སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རིམ་པ་ལ་བློ་སྦྱོང་ཚུལ།
སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རིམ་པ་ལ་བློ་སྦྱོང་ཚུལ།གཉིས་པ་སྙིང་པོ་ཇི་ལྟར་ལེན་པའི་ཚུལ་ལ་སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རིམ་པ་ལ་བློ་སྦྱོང་བ། སྐྱེས་བུ་འབྲིང་དང་ཐུན་མོང་བའི་ལམ་གྱི་རིམ་པ་ལ་བློ་སྦྱང་བ། སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱང་བ་དང་གསུམ། དང་པོ་ནི་ལམ་སྒྲོན་ལས། གང་
ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །དེ་ནི་སྐྱེས་བུ་ཐ་མར་ཤེས། །ཞེས་སྐྱེས་བུ་ཆུང་ངུ་ཕལ་པོ་ཆེ་འདིའི་བདེ་བ་དོན་དུ་གཉེར་ཞིང་སྡུག་བསྔལ་སྤོང་བ་ཙམ་ལྷུར་ལེན་པ་དུད་འགྲོ་དང་རིགས་མཐུན་པ་ལྟ་བུ་རྣམས་ནི་སྐབས་འདིར་ངོས་འཛིན་པའི་སྐྱེས་བུ་ཆུང་ངུར་མ་ཡིན་ལ། འདིར་བསྟན་སྐྱེས་བུ་ཆུང་ངུ་ཁྱད་པར་ཅན་ཚེ་འདི་དོན་དུ་མི་གཉེར་བར་ཕྱི་མའི་བདེ་བ་ཙམ་ལྷུར་ལེན་པ་ཞིག་དགོས་ནའང་། སྐབས་འདིར་ས་བཅད་དུ་ཐུན་མོང་བའི་ལམ་ཞེས་གསུངས་པའི་ཚིག་གི་ནུས་པས་འཁོར་བ་མཐའ་དག་ལ་ཡིད་འབྱུང་བའི་སྔོན་དུ་ངན་སོང་གསུམ་གྱི་སྡུག་བསྔལ་ལ་ཡིད་འབྱུང་བ་ཞིག་དགོས་པས་འདི་ལ་འཇིག་རྟེན་ཕྱི་མ་དོན་གཉེར་གྱི་བློ་བསྐྱེད་པ། འཇིག་རྟེན་ཕྱི་མར་བདེ་བའི་ཐབས་བསྟན་པ་གཉིས། དང་པོ་ལ་འཆི་བ་མི་རྟག་པ་བསམ་པ་དང་། ངན་འགྲོའི་སྡུག་བསྔལ་བསམ་པ་གཉིས། དང་པོ་ནི་བླུན་རྨོངས་ལ་ལ་འཆི་བ་མི་འོང་གི་རྟོག་དཔྱོད་ཙམ་ཡང་མི་བྱེད་ལ། ཕལ་ཆེར་ནི་ནམ་ཞིག་འཆི་བ་ཞིག་འོང་སྙམ་པ་ཡོད་ཀྱང་མ་རྒས་ཀྱི་བར་དང་ལོ་ཟླ་ཞག་གྲངས་རེ་རེ་བཞིན་ནས་མི་འཆི་སྙམ་པའི་དབང་གིས་འཆི་ནད་ཀྱིས་ཐེབས་པའམ་ལོ་བརྒྱ་ཕྲག་ལོན་ཀྱང་རེ་ཞིག་གསོན་དུ་རེ་བའི་བསམ་པ་མངོན་གྱུར་དེས་དཔེར་ན་ཕྱོགས་གཞན་དུ་མི་འགྲོ་བར་སྡོད་པའི་བློ་ཡོད་ན་འགྲོ་གྲབས་ཡེ་མི་བྱེད་པར་མཁར་རྩིག་པ་དང་སོ་ནམ་སོགས་ཀྱི་གཤོམ་ར་བྱེད་པ་བཞིན་ཚེ་འདིའི་འདུན་མ་འབའ་ཞིག་གི་དབང་དུ་འགྲོ་ལ། བསམ་པ་དེ་ལས་ལོག་སྟེ་སང་ཙམ་ཡང་མི་འཆི་བའི་ངེས་པ་མེད། ཟླ་བ་རྟིང་མའི་བརྒྱགས་གྲབས་བྱས་ཀྱང་དེའི་དུས་སུ་རང་ཉིད་
ལུས་རྟེན་འདི་དང་དབྱིབས་མི་འདྲ་བ་རྭ་ཅོ་ཟིང་ངེ་བ་ཞིག་ཏུ་མི་སྐྱེ་བའི་ངེས་པ་ཅི་ཡོད་སྙམ་པའི་བློ་ཞིག་དུར་རེ་བ་ཡོད་ཚེ། དཔེར་ན་ཡུལ་གཞན་དུ་མགྱོགས་པར་འགྲོ་བའི་འདུན་པ་ཅན་དེ་གཞིས་སུ་སྡོད་པའི་གྲབས་མི་བྱེད་པར་ཁལ་རྟ་སོགས་བྱེས་ཀྱི་སྟ་གོན་ལྷུར་ལེན་པ་ལྟར་མྱུར་དུ་འཆི་སྙམ་པའི་བློ་དེས་འདི་སྣང་གི་བྱ་བ་ལ་མི་བརྩོན་པར་ཚེ་ཕྱི་མར་ཕན་པའི་ཐབས་ངམ་ངམ་ཤུགས་ཀྱིས་བྱེད་པ་ཆོས་ཉིད་ཡིན་པའི་ཕྱིར། ཆོས་འདི་དོན་དུ་གཉེར་བ་རྣམས་ནི་འཆི་བ་མི་རྟག་པའི་ཆོས་སྐོར་ལ་བློ་སྦྱོང་བ་གལ་ཆེ་བས་འདི་ལ་གསུམ། ངེས་པར་འཆི་བ་བསམ་པ། ནམ་འཆི་ངེས་མེད་བསམ་པ། འཆི་བའི་ཚེ་ཆོས་མ་གཏོགས་པ་གཞན་གང་གིས་ཀྱང་མི་ཕན་པར་བསམ་པའོ། །དང་པོ་ནི་མི་རྟག་པའི་ཚོམས་ལས། གང་ཡང་སངས་རྒྱས་རང་སངས་རྒྱས། །སངས་རྒྱས་རྣམས་ཀྱི་ཉན་ཐོས་ཀྱང་། །སྐུ་ལུས་འདི་ནི་སྤོང་མཛད་ན། །སྐྱེ་བོ་ཕལ་པ་སྨོས་ཅི་དགོས། །ཞེས་དང་། ཚོམས་ལས། །གང་དུ་གནས་ནའང་འཆི་བས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ལ་མེད་རྒྱ་མཚོའི་ནང་ནའང་མེད། །རི་བོ་རྣམས་ཀྱི་གསེབ་ཏུ་ཞུགས་ནའང་མིན། །ཞེས་རང་ཅག་རྣམས་ངེས་པར་འཆི་སྟེ་སྔོན་བྱོན་པའི་ཡང་དག་པར་རྫོགས་པའི་སངས་རྒྱས་སྐྱེ་འཆི་ལ་དབང་ཐོབ་པ་རྣམས་ཀྱང་གདུལ་བྱ་རྟག་འཛིན་ཅན་རྣམས་བསྐུལ་བའི་དོན་དུ་མྱ་ངན་ལས་འདས། དེ་བཞིན་དུ་རྒྱ་བོད་ཀྱི་པཎ་གྲུབ་རྒྱལ་བློན་བྱང་ཆུབ་སེམས་དཔའ་སོགས་གང་ཟག་མཆོག་དམན་གྲངས་མེད་པ་བྱོན་པ་ཆོས་འབྱུང་དེབ་གཏེར་གཏམ་རྒྱུད་སོགས་ལས་བཤད་པ་མཐའ་དག་མ་བརྟགས་པའི་གནས་སྐབས་སུ་ད་ལྟ་ཡོད་ཡོད་འདྲ་བ་ཞིག་འོང་ནའང་།
ལེགས་པར་དཔྱད་ན་བྱུང་བའི་གཏམ་ཙམ་མ་གཏོགས་ཡུལ་དུས་གནས་སྐབས་གང་ན་བཞུགས་མེད་པར་མྱ་ངན་ལས་འདས་པའི་ཚུལ་བསྟན་ཟིན། རང་གི་མངོན་སུམ་གྱི་སྤྱོད་ཡུལ་ཅན་མཁན་སློབ་ཕ་མ་མཆེད་གྲོགས་མཛའ་བཤེས་སོགས་དགྲ་གཉེན་བར་མའི་འགྲོ་བ་མཐའ་ཡས་པ་ཞིག་འཇིག་རྟེན་ཕ་རོལ་ཏུ་སོང་། ད་ལྟ་ཁྲོམ་ཆེན་པོ་ཁྲི་ཕྲག་མང་པོ་ཚོགས་པའི་ཚེ་ནའང་དེར་འཁོད་པ་མཐའ་དག་དུས་ཚོད་འདི་ནས་བཟུང་སྟེ་ལོ་བརྒྱ་ཚུན་གྱི་ནང་དུ་འཆི་བར་ངེས། སྔར་བྱུང་བའི་མི་འདི་ཞེས་བྱ་བ་མ་ཤི་བར་ཚེ་ཐར་ཞེས་པ་མེད་ན་བདག་གཅིག་པུ་ལ་དམིགས་ཀྱིས་བསལ་ཏེ་འཆི་མི་དགོས་པ་ག་ལ་འོང་། ཚེ་ཚད་དྲུག་ཅུ་ཁ་རལ་དུ་བཤད་པ་བཞིན་ཐུབ་ནའང་དབུགས་འབྱུང་རྔུབ་ཉི་ཁྲི་ཆིག་སྟོང་གིས་ཞག་རེ་འཛད། ཞག་སུམ་ཅུས་ཟླ་བ་འཛད། ཟླ་བ་བཅུ་གཉིས་ཀྱིས་ལོ་འཛད། ལོ་དེ་འདྲ་བཅུ་གཉིས་ལ་ལོ་སྐོར་དུ་མིང་བཏགས་པ་ལྔ་ཙམ་སོང་བ་ན་ཚེའི་ཚད་ལ་ཡང་གཏུགས་པས་རྒྱ་ཆེར་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ཞེས་ཚེ་སྐད་ཅིག་ཀྱང་མི་སྡོད་ལ། ཟས་ནོར་ལྟ་བུ་སྔོན་མ་རྣམས་རིམ་གྱིས་ཟད་ཀྱང་སླར་གསར་པ་བསྣན་དུ་ཡོད་པ་ལྟ་བུ་མ་ཡིན་པར་ཚེ་ཟད་པ་ལ་གསར་དུ་བསྣན་རྒྱུ་མེད་པས་སྤྱོད་འཇུག་ལས། ཉིན་མཚན་སྡོད་པ་ཡོད་མེད་པར། །ཚེ་འདི་རྟག་ཏུ་དགོད་འགྱུར་ཞིང་། །སྣོན་པའང་གུད་ནས་འོང་མེད་ན། །བདག་ལྟ་འཆི་བར་ཅིས་མི་འགྱུར། །ཞེས་སོགས་དཔེ་དང་གཏན་ཚིགས་ཀྱི་སྒོ་ནས་ལེགས་པར་བསམས་ཏེ་ངེས་པར་འཆི་བ་
འོང་བ་ཐག་མ་ཆོད་ཀྱི་བར་བསྒོམ་མོ། །གཉིས་པ་ནི། དེ་ལྟར་བསྒོམས་པས་མཐར་འཆི་བ་ལས་མ་འདས་མོད་རེ་ཞིག་དགྲ་འདུལ་གཉེན་སྐྱོང་གི་བྱ་བ་དང་ཆོས་སྒྲུབ་པའི་མཐུན་རྐྱེན་སོགས་རྩོལ་བ་བྱས་ཏེ་མཐར་ཆོས་ཤིག་བྱའོ་སྙམ་ན། ཁམས་གསུམ་གྱི་སེམས་ཅན་རྣམས་ལ་ཚེའི་ཚད་རེ་བཤད་ཀྱང་དེ་རིང་མཐའ་ལ་བཤད་པ་བཞིན་དུ་ཐུབ་པའི་ངེས་པ་ནི་སྒྲ་མི་སྙན་པ་མ་གཏོགས་པ་ལ་མེད་ལ། ཁྱད་པར་དུ་འཛམ་བུ་གླིང་པ་རྣམས་ནི་མཛོད་ལས། འདི་ན་མ་ངེས་ཐ་མར་ནི། །ལོ་བཅུ་དང་པོ་དཔག་ཏུ་མེད། །ཅེས་ངེས་པ་ཤིན་ཏུ་ཆུང་བར་བཤད་ཅིང་། བཤད་པ་ལྟར་རང་གིས་དངོས་སུ་མཐོང་བ་སྔོན་ཆད་རང་ལས་གཞོན་པ་ཤིན་ཏུ་མང་བ་ཞིག་ཤི་སོང་ཞིང་ད་ལྟ་རང་ལས་རྒན་པ་མང་པོ་ཞིག་འདུག་པས་དེ་དག་གི་སྔོན་དུ་བདག་མི་འཆི་བའི་ངེས་པ་ག་ལ་ཡོད་དེ། ཚོམས་ལས། སང་དང་འཇིག་རྟེན་ཕྱི་མ་གཉིས། །སྔོན་དུ་གང་འོང་གཏོལ་མེད་པས། །སང་གི་ཚེས་ལ་མི་འབད་པར། །ཕྱི་མའི་དོན་ལ་འབད་པར་རིགས། །ཞེས་སང་གི་ཚེས་གྲངས་དང་འཇིག་རྟེན་ཕྱི་མའི་བར་སྲིད་གཉིས་སྔོན་ལ་གང་འགྲུབ་ཁ་ཚོན་མི་ཆོད། ལ་ལ་དག་ཟས་བཅོས་སྨན་དཔྱད་སོགས་ཐབས་མང་པོའི་སྒོ་ནས་གསོན་པའི་རྐྱེན་མང་ངོ་སྙམ་ན། རིན་ཆེན་འཕྲེང་བ་ལས། འཆི་བའི་རྐྱེན་ནི་མང་བ་སྟེ། །གསོན་པ་ཡི་ནི་ཅུང་ཟད་ཅིག །དེ་དག་རྣམས་ཀྱང་འཆི་བའི་ཡང་། །དེ་བས་རྟག་ཏུ་ཆོས་མཛོད་ཅིག །ཅེས་ཟས་མ་འཕྲོད་པ། སྨན་ལོག་པ། གནས་ཁང་རྡིབ་པ། གྲུ་བཤམ་ཞིག་པ། མཛའ་བོས་བསླུས་པ་སོགས་གསོན་རྐྱེན་འཆི་རྐྱེན་དུ་འགྱུར་བ་ཤིན་ཏུ་མང་། མར་མེ་ལ་སྡོང་བུ་དང་མར་ཁུ་ལ་སོགས་པ་རིང་དུ་གནས་པའི་རྐྱེན་དུ་མ་ཡོད་ཀྱང་
