལེན་ཟེར་ལོ། །དེ་བཞིན་དུ་འོ་སྐོལ་རྟེན་དལ་འབྱོར་ཁྱད་པར་ཅན་འདི་ལྟ་བུ་ཐོབ་ནས་ཀྱང་ཆོས་མི་བྱེད་ན་ནམ་བྱེད། དུས་ད་རེས་ཡོད་ན་འདིར་ཡོད། མེད་ན་འདིར་མེད་ཅིག་འདུག་ན། ཞེས་བྱུང་བ་ལྟར་རོ། །གཉིས་པ་ལོང་མེད་པ་ནི། ངེས་པར་འཆི་བའི་རྒྱུ་མཚན། བཤེས་སྤྲིང་ལས། ཚེ་ནི་གནོད་མང་རླུང་གིས་བཏབ་པ་ཡི། །ཆུ་ཡི་ཆུ་ལྦུར་བས་ཀྱང་མི་རྟག་ན། །དབུགས་འབྱུང་དབུགས་རྔུབ་གཉིད་ཀྱིས་
ལོག་པ་ལས། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་འཚོ་བའི་རྐྱེན་ཉུང་ཞིང་འཆི་བའི་རྐྱེན་མང་བས་རླུང་གིས་བཏབ་པའི་ཆུའི་ལྦུ་བ་བཞིན་འཇིག་པར་ཤིན་ཏུ་སླ་བ་དོ་ནུབ་གཉིད་ལོག་ནས་ནང་པར་སད་རྒྱུ་ཡོང་བ་ངོ་མཚར་བའི་གནས་སུ་གསུངས་པའི་དོན། དཔེ་འགྲེལ་དུ། འདི་ན་མི་དགའ་ཞེས་པ་ནི། གཞོན་པ་གླུ་ལེན་པ་ཞིག་ན་རེ། འདི་ན་མི་དགའ་ཡེར་པར་འགྲོ། །དེ་ན་བྲག་ལྷ་མགོན་པོ་ཡོད། །དགའ་ཡང་གཏན་གྱིས་ཡུལ་མ་ཡིན་ཟེར་ལོ། དཔེ་དེ་བཞིན་དུ་འོ་སྐོལ་ཡང་ཚེ་ཕ་རོལ་ཏུ་འགྲོ་བ་འདི་མི་དགའ་ཞིང་ཚེ་འདིར་གཏན་དུ་སྡོད་པར་འདོད་ཀྱང་འོ་སྐོལ་གྱི་གཏན་ཡུལ་མ་ཡིན་ཏེ། མྱུར་དུ་འགྲོ་འཚལ་སྔར་གྱི་དགེ་བའི་བཤེས་གཉེན་ཆེན་པོ་རྣམས་ཀྱང་གཤེགས་པ་དེ་ཡིན། སྔོན་གྱི་རྒྱལ་བློན་བྱང་ཆུབ་སེམས་དཔའ་རྣམས་དང་མི་སྐྱ་བཙན་ཕྱུག་ཕན་དར་བ་རྣམས་ཀྱང་སྡོད་དབང་མེད་པར་སོང་བ་དེ་ལ། དེ་བཞིན་དུ་འོ་སྐོལ་ད་ལྟས་ཐོག་འདི་ན་གནས་ཆད་པོ་ཐམས་ཅད་ཀྱང་ངེས་པར་འགྲོ་འཚལ་ཏེ། སའམ་འོན་ཏེ་མཐོ་རིས་ན། །སྐྱེས་ནས་ལ་ལ་མ་ཤི་བ། །གང་ཞིག་ཁྱོད་ཀྱིས་མཐོང་བའམ། །ཐོས་སམ་འོན་ཏེ་ཐེ་ཚོམ་ཟ། །ཞེས་གསུངས་པ་དང་། ཉིན་མཚན་གྱིས་ལོ་ཟླ་མ་ཚོར་བར་ཟད་དེ་ཚེའི་མཐའ་ལ་གཏུགས་པའང་། ཇི་སྐད་དུ། རྩྭ་ཕུང་ཞེས་པ་ནི། དཔེར་ན་མདོ་ཁམས་ན་བྲག་ཆེན་པོ་གཡང་ཅན་གྱི་ལོགས་ལ་སྦྲང་རྩིའམ་ཤིང་ཏོག་ཡོད་པ། འོག་ན་གཅོང་རོང་དང་ཆུའི་གློང་འཁྱིལ་བ་ཡོད་པ་ལ་མི་ཞིག་གིས་བྲག་ལ་འཛེགས་ཏེ་ལག་པ་རྩྭ་ཕུང་ཞིག་ལ་འཇུས། རྐང་པ་རྩྭ་ཕུང་ཞིག་ལ་བསྟད་ནས་སྦྲང་རྩིའམ་ཤིང་རྟོག་ཉབ་ཀྱིན་ཟོས་པས་ཞིམ་སྟེ་ཅུང་ཟད་ཆགས་པའི་བར་ལ་རྩྭ་ཕུང་ལ་བྱི་བ་དཀར་པོ་ཞིག་བྱུང་ནས་བཅད་དེ་ཁྱེར། ནག་པོ་ཞིག་བྱུང་ནས་བཅད་དེ་ཁྱེར་བས་མཐར་རྩྭ་ཕུང་ཟད་ལ་ཁད་ཙ་ན་རྐང་ལག་གི་རྟེན་མེད་པས་བདེ་བར་འགྲོ་འདོད་ཀྱང་མི་
ཐར་ཏེ་ངེས་པར་གཡང་ལ་ལྷུང་བ་ཡིན། དེ་བཞིན་དུ་འོ་སྐོལ་འཁོར་བ་བྲག་ལོགས་དང་འདྲ་བ་ན་མི་ལུས་རྩྭ་ཕུང་ལྟ་བུ་ལ་རྟེན་བཅས་ནས་འདོད་ཡོན་ལྔའི་སྦྲང་རྩིའི་རོ་ལ་ཆགས་པའི་བར་ལ་ཉིན་མཚན་བྱི་བ་དཀར་ནག་ལྟ་བུས་རྩྭ་ཕུང་བརྐུས་ནས་མཐར་རྩྭ་ཕུང་ལྟ་བུའི་ཚེ་ཟད་ཙ་ན་ཐར་པའི་བདེ་བར་འགྲོ་འདོད་ཀྱང་མི་ཐར་ཏེ་ངན་སོང་གསུམ་གྱི་རྦ་གློང་དུ་ལྷུང་བ་ལས་འོས་མེད་གསུང་། དེས་ན་འོ་སྐོལ་གྱི་དལ་འབྱོར་གྱི་ཚེའི་རྩྭ་ཕུང་རྩྭ་བ་ནས་མ་ཟད་པ་ལ་འབྲོས་དགོས། ཞེས་གསུངས་པས་ཤེས་སོ། །དེ་ཡང་ལོང་མེད་པར་གྱུར་དུ་འཆི་བར་མ་ཟད། ཚོམས་ལས། སྐྱེས་པ་བུད་མེད་མང་པོ་དང་། །དར་ལ་བབས་པའང་འཆི་འགྱུར་ན། །དེ་ལ་མི་འདི་གཞོན་ཞེས་ཏེ། །གསོན་པའི་གདེང་བྲོད་ཅི་ཞིག་ཡོད། ཁ་ཅིག་མངལ་དུ་འཆི་བར་འགྱུར། །དེ་བཞིན་ཁ་ཅིག་བཙས་པའི་སར། །དེ་བཞིན་ཁ་ཅིག་གོག་ཙ་ན། །དེ་བཞིན་ཁ་ཅིག་ཡོངས་རྒྱུག་ན། །ལ་ལ་རྒན་དང་ལ་ལ་གཞོན། །ལ་ལ་དར་ལ་བབ་པའི་མི། །རིམ་གྱིས་རབ་ཏུ་འགྲོ་འགྱུར་ཏེ། །འབྲས་བུ་སྨིན་པ་ལྷུང་བ་བཞིན། །ཞེས་གསུངས་པ་ལྟར་ཤི་བ་ལ་རྒན་གཞོན་གོ་རིམ་སོགས་ཡིད་བརྟན་ཅི་ཡང་མེད་པས། ཇི་སྐད་དུ། སང་དང་འཇིག་རྟེན་ཕྱི་མ་གཉིས། །སྔོན་དུ་གང་འོང་གཏོལ་མེད་པས། །སང་གི་ཚིགས་ལ་མི་འབད་པར། །ཕྱི་མའི་དོན་ལ་འབད་པར་རིགས། །ཞེས་དོ་ནུབ་ཙམ་ཡང་མི་འཆི་བའི་གདེང་ཚོད་མེད་ཅིང་རང་གི་བླ་མ་དང་ཚངས་པར་མཚུངས་པའི་མཆེད་གྲོགས་སྐྱེས་པ་བུད་མེད་སོགས་རྒན་གཞོན་མ་ངེས་པ་ཚེའི་དུས་བྱས་པ་མཐོང་བ་ན་ངེས་པ་མེད་པའི་བརྡ་སྟོན་དུ་བསམ་དགོས་པ་དཔེ་འགྲེལ་དུ། བྱ་གཏོང་ལྟོས་ཞེས་པ་ནི། དཔེར་ན་སང་ནང་པར་ལྟ་བུ་དམག་ཡོང་བ་ལ་སྲོད་ལ་བྱ་གཏོང་གི་མི་ཞིག་བྱུང་ན་མི་ཐམས་ཅད་རྟབ་ཤོད་ལངས་
ནས་ར་མདའ་སྲིད་སྡེ་སྒྲོན། གོ་ཆ་གསོག །མེལ་ཚེ་བྱེད་པ་ཡིན། དེ་བཞིན་དུ་འོ་སྐོལ་ཡང་གཞན་ཤི་བ་མཐོང་བའམ་ཐོས་ཙ་ན་ང་ཡང་འདི་བཞིན་དུ་སོང་ཁྱེད་ཀྱང་འདི་ལས་མ་འདས་སོ་བྱ་བའི་བརྡ་སྟོན་ནམ་བྱ་གཏོང་ལྟ་བུར་གོ་བར་བྱས་ལ། དགེ་སྦྱོར་ལ་བསྒྲིམ་དགོས་གསུང་། དགེ་བཤེས་གསང་ཕུ་པ་མི་ཤི་བ་གསན་ཙ་ན། ཀྱེ་ཇོ་བོ་ཀུན་བྱ་གཏོང་གདའོ་གསུང་སྐད། ཅེས་པ་ལྟར་གཞན་ཤི་བ་མཐོང་ཐོས་ཀྱི་ལྕག་གིས་བྲབས་པའི་འཆི་བ་མི་རྟག་པ་གཤའ་མ་རྒྱུད་ལ་སྐྱེ་བར་བྱེད་པ་གནད་དུ་ཆེའོ། །གཉིས་པ་ཕྱི་མའི་བདེ་བ་ཙམ་དོན་དུ་གཉེར་བའི་སྣང་ཤས་ལྡོག་པ་ལ་ཚིག་དོན་དང་སྤྱི་དོན་གཉིས་ལས། དང་པོ་ནི། ཚེ་རབས་ཕྱི་མ་རྣམས་སུ། ཚངས་པ། དབང་ཕྱུག །ཁྱབ་འཇུག །དགའ་རབ་དབང་ཕྱུག །བརྒྱ་བྱིན། འཁོར་ལོས་སྒྱུར་རྒྱལ་སོགས་ལྷ་མིའི་གཙོ་བོ་རྣམས་ཀྱིས་མཚོན་མཐོ་རིས་ཀྱི་དཔལ་འབྱོར་ལོངས་སྤྱོད་དོན་དུ་གཉེར་བའི་འཇིག་རྟེན་ཆོས་བརྒྱད་ཀྱི་རྟོག་པའི་སྣང་ཤས་དེ་ནི་ཆོས་ཅན། ཁྱོད་ལྡོག་པར་བྱེད་པའི་ཐབས་ཡོད་དེ། ལྷ་མིའི་དབང་ཕྱུག་རྣམས་ཀྱང་ཚེ་རབས་སྔ་མ་མང་པོར་མི་དགེ་བའི་ལས་སྟོབས་པོ་ཆེ་བསགས་པའི་ལས་འབྲས་ནམ་ཡང་མི་སླུ་བའི་རྒྱུས་སླར་ཡང་བྲན་འཁོར་དུ་འགྱུར་ཞིང་ངན་སོང་གི་གནས་སུ་ལྷུང་བ་དང་འཇིག་རྟེན་སྣང་བར་བྱེད་པའི་ཉི་ཟླའང་མུན་པའི་རུམ་དུ་སྐྱེ་བ་ལ་དམྱལ་བ་ཡི་དྭགས་དུད་འགྲོ་གསུམ་སྡུག་བསྔལ་གྱི་སྡུག་བསྔལ། མི་དང་འདོད་ལྷ་དང་ལྷ་མ་ཡིན་གསུམ་འགྱུར་བའི་སྡུག་བསྔལ། གཟུགས་ཁམས་དང་གཟུགས་མེད་ཀུན་ཁྱབ་པ་འདུ་བྱེད་ཀྱི་སྡུག་བསྔལ་ཏེ་མཐའ་མེད་པའི་ཁམས་གསུམ་གྱི་འཁོར་བའི་ངང་ཚུལ་རྣམས་ཡང་ནས་ཡང་དུ་བསམས་པར་བྱས་པ་ན་རྒྱུད་ཐོག་ཏུ་མྱོང་བ་ཐོན་པ་དེ་ཡིན་པའི་ཕྱིར་རོ། །གཉིས་པ་སྤྱི་དོན་ལ་ལས་འབྲས་དང་འཁོར་བའི་སྡུག་
བསྔལ་བསམ་པ་གཉིས་ཀྱི། དང་པོ་ནི། མདོ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུས་མི་ཟ། །ཚོགས་ཤིང་དུས་ལ་བབས་པ་ན། འབྲས་བུ་ཉིད་དུ་སྨིན་པར་འགྱུར། ཞེས་སེམས་ཅན་རྣམས་ཀྱིས་བསགས་པའི་དཀར་ནག་གི་ལས་ནི། དཔེར་ན་དམྱལ་བར་སྐྱེ་བའི་ལས་བསགས་པའི་གང་ཟག་ཞིག་ལས་དེ་མ་སྨིན་པའི་སྔོན་རོལ་ཏུ་སྦྱོར་ལམ་བཟོད་པ་ལྟ་བུ་ཐོབ་ན། མགོན་པོ་བྱམས་པས། བཟོད་ཐོབ་ངན་སོང་ཡོངས་མི་ལྟུང་། །ཞེས་གསུངས་པའི་ཕྱིར་ལས་དེ་མི་མྱོང་ཞིང་དེས་མཚོན་སྲིད་པའི་སྲེད་ལས་བརྒལ་བའི་ཉན་ཐོས་དགྲ་བཅོམ་པ་དེ་ལས་ཀྱི་དབང་གིས་ཡང་སྲིད་ཕྱི་མའི་ཕུང་པོའི་རྒྱུན་གཞན་འཕེན་མི་ནུས་པ་ནི་དེའི་ལྷན་ཅིག་བྱེད་རྐྱེན་ཟད་པས་མི་ལྡོག་པར་རིག་པའི་དབང་ཕྱུག་བཞེད་པའི་ཕྱིར། ཇི་སྐད་དུ། སྲིད་པའི་སྲེད་ལས་རྣམ་བརྒལ་བའི། ལས་གཞན་འཕེན་ནུས་མ་ཡིན་ཏེ། །ལྷན་ཅིག་བྱེད་པ་ཟད་ཕྱིར་རོ། །ཞེས་པས་ཤེས་ནུས་ལ། དེ་ལྟར་མ་ཡིན་ན་བསྐལ་པ་སོགས་དུས་ཡུན་རིང་བ་དག་གིས་ཆོད་ནའང་ཞིང་ས་སྐམ་པོ་ལ་ས་བོན་ཡོད་པ་གཤེར་དང་ཕྲད་པ་བཞིན་ལས་གང་ཡིན་པ་དེ་ལ་གསོས་བཏབ་པ་དེའི་ཚེ་བདེ་སྡུག་གི་འབྲས་བུ་སྨིན་པར་འགྱུར་ལ། དེ་ཡང་མངོན་པ་མཛོད་ལས། དེ་ལས་ཆེ་ལོང་བསྡུས་ནས་ནི། །དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུར་གསུངས་སོ། །ཞེས་སྲོག་གཅོད། མ་བྱིན་ལེན། ལོག་གཡེམ་སྟེ་ལུས་ཀྱི་ལས་གསུམ། རྫུན། ཕྲ་མ། ཚིག་རྩུབ། ངག་འཁྱལ་ཏེ་ངག་གི་ལས་བཞི། བརྣབ་སེམས། གནོད་སེམས། ལོག་ལྟ་སྟེ་ཡིད་ཀྱི་ལས་གསུམ་རྣམས་བསྡོམས་པ་བཅུ་པོ་ནག་པོའི་ལས་བཅུ་སྟེ། དེ་ལས་ལྡོག་པ་དཀར་པོའི་ལས་ལམ་བཅུར་དགེ་མི་དགེའི་ལས་ཐམས་ཅད་བསྡུས་པ་ཡིན་ལ། ལས་འབྲས་ཀྱི་
