སྐབས་གཉིས་པའི་ཚིག་དོན་མཐའ་དཔྱོད།

---

^{[མ་དཔེ་གཟིགས་ན་འདིར་གནོན།]}

བསྟན་བཅོས་མངོན་རྟོགས་རྒྱན་རྩ་འགྲེལ་རྣམས་གསལ་བར་བྱེད་པ་བློ་བཟང་དགོངས་རྒྱན་གདོང་ལྔའི་དབང་པོའི་སྒྲ་དབྱངས་ལས་སྐབས་གཉིས་པའི་ཚིག་དོན་མཐའ་དཔྱོད་བཞུགས་སོ། །

ལམ་ཤེས་མཚོན་བྱེད་ཀྱི་ཆོས་བཅུ་གཅིག་རྒྱས་པར་བཤད་པ།

---

^{[མ་དཔེ་གཟིགས་ན་འདིར་གནོན།]}

ལམ་ཤེས་མཚོན་བྱེད་ཀྱི་ཆོས་བཅུ་གཅིག་རྒྱས་པར་བཤད་པ། རྨད་བྱུང་མཁྱེན་པའི་ལང་ཚོ་རབ་རྒྱས་བལྟ་ན་མི་ངོམས་མཛེས་སྡུག་ལ། །མཚམས་སྤྲིན་རི་དྭགས་མིག་ཅན་མ་ཡིས་མི་ཕྱེད་མཛའ་བས་དམ་འཁྱུད་པ། །ཇི་སྙེད་ངག་གི་འདོད་པ་མ་ལུས་ཅིག་ཅར་འཇོ་བའི་བང་མཛོད་ཅན། །བརྟན་པའི་འཁོར་ལོའི་བློ་ཡི་རང་གཟུགས་ཡོངས་འཛིན་དམ་པས་རྟག་ཏུ་སྐྱོངས། །ཤེས་བྱའི་རང་བཞིན་ཡངས་པའི་ལྷ་ལམ་གྱི། །སྦས་དོན་གཞུང་ལུགས་འཆད་ལ་འཛུམ་པའི་མཆུ། །དམར་བའི་ཐུན་མཚམས་དབུས་ན་སྤྲིན་གྱི་སོའི། །འཕྲེང་འདིས་དགའ་བའི་གཏམ་ལ་འཇུག་གམ་སྙམ། །སྒྲིབ་གཉིས་དགྲ་ལས་རྒྱལ་བའི་བྱེད་པོ་ཡིས། །སྲིད་འདིར་སངས་རྒྱས་ཞེས་སུ་གྲགས་པའི་རྔ། ཁམས་གསུམ་ཡོངས་ཀྱི་རྣ་བར་སྤུད་དེའི་སར། །བགྲོད་ཐབས་ལམ་གྱི་གནས་ཚུལ་འདི་ནའོ། །གཉིས་པ་རྣམ་མཁྱེན་དེར་བགྲོད་པའི་ལམ་ཤེས་བཤད་པ་ལ། འབྲེལ་བཀོད་པས་མཚམས་སྦྱར་བ་དང་། ཆོས་བཅུ་གཅིག་གིས་ལམ་ཤེས་མཚོན་ཏེ་བསྟན་པ་དང་། སྐབས་བསྡུ་བའོ། །དང་པོ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན། སྔར་སྐབས་དང་པོར་བཤད་པའི་ཆོས་བཅུ་པོ་དེ་རྣམས་ལས་རྒྱུ་ཙམ་

---

^{[མ་དཔེ་གཟིགས་ན་འདིར་གནོན།]}

ཞིག་དྲངས་ནས། གཉིས་པ་འདིར་ལམ་ཤེས་པ་ཉིད་འཆད་པ་ཡིན་ཏེ། རྣམ་པ་ཐམས་ཅད་མཁྱེན་པ་ཉིད་རྟོགས་ཤིང་འཐོབ་པ་ནི་དེར་བགྲོད་པའི་ལམ་ཤེས་པ་ཉིད་རྫོགས་པར་སྒོམ་ཞིང་ཡོངས་སུ་ཤེས་པ་མེད་ན་རྣམ་མཁྱེན་ཐོབ་པ་མེད་ལ། ལམ་གསུམ་སྒོམ་པ་སྔོན་དུ་སོང་ན་ལམ་ཤེས་སྐྱེ་བས་དེ་ལྟར་བཤད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ནི། ཁ་ཅིག་ན་རེ། རང་རྒྱུད་ལྡན་གྱི་གང་ཟག་གི་རྒྱུད་ཀྱི་སྟོང་ཉིད་མངོན་སུམ་དུ་རྟོགས་པའི་ཤེས་རབ་ཀྱིས་ཟིན་པའི་ཐེག་ཆེན་གྱི་མངོན་རྟོགས་དེ་ལམ་ཤེས་ཀྱི་མཚན་ཉིད་ཟེར་ན། སྟོང་ཉིད་མངོན་སུམ་དུ་རྟོགས་པའི་བྱང་སེམས་ཚོགས་ལམ་པའི་རྒྱུད་ཀྱི་མཁྱེན་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། འདོད་ན། ཐེག་ཆེན་འཕགས་པའི་མངོན་རྟོགས་ཡིན་པར་ཐལ་ལོ། །འདོད་མི་ནུས། ཁ་ཅིག །ལམ་གསུམ་བདེན་སྟོང་དུ་མངོན་སུམ་དུ་རྟོགས་པའི་ཡེ་ཤེས་ལམ་ཤེས་ཀྱི་མཚན་ཉིད་ཟེར་ན། བྱང་འཕགས་ཀྱི་རྒྱུད་ཀྱི་མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་མཁྱེན་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཐབས་ཤེས་ཁྱད་

---

^{[མ་དཔེ་གཟིགས་ན་འདིར་གནོན།]}

པར་ཅན་གྱི་ཟིན་པའི་ཐེག་ཆེན་འཕགས་པའི་མཁྱེན་པ་ཡིན་པའི་ཕྱིར། འདོད་ན། སློབ་ལམ་ན་བློ་གཅིག་གིས་བདེན་གཉིས་ཅིག་ཅར་དུ་མངོན་སུམ་དུ་རྟོགས་པ་ཡོད་པར་ཐལ། འདོད་པའི་ཕྱིར། འདོད་ན། བདེན་གཉིས་ངོ་བོ་ཐ་དད་དུ་འཛིན་པའི་དྲི་མ་ཟད་པར་སྤངས་པའི་སློབ་པ་ཡོད་པར་ཐལ། འདོད་པའི་ཕྱིར། གཞན་ཡང་། སློབ་པའི་རྒྱུད་ལ་མཉམ་རྗེས་ཀྱི་གཞི་མཐུན་ཡོད་པར་ཐལ། བྱང་འཕགས་ཀྱི་རྒྱུད་ཀྱི་ཆོས་ཉིད་མངོན་སུམ་དུ་རྟོགས་པ་དེའི་གཟིགས་ངོར་ཀུན་རྫོབ་བདེན་པ་ཡོད་པའི་ཕྱིར། དེར་ཐལ། བྱང་འཕགས་ཀྱི་རྒྱུད་ཀྱི་མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་ཡེ་ཤེས་དེ་ཆོས་ཉིད་མངོན་སུམ་དུ་རྟོགས་པའི་ཡེ་ཤེས་ཡིན་པའི་ཕྱིར། དེར་ཐལ། དེ་ལམ་གསུམ་བདེན་སྟོང་དུ་མངོན་སུམ་དུ་རྟོགས་པའི་ཡེ་ཤེས་ཡིན་པའི་ཕྱིར། དེར་ཐལ། དེ་ལམ་ཤེས་ཡིན་པའི་ཕྱིར། ཁྱབ་པ་ཁས། གཞན་ཡང་། ས་དང་པོ་པའི་རྒྱུད་ཀྱི་སྙིང་རྗེ་ཆེན་པོ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ལམ་གསུམ་བདེན་པར་འཛིན་པའི་བདེན་འཛིན་དང་འཛིན་སྟངས་དངོས་སུ་འགལ་བར་ཐལ། འདོད་པའི་ཕྱིར། འདོད་ན། རྣམ་འགྲེལ་ལས། བྱམས་སོགས་རྨོངས་དང་འགལ་མེད་ཕྱིར། །ཞེས་གསུངས་པ་མི་འཐད་པར་ཐལ། འདོད་པའི་ཕྱིར། ཁ་ཅིག །རང་རྒྱུད་ལྡན་གྱི་གང་ཟག་དེའི་རྒྱུད་ཀྱི་སྟོང་ཉིད་མངོན་སུམ་དུ་རྟོགས་པའི་ཤེས་རབ་ཀྱིས་ཟིན་པའི་ཐེག་ཆེན་འཕགས་པའི་མངོན་རྟོགས་ལམ་ཤེས་ཀྱི་མཚན་ཉིད་ཟེར་ན། ཐེག་ཆེན་གྱི་མཐོང་ལམ་རྗེས་ཐོབ་ཡེ་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཐེག་

---

^{[མ་དཔེ་གཟིགས་ན་འདིར་གནོན།]}

ཆེན་གྱི་མཐོང་ལམ་རྗེས་ཐོབ་ཡེ་ཤེས་པ་དེ་སྟོང་ཉིད་མངོན་སུམ་དུ་རྟོགས་པའི་གང་ཟག་ཡིན་པར་ཐལ། འདོད་པའི་ཕྱིར། འདོད་ན། དེ་སྟོང་ཉིད་ལ་མཉམ་པར་བཞག་པའི་མཉམ་བཞག་པ་ཡིན་པར་ཐལ། འདོད་པའི་ཕྱིར། འདོད་ན། དེ་མཉམ་གཞག་པ་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། མཉམ་གཞག་པ་མ་ཡིན་པར་ཐལ། མཉམ་གཞག་ལས་ལངས་པའི་སློབ་པ་རྗེས་ཐོབ་པ་ཡིན་པའི་ཕྱིར། གཞན་ཡང་། སེམས་དཔའ་དེ་མཉམ་གཞག་ཡེ་ཤེས་ལ་གནས་པའི་གང་ཟག་མ་ཡིན་པར་ཐལ། དེའི་རྒྱུད་ལ་མཉམ་གཞག་ཡེ་ཤེས་འགགས་པའི་ཕྱིར། དེར་ཐལ། དེའི་རྒྱུད་ལ་རྗེས་ཐོབ་ཡེ་ཤེས་སྐྱེས་པ་གང་ཞིག །དེ་སྐྱེས་པ་དང་ཅིག་ཤོས་འགགས་པ་དུས་མཉམ་པའི་ཕྱིར། ཕྱི་མ་དེར་ཐལ། དེ་གཉིས་རྒྱུ་འབྲས་ཡིན་པའི་ཕྱིར། ཁ་ཅིག །སྟོང་ཉིད་མངོན་སུམ་དུ་རྟོགས་པའི་ཤེས་རབ་དང་སྙིང་རྗེ་ཆེན་པོ་གཉིས་ཀྱིས་ཟིན་པའི་ཐེག་ཆེན་འཕགས་པའི་མཁྱེན་པ་སྐབས་གཉིས་པའི་དངོས་བསྟན་བསྟན་བྱའི་གཙོ་བོར་གྱུར་པའི་ལམ་ཤེས་ཀྱི་མཚན་ཉིད་ཟེར་ན། ལམ་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། འདོད་ན། དང་པོ་ཉིད་ནས་ཐེག་ཆེན་དུ་རིགས་ངེས་པའི་གང་ཟག་གི་རྒྱུད་ཀྱི་ལམ་ཤེས་ཡིན་པར་ཐལ། འདོད་པའི་ཕྱིར། འདོད་མི་ནུས། གཞན་ཡང་། ལམ་ཤེས་ཆོས་ཅན། རྒྱུ་ལམ་ཤེས་ཡིན་པར་ཐལ། སྐབས་གཉིས་པའི་དངོས་བསྟན་བསྟན་བྱའི་གཙོ་བོར་གྱུར་པའི་ལམ་ཤེས་ཡིན་པའི་ཕྱིར། དེར་ཐལ། འགྲེལ་ཆེན་ལས། དེ་ཉིད་
ལས་རྒྱུ་ཙམ་ཞིག་དྲངས་ནས་བྱང་ཆུབ་སེམས་དཔའ་རྣམས་ཀྱི་མཐོང་བ་ལ་སོགས་པའི་ལམ་གྱི་བདག་ཉིད་ཅན་ལམ་ཤེས་པ་ཉིད་དུ་ལོགས་ཤིག་ཏུ་བཞག་པ་ཡིན་ནོ། །ཞེས་གསུངས་པའི་ཕྱིར། གཉིས་པ་རང་ལུགས་ནི། ཐབས་ཤེས་ཁྱད་པར་ཅན་གྱིས་ཟིན་པའི་ཐེག་ཆེན་འཕགས་པའི་མཁྱེན་པ་ལམ་ཤེས་ཀྱི་མཚན་ཉིད། དེ་ལ་དབྱེ་ན། ཉན་ཐོས་ཀྱི་ལམ་ཤེས་པའི་ལམ་ཤེས། རང་རྒྱལ་གྱི་ལམ་ཤེས་པའི་ལམ་ཤེས། བྱང་སེམས་ཀྱི་ལམ་ཤེས་པའི་ལམ་ཤེས་གསུམ། ངོ་བོའི་སྒོ་ནས་དབྱེ་ན། རྒྱུ་ལམ་ཤེས་དང་། འབྲས་བུ་ལམ་ཤེས་གཉིས་ཡོད། གསུམ་པ་རྩོད་པ་སྤོང་བ་ལ། ཁོ་ན་རེ། བྱང་འཕགས་ཀྱི་རྒྱུད་ཀྱི་སྙིང་རྗེ་ཆེན་པོ་དེས་ལམ་གསུམ་བདེན་སྟོང་དུ་མངོན་སུམ་དུ་རྟོགས་པར་ཐལ། དེས་སྟོང་ཉིད་མངོན་སུམ་དུ་རྟོགས་པའི་ཕྱིར། དེར་ཐལ། དེས་སྟོང་ཉིད་རྟོགས་པའི་ཕྱིར། དེར་ཐལ། དེས་བདེན་མེད་རྟོགས་པའི་ཕྱིར། དེར་ཐལ། དེས་བདེན་མེད་ལ་དམིགས་པའི་ཕྱིར། དེར་ཐལ། དེས་དམིགས་མེད་ལ་དམིགས་པའི་ཕྱིར། དེར་ཐལ། དེ་དམིགས་མེད་ལ་དམིགས་པའི་སྙིང་རྗེ་ཡིན་པའི་ཕྱིར་ན་མ་ཁྱབ། འོ་ན། དེའི་རྒྱུད་ཀྱི་སྙིང་རྗེ་དེ་ལ་འཛིན་སྟངས་མི་མཐུན་པ་གཉིས་ཡོད་པར་ཐལ། དེ་སེམས་ཅན་སྡུག་བསྔལ་དང་བྲལ་འདོད་ཀྱི་རྣམ་པ་ཅན་གྱི་བློ་དང་། སེམས་ཅན་བདེན་སྟོང་གི་རྣམ་པ་ཅན་གྱི་བློ་གཉིས་ཀ་ཡིན་པའི་ཕྱིར། འདོད་མི་ནུས་ཏེ། སློབ་པའི་རྒྱུད་ཀྱི་སྙིང་རྗེ་ཡིན་པའི་ཕྱིར། ཁ་ཅིག །ལམ་ཤེས་ཆོས་ཅན། སྐབས་གཉིས་པའི་བསྟན་བྱའི་གཙོ་བོར་གྱུར་པའི་ལམ་ཤེས་ཡིན་པར་ཐལ། དེའི་བསྟན་བྱའི་གཙོ་བོ་གང་ཞིག །ལམ་ཤེས་ཡིན་པའི་ཕྱིར་ན་མ་ཁྱབ།

ལམ་ཤེས་ཀྱི་ཡན་ལག་བཤད་པ།

---

^{[མ་དཔེ་གཟིགས་ན་འདིར་གནོན།]}

ལམ་ཤེས་ཀྱི་ཡན་ལག་བཤད་པ། གཉིས་པ་ལ། ལམ་ཤེས་ཀྱི་ཡན་ལག་དང་། དེའི་རང་བཞིན་ནོ། །དང་པོ་ལ། རྩ་བ་དང་། འགྲེལ་པ་གཉིས། དང་པོ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན།

---

^{[མ་དཔེ་གཟིགས་ན་འདིར་གནོན།]}

ལམ་ཤེས་ཀྱི་མདོ་འཆད་པའི་འཁོར་དུ་ལྷགས་པའི་འདོད་གཟུགས་ཀྱི་ལྷ་རྣམས་སེམས་བསྐྱེད་དང་ལམ་ཤེས་སོགས་སྐྱེ་བོའི་སྣོད་རུང་དུ་བསྒྲུབ་པར་བྱ་བའི་ཕྱིར་དེ་བཞིན་གཤེགས་པའི་རང་བཞིན་གྱི་འོད་ཀྱིས་ལྷ་དེ་རྣམས་ཀྱི་འོད་མོག་མོག་པོར་མཛད་པ་ལ་དགོས་པ་ཡོད་དེ། སེམས་བསྐྱེད་དང་ལམ་ཤེས་སྐྱེ་བ་ལ་ཡོན་ཏན་གོང་མའི་ཁྱད་པར་དོན་དུ་མི་གཉེར་བའི་ང་རྒྱལ་བཅོམས་དགོས་པར་ཤེས་པའི་ཆེད་ཡིན་པའི་ཕྱིར། ཤེས་བྱ་ཆོས་ཅན། ལམ་ཤེས་དངོས་སུ་སྐྱེ་བའི་རྟེན་གྱི་ཡུལ་ངེས་པ་ཡིན་ཏེ། ལམ་གསུམ་རྫོགས་པར་སྒོམ་པའི་ལམ་ལ་མཁས་པ་ལ་ནི་དེའི་སྔོན་དུ་རིགས་ཅན་གསུམ་གའི་དོན་དུ་སངས་རྒྱས་ཐོབ་འདོད་ཀྱི་རྟེན་ངེས་པར་དགོས་པའི་ཕྱིར། ཤེས་བྱ་ཆོས་ཅན། སེམས་ཅན་ཐམས་ཅད་ཀྱི་རྒྱུད་ལ་ལམ་ཤེས་སྐྱེ་རུང་བ་ཡིན་ཏེ། དེ་ཐམས་ཅད་ལ་སངས་རྒྱས་ཀྱི་རིགས་ཀྱིས་ཁྱབ་པའི་ཕྱིར། ལམ་ཤེས་ཆོས་ཅན། ཁྱོད་ཉན་རང་གི་ལམ་ལས་རང་བཞིན་གྱིས་སྒོ་ནས་ཁྱད་པར་འཕགས་ཏེ། ཁྱོད་ཉོན་མོངས་གཙོ་བོར་མི་སྤོང་བར་དེ་གཞན་དོན་སྒྲུབ་པའི་ཡན་ལག་ཏུ་བྱེད་པའི་རང་བཞིན་ཅན་ཡིན་པའི་ཕྱིར། ཤེས་བྱ་ཆོས་ཅན། ལམ་ཤེས་དེ་ཉན་ཐོས་ཀྱི་ལམ་དེ་ལས་དེ་ཡི་བྱེད་ལས་ཀྱང་ཁྱད་པར་འཕགས་ཏེ། དུས་མ་ཡིན་པར་ཡང་དག་མཐའ་མངོན་དུ་མི་བྱེད་ཅིང་། སེམས་ཅན་མཐའ་ཡས་པ་སྨིན་ཅིང་གྲོལ་བར་བྱེད་པའི་བྱེད་ལས་ཅན་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག་ན་རེ། ལམ་ཤེས་ཀྱི་རྒྱུ་ངོ་བོ་འབྲས་བུ་གསུམ་གང་རུང་གིས་བསྡུས་པའི་སེམས་དཔའི་ཡོན་ཏན་ལམ་ཤེས་ཀྱི་ཡན་ལག་གི་མཚན་ཉིད་ཟེར་ན། སངས་རྒྱས་ཀྱི་སའི་ལམ་ཤེས་ཀྱི་ཡན་ལག་ཆོས་ཅན། མཚན་ཉིད་དེར་ཐལ།

---

^{[མ་དཔེ་གཟིགས་ན་འདིར་གནོན།]}

མཚོན་བྱ་དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། སངས་རྒྱས་ཀྱི་ས་ན་ལམ་ཤེས་ཀྱི་རྒྱུ་ངོ་བོ་འབྲས་བུ་གསུམ་གང་རུང་གིས་བསྡུས་པའི་ཡོན་ཏན་ཁྱད་པར་ཅན་ཡོད་པའི་ཕྱིར། ཁ་ཅིག །ལམ་ཤེས་རྫོགས་བྱེད་ཀྱི་ཆ་ཤས་སུ་གྱུར་པའི་སེམས་དཔའི་ཡོན་ཏན་ལམ་ཤེས་ཀྱི་ཡན་ལག་གི་མཚན་ཉིད་ཟེར་ན། ལམ་མ་ཞུགས་ཀྱི་གང་ཟག་གི་རྒྱུད་ཀྱི་ལམ་ཤེས་ཀྱི་ཡན་ལག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། ཐེག་ཆེན་དུ་རིགས་སད་པ་དེ་ལམ་ཤེས་ཀྱི་ཡན་ལག་ཡིན་པའི་ཕྱིར། དེར་ཐལ། ཁྱབ་པ་དང་ཞེས་པའི་རྩ་འགྲེལ་གྱི་ལུང་དོན་གྲུབ་པའི་ཕྱིར། གཞན་ཡང་། ཁྱབ་པ་དང་ཞེས་པ་རྩ་འགྲེལ་འདི་བྱང་སེམས་ལས་གཞན་པའི་སེམས་ཅན་གྱི་རྒྱུད་ལ་ལམ་ཤེས་སྐྱེ་རུང་དུ་བསྟན་བྱའི་གཙོ་བོར་བྱས་ནས་སྟོན་པའི་གཞུང་མ་ཡིན་པར་ཐལ། འདི་བྱང་སེམས་ཀྱི་ཡོན་ཏན་བསྟན་བྱའི་གཙོ་བོར་བྱས་ནས་སྟོན་པའི་གཞུང་ཡིན་པའི་ཕྱིར། དེར་ཐལ། འདི་ལམ་ཤེས་རྫོགས་བྱེད་ཀྱི་ཆ་ཤས་སུ་གྱུར་པའི་སེམས་དཔའི་ཡོན་ཏན་བསྟན་བྱའི་གཙོ་བོར་བྱས་ནས་སྟོན་པའི་གཞུང་ཡིན་པའི་ཕྱིར། དེར་ཐལ། འདི་ལམ་ཤེས་ཀྱི་ཡན་ལག་བསྟན་བྱའི་གཙོ་བོར་བྱས་ནས་སྟོན་པའི་གཞུང་ཡིན་པ་གང་ཞིག །སྔར་གྱི་མཚན་ཉིད་དེ་འཐད་པའི་ཕྱིར། དང་པོ་དེར་ཐལ། ལྷ་རྣམས་རུང་བར་བྱ་བའི་ཕྱིར། །ཞེས་སོགས་རྩ་འགྲེལ་གྱིས་ལམ་ཤེས་ཀྱི་ཡན་ལག་ལྔ་བསྟན་བྱའི་གཙོ་བོར་བྱས་ནས་བསྟན་པའི་ཕྱིར། གཞན་ཡང་། ལམ་ཤེས་ཀྱི་རྒྱུ་ངོ་བོ་འབྲས་བུ་གསུམ་གང་རུང་གིས་བསྡུས་པའི་ལམ་ཤེས་ཀྱི་ཡན་ལག་མི་འཐད་པར་ཐལ། ལམ་ཤེས་ཀྱི་ཡན་ལག་ལམ་མ་ཞུགས་དང་སངས་རྒྱས་ཀྱི་ས་གཉིས་ཀར་མེད་པའི་ཕྱིར། འདོད་ན། མོག་མོག་པོར་བྱེད་ཅེས་སོགས་ཀྱིས་ལམ་ཤེས་ཀྱི་རྒྱུ་ངོ་བོ་

---

^{[མ་དཔེ་གཟིགས་ན་འདིར་གནོན།]}

འབྲས་བུ་གསུམ་གང་རུང་གིས་བསྡུས་པའི་ལམ་ཤེས་ཀྱི་ཡན་ལག་བསྟན་པར་རྣམ་བཤད་དུ་གསུངས་པ་མི་འཐད་པར་ཐལ། འདོད་པའི་ཕྱིར། འདོད་མི་ནུས། གཉིས་པ་རང་ལུགས་ནི། ལམ་ཤེས་ཀྱི་རྒྱུ་ངོ་བོ་འབྲས་བུ་གསུམ་གང་རུང་གིས་བསྡུས་པའི་སྙིང་རྗེ་ཆེན་པོས་ཟིན་པའི་ཡོན་ཏན་ཁྱད་པར་ཅན་དེ་ལམ་ཤེས་ཀྱི་ཡན་ལག་གི་མཚན་ཉིད། གསུམ་པ་རྩོད་པ་སྤོང་བ་ལ། ཁ་ཅིག །ལམ་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། དེ་ཆོས་ཅན། ཁྱོད་ཁྱོད་ཀྱི་ཡན་ལག་མ་ཡིན་པར་ཐལ། ཁྱོད་བདག་མེད་ཡིན་པའི་ཕྱིར། ཟེར་ན། འཕགས་ལམ་ཆོས་ཅན། ཁྱོད་ཁྱོད་ཀྱི་ཡན་ལག་མ་ཡིན་པར་ཐལ། ཁྱོད་བདག་མེད་ཡིན་པའི་ཕྱིར། ཁྱབ་པ་འགྲིག །འདོད་ན། དེ་ཆོས་ཅན། ཁྱོད་འཕགས་ལམ་གྱི་ཡན་ལག་ཡིན་པར་ཐལ། ཁྱོད་འཕགས་ལམ་ཡན་ལག་ཡིན་པའི་ཕྱིར། ཁྱབ་པ་ཡོད་དེ། བྱང་ཆུབ་ཡན་ལག་ཡིན་ན་བྱང་ཆུབ་ཀྱི་ཡན་ལག་ཡིན་དགོས་པའི་ཕྱིར། ཁ་ཅིག །མཚན་ཉིད་དེ་མི་འཐད་པར་ཐལ། སྙིང་རྗེ་ཆེན་པོ་སྐྱེད་པ་ལ་ཐེག་ཆེན་དུ་རིགས་སད་པ་སྔོན་དུ་འགྲོ་དགོས་པ་གང་ཞིག །ཐེག་ཆེན་དུ་རིགས་སད་པ་ལམ་ཤེས་ཀྱི་ཡན་ལག་ཡིན་པའི་ཕྱིར། དང་པོ་དེར་ཐལ། རྣམ་བཤད་ལས། གདུལ་བྱ་བཀྲི་བའི་རིམ་པ་ལྟར་ན་སྙིང་རྗེ་ཆེན་པོ་ལ་འཁྲིད་པའི་སྔོན་རོལ་ནས་རིགས་ནས་འཁྲིད་དགོས་སོ་ཞེས་གསུངས་པའི་ཕྱིར་ན་སྐྱོན་མེད་དེ། དེ་ནི་རིགས་གང་དང་ལྡན་རྟོགས་པའི་ཐབས་ཤེས་དགོས་པ་སོགས་ལ་དགོངས་པའི་ཕྱིར། འོ་ན། སྦྱོར་བའི་སྔོན་དུ་སྙིང་རྗེ་དང་། །ཞེས་གསུངས་པ་མི་འཐད་པར་ཐལ། འདོད་པ་དེའི་ཕྱིར། འདོད་མི་ནུས། གཉིས་པ་འགྲེལ་པ་ལ་ལྔ་ཡོད་པའི། གེགས་ང་རྒྱལ་མངོན་གྱུར་པ་དང་བྲལ་བའི་རྟེན་ནི། དེ་བཞིན་གཤེགས་པའི་རང་

---

^{[མ་དཔེ་གཟིགས་ན་འདིར་གནོན།]}

བཞིན་གྱི་འོད་དག་གིས་མདོ་འཆད་པའི་འཁོར་དུ་ལྷགས་པའི་ལྷ་ལ་སོགས་པའི་ཟག་བཅས་ཀྱི་ལས་ཀྱི་རྣམ་པར་སྨིན་པའི་འོད་མོག་མོག་པོར་མཛད་པ་ནི་ཆོས་ཅན། དགོས་པ་ཡོད་དེ། མངོན་པའི་ང་རྒྱལ་བཅོམ་ནས་སེམས་བསྐྱེད་དང་ལམ་ཤེས་པ་ཉིད་སྐྱེ་བར་རུང་བ་ཉིད་དུ་བསྒྲུབ་པའི་ཆེད་ཡིན་པའི་ཕྱིར། དེར་ཐལ། ཕྱིས་ཀྱང་མངོན་པའི་ང་རྒྱལ་བཅོམ་པའི་རྒྱུད་ཁོ་ན་ལ་སེམས་བསྐྱེད་དང་ལམ་ཤེས་ཀྱི་རྟོགས་པ་སྐྱེའོ་ཞེས་བྱ་བར་ཤེས་པའི་ཕྱིར་དུ་མཛད་པའི་ཕྱིར། ཤེས་བྱ་ཆོས་ཅན། མདོའི་ཚིག་ཟུར་གྱིས་སེམས་བསྐྱེད་དང་ལམ་ཤེས་སྐྱེ་བའི་རྟེན་བརྗོད་པ་ཡིན་ཏེ། ང་རྒྱལ་བཅོམ་པའི་རྒྱུད་ཁོ་ན་ལ་དེ་དག་སྐྱེ་བར་བསྟན་པ་དེའི་ཕྱིར། གཉིས་པ་ལྷན་ཅིག་བྱེད་པའི་རྐྱེན་ནི། ལམ་ཤེས་དེ་ཡང་ཆོས་ཅན། ཁྱོད་དངོས་སུ་སྐྱེ་བའི་རྟེན་གྱི་ཡུལ་སོ་སོར་ངེས་པ་ཡིན་ཏེ། ཁྱོད་ལམ་གཞན་གྱིས་བར་མ་ཆོད་པར་སྐྱེ་བའི་གང་ཟག་དེ་ནི་བྱང་ཆུབ་ཏུ་སེམས་བསྐྱེད་པ་ཁོ་ན་ཡིན་པའི་ཕྱིར། གསུམ་པ་ཉེར་ལེན་རིགས་ཀྱི་ཁྱད་པར་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། ཁམས་གསུམ་ལས་འདོད་ཆགས་དང་བྲལ་བ་ཉན་རང་དགྲ་བཅོམ་པ་དང་། ཅིག་ཤོས་ཀྱི་རྣལ་འབྱོར་པ་འདོད་ཆགས་དང་མ་བྲལ་བས་ཀྱང་ཆོས་ཅན། ཁྱོད་སོགས་སེམས་ཅན་ཀུན་ལ་རྒྱལ་བའི་རིགས་ཀྱིས་ཁྱབ་པ་ཡིན་ཏེ། དེ་རྣམས་སངས་རྒྱས་ཉིད་ཐོབ་པར་བྱ་བའི་ཕྱིར་དུ་ལམ་ཤེས་པ་ཉིད་བསྒོམ་པར་བྱ་དགོས་པའ་ིཕྱིར། དེར་ཐལ། སྐྱེ་བོ་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་མཐར་ཐུག་པར་འགྲོ་བ་ཅན་ཡིན་པ་དེའི་ཕྱིར། དེར་ཐལ། མཐར་ཐུག་པའི་ཐེག་པ་གསུམ་རྣམ་པར་གཞག་པའི་མདོ་སྡེ་ནི་དྲང་དོན་དགོངས་པ་ཅན་ཡིན་གྱི། སྒྲ་ཇི་བཞིན་པའི་ངེས་དོན་གྱི་མདོ་མཚན་ཉིད་པ་ནི་མ་ཡིན་ནོ་ཞེས་ཤིང་རྟ་ཆེན་པོ་ཀླུ་སྒྲུབ་

---

^{[མ་དཔེ་གཟིགས་ན་འདིར་གནོན།]}

དང་ཐོགས་མེད་ཀྱི་ལུགས་ལས་འབྱུང་བའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །སེམས་ཅན་ཐམས་ཅད་འཚང་རྒྱ་བ་ལྟ་ཞོག །འཚང་རྒྱ་རུང་ཙམ་དུ་ཡང་སྒྲུབ་མི་ནུས་ཏེ། ནས་མྱུག་འབྱུང་རུང་དུ་སྒྲུབ་པ་ལ། དེའི་རྒྱུ་ཚོགས་གྲངས་ཚང་རྟགས་སུ་འགོད་དགོས་པ་གང་ཞིག །སེམས་ཅན་ཐམས་ཅད་འཚང་རྒྱ་བའི་རྒྱུ་ཚོགས་གྲངས་མ་ཚང་བའི་ཕྱིར། དང་པོ་དེར་ཐལ། རྣམ་འགྲེལ་ལས། རྒྱུ་ཚོགས་པ་ལས་འབྲས་སྐྱེ་བར། །རྗེས་སུ་དཔོག་པ་གང་ཡིན་པ། དོན་གཞན་ལ་ནི་མ་ལྟོས་ཕྱིར། །དེ་ནི་རང་བཞིན་ཡིན་པར་བརྗོད། ཅེས་གསུངས་པའི་ཕྱིར། དེ་ལྟར་ཡིན་ཡང་། སེམས་ཅན་ཐམས་ཅད་འཚང་རྒྱ་བར་གསུངས་པ་ལ་འགལ་བའི་སྐྱོན་མེད་དེ། དེ་ལམ་ཞུགས་ཀྱི་སེམས་ཅན་ལ་དགོངས་པའི་ཕྱིར། ཟེར་ན། དགུན་དུས་ཀྱི་ཞིང་ཆོས་ཅན། ནས་མྱུག་འབྱུང་བའི་རྒྱུ་ཚོགས་གྲངས་ཚང་བར་ཐལ། ནས་མྱུག་འབྱུང་རུང་ཡིན་པའི་ཕྱིར། ཁྱབ་པ་ཁས། དེར་ཐལ། དཔྱིད་ཀྱི་དུས་སུ་བབས་པ་ན་ནས་མྱུག་འབྱུང་བའི་ཕྱིར། རྩ་བར་འདོད་མི་ནུས་ཏེ། དྲོད་སོགས་མ་ཚང་བའི་ཕྱིར། གཞན་ཡང་། ཉན་ཐོས་དགྲ་བཅོམ་པ་ཆོས་ཅན། ཁྱོད་འཚང་རྒྱ་བའི་རྒྱུ་ཚོགས་གྲངས་ཚང་བར་ཐལ། ལམ་ཞུགས་ཀྱི་སེམས་ཅན་ཡིན་པའི་ཕྱིར། ཁྱབ་པ་ཁས། འདོད་ན། བྱང་ཆུབ་ཏུ་སེམས་བསྐྱེད་པར་ཐལ། འདོད་པའི་ཕྱིར། ཁ་ཅིག །སེམས་ཅན་ཐམས་ཅད་འཚང་རྒྱ་ངེས་མ་ཡིན་པར་ཐལ། དེ་ལ་འགལ་རྐྱེན་གྱི་གེགས་སྲིད་པའི་ཕྱིར། ཁྱབ་པ་ཡོད་དེ། རྣམ་འགྲེལ་ལས། མ་ངེས་པ་ནི་ཉིད་ཡིན་ཏེ། །གེགས་བྱེད་པ་དག་སྲིད་ཕྱིར་རོ། །ཞེས་གསུངས་པའི་ཕྱིར། ཟེར་ན། སེམས་ཅན་ཐམས་ཅད་འཚང་རྒྱ་ངེས་ཡིན་པར་ཐལ། སེམས་ཅན་ཐམས་ཅད་འཚང་རྒྱ་བ་ཚད་མས་ངེས་པའི་ཕྱིར། དེར་ཐལ། སེམས་

---

^{[མ་དཔེ་གཟིགས་ན་འདིར་གནོན།]}

ཅན་ཐམས་ཅད་འཚང་རྒྱ་བ་ཡོད་པའི་ཕྱིར། མ་ཁྱབ་ན། ཚད་མས་དམིགས་པ་ཡོད་པའི་མཚན་ཉིད་མ་ཡིན་པར་ཐལ། སེམས་ཅན་ཐམས་ཅད་འཚང་རྒྱ་བ་ཡོད་པ་གང་ཞིག །དེ་འཚང་རྒྱ་བ་ཚད་མས་མ་ངེས་པའི་ཕྱིར། གཞན་ཡང་། བྱང་སེམས་ས་བརྒྱད་པ་བ་ཆོས་ཅན། འཚང་རྒྱ་ངེས་མ་ཡིན་པར་ཐལ། འཚང་རྒྱ་བ་ལ་འགལ་རྐྱེན་གྱི་གེགས་དང་བཅས་པའི་ཕྱིར། དེར་ཐལ། འཚང་རྒྱ་བ་ལ་གནས་ངན་ལེན་གྱི་དྲི་མ་ཕྲ་མོའི་གེགས་དང་བཅས་པའི་ཕྱིར། དེར་ཐལ། གནས་ངན་ལེན་གྱི་དྲི་མ་ཕྲ་མོའི་དངོས་གཉེན་རྒྱུད་ལ་སྐྱེ་དགོས་ཀྱི་གང་ཟག་ཡིན་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། རྩ་བར་འདོད་མི་ནུས། གཞན་ཡང་། བུམ་པ་ཡོད་ངེས་མ་ཡིན་པར་ཐལ། བུམ་པ་ཡོད་པ་ལ་འགལ་རྐྱེན་གྱི་གེགས་སྲིད་པའི་ཕྱིར། དེར་ཐལ། བུམ་པ་འཇོམས་བྱེད་ཀྱི་ཆོས་ཡོད་པའི་ཕྱིར། ཁ་ཅིག་ན་རེ། སེམས་ཅན་ཐམས་ཅད་འཚང་རྒྱ་ངེས་མ་ཡིན་ཟེར་ན། སེམས་ཅན་ཐམས་ཅད་འཚང་རྒྱའོ་སྙམ་པའི་ཤེས་པ་དེ་རང་རྒྱུ་ཚད་མའི་སྟོབས་ཀྱིས་འོངས་སམ་མ་འོངས། དང་པོ་ལྟར་ན། སེམས་ཅན་ཐམས་ཅད་འཚང་རྒྱ་ངེས་ཡིན་པར་ཐལ། སེམས་ཅན་ཐམས་ཅད་འཚང་རྒྱ་ངེས་སུ་ཚད་མས་གྲུབ་པའི་ཕྱིར། དེ་ལ་ཁོ་ན་རེ། མ་ཁྱབ་སྟེ། སེམས་ཅན་ཐམས་ཅད་འཚང་རྒྱ་བར་ཚད་མའི་སྟོབས་ཀྱིས་ངེས་ཀྱང་། དོན་ལ་འཚང་རྒྱ་བ་མ་ཡིན་པའི་ཕྱིར། ཟེར་ན། སེམས་ཅན་ཐམས་ཅད་འཚང་རྒྱའོ་སྙམ་པའི་ངེས་ཤེས་ཆོས་ཅན། ལོག་ཤེས་ཡིན་པར་ཐལ། སེམས་ཅན་ཐམས་ཅད་འཚང་རྒྱ་བར་ངེས་པའི་བློ་གང་ཞིག །དོན་གྱི་གནས་ཚོད་ལ་སེམས་ཅན་ཐམས་ཅད་འཚང་རྒྱ་ངེས་མ་ཡིན་པའི་ཕྱིར། གཞན་ཡང་། སེམས་ཅན་ཐམས་ཅད་གནས་ཚོད་ཀྱི་ངོས་ནས་འཚང་རྒྱ་མི་རྒྱ་གང་རུང་དུ་ཐག་ཆོད་དམ་མི་ཆོད།

---

^{[མ་དཔེ་གཟིགས་ན་འདིར་གནོན།]}

མ་ཆོད་ན་སེམས་ཅན་ཐམས་ཅད་འཚང་རྒྱ་བར་དམ་བཅས་པ་མི་རིགས་པར་ཐལ། འདོད་པའི་ཕྱིར། གང་རུང་དུ་ཐག་ཆོད་ཟེར་ན། སེམས་ཅན་ཐམས་ཅད་གནས་ཚོད་ཀྱི་ངོས་ནས་འཚང་རྒྱ་བར་ཐག་ཆོད་པར་ཐལ། གང་རུང་དུ་ཐག་ཆོད་པ་གང་ཞིག །ཅིག་ཤོས་མ་ཡིན་པའི་ཕྱིར། དང་པོ་མ་གྲུབ་ན། སེམས་ཅན་ཐམས་ཅད་འཚང་རྒྱ་ངེས་ཡིན་པར་ཐལ། འདོད་པའི་ཕྱིར། གཉིས་པ་མ་གྲུབ་ན། སེམས་ཅན་ཐམས་ཅད་འཚང་མི་རྒྱ་བར་ཐལ། འདོད་པའི་ཕྱིར། ཁ་ཅིག །འཁོར་བ་ལ་ཕྱི་མཐའ་མེད་ཟེར་ན། ཡོད་པར་ཐལ། སེམས་ཅན་ཐམས་ཅད་འཚང་རྒྱ་བའི་དུས་ཡོད་པའི་ཕྱིར། དེར་ཐལ། བྱང་འཕགས་ཐམས་ཅད་འཚང་རྒྱ་བའི་དུས་ཡོད་པའི་ཕྱིར། དེར་ཐལ། བྱང་སེམས་རྒྱུན་མཐའ་བ་ཐམས་ཅད་འཚང་རྒྱ་བའི་དུས་ཡོད་པའི་ཕྱིར། དེར་ཐལ། རྒྱུན་མཐའི་བར་ཆད་མེད་ལམ་ལ་གནས་པའི་སེམས་དཔའ་ཐམས་ཅད་འཚང་རྒྱ་བའི་དུས་ཡོད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་འཚང་རྒྱ་བའི་དུས་ཡོད་པར་ཐལ། ཁྱོད་རང་གི་སྐད་ཅིག་གཉིས་པར་རྣམ་མཁྱེན་མངོན་དུ་བྱེད་ངེས་ཀྱི་གང་ཟག་ཡིན་པའི་ཕྱིར་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །བྱང་སེམས་ཚོགས་ལམ་པ་སངས་རྒྱས་པའི་དུས་སུ་བྱང་སེམས་ཚོགས་ལམ་པ་སངས་རྒྱས་ཀྱང་། དེའི་ཚེ་ན་དེ་སངས་རྒྱས་འཕགས་པ་མ་ཡིན་ཟེར་ན། བྱང་སེམས་ཚོགས་ལམ་པ་དེ་འབྲས་སྐྱབས་མཐར་ཐུག་ཏུ་གྱུར་པའི་དུས་མི་སྲིད་པར་ཐལ། བྱང་སེམས་ཚོགས་ལམ་པ་སངས་རྒྱས་པའི་དུས་སུ་དེ་སངས་རྒྱས་འཕགས་པར་མ་གྱུར་པའི་ཕྱིར། མ་གྲུབ་ན། བྱང་སེམས་ཚོགས་ལམ་པ་སངས་རྒྱས་པའི་དུས་སུ་དེ་སངས་རྒྱས་འཕགས་པར་ཚད་མའི་ཡུལ་དུ་གྱུར་པར་ཐལ། མ་གྲུབ་པ་དེའི་ཕྱིར། འདོད་ན། བྱང་སེམས་ཚོགས་ལམ་པ་སངས་རྒྱས་པའི་དུས་སུ་

---

^{[མ་དཔེ་གཟིགས་ན་འདིར་གནོན།]}

བྱང་སེམས་ཚོགས་ལམ་པ་སངས་རྒྱས་འཕགས་པ་ཡིན་པར་ཐལ། བྱང་སེམས་ཚོགས་ལམ་པ་སངས་རྒྱས་པའི་དུས་སུ་དེ་སངས་རྒྱས་འཕགས་པར་ཚད་མས་དམིགས་པའི་ཕྱིར། དེར་ཐལ། དེའི་དུས་སུ་དེ་སངས་རྒྱས་འཕགས་པར་ཚད་མའི་ཡུལ་དུ་གྱུར་པའི་ཕྱིར། རྩ་བར་འདོད་ན། བྱང་སེམས་ཚོགས་ལམ་པ་ཆོས་ཅན། ཁྱོད་འབྲས་སྐྱབས་མཐར་ཐུག་ཏུ་གྱུར་པའི་དུས་སྲིད་པར་ཐལ། ཁྱོད་སེམས་ཅན་ཡིན་པའི་ཕྱིར། གཞན་ཡང་། བྱང་སེམས་ཚོགས་ལམ་པས་སེམས་ཅན་ཐམས་ཅད་ཀྱི་དོན་དུ་སངས་རྒྱས་འཐོབ་པར་བསམ་པ་དམ་བཅས་པ་ལ་དགོས་པ་མེད་པ་ཐལ། དེ་འཚང་རྒྱ་བའི་དུས་མི་སྲིད་པའི་ཕྱིར། དེར་ཐལ། དེ་སངས་འཕགས་སུ་གྱུར་པའི་དུས་མི་སྲིད་པའི་ཕྱིར། རྟགས་ཁས། འདོད་མི་ནུས་སོ། ཁ་ཅིག །སེམས་ཅན་སེམས་ཅན་སངས་རྒྱས་པའི་དུས་སུ་སངས་རྒྱས་ཤིང་། སེམས་ཅན་སངས་རྒྱས་པའི་དུས་སུ་སེམས་ཅན་སངས་མ་རྒྱས་ཟེར་ན། སེམས་ཅན་ཞིག་པའི་དུས་དེ་སེམས་ཅན་ཞིག་པའི་དུས་མ་ཡིན་པར་ཐལ། སེམས་ཅན་སངས་རྒྱས་པའི་དུས་དེ་སེམས་ཅན་སངས་རྒྱས་པའི་དུས་མ་ཡིན་པའི་ཕྱིར། དེར་ཐལ། སེམས་ཅན་སངས་རྒྱས་པའི་དུས་སུ་སེམས་ཅན་སངས་མ་རྒྱས་པའི་ཕྱིར། རྟགས་ཁས། འདོད་ན། སེམས་ཅན་མེད་པའི་དུས་དེ་སེམས་ཅན་མེད་པའི་དུས་མ་ཡིན་པར་ཐལ། འདོད་པའི་ཕྱིར། འདོད་ན། སེམས་ཅན་མེད་པའི་དུས་མི་སྲིད་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཁྱོད་མེད་པའི་དུས་སྲིད་པར་ཐལ། ཁྱོད་འདུས་བྱས་ཡིན་པའི་ཕྱིར།ཁ་ཅིག །སེམས་ཅན་ཐམས་ཅད་སངསརྒྱས་པའི་དུས་སུ་སེམས་ཅན་ཐམས་ཅད་མེད་པར་ཐལ། སེམས་ཅན་སངས་རྒྱས་པའི་དུས་སུ་སེམས་ཅན་མེད་པའི་ཕྱིར། འདོད་ན། སེམས་ཅན་ཐམས་ཅད་སངས་རྒྱས་པའི་