རླུང་ལྟ་བུས་བསྐྱོད་དེ་གློ་བུར་དུ་འཆི་བ་བཞིན། ཚེའི་འཕེན་པ་མ་ཟད་ཀྱང་འབྱུང་བའི་འཁྲུགས་པ། བར་དུ་གཅོད་པའི་བགེགས་ཕན་གནོད་རེས་འཇོག་ཏུ་བྱེད་པའི་གདོན་སོགས་ཉེར་འཚེ་ཤིན་ཏུ་མང་བས་བཤེས་སྤྲིངས་ལས།ཚེ་ནི་གནོད་མང་རླུང་གིས་བཏབ་པ་ཡི། །ཆུ་ཡི་ཆུ་བུར་བས་ཀྱང་མི་རྟག་ན། །དབུགས་རྔུབ་དབུགས་འབྱུང་གཉིད་ཀྱིས་ལོག་པ་ལས། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་གང་ལ་བསམས་ཀྱང་ནམ་འཆི་ཆ་མེད་པར་མྱོང་བ་ཐོན་ངེས་ཀྱི་བར་བསྒོམས་པས་རང་ལ་དགྲ་མ་རུང་བ་ཞིག་འོང་བར་ངེས་ཤིང་དུས་གང་ལ་མ་ངེས་ན་ཉིན་རེ་ཞིང་ཟོན་བྱེད་པ་དང་འདྲ་བས་གནད་ཆེའོ། །གསུམ་པ་ནི་སྤྱོད་འཇུག་ལས། །གཤིན་རྗེའི་ཕོ་ཉས་ཟིན་པ་ལ། །གཉེན་གྱིས་ཅི་ཕན་བཤེས་ཅི་ཕན། །དེ་ཚེ་བསོད་ནམས་གཅིག་སྐྱབས་ན། །དེ་ཡང་བདག་གིས་མ་བསྟེན་ཏོ། །ཞེས་འཆི་བ་མི་རྟག་པར་གྲགས་པའི་ལམ་པོ་ཆེ་རི་གཟར་གྱི་རྦབ་འདྲ་བ་དེ་ངེས་པར་འོང་བའི་དུས་ལ་བབ་པའི་ཚེ་རྫས་སྔགས་ཏིང་འཛིན་དང་དཔའ་བོའི་མཚོན་གྱིས་མི་བཟློགས། ཕྱུག་པོའི་ནོར་གྱིས་བསླུ་བ་དང་སྨྲ་མཁས་གཏམ་གྱིས་འདྲིད་དུ་མེད་ཅིང་། གཉེན་བཤེས་མང་པོས་མཐའ་ནས་བསྐོར། སྟོབས་དང་ལོངས་སྤྱོད་འཁོར་ལོས་སྒྱུར་རྒྱལ་ལ་འགྲན་དུ་བཟོད་པ་རྣམས་ཀྱང་འཁྲིད་པ་དང་འཁྱེར་བའི་དབང་ལྟ་ཅི་སྨོས། མའི་མངལ་ནས་ལྷན་ཅིག་ཏུ་འགྲོགས་པའི་ལུས་འདི་ཡང་ཙམ་གྱི་བཞག་སྟེ་རྣམ་པར་ཤེས་པ་གཅིག་པུ་དབང་མེད་འགྲོ་བའི་ཚེ་རྗེས་སུ་འབྲང་ཞིང་ཕན་ཐོགས་པ་ནི་སྔོན་བསགས་ཀྱིས་དགེ་བ་སོགས་དམ་པའི་ཆོས་ཁོ་ན་ལས་མི་འདུག་སྙམ་དུ་མྱོང་བ་ཐོན་པར་བསྒོམ་མོ། །
བླུན་པོ་ལ་ལའི་འཆི་བའི་ཚེ་ཆོས་ཀྱིས་ཕན་པ་དེ་འཆི་མི་དགོས་པ་ཞིག་ལ་གོ་བར་སྣང་མོད། འདི་པའི་ལུགས་ལ་མི་འཆི་བ་མ་ཡིན་ཡང་འཆི་ལུགས་མི་གཅིག་སྟེ། ཆོས་པ་རབ་འཆི་བ་ལ་བྲོད། འབྲིང་མི་མཚེར། ཐ་མ་མི་འགྱོད་བྱ་བ་བཀའ་གདམས་གོང་མའི་གསུང་འཕྲོས་ལས་བྱུང་བ་ཡིན་ནོ། །སྨྲས་པ། ལས་ཉོན་དབང་གིས་འཕངས་པའི་སྐྱེ་སྲིད་འདི། །གྲུབ་ཙམ་ཉིད་ནས་མི་རྟག་འཆི་བའི་དྲུང་། །ཅུང་ཟད་ངལ་གསོ་མེད་པར་འགྲོ་བཞིན་དུ། །གཏན་དུ་སྡོད་གྲབས་བྱེད་ལས་བླུན་པ་སུ། །ལོ་ཟླ་ཚེས་ཀྱི་མ་ངེས་དུས་མིན་དུ། །རྒན་གཞོན་གོ་རིམ་མེད་པར་འཆི་བ་དག །མཐོང་བཞིན་ནམ་འཆིའི་ཆ་ལ་དུས་འདེབས་པའི། །ཆུ་བུར་མིག་ལྡན་ཁྱོད་ཉིད་ཅེར་རེ་ལོང་། །ནམ་ཡང་མི་འབྲལ་དཀར་པོ་དགེ་བའི་གྲོགས། །སྤངས་ནས་ཁྲེལ་ཆུང་མཛའ་བཤེས་འཁོར་གཡོག་ནོར། །རྟག་ཏུ་ཕན་པར་སེམས་ཁྱོད་བར་དོ་ཡི། །བགྲོད་དཀའི་འཕྲང་དེར་གཅིག་པུར་ཕྱིན་གྱིས་དོགས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་ངན་འགྲོའི་སྡུག་བསྔལ་བསམ་པ་ལ་དམྱལ་བ། དུད་འགྲོ། ཡི་དྭགས་ཀྱི་སྡུག་བསྔལ་བསམ་པ་དང་གསུམ། དང་པོ་ལ་ཚ་དམྱལ་དང་། གྲང་དམྱལ་གཉིས། དང་པོ་ནི། དེ་ཡང་གོང་དུ་འཆི་བ་མི་རྟག་པའི་ཆོས་སྐོར་སྒོམ་པའི་རྒྱུ་མཚན། དེ་ལྟར་ཤི་བའི་འོག་ཏུ་མར་མེ་ཤི་བའམ་རྩྭ་ཕུང་མེས་བསྲེགས་པ་ལྟར་རིགས་འདྲ་ཕྱི་མ་རྒྱུན་ཆད་པ་ཞིག་ནི་མི་འོང་། ངེས་པར་སྐྱེ་བ་ཞིག་ལེན་པ་ལས་འོས་མེད། སྐྱེ་བ་དེ་ཡང་བདེ་འགྲོ་དང་ངན་འགྲོ་གང་རུང་ཞིག་ཏུ་སྐྱེ་བ་ལས་མ་འདས་པས་བདེ་འགྲོར་སྐྱེ་བའི་རྒྱུ་དགེ་བ་ནི་སྔོན་ཆད་རང་ཉིད་ཀྱི་བློ་བདེ་སིང་ངེ་བ་
བསགས་པ་ཞིག་ནི་མི་དྲན་ཞིང་ཚེ་རབས་སྔོན་མ་རྣམས་སུ་བསགས་མ་བསགས་ཀྱང་ཆ་མེད། མི་དགེ་བའི་ལས་ནི་རྒྱལ་པོའི་གན་མཛོད་བཞིན་དུ་གང་ལ་བལྟས་བལྟས་ནས་བསགས་འདུག །དེའི་འབྲས་བུ་ངན་སོང་གི་སྡུག་བསྔལ་ཞིག་མྱོང་དགོས་བྱུང་ན་ལུས་འདི་ག་ལ་བྱུང་བ་དང་ལུས་གཞན་དུ་འཕོས་ནས་བྱུང་པར་ཁྱད་མེད། ད་ལྟ་མ་བརྟགས་པའི་གནས་སྐབས་སུ་རྨ་འབྲས་ཀྱི་ནད་བྱུང་བ་ལྟ་བུ་དེ་གའི་ཐད་ཀྱི་ཤ་རུས་ཀྱི་ཐོག་ཏུ་མྱོང་བ་འདྲ་ཞིག་འདུག་ནའང་དོན་དུ་མྱོང་བྱེད་ནི་སེམས་ཡིན་ཏེ། མིན་ན་ཤི་བའི་འོག་ཏུ་རོ་ལ་མཚོན་བསྣུན་པ་ལ་ཡང་ན་ཚ་འབྱུང་དགོས་པ་ལ་མི་འབྱུང་བར་ངེས་པས་དེ་རིང་ལྷ་མིའི་དཔལ་འབྱོར་མྱོང་བཞིན་པའི་སེམས་འདིའི་ཐོག་ཏུ་སང་ནས་མནར་མེད་ཀྱི་སྡུག་བསྔལ་མི་འབྱུང་བའི་ངེས་པ་ཅི་ཡོད། དེ་དག་གི་ཚུལ་ལ་ཡིད་འབྱུང་སྐྱེ་བ་ལ་མགོན་པོ་ཀླུ་སྒྲུབ་ཀྱིས། རབ་ཏུ་ཚ་ཞིང་གྲང་བ་ཡི། །དམྱལ་བ་ཉི་མ་གཅིག་བཞིན་དྲན། །ཞེས་གསུངས་པ་ལྟར་དམྱལ་བའི་སྡུག་བསྔལ་དེ་བསམ་དགོས་ཏེ། བསམ་ཚུལ་ད་ལྟ་ཕལ་ཆེར་ལུང་དང་དེའི་ཚིགས་བཅད་ཡམ་མེ་བ་ཞིག་ངག་ཏུ་བརྗོད་ནས་ཁ་ཕྱིར་བལྟས་ཀྱི་ཤེས་པས་གཞན་གྱི་སྡུག་བསྔལ་ལ་ལྟ་བ་ལྟ་བུ་བྱེད་པ་དེ་རྒྱུད་ཐོག་ཏུ་ཡེ་མི་ཁེལ་ཏེ། དཔེར་ན་རྒྱལ་པོའི་ཁྲིམས་རར་ནག་ཅན་ཞིག་ཆད་ལས་ཀྱིས་ནན་ཏུར་སྣ་ཚོགས་བྱེད་པ་མཐོང་བ་ན། སེམས་དགེ་བ་རྣམས་དེ་ལ་བརྟེན་པའི་ངེས་འབྱུང་དང་སྙིང་རྗེ་སྐྱེ་བ་འོང་ནའང་ཕལ་ཆེ་བ་ནི་ལྟད་མོ་དང་ཉམས་དགའ་བའི་སྣང་བ་སྐྱེ་མོད། སྣང་བ་དེ་ག་སྐྱེ་བཞིན་པའི་མི་དེ་ཁྲིམས་རར་ཁྲིད་ནས་ཡན་ལག་ལྕགས་ཀྱིས་བཅིང་བ་སོགས་བྱས་བྱུང་ཚེ་སྔར་གྱི་བདེ་སེམས་དེ་སྐད་ཅིག་ཀྱང་མི་བཟོད་
པའི་སྡུག་བསྔལ་གྱི་སེམས་སུ་གྱུར་ནས་འདི་ལས་ཐར་ན་ཅི་མ་རུང་སྙམ་པ་མ་གཏོགས་བློ་གཞན་མངོན་གྱུར་མི་སྐྱེ་བ་དང་འདྲ་བས། སྐབས་འདིས་མཚོན་པའི་འཁོར་བའི་སྡུག་བསྔལ་སྒོམ་པའི་སྐོར་ཕལ་ཆེར་ལ་རང་ཉིད་འགྲོ་བ་རིགས་དྲུག་གང་ཡིན་པ་དེར་སྐྱེས་ནས་སྡུག་བསྔལ་དེ་རང་ཐོག་ལ་བྱུང་བའི་ཚུལ་གྱིས་བློ་ནང་དུ་བཀུག་ནས་སྒོམ་དགོས་པའི་ཕྱིར་ན། ཞེ་སྡང་གི་མཐུས་བསགས་པའི་མི་དགེ་བའི་འབྲས་བུ་དམྱལ་བའི་བར་སྲིད་གྲུབ་པའི་ཚེ་ལུས་ལ་བསིལ་བའི་སྣང་བ་ཤར་ཏེ་ཚ་བ་དོན་དུ་གཉེར་བ་ན་བར་སྲིད་འགགས་ནས་ཚ་དམྱལ་དུ་སྐྱེས་པར་བཤད་པས། སྤྱི་ཁྱབ་ཏུ་འོག་ཐམས་ཅད་ལྕགས་བསྲེགས་ཀྱི་ས་གཞི། ཁོར་ཡུག་ལྕགས་བསྲེགས་ཀྱི་ར་བ། སྟེང་འོག་མེ་ལྕེ་ཀུན་ཏུ་འབར་ཞིང་འཁྲུག་པའི་ནང་དུ། ཡང་སོས་ནི། བཤད་མ་ཐག་པའི་གནས་དེ་འདྲ་བ་ཞིག་ཏུ་རང་ཉིད་མངོན་སུམ་དུ་སྐྱེས་འདུག་སྙམ་དུ་འབད་ནས་བསྒོམས་པས་ལུས་རྩེད་ཡམ་ཡམ་པ། སེམས་འཇིགས་ཞུམ་ཞུམ་པ་འོང་ངོ་། །དེ་ལྟ་བུ་བྱུང་བ་ན་དེར་སྐྱེས་པས་སེམས་ཅན་མང་པོ་འཚོགས་ཏེ་ཞེ་སྡང་གི་དབང་གིས་ཕན་ཚུན་གཅིག་གིས་གཅིག་ལ་མཚོན་ཆ་སྣ་ཚོགས་རྡེགས་པར་བསམ། དེ་ལ་བརྟེན་ནས་རང་གི་ལུས་ཚལ་བ་བརྒྱ་སྟོང་དུ་སོང་བ་དང་བརྒྱལ་ཐབས་སུ་འགྱེལ་བ་སོགས་ཀྱི་རྣམ་པ་དངོས་སུ་མྱོང་རྒྱུ་ཡོད་པ་ལྟ་བུ་མ་བྱུང་གི་བར་གསལ་གདབ། དེ་ནས་ནམ་མཁའ་ལས། ཁྱོད་རྣམས་ཡང་སོས་པར་གྱུར་ཅིག་པའི་སྒྲ་བྱུང་བ་དང་གསོས་ཏེ་སྔར་ལྟར་མཚོན་བསྣུན་པ་སོགས་ཀྱིས་སྡུག་བསྔལ་ཁོར་མོ་ཡུག་ཏུ་བསྒོམ། དེ་ལྟར་ཉམས་ལེན་རྡོ་རུས་ཐུག་པ་བྱས་པས་ཟས་སྐོམ་གྱི་དང་ཁ་འགགས་པ་སྙམ་བྱེད་པ་དང་། བྲེ་མོའི་གཏམ་དང་འདུ་འཛིའི་གཡེང་བ་ལ་མི་སྤྲོ་ཞིང་། སྤྱོད་ལམ་མཐའ་དག་ཏུ་
འབད་པ་མེད་པར་སྡིག་སྤོང་དགེ་སྒྲུབ་ལ་ངང་གིས་འཇུག་པ་ཞིག་འོང་། སྔར་གྱི་སེམས་དང་སྤྱོད་ཚུལ་སོ་ན་འདུག་ཚེ་ཆོས་དང་གང་ཟག་ཐ་དད་དུ་སོང་བ་ཡིན་ནོ། །ཐིག་ནག་ནི། དམྱལ་སྲུང་རྣམས་ཀྱིས་ལུས་ལ་ཐིག་བརྒྱད་བཏབ་སྟེ་མཚོན་ཆས་གཤགས་པར་བྱེད་དོ། །བསྡུས་འཇོམས་ནི། དམྱལ་བ་བརྒྱད་ཀར་རིམ་པ་བཞིན་སྐྱེ་དགོས་པ་མིན་ཡང་འདིར་འཁྲིད་རིམ་ལྟར་སྒོམ་པའི་དབང་དུ་བྱས་ཏེ་སྔར་གྱི་སྡུག་བསྔལ་དེ་ལས་འབྲོས་པའི་སྣང་བ་ཤར་ཏེ་ཕྱིན་པ་ན་རི་ར་ལུག་གླང་སེང་ལྟ་བུའི་གདོང་པ་ཅན་གྱི་བར་དུ་ཆུད་དེ་བཙིར་བ་ན་སྒོ་ཐམས་ཅད་ནས་ཁྲག་གི་རྒྱུན་འབབ་བོ། །ངུ་འབོད་ནི། ཡང་བྲོས་པས་ལྕགས་ཀྱི་ཁང་པའི་ནང་དུ་སླེབ་པ་ན་སྒོ་དབྱེར་མེད་དུ་འགྲིག་སྟེ་ཕྱོགས་ཀུན་ནས་མེ་འབར་ཏེ་བསྲེགས་པས་ད་འབྲོས་ས་ཡང་མི་འདུག་སྙམ་ནས་ངུ་འབོད་ལྷང་ལྷང་བ་བྱེད་དོ། །ངུ་འབོད་ཆེན་པོ་ནི་ལྕགས་ཁང་དེ་ག་ལ་ལྕགས་ཁང་གཅིག་གིས་བསྐོར་ཏེ་བསྒོམ་པར་བཤད་ཀྱང་། བླ་མའི་བཞེད་པ་ལྕགས་ཁང་དེ་ནས་ཐོན་ཏེ་བྲོས་པ་ན་ལྕགས་ཁང་ཉིས་རིམ་དུ་ཆུད་དེ་སྡུག་བསྔལ་སྔོན་མ་ལས་ཉིས་འགྱུར་གྱིས་ཆེ་བ་ནི་བསམ་པའི་ཁྱད་པར་ལྕགས་ཁང་ནང་མ་ནས་ཐོན་སྲིད་ཀྱང་ཕྱི་མ་ལས་མི་ཐོན་སྙམ་པ་སྟེ། དཔེར་ན་བཙོན་ཁང་ལ་གྱང་ཉིས་རིམ་དུ་ཡོད་ན་གྱང་ནང་མ་བརྟོལ་ཐུབ་ཀྱང་ཕྱི་མ་བརྟོལ་མ་ཐུབ་དོགས་པས་སྡུག་བསྔལ་བ་བཞིན་ནོ། །ཚ་བ་ནི་ལྕགས་ཀྱི་གསལ་ཤིང་མེ་འབར་བས་འཕོངས་དང་སྤྱི་བོའི་བར་ཏལ་མར་ཕུག་སྟེ་དབང་པོའི་སྒོ་ཐམས་ཅད་ནས་མེ་ལྕེ་འབར་བ་དང་། ལུས་རིལ་བུ་ཁྲོ་ཆུའི་ནང་དུ་འཚོད་པའོ། །རབ་ཏུ་ཚ་བ་ནི་གསལ་ཤིང་རྩེ་གསུམ་གྱི་དབུས་མ་སྤྱི་བོ་དང་གཡས་གཡོན་ཕྲག་