རྣམ་གཞག་དཔེ་ཙམ་ཞིག་མཚོན་ན། བྱང་ཆུབ་སེམས་དཔའ་ལ་ངན་སེམས་སྐྱེས་ན་ངན་སེམས་གང་བསྐྱེད་པ་དེའི་གྲངས་དང་མཚུངས་པར་བསྐལ་པའི་ཡུན་དུ་དམྱལ་བར་གནས་པར་གསུངས་པས། སྤྱོད་འཇུག་ལས། གང་ཞིག་དེ་འདྲའི་རྒྱལ་སྲས་སྦྱིན་བདག་ལ། །གལ་ཏེ་ངན་སེམས་སྐྱེད་པར་བྱེད་པ་དེ། །ངན་སེམས་བསྐྱེད་པའི་གྲངས་བཞིན་བསྐལ་པར་ནི། །དམྱལ་བར་གནས་པར་འགྱུར་ཞེས་ཐུབ་པས་གསུངས། །ཞེས་གསུངས་ཤིང་དེར་མ་ཟད་ཁོང་ཁྲོ་ལ་བརྟེན་ནས་སྔོན་བསགས་ཀྱི་དགེ་བ་རྣམས་ཀྱང་འཇོམས་པའི་ཕྱིར། དེ་ཉིད་ལས། བསྐལ་པ་སྟོང་དུ་བསགས་པ་ཡི། །སྦྱིན་དང་བདེར་གཤེགས་མཆོད་པ་སོགས། །ལེགས་སྤྱད་གང་ཡིན་དེ་ཀུན་ཀྱང་། ཁོང་ཁྲོ་གཅིག་གིས་འཇོམས་པར་བྱེད། །ཅེས་བྱུང་བའི་གཙོ་བོ་ཡུལ་བྱང་ཆུབ་སེམས་དཔའ་ལ་བྱེད་ནའང་། ཆོས་ཐམས་ཅད་འབྱུང་བ་མེད་པར་བསྟན་པའི་མདོ་ལས། གང་ཟག་གིས་གང་ཟག་གི་ཚོད་གཟུང་བར་མི་བྱའོ། །གང་ཟག་གིས་གང་ཟག་ལ་ཚོད་བཟུང་ན་རྨ་འབྱུང་བར་འགྱུར་ཏེ། ངའམ་གཞན་ཡང་ང་དང་འདྲ་བ་དག་གིས་གང་ཟག་ལ་ཚོད་གཟུང་ངོ་། རིགས་ཀྱི་བུ་སུ་བདག་བསྲུང་བར་འདོད་པ་དེས་གཞན་སུའི་སྤྱོད་པ་ལའང་བརྟག་པར་མི་བྱ་སྟེ། དེ་དག་ལ་འདི་ནི་འདི་འདྲའོ་འདི་ནི་འདི་འདྲའོ་ཞེས་སྤྱོ་བར་མི་བྱའོ་ཞེས་གསུངས་པའི་ཕྱིར། ཡུལ་ཁྱད་པར་ཅན་གང་ན་ཡོད་བརྟག་དཀའ་ཞིང་གཉེན་པོ་ངན་པས་སྔོན་བསགས་ཀྱི་དགེ་བ་རྣམས་དྲུངས་ནས་འབྱིན་པ་ལ་ཚེགས་མེད་དོ། །དེ་བཞིན་དུ་ཁྱིམ་པས་དགེ་འདུན་གྱི་རྫས་དང་གནས་ཁང་སོགས་ལ་ལོངས་སྤྱོད་པའི་འབྲས་བུ་ཆེས་ཤིན་ཏུ་བརྣག་དཀའ་བར་འབྱུང་བ་ནི། མདོ་དྲན་པ་ཉེར་གཞག་ལས། སྤུ་གྲི་རྣོན་པོ་དག་གིས་སུ། །རང་གི་ཡན་ལག་གཏུམས་པ་བླའི། །དགེ་འདུན་དག་ལ་བསྔོས་ཟིན་པ། ཁྱིམ་
པ་རྣམས་ལ་སྦྱིན་མི་བྱ། །མེ་ལྕེ་འབར་བ་ལྟ་བུ་ཡི། །ལྕགས་ཀྱི་ཐོ་ལུམ་ཟོས་པ་བླའི། །དགེ་འདུན་དག་ལས་གང་དེ་ནི། །དགེ་འདུན་གྱི་ལས་ལོངས་མི་སྤྱད། །ལྷུན་པོ་དང་ནི་འདྲ་བའི་མེ། བླང་བ་བྱས་ཏེ་ཟོས་པ་བླའི། ཁྱིམ་པར་གྱུར་པས་དགེ་འདུན་གྱི། །ལོངས་སྤྱོད་པར་ནི་མི་བྱའོ། །ཐམས་ཅད་དབྱུང་བ་བྱས་པ་དང་། །གསལ་ཤིང་སྟེང་དུ་བཏེག་པ་བླའི། ཁྱིམ་པར་གྱུར་པས་དགེ་འདུན་གྱི། །ལོངས་སྤྱོད་པར་ནི་མི་བྱའོ། །མེ་མདག་དག་གིས་གང་བ་ཡི། །གནས་ཁང་དེར་ནི་ཞུགས་པ་བླའི། ཁྱིམ་པས་དགེ་འདུན་གནས་ཁང་དུ། །མཚན་མོ་གནས་པར་མི་བྱའོ། །ཞེས་ཉེས་དམིགས་མཐའ་ཀླས་པ་བསྟན་པ་མདོ་ཙམ་སྟེ་སྲོག་གཅོད་ལ་སོགས་པ་མི་དགེ་བ་གང་སྤྱད་པའི་འབྲས་བུ་རང་རྒྱུད་ལ་ཉོན་མོངས་པའི་ས་བོན་ཟད་པར་མ་བྱས་པ་དེ་སྲིད་དུ་རྒྱུ་འབྲས་མ་འཆོལ་བར་སྨིན་པའི་ཚུལ་ལ་གཟབ་པ་གནད་དུ་ཆེ་བའི་ཕྱིར། དཔེ་འགྲེལ་དུ། ཚ་མངར་འདྲ་ཞེས་པ་ནི། དཔེར་ན་པི་པི་ལིང་དང་ཏིག་ཏ་ལ་སོགས་པའི་རོ་ཚ་ཞིང་ཁ་པ་ཁོ་ནའི་ས་བོན་བཏབ་ན། འབྲས་བུ་ཡང་རོ་ཚ་ཞིང་ཁ་པ་ཁོ་ན་འབྱུང་ལ། ཡང་རྒུན་འབྲུམ་མམ་བུ་རམ་ཤིང་ལ་སོགས་པ་རོ་མངར་བའི་ས་བོན་བཏབ་ན་འབྲས་བུ་ཡང་རོ་མངར་བ་ཁོ་ན་འབྱུང་བ་ཡིན་ནོ། །དཔེ་དེ་བཞིན་དུ་འོ་སྐོལ་གྱིས་ལས་མི་དགེ་བ་སྤྱད་ན་འབྲས་བུ་སྡུག་བསྔལ་ཁོ་ན་འབྱུང་བར་ངེས་ལ། ལས་དགེ་བ་སྤྱད་ན་འབྲས་བུ་བདེ་བ་འབྱུང་བར་ངེས་ཏེ། འཕགས་པ་དེས་པས་ཞུས་པའི་མདོ་ལས། །ས་བོན་ཚ་བ་རྣམས་ཀྱིས་ནི། །འབྲས་བུ་ཚ་བ་སྐྱེ་བར་འགྱུར། ས་བོན་མངར་བ་རྣམས་ཀྱིས་ནི། །འབྲས་བུ་མངར་བ་སྐྱེ་བར་འགྱུར། །དཔེ་ཟླར་བྱ་བ་འདི་ཡིས་ནི། །སྡིག་པའི་རྣམ་སྨིན་ཚ་བ་དང་། །དཀར་པོའི་འབྲས་བུ་མངར་བ་ཡང་། །མཁས་པ་རྣམས་ཀྱིས་
ཤེས་པར་བྱ། །རྟག་ཏུ་ལུས་ངག་ཡིད་གསུམ་གྱིས། །སྡིག་པ་རྣམ་གསུམ་མི་བྱ་ཞིང་། །གཞན་དག་བྱེད་ཀྱང་མཁས་པ་ཡིས། །རྗེས་སུ་དགའ་བར་མི་བྱའོ། །ལུས་དང་ངག་དང་ཡིད་རྣམས་ཀྱིས། །དཀར་པོ་རྣམ་གསུམ་རྟག་ཏུ་བྱ། །གང་དག་དགེ་བ་སྤྱོད་བྱེད་པ། གཞན་དག་ལ་ཡང་ཡི་རང་བྱ། །ཞེས་དང་། ཨ་བ་དྷཱུ་ཏཱིས་གཟིགས་པ་བཞིན་ཞེས་པ་ནི། ཇོ་བོས་བླ་མ་ཨ་ཝ་དྷུ་ཏཱི་པ་དང་ལོ་བདུན་དུ་འགྲོགས་ནས་ཆོས་ཞུས་ཀྱང་རྡོ་ལ་སྨྲས་པ་བཞིན་སོང་ནས་ཡེ་མི་གནང་བ་ལ། རེས་འགའ་ཙ་ན་འཕྲང་ཟམ་པ་ཤིན་ཏུ་ཉམ་ང་བ་ལ་འགྲོ་བའི་ཚེ་ཇི་སྲིད་དུ་དངོས་པོར་འཛིན་པ་མ་སྤངས་ཀྱི་བར་དུ་ལས་ཕྲ་ཞིང་ཕྲ་བ་ལ་ཡང་འཛེམས་ཤིག་གསུངས་ནས་རྟགས་དང་བཅས་པ་གསུང་སྐད། དེ་བས་ན་འོ་སྐོལ་དངོས་པོར་འཛིན་པ་མ་སྤངས་སེམས་ལ་བརྟན་པ་མ་ཐོབ་བར་དུ་ལས་ཕྲ་ཞིང་ཕྲ་བས་ཀྱང་འབྲས་བུ་འབྱིན་པ་ཤེས་པར་བྱས་ལ་ལས་རྒྱུ་འབྲས་ལ་འཛེམ་དགོས། སེམས་ཟག་པ་ལས་གྲོལ་ནས་ཀྱང་ཕུང་པོ་མ་སྤངས་ཀྱི་བར་དུ་ལས་ཀྱི་རྣམ་སྨིན་གྱིས་མ་བཏང་བ་ནི་དགེ་སློང་མ་ཨུ་ཏྤ་ལའི་ལོ་རྒྱུས་དང་འཕགས་པ་སྒུར་ཆུང་གི་ལོ་རྒྱུས་ལྟ་བུ་ཡིན། དེས་ན་མདོ་ལས། དགེ་སློང་དག །ལས་ནི་ས་ལ་མི་སྨིན་རྡོ་ལ་མི་སྨིན་ཟིན་པའི་ཕུང་པོ་འབའ་ཞིག་ལ་སྨིན་ཅེས་པས་དེས་ན་འོ་སྐོལ་གཟབ་འཚལ། ཞེས་བྱུང་བ་ལྟར་རོ། །གཉིས་པ་འཁོར་བའི་སྡུག་བསྔལ་བསམ་པ་ནི། མགོན་པོ་ཀླུ་སྒྲུབ་ཀྱིས། རབ་ཏུ་ཚ་ཞིང་གྲང་བ་ཡི། །དམྱལ་བ་ཉི་མ་གཅིག་བཞིན་དྲན། །བཀྲེས་སྐོམ་དག་གིས་རིད་པ་ཡི། །ཡི་དྭགས་དག་ཀྱང་དྲན་པར་བྱ། །རྨོངས་པའི་སྡུག་བསྔལ་རབ་མང་བའི། །བྱོལ་སོང་བལྟ་ཞིང་དྲན་པར་བྱ། །དེ་རྒྱུ་རྣམ་སྤངས་བདེ་རྒྱུ་སྤྱད། །ཐོབ་དཀའ་འཛམ་གླིང་མི་ཡི་ལུས། །ད་ཐོབ་དུས་སུ་ངན་སོང་རྒྱུ། །རབ་ཏུ་བསྒྲིམས་ཏེ་གཅད་
བར་བྱ། །ཞེས་ཤིན་ཏུ་བཟོད་པར་དཀའ་བ་དམྱལ་བ་ཚ་གྲང་། ཡི་དྭགས་བཀྲེས་སྐོམ། དུད་འགྲོ་གླེན་ལྐུགས་བཀོལ་སྤྱོད་ཀྱིས་ཉམ་ཐག་པ་འབྲས་ཚ་བའི་སྟེང་དུ་ཕོལ་མིག་བྱུང་བ་ལྟར་སྡུག་བསྔལ་གྱིས་སྡུག་བསྔལ་བ་ནི། བཤེས་སྤྲིང་དུ་སྡིག་ཅན་དབུགས་འབྱུང་འགག་པ་ཙམ་ཞིག་གིས། །དུས་ཀྱི་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་རྣམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །དམྱལ་བ་བྲིས་པ་མཐོང་དང་ཐོས་པ་དང་། །དྲན་དང་བཀླགས་དང་གཟུགས་སུ་བགྱིས་རྣམས་ཀྱང་། །འཇིགས་པ་བསྐྱེད་པར་འགྱུར་ན་མི་བཟད་པའི། །རྣམ་སྨིན་ཉམས་སུ་མྱོང་རྣམས་སྨོས་ཅི་འཚལ། །ཞེས་པ་ལྟར་བཟོད་གླགས་མེད་ལ། བདེ་བགྲོར་སྐྱེས་ཀྱང་སློབ་སྤྲིང་ལས། གང་ཞིག་འཁོར་བའི་འཁོར་ལ་རྟག་ཏུ་འགྱུར་བ་ཡི། །ནང་དུ་ཞུགས་ནས་བསྟི་བ་ཙམ་ལ་བདར་སེམས་པ། །དེ་ནི་ངེས་པར་དབང་མེད་རིམ་གྱིས་བརྒྱ་ཕྲག་ཏུ། །འགྲོ་བ་མཉམ་དང་མི་མཉམ་ཀུན་ཏུ་འཁྱམས་པར་འགྱུར། །ཞེས་དང་། ཞི་བ་ལྷས། བདེ་འགྲོར་ཡང་དང་ཡང་འོངས་ཏེ། །བདེ་བ་མང་པོ་སྤྱད་སྤྱད་ནས། །ཤི་ནས་ངན་སོང་སྡུག་བསྔལ་ནི། །ཡུན་རིང་མི་བཟད་རྣམས་སུ་ལྷུང་། །ཞེས་གསུངས་པ་ལྟར་སྤྱིར་བདེ་འགྲོར་སྐྱེད་ཀྱང་སྐྱེ་རྒ་ན་འཆི་དང་འཆི་འཕོ་ལྟུང་བྱེད་སོགས་སྡུག་བསྔལ་སྣ་ཚོགས་ཀྱིས་གཟིར་བར་མ་ཟད་བཙོན་རར་ཚུད་པའི་མི་ཞིག་དེ་ནས་ཐོན་ཀྱང་སླད་བཙོན་ཁང་གཞན་དུ་མི་འཇུག་པའི་ངེས་པ་མེད་པ་བཞིན་བདེ་འགྲོ་ན་མི་འགྲོ་བའི་གདེང་ཚད་མ་རྙེད་པའི་ཕྱིར་ན་འཁོར་བ་ལས་མ་ཐར་ཕྱིན་སྡུག་བསྔལ་གྱི་ཟུག་རྔུ་དང་ནམ་ཡང་མི་འབྲལ་ལ། དེའི་རྩ་བ་ཡང་འདོད་ཡོན་ལྔ་ཁོ་ནར་ཆགས་པ་དང་དེའི་ལྡོག་ཕྱོགས་ལ་སྡང་བའི་སྐྱོན་ལས་བྱུང་བ་སྟེ། དཔེ་འགྲེལ་
ལས། ཉ་དང་ཞེས་པ་ནི། དཔེར་ན་ཉ་འཛིན་ཙ་ན་ལྕགས་ཀྱུའི་རྩེ་མོ་ལ་ཤ་བཏགས་ནས་ཆུའི་གཏིང་དུ་བཏང་བས་ཉ་དམར་དད་ཆེ་བས་ཤ་ལ་ཁྱུར་མིད་བྱས་པས་གྲེ་བར་ལྕགས་ཀྱུ་ཟུག་ནས་དེ་སྐམ་སར་དྲངས་ནས་གསོད་དེ་ཉ་རོས་ཕུང་བའོ། །དེ་བཞིན་དུ་འོ་སྐོལ་ཡང་ལྕེ་རོའི་རྗེས་སུ་འབྲང་འབྲང་ནས་ཉོན་མོངས་ལྕགས་ཀྱུས་ཟིན་ཏེ་ངན་སོང་གི་གྲུ་བར་འཚོད་པར་མཆི་ན་གསུང་། ཕྱེ་མ་ལེབ་ཅེས་པ་ནི། དཔེར་ན་ཕྱེ་མ་ལེབ་ཀྱིས་མར་མེ་གཞལ་ཡས་ཁང་དུ་མཐོང་སྟེ། དེར་དགའ་དགའ་འདྲ་བ་ལ་བསྙེགས་པས་མེ་ལྕེས་ཚིག་ཅིང་མར་ཁུར་ལྷུང་སྟེ་ཕྱེ་མ་ལེབ་གཟུགས་ཀྱིས་ཕུང་བའོ། །དེ་བཞིན་དུ་འོ་སྐོལ་ཡང་འཁྲུལ་པའི་སྣང་བ་སྡུག་བསྔལ་གྱི་རང་བཞིན་འདི་ལ་བདེ་བར་མཐོང་ཞིང་ཆགས་པས་འཁོར་བའི་རྒྱ་མཚོར་ལྷུང་ཞིང་ངན་སོང་གི་མེར་སྲེག་གསུང་། གླང་ཆེན་ཞེས་པ་ནི། གླང་པོ་ཆེ་རེག་བྱ་ལ་དགའ་བས་ཁོའི་ལུས་ལ་དལ་བུས་བགས་ཀྱིས་ཕྲུགས་པས་དགའ་ནས་ཙོག་གེ་སྡོད་པས་སྤྱི་བོར་ལྕགས་ཀྱུས་བཏབ་ནས་གང་འདོང་དུ་འཁྲིད་པ་ཡིན་སྐད། གླང་པོ་ཆེ་རེག་བྱས་ཕུང་བའོ། །དེ་བཞིན་དུ་འོ་སྐོལ་ཡང་ལུས་རེག་བྱ་ལ་དགའ་དགའ་ནས་སྡུག་བསྔལ་གྱི་ལྕགས་ཀྱུས་འཛིན་གསུང་། བུང་བ་ཞེས་པ་ནི། དཔེར་ན་བུང་བ་མི་གཙང་བའི་དྲི་ལ་འཁར་ནས་མི་གཙང་བའི་འདམ་རྫབ་ཏུ་ལྷུང་ཞིང་བྱ་བྱིས་ཁྱེར་ཏེ་བུང་བ་དྲིས་ཕུང་བའོ། །དེ་བཞིན་དུ་འོ་སྐོལ་ཡང་འདོད་པའི་དྲི་ལ་འཁོར་ནས་ཉོན་མོངས་ཀྱི་འདམ་དུ་བྱིང་ཞིང་བདུད་ཀྱིས་ཁྱེར་ནས་འགྲོ་གསུང་། རི་དྭགས་ཞེས་པ་ནི། ལྷོའི་རི་དྭགས་གཤོར་བ་ཀུན་གྱིས་ལུང་སྟོང་གི་ནགས་གསེབ་ཏུ་ཡིབས་ནས་དེར་གླིང་བུ་དང་པི་ཝཾ་གི་སྒྲ་སྙན་བསྒྲགས་པས་རི་དྭགས་སྒྲ་སྙན་ལ་དགའ་བས་དེར་སྒྲའི་ཕྱོགས་སུ་ཉན་ཅིང་འོང་བ་ལ་ཕག་ནས་མདའ་བརྒྱབ་ནས་གསོད་དེ་རི་དྭགས་སྒྲས་