---

^{[མ་དཔེ་གཟིགས་ན་འདིར་གནོན།]}

དུས་སུ་ཡོད་པའི་སེམས་ཅན་མེད་པར་ཐལ། འདོད་པའི་ཕྱིར་ན་མ་ཁྱབ། ཁ་ཅིག །སེམས་ཅན་སངས་རྒྱས་པའི་དུས་སུ་སེམས་ཅན་ཡོད་པར་ཐལ། འཁོར་བྱང་སེམས་འཕགས་པ་ཤ་སྟག་སངས་རྒྱས་པའི་དུས་སུ་འཁོར་བྱང་སེམས་འཕགས་པ་ཤ་སྟག་ཡོད་པའི་ཕྱིར། དེར་ཐལ། འཁོར་བྱང་སེམས་འཕགས་པ་ཤ་སྟག་སངས་རྒྱས་པའི་དུས་སུ་འཁོར་བྱང་སེམས་འཕགས་པ་ཤ་སྟག་ལོངས་སྐུའི་འཁོར་དུ་ཡོད་པའི་ཕྱིར། དེར་ཐལ། འཁོར་བྱང་སེམས་འཕགས་པ་ཤ་སྟག་སངས་རྒྱས་པའི་དུས་ཀྱི་ལོངས་སྐུ་དེ་འཁོར་བྱང་སེམས་འཕགས་པ་ཤ་སྟག་གིས་བསྐོར་བའི་ཕྱིར་ན་མ་ཁྱབ། མ་གྲུབ་ན། དེར་ཐལ། དེ་འདྲའི་ལོངས་སྐུ་དེ་ངེས་པ་ལྔ་ལྡན་གྱི་ལོངས་སྐུ་ཡིན་པའི་ཕྱིར། ཁ་ཅིག །སེམས་ཅན་རྒྱུན་ཆད་པ་སྲིད་པར་ཐལ། སེམས་ཅན་སངས་རྒྱས་པའི་དུས་སྲིད་པའི་ཕྱིར་ན་མ་ཁྱབ། འདོད་ན། སངས་རྒྱས་ཀྱི་འཕྲིན་ལས་རྒྱུན་ཆད་པའི་དུས་སྲིད་པར་ཐལ། འདོད་པའི་ཕྱིར། འདོད་མི་ནུས་ཏེ། ལས་ནི་རྒྱུན་མི་འཆད་པར་འདོད། །ཅེས་གསུངས་པའི་ཕྱིར། ཁ་ཅིག །འཁོར་བའི་ཕྱི་མཐའ་མེད་ཟེར་ན། དེ་ཡོད་པར་ཐལ། འཁོར་བའི་རྩ་བར་གྱུར་པའི་གང་ཟག་གི་བདག་འཛིན་ལ་ཕྱི་མཐའ་ཡོད་པའི་ཕྱིར། དེར་ཐལ། དེ་དངོས་སུ་འཇོམས་བྱེད་ཀྱི་གཉེན་པོ་སྟོབས་ལྡན་ཡོད་པའི་ཕྱིར། དེར་ཐལ། གང་ཟག་གི་བདག་མེད་མངོན་སུམ་དུ་རྟོགས་པའི་ཤེས་རབ་དེ་དེ་ཡིན་པའི་ཕྱིར། དེར་ཐལ། དེ་གང་ཟག་གི་བདག་འཛིན་དང་དམིགས་པ་གཅིག་ལ་དམིགས་ནས་འཛིན་སྟངས་དངོས་འགལ་དུ་ཞུགས་པའི་བློ་ཡིན་པའི་ཕྱིར། ཡང་ཁ་ཅིག །འཁོར་བའི་ཕྱི་མཐའ་མེད་པར་ཐལ། འཁོར་བའི་ཟད་མཐའ་མེད་པའི་ཕྱིར། དེར་ཐལ། སེམས་ཅན་ལ་ཟད་མཐའ་མེད་པའི་

---

^{[མ་དཔེ་གཟིགས་ན་འདིར་གནོན།]}

ཕྱིར་ན་མ་ཁྱབ། ཁ་ཅིག །ཉན་རང་དགྲ་བཅོམ་པ་ཐེག་ཆེན་ལམ་དུ་འཇུག་པའི་ཚེ་ས་བརྒྱད་པ་ནས་འཇུག་ཟེར་ན། ཉན་ཐོས་ཚོགས་ལམ་པ་དང་བྱང་སེམས་ཚོགས་ལམ་པ་གཉིས་འཚང་རྒྱ་བ་ལ་ཉན་ཐོས་ཚོགས་ལམ་པ་མྱུར་བར་ཐལ། ཉན་ཐོས་ཚོགས་ལམ་པས་བརྩོན་འགྲུས་ལྷག་པར་བརྩམས་ཏེ་ཚེ་གསུམ་ལ་ཉན་ཐོས་དགྲ་བཅོམ་མངོན་དུ་བྱས་ནས་ས་བརྒྱད་པ་ལ་ཞུགས་པའི་ཚེ་ཐེག་ཆེན་ཚོགས་ལམ་པས་ས་གཉིས་པ་ཐོབ་མ་ཟིན་པའི་ཕྱིར། དེར་ཐལ། ཐེག་ཆེན་གྱི་ཚོགས་སྦྱོར་དང་ས་དང་པོའི་སྐབས་སུ་བསྐལ་པ་གྲངས་མེད་གཅིག་ཏུ་ཚོགས་བསག་དགོས་པ་གང་ཞིག །ཅིག་ཤོས་ཀྱི་ཚེ་གསུམ་པོ་དེ་ལ་བསྐལ་པ་གྲངས་མེད་གཅིག་གི་ཡུན་མེད་པའི་ཕྱིར། རྩ་བར་འདོད་མི་ནུས། གཉིས་པ་རང་ལུགས་ནི། མཐར་ཐུག་ཐེག་པ་གཅིག་ཏུ་གྲུབ་སྟེ། དེར་ལུང་དང་རིགས་པ་གཉིས་ཀས་གྲུབ་པའི་ཕྱིར། དང་པོ་གྲུབ་སྟེ། དམ་ཆོས་པད་དཀར་ལས། དྲང་སྲོང་ཆེན་པོས་ཐེག་པ་གསུམ་བསྟན་པ། །རྣམ་འདྲེན་རྣམས་ཀྱི་ཐབས་ལ་མཁས་པ་སྟེ། །ཐེག་པ་གཅིག་སྟེ་གཉིས་སུ་ཡོད་མ་ཡིན། །བསྟི་བའི་དོན་དུ་ཐེག་པ་གསུམ་བསྟན་ཏོ། །ཞེས་དང་། དཔལ་འཕྲེང་གི་མདོ་ལས། ཡོངས་སུ་མྱ་ངན་ལས་འདས་པ་ཞེས་བྱ་བ་འདི་ནི། དེ་བཞིན་གཤེགས་པ་རྣམས་ཀྱི་ཐབས་སོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། གཉེན་པོས་སྤོང་དུ་མི་རུང་བའི་སྒྲིབ་པ་མེད་པའི་ཕྱིར། དེར་ཐལ། ཆགས་སོགས་ཉོན་མོངས་ཀྱི་རྩ་བ་བདེན་འཛིན་ཐག་ཁྲ་ལ་སྦྲུལ་གྱི་རྣམ་རྟོག་བཞིན་དུ་རྩ་བ་མི་བརྟན་པའི་ཕྱིར། འོ་ན། དགོངས་འགྲེལ་སོགས་སུ་མཐར་ཐུག་ཐེག་པ་གསུམ་དུ་བཤད་པ་དང་འགལ་ལམ་སྙམ་ན་མི་འགལ་ཏེ། དེ་ནི་དགོངས་གཞི་དགོས་པ་དངོས་ལ་གནོད་བྱེད་གསུམ་ཚང་བའི་སྒོ་ནས་དྲང་དོན་དུ་འགྲེལ་རིགས་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར། འཁོར་བའི་ཐོག་མའི་མཐའ་མེད་ཀྱང་། ཐ་མའི་མཐའ་ཡོད་དེ། འགྲེལ་ཆེན་ལས། གང་གཉེན་པོའི་ཕྱོགས་དང་ཕྲད་པ་ན་འབྲི་བའི་ཆོས་ཅན་དུ་སྣང་བ་དེ་ནི་གཉེན་པོའི་ཕྱོགས་ཤིན་ཏུ་འཕེལ་པ་ན་ཤིན་ཏུ་འགྲིབ་པར་འགྱུར་བ་སྲིད་པ་ཡིན་ཏེ། དཔེར་ན་གསེར་གྱི་དྲི་མ་ལ་སོགས་པ་བཞིན་ནོ། །འཁོར་བ་ཡང་བདག་མེད་པ་ལ་སོགས་པའི་མཚན་ཉིད་ཀྱི་གཉེན་པོའི་ཕྱོགས་མངོན་དུ་གྱུར་པ་ན་འགྲིབ་པའི་ཆོས་ཅན་ཡིན་ནོ། །ཞེས་བྱ་བའི་རང་བཞིན་གྱི་གཏན་ཚིགས་ཀྱི་སྟོབས་ཀྱིས་འཁོར་བ་རྒྱུན་ཆད་པ་ཡིན་ནོ། །ཞེས་གསུངས་པའི་ཕྱིར། ཉན་རང་དགྲ་བཅོམ་པ་ཐེག་ཆེན་དུ་འཇུག་པའི་ཚེ་ངེས་པར་ཐེག་ཆེན་གྱི་ཚོགས་ལམ་ནས་འཇུག་དགོས་ཏེ། རྣམ་མཁྱེན་ཡིན་ན་རང་གི་ཉེར་ལེན་དུ་གྱུར་པའི་ཐེག་ཆེན་གྱི་སྒོམ་ལམ་ལས་བྱུང་བས་ཁྱབ། དེ་ཡིན་ན་རང་གི་ཉེར་ལེན་དུ་གྱུར་པའི་ཐེག་ཆེན་གྱི་མཐོང་ལམ་ལས་བྱུང་བས་ཁྱབ། དེ་ཡིན་ན་རང་གི་ཉེར་ལེན་དུ་གྱུར་པའི་ཐེག་ཆེན་གྱི་སྦྱོར་ལམ་ལས་བྱུང་བས་ཁྱབ། དེ་ཡིན་ན་རང་གི་ཉེར་ལེན་དུ་གྱུར་པའི་ཐེག་ཆེན་གྱི་ཚོགས་ལམ་ལས་བྱུང་བས་ཁྱབ་པའི་ཕྱིར། གསུམ་པ་རྩོད་པ་སྤོང་བ་ལ། ཁ་ཅིག །ཉན་ཐོས་དགྲ་བཅོམ་པ་ཐེག་ཆེན་ལམ་དུ་ཞུགས་པའི་ཐེག་ཆེན་ཚོགས་ལམ་པ་ཆོས་ཅན། ཐེག་ཆེན་འཕགས་པ་ཡིན་པར་ཐལ། ཐེག་པ་ཆེན་པོར་སེམས་བསྐྱེད་པའི་འཕགས་པ་ཡིན་པའི་ཕྱིར་ན་མ་ཁྱབ། འོ་ན། དེ་ཆོས་ཅན། ཐེག་ཆེན་གྱི་མཐོང་ལམ་ཐོབ་མྱོང་བར་ཐལ། ཐེག་ཆེན་འཕགས་པ་ཡིན་པའི་ཕྱིར། བྱས་པ་ལ་ཁོ་ན་རེ། ཐེག་དམན་ཚོགས་ལམ་པ་ཡིན་ན་ཐེག་དམན་སོ་སྐྱེ་ཡིན་དགོས་པར་ཐལ། ཐེག་ཆེན་ལ་དེའི་ཕྱིར་ན་མ་ཁྱབ། འདོད་ན། སྤང་བྱ་ཅིག་ཅར་བའི་རྒྱུན་ཞུགས་ཀྱི་རྟོགས་པ་སྔོན་དུ་སོང་བའི་རང་རྒྱལ་ཚོགས་ལམ་པ་ཆོས་ཅན།

---

^{[མ་དཔེ་གཟིགས་ན་འདིར་གནོན།]}

དེར་ཐལ། དེའི་ཕྱིར། དེར་ཐལ། རང་རྒྱལ་ཚོགས་ལམ་པ་ཡིན་པའི་ཕྱིར། འདོད་ན། ཐེག་དམན་གྱི་མཐོང་ལམ་ཐོབ་མ་མྱོང་བར་ཐལ། འདོད་པའི་ཕྱིར། ཞེས་སྨྲ་ཡང་མི་འཐད་དེ། ཐེག་དམན་ལ་ཉན་རང་གི་ལམ་གཉིས་ཡོད་པས་ཐེག་ཆེན་དང་མི་མཚུངས་པའི་ཕྱིར། ཁ་ཅིག །འཁོར་བའི་སེམས་ཅན་འདི་ཕན་ཆད་དུ་མེད། འདི་ཚུན་ཆད་དུ་ཡོད་ཅེས་མཚམས་འཛིན་རིགས་པར་ཐལ། འཁོར་བ་ལ་མཐའ་ཡོད་པའི་ཕྱིར་ན་མ་ཁྱབ། འདོད་ན། མི་འཐད་པར་ཐལ། མདོ་ལས། ནམ་མཁའི་མཐར་ཐུག་གྱུར་པ་ཇི་ཙམ་པ། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཞེས་གསུངས་པའི་ཕྱིར། ཁ་ཅིག །འཁོར་བ་སྟོངས་པའི་དུས་སྲིད་པར་ཐལ། སེམས་ཅན་ཐམས་ཅད་སངས་རྒྱས་པའི་དུས་སྲིད་པའི་ཕྱིར། འདོད་ན། འཁོར་བའི་སེམས་ཅན་འདི་ཕན་ཆད་དུ་མེད། འདི་ཚུན་ཆད་དུ་ཡོད་ཅེས་ས་མཚམས་འཛིན་རིགས་པར་ཐལ། འདོད་པའི་ཕྱིར་ན་མ་ཁྱབ། འོ་ན། སྔོན་པོ་འདི་ཚུན་ཚད་དུ་ཡོད། འདི་ཕན་ཆད་དུ་མེད་ཅེས་ས་མཚམས་འཛིན་རིགས་པར་ཐལ། སྔོན་པོ་མེད་པའི་དུས་སྲིད་པའི་ཕྱིར། མ་གྲུབ་ན། སྔོན་པོ་ཆོས་ཅན། ཁྱོད་རྟག་དངོས་ཡིན་པར་ཐལ། ཁྱོད་རང་རྒྱུ་ལས་སྐྱེས་པ་གང་ཞིག །ཁྱོད་མེད་པའི་དུས་མི་སྲིད་པའི་ཕྱིར། བཞི་པ་ལམ་ཤེས་ཀྱི་རང་བཞིན་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན། འདོད་པ་དང་སྲིད་པའི་ཟག་པས་བསྡུས་པའི་ཉོན་མོངས་པ་སྤང་བྱའི་གཙོ་བོར་བྱས་ནས་འབད་པས་རྣམ་པ་ཐམས་ཅད་དུ་སྤངས་པ་མ་ཡིན་པ་ཞེས་བྱ་བ་ནི་ལམ་ཤེས་ཀྱི་རང་བཞིན་ཡིན་པས་དེ་ཉན་རང་གི་ལམ་ལས་ཁྱད་པར་འཕགས་པ་ཡིན་ཏེ། བྱང་ཆུབ་ཏུ་སེམས་བསྐྱེད་པ་ནི་འཁོར་བ་ཇི་སྲིད་པར་སེམས་ཅན་གྱི་དོན་བྱེད་པར་ཞུགས་པ་ཉིད་ཀྱིས་འདོད་སྲིད་ཀྱི་ཟག་པ་བྱང་ཆུབ་སེམས་དཔའ་འཕགས་པ་རྣམས་ཀྱིས་གཞན་དོན་སྒྲུབ་པའི་ཡན་ལག་ཏུ་འགྱུར་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །མ་རིག་བག་ཆགས་ཀྱི་ས་འདིར་བསྟན་ཉོན་མོངས་ཡིན་ཟེར་ན། དེ་ཆོས་ཅན། ཁྱོད་བྱང་ཆུབ་སེམས་དཔའ་རྣམས་ཀྱིས་སྤང་བྱའི་གཙོ་བོར་བྱས་ནས་མི་སྤོང་བར་ཐལ། ཁྱོད་སྐབས་འདིར་བསྟན་གྱི་ཉོན་མོངས་ཡིན་པའི་ཕྱིར། མ་ཁྱབ་སྟེ། རྒྱུ་ལམ་ཤེས་དེས་སྐབས་འདིར་བསྟན་གྱི་ཉོན་མོངས་སྤང་བྱའི་གཙོ་བོར་བྱས་ནས་མི་སྤོང་བའི་རྒྱུ་མཚན་གྱིས་ཉན་ཐོས་ཀྱི་ལམ་ལས་རང་བཞིན་གྱིས་ཁྱད་པར་དུ་འཕགས་པའི་ཕྱིར། རྩ་བར་འདོད་ན། དེས་མ་རིག་བག་ཆགས་ཀྱི་ས་སྤང་བྱའི་གཙོ་བོར་བྱས་ནས་སྤོང་བར་ཐལ། དེས་ཤེས་སྒྲིབ་སྤང་བྱའི་གཙོ་བོར་བྱས་ནས་སྤོང་བའི་ཕྱིར། གཞན་ཡང་། མ་རིག་བག་ཆགས་ཀྱི་ས་ཆོས་ཅན། ཁྱོད་ཉན་ཐོས་སློབ་པ་རྣམས་ཀྱིས་སྤང་བྱའི་གཙོ་བོར་བྱས་ནས་སྤོང་བར་ཐལ། ཁྱོད་སྐབས་འདིར་བསྟན་གྱི་ཉོན་མོངས་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཉན་ཐོས་སློབ་པས་སྤང་བྱའི་གཙོ་བོར་མི་བྱེད་པར་ཐལ། ཁྱོད་ཤེས་སྒྲིབ་ཡིན་པའི་ཕྱིར། ཁ་ཅིག །བསོད་ནམས་ཀྱི་ཚོགས་ཡོངས་སུ་ཚོལ་བས་མི་ངོམས་པ་སོགས་བརྒྱད་པོ་དེ། སྐབས་འདིར་བསྟན་གྱི་ཉོན་མོངས་ཡིན་ཟེར་ན། མི་འཐད་པར་ཐལ། དེ་བྱང་ཆུབ་སེམས་དཔས་ཆེད་དུ་གཉེར་ནས་སྤོང་ངམ་མི་སྤོང་སྙམ་པའི་དོགས་པ་བློ་ལྡན་ལ་མི་སྐྱེ་བའི་ཕྱིར། དེར་ཐལ། དེ་རྒྱལ་སྲས་ཀྱི་སྤྱོད་པ་ཡིན་པའི་ཕྱིར། གཞན་ཡང་། སྐབས་འདིར་བསྟན་གྱི་ཉོན་མོངས་ཉོན་མོངས་བཏགས་པ་བ་ཡིན་པར་ཐལ། བརྒྱད་པོ་དེ་སྐབས་འདིར་བསྟན་གྱི་ཉོན་མོངས་ཡིན་པའི་ཕྱིར། འདོད་ན། ཉན་ཐོས་འཕགས་པས་སྤང་བྱའི་གཙོ་བོར་བྱས་ནས་སྤོང་བའི་ཉོན་མོངས་ཉོན་མོངས་བཏགས་པ་བ་ཡིན་པར་ཐལ། འདོད་པའི་ཕྱིར། འདོད་མི་ནུས། ཁ་ཅིག །སྐབས་འདིར་བསྟན་གྱི་

---

^{[མ་དཔེ་གཟིགས་ན་འདིར་གནོན།]}

ཉོན་མོངས་བྱང་འཕགས་འཁོར་བར་སྐྱེ་བ་ལེན་པའི་རྒྱུ་ཡིན་ཟེར་ན། བྱང་འཕགས་དེ་ཉོན་མོངས་པའི་དབང་གིས་འཁོར་བར་སྐྱེ་བ་ལེན་པར་ཐལ། འདོད་པའི་ཕྱིར། འདོད་ན། མི་འཐད་པར་ཐལ། དེ་ལས་ཉོན་གྱིས་འཁོར་བར་སྐྱེ་འཆི་སྤངས་པའི་གང་ཟག་ཡིན་པའི་ཕྱིར། དེར་ཐལ། རྒྱུད་བླ་མ་ལས། འཕགས་པས་ན་དང་རྒ་བ་དང་། །འཆི་བའི་སྡུག་བསྔལ་རྩད་ནས་སྤངས། །ལས་དང་ཉོན་མོངས་དབང་གིས་སྐྱེ། །དེ་ལ་དེ་མེད་ཕྱིར་དེ་མེད། །ཅེས་གསུངས་པའི་ཕྱིར། ཁ་ཅིག །མ་རིག་བག་ཆགས་ཀྱི་ས་དང་། ཟག་མེད་ཀྱི་ལས་ལ་བརྟེན་ནས་འཁོར་བར་སྐྱེ་བ་ལེན་པའི་བྱང་འཕགས་ཡོད་ཟེར་ན། དེའི་དབང་གིས་འཁོར་བར་སྐྱེ་བ་ལེན་པའི་བྱང་འཕགས་མེད་པར་ཐལ། ཤེས་སྒྲིབ་ཀྱི་དབང་གིས་འཁོར་བར་སྐྱེ་བ་ལེན་པའི་བྱང་འཕགས་མེད་པའི་ཕྱིར། དེར་ཐལ། ཉོན་སྒྲིབ་ཀྱི་དབང་གིས་དེ་མེད་པ་གང་ཞིག །མཚུངས་པའི་ཕྱིར། གཞན་ཡང་། མ་རིག་བག་ཆགས་ཀྱི་ས་དང་ཟག་མེད་ཀྱི་ལས་ལ་བརྟེན་ནས་ཡིད་ལུས་ལེན་པའི་གང་ཟག་ཡིན་ན། དེ་ལ་བརྟེན་ནས་འཁོར་བར་སྐྱེ་བ་ལེན་པའི་གང་ཟག་ཡིན་དགོས་པར་ཐལ། དེ་ལ་བརྟེན་ནས་འཁོར་བར་སྐྱེ་བ་ལེན་པའི་བྱང་འཕགས་ཡོད་པའི་ཕྱིར། རྟགས་ཁས། འདོད་ན། དེ་ལ་བརྟེན་ནས་སྐྱེ་བ་ལེན་པའི་དགྲ་བཅོམ་པ་མེད་པར་ཐལ། འདོད་པའི་ཕྱིར། འདོད་ན། རྣམ་བཤད་ལས། ས་བདུན་པ་མན་ཆད་པས་ཀྱང་འབད་པས་བསྒྲུབས་ན་མ་རིག་བག་ཆགས་ཀྱི་ས་དང་། ཟག་པ་མེད་པའི་ལས་ལ་བརྟེན་ནས་ཡིད་ཀྱི་རང་བཞིན་གྱི་ལུས་ལེན་ནུས་མོད་ཀྱི། ངམ་ངམ་ཤུགས་ཀྱིས་གྲུབ་པ་ནི་ཉན་རང་དགྲ་བཅོམ་པ་དང་། དབང་ཐོབ་པའི་བྱང་ཆུབ་སེམས་དཔའ་རྣམས་ལ་ཡིན་པར་ཤེས་པར་བྱའོ་ཞེས་གསུངས་པ་མི་འཐད་པར་ཐལ། འདོད་པའི་ཕྱིར། འདོད་མི་ནུས། གཉིས་པ་རང་ལུགས་ནི། འདོད་པའི་སས་བསྡུས་ཀྱི་འདོད་ཆགས་དང་། གཟུགས་ཀྱི་

---

^{[མ་དཔེ་གཟིགས་ན་འདིར་གནོན།]}

སས་བསྡུས་ཀྱི་འདོད་ཆགས་དེ་དམན་ལམ་སྔོན་མ་སོང་གི་བྱང་སེམས་འཕགས་པས་ཆེད་དུ་གཉེར་ནས་མི་སྤོང་བའི་རྒྱུ་མཚན་ཡོད་དེ། བྱང་འཕགས་སྙིང་རྗེ་དང་སྨོན་ལམ་གྱི་དབང་གིས་འཁོར་ལོས་བསྒྱུར་རྒྱལ་དུ་སྐྱེ་བ་བླངས་ཏེ་སྲས་སྟོང་ལ་སོགས་པ་བསྐྲུན་འདོད་པའི་འདོད་ཆགས་གཞན་དོན་སྒྲུབ་པའི་ཡན་ལག་ཏུ་སྒྱུར་བར་བྱེད། གཟུགས་ཁམས་སུ་སྐྱེ་བ་བླངས་ནས་གཟུགས་ཀྱི་འདོད་ཆགས་གཞན་དོན་སྒྲུབ་པའི་ཡན་ལག་ཏུ་སྒྱུར་བར་བྱེད་པའི་ཕྱིར། འདོད་ཆགས་གཉིས་དང་མཚུངས་ལྡན་གྱི་མ་རིག་པ་དང་ཉོན་མོངས་ཅན་གྱི་འཇིག་ལྟ་བྱང་འཕགས་ཀྱིས་ཆེད་དུ་གཉེར་ནས་མི་སྤོང་རྒྱུ་དང་། སྐབས་འདིར་བསྟན་གྱི་ཉོན་མོངས་མ་ཡིན་ཏེ། དེ་བྱང་འཕགས་ཀྱིས་གཞན་དོན་སྒྲུབ་པའི་ཡན་ལག་ཏུ་སྒྱུར་མི་ནུས་པའི་ཕྱིར། གཉིས་ཀ་ལ་རྒྱུ་མཚན་ཡོད་དེ། འགྲེལ་ཆེན་ལས། མ་རིག་པ་དང་ལྟ་བས་བསྡུས་པའི་བག་ལ་ཉལ་སྤོང་གིའདོད་པ་དང་སྲིད་པའི་ཟག་པ་ནི་མ་ཡིན་ཏེ། བསམས་བཞིན་དུ་སྲིད་པར་སྐྱེ་བ་ལེན་པའི་ཕྱིར་རོ། །ཞེས་གསུངས་པའི་ཕྱིར། གསུམ་པ་རྩོད་པ་སྤོང་བ་ལ། ཁ་ཅིག །ལས་ཉོན་གྱི་དབང་གིས་བྱུང་བའི་བྱང་འཕགས་ཀྱི་སྐྱེ་བ་མེད་པར་ཐལ། ལས་ཉོན་གྱི་དབང་གིས་འཁོར་བར་སྐྱེ་བ་ལེན་པའི་བྱང་འཕགས་མེད་པའི་ཕྱིར་ན། མ་ཁྱབ། འདོད་ན། དེ་ཡོད་པར་ཐལ། ལས་ཉོན་གྱི་དབང་གིས་བྱུང་བའི་བྱང་སེམས་སྦྱོར་ལམ་པའི་སྐྱེ་བ་ཡོད་པ་གང་ཞིག །དེ་འདྲའི་སྦྱོར་ལམ་པས་ཚེ་དེ་ལ་བྱང་སེམས་ཀྱི་མཐོང་ལམ་ཐོབ་པ་ཡོད་པའི་ཕྱིར། ཁྱབ་པ་ཡོད་དེ། དེ་འདྲའི་སྦྱོར་ལམ་པ་དང་མཐོང་ལམ་པ་གཉིས་ལུས་རྟེན་གཅིག་གིས་བསྡུས་པའི་ཕྱིར། གཞན་ཡང་། ལས་ཉོན་གྱི་དབང་གིས་བྱུང་བའི་ཉན་ཐོས་སྲིད་པ་ཐ་མ་པ་མེད་པར་ཐལ། ལས་ཉོན་གྱི་དབང་གིས་འཁོར་བར་སྐྱེ་བ་ལེན་པའི་ཉན་ཐོས་སྲིད་པ་ཐ་མ་པ་མེད་པའི་ཕྱིར།

---

^{[མ་དཔེ་གཟིགས་ན་འདིར་གནོན།]}

ཁྱབ་པ་འགྲིག །ཁ་ཅིག །བྱང་འཕགས་ལས་དབང་གིས་འཁོར་བར་སྐྱེ་བ་ལེན་པ་ཡོད་པར་ཐལ། བྱང་འཕགས་འཁོར་བར་སྐྱེ་བ་ལེན་པའི་རྒྱུར་གྱུར་པའི་ལས་ཡོད་པའི་ཕྱིར་ན་མ་ཁྱབ། ཁ་ཅིག །བྱང་འཕགས་ཀྱིས་ཉོན་མོངས་ཅན་གྱི་མ་རིག་པ་དང་འཇིག་ལྟ་སྤང་བྱའི་གཙོ་བོར་བྱས་ནས་སྤོང་ཞིང་། འདོད་སྲིད་ཀྱི་ཉོན་མོངས་སྤང་བྱའི་གཙོ་བོར་བྱས་ནས་མི་སྤོང་བ་སྔར་གྱི་འགྲེལ་ཆེན་གྱི་ལུང་དོན་ཡིན་ཟེར་ན། མི་འཐད་པར་ཐལ། བྱང་འཕགས་ཀྱིས་ཉོན་སྒྲིབ་སྤང་བྱའི་གཙོ་བོར་བྱས་ནས་མི་སྤོང་བའི་ཕྱིར། ཁོ་ན་རེ། སྔ་མ་དེ་མི་འཐད་པར་ཐལ། བྱང་འཕགས་ཀྱིས་དེ་གཉིས་ཆེད་དུ་གཉེར་ནས་སྤོང་བའི་ཕྱིར། དེར་ཐལ། དེ་གཉིས་བྱང་འཕགས་ཀྱིས་ཆེད་དུ་གཉེར་ནས་སྤང་རྒྱུའི་ཉོན་མོངས་ཡིན་པའི་ཕྱིར། དེར་ཐལ། དེ་གཉིས་ཆེད་དུ་གཉེར་ནས་མི་སྤང་རྒྱུའི་ཉོན་མོངས་མ་ཡིན་པའི་ཕྱིར། དེར་ཐལ། དེ་གཉིས་སྐབས་འདིར་བསྟན་གྱི་ཉོན་མོངས་མ་ཡིན་པའི་ཕྱིར་ན་། རྩ་བར་མ་ཁྱབ་། ལྔ་པ་བྱེད་ལས་ནི་། ལམ་ཤེས་ཀྱི་རང་བཞིན་བཤད་པ་དེའི་འོག་ཏུ་དེ་ལྟ་བུའི་རང་བཞིན་ཅན་གྱི་ལམ་ཤེས་ཀྱི་བྱེད་ལས་ནི་ཆོས་ཅན་། ཁྱོད་ཉན་ཐོས་ཀྱི་ལམ་ལས་བྱེད་པ་ཁྱད་ཞུགས་པ་ཡིན་ཏེ། ཁྱོད་མ་རྫོགས་མ་སྨིན་མ་སྦྱངས་བར་དུ་ཡང་དག་པའི་མཐའ་མངོན་དུ་མི་བྱེད་པ་དང་། སྟོང་པ་ཉིད་ལ་དམིགས་པའི་ཤེས་རབ་དང་སྙིང་རྗེ་ལ་སོགས་པའི་ཐབས་ལ་མཁས་པས་སེམས་ཅན་འཁོར་དུ་ཡོངས་སུ་མ་བསྡུས་པ་རྣམས་ཡོངས་སུ་སྡུད་པ་དང་། ལ་སོགས་པས་བསྡུས་པ་རྣམས་སྨིན་ཅིང་གྲོལ་བ་བྱེད་པ་ཡིན་པའི་ཕྱིར། སྨྲས་པ། སྟོབས་བཅུའི་རྩལ་གྱི་ཆུ་འཛིན་ཕྲེང་བའི་དབུས། །གསུང་རབ་གྲུ་ཆར་འཇོ་བའི་དག་པའི་སྣོད། །ང་རྒྱལ་དྲི་མ་སེལ་ཕྱིར་གློག་འོད་ཕྲེང་། །མ་རིག་མུན་པ་རིང་དུ་བསྐྲད་དམ་སྙམ། །བློ་གྲོས་གཙུག་ན་ཟླ་བའི་རིགས་པའི་མདས། །སྔ་རབས་ལྷ་མིན་སྡེར་བཅས་བཅོམ་པ་ན། །ད་
ལྟའི་རིགས་པ་སྨྲ་བར་རློམ་པ་ཕལ། །མི་སྨྲའི་བརྟུལ་ཞུགས་འཛིན་པའི་གཉིད་ལ་ཡུར། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ།། །།

ཉན་ཐོས་ཀྱི་ལམ་ཤེས་པའི་ལམ་ཤེས་བཤད་པ།

---

^{[མ་དཔེ་གཟིགས་ན་འདིར་གནོན།]}

ཉན་ཐོས་ཀྱི་ལམ་ཤེས་པའི་ལམ་ཤེས་བཤད་པ། གཉིས་པ་ལམ་ཤེས་ཀྱི་རང་བཞིན་ལ། ཉན་ཐོས་དང་། རང་རྒྱལ་དང་། བྱང་སེམས་ཀྱི་ལམ་གྱི་རང་བཞིན་ཤེས་པ་གསུམ་ལས། དང་པོ་ལ། ལམ་ཤེས་ཀྱི་ངོ་བོ་དང་། རྒྱུ་ངེས་འབྱེད་ཆ་མཐུན་གཉིས། དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། དེ་ལྟར་ལམ་ཤེས་ཀྱི་རྟེན་ལ་སོགས་པ་བརྗོད་ནས་ལམ་ཤེས་པ་ཉིད་ཀྱི་སྐབས་སུ་ཉན་ཐོས་ཀྱི་ལམ་ཤེས་པའི་ཚུལ་བརྗོད་པར་རིགས་ཏེ། རྣམ་མཁྱེན་ཐོབ་པར་བྱེད་པ་ལ་ཐེག་པ་གསུམ་གྱི་ལམ་ཐམས་ཅད་རྫོགས་པར་བསྒོམ་པར་བྱ་དགོས་པས་དེ་ལྟར་བཤད་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ལམ་ཤེས་པ་ཉིད་རྫོགས་པར་སྒོམ་པ་ཉིད་ཀྱི་ཚུལ་ལ་ནི་ཉན་ཐོས་ཀྱི་ལམ་འདི་ཆོས་ཅན། ཁྱོད་ཇི་ལྟར་བསྒོམ་པ་ཡང་ཤེས་པར་བྱ་སྟེ། ཁྱོད་འཕགས་པའི་བདེན་པ་བཞི་པོ་དག་གི་རྣམ་པ་མི་རྟག་སོགས་བཅུ་དྲུག་སེམས་བསྐྱེད་དང་བསྔོ་བ་དང་བདེན་པར་མི་དམིགས་པའི་ཤེས་རབ་ཀྱིས་ཟིན་པའི་སྒོ་ནས་ནི་སྒོམ་པར་བྱེད་དགོས་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །ཁྱད་ཆོས་གསུམ་གྱིས་ཟིན་པའི་སྒོ་ནས་མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་ཡེ་ཤེས་གང་ཞིག །གདུལ་བྱ་ཉན་ཐོས་ཀྱི་རིགས་ཅན་རྗེས་སུ་གཟུང་བའི་ཕྱིར་དུ་ཤེས་པར་བྱ་བའི་མངོན་རྟོགས་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད་ཟེར་ན། བྱང་འཕགས་ཀྱི་རྒྱུད་ཀྱི་གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མི་རྟག་སོགས་བཅུ་དྲུག་མངོན་སུམ་དུ་རྟོགས་པར་ཐལ། འདོད་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར། འདོད་ན། ཉན་ཐོས་མཐོང་ལམ་པའི་རྒྱུད་ཀྱི་གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་དེས་མི་རྟག་སོགས་བཅུ་དྲུག་མངོན་སུམ་དུ་རྟོགས་པར་ཐལ། འདོད་པའི་ཕྱིར། འདོད་ན། ཉན་ཐོས་མཐོང་ལམ་བར་ཆད་མེད་ལམ་དེས། དེ་མངོན་སུམ་དུ་རྟོགས་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། མི་རྟག་སོགས་བཅུ་དྲུག་ཁྱོད་ཀྱི་དངོས་ཡུལ་ཡིན་པར་ཐལ། ཁྱོད་ཀྱིས་དེ་མངོན་སུམ་དུ་རྟོགས་པའི་ཕྱིར། འདོད་མི་ནུས་ཏེ། ཁྱོད་བར་ཆད་མེད་ལམ་ཡིན་པའི་ཕྱིར། གཞན་ཡང་། སྟོང་ཉིད་མངོན་སུམ་དུ་རྟོགས་པའི་ཉན་ཐོས་དགྲ་བཅོམ་གྱི་རྟོགས་པ་སྔོན་དུ་སོང་བའི་བྱང་སེམས་ཚོགས་ལམ་པའི་རྒྱུད་ཀྱི་མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་ཡེ་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། དེ་ཆོས་ཅན། ཐེག་ཆེན་འཕགས་པའི་མཁྱེན་པ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། རོང་ཊཱིཀ་པ་ན་རེ། ཉན་ཐོས་ཀྱི་ལམ་བདེན་སྟོང་དུ་མངོན་སུམ་དུ་རྟོགས་པའི་ཡེ་ཤེས། ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད་ཟེར་ན། མི་འཐད་པར་ཐལ། ཉན་ཐོས་ཀྱི་ལམ་ཤེས་པའི་ལམ་ཤེས་ཡིན་ན་ཉན་ཐོས་ཀྱི་རྟོགས་རིགས་སུ་གནས་པས་ཁྱབ་པའི་ཕྱིར། དེར་ཐལ། གཟུགས་ནི་མི་རྟག་པ་ཉིད་དུ་ཡིད་ལ་བྱའོ་ཞེས་སོགས་ཀྱི་མདོ་དེ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་འཛིན་སྟངས་འཆད་བྱེད་ཀྱི་མདོ་ཡིན་པའི་ཕྱིར། མ་ཁྱབ་ན། མི་རྟག་སོགས་མངོན་སུམ་དུ་རྟོགས་པའི་བྱང་སེམས་ཀྱི་མཐོང་ལམ་ཉན་ཐོས་ཀྱི་ལམ་ཤེས་པའི་ལམ་ཤེས་ཡིན་པ་ཐལ། མ་ཁྱབ་པ་དེའི་ཕྱིར། འདོད་ན། དེ་ཆོས་ཅན། ཉན་ཐོས་ཀྱི་ལམ་བདེན་སྟོང་དུ་མངོན་སུམ་དུ་རྟོགས་པའི་ཡེ་ཤེས་ཡིན་པར་ཐལ། འདོད་པའི་ཕྱིར། འདོད་ན། སློབ་ལམ་ན་མཉམ་རྗེས་ངོ་བོ་གཅིག་ཏུ་ཡོད་པར་ཐལ་ལོ། །གཞན་ཡང་

---

^{[མ་དཔེ་གཟིགས་ན་འདིར་གནོན།]}

མཚན་ཉིད་དེ་མི་འཐད་པར་ཐལ། ཉན་ཐོས་ཀྱི་ལམ་ཤེས་པའི་ལམ་ཤེས་ཡིན་ན། རྣལ་འབྱོར་མངོན་སུམ་ཡིན་པས་མ་ཁྱབ་པའི་ཕྱིར། དེར་ཐལ། གང་ཟག་གི་བདག་མེད་དོན་སྤྱིའི་ཚུལ་གྱིས་རྟོགས་པའི་ཐེག་ཆེན་གྱི་སྒོམ་ལམ་ཡོད་པའི་ཕྱིར། དེར་ཐལ། གཟུང་འཛིན་རྫས་གཞན་གྱིས་སྟོང་པ་དོན་སྤྱིའི་ཚུལ་གྱིས་རྟོགས་པའི་ཐེག་ཆེན་གྱི་སྒོམ་ལམ་ཡོད་པའི་ཕྱིར། དེར་ཐལ། འགྲེལ་པར། དེ་དག་གི་ཤེས་བྱའི་སྒྲིབ་པའི་གཉེན་པོ་ཉིད་དུ་སྒོམ་པའི་ལམ་ཟག་པ་དང་བཅས་པ་དང་། ཟག་པ་མེད་པ་གཉིས་ཡིན་པས་ལམ་རྣམ་པ་གསུམ་མོ་ཞེས་གསུངས་པའི་ཕྱིར། ཁ་ཅིག །ཉན་ཐོས་ཀྱི་ལམ་རང་བཞིན་མེད་པར་མངོན་སུམ་དུ་རྟོགས་པའི་ཐེག་ཆེན་འཕགས་པའི་མཁྱེན་པ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད་ཟེར་ན། དེ་མི་འཐད་པར་ཐལ། དེ་འདྲའི་ཐེག་ཆེན་འཕགས་པའི་མཁྱེན་པ་མེད་པའི་ཕྱིར། དེར་ཐལ། ཉན་ཐོས་ཀྱི་ལམ་རང་བཞིན་གྱིས་གྲུབ་པའི་ཕྱིར། མ་གྲུབ་ན། དེ་ཆོས་ཅན། རང་བཞིན་གྱིས་གྲུབ་པར་ཐལ། གཞི་གྲུབ་པའི་ཕྱིར། ཁ་ཅིག །སེམས་བསྐྱེད་བསྔོ་བ་སྟོང་ཉིད་རྟོགས་པའི་ཤེས་རབ་གསུམ་གྱིས་ཟིན་པའི་སྒོ་ནས་གདུལ་བྱ་ཉན་ཐོས་ཀྱི་རིགས་ཅན་རྗེས་སུ་གཟུང་བའི་ཕྱིར་དུ་ཤེས་པར་བྱ་བའི་མངོན་རྟོགས་ཀྱི་རིགས་སུ་གནས་པའི་ཐེག་ཆེན་འཕགས་པའི་མཁྱེན་པ་དེ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད་ཟེར་ན། གང་ཟག་གི་བདག་འཛིན་སྤངས་པའི་སྤངས་པ་དོན་གཉེར་གྱི་ཐེག་ཆེན་གྱི་མཐོང་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། གང་ཟག་གི་བདག་མེད་མངོན་སུམ་དུ་རྟོགས་པའི་ཐེག་ཆེན་གྱི་མཐོང་ལམ་དེ་མཚན་ཉིད་དེ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཉན་ཐོས་ཀྱི་ཤེས་རབ་ཀྱི་རྟོགས་རིགས་སུ་གནས་པར་ཐལ། འདོད་པའི་ཕྱིར། འདོད་

---

^{[མ་དཔེ་གཟིགས་ན་འདིར་གནོན།]}

ན། མ་ཡིན་པར་ཐལ། ཉན་ཐོས་ཀྱི་ཐབས་ཀྱི་རྟོགས་རིགས་སུ་གནས་པའི་ཕྱིར། དེར་ཐལ། གང་ཟག་གི་བདག་འཛིན་སྤངས་པའི་སྤངས་པ་དོན་གཉེར་གྱི་ཉན་ཐོས་ཀྱི་མཐོང་ལམ་དེ་ཉན་ཐོས་ཀྱི་ཐབས་ཡིན་པའི་ཕྱིར། དེར་ཐལ། ཉན་ཐོས་ཀྱི་སེམས་བསྐྱེད་དེ་ཉན་ཐོས་ཀྱི་ཐབས་ཡིན་པའི་ཕྱིར་ཁ་ཅིག །ཉན་ཐོས་ཀྱི་ལམ་ཤེས་པའི་ལམ་ཤེས་དང་། རང་རྒྱལ་གྱི་ལམ་ཤེས་པའི་ལམ་ཤེས་གཉིས་མི་འགལ་བར་ཐལ། བྱང་འཕགས་ཀྱི་རྒྱུད་ཀྱི་གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་དེ་གཉིས་ཀ་ཡིན་པའི་ཕྱིར། དེར་ཐལ། དེ་རང་རྒྱལ་གྱི་རྟོགས་རིགས་སུ་གནས་པའི་ཕྱིར། དེར་ཐལ། གང་ཟག་གི་བདག་མེད་དེ་རང་རྒྱལ་སློབ་པ་འཕགས་པའི་བསྒོམ་བྱའི་གཙོ་བོ་ཡིན་པའི་ཕྱིར། དེར་ཐལ། གང་ཟག་གི་བདག་འཛིན་དེ་དེའི་སྤང་བྱའི་གཙོ་བོ་ཡིན་པའི་ཕྱིར། དེར་ཐལ། འཁོར་བའི་རྩ་བ་དེའི་སྤང་བྱའི་གཙོ་བོ་ཡིན་པའི་ཕྱིར། དེར་ཐལ། འཁོར་བ་དེའི་སྤང་བྱའི་གཙོ་བོ་ཡིན་པའི་ཕྱིར། དེར་ཐལ། ཐར་པ་དེའི་ཐོབ་བྱའི་གཙོ་བོ་ཡིན་པའི་ཕྱིར་ན་མ་ཁྱབ། འོ་ན། གང་ཟག་གི་བདག་འཛིན་རང་རྒྱལ་གྱི་ཐར་པ་འཐོབ་པ་ལ་སྒྲིབ་པའི་གཙོ་བོ་ཡིན་པར་ཐལ། རང་རྒྱལ་སློབ་པ་འཕགས་པས་དེ་སྤང་བྱའི་གཙོ་བོར་བྱས་ནས་སྤོང་བའི་ཕྱིར། འདོད་ན། དེ་གཟུང་འཛིན་རྫས་གཞན་དུ་འཛིན་པའི་འཛིན་པ་སྤངས་པའི་སྤངས་པ་འཐོབ་པ་ལ་གེགས་བྱེད་ཀྱི་སྒྲིབ་པའི་གཙོ་བོ་ཡིན་པར་ཐལ། འདོད་པའི་ཕྱིར། འདོད་ན། གང་ཟག་གི་བདག་འཛིན་སྤངས་པའི་གང་ཟག་ཡིན་ན། གཟུང་འཛིན་རྫས་གཞན་དུ་འཛིན་པའི་འཛིན་པ་སྤངས་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། ཉན་ཐོས་དགྲ་བཅོམ་པ་ཆོས་ཅན། དེར་ཐལ། དེའི་ཕྱིར། ཁ་ཅིག །མི་རྟག་སོགས་བཅུ་དྲུག་གོམས་པ་ལྷུར་ལེན་གྱི་ཚུལ་གྱིས་སྒོམ་པའི་བྱང་སེམས་ཀྱི་མཐོང་ལམ་ཡོད་ཟེར་ན། དེ་

