བཀའ་དང་བསྟན་བཅོས་བཤད་པ།

བཀའ་དང་བསྟན་བཅོས་བཤད་པ། གཉིས་པ་འགྲེལ་པ་རྩོམ་རིགས་པར་སྒྲུབ་པ་ལ། ཕྱིའི་རྐྱེན་དགེ་བའི་བཤེས་གཉེན་གྱི་མན་ངག་དང་ལྡན་པར་སྒྲུབ་པ། ནང་གི་རྐྱེན་བསྟན་བཅོས་ཀྱི་དོན་མཐའ་དག་རྟོགས་པའི་ཤེས་རབ་དང་ལྡན་པར་སྒྲུབ་པ། དེས་ན་འགྲེལ་པ་རྩོམ་རིགས་པའོ། །དང་པོ་ལ་བཞི་ལས། ཐོགས་མེད་ཀྱི་མན་ངག་དང་ལྡན་ཚུལ་ལ། གཞུང་གི་ཚིག་དོན་བཤད་པ་དང་། མཐའ་དཔྱད་པ་གཉིས། དང་པོ་ནི། བསམ་པ་སྙིང་རྗེས་འགྲོ་ལ་ཆགས་པས་ཀུན་ཏུ་སྟེ། ལྷག་པར་ཆགས་པར་མཛད་པ་དང་། སྦྱོར་བ་གཞན་སྡུག་བསྔལ་ལས་སྐྱོབ་པ་ཉིད་ཀྱི་འཕགས་པ་ཐོགས་མེད་ཆོས་ཅན། ཁྱོད་ཀྱི་སྒྲ་བཤད་དུ་ཡོད་པའི་བསྟན་བཅོས་ཆེན་པོ། རྒྱས་འབྲིང་བསྡུས་གསུམ་གྱི་རྣམ་བཤད་མཛད་རིགས་ཏེ། ཁྱོད་མི་ཕམ་མགོན་པོ་ལ་དོན་འདི་རྫོགས་པར་གསན་ནས་ནི་ཐུགས་སུ་ཆུད་པའི་མཁས་པ་ཡིན་པའི་ཕྱིར། གཉིས་པ་ལ། དགག་གཞག་སྤང་གསུམ་ལས། དང་པོ་ནི། རོང་ཊཱིཀ་པ་ན་རེ། བསྟན་བཅོས་ཆེན་པོའི་རྣམ་བཤད་མཛད་ཅེས་པའི་བསྟན་བཅོས་དེ། མངོན་རྟོགས་རྒྱན་ལ་བྱེད་ཟེར་ན། ཉི་ཁྲི་དེ་ཉིད་རྣམ་ངེས་མདོ་རྒྱན་སྦྱར་བའི་འགྲེལ་པ་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། མི་འཐད་པར་ཐལ། མདོ་རྒྱན་སྦྱར་བའི་འགྲེལ་པའི་ཐོག་མ་ཉི་ཁྲི་སྣང་བ་ནས་འཛིན་

རིགས་པའི་ཕྱིར། གཞན་ཡང་། དམ་བཅའ་དེ་མི་འཐད་པར་ཐལ། ཤེར་འབྱུང་བློ་གྲོས་ཀྱི་འགྲེལ་པར། ཐོགས་མེད་ཀྱིས་མདོ་རྒྱན་སྦྱར་བའི་འགྲེལ་པ་མ་མཛད་པར་བཤད་པའི་ཕྱིར། གཞན་ཡང་བསྟན་བཅོས་མཐའ་དག་མ་རྙེད་པར་ཞེས་པའི་བསྟན་བཅོས་དེ་ཡང་མངོན་རྟོགས་རྒྱན་ལ་བྱེད་རིགས་པར་ཐལ། རྩ་བའི་དམ་བཅའ་འཐད་པའི་ཕྱིར། འདོད་ན། མཐའ་དག་ཅེས་མང་ཚིག་སྨོས་པ་ལ་དགོས་པ་མེད་པར་ཐལ་ལོ། །ཁ་ཅིག །སྤོབས་པ་བཞི་དང་ལྡན་པའི་གསུང་རབ་བཀའི་མཚན་ཉིད་ཡིན་ཟེར་ན། འགྲེལ་པ་དོན་གསལ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། སྤོབས་པ་བཞི་དང་ལྡན་པ་གང་ཞིག །གསུང་རབ་ཡིན་པའི་ཕྱིར། དང་པོ་མ་གྲུབ་ན། དེར་ཐལ། བརྗོད་བྱ་དོན་དང་ལྡན། རྗོད་བྱེད་ཚིག་དང་འབྲེལ། གདུལ་བྱའི་མི་མཐུན་ཕྱོགས་སྤོང་ཕྱིར་དུ་གསུངས། ཞི་བ་མྱང་འདས་ཀྱི་ཕན་ཡོན་སྟོན་པ་དང་ལྡན་པའི་ཕྱིར། རྩ་བར་འདོད་མི་ནུས་ཏེ། སློབ་དཔོན་སེང་གེ་བཟང་པོ་སངས་རྒྱས་འཕགས་པ་མ་ཡིན་པའི་ཕྱིར། ཁ་ཅིག །སངས་རྒྱས་ཀྱི་བཀའ་ཡིན་ན། སངས་རྒྱས་རང་རྒྱུད་ཀྱིས་བསྡུས་པའི་བཀའ་ཡིན་པས་ཁྱབ་ཟེར་ན། རབ་འབྱོར་གྱི་རྒྱུད་ཀྱིས་བསྡུས་པའི་བཀའ་བརྒྱད་སྟོང་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། དེ་ཡོད་པའི་ཕྱིར། དེར་ཐལ། བྱ་བ་ཡུལ་ལ་ཡོད་པའི་སངས་རྒྱས་ཀྱི་གསུང་རབ་ཀྱི་འཕྲིན་ལས་ཡོད་པའི་ཕྱིར། དེར་ཐལ། བྱ་བ་ཡུལ་ལ་ཡོད་པའི་སངས་རྒྱས་ཀྱི་འཕྲིན་ལས་རང་ཡོད་པའི་ཕྱིར། ཁ་ཅིག །གསུང་བ་པོ་སྟོན་པ་གཞན་གྱི་རྗེས་སུ་མ་འབྲངས་པར། གདུལ་བྱའི་དོན་དུ་རང་སྟོབས་ཀྱིས་བརྩམས་པའི་གསུང་རབ་དེ་བཀའི་མཚན་ཉིད་ཟེར་ན། ཤཱ་རིའི་བུ་དང་སྤྱན་རས་གཟིགས་གཉིས་དྲི་བ་དྲི་ལན་བྱས་པའི་ཤེས་རབ་

སྙིང་པོའི་མདོ་ཚིག་ཆོས་ཅན། མཚན་ཉིད་དེར་ཐལམཚོན་བྱ་དེའི་ཕྱིར། མ་གྲུབ་ན། དེར་ཐལ། བྱིན་གྱིས་བརླབས་པའི་བཀའ་ཡིན་པའི་ཕྱིར། རྩ་བར་འདོད་མི་ནུས་ཏེ། གཉིས་ཀ་སྟོན་པའི་རྗེས་འབྲང་ཡིན་པའི་ཕྱིར། ཁ་ཅིག །འཆོས་སྐྱོབ་ཀྱི་ཡོན་ཏན་གཉིས་དང་ལྡན་པའི་གསུང་རབ་མཐར་ཐུག་དེ་བསྟན་བཅོས་རྣམ་དག་གི་མཚན་ཉིད་ཟེར་ན། འགྲེལ་པ་དོན་གསལ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། གསུང་རབ་མཐར་ཐུག་ཡིན་པར་ཐལ། འདོད་པའི་ཕྱིར། འདོད་ན། སེང་བཟང་གསུང་བ་པོ་མཐར་ཐུག་ཡིན་པར་ཐལ། དོན་གསལ་གསུང་རབ་མཐར་ཐུག་ཡིན་པའི་ཕྱིར། འདོད་མི་ནུས་ཏེ། ཁྱོད་ལས་ལྷག་པའི་གསུང་བ་པོ་ཡོད་པའི་ཕྱིར། གཞན་ཡང་བརྒྱད་སྟོང་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་མི་ནུས་ཏེ། བཀའ་ཡིན་པའི་ཕྱིར། ཁ་ཅིག །འཆོས་སྐྱོབ་ཀྱི་ཡོན་ཏན་གཉིས་དང་ལྡན་པའི་ངག་དེ་བསྟན་བཅོས་ཀྱི་མཚན་ཉིད་ཟེར་ན། ཕྱི་རོལ་པའི་བསྟན་བཅོས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཕྱི་རོལ་པའི་བསྟན་བཅོས་ཡིན་པའི་ཕྱིར། ཁྱབ་པ་ཡོད་དེ། ཕྱི་རོལ་པའི་བསྟན་བཅོས་བསྟན་བཅོས་ཡིན་པའི་ཕྱིར། དེའི་བསྟན་པ་བསྟན་པ་ཡིན་པའི་ཕྱིར། དེའི་སྟོན་པ་སྟོན་པ་ཡིན་པའི་ཕྱིར། སྟོན་པ་ཡིན་ན་ལྟ་བ་བཀར་བཏགས་ཀྱི་ཕྱག་རྒྱ་བཞི་སྟོན་པ་པོ་ཡིན་པས་མ་ཁྱབ་པའི་ཕྱིར། ཁ་ཅིག །རྩོམ་པ་པོ་རྣམ་གཡེང་མེད་པའི་སེམས་ཅན་གྱིས་བཀའི་དགོངས་འགྲེལ་དུ་བརྩམས་པའི་ངག་རྣམ་དག་དེ། བཀའི་དགོངས་འགྲེལ་དུ་གྱུར་པའི་བསྟན་བཅོས་རྣམ་དག་གི་མཚན་ཉིད་ཟེར་ན། རྣམ་གཡེང་རྒྱུད་ལྡན་གྱི་བྱང་སེམས་ཚོགས་ལམ་པས་

བརྩམས་པའི་བསྟན་བཅོས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། དེར་ཐལ། དེས་བརྩམས་པའི་བསྟན་བཅོས་ཡོད་པའི་ཕྱིར། དེར་ཐལ། རྣམ་གཡེང་རྒྱུད་ལྡན་གྱི་བྱང་སེམས་ཚོགས་ལམ་པ་ཡོད་པའི་ཕྱིར་རོ། ཁ་ཅིག །རྣམ་མཁྱེན་གྱིས་དངོས་ཀྱི་བདག་རྐྱེན་བྱས་པ་ལ་བརྟེན་ནས་བྱུང་བའི་ཁྱད་ཆོས་བཞི་ལྡན་གྱི་ངག་རྣམ་དག་བཀའི་མཚན་ཉིད་ཟེར་ན། ལྗོན་ཤིང་རླུང་གིས་བསྐྱོད་པ་ལས་བྱུང་བའི་ཆོས་ཀྱི་སྡོམ་བཞི་སྟོན་པའི་སངས་རྒྱས་ཀྱི་ཐུགས་བདེན་པའི་སྒོ་ནས་བྱིན་གྱིས་བརླབས་པའི་སངས་རྒྱས་ཀྱི་བཀའ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། དེར་ཐལ། དེ་ཡོད་པའི་ཕྱིར། དེར་ཐལ། སངས་རྒྱས་ཀྱི་ཐུགས་བདེན་པའི་སྒོ་ནས་བྱིན་གྱིས་བརླབས་པའི་བཀའ་ཡོད་པའི་ཕྱིར། རྩ་བར་འདོད་མི་ནུས་སོ། །ཁ་ཅིག་བཀའ་ཡིན་ན་བསྟན་བཅོས་ཡིན་པས་ཁྱབ་སྟེ། རྣམ་བཤད་རིག་པ་ལས། དོན་དམ་པར་སངས་རྒྱས་ཀྱི་གསུང་ཉིད་བསྟན་བཅོས་ཀྱི་མཚན་ཉིད་དུ་འཐད་ཅེས་གསུངས་པའི་ཕྱིར་ན་མ་ཁྱབ་སྟེ། བསྟན་བཅོས་ཀྱི་སྒྲ་བཤད་དུ་ཡོད་པ་ལ་དགོངས་པའི་ཕྱིར། དེ་ལྟ་མ་ཡིན་ན་བསྟན་བཅོས་ཀྱི་སྒྲ་བཤད་དུ་ཡོད་ན་བསྟན་བཅོས་ཡིན་པས་ཁྱབ་པར་ཐལ། ངེས་པའི་ཚིག་གི་ཚུལ་གྱིས་ན་བསྟན་བཅོས་ཞེས་གསུངས་པ་གང་ཞིག །བརྒྱད་སྟོང་པ་ལྟ་བུ་བསྟན་བཅོས་ཡིན་པའི་ཕྱིར། འདོད་ན། འཆོས་སྐྱོབ་ཀྱི་ཡོན་ཏན་གཉིས་དང་ལྡན་ན་བསྟན་བཅོས་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། འཆོས་སྐྱོབ་ཀྱི་ཡོན་ཏན་གཉིས་དང་ལྡན་པའི་འཕགས་པ་ཆོས་ཅན། དེར་ཐལ། དེའི་ཕྱིར། གཉིས་པ་རང་ལུགས་ནི། རང་གསུངས་པ་པོ་སངས་རྒྱས་འཕགས་པས་གདུལ་བྱའི་ཉོན་མོངས་སྤོང་དོན་

དུ་གསུངས་པའི་མཐར་ཐུག་གི་གསུང་རབ་དེ་བཀའི་མཚན་ཉིད། བཀའ་དེ་ཁྱད་ཆོས་བཞི་དང་ལྡན་ཏེ། བདག་རྐྱེན་གྱི་ཁྱད་པར་རང་གི་བདག་རྐྱེན་དུ་གྱུར་པའི་ཡེ་ཤེས་ཆོས་སྐུ་ལས་བྱུང་། བརྗོད་བྱའི་ཁྱད་པར་ཁམས་གསུམ་གྱི་ཉོན་མོངས་པའི་གཉེན་པོ་རྫོགས་པར་སྟོན། ཕན་ཡོན་གྱི་ཁྱད་པར་སྒྲིབ་གཉིས་ཞི་བར་བྱེད། ངོ་བོའི་ཁྱད་པར་སྒྲ་སྐྱོན་མཐའ་དག་དང་བྲལ་བ་ཡིན་པའི་ཕྱིར་རོ། །ཇི་སྐད་དུ་རྒྱུད་བླ་མ་ལས། གང་ཞིག་དོན་ལྡན་ཆོས་དང་ཉེར་འབྲེལ་ཞིང་། །ཞེས་སོགས་གསུངས་པའི་ཕྱིར་རོ། །འདི་ལ་དབྱེ་ན་གཉེན་པོ་སྟོན་ཚུལ་གྱི་སྒོ་ནས་ཆོས་ཕུང་བརྒྱད་ཁྲི་བཞི་སྟོང་། ཡན་ལག་གི་སྒོ་ནས་གསུང་དབྱངས་ཡན་ལག་དྲུག་ཅུ། ངོ་བོའི་སྒོ་ནས་གསུང་རབ་ཡན་ལག་བཅུ་གཉིས། བྱེད་ལས་ཀྱི་སྒོ་ནས་སྡེ་སྣོད་གསུམ། བརྗོད་བྱའི་སྒོ་ནས་དྲང་ངེས་ཀྱི་མདོ་གཉིས། ཆེད་དུ་བྱ་བའི་གདུལ་བྱའི་སྒོ་ནས་ཐེག་པ་ཆེ་ཆུང་གི་སྡེ་སྣོད་གཉིས་རྣམས་སུ་ཡོད་དོ། །བསླབ་པ་གསུམ་གྱི་ནང་ནས། ལྷག་པ་ཚུལ་ཁྲིམས་ཀྱི་བསླབ་པ་བརྗོད་བྱའི་གཙོ་བོར་བྱས་ནས་སྟོན་པས་རབ་ཏུ་ཕྱེ་བའི་སྡེ་སྣོད་དེ་འདུལ་བའི་སྡེ་སྣོད་ཀྱི་མཚན་ཉིད། མདོ་སྡེ་དང་མངོན་པ་གཉིས་ལ་ཡང་ལྷག་པ་ཏིང་ངེ་འཛིན་དང་། ལྷག་པ་ཤེས་རབ་ཀྱི་བསླབ་པ་གཉིས་གོང་ལྟར་རིགས་འགྲེ་བྱས་ནས་སྦྱོར་རོ། །ལུང་སྡེ་བཞི་དང་པོའི་མཚན་གཞི། ལས་བརྒྱ་པ་གཉིས་པ་དང་། མངོན་པའི་མདོ་སྟོང་ཕྲག་བརྒྱ་པ་གསུམ་པའིའོ། དོན་དམ་བདེན་པ་དངོས་བསྟན་བསྟན་བྱའི་གཙོ་བོར་བྱས་ནས་སྟོན་ཞིང་། སྒྲ་ཇི་བཞིན་དུ་ཁས་བླང་དུ་རུང་བའི་མདོ་དེ་ངེས་དོན་གྱི་མདོའི་མཚན་ཉིད། དྲང་དོན་གྱི་མདོའི་མཚན་ཉིད་ནི་ཀུན་རྫོབ་བདེན་པ་གཙོ་བོར་དངོས་སུ་སྟོན་ཞིང་དངོས་བསྟན་སྒྲ་ཇི་བཞིན་དུ་ཁས་བླང་དུ་མི་རུང་