ཕུང་བའོ། དེ་བཞིན་དུ་འོ་སྐོལ་ཡང་ཚེ་འདིའི་གྲགས་སྙན་གྱི་རྗེས་སུ་འབྲང་འབྲང་ནས་ཆགས་སྡང་གི་རྔོན་པས་གསོད་གསུང་། སློབ་དཔོན་དབྱིག་གཉེན་གྱི་ཞལ་ནས། རི་དྭགས་ཉིད་ནི་སྒྲ་ཙམ་གྱིས། །རེག་པས་གླང་པོ་བརླག་པར་འགྱུར། །གཟུགས་ཉིད་ཀྱིས་ནི་ཕྱེ་ལེབ་སྟེ། །རོ་ཡི་ཉ་ཉིད་རྣམ་པར་བརླག །བུང་བ་དྲི་ལ་ཆགས་པས་ཏེ། །འདི་དག་རྒྱུ་ནི་རེ་རེ་ཡིན། །སྐྱེས་བུ་དག་ནི་གཅིག་ལ་ཡང་། །ལྔ་པོ་འདི་དག་རྟག་ལྡན་ཞིང་། །ཉིན་མཚན་དུ་ནི་རབ་ཏུ་འཇོམས། །བདེ་གནས་ཇི་ལྟར་ཐོབ་པར་འགྱུར། །ཞེས་གསུང་། དེས་ན་འོ་སྐོལ་འདོད་པའི་ཡོན་ཏན་ལྔའི་རྗེས་སུ་སྙེག་སྙེག་ནས། འཁོར་བ་འདིར་ཐོག་མ་མེད་པ་ནས་གཏིང་མཐའ་མེད་པར་འཁྱམས་ཏེ་ཕུང་ཚབས་དང་བརླག་ཚབས་འདི་ལས་ཆེ་བ་མེད་གསུང་། ཡུམ་ལས་ཀྱང་། ཤཱ་ར་དྭ་ཏཱིའི་བུ་བྱང་ཆུབ་སེམས་དཔའ་ཆེན་པོ་རྣམས་ནི་རྣམ་གྲངས་དུ་མས་འདོད་པ་རྣམས་ལ་སྐྱོན་དུ་བརྗོད་དེ། འདོད་པ་རྣམས་ནི་ཀུན་ནས་འབར་བའོ། །འདོད་པ་རྣམས་ནི་རབ་ཏུ་སྨད་པའོ། །འདོད་པ་རྣམས་ནི་རབ་ཏུ་གསོད་པའོ། །འདོད་པ་རྣམས་ནི་དགྲའོ། །འདོད་པ་རྣམས་ནི་ཕྱིར་རྒོལ་བའོ། འདོད་པ་རྣམས་ནི་རྩྭའི་སྒྲོན་མེ་ལྟ་བུའོ། །འདོད་པ་རྣམས་ནི་མེ་ཏོག་ཀིམྦ་ཀའི་འབྲས་བུ་ལྟ་བུའོ། །འདོད་པ་རྣམས་ནི་རལ་གྲིའི་སོ་ལྟ་བུའོ། །འདོད་པ་རྣམས་ནི་མེ་མདག་སྤུངས་པ་ལྟ་བུའོ། །འདོད་པ་རྣམས་ནི་དུག་གི་ལོ་མ་ལྟ་བུའོ། །འདོད་པ་རྣམས་ནི་ཉའི་མཆིལ་པ་ལྟ་བུའོ། །འདོད་པ་རྣམས་ནི་མི་གཙང་བའི་རླབས་ལྟ་བུའོ། །ཞེས་གསུངས་པས་མཚོན་ཏེ་ཤེས་པར་ནུས་སོ། །གསུམ་པ་ངེས་འབྱུང་སྐྱེས་པའི་ཚད་བསྟན་པ་ནི། ཤེས་བྱ་ཆོས་ཅན། བཤད་མ་ཐག་པའི་ཚུལ་དེ་ལྟ་བུར་ལན་ཅིག་མ་ཡིན་པར་ཡང་ནས་ཡང་དུ་འདྲིས་ཤིང་གོམས་པར་བྱས་པ་ལ་བརྟེན་ནས་བཅོས་མ་མ་ཡིན་པའི་ངེས་འབྱུང་གི་བསམ་པ་རྣམ་པར་དག་པ་རང་རྒྱུད་ལ་སྐྱེས་པ་ལགས་
ཞེས་གསུངས་པའི་ཚད་བསྟན་དུ་ཡོད་དེ། ལྷ་མིའི་གཙོ་བོ་རྣམས་ཀྱི་བདེ་བས་མཚོན་སྲིད་པ་འཁོར་བ་འདིར་ཉམས་སུ་མྱོང་བར་བྱ་བའི་འདོད་པའི་ཡོན་ཏན་ལྔ་སོགས་ཕུན་སུམ་ཚོགས་པ་གང་ལའང་སྐྱུགས་ནད་ཅན་གཟན་མཐོང་བ་ལྟར་ཡིད་ལ་རེ་བའི་སྨོན་པ་སྐད་ཅིག་ཙམ་ཡང་རྒྱུད་ལ་མི་སྐྱེ་ཞིང་ཡིད་བརྟན་དུ་མི་རུང་བའི་འཁོར་བ་ལས་ཅི་ནས་ཀྱང་ཐར་པ་ཞིག་བྱས་ཏེ་མྱ་ངན་ལས་འདས་པ་དོན་དུ་གཉེར་བའི་བློ་གཞན་རྐྱེན་གྱི་དབང་གིས་ལྡོག་མི་ནུས་པའི་ཤུགས་དྲག་པོ་ཉིན་མཚན་གྱི་དུས་ཀུན་ཏུ་བྱུང་བ་ན། དེའི་ཚེ་སྟེ་དུས་དེར་ངོས་འཛིན་དགོས་པའི་ཕྱིར་རོ། །གཉིས་པ་བྱང་ཆུབ་ཀྱི་སེམས་བསྒོམ་པ་ལ་དངོས་དང་རྒྱུ་མཚན་གཉིས་ལས། དང་པོ་ལ་ཚིག་དོན་དང་སྤྱི་དོན་གཉིས་ཀྱི་དང་པོ་ནི། ཐེག་པ་ཆེན་པོའི་རིགས་སད་པའི་བློ་གྲོས་དང་ལྡན་པའི་དབང་པོ་རྣོན་པོ་རྣམས་ཀྱིས་བྱང་ཆུབ་མཆོག་ཏུ་སེམས་བསྐྱེད་པར་གྱིས་ཤིག་པར་གདམས་པ་ལ་ཆོས་ཅན། དགོས་པ་ཡོད་དེ། མཁའ་མཉམ་གྱི་སེམས་ཅན་རྣམས་ཀྱི་ཆེད་དུ་རྣམ་པར་དག་པའི་སྨོན་འཇུག་གི་སེམས་བསྐྱེད་ཀྱི་རྩིས་ཟིན་པ་མེད་ན་ནི་གོང་དུ་བཤད་པའི་སྲིད་པའི་ཕུན་ཚོགས་ལ་ངེས་པར་འབྱུང་བ་ཙམ་གྱི་བསམ་པ་དེ་ཡང་རང་དོན་ཡིད་བྱེད་དམན་པའི་ལམ་དུ་གོལ་བའི་སྐྱོན་ཡོད་པས་བླ་ན་མེད་པའི་བྱང་ཆུབ་ཀྱིས་རང་གཞན་གཉིས་ཀའི་ཕུན་སུམ་ཚོགས་པ་འགྲུབ་པའི་གཏན་གྱི་བདེ་བ་མི་གནས་པ་མྱ་ངན་ལས་འདས་པའི་རྒྱུ་རུ་མི་འགྱུར་བས་ན་སྐྱོན་དང་བཅས་པའི་ཕྱིར་རོ། །གཉིས་པ་སྤྱི་དོན་ནི། རྒྱུད་བླ་མ་ལས། ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་བསྐྱེད་མ་དང་བསམ་གཏན་གྱི། །བདེ་བའི་མངལ་གནས་སྙིང་རྗེའི་མ་མ་ཅན། །གང་ཡིན་དེ་དག་ཐུབ་པའི་རྗེས་སྐྱེས་སྲས། །ཞེས་པ་ལྟར་ཆུ་ལུད་ཀྱིས་འབྲུ་སྣ་ཚོགས་བསྐྱེད་པ་དང་བྲམ་ཟེ་མོའི་བུར་རིགས་སྣ་ཚོགས་འབྱུང་བ་
བཞིན་སྔར་བཤད་པའི་ངེས་འབྱུང་གི་བསམ་པས་དྲངས་ནས་གདུལ་བྱ་རིགས་ཅན་གང་གི་ལམ་དུའང་འཇུག་པས་མར་ངེས་ལ། ས་བོན་གྲོ་བཏབ་པ་དང་ཕ་རྒྱལ་པོ་ལྟ་བུ་ལ་མྱུ་གུ་དང་བུ་ཡང་རིགས་མི་འཆོལ་བ་ཁོ་ནར་འབྱུང་བ་ལྟར་སེམས་བསྐྱེད་ཀྱི་རྩིས་ཟིན་ནས་ཐེག་པ་ཆེན་པོའི་ལམ་ལས་གཞན་དུ་མི་འགྱུར་བའི་ཕྱིར་སངས་རྒྱས་ཀྱི་རྒྱུ་ཐུན་མོང་མ་ཡིན་པས་ན། སྡོང་པོ་བཀོད་པ་ལས། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །ཞེས་དང་། ཕར་ཕྱིན་བསྡུས་པ་ལས། ཤེས་རབ་རྣམ་དག་མངོན་སྒྲུབ་ཐེག་པའི་མཆོག །ཐུབ་ཆེན་ཐམས་ཅད་མཁྱེན་པ་དེ་ལས་འབྱུང་། །དེ་ནི་འཇིག་རྟེན་རྣམས་ཀྱི་མིག་བཞིན་ཏེ། །འོད་ལྡན་ཉི་མ་ཤར་བའི་འོད་དང་འདྲ། །ཞེས་གསུངས་པ་ལྟར་ཡིན་ལ། སངས་རྒྱས་ཀྱི་གོ་འཕང་དེ་ཡང་རང་དོན་དོར་ནས་གཞན་དོན་ལྷུར་བླངས་པ་ལ་བརྟེན་ནས་འབྱུང་ཞིང་གཞན་གྱི་དོན་སྒྲུབ་དགོས་པའི་རྒྱུ་མཚན། སློབ་སྤྲིང་ལས། ཉེ་དུ་འཁོར་བའི་རྒྱ་མཚོའི་ཁོངས་སུ་ཆུད་གྱུར་པ། །གློང་གི་ནང་དུ་ལྷུང་བ་ལྟ་བུར་སྣང་བཞིན་དུ། །སྐྱེ་ཤི་འཕོས་པས་ངོ་མ་ཤེས་པ་དེ་བོར་ནས། །གལ་ཏེ་གཅིག་ཐར་བྱེད་པ་དེ་ལས་ཁྲེལ་བོར་མེད། །ཅེས་དང་། བྱིས་པ་པང་ནས་བཙའ་བ་ཅི་ཡང་མི་ནུས་པས། །གང་གིས་ནུ་ཞོ་བྱམས་པའི་སྐྱུགས་ཀྱིས་གཟིགས་འཐུངས་པ། །ངལ་བ་མང་བསྟེན་བྱམས་ལ་བརྟེན་པ་དེ་དག་འདིར། །ཤིན་ཏུ་མ་རབས་ཤིག་ནའང་སྤོང་བ་སུ་ཞིག་སྤྲོ། །གང་གི་ཁོང་ན་འདི་སྐབས་རྙེད་ནས་གནས་བྱས་ཤིང་། །གང་གིས་བརྩེ་བའི་སེམས་ཀྱིས་ཟོན་བཅས་འདི་བླངས་པ། །ཉོན་མོངས་དེ་དག་སྡུག་བསྔལ་སྐྱབས་མེད་འདིར་བོར་ནས། །འགྲོ་བ་མ་རབས་ཐ་ཤལ་ཞིག་ནའང་སུ་ཞིག་སྤྲོ། །ཞེས་སྐྱེ་ཤི་འཕོས་པས་ངོ་མ་ཤེས་པ་མ་གཏོགས་སྐྱེ་བ་
མང་པོར་ཉེ་དུར་འབྲེལ་ཞིང་ཁྱད་པར་མར་གྱུར་ནས་ཐབས་སྣ་ཚོགས་ཀྱིས་གནོད་པ་ལས་བསྐྱབས་ཤིང་ཕན་པ་བསྒྲུབས་པའི་རིས་མེད་ཀྱི་སེམས་ཅན་རྣམས་འཁོར་བ་ལས་བསྒྲལ་ཞིང་ཐར་པའི་བདེ་བ་ལ་འགོད་པའི་ཆེད་དུ་བསམ་པ་བྱང་ཆུབ་ཏུ་སེམས་བསྐྱེད། སྦྱོར་བ་ཕྱིན་དྲུག་ལ་བསླབ་པ་ནི་ཐེག་པ་ཆེན་པོའི་གཞུང་ཤིང་ཡིན་ཅིང་བསམ་སྦྱོར་དེ་ལྟ་བུ་དང་ལྡན་ན་ཆོས་ཁྱད་པར་དུ་འཕགས་པས། ཕ་རོལ་ཏུ་ཕྱིན་པ་ལྔའི་མདོ་ལས། གལ་ཏེ་བྱང་ཆུབ་སེམས་དཔའ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་ཁྱིམ་ན་གནས་ཏེ་འདོད་པའི་ཡོན་ཏན་ལྔ་རྣམས་ལ་བརྟེན་ཅིང་ལོངས་སྤྱོད་ལ་ཉན་ཐོས་ཀྱི་སའམ། རང་སངས་རྒྱས་ཀྱི་སར་ཡང་སེམས་མི་བསྐྱེད་ན། དེ་ཙམ་གྱིས་ནི་བྱང་ཆུབ་སེམས་དཔའ་ཚུལ་ཁྲིམས་འཆལ་བ་ཞེས་མི་བརྗོད་དོ། །དེ་ཅིའི་ཕྱིར་ཞེ་ན། དེ་ལྟར་འདིས་འདི་ལྟ་སྟེ། ཐམས་ཅད་མཁྱེན་པ་ཉིད་ཀྱི་ལྷག་པའི་བསམ་པ་མ་དཀྲུགས་པའི་ཕྱིར་རོ། །ཚེ་དང་ལྡན་པ་གང་པོ། དཔེར་ན་མི་ལ་ལ་ཞིག་ཉེས་པ་མེད་པར་བཙོན་རར་བཅུག་སྟེ། དེ་བཙོན་དེར་ལོ་མང་པོ། ལོ་བརྒྱ་ཕྲག་མང་པོ། ལོ་འབུམ་ཕྲག་མང་པོ་བཙོན་རར་བཅུག་ལ། དེའི་ལྷག་པའི་བསམ་པ་ཡང་འཁྲུགས་པར་མ་གྱུར། དེས་རྐུན་པོའི་སེམས་ཀྱང་མ་བསྐྱེད་དུ་ཟིན་ཀྱང་དེ་བཙོན་རར་བཅུག་ན། དེ་ཙམ་གྱིས་ནི་དེ་རྐུན་པོ་ཞེས་བརྗོད་པ་མ་ཡིན་ནོ། །ཚེ་དང་ལྡན་པ་དེ་བཞིན་དུ་བྱང་ཆུབ་སེམས་དཔའ་དེ་ཡང་ཁྱིམ་ན་གནས་ཤིང་འདོད་པའི་ཡོན་ཏན་ལྔ་རྣམས་ལ་ལོངས་སུ་སྤྱོད་པ་དེ་ཚུལ་ཁྲིམས་འཆལ་པ་ཞེས་བྱ་བར་མི་བརྗོད་དོ། །གལ་ཏེ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་ཚངས་པར་སྤྱད་པ་སྤྱོད་ལ། དེ་ཡང་ཉན་ཐོས་ཀྱི་སའམ་རང་སངས་རྒྱས་ཀྱི་སར་ཡོངས་སུ་བསྔོ་ཞིང་ཐམས་ཅད་མཁྱེན་པ་ཉིད་ཀྱི་
ལྷག་པའི་བསམ་པ་ཡང་འཁྲུགས་ན་དེ་ཙམ་གྱིས་ནི་དེ་ཚུལ་ཁྲིམས་དང་ལྡན་པ་ཞེས་མི་བྱའོ། །གང་གི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཉན་ཐོས་ཀྱི་ཚུལ་ཁྲིམས་ལ་གནས་ན། དེ་བྱང་ཆུབ་སེམས་དཔའ་ཞེས་མི་བརྗོད་དོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་འགལ་བའི་ཕྱིར་རོ། །ཞེས་གསུངས་པས་སེམས་བསྐྱེད་ནས་གཞན་དོན་འབའ་ཞིག་བསྒྲུབ་པའི་སེམས་དཔའ་དང་རང་དོན་ལྷུར་ལེན་པའི་ཉན་རང་གི་ཁྱད་པར་མཐའ་ཡས་པར་གསུངས་པ་ནི་བསམ་གྱིས་མི་ཁྱབ་པའི་གནས་ཡིན་ཅིང་། རང་ཉིད་ལ་རྒྱལ་བའི་སྲས་ཀྱི་ཡོན་ཏན་དང་མི་ལྡན་པར་ཚིག་ཙམ་ལ་འཆེལ་ནས་རྩིང་པོར་སྤྱོད་པ་དག་ཐར་པའི་སྲོག་དང་འབྲལ་བར་བྱེད་པའི་རྒྱུ་ཁོ་ན་ཡིན་པས། དཔེ་འགྲེལ་དུ། ནད་པ་ཆང་འཐུང་ཞེས་པ་ནི། དཔེར་ན་ཚད་རིམས་དྲག་པོས་ཐེབས་པའི་ནད་བསྐོམ་པས་གདུངས་ནས་ཆང་སྙིང་ལ་འདོད་པས་ཆང་འཐུངས་ན་ཚད་པ་ཆེར་འཕེལ་ནས་མྱུར་དུ་སྲོག་དང་འབྲལ་ལ་སྐོམ་པས་གདུངས་པའི་དུས་ན། སྨན་པའི་ངག་ལ་ཉན་ཆང་མ་འཐུངས་པར་བསྲན་པས་ཕྱིས་སྨན་གྱིས་ཚདཔ་ཞི། སྐོམ་པས་གདུངས་པ་སངས་ཙ་ན་ཆང་འཐུངས་ཀྱང་མི་གནོད་ལ། སླར་ལུས་ཟུངས་སྐྱེད་པར་བྱེད་པས། དེས་ན་སྐོམ་པའི་དུས་ན་ཆང་འཐུང་དུ་མི་བཏུབ་སྟེ། འཐུངས་སྲིད་ན་དུག་ཏུ་འགྱུར་ལ། མི་སྐོམ་པའི་དུས་འཐུངས་ཀྱང་མི་སྟོ་སྟེ། འཐུངས་པས་སྨན་དུ་འགྱུར་རོ། །དཔེ་དེ་བཞིན་དུ་འོ་སྐོལ་སོ་སོ་སྐྱེ་བོ་ལས་དང་པོ་པ། ལས་དང་ཉོན་མོངས་པ་ཁ་མ་བྲི་བ་ནད་ཚབས་ཅན་དང་འདྲ་བ་འདིས་འདོད་པ་ལ་བག་མེད་པར་སྤྱད་ན་འདོད་ཆགས་འབར་ནས་ཐར་པའི་སྲོག་གཅོད་ཅིང་ངན་སོང་དུ་འགྲོ་ལ། ད་རེས་འདོད་པས་གདུངས་པ་དང་