---

^{[མ་དཔེ་གཟིགས་ན་འདིར་གནོན།]}

བསྒོམ་བྱའི་གཙོ་བོར་བྱེད་པའི་བྱང་སེམས་ཀྱི་མཐོང་ལམ་ཡོད་པར་ཐལ། འདོད་པའི་ཕྱིར། འདོད་ན། ཉོན་སྒྲིབ་སྤང་བྱའི་གཙོ་བོར་བྱེད་པའི་བྱང་འཕགས་ཡོད་པར་ཐལ། འདོད་པའི་ཕྱིར། བྱས་པ་ལ་ཁོ་ན་རེ། དེ་གོམས་པ་ལྷུར་ལེན་གྱི་ཚུལ་གྱིས་སྒོམ་པའི་བྱང་སེམས་ཀྱི་མཐོང་ལམ་ཡོད་པར་ཐལ། རྣམ་བཤད་ལས། ལམ་འདི་ཡང་མཐོང་ལམ་གྱི་སྐབས་ཉིད་དུ་སྒོམ་པར་བྱེད་ཀྱི། སྒོམ་ལམ་གྱི་གནས་སྐབས་སུ་གོམས་པ་ལྷུར་ལེན་བྱེད་པ་ནི་མ་ཡིན་ནོ། །ཞེས་སྒོམ་ལམ་ལ་མི་བྱེད་པར་དངོས་སུ་བསྟན་པའི་ཤུགས་ལ་ཅིག་ཤོས་བསྟན་པའི་ཕྱིར་ན། དེ་འདྲའི་དངོས་ཤུགས་མི་འཐད་པར་ཐལ། སྒོམ་ལམ་པས་ཉོན་སྒྲིབ་སྤང་བྱའི་གཙོ་བོར་མི་བྱེད་པ་ཤུགས་ལ་བསྟན་ན་ཅིག་ཤོས་བྱེད་པ་དངོས་སུ་བསྟན་དགོས་པ་ཧ་ཅང་ཐལ་བའི་ཉེས་པ་ཡོད་པའི་ཕྱིར། ཁ་ཅིག །ཉན་ཐོས་ལམ་འདི་ཤེས་པར་བྱ། །ཞེས་པའི་ཤེས་བྱ་ཉན་ཐོས་ཀྱི་ལམ་དེ་ཉན་ཐོས་རང་རྒྱུད་ཀྱིས་བསྡུས་པའི་ལམ་ཡིན་ཟེར་ན། མི་འཐད་པར་ཐལ། དེ་བྱང་ཆུབ་སེམས་དཔའི་ཐུགས་རྒྱུད་ལ་བསྐྱེད་ནས་ཤེས་དགོས་པའི་ཕྱིར། དེར་ཐལ། བྱང་འཕགས་ཀྱིས་ཉན་ཐོས་ཀྱི་ལམ་ཤེས་ཚུལ་མིག་གིས་གཟུགས་ལ་བལྟ་བ་ལྟར་བྱེད་པ་མི་འཐད་པའི་ཕྱིར། ཁ་ཅིག །དེ་བྱང་སེམས་རང་རྒྱུད་ཀྱིས་བསྡུས་པའི་ལམ་ཡིན་ཟེར་ན། མི་འཐད་པར་ཐལ། དེ་རྣམ་གཞག་གི་རྟེན་ཉན་ཐོས་ལ་བཞག་ཅིང་། ཉན་ཐོས་དང་བྱང་སེམས་གཉིས་ཀའི་རྒྱུད་ལ་སྐྱེ་བ་ཞིག་དགོས་པའི་ཕྱིར། གཉིས་པ་རང་ལུགས་ནི། སེམས་བསྐྱེད། བསྔོ་བ། སྟོང་ཉིད་རྟོགས་པའི་ཤེས་རབ་གསུམ་གྱིས་ཟིན་པའི་སྒོ་ནས། གདུལ་བྱ་ཉན་ཐོས་ཀྱི་རིགས་ཅན་རྗེས་སུ་གཟུང་བའི་ཆེད་དུ་ཤེས་པར་བྱ་བའི་ཤེས་རབ་ཀྱི་རིགས་སུ་གནས་པའི་ཐེག་ཆེན་འཕགས་པའི་མཁྱེན་པ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད། མི་རྟག་སོགས་བཅུ་དྲུག་

---

^{[མ་དཔེ་གཟིགས་ན་འདིར་གནོན།]}

རྟོགས་པའི་ཡེ་ཤེས་འདིར་བསྟན་ཤེས་བྱ་ཉན་ཐོས་ཀྱི་ལམ་ཡིན། དབྱེ་ན་བྱང་འཕགས་ཀྱི་རྒྱུད་ཀྱི་ཉན་ཐོས་ཀྱི་ལམ་ཤེས་པའི་ལམ་ཤེས་དང་། སངས་འཕགས་ཀྱི་རྒྱུད་ཀྱི་ཉན་ཐོས་ཀྱི་ལམ་ཤེས་པའི་ལམ་ཤེས་གཉིས་ཡོད། གསུམ་པ་རྩོད་པ་སྤོང་བ་ལ་ཁ་ཅིག །ཉན་ཐོས་ཀྱི་ཐབས་ཡིན་ན། ཉན་ཐོས་ཀྱི་ཤེས་རབ་མ་ཡིན་དགོས་པར་ཐལ། ཉན་ཐོས་ཀྱི་ཐབས་ཀྱི་རྟོགས་རིགས་སུ་གནས་ན། ཉན་ཐོས་ཀྱི་ཤེས་རབ་ཀྱི་རྟོགས་རིགས་སུ་མི་གནས་དགོས་པའི་ཕྱིར། འདོད་ན། ཐེག་ཆེན་གྱི་ཐབས་ཡིན་ན་དེའི་ཤེས་རབ་མ་ཡིན་དགོས་པར་ཐལ། འདོད་པའི་ཕྱིར། འདོད་ན། ཐེག་ཆེན་སེམས་བསྐྱེད་གྱི་འཁོར་དུ་བྱུང་བའི་ཤེས་རབ་ཆོས་ཅན། དེར་ཐལ། དེའི་ཕྱིར། ཐེག་ཆེན་སེམས་བསྐྱེད་དང་མཚུངས་ལྡན་རྣམ་པ་ལྔ་མཚུངས་ཡིན་པའི་ཕྱིར་ན་མ་ཁྱབ། འོ་ན། སངས་རྒྱས་འཕགས་པའི་ཐེག་ཆེན་སེམས་བསྐྱེད་ཀྱི་འཁོར་དུ་བྱུང་བའི་ཤེས་རབ་ཆོས་ཅན། ཐེག་ཆེན་གྱི་ཐབས་ཡིན་པར་ཐལ། སངས་འཕགས་ཀྱི་རྒྱུད་ཀྱི་ཐེག་ཆེན་ཀུན་རྫོབ་སེམས་བསྐྱེད་དང་མཚུངས་ལྡན་རྣམ་པ་ལྔ་མཚུངས་ཡིན་པའི་ཕྱིར། ཁྱབ་པ་འགྲིག །འདོད་ན། དེའི་རྒྱུད་ཀྱི་སྟོང་ཉིད་མངོན་སུམ་དུ་རྟོགས་པའི་ཤེས་རབ་ཐེག་ཆེན་གྱི་ཐབས་ཡིན་པར་ཐལ། འདོད་པ་གང་ཞིག་དེའི་རྒྱུད་ཀྱི་ཐེག་ཆེན་སེམས་བསྐྱེད་ཀྱི་འཁོར་དུ་བྱུང་བའི་ཤེས་རབ་དེ་སྟོང་ཉིད་མངོན་སུམ་དུ་རྟོགས་པའི་ཤེས་རབ་ཡིན་པའི་ཕྱིར། འདོད་ན། བྱང་འཕགས་ཀྱི་རྒྱུད་ཀྱི་སྟོང་ཉིད་མངོན་སུམ་དུ་རྟོགས་པའི་ཤེས་རབ་དེ་ཐབས་ཡིན་པར་ཐལ། འདོད་པའི་ཕྱིར། འདོད་མི་ནུས། གཞན་ཡང་། བྱང་སེམས་ཀྱི་ཐབས་དང་ཤེས་རབ་འགལ་བར་ཐལ། བྱང་འཕགས་ཀྱི་རྒྱུད་ཀྱི་དེ་གཉིས་འགལ་བའི་ཕྱིར། དེར་ཐལ། དེའི་རྒྱུད་ཀྱི་གཙོ་བོར་ཆོས་སྐུ་ཐོབ་ཕྱིར་དུ་སྒོམ་པའི་ཤེས་རབ་དང་། དེའི་རྒྱུད་ཀྱི་གཙོ་བོར་གཞན་དོན་གཟུགས་སྐུ་ཐོབ་ཕྱིར་དུ་སྒོམ་པའི་ཉམས་ལེན་འགལ་བའི་ཕྱིར། དེར་ཐལ། སངས་

---

^{[མ་དཔེ་གཟིགས་ན་འདིར་གནོན།]}

རྒྱས་ཀྱི་སར་རང་དོན་ཆོས་སྐུ་དང་གཞན་དོན་གཟུགས་སྐུ་འགལ་བའི་ཕྱིར། གཞན་ཡང་། དེ་མི་འཐད་པར་ཐལ། དེ་གཉིས་ཀྱི་གཞི་མཐུན་མེད་པའི་ཕྱིར། མ་གྲུབ་ན། དེའི་རྒྱུད་ཀྱི་ཐེག་ཆེན་སེམས་བསྐྱེད་ཀྱི་འཁོར་དུ་བྱུང་བའི་ཤེས་རབ་དེ། དེ་གཉིས་ཀྱི་གཞི་མཐུན་ཡིན་པར་ཐལ། མ་གྲུབ་པ་གང་ཞིག །དེ་འདྲའི་ཤེས་རབ་དེ་ཐབས་ཤེས་གཉིས་ཀ་ཡིན་པའི་ཕྱིར། རྟགས་ཁས། འདོད་ན། དེ་འདྲའི་ཤེས་རབ་ཀྱང་ཡིན། སྟོང་ཉིད་རྟོགས་པའི་བློ་ཡང་ཡིན་པའི་གཞི་མཐུན་པ་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། དེའི་རྒྱུད་ཀྱི་ཐེག་ཆེན་སེམས་བསྐྱེད་ཀྱི་འཁོར་དུ་བྱུང་བའི་བློ་ཡིན་ན་མ་རྟོགས་པའི་བློ་ཡིན་དགོས། དེའི་རྒྱུད་ཀྱི་ཐེག་ཆེན་སེམས་བསྐྱེད་ཡིན་ན་མ་རྟོགས་པའི་བློ་ཡིན་དགོས་པའི་ཕྱིར། གསུམ་པ་འགྲེལ་པ་ལ། ཤེས་བྱའི་ལམ་དང་། དེ་ཇི་ལྟར་ཤེས་པའི་ཚུལ་ལོ། །དང་པོ་ནི། མདོ་བར་མ་ལས། འདི་ལ་བྱང་ཆུབ་སེམས་དཔའ་ཆེན་པོ་ནི། རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་སེམས་བསྐྱེད་པས་མི་དམིགས་པའི་ཚུལ་གྱིས་གཟུགས་མི་རྟག་པར་ཡིད་ལ་བྱའོ་ཞེས་སོགས་རྣམ་པ་བཅུ་དྲུག་གི་ངོ་བོ་དང་རྣམ་གྲངས་ཅི་རིགས་པའི་སྒོ་ནས་བསྟན་པ་འདིར་འགྲེལ་པས་འཆད་པ་ལ་གསུམ། སྡུག་ཀུན་གྱི་རྣམ་པ་དང་། འགོག་བདེན་གྱི་རྣམ་པ་དང་། ལམ་བདེན་གྱི་རྣམ་པའོ། །དང་པོ་ལ། སོ་སོའི་རྣམ་པ་དང་། ཐུན་མོང་གི་རྣམ་པ་གཉིས། དང་པོ་ལ། སྡུག་བསྔལ་བདེན་པའི་རྣམ་པ་དང་། ཀུན་འབྱུང་བདེན་པའི་རྣམ་པའོ། །དང་པོ་ནི། བདེན་བཞིའི་རྣམ་པ་བཅུ་དྲུག་ཡོད་པ་དེ་ལས། སྡུག་བསྔལ་གྱི་བདེན་པའི་རྣམ་པ་བཞི་གོ་རིམ་བཞིན་དུ་འཆད་དོ། །ཞེས་དམ་བཅས་ནས། སྡུག་བསྔལ་བདེན་པ་ཆོས་ཅན། མི་རྟག་པའི་རྣམ་པ་ཡིན་ཏེ། རྐྱེན་ལས་སྐྱེས་པའི་ཕྱིར། དེ་ཆོས་ཅན། སྡུག་བསྔལ་གྱི་རྣམ་པ་ཡིན་ཏེ། ལས་ཉོན་གྱི་གཞན་དབང་དུ་གྱུར་པའི་ཕྱིར། དེ་ཆོས་ཅན།

---

^{[མ་དཔེ་གཟིགས་ན་འདིར་གནོན།]}

སྟོང་པའི་རྣམ་པ་ཡིན་ཏེ། དོན་གཞན་གྱི་བདག་གིས་སྟོང་པའི་ཆོས་ཡིན་པའི་ཕྱིར། དེ་ཆོས་ཅན། བདག་མེད་པའི་རྣམ་པ་ཡིན་ཏེ། རང་གི་ངོ་བོ་བདག་ཏུ་མ་གྲུབ་པའི་ཆོས་ཡིན་པའི་ཕྱིར། བདག་མེད་པ་དེ་དག་གི་མཚན་ཉིད་དེ་ངོ་བོ་རྣམ་པ་བཞི་པོ་དག་ནི་ཆོས་ཅན། ཞི་བའི་རྣམ་པ་ཡིན་ཏེ། རང་གི་ངོ་བོ་བདག་ཏུ་མ་གྲུབ་པའི་ཆོས་ཡིན་པའི་ཕྱིར། གཉིས་པ་ནི། ཀུན་འབྱུང་བའི་བདེན་པའི་རྣམ་པ་མདོ་ལས་འབྱུང་བ་ལྟར་འཆད་དོ། །སྲེད་པ་ཆོས་ཅན། ནད་དང་འདྲ་བར་རྒྱུའི་རྣམ་པ་ཡིན་ཏེ། སྡུག་བསྔལ་གྱི་རྩ་བར་གྱུར་པ་ཡིན་པའི་ཕྱིར། དེ་ཆོས་ཅན། འབྲས་དང་འདྲ་བར་ཀུན་འབྱུང་བའི་རྣམ་པ་ཡིན་ཏེ། སྡུག་བསྔལ་ཡང་དང་ཡང་དུ་སྐྱེད་བྱེད་ཡིན་པའི་ཕྱིར། དེ་ཆོས་ཅན། ཟུག་རྔུ་དང་འདྲ་བར་རབ་ཏུ་སྐྱེ་བའི་རྣམ་པ་ཡིན་ཏེ། རང་འབྲས་སྡུག་བསྔལ་ཤུགས་དྲག་སྐྱེད་པའི་ཕྱིར། དེ་ཆོས་ཅན། སྡིག་པའི་རྣམ་པ་དང་འདྲ་བར་རྐྱེན་གྱི་རྣམ་པ་ཡིན་ཏེ། ཡང་སྲིད་ཕྱི་མའི་ལྷན་ཅིག་བྱེད་རྐྱེན་ཡིན་པའི་ཕྱིར། གཉིས་པ་ཐུན་མོང་གི་རྣམ་པ་ནི། སྡུག་བསྔལ་དང་ཀུན་འབྱུང་བའི་བདེན་པ་དེ་དག་ཉིད་ཆོས་ཅན། སྡུག་ཀུན་སོ་སོའི་ཡིད་འབྱུང་བ་དག་གི་མཚན་ཉིད་ཕྱིར་རྒོལ་བས་ཕ་རོལ་དགྲ་ལྟ་བུ་དང་། གནོད་བྱེད་ཀྱིས་འཇིག་པའི་ཆོས་ཅན་གྱི་རྣམ་པའི་ངོ་བོ་ཉིད་དག་དམིགས་པར་བྱ་བ་ཡིན་ཏེ། སྡུག་ཀུན་གཉིས་ལས་ཡིད་འགྱུར་བའི་ཕྱིར་དུ་སྦྱོར་ལམ་དུ་ཞུགས་པ་ཡིན་ནོ་ཞེས་འབྱུང་བའི་ཕྱིར། དེ་ཆོས་ཅན། འདོད་ཆགས་དང་བྲལ་བར་བྱ་བ་དག་གི་ངོ་བོ་དུས་གཉིས་པར་མི་སྡོད་པས་གཡོ་བ་དང་། ཕྱིས་འབྱུང་བའི་རྐྱེན་རྒྱུ་ལ་མི་ལྟོས་པར་རབ་ཏུ་འཇིག་པའི་རྣམ་པ་དག་ཏུ་དམིགས་པར་བྱ་བ་ཡིན་ཏེ། སྡུག་ཀུན་ལ་འདོད་ཆགས་དང་བྲལ་བར་བྱ་བའི་ཕྱིར་དུ་ཞུགས་པ་ཡིན་ནོ། །ཞེས་འབྱུང་བའི་ཕྱིར། དེ་ཆོས་ཅན། འགོག་པའི་རང་གི་ངོ་བོ་གནོད་པའི་གནས་སུ་གྱུར་པས་འཇིགས་པ་དང་། སྲིན་

---

^{[མ་དཔེ་གཟིགས་ན་འདིར་གནོན།]}

པོ་སོགས་ཀྱིས་གླགས་ཐོད་པས་ནད་འགོ་བ་དང་། ཐོག་འབབ་པ་སོགས་ཀྱི་འཚེ་བའི་རྣམ་པར་དམིགས་པ་ཡིན་ཏེ། སྡུག་ཀུན་འགོག་པའི་ཕྱིར་ཞུགས་པ་ཡིན་ནོ་ཞེས་རྣམ་གྲངས་བསྡུ་བ་ལས་འབྱུང་བའི་ཕྱིར། གཉིས་པ་འགོག་བདེན་གྱི་རྣམ་པ་ནི། ཉོན་མོངས་པའི་སྒྲིབ་པ་སྤངས་པའི་འགོག་པའི་བདེན་པའི་འགོག་པའི་རང་གི་ངོ་བོའི་རྣམ་པ་ནི་ཆོས་ཅན། བདག་མེད་པའི་རྣམ་པ་ཡིན་ཏེ། ཉོན་མོངས་སྤངས་པའི་བྲལ་བ་ཡིན་པའི་ཕྱིར། དེ་ཆོས་ཅན་ཞི་བའི་རྣམ་པ་ཡིན་ཏེ། སྡུག་བསྔལ་ཞི་བའི་བྲལ་བ་ཡིན་པའི་ཕྱིར། གྱ་ནོམ་པའི་རྣམ་པའི་བདག་ཉིད་ནི་ཆོས་ཅན། དབེན་པའི་རྣམ་པ་ཡིན་ཏེ། གཙང་བདེའི་ངོ་བོར་གྱུར་པའི་བྲལ་བ་ཡིན་པའི་ཕྱིར། ངེས་པར་འབྱུང་བའི་མཚན་ཉིད་ཀྱི་བྲལ་བ་ནི་ཆོས་ཅན། སྟོང་པ་ཉིད་ཀྱི་རྣམ་པ་ཡིན་ཏེ། ཇི་ལྟར་ངེས་པར་འབྱུང་བའི་ངོ་བོ་བདེན་པས་སྟོང་པ་བདེན་གྲུབ་དང་བྲལ་བའི་སྤངས་པ་ཡིན་པའི་ཕྱིར། དེ་ཆོས་ཅན། མཚན་མ་མེད་པའ་རྣམ་པ་ཡིན་ཏེ། ཇི་ལྟར་ངེས་པར་འབྱུང་བའི་རྒྱུ་བདེན་པས་སྟོང་པ་བདེན་གྲུབ་དང་བྲལ་བའི་སྤངས་པ་ཡིན་པའི་ཕྱིར། དེ་ཆོས་ཅན། སྨོན་པ་མེད་པའི་རྣམ་པ་ཡིན་ཏེ། ཇི་ལྟར་ངེས་འབྱུང་འབྲས་བུ་བདེན་སྟོང་བདེན་གྲུབ་དང་བྲལ་བའི་སྤངས་པ་ཡིན་པའི་ཕྱིར། དེ་ཆོས་ཅན། མངོན་པར་འདུ་བྱེད་པ་མེད་པའི་རྣམ་པ་ཡིན་ཏེ། གང་ངེས་པར་འབྱུང་བའི་འབད་རྩོལ་གྱིས་མངོན་པར་འདུ་བྱེད་པ་བདེན་གྲུབ་དང་བྲལ་བའི་སྤངས་པ་ཡིན་པའི་ཕྱིར། གསུམ་པ་ལམ་བདེན་གྱི་རྣམ་པ་ནི། ལམ་གྱི་བདེན་པའི་རྣམ་པ་བདག་མེད་མངོན་སུམ་དུ་རྟོགས་པའི་ཤེས་རབ་ཆོས་ཅན། ལམ་གྱི་རྣམ་པ་ཡིན་ཏེ། མྱང་འདས་སུ་དངོས་སུ་བགྲོད་པའི་ལམ་ཡིན་པའི་ཕྱིར། དེ་ཆོས་ཅན། རིག་པའི་རྣམ་པ་ཡིན་ཏེ། ཉོན་མོངས་ཀྱི་ས་བོན་གྱི་དངོས་གཉེན་གྱི་རིགས་སུ་གནས་པའི་ལམ་ཡིན་པའི་ཕྱིར། དེ་ཆོས་ཅན། སྒྲུབ་པའི་རྣམ་པ་ཡིན་ཏེ། སེམས་
ཀྱི་གནས་ལུགས་མངོན་སུམ་དུ་རྟོགས་པའི་ལམ་ཡིན་པའི་ཕྱིར། དེ་ཆོས་ཅན། ངེས་པར་འབྱིན་པའི་རྣམ་པ་ཡིན་ཏེ། སྡུག་བསྔལ་གཏན་ཟད་དུ་བྱེད་པའི་ལམ་ཡིན་པའི་ཕྱིར། གཉིས་པ་དེ་ཇི་ལྟར་ཤེས་པའི་ཚུལ་ནི། སྔར་བཤད་པའི་ལམ་དེ་རྣམས་ཆོས་ཅན། ཁྱོད་ཉན་ཐོས་རྣམས་ཀྱི་ལམ་ཡིན་པར་བྱང་ཆུབ་སེམས་དཔས་དེ་ལྟར་ཡོངས་སུ་ཤེས་པར་བྱ་བ་ཡིན་ཏེ། སེམས་བསྐྱེད་དང་དགེ་རྩ་རྫོགས་བྱང་དུ་བསྔོ་བའི་བསྔོ་བ་དང་། བདེན་གྲུབ་ཀྱི་ངོ་བོ་ཉིད་མི་དམིགས་པར་རྟོགས་པའི་ཤེས་རབ་ཀྱིས་ཟིན་པའི་སྒོ་ནས་ཤེས་པར་བྱ་བ་ཡིན་པའི་ཕྱིར། ཤེས་ཚུལ་ཡོད་དེ། རྣམ་མཁྱེན་གྱི་རྒྱུ་ཚོགས་སྟོན་པ་ལམ་ཤེས་པ་ཉིད་ཀྱི་སྐབས་སུ་ཡིན་པའི་ཕྱིར། །སྨྲས་པ། དུཿཁའི་རྦ་ཀློང་འཁྲུགས་པའི་འཁོར་བའི་མཚོར། །ལྟུང་བྱེད་འདོད་པའི་མི་མཐུན་རླུང་ཤུགས་ཀྱིས། །སྐྱོད་མིན་ལམ་གྱི་ཐབས་མཁས་བྱེད་པོ་ཡིས། །མྱང་འདས་བདེ་བའི་རིན་ཆེན་གླིང་དུ་འཁྲིད། །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་བཤད་པ།

---

^{[མ་དཔེ་གཟིགས་ན་འདིར་གནོན།]}

ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་བཤད་པ། གཉིས་པ་ངེས་འབྱེད་ཆ་མཐུན་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་ཡོད་དེ། བདེན་པ་བཞིའི་རྣམ་པ་མི་རྟག་སོགས་བཅུ་དྲུག་མངོན་སུམ་དུ་གསར་དུ་རྟོགས་པའི་ལམ་ཤེས་རྒྱུད་ལ་སྐྱེ་བ་སྟེ་ཡོངས་སུ་ཤེས་པ་ནི། དེའི་རྒྱུ་ངེས་པར་འབྱེད་པའི་ཆ་དང་མཐུན་པ་རྟོགས་པ་སྟེ་ཐོབ་པ་སྔོན་དུ་འགྲོ་དགོས་པ་ཅན་ཡིན་པས། ཉན་ཐོས་ཀྱི་ལམ་ཤེས་པའི་ལམ་ཤེས་བརྗོད་ནས། དེ་ནས་ངེས་པར་འབྱེད་པའི་ཆ་དང་མཐུན་པ་འཆད་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ལ་དངོས་བསྟན་ནི། ཤེས་བྱ་ཆོས་ཅན། འཕགས་པ་ཉན་ཐོས་ཀྱིས་ལམ་མངོན་སུམ་དུ་ཤེས་པའི་ལམ་ཤེས་རྒྱུད་ལ་སྐྱེ་བ་ལ་ནི། དེའི་རྒྱུ་ངེས་འབྱེད་ཆ་མཐུན་

---

^{[མ་དཔེ་གཟིགས་ན་འདིར་གནོན།]}

སྔོན་དུ་འགྲོ་དགོས་ཏེ། མི་རྟག་སོགས་བཅུ་དྲུག་དོན་སྤྱིའི་ཚུལ་གྱིས་རྟོགས་པའི་ལམ་དེ་ཉིད་སྟོང་ཉིད་དོན་སྤྱིའི་ཚུལ་གྱིས་རྟོགས་པའི་བསྒོམས་བྱུང་གི་ཤེས་རབ་ཀྱིས་དང་པོར་ཟིན་པའི་ཐེག་ཆེན་གྱི་སྦྱོར་ལམ་དེ་དྲོད་དང་། དེ་ནས་རིམ་གྱིས་རྩེ་མོ། བཟོད་པ། ཆོས་མཆོག་རྣམས་སྔོན་དུ་འགྲོ་དགོས་པའི་ཕྱིར། ཤུགས་བསྟན་གྱི་དྲོད་ནི། འཕགས་པ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་དུ་གྱུར་པའི་དྲོད་ཀྱི་དམིགས་པ་ཡོད་དེ། གཟུགས་སོགས་ཀྱི་ཆོས་རྣམས་རང་རྐྱ་ཐུབ་པའི་རྫས་ཡོད་ཀྱིས་སྟོང་པ་ཉིད་རྣམས་ངོ་བོ་དབྱེར་མེད་པ་དེའི་དམིགས་པ་ཡིན་པའི་ཕྱིར། དེར་ཐལ། གཟུགས་ལ་སོགས་པ་རང་རྐྱ་ཐུབ་པའི་རྫས་ཡོད་ཀྱིས་སྟོང་པའི་ཕྱིར། རྩེ་མོ་ནི། དེའི་རྒྱུ་ངེས་འབྱེད་ཆ་མཐུན་དུ་གྱུར་པའི་རྩེ་མོའི་དམིགས་པ་ཡོད་དེ། གཟུགས་སོགས་དེ་དག་རང་རྐྱ་ཐུབ་པའི་རྫས་ཡོད་དུ་མི་དམིགས་པ་དེ། དེའི་དམིགས་པ་དག་ཏུ་འདོད་པ་ཡིན་པའི་ཕྱིར། བཟོད་པ་ནི། དེའི་རྒྱུ་ངེས་འབྱེད་ཆ་མཐུན་དུ་གྱུར་པའི་བཟོད་པའི་དམིགས་པ་ཡོད་དེ། དམིགས་ཡུལ་དུ་མ་ཡོད་པ་དེ་ལས། རྟག་པ་དང་ལ་སོགས་པ་མི་རྟག་པ་རང་རྐྱ་ཐུབ་པའི་རྫས་ཡོད་དུ་གྲུབ་པའི་ཚུལ་གྱིས་གནས་པ་བཀག་པ་དེའི་དམིགས་པ་ཡིན་པའི་ཕྱིར། ཆོས་མཆོག་ནི། དེར་གྱུར་པའི་ཆོས་ཀྱི་མཆོག་གི་དམིགས་པ་བཤད་དུ་ཡོད་དེ། ས་བཅུ་དག་ལས་བརྩམས་ནས་ནི་ལམ་དེ་དག་རང་རྐྱ་ཐུབ་པའི་རྫས་ཡོད་དུ་མི་གནས་པ་དེའི་དམིགས་པ་མདོ་ལས་རྒྱས་པར་བསྟན་པའི་ཕྱིར། འོ་ན། ལམ་དེ་དག་ཅིའི་ཕྱིར་གནས་བྱར་མི་བདེན་ཞེ་ན། དེའི་རྒྱུ་མཚན་ཡོད་དེ། སངས་རྒྱས་ཀྱིས་མངོན་སུམ་དུ་མཁྱེན་ནས་ཆོས་རྣམས་གནས་བྱར་བདེན་པར་གྲུབ་པ་ཡོད་ན་གཟིགས་དགོས་པ་ལ་མ་གཟིགས་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ།

---

^{[མ་དཔེ་གཟིགས་ན་འདིར་གནོན།]}

ཁ་ཅིག །བྱང་སེམས་སྦྱོར་ལམ་པའི་རྒྱུད་ཀྱི་སྟོང་ཉིད་དོན་སྤྱིའི་ཚུལ་གྱིས་རྟོགས་པའི་བློ་དེ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་ཡིན་ཟེར་ན། དེ་ཆོས་ཅན། ཁྱོད་ཉན་ཐོས་ཀྱི་རྟོགས་རིགས་སུ་གནས་པར་ཐལ། འདོད་པའི་ཕྱིར། འདོད་མི་ནུས་ཏེ། ཁྱོད་ཐེག་ཆེན་གྱི་རྟོགས་རིགས་སུ་གནས་པའི་ཕྱིར། བྱས་པ་ལ་ཁོ་ན་རེ། དེ་ཆོས་ཅན། ཁྱོད་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་ཡིན་པར་ཐལ། ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་གང་ཞིག །ཁྱོད་ངེས་འབྱེད་ཆ་མཐུན་ཡིན་པའི་ཕྱིར། ཟེར་ན་མ་ཁྱབ། རྣམ་མཁྱེན་ཆོས་ཅན། ཁྱོད་ལམ་ཤེར་ཕྱིན་ཡིན་པར་ཐལ། ལམ་གང་ཞིག །ཤེར་ཕྱིན་ཡིན་པའི་ཕྱིར། ཁྱབ་པ་ཁས། གཞན་ཡང་། དེ་ཆོས་ཅན། རྒྱུ་ལམ་ཤེས་ཡིན་པར་ཐལ། རྒྱུ་གང་ཞིག །ལམ་ཤེས་ཡིན་པའི་ཕྱིར། ཁོ་ན་རེ། དེ་ཆོས་ཅན། ཁྱོད་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་ཡིན་པར་ཐལ། ཁྱོད་འཕགས་པ་ཉན་ཐོས་ལམ་ལ་ནི། །ཞེས་པའི་གཞུང་གི་སྐབས་ནས་དངོས་སུ་བསྟན་པའི་ཐེག་ཆེན་གྱི་ངེས་འབྱེད་ཆ་མཐུན་ཡིན་པའི་ཕྱིར་ན་མ་ཁྱབ་སྟེ། གཞུང་འདིས་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་དངོས་སུ་མ་བསྟན་པར་དོན་གྱིས་འཕངས་པའི་ཕྱིར། དེར་ཐལ། རྣམ་བཤད་ལས། འདིར་དངོས་སུ་བསྟན་པ་ནི་སྟོང་ཉིད་རྟོགས་པའི་སྦྱོར་ལམ་ཡིན་ལ། ཉན་ཐོས་ཀྱི་ལམ་ཤེས་པའི་རྒྱུ་ངེས་འབྱེད་ནི་གཞུང་འདིར་དོན་གྱིས་འཕངས་པ་རྣམ་པ་བཅུ་དྲུག་ལ་དམིགས་པའི་འཇིག་རྟེན་པའི་སྒོམ་བྱུང་ཡིན་ནོ། །ཞེས་གསུངས་པའི་ཕྱིར། ཁ་ཅིག །ཉན་ཐོས་ཀྱི་རྟོགས་རིགས་སུ་གནས་པའི་ཐེག་ཆེན་གྱི་དོན་མངོན་རྟོགས་དེ་ཉན་ཐོས་ཀྱི་ལམ་ཤེས་པའི་ལམ་

---

^{[མ་དཔེ་གཟིགས་ན་འདིར་གནོན།]}

ཤེས་ཀྱི་རྒྱུ་ངེས་འབྱེད་ཆ་མཐུན་གྱི་མཚན་ཉིད་ཟེར་ན། གང་ཟག་གི་བདག་འཛིན་སྤངས་པའི་སྤངས་པ་དོན་གཉེར་གྱི་ཐེག་ཆེན་གྱི་སྦྱོར་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། དེ་ཆོས་ཅན། ཉན་ཐོས་ཀྱི་ཤེས་རབ་ཀྱི་རྟོགས་རིགས་སུ་གནས་པར་ཐལ། འདོད་པའི་ཕྱིར། འདོད་ན། མི་གནས་པར་ཐལ། དེའི་ཐབས་ཀྱི་རྟོགས་རིགས་སུ་གནས་པའི་ཕྱིར། གཉིས་པ་རང་ལུགས་ནི། ཉན་ཐོས་ཀྱི་ཤེས་རབ་ཀྱི་རྟོགས་རིགས་སུ་གནས་པའི་ཐེག་ཆེན་གྱི་དོན་མངོན་རྟོགས་དེ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་གྱི་མཚན་ཉིད། གསུམ་པ་རྩོད་པ་སྤོང་བ་ལ། ཁོ་ན་རེ། བྱང་སེམས་སྦྱོར་ལམ་པའི་རྒྱུད་ཀྱི་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་སྒོམ་པའི་བློ་ཆོས་ཅན། ཉན་ཐོས་ཀྱི་ཤེས་རབ་ཀྱི་རྟོགས་རིགས་སུ་མི་གནས་པར་ཐལ། དེའི་ཐབས་ཀྱི་རྟོགས་རིགས་སུ་གནས་པའི་ཕྱིར། ཁྱབ་པ་ཁས། འདོད་ན། དེ་དེའི་རྟོགས་རིགས་སུ་གནས་པར་ཐལ། དེའི་རྒྱུད་ཀྱི་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་རྟོགས་པའི་བློ་དེ་ཉན་ཐོས་ཀྱི་ཤེས་རབ་ཀྱི་རྟོགས་རིགས་སུ་གནས་པའི་ཕྱིར། དེར་ཐལ། དེའི་རྒྱུད་ཀྱི་སྡུག་བསྔལ་བདེན་པ་རྟོགས་པའི་བློ་དེ་དེའི་རྟོགས་རིགས་སུ་གནས་པའི་ཕྱིར། དེར་ཐལ། དེའི་རྒྱུད་ཀྱི་མི་རྟག་སོགས་བཅུ་དྲུག་རྟོགས་པའི་བློ་དེ་དེའི་ཤེས་རབ་ཀྱི་རྟོགས་རིགས་སུ་གནས་པའི་ཕྱིར་ན། འོ་ན། བྱང་སེམས་སྦྱོར་ལམ་པའི་རྒྱུད་ཀྱི་ཐར་པ་དོན་གཉེར་གྱི་བློ་དེ་ཉན་ཐོས་ཀྱི་ཐབས་ཤེས་གཉིས་སུ་ཕྱེ་བའི་ཤེས་རབ་ཀྱི་རྟོགས་རིགས་སུ་གནས་པར་ཐལ། དེའི་རྒྱུད་ཀྱི་འཁོར་བ་སྡུག་བསྔལ་གྱི་རང་བཞིན་དུ་རྟོགས་པའི་བློ་དེ་དེར་གནས་པའི་ཕྱིར། དེར་ཐལ། དེའི་རྒྱུད་ཀྱི་སྡུག་བསྔལ་བདེན་པ་རྟོགས་པའི་བློ་ལ་དེའི་ཕྱིར། དེར་ཐལ། དེའི་རྒྱུད་ཀྱི་མི་རྟག་སོགས་བཅུ་དྲུག་རྟོགས་པའི་བློ་ལ་དེའི་ཕྱིར། གསུམ་པ་འགྲེལ་པ་ལ། དྲོད་ནི། སྟོང་ཉིད་རྟོགས་པའི་ཐེག་ཆེན་གྱི་སྦྱོར་ལམ་དྲོད་མཉམ་

---

^{[མ་དཔེ་གཟིགས་ན་འདིར་གནོན།]}

གཞག་ཡེ་ཤེས་ཆོས་ཅན། ཁྱོད་ཀྱིས་གཟུགས་ལ་སོགས་པའི་ཕུང་པོ་དང་། དེའི་སྟོང་པ་ཉིད་རྣམས་དོན་དམ་པར་ཕན་ཚུན་ཐ་དད་པ་མེད་པར་རྟོགས་པ་ཡིན་ཏེ། ཁྱོད་ཀྱིས་གཟུགས་སོགས་དོན་དམ་པར་རང་རང་གི་ངོ་བོ་ཉིད་ཀྱིས་གྲུབ་པས་སྟོང་པར་རྟོགས་པའི་ཕྱིར། རྩེ་མོ་ནི། སྟོང་ཉིད་རྟོགས་པའི་ཐེག་ཆེན་གྱི་སྦྱོར་ལམ་རྩེ་མོ་མཉམ་གཞག་ཡེ་ཤེས་ཆོས་ཅན། ཁྱོད་ཀྱིས་གཟུགས་ལ་སོགས་པ་དོན་དམ་པར་མེད་པར་རྟོགས་པ་ཡིན་ཏེ། ཁྱོད་ཀྱིས་སྔ་མ་དྲོད་ལ་བཤད་པ་བཞིན་དུ་བདེན་པར་ཡོད་ན་དམིགས་སུ་རུང་བ་ལ། ཁྱོད་ཀྱིས་གཟུགས་སོགས་བདེན་པར་མི་དམིགས་པར་རྟོགས་པའི་ཕྱིར། བཟོད་པ་ནི། ཐེག་ཆེན་གྱི་སྦྱོར་ལམ་བཟོད་པ་མཉམ་གཞག་ཡེ་ཤེས་ཆོས་ཅན། ཁྱོད་སྔར་བཤད་པ་དེ་བཞིན་དུ་གཟུགས་ལ་སོགས་པ་ལ་དོན་དམ་པར་དམིགས་པའི་ཚུལ་གྱིས་གནས་པར་བྱ་བ་བཀག་པ་སྟེ་གནས་བྱར་མེད་པར་རྟོགས་པ་ཡིན་ཏེ། ཁྱོད་ཀྱིས་གཟུགས་སོགས་དོན་དམ་པར་སྒྲུབ་པའི་ཚུལ་གྱིས་རྟག་པ་ཡང་མ་ཡིན་མི་རྟག་པ་ཡང་མ་ཡིན་པར་རྟོགས་པའི་ཕྱིར། ཆོས་མཆོག་ནི། ཤེས་བྱ་ཆོས་ཅན། སྟོང་ཉིད་རྟོགས་པའི་ཐེག་ཆེན་གྱི་སྦྱོར་ལམ་མཉམ་གཞག་ཡེ་ཤེས་དེས། ས་དང་པོ་རབ་ཏུ་དགའ་བ་ལ་སོགས་པ་ལ་གནས་བྱར་བདེན་མེད་དུ་རྟོགས་པ་ཡིན་ཏེ། རྒྱུ་མཚན་གང་གི་ཕྱིར་ན་བདེན་པར་ཡོད་ན་དེ་བཞིན་གཤེགས་པས་བདེན་པར་གཟིགས་དགོས་པ་ལ། དེ་བཞིན་གཤེགས་པས་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་ས་དང་པོ་ལ་སོགས་པའི་ཆོས་རྣམས་དོན་དམ་པར་གནས་བྱར་མ་གཟིགས་པའི་ཕྱིར། ཞེས་བྱ་བ་ཚད་མའི་སྐྱེས་བུས་མ་དམིགས་པའི་གཏན་ཚིགས་ཀྱི་འཐད་པས་དོན་དམ་པར་མི་གནས་པར་རྒྱས་པར་མདོ་ལས་ཇི་སྐད་དུ་བསྟན་པ་ཞེས་བྱ་བའི་རྣམ་པ་དེ་རྣམས་ཀྱིས་གོ་རིམ་བཞིན་དུ་བདེན་པའི་དམིགས་པ་ལ་དམིགས་ནས་བསྒོམས་པས་ངེས་པར་འབྱེད་པའི་ཆ་དང་མཐུན་པ་བཞི་
སྐྱེའོ་ཞེས་བྱ་བ་ཡིན་ནོ་སྟེ་ཡིན་པའི་ཕྱིར།

རང་རྒྱལ་གྱི་ལམ་ཤེས་པའི་ལམ་ཤེས་བཤད་པ།

---

^{[མ་དཔེ་གཟིགས་ན་འདིར་གནོན།]}

རང་རྒྱལ་གྱི་ལམ་ཤེས་པའི་ལམ་ཤེས་བཤད་པ། གཉིས་པ་རང་རྒྱལ་གྱི་ལམ་ཤེས་པའི་རང་བཞིན་ལ། སྤྱི་དོན་དང་། ཡན་ལག་གི་དོན་གཉིས། གཉིས་པ་ལ། རྟེན་གྱི་ཁྱད་པར། དེའི་ལམ་ཇི་ལྟར་ཤེས་པའི་ཚུལ། དེའི་རྒྱུ་ངེས་འབྱེད་ཆ་མཐུན་བཤད་པའོ། །དང་པོ་ལ། ཁྱད་ཆོས་དངོས་དང་། རྩོད་པ་སྤོང་བའོ། །དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། ལུས་དང་བསྟུན་ན་ཉན་ཐོས་ཀྱི་ལམ་ཤེས་པའི་ལམ་ཤེས་བཤད་པའི་དེ་མ་ཐག་པའི་མཇུག་ཐོགས་སུ་རང་སངས་རྒྱས་ཀྱི་ལམ་བརྗོད་པར་རིགས་མོད་ཀྱི་སྟེ་རིགས་ན་ཡང་། ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་འཆད་པའི་རྒྱུ་མཚན་ཡོད་དེ། རེ་ཞིག་རང་རྒྱལ་གྱི་ལམ་ཉན་ཐོས་ལས་ཁྱད་ཞུགས་པ་ཉིད་དུ་བསྒྲུབ་པའི་ཆེད་ཡིན་པའི་ཕྱིར། དེ་གཉིས་ཁྱད་པར་མེད་ན་ཉན་ཐོས་ཀྱི་ལམ་ལོགས་སུ་འཆད་མི་རིགས་ལ། ཡོད་ན་ཉན་ཐོས་རྣམས་ལས་ལམ་དེ་དག་ཇི་ལྟར་ཁྱད་པར་དུ་འཕགས་ན། རྒྱུ་མཚན་གང་གིས་ན་དེ་དག་གིས་ལམ་གཞན་ཡིན་སྙམ་པའི་དོགས་པ་བསུ་བར་བྱ་བའི་ཕྱིར་དུ་ཡིན་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། རང་བྱུང་སྟེ་རང་རྒྱལ་དགྲ་བཅོམ་པ་ཆོས་ཅན། ཁྱོད་སྲིད་པ་ཐ་མའི་ཚེ་སློབ་དཔོན་གཞན་གྱིས་གདམས་ངག་བསྟན་པ་ལ་ལྟོས་མི་དགོས་ཏེ། དེའི་ཚེ་གཞན་ལ་མི་ལྟོས་པར་བདག་ཉིད་ཀྱིས་བྱང་ཆུབ་རྟོགས་པའི་ཕྱིར། ཡང་སྒྲ་སྨོས་པ་ལ་ཆོས་ཅན། དགོས་པ་ཡོད་དེ། དེའི་ཚེ་རང་གིས་གཞན་ལ་ངག་གི་སྒོ་ནས་ཆོས་མི་སྟོན་པར་ཤེས་པའི་ཆེད་ཡིན་པའི་ཕྱིར། བསེ་རུ་ལྟ་བུའི་ཡེ་ཤེས་ནི་ཆོས་ཅན། ཉན་ཐོས་ལས་རྟོགས་པ་ཟབ་པ་ཉིད་དུ་མངོན་པར་བརྗོད་དེ། ཉན་ཐོས་ལྟར་ཆོས་སྟོན་པའི་ངག་གི་འབྲས་རྟགས་ལས་རྟོགས་མི་ནུས་ཤིང་། ལུས་ཀྱིས་ཆོས་

