སྐྱེས་བུ་འབྲིང་དང་ཐུན་མོང་བའི་ལམ་གྱི་རིམ་པ་ལ་བློ་སྦྱོང་ཚུལ།
སྐྱེས་བུ་འབྲིང་དང་ཐུན་མོང་བའི་ལམ་གྱི་རིམ་པ་ལ་བློ་སྦྱོང་ཚུལ།འཇམ་དབྱངས་མགྲིན་འཁྱུད་སྨྲ་མཁས་ངག་གི་དབང་། །བརྩེ་ཆེན་ཕྱག་ན་པད་མའི་རང་གཟུགས་ཅན། །མཐུ་སྟོབས་གསང་བའི་བདག་པོའི་ངང་ཚུལ་གྱིས། །རིགས་གསུམ་སྒྱུ་དྲའི་གར་མཁན་ཙོང་ཁ་པ། ཁྱེད་གསུང་དང་པོའི་སྐྱེས་བུ་བློ་སྦྱོང་པའི། །ཐུན་མོང་ལམ་གྱི་རིམ་པའི་གནད་འགག་རྣམས། འཁྲུལ་མེད་ཚིག་ཉུང་དོན་རྒྱས་གོ་བདེ་བར། །ཡོངས་འཛིན་བླ་མའི་གསུང་བཞིན་བཤད་ཟིན་ནས། །སྡུག་ཀུན་འཁོར་བའི་རྒྱ་མཚོ་ཆེན་པོ་ལས། །བསྒྲལ་ནས་འགོག་ལམ་རིན་ཆེན་གླིང་མཆོག་ཏུ། །བགྲོད་བྱེད་རྒྱ་བོད་མཁས་པའི་ལེགས་བཤད་ཀྱི། །རྒྱུད་མར་གླུ་ལ་བློ་ལྡན་རྣ་བ་བློགས། །གཉིས་པ་སྐྱེས་བུ་འབྲིང་དང་ཐུན་མོང་བའི་ལམ་གྱི་རིམ་པ་ལ་བློ་སྦྱང་བ་ནི་ལམ་སྒྲོན་ལས། །སྲིད་པའི་བདེ་ལ་རྒྱབ་ཕྱོགས་ཤིང་། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །ཞེས་སྐྱེས་བུ་ཆུང་ངུ་ནི་མངོན་མཐོ་ལྷ་མིའི་གོ་འཕང་སོགས་དོན་དུ་གཉེར་བར་བྱེད་པ་ལས། ཚུལ་དེ་ཙམ་ཐོབ་བྱར་མི་འཇོག་པས་ལམ་བསླབ་པ་གསུམ་ལ་བརྟེན་ནས་འཁོར་བ་ལས་ཐར་བའི་ཞི་བདེ་ཙམ་དོན་དུ་གཉེར་བ་རྣམས་སྐྱེས་བུ་འབྲིང་དུ་བཤད་པས་ན་སྐབས་འདིར་ཞི་བ་ཙམ་དོན་དུ་མི་གཉེར་ཡང་རྣམ་པ་ཐམས་ཅད་མཁྱེན་པ་སྒྲུབ་པ་ལ་དེའི་སྔོན་དུ་ངེས་པར་ཐར་པ་ཐོབ་དགོས་པས་འབྲིང་དང་ཐུན་མོང་བའི་ལམ་གྱི་རིམ་པ་ཉམས་སུ་ལེན་པ་ལ་སླར་སྐྱེས་བུ་ཆུང་ངུའི་སྐབས་ཀྱི་ཉམས་ལེན་རྣམས་གོ་རིམ་མ་ལོག་པར་བྱས་པས་རེ་ཞིག་ངན་སོང་གསུམ་དུ་སྐྱེས་ཏེ་སྡུག་བསྔལ་གྱི་སྡུག་བསྔལ་མྱོང་མ་དགོས་པ་ནི་བཙོན་དོང་ནས་ཐར་བའི་མི་
བཞིན་དགའ་བ་ཁྱད་པར་ཅན་ཐོབ་ནའང་། མི་དེ་སླར་བཙོན་ཁང་དུ་མི་འཇུག་པའི་གདེངས་མེད་པ་ལྟར་ཚེ་འདིར་གཉེན་པོ་སྟོབས་བཞིའི་སྒོ་ནས་སྔར་བྱས་ཀྱི་སྡིག་པ་རྣམས་བྱང་ཞིང་གསར་དུ་མ་བསགས་ལ་དགེ་བ་བཅུ་བསྒྲུབས་པའི་མཐུས་སྐྱེ་བ་ཕྱི་མར་བདེ་འགྲོའི་ལུས་ཤིག་ཐོབ་ཀྱང་ཉོན་མོངས་མ་སྤངས་པའི་དབང་གིས་ཚེ་སྔོན་མ་ངན་སོང་གི་སྡུག་བསྔལ་ལ་འཇིགས་པའི་བློ་སོ་ན་མི་སྡོད་པར་མི་དགེ་བའི་ལས་གསར་དུ་མི་གསོག་པའི་ཆ་ག་ལ་ཡོད། གལ་ཏེ་བསགས་ན་སླར་ཡང་ངན་སོང་གི་གནས་སུ་ལྡོག་པས་ན་སྤྱོད་འཇུག་ལས། བདེ་འགྲོར་ཡང་དང་ཡང་འོངས་ཏེ། །བདེ་བ་མང་པོ་སྤྱད་སྦྱད་ནས། །ཤི་ནས་ངན་སོང་སྡུག་བསྔལ་ནི། །ཡུན་རིང་མི་བཟད་རྣམས་སུ་ལྷུང་། །ཞེས་དཔེར་ན་ཚ་རེག་གིས་མནར་བ་ན་རླུང་བསེར་བུའམ་འབབ་ཆུ་ལྟ་བུ་ལུས་ལ་ཕོག་ཏུ་བཅུག་པའི་ཚེ་རེ་ཞིག་བདེ་བ་སྐྱེ་ནའང་ཡུན་སོང་བ་དང་གྲང་བའི་སྡུག་བསྔལ་བསྐྱེད་པ་བཞིན་ཟག་བཅས་ཀྱི་བདེ་བ་མཐའ་དག་ནི་འགྱུར་བའི་སྡུག་བསྔལ་ཤ་སྟག་ཡིན་པས་གནས་སྐབས་ཀྱི་བདེ་བ་ལ་ཡིད་བརྟན་མི་རུང་བ་འདུག །ད་ལྟ་ལས་ཉོན་གཉིས་ཀྱིས་འཁོར་བ་འདིར་ཉིང་མཚམས་སྦྱོར་དུ་བཅུག་ནས་མངོན་པར་བཅིངས་པ་འདི་ལ་ངེས་པར་འབྱུང་བའི་བློས་འདོར་འདོད་ཀྱིས་བསམ་པ་དང་བཅས་ཏེ་འབད་པས་བསྒྲུབས་པས་བཅིངས་པ་ལས་རྣམ་པར་ཐར་པ་ནི་ཞི་བའི་གོ་འཕང་ཡིན་པས་འདི་ཉིད་དོན་དུ་གཉེར་བར་བྱེད་པ་ལ་འཁོར་བའི་སྡུག་བསྔལ་བསམ་པ། དེ་ལས་ཐར་བར་བྱེད་པའི་ལམ་ཉམས་ལེན་གྱི་རིམ་པ་བཤད་པ་དང་གཉིས། དང་པོ་ལ་སྡུག་བསྔལ་དང་ཀུན་འབྱུང་གི་སྒོ་ནས་བསམ་པ། རྟེན་འབྲེལ་བཅུ་གཉིས་ཀྱི་སྒོ་ནས་བསམ་པ་གཉིས། དང་པོ་ལ་སྡུག་བསྔལ་འཁོར་བའི་ཉེས་དམིགས་དང་། ཀུན་འབྱུང་འཁོར་བའི་
འཇུག་རིམ་གཉིས་ལས། དང་པོ་ནི་མདོ་ལས། དགེ་སློང་དག །འདི་ནི་སྡུག་བསྔལ་འཕགས་པའི་བདེན་པའོ། །འདི་ནི་ཀུན་འབྱུང་འཕགས་པའི་བདེན་པའོ། །ཞེས་འབྲས་བུ་སྡུག་བསྔལ་བདེན་པ་དང་པོ་དང་། རྒྱུ་ཀུན་འབྱུང་བདེན་པ་རྗེས་སུ་གསུངས་པ་འདི་རྒྱུ་འབྲས་གོ་ལྡོག་པ་ལྟ་བུར་སྣང་ཡང་དགོས་པ་ཁྱད་པར་ཅན་ལ་དགོངས་པའི་ཚུལ་བཞི་བརྒྱ་པ་ལས། སྡུག་བསྔལ་རྒྱ་མཚོ་འདི་ལ་མཐའ། །རྣམ་པ་ཀུན་ཏུ་ཡོད་མིན་ན། །བྱིས་ཁྱོད་འདི་ནི་བྱིང་བ་ལ། །འཇིགས་པ་ཅིས་ན་སྐྱེ་མི་འགྱུར། །ཞེས་འབྲས་བུ་སྡུག་བསྔལ་ལ་བདེ་བར་འཛིན་པའི་བློ་ཡོད་ན་དེའི་རྒྱུ་ལས་དང་ཉོན་མོངས་པ་ལ་འཇིགས་པ་དང་སྤོང་སེམས་མི་སྐྱེ་ལ། དེ་ལས་གོ་ལྡོག་ན་འབྲས་བུ་དེ་མི་འདོད་བའི་དབང་གིས་དེའི་རྒྱུ་འགོག་པར་བྱེད་པ། དཔེར་ན་རང་རེ་ས་སྐམ་པོ་ཞིག་གི་སྟེང་ན་ཡོད་པའི་ཚེ་གློ་བུར་དུ་ཆུ་ཞིག་བྱུང་ནས་ལུས་དང་གོས་སྟན་སོགས་གཤེར་ཏེ་གྲང་བའི་རེག་བྱས་ཉེན་པ་ནི་སྡུག་བསྔལ་བདེན་པ། ཆུ་དེ་གང་ནས་བྱུང་བརྟགས་ནས་ཕྱོགས་འདི་ཞེས་བྱ་བ་ནས་བྱུང་བར་ངེས་པ་ནི་ཀུན་འབྱུང་བདེན་པར་ངེས་པ། ལུས་གྲང་རེག་ལས་གྲོལ་བ་ནི་འགོག་པའི་བདེན་པ། དེའི་ཐབས་སུ་ཆུ་འོལ་ཀ་བསྒྱུར་བའི་བྱ་བ་བྱེད་པ་ནི་ལམ་གྱི་བདེན་པ་སྟེ། རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རེག་པར་བྱ་ཞིང་བསྟེན་པར་བྱ། །ཞེས་ཆུས་གཤེར་བ་ལ་སྡུག་བསྔལ་དུ་ངོ་མ་ཤེས་ན་ཆུ་དེ་དགག་འདོད་ཀྱི་བློ་མི་འབྱུང་། རླན་དང་བྲལ་བ་དེ་བདེ་བར་མ་ཤེས་ན་ཆུ་འགོག་བྱེད་ཀྱི་རགས་བརྩིག་པའི་བློ་མི་འོང་བས་བདེ་སྡུག་གང་གི་ཡང་འབྲས་བུ་ངོས་ཟིན་པར་བྱས་ནས་དེ་སྐྱེད་བྱེད་ཀྱི་རྒྱུ་ལ་འདོར་
ལེན་མཛད་པ་ནི་གནད་ཤིན་ཏུ་ཆེ་བའི་ཕྱིར་ཚུལ་དེ་ལེགས་པར་ཁོང་དུ་ཆུད་པར་བྱས་ཏེ་ཐོག་མར་སྡུག་བསྔལ་བདེན་པ་བསམ་པ་ལ་ལམ་རིམ་དུ་འཁོར་བ་སྤྱི་དང་བྱེ་བྲག་གི་སྡུག་བསྔལ་སོ་སོར་གསུངས་པའི་སྐྱེ་རྒ་སོགས་སྤྱི་ལ་སྦྱར་བ་ནི་སྤྲོས་པ་ཆེ་བའི་དབང་དུ་མཛད་པ་ཡིན་ཞིང་། སྐབས་དོན་སྙིང་པོ་དྲིལ་ན། ངན་སོང་གསུམ་ནི་སྔར་སྐྱེས་བུ་ཆུང་ངུའི་དུས་མྱོང་བ་ཚད་ཐུབ་བསྒོམས་ཟིན་པས་ཆང་འཐུངས་པས་ནད་དྲག་པོ་བསླང་སྟེ་སྐྱུགས་ལོག་པ་ཞིག་ལ་ཆང་མཐོང་ཙམ་ནས་དེ་ལ་མི་སྡུག་པའི་བློ་སྐྱེ་བའི་མཐུས་བྱེ་བྲག་གི་རོ་སྐྱུར་པ་དང་ངན་པ་སོགས་ཆེད་དུ་བསམ་མི་དགོས་པར་རྟ་རྒྱུག་པའི་ཞར་ལ་མེ་ཏོག་ཆོད་པ་ལྟར་འོང་བས། ངན་སོང་གི་སྐྱེ་བའི་སྡུག་བསྔལ་ཆེད་དུ་མ་བསྒོམས་པས་སྐྱོན་དུ་མི་འགྱུར་ཞིང་། །དངོས་དོན་བདེའི་འགྲོའི་སྡུག་བསྔལ་ལ་གཙོ་ཆེར་སྦྱར་ཏེ་བསམ་པ་ལ། མི། བདེ་འགྲོ་གཞན་གཉིས། ཞར་བྱུང་རིགས་དྲུག་ཐུན་མོང་གི་སྡུག་བསྔལ་སྒོམ་པ་དང་གསུམ། དང་པོ་ནི་ལས་ཉོན་གྱི་དབང་གིས་སྐྱེ་བ་བླངས་པ་རྣམས་ནི་རྒ་བ་དང་འཆི་བ་སོགས་ཀྱི་སྡུག་བསྔལ་སྣ་ཚོགས་ཀྱི་གནས་སུ་གྱུར་ཅིང་སེམས་རབ་ཏུ་མ་ཞི་བས་དུག་གསུམ་གྱིས་ལུས་སེམས་ངལ་བཞིན་དུ་མཐར་འཆི་བའི་ཆོས་ཅན་ལས་མ་འདས་མོད། དེ་ཡང་སྐྱེ་གནས་བཞིར་གསུངས་པ་ཡང་གཙོ་ཆེ་བ་མངལ་སྐྱེས་ཀྱི་དབང་དུ་བྱས་ཏེ། སློབ་སྤྲིངས་ལས། ཤིན་ཏུ་མི་བཟད་དྲི་ང་མི་གཙང་བཅེར་བས་འགགས། །རབ་ཏུ་དོག་པ་མུན་ནག་འཐིབས་པོར་འདུག་པ་ཡི། །མངལ་གནས་དམྱལ་བ་ལྟ་བུའི་ནང་དུ་དེ་ཞུགས་ནས། །ལུས་ཡོངས་བསྐུམས་ལ་སྡུག་བསྔལ་ཆེན་པོ་བརྣག་དགོས་སོ། །ཞེས་ཕོ་བའི་འོག་ལོང་ཁའི་སྟེང་ན་ཁ་སྒལ་ཚིགས་ལ་བལྟས་ནས་དྲི་ང་ཞིང་མི་གཙང་པའི་ལྗན་ལྗིན་གྱི་ཁྲོད་དུ་ཡོད་པ་ལས་རིམ་གྱིས་མེར་མེར་པོ་ནས་རྐང་ལག་འགྱུས་པའི་བར་རྣམས་