བཅས་པའི་དུས་འདིར་བླ་མའི་གདམས་ངག་མཉན་ནས་འདོད་པ་ལ་བསྲན་ཚུགས་པས་ནམ་ཞིག་ལས་དང་ཉོན་མོངས་པ་མཐའ་དག་ཞི། འདོད་པའི་ཆགས་སྲེད་ཀྱིས་གདུངས་པ་སངས་ཙ་ན་འདོད་ཡོན་ལ་སྤྱད་ཀྱང་མི་གནོད་དེ། སླར་ས་གོང་ནས་གོང་དུ་འཕར་བའི་གྲོགས་སུ་འགྲོ་བ་ཡིན། ཞེས་འབྱུང་བས་འདོད་ཡོན་ལམ་དུ་འགྲོ་མི་འགྲོའི་དུས་འཚམས་ཤེས་དགོས་ཤིང་། རྣམ་དཀར་གྱི་ལས་སྟོབས་ཆེ་ཆུང་ཅི་འདྲ་བ་ཞིག་བསགས་ཀྱང་འབྲས་བུ་ཟད་མི་ཤེས་པར་ལོངས་སྤྱོད་དུ་ཡོད་པ་སེམས་རིན་པོ་ཆེ་འདི་ལ་རག་ལུས་པས། དེ་ཉིད་ལས། གསེར་འགྱུར་ཞེས་པ་ནི། དཔེར་ན་གསེར་འགྱུར་གྱི་རྩི་སྲང་གཅིག་གིས་ལྕགས་སྲང་སྟོང་གསེར་དུ་འགྱུར་སྐད། དེ་བཞིན་དུ་སྦྱིན་པ་ལ་སོགས་པའི་ངོ་བོ་ལུང་མ་བསྟན་ཡིན། དེ་ལ་བྱང་ཆུབ་སེམས་ཀྱི་རྩིས་ཟིན་ན། དེ་ཐམས་ཅད་སངས་རྒྱས་ཀྱི་རྒྱུར་འགྱུར་ལ། བྱང་ཆུབ་སེམས་ཀྱི་རྩིས་མ་ཟིན་ན། དེ་ལས་གཞན་པར་འགྱུར་བས། དེས་ན་བྱང་ཆུབ་ཀྱི་སེམས་ནི་གསེར་འགྱུར་གྱི་རྩི་དང་འདྲ་གསུང་། བདུད་རྩི་འདྲ་ཞེས་པ་ནི། དཔེར་ན་སྨན་གྱི་བྱེ་བྲག་གཞན་གྱིས་ནད་ཀྱི་བྱེ་བྲག་ལ་ཕན་ལ། ལྷའི་བདུད་རྩིས་ནད་ཐམས་ཅད་ལ་ཕན་པ་ལྟར་ཆོས་གཞན་ནི། ཉོན་མོངས་པ་བྱེ་བྲག་པའི་གཉེན་པོར་འགྲོ་ལ། བྱང་ཆུབ་ཀྱི་སེམས་ནི་ཉོན་མོངས་པ་ཐམས་ཅད་ཀྱི་གཉེན་པོར་འགྲོ་བ་ཡིན་གསུང་། དེས་ན་བྱང་ཆུབ་ཀྱི་སེམས་ནི་སངས་རྒྱས་ཐོབ་པར་བྱེད་པའི་རྒྱུ་ཐུན་མོང་མ་ཡིན་པ་སྟེ། ལམ་སྣ་ནས་ཟིན་མ་ཟིན་ཀྱང་བྱང་ཆུབ་ཀྱི་སེམས་སྐྱེས་མ་སྐྱེས་ལ་བཞག་པ་ཡིན། ཕྱིར་ལྡོག་མི་ལྡོག་ཀྱང་བྱང་ཆུབ་ཀྱི་སེམས་ལ་བརྟན་པ་ཐོབ་མ་ཐོབ་བཞག་པ་ཡིན། ས་ལམ་གྱི་རིམ་པ་ཐམས་ཅད་ཀྱང་བྱང་ཆུབ་ཀྱི་
སེམས་ཀྱི་ཡོན་ཏན་གོང་ནས་གོང་དུ་འཕེལ་བ་ལ་བརྩི་བ་ཡིན་གསུང་། ཆུ་ཤིང་ཞེས་པ་ནི། དཔེར་ན་ཆུ་ཤིང་གི་རིགས་རྣམས་རང་གི་འབྲས་བུ་སྨིན་པ་དང་རྩད་ནས་བསྐམས་པ་ལྟར་བྱང་ཆུབ་ཀྱི་སེམས་ཀྱིས་མ་ཟིན་པའི་དགེ་བའི་རྩ་བ་ནི་ལྷ་མིའམ་ཉན་ཐོས་སམ། རང་སངས་རྒྱས་ཀྱི་བྱང་ཆུབ་ཙམ་ཞིག་ཐོབ་པ་དང་དེའི་ནུས་པ་གཏན་ཟད་དུ་འགྲོ་སྟེ། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་པ་སྟེ། །ཞེས་གསུངས་པས་ཤེས་ལ། དེ་བསྒོམ་པའི་ཚུལ་ཡང་། ཞི་བ་ལྷས། གང་ཞིག་བདག་དང་གཞན་རྣམས་ནི། །མྱུར་དུ་སྐྱོབ་པར་འདོད་པ་དེས། །བདག་དང་གཞན་དུ་བརྗེ་བྱ་བ། །གསང་བའི་དམ་པ་སྤྱད་པར་བྱ། །ཞེས་དང་། བདག་པད་གཞན་གྱི་སྡུག་བསྔལ་དག །ཡང་དག་བརྗེ་བར་མ་བྱས་ན། །སངས་རྒྱས་ཉིད་དུ་མི་འགྲུབ་ཅིང་། །འཁོར་བ་ན་ཡང་བདེ་བ་མེད། །ཅེས་བདག་གཞན་མཉམ་པར་བརྗེ་བའི་བདེ་སྡུག་གི་གཏོང་ལེན་སྤེལ་མར་བྱེད་པ་ནི་ཉམས་ལེན་གྱི་གནད་འགག་ཆེ་ཤོས་ཡིན་པ་གོ་རིམ་ཡང་རྒྱུ་འབྲས་མན་ངག་བདུན་གྱི་སྒོ་ནས་ཚེ་འདིའི་མ་ལ་བརྟེན་ནས་རིམ་གྱིས་སྦྱོང་བས། དཔེ་འགྲེལ་ལས། བྱང་ཆུབ་ཀྱི་སེམས་དེ་གང་ལས་སྐྱེ་ན་སྨོན་འཇུག་བྱང་ཆུབ་ཏུ་སེམས་བསྐྱེད་ཅིང་དེའི་བསླབ་བྱ་ལ་བསླབ་པ་ཞིག་ལས་སྐྱེ། སྨོན་འཇུག་གཉིས་ཀྱི་སེམས་དེ་ཡང་སྔོན་དུ་སྙིང་རྗེ་ཆེན་པོ་ལ་བློ་འབྱོངས་པ་ཞིག་ལས་སྐྱེ། སྙིང་རྗེ་དེ་ཡང་བྱམས་པ་ཆེན་པོ་ལས་སྐྱེ། དེ་བྱས་པ་ཤེས་ཤིང་དྲིན་དུ་གཟོ་བ་ལས་སྐྱེ། དེ་ཕན་རྒྱ་ཆེན་པོ་བཏགས་པ་ལས་སྐྱེ་གསུང་། དེ་ལ་ཕན་བཏགས་པའི་མཆོག་སུ་ཡིན་ན། བདག་གི་མ་རྒན་རྣམས་ཡིན་པས་དེ་ལ་རྩ་བའི་མས་མཚོན་ནས་ནམ་མཁའི་མཐའ་དང་མཉམ་པའི་མ་རྒན་ཁམས་གསུམ་
གྱི་སེམས་ཅན་ཐམས་ཅད་ཀྱི་བྱས་པ་ཤེས་ཤིང་དྲིན་དུ་གཟོ་བ་ཡིན་ཅེས་གསུང་། འབུ་སྲིན་གཡག་ཙམ་ཞེས་པ་ནི། དང་པོ་རྩ་བའི་མས་བྱས་པ་ཤེས་ཤིང་དྲིན་དུ་གཟོ་བ་བསྟན་པ་ནི། འོ་སྐོལ་དང་པོ་མ་ལ་བཙས་མ་ཐག་ཏུ་འབུ་སྲིན་ལྟ་བུ་འཇིགས་ལ་སྐྱུག་བྲོ་བ་ཕ་མས་བརྩེ་བས་པང་དུ་བླངས། ཤའི་དྲོད་ལ་གླན། མར་གྱི་ལྡེ་གུ་བྱིན། ནུ་ཞོ་རན་པ་བླུད། བྱམས་པའི་མིག་གིས་བལྟས། སྙན་པའི་ཚིག་གིས་འདྲིད། ཟས་ཐམས་ཅད་ཁ་ཡིས་བསྙོད། མི་གཙང་བ་ཐམས་ཅད་ལག་པས་ཕྱིས། འཆི་བའི་སྲོག་ལས་བསྐྱབས། བརྡ་དང་བཤེས་གཉེན་བསླབས། ལྟོགས་པའི་དུས་སུ་ཟས་བྱིན། འཁྱགས་པའི་དུས་སུ་གོས་བསྐོན། དུས་རྟག་ཏུ་བརྩེ་བ་དང་གདུང་བ་ལ་བརྗེད་པ་མེད་པས་རང་གི་བདེ་སྡུག་གཏམ་ངན་ལུས་དང་སྲོག་ལ་མ་བལྟས་པར་བུའི་དོན་བྱས་པ་ཡིན་པས་མའི་བྱས་པ་ཤེས་ཤིང་བྱས་པ་དྲིན་དུ་གཟོ་བར་བྱེད་དགོས་ཞེས་གསུངས་སོ། །གཉིས་པ་བསྒོམ་དགོས་པའི་རྒྱུ་མཚན་ནི། ཤེས་བྱ་ཆོས་ཅན། ཚེ་འདིའི་མས་མཚོན་པའི་མཁའ་མཉམ་གྱི་སེམས་ཅན་རྣམས་ཀྱི་ཉམ་ཐག་པའི་ངང་ཚུལ་ལ་ལེགས་པར་བསམས་ནས་སེམས་ཅན་གཅིག་གི་དོན་དུ་འགྱུར་ན་རང་ཉིད་དམྱལ་བར་འཇུག་པ་ལ་ཡང་ཚམ་ཚོམ་མེད་པ་རྒྱལ་བའི་སྲས་ཀྱི་སྤྱོད་པ་རླབས་པོ་ཆེར་ཞུམ་པ་མེད་པའི་སྙིང་སྟོབས་ཀྱི་དམ་བཅའ་བརྟན་པོས་བྱང་ཆུབ་ཀྱི་མཆོག་ཏུ་སེམས་བསྐྱེད་པར་མཛོད་ཅིག་ཅེས་བསྐུལ་བ་ལ་རྒྱུ་མཚན་ཡོད་དེ། སྲིད་པའི་ཐོག་མ་འདི་ཞེས་ངོས་གཟུང་དུ་མི་ནུས་པ་ནས་ཐ་མའི་ཚད་ཀྱང་མུ་མེད་པར་རིགས་དྲུག་གི་གནས་སུ་ལན་གཅིག་དང་ལན་གཉིས་མ་ཡིན་པ་བགྲང་བར་དཀའ་བའི་སྐྱེ་བ་བླངས་པ་དང་སླར་ཡང་སྐྱེ་ཞིང་སྐྱེ་བ་རུ་སྡུག་བསྔལ་གྱི་སྡུག་བསྔལ་འགྱུར་བའི་སྡུག་བསྔལ།
ཁྱབ་པ་འདུ་བྱེད་ཀྱི་སྡུག་བསྔལ་ཏེ་སྡུག་བསྔལ་གསུམ་གྱིས་གནོད་པ་སྐད་ཅིག་ཀྱང་རྒྱུན་ཆད་པ་མེད་པར་མནར་བ་ལ་བརྟེན་ནས་ཆེས་བཟོད་པར་དཀའ་བའི་ཡུལ་ཉམ་ཐག་པའི་གནས་སྐབས་ཏེ་སྣང་ཚུལ་འདི་འདྲ་བར་གྱུར་པའི་ཕྱིར། རྟགས་གྲུབ་སྟེ། རི་གཟར་གྱི་འབབ་ཆུ་ལྟར་ཆུ་ལོན་གྱིས་དགག་པར་དཀའ་བ་ཤུགས་ཤིན་ཏུ་དྲག་པའི་སྐྱེ་རྒ་ན་འཆིའི་ཆུ་བོ་བཞི་ཡིས་ཅུང་ཟད་ཙམ་ཡང་མི་སྡོད་པར་སྡུག་བསྔལ་གྱི་རྒྱ་མཚོའི་གློང་དུ་རྒྱུན་གྱི་ཆ་བསགས་པས་ཁྱེར་ཞིང་རྐྱེན་གཞན་གྱིས་བཟློག་པར་དཀའ་བ་ཚེ་རབས་གྲངས་མེད་དུ་བསོད་ནམས་མ་ཡིན་པའི་ལས་ཀྱི་རིགས་སྣ་ཚོགས་པ་དུས་སུ་སྨིན་པས། འཆིང་བར་བྱེད་པའི་ཞགས་པས་གཡོ་འགུལ་ཙམ་ཡང་མི་ཐུབ་པར་དམ་པོས་བསྡམས་ཤིང་། ཆོས་ཐམས་ཅད་རང་བཞིན་གྱིས་སྟོང་ཉིད་དུ་མ་རྟོགས་པར་ཆོས་དང་གང་ཟག་གི་བདག་ཏུ་འཛིན་པ་གཅོད་པར་དཀའ་བ་ལྕགས་ཀྱི་དྲ་བ་ལྟ་བུའི་སྦུབས་སུ་ཆུད་པ་སོགས་ཉེས་པ་ཐམས་ཅད་ཀྱི་རྩ་བ་ལས་འབྲས་དང་དེ་ཁོ་ན་ཉིད་ལ་ལྟ་བའི་མ་རིག་པའི་མུན་པ་སྟུག་པོའི་སྨག་རུམ་ཆེན་པོ་ཕྱོགས་ཀུན་ནས་ཆུའི་ལྗིད་ཀྱིས་ནོན་པའི་དབྱར་གྱི་ཆར་སྤྲིན་ལྟ་བུར་འཐིབས་པའི་ཕྱིར་རོ། །གསུམ་པ་སྟོང་ཉིད་ཀྱི་ལྟ་བ་བསྟན་པ་ལ་ཚིག་དོན། སྤྱི་དོན། ཞར་བྱུང་མཐར་འཛིན་གྱི་ལྟ་བས་མི་འཕྲོག་པར་བསྟན་པ་དང་གསུམ་ལས། དང་པོ་ལ་རྟེན་འབྲེལ་རྟོགས་པའི་ཐབས་ལ་འབད་དགོས་པ། འབད་པའི་ལྟ་བ་བསྒོམ་པ། སྣང་སྟོང་ཟུང་དུ་འབྲེལ་བ། བསྒོམས་པ་ལ་བརྟེན་ནས་དཔྱད་པ་རྫོགས་ཚུལ་བསྟན་པ་དང་བཞིའི། དང་པོ་ནི། ཤེས་བྱ་ཆོས་ཅན། སྟོང་པ་ཉིད་ཀྱི་དོན་རྟེན་ཅིང་འབྲེལ་བར་འབྱུང་བས་འགྲུབ་པའི་ཚུལ་རྟོགས་