---

^{[མ་དཔེ་གཟིགས་ན་འདིར་གནོན།]}

བསྟན་པའི་དབང་གིས་རྟོགས་པ་ཟབ་མོ་དང་ལྡན་པའི་ཕྱིར། གཉིས་པ་མཐའ་དཔྱད་པ་ལ། ཁ་ཅིག །རང་བྱུང་བདག་ཉིད་རྟོགས་པའི་ཕྱིར། །ཞེས་པའི་ཤླཽ་ཀ་གཅིག་པུ་འདི། རང་རྒྱལ་གྱི་ལམ་ཤེས་པའི་ལམ་ཤེས་འཆད་བྱེད་ཀྱི་གཞུང་ཡིན་ཟེར་ན། མི་འཐད་པར་ཐལ། འདི་རང་རྒྱལ་རང་རྒྱུད་ཀྱིས་བསྡུས་པའི་ལམ་ཉན་ཐོས་ཀྱི་ལམ་ལས་ཁྱད་པར་འཕགས་པ་འཆད་བྱེད་ཀྱི་གཞུང་ཡིན་པའི་ཕྱིར། ཁ་ཅིག །ཉན་ཐོས་དགྲ་བཅོམ་རང་རྒྱལ་ལམ་དུ་འཇུག་པ་ཡོད་ཟེར་ན། ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་རང་རྒྱལ་ཚོགས་ལམ་པ་ཆོས་ཅན། སྲིད་པ་ཐ་མའི་ཚེ་སློབ་དཔོན་གཞན་གྱི་གདམས་ངག་ལ་ལྟོས་མེད་དུ་བྱང་ཆུབ་མངོན་དུ་བྱེད་པའི་གང་ཟག་ཡིན་པར་ཐལ། ཁྱོད་རང་རྒྱལ་གྱི་བྱང་ཆུབ་མངོན་དུ་བྱེད་ངེས་ཀྱི་གང་ཟག་ཡིན་པའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། ཉན་ཐོས་དགྲ་བཅོམ་པ་རང་རྒྱལ་ལམ་དུ་འཇུག་པ་ཡོད་པའི་ཕྱིར། འདོད་ན། མ་ཡིན་པར་ཐལ། སྲིད་པ་ཐ་མའི་ཚེ་སློབ་དཔོན་གཞན་གྱི་གདམས་ངག་ལ་ལྟོས་ནས་བྱང་ཆུབ་མངོན་དུ་བྱས་པའི་གང་ཟག་ཡིན་པའི་ཕྱིར། དེར་ཐལ། དེའི་ཚེ་གཞན་གྱི་གདམས་ངག་ལ་ལྟོས་ནས་ཉན་ཐོས་དགྲ་བཅོམ་གྱི་འབྲས་བུ་མངོན་དུ་བྱས་པའི་གང་ཟག་ཡིན་པའི་ཕྱིར་ཏེ། དེ་ཡོད་པའི་ཕྱིར། གཞན་ཡང་། དེ་ཆོས་ཅན། ཁྱོད་ཀྱི་རྒྱུད་ལ་ཐེག་དམན་གྱི་རིགས་ཡོད་པར་ཐལ། ཁྱོད་རང་རྒྱལ་ཚོགས་ལམ་པ་ཡིན་པའི་ཕྱིར། འདོད་མི་ནུས་ཏེ། ཁྱོད་ཐེག་དམན་དགྲ་བཅོམ་ཡིན་པའི་ཕྱིར། ཁ་ཅིག །རྒྱུན་ཞུགས་ཀྱི་རྟོགས་པ་སྔོན་སོང་གི་རང་རྒྱལ་ཚོགས་ལམ་པ་ཆོས་ཅན། ཐེག་དམན་སོ་སྐྱེ་ཡིན་པར་ཐལ། རང་རྒྱལ་སོ་སྐྱེ་ཡིན་པའི་ཕྱིར་ན་མ་ཁྱབ། དེ་ཆོས་ཅན། ཐེག་དམན་འཕགས་པ་ཡིན་པར་ཐལ། ཐེག་དམན་དགྲ་བཅོམ་ཡིན་པའི་ཕྱིར། འདོད་ན། དེ་ཆོས་ཅན། ཐེག་དམན་སོ་སྐྱེ་དང་ཐེག་དམན་འཕགས་པ་གཉིས་ཀ་མ་ཡིན་པར་

---

^{[མ་དཔེ་གཟིགས་ན་འདིར་གནོན།]}

ཐལ། གང་ཟག་གི་བདག་མེད་ཡིན་པའི་ཕྱིར། ཁ་ཅིག །རང་རྒྱལ་ཡིན་ན་དགེ་སློང་ཡིན་པས་ཁྱབ་ཟེར་ན། བར་དོའི་རྟེན་ཅན་གྱི་རང་རྒྱལ་ཆོས་ཅན། དེར་ཐལ། དེའི་ཕྱིར། འདོད་ན། མིའི་རྟེན་ཅན་ཡིན་པར་ཐལ་། འདོད་པའི་ཕྱིར། ཁ་ཅིག །དགེ་སློང་དུ་གྱུར་པའི་རང་རྒྱལ་ཡིན་ན་རང་རྒྱལ་དགྲ་བཅོམ་ཡིན་པས་ཁྱབ་ཟེར་ན། མི་འཐད་པར་ཐལ། དགེ་སློང་གི་རྟེན་ལ་ཡན་ལག་བཅུ་གཉིས་བསྒོམས་པས། རང་རྒྱལ་དགྲ་བཅོམ་གྱི་འབྲས་བུ་ཐོབ་པར་བྱེད་པ་ཡོད་པར་ཚད་ལྡན་གྱི་གཞུང་ལས་གསུངས་པའི་ཕྱིར། ཁ་ཅིག །རང་རྒྱལ་སྒོམ་ལམ་པ་ཆོས་ཅན། ཉན་ཐོས་ལས་ལམ་བགྲོད་ཚུལ་གྱི་སྒོ་ནས་ཁྱད་པར་འཕགས་ཏེ། ཁྱོད་ཀྱིས་སྲིད་པ་ཐ་མའི་ཚེ་སློབ་དཔོན་གཞན་གྱིས་ཆོས་བསྟན་པ་ལ་མི་ལྟོས་པར་རང་གིས་བྱང་ཆུབ་མངོན་དུ་བྱེད་ནུས་པའི་ཕྱིར། ཟེར་ན། གཟུགས་མེད་ཉེར་འགྲོའི་ཕྱིར་མི་འོང་ཆོས་ཅན། དེར་ཐལ། དེའི་ཕྱིར། དང་པོ་དེར་ཐལ། ལྟོས་ནས་བྱེད་པ་དང་མི་ལྟོས་པར་བྱེད་པ་གང་རུང་གང་ཞིག །ལྟོས་ནས་བྱེད་པ་མ་ཡིན་པའི་ཕྱིར། ཕྱི་མ་མ་གྲུབ་ན། གཟུགས་མེད་ཁམས་ན་སྒྲ་ཡོད་པར་ཐལ། མ་གྲུབ་པ་དེའི་ཕྱིར། འདོད་ན། གཟུགས་མེད་ཁམས་ན་གཟུགས་ཡོད་པར་ཐལ། འདོད་པའི་ཕྱིར། འདོད་མི་ནུས། ཁ་ཅིག །རང་རྒྱལ་སྒོམ་ལམ་པ་ཆོས་ཅན། ཉན་ཐོས་ལས་ལམ་བགྲོད་ཚུལ་གྱི་སྒོ་ནས་ཁྱད་པར་དུ་འཕགས་ཏེ། སྲིད་པ་ཐ་མའི་ཚེ་སློབ་དཔོན་གཞན་གྱིས་གདམས་ངག་བསྟན་པ་ལ་མི་ལྟོས་པར་རང་རྒྱལ་གྱི་བྱང་ཆུབ་མངོན་དུ་བྱེད་པའི་གང་ཟག་ཡིན་པའི་ཕྱིར། ཟེར་ན། རང་རྒྱལ་དགྲ་བཅོམ་གྱིས་གོ་འཕང་མངོན་དུ་བྱེད་པའི་སྤང་བྱ་ཅིག་ཅར་བའི་རྒྱུན་ཞུགས་ཆོས་ཅན། དེར་ཐལ། དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། རྩ་བར་འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །ཚེ་ཕྱི་མ་དེ་ཉིད་ལ་རང་རྒྱལ་དགྲ་བཅོམ་གྱི་འབྲས་བུ་མངོན་དུ་བྱེད་པའི་རང་རྒྱལ་ཚོགས་

---

^{[མ་དཔེ་གཟིགས་ན་འདིར་གནོན།]}

ལམ་པ་ཡོད་ཟེར་ན། མི་འཐད་པར་ཐལ། དེ་འདྲའི་ཚོགས་སྤྱོད་ཀྱི་རང་རྒྱལ་ཚོགས་ལམ་པ་མེད་པའི་ཕྱིར། དེར་ཐལ། བསེ་རུ་ལྟ་བུའི་རང་རྒྱལ་ཚོགས་ལམ་པ་རང་རྒྱལ་དགྲ་བཅོམ་གྱི་གོ་འཕང་འཐོབ་པ་ལ་བསྐལ་ཆེན་བརྒྱར་ཚོགས་གསོག་དགོས་པར་གསུངས་པའི་ཕྱིར། ཁ་ཅིག །རང་རྒྱལ་དགྲ་བཅོམ་པ་ཆོས་ཅན། ཁྱོད་ཉན་ཐོས་ལས་ཆོས་སྟོན་ཚུལ་གྱི་སྒོ་ནས་ཁྱད་པར་དུ་འཕགས་ཏེ། སྤྲུལ་སྒྱུར་སྣ་ཚོགས་བསྟན་པའི་སྒོ་ནས་གཞན་རྒྱུད་ལ་རྟོགས་པ་ཁྱད་པར་ཅན་སྐྱེད་པར་བྱེད་པའི་ཕྱིར་ཟེར་ན། རྫུ་འཕྲུལ་སྣ་ཚོགས་བསྟན་པའི་སྒོ་ནས་གཞན་རྒྱུད་ལ་དད་པ་ཁྱད་པར་ཅན་སྐྱེད་པའི་ཉན་ཐོས་དགྲ་བཅོམ་པ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། རྫུ་འཕྲུལ་སྣ་ཚོགས་སྟོན་པའི་ཉན་ཐོས་དགྲ་བཅོམ་ཡོད་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །རང་རྒྱལ་དགྲ་བཅོམ་པས་ངག་གི་སྒོ་ནས་ཆོས་སྟོན་པ་མེད་ཟེར་ན། མི་འཐད་པར་ཐལ། རང་རྒྱལ་དགྲ་བཅོམ་པས་ཆོས་དང་དོན་དང་ལྡན་པའི་གཏམ་སྨྲ་བ་ཡོད་པའི་ཕྱིར་ཏེ། དེ་ལྟར་ཡོད་པར་འདུལ་བ་ལུང་ལས་གསུངས་པའི་ཕྱིར། ཁ་ཅིག །རང་རྒྱལ་ཡིན་ན་ཟླ་མེད་གཅིག་པུར་གནས་པས་ཁྱབ་ཟེར་ན། ཚོགས་སྤྱོད་ཀྱི་རང་རྒྱལ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། རྩ་བར་འདོད་མི་ནུས་སོ། །གསུམ་པ་འགྲེལ་པ་ལ། ལམ་བགྲོད་པའི་ཁྱད་པར། ཆོས་སྟོན་པའི་ཁྱད་པར་རོ། །དང་པོ་ནི། ཤེས་བྱ་ཆོས་ཅན། རང་སངས་རྒྱས་དེ་དག་ལ་སྲིད་པ་ཐ་མའི་ཚེ་སངས་རྒྱས་ལ་སོགས་པ་གཞན་གྱིས་བྱང་ཆུབ་བསྟན་མི་དགོས་ཏེ། དེའི་ཚེ་གཞན་གྱིས་བསྟན་པ་ལ་མི་ལྟོས་པར་བདག་ཉིད་ཀྱིས་རང་གི་བྱང་ཆུབ་མངོན་པར་རྟོགས་པར་འགྱུར་བ་སྟེ་འཐོབ་པ་ཡིན་པའི་ཕྱིར། དེར་ཐལ། རང་སངས་རྒྱས་རྣམས་ནི་སྔོན་གྱི་ཐོས་པ་དང་སྨོན་ལམ་

---

^{[མ་དཔེ་གཟིགས་ན་འདིར་གནོན།]}

ལ་སོགས་པ་ལམ་མངོན་པར་འདུས་བྱས་པའི་རྒྱུས་དེ་ལྟར་འགྱུར་བའི་ཕྱིར། ཞེས་བྱ་བ་ནི་ཉན་ཐོས་ལས་ཁྱད་ཞུགས་པ་ཉིད་དུ་སྒྲུབ་པའི་གཅིག་སྟེ་སྒྲུབ་བྱེད་དང་པོ་ཡིན་ཏེ། ལུང་ལས། ཉན་ཐོས་རྣམས་ནི་སྲིད་པ་ཐ་མའི་ཚེ་གཞན་གྱིས་བསྟན་པ་ལ་ལྟོས་ནས་རང་གི་བྱང་ཆུབ་རྟོགས་པར་འགྱུར་ལ། གདུལ་བྱ་གཞན་དག་ཀྱང་བརྗོད་པ་དང་བཅས་པའི་ཆོས་བསྟན་པས་དགེ་བ་ལ་འཇུག་པར་བྱེད་དོ། །ཞེས་འབྱུང་བ་ལྟར་གནས་པའི་ཕྱིར། གཉིས་པ་ནི། ཤེས་བྱ་ཆོས་ཅན། ངག་གི་འབྲས་རྟགས་ལས་རང་རྒྱལ་དེ་དག་གི་ཡེ་ཤེས་མི་རྟོགས་པ་ཉིད་ནི། ཉན་ཐོས་ལས་ཆོས་སྟོན་ཚུལ་གྱི་སྒོ་ནས་ཁྱད་ཞུགས་པ་གཉིས་པ་ཡིན་ཏེ། རང་རྒྱལ་དེ་དག་གིས་ནི་རང་གིས་ཐོབ་པའི་ཡེ་ཤེས་ཀྱི་མཐུ་དང་སྨོན་ལམ་ལ་སོགས་པའི་མཐུས་སྒྲ་མེད་པའི་ཆོས་བསྟན་པས། གཞན་དག་དགེ་བ་བཅུ་དང་བདག་མེད་རྟོགས་པ་ལ་སོགས་པ་ལ་འཇུག་པར་བྱེད་པ་དེའི་ཕྱིར། ཁྱབ་སྟེ། ཉན་ཐོས་རྣམས་ནི་སྒྲར་བརྗོད་པའི་ཆོས་བསྟན་པའི་སྒོ་ནས་ཉན་པ་པོ་རྣམས་ཀྱིས་འཆད་པ་པོའི་ཤེས་པའི་རྩལ་བློའི་ནུས་པ་རྟོགས་པར་བྱེད་པ་ལ་ལྟོས་པའི་ཕྱིར། གཉིས་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། སྔར་གྱི་རྩོད་པ་དེར་མ་ཟད། དེ་ལས་འཕྲོས་པའི་རྩོད་པ་གཞན་ཡང་ཡོད་དེ། ཇི་ལྟར་ཡོད་ན། རང་རྒྱལ་གྱིས་སྒྲ་མེད་པར་རང་གི་གདུལ་བྱ་ལ་ཆོས་སྟོན་ནུས་སམ་སྙམ་པའི་དོགས་པ་ཁོང་ནས་བསུ་བར་བྱེད་པའི་ཕྱིར། གཉིས་པ་ནི། ཤེས་བྱ་ཆོས་ཅན། རང་རྒྱལ་གྱིས་སྒྲ་མེད་ཀྱང་ཆོས་སྟོན་པ་མི་འགལ་ཏེ། དེས་ལུས་ཀྱི་རྣམ་འགྱུར་གྱི་སྒོ་ནས་གདུལ་བྱ་གང་དག་གང་རྟོགས་བྱའི་དོན་ནི་གང་དང་གང་ལ་རྣམ་པ་ཇི་ལྟ་ཇི་ལྟར་ཉན་པར་འདོད་པ་དེ་དང་དེ་ལ་དོན་དེ་དང་དེ་སྔར་བཤད་པ་དེ་ལྟར་སྣང་བར་ནུས་པའི་ཕྱིར། གསུམ་པ་ནི། ཤེས་བྱ་ཆོས་ཅན། རང་རྒྱལ་

---

^{[མ་དཔེ་གཟིགས་ན་འདིར་གནོན།]}

དགྲ་བཅོམ་པས་གདུལ་བྱ་ལ་སྒྲ་མེད་པར་ཆོས་སྟོན་པ་མི་འགལ་བ་ཞེས་བྱ་སྟེ། ཆོས་སྟོན་པའི་སྒྲའི་དགོས་པའི་དོན་ནི། འདི་ལྟར་བརྗོད་པར་བྱ་བའི་ཆོས་རྟོགས་པ་ཉན་པ་པོའི་རྣམ་པར་ཤེས་པ་ལ་ཤིན་ཏུ་སྐྲུན་ཅིང་སྐྱེད་པ་ཞེས་བྱ་བ་འདི་ཡིན་ན། དོན་དེ་ནི་རང་རྒྱལ་དགྲ་བཅོམ་པས་སྒྲ་མེད་དུ་ཆོས་བསྟན་པ་ལ་ཡང་ཡོད་པའི་ཕྱིར། ཡོད་དེ། རང་སངས་རྒྱས་ཉིད་ཀྱི་གནས་སྐབས་ན་ཡང་སྔོན་གྱི་སྨོན་ལམ་ལ་སོགས་པའི་མཐུས་ཆོས་སྟོན་པའི་སྒྲ་མེད་ཀྱང་། གདུལ་བྱ་གང་ཞིག་མངོན་མཐོ་ངེས་ལེགས་ཀྱི་དོན་གང་ལ་རྣམ་པ་ཇི་ལྟར་ཉན་པར་འདོད་པའི་གདུལ་བྱ་དེའི་རྣམ་པར་ཤེས་པ་ལ་དོན་དེ་རྣམ་པ་དེ་ཁོ་ན་ལྟར་སྣང་བར་འགྱུར་བའི་ཕྱིར། རྒྱུ་མཚན་ཡོད་དེ། བྱང་ཆུབ་སེམས་དཔས་འདི་ལྟར་སངས་རྒྱས་སུ་གྱུར་ནས་བརྗོད་པ་མེད་པར་ཡང་ཆོས་སྟོན་པར་གྱུར་ཅིག་ཅེས་སྨོན་ལམ་བཏབ་ལ། རང་རྒྱལ་གྱིས་ཀྱང་དེ་ལྟར་བཏབ་པ་དེ་བས་ན་སངས་རྒྱས་དང་འདྲ་བའི་ཕྱིར། ཚིག་ཏུ་བརྗོད་པ་ནི་ཏིང་འཛིན་ལས་རྣམ་པར་གཡེང་བ་ཡིན་ལ། དེ་ཡང་ཏིང་ངེ་འཛིན་གྱི་རྒྱུད་འཁྲུག་པར་བྱེད་པ་ཡིན་པའི་ཕྱིར། རྒྱུ་མཚན་ཡོད་དེ། ངོ་བོ་ལ་རྣམ་པར་མ་བརྟགས། ཁྱད་པར་ལ་རྣམ་པར་མ་དཔྱད་པའི་ཚིག་ལག་ཏུ་མི་སྨྲ་བའི་ཕྱིར། སྨྲས་པ། སྒྲ་ཡི་དབྱངས་སྤངས་ལུས་ཀྱི་རྨད་བྱུང་གར། །ལས་ལྡན་ཡང་དག་སྣང་བ་སྒྱུར་མཁས་པ། །སྤུ་སྡུག་རྣམ་བཀྲའི་མདོངས་དང་མི་ལྡན་པའི། །མྱང་འདས་འབྲུག་སྒྲ་མངལ་འཛིན་འདི་ལས་ཅི། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་རང་རྒྱལ་གྱི་ལམ་ཤེས་པའི་ལམ་ཤེས་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། རྣལ་མ་སྟེ་ལུས་རྣམ་གཞག་གི་དཀྱུས་དོན་འཆད་བྱེད་ཡིན་པས་རང་སངས་རྒྱས་ཀྱི་ལམ་འཆད་ཚུལ་ཡོད་དེ། སྔར་བཤད་པ་དེ་ལྟར་

---

^{[མ་དཔེ་གཟིགས་ན་འདིར་གནོན།]}

རང་རྒྱལ་ཉན་ཐོས་ལས་ཁྱད་ཞུགས་པ་བརྗོད་ནས། ཁྱད་ཞུགས་པ་རྣམས་ཀྱི་རང་རྒྱལ་གྱི་ལམ་ནི་ཅིག་ཤོས་ལས་ཁྱད་པར་འཕགས་པ་ཁོ་ན་ཡིན་པས་འཆད་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། བསེ་རུ་ལྟ་བུའི་ལམ་ཆོས་ཅན། ཁྱད་ཆོས་གསུམ་དང་ལྡན་པས་ཡང་དག་པར་བསྡུས་པར་ཤེས་པར་བྱ་བ་ཡིན་ཏེ། གཟུང་བ་གཟུགས་ལ་སོགས་པ་ཕྱི་རོལ་གྱི་དོན་དུ་འཛིན་པའི་རྟོག་པ་སྤོང་བའི་ཕྱིར་དང་། གཟུགས་འཛིན་ཤེས་པ་ལ་སོགས་པ་འཛིན་པ་བདེན་པར་འཛིན་པ་མི་སྤོང་བའི་ཕྱིར་དང་ནི། རིགས་ལ་བརྟེན་པའི་རྟེན་གྱི་ཁྱད་པར་དང་ལྡན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། རོང་ཊཱིཀ་པ་ན་རེ། རང་རྒྱལ་གྱི་ལམ་བདེན་སྟོང་དུ་མངོན་སུམ་དུ་རྟོགས་པའི་ཡེ་ཤེས་རང་རྒྱལ་གྱི་ལམ་ཤེས་པའི་ལམ་ཤེས་ཀྱི་མཚན་ཉིད་ཟེར་ན། རང་རྒྱལ་གྱི་ལམ་ཤེས་པའི་ལམ་ཤེས་ཡིན་ན་རྣལ་འབྱོར་མངོན་སུམ་ཡིན་པས་ཁྱབ་པར་ཐལ། ཁྱོད་ཀྱི་མཚན་ཉིད་འཐད་པའི་ཕྱིར། འདོད་ན། མ་ཁྱབ་པར་ཐལ། གཟུང་འཛིན་རྫས་གཞན་གྱིས་སྟོང་པར་དོན་སྤྱིའི་ཚུལ་གྱིས་རྟོགས་པའི་ཐེག་ཆེན་གྱི་སྒོམ་ལམ་ཡོད་པའི་ཕྱིར། དེར་ཐལ། དེ་ལྟར་འགྲེལ་པར་བཤད་པའི་ཕྱིར། ཁ་ཅིག །རང་རྒྱལ་གྱི་རྟོགས་རིགས་སུ་གནས་པའི་ཐེག་ཆེན་འཕགས་པའི་མཁྱེན་པ་རང་རྒྱལ་གྱི་ལམ་ཤེས་པའི་ལམ་ཤེས་ཀྱི་མཚན་ཉིད་ཟེར་ན། གཟུགས་ཕྱི་རོལ་དོན་དུ་འཛིན་པའི་རྟོག་པ་སྤངས་པའི་སྤངས་པ་དོན་གཉེར་གྱི་ཐེག་ཆེན་གྱི་མཐོང་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། དེ་ཆོས་ཅན། རང་རྒྱལ་གྱི་ཤེས་རབ་ཀྱི་རྟོགས་རིགས་སུ་གནས་པར་ཐལ། འདོད་པའི་ཕྱིར། འདོད་ན། མི་གནས་པར་ཐལ། དེའི་

---

^{[མ་དཔེ་གཟིགས་ན་འདིར་གནོན།]}

ཐབས་ཀྱི་རྟོགས་རིགས་སུ་གནས་པའི་ཕྱིར། དེར་ཐལ། གཟུགས་ཕྱི་རོལ་དོན་འཛིན་གྱི་རྟོག་པ་སྤངས་པའི་སྤངས་པ་དོན་གཉེར་གྱི་རང་རྒྱལ་གྱི་མཐོང་ལམ་དེ་དེའི་ཐབས་ཡིན་པའི་ཕྱིར། དེར་ཐལ། རང་རྒྱལ་གྱི་སེམས་བསྐྱེད་དེ་རང་རྒྱལ་གྱི་ཐབས་ཡིན་པའི་ཕྱིར། ཁ་ཅིག །རང་རྒྱལ་དང་སེམས་ཙམ་པ་ལྟ་བ་མི་མཚུངས་ཏེ། སྟོང་ཉིད་རྟོགས་པའི་རང་རྒྱལ་ཡོད་པ་གང་ཞིག །དེ་རྟོགས་པའི་ཅིག་ཤོས་མེད་པའ་ིཕྱིར་ཟེར་ན། མི་འཐད་པར་ཐལ། དེ་གཉིས་ཀྱི་ལྟ་བ་ལ་མཐོ་དམན་གྱི་ཁྱད་པར་མེད་པའི་ཕྱིར། དེར་ཐལ། གཟུང་འཛིན་རྫས་གཞན་གྱིས་སྟོང་པར་རྟོགས་པའི་ལྟ་བ་དེ་དེ་གཉིས་ཀའི་བསྒོམ་བྱའི་གཙོ་བོར་གྱུར་པའི་ལྟ་བ་ཡིན་པའི་ཕྱིར། དེར་ཐལ། དང་པོ་གང་ཞིག །ཕྱི་མ་ཡིན་པའི་ཕྱིར། དང་པོ་དེར་ཐལ། ཉན་རང་གཉིས་ཀྱི་བསྒོམ་བྱའི་ལྟ་བ་ལ་ཁྱད་པར་ཡོད་པའི་ཕྱིར། གཉིས་པ་དེར་ཐལ། སེམས་ཙམ་པའི་བསྒོམ་བྱའི་གཙོ་བོར་གྱུར་པའི་ལྟ་བ་ཡོད་པའི་ཕྱིར། གཞན་ཡང་། སྟོང་ཉིད་རྟོགས་པའི་ལྟ་བ་དེ་སྟོང་ཉིད་རྟོགས་པའི་རང་རྒྱལ་གྱི་བསྒོམ་བྱའི་གཙོ་བོ་ཡིན་པར་ཐལ། རྩ་བའི་དམ་བཅའ་འཐད་པའི་ཕྱིར། འདོད་ན། ཤེས་སྒྲིབ་ཕྲ་མོ་སྤང་བྱའི་གཙོ་བོར་བྱས་ནས་སྤོང་བའི་རང་རྒྱལ་སློབ་པ་ཡོད་པར་ཐལ། འདོད་པའི་ཕྱིར། ཁ་ཅིག །དེ་གཉིས་ལྟ་བ་མི་མཚུངས་ཏེ། རང་སངས་རྒྱས་ཀྱིས་གཟུང་བ་བདེན་མེད་དུ་རྟོགས། འཛིན་པ་བདེན་མེད་དུ་མ་རྟོགས། སེམས་ཙམ་པས་དེ་གཉིས་ཀ་བདེན་མེད་དུ་རྟོགས་པའི་ཕྱིར། ཟེར་ན། མི་འཐད་པར་ཐལ། ཆོས་ཅན་གཅིག་བདེན་མེད་དུ་རྟོགས་ན། ཆོས་གཞན་བདེན་པར་གྲུབ་མ་གྲུབ་དཔྱོད་པ་ལ་ཞུགས་ན་སྔར་གྱི་ཕྱོགས་ཁྱབ་ཚད་མས་གྲུབ་པའི་ཚུལ་དྲན་པར་བྱས་པས་ངེས་པར་བདེན་མེད་དུ་རྟོགས་ནུས་པའི་ཕྱིར། དེར་ཐལ། འཕགས་པ་ལྷས། གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་

---

^{[མ་དཔེ་གཟིགས་ན་འདིར་གནོན།]}

དངོས་ཀུན་དེ་བཞིན་ཉིད་དུ་མཐོང་། །ཞེས་གསུངས་པའི་ཕྱིར། གཞན་ཡང་། སློབ་ལམ་དུ་ཆོས་ཅན་མཐའ་དག་བདེན་མེད་དུ་རྟོགས་པ་མི་སྲིད་པར་ཐལ། ཕྱི་རོལ་གྱི་ཆོས་ཅན་གཟུགས་བརྙན་ལྟ་བུ་བདེན་མེད་དུ་རྟོགས་ཀྱང་། སླར་ཡང་དེའི་ངོར་མྱུ་གུ་བདེན་མེད་དུ་སྒྲུབ་པའི་རྟགས་འགོད་དགོས་པའི་ཕྱིར། རྟགས་ཁས། ཁ་ཅིག །གཟུང་དོན་རྟོག་པ་སྤོང་ཕྱིར་དང་། །ཞེས་པའི་ལུང་དོན་ལ་རང་རྒྱལ་གྱི་ལམ་ཤེས་པའི་རྒྱུ་ལམ་ཤེས་དེ་གཟུགས་ཕྱི་རོལ་དོན་དུ་འཛིན་པའི་རྟོག་པ་སྤང་བྱའི་གཙོ་བོར་བྱས་ནས་སྤོང་བའི་རིགས་སུ་གནས། བདེན་འཛིན་སྤང་བྱའི་གཙོ་བོར་བྱས་ནས་མི་སྤོང་བའི་རིགས་སུ་གནས། རང་རྒྱལ་གྱི་རིགས་ལ་བརྟེན་པའི་ཁྱད་པར་གསུམ་དང་ལྡན་པ་ཡིན་ནོ་ཟེར་ན། གཞུང་འདིས་ཁྱད་པར་གསུམ་ལྡན་གྱི་ཤེས་བྱ་རང་རྒྱལ་གྱི་ལམ་ཤེས་པའི་ལམ་ཤེས་དེ་བསྟན་བྱའི་གཙོ་བོར་བྱས་ནས་མ་བསྟན་པར་ཐལ། གཞུང་འདིའི་སྐབས་ནས་བསྟན་པའི་ཁྱད་པར་གསུམ་ལྡན་གྱི་ཤེས་བྱ་རང་རྒྱལ་གྱི་ལམ་མེད་པའི་ཕྱིར། དེར་ཐལ། རང་རྒྱལ་རང་རྒྱུད་ཀྱིས་བསྡུས་པའི་ལམ་དེ་མ་ཡིན། གཟུང་འཛིན་རྫས་གཞན་གྱིས་སྟོང་པར་རྟོགས་པའི་ཡེ་ཤེས་ཀྱང་དེ་མ་ཡིན། བྱང་འཕགས་ཀྱི་རྒྱུད་ཀྱི་དེ་ཡང་དེ་མ་ཡིན་པའི་ཕྱིར། དང་པོ་མ་གྲུབ་ན། མི་འཐད་པར་ཐལ། དེ་འདྲ་རང་རྒྱལ་གྱི་ལམ་མཚན་ཉིད་པ་ཡིན་པའི་ཕྱིར། གཉིས་པ་མ་གྲུབ་ན། དེར་ཐལ། རྩ་བའི་དམ་བཅའ་གང་ཞོག །གཟུང་འཛིན་རྫས་གཞན་གྱིས་སྟོང་པར་རྟོགས་པའི་ཡེ་ཤེས་རང་རྒྱལ་གྱི་ལམ་ཤེས་པའ་ིརྒྱུ་ལམ་ཤེས་མ་ཡིན་པའི་ཕྱིར། དེར་ཐལ། བྱང་འཕགས་ཀྱི་རྒྱུད་ཀྱི་དེ་འདྲ་མངོན་སུམ་དུ་རྟོགས་པའི་ཡེ་ཤེས་དེ་འདིར་བསྟན་ཁྱད་པར་གསུམ་ལྡན་གྱི་ཤེས་བྱ་རང་རྒྱལ་གྱི་ལམ་མ་ཡིན་པ་གང་ཞིག །དེ་ལས་དོན་གཞན་དུ་གྱུར་པའི་འཛིན་རྒྱུ་མེད་པའི་ཕྱིར། རྟགས་ཁས། ཁ་ཅིག །བྱང་འཕགས་ཀྱིས་

---

^{[མ་དཔེ་གཟིགས་ན་འདིར་གནོན།]}

དེའི་ལམ་རྟོགས་ཚུལ་ཡོད་དེ། སེམས་བསྐྱེད་བསྔོ་བ་སྟོང་ཉིད་རྟོགས་པའི་ཤེས་རབ་གསུམ་གྱི་སྒོ་ནས་ཤེས་པར་བྱེད་པའི་ཕྱིར། བསེ་རུ་ལྟ་བུའི་རང་རྒྱལ་གྱི་སྒོམ་ལམ་ཆོས་ཅན། ཁྱོད་ཁྱད་ཆོས་གསུམ་དང་ལྡན་ཏེ། རང་ལམ་དུ་གཟུང་བ་ཕྱི་རོལ་དོན་དུ་འཛིན་པའི་རྟོག་པ་སྤོང་ནུས། རང་ལམ་དུ་ཤེས་པ་བདེན་པར་འཛིན་པའི་བདེན་འཛིན་ཟད་པར་སྤོང་མི་ནུས། རང་རྒྱལ་གྱི་རིགས་ལ་བརྟེན་པའི་ཁྱད་པར་གསུམ་དང་ལྡན་པའི་ཕྱིར། ཟེར་ན། མི་འཐད་པར་ཐལ། འདིར་བསྟན་ཤེས་བྱ་རང་རྒྱལ་གྱི་ལམ་དེ་བྱང་སེམས་ཀྱི་རྒྱུད་ལ་སྐྱེ་བ་ཞིག་ཡོད་པའི་ཕྱིར། དེར་ཐལ། རྣམ་བཤད་ལས། དེ་རང་སངས་རྒྱས་ཀྱི་རྒྱུད་ལ་ཡོད་པ་ན། དེའི་སྐྱེ་མཆེད་དྲུག་གི་ཆོས་ཉིད་ལ་བརྟེན་ལ། བྱང་ཆུབ་སེམས་དཔའི་རྒྱུད་ལ་ཡོད་པ་ནི་དེའི་རང་བཞིན་གནས་རིགས་ལ་བརྟེན་པའོ། །ཞེས་གསུངས་པའི་ཕྱིར། གཞན་ཡང་། བྱང་སེམས་ཀྱིས་རང་རྒྱལ་གྱི་ལམ་ཤེས་ཚུལ་མིག་གིས་གཟུགས་ལ་བལྟ་བ་ལྟར་བྱ་རིགས་པར་ཐལ། འདིར་བསྟན་ཤེས་བྱ་རང་རྒྱལ་གྱི་ལམ་དེ་རྣམ་གཞག་གི་རྟེན་རང་རྒྱལ་ལ་རྣམ་གཞག་དང་། བྱང་ཆུབ་སེམས་དཔའི་རྒྱུད་ལ་སྐྱེ་བ་གཉིས་ཚོགས་མ་ཡིན་པའི་ཕྱིར། ཁྱབ་པ་ཡོད་དེ། རྣམ་བཤད་ལས། རྟོགས་པ་འདིས་བསྡུས་པའི་གཞི་ཤེས་ཀྱང་རྣམ་གཞག་གི་རྟེན་རང་སངས་རྒྱས་ལ་རྣམ་པར་བཞག་ཀྱང་བྱང་ཆུབ་སེམས་དཔའི་ཐུགས་རྒྱུད་ལ་ཡང་སྐྱེ་བས། རང་སངས་རྒྱས་ཀྱི་ལམ་ཤེས་པའི་ཚུལ་མིག་གིས་གཟུགས་ལ་བལྟ་བ་ལྟར་དུ་གོ་བར་མི་བྱའོ། །ཞེས་གསུངས་པའི་ཕྱིར། ཁ་ཅིག །གཞུང་འདིའི་སྐབས་ནས་དངོས་སུ་བསྟན་པའི་རང་རྒྱལ་གྱི་ལམ་དེ་རང་རྒྱལ་གྱི་ལམ་མཚན་ཉིད་པ་ལ་བྱེད་རིགས་པར་ཐལ། རྣམ་བཤད་ལས། ཐེག་དམན་པའི་གང་ཟག་གི་རྒྱུད་ལ་བསྐྱེད་པར་བྱ་བ་དང་། བྱང་ཆུབ་སེམས་དཔའི་རྒྱུད་ལ་བསྐྱེད་པར་བྱ་བ་གཉིས་ཀ་བསྟན་ཅིང་། ཞེས་གསུངས་པའི་ཕྱིར་ན།

---

^{[མ་དཔེ་གཟིགས་ན་འདིར་གནོན།]}

དེ་རྣམ་བཤད་ཀྱི་དགོངས་པ་མ་ཡིན་པར་ཐལ། བྱང་སེམས་དང་རང་རྒྱལ་གཉིས་ཀའི་རྒྱུད་ལ་བསྐྱེད་པར་བྱ་བ་གཉིས་ཚོགས་ཤིག་འདིར་བསྟན་ཤེས་བྱ་རང་རྒྱལ་གྱི་ལམ་ལ་དགོས་པར་གསུངས་པའི་ཕྱིར། གཉིས་པ་རང་ལུགས་ནི། ཁྱད་ཆོས་གསུམ་གྱིས་ཟིན་པའི་སྒོ་ནས་གདུལ་བྱ་རང་རྒྱལ་གྱི་རིགས་ཅན་རྗེས་སུ་བཟུང་བའི་ཆེད་དུ་ཤེས་པར་བྱ་བའི་ཤེས་རབ་ཀྱི་རིགས་སུ་གནས་པའི་ཐེག་ཆེན་འཕགས་པའི་མཁྱེན་པ་རང་རྒྱལ་གྱི་ལམ་ཤེས་པའི་ལམ་ཤེས་ཀྱི་མཚན་ཉིད། གསུམ་པ་རྩོད་པ་སྤོང་བ་ལ། ཁ་ཅིག །གཟུང་འཛིན་རྫས་གཞན་གྱིས་སྟོང་པར་མངོན་སུམ་དུ་རྟོགས་པའི་ཡེ་ཤེས་དེ། འདིར་བསྟན་ཤེས་བྱ་རང་རྒྱལ་གྱི་ལམ་ཡིན་པར་ཐལ། རྣམ་བཤད་ལས། གཟུང་བ་བདེན་མེད་དུ་མངོན་སུམ་དུ་རྟོགས་པའི་ཡེ་ཤེས་དེ་ཉིད་ལ་རང་སངས་རྒྱས་ཀྱི་ལམ་ཞེས་བྱ་ལ་ཞེས་གསུངས་པའི་ཕྱིར་ན། མ་ཁྱབ་སྟེ། བྱང་སེམས་མཐོང་ལམ་པའི་རྒྱུད་ཀྱི་འདིར་བསྟན་ཤེས་བྱ་རང་རྒྱལ་གྱི་ལམ་ལྟ་བུ་ལ་དགོངས་པའི་ཕྱིར། ཁ་ཅིག །ལམ་མ་ཞུགས་ན་གཟུང་འཛིན་རྫས་གཞན་གྱིས་སྟོང་པར་རྟོགས་པའི་ཡེ་ཤེས་མེད་པར་ཐལ། དེ་ལམ་ཡིན་པའི་ཕྱིར། དེར་ཐལ། དེ་འདིར་བསྟན་ཤེས་བྱ་རང་རྒྱལ་གྱི་ལམ་ཡིན་པའི་ཕྱིར། འདོད་ན། ལམ་མ་ཞུགས་ན་དེ་འདྲའི་བློ་མེད་པར་ཐལ། ལམ་མ་ཞུགས་ན་དེ་འདྲའི་ཡེ་ཤེས་མེད་པའི་ཕྱིར་ན་མ་ཁྱབ། གསུམ་པ་ནི། ཤེས་བྱ་ཆོས་ཅན། བྱང་ཆུབ་སེམས་དཔས་རང་རྒྱལ་གྱི་ལམ་མངོན་སུམ་དུ་ཤེས་པར་བྱའི། མངོན་དུ་བྱ་བའི་ཚུལ་གྱིས་རྣམ་པ་ཐམས་ཅད་དུ་ཤེས་པར་བྱ་བ་ནི་མ་ཡིན་ནོ། །ཞེས་བྱ་བ་ནི་ཤེས་བྱ་རང་སངས་རྒྱས་ཀྱི་ལམ་དུ་བསྟན་པ་ཡིན་ཏེ། རང་སངས་རྒྱས་ཀྱི་ལམ་ལ་ཇི་སྐད་བཤད་པ་བདེན་པའི་རྣམ་པ་བཅུ་དྲུག་བསྒོམ་པ་ཁོ་ན་དང་། འབྱུང་ཚུལ་དང་། ལྡོག་ཚུལ་གྱི་དངོས་པོ་ཇི་ལྟ་བ་བཞིན་དུ་རྟེན་ཅིང་འབྲེལ་
པར་འབྱུང་བ་ཡན་ལག་བཅུ་གཉིས་ཀྱི་འབྱུང་ལྡོག་བསྒོམས་པས། གཟུང་བ་ཕྱི་རོལ་དོན་དུ་ཞེན་པའི་རྣམ་པར་རྟོག་པ་དག་གོ་རིམ་བཞིན་དུ་སྤངས་པ་དང་། ཤེས་པ་བདེན་པར་འཛིན་པའི་དོན་གྱི་རྣམ་པར་རྟོག་པ་དག་མ་སྤངས་པ་དང་། རང་སངས་རྒྱས་ཀྱི་ཐེག་པས་བསྡུས་པའི་བརྟེན་པའི་ཆོས་ཀྱི་ཆོས་ཉིད་རིགས་ལ་བརྟེན་པའི་རྟེན་གཞིའི་ཁྱད་པར་གྱིས་ཁྱད་པར་དུ་འཕགས་པ་དང་ལྡན་པའི་ཆོས་རྟོགས་པར་ཤེས་པར་བྱ་བ་ཡིན་པའི་ཕྱིར།

རང་རྒྱལ་གྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་བཤད་པ།

---

^{[མ་དཔེ་གཟིགས་ན་འདིར་གནོན།]}

རང་རྒྱལ་གྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་བཤད་པ། གསུམ་པ་རང་རྒྱལ་གྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། རང་རྒྱལ་གྱི་ལམ་མངོན་སུམ་དུ་ཤེས་པའི་ཚུལ་བཤད་པའི་འོག་ཏུ། དེའི་ངེས་འབྱེད་ཆ་མཐུན་འཆད་ཚུལ་ཡོད་དེ། རང་རྒྱལ་གྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་པར་འབྱེད་པའི་ཆ་དང་མཐུན་པ་ཐོབ་ན་སྔར་ཇི་སྐད་བཤད་པའི་ལམ་ཤེས་སྐྱེ་བས་དེ་འཆད་པ་ཡིན་པའི་ཕྱིར། གཉིས་པ་ལ། དྲོད་ནི། དེའི་རྒྱུ་ངེས་འབྱེད་ཆ་མཐུན་དུ་གྱུར་པའི་སྦྱོར་ལམ་དྲོད་ཡོད་དེ། ཕྱི་དོན་མེད་པར་རྟོགས་ཀྱང་། བརྡར་བཏགས་པའི་ཆོས་ཉིད་དང་མི་འགལ་བར་གཟུགས་སོགས་སྟོན་པའི་རྣམ་པ་དྲོ་བར་གྱུར་པ་དེ་ཡིན་པའི་ཕྱིར། རྩེ་མོ་ནི། དེ་འདྲའི་རྩེ་མོ་གཞག་ཏུ་ཡོད་དེ། གཟུགས་ལ་སོགས་པ་ཕྱི་རོལ་གྱི་དོན་དུ་འགྲིབ་པ་མེད་པ་ལ་སོགས་པས་ཕྱེ་བ་དེ་དེ་འདྲའི་རྩེ་མོར་གྱུར་པའི་ཕྱིར། བཟོད་པ་ནི། དེ་འདྲའི་བཟོད་པ་ཡོད་དེ། མིག་སོགས་ནང་གི་སྐྱེ་མཆེད་རྣམས་སྟོང་པར་རྟོགས་པ་ལ་སོགས་པའི་མཐུ་ཡིས་གཟུགས་སོགས་ཕྱི་རོལ་དོན་དུ་མི་འཛིན་པ་དེ་དེ་འདྲའི་བཟོད་པ་ཡིན་པའི་ཕྱིར། ཆོས་མཆོག་ནི། དེ་འདྲའི་ཆོས་མཆོག་གཞག་ཏུ་ཡོད་དེ། གཟུགས་སོགས་ཕྱི་རོལ་དོན་དུ་སྐྱེ་བ་མེད་པ་སོགས་ཀྱི་རྣམ་པ་ཅན་ནི། དེར་གྱུར་པའི་ཆོས་ཀྱི་མཆོག་ཡིན་པའི་ཕྱིར། གསུམ་པ་ལ། དྲོད་ནི། བཏགས་པའི་ཆོས་ཉིད་ཅེས་སོགས་རྩ་
འགྲེལ་གྱི་དོན་ཡོད་དེ། གཟུགས་ལ་སོགས་པ་ཐ་སྙད་ཙམ་དུ་ཡོད་པའི་ཆོས་ཀྱི་བརྡ་ལས་བྱུང་བའི་བཏགས་པའི་ཆོས་ཉིད་མི་འགལ་བར་རབ་ཏུ་སྟོན་པ་ལྟར་རྟོགས་པའི་དྲོད་དངོས་སུ་བསྟན་ནས། གཟུང་འཛིན་རྫས་ཡོད་ཀྱིས་སྟོང་པར་རྟོགས་པའི་དྲོད་ཤུགས་ལ་བསྟན་པའི་ཕྱིར། རྩེ་མོ་ནི། རྐང་པ་ལྷག་མ་གཉིས་རྩ་འགྲེལ་གྱི་དོན་ཡོད་དེ། གཟུགས་ལ་སོགས་པ་ལ་དོན་དམ་པར་འགྲིབ་པ་དང་འཕེལ་བ་མེད་པ་ལ་སོགས་པའི་དོན་དུ་སློབ་པ་ལྟར་རྟོགས་པའི་རྩེ་མོ་དངོས་སུ་བསྟན་ནས། ཅིག་ཤོས་ཤུགས་ལ་བསྟན་པའི་ཕྱིར། བཟོད་པ་ནི། རྐང་པ་ལྷག་མ་རྩ་འགྲེལ་གྱི་དོན་གཞག་ཏུ་ཡོད་དེ། དོན་དམ་པར་ངོ་བོ་ཉིད་ཀྱིས་སྟོང་པ་ཉིད་ཀྱི་ཕྱིར་གཟུགས་ལ་སོགས་པ་ལ་ནང་དང་ཕྱི་རོལ་ལ་སོགས་པ་བདེན་པས་སྟོང་པ་ཉིད་དུ་རྟོགས་པ་ཉིད་ཀྱིས་གཟུང་བྱ་བདེན་གྲུབ་ཡོངས་སུ་མི་འཛིན་པའི་བཟོད་པ་དངོས་སུ་བསྟན་ནས་ཅིག་ཤོས་ཤུགས་ལ་བསྟན་པའི་ཕྱིར། ཆོས་མཆོག་ནི། རྐང་པ་ལྷག་མ་རྩ་འགྲེལ་གྱི་དོན་ཡོད་དེ། གཟུགས་ལ་སོགས་པ་ལ་དོན་དམ་པར་སྐྱེ་བ་དང་འགག་པ་ལ་སོགས་པ་མེད་པར་རྟོགས་པའི་ཆོས་མཆོག་གི་ཡེ་ཤེས་དངོས་སུ་བསྟན་ནས། ཅིག་ཤོས་ཤུགས་ལ་བསྟན་པའི་ཕྱིར། དོན་བསྡུ་ནི། ཤེས་བྱ་ཆོས་ཅན། བྱང་སེམས་ཀྱི་རྒྱུད་ལ་རང་རྒྱལ་གྱི་ལམ་ཤེས་པའི་ལམ་ཤེས་ཀྱི་ངེས་པར་འབྱེད་པའི་ཆ་དང་མཐུན་པ་སྐྱེ་ཚུལ་ཡོད་དེ། སྔར་བཤད་པའི་རྣམ་པ་རྣམས་ཀྱིས་བདེན་པ་བཞིའི་གོ་རིམ་བཞིན་དུ་བདེན་པ་བཞིའི་དམིགས་པ་ལ་དམིགས་ནས་བསྒོམས་པས་སྐྱེ་བའི་ཕྱིར།