ཀྱི་གནས་སྐབས་སུ་མས་བཟའ་བཏུང་ཚ་བ་བསྟེན་ན་མེ་དོང་དུ་ཆུད་པ། གྲང་བ་བསྟེན་ན་འཁྱགས་སྦུབས་སུ་གནས་པ། མཆོང་བ་དང་རྒྱུག་པ་སོགས་ཀྱི་ཚེ་གཡང་ལ་ལྷུང་བ་ལྟ་བུའི་ཉམས་འཆར་བ་སོགས་མའི་སྤྱོད་ལམ་མི་གཟོ་བ་མཐའ་དག་ལ་བརྟེན་པའི་སྡུག་བསྔལ་ཐོག་ཏུ་འབབ་བཞིན་པ་གནས་ཞག་ཉིས་བརྒྱ་དྲུག་ཅུ་རྩ་དྲུག་སོང་བ་ན་ལས་ཀྱི་རླུང་གིས་མགོ་བོ་ཐུར་དུ་བསྟན་ཏེ་མངལ་སྒོའི་རུས་པ་ཤིན་ཏུ་དོག་པ་ནས་ཕྱིར་འབྱུང་པའི་ཚེ་བ་གླང་གི་པགས་པ་དམར་བཤུས་བྱས་པ་ལ་སྦྲང་མ་མཆུ་ཅན་གྱིས་ཟོས་པ་ལྟ་བུའི་སྡུག་བསྔལ་གྱི་ཚོར་བ་དྲག་པོ་མྱོང་བཞིན་དུ་སྐྱེ་ཞིང་། བཙས་ནས་ཀྱང་རེ་ཞིག་གི་བར་སྟན་འཇམ་པ་ལ་བཞག་ཀྱང་ཚེར་དོང་དུ་བཅུག་པ་ལྟ་བུའི་ཚ་གྲང་གི་སྡུག་བསྔལ་ཆུང་ངུ་ཙམ་ཡང་བཟོད་དཀའ་བའི་ཚུལ་རྣམས་རང་གི་ཚེ་སྔོན་མ་དང་འདིའི་བར་དུ་ཉམས་སུ་མྱོང་ཟིན་པ་ཞིག་ཡིན་ནའང་། མངལ་གྲིབ་དང་ན་ཚོད་གཞོན་པའི་དབང་གིས་ད་ལྟ་དྲན་པའི་ཡུལ་དུ་མ་གྱུར་པས་རྗེས་སུ་དཔགས་པའི་ཚུལ་གྱིས་བསྒོམ་པ་ལ་སྔར་སྐྱེས་བུ་ཆུང་ངུའི་སྐབས་བཞིན་བཤད་མ་ཐག་པའི་སྡུག་བསྔལ་དེ་རང་ཐོག་ལ་ཇི་ལྟར་བྱུང་བའི་ཚུལ་གྱིས་བསམས་པ་ན། ད་ལྟ་རང་ཤོང་གི་བུམ་པ་ལྟ་བུ་ཞིག་གི་ནང་དུ་ཞག་གཅིག་ཆུད་དེ་སྟེང་འོག་ཀུན་ཏུ་བཤང་གཅི་སོགས་མི་གཙང་བའི་རྫས་ཀྱིས་གང་བར་གྱུར་ན་བཟོད་ཐབས་མེད་པ་མངོན་སུམ་གྱིས་གྲུབ་ལ། དེས་གོང་གི་སྡུག་བསྔལ་གྱི་ཆ་ཙམ་དུ་ཡང་མི་འགྱུར་བའི་ཕྱིར་ན་བདེ་འགྲོར་སྐྱེ་བ་ལེན་པ་ལ་ཡང་སྐྱུགས་ནད་ཅན་གྱིས་ཟན་མཐོང་བ་ལྟ་བུའི་ཞེན་ལོག་མ་བྱུང་གི་བར་དུ་བསྒོམ་གསུང་། དེ་བཞིན་དུ་རྒ་བའི་སྡུག་བསྔལ་ཡང་རྒྱ་ཆེ་རོལ་བ་ལས། རྒ་བས་གཟུགས་སྡུག་གཟུགས་མི་སྡུག་པར་བྱེད། །རྒ་བས་
གཟི་བརྗིད་འཕྲོག་ཅིང་མཐུ་སྟོབས་འཕྲོག །རྒ་བས་བདེ་བ་འཕྲོག་ཅིང་བརྙས་པ་བྱེད། །རྒ་བས་འཚོ་བྱེད་རྒ་བས་མདངས་ཀྱང་འཕྲོག །ཅེས་སྐྲ་དཀར་ཞིང་ལུས་གུག་པ། དཔྲལ་བ་གཉེར་མས་ཁེབས་པ་སོགས་ལུས་ཀྱི་མཐུ་ཉམས་པའི་ཚུལ་ལ་མཚོན་ན། སྔར་ན་ཚོད་དར་བབ་ཀྱི་དུས་ལུས་དྲང་ཞིང་སྐྲའི་མདོག་གནག་པ་པགས་པ་ལ་གཉེར་མ་སོགས་མེད་པའི་གཞོན་ཤ་ཅན་དེ་ད་ལྟ་ལུས་ལ་འཕོས་ཀྱང་འཕོས་པ་དང་ཁྱད་པར་མེད་པ་འདི་བཞིན་དུ་སོང་འདུག །སླར་ཡང་ལོ་ཟླ་ཞག་མང་སོང་རིམ་གྱིས་ཟླ་བ་མར་གྱི་ངོ་བཞིན་རྣམ་པར་འགྲིབས་ནས་འཆི་བདག་གི་ཁར་ཆུད་པར་འདུག་སྙམ་དུ་སྐྱོ་ཤས་ཀྱི་མྱོང་བ་དྲག་པོ་མ་ཐོན་གྱི་བར་དུ་བསམ། དེ་བཞིན་དུ་ལུས་ཀྱི་མཐུ་ཉམས་པས་ལྡང་འདུག་ཚུལ་བཞིན་དུ་མི་འོང་། འགྲོ་བའི་ཚེ་གོམ་པ་འཁྱོར། ངག་ལྡབ་ལྡིབ་དུ་སྨྲ་བས་མཚོན་ཏེ་དབང་པོ་ཉམས་པས་མིག་རྣ་སོགས་ཀྱིས་སྔར་ལྟ་བུའི་མཐོང་ཐོས་སོགས་ཇི་བཞིན་མི་འབྱུང་ཞིང་དྲན་པ་མི་གསལ་བས་བརྗེད་ངས་ཅན་དུ་འགྱུར། བཟའ་བཏུང་ཡང་སྔར་ཟ་བའི་ཚོད་ཙམ་དུ་ཟོས་ན་ནད་སྣ་ཚོགས་སྐྱེད་པར་བྱེད་པའི་ཚུལ་རྣམས་གོང་བཞིན་བསྒོམ། ཉམས་ལེན་བྱེད་པ་པོ་ན་ཚོད་གཞོན་ནུ་ཞིག་ཡིན་ན་མགོ་བོ་དཀར་བ་སོགས་བཤད་མ་ཐག་པའི་སྐྱོན་ཕལ་ཆེར་རང་ཉམས་ལ་དཔགས་ཏེ་གཞལ་རྒྱུ་མེད་མོད། ན་ཚོད་རྒན་པོ་ཞིག་ལ་ཕར་བལྟས་ནས་འདི་ཡང་མའི་མངལ་ནས་བཙའ་བའི་དུས་རྒས་ཤིང་འཁོགས་པ་འདི་ག་མིན་པ་ཐག་ཆོད། བདག་ལྟ་བུའི་གཞོན་ནུ་ཞིག་གནས་སྐབས་འདི་འདྲར་གྱུར་འདུག་གོ་བསམ་པའི་ཚུལ་གྱིས་བསྒོམ་གསུང་། ན་བའི་སྡུག་བསྔལ་ནི་སྔར་རང་ཉིད་ནད་དྲག་པོས་འདེབས་མྱོང་བའམ་མིན་ན་ནད་པ་གཞན་དག་ལ་རྗེས་སུ་དཔགས་ཏེ་ཡུན་རིང་པོ་ནས་འདུ་བ་འཁྲུགས་པའི་ནད་
དམ། གློ་བུར་དུ་གདོན་དང་མཚོན་ལ་སོགས་པས་གཙེས་པའི་ཚུལ་ནི། རྒྱ་ཆེར་རོལ་པ་ལས། དཔེར་ན་དགུན་སྨད་རླུང་དང་ཁ་བ་ཆེ། །རྩ་ཤིང་གེལ་བ་ནགས་སྨན་མདངས་ཀྱང་འཕྲོག །དེ་ལྟར་ནད་འདིས་འགྲོ་བའི་མདངས་འཕྲོག་ཅིང་། །དབང་པོ་ཟུངས་དང་སྟོབས་ནི་ཉམས་པར་བྱེད། །ཅེས་ཚ་གྲང་ཤས་ཆེ་ཆུང་གི་ཟུག་གཟེར་སོགས་གདུང་བ་སྣ་ཚོགས་ཀྱིས་ཉམ་ཐག་པས་ལུས་ཀྱི་ཤ་ལྤགས་བསྐམས་ཤིང་བསྒུལ་སྐྱོད་དཀའ། ཡིད་དུ་འོང་བའི་ཟས་སྐོམ་རྣམས་ནད་ལ་གནོད་ཀྱི་དོགས་ནས་སྨན་པ་སོགས་ཀྱིས་ཟར་མི་སྟེར། ཡིད་དུ་མི་འོང་བའི་ཟས་དང་སྨན་སྣ་ཚོགས་གཏར་སྲེག་རྣམས་མི་འདོད་བཞིན་དུ་བསྟེན་དགོས་ཚུལ་བསམ་མོ། །འཆི་བའི་སྡུག་བསྔལ་ནི། རྒྱ་ཆེར་རོལ་པ་ལས། འཆི་དང་འཕོ་དང་འཆི་འཕོ་དུས་བྱེད་པ། །ཕངས་ཤིང་སྡུག་པའི་སྐྱེ་བོ་རྟག་ཏུ་འབྲལ། །ཕྱིར་མི་འོང་ཞིང་འཕྲད་པར་འགྱུར་མ་ཡིན། །ཤིང་ལས་ལོ་འབྲུལ་འདྲ་ཞིང་ཀླུང་རྒྱུན་མཚུངས། །ཞེས་ནད་ལས་ཐར་བ་ཞིག་བྱུང་ན་དཀའ་བ་དེ་ཙམ་སྤྱོད་རིང་ཆོག་ནའང་། །ཕལ་ཆེར་ནི་ཐབས་སྣ་ཚོགས་བྱས་པས་ཀྱང་ནད་ཇེ་ཆེར་སོང་སྟེ་སྨན་པས་བོར། མོ་བོན་གྱིས་བསླུས། གཉེན་བཤེས་རྣམས་ཀྱིས་མཐའ་བསྐོར་ནས་སྨྲེ་སྔགས་འདོན། ཤི་དགེ་དང་དུར་འདེབས་ཀྱི་གཤོམ་ར་འདིང་། རང་ཉིད་ཀྱང་བཀྲག་མདངས་ཉམས། ཁ་བསྐམས། །མཆུ་བརྫེས། སྣ་ཞོམ་མིག་ཀོང་མོར་སོང་། དབུགས་བརྩེགས། སྔར་བྱས་ཀྱི་སྡིག་པ་ལ་འགྱོད། གཉེན་བཤེས་འཁོར་གཡོག་རྫས་ནོར་ཕུན་ཚོགས་ཀུན་དང་བྲལ། གཅེས་པར་བསྐྱངས་པའི་ལུས་ཀྱང་མལ་དུ་བཞག་སྟེ་ཆགས་ཞེན་དྲག་པོའི་དབང་གིས་འཇིག་རྟེན་ཕ་རོལ་ཏུ་འགྲོ་དགོས་ཚུལ་གྱི་སྡུག་བསྔལ་དྲག་པོས་མནར་བ་རྣམས་