པ་ནས་ཐོན་པ་དང་། ལྕགས་བསྲེགས་ལེབ་མོ་ལུས་ལ་སྣམ་བུ་ལྟར་དཀྲི་བ་དང་། ཁྲོ་ཆུའི་ནང་དུ་འཚོད་པ་ན་ཤ་ཁྲག་རྣམས་ཞིག་སྟེ་ཀེང་རུས་ལྟར་འགྲོ་བའོ། །མནར་མེད་ནི། ཕྱོགས་མཚམས་ཀུན་ནས་མེ་འབར་བས་ལུས་དང་མེ་དབྱེར་མེད་པ་ལྟ་བུའི་ཚུལ་གྱིས་ངུ་བའི་སྐད་ཐོས་པ་ཙམ་མོ། །སྡུག་བསྔལ་དེ་དག་ཀྱང་ཡུན་ཐུང་ངུ་ཙམ་ཞིག་གིས་མི་ཆོག་སྟེ། ཆོས་མངོན་པ་ལས། མིའི་ལོ་ལྔ་བཅུ་ལ་འདོད་ལྷའི་ཉིན་ཞག་གཅིག་ཏུ་ཕྱེད་པ་སོགས་ཅུང་ཟད་གོ་དཀའ་ཞིང་མི་གསལ་བས། དམྱལ་བ་བརྒྱད་པོའི་ནང་གི་ཚེ་ཐུང་ཤོས་ཡང་སོས་པའི་ཚེ་ཚད་མི་ལོ་ཁྲག་ཁྲིག་གཅིག་འབུམ་ཆེན་པོ་དྲུག །ཐེར་འབུམ་གཉིས་ཡིན་པས། གཞན་རྣམས་རིམ་གྱིས་ལོག་པོར་འཕར་ཚུལ་བསམས་ན་སྙིང་འགས་པར་ཐུག་པ་ལས་འོས་ཅི་ཡོད། བཤེས་སྤྲིངས་སུ། ཇི་སྲིད་མི་དགེ་དེ་ཟད་མ་གྱུར་པ། །དེ་སྲིད་སྲོག་དང་འབྲལ་བར་མི་འགྱུར་རོ། །ཞེས་པ་ལྟར་ན་ད་ལྟའི་རང་ཅག་རྣམས་ཀྱི་སྤྱོད་ཚུལ་དང་བཅས་ཏེ་དེ་ལས་ཡུན་རིང་བ་ཞིག་མི་འོང་བའི་ངེས་པ་ཅི་ཡོད་སྙམ་དུ་ཡིད་འཁུལ་ངེས་ཤེས་པའི་བར་དུ་བསྒོམ་མོ། །གཉིས་པ་ནི། དམྱལ་བའི་བར་སྲིད་པ་དེའི་ལུས་ལ་ཚ་བའི་རྣམ་པ་ཤར་བས་གྲང་བ་ལ་དགའ་བའི་བསམས་པས་རྐྱེན་བྱས་ཏེ་བར་སྲིད་འགགས་ནས་མཐའ་ཐམས་ཅད་གངས་རིའི་ཕྲེང་བས་བསྐོར་བ་འོག་ཁ་བའི་ཐད་དང་འཁྱག་རོམ་གྱི་གཅོང་རོང་ཟབ་མོ། སྟེང་ཁ་བ་བུ་ཡུག་འཚུབས་པ། མུན་པས་གཏིབས་ཤིང་རླུང་དྲག་པོས་བཏབ་པའི་གནས་དང་དེར་སྐྱེ་ཚུལ་སོགས་ནི་ཚ་གྲང་གི་ཁྱད་པར་མ་གཏོགས་སྔར་ལྟར་ལ། བྱེ་བྲག་ཏུ་ཆུ་བུར་ཅན་ནི་ཁ་བའི་བུ་ཡུག་ཆེན་པོ་རླུང་གིས་ཕྱོགས་བཞི་ནས་བཏབ་སྟེ་ལུས་ལ་ཕོག་པས་ཆུ་བུར་བྱུང་ཞིང་འཁུམ་པའོ། །
ཆུ་བུར་རྡོལ་བ་ནི་དེ་ལས་རྣག་ཁྲག་འཛག་པའོ། །ཨ་ཆུ་ཟེར་པ་ནི་སྡུག་བསྔལ་ཆེར་སོང་བས་སྐད་ཀྱི་གདངས་དྲག་པོར་འདོན་པའོ། །ཀྱི་ཧུད་ཟེར་བ་ནི་སྡུག་བསྔལ་དེ་བས་ཆེར་སོང་བས་སྐད་ཀྱི་གདངས་ཆག་སྟེ་རྐན་གྱི་ཕུག་ནས་འདོན་པའོ། །སོ་ཐམ་ཐམ་པ་ནི་སྡུག་བསྔལ་སྔར་ལས་ཀྱང་ཇེ་ཆེར་འཕེལ་བས་སྐད་འདོན་མ་ནུས་པར་སོ་ཐམ་ཐམ་བྱེད་པའོ། །ཨུཏྤལ་ལྟར་གས་པ་ནི་རླུང་ཆེན་པོས་བཏབ་པས་ཁ་དོག་སྔོ་ཞིང་སེར་ཆུང་ཕྲ་མོ་ཁ་དྲུག་ཏུ་གས་པའོ། །པདྨ་ལྟར་གས་པ་ནི་པགས་པ་སྔོན་པོ་རྣམས་ཞུས་ཏེ་ཤའུ་དམར་ཧུ་རེ་བ་ཚལ་བ་བཅུར་གས་པའོ། །པདྨ་ལྟར་ཆེར་གས་པ་ནི་མདོག་སྔོན་མ་ལྟར་ལ་སེར་ཁ་བརྒྱའམ་དེ་བས་ཀྱང་མང་པ་སྟེ། སྐྱེས་རབས་ལས། མེད་པར་ལྟ་བ་ཚེ་རབས་ཕྱི་མ་ལ། །གནས་པ་དེ་ན་མུན་ནག་རླུང་གྲང་ལྡང་། །དེ་ནི་རུས་པའང་འཇིག་པའི་ནད་སློང་ན། །བདག་ལ་ཕན་འདོད་སུ་ཞིག་དེ་རུ་འཇུག །ཅེས་སོ། །སྡུག་བསྔལ་དེ་ཡང་མ་ག་ངྷའི་བྲེ་བོ་ཆེའི་ཁལ་བརྒྱད་ཅུ་འགྲོ་བའི་ཏིལ་གྱི་བང་བ་ནས་ལོ་བརྒྱ་བརྒྱ་ན་ཏིལ་རེ་ཕྱུང་བས་དེ་ཟད་པའི་ཚེ་ཆུ་བུར་ཅན་གྱི་ཚེ་ཚད་དུ་བཤད་པ་སོགས་ལ་ལུས་འདར་བ་དང་ཡིད་སྐྱོ་ཤས་ཀྱི་སྣང་བ་དྲག་ཏུ་བསྐྱེད་དོ། །དེ་ལྟར་དམྱལ་བ་ཚ་གྲང་གི་སྡུག་བསྔལ་བཅུ་དྲུག་པོ་འདི་རྒྱུད་ཐོག་ཏུ་ཁེལ་ངེས་ཤེས་པའི་འདི་སྡུག་བསྔལ་ལ་ཡིད་འབྱུང་སྐྱེས་ན་ཉེ་འཁོར་དང་ཉེ་ཚེ་བའི་དམྱལ་བ་སོགས་རྒྱས་བཤད་རྣམས་ལ་ཤུགས་ཀྱིས་ཡིད་འབྱུང་གི་མྱོང་བ་ཐོན་འོང་བས། ཧ་ཅང་རྒྱས་པར་མི་སྤྲོ་ན་འདི་ཙམ་གྱིས་ཆོག་གསུང་། ཟླ་བ་གཉིས་ཙམ་གྱི་ལོང་ཡོད་ན་ཉེ་འཁོར་ཉེ་ཚེའི་སྡུག་བསྔལ་གྱི་དམིགས་སྐོར་སྤྲོས་ཏེ་མཛད་པ་ཡི་གེའི་ཚོགས་ཀྱིས་འཇིགས་ཏེ་མ་བཀོད་པས་གཞན་ལས་
ཤེས་པར་བྱའོ། །གཉིས་པ་དུད་འགྲོའི་སྡུག་བསྔལ་བསམ་པ་ནི་བཤེས་སྤྲིངས་ལས། དུད་འགྲོའི་སྐྱེ་གནས་ན་ཡང་གསོད་པ་དང་། །བཅིང་དང་རྡེག་སོགས་སྡུག་བསྔལ་སྣ་ཚོགས་པ། །ཞི་གྱུར་དགེ་བ་སྤངས་པ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པ། །ཞེས་དུད་འགྲོ་ལ་བྱིངས་དང་ཁ་འཐོར་བ་གཉིས་སུ་ས་སྡེ་ལས་བཤད་པའི་བྱིངས་ན་གནས་པ་ནི་རི་རབ་ཀྱི་ཆུ་མཚམས་མན་ཆད་ཀྱི་ཁོངས་སུ་ཡོད་དེ་ལུས་ཀྱི་ཆེ་ཆུང་སོགས་མ་ངེས་པ་སྣ་ཚོགས་འབྲུའི་ཕུང་པོ་ལྟར་སྤུངས་པ་རྣམས་ནི་ཆེ་བས་ཆུང་བ་ཁྱུར་མིད་དང་ཆུང་བས་ཆེ་བའི་ལུས་འབུགས་པ་དང་། གཞན་དག་མུན་པ་ཤིན་ཏུ་གནག་པས་ལག་པ་བརྐྱངས་བསྐུམས་ཙམ་ཡང་མི་མཐོང་བ་དང་། རྒྱ་མཚོར་གནས་པའི་ཆུ་སྲིན་སོགས་ནི་གནས་དང་བཟའ་བཏུང་དང་གྲོགས་ལ་ངེས་པ་མེད་པའོ། ཁ་འཐོར་བའི་རི་དྭགས་རྣམས་ནི་ལིངས་པ་དང་ཁྱི་དང་གཅན་གཟན་སོགས་ཀྱིས་དབང་མེད་དུ་འདེད་པ། བདག་ཏུ་བཟུང་བ་རྣམས་ནི་གསོད་རྡེག་བཀོལ་བ། གཞན་ཡང་ཀླུའི་རིགས་རྣམས་ནི་བྱེ་ཚན་དང་མཁའ་ལྡིང་གི་འཇིགས་པ།སྲོག་ཆགས་ཕྲ་མོ་རྣམས་ནི་རྐྱེན་ཅུང་ཟད་ཙམ་གྱིས་འཆི་བ་སོགས་དང་། མཐའ་དག་ཀྱང་བླང་དོར་མི་ཤེས་པའི་རང་བཞིན་ཅན་ཏེ། རང་ཉིད་བཤད་མ་ཐག་པའི་དུད་འགྲོ་དེ་དག་ཅི་རིགས་པར་སྐྱེས་པ་དང་སྡུག་བསྔལ་གྱི་མྱོང་ཚུལ་སོགས་ཀྱི་ཉམས་ལེན་མྱོང་བ་སྐྱེ་ངེས་སུ་བསྒོམ། ཚེའི་ཚད་ནི་རིང་བ་རྣམས་བསྐལ་པ་ཙམ་ནས། ཐུང་པ་ཉིན་ཞག་ཀྱང་ཡོད་པས་མཐའ་གཅིག་ཏུ་མ་ངེས་སོ། །གསུམ་པ་ཡི་དྭགས་ཀྱི་སྡུག་བསྔལ་ནི་བཤེས་སྤྲིངས་ལས། ཡི་དྭགས་ན་ཡང་འདོད་པས་ཕོངས་པ་ཡིས། །བསྐྱེད་པའི་སྡུག་བསྔལ་རྒྱུན་ཆགས་མི་འཆོས་པ། །བཀྲེས་སྐོམ་གྲང་དྲོ་ངལ་དང་
འཇིགས་པ་ཡིས། བསྐྱེད་པ་ཤིན་ཏུ་མི་བཟད་བསྟེན་འཚལ་ལོ། །ཞེས་ཡི་དྭགས་ལ་རིགས་གསུམ་དུ་ཡོད་པར་བཤད་པའི་ཕྱིའི་སྒྲིབ་པ་ཅན་ནི་ལྗོན་པའི་འབྲས་བུ་དང་ཆུ་ཀླུང་སོགས་མཐོང་སྟེ་ལོངས་སྤྱོད་པར་ཕྱིན་པ་ན་མཚོན་ཆ་ཐོགས་པས་སྲུང་བའམ་རྣག་ཁྲག་སོགས་སུ་མཐོང་བའོ། ། ནང་གི་སྒྲིབ་པ་ཅན ་ནི་གྲོང་ཁྱེར་སེར་སྐྱ་ཞེས་བྱ་བ་ཆུ་དང་རྩི་ཤིང་སོགས་འདོད་པའི་དངོས་པོ་ཅི་ཡང་མེད་པ་དེར་ཟས་སྐོམ་མི་རྙེད་པ་དང་། །ཅུང་ཟད་རྙེད་ཀྱང་ཁབ་མིག་མགྲིན་པ་རྟ་རྔ་ལྟོ་བ་རི་རབ་ཡན་ལག་འཇག་མ་ལྟ་བུར་གྱུར་པའི་དབང་གིས་ཟས་ཁར་མི་ཤོང་། ཉུང་ཟད་སོང་བ་རྣམས་མགྲིན་པ་ནས་མི་ཐར། ཐར་ཀྱང་ལྟོ་བ་མི་ཁེངས་པས་སྡུག་བསྔལ་བའོ། །ཟས་སྐོམ་གྱི་སྒྲིབ་པ་ཅན་ནི་ཟས་སྐོམ་རྣམས་ཀྱང་མེ་འབར་ནས་ལུས་འཚིག་པ་དང་། བཤང་གཅི་དང་རང་ཤ་ཟ་བས་ཉམ་ཐག་པའོ། །གཞན་ཡང་ས་ག་ཟླ་བའི་རེག་བྱ་ཚ་ཞིང་དགུན་ཉི་མ་གྲང་བ། བལྟས་པ་ཙམ་གྱིས་ཆུ་ཀླུང་བསྐམས་ཏེ་ངམ་གྲོག་ཏུ་འཆར་བ་སོགས་བཀྲེས་སྐོམ་གྱི་སྡུག་བསྔལ་སྣ་ཚོགས་མྱོང་བ་དེ་དག་ཏུ་བཤད་མ་ཐག་པའི་ཡི་དྭགས་དེ་འདྲའི་གཟུགས་སུ་རང་ཉིད་སྐྱེས་པར་བསམས་ཏེ་རྒྱུད་ཐོག་ཏུ་ཁེལ་ངེས་ཤེས་པ་ཞིག་བསྒོམ་མོ། །སྡུག་བསྔལ་དེ་ཡང་ཡུན་ཐུང་ངུ་ཙམ་མ་ཡིན་པར་མི་ལོ་ཆིག་ཁྲི་ལྔ་སྟོང་མྱོང་དགོས་པར་བཤད་པ་སོགས་ལ་རྗེས་སུ་དཔགས་ཏེ་བསམས་ན་ངེས་འབྱུང་བཅོས་མིན་སྐྱེ་བར་སྣང་། དོན་ཧྲིལ་གྱི་དྲིལ་ན་ད་ལྟ་རང་རེ་རྣམས་ཇ་ཕོར་བ་གང་འཐུང་ཡུན་ཙམ་ཞིག་ལག་པ་མེ་དོང་དུ་འཇུག་པ། དགུན་གྲང་སྒང་ལ་ཞག་གཅིག་ཙམ་གཅེར་བུ་བྱེད་པ། ཞག་གསུམ་བཞི་ཙམ་བཟའ་བཏུང་ཡེ་མེད་པ། ས་རྡོ་མང་པོ་སྤུངས་པའི་འོག་ཏུ་
