བསྟན་བཅོས་མངོན་རྟོགས་རྒྱན་རྩ་འགྲེལ་རྣམས་གསལ་བར་བྱེད་པ་བློ་བཟང་དགོངས་རྒྱན་གདོང་ལྔའི་དབང་པོའི་སྒྲ་དབྱངས། སྐབས་དང་པོའི་ཚིག་དོན་མཐའ་དཔྱོད།
བསྟན་བཅོས་མངོན་རྟོགས་རྒྱན་རྩ་འགྲེལ་རྣམས་གསལ་བར་བྱེད་པ་བློ་བཟང་དགོངས་རྒྱན་གདོང་ལྔའི་དབང་པོའི་སྒྲ་དབྱངས་ལས། སྐབས་དང་པོའི་ཚིག་དོན་མཐའ་དཔྱོད་བཞུགས་སོ། །
མཆོད་བརྗོད་དང་རྩོམ་པར་དམ་བཅའ་བ། མཆོད་བརྗོད་དང་རྩོམ་པར་དམ་བཅའ་བ།
ཕུལ་དུ་བྱུང་བའི་མཐའ་བྲལ་བསོད་ནམས་མཆོག་གི་ཟླ་བའི་མ་མ་གང་། །བླ་ན་མེད་པའི་ཡེ་ཤེས་ས་འཛིན་དབང་པོ་དག་གི་ཟློས་གར་ལས། །
སྐུ་གསུམ་འཁོར་ལོ་ཡོངས་སུ་རྫོགས་པའི་ཟས་གཙང་སྲས་པོ་བསིལ་ཟེར་ཅན། །ཕན་དང་བདེ་བའི་ཨུཏྤལ་དཀར་པོ་རབ་ཏུ་རྒྱས་པའི་དགེ་ལེགས་སྩོལ། །
ཤེལ་དཀར་རྡུལ་བརྩེགས་རྟ་ལྗང་དབང་པོ་ཡིས། །ལན་བརྒྱར་འཁྱུད་ལ་སྒེག་མོའི་གཟུགས་ལྡན་ན། །མཛེས་སྡུག་ཁྱོད་སྐུའི་དཔེར་བསྟན་ཚངས་སྲས་མ། །ངག་གི་དབང་ཕྱུག་ཐམས་ཅད་མ་སྦྱིན་ཀྱེ། །
རྟོགས་པར་དཀའ་བའི་རྒྱལ་ཡུམ་དོན། །ལེགས་པར་སྟོན་པའི་སྔོན་མེད་རྒྱན། །ཕྱོགས་འདི་ཤིང་རྟ་ཆེན་པོ་ཡི། །མགྲིན་པར་འཆང་མཛད་མི་ཕམ་པ། །
མི་དམན་བརྩོན་འགྲུས་རྡུལ་གྱི་རྒྱལ་མཚན་གྱིས། །སྦས་དོན་མངོན་པར་རྟོགས་པའི་དྲི་བསུང་ཅན། །དགའ་ལྡན་མ་ལ་ཡ་ནས་ལེན་མཛད་པའི། །ཐོགས་མེད་དཔྱིད་ཀྱི་ཕོ་ཉ་ཕྱག་གི་ཡུལ། །མཐའ་ཡས་ཤེས་བྱའི་ཚིག་དོན་རྩལ་གསུམ་ཀུན། །ཡོངས་རྫོགས་ལེགས་བཤད་སེང་གེའི་ང་རོའི་སྒྲས། །རྒོལ་ངན་གཉིས་འཐུང་སྐྲག་པའི་མཛད་བཟང་དཔལ། །རྣམ་འདྲེན་ཉི་མའི་གཉེན་གྱི་བསྟན་ལ་འཇེབས། །མདོ་རྒྱན་འགྲེལ་བར་བཅས་པའི་ཡིད་བཞིན་ནོར། །འཕགས་ཡུལ་རིན་ཆེན་གླིང་ནས་འདྲེན་མཁས་པའི། །འཇིག་རྟེན་མིག་གཅིག་སྐད་བན་དྷེ་དཔལ་བརྩེགས། བློ་ལྡན་ཤེས་རབ་སོགས། གཉིས་སྨྲ་བའི་དྲིན། །ཀུན་གསལ་མཛེས་མའི་མཐས་ཀྱང་གཞལ་དུ་ཅི། །འཇམ་མགོན་སྒྱུ་འཕྲུལ་དྲ་བའི་རོལ་གར་འཆི་མེད་དབང་པོའི་དགའ་བའི་ཚལ་རབ་ཡངས་པ་ལས། །གསེར་མངལ་ཅན་སོགས་རྒན་པོ་ཀུན་གྱི་སྙེམས་པ་འཕྲོག་བྱེད་རྨད་བྱུང་བློ་གྲོས་ཡོངས་འདུའི་ལྗོན། །མཁས་པའི་ལྕུག་ཕྲན་གཞོན་ནུའི་ཕོན་པོ་ལྡེམ་ལྡེམ་རབ་གཡོ་བཙུན་པའི་དྲི་བསུང་ཆེས་ཆེར་འཕྲོ། །བཟང་པོའི་འབྲས་བུ་ཁུར་དུ་རབ་དུད་གྲགས་སྙན་རོ་བརྒྱ་དཔྱོད་ལྡན་ལེགས་བྲིས་འདོད་འཇོའི་དཔྱིད། །རྣ་བ་བརྒྱད་པའི་ཐོད་ལྟར་ཕ་མཐའ་ཡོངས་བྲལ་རྒྱལ་བའི་གསུང་རབ་ཆུ་ཀླུང་ཆེ། །འཇམ་དབྱངས་བླ་མ་སྐལ་ལྡན་ཤིང་རྟས་རབ་དྲངས་ལེགས་བཤད་ཡན་ལག་བརྒྱད་ལྡན་ཆབ། །རྣམ་དཔྱོད་ཧུབ་ཀྱིས་ཅིག་ཅར་འཐུངས་ལ་སྟོབས་ལྡན་དར་མ་རིན་ཆེན་ཛ་ཧྣུས། །སླར་སྐྱུགས་གསུང་རབ་ཡང་སྙིང་ནོར་བུའི་
འཕྲེང་འདི་ཐུབ་བསྟན་ལུས་ཕྲའི་རྒྱན་དུ་མཚར། །རྗེ་བོའི་སྟོབས་དང་ནོར་ལྡན་སྤྱོད་ཚུལ་ཙམ། །སྐྱབས་སུ་བསྟེན་མིན་བརྒྱ་ཕྲག་གཞུང་ལུགས་ལ། །བརྒལ་བརྟག་དཔྱད་བཟོད་ཚུལ་འདིའི་གསལ་ཆོས་རྗེ་ལེགས་ཆོས་པ། ཆོས་རྗེ་བསོད་ནམས་གྲགས། ཆོས་རྗེ་རྗེ་བཙུན་པ་སོགས། བྱེད་ཅན། །ཀུན་ལ་དང་བའི་སྤྲོ་བ་ཅིས་མི་འཕེལ། །རྒྱ་བོད་མཁས་པའི་ཞལ་སྐྱོན་བདུད་རྩིས་ཐུགས་ཀྱི་ཟ་མ་ཏོག་གཏམས་ལས། །སྲིད་འདིར་ཡོངས་དཀོན་དྲང་ངེས་འབྱེད་པའི་མཁྱེན་རབ་གསེར་སྐྱོགས་ཀྱིས་བཅུས་པའི། །ལེགས་བཤད་ཟིལ་མངར་དགའ་སྟོན་མཆོག་གིས་ཤེས་ལྡན་སྐབས་གསུམ་བདེ་བ་ཡིས། །ཆོས་ཀུན་འབྱེད་པའི་ཤེས་རབ་འཕེལ་མཛད་ཡོངས་འཛིན་ཞབས་པད་གཙུག་ཏུ་བསྟེན། །ཨེ་མ་ཟུར་ཕུད་ལྔ་པ་གང་། །ཆགས་བྲལ་ངུར་སྨྲིག་འཆང་བ་ཡི། །སྒྱུ་འཕྲུལ་སྨིན་མའི་གར་མཁན་མ། །མཁས་དབང་གང་དེའི་བཀའ་དྲིན་ལས། །ལྷ་ཡི་ལམ་ལྟར་ཕ་མཐའི་ཚད། །གཞལ་བ་ལས་འགོངས་རྒྱལ་ཡུམ་དོན། །བདག་ལྟའི་དམན་བློའི་ལུས་འདེགས་ཀྱིས། །ཅུང་ཟད་སྤྱོད་པའི་སྐལ་བ་ཐོབ། །དེ་ཕྱིར་རྒྱལ་དབང་བཙོང་ཁ་པ། །སྲས་བཅས་དགོངས་དོན་ཡོངས་འཛིན་རྗེའི། །གསུང་ལས་ཐོས་པའི་ཚིག་གི་འཕྲེང་། །བློ་བཟང་དགོངས་རྒྱན་འདི་ན་སྤྲོ། །གང་ཞིག་མངོན་སུམ་རྗེས་དཔག་ཚད་མ་ཡིས། །གཞལ་ནུས་གསུང་རབ་དོན་ལ་ལྟར་རྨོངས་ཀྱང་། །ལྐོག་ཏུ་གྱུར་སོགས་ཆོས་ཀུན་མ་ལུས་པ། །མཁྱེན་པར་རློམ་པ་གངས་ཅན་འདི་ན་མང་། །མི་བསྲུན་བཟོད་དཀའི་ཉོན་མོངས་མེ་
འོབས་དོང་། །ཚུལ་འཆོས་ཐལ་བས་གཡོགས་པའི་སྣང་ཚུལ་གྱིས། །སྒྲིབ་བྱང་རྒྱལ་བའི་མཚན་ལ་བདག་གིར་ཅན། །མགྲིན་བཟང་གཟིག་ལྤགས་གྱོན་པས་བོད་འདི་གང་། །ཀྱེ་མ་ལུང་རིགས་སྨྲ་བའི་འབབ་སྟེགས་དང་། །བྲལ་བའི་དྲེགས་ལྡན་མཐའ་དག་ཚུལ་འདི་ལ། །རྟོག་དཔྱོད་ངལ་བ་སྤངས་ཏེ་མཐོན་པོའི་ཁྲིར། །བག་མེད་གཉིད་ཀྱི་དགའ་སྟོན་ལྷུར་བྱོས་ཤིག །བཻཌཱུརྱ་མཐིང་ཁ་འཁྱིལ་འདྲའི་རྫིང་བུ་ལ། །འཁོར་ལོའི་ཡན་ལག་ཅན་ཀུན་འདུ་བ་ལྟར། །ཐེག་ཆེན་ལམ་འདིར་བཟང་པོའི་བག་ཆགས་དག །སད་པའི་བློ་གསལ་མཐའ་དག་རྣ་བ་བློགས། །དེ་ལྟར་ལེགས་བྱས་ཀྱི་དངོས་པོ་མཐའ་ཀླས་པར་བསྐྲུན་པའི་ཡུལ་ཁྱད་པར་ཅན་རྣམས་ལ་ཆེད་དུ་བརྗོད་པའི་དབྱངས་ཀྱི་ང་རོ་འཕང་འགྲོའི་རྒྱུད་ལས་ཉེ་བར་དྲངས་ཏེ། རང་ཅག་རྣམས་ཀྱིས་མཇལ་བར་དཀའ་བ་སྒྲོན་མེའི་བསྐལ་པ་རྣམས་ཀྱི་ནང་ནས། །ལྷ་རྣམས་ཀྱིས་བསྟོད་བསྔགས་ཀྱི་འཕྲེང་བས་བཟང་པོའི་བསྐལ་པར་གྲགས་པ་འདི་ལ། །སྟོབས་བཅུ་མངའ་བ་སྟོང་གི་ནང་ནས། །སྙིང་སྟོབས་ཀྱི་གོ་ཆ་བཙན་པོ་མ་སྨད་པ་གྱོན་པའི་སྐྱེས་མཆོག །མ་ལུས་པར་སྤངས་པ། ལེགས་པར་རྟོགས་པ། བརྩེ་ཆེན་ཐུགས་རྗེའི་བདག་ཉིད་དུ་གྱུར་པ། སྙིགས་མ་ལྔ་བདོ་བའི་སེམས་ཅན་བློ་མ་སྦྱངས་པ། དབང་པོ་མཐའ་དག་ཉོན་མོངས་པའི་ཕྱོགས་སུ་རྟས་པ་རྣམས་ལ་སྙིང་རྗེས་ལྷག་པར་བརླན་པ། སྟོན་པ་བུ་རམ་ཤིང་པའི་བསྟན་པ་རིན་པོ་ཆེ་དང་མཇལ། ཆེས་ཤིན་ཏུ་རྙེད་པར་དཀའ་བའི་དལ་བའི་རྟེན་བཟང་པོ་ཐོབ་པའི་དུས་འདིར། དེ་དོན་ལྡན་དུ་བྱེད་པའི་ཐབས་དམ་པ། མཆོག་དམན་གྱི་འགྲོ་བའི་བློ་ངོ་དང་འཚམས་པར། རྒྱལ་བས་ཆོས་ཀྱི་ཕུང་པོ་ཇི་སྙེད་ཅིག་གསུངས་པ་རྣམས་ཀྱི་ཚིག་དོན་ཐོས་བསམ་སྒོམ་པས་གཏན་ལ་འབེབས་པ་ལས་ཆེས་ལྷག་པ་
མ་མཆིས་ལ། ཁྱད་པར་དུ་ཕྲ་ཞིང་རྟོགས་པར་དཀའ་བའི་སྦས་དོན་མངོན་རྟོགས་ཀྱི་དོན་གསལ་བར་མཛད་པ་ལ་འགྲན་ཟླ་མེད་པའི་ཤིང་རྟ་ཆེན་པོར་རྒྱལ་བས་ལུང་བསྟན་པའི་འཕགས་པ་ཐོགས་མེད་ཀྱི་བཀའ་སྲོལ་ཕྱིན་ཅི་མ་ལོག་པ་རྗོད་བྱེད་ཀྱི་ཚིག་ཉུང་ཞིང་བརྗོད་བྱའི་དོན་ཚང་བར་འགྲེལ་ནུས་པའི་སློབ་དཔོན་སེང་གེ་བཟང་པོའི་རིང་ལུགས་འཁྲུལ་པ་དང་བྲལ་བ། གངས་རིའི་ར་བས་བསྐོར་བའི་ལྗོངས་འདིར་གསལ་བར་སྟོན་པའི་སྙིགས་དུས་ཀྱི་རྒྱལ་བ་གཉིས་པ་ཡབ་སྲས་ཀྱི་གསུང་རབ་རིན་པོ་ཆེར། བློ་གྲོས་ཀྱི་བགོ་སྐལ་ཅི་མཆིས་པས་སྐྱོད་པ་ནི་རྙེད་པའི་མཆོག་ཡིན་པའི་ཕྱིར་ན་གཏན་ལ་འབེབས་པར་བྱའོ། །
མཚན་གྱི་དོན་བཤད་པ།
མཚན་གྱི་དོན་བཤད་པ། དེ་ལ་གསུམ། མཚན་གྱི་དོན། གཞུང་དོན། མཇུག་གི་དོན་ནོ། །དང་པོ་ལ། དངོས་དང་། ཞར་བྱུང་གཉིས་ལས། དང་པོ་ལ། མཚན་བསྒྱུར་བ་དང་། མཚན་བཤད་པའོ། །དང་པོ་ནི། རྒྱ་གར་སྐད་དུ་ཞེས་པ་ནས། འགྲེལ་པ་ཞེས་པའི་བར་བྱུང་། སྦྱོར་ངག་ཏུ་དྲིལ་ན། ཤེས་བྱ་ཆོས་ཅན། རྒྱ་གར་གྱི་སྐད་དུ། བསྟན་བཅོས་འདིའི་མཚན་ལ་ཨ་བྷི་ཞེས་སོགས། བོད་ཡུལ་གྱི་སྐད་དུ་བསྒྱུར་ན། ཤེས་རབ་ཅེས་སོགས་ལ་འཇུག་པ་ཡིན་ཏེ། ཨ་བྷི་ས་མ་ཡ་མངོན་པར་རྟོགས་པ། ཨ་ལཾ་ཀ་ར་རྒྱན། ནཱ་མ་ཞེས་བྱ་བ། པྲཛྙཱ་ཤེས་རབ། པཱ་ར་མི་ཏ་ཕ་རོལ་ཏུ་ཕྱིན་པ། ཨུ་པ་དེ་ཤ་མན་ངག །ཤཱསྟྲ་བསྟན་བཅོས། བྲི་ཏི་འགྲེལ་པར་སྐད་ཤན་སྦྱོར་རིགས་པའི་ཕྱིར། དེས་ན་སློབ་དཔོན་དཎྜིས། ངག་གི་རང་བཞིན་དེ་དག་ཀྱང་། །ལེགས་སྦྱར་དེ་བཞིན་རང་བཞིན་དང་། །ཟུར་ཆག་འདྲེས་མ་ཞེས་བྱསྟེ། །རྣམ་པ་བཞི་རུ་མཁས་པས་གསུངས། །ཞེས་སྐད་རིགས་བཞིར་བཤད་པ་ལས།
འདི་ནི་ལེགས་པར་སྦྱར་བ་ལྷའི་སྐད་དེ། རྒྱལ་བའི་གསུང་རབ་དེའི་དགོངས་འགྲེལ་ཚད་ལྡན་ཕལ་ཆེར་ལེགས་སྦྱར་གྱི་སྐད་དུ་བརྗོད་པས་སོ། །དེའི་རྒྱུ་མཚན་གྱིས། མཁས་པའི་དབང་པོ་སྟག་ཚང་ལོ་ཙཱ་བས། རྒྱལ་བའི་གསུང་རབ་ཐམས་ཅད་སུཔྲ་དང་ནི། །ཏིང་གི་མཐའ་ཅན་ལེགས་སྦྱར་ལྷ་ཡི་སྐད། །བྱིངས་དང་རྣམ་འགྱུར་རྐྱེན་གྱི་རང་བཞིན་དུ། །གནས་ཕྱིར་འཕགས་ཡུལ་མཁས་རྣམས་ཚུལ་འདིར་རོལ། །ཞེས་གསུངས་པ་ལྟར་རོ། །སྤྱིར་སྒྲ་བསྒྱུར་བ་ལ། བརྒྱུད་དེ་བསྒྱུར་བ། ཡན་ལག་བསྒྱུར་བ། རྣམ་གྲངས་བསྒྱུར་བ། རང་ཐད་བསྒྱུར་བ་བཞིར། །གནས་བརྒྱད་ཆེན་པོའི་རྩ་བ་ལས་གསུངས་པའི་དང་པོ་ནི་གོ་ལུ་ཞེས་པའི་སྒྲ་ལས་བརྒྱུད་པས། འཛམ་བུའི་འབྲས་བུ་སྨིན་པ་ནི། །དྲི་མ་མེད་པའི་ཆུ་ལ་ལྷུང་། །ཉ་ཡིས་ཟ་བའི་ཆེད་དུ་ནི། །གུ་ལུ་གུ་ལུ་ཞེས་སུ་སྨྲ། །ཞེས་བསྒྱུར་བ་ལྟ་བུས་དང་། གཉིས་པ་ནི། ཨ་པྲ་ཤི་ཀ་ཞེས་པ་སོ་སོར་ཕྲལ་བས། སྙིང་དང་འདྲ་བའི་གྲོགས་པོ་འདིས། །དབེན་པའི་གནས་སུ་བདག་བཟུང་སྟེ། །རྐང་པས་མགོ་བོ་མནན་བྱས་ནས། །རལ་གྲིས་མགོ་བོ་ཉེ་བར་བཅད། །ཅེས་བསྒྱུར་བ་ལྟ་བུའོ། །གསུམ་པ་ནི། ཀཽ་ཤི་ཀ་ཞེས་པ་བརྒྱ་བྱིན། མཁས་པ། གུ་གུལ། འུག་པ། ཀུ་ཤ་ཐོགས་པ། མཛོད་ལྡན་རྣམས་ལ་འཇུག་པ་སྐབས་ཐོབ་ཀྱིས་བསྒྱུར་བ་ལྟ་བུ། བཞི་པ་ནི། དེ་དག་ལས་ལོགས་སུ་བསྒྱུར་བ་རྣམས་ཡིན་པས་འཆད་ཚུལ་མཐའ་ཡས་ལ། དེ་ལྟ་ན་ཡང་རྒྱ་གར་མཁས་པའི་གཞུང་། བོད་སྐད་དུ་བསྒྱུར་བ་ལ་དགོས་པའི་གཙོ་བོ་ནི། པང་ལོ་ཆེན་པོས། རང་བཞིན་རྐྱེན་དང་རྣམ་འགྱུར་གསུམ། །བརྡ་སྤྲོད་གཞུང་གི་བརྗོད་བྱ་ཡིན། །ཞེས་པ་ལྟར། བྱིངས་ལ་རྐྱེན་དང་། རྟགས་ལ་རྣམ་དབྱེ་སྟེར་ཚུལ་འདི་ཉིད་གཙོ་བོ་ཡིན་ཀྱང་། སྐབས་
འདིར་བྱིངས་སྒྲུབ་སོགས་ཀྱི་སྤྲོས་པ་བྱས་ཚེ། ཕྱོགས་འདི་ལ་བརྡ་མ་བྱང་བ་རྣམས་ཀྱིས་དོན་ལྟ་ཞོག །ཚིག་ཙམ་ཡང་ཚུལ་བཞིན་དུ་བརྗོད་པར་དཀའ་བས་མི་འཆད་ལ། སྐད་ཤན་སྦྱར་ཙམ་ནི་གོང་དུ་སྦྱོང་ངག་གི་སྐབས་སུ་སྨོས་ཟིན་ཏོ། །དེ་ཡང་ལོ་ཙཱ་བས་རྒྱ་སྐད་སྨོས་པའི་རྒྱུ་མཚན། རྒྱ་གར་གྱི་ཡུལ་དེ་དུས་གསུམ་གྱི་སངས་རྒྱས་རྣམས་བལྟམས་པ་དང་། འཚང་རྒྱ་ཚུལ་བསྟན། ཆོས་གསུངས་ཤིང་མྱ་ངན་ལས་འདས་པའི་མཛད་པ་རྣམས་བསྟན་ཅིང་། སྟོན་པར་འགྱུར་བའི་ཡོན་ཏན་ཁྱད་འཕགས་དང་ལྡན་པ། དམ་པའི་ཆོས་ཀྱི་འབྱུང་ཁུངས་ཡིན་པའི་ཕྱིར་ན། ཁུངས་བཙུན་པའི་ཆེད་དུ་ཡིན་ལ། འགའ་ཞིག་རྒྱ་གར་ཞེས་པ་ལ་སྒྲ་བཤད་པར་བྱེད་ནའང་། འདི་ནི་འདོད་རྒྱལ་བར་མཁས་པ་ཚད་ཐུབ་ཕལ་ཆེར་བཞེད་ཅིང་། བློ་ཆུང་ལ་ལ་དག །སྒྲ་བཤད་དུ་མེད་ན་དོན་རྟོགས་མི་ནུས་སྙམ་པ་ནི་བློ་ཤིན་ཏུ་དམན་ཏེ། རྣམ་འགྲེལ་ལས། གྲགས་པ་བརྡ་ཡི་རྗེས་འགྲོ་ཅན། །དེ་ཡང་བརྗོད་འདོད་རྗེས་འགྲོ་ཅན། ཐ་སྙད་དོན་དུ་བྱས་པ་སྟེ། སྡེབ་སྦྱོར་མིང་དང་སྒྲ་ཆ་བཞིན། ཞེས་པའི་ཚིག་ཙམ་ཡང་རྣ་བར་མ་ཐོས་པའི་སྐྱོན་ནོ། །མཁས་རློམ་ཁ་ཅིག་གིས་རྒྱ་གར་གྱི་ཡུལ་དབུས་མ་ག་དྷ་ཞེས་པ་མང་པོས་བཀུར་བའི་རྒྱལ་པོའི་མཾ་གྷས་བཟུང་བའི་ཡུལ་ཡིན་པས་དེ་ལྟར་གྲགས་ཞེས་སྨྲ་བ་ནི། མ་དྷྱ་ག་ཏ་དྷ་ར་ལ་ཙནྡྲ་པའི་དགོངས་པ་ལྟར། པྲྀ་ཥོ་དྷ་རའི་བསྡུ་བ་བྱས་པ། བོད་སྐད་དུ་དབུས་འགྱུར་འཆང་ཡིན་པ་སོགས་མ་ཐོས་པའི་གཏམ་ཡིན་ཞིང་། འདི་འདྲའི་རིགས་ཀྱི་བརྗོད་བྱ། བཀའ་བརྒྱུད་པ་རྣམས་ཀྱིས་ནཱ་རོ་པའི་སྒྲ་བཤད་བྱེད་པ་ལྟ་བུའི་བླུན་གཏམ་ལ་བོད་ཡུལ་འདིར་ཟད་པ་མེད་པའི་ཕྱིར་དགག་གཞག་གི་སྤྲོས་པ་བསྐྱུངས་
ཏེ་དཀྱུས་ལ་འཇུག་པར་བྱེད་དོ། །གཉིས་པ་ནི། གདུལ་བྱའི་ཤེས་རྒྱུད་ཉོན་མོངས་པ་ལས་འཆོས་ཤིང་། ངན་འགྲོ་དང་སྲིད་པའི་འཇིགས་པ་ལས་སྐྱོབ་པའི་བསྟན་བཅོས་མངོན་པར་རྟོགས་པའི་རྒྱན་ཆོས་ཅན། ཁྱོད་ལ་མན་ངག་ཅེས་བརྗོད་པའི་རྒྱུ་མཚན་ཡོད་དེ། ལམ་དང་འབྲས་བུ་ཤེར་ཕྱིན་བརྗོད་བྱར་བྱེད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་དོན་རྟོགས་བྱེད་ཀྱི་ཐབས་ཡིན་པས་དེ་ལྟར་བརྗོད་པའི་ཕྱིར། རྒྱན་གྱི་བརྗོད་བྱ་མངོན་པར་རྟོགས་པ་བརྒྱད་པོ་ཆོས་ཅན། ཁྱོད་ལ་མངོན་པར་རྟོགས་པ་ཞེས་བྱ་བའི་རྒྱུ་མཚན་ཡོད་དེ། རང་ཡུལ་མངོན་སུམ་དུ་རྟོགས་པའམ། དེ་ལ་མངོན་དུ་ཕྱོགས་པས་དེ་ལྟར་བརྗོད་པའི་ཕྱིར། བསྟན་བཅོས་འདི་ཆོས་ཅན། ཁྱོད་ལ་རྒྱན་ཞེས་བརྗོད་པའི་རྒྱུ་མཚན་ཡོད་དེ། མཛེས་མ་རྒྱན་བཟང་གིས་སྤྲས་པ་མེ་ལོང་དུ་ཤར་བ་མཐོང་བ་ན་ཆགས་ལྡན་དགའ་བ་ལྟར། ཡུམ་ལ་དངོས་པོ་བརྒྱད་དོན་བདུན་ཅུས་སྤྲས་པ་བསྟན་བཅོས་འདིར་གསལ་བར་མཐོང་ཚེ་མཁས་པ་རྣམས་དགའ་བའི་ཕྱིར། ཤེས་བྱ་ཆོས་ཅན། འདི་ལ་ཅེས་བྱ་བ་ཞེས་བརྗོད་པའི་རྒྱུ་མཚན་ཡོད་དེ། རྒྱན་གྱི་མིང་དོན་དེ་ལྟར་དུ་སྒྲོགས་པའི་རྒྱུ་མཚན་གྱིས་ཡིན་པའི་ཕྱིར། འགྲེལ་པ་དོན་གསལ་ཆོས་ཅན། ཁྱོད་ལ་འགྲེལ་པ་ཞེས་བྱ་བའི་རྒྱུ་མཚན་ཡོད་དེ། རྒྱན་གྱི་དོན་ལེགས་པར་འགྲེལ་བས་དེ་ལྟར་བརྗོད་པའི་ཕྱིར། གཉིས་པ་ལ། བམ་གྲངས་དང་། འགྱུར་ཕྱག་གཉིས་ལས། དང་པོ་ནི། ཤེས་བྱ་ཆོས་ཅན། བམ་པོ་དང་པོ་ཞེས་བརྗོད་པ་ལ་རྒྱུ་མཚན་ཡོད་དེ། བསྟན་བཅོས་འདི་ལ་ཤོ་ལོ་ཀ་སུམ་བརྒྱ་རེ་ལ་བམ་པོར་བྱས་པའི་བམ་པོ་ལྔ་ཡོད་པའི་དང་པོ་འདི་ནས་འཛིན་པས་དེ་ལྟར་དུ་བརྗོད་པའི་ཕྱིར། གཉིས་པ་ནི། བསྟན་པ་སྔ་དར་གྱི་ལོ་ཙཱ་བ་སྐ་བ་དཔལ་བརྩེགས་དང་། ཕྱི་དར་གྱི་ལོ་ཙཱ་བ་བློ་
ལྡན་ཤེས་རབ་གཉིས་ཆོས་ཅན། ཁྱོད་ཀྱིས་འདི་བསྒྱུར་བའི་ཐོག་མར་གུས་པའི་ཚུལ་གྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་བ་ལ་དགོས་པ་ཡོད་དེ། གནས་སྐབས་འགྱུར་གྱི་བར་ཆད་ཞི་ཞིང་། མཐར་ཐུག་བྱང་གྲོལ་འཐོབ་པའི་ཆེད་ཡིན་པའི་ཕྱིར།
གཞུང་གི་དོན་ལས་བཤད་པ་ལ་འཇུག་པའི་བྱ་བ།
གཞུང་གི་དོན་ལས་བཤད་པ་ལ་འཇུག་པའི་བྱ་བ། གཉིས་པ་གཞུང་དོན་ལ། བཤད་པ་ལ་འཇུག་པ། བཤད་པ་ཉིད་དགོད་པ། བཤད་པ་མཐར་ཕྱིན་པའི་ཚུལ་གསུམ་ལས། དང་པོ་ལ། མཆོད་པར་བརྗོད་ཅིང་བཤད་པར་དམ་བཅའ་བ། འགྲེལ་པ་རྩོམ་རིགས་པར་སྒྲུབ་པ། ཁེངས་སྐྱུང་ཞིང་སྤྲོ་བ་སྐྱེད་པའི་རྒྱུ་མཚན་ནོ། །དང་པོ་ལ། གཞུང་གི་ཚིག་དོན་བཤད་པ་དང་། མཐའ་དཔྱད་པ་གཉིས་ལས། དང་པོ་ནི། སློབ་དཔོན་སེང་བཟང་ཆོས་ཅན། ཁྱོད་ཀྱི་འགྲེལ་པ་འདི་རྩོམ་པའི་ཐོག་མར་གཞུང་ལམ་འབྲས་བུའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་བ་ཡིན་ཏེ། དེ་ལ་གུས་པས་འདུད་པའི་ཕྱིར། སློབ་དཔོན་གྱིས་འདི་རྩོམ་པའི་ཐོག་མར་ཤེར་ཕྱིན་གསུམ་ལ་ཕྱག་འཚལ་བ་ལ་ཆོས་ཅན། དགོས་པ་ཡོད་དེ། ཡུམ་དེའི་རྒྱན་གྱི་ཚིག་ལེའུར་བྱས་པ་དག །ཡུམ་གསུམ་པོ་ཀུན་གྱི་རྒྱན་དུ་འགྱུར་བ་ནི། འགྲེལ་པ་འདིས་རྣམ་པར་དབྱེ་བར་བྱ་བའི་ཕྱིར་དུ་ཡིན་པའི་ཕྱིར། གཉིས་པ་ལ། དགག་གཞག་སྤང་གསུམ་ལས། དང་པོ་ནི། ཁ་ཅིག་འགྲེལ་བྱེད་མཁན་པོ་གཞན་གྱི་རྗེས་སུ་མ་འབྲངས་པར། མདོ་དོན་རང་དབང་དུ་འགྲེལ་བར་བྱེད་པའི་གང་ཟག་དེ་ཤིང་རྟའི་སྲོལ་འབྱེད་ཀྱི་མཚན་ཉིད་ཡིན་ཟེར་ན། རྒྱན་རྩོམ་པ་པོའི་རྗེ་བཙུན་བྱམས་མགོན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། ཤིང་རྟའི་སྲོལ་འབྱེད་གཞན་གྱི་
རྗེས་སུ་མ་འབྲངས་པར་མདོ་དོན་རང་དབང་དུ་འགྲེལ་བར་བྱེད་པའི་བསྟན་བཅོས་མངོན་རྟོགས་རྒྱན་མཛད་པའི་གང་ཟག་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། དབུ་མ་བའི་ཤིང་རྟའི་སྲོལ་འབྱེད་ཡིན་པར་ཐལ། ཐེག་ཆེན་གྱི་ཤིང་རྟའི་སྲོལ་འབྱེད་གང་ཞིག །ཁྱོད་དེ་ཡིན་ན་ཁྱོད་དབུ་མ་པའི་དེ་ཡིན་དགོས་པའི་ཕྱིར། འདོད་ན། མངོན་རྟོགས་རྒྱན་དེ་དབུ་མ་པའི་ཤིང་རྟའི་སྲོལ་འབྱེད་ཀྱི་བསྟན་བཅོས་ཡིན་པར་ཐལ། འདོད་པའི་ཕྱིར། འདོད་ན། མདོ་སྡེ་རྒྱན་དེ་སེམས་ཙམ་པའི་ཤིང་རྟའི་སྲོལ་འབྱེད་ཀྱི་བསྟན་བཅོས་ཡིན་པར་ཐལ། འདོད་པའི་ཕྱིར། འདོད་ན། རྗེ་བཙུན་སེམས་ཙམ་པའི་ཤིང་རྟའི་སྲོལ་འབྱེད་ཀྱི་གང་ཟག་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། དབུ་མ་པའི་ཤིང་རྟའི་སྲོལ་འབྱེད་ཀྱི་གང་ཟག་ཡིན་པའི་ཕྱིར། གཞན་ཡང་། མཆོག་ཟུང་གཉིས་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། འགྲེལ་འབྱེད་གཞན་གྱི་རྗེས་སུ་མ་འབྲངས་པར་མངོན་པའི་དགོངས་པ་རང་དབང་དུ་བཀྲལ་བའི་ཕྱིར། རྩ་བར་འདོད་མི་ནུས་ཏེ། ཉན་ཐོས་དགྲ་བཅོམ་པ་ཡིན་པའི་ཕྱིར་རོ། ཁ་ཅིག །འགྲེལ་པ་དོན་གསལ་མདོ་རྒྱན་སྦྱར་བའི་འགྲེལ་པ་ཡིན་ཟེར་ན། མི་འཐད་པར་ཐལ། དེ་ཉིད་ལས། ངག་སོགས་སྦྱོར་བ་མ་བྱས་པར། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ཚིག་གི་ཆ་གཙོ་བོར་མ་སྦྱར་བའི་དོན་ཡིན་ཟེར་ན། མདོའི་དོན་གཏན་ལ་འབེབས་པའི་འགྲེལ་པ་ཡིན་ན། མདོ་འགྲེལ་ཡིན་པས་ཁྱབ་པར་ཐལ། དེ་མདོ་རྒྱན་སྦྱར་བའི་འགྲེལ་པ་གང་ཞིག །ཁྱོད་ཀྱི་ལུང་དོན་འཐད་པའི་ཕྱིར། འདོད་མི་ནུས་སོ། །ཁ་ཅིག་རྒྱན་གྱི་བཤད་བྱའི་མདོ་ཡིན་ན། དེའི་བཤད་བྱ་རྩ་བའི་མདོ་ཡིན་པས་ཁྱབ་ཟེར་ན།
བཀའ་དང་པོ་བདེན་བཞིའི་ཆོས་འཁོར་ཆོས་ཅན། དེར་ཐལ། དེའི་ཕྱིར། དེར་ཐལ། མདོ་ཡིན་པའི་ཕྱིར། ཁྱབ་སྟེ། མངོན་རྟོགས་རྒྱན་གྱིས་གསུང་རབ་མཐའ་དག་གི་དོན་མ་ཚང་བ་མེད་པར་བསྡུས་ཏེ་གཏན་ལ་ཕབ་པའི་ཕྱིར། དེར་ཐལ། དེས་རིགས་ཅན་གསུམ་གྱི་མངོན་པར་རྟོགས་པའི་ངོ་བོ་ངེས་པ་གྲངས་ངེས་པ་གོ་རིམ་ངེས་པ་བསྟན་པའི་ཕྱིར། རྩ་བར་འདོད་མི་ནུས་ཏེ། ཐེག་དམན་གྱི་མདོ་ཡིན་པའི་ཕྱིར། ཁ་ཅིག་ཁྲི་བརྒྱད་སྟོང་པ་དང་མདོ་སྡུད་པ་གཉིས་དེའི་བཤད་བྱ་རྩ་བའི་མདོ་ཡིན་ཟེར་ན། མི་འཐད་པར་ཐལ། དེའི་བཤད་བྱ་རྩ་བའི་མདོ་ལ་ཡུམ་རྒྱས་འབྲིང་བསྡུས་གསུམ་དུ་གྲངས་ངེས་པའི་ཕྱིར་དེར་ཐལ། རྣམ་བཤད་ལས་ཡུམ་གསུམ་ཀུན་གྱི་རྒྱན་དུ་འགྱུར་བ་ནི་ཞེས་གསུངས་པའི་ཕྱིར། ཁ་ཅིག་མདོ་སྡུད་པ་ཁྲི་བརྒྱད་སྟོང་པའི་ལེའུ་གྱ་བཞི་པ་ཡིན་པ་ལ་བསམས་ནས་ཁྲི་བརྒྱད་སྟོང་པ་ཡིན་ཟེར་ན། མངོན་རྟོགས་རྒྱན་གྱི་སྐབས་གཉིས་པ་མངོན་རྟོགས་རྒྱན་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། དེའི་བརྗོད་བྱ་ལ་དངོས་བརྒྱད་དོན་བདུན་ཅུ་ཚང་བར་ཐལ། འདོད་པའི་ཕྱིར། འདོད་མི་ནུས་སོ། ཁ་ཅིག །ཤེས་རབ་ཕ་རོལ་ཕྱིན་པ་ལ། །ཞེས་པའི་རྐང་པ་བཞི་པོ་དེ། འགྲེལ་པའི་མཆོད་བརྗོད་དང་རྩོམ་པར་དམ་བཅའ་གཉིས་ཀའི་གཞུང་ཡིན་ཟེར་ན། ཤེས་རབ་ཕ་རོལ་ཕྱིན་པ་ལ། །གུས་ཕྱག་འཚལ་ཞེས་པ་འདི་འགྲེལ་པའི་རྩོམ་པར་དམ་བཅའི་གཞུང་ཡིན་པར་ཐལ། འདོད་པའི་ཕྱིན། འདོད་ན། གཞུང་དེ་ལས་ལོགས་སུ། ཀུན་གྱི་རྒྱན་དུ་འགྱུར་བར་ནི། །རྣམ་པར་དབྱེ་ཕྱིར། ཞེས་ལོགས་སུ་སྨོས་པ་ལ་དགོས་པ་མེད་པར་ཐལ། འདོད་པའི་ཕྱིར་རོ། །གཉིས་པ་རང་ལུགས་
ནི། ཤེས་རབ་ཕ་རོལ་ཕྱིན་པ་ལ། །ཞེས་སོགས་རྐང་པ་བཞི་པོ་འདིས་འགྲེལ་པའི་མཆོད་བརྗོད་དང་རྩོམ་པར་དམ་བཅའ་གཉིས་ཀ་བསྟན་ཏེ། དྲངས་མ་ཐག་པའི་གཞུང་སྔ་མས་མཆོད་བརྗོད་དང་། ཕྱི་མས་རྩོམ་པར་དམ་བཅའ་བསྟན་པའི་ཕྱིར། ཤིང་རྟའི་སྲོལ་འབྱེད་དུ་རྒྱལ་བས་ལུང་བསྟན་པའི་བྱང་འཕགས་དེ་ཤིང་རྟའི་སྲོལ་འབྱེད་ཀྱི་མཚན་ཉིད། ཤིང་རྟའི་སྲོལ་བྱེད་ལ་ཀླུ་སྒྲུབ་དང་ཐོགས་མེད་གཉིས་སུ་གྲངས་ངེས་ཏེ། དེ་གཉིས་སངས་རྒྱས་ཀྱི་ཤིང་རྟའི་སྲོལ་འབྱེད་དུ་ལུང་བསྟན་པའི་ཕྱིར་དང་། ལེགས་བཤད་སྙིང་པོ་ལས། བདེ་གཤེགས་གསུང་རབ་ཚུལ་གཉིས་ཤིང་རྟའི་སྲོལ། །ལེགས་པར་ཕྱེ་བས་རྒྱལ་བའི་བསྟན་པ་མཆོག །ས་གསུམ་འགྲོ་ན་ཉི་ལྟར་གསལ་མཛད་པ། །ཀླུ་སྒྲུབ་ཐོགས་མེད་ཅེས་གསུངས་པའི་ཕྱིར་རོ། །མངོན་རྟོགས་ཀྱི་རིམ་པ་རྣམས་ཡུམ་གྱི་མདོས་སྦས་དོན་དུ་བྱེད་ཚུལ་ཇི་ལྟར་ན། སྤྱིར་དེ་ལ་མ་བསྟན་པར་སྦས་པ་དང་། བསྟན་ཡང་མི་མངོན་པར་སྦས་པ་གཉིས་ལས། འདི་ནི་ཕྱི་མ་སྟེ། མངོན་རྟོགས་བརྒྱད་ཀྱི་མཚན་ཉིད་དང་གཞི་ལྡོག་རྣམས་ཡུམ་གྱི་མདོས་མི་མངོན་པའི་ཚུལ་གྱིས་བསྟན་པའི་ཕྱིར། མངོན་རྟོགས་བརྒྱད་ཀྱི་རང་ལྡོག་ནི་དེ་ལྟར་མ་ཡིན་ཏེ། དེ་དངོས་སུ་བསྟན་པའི་ཕྱིར། དེར་ཐལ། དེ་དངོས་སུ་བསྟན་པའི་ཡུམ་གྱི་མདོ་ཚིག་ཡོད་པའི་ཕྱིར། གསུམ་པ་རྩོད་པ་སྤོང་བ་ལ། ཁ་ཅིག་ཁྲི་བརྒྱད་སྟོང་པ་མངོན་རྟོགས་རྒྱན་གྱི་བཤད་བྱ་རྩ་བའི་མདོ་ཡིན་པར་ཐལ། དེ་དང་རྒྱན་སྦྱར་བའི་ཚད་ལྡན་གྱི་འགྲེལ་པ་ཡོད་པའི་ཕྱིར་ན་མ་ཁྱབ། འོ་ན་དེ་ཆོས་ཅན། ཀུན་གྱི་རྒྱན་དུ་འགྱུར་བར་ནི། ཞེས་པའི་རྒྱན་གྱི་བཤད་གཞིའི་མདོ་ཡིན་པར་ཐལ། རྒྱན་གྱི་
བཤད་བྱ་རྩ་བའི་མདོ་ཡིན་པའི་ཕྱིར། འདོད་མི་ནུས་སོ། ཁ་ཅིག་རྗེ་བཙུན་ཤིང་རྟའི་སྲོལ་འབྱེད་ཡིན་པར་ཐལ། དེ་ཡིན་པར་ལེགས་བཤད་གསེར་འཕྲེང་དུ་གསུངས་པའི་ཕྱིར་ན། དེ་ནི་ཤིང་རྟའི་སྲོལ་འབྱེད་གཞན་ལ་མ་ལྟོས་པར་དགའ་ལྡན་དུ་སྦས་དོན་མངོན་རྟོགས་ཀྱི་རིམ་པ་གཏན་ལ་ཕབ་པ་ཙམ་ལ་དགོངས་སོ། །
བཀའ་དང་བསྟན་བཅོས་བཤད་པ།
བཀའ་དང་བསྟན་བཅོས་བཤད་པ། གཉིས་པ་འགྲེལ་པ་རྩོམ་རིགས་པར་སྒྲུབ་པ་ལ། ཕྱིའི་རྐྱེན་དགེ་བའི་བཤེས་གཉེན་གྱི་མན་ངག་དང་ལྡན་པར་སྒྲུབ་པ། ནང་གི་རྐྱེན་བསྟན་བཅོས་ཀྱི་དོན་མཐའ་དག་རྟོགས་པའི་ཤེས་རབ་དང་ལྡན་པར་སྒྲུབ་པ། དེས་ན་འགྲེལ་པ་རྩོམ་རིགས་པའོ། །དང་པོ་ལ་བཞི་ལས། ཐོགས་མེད་ཀྱི་མན་ངག་དང་ལྡན་ཚུལ་ལ། གཞུང་གི་ཚིག་དོན་བཤད་པ་དང་། མཐའ་དཔྱད་པ་གཉིས། དང་པོ་ནི། བསམ་པ་སྙིང་རྗེས་འགྲོ་ལ་ཆགས་པས་ཀུན་ཏུ་སྟེ། ལྷག་པར་ཆགས་པར་མཛད་པ་དང་། སྦྱོར་བ་གཞན་སྡུག་བསྔལ་ལས་སྐྱོབ་པ་ཉིད་ཀྱི་འཕགས་པ་ཐོགས་མེད་ཆོས་ཅན། ཁྱོད་ཀྱི་སྒྲ་བཤད་དུ་ཡོད་པའི་བསྟན་བཅོས་ཆེན་པོ། རྒྱས་འབྲིང་བསྡུས་གསུམ་གྱི་རྣམ་བཤད་མཛད་རིགས་ཏེ། ཁྱོད་མི་ཕམ་མགོན་པོ་ལ་དོན་འདི་རྫོགས་པར་གསན་ནས་ནི་ཐུགས་སུ་ཆུད་པའི་མཁས་པ་ཡིན་པའི་ཕྱིར། གཉིས་པ་ལ། དགག་གཞག་སྤང་གསུམ་ལས། དང་པོ་ནི། རོང་ཊཱིཀ་པ་ན་རེ། བསྟན་བཅོས་ཆེན་པོའི་རྣམ་བཤད་མཛད་ཅེས་པའི་བསྟན་བཅོས་དེ། མངོན་རྟོགས་རྒྱན་ལ་བྱེད་ཟེར་ན། ཉི་ཁྲི་དེ་ཉིད་རྣམ་ངེས་མདོ་རྒྱན་སྦྱར་བའི་འགྲེལ་པ་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། མི་འཐད་པར་ཐལ། མདོ་རྒྱན་སྦྱར་བའི་འགྲེལ་པའི་ཐོག་མ་ཉི་ཁྲི་སྣང་བ་ནས་འཛིན་
རིགས་པའི་ཕྱིར། གཞན་ཡང་། དམ་བཅའ་དེ་མི་འཐད་པར་ཐལ། ཤེར་འབྱུང་བློ་གྲོས་ཀྱི་འགྲེལ་པར། ཐོགས་མེད་ཀྱིས་མདོ་རྒྱན་སྦྱར་བའི་འགྲེལ་པ་མ་མཛད་པར་བཤད་པའི་ཕྱིར། གཞན་ཡང་བསྟན་བཅོས་མཐའ་དག་མ་རྙེད་པར་ཞེས་པའི་བསྟན་བཅོས་དེ་ཡང་མངོན་རྟོགས་རྒྱན་ལ་བྱེད་རིགས་པར་ཐལ། རྩ་བའི་དམ་བཅའ་འཐད་པའི་ཕྱིར། འདོད་ན། མཐའ་དག་ཅེས་མང་ཚིག་སྨོས་པ་ལ་དགོས་པ་མེད་པར་ཐལ་ལོ། །ཁ་ཅིག །སྤོབས་པ་བཞི་དང་ལྡན་པའི་གསུང་རབ་བཀའི་མཚན་ཉིད་ཡིན་ཟེར་ན། འགྲེལ་པ་དོན་གསལ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། སྤོབས་པ་བཞི་དང་ལྡན་པ་གང་ཞིག །གསུང་རབ་ཡིན་པའི་ཕྱིར། དང་པོ་མ་གྲུབ་ན། དེར་ཐལ། བརྗོད་བྱ་དོན་དང་ལྡན། རྗོད་བྱེད་ཚིག་དང་འབྲེལ། གདུལ་བྱའི་མི་མཐུན་ཕྱོགས་སྤོང་ཕྱིར་དུ་གསུངས། ཞི་བ་མྱང་འདས་ཀྱི་ཕན་ཡོན་སྟོན་པ་དང་ལྡན་པའི་ཕྱིར། རྩ་བར་འདོད་མི་ནུས་ཏེ། སློབ་དཔོན་སེང་གེ་བཟང་པོ་སངས་རྒྱས་འཕགས་པ་མ་ཡིན་པའི་ཕྱིར། ཁ་ཅིག །སངས་རྒྱས་ཀྱི་བཀའ་ཡིན་ན། སངས་རྒྱས་རང་རྒྱུད་ཀྱིས་བསྡུས་པའི་བཀའ་ཡིན་པས་ཁྱབ་ཟེར་ན། རབ་འབྱོར་གྱི་རྒྱུད་ཀྱིས་བསྡུས་པའི་བཀའ་བརྒྱད་སྟོང་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། དེ་ཡོད་པའི་ཕྱིར། དེར་ཐལ། བྱ་བ་ཡུལ་ལ་ཡོད་པའི་སངས་རྒྱས་ཀྱི་གསུང་རབ་ཀྱི་འཕྲིན་ལས་ཡོད་པའི་ཕྱིར། དེར་ཐལ། བྱ་བ་ཡུལ་ལ་ཡོད་པའི་སངས་རྒྱས་ཀྱི་འཕྲིན་ལས་རང་ཡོད་པའི་ཕྱིར། ཁ་ཅིག །གསུང་བ་པོ་སྟོན་པ་གཞན་གྱི་རྗེས་སུ་མ་འབྲངས་པར། གདུལ་བྱའི་དོན་དུ་རང་སྟོབས་ཀྱིས་བརྩམས་པའི་གསུང་རབ་དེ་བཀའི་མཚན་ཉིད་ཟེར་ན། ཤཱ་རིའི་བུ་དང་སྤྱན་རས་གཟིགས་གཉིས་དྲི་བ་དྲི་ལན་བྱས་པའི་ཤེས་རབ་
སྙིང་པོའི་མདོ་ཚིག་ཆོས་ཅན། མཚན་ཉིད་དེར་ཐལམཚོན་བྱ་དེའི་ཕྱིར། མ་གྲུབ་ན། དེར་ཐལ། བྱིན་གྱིས་བརླབས་པའི་བཀའ་ཡིན་པའི་ཕྱིར། རྩ་བར་འདོད་མི་ནུས་ཏེ། གཉིས་ཀ་སྟོན་པའི་རྗེས་འབྲང་ཡིན་པའི་ཕྱིར། ཁ་ཅིག །འཆོས་སྐྱོབ་ཀྱི་ཡོན་ཏན་གཉིས་དང་ལྡན་པའི་གསུང་རབ་མཐར་ཐུག་དེ་བསྟན་བཅོས་རྣམ་དག་གི་མཚན་ཉིད་ཟེར་ན། འགྲེལ་པ་དོན་གསལ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། གསུང་རབ་མཐར་ཐུག་ཡིན་པར་ཐལ། འདོད་པའི་ཕྱིར། འདོད་ན། སེང་བཟང་གསུང་བ་པོ་མཐར་ཐུག་ཡིན་པར་ཐལ། དོན་གསལ་གསུང་རབ་མཐར་ཐུག་ཡིན་པའི་ཕྱིར། འདོད་མི་ནུས་ཏེ། ཁྱོད་ལས་ལྷག་པའི་གསུང་བ་པོ་ཡོད་པའི་ཕྱིར། གཞན་ཡང་བརྒྱད་སྟོང་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་མི་ནུས་ཏེ། བཀའ་ཡིན་པའི་ཕྱིར། ཁ་ཅིག །འཆོས་སྐྱོབ་ཀྱི་ཡོན་ཏན་གཉིས་དང་ལྡན་པའི་ངག་དེ་བསྟན་བཅོས་ཀྱི་མཚན་ཉིད་ཟེར་ན། ཕྱི་རོལ་པའི་བསྟན་བཅོས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཕྱི་རོལ་པའི་བསྟན་བཅོས་ཡིན་པའི་ཕྱིར། ཁྱབ་པ་ཡོད་དེ། ཕྱི་རོལ་པའི་བསྟན་བཅོས་བསྟན་བཅོས་ཡིན་པའི་ཕྱིར། དེའི་བསྟན་པ་བསྟན་པ་ཡིན་པའི་ཕྱིར། དེའི་སྟོན་པ་སྟོན་པ་ཡིན་པའི་ཕྱིར། སྟོན་པ་ཡིན་ན་ལྟ་བ་བཀར་བཏགས་ཀྱི་ཕྱག་རྒྱ་བཞི་སྟོན་པ་པོ་ཡིན་པས་མ་ཁྱབ་པའི་ཕྱིར། ཁ་ཅིག །རྩོམ་པ་པོ་རྣམ་གཡེང་མེད་པའི་སེམས་ཅན་གྱིས་བཀའི་དགོངས་འགྲེལ་དུ་བརྩམས་པའི་ངག་རྣམ་དག་དེ། བཀའི་དགོངས་འགྲེལ་དུ་གྱུར་པའི་བསྟན་བཅོས་རྣམ་དག་གི་མཚན་ཉིད་ཟེར་ན། རྣམ་གཡེང་རྒྱུད་ལྡན་གྱི་བྱང་སེམས་ཚོགས་ལམ་པས་
བརྩམས་པའི་བསྟན་བཅོས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། དེར་ཐལ། དེས་བརྩམས་པའི་བསྟན་བཅོས་ཡོད་པའི་ཕྱིར། དེར་ཐལ། རྣམ་གཡེང་རྒྱུད་ལྡན་གྱི་བྱང་སེམས་ཚོགས་ལམ་པ་ཡོད་པའི་ཕྱིར་རོ། ཁ་ཅིག །རྣམ་མཁྱེན་གྱིས་དངོས་ཀྱི་བདག་རྐྱེན་བྱས་པ་ལ་བརྟེན་ནས་བྱུང་བའི་ཁྱད་ཆོས་བཞི་ལྡན་གྱི་ངག་རྣམ་དག་བཀའི་མཚན་ཉིད་ཟེར་ན། ལྗོན་ཤིང་རླུང་གིས་བསྐྱོད་པ་ལས་བྱུང་བའི་ཆོས་ཀྱི་སྡོམ་བཞི་སྟོན་པའི་སངས་རྒྱས་ཀྱི་ཐུགས་བདེན་པའི་སྒོ་ནས་བྱིན་གྱིས་བརླབས་པའི་སངས་རྒྱས་ཀྱི་བཀའ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། དེར་ཐལ། དེ་ཡོད་པའི་ཕྱིར། དེར་ཐལ། སངས་རྒྱས་ཀྱི་ཐུགས་བདེན་པའི་སྒོ་ནས་བྱིན་གྱིས་བརླབས་པའི་བཀའ་ཡོད་པའི་ཕྱིར། རྩ་བར་འདོད་མི་ནུས་སོ། །ཁ་ཅིག་བཀའ་ཡིན་ན་བསྟན་བཅོས་ཡིན་པས་ཁྱབ་སྟེ། རྣམ་བཤད་རིག་པ་ལས། དོན་དམ་པར་སངས་རྒྱས་ཀྱི་གསུང་ཉིད་བསྟན་བཅོས་ཀྱི་མཚན་ཉིད་དུ་འཐད་ཅེས་གསུངས་པའི་ཕྱིར་ན་མ་ཁྱབ་སྟེ། བསྟན་བཅོས་ཀྱི་སྒྲ་བཤད་དུ་ཡོད་པ་ལ་དགོངས་པའི་ཕྱིར། དེ་ལྟ་མ་ཡིན་ན་བསྟན་བཅོས་ཀྱི་སྒྲ་བཤད་དུ་ཡོད་ན་བསྟན་བཅོས་ཡིན་པས་ཁྱབ་པར་ཐལ། ངེས་པའི་ཚིག་གི་ཚུལ་གྱིས་ན་བསྟན་བཅོས་ཞེས་གསུངས་པ་གང་ཞིག །བརྒྱད་སྟོང་པ་ལྟ་བུ་བསྟན་བཅོས་ཡིན་པའི་ཕྱིར། འདོད་ན། འཆོས་སྐྱོབ་ཀྱི་ཡོན་ཏན་གཉིས་དང་ལྡན་ན་བསྟན་བཅོས་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། འཆོས་སྐྱོབ་ཀྱི་ཡོན་ཏན་གཉིས་དང་ལྡན་པའི་འཕགས་པ་ཆོས་ཅན། དེར་ཐལ། དེའི་ཕྱིར། གཉིས་པ་རང་ལུགས་ནི། རང་གསུངས་པ་པོ་སངས་རྒྱས་འཕགས་པས་གདུལ་བྱའི་ཉོན་མོངས་སྤོང་དོན་
དུ་གསུངས་པའི་མཐར་ཐུག་གི་གསུང་རབ་དེ་བཀའི་མཚན་ཉིད། བཀའ་དེ་ཁྱད་ཆོས་བཞི་དང་ལྡན་ཏེ། བདག་རྐྱེན་གྱི་ཁྱད་པར་རང་གི་བདག་རྐྱེན་དུ་གྱུར་པའི་ཡེ་ཤེས་ཆོས་སྐུ་ལས་བྱུང་། བརྗོད་བྱའི་ཁྱད་པར་ཁམས་གསུམ་གྱི་ཉོན་མོངས་པའི་གཉེན་པོ་རྫོགས་པར་སྟོན། ཕན་ཡོན་གྱི་ཁྱད་པར་སྒྲིབ་གཉིས་ཞི་བར་བྱེད། ངོ་བོའི་ཁྱད་པར་སྒྲ་སྐྱོན་མཐའ་དག་དང་བྲལ་བ་ཡིན་པའི་ཕྱིར་རོ། །ཇི་སྐད་དུ་རྒྱུད་བླ་མ་ལས། གང་ཞིག་དོན་ལྡན་ཆོས་དང་ཉེར་འབྲེལ་ཞིང་། །ཞེས་སོགས་གསུངས་པའི་ཕྱིར་རོ། །འདི་ལ་དབྱེ་ན་གཉེན་པོ་སྟོན་ཚུལ་གྱི་སྒོ་ནས་ཆོས་ཕུང་བརྒྱད་ཁྲི་བཞི་སྟོང་། ཡན་ལག་གི་སྒོ་ནས་གསུང་དབྱངས་ཡན་ལག་དྲུག་ཅུ། ངོ་བོའི་སྒོ་ནས་གསུང་རབ་ཡན་ལག་བཅུ་གཉིས། བྱེད་ལས་ཀྱི་སྒོ་ནས་སྡེ་སྣོད་གསུམ། བརྗོད་བྱའི་སྒོ་ནས་དྲང་ངེས་ཀྱི་མདོ་གཉིས། ཆེད་དུ་བྱ་བའི་གདུལ་བྱའི་སྒོ་ནས་ཐེག་པ་ཆེ་ཆུང་གི་སྡེ་སྣོད་གཉིས་རྣམས་སུ་ཡོད་དོ། །བསླབ་པ་གསུམ་གྱི་ནང་ནས། ལྷག་པ་ཚུལ་ཁྲིམས་ཀྱི་བསླབ་པ་བརྗོད་བྱའི་གཙོ་བོར་བྱས་ནས་སྟོན་པས་རབ་ཏུ་ཕྱེ་བའི་སྡེ་སྣོད་དེ་འདུལ་བའི་སྡེ་སྣོད་ཀྱི་མཚན་ཉིད། མདོ་སྡེ་དང་མངོན་པ་གཉིས་ལ་ཡང་ལྷག་པ་ཏིང་ངེ་འཛིན་དང་། ལྷག་པ་ཤེས་རབ་ཀྱི་བསླབ་པ་གཉིས་གོང་ལྟར་རིགས་འགྲེ་བྱས་ནས་སྦྱོར་རོ། །ལུང་སྡེ་བཞི་དང་པོའི་མཚན་གཞི། ལས་བརྒྱ་པ་གཉིས་པ་དང་། མངོན་པའི་མདོ་སྟོང་ཕྲག་བརྒྱ་པ་གསུམ་པའིའོ། དོན་དམ་བདེན་པ་དངོས་བསྟན་བསྟན་བྱའི་གཙོ་བོར་བྱས་ནས་སྟོན་ཞིང་། སྒྲ་ཇི་བཞིན་དུ་ཁས་བླང་དུ་རུང་བའི་མདོ་དེ་ངེས་དོན་གྱི་མདོའི་མཚན་ཉིད། དྲང་དོན་གྱི་མདོའི་མཚན་ཉིད་ནི་ཀུན་རྫོབ་བདེན་པ་གཙོ་བོར་དངོས་སུ་སྟོན་ཞིང་དངོས་བསྟན་སྒྲ་ཇི་བཞིན་དུ་ཁས་བླང་དུ་མི་རུང་
པའམ། རུང་ཡང་གནས་ལུགས་ཀྱི་དོན་དེ་ལས་གོང་དུ་དྲངས་ནས་བཤད་དགོས་པ་གང་ཡང་རུང་བའི་མདོའོ། །རྒྱས་འབྲིང་བསྡུས་གསུམ་དང་པོ་དང་། གང་ཟག་གི་བདག་ཡོད་པར་སྟོན་པའི་མདོ་ཕྱི་མའི་མཚན་གཞིའོ། །གཞན་ཡང་ཞལ་ནས་གསུངས་པ། རྗེས་སུ་གནང་བ། བྱིན་གྱིས་བརླབས་པའི་བཀའ་གསུམ་ལས། མདོ་སྡུད་པ་དང་པོ་དང་། ཤེར་སྙིང་གཉིས་པའི་མཚན་གཞི། གསུམ་པ་ལ་སྐུ་གསུང་ཐུགས་གསུམ་ལས། མདོ་སྡེ་ས་བཅུ་པ་དང་པོ་དང་། ཏིང་འཛིན་རྒྱལ་པོ་གཉིས་པའི་མཚན་གཞི། གསུམ་པ་ལ། ཏིང་ངེ་འཛིན་དང་བདེན་པ་དང་འཕྲིན་ལས་གསུམ་གྱིས་བྱིན་གྱིས་བརླབས་པས། དང་པོ་ཤེར་སྙིང་། གཉིས་པ་སངས་རྒྱས་ཀྱི་བདེན་པ་བརྗོད་པས་ལྗོན་ཤིང་རླུང་གིས་བསྐྱོད་པ་ལས་ཆོས་ཀྱི་སྡོམ་བཞི་སྟོན་པའི་ངག་གསུམ་པ་རྒྱལ་བའི་འཕྲིན་ལས་ཀྱིས་མི་མ་ཡིན་གྱིས་ཐོལ་བྱུང་དུ་སྨྲས་པའི་རིག་སྔགས་ལྟ་བུའོ། །ཁྱད་ཆོས་བཞི་དང་ལྡན་པའི་རིགས་སུ་གནས་པའི་བསྟན་བཅོས་སུ་དམིགས་པ་དེ་བསྟན་བཅོས་རྣམ་དག་གི་མཚན་ཉིད། དེ་ནི་རང་གི་བཤད་བྱར་གྱུར་པའི་བཀའི་དགོངས་འགྲེལ་ཡིན་པ། རྩོམ་པ་པོ་འཇིག་རྟེན་ཕྱོགས་ཀྱི་རྙེད་བཀུར་གྲགས་འདོད་ཀྱི་རྣམ་གཡེང་དང་བྲལ་བ། ཐར་པ་འཐོབ་པའི་ལམ་དང་རྗེས་སུ་མཐུན་པ། སྒྲ་སྐྱོན་མཐའ་དག་དང་བྲལ་བའི་ཁྱད་ཆོས་བཞི་ལྡན་ཡིན་ཏེ། དེ་སྐད་དུ་རྒྱུད་བླ་མ་ལས། གང་ཞིག་རྒྱལ་བའི་བསྟན་པ་འབའ་ཞིག་གི །ཞེས་སོགས་གསུངས་པའི་ཕྱིར། དེ་ལ་དབྱེ་ན། འཁོར་ལོ་གསུམ་གྱི་དགོངས་འགྲེལ་ལས། དང་པོ་ལ་ལྟ་བའི་ཆ་གཙོ་བོར་འགྲེལ་བ་མངོན་པ་སྡེ་བདུན། མངོན་པ་གོང་འོག །སྤྱོད་པའི་ཆ་གཙོ་བོར་འགྲེལ་པ་མདོ་རྩ་ལྟ་བུ། གཉིས་པ་ལ་ལྟ་བའི་ཆ་ལ་རིགས་ཚོགས་དྲུག །སྤྱོད་པའི་ཆ་ལ་མངོན་
རྟོགས་རྒྱན་ལྟ་བུའོ། །གསུམ་པ་ལ། ལྟ་བའི་ཆ་ལ་འབྱེད་རྣམ་གཉིས། པྲ་ཀ་ར་ན་སྡེ་བརྒྱད། སྤྱོད་པའི་ཆ་ལ་མདོ་རྒྱན། ས་སྡེ་ལྔ། སྡོམ་རྣམ་པ་གཉིས་ལྟ་བུའོ། །དེས་ན། དོན་མེད་དོན་ལོག་དོན་དང་ལྡན། །ཐོས་རྩོད་སྒྲུབ་པ་ལྷུར་ལེན་པ། །ངན་གཡོ་བརྩེ་བྲལ་སྡུག་བསྔལ་སྤོང་། །བསྟན་བཅོས་དྲུག་བྲལ་གསུམ་དུ་འདོད། །ཅེས་པ་ལས། སྔར་བཤད་པ་རྣམས་གསུམ་པོའི་ནང་དུ་གཏོགས་ལ། དྲུག་པོ་ནི་བྱ་རོག་སོ་ཐོགས་ཀྱི་བསྟན་བཅོས། འཇོག་པོའི་གཙུག་རྒྱན་ལེན་པའི་བསྟན་བཅོས་ཕྱི་རོལ་པའི་ཐོས་པ་ཙམ་དང་རྩོད་པ་ཙམ་ལྷུར་ལེན་པའི་བསྟན་བཅོས། བྲམ་ཟེའི་གསང་ཚིག་སྟོན་པའི་བསྟན་བཅོས། ཕྱུགས་ཀྱི་མཆོད་སྦྱིན་བྱེད་པའི་བསྟན་བཅོས་རྣམས་སོ། །གོང་དུ་བཤད་པའི་བསྟན་བཅོས་རྣམ་དག་རྣམས་ཆོས་ཅན། ཁྱོད་བྱེད་ལས་ཁྱད་པར་ཅན་དང་ལྡན་ཏེ། མཐོ་རིས་ཀྱི་འཇིག་རྟེན་དུ་བསྟན་པ་རིན་པོ་ཆེ་ཡུན་རིང་དུ་གནས་པར་བྱེད་པའི་ཕྱིར། ལྷའི་བུ་བློ་གྲོས་རབ་གསལ་གྱིས་ཞུས་པའི་མདོ་ལས། ཆོས་རྣམས་ཐམས་ཅད་བཀའ་དང་བསྟན་བཅོས་གཉིས་སུ་འདུ། །ལེགས་པར་བཤད་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་ནི། །འཇིག་རྟེན་ཁམས་འདིར་ཡུན་རིང་གནས་པར་འགྱུར། །ཞེས་གསུངས་པའི་ཕྱིར། རྒྱས་འབྲིང་བསྡུས་གསུམ་དེ་བསྟན་བཅོས་ཆེན་པོའི་རྣམ་བཤད་མཛད་ཅེས་པའི་སྐབས་ཀྱི་བསྟན་བཅོས་ཡིན་ཏེ། ཚིགས་གསལ་ལས། ངེས་པའི་ཚིག་གི་ཚུལ་གྱིས་ན་བསྟན་བཅོས་ཏེ། དེ་ཡང་ཁྱད་པར་ཅན་རྒྱལ་བའི་ཡུམ་རྣམས་སོ། །ཞེས་དང་། རྣམ་བཤད་ལས། སྒྲ་བཤད་དུ་ཡོད་པས་བསྟན་བཅོས་ཆེན་པོ་མདོའི་ཞེས་གསུངས་པའི་ཕྱིར། གསུམ་པ་རྩོད་པ་སྤོང་
བ་ནི་ཉོན་སྒྲིབ་སྤངས་པའི་བྱང་སེམས་འཕགས་པ་ཁོ་ན་ལ་གསུངས་པའི་མདོ་ཆོས་ཅན། རང་ལུགས་ཀྱི་མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་སླ། འདོད་མི་ནུས་ཏེ། མདོ་དེའི་ཆེད་དུ་བྱ་བའི་གདུལ་བྱར་གྱུར་པའི་ཉོན་མོངས་སྤོང་དགོས་ཀྱི་སེམས་ཅན་མེད་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར་ན་མ་ཁྱབ་སྟེ། དེའི་ཆེད་དུ་བྱ་བའི་གདུལ་བྱར་གྱུར་པའི་ཐེག་ཆེན་དུ་རིགས་ངེས་ཀྱི་གང་ཟག་ཡོད་པ་གང་ཞིག །དེ་ཡིན་ན་ཉོན་སྒྲིབ་མ་སྤངས་པས་ཁྱབ་པའི་ཕྱིར། དང་པོ་གྲུབ་སྟེ། དེ་ཐེག་ཆེན་གྱི་མདོ་ཡིན་པའི་ཕྱིར། དེ་མདོ་གང་ཞིག །དེ་ཐེག་དམན་གྱི་མདོ་མ་ཡིན་པའི་ཕྱིར། ཕྱི་མ་མ་གྲུབ་ན། དེའི་ཆེད་དུ་བྱ་བའི་གདུལ་བྱར་གྱུར་པའི་ཐེག་དམན་དུ་རིགས་ངེས་པའི་ཐེག་དམན་སློབ་པ་ཡོད་པར་ཐལ། མ་གྲུབ་པ་དེའི་ཕྱིར། འདོད་མི་ནུས་ཏེ། ཉེས་པ་སོ་ན་གནས་པའི་ཕྱིར། ཡང་ཁོ་ན་རེ། ཉི་ཁྲི་དེ་ཉིད་རྣམ་ངེས་ཉི་ཁྲི་ཁོ་ནའི་འགྲེལ་པ་ཡིན་པར་ཐལ། མིང་དེ་ལྟར་དུ་སྨོས་པའི་ཕྱིར་ན། གསེར་འཕྲེང་ལས། འདི་ལ་ཉི་ཁྲི་དེ་ཉིད་རྣམ་ངེས་ཞེས་པ་བརྟག་དགོས་སོ་ཞེས་པའི་དོན་མི་འཐད་པར་ཐལ། ཁྱོད་ཀྱི་ཁྱབ་པ་གྲུབ་པའི་ཕྱིར། ཁ་ཅིག །ཤཱ་རིའི་བུའི་རྒྱུད་ཀྱི་བཀའ་བརྒྱད་སྟོང་པ་ཆོས་ཅན། སྒྲིབ་པ་སྤངས་པའི་གསུང་ཡིན་པར་ཐལ། སངས་རྒྱས་ཀྱི་གསུང་ཡིན་པའི་ཕྱིར། ཁྱབ་པ་ཡོད་དེ། སངས་རྒྱས་ཀྱི་སྐུ་ཡིན་ན། སྒྲིབ་པ་སྤངས་པའི་སྐུ་ཡིན་པས་ཁྱབ་པའི་ཕྱིར་ན། མ་ཁྱབ། འོ་ན། ཤཱ་རིའི་བུའི་ངག་དང་བྱིན་གྱིས་བརླབས་པའི་བཀའི་གཞི་མཐུན་ཆོས་ཅན། སྒྲིབ་པ་སྤངས་པའི་ངག་ཡིན་པར་ཐལ། སངས་རྒྱས་ཀྱི་ངག་ཡིན་པའི་ཕྱིར། དེར་ཐལ། སངས་རྒྱས་ཀྱི་བཀའ་ཡིན་པའི་ཕྱིར། རྩ་བར་འདོད་མི་ནུས་སོ། །ཁ་ཅིག །ཤེས་རབ་སྙིང་
པོ་ཆོས་ཅན། རྗེས་སུ་གནང་བའི་བཀའ་མ་ཡིན་པར་ཐལ། བྱིན་གྱིས་བརླབས་པའི་བཀའ་ཡིན་པའི་ཕྱིར་ན་མ་ཁྱབ་སྟེ། དེ་གཉིས་མི་འགལ་བའི་ཕྱིར་རོ། །གཉིས་པ་དབྱིག་གཉེན་གྱི་མན་ངག་དང་ལྡན་ཚུལ་ནི། འགྲོ་བའི་དོན་བདེ་ལེགས་ཀྱི་རྩ་ལག་ཏུ་གྱུར་བའི་དབྱིག་གི་གཉེན་ཆོས་ཅན། ཁྱོད་ཀྱིས་མདོ་འདིའི་དོན་རྣམ་པར་དཀྲོལ་ཚུལ་ཡོད་དེ། རང་གི་མོས་པ་གཙོ་བོར་བྱེད་པས། དབུ་མ་ལས་གཞན་དུ་གཟུགས་སོགས་ཤེས་བྱ་ནང་སེམས་ཀྱི་བདག་ཉིད་ཡིན་པའི་ལྟ་བ་ལ་ཡང་དག་པར་བརྟེན་ནས་སེམས་ཙམ་དུ་བཀྲལ་བའི་ཕྱིར། གསུམ་པ་གྲོལ་སྡེའི་མན་ངག་དང་ལྡན་ཚུལ་ནི། ཐེག་ཆེན་གྱི་མཐོང་ལམ་ཐོབ་པས་འཕགས་པའི་ཁོངས་སུ་གཏོགས་པའི་རྣམ་པར་གྲོལ་བའི་སྡེ་ཞེས་བྱ་བ་ཆོས་ཅན། སྐུ་མཆེད་གཉིས་ཀས་སྔར་བཀྲལ་ཀྱང་དབྱིག་གཉེན་དེས་ཡུམ་དོན་སེམས་ཙམ་དུ་བྱས་པ་དེ། དོན་བཞིན་བྱས་པ་མིན་པར་མཐོང་ནས་དབུ་མར་གནས་པ་ལྟར་བཀྲལ་ཏེ་དོན་དེ་མཁྱེན་པས་བློས་རྣམ་པར་ཕྱེ་བའི་ཕྱིར། བཞི་པ་བཙུན་པ་གྲོལ་སྡེའི་མན་ངག་དང་ལྡན་ཚུལ་ནི། འཕགས་པས་རྣམ་བཤད་མཛད་པའི་དུས་དེའི་འོག་ཏུ། དད་པའི་ས་ཚོགས་ལམ་ལ་གནས་པ་ཡི་བཙུན་པ་རྣམ་པར་གྲོལ་བའི་སྡེ་ཆོས་ཅན། ཁྱོད་ཀྱིས་མདོ་དང་བསྟན་བཅོས་ཀྱི་ཚིག་དོན་མཐའ་དག་མ་རྙེད་པར་རང་གིས་གང་རྙེད་དང་། རྗེས་མཐུན་དུ་ཉི་ཁྲི་དང་སྦྱར་བའི་རྣམ་བཤད་བྱས་པ་ལ་རྩོམ་མི་རིགས་པའི་སྐྱོན་མེད་དེ། རང་ཉིད་མདོ་རྒྱན་གྱི་དོན་ལ་བློ་གྲོས་འཕེལ་བའི་དགོས་པ་ཡོད་པའི་ཕྱིར། གཉིས་པ་ནི། དེ་ལྟར་སྔར་གྱི་མཁས་པ་བཞིས་ཚིག་དོན་ཅི་རིགས་
སྣང་བར་བྱས་ཤིང་། དབྱིག་གཉེན་སོགས་འགའ་ཞིག་ཁོ་ནས་ཇི་བཞིན་མ་རྙེད་པའི་བསྟན་བཅོས་ཡུམ་གསུམ་མཐའ་དག་འདི་སྙིང་པོའི་དོན་མཐར་ཐུག་དང་། མངོན་རྟོགས་བརྒྱད་ཚང་ཞིང་དེ་ཉིད་རྒྱན་གྱིས་འགྲེལ་པ་དེ་ལྟར་སེང་གེ་བཟང་པོ་བདག་གིས་རྙེད་པ་གང་དེ་ཆོས་ཅན། ཆེས་ཡ་མཚན་ཏེ། ཕྱི་རྐྱེན་དུ་མ་ཟད་ནང་རྐྱེན་བསྟན་བཅོས་ཀྱི་དོན་ཀུན་རྟོགས་པའི་ཤེས་རབ་དང་ལྡན་པ་ཡིན་པའི་ཕྱིར། གསུམ་པ་ནི། མཁས་པ་དབྱིག་གཉེན་དེ་ལྟ་བུས་ཀྱང་མ་རྙེད་པས་ཤིན་ཏུ་རྙེད་དཀའ་བའི་ཟབ་མོའི་ལམ་འདི་ཅི་ཞིག་ལྟར་སངས་རྒྱས་ཀྱི་བྱིན་རླབས་ཀྱི་དབང་གིས་རྙེད་པ་ནི་ཆོས་ཅན། སེང་བཟང་དང་མཚུངས་པའི་མཁས་པ་གཞན་རྣམས་ཀྱིས་ཀྱང་དབྱེ་བར་རིགས་ཏེ། བསྟན་བཅོས་རྩོམ་པའི་མཐུན་རྐྱེན་ཚང་བའི་ཕྱིར། གསུམ་པ་ཁེངས་པ་སྐྱུང་ཞིང་སྤྲོ་བ་སྐྱེད་ཚུལ་ནི། དགེ་བའི་བཤེས་གཉེན་གྱི་མཐུ་མེད་པར་རང་དབང་གིས་ཡུམ་དོན་རྣམ་པ་ཀུན་ཏུ་སེང་བཟང་བདག་གི་ནི་བློའི་སྤྱོད་ཡུལ་མིན་ཡང་། རྣམ་མཁྱེན་གྱི་ཆེད་དུ་བསོད་ནམས་དག་རྒྱ་ཆེར་སྒྲུབ་པ་དང་རྗེས་མཐུན་གྱི་ཐབས་འགྲེལ་པ་འདི་ཆོས་ཅན། ཁྱོད་རྩོམ་པ་ལ་སྤྲོ་བ་ཁྱད་པར་ཅན་སྐྱེས་པའི་རྒྱུ་མཚན་ཡོད་དེ། རང་དང་ཐེག་ཆེན་གྱི་རིགས་ཅན་གཞན་ལ་ཕན་གདགས་པར་འདོད་པ་བཞིན་སྒྲུབ་ནུས་པའི་ཕྱིར།
བཤད་པ་ཉིད་ཉེ་བར་དགོད་པ་ལས་བྱམས་གཞུང་བཤད་པ།
བཤད་པ་ཉིད་ཉེ་བར་དགོད་པ་ལས་བྱམས་གཞུང་བཤད་པ། གཉིས་པ་བཤད་པ་ཉིད་ཉེ་བར་དགོད་པ་ལ་མཆོད་བརྗོད་བཤད་པ། རྒྱས་པ་ལ་དད་པའི་གང་ཟག་ལ་ཕྱེ་སྟེ་བཤད་པ། བསྡུས་དོན་གཞན་བསྟན་པ་གསུམ། དང་པོ་ལ། མཚམས་སྦྱར་བ། རྩ་བ། འགྲེལ་པའོ། དང་པོ་ལ། ཚིག་དོན་བཤད་པ་དང་། མཐའ་དཔྱད་པ་གཉིས། དང་པོ་ནི། འཕགས་པ་བྱམས་པ་མགོན་པོས་རྒྱན་རྩོམ་པའི་བྱ་བ་རིམ་ཅན་དུ་མ་ཡོད་པའི་ནང་ནས། རེ་ཞིག་དང་པོར་མཁྱེན་གསུམ་
ལ་ཕྱག་འཚལ་བ་ལ་ཆོས་ཅན། རང་དོན་གྱི་དགོས་པ་ཡོད་དེ། རང་ཉིད་དམ་པའི་སྤྱོད་པ་དང་མཐུན་པར་རབ་ཏུ་སྟོན་པའི་ཆེད་ཡིན་པའི་ཕྱིར། དེ་ཆོས་ཅན། གཞན་དོན་གྱི་དགོས་པ་ཡོད་དེ། རྒྱན་གྱི་ཆེད་དུ་བྱ་བའི་གདུལ་བྱ་གཞན་དག་ཡུམ་ལ་རབ་ཏུ་དང་བ་བསྐྱེད་པའི་ཆེད་དུ་ཡིན་པའི་ཕྱིར། རྒྱན་གྱི་ཆེད་དུ་བྱ་བའི་གདུལ་བྱ་ཆོས་ཅན། དང་བ་སྐྱེས་པ་ལ་དགོས་པ་ཡོད་དེ། དངོས་སུ་མ་བསྐུལ་ཀྱང་དོན་གྱིས་འཇུག་པར་བྱ་བའི་ཆེད་ཡིན་པའི་ཕྱིར། དེ་ཆོས་ཅན། ཁྱོད་ཀྱི་དང་བ་སྐྱེ་བའི་ཡུལ་ཡོད་དེ། བཅོམ་ལྡན་འདས་མ་ཡོན་ཏན་རིན་པོ་ཆེ་ཕུལ་དབྱུང་དུ་མེད་ཅིང་དཔག་ཏུ་མེད་པའི་སྲས་བཞིའི་བཞེད་དོན་སྒྲུབ་པའི་འབྱུང་གནས་ཏེ་རྒྱུ་དེ་ཡིན་པའི་ཕྱིར། དེ་ཆོས་ཅན། དང་བ་སྐྱེ་ཚུལ་ཡོད་དེ། གཞི་ལམ་རྣམ་མཁྱེན་གསུམ་ལ་རིམ་པ་བཞིན། ཉན་རང་སློབ་པ་ཉེར་ཞིར་འཁྲིད། བྱང་འཕགས་རིགས་ཅན་གསུམ་གྱི་དོན་སྒྲུབ། སངས་འཕགས་རིགས་ཅན་གསུམ་ལ་ཆོས་འཁོར་བསྐོར་བའི་ཡོན་ཏན་ཡོད་པ་ཇི་ལྟ་བ་བཞིན་དུ་བརྗོད་པ་སྔོན་དུ་འགྲོ་བ་ཅན་གྱི་སྒོ་ནས་ཡིན་པའི་ཕྱིར། དེ་ཆོས་ཅན། དེ་ལྟར་ཐོས་སོགས་ཀྱིས་ཞུགས་པ་ལ་དགོས་པ་ཡོད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་ཡུལ་དུ་བྱེད་པའི་ཡུལ་ཅན་གྱི་རབ་ཏུ་དང་བའི་དད་པ་ནི་གནས་སྐབས་མཐར་ཐུག་གི་ལེགས་པ་ཐམས་ཅད་འཐོབ་པའི་རྒྱུའི་གཙོ་བོ་ཡིན་ནོ་ཞེས་བྱ་བ་ཚད་མ་འཕགས་པ་བྱམས་པའི་མཉམ་གཞག་སོ་སོ་རང་གིས་རིག་པའི་ཡེ་ཤེས་ཀྱིས་ངེས་པར་བཟུང་ནས་གདུལ་བྱ་གཞན་དག་ཀྱང་དད་པ་ལ་བརྟེན་ནས་བྱང་ཆུབ་འཐོབ་པའི་དགོས་པ་ཡོད་པའི་ཕྱིར། གཉིས་པ་ལ། དགག་གཞག་སྤང་གསུམ་ལས། ཁ་ཅིག །སངས་རྒྱས་དབང་གིས་རྙེད་པ་ནི། ཞེས་དང་། བཅོམ་
ལྡན་འདས་འཕགས་པ་མ་རྒྱལ་བ་ལས་རྒྱལ་བ་ཞེས་པའི་རིགས་ཀྱི་ལུང་ལ་བརྟེན་ནས་རྗེ་བཙུན་བྱམས་མགོན་སངས་རྒྱས་འཕགས་པ་ཡིན་ཟེར་ན། འོ་ན། དེ་མ་འོངས་པའི་སངས་རྒྱས་འཕགས་པ་ཡིན་པའི་དོན་དེ་མ་འོངས་པ་ན་འཚང་རྒྱ་འགྱུར་ཡིན་པ་ལ་བྱེད་དམ། མ་འོངས་པ་ན་སངས་རྒྱས་ཀྱི་མཛད་པ་སྟོན་པ་ལ་བྱེད། དང་པོ་ལྟར་ན། དེ་ཆོས་ཅན། སངས་རྒྱས་འཕགས་པ་མ་ཡིན་པར་ཐལ། འཚང་རྒྱ་དགོས་ཡིན་པའི་ཕྱིར། དེར་ཐལ། མ་འོངས་པ་ན་འཚང་རྒྱ་འགྱུར་ཡིན་པའི་ཕྱིར། གཞན་ཡང་། སེམས་ཅན་ཐམས་ཅད་སངས་རྒྱས་འཕགས་པ་ཡིན་པར་ཐལ་ལོ། །གཉིས་པ་ལྟར་ན། སྟོན་པ་ཤཱཀྱ་ཐུབ་པ་ཆོས་ཅན། མ་འོངས་པའི་སངས་རྒྱས་འཕགས་པ་ཡིན་པར་ཐལ། མ་འོངས་པ་ན་སངས་རྒྱས་ཀྱི་མཛད་པ་སྟོན་པའི་གང་ཟག་ཡིན་པའི་ཕྱིར། དེར་ཐལ། མ་འོངས་པ་ན་ཆོས་ཀྱི་འཁོར་ལོ་བསྐོར་བའི་གང་ཟག་ཡིན་པའི་ཕྱིར། དེར་ཐལ། དུས་འཁོར་བ་ཇི་སྲིད་མ་སྟོངས་ཀྱི་བར་དུ་མཛད་པ་བཅུ་གཉིས་ཀྱི་ཚུལ་བསྟན་པའི་སྒོ་ནས་སེམས་ཅན་གྱི་དོན་མཛད་པའི་གང་ཟག་ཡིན་པའི་ཕྱིར། རྩ་བར་འདོད་མི་ནུས་ཏེ། ད་ལྟར་བའི་སངས་རྒྱས་འཕགས་པ་ཡིན་པའི་ཕྱིར་རོ། །མཁས་པ་ཁ་ཅིག །རྣམ་བཤད་ལས། རྗེ་བཙུན་མངོན་པར་རྫོགས་པར་སངས་རྒྱས་པའི་དབང་དུ་བྱེད་ན་ཐུན་མོང་དང་ཐུན་མོང་མ་ཡིན་པའི་སྐབས་མ་ཕྱེད་པ་ཡིན་ལ་ཞེས་པའི་ལུང་དོན། ཐུན་མོང་བ་གདུལ་བྱ་ཐུན་མོང་བའི་ངོར་སངས་རྒྱས་མ་ཡིན་ལ། ཐུན་མོང་མ་ཡིན་པ་དངོས་པོའི་གནས་ཚོད་ལ་སངས་རྒྱས་ཡིན་པའི་ཁྱད་པར་འབྱེད་དགོས་ཤིང་། དེའི་རྒྱུད་ལ་རང་དོན་དོན་གཉེར་གྱི་བློ་ཡོད་དོ་ཟེར་ན། རྗེ་བཙུན་ཆོས་ཅན། སངས་རྒྱས་ཡིན་པར་ཐལ། དངོས་པོའི་གནས་ཚོད་ལ་སངས་རྒྱས་
ཡིན་པའི་ཕྱིར། འདོད་ན། སྟོན་པ་ཤཱཀྱ་ཐུབ་པའི་ཐུགས་རྒྱུད་ལ་རང་དོན་དོན་གཉེར་གྱི་བློ་ཡོད་པར་ཐལ། རྗེ་བཙུན་གྱི་ཐུགས་རྒྱུད་ལ་དེ་ཡོད་པ་ནི་གང་ཞིག །དེ་གཉིས་སངས་རྒྱས་ཡིན་པར་མཚུངས་པའི་ཕྱིར། འདོད་ན། དེའི་རྒྱུད་ལ་རང་དོན་ཆོས་སྐུ་དོན་གཉེར་གྱི་བློ་ཡོད་པར་ཐལ། འདོད་པའི་ཕྱིར། འདོད་ན། དེའི་རྒྱུད་ལ་ཐེག་ཆེན་གྱི་ཐར་པ་དོན་གཉེར་གྱི་བློ་ཡོད་པར་ཐལ། འདོད་པའི་ཕྱིར། འདོད་ན། དེ་ཐར་པ་དོན་གཉེར་གྱི་གང་ཟག་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཐར་འདོད་ཀྱི་སྐྱེས་བུ་མ་ཡིན་པའི་ཕྱིར་རོ། །ཁ་ཅིག །འདོད་པའི་རྟེན་ལ་གསར་དུ་འཚང་རྒྱ་བ་ཡོད་པར་ཐལ། དགའ་ལྡན་གྱི་རྟེན་ཅན་གྱི་རྗེ་བཙུན་བྱམས་པ་གསར་དུ་འཚང་རྒྱ་དགོས་ཀྱི་གང་ཟག་གང་ཞིག །དེས་དགའ་ལྡན་དུ་བཞུགས་པའི་མོད་དེ་ཉིད་ལ་མཛད་པ་བཅུ་གཉིས་ཀྱི་ཚུལ་སྟོན་པའི་ཕྱིར་ན་མ་ཁྱབ། རྗེ་བཙུན་དགའ་ལྡན་དུ་བཞུགས་པའི་མོད་ཉིད་ལས་མཛད་པ་བཅུ་གཉིས་ཀྱི་ཚུལ་མ་བསྟན་པའི་སྔ་རོལ་ཏུ་འོག་མིན་དུ་འཚང་རྒྱ་བར་ཐལ། དེས་དགའ་ལྡན་དུ་སྤྲུལ་པ་ཞིག་བཞག །འོག་མིན་དུ་ཆོས་སྐུ་མངོན་དུ་མཛད་ནས། སླར་ཡང་སྤྲུལ་པ་དེ་ཉིད་ལ་ཞུགས་ཏེ་མཛད་པ་བཅུ་གཉིས་ཀྱི་ཚུལ་སྟོན་པའི་ཕྱིར་ཏེ། ཇི་སྐད་དུ། ཕལ་པོ་ཆེ་ལས། བྱང་ཆུབ་སེམས་དཔའ་དགའ་ལྡན་གྱི་གནས་ན་འདུག་བཞིན་དུ་ཆོས་ཀྱི་སྐུར་མངོན་པར་རྫོགས་པར་འཚང་རྒྱ་བའི་ཕྱིར། ཞེས་གསུངས་པའི་ཕྱིར་རོ། །བྱས་པ་ལ་ཁོ་ན་རེ། དགའ་ལྡན་གྱི་རྟེན་ལ་གསར་དུ་སངས་རྒྱས་པ་ཡོད་པར་ཐལ། དེའི་རྟེན་ལ་གསར་དུ་སངས་རྒྱས་མ་ཐག་པའི་གང་ཟག་ཡོད་པའི་ཕྱིར། དེར་ཐལ། རྗེ་བཙུན་གྱིས་དགའ་ལྡན་དུ་སྤྲུལ་པ་ཞིག་བཞག །འོག་མིན་དུ་
ཆོས་སྐུ་མངོན་དུ་མཛད་མ་ཐག་པ་དེའི་ཚེ་དགའ་ལྡན་གྱི་སྤྲུལ་པ་དེས་གསར་དུ་སངས་རྒྱས་མ་ཐག་པའི་དགའ་ལྡན་གྱི་རྟེན་ཅན་ཡིན་པའི་ཕྱིར། དེར་ཐལ། དེའི་རྟེན་ཅན་གྱི་རྣམ་པ་ཅན་ཡིན་པའི་ཕྱིར་ན་མ་ཁྱབ། འོ་ན། བཅོམ་ལྡན་འདས་གདུལ་བྱའི་དོན་དུ་རི་དྭགས་རུ་རུའི་རྣམ་པར་བསྟན་པའི་ལུས་དེ་ཆོས་ཅན། རི་དྭགས་རུ་རུའི་ལུས་ཡིན་པར་ཐལ། དེའི་རྣམ་པ་བསྟན་པའི་ལུས་ཡིན་པའི་ཕྱིར། ཁ་ཅིག་རྗེ་བཙུན་གྱི་རྒྱུད་ལ་རང་དོན་ཆོས་སྐུ་དོན་གཉེར་གྱི་བློ་ཡོད་པར་ཐལ། དེའི་རྒྱུད་ལ་རང་དོན་ཆོས་སྐུ་ལ་དམིགས་པའི་འདུན་པ་ཡོད་པའི་ཕྱིར་ཟེར་བ་ལ་ནི། འོ་ན། དེའི་རྒྱུད་ལ་འཁོར་བ་དོན་གཉེར་གྱི་བློ་ཡོད་པར་ཐལ། དེའི་རྒྱུད་ལ་འཁོར་བ་ལ་དམིགས་པའི་འདུན་པ་ཡོད་པའི་ཕྱིར། ཁྱབ་པ་ཁས། འདོད་མི་ནུས་སོ། །ཁ་ཅིག །རྗེ་བཙུན་སངས་རྒྱས་ཡིན་པར་ཐལ། དེ་སངས་རྒྱས་སྟོང་པོ་གང་རུང་ཡིན་པའི་ཕྱིར། མ་གྲུབ་ན། དེར་ཐལ། དེར་གྱུར་པའི་སངས་རྒྱས་སྟོང་པོ་གང་རུང་ཡོད་པའི་ཕྱིར་ན་མ་ཁྱབ། འོ་ན། དེ་ཉེ་བའི་སྲས་བརྒྱད་གང་རུང་ཡིན་པར་ཐལ། དེར་གྱུར་པའི་ཉེ་བའི་སྲས་བརྒྱད་གང་རུང་ཡོད་པའི་ཕྱིར། ཁྱབ་པ་ཁས། རང་ལུགས་ནི་འགྲེལ་པ་དང་ཊཱིཀྐར་སངས་རྒྱས་དང་བཅོམ་ལྡན་འདས་སོགས་སུ་བཤད་པ་ནི་ཡུམ་རྒྱས་འབྲིང་བསྡུས་གསུམ་ལ་བསྟན་བཅོས་ཀྱི་སྒྲས་བསྟན་པ་ལྟར་ཡིན་ལ། རྒྱུད་བླར། སྐྱེ་བ་མངོན་པར་སྐྱེ་བ་དང་། །ཞེས་སོགས་དང་། རྒྱུད་བླའི་ཊཱིཀྐར་ངེས་པའི་དོན་དུ་ནི་མ་ཡིན་གྱི། བཅོམ་ལྡན་འདས་བྱམས་པ་ཉིད་ཞེས་སོགས་ཀྱང་རྩ་བའི་དེ་སྤྲུལ་སྐུ་སྤྱིའི་དབང་དང་། ཊཱིཀྐའི་དེ་ཐུན་མོང་མ་ཡིན་པའི་ཤན་ཤོར་བ་ཡིན་ནོ། །རྣམ་བཤད་ཀྱི་ཐུན་མོང་མ་ཡིན་པ་ནི་སྔགས་དང་ཐུན་མོང་བ་ཕར་ཕྱིན་ཐེག་པ་ལ་བྱ་རིགས་ཞིང་། དེས་ན་རང་ལུགས་ལ་
རྗེ་བཙུན་བྱང་ཆུབ་སེམས་དཔའ་ཡིན་ཏེ། གླེང་གཞིའི་མདོ་ལས། བྱང་ཆུབ་སེམས་དཔའ་ཆེན་པོ་བྱམས་པ་དང་། ཞེས་དང་། སྲིད་ཞི་མཉམ་ཉིད་ཀྱི་མདོ་ལས། བྱམས་པ་ནི་སྐྱེ་བ་གཅིག་གིས་ཐོགས་པ་སྟེ། ཞེས་དང་། རྒྱུད་བླ་ལས། དེ་ལྟར་ཡིད་ཆེས་ལུང་དང་རིགས་པ་ལ། །བརྟེན་ནས་བདག་ཉིད་འབའ་ཞིག་དག་ཕྱིར་དང་། །ཞེས་སོགས་གསུངས་པ་རྣམས་ཀྱིས་གྲུབ་པའི་ཕྱིར་རོ། །གསུམ་པ་རྩོད་པ་སྤོང་བ་ལ། ཁ་ཅིག །འདོད་པའི་ཁམས་སུ་གསར་དུ་འཚང་རྒྱ་བ་ཡོད་པར་ཐལ། སྔགས་ཀྱི་ཐེག་པ་ཡོད་པའི་ཕྱིར་ན་མ་ཁྱབ། འོ་ན། སྔགས་ཀྱི་ཐེག་པ་ནས་བཤད་པ་ལྟར་ཁས་མ་བླངས་པས་སྔགས་ཀྱི་ཐེག་པ་མེད་པར་འདོད་དགོས་པར་ཐལ། ཁྱོད་ཀྱི་ཞེ་འདོད་འཐད་པའི་ཕྱིར། འདོད་ན། གྲུབ་མཐའ་འོག་མ་གསུམ་ནས་བཤད་པ་ལྟར་ཁས་མ་བླངས་པས་གྲུབ་མཐའ་འོག་མ་གསུམ་མེད་པར་འདོད་དགོས་པར་ཐལ། མཚུངས་པའི་ཕྱིར། འདོད་ན། སྐབས་འདིར་གྲུབ་མཐའ་འོག་མ་གསུམ་མེད་པར་ཐལ། དེ་ནས་བཤད་པ་ལྟར་སྐབས་འདིར་ཁས་མི་ལེན་པའི་ཕྱིར། འདོད་ན། གྲུབ་མཐའ་སྨྲ་བ་བཞི་མེད་པར་ཐལ་ལོ། ཁ་ཅིག །རྗེ་བཙུན་སངས་རྒྱས་ཡིན་པར་ཐལ། ལྷའི་བུ་དམ་པ་ཏོག་དཀར་པོ་སངས་རྒྱས་ཡིན་པའི་ཕྱིར་ན་མ་ཁྱབ་བོ། །
ཡུམ་སྲས་བཤད་པ།
ཡུམ་སྲས་བཤད་པ། གཉིས་པ་རྩ་བ་ལ། ཚིག་དོན་དང་། བརྒལ་ལན་གྱིས་གཏན་ལ་འབེབས་པའོ། །དང་པོ་ལ། དངོས་དང་། མཐའ་དཔྱད་པ་གཉིས། དང་པོ་ལ། བསྟོད་པ་དང་། ཕྱག་འཚལ་བ་གཉིས། དང་པོ་ལ། མཁྱེན་གསུམ་གྱི་ཡོན་ཏན་གྱི་སྒོ་ནས་བསྟོད་པ་དང་། འཕགས་བཞིའི་ཡུམ་བྱེད་པས་བསྟོད་པའོ། །དང་པོ་ལ། གཞི་ལམ་རྣམ་མཁྱེན་གསུམ་ལས། དང་པོ་ནི། ཉན་ཐོས་དང་རང་རྒྱལ་རང་དོན་དུ་འབྲས་བུ་སྡུག་ཀུན་ཉེ་བར་ཞི་བའི་
ཉེར་ཞི་བའི་འཚོལ་བ་པོ་རྣམས་ཆོས་ཅན། ཁྱོད་ཉེར་ཞིར་འཁྲིད་པའི་ཐབས་ཡོད་དེ། ཆོས་ཀུན་གང་ཟག་གི་བདག་མེད་དུ་ཤེས་པའི་གཞི་ཤེས་གང་ཡིན་པ་དེ་ཉིད་ཀྱིས་འཁྲིད་པ་དེ་ཉིད་ཀྱིས་འཁྲིད་པར་མཛད་པའི་ཕྱིར། གཉིས་པ་ནི། འགྲོ་ལ་ཀུན་དུ་ཕན་པ་སྒྲུབ་པར་བྱེད་པའི་བྱང་འཕགས་རྣམས་ཆོས་ཅན། ཁྱོད་ཀྱིས་འབྲས་བུ་འཇིག་རྟེན་ཏེ་རིགས་ཅན་གསུམ་གྱི་དོན་སྒྲུབ་པའི་ཐབས་ཡོད་དེ། ལམ་གསུམ་བདག་མེད་པར་ཤེས་པའི་ལམ་ཤེས་གང་ཡིན་པ་ཉིད་ཀྱིས་འཁྲིད་པར་མཛད་པའི་ཕྱིར། གསུམ་པ་ནི། ཐུབ་པ་སངས་རྒྱས་རྣམས་ཆོས་ཅན། འབྲས་བུ་ཐེག་གསུམ་གྱི་ལམ་རྫོགས་པའི་བརྗོད་བྱ་རྣམ་པ་ཀུན་དང་ལྡན་པའི་མདོ་སྡེ་སྣ་ཚོགས་པ་འདི་གསུང་བའི་ཐབས་ཡོད་དེ། ཤེས་བྱ་ཐམས་ཅད་བདག་མེད་དུ་མཁྱེན་པའི་རྣམ་མཁྱེན་གང་དང་ཡང་དག་པར་ལྡན་པས། དེ་ལ་བརྟེན་ནས་གསུངས་པའི་ཕྱིར། གཉིས་པ་ནི། ཡུམ་མཁྱེན་གསུམ་ཆོས་ཅན། རང་སྲས་འཕགས་བཞིའི་བཞེད་དོན་སྒྲུབ་པའི་ཡོན་ཏན་དང་ལྡན་ཏེ། རང་སྲས་ཉན་ཐོས་འཕགས་པ་བྱང་ཆུབ་སེམས་དཔའ་འཕགས་པའི་ཚོགས་དང་བཅས་པ་སྟེ། རང་སྲས་རང་རྒྱལ་འཕགས་པ་དང་རང་སྲས་སངས་རྒྱས་འཕགས་པ་རྣམས་ཀྱི་བཞེད་དོན་སྒྲུབ་པའི་ཕྱིར། གཉིས་པ་ཕྱག་འཚལ་བ་ནི། རྗེ་བཙུན་བྱམས་མགོན་ཆོས་ཅན། ཁྱོད་ཀྱིས་རྒྱན་རྩོམ་པའི་ཐོག་མར་མཁྱེན་གསུམ་ལ་ཕྱག་འཚལ་བ་ཡིན་ཏེ། དེ་ལ་འདུད་པའི་ཕྱིར། གཉིས་པ་ལ། དགག་གཞག་སྤང་གསུམ་ལས། ཁ་ཅིགམཆོད་བརྗོད་དུ་མཁྱེན་གསུམ་གྱི་གོ་རིམ་བཤད་པ་འདི་མདོའི་གླེང་གཞིའི་གོ་རིམ་དང་མཐུན་པར་བསྟོད་པ་ཡིན་ཟེར་ན། མི་འཐད་པར་ཐལ། འཕགས་སེང་གཉིས་ཀས་མཆོད་བརྗོད་གླེང་གཞི་དང་སྦྱར་བའི་བཤད་
པ་མཛད་པའི་ཕྱིར་དང་། སློབ་དཔོན་གྱིས་གླེང་གཞིའི་བཤད་པ་དགོས་འབྲེལ་གྱི་མཇུག་ཏུ་མཛད་པའི་ཕྱིར། ཁ་ཅིག་ཉན་ཐོས་ཀྱི་རིགས་ཅན་ཐེག་གསུམ་ལ་རིམ་གྱིས་གཞུག་པའི་ཆེད་དུ་དང་པོར་གཞི་ཤེས་ལ་བསྟོད་པ་ཡིན་ཟེར་ན། རྒྱན་གྱི་ཆེད་དུ་བྱ་བའི་གདུལ་བྱ་ཉན་ཐོས་ཀྱི་རིགས་ཅན་ཡོད་པར་ཐལ། དམ་བཅའ་འཐད་པའི་ཕྱིར། འདོད་ན། མངོན་རྟོགས་རྒྱན་ཆོས་ཅན། ཐེག་པ་ཐུན་མོང་བའི་བསྟན་བཅོས་ཡིན་པར་ཐལ། བསྟན་བཅོས་གང་ཞིག །ཁྱོད་ཀྱི་ཆེད་དུ་བྱ་བའི་གདུལ་བྱ་ཐེག་པ་མཆོག་དམན་གྱི་རིགས་ཅན་གཉིས་ཀ་ཡོད་པའི་ཕྱིར། འདོད་མི་ནུས་ཏེ། ཐེག་ཆེན་ཐུན་མོང་མ་ཡིན་པའི་བསྟན་བཅོས་ཡིན་པའི་ཕྱིར། ཁ་ཅིག །གདུལ་བྱ་ཐེག་པ་གསུམ་ལ་རིམ་གྱིས་གཞུག་པའི་ཕྱིར་དེ་ལྟར་བསྟོད་པ་ཡིན་ཟེར་ན་ཡང་གོང་གི་དེས་ཁེགས་སོ། །ཁ་ཅིག །ལམ་ཤེས་ཐོབ་པ་ལ་གཞི་ཤེས་ཐོབ་པ་སྔོན་དུ་འགྲོ་དགོས་པའི་རྒྱུ་མཚན་གྱིས་དེ་ལྟར་བསྟོད་པ་ཡིན་ཟེར་ན། དམན་ལམ་སྔོན་དུ་མ་སོང་བའི་བྱང་སེམས་སྦྱོར་ལམ་ཆོས་མཆོག་ཆེན་པོ་བ་དེ་ལ་གཞི་ཤེས་ཡོད་པར་ཐལ། དམ་བཅའ་དེའི་ཕྱིར། ཁ་ཅིག །ལམ་ཤེས་ཐོབ་པ་ལ། སྐྱེས་བུ་འབྲིང་དང་ཐུན་མོང་བའི་ལམ་གྱིས་བསྡུས་པའི་མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་ཡེ་ཤེས་ཐོབ་པ་སྔོན་དུ་འགྲོ་དགོས་པའི་རྒྱུ་མཚན་གྱིས་ཡིན་ཟེར་ན། དམན་ལམ་སྔོན་དུ་མ་སོང་བའི་བྱང་སེམས་སྦྱོར་ལམ་པས་མི་རྟག་སོགས་བཅུ་དྲུག་མངོན་སུམ་དུ་རྟོགས་པར་ཐལ། དམ་བཅའ་དེའི་ཕྱིར། ཁ་ཅིག །སྐྱེས་བུ་ཆེན་པོའི་ལམ་རིམ་རྒྱུད་ལ་སྐྱེ་བ་ལ། སྐྱེས་བུ་འབྲིང་གི་ལམ་ལ་བློ་སྦྱོང་བ་སྔོན་དུ་འགྲོ་དགོས་པ་ཤེས་པའི་ཆེད་དུ་དེ་
ལྟར་བསྟོད་པ་ཡིན་ཟེར་བ་ཡང་མི་འཐད་དེ། འབྲིང་དང་ཐུན་མོང་བའི་ལམ་ལ་བློ་སྦྱོང་དགོས་ཀྱང་། འབྲིང་གི་བསམ་པ་དེ་རང་ཉིད་གཅིག་པུའི་ཆེད་དུ་ཐར་པ་དོན་གཉེར་གྱི་བློ་ལ་བྱེད་དགོས་པའི་ཕྱིར། ཁ་ཅིག །སྐབས་འདིར་དངོས་སུ་བསྟན་པའི་ཡུམ་ཡིན་ན། འཕགས་རྒྱུད་ཀྱི་མཁྱེན་པ་ཡིན་པས་ཁྱབ་ཟེར་ན། ཉན་ཐོས་མཐོང་ལམ་པའི་ཡུམ་ཆོས་ཅན། དེར་ཐལ། དེའི་ཕྱིར། དེར་ཐལ། ཉན་ཐོས་ཞི་བ་འཚོལ་རྣམས་ཞེས་སོགས་ཀྱི་ཚིག་རྐང་དང་པོས་དངོས་སུ་བསྟན་པའི་ཡུམ་ཡོད་པའི་ཕྱིར་ཏེ། ཚིགས་རྐང་དང་པོས་ཉན་ཐོས་མཐོང་ལམ་པའི་ཡུམ་དངོས་སུ་བསྟན་པའི་ཕྱིར། རྩ་བར་འདོད་མི་ནུས་ཏེ། ཉན་ཐོས་ཀྱི་སྦྱོར་ལམ་ཆོས་མཆོག་ཆེན་པོའི་ཡེ་ཤེས་དེ་ཁྱོད་ཡིན་པའི་ཕྱིར་རོ། །མཆོད་བརྗོད་ཡུལ་དུ་གྱུར་པའི་ཡུམ་ཡིན་ན་མཁྱེན་གསུམ་གང་རུང་ཡིན་པས་ཁྱབ་ཟེར་ན། མཁྱེན་གསུམ་ཆོས་ཅན། དེར་ཐལ། དེའི་ཕྱིར། འདོད་ན། མ་ཡིན་པར་ཐལ། གཞི་ཤེས་ཀྱང་མ་ཡིན། ལམ་ཤེས་ཀྱང་མ་ཡིན། རྣམ་མཁྱེན་ཡང་མ་ཡིན་པའི་ཕྱིར་རོ། །ཁ་ཅིག །དངོས་པོ་བརྒྱད་པོ་མཆོད་བརྗོད་ཡུལ་དུ་གྱུར་པའི་ཡུམ་ཡིན་ཟེར་ན། ཆོས་སྐུ་དེ་ཡིན་པར་ཐལ། བརྒྱད་ཀ་དེ་ཡིན་པའི་ཕྱིར། འདོད་མི་ནུས་ཏེ། རྟག་པ་ཡིན་པའི་ཕྱིར། ཁ་ཅིག །སྐབས་འདིར་དངོས་སུ་བསྟན་པའི་མཆོད་བརྗོད་ཡུལ་དུ་གྱུར་པའི་ཡུམ་ཡིན་ན་སྐབས་འདིར་བསྟན་བྱའི་གཙོ་བོར་བྱས་ནས་བསྟན་པའི་ཡུམ་ཡིན་པས་ཁྱབ་ཟེར་ན། སྐབས་འདིར་དངོས་སུ་བསྟན་པའི་མཆོད་བརྗོད་ཡུལ་དུ་གྱུར་པའི་ཐེག་དམན་གྱི་གཞི་ཤེས་ཆོས་ཅན། དེར་ཐལ། དེའི་ཕྱིར། འདོད་ན། གཉེན་པོ་ཕྱོགས་ཀྱི་གཞི་ཤེས་ཡིན་པར་ཐལ། འདོད་པའི་ཕྱིར། ཁྱབ་པ་ཡོད་དེ། སྐབས་འདིའི་བསྟན་
བྱའི་གཙོ་བོར་གྱུར་པའི་གཞི་ཤེས་ཡིན་ན། སྐབས་གསུམ་པའི་བསྟན་བྱའི་གཙོ་བོར་གྱུར་པའི་གཞི་ཤེས་ཡིན་དགོས། དེ་ཡིན་ན་གཉེན་པོ་ཕྱོགས་ཀྱི་གཞིས་ཤེས་ཡིན་དགོས་པའི་ཕྱིར་རོ། །ཁ་ཅིག །མཁྱེན་གསུམ་འཕགས་བཞིའི་ཡུམ་ཡིན་ཟེར་ན། མཁྱེན་གསུམ་སངས་རྒྱས་འཕགས་པའི་ཡུམ་ཡིན་པར་ཐལ། དམ་བཅའ་དེའི་ཕྱིར། འདོད་ན། དེ་སྐྱེད་བྱེད་ཡིན་པར་ཐལ། འདོད་པའི་ཕྱིར། འདོད་ན། དེའི་སྔ་ལོགས་སུ་གྲུབ་པར་ཐལ། འདོད་པའི་ཕྱིར། ཁ་ཅིག །འཕགས་པ་དེའི་ཡུམ་ཡིན་ན། འཕགས་པ་དེའི་རྒྱུ་ཡིན་པས་མ་ཁྱབ་པར་ཐལ། རྒྱལ་བའི་སྲས་ཡིན་ན་རྒྱལ་བའི་འབྲས་བུ་ཡིན་པས་མ་ཁྱབ་པའི་ཕྱིར། མ་གྲུབ་ན། སངས་འཕགས་ཀྱི་རྒྱུར་གྱུར་པའི་བྱང་འཕགས་ཆོས་ཅན། དེར་ཐལ། དེའི་ཕྱིར། དེར་ཐལ། རྒྱལ་སྲས་ཡིན་པའི་ཕྱིར་ན་མ་ཁྱབ། འོ་ན། སྐམ་ལས་སྐྱེས་པའི་པདྨོ་ཆོས་ཅནམཚོ་ལས་སྐྱེས་པར་ཐལ། མཚོ་སྐྱེས་ཡིན་པའི་ཕྱིར། འདོད་མི་ནུས་སོ། །ཁ་ཅིག །རང་སྲས་འཕགས་པའི་བཞེད་དོན་སྒྲུབ་ནུས་ཀྱི་འཕགས་རྒྱུད་ཀྱི་མཁྱེན་པ་དེ་སྐབས་འདིར་དངོས་སུ་བསྟན་པའི་མཆོད་བརྗོད་ཡུལ་དུ་གྱུར་པའི་ཡུམ་གྱི་མཚན་ཉིད་ཟེར་ན། རང་རྒྱལ་གྱི་མཐོང་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། འཕགས་རྒྱུད་ཀྱི་མཁྱེན་པ་ཡིན་པའི་ཕྱིར། རྩ་བར་འདོད་མི་ནུས་ཏེ། ཤུགས་ལ་བསྟན་པའི་ཕྱིར། ཁ་ཅིག །རང་སྲས་འཕགས་པ་སྐྱེད་པའི་ཡོན་ཏན་ལྡན་པའི་ཆ་ནས་རྒྱན་རྩོམ་པ་པོའི་བསྟོད་ཕྱག་གི་ཡུལ་དུ་དམིགས་པ་དེ་རྒྱན་གྱི་མཆོད་བརྗོད་ཡུལ་དུ་གྱུར་པའི་ཡུམ་གྱི་མཚན་ཉིད་ཟེར་ན། སྟོན་པ་ཤཱཀྱ་ཐུབ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། མཆོག་གི་སྤྲུལ་
སྐུ་ཡིན་པའི་ཕྱིར། རྩ་བར་འདོད་མི་ནུས་སོ། །ཁ་ཅིག །ཡུམ་ཡིན་ན་མཁྱེན་པ་ཡིན་པས་ཁྱབ་ཟེར་ན། སྙིང་རྗེ་ཆེན་པོ་ཆོས་ཅན། དེར་ཐལ། དེའི་ཕྱིར། དེར་ཐལ། ཚོགས་ལམ་སྐད་ཅིག་དང་པོ་ལ་གནས་པའི་སེམས་དཔའི་ཡུམ་ཡིན་པའི་ཕྱིར། དེ་དེར་ཐལ། དེའི་ཡུམ་ཡོད་པའི་ཕྱིར། རྒྱུད་བླ་ལས། ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་སྐྱེད་མ་དང་བསམ་གཏན་གྱི། །བདེ་བའི་མངལ་གནས་སྙིང་རྗེའི་མ་མ་ཅན། །གང་ཡིན་དེ་དག་ཐུབ་པའི་རྗེས་སྐྱེས་སྲས། །ཞེས་གསུངས་པའི་ཕྱིར། ཁ་ཅིག །ཡུམ་ལ་ཤེས་པས་ཁྱབ་ཟེར་བ་ལ་སྐྱོན་འཕེན་པ་གཞན་དག་གིས། ཡུམ་སྒྱུ་མ་ལྷ་མཛེས་ཆོས་ཅན། དེར་ཐལ། དེའི་ཕྱིར། དེར་ཐལ། སྟོན་པ་ཤཱཀྱ་ཐུབ་པའི་ཡུམ་ཡིན་པའི་ཕྱིར་ཏེ། དེའི་ཡུམ་ཡོད་པའི་ཕྱིར་ན་མ་ཁྱབ། སྲས་སྒྲ་གཅན་འཛིན་དེ་ཤཱཀྱ་ཐུབ་པའི་སྲས་ཡིན་པར་ཐལ། སྒྱུ་མ་ལྷ་མཛེས་དེའི་ཡུམ་ཡིན་པའི་ཕྱིར། འདོད་ན། བྱང་ཆུབ་སེམས་དཔའ་ཡིན་པར་ཐལ། རྒྱལ་བའི་སྲས་ཡིན་པའི་ཕྱིར། གཉིས་པ་རང་ལུགས་ནི། མཆོད་བརྗོད་ཀྱི་སྐབས་སུ་དང་པོར་གཞི་ཤེས། དེ་ནས་ལམ་ཤེས། དེ་ནས་རྣམ་མཁྱེན་ལ་བསྟོད་པ་དེ་རྒྱན་གྱི་ཆེད་དུ་བྱ་བའི་གདུལ་བྱའི་ལམ་ཉམས་ལེན་གྱི་རིམ་པ་དང་མཐུན་པར་བསྟོད་པ་ཡིན་ཏེ། སྐྱེས་བུ་འབྲིང་དང་ཐུན་མོང་པའི་ལམ་གྱི་རིམ་པ་ལ་བློ་མ་སྦྱངས་པར་སྐྱེས་བུ་ཆེན་པོའི་ལམ་རིམ་གྱིས་བསྡུས་པའི་སྙིང་རྗེ་ཆེན་པོ་མི་སྐྱེ། དེ་མ་སྐྱེས་ན་ཐེག་ཆེན་སེམས་བསྐྱེད་དང་ལམ་ཤེས་སོགས་མི་སྐྱེ་བས་སྐྱེས་བུ་ཆེན་པོའི་ལམ་རིམ་རྒྱུད་ལ་སྐྱེ་བ་ལ་འབྲིང་དང་ཐུན་མོང་བའི་ལམ་རིམ་ལ་བློ་སྦྱོང་བ་སྔོན་དུ་འགྲོ་དགོས་པ་ཤེས་པའི་ཆེད་དུ་ཡིན་པའི་ཕྱིར།
སྐབས་འདིར་དངོས་སུ་བསྟན་པའི་མཆོད་བརྗོད་ཡུལ་དུ་གྱུར་པའི་ཡུམ་ལ་སྐབས་འདིར་དངོས་སུ་བསྟན་པའི་མཁྱེན་པ་གསུམ་དུ་གྲངས་ངེས་ཏེ། དེ་ལ་དེ་གསུམ་དུ་དབྱེར་ཡོད། དེ་ལས་མང་མི་དགོས་ཤིང་ཉུང་ན་མི་འདུ་བའི་ཕྱིར། སངས་འཕགས་ཀྱི་ཡུམ་དེ་ལ་སྒྲས་བརྗོད་རིགས་ཀྱིས་དབྱེ་ན། དེའི་སྐྱེད་བྱེད་ཀྱི་ཡུམ་དང་། དེའི་བཞེད་དོན་སྒྲུབ་བྱེད་ཀྱི་ཡུམ་གཉིས་ལས། ཕྱི་མ་ལ། དེ་སྐྱེད་བྱེད་མ་ཡིན་པའི་བཞེད་དོན་སྒྲུབ་བྱེད་ཀྱི་ཡུམ་དང་། སྐྱེད་བྱེད་ཀྱི་བཞེད་དོན་སྒྲུབ་བྱེད་ཀྱི་ཡུམ་གཉིས་ཡོད་དེ། རྣམ་མཁྱེན་དང་པོ་དང་། ས་བཅུའི་ཡེ་ཤེས་གཉིས་པ་ཡིན་པའི་ཕྱིར། སངས་རྒྱས་འཕགས་པའི་ཡུམ་ཡིན་ན། དེའི་སྐྱེད་བྱེད་ཡིན་པས་ཁྱབ་པ་དང་། རྣམ་མཁྱེན་གྱི་སྲས་ཡིན་ན། དེའི་འབྲས་བུ་ཡིན་པས་ཁྱབ་སྟེ། འགྲེལ་པ་ལས། སངས་རྒྱས་ལ་སོགས་པ་སྐྲུན་པར་མཛད་པ་ནི་གདོན་མི་ཟ་བར་སྲིད་པ་ཉིད་དོ། །ཞེས་དང་། རྣམ་བཤད་ལས། མཁྱེན་པ་སྔ་མས་འཕགས་པ་ཕྱི་མ་སྐྱེད་ཅིང་། ཉེར་ཞི་ལ་སོགས་པའི་བཞེད་དོན་སྒྲུབ་པར་བྱེད་པས་ཡུམ་དང་སྲས་ནི་བསྐྱེད་བྱ་སྐྱེད་བྱེད་དུ་ཤེས་པར་བྱའོ། །ཞེས་གསུངས་པའི་ཕྱིར། རང་སྲས་འཕགས་པའི་བཞེད་དོན་ཕུན་ཚོགས་སྒྲུབ་བྱེད་ཀྱི་ལམ་ཞུགས་ཀྱི་མཁྱེན་པ་དེ་འདིར་བསྟན་མཆོད་བརྗོད་ཡུལ་དུ་གྱུར་པའི་ཡུམ་གྱི་མཚན་ཉིད། རང་སྲས་འཕགས་པའི་བཞེད་དོན་ཕུན་ཚོགས་སྒྲུབ་བྱེད་ཀྱི་སྐབས་འདིར་དངོས་སུ་བསྟན་པའི་འཕགས་རྒྱུད་ཀྱི་མཁྱེན་པ་དེ་སྐབས་འདིར་དངོས་སུ་བསྟན་པའི་མཆོད་བརྗོད་ཡུལ་དུ་གྱུར་པའི་ཡུམ་གྱི་མཚན་ཉིད། རྩོད་པ་སྤོང་བ་ལ་ཁ་ཅིག །མཁྱེན་གསུམ་གང་རུང་ཡིན་ན། སྐབས་འདིར་
དངོས་སུ་བསྟན་པའི་མཆོད་བརྗོད་དུ་གྱུར་པའི་ཡུམ་ཡིན་པས་ཁྱབ་པར་ཐལ། དེར་གྲངས་ངེས་པའི་ཕྱིར་ན་མ་ཁྱབ། འདོད་ན། སྔར་བཀག་ཟིན། མ་ཁྱབ་མཚམས་སུ། མངོན་རྗེས་གང་རུང་ཡིན་ན་ཚད་མ་ཡིན་པས་ཁྱབ་པ་ཐལ། ཚད་མ་ལ་མངོན་རྗེས་ཀྱི་དེ་གཉིས་སུ་གྲངས་ངེས་པའི་ཕྱིར། ཁྱབ་པ་འགྲིག །ཡང་ཁ་ཅིག །རྣམ་མཁྱེན་ཆོས་ཅན། སངས་འཕགས་ཀྱི་ཡུམ་ཡིན་པར་ཐལ། དེའི་བཞེད་དོན་སྒྲུབ་བྱེད་ཀྱི་ཡུམ་ཡིན་པའི་ཕྱིར་ན་མ་ཁྱབ། ཡང་ཁོ་ན་རེ། དམན་ལམ་སྔོན་དུ་མ་སོང་བའི་ཐེག་ཆེན་གྱི་ཚོགས་ལམ་ཆོས་ཅན། རང་སྲས་འཕགས་པའི་བཞེད་དོན་ཕུན་སུམ་ཚོགས་སྒྲུབ་བྱེད་ཀྱི་ལམ་ཞུགས་ཀྱི་མཁྱེན་པ་ཡིན་པར་ཐལ། འདིར་བསྟན་མཆོད་བརྗོད་ཡུལ་དུ་གྱུར་པའི་ཡུམ་ཡིན་པའི་ཕྱིར། འདོད་མི་ནུས་ཏེ། ཁྱོད་ཀྱི་སྲས་སུ་གྱུར་པའི་འཕགས་པ་མེད་པའི་ཕྱིར། དེར་ཐལ། ཚོགས་སྦྱོར་ལ་གནས་པའི་དམན་ལམ་སྔོན་མ་སོང་གི་འཕགས་པ་མེད་པའི་ཕྱིར་ཟེར་ན། རང་སྲས་འཕགས་པའི་བཞེད་དོན་ཕུན་ཚོགས་སྒྲུབ་ནུས་ཀྱི་མཁྱེན་པ་ཡིན་ན། འཕགས་རྒྱུད་ཀྱི་མཁྱེན་པ་ཡིན་པས་ཁྱབ་པར་ཐལ། དམན་ལམ་སྔོན་དུ་མ་སོང་བའི་ཐེག་ཆེན་གྱི་ཚོགས་ལམ་དེ་དེ་མ་ཡིན་པའི་ཕྱིར། འདོད་ན། དམན་ལམ་སྔོན་དུ་མ་སོང་བའི་ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོ་ཆོས་ཅན། དེར་ཐལ། དེའི་ཕྱིར། རྟགས་སྔར་བསྒྲུབ་ཟིན་ཏོ། །ཁ་ཅིག །རྣམ་མཁྱེན་སྐད་ཅིག་ཐ་མ་ཆོས་ཅན། གོང་གི་མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མ་ཡིན་པར་ཐལ། ཁྱོད་ཀྱི་སྲས་སུ་གྱུར་པའི་འཕགས་པ་མེད་པའི་ཕྱིར། དེར་ཐལ། ཁྱོད་ཀྱི་རིགས་འདྲ་ཕྱི་མར་གྱུར་པའི་མཁྱེན་པ་མེད་པའི་ཕྱིར་ཏེ། ཆོས་ཅན་དེ་ཡིན་པའི་ཕྱིར། ཟེར་ན་མི་འཐད་དེ། རྣམ
་མཁྱེན་སྐད་ཅིག་ཐ་མ་ཆོས་ཅན། ཁྱོད་ཀྱི་རིགས་འདྲ་ཕྱི་མར་གྱུར་པའི་ཤེས་པ་ཡོད་པར་ཐལ། ཁྱོད་ཤེས་པ་གང་ཞིག །རང་གི་རིགས་འདྲ་ཕྱི་མར་མཚམས་སྦྱོར་བའི་ཕྱིར། ཕྱི་མ་དེར་ཐལ། རིག་པ་ཡིན་པའི་ཕྱིར། མ་ཁྱབ་ན། སྐྱེ་བ་ཕྱི་མ་ཡོད་པའི་སྒྲུབ་བྱེད་རྣམ་དག་མེད་པར་ཐལ་ལོ། །གཞན་ཡང་། རིག་པ་སྐད་ཅིག་དང་པོ་ཆོས་ཅན། ཁྱོད་ཀྱི་རིགས་འདྲ་སྔ་མར་གྱུར་པའི་རིག་པ་མེད་པར་ཐལ། ཁྱོད་རིག་པ་སྐད་ཅིག་དང་པོ་ཡིན་པའི་ཕྱིར། ཁྱབ་པ་ཡོད་དེ། རིག་པ་སྐད་ཅིག་ཐ་མ་ཡིན་ན་རང་གི་རིགས་འདྲ་ཕྱི་མར་གྱུར་པའི་ཤེས་པ་མེད་དགོས་པའི་ཕྱིར་རོ། །གཉིས་པ་བརྒལ་ལན་ལ། ས་བཅད་འགའ་ཞིག་གྱིས་ཀྱང་། སྤྱི་དོན་དུ་རིགས་པ་ཆགས་པ་རྣམས་ཀྱིས་ཤེས་པར་བྱའོ།། །།
གཅིག་དུ་བྲལ་གྱི་གཏན་ཚིགས་བཤད་པ།
གཅིག་དུ་བྲལ་གྱི་གཏན་ཚིགས་བཤད་པ། རྩ་བའི་གསུམ་པ་འགྲེལ་པ་འཆད་པ་ལ། བསྡུས་པའི་དོན། དགོས་པའི་དོན། རྩོད་པ་སྤང་བ། ཚིག་གི་དོན་ནོ། །དང་པོ་ནི། ཉན་ཐོས་ཞི་བ་འཚོལ་རྣམས་ཞེས་སོགས་ཚིགས་སུ་བཅད་པ་འདིས་ནི་ཆོས་ཅན། ཡུམ་གྱི་ཡོན་ཏན་འདིའི་ཆེ་བའི་བདག་ཉིད་ཕུལ་དུ་བྱུང་བ་དང་ལྡན་པར་བརྗོད་དེ། མཁྱེན་གསུམ་གྱི་ཡོན་ཏན་བརྗོད་པའི་སྒོ་ནས་བསྟོད་པའི་ཕྱིར། གཉིས་པ་ལ། རྒྱས་པར་བཤད་པ་དང་། དོན་བསྡུ་བའོ། དང་པོ་ལ། དད་པ་སྐྱེ་ཚུལ་དང་། དེ་ལས་དོན་གཉེར་གྱི་འདུན་པ་སྐྱེ་བ་དང་། དེ་ལས་ཞུགས་ནས་འབྲས་བུ་འཐོབ་ཚུལ་ལོ། །དང་པོ་ལ། དབང་རྟུལ་དད་པ་སྐྱེ་ཚུལ། དབང་རྣོན་དད་པ་སྐྱེ་ཚུལ་ལོ། །དང་པོ་ནི། མཆོད་བརྗོད་དེ་ཐོས་པས་རྐྱེན་བྱས་ནས་དུས་རེ་ཞིག་གདུལ་བྱ་དད་པའི་རྗེས་སུ་འབྲང་བ་རྣམས་ནི་ཆོས་ཅན། ཡུམ་ལ་རབ་ཏུ་དང་བ་སྐྱེ་སྟེ། ཡུམ་འདི་ལ་ཡོན་ཏན་ཡོད་སྙམ་ཐེ་ཚོམ་མེད་
པར་མྱུར་དུ་དད་པ་སྐྱེ་བའི་ཕྱིར། གཉིས་པ་ལ། དངོས་དང་། མཐའ་དཔྱད་པ་གཉིས་ལས། དང་པོ་ནི། དབང་རྟུལ་དུ་མ་ཟད་གདུལ་བྱ་ཆོས་ཀྱི་རྗེས་སུ་འབྲང་བ་རྣམས་ཀྱང་ཆོས་ཅན། མཆོད་བརྗོད་ཐོས་པས་ཡུམ་དེ་ལ་རབ་ཏུ་དང་བ་སྐྱེད་པར་བྱེད་པ་ཉིད་ཡིན་ཏེ། དེ་ཐོས་པས་རྐྱེན་བྱས་ནས་གཞི་དང་ལམ་དང་རྣམ་པ་བདེན་པའི་སྐྱེ་བ་མེད་པ་ཡོངས་སུ་ཤེས་པའི་ཡེ་ཤེས། མཆོད་བརྗོད་ཀྱི་ཚིགས་སུ་བཅད་པའི་བརྗོད་བྱའི་དོན་གྱི་མཚན་ཉིད་ཀྱི་ཡུམ་ལ་གནོད་པ་ཡོད་མེད་བརྟགས་པས་མ་མཐོང་ནས་དང་བ་སྐྱེ་བའི་ཕྱིར། ཤེས་བྱ་ཆོས་ཅན། གཞི་ལམ་རྣམ་གསུམ་སྐྱེ་མེད་དུ་ཚད་མ་གང་གིས་གྲུབ་པ་ཡོད་དེ། གཅིག་དང་དུ་མའི་ངོ་བོ་ཉིད་དང་བྲལ་བའི་ཕྱིར། ཞེས་བྱ་བ་དང་། རྡོ་རྗེ་གཟེག་མའི་གཏན་ཚིགས་ལ་སོགས་པའི་ཚད་མས། དང་པོར་ཚོགས་ལམ་གྱི་གནས་སྐབས་སུ་གྲུབ་ཅིང་། དེའི་དོན་བསྒོམས་པས་ལམ་ཤེས་དང་རྣམ་མཁྱེན་རིམ་གྱིས་འཐོབ་པའི་ཕྱིར། གདུལ་བྱ་དབང་རྣོན་དེ་ཆོས་ཅན། ཡུམ་ལ་དང་བ་སྐྱེ་ཚུལ་ཡོད་དེ། ཁྱོད་ཀྱིས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་ཐམས་ཅད་མཁྱེན་པ་ཉིད་གསུམ་གྱི་བདག་ཉིད་ལམ་གྱི་ཚུལ་ལུགས་གསུམ་པ་ཅན་ནི་གདོན་མི་ཟ་བར་སྲིད་པ་ཉིད་དོ་ཞེས་དེའི་ངོ་བོ་ལ་དང་བ་སྐྱེ་བ་དང་། སངས་རྒྱས་འཕགས་པ་ལ་སོགས་པ་སྲས་འཕགས་བཞི་སྐྲུན་པར་མཛད་པ་ལ་ཡང་སྔར་བཞིན་ངེས་པར་བཟུང་སྟེ། དེའི་ནུས་པ་ལ་དད་པ་སྐྱེ་བའི་ཕྱིར། གཉིས་པ་ལ། དགག་གཞག་སྤང་གསུམ་ལས། དང་པོ་ནི། སློབ་དཔོན་གྱི་བཞེད་པའི་རྟགས་ཀྱི་དགག་བྱའི་ཆོས་ངོས་གཟུང་བའི་སྐབས་འདིར། ཁ་ཅིག །རང་གི་མཚན་ཉིད་ཀྱིས་གྲུབ་པ་དོན་དམ་དཔྱོད་བྱེད་ཀྱི་རྟགས་ཀྱི་དགག་བྱའི་ཆོས་ཡིན་ཟེར་ན། མི་འཐད་པར་ཐལ། རང་གི་མཚན་ཉིད་