པའི་ཐབས་ལ་རིགས་པ་བརྒྱ་ཕྲག་དུ་མའི་སྒོ་ནས་འབད་པར་བྱེད་དགོས་ཏེ། སྔར་བཤད་པའི་ངེས་འབྱུང་དང་བྱང་ཆུབ་ཀྱི་སེམས་ཀྱི་རིམ་པ་ལ་ཇི་ཙམ་གྱི་བར་དུ་གོམས་པར་བྱས་ཀྱང་ཆོས་རྣམས་ཀྱི་གནས་ལུགས་ཕྱིན་ཅི་མ་ལོག་པར་ངེས་པའི་བདག་མེད་རྟོགས་པའི་ཤེས་རབ་དང་མི་ལྡན་ན། སྲིད་པ་འཁོར་བའི་སྡུག་བསྔལ་ཀུན་གྱི་རྩ་བ་བདག་ཏུ་འཛིན་པའི་ཞེན་ཡུལ་སུན་དབྱུང་ཞིང་གཅད་པ་སྟེ་སླར་སྐྱེ་མི་རུང་བའི་ཆོས་ཅན་དུ་མ་ནུས་པས་འཁོར་བ་ལས་མི་གྲོལ་བ་དེའི་ཕྱིར་རོ། །གཉིས་པ་འབད་པའི་ལྟ་བ་བསྒོམ་པའི་ཚུལ་ནི། ཤེས་བྱ་ཆོས་ཅན། དུས་གསུམ་གྱི་སངས་རྒྱས་སྲས་དང་བཅས་པ་དགྱེས་པའི་དགོངས་པའི་ཞེ་ཕུགས་ཕྱིན་ཅི་མ་ལོག་པའི་ལམ་ལ་ཞུགས་པར་བྱེད་པའི་ཐབས་གནས་ལུགས་ཀྱི་དོན་ཟབ་མོ་རྟེན་ཅིང་འབྲེལ་བར་འབྱུང་བའི་ཚུལ་དེ་ནི་བཤད་དུ་ཡོད་དེ། རྣམ་གྲོལ་གྱི་ལམ་དོན་དུ་གཉེར་བའི་གདུལ་བྱ་གང་ཞིག་འཁོར་བ་འཇིག་རྟེན་གྱིས་བསྡུས་པའི་ལས་དང་ཉོན་མོངས་པ་དེའི་མཐུས་གྲུབ་པའི་སྣོད་ཀྱི་འཇིག་རྟེན་དང་བཅུད་ཀྱི་སེམས་ཅན། དེའི་ཅིག་ཤོས་མྱ་ངན་ལས་འདས་པས་བསྡུས་པའི་ཆོས་རྣམས་མ་ལུས་པ་ཐམས་ཅད་ཀྱི་རྒྱུ་རྐྱེན་དགེ་མི་དགེ་ལུང་མ་བསྟན་ཚོགས་ཙམ་ལ་བརྟེན་ནས་འབྲས་བུ་བདེ་སྡུག་བཏང་སྙོམས་རྣམས་ནམ་ཡང་སྟེ་ཅུང་ཟད་ཙམ་ཡང་བསླུ་བ་མེད་པ་ས་བོན་ནས་བཏབ་པ་ལ་འབྲས་བུ་སྲན་མ་སྨིན་པ་ལྟ་བུའི་འཆོལ་བ་མི་འབྱུང་བར་རབ་ཏུ་མཐོང་ཞིང་། དེ་ལྟ་བུའི་དམིགས་པའི་ཡུལ་ལ་ཡན་ལག་ཚོགས་པ་ཙམ་ལ་ཤིང་རྟར་བཏགས་པ་ལྟ་བུའི་དོན་རང་བཞིན་གྱིས་མེད་པ་དུ་མ་རྟོགས་པར་བདེན་འཛིན་གྱི་རྟོག་པའི་འཛིན་སྟངས་ཀྱི་བསྟད་སོའི་ཡུལ་གང་ཡིན་པ་དོན་དམ་པར་ཅུང་ཟད་
ཙམ་ཡང་མེད་པར་རིག་པས་ཀུན་ནས་ཞིག་པ་སྟེ་ཁས་ལེན་དང་བྲལ་བ་དེ་ནི་ཡིན་པའི་ཕྱིར་རོ། །གསུམ་པ་སྣང་སྟོང་ཟུང་དུ་འབྲེལ་དགོས་པ་ནི། དྲང་དོན་གྱི་སྣང་བ་ཚུལ་ཁྲིམས་བསྲུངས་པ་ལ་བརྟེན་ནས་མངོན་མཐོའི་གོ་འཕང་དང་མ་བྱིན་པར་བླངས་པས་ཡི་དྭགས་སུ་སྐྱེ་བ་ལྟ་བུས་མཚོན་པའི་རྒྱུ་འབྲས་རྟེན་ཅིང་འབྲེལ་པར་འབྱུང་བའི་རྣམ་གཞག་ནམ་ཡང་བསླུ་བ་མེད་པ་སྟེ་མི་འཆོལ་བར་སྒྲ་ཇི་བཞིན་དུ་འབྱུང་བའི་དོན་ལ་གཏིང་ཚུགས་པའི་གོ་བ་དང་། དེ་རྙེད་པའི་ལས་འབྲས་སོགས་ཀུན་རྫོབ་ཀྱི་ཆོས་རྣམས་གདོད་མ་ནས་རང་བཞིན་གྱིས་གྲུབ་པ་ཅུང་ཟད་ཙམ་ཡང་མེད་པར་སྟོང་པ་ཉིད་ཀྱི་དོན་བདེན་པར་གྲུབ་པའི་རྟག་མཐའ་དང་ཐ་སྙད་དུ་འཇོག་མི་ནུས་པའི་ཆད་མཐའ་གཉིས་ཀྱི་མཐར་མ་ལྷུངས་པས་རང་གི་ངོ་བོས་གྲུབ་པའི་ཆོས་རྡུལ་ཙམ་ཡང་ཁས་ལེན་དང་བྲལ་བའི་དོན་ལ་ངེས་ཤེས་རྙེད་པའི་གོ་བ་གཉིས་པོ་དེ་ཆོས་ཅན། ཁྱོད་གཉིས་གཅིག་གྲོགས་སུ་གཅིག་མི་འགྲོ་བར་ཀུན་རྫོབ་ཀྱི་སྣང་བ་ལ་ངེས་པ་ཆེར་སོང་བ་ཙམ་གྱིས་སྟོང་ཕྱོགས་ལ་ཐེ་ཚོམ་ཞིང་ཅིག་ཤོས་ལ་ངེས་པ་རྙེད་པ་ཙམ་གྱིས་ལས་འབྲས་ཀྱི་རྣམ་གཞག་སོགས་དོར་ནས་དོན་གཉིས་པོ་ཇི་སྲིད་ཀྱི་བར་དུ་སོ་སོར་འཛིན་སྟངས་ཐ་དད་པས་གཅིག་གི་དུས་ཅིག་ཤོས་འགོག་པར་སྣང་བ་སྟེ་ཚ་གྲང་ལྟར་འགལ་བར་བཟུང་བ་དེ་སྲིད་དུ་སྔར་བཤད་པའི་དབུ་མའི་ལྟ་བ་རྣམ་དག་རྒྱུད་ལ་སྐྱེ་བའི་སྐབས་མེད་དེ། སྣང་སྟོང་ཟུང་དུ་འཇུག་པའི་གནད་འདི་ལ་ད་དུང་བར་དུ་ངེས་པ་མ་འདྲོངས་ན་བདུད་བཞིའི་དགྲ་ཚོགས་ཐུབ་པའི་ཀུན་མཁྱེན་བུ་རམ་ཤིང་པའི་མཐར་ཐུག་གི་དགོངས་པ་ཤིང་རྟ་ཆེན་པོ་ཀླུ་སྒྲུབ་ཡབ་སྲས་ཀྱིས་བཀྲལ་བའི་
ཐལ་འགྱུར་བའི་ལུགས་ཀྱི་ལྟ་བ་རྟོགས་པའི་དུས་མེད་པ་དེའི་ཕྱིར་རོ། །བཞི་པ་བསྒོམས་པ་ལ་བརྟེན་ནས་དཔྱད་པ་རྫོགས་ཚུལ་ནི། ཤེས་བྱ་ཆོས་ཅན། མགོན་པོ་ཀླུ་སྒྲུབ་གྱི་རྗེས་འབྲངས་རྣམས་ཀྱི་ནང་ནས་འཁྲུལ་པ་མེད་པའི་ལུགས་འཛིན་པ་དཔལ་ལྡན་ཟླ་བའི་ཞབས་ཀྱིས་བཀྲལ་བའི་ཟབ་མོ་རྟེན་ཅིང་འབྲེལ་བར་འབྱུང་བའི་དབུ་མའི་དོན་རང་རྒྱུད་ལ་ཐེ་ཚོམ་དང་བྲལ་ནས་ལྟ་བའི་དཔྱད་པ་ཐམས་ཅད་རྫོགས་པ་ལགས་པ་སྟེ་ཚུལ་བཞིན་རྒྱུད་ལ་སྐྱེས་པའི་ཚད་དམ་དུས་ངོས་གཟུང་དུ་ཡོད་དེ། སྔར་བཤད་པའི་ལྟ་བ་དེ་ཉིད་ཉམས་སུ་བླངས་ཚེ་སྟོང་ཕྱོགས་དང་སྣང་ཕྱོགས་གཉིས་རྒྱུད་ལ་གཅིག་གི་གོ་བ་རྙེད་ཚེ་ཅིག་ཤོས་ཀྱི་དོན་ཕྱིན་ཅི་ལོག་ཏུ་འགྲོ་བ་དུས་ནམ་ཞིག་གི་ཚེ་ན་རེ་མོས་སུ་འཇོག་པ་མེད་པར་ལས་འབྲས་ཀྱི་རྣམ་གཞག་སོགས་ཀུན་རྫོབ་ཀྱི་བྱ་བྱེད་མཐའ་དག་སྟོང་ཕྱོགས་ཀྱིས་དགག་མི་ནུས་པར་བསྙོན་མེད་དུ་ཉམས་སུ་མྱོང་བ་ཙམ་གྱིས་བཟང་ངན་མཐའ་དག་རྐྱེན་གྱིས་བསྒྱུར་ནུས་པ་དེ་ཡེ་ནས་རང་བཞིན་གྱིས་ཚུགས་ཐུབ་ཏུ་མ་གྲུབ་པར་སྒྱུ་མའི་རྟ་གླང་དང་རྨི་ལམ་གྱི་བྱ་བྱེད་བཞིན་སྣང་ཡང་རང་གི་ངོ་བོས་མ་གྲུབ་པའི་གནད་ཡིན་པས། དོན་དམ་པར་འཁོར་འདས་ཀྱིས་བསྡུས་པའི་ཆོས་ཅུང་ཟད་ཙམ་ཡང་མེད་པ་ལ་གཏིང་ནས་ཡིད་ཆེས་པས་གཞི་གང་གི་སྟེང་ནས་ཀྱང་སྣང་སྟོང་གཉིས་པོ་དེ་ཅིག་ཅར་དུ་འཆར་ཐུབ་པའི་རྟེན་འབྲེལ་གྱི་ཚུལ་མི་བསླུ་བར་གཏན་ཚིགས་རྣམ་དག་གི་རིག་པས་མཐོང་བ་ཙམ་ཉིད་ལ་བརྟེན་ནས་ངེས་ཤེས་ལྷང་གིས་སྐྱེས་པ་དེའི་ཚེ། ཆོས་རྣམས་ཀྱི་ཡུལ་རང་བཞིན་གྱིས་གྲུབ་པར་འཛིན་པའི་བདེན་འཛིན་གྱི་བློའི་འཛིན་སྟངས་ཀུན་ལྷག་མ་ལུས་པར་འཇིག་ཐུབ་པའི་གདེང་ཚད་རྙེད་པ་ན་སྟེ་དེའི་ཚེའམ་དེའི་དུས་ང་ཡིན་པའི་
ཕྱིར་རོ། །གཉིས་པ་སྤྱི་དོན་ནི། སློབ་དཔོན་ཟླ་བ་གྲགས་པའི་ཞལ་སྔ་ནས། ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། དེ་གཉིས་རྣམ་དབྱེ་གང་གིས་མི་ཤེས་པ། །དེ་ནི་རྣམ་རྟོག་ལོག་པའི་ལམ་ངན་ཞུགས། །ཞེས་གཞིའི་ལྟ་བ་ཀུན་རྫོབ་བདེན་པ་སྣང་བའི་ཆོས་རྣམས་ཐ་སྙད་དུ་གྲུབ་ཅིང་རྒྱུ་འབྲས་མི་བསླུ་བའི་རྟེན་ཅིང་འབྲེལ་འབྱུང་དང་དོན་དམ་བདེན་པ་ཆོས་ཐམས་ཅད་རང་གི་ངོ་བོས་སྟོངས་པའི་ཆོས་དང་གང་ཟག་གི་བདག་མེད་གཉིས་ཕྱིན་ཅི་མ་ལོག་པར་ཤེས་ན་སྦྱིན་སོགས་ཀྱི་སྤྱོད་པ་དང་སྟོང་ཉིད་ཀྱི་ལྟ་བ་ཟུང་དུ་འབྲེལ་པ་ལ་བརྟེན་ནས་ཆོས་གཟུགས་ཀྱི་སྐུ་གཉིས་ཐོབ་པར་འགྱུར་བས་སངས་རྒྱས་ཐོབ་པའི་རྒྱུ་ཐུན་མོང་མ་ཡིན་པ་བྱང་ཆུབ་ཀྱི་སེམས་ཡིན་ཀྱང་བུ་སྐྱེ་བ་ལ་ཕ་གཅིག་པུས་མི་འོང་བར་ཕ་མ་གཉིས་ཀ་ཚོགས་དགོས་པ་བཞིན་ཐེག་པ་གསུམ་གའི་ཐུན་མོང་གི་རྒྱུ་སྟོང་ཉིད་རྟོགས་པའི་ཤེས་རབ་དང་ཟུང་དུ་འབྲེལ་དགོས་པའི་ཕྱིར་ན་དྲངས་མ་ཐག་པའི་ལུང་གི་ཤུགས་བསྟན་ལས། དེ་གཉིས་རྣམ་དབྱེ་གང་གིས་ལེགས་ཤེས་པ། །དེ་ནི་ཕྱིན་ཅི་མ་ལོག་ལམ་བཟང་ཞུགས། །ཞེས་འབྱུང་ལ།བཞི་བརྒྱ་པ་ལས། བསོད་ནམས་ཆུང་ངུས་ཆོས་འདི་ལ། །ཐེ་ཚོམ་ཙམ་ཡང་ཟ་མི་འགྱུར། །ཐེ་ཚོམ་ཟོས་པ་ཙམ་གྱིས་ཀྱང་། །སྲིད་པ་ཧྲུལ་པོར་བྱེད་པར་འགྱུར། །ཞེས་ཟབ་མོ་རྟེན་ཅིང་འབྲེལ་བར་འབྱུང་བ་འདི་ཉིད་མངོན་སུམ་དུ་རྟོགས་ན་ལྟ་ཅི་སྨོས། ཆོས་ཐམས་ཅད་བདེན་པར་གྲུབ་བམ་མ་གྲུབ། ཕལ་ཆེར་མ་གྲུབ་སྙམ་པའི་རྟོག་པ་ཙམ་གྱིས་ཀྱང་སྲིད་པ་འཁོར་བའི་སྡུག་བསྔལ་ཧྲུལ་པོར་བྱེད་ནུས་སོ། །ཅིའི་ཕྱིར་ཞེ་ན། ཕ་རོལ་ཏུ་ཕྱིན་པ་གཞན་དག་ལ་རྒྱ་ཆེར་བསླབས་ཀྱང་ཆོས་རབ་ཏུ་
འབྱེད་པའི་ཤེས་རབ་ཀྱིས་བདེན་འཛིན་གྱི་ཞེན་ཡུལ་སུན་མ་ཕྱུངས་ན་གཞན་དག་གིས་བདག་མེད་རྟོགས་མི་ནུས་པའི་ཕྱིར། དཔེ་འགྲེལ་ལས། སྐྱེས་བུ་མིག་ཅན་ཞེས་པ་ནི། དཔེར་ན་སྐྱེས་བུ་མིག་དང་ལྡན་པ་ཞིག་གིས་ལམ་སྣ་དྲངས་ན་དམུས་ལོང་བརྒྱ་ཕྲག་དུ་མས་ཀྱང་གྲོང་ཁྱེར་ལ་སོགས་པ་གང་འདོད་དུ་འགྲོ་ནུས་པ་ཡིན། དཔེ་དེ་བཞིན་དུ་ཤེས་རབ་སྟོང་པ་ཉིད་ཀྱི་དོན་རྟོགས་ནས་ཉམས་སུ་བླངས་ན་ཕ་རོལ་ཏུ་ཕྱིན་པ་ལྔ་ཡིས་ཀྱང་ཕ་རོལ་ཏུ་ཕྱིན་པའི་མིང་ཐོབ་ཅིང་ཐམས་ཅད་མཁྱེན་པའི་ས་ལ་འགྲོ་བར་ནུས་ཏེ། ཕ་རོལ་ཕྱིན་པ་ལྔ་ཡི་ཡོན་ཏན་ཇི་སྙེད་པ། །དེ་དག་ཀུན་ཀྱང་ཤེས་རབ་ཕ་རོལ་ཕྱིན་ལ་བརྟེན། །ཞེས་པ་དང་། སྦྱིན་པ་སྦྱིན་པའི་སྔོན་དུ་འགྲོ་བ་ཤེས་རབ་སྟེ། །ཚུལ་ཁྲིམས་བཟོད་པས་བརྩོན་འགྲུས་བསམ་གཏན་དེ་བཞིན་ནོ། །ཞེས་དང་། ཟས་ལ་ལྕེ་ཞེས་པ་ནི། དཔེར་ན་ཟས་ལ་ལྕེས་རེག་པ་ཙམ་གྱིས་ཟས་ཀྱི་རོ་ཐམས་ཅད་མོད་ལ་ཚོར་ནས་ཡོང་ལ། གཟར་བུ་དེ་ཟས་ཀྱི་གསེབ་ཏུ་བཅུག་ཀྱང་རོ་མི་ཚོར། དེ་བཞིན་དུ་སྐྱེས་བུ་ཤེས་རབ་ལྡན་པས་ཆོས་ཐམས་ཅད་ཀྱི་དོན་ཚེགས་མེད་དུ་ལོན་ནས་ཡོང་། ཤེས་རབ་མེད་ན་ཆོས་དང་རྟག་ཏུ་འགྲོགས་ཀྱང་ཆོས་ཀྱི་དོན་མི་ལོངས་གསུང་། དེས་ན་ཤེས་རབ་གལ་ཆེ་བས་ཤེས་རབ་འཕེལ་བའི་རྒྱུ་ལ་འབད་དགོས། ཤེས་རབ་འཕེལ་བའི་རྒྱུའི་གཙོ་བོ་ཐོས་བསམ་སྒོམ་གསུམ་རང་ཡིན་པས། ཐོས་བསམ་སྒོམ་གསུམ་ལ་ནན་ཏན་བྱེད་དགོས། གཞན་གང་ཟག་ཤེས་རབ་ཅན་དང་ཆོས་ཀྱི་བླ་བོ་དང་བཀའ་བསྟན་བཅོས་ཀུན་ལ་ལྟ་རྟོག་མང་དུ་བྱས་ན་ཤེས་རབ་ཇེ་ཆེ་ལ་འགྲོ། གཞན་ཡང་ཁབ་དང་སྐུད་པའི་སྦྱིན་པ་དང་། ཤོག་བུ་དང་།སྣག་ཚ་དང་། སྨྱུ་གུའི་སྦྱིན་པ་བཏང་ན་མ་འོངས་པ་ན་ཤེས་