འགུལ་སྐྱོད་མི་ནུས་པར་གནས་དགོས་པ་ལྟ་བུ་བྱུང་ན་བཟོད་བསྲན་མི་ཐུབ་པ་མངོན་སུམ་གྱིས་གྲུབ་པ་དེ་ལྟར་ན་ངན་སོང་གསུམ་གྱི་སྡུག་བསྔལ་བཟོད་ག་ལ་ནུས་པས་མགོན་པོ་ཀླུ་སྒྲུབ་ཀྱིས། ཐོབ་དཀའ་འཛམ་གླིང་མི་ཡི་ལུས། །དེ་ཐོབ་དུས་སུ་ངན་སོང་རྒྱུ། །རབ་ཏུ་བསྒྲིམས་ཏེ་བཅད་པར་བྱ། །ཞེས་ད་རེས་མི་དང་དུད་འགྲོའི་ཁྱད་པར་འབྱེད་པའི་དུས་འདིར་སྙིང་རུས་བསྐྱེད་དགོས་སྙམ་པའི་རང་ལ་ཡང་ཡང་ལྕག་གིས་བྲབ་པར་བྱའོ། །སྨྲས་པ། ཚ་སྲེག་རབ་འབར་ལྕགས་ཀྱི་ཁང་པའི་ནང་། །བཅད་གཏུབས་གཙིར་བའི་ཁྲག་གི་ཆུ་ཀླུང་འབབ། །དབང་པོའི་སྒོ་ནས་ལྷབ་ལྷབ་མེ་འབར་བའི། །ཚུལ་འདིར་མི་འཇིགས་སྙིང་ལ་གདོན་གྱིས་བརླམས། །མུན་ནག་གངས་རིའི་སྦུབས་ཀྱི་འཐོར་རླུང་ཁྲོད། །གྲང་རེག་རྣོན་པོའི་མཚོན་གྱིས་ཉམ་ཆུང་ལུས། །བརྒྱ་སྟོང་མང་པོར་གས་ཀྱང་མི་འཆི་བའི། །བྱེད་པོ་མི་དགེའི་དགྲ་འདིས་རྟག་ཏུ་མནར། །རྨ་འབྲས་ནད་ཀྱི་ཟུག་གཟེར་ཆུང་ངུ་ཡང་། །མི་བཟོད་བཞིན་དུ་ཤ་རུས་པགས་པའི་ཆེད། །གསོད་ཅིང་ཟ་བའི་སྡུག་བསྔལ་མཐའ་མེད་ལ། །སྙིང་རྩ་མི་འདར་སེམས་མེད་བེམ་པོའམ་ཅི། །ད་ལྟའི་ཚེ་ཐུང་འདི་ཡི་ཟས་སྐོམ་དོན། །ངལ་བར་ནུས་ན་མི་ལོ་ཁྲི་ལྔ་སྟོང་། །མི་བཟད་བཀྲེས་སྐོམ་གདུང་བ་སེལ་སླད་དུ། །ལུས་སྲོག་འདོར་ནུས་སྙིང་རུས་བསྐྱེད་ཀྱང་ཆུང་། །བཟོད་དཀའ་ངན་འགྲོའི་གཡང་ལ་བ་སྤུའི་རྩེ། །འགུལ་བ་ཙམ་གྱི་ཡ་ང་མ་མཆིས་ཀྱང་། །དགྲ་འདུལ་གཉེན་སྐྱོང་འདི་སྣང་ཆོས་བརྒྱད་ལ། །སྤྱང་གྲུང་ཁུར་འཛིན་ཁྱོད་ལས་བླུན་པ་སུ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་འཇིག་རྟེན་ཕྱི་མར་བདེ་བའི་ཐབས་བསྟེན་པ་ལ་བསྟན་པ་ལ་འཇུག་པའི་སྒོ་སྐྱབས་སུ་འགྲོ་བ། །
བདེ་ལེགས་ཐམས་ཅད་ཀྱི་རྩ་བ་ལས་འབྲས་སྒོམ་པ་གཉིས། དང་པོ་ལ་དངོས་དང་། བསླབ་བྱ་གཉིས། དང་པོ་ནི་སྤྱོད་འཇུག་ལས། ཇི་ལྟར་མཚན་མོ་མུན་ནག་སྤྲིན་རུམ་ན། །གློག་འགྱུ་སྐད་ཅིག་རབ་སྣང་སྟོན་པ་ལྟར། །དེ་བཞིན་སངས་རྒྱས་མཐུ་ཡིས་བརྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་འབྱུང་། །དེ་ལྟས་དགེ་བ་ཉམ་ཆུང་ཉིད་ལ་རྟག །སྡིག་པ་སྟོབས་ཆེན་ཤིན་ཏུ་མི་བཟད་པ། །ཞེས་ཉེས་དམིགས་ལ་འཇིགས་པ། ཡོན་ཏན་ལ་དད་པ། རང་འདྲའི་འགྲོ་བ་ལ་སྙིང་རྗེ་གསུམ་གྱི་སྒོ་ནས་བསམ་པ་ལ་དམ་པའི་ཆོས་ཀྱི་སྒྲ་ཙམ་མི་ཐོས་པའི་མུན་བསྐལ་ནི་མཚན་མོ་སྤྲིན་ནག་འཁྲིགས་པའི་སྨག་རུམ་ལྟ་བུ་ནས་ཆོས་དང་མཇལ་རྒྱུ་ཡོད་པའི་སྒྲོན་བསྐལ་ནི་མུན་རུམ་དེ་ན་གློག་འཁྱུག་པ་བཞིན་དུ་དཀོན་པས་སྔོན་ཆད་སྡིག་པ་རྒྱ་མཚོ་ཆེན་པོ་ཙམ་ནས་དགེ་བ་ཀུ་ཤའི་རྩེས་ཆུ་ཐིགས་བླངས་པ་ལྟར་སྟོབས་ཤིན་ཏུ་ཆུང་བའི་སྟེང་དུ་ཚེ་འདིར་ཡང་ཆོས་པའི་མིང་གཟུགས་ཀྱི་བློ་བྲིད་ཀྱིས་གཞན་མགོ་བསྐོར་བ་ལས་གསུང་རབ་དང་རང་སེམས་སྤྱོད་ཚུལ་རྣམས་ཞུས་དག་བཏང་ན་མི་དགེ་བའི་ཕྱོགས་ཆེས་མང་བར་གདའ། དེ་ཡང་རང་ལ་དགྲ་མ་རུང་བ་ཞིག་ཡོད་དོགས་པ་ལས་མྱུར་དུ་འོང་བའི་གཏམ་དང་དགྲ་དེའི་དཔའ་ནུས་ཚུར་ལུས་སྲོག་ལོངས་སྤྱོད་ལ་ཇི་ལྟར་གནོད་སོགས་ཀྱི་རྒྱུ་མཚན་ཡང་མ་ངེས་ན་དེ་ལ་འཇིགས་པ་དང་ཟོན་བྱེད་པ་མི་འོང་ལ། དགྲ་དེ་བྱུང་ན་རྨེག་མེད་དུ་འཇོམས་པ་དང་། དུས་ཀྱང་ལོ་གཅིག་ཚུན་ལ་འོང་ངེས་ཤིང་དེའི་བར་ལ་ནམ་འོང་ཆ་མེད་པར་ཤེས་ན་དལ་བར་སྡོད་པ་སྐད་ཅིག་མི་ནུས་པར། ཕ་རོལ་གྱི་དགྲ་ལས་སྟོབས་མངའ་ཐང་ཆེ་ངེས་ཀྱི་དཔོན་ཞིག་འཚོལ་ཞིང་གྲོགས་སུ་སྦྲན་ནམ།
མཁར་བཙན་པོ་བཟོའམ། དེས་མི་སླེབ་པའི་ཐག་རིང་དུ་འགྲོ་བ་སོགས་སྟ་གོན་གང་རུང་བྱེད་པ་ལྟར་དགྲ་ངན་སོང་གི་སྡུག་བསྔལ་ཟེར་བ་དེ་ལོ་བརྒྱ་ཚུན་ལ་འོང་བར་ཤེས་ཤིང་། ཟླ་བ་རྟིང་མ་དང་མནར་མེད་ཀྱི་དམྱལ་བ་གཉིས་གང་སྔ་མི་ཤེས་པས་འཆི་བ་མི་རྟག་པ་དང་ངན་འགྲོའི་ངང་ཚུལ་ལ་གོང་དུ་མྱོང་བས་ཐོན་པའི་དབང་གིས་སྐྱབས་གནས་ཤིག་འཚོལ་བ་ལས་འོས་མི་འདུག །སྐྱབས་ཡུལ་ཡང་སློབ་དཔོན་ཕྱོགས་གླང་གིས། གཏིང་མཐའ་མེད་པའི་འཁོར་བ་ནི། །རྒྱ་མཚོའི་ནང་ན་རྣམ་པར་གནས། །འདོད་ཆགས་ལ་སོགས་མི་བཟད་པའི། །ཆུ་སྲིན་གྱིས་ནི་ལུས་ཟོས་པས།དེ་རིང་གང་ལ་སྐྱབས་སུ་མཆི། །ཞེས་འཁོར་བ་འདི་རྒྱ་མཚོ་ལྟར་གཏིང་ཟབ་ཅིང་། །འདོད་ཆགས་ལ་སོགས་པ་མི་དགེ་བའི་ཆུ་སྲིན་གདུག་པ་ཅན་གྱིས་གཙེས་པར་ཆུད་པའི་རང་རེ་སྐྱེ་རྒུ་རྣམས་གང་ལ་སྐྱབས་སུ་འགྲོ་ཞེས་དྲི་བའི་ཚུལ་དུ་གསུངས་པ་ལ་ལན་གྱི་ཚུལ་དུ་བསྟོད་པ་བརྒྱ་ལྔ་བཅུ་པ་ལས། །གང་ཞིག་ལ་ནི་ཉེས་པ་ཀུན། །གཏན་ནས་ཡོང་ཡེ་མི་མངའ་ཞིང་། །གང་ལ་རྣམ་པ་ཐམས་ཅད་དུ། །ཡོན་ཏན་ཐམས་ཅད་གནས་གྱུར་པ། །གལ་ཏེ་སེམས་ཤིག་ཡོད་ན་ནི། །དེ་ཉིད་ལ་ནི་སྐྱབས་འགྲོ་ཞིང་། དེ་བསྟོད་དེ་ནི་བཀུར་བ་དང་། །དེ་ཡི་བསྟན་ལ་གནས་པར་རིགས། །ཞེས་དགྲ་ཟླ་ལས་སྟོབས་དང་ཁ་དོག་ཆུང་བ་ཞིག་གིས་རང་ཕ་རོལ་གྱི་དགྲ་དེའི་འཇིགས་པ་ལས་སྐྱོབ་མི་ནུས་པ་བཞིན་ཚངས་པ་དང་ཁྱབ་འཇུག་དང་དབང་ཕྱུག་སོགས་ལྷ་མི་མཐུ་བོ་ཆེ་ལ་བརྟེན་ཀྱང་ཁོང་རང་རྣམས་འཁོར་བ་ལས་མ་ཐར་བར་འཁོར་བའི་ཉེས་པས་མནར་བཞིན་པ་ཡིན་པས་གཏན་གྱི་སྐྱབས་སུ་མི་འོས། གང་འོས་ན། སྐྱབས་འགྲོ་བདུན་ཅུ་པར། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་དཀོན་མཆོག་གསུམ་
གཏན་གྱི་སྐྱབས་སུ་གསུངས་པ་ནི་བཤད་མ་ཐག་པའི་སྐྱོན་དང་བྲལ་ཞིང་ཡོན་ཏན་དང་ལྡན་པས་བསླུ་བ་མེད་པར་ངེས་པ་རྙེད་ནས་སྐྱབས་སུ་འགྲོ་བ་ལ། འགྲོ་ཚུལ་གྱི་དམིགས་སྐོར་མང་ཡང་འདྲ་བཅོས་རྒྱས་བཀབ་ཀྱི་རང་བཟོ་མེད་པའི་ཆོས་འདི་གའི་ལུགས་སྲོལ་གྱི་བཞེད་པ། དཔེ་ལ་བསྟོད་པ་ལས། ཁྱོད་སྐུ་མཚན་གྱིས་སྤྲས་གྱུར་པ། །མཛེས་གྱུར་མིག་གི་བདུད་རྩི་ནི། །སྤྲིན་མེད་སྟོན་གྱི་ནམ་མཁའ་ལ། །སྐར་མའི་ཚོགས་ཀྱིས་སྤྲས་པ་འདྲ། །ཞེས་པ་ལྟར་བསམ་དགོས་པས་སངས་རྒྱས་ཀྱི་སྐུ་སྒོམ་ཚུལ་ཡང་གསང་སྔགས་ཀྱི་སྐབས་སུ་སྒོམ་པའི་མདུན་དུ་དམ་ཚིག་པ་བསྐྱེད་པ་ལྟ་བུའི་ཆེད་དུ་གསལ་བཏབ་པ་དེ་འདྲ་མ་ཡིན་པར། དཔེར་ན་ཁྲོམ་དང་ཚོང་འདུས་ཆེན་པོར་ཕྱིན་པ་ན་བྲོ་ཤོན་ལ་སོགས་པའི་ལྟད་མོ་སྣ་ཚོགས་དང་རྒྱན་ཆ་ལུགས་དང་འཁོར་གཡོག་གི་མཛེས་པ་སོགས་གང་ཟག་མཆོག་དམན་རང་བློ་འཇུག་པའི་རིགས་མཐོང་བ་ན། སླར་གནས་དེ་མ་ཡིན་པའི་གཞན་དུ་སླེབ་པའི་དུས་དྲན་ཤེས་ཀྱིས་གསོས་བཏབ་པའི་ཚེ་དེ་རྣམས་ཀྱི་བྱད་དབྱིབས་རྒྱན་ཆ་ལུགས་སྤྱོད་ལམ་སོགས་མིག་གིས་མཐོང་རྒྱུ་ཡོད་པ་ལྟ་བུར་བཀྲ་ལམ་གྱི་འཆར་བ་ཡིན་གྱི། དེ་རྣམས་མདུན་གྱི་ཐད་ལྟ་བུར་ཆེད་གཉེར་སྒོམ་པའི་སྣང་བ་མི་འཆར་བཞིན་དུ་འདིར་ཡང་དེ་བཞིན་གཤེགས་པའི་བྲིས་འབུར་གྱི་སྐུ་གཟུགས་ལ་ཡང་ཡང་བལྟས་ཤིང་། སེམས་ཀྱིས་དེ་བཞིན་གཤེགས་པ་དེ་སྐུ་མདོག་གསེར་བཙོ་མ་ལྟ་བུ་ན་བཟའ་ཆོས་གོས་གསུམ་དང་ལྡན་པ་མཚན་དང་དཔེ་བྱད་ཀྱིས་སྤྲས་པ་ལྟ་བས་ཆོག་མི་ཤེས་པ་ཞིག་ཡོད་པ་འདུག་གོ་སྙམ་དུ་གསོས་བཏབ་པ་ན་སྔར་མིག་ཤེས་ཀྱི་ཡུལ་དུ་གྱུར་པ་དེས་རྐྱེན་བྱས་ནས་གསལ་ལམ་ལམ་པ་འཆར་བས་དེའི་ཚེ་མཐོང་ན་མི་མཐུན་པ་མེད་ཅིང་མཐོང་