ཀྱིས་གྲུབ་པ་ཡོད་པའི་ཕྱིར་ཏེ། རང་རྒྱུད་ཀྱི་གཏན་ཚིགས་ཡོད་པའི་ཕྱིར་ཏེ། སློབ་དཔོན་སེང་གེ་བཟང་པོས་རང་རྒྱུད་ཀྱི་གཏན་ཚིགས་ཁས་ལེན་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱིས་རང་རྒྱུད་ཀྱི་གཏན་ཚིགས་ཁས་ལེན་པར་ཐལ། ཁྱོད་དབུ་མ་རང་རྒྱུད་པ་ཡིན་པའི་ཕྱིར། གཞན་ཡང་། རང་གི་མཚན་ཉིད་ཀྱིས་གྲུབ་པ་ཡོད་པར་ཐལ། རང་གི་མཚན་ཉིད་ཀྱིས་གྲུབ་པའི་དངོས་པོ་ཡོད་པའི་ཕྱིར། དེར་ཐལ། རང་གི་མཚན་ཉིད་ཀྱིས་གྲུབ་པའི་དངོས་པོ་དེ་མདོ་སྡེ་པས་དོན་དམ་དུ་ཡོད་པར་འདོད་པ་དང་། དབུ་མ་པས་ཀུན་རྫོབ་ཏུ་ཡོད་པར་འདོད་པའི་གཞི་མཐུན་པ་ཡིན་པའི་ཕྱིར། དེར་ཐལ། འཇུག་འགྲེལ་ལས། དེའི་ཕྱིར་ཁ་ཅིག་གིས་མདོ་སྡེ་པ་རྣམས་ཀྱིས་དོན་དམ་དུ་ཡོད་པར་སྨྲ་བ་དེ་ཉིད། དབུ་མ་པ་རྣམས་ཀྱིས་ཀུན་རྫོབ་ཏུ་འདོད་དེ་ཞེས་པའི་ཁ་ཅིག་དེ་རང་རྒྱུད་པ་ལ་བྱེད་རིགས་པའི་ཕྱིར། ཁ་ཅིག །རྟོག་པའི་དབང་གིས་བཞག་པ་ཙམ་མ་ཡིན་པའི་ཡོད་པ་དེ། གཞི་ལམ་རྣམ་གསུམ་བདེན་མེད་དུ་སྒྲུབ་པའི་རྟགས་ཀྱི་དགག་བྱའི་ཆོས་ཡིན་ཟེར་ན་མི་འཐད་པར་ཐལ། དེ་ཡོད་པའི་ཕྱིར། དེར་ཐལ། གཟུགས་སོགས་རྟོག་པའི་དབང་གིས་བཞག་ཙམ་མ་ཡིན་པའི་ཕྱིར། དེར་ཐལ། གཟུགས་སོགས་འཛིན་པའི་རྟོག་པ་གཟུགས་སོགས་སྒྲུབ་བྱེད་ཀྱི་ཚད་མ་མ་ཡིན་པའི་ཕྱིར། གཞན་ཡང་། ཐལ་རང་གཉིས་གཞི་ལམ་རྣམ་གསུམ་བདེན་མེད་དུ་སྒྲུབ་པའི་དགག་བྱའི་ཆོས་ངོས་འཛིན་ཚུལ་ལ་ཁྱད་པར་མེད་པར་ཐལ། དམ་བཅའ་འཐད་པའི་ཕྱིར། འདོད་ན། དེ་ཉིད་གཟུགས་སོགས་རྟོག་པའི་དབང་གིས་འཇོག་ཚུལ་ལ་ཁྱད་པར་མེད་པར་ཐལ། འདོད་མི་ནུས་སོ། །ཁ་ཅིག །གཞི་ལམ་རྣམ་གསུམ་ཆོས་ཅན། བདེན་པར་མེད་དེ། བདེན་པའི་གཅིག་དང་བདེན་པའི་དུ་མ་
གང་རུང་དུ་མེད་པའི་ཕྱིར། ཞེས་པ་གཞུང་འདིའི་དངོས་བསྟན་གྱི་སྦྱོར་བ་ཡིན་ཟེར་ན། མི་འཐད་པར་ཐལ། གཞི་སྐྱེ་བ་མེད་པར་ཡོངས་སུ་ཤེས་པ་ཞེས་པ་གཞི་བདེན་པའི་སྐྱེ་མེད་ལ་འཆད་མི་རིགས་པའི་ཕྱིར། དེར་ཐལ། གཞི་གང་ཟག་གི་བདག་གི་སྐྱེ་བ་མེད་པ་ལ་འཆད་པར་རྣམ་བཤད་ལས་གསུངས་པའི་ཕྱིར། རོང་ཊཱིཀ་པས། ཉན་ཐོས་ཞི་བ་འཚོལ་རྣམས་ཞེས་པའི་སྐབས་ནས་དངོས་སུ་བསྟན་པའི་གཞི་ཤེས་ཡིན་ན་ཐེག་དམན་གྱི་གཞི་ཤེས་ཡིན་པས་ཁྱབ་པ་སྐབས་འདིར་བཤད་པ་དང་ཁྱད་པར་མེད་པར་འདོད་བཞིན་དུ། གཅིག་དུ་བྲལ་གྱི་རྟགས་ཀྱིས་གཞི་བདེན་པའི་སྐྱེ་མེད་ཀྱི་དོན་དུ་འཆད་པ་དང་། ཆོས་ཀྱི་བདག་མེད་རྟོགས་པའི་ཐེག་དམན་འཕགས་པ་གཏན་མེད་དུ་ཁས་ལེན་པ་འདི་ལ། ཉན་ཐོས་ཞི་བ་འཚོལ་རྣམས་ཞེས་པའི་སྐབས་ནས་དངོས་སུ་བསྟན་པའི་གཞི་བདེན་པའི་སྐྱེ་མེད་དུ་རྟོགས་པའི་གཞི་ཤེས་ཡོད་པར་ཐལ། གཞི་སྐྱེ་བ་མེད་པ་ཞེས་པའི་དོན་བདེན་པའི་སྐྱེ་མེད་ལ་འཆད་རིགས་པ་གང་ཞིག །གཞུང་གཉིས་པོའི་སྐབས་ནས་དངོས་སུ་བསྟན་པའི་གཞི་ཤེས་གཉིས་དོན་གཅིག་པའི་ཕྱིར། འདོད་ན། དེ་ཆོས་ཅན། ཐེག་དམན་གྱི་གཞི་ཤེས་ཡིན་པར་ཐལ། ཚིགས་རྐང་སྔ་མས་དངོས་སུ་བསྟན་པའི་གཞི་ཤེས་ཡིན་པའི་ཕྱིར། རྟགས་ཁྱབ་ཁས། འདོད་ན། ཐེག་དམན་ལ་ཆོས་ཀྱི་བདག་མེད་རྟོགས་པ་ཡོད་པར་ཐལ། འདོད་པའི་ཕྱིར། བསལ་བ་ཡང་དངོས་སོ། །ཁ་ཅིག །རེ་ཞིག་དད་པའི་རྗེས་སུ་འབྲང་བ་རྣམས་ཀྱང་འདི་ལ་ཐེ་ཚོམ་མེད་པར་མྱུར་དུ་རབ་ཏུ་དང་བ་སྐྱེའོ་ཞེས་པའི་གཞུང་འདིས། རྒྱན་གྱི་ཆེད་དུ་བྱ་བའི་གདུལ་བྱ་དབང་རྟུལ་ཡུམ་མཁྱེན་གསུམ་ལ་དང་བ་སྐྱེ་ཚུལ་བསྟན་པ་ཡིན་ཟེར་ན། འོ་
ན། རྒྱན་གྱི་ཆེད་དུ་བྱ་བའི་གདུལ་བྱ་དབང་རྟུལ་དེས་ཡུམ་མཁྱེན་གསུམ་གྱི་ཡོན་ཏན་བརྗོད་པ་ཐོས་མ་ཐག་ཏུ་ཡུམ་མཁྱེན་གསུམ་ལ་ངོ་བོ་དང་ནུས་པའི་ཡོན་ཏན་འདི་ལྟ་བུ་ཡོད་ངེས་སྙམ་དུ་ཐེ་ཚོམ་མེད་པར་མྱུར་དུ་རབ་ཏུ་དང་བ་སྐྱེ་བ་ཡིན་པར་ཐལ། ཁྱོད་ཀྱི་དམ་བཅའ་འཐད་པའི་ཕྱིར། འདོད་མི་ནུས་ཏེ། དེས་མཁྱེན་གསུམ་ལ་ངོ་བོ་དང་ནུས་པའི་ཡོན་ཏན་ཡོད་མེད་ལེགས་པར་བརྟགས་ནས་ཡོད་པ་ལ་གནོད་པ་མ་མཐོང་བ་རྒྱུ་མཚན་དུ་བྱས་ནས་དང་བ་སྐྱེ་བའི་ཕྱིར། དེར་ཐལ། དེ་ཐེག་ཆེན་གྱི་རིགས་ཅན་དབང་རྣོན་ཡིན་པའི་ཕྱིར། མ་གྲུབ་ན། དེ་ཆོས་ཅན། ཁྱོད་དེར་ཐལ། ཁྱོད་རྒྱན་གྱི་ཆེད་དུ་བྱ་བའི་གདུལ་བྱ་ཡིན་པའི་ཕྱིར། ཁ་ཅིག །བདེན་པའི་གཅིག་དང་བདེན་པའི་དུ་མ་གང་རུང་དང་བྲལ་བ་དེ། གཞི་ལམ་རྣམ་གསུམ་བདེན་མེད་དུ་སྒྲུབ་པའི་རྟགས་ཡང་དག་ཡིན་ཟེར་ན། བདེན་པའི་གཅིག་དང་བདེན་པའི་དུ་མ་གང་རུང་མེད་པར་ཐལ། དམ་བཅའ་དེའི་ཕྱིར། འདོད་ན། དེ་ཡོད་པར་ཐལ། བདེན་པའི་གཅིག་ཀྱང་ཡོད། བདེན་པའི་དུ་མ་ཡང་ཡོད་པའི་ཕྱིར། དང་པོ་ཡོད་པར་ཐལ། བུམ་པའི་ཆོས་ཉིད་བདེན་པའི་གཅིག་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། བདེན་པ་ཡིན་པ་གང་ཞིག །གཅིག་ཡིན་པའི་ཕྱིར། རྩ་རྟགས་གཉིས་པ་གྲུབ་སྟེ། ཀ་བའི་ཆོས་ཉིད་དང་བུམ་པའི་ཆོས་ཉིད་བདེན་པའི་དུ་མ་ཡིན་པའི་ཕྱིར། དེར་ཐལ། བདེན་པ་གང་ཞིག །དུ་མ་ཡིན་པའི་ཕྱིར། དང་པོ་དེར་ཐལ། ཆོས་ཉིད་ཡིན་པའི་ཕྱིར། གཉིས་པ་དེར་ཐལ། ཐ་དད་ཡིན་པའི་
ཕྱིར། ཁ་ཅིག །བདེན་པར་གྲུབ་པའི་གཅིག་དང་དུ་མ་གང་རུང་དུ་མ་གྲུབ་པ་དེ་གཞི་ལམ་རྣམ་གསུམ་བདེན་མེད་དུ་སྒྲུབ་པའི་རྟགས་ཡང་དག་ཡིན་ཟེར་ན། གཞི་ལམ་རྣམ་གསུམ་ཆོས་ཅན། བདེན་པར་གྲུབ་པའི་གཅིག་དང་དུ་མ་གང་རུང་དུ་གྲུབ་པར་ཐལ། དུ་མར་གྲུབ་པའི་ཕྱིར། དུ་མ་ཡིན་པའི་ཕྱིར། ཐ་དད་ཡིན་པའི་ཕྱིར། ཁ་ཅིག །ཡོད་ན་གཅིག་དང་དུ་མ་གང་རུང་ཡིན་པས་ཁྱབ་པ་འཇལ་བའི་ཚད་མས་བདེན་པར་ཡོད་ན་བདེན་པའི་གཅིག་དང་དེའི་དུ་མ་གང་རུང་གིས་མ་ཁྱབ་པར་འཛིན་པའི་སྒྲོ་འདོགས་གཅོད་པ་ཡིན་ཟེར་ན། བྱས་ན་མི་རྟག་པས་ཁྱབ་པ་འཇལ་པའི་ཚད་མ་དེས། སྒྲ་བྱས་ན་སྒྲ་མི་རྟག་ཡིན་པས་མ་ཁྱབ་པར་འཛིན་པའི་སྒྲོ་འདོགས་གཅོད་པར་ཐལ། དམ་བཅའ་འཐད་པའི་ཕྱིར། འདོད་ན། དེས་སྒྲ་ལ་རྟག་འཛིན་གྱི་སྒྲོ་འདོགས་གཅོད་པར་ཐལ། འདོད་པའི་ཕྱིར། འདོད་ན། སྒྲ་མི་རྟག་པར་རྟོགས་པའི་རྗེས་དཔག་དེས། སྒྲ་ལ་རྟག་འཛིན་གྱི་སྒྲོ་འདོགས་གསར་དུ་མི་གཅོད་པར་ཐལ། འདོད་པའི་ཕྱིར། འདོད་ན། དེ་སྒྲ་རྟག་པ་མ་ཡིན་པ་ལ་གསར་དུ་མི་བསླུ་བའི་རིགས་པ་མ་ཡིན་པར་ཐལ་ལོ། །གལ་ཏེ་ཁོ་ན་རེ། ཡོད་ན་གཅིག་དང་དུ་མ་གང་རུང་ཡིན་པས་ཁྱབ་པ་འཇལ་བའི་ཚད་མ་དེས། བདེན་པར་ཡོད་ན་བདེན་པའི་གཅིག་དང་དེའི་དུ་མ་གང་རུང་གིས་མ་ཁྱབ་པར་འཛིན་པའི་སྒྲོ་འདོགས་གཅོད་པར་ཐལ། ཡོད་པ་ཡང་ཡིན། གཅིག་དང་དུ་མ་གང་རུང་མ་ཡིན་པ་ཡང་ཡིན་པའི་གཞི་མཐུན་པ་འགོག་བྱེད་ཀྱི་ཚད་མ་དེས། བདེན་པར་ཡོད་པ་ཡང་ཡིན། བདེན་པའི་གཅིག་དང་དེའི་དུ་མ་གང་རུང་མ་ཡིན་པ་ཡང་ཡིན་པའི་གཞི་མཐུན་པར་འཛིན་པའི་སྒྲོ་འདོགས་གཅོད་པའི་ཕྱིར། དེར་ཐལ། གཟུགས་བརྙན་གྱི་སྟེང་དུ་ཡོད་པ་ཡང་ཡིན། གཅིག་དང་དུ་མ་གང་རུང་མ་ཡིན་པ་
ཡང་ཡིན་པའི་གཞི་མཐུན་པ་འགོག་བྱེད་ཀྱི་ཚད་མ་དེས་གཟུགས་བརྙན་གྱི་སྟེང་དུ་བདེན་པར་ཡོད་པ་ཡང་ཡིན། བདེན་པར་གྲུབ་པའི་གཅིག་དང་དེའི་དུ་མ་གང་རུང་མ་ཡིན་པ་ཡང་ཡིན་པའི་གཞི་མཐུན་པར་བརྗོད་པ་ལ་སྒྲོ་འདོགས་གཅོད་པའི་ཕྱིར། མ་གྲུབ་ན། རྣམ་བཤད་སྙིང་པོ་རྒྱན་ལས། གཞི་གཟུགས་བརྙན་གྱི་སྟེང་དུ་གཅིག་དུ་མ་ཕན་ཚུན་སྤངས་འགལ་གྱི་དངོས་འགལ་དུ་ངེས་པའི་ཚད་མ་དེས། གཅིག་དང་དུ་མའི་ཕུང་གསུམ་མི་སྲིད་པར་རྟོགས་པ་ན་གཞི་གཟུགས་བརྙན་གྱི་སྟེང་དུ་བདེན་གྲུབ་ཀྱི་གཅིག་དང་དུ་མའི་ཕུང་གསུམ་མི་སྲིད་པར་རྟོགས་པས་ངེས་པ་ཡིན་ནོ། །ཞེས་གསུངས་པའི་ཕྱིར། ཞེ་ན་སྐྱོན་མེད་དེ། དེའི་དོནགཞི་གཟུགས་བརྙན་གྱི་སྟེང་དུ་གཅིག་དང་དུ་མ་ཕན་ཚུན་སྤངས་འགལ་གྱི་དངོས་འགལ་དུ་ངེས་པའི་ཚད་མ་དེའི་བྱེད་པ་ལ་བསྟེན་ནས་དེའི་སྟེང་དུ་བདེན་གྲུབ་ཀྱི་གཅིག་དང་དེའི་དུ་མའི་ཕུང་གསུམ་མི་སྲིད་པར་རྟོགས་ནུས་ཞེས་པའི་དོན་ཡིན་ནོ། །ཁ་ཅིག །དབུ་མ་རྒྱན་ལས། ཡང་དག་ཤེས་འཚོལ་སྔོན་བཏང་ནས། དོན་དམ་རྣམ་པར་ངེས་གྱུར་པ། ཞེས་སོགས་ཀྱི་དོན་ལ་རིགས་པ་ལྟར་སྣང་གིས་རྣམ་བཤད་དུ་ཐེག་ཆེན་གྱི་ཚོགས་ལམ་གྱི་སྐབས་སུ་སྟོང་ཉིད་སྔར་མ་རྟོགས་པ་གསར་དུ་རྟོགས་དགོས་ཀྱི་རྒྱན་གྱི་གདུལ་བྱ་དབང་རྣོན་བཤད་པ་མི་རིགས་པར་སྨྲ་བ་མི་འཐད་དེ། དེ་ཡོད་པའི་ཕྱིར། དེར་ཐལ། ལམ་དུ་མ་ཞུགས་པའི་རྒྱན་གྱི་གདུལ་བྱ་དབང་རྣོན་དེ་དེ་ལྟར་རྟོགས་དགོས་ཡིན་པའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། དེ་ཐེག་ཆེན་གྱི་ཚོགས་ལམ་གྱི་གནས་སྐབས་སུ་སྟོང་ཉིད་སྔར་མ་རྟོགས་པ་
གསར་དུ་རྟོགས་པའི་ཡེ་ཤེས་གསར་དུ་རྒྱུད་ལ་སྐྱེ་དགོས་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཁྱོད་ཐེག་ཆེན་གྱི་ཚོགས་ལམ་རྒྱུད་ལ་སྐྱེ་དགོས་གང་ཞིག །དེའི་གནས་སྐབས་ཀྱི་སྟོང་ཉིད་སྔར་མ་རྟོགས་པ་གསར་དུ་རྟོགས་པའི་ཐེག་ཆེན་གྱི་ཡེ་ཤེས་དེ། ཐེག་ཆེན་གྱི་ཚོགས་ལམ་ཡིན་པའི་ཕྱིར། ཕྱི་མ་དེར་ཐལ། དེ་ཡོད་པའི་ཕྱིར། དེར་ཐལ། དེའི་སྐབས་སུ་སྟོང་ཉིད་ལ་ཚད་མར་སོང་བའི་ཐེག་ཆེན་གྱི་ཚོགས་ལམ་གསར་དུ་སྐྱེ་བ་ཡོད་པའི་ཕྱིར། ཡང་ཁ་ཅིག །སྐབས་འདིར་རྒྱན་གྱི་གདུལ་བྱ་དབང་རྣོན་ཡུམ་ལ་དང་བ་སྐྱེ་ཚུལ་བསྟན་གྱི། དེའི་རྒྱུ་མཚན་མ་བསྟན་ཟེར་བ་ཡང་མི་འཐད་དེ། རྒྱུ་མཚན་མེད་ནས་མ་བསྟན་པ་དང་། ཡོད་ནས་མ་བསྟན་པ་གཉིས་ཀ་མི་འཐད་པའི་ཕྱིར། དེར་ཐལ། རྒྱུ་མེད་རྐྱེན་མེད་དུ་དང་བ་སྐྱེ་བ་མི་འཐད་པས། རྒྱུ་མཚན་ཡོད་ལ། དེ་ཡོད་ན་སྐབས་འདིར་སྟོན་པ་སྐབས་སུ་བབ་པའི་ཕྱིར། གཉིས་པ་རང་ལུགས་ལ། སྟོང་ཉིད་ཀྱི་ལྟ་བ་རྒྱུད་ལ་སྐྱེ་བ་ལ་དགག་བྱ་བདེན་གྲུབ་ཀྱི་དོན་སྤྱི་བློ་ཡུལ་དུ་ཤར་དགོས། དེ་མ་ཤར་ན་དེ་བཀག་པའི་མེད་དགག་བློ་ཡུལ་དུ་འཆར་མི་ནུས་ཏེ། དཔེར་ན་དགག་བྱ་བུམ་པའི་དོན་སྤྱི་བློ་ཡུལ་དུ་མ་ཤར་ན། དེ་བཀག་པའི་བུམ་མེད་བློ་ཡུལ་དུ་འཆར་མི་ནུས་པ་ལྟ་བུ་སྟེ། སྤྱོད་འཇུག་ལས། བཏགས་པའི་དངོས་ལ་མ་རེག་པར། དེ་ཡི་དངོས་མེད་འཛིན་མ་ཡིན། །ཞེས་གསུངས་པའི་ཕྱིར། རྟགས་འགོད་པ་ནི། གཞི་ལམ་རྣམ་གསུམ་ཆོས་ཅན། བདེན་པར་མེད་དེ། བདེན་པར་གྲུབ་པའི་གཅིག་དང་། བདེན་པར་གྲུབ་པའི་དུ་མ་གང་རུང་དུ་མེད་པའི་ཕྱིར། དཔེར་ན་གཟུགས་བརྙན་བཞིན། ཚུལ་སྒྲུབ་པ་ལ་གཉིས་ཡོད་པའི་ཕྱོགས་
ཆོས་སྒྲུབ་པ་ལ་ཡང་གཉིས་ལས། བདེན་གྲུབ་ཀྱི་གཅིག་བྲལ་དུ་སྒྲུབ་པ་ནི། གཞི་ལམ་རྣམ་གསུམ་ཆོས་ཅན། བདེན་གྲུབ་ཀྱི་གཅིག་ཏུ་མེད་དེ། ཆ་བཅས་ཡིན་པའི་ཕྱིར། ཁྱབ་སྟེ། བདེན་གྲུབ་ཀྱི་གཅིག་ཡིན་ན། རང་གི་ཆ་ཤས་ལ་ལྟོས་མེད་ཀྱི་གཅིག་ཡིན་དགོས། དེ་ཡིན་ན་ཆ་བཅས་མ་ཡིན་དགོས་པའི་ཕྱིར། དེ་ཆོས་ཅན། ཆ་བཅས་ཡིན་ཏེ། ཡོད་པ་གང་ཞིག །ཆ་བཅས་ཆ་མེད་དངོས་འགལ་ཡིན། ཆ་མེད་ཤེས་བྱ་ལ་མི་སྲིད་པའི་ཕྱིར། བདེན་གྲུབ་ཀྱི་དུ་བྲལ་དུ་སྒྲུབ་པ་ནི། དེ་ཆོས་ཅན། བདེན་གྲུབ་ཀྱི་དུ་མར་མེད་དེ། བདེན་གྲུབ་ཀྱི་གཅིག་མེད་པའི་ཕྱིར། བདེན་གྲུབ་ཀྱི་གཅིག་དང་བདེན་གྲུབ་ཀྱི་དུ་མ་གང་རུང་དུ་མེད་ན་བདེན་པར་མེད་པས་ཁྱབ་སྟེ། བདེན་པར་ཡོད་ན་དེ་གང་རུང་དུ་ཡོད་དགོས་པའི་ཕྱིར་ཏེ། ཡོད་ན་གཅིག་དང་དུ་མ་གང་རུང་དུ་ཡོད་དགོས་པའི་ཕྱིར། བློ་གནོད་མེད་ལ་སྣང་བའི་དབང་གིས་བཞག་པ་མ་ཡིན་པར་ཡུལ་རང་གི་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་གྲུབ་པ་དེ་གཞི་ལམ་རྣམ་གསུམ་བདེན་མེད་དུ་སྒྲུབ་པའི་རྟགས་ཀྱི་དགག་བྱའི་ཆོས་ཡིན་ཏེ། དབུ་མ་སྣང་བ་ལས། དངོས་རྣམས་སྐྱེ་བ་ཀུན་རྫོབ་ཏུ། །དམ་པའི་དོན་དུ་རང་བཞིན་མེད། །རང་བཞིན་མེད་ལ་འཁྲུལ་པ་གང་། །དེ་ནི་ཡང་དག་ཀུན་རྫོབ་པ་འདོད། །ཅེས་པའི་ཁུངས་གསལ་བར་ཡོད་པའི་ཕྱིར། གསུམ་པ་རྩོད་པ་སྤོང་བ་ལ། ཁ་ཅིག །ལམ་མ་ཞུགས་ཀྱི་རྒྱན་གྱི་གདུལ་བྱ་དབང་རྣོན་ཆོས་ཅན། ཐེག་ཆེན་གྱི་ཚོགས་ལམ་གྱི་སྔ་རོལ་ཏུ་སྟོང་ཉིད་རྟོགས་པ་མ་ཡིན་པར་ཐལ། ཐེག་ཆེན་གྱི་ཚོགས་ལམ་གྱི་གནས་སྐབས་སུ་སྟོང་ཉིད་སྔར་མ་རྟོགས་པ་གསར་དུ་རྟོགས་དགོས་པའི་གང་ཟག་ཡིན་པའི་ཕྱིར་ན་
མ་ཁྱབ། འོ་ན། དེ་ཆོས་ཅན། ཐེག་ཆེན་གྱི་ཚོགས་ལམ་གྱི་སྔ་རོལ་ཏུ་ཡོན་ཏན་མ་ཐོབ་པར་ཐལ། ཐེག་ཆེན་གྱི་ཚོགས་ལམ་གྱི་གནས་སྐབས་སུ་ཡོན་ཏན་གསར་དུ་འཐོབ་དགོས་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། དེས་ཐེག་ཆེན་གྱི་ཚོགས་ལམ་གྱི་གནས་སྐབས་སུ་སྔར་སྟོང་ཉིད་རྟོགས་མ་མྱོང་བའི་ཕྱིར། ཁ་ཅིག །བདེན་པའི་གཅིག་དང་བདེན་པའི་དུ་མ་གང་རུང་དུ་མ་གྲུབ་པའི་རྟགས་ཀྱིས་གཞི་ལམ་རྣམ་གསུམ་བདེན་མེད་དུ་སྒྲུབ་པའི་ཕྱིར་རྒོལ་ཡང་དག་དེས། དེ་གང་རུང་དང་བྲལ་བ་བདེན་སྟོང་དང་། མེ་ལོང་ནང་གི་བྱད་བཞིན་གྱི་གཟུགས་བརྙན་བདེན་སྟོང་དུ་རྟོགས་ཏེ། རྟེན་འབྲེལ་ཡིན་ན་བདེན་མེད་ཡིན་པས་ཁྱབ། དཔེར་ན་མེ་ལོང་ནང་གི་བྱད་བཞིན་གྱི་གཟུགས་བརྙན་བཞིན། མྱུ་གུ་ཡང་རྟེན་འབྲེལ་ཡིན་ནོ། །ཞེས་པའི་སྒྲུབ་ངག་ཡང་དག་འགོད་པ་སྐབས་སུ་བབ་པའི་ཕྱིར་རྒོལ་དེས་རྟེན་འབྲེལ་དང་གཟུགས་བརྙན་བདེན་མེད་དུ་རྟོགས་པའི་ཕྱིར། དེར་ཐལ། དེས་རྟེན་འབྲེལ་ཡིན་ན་བདེན་མེད་ཡིན་པས་ཁྱབ་པ་གཟུགས་བརྙན་གྱི་སྟེང་དུ་རྟོགས་པའི་ཕྱིར་ན་མ་ཁྱབ། འོ་ན། དེ་འདྲའི་སྒྲུབ་ངག་ཡང་དག་འགོད་པ་སྐབས་སུ་བབ་པའི་ཕྱིར་རྒོལ་ཡང་དག་གི་ངོར། མྱུ་གུ་བདེན་མེད་དུ་སྒྲུབ་པར་བྱེད་པའི་རྟགས་ཡང་དག་འགོད་མི་དགོས་པར་ཐལ། དེ་རྟེན་འབྲེལ་དང་གཟུགས་བརྙན་བདེན་མེད་དུ་ཚད་མས་གྲུབ་ཟིན་པའི་གང་ཟག་ཡིན་པའི་ཕྱིར། ཁྱབ་སྟེ། ཆོས་གཅིག་བདེན་མེད་དུ་ཚད་མས་གྲུབ་ན། དེའི་ཕྱོགས་ཁྱབ་དྲན་པར་བྱས་པ་ལ་བརྟེན་ནས་ཆོས་གཞན་བདེན་མེད་དུ་རྟོགས་ནུས་པས་ཁྱབ་པའི་ཕྱིར་ཏེ། འཕགས་པ་ལྷས། གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་དངོས་ཀུན་དེ་བཞིན་ཉིད་དུ་མཐོང་། །ཞེས་གསུངས་པའི་ཕྱིར།
གཉིས་པ་དེ་ལས་དོན་གཉེར་གྱི་འདུན་པ་སྐྱེ་ཚུལ་ནི། ཤེས་བྱ་ཆོས་ཅན། རྒྱན་གྱི་གདུལ་བྱ་ཡུམ་ལ་དང་བ་སྐྱེས་པ་ལ་དགོས་པ་ཡོད་དེ། །ཡུམ་དེ་ལ་རབ་ཏུ་དང་བས་ཀྱང་དེའི་ཡོན་ཏན་འཕགས་བཞིའི་བཞེད་དོན་སྒྲུབ་པ་སོགས་མངོན་པར་འདོད་པའི་གང་ཟག་རྒྱན་གྱི་གདུལ་བྱ་དབང་པོ་རྣོ་རྟུལ་གཉིས་ཀ་ཡང་། ཤེར་ཕྱིན་དེ་དང་དེ་བརྗོད་བྱར་ཡོད་པ་ལ་བརྟེན་པའི་གསུང་རབ་ཡུམ་གསུམ་རྣམས་ལ་ཤིན་ཏུ་གུས་པར་བྱེད་ཅིང་། དོན་གཉེར་གྱི་འདུན་པ་སྐྱེ་བའི་ཕྱིར། དེའི་གདུལ་བྱ་དབང་རྣོན་ཆོས་ཅན། དགོས་པ་གང་གི་དོན་དུ་དེ་སྐྱེ་བ་ཡོད་དེ། བརྗོད་བྱ་ཡོངས་སུ་རྫོགས་པ་དང་བཅས་པ་ལ་རྣམ་པ་ཐམས་ཅད་དུ་ཚིག་བཟུང་བ་ལ་སོགས་པའི་ཐོས་བསམ་སྒོམ་གསུམ་གྱི་ཤེས་རབ་སྐྱེ་བའི་དོན་དུ་ཡིན་པའི་ཕྱིར། གསུམ་པ་དེ་ལ་ཞུགས་ནས་འབྲས་བུ་འཐོབ་ཚུལ་ནི། དེའི་ཆེད་དུ་བྱ་བའི་གདུལ་བྱ་ཆོས་ཅན། ཡུམ་ལ་དོན་གཉེར་གྱི་འདུན་པ་སྐྱེས་པ་ལ་དགོས་པ་ཡོད་དེ། དེ་སྐྱེས་པ་དེ་ནས་ཏེ། དེ་ལ་བརྟེན་ནས་ལེགས་པའི་མཆོག་བླ་མེད་བྱང་ཆུབ་ཐོབ་པར་འགྱུར་བའི་ཕྱིར། ཤེས་བྱ་ཆོས་ཅན། དོན་གཉེར་སྐྱེས་མ་ཐག་པ་དེར་ཐོབ་པ་མ་ཡིན་ཏེ། ཐོས་པ་ལས་བྱུང་བ་ལ་སོགས་པའི་ཤེས་རབ་གསུམ་སྐྱེ་བའི་རིམ་གྱིས་ཐོབ་དགོས་པའི་ཕྱིར། གཉིས་པ་དོན་བསྡུ་ནི། བཅོམ་ལྡན་འདས་མ་མཁྱེན་གསུམ་ལ་རབ་ཏུ་དང་བའི་དད་པ་ནི་ཆོས་ཅན། ལེགས་པ་ཐམས་ཅད་འཐོབ་པའི་རྒྱུའི་གཙོ་བོ་ཡིན་ཏེ། དེ་ལྟར་གོང་དུ་རྒྱུ་འབྲས་ངེས་བྱེད་ཀྱི་ཚད་མའི་སྒོ་ནས་བསྟན་ཟིན་པ་དེའི་ཕྱིར། གསུམ་པ་རྩོད་པ་སྤོང་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན། ཡུམ་དེ་ལ་མཁྱེན་གསུམ་གྱི་ཡོན་
ཏན་བརྗོད་པའི་སྒོ་ནས་བསྟོད་པའི་རྒྱུ་མཚན་ཡོད་དེ། རྗེ་བཙུན་གྱིས་དོན་བརྒྱད་ཀ་ལ་བསྟོད་བཞེད་པ་ནི་གང་ཞིག །ཐམས་ཅད་མཁྱེན་པ་ཉིད་གསུམ་གྱིས་ནི། དོན་མངོན་རྟོགས་བརྒྱད་ཉམས་ལེན་གྱི་ཚུལ་གྱིས་བསྡུས་ལ། བསྡུས་པ་དེ་ལྟར་ཐུགས་ལ་བཞག་ནས་ཐམས་ཅད་མཁྱེན་པ་ཉིད་གསུམ་གྱི་ཡོན་ཏན་གྱི་སྒོ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྟོད་པའི་ཕྱིར། ཤེས་བྱ་ཆོས་ཅན། དེ་ལྟར་བསྟོད་པ་ལ་དགོས་པ་ཡོད་དེ། ཡུམ་མཁྱེན་པ་གསུམ་གྱིས་བསྡུས་པའི་དོན་བརྒྱད་པོ་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ཞིང་། མཁྱེན་གསུམ་དེས་ཀྱང་འཆད་པར་འགྱུར་བའི་ཚུལ་གྱིས་འཕགས་བཞིའི་བཞེད་དོན་ཐམས་ཅད་ཕུན་སུམ་ཚོགས་པར་སྒྲུབ་ནུས་པ་ཡིན་ནོ། །ཞེས་ཤེས་པར་འགྱུར་བའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། རོང་ཊཱིཀ་པ་ན་རེ། འཕགས་བཞིའི་མངོན་རྟོགས་ལ་མཁྱེན་གསུམ་དུ་བཞག་པ་ནི། མཁྱེན་གསུམ་གྱིས་རང་ཡིན་པའི་ཚུལ་གྱིས་བསྡུས་ལ། ཆོས་སྐུ་རྣམ་མཁྱེན་གྱིས་བསྡུས་པ་དེ་མཁྱེན་གསུམ་གྱིས་མངོན་པར་རྟོགས་པ་བརྒྱད་བསྡུས་པའི་དོན་ཡིན་ཟེར་བ་མི་འཐད་དེ། དེ་ལྟར་ན་མཁྱེན་གསུམ་གྱིས་མངོན་པར་རྟོགས་པ་བརྒྱད་བསྡུས་པ་དེ། མཁྱེན་གསུམ་གྱིས་མངོན་པར་རྟོགས་པ་བརྒྱད་བསྡུས་པའི་དོན་དུ་མི་འཐད་པར་ཐལ། དམ་བཅའ་འཐད་པའི་ཕྱིར། ཁ་ཅིག །མངོན་པར་རྟོགས་བརྒྱད་པོ་གང་རུང་ཡིན་ན་མཁྱེན་གསུམ་གང་རུང་ཡིན་པས་ཁྱབ་པ་དེ་མཁྱེན་གསུམ་གྱིས་མངོན་པར་རྟོགས་པ་བརྒྱད་བསྡུས་པའི་དོན་ཡིན་ཟེར་ན། ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་བྱང་སེམས་ཚོགས་ལམ་པའི་རྒྱུད་ཀྱི་སྙིང་
རྗེ་ཆེན་པོ་ཆོས་ཅན། དེར་ཐལ། དེའི་ཕྱིར། རྣམ་རྫོགས་སྦྱོར་བ་ཡིན་པའི་ཕྱིར། དེར་ཐལ། བྱང་སེམས་ཀྱི་མཁྱེན་པ་ཡིན་པའི་ཕྱིར། རྩ་བར་འདོད་ན། མ་ཡིན་ཏེ། གཞི་ལམ་རྣམ་མཁྱེན་གསུམ་པོ་རེ་རེ་ནས་མ་ཡིན་པའི་ཕྱིར། དང་པོ་དེར་ཐལ། ཐེག་དམན་གྱི་རྟོགས་རིགས་སུ་མི་གནས་པའི་ཕྱིར། གཉིས་པ་དེར་ཐལ། ལམ་ཤེས་ཐོབ་པ་ལ་ཐེག་ཆེན་གྱི་སྦྱོར་ལམ་དྲོད་སོགས་བཞི་ཐོབ་པ་སྔོན་དུ་འགྲོ་དགོས་པའི་ཕྱིར། གསུམ་པ་སྒྲུབ་མི་དགོས་སོ། །ཁ་ཅིག །མཁྱེན་གསུམ་མཚོན་བྱེད་ཀྱི་ཆོས་སུམ་ཅུས་མངོན་པར་རྟོགས་པ་བརྒྱད་བསྡུས་པ་དེ། མཁྱེན་གསུམ་གྱིས་མངོན་པར་རྟོགས་པ་བརྒྱད་བསྡུས་པའི་དོན་ཡིན་ཟེར་ན། མི་འཐད་དེ། དེ་སུམ་ཅུ་སྡུད་བྱེད་ཀྱི་མཁྱེན་གསུམ་མ་ཡིན་པའི་ཕྱིར། ཁ་ཅིག །མཁྱེན་གསུམ་གྱིས་མངོན་པར་རྟོགས་པ་བརྒྱད་བསྡུས་པ་མི་འཐད་པར་ཐལ། མཁྱེན་གསུམ་རྣམ་མཁྱེན་ཡིན་པའི་ཕྱིར། དེར་ཐལ། མཁྱེན་གསུམ་ཡིན་པ་ཡོད། དེ་ཡིན་ན་རྣམ་མཁྱེན་ཡིན་དགོས་པའི་ཕྱིར་ན་མ་ཁྱབ། དང་པོ་དེར་ཐལ། སངས་འཕགས་ཀྱི་རྒྱུད་ཀྱི་གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་དེ་མཁྱེན་གསུམ་ཡིན་པའི་ཕྱིར། ཟེར་ན། མཁྱེན་གསུམ་གཞི་ཤེས་ཡིན་པར་ཐལ། མཁྱེན་གསུམ་ཡིན་པ་ཡོད། མཁྱེན་གསུམ་ཡིན་ན། གཞི་ཤེས་ཡིན་དགོས་པའི་ཕྱིར། ཁྱབ་པ་ཁས། འདོད་ན། མཁྱེན་གསུམ་གྱི་རྣམ་པ་བསྒོམ་བྱའི་གཙོ་བོར་བྱེད་པའི་གང་ཟག་ཡིན་ན། གཞི་ཤེས་ཀྱི་རྣམ་པ་བསྒོམ་བྱའི་གཙོ་བོར་བྱེད་པའི་གང་ཟག་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། བྱང་སེམས་ཚོགས་ལམ་པ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་
ཡོད་པའི་ཕྱིར། རྩ་བར་འདོད་ན་གང་ཟག་གི་བདག་མེད་བསྒོམ་བྱའི་གཙོ་བོར་བྱེད་པའི་གང་ཟག་ཡིན་པར་ཐལ་ལོ། །ཁ་ཅིག །རྗེ་བཙུན་གྱིས་མཁྱེན་གསུམ་གྱི་སྒོ་ནས་ཡུམ་ལ་བསྟོད་པར་རྒྱུ་མཚན་དང་དགོས་པ་གཉིས་ཡོད་དེ། མཁྱེན་གསུམ་གྱིས་དོན་བརྒྱད་བསྡུས་པའི་རྒྱུ་མཚན་དང་། དོན་མངོན་པར་རྟོགས་བརྒྱད་པོ་གང་རུང་ཡིན་ན་མཁྱེན་གསུམ་གང་རུང་ཡིན་པས་ཁྱབ་པ་དེ་ཡིན་ཟེར་ན། མི་འཐད་དེ། དེ་གསུམ་གང་རུང་ཡིན་ན་འཕགས་རྒྱུད་ཀྱི་མཁྱེན་པ་ཡིན་དགོས་པའི་ཕྱིར། ཁྱབ་སྟེ། ཐེག་པ་གསུམ་པོ་གང་རུང་གི་མངོན་རྟོགས་དང་སོ་སྐྱེའི་མངོན་རྟོགས་ཀྱི་གཞི་མཐུན་ཡོད་པ་གང་ཞིག །རྣམ་རྫོགས་སྦྱོར་བ་སོགས་སྦྱོར་བ་བཞི་པོ་གང་རུང་དང་སོ་སྐྱེའི་མངོན་རྟོགས་ཀྱི་གཞི་མཐུན་ཡོད་པའི་ཕྱིར། དང་པོ་དེར་ཐལ། ཉན་ཐོས་ཀྱི་ཚོགས་ལམ་དེ་དེ་འདྲའི་གཞི་མཐུན་ཡིན་པའི་ཕྱིར། དེར་ཐལ། དེ་ཐེག་པ་གསུམ་པོ་གང་རུང་གི་མངོན་རྟོགས་གང་ཞིག །སོ་སྐྱེའི་མངོན་རྟོགས་ཡིན་པའི་ཕྱིར། དང་པོ་གྲུབ་སྟེ། ཉན་ཐོས་ཀྱི་མངོན་རྟོགས་ཡིན་པའི་ཕྱིར། ཕྱི་མ་གྲུབ་སྟེ། ཉན་ཐོས་ཚོགས་ལམ་པའི་མངོན་རྟོགས་ཡིན་པའི་ཕྱིར། རྩ་རྟགས་གཉིས་པ་གྲུབ་སྟེ། དམན་ལམ་སྔོན་མ་སོང་གི་བྱང་སེམས་ཀྱི་ཚོགས་ལམ་དེ་སྦྱོར་བཞི་གང་རུང་དང་སོ་སྐྱེའི་མངོན་རྟོགས་ཀྱི་གཞི་མཐུན་ཡིན་པའི་ཕྱིར། དེར་ཐལ། དང་པོ་གང་ཞིག །ཕྱི་མ་ཡིན་པའི་ཕྱིར། དང་པོ་དེར་ཐལ། རྣམ་རྫོགས་སྦྱོར་བ་ཡིན་པའི་ཕྱིར། དེར་ཐལ། བྱང་སེམས་ཀྱི་མཁྱེན་པ་ཡིན་པའི་ཕྱིར། ཁྱབ་སྟེ། བྱང་སེམས་ཀྱི་མཁྱེན་པ། རྣམ་རྫོགས་སྦྱོར་བ། སེམས་དཔའི་ལམ་ཤེས་སྦྱོར་བ། སེམས་དཔའི་རྣམ་མཁྱེན་སྦྱོར་བ། གོ་སྒྲུབ་རྣམས་དོན་གཅིག་པའི་ཕྱིར་རོ། །
གཉིས་པ་རང་ལུགས་ནི། དོན་མངོན་པར་རྟོགས་པ་བརྒྱད་པོ་གང་རུང་ཡིན་ན་མཁྱེན་གསུམ་གང་རུང་གི་བསྒོམ་བྱའི་རྣམ་པ་ཡིན་པས་ཁྱབ། ཚུལ་དེ་ལྟར་དུ་ཉམས་སུ་ལེན་པ་དེ་མཁྱེན་གསུམ་གྱིས་དོན་མངོན་རྟོགས་བརྒྱད་བསྡུས་པའི་དོན་ནོ། །རྩོད་པ་སྤོང་བ་ལ་ཁོ་ན་རེ། དེ་མི་འཐད་པར་ཐལ། དེ་གསུམ་གྱིས་དེ་བརྒྱད་མ་བསྡུས་པའི་ཕྱིར། དེར་ཐལ། འཕགས་རྒྱུད་ཀྱི་མཁྱེན་པས་དེ་བརྒྱད་མ་བསྡུས་པའི་ཕྱིར། དེར་ཐལ། དེས་དེ་བརྒྱད་ཉམས་ལེན་གྱི་ཚུལ་གྱིས་མ་བསྡུས་པའི་ཕྱིར། དེར་ཐལ། རྣམ་རྫོགས་སྦྱོར་བ་ཉམས་སུ་ལེན་པའི་བྱང་སེམས་ཚོགས་ལམ་པ་དེས་དེ་བརྒྱད་ཉམས་སུ་མི་ལེན་པའི་ཕྱིར། དེར་ཐལ། དེ་འདྲའི་བྱང་སེམས་ཀྱི་ཚོགས་ལམ་དེ་དེ་བརྒྱད་ཉམས་སུ་ལེན་པའི་ཉམས་ལེན་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། འཕགས་རྒྱུད་ཀྱི་ཉམས་ལེན་ཡིན་པར་ཐལ། མ་གྲུབ་པ་དེའི་ཕྱིར་ན། མ་ཁྱབ་སྟེ། སངས་རྒྱས་འཕགས་པའི་ཐུགས་རྒྱུད་ཀྱི་རྣམ་མཁྱེན་ཉམས་སུ་ལེན་པའི་ཉམས་ལེན་ཡིན་ན། དེའི་རྒྱུད་ཀྱི་ཉམས་ལེན་ཡིན་པས་མ་ཁྱབ་པའི་ཕྱིར། དེར་ཐལ། དེ་འདྲའི་ཉམས་ལེན་ས་བཅུ་པའི་གནས་སྐབས་ན་ཡོད་པའི་ཕྱིར་དང་། སངས་རྒྱས་འཕགས་པ་རྣམ་མཁྱེན་ཉམས་སུ་ལེན་པ་པོ་མ་ཡིན་པའི་ཕྱིར། ཕྱི་མ་དེར་ཐལ། དེ་རྣམ་མཁྱེན་སྒོམ་པ་པོ་མ་ཡིན་པའི་ཕྱིར། དེ་སྒོམ་པ་མཐར་ཕྱིན་པའི་གང་ཟག་ཡིན་པའི་ཕྱིར་རོ། །
མྱང་འདས་བཤད་པ།
མྱང་འདས་བཤད་པ། བཞི་པ་ཚིག་དོན་བཤད་པ་ལ་གཉིས། ཡོན་ཏན་སོ་སོའི་སྒོ་ནས་བསྟོད་པ་དང་། བསྡུས་ཏེ་ཕྱག་འཚལ་བའོ། །དང་པོ་ལ། གཞི་ཤེས་ཀྱིས་ཉེར་ཞིར་འཁྲིད་པའི་ཡོན་ཏན་དང་ལྡན་པའི་སྒོ་ནས་བསྟོད་པ། ལམ་ཤེས་ཀྱིས་འཇིག་རྟེན་གྱི་དོན་སྒྲུབ་པའི་
སྒོ་ནས་བསྟོད་པ། རྣམ་མཁྱེན་གྱིས་ཆོས་འཁོར་རྫོགས་པར་བསྐོར་བའི་བདག་རྐྱེན་བྱེད་པའི་སྒོ་ནས་བསྟོད་པའོ། །དང་པོ་ནི། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། གང་ཟག་ཉན་ཐོས་དང་། དེར་མ་ཟད་རང་སངས་རྒྱས་ཀྱང་སྟེ། འབྲས་བུ་རང་དོན་དུ་མྱ་ངན་ལས་འདའ་བར་འདོད་པ་རྣམས་ཆོས་ཅན། ཁྱོད་ཀྱིས་སྡུག་བསྔལ་གྱི་ཕུང་པོའི་ལྷག་མ་དང་བཅས་པ་དང་། ཕུང་པོ་ལྷག་མ་མེད་པའི་མཚན་ཉིད་ཀྱི་མྱ་ངན་ལས་འདས་པ་རྣམ་པ་གཉིས་ཐོབ་པར་མཛད་པའི་ཐབས་ཡོད་དེ། གཞི་ཐམས་ཅད་གང་ཟག་གི་བདག་གི་སྐྱེ་བ་མེད་པར་ཡོངས་སུ་ཤེས་པའི་གཞི་ཤེས་གང་ཡིན་པ་ཉིད་ཀྱིས་ཐོབ་པར་མཛད་པའི་ཕྱིར། ཤེས་བྱ་ཆོས་ཅན། རང་རྒྱལ་རྩ་ཚིག་གང་གིས་བསྟན་པ་ཡོད་དེ། ཉན་ཐོས་ཞི་བ་འཚོལ་རྣམས་ཞེས་པའི་གཞི་ཤེས་ཀྱི་ཡོན་ཏན་བརྗོད་པའི་ཚིག་གི་རིམ་པ་གཅིག་གིས་བསྟན་པའི་ཕྱིར། ཤེས་བྱ་ཆོས་ཅན། བསྟན་ཚུལ་ཡོད་དེ། དེའི་རྣམས་ཞེས་པའི་རྣམས་སྒྲའི་མང་ཚིག་གིས་རང་རྒྱལ་དེ་ཉན་ཐོས་དང་དེའི་ཕྱོགས་སུ་བསླན་པ་སྟེ་ཤུགས་ལ་བསྟན་པའི་ཕྱིར། ཤེས་བྱ་ཆོན་ཅན། དགྲ་བཅོམ་གཉིས་ལ་སྤངས་རྟོགས་ཀྱི་ཁྱད་པར་མེད་པ་མ་ཡིན་ཏེ། རང་རྒྱལ་དགྲ་བཅོམ་དེས་སྒྲ་མེད་ལུས་ཀྱི་རྣམ་འགྱུར་གྱི་སྒོ་ནས་ཆོས་སྟོན་པ་དང་། གཟུགས་ཕྱི་རོལ་དོན་འཛིན་གྱི་རྟོག་པ་སྤངས་པ་དང་། སྲིད་མཐའི་ཚེ་གཞན་གྱི་མན་ངག་ལ་མི་ལྟོས་པ་སོགས་སྐུ་གསུང་ཐུགས་ཀྱི་རྣམ་པར་ཐར་པ་ཅུང་ཟད་ཙམ་ཞིག་གི་སྒོ་ནས་ཅིག་ཤོས་ལས་ལྷག་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །བྱང་འཕགས་ཀྱི་རྒྱུད་ཀྱི་མྱང་འདས་མི་གནས་པའི་མྱང་འདས་ཡིན་ཏེ། སྲིད་ཞིའི་མཐའ་ལ་མི་གནས་པའི་མྱང་
འདས་ཡིན་པའི་ཕྱིར། ཟེར་ན། མི་འཐད་པར་ཐལ། དེ་སྲིད་ཞིའི་མཐའ་ལ་མི་གནས་པའི་ལམ་སྒོམ་སྟོབས་ཀྱིས་ཐོབ་པའི་སྤངས་པ་མཐར་ཐུག་མ་ཡིན་པའི་ཕྱིར་དང་། དེ་ཐེག་ཆེན་གྱི་མྱང་འདས་མ་ཡིན་པའི་ཕྱིར། ཕྱི་མ་དེར་ཐལ། དེ་རྒྱུད་ལྡན་གྱི་བྱང་འཕགས་ཐེག་ཆེན་གྱི་མྱང་འདས་ལ་གནས་པ་མ་ཡིན་པའི་ཕྱིར། དེར་ཐལ། དེས་ཐེག་ཆེན་གྱི་མྱ་ངན་མ་བཅོམ་པའི་ཕྱིར། ཁ་ཅིག །ཉོན་སྒྲིབ་སྤངས་པ་གཞིར་བཅས་ལ་འཁོར་བར་འཆིང་བྱེད་ཀྱི་ཕུང་པོའི་ལྷག་མ་ཡོད་པའི་ཆ་ནས་ལྷག་བཅས་དང་། མེད་པའི་ཆ་ནས་ལྷག་མེད་དུ་འཇོག་ཟེར་ན། ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པའི་རྒྱུད་ལ་འཁོར་བར་འཆིང་བྱེད་ཀྱི་ཕུང་པོའི་ལྷག་མ་ཡོད་པར་ཐལ། དམ་བཅའ་འཐད་པའི་ཕྱིར། འདོད་མི་ནུས་ཏེདེས་འཁོར་བར་འཆིང་བྱེད་ཀྱི་ཉོན་སྒྲིབ་ཟད་པར་སྤངས་པའི་ཕྱིར། ཁ་ཅིག །ཉོན་སྒྲིབ་སྤངས་པ་གཞིར་བཅས་ལ། སྔ་མའི་ལས་ཉོན་གྱིས་འཕངས་པའི་སྡུག་བསྔལ་གྱི་ཕུང་པོ་དང་བཅས་པའི་དམན་པའི་སོ་སོར་བརྟགས་འགོག་དེ། དམན་པའི་ལྷག་བཅས་མྱང་འདས་ཀྱི་མཚན་ཉིད་ཟེར་ན། མི་འཐད་པར་ཐལ། དམན་པའི་ལྷག་བཅས་མྱང་འདས་དེ་སྔ་མའི་ལས་ཉོན་གྱིས་འཕངས་པའི་སྡུག་བསྔལ་གྱི་ཕུང་པོ་དང་བཅས་པའི་དམན་པའི་སོ་སོར་བརྟགས་འགོག་མ་ཡིན་པའི་ཕྱིར། དེར་ཐལ། དེ་སྔ་མའི་ལས་ཉོན་གྱིས་འཕངས་པའི་སྡུག་བསྔལ་གྱི་ཕུང་པོ་དང་བཅས་པ་མ་ཡིན་པའི་ཕྱིར། དེ་ཟག་བཅས་མ་ཡིན་པའི་ཕྱིར། དེ་ཟག་མེད་ཡིན་པའི་ཕྱིར། ཁ་ཅིག །ཉོན་སྒྲིབ་ཟད་པར་སྤངས་པ་གཞིར་བཅས་ལ་ཕུང་པོའི་ལྷག་མ་དང་བཅས་ཀྱི་སྒོ་ནས་དེ་གཉིས་འཇོག་
ཟེར་ན། ལྷག་མེད་མྱང་འདས་ལ་གནས་པའི་ཉན་ཐོས་དགྲ་བཅོམ་པའི་རྒྱུད་ལ་ཕུང་པོ་མེད་པར་ཐལ། འདོད་པའི་ཕྱིར། འདོད་མི་ནུས་ཏེ། དེའི་རྒྱུད་ལ་རྣམ་ཤེས་ཀྱི་ཕུང་པོ་ཡོད་པའི་ཕྱིར། དེར་ཐལ། དེའི་རྒྱུད་ལ་གཙོ་སེམས་ཡོད་པའི་ཕྱིར། ཁ་ཅིག །སྐུ་ཚེའི་འདུ་འབྱེད་བཏང་བ་དང་བཏང་བའི་དགྲ་བཅོམ་པའི་རྒྱུད་ཀྱི་མྱང་འདས་གཉིས་པོ་དེ་རིམ་པ་བཞིན་དུ་ཡིན་ཟེར་ན། སྐུ་ཚེའི་འདུ་འབྱེད་བཏང་བའི་དགྲ་བཅོམ་པ་ཡོད་པར་ཐལ། དམ་བཅའ་འཐད་པའི་ཕྱིར། འདོད་ན། སྲོག་དབང་དང་མི་ལྡན་པའི་དགྲ་བཅོམ་པ་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། དགྲ་བཅོམ་པ་ཡིན་ན་སྲོག་དབང་དང་ལྡན་པས་ཁྱབ་པའི་ཕྱིར། ཁ་ཅིག །ཀུན་འབྱུང་སྤངས་པ་གཞིར་བཅས་ལ། སྡུག་བསྔལ་ཟད་པར་མ་སྤངས་པ་དང་། དེ་ཟད་པར་སྤངས་པའི་ཆ་ནས་མྱང་འདས་གཉིས་འཇོག་ཟེར་ན། ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པས་ཀུན་འབྱུང་ཟད་པར་སྤངས་པར་ཐལ། འདོད་པའི་ཕྱིར། འདོད་ན། དེས་ལས་ཀྱི་ཀུན་འབྱུང་སྤངས་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་བརྩེ་བའམ་ལས་ཀྱི་དབང་གིས་འཁོར་བར་གནས་པའི་ཕྱིར། དེར་ཐལ། རྣམ་འགྲེལ་ལས། འདོད་ཆགས་བྲལ་བའི་གནས་པ་ནི། བརྩེ་བའམ་ཡང་ན་ལས་ཀྱིས་ཡིན། །ཞེས་གསུངས་པའི་ཕྱིར། གཉིས་པ་རང་ལུགས་ནི། ཉོན་སྒྲིབ་མ་ལུས་པར་སྤངས་པའི་སོ་སོར་བརྟགས་འགོག །མྱང་འདས་ཀྱི་མཚན་ཉིད། དེ་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན། རང་བཞིན་མྱང་འདས། ལྷག་བཅས་མྱང་འདས། ལྷག་མེད་མྱང་འདས། མི་གནས་པའི་མྱང་འདས་དང་བཞིར་ཡོད། དང་པོ་ནི། ཆོས་ཉིད་བདེན་གྲུབ་ཀྱིས་སྟོང་པའི་སྟོང་ཉིད་ལྟ་བུ། ཉོན་སྒྲོབ་ཟད་པར་སྤངས་
ཤིང་། སྔ་མའི་ལས་ཉོན་གྱིས་འཕངས་པའི་སྡུག་བསྔལ་གྱི་ཕུང་པོའི་ལྷག་མ་དང་བཅས་པའི་དམན་པའི་རྒྱུད་ཀྱི་བྲལ་བ་དེ། དམན་པའི་ལྷག་བཅས་མྱང་འདས་ཀྱི་མཚན་ཉིད། སྡུག་བསྔལ་གྱི་ཕུང་པོའི་ལྷག་མ་དང་བྲལ་བ་ཙམ་ཁ་སྤོས་ནས་དམན་པའི་ལྷག་མེད་མྱང་འདས་ཀྱི་མཚན་ཉིད། སྒྲིབ་གཉིས་མ་ལུས་པར་སྤངས་པའི་སོ་སོར་བརྟགས་འགོག །མི་གནས་པའི་མྱང་འདས་ཀྱི་མཚན་ཉིད། གསུམ་པ་རྩོད་པ་སྤོང་བ་ལ། ཁོ་ན་རེ། དམན་པའི་མྱང་འདས་གཉིས་ཞེས་ཞིབ་ཆ་མི་དགོས་ཏེ། ལྷག་བཅས་མྱང་འདས་དང་ལྷག་མེད་མྱང་འདས་གང་རུང་ཡིན་ན་དམན་པའི་མྱང་འདས་ཡིན་པས་ཁྱབ་པའི་ཕྱིར། ཟེར་ན། ཐེག་ཆེན་གྱི་མྱང་འདས་ཆོས་ཅན། དེར་ཐལ། དེའི་ཕྱིར། དེར་ཐལ། ལྷག་མེད་མྱང་འདས་ཡིན་པའི་ཕྱིར། གཞན་ཡང་། བྱང་སེམས་ཚོགས་ལམ་པའི་རྒྱུད་ཀྱི་ལྷག་བཅས་མྱང་འདས་ཆོས་ཅན། དེར་ཐལ། དེའི་ཕྱིར། དེ་ཡོད་པའི་ཕྱིར། དེར་ཐལ། ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་བྱང་སེམས་ཚོགས་ལམ་པ་ཡོད་པའི་ཕྱིར། བྱས་པ་ལ་ཁོ་ན་རེ། དེ་བྱང་སེམས་ཀྱི་མྱང་འདས་ཡིན་པར་ཐལ། དེ་བྱང་སེམས་ཚོགས་ལམ་པའི་རྒྱུད་ཀྱི་མྱང་འདས་ཡིན་པའི་ཕྱིར། ཟེར་ན། དེ་ཐེག་ཆེན་གྱི་མྱང་འདས་ཡིན་པར་ཐལ། དེ་ཐེག་ཆེན་གང་ཟག་ཀྱི་རྒྱུད་ཀྱི་མྱང་འདས་ཡིན་པའི་ཕྱིར། ཁྱབ་པ་ཁས། ཁ་ཅིག །གཟུགས་སྐུ་གཉིས་ལྷག་བཅས་མྱང་འདས་དང་། ངོ་བོ་ཉིད་སྐུ་ལྷག་མེད་མྱང་འདས་ཡིན་ཏེ། སློབ་དཔོན་ཀླུའི་བཤེས་གཉེན་གྱིས། ཕུང་པོར་བཅས་པ་མྱ་ངན་འདས།
ཐུབ་སྐུ་ཉིད་ལ་བརྗོད་པ་ཡིན། ཕུང་པོ་ཀུན་དང་བྲལ་བའི་ཕྱིར། ཆོས་ཀྱི་སྐུ་ལ་ཕུང་པོ་མེད། །ཅེས་གསུངས་པའི་ཕྱིར་ན། དེ་ནི་སྒྲས་བསྟན་པ་ལ་དགོངས་ཀྱི། འོ་ན། གཟུགས་སྐུ་གཉིས་ཆོས་ཅན། མྱང་འདས་མ་ཡིན་པར་ཐལ། འདུས་བྱས་ཡིན་པའི་ཕྱིར། ཁ་ཅིག །སྲོག་དབང་དང་མི་ལྡན་པའི་དགྲ་བཅོམ་པ་ཡོད་པར་ཐལ། ཤི་བའི་གང་ཟག་ཡོད་པའི་ཕྱིར། དེར་ཐལ། འདས་པའི་གང་ཟག་ཡོད་པའི་ཕྱིར་ན་མ་ཁྱབ། འོ་ན། ཤི་བའི་སངས་རྒྱས་ཡོད་པར་ཐལ། འདས་པའི་སངས་རྒྱས་ཡོད་པའི་ཕྱིར། འདོད་མི་ནུས་ཏེ། སངས་རྒྱས་འཕགས་པས་འཆི་བདག་གི་བདུད་བཅོམ་པའི་ཕྱིར། ཁ་ཅིག །དམན་པའི་མྱང་འདས་ཀྱིས་མྱང་འདས་ཀྱི་གོ་མི་ཆོད་དེ། སངས་རྒྱས་ཐོབ་པར་མྱང་འདས་མི་འཐོབ་པའི་ཕྱིར། དེར་ཐལ། རྒྱུད་བླ་མ་ལས། དེས་ན་སངས་རྒྱས་མ་ཐོབ་པར། །མྱ་ངན་འདས་པ་མི་འཐོབ་སྟེ། །ཞེས་གསུངས་པའི་ཕྱིར་ན། དེ་ནི་མི་གནས་པའི་མྱང་འདས་ལ་དགོངས་པ་ཡིན་ལ། དེ་ལྟར་ན་ཐེག་དམན་དགྲ་བཅོམ་པས་དགྲ་བཅོམ་པའི་གོ་མི་ཆོད་པར་ཐལ། འདོད་པའི་ཕྱིར། འདོད་ན། དགྲ་བཅོམ་པ་བསད་པའི་མཚམས་མེད་ཀྱི་ལས་མེད་པར་ཐལ། དེས་དེའི་གོ་མི་ཆོད་པ་གང་ཞིག །ཐེག་ཆེན་དགྲ་བཅོམ་པ་གསོད་མི་ནུས་པའི་ཕྱིར་རོ། །གཉིས་པ་ནི། རྟེན་གྱི་གང་ཟག་བྱང་ཆུབ་སེམས་དཔའ་འཁོར་བ་ཇི་སྲིད་པར་འགྲོ་བའི་དོན་བྱེད་པ་རྣམས་ཆོས་ཅན། ཁྱོད་ཀྱིས་འབྲས་བུ་འགྲོ་བ་སྟེ། རིགས་ཅན་གསུམ་མཐའ་དག་གི་དོན་སྒྲུབ་པར་མཛད་པའི་ཐབས་ཡོད་དེ། །ལམ་གསུམ་ཐམས་ཅད་བདེན་པའི་སྐྱེ་བ་མེད་པར་རྟོགས་པའི་ལམ་ཤེས་ཀྱི་ངོ་བོ་གང་ཡིན་པ་ཉིད་ཀྱིས་སྒྲུབ་པར་མཛད་པའི་ཕྱིར། །
སྨྲས་པ། མཁས་མང་གཞུང་བརྒྱའི་དགོངས་དོན་ཆུ་གཏེར་ཆེ། རྒྱལ་བ་གཉིས་པའི་ལེགས་བཤད་བཅུ་གཉིས་བདག །འཁྲུལ་མེད་ལུང་དང་རིགས་པའི་རྟ་བདུན་གྱིས། །རྒྱལ་བསྟན་འཆི་མེད་ལམ་དུ་དྲངས་པ་ན། །གཟུར་གནས་བློ་ཡི་སྦྲང་རྩིའི་རྒྱལ་མཚན་ཚལ། །ཅིག་ཅར་རབ་བཞད་ལོག་སྨྲའི་ཨུཏྤལ་དཀར། །ཟུམ་པའི་ངལ་བ་སྟེར་བ་མཉམ་བྱས་ཚེ། །དྲེགས་ལྡན་མེ་ཁྱེར་མི་སྨྲའི་གནས་སུ་ཡིབ། །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །
ཆོས་ཀྱི་འཁོར་ལོ་ཇི་ལྟར་བསྐོར་བའི་ཚུལ་བཤད་པ།
ཆོས་ཀྱི་འཁོར་ལོ་ཇི་ལྟར་བསྐོར་བའི་ཚུལ་བཤད་པ། གསུམ་པ་རྣམ་མཁྱེན་གྱིས་ཆོས་འཁོར་བསྐོར་བའི་བདག་རྐྱེན་བྱེད་པའི་ཡོན་ཏན་དང་ལྡན་ཚུལ་ནི། ཤེས་བྱ་ཆོས་ཅན། ཆོས་འཁོར་བསྐོར་བ་པོའི་གང་ཟག་ཡོད་དེ། སངས་རྒྱས་སྒོ་གསུམ་མི་མཐུན་པ་ལས་ཡང་དག་པར་བསྡམས་པའི་སྐུ་ཅན་ཞི་ལྷག་ཟུང་འབྲེལ་གྱི་རྣལ་འབྱོར་ཅན་ཉན་རང་དག་ལས་གོང་ན་མེད་པའི་དབང་ཕྱུག་ཕུན་ཚོགས་མངའ་ཞིང་། དེ་དག་ལ་བཀས་མངའ་བསྒྱུར་བས་ན་གཙོ་བོ་རྣམས་ཀྱིས་བསྐོར་བའི་ཕྱིར། བཅོམ་ལྡན་འདས་ཆོས་ཅན། ཁྱོད་ཀྱིས་ཐབས་གང་ལ་བརྟེན་ནས་བསྐོར་བ་ཡོད་དེ། ཆོས་རྣམས་ཀྱི་རྒྱུ་འབྲས་ངོ་བོའི་རྣམ་པ་ཐམས་ཅད་སྐྱེ་བ་མེད་པར་ཐུགས་སུ་ཆུད་པའི་རྣམ་མཁྱེན་གང་དང་ལྡན་ན་སྟེ། དེ་ལ་བརྟེན་ནས་བསྐོར་བའི་ཕྱིར། དེ་ཆོས་ཅན། ཁྱོད་ཀྱིས་འབྲས་བུ་ཆོས་འཁོར་གང་བསྐོར་བ་ཡོད་དེ། གདུལ་བྱ་རྣམས་ཀྱི་ཉོན་མོངས་ཀྱི་སྤྱོད་པ་བརྒྱད་ཁྲི་བཞི་སྟོང་གི་གཉེན་པོར་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་རང་བཞིན་གྱི་ཆོས་ཀྱི་འཁོར་ལོ་མ་ལུས་པར་བརྗོད་བྱ་ཐབས་ཀྱི་རྣམ་པ་ཡོངས་སུ་རྫོགས་པའི་རྣམ་པ་ཐམས་ཅད་བསྐོར་བར་མཛད་པའི་ཕྱིར།
གཉིས་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །རང་གི་མི་མཐུན་ཕྱོགས་འཇོམས་ནུས་ཀྱི་ཡོན་ཏན་དེ་ཆོས་འཁོར་གྱི་མཚན་ཉིད་ཟེར་ན། རྣམ་མཁྱེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། རྟོགས་པའི་ཆོས་འཁོར་ཡིན་པའི་ཕྱིར། དེར་ཐལ། ལམ་ཞུགས་ཀྱི་མཁྱེན་པ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཁྱོད་ཀྱི་མི་མཐུན་ཕྱོགས་ཡོད་པར་ཐལ། ཁྱོད་དེ་འཇོམས་ནུས་ཡིན་པའི་ཕྱིར། ཁ་ཅིག །ལུང་རྟོགས་གང་རུང་གིས་བསྡུས་པའི་དམ་ཆོས་དེའི་མཚན་ཉིད་ཟེར་ན། ཉི་ཁྲི་སྣང་བ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། བསྟན་བཅོས་རྣམ་དག་ཡིན་པའི་ཕྱིར། འདོད་ན། དེ་ཆོས་ཅན། ལུང་གི་ཆོས་འཁོར་ཡིན་པར་ཐལ། ཆོས་འཁོར་གང་ཞིག །ཅིག་ཤོས་མ་ཡིན་པའི་ཕྱིར། འདོད་ན། བཀའ་ཡིན་པར་ཐལ་ལོ། །གཞན་ཡང་འཕགས་པ་གྲོལ་སྡེ་དེ་ཆོས་འཁོར་བསྐོར་བ་པོའི་གང་ཟག་ཡིན་པར་ཐལ། ཉི་ཁྲི་སྣང་བ་ལུང་གི་ཆོས་འཁོར་ཡིན་པའི་ཕྱིར། འདོད་ན། དེ་ཆོས་འཁོར་རིམ་པ་གསུམ་དུ་བསྐོར་བ་པོ་ཡིན་པར་ཐལ། འདོད་པའི་ཕྱིར། འདོད་ན། གདུལ་བྱ་རིགས་ཅན་གསུམ་གྱི་ཆེད་དུ་ཆོས་འཁོར་རིམ་པ་གསུམ་བསྐོར་བ་པོ་ཡིན་པར་ཐལ་ལོ། ཁ་ཅིག །བཤད་པས་གདུལ་བྱའི་རྒྱུད་ལ་འཕོ་བྱ་འཕོ་བྱེད་གང་རུང་དུ་གྱུར་པའི་རྣམ་དཀར་གྱི་ཡོན་ཏན། དེའི་མཚན་ཉིད་ཟེར་ན། རྣམ་མཁྱེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ནམདོ་ལས། ཉིད་ཀྱི་རྟོགས་པ་གཞན་ལ་སྤོ་མིན་ཏེ། །ཆོས་ཉིད་བདེན་པ་བསྟན་པས་གྲོལ་བར་འགྱུར། ཞེས་གསུངས་པ་མི་འཐད་པར་ཐལ་ལོ། །རོང་ཊཱིཀ་པ་ན་
རེ། སྟོན་པས་གསུངས་པའི་དམ་ཆོས་གང་ཞིག །རང་གི་མི་མཐུན་ཕྱོགས་གཅོད་པར་བྱེད་པ་དེ་དེའི་མཚན་ཉིད་ཟེར་ན། ལྷག་པ་ཚུལ་ཁྲིམས་ཀྱི་བསླབ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དང་པོ་དེར་ཐལ། སྟོན་པས་གསུངས་པ་གང་ཞིག །དམ་ཆོས་ཡིན་པའི་ཕྱིར། དང་པོ་དེར་ཐལ། སྟོན་པས་དེ་གསུངས་པའི་ཕྱིར། མ་གྲུབ་ན། སྟོན་པས་བརྗོད་བྱ་ལྷག་པ་ཚུལ་ཁྲིམས་ཀྱི་བསླབ་པ་གསུངས་པར་ཐལ། དེས་རྗོད་བྱེད་འདུལ་བའི་སྡེ་སྣོད་གསུངས་པའི་ཕྱིར། རྩ་རྟགས་གཉིས་པ་དེར་ཐལ། དེས་སྒྲིབ་པ་སྤོང་ནུས་པའི་ཕྱིར་ཏེ། དེ་ཉམས་སུ་བླངས་པས་ལེན་པ་པོའི་སྒྲིབ་པ་སྤོང་ནུས་པའི་ཕྱིར། རྩ་བར་འདོད་ན། རྟོགས་པའི་ཆོས་འཁོར་ཡིན་པར་ཐལ། གང་རུང་གང་ཞིག །ཅིག་ཤོས་མ་ཡིན་པའི་ཕྱིར། འདོད་ན། ལམ་ཞུགས་ཀྱི་མཁྱེན་པ་ཡིན་པར་ཐལ། འདོད་པའི་ཕྱིར། འདོད་མི་ནུས་སོ། ཁ་ཅིག །བཀའ་དང་ལམ་ཞུགས་ཀྱི་སྤངས་རྟོགས་གང་རུང་གིས་བསྡུས་པའི་དམ་ཆོས་དེའི་མཚན་ཉིད་ཟེར་ན། འགོག་བདེན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། ལམ་ཞུགས་ཀྱི་སྤངས་པས་བསྡུས་པའི་ཕྱིར། རྩ་བར་འདོད་མི་ནུས་ཏེ། རྟག་པ་ཡིན་པའི་ཕྱིར། ཁ་ཅིག །སྟོན་པས་ཆོས་འཁོར་གསུམ་པོ་རིམ་ཅན་དུ་བསྐོར་ཟེར་ན། མི་འཐད་པར་ཐལ། དེས་དེ་ཅིག་ཅར་དུ་བསྐོར་བའི་ཕྱིར། དེར་ཐལ། བཀའ་དང་པོ་བདེན་བཞིའི་ཆོས་འཁོར་དང་དུས་མཉམ་དུ་གསུངས་པའི་བཀའ་ཐ་མ་ལེགས་པར་ཕྱེ་བའི་ཆོས་འཁོར་ཡོད་པའི་ཕྱིར། མ་གྲུབ་ན། བཀའ་ཐ་མ་ལེགས་པར་རྣམ་པར་ཕྱེ་བའི་ཆོས་འཁོར་ཡིན་ན། དུས་ཐ་མར་གསུངས་པའི་མདོ་
ཡིན་པས་ཁྱབ་པར་ཐལ། མ་གྲུབ་པ་དེའི་ཕྱིར། འདོད་ན། འཁོར་ལོ་གསུམ་སྟོན་པའི་སྐུ་ཚེའི་ཚིགས་ཀྱི་སྒོ་ནས་འཇོག་རིགས་པར་ཐལ། འདོད་པའི་ཕྱིར། འདོད་ན། དྲང་ངེས་རྣམ་འབྱེད་ལས། དགོངས་འགྲེལ་ལས། འཁོར་ལོ་རིམ་པ་གསུམ་གསུངས་པའི་འཁོར་གྱི་འདུ་ཐེབས་དང་། སྟོན་པའི་སྐུ་ཚེའི་ཚིགས་ལ་སོགས་པས་འཇོག་པ་མིན་གྱི། ཞེས་གསུངས་པ་མི་འཐད་པར་ཐལ་ལོ། །གཞན་ཡང་། སྟོན་པས་ཡུལ་ཝཱ་ར་ཎཱ་སིར་གསུངས་པའི་བདེན་བཞིའི་ཆོས་འཁོར་དེ། སྟོན་པས་ཞིང་འདིར་ཆོས་འཁོར་བསྐོར་བའི་ཐོག་མ་ཡིན་པར་ཐལ། དེས་ཆོས་འཁོར་གསུམ་རིམ་ཅན་དུ་བསྐོར་བའི་ཕྱིར། འདོད་ན། དེ་འཚང་རྒྱ་ཚུལ་བསྟན་ནས་ཞག་ཞེ་དགུའི་བར་དུ་ཆོས་འཁོར་མ་བསྐོར་བར་བཤད་པ་དེ་སྒྲ་ཇི་བཞིན་དུ་ཁས་ལེན་རིགས་པར་ཐལ། དེ་ཆོས་འཁོར་བསྐོར་བའི་ཐོག་མ་ཡིན་པའི་ཕྱིར། འདོད་ན། གདུལ་བྱ་ལ་ཆོས་མི་སྟོན་པའི་མཆོག་གི་སྤྲུལ་སྐུ་ཡོད་པར་ཐལ། འདོད་པའི་ཕྱིར། འདོད་མི་ནུས་སོ། །གཞན་ཡང་། དེས་ཆོས་འཁོར་གསུམ་ཅིག་ཅར་དུ་བསྐོར་བར་ཐལ། གསང་བ་བསམ་གྱིས་མི་ཁྱབ་པའི་མདོ་ལས། ཞི་བའི་བློ་གྲོས། གང་གི་ཚེ་བཅོམ་ལྡན་འདས་ཀྱིས་འདི་སྐད་དུ་ཀོའུ་དྱི་ནྱ་ལ་མིག་མི་རྟག་གོ་ཞེས་བཀའ་སྩལ་པ་དེའི་ཚེ་སྡུག་བསྔལ་གྱིས་འདུལ་བ་རྣམས་ཀྱིས་ནི་མིག་སྡུག་བསྔལ་ལོ་ཞེས་ཐོས་སོ། །བདག་མེད་པས་འདུལ་བ་རྣམས་ཀྱིས་ནི་མི་བདག་མེད་དོ་ཞེས་ཐོས་སོ། །སྟོང་པ་ཉིད་ཀྱིས་འདུལ་བ་རྣམས་ཀྱིས་ནི་མིག་སྟོང་པ་ཉིད་དོ་ཞེས་ཐོས་སོ། །ཞི་བས་འདུལ་བ་རྣམས་ཀྱིས་ནི་མིག་ཞི་བའོ་ཞེས་ཐོས་སོ། །དབེན་པས་འདུལ་བ་རྣམས་ཀྱིས་ནི་མིག་དབེན་པའོ་ཞེས་ཐོས་སོ། །མི་རྟག་པས་འདུལ་བ་རྣམས་ཀྱིས་ནི་མིག་མི་རྟག་གོ་ཞེས་
ཐོས་སོ། །ཞེས་གསུངས་པའི་ཕྱིར། ཁ་ཅིག་སྟོན་པས་མཛད་པ་བཅུ་གཉིས་ཀྱི་ཚུལ་ཅིག་ཅར་དུ་བསྟན་པར་ཐལ། དེས་ཆོས་འཁོར་གསུམ་ཅིག་ཅར་དུ་བསྐོར་བའི་ཕྱིར། འདོད་ན། སྟོན་པས་ཁྱིམ་ན་བཞུགས་པའི་མཛད་པ་དང་རབ་ཏུ་བྱུང་བའི་མཛད་པ་གཉིས་ཅིག་ཅར་དུ་མཛད་པར་ཐལ། འདོད་པའི་ཕྱིར། འདོད་ན། ཁྱིམ་པ་དང་རབ་བྱུང་གི་གཞི་མཐུན་ཡོད་པར་ཐལ་ལོ། །ཟེར་ན་མ་ཁྱབ། ཁ་ཅིག །ཆོས་འཁོར་ཅིག་ཅར་དུ་བསྐོར་བའི་དོན་ལ་ཝཱ་ར་ཎཱ་སིར་བཀའ་དང་པོ་བདེན་བཞིའི་ཆོས་འཁོར་གསུངས་པའི་མཛད་པ་དང་། བྱ་རྒོད་ཕུང་པོའི་རིར་ཤེར་ཕྱིན་གྱི་མདོ་གསུངས་པའི་མཛད་པ་ཅིག་ཅར་དུ་བསྟན་པ་ཡིན་ཏེ། སྟོན་པས་སྤྲུལ་པ་མི་འདྲ་བ་དུ་མ་ཅིག་ཅར་དུ་བསྟན་པའི་ཕྱིར་ཟེར་ན། སྟོན་པས་ཆོས་འཁོར་ཐམས་ཅད་ཅིག་ཅར་དུ་བསྐོར་བར་ཐལ། དམ་བཅའ་འཐད་པའི་ཕྱིར། འདོད་ན། འདུལ་བ་ལུང་སྡེ་བཞི་ཅིག་ཅར་དུ་གསུངས་པར་ཐལ། འདོད་པའི་ཕྱིར། འདོད་ན། སྔོན་ཆོག་དང་ད་ཆོག་གཉིས་ཅིག་ཅར་དུ་བཅས་པར་ཐལ་ལོ། །འདོད་མི་ནུས་སོ། །གཉིས་པ་རང་ལུགས་ནི། སངས་རྒྱས་ཀྱི་བཀའ་དང་ལམ་ཞུགས་ཀྱི་མཁྱེན་པ་གང་རུང་གིས་བསྡུས་པའི་རྣམ་དཀར་གྱི་ཡོན་ཏན་དེ་ཆོས་འཁོར་གྱི་མཚན་ཉིད། དེ་ལ་ལུང་རྟོགས་གཉིས་ལས། སངས་རྒྱས་ཀྱི་བཀས་བསྡུས་པའི་རྣམ་དཀར་གྱི་ཡོན་ཏན་སྔ་མའི་མཚན་ཉིད། ལམ་ཞུགས་ཀྱི་མཁྱེན་པས་བསྡུས་པའི་རྣམ་དཀར་གྱི་ཡོན་ཏན་ཕྱི་མའི་མཚན་ཉིད། དང་པོ་ལ། རྒྱས་པར་ཕྱེ་ན་ཆོས་ཕུང་བརྒྱད་ཁྲི་བཞི་སྟོང་། གཉིས་པ་ལ་ལམ་ལྔ་གསུམ་བཅོ་ལྔ་སོགས་ཡོད། ཆོས་ཕུང་གི་ཚད་ནི་གླང་པོ་ཆེ་ས་ལ་རབ་བརྟན་གྱིས་ཇི་ཙམ་ཁུར་བར་འོས་པའི་
སྣ་ཚོགས་ཆོས་ཀྱི་ཕུང་པོ་གཅིག་འབྲི་བར་ནུས་ཏེ། སློབ་དཔོན་ཆོས་ཀྱི་བཤེས་གཉེན་གྱི་ཚིག་གསལ་ལས། ཐེག་པ་བླ་ན་མེད་པའི་དབང་དུ་བྱས་ཏེ་དབང་པོའི་གླང་པོ་ཆེ་རབ་བརྟན་གྱིས་ཇི་ཙམ་ཁུར་བར་འོས་པའི་སྣག་ཚས་ཆོས་ཀྱི་ཕུང་པོ་གཅིག་འབྲི་བར་ནུས་སོ། །ཞེས་གསུངས་པའི་ཕྱིར། དེ་ལྟར་ན་འཛམ་གླིང་འདིར་གསུང་རབ་དེ་ཙམ་མེད་པ་ཅི་ཡིན་སྙམ་ན། ཕལ་ཆེར་ནི་ཀླུ་ཡུལ་ན་བཞུགས་ཏེ། སློབ་སྤྲིངས་ལས། བསྟན་པ་རིན་ཆེན་མཆོག་ལྟར་བཟང་ལ་འཕན་མེད་པ། །རྣམ་པར་དག་ཚུལ་གང་ཡིན་ཀླུས་མགོའི་གདེངས་ཀ་ཅན། །ཆེན་པོ་རྣམས་ཀྱིས་གཙུག་གི་རྒྱན་བཞིན་གུས་མནོས་ནས། །ས་ཡི་གཏིང་ན་གནས་པའི་རབ་རིབ་སེལ་བར་བྱེད། །ཅེས་གསུངས་པའི་ཕྱིར། གསུམ་པ་རྩོད་པ་སྤོང་པ་ལ། ཁོ་ན་རེ། མངོན་རྟོགས་རྒྱན་ཆོས་ཅན། རང་ལུགས་ཀྱི་ཆོས་འཁོར་གྱི་མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། དོན་མངོན་པར་རྟོགས་པ་བརྒྱད་པོ་རྟོགས་པའི་ཆོས་འཁོར་ཡིན་པའི་ཕྱིར་ན་མ་ཁྱབ། ཁ་ཅིག །མངོན་རྟོགས་རྒྱན་ཆོས་ཅན། སྟོན་པས་གསུངས་པའི་དམ་ཆོས་ཡིན་པར་ཐལ། དེས་ལུང་ལས་གསུངས་པའི་དམ་ཆོས་ཡིན་པའི་ཕྱིར་ན་མ་ཁྱབ། དེར་ཐལ། སྟོན་པའི་ལུང་གི་བརྗོད་བྱར་གྱུར་པའི་དམ་ཆོས་ཡིན་པའི་ཕྱིར། ཁ་ཅིག །བསྟན་བཅོས་རྣམ་དག་ཡིན་ན་ལུང་གི་ཆོས་འཁོར་ཡིན་པས་ཁྱབ་པར་ཐལ། རྟོགས་པའི་བསྟན་པ་ཡིན་ན་རྟོགས་པའི་ཆོས་འཁོར་ཡིན་པས་ཁྱབ་པའི་ཕྱིར། ཟེར་ན། ལམ་མ་ཞུགས་ཀྱི་གང་ཟག་གི་རྒྱུད་ཀྱི་བསླབ་པ་གསུམ་ཆོས་ཅན། དེར་ཐལ། དེའི་ཕྱིར། དེར་ཐལ། སྦྱིར་བསླབ་པ་གསུམ་རྟོགས་པའི་བསྟན་པ་
ཡིན་པའི་ཕྱིར། དེར་ཐལ། མདོ་ལས། སྡིག་པ་ཅི་ཡང་མི་བྱ་ཞིང་། །ཞེས་གསུངས་པའི་ཕྱིར། ཁ་ཅིག །འདུལ་བ་མདོ་རྩ་བ་སྟོན་པས་གསུངས་པར་ཐལ། ལྷག་པ་ཚུལ་ཁྲིམས་ཀྱི་བསླབ་པ་སྟོན་པས་གསུངས་པའི་ཕྱིར་ན། འདུལ་བ་མདོ་རྩ་བ་སྟོན་པས་ཞལ་ནས་གསུངས་པར་ཐལ། ལྷག་པ་ཚུལ་ཁྲིམས་ཀྱི་བསླབ་པ་སྟོན་པས་ཞལ་ནས་གསུངས་པའི་ཕྱིར། དེར་ཐལ། རྗོད་བྱེད་འདུལ་བའི་མདོ་ཞལ་ནས་གསུངས་པའི་ཕྱིར། འདོད་ན། མདོ་རྩ་སྟོན་པའི་ཞལ་ནས་གསུངས་པའི་ལུང་ཡིན་པར་ཐལ། འདོད་ན། དེ་སྟོན་པའི་ལུང་ཡིན་པར་ཐལ། འདོད་ན། དེ་སྟོན་པའི་བཀའ་ཡིན་པར་ཐལ། འདོད་མི་ནུས་སོ། །གཉིས་པ་བསྡུས་ཏེ་ཕྱག་འཚལ་བ་ནི། རྗེ་བཙུན་ཆོས་ཅན། ཁྱོད་ཀྱིས་རྒྱན་རྩོམ་པའི་ཐོག་མར་ཡུམ་ལ་ཕྱག་འཚལ་བ་ཡིན་ཏེ། དེའི་ཐོག་མར་སངས་རྒྱས་ཉན་ཐོས་དང་བྱང་ཆུབ་སེམས་དཔའ་ལ་སོགས་པས་ཡོངས་སུ་བསྐོར་བའི་བཞེད་དོན་དེ་སྒྲུབ་པར་བྱེད་པ་ཉིད་ཀྱི་ཡུམ་དེ་ལ་འདུད་པའི་ཕྱིར།
འདིར་བསྟན་ཡང་དག་མཐའ་བཤད་པ།
འདིར་བསྟན་ཡང་དག་མཐའ་བཤད་པ། གཉིས་པ་རྒྱས་པ་ལ་དད་པའི་གང་ཟག་ལ་ཕྱེ་སྟེ་བཤད་པ་ལ། བསྟན་བཅོས་ཀྱི་དགོས་པའི་དོན་དང་། བསྡུས་པའི་དོན་དང་། ཚིག་གི་དོན། དང་པོ་ལ། བསྟན་བཅོས་བརྩམས་པ་ལ་དགོས་མེད་དྭོགས་པ་སོ་སོར་སྤངས་ནས་བརྗོད་བྱ་མཁྱེན་གསུམ་སྤྱིའི་རྣམ་གཞག་བཤད་པ། མདོ་དང་ཟློས་པའི་སྐྱོན་སྤངས་ནས་དགོས་པ་ཡོད་པར་སྒྲུབ་པའོ། །དང་པོ་ལ། རྩོད་པ་དང་ལན་གཉིས། དང་པོ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། ཁོ་ན་རེ། དེས་ན་དེ་ལྟར་ཡུམ་ལ་ཕྱག་འཚལ་བ་དང་བསྟོད་པ་སྔོན་དུ་འགྲོ་བའི་བསྟན་བཅོས་མངོན་རྟོགས་རྒྱན་རྩོམ་ན། ཆོས་རབ་ཏུ་རྣམ་འབྱེད་ཀྱི་ཤེས་རབ་
སྐྱེད་པའི་ཕྱིར་དུ་གཞི་དང་། མི་མཐུན་ཕྱོགས་སེལ་བའི་ཕྱིར་དུ་གཉེན་པོ་དང་། ཤེས་བྱ་མ་ལུས་པ་ཤེས་པའི་ཕྱིར་དུ་རྣམ་པ་ཅི་ཞིག་བརྗོད་བྱར་བསྡུས་པ་རྣམས་ལས། གང་ཡང་རུང་བ་ཞིག་བསྡུས་པ་མཛད་བརྟག་ན་ཞེས་དྲིས་པ་ལ། ཤེས་བྱ་ཆོས་ཅན། ཕྱོགས་དང་པོ་ལྟར་ན་ནི་བསྟན་བཅོས་བརྩམས་པའི་འབད་པ་དོན་མེད་པ་ཡིན་ཏེ། ཆོས་མངོན་པ་དང་ཟློས་པའི་སྐྱོན་འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་རྟོགས་རྒྱན་འདི་ལས་ནི། ཆོས་རྣམས་ཀྱི་རང་སྤྱིའི་མཚན་ཉིད་གཏན་ལ་འབེབས་པའི་མཚན་ཉིད་ཀྱི་བསྟན་བཅོས་དག་ལས་སྨོས་པའི་གཞི་གང་ཡིན་པ་དེ་འབྱུང་བ་ནི་མེད་པའི་ཕྱིར། ཤེས་བྱ་ཆོས་ཅན། བསྟན་བཅོས་འདི་ལ་བརྟེན་ནས། གཉེན་པོ་འདི་སྤང་བྱ་གང་གི་གཉེན་པོ་ཡིན་པར་ཁོང་དུ་ཆུད་པར་མི་འགྱུར་བར་ཐལ། བསྟན་བཅོས་འདིས་སྤང་བྱ་ཀུན་ནས་ཉོན་མོངས་པའི་དངོས་པོ་བརྗོད་བྱར་མ་བསྡུས་པའི་ཕྱིར། དེར་ཐལ། གཉེན་པོ་རྣམ་པར་བྱང་བའི་དངོས་པོ་ཙམ་ཞིག་བརྗོད་བྱར་བསྡུས་པའི་ཕྱིར། འོ་ན། བསྟན་བཅོས་འདིས་དོན་གཉེར་གྱི་སྐྱེས་བུ་ལ་ཉེར་མཁོ་ཅུང་ཟད་ཀྱང་མ་བསྟན་པར་ཐལ། འདིས་རྣམ་པ་གཞི་མེད་ཙམ་ཞིག་བརྗོད་བྱར་བསྡུས་པའི་ཕྱིར། ཁྱབ་པ་ཡོད་དེ། ཕུང་སོགས་ཀྱི་ཚོགས་པའི་གཞི་དང་འབྲེལ་བའི་དོན་བསྟན་བཅོས་འདི་ལ་བརྟེན་ནས་རྟོགས་པ་མེད་པའི་ཕྱིར། འདི་བརྩམས་པ་ལ་དོན་མེད་པར་ཐལ། དོན་གཉེན་ཅན་ལ་དོན་ཅུང་ཟད་ཀྱང་མ་བཤད་པའི་ཕྱིར། དེས་ན་བསྟན་བཅོས་བརྩམས་པ་དོན་མེད་པ་ཡིན་ནོ་སྙམ་དུ་དཔྱོད་ལྡན་གཞན་དག་སེམས་པར་འབྱུང་བ་མ་ཡིན་ནམ་ཞེ་ན། གཉིས་པ་མཐའ་དཔྱད་པ་ལ། ཁ་ཅིག །གཞིས་གཞི་ཤེས་ཁོ་ན། གཉེན་པོས་
ལམ་ཤེས་ཁོ་ན། རྣམ་པས་རྣམ་མཁྱེན་ཁོ་ན་མཚོན་ཟེར་ན། གཞི་གཉེན་རྣམ་པའི་ཕྱོགས་གསུམ་གྱིས་གཞི་ཤེས། ལམ་ཤེས། རྣམ་མཁྱེན་གསུམ་རེ་རེ་ནས་མི་མཚོན་པར་ཐལ། དམ་བཅའ་འཐད་པའི་ཕྱིར། འདོད་ན། དེར་ཐལ། གཞི་ལ་བཀར་ན་གཞི་བདེན་པ་བཞི་རྣམ་པ་བདེན་བཞིའི་ཁྱད་ཆོས། གཉེན་པོ་བདེན་བཞི་རྟོགས་པའི་གཞི་ཤེས་འཇོག་ནུས་པའི་ཕྱིར། དེས་མཚོན་ཏེ་གཞི་བདེན་བཞི་རྣམ་པ་བདེན་བཞིའི་སྟེང་གི་ཆོས་ཀྱི་བདག་མེད་གཉེན་པོ་བདེན་བཞི་རྟོགས་པའི་ལམ་ཤེས། དེས་རྣམ་མཁྱེན་ལ་ཡང་འགྲེའོ། ཁ་ཅིག །གཞི་བདེན་བཞི་ཁོ་ན་རྒྱན་གྱི་བརྗོད་བྱ་ཡིན་ཟེར་ན། གཉེན་པོ་སོགས་དེའི་བརྗོད་བྱ་མ་ཡིན་པར་ཐལ། འདོད་པའི་ཕྱིར། ཁྱབ་པ་ཡོད་དེ། ཁོ་ནའི་སྒྲས་གཞན་འགོག་པའི་ཕྱིར། དེར་ཐལ། སྲིད་སྒྲུབ་ཁོ་ན་འཕོངས་སྐྱེན་ཞེས་པས་གཞན་འཕོངས་མི་སྐྱེན་པ་བསྟན་པའི་ཕྱིར། གཉིས་པ་ལ་བཞི། ལན་དངོས། ཤེས་བྱེད་ཀྱི་ལུང་དགོད། ལུང་གི་དོན་བཤད། དོན་བསྡུས་པའོ། །དང་པོ་ནི། མངོན་རྟོགས་རྒྱན་ཆོས་ཅན། ཁྱོད་ཀྱི་གཞི་གཉེན་རྣམ་གསུམ་གང་རུང་གཅིག་ཁོ་ན་བརྗོད་བྱར་བྱས་པའི་སྒོ་ནས། སྐྱོན་དེ་ནི་ཡོད་པ་མ་ཡིན་ཏེ། གང་གི་ཕྱིར་ན་ཁྱོད་ཀྱིས་དེ་གསུམ་ཀ་བརྗོད་བྱར་བྱས་ཤིང་། དེ་གསུམ་གྱི་ཕྱོགས་གསུམ་ཆར་གྱིས་ཀྱང་མཁྱེན་གསུམ་མཚོན་པའི་སྒོ་ནས་ཁྱོད་ཀྱི་བརྗོད་བྱར་བསྡུས་པའི་ཕྱིར། ཤེས་བྱ་ཆོས་ཅན། སྐབས་འདིར་མཁྱེན་གསུམ་གཏན་ལ་འབེབས་པའི་རྒྱུ་མཚན་ཡོད་དེ། འཕགས་བཞིའི་མངོན་པར་རྟོགས་པ་མཐའ་དག་གཏན་ལ་འབེབས་པར་འདོད་པས་ན། ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་
དང་བླ་ན་མེད་པའི་སངས་རྒྱས་རྣམས་ཀྱི་མངོན་རྟོགས་ཀུན་གོ་རིམ་ཇི་ལྟ་བ་བཞིན། གཞི་ཤེས་དང་། ལམ་ཤེས་དང་། རྣམ་མཁྱེན་དང་། ཐམས་ཅད་མཁྱེན་པ་ཉིད་གསུམ་གྱིས་བསྡུས་པའི་ཕྱིར། གཉིས་པ་ལ། ཡུམ་བར་མའི་ཤེས་བྱེད་དང་། བསྡུས་པའི་ཤེས་བྱེད་དང་། རྒྱས་པའི་ཤེས་བྱེད་ཁ་འཕངས་པའོ། །དང་པོ་ལ། མདོར་བསྟན་པ་དང་རྒྱས་པར་བཤད་པ་གཉིས་ཀྱི་དང་པོ་ནི། ཤེས་བྱ་ཆོས་ཅན། མཁྱེན་གསུམ་གྱིས་འཕགས་བཞིའི་མངོན་རྟོགས་བསྡུས་ཚུལ་ཡོད་དེ། འདི་ལྟར་རྒྱལ་བའི་ཡུམ་བར་མ་ལས། རྒྱལ་བས་རབ་འབྱོར་ཞེས་བོས་ནས། ཐམས་ཅད་ཤེས་པ་ཉིད་ནི་རྣམ་གཞག་དང་སྐྱེ་བ་གཉིས་ཀྱི་རྟེན་ལས། དང་པོའི་དབང་དུ་བྱས་ནས་ཉན་ཐོས་དང་རང་སངས་རྒྱས་རྣམས་ཀྱི་མངོན་པར་རྟོགས་པ་ཡིན་ནོ། །ལམ་ཤེས་པ་ཉིད་ནི་སྔ་མ་དང་འདྲ་བར་མངོན་རྟོགས་རིགས་སོ་སོར་འབྱེད་པའི་རྟེན་གྱི་དབང་དུ་བྱང་ཆུབ་སེམས་དཔའ་རྣམས་ཀྱི་མངོན་པར་རྟོགས་པ་ཡིན་ནོ། །རྣམ་པ་ཐམས་ཅད་མཁྱེན་པ་ཉིད་ནི་རྣམ་གཞག་དང་སྐྱེ་བའི་རྟེན་གཉིས་ཀ་ལྟར་ན་ཡང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་མངོན་པར་རྟོགས་པ་ཡིན་ནོ་ཞེས་གསུངས་པའི་ཕྱིར། གཉིས་པ་ལ། གཞི་ཤེས་ཀྱིས་ཉན་རང་གི་མངོན་རྟོགས་བསྡུས་ཚུལ། ལམ་ཤེས་ཀྱིས་བྱང་སེམས་ཀྱི་མངོན་རྟོགས་བསྡུས་ཚུལ། རྣམ་མཁྱེན་གྱིས་སངས་རྒྱས་ཀྱི་མངོན་རྟོགས་བསྡུས་ཚུལ་ལོ། །དང་པོ་ལ། དྲི་བ་དང་། ལན་ནོ། །དང་པོ་ནི། ཤེས་བྱ་ཆོས་ཅན། ཐམས་ཅད་ཤེས་པ་ཞེས་སོགས་ལས་བརྩམས་ཏེ་དྲི་བ་ཞུས་ཚུལ་ཡོད་དེ། བཅོམ་ལྡན་འདས་ཞེས་བོས་ནས།
རྒྱུ་མཚན་དང་དགོས་པ་ཅིའི་སླད་དུ་ཐམས་ཅད་འཚལ་བ་ཉིད་ཉན་ཐོས་དང་རང་སངས་རྒྱས་རྣམས་ཀྱི་མངོན་རྟོགས་སུ་གསུངས་པ་ལགས་ཞེས་ཞུས་པའི་ཕྱིར། གཉིས་པ་ནི། ཤེས་བྱ་ཆོས་ཅན། ཉན་ཐོས་དང་རང་སངས་རྒྱས་རྣམས་ཀྱིས་མངོན་རྟོགས་ནི་ཐམས་ཅད་ཤེས་པ་ཉིད་ཀྱི་བསྡུས་ཞེས་བྱ་བ་ཡིན་ཏེ། རབ་འབྱོར་ཞེས་བོས་ནས། གཞི་ཐམས་ཅད་ནི་ཕྱི་དང་ནང་གི་ཆོས་སྐྱེ་བ་སྐྱེ་མཆེད་བཅུ་གཉིས་པོ་རྣམས་ཇི་སྙེད་པ་འདི་ཙམ་ཡིན་ལ། དེ་དག་ཀྱང་ཉན་ཐོས་དང་རང་སངས་རྒྱས་རྣམས་ཀྱིས་མི་རྟག་སོགས་བཅུ་དྲུག་གིས་ཁྱད་པར་དུ་བྱས་ནས། མངོན་སུམ་དུ་ཤེས་པས་གཞི་ཤེས་ཡོད་ཀྱི། ལམ་གསུམ་པོ་ཐམས་ཅད་ཀྱིས་ཀྱང་ངེས་པར་འབྱུང་བཞིན་པ་མ་ཡིན་པས་ལམ་ཤེས་མེད་ལ། རྣམ་པ་ཐམས་ཅད་མངོན་སུམ་དུ་རྟོགས་པ་ཡང་མ་ཡིན་པས་རྣམ་མཁྱེན་མེད་པ་དེའི་ཕྱིར། གཉིས་པ་ལ། དྲི་བ་དང་། ལན་གཉིས་ལས། དང་པོ་ནི། ཤེས་བྱ་ཆོས་ཅན། ལམ་ཤེས་པ་ཉིད་ནི་ཞེས་སོགས་ལས་བརྩམས་ཏེ་དྲི་བ་ཞུས་ཚུལ་ཡོད་དེ། །བཅོམ་ལྡན་འདས་ཅིའི་སླད་དུ་ལམ་གསུམ་གྱི་རྣམ་པ་འཚལ་བ་སྟེ་ཤེས་པ་ཉིད་བྱང་ཆུབ་སེམས་དཔའ་རྣམས་ཀྱི་མངོན་རྟོགས་སུ་གསུངས་པ་ལགས་ཞེས་ཞུས་པའི་ཕྱིར། གཉིས་པ་ལན་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། བྱང་ཆུབ་སེམས་དཔའ་རྣམས་ཀྱི་ནི་མངོན་རྟོགས་ཆོས་ཅན། ལམ་གྱི་རྣམ་པ་ཤེས་པ་ཉིད་ཅེས་བྱ་བས་བསྡུས་པ་ཡིན་ཏེ། ཐབས་ཤེས་ཀྱིས་ཟིན་པའི་རྒྱལ་སྲས་རྣམས་ཀྱི་མངོན་རྟོགས་ཡིན་པའི་ཕྱིར། ཤེས་བྱ་ཆོས་ཅན། བྱང་སེམས་ཀྱི་མངོན་རྟོགས་ཤེས་རབ་ཁྱད་པར་ཅན་གྱིས་བསྡུས་ཏེ། ཤེས་
རབ་རྣམ་པར་དག་པ་དང་ལྡན་པས་གདམས་པ་རབ་འབྱོར་བྱང་ཆུབ་སེམས་དཔའ་རྣམས་ཀྱིས་ནི་ཉན་ཐོས་ཀྱི་ལམ་གང་ཡིན་པ། གང་ཟག་གི་བདག་མེད་རྟོགས་པའི་ཡེ་ཤེས་དང་། རང་སངས་རྒྱས་ཀྱི་ལམ་གང་ཡིན་པ། གཟུང་འཛིན་རྫས་ཐ་དད་ཀྱིས་སྟོངས་པར་རྟོགས་པའི་ཡེ་ཤེས་དང་། སངས་རྒྱས་ཀྱི་ལམ་གང་ཡིན་པ་ཆོས་ཐམས་ཅད་བདེན་མེད་དུ་རྟོགས་པའི་ལམ་གསུམ་པོ་ཐམས་ཅད་དང་པོར་རྒྱུད་ལ་བསྐྱེད་པར་བྱ་ཞིང་། དེ་ནས་ལམ་ཐམས་ཅད་མངོན་སུམ་དུ་ཤེས་པར་བྱའོ། །ལམ་གསུམ་པོ་དེ་དག་ཀྱང་སྤངས་རྟོགས་ཀྱི་སྒོ་ནས་ཡོངས་སུ་རྫོགས་པར་བྱ་ཞིང་། གསུམ་པོ་དེ་དག་གི་ཐུན་མོང་གི་ལམ་གྱི་བྱ་བ་སེམས་ཅན་སྨིན་པ་ཡང་བྱ་ལ་སྟེ་བྱ་བའི་ཕྱིར། བྱང་འཕགས་ཆོས་ཅན། འདིར་བསྟན་ཡང་དག་མཐའ་མངོན་དུ་བྱེད་པའི་དུས་དང་དུས་མ་ཡིན་པ་ལ་མཁས་ཏེ། ཁྱོད་ཀྱིས་སྨོན་ལམ་གྱི་ནུས་པ་ཡོངས་སུ་རྫོགས་པའི་སྒོ་ནས་སྨོན་ལམ་ཡོངས་སུ་རྫོགས་པར་མ་བྱས་པ་དང་། ཞིང་བྱེ་བ་ཕྲག་བརྒྱར་དེ་མཚུངས་ཀྱི་སྐུ་དང་དེའི་འཁོར་ཆོས་ཀྱི་ཚིགས་བཅད་ཀྱིས་འཕགས་པའི་སར་འགོད་པའི་ནུས་པ་རྫོགས་པའི་སྒོ་ནས། སེམས་ཅན་རྣམས་ཡོངས་སུ་སྨིན་པར་མ་བྱས་པ་དང་། ལོངས་སྤྲུལ་གྱི་ཞིང་འགྲུབ་པའི་དགེ་རྩ་ཡོངས་སུ་རྫོགས་པའི་སྒོ་ནས་སངས་རྒྱས་ཀྱི་ཞིང་ཡོངས་སུ་མ་སྦྱངས་པར། ཞི་བའི་དབྱིངས་སུ་བསྐལ་པ་སོགས་སུ་སྙོམས་པར་ཞུགས་ཚུལ་གྱི་དེ་དག་གི་ཡང་དག་པའི་མཐའ་མངོན་དུ་མི་བྱའོ་སྟེ་མི་བྱེད་ཅིང་། རྫོགས་སྨིན་སྦྱང་གསུམ་བྱས་རྗེས་སུ་དེ་མངོན་དུ་བྱེད་པ་དེའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། ཁ་ཅིག །གང་ཟག་གི་བདག་
མེད་རྟོགས་པའི་ཡེ་ཤེས་དེ། ཉན་ཐོས་ཀྱི་ལམ་ཡིན་ཟེར་ན། ཉན་ཐོས་ཀྱི་ལམ་ཡིན་ན། ཉན་ཐོས་རང་རྒྱུད་ཀྱིས་བསྡུས་པའི་ལམ་ཡིན་མི་དགོས་པར་ཐལ། དམ་བཅའ་འཐད་པའི་ཕྱིར། འདོད་ན། དེར་ཐལ། ཉན་ཐོས་ཀྱི་མངོན་རྟོགས་ཡིན་ན། ཉན་ཐོས་རང་རྒྱུད་ཀྱིས་བསྡུས་པའི་མངོན་རྟོགས་ཡིན་དགོས་པའི་ཕྱིར། དེར་ཐལ། དེའི་ཐེག་པ་ཡིན་ན། དེ་རང་རྒྱུད་ཀྱིས་བསྡུས་པའི་ཐེག་པ་ཡིན་དགོས་པའི་ཕྱིར། དེར་ཐལ། དེའི་རྟོགས་རིགས་སུ་གནས་པའི་ཐེག་པ་ཡིན་ན་དེའི་ཐེག་པ་ཡིན་པས་མ་ཁྱབ་པའི་ཕྱིར། མ་གྲུབ་ན། གང་ཟག་གི་བདག་མེད་མངོན་སུམ་དུ་རྟོགས་པའི་རྣམ་མཁྱེན་ཆོས་ཅན། དེར་ཐལ། དེའི་ཕྱིར། དེར་ཐལ། ཉན་ཐོས་ཀྱི་ལམ་ཤེས་པའི་ལམ་ཤེས་ཡིན་པའི་ཕྱིར། འདོད་ན། མཐར་ཐུག་ཉན་ཐོས་ཀྱི་ཐེག་པ་ཡིན་པར་ཐལ། ཉན་ཐོས་ཀྱི་ཐེག་པ་གང་ཞིག །མཐར་ཐུག་གི་ཐེག་པ་ཡིན་པའི་ཕྱིར། འདོད་ན། མཐར་ཐུག་ཉན་ཐོས་ཀྱི་ཐེག་པ་ཡོད་པར་ཐལ། འདོད་པའི་ཕྱིར། འདོད་ན། མཐར་ཐུག་ཐེག་པ་གསུམ་དུ་གྲུབ་པར་ཐལ། འདོད་མི་ནུས་སོ། །ཁ་ཅིག །གང་ཟག་གི་བདག་མེད་མངོན་སུམ་དུ་རྟོགས་པའི་བྱང་སེམས་ཀྱི་མཐོང་ལམ་དེ་འདིར་བསྟན་ཉན་ཐོས་ཀྱི་རྟོགས་རིགས་སུ་གནས་པའི་ལམ་དང་། དེ་འདིར་བསྟན་ཤེས་བྱ་ཉན་ཐོས་ཀྱི་ལམ་ཡིན་ཟེར་ན། འོ་ན། འདིར་བསྟན་ཤེས་བྱ་ཉན་ཐོས་ཀྱི་ལམ་ཡིན་ན། ཉན་ཐོས་ཀྱི་ལམ་ཡིན་དགོས་པར་ཐལ། དམ་བཅའ་འཐད་པའི་ཕྱིར། འདོད་ན། འདིར་བསྟན་ཡང་དག་མཐའ་ཡིན་ན་ཡང་དག་མཐའ་ཡིན་དགོས་པར་ཐལ། འདོད་པའི་ཕྱིར། འདོད་ན། ཁྱབ་པ་འདུ་བྱེད་ཀྱི་
སྡུག་བསྔལ་ཉེ་བར་ཞི་བའི་ཉེར་བཞི་ཆོས་ཅན། དེར་ཐལ། དེའི་ཕྱིར། དེར་ཐལ། དེའི་མཚན་གཞི་ཞིག་ཡོད་པའི་ཕྱིར། འདོད་ན། སྟོང་ཉིད་ཡིན་པར་ཐལ། འདོད་པའི་ཕྱིར། འདོད་ན། དོན་དམ་བདེན་པ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཀུན་རྫོབ་བདེན་པ་ཡིན་པའི་ཕྱིར། ཁ་ཅིག །གཟུངས་འཛིན་རྫས་གཞན་གྱིས་སྟོང་པར་མངོན་སུམ་དུ་རྟོགས་པའི་བྱང་སེམས་ཀྱི་མཐོང་ལམ་དེ། འདིར་བསྟན་ཤེས་བྱ་རང་རྒྱལ་གྱི་ལམ་ཡིན་ཟེར་ན། རྣམ་གཞག་གི་རྟེན་རང་རྒྱལ་ལ་འཇོག་ཅིང་། བྱང་ཆུབ་སེམས་དཔའི་རྒྱུད་ལའང་སྐྱེ་བ་ཞིག་ཡིན་པར་ཐལ། དེ་འདིར་བསྟན་བསྐྱེད་བྱ་རྒྱུའི་ལམ་ཡིན་པའི་ཕྱིར། ཁྱབ་པ་ཡོད་དེ། བྱང་སེམས་འཕགས་པས་འདིར་བསྟན་ཤེས་བྱ་རང་རྒྱལ་གྱི་ལམ་དེ་ཤེས་པར་བྱེད་ཚུལ་རང་རྒྱུད་ལ་བསྐྱེད་ནས་ཤེས་པར་བྱེད་ཀྱི། མིག་གི་གཟུགས་ལ་ལྟ་བ་ལྟར་བྱེད་པ་མ་ཡིན་པའི་ཕྱིར། འདོད་མི་ནུས་ཏེ། བྱང་སེམས་ཀྱི་མཐོང་ལམ་ཡིན་པའི་ཕྱིར། ཁ་ཅིག །གང་ཟག་གི་བདག་མེད་མངོན་སུམ་དུ་རྟོགས་པའི་ཡེ་ཤེས་དེ་གང་ཟག་སུའི་རྒྱུད་ལ་ཡོད་ཀྱང་ཉན་ཐོས་ཀྱི་ལམ་ཡིན་ཟེར་ན། གང་ཟག་གི་བདག་མེད་མངོན་སུམ་དུ་རྟོགས་པའི་རྣམ་མཁྱེན་ཉན་ཐོས་ཀྱི་ལམ་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། མ་ཡིན་པར་ཐལ། དེ་རྣམ་གཞག་གི་དབང་དུ་བྱས་པའི་ཉན་ཐོས་ཀྱི་ལམ་ཡང་མ་ཡིན། སྐྱེ་བའི་རྟེན་གྱི་དབང་དུ་བྱས་པའི་ཉན་ཐོས་ཀྱི་ལམ་ཡང་མ་ཡིན་པའི་ཕྱིར། དང་པོ་མ་གྲུབ་ན། དེ་ཉན་ཐོས་སློབ་པ་རྣམས་ཀྱི་བྱང་ཆུབ་འཐོབ་པ་ལ་བསྒོམ་བྱའི་གཙོ་བོར་བྱས་ནས་སྒོམ་ཞིང་། བསྒོམས་ན་ཉན་ཐོས་ཀྱི་བྱང་ཆུབ་འཐོབ། མ་བསྒོམས་ན་དེ་མི་འཐོབ་པའི་ལམ་ཡིན་པར་ཐལ། མ་གྲུབ་
པ་དེའི་ཕྱིར། འདོད་ན། རྣམ་མཁྱེན་བསྒོམ་བྱའི་གཙོ་བོར་བྱེད་པའི་ཉན་ཐོས་སློབ་པ་ཡོད་པར་ཐལ། འདོད་པའི་ཕྱིར། འདོད་མི་ནུས། ཕྱི་མ་མ་གྲུབ་ན། གང་ཟག་གི་བདག་མེད་མངོན་སུམ་དུ་རྟོགས་པའི་རྣམ་མཁྱེན་རང་རྒྱུད་ལ་སྐྱེས་པའི་ཉན་ཐོས་སློབ་པ་ཡོད་པར་ཐལ། མ་གྲུབ་པ་དེའི་ཕྱིར། འདོད་མི་ནུས་སོ། །ཁ་ཅིག །གང་ཟག་གི་བདག་མེད་མངོན་སུམ་དུ་རྟོགས་པའི་ཡེ་ཤེས་ཉན་ཐོས་ཀྱི་ལམ་ཡིན་ཟེར་ན། གང་ཟག་གི་བདག་འཛིན་སྤངས་པའི་སྤངས་པ་དེ་ཉན་ཐོས་ཀྱི་འགོག་བདེན་ཡིན་པར་ཐལ། གང་ཟག་གི་བདག་མེད་མངོན་སུམ་དུ་རྟོགས་པའི་ཡེ་ཤེས་ཉན་ཐོས་ཀྱི་ལམ་བདེན་ཡིན་པའི་ཕྱིར། དེར་ཐལ། དེ་ཉན་ཐོས་ཀྱི་འཕགས་ལམ་ཡིན་པའི་ཕྱིར་ཏེ། དེ་ཉན་ཐོས་ཀྱི་ལམ་ཡིན་པའི་ཕྱིར། འདོད་ན། དེ་སྤངས་པའི་མྱང་འདས་དེ་ཉན་ཐོས་ཀྱི་མྱང་འདས་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཁྱོད་རྒྱུད་ལྡན་གྱི་སངས་འཕགས་མེད་པར་ཐལ་ལོ། །གཞན་ཡང་ཐེག་ཆེན་གྱི་རིགས་ཅན་དབང་རྣོན་རྣམས་སྐྱེས་བུ་གསུམ་གྱི་ལམ་ལ་འཁྲིད་པ་དེའི་ཚེ་འབྲིང་གི་ལམ་དངོས་ལ་འཁྲིད་པར་ཐལ། མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་ལམ་ལ་འཁྲིད་པ་གང་ཞིག །དེ་འབྲིང་གི་ལམ་དངོས་ཡིན་པའི་ཕྱིར། དེར་ཐལ། བདག་མེད་མངོན་སུམ་དུ་རྟོགས་པའི་ཡེ་ཤེས་ཉན་ཐོས་ཀྱི་ལམ་དངོས་ཡིན་པའི་ཕྱིར། རྟགས་ཁས། རྩ་བར་འདོད་མི་ནུས་ཏེ། དེ་སྐྱེས་བུ་འབྲིང་དང་ཐུན་མོང་པའི་ལམ་ལ་འཁྲིད་པ་ཡིན་གྱི། འབྲིང་གི་ལམ་དངོས་ལ་འཁྲིད་ན་གོལ་སར་ལྟུང་བའི་སྐྱོན་ཡོད་པའི་ཕྱིར། ཁ་ཅིག །གཞུང་འདིའི་དངོས་ཤུགས་ཀྱི་དོན་ལ་སྤྱིར་བཏང་དམིགས་བསལ་གྱི་དོན་འཆད་ཟེར་ན། དེ་མི་འཐད་པར་ཐལ། སྤྱིར་བཏང་དམིགས་
བསལ་ཞེས་པ། དཔེར་ན་ཐམས་ཅད་ཀྱང་དགྲ་བཅོམ་པ་ཟག་པ་ཟད་པ་ཞེས་སྤྱིར་བཏང་དང་། གང་ཟག་གཅིག་མ་གཏོགས་པ་ན་འདི་ལྟ་སྟེ། སློབ་པ་རྒྱུན་དུ་ཞུགས་པ་ཚེ་དང་ལྡན་པ་ཀུན་དགའ་བོའོ་ཞེས་དམིགས་ཀྱིས་བསལ་བ་ལྟ་བུ་དངོས་ཟིན་ལ་ཡོད་པ་དང་ཡིན་པ་ལ་སྤྱིར་བཏང་ནས། མེད་པ་དང་མ་ཡིན་པ་ལ་དམིགས་ཀྱིས་བསལ་བ་གཅིག་འབྱེད་རིགས་པའི་ཕྱིར། ཁ་ཅིག །ཆོས་ཉིད་ལ་མཉམ་པར་བཞག་བཞིན་པའི་ངང་ནས་གཞན་དོན་འབད་མེད་ལྷུན་གྲུབ་ཏུ་བྱེད་ནུས་པ་དེ་སྨོན་ལམ་རྫོགས་པའི་ཚད་དང་། དེ་བཞིན་ཉིད་དེ་འདིར་བསྟན་ཡང་དག་མཐར་བྱེད་དོ་ཟེར་ན། མཆོག་གི་སྤྲུལ་སྐུས་དམན་ལམ་སྔོན་དུ་མ་སོང་བའི་བྱང་འཕགས་ལ་ཆོས་སྐུ་མ་ཐོབ་བར་དུ་ཆོས་སྐུ་མངོན་དུ་མི་བྱའོ་ཞེས་གདམས་རིགས་པར་ཐལ། དེས་དེ་ལ་རྫོགས་སྨིན་སྦྱང་གསུམ་མ་བྱས་བར་དུ་འདིར་བསྟན་ཡང་དག་མཐའ་མངོན་དུ་མི་བྱའོ་ཞེས་གདམས་རིགས་པ་གང་ཞིག །རྫོགས་སྨིན་སྦྱང་གསུམ་བྱས་པའི་གང་ཟག་ཡིན་ན་ཆོས་སྐུ་ཐོབ་པའི་གང་ཟག་ཡིན་པས་ཁྱབ། འདིར་བསྟན་ཡང་དག་མཐའ་མངོན་དུ་བྱས་པའི་གང་ཟག་ཡིན་ནའང་ཆོས་སྐུ་ཐོབ་པས་ཁྱབ་པའི་ཕྱིར། གཉིས་པ་དེར་ཐལ། དེ་ཡིན་ན་ཆོས་ཉིད་ལ་མཉམ་པར་བཞག་ཟིན་པའི་ངང་ནས་གཞན་དོན་འབད་མེད་ལྷུན་གྲུབ་ཏུ་བྱེད་ནུས་པས་ཁྱབ་པ་གང་ཞིག །དེ་ནུས་པའི་གང་ཟག་ཡིན་ན། ཆོས་སྐུ་ཐོབ་པའི་གང་ཟག་ཡིན་དགོས་པའི་ཕྱིར། དང་པོ་གྲུབ་སྟེ། ཁྱོད་ཀྱི་སྨོན་ལམ་རྫོགས་པའི་ཚད་དེ་འཐད་པའི་ཕྱིར། གཉིས་པ་སྒྲུབ་མི་དགོས། རྩ་རྟགས་གསུམ་པ་གྲུབ་སྟེ། འདིར་བསྟན་ཡང་དག་མཐའ་མངོན་དུ་བྱས་པའི་གང་ཟག་ཡིན་ན། དེ་བཞིན་ཉིད་མངོན་དུ་བྱས་པའི་གང་ཟག་ཡིན་དགོས།
དེ་མངོན་དུ་བྱས་པའི་གང་ཟག་ཡིན་ན། ཆོས་སྐུ་ཐོབ་པའི་གང་ཟག་ཡིན་དགོས་པའི་ཕྱིར། དང་པོ་གྲུབ་སྟེ། དེ་འདིར་བསྟན་ཡང་དག་མཐའ་ཡིན་པའི་ཕྱིར། གཉིས་པ་སྒྲུབ་མི་དགོས། བྱས་པ་ལ་ཁོ་ན་རེ། བྱང་འཕགས་ཆོས་ཅན། ཆོས་སྐུ་ཐོབ་པར་ཐལ། དེ་བཞིན་ཉིད་མངོན་དུ་བྱས་པའི་ཕྱིར། དེར་ཐལ། དེ་མངོན་སུམ་དུ་རྟོགས་པའི་ཕྱིར་ན་མ་ཁྱབ། དེ་ལ་ཁ་ཅིག་ལོངས་སྐུ་མངོན་སུམ་དུ་རྟོགས་ན་དེ་མངོན་དུ་བྱས་པས་ཁྱབ་པར་ཐལ། མཚུངས་པའི་ཕྱིར། འདོད་ན། དེའི་འཁོར་དུ་གྱུར་པའི་བྱང་འཕགས་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཤིང་རྟགས་སྒྲུབ་མི་དགོས་ཟེར་ཡང་། མི་འཐད་པར་ཐལ། ལོངས་སྐུའི་གཟུགས་ཕུང་མངོན་སུམ་དུ་རྟོགས་ན་ལོངས་སྐུ་མངོན་སུམ་དུ་རྟོགས་པས་མ་ཁྱབ་པའི་ཕྱིར། དེར་ཐལ། ལོངས་སྐུའི་རྒྱུད་ཀྱི་ཡིད་ཀྱི་རྣམ་པར་ཤེས་པ་ལོངས་སྐུ་ཡིན་པའི་ཕྱིར། དེར་ཐལ། ཡིད་ཀྱི་རྣམ་པར་ཤེས་པ་གང་ཟག་ཡིན་པའི་ཕྱིར། དེར་ཐལ། རྟོག་གེ་འབར་བ་ལས། འདི་ལྟར་ཁོ་བོ་ཅག་ཐ་སྙད་དུ་རྣམ་པར་ཤེས་པ་ལ་བདག་གི་སྒྲ་དངོས་སུ་འདོགས་ཏེ། འདི་ལྟར་རྣམ་པར་ཤེས་པ་ནི་ཡང་སྲིད་པ་ལེན་པའི་ཕྱིར་བདག་ཡིན་ནོ། །ཞེས་གསུངས་པའི་ཕྱིར། རང་ལུགས་ནི། དེ་བཞིན་ཉིད་མངོན་སུམ་དུ་རྟོགས་ན་དེ་མངོན་དུ་བྱས་པས་མ་ཁྱབ་པར་ཐལ། རང་བཞིན་རྣམ་དག་གི་ཆར་གྱུར་པའི་ངོ་བོ་ཉིད་སྐུ་མངོན་སུམ་རྟོགས་ན་དེ་མངོན་དུ་བྱས་པས་མ་ཁྱབ་པའི་ཕྱིར། དེར་ཐལ། དེ་མངོན་སུམ་དུ་རྟོགས་པའི་བྱང་འཕགས་ཡོད་པའི་ཕྱིར། ཁ་ཅིག་རང་གི་སྨོན་ལམ་གང་བཏབ་ཀྱི་ཞེན་དོན་ཡོངས་སུ་རྫོགས་པ་དེ་སྨོན་ལམ་རྫོགས་པའི་ཚད་ཡིན་ཟེར་ན། སངས་རྒྱས་འཕགས་ཆོས་ཅན། ཚད་དེ་
རྫོགས་པར་ཐལ། སྨོན་ལམ་རྫོགས་པའི་ཚད་རྫོགས་པའི་གང་ཟག་ཡིན་པའི་ཕྱིར། དེར་ཐལ། སངས་འཕགས་ཡིན་པའི་ཕྱིར། འདོད་ན། དེས་སྐྱེ་བོ་ཐམས་ཅད་སྦྱིན་པས་གྲོལ་བར་བྱས་ཟིན་པར་ཐལ། དེས་དེ་འདྲའི་སྨོན་ལམ་བཏབ་པ་གང་ཞིག །རང་གིས་སྨོན་ལམ་གང་བཏབ་ཀྱི་བཞེད་དོན་ཡོངས་སུ་རྫོགས་པའི་གང་ཟག་ཡིན་པའི་ཕྱིར། འདོད་མི་ནུས་ཏེ། འཕོངས་པའི་སྐྱེ་བོ་ཡོད་པའི་ཕྱིར། ཁ་ཅིག །རང་གི་འཁོར་དུ་མངོན་ཤེས་ལྔ་དང་མི་ལྡན་པའི་གདུལ་བྱ་མེད་པར་མ་གྱུར་པ་དེ་སྲིད་དུ་བདག་འཚང་མི་རྒྱའོ་ཞེས་པའི་སྨོན་ལམ་གྱི་ནུས་པ་ཡོངས་སུ་རྫོགས་པ་དེ་སྤྲུལ་སྐུའི་དབང་དུ་བྱས་པའི་སྨོན་ལམ་ཡོངས་སུ་རྫོགས་པའི་ཚད་ཡིན་ཟེར་ན། མཆོག་གི་སྤྲུལ་སྐུའི་འཁོར་དུ་གྱུར་པའི་གདུལ་བྱ་ཡིན་ན་མངོན་ཤེས་ལྔ་དང་ལྡན་པས་ཁྱབ་པར་ཐལ། དམ་བཅའ་འཐད་པའི་ཕྱིར། འདོད་མི་ནུས། ཁ་ཅིག །རང་ཉིད་གང་དུ་འཚང་རྒྱ་འགྱུར་གྱི་སངས་རྒྱས་ཀྱི་ཞིང་དེར། འཁོར་བྱང་སེམས་འཕགས་པ་ཤ་སྟག་འབྱུང་བའི་རྒྱུའི་དགེ་བའི་རྩ་བའི་ནུས་པ་ཡོངས་སུ་རྫོགས་པ་དེ་ལོངས་སྐུའི་དབང་དུ་བྱས་པའི་སངས་རྒྱས་ཀྱི་ཞིང་སྦྱངས་པའི་ཚད་ཡིན་ཟེར་ན། ལོངས་སྐུ་ཆོས་ཅན། རང་ཉིད་གང་དུ་འཚང་རྒྱ་འགྱུར་གྱི་སངས་རྒྱས་ཀྱི་ཞིང་དེར་འཁོར་བྱང་སེམས་འཕགས་པ་ཤ་སྟག་འབྱུང་བའི་རྒྱུའི་དགེ་བའི་རྩ་བའི་ནུས་པ་ཡོངས་སུ་རྫོགས་པར་ཐལ། ཅིག་ཤོས་ཀྱི་ཚད་རྫོགས་པའི་གང་ཟག་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་འཚང་རྒྱ་འགྱུར་གྱི་སངས་རྒྱས་ཀྱི་ཞིང་ཡོད་པར་ཐལ། འདོད་པའི་ཕྱིར། འདོད་ན། ཁྱོད་འཚང་རྒྱ་འགྱུར་ཡིན་པར་ཐལ། འདོད་པའི་ཕྱིར། འདོད་མི་ནུས། ཁ་ཅིག །རྫོགས་སྨིན་སྦྱང་གསུམ་བྱས་པའི་གང་ཟག་