བསམ་མོ། །དགྲ་ལ་བརྟེན་པའི་སྡུག་བསྔལ་ནི། མི་སྡུག་པའི་དགྲ་ཞིག་གིས་ལུས་སྲོག་གཏམ་དོན་ལ་གནོད་པ་བྱས་དོགས་པའི་སྡུག་བསྔལ་ལྟ་ཅི་སྨོས། དགྲ་དངོས་སམ་མི་མཛའ་བ་ཞིག་དང་གནས་ཁང་གཅིག་ཏུ་འཚོག་དགོས་བྱུང་ནའང་ཡིད་མི་བདེ་བ་ནག་ཡོར་རེ་བ་ལྟ་བུའི་སྣང་བ་འཆར། དེ་ཕྱོགས་གཞན་ཞིག་ཏུ་སོང་ན་ནམ་ལངས་པ་ལྟ་བུའི་སྤྲོ་བ་འབྱུང་ཚུལ་ལ་བརྟེན་ནས་དགྲ་སྡང་བ་དང་ཕྲད་ཀྱི་དོགས་པའི་སྡུག་བསྔལ་བསམ། གཉེན་ལ་བརྟེན་པའི་སྡུག་བསྔལ་ནི། གཉེན་བཤེས་དང་། དེའི་ནང་ནས་ཀྱང་ཤིན་ཏུ་མཛའ་བ་ཞིག་ཡུལ་གཞན་དུ་སོང་བ་ལ་དེ་དག་གི་ཡོན་ཏན་དང་ཕུན་ཚོགས་རྣམས་དྲན་ཏེ་སྒོ་གསུམ་སྡུག་བསྔལ་དྲག་པོ་དང་། དེ་ལས་གོ་ལོག་ན་དགའ་བ་ཆེན་པོ་འབྱུང་བའི་ཚུལ་གྱི་གཉེན་སྡུག་པ་དང་བྲལ་གྱི་དོགས་པའི་སྡུག་བསྔལ་བསམ། འདོད་པ་ལ་བརྟེན་པའི་སྡུག་བསྔལ་ནི། ཚོང་པ་དང་ཞིང་ལས་པ་སོགས་ཀྱིས་འབད་པས་བསྒྲུབས་ཀྱང་ཚོང་ཟོག་སྟོར་བ་དང་ལོ་ཏོག་སེར་བས་བཅོམ་པ། དབུ་གཙོ་དང་ཞང་བློན་རྣམས་ཀྱིས་དགྲ་མ་ཐུལ་ཞིང་གཉེན་མ་འཁྱོངས་པ། རབ་ཏུ་བྱུང་བ་ལ་ལ་གཉེན་པོ་ཞན་པས་ཚུལ་ཁྲིམས་ཀྱི་འགོ་མི་ཐོན་པ། ཤེས་རབ་དམན་པས་ཐོས་བསམ་གྱི་བྱ་བ་མ་འགྲུབ་པ་སོགས་འདོད་པ་བཙལ་གྱིས་མི་རྙེད་པའི་སྡུག་བསྔལ། གཞན་ཡང་ཁ་དྲག་པོ་ཞན་པོར་སོང་བ། ཕྱུག་པོ་སྤྲང་པོར་སོང་བ། མི་མང་པོ་གཅིག་པུར་སོང་བས་མཚོན་ཏེ་རྒྱལ་ཁམས་ལ་བརྟགས་ན་སྔར་གྱི་ས་ན་མི་འདུག་པ་སོགས་མདོར་ན་བཀྲེས་སྐོམ་ཚ་གྲང་མི་འདོད་པ་སྣ་ཚོགས་པས་མིའི་ལུས་རྟེན་འདི་ཉིད་ཀྱང་སྡུག་བསྔལ་གྱི་རང་བཞིན་ཅན་ཡིན་པར་མྱོང་བ་སྙིང་ཐག་པ་ནས་མ་སྐྱེས་ཀྱི་བར་དུ་བསྒོམ་མོ། །བྱང་ཆུབ་ལམ་རིམ་དུ་སྡུག་བསྔལ་བརྒྱད་བསམ་པ་
དང་དྲུག་བསམ་པ་སོགས་སྤྱི་ལྡོག་ཏུ་གསུངས་ནའང་། འཁྲིད་ཀྱི་སྐབས་འཇུག་པ་བདེ་བའི་དབང་དུ་མཛད་དེ་སྡུག་བསྔལ་བདུན་པོ་གཙོ་ཆེར་མི་ལ་སྦྱར་ནས་དེའི་མཇུག་ཏུ་བདེ་འགྲོ་གཞན་གཉིས་ཀྱི་སྡུག་བསྔལ་དང་སྡུག་བསྔལ་བརྒྱད་པ་དང་། གསུམ་དང་དྲུག་བསམ་པ་རྣམས་སྤྱིར་མཛད་པ་ཡིན་ནོ། །གཉིས་པ་བདེ་འགྲོ་གཞན་གཉིས་ཀྱི་སྡུག་བསྔལ་བསམ་པ་ནི། བཤེས་སྤྲིངས་ལས། ལུས་ཀྱི་ཁ་དོག་མི་སྡུག་འགྱུར་བ་དང་། །སྟན་ལ་མི་དགའ་མེ་ཏོག་འཕྲེང་བརྙིངས་དང་། །གོས་ལ་དྲི་མ་ཆགས་དང་ལུས་ལ་ནི། །སྔོན་ཆད་མེད་པའི་རྔུལ་འབྱུང་ཞེས་བགྱི་བ། །མཐོ་རིས་འཆི་འཕོ་སྦྲོན་བྱེད་འཆི་ལྟས་ལྔ། །ཞེས་འདོད་པའི་ལྷ་རྣམས་ལ་མི་ལྟ་བུའི་སྐྱེ་རྒ་སོགས་ཀྱི་སྡུག་བསྔལ་མེད་ནའང་། འཆི་བར་ཉེ་བའི་ཚེ་གློ་བུར་དུ་ལུས་ཀྱི་བཀྲག་མདངས་ཉམས་ཤིང་བདེ་བའི་སྟན་ལ་འདུག་སྙིང་མི་འདོད་པ། མེ་ཏོག་གི་འཕྲེང་བ་བརྙིངས་པ། གོས་ལ་དྲི་མ་ནག་ནོག་ཆགས་པ། སྔོན་མེད་པའི་ལུས་ལ་རྔུལ་འབྱུང་བ་རྣམས་འཆི་ལྟས་ལྔ། ལུས་ཀྱི་འོད་ཆུང་དུ་སོང་བ། ཁྲུས་ཆུ་ལུས་ལ་ཆགས་པ། གོས་རྒྱན་ལས་སྒྲ་མི་སྙན་པ་འབྱུང་བ། མིག་གི་རྫི་མ་འཁྲབ་པ། ཡུལ་གཅིག་ལ་ཆགས་པ་ལྔ་པོ་ཉེ་བའི་འཆི་ལྟས་ཏེ་བཅུ་པོ་དེ་རྣམས་འཆི་ལྟས་སུ་རིག་ནས་སྡུག་བསྔལ་ཞིང་། ཁྱད་པར་སྐབས་གསུམ་པ་ཞེས་བྱ་བ་གང་དུ་སྐྱེ་འགྱུར་གྱི་གནས་ཀྱང་བརྟགས་ན་ཤེས་པ་ཡིན་པས། དེ་མ་ཐག་དམྱལ་བར་སྐྱེས་ངེས་ལྟ་བུ་ཡིན་ན་དམྱལ་བར་སྐྱེས་ཟིན་པ་དང་ཁྱད་པར་མེད་པའི་སྡུག་བསྔལ་དྲག་པོ་མི་བཟད་པ་ཡོད་པས་མི་ལྟ་བུ་ལ་ངན་སོང་དུ་སྐྱེས་དོགས་པ་ཙམ་ལས་རྟག་བརྟན་ཐེར་ཟུག་དེ་འདྲ་མེད་པས་ལྷའི་སྡུག་
བསྔལ་ལྷག་པར་ཆེ་བ་ཡིན་གསུང་། གཞན་ཡང་བསོད་ནམས་ཆེན་པོའི་ལྷ་རྣམས་མཐོང་བའི་ཚེ་ཆུང་བ་རྣམས་སྤ་བཀོང་བ་དང་། སྟོབས་ཆེ་བས་ཆུང་བ་གནས་གཞན་དུ་བསྐྲོད་པ་དང་། ལྷ་མ་ཡིན་དང་འཐབ་པའི་ཚེ་ཕན་ཚུན་གཅིག་གིས་གཅིག་གསོད་ཅིང་ལུས་དང་ཡན་ལག་གཏུབ་ཅིང་གཅོད་པའི་སྡུག་བསྔལ་སྣ་ཚོགས་པ། གཟུགས་གཟུགས་མེད་ཀྱི་ལྷ་རྣམས་ནི་མངོན་གྱུར་གྱི་སྡུག་བསྔལ་དེ་དག་དང་མི་ལྡན་ནའང་རྒྱ་མཚོའི་གཟིངས་ཀྱི་ཕུག་རོན་སླར་ཡང་གཟིངས་ལ་འཁོར་བ་ལྟར་ཏིང་ངེ་འཛིན་གྱི་འཕེན་པ་ཟད་དེ་ཤི་བའི་རྗེས་སུ་སླར་ཡང་འདོད་ཁམས་ཀྱི་སྡུག་བསྔལ་མངོན་གྱུར་སྤྱོད་དགོས་ཚུལ་ལེགས་པར་བསྒོམ་མོ། །གསུམ་པ་ཞར་བྱུང་རིགས་དྲུག་ཐུན་མོང་གི་སྡུག་བསྔལ་བསམ་པ་ནི། གཞན་ཡང་འཁོར་བ་ལས་མ་གྲོལ་ཕྱིན་ཆད་བསོད་ནམས་ཀྱི་མཐུས་འཁོར་ལོས་སྒྱུར་བའི་རྒྱལ་པོ་དང་ཚངས་པར་གྱུར་ཀྱང་སླར་བྲན་དུ་འགྱུར་བ་ལྟ་བུ་ནི་འགྲུབ་པའི་སྡུག་བསྔལ། ཚེ་འདིའི་སྐྱེ་རྒ་ན་འཆིའི་སྡུག་བསྔལ་ནི་གྲུབ་ཟིན་པའི་སྡུག་བསྔལ། འབྲས་ཚ་བའི་སྟེང་དུ་ཚྭ་ཆུ་བཏབ་པའི་འགྱུར་བྱེད་ཀྱི་རེག་པ་དང་ཕྲད་པས་སྡུག་བསྔལ་ཆེར་སོང་བ་ལྟ་བུ་ནི་སྡུག་བསྔལ་གྱི་སྡུག་བསྔལ། ཕྱིན་པས་ངལ་བ་ན་བསྡད་པས་བདེ་བར་སྣང་བ་ལ་ནམ་ཞིག་ན་ཡན་ལག་དང་སྐེད་པ་ན་བ་དེ་འགྱུར་བའི་སྡུག་བསྔལ། འཁྱགས་པའི་སྦུབས་སུ་ཆུད་པ་ཞིག་དེ་ལས་མ་ཐར་གྱི་བར་དུ་དྲོ་བའི་སྐབས་མེད་པ་ལྟ་བུ་ཁྱབ་པ་འདུ་བྱེད་ཀྱི་སྡུག་བསྔལ་ཡིན་པས་དོན་ཧྲིལ་གྱི་དྲིལ་ན་ཟག་བཅས་ཉེར་ལེན་གྱི་ཕུང་པོ་འདི་བླངས་ཕྱིན་ཆད་ད་ལྟའི་ཕུང་པོ་ལ་བརྟེན་པའི་སྡུག་བསྔལ་མྱོང་ཞིང་ཕྱི་མའི་སྡུག་བསྔལ་འདྲེན་པ་
ལས་འོས་མེད། ཉེར་ལེན་གྱི་དོན་འདུན་པ་དང་འདོད་ཆགས་ཡིན་པས་དཔེར་ན་ཤིང་ལས་བྱུང་བའི་མེ་ལ་ཤིང་གི་མེ་ཟེར་བ་བཞིན་མ་འོངས་པའི་ལུས་ཐོབ་འདོད་དང་ད་ལྟའི་ལུས་ལ་ཆགས་པའི་དབང་གིས་ཕུང་པོ་འགྲུབ་པ་རྒྱུ་ལ་བརྟེན་ནས་བཏགས་པ། དེ་བཞིན་དུ་འབྲས་བུ་བསྐྱེད་པའི་ཤིང་ལ་འབྲས་བུའི་ཤིང་དུ་གྲགས་པ་ལྟར་གྲུབ་པའི་ཕུང་པོ་དེས་འདུན་པ་དང་འདོད་ཆགས་བསྐྱེད་པ་འབྲས་བུའི་སྒོ་ནས་བཏགས་པ་སྟེ་གཅིག་ལས་གཅིག་བྱུང་བས་འཁོར་བར་འཁོར་རོ། །བཤད་མ་ཐག་པའི་སྡུག་བསྔལ་དེར་མ་ཟད་ཡིད་བརྟན་དུ་མི་རུང་བ་ནི་བཤེས་སྤྲིངས་ལས། །ཕ་ནི་བུ་ཉིད་མ་ནི་ཆུང་མ་ཉིད། །སྐྱེ་བོ་དགྲར་གྱུར་པ་དང་བཤེས་ཉིད་དང་། །ལྡོག་པ་ཉིད་དུ་མཆིས་པས་དེ་སླད་དུ། །འཁོར་བ་དག་ནས་ངེས་པ་འགའ་མ་མཆིས། །ཞེས་ཕ་མ་དང་གཉེན་བཤེས་དགྲ་གཉེན་མང་པོ་གོ་ལྡོག་པ་སྐྱེ་བ་རིམ་བརྒྱུད་ལ་འོང་བར་མ་ཟད་ཚེ་འདིར་ཡང་ཚེ་སྟོད་ལ་ཤིན་ཏུ་མཛའ་བ་དག་ཚེ་སྨད་ལ་དགྲར་འགྱུར་བ་དང་། ལོ་སྔོན་མ་གཅིག་གིས་གཅིག་གསོད་དུ་ཆ་བའི་མི་ཞིག་ལོ་རྟིང་མ་གཉེན་གྱི་དྭངས་མར་འགྲོ་བ་སོགས་མངོན་སུམ་གྱིས་གྲུབ་པས་དགྲ་གཉེན་ལ་ངེས་གཟུང་གི་ཡིད་བརྟན་མི་ཐུབ་པས་ངེས་པ་མེད་པའི་སྡུག་བསྔལ་བསམ། ཆོག་མི་ཤེས་པ་ནི་བཤེས་སྤྲིངས་ལས། ཇི་ལྟར་མཛེ་ཅན་སྲིན་བུས་ཉེན་པ་ནི། །བདེ་བའི་དོན་དུ་མེ་ལ་ཀུན་བརྟེན་ཀྱང་། །ཞི་བར་མི་འགྱུར་དེ་དང་འདྲ་བར་ནི། །འདོད་པ་རྣམས་ལ་ཆགས་པའང་མཁྱེན་པར་མཛོད། །ཅེས་སྔོན་ཆད་ཕུན་སུམ་ཚོགས་པའི་ལྷའི་བདུད་རྩི། བར་མ་མའི་ནུ་ཞོ། ཐ་མ་མི་གཙང་བའི་ཁུ་བ་དང་ཁྲོ་ཆུ་ཁོལ་མ་བཏུངས་