བ་ཙམ་གྱིས་དོན་དང་ལྡན་པར་བྱེད་ནུས་པ་དེ་ལྟ་བུ་བྱང་ཆུབ་སེམས་དཔའ་མན་ཆད་ལ་མེད་པའི་སངས་རྒྱས་ཀྱི་སྐུའི་ཡོན་ཏན་ཕུལ་དུ་བྱུང་བར་འདུག་སྙམ་པའི་དད་པ་ལྷང་ལྷང་བ་དང་། དངོས་སུ་མཇལ་རྒྱུ་བྱུང་ན་སྙམ་པའི་གདུང་བ་དང་། སངས་རྒྱས་རྗེས་སུ་དྲན་པ་འདི་ལྟ་བུ་བསོད་ནམས་ཆེ་སྙམ་པའི་སྤྲོ་བ་རྣམས་ཤུགས་དྲག་པོ་མ་བྱུང་གི་བར་དུ་བསྒོམ། དེ་བཞིན་དུ་གསུང་གི་ཡོན་ཏན་ནི་བདེན་པ་པོའི་ལེའུ་ལས། འདི་ལྟར་སེམས་ཅན་ཀུན་གྱིས་ངེས་པའི་ཚིག །མང་པོ་དག་གིས་དུས་གཅིག་ཞུ་ཞུས་ན། །སེམས་ཀྱི་སྐད་ཅིག་གཅིག་ལ་ཐུགས་ཆུད་ནས། །གསུང་དབྱངས་གཅིག་གིས་སོ་སོར་ལན་ཡང་འདེབས། །དེ་ལྟ་བས་ན་འདྲེན་པ་འཇིག་རྟེན་ན། །ཚངས་པའི་སྒྲ་དབྱངས་གསུང་སྒྲོག་མཁྱེན་པར་མཛོད། །དེ་ནི་ལྷ་མིའི་སྡུག་བསྔལ་མཐར་འབྱིན་པའི། །ཆོས་ཀྱི་འཁོར་ལོ་རབ་ཏུ་བསྐོར་བར་མཛད། །ཅེས་པ་ལྟར་བསམ་དགོས་ཀྱང་སངས་རྒྱས་ཀྱི་གསུང་དང་འདྲ་བའམ་དེའི་དཔེར་འོས་པ་ཞིག་དངོས་སུ་ཐོས་པའི་སྐལ་བ་ཕྲ་བས། ད་ལྟ་པི་ཝང་ལྟ་བུ་རང་གི་བློ་འགྲོ་བའི་སྒྲ་སྙན་པ་ཞིག་ལས་རྗེས་སུ་དཔགས་ཏེ། གོང་གི་སྐུ་ཤིན་ཏུ་མཛེས་པའི་སངས་རྒྱས་དེའི་མགུར་ལས་འོངས་པའི་གསུང་གི་སྒྲ་སྙན་པ་ཡན་ལག་དྲུག་ཅུ་རྩ་བཞིའི་དབྱངས་ཅན། ཁམས་གསུམ་གྱི་སེམས་ཅན་ཐམས་ཅད་ཀྱིས་དུས་གཅིག་ཏུ་དྲི་བ་ཞུས་ན། ལེགས་སྦྱར་གྱི་སྐད་ལྟ་བུ་གཅིག་གི་སྒོ་ནས་བསྟན་པའི་དྲི་ལན་དེ་འགྲོ་བ་སོ་སོའི་སྐད་དུ་ཤར་ཏེ་ཐེ་ཚོམ་ཅིག་ཅར་དུ་སེལ་བ་སོགས་སྔར་བཞིན་དད་གདུང་སྤྲོ་གསུམ་གྱི་སྒོ་ནས་ཉམས་སུ་མྱོང་བར་བྱ། ཐུགས་ཀྱི་ཡོན་ཏན་ནི་བསྔགས་འོས་བསྔགས་བསྟོད་ལས། ཁྱོད་འབའ་ཞིག་གི་ཡེ་ཤེས་ཀྱིས། །ཤེས་བྱ་མཐའ་དག་ཁྱབ་ལགས་ཀྱི། ཁྱོད་ལས་གཞན་པ་ཐམས་ཅད་
ཀྱི། །ཤེས་བྱ་ཁོ་ན་ལྷག་པ་ལགས། །ཞེས་མཁྱེན་པའི་ཡོན་ཏན་ཆོས་མཐའ་དག་ལ་ལྐོག་ཏུ་མ་གྱུར་པས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་གདུལ་བྱའི་དབང་པོ་འཚམ་པར་རྗེས་སུ་འཛིན་པ་ལ་མཁས། བརྒྱ་ལྔ་བཅུ་པ་ལས། འགྲོ་བ་འདི་དག་ཐམས་ཅད་ནི། ཁྱད་མེད་ཉོན་མོངས་རྣམས་ཀྱིས་བཅིངས། ཁྱོད་ནི་འགྲོ་བའི་ཉོན་མོངས་དག །དགྲོལ་སླད་ཡུན་རིང་ཐུགས་རྗེས་བསྡམས། །དང་པོར་ཁྱོད་ལ་ཕྱག་བགྱིའམ། །འོན་ཏེ་གང་གིས་འཁོར་བར་ཁྱོད། །སྐྱོན་མཁྱེན་ཡུན་རིང་དེ་ལྟ་བུར། །བཞུགས་མཛད་ཐུགས་རྗེ་ཆེ་ལ་བགྱི། །ཞེས་སེམས་ཐམས་ཅད་ལ་རྗེས་སུ་བརྩེ་བའི་ཐུགས་རྗེ་ཆེན་པོས་བསྡམས་པས་གཡས་ནས་ཙན་དན་གྱི་ལྡེ་གུ་བྱུགས་པ་དང་གཡོན་ནས་སྟ་གྲིས་བཞོགས་པ་ལ་ཡང་ཉེ་རིང་མི་མངའ་བའི་ཕྱིར་ན་སེམས་ཅན་ཀུན་ལ་མ་རང་གི་བུ་གཅིག་པུ་ལ་བརྩེ་བ་ལྟ་བུ་མངའ་ཚུལ་སོགས་ལ་ཡང་སྔར་ལྟར་བསམ། འཕྲིན་ལས་ནི་བརྒྱ་ལྔ་བཅུ་པ་ལས། ཁྱོད་ཀྱིས་ཉོན་མོངས་གཞོམ་པར་བཤད། བདུད་ཀྱི་གཡོ་དག་བསྟན་པར་མཛད། །འཁོར་བའི་རང་བཞིན་མི་བཟད་བརྗོད། །འཇིགས་པ་མེད་པའི་ཕྱོགས་ཀྱང་བསྟན། །ཕན་དགོངས་ཐུགས་རྗེ་ཅན་གྱིས་ནི། །སེམས་ཅན་རྣམས་ལ་བགྱི་འཚལ་བ། །གང་ཞིག་ཁྱོད་ཀྱིས་མ་མཛད་པ། །གཞན་ཀོ་ཅི་ཞིག་མཆིས་ལགས་ཀྱེ། །ཞེས་སེམས་ཅན་ལ་བརྩེ་བ་ཙམ་ཉན་རང་སོགས་ལ་ཡང་ཡོད་མོད། ཡོད་པ་ཙམ་གྱིས་མི་ཕན་པ་དཔེར་ན་མ་ལག་ཞ་མའི་བུ་ཆུས་ཁྱེར་ན་གྲོགས་གཞན་ལ་ར་མདའ་སྒྲན་ནས་འདོན་དགོས་པ་ལྟར་ལ། སངས་རྒྱས་ནི་འགྲོ་བ་རྣམས་སྒྲོལ་བའི་ནུས་མཐུ་ཡོངས་སུ་རྫོགས་པས་གཞན་ཕན་དུ་འགྱུར་ན་དམྱལ་བའི་མེ་དོང་ཡང་འདོད་ལྡན་མཐོ་རིས་ཀྱི་དགའ་ཚལ་དུ་འཇུག་
པ་ལྟར་སྤྲོ་བ་དང་བཅས་ཏེ་ཐོགས་པ་མེད་པར་དོན་མཛད་ཚུལ་རྣམས་སྔར་ལྟར་བསམ།དེ་ལྟ་བུའི་སྐུ་གསུང་ཐུགས་ཀྱི་ཡོན་ཏན་དེ་ནི་རྒྱུ་མེད་པ་དང་མི་མཐུན་པའི་རྒྱུ་ལས་བྱུང་བ་མ་ཡིན་ཏེ། འགོག་པ་དང་ལམ་གྱི་བདེན་པ་བརྗོད་བྱའི་གཙོ་བོར་བྱས་ནས་སྟོན་པའི་ལུང་གི་ཆོས་དཀོན་མཆོག་ལ་ཐོས་བསམ་བྱས་པས་རྟོགས་པའི་ཆོས་དཀོན་མཆོག་སྤངས་རྟོགས་ཀྱི་ཡོན་ཏན་བདེན་པ་གཉིས་མངོན་དུ་མཛད་པ་ལ་ངེས་ཤེས་རྙེད་ནས་ཆོས་དཀོན་མཆོག་ལ་དམིགས་པའི་དད་པ་བཅོས་མིན་མ་བྱུང་བར་དུ་བསྒོམ། དགེ་འདུན་དཀོན་མཆོག་ནི་བྱམས་འཇམ་དབྱངས་སྤྱན་རས་གཟིགས་ལ་སོགས་པ་བྱང་ཆུབ་སེམས་དཔའ་རྣམས་དང་། འོད་སྲུང་ཆེན་པོ་མཆོག་ཟུང་གཉིས་ལ་སོགས་པ་ཉན་ཐོས་ཀྱི་དགེ་འདུན་དཀོན་མཆོག་རྣམས་ལ་སྔར་ལྟར་སྐུ་གསུང་ཐུགས་ཀྱི་མཛད་པ་རྣམས་ལེགས་པར་དྲན་པར་བྱས་ཏེ། འདི་དག་རྣམས་ཀྱིས་སངས་རྒྱས་ཀྱི་ཡོན་ཏན་དངོས་མ་ཐོབ་ཀྱང་བདེན་པ་གཉིས་ཉམས་སུ་ལེན་ཅིང་སྐྱབས་སྒྲུབ་པའི་ཟླ་གྲོགས་མཛད་པར་འདུག་སྙམ་པའི་ཡོན་ཏན་རྣམས་བསམ་མོ། །དེ་ལྟར་དང་བའི་དད་པ་ཁྱད་པར་ཅན་དང་ལྡན་པར་མ་ཟད་མངོན་འདོད་ཀྱི་བློ་གལ་ཆེ་བ་དཔེར་ན་འཇིག་རྟེན་གྱི་དཔོན་དེས་དགྲའི་གནོད་པ་ལས་སྐྱོབ་ཅིང་། སྨན་པ་མཁས་པས་འདུ་བ་འཁྲུགས་པའི་འཇིགས་པ་བསལ་ཡང་རང་དེ་དག་གི་གོ་འཕང་འཐོབ་རྒྱུ་མིན་ལ། ཁ་དྲག་དང་གསོ་དཔྱད་ཀྱིས་ཡིད་ཕྲོགས་ཏེ་བདག་ཀྱང་དེ་ལྟ་བུ་ཞིག་བྱུང་ན་སྙམ་པའི་བློ་སྐྱེ་བ་ཙམ་ནི་མི་སྲིད་པའི་ངེས་པ་ཅི་ཡོད། སྐྱེས་བུ་ཆུང་ངུ་ཁོ་ན་ལ་རང་དཀོན་མཆོག་གི་གོ་འཕང་ཐོབ་པ་མིན་ཡང་། དེའི་ཐུགས་རྗེས་གནས་སྐབས་ཀྱི་སྡུག་བསྔལ་ལས་སྐྱོབ། སྲིད་པའི་བདེ་བ་ལ་སྦྱོར་བ་ཉེ་ཚེ་བའི་སྐྱབས་ཀྱིས་སྐྱོབ་པ་ལྟར་ལ། འབྲིང་གི་སྐབས་སུ་ཡུལ་ཉན་རང་གང་རུང་གི་སློབ་
པ་དང་མི་སློབ་པའི་རྟོགས་པའི་ཡོན་ཏན་མངོན་དུ་བྱེད་པའི་ཚུལ་གྱི་སྒོ་ནས་སྐྱོབ་དགོས་ཤིང་། སྐྱེས་བུ་ཆེན་པོ་ལ་གནས་སྐབས་ཀྱི་སྐྱབས་བྱང་ཆུབ་སེམས་དཔའི་ལམ་དང་སྐྱབས་མཐར་ཐུག་རྣམ་པ་ཐམས་ཅད་མཁྱེན་པ་མངོན་དུ་བྱེད་པའི་ཚུལ་གྱིས་སྐྱབས་གནས་སུ་འཛིན་དགོས་པས་འདུལ་བ་རྒྱ་ཆེར་འགྲེལ་ལས། སངས་རྒྱས་ལ་སྐྱབས་སྟོན་པ་པོ། ཆོས་ལ་སྐྱབས་དངོས། དགེ་འདུན་ལ་སྐྱབས་སྒྲུབ་པའི་ཟླ་གྲོགས་སུ་བཟུང་བར་བཤད་པ་ལྟར། དེ་ལྟ་བུའི་གོ་འཕང་དེ་དག་གིས་ཀྱང་མངོན་དུ་བྱ་སྙམ་པའི་བསམ་པ་ཡང་ཡང་གསལ་གདབ། འོ་ན་སྐབས་འདིར་སྐྱེས་བུ་ཆེན་པོ་གཙོ་ཆེ་བས་མི་གནས་པའི་མྱང་འདས་ལ་སྐྱབས་དངོས་ཞུ་ན། ཉན་རང་གི་མྱང་འདས་དང་དགེ་འདུན་ལ་སྐྱབས་སུ་བཟུང་བར་དགོས་པ་ཅི་ཡོད་སྙམ་ན། དམིགས་བསལ། ས་གཉིས་པ་ཐོབ་པའི་བྱང་སེམས་དེས། ས་དང་པོའི་སྤངས་རྟོགས་ཀྱི་ཆོས་དང་དགེ་འདུན་ལ་སྐྱབས་སུ་འགྲོ་མི་དགོས་པ་དེ་ཉིད་རྒྱུ་སྐྱབས་སུ་གྱུར་པས་ཆུ་བོའི་འཇིགས་པ་ལས་སྒྲོལ་བའི་ཟམ་པ་ལྟར་བྱེད་ནའང་། རང་རེ་ལམ་དུ་མ་ཞུགས་པ་རྣམས་ཀྱིས་ཐེག་པ་གསུམ་གའི་སྐྱབས་གནས་ལ་སྐྱབས་སུ་འགྲོ་དགོས་པས་གསུང་རབ་ཀྱི་གནད་མ་གོ་བའི་ཅལ་ཅོལ་གྱི་རྗེས་སུ་མི་འབྲང་ངོ་། །དཀོན་མཆོག་གསུམ་གྱི་ཡོན་ཏན་ལ་དད་ཅིང་ཐོབ་འདོད་ཡོད་པ་རྒྱུ་མཚན་དུ་བྱས་ཏེ། སྐྱིད་སྡུག་ཅི་བྱུང་ཡང་ཁྱེད་ཤེས་སྙམ་པའི་བློ་ལིངས་བསྐྱུར་ཡིད་ཆེས་ཀྱི་མོས་གུས་ཤིག་མེད་ན་ཁུག་པའམ་ཨ་ལོང་ལྟ་བུ་མེད་པ་ལ་ལྕགས་ཀྱུས་འདྲེན་མི་ནུས་པ་བཞིན། དཀོན་མཆོག་ཐུགས་རྗེ་ཆེ་ཡང་ཐབས་ཤེས་ཡ་བྲལ་དུ་འགྲོ་བས་བཤད་མ་ཐག་པའི་ཡོན་ཏན་དྲན་ལ་ཡོན་ཏན་ཐོབ་འདོད་མོས་