ཡིན་ན་སངས་རྒྱས་ཡིན་དགོས་ཏེ། གཞན་དོན་དུ་སངས་རྒྱས་ཐོབ་པར་གྱུར་ཅིག་ཅེས་པའི་སྨོན་ལམ་གྲུབ་པ་དེ་རྫོགས་ཚད། རང་གི་སྐུ་དངོས་ཀྱི་གདུལ་བྱར་གྱུར་པའི་སེམས་ཅན་རྣམས་སྒྲིབ་པ་དངོས་སུ་སྤོང་རུང་དང་གཉེན་པོ་དངོས་སུ་སྐྱེ་རུང་དུ་བྱས་པ་དེ་སྨིན་ཚད། སངས་རྒྱས་རང་སྣང་ལ་ཞིང་དག་པ་རབ་འབྱམས་འབའ་ཞིག་སྣང་བ་དེ་སྦྱངས་ཚད་ཡིན་ཟེར་ན། མཆོག་གི་སྤྲུལ་སྐུས་དམན་ལམ་སྔོན་དུ་མ་སོང་བའི་བྱང་འཕགས་ལ་རྫོགས་སྨིན་སྦྱང་གསུམ་མ་བྱས་པར་འདིར་བསྟན་ཡང་དག་མཐའ་མངོན་དུ་མི་བྱོའི་ཞེས་དངོས་སུ་གདམས་པའི་ཤུགས་ལ་དེ་གསུམ་རྫོགས་ནས་དེ་བྱེད་པར་མ་བསྟན་པར་ཐལ། རྫོགས་སྨིན་སྦྱང་གསུམ་བྱས་པའི་གང་ཟག་ཡིན་ན། འདིར་བསྟན་ཡང་དག་མཐའ་མངོན་དུ་བྱས་པས་ཁྱབ་པའི་ཕྱིར། མ་གྲུབ་ན་སོང་། དེར་ཐལ། དེ་ཡིན་ན་སངས་རྒྱས་འཕགས་པ་ཡིན་དགོས་པའི་ཕྱིར། གཞན་ཡང་སངས་རྒྱས་ཀྱི་ཡེ་ཤེས་ལ་མ་དག་པའི་ཞིང་མི་སྣང་བར་ཐལ། དེ་ལ་ཞིང་དག་པ་འབའ་ཞིག་སྣང་བའི་ཕྱིར། རྟགས་ཁས། འདོད་ན། དེ་ཆོས་ཅན། མེད་པར་ཐལ། སངས་རྒྱས་ཀྱི་ཡེ་ཤེས་ལ་མི་སྣང་བའི་ཕྱིར། ཁྱབ་པ་ཡོད་དེ། རྣམ་ངེས་ལས། ཐམས་ཅད་མཁྱེན་པའི་གཟིགས་པ་ལོག་པས་ནི་ཐམས་ཅད་དུ་མེད་པ་གོ་བར་བྱེད་དོ། །ཞེས་གསུངས་པའི་ཕྱིར། རོང་ཊཱིཀ་པ་ན་རེ། ས་དང་པོ་ནས་ཉན་རང་གི་སྤངས་རྟོགས་གཉིས་ཀ་རྫོགས་ལ། དེ་ཡང་སྤངས་པ་ས་དང་པོར་རྫོགས་ཏེ། ཉོན་སྒྲིབ་ལ་འཁོར་བར་འཆིང་བྱེད་ཀྱི་ཉོན་སྒྲིབ་དང་བག་ལ་ཉལ་གྱི་ཉོན་སྒྲིབ་གཉིས་ལས། དང་པོ་ས་དང་པོ་ནས་ཀྱང་སྤངས། གཉིས་པ་ཉན་ཐོས་དགྲ་བཅོམ་པས་ཀྱང་མ་
སྤངས་པའི་ཕྱིར་ཏེ། མ་རིག་བག་ཆགས་ཀྱི་རྒྱུ་ལས་ཡིད་ཀྱི་རང་བཞིན་གྱི་ལུས་ལེན་པའི་ཕྱིར་ཟེར་ན། འཕགས་པའི་གང་ཟག་སློབ་པ་རྣམས་དགེ་འདུན་དཀོན་མཆོག་ཏུ་གཞག་ཏུ་མི་རུང་བར་ཐལ། སྐྱབས་གནས་ལ་ཐེ་ཚོམ་ཟ་བའི་ཐེ་ཚོམ་གྱི་གཉེན་པོ་རྒྱུད་ལ་སྐྱེ་མ་མྱོང་བའི་འཕགས་པ་ཡོད་པའི་ཕྱིར། མཐོང་ལམ་བར་ཆད་མེད་ལམ་ལ་གནས་པའི་ཉན་ཐོས་འཕགས་པའི་རྒྱུད་ལ་དེའི་དངོས་གཉེན་བར་ཆད་མེད་ལམ་སྐྱེ་མ་མྱོང་བའི་ཕྱིར་ཏེ། ཉན་ཐོས་ཀྱི་མཐོང་ལམ་བར་ཆད་མེད་ལམ་དེ་དེའི་དངོས་གཉེན་བར་ཆད་མེད་ལམ་མ་ཡིན་པའི་ཕྱིར། ཉན་ཐོས་ཀྱི་མཐོང་ལམ་རྣམ་གྲོལ་ལམ་ལ་གནས་པའི་འཕགས་པས་སྐྱབས་གནས་ལ་ཐེ་ཚོམ་ཟ་བའི་ཐེ་ཚོམ་གྱི་ས་བོན་ཟད་པར་མ་སྤངས་པའི་ཕྱིར། དེར་ཐལ། དེས་ཉོན་སྒྲིབ་ཀུན་བརྟགས་ཀྱི་ས་བོན་ཟད་པར་མ་སྤངས་པའི་ཕྱིར། དེར་ཐལ། ཉན་ཐོས་དགྲ་བཅོམ་པས་ཉོན་སྒྲིབ་ལྷན་སྐྱེས་ཀྱི་ས་བོན་ཟད་པར་མ་སྤངས་པའི་ཕྱིར། དེར་ཐལ། དེས་བག་ལ་ཉལ་གྱི་ཉོན་སྒྲིབ་མ་སྤངས་པའི་ཕྱིར། གཞན་ཡང་། མ་རིག་བག་ཆགས་ཀྱི་ས་དེ་ཉོན་སྒྲིབ་ཡིན་པར་ཐལ། ཉན་ཐོས་དགྲ་བཅོམ་པས་བག་ལ་ཉལ་གྱི་ཉོན་སྒྲིབ་མ་སྤངས་པའི་སྒྲུབ་བྱེད་དུ་མ་རིག་བག་ཆགས་ཀྱི་རྒྱུ་ལས་ཡིད་ལུས་ལེན་པ་འགོད་རིགས་པའི་ཕྱིར། འདོད་མི་ནུས་ཏེ། དེ་ཤེས་སྒྲིབ་ཏུ་ཤིང་རྟ་ཆེན་པོ་རྣམས་ཀྱིས་བཞེད་པའི་ཕྱིར། ཁོ་ན་རེ། བག་ལ་ཉལ་གྱི་ཉོན་སྒྲིབ་ཤེས་སྒྲིབ་ཡིན་ཟེར་ན། མི་འཐད་པར་ཐལ། ས་དང་པོར་ཉན་རང་གི་སྤངས་རྟོགས་རྫོགས་མ་རྫོགས་དཔྱོད་པའི་སྤང་བྱར་ཤེས་སྒྲིབ་མི་རུང་བའི་ཕྱིར། གཟུགས་ཕྱི་རོལ་དོན་འཛིན་གྱི་རྟོག་པ་དེ་རང་རྒྱལ་གྱི་
སྤང་བྱར་རུང་བར་ཐལ། རང་རྒྱལ་སློབ་པས་ཤེས་སྒྲིབ་རགས་པ་སྤང་བྱའི་གཙོ་བོར་བྱེད་པའི་ཕྱིར། དེར་ཐལ། རང་རྒྱལ་དགྲ་བཅོམ་པས་ཤེས་སྒྲིབ་རགས་པ་སྤངས་པའི་ཕྱིར། གཞན་ཡང་། བྱང་སེམས་འཕགས་པ་ཡིན་ན་ཉོན་སྒྲིབ་སྤངས་པས་ཁྱབ་པར་ཐལ། ཉན་རང་གི་སྤངས་རྟོགས་ས་དང་པོ་ནས་རྫོགས་པའི་ཕྱིར། འདོད་ན། དམན་ལམ་སྔོན་དུ་མ་སོང་བའི་བྱང་སེམས་རྣམས་ཀྱིས་སྒྲིབ་གཉིས་ཅིག་ཅར་དུ་མི་སྤོང་བར་ཐལ། འདོད་པའི་ཕྱིར། འདོད་མི་ནུས་ཏེ། ཀུན་ལས་བཏུས་ལས། དེས་བྱང་ཆུབ་ཐོབ་པ་ན་ཅིག་ཅར་ཉོན་མོངས་པ་དང་ཤེས་བྱའི་སྒྲིབ་པ་སྤོང་། ཅིག་ཅར་དགྲ་བཅོམ་པ་དང་དེ་བཞིན་གཤེགས་པར་འགྱུར་རོ། །དེས་ཉོན་མོངས་པ་མ་སྤངས་སུ་ཟིན་ཀྱང་། སྔགས་དང་སྨན་གྱིས་བསད་པའི་དུག་དང་། དཔེར་ན་སྤངས་པའི་དགྲ་བཅོམ་པ་ལྟར་ས་ཐམས་ཅད་དུ་ཉོན་མོངས་པའི་ཉེས་པ་མི་སྐྱེད་དོ། །ཞེས་གསུངས་པའི་ཕྱིར། གཞན་ཡང་། སྒོམ་སྤང་ཉོན་མོངས་མེད་པར་ཐལ། འདོད་པའི་ཕྱིར། འདོད་ན། འགྲེལ་ཆེན་ལས། དེ་བས་ན་ས་དང་པོའི་སྐད་ཅིག་མ་དང་པོ་ནི་མཐོང་བའི་ལམ་ཡིན་ནོ། །དེ་ལས་གཞན་སྐད་ཅིག་མ་གཉིས་པ་ལ་སོགས་པ་ནས་རྡོ་རྗེ་ལྟ་བུར་བརྗོད་པའི་བར་ཆད་མེད་པའི་ལམ་གང་ལས་དེ་མ་ཐག་སངས་རྒྱས་ཀྱི་ས་ཀུན་ཏུ་འོད་འཐོབ་པའི་བར་འདི་དག་ཐམས་ཅད་ནི་ཆོས་ཀྱི་དབྱིངས་མཆོག་གི་དོན་ལ་སོགས་པ་སོ་སོར་རྟོགས་པའི་ཕྱིར་སྒོམ་པའི་ལམ་ཡིན་པར་བཤད་དོ། །དེ་ལ་ཡང་ཉོན་མོངས་པ་དྲུག་ཅི་རིགས་པར་སྤོང་ངོ་། །འདི་ལྟ་སྟེ། འདོད་ཆགས་དང་། ཞེ་སྡང་དང་། ང་རྒྱལ་དང་། མ་རིག་པ་དང་། འཇིག་ཚོགས་ལ་ལྟ་བ་དང་། མཐར་འཛིན་པར་ལྟ་བ་
སྟེ་འདོད་པ་སྤྱོད་པ་དྲུག་གོ །དེ་དག་ཉིད་ལས་ཞེ་སྡང་བོར་ཏེ་གཟུགས་དང་གཟུགས་མེད་པ་ན་སྤྱོད་པ་བཅུ་ཡིན་ནོ། །མཐོང་བ་དང་སྒོམ་པའི་ལམ་ལ་ཡོངས་སུ་སྦྱོང་བའི་ཆོས་ཀྱི་དབྱེ་བས་རབ་ཏུ་དགའ་བ་ལ་སོགས་པའི་ས་བཅུར་རྣམ་པར་བཞག་གོ །ཞེས་གསུངས་པ་མི་འཐད་པར་ཐལ་ལོ། །གཞན་ཡང་། ས་དང་པོར་གང་ཟག་གི་བདག་འཛིན་དང་། གཟུང་བ་ཕྱི་རོལ་དོན་དུ་འཛིན་པའི་རྟོག་པའི་ས་བོན་སྤངས་པས་ཁྱད་པར་དུ་བྱས་པའི་གང་ཟག་གི་བདག་མེད་རྟོགས་པ་དང་། གཟུང་བ་ཕྱི་རོལ་དོན་གྱིས་སྟོང་པར་རྟོགས་པའི་རྟོགས་རིགས་རྫོགས་པར་ཐལ། ས་དང་པོར་ཉན་རང་གི་སྤངས་རྟོགས་ཀྱི་རིགས་རྫོགས་པའི་ཕྱིར། འདོད་ན། མི་འཐད་པར་ཐལ། དམན་ལམ་སྔོན་མ་སོང་གི་བྱང་སེམས་འཕགས་པས་ཉན་རང་གི་སྤངས་རྟོགས་ཀྱི་རིགས་རྫོགས་པ་དང་སངས་རྒྱས་པ་དུས་མཉམ་དུ་འབྱུང་བའི་ཕྱིར། དེར་ཐལ། རྟོགས་པའི་ཚད་འདི་ཙམ་མ་ཡིན་ནོ་ཞེས་བྱ་བ་ནི་རྣམ་གྲངས་གཞན་ཡིན་ནོ། །ཞེས་གསུངས་པའི་ཕྱིར། ཁ་ཅིག །གློ་བུར་དྲི་བྲལ་གྱི་ཆོས་ཉིད་དེ་འདིར་བསྟན་ཡང་དག་མཐའ་དང་། དེ་ཐོབ་པ་འདིར་བསྟན་ཡང་དག་མཐའ་མངོན་དུ་བྱས་པའི་ཚད་ཡིན་ཟེར་ན། དེ་ཆོས་ཅན། དམན་ལམ་སྔོན་མ་སོང་གི་བྱང་འཕགས་ཀྱིས་རྫོགས་སྨིནསྦྱང་གསུམ་མ་བྱས་པར་ཁྱོད་མངོན་དུ་བྱེད་ནུས་པར་ཐལ། འདིར་བསྟན་ཡང་དག་མཐའ་ཡིན་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །དེ་བཞིན་ཉིད་འདིར་བསྟན་ཡང་དག་མཐའ་དང་། དེ་ལས་སླར་མི་ལྡང་བའི་ཚུལ་གྱིས་མཉམ་པར་བཞག་པ་དེ། དེ་མངོན་དུ་བྱས་པའི་ཚད་ཡིན་ཟེར་ན། ཆོས་གསུམ་མ་རྫོགས་པར་དེ་བཞིན་ཉིད་ལས་སླར་མི་ལྡང་པའི་ཚུལ་གྱིས་མཉམ་པར་
བཞག་པའི་གང་ཟག་ཡོད་པར་ཐལ། དམ་བཅའ་འཐད་པའི་ཕྱིར། འདོད་མི་ནུས་ཏེ། ས་དེ་ལ་དེ་ལྟར་མཉམ་པར་བཞག་པའི་སེམས་ཅན་མེད་པའི་ཕྱིར། བྱས་པ་ལ་ཁོ་ན་རེ། དེ་ཡོད་པར་ཐལ། བྱང་སེམས་རྒྱུན་མཐའ་པ་དེ་ཡིན་པའི་ཕྱིར། དེར་ཐལ། དེ་དེ་བཞིན་ཉིད་ལ་མཉམ་པར་བཞག་པ་ལས་ལྡང་མི་སྲིད་པའི་ཕྱིར་ན་མ་ཁྱབ། ཁ་ཅིག །ཉོན་སྒྲིབ་སྤངས་པའི་སྤངས་པ་དེ་ཉན་ཐོས་ཀྱི་ལམ་གང་ཡིན་པ་དང་ཞེས་པའི་སྐབས་ནས་བསྟན་པའི་འདིར་བསྟན་ཡང་དག་མཐའ་དང་། གཟུགས་ཕྱི་རོལ་དོན་འཛིན་གྱི་རྟོག་པ་སྤངས་པའི་སྤངས་པ་དེ། རང་སངས་རྒྱས་ཀྱི་ལམ་གང་ཡིན་པ་དང་། ཞེས་པའི་སྐབས་ནས་བསྟན་པའི་འདིར་བསྟན་ཡང་དག་མཐའ་དང་། ཤེས་སྒྲིབ་སྤངས་པའི་སྤངས་པ་དེ་སངས་རྒྱས་ཀྱི་ལམ་གང་ཡིན་པ་དང་ཞེས་པའི་སྐབས་ནས་བསྟན་པའི་འདིར་བསྟན་ཡང་དག་མཐའ་ཡིན་ཟེར་ན། མི་འཐད་པར་ཐལ། དེ་རྣམས་རེ་རེ་ནས་འདིར་བསྟན་ཡང་དག་མཐའ་མ་ཡིན་པའི་ཕྱིར། དེར་ཐལ། གང་ཟག་གི་བདག་འཛིན་སྤངས་པའི་སྤངས་པ་དེ་འདིར་བསྟན་ཡང་དག་མཐའ་མ་ཡིན་པའི་ཕྱིར། དེར་ཐལ། འདིར་བསྟན་ཡང་དག་མཐའ་ཡིན་ན། རང་ཉིད་མངོན་དུ་བྱས་པའི་ཐེག་དམན་ལྷག་བཅས་པ་མེད་དགོས། ཆོས་གསུམ་མ་རྫོགས་པར་གང་ཟག་གི་བདག་འཛིན་སྤངས་པའི་སྤངས་པ་མངོན་དུ་བྱས་པའི་གང་ཟག་ཡོད་པའི་ཕྱིར། ཕྱི་མ་དེར་ཐལ། ལྷག་བཅས་མྱང་འདས་ལ་གནས་པའི་ཉན་ཐོས་དེ་དེ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཆོས་གསུམ་མ་རྫོགས་པར་གང་ཟག་གི་བདག་འཛིན་སྤངས་པའི་སྤངས་པ་མངོན་དུ་བྱས་པའི་གང་ཟག་ཡིན་
པར་ཐལ། ཁྱོད་གང་ཟག་གི་བདག་འཛིན་སྤངས་པའི་སྤངས་པ་མངོན་དུ་བྱས་པའི་གང་ཟག་གང་ཞིག །ཁྱོད་ཆོས་གསུམ་མ་རྫོགས་པའི་གང་ཟག་ཡིན་པའི་ཕྱིར། དང་པོ་དེར་ཐལ། ཁྱོད་ཉོན་སྒྲིབ་སྤངས་པའི་སྤངས་པ་མངོན་དུ་བྱས་པའི་གང་ཟག་ཡིན་པའི་ཕྱིར་ཏེ། ཁྱོད་དགྲ་བཅོམ་པ་ཡིན་པའི་ཕྱིར། རྩ་བར་འདོད་མི་ནུས་ཏེ། ཁྱོད་ཐེག་དམན་ལྷག་བཅས་པ་ཡིན་པའི་ཕྱིར། དེ་འདྲའི་གང་ཟག་ཆོས་ཅན། ཁྱོད་དེ་མངོན་དུ་བྱས་པའི་གང་ཟག་ཡིན་པར་ཐལ། རང་གིས་མངོན་དུ་བྱས་པའི་དེ་མངོན་དུ་བྱས་པའི་གང་ཟག་ཡིན་པའི་ཕྱིར། དེར་ཐལ། རང་གིས་མངོན་དུ་བྱས་པའི་དེ་ཡོད་པའི་ཕྱིར། དེར་ཐལ། རང་གིས་མངོན་དུ་བྱས་པ་དང་དེའི་གཞི་མཐུན་ཡོད་པའི་ཕྱིར། དེར་ཐལ། གང་ཟག་གི་བདག་འཛིན་སྤངས་པའི་སྤངས་པ་དེ་དེ་ཡིན་པའི་ཕྱིར། ཡང་ཁ་ཅིག །ཆད་པའི་མྱང་འདས་དེ་འདིར་བསྟན་ཡང་དག་མཐའ་ཡིན་ཟེར་ན། དམན་ལམ་སྔོན་མ་སོང་གི་བྱང་འཕགས་དེས་རྫོགས་སྨིན་སྦྱང་གསུམ་བྱས་ནས་ཁྱོད་མངོན་དུ་བྱེད་ནུས་པར་ཐལ། རྟགས་དེའི་ཕྱིར། གཉིས་པ་རང་ལུགས་ནི། གང་ཟག་གི་བདག་མེད་རྟོགས་པའི་ཡེ་ཤེས། གཟུང་འཛིན་རྫས་གཞན་གྱིས་སྟོངས་པར་རྟོགས་པའི་ཡེ་ཤེས། ཆོས་ཐམས་ཅད་བདེན་མེད་དུ་རྟོགས་པའི་ཡེ་ཤེས་གསུམ་རིམ་པ་བཞིན། འདིར་བསྟན་ཤེས་བྱ་ཉན་ཐོས་ཀྱི་ལམ་སོགས་སུ་འཇོག །སྐབས་འདིར་སྤྱིར་བཏང་དམིགས་བསལ་ཞེས་པ་ཡང་། ཟས་མ་ཞུ་བའི་བར་དུ་སྨན་མི་བཟའོ་ཞེས་སྤྱིར་བཏང་བ་ན། ཟས་ཞུ་ནས་སྨན་ཟ་བ་དོན་གྱིས་གོ་བ་ལྟར་རྫོགས་སྨིན་སྦྱང་གསུམ་མ་བྱས་བར་དུ་འདིར་བསྟན་ཡང་དག་མཐའ་མངོན་དུ་མི་བྱའོ་ཞེས་བརྗོད་པ་ན་
རྫོགས་སྨིན་སྦྱང་གསུམ་བྱས་རྗེས་སུ་འདིར་བསྟན་ཡང་དག་མཐའ་མངོན་དུ་བྱེད་པ་གོ་ནུས་པའི་ཚིག་གཅིག་ཉིད་ཀྱི་དངོས་ཤུགས་ཀྱི་དོན་ལ་སྤྱིར་བཏང་དང་དམིགས་བསལ་མི་བྱེད་པར་ལམ་གྱི་བྱ་བ་ཡང་བྱ་ལ་ཞེས་པས་ལམ་གསུམ་གྱི་བྱ་བ་སྤྱིར་བཏང་ནས། འོ་ན། དུས་ཐམས་ཅད་དུ་ལམ་གྱི་བྱ་བ་མཐའ་དག་བྱའམ་ཞེ་ན་རྫོགས་སྨིན་སྦྱང་གསུམ་མ་བྱས་བར་དུ་འདིར་བསྟན་ཡང་དག་མཐའ་མངོན་དུ་མི་བྱའོ་ཞེས་དམིགས་ཀྱིས་བསལ་བ་ཡིན་ནོ། །ལོངས་སྐུའི་ཞིང་ཁྱད་པར་ཅན་གྱི་གདུལ་བྱའི་ཆེད་དུ་གདམས་པའི་སྨོན་ལམ་གྱི་རྒྱུའི་དགེ་བའི་རྩ་བའི་ནུས་པ་ཡོངས་སུ་རྫོགས་པ་དེ་ལོངས་སྐུའི་ཞིང་ཁྱད་པར་ཅན་གྱི་གདུལ་བྱའི་ཆེད་དུ་གདམས་པའི་སྨོན་ལམ་ཡོངས་སུ་རྫོགས་པའི་ཚད་སྤྲུལ་སྐུ་ལ་ཡང་ལོངས་སྐུ་ཁ་སྤོས་ནས་སྔར་བཞིན་དེའི་སྨོན་ལམ་རྫོགས་ཚད་དང་། ཞིང་བྱེ་བ་ཕྲག་བརྒྱར་སྐུའི་བཀོད་པ་གྲངས་དེ་སྙེད་རེ་རེའི་འཁོར་དུ་སེམས་ཅན་གྲངས་ལས་འདས་པ་ལ་ཆོས་ཚིགས་སུ་བཅད་པ་རེ་རེ་བསྟན་པ་ལ་བརྟེན་ནས་སྨིན་གྲོལ་གྱི་ལམ་ལ་འགོད་ནུས་པའི་རྒྱུའི་དགེ་བའི་རྩ་བ་ཡོངས་སུ་རྫོགས་པ་བསགས་ཟིན་པ་དེ་སེམས་ཅན་ཡོངས་སུ་སྨིན་པའི་ཚད་ཡིན་ལ། སྤྱིར་སེམས་ཅན་སྨིན་པའི་ཚད་ནི། དཔེར་ན་རྣག་སྨིན་པ་བརྟོལ་བས་ཆོག་པ་ལྟར། སེམས་ཅན་དེའི་རྒྱུད་ཀྱི་མཐོང་སྤང་དངོས་སུ་སྤང་རུང་དུ་བྱས་པ་དང་། ཤིང་ཐོག་སྨིན་པ་ལོངས་སྤྱད་དུ་རུང་བ་ལྟར་སེམས་ཅན་དེའི་རྒྱུད་ལ་གཉེན་པོ་མཐོང་ལམ་དངོས་སུ་སྐྱེ་རུང་དུ་བྱས་པ་དེ་སེམས་ཅན་སྨིན་པའི་ཚད་ཡིན་ཏེ། མདོ་སྡེ་རྒྱན་ལས། ཇི་ལྟར་རྨ་དང་ཟས་ལ་དེ་དག་གིས། །ཟས་དང་སྤྱད་དུ་རུང་བ་སྨིན་འདོད་ལྟར། །དེ་བཞིན་རྟེན་འདིར་ཕྱོགས་
གཉིས་ཞི་བ་དང་། །ལོངས་སུ་སྤྱད་པ་སྨིན་པ་ཉིད་དུ་འདོད། །ཅེས་གསུངས་པའི་ཕྱིར། རང་གང་དུ་འཚང་རྒྱ་འགྱུར་གྱི་ལོངས་སྤྲུལ་གྱི་ཞིང་ཁྱད་པར་ཅན་འགྲུབ་པའི་དགེ་བའི་རྩ་བའི་ནུས་པ་ཡོངས་སུ་རྫོགས་པ་བསགས་ཟིན་པ་དེ་སངས་རྒྱས་ཀྱི་ཞིང་སྦྱངས་པའི་ཚད་ཡིན། དམན་ལམ་སྔོན་དུ་མ་སོང་བའི་བྱང་སེམས་འཕགས་པ་རྣམས་ཉན་རང་གི་སྤངས་རྟོགས་ཀྱི་རིགས་རྫོགས་པ་དང་སངས་རྒྱས་པ་དུས་མཉམ་པ་ཡིན་ཏེ། དེས་གང་ཟག་གི་བདག་འཛིན་སྤངས་པའི་སྤངས་པའི་རིགས་རྫོགས་པ་དང་། སྤངས་པ་དེས་ཁྱད་པར་དུ་བྱས་པའི་གང་ཟག་གི་བདག་མེད་རྟོགས་པའི་རྟོགས་རིགས་རྫོགས་པ་དང་། གཟུགས་ཕྱི་རོལ་དོན་འཛིན་གྱི་རྟོག་པ་སྤངས་པའི་སྤངས་པའི་རིགས་རྫོགས་པ་དང་། སྤངས་པ་དེས་ཁྱད་པར་དུ་བྱས་པའི་གཟུགས་ཕྱི་རོལ་དོན་གྱིས་སྟོང་པར་རྟོགས་པའི་རྟོགས་རིགས་རྫོགས་པ་རྣམས་དུས་མཉམ་པའི་ཕྱིར། ཐེག་དམན་ལྷག་མེད་པས་རང་གི་བསམ་ངོ་ལ་ལྟོས་དེ་ཁྱབ་པ་འདུ་བྱེད་ཀྱི་སྡུག་བསྔལ་ཉེར་བཞི་ལས་སླར་མི་ལྡང་བའི་ཚུལ་གྱིས་མཉམ་པར་བཞག་པ་དེ་ཐེག་དམན་གྱི་དབང་དུ་བྱས་པའི་དེ་མངོན་དུ་བྱས་པའི་ཚད་དང་། སངས་འཕགས་ཀྱིས་དེ་ལས་སླར་མི་ལྡང་བའི་ཚུལ་གྱིས་མཉམ་པར་བཞག་པ་དེ་ཐེག་ཆེན་གྱི་དབང་དུ་བྱས་པའི་དེ་མངོན་དུ་བྱས་པའི་ཚད་ཡིན་ནོ། །གསུམ་པ་རྩོད་པ་སྤོང་པ་ལ། ཁོ་ན་རེ། དམན་ལམ་སྔོན་མ་སོང་གི་བྱང་སེམས་ཡིན་ན། ཉན་རང་གི་སྤངས་རྟོགས་ཀྱི་རིགས་རྫོགས་པ་དང་། སངས་རྒྱས་པ་དུས་མཉམ་པས་ཁྱབ་པར་ཐལ། དེ་དུས་མཉམ་པའི་ཕྱིར་ན་མ་ཁྱབ། འོ་ན། དམན་ལམ་སྔོན་མ་སོང་གི་བྱང་སེམས་ཐེག་དམན་
ལམ་དུ་ཞུགས་པ་མེད་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་ཐེག་དམན་དགྲ་བཅོམ་པར་གྱུར་པ་ཡོད་པའི་ཕྱིར། ཡང་ཁ་ཅིག །དམན་ལམ་སྔོན་མ་སོང་གི་བྱང་སེམས་ཉན་རང་གི་སྤངས་རྟོགས་རྫོགས་པ་དང་སངས་རྒྱས་པ་དུས་མཉམ་ཟེར་ན། མི་འཐད་པར་ཐལ། སངས་རྒྱས་ཀྱི་སར་ཉན་རང་གི་སྤངས་རྟོགས་མེད་པའི་ཕྱིར། དེར་ཐལ། སངས་རྒྱས་སར་དང་པོ་མེད་པ་གང་ཞིག །ཕྱི་མ་མེད་པའི་ཕྱིར། དང་པོ་དེར་ཐལ། དེར་ཉན་རང་གི་འགོག་བདེན་མེད་པའི་ཕྱིར། གཉིས་པ་དེར་ཐལ། དེར་ཉན་རང་གི་ལམ་བདེན་མེད་པའི་ཕྱིར། ཡང་ཁ་ཅིག །བག་ལ་ཉལ་གྱི་ཉོན་སྒྲིབ་ཉོན་སྒྲིབ་ཡིན་ཡང་། ཉོན་སྒྲིབ་ཀྱི་བག་ལ་ཉལ་ཤེས་སྒྲིབ་ཏུ་བྱེད་པ་ཡིན་ཟེར་ན། དེ་མི་འཐད་པར་ཐལ། དེ་ཤེས་སྒྲིབ་ཡིན་ན་ཅིག་ཤོས་ཀྱང་ཤེས་སྒྲིབ་ཡིན་དགོས་པའི་ཕྱིར། བྱས་པ་ལ་ཁོ་ན་རེ། མ་རིག་བག་ཆགས་ཀྱི་ས་དང་ཟག་མེད་ཀྱི་ལས་ལ་བརྟེན་ནས་ཡིད་ཀྱི་རང་བཞིན་གྱི་ལུས་ལེན་ཚུལ་ཇི་ལྟ་བུ་ཞེ་ན། ཡོད་དེ། ཉན་རང་ལྷག་མེད་པ་དང་དག་ས་ལ་གནས་པའི་སེམས་དཔའི་རྒྱུད་ཀྱི་གནས་ངན་ལེན་གྱི་དྲི་མ་ཕྲ་མོ་དེ་མ་རིག་བག་ཆགས་ཀྱི་ས་དང་། དེ་རྣམས་ཀྱི་རྒྱུད་ཀྱི་ཡིད་ལུས་ལེན་པར་འདོད་པའི་ཀུན་སློང་གི་རྩོལ་བ་ཕྲ་མོར་གྱུར་པའི་སེམས་བྱུང་སེམས་པ་དེ་ཟག་མེད་ཀྱི་ལས་ཡིན་པའི་ཕྱིར། བྱས་པ་ལ་ཁོ་ན་རེ། ཟག་མེད་ཀྱི་ལས་མ་ཡིན་པར་ཐལ། དེ་ཟག་བཅས་ཀྱི་ལས་ཡིན་པའི་ཕྱིར། དེར་ཐལ། ཟག་བཅས་གང་ཞིག །ལས་ཡིན་པའི་ཕྱིར། དང་པོ་དེར་ཐལ། ཤེས་སྒྲིབ་ཀྱི་ཟག་པ་དང་བཅས་པའི་ཕྱིར། ཟེར་ན། ཉན་ཐོས་དགྲ་བཅོམ་པའི་རྒྱུད་ཀྱི་ཟག་མེད་ཀྱི་མངོན་ཤེས་ཆོས་ཅན། ཟག་མེད་ཀྱི་མངོན་ཤེས་མ་ཡིན་པར་ཐལ། ཟག་བཅས་ཀྱི་མངོན་
ཤེས་ཡིན་པའི་ཕྱིར། དེར་ཐལ། ཟག་བཅས་གང་ཞིག །མངོན་ཤེས་ཡིན་པའི་ཕྱིར། དང་པོ་དེར་ཐལ། ཤེས་སྒྲིབ་ཀྱི་ཟག་པ་དང་བཅས་པའི་ཕྱིར། ཁྱབ་པ་འགྲིག །ཡང་ཁོ་ན་རེ། གང་ཟག་གི་བདག་འཛིན་སྤངས་པའི་སྤངས་པ་དེ་འདིར་བསྟན་ཡང་དག་མཐའ་ཡིན་པར་ཐལ། དེ་གང་ཟག་བདག་མེད་པའི་མཐའ་ཞི་བ་ཉིད་ཅེས་པའི་སྐབས་ནས་བསྟན་པའི་དེ་ཁོ་ན་ཉིད་ཡིན་པའི་ཕྱིར། ཁྱབ་པ་ཡོད་དེ། འདིར་བསྟན་ཡང་དག་མཐའ་ངོས་འཛིན་དུ་ཆོས་ཀྱི་བཤེས་གཉེན་གྱི་བཤད་ལ། ཊཱི་ཀྐར་བདེན་ཁ་ཡོད་པའི་ཕྱིར་ན་སྐྱོན་མེད་དེ། གང་ཟག་གི་བདག་འཛིན་སྤངས་པས་ཁྱད་པར་དུ་བྱས་པའི་ཁྱབ་པ་འདུ་བྱེད་ཀྱི་སྡུག་བསྔལ་ཉེ་བར་ཞི་བའི་ཉེར་བཞི་དེ་འདིར་བསྟན་ཡང་དག་མཐའ་ཡིན་པ་ཞི་བ་ཞེས་པའི་ཚིག་གི་ནུས་པ་ལ་དགོངས་པའི་ཕྱིར། ཡང་ཁོ་ན་རེ། ཐེག་དམན་ལྷག་མེད་པ་ཡིན་ན་རང་གི་བསམ་ངོ་ལ་ལྟོས་ཏེ་ཁྱབ་པ་འདུ་བྱེད་ཀྱི་སྡུག་བསྔལ་ཉེ་བར་ཞི་བའི་ཉེར་ཞི་ལས་སླར་མི་ལྡང་བའི་ཚུལ་གྱིས་མཉམ་པར་བཞག་པས་ཁྱབ་པར་ཐལ། དེ་དེའི་ཚད་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། དེ་ཡིན་ན་དེ་ལ་གནས་པས་མ་ཁྱབ་པའི་ཕྱིར། རྗེས་ཐོབ་ལ་གནས་པའི་དེ་ཡོད་པའི་ཕྱིར་ཏེ། ཁ་ཅིག །ཐེག་ཆེན་གྱི་རྟེན་ལ་འདིར་བསྟན་ཡང་དག་མཐའ་མངོན་དུ་བྱས་པའི་གང་ཟག་ཡིན་ན། ཐེག་ཆེན་གྱི་དབང་དུ་བྱས་པའི་དེ་མངོན་དུ་བྱས་པས་ཁྱབ་པར་ཐལ། ཁྱོད་ཀྱིས་ཐེག་ཆེན་གྱི་དབང་དུ་བྱས་ནས་དེའི་ཚད་དེ་འཐད་པའི་ཕྱིར་ན་མ་ཁྱབ། འོ་ན། ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པ་བྱང་སེམས་ཀྱི་ཚོགས་ལམ་དུ་ཞུགས་པའི་རྟེན་ལ་རྣམ་སྨིན་གྱི་ཕུང་པོ་བོར་བ་མེད་པར་ཐལ། འདོད་པའི་ཕྱིར། འདོད་མི་ནུས་སོ། །ཡང་ཁ་ཅིག །ཆོས་གསུམ་མ་རྫོགས་
པར་འདིར་བསྟན་ཡང་དག་མཐའ་མངོན་དུ་མི་བྱའོ་ཞེས་གདམས་པའི་ཡུལ་གྱི་གདུལ་བྱ་ལ་གཙོ་བོ་ཐེག་ཆེན་གྱི་རིགས་ངེས་དང་། ཕལ་པ་ཐེག་དམན་པ་ཐེག་ཆེན་ཙམ་དུ་ཞུགས་པ་ཡོད་པ་ལ་བསམས་ཏེ། འདིར་བསྟན་གདམས་དོན་གཙོ་བོར་གྱུར་པའི་ཡང་དག་མཐའ་དང་། འདིར་བསྟན་གདམས་དོན་ཕལ་པར་གྱུར་པའི་ཡང་དག་མཐའ་གཉིས་སུ་དབྱེ་ཟེར་ན། མི་འཐད་པར་ཐལ། གདམས་ངག་འདི་གཙོ་ཕལ་གཉིས་ཀ་ལ་གདམས་པའི་ཕྱིར་རོ། །དེ་ལྟར་ཚུལ་འདི་ཤིན་ཏུ་རྟོགས་དཀའ་བས་ཞིབ་ཏུ་དཔྱད་དགོས་པར་མཁས་པ་ཕལ་ཆེར་གསུང་བས་ན་མཐའ་དཔྱོད་ཀྱི་རིམ་པ་མང་དུ་སྤྲོས་ཚེ། ཚིག་གི་ཁུར་པོས་ཧ་ཅང་གནོན་པས་འཇིགས་པར་གྱུར་ལ། ཉུང་ངུ་ཞིག་གིས་དངོས་བསྟན་གྱི་དོན་ཙམ་ལས་མཐའ་ཐམས་ཅད་ཆོད་པར་དཀའ་བས། བློ་གསལ་རྣམས་ཀྱིས་ཆོས་རབ་ཏུ་རྣམ་པར་འབྱེད་པའི་ཤེས་རབ་ཀྱིས་ཡང་ནས་ཡང་དུ་དཔྱོད་པ་གནད་དུ་ཆེའོ། །སྨྲས་པ། མཁས་མང་དགོངས་དོན་དབྱིངས་འཛིན་ལུས་ཕྲའི་ལྟོར། །རྟོགས་དཀའི་སྦས་དོན་གཞུང་གི་རྐང་འཐུང་འཕྲེང་། །ཕྲ་ཞིབ་རིགས་པའི་ལོ་མའི་ཕང་ཕུང་དེས། །བློ་དམན་དོན་གྱི་འབྲས་བུ་ལྟ་ལ་སྒྲིབ། །འོན་ཀྱང་མི་དམན་སྦྱངས་པའི་སྟོབས་རྒྱས་ཤིང་། །ཤེས་རབ་འཕྲུལ་གྱི་འཁོར་ལོ་འདེགས་ཤེས་པའི། །དཔྱོད་ལྡན་ཤེས་བྱའི་ས་ལ་ཐོགས་མེད་དུ། །བགྲོད་ཚེ་ཉིན་བྱེད་ཕྱི་ལ་བསྙེག་ཕྱིར་བྲེལ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །
དགོས་སོགས་ཆོས་བཞི་བཤད་པ།
གསུམ་པ་རྣམ་མཁྱེན་གྱིས་སངས་འཕགས་ཀྱི་མངོན་རྟོགས་བསྡུས་ཚུལ་ལ། དྲི་བ་དང་། ལན་
གཉིས་ལས། དང་པོ་ནི། ཤེས་བྱ་ཆོས་ཅན། རྣམ་པ་ཐམས་ཅད་མཁྱེན་པ་སོགས་ལས་བརྩམས་ཏེ་དྲི་བ་ཞུས་ཚུལ་ཡོད་དེ། བཅོམ་ལྡན་འདས་རྒྱུ་མཚན་དང་དགོས་པ་ཅིའི་སླད་དུ་རྣམ་པ་ཐམས་ཅད་མཁྱེན་པ་ཉིད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མངོན་རྟོགས་སུ་གསུངས་པ་ལགས། ཞེས་ཞུས་པའི་ཕྱིར། གཉིས་པ་ནི། ཤེས་བྱ་ཆོས་ཅན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་མངོན་རྟོགས་ནི་རྣམ་པ་ཐམས་ཅད་མཁྱེན་པ་ཉིད་ཅེས་བྱ་བ་སྟེ། རབ་འབྱོར། རྣམ་པ་ངོ་བོ་གང་དག་དང་། རྟགས་འབྲས་བུ་གང་དག་དང་། མཚན་མ་རྒྱུ་གང་དག་གིས་གཟུགས་ནས་རྣམ་མཁྱེན་གྱི་བར་གྱི་ཆོས་རྣམས་རབ་ཏུ་བརྗོད་ཅིང་། ཐ་སྙད་འདོགས་པའི་རྣམ་པ་སྔར་བཤད་པ་ལྟར་ངོ་བོ་སོགས་དེ་དག་དང་། རྟགས་དེ་དག་དང་། མཚན་མ་དེ་དག་དེ་བཞིན་གཤེགས་པས་ཐུགས་སུ་ཆུད་པ་དེའི་ཕྱིར། གཉིས་པ་བསྡུས་པའི་ཤེས་བྱེད་ཁ་འཕངས་པ་ནི། ཤེས་བྱ་ཆོས་ཅན། ཡུམ་བར་པ་ལས། མཁྱེན་གསུམ་གྱིས་འཕགས་བཞིའི་མངོན་རྟོགས་བསྡུས་ཚུལ་གསུངས་པ་དེ་བཞིན་དུ་མདོར་བསྡུས་པ་བརྒྱད་སྟོང་པ་ལས་ཀྱང་གསུངས་ཏེ། དེ་ལས་ཉན་ཐོས་ཀྱི་ས་ལ་སློབ་པར་འདོད་པ་རྣམས་ཀྱིས་ཀྱང་ཡུམ་ལ་བསླབ་ཅེས་བྱ་བ་ལ་སོགས་པ་གསུངས་པའི་ཕྱིར། རྒྱས་པའི་ཤེས་བྱེད་ཁ་འཕངས་པ་ནི། ཤེས་བྱ་ཆོས་ཅན། དེ་གཉིས་སུ་ཟད། རྒྱས་པ་ལས་ཀྱང་གསུངས་ཏེ། རྒྱུན་དུ་ཞུགས་པའི་ས་ལ་སློབ་པར་འདོད་པས་ཀྱང་ཞེས་སོགས་རྒྱ་ཆེར་གསུངས་པའི་ཕྱིར། གསུམ་པ་ལུང་གི་དོན་བཤད་པ་ལ། དང་པོའི་དོན་བཤད་པ། གཉིས་པའི་དོན་བཤད་
པ། གསུམ་པའི་དོན་བཤད་པའོ། །དང་པོ་ནི། མཁྱེན་གསུམ་བསྟན་པ་དེ་ལ་སྟེ། དེའི་ནང་ནས་ཐམས་ཅད་ཤེས་པ་ཉིད་ནི་ཆོས་ཅན། ཁྱད་པར་གསུམ་དང་ལྡན་ཏེ། དམིགས་པ་གཟུགས་ལ་སོགས་པའི་ཆོས་ལ་དམིགས་ནས། རྣམ་པ་མི་རྟག་པ་ལ་སོགས་པའི་རྣམ་པ་བཅུ་དྲུག་གི་རྟེན་ཅན། བྲལ་བའི་འབྲས་བུ་གང་ཟག་གི་བདག་ཏུ་རྨོངས་པ་སྤངས་པ་ཅན་ཡིན་པའི་ཕྱིར། གཉིས་པ་ནི། ལམ་ཤེས་པ་ཉིད་ནི་ཆོས་ཅན། ཐབས་ཤེས་ཁྱད་པར་ཅན་དང་ལྡན་ཏེ། ཐེག་པ་གསུམ་པོ་ཐམས་ཅད་ཀྱི་ངེས་པར་འབྱུང་བའི་ཤེས་རབ་དང་། དུས་མ་ཡིན་པར་དེ་ཁོ་ན་ཉིད་མངོན་སུམ་དུ་མི་བྱེད་པའི་རྟེན་ཅན་གྱིས་ཐབས་དང་། སྐྱེས་བུ་བྱེད་པའི་འབྲས་བུ་སེམས་ཅན་འཁོར་དུ་མ་བསྡུས་པ་རྣམས་སྡུད་པ་དང་། ལ་སོགས་པས་བསྡུས་པ་རྣམས་སྨིན་གྲོལ་དུ་བྱེད་པ་ཅན་ཡིན་པའི་ཕྱིར། གསུམ་པ་ནི། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ནི་ཆོས་ཅན། དོན་གཉིས་མཐར་ཕྱིན་པ་ཡིན་ཏེ། དམིགས་པ་ཆོས་ཐམས་ཅད། རྣམ་པ་བདེན་པའི་སྐྱེ་བ་མེད་པར་རྟོགས་པའི་རྟེན་ཅན། འབྲས་བུ་གཞན་དོན་ནམ་མཁའི་ཁམས་ཀྱི་མཐས་གཏུགས་པར་སེམས་ཅན་ཐམས་ཅད་ཀྱི་དོན་རྒྱུན་མི་ཆད་པ་དང་། རང་དོན་ཡང་དག་པ་ཉིད་ཀྱི་མཐའ་སླར་མི་ལྡང་བའི་ཚུལ་གྱིས་མངོན་སུམ་དུ་རྟོགས་པ་དང་ཉོན་མོངས་པ་ཅན་མ་ཡིན་པའི་མ་རིག་པའི་བག་ཆགས་ཀྱིས་རིགས་འདྲ་ཕྱི་མ་མཚམས་སྦྱོར་བ་ཉིད་སྤངས་པ་ཅན་ཡིན་པའི་ཕྱིར། བཞི་པ་དོན་བསྡུ་བ་ནི། མཁྱེན་གསུམ་གྱིས་འཕགས་བཞིའི་མངོན་རྟོགས་མཐའ་དག་བསྡུས་པ་དེ་ལྟ་བས་ན་མངོན་པར་རྟོགས་པའི་རྒྱན་ནི་ཆོས་ཅན། ཁྱོད་ཀྱི་འཕགས་བཞིའི་མངོན་པར་རྟོགས་པ་རིལ་ཏེ། མ་ལུས་པ་རྫོགས་
པར་བསྟན་པ་ཡིན་ནོ། །ཞེས་བྱ་བ་འདི་འཐད་པ་ཡིན་ཏེ། ཁྱོད་ཀྱིས་གཞི་དང་གཉེན་པོ་དང་རྣམ་པ་ཐམས་ཅད་བརྗོད་བྱར་བསྡུས་པའི་ཕྱིར། གཉིས་པ་མདོ་དང་ཟློས་པའི་སྐྱོན་སྤངས་ནས་དགོས་པ་ཡོད་པར་སྒྲུབ་པ་ལ། མཚམས་སྦྱར་བ། རྩ་བ། འགྲེལ་པ་གསུམ། དང་པོ་ནི། ཤེས་བྱ་ཆོས་ཅན། རྗེ་བཙུན་གྱིས་རང་གི་བསྟན་བཅོས་ཀྱི་བརྗོད་པར་བྱ་བ་དང་། དགོས་པ་དང་། དགོས་པའི་ཡང་དགོས་པ་དང་། འབྲེལ་བ་ཁོངས་ན་ཡོད་པ་རྣམས་གསུངས་པ་ཡིན་ཏེ། ཤེར་ཕྱིན་དང་རྒྱན་གྱི་ཐུན་མོང་མ་ཡིན་པའི་དགོས་པའི་ཁྱད་པར་མི་ཤེས་པའི་སྐྱེ་བོ་བློ་གྲོས་དམན་པ་དག་གི་དོགས་པ་བསལ་བའི་ཕྱིར་དུ་ཡིན་པའི་ཕྱིར། ཇི་ལྟར་དྭོགས་ཚུལ་ཡོད་དེ། བཅོམ་ལྡན་འདས་འཕགས་པ་མ་རྒྱལ་བ་ལས་རྒྱལ་བས་ཡང་མངོན་རྟོགས་བརྒྱད་ཀྱི་རིམ་པ་དེ་བསྟན་པ་ལ་དགོས་པའི་དོན་ཅི་ཞིག་ཡོད་དམ་མེད་སྙམ་དུ་དོགས་པའི་ཕྱིར། ཤེས་བྱ་ཆོས་ཅན། ལོག་རྟོག་སྐྱེ་བའི་རྒྱུ་མཚན་ཡོད་དེ། བཅོམ་ལྡན་འདས། ཚིག་རྒྱས་པ་དང་། འབྲིང་དང་། མདོར་བསྡུས་པ་ལ་དད་པའི་སེམས་ཅན་ལ་ཕན་འདོགས་པར་བཞེད་པ་ཐུགས་རྗེ་ཅན་ཉིད་ཀྱིས་རྒྱལ་བའི་ཡུམ་གསུམ་པོ་དེ་དང་དེ་ལས་དོན་མངོན་པར་རྟོགས་པར་བརྒྱད་ཀྱི་རིམ་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་དོན་མཐའ་དག་གསལ་བར་མཛད་པ་མ་ཡིན་ནམ་སྟེ་ཡིན་པའི་ཕྱིར། ཤེས་བྱ་ཆོས་ཅན། དགོས་འབྲེལ་གྱི་ངག་བཀོད་པ་ལ་དགོས་པ་ཡོད་དེ། དེ་གདུལ་བྱ་བསྟན་བཅོས་ལ་འཇུག་པའི་ཐབས་ཀྱི་ཡན་ལག་ཡིན་པའི་ཕྱིར། དེ་ལ་བརྟེན་ནས་གདུལ་བྱ་བསྟན་བཅོས་ལ་འཇུག་པར་འགྱུར་ཏེ། ངག་འདི་ལ་བརྟེན་ནས་དགོས་པ་ཤས་ཆེར་ཡོད་སྙམ་པའི་དོན་ལ་ཐེ་ཚོམ་སྐྱེ་བ་ཉིད་ཀྱིས་འཇུག་པའི་ཕྱིར། གཉིས་པ་རྩ་བ་ལ། ཚིག་དོན་དང་། མཐའ་དཔྱད་པ་གཉིས།
དང་པོ་ནི། ཤེས་བྱ་ཆོས་ཅན། བསྟན་བཅོས་འདི་བརྩམས་པས་མདོ་དང་ཟློས་པའི་སྐྱོན་མེད་དེ། འདི་ལ་བརྟེན་ནས་མདོའི་དོན་བདེ་བླག་ཏུ་ནི་རྟོགས་པ་ཞེས་བྱ་བ་ནི་བསྟན་བཅོས་འདི་རྩོམ་པའི་དགོས་པ་ཡིན་པའི་ཕྱིར། ཤེས་བྱ་ཆོས་ཅན། མདོ་དོན་བདེ་བླག་ཏུ་རྟོགས་པ་ལ་དགོས་པ་ཡོད་དེ། དེ་ལ་བརྟེན་ནས་རྣམ་མཁྱེན་མཚོན་བྱེད་ཀྱི་སེམས་བསྐྱེད་སོགས་ཆོས་སྤྱོད་བཅུའི་བདག་ཉིད་ཀྱི་མདོ་དོན་བློ་གྲོས་དང་ལྡན་པའི་བྱང་ཆུབ་སེམས་དཔས་མངོན་སུམ་དུ་མཐོང་བར་འགྱུར་བའི་ཕྱིར། ཤེས་བྱ་ཆོས་ཅན། མདོ་དོན་འདི་མངོན་སུམ་དུ་ཐོབ་པའི་ཐབས་ཡོད་དེ། དེ་ཐོས་བསམ་གྱིས་དྲན་པའི་ལམ་བཞག་ནས་གོམས་པས་མངོན་དུ་འགྱུར་བའི་ཕྱིར། མངོན་རྟོགས་རྒྱན་ཆོས་ཅན། རྟོགས་པར་བྱ་བའི་དོན་ཁྱད་པར་ཅན་དང་ལྡན་ཏེ། རྣམ་པ་ཐམས་ཅད་མཁྱེན་པ་ཉིད་ཀྱིས་མངོན་སུམ་དུ་གཟིགས་ཤིང་། དེར་བགྲོད་པའི་ལམ་ཆོས་བཅུ་གནས་སྐབས་བརྒྱད་ཀྱིས་ཕྱེ་བ་སྟོན་པས། ཡུམ་གསུམ་པོ་འདི་ལས་བཤད་པ་གང་ཡིན་པ་དེ་བརྗོད་བྱར་གཏན་ལ་འབེབས་པའི་ཕྱིར། མངོན་པར་རྟོགས་པར་བརྒྱད་ཀྱི་རིམ་པ་དེ་ཆོས་ཅན། ཁྱོད་གང་ཟག་གང་ཡང་རུང་བས་རང་ལམ་དུ་རྫོགས་པར་ཉམས་སུ་མྱོང་བ་མ་ཡིན་ཏེ། ཕྱི་རོལ་པ་དང་ཉན་རང་སོགས་གཞན་གྱིས་མྱོང་བ་མ་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། ཁ་ཅིག །རྒྱན་གྱི་ཉིང་དགོས་ཡིན་ན། དེའི་ཉིང་དགོས་མཐར་ཐུག་ཡིན་པས་ཁྱབ་ཟེར་ན། རྒྱན་གྱི་ཆེད་དུ་བྱ་བའི་གདུལ་བྱས་རྒྱན་ལ་ཐོས་སོགས་ཀྱིས་ཞུགས་པ་ལ་བརྟེན་ནས་མཐར་ཐོབ་པའི་ས་བཅུའི་ཡེ་ཤེས་ཆོས་ཅན། དེར་ཐལ། དེའི་ཕྱིར། དེས་རྒྱན་ལ་
ཐོས་སོགས་ཀྱིས་ཞུགས་པ་དེ་གནས་སྐབས་ས་བཅུ་འཐོབ་པའི་ཆེད་དུ་ཡིན་པའི་ཕྱིར། ཁ་ཅིག །རྒྱན་གྱི་དགོས་འབྲེལ་ངག་གི་བརྗོད་བྱ་དང་། བསྟན་བཅོས་ལུས་ཀྱི་བརྗོད་བྱ་གཉིས་འགལ་ཟེར་ན། རྒྱས་འབྲིང་བསྡུས་གསུམ་གྱི་བརྗོད་བྱ་བསྟན་བཅོས་ལུས་ཀྱི་བརྗོད་བྱ་མ་ཡིན་པར་ཐལ། དགོས་འབྲེལ་ངག་གི་བརྗོད་བྱ་ཡིན་པའི་ཕྱིར། དེར་ཐལ། དེ་དགོས་འབྲེལ་ངག་དེས་རྒྱས་འབྲིང་བསྡུས་གསུམ་གྱི་ཚིག་དོན་རྣམས་མངོན་རྟོགས་རྒྱན་གྱི་བརྗོད་བྱར་གཏན་ལ་འབེབས་པའི་ཕྱིར། དེར་ཐལ། རྣམ་པ་ཐམས་ཅད་མཁྱེན་ཉིད་ལམ། །སྟོན་པས་འདི་ལས་བཤད་པ་གང་། །ཞེས་གསུངས་པའི་ཕྱིར། ཁ་ཅིག །རྒྱན་གྱི་དགོས་སོགས་ཀྱི་འབྲེལ་པ་ཡིན་ན། དེ་བྱུང་གི་འབྲེལ་བ་ཡིན་པས་ཁྱབ་ཟེར་ན། རྒྱན་གྱི་བརྗོད་བྱ་རྒྱན་ལ་འབྲེལ་བའི་འབྲེལ་བ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་འདྲའི་འབྲེལ་པ་གྲུབ་པའི་ཕྱིར། འདོད་མི་ནུས་ཏེ། འདུས་མ་བྱས་ཡིན་པའི་ཕྱིར། ཁ་ཅིག །མངོན་རྟོགས་རྒྱན་གྱི་དགོས་སོགས་ཀྱི་འབྲེལ་བ་ཡིན་ན་བདག་གཅིག་གི་འབྲེལ་བ་ཡིན་པས་ཁྱབ་ཟེར་ན། དེའི་ཆེད་དུ་བྱ་བའི་གདུལ་བྱས་དེ་ལ་བརྟེན་ནས་ཡུམ་གྱི་ཚིག་དོན་བདེ་བླག་ཏུ་རྟོགས་པའི་མཐུ་ལ་བརྟེན་ནས་མཐར་སྐྱེས་པའི་རྣམ་མཁྱེན་དེ་དེ་ལྟར་རྟོགས་པ་ལ་འབྲེལ་བ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། དེ་བྱུང་གི་འབྲེལ་བ་ཡིན་པའི་ཕྱིར། གཉིས་པ་རང་ལུགས་ལ། ངག་ཙམ་ལ་ཡོད་པའི་དགོས་སོགས་ཆོས་བཞི་ནི། དཔེར་ན། ཆོས་སྟོན་ཅིག་ཅེས་པ་ལྟ་བུའི་ངག་ལ་མཚོན་ན་ཆོས་སྟོན་པ་ངག་དེའི་བརྗོད་བྱ། དེ་ལ་བརྟེན་ནས་གཞན་གྱི་ཆོས་ཐོས་པ་ངག་དེའི་དགོས་པ། དེ་ལ་བརྟེན་ནས་མཐར་གདུལ་བྱའི་འདོད་དོན་གྲུབ་
པ་ངག་དེའི་ཉིང་དགོས། དེའི་ཉིང་དགོས་སུ་གྱུར་པའི་དངོས་པོ་དེའི་དགོས་པར་གྱུར་པའི་དངོས་པོ་ལ་འབྲེལ་བ་སོགས་ངག་དེའི་འབྲེལ་བ་ཡིན། དགོས་འབྲེལ་ངག་ལ་ཡོད་པའི་དགོས་སོགས་ཆོས་བཞི་ནི། བསྟན་བཅོས་ལུས་ཀྱི་དགོས་སོགས་ཆོས་བཞི་དགོས་འབྲེལ་ངག་གི་བརྗོད་བྱ། དེ་ལ་བརྟེན་ནས་གདུལ་བྱས་རྒྱན་ལ་དགོས་སོགས་ཆོས་བཞི་ཡོད་པར་རྟོགས་པ་དེ་དེའི་དགོས་པ། དེ་ལ་བརྟེན་ནས་གདུལ་བྱས་རྒྱན་ལ་ཐོས་བསམ་གྱིས་ཞུགས་པ་དེ་དེའི་ཉིང་དགོས། འབྲེལ་བ་ནི་སྔར་ལྟར། བསྟན་བཅོས་ལུས་ལ་ཡོད་པའི་དགོས་སོགས་ཆོས་བཞི་ནི། ཤེར་ཕྱིན་གྱི་མདོའི་སྦས་དོན་མངོན་རྟོགས་བརྒྱད་མཚོན་བྱེད་དོན་བདུན་བཅུ་དང་བཅས་པ་དེ་རྒྱན་གྱི་བརྗོད་བྱ། དེ་ལ་བརྟེན་ནས་གདུལ་བྱས་དེ་རྣམས་བདེ་བླག་ཏུ་རྟོགས་པ་རྒྱན་གྱི་དགོས་པ། དེ་ལ་བརྟེན་ནས་རྒྱན་གྱི་གདུལ་བྱས་མཐར་རྣམ་མཁྱེན་ཐོབ་པ་རྒྱན་གྱི་ཉིང་དགོས། འབྲེལ་བ་ནི་སྔར་དང་འདྲའོ། །གསུམ་པ་རྩོད་པ་སྤོང་པ་ལ། ཁ་ཅིག །རྒྱན་དུ་དགོས་འབྲེལ་གྱི་ངག་སྨོས་པ་ལ་དགོས་པ་མེད་པར་ཐལ། དགོས་འབྲེལ་ངག་གི་བརྗོད་བྱ་དང་བསྟན་བཅོས་ལུས་ཀྱི་བརྗོད་བྱ་ཡིན་ཁྱབ་མཉམ་ཡིན་པའི་ཕྱིར་ན་མ་ཁྱབ། འོ་ན། རྒྱན་གྱི་སྐབས་དང་པོ་ལས་ལོགས་སུ་སྐབས་གཉིས་པ་གསུངས་པ་ལ་དགོས་པ་མེད་པར་ཐལ། དེ་གཉིས་ཀྱི་བརྗོད་བྱ་ཡིན་ཁྱབ་མཉམ་ཡིན་པའི་ཕྱིར། ཁ་ཅིག་རྒྱས་འབྲིང་བསྡུས་གསུམ་གྱི་དོན་བདེ་བླག་ཏུ་རྟོགས་པ་དེ་རྒྱན་གྱི་དགོས་པ་ཡིན་པར་ཐལ། རྒྱན་གྱི་ཆེད་དུ་བྱ་བའི་གདུལ་བྱས་དེ་ལ་བརྟེན་ནས་རྒྱས་འབྲིང་བསྡུས་གསུམ་གྱི་དོན་བདེ་བླག་ཏུ་རྟོགས་པ་དེ་རྒྱན་གྱི་དགོས་པ་ཡིན་པའི་ཕྱིར་ན་མ་ཁྱབ། འདོད་ན།
དེ་རྒྱན་ལ་རག་ལས་པར་ཐལ། འདོད་པའི་ཕྱིར། འདོད་མི་ནུས་ཏེ། རྒྱན་མ་བརྩམས་པའི་སྔ་རོལ་ཏུ་དེ་ཡོད་པའི་ཕྱིར། གསུམ་པ་འགྲེལ་པ་འཆད་པ་ལ། དགོས་པ། ཉིང་དགོས། བརྗོད་བྱ་བཤད་པ་གསུམ། དང་པོ་ནི། ཤེས་བྱ་ཆོས་ཅན། བསྟན་བཅོས་འདི་བརྩམས་པ་ལ་དགོས་པ་ཡོད་དེ། རྒྱན་གྱི་ཆེད་དུ་བྱ་བའི་གདུལ་བྱ་རྣམས་ཀྱི་ཡུམ་དོན་བདེ་བླག་ཏུ་རྟོགས་པར་འགྱུར་བ་ནི་བསྟན་བཅོས་འདི་བརྩམས་པའི་དགོས་པ་ཡིན་པའི་ཕྱིར། ཤེས་བྱ་ཆོས་ཅན། གང་བདེ་བླག་ཏུ་རྟོགས་པ་ཡོད་དེ། ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་དོན། བྱང་ཆུབ་ཀྱི་སེམས་དང་། སྒྲུབ་པ་ལ་སོགས་པའི་མཚན་ཉིད་མཚོན་བྱེད་ཀྱི་ཆོས་བཅུ་བཞིར་བྱས་ནས་མངོན་པར་རྟོགས་པ་བརྒྱད་ཀྱི་རིམ་པར་ཕྱེ་བ་དེ་ཉིད་རྟོགས་པར་འགྱུར་བའི་ཕྱིར། གཉིས་པ་ནི། ཤེས་བྱ་ཆོས་ཅན། འདིའི་ཉིང་དགོས་མེད་པ་མ་ཡིན་ཏེ། དགོས་པའི་ཡང་དགོས་པའི་ཆེད་དུ་མངོན་པར་འདོད་པའི་དོན་ནི་ཉིང་དགོས་ཡིན་པའི་ཕྱིར། དེར་ཐལ། དགོས་པ་འདི་ལ་བརྟེན་ནས་ཆོས་ཀྱི་དབྱིངས་ཆོས་ཅན་ཐམས་ཅད་ལ་ཀུན་ཏུ་འགྲོ་བ་རྟོགས་པའི་མཚན་ཉིད་ས་རབ་ཏུ་དགའ་བ་དང་། ལ་སོགས་པ་གཉིས་པ་ནས་བཅུ་པའི་བར་རྣམས་རྟོགས་ཤིང་། ཐོབ་པའི་རིམ་པས་མངོན་རྟོགས་ཀྱི་རིམ་པ་མཐའ་དག་རྣམ་པ་ཐམས་ཅད་དུ་མངོན་སུམ་དུ་བྱེད་པར་འགྱུར་བ་ཞེས་བྱ་བ་འཐོབ་པའི་ཕྱིར། ཤེས་བྱ་ཆོས་ཅན། ཉིང་དགོས་མངོན་དུ་འགྱུར་བའི་ཐབས་ཡོད་དེ། ཡུམ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་དོན་མ་ལུས་པ་བྱང་ཆུབ་ཀྱི་སེམས་དང་སྦྱིན་པ་ལ་སོགས་པ་རྣམ་མཁྱེན་མཚོན་བྱེད་ཀྱི་ཆོས་བཅུ་པོ་སྤྱོད་པའི་རྟེན་སེམས་བསྐྱེད་དང་སྤྱོད་པ་ཉམས་སུ་ལེན་པའི་སྒྲུབ་པའི་སྤྱོད་པ། ཐོབ་བྱའི་འབྲས་བུ་བསྡུས་པ་རྣམས་ཐོས་བསམ་གྱིས་དྲན་པའི་ཤེས་པ་ལ་སོགས་པར་བཞག་ནས་
ཕྱིས་མངོན་དུ་བྱེད་པར་འགྱུར་བའི་ཕྱིར། དེ་ཆོས་ཅན། མངོན་པར་རྟོགས་པ་བརྒྱད་དུ་འབྱེད་པའི་རྒྱུ་མཚན་ཡོད་དེ། སྐབས་བརྒྱད་ཀྱི་གཏན་ལ་དབབ་བྱའི་གཙོ་བོའི་དབང་དུ་བྱས་ནས། མངོན་པར་རྟོགས་པ་བརྒྱད་ཀྱི་བདག་ཉིད་དུ་ཕྱེ་བའི་ཕྱིར། ཤེས་བྱ་ཆོས་ཅན། དྲན་ཤེས་ཀྱི་ཁྱད་པར་ཡོད་དེ། མངོན་པར་རྟོགས་པའི་རིམ་པ་རྣམས་ཐོས་དོན་ལ་རིགས་པས་བསམས་ནས། ཇི་ལྟར་འདོད་པར་ངེས་ཤེས་འདྲེན་ནུས་པས་ཉམས་སུ་མྱོང་བ་ཤིན་ཏུ་གསལ་བས་བཞག་པའི་བག་ཆགས་ལས་བྱུང་བའི་མི་བརྗེད་པའི་དྲན་པ་དང་། ཤེས་བཞིན་ནི་བྱར་བྱེད་པས་བློ་ལ་བྱེད་པའི་ཕྱིར། ཤེས་བྱ་ཆོས་ཅན། གང་གིས་ཐོག་མར་ཐོས་བསམ་གྱིས་ཉམས་སུ་མྱོང་ནས་མཐར་མངོན་དུ་བྱེད་ཚུལ་ཡོད་དེ། བྱང་ཆུབ་སེམས་དཔའ་རང་དང་གཞན་གྱི་དོན་ཕུན་སུམ་ཚོགས་པ་སྒྲུབ་པ་དེ་ལྟ་བུའི་ལམ་ལ་ངེས་པར་འཇུག་ཅིང་། གཞན་དྲིང་མི་འཇོག་པས་ན། ཅི་ལ་ཡང་མ་རག་པར་ཆས་ཤིང་བརྩམས་པ་དག་ཁོ་ནས་མྱོང་བར་འགྱུར་བའི་ཕྱིར། གསུམ་པ་བརྗོད་བྱ་ནི། རྒྱན་ཆོས་ཅན། ཁྱོད་ཀྱི་བརྗོད་བྱ་ཡོད་དེ། རྒྱལ་བའི་ཡུམ་རྣམ་པ་གསུམ་ཆར་ལས་བརྗོད་པར་བྱ་བ་ཉིད་དུ་བསྟན་པ་གང་ཡིན་པ་དེ། ཁྱོད་ཀྱི་བརྗོད་བྱ་ཡིན་པའི་ཕྱིར། ཤེས་བྱ་ཆོས་ཅན། དེ་འདྲའི་བརྗོད་བྱ་གང་ཟག་གིས་བསྟན་པ་ཡོད་དེ། བཅོམ་ལྡན་འདས། རྫུ་འཕྲུལ་གྱི་ཆོ་འཕྲུལ་དང་། ཐུགས་ཀུན་བརྗོད་པའི་ཆོ་འཕྲུལ་དང་། རྗེས་བསྟན་གྱི་ཆོ་འཕྲུལ་རྣམ་པ་གསུམ་གྱིས་འགྲོ་བ་རིགས་ཅན་གསུམ་མཐའ་དག་ལ་ཐེག་གསུམ་གྱི་ལམ་རྗེས་སུ་སྟོན་པར་མཛད་པ་དེ་ཉིད་ཀྱིས་བསྟན་པའི་ཕྱིར་རོ། །རྒྱན་ཆོས་ཅན། ཁྱོད་ཀྱི་བརྗོད་བྱ་ཁྱད་པར་ཅན་དང་ལྡན་ཏེ། ཁྱོད་ཀྱི་རྣམ་པ་ཐམས་ཅད་མཁྱེན་པ་ཉིད་ནི་གང་ཞིག་མངོན་སུམ་དུ་རྟོགས་པས་
རྣམ་མཁྱེན་དུ་འཇོག་པའི་སངས་རྒྱས་ཉིད་ཀྱི་ལམ་སེམས་བསྐྱེད་ནས་སྒྲུབ་པའི་བར་ཏེ། དེ་གཞིར་བཟུང་ནས་གནས་སྐབས་བརྒྱད་དུ་ཕྱེ་ནས་མངོན་པར་རྟོགས་པ་བརྒྱད་པོ་ཐམས་ཅད་ཉེ་བར་མཚོན་པ་ཆོས་བཅུ་སྟོན་པ་དེས་ལྷུར་ལེན་པ་ཡིན་པའི་ཕྱིར། རྒྱན་ཆོས་ཅན། ཁྱོད་ཀྱི་བརྗོད་བྱའི་ཁྱད་པར་ཡོད་དེ། སེང་གེ་དང་འཕྲོག་བྱེད་སོགས་ཀྱི་རྗེས་འབྲང་ཕྱི་རོལ་པ་དང་། ཅིག་ཤོས་འདོད་ཆགས་དང་བྲལ་བ་ཉན་རང་ལ་སོགས་པ་ཆོས་ཐམས་ཅད་བདག་མེད་པ་མཐའ་ཀུན་དང་བྲལ་བ་ལ་གོམས་པར་མ་བྱས་པ་རྣམས་ཀྱིས། ཐོས་པ་ལས་བྱུང་བ་ལ་སོགས་པའི་ཤེས་པའི་རིམ་གྱིས་མ་མྱངས་པ་དེ་ཁྱོད་ཀྱི་བརྗོད་བྱ་ཡིན་པའི་ཕྱིར། ཤེས་བྱ་ཆོས་ཅན། དེ་དག་གིས་མ་མྱངས་པའི་རྒྱུ་མཚན་ཡོད་དེ། རྗོད་པར་བྱེད་པ་ཡུམ་གྱི་མདོ་རྒྱན་དང་བཅས་པ་དང་། བརྗོད་པར་བྱ་བ་མངོན་རྟོགས་བརྒྱད་པོ་དག་ཐབས་དང་ཐབས་ཀྱིས་སྒྲུབ་པར་བྱེད་པའི་ཚུལ་གྱིས་འགྲེལ་པར་མཛད་པ་ཡིན་པའི་ཕྱིར།
ཤེར་ཕྱིན་བཤད་པ།
གཉིས་པ་བསྡུས་པའི་དོན་ལ། མཚམས་སྦྱར་བ་དང་། ངག་ཉེ་བར་དགོད་པ། བསྡུས་ཏེ་བཤད་པ། རྒྱས་པར་མ་དཀྲོལ་བའི་རྒྱུ་མཚན་ནོ། །དང་པོ་ནི། སྔར་བཤད་པ་དེ་ལྟར་འགྲེལ་པ་ལ་སོགས་པ་བསྙད་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་ལུས་རྣམ་པར་གཞག་པ་གསུངས་པ་ལ་ཆོས་ཅན། དགོས་པ་ཡོད་དེ། གདུལ་བྱ་ཉན་པ་པོ་དང་བསྟན་བཅོས་འཆད་པ་པོ་གཉིས་ཀ་ལ་ལྟོས་པའི་དགོས་པ་ཡོད་པའི་ཕྱིར། དེ་ཆོས་ཅན། གདུལ་བྱ་ཉན་པ་པོ་ལ་ལྟོས་པའི་དགོས་པ་ཡོད་དེ། གདུལ་བྱ་ཉན་པ་པོ་རྣམས་ཀྱིས་ཡན་ལག་རྒྱས་བཤད་ཀྱི་རིམ་པ་བདེ་བླག་ཏུ་རྟོགས་པར་བྱ་བའི་ཕྱིར་དུ་ཡིན་པའི་ཕྱིར། དེ་ཆོས་ཅན། བསྟན་བཅོས་འཆད་པ་པོ་ལ་ལྟོས་པའི་དགོས་པ་ཡོད་དེ། བསྟན་བཅོས་ཀྱི་དོན་མདོ་ཙམ་རྣམ་པར་དབྱེ་
བར་བྱས་པ་ཡང་ཡན་ལག་རྒྱས་བཤད་ཀྱི་རིམ་པ་མ་འཛིངས་པ་ཉིད་ཀྱིས་བཤད་པར་བྱ་བ་སླ་བར་གཟིགས་ནས་མཛད་པའི་ཕྱིར། ཤེས་བྱ་ཆོས་ཅན། བསྟན་བཅོས་ཀྱི་དོན་བསྡུས་ནས་སྟོན་ཚུལ་ཡོད་དེ། ཤེས་རབ་ཕ་རོལ་ཕྱིན་པ་ཞེས་པ་ནས། ཡང་དག་བརྗོད་ཅེས་པའི་བར་གྱི་ཚིག་ལེའུར་བྱས་པ་སྟེ། ཚིགས་བཅད་བཅོ་ལྔས་མདོར་བསྟན་དང་རྒྱས་པར་བཤད་པའི་སྒོ་ནས་བསྟན་པའི་ཕྱིར། གཉིས་པ་ལ། ལུས་མདོར་བསྟན་པ་དང་། དེ་རྒྱས་པར་བཤད་པའོ། །དང་པོ་ལ། བཤད་བྱ་འཆད་བྱེད་མདོར་བསྟན་པ་དང་། འཆད་བྱེད་ཀྱི་རྐང་གྲངས་སོགས་མདོར་བསྟན་པའོ། །དང་པོ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། རྗེ་བཙུན་བྱམས་མགོན་ཆོས་ཅན། གཞུང་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱས་འབྲིང་བསྡུས་གསུམ་ནི་ལེགས་པར་བཤད་པ་ཡིན་ཏེ། ཡུམ་གྱི་རྗོད་བྱེད་ལ་སྐབས་བརྒྱད་དང་། བརྗོད་བྱ་དོན་གྱི་དངོས་པོ་ལ་མངོན་རྟོགས་བརྒྱད་ཀྱིས་ཕྱེ་བ་ཉིད་ཀྱིས་ཡང་དག་པར་ཏེ་ཕྱིན་ཅི་མ་ལོག་པར་བཤད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ནི། ཁ་ཅིག །སྤྲོས་བྲལ་མངོན་སུམ་དུ་རྟོགས་པའི་མཁྱེན་པ་གང་ཞིག །མི་གནས་པའི་མྱང་འདས་སུ་ཕྱིན་པའམ་ཕྱིན་བྱེད་གང་རུང་དེ་ཤེར་ཕྱིན་གྱི་མཚན་ཉིད་དང་། སློབ་ལམ་ན་ཤེར་ཕྱིན་ཡོད་ཟེར་ན། ཤེར་ཕྱིན་ཆོས་ཅན། མི་གནས་པའི་མྱང་འདས་སུ་ཕྱིན་པ་དང་ཕྱིན་བྱེད་གང་རུང་ཡིན་པར་ཐལ། ཤེར་ཕྱིན་ཡིན་པའི་ཕྱིན། འདོད་ན། མི་གནས་པའི་མྱང་འདས་སུ་ཕྱིན་བྱེད་ཡིན་པར་ཐལ། འདོད་པ་གང་ཞིག །མི་གནས་པའི་མྱང་འདས་སུ་ཕྱིན་པ་མ་ཡིན་པའི་ཕྱིར། ཕྱི་མ་མ་གྲུབ་ན། སློབ་ལམ་ན་ཤེར་ཕྱིན་མེད་
པར་ཐལ་ལོ། །རྩ་བར་འདོད་མི་ནུས་ཏེ། རྣམ་མཁྱེན་དེ་ཁྱོད་ཡིན་པའི་ཕྱིར། གཞན་ཡང་། ལམ་ཤེར་ཕྱིན་དེ་ཤེར་ཕྱིན་ཡིན་པར་ཐལ། སློབ་ལམ་ན་ཤེར་ཕྱིན་ཡོད་པའི་ཕྱིར། འདོད་ན། མ་ཡིན་པར་ཐལ། དེ་ཤེར་ཕྱིན་བཏགས་པ་བ་ཡིན་པའི་ཕྱིར། དེར་ཐལ། འགྲེལ་ཆེན་ལས། མཐོང་བ་ལ་སོགས་པའི་མཚན་ཉིད་ཅན་གྱི་ལམ་ལ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ནི་བཏགས་སོ། །ཞེས་གསུངས་པའི་ཕྱིར། ཁ་ཅིག །ཆོས་རབ་ཏུ་རྣམ་འབྱེད་ཀྱི་བློ་གང་ཞིག །སྲིད་ཞིའི་ཕ་རོལ་ཏུ་ཕྱིན་ཟིན་པའམ། ཕྱིན་པར་བྱེད་པ་གང་རུང་དེ་ཤེར་ཕྱིན་མཚན་ཉིད་ཟེར་ན། ཐེག་ཆེན་གྱི་མཐོང་ལམ་བར་ཆད་མེད་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། སྟོང་ཉིད་མངོན་སུམ་དུ་རྟོགས་པའི་ཡེ་ཤེས་ཡིན་པའི་ཕྱིར། ཁྱབ་པ་ཡོད་དེ། ཆོས་རབ་ཏུ་རྣམ་འབྱེད་ཀྱི་བློ་ཡིན་ན་ཤེས་རབ་ཡིན་པས་མ་ཁྱབ་པའི་ཕྱིར། དེར་ཐལ། ཆོས་རབ་ཏུ་རྣམ་འབྱེད་ཀྱི་ཤེས་རབ་འཁོར་དུ་ལྡན་པའི་གཙོ་བོ་སེམས་དེ་དེ་འདྲའི་བློ་ཡིན་པའི་ཕྱིར། རྩ་བར་འདོད་མི་ནུས་ཏེ། རྣམ་མཁྱེན་མ་ཡིན་པའི་ཕྱིར། ཁ་ཅིག །སློབ་ལམ་ན་བསླབ་པ་གསུམ་མེད་པར་ཐལ། སློབ་ལམ་ན་ཕར་ཕྱིན་དྲུག་མེད་པའི་ཕྱིར། ཁྱབ་པ་ཡོད་དེ། མདོ་སྡེ་རྒྱན་ལས། བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཅེས་གསུངས་པའི་ཕྱིར་ན་མ་ཁྱབ། འོ་ན། ཉན་ཐོས་དགྲ་བཅོམ་པའི་རྒྱུད་ལ་བསླབ་པ་གསུམ་མེད་པར་ཐལ། དེའི་རྒྱུད་ལ་ཕར་ཕྱིན་དྲུག་མེད་པའི་ཕྱིར། ཁ་ཅིག །སློབ་ལམ་ན་ཕར་ཕྱིན་དྲུག་ཡོད་པར་ཐལ། བྱང་ཆུབ་སེམས་དཔའི་རྒྱུད་ཀྱི་ཕར་ཕྱིན་བཅུ་སངས་རྒྱས་སུ་འགྲོ་བའི་ལམ་ཡིན་པའི་ཕྱིར། སངས་རྒྱས་ཉིད་ཀྱི་ལམ་
ལ་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་བཅུ་སྟེ། ཞེས་པའི་འགྲེལ་ཚིག་གི་བསྟན་དོན་གྲུབ་པའི་ཕྱིར་ན་མ་ཁྱབ་སྟེ། དེ་ཉམས་ལེན་ལ་དགོངས་པའི་ཕྱིར། ཁ་ཅིག །སློབ་ལམ་ན་ཕར་ཕྱིན་དྲུག་ཡོད་པར་ཐལ། དེ་དང་མཚུངས་ལྡན་གྱི་སེམས་བསྐྱེད་དྲུག་ཡོད་པའི་ཕྱིར་ན། སློབ་ལམ་ན་ཆོས་སྐུ་ཡོད་པར་ཐལ། སློབ་ལམ་ན་ཆོས་སྐུ་དང་མཚུངས་ལྡན་གྱི་སེམས་བསྐྱེད་ཡོད་པའི་ཕྱིར་ཏེ། མདོ་སྡེ་རྒྱན་ལས། རྒྱལ་སྲས་རྣམས་ཀྱི་སེམས་བསྐྱེད་ནི། །སྤྲིན་དང་འདྲ་བ་ཉིད་དུ་བསྟན། །ཞེས་གསུངས་པའི་ཕྱིར། གཉིས་པ་རང་ལུགས་ནི། ཁྱད་ཆོས་གསུམ་གྱིས་ཁྱད་པར་དུ་བྱས་པའི་མཐར་ཕྱིན་པའི་ཡེ་ཤེས་དེ་ཤེར་ཕྱིན་གྱི་མཚན་ཉིད། རྣམ་མཁྱེན་ཆོས་ཅན། ཁྱད་ཆོས་གསུམ་དང་ལྡན་ཏེ། རྟེན་གྱི་ཁྱད་པར་སངས་འཕགས་ཁོ་ནའི་རྒྱུད་ལ་ཡོད། ངོ་བོའི་ཁྱད་པར་གཉིས་སུ་མེད་པའི་ཡེ་ཤེས་ཡིན་པ། དགག་བྱ་དང་བྲལ་བའི་ཁྱད་པར་བདེན་སྟོང་སྒྱུ་མ་ལྟ་བུ་ཡིན་པའི་ཕྱིར། དེ་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན། རང་བཞིན་གྱི་ཤེར་ཕྱིན། གཞུང་ཤེར་ཕྱིན། ལམ་ཤེར་ཕྱིན། འབྲས་བུ་ཤེར་ཕྱིན་བཞི་ལས། དང་པོ་ནི། ཆོས་ཉིད་བདེན་སྟོང་ལྟ་བུའོ། །ཐེག་ཆེན་གྱི་ལམ་དང་འབྲས་བུ་གང་རུང་བརྗོད་བྱའི་གཙོ་བོར་སྟོན་པའི་ཤེར་ཕྱིན་གྱི་རྒྱལ་བའི་གསུང་རབ་དེ་གཉིས་པའི་མཚན་ཉིད། དོན་གཉིས་ཕུན་སུམ་ཚོགས་པ་སྒྲུབ་བྱེད་ཀྱི་སེམས་དཔའི་རྣལ་འབྱོར་གསུམ་པའི་མཚན་ཉིད། ཁྱད་ཆོས་བཞིས་ཁྱད་པར་དུ་བྱས་པ་མཐར་ཕྱིན་པའི་ཡེ་ཤེས་བཞི་པའི་མཚན་ཉིད། ཁྱད་ཆོས་བཞི་ཡང་ཡོད་དེ། རྟེན་གྱི་ཁྱད་པར་སངས་རྒྱས་ཁོ་ནའི་རྒྱུད་ལ་ཡོད་པ། ངོ་བོའི་ཁྱད་པར་ཡེ་ཤེས་ཡིན་
པ། རྣམ་པའི་ཁྱད་པར་གཉིས་སུ་མེད་པ། དགག་བྱ་དང་བྲལ་བའི་ཁྱད་པར་བདེན་སྟོང་སྒྱུ་མ་ལྟ་བུ་རྣམས་ཡིན་པའི་ཕྱིར། གསུམ་པ་རྩོད་པ་སྤོང་བ་ལ། ཁོ་ན་རེ། རྣམ་མཁྱེན་ཆོས་ཅན། ཤེར་ཕྱིན་གྱི་མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། སངས་འཕགས་ཁོ་ནའི་རྒྱུད་ལ་ཡོད་པར་ཐལ། འདོད་པའི་ཕྱིར། འདོད་ན། ཁྱོད་རྒྱུད་ལྡན་གྱི་གང་ཟག་ཡིན་ན་སངས་འཕགས་ཡིན་དགོས་པར་ཐལ། འདོད་པའི་ཕྱིར། འདོད་ན། ཐེག་ཆེན་འཕགས་པ་ཆོས་ཅན། དེར་ཐལ། དེའི་ཕྱིར། དེར་ཐལ། གང་ཟག་གང་ཞིག །རྣམ་མཁྱེན་ཁྱོད་ཀྱི་མངོན་རྟོགས་ཡིན་པའི་ཕྱིར་ན། མ་ཁྱབ། ཡང་ཁོ་ན་རེ། བྱང་སེམས་ཀྱི་སྦྱོར་ལམ་ཆོས་ཅན། ལམ་ཤེར་ཕྱིན་ཡིན་པར་ཐལ། མཚན་ཉིད་དེའི་ཕྱིར། འདོད་ན། ལམ་ཤེར་ཕྱིན་གྱི་ས་མཚམས་ཐེག་ཆེན་གྱི་མཐོང་ལམ་ནས་འཛིན་མི་རིགས་པར་ཐལ། འདོད་པའི་ཕྱིར། འདོད་མི་ནུས་ཏེ། མཐོང་བ་ལ་སོགས་པའི་ཞེས་སོགས་གསུངས་པའི་ཕྱིར་ན། མ་ཁྱབ་སྟེ། དེ་ནི་མཚོན་པ་ཙམ་ཡིན་པའི་ཕྱིར། དེ་ལྟར་ན། སྡུད་འགྲེལ་རྟོགས་སླ་ལས། དངོས་དང་སྦྱོར་བ་ལ་སོགས་པའི་མཚན་ཉིད་ཀྱི་ལམ་དེ་དེའི་དོན་དུ་སྦྱོར་བ་ཉིད་ཀྱི་གཙོ་བོ་མ་ཡིན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་གསུངས་པ་མི་འཐད་པར་ཐལ་ལོ། །ཡང་ཁ་ཅིག །ལམ་ཤེར་ཕྱིན་ཤེར་ཕྱིན་ཡིན་པར་ཐལ། ཡུམ་རྒྱས་འབྲིང་བསྡུས་གསུམ་ཤེར་ཕྱིན་ཡིན་པའི་ཕྱིར། དེར་ཐལ། ཤེས་རབ་ཕ་རོལ་ཕྱིན་པ་ནི། ཞེས་པའི་སྐབས་ནས་བསྟན་པའི་ཤེར་ཕྱིན་མཚན་ཉིད་པ་ཞིག་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། རྒྱས་འབྲིང་བསྡུས་གསུམ་དེ་དེ་ཡིན་པའི་ཕྱིར་ཏེ། དེ་ཡོད་པའི་ཕྱིར། ཁ་ཅིག །གཞུང་དེའི་སྐབས་ནས་བསྟན་པའི་ཤེར་ཕྱིན་ཡིན་ན་
ཤེར་ཕྱིན་དངོས་ཡིན་དགོས་པར་ཐལ། དེའི་སྐབས་ནས་བསྟན་པའི་ཤེར་ཕྱིན་བཏགས་པ་བ་མེད་པའི་ཕྱིར་ན་མ་ཁྱབ། འོ་ན། ས་བཅུ་པའི་ཡེ་ཤེས་དེ་སངས་རྒྱས་ཀྱི་ས་ཡིན་པར་ཐལ། གང་གི་སངས་རྒྱས་སར་གནས་པ། ཞེས་པའི་སྐབས་ནས་བསྟན་པའི་སངས་རྒྱས་ཀྱི་ས་མཚན་ཉིད་པ་ཡོད་པའི་ཕྱིར། ཁྱབ་པ་འགྲིག །རྟགས་གྲུབ་སྟེ། དེ་དེའི་སྐབས་ནས་བསྟན་པའི་སངས་རྒྱས་ཀྱི་ས་ཡིན་པའི་ཕྱིར། འདོད་ན། དེའི་གནས་སྐབས་ན་སངས་རྒྱས་ཀྱི་ས་མཚན་ཉིད་པ་ཡོད་པར་ཐལ། འདོད་པའི་ཕྱིར། གཞན་ཡང་། གཞུང་འདིའི་སྐབས་ནས་བསྟན་པའི་སངས་རྒྱས་ཀྱི་ས་ཡིན་ན་སངས་རྒྱས་ཀྱི་ས་དངོས་ཡིན་དགོས་པར་ཐལ། གཞུང་འདིའི་སྐབས་ནས་བསྟན་པའི་སངས་རྒྱས་ཀྱི་ས་བཏགས་པ་བ་མེད་པའི་ཕྱིར་རོ། །
དངོས་བརྒྱད་དོན་བདུན་ཅུ་བཤད་པ།
གཉིས་པ་འཆད་བྱེད་ཀྱི་རྐང་གྲངས་ནི། ཤེས་བྱ་ཆོས་ཅན། མཁྱེན་པ་གསུམ་ཡང་ཡོད་དེ། ཤེས་བྱའི་རྣམ་པ་ཀུན་མངོན་སུམ་དུ་རྟོགས་པའི་རྣམ་མཁྱེན་ཉིད་དང་། ཐེག་པ་གསུམ་གྱི་ལམ་ཤེས་པའི་ལམ་ཤེས་ཉིད་དང་། དེ་ནས་ཐམས་ཅད་ཤེས་པ་ཉིད་དེ་གཞི་ཤེས་རྣམས་སུ་ཡོད་པའི་ཕྱིར། ཤེས་བྱ་ཆོས་ཅན། ཉམས་ལེན་སྦྱོར་བ་བཞི་ཡོད་དེ། རྣམ་པ་ཀུན་མངོན་པར་རྫོགས་པ་རྟོགས་པའི་སྦྱོར་བ་དང་། རྩེ་མོར་ཕྱིན་པའི་སྦྱོར་བ་དང་། མཐར་གྱིས་པའི་སྦྱོར་བ་དང་། སྐད་ཅིག་མ་གཅིག་གིས་མངོན་པར་རྫོགས་པར་བྱང་ཆུབ་པའི་སྦྱོར་བ་རྣམས་སུ་ཡོད་པའི་ཕྱིར། ཤེས་བྱ་ཆོས་ཅན། འབྲས་བུ་མཐར་ཐུག་གི་སྐུ་ཡོད་དེ། །སངས་རྒྱས་ཆོས་ཀྱི་སྐུ་དེ་དེ་ཡིན་ལ། དེའི་ཕྱིར་ན་རྣམ་པ་བརྒྱད་ཡོད་པའི་ཕྱིར། གཉིས་པ་ལུས་རྒྱས་པར་བཤད་པ་ལ་གསུམ། མཁྱེན་གསུམ་གྱི་ལུས་རྒྱས་པར་
བཤད་པ། སྦྱོར་བཞིའི་ལུས་རྒྱས་པར་བཤད་པ། ཆོས་སྐུའི་ལུས་རྒྱས་པར་བཤད་པའོ། །དང་པོ་ལ། རྣམ་མཁྱེན་གྱི་ལུས་རྒྱས་པར་བཤད་པ། ལམ་ཤེས་ཀྱི་ལུས་རྒྱས་པར་བཤད་པ། གཞི་ཤེས་ཀྱི་ལུས་རྒྱས་པར་བཤད་པའོ། །དང་པོ་ལ། མཚོན་བྱེད་ཀྱི་ཆོས་ངོས་གཟུང་བ། བསྟན་བཤད་སྦྱར་བའོ། །དང་པོ་ནི། ཤེས་བྱ་ཆོས་ཅན། རྣམ་མཁྱེན་མཚོན་བྱེད་ཀྱི་ཆོས་དེ་ལ་བཅུ་ཡོད་དེ། བསམ་པ་བྱང་ཆུབ་ཏུ་སེམས་བསྐྱེད་པ་དང་། དམ་བཅའི་དོན་སྒྲུབ་པའི་ཐེག་ཆེན་གྱི་གདམས་ངག་དང་། ངེས་འབྱེད་ཡན་ལག་རྣམ་པ་བཞི་དང་། ཐེག་ཆེན་སྒྲུབ་པ་ཡི་ནི་རྟེན་དུ་གྱུར་པའི་ཆོས་ཀྱི་དབྱིངས་ཀྱི་རང་བཞིན་དུ་གནས་པའི་རིགས་དང་། ཐེག་ཆེན་སྒྲུབ་པའི་དམིགས་པ་དག་དང་། ཐེག་ཆེན་སྒྲུབ་པའི་ཆེད་དུ་བྱ་བ་དང་ནི་གོ་ཆའི་སྒྲུབ་པ་དང་། འཇུག་པར་བྱ་བའི་སྒྲུབ་པ་དང་། ཚོགས་ཀྱི་སྒྲུབ་པ་དང་ནི་ངེས་པར་འབྱུང་བ་དང་བཅས་པའི་སྒྲུབ་པ་རྣམས་སུ་ཡོད་པའི་ཕྱིར། གཉིས་པ་ནི། ཆོས་བཅུ་མངོན་སུམ་དུ་རྟོགས་པ་མཐར་ཕྱིན་པའི་ཡེ་ཤེས་ཆོས་ཅན། རྣམ་ཀུན་མཁྱེན་པ་ཉིད་ཡིན་ཏེ། ཐུབ་པ་བཅོམ་ལྡན་འདས་ཀྱི་མངོན་རྟོགས་ཡིན་པའི་ཕྱིར། གཉིས་པ་ལ། མཚོན་བྱེད་ཀྱི་ཆོས་དང་། བསྟན་བཤད་སྦྱར་བའོ། །དང་པོ་ནི། ཤེས་བྱ་ཆོས་ཅན། ལམ་ཤེས་མཚོན་བྱེད་ཀྱི་ཆོས་བཅུ་གཅིག་ཡོད་དེ། སངས་རྒྱས་རང་འོད་ཀྱིས་འདོད་གཟུགས་ཀྱི་ལྷའི་འོད་མོག་མོག་པོར་བྱེད་པས་ང་རྒྱལ་སེལ་བ་ལ་སོགས་ཀྱི་ལམ་ཤེས་ཀྱི་ཡན་ལག་དང་། སློབ་མ་ཉན་ཐོས་ཀྱི་ལམ་ཤེས་པའི་ལམ་ཤེས་དང་། བསེ་རུ་རང་རྒྱལ་གྱི་ལམ་ཤེས་པའི་ལམ་ཤེས་གང་དང་། ཚེ་འདི་དང་དེ་ལས་གཞན་པའི་ཡོན་ཏན་གྱི་ཕན་ཡོན་ཆེན་པོ་ཅན་གྱི་ཐེག་
ཆེན་མཐོང་བའི་ལམ་དང་། སྒོམ་ལམ་གྱི་བྱེད་པ་དང་ནི། མོས་པ་སྒོམ་ལམ་དང་། བསྟོད་པ་དང་བཀུར་བ་དང་བསྔགས་པ་སོགས་ཀྱིས་མཚོན་པའི་མོས་པ་སྒོམ་ལམ་གྱི་བྱེད་པ་དང་། རང་བཞན་གྱི་དགེ་རྩ་རྫོགས་བྱང་དུ་བསྔོ་བ་ཡིད་ལ་བྱེད་པའི་བླ་ན་མེད་པའི་སྒོམ་ལམ་དང་དེ་ལ་རྗེས་སུ་ཡི་རང་བ་ཡིད་ལ་བྱེད་པའི་བླ་ན་མེད་པའི་སྒོམ་ལམ་དག་དང་། རྟོགས་པ་མཐར་ཐུག་གི་ལག་རྗེས་འཇོག་བྱེད་སྒྲུབ་པ་སྒོམ་ལམ་དང་། སྤངས་པ་མཐར་ཐུག་གི་ལག་རྗེས་འཇོག་བྱེད་ཤིན་ཏུ་རྣམ་པར་དག་པ་ཞེས་བྱ་བའི་སྒོམ་པའི་ལམ་རྣམས་སུ་ཡོད་པའི་ཕྱིར། གཉིས་པ་ནི། གཞན་དོན་སྒྲུབ་པའི་ཐབས་ལ་མཁས་པའི་བྱང་ཆུབ་སེམས་དཔའ་འཕགས་པ་རྣམས་ཀྱི་ལམ་ཤེས་ཉིད་ནི་ཆོས་ཅན། ཁྱོད་མཚོན་བྱེད་ཀྱི་ཆོས་ཡོད་དེ། མཚོན་བྱེད་ཀྱི་ཆོས་བཅུ་གཅིག་པོ་དེ་འདྲ་བར་མདོར་བསྟན་རྒྱས་བཤད་དུ་སྦྱར་ནས་བཤད་པའི་ཕྱིར། གསུམ་པ་ལ་གཉིས། མཚོན་བྱེད་ཀྱི་ཆོས་དང་། བསྟན་བཤད་སྦྱར་བའོ། །དང་པོ་ནི། ཤེས་བྱ་ཆོས་ཅན། གཞི་ཤེས་མཚོན་བྱེད་ཀྱི་ཆོས་དེ་ལ་དགུ་ཡོད་དེ། ཤེས་པས་སྲིད་མཐའ་ལ་མི་གནས་པའི་ལམ་ཤེས་དང་། སྙིང་རྗེས་ཞི་མཐའ་ལ་མི་གནས་པའི་ལམ་ཤེས་དང་། ཐབས་མ་ཡིན་པས་རིང་བ་སྟེ། འབྲས་ཡུམ་ལ་རིང་བའི་གཞི་ཤེས། ཐབས་ཀྱི་རིང་བ་མ་ཡིན་པ་ཉིད་དེ་འབྲས་ཡུམ་ལ་ཉེ་བའི་གཞི་ཤེས། མི་མཐུན་ཕྱོགས་ཀྱི་གཞི་ཤེས། གཉེན་པོའི་ཕྱོགས་ཀྱི་གཞི་ཤེས་དག་དང་གཞི་ཤེས་སྦྱོར་བ་དང་། གཞི་ཤེས་སྦྱོར་བ་དེའི་མཉམ་ཉིད་དེ་འཛིན་སྟངས་དང་། ཐེག་ཆེན་གྱི་འདའ་བྱའི་མཐོང་བའི་ལམ་རྣམས་སུ་ཡོད་པའི་ཕྱིར། གཉིས་པ་ནི། ཉན་ཐོས་འཕགས་པ་དང་། ལ་སོགས་པ་རང་རྒྱལ་
འཕགས་པའི་མཐོང་ལམ་དེ་འདྲ་བ་ཆོས་ཅན། ཁྱོད་མཚོན་བྱེད་ཡོད་དེ། ཆོས་དགུ་པོ་དེས་ཀུན་ཤེས་ཏེ་གཞི་ཤེས་ཉིད་དུ་མཚོན་ནས་བསྟན་བཤད་དུ་སྦྱར་བར་འདོད་པའི་ཕྱིར། གཉིས་པ་ལ། རྣམ་རྫོགས་སྦྱོར་བའི་ལུས་རྒྱས་པར་བཤད་པ། རྩེ་མོའི་སྦྱོར་བའི་ལུས་རྒྱས་པར་བཤད་པ། མཐར་གྱིས་སྦྱོར་བའི་ལུས་རྒྱས་པར་བཤད་པ། སྐད་ཅིག་སྦྱོར་བའི་ལུས་རྒྱས་པར་བཤད་པའོ། །དང་པོ་ལ། སྔར་ལྟར་གཉིས་ལས། དང་པོ་ནི། ཤེས་བྱ་ཆོས་ཅན། རྣམ་རྫོགས་སྦྱོར་བ་མཚོན་བྱེད་ཀྱི་ཆོས་དེ་ལ་བཅུ་གཅིག་ཡོད་དེ། སྦྱོར་བའི་རྣམ་པ་དང་། སྦྱོར་བར་བཅས་རྣམས་དང་ཞེས་པས་སྦྱོར་བ་སྒོམ་པ་དང་དགེ་རྩའི་རྟེན་གྱི་གང་ཟག་དང་། སྦྱོར་བའི་ཡོན་ཏན་དང་། སྦྱོར་བའི་སྐྱོན་དང་ནི། ལམ་ཤེར་ཕྱིན་གྱི་རྣལ་འབྱོར་གྱི་མཚན་ཉིད་དང་བཅས་པ་དང་། ཐར་པ་ཆ་མཐུན་དང་། ངེས་འབྱེད་ཆ་མཐུན་དང་། སློབ་པ་ཕྱིར་མི་ལྡོག་པའི་དགེ་འདུན་གྱི་ཚོགས་ཏེ་ཕྱིར་མི་ལྡོག་པའི་རྟགས་དང་། ཆོས་སྐུའི་ལག་རྗེས་འཇོག་བྱེད་སྲིད་དང་ཞི་བ་མཉམ་པ་ཉིད་ཀྱི་སྦྱོར་བ་དང་། ལོངས་སྐུའི་ལག་རྗེས་འཇོག་བྱེད་ཞིང་དག་པ་བླ་ན་མེད་པའི་སྦྱོར་བ་དང་། སྤྲུལ་སྐུའི་ལག་རྗེས་འཇོག་བྱེད་ཐབས་མཁས་སྦྱོར་བ་རྣམས་སུ་ཡོད་པའི་ཕྱིར། གཉིས་པ་ནི། རྣམ་ཀུན་མངོན་རྫོགས་རྟོགས་པ་སྟེ། འདི་ནི་ཞེས་པས་བཤད་དོ། །གཉིས་པ་ལ་གཉིས་ལས། དང་པོ་ནི། ཤེས་བྱ་ཆོས་ཅན། རྩེ་སྦྱོར་མཚོན་བྱེད་ཀྱི་ཆོས་དེ་ལ་བརྒྱད་དུ་ཡོད་དེ། རྩེ་སྦྱོར་ཐོབ་པ་དེའི་རྟགས་བཅུ་གཉིས་པོ་གང་རུང་ཐོབ་པའི་ངེས་འབྱེད་ཆ་མཐུན་དང་པོ་དང་། སྟོང་གསུམ་གྱི་འགྲོ་བ་དང་མཉམ་པའི་སངས་རྒྱས་མཆོད་པ་བས་ལྷག་པ་ལ་སོགས་པས་བསོད་ནམས་རྣམ་པར་འཕེལ་བ་བཅུ་དྲུག་ཚང་བའི་གཉིས་པ་དང་། མཁྱེན་
པ་གསུམ་རྗེས་མཐུན་པ་རྫོགས་པའི་ཤེས་རབ་དང་། གཞན་དོན་ལ་མི་ཕྱེད་པས་བརྟན་པ་ཐོབ་པའི་གསུམ་པ་དང་། མཐོང་ལམ་སྐྱེད་པའི་ནུས་པ་སྨིན་པས་ཏིང་ངེ་འཛིན་མཐའ་ཡས་པ་ལ་སེམས་ཀུན་ཏུ་གནས་པ་ཐོབ་པའི་ངེས་ཆ་བཞི་པ་དང་། མཐོང་ལམ་རྩེ་སྦྱོར་ཞེས་བྱ་བ་དང་། སྒོམ་པ་ཞེས་བྱ་བའི་ལམ་དང་། དེ་སོ་སོ་ལ་མཐོང་སྒོམ་རྩེ་སྦྱོར་གྱི་སྤང་བྱ་གཟུང་འཛིན་གྱི་རྣམ་པར་རྟོག་པ་བཞིའི་གཉེན་པོ་རྣམ་པ་བཞི་དང་། བར་ཆད་མེད་པའི་ཏིང་ངེ་འཛིན་གྱི་རྩེ་སྦྱོར་དང་། བསལ་བྱ་ལོག་པར་སྒྲུབ་པ་དང་བཅས་པ་རྣམས་སུ་ཡོད་པའི་ཕྱིར། གཉིས་པ་ནི། རྩེ་མོའི་མངོན་རྟོགས་ཞེས་པས་བཤད་དོ། །གསུམ་པ་ལ་བསྟན་བཤད་སྦྱར་བ་དང་། མཚོན་བྱེད་ཀྱི་ཆོས་ངོས་གཟུང་བ་གཉིས་ཀྱི་དང་པོ་ནི་མཐར་གྱིས་པ་ཞེས་པས་བཤད། གཉིས་པ་ནི། ཤེས་བྱ་ཆོས་ཅན། མཐར་གྱིས་སྦྱོར་བ་མཚོན་བྱེད་ཀྱི་ཆོས་དེ་ལ་བཅུ་གསུམ་ཡོད་དེ། རྣམ་གསུམ་རྣམ་བཅུ་སྟེ། ཕར་ཕྱིན་དྲུག་གི་མཐར་གྱིས་སྦྱོར་བ། དཀོན་མཆོག་གསུམ་རྗེས་སུ་དྲན་པའི་མཐར་གྱིས་སྦྱོར་བ། ལྷ། གཏོང་བ། ཚུལ་ཁྲིམས་གསུམ་རྗེས་དྲན་གྱི་མཐར་གྱིས་སྦྱོར་བ། དངོས་མེད་ངོ་བོ་ཉིད་ཀྱི་མཐར་གྱིས་སྦྱོར་བ་གཅིག་རྣམས་སུ་ཡོད་པའི་ཕྱིར། བཞི་པ་ལ། སྔ་མ་ལྟར་གཉིས་ལས། དང་པོ་ནི། སྐད་ཅིག་མ་གཅིག་གིས་མངོན་རྫོགས་བྱང་ཆུབ་བོ་ཞེས་པས་བཤད། གཉིས་པ་ནི། ཤེས་བྱ་ཆོས་ཅན། སྐད་ཅིག་སྦྱོར་བ་མཚོན་བྱེད་ཀྱི་ཆོས་དེ་ལ་རྣམ་པ་བཞི་ཡོད་དེ། ལྡོག་མཚམས་མི་འདྲ་བའི་མཚན་ཉིད་ཀྱིས་ནི་ངོ་བོ་གཅིག་ལ་ལྡོག་པ་ཐ་དད་པའི་རྣམ་པར་སྨིན་པའི་སྐད་ཅིག་མའི་སྦྱོར་བ། རྣམ་པར་
སྨིན་པ་མ་ཡིན་པའི་དེ། གཉིས་སུ་མེད་པའི་དེ། མཚན་ཉིད་མེད་པའི་དེ་རྣམས་སུ་ཡོད་པའི་ཕྱིར། གསུམ་པ་ལ། གཉིས་ལས། དང་པོ་ནི། ཤེས་བྱ་ཆོས་ཅན། ཆོས་སྐུ་མཚོན་བྱེད་ཆོས་བཞི་ཡོད་དེ། དག་པ་གཉིས་ལྡན་གྱི་དབྱིངས་སུ་གྱུར་པའི་ངོ་བོ་ཉིད་ཀྱི་སྐུ་དང་། ངེས་པ་ལྔས་ཁྱད་པར་དུ་བྱས་པའི་ལོངས་སྤྱོད་རྫོགས་སྐུ་དང་བཅས་པ་དང་། དེ་བཞིན་དུ། དེ་གཉིས་ལས་གཞན་པའི་གཟུགས་སྐུ་མཐར་ཐུག་པ་སྤྲུལ་པའི་སྐུའི་མཛད་པ་འཕྲིན་ལས་དང་བཅས་པ་རྣམས་ཡོད་པའི་ཕྱིར། གཉིས་པ་ནི། ཆོས་སྐུ་ཞེས་པ་སློབ་དཔོན་གྱི་བསྟན་བཤད་སྦྱོར་བའི་ཚིག་ཏུ་ཡང་མཛད་ལ། གཞན་དུ་ན་འདིར་སྐུ་བཞི་བསྟན་པར་བྱས་ན་བསྟན་བཅོས་ཀྱི་ཚིག་དོན་ལ་མ་ཞུགས་པའི་སྐྱོན་མེད་དེ། ཇི་ལྟ་བ་དང་ཇི་སྙེད་པ་ལ་ལྟོས་ནས་གཟིགས་པ་མཐར་ཐུག་པའི་ཆོས་སྐུའི་ཆོས་རྣམ་པ་བཞི་ནི་ཡང་དག་པར་བརྗོད་པའི་ཕྱིར། གསུམ་པ་བསྡུས་ཏེ་བཤད་པ་ནི། ཚིགས་བཅད་བཅོ་ལྔ་པོ་དེ་ལས་ཚིག་ལེའུར་བྱས་པ་དང་པོ་གཉིས་ཀྱི་ནི་ཆོས་ཅན། ཁྱོད་ཀྱིས་བསྟན་བཅོས་ཀྱི་ལུས་མདོར་བསྟན་པ་ཡིན་ཏེ། ལུས་དངོས་པོ་བརྒྱད་ཀྱི་རྐང་གྲངས་ཙམ་དུ་བསྡུས་ནས་བསྟན་པའི་ཕྱིར། ཚིག་ལེའུར་བྱས་པ་ལྷག་མ་བཅུ་གསུམ་གྱིས་ནི་ཆོས་ཅན། བསྟན་བཅོས་ཀྱི་ལུས་རྒྱས་པར་བཤད་དེ། བརྒྱད་པོ་དེ་དག་ཉིད་ཀྱིས་དོན་བདུན་ཅུའི་རྐང་གྲངས་ཙམ་དུ་བསྡུས་ནས་བཤད་པའི་ཕྱིར། དེ་ལྟར་ན་དེ་བཅོ་ལྔས་བསྟན་བཅོས་ཀྱི་ལུས་ལེགས་པར་བཤད་པ་ཡིན་ཏེ། སྔར་ལྟར་བསྡུས་པ་དང་རྒྱས་པར་བཤད་པ་དེའི་ཕྱིར། བཞི་པ་རྒྱས་པར་མ་དཀྲོལ་བའི་རྒྱུ་མཚན་ནི། བསྡུས་པའི་དོན་གྱི་ཚིག་ལེའུར་བྱས་པ་འདི་རྣམས་ནི་ཆོས་ཅན། ཁྱོད་ཡན་ལག་རྒྱས་བཤད་འཆད་པའི་སྔ་རོལ་ཏུ་ཞིབ་
ཏུ་རྣམ་པར་མ་དཀྲོལ་བའི་རྒྱུ་མཚན་ཡོད་དེ། དེ་ལྟར་དཀྲོལ་ན་རྒྱས་བཤད་ཀྱི་འགྲེལ་པ་དང་ཟློས་པའི་ཉེས་པར་གྱུར་དུ་དོགས་ནས་མ་དཀྲོལ་བའི་ཕྱིར། དེ་ལྟར་ཟློས་པར་འགྱུར་ཏེ། བསྟན་བཅོས་མཛད་པ་ཉིད་ཀྱིས། སེམས་བསྐྱེད་པ་ནི་གཞན་དོན་ཕྱིར། །ཞེས་བྱ་བ་ལ་སོགས་པ་འཆད་པར་འགྱུར་བའི་བསྟན་བཅོས་རྒྱས་བཤད་ཀྱི་རྩ་ཚིག་མཐའ་དག་གིས་ལུས་འདི་འཆད་པ་ཡིན་པའི་ཕྱིར། ཁྱབ་སྟེ། རྒྱས་བཤད་ཀྱི་རྩ་ཚིག་མཐའ་དག་འཆད་ལ། དེ་དག་རྣམ་པར་བཤད་པས་ལུས་འདི་བཤད་པར་བསམས་པ་སྟེ་འཆད་འགྱུར་ཡིན་པའི་ཕྱིར།
རྣམ་མཁྱེན་མཚོན་བྱེད་ཀྱི་ཆོས་བཅུ་རྒྱས་པར་བཤད་པ།
རྣམ་མཁྱེན་མཚོན་བྱེད་ཀྱི་ཆོས་བཅུ་རྒྱས་པར་བཤད་པ། གསུམ་པ་ཚིག་དོན་ལ། མཁྱེན་གསུམ་རྒྱས་པར་བཤད་པ། སྦྱོར་བ་བཞི་རྒྱས་པར་བཤད་པ། ཆོས་སྐུ་རྒྱས་པར་བཤད་པའོ། །དང་པོ་ལ། དོན་དུ་གཉེར་བྱ་རྣམ་མཁྱེན་བཤད། དེར་བགྲོད་པའི་ལམ་ཤེས། ལམ་ཤེས་རྣམ་པར་དག་བྱེད་ཀྱི་ཡན་ལག་གཞི་ཤེས་བཤད་པའོ། །དང་པོ་ལ། མཚམས་སྦྱར་བ། ཆོས་བཅུ་རྒྱས་པར་བཤད་པ། སྐབས་བསྡུ་བའོ། །དང་པོ་ནི། ཤེས་བྱ་ཆོས་ཅན། སྔར་བཤད་པ་དེ་ལྟར་བསྡུས་པའི་དོན་ཀུན་བསྟན་ནས། དང་པོར་རྣམ་པ་ཐམས་ཅད་མཁྱེན་པ་ཉིད་བཤད་པར་བཞེད་དེ། སེམས་བསྐྱེད་ལ་སོགས་པ་ཆོས་བཅུའི་ཡུལ་གྱི་ཡུལ་ཅན་མཚོན་པའི་ཕྱིར་དུ་བཤད་པའི་ཕྱིར། ཤེས་བྱ་ཆོས་ཅན། དང་པོར་རྣམ་མཁྱེན་འཆད་པའི་རྒྱུ་མཚན་ཡོད་དེ། མངོན་རྟོགས་ཀྱི་རིམ་པ་ཀུན་མངོན་སུམ་དུ་རྟོགས་འདོད་ཀྱི་གདུལ་བྱས། མཐར་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱ་དགོས་པའི་ཕྱིར། དེ་དགོས་ཏེ། རྒྱན་གྱི་ཆེད་དུ་བྱ་བའི་གདུལ་བྱས་ཆེད་དུ་གཉེར་བྱའི་འབྲས་བུའི་གཙོ་བོ་རྣམ་མཁྱེན་ཡིན་པའི་ཕྱིར། དེར་ཐལ། དེ་འདྲའི་གདུལ་བྱ་
བྱང་ཆུབ་སེམས་དཔའ་བླ་ན་མེད་པའི་བྱང་ཆུབ། འདས་པ་དང་ད་ལྟར་བའི་སངས་རྒྱས་རྣམས་གཤེགས་པའི་རྗེས་སུ་མཐུན་པར་ཐོབ་པར་འདོད་པའི་ཕྱིར། ཤེས་བྱ་ཆོས་ཅན། སེམས་བསྐྱེད་སོགས་ཐོག་མར་འཆད་རིགས་ཏེ། རྣམ་མཁྱེན་བསྡུས་པའི་ཚིག་ལེའུར་བྱས་པ་རྣམ་པར་བཤད་པའི་སྒོ་ནས་ཡུལ་གྱིས་ཡུལ་ཅན་མཚོན་པར་བཞེད་པ་ཡིན་པའི་ཕྱིར།
ཐེག་ཆེན་གྱི་ཀུན་རྫོབ་སེམས་བསྐྱེད་བཤད་པ།
ཐེག་ཆེན་གྱི་ཀུན་རྫོབ་སེམས་བསྐྱེད་བཤད་པ། གཉིས་པ་ལ། རྣམ་མཁྱེན་ཐོབ་པའི་ཆེད་དུ་དམ་བཅས་པའི་བསམ་པ་དམ་བཅའ་བཤད་པ། དམ་བཅའི་དོན་སྒྲུབ་པའི་ཐབས་སྟོན་པའི་གདམས་ངག་བཤད་པ། གདམས་དོན་ཇི་ལྟར་སྒྲུབ་པའི་སྒྲུབ་པ་བཤད་པའོ། །དང་པོ་ལ། སྤྱི་དོན་དང་། ཡན་ལག་གི་དོན་ནོ། །གཉིས་པ་ཡན་ལག་གི་དོན་ལ། དཀྱུས་མ་མཚན་ཉིད་དམིགས་པ་དང་བཅས་པ་དང་། འཕྲོས་དོན་དབྱེ་བ་བཤད་པའོ། །དང་པོ་ལ། མཚན་ཉིད་དང་། དེ་ངེས་པའི་ཡན་ལག་དམིགས་པ་གཉིས། དང་པོ། སྤྱིའི་མཚམས་སྦྱར་བ་དང་། རྩ་བ་དང་། འགྲེལ་པ་གསུམ། དང་པོ་ནི། ཤེས་བྱ་ཆོས་ཅན། ཆོས་བཅུའི་ནང་ནས་སེམས་བསྐྱེད་ཐོག་མར་འཆད་པའི་རྒྱུ་མཚན་ཡོད་དེ། དེ་རང་གི་ངོ་བོ་སྟེ་མཚན་ཉིད་དང་དམིགས་པ་ཡུལ་དང་བཅས་པའི་སྒོ་ནས་འཆད་པ་ཡིན་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། རང་གི་གྲོགས་སུ་གྱུར་པའི་གཞན་དོན་གྱི་ཕྱིར་དུ་ཡང་དག་པར་རྫོགས་པའི་བྱང་ཆུབ་ལ་དམིགས་པའི་འདོད་པ་དང་མཚུངས་ལྡན་དུ་བྱུང་ཞིང་ཐེག་ཆེན་ལམ་གྱི་འཇུག་སྒོར་གྱུར་པའི་རིགས་སུ་གནས་པས་རབ་ཏུ་ཕྱེ་བའི་ཐེག་ཆེན་གྱི་གཙོ་བོ་ཡིད་ཀྱི་རྣམ་རིག་ཆོས་ཅན། ཁྱོད་ཐེག་ཆེན་སེམས་བསྐྱེད་ཀྱི་མཚན་ཉིད་ཡིན་ཏེ། དེའི་འཇོག་བྱེད་ཡིན་པའི་ཕྱིར། གཉིས་
པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག་ན་རེ། ཐེག་ཆེན་ཀུན་རྫོབ་སེམས་བསྐྱེད་གསར་དུ་སྐྱེ་བའི་ལུས་རྟེན་ཅན་གྱི་གང་ཟག་ཡིན་ན་མི་ཡིན་པས་ཁྱབ་ཟེར་ན། མི་འཐད་པར་ཐལ། ལྷའི་རྟེན་ལ་ཡང་ཡོད། དུད་འགྲོའི་རྟེན་ལ་ཡང་ཡོད། དམྱལ་བའི་རྟེན་ལ་ཡང་ཡོད་པའི་ཕྱིར། དང་པོ་དེར་ཐལ། ལམ་ཤེས་ཀྱི་མདོ་ལས། ལྷའི་བུ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དེ་དག་གིས་ཀྱང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །ཞེས་གསུངས་པའི་ཕྱིར། གཉིས་པ་དེར་ཐལ། ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས། ཀླུ་ཉི་ཁྲི་ཆིག་སྟོང་གིས་བྱང་ཆུབ་མཆོག་ཏུ་སེམས་བསྐྱེད་པར་གསུངས་པ་གང་ཞིག །ཀླུ་དུད་འགྲོ་ཡིན་པའི་ཕྱིར། གསུམ་པ་དེར་ཐལ། དྲིན་ལན་བསབ་པའི་མདོ་ལས། བདག་ཅག་གི་སྟོན་པ་དམྱལ་བའི་ཤིང་རྟ་འདྲེན་པའི་གྱད་དུ་འཁྲུངས་པའི་ཚེ། བྱང་ཆུབ་མཆོག་ཏུ་སེམས་བསྐྱེད་པར་གསུངས་པའི་ཕྱིར། བྱས་པ་ལ་ཁོ་ན་རེ། དམྱལ་བ་པ་དང་བྱང་ཆུབ་སེམས་དཔའི་གཞི་མཐུན་ཡོད་པར་ཐལ། དམ་བཅའ་འཐད་པའི་ཕྱིར། འདོན་ན། མེད་པར་ཐལ། དམྱལ་བ་པའི་རྒྱུད་ལ་ཐེག་ཆེན་སེམས་བསྐྱེད་ནམ་བསྐྱེད་པའི་ཚེ་བདེ་འགྲོར་སོང་བའི་ཕྱིར། ཟེར་ན། དེའི་བདེ་འགྲོའི་ཕུང་པོ་དང་ངན་འགྲོའི་ཕུང་པོ་གཉིས་འཕེན་བྱེད་ཀྱི་ལས་གཅིག་གིས་འཕངས་པར་ཐལ། ཁྱོད་ཀྱི་ཞེ་འདོད་འཐད་པའི་ཕྱིར། འདོད་མི་ནུས་ཏེ། བསོད་ནམས་དང་བསོད་ནམས་མ་ཡིན་པའི་ལས་གཉིས་འགལ་བའི་ཕྱིར། ཡང་ཁ་ཅིག །འཇུག་སེམས་དངོས་སུ་གསར་དུ་སྐྱེ་བའི་ལུས་རྟེན་ཅན་གྱི་གང་
ཟག་ཡིན་ན་སོ་ཐར་གྱི་སྡོམ་ལྡན་ཡིན་པས་ཁྱབ་ཟེར་ན། དེ་འདྲའི་རྟེན་ཅན་གྱི་ལྷ་ཆོས་ཅན། དེར་ཐལ། དེའི་ཕྱིར། འདོད་ན། མ་ཡིན་པར་ཐལ། ཆོས་ཅན་དེ་ཡིན་པའི་ཕྱིར། ཁྱབ་པ་ཡོད་དེ། ལྷའི་རྟེན་ལ་སོ་ཐར་གྱི་སྡོམ་པ་སྐྱེ་བ་མེད་པའི་ཕྱིར། དེར་ཐལ། མདོ་རྩ་བ་ལས། མི་མ་ཡིན་པའི་འགྲོ་བ་དང་། བྱང་གི་སྒྲ་མི་སྙན་པ་ནི་སྡོམ་པའི་ཞིང་ཉིད་མ་ཡིན་ནོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། གཟུགས་མེད་ཀྱི་རྟེན་ལ་ཐེག་ཆེན་སེམས་བསྐྱེད་གསར་དུ་སྐྱེ་བ་ཡོད་པར་ཐལ། ལྷའི་རྟེན་ལ་དེ་སྐྱེ་བ་ཡོད་པའི་ཕྱིར་ན་མ་ཁྱབ། དེ་ལ་ཁོ་ན་རེ། དེ་ཡོད་པར་ཐལ། དེའི་རྒྱུད་ལ་དེ་གསར་དུ་སྐྱེ་བ་ཡོད་པའི་ཕྱིར་ན་མ་ཁྱབ། མ་གྲུབ་ན། དེར་ཐལ། དེའི་རྒྱུད་ལ་རྣམ་མཁྱེན་གསར་དུ་སྐྱེ་བ་ཡོད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་རྒྱུད་ལ་རྣམ་མཁྱེན་གསར་དུ་སྐྱེ་བ་ཡོད་པར་ཐལ། ཁྱོད་སེམས་ཅན་ཡིན་པའི་ཕྱིར། ཁ་ཅིག །འཇུག་སེམས་དངོས་སུ་གསར་དུ་སྐྱེ་བའི་ལུས་རྟེན་ཅན་གྱི་གང་ཟག་ཡིན་ན། སོར་ཐར་གྱི་སྡོམ་ལྡན་ཡིན་པས་ཁྱབ་པར་ཐལ། འཇུག་སྡོམ་དངོས་སུ་གསར་དུ་སྐྱེ་བའི་ལུས་རྟེན་ཅན་གྱི་གང་ཟག་ཡིན་ན། སོ་ཐར་གྱི་སྡོམ་པ་དང་ལྡན་པས་ཁྱབ་པའི་ཕྱིར། དེར་ཐལ། ལམ་སྒྲོན་ལས། སོ་སོར་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་པ་ཡོད་ཀྱི་གཞན་དུ་མིན། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་ནི་རྟེན་ཁྱད་པར་ཅན་ཞིག་ལ་དགོངས་པ་ཡིན་པའི་ཕྱིར། ཁ་ཅིག །གཞན་དོན་དུ་རྫོགས་བྱང་ཐོབ་པར་འདོད་པའི་འདོད་པ་དང་མཚུངས་ལྡན་གྱི་ཐེག་པ་ཆེན་པོའི་སེམས་ཁྱད་པར་ཅན། ཐེག་ཆེན་སེམས་བསྐྱེད་ཀྱི་མཚན་ཉིད་ཟེར་ན། བྱང་སེམས་ཚོགས་ལམ་
པའི་རྒྱུད་ཀྱི་ཐེག་ཆེན་སེམས་བསྐྱེད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་དང་མཚུངས་ལྡན་ཡིན་པར་ཐལ། འདོད་པའི་ཕྱིར། འདོད་ན། མཚུངས་ལྡན་རྣམ་པ་ལྔ་མཚུངས་ཡིན་པར་ཐལ། འདོད་པའི་ཕྱིར། འདོད་ན། དེ་དང་རྟེན་མཚུངས་པར་ཐལ། འདོད་པའི་ཕྱིར། འདོད་ན། གཞན་དོན་དུ་རྫོགས་བྱང་དོན་གཉེར་གྱི་འདུན་པ་རྒྱུད་ལྡན་གྱི་གང་ཟག་ཡིན་ན། ཁྱོད་རྒྱུད་ལྡན་གྱི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། བྱང་སེམས་མཐོང་ལམ་པ་ཆོས་ཅན། དེར་ཐལ། དེའི་ཕྱིར། ཁ་ཅིག །རང་རྒྱུ་གཞན་དོན་དོན་གཉེར་གྱི་འདུན་པ་ལས་བྱུང་ཞིང་། རང་གི་གྲོགས་བྱང་ཆུབ་དོན་གཉེར་གྱི་འདུན་པ་དང་མཚུངས་ལྡན་དུ་བྱུང་བའི་གཙོ་བོ་ཡིད་ཀྱི་རྣམ་རིག་དེ། ཐེག་ཆེན་སེམས་བསྐྱེད་ཀྱི་མཚན་ཉིད་ཟེར་ན། སངས་འཕགས་ཀྱི་རྒྱུད་ཀྱི་གང་ཟག་གི་བདག་མེད་མངོན་སུམ་དུ་རྟོགས་པའི་གཙོ་བོ་སེམས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། ཐེག་ཆེན་གྱི་རྟོགས་རིགས་སུ་གནས་པར་ཐལ། འདོད་པའི་ཕྱིར། བྱས་པ་ལ་ཁོ་ན་རེ། གང་ཟག་གི་བདག་མེད་མངོན་སུམ་དུ་རྟོགས་པའི་ཐེག་ཆེན་སེམས་བསྐྱེད་ཆོས་ཅན། དེར་ཐལ། དེའི་ཕྱིར། འདོད་ན། མ་ཡིན་པར་ཐལ། ཐེག་དམན་གྱི་རྟོགས་རིགས་སུ་གནས་པའི་ཕྱིར། དེར་ཐལ། དེ་ཡོད་པ་གང་ཞིག །གང་ཟག་གི་བདག་མེད་མངོན་སུམ་དུ་རྟོགས་པའི་ཡེ་ཤེས་ཉན་ཐོས་ཀྱི་རྟོགས་རིགས་སུ་གནས་པའི་ཕྱིར་ན་མ་ཁྱབ་སྟེ། གང་ཟག་གི་བདག་མེད་མངོན་སུམ་དུ་རྟོགས་པའི་ཐེག་ཆེན་སེམས་བསྐྱེད་དེ་ཉན་ཐོས་ཀྱི་རྟོགས་རིགས་སུ་གནས་པ་མ་ཡིན་པའི་ཕྱིར། དེར་ཐལ། ཐེག་ཆེན་གྱི་རྟོགས་རིགས་སུ་གནས་པའི་ཕྱིར། དེར་ཐལ། དེ་ཡོད་པའི་
ཕྱིར། སངས་རྒྱས་འཕགས་པའི་ཐེག་ཆེན་སེམས་བསྐྱེད་དེ་ཡིན་པའི་ཕྱིར། ཁ་ཅིག །རང་གི་གྲོགས་སུ་གྱུར་པའི་གཞན་དོན་དུ་རྫོགས་བྱང་དོན་གཉེར་གྱི་འདུན་པ་དང་མཚུངས་ལྡན་དུ་གྱུར་པའི་སེམས་ཁྱད་པར་ཅན་དེ་ཐེག་ཆེན་སེམས་བསྐྱེད་ཀྱི་མཚན་ཉིད་ཟེར་ན། ལམ་མ་ཞུགས་ཀྱི་གང་ཟག་གི་རྒྱུད་ལ་ཐེག་ཆེན་སེམས་བསྐྱེད་ཡོད་པར་ཐལ། དེའི་རྒྱུད་ལ་མཚན་ཉིད་དེ་ཡོད་པའི་ཕྱིར། དེར་ཐལ། གཞན་དོན་དུ་རྫོགས་བྱང་ཐོབ་འདོད་ཀྱི་ལམ་མ་ཞུགས་ཀྱི་གང་ཟག་ཡོད་པའི་ཕྱིར། འདོད་མི་ནུས་ཏེ། ཐེག་ཆེན་སེམས་བསྐྱེད་རྒྱུད་ལྡན་ཡིན་ན་ལམ་ཞུགས་ཡིན་དགོས་པའི་ཕྱིར། ཁོ་ན་རེ། ཐེག་ཆེན་སེམས་བསྐྱེད་རྒྱུད་ལྡན་གྱི་ལམ་མ་ཞུགས་ཀྱི་གང་ཟག་ཡོད་པར་ཐལ། འཇུག་སེམས་རྒྱུད་ལྡན་གྱི་དེ་ཡོད་པའི་ཕྱིར། དེར་ཐལ། འཇུག་སྡོམ་རྒྱུད་ལྡན་གྱི་དེ་ཡོད་པའི་ཕྱིར་ན་མ་ཁྱབ་སྟེ། ཐེག་ཆེན་སེམས་བསྐྱེད་ལ་རྩོལ་བཅས་ཀྱི་མྱོང་བ་ཙམ་རྒྱུད་ལ་སྐྱེས་པའི་གང་ཟག་དེ། བྱང་སྡོམ་སྐྱེ་བའི་རྟེན་དུ་རུང་བའི་ཕྱིར། དེར་ཐལ། ལམ་རིམ་ལས། ལྷ་ཀླུ་ལ་སོགས་ལུས་དང་བསམ་པའི་སྒོ་ནས་སྨོན་སེམས་སྐྱེ་རུང་བ་ཐམས་ཅད་འདིའི་རྟེན་དུ་རུང་ཡང་། འདི་ནི་ལམ་སྒྲོན་གྱི་འགྲེལ་པ་ལས། འཁོར་བས་ཡིད་འབྱུང་ལ་འཆི་བ་དྲན་པ། ཤེས་རབ་སྙིང་རྗེ་ཆེ་བ་ཞེས་སོགས་འབྱུང་བ་ལྟར་སྔར་བཤད་པའི་ལམ་རིམ་ལ་བློ་སྦྱོང་བས་བྱང་ཆུབ་ཀྱི་སེམས་ལ་ཡིད་འགྱུར་བའི་ཉམས་མྱོང་ཅུང་ཟད་རྙེད་པ་ཞིག་ལ་བྱེད་པ་ཡིན་ནོ། །ཞེས་གསུངས་པའི་ཕྱིར། ཁ་ཅིག །རང་གི་གྲོགས་སུ་གྱུར་པའི་གཞན་དོན་དུ་རྫོགས་པའི་བྱང་ཆུབ་ལ་དམིགས་པའི་འདུན་པ་དང་མཚུངས་ལྡན་དུ་བྱུང་བའི་གཙོ་བོ་རྣམ་རིག་དེ་ཐེག་ཆེན་སེམས་བསྐྱེད་ཀྱི་མཚན་ཉིད་ཟེར་ན། སངས་འཕགས་ཀྱི་རྒྱུད་ཀྱི་མིག་གི་རྣམ་