པའང་རྒྱ་མཚོ་ཆེན་པོ་གྲངས་མེད་པ་ལས་ཆེས་མང་མོད། དེས་ཀྱང་ངོམས་སུ་མེད་པ་མཛེ་ཅན་མེ་ལ་བརྟེན་པའི་དཔེ་ལྟར་འདོད་པའི་ལོངས་སྤྱོད་ལ་ངོམས་མི་ཤེས་པར་བསམ། ལུས་རྟེན་བགྲང་མི་ནུས་པ་ནི་མྱ་ངན་བསལ་བ་ལས། ཕན་ཚུན་འཐབ་དང་བརྩོད་པའི་ཕྱིར། །མགོ་བོ་བཅད་པ་གང་ཡིན་པ། །སྤུངས་ན་དེ་ལྟར་མཐོ་བ་ནི། ཚངས་པའི་འཇིག་རྟེན་ལས་ཀྱང་ཐལ། །ཞེས་ནད་སྣ་ཚོགས་ཀྱི་སྒོ་ནས་ལུས་དོར་བ་གཞན་རྣམས་ཕར་ཞོག །མཚོན་གྱིས་གཏུབས་ཏེ་ཤི་བའི་མགོ་བོ་རྣམས་སྤུངས་ན་ཚངས་པའི་འཇིག་རྟེན་ལས་མཐོ་བར་འགྱུར་བས། ད་དུང་འཁོར་བ་ལས་མཐར་ན་ལུས་ཡང་ཡང་འདོར་བའི་སྣང་ཚུལ་དེ་ལས་མ་འདས་སྙམ་དུ་བསམ། མངལ་སྒོ་གྲངས་མེད་འགྲིམ་པ་ནི། མ་ཡི་ཐུག་མཐའ་རྒྱ་ཐུག་ཚི་གུ་ཙམ། །རི་ལུར་བགྲངས་ཀྱང་ས་ཡིས་ལང་མི་འགྱུར། །ཞེས་རང་ཅག་གི་རྩ་བའི་མ་དེའི་མ། དེའི་ཡང་མ་ཞེས་བགྲང་བའི་ཆེད་དུ་ས་ཆེན་པོ་འདི་རིལ་བུ་ཆུང་ངུར་དྲིལ་ནས་བགྲངས་ཀྱང་འདྲེན་མི་ཐུབ་པ་ཐུག་མཐའ་ཞེས་པ་ནུས་པས་དངོས་སུ་བསྟན་ནས། དོན་གྱིས་རང་གི་མ་ཡང་བགྲང་བར་མི་ནུས་པའི་ཕྱིར་ན་སྔར་ཉིང་མཚམས་སྦྱར་བ་དང་སླད་ནས་སྦྱོར་བར་འགྱུར་བ་ལ་ཡིད་ངེས་པར་འབྱུང་བར་བྱའོ། །མཐོ་དམའ་མ་ངེས་པ་ནི། བརྒྱ་བྱིན་འཇིག་རྟེན་མཆོད་འོས་གྱུར་ནས་ནི། །ལས་ཀྱི་དབང་གིས་ཕྱིར་ཡང་ས་སྟེང་ལྷུང་། །འཁོར་ལོས་སྒྱུར་བ་ཉིད་དུ་གྱུར་ནས་ཀྱང་། །འཁོར་བ་དག་ཏུ་ཡང་བྲན་ཉིད་དུ་འགྱུར། །ཞེས་ལྷ་རྣམས་ཀྱི་བདག་པོ་བརྒྱ་བྱིན་དང་འཁོར་ལོས་སྒྱུར་བའི་རྒྱལ་པོའི་གོ་འཕང་ཐོབ་ཀྱང་སྔར་བྱས་ཀྱི་མི་དགེ་བའི་ལས་མ་ཟད་པའི་མཐུས་
དེ་ལ་གསོས་འདེབས་པ་པོ་བྱུང་ན་ཡང་བྲན་དང་ངན་སོང་སོགས་དམན་པའི་གནས་སུ་སྐྱེ་བར་འགྱུར་ཞིང་རང་འོད་ཀྱིས་འཇིག་རྟེན་སྣང་བར་བྱེད་པའི་ཉི་ཟླ་ཡང་མུན་པའི་སྨག་རུམ་དུ་སྐྱེ་བ་དང་། སྟོབས་འབྱོར་གྱི་དྲེགས་པས་མྱོས་པ་མང་པོའང་རྒྱལ་པོའི་ཆད་ལས་དང་ཕ་རོལ་གྱི་དགྲ་ཟླས་བཅོམ་པས་ཁས་ཞན་ལ་མངའ་ཐང་དང་བྲལ་བའི་ཚུལ་རྣམས་བསམ། ཐམས་ཅད་ཤུལ་དུ་ལུས་འགྲོ་བ་ནི་སྤྱོད་འཇུག་ལས། ལུས་འདི་གཅིག་པུ་བྱུང་བ་ཡང་། །ལྷན་ཅིག་སྐྱེས་པའི་ཤ་རུས་དག །ཞིག་སྟེ་སོ་སོར་འགྱེས་འགྱུར་ན། །མཛའ་བ་གཞན་དག་ཅི་ཞིག་སྨོས། །ཞེས་འཆི་བའི་དུས་སུ་གྲོགས་མེད་གཅིག་པུར་འགྲོ་བའི་ཚུལ་རྣམས་ལ་ཡིད་འཇིགས་ཞུམ་ཞུམ་པ་མ་བྱུང་གི་བར་དུ་བསྒོམ་མོ། །བཤད་མ་ཐག་པའི་སྡུག་བསྔལ་དེ་དག་ཀྱང་རང་རེ་རྣམས་ཀྱིས་སྔོན་ཆད་མྱོང་ཟིན་པ་དང་། །ད་ལྟའི་སྤྱོད་ཚུལ་ལ་དཔགས་ན་སླར་ཐོག་ཏུ་འབབ་པ་ལས་འོས་མེད་དོ། །པོ་ཏོ་བའི་ཞལ་ནས། རིགས་དྲུག་གང་དུ་སྐྱེས་ཕན་ཆད་ན་ཚ་དང་འཆི་བ་ལ་སོགས་པའི་སྡུག་བསྔལ་འབྱུང་བ་ནི་ན་རྒྱུ་ཅིག་ན་བ་ཡིན། འཆི་རྒྱུ་ཅིག་འཆི་བ་ཡིན་གྱི་དེ་ལ་མི་འོས་པ་ཅིག་གློ་བུར་དུ་བྱུང་བ་མིན། འཁོར་བའི་མཚན་ཉིད་དམ་རང་བཞིན་ཡིན། འཁོར་བར་གནས་རིང་ལ་དེ་ལས་མ་འདས། རང་ཅག་དེ་ལ་ཡིད་འབྱུང་ན་སྐྱེ་བ་སྤོང་དགོས། དེ་ལ་རྒྱུ་སྤོང་དགོས་ཞེས་གསུངས་པས་ཀྱང་ཤེས་སོ། །སྨྲས་པ། མངལ་མི་གཙང་རྫས་ཀྱི་ལྗན་ལྗིན་ཁྲོད། །ཡུལ་གཟུགས་སྣང་མི་མཐོང་མུན་ཁུང་དུ། །ཡོངས་སྡུག་བསྔལ་དྲག་པོས་རབ་བཅེར་བའི། །ལུས་ལང་ཚོ་རྒྱས་པའི་མཛེས་སྡུག་
ཅན། །སྐྲ་མིག་སྨན་མདོག་དེ་གངས་ལྟར་དཀར། །མདངས་འོད་བཀྲག་ཅན་དེ་མུན་ལྟར་གནག །ལུས་དྲང་པོར་སྐྱེས་པ་གཞུ་ལྟར་གུག །ཡུལ་འདོད་ལ་སྲེད་བྲལ་རྒ་བས་ནོན། །སྨན་མོ་བོན་རིམ་གྲོས་མ་ཕན་པར། །ཞག་རེ་རེས་སོང་གི་ཇེ་ཐུར་ན། །གྲོགས་ཉེ་དུ་གཡོག་འཁོར་སུན་ནས་འབྱོལ། །འདི་གཤིན་རྗེས་འབོད་པའི་ཕོ་ཉ་ཡིན། །དུས་ད་ལྟ་སེམས་དང་དབྱེར་མེད་འདྲའི། །གཟུགས་ཟག་ཕུང་མལ་སྟན་སྟེང་བཞག་ནས། །ཡིད་རྣམ་ཤེས་གཅིག་པུར་བར་དོ་ཡི། །འཕྲང་རིང་པོ་བརྒལ་ནས་འཁོར་བར་འཁྱམ། །ཐབས་དུ་མའི་སྒོ་ནས་ཉེར་བཟློག་ཀྱང་། །སྡང་དགྲ་གདོན་འཚེ་བ་ཆར་ལྟར་འབབ། །ཤ་ཐང་ཐང་བསྒྲུབས་ཀྱང་ལོངས་སྤྱོད་གཉེན། །སོས་ཐེན་པའི་སྤྲིན་ལྟར་ཕྱོགས་བཅུར་འཐོར། །ལུས་ལྷ་ཡི་དཔལ་ལ་སྤྱོད་བཞིན་དུ། །སེམས་དམྱལ་པའི་སྡུག་བསྔལ་དངོས་མྱོང་བའི། །ལྷ་འཆི་བའི་ལྟས་ཀྱི་སྡུག་བསྔལ་དེས། །སྙིང་ལྕགས་ལས་བྱས་ཀྱང་འགས་མིན་ནམ། །བྱ་ནམ་མཁའི་དབྱིངས་སུ་འཕུར་འཕུར་ནས། །མཐར་ས་ལ་འབབ་པ་ཇི་བཞིན་དུ། །གནས་སྲིད་རྩེར་ཕྱིན་ཀྱང་ཁམས་གསུམ་འདིར། །ལར་མགལ་མེ་ལྟ་བུར་འཁོར་བས་སྐྱོ། །དཔལ་ལྷ་མིའི་དབང་ཕྱུག་དམ་པ་རྣམས། །བྲན་ཡང་བྲན་འགྱུར་ཞིང་གནས་ངན་ལེན། །ལྷ་ཉི་ཟླ་མུན་པའི་རུམ་སྐྱེ་ན། །ད་འཁོར་བར་ཕྱི་ཕྱག་འཚལ་རེ་རན། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་ཀུན་འབྱུང་འཁོར་བའི་འཇུག་རིམ་བསྒོམ་པ་ནི། བཤད་མ་ཐག་པའི་སྲིད་པ་འཁོར་བའི་སྡུག་བསྔལ་གྱི་གནས་ཚུལ་ཤེས་པར་བྱས་ནས། དེ་མི་འདོད་ན་དེའི་རྒྱུ་སྤོང་
དགོས། སྤོང་བ་ལ་རྒྱུ་ངོས་ཟིན་དགོས་པས་གང་ཡིན་ན་ཀུན་འབྱུང་ཡིན་ལ། དེ་ལ་ལས་ཉོན་གཉིས་ཡོད་པའི་གཙོ་བོ་ནི་ཉོན་མོངས་པ་སྟེ། དཔེར་ན་ཞིང་ས་སྐམ་པོ་ལ་ས་བོན་བཏབ་ཀྱང་ཆུ་ལུད་སོགས་དང་མ་ཕྲད་ན་འབྲས་བུ་མི་འབྱིན་པ་ལྟར་རྣམ་འགྲེལ་ལས། སྲིད་པའི་སྲེད་ལས་རྣམ་བརྒལ་པའི། །ལས་གཞན་འཕེན་ནུས་མ་ཡིན་ཏེ། །ལྷན་ཅིག་བྱེད་པ་ཟད་ཕྱིར་རོ། །ཞེས་དུད་འགྲོར་སྐྱེ་བའི་ལས་བསགས་པའི་མི་ཞིག་ལས་དེ་དང་མ་ཕྲད་པའི་སྔོན་རོལ་དུ་ཞི་བའི་གོ་འཕང་ཐོབ་ན་ལས་དེ་སྟོང་ཟད་དུ་སོང་ནས་འབྲས་བུ་མི་འབྱིན་པ་ཡིན་པས་སྤྱོད་འཇུག་ལས། གལ་ཏེ་ལྷ་དང་ལྷ་མིན་རྣམས། །ཐམས་ཅད་བདག་ལ་དགྲར་ལངས་ཀྱང་། །དེ་དག་གིས་ཀྱང་མནར་མེད་པའི། །མེ་ནང་འཁྲིད་ཅིང་འཇུག་མི་ནུས། །ཉོན་མོངས་སྟོབས་ཅན་དགྲ་འདིས་ནི། །གང་དང་ཕྲད་ན་རི་རབ་ཀྱང་། །ཐལ་བ་ཡང་ནི་མི་ལུས་པ། །དེར་བདག་སྐད་ཅིག་གཅིག་ལ་འདོར། །ཞེས་འགྲོ་བ་ཐམས་ཅད་དགྲར་ལངས་ཀྱང་ཚེ་ཕྱི་མ་སྡུག་བསྔལ་ལ་སྦྱོར་མི་ནུས་ལ། །ཉོན་མོངས་པའི་དགྲ་འདི་རྐྱེན་དང་ཕྲད་ན་སྡུག་བསྔལ་དྲག་པོས་མནར་ཏེ་ཐལ་བར་རློག་པ་ལས་འོས་མི་འདུག །དེ་ཡང་ཉོན་མོངས་དེ་ངོས་བཟུང་ན་ཆགས་སྡང་སོགས་སྐྱེས་པས་སེམས་བློང་བློང་པོར་སོང་བ་ལྟ་བུ་ལ་མ་ཞི་བར་འཇོག་པས་དེ་འདྲ་བའི་སེམས་རྒྱུད་རབ་ཏུ་མ་ཞི་བར་བྱེད་པའི་ཤེས་པ་ཅིག་གི་སྟེང་ནས་ངོས་འཛིན་དགོས་ལ། རང་རེ་རྣམས་ཀྱི་རྒྱུད་ལ་ཉོན་མོངས་པ་བག་ལ་ཉལ་བའི་ཚུལ་གྱིས་ཡོད་པ་ནི་ཤོག་བུ་ལ་སྣུམ་ཕོག་པ་བཞིན་དབྱེ་དཀའ་བས་མི་ནད་