ཐེག་ཆེན་གྱི་མཐོང་ལམ་བཤད་པ།

---

^{[མ་དཔེ་གཟིགས་ན་འདིར་གནོན།]}

ཐེག་ཆེན་གྱི་མཐོང་ལམ་བཤད་པ། གསུམ་པ་བྱང་སེམས་ཀྱི་ལམ་ཤེས་པའི་ལམ་ཤེས་ཀྱི་རང་བཞིན་འཆད་པ་ལ། སྤྱིའི་མཚམས་སྦྱོར་བ་དང་། སོ་སོའི་ངོ་བོ་བཤད་པའོ། །དང་པོ་ནི། ཤེས་བྱ་ཆོས་ཅན། རང་སངས་རྒྱས་ཀྱི་ལམ་གྱི་མཇུག་ཐོགས་སུ་བྱང་ཆུབ་སེམས་དཔའི་ལམ་

---

^{[མ་དཔེ་གཟིགས་ན་འདིར་གནོན།]}

ཤེས་པའི་ལམ་ཤེས་འཆད་ཚུལ་ཡོད་དེ། བདེན་དང་བདེན་པ་སོགས་ཀྱིས་འཆད་པའི་ཕྱིར། གཉིས་པ་ལ། མཐོང་ལམ་བཤད་པ། སྒོམ་ལམ་བཤད་པ་གཉིས། དང་པོ་ལ། སྐད་ཅིག་མ་མདོར་བསྟན་པ། རྣམ་པ་སྒོམ་ཚུལ་རྒྱས་པར་བཤད་པ། རྣམ་པ་མ་བསྟན་པར་འདོད་པ་དགག་པ་གསུམ། དང་པོ་ལ། རྩ་བ་དང་འགྲེལ་པ་གཉིས། དང་པོ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན། ལམ་ཤེས་ཉིད་ཀྱི་སྐབས་ལ་མཐོང་བའི་ལམ་ཕན་ཡོན་དང་བཅས་པ་འདི་བཤད་པར་བྱ་བ་ཡིན་ཏེ། ཕན་ཡོན་དང་བཅས་པ་དེ་ཡང་སྡུག་ཀུན་གྱི་བདེན་པ་དང་། འགོག་ལམ་གྱི་བདེན་པ་ལ་བཟོད་པ་དང་ཤེས་པའི་སྐད་ཅིག་མ་རྣམ་པ་བཞིའི་སྒོ་ནས་བཤད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །སྦྱོར་ལམ་ཆོས་མཆོག་གི་མཇུག་ཐོགས་དེ་མ་ཐག་ཏུ་བདེན་བཞིའི་རྣམ་པ་བཅུ་དྲུག་ལ་དམིགས་ནས་སྟོང་ཉིད་སྤྲོས་བྲལ་མངོན་སུམ་གྱིས་གསར་དུ་རྟོགས་པའི་ཤེས་རབ་ཏིང་འཛིན་མཚུངས་ལྡན་དང་བཅས་པ་གང་ཞིག །སྦྱིན་སོགས་སྤྱོད་པའི་རིགས་མཐའ་དག་གིས་ཟིན་པ་དེ་ཐེག་ཆེན་གྱི་མཐོང་ལམ་གྱི་མཚན་ཉིད་ཟེར་ན། གང་ཟག་གི་བདག་མེད་མངོན་སུམ་དུ་རྟོགས་པའི་ཐེག་ཆེན་གྱི་མཐོང་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། འདོད་ན། སློབ་ལམ་ན་བློ་གཅིག་གིས་བདེན་གཉིས་ཅིག་ཅར་དུ་མངོན་སུམ་དུ་རྟོགས་པ་ཡོད་པར་ཐལ། འདོད་པའི་ཕྱིར། ཁ་ཅིག །དེ་ཐེག་ཆེན་ཐུན་མོང་མ་ཡིན་པའི་མཐོང་ལམ་གྱི་མཚན་ཉིད་ཟེར་ན། བྱང་སེམས་མཐོང་ལམ་པའི་རྒྱུད་ཀྱི་སྙིང་རྗེ་ཆེན་པོ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཐེག་ཆེན་གྱི་རྟོགས་རིགས་སུ་གནས་པའི་ཐེག་ཆེན་གྱི་མཐོང་ལམ་ཡིན་པའི་ཕྱིར། འདོད་

---

^{[མ་དཔེ་གཟིགས་ན་འདིར་གནོན།]}

ན། མངོན་སུམ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། རྟོག་པ་ཡིན་པའི་ཕྱིར། ཁ་ཅིག །སྲིད་ཞི་གཉིས་ཀའི་མཐའ་འགོག་བྱེད་ཀྱི་ཐེག་ཆེན་གྱི་བདེན་པ་མངོན་རྟོགས་དེ་ཐེག་ཆེན་མཐོང་ལམ་གྱི་མཚན་ཉིད་ཟེར་ན། སྐྱོན་འཕེན་པ་ཁ་ཅིག །བྱང་སེམས་མཐོང་ལམ་པའི་རྒྱུད་ཀྱི་སྙིང་རྗེ་ཆེན་པོ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དོན་དམ་ལ་བརྟེན་པའི་དེ་ཡིན་པར་ཐལ། འདོད་པ་གང་ཞིག །ཀུན་རྫོབ་ལ་བརྟེན་པའི་དེ་མ་ཡིན་པའི་ཕྱིར། ཕྱི་མ་དེར་ཐལ། ཀུན་རྫོབ་ལ་བརྟེན་པའི་སྲིད་མཐའ་འགོག་བྱེད་ཀྱི་ཡེ་ཤེས་མ་ཡིན་པའི་ཕྱིར། དེར་ཐལ། བདག་མེད་ཕྲ་རགས་གང་རུང་རྟོགས་པའི་ཡེ་ཤེས་མ་ཡིན་པའི་ཕྱིར་ན་མ་ཁྱབ་སྟེ། ཐེག་ཆེན་གྱི་མཐོང་ལམ་དེ་སྲིད་ཞི་གཉིས་ཀའི་མཐའ་འགོག་བྱེད་ཀྱི་ཡེ་ཤེས་ཡིན་པའི་ཕྱིར། ཁ་ཅིག །སྲིད་ཞིའི་མཐའ་འགོག་བྱེད་ཀྱི་རྟོགས་རིགས་སུ་གནས་པའི་ཐེག་ཆེན་གྱི་བདེན་པ་མངོན་རྟོགས་ཐེག་ཆེན་མཐོང་ལམ་གྱི་མཚན་ཉིད་ཟེར་ན། བྱང་སེམས་མཐོང་ལམ་པའི་རྒྱུད་ཀྱི་སྙིང་རྗེ་ཆེན་པོ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། སྲིད་མཐའ་འགོག་བྱེད་ཀྱི་རྟོགས་རིགས་སུ་གནས་པར་ཐལ། འདོད་པའི་ཕྱིར། འདོད་ན། ཐེག་དམན་གྱི་རྟོགས་རིགས་སུ་གནས་པར་ཐལ། འདོད་པའི་ཕྱིར། འདོད་མི་ནུས། ཁ་ཅིག །ཐེག་ཆེན་གྱི་སྦྱོར་ལམ་རྫོགས་རྗེས་སུ་བྱུང་ཞིང་། ཐེག་ཆེན་གྱི་སྒོམ་ལམ་མ་སྐྱེས་གོང་གི་མཁྱེན་པ་དེ་ཐེག་ཆེན་གྱི་མཐོང་ལམ་གྱི་མཚན་ཉིད་ཟེར་ན། ཐེག་ཆེན་གྱི་སྒོམ་ལམ་གྱི་འབྲས་བུར་གྱུར་པའི་ཐེག་ཆེན་གྱི་མཐོང་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། སྒོམ་ལམ་མ་སྐྱེས་གོང་གི་མཁྱེན་པ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེའི་ཕྱི་ལོགས་སུ་གྲུབ་པའི་ཕྱིར། གཞན་ཡང་། ཐེག་ཆེན་

---

^{[མ་དཔེ་གཟིགས་ན་འདིར་གནོན།]}

སྦྱོར་ལམ་གྱི་རྒྱུར་གྱུར་པའི་ཐེག་ཆེན་གྱི་མཐོང་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཐེག་ཆེན་སྦྱོར་ལམ་རྫོགས་རྗེས་སུ་མ་བྱུང་བར་ཐལ། ཐེག་ཆེན་གྱི་སྦྱོར་ལམ་གྱི་སྔ་ལོགས་སུ་བྱུང་བའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། ཁ་ཅིག་སྟོང་ཉིད་མངོན་སུམ་དུ་རྟོགས་པའི་ཐེག་ཆེན་གྱི་བདེན་པ་མངོན་རྟོགས་དེ་སྐབས་འདིར་དངོས་སུ་བསྟན་པའི་ཐེག་ཆེན་མཐོང་ལམ་གྱི་མཚན་ཉིད་ཟེར་ན། ཉན་ཐོས་དགྲ་བཅོམ་གྱི་རྟོགས་པ་སྔོན་དུ་སོང་བའི་ཆོས་ཉིད་ལ་མངོན་སུམ་དུ་མཉམ་པར་བཞག་པའི་མཐོང་ལམ་མཉམ་གཞག་ཡེ་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། དང་པོ་ཉིད་ནས་ཐེག་ཆེན་དུ་རིགས་ངེས་ཀྱི་དེར་ཐལ། འདོད་པའི་ཕྱིར། འདོད་ན། དམན་ལམ་སྔོན་མ་སོང་གི་ཐེག་ཆེན་གྱི་མཐོང་ལམ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །སྟོང་ཉིད་ལ་གཉིས་སྣང་ནུབ་པའི་ཐེག་ཆེན་གྱི་བདེན་པ་མངོན་རྟོགས་གང་ཞིག །མཐོང་སྤང་བདེན་འཛིན་ལས་དངོས་སུ་གྲོལ་བ་ཐེག་ཆེན་གྱི་མཐོང་ལམ་རྣམ་གྲོལ་ལམ་གྱི་མཚན་ཉིད་ཟེར་ན། དེ་འདྲ་སྐད་ཅིག་གཉིས་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཐེག་ཆེན་མཐོང་ལམ་བར་ཆད་མེད་ལམ་གྱི་དངོས་འབྲས་སུ་གྱུར་པའི་ཐེག་ཆེན་གྱི་མཐོང་ལམ་རྣམ་གྲོལ་ལམ་སྐད་ཅིག་གཉིས་པ་ཡོད་པར་ཐལ། འདོད་པའི་ཕྱིར། འདོད་ན། འོ་ན། དེ་འདྲ་སྐད་ཅིག་སྔ་ཕྱི་གཉིས་དུས་མཉམ་པར་ཐལ། འདོད་པའི་ཕྱིར། འདོད་མི་ནུས། ཁ་ཅིག །ཐེག་ཆེན་གྱི་མཐོང་ལམ་མཉམ་གཞག་ཡེ་ཤེས་གང་ཞིག །བདེན་འཛིན་ཀུན་བརྟགས་ཀྱི་དངོས་གཉེན་བྱེད་པ་དེ་ཐེག་ཆེན་གྱི་མཐོང་ལམ་བར་ཆད་མེད་ལམ་གྱི་མཚན་ཉིད་ཟེར་ན། བདེན་འཛིན་ཀུན་བརྟགས་ཀྱི་རྒྱུར་གྱུར་པའི་ཐེག་ཆེན་གྱི་མཐོང་ལམ་

---

^{[མ་དཔེ་གཟིགས་ན་འདིར་གནོན།]}

བར་ཆད་མེད་ལམ་ཡོད་པར་ཐལ། དེའི་རྒྱུར་གྱུར་པའི་རྣམ་མཁྱེན་ཡོད་པའི་ཕྱིར། དེར་ཐལ། དེའི་རྒྱུར་གྱུར་པའི་སངས་འཕགས་ཡོད་པའི་ཕྱིར། དེར་ཐལ། སངས་འཕགས་ལ་དམིགས་ནས་བདེན་འཛིན་སྐྱེ་བ་ཡོད་པའི་ཕྱིར། འདོད་ན། དེ་འདྲའི་བར་ཆད་མེད་ལམ་ཆོས་ཅན། ཁྱོད་བདེན་འཛིན་ཀུན་བརྟགས་ལ་ཕན་འདོགས་བྱེད་ཡིན་པར་ཐལ། དེའི་རྒྱུ་ཡིན་པའི་ཕྱིར། འདོད་ན། མ་ཡིན་པར་ཐལ། དེ་ལ་གནོད་བྱེད་ཡིན་པའི་ཕྱིར། དེར་ཐལ། དེའི་དངོས་གཉེན་ཡིན་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། ཁྱབ་པ་ཁས། ཁ་ཅིག །ཐེག་ཆེན་གྱི་མཐོང་ལམ་མཉམ་གཞག་ཡེ་ཤེས་གང་ཞིག །བདེན་འཛིན་ཀུན་བརྟགས་སྤངས་པ་དེ། ཐེག་ཆེན་གྱི་མཐོང་ལམ་རྣམ་གྲོལ་ལམ་གྱི་མཚན་ཉིད་ཟེར་ན། ཐེག་ཆེན་གྱི་མཐོང་ལམ་རྣམ་གྲོལ་ལམ་ལས་ལངས་པའི་རྗེས་ཐོབ་ཀྱི་རྗེས་སུ་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་ཐེག་ཆེན་གྱི་མཐོང་ལམ་མཉམ་གཞག་ཡེ་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། དེ་ཆོས་ཅན། ཁྱོད་དང་མཉམ་གཞག་ཐུན་གཅིག་ལས་སྐྱེས་པའི་ཐེག་ཆེན་གྱི་མཐོང་ལམ་བར་ཆད་མེད་ལམ་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །མཐོང་སྤང་སྤངས་པའི་ཐེག་ཆེན་གྱི་བདེན་པ་མངོན་རྟོགས་དེ་ཐེག་ཆེན་གྱི་མཐོང་ལམ་རྣམ་གྲོལ་ལམ་གྱི་མཚན་ཉིད་ཟེར་ན། ཐེག་ཆེན་མཐོང་ལམ་རྗེས་ཐོབ་ཡེ་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། དེ་ཆོས་ཅན། ཐེག་ཆེན་གྱི་མཐོང་ལམ་ཤེས་པ་བརྒྱད་པོ་གང་རུང་ཡིན་པར་ཐལ། འདོད་པའི་ཕྱིར། ཁྱབ་པ་ཡོད་དེ། དེའི་བར་ཆད་མེད་ལམ་ཡིན་ན་བཟོད་པ་བརྒྱད་པོ་གང་རུང་ཡིན་དགོས་པའི་ཕྱིར། ཁ་ཅིག །ཐེག་ཆེན་གྱི་མཐོང་ལམ་རྣམ་

---

^{[མ་དཔེ་གཟིགས་ན་འདིར་གནོན།]}

གྲོལ་ལམ་ལས་ལངས་པའི་སྒྲ་དོན་འདྲེས་རུང་དུ་འཛིན་པའི་ཞེན་རིག་ཏུ་གྱུར་པའི་ཐེག་ཆེན་གྱི་བདེན་པ་མངོན་རྟོགས་གང་ཞིག །རང་རྒྱུད་ལྡན་གྱི་གང་ཟག་གི་རྒྱུད་ལ་མངོན་གྱུར་ཏུ་བྱུང་བ་དེ་ཐེག་ཆེན་གྱི་མཐོང་ལམ་རྗེས་ཐོབ་ཡེ་ཤེས་ཀྱི་མཚན་ཉིད་ཟེར་ན། ཐེག་ཆེན་གྱི་མཐོང་ལམ་རྗེས་ཐོབ་ཡེ་ཤེས་ལ་གནས་པའི་སེམས་དཔའི་རྒྱུད་ཀྱི་གཟུགས་བདེན་སྟོང་སྒྱུ་མ་ལྟ་བུར་སྣང་བའི་ཡེ་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། རྟོག་མེད་ཀྱི་ཤེས་པ་ཡིན་པའི་ཕྱིར། གཞན་ཡང་། སློབ་པའི་རྗེས་ཐོབ་ཡེ་ཤེས་ཡིན་ན་རྟོག་པ་ཡིན་དགོས་པར་ཐལ། མཚན་ཉིད་དེ་འཐད་པའི་ཕྱིར། འདོད་ན། ལམ་སྒྲིག་ལས། སྒྲུབ་པ་སྒོམ་ལམ་རྗེས་ཐོབ་ཀྱི་གནས་སྐབས་སུ་འབྱུང་བ་ཡིན་ཡང་རྟེན་འབྲེལ་སྒྱུ་མ་ལྟ་བུར་སྣང་བའི་བློ་འདྲེས་རུང་འཛིན་པའི་རྟོག་བྲལ་ལོ། །ཞེས་གསུངས་པ་མི་འཐད་པར་ཐལ། འདོད་པའི་ཕྱིར། ཁ་ཅིག །བདག་མེད་ཕྲ་རགས་གང་རུང་ལ་རྩེ་གཅིག་ཏུ་མཉམ་པར་བཞག་པའི་ཐེག་ཆེན་གྱི་བདེན་པ་མངོན་རྟོགས་དེ་ཐེག་ཆེན་གྱི་མཐོང་ལམ་བར་ཆད་མེད་ལམ་གྱི་མཚན་ཉིད་ཟེར་ན། བྱང་སེམས་མཐོང་ལམ་པའི་རྒྱུད་ཀྱི་གང་ཟག་གི་བདག་མེད་ལ་རྩེ་གཅིག་ཏུ་མཉམ་པར་བཞག་པའི་མཉམ་གཞག་ཡེ་ཤེས་ཆོས་ཅན། མཚོན་བྱ་དེར་ཐ། མཚན་ཉིད་དེའི་ཕྱིར། འདོད་ན། ཆོས་ཉིད་ལ་མངོན་སུམ་དུ་མཉམ་པར་བཞག་པའི་མཉམ་གཞག་ཡེ་ཤེས་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །ཐེག་ཆེན་གྱི་མཐོང་ལམ་ཤེས་བཟོད་སྐད་ཅིག་བཅུ་དྲུག་ཅིག་ཅར་དུ་སྐྱེ་སྟེ། འགྲེལ་ཆེན་ལས། དགོངས་པ་འདི་ཉིད་ཀྱིས་ན་རིགས་པའི་སྟོབས་ཀྱི་མཐོང་བའི་ལམ་གྱི་མངོན་པར་རྟོགས་པ་སྐད་ཅིག་མ་གཅིག་ཡིན་ཡང་། སྐད་ཅིག་མ་བཅུ་དྲུག་ཉིད་དུ་

---

^{[མ་དཔེ་གཟིགས་ན་འདིར་གནོན།]}

བཤད་པ་ཡིན་ནོ། །ཞེས་གསུངས་པའི་ཕྱིར། ཟེར་ན། ཐེག་ཆེན་གྱི་མཐོང་ལམ་བཟོད་པ་བརྒྱད་དང་ཤེས་པ་བརྒྱད་ཅིག་ཅར་དུ་སྐྱེ་བར་ཐལ། འདོད་པའི་ཕྱིར། འདོད་ན། ཐེག་ཆེན་གྱི་མཐོང་ལམ་བར་ཆད་མེད་ལམ་དང་རྣམ་གྲོལ་ལམ་ཅིག་ཅར་དུ་སྐྱེ་བར་ཐལ། འདོད་པའི་ཕྱིར། འདོད་མི་ནུས་ཏེ། དེ་གཉིས་རྒྱུ་འབྲས་ཡིན་པའི་ཕྱིར། འགྲེལ་ཆེན་གྱི་ལུང་དོན་ཡོད་དེ། དེ་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་མཉམ་གཞག་ཐུན་གཅིག་ཏུ་དགོངས་པའི་ཕྱིར། ཁ་ཅིག །བཅུ་དྲུག་པོ་དེ་དུས་མཐའི་སྐད་ཅིག་མ་ཡིན་ཟེར་ན། མི་འཐད་པར་ཐལ། དེ་བཅུ་དྲུག་པོ་བྱ་རྫོགས་ཀྱི་སྐད་ཅིག་མ་ཡིན་པའི་ཕྱིར། དེར་ཐལ། འགྲེལ་ཆེན་ལས། སེམས་ཀྱི་སྐད་ཅིག་མ་ནི་ཤེས་བྱ་ལ་ཤེས་པ་སྐྱེ་བ་ཡོངས་སུ་གཟུང་ངོ་། །ཞེས་གསུངས་པའི་ཕྱིར་རོ། ཁ་ཅིག །ཐེག་ཆེན་གྱི་མཐོང་ལམ་ཤེས་བཟོད་སྐད་ཅིག་མ་བཅུ་དྲུག་རྫས་ཅིག་ཅར་དུ་སྐྱེ་བ་ཡིན་ཏེ། ཐེག་ཆེན་གྱི་མཐོང་ལམ་ཆོས་བཟོད་བཞི་དང་པོར་སྐྱེ་བ་རྫས་གཅིག །དེ་རྗེས་ཆོས་ཤེས་བཞི་སྐྱེ་བ་རྫས་གཅིག །དེ་རྗེས་རྗེས་བཟོད་བཞི་སྐྱེ་བ་རྫས་གཅིག །དེ་རྗེས་རྗེས་ཤེས་བཞི་སྐྱེ་བ་རྫས་གཅིག་ཟེར་ན། ཐེག་ཆེན་གྱི་མཐོང་ལམ་རྣམ་གྲོལ་ལམ་གྱི་རྗེས་སུ་དེ་དང་རྒྱུད་གཅིག་ཏུ་གྱུར་པའི་ཐེག་ཆེན་གྱི་མཐོང་ལམ་བར་ཆད་མེད་ལམ་སྐྱེ་བ་ཡོད་པར་ཐལ། དམ་བཅའ་འཐད་པའི་ཕྱིར། འདོད་ན། མི་འཐད་པར་ཐལ། ཐེག་ཆེན་གྱི་མཐོང་ལམ་རྣམ་གྲོལ་ལམ་ཡིན་ན་མཐོང་སྤང་མ་ལུས་པར་སྤངས་པས་ཁྱབ་པའི་ཕྱིར། ཁ་ཅིག །དེ་བཅུ་དྲུག་པོ་ཅིག་ཅར་དུ་མི་སྐྱེ་སྟེ། ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་དང་ཆོས་ཤེས་གཉིས་ཅིག་ཅར་དུ་མི་སྐྱེ་བའི་ཕྱིར། རིམ་ཅན་དུ་ཡང་མི་སྐྱེ་སྟེ། བཟོད་པ་བརྒྱད་རིམ་ཅན་དུ་མི་སྐྱེ། ཤེས་པ་བརྒྱད་རིམ་ཅན་དུ་མི་སྐྱེ་བའི་ཕྱིར། ཟེར་ན། འོ་ན། དེ་བཅུ་དྲུག་རྫས་གཅིག་མ་

---

^{[མ་དཔེ་གཟིགས་ན་འདིར་གནོན།]}

ཡིན་པར་ཐལ། ཆོས་བཟོད་དང་ཆོས་ཤེས་གཉིས་རྫས་གཅིག་མ་ཡིན་པའི་ཕྱིར། འདོད་ན། དེ་བཅུ་དྲུག་རྫས་ཐ་དད་མ་ཡིན་པར་ཐལ། བཟོད་པ་བརྒྱད་རྫས་ཐ་དད་མ་ཡིན་པ་གང་ཞིག །ཤེས་པ་བརྒྱད་རྫས་ཐ་དད་མ་ཡིན་པའི་ཕྱིར། ཁྱབ་པ་ཁས། འདོད་ན། དེ་བཅུ་དྲུག་རྫས་སུ་མ་གྲུབ་པར་ཐལ། དེ་བཅུ་དྲུག་རྫས་གཅིག་དང་རྫས་ཐ་དད་གང་རུང་མ་ཡིན་པའི་ཕྱིར། ཁ་ཅིག །ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་དེས་བདེན་བཞིའི་ཆོས་ཉིད་མངོན་སུམ་རྟོགས་པའི་ཆ་ནས་དེ་ཐེག་ཆེན་གྱི་མཐོང་ལམ་ཆོས་བཟོད་བཞིར་བཞག །ཆོས་བཟོད་བཞིའི་ཆོས་ཉིད་མངོན་སུམ་དུ་རྟོགས་པའི་ཆ་ནས་རྗེས་བཟོད་བཞིར་བཞག །དེས་ཤེས་པ་བརྒྱད་ལ་ཡང་རིགས་འགྲེ་ཟེར་ན། འོ་ན། བདེན་བཞིའི་ཆོས་ཉིད་མངོན་སུམ་དུ་རྟོགས་པའི་ཡེ་ཤེས་ཡིན་ན། ཐེག་ཆེན་གྱི་མཐོང་ལམ་ཆོས་བཟོད་བཞི་ཀ་ཡིན་དགོས་པར་ཐལ། འདོད་པའི་ཕྱིར། འདོད་ན། རྣམ་མཁྱེན་ཆོས་ཅན། དེར་ཐལ། དེའི་ཕྱིར། ཁ་ཅིག །འདའ་བྱའི་མཐོང་ལམ་དང་འདའ་བྱེད་ཀྱི་མཐོང་ལམ་གཉིས་ཅིག་ཅར་དུ་སྐྱེ་སྟེ། ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་དང་། མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་མཐོང་ལམ་ཅིག་ཅར་དུ་སྐྱེ་བའི་ཕྱིར། ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་པའི་རྒྱུད་ལ་མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་ཐེག་ཆེན་གྱི་མཐོང་ལམ་ཡོད་པའི་ཕྱིར། ཟེར་ན། མཐོང་ལམ་དེ་གཉིས་མངོན་གྱུར་དུ་ཅིག་ཅར་དུ་ཡོད་པར་ཐལ། དེ་གཉིས་མངོན་གྱུར་དུ་ཅིག་ཅར་དུ་སྐྱེ་བའི་རྒྱུ་ཡོད་པའི་ཕྱིར། དེར་ཐལ། དེ་གཉིས་དངོས་སུ་ཅིག་ཅར་དུ་སྐྱེ་བའི་རྒྱུ་ཡོད་པའི་ཕྱིར། དེར་ཐལ། ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོའི་ཡེ་ཤེས་དེ་དེ་ཡིན་པའི་ཕྱིར། དེར་ཐལ། དེ་དེ་གཉིས་ཀའི་དངོས་རྒྱུ་ཡིན་པའི་ཕྱིར། དེར་ཐལ། དེ་འདའ་བྱའི་ཐེག་ཆེན་གྱི་མཐོང་ལམ་གྱི་དངོས་རྒྱུ་

---

^{[མ་དཔེ་གཟིགས་ན་འདིར་གནོན།]}

ཡིན་པ་གང་ཞིག །དེ་གཉིས་ཀའི་དངོས་རྒྱུ་ཡོད་པའི་ཕྱིར། དང་པོ་དེར་ཐལ། དེ་འདའ་བྱེད་ཀྱི་མཐོང་ལམ་གྱི་དངོས་རྒྱུ་གང་ཞིག །དེ་གཉིས་ཅིག་ཅར་དུ་སྐྱེ་བའི་ཕྱིར། རོང་ཊཱིཀ་པ་ན་རེ། ཐེག་ཆེན་གྱི་མཐོང་ལམ་སྐྱེ་བའི་ལུས་རྟེན་རང་སྟོབས་ཀྱི་དབང་དུ་བྱས་ན་གླིང་གསུམ་གྱི་མི་དང་འདོད་ལྷའི་རྟེན་ལ་དངོས་སུ་གསར་དུ་སྐྱེ་ལ། གཞན་སྟོབས་ཀྱི་དབང་དུ་བྱས་ན་ངན་སོང་དང་གཟུགས་ཁམས་པའི་རྟེན་ལ་ཡོད་དེ། ཟ་མ་ཏོག་བཀོད་པའི་མདོ་ལས། འཕགས་པ་འཇིག་རྟེན་དབང་ཕྱུག་གིས་ཡུལ་ཝཱ་ར་ཎ་སིར་ཡི་དྭགས་མང་པོ་བདེན་པ་མཐོང་བ་ལ་བཀོད་པར་གསུངས་པ་དང་། ལྷའི་བུ་བློ་གྲོས་རབ་གནས་ཀྱིས་ཞུས་པའི་མདོ་ལས། འདོད་གཟུགས་ཀྱི་ལྷའི་བུ་བྱེ་བ་ཁྲག་ཁྲིག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པ་ཐོབ་བོ་ཞེས་གསུངས་པའི་ཕྱིར། ཟེར་ན། མི་འཐད་པར་ཐལ། བསྡུ་བ་ལས། གཟུགས་ཀྱི་ཁམས་དང་གཟུགས་མེད་པའི་ཁམས་གོང་མར་སྐྱེས་པས་ཀྱང་དང་པོར་བདེན་པ་རྣམས་མངོན་པར་མི་རྟོགས་ཏེ། ཞེས་དང་། མཛོད་ལས། གོང་ན་མཐོང་ལམ་མེད། །མི་སྐྱོ་ལུང་ལས་འདིར་རྩོམ་ཞིང་། །ཞེས་པ་མི་འཐད་པར་ཐལ། དམ་བཅའ་འཐད་པའི་ཕྱིར། གཞན་ཡང་། ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོ་ལ་གནས་པའི་ངན་སོང་བ་ཡོད་པར་ཐལ། འདོད་པའི་ཕྱིར། འདོད་ན། མཛོད་ལས། བཟོད་ཐོབ་ངན་སོང་ཡོངས་མི་ལྟུང་། །ཞེས་གསུངས་པ་མི་འཐད་པར་ཐལ། འདོད་པའི་ཕྱིར། གཞན་ཡང་། ཁམས་གོང་མའི་རྟེན་ལ་མཐོང་ལམ་གསར་དུ་སྐྱེ་བ་མེད་པར་ཐལ། རྣམ་བཤད་ལས། སྒྲ་མི་སྙན་པ་དང་། ཟ་མ་དང་། མ་ནིང་མ་གཏོགས་པའི་མི་དང་འདོད་ལྷའི་རྟེན་ལ་སྐྱེ། གོང་མའི་རྟེན་ལ་མ་ཡིན་ཏེ། ཁམས་གསུམ་ལ་སྐྱོ་ཤས་ཆུང་བའི་ཕྱིར་རོ། །ཞེས་

---

^{[མ་དཔེ་གཟིགས་ན་འདིར་གནོན།]}

གསུངས་པའི་ཕྱིར། ཁ་ཅིག །ཐེག་ཆེན་གྱི་མཐོང་ལམ་བསམ་གཏན་ས་དྲུག་ལ་བརྟེན་ནས་དངོས་སུ་གསར་དུ་སྐྱེ་བ་ཡོད་ཟེར་ན། མེད་པར་ཐལ། དེ་དངོས་སུ་གསར་དུ་སྐྱེ་བའི་སེམས་རྟེན་དུ་གྱུར་པའི་བསམ་གཏན་གྱི་ཉེར་བསྔོགས་མེད་པའི་ཕྱིར། དེར་ཐལ། དེ་འདྲའི་རྟེན་ཡིན་ན་བསམ་གཏན་གྱི་དངོས་གཞི་ཐོབ་པས་ཁྱབ་པ་གང་ཞིག །ལམ་སླ་བ་བསམ་གཏན་དང་པོའི་དངོས་གཞི་ཐོབ་ནས། དཀའ་བ་ཅིག་ཤོས་ལ་བརྟེན་ནས་བསྐྱེད་པ་ལ་དགོས་པ་མེད་པའི་ཕྱིར། དང་པོ་དེར་ཐལ། དེ་ཡིན་ན་ཆོས་རྒྱུན་གྱི་ཏིང་འཛིན་ཐོབ་པས་ཁྱབ་པའི་ཕྱིར། གཉིས་པ་རང་ལུགས་ལ། ཐེག་ཆེན་གྱི་བདེན་པ་མངོན་རྟོགས་ཐེག་ཆེན་གྱི་མཐོང་ལམ་གྱི་མཚན་ཉིད། དེ་ལ་དབྱེ་ན། དེ་མཉམ་གཞག་ཡེ་ཤེས། དེ་རྗེས་ཐོབ་ཡེ་ཤེས། དེ་གཉིས་ཀ་མ་ཡིན་པའི་ཐེག་ཆེན་གྱི་མཐོང་ལམ་དང་གསུམ། ཆོས་ཉིད་ལ་གཉིས་སྣང་ནུབ་པའི་ཐེག་ཆེན་གྱི་བདེན་པ་མངོན་རྟོགས་དང་པོའི་མཚན་ཉིད། དེ་ལ་དབྱེ་ན། དེ་བར་ཆད་མེད་ལམ། དེ་རྣམ་གྲོལ་ལམ། དེ་གཉིས་ཀ་མ་ཡིན་པའི་ཐེག་ཆེན་གྱི་མཐོང་ལམ་མཉམ་གཞག་ཡེ་ཤེས་དང་གསུམ། སྟོང་ཉིད་ལ་གཉིས་སྣང་ནུབ་པའི་ཐེག་ཆེན་གྱི་བདེན་པ་མངོན་རྟོགས་གང་ཞིག །རང་གི་ངོ་སྐལ་གྱི་སྤང་བྱར་གྱུར་པའི་མཐོང་སྤང་བདེན་འཛིན་གྱི་དངོས་གཉེན་བྱེད་པ་དེ་དང་པོའི་མཚན་ཉིད། དེ་ལ་དབྱེ་ན། ཐེག་ཆེན་གྱི་མཐོང་ལམ་བཟོད་པ་བརྒྱད་ཡོད། སྟོང་ཉིད་ལ་གཉིས་སྣང་ནུབ་པའི་ཐེག་ཆེན་གྱི་བདེན་པ་མངོན་རྟོགས་གང་ཞིག །རང་དང་མཉམ་གཞག་ཐུན་གཅིག་ལ་སྐྱེས་པའི་ཐེག་ཆེན་གྱི་མཐོང་ལམ་བར་ཆད་མེད་ལམ་གྱི་ངོ་སྐལ་གྱི་སྤང་བྱ་ལས་གྲོལ་བ་དེ་གཉིས་པའི་མཚན་ཉིད། དེ་ལ་དབྱེ་ན། ཐེག་ཆེན་གྱི་མཐོང་ལམ་ཤེས་པ་བརྒྱད་ཡོད། སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་མཉམ་གཞག་ལས་ལངས་པའི་རྗེས་ཐོབ་ཀྱི་རྗེས་སུ། སླར་ཡང་སྟོང་ཉིད་ལ་རྩེ་གཅིག་ཏུ་

---

^{[མ་དཔེ་གཟིགས་ན་འདིར་གནོན།]}

མཉམ་པར་བཞག་པའི་ཐེག་ཆེན་གྱི་མཐོང་ལམ་མཉམ་གཞག་ཡེ་ཤེས་ལྟ་བུ་གསུམ་པའི་མཚན་གཞི། ཐེག་ཆེན་གྱི་མཐོང་ལམ་མཉམ་གཞག་ཡེ་ཤེས་ལས་ལངས་པའི་ཐེག་ཆེན་གྱི་བདེན་པ་མངོན་རྟོགས་གང་ཞིག །རང་རྒྱུད་ལྡན་གྱི་གང་ཟག་གི་རྒྱུད་ལ་མངོན་གྱུར་ཏུ་བྱུང་བ་དེ་ཐེག་ཆེན་གྱི་མཐོང་ལམ་རྗེས་ཐོབ་ཡེ་ཤེས་ཀྱི་མཚན་ཉིད། མཐོང་ལམ་བར་ཆད་མེད་ལམ་པའི་རྒྱུད་ཀྱི་ཀུན་རྫོབ་སེམས་བསྐྱེད་ལྟ་བུ་མཉམ་རྗེས་གཉིས་ཀ་མ་ཡིན་པའི་ཐེག་ཆེན་མཐོང་ལམ་གྱི་མཚན་གཞི། དེ་ཡང་དང་པོར་བཟོད་པ་བརྒྱད་ཅིག་ཅར་དུ་སྐྱེ། དེའི་རྗེས་སུ་ཤེས་པ་བརྒྱད་ཅིག་ཅར་དུ་སྐྱེ། དེའི་རྗེས་སུ་རྗེས་ཐོབ་ཡེ་ཤེས་སྐྱེ། ལུས་རྟེན་ནི། སྒྲ་མི་སྙན་པ་དང་། ཟ་མ་མ་ནིང་མ་གཏོགས་པའི་མི་དང་འདོད་ལྷའི་རྟེན་ལ་སྐྱེ། སེམས་རྟེན་ནི་བསམ་གཏན་གྱི་དངོས་གཞི་ལ་བརྟེན་ཏེ། དེ་ལྟར་རྣམ་བཤད་ལས་གསུངས་པའི་ཕྱིར། གསུམ་པ་རྩོད་པ་སྤོང་བ་ལ། གང་ཟག་གི་བདག་མེད་ལ་རྩེ་གཅིག་ཏུ་མཉམ་པར་བཞག་པའི་ཉན་ཐོས་ཀྱི་མཐོང་ལམ་མཉམ་གཞག་ཡེ་ཤེས་དེ། ཉན་ཐོས་ཀྱི་མཉམ་གཞག་ཡེ་ཤེས་མ་ཡིན་པར་ཐལ། དེ་འདྲའི་བྱང་སེམས་ཀྱི་རྒྱུད་ཀྱི་དེ་ཐེག་ཆེན་གྱི་མཉམ་གཞག་ཡེ་ཤེས་མ་ཡིན་པའི་ཕྱིར་ན་མ་ཁྱབ། འོ་ན། གང་ཟག་གི་བདག་མེད་ལ་རྩེ་གཅིག་ཏུ་མཉམ་པར་བཞག་པའི་ཉན་ཐོས་ཀྱི་མཐོང་ལམ་བར་ཆད་མེད་ལམ་དང་རྣམ་གྲོལ་ལམ་མེད་པར་ཐལ། དེ་འདྲའི་ཐེག་ཆེན་གྱི་དེ་འདྲ་མེད་པའི་ཕྱིར། ཁྱབ་པ་ཁས། བྱས་པ་ལ་ཁོ་ན་རེ། དེ་འདྲའི་ཐེག་ཆེན་གྱི་བར་ཆད་མེད་ལམ་ཡོད་པར་ཐལ། གང་ཟག་གི་བདག་འཛིན་གྱི་དངོས་གཉེན་དུ་གྱུར་པའི་ཐེག་ཆེན་གྱི་བར་ཆད་མེད་ལམ་ཡོད་པའི་ཕྱིར་ན་མ་ཁྱབ། དེར་ཐལ། དམན་ལམ་སྔོན་མ་སོང་གི་རྒྱུན་མཐའི་བར་ཆད་མེད་ལམ་དེ་དེ་ཡིན་པའི་ཕྱིར། དེར་ཐལ། དེས་སྒྲིབ་གཉིས་ཅིག་ཅར་དུ་སྤོང་བའི་ཕྱིར། ཁ་

---

^{[མ་དཔེ་གཟིགས་ན་འདིར་གནོན།]}

ཅིག །ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་ཀྱིས་ཁོ་རང་རྟོགས་པར་ཐལ། དེས་བྱང་ཆུབ་སེམས་དཔའི་ལམ་རྟོགས་པའི་ཕྱིར། དེར་ཐལ། དེས་བྱང་ཆུབ་སེམས་དཔའི་ལམ་ཤེས་པའི་ཕྱིར། དེར་ཐལ། དེ་བྱང་སེམས་ཀྱི་ལམ་ཤེས་པའི་ལམ་ཤེས་ཡིན་པའི་ཕྱིར་ན་མ་ཁྱབ། འོ་ན། བྱང་ཆུབ་སེམས་དཔའི་ལམ་ཤེས་པ་དང་ལམ་ཤེས་ཀྱི་གཞི་མཐུན་ཡིན་ན། བྱང་ཆུབ་སེམས་དཔའི་ལམ་ཤེས་པའི་ལམ་ཤེས་ཡིན་དགོས་པར་ཐལ། ཚུར་ལ་དེ་ལྟར་དགོས་པའི་ཕྱིར། རྟགས་ཁས། འདོད་ན། གང་ཟག་གི་བདག་མེད་མངོན་སུམ་དུ་རྟོགས་པའི་རྣམ་མཁྱེན་ཆོས་ཅན། དེར་ཐལ། དེའི་ཕྱིར། ཁོ་ན་རེ། སློབ་ལམ་ན་བདེན་གཉིས་ཅིག་ཅར་དུ་མངོན་སུམ་དུ་རྟོགས་པའི་བློ་ཡོད་པར་ཐལ། དེ་ལྟར་མངོན་སུམ་དུ་རྟོགས་པའི་གང་ཟག་ཡོད་པའི་ཕྱིར་ན་མ་ཁྱབ། དེར་ཐལ། ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་ལ་གནས་པའི་གང་ཟག་དེ་དེ་ཡིན་པའི་ཕྱིར། དེར་ཐལ། དེའི་རྒྱུད་ཀྱི་མཐོང་ལམ་སྡུག་བསྔལ་ཆོས་བཟོད་ཀྱིས་སྟོང་ཉིད་རྟོགས་པ་དང་། དེའི་རྒྱུད་ཀྱི་མཐོང་ལམ་དེ་མྱོང་བྱེད་ཀྱི་རང་རིག་གིས་མཐོང་ལམ་དེ་མངོན་སུམ་དུ་རྟོགས་པ་དུས་མཉམ་དུ་ཡོད་པའི་ཕྱིར། ཁ་ཅིག །ཁམས་གོང་མའི་རྟེན་ལ་ཐེག་ཆེན་གྱི་མཐོང་ལམ་དངོས་སུ་གསར་དུ་སྐྱེ་བ་ཡོད་པར་ཐལ། དེའི་རྟེན་ལ་ལམ་ཤེས་དངོས་སུ་གསར་དུ་སྐྱེ་བ་ཡོད་པའི་ཕྱིར། དེར་ཐལ། ལམ་ཤེས་ཀྱི་མདོ་འཆད་པའི་འཁོར་དུ་དངོས་སུ་གསར་དུ་ལྷགས་པའི་འདོད་གཟུགས་ཀྱི་ལྷ་རྣམས་ཀྱི་རྒྱུད་ལ་ལམ་ཤེས་དངོས་སུ་གསར་དུ་སྐྱེ་རུང་དུ་བསྒྲུབ་པའི་ཆེད་དུ་དེ་བཞིན་གཤེགས་པའི་རང་འོད་ཀྱིས་ལྷ་དེ་རྣམས་མོག་མོག་པོར་མཛད་པའི་ཕྱིར། དེར་ཐལ། ལྷ་དེ་རྣམས་ཀྱི་རྒྱུད་ལ་ལམ་ཤེས་སྐྱེ་རུང་དུ་བསྒྲུབ་པའི་ཆེད་དུ་དེ་ལྟར་མཛད་པའི་ཕྱིར་ན་མ་ཁྱབ། དེར་ཐལ། དེའི་རྒྱུད་ལ་ལམ་ཤེས་སྐྱེ་རུང་དུ་སྒྲུབ་པར་མཛད་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར། དེ་ལྟ་མ་ཡིན་ན། དེ་འདྲའི་ལྷ་ཡིན་ན་ལམ་ཤེས་དངོས་སུ་གསར་དུ་སྐྱེ་བའི་རྟེན་ཡིན་དགོས་པར་ཐལ། འདོད་པའི་ཕྱིར། འདོད་ན། དེ་ཡིན་ན་ཐེག་ཆེན་སེམས་བསྐྱེད་རྒྱུད་ལ་ལྡན་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། མདོ་ལས། ལྷའི་བུ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དེ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །ཞེས་གསུངས་པ་མི་འཐད་པར་ཐལ། འདོད་པའི་ཕྱིར། འདོད་མི་ནུས། སྨྲས་པ། ཁུངས་ལྡན་ལུང་གི་རལ་པ་ཆེར་གཡོ་ཞིང་། །མི་བཟད་རིགས་པའི་སྡེར་མོའི་རྣོ་དཔལ་གྱིས། །རྒོལ་ངན་རི་དྭགས་སྙིང་ག་ཕུག་པ་ན། །གཞུང་ལུགས་གངས་ཀྱི་ས་འཛིན་སྤོ་ལ་མཛེས། །ཐབས་མང་འཕྲུལ་གྱི་ངལ་བརྒྱ་ལྷུར་བླངས་ནས། །མཐའ་བྲལ་རྒྱལ་ཁམས་ཉུལ་བར་མ་ཕྱིན་ཀྱང་། །ཤེས་བྱའི་སྣང་བརྙན་འགོག་མེད་འཆར་བའི་བློའི། །མེ་ལོང་འདི་འདྲ་དཔྱོད་ལྡན་མགུལ་བའི་རྒྱན། །དྲེགས་ལྡན་ཕལ་གྱི་སྤྱོད་ཡུལ་མ་ཡིན་ཞིང་། །ཟང་ཟིང་ནོར་གྱིས་བསྒྲུན་དུ་མ་མཆིས་པའི། །སྤྱད་པས་འཛད་མེད་ལེགས་བཤད་དངོས་པོ་འདིས། །འཇམ་མགོན་བླ་མའི་བཀའ་དྲིན་ཡང་ཡང་དྲན། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་ནི། ཤེས་བྱ་ཆོས་ཅན། ལམ་ཤེས་པ་ཉིད་ཀྱི་སྐབས་སུ། སེམས་ཅན་སྨིན་པར་བྱེད་པ་སོགས་ཚེ་འདི་དང་ཚེ་རབས་གཞན་གྱི་ཡོན་ཏན་དག་དང་ལྡན་པ། སྟོང་ཉིད་མངོན་སུམ་གྱིས་གསར་དུ་བསྒོམ་པར་བྱ་བ་ལ་ནི། མཐོང་བའི་ལམ་ཕན་ཡོན་ཆེན་པོ་ཞེས་བརྗོད་རིགས་ཏེ། སྐབས་འདིར་བྱང་ཆུབ་སེམས་དཔའི་ཆོས་ཤེས་པའི་བཟོད་པ་སོགས་སྐད་ཅིག་མ་བཞི་པོ་སོ་སོར་རེ་རེ་ལ་སྡུག་བསྔལ་ལ་སོགས་པའི་བདེན་པའི་ཆོས་ཉིད་དང་