པར་ཤེས་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། སངས་འཕགས་ཀྱི་རྒྱུད་ཀྱི་གཙོ་བོ་སེམས་ཡིན་པའི་ཕྱིར། རྩ་བར་འདོད་མི་ནུས་ཏེ། ཡིད་ཀྱི་རྣམ་པར་ཤེས་པ་མ་ཡིན་པའི་ཕྱིར། ཁ་ཅིག །ཐེག་ཆེན་སེམས་བསྐྱེད་གང་ཞིག་སྤྱོད་པ་ཉམས་ལེན་གྱི་བྱ་བས་མ་ཟིན་པ། སྨོན་སེམས་ཀྱི་མཚན་ཉིད། དེ་གང་ཞིག །སྤྱོད་པ་ཉམས་ལེན་གྱི་བྱ་བས་ཟིན་པ་དེ། འཇུག་པ་སེམས་བསྐྱེད་ཀྱི་མཚན་ཉེར་ཟེར་ན། བྱང་འཕགས་ཀྱི་རྒྱུད་ཀྱི་སྨོན་པ་སེམས་བསྐྱེད་ཆོས་ཅན། སྤྱོད་པ་ཉམས་ལེན་གྱི་བྱ་བས་མ་ཟིན་པར་ཐལ། སྨོན་སེམས་ཡིན་པའི་ཕྱིར། འདོད་ན། དེ་ཆོས་ཅན། དེས་ཟིན་པར་ཐལ། བྱང་འཕགས་ཀྱི་རྒྱུད་ཀྱི་སེམས་བསྐྱེད་ཡིན་པའི་ཕྱིར། ཁྱབ་པ་ཡོད་དེ། རྣམ་བཤད་དགོངས་པ་རབ་གསལ་ལས། ས་ཐོབ་ནས་སེམས་བསྐྱེད་སྤྱོད་པ་དང་བྲལ་བ་མི་སྲིད་པའི་ཕྱིར། ཞེས་གསུངས་པའི་ཕྱིར། ཁ་ཅིག །ཀུན་རྫོབ་སེམས་བསྐྱེད་གང་ཞིག །ཆོ་གས་མ་བླངས་པ་དེ་སྨོན་སེམས་ཀྱི་མཚན་ཉིད་ཟེར་ན། མི་འཐད་པར་ཐལ། སྨོན་སེམས་ལེན་པའི་ཆོ་ག་ཡོད་པའི་ཕྱིར། དེར་ཐལ། སངས་རྒྱས་ཆོས་དང་ཚོགས་ཀྱི་ཞེས་སོགས་དེ་དེ་ཡིན་པའི་ཕྱིར་རོ། །འཇུག་སྡོམ་ཐོབ་ལ་མ་ཉམས་པའི་གང་ཟག་གི་རྒྱུད་ཀྱི་ཀུན་རྫོབ་སེམས་བསྐྱེད་དེ་འཇུག་པ་སེམས་བསྐྱེད་ཀྱི་མཚན་ཉིད། འཇུག་སྡོམ་རྒྱུད་ལ་མི་ལྡན་པའི་གང་ཟག་གི་རྒྱུད་ཀྱི་ཀུན་རྫོབ་སེམས་བསྐྱེད་དེ་སྨོན་པ་སེམས་བསྐྱེད་ཀྱི་མཚན་ཉིད་ཟེར་ན། བྱང་འཕགས་ཀྱི་རྒྱུད་ལ་སྨོན་སེམས་མེད་པར་ཐལ། མཚན་ཉིད་དེ་འཐད་པའི་ཕྱིར། འདོད་མི་ནུས་ཏེ། མཐོང་ལམ་བར་ཆད་མེད་ལམ་ལ་གནས་པའི་སེམས་དཔའི་རྒྱུད་ཀྱི་ཀུན་རྫོབ་སེམས་བསྐྱེད་དེ་
སྨོན་སེམས་ཡིན་པའི་ཕྱིར། དེར་ཐལ། དེ་ཡོད་པ་གང་ཞིག །དེ་འཇུག་སེམས་མ་ཡིན་པའི་ཕྱིར། དང་པོ་དེར་ཐལ། དེའི་རྒྱུད་ལ་གཞན་དོན་དུ་རྫོགས་པའི་བྱང་ཆུབ་ཐོབ་འདོད་ཀྱི་བློ་ཡོད་པའི་ཕྱིར། དེར་ཐལ། གཞན་དོན་དུ་རྫོགས་བྱང་ཐོབ་པའི་ཕྱིར་དུ་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་གང་ཟག་ཡིན་པའི་ཕྱིར། རྩ་རྟགས་གཉིས་པ་མ་གྲུབ་ན། དེ་ཆོས་ཅན། སྤྱོད་པ་ཉམས་ལེན་གྱི་བྱ་བས་དངོས་སུ་ཟིན་པར་ཐལ། འཇུག་སེམས་ཡིན་པའི་ཕྱིར། འདོད་ན། དེའི་རྒྱུད་ལ་ཀུན་རྫོབ་སེམས་བསྐྱེད་དངོས་སུ་ཡོད་པར་ཐལ། འདོད་པའི་ཕྱིར། འདོད་ན། དེའི་རྒྱུད་ལ་དེ་མངོན་གྱུར་དུ་ཡོད་པར་ཐལ། འདོད་པའི་ཕྱིར། འདོད་ན། རྣམ་བཤད་ལས། སྟོང་ཉིད་ལ་མཉམ་བཞག་བཞིན་པའི་དུས་ན་གང་ཟག་དེའི་རྒྱུད་ལ་ཐེག་ཆེན་སེམས་བསྐྱེད་ཡོད་མོད་ཀྱི། སེམས་ཅན་གྱི་དོན་དུ་སངས་རྒྱས་ཐོབ་པར་བྱའོ་སྙམ་པའི་བློ་མངོན་གྱུར་དུ་ག་ལ་དགོས། ཞེས་གསུངས་པ་མི་འཐད་པར་ཐལ་ལོ། །བྱས་པ་ལ་ཁོ་ན་རེ། དེའི་རྒྱུད་ལ་ཀུན་རྫོབ་སེམས་བསྐྱེད་དངོས་སུ་ཡོད་པར་ཐལ། དེའི་རྒྱུད་ཀྱི་དེ་དངོས་སུ་ཡོད་པའི་ཕྱིར། དེར་ཐལ། དེ་དངོས་སུ་སྐྱེས་པའི་ཕྱིར། མ་གྲུབ་ན། དེའི་རྒྱུད་ཀྱི་ཀུན་རྫོབ་སེམས་བསྐྱེད་ཆོས་ཅན། དངོས་སུ་སྐྱེས་པར་ཐལ། རང་རྒྱུ་ལས་དངོས་སུ་སྐྱེས་པའི་ཕྱིར་ན་མ་ཁྱབ། འོ་ན། སྔོན་པོ་ཆོས་ཅན། འབྱུང་བ་ཡིན་པར་ཐལ། རང་རྒྱུ་ལས་བྱུང་བ་ཡིན་པའི་ཕྱིར། འདོད་མི་ནུས་ཏེ། འབྱུང་འགྱུར་ཡིན་པའི་ཕྱིར། གཞན་ཡང་སྤྱོད་པ་ཉམས་ལེན་གྱི་བྱ་བས་ཟིན་ན། དེས་དངོས་སུ་ཟིན་པས་ཁྱབ་པར་ཐལ། མཐོང་ལམ་བར་ཆད་མེད་ལམ་པའི་རྒྱུད་ཀྱི་ཀུན་རྫོབ་སེམས་བསྐྱེད་དེ་སྤྱོད་པ་ཉམས་ལེན་གྱི་བྱ་བས་དངོས་སུ་ཟིན་པའི་ཕྱིར། འདོད་ན། སྟོང་ཉིད་མངོན་སུམ་དུ་རྟོགས་པའི་ཤེས་རབ་ཀྱིས་ཟིན་
ན་དེས་དངོས་སུ་ཟིན་པས་ཁྱབ་པར་ཐལ། འདོད་པའི་ཕྱིར། འདོད་ན། བྱང་འཕགས་ཀྱི་རྒྱུད་ཀྱི་ཀུན་རྫོབ་སེམས་བསྐྱེད་ཡིན་ན་དེས་དངོས་སུ་ཟིན་པས་ཁྱབ་པར་ཐལ། དེས་ཟིན་པས་ཁྱབ་པ་གང་ཞིག །འདོད་པའི་ཕྱིར། འདོད་ན། རྣམ་བཤད་ལས། ས་ཐོབ་ནས་སྟོང་པ་ཉིད་ཀྱི་དོན་མངོན་སུམ་དུ་རྟོགས་ཀྱང་། དེས་དངོས་སུ་མ་ཟིན་པའི་སེམས་བསྐྱེད་སྐབས་དུ་མར་འབྱུང་བའི་ཕྱིར། ཞེས་བཤད་པ་མི་འཐད་པར་ཐལ། འདོད་པའི་ཕྱིར། ཡང་ཁ་ཅིག །མཐོང་ལམ་བར་ཆད་མེད་ལམ་པའི་རྒྱུད་ལ་ཀུན་རྫོབ་སེམས་བསྐྱེད་མངོན་གྱུར་ཏུ་ཡོད་པར་ཐལ། དེའི་རྒྱུད་ཀྱི་ཀུན་རྫོབ་སེམས་བསྐྱེད་དེ་བློ་མངོན་གྱུར་པ་ཡིན་པའི་ཕྱིར་ཏེ། དེ་དམིགས་རྣམ་འཛིན་པའི་ཤེས་པ་ཡིན་པའི་ཕྱིར་ན་མ་ཁྱབ། ཁ་ཅིག །དེའི་རྒྱུད་ཀྱི་ཀུན་རྫོབ་སེམས་བསྐྱེད་དེ་སྨོན་སེམས་མ་ཡིན་པར་ཐལ། དེ་འཇུག་སེམས་ཡིན་པའི་ཕྱིར་ཏེ། དེའི་རྒྱུད་ལ་དེ་ཡོད་པའི་ཕྱིར། དེར་ཐལ། དེའི་རྒྱུད་ལ་འཇུག་སྡོམ་ཡོད་པའི་ཕྱིར་ན་མ་ཁྱབ། ཁ་ཅིག །ཁྱོད་ཀྱི་རྒྱུད་ལ་འཇུག་སེམས་ཡོད་པར་ཐལ། ཁྱོད་དེ་ཐོབ་ལ་མ་ཉམས་པའི་གང་ཟག་ཡིན་པའི་ཕྱིར་ན་མ་ཁྱབ། སངས་འཕགས་ཆོས་ཅན། ཁྱོད་ཀྱི་རྒྱུད་ལ་སྨོན་སེམས་ཡོད་པར་ཐལ། ཁྱོད་དེ་ཐོབ་ལ་མ་ཉམས་པའི་གང་ཟག་ཡིན་པའི་ཕྱིར། ཁ་ཅིག །ཐེག་ཆེན་སེམས་བསྐྱེད་གང་ཞིག །རྫོགས་པའི་བྱང་ཆུབ་ཀྱི་དོན་དམ་པའི་གནས་ལུགས་ལ་གཉིས་སྣང་ནུབ་པ་དོན་དམ་སེམས་བསྐྱེད་ཀྱི་མཚན་ཉིད་ཟེར་ན། དོན་དམ་པའི་བྱང་ཆུབ་སེམས་དཔའ་ཡིན་ན་བྱང་ཆུབ་སེམས་དཔའ་ཡིན་དགོས་པར་ཐལ། དོན་དམ་སེམས་བསྐྱེད་ཡིན་ན་ཐེག་ཆེན་སེམས་བསྐྱེད་ཡིན་དགོས་པའི་ཕྱིར། འདོད་ན། བྱང་སེམས་མཐོང་ལམ་པའི་རྒྱུད་ཀྱི་འགོག་བདེན་ཆོས་ཅན། དེར་ཐལ། དེའི་ཕྱིར། དེར་ཐལ། དོན་དམ་པའི་དགེ་འདུན་
དཀོན་མཆོག་ཡིན་པ་གང་ཞིག །རྒྱུ་མཚན་མཚུངས་པའི་ཕྱིར། ཁོ་ན་རེ། དོན་དམ་སེམས་བསྐྱེད་ཐེག་ཆེན་སེམས་བསྐྱེད་ཡིན་པར་ཐལ། སྒོམ་རིམ་བར་པ་ལས། བྱང་ཆུབ་ཀྱི་སེམས་རྣམ་པ་གཉིས་ཏེ། ཀུན་རྫོབ་དང་དོན་དམ་པའི་སེམས་སོ། །ཞེས་གསུངས་པའི་ཕྱིར་ན་མ་ཁྱབ། ཁ་ཅིག །སྨོན་འཇུག་གང་རུང་ཡང་ཡིན། འཇུག་སྡོམ་ཐོབ་པའི་སྤྱོད་པ་ཉམས་ལེན་གྱི་བྱ་བ་མངོན་འགྱུར་པས་མ་ཟིན་པ་ཡིན་པའི་གཞི་མཐུན་པ་དེ་སྨོན་སེམས་ཀྱི་མཚན་ཉིད་ཟེར་ན། ཐེག་ཆེན་མཐོང་ལམ་བར་ཆད་མེད་ལམ་ལ་གནས་པའི་སེམས་དཔའི་རྒྱུད་ཀྱི་ཀུན་རྫོབ་སེམས་བསྐྱེད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་འཇུག་སྡོམ་ཐོབ་པའི་སྤྱོད་པ་ཉམས་ལེན་གྱི་བྱ་བ་མངོན་གྱུར་པས་ཟིན་པར་ཐལ། དེའི་རྒྱུད་ལ་འཇུག་སྡོམ་ཡོད་པ་གང་ཞིག །དེའི་རྒྱུད་ཀྱི་ཀུན་རྫོབ་སེམས་བསྐྱེད་དེ་ཤེར་ཕྱིན་གྱི་ཉམས་ལེན་གྱི་བྱ་བ་མངོན་གྱུར་པས་ཟིན་པའི་ཕྱིར། གཉིས་པ་དེར་ཐལ། དེའི་རྒྱུད་ལ་དེ་ཡོད་པ་གང་ཞིག །དེའི་རྒྱུད་ཀྱི་ཤེར་ཕྱིན་གྱི་ཉམས་ལེན་གྱི་བྱ་བས་ཟིན་པའི་ཕྱིར། དང་པོ་མ་གྲུབ་ན། དེ་ཆོས་ཅན། ཁྱོད་ཀྱི་རྒྱུད་ལ་དེ་མངོན་གྱུར་ཏུ་ཡོད་པར་ཐལ། ཁྱོད་ཆོས་ཅན་དེ་ཡིན་པའི་ཕྱིར། རྩ་རྟགས་གཉིས་པ་མ་གྲུབ་ན། དེའི་རྒྱུད་ཀྱི་ཀུན་རྫོབ་སེམས་བསྐྱེད་ཆོས་ཅན། དེའི་རྒྱུད་ཀྱི་ཤེར་ཕྱིན་གྱི་ཉམས་ལེན་གྱི་བྱ་བས་ཟིན་པར་ཐལ། དེའི་རྒྱུད་ཀྱི་ཀུན་རྫོབ་སེམས་བསྐྱེད་ཡིན་པའི་ཕྱིར། ཁ་ཅིག །ཐེག་དམན་གྱི་ཀུན་རྫོབ་སེམས་བསྐྱེད་ཡོད་ཟེར་ན། ཐེག་དམན་གྱི་བྱང་ཆུབ་སེམས་ཡོད་པར་ཐལ། འདོད་པའི་ཕྱིར། འདོད་ན། ཐེག་དམན་གྱི་བྱང་ཆུབ་སེམས་དཔའ་ཡོད་པར་ཐལ། འདོད་པའི་ཕྱིར། འདོད་མི་ནུས་སོ། ཁ་ཅིག །ས་མ་ཐོབ་པའི་གང་ཟག་གི་རྒྱུད་ཀྱི་ཀུན་རྫོབ་སེམས་བསྐྱེད་སྨོན་སེམས་དང་། ཅིག་ཤོས་འཇུག་སེམས་ཀྱི་མཚན་
ཉིད་ཟེར་ན། མི་འཐད་པར་ཐལ། འཇུག་སེམས་རྒྱུད་ལྡན་གྱི་བྱང་སེམས་སོ་སྐྱེ་ཡོད་པའི་ཕྱིར། དེར་ཐལ། བསླབ་བཏུས་ལས། སར་མ་ཆུད་པ་རྣམས་ལ་ཡང་བྱང་ཆུབ་སེམས་དཔའི་སྡོམ་པའི་དབང་དུ་བྱས་པ་ཡོད་དམ་ཞེ་ན་ཡོད་པར་རིག་པར་བྱའོ། །ཞེས་གསུངས་པའི་ཕྱིར། གཉིས་པ་རང་ལུགས་ནི། ཐེག་ཆེན་ཀུན་རྫོབ་སེམས་བསྐྱེད་ཀྱི་མཚན་ཉིད་ནི་སྔར་ཚིག་སྦྱོར་གྱི་སྐབས་སུ་བཞག་ཟིན། དེ་ལ་ངོ་བོའི་སྒོ་ནས་སྨོན་འཇུག་གཉིས། ཐེག་ཆེན་ཀུན་རྫོབ་སེམས་བསྐྱེད་གང་ཞིག །སྤྱོད་པ་ཉམས་ལེན་གྱི་བྱ་བས་དངོས་སུ་མ་ཟིན་པས་རབ་ཏུ་ཕྱེ་བ་དེ་དང་པོའི་མཚན་ཉིད། དེ་གང་ཞིག །སྤྱོད་པ་ཉམས་ལེན་གྱི་བྱ་བས་དངོས་སུ་ཟིན་པས་རབ་ཏུ་ཕྱེ་བ་དེ་གཉིས་པའི་མཚན་ཉིད། དང་པོ་ནི། ཐེག་ཆེན་གྱི་ཚོགས་ལམ་ནས་རྒྱུན་མཐའི་བར་དུ་ཡོད། གཉིས་པ་ནི་ཐེག་ཆེན་གྱི་ཚོགས་ལམ་ནས་སངས་རྒྱས་ཀྱི་སའི་བར་དུ་ཡོད། སྤྱིར་སེམས་བསྐྱེད་ལ་ས་མཚམས་ཀྱི་སྒོ་ནས་དབྱེ་ན། མོས་པས་སྤྱོད་པའི་སེམས་བསྐྱེད། ལྷག་བསམ་དག་པའི་སེམས་བསྐྱེད། རྣམ་པར་སྨིན་པའི་སེམས་བསྐྱེད། སྒྲིབ་པ་སྤངས་པའི་སེམས་བསྐྱེད་དང་བཞི། དཔེ་གྲོགས་ཆོས་མཐུན་གྱི་སྒོ་ནས་དབྱེ་ན། ས་ལྟ་བུ་ནས་སྤྲིན་ལྟ་བུའི་བར་ཉེར་གཉིས། སྒྲས་བརྗོད་རིགས་ཀྱི་སྒོ་ནས་དབྱེ་ན། དོན་དམ་སེམས་བསྐྱེད་དང་ཀུན་རྫོབ་སེམས་བསྐྱེད་གཉིས་སུ་ཡོད་དོ། །གསུམ་པ་རྩོད་པ་སྤོང་བ་ལ། ཁ་ཅིག །སངས་འཕགས་ཀྱི་རྒྱུད་ཀྱི་ཐེག་ཆེན་ཀུན་རྫོབ་སེམས་བསྐྱེད་དེ་ཐེག་ཆེན་ལམ་གྱི་འཇུག་སྒོ་མ་ཡིན་པར་ཐལ། སེམས་བསྐྱེད་ཀྱི་མཚན་ཉིད་ཀྱི་ཟུར་དུ་རིགས་གནས་སྨོས་པ་ལ་དགོས་པ་ཡོད་པའི་ཕྱིར། འདོད་ན། སངས་འཕགས་ཀྱི་རྒྱུད་ལ་ཐེག་ཆེན་ལམ་གྱི་འཇུག་
སྒོ་མེད་པར་ཐལ། འདོད་པའི་ཕྱིར། ཟེར་ན་མ་ཁྱབ། ཁ་ཅིག །བྱང་སེམས་ཚོགས་ལམ་པའི་རྒྱུད་ཀྱི་སྨོན་སེམས་ཆོས་ཅན། སྤྱོད་པ་ཉམས་ལེན་གྱི་བྱ་བས་དངོས་སུ་མ་ཟིན་པར་ཐལ། སྨོན་པ་སེམས་བསྐྱེད་ཡིན་པའི་ཕྱིར། འདོད་ན། ཟིན་པར་ཐལ། ཕྱིན་དྲུག་ཉམས་ལེན་གྱི་བྱ་བས་དངོས་སུ་ཟིན་པའི་ཕྱིར། དེར་ཐལ། གོ་སྒྲུབ་ཡིན་པའི་ཕྱིར་ན་མ་ཁྱབ། བདེན་འཛིན་མངོན་གྱུར་བ་རྒྱུད་ལྡན་གྱི་བྱང་འཕགས་ཀྱི་རྒྱུད་ཀྱི་ཀུན་རྫོབ་སེམས་བསྐྱེད་ཆོས་ཅན། དེར་ཐལ། དེའི་ཕྱིར། འདོད་ན། ཤེར་ཕྱིན་ཉམས་ལེན་གྱི་བྱ་བས་དངོས་སུ་ཟིན་པར་ཐལ། འདོད་པའི་ཕྱིར། འདོད་ན། སྟོང་ཉིད་རྟོགས་པའི་ཤེས་རབ་ཀྱིས་དངོས་སུ་ཟིན་པར་ཐལ། འདོད་པའི་ཕྱིར། འདོད་མི་ནུས་ཏེ། རྣམ་བཤད་ལས། ས་ཐོབ་ནས་ཞེས་སོགས་ཀྱི་ལུང་གི་ཉེས་པ་དངོས་སུ་ཡོད་པའི་ཕྱིར། ཁ་ཅིག །ས་བརྒྱད་པ་བའི་རྒྱུད་ལ་སྤྱོད་པ་ཉམས་ལེན་གྱི་བྱ་བས་དངོས་སུ་མ་ཟིན་པའི་ཀུན་རྫོབ་སེམས་བསྐྱེད་ཡོད་པར་ཐལ། དེའི་རྒྱུད་ལ་སྨོན་སེམས་ཡོད་པའི་ཕྱིར། འདོད་ན། དེའི་རྒྱུད་ལ་སྟོང་ཉིད་རྟོགས་པའི་ཤེས་རབ་ཀྱིས་དངོས་སུ་མ་ཟིན་པའི་དེ་ཡོད་པར་ཐལ། འདོད་པའི་ཕྱིར། འདོད་ན། ས་བརྒྱད་པ་བའི་རྒྱུད་ལ་བདེན་འཛིན་མངོན་གྱུར་ཏུ་ཡོད་པར་ཐལ། འདོད་པའི་ཕྱིར། ཟེར་ན་མ་ཁྱབ། སྨོན་སེམས་རྒྱུད་ལྡན་གྱི་ས་བརྒྱད་པ་བ་ཡོད་པར་ཐལ། ཀུན་རྫོབ་སེམས་བསྐྱེད་རྒྱུད་ལ་ལྡན། དེ་དངོས་སུ་རྒྱུད་ལ་མི་ལྡན་པའི་ས་བརྒྱད་པ་བའི་རྒྱུད་ཀྱི་ཀུན་རྫོབ་སེམས་བསྐྱེད་དེ་སྨོན་སེམས་ཡིན་པའི་ཕྱིར། དེར་ཐལ། དེ་སྤྱོད་པ་ཉམས་ལེན་གྱི་བྱ་བས་དངོས་སུ་མ་ཟིན་པའི་ཀུན་རྫོབ་སེམས་བསྐྱེད་ཡིན་པའི་ཕྱིར། དེར་ཐལ། དེ་ཀུན་རྫོབ་སེམས་བསྐྱེད་གང་ཞིག །དེ་སྤྱོད་པ་ཉམས་ལེན་གྱི་བྱ་བས་དངོས་སུ་མ་ཟིན་པའི་ཕྱིར། དང་པོར་དེར་ཐལ། དེ་རྒྱུད་ལ་ལྡན། དེ་
དངོས་སུ་རྒྱུད་ལ་མི་ལྡན་པའི་ས་བརྒྱད་པ་བ་ཡོད་པའི་ཕྱིར། དེར་ཐལ། དེ་འདྲའི་ས་དང་པོ་བ་ཡོད་པའི་ཕྱིར། དེ་འདྲའི་ཚོགས་ལམ་པ་ཡོད་པའི་ཕྱིར་ཏེ། རྣམ་བཤད་ལས། དེ་ལྟ་བུ་མེད་པའི་དུས་ན་དངོས་སུ་མ་ཟིན་པའོ། །ཞེས་གསུངས་པའི་ཕྱིར། རྩ་རྟགས་གཉིས་པ་མ་གྲུབ་ན། ཀུན་རྫོབ་སེམས་བསྐྱེད་རྒྱུད་ལ་ལྡན། དེ་དངོས་སུ་རྒྱུད་ལ་མི་ལྡན་པའི་ས་བརྒྱད་པ་བའི་རྒྱུད་ཀྱི་ཀུན་རྫོབ་སེམས་བསྐྱེད་དངོས་སུ་ཡོད་པར་ཐལ། དེ་སྤྱོད་པ་ཉམས་ལེན་གྱི་བྱ་བས་དངོས་སུ་ཟིན་པའི་ཕྱིར། ཁྱབ་པ་ཡོད་དེ། རྣམ་བཤད་ལས། གཏོང་བའི་སེམས་དཔའ་སྤེལ་པའི་རྣམ་པར་ཤར་བའི་དུས་ཉིད་ན། རྣམ་མཁྱེན་དོན་གཉེར་གྱི་དྲན་འདུན་དུ་རེ་བ་དངོས་སུ་ཡོད་པ་ནི་སྤྱོད་པ་ཉམས་ལེན་གྱི་བྱ་བས་དངོས་སུ་ཟིན་པའི་དོན་ཡིན་ལ། དེ་ལྟ་བུ་མེད་པའི་དུས་ན་དངོས་སུ་མ་ཟིན་པའོ། །ཞེས་གསུངས་པའི་ཕྱིར། ཁ་ཅིག །གང་ཟག་གཅིག་གི་རྒྱུད་ལ་ཡིད་ཀྱི་རྣམ་པར་ཤེས་པ་རྫས་པ་ཐ་དད་པ་དུ་མ་ཅིག་ཅར་དུ་སྐྱེ་བ་ཡོད་པར་ཐལ། སྔར་གྱི་དམ་བཅའ་འཐད་པའི་ཕྱིར། འདོད་མི་ནུས་ཏེ། མདོ་ལས། སེམས་ཅན་རྣམས་ནི་རྣམ་པར་ཤེས་པའི་རྒྱུན་རེ་རེ་བའོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་ནི་གང་ཟག་གཅིག་གི་རྒྱུད་ལ་ཡིད་ཀྱི་རྣམ་པར་ཤེས་པ་རིགས་མཐུན་པ་རྫས་ཐ་དད་པ་དུ་མ་མངོན་གྱུར་དུ་ཅིག་ཅར་དུ་མི་སྐྱེ་བའི་དོན་ཡིན་པའི་ཕྱིར། སྨྲས་པ། མ་རྨད་སྙིང་སྟོབས་མཆོག་གི་བྱེད་པོས་གྲངས་མེད་ལུས་ཅན་མ་ལུས་པ། །ཀུན་མཁྱེན་ཡེ་ཤེས་རིན་ཆེན་གླིང་དུ་བདེ་བར་འཁྲིད་པའི་འཁོར་ལོ་ཆེ། །སྨོན་འཇུག་འཕྲུལ་གྱིས་རྟོགས་དཀའི་ལུགས་བཟང་གཏན་ལ་ཕབ་ཚེ་སེང་གེ་བཟང་། །ཚུལ་འདིར་ངལ་བའི་ཁུར་རྣམས་སྤངས་ཏེ་ཞི་བདེའི་དབྱིངས་སུ་བཞུགས་མིན་ནམ། །རྒྱལ་བའི་
ཆོས་ཚུལ་མ་ལུས་ཀུན་འཛིན་འཛིན་མའི་སྤོ་འདིར་སྨྲ་བའི་དཔལ། །དཔལ་གྱི་གཡུང་དྲུང་འཁྱིལ་འདྲའི་མཁྱེན་རབ་རབ་ཡངས་བློ་ཡིས་དཀའ་བའི་གནད། །གནད་ཀུན་སྟོན་ལ་འཇིགས་བྲལ་མཁས་དབང་དབང་ཕྱུག་ལ་སོགས་དྲེགས་ལྡན་ཀུན། །ཀུན་གྱི་གཙུག་ན་མངོན་པར་རབ་མཐོ་མཐོ་རིས་འདྲེན་པ་ཡོངས་འཛིན་རྗེ། །གང་གི་འཆད་མཁས་གསུང་རབ་གཏམ་གྱི་རྔ། །ཕྱོགས་བྲལ་ལེགས་བཤད་ཚོགས་ཀྱི་དབྱུག་གུ་དེ། ཁོ་བོའི་བློ་གྲོས་སྙིམ་པས་བསྐུལ་བ་ན། ཤེས་ལྡན་ཐོས་འཛིན་རྨ་བྱ་ཟློས་གར་བྱེད། །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གསུམ་པ་འགྲེལ་པ་བཤད་པ་ལ། ཚིག་དོན་དང་། རྩོད་པ་སྤོང་བ་གཉིས། དང་པོ་ནི། གཞན་གྱི་དོན་གྱི་ཕྱིར་དུ་ཐོག་མར་རང་ཉིད་སངས་རྒྱས་སུ་གྲུབ་ནས། རིགས་ཅན་གསུམ་གྱི་སྐལ་བ་ཇི་ལྟ་བ་བཞིན་དུ་འབད་པར་བྱའོ་སྙམ་དུ་སེམས་བསྐྱེད་པ་ཆོས་ཅན། རྣམ་པ་གཉིས་ཡོད་དེ། གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་དོན་གཉེར་གྱི་འདོད་པ་དང་མཚུངས་ལྡན་གྱི་མཚན་ཉིད་ཀྱི་ཚིག་ཟུར་དུ་ཞུགས་པའི་སྨོན་པ་སེམས་བསྐྱེད་དང་འཇུག་པའི་སེམས་བསྐྱེད་ཀྱི་ངོ་བོ་ཉིད་རྣམ་པ་གཉིས་ཡོད་པའི་ཕྱིར། གཉིས་པ་ལ། རྩོད་པ་དང་། ལན་གཉིས་ལས། དང་པོ་ནི། གཞན་དོན་དུ་ཡང་དག་པར་རྫོགས་པའི་བྱང་ཆུབ་འདོད་པའི་དོན་གཉེར་གྱི་འདུན་པ་དེ་ཆོས་ཅན། ཁྱོད་སེམས་བསྐྱེད་པ་ཡིན་པར་འགྱུར་ཏེ་མ་ཡིན་པར་ཐལ། ཁྱོད་སེམས་ལས་བྱུང་བ་སྟེ་སེམས་བྱུང་ཡིན་པའི་ཕྱིར། ཁྱབ་པ་ཡོད་དེ། བྱང་ཆུབ་འདོད་པ་ཉིད་ནི་དེ་དོན་དུ་གཉེར་བ་དགེ་བའི་ཆོས་འདུན་པ་ཡུལ་སོ་སོར་ངེས་པ། འདུ་བྱེད་ཀྱི་ཕུང་པོས་བསྡུས་པ་ཡིན་ལ། སེམས་བསྐྱེད་པ་ནི། སེམས་གང་ཞིག །ཡུལ་ཁྱད་པར་དུ་འཕགས་པ། དོན་གཉིས་
ཡུལ་དུ་སྣང་བ་ཅན་དུ་འབྱུང་བ་མ་ཡིན་ནམ་སྟེ་ཡིན་པའི་ཕྱིར་ཞེ་ན། གཉིས་པ་ལ། གཞན་དོན་འདོད་པའི་མིང་གིས་བཏགས་པ་དང་། བྱང་ཆུབ་འདོད་པའི་མིང་གིས་བཏགས་པའོ། །དང་པོ་ནི། སེམས་བྱུང་ཡིན་ན་སེམས་བསྐྱེད་མ་ཡིན་པ་བདེན་མོད་ཀྱི། འོན་ཀྱང་། སེམས་བསྐྱེད་ཀྱི་མཚན་ཉིད་སྟོན་པའི་སྐབས་འདིར་ཆོས་ཅན། སེམས་བསྐྱེད་ལ་གཞན་དོན་འདོད་པའི་མིང་གིས་ཉེ་བར་བཏགས་པ་ལ་བརྟེན་པ་ཡིན་པས། གཞི་མཐུན་ཁས་བླངས་པའི་ཉེས་པ་མེད་དོ་སྟེ་མེད་པར་ཐལ། སེམས་བསྐྱེད་ལ་འདུན་པའི་མིང་གིས་འདོགས་པའི་ཆོས་གསུམ་ཚང་བས་བཏགས་པ་ཡིན་པའི་ཕྱིར། དེ་ཆོས་ཅན། དེ་ལྟར་འདོགས་པའི་རྒྱུ་མཚན་ཡོད་དེ། སེམས་བསྐྱེད་དེ་རང་རྒྱུ་གཞན་དོན་དོན་གཉེར་གྱི་འདུན་པ་ལས་བྱུང་བས་རྒྱུའི་མིང་གིས་འབྲས་བུ་ལ་བཏགས་ནས་བསྟན་པ་ཡིན་པའི་ཕྱིར། ཤེས་བྱ་ཆོས་ཅན། དེ་གཉིས་རྒྱུ་འབྲས་སུ་འགྱུར་ཏེ། སེམས་ཅན་སྡུག་བསྔལ་ལས་འདོན་པའི་བསམ་པ་དགེ་བའི་ཆོས། འགྲོ་ཀུན་སྡུག་བསྔལ་དང་བྲལ་བ་ལ་འདུན་པའི་མཚན་ཉིད་ཀྱི་གཞན་དོན་དོན་དུ་གཉེར་བ་ཡོད་ན་དེའི་རྗེས་སུ་ངེས་པར་བྱང་ཆུབ་ཀྱི་སེམས་བསྐྱེད་པས་ཁྱབ་ལ། འདུན་པ་དེ་སྔོན་དུ་མ་སོང་ན་འདིར་བསྟན་སེམས་བསྐྱེད་མཚན་ཉིད་རྫོགས་པ་མི་སྐྱེ་བའི་ཕྱིར། ཤེས་བྱ་ཆོས་ཅན། དེ་ལ་གཞན་དོན་དོན་གཉེར་གྱི་མིང་གིས་བཏགས་པ་ལ་དགོས་པ་ཡོད་དེ། དེ་ལྟར་གཞན་དོན་དོན་དུ་གཉེར་བའི་བྱང་ཆུབ་སེམས་དཔའི་རྒྱུད་ལ་སྤྱོད་པའི་རྟེན་སེམས་བསྐྱེད་དང་ཕྱིན་དྲུག་གིས་བསྡུས་པའི་དགེ་བའི་ཆོས་ཐམས་ཅད་གོང་དུ་འཕེལ་བར་འགྱུར་རོ་ཞེས་ཤེས་པར་བྱ་བའི་ཆེད་ཡིན་པའི་ཕྱིར།
གཉིས་པ་ནི། དོན་གཉེར་གྱི་འདུན་པ་གཉིས་ཀྱི་ནང་ནས། རྣམ་པ་གཅིག་ཏུ་བྱང་ཆུབ་དོན་གཉེར་གྱི་འདུན་པའི་དབང་དུ་བྱས་ན་ཡང་སེམས་བསྐྱེད་ལ་འདུན་པའི་མིང་གིས་བཏགས་པ་ཙམ་ཡིན་པས་གཞི་མཐུན་ཁས་བླངས་པའི་ཉེས་པ་མེད་དོ། །རང་གི་ཐོབ་བྱའི་འབྲས་བུ་ལ་རེ་བ་འཆའ་བའི་སྨོན་ལམ་ནི་དོན་དུ་གཉེར་བ་སྟེ། དེ་ཡང་འདིར་བསྟན་ཡང་དག་པར་རྫོགས་པའི་བྱང་ཆུབ་འདོད་པ་ཉིད་ཡིན་ལ་སྟེ་ཡིན་པས་སེམས་བསྐྱེད་པ་ཆོས་ཅན། བྱང་ཆུབ་དོན་གཉེར་གྱི་འདུན་པའི་མིང་གིས་འདོགས་པའི་རྒྱུ་མཚན་ཡོད་དེ། ཁྱོད་དེ་དང་མཚུངས་པ་ལྔས་ལྷན་ཅིག་སྤྱོད་པའི་ཕྱིར། ཤེས་བྱ་ཆོས་ཅན། དེ་ལ་བྱང་ཆུབ་དོན་གཉེར་གྱི་འདུན་པའི་སྒྲར་བསྟན་པ་ལ་ནི་དགོས་པ་དང་བཅས་པ་ཡིན་ཏེ། སྔར་བཤད་པ་དེ་ལྟར་ན་བྱང་ཆུབ་སེམས་དཔའ་རྣམས་ལ་སྨོན་ལམ་བཤད་པ་དེ་དང་ལྡན་པའི་སེམས་བསྐྱེད་དེ་སྐྱེའོ་ཞེས་ཤེས་པར་བྱ་བའི་ཕྱིར་དུ་ཡིན་པའི་ཕྱིར། གཉིས་པ་དེ་ངེས་པའི་ཡན་ལག་དམིགས་པ་བཤད་པ་ལ། དྲི་བ་དང་། ལན་གཉིས་ལས། དང་པོ་ནི། ཤེས་བྱ་ཆོས་ཅན། མཚན་ཉིད་ལས་འཕྲོས་པའི་དྲི་བར་མ་ཟད། དྲི་ཚུལ་གཞན་ཡང་ཡོད་དེ། ཐོབ་བྱའི་འབྲས་བུ་གང་འདོད་པའི་བདག་ཉིད་ཡང་དག་པར་རྫོགས་པའི་བྱང་ཆུབ་དེ་ནི་གང་ཡིན། གང་གི་དོན་དུ་སེམས་བསྐྱེད་པ་གཞན་གྱི་དོན་ནི་གང་ཡིན་ཞེ་ན་ཞེས་འདྲི་བར་བྱེད་པའི་ཕྱིར། གཉིས་པ་ལ་རྩ་བ་དང་། འགྲེལ་པ། དང་པོ་ནི། དམིགས་ཡུལ་བྱང་ཆུབ་དེ་དང་གཞན་དོན་དེ་ནི་ཆོས་ཅན། ཡུམ་གསུམ་ཀ་ལས། བསྡུས་པ་དང་། རྒྱས་པའི་སྒོ་ནས་བརྗོད་པར་ཤེས་པར་བྱ་སྟེ། མདོ་བར་མ་ལས་བསྟན་པ་བཞིན་དུ། གཞན་གཉིས་ལས་ཀྱང་དོན་ཚང་བར་བསྟན་པའི་
ཕྱིར། གཉིས་པ་ལ། དམིགས་ཡུལ་གཉིས་བཤད་པ་དང་། དེ་གཉིས་གྲུབ་ཟིན་པར་བསྟན་པ་དང་། ཁུངས་གཞན་མི་འདྲེན་པའི་རྒྱུ་མཚན་ནོ། །དང་པོ་ནི། ཤེས་བྱ་ཆོས་ཅན། སེམས་བསྐྱེད་ཀྱི་དམིགས་ཡུལ་ཡུམ་བར་མ་བཞིན་དུ་བསྟན་པས། རྒྱལ་བའི་ཡུམ་རྣམ་པ་གསུམ་ཆར་ལས་ཀྱང་བསྡུས་པ་དང་རྒྱས་པའི་སྒོ་ནས་སེམས་བསྐྱེད་ཀྱི་དམིགས་ཡུལ་ཡང་དག་པར་རྫོགས་པའི་བྱང་ཆུབ་སེམས་དང་གཞན་གྱི་དོན་བསྟན་པ་ཡིན་ཏེ། རྒྱས་བསྡུས་གཉིས་ལས་ཀྱང་སྟོང་ཕྲག་ཉི་ཤུ་ལྔ་པའི་མདོའི་དོན་དང་མི་འགལ་བ་སྟེ་མཐུན་པར། དེའི་དོན་ཇི་ལྟ་བ་བཞིན་དུ་བསྟན་པའི་ཕྱིར། ཤེས་བྱ་ཆོས་ཅན། རྒྱས་བསྡུས་གཉིས་ནས་དམིགས་ཡུལ་བྱང་ཆུབ་དང་གཞན་དོན་དེ་གཉིས་བར་མ་བཞིན་དུ་སྟོན་བྱེད་ཀྱི་ངག་མེད་པ་མ་ཡིན་ཏེ། ཡུམ་བར་མ་ལས། བྱང་ཆུབ་མདོར་བསྟན་དང་རྒྱས་བཤད་བསྟན་པའི་དོན་བརྗོད་བྱར་བྱས་ནས་ཤེས་པར་བྱེད་པའི་དོན་ཅན་གྱི་ངག་དང་། བར་མ་ལས་བསྟན་པའི་གཞན་དོན་མདོར་བསྟན་རྒྱས་བཤད་ཀྱི་དོན་རབ་ཏུ་སྟོན་པ་ལྷུར་ལེན་པར་བྱེད་པའི་ཡུམ་རྒྱས་པའི་ངག་དང་། བསྡུས་པ་ལས། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་ལས་བརྩམས་ཏེ་སྤོབས་པར་བྱོས་ཤིག །ཅེས་པའི་ངག་གིས་བསྟན་པའི་ཕྱིར། ཤཱ་རིའི་བུ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ། ཆོས་ཐམས་ཅད་རྣམ་པ་ཐམས་ཅད་མངོན་པར་རྫོགས་པར་འཚང་རྒྱ་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱའོ་ཞེས་པའི་ཡུམ་བར་མའི་མདོ་ཆོས་ཅན། ཁྱོད་ཀྱིས་སེམས་བསྐྱེད་ཀྱི་དམིགས་ཡུལ་བྱང་ཆུབ་དེ་
ཉིད་མདོར་བསྟན་པ་ཡིན་ཏེ། ཆོས་ཀུན་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཀྱི་ངོ་བོ་ཡིན་ལ། ཁྱོད་ཀྱིས་དེ་ཐོབ་བྱེད་ཀྱི་ཐབས་ཤེར་ཕྱིན་ལ་སློབ་ཚུལ་ཙམ་ཞིག་མདོར་བསྟན་པའི་ཕྱིར། ཤཱ་རི་བུ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ། ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་འཚང་རྒྱ་བར་འདོད་པས་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་གྱི་ཕར་ཕྱིན་དྲུག་པོ་ཐམས་ཅད་ལ། སྦྱིན་པར་བྱ་བ་དང་། སྦྱིན་པ་པོ་དང་། ལེན་པ་པོ་ལ་སོགས་པ་མི་དམིགས་པར་བསྒྲུབ་པར་བྱའོ་ཞེས་པའི་ཡུམ་བར་མའི་མདོ་ཆོས་ཅན། ཁྱོད་ཀྱིས་དམིགས་ཡུལ་བྱང་ཆུབ་དེ་རྒྱས་པར་བཤད་པ་ཡིན་ཏེ། ཆོས་ཀུན་མངོན་པར་བྱང་ཆུབ་པ་ནི་བྱང་ཆུབ་ཀྱི་ངོ་བོ་ཡིན་ལ། དེ་ཐོབ་བྱེད་ཀྱི་ཐབས་ཕར་ཕྱིན་དྲུག་ཀ་སྟོང་ཉིད་རྟོགས་པའི་ཤེས་རབ་ཀྱིས་ཟིན་པའི་སྒོ་ནས་རྒྱས་པར་བསྟན་པའི་ཕྱིར། སེམས་ཅན་ཐམས་ཅད་སྐལ་བ་ཇི་ལྟ་བ་བཞིན་དུ་མྱ་ངན་ལས་འདའ་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ཞེས་པའི་ཡུམ་བར་མའི་མདོ་ཆོས་ཅན། ཁྱོད་ཀྱིས་དམིགས་ཡུལ་གཞན་དོན་དེ་ཐབས་ཀྱི་སྒོ་ནས་མདོར་བསྟན་པ་ཡིན་ཏེ། གཞན་དོན་ནི་གཞན་རྒྱུད་ཀྱི་མྱང་འདས་ཡིན་ལ། ཁྱོད་ཀྱིས་དེ་ཐོབ་བྱེད་ཀྱི་ཐབས་ཤེར་ཕྱིན་ལ་སློབ་ཚུལ་མདོར་བསྡུས་ནས་བསྟན་པའི་ཕྱིར། སེར་སྣ་ཅན་ལ་སོགས་པ་རྣམས་སྦྱིན་པ་ལ་སོགས་པ་ལ་འགོད་པར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བསྒྲུབ་པར་བྱའོ། །ཞེས་བྱ་བ་ལ་སོགས་པའི་ཡུམ་བར་མའི་མདོ་ཆོས་ཅན། ཁྱོད་ཀྱིས་དམིགས་ཡུལ་གཞན་དོན་དེ་ཐབས་ཀྱི་སྒོ་ནས་རྒྱས་པར་བཤད་པ་ཡིན་
ཏེ། གཞན་དོན་ནི་གཞན་རྒྱུད་ཀྱི་མྱང་འདས་ཡིན་ལ། དེ་ཐོབ་བྱེད་ཀྱི་ཐབས་ཕྱིན་དྲུག་ལ་སློབ་ཚུལ་རྒྱས་པར་བཤད་པའི་ཕྱིར། གཉིས་པ་ནི། ཤེས་བྱ་ཆོས་ཅན། སེམས་བསྐྱེད་པ་ནི་གཞན་གྱི་དོན་གྱི་ཕྱིར་ཡང་དག་པར་རྫོགས་པའི་བྱང་ཆུབ་འདོད་པའི་བདག་ཉིད་ཡིན་པར་ཤེས་པར་བྱ་བ་ཡིན་ཏེ། དམིགས་ཡུལ་གོང་དུ་བསྒྲུབས་ཟིན་པ་དེ་ལྟར་ཡིན་པའི་ཕྱིར། གསུམ་པ་ཁུངས་གཞན་མི་འདྲེན་པའི་རྒྱུ་མཚན་ནི། ཤེས་བྱ་ཆོས་ཅན། གཙུག་ལག་གི་གཞུང་སྟེ། གསུང་རབ་ལས་སྐབས་ཀྱི་དོན་སེམས་བསྐྱེད་ཀྱི་དམིགས་ཡུལ་སྟོན་པ་ལྷུར་ལེན་པ་ནི་ཡུམ་གསུམ་པོ་ཐམས་ཅད་ལས་ཀྱང་གསུངས་མོད་ཀྱི། འགྲེལ་པ་འདིར་ཁུངས་ཉིད་དུ་དངོས་སུ་མ་བྲིས་པའི་རྒྱུ་མཚན་ཡོད་དེ། འདིར་བསྡུས་པ་ཙམ་ཞིག་འཆད་འདོད་པས་ཚིག་མངས་སུ་དོགས་པའི་ཕྱིར། གཉིས་པ་འཕྲོས་དོན་དབྱེ་བ་བཤད་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། འཕྲོས་དོན་དབྱེ་བ་འཚད་ཚུལ་ཡོད་དེ། སྔར་བཤད་པ་དེ་ལྟར་སེམས་བསྐྱེད་པ་དམིགས་པ་དང་། རང་གི་ངོ་བོ་དང་བཅས་པ་བརྗོད་ནས། ད་ནི་སེམས་བསྐྱེད་པ་དེའི་རབ་ཏུ་དབྱེ་བ་རྣམ་པ་ཉི་ཤུ་རྩ་གཉིས་ལུས་རྣམ་གཞག་གི་དཀྱུས་དོན་མ་ཡིན་པར་འཕྲོས་དོན་ཚིགས་བཅད་དུ་བསྡེབས་ནས་བར་སྐབས་ཀྱི་ཚིགས་སུ་བཅད་པ་གཉིས་ཀྱིས་འཆད་པར་བྱེད་པའི་ཕྱིར། གཉིས་པ་ནི། ཤོ་ལོ་ཀ་གཉིས་ཀྱིས་སྟོན་ནོ། །གསུམ་པ་ལ། དཔེ་ཉེར་གཉིས་ཀྱིས་དོན་ཉེར་གཉིས་མཚོན་ཚུལ། ས་མཚམས། དང་པོ་ལ། རྒྱས་པར་བཤད་པ་དང་། དོན་བསྡུ་བའོ། །དང་པོ་ནི། རང་གི་གྲོགས་འདུན་པ་དང་མཚུངས་ལྡན་
ཞེས་པ་ནས། རང་གི་གྲོགས་ཡེ་ཤེས་ཆོས་ཀྱི་སྐུ་དང་མཚུངས་ལྡན་ཞེས་པའི་བར་སྦྱར། འདུན་པ་དང་མཚུངས་ལྡན་དུ་བྱུང་བའི་སེམས་བསྐྱེད་ནི་ཆོས་ཅན། ས་ལྟ་བུ་ཡིན་ཏེ། ལམ་ཐམས་ཅད་འདྲེན་པར་བྱེད་པ། ཆོས་དཀར་པོ་ཐམས་ཅད་ཀྱི་གཞིའི་དངོས་པོ་སྟེ་རང་བཞིན་ཡིན་པའི་ཕྱིར། བསམ་པ་དང་མཚུངས་ལྡན་གྱི་སེམས་བསྐྱེད་ནི་ཆོས་ཅན། གསེར་བཟང་པོ་ལྟ་བུ་ཡིན་ཏེ། བླ་ན་མེད་པའི་བྱང་ཆུབ་ཀྱི་བར་དུ་སེམས་ཉམས་པར་མི་འགྱུར་བའི་ཕྱིར། ལྷག་པའི་སེམས་པ་དང་མཚུངས་ལྡན་གྱི་སེམས་བསྐྱེད་ནི་ཆོས་ཅན། ཟླ་བ་ཚེས་པ་ལྟ་བུ་ཡིན་ཏེ། དྲན་པ་ཉེར་གཞག་ལ་སོགས་པའི་བྱང་ཕྱོགས་སོ་བདུན་གྱི་དགེ་བའི་ཆོས་མཐའ་དག་རྣམ་པར་འཕེལ་བར་འགྱུར་བ་ཡིན་པའི་ཕྱིར། མཁྱེན་གསུམ་རྗེས་སུ་དྲན་པ་སྒོམ་པའི་སྦྱོར་བ་དང་མཚུངས་ལྡན་གྱི་སེམས་བསྐྱེད་ཆོས་ཅན། མེ་ལྟ་བུ་ཡིན་ཏེ། ཐམས་ཅད་མཁྱེན་པ་ཉིད་གསུམ་གྱི་སྒྲིབ་པའི་བུད་ཤིང་མངོན་གྱུར་སྲེག་པར་བྱེད་པའི་ཕྱིར། སྦྱིན་པའི་ཕར་ཕྱིན་དང་མཚུངས་ལྡན་གྱི་སེམས་བསྐྱེད་ཆོས་ཅན། གཏེར་ཆེན་པོ་ལྟ་བུ་ཡིན་ཏེ། ལོངས་སྤྱོད་ཀྱིས་སློང་བ་པོའི་སེམས་ཅན་ཐམས་ཅད་ཚིམ་པར་བྱེད་པའི་ཕྱིར། ཚུལ་ཁྲིམས་ཀྱི་ཕར་ཕྱིན་དང་མཚུངས་ལྡན་གྱི་སེམས་བསྐྱེད་ཆོས་ཅན། རིན་པོ་ཆེའི་འབྱུང་ཁུངས་ཀྱི་གནས་དང་འདྲ་སྟེ། མངོན་མཐོ་དང་ངེས་ལེགས་ཀྱི་ཡོན་ཏན་རིན་པོ་ཆེའི་རྟེན་གྱི་དངོས་པོ་སྟེ་རང་བཞིན་བྱེད་པའི་ཕྱིར། བཟོད་པའི་ཕར་ཕྱིན་དང་མཚུངས་ལྡན་གྱི་སེམས་བསྐྱེད་ཆོས་ཅན། རྒྱ་མཚོ་ཆེན་པོ་ལྟ་བུ་ཡིན་ཏེ། གནོད་པ་དང་སྡུག་བསྔལ་གྱི་མི་འདོད་པ་ཐམས་ཅད་ཐོག་ཏུ་འབབ་པས་མི་འཁྲུགས་པ་ཡིན་པའི་ཕྱིར། བརྩོན་འགྲུས་ཀྱི་ཕར་ཕྱིན་དང་མཚུངས་ལྡན་གྱི་སེམས་བསྐྱེད་ཆོས་ཅན། རྡོ་རྗེ་དང་འདྲ་སྟེ། ཐེག་ཆེན་གྱི་
ལམ་ལ་ཡིད་ཆེས་པ་བརྟན་པས་ཐེག་ཆེན་ལས་མི་ཕྱེད་པའི་ཕྱིར། བསམ་གཏན་གྱི་ཕར་ཕྱིན་དང་མཚུངས་ལྡན་གྱི་སེམས་བསྐྱེད་ཆོས་ཅན། རིའི་རྒྱལ་པོ་དང་འདྲ་སྟེ། དམིགས་པ་ལས་མི་གཡོ་བའི་ཏིང་ངེ་འཛིན་བརྟན་པོ་དང་ལྡན་པས་དམིགས་པའི་རྣམ་པར་གཡེང་བས་མི་བསྐྱེད་པའི་ཕྱིར། ཤེས་རབ་ཀྱི་ཕར་ཕྱིན་དང་མཚུངས་ལྡན་གྱི་སེམས་བསྐྱེད་ཆོས་ཅན། སྨན་དང་འདྲ་སྟེ། ཉོན་མོངས་པ་དང་ཤེས་བྱའི་སྒྲིབ་པའི་ནད་རབ་ཏུ་ཞི་བར་བྱེད་པའི་ཕྱིར། ཐབས་མཁས་ཀྱི་ཕར་ཕྱིན་དང་མཚུངས་ལྡན་གྱི་སེམས་བསྐྱེད་ཆོས་ཅན། དགེ་བའི་བཤེས་གཉེན་དང་འདྲ་སྟེ། སེམས་ཅན་མི་འདོར་བའི་ཐབས་ཚད་མེད་པ་བཞིས་གནས་སྐབས་ཐམས་ཅད་དུ་སེམས་ཅན་གྱི་དོན་ཡོངས་སུ་མི་གཏོང་བའི་ཕྱིར། སྨོན་ལམ་གྱི་ཕར་ཕྱིན་དང་མཚུངས་ལྡན་གྱི་སེམས་བསྐྱེད་ཆོས་ཅན། ཡིད་བཞིན་གྱི་ནོར་བུ་དང་འདྲ་སྟེ། ཐོབ་བྱའི་འབྲས་བུ་དབང་སྒྱུར་བའི་ཐབས་མངོན་ཤེས་ལྔས་ཇི་ལྟར་སྨོན་པའི་འབྲས་བུ་འགྲུབ་པའི་ཕྱིར། སྟོབས་ཀྱི་ཕར་ཕྱིན་དང་མཚུངས་ལྡན་གྱི་སེམས་བསྐྱེད་ཆོས་ཅན། ཉི་མ་དང་འདྲ་སྟེ། བསྡུ་བའི་དངོས་པོ་བཞིས་གདུལ་བྱ་ཡོངས་སུ་སྨོན་པར་བྱེད་པའི་ཕྱིར། ཡེ་ཤེས་ཀྱི་ཕར་ཕྱིན་དང་མཚུངས་ལྡན་གྱི་སེམས་བསྐྱེད་ཆོས་ཅན། ཆོས་ཀྱི་སྒྲ་དབྱངས་སྙན་པ་དང་འདྲ་སྟེ། རྣམ་གྲོལ་ཐོབ་པའི་ཐབས་སོ་སོ་ཡང་དག་པར་རིག་པ་བཞིས་གདུལ་བྱ་འདུན་པར་བྱེད་པའི་ཆོས་སྟོན་པའི་ཕྱིར། མངོན་པར་ཤེས་པ་དང་མཚུངས་ལྡན་གྱི་སེམས་བསྐྱེད་ཆོས་ཅན། རྒྱལ་པོ་ཆེན་པོ་དང་འདྲ་སྟེ། རྟོགས་པ་ཐོབ་ཟིན་ཆུད་མི་ཟ་བའི་མཐུ་ཐོགས་པ་མེད་པས་གཞན་གྱི་དོན་སྒྲུབ་པའི་ཕྱིར། བསོད་
ནམས་དང་ཡེ་ཤེས་དང་མཚུངས་ལྡན་གྱི་སེམས་བསྐྱེད་ཆོས་ཅན། བང་མཛོད་དང་འདྲ་སྟེ། བླ་ན་མེད་པའི་བྱང་ཆུབ་ཀྱི་ཉེར་ལེན་བྱེད་པའི་བསོད་ནམས་དང་ཡེ་ཤེས་ཀྱི་ཚོགས་མང་པོའི་མཛོད་ལྟ་བུ་ཡིན་པའི་ཕྱིར། བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་དང་མཚུངས་ལྡན་གྱི་སེམས་བསྐྱེད་ཆོས་ཅན། ལམ་པོ་ཆེ་དང་འདྲ་སྟེ། དུས་གསུམ་གྱི་ཐེག་ཆེན་འཕགས་པ་ཐམས་ཅད་ལམ་དེ་ནས་གཤེགས་ཤིང་རྗེས་སུ་གཤེགས་པ་ཡིན་པའི་ཕྱིར། སྙིང་རྗེ་དང་ལྷག་མཐོང་དང་མཚུངས་ལྡན་གྱི་སེམས་བསྐྱེད་ཆོས་ཅན། བཞོན་པ་དང་འདྲ་སྟེ། འཁོར་བ་དང་མྱ་ངན་ལས་འདས་པ་གང་དུ་ཡང་མི་ལྟུང་བས་བླ་ན་མེད་པའི་བྱང་ཆུབ་ཏུ་བདེ་བླག་ཏུ་འགྲོ་བ་ཡིན་པའི་ཕྱིར། གཟུངས་དང་སྤོབས་པ་དང་མཚུངས་ལྡན་གྱི་སེམས་བསྐྱེད་ཆོས་ཅན། ཆུ་འབྱིན་ཅིང་མི་ཟད་པ་བཀོད་མའི་ཆུ་དང་འདྲ་སྟེ། སྔར་ཐོས་པ་དང་མ་ཐོས་པའི་ཆོས་འཛིན་པས་མི་ཟད་པའི་ཕྱིར། འདུས་བྱས་ཐམས་ཅད་མི་རྟག་ཅེས་སོགས་ཆོས་ཀྱི་སྡོམ་བཞིའི་དགའ་སྟོན་དང་མཚུངས་ལྡན་གྱི་སེམས་བསྐྱེད་ཆོས་ཅན། སྒྲ་སྙན་པ་དྲི་ཟའི་གླུ་དང་འདྲ་སྟེ། ཐར་པ་འདོད་པའི་གདུལ་བྱ་ལ་འཁོར་བ་ལས་གྲོལ་བར་བྱེད་པའི་སྙན་པ་སྒྲོགས་པའི་ཕྱིར། བགྲོད་པ་གཅིག་པའི་ལམ་དང་མཚུངས་ལྡན་གྱི་སེམས་བསྐྱེད་ཆོས་ཅན། ཆུ་བོའི་རྒྱུན་དང་འདྲ་སྟེ། གདུལ་བྱ་ཀུན་ཐུན་མོང་དུ་འདུལ་བའི་ནུས་པ་ཐོབ་པས་གཞན་གྱི་དོན་བྱ་བ་ཐ་མི་དད་པ་ཡིན་པའི་ཕྱིར། མཛད་པ་བཅུ་གཉིས་ཀྱིས་འགྲོ་དོན་བྱེད་པའི་ཆོས་སྐུ་དང་མཚུངས་ལྡན་གྱི་སེམས་བསྐྱེད་ཆོས་ཅན། སྤྲིན་ལྟ་བུ་ཡིན་ཏེ། དགའ་ལྡན་གྱི་གནས་ན་བཞུགས་པ་དང་། དེ་ནས་འཕོ་བ་ལ་སོགས་པ་མཛད་པ་བཅུ་གཉིས་དུས་ཀུན་ཏུ་
སྟོན་པར་རུང་བ་ཉིད་ཡིན་པའི་ཕྱིར། གཉིས་པ་ནི། ཤེས་བྱ་ཆོས་ཅན། དེ་ཡང་ས་གསེར་ཟླ་བ་མེ། །ཞེས་བྱ་བ་ལ་སོགས་པས་དཔེས་སེམས་བསྐྱེད་ཉི་ཤུ་རྩ་གཉིས་བཤད་པ་ཡིན་ཏེ། སྔར་བཤད་པ་ལྟར། དཔེས་དོན་མཚོན་པར་བྱས་པའི་དོན་དང་ཆོས་མཐུན་གྱི་སྒོ་ནས་འཕངས་པ་དེ་ལྟར་ན་སྟེ་ཡིན་པའི་ཕྱིར། གཉིས་པ་ལ། ས་མཚམས་སོ་སོར་བཤད་པ་དང་། ལམ་ཀུན་བསྡུས་ཏེ་བསྟན་པའོ། །དང་པོ་ནི། སེམས་བསྐྱེད་ཉེར་གཉིས་བསྟན་པ་དེ་ལ་སྟེ་དེའི་ནང་ནས་སེམས་བསྐྱེད་དང་པོ་གསུམ་ནི་ཆོས་ཅན། བྱང་སེམས་ལས་དང་པོ་བའི་སས་བསྡུས་ཏེ། ཐེག་ཆེན་གྱི་ཚོགས་ལམ་ཆུང་ངུ་དང་འབྲིང་དང་ཆེན་པོ་ཉིད་ཀྱིས་རིམ་བཞིན་དུ་བསྡུས་པའི་ཕྱིར། དེའི་འོག་ཏུ་སྦྱོར་བ་དང་མཚུངས་པར་ལྡན་པའི་སེམས་བསྐྱེད་གཅིག་ནི་ཆོས་ཅན། ས་དང་པོ་ལ་འཇུག་པའི་ལམ་གྱིས་བསྡུས་པ་ཡིན་ཏེ། ཐེག་ཆེན་གྱི་སྦྱོར་ལམ་གྱིས་བསྡུས་པའི་ཕྱིར། དེའི་འོག་ཏུ་སྦྱིན་པའི་ཕར་ཕྱིན་སོགས་དང་མཚུངས་ལྡན་དུ་གྱུར་པའི་སེམས་བསྐྱེད་བཅུ་ནི་ཆོས་ཅན། ས་རབ་ཏུ་དགའ་བ་ལ་སོགས་པ་ས་བཅུའི་རིགས་ཀྱིས་བསྡུས་ཏེ། རིམ་པ་བཞིན་དུ་ས་བཅུའི་ངོ་བོར་གྱུར་པའི་མཐོང་བ་དང་སྒོམ་པའི་ལམ་ཅི་རིགས་པའི་སྤྱོད་ཡུལ་ཅན་ཡིན་པའི་ཕྱིར། དེའི་འོག་ཏུ་མངོན་ཤེས་དྲུག་དང་མཚུངས་པར་ལྡན་པའི་སེམས་བསྐྱེད་ལྔ་ནི་ཆོས་ཅན། ཁྱད་པར་གྱི་ལམ་གྱིས་བསྡུས་ཏེ། དག་ས་གསུམ་ཅི་རིགས་པས་བསྡུས་པའི་ཕྱིར། དེའི་འོག་ཏུ་སེམས་བསྐྱེད་ཐ་མ་གསུམ་ནི་ཆོས་ཅན། སངས་རྒྱས་ཀྱི་སས་བསྡུས་པ་ཞེས་བྱ་སྟེ། སངས་རྒྱས་ཀྱི་སའི་སྤྱོད་པ་དང་། དངོས་དང་། མཇུག་གི་སྒོ་ནས་རིམ་བཞིན་ཅི་རིགས་པས་བསྡུས་པའི་ཕྱིར། གཉིས་པ་
ནི། སེམས་བསྐྱེད་པའི་རབ་ཏུ་དབྱེ་བ་ནི་ཆོས་ཅན། བྱང་སེམས་ལས་དང་པོ་པའི་ས་ནས་བཟུང་སྟེ། སངས་རྒྱས་ཀྱི་སའི་བར་གྱིས་བསྡུས་པ་ཡིན་ཏེ། ཚུལ་དེ་གོང་དུ་བཤད་པ་དེ་ལྟར་ཡིན་པའི་ཕྱིར།
ཐེག་ཆེན་གྱི་གདམས་ངག་བཤད་པ།
ཐེག་ཆེན་གྱི་གདམས་ངག་བཤད་པ། གཉིས་པ་དམ་བཅའི་དོན་སྒྲུབ་པའི་ཐབས་སྟོན་པའི་གདམས་ངག་བཤད་པ་ལ་གཉིས། དངོས་དང་། གདམས་ངག་གི་དོན་བསྒོམ་པས་སྟོང་ཉིད་ལ་དམིགས་པའི་བསྒོམ་བྱུང་སྐྱེ་བའི་ཐོག་མ་བཤད་པའོ། །དང་པོ་ལ། མཚམས་སྦྱར་བ་དང་། དོན་བཤད་པ་གཉིས། དང་པོ་ལ། ཚིག་དོན་དང་། མཐའ་དཔྱད་པའོ། །དང་པོ་ནི། ཤེས་བྱ་ཆོས་ཅན། ཐེག་ཆེན་གྱི་གདམས་ངག་འཆད་ཚུལ་ཡོད་དེ། སེམས་བསྐྱེད་ཀྱི་དབྱེ་བ་དཀྱུས་མའི་འཕྲོས་དོན་ཡིན་པས་མཚན་ཉིད་དང་དམིགས་པ་སྟོན་པའི་ཞར་ལ་བརྗོད་ནས། དེའི་རྗེས་སུ་གདམས་ངག་འཆད་པར་བྱེད་པའི་ཕྱིར། སྔར་བཤད་པ་དེ་ལྟར་བྱང་ཆུབ་ཀྱི་སེམས་དང་པོ་ལ་སོགས་པ་གསུམ་བསྐྱེད་པའི་བྱང་ཆུབ་སེམས་དཔའ་ནི་ཆོས་ཅན། མཆོག་གི་སྤྲུལ་སྐུས་ཐེག་ཆེན་གྱི་གདམས་ངག་འདོམས་པ་ལ་ནི་དགོས་པ་དང་བཅས་པ་ཡིན་ཏེ། སྔར་མ་ཐོབ་པའི་བྱང་ཆུབ་ཀྱི་སེམས་གསར་དུ་བསྐྱེད་པ་དང་། དེས་འཕངས་པའི་ཆོས་སྦྱོར་བ་ཕུན་ཚོགས་ཀྱིས་བསྡུས་པའི་ཞི་ལྷག་སོགས་འགྲུབ་པར་བྱ་བ་ཡིན་པའི་ཕྱིར་ཏེ། སྔར་ཡོན་ཏན་ཐོབ་པ་མི་ཉམས་པར་ཡོངས་སུ་བསྲུང་བའི་དོན་གྱི་ཆེད་ཀྱིས་མངོན་པར་འཕེལ་བར་བྱ་བའི་ཕྱིར་དུ་ཡིན་པའི་ཕྱིར། ཤེས་བྱ་ཆོས་ཅན། གདམས་ངག་ནོད་པ་པོའི་ཁྱད་པར་ཡོད་དེ། གདམས་ངག་ཉན་པའི་དུས་ཇི་ལྟ་བ་བཞིན་དུ་གཉེར་བར་བྱེད་པའི་བྱང་ཆུབ་སེམས་དཔའ་རྣམས་དེ་ལྟར་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས་
དང་པོ། ཁ་ཅིགཐེག་ཆེན་སེམས་བསྐྱེད་ཀྱི་ཆེད་དུ་གཉེར་བྱ་ཐོབ་པའི་ཐབས་སྟོན་པའི་སངས་རྒྱས་ཀྱི་གསུང་དེ་ཐེག་ཆེན་གྱི་གདམས་ངག་གི་མཚན་ཉིད་ཟེར་ན། བསྟན་བཅོས་མངོན་རྟོགས་རྒྱན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཐེག་ཆེན་གྱི་བསྟན་བཅོས་ཡིན་པའི་ཕྱིར། རྩ་བར་འདོད་མི་ནུས་ཏེ། རྒྱན་རྩོམ་པ་པོའི་རྗེ་བཙུན་བྱམས་མགོན་སེམས་ཅན་ཡིན་པའི་ཕྱིར། ཁ་ཅིག །ཐེག་ཆེན་སེམས་བསྐྱེད་ཀྱི་ཆེད་དུ་གཉེར་བྱ་ཐོབ་པའི་ཐབས་མ་ནོར་བར་འདོམས་པའི་རྗོད་བྱེད་དེ་སྤྱིར་གདམས་ངག་གི་མཚན་ཉིད་ཟེར་ན། སངས་རྒྱས་ཀྱི་བཀའ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། རྩ་བར་འདོད་མི་ནུས་ཏེ། ཐེག་དམན་གྱི་མདོ་དེ་ཁྱོད་ཡིན་པའི་ཕྱིར། ཁ་ཅིག །ཆེད་དུ་བྱ་བའི་གདུལ་བྱ་ཐེག་ཆེན་གྱི་རིགས་ཅན་ལ་རྫོགས་པའི་བྱང་ཆུབ་སྒྲུབ་བའི་ཐབས་མ་ནོར་བར་འདོམས་པའི་རྗོད་བྱེད་དེ་ཐེག་ཆེན་གྱི་གདམས་ངག་གི་མཚན་ཉིད་ཟེར་ན། གཞན་དབང་བདེན་གྲུབ་ཏུ་སྟོན་པའི་སེམས་ཙམ་པའི་བསྟན་བཅོས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཐེག་ཆེན་གྱི་བསྟན་བཅོས་ཡིན་པའི་ཕྱིར། འདོད་ན། གཞན་དབང་བདེན་པར་གྲུབ་པར་ཐལ་ལོ། །ཁ་ཅིག །མཆོག་གི་སྤྲུལ་སྐུ་ལ་ཐེག་ཆེན་གྱི་གདམས་ངག་དངོས་སུ་ཉན་པ་ལ་ཚོགས་ལམ་ཆེན་པོ་ཐོབ་དགོས་ཟེར་ན། མི་འཐད་པར་ཐལ། དེ་ལ་ཐེག་ཆེན་གྱི་གདམས་ངག་དངོས་སུ་ཉན་པའི་ལམ་མ་ཞུགས་ཀྱི་གང་ཟག་ཡོད་པའི་ཕྱིར། ལམ་ཤེས་ཀྱི་མདོ་ལས། ལྷའི་བུ་གང་དག་གིས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དེ་དག་ཀྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །ཞེས་གསུངས་པའི་ཕྱིར། གཞན་ཡང་། མི་འཐད་པར་ཐལ། དེ་འདྲའི་ཐེག་ཆེན་ཚོགས་ལམ་ཆུང་ངུ་ལ་གནས་པའི་སེམས་དཔའ་ཡོད་པའི་ཕྱིར། དེར་ཐལ། འགྲེལ་པ་ལས། དེ་ལྟར་བྱང་ཆུབ་ཀྱི་སེམས་དང་པོ་ལ་སོགས་པ་བསྐྱེད་པའི་བྱང་ཆུབ་སེམས་དཔའ། ཞེས་གསུངས་པའི་ཕྱིར། ཁ་ཅིག །སྲིད་པ་ཐ་མ་པའི་བྱང་སེམས་ཡིན་ན། ཐེག་ཆེན་གྱི་གདམས་ངག་མི་ཉན་པས་ཁྱབ་སྟེ། མདོ་ལས། ཉེར་འགྲོ་ང་ནི་སངས་རྒྱས་ཏེ། །ང་ལ་སློབ་དཔོན་ཅི་ཡང་མེད། །ཅེས་གསུངས་པའི་ཕྱིར་ཟེར་ན་མི་འཐད་པར་ཐལ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཕྲ་རབ་ཀྱི་གྲངས་དང་མཉམ་པའི་སངས་རྒྱས་ལ་ཐེག་ཆེན་གྱི་མདོ་ཉན་པའི་སྲིད་པ་ཐ་མ་པའི་བྱང་སེམས་ཡོད་པའི་ཕྱིར། དེར་ཐལ། དེ་འདྲའི་གྲངས་དང་མཉམ་པའི་ཡོན་ཏན་སྡེ་ཚན་བཅུ་གཉིས་ཐོབ་པའི་སྲིད་པ་ཐ་མ་པའི་བྱང་སེམས་ཡོད་པའི་ཕྱིར། ཁ་ཅིག །ཐེག་ཆེན་གྱི་གདམས་ངག་ཉན་པའི་ས་མཚམས་ཀྱི་ཡ་མཐའ་རྒྱུན་མཐའི་བར་དུ་འཇོག་ཟེར་ན། མི་འཐད་པར་ཐལ། སངས་རྒྱས་ཀྱི་ས་ན་ཐེག་ཆེན་གྱི་གདམས་ངག་ཉན་པ་ཡོད་པའི་ཕྱིར། དེར་ཐལ། དེ་ན་དེ་ཉན་པའི་ཉན་ཤེས་ཡོད་པའི་ཕྱིར། དེར་ཐལ། དེ་ན་དེ་ཐོས་པའི་ཉན་ཤེས་ཡོད་པའི་ཕྱིར། གཉིས་པ་རང་ལུགས་ནི། ཐེག་ཆེན་སེམས་བསྐྱེད་ཀྱི་ཆེད་དུ་གཉེར་བྱ་ཐོབ་པའི་ཐབས་སྟོན་པའི་ཐེག་ཆེན་གྱི་ངག་དེ། ཐེག་ཆེན་གྱི་གདམས་ངག་གི་མཚན་ཉིད། དེ་ལ་དབྱེ་ན། ཐེག་ཆེན་གྱི་འདོམས་པའི་གདམས་ངག་དང་། རྗེས་བསྟན་གྱི་གདམས་ངག་གཉིས། ཐོབ་ཟིན་གྱི་ཡོན་ཏན་མི་ཉམས་པའི་ཕྱིར་དུ་འདོམས་པའི་
ཐེག་ཆེན་ངག་དེ་དང་པོའི་མཚན་ཉིད། སྔར་མ་ཐོབ་པའི་ཡོན་ཏན་ཐོབ་ཕྱིར་དུ་འདོམས་པའི་ཐེག་ཆེན་གྱི་ངག་དེ་གཉིས་པའི་མཚན་ཉིད། གསུམ་པ་རྩོད་པ་སྤོང་བ་ལ། ཤཱ་རི་བུས་དྲི་ལན་གྱི་ཚུལ་གྱིས་ཞུས་པའི་ཡུམ་གྱི་མདོ་ཚིག་ཆོས་ཅན། ཐེག་ཆེན་གྱི་ངག་ཡིན་པར་ཐལ། ཐེག་ཆེན་གྱི་གདམས་ངག་ཡིན་པའི་ཕྱིར། འདོད་ན། མ་ཡིན་པར་ཐལ། ཐེག་དམན་གྱི་ངག་ཡིན་པའི་ཕྱིར། འོ་ན། སྟོན་པ་ཤཱཀྱ་ཐུབ་པའི་ཞལ་ནས་གསུངས་པའི་ཐེག་དམན་གྱི་མདོ་ཆོས་ཆན། ཐེག་ཆེན་གྱི་བཀའ་ཡིན་པར་ཐལ། སྟོན་པའི་བཀའ་ཡིན་པའི་ཕྱིར། ཁྱབ་པ་ཁས། འདོད་ན། མ་ཡིན་པར་ཐལ། ཐེག་དམན་གྱི་མདོ་ཡིན་པའི་ཕྱིར། ཁོ་ན་རེ། སྒྲ་མེད་དུ་གདམས་ངག་སྟོན་པ་མེད་པར་ཐལ། གདམས་ངག་ཡིན་ན་ངག་ཡིན་པས་ཁྱབ་པའི་ཕྱིར། འདོད་ན། སྒྲ་མེད་དུ་ཆོས་སྟོན་པ་མེད་པར་ཐལ། འདོད་པའི་ཕྱིར་ན་མ་ཁྱབ། ཡང་ཁོ་ན་རེ། སངས་རྒྱས་ཀྱི་ཐུགས་རྗེའི་དབང་གིས་ལྗོན་ཤིང་རླུང་གིས་བསྐུལ་བ་ལ་བརྟེན་ནས་བྱུང་བའི་འདུས་བྱས་མི་རྟག་ཅེས་པའི་སྒྲ་ཆོས་ཅན། ངག་ཡིན་པར་ཐལ། གདམས་ངག་ཡིན་པའི་ཕྱིར། འདོད་ན་རང་རྒྱུ་སྐྱེས་བུའི་བརྗོད་པ་ལྕེ་རྐན་ལས་བྱུང་བར་ཐལ། འདོད་པའི་ཕྱིར་ན་མ་ཁྱབ་བོ། །གཉིས་པ་ལ་གཉིས། སྤྱིའི་དབྱེ་བ་དང་། དགེ་འདུན་དཀོན་མཆོག་བྱེ་བྲག་ཏུ་བཤད་པའོ། །དང་པོ་ལ། རྩ་བ། འགྲེལ་པ། དོན་བསྡུ་བ་གསུམ་ལས། དང་པོ་ནི། ཐེག་ཆེན་གྱི་གདམས་ངག་ཆོས་ཅན། ཁྱོད་ལ་དབྱེ་ན་བཅུའི་བདག་ཉིད་དུ་ཤེས་པར་བྱ་སྟེ། སྒྲུབ་པ་རང་གི་ངོ་བོ་ཀུན་རྫོབ་དང་དོན་དམ་པའི་བདེན་པ་ལ་འདོམས་ཟིན་པའི་གདམས་ངག །སྒྲུབ་པའི་དམིགས་པ་བདེན་པ་བཞི་ལ་འདོམས་པའི་གདམས་ངག་རྣམས་དང་ནི། སྒྲུབ་པའི་རྟེན་སངས་རྒྱས་དཀོན་
མཆོག་ལ་སོགས་པས་ཆོས་དཀོན་མཆོག་དང་དགེ་འདུན་དཀོན་མཆོག་གསུམ་ལ་འདོམས་པའི་གདམས་ངག་དང་། སྒྲུབ་པ་བསྟན་པའི་རྒྱུ་ལ་གདམས་པ་བྱ་བ་ངན་པ་ལ་མ་ཞེན་པའི་བརྩོན་འགྲུས་ལ་འདོམས་པ་དང་། སྒྲུབ་པ་འཕེལ་བའི་རྒྱུ་ལ་གདམས་པ་ཡོངས་སུ་མི་ངལ་བའི་བརྩོན་འགྲུས་ལ་འདོམས་པའི་གདམས་ངག་དང་། སྒྲུབ་པ་མི་ཉམས་པའི་རྒྱུ་ལ་གདམས་པ་ཐེག་ཆེན་གྱི་ལམ་ནི་ཡོངས་སུ་འཛིན་པ་ལ་འདོམས་པའི་གདམས་ངག་དང་། སྒྲུབ་པ་ལ་རང་དབང་དུ་འཇུག་པའི་རྒྱུ་སྤྱན་ལྔ་ལ་འདོམས་པའི་གདམས་ངག་དང་། སྒྲུབ་པའི་འབྲས་བུ་མྱུར་དུ་རྫོགས་པའི་རྒྱུ་མངོན་ཤེས་ཀྱི་ཡོན་ཏན་དྲུག་ལ་འདོམས་པའི་གདམས་ངག་དང་། སྤང་བྱའི་ས་བོན་སེལ་བ་མཐོང་ལམ་དང་སྒོམ་ལམ་ཞེས་བྱ་བ་ལ་འདོམས་པའི་གདམས་ངག་རྣམས་སུ་ཡོད་པའི་ཕྱིར།
བདེན་པ་གཉིས་ཀྱི་རྣམ་གཞག་བཤད་པ།
བདེན་པ་གཉིས་ཀྱི་རྣམ་གཞག་བཤད་པ། གཉིས་པ་འགྲེལ་པ་བཤད་པ་ལ་བརྟེན་པ་སྒྲུབ་པ་ལ་གདམས་པ་དང་། སྒྲུབ་པའི་རྟེན་ལ་གདམས་པ་དང་། སྒྲུབ་པའི་ཁྱད་པར་གྱི་ཆོས་ལ་གདམས་པའོ། །དང་པོ་ལ། སྒྲུབ་པ་རང་གི་ངོ་བོ་ལ་གདམས་པ་དང་། དེའི་དམིགས་པ་ལ་གདམས་པའོ། །དང་པོ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། བསམ་པ་བྱང་ཆུབ་ཀྱི་སེམས་ཀྱི་རབ་ཏུ་དབྱེ་བ་དང་། དེས་འཕངས་པའི་སྦྱོར་བ་སྦྱིན་པ་ལ་སོགས་པ་སྔར་སེམས་བསྐྱེད་ཀྱི་སྐབས་སུ་ཇི་སྐད་བཤད་པ་སྒྲུབ་པ་ལ་འདོམས་པའི་གདམས་ངག་ཆོས་ཅན། ཁྱོད་སྒྲུབ་པ་རང་གི་ངོ་བོ་ལ་འདོམས་པའི་གདམས་ངག་ཡིན་ཏེ། ཁྱོད་ཀྱིས་སྒྲུབ་པ་པོ་རྟེན་གྱི་གང་ཟག་དང་། ཉམས་སུ་བླང་བྱ་དང་། དེའི་འབྲས་བུ་སོགས་གང་བཤད་པ་ལྟར་ཚད་མས་གྲུབ་ནས་ཉམས་སུ་ལེན་པ་ཀུན་རྫོབ་བདེན་པ་ལ་བརྟེན་པའི་ལམ་རིམ་དང་། དེ་ཀུན་བདེན་སྟོང་དུ་རྟོགས་ནས་ཉམས་སུ་ལེན་པ་དོན་དམ་
པའི་བདེན་པ་ལ་བརྟེན་པའི་ལམ་རིམ་ལས་མི་འདའ་བ་དང་། ཉན་ཐོས་དང་ལ་སོགས་པ་རང་རྒྱལ་དང་ཐུན་མོང་མ་ཡིན་པ་འགྲོ་ཀུན་མྱང་འདས་དང་ཆོས་སྐུ་འགྲུབ་བྱེད་དུ་ཡུམ་ལ་སྤྱོད་པའི་ཆོས་བཞི་མི་དམིགས་པའི་ཚུལ་གྱིས་འཇུག་པར་བྱའོ་ཞེས་སློབ་པའི་ཚུལ་གྱིས་འདོམས་པ་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །མཐར་ཐུག་དཔྱོད་པའི་རིགས་ཤེས་ཚད་མའི་རྙེད་དོན། དོན་དམ་བདེན་པའི་མཚན་ཉིད་ཟེར་ན། བུམ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། ཇི་ལྟ་བ་རྟོགས་པའི་རྣམ་མཁྱེན་གྱི་རྙེད་དོན་ཡིན་པའི་ཕྱིར། དེར་ཐལ། གཞི་གྲུབ་པའི་ཕྱིར། རྩ་བར་འདོད་མི་ནུས་ཏེ། དངོས་པོ་ཡིན་པའི་ཕྱིར། ཡང་ཁ་ཅིག །ཐ་སྙད་དཔྱོད་བྱེད་ཀྱི་ཚད་མའི་རྙེད་དོན། ཀུན་རྫོབ་བདེན་པའི་མཚན་ཉིད་ཟེར་ན། བདེན་མེད་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། ཇི་སྙེད་པ་རྟོགས་པའི་རྣམ་མཁྱེན་གྱི་རྙེད་དོན་ཡིན་པའི་ཕྱིར། དེར་ཐལ། གཞི་གྲུབ་པའི་ཕྱིར། བྱས་པ་ལ་ཁོ་ན་རེ། ཇི་ལྟ་བ་རྟོགས་པའི་རྣམ་མཁྱེན་གྱི་རྙེད་དོན་ཡིན་ན་མཐར་ཐུག་དཔྱོད་པའི་རིགས་ཤེས་ཀྱི་རྙེད་དོན་ཡིན་མི་དགོས་པར་ཐལ། སངས་འཕགས་ཀྱི་མིག་ཤེས་ཀྱི་གཟུང་བྱ་ཡིན་ན་མིག་ཤེས་ཀྱི་གཟུང་བྱ་ཡིན་མི་དགོས་པའི་ཕྱིར་ན་མ་ཁྱབ། འོ་ན། མཐར་ཐུག་དཔྱོད་པའི་མངོན་སུམ་གྱི་ཚད་མའི་རྙེད་དོན་ཡིན་ན་སློབ་པའི་དེའི་རྙེད་དོན་ཡིན་དགོས་པར་ཐལ། མིག་ཤེས་ཀྱི་གཟུང་བྱ་ཡིན་ན་སློབ་པའི་མིག་ཤེས་ཀྱི་གཟུང་བྱ་ཡིན་དགོས་པའི་ཕྱིར། ཁྱབ་པ་ཁས། འདོད་ན། གློ་བུར་རྣམ་དག་གི་ཆར་གྱུར་པའི་ངོ་བོ་ཉིད་སྐུ་ཆོས་ཅན།
དེར་ཐལ། དེའི་ཕྱིར། འདོད་མི་ནུས་སོ། །ཡང་ཁ་ཅིག །རང་མངོན་སུམ་དུ་རྟོགས་པའི་མངོན་སུམ་གྱི་ཚད་མས་གཉིས་སྣང་ནུབ་པའི་ཚུལ་གྱིས་རྟོགས་པ་དེ་རང་ཉིད་དོན་དམ་བདེན་པའི་མཚན་ཉིད་ཟེར་ན། མི་འཐད་པར་ཐལ། མཚན་ཉིད་དེ་སྒྲུབ་པ་ཡིན་པའི་ཕྱིར། དེར་ཐལ། དེ་ཡོད་པ་གང་ཞིག །བུམ་པའི་ཆོས་ཉིད་མངོན་སུམ་དུ་རྟོགས་པའི་མངོན་སུམ་ཚད་མ་དེས་གཉིས་སྣང་ནུབ་པའི་ཚུལ་གྱིས་རྟོགས་པ་དེ་སྒྲུབ་པ་ཡིན་པའི་ཕྱིར། དེར་ཐལ། དེས་མངོན་སུམ་དུ་རྟོགས་པ་སྒྲུབ་པ་ཡིན་པའི་ཕྱིར། བྱས་པ་ལ་ཁོ་ན་རེ། མཚན་ཉིད་དེ་འཐད་པར་ཐལ། དེ་ཡིན་ན་དོན་དམ་བདེན་པ་ཡིན་པས་ཁྱབ་པའི་ཕྱིར་ན་མ་ཁྱབ། དེ་ལ་ཁ་ཅིག །མ་གྲུབ་སྟེ། སྔོར་སྣང་གི་དབང་ཤེས་དེ་རང་མངོན་སུམ་དུ་རྟོགས་པའི་མངོན་སུམ་དུ་ཚད་མས་དེ་ལྟར་རྟོགས་པའི་ཕྱིར་ཏེ། རང་མངོན་སུམ་དུ་རྟོགས་པའི་རང་རིག་མངོན་སུམ་གྱིས་དེ་ལྟར་རྟོགས་པའི་ཕྱིར་ན་མ་ཁྱབ། དེ་ལ་ཁ་ཅིག །སྔོར་སྣང་དབང་ཤེས་དོན་དམ་བདེན་པ་ཡིན་པ་བཅད་པའི་ཆེད་དུ་རང་མངོན་སུམ་དུ་རྟོགས་པའི་མངོན་སུམ་ཚད་མས་གཉིས་སྣང་ནུབ་པའི་ཚུལ་གྱི་རྟོགས་པར་བྱ་བ་གང་ཞིག །སྒྲུབ་པའི་རྣམ་པར་རྟོགས་བྱ་མ་ཡིན་པ་དོན་དམབདེན་པའི་མཚན་ཉིད་ཟེར་ན། སྔོར་སྣང་གི་དབང་ཤེས་དེ་རང་མངོན་སུམ་དུ་རྟོགས་པའི་མངོན་སུམ་གྱི་ཚད་མས་གཉིས་སྣང་ནུབ་པའི་ཚུལ་གྱིས་རྟོགས་པར་བྱ་བ་ཡིན་པར་ཐལ། ཁྱོད་ཀྱི་མཚན་ཉིད་ཀྱི་ཟུར་དུ་རྣམ་པར་རྟོགས་བྱ་མ་ཡིན་ཞེས་སྨོས་པ་ལ་དགོས་པ་ཡོད་པའི་ཕྱིར། འདོད་ན། སྔོར་སྣང་དབང་ཤེས་མ་ཡིན་པ་ལས་ལོག་པ་དེ། རང་མངོན་སུམ་དུ་རྟོགས་པའི་ཚད་མས་གཉིས་སྣང་ནུབ་པའི་ཚུལ་གྱིས་རྟོགས་པར་བྱ་བ་ཡིན་པར་ཐལ། སྔོར་སྣང་དབང་ཤེས་དེ་དེ་ཡིན་པའི་ཕྱིར། འདོད་ན། དེ་ཆོས་ཅན། དོན་དམ་བདེན་པ་ཡིན་པར་
ཐལ། མཚན་ཉིད་དེའི་ཕྱིར། དང་པོ་དངོས། ཕྱི་མ་དེར་ཐལ། དགག་པ་ཡིན་པའི་ཕྱིར། གཞན་ཡང་། རྣམ་བཤད་ལས། འདི་ལྟར་གསུངས་པའི་ཟུར་གཉིས་པ་སྒྲུབ་པའི་རྣམ་པར་རྟོགས་བྱ་མ་ཡིན་པར་ཞེས་པའི་སྒྲུབ་པ་དེ་དགག་སྒྲུབ་གཉིས་སུ་ཕྱེ་བའི་སྒྲུབ་པ་ལ་བྱེད་རིགས་པར་ཐལ། ཁྱོད་ཀྱི་ཞེ་འདོད་འཐད་པའི་ཕྱིར། འདོད་མི་ནུས་ཏེ། དེ་ཀུན་རྫོབ་པའི་རྣམ་པར་རྟོགས་བྱ་ལ་བྱེད་རིགས་པའི་ཕྱིར། དེར་ཐལ། དེ་གཉིས་སྣང་དང་བཅས་པའི་ཚུལ་གྱིས་རྟོགས་པར་བྱ་བ་ལ་བྱེད་རིགས་པའི་ཕྱིར། སྤྱོད་འཇུག་རྣམ་བཤད་ལས། རང་མངོན་སུམ་དུ་རྟོགས་པའི་མངོན་སུམ་ཚད་མས་གཉིས་སྣང་དང་བཅས་པའི་ཚུལ་གྱིས་རྟོགས་པར་བྱ་བ་མ་ཡིན་པའི་ཕྱིར། དེས་རྟོགས་པར་བྱ་བ་དོན་དམ་པའི་མཚན་ཉིད་དུ་གསུངས་པ་དང་གནད་གཅིག་པའི་ཕྱིར། ཁ་ཅིག །མཐར་ཐུག་དཔྱོད་པའི་རིགས་ཤེས་ཀྱི་དངོས་ཀྱི་རྙེད་དོན། དོན་དམ་བདེན་པའི་མཚན་ཉིད་ཟེར་ན། མཐར་ཐུག་དཔྱོད་པའི་རིགས་ཤེས་རྗེས་དཔག་གི་གཞལ་བྱ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། མཐར་ཐུག་དཔྱོད་པའི་རིགས་ཤེས་རྗེས་དཔག་དེས། ཁྱོད་དངོས་སུ་རྟོགས་པའི་ཕྱིར། མ་གྲུབ་ན། མཐར་ཐུག་དཔྱོད་པའི་རིགས་ཤེས་རྗེས་དཔག་ཆོས་ཅན། ཁྱོད་ཀྱིས་རང་གི་གཞལ་བྱ་དངོས་སུ་རྟོགས་པར་ཐལ། ཁྱོད་རྟོག་པ་ཚད་མ་ཡིན་པའི་ཕྱིར། རྩ་བ་འདོད་ན། ཐེག་ཆེན་མཐོང་ལམ་བར་ཆད་མེད་ལམ་པའི་གཞལ་བྱ་དོན་དམ་བདེན་པ་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། ཐེག་ཆེན་མཐོང་ལམ་བར་ཆད་མེད་ལམ་དེ་དེའི་གཞལ་བྱ་ཡིན་པའི་ཕྱིར། གཞན་ཡང་། བདག་མེད་ཀྱི་དོན་སྤྱི་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། བདག་མེད་རྟོགས་པའི་རིགས་ཤེས་
རྗེས་དཔག་གི་དངོས་ཀྱི་རྙེད་དོན་ཡིན་པའི་ཕྱིར། དེའི་དངོས་ཀྱི་ཡུལ་གང་ཞིག །དེའི་གཞལ་བྱ་ཡིན་པའི་ཕྱིར། ཕྱི་མ་དེར་ཐལ། དེའི་སྣང་ཚུལ་གྱི་གཞལ་བྱ་ཡིན་པའི་ཕྱིར་ཏེ། དེ་ཡོད་པའི་ཕྱིར། ཁ་ཅིག །ཇི་སྙེད་པ་མཁྱེན་པའི་རྣམ་མཁྱེན་གྱིས་གཉིས་སྣང་དང་བཅས་པའི་སྒོ་ནས་རྟོགས་པར་བྱ་བ་ཀུན་རྫོབ་བདེན་པའི་མཚན་ཉིད་ཡིན་ཟེར་ན། ཇི་སྙེད་པ་རྟོགས་པའི་རྣམ་མཁྱེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་ཇི་སྙེད་པ་མཁྱེན་པའི་རྣམ་མཁྱེན་དེ། ཁྱོད་རང་ལས་ཐ་དད་པའི་ཚུལ་གྱིས་རྟོགས་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་ཇི་སྙེད་པ་མཁྱེན་པའི་རྣམ་མཁྱེན་དང་ཐ་དད་ཡིན་པར་ཐལ། འདོད་པའི་ཕྱིར། འདོད་མི་ནུས། ཁ་ཅིག །ཀུན་རྫོབ་བདེན་པ་གཞིར་བྱས་ལ། སོ་སྐྱེའི་མངོན་སུམ་ལ་སྣང་བ་ལྟར་དོན་བྱེད་ནུས་པ་དེ་ཡང་དག་ཀུན་རྫོབ་ཀྱི་མཚན་ཉིད་ཟེར་ན། ལོངས་སྐུ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེའི་འཁོར་དུ་གྱུར་པའི་སོ་སྐྱེ་ཡོད་པར་ཐལ། འདོད་པའི་ཕྱིར། འདོད་མི་ནུས། ཡང་ཁ་ཅིག །མངོན་སུམ་དུ་སྣང་བ་ལྟར་དོན་བྱེད་ནུས་པའི་ཀུན་རྫོབ་པར་དམིགས་པ་དེ་ཡང་དག་ཀུན་རྫོབ་ཀྱི་མཚན་ཉིད་ཟེར་ན། གང་ཟག་གི་བདག་མེད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས། ཁ་ཅིག །མཐར་ཐུག་དཔྱོད་པའི་རིགས་ཤེས་ཀྱི་རྙེད་དོན་ཡིན་ན་དེའི་དཔྱད་བཟོད་ཡིན་པས་ཁྱབ་ཟེར་ན། མི་འཐད་པར་ཐལ། དེའི་དཔྱད་བཟོད་ཚད་མས་ཁེགས་པའི་ཕྱིར། གཉིས་པ་རང་ལུགས་ནི། རང་མངོན་སུམ་དུ་
རྟོགས་པའི་མངོན་སུམ་ཚད་མས་གཉིས་སྣང་ནུབ་པའི་ཚུལ་གྱིས་རྟོགས་པར་བྱ་བ་གང་ཞིག །སྒྲུབ་པའི་རྣམ་པར་རྟོགས་བྱ་མ་ཡིན་པ་དེ། རང་ཉིད་དོན་དམ་བདེན་པ་ཡིན་པའི་མཚན་ཉིད། རང་མངོན་སུམ་དུ་རྟོགས་པའི་མངོན་སུམ་ཚད་མས་གཉིས་སྣང་དང་བཅས་པའི་ཚུལ་གྱིས་རྟོགས་པར་བྱ་བའི་རིགས་སུ་གནས་པ་དེ་རང་ཉིད་ཀུན་རྫོབ་བདེན་པ་ཡིན་པའི་མཚན་ཉིད། དང་པོ་ལ། ཡིན་ཚུལ་གྱི་སྒོ་ནས་དབྱེ་ན། ནང་སྟོང་པ་ཉིད་ལ་སོགས་པ་སྟོང་ཉིད་བཅུ་དྲུག་གམ་ཉི་ཤུར་ཡོད། སྒྲས་བརྗོད་རིགས་ཀྱི་སྒོ་ནས་དབྱེ་ན། ཡུལ་གྱི་དོན་དམ་བདེན་པ་དང་། ཡུལ་ཅན་གྱི་དོན་དམ་བདེན་པ་གཉིས། དང་པོ་ནི། བུམ་པ་བདེན་སྟོང་ལྟ་བུ། གཉིས་པ་ནི། དེ་མངོན་སུམ་དུ་རྟོགས་པའི་མཉམ་གཞག་ཡེ་ཤེས་ལྟ་བུ། ཀུན་རྫོབ་བདེན་པ་ལ་ཡིན་ཚུལ་གྱི་སྒོ་ནས་དབྱེ་ན། ཡང་དག་ཀུན་རྫོབ་དང་ལོག་པའི་ཀུན་རྫོབ་གཉིས། ཀུན་རྫོབ་བདེན་པ་གང་ཞིག །རང་སྣང་ཡུལ་དུ་བྱེད་པའི་བློ་ལ་སྣང་བ་ལྟར་གྲུབ་པའི་རིགས་སུ་གནས་པ་དེ་དང་པོའི་མཚན་ཉིད། མཚན་གཞི་ནི་ཤེས་པ་ལྟ་བུ། དེ་གང་ཞིག་རང་སྣང་ཡུལ་དུ་བྱེད་པའི་བློ་ལ་སྣང་བ་ལྟར་མ་གྲུབ་པའི་རིགས་སུ་གནས་པ་དེ་གཉིས་པའི་མཚན་ཉིད། མེ་ལོང་གི་གཟུགས་བརྙན་ལྟ་བུ་དེའི་མཚན་གཞི། གསུམ་པ་རྩོད་པ་སྤོང་བ་ལ། ཁོ་ན་རེ། རྣམ་མཁྱེན་ཆོས་ཅན། རང་ལུགས་ཀྱི་ཀུན་རྫོབ་བདེན་པའི་མཚན་ཉིད་དེར་ཐལ། མཚོན་བྱ་དེའི་ཕྱིར། རང་མངོན་སུམ་དུ་རྟོགས་པའི་མངོན་སུམ་ཚད་མས་གཉིས་སྣང་དང་བཅས་པའི་ཚུལ་གྱིས་རྟོགས་པར་ཐལ། འདོད་པའི་ཕྱིར་ན་མ་ཁྱབ་སྟེ། དེས་ཐ་དད་པའི་ཚུལ་གྱིས་མ་རྟོགས་པའི་ཕྱིར་དང་། དེ་དེ་ལ་མི་སྣང་བའི་ཕྱིར། ཁོ་ན་རེ། སངས་རྒྱས་འཕགས་པའི་མིག་གི་རྣམ་ཤེས་དང་། དེའི་འཁོར་དུ་གྱུར་པའི་ཚོར་བ་རྣམ་པ་མི་མཚུངས་པར་ཐལ། དེ་ལྟ་བུའི་ཚོར་བ་ལ་སྣང་ན། དེའི་མིག་ཤེས་ལ་སྣང་བས་མ་ཁྱབ་པའི་ཕྱིར། མ་གྲུབ་ན། དེར་ཐལ། དེའི་མིག་གི་རྣམ་ཤེས་དེ་ཁོ་རང་ལ་མི་སྣང་བའི་ཕྱིར་ན་མ་
ཁྱབ་སྟེ། མིག་ཤེས་དང་ཐ་དད་གང་ཞིག །དེ་ལྟ་བུའི་ཚོར་བ་ལ་སྣང་ན། དེའི་མིག་ཤེས་ལ་སྣང་བས་ཁྱབ་པ་དེ་གཉིས་རྣམ་པ་མཚུངས་པའི་དོན་ཡིན་པའི་ཕྱིར། ཁ་ཅིག །ལས་རྒྱུ་འབྲས་ཆོས་ཅན། རྫུན་པ་སླུ་བའི་ཆོས་ཅན་ཡིན་པར་ཐལ། འདུས་བྱས་ཡིན་པའི་ཕྱིར། འདོད་ན། སླུ་བ་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། མི་སླུ་བ་ཡིན་པའི་ཕྱིར། དེར་ཐལ། མི་སླུ་བའི་ཕྱིར་ན་མ་ཁྱབ།
འཕགས་པའི་བདེན་པ་བཞི་བཤད་པ།
འཕགས་པའི་བདེན་པ་བཞི་བཤད་པ། གཉིས་པ་ལ། སྤྱི་དོན་དང་། ཡན་ལག་གི་དོན་གཉིས། ཕྱི་མ་བཞི་ལས། སྡུག་བསྔལ་བདེན་པ་ལ་འདོམས་པ་ལ་ཚིག་དོན་དང་། མཐའ་དཔྱད་པ་གཉིས། དང་པོ་ནི། ཤཱ་རའི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ། གཟུགས་སྟོང་པ་ཉིད་ལ་བརྩོན་ན་བརྩོན་ཞེས་བྱའོ། །ཞེས་སོགས་ཀྱི་ཡུམ་བར་མའི་མདོ་ཆོས་ཅན། སྡུག་བསྔལ་བདེན་པ་ལ་ཤེས་བྱར་བདེན་ཞེན་དགག་པའི་ཕྱིར་དུ་གདམས་པ་ཡིན་ཏེ། ཟག་བཅས་ཀྱི་གཟུགས་ལ་སོགས་པ་འབྲས་བུར་གྱུར་པའི་སྟོང་པ་ཉིད་དང་། དེ་མངོན་སུམ་དུ་རྟོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དག་བདེན་པར་གྲུབ་པས་སྟོང་པ་དེ་བཞིན་ཉིད་ཀྱི་ངོ་བོ་རང་བཞིན་གཅིག་གོ་ཞེས་ཤེས་པར་བྱ་བའི་ཕྱིར་གདམས་པ་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །རང་རྒྱུ་ཀུན་འབྱུང་བདེན་པའི་རྣམ་སྨིན་གྱི་འབྲས་བུར་འགྱུར་པའི་ཟག་བཅས་དེ་སྡུག་བསྔལ་བདེན་པའི་མཚན་ཉིད། རང་འབྲས་སྡུག་བསྔལ་བདེན་པའི་རྣམ་སྨིན་གྱི་རྒྱུར་གྱུར་པའི་ཟག་བཅས་ཀུན་འབྱུང་བདེན་པའི་མཚན་ཉིད་ཟེར་ན། མ་དག་པའི་སྣོད་ཀྱི་འཇིག་རྟེན་ཆོས་ཅན། མཚན་ཉིད་དང་པོ་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། རྣམ་སྨིན་གྱི་འབྲས་བུ་ཡིན་པར་ཐལ། འདོད་པའི་
ཕྱིར། འདོད་ན། གང་ཟག་གི་རྒྱུད་ཀྱིས་བསྡུས་པར་ཐལ། འདོད་པའི་ཕྱིར། ཁྱབ་སྟེ། མཛོད་ལས། སེམས་ཅན་བརྗོད། ཅེས་གསུངས་པའི་ཕྱིར། གཞན་ཡང་། མི་དགེ་བའི་ལས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཀུན་འབྱུང་བདེན་པ་ཡིན་པའི་ཕྱིར། རྩ་བར་འདོད་ན། རྣམ་སྨིན་གྱི་འབྲས་བུ་ཡིན་པར་ཐལ། འདོད་པའི་ཕྱིར། འདོད་ན། ལུང་མ་བསྟན་ཡིན་པར་ཐལ། འདོད་པའི་ཕྱིར། ཁྱབ་སྟེ། མཛོད་ལས། རྣམ་སྨིན་ལུང་དུ་མ་བསྟན་ཆོས། ཞེས་གསུངས་པའི་ཕྱིར། གཞན་ཡང་ཁམས་གོང་མའི་སྐྱེ་བ་འཕེན་བྱེད་ཀྱི་ཉོན་མོངས་ཆོས་ཅན། མཚན་ཉིད་ཕྱི་མ་དེར་ཐལ། མཚོན་བྱ་དེའི་ཕྱིར། ཆོས་ཅན་དེ་ཡིན་པའི་ཕྱིར། རྩ་བར་འདོད་ན། མ་ཡིན་པར་ཐལ། མི་དགེ་བ་དང་དགེ་བ་ཟག་བཅས་གང་རུང་མ་ཡིན་པའི་ཕྱིར། ཁྱབ་སྟེ། མཛོད་ལས། རྣམ་སྨིན་རྒྱུ་ནི་མི་དགེ་དང་། དགེ་བ་ཟག་བཅས་རྣམས་ཁོ་ན། ཞེས་གསུངས་པའི་ཕྱིར། གཞན་ཡང་། དེ་ཆོས་ཅན། རྣམ་སྨིན་གྱི་རྒྱུ་མ་ཡིན་པར་ཐལ། ལུང་མ་བསྟན་ཡིན་པའི་ཕྱིར། དེར་ཐལ། གོང་མའི་སས་བསྡུས་ཀྱི་ཉོན་མོངས་ཡིན་པའི་ཕྱིར། ཁྱབ་པ་ཡོད་དེ། མཛོད་ལས། གོང་མ་ཐམས་ཅད་ལུང་མ་བསྟན། ཞེས་གསུངས་པའི་ཕྱིར། ལམ་བདེན་གྱི་འབྲས་བུར་གྱུར་པའི་སོ་སོར་བརྟག་འགོག་འགོག་བདེན་གྱི་མཚན་ཉིད། འགོག་བདེན་གྱི་བྲལ་རྒྱུར་གྱུར་པའི་འཕགས་པའི་རྣམ་བྱང་བདེན་པ་ལམ་བདེན་གྱི་མཚན་ཉིད་ཟེར་ན། ལམ་བདེན་དང་དུས་མཉམ་དུ་གྲུབ་པའི་འགོག་བདེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཁྱོད་ལམ་བདེན་གྱི་ཕྱི་ལོགས་སུ་གྲུབ་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་དང་དུས་མཉམ་དུ་གྲུབ་པའི་ཕྱིར། ཁ་ཅིག །ཀུན་ནས་ཉོན་མོངས་ཕྱོགས་ཀྱི་བདེན་པ་གང་ཞིག །གྲོལ་པ་དོན་གཉེར་གྱི་སྐྱེ་བུས། ནད་དང་འདྲ་བར་ཤེས་པར་བྱ་བ་དེ་སྡུག་བསྔལ་བདེན་པའི་མཚན་
ཉིད། དེ་གང་ཞིག །གྲོལ་བ་དོན་གཉེར་གྱི་སྐྱེས་བུས་ནད་ཀྱི་རྒྱུ་ལྟར་སྤང་བར་བྱ་བ་དེ་ཀུན་འབྱུང་བདེན་པའི་མཚན་ཉིད། རྣམ་བྱང་གི་བདེན་པ་གང་ཞིག །དེས་ནད་དང་བྲལ་བ་ལྟར་མངོན་དུ་བྱ་བ་དེ་འགོག་བདེན་གྱི་མཚན་ཉིད། དེས་སྨན་ལྟར་དུ་བསྟེན་པར་བྱ་བ་ལམ་གྱི་བདེན་པའི་མཚན་ཉིད་ཟེར་ན། ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པའི་རྒྱུད་ཀྱི་ཉེར་ལེན་གྱི་ཕུང་པོ་ཆོས་ཅན། མཚན་ཉིད་དང་པོ་དེར་ཐལ། མཚོན་བྱ་དེའི་ཕྱིར། དེར་ཐལ། དེའི་རྒྱུད་ལ་སྡུག་བསྔལ་བདེན་པ་ཡོད་པའི་ཕྱིར། དེར་ཐལ། དེའི་རྒྱུད་ལ་འཁོར་བས་བསྡུས་པའི་ལས་ཡོད་པའི་ཕྱིར། དེར་ཐལ། དེ་ལས་དབང་གིས་འཁོར་བར་གནས་པ་ཡོད་པའི་ཕྱིར། རྩ་བར་འདོད་ན། དེའི་རྒྱུད་ལ་ཀུན་ནས་ཉོན་མོངས་ཕྱོགས་ཀྱི་བདེན་པ་ཡོད་པར་ཐལ། འདོད་པའི་ཕྱིར། འདོད་ན། དེས་ཉོན་སྒྲིབ་ཟད་པར་མ་སྤངས་པར་ཐལ། འདོད་པའི་ཕྱིར། འདོད་མི་ནུས་སོ། །གཞན་ཡང་། སྡུག་བསྔལ་བདེན་པར་འགྱུར་བའི་དད་པའི་དབང་པོ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། དེར་ཐལ། དེ་ཡོད་པའི་ཕྱིར། དེར་ཐལ། ཀུན་འབྱུང་བདེན་པར་གྱུར་པའི་དེ་ཡོད་པའི་ཕྱིར། དེར་ཐལ། དེར་གྱུར་པའི་བསོད་ནམས་ཀྱི་ལས་འཁོར་དུ་ལྡན་པའི་གཙོ་བོ་སེམས་ཀྱི་འཁོར་དུ་བྱུང་བའི་དད་པའི་དབང་པོ་ཡོད་པའི་ཕྱིར། མ་གྲུབ་ན། དེ་འདྲ་བའི་གཙོ་བོ་སེམས་ཆོས་ཅན། ཁྱོད་ཀྱི་འཁོར་དུ་བྱུང་བའི་དད་པའི་དབང་པོ་ཡོད་པར་ཐལ། ཁྱོད་དགེ་སེམས་ཡིན་པའི་ཕྱིར། རྩ་བར་འདོད་ན། ཀུན་ནས་ཉོན་མོངས་ཕྱོགས་ཀྱི་བདེན་པ་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། རྣམ་བྱང་གི་དབང་པོ་ཡིན་པའི་ཕྱིར། དེར་ཐལ། དད་པའི་དབང་པོ་ཡིན་པའི་ཕྱིར། ཁ་ཅིག །ཟག་བཅས་འབྲས་དུས་ཀྱི་ཆར་གྱུར་པ་སྡུག་བསྔལ་བདེན་པའི་མཚན་ཉིད།
ཟག་བཅས་རྒྱུ་དུས་ཀྱི་ཆར་གྱུར་པ་ཀུན་འབྱུང་བདེན་པའི་མཚན་ཉིད། ཟག་མེད་འབྲས་དུས་ཀྱི་ཆར་གྱུར་པ་འགོག་བདེན་གྱི་མཚན་ཉིད། ཟག་མེད་རྒྱུ་དུས་ཀྱི་ཆར་གྱུར་པ་ལམ་བདེན་གྱི་མཚན་ཉིད་ཟེར་ན། ཀུན་འབྱུང་བདེན་པ་ཆོས་ཅན། མཚན་ཉིད་དང་པོར་དེར་ཐལ། མཚོན་བྱ་དེའི་ཕྱིར། འདོད་ན། སྡུག་བསྔལ་བདེན་པ་དེ་ཟག་བཅས་རྒྱུ་དུས་ཀྱི་ཆར་གྱུར་པ་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཀུན་འབྱུང་བདེན་པ་ཡིན་པར་ཐལ། འདོད་པའི་ཕྱིར། ཁྱབ་པ་ཁས། འདོད་མི་ནུས་ཏེ། མ་དག་པའི་སྣོད་ཀྱི་འཇིག་རྟེན་ཁྱོད་ཡིན་པའི་ཕྱིར། གཞན་ཡང་། མོས་པ་སྒོམ་ལམ་ཆོས་ཅན། མཚོན་བྱ་གཉིས་པ་དེར་ཐལ། མཚན་ཉིད་དེའི་ཕྱིར། དེར་ཐལ། ཟག་བཅས་གང་ཞིག །རྒྱུ་ཡིན་པའི་ཕྱིར། དང་པོ་དེར་ཐལ། ཟག་བཅས་ཀྱི་ཤེས་པ་ཡིན་པའི་ཕྱིར། དེར་ཐལ། ཟག་བཅས་ཀྱི་ལམ་ཡིན་པའི་ཕྱིར། དེར་ཐལ། ཟག་བཅས་ཀྱི་འཕགས་པའི་ལམ་ཡིན་པའི་ཕྱིར། ཟག་བཅས་སྒོམ་ལམ་ཡིན་པའི་ཕྱིར། གཞན་ཡང་། རྣམ་མཁྱེན་ཆོས་ཅན། མཚོན་བྱ་གསུམ་པ་དེར་ཐལ། མཚན་ཉིད་དེའི་ཕྱིར། དེར་ཐལ། ཟག་མེད་གང་ཞིག །འབྲས་བུ་ཡིན་པའི་ཕྱིར། སངས་འཕགས་ཆོས་ཅན། མཚོན་བྱ་བཞི་པ་དེར་ཐལ། མཚན་ཉིད་དེའི་ཕྱིར། དེར་ཐལ། ཟག་མེད་གང་ཞིག །རྒྱུ་ཡིན་པའི་ཕྱིར། ཁ་ཅིག །མི་རྟག་སྡུག་བསྔལ་སྟོང་བདག་མེད་བཞིའི་ཚོགས་དོན། སྡུག་བསྔལ་བདེན་པའི་མཚན་ཉིད་ཟེར་ན། ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། དེ་བཞི་དང་ལྡན་པའི་ཕྱིར་ཏེ། དེ་འདྲའི་སྐྱེས་བུ་ཡིན་པའི་ཕྱིར། ཡང་ཁ་ཅིག །འགོག་པ་ཞི་བ་གྱ་ནོམ་ངེས་འབྱུང་བཞིའི་ཚོགས་དོན། འགོག་བདེན་གྱི་མཚན་ཉིད་ཟེར་ན། སངས་འཕགས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། ཁ་ཅིག །རང་རྒྱུ་ལས་ཉོན་གྱི་འབྲས་བུར་གྱུར་པའི་ཟག་བཅས་ཀྱི་ཕུང་པོ་སྡུག་བསྔལ་བདེན་པའི་མཚན་ཉིད་ཟེར་ན། ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། དེའི་གཟུགས་
ཕུང་དེ་དེ་ཡིན་པ་གང་ཞིག །དེ་གཉིས་ཀྱི་དངོས་རྒྱུ་དོན་གཅིག་ཡིན་པའི་ཕྱིར། འདོད་མི་ནུས་ཏེ། དགྲ་བཅོམ་པ་ཡིན་པའི་ཕྱིར། ཁ་ཅིག །རང་འབྲས་རྣམ་སྨིན་སྡུག་བསྔལ་འབྱིན་བྱེད་ཀྱི་ཕུང་པོ་ཀུན་འབྱུང་བདེན་པའི་མཚན་ཉིད་ཟེར་ན། འདོད་ལྷའི་ཕུང་པོ་འཕེན་བྱེད་ཀྱི་ལས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ལས་ཀྱི་ཀུན་འབྱུང་ཡིན་པའི་ཕྱིར། དེར་ཐལ། འཁོར་བས་བསྡུས་པའི་ལས་ཡིན་པའི་ཕྱིར། དེར་ཐལ། དེས་བསྡུས་པའི་བསོད་ནམས་ཀྱི་ལས་ཡིན་པའི་ཕྱིར། རྩ་བར་འདོད་མི་ནུས་ཏེ། དགེ་བའི་ལས་ཡིན་པའི་ཕྱིར། ཁ་ཅིག །ལས་ཡིན་ན་ལས་ཀྱི་ཀུན་འབྱུང་ཡིན་པས་ཁྱབ་ཟེར་ན། སྟོན་པ་ཤཱཀྱ་ཐུབ་པའི་ཐུགས་རྒྱུད་ཀྱི་ལས་ཆོས་ཅན། དེར་ཐལ། དེའི་ཕྱིར། དེ་ཡོད་པའི་ཕྱིར། དེར་ཐལ། གཙོ་བོ་སེམས་ཡིན་ན་རང་གི་འཁོར་དུ་གྱུར་པའི་སེམས་པའི་ལས་ཡོད་པས་ཁྱབ་པའི་ཕྱིར། ཡང་ཁ་ཅིག །ཀུན་འབྱུང་བདེན་པ་ཡིན་ན་ལས་ཉོན་གྱི་ཀུན་འབྱུང་གང་རུང་ཡིན་པས་ཁྱབ་ཟེར་ན། ཀུན་འབྱུང་བདེན་པར་གྱུར་པའི་གཟུགས་ཕུང་ཆོས་ཅན། དེར་ཐལ། དེའི་ཕྱིར། འདོད་ན། འདུ་བྱེད་ཀྱི་ཕུང་པོ་ཡིན་པར་ཐལ། འདོད་པའི་ཕྱིར། འདོད་མི་ནུས། ཁ་ཅིག །སྡུག་བསྔལ་བདེན་པ་དང་ལམ་བདེན་མི་འགལ་ཟེར་ན། ཀུན་ནས་ཉོན་མོངས་ཀྱི་བདེན་པ་དང་། རྣམ་བྱང་གི་བདེན་པའི་གཞི་མཐུན་ཡོད་པར་ཐལ། སྡུག་བདེན་དང་ལམ་བདེན་གྱི་གཞི་མཐུན་ཡོད་པའི་ཕྱིར། རྟགས་ཁས། འདོད་ན། ཤེས་སྒྲིབ་ཀུན་ནས་ཉོན་མོངས་གཟུང་རྟོག་དང་། རྣམ་བྱང་གཟུང་རྟོག་གི་གཞི་མཐུན་ཡོད་པར་ཐལ། འདོད་པའི་ཕྱིར། འདོད་ན། འགྲེལ་ཆེན་ལས། འདི་གཉིས་ཕན་ཚུན་རྣམ་པར་གཅོད་པའི་ངོ་བོ་ཡིན་པའི་ཕྱིར། ཞེས་གསུངས་པ་མི་འཐད་པར་ཐལ། འདོད་པའི་ཕྱིར། ཁ་ཅིག །ཟག་བཅས་ཀྱི་ཕུང་པོ་ཡིན་ན་སྡུག་བསྔལ་བདེན་པ་ཡིན་པས་ཁྱབ་ཟེར་ན། བདེ་བ་ཅན་གྱི་སོ་སྐྱེ་ཆོས་ཅན།
དེར་ཐལ། དེའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁྱབ་པ་ཡོད་དེ། ཀུན་ལས་བཏུས་ལས། ཡོངས་སུ་དག་པའི་འཇིག་རྟེན་གྱི་ཁམས་དེ་དག་ནི་སྡུག་བསྔལ་གྱི་བདེན་པ་མ་ཡིན་པར་བལྟ་སྟེ། དེ་དག་ནི་ལས་དང་ཉོན་མོངས་པས་བསྐྱེད་པ་མ་ཡིན། ལས་དང་ཉོན་མོངས་པའི་དབང་གིས་བྱུང་བ་མ་ཡིན་གྱི། སྨོན་ལམ་དང་དགེ་བའི་རྩ་བའི་དབང་གིས་བྱུང་བ་དག་གོ །ཞེས་གསུངས་པའི་ཕྱིར། ཁ་ཅིགའགོག་པ་ཡིན་ན་འགོག་བདེན་ཡིན་པས་ཁྱབ་ཟེར་ན། མི་འཐད་པར་ཐལ། འགོག་པ་ལ་དབྱེ་ན། སོ་སོར་བརྟགས་འགོག་དང་སོ་སོར་བརྟགས་མིན་གྱི་འགོག་པ་གཉིས་ཡོད་པའི་ཕྱིར། གཞན་ཡང་། ལམ་ཡིན་ན་ལམ་བདེན་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། ཉན་ཐོས་ཀྱི་ཚོགས་ལམ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། སོ་སྐྱེའི་ལམ་ཡིན་པའི་ཕྱིར་རོ། །གཉིས་པ་རང་ལུགས་ནི། རང་རྒྱུ་ཀུན་འབྱུང་ལས་བྱུང་བའི་འཁོར་བས་བསྡུས་པའི་ཟག་བཅས་དེ་སྡུག་བསྔལ་བདེན་པའི་མཚན་ཉིད། དེ་ལ་རྟེན་གྱི་སྒོ་ནས་དབྱེ་ན་མ་དག་པའི་སྣོད་བཅུད་གཉིས། ངོ་བོའི་སྒོ་ནས་དབྱེ་ན། སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་དང་གསུམ། རང་འབྲས་སྡུག་བསྔལ་བདེན་པ་སྐྱེད་བྱེད་ཀྱི་འཁོར་བས་བསྡུས་པ་ཀུན་འབྱུང་བདེན་པའི་མཚན་ཉིད། དེ་ལ་དབྱེ་ན། ཉོན་མོངས་པའི་ཀུན་འབྱུང་དང་། ལས་ཀྱི་ཀུན་འབྱུང་གཉིས། རང་ཐོབ་བྱེད་ཀྱི་ཐབས་སུ་གྱུར་པའི་བར་ཆད་མེད་ལམ་གྱི་ངོ་སྐལ་གྱི་སྒྲིབ་པ་སྤངས་པའི་བྲལ་བ་དེ་འགོག་བདེན་གྱི་མཚན་ཉིད། དེ་ལ་དབྱེ་ན། ཐེག་པ་གསུམ་གྱི་འགོག་བདེན། རང་གི་བྲལ་འབྲས་སུ་གྱུར་པའི་འགོག་བདེན་ཐོབ་བྱེད་ཀྱི་འཕགས་རྒྱུད་ཀྱི་མངོན་རྟོགས། རང་ཉིད་ལམ་བདེན་ཡིན་པའི་མཚན་ཉིད་
དེ་ལ་དབྱེ་ན། ཐེག་པ་གསུམ་གྱི་མཐོང་སྒོམ་མི་སློབ་པའི་ལམ་གསུམ་དུ་ཡོད་དོ། །གསུམ་པ་རྩོད་པ་སྤོང་བ་ལ། ཁ་ཅིག །རང་རྒྱལ་གྱི་རྒྱུད་ཀྱི་འགོག་བདེན་ཡིན་ན། རང་རྒྱལ་གྱི་འགོག་བདེན་ཡིན་དགོས་པར་ཐལ། ཉན་ཐོས་ལ་དེའི་ཕྱིར་ན་མ་ཁྱབ་སྟེ། ཉན་ཐོས་འཕགས་པའི་རྟོགས་པ་སྔོན་དུ་སོང་བའི་རང་རྒྱལ་ཚོགས་ལམ་པའི་རྒྱུད་ཀྱི་འགོག་བདེན་རང་རྒྱལ་གྱི་འགོག་བདེན་མ་ཡིན་པའི་ཕྱིར། དེར་ཐལ། རང་རྒྱལ་གྱི་འགོག་བདེན་ཐོབ་པ་ལ་རང་རྒྱལ་གྱི་ལམ་བདེན་ཐོབ་པ་སྔོན་དུ་འགྲོ་དགོས་པ་གང་ཞིག །དེས་རང་རྒྱལ་གྱི་ལམ་བདེན་མ་ཐོབ་པའི་ཕྱིར། ཕྱི་མ་དེར་ཐལ། དེས་དེའི་འཕགས་ལམ་མ་ཐོབ་པའི་ཕྱིར་རོ། །ཡང་ཁ་ཅིག །ལས་ཉོན་གྱི་ཀུན་འབྱུང་གཉིས་མི་འགལ་བར་ཐལ། ལས་ཉོན་གཉིས་མི་འགལ་བའི་ཕྱིར། དེར་ཐལ། དེའི་གཞི་མཐུན་ཡོད་པའི་ཕྱིར། དེར་ཐལ། ལས་འབྲས་ལ་སྐུར་བ་འདེབས་པའི་ལོག་ལྟ་དེ་དེ་ཡིན་པའི་ཕྱིར། དེར་ཐལ། དེ་མི་དགེ་བའི་ལས་ཡིན་པའི་ཕྱིར། དེར་ཐལ། དེ་ཡིད་ཀྱི་མི་དགེ་བའི་ལས་ཡིན་པའི་ཕྱིར། དེར་ཐལ། མི་དགེ་བ་བཅུའི་ལས་ཡོད་པའི་ཕྱིར་ཏེ། དེའི་ལས་ལམ་ཡོད་པའི་ཕྱིར་ན། མ་ཁྱབ་སྟེ། དེ་གཉིས་དོན་མི་གཅིག་པའི་ཕྱིར། དེར་ཐལ། ཡིད་ཀྱི་གསུམ་དེའི་ལས་ལམ་ཡིན་ལ། ལས་མ་ཡིན་ཞིང་། ལུས་ངག་གི་བདུན་པོ་དེའི་ལས་དང་ལས་ལམ་གཉིས་ཀ་ཡིན་པའི་ཁྱད་པར་འཐད་པའི་ཕྱིར། དེར་ཐལ། གསུམ་མམ་བདུན་ནི་ལས་ཀྱང་ཡིན། ཞེས་གསུངས་པའི་ཕྱིར། གཉིས་པ་ཀུན་འབྱུང་བདེན་པ་ལ་འདོམས་པའི་ཚུལ་ནི། གཟུགས་སྐྱེ་བའི་ཆོས་ཅན་ནམ། འགག་པའི་ཆོས་ཅན་དུ་ཡང་དག་པར་རྗེས་སུ་མི་མཐོང་ཞེས་སོགས་ཀྱི་ཡུམ་བར་མའི་མདོ་ཆོས་ཅན། ཀུན་འབྱུང་བདེན་པ་ལ་སྤང་བྱར་བདེན་ཞེན་དགག་པའི་ཕྱིར་དུ་གདམས་པ་ཡིན་ཏེ། ཟག་བཅས་རྒྱུས་བསྡུས་ཀྱི་གཟུགས་ལ་སོགས་