རོ་ཡོད་པ་ཞིག་འཕྲལ་དུ་ལུས་ཐང་པོ་ཡོད་པ་འདྲ་བ་ལ་ནད་སློང་བྱེད་ཀྱི་ཟས་ཟོས་པས་ཟུག་གཟེར་བསྐྱེད་པ་བཞིན་ཡིད་དུ་འོང་བའི་བུ་ཕོ་མོ་དང་རྟ་ཕྱུགས་གོས་དང་རིན་པོ་ཆེ་སོགས་དངོས་པོ་མཐོང་བ་ན་དེས་གསོས་བཏབ་པའི་འདོད་ཆགས་བག་ལ་ཉལ་བ་དེ་མངོན་གྱུར་གྱི་ཚུལ་དུ་ལངས་ཏེ། དེ་དག་ལ་ལྟ་བ་དང་རེག་པ་སོགས་ལོངས་སྤྱོད་འདོད་ཀྱི་བློ་དུང་དུང་བ་ཡོང་བའི་ཉོན་མོངས་དེ་འདོད་ཆགས་ཡིན་པས་ཉམས་ལེན་གྱི་ཚེ་རང་ཉིད་ཡུལ་གང་ལ་འདོད་ཆགས་ཡོད་པ་བཞིན་དངོས་སུ་ལྟར་ཡོད་དམ་མེད་ནའང་སེམས་ཀྱིས་གསལ་བཏབ་ན་སྔར་ཤེས་པ་སོ་ན་ཡོད་པ་དེ་འདོད་ཆགས་མངོན་གྱུར་གྱི་བློས་ཀུན་རྟོག་རགས་པ་གཞན་རྣམས་འགགས་ཏེ་བསྲན་པར་མི་བཟོད་པའི་ཆགས་པ་སྐྱེས་པ་ན་དེ་ཉིད་བཅར་གྱིས་ངོས་ཟིན་པ་བྱས་ནས་རྗེས་སུ་ཁོ་ནམ་བྱུང་ཙ་ན་དེའི་གཉེན་པོ་བསྟེན་པ་ཞིག་དགོས་ཀྱི་ཉོན་མོངས་པ་ཁ་རྒྱལ་དུ་སོང་བའི་ཆོས་དེས་གར་ཡང་མི་ཕྱིན་གསུང་། དཔེར་ན་ལྷས་བྱིན་ཞེས་བྱ་བའི་མི་ཞིག་གསོད་རྒྱུ་ཡིན་ན་དེའི་བྱས་དབྱིབས་སོགས་གཞན་དང་མ་འདྲེས་པར་ངེས་པར་བྱས་ནས་སླར་ནམ་བྱུང་བའི་ཚེ་མཚོན་བསྣུན་དགོས་པ་ལྟ་བུ་སྟེ། དགེ་བའི་བཤེས་གཉེན་འབན་གུང་རྒྱལ་གྱིས། ཉོན་མོངས་པའི་མཁར་སྒོར་གཉེན་པོའི་མདུང་ཐུང་འཛིན་གསུང་བ་ཡང་འདི་དག་ལ་དགོངས་པར་སྣང་ངོ་། །དགྲའམ་མི་མཛའ་བ་ཞིག་མཐོང་བའི་ཚེ་མནར་སེམས་རྩུབ་མོས་འདི་ལ་ཐབས་གང་འདྲ་ཞིག་གི་སྒོ་ནས་གནོད་པ་བྱ་ན་སྙམ་པའི་ཞེ་སྡང་དྲག་པོ་སོལ་མེ་རླུང་གིས་སྤར་བ་ལྟ་བུའི་དམར་ལམ་ལམ་པ་སྐྱེས་པའི་ཉོན་མོངས་དེ་ཁོང་ཁྲོ། བདག་འཛིན་གྱི་
དབང་གིས་རིགས་མཐོ་བ། ནོར་གྱིས་ཕྱུག་པ། ཐོས་པའི་ཡོན་ཏན། ལུས་ཀྱི་སྒྱུ་རྩལ་སོགས་ལ་བརྟེན་ནས་གང་ཟག་ཆེ་གེ་མོ་འདི་དག་གིས་བདག་གི་བ་སྤུའི་ཁུང་བུ་གཅིག་ཙམ་ལ་ཡང་མི་བསྡོ་སྙམ་པའི་རང་ཉིད་ལ་མཆོག་ཏུ་འཛིན་པའི་ཁེངས་པའི་རྣམ་པ་ཅན་གྱིས་ཉོན་མོངས་དེ་ང་རྒྱལ། སྐར་ཁུང་མེད་པའི་ཁང་པའི་ནང་དུ་དངོས་པོ་ཁ་དོག་དང་དབྱིབས་མི་འདྲ་བ་མང་པོ་ཡོད་ཀྱང་མུན་པའི་དབང་གིས་དཀར་ནག་དང་ལེགས་ཉེས་སོགས་མི་ཤེས་པ་བཞིན་དུ་ལས་འབྲས་བདེན་བཞི་དེ་ཁོ་ན་ཉིད་སོགས་ཇི་ལྟ་ཇི་སྙེད་ཀྱི་གནས་ལུགས་མཐའ་དག་བསྒྲིབས་ཏེ་མི་གསལ་བར་བྱེད་པ་པོའི་ཉོན་མོངས་དེ་མ་རིག་པ། དཀོན་མཆོག་གསུམ་དང་ལས་འབྲས་སོགས་གསུང་རབ་ནས་བཤད་པ་འདི་དག་བདེན་ནམ་མི་བདེན་སྙམ་པ་ལྟ་བུའི་ཡུལ་ལ་ངེས་ཤེས་བསྐྱེད་པ་ལ་གེགས་བྱེད་པ་པོའི་ཉོན་མོངས་དེ་ཐེ་ཚོམ། མི་རྟག་པ་ཡིན་པས་རང་དུས་ཀྱི་སྐད་ཅིག་མ་གཉིས་པ་ལ་འཇིག་ཅིང་། གཅིག་མ་ཡིན་པར་དུ་མ་ཚོགས་པའི་ཕུང་པོ་ལྔ་ལྟ་བུའི་གདགས་གཞིའི་སྟེང་ནས་ང་དང་ངའི་ཞེས་བདག་ཏུ་འཛིན་པའི་ཤེས་རབ་ཉོན་མོངས་ཅན་དེ་འཇིག་ཚོགས་ལ་ལྟ་བ། ཕུང་པོའི་སྟེང་ནས་ངར་བཟུང་བ་དེ་རྟག་པ་ཐེར་ཟུག་གམ་འདི་ནས་ཕྱི་མར་ཉིང་མཚམས་སྦྱོར་བ་མེད་པར་ཆད་པར་ལྟ་བའི་ཤེས་རབ་ཉོན་མོངས་ཅན་དེ་མཐར་འཛིན་པའི་ལྟ་བ། འཇིག་ལྟ་མཐར་ལྟ་ལོག་ལྟ་གསུམ་པོ་གང་རུང་དང་། དེ་དག་གང་ལ་བརྟེན་ནས་འབྱུང་བའི་ཕུང་པོ་ལ་དམིགས་ནས་མཆོག་ཏུ་འཛིན་པའི་ཤེས་རབ་ཉོན་མོངས་ཅན་དེ་ལྟ་བ་མཆོག་ཏུ་འཛིན་པ། རང་གི་བློ་ངོར་
འཆལ་ཚུལ་སྤངས་པའི་ཚུལ་ཁྲིམས་དང་། སྐྲ་བྲེགས་པས་གཡང་གཞི་དང་ཀེང་རུས་འཆང་བ། ཟས་གཅོད་པ་མེ་ལྔ་བསྟེན་པ་རྐང་པ་གཅིག་གིས་འགྲེང་སྟེ་ཉི་མ་ལ་བལྟ་བ། གཅེར་བུ་ལུས་ལ་ཐལ་བ་བྱུགས་ཤིང་ངག་མི་སྨྲ་བ་ལྟ་བུའི་བརྟུལ་ཞུགས་དང་། དེ་དག་གང་ལ་བརྟེན་ནས་འབྱུང་བའི་ཕུང་པོ་ལ་དམིགས་ནས་གྲོལ་བ་ཐོབ་པར་འདོད་པའི་ཤེས་རབ་ཉོན་མོངས་ཅན་དེ་ཚུལ་ཁྲིམས་བརྟུལ་ཞུགས་མཆོག་འཛིན། དེ་ཡང་འདི་ནི་ཚུལ་ཁྲིམས་རྣམ་དག་ལ་རློམ་པའི་མཆོག་འཛིན་མིན་གྱི། སོ་སྐྱེ་ཐ་མལ་བ་མངོན་ཤེས་ཐོབ་ནས་ཚེ་སྔ་མ་ཁྱི་ཕག་གི་བརྟུལ་ཞུགས་འཛིན་པ་ལྟ་བུ་མཐོང་བས་རྒྱུ་དེས་མི་ལུས་ཐོབ་པར་བཟུང་ནས་ད་ལྟ་བརྟུལ་ཞུགས་དེ་འཛིན་པ་སོགས་ལོག་ལྟ་ཞིག་དགོས་གསུང་། ལས་འབྲས་དང་ཚེ་སྔ་ཕྱི་མེད་ཅེས་སྐུར་བ་འདེབས་ཤིང་། འཇིག་རྟེན་འཆགས་འཇིག་ཚངས་པ་དབང་ཕྱུག་ཁྱབ་འཇུག་སོགས་ཀྱིས་བྱས་པར་འདོད་པའི་ཤེས་རབ་ཉོན་མོངས་ཅན་དེ་ལོག་ལྟ་ཡིན་ནོ། །དེ་ལྟར་ཉོན་མོངས་པ་གཞན་རྣམས་ཀྱང་ཚིག་བཤར་དང་སྐྱོར་སྦྱང་ཙམ་དུ་སོང་བ་ཡིན་པའི་རེ་རེ་བཞིན་ནས་རང་རྒྱུད་ལ་མངོན་གྱུར་ཏུ་སྐྱེད་བཅུག་ནས། རྗེས་སུ་འབད་རྩོལ་ལ་མ་ལྟོས་པར་སྐྱེས་མ་ཐག་ནས་ངོས་འཛིན་པ་ལ་དཀའ་བ་མེད་པ་སྔར་འདྲིས་ཀྱི་མི་ཁྲོམ་ཁྲི་ཕྲག་ཚོགས་པའི་ཁྲོད་ནས་ཀྱང་མཐོང་བ་ཙམ་གྱིས་ངོ་ཤེས་པ་ལྟ་བུ་ཞིག་མ་བྱུང་ན་དགྲ་ངོ་མ་ཤེས་པར་ཁྲོམས་གསེབ་ཏུ་ལོང་མདའ་འཕེན་པ་དང་འདྲ་གསུང་། དེ་ཡང་ཉོན་མོངས་པ་བཅུ་པོ་གང་རུང་རེ་མངོན་གྱུར་ཏུ་སྐྱེས་ན་ཅུང་ཟད་ངོ་འཕྲོད་པ་སླ་ནའང་། ལྡན་པ་དང་འདུས་པའི་ནད་སྨན་པ་རྣམས་ཀྱིས་ངོས་འཛིན་ཅུང་དཀའ་བ་ལྟར་ཉོན་མོངས་པ་གཉིས་ལྡན་