པ་རྣམས་ཕན་ཚུན་འགྲན་བཞིན་པའི་ངང་ནས་སེམས་ཅན་རྣམས་ལའང་སྙིང་རྗེ་ཆེན་པོའི་ཀུན་སློང་དང་བཅས་ཏེ། བདག་སོགས་སེམས་ཅན་རྣམས་ཀྱི་དོན་དུ་ཐུགས་རྗེ་ཆེན་པོའི་གཞན་དབང་གིས་བྱ་འཕུར་པ་ལྟར་བྱོན་པར་བསམས་ཏེ་འདི་ལྟར་བརྗོད་འཚལ། རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །བདག་འཁོར་བ་དང་ངན་སོང་གི་སྡུག་བསྔལ་ལས་སྒྲོལ་བའི་སྟོན་པ་མཛད་དུ་གསོལ། འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །བདག་འཁོར་བ་དང་ངན་སོང་གི་འཇིགས་པ་ལས་སྒྲོལ་བའི་སྐྱབས་དངོས་མཛད་དུ་གསོལ། ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་འཁོར་བ་དང་ངན་སོང་གི་སྡུག་བསྔལ་ལས་སྒྲོལ་བའི་གྲོགས་མཛད་དུ་གསོལ། ཞེས་པའི་ཚིག་འཕྲེང་བ་ལྟ་བུར་གྲངས་སུ་བཅུག་སྟེ་ཐུན་རེ་ལ་བརྒྱ་རྩ་སོགས་ཇི་ལྟར་ནུས་པ་བརྗོད། སྔར་བཤད་པའི་སྐྱབས་འགྲོའི་ཚིག་བརྗོད་ཀྱང་རུང་མོད་འདིར་གསེར་ཞུན་ལས་བྱུང་བ་ལྟར་ངེས་ཅན་དུ་བདག་གི་བླ་མ་མཛད་དོ། །གཉིས་པ་ནི། དེ་ལྟར་ཐུན་དངོས་གཞི་ལ་སྐྱབས་སུ་སོང་བས་མི་ཆོག་པར། ཐུན་མཚམས་རྣམས་སུ་བསླབ་བྱ་ལ་ལེགས་པར་སློབ་དགོས་ཏེ། སངས་རྒྱས་ལ་སྐྱབས་སུ་སོང་བས་འཇིག་རྟེན་གྱི་ལྷ་མཐུ་བོ་ཆེ་ལ་གཏན་གྱི་སྐྱབས་མི་འཆོལ། ཆོས་ལ་སྐྱབས་སུ་སོང་བས་སེམས་ཅན་རྣམས་ལ་གནོད་འཚེ་སྤང་། དགེ་འདུན་ལ་སྐྱབས་སུ་སོང་བས་དཀོན་མཆོག་གསུམ་ལ་ཡིད་མི་ཆེས་པའི་མི་ལ་གཏན་གྱི་གྲོགས་མི་འཚོལ་བ་དེ་དགག་པའི་བསླབ་བྱ་གསུམ། སངས་རྒྱས་ཀྱི་སྐུ་གཟུགས་བཟོ་དང་རྒྱུ་ངན་པ་ལའང་སངས་རྒྱས་སུ་མོས། གསུང་རབ་ཀྱི་ཡི་གེ་ཚིག་བཞི་པ་ཡན་ཆད་ལའང་ཆོས་དཀོན་མཆོག་ཏུ་མོས། རབ་ཏུ་བྱུང་
བའི་རྟགས་ཙམ་འཛིན་པ་ལའང་དགེ་འདུན་དཀོན་མཆོག་ཏུ་མོས་པའི་སྒོ་ནས་སྒོ་གསུམ་གྱི་མི་གུས་པ་སྤང་ཞིང་། མཆོད་བསྟོད་བཀུར་བར་བྱེད་པ་ནི་སྒྲུབ་པའི་བསླབ་བྱ་གསུམ་སྟེ། ཚུལ་བཞིན་ཉམས་སུ་བསྟར་པ་ལ་བརྟེན་ནས་འདི་ཕྱི་ཀུན་གྱི་རྒུད་པ་མ་ལུས་པ་སེལ་ཞིང་ཕན་བདེ་ལེགས་ཚོགས་ཀུན་གྱི་འབྱུང་གནས་དམ་པར་འགྱུར་པ་ལགས་སོ། །སྨྲས་པ། གློག་ལྟར་མི་བརྟན་ཚེ་འདིར་བདེ་ཐབས་སུ། ཁ་དྲག་དཔོན་འཚོལ་གུས་པ་ལྷུར་ལེན་པ། །འདུན་མའི་ཡང་རྩེར་སོན་པའི་དགའ་བ་དང་། །དེ་ལ་ཡིད་སྨོན་བྱེད་རྣམས་མཐོང་བའི་ཚེ། །བཟོད་དཀའ་ངན་འགྲོའི་འཇིགས་ལས་སྐྱོབ་པའི་མགོན། །བསླུ་མེད་རིན་ཆེན་རྣམ་གསུམ་དགྱེས་པའི་འཛུམ། །ལྷུག་པར་སྟོན་པའི་གནད་འགག་འདི་འདྲ་དང་། །མཇལ་བ་སྔར་བསགས་བསོད་ནམས་བྱེ་བས་བསྐྲུན། །སྔོན་ཆད་མི་དགེའི་མཐུ་ཡིས་ངན་སོང་དུ། །མི་བཟད་སྡུག་བསྔལ་མྱོང་བ་དེས་ཆོག་མེད། །ད་ནི་སྙིང་ལ་རུས་པ་ལེགས་བཅུག་སྟེ། །མངོན་མཐོའི་རྟེན་བཟང་སྒྲུབས་ཤིག་ཤེས་ལྡན་ཀྱེ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་བདེ་ལེགས་ཐམས་ཅད་ཀྱི་རྩ་བ་ལས་འབྲས་བསྒོམ་པ་ནི། དལ་འབྱོར་རྙེད་དཀའ་དང་འཆི་བ་མི་རྟག་པ་ངན་སོང་གི་སྡུག་བསྔལ་གསུམ་དྲན་པས་ཆོས་བྱེད་སྙམ་པའི་བློ་ཙབ་ཙུབ་ཅིག་ཡོད་ཀྱང་། ཆོས་བྱེད་ལུགས་ཀྱི་གནད་ཅིག་མ་གོ་ན་ཆོས་ཀྱི་མཐུན་རྐྱེན་དུ་མིང་གིས་བཏགས་པའི་ཟས་གོས་ལོངས་སྤྱོད་ལ་ཆོག་མི་ཤེས། དེའི་ཆེད་དུ་སྡིག་པ་སྣ་ཚོགས་བསགས་ཏེ་ཆོས་བརྒྱད་ཁྲོ་བོ་འབའ་ཞིག་གིས་དུས་འདའ། འགའ་ཞིག་ལྟོ་གོས་གཏམ་གསུམ་ལ་གྱོང་བཀུར་པས་ལུས་ཀྱི་མི་དགེ་བ་གསུམ་ཅུང་ཟད་མགོ་ནོན་ནའང་།
གཞན་བདུན་པོ་ཁོ་ནའི་དབང་དུ་སོང་སྟེ་ཆོས་བརྒྱད་དཀར་པོ་འབའ་ཞིག་གིས་དུས་འདས་ཏེ་སྒོ་གསུམ་སྡིག་ལྟུང་གིས་མ་སྦགས་པ་ཞིག་མི་འབྱུང་། དེ་ལ་བརྟེན་ནས་ཤི་བའི་འོག་ཏུ་ལས་དཀར་ནག་ལུས་ཀྱི་གྲིབ་མ་བཞིན་དུ་འབྲང་བས་རིན་ཆེན་འཕྲེང་བ་ལས། མི་དགེ་བ་ལས་སྡུག་བསྔལ་ཀུན། །དེ་བཞིན་ངན་འགྲོ་ཐམས་ཅད་དོ། །དགེ་ལས་བདེ་འགྲོ་ཐམས་ཅད་དང་། །སྐྱེ་བ་ཀུན་ཏུ་བདེ་བ་དག །ཅེས་དཀར་ནག་གི་ལས་འབྲས་མི་བསླུ་བར་གསུངས་ཤིང་། གསུང་བ་པོ་སྔར་སྐྱབས་འགྲོའི་སྐབས་སུ་རང་ཉིད་ལ་དད་པའི་ཉམས་མྱོང་ཚད་མ་སྐྱེས་པའི་སངས་རྒྱས་བཅོམ་ལྡན་འདས་ཀྱིས་གསུངས་པས་ཏིང་ངེ་འཛིན་རྒྱལ་པོ་ལས། ཟླ་བ་སྐར་མར་བཅས་པ་གནས་ལྷུང་ཞིང་། །རི་དང་གྲོང་དུ་བཅས་པའི་ས་ཞིག་ལ། །ནམ་མཁའི་ཁམས་ནི་རྣམ་པ་གཞན་གྱུར་ཀྱང་། ཁྱོད་ནི་མི་བདེན་པ་ཡི་ཚིག་མི་གསུང་། ཞེས་སངས་རྒྱས་ཀྱིས་རྫུན་གསུང་བ་ནི་རྣམ་པ་ཐམས་ཅད་དུ་མེད་སྙམ་པའི་ལས་རྒྱུ་འབྲས་ལ་ཡིད་མི་ཕྱེད་པའི་དད་པ་ཞིག་མ་བྱུང་གི་བར་དུ་བསམ་དགོས་ལ། རང་ཉིད་ལ་དངོས་སུ་ལུས་ལ་ནད་དང་སེམས་ལ་སྡུག་བསྔལ་མེད་ཅིང་དགྲ་གདོན་གྱི་འཚེ་བ་དང་བྲལ་བ་མཐུན་རྐྱེན་འཛོམ་པ་སོགས་ཡོད་པའི་སྐབས་སམ། ཡང་ན་དེའི་བཟློག་ཕྱོགས་སམ། དེ་ཉིད་སྤེལ་བ་ལྟ་བུ་གསུམ་པོ་གང་རུང་ལས་འོས་མ་འདས་པས་རང་ལ་སྣང་ཚུལ་ཇི་ལྟར་ཡོད་པ་དེ་ཉིད་གསལ་བཏབ་ནས་བདེ་སྡུག་གི་སྣང་བ་ལྷང་ལྷང་བ་མ་ཤར་གྱི་བར་དུ་བསྒོམ། དེ་ནས་མདོ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་པ་ད་ལྟ་ཚ་བས་གདུངས་པ་ན་རླུང་བསིལ་པོ་ལུས་ལ་ཕོག་པ་ཡན་ཆད་ཀྱི་བདེ་བ་དང་། ཚེར་
མ་ཕྲ་མོས་རྨ་ཕྱུང་ཡན་ཆད་ཀྱི་སྡུག་བསྔལ་ནི་རང་གིས་སྔར་བྱས་པའི་དགེ་སྡིག་གི་འབྲས་བུ་ཁོ་ནར་འདུག །དེ་ཡང་ཚེ་སྔོན་མ་དགེ་བ་ཞིག་བསགས་པའི་མཐུས་འཕངས་པའི་མི་ལུས་འདི་ལྟ་བུ་ཐོབ་ནའང་། མི་དགེ་བ་བསགས་པས་རྫོགས་པའི་སྡུག་བསྔལ་འདི་དང་འདི་ཞེས་བྱ་བ་འདུག་གོ་སྙམ་དུ་རང་ཐོག་ཏུ་བསམ། དེ་བཞིན་དུ་དུད་འགྲོ་གནས་སྐབས་སུ་བདེ་བ་དང་ལྡན་པ་ཞིག་ལ་ཁ་ཕར་བལྟས་ཏེ་འཕེན་བྱེད་མི་དགེ་བས་འཕངས་པའི་ལུས་ཐོབ་ཀྱང་རྫོགས་བྱེད་དགེ་བས་རྫོགས་པའི་ལུས་འདི་ལྟ་བུ་ཐོབ་འདུག་གོ་སྙམ་པའི་མངོན་སུམ་དུ་ཉམས་སུ་མྱོང་བ་དང་། ལས་སྟོབས་ཅན་གཅིག་གིས་ལུས་མང་པོ་འཕེན་པ་དང་། ལས་སྟོབས་ཆུང་མང་པོས་ལུས་གཅིག་འཕེན་ཚུལ་དཔེར་ན་ཕྱུག་པོ་གཅིག་གིས་མཆོད་གནས་མང་པོར་ཞབས་ཏོག་བྱེད་པ་དང་དབུལ་པོ་མང་པོས་མཆོད་གནས་གཅིག་ལ་ཞབས་ཏོག་བྱེད་པའི་རྗེས་དཔག་གི་ཚུལ་ལ་ཡིད་ཆེས་ཀྱི་ངེས་པ་དྲངས་ཏེ། ད་ལྟ་འདེམ་ཁ་བྱུང་ན་ལྷའི་བདེ་བ་ཙམ་ལ་ལོངས་སྤྱོད་རྒྱུ་བྱུང་ཡང་ངོམས་མི་ཤེས་ཤིང་སྡུག་བསྔལ་ཕྲ་མོ་ཙམ་ཡང་མི་བཟོད་པ་འདི་ལྟ་ན། སྔར་ངན་སོང་གི་སྡུག་བསྔལ་བཟོད་གླགས་མེད་པ་མྱོང་པའི་རྒྱུ་ནི་མི་དགེ་བ་ཡིན་པར་འདུག །དེ་མ་སྤངས་ན་མི་འདོད་བཞིན་དུ་འབྲས་བུ་སྡུག་བསྔལ་མྱོང་བ་ལས་འོས་མ་མཆིས། སྡུག་བསྔལ་སྤོང་བ་ལ་དེའི་རྒྱུ་སྤང་བྱའི་སྡིག་པ་དེ་ཡང་རྐུན་མ་མི་ཡིན་ཞེས་པ་ལྟ་བུ་ཙམ་གྱིས་མི་ཆོག་པར་བཅར་ཏེ་ངོས་ཟིན་དགོས་པས་མཛོད་ལས། དེ་ལས་ཆེ་ལོང་བསྡུས་ནས་ནི། །དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུར་གསུངས་སོ། །ཞེས་པ་ལྟར་སྡིག་པ་མི་དགེ་བ་བཅུར་འདུ་བ་ཡིན་པས་ལུས་ཀྱི་ལས་སྲོག་གཅོད་མ་བྱིན་ལེན་ལོག་གཡེམ། ངག་གི་ལས་
རྫུན་ཕྲ་མ་ཚིག་རྩུབ་ངག་ཀྱལ། ཡིད་ཀྱི་ལས་བརྣབ་སེམས་གནོད་སེམས་ལོག་ལྟ་རྣམས་ལས་སེམས་ཅན་གྱི་རིགས་གང་བསད་ཀྱང་སྲོག་གཅོད་ཀྱི་མི་དགེ་བ་ཡིན་ནའང་། དཔེར་མཚོན་ན་གཞི་ལྷས་བྱིན་ལྟ་བུ་བསམ་པའི་ཁྱད་པར་དེར་འདུ་ཤེས་ཤིང་ཉོན་མོངས་དུག་གསུམ་གང་རུང་གི་སྒོ་ནས་ཀུན་སློང་གསོད་པར་འདོད་དེ་སྦྱོར་བ་རང་ངམ་གཞན་བྱེད་དུ་བཅུག་པ་གང་རུང་གིས་མཚོན་ལྟ་བུ་བསྣུན་ནས་མཐར་ཐུག་ཕ་རོལ་པོ་ཤི་བ་ན་སྲོག་གཅོད་ཀྱི་མི་དགེ་བ་རྫོགས་པར་འགྱུར། འདུ་ཤེས་འཁྲུལ་བ་དང་གསོད་སེམས་མེད་པར་རྐང་འོག་ཏུ་ཆུད་དེ་ཤི་བ་དང་ཕ་རོལ་པོའི་སྔོན་དུ་རང་ཤི་བ་སོགས་ལ་བཤད་མ་ཐག་པའི་གཞི་བསམ་པ་སྦྱོར་བ་མཐར་ཐུག་ཚང་བའི་མི་དགེ་བར་མ་སོང་ཡང་སྲོག་གཅོད་ཀྱི་མི་དགེ་བའི་ཁོངས་སུ་གཏོགས་སོ། །མ་བྱིན་ལེན་ནི། གཞི་རང་མི་དབང་ཞིང་གཞན་གྱིས་བདག་ཏུ་བཟུང་པའི་གསེར་ལྟ་བུ་དེར་འདུ་ཤེས་ཤིང་ཉོན་མོངས་གང་རུང་གི་སྒོ་ནས་ཀུན་སློང་འབྲལ་བར་འདོད་དེ་སྦྱོར་བ་ཐབས་སྣ་ཚོགས་ཀྱིས་བླངས་པས་མཐར་ཐུག་ཐོབ་བློ་སྐྱེས་པའོ། །ལོག་གཡེམ་ནི། གཞི་གཞན་གྱིས་བདག་ཏུ་བཟུང་བ་དང་རང་གི་ཉེ་དུ་དང་ཁ་དང་བཤང་ལམ་སོགས་བགྲོད་བྱ་མིན་པ་དང་། རང་གི་ཆུང་མ་སོགས་བགྲོད་ཡུལ་ཡིན་ཡང་རྟེན་གྱི་དྲུང་དང་སྦྲུམ་མ་དང་བསྙེན་གནས་ལ་གནས་པ་ལྟ་བུ་ལ་དེར་འདུ་ཤེས་ཏེ་ཉོན་མོངས་གང་རུང་གི་སྒོ་ནས་ཀུན་སློང་མི་ཚངས་པར་སྤྱད་འདོད་ཀྱིས་སྦྱོར་བ་དེའི་དོན་ལ་བརྩོན་པས་མཐར་ཐུག་དབང་པོ་གཉིས་སྦྱོར་བ་སོགས་སོ། །རྫུན་དུ་སྨྲ་བ་ནི། གཞི་མངོན་ཤེས་མེད་པ་ལྟ་བུ་དེ་ཡོད་པར་སྨྲ་བའི་ཡུལ་ལ་འདུ་ཤེས་མེད་པ་ལ་ཡོད་པར་བསྒྱུར་ཏེ་ཉོན་མོངས་གང་རུང་གི་སྒོ་ནས་ཀུན་སློང་ཚུལ་དེ་སྨྲ་བར་འདོད་དེ་སྦྱོར་བ་ལུས་ངག་གང་རུང་གི་རྣམ་