པ་ནི་གསར་དུ་ཀུན་འབྱུང་བ་དང་། ཡང་འགོག་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བའི་ཆོས་ཅན་བདེན་པར་གྲུབ་པ་མ་ཡིན་ནོ། །ཞེས་འདོམས་པའི་ཕྱིར། དེ་དེར་བདེན་པར་མ་གྲུབ་སྟེ། སྟོང་པ་ཉིད་གཟུགས་ལ་སོགས་པ་རྒྱུར་གྱུར་པ་དག་དོན་དམ་པར་ཐ་མི་དད་པ་ཉིད་ཀྱི་ཕྱིར། གསུམ་པ་འགོག་བདེན་ལ་གདམས་པ་ནི། ཤཱ་རིའི་བུ། སྟོང་པ་ཉིད་མི་སྐྱེ་མི་འགག་ཅིང་། ཀུན་ནས་ཉོན་མོངས་པ་མ་ཡིན་ན། རྣམ་པར་བྱང་བ་མ་ཡིན་ནོ་ཞེས་སོགས་ཀྱི་ཡུམ་བར་མའི་མདོ་ཆོས་ཅན། འགོག་པ་ལ་མངོན་དུ་བྱ་བར་བདེན་ཞེན་དགག་པའི་ཕྱིར་དུ་གདམས་པ་ཡིན་ཏེ། སྟོང་པ་ཉིད་གློ་བུར་གྱི་དྲི་མ་དང་བྲལ་བ་དེ་འདུས་བྱས་ཀྱི་མཚན་ཉིད་སྐྱེ་བ་དང་འགག་པ་དང་། སྤང་བྱ་ཀུན་ནས་ཉོན་མོངས་པ་དང་། གཉེན་པོ་རྣམ་པར་བྱང་བ་དང་། གནས་སྐབས་ཉམས་པ་དང་འཕེལ་བ་དང་རྒྱུ་འབྲས་ལ་སོགས་པ་བདེན་པར་གྲུབ་པ་དང་བྲལ་བ་ཡིན་ལ། དེ་ལ་ནི་ཁྱད་ཆོས་བདེན་པ་གང་དུ་ཡང་མ་གྲུབ་བོ་ཞེས་གདམས་པའི་ཕྱིར། གང་དུ་ཡང་བདེན་པར་མ་གྲུབ་སྟེ། དོན་དམ་པར་ཀུན་ནས་ཉོན་མོངས་ཀྱི་སྤྱི་གཟུགས་མེད་པ་ནས། ཁྱད་པར་མ་རིག་པ་སྐྱེ་བ་ཡང་མེད། རྣམ་བྱང་གི་སྤྱི་མ་རིག་པ་འགག་པ་ཡང་མེད། ཁྱད་པར་རྟོགས་པ་སངས་རྒྱས་ཀྱང་མེད། སྤངས་པ་བྱང་ཆུབ་ཀྱི་བར་དུ་ཡང་མེད་པའི་ཕྱིར། བཞི་པ་ལམ་བདེན་ལ་འདོམས་པ་ནི། ཤཱ་རི་བུ། བྱང་ཆེན་ཤེར་ཕྱིན་ལ་སྤྱོད་པའི་ཚེ། བདག་ཉིད་སྦྱིན་པ་ལ་བརྩོན་ཞེས་པའམ་མི་བརྩོན་ཞེས་བྱ་བར་ཡང་དག་པར་རྗེས་སུ་མི་མཐོང་ངོ་ཞེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱི་ལམ་བདེན་གྱི་རྣམ་པ་བཞིའི་ནང་ནས། ལམ་ལ་གདམས་པ་ཡིན་ཏེ། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དང་། བྱང་སེམས་བདག་ཉིད་བསྒོམ་བྱ་སྒོམ་བྱེད་དུ་བདེན་པར་མ་གྲུབ་པས་ལྡན་པ་མ་ཡིན།
བཀག་པ་བདེན་པར་མ་གྲུབ་པས་མི་ལྡན་པ་མ་ཡིན་པར་རྟོགས་པར་གྱིས་ཤིག་ཅེས་འདོམས་པའི་ཕྱིར། སྟོང་པ་ཉིད་ལ་སྟོང་ཉིད་ཀྱིས་སྦྱོར་བར་མི་བྱེད་དེ། སྟོང་པ་ཉིད་ཀྱི་རྣལ་འབྱོར་མ་ཡིན་ནོ་ཞེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་ལམ་བདེན་གྱི་རྣམ་པ་བཞིའི་ནང་ནས་རིག་པ་དང་སྒྲུབ་པ་གཉིས་ལ་གདམས་པ་ཡིན་ཏེ། ནང་སྟོང་པ་ཉིད་ལ་སོགས་པ་གསུམ་ཡུལ་དུ་བྱེད་པའི་ཏིང་འཛིན་དང་། ཕྱིའི་ཡུལ་སྟོང་པ་ཉིད་ལ་སོགས་པ་གསུམ་ཡུལ་ཡུལ་ཅན་དུ་བདེན་གྲུབ་བཀག་ཅིང་། དེ་ཉིད་ཀྱང་བདེན་མེད་དུ་འདོམས་པའི་ཕྱིར། གཟུགས་ལ་སོགས་པ་སྔོན་གྱི་མཐའ་སྤྱོད་པར་མི་བྱེད། ཅེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་ལམ་བདེན་གྱི་རྣམ་པ་བཞིའི་ནང་ནས་ངེས་འབྱིན་ལ་གདམས་པ་ཡིན་ཏེ། སྔོན་གྱི་མཐའ་འཁོར་བ་དང་། ཕྱི་མའི་མཐའ་མྱང་འདས་དག་ཕན་ཚུན་གང་ལས་ངེས་པར་འབྱུང་བ་དང་། གང་དུ་ངེས་པར་འབྱུང་བ་དེར་ལྡན་པ་བདེན་མེད་དང་། བདེན་མེད་དེ་ཉིད་ཀྱང་དེར་མ་གྲུབ་པས་མི་ལྡན་པ་མ་ཡིན་པ་ཉིད་དུ་བསྒྲུབ་བོ། །ཞེས་སྟོན་པའི་ཚུལ་གྱིས་བདེན་པ་ལ་འདོམས་པའི་ཕྱིར།
སྐྱབས་གསུམ་གྱི་རྣམ་གཞག་བཤད་པ།
སྐྱབས་གསུམ་གྱི་རྣམ་གཞག་བཤད་པ། གཉིས་པ་སྒྲུབ་པའི་རྟེན་ལ་གདམས་པ་ལ། སྤྱི་དོན་དང་ཡན་ལག་གི་དོན་གཉིས། གཉིས་པ་ལ། སངས་རྒྱས་དཀོན་མཆོག་ལ་སྐྱབས་སྟོན་པ་པོར་གདམས་པ། ཆོས་དཀོན་མཆོག་སྐྱབས་དངོས་སུ་གདམས་པ། དགེ་འདུན་དཀོན་མཆོག་ལ་སྐྱབས་སྒྲུབ་པའི་ཟླ་གྲོགས་སུ་གདམས་པའོ། །དང་པོ་ལ། ཚིག་དོན་དང་། མཐའ་དཔྱད་པ་གཉིས། བྱང་སེམས་ཤེར་ཕྱིན་ལ་སྤྱོད་པའི་ཚེ། གཟུགས་ལ་རྣམ་མཁྱེན་ཉིད་སྦྱོར་བར་མི་བྱེད་དེ། གཟུགས་ཉིད་ཡང་དག་པར་རྗེས་སུ་མི་མཐོང་ངོ་ཞེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་སངས་རྒྱས་དཀོན་མཆོག་ལ་སྐྱབས་སྟོན་པ་
པོར་བདེན་ཞེན་དགག་པའི་ཕྱིར་དུ་གདམས་པ་ཡིན་ཏེ། དམིགས་པར་བྱ་བ་ཡུལ་གཟུགས་སོགས་དང་། དམིགས་པར་བྱེད་པ་ཡུལ་ཅན་ཡེ་ཤེས་གཉིས་བདེན་པས་སྟོང་པར་མཉམ་པ་ཉིད་དུ་ཤེས་པའི་ཡེ་ཤེས་མཐར་ཐུག་དེ་སངས་རྒྱས་དཀོན་མཆོག་གོ་ཞེས་འདོམས་པའི་ཕྱིར། དེར་ཐལ། རྣམ་པ་ཐམས་ཅད་མཁྱེན་པ་ཉིད་དོན་དམ་པར་མི་དམིགས་པ་ལ་གཟུགས་ལ་སོགས་པ་ཡུལ་ཡུལ་ཅན་དང་། མཚན་ཉིད་དང་། མཚོན་བྱ་དང་། དབྱིངས་དང་རིག་པར་དོན་དམ་པའི་མི་སྦྱོར་ཞིང་། སྦྱར་ནས་ཞེན་བྱར་མེད་དོ་ཞེས་འདོམས་པའི་ཕྱིར། ཤེས་བྱ་ཆོས་ཅན། རྣམ་མཁྱེན་ལ་གདམས་པས་སངས་རྒྱས་དཀོན་མཆོག་ལ་གདམས་པར་འགྱུར་ཏེ། རྣམ་མཁྱེན་དེ་རང་ཉིད་མངོན་དུ་བྱས་པའི་གང་ཟག་སངས་རྒྱས་སུ་མཚོན་པར་བྱེད་པའི་ཆོས་ཀྱི་མཚན་ཉིད་ཡིན་པའི་ཕྱིར། ཤེས་བྱ་ཆོས་ཅན། རྣམ་མཁྱེན་དོན་དམ་པར་མི་དམིགས་པ་ཡིན་ཏེ། སངས་རྒྱས་དང་དག་པ་གཉིས་ལྡན་གྱི་བྱང་ཆུབ་དག་བདེན་སྟོང་དུ་མཚན་ཉིད་གཅིག་པ་ཉིད་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །འདུས་མ་བྱས་སོགས་ཡོན་ཏན་བརྒྱད་པོ་གང་རུང་དང་ལྡན་པའི་སྐྱབས་གནས་མཐར་ཐུག་སངས་རྒྱས་དཀོན་མཆོག་གི་མཚན་ཉིད་ཟེར་ན། སངས་རྒྱས་དཀོན་མཆོག་ཡིན་ན། འདུས་མ་བྱས་སོགས་ཡོན་ཏན་བརྒྱད་དང་ལྡན་པས་མ་ཁྱབ་པར་ཐལ། གང་རུང་སྨོས་པ་ལ་དགོས་པ་ཡོད་པའི་ཕྱིར། འདོད་ན། ཁྱབ་པར་ཐལ། གཟུགས་སྐུ་དང་ཡེ་ཤེས་ཆོས་སྐུ་འདུས་མ་བྱས་ཀྱི་ཡོན་ཏན་དང་ལྡན། ངོ་བོ་ཉིད་སྐུ་དེ་མཁྱེན་བརྩེའི་ཡོན་ཏན་དང་ལྡན་པའི་ཕྱིར། དང་པོ་དེར་ཐལ། དེ་གཉིས་སྤངས་པའི་ཡོན་ཏན་དང་
ལྡན་པའི་ཕྱིར། གཉིས་པ་དེར་ཐལ། དེ་ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་དང་ལྡན་པའི་ཕྱིར། དེར་ཐལ། ཟག་པ་མེད་པའི་ཆོས་གང་དག །ཅེས་པའི་གཞུང་འདི་ངོ་བོ་ཉིད་སྐུ་ལ་ལྡན་པའི་ཁྱད་པར་འཆད་པའི་གཞུང་ཡིན་པའི་ཕྱིར། གཞན་ཡང་ངོ་བོ་ཉིད་སྐུ་ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་དང་ལྡན་པར་ཐལ། དེ་དེ་དང་བཅས་པའི་ཕྱིར། དེར་ཐལ། ཟག་པ་མེད་པའི་ཆོས་གང་དག །ཐོབ་གྱུར་ཅེས་གསུངས་པའི་ཕྱིར། ཁ་ཅིག །བསམ་དུ་མེད་པ་སོགས་ཡོན་ཏན་བརྒྱད་དང་ལྡན་པའི་ཐེག་ཆེན་གྱི་རྣམ་བྱང་བདེན་པ་དེ་ཐེག་ཆེན་གྱི་ཆོས་དཀོན་མཆོག་གི་མཚན་ཉིད་ཟེར་ན། དམན་ལམ་སྔོན་དུ་མ་སོང་བའི་ཐེག་ཆེན་སྡུག་བསྔལ་ཆོས་བཟོད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཐེག་ཆེན་འཕགས་པའི་མཁྱེན་པ་ཡིན་པའི་ཕྱིར། རྩ་བར་འདོད་ན། འགོག་བདེན་གྱི་ཡོན་ཏན་དང་ལྡན་པར་ཐལ། འདོད་པའི་ཕྱིར། འདོད་ན། འགོག་བདེན་ཐོབ་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །རིག་གྲོལ་གྱི་ཡོན་ཏན་བརྒྱད་དང་ལྡན་པའི་རྒྱལ་སྲས་འཕགས་པ་དེ། ཐེག་ཆེན་གྱི་དགེ་འདུན་དཀོན་མཆོག་གི་མཚན་ཉིད་ཟེར་ན། སངས་རྒྱས་འཕགས་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཐེག་ཆེན་འཕགས་པ་ཡིན་པའི་ཕྱིར། འདོད་མི་ནུས། བྱས་པ་ལ་ཁོ་ན་རེ། སངས་འཕགས་ཆོས་ཅན། དགེ་འདུན་དཀོན་མཆོག་མ་ཡིན་པར་ཐལ། ཐེག་ཆེན་དགྲ་བཅོམ་པ་ཡིན་པའི་ཕྱིར། ཁྱབ་པ་ཡོད་དེ། འགྲེལ་པ་ལས། དགེ་འདུན་ལ་སངས་རྒྱས་དཀོན་མཆོག་གི་ཁོངས་སུ་གཏོགས་པ་ཉིད་ཀྱིས་དགྲ་བཅོམ་པ་མ་གཏོགས་པ། ཞེས་གསུངས་པའི་ཕྱིར་ན། མ་ཁྱབ་སྟེ། ཐེག་ཆེན་དགྲ་བཅོམ་པ་ཡིན་ན་འདིར་བསྟན་གདམས་ཡུལ་གྱི་དགེ་འདུན་མ་ཡིན་པས་ཁྱབ་པ་ལུང་དེའི་དོན་ཡིན་
པའི་ཕྱིར། འོ་ན། མཐར་ཐུག་གི་དཀོན་མཆོག་གསུམ་མེད་པར་ཐལ། ཐེག་ཆེན་དགྲ་བཅོམ་པ་ཡིན་ན་དགེ་འདུན་དཀོན་མཆོག་མ་ཡིན་དགོས་པའི་ཕྱིར། རྟགས་ཁས། འདོད་ན། རྒྱུད་བླ་མ་ལས། དྲི་བཅས་དེ་བཞིན་ཉིད་དང་དྲི་མ་མེད། །དྲི་མེད་སངས་རྒྱས་ཡོན་ཏན་རྒྱལ་བའི་མཛོད། གང་ལ་དཀོན་མཆོག་དགེ་བ་གསུམ་འབྱུང་བ། །དོན་དམ་གཟིགས་པ་རྣམས་ཀྱི་ཡུལ་ཉིད་དོ། །ཞེས་གསུངས་པ་མི་འཐད་པར་ཐལ། འདོད་པའི་ཕྱིར། གཞན་ཡང་། རྒྱུད་བླ་དར་ཊཱིཀ་ལས། འདིར་དངོས་སུ་བསྟན་པའི་དཀོན་མཆོག་ནི་ས་དང་པོ་ཡན་ཆད་ཀྱི་དབང་དུ་བྱས་ཤིང་། ས་དང་པོ་ནས་བཅུ་པའི་བར་གྱི་དཀོན་མཆོག་ནི། མཐར་ཐུག་གི་དཀོན་མཆོག་གསུམ་སྒྲུབ་པའི་དབང་དུ་བྱས་པས། ཐེག་པ་ཐུན་མོང་བར་ཐལ་པའི་སྐྱོན་མེད་དེ། ཞེས་བཤད་པ་མི་འཐད་པར་ཐལ་ལོ། །ཁ་ཅིག །རིག་གྲོལ་གྱི་ཡོན་ཏན་བརྒྱད་དང་ལྡན་པའི་ཐེག་ཆེན་འཕགས་པ་དེ་ཐེག་ཆེན་གྱི་དགེ་འདུན་དཀོན་མཆོག་གི་མཚན་ཉིད་ཟེར་ན། དམན་ལམ་སྔོན་དུ་མ་སོང་བའི་ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་ལ་གནས་པའི་སེམས་དཔའ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཐེག་ཆེན་འཕགས་པ་ཡིན་པའི་ཕྱིར། འདོད་ན། གྲོལ་བའི་ཡོན་ཏན་དང་ལྡན་པར་ཐལ། འདོད་པའི་ཕྱིར། འདོད་ན། བསྒྲུབས་ཟིན། རོང་ཊཱིཀ་པ་ན་རེ། ལུང་གི་ཆོས་དཀོན་མཆོག་ཆོས་ཅན། མཐར་ཐུག་གི་སྐྱབས་མ་ཡིན་ཏེ། དོན་མངོན་པར་རྟོགས་པ་མཐར་ཐུག་པའི་ཚེ་གཟིངས་ལྟར་སྤང་བྱ་ཡིན་པའི་ཕྱིར། སློབ་པའི་ལམ་བདེན་ཆོས་ཅན། མཐར་ཐུག་གི་སྐྱབས་མ་ཡིན་ཏེ། རྫུན་པ་སླུ་བའི་ཆོས་ཅན་ཡིན་པའི་ཕྱིར། དེའི་འགོག་བདེན་ཆོས་ཅན། མཐར་ཐུག་གི་
སྐྱབས་མ་ཡིན་ཏེ། མེད་དགག་ཡིན་པའི་ཕྱིར། ཟེར་ན། ལུང་གི་ཆོས་དཀོན་མཆོག་ཡིན་ན། མཐར་ཐུག་གི་སྐྱབས་མ་ཡིན་དགོས་པར་ཐལ། དམ་བཅའ་འཐད་པའི་ཕྱིར། འདོད་ན། སངས་རྒྱས་རང་རྒྱུད་ཀྱིས་བསྡུས་པའི་བཀའ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། སངས་རྒྱས་དཀོན་མཆོག་ཡིན་པའི་ཕྱིར། དེར་ཐལ། སངས་རྒྱས་ཡིན་པའི་ཕྱིར། གཟུགས་སྐུ་གཉིས་ཆོས་ཅན། མཐར་ཐུག་གི་སྐྱབས་མ་ཡིན་པར་ཐལ། རྫུན་པ་སླུ་བའི་ཆོས་ཅན་ཡིན་པའི་ཕྱིར་ཏེ། འདུས་བྱས་ཡིན་པའི་ཕྱིར། འདོད་མི་ནུས། ངོ་བོ་ཉིད་སྐུ་ཆོས་ཅན། མཐར་ཐུག་གི་སྐྱབས་མ་ཡིན་པར་ཐལ། མེད་དགག་ཡིན་པའི་ཕྱིར། ཁ་ཅིག །ཆོས་དཀོན་མཆོག་ལ་ཀུན་རྫོབ་པའི་ཆོས་དཀོན་མཆོག་དང་། དོན་དམ་པའི་ཆོས་དཀོན་མཆོག་གཉིས་སུ་ཡོད་ཟེར་ན། ཀུན་རྫོབ་པའི་ཆོས་དཀོན་མཆོག་ཡིན་ན་ཆོས་དཀོན་མཆོག་ཡིན་དགོས་པར་ཐལ། འདོད་པའི་ཕྱིར། འདོད་ན། གསུང་རབ་ཡན་ལག་བཅུ་གཉིས་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། འགོག་ལམ་གང་རུང་གིས་བསྡུས་པར་ཐལ། འདོད་པའི་ཕྱིར། བྱས་པ་ལ་ཁོ་ན་རེ། ཀུན་རྫོབ་པའི་ཆོས་དཀོན་མཆོག་ཡིན་ན་ཆོས་དཀོན་མཆོག་ཡིན་དགོས་པར་ཐལ། ཀུན་རྫོབ་པའི་སངས་རྒྱས་དཀོན་མཆོག་ཡིན་ན་སངས་རྒྱས་དཀོན་མཆོག་ཡིན་དགོས་པའི་ཕྱིར་ན་མ་ཁྱབ། ཁ་ཅིག །དོན་དམ་པའི་དགེ་འདུན་དཀོན་མཆོག་དང་། ཀུན་རྫོབ་པའི་དགེ་འདུན་དཀོན་མཆོག་འགལ་ཟེར་ན། བྱང་སེམས་མཐོང་ལམ་པའི་རྒྱུད་ཀྱི་ཡིད་ཀྱི་རྣམ་པར་ཤེས་པ་ཆོས་ཅན། ཀུན་རྫོབ་པའི་དགེ་འདུན་དཀོན་མཆོག་མ་ཡིན་པར་ཐལ། དོན་དམ་པའི་དགེ་འདུན་དཀོན་མཆོག་ཡིན་པའི་ཕྱིར། དེར་ཐལ། ལམ་བདེན་པའི་ཕྱིར། དེར་ཐལ། འཕགས་རྒྱུད་ཀྱི་མཁྱེན་པ་ཡིན་པའི་ཕྱིར། རྩ་བར་འདོད་མི་ནུས་ཏེ། འཕགས་པ་ཡིན་པའི་ཕྱིར། ཡང་ཁ་ཅིག་
རྒྱུད་བླའི་སྤང་ཕྱིར་སླུ་བའི་ཆོས་ཅན་ཕྱིར། །ཞེས་སོགས་ཀྱི་དོན་ལ། གཞུང་འདིས་གནས་སྐབས་དང་མཐར་ཐུག་གི་སྐྱབས་ཀྱི་ཁྱད་པར་སྟོན་པ་ཡིན་གྱི། ཀུན་རྫོབ་པ་དང་དོན་དམ་པའི་སྐྱབས་ཀྱི་ཁྱད་པར་མི་སྟོན་པས། གཟུགས་སྐུ་གཉིས་ཀུན་རྫོབ་པའི་སྐྱབས་དང་། ཐེག་ཆེན་གྱི་མཐོང་ལམ་བར་ཆད་མེད་ལམ་ཅིག་ཤོས་ཡིན་ཟེར་ན། གཟུགས་སྐུ་གཉིས་ཆོས་ཅན། དངོས་པོའི་གནས་ཚོད་ལ་ལམ་གྱི་བགྲོད་པ་མཐར་མ་ཐུག་པའི་སྐྱབས་ཡིན་པར་ཐལ། ཀུན་རྫོབ་པའི་སྐྱབས་ཡིན་པའི་ཕྱིར། རྟགས་ཁས། འདོད་མི་ནུས། ཐེག་ཆེན་གྱི་མཐོང་ལམ་ཆོས་ཅན། དངོས་པོའི་གནས་ཚོད་ལ་ལམ་གྱི་བགྲོད་པ་མཐར་ཐུག་པའི་སྐྱབས་ཡིན་པར་ཐལ། རྟགས་དེའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། བྱས་པ་ལ་ཁོ་ན་རེ། གཟུགས་སྐུ་གཉིས་ཆོས་ཅན། ཀུན་རྫོབ་པའི་སྐྱབས་ཡིན་པར་ཐལ། ཀུན་རྫོབ་པའི་སངས་རྒྱས་དཀོན་མཆོག་ཡིན་པའི་ཕྱིར་དང་། ཐེག་ཆེན་གྱི་མཐོང་ལམ་ཆོས་ཅན། དོན་དམ་པའི་སྐྱབས་ཡིན་པར་ཐལ། དོན་དམ་པའི་ཆོས་དཀོན་མཆོག་ཡིན་པའི་ཕྱིར་ན་མ་ཁྱབ། འོ་ན། ཐེག་ཆེན་མཐོང་ལམ་པ་ཆོས་ཅན། ཀུན་རྫོབ་པའི་སྐྱབས་མ་ཡིན་པར་ཐལ། དོན་དམ་པའི་སྐྱབས་ཡིན་པའི་ཕྱིར། མ་གྲུབ་ན་སོང་། དེར་ཐལ། དོན་དམ་པའི་བྱང་ཆུབ་སེམས་དཔའ་ཡིན་པའི་ཕྱིར། མ་ཁྱབ་ན། ཁོ་རང་གི་ཁྱབ་པ་གཉིས་པ་ཡོད་པ་བུད། རྩ་བར་འདོད་ན། ཀུན་རྫོབ་པའི་སྐྱབས་ཡིན་པར་ཐལ། ཀུན་རྫོབ་པའི་དགེ་འདུན་དཀོན་མཆོག་ཡིན་པའི་ཕྱིར། མ་ཁྱབ་ན། ཁྱབ་པ་སྔ་མ་ལ་ཡང་སྔར་བཞིན་ནོ། །ཁ་ཅིག །འདུས་བྱས་ཡིན་ན་སླུ་བ་ཡིན་པས་མ་ཁྱབ་ཟེར་ན། རྩ་ཤེ་ལས། འདུས་བྱས་ཐམས་ཅད་སླུ་བའི་ཆོས། །ཞེས་གསུངས་པ་མི་འཐད་པར་ཐལ། འདོད་པའི་ཕྱིར། ཁོ་ན་
རེ། ལས་རྒྱུ་འབྲས་ཆོས་ཅན། སླུ་བའི་ཆོས་ཅན་ཡིན་པར་ཐལ། འདུས་བྱས་ཡིན་པའི་ཕྱིར། འདོད་ན། སླུ་བ་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། མི་སླུ་བ་ཡིན་པའི་ཕྱིར། མི་སླུ་བའི་ཕྱིར་ན་མ་ཁྱབ། འོ་ན། རི་བོང་རྭ་ཆོས་ཅན། མ་འོངས་པ་ཡིན་པར་ཐལ། མ་འོངས་པའི་ཕྱིར། ཁྱབ་པ་འགྲིག །མ་གྲུབ་ན། ཡོད་པར་ཐལ། འོངས་པའི་ཕྱིར། རྟགས་ཁས། གཞན་ཡང་། སངས་རྒྱས་ཀྱི་བཀའ་ཆོས་ཅན། བདེན་པ་ཡིན་པར་ཐལ། བདེན་པའི་ཕྱིར། མ་གྲུབ་ན། དེར་ཐལ། རྒྱུ་དགེ་བ་སྤྱད་པ་ལས་འབྲས་བུ་བདེ་བ་འབྱུང་བའི་ཕྱིར། རྩ་བར་འདོད་མི་ནུས་ཏེ། རྫུན་པ་ཡིན་པའི་ཕྱིར། ཁ་ཅིག །ཚད་མ་ཆོས་ཅན། མི་སླུ་བ་ཡིན་པར་ཐལ། མི་སླུ་བའི་རིག་པ་ཡིན་པའི་ཕྱིར། ཟེར་ན། བཀའ་བརྒྱད་སྟོང་པ་ཆོས་ཅན། ངེས་དོན་ཡིན་པར་ཐལ། ངེས་དོན་གྱི་མདོ་ཡིན་པའི་ཕྱིར། ཁྱབ་པ་འགྲིག །ཁ་ཅིག །བྱང་སེམས་རྒྱུན་མཐའ་བའི་རྒྱུད་ལ་འབྱུང་རུང་གི་རྣམ་མཁྱེན་དེ་དེའི་འབྲས་སྐྱབས་ཡིན་ཟེར་ན། འདི་ལ་ཁ་ཅིག་གིས། དེའི་རྒྱུད་ལ་འབྱུང་རུང་གི་རྣམ་མཁྱེན་ཆོས་ཅན། ཁྱོད་བྱང་སེམས་རྒྱུན་མཐའ་བའི་དུས་ན་མེད་པར་ཐལ། ཁྱོད་དེའི་འབྲས་སྐྱབས་ཡིན་པའི་ཕྱིར། འདོད་ན། དེ་ལས་སྐྱེ་བཞིན་པའི་རྣམ་མཁྱེན་དེ་དེའི་དུས་ན་མེད་པར་ཐལ། འདོད་པའི་ཕྱིར། འདོད་ན། ས་བོན་ལས་སྐྱེ་བཞིན་པའི་མྱུ་གུ་དེ་ས་བོན་གྱི་དུས་ན་མེད་པར་ཐལ། འདོད་པའི་ཕྱིར། འདོད་མི་ནུས་ཏེ། ས་བོན་ལས་སྐྱེ་བཞིན་པའི་མྱུ་གུ་ཡོད། དེ་མྱུ་གུའི་དུས་ན་མེད་པའི་ཕྱིར། དང་པོ་དེར་ཐལ། མྱུ་གུ་སྐྱེ་བཞིན་པ་དང་ས་བོན་འགག་བཞིན་པ་དུས་མཉམ་པའི་ཕྱིར། རྩ་རྟགས་གཉིས་པ་དེར་ཐལ། མྱུ་གུ་དེ་རང་དུས་སུ་ས་བོན་ལས་སྐྱེ་བཞིན་པ་མ་ཡིན་པའི་ཕྱིར། དེར་ཐལ། དེ་རང་དུས་སུ་དེ་ལས་རྫོགས་པར་གྲུབ་ཟིན་པའི་ཕྱིར། ཞེས་ཟེར་ན། ས་བོན་ལས་
སྐྱེ་བཞིན་པའི་མྱུ་གུ་དེ། ས་བོན་ལས་སྐྱེ་བཞིན་པ་ཡིན་པར་ཐལ། དེ་ཡོད་པའི་ཕྱིར། རྟགས་ཁས། འདོད་ན། དེ་ཆོས་ཅན། དེ་ལས་སྐྱེ་བཞིན་པ་མ་ཡིན་པར་ཐལ། དེ་ལས་སྐྱེས་ཟིན་པའི་ཕྱིར། མ་ཁྱབ་ན། ས་བོན་གྱི་འབྲས་བུ་ཡིན་ན། ས་བོན་ལས་སྐྱེ་བཞིན་པ་ཡིན་དགོས་པར་ཐལ། མ་ཁྱབ་པའི་ཕྱིར། འདོད་ན། ཆོས་དེའི་འབྲས་བུ་ཡིན་ན་ཆོས་དེ་ལས་སྐྱེ་བཞིན་པ་ཡིན་དགོས་པར་ཐལ། འདོད་པའི་ཕྱིར། འདོད་ན། དུ་བ་ཆོས་ཅན། བུད་ཤིང་ལས་སྐྱེ་བཞིན་པ་ཡིན་པར་ཐལ། དེའི་འབྲས་བུ་ཡིན་པའི་ཕྱིར། ཁྱབ་པ་ཁས། འདོད་ན། བུད་ཤིང་གི་དུས་སུ་མེ་འགག་བཞིན་པ་ཡིན་པར་ཐལ། འདོད་པ་གང་ཞིག །མེ་འགག་བཞིན་པ་དང་དུས་བ་སྐྱེ་བཞིན་པ་དུས་མཉམ་པའི་ཕྱིར། ཁ་ཅིག །བྱང་སེམས་ཚོགས་ལམ་པ་དང་རྒྱུད་ཐ་དད་དུ་གྱུར་པའི་སངས་འཕགས་དེའི་རྒྱུ་སྐྱབས་ཡིན་ཟེར་ན། དེ་ཆོས་ཅན། ཡོད་པར་ཐལ། རྒྱུ་སྐྱབས་ཡིན་པའི་ཕྱིར། འདོད་ན། མེད་པར་ཐལ། སངས་འཕགས་དང་རྒྱུད་ཐ་དད་དུ་གྱུར་པའི་བྱང་སེམས་མེད་པའི་ཕྱིར། དེར་ཐལ། དེ་ཡིན་ན། སངས་འཕགས་དེ་རང་ཉིད་དང་རྒྱུད་གཅིག་ཡིན་དགོས་པའི་ཕྱིར། དེར་ཐལ། དེ་ཡིན་ན་དེ་རང་ཉིད་ཀྱི་ཐོབ་བྱ་མཐར་ཐུག་ཡིན་དགོས་པའི་ཕྱིར། བྱས་པ་ལ་ཁོ་ན་རེ། སེམས་ཅན་ཡིན་ན་སངས་འཕགས་དང་རྒྱུད་གཅིག་ཡིན་དགོས་པར་ཐལ། བྱང་ཆུབ་སེམས་དཔའ་ལ་དེའི་ཕྱིར། འདོད་ན། སངས་ས་འཕགས་ཆོས་ཅན། ཁྱོད་ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་སངས་འཕགས་ཡིན་པར་ཐལ། ཁྱོད་དེ་དང་རྒྱུད་གཅིག་པའི་སངས་རྒྱས་འཕགས་པ་ཡིན་པའི་ཕྱིར་ན་མ་ཁྱབ། འོ་ན། རི་དྭགས་རུ་རུ་ཆོས་ཅན། ཁྱོད་སྟོན་པ་ཤཱཀྱ་ཐུབ་པའི་གོ་འཕང་མངོན་དུ་བྱེད་ངེས་ཀྱི་གང་ཟག་ཡིན་པར་ཐལ། ཁྱོད་དེ་དང་རྒྱུད་གཅིག་ཏུ་གྱུར་པའི་སེམས་ཅན་ཡིན་པའི་ཕྱིར། ཁྱབ་པ་འགྲིག །མ་གྲུབ་ན་
དེར་ཐལ། ཁྱོད་སེམས་ཅན་གང་ཞིག །སྟོན་པ་ཤཱཀྱ་ཐུབ་པ་དེ་ཁྱོད་དང་རྒྱུད་གཅིག་ཡིན་པའི་ཕྱིར། དེར་ཐལ། རི་དྭགས་རུ་རུའི་སྐྱེ་བ་ལེན་མྱོང་བའི་ཕྱིར། རྩ་བར་འདོད་མི་ནུས་ཏེ། སེམས་ཅན་ཡིན་ན་ཤཱཀྱཱ་ཐུབ་པའི་གོ་འཕང་མངོན་དུ་བྱེད་ངེས་ཡིན་མི་དགོས་པའི་ཕྱིར་། ཁ་ཅིག །རྒྱུ་སྐྱབས་དང་འབྲས་སྐྱབས་འགལ་ཟེར་ན། སྟོན་པ་ཤཱཀྱ་ཐུབ་པ་ཆོས་ཅན། རྒྱུ་སྐྱབས་མ་ཡིན་པར་ཐལ། འབྲས་སྐྱབས་ཡིན་པའི་ཕྱིར། དེར་ཐལ། རྒྱལ་པོ་ང་ལས་ནུའི་འབྲས་སྐྱབས་ཡིན་པའི་ཕྱིར། དེའི་ཐོབ་བྱ་མཐར་ཐུག་ཡིན་པའི་ཕྱིར། རྩ་བར་འདོད་མི་ནུས་ཏེ། སངས་འཕགས་ཡིན་པའི་ཕྱིར། ཁ་ཅིག །གང་ཟག་དེའི་འབྲས་སྐྱབས་ཡིན་ན། གང་ཟག་དེའི་འབྲས་བུ་ཡིན་པས་ཁྱབ་ཟེར་ན། བྱང་སེམས་ཚོགས་ལམ་པའི་ཐོབ་བྱར་གྱུར་པའི་ངོ་བོ་ཉིད་སྐུ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། དངོས་མེད་ཡིན་པའི་ཕྱིར། ཁ་ཅིག །རྒྱལ་པོ་ང་ལས་ནུ་ཆོས་ཅན། ཁྱོད་ཀྱི་འབྲས་སྐྱབས་མེད་པར་ཐལ། ཁྱོད་སངས་རྒྱས་ཡིན་པའི་ཕྱིར། དེར་ཐལ། སྟོན་པ་ཤཱཀྱ་ཐུབ་པར་སངས་རྒྱས་ཟིན་པའི་ཕྱིར། དེར་ཐལ། ཁྱོད་ད་ལྟར་གྱི་དུས་སུ་སྟོན་པ་ཤཱཀྱ་ཐུབ་པར་སངས་རྒྱས་ཟིན་པའི་ཕྱིར་ན་མ་ཁྱབ། ཁ་ཅིག །མདུན་གྱི་སྐྱེས་བུ་ལན་འདེབས་པ་པོ་སངས་རྒྱས་པའི་སངས་རྒྱས་ཀྱི་ཞིང་དེ་ད་ལྟ་ཡོད་པར་ཐལ། དེ་སངས་རྒྱས་པའི་སངས་རྒྱས་ད་ལྟ་ཡོད་པའི་ཕྱིར། དེར་ཐལ། དེ་དང་རྒྱུད་གཅིག་ཏུ་གྱུར་པའི་སངས་རྒྱས་ད་ལྟ་ཡོད་པའི་ཕྱིར་ན་མ་ཁྱབ། འདོད་ན། དེ་གྲུབ་ཟིན་པར་ཐལ། འདོད་པའི་ཕྱིར། འདོད་ན། མདུན་གྱི་སྐྱེས་བུ་ལན་འདེབས་པ་པོ་སངས་རྒྱས་ཟིན་པར་ཐལ་ལོ། །གཉིས་པ་རང་ལུགས་ནི། དོན་གཉིས་མཐར་ཕྱིན་པའི་སྐྱབས་གནས་དེ་སངས་རྒྱས་དཀོན་མཆོག་གི་མཚན་ཉིད། དེ་ལ་དབྱེ་ན། དོན་དམ་པའི་སངས་རྒྱས་དཀོན་མཆོག་དང་། ཀུན་རྫོབ་པའི་སངས་རྒྱས་དཀོན་
མཆོག་གཉིས། ངོ་བོ་ཉིད་སྐུ་དང་། ཡེ་ཤེས་ཆོས་སྐུ་ལྟ་བུ་དང་པོའི་མཚན་གཞི། གཟུགས་སྐུ་གཉིས་ལྟ་བུ་གཉིས་པའི་མཚན་གཞི། བསམ་དུ་མེད་པ་སོགས་ཡོན་ཏན་བརྒྱད་པོ་ཅི་རིགས་དང་ལྡན་པའི་འཕགས་རྒྱུད་ཀྱི་རྣམ་བྱང་བདེན་པ་ཆོས་དཀོན་མཆོག་གི་མཚན་ཉིད། དེ་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན། དོན་དམ་པའི་ཆོས་དཀོན་མཆོག་དང་། ཀུན་རྫོབ་པའི་ཆོས་དཀོན་མཆོག་གཉིས། འགོག་ལམ་ལྟ་བུ་དང་པོའི་མཚན་གཞི། གསུང་རབ་ཡན་ལག་བཅུ་གཉིས་ལྟ་བུ་གཉིས་པའི་མཚན་གཞི། རིག་གྲོལ་གྱི་ཡོན་ཏན་བརྒྱད་པོ་ཅི་རིགས་དང་ལྡན་པའི་འཕགས་པ་དེ། དགེ་འདུན་དཀོན་མཆོག་གི་མཚན་ཉིད། དེ་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན། དོན་དམ་པའི་འདུན་དཀོན་མཆོག་དང་། ཀུན་རྫོབ་དགེ་འདུན་དཀོན་མཆོག་གཉིས། བྱང་སེམས་མཐོང་ལམ་པའི་རྒྱུད་ཀྱི་འགོག་བདེན་ལྟ་བུ་དང་པོའི་མཚན་གཞི་དང་། འཕགས་པའི་གང་ཟག་དེ་གཉིས་པའི་མཚན་གཞི། དངོས་པོའི་གནས་ཚོད་ལ་ལམ་གྱི་བགྲོད་པ་མཐར་ཐུག་པའི་སྐྱབས་དེ་དོན་དམ་པའི་སྐྱབས་ཀྱི་མཚན་ཉིད། སྔར་བཞིན་ལ་མཐར་མ་ཐུག་པ་ཞེས་བསྒྱུར་ནས། ཀུན་རྫོབ་པའི་སྐྱབས་ཀྱི་དོན་དུ་འཇོག །གང་ཟག་གཞན་རྒྱུད་ལ་གྲུབ་ཟིན་པའི་དཀོན་མཆོག་གསུམ་ལྟ་བུ་བྱང་སེམས་ཚོགས་ལམ་པའི་རྒྱུ་སྐྱབས་དང་། དེའི་ཐོབ་བྱ་མཐར་ཐུག་ཏུ་གྱུར་པའི་དཀོན་མཆོག་གསུམ་ལྟ་བུ་དེའི་འབྲས་སྐྱབས་སུ་འཇོག་གོ ། གསུམ་པ་རྩོད་པ་སྤོང་བ་ལ། སངས་འཕགས་དང་བྱང་སེམསས་མཐོང་ལམ་པ་གཉིས་ཀ་ཆོས་ཅན། ཀུན་རྫོབ་པའི་སྐྱབས་ཡིན་པར་ཐལ། མཚན་ཉིད་དེའི་ཕྱིར། དེར་ཐལ། དེ་གང་རུང་གང་ཞིག །ཅིག་ཤོས་མ་ཡིན་པའི་ཕྱིར། དང་པོ་དེར་ཐལ། སྐྱབས་ཡིན་པའི་ཕྱིར་ན་མ་ཁྱབ། ཕྱི་མ་མ་གྲུབ་ན། བྱང་སེམས་མཐོང་
ལམ་པ་དེ་དེ་ཡིན་པར་ཐལ། དེ་གཉིས་ཀ་དེ་ཡིན་པའི་ཕྱིར་ཟེར་ན། ཕྱིར་མི་འོང་ཆོས་ཅན། འདོད་པར་ཚེ་ཡོངས་སུ་གྱུར་པའི་དེ་དང་། འདོད་པར་ཚེ་ཡོངས་སུ་མ་གྱུར་པའི་དེ་གང་རུང་ཡིན་པར་ཐལ། ཆོས་ཅན་དེ་ཡིན་པའི་ཕྱིར། ཁྱབ་པ་ཁས། དེ་ཆོས་ཅན། ལུས་མངོན་བྱེད་ཀྱི་ཕྱིར་མི་འོང་དང་། ལུས་མངོན་བྱེད་མ་ཡིན་པའི་ཕྱིར་མི་འོང་གང་རུང་ཡིན་པར་ཐལ། ཕྱིར་མི་འོང་ཡིན་པའི་ཕྱིར། ཁྱབ་པ་འགྲིག །ཁ་ཅིག །རང་བཞིན་རྣམ་དག་གི་ཆར་གྱུར་པའི་ངོ་བོ་ཉིད་སྐུ་ཆོས་ཅན། མཚན་ཉིད་དེར་ཐལ། ཆོས་དཀོན་མཆོག་ཡིན་པའི་ཕྱིར། འདོད་མི་ནུས་ཏེ། དོན་དམ་བདེན་པ་ཡིན་པའི་ཕྱིར། ཟེར་ན་མ་ཁྱབ། ཡང་ཁ་ཅིག །ངོ་བོ་ཉིད་སྐུ་ཆོས་ཅན། སེམས་དང་ལྡན་པར་ཐལ། ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་དང་ལྡན་པའི་ཕྱིར། འདོད་ན། སེམས་ལྡན་ཡིན་པར་ཐལ། འདོད་པའི་ཕྱིར་ན་མ་ཁྱབ། འོ་ན། སྟོང་ཉིད་རྟོགས་པའི་རྣམ་མཁྱེན་ཆོས་ཅན། གཞི་ཤེས་ཡིན་པར་ཐལ། གཞི་ཤེས་པའི་ཕྱིར། ཁྱབ་པ་ཁས། སྨྲས་པ། འཇིགས་རུང་འཁོར་བའི་ཆུ་གཏེར་རྦ་ཀློང་དབུས། །སྒྲིབ་གཉིས་རལ་གྲིའི་སོ་ཅན་རྒྱུ་བའི་མཚོར། །ཕུལ་བྱུང་མཐར་ཐུག་སྐྱབས་ཀྱི་གྲུ་རྫིངས་ལས། །ཀུན་མཁྱེན་གླིང་དུ་བགྲོད་ཐབས་འདི་རྨད་བྱུང་། །འཕགས་ཡུལ་མཁས་མང་ལེགས་བཤད་དབང་པོའི་གཞུ། །གླེགས་བུའི་ཀུན་གསལ་ངོས་སུ་ཤར་བའི་གཟུགས། །རྣམ་དཔྱོད་ལང་ཚོ་མ་རྒྱས་བྱིས་པ་དག །ཆེན་པོར་རློམ་ཡང་བརྗོད་པའི་ཡུལ་ལས་འདས། །ཐོས་བྲལ་འཇིག་རྟེན་དྲེགས་པའི་ཅོད་པན་དང་། །དུད་འགྲོའི་ལུས་རྟེན་སྒྲུབ་པའི་སྒོམ་ཆེན་པ། །རྫུན་ཟོག་གཞན་སྣང་འཁྲུལ་བྱེད་དམ་པ་རྣམས། །གཞུང་ལུགས་འདི་འདྲ་མཐོང་ཚེ་ངོ་འཛུམ་གནག །ཟང་ཟིང་གིས་འཕོངས་ཐོས་པའི་བང་མཛོད་ཅན། །ཚུལ་འཆོས་གོས་བྲལ་ལེགས་བཤད་རྒྱན་གྱིས་སྤྲས། །གཅམ་བུའི་གཏམ་སྤངས་ལུང་རིགས་
སྨྲ་བ་ཅན། །བློ་ལྡན་དེ་འདྲ་ཚུལ་འདིར་ཁོང་འཛུམ་འཆོར། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་ཆོས་དཀོན་མཆོག་ལ་གདམས་ཚུལ་ནི། གཟུགས་དངོས་པོ་ཡོད་ཅེས་བྱ་བར་མི་སྤྱོད། དངོས་པོ་མེད་ཅེས་བྱ་བར་མི་སྤྱོད་ཅེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་ཆོས་དཀོན་མཆོག་ལ་བདེན་ཞེན་དགག་པའི་ཕྱིར་དུ་གདམས་པ་ཡིན་ཏེ། ཁྱོད་ཀྱིས་ཐམས་ཅད་མཁྱེན་པ་ཉིད་གསུམ་གྱི་ཡུལ་དུ་བསྡུས་པའི་གཞི་དང་གཉེན་པོ་དང་རྣམ་པའི་གསལ་བའི་དབྱེ་བ་མཐའ་དག་བསྡུས་པ་དག་གིས་བསྡུས་ཤིང་བསྡོམས་པའི་ཆོས་ཐམས་ཅད་དོན་དམ་པར་ངོ་བོ་ཉིད་མེད་དོ་ཞེས་འདོམས་པའི་ཕྱིར། གསུམ་པ་དགེ་འདུན་དཀོན་མཆོག་ལ་གདམས་ཚུལ་ནི། བྱང་ཆུབ་སེམས་དཔའ་འཕགས་པ་སློབ་པ་ཕྱིར་མི་ལྡོག་པ་རྣམས་ལ་དོན་དམ་པར་སྐྱེ་བ་མེད་པ་ཉིད་དུ་འཇུག་པར་བྱའོ། །ཞེས་ལུང་འབོག་པའི་ཡུམ་བར་མའི་མདོ་ཆོས་ཅན། ཁྱོད་ཀྱིས་དགེ་འདུན་མཆོག་ལ་འདོམས་པ་ཡིན་ཏེ། ཁྱོད་ཀྱིས་དགེ་འདུན་དཀོན་མཆོག་ལ་ལམ་སྒྲུབ་པའི་གྲོགས་སུ་བདེན་ཞེན་དགག་པའི་ཕྱིར་དུ་འདོམས་པའི་ཕྱིར། འབྲས་བུ་ལ་གནས་པ་གསུམ་དང་ཞུགས་པ་བཞིའི་བྱེ་བྲག་གིས་ཏེ། ཁྱད་པར་གྱིས་སྐྱེས་བུ་ཆེན་པོ་བདུན་པོ། རང་སངས་རྒྱས་འཕགས་པ་དང་ལྷན་ཅིག་བརྒྱད་པོའི་མིང་ཅན་གྱི་བྱང་འཕགས་ཆོས་ཅན། ཁྱོད་ལ་དུ་མར་དབྱེ་རུང་སྟེ། རྒྱུན་ཞུགས་ཞུགས་པ་དབང་པོ་རྟུལ་པོ་ལ་སོགས་པ་ནས་རང་རྒྱལ་གྱི་མིང་ཅན་གྱི་བྱེ་བྲག་གིས་ཏེ་ཁྱད་པར་གྱིས་གྲངས་ཉི་ཤུར་འཆད་པའི་ཕྱིར། ཐེག་པ་ཆེན་པོའི་དགྲ་བཅོམ་པ་ཆོས་ཅན། ཁྱོད་སྐབས་འདིར་དངོས་སུ་བསྟན་པའི་དགེ་འདུན་དཀོན་མཆོག་གི་ནང་དུ་མ་གཏོགས་པ་ཡིན་ཏེ། ཁྱོད་འདིར་དངོས་སུ་བསྟན་པའི་
སངས་རྒྱས་དཀོན་མཆོག་གི་ཁོངས་སུ་གཏོགས་པ་ཉིད་ཀྱི་ཕྱིར། གསུམ་པ་སྒྲུབ་པའི་ཁྱད་པར་གྱི་ཆོས་ལ་གདམས་པ་ལ་གསུམ། མི་མཐུན་ཕྱོགས་མངོན་གྱུར་སེལ་བ་ལ་གདམས་པ། ལམ་ཁྱད་པར་ཅན་སྒྲུབ་པ་ལ་གདམས་པ། སྤང་བྱའི་ས་བོན་སེལ་བ་ལ་གདམས་པའོ། །དང་པོ་ལ་གསུམ་ལས། སྒྲུབ་པ་མི་ཉམས་པའི་རྒྱུ་ལ་གདམས་པ་ནི། བྱང་ཆེན་ཤེར་ཕྱིན་ལ་སྤྱོད་པ་ནི་ཞེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་སྒོ་གསུམ་གྱི་བྱ་བ་ངན་པ་ལ་མ་ཞེན་པའི་བརྩོན་འགྲུས་བརྩམ་པ་ལ་འདོམས་པ་ཡིན་ཏེ། ལུས་དང་ལ་སོགས་པས་ངག་ཡིད་དོན་དམ་པར་ངོ་བོ་ཉིད་མེད་པར་རྟོགས་པར་གྱིས་ཤིག་ཅེས་བསྟན་པའི་སྒོ་ནས་འདོམས་པ་ཡིན་པའི་ཕྱིར། དེ་ལྟར་གདམས་རིགས་ཏེ། སྟོང་ཉིད་ཀྱི་དོན་ལ་གོམས་པར་མ་བྱས་ན། བརྩོན་འགྲུས་བརྩམས་པ་ཉིད་ཀྱིས་སྔར་སེམས་བསྐྱེད་ཀྱི་སྐབས་སུ་ཇི་སྐད་བཤད་པའི་དོན་ལ་སྒྲུབ་པ་ནན་ཏན་བྱེད་པ་ལ་དབང་རྟུལ་ལ་མངོན་པར་ཞེན་པར་འགྱུར་བས་དེ་སྤང་དགོས་པའི་ཕྱིར། ཤེས་བྱ་ཆོས་ཅན། རྒྱུ་དེ་སྤོང་ཚུལ་ཡོད་དེ། བྱ་བ་ཕལ་པ་ལ་ཆགས་པའི་ལུས་ལ་སོགས་པའི་འདོད་པ་བསོད་ནམས་ཉིད་ཀྱིས་སྐྱེ་བར་འགྱུར་བ་ཡིན་པའི་ཕྱིར། གཉིས་པ་སྒྲུབ་པ་འཕེལ་བའི་རྒྱུ་ལ་གདམས་པ་ནི། བྱང་ཆེན་ཕར་ཕྱིན་དྲུག་ལ་སྤྱོད་པའི་ཚེ་གཟུགས་སུ་མི་རློམ། ཚོར་བར་མི་རློམ་ཞེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་སྒྲུབ་པ་བྱེད་པའི་ཚེ་ཡོངས་སུ་ངལ་པ་མེད་པའི་བརྩོན་འགྲུས་ལ་འདོམས་པ་ཡིན་ཏེ། ཁྱོད་གཟུགས་ལ་སོགས་པ་ནས་ཡང་དག་པར་རྫོགས་པའི་བྱང་ཆུབ་ཀྱི་བར་ལ་བདེན་པར་རློམ་པ་མེད་པ་ཉིད་དུ་རྟོགས་པར་གྱིས་ཤིག་ཅེས་བསྟན་པའི་གདམས་ངག་ཡིན་པའི་ཕྱིར། དེ་ལྟར་གདམས་རིགས་
ཏེ། སྒྲུབ་པ་ལ་དུས་ཡུན་རིང་མོ་ཞིག་ཏུ་གོམས་པར་བྱས་ཀྱང་། ཇི་ལྟར་འཚམ་པའི་འདོད་པའི་དོན་མ་གྲུབ་ན་དད་པའི་རང་བཞིན་ཅན་གྱི་དབང་རྟུལ་ལ་ལ་ཡོངས་སུ་སྐྱོ་བར་འགྱུར་བས་དེ་སེལ་དགོས་པའི་ཕྱིར། གསུམ་པ་ཐེག་དམན་དུ་མི་ལྟུང་བའི་རྒྱུ་ལ་གདམས་པ་ནི། ཤཱ་རིི་བུ། བྱང་ཆེན་ཡེ་ཤེས་དེ་ལྟ་བུ་དང་ལྡན་པས། ཤར་ཕྱོགས་ཀྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཅེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་ཐེག་པ་ཆེན་པོར་ལམ་ཡོངས་སུ་གཟུང་བའི་བརྩོན་འགྲུས་ལ་གདམས་པ་ཡིན་ཏེ། ཁྱོད་ཆོས་རྣམས་དོན་དམ་པར་རང་བཞིན་གྱིས་མ་སྐྱེས་པ་ཉིད་དུ་སློབ་པའི་གདམས་ངག་ཡིན་པའི་ཕྱིར། དེ་ལྟར་གདམས་རིགས་ཏེ། ཕྱོགས་བཅུ་ན་བཞུགས་པའི་སངས་རྒྱས་ལ་སོགས་པ་ལས། དོན་རེ་རེའི་ཕྱིར་དུ་ལམ་གྱི་ལུང་ནོད་པར་བྱ་དགོས་ན། དེ་འདྲ་ག་ལ་ནུས་སྙམ་དུ་སེམས་ཞུམ་པར་འགྱུར་བས་དེ་སེལ་དགོས་པའི་ཕྱིར། །
སྤྱན་ལྔ་བཤད་པ།
སྤྱན་ལྔ་བཤད་པ། གཉིས་པ་ལམ་ཁྱད་པར་ཅན་སྒྲུབ་པར་གདམས་པ་ལ་གཉིས། སྒྲུབ་པ་ལ་རང་དབང་དུ་འཇུག་པའི་རྒྱུ་སྤྱན་ལྔ་ལ་གདམས་པ། སྒྲུབ་པ་མྱུར་དུ་རྫོགས་པའི་རྒྱུ་མངོན་ཤེས་དྲུག་ལ་གདམས་པའོ། དང་པོ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཤའི་མིག་གིས་དཔག་ཚད་བརྒྱ་མཐོང་བ་ཡོད་དོ་ཞེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་སྒྲུབ་པ་ལ་རང་དབང་དུ་འཇུག་པའི་རྒྱུ་སྤྱན་ལྔ་ལ་འདོམས་པ་ཡིན་ཏེ། ཁྱོད་ཀྱིས་སྤྱན་ལྔའི་ཡུལ་ཡུལ་ཅན་རྣམས་དེ་བཞིན་ཉིད་དུ་རོ་གཅིག་པ་ཉིད་དུ་གྲུབ་བོ་ཞེས་སློབ་པ་ལ་འདོམས་པ་ཡིན་པའི་ཕྱིར། སྤྱན་ལྔ་སོ་སོའི་ངོ་བོ་ཡོད་དེ། ཤའི་སྤྱན་གྱིས་གྲངས་ཇི་ལྟ་བ་བཞིན་དུ་དངོས་པོ་སོ་སོར་ངེས་
པ། དཔག་ཚད་བརྒྱ་ནས་སྟོང་གསུམ་ཚུན་ཆད་ཀྱི་གཟུགས་ཕྲ་རགས་རྣམས་མཐོང་བ་དང་། སྔོན་དགེ་བ་ཟག་བཅས་ཀྱི་ལས་ཀྱི་རྣམ་པར་སྨིན་པ་ལས་བྱུང་བའི་ལྷའི་སྤྱན་ནི། སེམས་ཅན་ཐམས་ཅད་ཀྱི་འཆི་འཕོ་བ་དང་། སྐྱེ་བ་ཇི་ལྟ་བ་བཞིན་དུ་ཤེས་པ་དང་། ཤེས་རབ་ཀྱི་སྤྱན་ནི་ཆོས་ཐམས་ཅད་ལ་བདེན་པར་རྣམ་པར་མི་རྟོག་པ་བདེན་མེད་མངོན་སུམ་དུ་རྟོགས་པ་དང་། ཆོས་ཀྱི་སྤྱན་ནི་འཕགས་པའི་གང་ཟག་དབང་པོ་རྣོ་རྟུལ་ཐམས་ཅད་རྟོགས་པ་དང་། སངས་རྒྱས་ཀྱི་སྤྱན་ནི་གྲངས་ཇི་ལྟ་བ་བཞིན་དུ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་ཡུལ་ཅན་གྱི་བྱེད་པ་དང་ལྡན་པ་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །སྤྱན་ལྔའི་ནང་ཚན་གང་ཞིག །རང་གི་བདག་རྐྱེན་དུ་གྱུར་པའི་ཤའི་མིག་ལ་བརྟེན་ནས་བྱུང་ཞིང་། སྟོང་གསུམ་ཚུན་ཆད་ཀྱི་གཟུགས་ཕྲ་རགས་མངོན་སུམ་དུ་མཐོང་བ་དེ་ཤའི་སྤྱན་གྱི་མཚན་ཉིད་ཟེར་ན། དཔག་ཚད་བརྒྱ་ཚུན་ཆད་ཙམ་ལས་མི་མཐོང་བའི་ཤའི་སྤྱན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། དེ་འདྲ་ཡོད་པའི་ཕྱིར། དེར་ཐལ། མདོ་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ཤའི་མིག་གིས་དཔག་ཚད་བརྒྱ་མཐོང་བ་ཡོད་དོ། །ཞེས་པའི་ལུང་དོན་གྲུབ་པའི་ཕྱིར། ཁ་ཅིག །རང་གི་བདག་རྐྱེན་དུ་གྱུར་པའི་བསམ་གཏན་གྱི་དངོས་གཞི་ལ་བརྟེན་ནས་སེམས་ཅན་ཐམས་ཅད་ཀྱི་འཆི་འཕོ་བ་དང་སྐྱེ་བ་ཇི་ལྟ་བ་བཞིན་དུ་ཤེས་པའི་ཡུལ་ཅན་དེ་ལྷའི་སྤྱན་གྱི་མཚན་ཉིད་ཟེར་ན། ལྷའི་སྤྱན་ནུས་པ་མཐུ་ཆེ་ཆུང་གི་ཁྱད་པར་མེད་པར་ཐལ། དེ་ཡིན་ན་སེམས་ཅན་ཐམས་ཅད་ཀྱི་སྐྱེ་བ་དང་འཆི་འཕོ་བ་མངོན་སུམ་དུ་རྟོགས་པས་ཁྱབ་པའི་ཕྱིར། གཞན་ཡང་། སེམས་ཅན་ཐམས་ཅད་སྐྱེ་བ་ལེན་པར་ཐལ། ལྷའི་སྤྱན་གྱི་སེམས་
ཅན་ཐམས་ཅད་སྐྱེ་བ་ལེན་པ་མངོན་སུམ་དུ་མཐོང་བའི་ཕྱིར། འདོད་ན། བྱང་སེམས་རྒྱུན་མཐའ་བ་སྐྱེ་བ་ལེན་པར་ཐལ། འདོད་པའི་ཕྱིར། འདོད་ན། མི་ལེན་པར་ཐལ། དེ་མ་རིག་བག་ཆགས་ཀྱི་ས་དང་། ཟག་མེད་ཀྱི་ལས་ལ་བརྟེན་ནས་སྐྱེ་བ་ཡང་མི་ལེན། ལས་ཉོན་གྱིས་སྐྱེ་བ་ཡང་མི་ལེན་པའི་ཕྱིར། དང་པོ་དེར་ཐལ། དེ་འདྲའི་སངས་འཕགས་མེད་པའི་ཕྱིར། ཕྱི་མ་མ་གྲུབ་ན། བྱང་སེམས་རྒྱུན་མཐའ་བ་ཆོས་ཅན། ལས་ཉོན་གྱིས་སྐྱེ་བ་མི་ལེན་པར་ཐལ། བྱང་འཕགས་ཡིན་པའི་ཕྱིར། བྱས་པ་ལ། ཁོ་ན་རེ། སངས་འཕགས་སེམས་ཅན་ཐམས་ཅད་སྡུག་བསྔལ་ལས་བསྒྲལ་འདོད་ཀྱི་སྙིང་རྗེ་ཅན་མ་ཡིན་པར་ཐལ། སེམས་ཅན་ཐམས་ཅད་སྡུག་བསྔལ་དང་མི་ལྡན་པའི་ཕྱིར། ཟེར་ན། འདོད་ལན་བཏབ་ཚེ་སྒྲུབ་བྱེད་མི་འབྱུང་ངོ་། །ཁ་ཅིག །སྤྱན་ལྔའི་ནང་ཚན་གང་ཞིག །བདག་མེད་ཕྲ་རགས་གང་རུང་མངོན་སུམ་དུ་རྟོགས་པ་ཤེས་རབ་ཀྱི་སྤྱན་གྱི་མཚན་ཉིད་ཟེར་ན། ཐེག་ཆེན་གྱི་མཐོང་ལམ་བར་ཆད་མེད་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། བདག་མེད་ཕྲ་རགས་གང་རུང་ཁྱོད་ཀྱི་དངོས་གཞལ་ཡིན་པར་ཐལ། འདོད་པའི་ཕྱིར། འདོད་ན། བདག་མེད་ཕྲ་རགས་གང་རུང་ཆོས་ཅན། སྟོང་ཉིད་ཡིན་པར་ཐལ། དེའི་དངོས་གཞལ་ཡིན་པའི་ཕྱིར། སྤྱན་ལྔའི་ནང་ཚན་གང་ཞིག །རང་དང་རྒྱུད་ཚོད་མཉམ་པའི་འཕགས་པའི་གང་ཟག་གི་དབང་པོ་རྣོ་རྟུལ་ཇི་ལྟ་བ་བཞིན་དུ་རྟོགས་པའི་ཡུལ་ཅན་དེ་ཆོས་ཀྱི་སྤྱན་གྱི་མཚན་ཉིད་ཟེར། སངས་འཕགས་ཀྱི་རྒྱུད་ཀྱི་ཆོས་ཀྱི་སྤྱན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། རང་དང་རྒྱུད་ཚོད་མཉམ་པའི་འཕགས་པའི་གང་ཟག་དབང་པོ་རྟུལ་པོ་རྟོགས་པར་ཐལ། འདོད་པའི་ཕྱིར། འདོད་ན། སངས་འཕགས་ཆོས་
ཅན། ཁྱོད་དང་རྒྱུད་ཚོད་མཉམ་པའི་དབང་རྟུལ་ཡོད་པར་ཐལ། ཁྱོད་ཀྱི་རྒྱུད་ཀྱི་ཆོས་ཀྱི་སྤྱན་དེས་དེ་རྟོགས་པའི་ཕྱིར། ཁ་ཅིག །ཤའི་སྤྱན་གྱི་མ་མཐའི་ས་མཚམས་ཐེག་ཆེན་གྱི་ཚོགས་ལམ་དང་། ལྷའི་སྤྱན་སྦྱོར་ལམ་དང་། ཤེས་རབ་ཀྱི་སྤྱན་ཐེག་ཆེན་གྱི་མཐོང་ལམ་མཉམ་གཞག་དང་། ཆོས་ཀྱི་སྤྱན་ཐེག་ཆེན་གྱི་མཐོང་ལམ་རྗེས་ཐོབ་དང་། སངས་རྒྱས་ཀྱི་སྤྱན་སངས་རྒྱས་ཀྱི་ས་དང་ས་བརྒྱད་པ་ན་ཡོད་ཟེར་ན། ཤའི་སྤྱན་དང་ལྷའི་སྤྱན་ཆོས་ཅན། ཁྱོད་ཐོབ་པའི་གང་ཟག་ཡིན་ན་ལམ་ཞུགས་ཡིན་དགོས་པར་ཐལ། འདོད་པའི་ཕྱིར། འདོད་ན། མི་འཐད་པར་ཐལ། ལམ་མ་ཞུགས་ན་དེ་ཡོད་པའི་ཕྱིར། དེ་ན་བསམ་གཏན་དང་པོའི་དངོས་གཞི་ཐོབ་པ་ཡོད་པའི་ཕྱིར། གཞན་ཡང་། ཤེས་རབ་ཀྱི་སྤྱན་དང་ཆོས་ཀྱི་སྤྱན་གཉིས་ཐོབ་པའི་གང་ཟག་ཡིན་ན་ཐེག་ཆེན་འཕགས་པ་ཡིན་དགོས་པར་ཐལ། འདོད་པའི་ཕྱིར། འདོད་ན། དེ་གཉིས་ཐོབ་པའི་ཉན་ཐོས་མཐོང་ལམ་པ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། ཉན་ཐོས་ཀྱི་མཐོང་ལམ་མཉམ་གཞག་ནས་ཤེས་རབ་ཀྱི་སྤྱན་འཐོབ་པ་གང་ཞིག །རྗེས་ཐོབ་ནས་ཆོས་ཀྱི་སྤྱན་འཐོབ་པའི་ཕྱིར། དང་པོ་དེར་ཐལ། དེ་ནས་གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་འཐོབ་པའི་ཕྱིར། ཁ་ཅིག །ཤའི་སྤྱན་ཡིན་ན་མིག་དབང་ཡིན་པས་ཁྱབ། བྱས་པ་ལ་མི་འཐད་པར་ཐལ། དེ་གཟུགས་ཅན་མ་ཡིན་པའི་ཕྱིར། དེར་ཐལ། དེ་ཡུལ་ཅན་ཡིན་པའི་ཕྱིར་ན་མ་ཁྱབ། དེར་ཐལ། དེ་དཔག་ཚད་བརྒྱ་ལ་སོགས་པའི་གཟུགས་མཐོང་བའི་ཡུལ་ཅན་ཡིན་པའི་ཕྱིར། ཁོ་ན་རེ། མིག་གིས་གཟུགས་མཐོང་བར་ཐལ། དེ་ལྟར་འཇིག་རྟེན་ན་གྲགས་པའི་ཕྱིར་ན་མ་ཁྱབ། འོ་ན། སའི་ཁ་དོག་ས་ཡིན་པར་ཐལ། དེ་ལྟ་འཇིག་རྟེན་གྲགས་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། རེག་
བྱའི་སྐྱེ་མཆེད་ཡིན་པར་ཐལ། འདོད་པའི་ཕྱིར། ཁྱབ་ཡོད་དེ། མེ་ཡིན་ན་རེག་བྱའི་སྐྱེ་མཆེད་ཡིན་དགོས་པའི་ཕྱིར། དེར་ཐལ། དེ་ཡིན་ན་ཚ་ཞིང་སྲེག་པ་ཡིན་དགོས་པའི་ཕྱིར། དཔེར་ན། སྲེག་པར་བྱེད་པ་མ་ཡིན་ཕྱིར། མེ་མ་ཡིན་ཞེས་བྱ་བ་བཞིན། ཞེས་གསུངས་པའི་ཕྱིར། ཁ་ཅིག །ཤའི་སྤྱན་དང་ལྷའི་སྤྱན་གྱི་ས་མཚམས་སྔར་ལྟར་ལ། ཤའི་སྤྱན་དང་ལྷའི་སྤྱན་སོགས་དབང་ཤེས་ཡིན་ཟེར་བ་འགལ་ཏེ། སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་ཐེག་ཆེན་སྦྱོར་ལམ་པའི་རྒྱུད་ལ་ལྷའི་སྤྱན་ཡོད་པར་ཐལ། ཐེག་ཆེན་གྱི་སྦྱོར་ལམ་ཐོབ་ན་ལྷའི་སྤྱན་ཐོབ་པས་ཁྱབ་པའི་ཕྱིར། ཁྱབ་པ་ཡོད་དེ། ཐེག་ཆེན་གྱི་སྦྱོར་ལམ་དྲོད་ཀྱི་ཡེ་ཤེས་སྐད་ཅིག་དང་པོ་ལ་གནས་པའི་གང་ཟག་ཡིན་ན་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་གང་ཟག་ཡིན་དགོས་པའི་ཕྱིར། འདོད་ན། དེའི་རྒྱུད་ལ་དབང་ཤེས་ཡོད་པར་ཐལ། དེའི་རྒྱུད་ལ་ལྷའི་སྤྱན་ཡོད་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། ཁྱོད་ཀྱི་རྒྱུད་ལ་དབང་ཤེས་མེད་པར་ཐལ། ཁྱོད་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་མཉམ་གཞག་ཡེ་ཤེས་ལ་གནས་པའི་སེམས་དཔའ་ཡིན་པའི་ཕྱིར། ཁ་ཅིག །སྔར་ལྟར་སྨྲ་བ་དང་། ཐེག་ཆེན་མཐོང་ལམ་བར་ཆད་མེད་ལམ་པའི་རྒྱུད་ལ་ཀུན་རྫོབ་སེམས་བསྐྱེད་མེད་པར་འདོད་པ་འགལ་ཏེ། དེའི་རྒྱུད་ཀྱི་མཁྱེན་པ་ཡིན་ན་བར་ཆད་མེད་ལམ་ཡིན་དགོས་པར་ཐལ། དེའི་རྒྱུད་ལ་ཀུན་རྫོབ་སེམས་བསྐྱེད་མེད་པའི་ཕྱིར། འདོད་ན། སྟོང་ཉིད་ལ་རྩེ་གཅིག་ཏུ་མཉམ་པར་བཞག་བཞིན་པའི་བྱང་སེམས་སྦྱོར་ལམ་པའི་མཁྱེན་པ་ཡིན་ན། སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་ཡེ་ཤེས་ཡིན་དགོས་པར་ཐལ། འདོད་པའི་ཕྱིར། འདོད་ན། སྟོང་ཉིད་ལ་རྩེ་གཅིག་ཏུ་མཉམ་པར་
བཞག་པའི་བྱང་སེམས་སྦྱོར་ལམ་པའི་རྒྱུད་ཀྱི་ལྷའི་སྤྱན་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། ཐེག་ཆེན་ཚོགས་ལམ་གྱི་གནས་སྐབས་སུ་དེ་མ་ཐོབ་ལ། ཐེག་ཆེན་གྱི་སྦྱོར་ལམ་དྲོད་ཐོབ་པ་དང་དུས་མཉམ་དུ་ལྷའི་སྤྱན་ཐོབ་པའི་གང་ཟག་ཡོད་པའི་ཕྱིར། དེར་ཐལ། ཁྱོད་ཀྱི་དམ་བཅའ་འཐད་པའི་ཕྱིར། ཡང་ཁ་ཅིག །ཤའི་སྤྱན་མིག་དབང་གཟུགས་ཅན་པ་ཡིན་པར་ཐལ། ལྷའི་སྤྱན་དེ་ཡིན་པའི་ཕྱིར། དེར་ཐལ། ལྷའི་མིག་དེ་ཡིན་པའི་ཕྱིར། རྣམ་བཤད་ལས། ཚེ་འདིར་བསམ་གཏན་བསྒོམས་པའི་མངོན་པར་འདུ་བྱེད་པ་ལས་བྱུང་བའི་ལྷའི་མིག་ནི། བསྐལ་བ་དང་མ་བསྐལ་བའི་གཟུགས་ཕྲ་རགས་ཐམས་ཅད་མཐོང་བ་བསྒོམས་པ་ལས་བྱུང་བའི་མཉམ་པར་བཞག་པའི་སས་བསྡུས་ཀྱི་གཟུགས་ཅན་དང་བ་ཡིན་ལ། མངོན་ཤེས་ནི་དེའི་བདག་རྐྱེན་ལ་བརྟེན་པ། ཆོས་གཉིས་དང་མཚུངས་པར་ལྡན་པའི་ཡིད་ཀྱི་ཤེས་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ། ལྷའི་མིག་དབང་དེས། དེ་ལྟ་བུའི་གཟུགས་ཕྲ་རགས་མཐོང་བའི་མངོན་ཤེས་ཀྱི་བདག་རྐྱེན་བྱེད་པ་ལ་དགོངས་པའི་ཕྱིར། གཞན་ཡང་། དེ་མི་འཐད་པར་ཐལ། ཤའི་སྤྱན་ཡིད་ཤེས་ཡིན་པའི་ཕྱིར། དེར་ཐལ། ལྷའི་མིག་གི་མངོན་ཤེས་དེ་དེ་ཡིན་པའི་ཕྱིར། གཞན་ཡང་། བར་དུ་ཆོད་པའི་གཟུགས་མཐོང་བའི་སོ་སྐྱེའི་དབང་ཤེས་ཡོད་པར་ཐལ། སོ་སྐྱེའི་རྒྱུད་ཀྱི་ཤའི་སྤྱན་དེ་དབང་ཤེས་ཡིན་པའི་ཕྱིར། རྟགས་ཁས། འདོད་ན། རྣམ་འགྲེལ་ལས། བར་ཆོད་ལ་སོགས་ཡོད་ན་ཡང་། །དབང་སྐྱེས་བློ་ནི་སྐྱེ་བར་འགྱུར། །ཞེས་གསུངས་པ་མི་འཐད་པར་ཐལ་ལོ། །གཉིས་པ་རང་ལུགས་ནི། སྤྱན་ལྔ་པོ་གང་རུང་ཡང་ཡིན། རང་ཡུལ་དུ་གྱུར་པའི་སྟོང་གསུམ་ཚུན་ཆད་ཀྱི་གཟུགས་ཅི་རིགས་པ་མཐོང་བ་ཡང་ཡིན་པའི་གཞི་མཐུན་པར་གྱུར་པའི་ཡིད་བློ་དེ་ཤའི་སྤྱན་གྱི་
མཚན་ཉིད། དེ་ཡང་ཡིན་རང་ཡུལ་དུ་གྱུར་པའི་སེམས་ཅན་འཆི་འཕོ་བ་དང་སྐྱེ་བ་ཅི་རིགས་མཐོང་བ་ཡང་ཡིན་པའི་གཞི་མཐུན་པར་གྱུར་པའི་ཡིད་བློ་དེ་ལྷའི་སྤྱན་གྱི་མཚན་ཉིད། དེ་ཡང་ཡིན། རང་ཡུལ་དུ་གྱུར་པའི་བདག་མེད་ཕྲ་རགས་གང་རུང་མངོན་སུམ་དུ་རྟོགས་པ་ཡང་ཡིན་པའི་གཞི་མཐུན་པར་གྱུར་པའི་ཡིད་བློ་ཤེས་རབ་ཀྱི་སྤྱན་གྱི་མཚན་ཉིད། དེ་ཡང་ཡིན། རང་ཡུལ་དུ་གྱུར་པའི་འཕགས་པའི་གང་ཟག་གི་དབང་པོའི་རིམ་པ་མངོན་སུམ་དུ་རྟོགས་པ་ཡང་ཡིན་པའི་གཞི་མཐུན་པར་གྱུར་པའི་འཕགས་པའི་མཁྱེན་པ་ཆོས་ཀྱི་སྤྱན་གྱི་མཚན་ཉིད། དེ་ཡང་ཡིན། ཆོས་ཐམས་ཅད་མངོན་སུམ་དུ་རྟོགས་པ་མཐར་ཕྱིན་པ་ཡང་ཡིན་པའི་གཞི་མཐུན་པར་གྱུར་པའི་ཡེ་ཤེས་དེ་སངས་རྒྱས་ཀྱི་སྤྱན་གྱི་མཚན་ཉིད། གསུམ་པ་རྩོད་པ་སྤོང་བ་ལ། ཁོ་ན་རེ། མིག་གིས་གཟུགས་མཐོང་བར་ཐལ། དེས་གཟུགས་ལ་བལྟ་བའི་ཕྱིར། དེར་ཐལ། ཤེས་རབ་སྒྲོན་མེ་ལས། མིག་ཆོས་ཅན། དོན་དམ་པར་གཟུགས་ལ་མི་བལྟ་སྟེ། དབང་པོ་ཡིན་པའི་ཕྱིར། དཔེར་ན་རྣ་བའི་དབང་པོ་བཞིན། ཞེས་པའི་རྟགས་སྦྱོར་འགོད་པ་ན། དོན་དམ་པར་ཞེས་པའི་ཚིག་སྦྱར་བ་ལ་དགོས་པ་ཡོད་པའི་ཕྱིར་ན། མ་ཁྱབ་སྟེ། དངོས་བསྟན་ལ་དེ་ཙམ་ལས་མེད་ན་ཡང་། དོན་དུ་མིག་གི་རྣམ་ཤེས་ཆོས་ཅན་དུ་བཟུང་ནས། རྟགས་སྦྱོར་འགོད་པར་བཞེད་པའི་ཕྱིར། ཡང་ཁོ་ན་རེ། ལྷའི་མིག་ཡིན་ན། དེའི་སྤྱན་ཡིན་པས་མ་ཁྱབ་པར་ཐལ། འདོད་ལྷའི་སྐྱེས་བུ་རེ་རེ་བའི་མིག་གི་དབང་པོ་གཟུགས་ཅན་པ་ལྷའི་མིག་ཡིན་པའི་ཕྱིར། དེར་ཐལ། འདོད་ལྷའི་སྐྱེས་བུའི་མིག་ཡིན་པའི་ཕྱིར་ན་མ་ཁྱབ། འདོད་ན། དེ་ལྷའི་སྤྱན་ཡིན་པར་ཐལ། དེ་འདོད་ལྷའི་སྐྱེས་བུའི་སྤྱན་ཡིན་པའི་ཕྱིར། ཁྱབ་པ་ཁས། དེར་ཐལ། དེའི་སྤྱན་ཡོད་པའི་ཕྱིར། ཡང་ཁོ་ན་
རེ། ཐེག་ཆེན་གྱི་མཐོང་ལམ་བར་ཆད་མེད་ལམ་ཆོས་ཅན། མཚན་ཉིད་དེར་ཐལ། ཆོས་ཀྱི་སྤྱན་ཡིན་པའི་ཕྱིར། དེར་ཐལ། ཆོས་ཀྱི་མིག་ཡིན་པའི་ཕྱིར། དེར་ཐལ། མདོ་ལས། འདོད་པ་དང་གཟུགས་ཀྱི་ལྷའི་བུ་བྱེ་བ་ཕྲག་དུ་མ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པ་ཐོབ་བོ། །ཞེས་གསུངས་པའི་ཆོས་ཀྱི་མིག་དེ་མཐོང་ལམ་ལ་བྱེད་རིགས་པའི་ཕྱིར་ཟེར་ན་ཡང་མ་ཁྱབ་བོ། །འདི་ལྟར་འཆད་པར་བྱེད་མོད། གསེར་ཕྲེང་དང་སྙིང་པོ་རྒྱན་གཉིས་ཀར་ལྷའི་མིག་གཟུགས་ཅན་དང་བར་བཤད་པ་ལ་བསྙོན་པར་མི་ནུས་སོ། །
མངོན་པར་ཤེས་པ་དྲུག་བཤད་པ།
མངོན་པར་ཤེས་པ་དྲུག་བཤད་པ། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེར་ཕྱིན་ལ་སྤྱོད་པའི་བྱང་ཆེན་མངོན་ཤེས་ཀྱི་ཕ་རོལ་ཏུ་ཕྱིན་པ་འཐོབ་སྟེ། རྫུ་འཕྲུལ་གྱི་རྣམ་པ་དུ་མ་ཉམས་སུ་མྱོང་བ་བྱེད་དོ་ཞེས་སོགས་ཀྱི་ཡུམ་བར་མའི་མདོ་ཚིག་ཆོས་ཅན། ཁྱོད་ཀྱིས་སྒྲུབ་པའི་འབྲས་བུ་མྱུར་དུ་རྫོགས་པའི་རྒྱུ་མངོན་པར་ཤེས་པ་དྲུག་ལ་འདོམས་པ་ཡིན་ཏེ། མངོན་ཤེས་དྲུག་པོ་རྣམས་ཐ་སྙད་དུ་རྒྱུད་ལ་ཇི་ལྟར་འབྱུང་བ་དང་དོན་དམ་པར་གཟོད་མ་ནས་ཞི་བ་ཉིད་དུ་རྟོགས་པར་བྱའོ་ཞེས་སྟོན་པའི་ཚུལ་གྱིས་འདོམས་པའི་ཕྱིར། དེ་ལ་རྫུ་འཕྲུལ་གྱི་མངོན་པར་ཤེས་པ་ནི་ཆོས་ཅན། མཐུ་ཁྱད་པར་ཅན་དང་ལྡན་ཏེ། ས་གཡོ་བ་དང་། གཅིག་ཏུ་གྱུར་ཅིང་མང་དུ་སྤྲུལ་པ་ལ་སོགས་པ་བྱེད་ནུས་པའི་ཏིང་ངེ་འཛིན་དང་། ཤེས་རབ་དང་མཚུངས་པར་ལྡན་པའི་ཕྱིར། ལྷའི་རྣ་བའི་མངོན་ཤེས་ནི་ཆོས་ཅན། མཐུ་ཁྱད་པར་ཅན་དང་ལྡན་ཏེ། འཇིག་རྟེན་གྱི་ཁམས་ཐམས་ཅད་ན་གནས་པའི་སྒྲ་ཆུང་ངུ་དང་ཅིག་ཤོས་ཆེན་པོ་ཐོས་པ་བསྒོམས་པའི་སྟོབས་ལས་བྱུང་བའི་མཉམ་པར་བཞག་པའི་སས་བསྡུས་པའི་གཟུགས་ཅན་དང་བདག་རྐྱེན་དུ་ཡོད་པའི་ཏིང་འཛིན་དང་ཤེས་རབ་དང་མཚུངས་པར་ལྡན་
པའི་ཕྱིར། གཞན་གྱི་སེམས་ཤེས་པའི་མངོན་ཤེས་ཆོས་ཅན། མཐུ་ཁྱད་པར་ཅན་དང་ལྡན་ཏེ། ཁྱོད་ཀྱིས་གཞན་གྱི་སེམས་འདོད་ཆགས་དང་བཅས་པ་དང་བྲལ་བ་ལ་སོགས་པ་མངོན་སུམ་དུ་ཡོངས་སུ་ཤེས་པའི་ཏིང་ངེ་འཛིན་དང་ཤེས་རབ་དང་མཚུངས་པར་ལྡན་པའི་ཕྱིར། སྔོན་གྱི་གནས་རྗེས་སུ་དྲན་པའི་མངོན་ཤེས་ཆོས་ཅན། མཐུ་ཁྱད་པར་ཅན་དང་ལྡན་ཏེ། རང་དང་གཞན་གྱི་ཚེ་རབས་སྔ་མ་བརྒྱ་སྟོང་ལ་སོགས་པ་དུ་མ་མྱོང་བའི་སྟོབས་ཀྱིས་རྗེས་སུ་དྲན་པའི་ཏིང་འཛིན་དང་ཤེས་རབ་དང་མཚུངས་པར་ལྡན་པའི་ཕྱིར། ཚེ་འདིར་བསམ་གཏན་བསྒོམས་པའི་མངོན་པར་འདུ་བྱེད་པ་ལས་བྱུང་བའི་ལྷའི་མིག་ཆོས་ཅན། མཐུ་ཁྱད་པར་ཅན་དང་ལྡན་ཏེ། ཁྱོད་བསྐལ་བ་དང་མ་བསྐལ་བའི་གཟུགས་ཕྲ་རགས་ཐམས་ཅད་མཐོང་བ་བསྒོམས་པ་ལས་བྱུང་བའི་མཉམ་གཞག་གི་སས་བསྡུས་པའི་གཟུགས་ཅན་དང་བ་ཡིན་ལ། མངོན་ཤེས་ནི་དེའི་བདག་རྐྱེན་ལ་བརྟེན་པ་ཆོས་གཉིས་དང་མཚུངས་པར་ལྡན་པའི་ཡིད་ཀྱི་ཤེས་པ་ཡིན་པའི་ཕྱིར། ཟག་པ་ཟད་པ་ཤེས་པའི་མངོན་པར་ཤེས་པ་ནི་ཆོས་ཅན། མཐུ་ཁྱད་པར་ཅན་དང་ལྡན་ཏེ། ཁྱོད་ཉོན་མོངས་པ་དང་ཤེས་བྱའི་སྒྲིབ་པ་སྤོང་བར་བྱེད་པའི་ཐབས་དང་སྤངས་པའི་བྲལ་བ་མངོན་སུམ་དུ་ཤེས་པའི་ཆོས་གཉིས་དང་མཚུངས་ལྡན་གྱི་ཤེས་པ་ཡིན་པའི་ཕྱིར། གཉིས་པ་མཐའ་དཔྱད་ལ་དགག་གཞག་སྤང་གསུམ་ལས། དང་པོ་ལ། ཁ་ཅིག །རང་གི་བདག་རྐྱེན་དུ་གྱུར་པའི་བསམ་གཏན་དང་པོའི་སེམས་རྟེན་ལ་བརྟེན་ནས་ས་གཡོ་བ་དང་གཅིག་ཏུ་གྱུར་ཅིང་མང་དུ་སྤྲུལ་པ་ལ་སོགས་བྱེད་ནུས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། རྫུ་འཕྲུལ་གྱི་མངོན་ཤེས་ཀྱི་མཚན་ཉིད་ཟེར་ན། རྫུ་འཕྲུལ་གྱི་མངོན་ཤེས་སུ་གྱུར་པའི་ཤེས་
རབ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། དེ་ཡོད་པའི་ཕྱིར། འདོད་ན། ཁྱོད་དང་མཚུངས་ལྡན་གྱི་ཤེས་རབ་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། ཁྱོད་ཤེས་རབ་ཡིན་པའི་ཕྱིར། ཁ་ཅིག །རང་གི་བདག་རྐྱེན་དུ་གྱུར་པའི་བསམ་གཏན་གྱི་དངོས་གཞི་ལ་བརྟེན་ནས་འཇིག་རྟེན་གྱི་ཁམས་ཀྱི་སྒྲ་ཕྲ་རགས་ཐམས་ཅད་མངོན་སུམ་དུ་ཤེས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་ལྷའི་རྣ་བའི་མངོན་ཤེས་ཀྱི་མཚན་ཉིད་ཟེར་ན། ལྷའི་རྣ་བའི་མངོན་ཤེས་འཁོར་དུ་ལྡན་པའི་གཙོ་བོ་སེམས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། ལྷའི་རྣ་བའི་མངོན་ཤེས་དེ་དེ་ཡིན་པ་གང་ཞིག །དེ་དང་མཚུངས་ལྡན་རྣམ་པ་ལྔ་མཚུངས་པ་ཡིན་པའི་ཕྱིར། འདོད་ན། སེམས་བྱུང་ཡིན་པར་ཐལ་ལོ། ཁ་ཅིག །རང་གི་བདག་རྐྱེན་དུ་གྱུར་པའི་བསམ་གཏན་དང་པོའི་དངོས་གཞི་ལ་བརྟེན་ནས་གཞན་གྱི་སེམས་འདོད་ཆགས་དང་བཅས་པ་དང་། བྲལ་བ་མངོན་སུམ་དུ་རྟོགས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། གཞན་སེམས་ཤེས་པའི་མངོན་ཤེས་ཀྱི་མཚན་ཉིད་ཟེར་ན། ཕྱི་རོལ་པའི་རྒྱུད་ཀྱི་གཞན་སེམས་ཤེས་པའི་མངོན་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། དེ་ཡོད་པའི་ཕྱིར་ཏེ། ཀུན་ལས་བཏུས་ལས། ཕྱི་རོལ་པའམ། ཉན་ཐོས་སམ། བྱང་ཆུབ་སེམས་དཔའང་རུང་སྟེ། དག་པའི་བསམ་གཏན་བཞི་ལ་བརྟེན་ནས་ཚད་མེད་པ་རྣམས་མངོན་པར་བསྒྲུབ་བོ། །ཚད་མེད་པ་རྣམས་ཇི་ལྟ་བར་མངོན་པར་ཤེས་པ་ལྔ་ཡང་དེ་བཞིན་ནོ། །ཞེས་གསུངས་པའི་ཕྱིར། རྩ་བར་འདོད་ན། དེ་ཆོས་ཅན། གཞན་གྱི་སེམས་འདོད་ཆགས་དང་བྲལ་བའི་བྲལ་བ་མངོན་སུམ་དུ་རྟོགས་པར་ཐལ། འདོད་པའི་ཕྱིར། འདོད་ན། འགོག་བདེན་མངོན་སུམ་དུ་རྟོགས་པར་ཐལ། འདོད་པའི་ཕྱིར། འདོད་མི་
ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །རང་གི་བདག་རྐྱེན་དུ་གྱུར་པའི་བསམ་གཏན་དང་པོའི་དངོས་གཞི་ལ་བརྟེན་ནས་རང་དང་གཞན་གྱི་ཚེ་རབས་སྔ་མ་བརྒྱ་སྟོང་དུ་མ་མྱོང་བའི་སྟོབས་ཀྱིས་དྲན་པའི་རིག་པ་དེ་སྔོན་གནས་རྗེས་དྲན་གྱི་མངོན་ཤེས་ཀྱི་མཚན་ཉིད་ཟེར་ན། ཕྱི་རོལ་པའི་རྒྱུད་ཀྱི་སྔོན་གནས་རྗེས་དྲན་གྱིས་དྲངས་པའི་ཚེ་རབས་སྔ་མ་དྲན་པའི་དྲན་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། ཕྱི་རོལ་པའི་རྒྱུད་ཀྱི་སྔོན་གནས་རྗེས་དྲན་གྱི་མངོན་ཤེས་དེ་དེ་ལྟར་ཡིན་པའི་ཕྱིར། འདོད་ན། དེ་ཆོས་ཅན། མངོན་སུམ་ཡིན་པར་ཐལ། མངོན་ཤེས་ཡིན་པའི་ཕྱིར། འདོད་མི་ནུས་ཏེ། རྟོག་པ་ཡིན་པའི་ཕྱིར། ཁ་ཅིག །རང་གི་ཐུན་མོང་མ་ཡིན་པའི་བདག་རྐྱེན་མཉམ་གཞག་གི་སས་བསྡུས་ཀྱི་གཟུགས་ཅན་དང་བ་ལ་བརྟེན་ནས་གཟུགས་ཕྲ་རགས་ཐམས་ཅད་མངོན་སུམ་དུ་མཐོང་བའི་རིག་པ། ལྷའི་མིག་གི་མངོན་ཤེས་ཀྱི་མཚན་ཉིད་ཟེར་ན། ཕྱི་རོལ་པའི་རྒྱུད་ཀྱི་ལྷའི་མིག་གི་མངོན་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། འདོད་ན། དེ་རང་གི་ཐུན་མོང་མ་ཡིན་པའི་བདག་རྐྱེན་མིག་དབང་གཟུགས་ཅན་པ་ལ་བརྟེན་ནས་སྐྱེས་པར་ཐལ། འདོད་པའི་ཕྱིར། འདོད་ན། དབང་ཤེས་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཡིད་ཤེས་ཡིན་པའི་ཕྱིར། དེར་ཐལ། མངོན་ཤེས་ཡིན་པའི་ཕྱིར། ཁ་ཅིག །སྒྲིབ་གཉིས་སྤོང་བར་བྱེད་པའི་ཐབས་དང་། སྤངས་པའི་བྲལ་བ་གང་རུང་མངོན་སུམ་དུ་ཤེས་པའི་ཤེས་རབ་མཚུངས་ལྡན་དང་བཅས་པ། ཟག་ཟད་ཀྱི་མངོན་ཤེས་ཀྱི་མཚན་ཉིད་ཟེར་ན། ཉན་ཐོས་དགྲ་བཅོམ་པའི་རྒྱུད་ཀྱི་ཟག་ཟད་ཀྱི་མངོན་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་
ཕྱིར། འདོད་ན། དེ་ཆོས་ཅན། སྒྲིབ་གཉིས་སྤངས་པའི་བྲལ་བ་མངོན་སུམ་དུ་རྟོགས་པར་ཐལ། འདོད་པའི་ཕྱིར། འདོད་མི་ནུས་ཏེ། སེམས་ཅན་གྱི་རྒྱུད་ཀྱི་ཤེས་པ་ཡིན་པའི་ཕྱིར། ཁ་ཅིག །གཞན་སེམས་ཤེས་པའི་མངོན་ཤེས་ཡིན་ན་གཞན་གྱི་སེམས་ལ་ཅི་མངོན་ཤེས་པས་ཁྱབ་ཟེར་ན། སེམས་ཅན་གྱི་རྒྱུད་ཀྱི་གཞན་སེམས་ཤེས་པའི་མངོན་ཤེས་ཆོས་ཅན། དེར་ཐལ། དེའི་ཕྱིར། འདོད་ན། གཞན་གྱི་སེམས་ལ་མངོན་ཚད་ཤེས་པར་ཐལ། འདོད་པའི་ཕྱིར། གཞན་གྱི་སེམས་ལ་བསམས་ཚད་ཤེས་པར་ཐལ། འདོད་པའི་ཕྱིར། འདོད་ན། སངས་རྒྱས་འཕགས་པའི་རྒྱུད་ཀྱི་བསམས་ཚད་ཤེས་པར་ཐལ། འདོད་པའི་ཕྱིར། འདོད་མི་ནུས། གཉིས་པ་རང་གི་ལུགས་ལ། མངོན་ཤེས་དྲུག་གི་ནང་ཚན་གང་ཞིག །ས་གཡོ་བ་སོགས་བྱེད་ནུས་པ་དེ་རྫུ་འཕྲུལ་གྱི་མངོན་ཤེས་ཀྱི་མཚན་ཉིད། དེ་གང་ཞིག །རང་གི་བདག་རྐྱེན་དུ་གྱུར་པའི་རྣ་བ་ལ་བརྟེན་ནས་འཇིག་རྟེན་གྱི་ཁམས་ཀྱི་སྒྲ་ཕྲ་རགས་ཤེས་པ་དེ་ལྷའི་རྣ་བའི་མངོན་ཤེས་ཀྱི་མཚན་ཉིད། དེ་གང་ཞིག །རང་གི་ཡུལ་དུ་གྱུར་པའི་གཞན་གྱི་སེམས་ལ་ཅི་མངོན་ཤེས་པ་དེ་གཞན་སེམས་ཤེས་པའི་མངོན་ཤེས་ཀྱི་མཚན་ཉིད། དེ་གང་ཞིག །རང་གི་ཚེ་རབས་སྔ་མ་རྗེས་སུ་དྲན་པ་དེ་སྔོན་གནས་རྗེས་དྲན་གྱི་མངོན་ཤེས་ཀྱི་མཚན་ཉིད། དེ་གང་ཞིག །རང་གི་བདག་རྐྱེན་དུ་གྱུར་པའི་མིག་ལ་བརྟེན་ནས་འཇིག་རྟེན་གྱི་ཁམས་ཀྱི་གཟུགས་ཕྲ་རགས་ཤེས་པ་དེ་ལྷའི་མིག་གི་མངོན་ཤེས་ཀྱི་མཚན་ཉིད། དེ་གང་ཞིག །ཉོན་སྒྲིབ་སྤངས་པ་དེ་ཟག་ཟད་ཀྱི་མངོན་ཤེས་ཀྱི་མཚན་ཉིད། གསུམ་པ་རྩོད་པ་སྤོང་པ་ལ། ཁོ་ན་རེ། གཞན་སེམས་ཤེས་པའི་མངོན་ཤེས་རྒྱུད་ལྡན་གྱི་རྒྱང་འཕེན་པ་ཡོད་པར་ཐལ། དེ་འདྲའི་ཕྱི་རོལ་པ་ཡོད་པའི་ཕྱིར། འདོད་ན། དེ་འདྲའི་རྒྱུད་ལ་ནང་པ་སངས་རྒྱས་པའི་རྒྱུད་ལ་ལྟ་བ་བཀར་བཏགས་ཀྱི་
ཕྱག་རྒྱ་བཞི་རྟོགས་པའི་ཡང་དག་པའི་ལྟ་བ་ཡོད་པར་ཤེས་པའི་མངོན་ཤེས་ཡོད་པར་ཐལ། འདོད་པའི་ཕྱིར། འདོད་ན། དེས་བདེན་ཞེན་གྱིས་ཤེས་བཞིན་དུ་འདུས་བྱས་རྟག་པར་ཁས་ལེན་པ་མི་འཐད་པར་ཐལ་ལོ། །ཡང་ཁ་ཅིག །སྔོན་གནས་རྗེས་དྲན་གྱི་མངོན་ཤེས་རྒྱུད་ལྡན་གྱི་རྒྱང་འཕེན་ཡོད་པར་ཐལ། དེ་འདྲའི་ཕྱི་རོལ་པ་ཡོད་པའི་ཕྱིར་ན་མ་ཁྱབ། འདོད་ན། རང་གི་སྐྱེ་བ་སྔ་མ་མངོན་སུམ་དུ་རྟོགས་པའི་མངོན་ཤེས་རྒྱུད་ལྡན་གྱི་རྒྱང་འཕེན་ཡོད་པར་ཐལ། འདོད་པའི་ཕྱིར། འདོད་ན། སྐྱེ་བ་སྔ་ཕྱི་ཁས་ལེན་པའི་རྒྱང་འཕེན་ཡོད་པར་ཐལ་ལོ། །ཟེར་ན། དེ་འདྲའི་རྒྱང་འཕེན་མེད་པར་ཐལ། བསམ་གཏན་གྱི་དངོས་གཞི་ཐོབ་པའི་རྒྱང་འཕེན་མེད་པའི་ཕྱིར། ཁ་ཅིག །གཟུགས་མེད་ཀྱི་དངོས་གཞིས་བསྡུས་པའི་མངོན་ཤེས་དྲུག་ཡོད་ཟེར་ན། མི་འཐད་པར་ཐལ། མངོན་ཤེས་དྲུག་པོ་གང་རུང་ཡིན་ན་བསམ་གཏན་གྱི་དངོས་གཞི་ཡིན་དགོས་པའི་ཕྱིར། དེར་ཐལ། དེ་ཡིན་ན་རང་གི་སེམས་རྟེན་བསམ་གཏན་གྱི་དངོས་གཞི་ཡོད་པས་ཁྱབ་པའི་ཕྱིར། དེར་ཐལ། ཀུན་ལས་བཏུས་ལས། དག་པའི་བསམ་གཏན་བཞི་ལ་བརྟེན་ནས་ཚད་མེད་པ་རྣམས་མངོན་པར་བསྒྲུབ་བོ། །ཚད་མེད་པ་རྣམས་ཇི་ལྟ་བར་མངོན་པར་ཤེས་པ་ལྔ་ཡང་དེ་བཞིན་ནོ། །ཞེས་གསུངས་པའི་ཕྱིར། སྨྲས་པ། ངལ་བའི་ཁུར་མང་དཔྱིད་ཀྱི་དཔལ་མོ་ལས། །མངོན་ཤེས་རྫུ་འཕྲུལ་དབྱར་གྱི་དགའ་སྟོན་ཅན། །ངོ་མཚར་སྤང་ལྗོངས་འོག་པག་བཀྲ་བའི་ཚེ། །ཚུལ་མིན་བཅོས་མའི་དགུན་གྱི་བཞིན་རས་ཉམས། །སྣ་ཚོགས་ཚིག་གི་ཚང་ཚིང་སྟུག་པོའི་དབུས། མཐའ་ཡས་ལུང་གི་ལྗོན་པའི་ཡོངས་འདུའི་དབང་། རིགས་པའི་གང་བུ་ཁུར་དུ་དུད་པ་དེ། །བློ་ལྡན་སྐབས་གསུམ་དགའ་སྟོན་དཔལ་དུ་ཤར། ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གསུམ་
པ་སྤང་བྱའི་ས་བོན་སེལ་བར་གདམས་པ་ལ། སྤང་བྱ་ཀུན་བརྟགས་ཀྱི་གཉེན་པོ་ལ་གདམས་པ་དང་། ལྷན་སྐྱེས་ཀྱི་གཉེན་པོ་ལ་གདམས་པའོ། །དང་པོ་ནི། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཤེར་ཕྱིན་ལས་བརྩམས་ཏེ་སྤོབས་པ་སྐྱེད་ཅིག །ཅེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་མཐོང་བའི་ལམ་ལ་འདོམས་པ་ཡིན་ཏེ། ཁྱོད་ཀྱིས་མཐོང་ལམ་དེས་སྤང་བར་བྱ་བའི་ཀུན་བརྟགས་ཀྱི་དངོས་པོའི་གཉེན་པོ་ཉིད་དུ་རྣམ་པར་སྒོམ་པར་བྱེད་དོ་ཞེས་སྟོན་པའི་ཚུལ་གྱིས་འདོམས་པའི་ཕྱིར། མཐོང་ལམ་ལ་འདོམས་པ་ཡོད་དེ། ཡུལ་བདེན་པ་བཞི་བསྡུས་པ་ཡུལ་ཅན་སྐད་ཅིག་མ་བཅུ་དྲུག་གི་ངོ་བོ་ཉིད་ཆོས་དང་རྗེས་སུ་ཤེསཔའི་བཟོད་པ་དང་། ཤེས་པའི་བདག་ཉིད་ཅན་གྱི་ལམ་ལ་འདོམས་པའི་ཕྱིར། གང་ཟག་གང་གིས་འདོམས་པ་ཡོད་དེ། རྣལ་འབྱོར་པ་ཆོས་ཐམས་ཅད་བདེན་པའི་ངོ་བོ་ཉིད་མེད་པར་རྟོགས་པ་དེས་འདོམས་པའི་ཕྱིར། གང་ཟག་གང་གིས་སྒོམ་པར་བྱེད་པ་ཡོད་དེ། དེ་ཡང་སྒྱུ་མ་མཁན་བཞིན་དུ་ཆོས་ཐམས་ཅད་བདེན་པར་མངོན་པར་མ་ཞེན་པའི་ལུས་ཅན་དེས་སྒོམ་པར་བྱེད་པའི་ཕྱིར། གཉིས་པ་ནི། རབ་འབྱོར་འདུས་བྱས་ཀྱི་དབྱིངས་མེད་པར་འདུས་མ་བྱས་ཀྱི་དབྱིངས་གདགས་པར་མི་ནུས་སོ་ཞེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་དཔེའི་སྒོ་ནས་ཐེག་ཆེན་གྱི་སྒོམ་པའི་ལམ་ལ་འདོམས་པ་ཡིན་ཏེ། ཐེག་ཆེན་གྱི་སྒོམ་ལམ་དེས་སྤང་བར་བྱ་བའི་སྤང་བྱ་ལྷན་སྐྱེས་ཀྱི་དངོས་པོའི་གཉེན་པོ་ཉིད་དུ་རྣམ་པར་སྒོམ་པར་བྱེད་དོ། །ཞེས་འདོམས་པའི་ཕྱིར། ཤེས་བྱ་ཆོས་ཅན། སྟོང་ཉིད་མངོན་སུམ་དུ་རྟོགས་པའི་མཐོང་ལམ་ལས་རིགས་ཐ་དད་པའི་ཟག་པ་མེད་པའི་ཐེག་ཆེན་སྒོམ་པའི་ལམ་མཚན་ཉིད་པ་རྣམ་པར་བཞག་པ་ནི་མེད་དེ། ཆོས་ཉིད་ལ་མངོན་སུམ་དུ་མཉམ་པར་བཞག་པའི་ཐེག་ཆེན་གྱི་མཐོང་ལམ་ཟག་མེད་དང་། ཐེག་ཆེན་གྱི་སྒོམ་
ལམ་ཟག་མེད་རིགས་ཐ་དད་དུ་གྱུར་པ་མེད་པའི་ཕྱིར། ཤེས་བྱ་ཆོས་ཅན། དེ་གཉིས་རིགས་ཐ་དད་དུ་གྱུར་པ་མེད་དེ། འདུས་བྱས་བདག་མེད་མངོན་སུམ་དུ་རྟོགས་པའི་ལམ་བདེན་དང་། འདུས་མ་བྱས་ཏེ་དྲི་མའི་ས་བོན་དང་བྲལ་བ་དག་ངོ་བོ་ཐ་དད་ན་དྲི་མ་དང་མ་བྲལ་བར་ཐལ་བས་ངོ་བོ་གཅིག་པ་ཉིད་ཀྱིས་ཕན་ཚུན་ངོ་བོ་ཐ་དད་པར་གདགས་པར་མི་ནུས་པ་བཞིན་དུ་སྔར་ཇི་སྐད་བཤད་པའི་མཐོང་ལམ་གྱིས་མངོན་སུམ་དུ་བྱས་པའི་དངོས་པོ་ཆོས་ཉིད་དེ་ལས་ཐ་མི་དད་པ་ལ་སྒོམ་ལམ་དེས་ཀྱང་མངོན་སུམ་དུ་དམིགས་པའི་ཕྱིར། ཤེས་བྱ་ཆོས་ཅན། ཐེག་ཆེན་གྱི་ལམ་ཟག་མེད་དེ་གཉིས་རིགས་ཐ་དད་དུ་མེད་མོད་ཀྱི། འོན་ཀྱང་སྤང་བྱ་སྤོང་བའི་ནུས་པ་ལ་ཁྱད་པར་མེད་པ་མ་ཡིན་ཏེ། སྔ་མའི་བར་ཆད་མེད་ལམ་གྱིས་སྤང་བྱ་ལྷན་སྐྱེས་ཀྱི་ས་བོན་མི་སྤོང་ཡང་། ཅིག་ཤོས་དེ་ནི་སྔ་མ་ལས་གོམས་པ་ཆེས་བསྲིང་བའི་དབང་གིས་རྟེན་ཅིང་འབྲེལ་བར་འབྱུང་བའི་ཆོས་ཉིད་ཀྱིས་ལྷན་སྐྱེས་ཀྱི་ས་བོན་སྤོང་ནུས་པའི་ཕྱིར། གསུམ་པ་བསྡུས་དོན་ནི། ཤེས་བྱ་ཆོས་ཅན། སྔར་བཤད་པ་དེ་ལྟར་ན་ཐེག་ཆེན་གྱི་གདམས་ངག་ནི་འདིར་བསྟན་པ་རྣམ་པ་བཅུར་ངེས་པའོ་སྟེ་ངེས་པ་ཡིན་པས། བཅུ་པོ་དེ་དག་ཐམས་ཅད་ནི་གདམས་ངག་གི་སྐབས་སུ་བསྟན་པ་སྟེ། བཅུ་པོ་འདི་ཙམ་ཁོ་ནས་རྣམ་མཁྱེན་དོན་གཉེར་གྱི་སྐྱེས་བུའི་འདོད་དོན་ཐམས་ཅད་ཕུན་སུམ་ཚོགས་པ་སྟེ་རྫོགས་པར་འགྱུར་བའི་ཕྱིར། ལམ་བཅུ་པོ་དེ་ལ་འདོམསཔའི་གདམས་ངག་གི་དབྱེ་བསྡུ་ཡོད་དེ། བྱང་ཆུབ་སེམས་དང་། དེས་འཕངས་ཤིང་ཟིན་པའི་ཆོས་ཀྱི་ངོ་བོ་ཉིད་ཀྱི་ཐེག་པ་ཆེན་པོའི་ལམ་གྱི་རིམ་པས་བསྡུས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཉམས་སུ་ལེན་པ་ལ་སྒོམ་ཚུལ་གྱི་རྣམ་པ་གང་ཡིན་པ་ཉན་ཐོས་དང་ཐུན་མོང་མ་ཡིན་པ་དང་། བདེན་གཉིས་ལས་མི་འདའ་བ་མ་དམིགས་པ་དང་། སྒྲུབ་པ་དེའི་དམིགས་པ་གང་
ཡིན་པ་འཕགས་པའི་བདེན་པ་བཞི་ལ་འདོམས་པ་དང་། སྒྲུབ་པའི་རྟེན་གང་ཡིན་པ་སྐྱབས་གསུམ་ལ་འདོམས་པ་དང་། སྒྲུབ་པ་གོང་ནས་གོང་དུ་ཁྱད་པར་དུ་འགྲོ་བའི་རྒྱུ་གང་ཡིན་པ་མ་ཆགས་པའི་དོན་བརྩོན་འགྲུས་ལ་འདོམས་པ་དང་། སྒྲུབ་པ་ཉམས་སུ་ལེན་པ་ལས་མི་བཟློག་པར་འགྲོ་བའི་རྒྱུ་གང་ཡིན་པ་ཡོངས་སུ་མི་ངལ་བའི་བརྩོན་འགྲུས་ལ་འདོམས་པ་དང་། ཐེག་ཆེན་ལས་ཉམས་ནས་ཉན་རང་གི་ཐེག་པ་གཞན་གྱི་མི་འགྲོ་བའི་རྒྱུ་གང་ཡིན་པ་ཐེག་ཆེན་གྱི་ལམ་ཡོངས་སུ་འཛིན་པ་ལ་འདོམས་པ་དང་། སྒྲུབ་པ་ལ་རང་དབང་དུ་འཇུག་པས་གཞན་གྱི་དྲིང་མི་འཇོག་པ་སྟེ་མི་ལྟོས་པར་འགྲོ་བ་ཉིད་ཀྱི་རྒྱུ་གང་ཡིན་པ་སྤྱན་ལྔ་ལ་འདོམས་པ་དང་། ཚོགས་མྱུར་དུ་རྫོགས་པར་བྱེད་པའི་རྣམ་པ་ཐམས་ཅད་མཁྱེན་པ་ཉིད་ཡོངས་སུ་རྫོགས་པའི་རྒྱུ་གང་ཡིན་པ་མངོན་པར་ཤེས་པ་དྲུག་ལ་འདོམས་པ་དང་། སྒྲིབ་གཉིས་མཐའ་དག་ཟད་པའི་སྒོ་ནས་སྒྲུབ་པ་མཐར་ཐུག་གི་རྒྱུ་གང་དག་ཡིན་ཐེག་ཆེན་གྱི་མཐོང་ལམ་དང་སྒོ་ལམ་ལ་འདོམས་པའི་གདམས་ངག་དང་བཅུ་རྣམས་སུ་ཡོད་པའི་ཕྱིར།
དགེ་འདུན་དཀོན་མཆོག་བྱེ་བྲག་ཏུ་བཤད་པ།
དགེ་འདུན་དཀོན་མཆོག་བྱེ་བྲག་ཏུ་བཤད་པ། གཉིས་པ་དགེ་འདུན་དཀོན་མཆོག་བྱེ་བྲག་ཏུ་བཤད་པ་ལ། སྤྱི་དོན་དང་། ཡན་ལག་གི་དོན་གཉིས། གཉིས་པ་ལ། མཚམས་སྦྱར་བ། རྩ་བ། འགྲེལ་པ་གསུམ། དང་པོ་ནི། ཤེས་བྱ་ཆོས་ཅན། དགེ་འདུན་དཀོན་མཆོག་གི་དབྱེ་བ་ཡོད་དེ། དགེ་འདུན་དཀོན་མཆོག་གི་སྐབས་སུ་མདོ་ལས་གསུངས་པ་རྣམས་ཀྱི་དབྱེ་བ་བདེ་བླག་ཏུ་རྟོགས་པར་བྱ་བའི་ཕྱིར་དུ། དབང་པོ་རྟུལ་དང་ཞེས་སོགས་བར་སྐབས་ཀྱི་ཚིགས་སུ་བཅད་པ་གཉིས་གསུངས་པའི་ཕྱིར། གཉིས་པ་ནི། ཐེག་ཆེན་གྱི་མཐོང་ལམ་ཆོས་བཟོད་བར་ཆད་མེད་ལ་གནས་པའི་གང་ཟག་དེ་ཆོས་ཅན། ཁྱོད་ལ་གཉིས་སུ་ཡོད་དེ། ཁྱོད་ལ་དབང་པོ་རྟུལ་པོ་དང་། དབང་པོ་རྣོན་པོ་གཉིས་དག་ཏུ་ཡོད་པའི་ཕྱིར། གཞུང་དེས་ཤུགས་ལ་བསྟན་པའི་རྒྱུན་ཞུགས་
ཀྱི་མིང་ཅན་གཅིག་དང་། དད་དང་མཐོང་ཐོབ་ཅེས་པས་བསྟན་པའི་བར་པ་གཉིས་ཀྱིས་ཞུགས་པའི་མིང་ཅན་གཉིས་དང་། རིགས་ནས་རིགས་ཞེས་པས་བསྟན་པ་རྒྱུན་ཞུགས་ལྷ་མིའི་རིགས་སྐྱེས་ཀྱི་འབྲས་གནས་ཁྱད་པར་ཅན་གྱི་མིང་ཅན་གཉིས་དང་། ཤུགས་བསྟན་ཕྱིར་འོང་འབྲས་གནས་ཙམ་གྱི་མིང་ཅན་དང་། བར་ཆད་གཅིག་ཅེས་པས་བསྟན་པ་ཕྱིར་འོང་ཁྱད་པར་ཅན་ཚེ་གཅིག་བར་ཆད་གཅིག་པའི་མིང་ཅན་དང་། བར་སྐྱེས་ནས་དང་། བྱེད་དང་བྱེད་མིན་ཞེས་པས་བསྟན་པ་ཕྱིར་མི་འོང་བར་འདའ་བ་དང་། སྐྱེས་འདའ་བ་དང་། མངོན་པར་དུ་འདུ་བྱེད་པ་དང་། མངོན་པར་འདུ་བྱེད་མེད་པར་འདའ་བའི་མིང་ཅན་བཞི་དང་། འོག་མིན་འགྲོ་ཞེས་པས་བསྟན་པ། དེ་དབྱེ་གཞིར་བྱས་ནས། དེ་ལས་ཕྱེ་བའི་འཕར་བ་གསུམ་གྱི་མིང་ཅན་གསུམ་དང་། སྲིད་རྩེའི་མཐར་ཐུག་འགྲོ། །གཟུགས་ཀྱི་ཆགས་བཅོམ་མཐོང་བ་ཡི། །ཆོས་ལ་གཞི་ལུས་མངོན་སུམ་བྱེད། །ཅེས་པས་བསྟན་པ་སྲིད་རྩེའི་མཐར་ཐུག་འགྲོ་བར་བཏགས་པའི་གཟུགས་ཀྱི་ཆགས་བཅོམ་དབྱེ་གཞིར་བྱས་ནས། དེ་ལས་ཕྱེ་བའི་མཐོང་ཆོས་ཞི་དང་། ལུས་མངོན་བྱེད་ཀྱི་མིང་ཅན་གཉིས་དང་། ཤུགས་བསྟན་དགྲ་བཅོམ་ཞུགས་པའི་མིང་ཅན་གཅིག་དང་། བསེ་རུ་རང་རྒྱལ་གྱི་མིང་ཅན་དང་ནི་ཉི་ཤུ་ཡོད་པའི་ཕྱིར། གསུམ་པ་འགྲེལ་པ་ནི། འོག་ཏུ་སྐབས་གཉིས་པ་ནས་འཆད་པར་འགྱུར་བའི་ལམ་ཤེས་པ་ཉིད་ཀྱིས་བསྡུས་པ་ཐེག་ཆེན་གྱི་མཐོང་བའི་ལམ་སྐད་ཅིག་མ་བཅུ་དྲུག་ཏུ་ཕྱེ་བའི་བཟོད་པ་བརྒྱད་གྱི་ངོ་བོ་ཆོས་བཟོད་བར་ཆད་མེད་ལམ་ལ་བརྟེན་ནས་གནས་པའི་སེམས་དཔའ་ཆོས་ཅན། ཁྱོད་ལ་འབྲས་བུ་དང་པོ་ལ་ཞུགས་པའི་མིང་ཅན་རྣམ་པ་གཉིས་ཡོད་དེ། ཁྱོད་ལ་དེའི་མིང་ཅན་དབང་རྟུལ་དད་པ་དང་། དབང་རྣོན་ཆོས་ཀྱི་རྗེས་སུ་འབྲང་བའི་བྱེ་བྲག་གིས་གཉིས་སུ་ཡོད་པའི་
ཕྱིར། གཉིས་པ་རྒྱུན་ཞུགས་འབྲས་གནས་ཙམ་པོ་བའི་མིང་ཅན་ནི། རྗེས་འབྲང་གཉིས་བཤད་ཟིན་པ་དེའི་འོག་ཏུ་ཤེས་པ་བརྒྱད་ཀྱི་བདག་ཉིད་ཐེག་ཆེན་གྱི་མཐོང་ལམ་རྣམ་གྲོལ་ལམ་ལ་གནས་པའི་གང་ཟག་དེ་ཆོས་ཅན། ཁྱོད་ཉོན་སྒྲིབ་སྤངས་པའི་མྱང་འདས་ཐོབ་པར་བྱེད་པའི་ལམ་གྱི་རྒྱུན་དུ་ཞུགས་པ་ཡིན་ཏེ། ཁྱོད་མཐོང་བས་སྤང་བར་བྱ་བ་ཀུན་སྦྱོར་གསུམ་ཟད་པར་སྤངས་པའི་སེམས་དཔའ་ཡིན་པའི་ཕྱིར། གསུམ་པ་རིགས་སྐྱེ་ནི། བཤད་མ་ཐག་པ་དེའི་འོག་ཏུ་བྱང་སེམས་དེ་ཉིད་ཆོས་ཅན། སྔ་མ་ལས་གཞན་པ་རྣམ་པ་གཉིས་ཡོད་པའི་ཕྱིར། ཁྱོད་ལ་འདོད་པའི་ལྷ་དང་མིའི་རིགས་ནས་རིགས་སུ་སྐྱེ་བ་ཉིད་ཀྱིས་གཉིས་ཡོད་པའི་ཕྱིར། བཞི་པ་ནི། རིགས་སྐྱེ་གཉིས་བཤད་ཟིན་པ་དེའི་འོག་ཏུ་སྒོམ་སྤང་ཉོན་མོངས་དྲུག་པ་སྤངས་པའི་རྣམ་གྲོལ་ལམ་ཐོབ་ཕྱིར་དུ་བརྩོན་པའི་བྱང་ཆུབ་སེམས་དཔའ་སྒོམ་ལམ་པ་དབང་པོ་རྟུལ་པོ་དང་རྣོན་པོ་དད་པ་དང་མཐོང་བས་ཐོབ་པ་དག་ཆོས་ཅན། ཁྱོད་འདིར་བསྟན་དགེ་འདུན་ཉི་ཤུའི་གྲངས་འཛིན་པའི་གཅིག་ཁོ་ན་ཡིན་ཏེ། ཁྱོད་འདིར་བསྟན་དགེ་འདུན་ཉི་ཤུའི་གྲངས་འདྲེན་པའི་ཚེ་འབྲས་བུ་གཉིས་པ་ལ་ཞུགས་པ་ཞེས་པའི་མིང་ཅན་གཅིག་ཏུ་འདྲེན་པའི་ཕྱིར། ལྔ་པ་ནི། དད་ཐོབ་གཉིས་བཤད་པ་དེའི་འོག་ཏུ། དེ་སྤངས་པའི་རྣམ་གྲོལ་ལམ་ལ་གནས་པའི་བྱང་སེམས་དེ་ཉིད་ཆོས་ཅན། ཁྱོད་ལ་འདོད་པར་ལན་ཅིག་ཕྱིར་འོང་བ་ཞེས་བྱ་བ་ཡིན་ཏེ། ཁྱོད་འདོད་ཉོན་དྲུག་པ་སྤངས་པའི་རྣམ་གྲོལ་ལམ་ལ་གནས་པའི་དམན་ལམ་སྔོན་མ་སོང་གི་བྱང་སེམས་ཡིན་པའི་ཕྱིར། དྲུག་པ་ནི། རྒྱུན་ཞུགས་ཙམ་པོ་བ་བཤད་ཟིན་པ་དེའི་འོག་ཏུ་ཕྱིར་འོང་གི་མིང་ཅན་དེ་ཉིད་ཆོས་ཅན། ཁྱོད་སྔ་མ་ལས་གཞན་བར་ཆད་གཅིག་པའི་མིང་ཅན་ཡིན་ཏེ། ཉོན་སྒྲིབ་སྤངས་པའི་རྣམ་གྲོལ་ལམ་ཐོབ་པ་ལ་སྒོམ་སྤང་ལྷག་མ་གཅིག་ལུས་པའི་དམན་ལམ་སྔོན་མ་སོང་གི་བྱང་སེམས་
ཡིན་པའི་ཕྱིར། བདུན་པ་ནི། ཚེ་གཅིག་བར་ཆད་གཅིག་པའི་མིང་ཅན་གྱི་བྱང་སེམས་བཤད་ཟིན་པ་དེའི་འོག་ཏུ་འདོད་པའི་སྒོམ་སྤང་དགུ་པ་སྤངས་པའི་རྣམ་གྲོལ་ལམ་ཐོབ་ཕྱིར་དུ་བརྩོན་པའི་སེམས་དཔའ་སྒོམ་ལམ་པ་སྔ་མ་བཞིན་དུ་དད་པ་དང་མཐོང་བས་ཐོབ་པ་ནི་ཆོས་ཅན། ཁྱོད་ཉི་ཤུའི་གྲངས་འཛིན་གཅིག་ཏུ་བགྲང་སྟེ། འབྲས་བུ་གསུམ་པ་ལ་ཞུགས་པ་ཞེས་པའི་མིང་ཅན་གཅིག་གི་སེམས་དཔའ་ཡིན་པའི་ཕྱིར། བརྒྱད་པ་ནི། ཕྱིར་འོང་ཞུགས་པའི་མིང་ཅན་གྱི་བྱང་སེམས་བཤད་ཟིན་པ་དེའི་འོག་ཏུ་ཕྱིར་མི་འོང་བ་ཞེས་རྣམ་པར་བཞག་པ་ཆོས་ཅན། ཁྱོད་ལ་བཞི་ཡོད་དེ། ཁྱོད་ལ་གཟུགས་ཀྱི་བར་སྲིད་ཀྱི་རྟེན་ལ་ཉོན་སྒྲིབ་ཅི་རིགས་སྤངས་པའི་རྣམ་གྲོལ་ལམ་ཐོབ་པ་བར་མ་དོར་འདའ་བ་དང་། གཟུགས་སུ་སྐྱེས་ནས་འདའ་བ་དང་། འབད་རྩོལ་གྱི་མངོན་པར་འདུ་བྱེད་པ་དང་བཅས་པ་དང་། མངོན་པར་འདུ་བྱེད་པ་མེད་པར་ཉོན་སྒྲིབ་ཅི་རིགས་སྤངས་པའི་རྣམ་གྲོལ་ལམ་ཐོབ་པ་ལ་ཡོངས་སུ་མྱ་ངན་ལས་འདའ་བ་ཞེས་བྱ་བ་བཞིར་ཡོད་པའི་ཕྱིར། དགུ་པ་ནི། འདའ་བ་གསུམ་གྱི་མིང་ཅན་བཤད་ཟིན་པ་དེའི་འོག་ཏུ་བྱང་ཆུབ་སེམས་དཔའ་འཕགས་པ་དེ་ཉིད་འོག་མིན་གྱི་རྟེན་ལ་ཉོན་སྒྲིབ་ཅི་རིགས་སྤངས་པའི་རྣམ་གྲོལ་ལམ་མངོན་དུ་བྱེད་པ་འོག་མིན་གྱི་མཐར་ཐུག་པར་འགྲོ་བ་སྟེ་དེ་ཆོས་ཅན། ཁྱོད་ལ་ཕྱིར་མི་འོང་གི་མིང་ཅན་སྐོར་ལ་བཅུ་ཡོད་པའི་ནང་ནས་འདའ་བ་བཞིའི་མིང་ཅན་བཞི། ཕྱིར་མི་འོང་ཞུགས་པའི་མིང་ཅན་གཅིག་དང་བཅས་པ་སྔར་བཤད་པའི་གྲངས་འཛིན་པའི་ལྔ་པོ་དེ་ལས་གཞན་རྣམ་པ་གསུམ་ཡོད་དེ། དང་པོར་ཚངས་རིས་སུ་སྐྱེ་བ་བླངས་ནས་གཞན་དོར་ཏེ། དེ་ནས་འོག་མིན་དུ་སྐྱེ་བ་བླངས་ཏེ་སྔར་གྱི་ལམ་
དེ་མངོན་དུ་བྱེད་པ་འཕར་བ་དང་། ཡང་ཚངས་རིས་ནས་གནས་གཙང་འོག་མ་གསུམ་པོ་གང་རུང་དུ་སྐྱེ་བ་བླངས་ནས། དེ་ནས་འོག་མིན་དུ་སྔར་གྱི་ལམ་མངོན་སུམ་དུ་བྱེད་པ་ཕྱེད་དུ་འཕར་བ་དང་། ཚངས་རིས་ནས་འོག་མིན་གྱི་བར་རིམ་གྱིས་བརྒྱུད་ནས་དེའི་རྟེན་ལ་སྔར་གྱི་ལམ་ཐོབ་པ་གནས་ཐམས་ཅད་དུ་འཆི་བ་ཉིད་ཀྱི་གོང་དུ་འཕོ་བ་གསུམ་ཡོད་པའི་ཕྱིར། བཅུ་པ་ནི། འཕར་བ་གསུམ་གྱི་མིང་ཅན་བཤད་པ་དེའི་འོག་ཏུ། བྱང་སེམས་དེ་ཉིད་གཟུགས་མེད་ཁམས་སུ་སྐྱེ་བ་དོན་དུ་མི་གཉེར་བས་སྲིད་པའི་རྩེ་མོའི་མཐར་ཐུག་པར་འགྲོ་བ་ཞེས་མིང་གིས་བཏགས་པ་དེ་ཆོས་ཅན། ཁྱོད་གཟུགས་ཀྱི་འདོད་ཆགས་དང་བྲལ་བའི་ཁྱད་པར་གཅིག་ལ་བཏགས་པ་ཡིན་ཏེ། ཁྱོད་གཟུགས་ཀྱི་ཉོན་མོངས་ཅི་རིགས་སྤངས་པའི་དམན་ལམ་སྔོན་མ་སོང་གི་བྱང་སེམས་ཡིན་པའི་ཕྱིར། བཅུ་གཅིག་པ་ནི། སྲིད་རྩེའི་ཉོན་མོངས་དང་ལྡན་པའི་བྱང་སེམས་ས་དྲུག་པ་བ་ཆོས་ཅན། ཁྱོད་ལ་དབྱེ་ན། ཕྱིར་མི་འོང་གི་སྐོར་ལ་བཅུ་ཡོད་པའི་དགེ་འདུན་ཉི་ཤུའི་གྲངས་འཛིན་ལ་གཏོགས་པ་ལ་འདའ་བ་བཞིའི་མིང་ཅན་བཞི། ཕྱིར་འོང་ཞུགས་པའི་མིང་ཅན་གཅིག །འཕར་བ་གསུམ་གྱི་མིང་ཅན་གསུམ་དང་བཅས་པ་སྔར་བཤད་ཟིན་པའི་བརྒྱད་པོ་དེ་ལས་གཞན་པ་གཉིས་ཡོད་དེ། མཐོང་བའི་ཆོས་ལ་ཞི་བ་སྟེ་ལས་ཉོན་གྱི་དབང་གིས་ཉིང་མཚམས་སྦྱོར་བའི་སྐྱེ་བ་ཟད་པ་ཐོབ་པ་དང་། རྣམ་ཐར་བརྒྱད། ཏིང་ངེ་འཛིན་གྱི་ལུས་ཀྱིས་མངོན་སུམ་དུ་བྱེད་པ་གཉིས་ཡོད་པའི་ཕྱིར། བཅུ་གཉིས་པ་ནི། མཐོང་ཆོས་ཞི་དང་། ལུས་མངོན་བྱེད་ཀྱི་མིང་ཅན་བཤད་ཟིན་པ་དེའི་འོག་ཏུ་ཉོན་སྒྲིབ་ཟད་པར་སྤངས་པའི་རྣམ་གྲོལ་ལམ་ཐོབ་ཕྱིར་དུ་བརྩོན་པའི་ས་བཅུ་པ་བ་དེ་ཆོས་ཅན། ཁྱོད་དགེ་འདུན་ཉི་ཤུའི་གྲངས་འཛིན་གཅིག་