གསུམ་ལྡན་གྱི་ཚུལ་དུ་མངོན་གྱུར་ཏུ་སྐྱེས་ན་ཉམས་འོག་ཏུ་ཆུད་དཀའ་བ་ཤིང་རྟ་ལྟ་བུ་ལ་འདོད་ཆགས་ཀྱི་བློ་མངོན་གྱུར་བས་ཐོབ་ཏུ་རེ་བའི་ཚེ་གཞན་གྱིས་བཙན་ཐབས་སུ་ཁྱེར་ན་དེ་ལ་ཞེ་སྡང་སྐྱེ། ཞེ་སྡང་ཆེ་ཆུང་གི་རྒྱུ་ཤིང་རྟ་ལ་དམིགས་པའི་འདོད་ཆགས་ཆེ་ཆུང་གིས་བྱེད་ཅིང་། ཡན་ལག་བདུན་ཙམ་ཚོགས་པ་ལ་ཁོ་རང་གི་ངོས་ནས་ཤིང་རྟར་འཛིན་པའི་བདེན་ལྟ། དེ་ལ་མཆོག་ཏུ་འཛིན་པ་སོགས་དུས་གཅིག་ལ་ཉོན་མོངས་པ་བཞི་ཙམ་མངོན་གྱུར་ཏུ་སྐྱེ་བས་ཞིབ་མོར་དཔྱད་དེ་ངོ་འཕྲོད་པ་བྱེད་དགོས་ལ། ཉོན་མོངས་པ་ཐམས་ཅད་ཀྱི་རྩ་བ་མ་རིག་པ་དང་འཇིག་ལྟ་གཉིས་གཅིག་ཏུ་བྱས་ཀྱང་འགལ་བ་མེད་མོད། སྤུ་རིས་འབྱེད་ཚེ་སོ་སོར་བྱ་སྟེ། དཔེར་ན་ཐག་པའི་གནས་ལུགས་མི་གསལ་བར་བྱེད་པའི་མུན་པ་དེ་མ་རིག་པ་དང་། དེ་ལ་བརྟེན་ནས་ཐག་པ་ལ་སྦྲུལ་དུ་འཛིན་པའི་བློ་དེ་འཇིག་ལྟ་ལྟ་བུ་ཡིན་པས་འདི་གཉིས་ཀྱིས་ཉོན་མོངས་པ་ཐམས་ཅད་ཀྱི་རྩ་བ་བྱས་ནས་ཆགས་སྡང་གི་དབང་གིས་ཉེས་པ་ཐམས་ཅད་བསྐྱེད་པའི་ཕྱིར། རྣམ་འགྲེལ་ལས། བདག་ཡོད་ན་ནི་གཞན་དུ་ཤེས། །བདག་གཞན་ཆ་ལས་འཛིན་དང་སྡང་། །འདི་དག་དང་ནི་ཡོངས་འབྲེལ་ལས། །ཉེས་པ་ཐམས་ཅད་འབྱུང་བར་འགྱུར། །ཞེས་གསུངས་སོ། །དེ་ལྟར་ཉེས་པ་མ་ལུས་པ་བསྐྱེད་པའི་རྒྱུ་ཉོན་མོངས་པ་འདི་ད་ལྟ་ཅུང་ཟད་འགོ་གནོན་པའི་ལུགས་སུ་བྱས་ཀྱང་། རྩ་བ་ནས་དྲུངས་འབྱིན་པར་མ་ནུས་ན་མེ་ལོང་ལ་འཆར་བའི་གཟུགས་བརྙན་ལྟར་བག་ལ་ཉལ་བ་དེས་ཉོན་མོངས་པ་འཕེལ་བའི་རྟེན་བྱེད། མེ་ལོང་དང་བྱད་བཞིན་ཕྲད་པ་ན་དེ་མ་ཐག་
གཟུགས་བརྙན་འཆར་བ་བཞིན་དགྲ་གཉེན་སོགས་ཡུལ་སྣ་ཚོགས་ལ་བརྟེན་ནས་མངོན་གྱུར་ཏུ་སྐྱེ་བའི་དམིགས་པའི་སྒོ་ནས་ཉོན་མོངས་པ་འཕེལ་བར་བྱེད། དགེ་བའི་བཤེས་གཉེན་དང་གྲོགས་ཆོས་བྱེད་ལས་རིང་དུ་འགྱུར་ཞིང་ཉོན་མོངས་པ་ཤིན་ཏུ་ཆེ་བའི་གྲོགས་ངན་པའི་གཏམ་དང་ཀུན་སྤྱོད་སོགས་ཀྱི་འདུ་འཛི་ལ་བརྟེན་ནས་ཉོན་མོངས་པ་འཕེལ་བར་བྱེད། མི་དགེ་བའི་བཤེས་གཉེན་སོགས་ཀྱིས་ཉོན་མོངས་པ་མ་སྤངས་བཞིན་དུ་ཐར་པ་ཐོབ་པ་སྐད་ཀྱི་བཤད་པའི་དབང་གིས་ཉོན་མོངས་པ་འཕེལ་བར་བྱེད། ཁ་ཏོན་སོགས་ཤིན་ཏུ་བྱང་བ་ཞིག་སེམས་རྒྱ་ཡན་དུ་བཏང་ཡང་ངག་ནས་ཐོགས་མེད་དུ་འགྲོ་བ་བཞིན་སྔར་ནས་ ཧ་ཅང་འདྲིས་པས་གོམས་པའི་དབང་གིས་ཉོན་མོངས་པ་འཕེལ་བར་བྱེད 
། གང་ཟག་འདིས་ཕན་གནོད་འདི་ལྟར་བྱས་སྙམ་པ་ལྟ་བུའི་ཆགས་སྡང་གིས་སྒྲོ་སྣ་ཚོགས་འདོགས་པ་དང་། མི་འདིས་སྡིག་པ་ཆེན་པོ་བྱས་སོང་ཡང་ད་ལྟ་སྐྱིད་པར་འདུག་པས་ལས་འབྲས་མི་བདེན་སྙམ་པ་ལྟ་བུའི་ཚུལ་མིན་ཡིད་བྱེད་ཀྱི་སྒོ་ནས་ཉོན་མོངས་པ་འཕེལ་བར་བྱེད་པས་རྒྱུ་དྲུག་པོ་འདི་དག་ངོས་ཟིན་པར་བྱས་ནས་འཕྲང་དམ་སར་དགྲ་ལ་བསྒུགས་རྒྱག་པ་ལྟ་བུའི་ཉམས་ལེན་ཞིག་མ་བྱུང་བར་ཉོན་མོངས་པའི་དབང་དུ་གྱུར་ན་འདི་ཕྱི་ཐམས་ཅད་དུ་སྡིག་པ་སྣ་ཚོགས་པ་བསྐྱེད་ནས་འཁོར་བའི་སྡུག་བསྔལ་ལ་སྦྱོར་ཞིང་མྱ་ངན་ལས་འདས་པ་ལས་རིང་དུ་བྱེད་པར་གདའ་བས་སྔོན་ཆད་འདི་ལ་གྲོགས་སུ་བཟུང་བས་བདག་རྒུད་པ་ཐམས་ཅད་ཀྱི་རྩ་བར་སོང་འདུག །ཚེ་འདིའི་གནོད་པ་ཅུང་ཟད་བྱས་པ་ལའང་དགྲ་ཞེས་སྙིང་ན་ན་ལྟར་བྱེད་ན། ཚེ་རབས་ཐོག་མ་མེད་
པ་ནས་ད་ལྟའི་བར་སྡུག་བསྔལ་ཁོ་ན་ལ་སྦྱོར་པའི་དགྲ་ཉོན་མོངས་པ་འདི་ལ་ནུས་པ་ཐོན་པ་ཞིག་ཅིའི་ཕྱིར་མི་བྱེད། འདི་འཇོམས་པར་བྱེད་པའི་གཉེན་པོ་ཡང་ཡང་བསྟེན་ནས་དྲུངས་ཕྱུང་ན་དགྲ་གཞན་ལྟར་ཁོ་སླར་བལྡབ་རྒྱུ་མེད་པས། ཐ་མལ་དགྲ་བོ་ཡུལ་ནས་ཕྱུང་ཡང་ནི། །ཡུལ་གཞན་དག་ཏུ་གནས་ཤིང་ཡོངས་བཟུང་ནས། །ནུས་པ་བརྟས་ནས་དེ་ནས་ཕྱིར་ལྡོག་གི །ཉོན་མོངས་དགྲ་ཚུལ་དེ་དང་འདྲ་མ་ཡིན། །ཉོན་མོངས་ཉོན་མོངས་ཤེས་རབ་མིག་གིས་སྤངས། །བདག་ཡིད་ལས་བསལ་གང་དུ་འགྲོ་བར་འགྱུར། །གང་དུ་གནས་ནས་བདག་གནོད་བྱ་ཕྱིར་འོང་། །བློ་ཞན་བདག་ལ་བརྩོན་པ་མེད་པར་ཟད། །ཅེས་སོ། །དེ་ལྟར་ལས་ཉོན་གྱི་དབང་གིས་སྐྱེ་བ་བླངས་པ་རྣམས་ནི་འཆི་འཕོ་བ་དང་ཉིང་མཚམས་སྦྱོར་བ་ལས་མ་འདས། དེ་ལ་ཡང་ཚེ་ཟད་ནས་དུས་ལ་བབ་པའི་འཆི་བ། ཟས་དང་སྤྱོད་ལམ་སོགས་ལོག་པས་གློ་བུར་དུ་འཆི་བའི་རྐྱེན་དགུ་མདོ་ལས་གསུངས་པ་སོགས་རྣམ་གྲངས་མང་ན་ཡང་། འཆི་ཁ་དང་ཤི་ཟིན་པའི་འོག་ཏུ་ཕན་གནོད་བྱེད་པ་ནི་སྔར་བཤད་པའི་ཉོན་མོངས་པ་རྣམས་ཀྱིས་སེམས་པའི་ལས་དང་བསམ་པའི་ལས་གཉིས་ཀྱི་དགེ་མི་དགེའི་ལས་བསགས་པ་ལ་བརྟེན་ནས་བདེ་སྡུག་འབྱུང་བ་ཡིན་ལ། དེ་ཡང་ཚེ་འདིར་དགེ་བ་སྟོབས་ཆེར་བྱེད་པ་ཞིག་མངའ་ཐང་དང་ལུས་སྲོག་ལ་གནོད་པ་དང་འཆི་ཁར་གནད་གཅོད་ཆེན་པོ་འབྱུང་བ་ཡང་སྲིད་ལ། སྡིག་པ་ཤས་ཆེར་སྤྱོད་པ་ལ་བདེ་བ་ཕུན་སུམ་ཚོགས་པ་འབྱུང་བ་ཡང་ཡོད་པས་བླུན་པོ་ལ་ལ། ལས་འབྲས་མི་བདེན་པ་འདི་ལྟ་བུའོ་ཞེས་ལོག་རྟོག་བྱེད་པ་
འབྱུང་མོད། དེ་དག་ནི་ཚེ་སྔོན་མའི་དགེ་སྡིག་སྟོབས་ཆེན་པོའི་འབྲས་བུ་ཚེ་འདིར་མ་སྨིན་པའི་ངེས་པའང་ཅི་ཡོད། རྣམ་པ་གཅིག་ཏུ་ན་སྤྱོད་འཇུག་ལས། བསད་བྱའི་མི་ཞིག་ལག་བཅད་དེ། །གལ་ཏེ་ཐར་ན་ཅིས་མ་ལེགས། །གལ་ཏེ་མི་ཡི་སྡུག་བསྔལ་གྱིས། །དམྱལ་བ་བྲལ་ན་ཅིས་མ་ལེགས། །ཞེས་སྲོག་ལ་འབབ་པའི་ཉེས་པ་ཞིག་ལག་པ་བཅད་པས་ཐར་བ་བཞིན་ཕྱི་མ་དམྱལ་བར་སྐྱེ་དགོས་པ་ཞིག་མིའི་རྟེན་ལ་སྡུག་བསྔལ་མྱོང་བས་གོ་ཆོད་པ་ལྟ་བུ་དང་། སྒྲ་སྒྲོག་གི་རྒྱལ་པོ་གཙུག་ཕུད་ཅན་གྱིས་འཕགས་པ་ཀཱ་ཏྱ་ཡ་ན་ལ་ཐལ་བ་གཏོར་བས་ཐོག་མར་རིན་པོ་ཆེ་སོགས་ཀྱི་ཆར་བབས་ཀྱང་རྗེས་སུ་ས་ཆར་བབས་པའི་འོག་ཏུ་ནོན་པ་ལྟ་བུས་ཤེས་ནུས་ལ། ཁྱད་པར་སྐྱེ་བ་དེ་མ་ཐག་པ་དེ་བདེ་འགྲོ་དང་ངན་འགྲོ་གང་དུ་སྐྱེ་བ་ཆོས་མངོན་པ་ལས། ལས་ཀྱིས་འཁོར་བར་ལྕི་གང་དང་། །ཉེ་བ་གང་དང་གོམས་པ་གང་། །སྔོན་བྱས་གང་ཡིན་དེ་དག་ལས། །སྔ་མ་སྔ་མ་རྣམ་སྨིན་འགྱུར། །ཞེས་དགེ་མི་དགེའི་ལས་སྣ་ཚོགས་རང་རྒྱུདལ་ཡོད་བཞིན་པ་ན་ཚེ་དེར་དགེ་སྡིག་གང་ལ་གོམས་པ་ཤས་ཆེ་བའི་སེམས་འཆི་ཁའི་གནས་སྐབས་སུ་ཡང་འོང་བས་ཕྱི་དབུགས་ཆད་ཁའི་གནས་སྐབས་ཀྱི་འཆི་སེམས་དེ་རགས་པ་དང་། ཕྱི་དབུགས་ཆད་ཅིང་ནང་དབུགས་མ་ཆད་པའི་བར་དེར་འཆི་སེམས་ཕྲ་མོ་ཡིན། འཆི་སེམས་རགས་པའི་སྐབས་དགྲ་གཉེན་ལ་ཆགས་སྡང་སོགས་མི་དགེ་བའི་སེམས་དང་། དཀོན་མཆོག་རྗེས་སུ་དྲན་པ་སོགས་དགེ་བའི་སེམས་སྔར་གོམས་པ་གང་ཆེ་རང་སྟོབས་ཀྱིས་དྲན་པ་དང་། ལ་ལ་ནད་ཀྱི་དབང་གིས་མི་གསལ་བ་རྣམས་ལ་གྲོགས་ཀྱིས་དགེ་བའི་གཏམ་སྣ་ཚོགས་ཀྱི་སྒོ་ནས་གསོས་བཏབ་སྟེ། དཔེར་