རབ་ཆེ་བའི་རྒྱུ་རུ་འགྲོ་སྟེ། ཤཱ་རིའི་བུས་སྔོན་ཚེམ་བུ་བ་ཞིག་ལ་ཁབ་ཅིག་དང་སྐུད་པ་ཕུལ་བས་འཛམ་བུ་གླིང་ན་ཤེས་རབ་ཆེ་བ་ཞིག་བྱུང་གསུང་། བདུད་རྩི་ཞེས་པ་ནི། དཔེར་ན་དུག་བུམ་པ་གང་གི་ནང་དུ་བདུད་རྩི་ཐིགས་པ་གཅིག་བླུགས་ན་དུག་དེ་ཐམས་ཅད་ཀྱང་སྨན་དུ་འགྱུར་རོ། །དཔེ་དེ་བཞིན་དུ་འོ་སྐོལ་གྱི་བདག་ཏུ་འཛིན་པ་དུག་བུམ་པ་གང་དང་འདྲ་བ་དེའི་གཉེན་པོར་བདག་མེད་བདུད་རྩི་ལྟ་བུ་དེ་རྟོག་ཅིང་བསྒོམས་ན་ཉོན་མོངས་པ་ཐམས་ཅད་ཀྱང་ཡེ་ཤེས་ཀྱི་བདུད་རྩིར་འགྱུར། ཞེས་གསུངས་ལ། དེའང་འཁོར་འདས་ཀྱི་ཆོས་ཐམས་ཅད་རང་བཞིན་གྱིས་མ་གྲུབ་པ་ལ་བཅིངས་གྲོལ་སོགས་ཐ་སྙད་ཀྱི་བྱ་བྱེད་ཐམས་ཅད་བསྙོན་མེད་དུ་འཇོག་ནུས་པའི་རྣམ་གཞག་འདི་རང་སྡེ་དངོས་པོར་སྨྲ་བའི་མཁས་པ་རྣམས་ཀྱིས་ཐུགས་སུ་མ་ཆུད་པས། རྩ་ཤེ་ལས། གལ་ཏེ་འདི་དག་ཀུན་སྟོང་ན། །འབྱུང་བ་མེད་ཅིང་འཇིག་པ་མེད། །འཕགས་པའི་བདེན་པ་བཞི་པོ་རྣམས། ཁྱོད་ལ་མེད་པར་ཐལ་བར་འགྱུར། །ཞེས་དང་། རྩོད་ཟློག་ཏུ། གལ་ཏེ་དངོས་པོ་ཐམས་ཅད་ཀྱི། །རང་བཞིན་ཀུན་ལ་ཡོད་མིན་ན། ཁྱོད་ཀྱི་ཚིག་ཀྱང་རང་བཞིན་མེད། །རང་བཞིན་བཟློག་པར་མི་ནུས་སོ། །ཞེས་རང་བཞིན་གྱིས་མ་གྲུབ་ན་བདེན་པ་བཞི་སོགས་ཀྱི་རྣམ་གཞག་ཀྱང་གཏན་མེད་དུ་སོང་ནས་འཇོག་མི་ནུས་ཤིང་། ཚིག་ལ་རང་བཞིན་མེད་ན་རང་བཞིན་འགོག་པ་དང་རང་བཞིན་མེད་པ་བསྒྲུབ་པར་མི་ནུས་སོ། །ཞེས་རྒོལ་བ་ལ་ཆོས་ཐམས་ཅད་རང་བཞིན་གྱིས་མ་གྲུབ་པས་དོན་དམ་པར་རྡུལ་ཙམ་ཡང་མ་རྙེད་པ་ལ་བསྐྱེད་བྱ་སྐྱེད་བྱེད་དང་དགག་བསྒྲུབ་སོགས་འཁོར་འདས་ཀྱི་བྱ་བྱེད་ཐམས་ཅད་འཇིག་རྟེན་གྱི་ཐ་སྙད་དང་མཐུན་པར་འཇོག་ནུས་པ་དབུ་ལ
མ་ཐལ་འགྱུར་བའི་ཐུན་མོང་མ་ཡིན་པའི་ལུགས་ཡིན་ནོ་ཞེས་པ་སྟེ། རྩ་ཤེའི་རབ་བྱེད་ཉེར་བཞི་པ་ལས། སྐྱོན་དུ་ཐལ་བར་འགྱུར་བ་ནི། །སྟོང་ལ་འཐད་པ་མ་ཡིན་པས། ཁྱོད་ནི་སྟོང་ཉིད་སྤོང་བྱེད་པ། །གང་དེ་ང་ལ་མི་འཐད་དོ། །གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །གང་ལ་སྟོང་ཉིད་མི་རུང་བ། །དེ་ལ་ཐམས་ཅད་མི་རུང་འགྱུར། །ཞེས་དང་། ཚིག་གསལ་ལས། ཁོ་བོ་ཅག་གི་ཕྱོགས་ལ་ནི་ཇི་སྐད་སྨྲས་པའི་སྐྱོན་དུ་ཐལ་བ་མི་འཇུག་པ་འབའ་ཞིག་ཏུ་མ་ཟད་ཀྱི་འོན་ཀྱང་བདེན་པ་ལ་སོགས་པ་རྣམ་པར་བཞག་པ་ཐམས་ཅད་ཆེས་ཤིན་ཏུ་འཐད་པ་ཡིན་ནོ། །ཞེས་བསྟན་པའི་ཕྱིར་གསུངས་པ། གང་ལ་སྟོང་པ་ཉིད་རུང་བ། །ཞེས་སོགས་ཀྱི་གཞུང་བཀོད་ནས་བཤད་པ་མཛད་དོ། །ཞེས་པའི་དོན་བཤད་མ་ཐག་པའི་སྐྱོན་ངེད་ཅག་དབུ་མ་པ་ལ་མི་འབྱུང་བར་མ་ཟད་ཆོས་རྣམས་རང་བཞིན་མེད་པའི་ཕྱོགས་ལ་ཀུན་རྫོབ་ཀྱི་རྣམ་གཞག་ཐམས་ཅད་རུང་ལ། ཅིག་ཤོས་ལ་རང་བཞིན་གྱིས་གྲུབ་ཕྱིན་དེ་ལ་རྐྱེན་གྱིས་བསྒྱུར་དུ་མི་རུང་བའི་ཕྱིར། སྐྱེ་འཇིག་སོགས་གློ་བུར་དུ་བཅོས་སུ་མེད་དོ་ཞེས་ལན་བཏབ་པའི་ཕྱིར། དེ་ཡང་འཁོར་བ་ལས་གྲོལ་བའི་ཐབས་ཀྱི་གཙོ་བོ་བདག་མེད་གཉིས་རྟོགས་པའི་ཤེས་རབ་ཀྱི་ནང་ནས་ཀྱང་གང་ཟག་གི་བདག་མེད་གཙོ་བོར་གསུངས་པའི་ཕྱིར། ལྷག་མཐོང་ཆེན་མོ་ལས། དེ་ཁོ་ན་ཉིད་ལ་ཇི་ལྟར་འཇུག་པའི་རིམ་པ་ནི་དང་པོར་འཁོར་བའི་ཉེས་སྐྱོན་བསམས་ནས་ཡིད་སུན་ཏེ་དེ་ལ་འདོར་འདོད་སྐྱེས་པ་ཞིག་དགོས། དེ་ནས་དེ་རྒྱུ་མ་ལོག་ན་མི་ལྡོག་པར་མཐོང་ནས་འཁོར་བའི་རྩ་བ་གང་ཡིན་སྙམ་སྟེ་དེའི་རྩ་བ་རྩད་བཅད་པས་འཇིག་ལྟའམ་མ་རིག་པ་འཁོར་བའི་རྩ་བར་འགྲོ་ལུགས་ལ་ངེས་པ་གཏིང་ཐག་པ་ནས་འདྲོངས་ནས་དེ་སྤོང་བར་འདོད་
པ་བཅོས་མ་མ་ཡིན་པ་སྐྱེས་པ་ཞིག་དགོས། དེ་ནས་འཇིག་ལྟ་ལྡོག་པ་དེ་ངོས་བཟུང་བའི་བདག་མེད་པར་རྟོགས་པའི་ཤེས་རབ་སྐྱེ་བ་ལ་རག་ལས་པར་མཐོང་ནས་བདག་དེ་དགག་དགོས་པར་མཐོང་སྟེ། བདག་དེ་ཡོད་པ་ལ་གནོད་བྱེད་དང་མེད་པའི་སྒྲུབ་བྱེད་ཀྱི་ལུང་དང་རིག་པ་ལ་བརྟེན་ནས་ངེས་པ་རྙེད་པ་ཞིག་ཐར་པ་དོན་དུ་གཉེར་ན་མེད་པའི་ཐབས་མེད་དོ། དེ་ལྟར་བདག་དང་བདག་གི་བ་ལ་རང་བཞིན་ཅུང་ཟད་ཀྱང་མེད་པར་ངེས་པའི་ལྟ་བ་རྙེད་ནས་དེའི་དོན་གོམས་པར་བྱས་པས་ཆོས་ཀྱི་སྐུ་འཐོབ་པར་འགྱུར་བ་ཡིན་ནོ། །དེ་ཡང་ཚིག་གསལ་ལས། གལ་ཏེ་ཉོན་མོངས་པ་རྣམས་དང་ལས་དང་ལུས་རྣམས་དང་བྱེད་པ་པོ་དང་འབྲས་བུ་རྣམས་ཏེ། འདི་དག་ཐམས་ཅད་དེ་ཁོ་ན་ཉིད་མ་ཡིན་གྱི་འོན་ཀྱང་དྲི་ཟའི་གྲོང་ཁྱེར་ལ་སོགས་པ་ལྟར་དེ་ཁོ་ན་འདི་མ་ཡིན་བཞིན་དུ་བྱིས་པ་རྣམས་ལ་དེ་ཁོ་ན་ཉིད་ཀྱི་རྣམ་པར་སྣང་བ་ཡིན་ན། ཡང་འདིར་དེ་ཁོ་ན་ཉིད་ནི་གང་ཞིག་ཡིན་ལ་དེ་ཁོ་ན་ཉིད་ལ་འཇུག་པ་ཡང་ཇི་ལྟར་ཡིན་ཞེ་ན། བརྗོད་པར་བྱ་སྟེ་ནང་དང་ཕྱིའི་དངོས་པོ་མ་དམིགས་པས་ནང་དང་ཕྱི་ལ་བདག་ཏུ་འཛིན་པ་དང་བདག་གིར་འཛིན་པ་རྣམ་པ་ཐམས་ཅད་དུ་ཟད་པ་འདི་ནི་འདིར་དེ་ཁོ་ན་ཉིད་དོ། །དེ་ཁོ་ན་ཉིད་ལ་འཇུག་པ་ནི། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བར་བློ་ཡིས་མཐོང་གྱུར་ཅིང་། །བདག་ནི་འདི་ཡི་ཡུལ་དུ་རྟོགས་བྱས་ནས། རྣལ་འབྱོར་པ་ཡིས་བདག་ནི་འགོག་པར་བྱེད། །ཅེས་བྱ་བ་ལ་སོགས་པས་དབུ་མ་ལ་འཇུག་པ་ལས་བཙལ་བར་བྱའོ། །ཞེས་པ་དང་། འདིར་རྣལ་འབྱོར་པ་དེ་ཁོ་ན་ཉིད་ལ་འཇུག་པར་འདོད་ཅིང་ཉོན་མོངས་པ་དང་སྐྱོན་མ་ལུས་པ་རབ་ཏུ་སྤོང་བར་འདོད་པ་ནི་འཁོར་བ་འདི་
ཅིའི་རྩ་བ་ཅན་ཡིན་ཅེས་དེ་ལྟར་ཉེ་བར་རྟོག་པར་བྱེད་ལ། དེ་དེ་ལྟར་ཉེ་བར་རྟོག་པ་ན་འཁོར་བ་འཇིག་ཚོགས་ལ་ལྟ་བའི་རྩ་བ་ཅན་ཉིད་དུ་མཐོང་ཞིང་བདག་ནི་འཇིག་ཚོགས་ལ་ལྟ་བ་དེའི་དམིགས་པ་ཡིན་པར་མཐོང་ལ་བདག་ལ་དམིགས་པས་འཇིག་ཚོགས་ལ་ལྟ་བ་སྤོང་ཞིང་། དེ་སྤངས་པས་ཉོན་མོངས་པ་དང་སྐྱོན་མ་ལུས་པ་ལྡོག་པར་མཐོང་བས་གང་ཞིག་བདག་ཏུ་འཛིན་པའི་ཡུལ་བདག་ཅེས་བྱ་བ་འདི་ཅི་ཞིག་ཅེས་ཆེས་ཐོག་མར་བདག་ཁོ་ན་ལ་ཉེ་བར་རྟོགས་པར་བྱེད་དོ། །ཞེས་གསུངས་སོ། །ཞེས་ཚིག་གསལ་གྱི་ཁུངས་དང་བཅས་རྒྱས་པར་གསུངས་ལ། དེའང་བདག་དང་བདག་གི་བ་ལ་རང་བཞིན་མེད་པར་གཏན་ལ་ཕབ་པ་ཙམ་གྱིས་ཆོས་ཀྱི་བདག་འཛིན་གྱི་ཞེན་ཡུལ་སུན་ཕྱུང་མི་ནུས་པས་དེ་ཁོ་ན་ཉིད་ལ་འཇུག་པའི་ལམ་དུ་མི་རིགས་སྙམ་ན། བཤད་མ་ཐག་པས་ཉོན་མོངས་པ་སླར་སྐྱེ་མི་རུང་གི་ཆོས་ཅན་དུ་བྱས་པ་ཙམ་ཉན་རང་ལའང་ཡོད་ཀྱང་བདག་རང་བཞིན་མེད་པར་རྟོགས་པའི་གནད་ཀྱིས་གཟུགས་ནས་རྣམ་མཁྱེན་གྱི་བར་གྱི་ཕུང་པོ་ལྔ་ལ་སོགས་པའི་ཆོས་ཐམས་ཅད་ལ་ཡང་རང་བཞིན་ཡོད་པར་འཛིན་པ་དཔེར་ན་ཤིང་རྟ་ཚིག་ན་འཁོར་ལོ་ལ་སོགས་པ་དེའི་ཡན་ལག་ཐམས་ཅད་ལྷག་མ་མ་ལུས་པ་ཚིག་པ་ལྟ་བུ་སྟེ། ཚིག་གསལ་ལས། ཇི་ལྟར་ཤིང་རྟ་ཚིག་ན་དེའི་ཡན་ལག་དག་ཀྱང་ཚིག་པས་མ་དམིགས་པ་དེ་བཞིན་དུ་རྣལ་འབྱོར་པ་དག་གིས་གང་གི་ཚེ་བདག་མེད་པར་རྟོགས་པ་དེ་ཉིད་ཀྱི་ཚེ་ཕུང་པོའི་དངོས་པོ་བདག་གི་བ་ཡང་བདག་མེད་པར་རྟོགས་པར་འགྱུར་རོ། །ཞེས་དང་། སློབ་དཔོན་སངས་རྒྱས་བསྐྱངས་ཀྱིས། འདི་ལྟར་བདག་ཅེས་བྱ་བ་གང་ཡིན་པ་དེ་བདག་གི་ཞེས་བྱ་བ་ན་བདག་དེ་ཡང་མེད་དེ་དེ་མེད་ན་དེའི་འདི་ཡིན་ནོ། །ཞེས་
པའི་དོན་མོ་གཤམ་གྱི་བུ་མི་སྲིད་ན་བུ་དེའི་མིག་རྣ་ལ་སོགས་པ་མེད་པ་ཤུགས་ལ་ཁེགས་པ་ལྟར་གཞི་གང་ཟག་གི་བདག་མེད་པར་དེའི་ཁྱད་ཆོས་ཕུང་པོ་ལྔ་སོགས་མེད་པར་རྟོགས་ནུས་པས་སོ། །བདག་མེད་ཀྱི་དོན་ཇི་ལྟར་བསྒོམ་ན། ཇི་སྐད་དུ། མཉམ་གཞག་ནམ་མཁའ་ལྟ་བུའི་སྟོང་ཉིད་དང་། །རྗེས་ཐོབ་སྒྱུ་མ་ལྟ་བུའི་སྟོང་པ་གཉིས། །བསྒོམས་ནས་ཐབས་ཤེས་ཟུང་དུ་འབྲེལ་བ་ཡིས། །རྒྱལ་སྲས་སྤྱོད་པའི་ཕ་རོལ་འགྲོ་བ་བསྔགས། །ཞེས་མཉམ་གཞག་དང་རྗེས་ཐོབ་གཉིས་སུ་ཡོད་པ་ནི། དཔེ་འགྲེལ་ལས། ནམ་མཁའི་དཀྱིལ་ལྟར་ཞེས་པ་ནི། དཔེར་ན་ནམ་མཁའ་རྣམ་པར་དག་པའི་དཀྱིལ་དེ་ངོས་གཟུང་ཐམས་ཅད་དང་བྲལ་བ་ལྟར་ཕུང་པོ་ཁམས་སྐྱེ་མཆེད་དང་གཟུང་བ་དང་འཛིན་པས་བསྡུས་པའི་ཆོས་ཐམས་ཅད་ལ་ཐོས་བསམ་གྱིས་གཏན་ལ་ཕབ་ཅིང་གཞིགས་པས་དངོས་པོ་ཅི་ཡང་མ་རྙེད་དེ། ཤེས་བྱ་ཤེས་བྱེད་གཉིས་ཀ་རང་བཞིན་མེད་པ་ནམ་མཁའི་དཀྱིལ་ལྟར་སོང་བ་དེའི་ངང་ལ་མཉམ་པར་བཞག་སྟེ་གོམས་པར་བྱའོ། །ཡུམ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་འདི་ནི་ནམ་མཁའ་བསྒོམ་པ་སྟེ། ནམ་མཁའ་ལ་ནི་གཟུགས་མ་མཆིས། ཚོར་བ་མ་མཆིས། ཞེས་པ་ནས། སངས་རྒྱས་ཀྱི་བར་དུ་མ་མཆིས་སོ། །ཞེས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འདོད་པས་ཆོས་ཐམས་ཅད་ལ་མི་དམིགས་པའི་ཚུལ་གྱིས་བསླབ་པར་བྱའོ། །དེ་ཡང་ཡོད་པར་བཀག་པའི་མེད་པ་ཞིག་ལོགས་སུ་བསྒོམ་པ་ནི་མ་ཡིན་ཏེ། འཕགས་པས་ཀྱང་། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་ཅུང་
ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ནས་རྣམ་པར་གྲོལ། །ཞེས་སྣང་བའམ་རྣམ་རྟོག་ངན་པ་ཞིག་ཕར་ལོགས་སུ་བསལ་དུ་མེད། ཡེ་ཤེས་བཟང་པོ་ཞིག་ཚུར་ལོགས་སུ་གཞག་ཏུ་མེད་དེ། ཆོས་རྣམས་ཀྱི་གནས་ལུགས་ཡེ་ནས་ཡོད་མེད་བདེན་རྫུན་རྟག་ཆད་ཀྱི་མཐའ་ལས་འདས་པའི་དོན་ལ། ལྟ་རུ་མེད་པའི་ཚུལ་གྱིས་ལྟ། བསྒོམ་དུ་མེད་པའི་ཚུལ་གྱིས་བསྒོམ་པ་ནི། ཡང་དག་ཉིད་ལ་ཡང་དག་ལྟ། །ཞེས་བྱ། དེ་ཉིད་མངོན་དུ་གྱུར་ཙ་ན་ང་བདག་ཉོན་མོངས་པའི་གཟུང་འཛིན་ཐམས་ཅད་རང་གྲོལ་དུ་འགྲོ་བས་ན། ཡང་དག་མཐོང་ནས་རྣམ་པར་གྲོལ། །ཞེས་སོ། །སྒྱུ་མ་མཁན་ཞེས་པ་ནི། དཔེར་ན་སྒྱུ་མ་མཁན་གྱིས་སྒྱུ་མའི་སྐྱེས་པ་བུད་མེད་རྟ་དང་གླང་པོ་ལ་སོགས་པ་སྤྲུལ་པའི་ཚེ་སྒྱུ་མ་མཁན་པོ་ལ་སྣང་བ་ཡོད་ཀྱང་ཞེན་པ་མེད་དེ། བྱེད་མཁན་ཁོ་རང་ཡིན་པ་ལྟར། དཔེ་དེ་བཞིན་དུ་འོ་སྐོལ་གྱི་མཉམ་གཞག་ལ་ཆོས་ཐམས་ཅད་སྟོང་པ་བདག་མེད་ནམ་མཁའི་དཀྱིལ་ལྟར་བསྒོམས་པའི་རྗེས་ཐོབ་ལ། རང་སེམས་འཁྲུལ་པའི་རྣམ་རྟོག་གིས་བྱས་པས་ཇི་ལྟར་སྣང་བའི་ཆོས་ཐམས་ཅད་རྨི་ལམ་སྒྱུ་མ་ལྟ་བུ་ལ་ཞེན་འཛིན་མེད་པ་སྒྱུ་མ་མཁན་པོ་ལྟ་བུར་ཤེས་པར་དཔྱད་པར་བྱ་སྟེ། སྲིད་གསུམ་སྐྲ་ཤད་འཛིངས་པ་འདྲ། །སྨིག་རྒྱུའི་ཆུ་ལྟར་ནོར་བ་སྟེ། །རྨི་ལམ་སྒྱུ་མ་ལྟ་བུ་རུ། །བསྒོམས་ན་རྣམ་པར་གྲོལ་བར་འགྱུར། །ཞེས་དང་། རྨི་ལམ་ལྟ་བུའི་ཆོས་རྣམས་ལ། །རྨི་ལམ་ལྟ་བུར་བསྒོམས་བྱས་ན། །རྨི་ལམ་ལྟ་བུར་འཚང་ཡང་རྒྱ། །སྒྱུ་མ་དང་ནམ་མཁའ་ལའང་སྦྱར་རོ། །དེས་ན་མཉམ་གཞག་གི་ཆོས་ཐམས་ཅད་ནམ་མཁའི་དཀྱིལ་ལྟར་ཅིའང་མི་རྟོག་པའི་ཚུལ་གྱིས་བསྒོམ་ཞིང་རྗེས་སུ་སྣང་བའི་ཆོས་ཐམས་ཅད་རྨི་ལམ་སྒྱུ་མ་ལྟ་བུར་ཤེས་པར་
དཔྱད་པར་བྱའོ། །ཞེས་རྒྱ་ཆེར་གསུངས་པས་མཚོན་ནུས་སོ། །དེ་ཡང་། ཟླ་བ་གྲགས་པས། སློབ་དཔོན་ཀླུ་སྒྲུབ་ཞབས་ཀྱི་ལམ་ལས་ནི། །ཕྱི་རོལ་གྱུར་ལ་ཞི་བའི་ཐབས་མེད་དེ། །དེ་དག་ཀུན་རྫོབ་དེ་ཉིད་བདེན་ལས་ཉམས། །དེ་ལས་ཉམས་པས་ཐར་པ་འགྲུབ་ཡོད་མིན། །ཞེས་བདེན་པ་གཉིས་ཀྱི་རྣམ་པར་འཇོག་ཚུལ་འཁྲུལ་མེད་དུ་མ་ཤེས་ན་ཐར་པ་ཐོབ་པའི་སྐབས་ནམ་ཡང་མེད་ལ། ཚུལ་དེ་འཁྲུལ་མེད་དུ་ཤེས་པ་སློབ་དཔོན་ཀླུ་སྒྲུབ་ཀྱི་བཞེད་པ་མཐར་ཐུག་པ་ཐལ་འགྱུར་བའི་ལུགས་ལས་ཕྱི་རོལ་ཏུ་མ་གྱུར་པ་ཞིག་དགོས་པས་ཕྱོགས་འདི་ལ་བློའི་མཐུ་ཅི་ནུས་ཀྱིས་འབད་པར་རིགས་པ་ཡིན་ནོ། །དེའང་རི་བོང་ཅལ་སྒྲོག་དང་ལུག་ཆུར་འབབ་ཀྱི་རྨོངས་པ་རྣམས་ལ་ཆེས་ཆེར་གྲགས་པའི་ཕྱག་རྒྱ་པའི་ལུགས་ལ་ནམ་ཡང་འགྲམ་ཆུ་ལྡང་བར་རིགས་པ་མ་ཡིན་ཏེ། ཕྱག་རྒྱ་ཆེན་པོ་དངོས་དེ། འཇམ་དབྱངས་ས་སྐྱ་པཎྜི་ཏས། ངེད་ཀྱི་ཕྱག་རྒྱ་ཆེན་པོ་ནི། །དབང་ལས་བྱུང་བའི་ཡེ་ཤེས་དང་། །རིམ་པ་གཉིས་ཀྱི་ཏིང་འཛིན་ལས། །བྱུང་བའི་རང་བྱུང་ཡེ་ཤེས་ཡིན། །འདི་ཡི་རྟོགས་པ་གསང་སྔགས་ཀྱི། །ཐབས་ལ་མཁས་ན་ཚེ་འདིར་འགྲུབ། །དེ་ལས་གཞན་དུ་ཕྱག་རྒྱ་ཆེ། །རྟོགས་པ་སངས་རྒྱས་ཀྱིས་མ་གསུངས། །དེས་ན་ཕྱག་རྒྱ་ཆེན་པོ་ལ། །མོས་ན་གསང་སྔགས་གཞུང་བཞིན་བསྒྲུབ། །ཅེས་གསུངས་པ་ལྟར། སྔགས་ལུགས་ཀྱི་ཕྱག་རྒྱ་ཆེན་པོ་ནི་དབང་དང་རིམ་པ་གཉིས་ལས་བྱུང་བའི་མ་བཅོས་པའི་ལྷུན་གྲུབ་རང་བྱུང་གི་ཡེ་ཤེས་ཞེས་བྱ་བ། སམྦུ་ཊི་ལས། དེ་ཕྱིར་ཡེ་ཤེས་བསྐྱེད་པཡི། །ཕྱག་རྒྱ་བཞི་ནི་སྦྱར་བར་བྱའོ། །ཞེས་ཕྱི་རོལ་གྱི་ཕྱག་རྒྱ་མཚན་ཉིད་དང་ལྡན་པ་ནི་ལས་ཀྱི་ཕྱག་རྒྱ། དེ་ལ་བརྟེན་ནས་ཨ་ཝ་དྷཱུ་ཏཱི་སྟོང་པ་
ཉིད་དང་རོ་གཅིག་པའི་ལྷན་ཅིག་སྐྱེས་པའི་དགའ་བ་ནི་དམ་ཚིག་གི་ཕྱག་རྒྱ། དེའི་རང་བཞིན་ཆོས་ཀྱི་དབྱིངས་ནི་ཆོས་ཀྱི་ཕྱག་རྒྱ། དེ་དག་གི་འབྲས་བུ་རང་བྱུང་གི་ཡེ་ཤེས་ནི་ཕྱག་རྒྱ་ཆེན་པོ་ཡིན་པར་གསང་སྔགས་ཀྱི་རྒྱུད་ནས་ཇི་སྐད་གསུངས་པ་བཞིན་ཡིན་ལ། དེ་སྒྲུབ་པའི་དུས་མྱུར་བུ་ལ་ཡང་སྔར་བཤད་པའི་ཐབས་ལ་མཁས་ན་ཚེ་འདིར་འགྲུབ་ཅིང་། སྣང་བ་ཅི་ཤར་མ་འགགས་པ་ལ་མ་བཅོས་ཕྱག་རྒྱ་ཆེན་པོ་ཡིན་ཟེར་བ། འཁྲུལ་ལུགས་ཕྱག་རྒྱ་ཆེན་པོ། གནས་ལུགས་ཕྱག་རྒྱ་ཆེན་པོ། རྣམ་རྟོག་ཆོས་སྐུ་ཕྱག་རྒྱ་ཆེན་པོ། ཕྱག་དང་རྒྱ་དང་ཆེན་པོ་གསུམ་ལ་ཡི་གེ་ཐ་དད་པའི་གོ་དོན་བྱེད་པས་མཚོན་ལོག་བཤད་སོགས། དེ་འདྲ་བའི་ཐབས་གཞན་ཡོད་པར་སངས་རྒྱས་ཀྱིས་མ་གསུངས་པས་ཚེ་གཅིག་ལ་སངས་རྒྱས་བསྒྲུབ་པའི་ལམ་ཕྱག་རྒྱ་ཆེན་པོ་ལ་མོས་ན་གསང་སྔགས་ཀྱི་གཞུང་བཞིན་བསྒྲུབ་པར་གསུངས་པས་སོ། །གསང་སྔགས་མ་ཡིན་པའི་ཕྱག་རྒྱ་ཆེན་པོར་མིང་བཏགས་པ་ནི་རྣམ་པར་རྟོག་པ་ཕྱི་རོལ་གྱི་ཡུལ་ལ་མི་འཕྲོ་བར་ནང་དུ་བསྡུས་པའི་རྟོག་པ་ཁ་ཚོམ་གྱི་སེམས་གནས་ལྟེམ་པོ་ཙམ་དང་བསྲེས་པའི་སྟོང་རྐྱང་ཧད་པོ་ཆད་མཐར་ལྷུང་བའི་སྒོམ་དེ་ནི། སྡོམ་གསུམ་ལས། ད་ལྟའི་ཕྱག་རྒྱ་ཆེན་པོ་དང་། །རྒྱ་ནག་ལུགས་ཀྱི་རྫོགས་ཆེན་ལ། །ཡས་འབབ་དང་ནི་མས་འཛེག་གཉིས། །རིམ་གྱིས་པ་དང་ཅིག་ཅར་བར། མིང་འདོགས་བསྒྱུར་བ་མ་གཏོགས་པ། །དོན་ལ་རྣམ་པར་དབྱེ་བ་མེད། །ཆོས་ལུགས་འདི་འདྲ་འཆང་བ་ཡང་། །བྱང་ཆུབ་སེམས་དཔའ་ཞི་བ་འཚོས། །རྒྱལ་པོ་ཁྲི་སྲོང་ལྡེའུ་བཙན་ལ། །ལུང་བསྟན་ཇི་བཞིན་ཐོག་ཏུ་བབས། །ཞེས་པ་ལྟར་ལྟ་བ་ལ་ཕྱག་རྒྱ་ཆེན་པོར་མིང་བཏགས་པ་ལ་མས་འཛེག་དང་རིམ་གྱིས་པའི་ལུགས། རྒྱ་ནག་མཁན་པོ་ཧྭ་ཤང་གི་རྫོགས་
ཆེན་ལ་ཡས་བབས་དང་ཅིག་ཅར་བ་ཞེས་མིང་གི་འདོགས་ལུགས་ཙམ་མ་གཏོགས་དོན་ལ་ཁྱད་པར་ཅི་ཡང་མེད་ཅིང་ཆོས་ལུགས་འདི་འདྲ་འབྱུང་བའི་རྒྱུ་མཚན་མཁན་པོ་བོ་བྷི་ས་ཏྭའི་ཞལ་ཆེམས་ན། སློབ་དཔོན་པདྨ་འབྱུང་གནས་ཀྱིས་བསྟན་མ་བཅུ་གཉིས་དམ་ལ་བཏགས་པའི་མཐུས་བོད་དུ་མུ་སྟེགས་མི་འབྱུང་ཡང་། ཆོས་ལུགས་གཉིས་སུ་གྱེས་པ་ཞིག་འོང་བས་དེའི་ཚེ་ངའི་སློབ་མ་ཀ་མ་ལ་ཤཱི་ལ་གདན་དྲོངས་ལ་ཆོས་ལོག་དེ་སུན་ཕྱུངས་ཤིག་ཅེས་ལུང་བསྟན་པ་བཞིན་ཀ་མ་ལ་ཤཱི་ལས་ཧྭ་ཤང་བཏུལ་ནས་རང་ཡུལ་དུ་ཕྱིར་ལྡོག་མོད། འོན་ཀྱང་དེ་ཉིད་ལས། ཕྱི་ནས་རྒྱལ་ཁྲིམས་ནུབ་པ་དང་། རྒྱ་ནག་མཁན་པོའི་གཞུང་ལུགས་ཀྱི། །ཡི་གེ་ཙམ་ལ་བརྟེན་ནས་ཀྱང་། །དེ་ཡི་མིང་འདོགས་གསངས་ནས་ནི། །ཕྱག་རྒྱ་ཆེན་པོར་མིང་བསྒྱུར་ནས། །ད་ལྟའི་ཕྱག་རྒྱ་ཆེན་པོ་ནི། ཕལ་ཆེར་རྒྱ་ནག་གི་ཆོས་ལུགས་ཡིན། །ཞེས་པ་ལྟར་ཡུམ་བརྟན་དང་འོད་སྲུངས་འཁྲུགས་ནས་རྒྱལ་ཁྲིམས་སིལ་བུར་གྱུར་པའི་དུས་རྒྱ་ནག་མཁན་པོའི་ལུགས་ཀྱི་ཡི་གེ་འབའ་ཞིག་ལྐོག་ཏུ་སྦས་པ་དོན་ཏེ་བློན་པོ་ཆོས་དད་ཅན་འགས་ཕྱག་ཆེན་ཞེས་མིང་བསྒྱུར་ནས་བསྟན་པའི་དོན་ཆེན་རྒྱ་ནག་གི་ཆོས་ལུགས་ཁོ་ན་ཡིན་ལ། དིང་སང་གནས་ལུགས་ཕྱག་ཆེན་པོའི་བརྒྱུད་པ་ནཱ་རོ་མཻ་ཏྲི་སོགས་ལ་འདོད་ཀྱང་། རྗེ་བཙུན་མི་ལས། སྒམ་པོ་བར་ངའི་གཏུམ་མོ་ཨ་ཐུང་འདི་སྒོམས་དང་ད་གཟོད་སེམས་ཀྱི་ངོ་བོ་མཐོང་གི །ཞེས་གསུངས་པས་ཀྱང་རྗེ་མི་ལ་ཡན་ཆོད་དུ་སྔགས་ལུགས་ཀྱི་ཕྱག་ཆེན་མཚན་ཉིད་པ་མ་གཏོགས་ཕྱག་ཆེན་བཏགས་པ་བ་དེ་འདྲའི་མིང་ཙམ་ཡང་མེད་པར་རིག་པས་ཀྱང་འགྲུབ། རྗེ་མི་ལའི་མགུར་དྲུག་སོགས་གསུང་ཚད་མར་ལྟ་བ་ཐལ་འགྱུར་བའི་ལུགས་མ་གཏོགས་དིང་སང་གི་རྗེས་
འབྲངས་སུ་རློམས་པ་དག་གི་ཆད་ལྟ་ཧད་པོ་དེ་འདྲ་ཅུང་ཟད་ཙམ་ཡང་མེད་མོད། སྒམ་པོ་ཟླ་འོད་གཞོན་ནུས་རྩ་བ་རྒྱ་ནག་མཁན་པོའི་ཡི་གེ་ལ་བརྟེན་དོ་ཧ་སོགས་གནས་ལུགས་ཀྱི་བསྟན་བཅོས་ཁུངས་མ་རྣམས་བསྲེས་ཤིང་བརྒྱུད་པ་མི་ལ་ཡན་ཆད་ལ་བསྙེགས་པའི་ཕྱག་རྒྱ་ཆེན་པོ་ཞེས་དར་རྒྱས་སུ་མཛད་སྣང་བ། སྡོམ་གསུམ་ལས། བླུན་པོ་ཕྱག་རྒྱ་ཆེ་བསྒོམ་པ། །ཕལ་ཆེར་དུད་འགྲོའི་རྒྱུ་རུ་གསུངས། །མིན་ན་གཟུགས་མེད་ཁམས་སུ་སྐྱེ། །ཡང་ན་ཉན་ཐོས་འགོག་པར་ལྟུང་། །ཞེས་བླུན་པོས་ལྟ་བ་དེ་སྐྱེ་མེད་ཅང་མེད་དུ་གོ་ནས་ད་ལྟར་གཟུང་བས་ངན་སོང་དུ་འགྲོ་བ། རྩ་ཤེར། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཞེས་པའི་དོན་དང་རྟོག་པ་ནང་དུ་ཁ་ཚོམ་པའི་ཞི་གནས་འཐུག་པོ་འཕྱི་བ་ཚང་དུ་གཉིད་ལ་ཤོར་བ་ལྟ་བུ་ནི། ཨིནྡྲ་བྷཱུ་ཏིས། རྨོངས་པའི་སྒོམ་པ་གང་ཡིན་པ། །རྨོངས་པ་རྨོངས་པ་ཐོབ་པར་འགྱུར། །ཞེས་པའི་དོན་ཐོག་ཏུ་འབབ་ཤིང་བླུན་པོའི་བསྒོམ་ཚུལ་དེ་ལྟ་བུ་མ་ཡིན་པར་གཟུགས་ཀྱི་སྣང་བ་མཐའ་དག་བཀག་ནས་གཟུགས་ལ་འདོད་ཆགས་དང་བྲལ་བར་བྱས་ཏེ་ནམ་མཁའ་ལ་དམིགས་པ། རྣམ་ཤེས་ལ་དམིགས་པ། གཟུང་བྱ་ཅི་ཡང་མེད་པ་ལ་དམིགས་པ། འདུ་ཤེས་རགས་པ་ཡོད་པ་མ་ཡིན་ཅིང་ཕྲ་བ་མེད་པ་མིན་པ་ལ་དམིགས་པའི་ཞི་གནས་ཏེ་བཞི་དང་། གཟུགས་སྣང་འགགས་པའི་སྟོང་པ་ཟུང་དུ་སྦྲེལ་ནས་བསྒོམས་ན་གཟུགས་མེད་སྐྱེ་མཆེད་མུ་བཞིར་སྐྱེ་ཡང་སེམས་སྟོང་པར་ངོ་འཕྲོད་པའི་སྟོང་རྐྱང་དེ་སྔོན་དུ་ངེས་འབྱུང་གི་བསམ་པས་ཀུན་ནས་བླངས་ཤིང་། ཞི་གནས་སྐྱོན་མེད་ཅིག་དང་ཟུང་དུ་འབྲེལ་ནས་བསྒོམས་ན་ཐེག་ཆེན་དུ་མི་འགྲོ་བར་ཉན་ཐོས་ཀྱི་འགོག་པ་སྟེ་མྱང་འདས་སུ་ལྟུང་བར་འགྱུར་བ་སྟེ་རྒྱལ་བ་སྲས་བཅས་དགྱེས་པར་མི་འགྱུར་བའི་ཁུངས་འདི་ལ་ཤེས་ལྡན་