ཡིན་ཏེ། ཁྱོད་དགྲ་བཅོམ་པ་ཉིད་ཀྱི་འབྲས་བུ་ལ་ཞུགས་པའི་མིང་ཅན་གྱི་བྱང་སེམས་ཡིན་པའི་ཕྱིར། བཅུ་གསུམ་པ་ནི། དགྲ་བཅོམ་བཞུགས་པའི་མིང་ཅན་བཤད་ཟིན་པ་དེའི་འོག་ཏུ། རང་སངས་རྒྱས་ཀྱི་མིང་ཅན་གྱི་བྱང་ཆུབ་སེམས་དཔའ་ཆོས་ཅན། ཁྱོད་འདིར་བསྟན་མཚོན་བྱ་དོན་གྱི་དགེ་འདུན་གྱི་གྲངས་འཛིན་ཉི་ཤུ་པ་ཡིན་ཏེ། ཁྱོད་སློབ་དཔོན་གཞན་གྱི་གདམས་ངག་ལ་མི་ལྟོས་པར་རྟེན་དེ་ལ་རྫོགས་པའི་བྱང་ཆུབ་མངོན་དུ་བྱེད་ནུས་ཀྱི་དམན་ལམ་སྔོན་མ་སོང་གི་བྱང་སེམས་ཡིན་པའི་ཕྱིར། སྨྲས་པ། འཕགས་ཡུལ་མཁས་པའི་གཞུང་གི་མན་ཤེལ་གསར་པའི་རྩིག་ངོས་ལ། །རྣམ་མང་ཚིག་དོན་ལངྐའི་བདག་པོའི་གཟུགས་བརྙན་ཤར་པ་ན། །མ་འདྲེས་བརྟགས་པའི་ཆོས་ཀུན་རྣམ་པར་འབྱེད་པའི་ཤེས་རབ་ཀྱི། །ཧ་ན་མནྠ་གཉིས་པ་འཛིན་མའི་ཁྱོན་འདིར་ཟློས་གར་བསྒྱུར། །ཞེས་བྱ་བ་ནི་སྐབས་ཀྱི་ཚིགས་སུ་བཅད་པའོ། །
ཐེག་ཆེན་གྱི་སྦྱོར་ལམ་བཤད་པ།
ཐེག་ཆེན་གྱི་སྦྱོར་ལམ་བཤད་པ། གཉིས་པ་གདམས་ངག་གི་དོན་བསྒོམས་པས་སྟོང་ཉིད་ལ་དམིགས་པའི་སྒོམ་བྱུང་སྐྱེ་བའི་ཐོག་མ་བཤད་པ་ལ། སྤྱི་དོན་དང་། ཡན་ལག་གི་དོན་གཉིས། གཉིས་པ་ལ། མདོར་བསྟན་པ། རྒྱས་པར་བཤད་པའོ། །དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། གདམས་ངག་བཤད་པས་དེའི་རྗེས་སུ་ཐེག་ཆེན་གྱི་མཐོང་ལམ་སྐྱེ་བ་དང་རྗེས་སུ་མཐུན་པའི་ལམ་ཐེག་ཆེན་གྱི་ངེས་པར་འབྱེད་པའི་ཡན་ལག་འཆད་རིགས་ཏེ། ཚོགས་ལམ་ལ་གནས་པས་ལས་དང་པོ་བ་སྔར་བཤད་པ་དེ་ལྟར་གདམས་ངག་ཐོབ་པས། དེ་དོན་བསྒོམས་པ་ལས་ངེས་པར་འབྱེད་
པའི་ཡན་ལག་འབྱུང་བས་དེ་ལྟར་བཤད་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་གཉིས། དང་པོ་ནི། བྱང་ཆུབ་སེམས་དཔའ་སྐྱོབ་པ་ཡི་དྲོད་སོགས་བཞི་ཆོས་ཅན། ཁྱོད་ཉན་ཐོས་དང་བསེ་རུ་རང་རྒྱལ་དང་བཅས་པའི་སྒྲས་བསྡུས་པ་ཚོགས་སྤྱོད་ཀྱི་རང་རྒྱལ་སྦྱོར་ལམ་དག་ལས་ཁྱད་པར་འཕགས་ཏེ། ཁྱོད་དེ་ལས་དམིགས་པ་དང་ནི་རྣམ་པ་དང་། རྒྱུ་དང་ཡོངས་སུ་འཛིན་པ་ཡིས་དང་། བདག་ཉིད་ཇི་ལྟ་བ་བཞིན་དུ་གཟུང་འཛིན་གྱི་རྣམ་པར་རྟོག་པ་བཞི་པོ་སྤང་བྱར་ལྡན་པ་ལ་བརྟེན་པ་དང་། ཆུང་ངུ་དང་འབྲིང་དང་ཆེན་པོ་རྣམས་ཀྱིས་ཁྱད་པར་དུ་འཕགས་པའི་ཕྱིར། གཉིས་པ་ལ། དགག་གཞག་སྤང་གསུམ་ལས། དང་པོ་ནི། ཁ་ཅིག་ན་རེ། ཚོགས་ལམ་རྫོགས་རྗེས་སུ་བྱུང་ཞིང་མཐོང་ལམ་མ་སྐྱེས་གོང་གི་མཁྱེན་པ་དེ་ཐེག་ཆེན་གྱི་སྦྱོར་ལམ་གྱི་མཚན་ཉིད་ཟེར་ན། ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་ཐེག་ཆེན་གྱི་སྦྱོར་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མཐོང་ལམ་མ་སྐྱེས་གོང་གི་མཁྱེན་པ་མ་ཡིན་པར་ཐལ། མཐོང་ལམ་སྔོན་དུ་སོང་བའི་མཁྱེན་པ་ཡིན་པའི་ཕྱིར། དེར་ཐལ། ཉན་ཐོས་ཀྱི་མཐོང་ལམ་སྔོན་དུ་སོང་བའི་མཁྱེན་པ་ཡིན་པའི་ཕྱིར་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །ཐེག་ཆེན་གྱི་ཐར་པ་ཆ་མཐུན་རྫོགས་རྗེས་སུ་བྱུང་བའི་འཇིག་རྟེན་པའི་ལམ་དེ་ཐེག་ཆེན་གྱི་སྦྱོར་ལམ་གྱི་མཚན་ཉིད་ཟེར་ན། ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་ཐེག་ཆེན་གྱི་སྦྱོར་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། འཇིག་རྟེན་པའི་ལམ་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། འཇིག་རྟེན་ལས་འདས་པའི་ལམ་ཡིན་པའི་ཕྱིར། དེར་ཐལ། འཕགས་རྒྱུད་ཀྱི་མཁྱེན་པ་ཡིན་ཕྱིར། གཞན་ཡང་། ཐེག་ཆེན་གྱི་ཐར་པ་ཆ་མཐུན་གྱི་རྒྱུར་གྱུར་པའི་ཐེག་ཆེན་
གྱི་སྦྱོར་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེའི་ཕྱིར་ལོགས་སུ་བྱུང་བར་ཐལ། འདོད་པའི་ཕྱིར། འདོད་མི་ནུས་སོ། ཁ་ཅིག །བསྒོམས་བྱུང་གཙོ་བོར་གྱུར་པའི་ཐེག་ཆེན་གྱི་དོན་མངོན་རྟོགས་དེ། ཐེག་ཆེན་སྦྱོར་ལམ་གྱི་མཚན་ཉིད་ཟེར་ན། ཐེག་ཆེན་གྱི་སྦྱོར་ལམ་གྱིས་བསྡུས་པའི་ཐོས་བསམ་གྱིས་ཤེས་རབ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མ་ཡིན་པར་ཐལ། ཆོས་ཅན་དེ་ཡིན་པའི་ཕྱིར། ཁ་ཅིག །རང་དང་རྒྱུད་གཅིག་ཏུ་གྱུར་པའི་ཚོགས་ལམ་རྫོགས་རྗེས་སུ་བྱུང་ཞིང་། རང་དང་རྒྱུད་གཅིག་ཏུ་གྱུར་པའི་མཐོང་ལམ་མ་སྐྱེས་གོང་གི་མཁྱེན་པ་དེ་ཐེག་ཆེན་གྱི་སྦྱོར་ལམ་གྱི་མཚན་ཉིད་ཟེར་ན། རང་རྒྱལ་དགྲ་བཅོམ་པའི་རྟོགས་པ་སྔོན་དུ་སོང་བའི་བྱང་སེམས་ཀྱི་སྦྱོར་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། རང་དང་རྒྱུད་གཅིག་ཏུ་གྱུར་པའི་རང་རྒྱལ་གྱི་མཐོང་ལམ་ཐོབ་པའི་མཁྱེན་པ་ཡིན་པའི་ཕྱིར། རོང་ཊཱིཀ་པ་ན་རེ། ཐེག་ཆེན་གྱི་ཐར་པ་ཆ་མཐུན་རྫོགས་རྗེས་སུ་བྱུང་ཞིང་། བདེན་པ་མངོན་པར་རྟོགས་པ་དང་རྗེས་སུ་མཐུན་པའི་འཇིག་རྟེན་པའི་སྒོམ་བྱུང་གཙོ་བོར་གྱུར་པའི་མཁྱེན་པ་དེ་ཐེག་ཆེན་གྱི་སྦྱོར་ལམ་གྱི་མཚན་ཉིད། ཐེག་ཆེན་གྱི་ངེས་འབྱེད་ཆ་མཐུན་དང་པོ་གང་ཞིག །གཟུང་བ་རང་བཞིན་མེད་པའི་དོན་ལ་གསལ་སྣང་དང་པོར་ཐོབ་པ་ཐེེག་ཆེན་གྱི་སྦྱོར་ལམ་དྲོད་ཀྱི་མཚན་ཉིད། གཉིས་པ་གང་ཞིག །དེའི་དོན་ལ་གསལ་སྣང་འཕེལ་བ་དེ་ཐེག་ཆེན་གྱི་སྦྱོར་ལམ་རྩེ་མོའི་མཚན་ཉིད། གསུམ་པ་གང་ཞིག །འཛིན་པ་རང་བཞིན་མེད་པའི་དོན་ལ་གསལ་སྣང་དང་པོར་ཐོབ་པ་དེ་ཐེག་ཆེན་གྱི་སྦྱོར་ལམ་བཟོད་པའི་མཚན་ཉིད། དེ་གང་ཞིག །དེའི་དོན་ལ་གསལ་སྣང་འཕེལ་བ་
དེ་ཐེག་ཆེན་གྱི་སྦྱོར་ལམ་ཆོས་མཆོག་གི་མཚན་ཉིད་ཟེར་ན། བྱང་སེམས་སྦྱོར་ལམ་པའི་རྒྱུད་ཀྱི་ཐོས་པའི་ཤེས་རབ་ཆོས་ཅན། མཚན་ཉིད་དང་པོ་དེར་ཐལ། མཚོན་བྱ་དེའི་ཕྱིར། དེར་ཐལ། བྱང་སེམས་ཚོགས་ལམ་པའི་རྒྱུད་ཀྱི་ཐོས་པའི་ཤེས་རབ་དེ་བྱང་སེམས་ཀྱི་ཚོགས་ལམ་གང་ཞིག་མཚུངས་པའི་ཕྱིར། དང་པོ་དེར་ཐལ། ཀུན་ལས་བཏུས་ལས། ཚོགས་ཀྱི་ལམ་གང་ཞེ་ན། སོ་སོ་སྐྱེ་བོའི་ཚུལ་ཁྲིམས་དང་། དབང་པོའི་སྒོ་སྡོམ་པ་དང་། ཟས་ཀྱི་ཚོད་རིག་པ་དང་། ནམ་གྱི་ཆ་སྟོད་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་དང་། ཡང་རྒྱུར་གྱུར་པའི་དགེ་བ་གཞན་དག་དང་། ཐོས་པ་དང་། བསམས་པ་དང་། བསྒོམས་པ་ལས་བྱུང་བའི་ཤེས་རབ་དག་ཀྱང་རུང་སྟེ། ཞེས་གསུངས་པའི་ཕྱིར། གཉིས་པ་དེར་ཐལ། ཀུན་ལས་བཏུས་ལས། ཚོགས་ཀྱི་ལམ་གང་ཡིན་པ། སྦྱོར་བའི་ལམ་ཡང་དེ་ཡིན་ནོ། །ཞེས་གསུངས་པའི་ཕྱིར། གཞན་ཡང་། བྱང་སེམས་ཀྱི་སྦྱོར་ལམ་ཡིན་ན། སྟོང་ཉིད་རྟོགས་པའི་མཁྱེན་པ་ཡིན་པས་ཁྱབ་པར་ཐལ། མཚན་ཉིད་ཕྱི་མ་བཞི་འཐད་པའི་ཕྱིར། འདོད་ན། དམན་ལམ་སྔོན་མ་སོང་གི་བྱང་སེམས་སྦྱོར་ལམ་པའི་རྒྱུད་ཀྱི་གཞན་སེམས་ཤེས་པའི་མངོན་ཤེས་ཆོས་ཅན། དེར་ཐལ། དེའི་ཕྱིར། འདོད་ན། དེས་སྟོང་ཉིད་མངོན་སུམ་དུ་རྟོགས་པར་ཐལ། རྟོགས་པ་ནི་གང་ཞིག །དོན་སྤྱིའི་ཚུལ་གྱིས་མ་རྟོགས་པའི་ཕྱིར། ཕྱི་མ་དེར་ཐལ། མངོན་སུམ་ཡིན་པའི་ཕྱིར། འདོད་ན། དམན་ལམ་སྔོན་མ་སོང་གི་བྱང་སེམས་སྦྱོར་ལམ་པ་དེས་སྟོང་ཉིད་མངོན་སུམ་དུ་རྟོགས་པར་ཐལ། འདོད་པའི་ཕྱིར། འདོད་མི་ནུས་སོ། །ཁ་ཅིག །དམན་ལམ་སྔོན་མ་སོང་གི་བྱང་སེམས་སྦྱོར་ལམ་པའི་རྒྱུད་ཀྱི་ཆོས་ཉིད་ལ་རྩེ་གཅིག་ཏུ་མཉམ་པར་བཞག་པའི་མཉམ་གཞག་ཡེ་ཤེས་དེ་ཆོས་ཉིད་ལ་མངོན་སུམ་ཡིན་ཟེར་ན། དེ་འདྲའི་བྱང་སེམས་སྦྱོར་ལམ་པ་དེ་
ཆོས་ཉིད་མངོན་སུམ་དུ་རྟོགས་པའི་གང་ཟག་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། དེ་ཆོས་ཅན། འཕགས་པ་ཡིན་པར་ཐལ་ལོ། །གཞན་ཡང་། དེ་མི་འཐད་པར་ཐལ། དེ་ཆོས་ཉིད་ལ་རྟོག་པ་དཔྱད་ཤེས་ཡིན་པའི་ཕྱིར། དེར་ཐལ། དེ་རྟོག་པ་དཔྱད་ཤེས་ཡིན་པའི་ཕྱིར། དེར་ཐལ། དེ་རང་འདྲེན་བྱེད་ཀྱི་ཚད་མ་སྔ་མས་རྟོགས་ཟིན་བྱེད་པ་མ་ཉམས་པའི་དོན་ལ་རྟོགས་ཟིན་རྟོགས་པའི་རིག་པ་ཡིན་པའི་ཕྱིར། ཁ་ཅིག །དམན་ལམ་སྔོན་མ་སོང་གི་ཆོས་ཉིད་ལ་རྩེ་གཅིག་ཏུ་མཉམ་པར་བཞག་པའི་བྱང་སེམས་ཀྱི་སྦྱོར་ལམ་དེ་ཆོས་ཉིད་ལ་རྗེས་དཔག་ཡིན་ཟེར་ན། དེ་འདྲའི་མཉམ་གཞག་ཡེ་ཤེས་ཆོས་ཅན། བསམ་བྱུང་གི་རིག་པ་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། སྒོམ་བྱུང་གི་རིག་པ་ཡིན་པའི་ཕྱིར། ཆོས་ཅན་དེ་ཡིན་པའི་ཕྱིར། ཁ་ཅིག །སྦྱོར་ལམ་དེ་དཔྱད་ཤེས་མ་ཡིན་ཟེར་ན། མི་འཐད་པར་ཐལ། དེ་ཚད་ལྡན་གྱི་བློ་གང་ཞིག །སྣང་ལ་མ་ངེས་པ་མ་ཡིན། ལོག་ཤེས་ཐེ་ཚོམ་ཡིད་དཔྱོད་སོགས་མ་ཡིན་པའི་ཕྱིར། དང་པོ་དེར་ཐལ། དེ་ཚད་མ་མ་ཡིན་པའི་ཕྱིར། གཉིས་པ་དེར་ཐལ། མངོན་སུམ་མ་ཡིན་པའི་ཕྱིར། ཁྱབ་པ་ཡོད་དེ། མདོ་སྡེ་པའི་ལུགས་ལ། སྣང་ལ་མ་ངེས་པའི་བློ་ཡིན་ན་རྟོག་མེད་མ་འཁྲུལ་བའི་ཤེས་པ་ཡིན་དགོས་པའི་ཕྱིར། དེར་ཐལ། དེ་ཡིན་ན་རྟོག་མེད་ཀྱི་ཤེས་པ་ཡིན་དགོས་པ་གང་ཞིག །རྟོག་མེད་འཁྲུལ་ཤེས་མ་ཡིན་དགོས་པའི་ཕྱིར། དང་པོ་དེར་ཐལ། དེ་ཡིན་ན་རྟོག་པ་མ་ཡིན་དགོས་པའི་ཕྱིར། དེར་ཐལ། རྟོག་པ་དོན་མཐུན་དང་། རྟོག་པ་ལོག་ཤེས་གང་ཡང་མ་ཡིན་དགོས་པའི་ཕྱིར། རྩ་རྟགས་གཉིས་པ་དེར་ཐལ། དེ་ཡིན་ན་རྟོག་མེད་ལོག་ཤེས་མ་ཡིན་དགོས་པའི་ཕྱིར། ཁ་ཅིག །ཐོས་པའི་ཤེས་རབ་ཡིན་ན། མིང་རྐྱང་
པ་ལ་དམིགས་པས་ཁྱབ། བསམ་བྱུང་གི་ཤེས་རབ་ཡིན་ན། མིང་དོན་གཉིས་ཀ་ལ་དམིགས་པས་ཁྱབ། སྒོམ་བྱུང་གི་ཤེས་རབ་ཡིན་ན་དོན་རྐྱང་པ་ལ་དམིགས་པས་ཁྱབ་སྟེ། མཛོད་ལས། མིང་དང་གཉིས་ཀ་དོན་ཡུལ་ཅན། ཞེས་གསུངས་པའི་ཕྱིར་ན། སངས་འཕགས་ཀྱི་རྒྱུད་ཀྱི་སྒོམ་བྱུང་གི་ཤེས་རབ་ཆོས་ཅན། དོན་རྐྱང་པ་ལ་དམིགས་པར་ཐལ། སྒོམ་བྱུང་གི་ཤེས་རབ་ཡིན་པའི་ཕྱིར། འདོད་མི་ནུས་ཏེ། ཁྱོད་ཀྱིས་ཤེས་བྱ་ཐམས་ཅད་མངོན་སུམ་དུ་རྟོགས་པའི་ཕྱིར། མཛོད་ཀྱི་ལུང་དེ་ནི་བྱེ་བྲག་སྨྲ་བའི་རྟོགས་བཏགས་ཏེ། སྐབས་འདིར་ཁས་མི་ལེན་པ་གསེར་འཕྲེང་ལས་བཤད་དོ། །ཁ་ཅིག །རྒྱུད་གཅིག་པའི་དབང་དུ་བྱས་ན། དང་པོར་སྐྱེས་པའི་སྦྱོར་ལམ་ཆུང་ངུ་། བར་དུ་སྐྱེས་པའི་སྦྱོར་ལམ་འབྲིང་། ཐ་མར་སྐྱེས་པའི་སྦྱོར་ལམ་དེ་ཆེན་པོ་ཡིན་ལ། རྒྱུད་ཐ་དད་པའི་དབང་དུ་བྱས་ན། དབང་རྟུལ་གྱི་སྦྱོར་ལམ་དེ་ཆུང་ངུ་། དབང་འབྲིང་གི་དེ་འབྲིང་། དབང་རྣོན་གྱི་དེ་ཆེན་པོ་ཡིན་ལ། རྒྱུད་ཐ་དད་པའི་དབང་དུ་བྱས་པའི་ཆུང་ངུ་སོགས་ལ་རིམ་པ་བཞིན་དུ་སྦྱོར་ལམ་ཆུང་ངུ་སོགས་ཀྱིས་རིམ་གྱིས་ཁྱབ་ཟེར་ན། མངོན་རྟོགས་རྒྱན་གྱི་གདུལ་བྱའི་རྒྱུད་ལ། དང་པོར་སྐྱེས་པའི་སྦྱོར་ལམ་ཆོས་ཅན། ཁྱོད་སྦྱོར་ལམ་ཆེན་པོ་ཡིན་པར་ཐལ། ཁྱོད་དབང་རྣོན་གྱི་རྒྱུད་ཀྱི་སྦྱོར་ལམ་ཡིན་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། མ་ཡིན་པར་ཐལ། ཁྱོད་སྦྱོར་ལམ་ཆུང་ངུ་ཡིན་པའི་ཕྱིར། དེར་ཐལ། དང་པོར་སྐྱེས་པའི་སྦྱོར་ལམ་ཡིན་པའི་ཕྱིར། ཁ་ཅིག །སྔར་གྱི་དེའི་སྟེང་དུ། དང་པོར་སྐྱེས་པའི་སྦྱོར་ལམ་ཆུང་ངུ་སོགས་རིམ་བཞིན་སྦྱོར་ལམ་ཆུང་ངུ་སོགས་མ་ཡིན་དགོས་ཟེར་ན། དག་ས་ལ་གནས་པའི་སེམས་དཔའི་རྒྱུད་ཀྱི་ཐེག་ཆེན་གྱི་སྒོམ་ལམ་ཡིན་ན། ཐེག་ཆེན་གྱི་སྒོམ་ལམ་ཆེན་པོ་ཡིན་
པས་མ་ཁྱབ་པར་ཐལ། དེ་འདྲའི་སེམས་དཔའ་དབང་རྟུལ་གྱི་ཐེག་ཆེན་གྱི་སྒོམ་ལམ་དེ་ཐེག་ཆེན་གྱི་སྒོམ་ལམ་ཆུང་ངུ་ཡིན་པའི་ཕྱིར། དེར་ཐལ། བྱང་སེམས་སྦྱོར་ལམ་པ་དབང་རྟུལ་གྱི་རྒྱུད་ཀྱི་ཐེག་ཆེན་གྱི་སྦྱོར་ལམ་དེ་ཐེག་ཆེན་གྱི་སྦྱོར་ལམ་ཆུང་ངུ་ཡིན་པའི་ཕྱིར། རྟགས་ཁས། འདོད་མི་ནུས་ཏེ། རང་གི་དངོས་གཉེན་དུ་གྱུར་པའི་དག་སའི་ཡེ་ཤེས་ཀྱི་སྤང་བྱ་ཡིན་ན། ཐེག་ཆེན་གྱི་སྒོམ་སྤང་ཆུང་ངུ་ཡིན་དགོས་པའི་ཕྱིར། ཁྱབ་སྟེ། སྤང་གཉེན་གྱི་རྣམ་གཞག་འཆད་པ་ན། དྲི་མ་ཕྲ་མོ་སེལ་བ་ལ། བཙོ་བླག་མཁན་ཆེ་ཐང་དུ་འབད་པའི་དཔེ་དང་མཚུངས་པར་གསུངས་པའི་ཕྱིར། ཁོ་ན་རེ། ཐེག་ཆེན་གྱི་སྦྱོར་ལམ་དྲོད་ལ་གནས་པའི་སེམས་དཔའ་དབང་རྣོན་གྱི་རྒྱུད་ཀྱི་སྦྱོར་ལམ་ཆོས་ཅན། ཁྱོད་ཐེག་ཆེན་གྱི་སྦྱོར་ལམ་ཆེན་པོ་ཡིན་པར་ཐལ། བྱང་སེམས་དབང་རྣོན་གྱི་རྒྱུད་ཀྱི་སྦྱོར་ལམ་ལ་སྦྱོར་ལམ་ཆེན་པོར་བྱས་པའི་ཐེག་ཆེན་གྱི་སྦྱོར་ལམ་ཆེན་པོ་ཡིན་པའི་ཕྱིར་ན་མ་ཁྱབ། འོ་ན། དེ་ཆོས་ཅན། ཐེག་ཆེན་གྱི་སྦྱོར་ལམ་ཆུང་ངུ་ཡིན་པར་ཐལ། དང་པོར་སྐྱེས་པའི་ཐེག་ཆེན་གྱི་སྦྱོར་ལམ་ལ་སྦྱོར་ལམ་ཆུང་ངུར་བྱས་པའི་སྦྱོར་ལམ་ཡིན་པའི་ཕྱིར། ཁྱབ་པ་ཁས། རོང་ཊཱིཀ་པ་ན་རེ། ཐེག་ཆེན་གྱི་སྦྱོར་ལམ་ལ་རང་སྟོབས་དང་གཞན་སྟོབས་གཉིས་ཀྱིས་བསྐྱེད་པའི་རྟེན་ལས། དང་པོའི་དབང་དུ་བྱས་ན་གླིང་གསུམ་གྱི་མི་དང་། འདོད་ལྷའི་རྟེན་ལ་དངོས་སུ་གསར་དུ་སྐྱེ་བ་ཡོད། འགྲོ་བ་གཞན་གྱི་རྟེན་ལ་དེ་མེད་དེ། ངན་སོང་བ་རྣམས་རྣམ་སྨིན་གྱི་སྒྲིབ་པ་ཤས་ཆེ། ཁམས་གོང་མ་བ་རྣམས་སྙོམས་འཇུག་གི་བདེ་བ་ལ་ཆགས་པས་འཁོར་བར་སྐྱོ་བ་དང་མི་ལྡན་པའི་ཕྱིར། གཞན་སྟོབས་ཀྱི་དབང་དུ་བྱས་
ན། ངན་སོང་དང་། ཁམས་གོང་གི་རྟེན་ལ་གསར་དུ་སྐྱེ་བ་ཡོད་དེ། དེའི་རྟེན་ལ་མཐོང་ལམ་གསར་དུ་སྐྱེ་བ་ཡོད་པར་ཟ་མ་ཏོག་བཀོད་པའི་མདོ་ལས་གསུངས་པ་གང་ཞིག །མཚུངས་པའི་ཕྱིར། ཟེར་ན། ངན་སོང་བའི་རྟེན་ལ། དེ་གཞན་སྟོབས་ཀྱིས་གསར་དུ་སྐྱེ་བ་མེད་པར་ཐལ། ངན་སོང་བ་རྣམས་རྣམ་སྨིན་གྱི་སྒྲིབ་པ་ཆེན་པོ་དང་ལྡན་པའི་ཕྱིར། ཁྱབ་པ་རྣམས་དོན་གྱི་དངོས། གཞན་ཡང་། སྦྱོར་ལམ་བཟོད་པ་ལ་གནས་པའི་སེམས་དཔའ་ལས་ཉོན་གྱིས་ངན་སོང་དུ་སྐྱེ་བ་ལེན་པ་ཡོད་པར་ཐལ། ངན་སོང་གི་རྟེན་ལ་ཐེག་ཆེན་གྱི་མཐོང་ལམ་གསར་དུ་སྐྱེ་བ་ཡོད་པའི་ཕྱིར། འདོད་ན། ངན་འགྲོ་མེད་པས་ཆོས་ཆེན་པོ་ལ་བཟོད་པའི་ཕྱིར། བཟོད་པར་གྱུར་པ། ཞེས་གསུངས་པ་མི་འཐད་པར་ཐལ། འདོད་པའི་ཕྱིར། ཁ་ཅིག །ཐེག་ཆེན་གྱི་སྦྱོར་ལམ་དངོས་སུ་གསར་དུ་སྐྱེ་བའི་སེམས་རྟེན་དུ་གྱུར་པའི་བསམ་གཏན་ས་དྲུག་ཡོད་ཟེར་ན། མི་འཐད་པར་ཐལ། ཐེག་ཆེན་གྱི་སྦྱོར་ལམ་གྱི་སེམས་རྟེན་ཡིན་ན། བསམ་གཏན་དང་པོའི་དངོས་གཞིའི་སྙོམས་འཇུག་ཡིན་དགོས་པའི་ཕྱིར། དེར་ཐལ། བྱང་སེམས་ཀྱི་ཚོགས་ལམ་ཆེན་པོ་ལ་གནས་པའི་གང་ཟག་ཡིན་ན། བསམ་གཏན་དང་པོའི་དངོས་གཞི་ཐོབ་པས་ཁྱབ་པ་གང་ཞིག །ལམ་སླ་བ་དེ་ལྟ་བུ་ཐོབ་ནས། ལམ་དཀའ་བ་བསམ་གཏན་གྱི་ཉེར་བསྡོགས་སོགས་ལ་བརྟེན་ནས་སྐྱེད་པ་མི་འཐད་པའི་ཕྱིར། དང་པོ་དེར་ཐལ། དེ་ཡིན་ཆོས་རྒྱུན་གྱི་ཏིང་འཛིན་ཐོབ་པས་ཁྱབ་པའི་ཕྱིར། ཁ་ཅིག །ཆོས་བརྗོད་ཀྱི་སྒྲ་དང་། ཆོས་ཅན་བརྗོད་པའི་སྒྲ་གཉིས་འགལ་ཟེར་ན། སྒྲ་མི་རྟག་ཅེས་པའི་ངག་ཆོས་ཅན། ཆོས་བརྗོད་ཀྱི་སྒྲ་མ་ཡིན་པར་ཐལ། ཆོས་ཅན་བརྗོད་པའི་སྒྲ་ཡིན་པའི་ཕྱིར། དེར་ཐལ། སྒྲ་ལ་ལྟོས་ཏེ་ཆོས་ཅན་བརྗོད་པའི་སྒྲ་ཡིན་པའི་ཕྱིར། དེར་ཐལ། སྒྲ་མི་རྟག་པའི་ཁྱད་གཞི་ལྟ་བུར་བློ་ཡུལ་དུ་
གོ་བར་བྱེད་པའི་མཉན་བྱ་ཡིན་པའི་ཕྱིར། འདོད་ན། མ་ཡིན་པར་ཐལ། མི་རྟག་པ་ལ་ལྟོས་ཏེ་ཆོས་བརྗོད་ཀྱི་སྒྲ་ཡིན་པའི་ཕྱིར། དེར་ཐལ། མི་རྟག་པ་སྒྲའི་ཁྱད་གཞི་ཁྱད་ཆོས་གཉིས་ཀྱི་ནང་ནས། ཁྱད་ཆོས་ལྟ་བུར་བློ་ཡུལ་དུ་གོ་བར་བྱེད་པའི་མཉན་བྱ་ཡིན་པའི་ཕྱིར། ཁ་ཅིག །གཞི་གཅིག་ལ་ལྟོས་ཏེ། དེ་གཉིས་འགལ་ཟེར་ན། མི་འཐད་པར་ཐལ། བྱས་པ་བྱས་ཞེས་པའི་ངག་དེ་བྱས་པ་ལ་ལྟོས་ཏེ་ཆོས་ཅན་བརྗོད་པའི་ངག་གང་ཞིག །དེ་ལ་ལྟོས་ཏེ་ཆོས་བརྗོད་ཀྱི་སྒྲ་ཡང་ཡིན་པའི་ཕྱིར། དང་པོ་དེར་ཐལ། བྱས་པ་ཁྱད་གཞི་ལྟ་བུར་གོ་བར་བྱེད་པའི་མཉན་བྱ་ཡིན་པའི་ཕྱིར། དེར་ཐལ། བྱས་པ་དེ་བྱས་པ་བྱས་པར་སྒྲུབ་པའི་ཤེས་འདོད་ཆོས་ཅན་ཡིན་པའི་ཕྱིར། རྟགས་གཉིས་པ་དེར་ཐལ། དེ་བྱས་པ་ཁྱད་ཆོས་ལྟ་བུར་གོ་བར་བྱེད་པའི་མཉན་བྱ་ཡིན་པའི་ཕྱིར། དེར་ཐལ། བྱས་པ་དེ་བྱས་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཡིན་པའི་ཕྱིར། གཉིས་པ་རང་ལུགས་ནི། རང་གི་རྒྱུར་གྱུར་པའི་ཐེག་ཆེན་གྱི་ཐར་པ་ཆ་མཐུན་རྫོགས་རྗེས་སུ་བྱུང་བའི་ཐེག་ཆེན་གྱི་དོན་མངོན་རྟོགས་དེ། ཐེག་ཆེན་གྱི་སྦྱོར་ལམ་གྱི་མཚན་ཉིད། དེ་ལ་དབྱེ་ན། དྲོད། རྩེ་མོ། བཟོད་པ། ཆོས་མཆོག་བཞི། གསུམ་པ་རྩོད་པ་སྤོང་པ་ལ། ཁ་ཅིག་ན་རེ། བྱང་སེམས་ཀྱི་སྦྱོར་ལམ་གྱི་སྐབས་སུ་སྒོམ་བྱུང་གཙོ་བོར་གྱུར་པ་མ་ཡིན་པར་ཐལ། དེས་བསྡུས་པའི་ཐོས་བསམ་གྱིས་ཤེས་རབ་སྒོམ་བྱུང་གཙོ་བོར་གྱུར་པ་མ་ཡིན་པའི་ཕྱིར། ཟེར་ན་མ་ཁྱབ། འོ་ན། ཐེག་ཆེན་གྱི་ཚོགས་ལམ་གྱི་སྐབས་སུ་ཐོས་བསམ་གཙོ་བོར་གྱུར་པ་མ་ཡིན་པར་ཐལ། དེས་བསྡུས་པའི་སྒོམ་བྱུང་གི་ཤེས་རབ་དེ་ཐོས་བསམ་གཙོ་བོར་གྱུར་པ་མ་ཡིན་པའི་ཕྱིར། ཁྱབ་པ་ཁས། ཁ་ཅིག །ཁམས་གོང་མའི་
རྟེན་ལ་ཐེག་ཆེན་གྱི་སྦྱོར་ལམ་ཆོས་མཆོག་གསར་དུ་སྐྱེ་བ་ཡོད་པར་ཐལ། དེའི་རྟེན་ལ་དེ་བཟོད་པ་གསར་དུ་སྐྱེ་བ་ཡོད་པའི་ཕྱིར། དེར་ཐལ། དེའི་རྟེན་ལ་དེ་རྩེ་མོ་གསར་དུ་སྐྱེ་བ་ཡོད་པའི་ཕྱིར་ན་མ་ཁྱབ། དེར་ཐལ། རྣམ་བཤད་ལས། ཆོས་མཆོག་དངོས་སུ་སྐྱེ་བའི་རྟེན་མ་ཡིན་ཡང་། དྲོད་དང་རྩེ་མོ་གཟུགས་ཁམས་པ་འགའ་ཞིག་ལ་ཡང་སྐྱེ་བ་མངོན་ནོ། །ཞེས་གསུངས་པའི་ཕྱིར། ཁ་ཅིག །བྱས་པ་བྱས་པ་ཞེས་པའི་ངག་དེ། བྱས་པ་ལ་ལྟོས་ཏེ་ཁྱད་པར་གཞན་སྤོང་བའི་སྒྲ་ཡིན་པར་ཐལ། དེ་ལ་ལྟོས་ཏེ་ཆོས་བརྗོད་ཀྱི་སྒྲ་ཡིན་པའི་ཕྱིར། འདོད་ན། མ་ཡིན་པར་ཐལ། དེ་དེ་མི་སྤོང་བའི་སྒྲ་ཡིན་པའི་ཕྱིར། དེ་དེ་ལ་ལྟོས་ཏེ་ཆོས་ཅན་བརྗོད་པའི་སྒྲ་ཡིན་པའི་ཕྱིར་ཕྱིར། ཁྱབ་པ་ཡོད་དེ། འགྲེལ་པར། ཁྱད་པར་གཞན་སྤོང་བ་དང་མི་སྤོང་བ་མ་གཏོགས་པར་འདི་དག་ལ་དོན་གྱི་ཁྱད་པར་འགའ་ཡང་མེད་དོ། །ཞེས་གསུངས་པའི་ཕྱིར་ན་མ་ཁྱབ་སྟེ། སྒྲ་མི་རྟག་ཅེས་པའི་ངག་ལྟ་བུ་སྒྲ་ལ་ལྟོས་ཏེ་ཆོས་བརྗོད་ཀྱི་སྒྲ་ཡིན་ན། དེ་དེ་ལ་ལྟོས་དེ་ཁྱད་པར་གཞན་སྤོང་བའི་སྒྲ་ཡིན་དགོས། དེ་སྒྲ་ལ་ལྟོས་ཏེ་ཆོས་ཅན་བརྗོད་པའི་སྒྲ་ཡིན་ན། དེ་དེ་ལ་ལྟོས་ཏེ་ཁྱད་པར་གཞན་མི་སྤོང་བའི་སྒྲ་ཡིན་དགོས་པ་ལྟ་བུ་ལ་དགོངས་པའི་ཕྱིར། གསུམ་པ་འགྲེལ་པ་འཆད་པ་ལ། དམན་པའི་སྦྱོར་ལམ་ལས་ཁྱད་ཞུགས་པར་སྒྲུབ་པ་དང་། དམིགས་ཚུལ་བཅུ་གཉིས་བཞིར་བསྡུ་བའོ། །དང་པོ་ལ། ཁྱད་པར་འཕགས་ཚུལ་དང་། དེའི་རྒྱུ་མཚན་ནོ། །དང་པོ་ནི། བྱང་ཆུབ་སེམས་དཔའ་རྣམས་ཀྱི་ངེས་པར་འབྱེད་པའི་ཆ་དང་མཐུན་པ་བཞི་པོ་ཆོས་ཅན། ཉན་ཐོས་དང་ལ་སོགས་པས་རང་སངས་རྒྱས་རྣམས་ཀྱི་དྲོ་བ་ལ་སོགས་པ་སྦྱོར་ལམ་བཞི་ལས་ཁྱད་པར་དུ་འཕགས་པ་ཡིན་ཏེ། དེ་ལས་ཁྱད་ཆོས་དྲུག་གམ་ལྔས་ཁྱད་པར་དུ་འཕགས་པའི་ཕྱིར། ཐེག་ཆེན་གྱི་སྦྱོར་ལམ་ཆོས་ཅན། ཁྱོད་རྒྱུ་ཁྱད་པར་དུ་
འཕགས་པ་དང་ལྡན་ཏེ། ཐེག་ཆེན་གྱི་ལམ་འབྲས་བུ་དང་བཅས་པ་ལ་ཐོས་པ་དང་། ལ་སོགས་པ་བསམ་པ་དང་། སྒོམ་པ་རབ་ཀྱི་མཐར་ཕྱིན་པ་ཐོབ་པ། ཐར་པའི་ཆ་དང་མཐུན་པ། དད་པའི་ཡུལ་དུ་ཐེག་ཆེན་གྱི་ཆོས་ཀུན་རྫོབ་པ་ལ་སོགས་པས་དད་སོགས་ཡུལ་ལྔ་ལ་མཁས་པའི་དད་པ་ལ་སོགས་པའི་མཚན་ཉིད་ཀྱི་དགེ་བའི་རྩ་བའི་རང་སྟོབས་ཀྱིས་དྲངས་པས་དེའི་འོག་ཏུ་འབྱུང་བ་སྟེ་སྐྱེས་པའི་ཕྱིར། ཐེག་ཆེན་གྱི་སྦྱོར་ལམ་ཆོས་ཅན། ཁྱོད་འབྲས་བུ་ཁྱད་པར་ཅན་དང་ལྡན་ཏེ། བདེན་པ་བཞི་མངོན་སུམ་དུ་རྟོགས་པའི་ཐེག་ཆེན་གྱི་མཐོང་ལམ་སྐྱེ་བ་དང་རྗེས་སུ་མཐུན་པའི་ཉེ་བའི་རྒྱུ་ཡིན་པའི་ཕྱིར། དེ་ཆོས་ཅན། ཁྱོད་རང་གི་ངོ་བོ་ཁྱད་པར་ཅན་དང་ལྡན་ཏེ། ཁྱོད་ཡུལ་སྟོང་ཉིད་ལ་དམིགས་པའི་ཐེག་ཆེན་གྱི་འཇིག་རྟེན་པའི་བསྒོམས་པ་ལས་བྱུང་བ་གཙོ་བོར་གྱུར་པའི་སྐབས་ཀྱི་ལམ་ཡིན་པའི་ཕྱིར། དེ་ཆོས་ཅན། ཁྱོད་ལ་ངོ་བོའི་སྒོ་ནས་དབྱེ་ན་དུ་མར་ཡོད་དེ། སྟོང་ཉིད་ལ་དམིགས་པའི་དྲོ་བར་གྱུར་པ་ཞེས་བྱ་བའི་དགེ་བའི་རྩ་བ་དང་། དེའི་འོག་ཏུ་དེ་ཉིད་ལས་རབ་ཏུ་གྱུར་པ་རྩེ་མོར་གྱུར་པའི་ངེས་འབྱེད་ཡན་ལག་དང་། དེའི་འོག་ཏུ་སྟོང་པ་ཉིད་ལ་མི་སྐྲག་པའི་བཟོད་པ་དང་པོར་ཐོབ་པས་བཟོད་པར་གྱུར་པའི་ངེས་འབྱེད་ཡན་ལག་དང་། དེའི་འོག་ཏུ་འཇིག་རྟེན་པའི་ཆོས་ཀྱི་ནང་ནས་མཆོག་ཏུ་གྱུར་པ་ཆོས་མཆོག་ཆེན་པོའི་ཡེ་ཤེས་ཞེས་བྱ་བ་དང་བཞི་ཡོད་པའི་ཕྱིར། ཐེག་ཆེན་གྱི་སྦྱོར་ལམ་ཆོས་ཅན། ཁྱོད་ལ་གནས་སྐབས་ཀྱི་དབྱེ་བ་ཡོད་དེ། རྒྱུད་གཅིག་པའི་དབང་དུ་བྱས་ན་དང་པོར་སྐྱེས་པའི་སྦྱོར་ལམ་དེ་ཆུང་ངུ་དང་། ལ་སོགས་པ་བར་འབྲིང་། ཐ་མ་ཆེན་པོར་འཇོག་པ་སོགས་རིམ་གྱིས་སྐྱེ་བའི་དབྱེ་བས་ཁྱད་པར་འཕགས་པའི་ཕྱིར། དེ་ཆོས་ཅན། ཁྱོད་ལ་རྒྱུད་ཐ་དད་པའི་དབྱེ་བ་ཡོད་དེ། བྱང་ཆུབ་སེམས་དཔའ་དང་འབྲེལ་བའི་གང་ཟག་གི་བྱེ་བྲག་གིས་
ཏེ་ཁྱད་པར་གྱིས་དབང་པོ་རྟུལ་པོའི་རྒྱུད་ཀྱི་སྦྱོར་ལམ་དེ་ཆུང་ངུ་དང་། ལ་སོགས་པས་དབང་འབྲིང་གི་དེ་འབྲིང་དང་། དབང་རྣོན་གྱི་དེ་ཆེན་པོར་འཇོག་པའི་ཕྱིར། རྒྱུད་གཅིག་གི་དབང་དུ་བྱས་ན། ཐོག་མཐའ་བར་གསུམ་དུ་སྐྱེ་བ་ཆུང་ངུ་སོགས་སམ། ཅིག་ཤོས་ལྟར་ན་དབང་རྟུལ་སོགས་ཀྱི་ཁྱད་པར་གྱི་སྦྱོར་ལམ་ཆུང་འབྲིང་ཆེན་པོ་ནི་ཆོས་ཅན། ཁྱོད་ཐེག་དམན་གྱི་སྦྱོར་ལམ་ལས་ཁྱད་ཆོས་ལྔས་ཁྱད་པར་འཕགས་ཏེ། དམིགས་པ་དང་། རྣམ་པ་དང་། རྒྱུ་དང་། ཡོངས་འཛིན་དང་། རྣམ་རྟོག་སྤང་བྱར་ལྡན་པའི་སྒོ་ནས་ཁྱད་པར་དུ་འཕགས་པའི་ཕྱིར། ཐེག་ཆེན་གྱི་སྦྱོར་ལམ་ཆོས་ཅན། ཁྱོད་འོག་ནས་འཆད་པར་འགྱུར་བའི་དམིགས་པའི་ཁྱད་པར་གྱི་ངོ་བོ་ཉིད་བདེན་པ་བཞིའི་དངོས་པོ་མི་རྟག་པ་སོགས་བཅུ་དྲུག་གིས་ཁྱད་པར་དུ་བྱས་པ་ལ་དམིགས་པ་ཡིན་ཏེ། ཁྱོད་དེ་སྒྲོ་འདོགས་གཅོད་པའི་གཞིར་བཟུང་བའི་ཕྱིར། སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་ཐེག་ཆེན་གྱི་སྦྱོར་ལམ་ཆོས་ཅན། ཁྱོད་བདེན་པར་མངོན་པར་ཞེན་པ་མེད་པ་དང་། ལ་སོགས་པ་ལྷག་མོས་དང་། ཀུན་ཤེས་ཀྱི་རྣམ་པར་ཞུགས་པ་ཡིན་ཏེ། ཁྱོད་ཀྱིས་གཟུང་འཛིན་བདེན་པར་ཞེན་པའི་ཆོས་སུ་ལྟ་བའི་དངོས་ཀྱི་གཉེན་པོ་ཉིད་ཀྱིས་བདེན་མེད་དུ་དངོས་སུ་རྟོགས་པའི་ཕྱིར། ཐེག་ཆེན་གྱི་སྦྱོར་ལམ་ཆོས་ཅན། འབྲས་བུ་ཁྱད་པར་ཅན་གྱི་རྒྱུ་ནུས་པ་མཐུ་ཅན་ཡིན་པས་ཁྱད་པར་དུ་འཕགས་ཏེ། ཐེག་པ་གསུམ་ཆར་མངོན་སུམ་དུ་རྟོགས་པའི་མཐོང་ལམ་གྱི་རྒྱུའི་ངོ་བོ་ཁྱད་པར་ཅན་དུ་གྱུར་པའི་ཕྱིར། དེ་ཆོས་ཅན། རང་གི་བདག་རྐྱེན་དུ་གྱུར་པའི་ཡོངས་སུ་འཛིན་པ་ཁྱད་པར་ཅན་དང་ལྡན་པ་ཡིན་ཏེ། རང་གི་བདག་རྐྱེན་དགེ་བའི་བཤེས་གཉེན་ཁྱད་པར་ཅན་མཆོག་གི་སྤྲུལ་སྐུས་ཐེག་ཆེན་གྱི་ལམ་རྫོགས་པར་སྟོན་པའི་ཐབས་ལ་མཁས་པའི་མཚན་ཉིད་ཀྱིས་དངོས་སུ་རྗེས་སུ་བཟུང་བའི་ཕྱིར། དེ་ཆོས་ཅན།
ཁྱོད་རྩེ་སྦྱོར་གྱིས་བསྡུས་པའི་མཐོང་ལམ་དང་སྒོམ་ལམ་གྱི་སྤང་བར་བྱ་བ་གཟུང་བ་འཛིན་པའི་རྣམ་པར་རྟོག་པ་རྣམ་པ་བཞི་པོ་སྤང་བྱར་ལྡན་པས་ཁྱད་པར་དུ་བྱས་པ་ཡིན་ཏེ། དེ་བཞི་པོ་འོག་ནས་འཆད་པར་འགྱུར་བའི་ཚུལ་དང་། ཀུན་ནས་ཉོན་མོངས་བྱེད་དུ་འབྲེལ་པར་འབྱུང་བས་ཁྱད་པར་དུ་བྱས་པའི་ཕྱིར། གཉིས་པ་རྒྱུ་མཚན་ནི། ཐེག་ཆེན་གྱི་སྦྱོར་ལམ་དེ་ཉིད་ཆོས་ཅན། ཁྱོད་དམན་པའི་སྦྱོར་ལམ་ལས་ཁྱད་པར་དུ་འཕགས་པ་ཡིན་ཏེ། ཉན་རང་དེ་དག་གི་སྦྱོར་ལམ་དྲོ་བར་གྱུར་པ་ལ་སོགས་པའི་དགེ་བའི་རྩ་བ་ནི་ཉན་ཐོས་ཀྱི་ཐེག་པའི་ཚུལ་གྱི་རྣམ་གཞག་བྱེད་པའི་ཤིང་རྟ་ཆེན་པོའི་ལུགས་ལས། ཟག་བཅས་ཀྱི་བསྡུས་པའི་གཟུགས་སུ་རུང་བ་དང་ལ་སོགས་པ་ཉམས་མྱོང་དང་མཚན་འཛིན་སོགས་དང་། ལས་ཉོན་གྱིས་བསྡུས་པའི་སྡུག་ཀུན་དག་པ་བ་དང་། འགོག་ལམ་དག་པ་བའི་མཚན་ཉིད་ཀྱི་དངོས་པོའི་བདག་ཉིད་ཀྱི་བདེན་པ་བཞི་ལ་དམིགས་པ་དང་། གང་ཟག་གི་བདག་ཏུ་ལྟ་བའི་གཉེན་པོ་ཙམ་བྱེད་པ་ཉིད་གྱིས་མི་རྟག་པ་དང་ལ་སོགས་པས་སྡུག་བསྔལ་སྟོང་བདག་མེད་ཀྱི་རྣམ་པར་ཞུགས་པ་དང་། ཉན་ཐོས་རང་གི་ཐེག་པ་སྟེ་གང་ཟག་གི་བདག་མེད་མངོན་སུམ་དུ་རྟོགས་པའི་ཉན་ཐོས་ཀྱི་མཐོང་ལམ་དང་། གཉིས་སྟོང་མངོན་སུམ་དུ་རྟོགས་པའི་རང་རྒྱལ་གྱི་མཐོང་ལམ་ཁོ་ནའི་རྒྱུའི་ཆེད་དང་། ཐབས་ཤེས་རྫོགས་པར་སྟོན་པའི་སྒོ་ནས་ཡོངས་སུ་འཛིན་པ་དང་བྲལ་བ་དང་། གཟུང་འཛིན་གྱི་རྣམ་པར་རྟོག་པ་རྣམ་པ་བཞི་གཙོ་བོར་སྤོང་བའི་སྒོ་ནས་སྤང་གཉེན་དུ་མི་ལྡན་པར་འབྱུང་ངོ་ཞེས་འབྱུང་བའི་ཕྱིར། གཉིས་པ་དམིགས་ཚུལ་བཅུ་གཉིས་བཞིར་བསྡུས་པ་ལ། དངོས་དང་། རྣམ་པ་གཞན་གྱི་སྒོ་ནས་དམིགས་པ། དེ་འདིར་དངོས་སུ་མི་སྟོན་པའི་རྒྱུ་མཚན། རྩོད་པ་སྤང་བ་དང་བཞི་
ལས། དང་པོ་ནི། བྱང་ཆུབ་སེམས་དཔའ་རྣམས་ཀྱི་ངེས་པར་འབྱེད་པའི་ཆ་དང་མཐུན་པ་རྣམས་ནི་ཆོས་ཅན། རང་གི་རྣམ་པའི་འཛིན་སྟངས་ཇི་ལྟར་སྲིད་པ་བཞིན། བདེན་པ་བཞིའི་དངོས་པོ་ལ་དམིགས་པ་ཡིན་ཏེ། ཁྱོད་ལམ་རྫོགས་པར་ཉམས་སུ་ལེན་པ་ལ་ཐབས་མཁས་པའི་སྟོབས་ཀྱིས་བཟོད་པ་འབྲིང་གི་གནས་སྐབས། ཁ་ཅིག་ཏུ་ནི་རྒྱུའི་སྒོ་ནས་ཆོས་མཆོག་ཆུང་ངུའི་གནས་སྐབས། ཁ་ཅིག་ཏུ་ནི་འབྲས་བུའི་སྒོ་ནས་བཟོད་པ་ཆུང་ངུའི་གནས་སྐབས། ཁ་ཅིག་ཏུ་ནི་བདེན་པ་གཉིས་ཀྱི་ངོ་བོ་ཉིད་ཀྱི་སྒོ་ནས་གཞན་དགུའི་གནས་སྐབས། ཁ་ཅིག་ཏུ་ནི་ཆོས་ཉིད་ཀྱི་རྣམ་པའི་སྒོ་ནས་བདེན་པ་བཞི་ལ་དམིགས་པའི་ཕྱིར། གཉིས་པ་ནི། བྱང་སེམས་སྦྱོར་ལམ་པ་ཆོས་ཅན། ཁྱོད་ཀྱིས་སྔ་མ་ཉན་ཐོས་ཀྱི་སྦྱོར་ལམ་བཞིན་དུ་མི་རྟག་སོགས་རྣམ་པ་གཞན་གྱིས་ཀྱང་བདེན་པ་བཞི་ལ་ཀུན་དུ་དམིགས་སོ་ཞེས་བྱ་བར་ཤེས་པར་བྱ་བ་ཡིན་ཏེ། ཁྱོད་ཀྱིས་སྐབས་དེར་ཉོན་མོངས་དབལ་གཞོམ་པ་དང་། འཁོར་བའི་ཡིད་འབྱུང་བསྐྱེད་པ་དང་། དམན་པའི་རིགས་ཅན་རྗེས་སུ་གཟུང་བའི་ཆེད་དུ་སྐྱེས་བུ་འབྲིང་གི་བསམ་པ་ལ་སྦྱང་དགོས་པའི་ཕྱིར། གསུམ་པ་ནི། ཤེས་བྱ་ཆོས་ཅན། ཐེག་ཆེན་གྱི་སྦྱོར་ལམ་གྱིས་བདེན་བཞི་མི་རྟག་སོགས་བཅུ་དྲུག་ལ་དམིགས་ཚུལ་དེ་སྐབས་འདིར་མ་སྤྲོས་པའི་རྒྱུ་མཚན་ཡོད་དེ། སྐབས་འདིར་མདོར་བསྡུས་ཏེ་རྩ་བའི་ཚིག་དོན་རྣམ་པར་དཀྲོལ་བ་ཙམ་དུ་བརྗོད་པར་འདོད་པའི་ཕྱིར། བཞི་པ་ནི། ཤེས་བྱ་ཆོས་ཅན། བདེན་བཞིའི་རྣམ་པ་བཅུ་དྲུག་ལས་ལྷག་པའི་རྣམ་པ་གཞན་མི་སྒོམ་པའི་ཐེག་པ་གཞན་ལ་བརྟེན་ནས་ནི། སྦྱོར་ལམ་གྱི་སྐབས་འདིར་མ་ཟད། རྒྱན་གྱི་གོང་འོག་གང་དུ་ཡང་སུན་འབྱིན་པ་སྟེ། གནོད་བྱེད་བརྗོད་པར་མི་བྱ་བ་ཡིན་ཏེ། རྒྱུ་མཚན་གང་གི་ཕྱིར་ན་བདེན་པ་བཞིའི་རྣམ་པ་རྫོགས་
པར་ཉམས་སུ་ལེན་པ་འདི་ནི་ཐེག་ཆེན་གྱི་རིགས་ཅན་ལ་དེའི་སྡེ་སྣོད་ཚད་མར་བྱས་པའི་རྣམ་པར་གཞག་པ་སྔ་མ་ལས་གཞན་ཁོ་ན་ཡིན་པ་དེའི་ཕྱིར། གཉིས་པ་རྒྱས་པར་བཤད་པ་ལ། ཁྱད་ཆོས་སྔ་མ་གསུམ་བཤད་པ་དང་། རྟོགས་པའི་ཁྱད་ཆོས་དང་ཡོངས་འཛིན་བཤད་པའོ། །དང་པོ་ལ། སྤྱིའི་མཚམས་སྦྱར་བ། སོ་སོའི་དོན་བཤད་པ། བརྗོད་ཚུལ་ལ་རྩོད་པ་སྤང་བའོ། །དང་པོ་ནི། ཁོ་ན་རེ། དེ་ཐེག་དམན་གྱི་སྦྱོར་ལམ་ལས་དམིགས་པ་དང་རྣམ་པ་ལ་སོགས་པའི་སྒོ་ནས་ཁྱད་པར་འཕགས་ན་འཕགས་ཚུལ་ཇི་ལྟ་བུ་ཡིན་ཞེས་དྲི་བ་འགོད་པ་ལ། དམིགས་པ་དང་རྣམ་པའི་ཁྱད་པར་ཡོད་ཚུལ་དག་ནི། དམིགས་པ་མི་རྟག་སོགས་བར་སྐབས་ཀྱི་ཚིགས་སུ་བཅད་པ་བདུན་གྱིས་བཤད་པ་སྟེ་འཆད་འགྱུར་དེའི་ཕྱིར། གཉིས་པ་སོ་སོའི་དོན་བཤད་པ་ལ། ཐེག་ཆེན་གྱི་སྦྱོར་ལམ་དྲོད་ཀྱི་དམིགས་རྣམ་རྒྱུ་གསུམ་གྱི་ཁྱད་པར་བཤད་པ་སོགས་བཞི་ལས། དང་པོ་ལ། རྩ་བ་དང་། འགྲེལ་པ་གཉིས། དང་པོ་ནི། བདེན་པའི་རྟེན་ཅན་མི་རྟག་པ་ལ་སོགས་པ་བཅུ་དྲུག་ཆོས་ཅན། ཐེག་ཆེན་གྱི་སྦྱོར་ལམ་དྲོད་ཆུང་ངུའི་དམིགས་པ་ཡིན་ཏེ། དེའི་སྒྲོ་འདོགས་གཅད་པར་བྱ་བའི་གཞི་ཡིན་པའི་ཕྱིར། རྟགས་འདི་འོག་མ་ཀུན་ལ་སྦྱར་རོ། །རྣམ་པ་ནི་བདེན་པ་བཞི་པོ་དེ་ཡི་ནི། ཁྱད་ཆོས་བཅུ་དྲུག་ལ་བདེན་པར་མངོན་པར་ཞེན་པ་དང་། ལ་སོགས་པ་ལྷག་གནས་དང་ཀུན་ཤེས་སོགས་ལ་བདེན་ཞེན་འགོག་པའི་སྦྱོར་ལམ་དྲོད་ཆུང་ངུའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། དེའི་དམིགས་པའི་ཆོས་ལ་ལོག་ཕྱོགས་སུ་སྒྲོ་འདོགས་པ་འགོག་པའི་དྲོད་ཆུང་ངུའི་ཡེ་ཤེས་ཡིན་པའི་ཕྱིར། རྟགས་འདི་ཡང་འོག་མ་ཀུན་ལ་སྦྱར་རོ། །རྒྱུ་ནི། ཐེག་ཆེན་གྱི་སྦྱོར་ལམ་དྲོད་ཆུང་ངུའི་ཡེ་ཤེས་ཆོས་ཅན། འབྲས་བུ་ཁྱད་པར་ཅན་
གྱི་རྒྱུ་བྱེད་དེ། ཐེག་པ་གསུམ་ཆར་འཐོབ་པའི་ཐེག་ཆེན་མཐོང་ལམ་གྱི་རྒྱུ་བྱེད་པའི་ཕྱིར། འབྲིང་གི་དམིགས་པ་ནི། གཟུགས་དང་སོགས་པའི་སྒྲས་བསྡུས་པ་ཚོར་སོགས་འདུ་འགོད་བདེན་པ་བ་དང་བྲལ་བས་ཁྱད་པར་དུ་བྱས་པའི་བདེན་པ་བཞི་ཆོས་ཅན། ཐེག་ཆེན་གྱི་སྦྱོར་ལམ་དྲོད་འབྲིང་གི་དམིགས་པ་ཡིན་ཏེ། དེའི་སྒྲོ་འདོགས་ཞེས་སོགས་སྔར་བཞིན་ནོ། །རྣམ་པ་ནི། མིང་རྒྱུན་དོན་དམ་པར་གནས་པ་དང་བྲལ་བ་དང་གནས་པ་དེར་མེད་པར་རྟོགས་པའི་དྲོད་འབྲིང་གི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ་དམིགས་པའི་ཆོས་སོགས་སྔར་བཞིན་ནོ། །ཆེན་པོའི་དམིགས་པ་ནི། གཟུགས་སོགས་བརྡར་བཏགས་པས་ཁྱད་པར་དུ་བྱས་པའི་བདེན་པ་བཞི་ཆོས་ཅན། དྲོད་ཆེན་པོའི་དམིགས་པ་ཡིན་ཏེ། དེའི་སྒྲོ་འདོགས་ཞེས་སོགས། རྣམ་པ་ནི། གཟུགས་སོགས་དོན་དམ་པར་བརྗོད་དུ་མེད་པར་རྟོགས་པའི་དྲོད་ཆེན་པོའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། དེའི་དམིགས་པ་སོགས་སོ། །གཉིས་པ་འགྲེལ་པ་ལ། རྒྱས་པར་བཤད་པ་དང་། དོན་བསྡུ་བའོ། །དང་པོ་ལ། དམིགས་རྣམ་རྒྱུ་གསུམ་ལས། དང་པོ་ནི། སྡུག་བསྔལ་ལ་སོགས་པའི་བདེན་པ་བཞི་པོ་ལ་བརྟེན་པ་མི་རྟག་པ་ལ་སོགས་པའི་རྣམ་པ་བཅུ་དྲུག་ཆོས་ཅན། ཐེག་ཆེན་གྱི་སྦྱོར་ལམ་དྲོད་དེ་ལ་གསུམ་ཡོད་པའི་ནང་ནས་ཆུང་ངུའི་དམིགས་པ་ཡིན་ཏེ། དེའི་སྒྲོ་འདོགས་ཞེས་སོགས། རྣམ་པ་ནི། སྡུག་བསྔལ་ལ་སོགས་པའི་བདེན་པ་བཞི་ལ། དང་པོར་བདེན་པར་མངོན་པར་ཞེན་པ་དང་། ལ་སོགས་པ་བདེན་པར་ལྷག་པར་དམིགས་པ་དང་། ཕྱིན་ཅི་ལོག་གི་ཀུན་ཤེས་སོགས་ལ་ཞེན་པ་འགོག་པའི་དྲོད་ཆུང་ངུའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། རྟགས་སྔར་བཞིན་ནོ། །རྒྱུ་ནི། ཐེག་ཆེན་གྱི་སྦྱོར་ལམ་དྲོ་བ་ལ་སོགས་པ་བཞི་པོ་
ཐམས་ཅད་ཀྱང་ཆོས་ཅན། ཐེག་པ་གསུམ་ཆར་གྱི་རྟོགས་རིགས་ཚང་བར་འཐོབ་པའི་མཐོང་ལམ་གྱི་རྒྱུའི་ངོ་བོ་ཉིད་ཡིན་པར་ཁོང་དུ་ཆུད་པར་བྱ་བ་ཡིན་ཏེ། དེའི་ཐོབ་པ་དང་རྗེས་སུ་མཐུན་པའི་ཐབས་དམ་པ་ཡིན་པའི་ཕྱིར། འབྲིང་གི་དམིགས་པ་ནི། གཟུགས་ལ་སོགས་པ་སྒྲུབ་པ་དང་དགག་པ་དག་དོན་དམ་པར་མོས་པ་ཡིད་བྱེད་ཀྱིས་གྲངས་བཞིན་དུ་མི་དམིགས་ཤིང་། དེ་ཁོ་ན་ཉིད་ཡིད་ལ་བྱེད་པ་དག་གིས་མ་མཐོང་བས་ཁྱད་པར་དུ་གཟུགས་སོགས་ཆོས་ཅན། དྲོད་འབྲིང་གི་དམིགས་པ་ཡིན་ཏེ། རྟགས་སྔར་བཞིན་ནོ། །རྣམ་པ་ནི་དོན་དམ་པར་མིང་ཐམས་ཅད་མེད་པ་ཉིད་ཀྱིས་མིང་གི་རྒྱུན་མི་འདྲ་བ་དང་། རིགས་རྒྱུན་འདྲ་བར་འཇུག་པའི་མཚན་ཉིད་དག་མེད་པར་རྟོགས་པའི་དྲོད་འབྲིང་གི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། རྟགས་སྔར་བཞིན། དྲོད་ཆེན་པོའི་དམིགས་པ་ནི། གཟུགས་ནས་སངས་རྒྱས་ཞེས་བྱ་བའི་བར་ཆོས་ཐམས་ཅད་བརྡར་བཏགས་པའི་ཆོས་མིང་གི་ཐ་སྙད་པ་ཙམ་གྱིས་ཁྱད་པར་དུ་བྱས་པ་ཆོས་ཅན། དྲོད་ཆེན་པོའི་དམིགས་པ་ཡིན་ཏེ། རྟགས་སྔར་བཞིན། དེའི་རྣམ་པ་ནི། དོན་དམ་པར་དགེ་བ་དང་། ལ་སོགས་པ་མི་དགེ་བ་དང་། ལུང་མ་བསྟན་ཉིད་ཀྱི་ཆོས་གང་དུ་ཡང་བརྗོད་དུ་མེད་པར་རྟོགས་པའི་དྲོད་ཆེན་པོའི་ཡེ་ཤེས་ཆོས་ཅན། ཁྱོད་ཐེག་ཆེན་གྱི་སྦྱོར་ལམ་དྲོད་ཆེན་པོའི་རྣམ་པ་ཡིན་ཏེ། རྟགས་སྔར་བཞིན། གཉིས་པ་དོན་བསྡུ་ནི། ཐེག་ཆེན་གྱི་ངེས་འབྱེད་ཆ་མཐུན་དང་པོ་ཆོས་ཅན། ཁྱོད་ལ་དྲོད་ཅེས་བརྗོད་པའི་རྒྱུ་མཚན་ཡོད་དེ། མཐོང་ལམ་མཉམ་གཞག་རྣམ་པར་མི་རྟོག་པའི་ཡེ་ཤེས་ཀྱི་མེ་འབྱུང་བའི་སྔ་ལྟས་སུ་འབྱུང་བའི་རྒྱུ་མཚན་གྱིས་དེ་ལྟར་བརྗོད་པ་ཡིན་པའི་ཕྱིར། ཐེག་ཆེན་གྱི་སྦྱོར་ལམ་དྲོ་བར་གྱུར་པ་ཞེས་བརྡ་སྦྱར་བའི་ལམ་ཆོས་ཅན། ཁྱོད་ལ་དམིགས་པ་
དང་རྣམ་པ་ཟུང་དང་ལྡན་པ་རྣམ་པ་གསུམ་ཡོད་དེ། ཁྱོད་ཆེ་ཆུང་རེ་རེ་ལ་གསུམ་གསུམ་ཡོད་པ་སྔར་བཤད་པ་དེ་ལྟར་ཡིན་པའི་ཕྱིར། གཉིས་པ་རྩེ་མོའི་དམིགས་རྣམ་རྒྱུ་གསུམ་བཤད་པ་ལ། རྩ་བ་དང་འགྲེལ་པ་གཉིས་ལས། དང་པོ་ནི། གཟུགས་སོགས་དོན་དམ་པར་མི་གནས་པ་དེ་དག་ནི། དོན་དམ་པར་དེའི་ངོ་བོར་རང་བཞིན་མེད་པས་ཁྱད་པར་དུ་བྱས་པའི་བདེན་པ་བཞི་ཆོས་ཅན། རྩེ་མོ་ཆུང་ངུའི་དམིགས་པ་ཡིན་ཏེ། རྟགས་སྔར་བཞིན། རྣམ་པ་ནི། གཟུགས་སོགས་དང་དེའི་ཆོས་ཉིད་དེ་དག་བདེན་སྟོང་གཅིག་གི་རང་བཞིན་གཅིག་ཏུ་རྟོགས་པའི་རྩེ་མོ་ཆུང་ངུའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། རྟགས་སྔར་བཞིན་བདེན་པ་རྣམ་པར་མ་བཞག་པའི་ལུགས་སོ། །དམིགས་པ་ནི། གཟུགས་སོགས་དེ་རྣམས་དེའི་ངོ་བོར་བདེན་གྲུབ་ཀྱིས་སྟོངས་པས་དོན་དམ་པར་མི་རྟག་པ་ལ་སོགས་པར་མི་གནས་པར་ཁྱད་པར་དུ་བྱས་པའི་བདེན་པ་བཞི་ཆོས་ཅན། རྩེ་མོ་ཆུང་ངུའི་དམིགས་པ་ཡིན་ཏེ། སྔར་བཞིན། རྣམ་པ་ནི། མི་རྟག་སོགས་དང་། དེའི་ཆོས་ཉིད་དེ་དག་བདེན་སྟོང་གཅིག་གི་རང་བཞིན་གཅིག་ཏུ་རྟོགས་པའི་རྩེ་མོ་ཆུང་ངུའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་བཞིན་བཞག་པའི་དབང་དུ་བྱས་སོ། །རྒྱུའི་ཁྱད་པར་ནི། ཐེག་པ་གསུམ་ཆར་འཐོབ་པའི་རྒྱུ། །ཞེས་པས་བསྟན་ཏོ། །འབྲིང་གི་དམིགས་པ་ནི། ཆོས་རྣམས་བདེན་གྲུབ་ཀྱི་མཚན་མར་མི་འཛིན་པ་གང་ཡིན་པས་ཁྱད་པར་དུ་བྱས་པའི་བདེན་བཞི་ཆོས་ཅན། རྩེ་མོ་འབྲིང་གི་དམིགས་པ་
ཡིན་ཏེ། སྔར་བཞིན། རྣམ་པ་ནི། ཆོས་དེ་དག་བདེན་པའི་མཚན་མར་མི་མཐོང་བར་བདེན་མེད་རྟོགས་པའི་རྩེ་མོ་འབྲིང་གི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་བཞིན། ཆེན་པོའི་དམིགས་པ་ནི། དོན་དམ་ལ་དཔྱོད་པའི་ཤེས་རབ་ཀྱིས་ཡོངས་སུ་རྟོག་པ་བརྟགས་པས་ཁྱད་པར་དུ་བྱས་པའི་བདེན་བཞི་ཆོས་ཅན། རྩེ་མོ་ཆེན་པོའི་དམིགས་པ་ཡིན་ཏེ། སྔར་བཞིན། རྣམ་པ་ནི། འཁོར་གསུམ་ཐམས་ཅད་བདེན་པར་དམིགས་སུ་མེད་པར་རྟོགས་པའི་རྩེ་མོ་ཆེན་པོའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་བཞིན། གཉིས་པ་ལ་གཉིས། བཤད་པ་དང་། བསྡུ་བའོ། །དང་པོ་ནི། གཟུགས་ལ་སོགས་པ་ལ་དོན་དམ་པར་མི་གནས་པས་ཁྱད་པར་དུ་བྱས་པའི་བདེན་བཞི་ཆོས་ཅན། རྩེ་མོ་ཆུང་ངུའི་དམིགས་པ་ཞེས་བྱ་བ་ཡིན་ཏེ། སྔར་བཞིན་ནོ། །ཤེས་བྱ་ཆོས་ཅན། གཟུགས་ལ་སོགས་པ་དོན་དམ་པར་རང་གི་ངོ་བོས་གྲུབ་པས་སྟོང་པ་ཉིད་ཀྱིས་ཁྱད་པར་དུ་བྱས་ཏེ། གཟུགས་ལ་སོགས་པ་དོན་དམ་པར་རང་གི་ངོ་བོ་དང་བྲལ་བའི་ངོ་བོ་ཉིད་ཡིན་པའི་ཕྱིར། རྩེ་མོ་ཆུང་ངུའི་རྣམ་པ་ནི། གཟུགས་ལ་སོགས་པ་དེ་དག་ལ་དོན་དམ་པར་རྟག་པ་དང་མི་རྟག་པ་ལ་སོགས་པ་ཉིད་དུ་མི་གནས་པར་རྟོགས་པའི་རྩེ་མོ་ཆུང་ངུའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་བཞིན་ནོ། །སྟོང་པ་ཉིད་ལ་དོན་དམ་པར་མི་རྟག་པ་དང་ལ་སོགས་པ་རྟག་པ་མེད་པ་ཉིད་ཀྱིས་ཁྱབ་སྟེ། དོན་དམ་པར་གཟུགས་ལ་སོགས་པ་ཆོས་ཐམས་ཅད་དང་། སྟོང་པ་ཉིད་དག་ཕན་ཚུན་ངོ་བོ་གཅིག་པ་ཡིན་པའི་ཕྱིར། འབྲིང་གི་དམིགས་པ་ནི། མི་རྟག་པ་ཉིད་ལ་སོགས་པའི་སྟོང་པ་ཉིད་དག་ཕན་ཚུན་བདག་ཉིད་གཅིག་པས་ཁྱད་པར་དུ་བྱས་པའི་བདེན་བཞི་ཆོས་ཅན། རྩེ་མོ་འབྲིང་གི་དམིགས་པ་ཡིན་ཏེ། སྔར་བཞིན། མི་རྟག་པ་ལ་སོགས་པ་དང་། དེའི་སྟོང་པ་ཉིད་རྣམས་ནི་ཆོས་ཅན། དོན་དམ་པར་རང་གི་ངོ་བོ་ཉིད་མེད་པ་ཡིན་པས་ཁྱབ་སྟེ། བདེན་པར་གྲུབ་པསསྟོང་པ་ཆོས་ཀྱི་དབྱིངས་ཀྱི་ངོ་བོ་ཉིད་ཡིན་པའི་ཕྱིར། རྣམ་པ་ནི། ངོ་བོ་ཉིད་བཀག་པས་གཟུགས་ལ་སོགས་པ་ལ་དོན་དམ་པར་རང་གིར་མི་བྱེད་པར་རྟོགས་པའི་རྩེ་མོ་འབྲིང་གི་ཡེ་ཤེས་གང་ཡིན་པ་དེ་ཆོས་ཅན། དེའི་རྣམ་པ་ཡིན་ཏེ། སྔར་བཞིན་ནོ། །ཆེན་པོའི་དམིགས་པ་ནི།
དོན་དམ་པར་ངོ་བོ་ཉིད་མེད་པ་ཉིད་ཀྱིས་གཟུགས་ལ་སོགས་པ་དེ་དག་དོན་དམ་པར་གྲུབ་པའི་སྔོན་པོ་དང་ལ་སོགས་པ་དཀར་དམར་སོགས་ཀྱི་མཚན་མར་མི་མཐོང་བས་ཁྱད་པར་དུ་བྱས་པའི་བདེན་བཞི་ཆོས་ཅན། རྩེ་མོ་ཆེན་པོའི་དམིགས་པ་ཡིན་ཏེ། སྔར་བཞིན་ནོ། །རྣམ་པ་ནི། ཤེས་རབ་ཀྱིས་ཡང་དག་པར་ཆོས་རབ་ཏུ་རྣམ་པར་འབྱེད་པ་དང་ལྡན་པས་དངོས་པོ་ཐམས་ཅད་འཁོར་གསུམ་དུ་བདེན་པར་མི་དམིགས་པར་ངེས་པར་རྟོགས་པའི་རྩེ་མོ་ཆེན་པོའི་ཡེ་ཤེས་ཆོས་ཅན། རྩེ་མོ་ཆེན་པོའི་རྣམ་པ་ཡིན་ཏེ། སྔར་བཞིན་ནོ། །གཉིས་པ་བསྡུ་བ་ནི། ཐེག་ཆེན་གྱི་ངེས་འབྱེད་ཆ་མཐུན་གཉིས་པ་ཆོས་ཅན། ཁྱོད་ལ་རྩེ་མོ་ཞེས་བྱ་བའི་རྒྱུ་མཚན་ཡོད་དེ། དྲོད་མན་ཆད་དུ་ལོག་ལྟས་དགེ་བའི་རྩ་བ་གཡོ་བ་ཡིན་ལ། ཁྱོད་ཐོབ་ནས་དེ་མི་འབྱུང་བས་ན་གཡོ་བའི་རྩེ་མོ་ཡིན་པའི་ཕྱིར། ཐེག་ཆེན་གྱི་སྦྱོར་ལམ་རྩེ་མོར་གྱུར་པ་ཞེས་བརྡ་སྦྱར་བའི་ལམ་ཆོས་ཅན། ཁྱོད་ལ་དམིགས་པ་དང་རྣམ་པ་ཟུང་དང་ལྡན་པ་རྣམ་པ་གསུམ་ཡོད་དེ། ཁྱོད་ཆུང་འབྲིང་ཆེ་གསུམ་ལ་དམིགས་རྣམ་ཟུང་རེ་རེ་ཡོད་པའི་ཕྱིར། གསུམ་པ་བཟོད་པའི་དམིགས་རྣམ་རྒྱུ་གསུམ་གྱི་ཁྱད་པར་ལ། རྩ་བ་དང་། འགྲེལ་པའོ། །དང་པོ་ནི། གཟུགས་ལ་སོགས་པ་དོན་དམ་པར་ངོ་བོ་ཉིད་མེད་པ་ཉིད་ཀྱིས་ཁྱད་པར་དུ་བྱས་པ་ཆོས་ཅན། བཟོད་པ་ཆུང་ངུའི་དམིགས་པ་ཡིན་ཏེ། སྔར་བཞིན་ནོ། །རྣམ་པ་ནི། དོན་དམ་པར་གཟུགས་སོགས་དེ་མེད་པ་ཉིད་ཡིན་ཡང་། དེ་ཐ་སྙད་པའི་ངོ་བོ་ཉིད་དུ་རྟོགས་པའི་བཟོད་པ་ཆུང་ངུའི་ཡེ་ཤེས་ཆོས་ཅན། བཟོད་པ་ཆུང་ངུའི་རྣམ་པ་ཡིན་ཏེ། སྔར་བཞིན། འབྲིང་གི་དམིགས་པ་ནི། གཟུགས་ལ་སོགས་པ་དེ་དག་དོན་དམ་པར་སྐྱེ་བ་མེད་ངེས་འབྱུང་མེད་པས་ཁྱད་པར་དུ་བྱས་པ་ཆོས་ཅན། འབྲིང་གི་དམིགས་པ་ཡིན་ཏེ། སྔར་བཞིན་ནོ། །རྣམ་པ་ནི། བདེན་བཞི་ལ་དེ་ལྟར་བསྒོམས་པས་ལུས་ངག་ཡིད་བདེན་གྲུབ་ཀྱིས་རྣམ་པར་དག་པ་རྟོགས་པའི་འབྲིང་གི་ཡེ་ཤེས་
ཆོས་ཅན། དེའི་རྣམ་པ་ཡིན་ཏེ། སྔར་བཞིན་ནོ། །བཟོད་པ་ཆེན་པོའི་དམིགས་པ་ནི། སྒོ་གསུམ་པོ་དེ་དག་བདེན་གྲུབ་ཀྱི་མཚན་མ་མེད་པས་ཁྱད་པར་དུ་བྱས་པ་ཆོས་ཅན། བཟོད་པ་ཆེན་པོའི་དམིགས་པ་ཡིན་ཏེ། སྔར་བཞིན་ནོ། །རྣམ་པ་ནི། དོན་དམ་པར་སྒོ་གསུམ་དེའི་མཚན་མར་མི་རྟེན་པས། ཡིད་བྱེད་གཉིས་ཀྱིས་མོས་པ་མིན་པ་དང་འདུ་ཤེས་མེད་པར་རྟོགས་པའི་བཟོད་པ་ཆེན་པོའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་ལྟར། གཉིས་པ་འགྲེལ་པ་ལ། རྒྱས་བཤད། དོན་བསྡུ་གཉིས་ལས། དང་པོ་ལ་དྲུག་ཡོད་པའི་བཟོད་པ་ཆུང་ངུའི་དམིགས་པ་ལ། གཟུགས་ལ་སོགས་པ་དོན་དམ་པར་ངོ་བོ་ཉིད་མེད་པ་ཉིད་ཀྱིས་ཁྱད་པར་དུ་བྱས་པ་ཆོས་ཅན། བཟོད་པ་ཆུང་ངུའི་དམིགས་པ་ཡིན་ཏེ། སྔར་བཞིན། ཤེས་བྱ་ཆོས་ཅན། གཟུགས་སོགས་དོན་དམ་པར་གྲུབ་པའི་ངོ་བོ་ཉིད་མེད་དེ། །འདིས་མཚོན་བྱེད་མཚན་ཉིད་ཀྱི་ངོ་བོ་ཉིད་དང་མཚོན་བྱ་ངོ་བོ་ཉིད་ཀྱི་མཚན་ཉིད་དག་དོན་དམ་པར་བདེན་གྲུབ་ཀྱིས་སྟོང་པ་ཉིད་དུ་ངོ་བོ་གཅིག་པ་ཉིད་ཡིན་པའི་ཕྱིར། རྣམ་པ་ནི། གཟུགས་ལ་སོགས་པ་དོན་དམ་པར་དངོས་པོ་མེད་པ་ཉིད་ཡིན་ཡང་། བདེན་པར་ཞེན་པའི་སྐྱེ་བོ་དམིགས་པ་ཅན་གྱི་ངོར་གཟུགས་ལ་སོགས་པའི་ངོ་བོ་ཉིད་དོ་ཞེས་རྟོགས་པའི་བཟོད་པ་ཆུང་ངུའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་བཞིན། འབྲིང་གི་དམིགས་པ་ནི། གཟུགས་ལ་སོགས་པ་ལ་དོན་དམ་པར་སྐྱེ་བ་འཁོར་བ་ཡང་མེད། མྱང་ངན་ལས་འདས་པ་ཡང་མེད་པ་ཆོས་ཅན། བཟོད་པ་འབྲིང་གི་དམིགས་པ་ཡིན་ཏེ། སྔར་ལྟར། ཤེས་བྱ་ཆོས་ཅན། དོན་དམ་པར་འཁོར་འདས་མེད་དེ། དེ་རང་བཞིན་གྱིས་མ་སྐྱེས་པ་ཉིད་ཀྱི་ཕྱིར། རྣམ་པ་ནི། ཆོས་ཐམས་ཅད་ཀྱི་རང་གི་ངོ་བོ་དོན་དམ་པར་མ་གྲུབ་པར་རྟོགས་ནས་གོམས་པར་བྱས་པ་ཁོ་ནས་ལུས་ལ་སོགས་པ་སྒོ་གསུམ་དང་། མཚན་བཟང་དང་ཞིང་སོགས་རྣམ་པ་ཐམས་ཅད་དུ་རྣམ་པར་
དག་པ་ཐོབ་འགྱུར་རྟོགས་པའི་བཟོད་པ་འབྲིང་གི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་ལྟར། ཆེན་པོའི་དམིགས་པ་ནི། དོན་དམ་པར་རང་དང་སྤྱིའི་མཚན་ཉིད་མི་འཐད་པས། ཆོས་ཐམས་ཅད་མཚན་ཉིད་མེད་པ་ཉིད་ཀྱིས་ཁྱད་པར་དུ་བྱས་པའི་བདེན་བཞི་ཆོས་ཅན། བཟོད་པ་ཆེན་པོའི་དམིགས་པ་ཡིན་ཏེ། སྔར་བཞིན། རྣམ་པ་ནི། མཚན་མ་རྣམས་ཀྱི་རྟེན་བདེན་པ་སྟོང་ཉིད་དོན་སྤྱིའི་ཚུལ་གྱིས་རྟོགས་པའི་མོས་པ་ཡིད་ལ་བྱེད་པས་མཚན་མར་མི་མོས་ཤིང་མངོན་སུམ་དུ་རྟོགས་པའི་དེ་ཁོ་ན་ཉིད་ཡིད་ལ་བྱེད་པས་མཚན་མར་ཡོངས་སུ་ཤེས་པ་མེད་པར་རྟོགས་པའི་བཟོད་པ་ཆེན་པོའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་བཞིན་ནོ། །དེ་ན་གཟུགས་ལ་སོགས་པའི་རང་སྤྱིའི་མཚན་མ་རྣམས་ཀྱི་རྟེན་བདེན་པར་གྲུབ་པ་དང་བྲལ་བ་ཉིད་ཀྱིས་ཁྱབ་སྟེ། དོན་དམ་པར་མ་གྲུབ་པ་རང་བཞིན་ཡིན་པ་ཁོ་ན་ཡིན་པའི་ཕྱིར། གཉིས་པ་བསྡུ་བ་ནི། ཐེག་ཆེན་གྱི་ངེས་འབྱེད་ཆ་མཐུན་གསུམ་པ་ཆོས་ཅན། ཁྱོད་ལ་བཟོད་པ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་ཀྱིས་མི་སྐྱེ་བའི་ཆོས་ལ་བཟོད་པ་ཆུང་ངུ་ཐོབ་ཅིང་། ལས་ཉོན་གྱིས་ངན་འགྲོར་སྐྱེ་བ་ལ་སོ་སོར་བརྟགས་མིན་གྱི་འགོག་པ་ཐོབ་པས་ངན་འགྲོ་མེད་པས་ཆོས་ཆེན་པོ་མི་སྐྱེ་བའི་ཆོས་ལ་སྐྲག་པ་མངོན་གྱུར་དང་བྲལ་བས་བཟོད་པའི་ཕྱིར། བཟོད་པར་གྱུར་པ་ཞེས་བརྡ་སྦྱར་བའི་ལམ་ཆོས་ཅན། ཁྱོད་ལ་དམིགས་པ་དང་རྣམ་པ་ཟུང་ལྡན་རྣམ་པ་གསུམ་ཡོད་དེ། ཁྱོད་ཆུང་འབྲིང་ཆེ་གསུམ་ལ་དམིགས་རྣམ་ཟུང་རེ་རེ་ཡོད་པ་གོང་དུ་བསྒྲུབས་ཟིན་པ་དེ་ལྟར་ཡིན་པའི་ཕྱིར། བཞི་པ་ཆོས་མཆོག་གི་དམིགས་རྣམ་རྒྱུ་གསུམ་བཤད་པ་ལ་གཉིས། རྩ་བ་དང་། འགྲེལ་པའོ། །དང་པོ་ལ། དེའི་དམིགས་རྣམ་བྱེ་བྲག་ཏུ་བཤད་པ་དང་། སྤྱི་དོན་བསྡུ་བའོ། །དང་པོ་ནི། བསྒོམ་བྱ་ཏིང་ངེ་འཛིན་གྱི་ངོ་བོར་གྱུར་པ་ཆོས་ཅན། ཆོས་མཆོག་ཆུང་ངུའི་དམིགས་པ་ཡིན་ཏེ། སྔར་བཞིན། རྣམ་པ་ནི། བསྒོམ་བྱ་ཏིང་འཛིན་དེའི་བྱེད་
པ་ལྷུན་གྲུབ་ཏུ་འཇུག་པར་རྟོགས་པའི་ཆོས་མཆོག་ཆུང་ངུའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་ལྟར། འབྲིང་གི་དམིགས་པ་ནི། ལྐོག་ཏུ་ལུང་སྟོན་པའི་རྒྱུ་ཁྱད་པར་ཅན་ཆོས་མཆོག་འབྲིང་དང་། དོན་དམ་པར་ངོ་བོ་ཉིད་མེད་པའི་གཟུགས་ལ་སོགས་པ་ཆོས་ཅན། འབྲིང་གི་དམིགས་པ་ཡིན་ཏེ། སྔར་ལྟར། རྣམ་པ་ནི། དོན་དམ་པར་འཁོར་གསུམ་དུ་རློམ་པ་རགས་པ་ཟད་པའི་ཆོས་མཆོག་འབྲིང་གི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་བཞིན། ཆེན་པོའི་དམིགས་པ་ནི། འཁོར་གསུམ་པོ་བདེན་པས་སྟོང་པའི་ཆོས་ཉིད་ཀྱི་རང་བཞིན་དུ་ཕན་ཚུན་བདེན་སྟོང་ངོ་བོ་གཅིག་པ་ཆོས་ཅན། ཆེན་པོའི་དམིགས་པ་ཡིན་ཏེ། སྔར་བཞིན། ཆོས་མཆོག་ཆེན་པོའི་ཏིང་འཛིན་མཐའ་གང་དུ་ཡང་རྣམ་པར་མི་རྟོག་པ་བདེན་མེད་དུ་རྟོགས་པའི་ཆོས་མཆོག་ཆེན་པོའི་ཡེ་ཤེས་ཆོས་ཅན། ཡང་དེའི་རྣམ་པ་ཡིན་ཏེ། སྔར་བཞིན། གཉིས་པ་ན། དེ་ལྟར་ངེས་འབྱེད་ཅེས་སོགས་རྐང་པ་གཉིས་ཀྱིས་བསྟན་ཏོ། །གཉིས་པ་འགྲེལ་པ་ལ། རྒྱས་བཤད་དང་། དོན་བསྡུ་བའོ། །དང་པོ་ལ་དྲུག་ལས། ཆུང་ངུའི་དམིགས་པ་ནི་ཆོས་ཐམས་ཅད་སྐྱེ་བ་མེད་པ་དང་། དཔའ་བར་འགྲོ་བ་ལ་སོགས་པའི་ཏིང་ངེ་འཛིན་བསྒོམ་པར་བྱའོ་ཞེས་དངོས་སུ་བསྟན་པའི་ཏིང་ངེ་འཛིན་དང་། དེ་ཁོ་ནར་ངོ་བོ་དབྱེར་མེད་པའི་གཟུགས་ལ་སོགས་པ་ཆོས་ཅན། ཆོས་མཆོག་ཆུང་ངུའི་དམིགས་པ་ཡིན་ཏེ། སྔར་ལྟར། རྣམ་པ་ནི། སངས་རྒྱས་པ་ན་ལྷུན་གྱིས་གྲུབ་པར་འཇིག་རྟེན་གྱིས་གྲུབ་པར་འཇིག་རྟེན་གྱི་ཁམས་ཐམས་ཅད་དུ་གདུལ་བྱའི་སྐལ་བ་ཇི་ལྟ་བ་བཞིན་དུ་ཏིང་ངེ་འཛིན་གྱི་བྱེད་པ་འཇུག་པར་རྟོགས་པའི་ཆོས་མཆོག་ཆུང་ངུའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་ལྟར། ཤེས་བྱ་ཆོས་ཅན། སངས་རྒྱས་པ་ན་འཕྲིན་ལས་ལྷུན་གྲུབ་ཏུ་འཇུག་སྟེ། སྔོན་རང་གི་སྨོན་ལམ་བཏབ་པ་དང་བསོད་ནམས་དང་ཡེ་ཤེས་ཀྱི་ཚོགས་གཉིས་མཐར་ཕྱིན་པའི་མཐུ་དང་ཆོས་ཀྱི་དབྱིངས་
རྣམ་པར་དག་ཅིང་བསམ་གྱིས་མི་ཁྱབ་པ་ཉིད་ཀྱི་སྟོབས་ཀྱིས་ཡིན་པའི་ཕྱིར། འབྲིང་གི་དམིགས་པ་ནི། ལུང་སྟོན་པའི་རྒྱུ་ཁྱད་པར་ཅན་ཆོས་མཆོག་འབྲིང་དང་དོན་དམ་པར་ངོ་བོ་དབྱེར་མེད་པའི་གཟུགས་ལ་སོགས་པ་ཆོས་ཅན། འབྲིང་གི་དམིགས་པ་ཡིན་ཏེ། སྔར་བཞིན། ཤེས་བྱ་ཆོས་ཅན། དེ་ལྟར་ལུང་སྟོན་པའི་རྒྱུ་མཚན་ཡོད་དེ། གཟུང་འཛིན་དོན་དམ་པར་རང་བཞིན་མེད་པ་སྒོམ་པ་ལ་ཡང་དག་པར་ཞུགས་པའི་ཏིང་ངེ་འཛིན་དང་ལྡན་པའི་རྣལ་འབྱོར་པ་ལ་སངས་རྒྱས་རྣམས་བླ་ན་མེད་པའི་བྱང་ཆུབ་ཏུ་ལུང་སྟོན་པར་མཛད་པ་འདི་ནི་རྟེན་འབྲེལ་གྱི་ཆོས་ཉིད་ཡིན་པའི་ཕྱིར། རྣམ་པ་ནི། འཁོར་གསུམ་དུ་བདེན་པར་མི་རྟོག་པ་སྟེ་བདེན་མེད་དུ་རྟོགས་པའི་ཆོས་མཆོག་འབྲིང་གི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། སྔར་བཞིན། བྱང་ཆུབ་སེམས་དཔའ་ཆོས་མཆོག་འབྲིང་གི་ཏིང་ངེ་འཛིན་དེ་རང་གི་ངོ་བོར་རྟོགས་ཤིང་ཐོབ་པ་ལ་མཉམ་པར་བཞག་པའི་ཚེ། བདག་ནི་ད་ལྟ་མཉམ་པར་བཞག་པའོ་སྙམ་པ་ལ་སོགས་པའི་འཁོར་གསུམ་བདེན་པར་འཛིན་པའི་ཤེས་པ་མི་འབྱུང་བ་ཡིན་ཏེ། དེའི་ཚེ་བདེན་རྫུན་གྱི་རྣམ་པར་རྟོག་པ་མངོན་གྱུར་ཐམས་ཅད་མི་འཐད་པ་ཡིན་པའི་ཕྱིར། ཆེན་པོའི་དམིགས་པ་ནི། བདེན་པར་གྲུབ་པས་སྟོང་པའི་ཆོས་ཉིད་ཀྱི་ཏིང་ངེ་འཛིན་དང་བྱང་ཆུབ་སེམས་དཔའ་དང་བསྒོམ་བྱ་ཤེས་རབ་ཀྱི་ཕ་རོལ་ཏུ་ཕྱིན་པ་དང་། དོན་གསུམ་ཕན་ཚུན་ངོ་བོ་གཅིག་པས་ཁྱད་པར་དུ་བྱས་པའི་བདེན་པ་བཞི་ཆོས་ཅན། ཐེག་ཆེན་སྦྱོར་ལམ་ཆོས་མཆོག་ཆེན་པོའི་དམིགས་པ་ཡིན་ཏེ། དེའི་སྒྲོ་འདོགས་གཅད་པར་བྱ་བའི་གཞི་ཡིན་པའི་ཕྱིར། རྣམ་པ་ནི། དོན་དམ་པར་ཏིང་ངེ་འཛིན་དུ་རྣམ་པར་མི་རྟོག་པ་སྟེ་དོན་དམ་པར་མེད་པར་རྟོགས་པའི་ཡེ་ཤེས་ནི་སངས་རྒྱས་འཐོབ་པའི་ཐབས་དམ་པར་རྟོགས་པའི་ཆོས་མཆོག་ཆེན་པོའི་ཡེ་ཤེས་ཆོས་ཅན། དེའི་རྣམ་པ་ཡིན་ཏེ། དེའི་དམིགས་པའི་ཁྱད་ཆོས་ལ་ལོག་པར་སྒྲོ་འདོགས་པའི་
གཉེན་པོ་བྱེད་པའི་ཆོས་མཆོག་ཆེན་པོའི་ཡེ་ཤེས་ཡིན་པའི་ཕྱིར། ཆོས་མཆོག་ཆེན་པོའི་ཡེ་ཤེས་དེ་ཁོ་ནར་ཏིང་ངེ་འཛིན་དུ་གདགས་བྱར་མ་གྲུབ་སྟེ། དོན་དམ་པར་ཆོས་ཐམས་ཅད་ཡོད་པ་མ་ཡིན་པ་ཉིད་ཀྱི་ཕྱིར། གཉིས་པ་དོན་བསྡུ་ནི། ཐེག་ཆེན་གྱི་ངེས་འབྱེད་ཆ་མཐུན་བཞི་པ་ཆོས་ཅན། ཆོས་ཀྱི་མཆོག་ཅེས་བྱ་བའི་རྒྱུ་མཚན་ཡོད་དེ། ཟག་པ་མེད་པའི་ཡེ་ཤེས་སུ་གྱུར་པའི་ཐེག་ཆེན་གྱི་མཐོང་ལམ་བར་ཆད་མེད་ལམ་དངོས་སུ་སྐྱེད་པས་ན་འཇིག་རྟེན་པའི་ཆོས་ཐམས་ཅད་ཀྱི་མཆོག་ཡིན་པའི་ཕྱིར། གསུམ་པ་རྗོད་ཚུལ་ལ་རྩོད་པ་སྤོང་བ་ལ། རྩོད་པ་དང་། ལན་ནོ། །དང་པོ་ནི། དྲོད་ཆུང་ངུའི་དམིགས་པ་སྟོན་པའི་ཚེ། དམིགས་པ་མི་རྟག་ལ་སོགས་པ། །བདེན་པའི་རྟེན་ཅན་ཞེས་བྱ་བ་མ་གཏོགས་པར་རྩེ་མོ་ཡན་ཆད་ལྷག་མ་རྣམས་ཀྱི་དམིགས་པ་དང་རྣམ་པ་སྟོན་པ་ན་ཁྱད་པར་ཅན་གྱི་ཆོས་བརྗོད་པ་འབའ་ཞིག་གིས་ཐམས་ཅད་དུ་བརྗོད་པ་ནི་མི་རིགས་ཏེ། དམིགས་པ་ཁྱད་པར་ཅན་གྱི་ཆོས་ཅན་དང་། རྣམ་པ་དེའི་སྟེང་དུ་ཆོས་བརྗོད་པར་བྱ་བ་རིགས་པ་ཡིན་ཡང་སྟེ། རིགས་པའི་ཕྱིར། ཞེས་རྩོད་དོ། །གཉིས་པ་ལ། ཆོས་ཅན་བདེན་བཞི་ལ་བརྟེན་པར་དངོས་སུ་མ་བརྗོད་པས། དེ་ལྟར་མི་རྟོགས་པའི་སྐྱོན་མེད་པ་དང་། དེ་ལྟར་དངོས་སུ་མ་བརྗོད་ཀྱང་དོན་གྱིས་གོ་བར་བྱ་བའོ། །དང་པོ་ནི། ཤེས་བྱ་ཆོས་ཅན། སྦྱོར་ལམ་རྩེ་མོ་སོགས་དམིགས་རྣམ་ལྷག་མ་རྣམས་བདེན་བཞི་ལ་བརྟེན་ནས་དངོས་སུ་མ་བརྗོད་ཀྱང་། དེ་ལ་བརྟེན་པར་མི་རྟོགས་པའི་སྐྱོན་མེད་པར་ཐལ། གཞི་གཅིག་ལ་ལྟོས་པའི་ཆོས་དང་ཆོས་ཅན་བརྗོད་པའི་སྒྲ་གཉིས་ལ། ཁྱད་པར་གཞན་སྤོང་བ་དང་མི་སྤོང་བ་མ་གཏོགས་པར་འདི་དག་ལ་དོན་གྱི་ཁྱད་པར་ནི་འགའ་ཡང་མེད་དོ་ཞེས་ཤིང་རྟ་ཆེན་པོའི་ལུགས་ལས་འབྱུང་བའི་ཕྱིར། གཉིས་པ་ནི། ཤེས་
བྱ་ཆོས་ཅན། ལན་གྱི་རྣམ་པ་གཅིག་ཏུ་ན་སྡུག་བསྔལ་ལ་སོགས་པ་བདེན་པར་རྟོགས་པ་ཁོ་ན་དྲོད་ཆུང་ངུའི་རྣམ་པར་གོ་བར་བྱ་བ་ཡིན་ཏེ། ཆོས་བདེན་བཞི་ལ་བདེན་པར་མངོན་པར་ཞེན་པ་དང་། ལྷག་པར་གནས་པ་དང་། ལ་སོགས་པས་ཀུན་ཤེས་ལ་ཞེན་པ་བཀག་པ་དང་ལྡན་པ་དག་ཏུ་རྟོགས་པའི་དྲོད་ཆུང་ངུའི་ཡེ་ཤེས་དེ་དེའི་རྣམ་པ་ཡིན་པའི་ཕྱིར། དྲོད་འབྲིང་སོགས་འོག་མ་དག་ལ་ཡང་དེ་བཞིན་དུ་ཤེས་པར་བྱའོ། །སྡུག་བསྔལ་ལ་སོགས་པའི་བདེན་པར་གཏོགས་པ་དྲོད་འབྲིང་གི་དམིགས་པར་བྱ་བ་ཡིན་ཏེ། དེ་ཁོ་ནར་སྒྲུབ་པ་དང་དགག་པ་དང་བྲལ་བས་ཁྱད་པར་དུ་བྱས་པའི་བདེན་བཞི་དྲོད་འབྲིང་གི་དམིགས་པར་འགྱུར་བའི་ཕྱིར། ཤེས་བྱ་ཆོས་ཅན། དམིགས་རྣམ་ལྷག་མ་རྣམས་རྟེན་ཆོས་ཅན་བདེན་བཞི་ལ་བརྟེན་པར་གྲུབ་ཀྱང་། བདེན་པའི་རྟེན་ཅན་ཞེས་ལྷག་མ་རྣམས་ལ་དངོས་སུ་མི་བརྗོད་པའི་རྒྱུ་མཚན་ཡོད་དེ། རྒྱན་གྱི་ཚིག་ལེའུར་བྱས་པ་སྡེབ་པའི་ངོར་ཐ་དད་པར་བརྗོད་པ་ཙམ་དུ་ཟད་པའི་ཕྱིར། གཉིས་པ་ལ། སྤྱིའི་མཚམས་སྦྱར་བ། སོ་སོའི་དོན་བཤད་པ། དོན་བསྡུ་བའོ། །དང་པོ་ནི། ཐེག་ཆེན་གྱི་སྦྱོར་ལམ་དྲོད་སོགས་བཞི་གཟུང་འཛིན་གྱི་རྣམ་པར་རྟོག་པ་བཞི་དང་ལྡན་པ་ཡང་། བར་སྐབས་ཀྱི་ཚིགས་སུ་བཅད་པས་གསུངས་པ་ལ་དགོས་པ་ཡོད་དེ། རྟོགས་པའི་ངོ་བོ་དང་དབྱེ་བའི་དོན་གསལ་བར་བྱ་བའི་ཕྱིར་དུ་ཡིན་པའི་ཕྱིར། སྨྲས་པ། མཐོང་སྤང་ས་མོས་མཐའ་དག་གཟུམ་བྱེད་པའི། །སྦྱོར་ལམ་དྲོད་ཀྱི་རྟ་བདུན་དབང་པོ་ཡིས། །མཐོང་ལམ་པུཎྜ་རི་ཀའི་འདབ་སྟོང་དེ། །བཞད་བྱེད་སོས་ཀྱི་ཚ་གདུང་འབྱུང་སྙམ་བྱེད། །ལོག་པར་ལྟ་བའི་ནམ་མཁའི་གླང་པོ་ལས། །རིང་བརྒལ་རྣམ་པར་དགེ་བའི་ཀུན་གསལ་གྱི། །རྩེ་མོར་འགོད་པའི་ལམ་གྱི་འོད་དཀར་ཅན། །བགྲོད་པའི་ཚུལ་ལས་ནམ་ཡང་གཡོ་བ་མེད། བཏགས་མིང་འགོག་པའི་འཇུག་པ་བཅུ་པ་ཡིས། །ངན་འགྲོར་འཕེན་པའི་འགྲོ་སྐྱབས་གསེར་ཅན་གྱི། །ལས་ཉོན་ལྟོ་བ་བྲལ་ཚེ་ཕྱོགས་ཀུན་ལས། །རྒྱལ་
བའི་བཟོད་པའི་གོ་ཆ་རྨད་དུ་བྱུང་། །ཟག་པའི་སྐྱོན་བྲལ་ཡེ་ཤེས་མྱུ་གུའི་ཆོས། །སྐྱེད་བྱེད་ཞིང་ས་མཆོག་ཏུ་གཤིན་པ་གང་། །ཀུན་མཁྱེན་འབྲས་བུར་སྤྱོད་ལ་རིངས་པ་ཡི། །བྱང་སེམས་ཞིང་པའི་དགའ་སྟོན་ཚར་དུ་མངར། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །
ཤེས་སྒྲིབ་ཉོན་མོངས་གཟུང་རྟོག་དང་རྣམ་བྱང་གཟུང་རྟོག་བཤད་པ།
ཤེས་སྒྲིབ་ཉོན་མོངས་གཟུང་རྟོག་དང་རྣམ་བྱང་གཟུང་རྟོག་བཤད་པ། གཉིས་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ལ་གཉིས། གཟུང་རྟོག་བཤད་པ་དང་། འཛིན་རྟོག་བཤད་པའོ། །དང་པོ་ལ། རྩ་བ་དང་། འགྲེལ་པ་གཉིས། དང་པོ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་སྒྲིབ་གཟུང་བར་རྟོག་པ་དབྱེ་བཞི་རྣམ་པ་གཉིས་ཡོད་དེ། གཞི་ཀུན་ནས་ཉོན་མོངས་པའི་རྟེན་ཅན་དང་། དེའི་གཉེན་པོའི་རྟེན་ཅན་དུ་དབྱེ་བ་ཡིས་དེ་ལྟར་འབྱུང་བའི་ཕྱིར། གཉིས་པོ་དེ་ནི་ཆོས་ཅན། ཁྱོད་སོ་སོར་རྣམ་པ་དགུ་དགུ་ཡོད་དེ། རྨོངས་པ་མ་རིག་པ་ལ་དམིགས་པ་དང་། ཕུང་སོགས་ལ་དམིགས་པའི་བྱེ་བྲག་གིས་ཏེ་ཁྱད་པར་གྱིས་དེ་ལྟར་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །རང་གི་དམིགས་ཡུལ་དུ་གྱུར་པའི་གཟུང་བ་ལ་དམིགས་ནས་བདེན་པར་ཞེན་པའི་ཞེན་རིག་དེ་ཤེས་སྒྲིབ་གཟུང་རྟོག་གི་མཚན་ཉིད། རང་གི་དམིགས་ཡུལ་དུ་གྱུར་པའི་འཛིན་པ་ལ་དམིགས་ནས་བདེན་པར་ཞེན་པའི་ཞེན་རིག་དེ་ཤེས་སྒྲིབ་འཛིན་རྟོག་གི་མཚན་ཉིད་ཟེར་ན། བུམ་འཛིན་རྟོག་པ་ལ་དམིགས་ནས་ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་ཆོས་ཅན། མཚོན་བྱ་དང་པོ་དེར་ཐལ། མཚན་ཉིད་དེའི་ཕྱིར། དེར་ཐལ། བུམ་འཛིན་རྟོག་པ་ལ་དམིགས་ནས་བདེན་པར་ཞེན་པའི་ཞེན་རིག་ཡིན་པའི་ཕྱིར་ཏེ། ཆོས་ཅན་དེ་ཡིན་པའི་ཕྱིར། རྩ་བར་འདོད་ན། མ་ཡིན་པར་ཐལ། ཆོས་ཅན་དེ་ཡིན་པའི་ཕྱིར། གཞན་ཡང་། ཉོན་མོངས་ཅན་
གྱི་མ་རིག་པ་ལ་དམིགས་ནས། ལོངས་སྤྱད་བྱར་བདེན་པར་ཞེན་པའི་ཞེན་རིག་ཆོས་ཅན། མཚོན་བྱ་ཕྱི་མ་དེར་ཐལ། མཚན་ཉིད་དེའི་ཕྱིར། དེར་ཐལ། ཉོན་མོངས་ཅན་གྱི་མ་རིག་པ་ལ་དམིགས་ནས་བདེན་པར་ཞེན་པའི་ཞེན་རིག་ཡིན་པའི་ཕྱིར་ཏེ། ཆོས་ཅན་དེ་ཡིན་པའི་ཕྱིར། རྩ་བར་འདོད་མི་ནུས་ཏེ། ཤེས་སྒྲིབ་གཟུང་རྟོག་ཡིན་པའི་ཕྱིར་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །རང་གི་དམིགས་ཡུལ་དུ་གྱུར་པའི་སྡུག་བདེན་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་དེ། ཤེས་སྒྲིབ་ཀུན་ནས་ཉོན་མོངས་གཟུང་རྟོག་གི་མཚན་ཉིད་ཟེར་ན། སྡུག་བདེན་དུ་གྱུར་པའི་དད་པའི་དབང་པོ་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་ན། མ་ཡིན་པར་ཐལ། སྡུག་བདེན་དུ་གྱུར་པའི་དད་པའི་དབང་པོ་དེ་ཀུན་ནས་ཉོན་མོངས་ཕྱོགས་ཀྱི་བདེན་པ་མ་ཡིན་པའི་ཕྱིར། དེར་ཐལ། དེ་རྣམ་བྱང་གི་དབང་པོ་ཡིན་པའི་ཕྱིར། ཁ་ཅིག །ཉོན་མོངས་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་རིག་དེ། ཤེས་སྒྲིབ་ཀུན་ནས་ཉོན་མོངས་གཟུང་རྟོག་གི་མཚན་ཉིད་ཟེར་ན། ཀུན་ནས་ཉོན་མོངས་ཕྱོགས་ཀྱི་བསྡུས་པའི་རྣམ་ཤེས་ཀྱི་ཕུང་པོ་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་ཆོས་ཅན། མཚན་ཉིད། དེར་ཐལ། མཚོན་བྱ་དེའི་ཕྱིར། དེར་ཐལ། དེ་ཡོད་པའི་ཕྱིར། ཀུན་ནས་ཉོན་མོངས་ཕྱོགས་ཀྱིས་བསྡུས་པའི་རྣམ་ཤེས་ཀྱི་ཕུང་པོ་ཉོན་མོངས་མ་ཡིན་པའི་ཕྱིར་ཏེ། ཉོན་མོངས་ཡིན་ན་སེམས་བྱུང་ཡིན་དགོས་པའི་ཕྱིར། ཁ་ཅིག །འཕགས་པའི་ལུགས་ལ་ཤེས་སྒྲིབ་ཀུན་ནས་ཉོན་མོངས་གཟུང་རྟོག་ཡིན་ན་རྣམ་བྱང་གཟུང་རྟོག་ཡིན་པས་ཁྱབ་སྟེ། ཉི་ཁྲི་སྣང་བ་ལས་གཟུང་བའི་རྣམ་པར་རྟོག་པ་དང་པོ་གང་ཡིན་པ་གཉིས་པའང་
ཡིན་ནོ། །ཞེས་གསུངས་པའི་ཕྱིར་ན། མི་འཐད་པར་ཐལ། དེའི་ལུགས་ལ་ཤེས་སྒྲིབ་ཀུན་ནས་ཉོན་མོངས་གཟུང་རྟོག་དང་། རྣམ་བྱང་གཟུང་རྟོག་གི་ཐ་སྙད་མི་འཐད་པའི་ཕྱིར། ཁ་ཅིག །ཤེས་སྒྲིབ་གཟུང་རྟོག་དང་པོ་ཡིན་ན། དེ་གཉིས་པ་ཡིན་པས་ཁྱབ་པ་དེ། ལུང་དེའི་དོན་ཡིན་ཟེར་ན། དེའི་ལུགས་ལ་དེ་གཉིས་མི་འགལ་བར་ཐལ། དམ་བཅའ་འཐད་པའི་ཕྱིར། འགལ་བར་ཐལ། དེའི་ལུགས་ལ་དང་པོ་དེ་ཡིན་ན་རང་གི་དམིགས་ཡུལ་དུ་གྱུར་པའི་ཀུན་ནས་ཉོན་མོངས་ཕྱོགས་ཀྱི་ཆོས་དང་རྣམ་བྱང་གི་ཆོས་གཉིས་ཀ་ཡོད་པས་ཁྱབ། གཉིས་པ་དེ་ཡིན་ན་རྣམ་བྱང་གི་ཆོས་ཁོ་ན་ཡོད་པས་ཁྱབ་པའི་ཕྱིར། དེར་ཐལ། ཉི་ཁྲི་སྣང་བ་ལས། གཟུང་བའི་རྣམ་པར་རྟོག་པ་དང་པོ་ནི་དངོས་པོ་ཐམས་ཅད་པ་ཁོ་ན་ཡིན་ལ། གཉིས་པ་ནི་རྣམ་པར་བྱང་བའི་དངོས་པོ་ཁོ་ན་ཡིན་ཏེ། འདི་ནི་གཟུང་བའི་རྣམ་པར་རྟོག་པ་འདི་དག་གི་ཁྱད་པར་རོ། །ཞེས་གསུངས་པའི་ཕྱིར། ལུང་སྔ་མའི་དོན་ཡོད་དེ། ཤེས་སྒྲིབ་གཟུང་རྟོག་དང་པོའི་དམིགས་ཡུལ་ལ་ཀུན་ནས་ཉོན་མོངས་ཕྱོགས་ཀྱི་ཆོས་དང་། རྣམ་བྱང་ཕྱོགས་ཀྱི་ཆོས་གཉིས་ཡོད་པའི་ནང་ནས། ཕྱི་མ་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་དེ་ཤེས་སྒྲིབ་གཟུང་རྟོག་གཉིས་པ་ཡིན་ཞེས་པའི་དོན་ཡིན་པའི་ཕྱིར། ཁ་ཅིག་རྫས་ཡོད་དང་རྫས་འཛིན་གང་རུང་ལ་དམིགས་ནས་ལོངས་སྤྱོད་བྱེད་དུ་བདེན་པའི་ཞེན་རིག་དེ། ཤེས་སྒྲིབ་རྫས་འཛིན་རྟོག་པའི་མཚན་ཉིད། བཏགས་ཡོད་དང་བཏགས་འཛིན་རུང་ལ་དམིགས་ནས་ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་དེ། ཤེས་སྒྲིབ་བཏགས་འཛིན་རྟོག་པའི་མཚན་ཉིད་ཟེར་ན། མི་འཐད་པར་ཐལ། རྫས་ཡོད་ལ་དམིགས་ནས་དེ་ལྟར་ཞེན་པའི་ཞེན་རིག་དེ་ཤེས་སྒྲིབ་རྫས་འཛིན་རྟོག་པ་མ་ཡིན། བཏགས་
ཡོད་ལ་དམིགས་ནས་དེ་ལྟར་ཞེན་པའི་ཞེན་རིག་ཤེས་སྒྲིབ་བཏགས་འཛིན་རྟོག་པ་མ་ཡིན་པའི་ཕྱིར། དང་པོ་དེར་ཐལ། རྫས་ཡོད་ལོངས་སྤྱོད་པ་པོ་མ་ཡིན་པའི་ཕྱིར། གཉིས་པ་དེར་ཐལ། བཏགས་ཡོད་ལོངས་སྤྱོད་པ་པོ་མ་ཡིན་པའི་ཕྱིར། གཉིས་ཀ་དེར་ཐལ། ཡུལ་ཅན་མ་ཡིན་པའི་ཕྱིར། ཁ་ཅིག །སྐྱེས་བུ་བདེན་སྟོང་སྒྱུ་མ་ལྟ་བུ་ལ་དམིགས་ནས་ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་དེ། ཤེས་སྒྲིབ་བཏགས་འཛིན་རྟོག་པ་ཡིན་ཟེར་ན། སྐྱེས་བུ་བདེན་སྟོང་ལ་དམིགས་ནས་དེར་ཞེན་པའི་ཞེན་རིག་དེ་ཤེས་སྒྲིབ་བཏགས་འཛིན་རྟོགས་པ་ཡིན་པར་ཐལ། འདོད་པའི་ཕྱིར། འདོད་ན། སྐྱེས་བུ་བདེན་སྟོང་ལོངས་སྤྱོད་པ་པོ་ཡིན་པར་ཐལ། འདོད་པའི་ཕྱིར། འདོད་མི་ནུས་སོ། ཁ་ཅིག །ཤེས་སྒྲིབ་ཡིན་ན་ཤེས་སྒྲིབ་རྟོག་པ་ཡིན་པས་ཁྱབ་ཟེར་ན། བདེན་འཛིན་གྱི་བག་ཆགས་ཆོས་ཅན། དེར་ཐལ། དེའི་ཕྱིར། དེར་ཐལ། ཐར་པ་དང་ཐམས་ཅད་མཁྱེན་པ་གཉིས་ཀྱི་ནང་ནས་ཐམས་ཅད་མཁྱེན་པ་འཐོབ་པ་ལ་བར་དུ་གཅོད་བྱེད་ཀྱི་སྒྲིབ་པ་ཡིན་པའི་ཕྱིར། འདོད་ན། དེ་ཆོས་ཅན། ཤེས་པ་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། བག་ཆགས་ཡིན་པའི་ཕྱིར། ཁ་ཅིག །འདིར་བསྟན་ཤེས་སྒྲིབ་རྟོག་པ་ཡིན་ན་དགག་རྟོག་ཡིན་པས་ཁྱབ་ཟེར་ན། མི་འཐད་པར་ཐལ། སྐབས་འདི་དང་རྩེ་སྦྱོར་གྱི་སྐབས་གཉིས་ཀར་ཤེས་སྒྲིབ་རྟོག་པ་དང་སྒྲུབ་རྟོག་གི་གཞི་མཐུན་བསྟན་པའི་ཕྱིར། དེར་ཐལ། འདིར་ཀུན་ནས་ཉོན་མོངས་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་དེ། ཤེས་སྒྲིབ་ཀུན་ནས་ཉོན་མོངས་གཟུང་རྟོག་ཏུ་བསྟན། རྩེ་སྦྱོར་གྱི་སྐབས་སུ་ཐེག་ཆེན་གྱི་ལམ་འབྲས་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་དེ། ཤེས་སྒྲིབ་འཇུག་པ་གཟུང་རྟོག་ཏུ་བསྟན་པའི་ཕྱིར། ཁ་ཅིག །འདིར་བསྟན་ཤེས་སྒྲིབ་རྟོག་པ་ཡིན་ན་སྒྲུབ་རྟོག་ཡིན་པས་ཁྱབ་ཟེར་ན། གཟུང་འཛིན་བདེན་སྟོང་བདེན་གྲུབ་ཏུ་ཞེན་པའི་
བློ་ཆོས་ཅན། དེར་ཐལ། དེའི་ཕྱིར། དེར་ཐལ། ཤེས་སྒྲིབ་གཟུང་འཛིན་རྣམ་པར་རྟོག་པའི་གཙོ་བོ་ཀུན་སྐབས་འདི་དང་རྩེ་སྦྱོར་གི་སྐབས་གཉིས་ཀར་བསྟན་པའི་ཕྱིར། དེར་ཐལ། མངོན་རྟོགས་རྒྱན་གྱིས་དེ་རྣམས་བསྟན་པའི་ཕྱིར། དེར་ཐལ། མངོན་རྟོགས་རྒྱན་ལ་བརྟེན་ནས་དེ་རྣམས་ཀྱི་གཉེན་པོ་ཁོང་དུ་ཆུད་ནུས་པའི་ཕྱིར། རྩ་བར་འདོད་ན། མ་ཡིན་པར་ཐལ། དགག་རྟོག་ཡིན་པའི་ཕྱིར། དེར་ཐལ། གཟུང་འཛིན་བདེན་སྟོང་ཡོད་པར་འཛིན་པའི་རྟོག་པ་དེ་དགག་རྟོག་ཡིན་པའི་ཕྱིར། དེར་ཐལ། གཟུང་འཛིན་བདེན་སྟོང་ཡོད་པ་དགག་པ་ཡིན་པའི་ཕྱིར། དེར་ཐལ། གཟུང་འཛིན་བདེན་སྟོང་དགག་པ་ཡིན་པའི་ཕྱིར། ཊཱི་ཀར་གཟུང་བར་རྟོག་པ་དང་འཛིན་པར་རྟོག་པ་ཞེས་བཤད་པ་ནི་ཕྱོགས་ཙམ་མཚོན་པར་བྱེད་པ་ཡིན་གྱི། སྤང་བྱ་རྟོག་པ་ཐམས་ཅད་འཛིན་སྟངས་དེ་དང་འདྲ་བར་ཟད་པ་མ་ཡིན་ཏེ། ཉན་ཐོས་ཀྱི་ལམ་འབྲས་ལྡོག་བྱར་བདེན་པར་ཞེན་པ་ཡང་འདིར་བསྟན་པའི་སྤང་བྱ་རྟོག་པ་ཡིན་པའི་ཕྱིར་རོ། །ཞེས་དང་། དེས་ན་ལོངས་སྤྱད་བྱར་བདེན་པར་ཞེན་པ་དང་། ལོངས་སྤྱོད་བྱེད་དུ་བདེན་པར་ཞེན་པ་ནི་གཟུང་བར་རྟོག་པ་དང་འཛིན་པར་རྟོག་པའི་དོན་ནོ་ཞེས་སོགས་ཀྱི་དོན་ལ། ཁ་ཅིག །ཉན་རང་གི་ལམ་འབྲས་ལ་དམིགས་ནས་ཐེག་ཆེན་ལམ་གྱི་ལྡོག་བྱར་བདེན་པར་ཞེན་པའི་ཞེན་རིག་ཆོས་ཅན། ལོངས་སྤྱད་བྱར་བདེན་པར་ཞེན་པའི་ཞེན་རིག་ཡིན་པར་ཐལ། ཤེས་སྒྲིབ་གཟུང་རྟོག་ཡིན་པའི་ཕྱིར། ལུང་དང་པོའི་སྐབས་སུ་རྟགས་ཁས་བླངས། ལུང་གཉིས་པའི་སྐབས་སུ་ཁྱབ་པ་ཁས་བླངས་ཟེར་བ་མི་འཐད་དེ། དང་པོའི་སྐབས་སུ་ཉན་རང་གི་ལམ་འབྲས་ལ་དམིགས་ནས་བྱང་སེམས་ལམ་གྱི་ལྡོག་བྱར་བདེན་པར་ཞེན་པའི་ཞེན་རིག་དེ། འདིར་བསྟན་ཤེས་སྒྲིབ་རྟོག་པར་བསྟན་གྱི། འདིར་བསྟན་ཤེས་སྒྲིབ་གཟུང་རྟོག་ཏུ་མ་བསྟན་པའི་ཕྱིར། དེར་ཐལ། ལུང་དང་པོས་འདིར་
བསྟན་ཤེས་སྒྲིབ་གཟུང་རྟོག་ཡིན་ན། ལོངས་སྤྱད་བྱར་བདེན་པར་ཞེན་པའི་ཞེན་རིག་ཡིན་པས་ཁྱབ་པར་བསྟན་པ་གང་ཞིག །དེས་ཉན་རང་གི་ལམ་འབྲས་ལ་དམིགས་ནས་བྱང་སེམས་ལམ་གྱི་ལྡོག་བྱར་བདེན་པར་ཞེན་པའི་ཞེན་རིག་དེ་ལོངས་སྤྱད་བྱར་བདེན་པར་ཞེན་པའི་ཞེན་རིག་མ་ཡིན་པའི་མཚན་གཞིར་བསྟན་པའི་ཕྱིར། བྱས་པ་ལ་ཁོ་ན་རེ། ཉན་རང་གི་ལམ་འབྲས་ལ་དམིགས་ནས། བྱང་སེམས་ལམ་གྱི་ལྡོག་བྱར་བདེན་པར་ཞེན་པའི་ཞེན་རིག་དེ་ཆོས་ཅན། ཤེས་སྒྲིབ་གཟུང་རྟོག་ཡིན་པར་ཐལ། ཤེས་སྒྲིབ་ལྡོག་པ་གཟུང་རྟོག་ཡིན་པའི་ཕྱིར། དེར་ཐལ། འཇུག་པ་དང་ནི་ལྡོག་པ་ལ། ཞེས་པའི་ནང་ཚན་གྱི་ལྡོག་པ་ལ་ཞེས་པའི་གཞུང་གི་སྐབས་ནས་བསྟན་པའི་ཤེས་སྒྲིབ་རྟོག་པ་ཡིན་པའི་ཕྱིར་ན་མ་ཁྱབ་སྟེ། ལྡོག་པ་ལ་ཞེས་པའི་གཞུང་གི་སྐབས་ནས་བསྟན་པའི་ཤེས་སྒྲིབ་རྟོག་པ་ཡིན་ན། དེའི་སྐབས་ནས་དངོས་སུ་བསྟན་པའི་ཤེས་སྒྲིབ་རྟོག་པ་ཡིན་པས་མ་ཁྱབ་པའི་ཕྱིར། དེར་ཐལ། རྩེ་སྦྱོར་གྱི་སྐབས་ནས་བསྟན་པའི་ཤེས་སྒྲིབ་རྟོག་པ་ཡིན་ན། དེའི་སྐབས་ནས་དངོས་སུ་བསྟན་པའི་ཤེས་སྒྲིབ་རྟོག་པ་ཡིན་པས་མ་ཁྱབ་པའི་ཕྱིར། ཁ་ཅིག །དེ་ཤེས་སྒྲིབ་ལྡོག་པ་གཟུང་རྟོག་ཡིན་པར་ཐལ། དེའི་མཚན་གཞི་ཡོད་པའི་ཕྱིར་ན་མ་ཁྱབ་སྟེ། བྱང་སེམས་ལམ་གྱི་ལྡོག་བྱར་གྱུར་པའི་ཉན་རང་གི་ལམ་འབྲས་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་དེ། དེའི་མཚན་གཞི་ཡིན་པའི་ཕྱིར་ཏེ། དེ་ཡོད་པའི་ཕྱིར། གཞན་ཡང་། ཉན་རང་གི་དེ་ལ་དམིགས་ནས་བྱང་སེམས་ལམ་གྱི་ལྡོག་བྱར་བདེན་པར་ཞེན་པའི་ཞེན་རིག་དེ་ཆོས་ཅན། ལོངས་སྤྱད་བྱར་བདེན་པར་ཞེན་པའི་ཞེན་རིག་ཡིན་པར་ཐལ། ཤེས་སྒྲིབ་གཟུང་རྟོག་ཡིན་པའི་ཕྱིར། རྟགས་ཁས། འདོད་ན། ཉན་རང་གི་ལམ་འབྲས་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་ཡིན་པར་ཐལ། འདོད་པའི་ཕྱིར། འདོད་ན། དེ་ལ་དམིགས་ནས་གཟུང་བར་བདེན་