ན་སྡིག་པ་ཡང་ལྕི་ཆ་སྙོམས་པ་དང་འཆི་ཁའི་དུས་འབྲས་བུ་ཉེ་རིང་མེད་པ་ལ་གོམས་པ་གཙོ་ཆེ་བས །སྡིག་པ་ཆེན་པོ་སྤྱོད་པའི་མི་ཡང་འཆི་ཁར་དགེ་སེམས་མངོན་གྱུར་གྱི་ངང་ནས་ཤི་ན་བདེ་འགྲོར་སྐྱེ་ཞིང་། དགེ་བ་སྟོབས་ཆེན་བསགས་ཀྱང་འཆི་ཁར་སྡིག་སེམས་མངོན་གྱུར་བྱུང་ན་ངན་འགྲོར་སྐྱེ་བའི་གནད་འགག་ཅིག་འདིར་སྣང་མོད། འོན་ཀྱང་རང་བློ་རང་ལ་ལྐོག་ཏུ་མ་གྱུར་བས་སྔར་བྱས་ཀྱི་ལས་རྣམས་དྲན་པས་དགའ་བ་དང་འགྱོད་པ་གང་རུང་འོང་བའི་ཕྱིར་ན་དགེ་སྡིག་གི་རྣམ་དབྱེ་མི་ཤེས་པའི་སྡིག་ཅན་ཞིག་ལའང་ཚེ་འདིར་གོམས་པ་ཤས་ཆེ་བའི་སྡིག་སེམས་དེ་ག་འབྱུང་བ་ལས་འོས་མེད། འོན་ཀྱང་དེ་བཞིན་གཤེགས་འི་མཚན་དང་གཟུངས་སྔགས་ཁྱད་པར་ཅན་གྱིས་ངན་འགྲོའི་སྐྱེ་གནས་ལས་བཟློག་པའི་ཕན་ཡོན་ནི་ཆེའོ། །འཆི་སེམས་ཕྲ་མོའི་དུས་སུ་དགེ་མི་དགེའི་སྣང་བ་གང་ཡང་མི་འཆར་བས་ལུང་མ་བསྟན་གྱི་སེམས་ཡིན། དེ་ཡང་སྤྱིར་བཏང་ལ་དགེ་བ་བྱེད་པ་རྣམས་གནད་གཅོད་ཆུང་ཞིང་གཟུགས་ཡིད་དུ་འོང་བ་རྨི་ལམ་ལྟ་བུར་མཐོང་བ་དང་མུན་པའི་ཁྲོད་ནས་སྣང་བར་འགྲོ་བ་ལྟ་བུ་འབྱུང་ལ། མི་དགེ་བ་བྱེད་པ་རྣམས་ནི་དེ་ལས་གོ་ལྡོག །དགེ་སྡིག་ཅན་གང་ཡང་འཆི་ཁའི་ཚེ་ད་ནི་འཆི་བ་འདུག་སྙམ་པའི་ལུས་ལ་ཆགས་པ་དྲག་པོ་ཞིག་སྐྱེས་པས་རྒྱུ་བྱས། རྣམ་ཤེས་འཕོས་པ་དང་མཉམ་དུ་སྲང་མདའི་མཐོ་དམའ་ལྟར་བར་དོའི་ལུས་གང་དུ་སྐྱེ་འགྱུར་གྱི་བྱད་དབྱིབས་ཅན་དུ་གྲུབ་སྟེ། དམྱལ་བའི་བར་དོ་ནི་སྡོང་དུམ་མེས་འཚིག་པ། དུད་འགྲོའི་བར་དོ་ནི་དུ་བ། ཡི་དྭགས་ཀྱི་བར་དོ་ནི་ཆུ། འདོད་ལྷ་དང་མིའི་བར་དོ་གསེར། གཟུགས་ཁམས་པའི་བར་དོ་ཁ་དོག་དཀར་
པོའི་རྣམ་པ་ཅན། ལྷའི་བར་དོ་གྱེན། མིའི་བར་དོ་ཐད་ཀ་ངན་སོང་གི་བར་དོ་ཐུར་དུ་འགྲོ་ཞིང་། ཞག་ཞེ་དགུ་ཚུན་ལ་ཕ་མ་ཉལ་པོ་བྱེད་པ་སྒྱུ་མ་བཞིན་དུ་མཐོང་སྟེ། དེར་ཆགས་སྡང་གི་དབང་གིས་ཞུགས་པས་ཉིང་མཚམས་སྦྱོར་ཞིང་། དམྱལ་བར་སྐྱེ་བ་ལྟ་བུ་ལ་སྲོག་གཅོད་པའི་ཡུལ་གྱི་སེམས་ཅན་མཐོང་བས་རྐྱེན་བྱས་ཏེ་སྐྱེ་བ་སོགས་མགལ་མེའི་འཁོར་ལོ་ལྟར་འཁོར་བར་འཁྱམས་ཚུལ་ལ་ངེས་འབྱུང་མ་སྐྱེས་ཀྱི་བར་དུ་བསྒོམ་མོ། །སྨྲས་པ། སྔོན་ཐོག་མེད་དུས་ནས་རང་སེམས་དང་། དུས་སྐད་ཅིག་འབྲལ་བ་མེད་པ་ཡི། །གྲོགས་ཉོན་མོངས་འདི་གོ་བསྟེན་བསྟེན་པས། །མཐའ་མི་མངོན་འཁོར་བའི་རྒྱ་མཚོར་བསྐྱུར། །ལས་མི་འབོད་རླུང་གིས་རབ་བསྐྱོད་ནས། །ཡོངས་སྡུག་བསྔལ་གསུམ་གྱི་རྦ་ཀློང་དུ། །དུས་གཏན་དུ་མགལ་མེ་ལྟར་འཁོར་བ། །འདི་བསམས་ཀྱིན་ཉོན་མོངས་དྭངས་མའི་དགྲ། །ཚེ་འདི་སྣང་དགྲ་ཞིག་བསད་པ་ལ། །རང་གོ་ཆོད་དཔའ་བོར་རློམ་བྱེད་ན། །དུས་གཏན་གྱི་དགྲ་བོ་ཉོན་མོངས་འདི། །ད་གདུལ་བའི་དུས་ལ་ངེས་པར་བབ། །རྟེན་དལ་འབྱོར་མི་ལུས་ལེགས་ཐོབ་ཅིང་། །ལམ་བསླབ་གསུམ་གནད་འགག་ཤེས་དུས་འདིར། ཁོང་ཀུན་འབྱུང་དཔུང་ཚོགས་མ་བཅོམ་ན། །སླར་སྐྱེ་འཆིའི་ཐང་ལ་འོ་བརྒྱལ་དོགས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་རྟེན་འབྲེལ་བཅུ་གཉིས་ཀྱི་སྒོ་ནས་བསམ་པ་ནི། མ་རིག་པ་ནི་མུན་པས་ཕྱི་རོལ་གྱི་གཟུགས་མི་མཐོང་བར་བྱེད་པ་ལྟ་བུ། དེ་ལ་ལས་འབྲས་ལ་རྨོངས་པ་དང་དེ་ཁོ་ན་ཉིད་ལ་རྨོངས་པ་གཉིས་ཡོད་པའི་དེ་གཉིས་གང་རུང་ལས་འདུ་བྱེད་ཀྱི་ལས་དཀར་ནག་བསགས་
པ་ལ་བརྟེན་ནས་བདེ་འགྲོ་དང་ངན་འགྲོར་འཕེན་པ་ཡིན་པས་འཕེན་ཚུལ་ནི། འཕེན་བྱེད་ཀྱི་རྒྱུ། འགྲུབ་བྱེད་ཀྱི་རྒྱུ། འཕངས་པའི་འབྲས་བུ། གྲུབ་པའི་འབྲས་བུ་དང་བཞིར་ཡོད་པའི་བདེ་འགྲོ་ལ་མཚོན་ན། རང་གི་སྐྱེ་བ་སྔ་མའི་དགེ་བའི་ལས་ཀྱི་ཀུན་སློང་དུ་གྱུར་པ་དེ་ཁོ་ན་ཉིད་ལ་རྨོངས་ཤིང་ལས་འབྲས་ལ་མ་རྨོངས་པའི་མ་རིག་པའི་རྟེན་འབྲེལ་དེས་ཀུན་ནས་བསླང་སྟེ་བསགས་པའི་འདོད་ཁམས་ཀྱི་སས་བསྡུས་པའི་དགེ་བའི་ལས་འདུ་བྱེད་ཀྱི་རྟེན་འབྲེལ་དེ་ཉིད་ཀྱིས་རྒྱུ་དུས་ཀྱི་རྣམ་པར་ཤེས་པའི་རྟེན་འབྲེལ་ལ་བག་ཆགས་བཞག་པ་ནི་འཕེན་བྱེད་ཀྱི་རྒྱུའོ། །དེ་ལྟར་ལས་ཀྱི་བག་ཆགས་བསྒོས་པ་དེ་ལ་མངོན་པར་འགྲུབ་པའི་ཆེད་དུ་ཚོར་བ་བདེ་བ་དང་མི་འབྲལ་ཞིང་སྡུག་བསྔལ་དང་འབྲལ་འདོད་ཀྱི་སྲེད་པའི་རྟེན་འབྲེལ་དང་། དེ་བཞིན་དུ་འདུན་ཞིང་ཆགས་པར་བྱེད་པ་ལེན་པའི་རྟེན་འབྲེལ་གཉིས་ཀྱིས་གསོས་བཏབ་པས་ཡང་སྲིད་ཕྱི་མ་འདྲེན་པའི་སྲིད་པའི་རྟེན་འབྲེལ་མཐུ་ཅན་དུ་གྱུར་པ་གསུམ་པོ་འདི་འགྲུབ་བྱེད་ཀྱི་རྒྱུ་ཡིན་ལ། དེ་ལ་བརྟེན་ནས་རྒྱུ་དུས་ཀྱི་རྣམ་པར་ཤེས་པ་སྐྱེ་བ་འདིའི་མའི་མངལ་དུ་ཉིང་མཚམས་སྦྱར་བས་འབྲས་དུས་ཀྱི་རྣམ་པར་ཤེས་པ་ཚོར་བ་འདུ་ཤེས་འདུ་བྱེད་རྣམས་ཀྱི་ཕུང་པོ་ནི་མིང་གི་རྟེན་འབྲེལ། ཕ་མའི་ཁུ་ཁྲག་གམ་དྲོད་གཤེར་ལྟ་བུ་གཟུགས་ཀྱི་རྟེན་འབྲེལ་ཏེ་དེ་གཉིས་བསྡོམས་པས་མིང་གཟུགས་ཀྱི་རྟེན་འབྲེལ། དེ་ནས་མིག་ལ་སོགས་པའི་སྐྱེ་མཆེད་དྲུག་གྲུབ་པ་སྐྱེ་མཆེད་དྲུག་གི་རྟེན་འབྲེལ་དེ་ལས་ཆེར་སོང་བ་ན་ཡུལ་དབང་རྣམ་ཤེས་གསུམ་འདུས་ནས་ཡིད་དུ་འོང་མི་འོང་བར་མ་གསུམ་པ་ལ་རེག་ཅིང་སྤྱོད་པ་རེག་པའི་རྟེན་འབྲེལ། དེ་ལྟར་སྤྱད་པ་ལ་བརྟེན་ནས་ཚོར་བ་བདེ་སྡུག་
བཏང་སྙོམས་གསུམ་སྐྱེ་བ་ནི་ཚོར་བའི་རྟེན་འབྲེལ་ཏེ་བཞི་པོ་འདི་འཕངས་པའི་འབྲས་བུ། སྐྱེ་གནས་བཞི་པོར་རྣམ་ཤེས་ཉིང་མཚམས་སྦྱར་ཟིན་པ་དེ་ཕྱིར་བཙས་པ་སྐྱེ་བའི་རྟེན་འབྲེལ། སྐྱེས་པའི་ཕུང་པོ་ན་ཚོད་སྨིན་པར་གྱུར་པ་རྒ་བ་དང་། ཕུང་པོ་དོར་བ་ནི་ཤི་བ་སྟེ་རྒ་ཤིའི་རྟེན་འབྲེལ་གཉིས་པོ་མངོན་པར་གྲུབ་པའི་འབྲས་བུ་ཡིན་པས་དེ་ལྟར་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་ལ་བརྟེན་ནས་བདེ་འགྲོ་དང་ངན་འགྲོར་འཁོར་བའི་ཚུལ་ལེགས་པར་བསྒོམས་ན་སྐྱེས་བུ་ཆུང་འབྲིང་གཉིས་ཀའི་ཆོས་སྐོར་གྱི་གནད་རྣམས་ཚང་ཞིང་། དགེ་བའི་བཤེས་གཉེན་ཕུ་ཆུང་པ་ཆེན་པོས་རྟེན་འབྲེལ་ཡན་ལག་བཅུ་གཉིས་ལུགས་འབྱུང་ལུགས་ལྡོག་ལ་བརྟེན་པའི་བློ་སྦྱོང་མཛད་པ་ཡིན་ནོ། །དེང་སང་ཕྱག་ལེན་དུ་སྐྱེས་བུ་ཆུང་འབྲིང་གི་ལམ་ལ་སྔར་བཤད་པ་ལྟར་ཁྲིད་ནས། བློ་ཡངས་པ་རྣམས་ལ་རྟེན་འབྲེལ་བཅུ་གཉིས་གྱི་རིམ་པ་སྙིང་པོ་བསྡུས་ཙམ་གྱི་དམིགས་སྐོར་གསུང་ཞིང་། བློ་འབྲིང་མན་ཆད་ལ་ཆད་ལྷག་ཏུ་མི་འགྱུར་བས་འདི་པའི་དམིགས་སྐོར་མི་འབབ་ལ། གང་ཟག་གི་རིགས་ལ་ལར་རྟེན་འབྲེལ་བཅུ་གཉིས་ཀྱི་སྐོར་འདི་འཆར་སྐྱེན་པ་ཞིག་འོང་བས་སྐྱེས་བུ་ཆུང་ངུའི་བཤེས་གཉེན་བསྟེན་ཚུལ་ནས་བཟུང་སྐྱབས་འགྲོའི་བར་དཀྱུས་ལྟར་ལ། ངན་འགྲོའི་རྟེན་འབྲེལ་ཡན་ལག་བཅུ་གཉིས་ཀྱི་འཇུག་ལྡོག་གི་སྐོར་ལ་བརྟེན་ནས་སྐྱེས་བུ་ཆུང་ངུ་དང་། བདེ་འགྲོའི་འཇུག་ལྡོག་ལ་བརྟེན་ནས་སྐྱེས་བུ་འབྲིང་གི་ཉམས་འཁྲིད་མཛད་སྲོལ་ཡོད་ཅེས་བདག་གི་བླ་མ་གསུང་ངོ་།།སྨྲས་པ། ཚེ་སྔ་མའི་རྣམ་པར་ཤེས་པ་ལ། །ལས་ཉོན་མོངས་ཀྱི་བག་ཆགས་རབ་བསྒོས་པ། །སྲེད་ལེན་པ་གཉིས་ཀྱིས་གསོས་བཏབ་པས། །ཚེ་ཕྱི་མའི་ཡང་སྲིད་