---

^{[མ་དཔེ་གཟིགས་ན་འདིར་གནོན།]}

ཡུལ་ཡུལ་ཅན་དུ་འབྲེལ་བ་དག་དང་ལྡན་པ་ཕན་ཡོན་ཆེན་པོ་ཅན་དུ་བརྗོད་པའི་ཕྱིར། གཉིས་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ལ། སྡུག་བདེན་ནི། ཤེས་བྱ་ཆོས་ཅན། མཐོང་ལམ་ཤེས་བཟོད་སྐད་ཅིག་མ་བཅུ་དྲུག་རྣམ་པ་ཇི་ལྟ་བུར་བསྒོམ་པར་བྱ་བ་བཤད་དུ་ཡོད་དེ། འོག་ནས་འབྱུང་བ་རྣམས་ཀྱིས་སྟོན་པའི་ཕྱིར། གཉིས་པ་ནི། སྡུག་བདེན་གྱི་དེ་བཞིན་ཉིད་དང་། སངས་རྒྱས་ཏེ་དེ་མངོན་སུམ་དུ་རྟོགས་པའི་ཡེ་ཤེས་དེ་དག་དོན་དམ་པར་ཕན་ཚུན་རྟེན་དང་བརྟེན་པའི་དངོས་པོ་མེད་པ་དེའི་ཕྱིར། དོན་དམ་པར་རྟེན་དང་བརྟེན་པའི་རྣམ་གྲངས་ཀྱིས་ཁས་མི་ལེན་པ་དང་སྟེ། དེ་མེད་པར་མངོན་སུམ་དུ་རྟོགས་པའི་ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། དེའི་ངོ་སྐལ་གྱི་སྤང་བྱའི་ས་བོན་གྱི་དངོས་གཉེན་བྱེད་པའི་ཆོས་བཟོད་ཀྱི་ཡེ་ཤེས་ཡིན་པའི་ཕྱིར། ཆེན་པོ་སྟེ་གཟུགས་སོགས་བདེན་སྟོང་གི་སྡུག་བསྔལ་ཆོས་ཤེས་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྡུག་བསྔལ་ཆོས་བཟོད་ཀྱི་ངོ་སྐལ་གྱི་སྤང་བྱའི་ས་བོན་ལས་དངོས་སུ་གྲོལ་བའི་རྣམ་གྲོལ་ལམ་གྱི་ངོ་བོར་གནས་པའི་དེའི་ཡེ་ཤེས་ཡིན་པའི་ཕྱིར། སྡུག་བསྔལ་དོན་དམ་པར་འཇལ་བྱེད་ཀྱི་ཚད་མ་མེད་པ་ཉིད་དུ་མངོན་སུམ་དུ་རྟོགས་པའི་སྡུག་བསྔལ་རྗེས་བཟོད་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། དེའི་ངོ་སྐལ་གྱི་སྤང་བྱའི་ས་བོན་ལས་དངོས་སུ་གྲོལ་བའི་རྣམ་གྲོལ་ལམ་ཡིན་པའི་ཕྱིར། སྡུག་བསྔལ་དོན་དམ་པར་མཚན་མ་མེད་པར་མངོན་སུམ་དུ་རྟོགས་པའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྡུག་བསྔལ་རྗེས་བཟོད་ཀྱི་ངོ་སྐལ་གྱི་སྤང་བྱ་ལས་དངོས་སུ་གྲོལ་བའི་རྣམ་གྲོལ་ལམ་གྱི་ངོ་བོར་གནས་པའི་སྡུག་བསྔལ་རྗེས་ཤེས་ཀྱི་ཡེ་ཤེས་ཡིན་པའི་ཕྱིར། ཀུན་འབྱུང་གི་བཞི་ནི། ཀུན་འབྱུང་དོན་དམ་པར་རྟག་ཆད་ཀྱི་མཐའ་མེད་པར་མངོན་སུམ་དུ་

---

^{[མ་དཔེ་གཟིགས་ན་འདིར་གནོན།]}

རྟོགས་པའི་ཀུན་འབྱུང་ཆོས་བཟོད་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། རྟགས་སྔར་བཞིན། ཀུན་འབྱུང་ཆོས་བཟོད་དེར་གནས་པའི་རྣལ་འབྱོར་པ་གཟུགས་ལ་སོགས་པ་ལ་སངས་རྒྱས་ཉིད་ཀྱི་རང་བཞིན་བདེན་སྟོང་དུ་ངེས་པར་འཛིན་པའི་ཀུན་འབྱུང་ཆོས་ཤེས་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། རྟགས་རིགས་འགྲེ། ཀུན་འབྱུང་དོན་དམ་པར་བླང་བྱ་དང་དོར་བར་བྱར་མེད་པར་མངོན་སུམ་དུ་རྟོགས་པའི་ཀུན་འབྱུང་རྗེས་བཟོད་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། རྟགས་རིགས་འགྲེ། བྱམས་པ་ལ་སོགས་པའི་ཚད་མེད་བཞི་སྒོམ་པའི་ཡོན་ཏན་དང་ལྡན་པའི་ཀུན་འབྱུང་རྗེས་ཤེས་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། རྟགས་རིགས་འགྲེ། འགོག་བདེན་གྱི་བཞི་ནི། གཟུགས་སོགས་བདེན་སྟོང་གི་སྟོང་ཉིད་མངོན་སུམ་དུ་རྟོགས་པའི་འགོག་པ་ཆོས་བཟོད་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། དགེ་བའི་རྩ་བའི་འབྲས་བུ་སངས་རྒྱས་ཉིད་འཐོབ་པའི་ཕན་ཡོན་གྱི་འགོག་པ་ཆོས་ཤེས་ཆོས་ཅན། དེའི་རྣམ་པ་ཡིན་ཏེ། འགོག་པ་རྗེས་བཟོད་དུ་གཉེན་པོ་རྣམ་པར་བྱང་བའི་རིགས་ཀུན་ཡོངས་སུ་བསྡུས་པའི་ཡོན་ཏན་དང་ལྡན་པའི་འགོག་པ་རྗེས་བཟོད་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། ཕྱིའི་འཚེ་བ་ཉམ་ང་བ་དང་། ནང་གི་འཚེ་བ་རླུང་མཁྲིས་སོགས་ནད་ཀུན་སེལ་བའི་འགོག་པ་རྗེས་ཤེས་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། ལམ་བདེན་གྱི་བཞི་ནི། མྱ་ངན་ལས་འདས་པ་ལ་བདེན་པར་འཛིན་པའི་བདེན་འཛིན་གྱི་སྤྲོས་པ་ཞི་བ་ཉིད་ཀྱི་ལམ་ཆོས་བཟོད་ཀྱི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། ལམ་ཆོས་ཤེས་ལ་གནས་པའི་རྣལ་འབྱོར་པ་ལ་སངས་རྒྱས་རྣམས་ཀྱིས་སྲུང་སྐྱོབ་མཛད་པའི་ཕན་ཡོན་ཅན་གྱི་ལམ་ཆོས་ཤེས་ཀྱི་ཡེ་ཤེས་ཆོས་ཅན། སྲོག་མི་གཅོད་

---

^{[མ་དཔེ་གཟིགས་ན་འདིར་གནོན།]}

པ་ལ་སོགས་པ་མི་དགེ་བཅུ་སྤོང་བའི་དགེ་བཅུ་རྣམ་ཀུན་མངོན་སུམ་དུ་མཁྱེན་པ་ཐོབ་པའི་ཚུལ་ཏེ་རྒྱུ་ལ་ནི་བདག་ཉིད་གནས་ཏེ་སེམས་ཅན་གཞན་དག་དེ་ལ་འགོད་པའི་ཡེ་ཤེས་ཆོས་ཅན། སྦྱིན་པ་ལ་སོགས་པའི་ཕྱིན་དྲུག་རྫོགས་པའི་བྱང་ཆུབ་ཏུ་བསྔོ་བར་བྱེད་པའི་ཡོན་ཏན་དང་ལྡན་པའི་ཐེག་ཆེན་གྱི་མཐོང་ལམ་རྗེས་ཤེས་ཆོས་ཅན། དོན་བསྡུ་ནི། ཤེས་བྱ་ཆོས་ཅན། བཅུ་དྲུག་སྐྱེ་ཚུལ་ཡོད་དེ། ལམ་ཤེས་ཉིད་ཀྱི་སྐབས་སུ་སྐད་ཅིག་མ་བཅུ་དྲུག་དེ་སྟན་ཐོག་གཅིག་ཏུ་བར་མ་ཆད་དུ་སྐྱེ་བའི་ཕྱིར། གསུམ་པ་འགྲེལ་པ་ལ། རྒྱས་པར་བཤད་པ་དང་། དོན་བསྡུ་བ་གཉིས། དང་པོ་ལ། བཞི་ཡོད་པའི་སྡུག་བསྔལ་བདེན་པ་ལ་རྒྱས་བཤད་དང་། དོན་བསྡུ་གཉིས་ལས། དང་པོ་ལ། ཆོས་བཟོད་ཀྱི་རྣམ་པ་ནི། ཤེས་བྱ་ཆོས་ཅན། དོན་དམ་པའི་ཚུལ་ཉིད་ཀྱིས་སྡུག་བདེན་གྱི་དེ་བཞིན་ཉིད་དང་། སངས་རྒྱས་ཏེ་དེ་མངོན་སུམ་དུ་རྟོགས་པའི་ཡེ་ཤེས་དེ་དག་དོན་དམ་པར་ཕན་ཚུན་རྟེན་དང་བརྟེན་པའི་རྣམ་གྲངས་ཀྱིས་གནས་པར་ཁས་མི་ལེན་པ་ཡིན་ཏེ། དོན་དམ་པར་དེ་དག་ལ་རྟེན་དང་བརྟེན་པའི་དངོས་པོ་སྟེ་རང་བཞིན་མེད་པ་དེའི་ཕྱིར། ཆོས་ཤེས་ནི། གཟུགས་ལ་སོགས་པ་དོན་དམ་པར་བདེན་སྟོང་ཆོས་ཀྱི་དབྱིངས་ཀྱི་ངོ་བོ་ཉིད་ཀྱིས་དེའི་ཡུལ་ཅན། ཤེར་ཕྱིན་ཡང་ཆེན་པོ་ཉིད་དང་ལྡན་པའི་སྡུག་བསྔལ་ཆོས་ཤེས་ཀྱི་ཡེ་ཤེས་ཆོས་ཅན། རྟགས་གསལ་སྔར་ལྟར། རྗེས་བཟོད་ནི། ཆོས་ཤེས་ལ་བཤད་པ་དེ་བཞིན་དུ་གཟུགས་སོགས་དེ་དག་དོན་དམ་པར་འཇལ་བྱེད་ཀྱི་ཚད་མ་མེད་པ་ཉིད་དུ་མངོན་སུམ་དུ་རྟོགས་པའི་སྡུག་བསྔལ་རྗེས་བཟོད་ཀྱི་ཡེ་ཤེས་ཆོས་ཅན། རྗེས་ཤེས་ནི། སྔ་མ་བཞིན་དུ་ནམ་མཁའ་ཚད་མེད་པ་ཉིད་ཀྱིས་སྡུག་བསྔལ་དེ་དག་དོན་དམ་པར་ཚད་མེད་པར་མངོན་སུམ་དུ་རྟོགས་པའི་རྗེས་ཤེས་ཀྱི་ཡེ་ཤེས་ཆོས་ཅན།

---

^{[མ་དཔེ་གཟིགས་ན་འདིར་གནོན།]}

གཉིས་པ་ནི། སྡུག་བསྔལ་ཆོས་བཟོད་སོགས་བཞི་ཆོས་ཅན། སྡུག་བསྔལ་གྱི་བདེན་པའི་ཆོས་ཉིད་ཀྱི་རྣམ་པ་ཅན་དག་ཡིན་ཏེ། ཆོས་ཉིད་མངོན་སུམ་དུ་རྟོགས་པ་ཞེས་བྱ་བ་དེ་ལྟ་བུའི་ཡེ་ཤེས་སྔར་བཤད་ཟིན་པ་དེ་ལྟར་ཡིན་པའི་ཕྱིར། གཉིས་པ་ཀུན་འབྱུང་བདེན་པ་ལ་རྒྱས་བཤད་དང་། དོན་བསྡུ་གཉིས། དང་པོ་ལ། ཆོས་བཟོད་ནི། ཟག་བཅས་ཀྱི་རྒྱུས་བསྡུས་པའི་གཟུགས་ལ་སོགས་པ་ལ་དོན་དམ་པར་ངོ་བོ་ཉིད་མེད་པ་ཉིད་ཀྱིས་རྟག་པ་དང་ཆད་པའི་མཐའ་ཉིད་ལ་སོགས་པ་མེད་པ་མངོན་སུམ་དུ་རྟོགས་པའི་ཀུན་འབྱུང་ཆོས་བཟོད་ཀྱི་ཡེ་ཤེས་ཆོས་ཅན། ཆོས་ཤེས་ནི། ཀུན་འབྱུང་ཆོས་ཤེས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་རྣལ་འབྱོར་པ་ནི་ཆོས་ཀྱི་དབྱིངས་ཀྱི་ངོ་བོ་ཉིད་ཀྱི་གཟུགས་ལ་སོགས་པ་ལ་དེ་བཞིན་གཤེགས་པ་ཉིད་ཀྱི་རང་བཞིན་བདེན་སྟོང་དུ་ངེས་པར་འཛིན་པའི་ཀུན་འབྱུང་ཆོས་ཤེས་ཀྱི་ཡེ་ཤེས་ཆོས་ཅན། རྗེས་བཟོད་ནི། སྔ་མ་གཉིས་ལས་བཤད་པ་དེ་བཞིན་དུ་ཤེར་ཕྱིན་དེའི་རྒྱུན་དེ་ལ་གནས་པ་ནི་ཆོས་ཐམས་ཅད་ལ་དོན་དམ་པར་བླང་བ་དང་དོར་བ་མེད་པར་སྒོམ་པ་ལ་སོགས་པ་ཀུན་འབྱུང་རྗེས་བཟོད་ཀྱི་ཡེ་ཤེས་ཆོས་ཅན། རྗེས་ཤེས་ནི། དོན་དམ་པར་ངོ་བོ་ཉིད་མེད་པར་མོས་པ་སྔོན་དུ་འགྲོ་བའི་ཚད་མེད་པ་བཞི་བསྒོམ་པར་བྱའོ་སྟེ། དེ་ལྟར་སྒོམ་པའི་ཡོན་ཏན་དང་ལྡན་པའི་ཀུན་འབྱུང་རྗེས་ཤེས་ཀྱི་ཡེ་ཤེས་ཆོས་ཅན། གཉིས་པ་ནི། ཆོས་བཟོད་སོགས་བཞི་ཆོས་ཅན། ཀུན་འབྱུང་གི་བདེན་པའི་ཆོས་ཉིད་ཀྱི་རྣམ་པ་དག་ཡིན་ཏེ། ཀུན་འབྱུང་གི་ཆོས་ཉིད་མངོན་སུམ་དུ་རྟོགས་པ་ཞེས་བྱ་བ་དེ་ལྟ་བུའི་ཡེ་ཤེས་སྔར་བཤད་ཟིན་པའི་ཕྱིར། གསུམ་པ་འགོག་བདེན་ལ། རྒྱས་བཤད་དང་། དོན་བསྡུ་གཉིས། དང་པོ་ལ། ཆོས་བཟོད་ནི། གཟུགས་ལ་སོགས་པའི་ངོ་བོ་གཉུག་མ་དང་པོ་ནས་བདེན་པར་གྲུབ་པའི་རང་བཞིན་ཁོ་ནས་སྟོང་པ་ཉིད་མངོན་སུམ་དུ་རྟོགས་པའི་འགོག་པ་

---

^{[མ་དཔེ་གཟིགས་ན་འདིར་གནོན།]}

ཆོས་བཟོད་ཀྱི་ཡེ་ཤེས་ཆོས་ཅན། ཆོས་ཤེས་ནི། ཆོས་ཀྱི་དབྱིངས་དང་མཉམ་པའི་དགེ་བའི་རྩ་བ་རྣམས་ཀྱི་འབྲས་བུ་དེ་བཞིན་གཤེགས་པ་ཉིད་འཐོབ་པའི་འགོག་པ་ཆོས་བཟོད་ཀྱི་ཡེ་ཤེས་ཆོས་ཅན། རྗེས་བཟོད་ནི། འགོག་པ་རྗེས་བཟོད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པར་གཉེན་པོ་རྣམ་བྱང་གི་རིགས་རྣམས་རྣམ་པ་ཐམས་ཅད་དུ་བསྡུས་པས་འགོག་པ་རྗེས་བཟོད་ཀྱི་ཡེ་ཤེས་ཆོས་ཅན། རྗེས་ཤེས་ནི། འགོག་པ་རྗེས་ཤེས་དེ་ཉིད་ཀྱི་ཕྱི་དང་ནང་གི་འཚེ་བ་རབ་ཏུ་ཞི་བས་ཡོན་ཏན་དང་ལྡན་པའི་འགོག་པ་རྗེས་ཤེས་ཀྱི་ཡེ་ཤེས་ཆོས་ཅན། གཉིས་པ་ནི། འགོག་པ་ཆོས་བཟོད་སོགས་བཞི་ཆོས་ཅན། འགོག་པའི་བདེན་པའི་ཆོས་ཉིད་ཀྱི་རྣམ་པ་དག་ཡིན་ཏེ། འགོག་པ་ཆོས་ཉིད་མངོན་སུམ་དུ་རྟོགས་པ་ཞེས་བྱ་བ་དེ་ལྟ་བུའི་ཡེ་ཤེས་བསྟན་ཟིན་པའི་ཕྱིར། བཞི་པ་ལམ་བདེན་ལ་རྒྱས་བཤད་དང་དོན་བསྡུ་གཉིས། དང་པོ་ལ། ཆོས་བཟོད་ནི། དོན་དམ་པར་ངོ་བོ་ཉིད་མེད་པ་སྒོམ་པ་ཁོ་ནས་གཟུགས་ལ་སོགས་པ་དང་། མྱ་ངན་ལས་འདས་པ་ལ་བདེན་པར་མངོན་པར་ཞེན་པ་ཞི་བའི་ཆོས་བཟོད་ཀྱི་ཡེ་ཤེས་ཆོས་ཅན། ཆོས་ཤེས་ནི། ཆོས་ཤེས་ཀྱི་ཡེ་ཤེས་དེ་ཤེས་རབ་དང་ཐབས་ལ་མཁས་པ་ལ་ཞུགས་པ་ལ་ལྷས་བྱས་པ་དང་། འབྱུང་བས་བསྒྱུར་བ་དང་། ནང་གི་བདག་ཉིད་ཅན་གྱི་བར་ཆད་གསུམ་སངས་རྒྱས་རྣམས་ཀྱིས་སྲུང་བ་དང་། བསྐྱབ་པ་དང་སྦ་བ་དག་མཛད་པའི་ཕན་ཡོན་ཅན་གྱི་ལམ་ལ་ཆོས་ཤེས་ཀྱི་ཡེ་ཤེས་ཆོས་ཅན། རྗེས་བཟོད་ནི། སངས་རྒྱས་ཉིད་མངོན་པར་འདོད་པས། བདག་ཉིད་སྲོག་གཅོད་པ་སྤང་བ་ལ་སོགས་པ་རྣམ་པ་ཐམས་ཅད་མཁྱེན་པ་ཉིད་ཀྱི་རྒྱུ་ཕར་ཕྱིན་ལ་གནས་ནས། དེ་ཉིད་ལ་གཞན་དག་འགོད་པའི་ཡོན་ཏན་དང་ལྡན་པའི་རྗེས་བཟོད་ཀྱི་ཡེ་ཤེས་ཆོས་ཅན། རྗེས་ཤེས་ནི། སྦྱིན་པ་ལ་སོགས་པའི་དགེ་བ་མི་ཟད་པར་བྱེད་པར་འདོད་པས་ཡང་དག་པར་རྫོགས་པའི་བྱང་

---

^{[མ་དཔེ་གཟིགས་ན་འདིར་གནོན།]}

ཆུབ་ཏུ་བསྔོ་བར་བྱ་བ་སྟེ་བྱེད་པའི་ཡོན་ཏན་དང་ལྡན་པའི་ལམ་ལ་རྗེས་ཤེས་ཀྱི་ཡེ་ཤེས་ཆོས་ཅན། གཉིས་པ་ནི། བཤད་མ་ཐག་པ་དེ་ལྟ་བུའི་ཆོས་བཟོད་སོགས་བཞི་ཆོས་ཅན། ལམ་གྱི་བདེན་པའི་ཆོས་ཉིད་ཀྱི་རྣམ་པ་ལ་དམིགས་པ་དག་ཡིན་ཏེ། ལམ་བདེན་གྱི་ཆོས་ཉིད་མངོན་སུམ་དུ་རྟོགས་པ་ཞེས་བྱ་བའི་ཐེག་ཆེན་གྱི་བདེན་པ་མངོན་རྟོགས་ཡིན་པའི་ཕྱིར། གཉིས་པ་དོན་བསྡུ་ནི། བཅུ་དྲུག་པོ་དེ་ལྟ་བུ་ནི་ཆོས་ཅན། ཁྱོད་ལམ་ཤེས་པ་ཉིད་ཀྱི་སྐབས་སུ། སྐད་ཅིག་མ་སྟེ་མཉམ་གཞག་ཐུན་གཅིག་དག་ཡིན་ཏེ། ཁྱོད་མཉམ་གཞག་ཐུན་གཅིག་ལས་སྐྱེས་པ་རིགས་པས་འགྲུབ་པའི་ཕྱིར། གསུམ་པ་ལ། ཁས་བླངས་བརྗོད་པ་དང་། དེ་དགག་པའོ། །དང་པོ་ནི། ཤེས་བྱ་ཆོས་ཅན། ཁ་ཅིག་ནི་འདིར་སྐད་ཅིག་མ་མདོར་བསྟན་གྱི་ཚིག་ལེའུར་བྱས་པའི་བརྗོད་དོན་ཉེ་བར་མཚོན་པ་སྟོན་པ་ལྷུར་ལེན་པའི་གཞུང་རྒྱས་བཤད་ཀྱི་ཚིག་དང་། དོན་དེ་དག་སྟོན་པའི་མདོའི་ཚིག་གིས་མཐོང་ལམ་ཤེས་བཟོད་ཀྱི་རྣམ་པའི་དོན་དངོས་སུ་མ་བཤད་པར། མཐོང་བའི་ལམ་གྱི་སྐད་ཅིག་མ་བཅུ་དྲུག་རྗེས་ཀྱི་གནས་སྐབས་སུ་འབྱུང་བའི་ཕན་ཡོན་དངོས་སུ་བསྟན་པས་ཉེ་བར་མཚོན་པ་ཉི་ཚེ་མཛད་པར་ཟད་པར་ཐལ། དེར་མ་ཟད་སྔར་བཤད་པ་དང་མ་བཤད་པའི་ངེས་པར་འབྱེད་པའི་ཆ་དང་མཐུན་པ་ལ་སོགས་པ་མཐོང་སྒོམ་སྟོན་པའི་དོན་གྱི་ཚིག་ལེའུར་བྱས་པ་རྣམས་སུའང་དེ་བཞིན་དུ་བལྟ་བར་བྱ་བ་ཡིན་པའི་ཕྱིར། ཞེས་ཟེར་རོ། །གཉིས་པ་ནི། སློབ་དཔོན་དབྱིག་གཉེན་དང་། དེ་དང་མཐུན་པ་གཞན་དག་ན་རེ། དེ་བཞིན་ཉིད་དང་ཞེས་སོགས་ཀྱི་གཞུང་དེ་དག་གིས་ནི་ཆོས་ཅན། མངོན་པར་རྟོགས་པའི་རིམ་པ་ཅུང་ཟད་ཀྱང་དངོས་སུ་མ་བསྟན་པར་ཐལ། མངོན་རྟོགས་ཀྱི་འཛིན་སྟངས་ཀྱི་རྣམ་པ་ཇི་ལྟར་སྒོམ་པའི་རིམ་པ་
ལ་སོགས་པ་དངོས་སུ་མ་བསྟན་པའི་ཕྱིར། ཤེས་བྱ་ཆོས་ཅན། ཉེས་པ་གཞན་ཡང་ཚིག་དོན་ལ་མ་ཞུགས་པ་ནི། དམིགས་པ་དང་ནི་རྣམ་པ་དང་། །ཞེས་བྱ་བ་ལ་སོགས་པའི་ཚིགས་སུ་བཅད་པའི་དོན་ཡང་ཇི་ལྟར་དྲང་སྟེ་དྲང་བ་མི་རིགས་པར་ཐལ། སྐབས་དང་པོའི་ངེས་འབྱེད་ཆ་མཐུན་གྱི་གཞུང་གིས་རྣམ་པ་མ་བསྟན་པའི་ཕྱིར། ཞེས་སེང་བཟང་ཟེར་རོ། །

ཐེག་ཆེན་གྱི་སྒོམ་ལམ་བཤད་པ།

---

^{[མ་དཔེ་གཟིགས་ན་འདིར་གནོན།]}

ཐེག་ཆེན་གྱི་སྒོམ་ལམ་བཤད་པ། གཉིས་པ་སྒོམ་ལམ་ལ། སྤྱིའི་མཚམས་སྦྱར་བ་དང་། སོ་སོའི་དོན་བཤད་པ་གཉིས། དང་པོ་ནི། མཐོང་ལམ་གྱི་རྗེས་སུ་སྒོམ་ལམ་འཆད་པའི་རྒྱུ་མཚན་ཡོད་དེ། མཐོང་བའི་ལམ་གྱི་མཇུག་ཐོགས་སུ་སྒོམ་པའི་ལམ་དེ་མ་ཐག་བརྗོད་པར་བྱ་བ་རིགས་པ་ཡིན་པ་ལས་ཏེ་དེ་ལྟར་བཤད་པའི་ཕྱིར། གཉིས་པ་ལ། སྒོམ་ལམ་གྱི་བྱེད་པ་དང་། བྱེད་པ་ཅན་གྱི་སྒོམ་ལམ་གཉིས། དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། རེ་ཞིག་སྒོམ་ལམ་དེའི་བྱེད་པ་འཆད་པའི་རྒྱུ་མཚན་ཡོད་དེ། སྒོམ་ལམ་ལས་སྒོམ་ལམ་གྱི་བྱེད་པ་བརྗོད་པར་བྱ་བ་ཉུང་བ་ཉིད་དང་། གདུལ་བྱ་འབྲས་བུ་ལ་གཞོལ་བ་ཉིད་དུ་རྒྱུ་ལ་ཞུགས་ཤིང་གཞུག་པའི་ཆེད་ཡིན་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། སྒོམ་ལམ་གྱི་བྱེད་པ་དྲུག་ལས་སྐྱེས་བུ་བྱེད་འབྲས་བཞི་ཡོད་དེ། བྱང་སེམས་སྒོམ་ལམ་པའི་སེམས་ཡོངས་སུ་དུལ་བ་དང་ང་རྒྱལ་མ་མཆིས་པའི་ཀུན་ནས་ཞི་བ་དང་། དེའི་མཐུས་དགེ་བའི་བཤེས་གཉེན་ཐམས་ཅད་ལ་འདུད་པ་དང་། དེའི་མཐུས་ཆགས་སོགས་ཉོན་མོངས་ཐམས་ཅད་ཀྱི་གཡུལ་ལས་རྒྱལ་བ་དང་། ཕ་རོལ་ཀྱི་གནོད་པ་བྱས་པས་ཀྱང་བརྫི་བ་མེད་པ་ཉིད་དང་ལྡན་པའི་ཡོན་ཏན་རྣམས་སུ་ཡོད་པའི་ཕྱིར། དེའི་རྒྱུ་མཐུན་གྱི་འབྲས་བུ་ཡོད་དེ། རྫོགས་པའི་བྱང་ཆུབ་ཐོབ་ནས་ཆོས་ཉིད་མངོན་སུམ་དུ་མཐོང་བ་དེ་དེ་ཡིན་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར། དེའི་བདག་པོའི་འབྲས་བུ་ཡོད་དེ། དེ་ལ་གནས་པའི་རྟེན་གྱི་ཡུལ་དང་ཕྱོགས་དེ་ལྷ་སོགས་ཀྱིས་མཆོད་པའི་གནས་ཉིད་དུ་བྱེད་པ་དེ་དེ་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །རང་ཐོབ་བྱེད་ཀྱི་ཐབས་སུ་གྱུར་པའི་ཐེག་ཆེན་གྱི་སྒོམ་ལམ་བསྒོམས་སྟོབས་ཀྱིས་ཐོབ་པའི་རྣམ་དཀར་གྱི་ཡོན་ཏན་ཐེག་ཆེན་གྱི་སྒོམ་ལམ་གྱི་བྱེད་པའི་མཚན་ཉིད་ཟེར་ན། ལོངས་སྐུའི་སེན་མོ་ཟངས་མདོག་ཆོས་ཅན། མཚན་ཉིད་དེར། ཐལ། མཚོན་བྱ་དེའི་ཕྱིར། འདོད་ན། རྣམ་དཀར་གྱི་ཡོན་ཏན་ཡིན་པར་ཐལ། འདོད་པའི་ཕྱིར། འདོད་ན། དགེ་བ་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། ལུང་མ་བསྟན་ཡིན་པའི་ཕྱིར། དེར་ཐལ། རྣམ་སྨིན་གྱི་འབྲས་བུ་ཡིན་པའི་ཕྱིར། ཁྱབ་པ་ཡོད་དེ། མཛོད་ལས། རྣམ་སྨིན་ལུང་དུ་མ་བསྟན་ཆོས། །ཞེས་གསུངས་པའི་ཕྱིར། ཁ་ཅིག །ཐེག་ཆེན་གྱི་སྒོམ་ལམ་ཐོབ་མྱོང་བའི་གང་ཟག་གི་རྒྱུད་ཀྱི་ཐེག་ཆེན་གྱི་སྒོམ་ལམ་བསྒོམས་སྟོབས་ཀྱིས་ཐོབ་པའི་སེམས་དཔའི་ཡོན་ཏན་དེའི་མཚན་ཉིད་ཟེར་ན། རྣམ་མཁྱེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། འདོད་ན། སེམས་དཔའི་ཡོན་ཏན་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །ཐེག་ཆེན་གྱི་སྒོམ་ལམ་བསྒོམས་སྟོབས་ཀྱིས་ཐོབ་པའི་ཡོན་ཏན་དེའི་མཚན་ཉིད་ཟེར་ན། མཚན་ཉིད་དེ་ཆོས་ཅན། ཁྱོད་ལམ་མ་ཞུགས་ན་མེད་པར་ཐལ། ཁྱོད་མཚོན་བྱ་དེ་ཡིན་པའི་ཕྱིར། འདོད་ན། དེ་ཡོད་པར་ཐལ། དེ་ན་ཐེག་ཆེན་གྱི་སྒོམ་ལམ་སྒོམ་པ་ཡོད་པ་གང་ཞིག །དེ་ཡོད་ན་དེ་བསྒོམས་པའི་ཕན་ཡོན་ཡོད་དགོས་པའི་ཕྱིར། དང་པོ་དེར་ཐལ། དེ་སྒོམ་པའི་གང་ཟག་ཡིན་ན་དེ་རང་རྒྱུད་ལ་བསྐྱེད་ནས་སྒོམ་པ་ཡིན་མི་དགོས་པའི་ཕྱིར། དེར་ཐལ།

---

^{[མ་དཔེ་གཟིགས་ན་འདིར་གནོན།]}

རྣམ་མཁྱེན་སྒོམ་པའི་གང་ཟག་ཡིན་ན་དེ་རང་རྒྱུད་ལ་བསྐྱེད་ནས་སྒོམ་པའི་གང་ཟག་ཡིན་མི་དགོས་པའི་ཕྱིར། དེར་ཐལ། མཁྱེན་གསུམ་སྒོམ་པའི་བྱང་སེམས་ཡོད་པའི་ཕྱིར། གཉིས་པ་རང་ལུགས་ནི། ཐེག་ཆེན་གྱི་སྒོམ་ལམ་ཐོབ་མྱོང་བའི་གང་ཟག་གི་རྒྱུད་ཀྱི་ཐེག་ཆེན་གྱི་སྒོམ་ལམ་བསྒོམས་སྟོབས་ཀྱིས་ཐོབ་པའི་ཡོན་ཏན་ཐེག་ཆེན་གྱི་སྒོམ་ལམ་གྱི་བྱེད་པའི་མཚན་ཉིད། གསུམ་པ་རྩོད་པ་སྤོང་བ་ལ། ཁོ་ན་རེ། ལམ་མ་ཞུགས་ན་ཐེག་ཆེན་གྱི་སྦྱོར་བ་བསྒོམས་སྟོབས་ཀྱིས་ཐོབ་པའི་ཡོན་ཏན་ཡོད་པར་ཐལ། དེ་ན་ཐེག་ཆེན་གྱི་སྒོམ་ལམ་བསྒོམས་སྟོབས་ཀྱིས་ཐོབ་པའི་ཡོན་ཏན་ཡོད་པའི་ཕྱིར། འདོད་ན། དེ་ན་ཐེག་ཆེན་གྱི་སྦྱོར་བའི་ཡོན་ཏན་ཡོད་པར་ཐལ། འདོད་པའི་ཕྱིར་ན་མ་ཁྱབ། འོ་ན། ལམ་མ་ཞུགས་ན་རྣམ་མཁྱེན་སྦྱོར་བའི་ཡོན་ཏན་ཡོད་པར་ཐལ། དེ་ན་རྣམ་མཁྱེན་སྦྱོར་བ་བསྒོམས་སྟོབས་ཀྱིས་ཐོབ་པའི་ཡོན་ཏན་ཡོད་པའི་ཕྱིར། ཁྱབ་པ་ཁས། དེར་ཐལ། དེ་ན་རྣམ་མཁྱེན་བསྒོམས་སྟོབས་ཀྱིས་ཐོབ་པའི་ཡོན་ཏན་ཡོད་པའི་ཕྱིར། དེར་ཐལ། དེ་ན་རྣམ་མཁྱེན་སྒོམ་པ་ཡོད་པ་གང་ཞིག །དེ་ཡོད་ན་དེ་ལ་བརྟེན་ནས་ཐོབ་པའི་ཡོན་ཏན་ཡོད་དགོས་པའི་ཕྱིར། དང་པོ་དེར་ཐལ། དེ་ན་དཀོན་མཆོག་གསུམ་སྒོམ་པ་ཡོད་པའི་ཕྱིར། གསུམ་པ་ནི། ཤེས་བྱ་ཆོས་ཅན། བྱང་སེམས་སྒོམ་ལམ་པས་ཐེག་ཆེན་གྱི་སྒོམ་ལམ་བསྒོམས་པའི་བྱེད་པ་ལ་རྣམ་པ་དྲུག་ཡོད་པ་ཡིན་ཏེ། བྱང་སེམས་སྒོམ་ལམ་པས་ཐེག་ཆེན་གྱི་སྒོམ་ལམ་བསྒོམས་སྟོབས་ཀྱིས་རྣམ་པ་ཐམས་ཅད་དུ་སེམས་ལ་ལམ་གོང་མ་སྐྱེད་པ་ལ་རང་དབང་ཉིད་དུ་སྟེ་གཞན་གྱི་དྲིང་ལ་མི་ལྟོས་པར་བྱེད་པའི་ཡོན་ཏན་དང་། དེ་བསྒོམས་པས་ང་རྒྱལ་ཐམས་ཅད་བཅོམ་པའི་དགེ་བའི་བཤེས་གཉེན་ལ་སོགས་པ་ཡོན་ཏན་གོང་མ་དང་སྐྱེ་བོ་ཐམས་ཅད་ལ་གུས་པས་འདུད་པ་དང་། དེ་བསྒོམས་པས་ཉོན་མོངས་པའི་དབང་དུ་མི་འགྱུར་བར་འདོད་ཆགས་ལ་སོགས་པ་ཐམས་ཅད་

---

^{[མ་དཔེ་གཟིགས་ན་འདིར་གནོན།]}

ཟིལ་གྱིས་གནོན་པའི་ཡོན་ཏན་དང་། བྱང་སེམས་སྒོམ་ལམ་པ་ཕ་རོལ་གྱིས་བྱས་པའི་དུག་མཚོན་སོགས་གནོད་པ་རྗེས་སུ་སྒྲུབ་པའི་ཡུལ་མ་ཡིན་པ་ཉིད་ཀྱི་ཡོན་ཏན་དང་། རང་སྟོབས་ཀྱིས་ཡང་དག་པར་རྫོགས་པའི་བྱང་ཆུབ་སྒྲུབ་པའི་ཡོན་ཏན་དང་། དེ་འདྲའི་བྱང་སེམས་བཞུགས་པའི་རྟེན་གྱི་ཡུལ་ཏེ་ས་ཕྱོགས་དེ་ཡང་སྐྱེ་བོ་ཀུན་གྱིས་ཕྱག་དང་མཆོད་པ་བྱ་བ་ཉིད་དུ་བྱེད་པ་ཞེས་བྱ་བའི་ཡོན་ཏན་རྣམས་སུ་ཡོད་པའི་ཕྱིར། གཉིས་པ་བྱེད་པ་ཅན་གྱི་ཐེག་ཆེན་གྱི་སྒོམ་ལམ་ལ། དབྱེ་བ་བསྟན་ཏེ་མཚམས་སྦྱར་བ་དང་། སོ་སོའི་ངོ་བོ་གཉིས། དང་པོ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། ཤེས་བྱ་ཆོས་ཅན། ཐེག་ཆེན་གྱི་སྒོམ་ལམ་གྱི་བྱེད་པ་བསྟན་པའི་འོག་ཏུ། དེའི་སྒོམ་པའི་ལམ་འཆད་པ་ཡིན་ལ། དེ་ཡང་རྣམ་པ་གཉིས་ཡོད་དེ། རྟོག་པའི་ཟག་པ་དང་བཅས་པ་དང་། རྟོག་པའི་ཟག་པ་མེད་པའི་ཐེག་ཆེན་གྱི་སྒོམ་ལམ་གྱི་བྱེ་བྲག་གིས་ཏེ་དབྱེ་བ་རྣམ་པ་གཉིས་སུ་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །ཐེག་ཆེན་གྱི་མཐོང་ལམ་རྫོགས་རྗེས་སུ་བྱུང་ཞིང་། ཐེག་ཆེན་གྱི་མི་སློབ་ལམ་མ་སྐྱེས་གོང་གི་མཁྱེན་པ་དེ་ཐེག་ཆེན་གྱི་སྒོམ་ལམ་གྱི་མཚན་ཉིད་ཟེར་ན། ཐེག་ཆེན་གྱི་མཐོང་ལམ་གྱི་རྒྱུར་གྱུར་པའི་ཐེག་ཆེན་གྱི་སྒོམ་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། ཐེག་ཆེན་གྱི་མཐོང་ལམ་རྫོགས་རྗེས་སུ་མ་བྱུང་བར་ཐལ། དེའི་སྔ་རོལ་ཏུ་བྱུང་བའི་ཕྱིར། དེར་ཐལ། དེའི་རྒྱུ་ཡིན་པའི་ཕྱིར། མཚན་ཉིད་དེ་ལ་སྐྱོན་འཕེན་པ་ཁ་ཅིག །མཐོང་ལམ་རྫོགས་རྗེས་སུ་བྱུང་ཞིང་། མི་སློབ་ལམ་མ་སྐྱེས་གོང་གི་མཁྱེན་པ་དེ་སྒོམ་ལམ་གྱི་མཚན་ཉིད་དུ་འཇོག་རིགས་པར་ཐལ། དམ་བཅའ་འཐད་པའི་ཕྱིར། འདོད་ན། ཉན་ཐོས་དགྲ་བཅོམ་གྱི་རྟོགས་པ་སྔོན་དུ་སོང་བའི་བྱང་སེམས་

---

^{[མ་དཔེ་གཟིགས་ན་འདིར་གནོན།]}

ཀྱི་སྒོམ་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མི་འཐད་པར་ཐལ། མི་སློབ་ལམ་སྔོན་དུ་སོང་བའི་མཁྱེན་པ་ཡིན་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། ཟེར་ན། འོ་ན། དེ་འདྲའི་སྒོམ་ལམ་པ་དེ་མི་སློབ་པ་ཡིན་པར་ཐལ། དེ་འདྲའི་སྒོམ་ལམ་དེ་མི་སློབ་ལམ་ཡིན་པའི་ཕྱིར། རྟགས་ཁས། འདོད་ན། དེ་ཆོས་ཅན། མི་སློབ་པ་མ་ཡིན་པར་ཐལ། སློབ་པ་ཡིན་པའི་ཕྱིར། དེར་ཐལ། སློབ་བཞིན་པ་ཡིན་པའི་ཕྱིར། དེར་ཐལ། ཐེག་ཆེན་གྱི་ལམ་ལ་སློབ་བཞིན་པ་ཡིན་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། ཞེས་ཟེར་ཏེ་དཔྱད་པར་བྱའོ། །ཁ་ཅིག །བདག་མེད་མངོན་སུམ་དུ་རྟོགས་ཟིན་གོམས་པར་བྱེད་པའི་ཏིང་འཛིན་ཤེས་རབ་མཚུངས་ལྡན་དང་བཅས་པ་ཐེག་ཆེན་སྒོམ་ལམ་གྱི་མཚན་ཉིད་ཟེར་ན། བྱང་སེམས་སྒོམ་ལམ་པའི་རྒྱུད་ཀྱི་ཀུན་རྫོབ་སེམས་བསྐྱེད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། མངོན་སུམ་ཡིན་པར་ཐལ། འདོད་པའི་ཕྱིར། འདོད་ན། དེ་བྱང་འཕགས་ཀྱི་རྒྱུད་ཀྱི་མངོན་སུམ་ཡིན་པར་ཐལ། དེ་མངོན་སུམ་ཡིན་པའི་ཕྱིར། འདོད་ན། རྣམ་མཁྱེན་བྱང་འཕགས་ཀྱི་རྒྱུད་ཀྱི་མངོན་སུམ་གྱི་སྤྱོད་ཡུལ་ཡིན་པར་ཐལ། བྱང་སེམས་སྒོམ་ལམ་པའི་རྒྱུད་ཀྱི་ཀུན་རྫོབ་སེམས་བསྐྱེད་མངོན་སུམ་ཡིན་པ་གང་ཞིག །རྣམ་མཁྱེན་དེ་དེའི་ཡུལ་ཡིན་པའི་ཕྱིར། གཉིས་པ་དེར་ཐལ། རྫོགས་པའི་བྱང་ཆུབ་དེ་དེའི་ཡུལ་ཡིན་པའི་ཕྱིར། མ་གྲུབ་ན། དེ་ཆོས་ཅན། རྫོགས་པའི་བྱང་ཆུབ་ཁྱོད་ཀྱི་ཡུལ་ཡིན་པར་ཐལ། ཁྱོད་ཀུན་རྫོབ་སེམས་བསྐྱེད་ཡིན་པའི་ཕྱིར། གཞན་ཡང་། དེ་མི་འཐད་པར་ཐལ། ཐེག་ཆེན་སྒོམ་ལམ་དང་རྟོག་པའི་གཞི་མཐུན་ཡོད་པའི་ཕྱིར། དེར་ཐལ། ཡང་དང་ཡང་དུ་སེམས་པ་དང་། །འཇལ་དང་ངེས་རྟོག་སྒོམ་པའི་ལམ། །ཞེས་གསུངས་པའི་ཕྱིར། ཁ་ཅིག །ཐེག་ཆེན་གྱི་སྒོམ་ལམ་གང་ཞིག །མཉམ་གཞག་