རྣམས་ཅི་ཞིག་དགའ་བར་སེམས། ཆད་ལྟ་དང་། སྟོང་ཉིད་ཉི་ཚེ་བ་དང་། སྟོང་རྐྱང་དུ་ངོ་འཕྲོད་པའི་ཉན་ཐོས་ཀྱི་རྟོགས་བྱའི་སྟོང་པ་ཉིད་དེ་གསུམ་དུ་མ་ལྷུངས་པར། འ་ཞྭ་བོས་པས་བླ་གཡུའི་མངོན་ཤེས་ཀྱི་དཔེ་ལྟར་བག་ཆགས་ཀྱི་འཕྲོ་སད་པ་དང་། དབང་པོ་རྣོན་པོ་འདྲ་སྟབས་ལེགས་ཀྱི་སྒོམ་དེ་མཐའ་གཉིས་སུ་མ་ལྷུངས་པར་གནད་དུ་སོང་བ་རེ་གཉིས་བྱུང་ནའང་། སྡོམ་གསུམ་ལས། གལ་ཏེ་དེ་ནི་སྒོམ་ལེགས་ཀྱང་། །དབུ་མའི་སྒོམ་ལས་ལྷག་པ་མེད། །ཅེས་པ་ལྟར་ལྟ་བ་ཇི་ལྟར་མཐོ་ཡང་དབུ་མའི་སྒོམ་ལས་ལྷག་པ་ཞིག་ཡོང་རྒྱུ་མེད་པས་ཐལ་འགྱུར་བའི་ལུགས་ཀྱི་སྤྲོས་བྲལ་ལ་གནས་ལུགས་ཕྱག་རྒྱ་བའི་སྒྲིབ་ཤིང་གཞན་ལས་ཁྱད་ཞུགས་པར་རློམས་པ་ལ་སྙིང་པོ་མ་མཐོང་བས་འཕགས་པ་ཡབ་སྲས་ཀྱི་དགོངས་པ་སློབ་དཔོན་ཟླ་བ་གྲགས་པས་བཀྲལ་བ་བཞིན། དཔལ་མར་མེ་མཛད་ཀྱི་རིང་ལུགས་རྨ་མེད་པ་འཇམ་དཔལ་དབྱངས་ཀྱི་དྲིན་ལས་ཆོས་ཀྱི་རྒྱལ་པོ་བཙོང་ཁ་པ་ཆེན་པོས་རྙེད་པའི་ཟབ་མོ་རྟེན་ཅིང་འབྲེལ་པར་འབྱུང་བའི་དབུ་མའི་ལྟ་བ་འདི་ནི་མིང་དོན་གཉིས་ཀ་སྦེད་མི་དགོས་པར་རྒྱལ་མཚན་གྱི་ཏོག་གི་ནོར་བུ་བཞིན་ཀུན་ལ་ངོམས་ཆོག་པའི་ལྟ་བ་ཐམས་ཅད་ཀྱི་ཡང་རྩེ་འདི་དང་བྱང་ཆུབ་མ་ཐོབ་ཀྱི་བར་དུ་མི་འབྲལ་བའི་སྨོན་ལམ་གདབ་བང་མཛོད་ཅིག །ཅེས་ཐལ་མོ་སྦྱར་ནས་བསྐུལ་བར་གསོལ་ལོ། །གསུམ་པ་ཞར་བྱུང་མཐར་འཛིན་གྱི་ལྟ་བས་མི་འགྲོལ་བར་བསྟན་པ་ནི། ཤེས་བྱ་ཆོས་ཅན། བློ་གྲོས་དང་ལྡན་པ་རྣམས་ཀྱིས་ཡང་དག་པའི་ལྟ་བ་ལ་ངེས་པ་འདྲེན་ཚུལ། གཞན་ཡང་བཤད་པ་ལ་བརྟེན་ནས་རྟག་མཐའ་དང་ཆད་པའི་མཐར་འཛིན་པར་བྱེད་པ་ལོག་པའི་ལྟ་བ་ངན་པ་དེས་སྔར་བཤད་པའི་དབུ་མའི་ལྟ་བ་རྣམ་པར་དག་པ་དེའི་དོན་འཕྲོག་ནུས་པར་མི་འགྱུར་རོ་སྟེ་ཕྱིན་ཅི་ལོག་ཏུ་འཁྲིད་པར་མི་བྱེད་པའི་རྒྱུ་མཚན་
ཡོད་དེ། ཆོས་ཐམས་ཅད་སྐྱེ་འགག་གནས་གསུམ་དང་བྲལ་བའི་རང་བཞིན་མེད་པའི་དོན་སྟོང་པ་ཉིད་ཀྱི་ངང་ནས་ཐ་སྙད་དུ་རྒྱུ་ས་བོན་དངར་བ་བཏབ་པ་དང་དེའི་འབྲས་བུ་རོ་དངར་བས་མཚོན་འཕྱུག་པ་མེད་པར་འབྱུང་བ་སོགས་ཀུན་རྫོབ་ཐམས་ཅད་བསྙོན་མེད་འཆར་བའི་ཚུལ་ཤེས་པ་ན་ཡིད་ཆེས་ཀྱི་ངེས་པ་རྙེད་པ་དེ་ཡིན་པའི་ཕྱིར། སྣང་སྟོང་གཉིས་ཀྱི་ངེས་པ་འདྲེན་ཚུལ་ཡོད་དེ། མྱུ་གུ་ཆོས་ཅན། རང་བཞིན་གྱིས་མེད་དེ། རྟེན་འབྲེལ་ཡིན་པའི་ཕྱིར། ཞེས་བཀོད་པའི་ཚེ་བསལ་བ་ལ། རང་བཞིན་ཞེས་པའི་དགག་བྱ་སྦྱར་བའི་ནུས་པས་མྱུ་གུ་གཏན་མེད་མ་ཡིན་པར་རྟོགས་ནུས་ལ། དེས་སྣང་བ་རྟེན་འབྲེལ་མི་བསླུ་བའི་རྒྱུ་མཚན་གྱིས་རང་བཞིན་གྱི་ཡོད་པའི་རྟག་མཐའ་སེལ་བ་སྟེ་འགོག་པ་དང་། རྟགས་ལ། རྟེན་འབྲེལ་ཡིན་པའི་ཕྱིར་ཞེས་པའི་ནུས་པས་མྱུ་གུ་རྒྱུ་རྐྱེན་ལ་བལྟོས་ནས་གྲུབ་པར་བསྟན་པའི་ཤུགས་ལ་མྱུ་གུ་རང་བཞིན་གྱིས་མེད་པར་རྟོགས་ནུས་པས་མཚོན་ཏེ་སྟོང་པས་ཐ་སྙད་དུ་མེད་མཐའ་སེལ་ཞིང་འགོག་ནུས་པ་དེའི་ཕྱིར་རོ། །རྟེན་ཅིང་འབྲེལ་བར་འབྱུང་ཚུལ་འདི་གལ་ཆེ་ཞིང་རྟོགས་དཀའ་བར་དགོངས་ནས། མདུན་ལེགས་མ་ལས། མདོ་སྔགས་གཞུང་ལ་ངལ་བ་མང་བྱས་ཀྱང་། །ཟབ་དོན་ཉམས་སུ་ལེན་དང་སྨྲ་བ་ན། །གང་ཡང་མ་བསླབས་ཅི་ཡང་མི་ཤེས་པའི། །ལྟ་བའི་ཚུལ་ལས་རིང་དུ་མ་སོང་བར། །མཐོང་ནས་ལྷག་པར་ཀླུ་སྒྲུབ་གཞུང་ལུགས་ཀྱི། །ཟབ་མོ་འབྱེད་པའི་ཕྲ་བའི་རིག་ལམ་ནས། །ཡང་དག་ལྟ་བ་འདྲེན་པའི་གནད་ཀུན་ལ། །ལེགས་པར་སྦྱངས་ཏེ་ཐེ་ཚོམ་ཆོད་པར་བྱས། །ཚུལ་འདི་བསམས་ཤིང་མདུན་མ་ལེགས་ནས་གདའ། །བཀའ་དྲིན་ཆེའོ་རྗེ་བཙུན་མཁྱེན་པའི་གཏེར། །ཞེས་གསུངས་སོ། །རྩ་བའི་ས་བཅད་གསུམ་པ་མཇུག་ལ་ཉམས་སུ་བླང་
བར་བསྐུལ་བ་དང་སྦྱར་བྱང་གཉིས་ཀྱི། དང་པོ་ནི། ཤེས་བྱ་ཆོས་ཅན། རྗེ་བདག་ཉིད་ཆེན་པོས་ཚ་ཁོ་དབོན་པོ་ལ་ཤིན་ཏུ་ཉེ་བའི་ཚིག་གིས་བུ་ཞེས་བོས་ནས་ཁྱོད་ཀྱིས་ཚེ་འདིར་ཆོས་བརྒྱད་ཀྱིས་དབེན་པ་རྒྱང་གྲགས་ལས་རིང་དུ་གྱུར་པའི་དགོན་གནས་བསྟེན་ཏེ་གནས་སྐབས་ཀྱི་བདེ་བའི་རོ་ལ་མ་སྲེད་པར་མི་རྟག་པའི་ལྕག་གིས་བསྐུལ་བའི་བརྩོན་འགྲུས་ཀྱི་སྟོབས་ཆེས་ཆེར་བསྐྱེད་ནས་རང་གཞན་ཐམས་ཅད་ཀྱི་དོན་བདེ་བླག་ཏུ་འགྲུབ་པའི་གཏན་གྱི་མདུན་མ་རྣམ་པ་ཐམས་ཅད་མཁྱེན་པའི་གོ་འཕང་མྱུར་དུ་སྒྲུབས་ཤིག་ཅེས་བསྐུལ་བ་ཡིན་ཏེ། ཚུལ་ཇི་ལྟར་བསྐུལ་ན་བཤད་མ་ཐག་པ་དེ་ལྟར། ངེས་འབྱུང་བྱང་སེམས་སྟོང་པ་ཉིད་དེ་ལམ་གྱི་གཙོ་བོ་རྣམ་པ་གསུམ་ཉམས་སུ་ལེན་ཚུལ་གྱི་ཟབ་མོའི་གནད་རྣམས་ཐོས་བསམ་གྱིས་སྒྲོ་འདོགས་བཅད་ནས་རང་གིས་ཇི་ལྟ་བ་བཞིན་དུ་འཁྲུལ་པ་མེད་པར་རྟོགས་པ་དེའི་ཚེ་ཡིད་ལ་བསྒོམ་པར་གྱིས་ཤིག་ཅེས་གདམས་པ་ཡིན་པའི་ཕྱིར། གཉིས་པ་སྦྱར་བྱང་ནི། ཞེས་པ་འདི་ནི་མང་དུ་ཐོས་པའི་དགེ་སློང་བློ་བཟང་གྲགས་པའི་དཔལ་གྱིས་ཚ་ཁོ་དབོན་པོ་ངག་དབང་གྲགས་པ་ལ་གདམས་པའོ། །ཞེས་པ་ནི་གོ་སླའོ། །སྨྲས་པ། བསྟན་མ་ལུས་ཕྱེད་གསེར་ལྡན་ལས་འཐོན་ཏེ། །ལྷ་གཅིག་ཚོགས་བསགས་བདེན་དབང་ཐལ་སྦྱར་ཚེ། །དུས་གསུམ་རྒྱལ་རྣམས་བསྔགས་ཚིག་མེ་ཏོག་ཆར། །མཁའ་གོས་བཞིན་ཕབ་ཡུལ་གྱུར་ཤཱཀྱའི་ཏོག །ཨེ་མ་རླབས་ཆེན་སྤྱོད་གྲུས་སྲིད་ཞིའི་མཚོ། །ཡོངས་བརྒལ་ཀུན་མཁྱེན་ནོར་བུའི་གླིང་བགྲོད་ནས། །ཐེག་གསུམ་ལུང་རྟོགས་འདོད་དགུ་རིས་མེད་འགྲོར། །སྩལ་དྲིན་གཞལ་ལ་ཚངས་པས་གདོང་བཞི་སྤྲུལ། །ཡིད་ཅན་དབང་པོར་འཚམ་པའི་ཆོས་ཕུང་ཚད། །
བཟུང་དཀའི་གཙོ་བོ་རྣམ་གསུམ་ལམ་གྱི་གནད། །སྟོན་མཛད་ཤེས་བྱ་ཀུན་མཁྱེན་བཙོང་ཁ་པའི། །ལེགས་བཤད་གསུང་རབ་ཡོངས་ཀྱི་ཡང་སྙིང་བཅུད། །མུན་བསྐལ་རུམ་དུ་ཐུབ་བསྟན་སྐད་ཅིག་གློག །དེ་བས་དལ་འབྱོར་རྟེན་བཟང་རྙེད་པ་དཀོན། །ཐོབ་ཀྱང་རྒྱལ་བ་གཉིས་པའི་དམ་ཆོས་དང་། །ཕྲད་དཀའ་དེ་ཕྱིར་སྙིང་ལ་རུས་པ་ཆུག །སེར་ཚོས་ཞྭས་མཛེས་ངུར་ཁྱུ་དོན་མེད་སྐད། །འབྱིན་མོད་གྲགས་བསྐམ་སྒོ་ངའི་སྦུབས་ཀྱི་རྒྱ། །མ་གྲོལ་མདོ་རྒྱུད་ཀ་ལ་པིངྐའི་སྒྲ། །སྒྲོག་དེ་འཇམ་དབྱངས་དཀོན་ཅོག་ཆོས་འཕེལ་ཙམ། །མགོན་ཁྱོད་འཆད་མཁས་མ་ལ་ཡར་སྐྱེས་དྲི། །མངར་པོར་འཐུལ་ཚེ་བདག་བློ་འཕགས་པའི་ཤིང་། །རིག་ལམ་སྨྲ་བའི་ཙནྡན་ལྗོན་པའི་གྲངས། །འདྲེན་འདི་སྔོན་བསགས་ལེགས་བྱས་མཐུ་ལ་རངས། །གསང་འཇིགས་བདེ་དུས་རྗེས་གནང་གསར་བྱུང་དིང་། ཁམས་སོག་གྲལ་ཤོག་ཡོན་ཏན་མ་བསླབས་ཀྱང་། །ཐུབ་བསྟན་སྙིང་པོའི་བཀའ་མདུད་རྣམ་དཔྱོད་ཀྱི། །སོར་མོས་འགྲོལ་བའི་རེས་སུ་སོན་པས་སྤྲོ། །ཙེར་ཙེར་མགྲིན་བདེའི་གླུ་ལེན་ལུས་གནད་བསྲང་། །གཟེངས་མཐོའི་ལྟ་སྟངས་སྒོམ་ཞྭ་དྲ་ཕད་སྣོད། །པུས་འཁྱུད་མ་འབྱོར་ནོངས་ཀྱང་ཤེས་ལྡན་ཁྲོད། །རྔུལ་ཆུའི་མུ་ཏིག་འགྲམ་པར་མི་འཆད་ཙམ། །ཕྱག་རིང་ཟང་ཟིང་ལ་རྐྱོང་སྨྲ་བའི་ལྗགས། །ཐུང་རྣམས་མཐོན་པོའི་ཁྲི་ལ་ཞིམ་པོའི་རྫས། །ངོམས་ཤིང་ཞལ་སྒོ་བེར་ཟླམ་གྱིས་གྲིལ་ཏེ། །གཞན་འཕྲུལ་མཛེས་པའི་ཏིང་འཛིན་ལ་གཞོལ་མཛོད། །མཐའ་མེད་གསུང་རབ་མེས་པོའི་རལ་ཀླུང་ནས། །ཉེར་ཕབ་ལེགས་བཤད་གངྒཱས་ལོག་རྟོག་གི །ཁྱབ་འཇུག་རྐང་པའི་དྲི་མ་བཀྲུས་པའི་ཚེ། །སྐལ་ལྡན་ཤིང་རྟའི་བསྙེམས་པ་ངང་གིས་གཏོད། །སྒྲིབ་གཉིས་འབོད་སྒྲོག་མགྲིན་པ་དགེ་བའི་
མདས། གཅོད་པའི་དགའ་བྱེད་ལྷ་བདག་བྱང་ཆེན་པར། །བཤེས་གཉེན་སཱི་ཏཱར་རྩེ་བའི་ཐོས་བསམ་དོན། །ལེགས་བསྒོམ་བདེ་བའི་རོ་བདས་མྱོས་པར་ཤོག །ཅེས་རྒྱལ་བ་གཉིས་པ་བཙོང་ཁ་པ་ཆེན་པོས་ཚ་ཁོ་དབོན་པོ་ལ་གདམས་པ་ལམ་གྱི་གཙོ་བོ་རྣམ་གསུམ་འདི་ལ་མཚན་གྱིས་ཉུང་ངུར་བཀྲོལ་བ་ཞིག་གིས་ཞེས་འཕྱོང་རྒྱས་ཞལ་དཔོན་སྦྱིན་དཔལ་གྱིས་བསྐུལ་བ་ལ་བརྟེན་ནས་རང་ལོ་ཉེར་གཉིས་པའི་དུས་བཀོད་པ་ཞིག་ཡོད་ནའང་ཉེ་ཆར་དགོངས་འགྲེལ་ལུང་རིག་གཏེར་མཛོད་འདི་ནི་མདོ་ཁམས་སྟོད་སྨད་ནས་དོན་གཉེར་ཅན་དུ་མས་བསྐུལ་བ་དང་དགེ་སློང་འཇམ་དབྱངས་གྲགས་པས་མཚམས་སྦྱར་བའི་རྐྱེན་གྱིས་ཟ་ཧོར་གྱི་རིགས་ལས་འཇམ་དབྱངས་དགའ་བའི་བཤེས་གཉེན་ནམ་གདོང་དྲུག་བསྙེམས་པའི་ལང་ཚོར་འབོད་པས་ཀུན་དགའ་ཞེས་པ་ཤིང་སྟག་གླུ་དབྱངས་ཀྱི་ཟླ་བའི་དཀར་ཕྱོགས་དགའ་བ་གཉིས་པའི་ཚེས་ལ་ཕོ་བྲང་ཆེན་པོ་པོ་ཏ་ལར་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པས་བགྱིས་པ་སརྦ་ཀཱ་ལེ་ཥུལཀྵྨཱི་སཱ་གརེ་ཎ་པཱུརྞཾ་བྷ་ཝནྟུ།། །།མངྒ་ལཾ།། །།
ཤོག་སྟོང་