མཐུ་ཅན་འགྲུབ། །མིང་གཟུགས་གྲུབ་པའི་ཕུང་པོ་ལ། ཁམས་སྐྱེ་མཆེད་རྣམ་པར་བཀྲ་བ་དེས། །ཡུལ་འདོད་ལ་སྤྱོད་པའི་རེག་ཚོར་ཅན། །སྐྱེ་རྒས་དང་ཤི་བས་སླར་ཡང་འཁོར། །ལར་སྲིད་པའི་རྟེན་འབྲེལ་བཅུ་གཉིས་ཀྱི། །རྒྱུ་འབྲས་བུར་འཆར་བའི་སྣང་ཚུལ་འདི། །སྔར་ལུགས་འབྱུང་དུ་གྲངས་མེད་ཉམས་སུ་མྱོང་། །ལུགས་ལྡོག་ཏུ་བསྒྲུབ་ན་མི་ལེགས་སམ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་དེ་ལས་ཐར་པའི་ལམ་ཉམས་ལེན་གྱི་རིམ་པ་ནི་བཤེས་སྤྲིངས་ལས། །མགོའམ་གོས་ལ་གློ་བུར་མེ་ཤོར་ན། །དེ་དག་ཕྱིར་བཟློག་བགྱི་བ་བཏང་ནས་ཀྱང་། །ཡང་སྲིད་མེད་པར་བགྱི་སླད་འབད་འཚལ་ཏེ། །དེ་བས་ཆེས་མཆོག་དགོས་པ་གཞན་མ་མཆིས། །ཚུལ་ཁྲིམས་དག་དང་ཤེས་རབ་བསམ་གཏན་གྱིས། །མྱ་ངན་འདས་ཞི་དུལ་བ་དྲི་མེད་པའི། །གོ་འཕང་མི་རྒ་མི་འཆི་ཟད་མི་འཚལ། །ས་ཆུ་མེ་རླུང་ཉི་ཟླ་བྲལ་ཐོབ་མཛོད། །ཅེས་ལམ་བསླབ་པ་རིན་པོ་ཆེ་གསུམ་ལ་བསླབ་དགོས་པ་ཡིན་ལ། དེ་ཡང་སེམས་རྣམ་པར་གཡེང་བ་གཡེང་བ་མེད་པར་བྱེད་པ་ཚུལ་ཁྲིམས་ཀྱི་བསླབ་པས་ཉོན་མོངས་པ་མངོན་གྱུར་སུན་ཕྱུང་ནས་འབྲས་བུ་འདོད་ཁམས་ཀྱི་ལྷ་མིའི་བདེ་བ་ལ་ལོངས་སྤྱོད། སེམས་མཉམ་པར་མ་བཞག་པ་མཉམ་པར་འཇོག་པར་བྱེད་པ་ཏིང་ངེ་འཛིན་གྱི་བསླབ་པས་ཉོན་མོངས་པ་མངོན་གྱུར་མགོ་མནན་ནས་འབྲས་བུ་གཟུགས་གཟུགས་མེད་ཀྱི་ལྷའི་བདེ་བ་ལ་སྤྱོད་པར་བྱེད། སེམས་མ་གྲོལ་བ་གྲོལ་བར་བྱེད་པ་ཤེས་རབ་ཀྱི་བསླབ་པས་ཉོན་མོངས་པའི་ས་བོན་རྩ་བ་ནས་བཅད་དེ་འབྲས་བུ་ཐར་པ་མྱ་ངན་ལས་འདས་པ་ཐོབ་པར་བྱེད་པས་ཤེས་རབ་ཀྱི་བསླབ་པ་རྒྱུད་ལ་སྐྱེ་བར་བྱེད་པ་ལ་སེམས་ལས་སུ་རུང་བ་ཏིང་
ངེ་འཛིན་གྱི་བསླབ་པ་སྔོན་དུ་འགྲོ་དགོས། དེ་ལ་ཡང་སེམས་གཡེང་བ་མེད་པའི་ཕྱིར་དུ་ཚུལ་ཁྲིམས་ཀྱི་བསླབ་པ་སྔོན་དུ་འགྲོ་དགོས་པས་འདི་དག་རྒྱུ་དང་འབྲས་བུའི་ཚུལ་དུ་གོ་རིམ་མ་ལོག་པར་ཉམས་སུ་བླངས་ན་འཁོར་བ་ལས་རྣམ་པར་གྲོལ་བར་འགྱུར་བའི་ཕྱིར་ན། འགོག་པ་མངོན་དུ་བྱ། ལམ་བསྒོམ་པར་བྱ་ཞེས་གསུངས་པའི་དོན་ཡང་ཐོབ་བྱ་འགོག་པའི་བདེན་པ་མངོན་དུ་བྱེད་པ་ལ་ཐོབ་བྱེད་ལམ་གྱི་བདེན་པ་ཉམས་སུ་ལེན་པ་སྔར་སྡུག་བསྔལ་དང་ཀུན་འབྱུང་གི་ཚུལ་དང་མཚུངས་པ་ཡིན་མོད། དེ་ཡང་སྐྱེས་བུ་ཆེན་པོའི་ལམ་ཉམས་སུ་མི་ལེན་པར་སྐྱེས་བུ་འབྲིང་ཙམ་གྱི་གདུལ་བྱ་ལ་བཤད་མ་ཐག་པའི་ལམ་རྣམས་རྒྱས་པར་སྟོན་དགོས་ནའང་། སྐབས་འདིར་སྐྱེས་བུ་འབྲིང་དང་ཐུན་མོང་བའི་ལམ་ཡིན་པས་ཚུལ་ཁྲིམས་ཀྱི་སློབ་ཚུལ་ཙམ་ལས་བསླབ་བ་གཞན་གཉིས་ཞི་ལྷག་གི་སྐབས་སུ་འབྱུང་བས་འདིར་སྤྲོ་མི་དགོས་སོ། །དེ་ལྟར་ན་སྔར་སྐྱེས་བུ་ཆུང་ངུའི་སྐབས་ཀྱི་མི་དགེ་བཅུ་སྤོང་དང་འདིར་བསྟན་ཚུལ་ཁྲིམས་དག་ཀྱང་སྤྱོད་པ་སྤྱི་བསླབ་གྱི་ཚུལ་ཁྲིམས་ཀྱི་ཁོངས་སུ་འདུ་བས་སོ་སོར་མི་དགོས་སོ་སྙམ་ན། དགོས་ཏེ་ཉམས་མགུར་དུ། སྒོ་གསུམ་སྡིག་ལྟུང་དྲི་མས་སྦགས་པ་འདིས། ལྷག་པར་ལས་སྒྲིབ་སྦྱོང་བ་གནད་ཆེ་བས། །ཞེས་སྐྱེས་བུ་ཆེ་འབྲིང་གི་ལམ་རྒྱུད་ལ་སྐྱེ་བ་ལ་མི་དགེ་བཅུ་སོགས་སྡིག་ལྟུང་འདག་ཐབས་གལ་ཆེ་བར་གསུངས་ཤིང་། བྱང་ཆུབ་སེམས་དཔའ་ལ་སོ་ཐར་གྱི་སྡོམ་ལྡན་ཡིན་མིན་གཉིས་ཡོད་པའི་སོ་ཐར་གྱི་སྡོམ་ལྡན་མིན་པ་ལ་དེའི་དོད་ཐུབ་མི་དགེ་བཅུ་སྤོང་ལས་དངོས་བསྟན་ཚང་བར་མི་འབྱུང་བས་སྐབས་འདིའི་ཉམས་ལེན་དུ་འོས་པའི་ཕྱིར། ཚུལ་ཁྲིམས་ཀྱི་བསླབ་པ་ནི་བཤེས་སྤྲིང་ལས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། ཡོན་ཏན་ཀུན་གྱི་
གཞི་རྟེན་ལེགས་པར་གསུངས། །ཞེས་རང་གི་གཉེན་པོ་ཆེ་ཆུང་དང་བསྟུན་ཏེ་སོ་སོར་ཐར་པ་རིགས་བདུན་པོ་གང་རུང་གི་སྡོམ་པ་བླང་། བླངས་པ་ཙམ་གྱིས་མི་ཆོག་པར་སྲུང་དགོས་པས་མི་ཤེས་པ་ལྟུང་བ་འབྱུང་བའི་སྒོ་དགག་པའི་གཉེན་པོར་བསླབ་བྱ་ཕྲ་རགས་རྣམས་ཁོང་དུ་ཆུད་པར་བྱེད། བག་མེད་པའི་གཉེན་པོར་བླང་དོར་གང་ཡིན་དྲན་པས་གསལ་འདེབས་ཤིང་ལེགས་ཉེས་དཔྱོད་པའི་ཤེས་བཞིན་གྱིས་བྱ་ར་བལྟ་ཞིང་ངོ་ཚ་ཁྲེལ་ཡོད་དང་རྣམ་སྨིན་ལ་འཇིགས་པར་བྱེད། མ་གུས་པའི་གཉེན་པོར་སྟོན་པ་དང་དེས་གསུངས་པའི་བཅས་པ་དང་དེ་ཉམས་སུ་ལེན་པའི་གྲོགས་རྣམས་ལ་ཡིད་ཆེས་ཀྱི་སྒོ་ནས་གུས་པར་བྱེད། ཉོན་མོངས་མང་བའི་གཉེན་པོར་གང་ཤས་ཆེ་བ་དེ་ལ་འབུར་འཇོམས་སུ་བྱས་ནས་ཉིན་རེ་ཞིང་ཁས་བླངས་པའི་བསླབ་པ་དང་འགལ་མ་འགལ་བརྟགས་ནས་འགལ་བ་རྣམས་ཕྱིར་བཅོས་དང་སྟོབས་བཞི་སོགས་ཀྱི་སྒོ་ནས་བཤགས་སྡོམ་བྱེད་དགོས་ཏེ། ཚངས་པས་ཞུས་པ་ལས། བསླབ་པ་ལ་ནི་བརྟེན་པར་བྱ། །དེ་ལ་སྙིང་ནས་ནན་ཏན་བྱ། །ཕྱིར་ནི་སྤང་བར་མི་བྱ་ཞིང་། །སྲོག་གི་ཕྱིར་ཡང་གཞག་མི་བྱ། །རྟག་ཏུ་ནན་ཏན་གནས་པར་བྱ། །འདུལ་བ་ལ་ནི་འཇུག་པར་བྱ། །ཞེས་འབྱུང་བས་ཚུལ་ཁྲིམས་རྣམ་པར་དག་པ་འཕྲལ་ཡུན་ཐམས་ཅད་ཀྱི་བདེ་ལེགས་ཀྱི་རྩ་བ་ཡིན་ཞིང་། །ལྷག་ཏུ་སྙིགས་མ་ལྔ་བདོ་བའི་དུས་འདིར་ཕན་ཡོན་ལྷག་པར་ཆེ་བ་ཏིང་འཛིན་རྒྱལ་པོའི་མདོ་སྡེ་སོགས་ལས་གསུངས་ཤིང་། ཁྱད་པར་ཇོ་བོ་བཀའ་གདམས་པ་རྣམས་ཚུལ་ཁྲིམས་གཙང་བ་ལ་གཙོ་བོར་མཛད་པས་ཤ་ར་བའི་ཞལ་ནས། སྤྱིར་ལེགས་ཉེས་ཅི་བྱུང་ཡང་ཆོས་ལ་བརྟེན་པ། དེའི་ནང་ནས་ཀྱང་འདུལ་བ་ནས་ཇི་ལྟར་
འབྱུང་བ་ལ་བརྟེན་ན་བལྡབ་ཀྱང་མི་དགོས་པ་ཞེ་གཙང་བ་བརྟག་ཐུབ་པ་ཉམས་དགའ་བ་མཐའ་བཟང་བ་ཡིན་གསུང་བ་ཐུགས་ཤིན་ཏུ་མོད་པར་སྣང་བས་རྩ་བ་མེད་པའི་ཡལ་ག་འཚོལ་བ་བཞག་ནས་ལམ་འདི་ཉིད་ལ་ཉམས་ལེན་སྙིང་པོར་མཛད་པར་འཚལ་ལོ། །སྨྲས་པ། གཞི་ཚུལ་ཁྲིམས་གཙང་མའི་ཞིང་ས་ལ། །སེམས་ལས་སུ་རུང་བའི་ཆུ་ལུད་ཀྱིས། །ལམ་ལྷག་མཐོང་མྱུ་གུའི་འབྲས་སྨིན་པས། །གནས་འཁོར་བའི་དབུལ་ཕོངས་རྩ་བ་གཅོད། །བློ་བག་ཡོད་ས་སྲུང་སྟེང་འགྱིང་བའི། །སེམས་མཉམ་པར་འཇོག་པའི་མིག་སྟོང་ཅན། །བདག་འཛིན་མེད་ཀྱི་རྡོ་རྗེ་རྩེ་བརྒྱ་པས། །གཞི་སྲིད་པའི་ས་འཛིན་བགྲོད་པ་བཅོམ། །འབྲོག་འཁོར་བ་མཐའ་མེད་ཀྱི་ཚང་ཚིང་ཁྲོད། །ཆོས་བསླབ་གསུམ་དཔག་བསམ་ཤིང་འཁྲུངས་པས། །ཡོངས་སྡུག་བསྔལ་གྱི་མེ་ལྕེས་སྲེག་མིན་པའི། །དུས་གཏན་བདེའི་འཆི་མེད་ཚལ་དུ་མཛེས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ།།