པར་ཞེན་པའི་ཞེན་རིག་ཡིན་པར་ཐལ། འདོད་པའི་ཕྱིར། འདོད་ན། རྟོག་པ་སེལ་འཇུག་མ་ཡིན་པར་ཐལ། འདོད་པའི་ཕྱིར། ཁ་ཅིག །ཉན་རང་གི་ལམ་འབྲས་ལ་དམིགས་ནས་བྱང་སེམས་ལམ་གྱི་ལྡོག་བྱར་གཟུང་བ་བདེན་པར་ཞེན་པའི་ཞེན་རིག་དེ་ཤེས་སྒྲིབ་ལྡོག་པ་གཟུང་རྟོག་ཡིན་ཟེར་ན། མི་འཐད་པར་ཐལ། དེ་འདྲའི་ཞེན་རིག་དེ་ཉན་རང་གི་ལམ་འབྲས་ལ་དམིགས་ནས་གཟུང་བ་བདེན་པར་ཞེན་པའི་རྟོག་པ་མ་ཡིན་པའི་ཕྱིར། དེར་ཐལ། ཉན་རང་གི་ལམ་འབྲས་ལ་དམིགས་ནས་ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་དེ། དེ་མ་ཡིན་པའི་ཕྱིར། མ་གྲུབ་ན། ཞེན་རིག་དེ་ཉན་རང་གི་ལམ་འབྲས་ལ་དམིགས་ནས་ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་ཡིན་པར་ཐལ། མ་གྲུབ་པ་དེའི་ཕྱིར། འདོད་ན། དེ་ཆོས་ཅན། ཤེས་སྒྲིབ་འཛིན་རྟོག་ཡིན་པར་ཐལ། ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་ཡིན་པའི་ཕྱིར། འདོད་ན། མ་ཡིན་པར་ཐལ། ཤེས་སྒྲིབ་གཟུང་རྟོག་ཡིན་པའི་ཕྱིར། དེར་ཐལ། ལོངས་སྤྱད་བྱར་བདེན་པར་ཞེན་པའི་ཞེན་རིག་ཡིན་པའི་ཕྱིར། དེར་ཐལ། གཟུང་བར་བདེན་པར་ཞེན་པའི་ཞེན་རིག་ཡིན་པའི་ཕྱིར། རྟགས་ཁས། གཉིས་པ་རང་ལུགས་ནི། ལོངས་སྤྱད་བྱར་བདེན་པར་ཞེན་པའི་ཞེན་རིག་དེ། ཤེས་སྒྲིབ་གཟུང་རྟོག་གི་མཚན་ཉིད། དེ་ལ་དབྱེ་ན། ཉོན་མོངས་གཟུང་རྟོག་དང་། རྣམ་བྱང་གཟུང་རྟོག་གཉིས། རང་གི་དམིགས་ཡུལ་དུ་གྱུར་པའི་ཀུན་ནས་ཉོན་མོངས་ཕྱོགས་ཀྱི་བདེན་པ་ལ་དམིགས་ནས། ལོངས་སྤྱད་བྱར་བདེན་པར་ཞེན་པའི་ཞེན་རིག་དེ་དང་པོའི་མཚན་ཉིད། རང་གི་དམིགས་ཡུལ་དུ་གྱུར་པའི་རྣམ་བྱང་ཕྱོགས་ཀྱི་བདེན་པ་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་དེ་གཉིས་པའི་མཚན་ཉིད། ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་ཤེས་སྒྲིབ་འཛིན་རྟོག་གི་མཚན་ཉིད། དེ་ལ་
དབྱེ་ན། ཤེས་སྒྲིབ་རྫས་འཛིན་རྟོག་པ་དང་། བཏགས་འཛིན་རྟོག་པ་གཉིས། རང་གི་དམིགས་ཡུལ་དུ་གྱུར་པའི་རྫས་འཛིན་ལ་དམིགས་ནས། ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་དེ་དང་པོའི་མཚན་ཉིད། རང་གི་དམིགས་ཡུལ་དུ་གྱུར་པའི་བཏགས་འཛིན་ལ་དམིགས་ནས་ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་དེ་གཉིས་པའི་མཚན་ཉིད། གསུམ་པ་རྩོད་པ་སྤོང་བ་ལ། ཁ་ཅིག་ན་རེ། བུམ་འཛིན་རྟོག་པ་ལ་དམིགས་ནས་ལོངས་སྤྱད་བྱ་སྤྱོད་བྱེད་གཉིས་ཀར་བདེན་པར་ཞེན་པའི་ཞེན་རིག་ཆོས་ཅན། ཤེས་སྒྲིབ་གཟུང་རྟོག་ཡིན་པར་ཐལ། མཚན་ཉིད་དེའི་ཕྱིར། དེར་ཐལ། བུམ་འཛིན་རྟོག་པ་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་ཡིན་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར་ན་མ་ཁྱབ། ཡང་དེ་ཆོས་ཅན། ཤེས་སྒྲིབ་འཛིན་རྟོག་ཡིན་པར་ཐལ། མཚན་ཉིད་དེའི་ཕྱིར་སོགས་སྔར་ལྟར་ཟེར་ན་ཡང་མ་ཁྱབ། འོ་ན། བུམ་འཛིན་རྟོག་པ་ལ་དམིགས་ནས་རྟག་མི་རྟག་གཉིས་ཀར་ཞེན་པའི་ཞེན་རིག་ཆོས་ཅན། བུམ་འཛིན་རྟོག་པ་ལ་དམིགས་ནས་མི་རྟག་པར་ཞེན་པའི་ཞེན་རིག་ཡིན་པ་ཐལ། དེ་ལ་དམིགས་ནས་རྟག་མི་རྟག་གཉིས་ཀར་ཞེན་པའི་ཞེན་རིག་ཡིན་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། བདེན་འཛིན་ཡིན་པར་ཐལ། འདོད་པའི་ཕྱིར། འདོད་ན། བུམ་འཛིན་རྟོག་པ་རྟག་མི་རྟག་གཉིས་ཀར་བདེན་པར་གྲུབ་པས་སྟོང་པ་སྟོང་ཉིད་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། སེམས་ཙམ་པས་རྟག་མི་རྟག་གཉིས་ཀར་དུ་མ་གྲུབ་པར་རྟོགས་པའི་ཕྱིར། གཞན་ཡང་། བུམ་འཛིན་རྟོག་པ་ལ་དམིགས་ནས་ལོངས་སྤྱད་བྱ་སྤྱོད་བྱེད་གཉིས་ཀར་དུ་བདེན་པར་ཞེན་པའི་ཞེན་རིག་གི་ཞེན་ཡུལ་ཡིན་ན། བུམ་འཛིན་རྟོག་པ་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་གི་ཞེན་ཡུལ་ཡིན་དགོས་པར་ཐལ། བུམ་འཛིན་རྟོག་པ་ལོངས་སྤྱད་བྱར་བདེན་པར་གྲུབ་པ་དེ། དེ་ལ་དམིགས་ནས་ལོངས་སྤྱད་བྱ་སྤྱོད་
བྱེད་གཉིས་ཀར་དུ་བདེན་པར་ཞེན་པའི་ཞེན་རིག་གི་ཡུལ་ཡིན་པའི་ཕྱིར། དེར་ཐལ། ཞེན་རིག་དེ་རྟོག་པ་དེ་ལ་དམིགས་ནས་ལོངས་སྤྱད་བྱར་བདེན་པར་ཞེན་པའི་ཞེན་རིག་ཡིན་པའི་ཕྱིར། རྟགས་ཁས། རྩ་བར་འདོད་ན། བུམ་འཛིན་རྟོག་པ་ལོངས་སྤྱོད་བྱེད་དུ་བདེན་པར་གྲུབ་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། ཞེན་རིག་དེ་རྟོག་པ་དེ་ལ་དམིགས་ནས་ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་ཡིན་པའི་ཕྱིར། རྟགས་ཁས། འདོད་ན། མ་ཡིན་པར་ཐལ། བུམ་འཛིན་རྟོག་པ་ལ་དམིགས་ནས་ལོངས་སྤྱོད་བྱེད་དུ་བདེན་པར་ཞེན་པའི་ཞེན་རིག་གི་ཞེན་ཡུལ་ཡིན་པའི་ཕྱིར། ཁྱབ་པ་ཡོད་དེ། རྟོག་པ་རྣམས་སེལ་འཇུག་ཡིན་པའི་ཕྱིར། ཡང་ཁ་ཅིག །གང་ཟག་གི་བདག་ལ་དམིགས་ནས། ལོངས་སྤྱད་བྱར་བདེན་པར་ཞེན་པའི་ཞེན་རིག་ཆོས་ཅན། ཤེས་སྒྲིབ་གཟུང་རྟོག་ཡིན་པར་ཐལ། མཚན་ཉིད་དེའི་ཕྱིར། དེར་ཐལ། གང་ཟག་གི་བདག་ལ་དམིགས་ནས། ལོངས་སྤྱད་བྱར་བདེན་པར་ཞེན་པའི་ཞེན་རིག་ཡིན་པའི་ཕྱིར། ཟེར་ན་མ་ཁྱབ་སྟེ། དེ་ལ་དམིགས་ནས། ལོངས་སྤྱད་བྱར་བདེན་པར་ཞེན་པའི་ཞེན་རིག་དེ་བདེན་འཛིན་མ་ཡིན་པའི་ཕྱིར། དེར་ཐལ། གང་ཟག་གི་བདག་ལོངས་སྤྱད་བྱ་མ་ཡིན་པའི་ཕྱིར་ཏེ། ཡུལ་མ་ཡིན་པའི་ཕྱིར། གཉིས་པ་འགྲེལ་པ་ནི། གཟུང་བར་རྣམ་པར་རྟོག་པ་ཆོས་ཅན། རྣམ་པ་གཉིས་ཡོད་དེ། ཀུན་ནས་ཉོན་མོངས་པའི་གཞིའི་རྟེན་ཅན་དང་། གཉེན་པོའི་རྟེན་ཅན་ཉིད་ཀྱིས་གཉིས་ཡོད་པའི་ཕྱིར། ཤེས་བྱ་ཆོས་ཅན། དེ་རེ་རེ་ལ་ཡང་རྣམ་པ་དགུ་དགུ་ཡོད་དེ། མ་རིག་པ་དང་རྣམ་པར་བྱང་བའི་ཕུང་པོ་ལ་སོགས་པའི་དམིགས་པའི་རབ་ཏུ་དབྱེ་བས་དེ་ལྟར་ཡོད་པའི་ཕྱིར། གཉིས་པ་འཛིན་རྟོག་ལ། རྩ་བ་དང་། འགྲེལ་པ་གཉིས་ལས། དང་པོ་ནི། གཟུང་རྟོག་ཏུ་མ་ཟད། འཛིན་པར་རྟོག་པ་ལའང་ཆོས་ཅན། རྣམ་པ་གཉིས་སུ་འདོད་དེ། གང་ཟག་རྫས་ཡོད་དང་སྐྱེས་བུ་བཏགས་པའི་རྟེན་ཅན་
གྱིས་དེ་ལྟར་ཡོད་པའི་ཕྱིར། དེ་བཞིན་དུ་གཉིས་པོ་དེ་ལ་ཡང་སོ་སོར་དགུ་དགུ་ཡོད་དེ། རང་དབང་གི་བདག་དང་སོགས་པས་བསྡུས་པ། གང་ཟག་སོགས་ངོ་བོ་ལ་དམིགས་པ་དང་ཕུང་སོགས་ལ་བརྟེན་པ་དགུ་ཡོད་པ་ལས་ཏེ་ཡོད་པའི་ཕྱིར། གཉིས་པ་ནི། འཛིན་པར་རྣམ་པར་རྟོག་པ་ཡང་ཆོས་ཅན། ཁྱོད་ལ་དབྱེ་ན་རྣམ་པ་གཉིས་ཡོད་དེ། གང་ཟག་རྫས་སུ་ཡོད་པ་དང་། སྐྱེས་བུ་བཏགས་པར་ཡོད་པ་ལ་དམིགས་པས། དེ་ལྟར་ཡོད་པའི་ཕྱིར། དེ་སོ་སོར་གཟུང་རྟོག་ལ་དབྱེ་བ་དེ་ལྟར་རྣམ་པ་དགུ་དགུ་ཡོད་དེ། བདག་རང་དབང་ཅན་དང་། ཕུང་པོ་ལ་སོགས་པ་ལ་དམིགས་པ་ཉིད་ཀྱིས་དེ་ལྟར་ཡོད་པའི་ཕྱིར། གཉིས་པ་རྒྱས་པར་བཤད་པ་ལ། མཚམས་སྦྱར་བ་དང་། སོ་སོའི་དོན་གཉིས། དང་པོ་ནི། ཤེས་བྱ་ཆོས་ཅན། འདིར་བསྟན་རྟོག་པ་སོ་དྲུག་ཡོད་པ་དེ་ལ་མདོར་བསྡུས་པའི་དོན་ནི་བཤད་པ་འདི་ཡིན་ཏེ། དེ་ལྟར་འོག་ནས་འཆད་པར་འགྱུར་བའི་ཕྱིར། གཉིས་པ་ལ། གཟུང་རྟོག་དང་། འཛིན་རྟོག་གཉིས། དང་པོ་ལ། ཉོན་མོངས་གཟུང་རྟོག་དང་། རྣམ་བྱང་གཟུང་རྟོག་གཉིས་ལས། ཀུན་ནས་ཉོན་མོངས་པའི་གཞི་རྟེན་ཅན་གྱི་གཟུང་རྟོག་ཆོས་ཅན། ཁྱོད་ལ་ལོངས་སྤྱད་བྱའི་སྒོ་ནས་དབྱེ་ན། གཟུང་བར་བདེན་པར་རྣམ་པར་རྟོག་པ་དགུ་ཡོད་དེ། སྡུག་བསྔལ་ཀུན་སྤྱི་དང་བྱེ་བྲག་ལ་དམིགས་པ་དམིགས་པའི་སྒོ་ནས་དེ་ལྟར་ཡོད་པའི་ཕྱིར། ཤེས་བྱ་ཆོས་ཅན། སྡུག་ཀུན་སྤྱི་ལ་དམིགས་པའི་སྒོ་ནས་གཉིས་སུ་ཡོད་དེ། ཉོན་མོངས་ཀྱི་སྤྱི་ཉོན་མོངས་ཅན་གྱི་མ་རིག་པ་དང་། སྡུག་བསྔལ་གྱི་སྤྱི་ཟག་བཅས་ཀྱི་གཟུགས་ལ་སོགས་པའི་ཕུང་པོ་ལ་ལོངས་སྤྱད་བྱར་བདེན་པར་ཞེན་པ་གཉིས་ཡོད་པའི་ཕྱིར། ཤེས་བྱ་ཆོས་ཅན། ཉོན་མོངས་ཀྱི་བྱེ་བྲག་ལ་དམིགས་པའི་སྒོ་ནས་བཞི་ཡོད་དེ། མིང་དང་གཟུགས་ལ་མངོན་པར་ཞེན་པ་འབྲས་བུ་ཕྱིན་ཅི་ལོག་ལ་སྲེད་པ་དམིགས་པར་བྱས་པ་དང་། རྟག་ཆད་ཀྱི་མཐའ་གཉིས་ལ་ཆགས་པ་ཤེས་བྱ་ཕྱིན་ཅི་ལོག་ལ་སྲིད་པ་དང་། ཀུན་ནས་ཉོན་མོངས་
པ་དོར་བྱ་དང་རྣམ་པར་བྱང་བ་བླང་བྱར་མི་ཤེས་པ་མ་དད་པ་ལ་དམིགས་པ་དང་། འཕགས་པའི་ལམ་ལ་མངོན་པར་སྤྲོ་བའི་ཚུལ་གྱིས་མི་གནས་པ་ལེ་ལོ་ལ་དམིགས་ནས་ལོངས་སྤྱད་བྱར་བདེན་པར་ཞེན་པ་ཡོད་པའི་ཕྱིར། ཀུན་ནས་ཉོན་མོངས་པའི་གཞིའི་རྟེན་ཅན་གྱི་གཟུང་རྟོག་ཆོས་ཅན། ཁྱོད་ལ་སྡུག་བསྔལ་གྱི་བྱེ་བྲག་ལ་དམིགས་པའི་སྒོ་ནས་དབྱེ་ན་གསུམ་ཡོད་དེ། ཟག་བཅས་ཀྱི་ཚོར་བའི་དམིགས་པ་རྣམ་སྨིན་སིམ་གདུང་བར་མ་གསུམ་དང་། ཚོར་བའི་རྟེན་བདག་དང་། ལ་སོགས་པ་གཞན་དང་། ཚོར་བ་སྡུག་བསྔལ་གྱི་རང་བཞིན་ཤེས་པས་ཡིད་འབྱུང་ནས། རྣམ་པར་དག་པ་བསྐྱེད་པ་ལ་སོགས་པ་ལ་དམིགས་ནས་ལོངས་སྤྱད་བྱར་བདེན་པར་ཞེན་པ་ཡོད་པའི་ཕྱིར། གཉིས་པ་ནི། གཉེན་པོའི་རྟེན་ཅན་གཟུང་བར་རྣམ་པར་རྟོག་པ་རྣམས་ཆོས་ཅན། ཁྱོད་ལ་དབྱེ་ན་དགུ་ཡོད་དེ། རྣམ་བྱང་གི་ཤེས་བྱ་ལ་དམིགས་པ་ལྔ་དང་། སྤྱོད་པ་ལ་དམིགས་པ་གཅིག་དང་། ངོ་བོ་ལ་དམིགས་པ་གསུམ་ཡོད་པའི་ཕྱིར། དེ་ཆོས་ཅན། ཁྱོད་ལ་རྣམ་བྱང་གི་ཤེས་བྱ་ལ་དམིགས་པ་ལྔ་ཡོད་དེ། རྣམ་བྱང་གི་ཕུང་པོ་དང་། བདག་རྐྱེན་སྐྱེ་མཆེད་ཀྱིས་བསྡུས་པ་སྐྱེ་བའི་སྒོ་དང་། ཉེར་ལེན་ཁམས་ཀྱིས་བསྡུས་པ་རིགས་དང་། རྣམ་བྱང་གི་སྐྱེ་བ་རྟེན་འབྲེལ་ལུགས་བཟློག་ཤེས་བྱ་ཇི་སྙེད་པས་བསྡུས་པ་བཞི་དང་། ཇི་ལྟ་བ་སྟོང་པ་ཉིད་ལ་དམིགས་ནས་སྔར་ལྟར་ཞེན་པ་ཡོད་པའི་ཕྱིར། དེ་ཆོས་ཅན། ཁྱོད་ལ་སྤྱོད་པ་ལ་དམིགས་པ་ཡོད་དེ། སྤྱོད་པ་ཕ་རོལ་ཏུ་ཕྱིན་པའི་དོན་ལ་དམིགས་ནས་དེ་ལྟར་ཞེན་པ་ཡོད་པའི་ཕྱིར། དེ་ཆོས་ཅན། ཁྱོད་ལ་ངོ་བོ་ལ་དམིགས་པ་གསུམ་ཡོད་དེ། རྣམ་བྱང་གི་ངོ་བོ་མཐོང་བའི་ལམ་དང་། སྒོམ་པའི་ལམ་དང་། མི་སློབ་པའི་ལམ་ལ་དམིགས་ནས། ལོངས་སྤྱད་བྱར་བདེན་པར་མངོན་པར་ཞེན་པ་རྣམས་སུ་ཡོད་པའི་ཕྱིར། གཉིས་པ་ལ། རྫས་འཛིན་རྟོག་པ་དང་། རྟག་འཛིན་རྟོག་པ་གཉིས་ལས། དང་པོ་ནི། གང་ཟག་རྫས་སུ་ཡོད་པའི་རྟེན་ཅན་གྱི་འཛིན་པ་ལ་ལོངས་
སྤྱོད་བྱེད་དུ་བདེན་པར་ཞེན་པའི་འཛིན་པར་རྣམ་པར་རྟོག་པ་ཆོས་ཅན། ཁྱོད་ལ་དབྱེ་ན་དགུ་ཡོད་དེ། ཁྱོད་ལ་དམིགས་པ་རྫས་འཛིན་དེའི་ཞེན་ཚུལ་གཅིག་དང་། ཞེན་ཡུལ་གྱི་སྒོ་ནས་ཕྱེ་བ་བརྒྱད་ཡོད་པའི་ཕྱིར། དང་པོ་ཡོད་དེ། བདག་རང་དབང་ཅན་དུ་འཛིན་པ་ལ་དམིགས་ནས་ལོངས་སྤྱོད་བྱེད་དུ་བདེན་པར་ཞེན་པ་ཡོད་པའི་ཕྱིར། དེ་ཆོས་ཅན། ཁྱོད་ལ་ཞེན་ཡུལ་གྱི་སྒོ་ནས་ཕྱེ་བ་བརྒྱད་ཡོད་དེ། དམིགས་པ་རྫས་འཛིན་སྤྱིའི་དབང་དུ་བྱས་པ་གསུམ་དང་། བྱེ་བྲག་གི་དབང་དུ་བྱས་ནས་དབྱེ་བ་ལྔ་ཡོད་པའི་ཕྱིར། དེ་ཆོས་ཅན། ཁྱོད་ལ་གསུམ་པོ་དེ་ཡོད་དེ། རང་དབང་ཅན་གྱི་བདག་གཅིག་པུ་དང་། རྒྱུ་དང་ལྟ་བ་པོ་དང་ལ་སོགས་པ་ཤེས་པ་པོའི་བདག་ཏུ་འཛིན་པ་ལ་དམིགས་ནས། ལོངས་སྤྱོད་པ་པོར་བདེན་པར་ཞེན་པ་སྟེ། རིམ་པ་བཞིན་དུ་ཕུང་ཁམས་སྐྱེ་མཆེད་ལ་རང་དབང་ཅན་གྱི་བདག་ཏུ་འཛིན་པ་དམིགས་པར་བྱས་པ་གསུམ་ཡོད་པའི་ཕྱིར། དེ་ཆོས་ཅན། ཁྱོད་ལ་བྱེ་བྲག་གི་དབང་དུ་བྱས་པའི་སྒོ་ནས་དབྱེ་བ་ལྔ་ཡོད་དེ། མ་རིག་པ་ལ་སོགས་པའི་ཀུན་ནས་ཉོན་མོངས་པ་ལ་རང་དབང་བའི་བདག་ཏུ་འཛིན་པ་དང་། འཇིག་རྟེན་པའི་འདོད་ཆགས་དང་བྲལ་བ་དང་། མཐོང་བའི་ལམ་དང་། སྒོམ་པའི་ལམ་དང་། དོན་བྱས་པའི་རྟེན་སྟོབས་སོགས་ལ་རང་དབང་བའི་བདག་ཏུ་འཛིན་པ་དམིགས་པར་བྱས་ནས་ལོངས་སྤྱོད་བྱེད་དུ་བདེན་པར་ཞེན་པ་ཡོད་པའི་ཕྱིར། གཉིས་པ་ནི། སྐྱེས་བུ་བཏགས་པར་ཡོད་པའི་ཕྱིར་རྟེན་ཅན་གྱི་འཛིན་པ་ལ་དམིགས་ནས་ལོངས་སྤྱོད་བྱེད་དུ་འཛིན་པར་རྣམ་པར་རྟོག་པ་ཆོས་ཅན། ཁྱོད་ལ་དབྱེ་ན་དགུ་ཡོད་དེ། དམིགས་པ་འཛིན་པ་དེ་ཡུལ་སྤྱིའི་སྒོ་ནས་དབྱེ་བ་གསུམ་དང་། བྱེ་བྲག་གི་སྒོ་ནས་དབྱེ་བ་དྲུག་ཡོད་པའི་ཕྱིར། དེ་ཆོས་ཅན། ཁྱོད་ལ་དང་པོ་གསུམ་ཡོད་དེ། ཕུང་པོ་དང་། སྐྱེ་མཆེད་དང་། ཁམས་རྣམས་སྐྱེས་བུར་འཛིན་པ་ལ་དམིགས་པ་རྣམས་སུ་ཡོད་པའི་ཕྱིར། དེ་ཆོས་ཅན། བྱེ་བྲག་གི་དབྱེ་བ་དྲུག་ཡོད་དེ། མ་རིག་པ་ལ་སོགས་པའི་རྟེན་ཅིང་
འབྲེལ་བར་འབྱུང་བ་དང་། རྣམ་པར་བྱང་བ་བྱང་ཕྱོགས་སོ་བདུན་དང་། མཐོང་བའི་ལམ་དང་། སྒོམ་པའི་ལམ་དང་ཁྱད་པར་གྱི་ལམ་དང་། མི་སློབ་པའི་ལམ་ལ་སྐྱེས་བུར་འཛིན་པ་ལ་དམིགས་ནས་ལོངས་སྤྱོད་བྱེད་དུ་མངོན་པར་ཞེན་པའི་ཕྱིར། གསུམ་པ་དོན་བསྡུ་ནི། སྔར་བཤད་པ་དེ་ལྟ་བུའི་རྣམ་པར་རྟོག་པ་བཞི་དང་། ཐེག་ཆེན་གྱི་ངེས་པར་འབྱེད་པའི་ཆ་དང་མཐུན་པ་བཞི་པོ་གྲངས་བཞིན་དུ་ནུས་པ་འཇོམས་པར་བྱེད་པའི་སྤང་གཉེན་དུ་ལྡན་པ་ཡིན་ཏེ། དེ་ལྟར་གོང་དུ་བཤད་ཟིན་པའི་ཕྱིར།
ཡོངས་འཛིན་གྱི་རྣམ་གཞག
ཡོངས་འཛིན་གྱི་རྣམ་གཞག །གསུམ་པ་ཡོངས་འཛིན་བཤད་པ་ལ་གསུམ། གོ་རིམ་གཞན་གྱི་དགོས་པ་བསྟན་པས་མཚམས་སྦྱར་བ། རྩ་བ། འགྲེལ་པའོ། །དང་པོ་ནི། ཤེས་བྱ་ཆོས་ཅན། མདོར་བསྟན་དུ་ཡོངས་སུ་འཛིན་པ་རྟོག་པའི་སྔར་གསུངས་པ་ལ་དགོས་པ་ཡོད་དེ། རྒྱན་གྱི་ཚིགས་སུ་བཅད་པའི་སྡེབ་སྦྱོར་སླ་བ་མཐུན་པར་བསྟན་པར་བྱ་བའི་ཆེད་ཡིན་པའི་ཕྱིར། དེ་ལྟར་ཡང་རྒྱས་བཤད་དུ་ཡོངས་འཛིན་རྟོག་པའི་མཇུག་ཐོགས་སུ་བར་སྐབས་ཀྱི་ཚིགས་སུ་བཅད་པ་གསུངས་པ་ལ་དགོས་པ་ཡོད་དེ། རྗེས་སུ་གསུངས་པ་དེའི་སྟོབས་ཀྱིས་ཇི་སྐད་བཤད་པའི་སྦྱོར་བ་བཞི་ཀ་ཁྱད་པར་དུ་འགྱུར་རོ་ཞེས་བསྟན་པའི་ཆེད་ཡིན་པའི་ཕྱིར། གཉིས་པ་ལ། ནང་གི་ཡོངས་འཛིན་དང་། ཕྱིའི་ཡོངས་འཛིན་གཉིས། དང་པོ་ནི། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། བྱང་སེམས་སྦྱོར་ལམ་པའི་རྒྱུད་ཀྱི་རྣམ་མཁྱེན་ཡིད་བྱེད་དང་མི་འབྲལ་ཞིང་། སྟོང་ཉིད་ཟབ་མོའི་དོན་ལ་སེམས་མི་འགོང་མི་སྐྲག་པ་ཉིད་ལ་སོགས་པའི་ཐབས་མཁས་དང་། དེའི་མི་མཐུན་ཕྱོགས་ཉན་རང་གི་ཡིད་བྱེད་དང་བདེན་ཞེན་ཅི་རིགས་བོར་བའི་ཡེ་ཤེས་ཆོས་ཅན། རྣམ་པ་ཀུན་དུ་བྱང་སེམས་སྦྱོར་ལམ་པའི་ནང་གི་ཡོངས་འཛིན་ཡིན་ཏེ། སྲིད་ཞིའི་མཐའ་འགོག་བྱེད་ཀྱི་དེའི་མངོན་རྟོགས་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །བྱང་སེམས་སྦྱོར་ལམ་པ་ལ་ཐབས་ཤེས་རྫོགས་པར་
འདོམས་པར་བྱེད་པའི་བདག་རྐྱེན་དུ་གྱུར་བའི་དགེ་བའི་བཤེས་གཉེན་བྱང་སེམས་སྦྱོར་ལམ་པའི་ཕྱིའི་ཡོངས་འཛིན་གྱི་མཚན་ཉིད་ཟེར་ན། དེའི་ཡོངས་འཛིན་དུ་གྱུར་པའི་སེམས་ཙམ་པ་ཆོས་ཅན་མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། ཐེག་ཆེན་འཕགས་པའི་ཡོངས་འཛིན་དུ་གྱུར་པའི་སེམས་ཙམ་པ་ཡོད་པའི་ཕྱིར། དེར་ཐལ། སེམས་ཙམ་རྣམ་བདེན་པའི་ལྟ་བ་ལ་གནས་པའི་གསེར་གླིང་པ་དེ་ཇོ་བོ་རྗེའི་ཡོངས་འཛིན་ཡིན་པའི་ཕྱིར། རྩ་བར་འདོད་མི་ནུས་ཏེ། སེམས་ཙམ་པ་ཡིན་པའི་ཕྱིར། གཉིས་པ་རང་ལུགས་ནི། བྱང་སེམས་སྦྱོར་ལམ་པ་སྲིད་ཞིའི་མཐའ་གང་རུང་དུ་ལྟུང་བར་འགོག་པར་བྱེད་པའི་བྱང་སེམས་སྦྱོར་ལམ་པའི་མངོན་རྟོགས། དེའི་ནང་གི་ཡོངས་འཛིན་གྱི་མཚན་ཉིད། བྱང་སེམས་སྦྱོར་ལམ་པ་ལ་ཐབས་ཤེས་རྫོགས་པར་འདོམས་པའི་དེའི་བདག་རྐྱེན་དུ་གྱུར་པའི་དགེ་བཤེས་གཉེན་དེ་སྐབས་འདིར་བསྟན་གྱི་བྱང་སེམས་སྦྱོར་ལམ་པའི་ཕྱིའི་ཡོངས་འཛིན་གྱི་མཚན་ཉིད། གསུམ་པ་རྩོད་པ་སྤོང་བ་ལ། བྱང་སེམས་སྦྱོར་ལམ་པའི་རྒྱུད་ཀྱི་ཐབས་ཤེས་ཁྱད་པར་ཅན་གཉིས་ཆོས་ཅན། ཁྱོད་བྱང་སེམས་སྦྱོར་ལམ་པ་སྲིད་མཐར་ལྟུང་བ་འགོག་བྱེད་ཡིན་པར་ཐལ། ཁྱོད་དེ་སྲིད་ཞིའི་མཐའ་ལྟུང་བ་འགོག་བྱེད་ཡིན་པའི་ཕྱིར། འདོད་ན། དེའི་རྒྱུད་ཀྱི་སྙིང་རྗེ་ཆེན་པོ་དེ་སྲིད་མཐར་ལྟུང་བ་འགོག་བྱེད་ཡིན་པར་ཐལ། འདོད་པའི་ཕྱིར། ཟེར་ན་མ་ཁྱབ། གཉིས་པ་ཕྱིའི་ཡོངས་འཛིན་ནི། བྱང་སེམས་སྦྱོར་ལམ་པ་ལ་ཆོས་ཐམས་ཅད་ངོ་བོ་ཉིད་མེད་པ་སོགས་སུ་སྟོན་པར་བྱེད་ཅིང་། དེའི་མི་མཐུན་ཕྱོགས་བདུད་དང་སྡིག་གྲོགས་སོགས་བོར་བའི་མཆོག་གི་སྤྲུལ་སྐུ་དེ་ཆོས་ཅན། རྣམ་པ་ཀུན་དུ་དེའི་ཕྱིའི་ཡོངས་འཛིན་ཡིན་ཏེ། ཐབས་ཤེས་རྫོགས་པར་འདོམས་པའི་དེའི་བདག་རྐྱེན་བྱེད་པའི་དགེ་བའི་བཤེས་གཉེན་ཡིན་པའི་ཕྱིར། གསུམ་པ་འགྲེལ་པ་ནི་ཟབ་མོའི་དོན་ལ་སེམས་མི་འགོང་ཞིང་མི་སྐྲག་པ་དང་། ལ་སོགས་པས་ལམ་རིམ་པ་བཞིན་དུ་བཀྲི་བའི་ཐབས་མཁས་པས་གདུལ་བྱའི་བསམ་པ་ཇི་ལྟ་བ་བཞིན་དུ་དངོས་
པོ་མཐའ་དག་གང་ཟག་དང་ཆོས་ཀྱི་བདག་མེད་པ་ལ་སོགས་པ་སྟོན་པར་བྱེད་པ་དང་། སེམས་བསྐྱེད་ཕྱིན་དྲུག་སྟོན་ཅིང་ཐེག་ཆེན་སྤོང་དུ་འཇུག་པ་སྡིག་གྲོགས་སུ་སྟོན་པ་ཕྱིན་དྲུག་གི་མི་མཐུན་ཕྱོགས་ཀྱི་ཆོས་སེར་སྣ་ལ་སོགས་པ་དང་མི་ལྡན་པར་སྟོན་པའི་སྤྲུལ་སྐུ་ཆོས་ཅན། ཁྱོད་བྱང་སེམས་སྦྱོར་ལམ་པའི་ཡོངས་སུ་འཛིན་པ་ཡིན་ཏེ། དེ་ལ་ཐེག་ཆེན་གྱི་ལམ་སྟོན་པའི་དགེ་བའི་བཤེས་གཉེན་ཡིན་པའི་ཕྱིར། །
རང་བཞིན་གནས་རིགས་བཤད་པ།
རང་བཞིན་གནས་རིགས་བཤད་པ། གསུམ་པ་གདམས་དོན་ཇི་ལྟར་སྒྲུབ་པའི་སྒྲུབ་པ་བཤད་པ་ལ། སྒྲུབ་པའི་རྟེན་དང་། དམིགས་པ་དང་། ཆེད་དུ་བྱ་བ་དང་། སྒྲུབ་པའི་ངོ་བོ་དང་བཞི། དང་པོ་ལ། རིགས་ཀྱི་དབྱེ་བ། རྩོད་པ་སྤང་བ་གཉིས། དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། ཐེག་ཆེན་སྒྲུབ་པའི་རྟེན་དུ་གྱུར་པའི་རིགས་འཆད་པར་འཐད་དེ། སྒྲུབ་པ་འབྱུང་རུང་གི་རིགས་དང་ལྡན་པ་ལ་ཐེག་ཆེན་གྱི་ངེས་པར་འབྱེད་པའི་ཆ་དང་མཐུན་པ་ཇི་སྐད་བཤད་པ་དང་། འཆད་འགྱུར་མཐོང་བའི་ལམ་ལ་སོགས་པ་གཞན་ཡང་འབྱུང་བས་བཤད་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཐེག་ཆེན་གྱི་སྦྱོར་ལམ་དྲོད་སོགས་བཞི་དང་། མཐོང་སྒོམ་གྱི་ལམ་རྟོགས་པ་ཡི་ནི་ཆོས་དྲུག་གི་རྟེན་དྲི་མ་དང་བཅས་པའི་ཆོས་ཉིད་ཆོས་ཅན། ཁྱོད་ལ་རིགས་ཞེས་བྱ་སྟེ། ཁྱོད་ལ་དམིགས་ནས་བསྒོམས་པས་རང་གི་བརྟེན་ཆོས་སུ་གྱུར་པའི་སྒྲུབ་པ་གོང་ནས་གོང་དུ་འཕེལ་བའི་ཕྱིར། གཉེན་པོ་བར་ཆད་མེད་ལམ་སྐྱེ་བ་ལ་མངོན་དུ་ཕྱོགས་པ་དང་། སྤང་བྱའི་ས་བོན་འགགས་པ་ལ་མངོན་དུ་ཕྱོགས་པའི་ཚུལ་གྱིས་སྤོང་བ་དང་། སྤང་བྱ་དེ་དག་ཡོངས་སུ་གཏུགས་པ་སྟེ་ཟད་པའི་རྣམ་གྲོལ་ལམ་དང་སྲིད་ཞིའི་མཐའ་འགོག་བྱེད་ཤེས་རབ་སྙིང་བརྩེར་བཅས་པ་དང་། སློབ་མ་ཉན་ཐོས་སོགས་དང་ཐུན་མོང་མིན་པ་ཉིད་དང་། གཞན་གྱི་དོན་གྱི་གོ་རིམ་གྱི་སྒྲུབ་པ་དང་། ཇི་ལྟ་ཇི་སྙེད་ལ་ཡེ་ཤེས་རྩོལ་བ་མི་མངའ་བར་འཇུག་པའི་རྟེན་དྲི་མ་དང་བཅས་
པའི་ཆོས་ཉིད་ཆོས་ཅན། རྟགས་གསལ་སྔར་བཞིན། གཉིས་པ་མཐའ་དཔྱད་པ་ལ། དགག་བཞག་སྤང་གསུམ་ལས། དང་པོ་ལ། ཁ་ཅིག །དྲི་མ་དང་བཅས་པའི་སེམས་ཀྱི་ཆོས་ཉིད་གང་ཞིག །གནས་འགྱུར་མཐར་ཕྱིན་པའི་ཚེ། ངོ་བོ་ཉིད་སྐུར་འགྱུར་རུང་དེ་རང་བཞིན་གནས་རིགས་ཀྱི་མཚན་ཉིད་ཟེར་ན། བྱང་སེམས་རྒྱུན་མཐའ་བའི་རྒྱུད་ཀྱི་སེམས་ཀྱི་ཆོས་ཉིད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། མ་ཡིན་པར་ཐལ། གནས་འགྱུར་མཐར་ཕྱིན་པའི་ཚེ་ངོ་བོ་ཉིད་སྐུར་གྱུར་ཟིན་པའི་ཕྱིར། དེར་ཐལ། ཁྱོད་ངོ་བོ་ཉིད་སྐུར་གྱུར་པའི་དུས་ཡོད་པའི་ཕྱིར། ཁ་ཅིག །ཆོས་དབྱིངས་གང་ཞིག །ཐེག་ཆེན་སྒྲུབ་པའི་རྟེན་གཞི་བྱེད་པ་དེ་ཐེག་ཆེན་སྒྲུབ་པའི་རྟེན་རང་བཞིན་གནས་རིགས་ཀྱི་མཚན་ཉིད་ཟེར་ན། སངས་རྒྱས་ཀྱི་སེམས་ཀྱི་ཆོས་ཉིད་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། ཕྱི་མ་དེར་ཐལ། ཐེག་ཆེན་སྒྲུབ་པའི་བསྒོམ་བྱའི་གཙོ་བོ་ཡིན་པའི་ཕྱིར། གཞན་ཡང་། བདེན་འཛིན་གྱི་ཆོས་ཉིད་ཆོས་ཅན། དེར་ཐལ། དེའི་ཕྱིར། འདོད་ན། ངོ་བོ་ཉིད་སྐུར་འགྱུར་རུང་ཡིན་པར་ཐལ། མཚོན་བྱ་དེའི་ཕྱིར། འདོད་ན། བདེན་འཛིན་ཡེ་ཤེས་ཆོས་སྐུར་འགྱུར་རུང་ཡིན་པར་ཐལ། འདོད་པའི་ཕྱིར། འདོད་མི་ནུས་སོ། །ཁ་ཅིག །དྲི་མ་དང་བཅས་པའི་སེམས་ཀྱི་ཆོས་ཉིད་གང་ཞིག །ངོ་བོ་ཉིད་སྐུར་འགྱུར་རུང་དེ། རང་བཞིན་གནས་རིགས་ཀྱི་མཚན་ཉིད་ཟེར་ན། ཚུར་མཐོང་ལྷས་བྱིན་གྱི་རྒྱུད་ཀྱི་སེམས་ཀྱི་ཆོས་ཉིད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། རང་གི་བརྟེན་ཆོས་སུ་གྱུར་པའི་སེམས་ཀྱི་ཆོས་ཉིད་གང་ཞིག །ངོ་བོ་ཉིད་སྐུར་འགྱུར་རུང་ཡིན་པའི་ཕྱིར། འདོད་ན་དེ་ཆོས་ཅན། དྲི་མ་དང་བཅས་པའི་སེམས་ཡོད་ན་ཁྱོད་ཡོད་དགོས་པར་ཐལ། འདོད་པའི་ཕྱིར། འདོད་ན། ཚུར་མཐོང་ལྷས་བྱིན་ཚད་མས་མ་དམིགས་པའི་ས་ཕྱོགས་ཆོས་ཅན། དེར་ཐལ། དེའི་ཕྱིར། གཞན་ཡང་། བུམ་པའི་ཆོས་ཉིད་དེ་དངོས་པོའི་ཆོས་ཉིད་ཡིན་པར་ཐལ། ཚུར་མཐོང་ལྷས་བྱིན་གྱི་རྒྱུད་ཀྱི་སེམས་ཀྱི་ཆོས་ཉིད་དེ་དྲི་
མ་དང་བཅས་པའི་སེམས་ཀྱི་ཆོས་ཉིད་ཡིན་པའི་ཕྱིར། རྟགས་སོང་། འདོད་ན། བུམ་པའི་ཆོས་ཉིད་དེ་ཤེས་བྱའི་ཆོས་ཉིད་ཡིན་པར་ཐལ། འདོད་པའི་ཕྱིར། འདོད་ན། ཆོས་ཉིད་ཡིན་ན་ཤེས་བྱའི་ཆོས་ཉིད་ཡིན་དགོས་པར་ཐལ། འདོད་པའི་ཕྱིར། ཁ་ཅིག །བྱང་ཆུབ་ཏུ་འགྱུར་རུང་གི་དགེ་བ་དེ་རིགས་ཀྱི་མཚན་ཉིད་ཟེར་ན། རང་བཞིན་གནས་རིགས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དགེ་བ་ཡིན་པར་ཐལ། འདོད་པའི་ཕྱིར། འདོད་ན། འཁོར་བ་མི་དགེ་བ་ཡིན་པར་ཐལ། ཅིག་ཤོས་དེ་དགེ་བ་ཡིན་པའི་ཕྱིར། འདོད་ན། ཁམས་གོང་མའི་སས་བསྡུས་ཀྱི་མི་དགེ་བ་ཡོད་པར་ཐལ། དེའི་འཁོར་བ་ཡོད་པ་གང་ཞིག །འདོད་པའི་ཕྱིར། འདོད་ན། མཛོད་ལས། དེ་ལས་འགྱོད་གཉིད་མི་དགེ་རྣམས། །བསམ་གཏན་དང་པོ་དག་ན་མེད། །ཅེས་གསུངས་པ་མི་འཐད་པར་ཐལ་ལོ། །རོང་ཊཱི་ཀ་པ་ན་རེ། དྲི་བཅས་ཀྱིས་སེམས་གསལ་རིག་དེ་རང་བཞིན་གནས་རིགས་ཡིན་ཏེ། སངས་རྒྱས་ཀྱི་ཉེར་ལེན་ཡིན་པའི་ཕྱིར། རྒྱུད་བླ་མ་ལས། རིགས་ཁམས་སྦྲང་རྩི་དང་འདྲ་འདི་གཟིགས་ནས། །ཞེས་དང་། དེའི་རྒྱས་བཤད་ལས། ལུས་ཅན་ལ་ཡོད་ཟག་པ་མེད་པའི་ཤེས་པ་སྦྲང་མའི་རྩི་དང་འདྲ། ཞེས་དང་། བསྟོད་ཚོགས་ལས། བདེ་ལེགས་སེམས་ལས་སངས་རྒྱས་འབྱུང་། །རང་སེམས་དེ་ལ་ཕྱག་འཚལ་ལོ། །ཉོན་མོངས་ནང་ནས་སངས་རྒྱས་ཀྱང་། །དེ་བཞིན་དྲི་མ་མེད་པར་གནས། །ཞེས་གསུངས་པའི་ཕྱིར། སེམས་ཙམ་པས་འདོད་པའི་ཟག་མེད་ཀྱི་ཡེ་ཤེས་ཀྱི་ས་བོན་ཆོས་ཅན། རང་བཞིན་གནས་རིགས་མ་ཡིན་ཏེ། སེམས་ཅན་ཐམས་ཅད་ལ་མེད་པའི་ཕྱིར་ཏེ། དེ་དང་མི་ལྡན་པའི་སེམས་ཅན་སྲིད་པའི་ཕྱིར། ཟེར་ན། དྲི་བཅས་ཀྱི་སེམས་གསལ་རིག་ཆོས་ཅན། ཁྱོད་རང་བཞིན་གནས་རིགས་མ་ཡིན་པར་ཐལ། ཁྱོད་ལ་རང་བཞིན་དུ་གནས་པའི་དོན་མ་ཚང་བའི་ཕྱིར། དེར་ཐལ། ཁྱོད་རང་གི་རྒྱུ་རྐྱེན་གྱིས་གསར་དུ་བཅོས་པའི་ཕྱིར། ཁྱབ་པ་ཡོད་དེ། ཉི་སྣང་ལས། དེ་དག་གིས་རང་བཞིན་དུ་གནས་པའི་རིགས་
ལ་རང་བཞིན་དུ་གནས་པའི་དོན་བརྗོད་དགོས་སོ། །རྒྱུའི་རྣམ་གྲངས་ཡིན་ནོ་ཞེ་ན་རྐྱེན་གྱིས་ཡང་དག་པར་བླངས་པ་ལས་བྱུང་བ་ཡང་དེ་ཡིན་པས། དེས་ན་དོན་གྱི་ཁྱད་པར་ཅི་ཞིག །ཅེས་གསུངས་པའི་ཕྱིར། གཞན་ཡང་། དྲི་བཅས་ཀྱི་སེམས་གསལ་རིག་ཆོས་ཅན། ཆོས་ཉིད་ཡིན་པར་ཐལ། རང་བཞིན་གནས་རིགས་ཡིན་པའི་ཕྱིར། ཁྱབ་པ་ཡོད་དེ། ཉི་སྣང་ལས། ཆོས་ཀྱི་རྣམ་གྲངས་ཡིན་པས་ཉེས་པ་འདི་མེད་དེ། ཞེས་པ་དང་། འགྲེལ་པ་དོན་གསལ་ལས། ཆོས་ཀྱི་དབྱིངས་ཀྱི་ངོ་བོ་ཉིད་ཁོ་ན་ལ་རིགས་ཞེས་བསྟན་ཏོ། །ཞེས་གསུངས་པའི་ཕྱིར། གཞན་ཡང་། དྲི་བཅས་ཀྱི་སེམས་གསལ་རིག་ཆོས་ཅན། གནས་གྱུར་པ་ན་ངོ་བོ་ཉིད་སྐུར་འགྱུར་རུང་ཡིན་པར་ཐལ། རང་བཞིན་གནས་རིགས་ཡིན་པའི་ཕྱིར། ཁྱབ་པ་ཡོད་དེ། རྒྱུད་བླ་མ་ལས། སྐུ་གསུམ་ཐོབ་པར་འདོད་པ་ཡིས། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་གསུངས་པའི་ཕྱིར། འདོད་ན། སངས་རྒྱས་ཀྱི་སེམས་གསལ་རིག་དེ་ངོ་བོ་ཉིད་སྐུ་ཡིན་པར་ཐལ། འདོད་པའི་ཕྱིར། གཞན་ཡང་། རྒྱུན་མཐའི་བར་ཆད་མེད་ལམ་ཆོས་ཅན། རང་བཞིན་གནས་རིགས་ཡིན་པར་ཐལ། སངས་རྒྱས་ཀྱི་ཡེ་ཤེས་ཀྱི་ཉེན་ལེན་ཡིན་པའི་ཕྱིར། འདོད་མི་ནུས་ཏེ། སེམས་ཅན་ཐམས་ཅད་ལ་མེད་པའི་ཕྱིར། གཞན་ཡང་། འཚང་མི་རྒྱ་བའི་སེམས་ཅན་ཡོད་པར་ཐལ། ཟག་མེད་ཀྱི་ཡེ་ཤེས་ཀྱི་ས་བོན་རྒྱུད་ལ་མི་ལྡན་པའི་སེམས་ཅན་ཡོད་པའི་ཕྱིར། རྟགས་ཁྱབ་རིམ་པར་རོང་པོ་ཁྱོད་རང་ལ་སོང་། ཁ་ཅིག །ཐེག་ཆེན་སྒྲུབ་པའི་རྟེན་རང་བཞིན་གནས་རིགས་དང་ཐེག་ཆེན་གྱི་རང་བཞིན་གནས་རིགས་དོན་གཅིག་ཟེར་ན། ཐེག་ཆེན་དུ་རིགས་སད་མ་ཐག་པའི་ལམ་མ་ཞུགས་ཀྱིས་གང་ཟག་གི་རྒྱུད་ཀྱི་སེམས་ཀྱི་ཆོས་ཉིད་ཆོས་ཅན། ཐེག་ཆེན་སྒྲུབ་པའི་རྟེན་རང་བཞིན་གནས་རིགས་ཡིན་པར་ཐལ། ཅིག་ཤོས་དེ་ཡིན་པའི་ཕྱིར། དེར་ཐལ། དེའི་རྒྱུད་ལ་ཐེག་ཆེན་གྱི་རིགས་ཡོད་པའི་ཕྱིར། དེར་ཐལ། ཁྱོད་ཐེག་ཆེན་དུ་རིགས་སད་མ་ཐག་པའི་གང་ཟག་ཡིན་
པའི་ཕྱིར། ཁ་ཅིག །ཉན་ཐོས་ཀྱི་ལམ་དུ་འཇུག་པར་ངེས་པའི་བྱང་སེམས་ཚོགས་ལམ་པའི་རྒྱུད་ཀྱི་རང་བཞིན་གནས་རིགས་ཆོས་ཅན། ཐེག་ཆེན་གྱི་རང་བཞིན་གནས་རིགས་ཡིན་པར་ཐལ། ཅིག་ཤོས་དེ་ཡིན་པའི་ཕྱིར། འདོད་ན། མ་ཡིན་པར་ཐལ། ཉན་ཐོས་ཀྱི་རིགས་ཡིན་པའི་ཕྱིར། དེར་ཐལ། བྱང་སེམས་དེའི་རྒྱུད་ལ་ཉན་ཐོས་ཀྱི་རིགས་ཡོད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་རྒྱུད་ལ་ཉན་ཐོས་ཀྱི་རིགས་ཡོད་པར་ཐལ། ཁྱོད་ཉན་ཐོས་རིགས་ངེས་ཀྱི་གང་ཟག་ཡིན་པའི་ཕྱིར་མ་ཁྱབ། འོ་ན། སྙིང་རྗེ་ཆེན་པོ་རྒྱུད་ལ་མ་སྐྱེས་པའི་ཐེག་ཆེན་རིགས་ངེས་ཀྱི་གང་ཟག་ཆོས་ཅན། ཁྱོད་ཀྱི་རྒྱུད་ལ་ཐེག་ཆེན་གྱི་རིགས་ཡོད་པར་ཐལ། ཁྱོད་ཐེག་ཆེན་དུ་རིགས་ངེས་ཀྱི་གང་ཟག་ཡིན་པའི་ཕྱིར། ཁྱབ་པ་ཁས། འདོད་ན། ཐེག་ཆེན་དུ་རིགས་སད་པའི་གང་ཟག་ཡིན་པར་ཐལ། འདོད་པའི་ཕྱིར། འདོད་ན། དེ་སྙིང་རྗེ་ཆེན་པོ་ཐོབ་མྱོང་བའི་གང་ཟག་ཡིན་པར་ཐལ། འདོད་པའི་ཕྱིར། ཁྱབ་པ་ཡོད་དེ། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ཤེས་པར་བྱ། །ཞེས་གསུངས་པའི་ཕྱིར། །གཉིས་པ་རང་ལུགས་ནི། རང་གི་བརྟེན་ཆོས་སུ་གྱུར་པའི་དྲི་མ་མ་སྤངས་པའི་སེམས་ཀྱི་ཆོས་ཉིད་གང་ཞིག །ངོ་བོ་ཉིད་སྐུར་འགྱུར་རུང་དེ་རང་བཞིན་གནས་རིགས་ཀྱི་མཚན་ཉིད། རང་གི་བརྟེན་ཆོས་སུ་གྱུར་པའི་བྱང་སེམས་ཀྱི་སེམས་ཀྱི་ཆོས་ཉིད་གང་ཞིག །ཐེག་ཆེན་སྒྲུབ་པའི་རྟེན་གཞི་བྱེད་པ་དེ། ཐེག་ཆེན་སྒྲུབ་པའི་རྟེན་རང་བཞིན་གནས་རིགས་ཀྱི་མཚན་ཉིད། སངས་རྒྱས་ཀྱི་རིགས་གང་ཞིག །འདུས་བྱས་ཀྱི་སངས་རྒྱས་ཀྱི་སྐུར་འགྱུར་རུང་དེ། རྒྱས་འགྱུར་གྱི་རིགས་ཀྱི་མཚན་ཉིད། གསུམ་པ་རྩོད་པ་སྤོང་བ་ལ། ཁོ་ན་རེ། བདེན་འཛིན་གྱི་ཆོས་ཉིད་ཆོས་ཅན། རང་བཞིན་གནས་རིགས་ཡིན་པར་ཐལ། མཚན་ཉིད་དེའི་ཕྱིར། དེར་ཐལ། དྲི་མ་
དང་བཅས་པའི་སེམས་ཀྱི་ཆོས་ཉིད་དེ་ཡིན་པའི་ཕྱིར་ན་མ་ཁྱབ། འོ་ན། བདེན་འཛིན་ཡེ་ཤེས་ཆོས་སྐུར་འགྱུར་རུང་ཡིན་པར་ཐལ། དྲི་མ་དང་བཅས་པའི་སེམས་དེ་དེར་འགྱུར་རུང་ཡིན་པའི་ཕྱིར། ཁ་ཅིག །ཐེག་ཆེན་སྒྲུབ་པའི་རྟེན་རང་བཞིན་གནས་རིགས་ཡིན་ན། སྐབས་འདིར་དངོས་སུ་བསྟན་པའི་དེ་ཡིན་པས་ཁྱབ་ཟེར་ན། བྱང་སེམས་ཚོགས་ལམ་པའི་ཆོས་ཉིད་ཆོས་ཅན། དེར་ཐལ། དེའི་ཕྱིར། འདོད་ན། མ་ཡིན་པར་ཐལ། རྟོགས་པ་ཡི་ནི་ཆོས་དྲུག་དང་། །ཞེས་པའི་དྲུག་པོ་དྲོད་སོགས་བཞི་དང་། མཐོང་སྒོམ་གྱི་ལམ་ལ་བྱེད་པའི་ཕྱིར། གསུམ་པ་ལ་གཉིས། རྒྱས་བཤད་དང་། དོན་བསྡུ་བའོ། །དང་པོ་ལ། སོ་སོའི་ངོ་བོ་དང་། གོ་རིམ་དང་། གྲངས་ངེས་གསུམ་ལས། དང་པོ་ནི། རིགས་བཅུ་གསུམ་རིམ་ཅན་དུ་སྟོན་པའི་རེ་ཞིག་དང་པོར་ཐེག་ཆེན་གྱི་འཇིག་རྟེན་པའི་ངེས་པར་འབྱེད་པའི་ཆ་དང་མཐུན་པ་རྣམས་ཀྱི་ཆོས་ཉིད་ཆོས་ཅན། ངེས་འབྱེད་ཆ་མཐུན་དེའི་རྟེན་ཏེ། ཁྱོད་ལ་དམིགས་ནས་བསྒོམས་པས་རང་ཉིད་གོང་ནས་གོང་དུ་འཕེལ་བར་འགྱུར་བའི་ཆོས་ཉིད་ཡིན་པའི་ཕྱིར། དེའི་འོག་ཏུ་འཇིག་རྟེན་ལས་འདས་པ་སྟོང་ཉིད་མངོན་སུམ་གྱིས་གསར་དུ་རྟོགས་པའི་མཐོང་བའི་ལམ་དང་། རྟོགས་ཟིན་སྒོམ་པར་བྱེད་པའི་སྒོམ་པའི་ལམ་དག་གི་རྟེན་དྲི་མ་དང་བཅས་པའི་ཆོས་ཉིད་ཆོས་ཅན། རིགས་སྔར་ལྟར་རོ། །འདི་ལ་ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན། དེའི་འོག་ཏུ་ཐེག་ཆེན་གྱི་མཐོང་སྒོམ་གྱི་ལམ་དེ་དག་གིས་བསྡུས་པའི་བར་ཆད་མེད་ལམ་སྐྱེས་པའི་སྟོབས་ཀྱིས་ངོ་སྐལ་གྱི་སྤང་བྱའི་ས་བོན་ཟད་པ་དུས་མཉམ་དུ་བྱུང་བ་ཡིན་ཏེ། གཉེན་པོ་བར་ཆད་མེད་ལམ་སྐྱེ་བ་ལ་མངོན་དུ་ཕྱོགས་པ་དང་། མི་མཐུན་ཕྱོགས་ངོ་སྐལ་གྱི་སྤང་བྱའི་ས་བོན་འགག་པ་ལ་མངོན་དུ་ཕྱོགས་པ་དུས་མཉམ་པ་དག་ཡིན་པའི་ཕྱིར་ཏེ། དཔེར་ན་རྐུན་པོ་ཕྱུང་བ་དང་སྒོ་འཕར་བཅད་པ་དུས་མཉམ་པ་ལྟར་རོ། །
གཉིས་པ་ལ་མཐའ་དཔྱད་པ་ལ། ཁ་ཅིག །ཐེག་ཆེན་གྱི་མཐོང་ལམ་བར་ཆད་མེད་ལམ་པའི་རྒྱུད་ལ་ལམ་དེ་སྐྱེ་བ་ལ་མངོན་དུ་ཕྱོགས་པ་དང་། མཐོང་སྤང་རྟོག་པའི་ས་བོན་འགག་པ་ལ་མངོན་དུ་ཕྱོགས་པ་དུས་མཉམ་ཟེར་ན། ཐེག་ཆེན་མཐོང་ལམ་བར་ཆད་མེད་ལམ་པའི་རྒྱུད་ལ་མཐོང་ལམ་བར་ཆད་མེད་ལམ་སྐྱེ་བ་ལ་མངོན་དུ་ཕྱོགས་པར་ཐལ། དེའི་རྒྱུ་ལ་དེ་སྐྱེ་བ་ལ་མངོན་དུ་ཕྱོགས་པ་དང་། ཅིག་ཤོས་འགག་པ་ལ་མངོན་དུ་ཕྱོགས་པ་དུས་མཉམ་པའི་ཕྱིར། རྟགས་ཁས། འདོད་ན། དེའི་རྒྱུད་ལ་མཐོང་ལམ་བར་ཆད་མེད་ལམ་སྐྱེས་མ་ཟིན་པར་ཐལ། འདོད་པའི་ཕྱིར། འདོད་མི་ནུས། གཞན་ཡང་། སངས་འཕགས་གྱི་རྒྱུད་ལ་རྣམ་མཁྱེན་སྐྱེ་བ་ལ་མངོན་དུ་ཕྱོགས་པ་ཡིན་པར་ཐལ། ཐེག་ཆེན་མཐོང་ལམ་པ་ལ་དེའི་ཕྱིར། འདོད་ན། དེའི་རྒྱུད་ལ་རྣམ་མཁྱེན་སྐྱེ་དགོས་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །ཐེག་ཆེན་མཐོང་ལམ་བར་ཆད་མེད་ལམ་གྱི་དུས་སུ་མཐོང་སྤང་རྟོག་པའི་ས་བོན་ཡོད་དེ། ཀུན་ལས་བཏུས་ལས། འདས་པ་ནི་འགགས་པའི་ཕྱིར་མ་ཡིན། ཞེས་གསུངས་པའི་ཕྱིར། ཟེར་ན། སྒྲོན་མེའི་དུས་སུ་སྒྲོན་མེའི་བསལ་བྱར་གྱུར་པའི་མུན་པ་ཡོད་པར་ཐལ། དམ་བཅའ་དེའི་ཕྱིར། འདོད་ན། མདོ་ལས། ཉི་མའི་དཀྱིལ་འཁོར་ཤར་བའི་ཚེ་མུན་པའི་གནས་མེད་ཅིང་མི་དམིགས་སོ། །ཞེས་གསུངས་པ་མི་འཐད་པར་ཐལ། འདོད་པའི་ཕྱིར། དེའི་འོག་ཏུ་སྤང་གཉེན་གྱི་རྣམ་རྟོག་དེ་དག་བདེན་པར་མི་དམིགས་པ་བསྒོམ་པས་སྤང་གཉེན་དེ་དག་སྐྱེ་བ་དང་འགག་པ་ཡུལ་དུ་ཡོད་པ་དང་ལྡན་པའི་བདེན་འཛིན་གྱི་རྣམ་པར་རྟོག་པ་སྤངས་པ་རྣམ་གྲོལ་ལམ་གྱི་རྟེན་དྲི་མ་དང་བཅས་པའི་ཆོས་ཉིད་ཆོས་ཅན། རིགས་སྔར་ལྟར། དེའི་འོག་ཏུ་གཞན་དོན་འབད་མེད་དུ་བྱེད་
པར་གྱུར་ཅིག་སྙམ་པའི་སྔོན་གྱི་སྨོན་ལམ་དང་སྦྱིན་པ་ལ་སོགས་པ་ཕྱིན་དྲུག་ལ་སྦྱངས་པས་ཐབས་ལ་མཁས་པའི་སྟོབས་ཀྱིས་འཁོར་བའི་མཐའ་དང་མྱ་ངན་ལས་འདས་པའི་མཐའ་ལ་མི་གནས་པའི་མཚན་ཉིད་དེ་ངོ་བོ་ཉིད་ཀྱི་ཤེས་རབ་དང་ཐབས་ཀྱི་རྟེན་དྲི་མ་དང་བཅས་པའི་མཚན་ཉིད་ཆོས་ཅན། རིགས་སྔར་ལྟར། དེའི་འོག་ཏུ་ཐབས་ཤེས་དེ་དག་སྐྱེས་པས་ཉན་ཐོས་ལ་སོགས་པ་དང་ཐུན་མོང་མ་ཡིན་པའི་ཆོས་སེམས་ཅན་སྨིན་བྱེད་ཀྱི་ཐབས་སོ་སོ་ཡང་དག་རིག་པ་བཞི་ས་དགུ་པ་ནས་ཐོབ་པ་དེའི་རྟེན་དྲི་མ་དང་བཅས་པའི་ཆོས་ཉིད་ཆོས་ཅན། རིགས་སྔར་ལྟར། འདི་ལ་ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། དེའི་འོག་ཏུ་ས་བཅུ་པ་ཆོས་ཅན། གཞན་གྱི་དོན་གྱི་གོ་རིམ་གྱི་སྒྲུབ་པ་དང་ལྡན་ཏེ། གདུལ་བྱའི་བསམ་པ་ཇི་ལྟ་བ་བཞིན་དུ་གཞུག་པ་ལ་སོགས་པ་ལ་ལྡེམ་པོར་དགོངས་པའི་སྒོ་ནས་དང་། ངེས་དོན་གྱི་སྒོ་ནས་ཐེག་གསུམ་གྱི་ལམ་ལ་འགོད་པའི་མཚན་ཉིད་ཀྱི་གཞན་དོན་ལྷུན་གྲུབ་སངས་རྒྱས་དང་མཉམ་པ་ལྟ་བུའི་སེམས་དཔའ་ཡིན་པའི་ཕྱིར། གཉིས་པ་མཐའ་དཔྱད་པ་ལ། ཁ་ཅིག །དོན་དམ་བདེན་པ་བསྟན་བྱའི་གཙོ་བོར་བྱས་ནས་སྟོན་པའི་མདོ་དེ། ངེས་དོན་གྱི་མདོའི་མཚན་ཉིད། ཀུན་རྫོབ་བདེན་པ་བསྟན་བྱའི་གཙོ་བོར་བྱས་ནས་སྟོན་པའི་མདོ་དེ་དྲང་དོན་གྱི་མདོའི་མཚན་ཉིད་ཟེར་ན། རྒྱས་འབྲིང་བསྡུས་གསུམ་ཆོས་ཅན། མཚོན་བྱ་ཕྱི་མ་དེར་ཐལ། མཚན་ཉིད་དེའི་ཕྱིར། དེར་ཐལ། ལྷག་པ་ཤེས་རབ་ཀྱི་བསླབ་པ་བསྟན་བྱའི་གཙོ་བོར་བྱས་ནས་སྟོན་པའི་མདོ་ཡིན་པའི་ཕྱིར། དེར་ཐལ། མངོན་པའི་མདོ་ཡིན་པའི་ཕྱིར། ཁ་ཅིག །སྒྲ་ཇི་བཞིན་དུ་ཁས་བླང་དུ་རུང་བའི་མདོ་དེ་ངེས་དོན་གྱི་མདོའི་མཚན་ཉིད། སྒྲ་ཇི་བཞིན་དུ་ཁས་བླང་དུ་མི་རུང་བའི་མདོ་དེ་དྲང་དོན་གྱི་མདོའི་མཚན་ཉིད་ཟེར་ན། འདུས་བྱས་མི་རྟག་པར་སྟོན་པའི་མདོ་ཆོས་ཅན། མཚན་ཉིད་ཕྱི་མ་དེར་ཐལ། མཚོན་བྱ་དེའི་ཕྱིར།
ཁ་ཅིག །དྲང་དོན་གྱི་མདོ་ཡིན་ན་དྲང་དོན་དགོངས་པ་ཅན་གྱི་མདོ་ཡིན་དགོས་ཟེར་ན། འདུས་བྱས་མི་རྟག་པར་སྟོན་པའི་མདོ་ཆོས་ཅན། དེར་ཐལ། དེའི་ཕྱིར། ཁ་ཅིག །དགོངས་པ་ཅན་གྱི་མདོ་དང་། ལྡེམ་དགོངས་ཀྱི་མདོ་གཉིས་འགལ་ཟེར་ན། མི་འགལ་བར་ཐལ། དེ་གཉིས་ཡིན་ཁྱབ་མཉམ་ཡིན་པའི་ཕྱིར། དེར་ཐལ། དགོངས་པ་ཅན་གྱི་མདོ་ཡིན་ན་ལྡེམ་དགོངས་ཀྱི་མདོ་ཡིན་དགོས། དེ་ཡིན་ན་ཅིག་ཤོས་དེ་ཡིན་དགོས་པའི་ཕྱིར། དང་པོ་དེར་ཐལ། དེ་ཡིན་ན་གཉེན་པོ་ལ་ལྡེམ་དགོངས་ཀྱི་མདོ་ཡིན་དགོས་པའི་ཕྱིར། གཞན་ཡང་། དེ་གཉིས་མི་འགལ་བར་ཐལ། དགོངས་གཞི་གཙོ་བོར་གྱུར་པའི་མདོ་དང་། དགོངས་པ་གཙོ་བོར་གྱུར་པའི་མདོ་གཉིས་མི་འགལ་བའི་ཕྱིར། དེར་ཐལ། ཀུན་རྫོབ་བདེན་པ་དང་དོན་དམ་བདེན་པ་གཉིས་བསྟན་བྱའི་གཙོ་བོར་བྱས་ནས་སྟོན་པའི་མདོ་མི་འགལ་བའི་ཕྱིར། རང་ལུགས་ནི། སྒྲ་ཇི་བཞིན་དུ་ཁས་བླང་དུ་མི་རུང་བའི་མདོ་གང་ཞིག །དགོངས་གཞི་གཙོ་བོར་གྱུར་པ་དགོངས་པ་ཅན་གྱི་མདོའི་མཚན་ཉིད། དེ་གང་ཞིག །དགོངས་པ་གཙོ་བོར་གྱུར་པ་དེ་ལྡེམ་དགོངས་ཀྱི་མདོའི་མཚན་ཉིད། དེའི་འོག་ཏུ་ས་བཅུ་པ་དེ་ལ་འཁོར་བ་ཇི་སྲིད་བར་འབད་རྩོལ་གྱི་མཚན་མ་མེད་ཅིང་ལྷུན་གྱིས་གྲུབ་པར་གཞན་གྱི་དོན་ཡེ་ཤེས་མཐར་ཕྱིན་འབྱུང་བའི་དེའི་རྟེན་དུ་གྱུར་པའི་དྲི་མ་དང་བཅས་པའི་ཆོས་ཉིད་ཆོས་ཅན། རིགས་སྔར་བཞིན་ནོ། །གཉིས་པ་ནི། བརྟེན་ཆོས་སྒྲུབ་པ་ལ་བཅུ་གསུམ་བཤད་པའི་རིམ་པ་འདི་ནི་ཆོས་ཅན། རྟག་པའི་རིམ་པའི་དབང་དུ་བྱས་པའི་གོ་རིམ་ཡིན་ཏེ། སྒྲུབ་པའི་གནས་སྐབས་ཀྱི་དབང་དུ་བྱས་པའི་གོ་རིམ་ཡིན་པའི་ཕྱིར། གསུམ་པ་ནི། ཤེས་བྱ་ཆོས་ཅན། སྒྲུབ་པ་བཅུ་གསུམ་དུ་གྲངས་ངེས་པ་ཡིན་ཏེ། གདམས་ངག་གི་བརྗོད་བྱ་བཅུས་ཕུན་ཚོགས་སུ་འགྱུར་བར་མ་ཟད། སྒྲུབ་པ་བཅུ་གསུམ་པོ་འདིས་ཀྱང་རྣམ་མཁྱེན་
དོན་གཉེར་གྱི་སྐྱེས་བུའི་དོན་ཐམས་ཅད་ཕུན་སུམ་ཚོགས་པ་རྫོགས་འགྱུར་ཡིན་པའི་ཕྱིར། གཉིས་པ་དོན་བསྡུ་ནི། ཤེས་བྱ་ཆོས་ཅན། བྱང་ཆུབ་སེམས་དཔའ་རྣམ་པ་བཅུ་གསུམ་པོའི་རྒྱུད་ཀྱི་ཆོས་ཀྱི་དབྱིངས་ཀྱི་ངོ་བོ་ཉིད་ཁོ་ན་ལ་སྐབས་འདིར་རིགས་ཞེས་བསྟན་པ་ཡིན་ཏེ། དེ་ཁོ་ན་སྔར་ཇི་སྐད་བཤད་པའི་སྒྲུབ་པའི་ཆོས་ཀྱི་གཞིར་གྱུར་པའི་དབྱིངས་ཡིན་པའི་ཕྱིར། ཤེས་བྱ་ཆོས་ཅན། བྱང་ཆུབ་སེམས་དཔའ་དེ་ལ་བཅུ་གསུམ་དུ་དབྱེ་རུང་སྟེ། སྒྲུབ་པའི་ཆོས་ཀྱི་གནས་སྐབས་བཅུ་གསུམ་ཐ་དད་པའི་བྱེ་བྲག་གིས་ཏེ་ཁྱད་པར་གྱིས་ཡིན་པའི་ཕྱིར། གཉིས་པ་རྩོད་པ་སྤོང་བ་ལ། རྩོད་པ་དང་། ལན་ནོ། །དང་པོ་ལ། སྔ་འགྲེལ་དང་། རྩ་བའོ། །དང་པོ་ལ། འདོད་པ་བརྗོད་པ་དང་། ཐལ་བ་དགོད་པའོ། །དང་པོ་ནི། གལ་ཏེ་ཆོས་དབྱིངས་དེའི་བདག་ཉིད་ཅན་གྱི་བྱང་ཆུབ་སེམས་དཔའ་ཐེག་པ་ཆེན་པོའི་རིགས་ཅན་ཡིན་ཞིང་། བྱང་སེམས་དེའི་ཆོས་ཉིད་བླ་ན་མེད་པའི་སངས་རྒྱས་ཀྱི་ཆོས་རྣམས་ཀྱི་འབྱུང་ཁུངས་རང་བཞིན་དུ་གནས་པའི་རིགས་ཡིན་ཏེ། སེམས་ཅན་གྱི་ཆོས་དབྱིངས་ཁོ་ན་འཕགས་པའི་ཆོས་རྟོགས་པར་འགྱུར་བའི་རྒྱུའི་དམིགས་པ་ཡིན་པའི་ཕྱིར། གཉིས་པ་ནི། ཤེས་བྱ་ཆོས་ཅན། ཆོས་དབྱིངས་རིགས་ཡིན་པ་འོ་ན་ནི། དེའི་ཚེ་འགྲོ་ཀུན་སངས་རྒྱས་ཀྱི་རིགས་ལ་གནས་པར་ཐལ། དེ་གང་ཞིག་ཆོས་དབྱིངས་འགྲོ་ཀུན་ལ་གནས་པའི་ཕྱིར། དེར་ཐལ། དེ་རིགས་ཅན་གསུམ་གའི་གང་ཟག་ལ་སྤྱིར་གནས་པ་ཡིན་པའི་ཕྱིར། དེས་ན་བྱང་ཆུབ་སེམས་དཔའ་ཁོ་ན་སངས་རྒྱས་ཀྱི་རིགས་ཅན་མ་ཡིན་པར་ཐལ། རིགས་ཅན་གསུམ་ག་ལམ་གྱི་སྐབས་ཀྱི་རིགས་ལ་གནས་པར་ཁས་ལེན་དགོས་པས་དེ་གསུམ་ག་སངས་རྒྱས་ཀྱི་རིགས་ཅན་དུ་འགྱུར་པའི་ཕྱིར་སྙམ་པའི་སྐྱེ་བོ་བློ་དམན་པའི་ངོར་དྭོགས་པ་བསུ་བར་བཞེད་ནས་ཆོས་ཀྱི་དབྱིངས་ལ་ཞེས་སོགས་བར་སྐབས་ཀྱི་ཚིགས་སུ་བཅད་པ་གསུངས་པའི་ཕྱིར། གཉིས་པ་རྩ་བ་ནི། ཐེག་པ་གསུམ་གྱི་རིགས་ནི་ཐ་དད་པར་རུང་བ་མ་ཡིན་ཞིང་། རིགས་
ཅན་གསུམ་གའི་སློབ་ལམ་པ་རྣམས་ཐེག་ཆེན་ལམ་གྱི་རིགས་ལ་གནས་པར་ཐལ། དེ་རྣམས་ཀྱི་ཆོས་ཀྱི་དབྱིངས་ལ་དབྱེར་མེད་པ་ཡིན་པའི་ཕྱིར། གཉིས་པ་ལན་ལ། དོན་གྱིས་ཐོབ་པའི་ལན་དང་། དངོས་སུ་བསྟན་པའི་ལན་གཉིས། དང་པོ་ལ། ཚིག་དོན་དང་མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན། དྲི་བཅས་ཀྱི་དེ་བཞིན་ཉིད་སངས་རྒྱས་ཀྱི་རིགས་ཡིན་ན་རིགས་གསུམ་གྱི་རྣམ་དབྱེ་མི་རུང་བའི་སྐྱོན་མེད་པར་ཐལ། ཇི་ལྟར་ཉན་ཐོས་ཀྱི་ཐེག་པ་དང་ལ་སོགས་པས་རང་རྒྱལ་དང་བྱང་སེམས་ཀྱི་ཐེག་པ་ཚོགས་གཉིས་དང་དབང་པོ་རྣོ་རྟུལ་གྱི་རྟོགས་པའི་རིམ་གྱིས་ཆོས་དབྱིངས་དེ་བཞིན་ཉིད་ལ་དམིགས་པ་དེ་བཞིན་དུ་སྟེ་དེ་ལྟར་རང་རང་གི་འཕགས་པའི་ཆོས་རྟོགས་པར་བྱ་བའི་ཕྱིར་དུ་དམིགས་པའི་ཆོས་ཀྱི་དབྱིངས་རྒྱུའི་དམིགས་པས་ངོ་བོར་རྣམ་པར་འཇོག་པའི་སྒོ་ནས་གང་ཟག་གསུམ་རང་རང་གི་རིགས་ལ་གནས་པ་དང་། དེའི་ཆོས་ཉིད་ཐེག་པ་གསུམ་གྱི་རིགས་ཉིད་དུ་ཐ་སྙད་འདོགས་པ་ཡིན་པའི་ཕྱིར། གཉིས་པ་མཐའ་དཔྱད་པ་ལ། ཁ་ཅིག །གཞུང་འདི་དབུ་མ་ཐལ་འགྱུར་བའི་གཞུང་ཡིན་ཟེར་ན། སློབ་དཔོན་སེང་གེ་བཟང་པོ་དེ་ཐལ་འགྱུར་བ་ཡིན་པར་ཐལ། འདོད་པའི་ཕྱིར། འདོད་ན། ཞི་འཚོ་ཡབ་སྲས་དབུ་མ་ཐལ་འགྱུར་བ་ཡིན་པར་ཐལ། འདོད་པའི་ཕྱིར། འདོད་ན། རྣལ་འབྱོར་སྤྱོད་པའི་རང་རྒྱུད་པ་མེད་པར་ཐལ་ལོ། །གཞན་ཡང་། ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པར་འདོད་པའི་དབུ་མ་པ་ཡིན་ན། ཐལ་འགྱུར་བ་ཡིན་དགོས་པར་ཐལ། རྩ་བའི་དམ་བཅའ་འཐད་པའི་ཕྱིར། འདོད་ན། མི་འཐད་པ་ཐལ། དེ་འདྲའི་རང་རྒྱུད་པ་ཡོད་པའི་ཕྱིར། དེར་ཐལ། རྣམ་བཤད་དགོངས་པ་རབ་གསལ་ལས། རང་རྒྱུད་པ་དེ་དག་ཉན་རང་གི་ལམ་དེ་ལྟར་བསྒོམས་པ་ལ་ཆོས་ཀྱི་བདག་འཛིན་མངོན་གྱུར་རེ་ཞིག་སྤངས་པ་འོང་ཡང་། ཞེས་དང་། རྣམ་བཤད་ལས། ཉན་ཐོས་འཕགས་
པས་ཀྱང་། སྟོང་པ་ཉིད་ཀྱི་དོན་མངོན་སུམ་དུ་རྟོགས་པ་ཡོད་པར་བཞེད་པའི་དབུ་མ་རང་རྒྱུད་པ་ནི་ཤིན་ཏུ་མང་ངོ་། །ཞེས་གསུངས་པའི་ཕྱིར། གཞན་ཡང་། བསྟན་བཅོས་མངོན་རྟོགས་རྒྱན་དབུ་མ་ཐལ་འགྱུར་བའི་གཞུང་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། རྒྱན་གྱི་སྐབས་འདིར་སྤྱིར་ཤེས་སྒྲིབ་ཀྱི་གཟུང་འཛིན་གྱི་རྣམ་པར་རྟོག་པའི་རྣམ་གཞག་དང་། བྱེ་བྲག་ཏུ་ཤེས་སྒྲིབ་སྒོམ་སྤང་བདེན་འཛིན་དགུ་དང་ས་གཉིས་པ་ནས་བཅུ་པའི་བར་ཆད་མེད་ལམ་གྱི་བར་སྤངས་གཉེན་སྦྱོར་བ་མི་འཐད་པར་ཐལ། འདོད་པའི་ཕྱིར། འདོད་ན། གཞི་དང་དེ་ཡི་གཉེན་པོ་ཡིས། །ཞེས་དང་། །ས་དགུ་ལ་ནི་ཆེན་པོ་ཡི། །ཞེས་བཤད་པ་མི་འཐད་པར་ཐལ། འདོད་པའི་ཕྱིར། ཁོ་ན་རེ། རྒྱས་འབྲིང་བསྡུས་གསུམ་རང་རྒྱུད་པའི་མདོ་ཡིན་པར་ཐལ། མངོན་རྟོགས་རྒྱན་རང་རྒྱུད་པའི་བསྟན་བཅོས་ཡིན་པའི་ཕྱིར། འདོད་ན། སྟོན་པ་ཤཱཀྱ་ཐུབ་པ་དང་། རྗེ་བཙུན་བྱམས་མགོན་གཉིས་རང་རྒྱུད་པ་ཡིན་པར་ཐལ། འདོད་པའི་ཕྱིར་ན་འདོད་དོ། །གཉིས་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཇི་ལྟར་ཞེས་བྱ་བ་སོགས་ཀྱི་ལན་ཞིག་ཀྱང་དོན་གྱིས་ཐོབ་པར་གཟིགས་མོད་ཀྱི། ལན་གྱི་རྣམ་གྲངས་གཞན་ཡང་ཡོད་དེ། །རྟོགས་སླ་བའི་ཆོས་ཉིད་དུ་འཇིག་རྟེན་པའི་དངགས་པ་སྟེ། དེའི་གྲགས་པས་ལན་སྔ་མ་ལས་གཞན་དུ་བརྟེན་པའི་ཆོས་ཞེས་སོགས་ཀྱིས་འཆད་པའི་ཕྱིར། གཉིས་པ་ནི། ཤེས་བྱ་ཆོས་ཅན། ཐེག་གསུམ་གྱིས་དེ་བཞིན་ཉིད་ལ་དམིགས་པར་ཁྱད་མེད་ན། རིགས་གསུམ་གྱི་རྣམ་དབྱེ་མི་རུང་བའི་སྐྱོན་མེད་པར་ཐལ། བརྟེན་པའི་ཆོས་ཀྱི་བྱེ་བྲག་གིས། །རྟེན་དེའི་དབྱེ་བ་འཇིག་རྟེན་ན་ཡོངས་སུ་བརྗོད་པ་ལྟར། བརྟེན་ཆོས་ཀྱི་སྒོ་ནས་དབྱེ་བ་ཐ་དད་པའི་ཕྱིར། གསུམ་པ་ནི་ཤེས་བྱ་ཆོས་ཅན། རིགས་ནི་ཞེས་སོགས་ཀྱི་སྐྱོན་མེད་པར་ཐལ། དཔེར་ན། ཉེར་ལེན་འཇིམ་པ་གཅིག་ལས་མངོན་པར་གྲུབ་ཅིང་། རྐྱེན་མེ་ལྕེ་གཅིག་གིས་སོ་བཏང་བ་ལ་སོགས་པའི་རྟེན་བུམ་པ་ལ་
སོགས་པ་སྣོད་གཅིག་ཉིད། བརྟེན་པ་སྦྲང་རྩི་དང་། ལི་ཁ་ར་དང་ལ་སོགས་པ། བུ་རམ་དང་། ཞོའི་བཅུད་མི་འདྲ་བ་ཐ་དད་པའི་སྣོད་ཉིད་ཀྱིས། སྣོད་ཐ་དད་པའི་ཐ་སྙད་བྱེད་པ་དེ་བཞིན་དུ། བརྟེན་པའི་ཆོས་ཐེག་པ་གསུམ་གྱིས་བསྡུས་པའི་རྟོགས་ཤིང་ཐོབ་པར་བྱ་བའི་ལམ་ཐ་དད་པ་ཉིད་ཀྱིས་རྟེན་རིགས་ཐ་དད་པ་ཉིད་དོ་ཞེས་བསྟན་པའི་ཕྱིར།
ཐེག་ཆེན་སྒྲུབ་པའི་དམིགས་པ་བཤད་པ།
ཐེག་ཆེན་སྒྲུབ་པའི་དམིགས་པ་བཤད་པ། གཉིས་པ་སྒྲུབ་པའི་དམིགས་པ་བཤད་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། སྔར་ཇི་སྐད་བཤད་པའི་སྒྲུབ་པའི་རྟེན་གྱི་དམིགས་པ་གང་ཡིན་ཞེ་ན། བཤད་དུ་ཡོད་དེ། དམིགས་པ་ཆོས་རྣམས་ཞེས་སོགས་ཀྱིས་འཆད་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཟག་བཅས་ཟག་མེད་ཀྱི་ཆོས་ཐམས་ཅད་ཆོས་ཅན། ཐེག་ཆེན་སྒྲུབ་པའི་དམིགས་པ་ཡིན་ཏེ། དེའི་སྒྲོ་འདོགས་གཅད་པར་བྱ་བའི་གཞི་ཡིན་པའི་ཕྱིར། ཐེག་ཆེན་སྒྲུབ་པའི་དམིགས་པ་དེ་ཡང་ཆོས་ཅན། དུ་མར་ཡོད་དེ། དགེ་བ་དགེ་སྦྱོང་ཚུལ་གྱི་ལམ་བདེན་དང་། སྲོག་གཅོད་ལ་སོགས་མི་དགེ་བ་དང་། བཏང་སྙོམས་སུ་བྱ་བའི་ལུང་མ་བསྟན་དང་། འཇིག་རྟེན་པ་ཡི་རྟོགས་པ་སོ་སྐྱེའི་ཕུང་པོ་ལྔ་དང་། འཇིག་རྟེན་ལས་འདས་པའི་ལམ་དུ་འདོད་པ་ཟག་མེད་ཀྱི་བསམ་གཏན་བཞི་པོ་གང་དག་དང་། ཟག་བཅས་ཟག་མེད་ཀྱི་ཆོས་དང་། རྒྱུ་རྐྱེན་གྱིས་འདུས་བྱས་པ་ཁམས་གསུམ་པོ་གང་དག་དང་། དེས་འདུས་མ་བྱས་པ་དེ་བཞིན་ཉིད་དང་། སློབ་མ་ཉན་ཐོས་དང་ཐུན་མོང་བའི་ཆོས་བསམ་གཏན་བཞི་རྣམས་དང་། ཐུབ་པའི་ཐུན་མོང་མིན་པའི་ཆོས་བཅོ་བརྒྱད་པོ་གང་དག་རྣམས་སུ་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་གཉིས་ལས། དང་པོ་ལ། ཁ་ཅིག་ན་རེ། ལུང་དུ་བསྟན་པ་གང་ཞིག །རང་འབྲས་རྣམ་སྨིན་བདེ་བ་འབྱིན་བྱེད་དེ་དགེ་བའི་མཚན་ཉིད་ཟེར་ན། རྣམ་མཁྱེན་ཆོས་ཅན།
མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཟག་བཅས་ཡིན་པར་ཐལ། འདོད་པའི་ཕྱིར། ཁྱབ་པ་ཡོད་དེ། རྣམ་སྨིན་གྱི་རྒྱུ་ལ་མི་དགེ་བ་དང་། དགེ་བ་ཟག་བཅས་གཉིས་སུ་གྲངས་ངེས་པའི་ཕྱིར་ཏེ། མཛོད་ལས། རྣམ་སྨིན་རྒྱུ་ནི་མི་དགེ་དང་། །དགེ་བ་ཟག་བཅས་རྣམས་ཁོ་ན། །ཞེས་གསུངས་པའི་ཕྱིར། ཁ་ཅིག །ལུང་དུ་བསྟན་པ་གང་ཞིག །རང་འབྲས་རྣམ་སྨིན་སྡུག་བསྔལ་འབྱིན་བྱེད་དེ། མི་དགེ་བའི་མཚན་ཉིད་ཟེར་ན། སྲོག་གཅོད་ཀྱི་ལས་བྱས་མ་ཐག་ཏུ་གཉེན་པོ་སྟོབས་བཞི་ཚང་བའི་བཤགས་པས་དག་པར་བྱེད་པའི་སྲོག་གཅོད་ཀྱི་ལས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། འདོད་ན། དེ་རྣམ་སྨིན་སྡུག་བསྔལ་འབྱིན་བྱེད་མ་ཡིན་པར་ཐལ། སྡུག་བསྔལ་དེ་དག་པར་བྱེད་པའི་ཕྱིར། ཁ་ཅིག །བླང་དོར་བཏང་སྙོམས་སུ་གཞག་པར་བྱ་བའི་ཆོས། ལུང་མ་བསྟན་གྱི་མཚན་ཉིད་ཟེར་ན། འཇིག་ལྟ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཁམས་གོང་མའི་སས་བསྡུས་ཀྱི་འཇིག་ལྟ་དེ་དེ་ཡིན་པ་གང་ཞིག །འདོད་པའི་སས་བསྡུས་ཀྱི་འཇིག་ལྟ་ཡང་དེ་ཡིན་པའི་ཕྱིར། དང་པོ་དེར་ཐལ། མཛོད་ལས། གོང་མ་ཐམས་ཅད་ལུང་མ་བསྟན། །ཞེས་གསུངས་པའི་ཕྱིར། གཉིས་པ་དེར་ཐལ། མཛོད་ལས། འདོད་ན་འཇིག་ཚོགས་ལྟ་བ་དང་། །མཐར་འཛིན་ལྷན་ཅིག་མ་རིག་པ། །ལྷག་མ་རྣམས་ནི་མི་དགེ་བའོ། །ཞེས་གསུངས་པའི་ཕྱིར། ཁ་ཅིག །ལུང་དུ་བསྟན་པ་གང་ཞིག །སྐྱེས་བུ་དམ་པས་བླང་བྱར་འོས་པ་དགེ་བ་དང་། དོར་བྱར་འོས་པ་མི་དགེ་བའི་མཚན་ཉིད་ཟེར་བ་ལ། ལ་ལ་དག་ལས་འབྲས་བདེན་པར་འཛིན་པའི་སེམས་བྱུང་དད་པ་ཆོས་ཅན། མཚན་ཉིད་དང་པོ་དེར་ཐལ། མཚོན་བྱ་དེའི་ཕྱིར། ཟེར་ན། མི་འཐད་པར་ཐལ། ཆོས་ཅན་དེ་མེད་པའི་ཕྱིར། དེར་ཐལ། ལས་འབྲས་ལ་ཡིད་ཆེས་པའི་དད་པ་དེ་དེ་མ་ཡིན་པའི་ཕྱིར། དེར་ཐལ། དེས་ལས་འབྲས་བདེན་གྲུབ་ཞེན་ཡུལ་དུ་མི་བྱེད་པའི་
ཕྱིར། གཞན་ཡང་། སྐྱེས་བུ་དམ་པས་བླང་བྱར་འོས་པ་དང་། དོར་བྱར་འོས་པ་འགལ་བར་ཐལ། འདོད་པའི་ཕྱིར། འདོད་ན། འཁོར་བའི་སྐྱེ་བ་ཆོས་ཅན། དེས་དོར་བྱར་འོས་པ་མ་ཡིན་པར་ཐལ། དེས་བླང་བྱར་འོས་པ་ཡིན་པའི་ཕྱིར། དེར་ཐལ། བྱང་སེམས་འཕགས་པས་བླང་བྱར་འོས་པ་ཡིན་པའི་ཕྱིར། དེར་ཐལ། བྱང་འཕགས་གཞན་དོན་དུ་འཁོར་བར་སྐྱེ་བ་ལེན་པའི་ཕྱིར། རྩ་བར་འདོད་ན། ཡིན་པར་ཐལ། ཁྱོད་སྤང་བྱ་ཡིན་པའི་ཕྱིར། གཉིས་པ་རང་ལུགས་ནི། ལུང་དུ་བསྟན་པ་གང་ཞིག །བདེ་བ་སྐྱེད་པའི་རིགས་སུ་གནས་པ་དགེ་བའི་མཚན་ཉིད། དེ་གང་ཞིག་སྡུག་བསྔལ་སྐྱེད་པའི་རིགས་སུ་གནས་པ་མི་དགེ་བའི་མཚན་ཉིད། དགེ་མི་དགེ་གང་རུང་དུ་མ་གྲུབ་པའི་ཆོས་ལུང་མ་བསྟན་གྱི་མཚན་ཉིད། གསུམ་པ་འགྲེལ་པ་ལ། སྤྱིར་བསྟན་པ་དང་། སོ་སོར་བཤད་པ། དམིགས་པ་བཅུ་གཅིག་ལ་རིམ་གྱིས་དམིགས་པར་བསྟན་པའོ། །དང་པོ་ནི། ཤེས་བྱ་ཆོས་ཅན། སྤྱིར་ཐེག་ཆེན་སྒྲུབ་པའི་དམིགས་པ་ལ་དཔྱོད་ཚུལ་ཡོད་དེ། བྱང་སེམས་རྣམས་རེ་ཞིག་དང་པོར་ཆོས་འདི་རྣམས་ལས་བླང་བྱ་དགེ་བ་དང་། དོར་བྱ་མི་དགེ་བ་དང་། བཏང་སྙོམས་སུ་གཞག་བྱ་ལུང་དུ་མ་བསྟན་པ་དེ་གསུམ་པོ་གང་ཞེས་དཔྱོད་པར་བྱེད་ལ། དེ་ནས་གོ་རིམ་བཞིན་དུ་དགེ་སྦྱོང་གི་ཚུལ་ཉིད་དང་། སྲོག་གཅོད་པ་ལ་སོགས་པ་དང་། ལུང་དུ་མ་བསྟན་པའི་ལུས་ཀྱི་ལས་ལ་སོགས་པ་རྣམས་རྟོགས་པར་འགྱུར་བའི་ཕྱིར། གཉིས་པ་ནི། ཆོས་གསུམ་པོ་སྤྱིར་རྟོགས་པ་དེའི་འོག་ཏུ་དམིགས་པ་ལྷག་མ་རྣམས་ལ་དཔྱོད་ཚུལ་ཡོད་དེ། གསུམ་པོ་དེ་དག་ཉིད་ལ་དབྱེ་གཞིར་བྱས་ནས། འཇིག་རྟེན་པ་ལ་སོགས་པ་རྣམ་པ་གཉིས་པོའི་དབྱེ་བ་ཟུང་བཞི་ཉིད་ཀྱིས་དབྱེར་ཡོད་པའི་ཕྱིར། དེ་ཡང་གྲངས་བཞིན་དུ་བྱིས་པའི་སྐྱེ་བོ་ཐམས་ཅད་དང་འབྲེལ་བའི་འཇིག་རྟེན་པའི་ལམ་གྱིས་བསྡུས་པའི་ཕུང་པོ་ལྔ་
ཆོས་ཅན། འཇིག་རྟེན་པ་ཡིན་ཏེ། ཐོག་མེད་ནས་འཁོར་བར་འདྲིས་པའི་ཆོས་ཅན་ཡིན་པའི་ཕྱིར། འཕགས་པའི་སྐྱེ་བོ་ཐམས་ཅད་ཀྱི་རྒྱུད་ཀྱིས་བསྡུས་པའི་ཟག་མེད་ཀྱི་བསམ་གཏན་བཞི་ཆོས་ཅན། འཇིག་རྟེན་ལས་འདས་པ་ཡིན་ཏེ། སྲིད་པའི་གཉེན་པོ་འཁོར་བར་མ་འདྲིས་པའི་ཆོས་ཡིན་པའི་ཕྱིར། ཉེ་བར་ལེན་པའི་ཕུང་པོ་ལྔ་ཆོས་ཅན། ཟག་བཅས་ཡིན་ཏེ། འཇིག་ལྟའི་རྩ་བ་ལས་སྐྱེས་ཤིང་། བདག་ཏུ་ལྟ་བའི་གཉེན་པོའི་ཕྱོགས་མ་ཡིན་པའི་ཕྱིར། བདག་དེར་ལྟ་བའི་གཉེན་པོ་ཟག་མེད་ཀྱི་དྲན་པ་ཉེ་བར་གཞག་པ་བཞི་ཆོས་ཅན། ཟག་མེད་ཡིན་ཏེ། སྤང་བྱའི་ས་བོན་གྱི་དངོས་གཉེན་གྱི་རིགས་སུ་གནས་པའི་འདས་ལམ་ཡིན་པའི་ཕྱིར། རྒྱུ་དང་རྐྱེན་ལ་རག་ལས་པ་འདོད་པའི་ཁམས་ལ་སོགས་པ་ལ་བརྟེན་པའི་ལམ་བདེན་ཆོས་ཅན། རྒྱུའི་ཆ་ཡིན་ཏེ། འགོག་བདེན་ཐོབ་བྱེད་ཀྱི་ཐབས་ཡིན་པའི་ཕྱིར། རྒྱུ་ལ་མི་ལྟོས་པ་དེ་བཞིན་ཉིད་སྤང་བྱའི་ས་བོན་དང་བྲལ་བ་ཆོས་ཅན། འབྲས་བུའི་ཆ་ཡིན་ཏེ། ལམ་བདེན་གྱི་བྲལ་འབྲས་ཡིན་པའི་ཕྱིར། འཕགས་པའི་རྒྱུད་ལ་འབྱུང་བའི་བསམ་གཏན་བཞི་ཆོས་ཅན། ཐུན་མོང་གི་ཡོན་ཏན་ཡིན་ཏེ། ཐེག་པ་གསུམ་གྱི་འཕགས་པའི་སྐྱེ་བོ་ཐམས་ཅད་ཀྱི་རྒྱུད་ལ་འབྱུང་བའི་ཡོན་ཏན་ཡིན་པའི་ཕྱིར། སྟོབས་བཅུ་ཆོས་ཅན། ཐུན་མོང་མ་ཡིན་པའི་ཡོན་ཏན་ཡིན་ཏེ། ཡང་དག་པར་རྫོགས་པའི་སངས་རྒྱས་ཀྱི་རྒྱུད་ཁོ་ན་ལ་འབྱུང་བའི་ཡོན་ཏན་ཡིན་པའི་ཕྱིར། ཆོས་ཅན་ཞེས་འབུར་དུ་སྨོས་པར་ཆོས་ཅན། དགོས་པ་ཡོད་དེ། སྟོབས་བཅུ་པོ་དེ་དེའི་ཡོན་ཏན་ཀུན་གྱི་རྟེན་དུ་ཤེས་པའི་ཆེད་ཡིན་པའི་ཕྱིར། གསུམ་པ་ནི། ཤེས་བྱ་ཆོས་ཅན། ཐེག་ཆེན་སྒྲུབ་པའི་དམིགས་པ་ལ་རྣམ་པ་བཅུ་གཅིག་ཏུ་གྲངས་ངེས་པ་ཡིན་ཏེ། སྔར་བཤད་པ་དེ་ལྟ་བུ་ལ་སོགས་པའི་རིམ་པ་ཇི་ལྟ་བ་བཞིན་དུ་རྟོགས་པའི་རིམ་གྱིས་ཆོས་ཐམས་ཅད་ལ་དམིགས་པས་ནའོ། །
ཐེག་ཆེན་སྒྲུབ་པའི་ཆེད་དུ་བྱ་བ་བཤད་པ།
ཐེག་ཆེན་སྒྲུབ་པའི་ཆེད་དུ་བྱ་བ་བཤད་པ། གསུམ་པ་སྒྲུབ་པའི་ཆེད་དུ་བྱ་བ་བཤད་པ་ལ་
མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། དམིགས་པ་དེ་ལྟ་བུ་ལ་དམིགས་ནས་ཤེས་པར་བྱ་བ་སྒྲུབ་པའི་ཆེད་དུ་བྱ་བ་དེ་གང་ཡིན་ཞེ་ན། བཤད་དུ་ཡོད་དེ། ཆེད་དུ་བྱ་བ་གསུམ་དུ་ཕྱེ་ནས་འཆད་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཐེག་ཆེན་སྒྲུབ་པའི་ཆེད་དུ་བྱ་བ་འདི་ཆོས་ཅན། ཁྱོད་གང་གིས་ཤེས་པར་བྱེད་པ་ཡོད་དེ། རང་བྱུང་དུ་འགྱུར་བས་རང་བྱུང་གི་མིང་བཏགས་པ་བྱང་སེམས་རྣམས་ཀྱིས་ཤེས་པར་བྱེད་པའི་ཕྱིར། གང་གི་སྒོ་ནས་ཤེས་པར་བྱེད་པ་ཡོད་དེ། ཆེན་པོ་གསུམ་གྱིས་ཤེས་པར་བྱེད་པ་ཡིན་པའི་ཕྱིར། ཆེན་པོ་གསུམ་ཡོད་དེ། སེམས་ཅན་ཀུན་མཆོག་ཉིད་དུ་བྱེད་པའི་སེམས་ཅན་པོ་དང་། རང་དོན་སྤོང་བ་དང་། གཞན་དོན་རྟོགས་པ་ཆེན་པོ་དང་གསུམ་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་གཉིས་ལས། དང་པོ་ལ། ཁ་ཅིག །བྱང་སེམས་གང་གི་ཆེད་དུ་སྒྲུབ་པ་ལ་འཇུག་པའི་ཐོབ་བྱ་མཐར་ཐུག །ཐེག་ཆེན་སྒྲུབ་པའི་ཆེད་དུ་བྱ་བའི་མཚན་ཉིད་ཟེར་བར། ལ་ལ་དག་ན་རེ། བྱང་སེམས་དང་རྒྱུད་ཐ་དད་དུ་གྱུར་པའི་སངས་འཕགས་ཀྱི་རྒྱུད་ཀྱི་རྣམ་མཁྱེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མ་ཡིན་པར་ཐལ། བྱང་སེམས་ཀྱི་ཐོབ་བྱ་མཐར་ཐུག་མ་ཡིན་པའི་ཕྱིར། ཟེར་ན། མི་འཐད་པར་ཐལ། བྱང་སེམས་དང་རྒྱུད་ཐ་དད་དུ་གྱུར་པའི་སངས་འཕགས་མེད་པའི་ཕྱིར། དེར་ཐལ། སངས་འཕགས་ཡིན་ན་བྱང་སེམས་ཀྱི་རྟོགས་པ་སྔོན་སོང་ཡིན་དགོས་པའི་ཕྱིར་ཏེ། དེ་ཡིན་ན་ཐེག་ཆེན་གྱི་སློབ་ལམ་སྔོན་སོང་ཡིན་དགོས་པའི་ཕྱིར། གཉིས་པ་རང་ལུགས་ནི། གང་གི་ཆེད་དུ་སྒྲུབ་པ་ལ་འཇུག་པའི་ཐོབ་བྱ་མཐར་ཐུག་དེ། ཐེག་ཆེན་སྒྲུབ་པའི་ཆེད་དུ་བྱ་བའི་མཚན་ཉིད། གསུམ་པ་ནི། འབྱུང་བར་འགྱུར་བའི་སངས་རྒྱས་བྱང་ཆུབ་སེམས་དཔའ་རྣམས་ཉིད་ཆོས་
ཅན། ཆེད་དུ་བྱ་བ་རྣམ་པ་གསུམ་དུ་ཤེས་པར་བྱ་བ་ཡིན་ཏེ། ཆེན་པོ་ཉིད་གསུམ་དང་ལྡན་པས་ཆེད་དུ་བྱ་བ་གསུམ་ཡོད་པའི་ཕྱིར། གསུམ་པོ་དེ་ཡང་ཡོད་དེ། དེ་ཐོབ་བྱ་མཐར་ཐུག་གསུམ་པོ་ཉིད་ཀྱི་དབང་དུ་བྱས་ཏེ། འོག་ནས་འབྱུང་བ་དེ་ལྟར་སྒྲུབ་པ་ལ་འཇུག་པ་དེའི་ཕྱིར། ཆེན་པོ་གསུམ་ཡང་ཡོད་དེ། སེམས་ཅན་ཞེས་ཏེ། དེ་ཐམས་ཅད་སངས་རྒྱས་སུ་བྱེད་འདོད་པ་སེམས་ཆེན་པོ་སྟེ། སངས་རྒྱས་ཀྱི་ཐུགས་རྗེ་ཆེན་པོ་ཉིད་དང་། སྤངས་པ་མཐར་ཐུག་སྤོང་བ་ཆེན་པོ་ཉིད་དང་། རྟོགས་པ་མཐར་ཐུག་རྟོགས་པ་ཆེན་པོ་ཉིད་རྣམས་སུ་ཡོད་པའི་ཕྱིར། སངས་རྒྱས་སུ་འགྱུར་ཚུལ་ཡོད་དེ། རྣམ་པ་ཐམས་ཅད་དུ་རྣམ་མཁྱེན་མཚོན་བྱེད་ཀྱི་ཆོས་བཅུས་མཚོན་པས། རྣམ་པ་ཐམས་ཅད་མཁྱེན་པ་ཉིད་ཡོངས་སུ་ཤེས་པའི་སྒོ་ནས་འབྱུང་བར་འགྱུར་བ་ཡིན་པའི་ཕྱིར། བཞི་པ་སྒྲུབ་པའི་ངོ་བོ་ལ། སྒྲུབ་པ་སྤྱིའི་རྣམ་གཞག་དང་། སོ་སོའི་རང་བཞིན་བཤད་པའོ། །དང་པོ་ལ། སྟོན་ཚུལ་གྱི་སྒོ་ནས་གཉིས་སུ་དབྱེ་བ། མཚན་གཞིའི་སྒོ་ནས་བཞིར་དབྱེ་བའོ། །དང་པོ་ལ། དྲི་བ་དང་། ལན་གཉིས་ལས། དང་པོ་ནི། ཐེག་ཆེན་གྱི་སྒྲུབ་པ་ལས་བརྩམས་ཏེ་དྲི་བ་ཞུས་ཚུལ་ཡོད་དེ། དེ་ལྟར་སྒྲུབ་པའི་རྟེན་དུ་གྱུར་པ་དང་དམིགས་པ་དང་ཆེད་དུ་བྱ་བ་ལ་སོགས་པ་བརྗོད་ནས་སྒྲུབ་པ་དེའི་རང་གི་ངོ་བོ་གང་ཡིན་ཞེས་དྲིས་པའི་ཕྱིར། གཉིས་པ་ལ་ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། དེའི་ལན་ཡོད་དེ། རྗོད་བྱེད་མི་འདྲ་བའི་ཁྱད་པར་གྱིས་སྐབས་དང་པོ་གསུམ་དུ་མཁྱེན་གསུམ་གྱི་རྣམ་པ་ངེས་པའི་རང་བཞིན་གྱི་ཐམས་ཅད་མཁྱེན་པ་ཉིད་གསུམ་གྱི་རྣམ་པ་ཡུལ་དུ་བྱས་ལ། གོ་ཆ་མ་གཏོགས་ཕར་ཕྱིན་དྲུག་ལྡན་གྱི་སྒོ་ནས་གསལ་བར་མ་བསྟན་པར། སྤྱིར་མཁྱེན་གསུམ་གྱིས་བསྡུས་པའི་དགེ་བའི་ཆོས་ཀྱི་རྟེན་ཅན་ཏེ། ཡུལ་ཅན་དུ་བསྟན་པའི་སྒྲུབ་པ་དང་། རྣམ་པ་ཀུན་མངོན་པར་རྫོགས་པ་རྟོགས་པ་ལ་སོགས་པ། མངོན་པར་རྟོགས་པ་རྣམ་པ་བཞི་སྟོན་པའི་སྐབས་ལ་མངོན་པར་རྟོགས་པ་རེ་རེ་ཞིང་། ཕ་རོལ་ཏུ་ཕྱིན་པ་དྲུག་གི་རྟེན་ཅན་དུ་བསྟན་
པའི་ཕྱིར། ཉམས་ལེན་གྱི་བྱ་བ་ནི་སྒྲུབ་པ་སྟེ། མཁྱེན་གསུམ་ཡུལ་དུ་བྱས་པ་དང་སྦྱོར་བ་བྱེ་བྲག་གི་སྒྲུབ་པ་གཉིས་སུ་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་གཉིས་ལས། དང་པོ་ལ། རོང་ཊྭཱིཀ་པ་ན་རེ། མཁྱེན་གསུམ་ཡུལ་དུ་བྱས་ནས་ཐོས་བསམ་གཙོ་བོར་གྱུར་པའི་སྒྲུབ་པ་དེ་མཁྱེན་པ་ཡུལ་གྱི་སྒྲུབ་པའི་མཚན་ཉིད། སྦྱིན་སོགས་ལ་གཙོ་བོར་སྤྱོད་པའི་སྒྲུབ་པ་དེ་སྦྱོར་བ་བྱེ་བྲག་གི་སྒྲུབ་པའི་མཚན་ཉིད་ཟེར་ཞིང་། མཁྱེན་གསུམ་ཉམས་ལེན་གྱི་བྱ་བ་ལྟ་བའི་ཉམས་ལེན་དང་། སྦྱོར་བཞི་ཉམས་ལེན་སྤྱོད་པའི་ཉམས་ལེན་ཡིན་ཟེར་ན། འོ་ན། ཐོས་བསམ་གཙོ་བོར་གྱུར་པའི་དོན་དེ་སྦྱིན་སོགས་སྦྱོར་བས་ཉམས་སུ་མི་ལེན་པར་ཤེས་བྱ་གཏན་ལ་འབེབས་པའི་གནས་སྐབསས་གཙོ་བོར་གྱུར་པ་ལ་བྱེད་དམ། གཏན་ལ་འབེབས་པའི་སྦྱིན་སོགས་ལ་བསམ་པས་ཡང་དང་ཡང་དུ་འདྲིས་པར་བྱེད་པའི་སྐབས་ལ་བྱེད། དང་པོ་ལྟར་ན། མཁྱེན་པ་ཡུལ་གྱི་སྒྲུབ་པ་ཆོས་ཅན། ལམ་མ་ཞུགས་ཀྱི་གནས་སྐབས་ཀྱི་སྒྲུབ་པ་ཡིན་པར་ཐལ། སྦྱིན་སོགས་སྦྱོར་བས་ཉམས་སུ་མི་ལེན་པར་ཤེས་བྱ་གཏན་ལ་འབེབས་པའི་གནས་སྐབས་གཙོ་བོར་གྱུར་བའི་མཁྱེན་པ་ཡིན་པའི་ཕྱིར། འདོད་ན། འགྲེལ་པ་ལས། རང་གི་ངོ་བོ་གང་ཞེ་ན། ཐམས་ཅད་མཁྱེན་པ་ཉིད་གསུམ་གྱི་ཡུལ་ལ་ཞེས་གསུངས་པ་མི་འཐད་པར་ཐལ། འདོད་པའི་ཕྱིར། གཉིས་པ་ལྟར་ན། དེ་ཆོས་ཅན། སྦྱིན་སོགས་ལ་གཙོ་བོར་སྤྱོད་པའི་སྒྲུབ་པ་ཡིན་པར་ཐལ། གཏན་ལ་འབེབས་པའི་སྦྱིན་སོགས་ལ་བསམ་པས་ཡང་དང་ཡང་དུ་འདྲིས་པར་བྱེད་པའི་གནས་སྐབས་ཀྱི་སྒྲུབ་པ་ཡིན་པའི་ཕྱིར། འདོད་ན། དེ་ཆོས་ཅན། སྦྱོར་བ་བྱེ་བྲག་གི་སྒྲུབ་པ་ཡིན་པར་ཐལ། འདོད་པའི་ཕྱིར། གཞན་ཡང་། དེ་གཉིས་ལ་ལྟ་སྤྱོད་ཀྱི་ཉམས་ལེན་དུ་འཇོག་པ་མི་འཐད་པར་ཐལ། དེ་གཉིས་ལ་ལྟ་སྤྱོད་གཙོ་བོར་གྱུར་མ་གྱུར་ཀྱི་ཤེས་བྱེད་མེད་པའི་ཕྱིར་དང་།
མཁྱེན་གསུམ་ཉམས་ལེན་གྱི་སྦྱོར་བ་སྤྱོད་པ་ཉམས་ལེན་གྱི་སྦྱོར་བ་ཡིན་ཞེས་ཁས་བླངས་པ་ལ་གནོད་པ་མེད་པའི་ཕྱིར། ཁ་ཅིག །མཁྱེན་པ་ཡུལ་གྱི་སྒྲུབ་པ་དང་། སྦྱོར་བ་བྱེ་བྲག་གི་སྒྲུབ་པ་འགལ་ཟེར་ན། མི་འཐད་པར་ཐལ། དེ་གཉིས་ཡིན་ཁྱབ་མཉམ་ཡིན་པའི་ཕྱིར། གཉིས་པ་རང་ལུགས་ནི། མཁྱེན་གསུམ་གང་རུང་གི་རྣམ་པ་ཡུལ་དུ་བྱས་ནས་སྒོམ་པར་བྱེད་པའི་ཤེས་རབ་ཀྱིས་ཟིན་པའི་སེམས་དཔའི་རྣལ་འབྱོར་མཁྱེན་པ་ཡུལ་གྱི་སྒྲུབ་པའི་མཚན་ཉིད། ཕར་ཕྱིན་དྲུག་ལྡན་དུ་བསམ་པ་ཅི་རིགས་པས་ཟིན་པའི་སེམས་དཔའི་རྣལ་འབྱོར་དེ་སྦྱོར་བ་བྱེ་བྲག་གི་སྒྲུབ་པའི་མཚན་ཉིད། གཉིས་པ་ནི། སྔར་བཤད་པ་དེ་ལྟར་རིམ་པ་ཇི་ལྟ་བ་བཞིན་དུ་སྦྱོར་ལམ་གྱི་སྒྲུབ་པ་ཆོས་ཅན། གོ་ཆའི་སྒྲུབ་པ་ཡིན་ཏེ། ཕྱིན་དྲུག་ཉམས་ལེན་གྱི་བསམ་པའི་སྒྲུབ་པ་ཡིན་པའི་ཕྱིར། མཐོང་ལམ་གྱིས་བསྡུས་པའི་སྒྲུབ་པ་ནི་ཆོས་ཅན། འཇུག་པའི་སྒྲུབ་པ་ཡིན་ཏེ། ཕྱིན་དྲུག་གི་མི་མཐུན་ཕྱོགས་འཇོམས་པའི་ཐེག་ཆེན་ལ་དངོས་སུ་ཞུགས་པའི་བརྩོན་འགྲུས་ཀྱི་སྒྲུབ་པ་ཡིན་པའི་ཕྱིར། ས་བདུན་པ་མན་ཆད་ཀྱི་སྒོམ་ལམ་ནི་ཆོས་ཅན། ཚོགས་སྒྲུབ་ཡིན་ཏེ། ཚོགས་གཉིས་རྒྱ་ཆེན་པོ་རྫོགས་པའི་བརྩོན་འགྲུས་ཀྱི་སྒྲུབ་པ་ཡིན་པའི་ཕྱིར། ས་བརྒྱད་པ་ཡན་ཆད་ཀྱི་ཁྱད་པར་གྱི་ལམ་གྱི་ངོ་བོ་ཉིད་ཀྱི་སྒྲུབ་པའི་མཚན་ཉིད་ཆོས་ཅན། ངེས་པར་འབྱུང་བའི་སྒྲུབ་པ་ཡིན་ཏེ། རྣམ་མཁྱེན་དུ་གདོན་མི་ཟ་བར་འབྱིན་པར་བྱེད་པའི་དག་སའི་རྣལ་འབྱོར་ཡིན་པའི་ཕྱིར།
གོ་སྒྲུབ་བཤད་པ།
གོ་སྒྲུབ་བཤད་པ། གཉིས་པ་སོ་སོའི་རང་བཞིན་ལ། བསམ་པ་རྒྱ་ཆེ་བ་གོ་སྒྲུབ། སྦྱོར་བ་རྒྱ་ཆེ་བ་འཇུག་སྒྲུབ། ཚོགས་གཉིས་རྒྱ་ཆེ་བའི་ཚོགས་སྒྲུབ། རྣམ་མཁྱེན་དུ་གདོན་མི་ཟ་བར་འབྱིན་བྱེད་ངེས་འབྱུང་སྒྲུབ་པའོ། །དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། སྒྲུབ་པ་དེ་རྣམས་ཀྱི་ནང་ནས། གོ་ཆའི་སྒྲུབ་པ་གསུངས་
པའི་ཚུལ་ཡོད་དེ། དེ་བརྩོན་འགྲུས་ཀྱི་ངོ་བོ་ཉིད་ཀྱིས་ཁྱད་པར་དུ་བྱས་པར། དེ་དག་སོ་སོར་སོགས་ཀྱིས་འཆད་པའི་ཕྱིར། གཉིས་པ་ལ་ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། གོ་ཆའི་སྒྲུབ་པ་གང་ཡིན་པ་དེ་ཆོས་ཅན། ཁྱོད་འཆད་ཚུལ་ཡོད་དེ། དྲུག་ཚན་དྲུག་གིས་མདོ་ཇི་ལྟ་བ་བཞིན་དུ་བཤད་པའི་ཕྱིར། དེར་དབྱེ་རུང་སྟེ། གོ་ཆའི་སྒྲུབ་པ་དྲུག་པོ་དེ་དག་སོ་སོར་སྦྱིན་པ་ལ་སོགས་པ་རྣམ་པ་དྲུག་དྲུག་ཏུ་བསྡུས་པ་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་གཉིས་ལས། དང་པོ་ལ། ཁ་ཅིག །སྦྱིན་སོགས་ཕར་ཕྱིན་དྲུག་ལྡན་དུ་ཉམས་སུ་ལེན་པའི་བསམ་པའི་བརྩོན་འགྲུས་གཙོ་བོར་གྱུར་པའི་སེམས་དཔའི་རྣལ་འབྱོར་གོ་སྒྲུབ་ཀྱི་མཚན་ཉིད་ཟེར་ན། སྦྱིན་སོགས་ཕར་ཕྱིན་དྲུག་ལྡན་དུ་ཉམས་སུ་ལེན་པའི་སྦྱོར་བའི་བརྩོན་འགྲུས་གཙོ་བོར་གྱུར་པའི་སེམས་དཔའི་རྣལ་འབྱོར་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། ཁ་ཅིག །ཕར་ཕྱིན་རེ་རེའི་ནང་དུ་དྲུག་དྲུག་བསྡུས་ནས་ཉམས་སུ་ལེན་པའི་སེམས་དཔའི་རྣལ་འབྱོར་གོ་སྒྲུབ་ཀྱི་མཚན་ཉིད་ཟེར་ན། ཐེག་ཆེན་གྱི་སྡུག་བསྔལ་ཆོས་བཟོད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། ཕར་ཕྱིན་དྲུག་དངོས་སུ་ཡུལ་དུ་བྱེད་པའི་མཁྱེན་པ་ཡིན་པར་ཐལ། འདོད་པའི་ཕྱིར། རང་ལུགས་ནི། སྦྱིན་སོགས་ཕར་ཕྱིན་རེ་རེའི་ནང་དུ་དྲུག་དྲུག་ཚང་བར་བསྡུས་ནས་ཉམས་སུ་ལེན་པར་འདོད་པའི་བསམ་པའི་བྱ་བ་རྒྱ་ཆེན་པོས་ཟིན་པའི་སེམས་དཔའི་རྣལ་འབྱོར་གོ་སྒྲུབ་ཀྱི་མཚན་ཉིད། གསུམ་པ་ལ། དབྱེ་བ་དང་། དོན་བསྡུ་བའོ། །དང་པོ་ལ། སྦྱིན་པ་ལ་སྦྱར་བ་དང་། གཞན་ལ་ཡང་དེ་ལྟར་སྦྱར་བའོ། །དང་པོ་ནི། ཤེས་བྱ་ཆོས་ཅན། གོ་སྒྲུབ་སྦྱིན་པའི་ཕར་ཕྱིན་ལ་སྦྱར་ནས་འཆད་ཚུལ་ཡོད་དེ། ཆོས་ཀྱི་སྦྱིན་པ་དང་།
མི་འཇིགས་པ་དང་ཟང་ཟིང་གི་སྦྱིན་པ་ལ་སོགས་པ་སྦྱིན་པར་བྱེད་པའི་གཏོང་བའི་སེམས་དཔའ་ནི་སྦྱིན་པའི་ངོ་བོ་ཡིན་ལ། དེའི་ཚེ་ན་རང་ཉིད་འབའ་ཞིག་གི་ཆེད་དུ་ཐར་པ་དོན་དུ་གཉེར་བའི་ཉན་ཐོས་ཀྱི་བྱང་ཆུབ་ཡིད་ལ་བྱེད་པ་ལ་སོགས་པ་སྤོང་བའི་སེམས་པ་ཚུལ་ཁྲིམས་དང་། སྐྱེ་བོ་ཐམས་ཅད་ཀྱིས་མི་སྙན་པར་སྨྲ་བ་ཉིད་ལ་བཟོད་པ་སོགས་བཟོད་པ་གསུམ་དང་། ཐེག་པ་ཆེན་པོའི་ཆོས་མཐའ་དག་ལ་དོན་གཉེར་གྱི་འདུན་པ་སྐྱེད་པའི་བརྩོན་འགྲུས་དང་། ཐེག་པ་གཞན་དང་མ་འདྲེས་པའི་སེམས་རྩེ་གཅིག་པ་ཉིད་ཀྱིས་དགེ་བ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བར་བྱེད་པའི་བསམ་གཏན་རྣམས་གོ་རིམ་བཞིན་དུ། སྦྱིན་པར་བྱ་བ་ལ་སོགས་པར་འཁོར་གསུམ་བདེན་པར་མི་དམིགས་པའི་ཤེས་རབ་ཀྱི་གོ་ཆ་ཉིད་ཀྱིས་ཁྱབ་པར་བྱེད་པའི་སྒོ་ནས་སྦྱིན་པ་ཉམས་སུ་ལེན་པ་ནི་དེའི་གོ་ཆ་ཡིན་པའི་ཕྱིར། དེ་བཞིན་དུ་གཞན་ལྔ་ལ་ཡང་སྦྱར་བར་བྱ་སྟེ། ཕྱིན་དྲུག་གི་སྒོ་ནས་ཚུལ་ཁྲིམས་སྲུང་། བཟོད་པ་རྫོགས། བརྩོན་འགྲུས་རྩོམ། བསམ་གཏན་སྒྲུབ། ཤེས་རབ་སྒོམ་པར་བྱེད་པ་ཡིན་པའི་ཕྱིར། གཉིས་པ་དོན་བསྡུ་ནི། ཤེས་བྱ་ཆོས་ཅན། དེ་ལྟར་ལྡོག་པས་ཕྱེ་ན། དྲུག་ཚན་དྲུག་གི་གོ་ཆ་རྣམ་པ་སུམ་ཅུ་རྩ་དྲུག་ཡོད་པ་ཡིན་ཏེ། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་རེ་རེའི་ནང་དུ་སོ་སོར་སྦྱིན་པ་ལ་སོགས་པ་དྲུག་དྲུག་བསྡུས་པས་ན་དེ་ལྟར་འབྱུང་བའི་ཕྱིར། ཤེས་བྱ་ཆོས་ཅན། ལྡོག་པས་དབྱེ་བ་དེ་ལྟར་ཡིན་མོད་ཀྱི། དེ་དག་བསྡུ་ན་གོ་ཆའི་སྒྲུབ་པ་རྣམ་པ་དྲུག་ཏུ་འདུ་བ་ཡིན་ཏེ། སྦྱིན་པའི་གོ་སྒྲུབ་ཏུ་འདུས་པའི་སྦྱིན་པ་ལ་སོགས་པ་དྲུག་སྦྱིན་པའི་གོ་ཆར་ཆོས་མཐུན་པའི་ཕྱིར། བམ་པོ་གཉིས་པ་ཞེས་སྨོས་པ་ལ་ཆོས་ཅན། དགོས་པ་ཡོད་དེ། འདི་ཡན་དུ་བམ་པོ་དང་པོ་རྫོགས་པས། འདི་ནས་གཉིས་པའི་འགོ་རྩོམ་པའི་དོན་ཡིན་པའི་ཕྱིར།
འཇུག་སྒྲུབ་བཤད་པ།
འཇུག་སྒྲུབ་བཤད་པ། གཉིས་པ་འཇུག་སྒྲུབ་ལ། མཚམས་
སྦྱར་། རྩ་བ། འགྲེལ་པ་གསུམ་ལས། དང་པོ་ནི། གཉིས་པ་འཇུག་པའི་སྒྲུབ་པ་འཆད་ཚུལ་ཡོད་དེ། དེ་ལྟར་གོ་ཆའི་སྒྲུབ་པའི་གོ་བགོས་པ་ལ། ཐེག་ཆེན་ལམ་ཀུན་སྦྱོར་བའི་ཉམས་ལེན་ལ་འཇུག་པའི་འཇུག་སྒྲུབ་འབྱུང་བའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཐེག་ཆེན་ལམ་གྱིས་བསྡུས་པའི་བསམ་གཏན་གཟུགས་མེད་ཀྱི་འཇུག་སྒྲུབ་དང་། སྦྱིན་སོགས་ཕྱིན་དྲུག་གི་འཇུག་སྒྲུབ་དང་། མཐོང་བ་དང་སྒོམ་པ་དང་མི་སློབ་པ་དང་ཁྱད་པར་གྱི་ལམ་བཞིའི་དེ་དང་། བྱམས་པ་ལ་སོགས་པ་ཚད་མེད་བཞིའི་དེ་དང་། བདེན་གྲུབ་ཀྱི་དམིགས་པ་མེད་པའི་ལམ་དང་ལྡན་པའི་དེ་དང་། འཁོར་གསུམ་རྣམ་པར་དག་པའི་དེ་དང་། ཆེད་དུ་བྱ་བའི་དེ་དང་། མངོན་ཤེས་དྲུག་ལ་འཇུག་པའི་འཇུག་སྒྲུབ་སྟེ་བརྒྱད་དང་། འབྲས་བུས་བསྡུས་པའི་རྣམ་ཀུན་མཁྱེན་པའི་ཚུལ་ལ་ནི་འཇུག་ཅིང་ཉམས་སུ་ལེན་པའི་བྱ་བ་ཆོས་ཅན། ཐེག་ཆེན་ལ་འཛེག་པ་ཡིན་པར་ཤེས་པར་བྱ་སྟེ། རྒྱུ་འབྲས་ཀྱིས་བསྡུས་པའི་ཐེག་ཆེན་ལ་གོང་ནས་གོང་དུ་འཇུག་པའི་སྒྲུབ་པ་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་གཉིས་ལས། དང་པོ་ལ། ཁ་ཅིག །ཐེག་པ་ཆེན་པོའི་རྒྱུ་འབྲས་ཀྱི་ཆོས་ཅི་རིགས་པ་སྦྱོར་བའི་བརྩོན་འགྲུས་གཙོ་བོར་གྱུར་པའི་སྒོ་ནས་ཉམས་སུ་ལེན་པའི་སེམས་དཔའི་རྣལ་འབྱོར་དེ་འཇུག་སྒྲུབ་ཀྱི་མཚན་ཉིད་ཟེར་ན། ཐེག་ཆེན་གྱི་ཚོགས་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། ཐེག་ཆེན་གྱི་རྒྱུ་འབྲས་ཀྱི་ཆོས་ཅི་རིགས་པ་རྣམ་རྫོགས་སྦྱོར་བ་གཙོ་བོར་གྱུར་པའི་སྒོ་ནས་ཉམས་སུ་ལེན་པའི་སེམས་དཔའི་རྣལ་འབྱོར་ཡིན་པའི་ཕྱིར། ཁ་ཅིག །སྟོང་ཉིད་ལ་དམིགས་པའི་སྒོམ་བྱུང་གི་ཤེས་རབ་གཙོ་བོར་གྱུར་པའི་སྒོ་ནས་ཐེག་ཆེན་གྱི་རྒྱུ་འབྲས་ཀྱི་ཆོས་ཅི་རིགས་