---

^{[མ་དཔེ་གཟིགས་ན་འདིར་གནོན།]}

ཡེ་ཤེས་ཀྱི་ངོ་བོར་གྱུར་པ་ཐེག་ཆེན་ཟག་མེད་སྒོམ་ལམ་གྱི་མཚན་ཉིད། དེ་གང་ཞིག །རྗེས་ཐོབ་ཡེ་ཤེས་ཀྱི་ངོ་བོར་གྱུར་པ་ཐེག་ཆེན་ཟག་བཅས་སྒོམ་ལམ་གྱི་མཚན་ཉིད་ཟེར་ན། གཟུགས་བདེན་སྟོང་སྒྱུ་མ་ལྟ་བུར་སྣང་བའི་ས་གཉིས་པའི་ཡེ་ཤེས་ཆོས་ཅན། མཚན་ཉིད་དང་པོ་དེར་ཐལ། མཚོན་བྱ་དེའི་ཕྱིར། དེར་ཐལ། སྒྲ་དོན་འདྲེས་རུང་དུ་འཛིན་པའི་ཞེན་རིག་དང་བྲལ་བའི་ཐེག་ཆེན་གྱི་རྗེས་ལ་མངོན་རྟོགས་ཡིན་པའི་ཕྱིར། ཁྱབ་པ་ཡོད་དེ། ཞེན་རིག་དང་བཅས་པའི་དེ་འདྲ་ཡིན་ན་ཐེག་ཆེན་གྱི་ཟག་བཅས་སྒོམ་ལམ་ཡིན་དགོས་པའི་ཕྱིར་ཏེ། ཚིག་གསལ་ལས། ཟག་པ་དང་བཅས་པ་དང་ཟག་པ་མེད་པའི་བྱེ་བྲག་གིས་རྣམ་པར་རྟོག་པ་དང་བཅས་པ་དང་བྲལ་བ་གཙོ་བོར་གྱུར་པའོ། །ཞེས་གསུངས་པའི་ཕྱིར། རྩ་བར་འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །ཁམས་གོང་གི་རྟེན་ལ་ཐེག་ཆེན་གྱི་སྒོམ་ལམ་གསར་དུ་སྐྱེ་བ་ཡོད་ཟེར་ན། ཁམས་གོང་གི་རྟེན་ལ་ཐེག་ཆེན་གྱི་མཐོང་ལམ་གསར་དུ་སྐྱེ་བ་ཡོད་པར་ཐལ། དེའི་རྟེན་ལ་དེའི་སྒོམ་ལམ་གསར་དུ་སྐྱེ་བ་ཡོད་པའི་ཕྱིར། འདོད་མི་ནུས། ཁ་ཅིག །ཐེག་ཆེན་གྱི་སྒོམ་ལམ་དངོས་སུ་གསར་དུ་སྐྱེ་བའི་རྟེན་དེ་ལ་ཟག་མེད་ས་དགུར་གྲངས་ངེས་ཟེར་ན། མི་འཐད་པར་ཐལ། དེ་དངོས་སུ་གསར་དུ་སྐྱེ་བའི་འདོད་སེམས་དང་སྲིད་རྩེའི་སེམས་ཡོད་པའི་ཕྱིར། དེར་ཐལ། འགྲེལ་ཆེན་ལས། འདོད་པའི་ཁམས་གཟུགས་ཀྱི་ཁམས་དང་གཟུགས་མེད་པའི་ཁམས་སུ་ཞེས་སྨོས་པས་ནི་འདོད་པའི་ཁམས་ལ་སོགས་པའི་ས་དགུ་པོའི་སྒོམ་པའི་ལམ་གཟུང་བར་བྱའོ། །གང་ཡང་། འདོད་པ་ཁམས་དང་སྲིད་རྩེ་ན། །བྱང་ཆུབ་ལམ་གྱི་ཡན་ལག་སྤངས། །ཞེས་བརྗོད་པ་དེ་ནི་ཐབས་ལ་མི་མཁས་པ་ཡིན་པའི་ཕྱིར་ཉན་ཐོས་ཀྱི་དབང་དུ་བྱས་པ་ཡིན་པས་དེ་དང་འདི་ལ་འགལ་བ་མེད་དོ། །ཞེས་བྱ་བ་ནི་ཁ་ཅིག་གིའོ། །ཞེས་གསུངས་པའི་
ཕྱིར། གཉིས་པ་རང་ལུགས་ནི། ཐེག་ཆེན་གྱི་རྗེས་ལ་མངོན་རྟོགས་ཐེག་ཆེན་གྱི་སྒོམ་ལམ་གྱི་མཚན་ཉིད། དེ་ལ་དབྱེ་ན། དེ་ཟག་བཅས་ཟག་མེད་གཉིས། སྒྲ་དོན་འདྲེས་རུང་དུ་འཛིན་པའི་ཞེན་རིག་དང་བཅས་པའི་ཐེག་ཆེན་གྱི་རྗེས་ལ་མངོན་རྟོགས་དེ་དང་པོའི་མཚན་ཉིད། དེ་དང་བྲལ་བའི་ཐེག་ཆེན་གྱི་རྗེས་ལ་མངོན་རྟོགས་དེ་གཉིས་པའི་མཚན་ཉིད། གླིང་གསུམ་གྱི་མི་དང་འདོད་ལྷའི་ལུས་རྟེན་ལ་ཐེག་ཆེན་གྱི་སྒོམ་ལམ་གསར་དུ་སྐྱེ་བ་ཡོད་ཅིང་། སེམས་རྟེན་ནི་ཁམས་གསུམ་ས་དགུར་འགྲེལ་ཆེན་ལས་བཤད་དོ། །གསུམ་པ་རྩོད་པ་སྤོང་བ་ལ། ཁོ་ན་རེ། ས་གཉིས་པའི་ཡེ་ཤེས་ཆོས་ཅན། ཐེག་ཆེན་གྱི་ཟག་བཅས་སྒོམ་ལམ་ཡིན་པར་ཐལ། མཚན་ཉིད་དེའི་ཕྱིར། དེར་ཐལ། བདེན་འཛིན་དང་བཅས་པའི་རྗེས་ལ་མངོན་རྟོགས་ཡིན་པའི་ཕྱིར། དེར་ཐལ། ས་གཉིས་པ་བ་དེ་བདེན་འཛིན་དང་བཅས་པའི་གང་ཟག་ཡིན་པའི་ཕྱིར་ན་མ་ཁྱབ། འོ་ན། བྱང་སེམས་ས་གཉིས་པ་བའི་རྒྱུད་ཀྱི་དབང་ཤེས་དེ་རྟོག་པ་དང་བཅས་པ་ཡིན་པར་ཐལ། ས་གཉིས་པ་བ་དེ་རྟོག་པ་དང་བཅས་པའི་གང་ཟག་ཡིན་པའི་ཕྱིར། ཁྱབ་པ་ཁས། དེར་ཐལ། བྱང་སེམས་ས་བརྒྱད་པ་བའི་རྒྱུད་ལ་ཡེ་ཤེས་ཆོས་སྐུ་འཇལ་བའི་རྟོག་པ་ཡོད་པའི་ཕྱིར། དེར་ཐལ། རྣམ་བཤད་ལས། ས་བརྒྱད་པ་ཡན་ཆད་ན་སྒྲ་དོན་འདྲེས་རུང་འཛིན་པའི་རྟོག་པ་མེད་ན་ལྐོག་གྱུར་གྱི་དོན་ཅུང་ཟད་ཀྱང་ཡུལ་དུ་བྱེད་མི་དགོས་པར་འགྱུར་རོ། །ཞེས་གསུངས་པའི་ཕྱིར།

མོས་པ་སྒོམ་ལམ་བཤད་པ།

---

^{[མ་དཔེ་གཟིགས་ན་འདིར་གནོན།]}

མོས་པ་སྒོམ་ལམ་བཤད་པ། གཉིས་པ་ལ། ཟག་བཅས་སྒོམ་ལམ། ཟག་མེད་སྒོམ་ལམ་གཉིས། དང་པོ་ལ། དབྱེ་བས་མཚམས་སྦྱར་བ། སོ་སོའི་དོན་བཤད་པ། དོན་བསྡུ་བ་གསུམ། དང་པོ་ནི། ཤེས་བྱ་ཆོས་ཅན། ཐེག་ཆེན་གྱི་སྒོམ་ལམ་ཟག་པ་དང་བཅས་པ་ལ་དབྱེ་ན་གསུམ་ཡོད་དེ། དེ་ལ་མོས་པ་སྒོམ་ལམ་དང་། བསྔོ་བ་སྒོམ་ལམ་དང་། རྗེས་སུ་ཡི་རང་བ་ཡིད་ལ་བྱེད་པ་ཞེས་བྱ་བའི་སྒོམ་ལམ་རྣམས་སུ་ཡོད་པའི་ཕྱིར།

---

^{[མ་དཔེ་གཟིགས་ན་འདིར་གནོན།]}

གཉིས་པ་ལ། མོས་པ་སྒོམ་ལམ། བསྔོ་བ་སྒོམ་ལམ། རྗེས་སུ་ཡི་རང་སྒོམ་ལམ་གསུམ། དང་པོ་ལ། མོས་པ་སྒོམ་ལམ་དངོས་དང་། དེའི་ཕན་ཡོན་བཤད་པ་གཉིས། དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། སྒོམ་པའི་ལམ་གསུམ་པོ་དེ་རྣམས་ཀྱི་ནང་ནས། དང་པོ་ཡུམ་དོན་གསུམ་གྱི་འབྱུང་གནས་སུ་མོས་ཤིང་ཡིད་ཆེས་པ་ཡིད་ལ་བྱེད་པ་ཞེས་བྱ་བའི་མོས་པ་སྒོམ་ལམ་འཆད་ཚུལ་ཡོད་དེ། དེ་རང་གི་རྩ་བ་དང་ཡན་ལག་གི་སྒོ་ནས་བཤད་པར་བྱ་བ་ཡིན་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། ཐེག་ཆེན་གྱི་མོས་པ་སྒོམ་ལམ་ཆོས་ཅན། ཁྱོད་ལ་དབྱེ་ན། རྣམ་པ་གསུམ་དུ་ཤེས་པར་བྱ་བ་ཡིན་ཏེ། རང་གི་དོན་གྱི་མོས་པ་སྒོམ་ལམ་དང་ནི། རང་གཞན་གཉིས་ཀའི་དོན་གྱི་མོས་པ་སྒོམ་ལམ་དང་། གཞན་དོན་མོས་པ་སྒོམ་ལམ་རྣམས་སུ་ཡོད་པའི་ཕྱིར། གསུམ་པོ་དེ་ཡང་ནི་ཆོས་ཅན། ཁྱོད་ལ་དབྱེ་ན་སོ་སོར་རྣམ་པ་གསུམ་དུ་འདོད་དེ། ཁྱོད་ལ་མོས་པ་སྒོམ་ལམ་ཆུང་ངུ་དང་འབྲིང་དང་ཆེན་པོ་རྣམས་སུ་ཡོད་པའི་ཕྱིར། ཆུང་འབྲིང་ཆེན་པོ་དེ་ཡང་ཆོས་ཅན། རྣམ་པ་གསུམ་གསུམ་དུ་འདོད་དེ། ཁྱོད་ལ་སོ་སོར་མོས་པ་སྒོམ་ལམ་ཆུང་ངུའི་ཆུང་ངུ་དང་། ལ་སོགས་པ་ཆུང་ངུའི་འབྲིང་སོགས་དབྱེ་བ་ཡིས་དེ་ལྟར་ཡོད་པའི་ཕྱིར། ཤེས་བྱ་ཆོས་ཅན། ཐེག་ཆེན་གྱི་མོས་པ་སྒོམ་ལམ་དེ་ལ་རྣམ་པ་ཉི་ཤུ་རྩ་བདུན་དུ་འདོད་དེ། སྔར་བཤད་པ་དེ་ལྟར་ན་སྟེ་དེའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །ཡུམ་དོན་གསུམ་གྱི་འབྱུང་གནས་སུ་ཡིད་ཆེས་པའི་ཐེག་ཆེན་གྱི་རྗེས་ལ་མངོན་རྟོགས་དེ་མོས་པ་སྒོམ་ལམ་གྱི་མཚན་ཉིད། རང་དོན་མོས་པ་སྒོམ་ལམ་དང་གཞན་དོན་མོས་པ་སྒོམ་ལམ་འགལ་ཟེར་ན། ཡུམ་རང་དོན་གྱི་འབྱུང་

---

^{[མ་དཔེ་གཟིགས་ན་འདིར་གནོན།]}

གནས་སུ་ཡིད་ཆེས་པའི་ཟག་པ་དང་བཅས་པའི་ཐེག་ཆེན་གྱི་རྗེས་ལ་མངོན་རྟོགས་ཡིན་ན་མོས་པ་སྒོམ་ལམ་ཡིན་དགོས་པར་ཐལ། འདོད་པའི་ཕྱིར། འདོད་ན། ཡུམ་དོན་གསུམ་གྱི་འབྱུང་གནས་སུ་ཡིད་ཆེས་པའི་ཟག་པ་དང་བཅས་པའི་ཐེག་ཆེན་གྱི་རྗེས་ལ་མངོན་རྟོགས་ཡིན་ན་རང་དོན་མོས་བསྒོམ་ལམ་ཡིན་དགོས་པར་ཐལ། མཚན་ཉིད་དེ་འཐད་པའི་ཕྱིར། འདོད་ན། དེ་ཡིན་ན་གཞན་དོན་མོས་པ་སྒོམ་ལམ་ཡིན་དགོས་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། རང་དོན་མོས་པ་སྒོམ་ལམ་མ་ཡིན་པར་ཐལ། གཞན་དོན་མོས་པ་སྒོམ་ལམ་ཡིན་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། ཁྱབ་པ་ཁས། གཞན་ཡང་། དེ་གཉིས་མི་འགལ་བར་ཐལ། མོས་པ་སྒོམ་ལམ་ཡིན་ན་མོས་སྒོམ་གསུམ་ག་ཡིན་དགོས་པའི་ཕྱིར། དེར་ཐལ། དེ་ཡིན་ན། ཡུམ་རང་དོན་གྱི་འབྱུང་གནས་སུ་ཡིད་ཆེས་པའི་རྗེས་ལ་མངོན་རྟོགས་དང་། ཡུམ་གཞན་དོན་གྱི་འབྱུང་གནས་སུ་ཡིད་ཆེས་པའི་རྗེས་ལ་མངོན་རྟོགས་དང་། ཡུམ་དོན་གཉིས་ཀའི་འབྱུང་གནས་སུ་ཡིད་ཆེས་པའི་ཐེག་ཆེན་གྱི་རྗེས་ལ་མངོན་རྟོགས་གསུམ་ག་ཡིན་དགོས་པའི་ཕྱིར། ཡང་ཁོ་ན་རེ། དེ་གཉིས་འགལ་བར་ཐལ། ཡུམ་རང་དོན་དང་གཞན་དོན་གཉིས་ཀྱི་ནང་ནས་གཙོ་བོར་རང་དོན་གི་འབྱུང་གནས་སུ་ཡིད་ཆེས་པའི་ཐེག་ཆེན་གྱི་རྗེས་ལ་མངོན་རྟོགས་དང་། ཡུམ་དེ་གཉིས་ཀྱི་ནང་ནས་གཙོ་བོར་གཞན་དོན་གྱི་འབྱུང་གནས་སུ་ཡིད་ཆེས་པའི་ཐེག་ཆེན་གྱི་རྗེས་ལ་མངོན་རྟོགས་གཉིས་འགལ་བའི་ཕྱིར་ཟེར་ན། མི་འཐད་པར་ཐལ། ཡུམ་དོན་གཉིས་ཀྱི་ནང་ནས་གཙོ་བོར་རང་དོན་གྱི་འབྱུང་གནས་སུ་ཡིད་ཆེས་པའི་ཟག་པ་དང་བཅས་པའི་ཐེག་ཆེན་གྱི་རྗེས་ལ་མངོན་རྟོགས་མེད་པའི་ཕྱིར། དེར་ཐལ། དེ་གཉིས་ཀྱི་ནང་ནས་གཙོ་བོར་རང་དོན་དོན་དུ་གཉེར་པའི་བྱང་

---

^{[མ་དཔེ་གཟིགས་ན་འདིར་གནོན།]}

སེམས་ཀྱི་སྒོམ་ལམ་མེད་པའི་ཕྱིར། དེར་ཐལ། ཆོས་གཟུགས་ཀྱི་སྐུ་གཉིས་ཀྱི་ནང་ནས་གཙོ་བོར་རང་དོན་ཆོས་སྐུ་དོན་དུ་གཉེར་བར་བྱེད་པའི་སྒོམ་ལམ་མེད་པའི་ཕྱིར། དེར་ཐལ། བྱང་སེམས་སྒོམ་ལམ་པ་ཡིན་ན། དེ་གཉིས་ཀྱི་ནང་ནས་གཙོ་བོར་གཞན་དོན་གཟུགས་སྐུ་དོན་དུ་གཉེར་བས་ཁྱབ་པའི་ཕྱིར། གཉིས་པ་རང་ལུགས་ནི། ཡུམ་དོན་གསུམ་གྱི་འབྱུང་གནས་སུ་ཡིད་ཆེས་པའི་ཟག་པ་དང་བཅས་པའི་ཐེག་ཆེན་གྱི་རྗེས་ལ་མངོན་རྟོགས་ཐེག་ཆེན་གྱི་མོས་པ་སྒོམ་ལམ་གྱི་མཚན་ཉིད། གསུམ་པ་རྩོད་ལ་སྤོང་བ་ལ། ཁོ་ན་རེ། རང་དོན་མོས་པ་སྒོམ་ལམ་མ་དག་ས་བདུན་གྱི་རྗེས་ཐོབ་ཀྱིས་བསྡུས། གཉིས་དོན་མོས་པ་སྒོམ་ལམ། བརྒྱད་པ་དང་དགུ་པའི་རྗེས་ཐོབ་ཀྱིས་བསྡུས། གཞན་དོན་མོས་པ་སྒོམ་ལམ། ས་བཅུ་པའི་རྗེས་ཐོབ་ཀྱིས་བསྡུས་ཟེར་ན། མི་འཐད་པར་ཐལ། ས་བཅུ་པས་བསྡུས་པའི་རང་དོན་མོས་པ་སྒོམ་ལམ་ཡོད་པ་གང་ཞིག །ས་གཉིས་པས་བསྡུས་པའི་གཞན་དོན་མོས་པ་སྒོམ་ལམ་ཡང་ཡོད་པའི་ཕྱིར། དང་པོ་དེར་ཐལ། རང་དོན་མོས་སྒོམ་ཆེན་པོའི་ཆེན་པོ་ཡོད་པ་གང་ཞིག །དེ་ཡིན་ན་ས་བཅུ་པའི་ཡེ་ཤེས་ཡིན་དགོས་པའི་ཕྱིར། ཕྱི་མ་དེར་ཐལ། དེ་ཡིན་ན་ཐེག་ཆེན་གྱི་སྒོམ་ལམ་ཆེན་པོའི་ཆེན་པོ་ཡིན་དགོས་པ་གང་ཞིག །དེ་ཡིན་ན་ས་བཅུ་པའི་ཡེ་ཤེས་ཡིན་དགོས་པའི་ཕྱིར། རྩ་རྟགས་གཉིས་པ་དེར་ཐལ། གཞན་དོན་མོས་སྒོམ་ཆུང་ངུའི་ཆུང་ངུ་ཡོད་པ་གང་ཞིག །དེ་ཡིན་ན་ས་གཉིས་པ་མན་གྱི་ཡེ་ཤེས་ཡིན་དགོས་པའི་ཕྱིར། ཕྱི་མ་དེར་ཐལ། དེ་ཡིན་ན་ཐེག་ཆེན་གྱི་སྒོམ་ལམ་ཆུང་ངུའི་ཆུང་ངུ་ཡིན་དགོས་པ་གང་ཞིག །དེ་ཡིན་ན་ཅིག་ཤོས་དེ་ཡིན་དགོས་པའི་ཕྱིར། སྨྲས་པ། འདོད་ལྷའི་མེ་ཏོག་མདའ་ཡིས་མ་ཕུག་ཅིང་། །ར་གྷུའི་བུ་ཡིས་ཉག་ཕྲན་

---

^{[མ་དཔེ་གཟིགས་ན་འདིར་གནོན།]}

འཕངས་མིན་པར། །དབང་ཕྱུག་མགྲིན་བཅུ་ལྟ་བུའི་རྒོལ་བ་དག །འཇོམས་བྱེད་འདི་འདྲ་སྔོན་མེད་རིགས་པའི་རྩལ། །འདི་ན་རིགས་པ་སྨྲ་བའི་དམ་བཅའ་ཀུན། །རི་མོར་བྲིས་པའི་མར་མེའི་གསལ་ཆ་ལྟར། །ཡང་དག་གཞུང་དོན་འཆད་ལས་ཕྱིར་གྱུར་ཚེ། །རྒྱ་གར་མཁས་ལ་དགའ་བ་ཅུང་ཟད་ཐལ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གསུམ་པ་འགྲེལ་པ་ནི། ཐེག་ཆེན་མོས་པ་སྒོམ་ལམ་གྱི་ངོ་བོ་ཡང་ཆོས་ཅན། ཁྱོད་ལ་དབྱེ་ན་རྣམ་པ་གསུམ་ཡོད་དེ། ཁྱོད་ལ་རང་དང་གཞན་དང་གཉིས་ཀའི་དོན་ལ་དམིགས་པ་ཉིད་ཀྱི་སྒོ་ནས་རྣམ་པ་གསུམ་ཡོད་པའི་ཕྱིར། མོས་པ་སྒོམ་ལམ་ཆོས་ཅན། ཁྱོད་འཕགས་ལམ་གྱི་དང་པོར་མངོན་དུ་མི་བྱེད་པའི་རྒྱུ་མཚན་ཡོད་དེ། ཁྱོད་ཡུམ་དོན་གསུམ་གྱི་འབྱུང་གནས་སུ་ཚུལ་ཇི་ལྟར་མོས་པ་བཞིན་མཐོང་བའི་དགེ་བའི་ཆོས་མོས་ཡུལ་ཤེར་ཕྱིན་གྱི་རྟེན་ཡིན་ན་ཡང་རྗེས་ཐོབ་དག་པ་ཐེག་ཆེན་གྱི་འཇིག་རྟེན་པའི་སྒོམ་པའི་ལམ་གྱི་དབང་དུ་བྱས་པ་ལས་འཐོབ་པའི་ལམ་ཡིན་པའི་ཕྱིར། མོས་པ་གསུམ་པོ་དེ་དག་ཆོས་ཅན། རེ་རེ་ནས་རྣམ་པ་གསུམ་གསུམ་དུ་ཡོད་དེ། རེ་རེ་ཞིང་ཆུང་ངུ་ལ་སོགས་པའི་བྱེ་བྲག་གིས་གསུམ་གསུམ་དུ་ཡོད་པའི་ཕྱིར། ཆུང་ངུ་ལ་སོགས་པ་དེ་ཡང་ཆོས་ཅན། རྣམ་པ་གསུམ་གསུམ་ཡོད་དེ། སོ་སོར་ཆུང་ངུའི་ཆུང་ངུ་ལ་སོགས་པའི་དབྱེ་བས་དེ་ལྟར་ཡོད་པའི་ཕྱིར། དོན་བསྡུ་བ་ནི། ཤེས་བྱ་ཆོས་ཅན། མོས་པ་སྒོམ་ལམ་དེ་ལ་རྣམ་པ་ཉི་ཤུ་རྩ་བདུན་ཡོད་དེ། དགུ་ཚན་གསུམ་གྱི་སྒོ་ནས་དེ་ལྟར་ཡོད་པའི་ཕྱིར། གཉིས་པ་ཕན་ཡོན་ལ། མཚམས་སྦྱར་བ། རྩ་བ། འགྲེལ་པ་གསུམ། དང་པོ་ནི། ཤེས་བྱ་ཆོས་ཅན། དེ་ལྟར་མོས་པ་སྒོམ་པ་ལ་སངས་རྒྱས་ལ་སོགས་པས་བསྟོད་པ་མཛད་པ་དང་ལ་སོགས་པས་བཀུར་བ་དང་བསྔགས་པར་མཛད་པ་ལ་དགོས་པ་ཡོད་དེ། མོས་པ་དེ་སྒོམ་
པའི་བྱང་ཆུབ་སེམས་དཔའ་སྤྲོ་བ་བསྐྱེད་པར་བྱ་བའི་ཆེད་ཡིན་པའི་ཕྱིར། གཉིས་པ་ནི། གཞུང་ལམ་འབྲས་བུའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དོན་གསུམ་གྱི་འབྱུང་གནས་སུ་མོས་པའི་གནས་སྐབས་རྣམས་ལ་ནི་ཆོས་ཅན། ཁྱོད་བསྟོད་པ་དང་བཀུར་བ་དང་ནི་བསྔགས་པར་འདོད་དེ། དགུ་ཚན་གསུམ་གྱིས་བསྟོད་བཀུར་བསྔགས་པར་འདོད་པའི་ཕྱིར། གསུམ་པ་ནི། ཤེས་བྱ་ཆོས་ཅན། དེ་འདྲའི་རྣལ་འབྱོར་པ་ལ་སངས་རྒྱས་སོགས་ཀྱིས་བསྟོད་པ་དང་བཀུར་བ་དང་བསྔགས་པར་འདོད་དེ། ཡུམ་དོན་གསུམ་གྱི་འབྱུང་གནས་སུ་ཇི་ལྟར་མོས་པ་བཞིན་དུ་མཐོང་བའི་ཆོས་ཀྱི་མཚན་ཉིད་ཀྱི་མོས་ཡུལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཡིད་ཆེས་པའི་རྣམ་པས་ཞུགས་པའི་མོས་པ་ཡིད་ལ་བྱེད་པ་དང་པོ་དང་གཉིས་པ་དང་གསུམ་པ་སྟེ་གནས་སྐབས་དགུ་དག་ཏུ་བརྗོད་པའི་ཕྱིར། དེར་ཐལ། དེ་ཡང་སོ་སོར་རྣམ་པ་དགུ་གོ་རིམ་བཞིན་དུ་སྔ་མ་སྔ་མ་ལས་ཕྱི་མ་ཕྱི་མ་གོང་ནས་གོང་དུ་འཕགས་པའི་སྒོ་ནས་མངོན་པར་དགའ་བར་བྱེད་ཅིང་བསྟོད་པ་སོགས་མཛད་པའི་ཕྱིར། དེས་ན་བསྟོད་པ་ལ་སོགས་པ་འདི་དག་ནི་ཆོས་ཅན། དོན་ལ་མི་གནས་བཞིན་དུ་གཅམ་བུའི་ངོ་བསྟོད་ནི་མ་ཡིན་ཏེ། ཡོན་ཏན་ཡོད་པ་ལྟར་དོན་ཡང་དག་པ་ཇི་ལྟ་བ་བཞིན་རྟོགས་པའི་མཚན་ཉིད་ཅན་གྱི་སྒོ་ནས་མཛད་པའི་ཕྱིར།

བསྔོ་བ་སྒོམ་ལམ་བཤད་པ།

---

^{[མ་དཔེ་གཟིགས་ན་འདིར་གནོན།]}

བསྔོ་བ་སྒོམ་ལམ་བཤད་པ། གཉིས་པ་བསྔོ་བ་སྒོམ་ལམ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། སྒོམ་ལམ་གཉིས་པ་དགེ་རྩ་རྫོགས་བྱང་གི་ཡན་ལག་ཏུ་སྒྱུར་བྱེད་བསྔོ་བ་ཡིད་ལ་བྱེད་པ་ཞེས་བྱ་བ་འཆད་ཚུལ་ཡོད་དེ། དེ་ལྟར་ཡུམ་དོན་གསུམ་གྱི་འབྱུང་གནས་སུ་མོས་པའི་སྒོམ་ལམ་ལས་བསྔོ་བ་འབྱུང་བའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། ཡོངས་སུ་བསྔོ་བ་ཁྱད་པར་ཅན་བྱང་སེམས་སྒོམ་ལམ་པ་དེ་ཡི་བསྔོ་བ་ཆོས་ཅན།

---

^{[མ་དཔེ་གཟིགས་ན་འདིར་གནོན།]}

ཁྱོད་བྱེད་པ་མཆོག་དང་ལྡན་པ་ཡིན་ཏེ། རང་གཞན་གྱི་དགེ་རྩ་རྣམས་རྫོགས་བྱང་གི་ཡན་ལག་ཏུ་སྒྱུར་བར་བྱེད་པའི་བསྔོ་བ་ཡིན་པའི་ཕྱིར། ཤེས་བྱ་ཆོས་ཅན། དེ་ལ་ནི་རྣམ་པ་བཅུ་གཉིས་ཡོད་དེ། བྱེད་པ་མཆོག་དང་ལྡན་པའི་བསྔོ་བ། སྦྱིན་བྱའི་རྫས་ལ་བདེན་ཞེན་འགོག་པའི་དམིགས་མེད་ཀྱི་རྣམ་པ་ཅན་དུ་བསྔོ་བ། སྦྱིན་ཡུལ་ལ་བདེན་ཞེན་འགོག་པའི་ཕྱིན་ཅི་མ་ལོག་པའི་མཚན་ཉིད་ཅན་གྱི་བསྔོ་བ། སྦྱིན་པ་ལ་དེ་འགོག་པའི་དབེན་པའི་བསྔོ་བ། རང་དང་སངས་རྒྱས་ཀྱི་དགེ་བ་ལ་དེ་འགོག་པའི་སངས་རྒྱས་བསོད་ནམས་ཚོགས་ཀྱི་རང་བཞིན་དྲན་པའི་སྤྱོད་ཡུལ་ཅན་གྱི་བསྔོ་བ། ཕྱིན་དྲུག་གི་དགེ་བ་ལ་དེ་འགོག་པའི་ཐབས་མཁས་དང་བཅས་པའི་བསྔོ་བ། འཁོར་གསུམ་ལ་དེ་འགོག་པའི་མཚན་མ་མེད་པའི་བསྔོ་བ། ཐ་སྙད་དུ་རྟེན་འབྲེལ་སྒྱུ་མར་ཤེས་ནས་སངས་རྒྱས་ཀྱི་སར་དམིགས་པའི་སངས་རྒྱས་རྗེས་སུ་ཡི་རང་གི་བསྔོ་བ། འཁོར་བའི་རྒྱུར་མི་བསྔོ་བའི་ཁམས་གསུམ་དུ་གཏོགས་པ་མ་ཡིན་པའི་བསྔོ་བ། བསྔོ་བ་གཞན་བསོད་ནམས་ཆེན་པོ་འབྱུང་བའི་བདག་ཉིད་ཆུང་ངུ་དང་། འབྲིང་དང་། ཆེན་པོ་རྣམ་པ་གསུམ་དུ་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །རང་གི་དགེ་རྩ་རྫོགས་བྱང་གི་ཡན་ལག་ཏུ་སྒྱུར་བར་བྱེད་པའི་བསྔོ་བ་སྒོམ་ལམ་དང་། གཞན་གྱི་དགེ་རྩ་རྫོགས་བྱང་གི་ཡན་ལག་ཏུ་སྒྱུར་བར་བྱེད་པའི་བསྔོ་བ་སྒོམ་ལམ་འགལ་ཟེར་ན། མི་འཐད་པར་ཐལ། བསྔོ་བ་སྒོམ་ལམ་ཡིན་ན་དེ་གཉིས་ཀ་ཡིན་དགོས་པའི་ཕྱིར། གཉིས་རང་ལུགས་ནི། རང་གཞན་གྱི་དགེ་རྩ་རྫོགས་བྱང་གི་ཡན་ལག་ཏུ་སྒྱུར་བར་བྱེད་པའི་ཟག་པ་དང་བཅས་པའི་ཐེག་ཆེན་གྱི་རྗེས་ལ་མངོན་རྟོགས་བསྔོ་བ་སྒོམ་ལམ་གྱི་མཚན་ཉིད། གསུམ་པ་རྩོད་པ་སྤོང་བ་ལ། ཁོ་ན་རེ། ཐེག་དམན་གྱི་བསྔོ་བ་སྒོམ་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། དེ་ཡོད་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར། དེར་ཐལ། ཉན་ཐོས་སྒོམ་ལམ་པའི་རྒྱུད་ཀྱི་བསྔོ་བ་དེ་དེ་ཡིན་པའི་ཕྱིར། དེར་ཐལ། དེ་བསྔོ་བ་གང་ཞིག །སྒོམ་ལམ་ཡིན་པའི་ཕྱིར་ན་མ་ཁྱབ། གསུམ་པ་ནི། བྱང་སེམས་སྒོམ་ལམ་པ་ཆོས་ཅན། ཁྱོད་ཀྱིས་དགེ་བ་སེམས་ཅན་ཐམས་ཅད་ཀྱི་དོན་དུ་མི་ཟད་པར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བ་རྣམ་པ་བཅུ་གཉིས་བྱེད་དེ། ཁྱོད་ཀྱིས་དགེ་བ་རྣམས་དོན་དམ་པར་མི་དམིགས་པར་ཐ་སྙད་དུ་དམིགས་པ་ཐེག་པ་གསུམ་གྱིས་གདུལ་བར་བྱ་བའི་སེམས་ཅན་ལ་ལམ་ཉེ་བར་སྟོན་པའི་རྒྱུའི་ངོ་བོ་བྱེད་པ་དང་ལྡན་པ་རྣམས་ཀྱིས་དེ་ལྟར་བྱེད་པའི་ཕྱིར། བསྔོ་བ་ཡིད་བྱེད་ཀྱི་བྱང་སེམས་སྒོམ་ལམ་པའི་བསྔོ་བ་ཆོས་ཅན། ཇི་སྐད་བཤད་པའི་མོས་པ་ཁྱད་པར་ཅན་ཞེས་བྱ་བ་དེ་ལྟར་མིང་དུ་བཏགས་པའི་ཡིད་ལ་བྱེད་པའི་བསྔོ་བ་ཡིན་ཏེ། གོ་རིམ་བཞིན་དུ་བླ་ན་མེད་པའི་བྱང་ཆུབ་དོན་དམ་པར་མི་དམིགས་ཤིང་ཐ་སྙད་དུ་དམིགས་པའི་བསྔོ་བ་ཡིན་པའི་ཕྱིར། དེ་ཆོས་ཅན། མི་དམིགས་པའི་མིང་ཅན་གྱི་བསྔོ་བ་ཡིན་ཏེ། ཚུལ་ཁྲིམས་ལ་སོགས་པའི་ཕུང་པོ་དོན་དམ་པར་མི་དམིགས་ཤིང་། ཐ་སྙད་དུ་དམིགས་པའི་བསྔོ་བ་ཡིན་པའི་ཕྱིར། དེ་ཆོས་ཅན། ཕྱིན་ཅི་མ་ལོག་པའི་མིང་ཅན་གྱི་བསྔོ་བ་ཡིན་ཏེ། བསྔོ་བར་བྱེད་པའི་སེམས་ཅན་ལྷག་མ་སྔར་བཞིན། དེ་ཆོས་ཅན། དབེན་པའི་མིང་ཅན་གྱི་བསྔོ་བ་ཡིན་ཏེ། བསྔོ་བ་པོ་བདག་ལ་སོགས་པ་དང་ལྡན་པའི་དངོས་པོ་སྔར་བཞིན། དེ་ཆོས་ཅན། དེ་བཞིན་གཤེགས་པའི་དགེ་བའི་རྩ་བའི་ཚོགས་ཀྱི་རང་བཞིན་དྲན་པའི་མིང་ཅན་གྱི་བསྔོ་བ་ཡིན་ཏེ། དུས་གསུམ་གྱི་སངས་རྒྱས་ཀྱི་དགེ་བ་སྔར་བཞིན། དེ་ཆོས་ཅན། ཐབས་ལ་མཁས་པ་དང་བཅས་པའི་མིང་ཅན་གྱི་བསྔོ་བ་ཡིན་ཏེ། སྦྱིན་པའི་ཕར་ཕྱིན་ལ་སོགས་པ་སྔར་བཞིན། དེ་ཆོས་ཅན། མཚན་མ་མེད་པའི་མིང་ཅན་གྱི་བསྔོ་བ་ཡིན་ཏེ། བསྔོ་བ་སྔར་བཞིན་
དེ་ཆོས་ཅན། སངས་རྒྱས་ཀྱིས་གནང་བའི་མིང་ཅན་གྱི་བསྔོ་བ་ཡིན་ཏེ། ལམ་ཐམས་ཅད་སྔར་བཞིན། དེ་ཆོས་ཅན། ཁམས་གསུམ་པོར་མ་གཏོགས་པའི་མིང་ཅན་གྱི་བསྔོ་བ་ཡིན་ཏེ། འདོད་པ་ལ་སོགས་པའི་ཁམས་སྔར་བཞིན། དེ་ཆོས་ཅན། བསོད་ནམས་ཆེན་པོ་ལས་བྱུང་བ་ཞེས་བྱ་བའི་བསྔོ་བ་ཆུང་ངུའི་མིང་ཅན་གྱི་བསྔོ་བ་ཡིན་ཏེ། འགྲོ་ཀུན་དགེ་བ་བཅུ་ལ་སོགས་པའི་ལས་ཀྱི་ལམ་ལ་བཀོད་པའི་དགེ་བ་སྔར་བཞིན། དེ་ཆོས་ཅན། བསོད་ནམས་ཆེན་པོ་འབྱུང་བའི་བསྔོ་བ་འབྲིང་གི་མིང་ཅན་ཡིན་ཏེ། འགྲོ་ཀུན་རྒྱུན་དུ་ཞུགས་པ་ལ་སོགས་པ་ལ་བཀོད་པའི་དགེ་བ་སྔར་བཞིན། དེ་ཆོས་ཅན། བསོད་ནམས་ཆེན་པོ་འབྱུང་བ་བསྔོ་བ་ཆེན་པོའི་མིང་ཅན་ཡིན་ཏེ། འགྲོ་ཀུན་བླ་ན་མེད་པའི་བྱང་ཆུབ་ལ་གནས་པར་བྱས་པའི་དགེ་བ་རྣམས་སྔར་བཞིན།

རྗེས་སུ་ཡི་རང་བའི་སྒོམ་ལམ་བཤད་པ།

---

^{[མ་དཔེ་གཟིགས་ན་འདིར་གནོན།]}

རྗེས་སུ་ཡི་རང་བའི་སྒོམ་ལམ་བཤད་པ། གསུམ་པ་རྗེས་སུ་ཡི་རང་སྒོམ་ལམ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། དེའི་འོག་ཏུ་དུས་གསུམ་པར་རྗེས་སུ་ཡི་རང་བ་ཡིད་ལ་བྱེད་པ་ཞེས་བྱ་བའི་སྒོམ་ལམ་འཆད་དེ། རབ་ཏུ་དགའ་བའི་སེམས་ཀྱིས་དེ་ལྟར་ལེགས་པར་བསྔོས་པའི་དངོས་པོ་གང་དུ་མངོན་པར་སྤེལ་བར་བྱ་བའི་ཆེད་ཡིན་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། བྱང་སེམས་སྒོམ་ལམ་པའི་རྒྱུད་ཀྱི་རྗེས་སུ་ཡི་རང་ཆོས་ཅན། ཁྱེད་རྗེས་སུ་ཡི་རང་བ་ཡིད་ལ་བྱེད་པའི་སྒོམ་ལམ་ཡིན་པར་སྐབས་འདིར་བརྗོད་དེ། ཐ་སྙད་དུ་དམིགས་པའི་ཐབས་དང་། དོན་དམ་པར་མི་དམིགས་པར་རྟོགས་པའི་ཤེས་རབ་ཀྱིས་ཟིན་པ་དག་གིས་རང་གཞན་གྱི་དགེ་རྩ་ལ་ཡི་རང་བ་དེ་དང་མཚུངས་ལྡན་གྱི་ཟག་པ་དང་བཅས་པའི་ཐེག་ཆེན་གྱི་རྗེས་ལ་མངོན་རྟོགས་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །རང་གི་དགེ་རྩ་ལ་དགའ་བ་

---

^{[མ་དཔེ་གཟིགས་ན་འདིར་གནོན།]}

སྒོམ་པའི་རྗེས་སུ་ཡི་རང་སྒོམ་ལམ་དང་། གཞན་གྱི་དགེ་རྩ་ལ་དགའ་བ་སྒོམ་པའི་རྗེས་སུ་ཡི་རང་སྒོམ་ལམ་གཉིས་འགལ་ཟེར་ན། དེ་མི་འཐད་པར་ཐལ། རྗེས་སུ་ཡི་རང་སྒོམ་ལམ་ཡིན་ན་དེ་གཉིས་ཀ་ཡིན་དགོས་པའི་ཕྱིར། གཉིས་པ་རང་ལུགས་ནི། རང་གཞན་གྱི་དགེ་རྩ་ལ་དགའ་བ་སྒོམ་པའི་ཟག་པ་དང་བཅས་པའི་ཐེག་ཆེན་གྱི་རྗེས་ལ་མངོན་རྟོགས་དེ་རྗེས་སུ་ཡི་རང་སྒོམ་ལམ་གྱི་མཚན་ཉིད། གསུམ་པ་རྩོད་པ་སྤོང་བ་ལ། ཁ་ཅིག །རྗེས་སུ་ཡི་རང་སྒོམ་ལམ་ཡིན་ན་གཞན་གྱི་དགེ་རྩ་ལ་དགའ་བ་བསྒོམས་པས་དགེ་བ་དེ་ཆེ་ཆུང་མཉམ་པར་ཐོབ་པས་ཁྱབ་པར་ཐལ། དེའི་ཕན་ཡོན་ཞིག་ཡོད་པའི་ཕྱིར་ན་མ་ཁྱབ། འདོད་ན། སངས་རྒྱས་འཕགས་པའི་དགེ་རྩ་ལ་དགའ་བ་སྒོམ་པའི་རྗེས་སུ་ཡི་རང་སྒོམ་ལམ་ཆོས་ཅན། དེར་ཐལ། དེའི་ཕྱིར། འདོད་མི་ནུས། གསུམ་པ་ནི། བྱང་སེམས་སྒོམ་ལམ་པའི་རྒྱུད་ཀྱི་རྗེས་སུ་ཡི་རང་བ་ཆོས་ཅན། ཁྱོད་རྗེས་སུ་ཡི་རང་བར་བྱ་བའི་སྒོམ་ལམ་དག་ཡིན་ཏེ། རབ་ཏུ་དགའ་བའི་སེམས་ཀྱིས་ཀུན་རྫོབ་ཏུ་ཐབས་ཀྱི་རང་བཞིན་གྱི་དགེ་བའི་རྩ་བ་རྣམས་ལ་དམིགས་ནས་དོན་དམ་པར་མི་དམིགས་པར་རྟོགས་པའི་ཤེས་རབ་ཀྱིས་ཟིན་པ་ཉིད་ཀྱིས་ཟག་པ་དང་བཅས་པའི་ཐེག་ཆེན་གྱི་རྗེས་ལ་མངོན་རྟོགས་ཡིན་པའི་ཕྱིར། གསུམ་པ་དོན་བསྡུ་བ་ནི། སྒོམ་ལམ་གསུམ་བསྟན་པ་དེ་ལ་གསུམ་པོའི་བྱེད་ལས་མདོར་བསྡུས་པའི་དོན་མོས་པ་ཡིད་ལ་བྱེད་པས་ཁྱད་པར་དུ་བྱས་པའི་སྒོམ་ལམ་ནི་ཆོས་ཅན། ཁྱོད་བྱེད་ལས་ཁྱད་པར་ཅན་དང་ལྡན་ཏེ། འབྱུང་ཁུངས་དག་ནས་གསེར་གྱི་གར་བུ་རྙེད་པ་བཞིན་དུ་བསོད་ནམས་མངོན་པར་འདུ་བྱེད་པ་ཡིན་པའི་ཕྱིར། བསྔོ་བ་ཡིད་ལ་བྱེད་པས་ཁྱད་པར་དུ་བྱས་པའི་སྒོམ་ལམ་ནི་ཆོས་ཅན།
བྱེད་ལས་ཁྱད་པར་ཅན་དང་ལྡན་ཏེ། གར་བུ་དེ་གསེར་འགར་གྱིས་རྒྱན་དུ་སྒྱུར་བ་བཞིན་དུ། ཁྱོད་ཀྱིས་དགེ་བ་རྣམས་ཡང་དག་པར་རྫོགས་པའི་བྱང་ཆུབ་ཀྱི་ཡན་ལག་ཏུ་སྒྱུར་བར་བྱེད་པའི་ཕྱིར། རྗེས་སུ་ཡི་རང་བ་ཡིད་ལ་བྱེད་པས་ཁྱད་པར་དུ་བྱས་པའི་སྒོམ་ལམ་ནི་ཆོས་ཅན། བྱེད་ལས་ཁྱད་པར་ཅན་དང་ལྡན་ཏེ། རང་དང་གཞན་གྱིས་བསོད་ནམས་བྱས་པ་མཉམ་པ་ཉིད་དུ་འཐོབ་བོ་ཞེས་བྱ་བ་འདི་འབྱུང་བ་ཡིན་པའི་ཕྱིར། སྨྲས་པ། ཚངས་དབང་མཆོད་སྦྱིན་བརྒྱ་པ་ལ་སོགས་པའི། །ཀུན་གྱི་གཙུག་ན་ཞབས་རྡུལ་ལེགས་འགོད་པས། །བསྟོད་བསྔགས་དབྱངས་ཀྱིས་དབུགས་དབྱུང་མོས་པའི་ལམ། །དེ་འདྲར་འཇུག་པའི་སྐྱེས་བུ་སྐལ་བ་བཟང་། །ཆོས་ཀུན་དམིགས་མེད་སྟོང་པའི་མཁའ་དབྱིངས་ལ། །ཕུལ་བྱུང་དགེ་བའི་རླུང་གི་རྒྱལ་མཚན་གྱིས། །བྱང་ཆུབ་མཆོག་གི་ཁ་དོག་རྣམ་བཀྲ་བ། །འདི་འདྲ་སྐལ་བཟང་ཡོངས་ཀྱི་གཟིགས་མོའི་གནས། །གཞན་གྱིས་ངལ་བརྒྱས་བསྒྲུབས་པའི་དགེ་བའི་འབྲས། །རྣམ་སྨིན་དཀར་པོར་འཛག་པའི་ལོངས་སྤྱོད་ལ། །ལྷན་ཅིག་དགྱེས་རྒུར་སྤྱོད་པའི་བྱང་སེམས་ལ། །མ་བྱིན་ལེན་གྱི་ལྟུང་བ་བྱུང་གིས་དོགས། །ཨེ་མ་སྔོན་མེད་སུ་ཝརྞ། །ཐེག་ཆེན་ལམ་གྱི་སོར་མོ་ལས། །ལེགས་འོངས་གཟུགས་ཀྱི་སྤྲུལ་སྒྱུར་འདི། །ལྟ་བྱེད་ལེགས་བྱས་ཟོང་གིས་བསྒྲུབས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