འགྱུར་བསྟན་པས་མཐར་ཐུག་དོན་གོ་བའོ། །ཕྲ་མ་ནི། གཞི་གང་ཟག་གཉིས་ལྟ་བུ་ལ་དེར་འདུ་ཤེས་ཤིང་ཉོན་མོངས་གང་རུང་གི་སྒོ་ནས་ཀུན་སློང་དབྱེ་བར་འདོད་དེ་སྦྱོར་བ་འབྱེད་ནུས་ཀྱི་ཚིག་སྨྲས་པ་མཐར་ཐུག་དོན་གོ་བའོ། །ཚིག་རྩུབ་ནི་གཞི་ཡིད་དུ་མི་འོང་བའི་འགྲོ་བ་ལ་དེར་འདུ་ཤེས་ཤིང་ཉོན་མོངས་གང་རུང་གི་སྒོ་ནས་ཀུན་སློང་ངག་རྩུབ་པོ་སྨྲ་བར་འདོད་དེ་སྦྱོར་བ་ཕ་རོལ་པོའི་སྙིང་ལ་བསྣུན་པའི་མི་སྙན་པ་བརྗོད་པས་མཐར་ཐུག་དོན་གོ་བའོ། །ངག་བཀྱལ་ནི་གཞི་སྔོན་མ་གསུམ་པོ་གང་རུང་དུ་མི་གཏོགས་པའི་དོན་མེད་དང་ལྡན་པའི་དོན་ལ་དེར་འདུ་ཤེས་ཏེ་ཉོན་མོངས་གང་རུང་གི་སྒོ་ནས་ཀུན་སློང་བྱུང་རྒྱལ་དུ་སྨྲ་བར་འདོད་པས་སྦྱོར་བ་ཕྱི་རོལ་པའི་བསྟན་བཅོས་དང་བྲམ་ཟེའི་གསང་སྔགས་འདོན་པ། རྒྱལ་བློན་དམག་རྐུན་པོ་སོགས་འདུ་འཛིའི་གཏམ་སྨྲ་བ། ཆགས་སེམས་ཀྱིས་གླུ་དང་ཟློས་གར་ཚིག་བརྗོད་པ། དགེ་སྦྱོང་དག་རྙེད་པ་བཙལ་བའི་ཕྱིར་གཞན་ལ་ཁ་གསག་སྨྲ་བར་བརྩམས་ནས་མཐར་ཐུག་སྨྲས་ཟིན་པའོ། །བརྣབ་སེམས་ནི་གཞི་གཞན་གྱི་ནོར་ལ་དེར་འདུ་ཤེས་ཤིང་རང་ནོར་ལ་ཆགས་སེམས་དང་གསོག་སེམས། གཞན་ནོར་ལ་རོ་མྱང་སེམས་དང་འཁུ་སེམས་ངོ་ཚ་དང་ཉེས་དམིགས་ཟིལ་གྱིས་གནོན་པའི་ཆོས་ལྔ་ལྡན་གྱི་ཉོན་མོངས་གང་རུང་གི་སྒོ་ནས་ཀུན་སློང་རང་ལ་བྱུང་ན་སྙམ་པའི་རྔམ་སེམས་ཀྱིས་སྦྱོར་བ་རང་ལ་འབྱུང་བའི་ཆེད་དུ་ཡིད་ཀྱིས་རྩོལ་བ་མཐར་ཐུག་དེར་སྨོན་པའོ། །གནོད་སེམས་ནི་གཞི་ཡིད་དུ་མི་འོང་བའི་སེམས་ཅན་ལ་དེར་འདུ་ཤེས་ཤིང་གནོད་བྱེད་ཀྱི་རྒྱུ་ལ་མཚན་མར་འཛིན་པའི་ཞེ་སྡང་གི་སེམས། གནོད་བྱེད་ལ་མི་བཟོད་པའི་སེམས། ཚུལ་མིན་ཡིད་བྱེད་ཡང་ཡང་དྲན་པས་ཁོན་འཛིན་གྱི་སེམས། བརྡེགས་
པ་དང་བསད་ན་ཅི་མ་རུང་སྙམ་པའི་འཁུ་སེམས། ངོ་ཚ་དང་ཉེས་དམིགས་ཟིལ་གྱིས་གནོན་པའི་སེམས་ལྔ་ལྡན་གྱི་ཉོན་མོངས་གང་རུང་གི་སྒོ་ནས་ཀུན་སློང་གསོད་བཅིང་སོགས་བྱ་འདོད་པའི་བློས་སྦྱོར་བ་སེམས་ཀྱིས་དེ་བྱེད་པར་རྩོལ་ཞིང་མཐར་ཐུག་དངོས་སུ་ནུས་ན་བྱེད་པར་ཐག་བཅད་པའོ། །བདག་ཚངས་པའི་གོ་འཕང་ཐོབ་ན་སྙམ་པ་དང་མི་འདི་ཤི་ན་སྙམ་པ་ལྟ་བུ་བརྣབ་སེམས་དང་། གནོད་སེམས་རྗེས་མཐུན་པ་ཡིན་གསུང་ངོ་། །ལོག་ལྟ་ནི་གཞི་ལས་འབྲས་ལྟ་བུ་དེ་མེད་པར་འདུ་ཤེས་ཤིང་ཉོན་མོངས་གང་རུང་གི་སྒོ་ནས་ཀུན་སློང་སྐུར་བ་འདེབས་པར་འདོད་པས་སྦྱོར་བ་ནི་བསམས་པ་ལྟར་མེད་པར་བསམས་ཏེ་མཐར་ཐུག་ཐག་བཅད་པའོ། །བཅུ་པོ་དེ་ལ་ཡང་ནང་གསེས་ཀྱི་ལྕི་ཡང་། བསམ་པ་ཉོན་མོངས་དྲག་པོས་ཀུན་ནས་བསླང་བ། །ཡུལ་བླ་མ་དང་ཕ་མ་ལྟ་བུ་བསད་པ། དེ་དག་གི་དཀོར་ཕྲོགས་པ། བསླུ་བ་དབྱེ་བ་ཚིག་རྩུབ་བརྣབ་སེམས་གནོད་སེམས་བྱེད་པ། གཞན་ཡང་དུད་འགྲོ་ལྟ་བུ་ལ་ལུས་བོངས་ཆེ་བ་གསོད་པ། དངོས་པོ་རིན་ཐང་ཆེ་ཞིང་མང་བ་རྐུ་བ། ཚངས་སྤྱོད་ལ་སོགས་བགྲོད་བྱ་མིན་པ་ལ་སྤྱོད་པ། དགེ་འདུན་འབྱེད་པའི་རྫུན་ཕྲ་མ་བྱེད་པ། དགྲ་བཅོམ་པ་འབྱུང་བ་མེད་པར་འདོད་པ། སྡིག་པ་ལ་བཤགས་སྡོམ་མེད་པར་དགའ་བཞིན་དུ་གོང་འཕེལ་དུ་བྱེད་པ་སོགས་རིགས་པས་རྗེས་སུ་དཔགས་ཏེ་ཤིན་ཏུ་ལྕི་ལ། དེའི་ལོག་ཕྱོགས་རྣམས་ནི་ལྟོས་ས་ལྟོས་འཇོག་གི་སྒོ་ནས་ཡང་བའོ། །དེ་ཡང་ས་བོན་སྣ་ཚོགས་བཏབ་ཀྱང་མྱུ་གུ་མི་འཆོལ་བར་འབྱུང་བ་བཞིན་སྡིག་པ་ཤིན་ཏུ་ལྕི་བས་རྣམ་སྨིན་གྱི་འབྲས་བུ་དམྱལ་བ། འབྲིང་གིས་ཡི་དྭགས། ཆུང་ངུས་དུད་འགྲོར་སྐྱེ། རྒྱུ་མཐུན་གྱི་འབྲས་བུ་སྲོག་གཅོད་ཀྱིས་ཚེ་ཐུང་། མ་བྱིན་ལེན་གྱིས་ལོངས་སྤྱོད་དབུལ། ལོག་གཡེམ་གྱིས་ཆུང་མ་བསྲུང་དུ་མི་བཏུག །རྫུན་གྱིས་མི་ཁ་སྡང་།
ཕྲ་མས་མཛའ་བཤེས་ཉུང་། ཚིག་རྩུབ་ཀྱིས་མི་སྙན་པ་མང་དུ་ཐོས། ངག་བཀྱལ་གྱིས་ཚིག་མི་བཙན། བརྣབ་སེམས་ཀྱིས་ཡིད་ཀྱི་རེ་བ་མི་འགྲུབ། གནོད་སེམས་ཀྱིས་འཇིགས་སྐྲག་ཆེ། ལོག་ལྟས་ཡང་དག་པའི་ལྟ་བ་ལ་རྨོངས་པར་འགྱུར། བདག་པོའི་འབྲས་བུ་ནི་སྲོག་བཅད་པས་བཟའ་བཏུང་དང་སྨན་གྱི་ནུས་པ་ཉམས། མ་བྱིན་ལེན་གྱིས་ལོ་འབྲས་ཉུང་ངུར་འགྱུར། ལོག་གཡེམ་གྱིས་གནས་འདམ་རྫབ་ཡ་ང་། རྫུན་སྨྲས་ནི་ཡུལ་དེར་བློ་བྲིས་དང་འཇིགས་པ་ཆེ། ཕྲ་མས་ནི་ས་ཕྱོགས་མི་སྙོམས་བགྲོད་དཀའ། ངག་རྩུབ་མོས་སྡོང་དུམ་དང་ཚེར་མ་སོགས་ཡིད་དུ་མི་འོང་། ངག་བཀྱལ་གྱིས་ལྗོན་ཤིང་ལ་འབྲས་བུ་མི་འཆགས། བརྣབ་སེམས་ཀྱིས་ཕུན་ཚོགས་ཐམས་ཅད་རིམ་གྱིས་འགྲིབ། གནོད་སེམས་ཀྱིས་ནད་འཁྲུག །མི་དང་མི་མིན་གྱི་འཚེ་བ་མང་། ལོག་ལྟས་ནི་བཟང་ངན་གོ་ལྡོག་པར་འགྱུར་བས་རྣམ་སྨིན་དང་རྒྱུ་མཐུན་ནི་གང་ཟག་རང་ལ་སྨིན་ཞིང་བདག་འབྲས་ནི་དེ་གནས་པའི་ཡུལ་དང་ས་ཕྱོགས་ལ་འབྱུང་ལ། དེ་ལ་ངེས་པ་དང་མ་ངེས་པ་གཉིས་ལས་མ་ངེས་པ་ནི་རྐྱེན་དང་མ་ཕྲད་ན་རྣམ་སྨིན་མི་འབྱིན་ཞིང་ཕྲད་ན་འབྱིན་པའི་སྐབས་ཤིག་ཀྱང་བཤད་མོད། ད་ལྟ་རང་རེ་རྣམས་ཀྱིས་བསགས་པའི་ལས་ཕལ་ཆེ་བ་ནི་དུག་གསུམ་དྲག་པོས་ཀུན་ནས་བསླང་བ་དང་། སྡིག་པ་རྒྱུན་ཆགས་སུ་བྱེད་པ། ཡུལ་ཁྱད་པར་ཅན་ལ་བསགས་པ་སོགས་ནས་མྱོང་བར་ངེས་པ་མང་ལ། དེ་ཡང་སློབ་དཔོན་དབྱིག་གཉེན་གྱིས། མཐོང་བའི་ཆོས་ལ་བསགས་པ་ལ། །མྱོང་འགྱུར་ལ་སོགས་ངེས་རྣམ་གསུམ། །ཞེས་གསུམ་དུ་ཡོད་པའི་དཔེར་ན་སྔོན་བྱུང་དུ་དགེ་འདུན་ལ་བུད་མེད་ཡིན་ཞེས་ངན་སྨྲས་བྱས་པས་ཚེ་དེར་མཚན་འགྱུར་བ་མཐོང་ཆོས་མྱོང་འགྱུར་སྐྱེ་བ་བརྒྱར་བུད་མེད་ཀྱི་ལུས་བླངས་
པས་སྐྱེས་ནས་དང་ལན་གྲངས་གཞན་ལ་མྱོང་འགྱུར་གཉིས་ཀ་ཚང་བའི་གཏམ་རྒྱུད་དང་། རང་ལ་ངན་སོང་དུ་སྐྱེ་ངེས་ཀྱི་ལས་ཤིག་ཡོད་ན་ཚེ་དེ་ལ་སྦྱོར་ལམ་བཟོད་པ་ཙམ་ཡང་འཐོབ་མི་ནུས། འདོད་ཁམས་སུ་སྐྱེ་ངེས་ཀྱི་ལས་ཤིག་ཡོད་ན་འདོད་ཆགས་དང་བྲལ་བའི་འབྲས་བུ་འཐོབ་མི་ནུས། འཁོར་བར་སྐྱེ་ངེས་ཀྱི་ལས་ཤིག་ཡོད་ན་ཚེ་དེར་འཁོར་བ་ལས་གྲོལ་མི་ནུས་པ་སོགས་བཤད་མ་ཐག་པའི་ལས་འབྲས་ཀྱི་རྣམ་གཞག་ངེས་པར་བྱས་ཏེ་རང་རྒྱུད་ཀྱི་དུག་གསུམ་དང་དེས་ཀུན་ནས་བསླང་བའི་སྲོག་གཅོད་མ་བྱིན་ལེན་སོགས་གང་ལ་མངོན་པར་དགའ་བརྟགས་ནས་གང་དགའ་བ་དེ་གའི་གཞི་ནས་བཟུང་མཐར་ཐུག་གི་བར་ཡིད་ངོར་འཆར་དུ་བཅུག་པ་ན་དགྲ་ལ་ཞེ་སྡང་དམར་ལམ་ལམ་པ་དང་། ཡུལ་སེམས་ཅན་དང་དངོས་པོ་ལྟ་བུ་ལ་འདོད་ཆགས་བརྩེ་དུང་དུང་བ་བྱུང་བ་ན་དྲན་ཤེས་ཀྱིས་ཚིར་གྱིས་གཟུང་། སྔོན་ཆད་ཤེས་བཞིན་གྱིས་མ་ཟིན་པའི་སྡིག་པ་མང་དུ་བསགས་ཡོད་འདུག་ཀྱང་བསགས་པ་ལ་བསགས་པར་ངོ་མ་འཕྲོད། ད་རེས་ཟིན་པས་ཁོ་ནམ་བྱུང་ཙ་ན་གཉེན་པོ་བསྟེན་ཐུབ་པ་ཞིག་བྱེད། དེ་ཙམ་གྱིས་མི་ཆོག་པར་དགེ་བ་སྒྲུབ་པ་ལ་བརྩོན་པར་བྱེད། དེ་ལ་ཡང་ངོས་ཟིན་དགོས་པས་མི་དགེ་བ་བཅུ་གོ་ལྡོག་པ་དེ་དགེ་བ་བཅུ་ཡིན་ལ། འབྲས་བུ་དགེ་བ་སྟོབས་ཆེན་གྱི་སྒོ་ནས་སྲོག་གཅོད་སྤངས་པས་རྣམ་སྨིན་གྱི་འབྲས་བུ་མི་ལུས་འཐོབ། རྒྱུ་མཐུན་གྱི་འབྲས་བུ་ཚེ་རིང་། བདག་པོའི་འབྲས་བུ་སྨན་མཐུ་ཆེ་བ་སོགས་ཀྱིས་མཚོན་ཏེ། མི་དགེ་བའི་འབྲས་བུ་རྣམས་གོ་ལྡོག་ཚུལ་དུ་ལེགས་པར་བསམས་ནས་མོས་པ་དང་སྤྲོ་བ་མ་བྱུང་གི་བར་དུ་བསྒོམ། དགེ་མི་དགེའི་ཚུལ་ལ་གནད་འགག་ཞིབ་མོར་དཔྱད་ན་གོང་གི་གཞི་བསམ་པ་སྦྱོར་བ་མཐར་ཐུག་གི་བར་ཐམས་ཅད་དགེ་སེམས་