ཉམས་སུ་ལེན་པའི་སེམས་དཔའི་རྣལ་འབྱོར་དེ་འཇུག་སྒྲུབ་ཀྱི་མཚན་ཉིད་ཟེར་ན། སྟོང་ཉིད་ལ་དམིགས་པའི་སྒོམ་བྱུང་གི་ཤེས་རབ་གཙོ་བོར་གྱུར་པའི་ཐེག་ཆེན་གྱི་ཚོགས་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། རྩ་བར་འདོད་མི་ནུས། གཉིས་པར་རང་ལུགས་ནི། ཐེག་པ་ཆེན་པོའི་རྒྱུ་འབྲས་ཀྱི་ཆོས་ཅི་རིགས་པ་རྩེ་སྦྱོར་གཙོ་བོར་གྱུར་པའི་སྒོ་ནས་ཉམས་སུ་ལེན་པའི་ཤེས་རབ་ཀྱིས་ཟིན་པའི་སེམས་དཔའི་རྣལ་འབྱོར་འཇུག་སྒྲུབ་ཀྱི་མཚན་ཉིད། གསུམ་པ་ལ་གཉིས། སོ་སོའི་དོན་དང་། རྟོགས་དཀའ་བ་བྱེ་བྲག་ཏུ་བཤད་པའོ། དང་པོ་ནི། ཤེས་བྱ་ཆོས་ཅན། ཐེག་པ་ཆེན་པོའི་རྒྱུ་འབྲས་ཀྱི་ཆོས་མཐའ་དག་སྦྱོར་བ་ལག་ལེན་གྱིས་རྣམ་པར་གནོན་པའི་ངོ་བོ་ཉིད་ཀྱི་སྒྲུབ་པ་དགུ་ཡིན་པས། འཇུག་པའི་སྒྲུབ་པ་རྣམ་པ་དགུ་པོ་དེ་ཡང་གཉིས་སུ་འདུས་ཏེ། རྒྱུ་ཐེག་ཆེན་གྱི་ལམ་དང་། དེའི་འབྲས་བུ་ལ་འཇུག་པ་གཉིས་སུ་ངེས་པའི་ཕྱིར། དང་པོ་ལ་གསུམ་ཡོད་དེ། རྟེན་འབྲེལ་ཐེག་ཆེན་གྱིས་བསྡུས་པའི་འཇིག་རྟེན་པའི་ལམ་བསམ་གཏན་དང་པོ་ནས་གཟུགས་མེད་པའི་སྙོམས་པར་འཇུག་པ་བཞི་པའི་བར་ཉམས་ལེན་གྱི་བྱ་བ་གཅིག་དང་། འཇིག་རྟེན་ལས་འདས་པའི་ལམ་ལ་འཇུག་པ་དང་། གཉིས་ཀ་ཐེག་དམན་ལས་འབྱེད་པའི་ཆོས་རྣམས་སུ་ཡོད་པའི་ཕྱིར། བར་པ་བཞི་ཡོད་དེ། རང་དོན་རྟོགས་པ་ཕུན་ཚོགས་ཐོབ་བྱེད་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་དྲུག་དང་། སྤངས་པ་ཕུན་ཚོགས་ཐོབ་བྱེད་མཐོང་བ་དང་། ས་བདུན་པ་མན་ཆད་ཀྱི་སྒོམ་པ་དང་། འབད་རྩོལ་གྱི་མཚན་མ་རགས་པ་ཞི་བས་མི་སློབ་པ་སྟེ་ས་བརྒྱད་པའི་ཡེ་ཤེས་དང་། ཁྱད་པར་གྱི་ལམ་ས་དགུ་པ་བཅུ་པ་གཉིས་དང་། གཞན་དོན་སྒྲུབ་པའི་ཐབས་ཚད་མེད་པ་བཞི་དང་། དེ་དག་བྱེད་མི་དམིགས་པ་དང་ལྡན་པ་རྣམས་ཡོད་པའི་ཕྱིར། ཐེག་
དམན་ལས་འབྱེད་པའི་ཆོས་གསུམ་ཡོད་དེ། ཕར་ཕྱིན་དྲུག་གི་དངོས་པོ་ཐམས་ཅད་ལ་ལས་བྱ་བྱེད་བདེན་སྟོང་དུ་རྟོགས་པའི་འཁོར་གསུམ་ཡོངས་སུ་དག་པ་དང་། དགེ་རྩ་བྱང་ཆུབ་ཏུ་བསྔོ་བའི་ཆེད་དུ་བྱ་བ་གསུམ་གྱི་དོན་དུ་སྒྱུར་བ་དང་། ཚོགས་མྱུར་དུ་རྫོགས་ཐབས་མངོན་པར་ཤེས་པ་དྲུག་ལ་འཇུག་པ་དང་། འབྲས་བུ་ལ་འཇུག་པ་རྣམ་པ་ཐམས་ཅད་མཁྱེན་པ་ཉིད་དག་ལ་དམིགས་ནས་ཡང་དག་པར་གནས་པའི་མཚན་ཉིད་ཀྱི་ཉམས་ལེན་གྱི་བྱ་བ་རྣམས་ཡོད་པའི་ཕྱིར།
ཚོགས་སྒྲུབ་བཤད་པ།
ཚོགས་སྒྲུབ་བཤད་པ། གསུམ་པ་ལ་གཉིས། སྤྱིར་བསྟན་པ་དང་། ཚོགས་གསུམ་བྱེ་བྲག་བཤད་པའོ། །དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། སྒྲུབ་པ་བཞིའི་ནང་ནས་གསུམ་པ་ཚོགས་ཀྱི་སྒྲུབ་པ་བྱེ་བྲག་ཏུ་བཤད་དུ་ཡོད་དེ། སྔར་བཤད་པ་དེ་ལྟར་ཐེག་ཆེན་གྱི་ཆོས་ཀུན་སྤྱོད་པའི་སྒོ་ནས་རྒྱུད་ལ་གནོན་པའི་འཇུག་པ་བྱས་པ་ལ་ཚོགས་གཉིས་རྒྱ་ཆེན་སྐྱེ་བས་ན་འཆད་རིགས་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། ཚོགས་ཀྱི་སྒྲུབ་པ་ཆོས་ཅན། ཁྱོད་ཉམས་ལེན་གྱི་རིམ་པ་བཅུ་བདུན་པོ་འདི་ཉིད་ཡིན་པར་ཤེས་པར་བྱ་སྟེ། བརྩེ་བ་སྙིང་རྗེ་ཆེན་པོའི་ཚོགས་སྒྲུབ་དང་། སྦྱིན་པ་ལ་སོགས་པ་དྲུག་ཉམས་ལེན་གྱི་དེ་དང་། ཞི་གནས་ལྷག་མཐོང་བཅས་པའི་དེ་དང་། ཟུང་དུ་འབྲེལ་བའི་ལམ་གང་ཡིན་པའི་དེ་དང་། གཞན་དོན་སྒྲུབ་པའི་ཐབས་ལ་མཁས་པ་གང་ཡིན་པའི་དེ་དང་། ཡེ་ཤེས་དང་ནི་བསོད་ནམས་ཀྱི་དེ་དང་། མཐོང་སྒོམ་ལམ་གྱི་དེ་དང་། ཚིག་དོན་གི་གཟུངས་ཀྱི་དེ་དང་། ས་བཅུའི་དེ་དང་། གཉེན་པོ་ཚོགས་ཀྱི་སྒྲུབ་པ་རྣམས་སུ་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་གཉིས་ལས་དང་པོ་ལ། ཁ་ཅིག །རང་འབྲས་བྱང་ཆེན་འབྱིན་པའི་སེམས་དཔའི་རྣལ་འབྱོར་
ཚོགས་སྒྲུབ་ཀྱི་མཚན་ཉིད་ཟེར་ན། ཐེག་ཆེན་གྱི་ཚོགས་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་བསལ་གཉིས་ཀ་གྲུབ་སྟེ། ཆོས་ཅན་དེ་ཡིན་པའི་ཕྱིར། ཁ་ཅིག །རང་འབྲས་གནས་སྐབས་ཀྱི་བྱང་ཆེན་དངོས་སུ་འབྱིན་པའམ། རང་འབྲས་མཐར་ཐུག་གི་བྱང་ཆེན་དངོས་སུ་འབྱིན་པ་གང་རུང་དུ་གྱུར་པའི་སེམས་དཔའི་རྣལ་འབྱོར་དེའི་མཚན་ཉིད་ཟེར་ན། ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོའི་སྐད་ཅིག་དང་པོ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། རང་འབྲས་གནས་སྐབས་ཀྱི་བྱང་ཆེན་དངོས་སུ་འབྱིན་པར་ཐལ། འདོད་པ་གང་ཞིག །ཅིག་ཤོས་མ་ཡིན་པའི་ཕྱིར། འདོད་ན། མི་འཐད་པར་ཐལ། དེ་དང་དེའི་འབྲས་བུར་གྱུར་པའི་གནས་སྐབས་ཀྱི་བྱང་ཆེན་གཉིས་ཀྱི་བར་དུ་ཐེག་ཆེན་གྱི་སྦྱོར་ལམ་ཆོས་མཆོག་སྐད་ཅིག་གཉིས་པས་ཆོད་པའི་ཕྱིར། ཁ་ཅིག །རང་འབྲས་བྱང་ཆུབ་དངོས་སུ་འབྱིན་པར་བྱེད་པའི་སེམས་དཔའི་རྣལ་འབྱོར་དེའི་མཚན་ཉིད་ཟེར་ན། མི་འཐད་པར་ཐལ། ཐེག་ཆེན་གྱི་མཐོང་ལམ་དང་། སྦྱོར་ལམ་ཆོས་མཆོག་ཆེན་པོའི་དངོས་འབྲས་སུ་གྱུར་པའི་བྱང་ཆེན་གཉིས་ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོ་ལས་དངོས་སུ་སྐྱེས་པར་མཚུངས་ན་དེ་གཉིས་ཅིག་ཅར་དུ་འབྱུང་དགོས་པའི་ཕྱིར་ཏེ། རྣམ་འགྲེལ་ལས། དངོས་པོ་དེ་ལས་སྐྱེ་བའི་བློའང་། །ཐམས་ཅད་ཅིག་ཅར་འབྱུང་བར་འགྱུར། །ཞེས་གསུངས་པའི་ཕྱིར། གཉིས་པ་རང་ལུགས་ནི། ཚོགས་གཉིས་རྒྱ་ཆེན་པོས་ཟིན་པའི་སྒོ་ནས་ཐེག་གྱི་སྦྱོར་ལམ་ཆོས་མཆོག་འབྲིང་མན་ཆད་ལས་ཁྱད་པར་དུ་འཕགས་ཤིང་། རང་འབྲས་བྱང་ཆེན་འབྱིན་པར་བྱེད་པའི་སེམས་དཔའི་རྣལ་འབྱོར་ཚོགས་སྒྲུབ་ཀྱི་མཚན་ཉིད། གསུམ་པ་ལ་སོ་སོའི་ངོ་བོ་དང་། ཚོགས་སུ་འཇོག་པའི་རྒྱུ་མཚན་དང་གཉིས་ལས། དང་པོ་ནི། ཤེས་བྱ་ཆོས་ཅན། ཚོགས་སྒྲུབ་དེ་ལ་བཅུ་བདུན་ཡོད་དེ། བརྩེ་བ་སྙིང་རྗེ་ཆེན་པོའི་ཚོགས་སྒྲུབ་དང་། དེས་ཡིད་གདུངས་
པ་རྣམས་ལ་སྦྱིན་པས་ཚིམ་པར་བྱེད་པའི་དེ་དང་། ཚུལ་ཁྲིམས་ཀྱིས་མངོན་མཐོ་སྒྲུབ་པའི་དེ་དང་། བཟོད་པ་དང་། བརྩོན་འགྲུས་དང་། བསམ་གཏན་རྣམས་ཀྱིས་གཅིག་ཏུ་ངེས་པའི་བདེ་བ་སྒྲུབ་པའི་དེ་དང་། ཤེས་རབ་ཀྱིས་གཏན་བདེ་སྒྲུབ་པའི་དེ་དང་། ཞི་གནས་དང་། ལྷག་མཐོང་དང་། དེ་གཉིས་ཟུང་དུ་འབྲེལ་བའི་ལམ་གྱི་དེ་དང་། རྣམ་མཁྱེན་ཡིད་བྱེད་ཀྱི་ཐབས་ལ་མཁས་པའི་དེ་དང་། མཉམ་རྗེས་ཀྱི་ལམ་དེ་གོམས་པར་བྱས་པས་ཡེ་ཤེས་དང་བསོད་ནམས་ཀྱི་དེ་དང་། ཚོགས་གཉིས་ལ་གོམས་པས་མཐོང་བ་ལ་སོགས་པའི་ལམ་གྱི་ཚོགས་དང་། དེ་དང་ལྡན་པས་ཚིག་དང་། ལ་སོགས་པ་དོན་མི་བརྗེད་པར་འཛིན་པའི་གཟུངས་དང་། ཡོན་ཏན་གྱི་རྟེན་བྱེད་པའི་སའི་ཚོགས་དང་། མི་མཐུན་ཕྱོགས་སྤོང་བའི་གཉེན་པོའི་ཚོགས་རྣམས་སུ་ཡོད་པའི་ཕྱིར། གཉིས་པ་ཚོགས་སུ་འཇོག་པའི་རྒྱུ་མཚན་ནི། སྙིང་རྗེ་ཆེན་པོའི་ཚོགས་སྒྲུབ་ལ་སོགས་ཚོགས་ཀྱི་སྒྲུབ་པ་རྣམ་པ་བཅུ་བདུན་པོ་ཆོས་ཅན། བྱང་ཆེན་འབྱིན་པར་བྱེད་པའི་རྒྱུའི་ཚོགས་ཡིན་ཏེ། སྙིང་རྗེ་ལ་སོགས་པ་ཚོགས་བཅུ་བདུན་པོ་འདི་དག་གིས་མྱུར་དུ་ཡང་དག་པར་འགྲུབ་པའི་ངོ་བོས་བྱང་ཆུབ་ཆེན་པོ་འབྲས་བུར་འཛིན་པར་བྱེད་པའི་ཕྱིར། མཐར་ཐུག་གི་བྱང་ཆེན་འབྲས་བུར་འཛིན་པར་བྱེད་དེ། དོན་དམ་པའི་བདེན་པ་ལས་མི་འདའ་བར་བདེན་པར་མི་དམིགས་པར་རྟོགས་པས་ཀུན་རྫོབ་ཀྱི་བདེན་པ་ལས་མི་འདའ་བར་རྒྱ་ཆེ་བས་བསྡུས་པའི་ཐེག་པ་ཆེན་པོའི་ལམ་གྱི་རིམ་པའི་དོན་མཐའ་དག་སྒྲུབ་པའི་ཕྱིར། གཉིས་པ་ཚོགས་གསུམ་བྱེ་བྲག་ཏུ་བཤད་པ་ལ། ཡེ་ཤེས་ཀྱི་ཚོགས་བྱེ་བྲག་ཏུ་བཤད་པ། སའི་ཚོགས་དང་གཉེན་པོའི་ཚོགས་བྱེ་བྲག་ཏུ་བཤད་པའོ། །དང་པོ་ལ། ཡུལ་ཅན་ཡེ་ཤེས་ཉི་ཤུ། དགག་གཞིའི་དབྱེ་བས་ཡུལ་སྟོང་ཉིད་ཉི་ཤུ། ཡེ་ཤེས་ཀྱི་དམིགས་པ་གང་ཡིན་ལ་དཔྱད་པའོ། །
དང་པོ་ནི། ཤེས་བྱ་ཆོས་ཅན། དེ་ལ་ཡེ་ཤེས་ཀྱི་ཚོགས་ནི་ས་གང་དང་གང་གིས་བསྡུས་པ་གཞག་ཏུ་ཡོད་དེ། སོ་སྐྱེའི་ས་དང་། ས་བཅུ་དང་། སངས་རྒྱས་ཀྱི་ཡེ་ཤེས་ཀྱིས་བསྡུས་པའི་ཕྱིར། ནང་དང་། ཕྱི་དང་། དེ་གཉིས་ཀ་སྟོང་ཉིད་དུ་རྟོགས་པའི་ཡེ་ཤེས་ཆོས་ཅན། ཁྱོད་ས་གང་གིས་བསྡུས་པ་གཞག་ཏུ་ཡོད་དེ། ལོངས་སྤྱོད་པ་པོ་དང་། སྤྱད་བྱ་དང་། དེའི་རྟེན་གསུམ་ལ་བདེན་ཞེན་འགོག་པ་ཚོགས་ལམ་གྱི་གནས་སྐབས་སུ་བཞག་པའི་ཕྱིར། སྟོང་ཉིད་སྟོང་ཉིད་དུ་རྟོགས་པའི་ཡེ་ཤེས་དེ་སྦྱོར་ལམ་ལ་བཞག་སྟེ། དེ་འཇིག་རྟེན་པའི་བསྒོམས་པ་ལས་བྱུང་བའི་ཤེས་རབ་ཀྱི་རྟོགས་པ་སྦྱོར་ལམ་དུ་འཕེན་པའི་ཕྱིར། ཆེན་པོ་སྟོང་ཉིད་མངོན་སུམ་དུ་རྟོགས་པའི་ཡེ་ཤེས་དེ་ས་དང་པོ་ལ་བཞག་སྟེ། སྟོང་ཉིད་དེས་དེ་མངོན་སུམ་དུ་རྟོགས་པའི་ཡེ་ཤེས་ཆོས་དབྱིངས་ཆོས་ཅན་ཐམས་ཅད་ལ་ཀུན་དུ་འགྲོ་བར་རྟོགས་པ་ས་དང་པོར་འཕེན་པར་བྱེད་པའི་ཕྱིར། དོན་དམ་པ་སྟོང་པ་ཉིད་མངོན་སུམ་དུ་རྟོགས་པའི་ཡེ་ཤེས་དེ་འདིའི་འོག་མ་རྣམས་ལ་ཡང་རིགས་འགྲེ། དོན་དམ་པ་རིགས་འགྲེ། ས་གཉིས་པར་བཞག་སྟེ། དེས་དེ་མངོན་སུམ་དུ་རྟོགས་པའི་ཡེ་ཤེས་ཆོས་དབྱིངས་མཆོག་གི་དོན་དུ་རྟོགས་པ་ས་གཉིས་པར་འཕེན་པར་བྱེད་པའི་ཕྱིར། འདུས་བྱས་རིགས་འགྲེ། ས་གསུམ་པར་བཞག་སྟེ། དེས་དེ་རྟོགས་པའི་ཡེ་ཤེས་ཆོས་དབྱིངས་རྒྱུ་མཐུན་པའི་དོན་དུ་རྟོགས་པ་ས་གསུམ་པར་འཕེན་པར་བྱེད་པའི་ཕྱིར། འདུས་མ་བྱས་རིགས་འགྲེ། ས་བཞི་པར་བཞག་སྟེ། དེས་དེ་རྟོགས་པའི་ཡེ་ཤེས་ཆོས་དབྱིངས་ཡོངས་སུ་འཛིན་མེད་ཀྱི་དོན་དུ་རྟོགས་པས་ས་བཞི་པར་འཕེན་པར་བྱེད་པའི་ཕྱིར། མཐའ་ལས་འདས་པ་རིགས་འགྲེ། ས་ལྔ་པར་བཞག་སྟེ། དེས་དེ་མངོན་སུམ་དུ་རྟོགས་པའི་ཡེ་ཤེས་ཆོས་དབྱིངས་རྒྱུ་ཐ་དད་མེད་པར་རྟོགས་པ་ས་ལྔ་པར་འཕེན་
པའི་ཕྱིར། ཐོག་མ་དང་ཐ་མ་མེད་པའི་རིགས་འགྲེ། ས་དྲུག་པར་བཞག་སྟེ། དེས་དེ་མངོན་སུམ་དུ་རྟོགས་པའི་ཡེ་ཤེས་ཆོས་དབྱིངས་ཀུན་བྱང་དོན་དམ་པར་མེད་པའི་སྟོང་པར་རྟོགས་པ་ས་དྲུག་པར་འཕེན་པའི་ཕྱིར། དོར་བ་མེད་པ་རིགས་འགྲེ། ས་བདུན་པར་བཞག་སྟེ། དེས་དེ་འཕངས་པའི་ཡུལ་ཅན་ཡེ་ཤེས་དེ་ས་བདུན་པར་འཕེན་པར་བྱེད་པའི་ཕྱིར། རང་བཞིན་དང་ཆོས་ཐམས་ཅད་རིགས་འགྲེ། ས་བརྒྱད་པར་བཞག་སྟེ། དེས་དེ་རྟོགས་པའི་ཡུལ་ཅན་ཡེ་ཤེས་ས་བརྒྱད་པར་འཕེན་པའི་ཕྱིར། རང་གི་མཚན་ཉིད་སྟོང་པ་ཉིད་དང་མི་དམིགས་པ་རིགས་འགྲེ། ས་དགུ་པར་བཞག་སྟེ། དེས་དེ་མངོན་སུམ་དུ་རྟོགས་པའི་ཡུལ་ཅན་ཡེ་ཤེས་དེ་ས་དགུ་པར་འཕེན་པའི་ཕྱིར། དངོས་པོ་མེད་པའི་ངོ་བོ་ཉིད་སྟོང་པ་དང་དངོས་པོ་རིགས་འགྲེ། ས་བཅུ་པར་བཞག་སྟེ། དེས་དེ་རྟོགས་པའི་ཡུལ་ཅན་ཡེ་ཤེས་དེ་ས་བཅུ་པར་འཕེན་པའི་ཕྱིར། དངོས་པོ་མེད་པ་དང་རང་གི་ངོ་བོ་དང་གཞན་གྱི་ངོ་བོ་སྟོང་པ་ཉིད་རིགས་འགྲེ། སངས་རྒྱས་ཀྱི་སར་བཞག་སྟེ། སྟོང་ཉིད་གསུམ་པོ་དེ་སྒྲིབ་གཉིས་ཀུན་སྤངས་པའི་རྟེན་དང་རང་བྱུང་ཡིན་པས་དེ་ལྟར་བཞག་པའི་ཕྱིར། གཉིས་པ་ནི། སྟོང་ཉིད་ཉི་ཤུ། འདིར་སྨྲས་པ། ནང་གི་སྐྱེ་མཆེད་དྲུག་ཆོས་ཅན། བདེན་པར་མེད་དེ། བདེན་གྲུབ་ཀྱི་གཅིག་དང་། བདེན་གྲུབ་ཀྱི་དུ་མ་གང་རུང་དང་བྲལ་བའི་ཕྱིར། ལྷག་མ་རྣམས་ལ་ཡང་རྟགས་བསལ་འདི་བཞིན་དུ་བྱའོ། །ཕྱི་རོལ་གྱི་སྐྱེ་མཆེད་དྲུག་པོ་རྣམས་བདེན་སྟོང་། ཕྱི་སྟོང་པ་ཉིད་ཆོས་ཅན། རྒྱུ་དང་སྐྱེ་མཆེད་ཀྱིས་གཉིས་ཀས་དབང་རྟེན་རྣམས་བདེན་སྟོང་། གཉིས་ཀ་སྟོང་པ་ཉིད་ཆོས་ཅན། བདེན་པས་སྟོང་པའི་དངོས་པོ་བདེན་གྲུབ་ཀྱིས་སྟོང་པ་སྟོང་ཉིད་སྟོང་ཉིད་ཆོས་ཅན། ཕྱོགས་བཅུ་བདེན་སྟོང་ཆེན་པོའི་སྟོང་ཉིད་ཆོས་ཅན། མྱ་ངན་ལས་འདས་པ་བདེན་སྟོང་དོན་དམ་པ་སྟོང་པའི་སྟོང་ཉིད་ཆོས་
ཅན། རྐྱེན་ལས་སྐྱེས་པ་འདུས་བྱས་བདེན་སྟོང་འདུས་བྱས་སྟོང་པའི་ཆོས་ཉིད་ཆོས་ཅན། ཅིག་ཤོས་ནམ་མཁའ་སོགས་འདུས་མ་བྱས་བདེན་སྟོང་འདུས་མ་བྱས་སྟོང་པའི་ཆོས་ཉིད་ཆོས་ཅན། རྟག་ཆད་ཀྱི་མཐས་སྟོང་པ་སྔ་ཕྱི་དང་དབུས་བདེན་སྟོང་མཐའ་ལས་འདས་པའི་སྟོང་ཉིད་ཆོས་ཅན། ཐོག་མཐའ་བདེན་སྟོང་ཐོག་མ་དང་ཐ་མ་མེད་པའི་སྟོང་ཉིད་ཆོས་ཅན། བླང་དོར་བདེན་སྟོང་དོར་བ་མེད་པའི་སྟོང་ཉིད་ཆོས་ཅན། གནས་ལུགས་བདེན་སྟོང་རང་བཞིན་སྟོང་ཉིད་ཆོས་ཅན། རྣམ་འགྱུར་གྱི་ཆོས་ཀུན་བདེན་སྟོང་ཆོས་ཀུན་སྟོང་ཉིད་ཆོས་ཅན། ཆོས་སྐྱེ་བ་དང་ལ་སོགས་འགག་གནས་བདེན་སྟོང་རང་གི་མཚན་ཉིད་སྟོང་ཉིད་ཆོས་ཅན། འདས་དུས་དང་སོགས་ཀྱིས་མ་འོངས་ད་ལྟར་བདེན་སྟོང་མི་དམིགས་སྟོང་ཉིད་ཆོས་ཅན། རྒྱུ་རྐྱེན་ལྡན་ཅིང་ཚོགས་པ་བདེན་སྟོང་དངོས་མེད་ངོ་བོ་ཉིད་སྟོང་ཉིད་ཆོས་ཅན། ཅིག་ཤོས་ཕུང་ལྔའི་ངོ་བོ་བདེན་སྟོང་དངོས་མེད་སྟོང་ཉིད་ཆོས་ཅན། འདུས་མ་བྱས་ཀྱི་ནམ་མཁའ་བདེན་སྟོང་དངོས་མེད་སྟོང་ཉིད་ཆོས་ཅན། རང་བཞིན་སྟོང་ཉིད་ཅེས་བྱ་བ་བདེན་སྟོང་རང་གི་ངོ་བོ་སྟོང་ཉིད་ཆོས་ཅན། བྱེད་པོ་གཞན་གྱིས་སྟོངས་པའི་སྟོང་ཉིད་ནི། ཆོས་ཀྱི་གཞན་གྱི་ངོ་བོ་ཉིད་དེ། བདེན་སྟོང་གཞན་གྱི་ངོ་བོ་སྟོང་ཉིད་ཆོསཅན། བདེན་པར་མེད་དེ། ཞེས་སྔ་མ་ལྟར་རོ། །སྟོང་པ་ཉིད་ནི་ཆོས་ཅན། ཁྱོད་ལ་ཉི་ཤུར་འདོད་དེ། སྔར་གྱི་ཉི་ཤུ་པོ་རང་རང་བདེན་གྲུབ་ཀྱི་ངོ་བོས་སྟོང་པའི་སྟོང་ཉིད་ཉི་ཤུར་ཡོད་པའི་ཕྱིར།
རྟོགས་དཀའ་བ་སའི་ཚོགས་བྱེ་བྲག་ཏུ་བཤད་པ།
རྟོགས་དཀའ་བ་སའི་ཚོགས་བྱེ་བྲག་ཏུ་བཤད་པ། གཉིས་པ་སའི་ཚོགས་བྱེ་བྲག་ཏུ་བཤད་པ་ལ། སྤྱིའི་མཚམས་སྦྱར་བ་དང་། སོ་སོའི་རང་བཞིན་བཤད་པའོ། །དང་པོ་ནི། སའི་ཚོགས་ཀྱི་ནང་ནས་ཡོངས་སྦྱོང་དེ་བར་སྐབས་ཀྱི་ཚིགས་སུ་བཅད་པ་སྟེ་ཤླཽ་ཀ་ཉི་ཤུ་རྩ་གསུམ་གྱིས་བཤད་པ་ཡིན་ཏེ། དེ་སའི་ཚོགས་ལ་ས་གང་གི་སྐྱོན་ཟད་པ་དང་ཡོན་ཏན་རྫོགས་པའི་སྒོ་ནས་ཡོངས་སུ་སྦྱོང་བར་འགྱུར་བའི་ཆོས་གང་དག་ཡིན་པ་དེ་དག་བསྟན་པའི་ཕྱིར་དུ་ཡིན་པའི་ཕྱིར། གཉིས་པ་
ལ་རྒྱུའི་ས་དགུ་བཤད་པ་དང་། འབྲས་བུའི་ས་བཅུ་པ་བཤད་པའོ། །དང་པོ་ལ་དགུ་ཡོད་པའི་ནང་ནས། ས་དང་པོ་རབ་ཏུ་དགའ་བ་ལ། རྩ་བ་དང་། འགྲེལ་པ་གཉིས་ལས། དང་པོ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། ས་དང་པོ་རབ་ཏུ་དགའ་བ་ཆོས་ཅན། ཁྱོད་ཐོབ་པར་འགྱུར་བའི་ཐབས་ཡོད་དེ། ཡོངས་སུ་སྦྱོང་བ་རྣམ་པ་བཅུའི་སྒོ་ནས་སྦྱངས་པས་ཡོན་ཏན་གོང་འཕེལ་དུ་འགྱུར་བའི་ཕྱིར། ཤེས་བྱ་ཆོས་ཅན། ས་དང་པོའི་ཡོངས་སྦྱོང་ལ་བཅུར་ཡོད་དེ། དྲང་པོའི་བསམ་པས་དམ་ཆོས་འཛིན་པར་སྤྲོ་བའི་ས་དང་པོའི་ཡོངས་སྦྱོང་དང་། རང་གཞན་གྱི་དོན་སྒྲུབ་པ་ལ་ཕན་པའི་དངོས་པོ་ཉིད་དེ་རང་བཞིན་ཅན་གྱི་དེ་དང་། སེམས་ཅན་རྣམས་ལ་ཚད་མེད་བཞིའི་སྒོ་ནས་སེམས་མཉམ་པ་ཉིད་ཀྱི་དེ་དང་། དགེ་རྩ་ཐམས་ཅད་གཏོང་བ་ལ་སེར་སྣ་མེད་པའི་དེ་དང་། དགེ་བའི་བཤེས་གཉེན་སྟེན་པར་བྱེད་པའི་དེ་དང་། དམ་ཆོས་དེ་ཤིན་ཏུ་རྒྱས་པའི་སྡེ་སྣོད་འཚོལ་བ་ལ་དམིགས་པའི་དེ་དང་རྟག་ཏུ་ངེས་པར་འབྱུང་བའི་སེམས་དང་བཅས་པ་ཉིད་ཀྱི་དེ་དང་། གཞན་དོན་དུ་སངས་རྒྱས་ཀྱི་སྐུ་ཐོབ་པར་འདོད་པ་ལ་དགའ་བའི་དེ་དང་། ཆོས་སྟོན་པ་ལ་དཔེ་མཁྱུད་མེད་པའི་དགུ་དང་། ཚིག་བདེན་པར་སྨྲ་བའི་ས་དང་པོ་བའི་རྒྱུད་ཀྱི་ཡོངས་སྦྱོང་ནི་བཅུ་པ་ཡིན་པར་འདོད་པའི་ཕྱིར། ཡོངས་སྦྱོང་བཅུ་པོ་འདི་དག་ཆོས་ཅན། ཁྱོད་ཀྱིས་སྦྱོང་བར་བྱེད་ཚུལ་ཡོད་དེ། ཐབས་སྙིང་རྗེ་ཆེན་པོ་དང་འཁོར་གསུམ་བདེན་གྲུབ་ཀྱི་རང་བཞིན་མི་དམིགས་པར་རྟོགས་པའི་ཤེས་རབ་ཀྱིས་ཟིན་པའི་སྒོ་ནས་ཡོངས་སུ་སྦྱོང་བར་ཤེས་པར་བྱ་བ་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་གཉིས་ལས། དང་པོ་ལ། ཁ་ཅིག །ས་དང་པོའི་སྐྱོན་ཟད་ཅིང་ཡོན་ཏན་རྫོགས་པར་བྱེད་པའི་ས་དང་པོའི་མཁྱེན་པ་དེ། ས་དང་པོའི་ཡོངས་སྦྱོང་གི་མཚན་ཉིད་ཟེར་ན། ས་
དང་པོའི་ཡེ་ཤེས་སྐད་ཅིག་ཐ་མ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མ་ཡིན་པར་ཐལ། དེའི་སྐྱོན་ཟད་ཅིང་ཡོན་ཏན་རྫོགས་པའི་མཁྱེན་པ་ཡིན་པའི་ཕྱིར། ཁ་ཅིག །ས་དང་པོའི་ཡོངས་སྦྱོང་ཡིན་ན། ས་དང་པོའི་ཡོན་ཏན་རྫོགས་པས་ཁྱབ། དེའི་ཡོངས་སྦྱོང་རྫོགས་པ་དང་། ས་གཉིས་པར་འཕོས་པ་དུས་མཉམ་ཟེར་ན། ས་དང་པོའི་ཡོན་ཏན་རང་རྒྱུད་ལ་རྫོགས་པར་སྐྱེས་པའི་བྱང་སེམས་ས་དང་པོ་བ་ཆོས་ཅན། ས་གཉིས་པའི་ཡེ་ཤེས་སྐད་ཅིག་དང་པོ་རང་རྒྱུད་ལ་སྐྱེས་པའི་གང་ཟག་ཡིན་པར་ཐལ། ས་དང་པོའི་ཡོངས་སྦྱོང་རྫོགས་པའི་གང་ཟག་གང་ཞིག །དེ་གཉིས་དུས་མཉམ་པའི་ཕྱིར། རྟགས་ཕྱི་མ་ཁས། དང་པོ་དེར་ཐལ། ཆོས་ཅན་དེ་ཡིན་པའི་ཕྱིར། ཁ་ཅིག །བྱང་སེམས་མཐོང་ལམ་པའི་རྒྱུད་ཀྱི་འགོག་བདེན་ས་དང་པོའི་ཡོངས་སྦྱོང་ཡིན་ཟེར་ན། དེ་ཆོས་ཅན། དངོས་པོ་ཡིན་པར་ཐལ། ས་དང་པོའི་ཡོངས་སྦྱོང་ཡིན་པའི་ཕྱིར། བྱས་པ་ལ། ཁོ་ན་རེ། དེ་ཆོས་ཅན། ས་དང་པོའི་ཡོངས་སྦྱོང་ཡིན་པར་ཐལ། དེའི་ཡོན་ཏན་ཡིན་པའི་ཕྱིར་ཏེ། དེའི་ཡོན་ཏན་ཡོད་པའི་ཕྱིར་ན་མ་ཁྱབ། འོ་ན། དེ་ཆོས་ཅན། ས་དང་པོའི་མཁྱེན་པའི་ཡོན་ཏན་ཡིན་པར་ཐལ། དེའི་ཡོན་ཏན་ཡིན་པ་གང་ཞིག །ས་དང་པོ་དང་ས་དང་པོའི་མཁྱེན་པ་གཉིས་དོན་གཅིག་པའི་ཕྱིར། གཉིས་པ་རང་ལུགས་ནི། ས་དང་པོའི་སྐྱོན་དང་བྲལ་ཞིང་། ས་དང་པོའི་ཡོན་ཏན་རྫོགས་པའི་ས་དང་པོའི་ཡོན་ཏན་དེ་ས་དང་པོའི་ཡོངས་སྦྱོང་གི་མཚན་ཉིད། གཉིས་པ་འགྲེལ་པ་ནི། ས་དང་པོའི་ཡོངས་སྦྱོང་འཆད་ཚུལ་ཡོད་དེ། རྩ་བའི་རིམ་པ་ཇི་ལྟ་བ་བཞིན་དུ་འཆད་པའི་ཕྱིར། སེམས་ཅན་དང་དགེ་བའི་རྩ་བ་སོགས་གཞི་ཐམས་ཅད་ལ་གྱ་གྱུར་མེད་པའི་བསམ་པས་དམ་ཆོས་འཛིན་པར་སྤྲོ་བའི་ས་དང་པོའི་རྒྱུད་ཀྱི་ཡོན་ཏན་ཆོས་ཅན། དེའི་ཡོངས་སྦྱོང་ཡིན་ཏེ། དེའི་མི་མཐུན་ཕྱོགས་འཇོམས་ཤིང་ཡོན་ཏན་རྫོགས་པར་བྱེད་པའི་དེའི་ཡོན་ཏན་ཡིན་པའི་ཕྱིར། རྟགས་
བསལ་གཉིས་ཀ་ཀུན་ལ་འགྲེ། གཞན་དོན་ཆེས་ཆེར་བྱས་ཏེ་རང་དང་གཞན་གྱི་དགོས་པ་ལ་ཕན་པ་ཐེག་ཆེན་གྱི་ཆོས་འཛིན་པ་ཉིད་ཀྱི་ས་དང་པོ་བའི་རྒྱུད་ཀྱི་ཡོན་ཏན་ཆོས་ཅན། སེམས་ཅན་ཐམས་ཅད་ལ་ཚད་མེད་བཞིའི་སེམས་རྩེ་གཅིག་པ་ཉིད་ཀྱིས་བསམ་པ་ཁྱད་འཕགས་ཀྱི་ས་དང་པོ་བའི་རྒྱུད་ཀྱི་ཡོན་ཏན་ཆོས་ཅན། ལུས་ལོངས་སྤྱོད་དགེ་རྩ་སོགས་བདོག་པ་ཐམས་ཅད་ཡོངས་སུ་གཏོང་བ་ལ་སེར་སྣ་མེད་པའི་ས་དང་པོ་པའི་རྒྱུད་ཀྱི་ཡོན་ཏན་ཆོས་ཅན། ཐེག་ཆེན་གྱི་དགེ་བའི་བཤེས་གཉེན་ལ་གུས་པར་བྱེད་པའི་དེ་ཆོས་ཅན། ཐེག་པ་གསུམ་དུ་གཏོགས་པའི་དམ་པའི་ཆོས་ཀྱི་དམིགས་པ་འདོད་པ་ཤིན་ཏུ་རྒྱས་པའི་སྡེ་སྣོད་ལ་དམིགས་པའི་དེ་ཆོས་ཅན། ཁྱིམ་ན་གནས་པ་ལ་མངོན་པར་མི་དགའ་བའི་དེ་ཆོས་ཅན། སངས་རྒྱས་རྗེས་དྲན་གྱི་བླ་ན་མེད་པའི་སངས་རྒྱས་ཀྱི་སྐུ་ཐོབ་པར་འདོད་པའི་དེ་ཆོས་ཅན། དཔེ་མཁྱུད་མེད་པར་དམ་པའི་ཆོས་རབ་ཏུ་སྟོན་པའི་དེ་ཆོས་ཅན། དམ་བཅའ་མཐར་ཕྱིན་བྱེད་པས་བདེན་པར་སྨྲ་བ་ཉིད་ཅེས་བྱ་བའི་དེ་ཆོས་ཅན། ཤེས་བྱ་ཆོས་ཅན། དེ་ལྟ་བུའི་མཚན་ཉིད་དང་ལྡན་པའི་ཡོངས་སྦྱོང་བཅུས་ས་དང་པོ་རབ་ཏུ་དགའ་བ་འཐོབ་པ་ཡིན་ཏེ། དེས་ས་དང་པོའི་ཡོན་ཏན་རྣམ་པ་ཐམས་ཅད་དུ་བསྐྱེད་ཅིང་ཐོབ་པར་བྱ་བ་ཡིན་པའི་ཕྱིར། དེར་ཐལ། ཡོངས་སུ་སྦྱོང་བའི་རྒྱུའི་ཁྱད་པར་བཅུ་པོ་བདེན་གྲུབ་ཀྱི་ངོ་བོ་ཉིད་མི་དམིགས་པས་ཁྱད་པར་དུ་བྱས་པའི་མཚན་ཉིད་ཀྱི་ཡོངས་སྦྱོང་དག་ཁོ་ནས་འཐོབ་པའི་ཕྱིར། སྨྲས་པ། གཡོ་མེད་དྲང་པོའི་ནོར་འཛིན་གཞི་ལ་ཐེག་ཆེན་ཆོས་ཀྱི་བང་རིམ་ཅན། །ཚད་མེད་ཤེལ་གྱི་བ་གམ་མངོན་མཐོ་སྦྱིན་པའི་སྒོ་འཕར་བརྒྱ་ཕྲག་ཕྱེ། །བཤེས་གཉེན་ལྷ་དབང་གཙུག་ན་རབ་འགྱིང་སྡེ་སྣོད་ཉེ་དབང་ཚོགས་ཀྱིས་བསྐོར། །ངེས་པར་འབྱུང་བའི་དགའ་སྟོན་རྨད་བྱུང་ཀུན་མཁྱེན་རྣམ་པར་རྒྱལ་ལ་བརྩོན། །དམ་ཆོས་དབྱངས་
ཀྱི་རྫ་རྔ་རབ་སྒྲོགས་བདེན་པར་སྨྲ་བའི་གླུ་དབྱངས་ལེན། གཏན་གྱི་བདེ་བའི་བདུད་རྩི་ལ་སྤྱོད་སྔ་ན་མེད་པའི་སྐབས་གསུམ་པ། །ཨེ་མ་རབ་ཏུ་དགའ་བའི་སའི། །ཡོན་ཏན་འདི་ཡང་ཆེས་དཀའ་ན། །ངལ་བ་མེད་པར་སངས་རྒྱས་སུ། །བགྲོད་པ་མཁས་པའི་བཞད་གད་གནས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །ས་གཉིས་པའི་ཡོངས་སྦྱོང་ལ། རྩ་བ་དང་། འགྲེལ་པ་གཉིས་ལས། དང་པོ་ནི། ཤེས་བྱ་ཆོས་ཅན། ས་གཉིས་པའི་ཡོངས་སྦྱོང་ལ་བརྒྱད་ཡོད་དེ། །ཚུལ་ཁྲིམས་ཀྱི་ཕར་ཕྱིན་ལྷག་པར་ཐོབ་པའི་གཉིས་པའི་ཡོངས་སྦྱོང་དང་། བྱས་པ་དྲན་པའི་བྱས་པ་གཟོ་བའི་དེ་དང་། གནོད་པ་ལ་བཟོད་པའི་དེ་དང་། དགེ་ཆོས་སྒྲུབ་པ་ལ་རབ་ཏུ་དགའ་བའི་དེ་དང་། འགྲོ་བ་ལ་སྙིང་བརྩེ་བ་ཆེན་པོའི་དེ་དང་། མཁན་པོ་སོགས་ལ་བཀུར་སྟི་བྱེད་པའི་དེ་དང་། བླ་མ་ལ་གུས་པས་ཆོས་ཉན་པའི་དེ་དང་། སྦྱིན་པ་ལ་སོགས་ཕྱིན་དྲུག་ཉམས་ལེན་བརྩོན་པས་ཁྱད་པར་དུ་བྱས་པའི་གཉིས་པའི་ཡོངས་སྦྱོང་དང་བརྒྱད་དུ་ཡོད་པའི་ཕྱིར། གཉིས་པ་ནི། ཤེས་བྱ་ཆོས་ཅན། གཉིས་པའི་ཡོངས་སྦྱོང་རྒྱས་པར་འཆད་ཚུལ་ཡོད་དེ། གཉིས་པར་ཚུལ་ཁྲིམས་ཀྱི་ཕར་ཕྱིན་གྱི་ཉམས་ལེན་ལྷག་པར་ཐོབ་པས་ཁྱད་པར་དུ་བྱས་པའི་དགེ་བའི་ཆོས་སྡུད་དང་། སེམས་ཅན་གྱི་དོན་བྱ་བ་དང་། ཉེས་སྤྱོད་སྡོམ་པའི་ཚུལ་ཁྲིམས་གསུམ་དང་ལྡན་པའི་གཉིས་པའི་ཡོངས་སྦྱོང་དང་། དེ་དག་བྱེད་ཀྱི་ཡན་ལག་གཞན་གྱིས་ཕན་པ་བྱས་པ་དྲན་པ་ཆུད་མི་ཟ་བའི་དེ་དང་། གཞན་གྱིས་གནོད་པ་བྱས་པ་ལ་སོགས་པ་བཟོད་པ་སྡུག་བསྔལ་དང་ལེན་དང་། ཆོས་ལ་ངེས་རྟོག་གི་བཟོད་པ་དང་ལྡན་པའི་དེ་དང་། དགེ་བའི་ཆོས་སྒྲུབ་པ་ལ་འགྱོད་པ་མེད་པར་སྤྲོ་ལྡན་གྱི་དེ་དང་། སྐྱེ་བོ་ཐམས་ཅད་མི་འདོར་བའི་བྱམས་པའི་དེ་དང་། མཁན་པོ་ལ་སོགས་པ་ལ་གུས་པས་འདུད་པའི་དེ་དང་། དགེ་བའི་བཤེས་གཉེན་གྱིས་བསྟན་པའི་ཆོས་ལྟར་སྒྲུབ་པའི་དེ་དང་། དེ་ཡང་སྒྲུབ་པ་དམ་པ་སྦྱིན་པ་ལ་སོགས་པའི་
ཕ་རོལ་ཏུ་ཕྱིན་པ་དྲུག་གི་ཉམས་ལེན་ལ་སྤྲོ་བ་ཞེས་བྱ་བ་དེ་ལྟ་བུའི་ས་གཉིས་པའི་ཡོངས་སུ་སྦྱོང་བ་སྔ་མ་ས་དང་པོ་ལ་བཤད་པ་བཞིན་ཐབས་ཤེས་ཀྱིས་ཟིན་པའི་སྒོ་ནས་ཡོངས་སུ་སྦྱོང་བ་བྱས་པའི་ཁྱད་པར་རྣམ་པ་བརྒྱད་ཀྱིས་ས་གཉིས་པ་དྲི་མ་མེད་པ་འཐོབ་པ་ཡིན་པའི་ཕྱིར། སྨྲས་པ། རྣམ་གསུམ་ཚུལ་ཁྲིམས་གསེར་གྱི་འཁོར་ལོ་ཡིས། །དྲིན་གཟོའི་དབྱིག་འཛིན་ལྟོ་བར་ཐོགས་མེད་དུ། །རྒྱུ་ཚེ་བཟོད་པའི་ཡ་ལད་བཙན་པོ་ཅན། །འགྱོད་པའི་ཕས་རྒོལ་དཔུང་ཚོགས་ངང་གིས་འཇོམས། བྱམས་པའི་འཛུམ་ལྡན་ལེགས་བྱས་མཁན་པོར་བཀུར། །དམ་ཆོས་རྫོགས་ལྡན་ཁྲིམས་ཀྱིས་ལྕི་བའི་དཔལ། །ཕྱིན་དྲུག་གླིང་བཞིར་འཁོར་ལོས་བསྒྱུར་བ་ཡི། །དྲི་མེད་གཉིས་པའི་ཡོན་ཏན་འདི་ན་ཤིས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །ས་གསུམ་པ་ལ། རྩ་བ་དང་། འགྲེལ་པ་གཉིས་ལས། དང་པོ་ནི། ཤེས་བྱ་ཆོས་ཅན། ས་གསུམ་པའི་ཡོངས་སྦྱོང་དེ་ལ་རྣམ་པ་ལྔ་ཡོད་དེ། མང་དུ་ཐོས་པས་མི་ངོམས་པ་ཉིད་ཀྱིས་གསུམ་པའི་ཡོངས་སྦྱོང་དང་། ཉོན་མོངས་པའི་ཟང་ཟིང་མེད་པར་ཆོས་ཀྱི་སྦྱིན་པའི་དེ་དང་། རང་གང་དུ་འཚང་རྒྱ་བའི་སངས་རྒྱས་ཀྱི་ཞིང་ཀུན་ཡོངས་སུ་སྦྱོང་བའི་དེ་དང་། འཁོར་བའི་འགྲོ་བས་ཕན་ལན་དུ་གནོད་པ་བྱེད་པ་ལ་ཡོངས་སུ་མི་སྐྱོ་བའི་དེ་དང་། སྡིག་པ་ལ་རང་གཞན་རྒྱུ་མཚན་དུ་བྱས་པའི་ངོ་ཚ་ཁྲེལ་ཡོད་ཅེས་བྱ་བའི་ཡོངས་སྦྱོང་སྟེ་དེ་ཀུན་བདེན་པར་རློམ་པ་མེད་པར་བདག་མེད་མངོན་སུམ་དུ་རྟོགས་པའི་ཤེས་རབ་ཉིད་ཀྱིས་ཟིན་པའི་སྒོ་ནས་སྦྱོང་བའི་དེ་རྣམས་སུ་ཡོད་པའི་ཕྱིར། གཉིས་པ་ནི། ཤེས་བྱ་ཆོས་ཅན། ས་གཉིས་པ་བས་ཡོངས་སུ་སྦྱོང་བ་ལྔ་བྱས་པས་ས་གསུམ་པ་འོད་བྱེད་པ་རྟོགས་པ་སྟེ་འཐོབ་པ་ཡིན་ཏེ། ཐོས་པ་ལ་བརྩོན་པས་དམ་པའི་ཆོས་ཉན་པས་ངོམས་མི་ཤེས་པའི་གསུམ་པའི་ཡོངས་སྦྱོང་དང་། དེས་རྙེད་པ་
དང་ལ་སོགས་པ་གྲགས་པ་ལ་མི་ལྟ་བའི་སེམས་ཀྱིས་དམ་པའི་ཆོས་རབ་ཏུ་སྟོན་པའི་དེ་དང་། རང་གང་དུ་འཚང་རྒྱ་བའི་རྟེན་གདུལ་བྱ་དང་བརྟེན་པའི་ཞིང་སྦྱོང་བའི་རྒྱུར་ཚོགས་རྒྱ་ཆེན་པོ་སྒྲུབ་པ་རང་གི་སངས་རྒྱས་ཀྱི་ཞིང་ཀུན་ཡོངས་སུ་སྦྱོང་བའི་དེ་དང་། ས་གསུམ་པར་བཟོད་པ་ལྷག་པར་ཐོབ་པས་ཕན་བཏགས་པའི་སེམས་ཅན་གྱིས་རང་ལ་མི་མཐུན་པ་བྱས་པ་ལ་སོགས་པ་མཐོང་བས་ཡོངས་སུ་མི་སྐྱོ་བའི་དེ་དང་། རང་ལ་ལྟོས་ནས་ཉེས་སྤྱོད་ལ་འཛེམ་པ་ངོ་ཚ་ཤེས་པ་དང་། གཞན་ལ་ལྟོས་ནས་དེ་ལ་འཛེམ་པ་ཁྲེལ་ཡོད་རྫོགས་པས་མི་དགེ་བའི་ཆོས་མི་བྱེད་པ་ཞེས་བྱ་བ་དེ་ལྟ་བུའི་ཡོངས་སུ་སྦྱོང་བ་རྣམ་པ་ལྔ་པོ་སྔ་མ་ས་དང་པོ་གཉིས་ལས་བཤད་པ་བཞིན་དུ་སྙིང་རྗེ་དང་བདེན་གྲུབ་ཀྱི་ངོ་བོ་ཉིད་དུ་མི་རྟོག་པས་ཟིན་པའི་སྒོ་ནས་ཡོངས་སུ་སྦྱངས་པས་ཐོབ་པ་ཡིན་པའི་ཕྱིར། སྨྲས་པ། ཆོས་ཚུལ་གངྒཱ་འཐུང་བའི་ཛཧྣུ། །དམ་ཆོས་ཆུ་ཀླུང་སྐྱུག་ལ་འཇུངས་པ་མེད། །ཚོགས་གཉིས་སྒྲུབ་པའི་ཏིང་འཛིན་ཡོངས་བརྟན་པས། །ཅ་ཅོའི་ལོག་པར་སྒྲུབ་ལ་ཇི་མི་སྙམ། །ངོ་ཚ་ཁྲེལ་ཡོད་ཀ་ཤིའི་གོས་ཀླུབས་ཤིང་། །ཐབས་ཤེས་དར་གྱིས་བཅིངས་པའི་ཐོར་ཚུགས་ཅན། །ཚངས་སྤྱོད་འོད་ཀྱིས་སྣང་བ་ཡོངས་བྱེད་པའི། །ཚུལ་འདི་བློ་ལྡན་རྣམས་ཀྱི་སྤྱོད་ཡུལ་ཡིན། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །ས་བཞི་པ་ལ། རྩ་བ་དང་། འགྲེལ་པ་གཉིས་ལས། དང་པོ་ནི། བཞི་པའི་ཡོངས་སྦྱོང་ལ་བཅུ་ཡོད་དེ། ཉན་རང་ཡིད་བྱེད་ཀྱི་བསམ་པས་དབེན་པའི་ནགས་ན་གནས་པའི་ས་བཞི་པའི་ཡོངས་སྦྱོང་དང་། ཟས་གོས་སོགས་དོན་གཉེར་མེད་པས་འདོད་པ་ཆུང་བའི་དེ་དང་། བཟང་པོ་ལ་སྲེད་པ་མེད་པས་ཆོག་ཤེས་པའི་དེ་དང་། སྦྱངས་པའི་ཡོན་ཏན་བཅུ་གཉིས་ཀྱི་སྡོམ་པ་ལ་ཡང་དག་པར་བརྟེན་པའི་དེ་དང་། ཁས་བླངས་པའི་བསླབ་པ་ཡོངས་སུ་མི་གཏོང་བའི་དེ་དང་། འདོད་ཡོན་རྣམས་ལ་ཆགས་ཅན་ལ་སྨོད་པ་སྟེ་སྤོང་བའི་
དེ་དང་། གཞན་མྱ་ངན་ལས་འདས་པ་ལ་འགོད་པའི་དེ་དང་། བདོག་པ་ཀུན་གཏོང་བ་ལ་སེར་སྣ་མེད་པའི་དེ་དང་། རྒྱས་སྲས་ཀྱི་སྤྱོད་པ་ལ་མི་ཞུམ་པའི་སྤྲོ་བའི་དེ་དང་། དེ་ཀུན་བདེན་གྲུབ་ཏུ་ལྟ་བ་མེད་པའི་བདག་མེད་མངོན་སུམ་དུ་རྟོགས་པའི་ཤེས་རབ་ཀྱིས་ཟིན་པའི་སྒོ་ནས་ཡོངས་སུ་སྦྱོང་བའི་དེ་རྣམས་སུ་ཡོད་པའི་ཕྱིར། གཉིས་པ་ནི། ཤེས་བྱ་ཆོས་ཅན། ས་བཞི་པ་བ་དེས་ཡོངས་སྦྱོང་རྣམ་པ་བཅུ་ཉམས་སུ་བླངས་པས་ས་བཞི་པ་འོད་འཕྲོ་བ་ཅན་རྣམ་པར་གནོན་པ་ཡིན་ཏེ། དེས་གྲོང་ལས་རྒྱང་གྲགས་གཅིག་གིས་འཕགས་པའི་དགོན་པར་གནས་པའི་ས་བཞི་པའི་ཡོངས་སྦྱོང་དང་། རྙེད་པ་མ་ཐོབ་པ་ལ་མངོན་པར་འདོད་པ་མེད་པ་འདོད་ཆུང་གི་དེ་དང་། རྙེད་པ་ཐོབ་པ་ལ་ལྷག་པར་དེ་ལས་བཟང་མང་དོན་དུ་གཉེར་བ་མེད་པ་ཆོག་ཤེས་ཀྱི་དེ་དང་། བསོད་སྙོམས་པ་ཉིད་ལ་སོགས་པ་སྦྱངས་པའི་ཡོན་ཏན་བཅུ་གཉིས་ལ་ཡང་དག་པར་སྡོམ་པའི་དེ་དང་། ཉེས་ལྟུང་གིས་མ་གོས་པས་བསླབ་པ་བླངས་པ་སྲོག་ལ་སོགས་པའི་ཕྱིར་དུ་ཡང་ཡོངས་སུ་མི་གཏོང་བའི་དེ་དང་། འདོད་ཡོན་ལ་སྲེད་པ་ཆེད་དུ་སྤོང་བས་འདོད་པའི་ཡོན་ཏན་ལ་ཉེས་དམིགས་སུ་ལྟ་བས་ཞེན་ཆགས་ལ་སྨོད་པའི་དེ་དང་། གདུལ་བྱ་དང་འཚམ་པར་ཐར་པ་ལ་འགོད་པས། མྱ་ངན་ལས་འདས་པ་ལ་གཞོལ་བར་བྱེད་པའི་དེ་དང་། བདོག་པ་ཐམས་ཅད་ཡོངས་སུ་གཏོང་བའི་དེ་དང་། བཞི་པར་བརྩོན་འགྲུས་ཀྱི་ཕར་ཕྱིན་ལྷག་པར་ཐོབ་པས་རང་ལ་དགེ་བ་ཀུན་སྒྲུབ་པའི་ནུས་ལྡན་དུ་ཤེས་ནས་དགེ་བ་སྒྲུབ་པ་ལ་སེམས་མི་ཞུམ་པར་སྤྲོ་བའི་དེ་དང་། ཅི་ལ་ཡང་ལྟོས་པ་མེད་པར་དངོས་པོ་ཐམས་ཅད་མངོན་པར་ཞེན་པས་མི་ལྟ་བ་ཞེས་བྱ་བ་དེ་ལྟ་བུའི་བཞི་པའི་ཡོངས་སུ་སྦྱོང་བ་སྔ་མ་ས་དང་པོ་གསུམ་ལ་བཤད་པ་ལྟ་བུ་ཐབས་ཤེས་ཀྱིས་ཟིན་པའི་ཡོངས་སྦྱོང་བཅུས་མཐར་ཕྱིན་
པའི་ཕྱིར། སྨྲས་པ། འདུ་འཛིའི་རྡུལ་གྱི་རྒྱལ་མཚན་དང་བྲལ་འདོད་ཆུང་ཆོག་ཤེས་ལྷ་ལམ་ངོས། །སྦྱངས་པའི་ཡོན་ཏན་ཟླ་བའི་མ་མ་བསླབ་ལ་ནན་ཏན་འོད་དཀར་ཅན། །འདོད་ཡོན་སྲེད་པའི་པད་དཀར་རབ་ཟུམ་མྱ་ངན་འདས་པའི་ཆ་ཤས་རྫོགས། །སྦྱིན་པའི་བསིལ་ཟེར་ཀུན་ནས་རབ་འཛག་ཞུམ་པ་མེད་པས་ས་མོས་རྒྱལ། །མ་ལུས་བདེན་གྲུབ་དོན་གྱིས་སྟོངས་པའི་བདེན་མེད་རི་བོང་སྣང་བརྙན་ཅན། །སྣང་ཚུལ་འདི་ཀུན་སྨྲ་བའི་ལྕེ་འདི་ལེགས་བྱས་བརྒྱ་ཕྲག་ཟོང་གིས་བསྒྲུབས། །བྱང་ཆུབ་ཕྱོགས་མཐུན་ཤེས་རབ་འོད་སྟོང་གིས། །ངོ་སྐལ་སྒྲིབ་པའི་མུན་པ་ཀུན་སེལ་བའི། །བཞི་པའི་ས་ཡི་ཡོན་ཏན་གྲགས་འབར་ཡང་། །བློ་གྲོས་སྣང་བ་མེད་ལ་ཅི་བྱར་ཡོད། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །ས་ལྔ་པ་ལ། རྩ་བ་དང་། འགྲེལ་པ་གཉིས་ལས། དང་པོ་ནི། ས་ལྔ་པའི་ཡོངས་སྦྱོང་ལ་བཅུ་ཡོད་དེ། རྙེད་བཀུར་གྱི་ཆེད་དུ་ཁྱིམ་པ་དང་རབ་བྱུང་སོགས་ལ་འགྲོགས་འདྲིས་བྱེད་པ་སྤོང་བའི་ས་ལྔ་པའི་ཡོངས་སྦྱོང་དང་། ཁྱིམ་ལ་འཁྲེན་པས་དད་ཅན་གྱི་ཁྱིམ་རབ་བྱུང་གཞན་ལ་མི་སྟོན་པ་སྤོང་བའི་དེ་དང་། འདུ་འཛིར་གྱུར་བའི་གནས་དང་། ཉར་རང་ཡིད་བྱེད་ཀྱི་བསམ་པ་སྤོང་བའི་དེ་དང་། རྙེད་བཀུར་གྱི་ཆེད་དུ་བདག་ལ་བསྟོད་ཅིང་གཞན་ལ་བརྙས་པ་སྤོང་བའི་དེ་དང་། མི་དགེ་བའི་ལས་ཀྱི་ལམ་བཅུ་སྤོང་བའི་དེ་དང་། ཐོས་སོགས་ཀྱིས་ང་རྒྱལ་ཏེ་རློམ་པས་ཁེངས་པ་སྤོང་བའི་དེ་དང་། དགེ་སྡིག་ལ་བླང་དོར་ཕྱིན་ཅི་ལོག་སྤོང་བར་བྱེད་པའི་དེ་དང་། བློ་ངན་ཏེ་འཇིག་ལྟ་སོགས་ལྔ་སྤོང་བའི་དེ་དང་། ཉོན་མོངས་ལ་བཟོད་པ་སྟེ་ཆགས་སྡང་དང་དུ་ལེན་པ་སྤོང་པའི་དེ་རྣམས་སུ་ཡོད་པའི་ཕྱིར། ཤེས་བྱ་ཆོས་ཅན། འདྲིས་པ་སོགས་བཅུ་པོ་འདི་ནི་སྦྱོང་བྱེད་བཅུ་པོས་སྦྱངས་ནས་རྣམ་པར་སྤངས་ན་ས་ལྔ་པ་ནི་ཡང་དག་འཐོབ་པར་འགྱུར་ཏེ། དེ་ལྟར་སྦྱངས་པས་དེའི་ཡོན་ཏན་རྫོགས་པའི་ཕྱིར། གཉིས་པ་ནི། ཤེས་བྱ་ཆོས་ཅན། ས་ལྔ་པ་བས་ཡོངས་སུ་སྦྱོང་
བ་རྣམ་པ་བཅུས་སྔ་མ་བཞི་བཞིན་དུ་སྦྱངས་པས་ས་ལྔ་པ་སྦྱང་དཀའ་བ་འཐོབ་པ་ཡིན་ཏེ། ལྔ་པ་བས་རྙེད་བཀུར་ལ་སྲེད་པས་རྙེད་པ་ལ་སོགས་པའི་དོན་དུ་རབ་ཏུ་བྱུང་བ་དང་། ལ་སོགས་པ་ཁྱིམ་པ་དང་འགྲོགས་པ་དང་། དད་པ་དང་འབྱོར་བ་ཅན་གྱི་ཁྱིམ་གཞན་ལ་ཉེ་བར་སྟོན་པ་དང་། འདུ་འཛི་འདོད་པས་སྐྱེ་བོ་མང་པོའི་གྲོང་དང་ལ་སོགས་པ་གྲོང་ཁྱེར་དུ་གནས་པ་དང་། རྙེད་བཀུར་གྱི་ཆེད་དུ་བདག་གི་ཡོན་ཏན་ལ་བསྔགས་པ་དང་། གཞན་ལ་སྨོད་པ་དང་། དེ་ལ་བརྟེན་ནས་མི་དགེ་བའི་ལས་ཀྱི་ལམ་བཅུ་འཕེལ་བ་དང་། རང་གི་ཡོན་ཏན་ཅུང་ཟད་ལ་ཁེངས་ཤིང་གཞན་ཁྱད་དུ་གསོད་པ་ཐོས་པ་ལ་སོགས་པ་བསམ་སྒོམ་ལ་རློམ་ཞིང་གཞན་ལ་མི་འདུད་པ་དང་། བླང་དོར་ཕྱིན་ཅི་ལོག་དགེ་བ་དོར་བྱ་དང་། མི་དགེ་བ་ལ་བླང་བྱར་བཟློག་སྟེ་མངོན་པར་ཞེན་པ་དང་། ལོག་པར་ལྟ་བ་ལ་སོགས་པ་འཇིག་ལྟ་ལ་ཞེན་པའི་བློ་གྲོས་ངན་པ་དང་། འདོད་ཆགས་ལ་སོགས་པ་ཉོན་མོངས་ཐམས་ཅད་ལ་ཡིད་ཕྱོགས་པར་བྱེད་པ་ཞེས་བྱ་བ་དེ་ལྟ་བུའི་མཚན་ཉིད་ཅན་གྱི་ཆོས་བཅུ་རྣམ་པར་སྤོང་ཞིང་། སྤང་བྱ་དེ་དག་བཟློག་པའི་ཆོས་གཉེན་པོ་བཅུ་འགྲེལ་པས་དོན་གྱི་འཕངས་པ་ཐབས་ཤེས་ཀྱིས་ཟིན་པའི་སྒོ་ནས་ཡོངས་སུ་སྦྱངས་པས་འཐོབ་པའི་ཕྱིར། སྨྲས་པ། ལོངས་སྤྱོད་རྒྱ་དང་འདུ་ཛི་ཤ་ཝ་རིའི། །ལག་ཏུ་ཆུད་མིན་མུ་ཅོར་སྐད་ངན་སྤངས། །དགེ་བའི་ལས་ལམ་སྤུ་སྡུག་གསེར་མདོག་ཅན། །ང་རྒྱལ་མི་གཙང་མ་གོས་འཁོར་ལོའི་ལག །འཐད་ལྡན་བླང་དང་དོར་བྱའི་ནམ་མཁའ་ལ། །ཡང་དག་ལྟ་བའི་འདབ་གཤོག་གིས་བགྲོད་དེ། །ཉོན་མོངས་མི་གཙང་རྙོག་པ་དང་བྲལ་བའི། །རླབས་ཆེན་སྤྱོད་པའི་རྫིང་བུར་འཇུག་དེ་མཚར། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །ས་དྲུག་པ་ལ། རྩ་བ་དང་། འགྲེལ་པ་གཉིས་ལས། དང་པོ་ནི། ས་དྲུག་པ་ཆོས་ཅན། ཁྱོད་ཀྱིས་སྦྱིན་སོགས་དྲུག་དང་སྤང་བྱ་དྲུག་སྦྱར་
ནས་སྦྱོང་ཚུལ་ཡོད་དེ། ཁྱོད་ཀྱིས་ལུས་ལོངས་སྤྱོད་ཐམས་ཅད་སྦྱིན་པར་བྱེད་པའི་ཉམས་ལེན་ལྷག་པར་ཐོབ་པས་སློབ་མ་སྟེ། ཉན་ཐོས་ཀྱི་བྱང་ཆུབ་ལ་དགའ་བའི་སེམས་སྤངས་པ་དང་། རང་དོན་ཡིད་བྱེད་ཀྱི་སེམས་སྤོང་བའི་ཚུལ་ཁྲིམས་ལ་ཉམས་ལེན་ལྷག་པའི་བསེ་རུ་རང་རྒྱལ་གྱི་བྱང་ཆུབ་ལ་དགའ་བའི་སེམས་སྤངས་པ་དང་། སྟོང་ཉིད་ལ་མི་སྐྲག་པའི་བཟོད་པ་ལྷག་པས། དེའི་དོན་ལ་སྐྲག་པའི་སེམས་སྤངས་པ་དང་། སྦྱིན་པ་ལ་སྤྲོ་བའི་བརྩོན་འགྲུས་ལྷག་པས་སྤོང་བ་པོས་བསླངས་ན་སེམས་མི་ཞུམ་པ་དང་། སྦྱིན་པ་ལ་སེམས་རྩེ་གཅིག་པའི་བསམ་གཏན་ལྷག་པས་ཕྱི་ནང་གི་བདོག་པ་ཀུན་བཏང་ཡང་འགྱོད་ནས་མི་དགའ་བ་མེད་པ་དང་། སྦྱིན་པའི་ཕན་ཡོན་རྟོགས་པའི་ཤེས་རབ་ལྷག་པས་དེའི་མཐར་ཡང་རང་ཉིད་དབུལ་ཡང་། སློང་བའི་སྐྱེ་བོ་མི་སྤོང་བར་བསླབས་པས་ས་དྲུག་པ་ནི་ཡང་དག་པར་འཐོབ་པའི་ཕྱིར། གཉིས་པ་ནི། ཤེས་བྱ་ཆོས་ཅན། ས་དྲུག་པ་བས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ་སྟེ། དེའི་ཉམས་ལེན་ལྷག་པར་ཐོབ་པས་སྤང་བྱ་དྲུག་སྤོང་བ་ཡིན་ཏེ། དེ་ཚུལ་ཁྲིམས་དང་བསམ་གཏན་ལྷག་པས་ཉན་ཐོས་དང་རང་སངས་རྒྱས་ཀྱི་བྱང་ཆུབ་ཐོབ་པར་འདོད་པ་སྤངས་པ་དང་། བཟོད་པ་ལྷག་པས་ངོ་བོ་ཉིད་མི་དམིགས་པ་ལ་སྐྲག་པ་སྤོང་བ་དང་། སྦྱིན་པ་ལྷག་པས་སློང་བ་པོའི་སྐྱེ་བོས་བསླངས་པ་ན་སེམས་ཞུམ་པ་སྤོང་བ་དང་། བརྩོན་འགྲུས་ལྷག་པས། བདོག་པ་ཐམས་ཅད་རང་གིས་ངང་གིས་གཏོང་བར་ཞུགས་པ་ལ་མི་དགའ་བ་སྤོང་བ་དང་། ཤེས་རབ་ལྷག་པས་རང་ཉིད་བཀྲེན་ཡང་སློང་བ་པོའི་སྐྱེ་བོ་སྤོང་བའི་སེམས་སྤོང་སྟེ། གཉེན་པོ་རྫོགས་པ་དང་སྤང་བྱ་སྤངས་པ་དེ་ལྟ་བུའི་ཡོངས་སུ་སྦྱོང་བ་བཅུ་གཉིས་ཀྱིས་སྔ་མ་ས་དང་པོ་ལྔ་ལ་བཤད་པ་བཞིན་སྦྱངས་པས་ས་དྲུག་པ་མངོན་དུ་གྱུར་པ་ཀུན་ཤེས་པར་འགྱུར་བའི་ཕྱིར། སྨྲས་པ། མི་མཐུན་སྤང་བྱའི་ཟླ་བའི་མ་མ་གང་། །དང་པོའི་ཕར་ཕྱིན་ལྔ་ཡི་གྲུ་རྫིངས་དང་། །ཤེས་
རབ་མཐུན་པའི་རླུང་གིས་རབ་བསྐྱོད་དེ། །མངོན་གྱུར་ས་ཡི་རིན་ཆེན་གླིང་དུ་ཁྲིད། །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །ས་བདུན་པ་ལ། སྤང་བྱ་ཉི་ཤུ་སྤོང་བ་དང་། གཉེན་པོ་ཉི་ཤུ་བསྟེན་པར་བསྟན་པའོ། །དང་པོ་ལ། རྩ་བ་དང་། འགྲེལ་པ་གཉིས་ལས། དང་པོ་ནི། ཤེས་བྱ་ཆོས་ཅན། བདག་དང་སེམས་ཅན་འཛིན་པ་སོགས་ཉེས་པ་ཉི་ཤུ་གང་ལ་རྣམ་པར་ཆད་པའི་སེམས་དཔའ་དེ་ཡིས་བྱང་སེམས་ཀྱི་ས་ནི་བདུན་པ་འཐོབ་པ་ཡིན་ཏེ། བྱང་སེམས་དེའི་ཡོན་ཏན་གྱི་ཆོས་གཉེན་པོ་ཉི་ཤུ་རྫོགས་པའི་སྒོ་ནས་འཐོབ་པའི་ཕྱིར། གཉིས་པ་ནི། ས་བདུན་པ་བ་ཆོས་ཅན། བདག་ཏུ་འཛིན་པའི་ས་བོན་ཅི་རིགས་སྤངས་པ་ཡིན་ཏེ། རྣམ་པར་ཐར་པའི་སྒོ་སྟོང་པ་ཉིད་མངོན་སུམ་དུ་རྟོགས་པ་བསྐལ་བར་གོམས་པར་བྱས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། སྟོང་པ་ཉིད་ལ་རྩོད་པ་སྟེ་སྟོང་ཉིད་དངོས་པོ་འཇིག་བྱེད་དུ་འཛིན་པ་དང་། ཆོས་ཀུན་བདེན་གྲུབ་ཀྱིས་སྟོངས་པ་དང་། ཀུན་རྫོབ་ཏུ་ཡོད་པ་འགལ་བར་བརྗོད་པ་འཛིན་པ་མངོན་གྱུར་ཡོངས་སུ་སྤངས་པ་ཡིན་ཏེ། ཁྱོད་ཀྱིས་སྔར་བཤད་པའི་ཉེས་པ་དེ་ལྟ་བུ་ཉི་ཤུ་དང་བྲལ་ནས་བཟློག་པའི་ཆོས་གཉེན་པོ་ཉི་ཤུ་བདག་དང་སེམས་ཅན་འཛིན་པ་དང་། །ཞེས་སོགས་རྩ་འགྲེལ་གྱི་དོན་གྱིས་ཤུགས་ཀྱིས་འཕངས་པ་ཡོངས་སུ་སྦྱོང་བ་རྣམ་པ་ཉི་ཤུ་སྔ་མ་ས་དང་པོ་དྲུག་ལ་བཤད་པ་བཞིན་དུ་སྦྱངས་པས་ས་བདུན་པ་རིང་དུ་སོང་བ་ཀུན་ཤེས་པར་འགྱུར་བའི་ཕྱིར། གཉིས་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། བདག་དང་ཞེས་སོགས་རྩ་འགྲེལ་གྱིས་སྤང་བྱ་ཉི་ཤུ་བསྟན་པའི་གཉེན་པོ་ཉི་ཤུ་ཡོད་དེ། དེ་དག་གི་བདག་ཏུ་འཛིན་པ་སོགས་ཉི་ཤུ་སྤང་བྱར་བསྟན་པའི་དོན་གྱིས་ཏེ་ཤུགས་ཀྱིས་འཕངས་པའི་ཆོས་གཉེན་པོ་ཉི་ཤུ་པོ་དེ་ཉིད་རྣམ་
ཐར་སྒོ་གསུམ་ཞེས་སོགས་ཀྱིས་བསྟན་པའི་ཕྱིར། གཉིས་པ་ནི། ཤེས་བྱ་ཆོས་ཅན། རྣམ་ཐར་སྒོ་གསུམ་ཤེས་པ་དང་། ཞེས་སོགས་ཤླཽཀ་བཞིས་བསྟན་པའི་གཉེན་པོ་ཉི་ཤུ་ས་བདུན་པ་ཡོངས་སུ་སྦྱོང་སྟེ། དེས་དེའི་སྐྱོན་སེལ་ཞིང་ཡོན་ཏན་རྫོགས་པར་བྱེད་པའི་ཕྱིར། གསུམ་པ་ནི། ས་བདུན་པ་བ་ཆོས་ཅན། ཁྱོད་ཀྱིས་རིམ་བཞིན་དུ་གང་ཟག་གི་བདག་དང་། སེམས་ཅན་དང་སྲོག་ཏུ་བདེན་པར་འཛིན་པ་སྤོང་བར་བྱེད་དེ། ཁྱོད་ཆོས་རྣམས་ཀྱི་ངོ་བོ་བདེན་སྟོང་རྣམ་པར་ཐར་པའི་སྒོ་སྟོང་པ་ཉིད་དང་། རྒྱུ་བདེན་སྟོང་མཚན་མ་མེད་པ་དང་། འབྲས་བུ་བདེན་སྟོང་སྨོན་པ་མེད་པ་གསུམ་ཡང་དག་པར་ཤེས་པ་གོམས་པར་བྱས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཁྱོད་ཀྱིས་རང་དབང་བའི་གང་ཟག་གཅིག་ཏུ་འཛིན་པ་སྤོང་པ་ཡིན་ཏེ། དགེ་བ་བཅུའི་ལས་ཀྱི་ལམ་ལ། གསད་པར་བྱ་བ་དང་། གསོད་པ་པོ་དང་། བསད་པ་སོགས་འཁོར་གསུམ་བདེན་པར་མི་དམིགས་པར་མངོན་སུམ་གྱིས་རྟོགས་པ་བསྐལ་བར་བསྒོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཁྱོད་ཀྱིས་སེམས་ཅན་ཆད་པར་འཛིན་པ་སྤོང་བ་ཡིན་ཏེ། སྐྱེ་བ་དུ་མར་སྡུག་བསྔལ་གྱིས་གདུངས་པའི་སྐྱེ་བོ་ཐམས་ཅད་ལ་དམིགས་པའི་སྙིང་བརྩེ་བ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཁྱོད་སེམས་ཅན་རྟག་པར་འཛིན་པ་སྤོང་བ་ཡིན་ཏེ། ཁྱོད་སེམས་ཅན་བདེན་གྲུབ་ཀྱི་དངོས་པོར་དམིགས་པ་མེད་པར་མངོན་སུམ་དུ་རྟོགས་པ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཁྱོད་ཀྱིས་བླང་དོར་གྱི་མཚན་མ་བདེན་འཛིན་སྤོང་བ་ཡིན་ཏེ། ཁྱོད་འཁོར་འདས་ཀྱི་ཆོས་ཐམས་ཅད་བདེན་སྟོང་མཉམ་པ་ཉིད་དུ་མངོན་སུམ་དུ་རྟོགས་པ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཁྱོད་
ཀྱིས་མཐར་ཐུག་གི་རྒྱུ་རིགས་ཐ་དད་པ་གསུམ་དུ་འཛིན་པ་སྤོང་སྟེ། ཁྱོད་ཐེག་པ་ཀུན་ཐེག་པ་ཆེན་པོའི་ཚུལ་གཅིག་ཏུ་རྟོགས་པ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཁྱོད་ཀྱིས་ཕུང་པོ་བདེན་འཛིན་སྤོང་སྟེ། མིང་གཟུགས་ཀྱི་ཆོས་རྣམས་དོན་དམ་པར་མི་སྐྱེ་བར་ཡོངས་སུ་ཤེས་པ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཁམས་སུ་བདེན་འཛིན་སྤོང་སྟེ། སྟོང་ཉིད་ཆོས་ཟབ་མོ་ལ་ངེས་པར་རྟོག་པའི་བཟོད་པ་ཁོང་དུ་ཆུད་པ་ལ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། སྐྱེ་མཆེད་དུ་བདེན་འཛིན་སྤོང་སྟེ། དེས་བསྡུས་པའི་ཤེས་བྱ་ཐམས་ཅད་ཐེག་པ་ཆེན་པོའི་ཐབས་ཀྱི་སྒོ་ནས་གཟུང་འཛིན་བདེན་མེད་དུ་རབ་ཏུ་སྟོན་པ་ལ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཁམས་གསུམ་ལ་གནས་བྱར་བདེན་འཛིན་སྤོང་སྟེ། ཁྱོད་བདེན་འཛིན་གྱི་རྟོག་པ་ཐམས་ཅད་གཅོད་པ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཁམས་གསུམ་ལ་དོར་བྱ་བདེན་པར་ཆགས་པ་སྤོང་སྟེ། གཙང་བདེ་སོགས་ཀྱི་མཚན་མར་འཛིན་པའི་ཚུལ་མིན་ཡིད་བྱེད་ཀྱི་རྟོག་པ་མེད་པ་དང་། འཇིག་ཚོགས་ལ་ལྟ་བ་ལ་སོགས་པ་ལྔ་འདོར་བ་དང་། འདོད་ཆགས་ལ་སོགས་པ་ཉོན་མོངས་པ་སྤོང་བ་གསུམ་ལ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ལམ་གོང་མའི་ཁྱད་པར་འཐོབ་མི་ནུས་སྙམ་དུ་སེམས་ཀུན་དུ་ཞུམ་པ་སྤོང་སྟེ། ཁྱོད་ཞི་གནས་ཁྱད་པར་ཅན་གྱི་ཡོན་ཏན་ལ་དབང་ཐོབ་པའི་ཞི་གནས་སྒོམ་པ་ལ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཁྱོད་སངས་རྒྱས་ལ་བདེན་ཞེན་སྤོང་སྟེ། ཁྱོད་ལྷག་མཐོང་གིས་བསྡུས་པའི་ཤེས་རབ་དང་། རྟེན་འབྲེལ་སྒྱུ་མར་ཤེས་པའི་ཐབས་ལ་མཁས་པར་
བྱེད་པ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཆོས་སུ་བདེན་འཛིན་སྤོང་སྟེ། དམིགས་པར་ལྟ་བའི་ཁེངས་པ་དང་བྲལ་ཞིང་། གནས་ལུགས་མངོན་སུམ་དུ་རྟོགས་པའི་སེམས་ཉེ་བར་ཞི་བ་བསྐལ་པར་གོམས་པ་སེམས་དཔའ་ཡིན་པའི་ཕྱིར། དེ་ཆོས་ཅན། དགེ་འདུན་དུ་བདེན་ཞེན་སྤོང་སྟེ། ཇི་ལྟ་ཇི་སྙེད་ཀྱིས་བསྡུས་པའི་གཟུགས་ལ་སོགས་པ་ལ་ཐོགས་པ་མེད་པའི་ཡེ་ཤེས་དང་ལྡན་པ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། ཚུལ་ཁྲིམས་སུ་ལྟ་བའི་བདེན་ཞེན་སྤོང་སྟེ། ཆོས་གང་ལ་ཡང་བདེན་པར་མངོན་པར་ཞེན་པའི་གནས་མ་ཡིན་པར་རྟོགས་པ་དང་ལྡན་པ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། སྟོང་པ་ཉིད་ལ་ཕྱིན་ཅི་ལོག་ཏུ་རྩོད་པ་སྤང་སྟེ། ཆོས་རབ་ཏུ་རྣམ་འབྱེད་ཀྱི་དོན་ཇི་ལྟར་འདོད་པ་བཞིན་དུ་དུས་མཉམ་དུ་སངས་རྒྱས་ཀྱི་ཞིང་ཐམས་ཅད་དུ་འགྲོ་བ་དང་ལྡན་པ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། དེ་ཆོས་ཅན། རྒྱུ་འབྲས་བདེན་སྟོང་དང་རྒྱུ་ལས་འབྲས་བུ་འབྱུང་བའི་རྟེན་འབྱུང་འགལ་བར་བརྗོད་པ་འཛིན་པ་སྤོང་བ་ཡིན་ཏེ། ཁྱོད་དམིགས་པ་ལ་བདེན་པར་ཞེན་པའི་སེམས་ཅན་རྫས་འཛིན་གྱི་ཆེད་དུ་གདུལ་བྱ་དང་མཐུན་པར་ཐམས་ཅད་དུ་བདག་གི་ལུས་ལ་དབང་སྒྱུར་བ་ཐོབ་པར་རབ་ཏུ་སྟོན་པ་བསྐལ་པར་གོམས་པའི་སེམས་དཔའ་ཡིན་པའི་ཕྱིར། ཤེས་བྱ་ཆོས་ཅན། ཉི་ཤུ་པོ་འདི་ལ་བསླབས་པས་ས་བདུན་པ་འཐོབ་པ་ཡིན་ཏེ། ཡོངས་སུ་སྦྱོང་བ་རྣམ་པ་ཉི་ཤུ་པོ་འདིས་ཀྱང་སྔ་མ་ས་དང་པོ་དྲུག་ལ་བཤད་པ་བཞིན་དུ་ཐབས་ཤེས་ཀྱིས་ཟིན་པའི་སྒོ་ནས་སྦྱངས་པས་ས་བདུན་པ་རྟོགས་པར་འགྱུར་བའི་ཕྱིར། སྨྲས་པ། གཉེན་པོའི་ག་བུར་གསར་པའི་ཐིགས་པ་ཡིས། །སྤང་བྱའི་ཚ་གདུང་མ་ལུས་བཅིལ་བ་ཡིས། །རིང་དུ་སོང་བའི་བདུན་པའི་ཟློས་གར་འདི། །ཐེག་ཆེན་ལམ་དུ་
བསླབ་པའི་གཟིགས་མོར་མཚར། །མ་དག་ས་ཡི་ཡོན་ཏན་རྒྱ་མཚོ་ལས། །ཕྲ་མོའི་རང་བཞིན་མགོ་སྐྱེས་རྩེ་མོ་ཡིས། །བླངས་པ་ཙམ་ཡང་ལྡན་མིན་དག་པའི་མཆོག །ས་བཅུའི་སེམས་དཔའ་རློམ་དེ་བཞད་གད་རྒྱུ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །ས་བརྒྱད་པ་ལ་རྩ་བ་དང་འགྲེལ་པ་གཉིས་ལས། དང་པོ་ནི། ཤེས་བྱ་ཆོས་ཅན། ས་བརྒྱད་པའི་ཡོངས་སྦྱོང་རྣམ་པ་བརྒྱད་པོ་འདི་ལ་སློབ་ཚུལ་བཤད་དུ་ཡོད་དེ། ས་བརྒྱད་པ་བས་སེམས་གཅིག་གིས་སེམས་ཅན་ཀུན་གྱི་ཡིད་ཀྱི་སྤྱོད་པ་བཟང་ངན་ཤེས་པ་དང་། སངས་རྒྱས་བཞུགས་པའི་འཇིག་རྟེན་གྱི་ཁམས་འདི་བལྟ་ཕྱིར་རྫུ་འཕྲུལ་གྱི་མངོན་པར་ཤེས་པས་རྩེ་བ་དང་། རང་གང་དུ་འཚང་རྒྱ་འགྱུར་གྱི་སངས་རྒྱས་ཀྱི་ཞིང་བཟང་སྒྲུབ་པ་དང་། ཆོས་ཀྱི་ཚིག་དོན་ཡོངས་སུ་བརྟག་པའི་ཕྱིར་སྒོ་གསུམ་གྱིས་སངས་རྒྱས་བསྟན་པ་དང་། ལྷའི་མིག་གིས་སེམས་ཅན་གྱི་དབང་པོ་རྣོ་རྟུལ་ཤེས་པ་དང་། རྒྱལ་བ་ཡི་ཞིང་སྦྱོང་བ་སྟེ་བརྟེན་པ་སངས་རྒྱས་ཀྱི་ཞིང་གི་སེམས་ཅན་གྱི་ཉོན་མོངས་སྦྱོང་བ་དང་། དེ་ཀུན་བདེན་སྟོང་སྒྱུ་མ་ལྟ་བུ་ལྟ་བ་ལ་གནས་པ་དང་། སེམས་ཅན་གྱི་དོན་དུ་བསམས་བཞིན་དུ་སྲིད་པར་སྐྱེ་བ་ལེན་པའི་ལས་དང་བརྒྱད་ལ་བསླབས་པས་ས་བརྒྱད་པ་འཐོབ་པའི་ཕྱིར། གཉིས་པ་ནི། ས་བརྒྱད་པ་བས་ཡོངས་སུ་སྦྱོང་བའི་ཆོས་དེ་ལྟ་བུ་རྣམ་པ་བརྒྱད་ཀྱི་སྔ་མ་ས་དང་པོ་བདུན་ལ་བཤད་པ་བཞིན་དུ་ཉམས་སུ་བླངས་པས་ས་བརྒྱད་པ་མི་གཡོ་བ་ཉམས་སུ་མྱོང་བར་འགྱུར་ཏེ། ས་བརྒྱད་པ་བས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ཆགས་པ་ཡོད་མེད་སོགས་སེམས་གཅིག་གིས་ཇི་ལྟ་བ་བཞིན་དུ་ཤེས་པ་དང་། ཕྱོགས་བཅུའི་འཇིག་རྟེན་གྱི་ཁམས་སུ་རྫུ་འཕྲུལ་གྱི་མངོན་པར་ཤེས་པས་རྩེ་བ་དང་། དགེ་རྩ་རྒྱ་ཆེན་པོས་རང་གི་སངས་རྒྱས་ཀྱི་ཞིང་རྟེན་གསེར་ལ་སོགས་པའི་ངོ་བོར་ཡོངས་
སུ་སྒྱུར་བ་དང་། རྣམ་པ་ཐམས་ཅད་དུ་ཆོས་ཀྱི་ཚིག་དོན་ཡོངས་སུ་བརྟག་པས། དེའི་ཆེད་དུ་སངས་རྒྱས་མཉེས་པར་བྱེད་པ་དང་། སྟོབས་བཅུ་རྗེས་མཐུན་པ་དང་། གཙོ་བོར་ལྷའི་མིག་བསྐྱེད་པས་དབང་པོ་མཆོག་དམན་ཤེས་པ་དང་། རང་འཚང་རྒྱ་འགྱུར་གྱི་སངས་རྒྱས་ཀྱི་ཞིང་བརྟེན་པ་སེམས་ཅན་གྱི་སྐྱོན་ཡོངས་སུ་སྦྱོང་བ་དང་། ཏིང་ངེ་འཛིན་ལས་ལྡང་འཇུག་གི་སྐབས་ཐམས་ཅད་དུ་སྒྱུ་མ་ལྟ་བུར་གནས་པ་དང་། གནས་གང་དུ་གང་ཟག་གང་གི་སྐྱེ་བ་བཟུང་ནས་སེམས་ཅན་ཐམས་ཅད་ཀྱི་དོན་འགྲུབ་པར་མཐོང་ནས་སྙིང་རྗེ་དང་སྨོན་ལམ་གྱི་བློ་སྔོན་དུ་བཏང་བའི་སྐྱེ་བ་ཡོངས་སུ་འཛིན་པ་བཞིན་བྱ་བ་བརྒྱད་ཀྱི་སྒོ་ནས་སྦྱངས་པས་འཐོབ་པའི་ཕྱིར། སྨྲས་པ། ཡིད་ཀྱི་གཟུགས་བརྙན་རྒྱལ་བའི་ཞིང་ཁམས་ཀུན། །སེམས་ཀྱི་མེ་ལོང་ངོས་སུ་རྟག་འཆར་ཞིང་། །མ་དག་ལྕགས་ཀྱི་ཞིང་ཀུན་ཡོངས་དག་པའི། །འཛམ་བུའི་གསེར་དུ་བྱེད་པའི་སྤྲུལ་སྒྱུར་མཁན། །མ་འདྲེས་ཚིག་དོན་དྭངས་པའི་མཚོ་ནང་དུ། །ལྷ་མིག་རྫོགས་པ་གསུམ་པའི་འོད་དཀར་ཅན། །རྣོ་རྟུལ་རི་དྭགས་གཟུགས་བརྙན་འགོག་མེད་འཆར། །ཉོན་མོངས་རྡུལ་བྲལ་སྟོན་མཚན་མཁའ་སྟོང་ལ། །གཡོ་མེད་སྲིད་པར་སྐྱེ་བའི་རྒྱུ་སྐར་འཕྲེང་། །དེ་ལྟའི་ཡོན་ཏན་ནོར་བུ་བཻཌཱུརྱ། །ཐབས་ཤེས་སྲད་བུར་བརྒྱུས་པའི་འཕྲེང་བ་འདི། །ཐེག་ཆེན་རིགས་སད་ལུས་ཕྲའི་མགུལ་བར་མཛེས། ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དགུ་པ་ལ། རྩ་བ་དང་། འགྲེལ་པ་གཉིས་ལས། དང་པོ་ནི། ཤེས་བྱ་ཆོས་ཅན། དགུ་པའི་ཡོངས་སྦྱོང་ཡོད་དེ། ཕྱིན་དྲུག་གི་ཉམས་ལེན་རྫོགས་པས་ཇི་ལྟར་སྨོན་པའི་དོན་ལ་སྨོན་ལམ་དག་ནི་མཐའ་ཡས་པ་འགྲུབ་པ་དང་། ངེས་ཚིག་སོ་སོ་ཡང་དག་རིག་པ་ཐོབ་པས་ལྷ་ལ་སོགས་པའི་སྐད་ཤེས་པ་དང་། སྤོབས་པ་སོ་སོ་ཡང་དག་རིག་པ་ཐོབ་པས་ཆོས་སྟོན་པ་ལ་སྤོབས་པ་ཆུ་བོ་ལྟ་བུ་རྒྱུན་
མི་ཆད་པ་དང་། མངལ་དུ་འཇུག་པ་མཆོག་བུད་མེད་སྒྱུ་འཕྲུལ་ལྟ་བུའི་མངལ་དུ་སྐྱེ་བ་དང་། རིགས་མཆོག་རྒྱལ་པོ་དང་བྲམ་ཟེའི་རིགས། རུས་མཆོག་བུ་རམ་ཤིང་པ་ལྟ་བུ། ཕ་མ་ནས་བདུན་བརྒྱུད་བར་མ་ཆད་པའི་ཆོ་འབྲང་དང་། རང་དབང་བའི་འཁོར་དང་། མི་མཆོག་རྣམས་ཀྱིས་བསྟོད་པར་སྐྱེ་བ་དག་དང་ནི་གནས་གཙང་གི་ལྷས་བསྐུལ་ནས་ངེས་པར་འབྱུང་བ་དང་། བྱང་ཆུབ་ཀྱི་ཤིང་ཨཱ་ཤྭད་ཐ་ལྟ་བུའི་དྲུང་དུ་འདུག་པ་དང་། མངོན་མཐོ་ངེས་ལེགས་ཀྱི་ཡོན་ཏན་ཕུན་སུམ་ཚོགས་པ་རྣམས་ཀྱི་སྒོ་ནས་ཡོངས་སུ་སྦྱོང་བར་བྱེད་པ་རྣམས་སུ་ཡོད་པ་ཡིན་པའི་ཕྱིར། གཉིས་པ་ནི། ཤེས་བྱ་ཆོས་ཅན། ས་དགུ་པ་བས་གོང་དུ་བསྟན་པའི་ཡོངས་སུ་སྦྱོང་བ་རྣམ་པ་བཅུ་གཉིས་པོ། སྔ་མ་ས་དང་པོ་བརྒྱད་ལ་བཤད་པ་བཞིན་དུ་ཐབས་ཤེས་ཀྱིས་ཟིན་པའི་སྒོ་ནས་ཡོངས་སུ་སྦྱང་བར་བྱས་པའི་ཁྱད་པར་དག་གིས་ས་དགུ་པ་ལེགས་པའི་བློ་གྲོས་མངོན་དུ་བྱེད་པ་ཡིན་ཏེ། དེས་ཕྱིན་དྲུག་གི་ཉམས་ལེན་རྫོགས་པས་སྨོན་ལམ་མཐའ་ཡས་པ་འགྲུབ་པ་དང་། ཐ་སྙད་སྣ་ཚོགས་ཤེས་པའི་ངེས་ཚིག་སོ་སོ་ཡང་དག་རིག་པ་བཞི་ཐོབ་པས་ལྷ་ལ་སོགས་པའི་སེམས་ཅན་ཐམས་ཅད་ཀྱི་སྐད་ཤེས་པ་དང་། བརྗོད་པ་ཟབ་མོས་སྤོབས་པ་སོ་སོ་ཡང་དག་རིག་པ་ཐོབ་པས་ཆོས་སྟོན་པ་ལ་སྤོབས་པ་ཆུ་བོ་ལྟར་མི་ཟད་པ་དང་། སྐྱེ་བོ་ཐམས་ཅད་ཀྱི་བསྔགས་པའི་མའི་མངལ་དུ་འཇུག་པ་དང་། རིགས་མཆོག་རྒྱལ་པོ་ལ་སོགས་པར་གནས་པ་དང་། ཉི་མའི་གཉེན་ལ་སོགས་པ་ལས་སྐྱེས་པའི་རུས་དང་། མ་ལ་སོགས་པ་དང་ལེགས་པར་འབྲེལ་བའི་གཉེན་དམ་པ་རྒྱུད་མར་བྱུང་བའི་ཆོ་འབྲང་དང་། རང་དབང་བའི་འཁོར་ཕུན་སུམ་ཚོགས་པ་དང་། བརྒྱ་བྱིན་ལ་སོགས་པས་མངོན་པར་བསྟོད་པར་སྐྱེ་བ་དང་།
སངས་རྒྱས་དང་ལྷ་ལ་སོགས་པས་བསྐུལ་ཏེ་ངེས་པར་འབྱུང་བ་དང་། ཡིད་བཞིན་གྱི་ནོར་བུ་དང་འདྲ་བའི་ཤིང་སྟོན་པ་འདིའི་ཨཱ་ཤྭད་ཐ་ལ་སོགས་པ་བྱང་ཆུབ་ཀྱི་སྙིང་པོ་ལ་འདུག་པ་དང་། སངས་རྒྱས་དང་སངས་ཀྱི་ཆོས་སྟོབས་སོགས་ཀྱི་ངོ་བོར་གྱུར་པའི་ཡོན་ཏན་ཐམས་ཅད་ཡོངས་སུ་རྫོགས་པར་བྱེད་པ་ཞེས་བྱ་བ་དེ་ལྟ་བུའི་ཕུན་སུམ་ཚོགས་པའི་མཚན་ཉིད་ཀྱིས་ཡོངས་སུ་སྦྱངས་པས་དེ་ལྟར་འཐོབ་པའི་ཕྱིར། སྨྲས་པ། རྨད་བྱུང་སྨོན་ལམ་མཆོག་གི་ས་བོན་གང་། །སྐྱོན་བྲལ་ལུས་ཕྲའི་མངལ་དུ་དུད་པ་ལས། །ཕུན་ཚོགས་རིགས་ཀྱིས་མཐོ་བའི་ལང་ཚོ་ཅན། །དྲེགས་ལྡན་རལ་པའི་ཟུར་ཕུད་བླ་ན་མེད། །རྣམ་མང་རིག་བྱེད་གཞུང་གི་རྦ་རླབས་དང་། །བརྗོད་པ་ཟབ་མོའི་ལྷུང་ལྷུང་སྒྲ་དབྱངས་ཅན། །སྤོབས་པའི་ཆུ་གཏེར་ཟད་མི་ཤེས་པ་དེ། །སྲིད་འདིར་སྔ་ན་མེད་པའི་ངོ་མཚར་དཔལ། །མཐའ་མེད་འཁོར་བའི་ཚང་ཚིང་སྟུག་པོའི་ཁྱིམ། །འཁྱོག་པོར་ངེས་པར་འབྱུང་བའི་ཕྲ་ལྡེམ་ཅན། །སྐྱེ་རྒུའི་རྐང་འཐུང་ཡོངས་ཀྱི་ཟླ་བྲལ་བའི། །ལེགས་པའི་བློ་གྲོས་མྱ་ངན་མེད་དེ་མཚར། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །འབྲས་བུའི་ས་བཅུ་པ་བཤད་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། རྒྱུའི་ས་རྣམས་ཀྱི་ཡོངས་སུ་སྦྱོང་བ་སྔར་བཤད་པ་དེ་ལྟར་ངེས་པར་བསྟན་ནས། འབྲས་བུའི་ས་བཅུ་པའི་མཚན་ཉིད་འཆད་པར་བྱེད་དེ། དེ་ཡང་ས་འོག་མ་ཐམས་ཅད་ཀྱི་སྤངས་རྟོགས་ཀྱི་རིགས་ཡར་ལྡན་དུ་རྫོགས་ལྡན་དུ་བསྡུ་བའི་སྒོ་ནས་འཆད་རིགས་པའི་ཕྱིར། རྒྱུ་མཚན་ཡོད་དེ། འབྲས་བུའི་ས་བཅུ་པ་ཉིད་དུ་ཡོངས་སྦྱོང་དེ་དག་མ་བཤད་པར། ས་བཅུ་པའི་མཚན་ཉིད་ཀྱི་སྒོ་ནས་བཤད་པ་ཙམ་གྱིས་གོ་ནུས་པས་མ་བཤད་པའི་ཕྱིར། གཉིས་པ་ནི། ཤེས་བྱ་ཆོས་ཅན། དམན་པ་ས་བརྒྱད་དང་རྒྱུའི་
ས་དགུ་བྱང་ཆུབ་སེམས་དཔའི་ས་ཞེས་གཅིག་ཏུ་བྱས་པའི་ས་དགུ་སྔ་མ་ལ་ཤེས་མཐོང་དང་། ཕྱི་མ་ལ་གནས་ནས་འདས་ནས་ཏེ་འདས་པའི་ཡེ་ཤེས་ནི་བྱང་ཆུབ་སེམས་དཔའི་ས་བཅུ་པ་ཡིན་པར་ཤེས་པར་བྱ་སྟེ། རྒྱུ་མཚན་གང་གིས་ན། མདོ་ལས་འདའ་བྱ་ས་དགུ་བཤད་མ་ཐག་པའི་བྱང་སེམས་ཀྱི་སར་གནས་པ་ལ། སངས་རྒྱས་ཀྱི་སར་གནས་པ་ཞེས་བཤད་པ་དེ་ནི་ཤེས་པར་བྱ་བ་ཡིན་པའི་ཕྱིར། གསུམ་པ་ལ། འདའ་བྱ་ས་དགུ་བཤད་པ། དེ་ལས་འདས་པ་ས་བཅུ་པ་བཤད་པ་གཉིས་ལས། དང་པོ་ནི། ཉན་ཐོས་དང་ལ་སོགས་པ་རང་རྒྱལ་གྱི་ཆོས་ཉིད་ཀྱི་རིགས་ལ་བརྟེན་པའི་སྦྱོར་ལམ་བཞི་ཆོས་ཅན། གོ་རིམ་བཞིན་དུ་རིགས་ཀྱི་ས་ཡིན་ཏེ། ཐེག་དམན་གྱི་ཡང་དག་བླངས་པའི་རིགས་ལ་མི་འཁྲུལ་བའི་སོ་སྐྱེའི་རྟོགས་པ་ཡིན་པའི་ཕྱིར། མཐར་གྱིས་པའི་འབྲས་བུ་དང་པོ་རྒྱུན་ཞུགས་ལ་ཞུགས་པའི་རྟོགས་པ་ཆོས་ཅན། བརྒྱད་པའི་ས་ཡིན་ཏེ། ཟུང་བཞིའི་ཡ་གྱལ་དང་པོའི་རྟོགས་པ་ཡིན་པའི་ཕྱིར། མཐར་གྱིས་པའི་རྒྱུན་དུ་ཞུགས་པའི་རྟོགས་པ་ཆོས་ཅན། མཐོང་བའི་ས་ཡིན་ཏེ། མཐོང་སྤང་ཀུན་སྦྱོར་གསུམ་སྤངས་པས་རབ་ཏུ་ཕྱེ་བའི་རྟོགས་པ་ཡིན་པའི་ཕྱིར། ལན་ཅིག་ཕྱིར་འོང་བའི་རྟོགས་པ་ཆོས་ཅན། བསྲབས་པའི་ས་ཡིན་ཏེ། ཕལ་ཆེར་ལ་འདོད་ཆགས་དང་བྲལ་བས་རབ་ཏུ་ཕྱེ་བའི་འབྲས་གནས་ཀྱི་རྟོགས་པ་ཡིན་པའི་ཕྱིར། ཕྱིར་མི་འོང་བའི་རྟོགས་པ་ཆོས་ཅན། འདོད་ཆགས་དང་བྲལ་བའི་ས་ཡིན་ཏེ། ཐ་མའི་ཆ་མཐུན་ལྔ་སྤངས་པས་རབ་ཏུ་ཕྱེ་བའི་འབྲས་གནས་ཀྱི་རྟོགས་པ་ཡིན་པའི་ཕྱིར། ཉན་ཐོས་དགྲ་བཅོམ་པ་ཉིད་ཀྱི་རྟོགས་པ་ཆོས་ཅན། བྱས་པ་རྟོགས་པའི་ས་ཡིན་ཏེ། གོང་མའི་ཆ་མཐུན་ལྔ་སྤངས་པས་རབ་ཏུ་ཕྱེ་བའི་ཐེག་པ་ཆུང་ངུའི་རྟོགས་པ་ཡིན་པའི་ཕྱིར། ཞེས་བྱ་བ་དྲུག་དང་། ཉན་ཐོས་ཀྱི་འབྲས་བུ་
ལྷག་མ་ལ་ཞུགས་པ་གསུམ་གྱི་རྟོགས་པ་ཆོས་ཅན། ཉན་ཐོས་ཀྱི་ས་ཡིན་ཏེ། ཉན་ཐོས་ཀྱི་འབྲས་ཞུགས་ལྷག་མའི་རྟོགས་པ་ཡིན་པའི་ཕྱིར། ཤེས་བྱ་ཆོས་ཅན། སྐབས་འདིར་ས་བདུན་པོ་དེ་ལ་ཉན་ཐོས་ཀྱི་ས་ཞེས་གཅིག་ཏུ་སྡུད་པའི་རྒྱུ་མཚན་ཡོད་དེ། འདིར་བལྟས་ནས་འདའ་བ་དང་། གནས་ནས་འདའ་བར་བྱ་བའི་ཐེག་པའི་ཚུལ་གསུམ་རྣམ་པར་བཞག་པ་མཛད་ནས་དེ་ལས་འདས་པ་ས་བཅུ་པའི་མཚན་ཉིད་བཤད་པར་དགོངས་པས་ཉན་ཐོས་ཀྱི་ས་ཞེས་གཅིག་ཏུ་བསྡུས་པའི་ཕྱིར། རང་སངས་རྒྱས་འཕགས་པའི་མངོན་རྟོགས་རྣམས་ཆོས་ཅན། རང་སངས་རྒྱས་ཀྱི་ས་ཡིན་ཏེ། ཐེག་པ་འབྲིང་གི་འཕགས་པའི་རྟོགས་པ་ཡིན་པའི་ཕྱིར། སྔར་ཇི་སྐད་བཤད་པའི་བྱང་ཆུབ་སེམས་དཔའི་ས་རྣམ་པ་དགུ་པོ་ཆོས་ཅན། བྱང་སེམས་ཀྱི་ས་ཞེས་འདའ་བྱ་ས་དགུའི་གྲངས་འཛིན་གཅིག་ཁོ་ན་ཡིན་ཏེ། འདའ་བྱ་ས་དགུའི་གནས་ནས་འདའ་བའི་ས་གཅིག་ཏུ་བསྡུས་ནས་བཞག་པའི་ཕྱིར། གཉིས་པ་ནི། ཤེས་བྱ་ཆོས་ཅན། སྔར་བཤད་པ་དེ་ལྟར་མདོ་ལས། ས་དགུ་འདས་ནས་བསྟན་མ་ཐག་པ་མངོན་པར་ཤེས་པ་ཆེན་པོ་ལ་དབང་པའི་སྨོན་ལམ་ཤེས་པ་གང་གིས་ས་སངས་རྒྱས་ཀྱི་ས་དེ་ལ་གནས་པའི་རྗེས་ཐོགས་དེ་མ་ཐག་སངས་རྒྱས་ཀྱི་ས་ཞེས་བཤད་པ་དེ་ནི་བྱང་ཆུབ་སེམས་དཔའི་ས་བཅུ་པ་ཡིན་པར་ཤེས་པར་བྱ་བ་ཡིན་ཏེ། ས་དེ་ལ་གནས་པའི་བྱང་ཆུབ་སེམས་དཔའི་དབང་དུ་བྱས་ན་ས་བཅུ་པ་ལ་ནི་བྱང་ཆུབ་སེམས་དཔའ་སངས་རྒྱས་ཁོ་ནར་བརྗོད་པར་བྱ་ཡི། ཡང་དག་པར་རྫོགས་པའི་སངས་རྒྱས་ནི་མ་ཡིན་ནོ་ཞེས་མདོ་ལས་འབྱུང་བའི་ཕྱིར། སྨྲས་པ། རྣམ་དཀར་འཕྲིན་ལས་མརྒད་ཞུན་མའི་གོས། །འབད་རྩོལ་རགས་པ་དང་བྲལ་ལེགས་ལྡན་དཔྱིད། །ཕན་བདེའི་དབྱར་གྱི་དགའ་སྟོན་བསྐྲུན་པ་འདི། །སངས་རྒྱས་མཛད་པར་མཚུངས་ཞེས་མཁས་རྣམས་གླེང་། །ཞེས་བྱ་བ་ནི་བར་སྐབས་ཀྱི་
ཚིགས་སུ་བཅད་པའོ། །
གཉེན་པོའི་ཚོགས་སྒྲུབ་བཤད་པ།
གཉེན་པོའི་ཚོགས་སྒྲུབ་བཤད་པ། གསུམ་པ་གཉེན་པོའི་ཚོགས་བྱེ་བྲག་ཏུ་བཤད་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། གཉེན་པོའི་ཚོགས་སྒྲུབ་བཤད་དུ་ཡོད་དེ། དེ་འཆད་པ་ལ་མཐོང་དང་ཞེས་སོགས་བར་སྐབས་ཀྱི་ཚིགས་སུ་བཅད་པ་གཅིག་གསུངས་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཐེག་ཆེན་གྱི་མཐོང་ལམ་དང་། སྒོམ་པའི་ལམ་དག་ལ་ཆོས་ཅན། གཉེན་པོ་རྣམ་པ་བརྒྱད་ཅེས་བྱ་བ་ཡིན་ཏེ། སྤང་བྱ་གཟུང་བ་དང་འཛིན་པའི་རྣམ་པར་རྟོག་པ་བརྒྱད་པོ་རྣམས་ཉེ་བར་ཞི་བར་བྱ་བའི་ཕྱིར་དུ་གྲངས་ཀྱི་སྒོ་ནས་བརྒྱད་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་གཉིས་ལས། དང་པོ་ལ། ཁ་ཅིག །ཤེས་སྒྲིབ་རྟོག་པའི་དངོས་གཉེན་བྱེད་པའི་བྱང་འཕགས་ཀྱི་མཁྱེན་པ་དེ། གཉེན་པོའི་ཚོགས་སྒྲུབ་ཀྱི་མཚན་ཉིད་ཟེར་ན། ས་གཉིས་པའི་བར་ཆེད་མེད་ལམ་ཆོས་ཅན། །མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ས་གཉིས་པའི་རྣམ་གྲོལ་ལམ་དེ། ཤེས་སྒྲིབ་རྟོག་པ་སྤངས་པའི་མཁྱེན་པ་ཡིན་པར་ཐལ་ལོ། ཁ་ཅིག །ཤེས་སྒྲིབ་རྟོག་པའི་དངོས་གཉེན་བྱེད་པའི་རིགས་སུ་གནས་པའི་བྱང་འཕགས་ཀྱི་མཁྱེན་པ་དེའི་མཚན་ཉིད་ཟེར་ན། གང་ཟག་གི་བདག་མེད་རྟོགས་པའི་ཐེག་ཆེན་གྱི་མཐོང་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཐེག་ཆེན་གྱི་རྟོགས་རིགས་སུ་གནས་པར་ཐལ། ཁ་ཅིག །རང་གི་ངོ་སྐལ་གྱི་སྤང་བྱ་ཤེས་སྒྲིབ་རྟོག་པའི་གཉེན་པོ་བྱེད་པའི་བྱང་འཕགས་ཀྱི་མཁྱེན་པ་དེའི་མཚན་ཉིད་ཟེར་ན། བྱང་སེམས་ཀྱི་མཐོང་ལམ་རྣམ་གྲོལ་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། ཁྱོད་ཀྱི་ངོ་སྐལ་གྱི་སྤང་བྱ་ཤེས་སྒྲིབ་མེད་པའི་ཕྱིར། གཉིས་པ་རང་ལུགས་ནི་
ཤེས་སྒྲིབ་རྟོག་པའི་གཉེན་པོ་བྱེད་པའི་བྱང་འཕགས་ཀྱི་མཁྱེན་པ་གཉེན་པོའི་ཚོགས་སྒྲུབ་ཀྱི་མཚན་ཉིད། གསུམ་པ་ནི། ཐེག་པ་ཆེན་པོའི་མཐོང་བ་དང་སྒོམ་པའི་ལམ་གཉིས་པོ་དག་ཁོ་ནའི་སྤང་བྱ་སེལ་བའི་ནུས་པའི་གནས་སྐབས་ཀྱི་ཁྱད་པར་ཆོས་ཅན། ཁྱོད་ལ་གཉེན་པོ་རྣམ་པ་བརྒྱད་ཡོད་དེ། སྤང་བྱ་མི་མཐུན་པའི་ཕྱོགས་ཀྱི་རབ་ཏུ་དབྱེ་བས་དེ་དག་ཉེ་བར་ཞི་བར་བྱ་བའི་ཕྱིར་དུ་བརྒྱད་ཡོད་པའི་ཕྱིར། མི་མཐུན་ཕྱོགས་ལ་བརྒྱད་དུ་དབྱེར་ཡོད་དེ། ཀུན་བརྟགས་དང་ལྷན་སྐྱེས་ཀྱིས་བསྡུས་པའི་གཟུང་བ་དང་འཛིན་པའི་རྣམ་པར་རྟོག་པ་བརྒྱད་ཡོད་པའི་ཕྱིར། ཤེས་བྱ་ཆོས་ཅན། མཐོང་སྤང་དང་སྒོམ་སྤང་གི་གཉེན་པོ། མདོ་ལས། བདེན་པ་གཉིས་ཀའི་རྣམ་པ་ལ་བརྟེན་ནས་མངོན་དུ་བྱས་པ་སྟེ་ཤེས་པར་བྱ་བར་བསྟན་ཏེ། ངེས་པར་འབྱུང་ས་འབྱུང་བྱེད་ཀུན་རྫོབ་ཏུ་ཁས་བླངས་པ་ཀུན་རྫོབ་བདེན་པ་ལ་བརྟེན་ནས་མཐོང་སྤང་གཟུང་འཛིན་གྱི་གཉེན་པོ་གསུངས་ལ། དོན་དམ་པར་དེ་བཀག་པ་དོན་དམ་བདེན་པ་ལ་བརྟེན་ནས་སྒོམ་སྤང་གཟུང་འཛིན་གྱི་གཉེན་པོ་ཤེས་པར་བྱ་བར་གསུངས་པའི་ཕྱིར། མི་མཐུན་ཕྱོགས་ཀྱི་གཉེན་པོ་བརྒྱད་དུ་ཡོད་དེ། གཟུང་བའི་རྣམ་པར་རྟོག་པ་ཀུན་ནས་ཉོན་མོངས་པའི་དངོས་པོ་ཙམ་དང་། གཉེན་པོ་རྣམ་བྱང་གི་རྟེན་ཅན་གྱི་གཟུང་རྟོག་གཉིས་དང་། འཛིན་པའི་རྣམ་པར་རྟོག་པ་གང་ཟག་རྫས་སུ་ཡོད་པ་དང་། སྐྱེས་བུ་བཏགས་པའི་རྟེན་ཅན་གྱི་འཛིན་རྟོག་གཉིས་ཀུན་བརྟགས་ལྷན་སྐྱེས་ཀྱི་ས་བོན་སོ་སོར་མཐོང་བའི་ལམ་དང་སྒོམ་པའི་ལམ་ལ་སྤོང་བའི་ཕྱིར།
ངེས་འབྱུང་སྒྲུབ་པ་བཤད་པ།
ངེས་འབྱུང་སྒྲུབ་པ་བཤད་པ། བཞི་པ་ངེས་འབྱུང་སྒྲུབ་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། སྒྲུབ་པ་གསུམ་གྱི་འོག་ཏུ། བཞི་པ་ངེས་པར་འབྱུང་བའི་སྒྲུབ་པ་འཆད་དེ། སྔར་བཤད་པ་དེ་ལྟར་བསམ་སྦྱོར་རྒྱ་ཆེན་པོའི་དཔུང་གིས་ཚོགས་བསགས་པ་ནི་རྣམ་མཁྱེན་དུ་ངེས་པར་འབྱུང་བས་ན་
དེ་ལྟར་འཆད་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ངེས་པར་འབྱུང་བ་རྣམ་པ་བརྒྱད་ཀྱི་བདག་ཉིད་འདི་ཆོས་ཅན། ཁྱོད་ཉམས་ལེན་གྱི་སེམས་དཔའི་བྱ་བ་ཁྱད་ཅན་དེ་ངེས་འབྱུང་སྒྲུབ་པ་ཡིན་པར་ཤེས་པར་བྱ་སྟེ། ཁྱོད་ངེས་འབྱུང་གི་ཆེད་དུ་བྱ་བ་སོགས་སྤྱི་བྱེ་བྲག་བརྒྱད་ཀྱི་སྒོ་ནས་ཤེས་བྱ་ཡིན་པའི་ཕྱིར། བརྒྱད་པོ་ཡོད་དེ། ཆེད་དུ་བྱ་བ་ཆེན་པོ་གསུམ་གཅིག་ཏུ་བྱས་པ་དང་། བདེན་སྟོང་མཉམ་ཉིད་མཁྱེན་པའི་ཐུགས་རྗེ་ཆེན་པོ་དང་། སེམས་ཅན་གྱི་དོན་བྱེད་པའི་ཡེ་ཤེས་དང་། འབད་མེད་ལྷུན་གྲུབ་ཀྱི་གཞན་དོན་དང་། སྲིད་ཞིའི་མཐའ་སྤངས་པས་སྤང་བྱ་ཟད་པ་ཐོབ་པ་དང་། སྤང་བྱ་ཟད་པས་ཐེག་པ་གསུམ་གྱི་རྟོགས་བྱའི་ཐམས་ཅད་ཐོབ་པ་དང་། ཆོས་བཅུ་རྣམ་པ་ཐམས་ཅད་དུ་མངོན་སུམ་དུ་མཁྱེན་པའི་རྣམ་མཁྱེན་དང་། རྣམ་མཁྱེན་དེའི་ཁྱད་པར་གྱི་ལམ་རྡོ་རྗེ་ལྟ་བུའི་ཏིང་ངེ་འཛིན་གྱིས་བསྡུས་པ་རྣམས་སུ་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །རྣམ་མཁྱེན་དུ་གདོན་མི་ཟ་བར་ངེས་པར་འབྱིན་པའི་སེམས་དཔའི་རྣལ་འབྱོར་ངེས་འབྱུང་སྒྲུབ་པའི་མཚན་ཉིད་ཟེར་ན། ཐེག་ཆེན་གྱི་མཐོང་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། གཉིས་པ་རང་ལུགས་ནི། རྣམ་མཁྱེན་དུ་གདོན་མི་ཟ་བར་ངེས་པར་འབྱིན་པའི་དག་སའི་རྣལ་འབྱོར་ངེས་འབྱུང་སྒྲུབ་པའི་མཚན་ཉིད། གསུམ་པ་རྩོད་པ་སྤོང་པ་ལ། ཁོ་ན་རེ། རྣམ་མཁྱེན་གྱི་འབྲས་བུར་གྱུར་པའི་ས་བརྒྱད་པའི་ཡེ་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། ཟེར་ན། འོ་ན་སངས་འཕགས་ཀྱི་འབྲས་བུར་གྱུར་པའི་བྱང་སེམས་ཀྱིས་སངས་རྒྱས་ཀྱི་གོ་འཕང་མངོན་དུ་མི་བྱེད་པར་ཐལ། ཁྱོད་ཀྱི་ཞེ་འདོད་འཐད་པའི་ཕྱིར། འདོད་མི་ནུས་ཏེ། སེམས་ཅན་ཡིན་ན་འཚང་རྒྱ་བས་
ཁྱབ་པའི་ཕྱིར། གསུམ་པ་ནི། ངེས་འབྱུང་བརྒྱད་ཐོབ་བྱེད་ཀྱི་ཐབས་སུ་གྱུར་པའི་ངེས་པར་འབྱུང་བའི་སྒྲུབ་པ་ནི་ཆོས་ཅན། ཁྱོད་ལ་རྣམ་པ་བརྒྱད་ཡོད་པ་ཡིན་ཏེ། ཁྱོད་ལ་ངེས་པར་འབྱུང་བ་ཐམས་ཅད་དོན་དམ་པར་མི་དམིགས་པ་ཉིད་ཀྱིས་ཁྱད་པར་དུ་བྱས་པར་རྟོགས་ཤིང་། ཐ་སྙད་དུ་ངེས་པར་འབྱུང་བ་རྣམ་པ་བརྒྱད་དུ་ངེས་པ་ཡིན་པའི་ཕྱིར། དེར་ངེས་ཏེ། ངེས་པར་འབྱུང་བར་བྱ་བའི་གཞི་བརྒྱད་པོ་དེ་ལྟ་བུ་དག་ལས་ཁྱད་པར་དུ་འཕགས་པའི་ཆོས་གཞན་མེད་པའི་ཕྱིར། ཤེས་བྱ་ཆོས་ཅན། བརྒྱད་པོ་ཡོད་དེ། སྔར་ཇི་སྐད་བཤད་པའི་ཆེད་དུ་བྱ་བ་གསུམ་དང་། ཆོས་ཐམས་ཅད་བདེན་སྟོང་མཉམ་པ་ཉིད་དུ་གཟིགས་པས་ཁྱད་པར་དུ་བྱས་ནས་འགྲོ་ཀུན་སྡུག་བསྔལ་གསལ་བྱར་མཁྱེན་པའི་ཐུགས་རྗེ་ཆེན་པོ་ནི་སེམས་དཔའ་ཆེན་པོ་དག་སྦྱོར་བའི་སྒོ་ནས་སེམས་ཅན་གྱི་དོན་བྱེད་པར་ཏེ་མཐའ་ཡས་པར་བྱེད་པའི་ཡེ་ཤེས་དང་། རྟོག་པ་དང་རྩོལ་བའི་མཚམས་མེད་པར་ཐམས་ཅད་བྱེད་པ་ཉིད་ཀྱིས་གཞན་དོན་ལྷུན་གྱིས་གྲུབ་པ་དང་གསུམ་ནི་སེམས་དཔའ་ཆེན་པོའི་ཁྱད་པར་དང་། སྲིད་ཞིའི་མཐའ་སྤངས་པས་རྟག་པ་དང་ཆད་པ་དང་བྲལ་བའི་ངོ་བོའི་གནས་སྐབས་ཀྱི་ཁྱད་པར་སྤང་བྱ་ཟད་པ་ཐོབ་པ་དང་། སྤང་བྱ་ཟད་པས་ཐེག་པ་གསུམ་གྱི་རྟོགས་བྱའི་དོན་ཐམས་ཅད་ཐོབ་པ་གཉིས་ནི་སྤོང་བ་ཆེན་པོའི་ཁྱད་པར་དང་། སེམས་བསྐྱེད་པ་ནི་ཞེས་སོགས་སྔར་ཇི་སྐད་བཤད་པའི་སེམས་བསྐྱེད་སོགས་ཆོས་བཅུ་མངོན་སུམ་དུ་མཁྱེན་པས་རྣམ་པ་ཐམས་ཅད་མཁྱེན་པ་ཉིད་དང་། རྣམ་མཁྱེན་དེའི་ཁྱད་པར་གྱི་ལམ་རྡོ་རྗེ་ལྟ་བུའི་ཏིང་ངེ་འཛིན་གྱིས་བསྡུས་པ་དང་བརྒྱད་ཡོད་པའི་ཕྱིར། གསུམ་པ་སྐབས་བསྡུ་བ་ནི། ཤེས་བྱ་ཆོས་ཅན། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་དོན་བདེ་བླག་ཏུ་རྟོགས་པར་བྱེད་པས་ན་མན་ངག་གི་བསྟན་བཅོས་མངོན་པར་རྟོགས་པའི་ཡུམ་གསུམ་གྱི་རྒྱན་མིང་དོན་སྒྲོག་པས་ན་ཞེས་བྱ་བའི་འགྲེལ་
པ་ལས་སྐབས་དང་པོའི་འགྲེལ་པའོ་སྟེ་སྐབས་དང་པོའི་ཚིག་དོན་ཀུན་གཏན་ལ་ཕབ་པ་ཡིན་ཏེ། རྣམ་མཁྱེན་མཚོན་བྱེད་ཀྱི་ཆོས་བཅུ་མདོར་བསྟན་རྒྱས་བཤད་གཉིས་ཀྱི་སྒོ་ནས་ལེགས་པར་བཤད་པ་ཡིན་པའི་ཕྱིར། སྨྲས་པ། མྱངས་ན་མངར་བའི་རོ་ཡི་མཆོག་གྱུར་ཀུན་མཁྱེན་བ་ཀུ་ལ་ཡི་འབྲས། །མཚོན་བྱེད་ཆོས་ཀྱི་མེ་ཏོག་ཁ་འབུས་ཕྱོགས་ཀྱི་གྲངས་ལྡན་ཡལ་འདབ་ཅན། །ཕང་ཕུང་རྩ་འགྲེལ་སྡོང་པོའི་ལང་ཚོ་གཡུར་ཟའི་གཞུང་ལུགས་རྐང་འཐུང་དབང་། །བློ་ལྡན་འཆི་མེད་སྒེག་མོ་ལས་གཞན་སྦྱིན་སྐྱེས་ཕལ་གྱི་བགོ་སྐལ་མིན། །མི་དམན་སྦྱངས་པའི་མ་ལ་ཡི་སྐྱེད་མོས་ཚལ་གྱི་དགའ་འཚལ་ན། །ཤེས་རབ་བྲང་འགྲོའི་སྙིང་པོའི་སྡོང་བུ་མཁས་པའི་གསུང་རྒྱུན་ལྕུག་ཕྲན་ལྡེམ། །ཡུམ་དོན་དྲི་བསུང་ཚར་དུ་མངར་བས་དཔྱོད་ལྡན་གཉིས་འཐུང་དགའ་སྐྱེད་ཀྱང་། །ཐོས་ཆུང་ཚུལ་འཆོས་མཁན་པོ་ཕལ་ཆེར་ཐལ་འགྱུར་དུག་སྦྲུལ་ལྕེ་ལ་འཛེམ། །དུག་གསུམ་མི་གཙང་གིས་བསྒོས་ཆོས་བརྒྱད་ཀྱི། །གར་སྒྱུར་བསྟན་འཛིན་གཟུགས་བརྙན་སྤྲེའུ་འགའ། །ཚུལ་མིན་བྱ་བའི་ལྗོན་ཤིང་ཡལ་ག་ལ། །སྤྱོད་པ་རྣམ་དཀར་འཕྲིན་ལས་ཡིན་སྙམ་བྱེད། །རྒྱ་ཆེན་ཤེས་བྱའི་ཡུལ་ཁམས་མ་མཐོང་བར། །སྐྱེད་བྱེད་དྲན་པའི་ཁྲོན་པར་ངོ་མཚར་བའི། །གཞན་གྱི་དམིགས་བུར་རློམ་སྟེ་མཐོན་པོའི་ཁྲིར། །འཛེག་འདི་ཐ་ག་པ་ལ་འགྲན་ནམ་ཅི། །ཟང་ཟིང་ནོར་ལ་ཀླུ་ཡི་ཚོགས་རྣམས་སྤྱོད། །མཐོན་པོའི་དབྱིངས་སུ་འདབ་ཆགས་ཕལ་ཆེར་ལྡིང་། །གཞན་སྣང་སྒྱུར་བར་ན་ཆུང་སྒེག་མོ་མཁས། །ཕྱི་རོལ་མཛེས་པར་ལྷ་སྐུའི་གསོབ་རྣམས་བཀྲ། །ཨེ་མ་རང་དང་རིགས་མཐུན་བླུན་པོའི་དབུས། །མཁས་གྲུབ་སྐྱེ་བར་རློམ་པའི་འུར་རྒྱངས་ཏེ། །བོད་རྒན་ཁྲོད་ན་མཆོག་གྱུར་གཞུང་ལུགས་དག །ཤེས་རྣམས་ཕལ་ཆེར་སྙིང་རྗེའི་ཡུལ་ལས་ཅི། །རྒྱ་བོད་མཁས་པའི་གསུང་
རབ་རྟ་ལྗང་དུས་ཀྱི་ཆུ་ལྷའི་རི་རྩེར་སོན། །རྒྱལ་བ་གཉིས་པའི་ལེགས་བཤད་འོད་དཀར་མ་དག་སྤྲིན་བསྒྲིབས་དེ་ལྟ་ཡང་། །འཇམ་དབྱངས་བླ་མ་དཀོན་མཆོག་ཆོས་འཕེལ་རྣམ་དཔྱོད་འཐོར་རླུང་དྲག་པོ་དེ། །འདྲེན་པའི་བྱེད་པོར་འཇིག་རྟེན་མེས་པོས་ཁོ་བོ་བསྐོས་སྙམ་ཚུལ་འདིར་ཞུགས། །དཔྱིད་ཀྱི་དཔལ་མོའི་མངལ་ལས་མ་བསྐྱངས་ཤིང་། །སོ་ནམ་ངལ་བའི་ཁུར་གྱིས་མ་བྲེལ་བར། ཚིག་དོན་རབ་ཏུ་གསལ་བའི་མྱུ་གུ་འདི། །བློ་གྲོས་གཤིན་པའི་ཞིང་ས་ལས་འོངས་སྙམ། །དེ་ལྟར་ཡུམ་དོན་དང་པོ་སྐབས། །སྐབས་མཚམས་ཡན་ལག་མཐའ་དཔྱོད་ཀུན། །ཀུན་ནས་མ་འདྲེས་གསལ་བའི་ཚུལ། །ཚུལ་ལྡན་གཟུར་གནས་དོན་དུ་བཀོད། །ཅེས་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་རྩ་འགྲེལ་གསལ་བར་བྱེད་པ་བློ་བཟང་དགོངས་རྒྱན་གདོང་ལྔའི་དབང་པོའི་སྒྲ་དབྱངས་ཞེས་བྱ་བ་ལས། སྐབས་དང་པོའི་ཚིག་དོན་མཐའ་དཔྱོད་ཇི་སྙེད་པ་བཤད་ཟིན་ཏོ།། །།མངྒ་ལཾ།། །།