སྒྲུབ་པ་སྒོམ་ལམ་བཤད་པ།

---

^{[མ་དཔེ་གཟིགས་ན་འདིར་གནོན།]}

སྒྲུབ་པ་སྒོམ་ལམ་བཤད་པ། གཉིས་པ་ཟག་མེད་སྒོམ་ལམ་ལ། དབྱེ་བས་མཚམས་སྦྱར་བ། སོ་སོའི་ངོ་བོ་བཤད་པ་གཉིས། དང་པོ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན། ཐེག་ཆེན་གྱི་ཟག་པ་དང་བཅས་པའི་སྒོམ་ལམ་བསྟན་པའི་འོག་ཏུ་ཟག་པ་མེད་པའི་སྒོམ་ལམ་འཆད་ཚུལ་ཡོད་དེ། དེ་ཡང་དབྱེ་ན་སྒྲུབ་པ་སྒོམ་ལམ་དང་རྣམ་དག་སྒོམ་ལམ་རྣམ་པ་གཉིས་

---

^{[མ་དཔེ་གཟིགས་ན་འདིར་གནོན།]}

སུ་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །ཐེག་ཆེན་གྱི་ཟག་མེད་སྒོམ་ལམ་གང་ཞིག །རྟོགས་པ་མཐར་ཐུག་གི་ལག་རྗེས་འཇོག་བྱེད་ཀྱི་རིགས་སུ་གནས་པ་སྒྲུབ་པ་སྒོམ་ལམ་གི་མཚན་ཉིད། དེ་གང་ཞིག །སྤངས་པ་མཐར་ཐུག་གི་ལག་རྗེས་འཇོག་བྱེད་ཀྱི་རིགས་སུ་གནས་པ་རྣམ་དག་སྒོམ་ལམ་གྱི་མཚན་ཉིད་ཟེར་ན། གང་ཟག་གི་བདག་མེད་མངོན་སུམ་དུ་རྟོགས་པའི་བྱང་སེམས་ཀྱི་སྒོམ་ལམ་ཆོས་ཅན། མཚན་ཉིད་དང་པོ་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། ཐེག་ཆེན་གྱི་རྟོགས་རིགས་སུ་གནས་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །ཐེག་ཆེན་གྱི་ཟག་མེད་སྒོམ་ལམ་གང་ཞིག །མཉམ་གཞག་ཡེ་ཤེས་ཀྱི་ངོ་བོར་གྱུར་པ་དེ་སྒྲུབ་པ་སྒོམ་ལམ་གྱི་མཚན་ཉིད། དེ་གང་ཞིག །རྣམ་གྲོལ་ལམ་གྱི་ངོ་བོར་གྱུར་པ་དེ་རྣམ་དག་སྒོམ་ལམ་གྱི་མཚན་ཉིད་ཟེར་ན། གང་ཟག་གི་བདག་མེད་མངོན་སུམ་དུ་རྟོགས་པའི་བྱང་སེམས་ཀྱི་སྒོམ་ལམ་ཆོས་ཅན། མཚན་ཉིད་དང་པོ་དེར་ཐལ། མཚོན་བྱ་དེའི་ཕྱིར། དེར་ཐལ། རང་ཐོབ་བྱེད་ཀྱི་ཐབས་སུ་གྱུར་པའི་རྟོགས་པ་དང་སྤངས་པ་མཐར་ཐུག་གཉིས་ཀའི་ལག་རྗེས་འཇོག་བྱེད་ཀྱི་ཐེག་ཆེན་གྱི་ཟག་མེད་སྒོམ་ལམ་ཡིན་པའི་ཕྱིར། གཞན་ཡང་། དེ་ཆོས་ཅན། རྣམ་དག་སྒོམ་ལམ་ཡིན་པར་ཐལ། ཐེག་ཆེན་གྱི་ཟག་མེད་སྒོམ་ལམ་གང་ཞིག །སྒྲུབ་པ་སྒོམ་ལམ་མ་ཡིན་པའི་ཕྱིར། ཕྱི་མ་མ་གྲུབ་ན། དེ་ཆོས་ཅན། དེར་ཐལ། ཐེག་ཆེན་གྱི་ཟག་མེད་སྒོམ་ལམ་གང་ཞིག །ཐེག་ཆེན་གྱི་རྣམ་གྲོལ་ལམ་གྱི་ངོ་བོར་གྱུར་པའི་ཕྱིར། དེར་ཐལ། རྣམ་དག་སྒོམ་ལམ་ཡིན་པའི་ཕྱིར། ཁྱབ་པ་ཁས། གཉིས་པ་རང་ལུགས་ནི། ཐེག་ཆེན་གྱི་ཟག་མེད་སྒོམ་ལམ་གང་ཞིག །རྟོགས་

---

^{[མ་དཔེ་གཟིགས་ན་འདིར་གནོན།]}

པ་མཐར་ཐུག་གི་ལག་རྗེས་འཇོག་བྱེད་དེ་སྒྲུབ་པ་སྒོམ་ལམ་གྱི་མཚན་ཉིད། དེ་གང་ཞིག །སྤངས་པ་མཐར་ཐུག་གི་ལག་རྗེས་འཇོག་བྱེད་དེ་རྣམ་དག་སྒོམ་ལམ་གྱི་མཚན་ཉིད། གསུམ་པ་རྩོད་པ་སྤོང་བ་ལ། ཁོ་ན་རེ། སྒོམ་ལམ་གཉིས་པོ་འགལ་བར་ཐལ། སྤངས་རྟོགས་གཉིས་ཀྱི་ནང་ནས་གཙོ་བོར་རྟོགས་པ་མཐར་ཐུག་གི་ལག་རྗེས་འཇོག་བྱེད་དང་། དེ་གཉིས་ཀྱི་ནང་ནས་གཙོ་བོར་སྤངས་པ་མཐར་ཐུག་གི་ལམ་རྗེས་འཇོག་བྱེད་འགལ་བའི་ཕྱིར་ཟེར་ན། ཁ་ཅིག །མ་གྲུབ་སྟེ། འཇོག་བྱེད་དེ་གཉིས་མེད་པའི་ཕྱིར། དེར་ཐལ། བྱས་མི་རྟག་གཉིས་ཀྱི་ནང་ནས་བྱས་པ་དང་། དེ་གཉིས་ཀྱི་ནང་ནས་མི་རྟག་པ་གཉིས་ཀ་མེད་པའི་ཕྱིར་ན། རང་ལུགས་ལ་མ་ཁྱབ། དེར་ཐལ། དེ་གཉིས་ཀྱི་ནང་ནས་གཅིག་པོ་གཞི་གྲུབ་ན་ཅིག་ཤོས་མེད་དགོས་པའི་ཕྱིར། གཉིས་པ་ལ། སྒྲུབ་པ་སྒོམ་ལམ་དང་། རྣམ་དག་སྒོམ་ལམ་གཉིས། དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། རྣམ་དག་སྒོམ་ལམ་གྱི་དང་པོར་ཡོན་ཏན་མངོན་པར་སྒྲུབ་པའི་མཚན་ཉིད་ཅན་གྱི་སྒྲུབ་པ་སྒོམ་ལམ་འཆད་ཚུལ་ཡོད་དེ། ཟག་མེད་སྒོམ་ལམ་ལ་དེ་གཉིས་སུ་ཡོད་པར་བསྟན་པའི་ཕྱིར། གཉིས་པ་ནི། ཐེག་ཆེན་གྱི་སྒྲུབ་པ་སྒོམ་ལམ་ཆོས་ཅན། ཁྱོད་ལ་ལྡོག་པའི་སྒོ་ནས་ལྔར་ཡོད་དེ། སྒོམ་ལམ་དེའི་ངོ་བོ་ཉིད་དང་། འབྲས་བུ་མཆོག་ཉིད་དང་། བྱེད་ལས་ཀུན་ནས་མངོན་པར་འདུ་མི་བྱེད་པ་དང་། གནས་སྐབས་ཆོས་རྣམས་དམིགས་སུ་མེད་པར་ནི་གཏོད་པར་བྱེད་པ་དང་། མཐར་དོན་ཆེན་སངས་རྒྱས་ཉིད་དུ་བྱེད་པའི་དེ་རྣམས་སུ་ཡོད་པའི་ཕྱིར། གསུམ་པ་ནི། དེ་ཆོས་ཅན། རང་གི་ངོ་བོ་ཉིད་ཡོད་དེ། གཟུགས་ལ་སོགས་པའི་གནས་ལུགས་ཕྱིན་ཅི་མ་ལོག་པར་མཐོང་བའི་ཐེག་ཆེན་གྱི་རྗེས་ལ་མངོན་རྟོགས་
ཡིན་པའི་ཕྱིར། དེ་ཆོས་ཅན། ཐབས་མཆོག་ཉིད་དང་ལྡན་ཏེ། ཐབས་ཀྱིས་མ་ཟིན་པའི་སྦྱིན་སོགས་གཞན་གྱིས་སངས་རྒྱས་ཉིད་མི་འཐོབ་པ་དེས་ཟིན་པའི་དབང་གིས་འཐོབ་པའི་ཕྱིར། དེ་ཆོས་ཅན། ཀུན་ལ་མངོན་པར་འདུ་མི་བྱེད་པ་དང་ལྡན་ཏེ། ཆོས་ཐམས་ཅད་ཀྱི་ཁྱད་པར་སྐྱེ་བ་མེད་པར་རྟོགས་པའི་རྣལ་འབྱོར་པར་སྦྱོར་བར་བྱེད་པའི་ཕྱིར། དེ་ཆོས་ཅན། གནས་སྐབས་ཀྱི་འབྲས་བུ་གཏོད་པར་བྱེད་པ་དང་ལྡན་ཏེ། དེ་ལྟ་བུའི་ངོ་བོ་ཉིད་ལ་སོགས་པ་དང་ལྡན་པའི་ལམ་གྱི་ཆོས་རྣམས་མི་དམིགས་པ་ཉིད་དུ་རྣལ་འབྱོར་པའི་རྒྱུད་ལ་སྐྱེད་པར་བྱེད་པའི་ཕྱིར། དེ་ཆོས་ཅན། མཐའི་འབྲས་བུ་དོན་ཆེན་པོ་ཉིད་དང་ལྡན་ཏེ། དོན་ཆེན་པོ་སངས་རྒྱས་ཉིད་དུ་བྱེད་པའི་ཕྱིར།

རྣམ་དག་སྒོམ་ལམ་བཤད་པ།

---

^{[མ་དཔེ་གཟིགས་ན་འདིར་གནོན།]}

རྣམ་དག་སྒོམ་ལམ་བཤད་པ། གཉིས་པ་ལ། རྒྱུའི་ཁྱད་པར། ཡུལ། འབྲས་བུ། ངོ་བོ་བཞི། དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། དེའི་འོག་ཏུ་གཉིས་པ་ཤིན་ཏུ་རྣམ་པར་དག་པའི་མཚན་ཉིད། རྣམ་དག་སྒོམ་ལམ་འཆད་དེ། མཐུན་རྐྱེན་གང་ཞིག་ཡོངས་སུ་བཟུང་བ་དང་། འགལ་རྐྱེན་བོར་བས་འཐོབ་པར་འགྱུར་བའི་རྣམ་དག་སྒོམ་ལམ་འདི་སྐྱེ་བ་དང་མི་སྐྱེ་བའི་རྒྱུ་གང་ཞིག་ཡིན་སྙམ་པའི་ཐེ་ཚོམ་བསལ་བའི་སྒོ་ནས་འཆད་པའི་ཕྱིར། གཉིས་པ་ནི། ཕྱིའི་རྐྱེན་སངས་རྒྱས་བསྟེན་པ་དང་། ནང་སྦྱིན་སོགས་དང་། ཞི་ལྷག་ཟུང་འབྲེལ་གྱི་ཐབས་ལ་མཁས་པ་གང་ཡིན་པ་རྣམས་ནི་ཆོས་ཅན། ཁྱོད་རྣམ་དག་སྒོམ་ལམ་འདི་ལ་མོས་པའི་རྒྱུ་དག་ཡིན་ཏེ། དེ་སྐྱེ་བའི་མཐུན་རྐྱེན་ཡིན་པའི་ཕྱིར། བདུད་ཀྱི་ཐིབས་ཀྱིས་ནོན་པ་དང་། ཟབ་མོའི་ཆོས་སྟོང་ཉིད་ལ་མ་མོས་པ་དང་། ཕུང་པོ་ལ་སོགས་ལ་མངོན་པར་ཞེན་པ་དང་། སྡིག་པའི་གྲོགས་པོས་ཡོངས་སུ་ཟིན་པ་རྣམས་ནི་ཆོས་ཅན། ཁྱོད་རྣམ་དག་སྒོམ་ལམ་སོགས་ཆོས་ཀྱིས་འཕོངས་པའི་རྒྱུ་དག་ཡིན་ཏེ། དེའི་འགལ་རྐྱེན་ཡིན་པའི་

---

^{[མ་དཔེ་གཟིགས་ན་འདིར་གནོན།]}

ཕྱིར། གསུམ་པ་ནི། སངས་རྒྱས་མཉེས་པར་བྱེད་པ་དང་། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པའི་ཉམས་ལེན་རྫོགས་པར་བྱེད་པ་དང་། ཞི་གནས་ལ་མཁས་པ་ཞེས་བྱ་བ་རྣམས་ནི་ཆོས་ཅན། ཁྱོད་དེ་སྐྱེ་བའི་རྒྱུ་རྣམ་དག་ཡིན་ཏེ། དེའི་མཐུན་རྐྱེན་ཡིན་པའི་ཕྱིར། སྔོན་དགེ་བ་དམན་པའི་བདུད་ཀྱིས་གནོད་པ་བྱས་པ་དང་། ཆོས་ཟབ་མོ་ལ་མ་མོས་པ་དང་། བདེན་གྲུབ་ཀྱི་དངོས་པོར་འཛིན་པ་དང་། མི་དགེ་བའི་གྲོགས་པོ་དང་འགྲོགས་པ་ནི་ཆོས་ཅན། ཁྱོད་དེ་མི་སྐྱེ་བའི་རྒྱུ་ཡིན་ཏེ། ཁྱོད་དེའི་འགལ་རྐྱེན་ཡིན་པའི་ཕྱིར། གཉིས་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། རྣམ་དག་སྒོམ་ལམ་འཐོབ་པ་དང་མི་འཐོབ་པའི་རྒྱུ་དག་བཤད་པ་ཡིན་ཏེ། སྐབས་སུ་བབ་པའི་རྣམ་པར་དག་པ་སྤྱིར་བསྟན་པའི་ཕྱིར། ལྷག་མ་རྣམས་འཆད་ཚུལ་ཡོད་དེ། དེའི་མཐུན་ཕྱོགས་དང་མི་མཐུན་ཕྱོགས་སྔར་བཤད་པ་དེ་ལྟར་ཡིན་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། དགེ་སྦྱོང་ཚུལ་གྱི་འབྲས་བུ་ངོ་སྐལ་གྱི་དྲི་མས་དག་པ་ན་དེའི་ཡུལ་གཟུགས་ལ་སོགས་པ་ཡང་དེ་ཉིད་ཀྱི་དག་པ་ཉིད་ཡིན་ཏེ། གང་གི་ཕྱིར་ན་དག་བྱ་གཅིག་གིས་དབེན་པའི་དག་པ་དེ་གཉིས་ངོ་བོ་ཐ་དད་མ་ཡིན་ཞིང་། རིགས་ཐ་དད་པའི་གཅད་དུ་མེད་པའི་རིགས་གཅིག་པའི་དག་པར་བརྗོད་པའི་ཕྱིར། གཉིས་པ་ལ། དགག་གཞག་གཉིས་ལས། དང་པོ་ལ། ཁ་ཅིག །འབྲས་བུ་རྣམ་གྲོལ་ལམ་ཆོས་ཅན། ཁྱོད་རང་རྒྱུ་བར་ཆད་མེད་ལམ་གྱི་བསལ་བྱའི་དྲི་མས་དག་པ་ན། ཁྱེད་ཀྱི་ཡུལ་གཟུགས་སོགས་ཀྱང་རང་རྒྱུ་བར་ཆད་མེད་ལམ་གྱི་བསལ་བྱའི་དྲི་མས་དག་པ་ཡིན་ཏེ། ཁྱོད་རང་རྒྱུ་བར་ཆད་མེད་ལམ་གྱི་བསལ་བྱའི་དྲི་མས་དག་པའི་དག་པ་དང་། གཟུགས་སོགས་དེས་དག་པའི་དག་པ་གཉིས། རང་མཚན་ལ་རྫས་ཐ་དད་མ་ཡིན་ཞིང་། སྤྱི་མཚན་ལ་ལྡོག་པ་སོ་སོར་དཔྱད་རྒྱུ་མེད་པའི་

---

^{[མ་དཔེ་གཟིགས་ན་འདིར་གནོན།]}

ཕྱིར། ཟེར་ན། རྣམ་མཁྱེན་རྒྱུན་མཐའི་བར་ཆད་མེད་ལམ་གྱི་བསལ་བྱའི་དྲི་མས་དག་པ་ན་དེའི་ཡུལ་གཟུགས་སོགས་དེས་དག་པར་ཐལ། དམ་བཅའ་འཐད་པའི་ཕྱིར། འདོད་ན། དེས་དེ་དག་པ་ན་སེམས་ཅན་ཐམས་ཅད་དག་པར་ཐལ། འདོད་པའི་ཕྱིར། འདོད་ན། དེས་དེ་དག་པ་ན་སེམས་ཅན་ཐམས་ཅད་འབད་མེད་དུ་གྲོལ་བར་ཐལ། འདོད་པའི་ཕྱིར། གཞན་ཡང་། ས་བརྒྱད་པའི་རྣམ་གྲོལ་ལམ་གྱིས་བདེན་འཛིན་ཆུང་ངུའི་ཆེན་པོ་སྤངས་པ་ན། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་ཀྱིས་དེ་སྤངས་པར་ཐལ། འདོད་པའི་ཕྱིར། འདོད་ན། སྐྱེས་བུ་གཅིག་སངས་རྒྱས་པ་ན་སྐྱེས་བུ་ཕྱི་མ་རྣམས་ལམ་སྒོམ་པའི་འབད་པ་ལ་མི་ལྟོས་པར་སངས་རྒྱས་ཟིན་པར་ཐལ། འདོད་པའི་ཕྱིར། ཁྱབ་པ་ཡོད་དེ། རྣམ་བཤད་ལས། རྣལ་འབྱོར་པ་རང་ཉིད་ཀྱི་དྲི་མ་མཐའ་དག་ཟད་པ་ན། དེའི་ཡུལ་མཐའ་དག་དྲི་མ་མཐའ་དག་གིས་དབེན་པར་སྟོན་པ་མ་ཡིན་ཏེ། དེ་ལྟ་ན། སྐྱེས་བུ་གཅིག་སངས་རྒྱས་པ་ན། ཕྱི་མ་རྣམས་ལམ་སྒོམ་པའི་འབད་པ་ལ་མི་ལྟོས་བར་ཐལ་བར་འགྱུར་རོ། །ཞེས་གསུངས་པའི་ཕྱིར། གསུམ་པ་འགྲེལ་པ་ནི། ཤེས་བྱ་ཆོས་ཅན། དེ་ལྟར་འབྲས་བུ་དང་གཟུགས་ལ་སོགས་པ་དག་བྱ་གཅིག་གིས་རྣམ་པར་དག་པ་རིགས་གཅིག་ཏུ་བརྗོད་པའི་རྒྱུ་མཚན་ཡོད་དེ། རྣམ་དག་དེ་ཉིད་རང་དང་སྤྱིའི་མཚན་ཉིད་ངོ་བོ་ཐ་དད་པ་ཉིད་མ་ཡིན་པ་དེའི་ཕྱིར། དེར་ཐལ། གང་གི་ཕྱིར། འབྲས་བུ་དག་པ་གཟུགས་ལ་སོགས་པ་དེ་དག་གི་རྣམ་པར་དག་པ་ངོ་བོ་ཉིད་ཀྱིས་ཐ་མི་དད་ཅིང་། ཚད་མས་རིགས་ཐ་དད་དུ་གཅད་དུ་མེད་པ་ཉིད་ཀྱི་ཕྱིར། དེར་ཐལ། འབྲས་བུ་རྣམ་གྲོལ་ལམ་དང་དེའི་ཡུལ་གཟུགས་ལ་སོགས་པ་རྣམ་པར་དག་པ་ནི་གཟུགས་ལ་སོགས་པ་ལ་རྣམ་གྲོལ་ལམ་དེའི་ངོ་སྐལ་གྱི་སྤང་བྱ་གཟུགས་ལ་སོགས་པ་ལ་

---

^{[མ་དཔེ་གཟིགས་ན་འདིར་གནོན།]}

བདག་ཏུ་མངོན་པར་ཞེན་པ་ལ་སོགས་པ་དང་བྲལ་བས་རབ་ཏུ་ཕྱེ་བ་ཉིད་ཀྱིས་དག་བྱ་གཅིག་གིས་དབེན་པའི་དག་ཆ་ཡིན་པའི་ཕྱིར། ཤེས་བྱ་ཆོས་ཅན། མདོ་ལས་འབྲས་བུ་རྣམ་པར་དག་པ་གང་ཡིན་པ་དེ་ནི་གཟུགས་ལ་སོགས་པ་རྣམ་པར་དག་པ་ཡིན་ཏེ། ཞེས་བརྗོད་པའི་རྒྱུ་མཚན་ཡོད་དེ། འཕགས་པའི་གང་ཟག་གི་དགེ་སྦྱོང་གི་ཚུལ་གྱི་འབྲས་བུ་རྣམ་གྲོལ་ལམ་གང་ཡིན་པ་དེའི་ངོ་སྐལ་གྱི་མི་མཐུན་པའི་ཕྱོགས་ཐམས་ཅད་དང་བྲལ་བ་ཉིད་ཀྱིས་དེའི་ཡུལ་གཟུགས་སོགས་རྣམས་ཀྱང་དྲི་མ་མེད་པ་སྟེ་རྣམ་པར་དག་པ་ཡིན་པའི་ཕྱིར། གསུམ་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། རྣམ་པར་དག་པའི་སྒོམ་ལམ་སྤྱིར་བརྗོད་ནས། ད་ནི་ཐེག་གསུམ་གྱི་རྣམ་པར་དག་པ་ཁྱད་པར་དུ་འཆད་དེ། ལྷག་མ་རྣམས་ཀྱིས་འཆད་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཉན་ཐོས་དགྲ་བཅོམ་པའི་འགོག་བདེན་ཆོས་ཅན། སློབ་མ་ཉན་ཐོས་ཀྱི་རྣམ་དག་ཡིན་ཏེ། ཉོན་མོངས་སྤངས་པའི་ཉན་ཐོས་ཀྱི་བྲལ་བ་ཡིན་པའི་ཕྱིར། རང་རྒྱལ་དགྲ་བཅོམ་པའི་འགོག་བདེན་ཆོས་ཅན། བསེ་རུ་རང་རྒྱལ་གྱི་རྣམ་དག་ཡིན་ཏེ། གཟུགས་ཕྱི་རོལ་དོན་འཛིན་གྱི་ཤེས་བྱའི་སྒྲིབ་པའི་རྟོག་པ་སྤངས་པའི་རང་རྒྱལ་གྱི་བྲལ་བ་ཡིན་པའི་ཕྱིར། ས་གཉིས་པའི་འགོག་བདེན་ཆོས་ཅན། རྒྱལ་སྲས་རྣམས་ཀྱི་རྣམ་དག་ཡིན་ཏེ། ལམ་གསུམ་གྱི་སྒྲིབ་པ་ཉམས་པའི་བྱང་སེམས་ཀྱི་བྲལ་བ་ཡིན་པའི་ཕྱིར། སངས་རྒྱས་ཀྱི་འགོག་བདེན་ཆོས་ཅན། རྣམ་ཀུན་ཤིན་ཏུ་བའི་དག་པ་ཡིན་ཏེ། སྒྲིབ་གཉིས་སྤངས་པའི་བྲལ་བ་ཡིན་པའི་ཕྱིར། གཉིས་པ་ལ། དགག་གཞག་གཉིས་ལས། དང་པོ་ལ། ཁ་ཅིག །ཉོན་སྒྲིབ་སྤངས་པའི་ཉན་ཐོས་ཀྱི་རྒྱུད་ཀྱི་བྲལ་བ་ཉན་ཐོས་ཀྱི་རྣམ་དག་གི་མཚན་ཉིད་ཟེར་ན། ཉན་ཐོས་མཐོང་ལམ་རྣམ་

---

^{[མ་དཔེ་གཟིགས་ན་འདིར་གནོན།]}

གྲོལ་ལམ་ལ་གནས་པའི་གང་ཟག་གི་རྒྱུད་ཀྱི་གང་ཟག་གི་བདག་འཛིན་མཐོང་སྤང་སྤངས་པའི་འགོག་བདེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། གཞན་ཡང་། ཐེག་ཆེན་གྱི་རྣམ་དག་ཡིན་ན། ཐེག་ཆེན་གྱི་མྱང་འདས་ཡིན་དགོས་པར་ཐལ། ཐེག་དམན་ལ་དེའི་ཕྱིར། འདོད་ན། བྱང་སེམས་ཀྱི་རྣམ་དག་ཆོས་ཅན། དེར་ཐལ། དེའི་ཕྱིར། འདོད་ན། སངས་རྒྱས་ཀྱི་མྱང་འདས་ཡིན་པར་ཐལ། འདོད་པའི་ཕྱིར། འདོད་མི་ནུས། ཁ་ཅིག །ལམ་གསུམ་གྱི་སྒྲིབ་པ་ཅི་རིགས་སྤངས་པའི་བྱང་སེམས་ཀྱི་བྲལ་བ་བྱང་སེམས་ཀྱི་རྣམ་དག་གི་མཚན་ཉིད་ཟེར་ན། དེའི་རྒྱུད་ཀྱི་འགོག་བདེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེས་དེ་མ་སྤངས་པར་ཐལ། བྱང་འཕགས་ཀྱིས་དེ་མ་སྤངས་པའི་ཕྱིར། གཉིས་པ་རང་ལུགས་ནི། རང་ཐོབ་བྱེད་ཀྱི་ཐབས་སུ་གྱུར་པའི་བར་ཆད་མེད་ལམ་གྱི་ངོ་སྐལ་གྱི་སྒྲིབ་པ་སྤངས་པའི་ཉན་ཐོས་ཀྱི་བྲལ་བ་དེ་ཉན་ཐོས་ཀྱི་རྣམ་དག་གི་མཚན་ཉིད། དེ་བཞིན་དུ་རང་རྒྱལ་དང་བྱང་སེམས་ལ་རིགས་འགྲེ། སྒྲིབ་གཉིས་བག་ཆགས་དང་བཅས་པ་སྤངས་པའི་བྲལ་བ་དེ་རྣམ་དག་ཤིན་ཏུ་བའི་མཚན་ཉིད། གསུམ་པ་འགྲེལ་པ་ནི། གོ་རིམ་བཞིན་དུ། ཉན་ཐོས་དགྲ་བཅོམ་པའི་འགོག་བདེན་ཆོས་ཅན། དེའི་རྣམ་དག་ཡིན་ཏེ། འདོད་ཆགས་ལ་སོགས་པའི་ཉོན་མོངས་པ་སྤངས་པའི་དེའི་བྲལ་བ་ཡིན་པའི་ཕྱིར། རང་རྒྱལ་དགྲ་བཅོམ་པའི་དེ་ཆོས་ཅན། རང་སངས་རྒྱས་ཀྱི་དེ་ཡིན་ཏེ། ཉོན་མོངས་པའི་སྒྲིབ་པ་དེ་དང་ཤེས་བྱའི་སྒྲིབ་པའི་ཕྱོགས་གཅིག་པུ་གཟུང་བ་ཕྱི་རོལ་དོན་དུ་འཛིན་པའི་གཟུང་བའི་དོན་གྱི་རྣམ་པར་རྟོག་པ་སྤངས་པའི་རང་རྒྱལ་གྱི་བྲལ་བ་ཡིན་པའི་ཕྱིར། ས་གཉིས་པའི་འགོག་བདེན་ཆོས་ཅན། བྱང་ཆུབ་སེམས་དཔའ་རྣམས་ཀྱི་དག་པ་ཡིན་ཏེ། ཐེག་པ་གསུམ་གྱི་ལམ་གྱི་སྒྲིབ་པ་གསུམ་ཅི་རིགས་སྤངས་

---

^{[མ་དཔེ་གཟིགས་ན་འདིར་གནོན།]}

པའི་བྱང་སེམས་ཀྱི་བྲལ་བ་ཡིན་པའི་ཕྱིར། ཤིན་ཏུ་རྣམ་པར་དག་པ་ཆོས་ཀྱི་དབྱིངས་ལས་བྱུང་བ་ཉིད་དེ་ཐོབ་པའི་སངས་རྒྱས་ཀྱི་འགོག་བདེན་ནི་ཆོས་ཅན། བླ་ན་མེད་པའི་སངས་རྒྱས་ཀྱི་དག་པ་ཡིན་པར་འདོད་དེ། ཉོན་མོངས་པ་དང་ཤེས་བྱའི་སྒྲིབ་པ་བག་ཆགས་དང་བཅས་པ་རྣམ་པ་ཐམས་ཅད་དུ་སྤངས་པའི་བྲལ་བ་ཡིན་པའི་ཕྱིར། བཞི་པ་ལ། རྣམ་དག་ཤིན་ཏུ་བ་ཡིན་མིན་གྱི་ཁྱད་པར་དང་། སངས་རྒྱས་ཀྱི་རྣམ་དག་ཤིན་ཏུ་བར་བསྒྲུབ་པའོ། །དང་པོ་ལ། དྲི་བ་དང་། ལན་གཉིས་ལས། དང་པོ་ནི། ཤེས་བྱ་ཆོས་ཅན། ལམ་ཤེས་པ་ཉིད་ཀྱི་སྐབས་སུ་རྣམ་པར་དག་པ་དངོས་སུ་སྨོས་པའི་ཞར་ལ་གོ་རིམ་བཞིན་དུ་སངས་རྒྱས་ཀྱི་རྣམ་དག་དེ་རྣམ་དག་ཤིན་ཏུ་བ་ཡིན་པ་དང་། ཉན་ཐོས་ལ་སོགས་པའི་རྣམ་དག་དེ་ཅིག་ཤོས་རྣམ་དག་ཤིན་ཏུ་བ་མ་ཡིན་པར་བཤད་པ་དེ་ཇི་ལྟ་བུ་ཡིན་ཞེས་དྲི་བར་བྱ་བ་ཡིན་ཏེ། སྐབས་འདིར་ཉན་རང་གི་རྣམ་དག་འཆད་པ་སྐབས་སུ་མ་བབ་པ་ཡིན་པའི་ཕྱིར་སྙམ་དུ་འདྲི་བའི་ཕྱིར། གཉིས་པ་ལན་ལ། རྩ་བ་དང་། འགྲེལ་པ་གཉིས། དང་པོ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན། སངས་རྒྱས་དང་ཉན་རང་གི་རྣམ་དག་ལ་ཤིན་ཏུ་བ་ཡིན་མིན་གྱི་ཁྱད་པར་འཐད་དེ། ཁམས་གསུམ་ས་དགུ་ལ་ནི་སྒོམ་སྤང་གཟུང་འཛིན་གྱི་རྣམ་རྟོག་ཆེན་པོའི་ཆེན་པོ་ལ་སོགས་པ་འཇོམས་བྱེད་དྲི་མ་ཡི་གཉེན་པོ་ཐེག་ཆེན་གྱི་སྒོམ་ལམ་ཆུང་ངུའི་ཆུང་ངུ་ལ་སོགས་པ་སྒོམ་ལམ་ནི་སྒྲིབ་གཉིས་དག་བྱེད་ཡིན་ཞིང་། ཉན་རང་གིས་དེ་གཉིས་ཀ་སྤོང་མི་ནུས་པའི་ཕྱིར། གཉིས་པ་ལ། ཁ་ཅིག །ས་གཉིས་པའི་བར་ཆད་མེད་ལམ་བདེན་འཛིན་ཆེན་པོའི་ཆེན་པོའི་དངོས་གཉེན་ཡིན་པ་ནས། ས་བཅུ་པའི་བར་ཆད་མེད་ལམ་བདེན་འཛིན་ཆུང་ངུའི་ཆུང་ངུའི་དངོས་གཉེན་བར་ཆད་མེད་ལམ་ཡིན་ནོ། །ཟེར་ན། མི་འཐད་པར་ཐལ། རང་གི་ངོ་སྐལ་གྱི་སྤང་བྱར་གྱུར་པའི་བདེན་འཛིན་ཆེན་པོའི་ཆེན་པོའི་

---

^{[མ་དཔེ་གཟིགས་ན་འདིར་གནོན།]}

དངོས་གཉེན་ཡིན་ན། བདེན་འཛིན་ཆེན་པོའི་ཆེན་པོའི་དངོས་གཉེན་ཡིན་མི་དགོས་པའི་ཕྱིར། མ་གྲུབ་ན། ས་དང་པོའི་སྒོམ་ལམ་བར་ཆད་མེད་ལམ་ཆོས་ཅན། དེར་ཐལ། དེའི་ཕྱིར། དེར་ཐལ། དེའི་ངོ་སྐལ་གྱི་སྤང་བྱར་གྱུར་པའི་དེ་ཡོད་པའི་ཕྱིར། གཞན་ཡང་། ས་བཅུ་པའི་རྣམ་གྲོལ་ལམ་དེ་བདེན་འཛིན་ཆུང་ངུའི་ཆུང་ངུ་སྤངས་པའི་ཡེ་ཤེས་ཡིན་པར་ཐལ། དེ་འདྲའི་བར་ཆད་མེད་ལམ་དེ་དེའི་དངོས་གཉེན་ཡིན་པའི་ཕྱིར། འདོད་ན། དེ་བདེན་འཛིན་གྱི་ས་བོན་སྤངས་པའི་ཡེ་ཤེས་ཡིན་པར་ཐལ། འདོད་པའི་ཕྱིར། འདོད་ན། དེ་ཤེས་སྒྲིབ་སྤངས་པའི་ཡེ་ཤེས་ཡིན་པར་ཐལ། འདོད་པའི་ཕྱིར། འདོད་མི་ནུས། གཉིས་པ་འགྲེལ་པ་ནི། ཤེས་བྱ་ཆོས་ཅན། སངས་རྒྱས་ཀྱི་རྣམ་པར་དག་པ་དེ་དག་རྣམ་དག་ཤིན་ཏུ་བ་ཡིན་པ་དང་། ཉན་རང་གི་དེ་ཅིག་ཤོས་མ་ཡིན་པར་འཆད་རིགས་ཏེ། འདོད་པའི་ཁམས་དང་། བསམ་གཏན་བཞི་དང་། གཟུགས་མེད་པའི་སྙོམས་པར་འཇུག་པ་དག་སྟེ་ཁམས་གསུམ་ས་དགུ་ལ་ཡོད་པའི་སྒོམ་སྤང་མི་མཐུན་པའི་ཕྱོགས་གཟུང་འཛིན་གྱི་རྣམ་པར་རྟོག་པ་ཆེན་པོའི་ཆེན་པོ་ལ་སོགས་པ་རྣམ་པ་དགུའི་གཉེན་པོའི་ངོ་བོར་གོ་རིམ་བཞིན་དུ་སྒོམ་ལམ་ཆུང་ངུའི་ཆུང་ངུ་ལ་སོགས་པ་རྣམ་པ་དགུ་སྒྲིབ་པའི་རྣམ་པ་ཐམས་ཅད་དག་བྱེད་ཡིན་ཞིང་། ཅིག་ཤོས་ཉན་རང་གི་སྒོམ་ལམ་ནི་སྤང་བྱ་ཉི་ཚེ་བ་ཙམ་རྣམ་པར་དག་པའི་རྒྱུ་ཡིན་པའི་ཕྱིར། གཉིས་པ་སངས་རྒྱས་ཀྱི་རྣམ་དག་ཤིན་ཏུ་བར་སྒྲུབ་པ་ལ། མཚམས་སྦྱར་བ། །རྩ་བ་འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། རྫོགས་པའི་སངས་རྒྱས་ཀྱི་རྣམ་དག་དེ་ཤིན་ཏུ་བ་ཇི་ལྟར་ཡིན་ཏེ་མ་ཡིན་པར་ཐལ། དེའི་སྒྲུབ་བྱེད་མེད་པའི་ཕྱིར། ཞེ་ན། གཉིས་ནི། བྱང་སེམས་ཀྱི་སྒོམ་ལམ་མཉམ་གཞག་ཡེ་ཤེས་ཆོས་ཅན། ཁྱོད་ཁམས་གསུམ་གྱི་སྒྲིབ་པ་མ་ལུས་

---

^{[མ་དཔེ་གཟིགས་ན་འདིར་གནོན།]}

པ་དག་བྱེད་ཀྱི་གཉེན་པོ་ཉིད་དུ་འདོད་པ་ཡིན་ཏེ། སྤང་གཉེན་གྱི་རིམ་པ་དེ་ལ་ཀླན་ཀ་སྤངས་པའི་སྒོ་ནས་དེའི་གཉེན་པོར་སྒྲུབ་པའི་ཕྱིར། དེར་ཐལ། ཁྱོད་འཇལ་བྱེད་ཀྱི་ཤེས་པ་དང་། གཞལ་བྱ་དག་དོན་དམ་པར་མ་གྲུབ་པར་མཉམ་པ་ཉིད་དུ་མངོན་སུམ་གྱིས་རྟོགས་པ་ཉིད་ཀྱི་སྤང་བྱ་དེ་དག་དངོས་སུ་འཇོམས་བྱེད་ཡིན་པའི་ཕྱིར། གསུམ་པ་ནི། ཁོ་ན་རེ། ཇི་སྐད་བཤད་པའི་སྤང་གཉེན་གྱི་རིམ་པ་དེ་མི་འཐད་པར་ཐལ། དགྲ་སྟོབས་ལྡན་ལ་གཤེད་མ་སྟོབས་ལྡན་དགོས་པ་ལྟར། དེ་ལ་སྒོམ་སྤང་ཆེན་པོའི་ཆེན་པོ་ནས་དང་པོར་རིམ་གྱིས་འགགས་ན། གཉེན་པོ་སྒོམ་ལམ་ནི་ཆེན་པོའི་ཆེན་པོ་ལ་སོགས་པའི་རིམ་ཅན་དུ་སྐྱེ་བ་འཐད་ལ། དགྲ་སྟོབས་ཆུང་ལ་གཤེད་མ་སྟོབས་ལྡན་མི་དགོས་པ་བཞིན་དུ་མི་མཐུན་ཕྱོགས་ནི་ཆུང་ངུའི་ཆུང་ངུ་ལ་སོགས་པ་འགགས་པ་ལ་གཉེན་པོ་ཡང་ཆུང་ངུའི་ཆུང་ངུ་ལ་སོགས་པ་རིགས་པས། སྒོམ་སྤང་ཆུང་ངུའི་ཆུང་ངུ་མཐར་འགགས་ན། སྒོམ་ལམ་ཆུང་ངུའི་ཆུང་ངུ་ཡང་མཐར་སྐྱེ་བར་རིགས་སོ་སྟེ་རིགས་པའི་ཕྱིར། ཞེས་ཀླན་ཀ་སྨྲ་ན། ཤེས་བྱ་ཆོས་ཅན། སྔར་ཇི་སྐད་བཤད་པ་དེ་མི་འཐད་པའི་སྐྱོན་མེད་དེ། གོས་ལ་ཆགས་པའི་དྲི་མ་ཕྲ་མོ་བསལ་བ་ལ་བཙོ་བླག་མཁན་ཆེ་ཐང་དུ་འབད་པའི་དཔེས་ཀླན་ཀ་སྤངས་པའི་སྒོ་ནས་སྤང་གཉེན་གྱི་རིམ་པ་དེ་ལྟར་གྲུབ་པའི་ཕྱིར། ཤེས་བྱ་ཆོས་ཅན། དེས་ན་སངས་རྒྱས་ཀྱི་རྣམ་པར་དག་པ་རྣམ་དག་ཤིན་ཏུ་བ་ཡིན་པར་རྣམ་པར་བཞག་པ་ཡིན་ཏེ། ཐེག་ཆེན་གྱི་སྒོམ་ལམ་ཤིན་ཏུ་བ་ཇི་སྐད་དུ་བསྟན་པ་གང་ཡིན་པ་དེ་ཉིད་ཁམས་གསུམ་པའི་རྣམ་པ་ཅན་གྱི་ཤེས་པ་དང་ཤེས་བྱ་དག་དོན་དམ་པར་མི་དམིགས་པ་སྟོང་པ་ཉིད་ཀྱིས་མཉམ་པ་ཉིད་གང་ཡིན་པ་དེ་ཉིད་དྲི་མ་མཐའ་དག་གི་གཉེན་པོའི་ངོ་བོ་ཉིད་ཡིན་པའི་ཕྱིར། གསུམ་པ་སྐབས་བསྡུ་བ་ནི། ཤེས་བྱ་ཆོས་ཅན། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ཅེས་བྱ་བ་ལས། སྐབས་

---

^{[མ་དཔེ་གཟིགས་ན་འདིར་གནོན།]}

གཉིས་པའི་འགྲེལ་པ་སྟེ། གཉིས་པའི་ཚིག་དོན་ཀུན་གཏན་ལ་ཕབ་པ་ཡིན་ཏེ། ལམ་ཤེས་མཚོན་བྱེད་ཀྱི་ཆོས་བཅུ་གཅིག་ལེགས་པར་བཤད་པའི་སྒོ་ནས་གཏན་ལ་ཕབ་པའི་ཕྱིར། སྨྲས་པ། གྲངས་མེད་རྒྱལ་བའི་སྲས་ཀྱི་སྤྱོད་ཚུལ་ཀ་ཤི་མཛེས་དགའི་བཞིན་རས་གང་། །འཆར་བར་བྱེད་པའི་བསྟན་བཅོས་མེ་ལོང་སྔ་རབས་ངག་བགྲོས་འཁྲུལ་པའི་གཡའ། །དྲུངས་ནས་འབྱིན་བྱེད་སེང་བཟང་བཞེད་དོན་སྣང་བརྙན་མ་ལུས་སྟོན་བྱེད་པའི། །མང་ཐོས་ལང་ཚོ་རྣམ་པར་རྒྱས་པའི་སྒེག་མོའི་འཕྱང་འཕྲུལ་ཨཱ་དཪྴ། །འདི་ལྟའི་རྒྱན་གྱིས་སྤུད་པས་མི་ངོམས་ཤིང་། །ལེགས་བཤད་ཟས་ལ་དུག་གི་ཆུ་བཞིན་ལྟ། །གཞུང་ལུགས་མཐོང་ཚེ་སྦྲུལ་ལ་གླ་རྩི་ཅན། །མཁས་པའི་དབུས་སུ་མི་སྨྲའི་བརྟུལ་ཞུགས་འཛིན། བླུན་པོ་ཚོགས་ནས་དྲེགས་པས་འགྱིང་བྱེད་པའི། །གངས་ཁྲོད་བསྟན་པ་འཛིན་པར་རབ་རློམ་པ། །དེ་འདྲ་ཡོངས་ཀྱི་སྤྱོད་ཡུལ་མ་ཡིན་ཡང་། །རིགས་ལམ་སྨྲ་བའི་བློ་གསལ་རྒྱན་དུ་མཛེས། ཁ་བའི་རྡུལ་བརྩེགས་ཆུ་ཤེལ་ཞུན་མའི་རི། །ཟླ་སྣང་གསར་པས་ཁྱབ་པའི་འོད་དཀར་ལ། །མིག་སྟོང་ཅན་གྱིས་བལྟས་ཀྱང་མཐོང་མིན་པའི། །ཕྲ་ཞིབ་རིག་པའི་གནས་འདི་བླ་མའི་དྲིན། །དཔལ་ལྡན་འདྲེན་མཆོག་མཆོག་གི་ལམ་བཟང་དེར། བགྲོད་པའི་ཐབས་ཚུལ་ཚུལ་བཞིན་འཆད་བྱེད་པའི། །རྒྱ་བོད་མཁས་ཀུན་ཀུན་གྱི་དགོངས་དོན་ལས། །འཁྲུལ་མེད་གཞུང་དོན་དོན་གྱི་སྙིང་པོར་དྲིལ། །ཞེས་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་རྩ་འགྲེལ་གསལ་བར་བྱེད་པ་བློ་བཟང་དགོངས་རྒྱན་གདོང་ལྔའི་དབང་པོའི་སྒྲ་དབྱངས་ཞེས་བྱ་བ་ལས། སྐབས་གཉིས་པའི་ཚིག་དོན་མཐའ་དཔྱོད་ཇི་སྙེད་པ་བཤད་ཟིན་ཏོ།། །།མངྒ་ལཾ།། །།