ཁོ་ནས་ཟིན་པའི་སྦྱིན་གཏོང་ལྟ་བུ་གཅིག་པུ་དཀར་པོའི་ལས། གཞི་ནས་མཐར་ཐུག་གི་བར་མཐའ་དག་སྡིག་སེམས་ཀྱིས་ཟིན་ནས་རང་དོན་དུ་སྲོག་གཅོད་པ་ལྟ་བུ་གཅིག་ཏུ་གནག་པའི་ལས། མང་པོའི་སྲོག་སྐྱོབ་པའི་དོན་དུ་གང་ཟག་གཅིག་གསོད་པ་ལྟ་བུ་སྦྱོར་བ་སྲོག་བཅད་པའི་རྒྱུ་མི་དགེ་བའི་ལས་སྟོབས་ཆུང་དེས་རྒྱུ་མཐུན་གྱི་འབྲས་བུ་སྡུག་བསྔལ་བསྐྱེད་ཀྱང་། བསམ་པའི་ཁྱད་པར་དགེ་བའི་རྒྱུ་སྟོབས་ཆེ་བས་རྣམ་སྨིན་དང་བདག་འབྲས་བདེ་བར་འབྱིན་པས་ན་ལས་ནག་རྣམ་སྨིན་དཀར་བ་བླང་བྱ་དང་། མང་པོ་ཞིག་གསོད་པའི་བསམ་པས་མ་ཆགས་པའི་སྦྱིན་པ་གཏོང་བ་ལྟ་བུ་བསམ་པའི་ཁྱད་པར་མི་དགེ་བ་ཤུགས་ཆེ་བས་རྣམ་སྨིན་དང་བདག་འབྲས་སྡུག་བསྔལ་ཁོ་ན་འབྱིན་ཞིང་། རྒྱུ་མཐུན་གྱི་འབྲས་བུ་ཚེ་ཐུང་བ་དང་ལོངས་སྤྱོད་ཆེ་བའི་འབྲས་བུ་དཀར་ནག་འདྲེས་མར་ཡོད་པས་ལས་དཀར་རྣམ་སྨིན་ནག་པས་སྤང་དགོས་ཚུལ་སོགས་ལས་འབྲས་ཕྲ་མོ་ཡང་བསམ་ཞིང་བླང་དོར་བྱེད་པ་གནད་དུ་ཆེ། འོན་ཀྱང་སྒོམ་ཞྭ་པུས་འཁྱུད་དྲ་ཕད་ཀྱི་སྒྲིབ་ཤིང་དང་སྨིན་མ་གཟེངས་མཐོ་བའི་ལྟ་སྟངས་ཅན་ཕལ་ཆེར་ལ་ནི་དགེ་མི་དགེ་བཅུ་པོ་རགས་རིམ་ཙམ་ངོས་ཟིན་པའི་བླང་དོར་བྱུང་ཡང་སྐྱེན་པའི་ཚད་དུ་འདུག་གོ །ཁྱད་པར་དུ་ཡང་རྣམ་སྨིན་གྱི་ཡོན་ཏན་བརྒྱད་དང་ལྡན་པའི་ལུས་རྟེན་འཐོབ་པའི་ཐབས་་སུ་གཞན་གྱི་སྲོག་སྐྱོབ་པ། རྟེན་ལ་མར་མེ་འབུལ་བ། གཞན་ལ་བྲན་ལྟར་གུས་པ། སྦྱིན་པ་ལ་བརྩོན་པ། ངག་བག་དང་ལྡན་པ། རང་ལ་ཡོན་ཏན་སྣ་ཚོགས་འབྱུང་བར་སྨོན་ལམ་འདེབས་པ། འབྲས་བུ་མི་དབྱུང་ཞིང་བུད་མེད་ལ་ཉེས་དམིགས་སུ་བལྟ་བ། །གཞན་གྱིས་མི་ནུས་པ་རང་གིས་སྒྲུབ་པ་ལ་བརྩོན་པ་སོགས་ཀྱིས། ཚེ་ཁ་དོག་རིགས་དབང་ཕྱུག་ཕུན་སུམ་ཚོགས་པ།ཚིག་
བཙུན་པ། དབང་ཆེ་བ། །སྐྱེས་པ་དང་། སྟོབས་དང་ལྡན་པའི་ཡོན་ཏན་རྣམས་སྒྲུབ་པར་བྱེད་པ་ལ་སྔར་བཞིན་དུ་མོས་སྤྲོའི་བསམ་པ་ནན་ཏན་དུ་བྱ། དེ་ལྟར་དགེ་མི་དགེའི་ངོ་བོ་དང་འབྲས་བུ་རྣམས་དཔྱད་འཇོག་གཉིས་ཀའི་སྒོ་ནས་བསྒོམས་པའི་མཐར། བཤད་མ་ཐག་པའི་དགེ་བཅུ་སྒྲུབ་པ་དང་རྣམ་མཁྱེན་སྒྲུབ་པའི་རྟེན་བཟང་པོ་ཞིག་ཐོབ་པར་བྱེད་པ་ལ་སྔར་བཤད་པའི་མི་དགེ་བ་དེ་དག་གིས་མ་གོས་ཤིང་གསར་དུ་མི་གསོག་པ་ཞིག་ངེས་པར་དགོས་འདུག་ཀྱང་རང་གི་མངོན་སུམ་གྱིས་གྲུབ་པ་ཚེ་འདིར་ཡང་སྡིག་པ་དེ་ཙམ་ཞིག་བསགས། དེས་ཆ་ཙམ་དུ་ཡང་འགྲན་མི་ནུས་པའི་ཚེ་རབས་མང་པོར་རང་གཅིག་པུའི་ཆེད་ཙམ་དུ་མ་ཟད་དཔོན་གྲོགས་བུ་སྤུན་ཟླ་བུད་མེད་གཡོག་འཁོར་སྡེ་དགོན་སོགས་ཀྱི་དོན་དུ་སྡིག་པ་གྲངས་མེད་བསགས་པ་དེ། བཤེས་སྤྲིངས་ལས། ཁྱོད་ཀྱིས་བྲམ་ཟེར་དགེ་སློང་ལྷ་དང་ནི། །མགྲོན་དང་ཡབ་ཡུམ་དག་དང་བཙུན་མོ་དང་། །འཁོར་གྱི་སླད་དུའང་སྡིག་པ་མི་བགྱི་སྟེ། །དམྱལ་བའི་རྣམ་སྨིན་སྐལ་ནོད་འགའ་མ་མཆིས། །ཞེས་གཞན་གྱི་དོན་དུ་སྡིག་པ་བྱས་པ་རྣམས་རྣམ་སྨིན་མྱོང་ཚེ་ཡུལ་དེ་དག་དང་བགོ་བཤའ་བྱར་མེད་པར་རང་གཅིག་པུའི་ཐོག་ཏུ་འོང་ཞིང་མྱོང་ངེས་ཀྱི་ལས་ནི་བཟློག་ཏུ་མེད་པར་ཆོས་མངོན་པ་ལས་བཤད་འདུག་པས་ཇི་ལྟར་བྱས་ཀྱང་འཁོར་བ་ལས་ཐར་མི་ནུས་པ་འདྲ་སྙམ་དུ་ཡིད་བློང་བློང་པོར་གྱུར་པ་ན། ག་རེ་བདག་ཅག་གི་སྟོན་པ་ཐབས་མཁས་ཐུགས་རྗེ་ཅན་དེས་དྲང་ངེས་ཀྱི་ཆོས་མང་དུ་བཀའ་སྩལ་པའི་ཐེག་པ་འོག་མར་དེ་ལྟར་བཤད་ཀྱང་། ངེས་དོན་དུ་མཚམས་མེད་བྱས་པའི་སྡིག་པ་རྔམས་ཆེན་ཡང་བཤགས་སྡོམ་བྱས་པས་འདག་ནུས་པར་གསུངས་པས། བཤེས་སྤྲིངས་ལས། གང་ཞིག་སྔོན་ཆད་བག་མེད་གྱུར་པ་ལས། །ཕྱི་ནས་བག་དང་
ལྡན་པར་གྱུར་དེ་ཡང་། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་འཕྲེང་མཐོང་ལྡན་བདེ་བྱེད་བཞིན། །ཞེས་གཅུང་དགའ་བོ་ཆུང་མ་ལ་ཧ་ཅང་ཆགས་པ་དང་། སོར་འཕྲེང་གིས་མི་གཅིག་གིས་མ་ལོངས་པའི་སྟོང་བསད་པ། མ་སྐྱེས་དགྲས་ཡབ་གཟུགས་ཅན་སྙིང་པོ་བསད་པ་རྣམས་ཀྱང་བཤགས་སྡོམ་བྱས་པས་དག་ཅིང་སྔ་མ་གཉིས་ཀྱིས་དགྲ་བཅོམ་པ་ཐོབ་པ་དང་། བདེ་བྱེད་ཀྱིས་མ་བསད་ཀྱང་འགྱོད་སེམས་ཀྱིས་བླང་དོར་ཚུལ་བཞིན་བྱས་པས་དམྱལ་བར་དར་གྱི་ཕོ་ལོང་བརྡབས་པ་ཙམ་ཞིག་སྐྱེས་ནས་བཅོམ་ལྡན་འདས་ཀྱི་དྲུང་དུ་རྒྱུན་ཞུགས་ཀྱི་འབྲས་བུ་ཐོབ་པར་བཤད་པས་བདག་གིས་དེ་ཙམ་ཞིག་མ་ཐོབ་ཀྱང་ངན་འགྲོའི་སྒོ་ཁེགས་པ་ཞིག་བྱེད་སྙམ་པའི་ངེས་འབྱུང་དྲག་པོས་རྒྱུད་བསྐུལ་ཏེ་སྡིག་པ་བཤགས་པའི་ཡུལ་སྐུ་གསུང་ཐུགས་རྟེན་དགྲམ། དེ་དག་ལ་དཀོན་མཆོག་དངོས་ཀྱི་མོས་པ་བརྟན་པོ་བྱ། སྔར་བྱས་ཀྱི་སྡིག་པ་ལ་དུག་ཁོང་དུ་སོང་བ་ལྟ་བུའི་སུན་འབྱིན་པའི་འགྱོད་སེམས་དྲག་པོ་དང་། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་ཉེས་པ་ལས་སླར་ལྡོག་པའི་སྡོམ་སེམས་སྔོན་དུ་བཏང་ནས་དུག་གཞོམ་པའི་ཆེད་དུ་སྨན་དཀར་པོ་ཆིག་ཐུབ་བསྟེན་པ་ལྟར། རྗེ་བདག་ཉིད་ཆེན་པོས་མཛད་པའི་སྟོབས་བཞིའི་བཤགས་པ། གཞན་ཡང་འཕགས་པ་ཕུང་པོ་གསུམ་པའི་མདོ་ངན་སོང་དང་སྡིག་པ་སྦྱོང་པའི་གཟུངས་སྔགས་ཁྱད་པར་ཅན་དེ་བཞིན་གཤེགས་པའི་མཚན་བརྗོད་པ་སོགས་དང་བཅས་ཕྱག་འཚལ་བ་ནི་ལག་ལེན་དངོས་ཡིན་ནོ། །གཞུང་ཆེན་པོར་སུན་འབྱིན་པའི་སྐབས་སུ་གསེར་འོད་དམ་པའི་བཤགས་པ་གསུངས་པ་ནི་ཉེས་པ་རྣམས་སྔོ་བགྲང་བྱེད་པར་དགོངས་ཤིང་། གཉེན་པོ་ཀུན་སྤྱོད་ཀྱི་སྐབས་
མདོ་སྡེ་ཀློག་པ་སྐུ་གཟུགས་བཞེང་བ་མཆོད་པ་འབུལ་བ་སོགས་ནི་ཐུན་མཚམས་རྒྱུན་གྱི་སྤྱོད་ལམ་རྣམས་ལ་བྱ་བའི་དབང་དུ་མཛད། དེ་ཁོ་ན་ཉིད་ཀྱི་རྒྱས་འདེབས་པ་ནི་ཐུན་དངོས་དང་མཚམས་ཀྱི་ངེས་པ་མེད་ཀྱང་གང་ཟག་གི་བློ་རྣོ་རྟུལ་ལ་རག་ལུས་ལ། རབ་ཏུ་བྱུང་བ་ལྟ་བུ་ལ་དངོས་གཞིའི་ཚེ་ལྟུང་བ་ཕྱིར་བཅོས་པ་ཡང་བཤད་པས་སྤྱིར་བཏང་དམིགས་བསལ་ཕྱེད་པའི་སྒོ་ནས་ཉམས་སུ་ལེན་པ་ལགས་སོ། །སྨྲས་པ། སྐྱེ་བར་མ་རིག་སྟུག་པོའི་ལིང་ཐོག་གིས། །བླང་དང་དོར་བྱར་བལྟ་བའི་མིག་ལྡོངས་རྣམས། །བཞིན་རས་ནག་ནོག་གོས་ཀྱི་དྲི་མ་སོགས། །འཁྲུད་པར་བྱེད་པ་དོན་ཆེན་ཡིན་པར་རློམ། །ལ་ལ་བསགས་ཀྱང་འཛད་པ་ཟང་ཟིང་ནོར། །བྱ་ལམ་རྗེས་མེད་ཆུ་ཡི་རི་མོ་ལ། །དཀའ་བ་ཁྱད་དུ་བསད་ནས་སྒོ་གསུམ་གྱིས། །མི་བཟད་འབད་པ་དྲག་པོས་དཀའ་ཐུབ་བསྟེན། །རྨི་ལམ་ཡུལ་གྱི་བདེ་སྡུག་ཇི་བཞིན་དུ། །ལོང་མེད་ཚེ་འདིའི་དགྲ་འདུལ་གཉེན་སྐྱོང་སོགས། །ཆོས་བརྒྱད་གཡེང་བའི་ཁོལ་པོར་འཛད་པའི་ངང་། །མནར་མེད་དམྱལ་པའི་བུད་ཤིང་བྱས་ཀྱི་དོགས། །མི་ཤེས་བླུན་པོ་ཚེ་འདིའི་དོན་གྱི་ཆེད། །མི་དགེའི་ལས་ལ་འཇུག་པ་བདེན་མོད་ཀྱི། ཁོ་བོ་གསུང་རབ་མང་པོ་ཐོས་བཞིན་དུ། །གཏན་འདུན་རླུང་ལ་བསྐུར་བ་ངོ་རེ་གནོང་། ཀྭ་ཡེ་དཔྱིད་དུས་ས་བོན་གང་བཏབ་པའི། །སྟོན་ཀ་འབྲས་བུ་སོ་སོར་སྨིན་པ་བཞིན། །དཀར་ནག་རྒྱུ་ལས་བདེ་སྡུག་འབྲས་འབྱིན་པའི། །ཚུལ་འདི་བསམས་པའི་བླང་དོར་གནད་འགག་གཅེས། །འགྱོད་སྡོམ་སེམས་ཀྱིས་དཀོན་མཆོག་གསུམ་གྱི་དྲུང་། །སྡིག་ཚོགས་བཤད་ནུས་གཉེན་པོ་སྟོབས་བཞི་ཡིས། །ཡུན་རིང་གོམས་ཤིང་འདྲིས་པའི་ངན་སོང་གི།གནས་ངན་འདི་ཡི་རྒྱུ་ཚོགས་དྲུང་ནས་འབྱིན། །ཞེས་བྱ་བ་ནི་བར་
སྐབས་ཀྱི་ཚིགས་སུ་བཅད་པའོ། །