པའམ། རུང་ཡང་གནས་ལུགས་ཀྱི་དོན་དེ་ལས་གོང་དུ་དྲངས་ནས་བཤད་དགོས་པ་གང་ཡང་རུང་བའི་མདོའོ། །རྒྱས་འབྲིང་བསྡུས་གསུམ་དང་པོ་དང་། གང་ཟག་གི་བདག་ཡོད་པར་སྟོན་པའི་མདོ་ཕྱི་མའི་མཚན་གཞིའོ། །གཞན་ཡང་ཞལ་ནས་གསུངས་པ། རྗེས་སུ་གནང་བ། བྱིན་གྱིས་བརླབས་པའི་བཀའ་གསུམ་ལས། མདོ་སྡུད་པ་དང་པོ་དང་། ཤེར་སྙིང་གཉིས་པའི་མཚན་གཞི། གསུམ་པ་ལ་སྐུ་གསུང་ཐུགས་གསུམ་ལས། མདོ་སྡེ་ས་བཅུ་པ་དང་པོ་དང་། ཏིང་འཛིན་རྒྱལ་པོ་གཉིས་པའི་མཚན་གཞི། གསུམ་པ་ལ། ཏིང་ངེ་འཛིན་དང་བདེན་པ་དང་འཕྲིན་ལས་གསུམ་གྱིས་བྱིན་གྱིས་བརླབས་པས། དང་པོ་ཤེར་སྙིང་། གཉིས་པ་སངས་རྒྱས་ཀྱི་བདེན་པ་བརྗོད་པས་ལྗོན་ཤིང་རླུང་གིས་བསྐྱོད་པ་ལས་ཆོས་ཀྱི་སྡོམ་བཞི་སྟོན་པའི་ངག་གསུམ་པ་རྒྱལ་བའི་འཕྲིན་ལས་ཀྱིས་མི་མ་ཡིན་གྱིས་ཐོལ་བྱུང་དུ་སྨྲས་པའི་རིག་སྔགས་ལྟ་བུའོ། །ཁྱད་ཆོས་བཞི་དང་ལྡན་པའི་རིགས་སུ་གནས་པའི་བསྟན་བཅོས་སུ་དམིགས་པ་དེ་བསྟན་བཅོས་རྣམ་དག་གི་མཚན་ཉིད། དེ་ནི་རང་གི་བཤད་བྱར་གྱུར་པའི་བཀའི་དགོངས་འགྲེལ་ཡིན་པ། རྩོམ་པ་པོ་འཇིག་རྟེན་ཕྱོགས་ཀྱི་རྙེད་བཀུར་གྲགས་འདོད་ཀྱི་རྣམ་གཡེང་དང་བྲལ་བ། ཐར་པ་འཐོབ་པའི་ལམ་དང་རྗེས་སུ་མཐུན་པ། སྒྲ་སྐྱོན་མཐའ་དག་དང་བྲལ་བའི་ཁྱད་ཆོས་བཞི་ལྡན་ཡིན་ཏེ། དེ་སྐད་དུ་རྒྱུད་བླ་མ་ལས། གང་ཞིག་རྒྱལ་བའི་བསྟན་པ་འབའ་ཞིག་གི །ཞེས་སོགས་གསུངས་པའི་ཕྱིར། དེ་ལ་དབྱེ་ན། འཁོར་ལོ་གསུམ་གྱི་དགོངས་འགྲེལ་ལས། དང་པོ་ལ་ལྟ་བའི་ཆ་གཙོ་བོར་འགྲེལ་བ་མངོན་པ་སྡེ་བདུན། མངོན་པ་གོང་འོག །སྤྱོད་པའི་ཆ་གཙོ་བོར་འགྲེལ་པ་མདོ་རྩ་ལྟ་བུ། གཉིས་པ་ལ་ལྟ་བའི་ཆ་ལ་རིགས་ཚོགས་དྲུག །སྤྱོད་པའི་ཆ་ལ་མངོན་

རྟོགས་རྒྱན་ལྟ་བུའོ། །གསུམ་པ་ལ། ལྟ་བའི་ཆ་ལ་འབྱེད་རྣམ་གཉིས། པྲ་ཀ་ར་ན་སྡེ་བརྒྱད། སྤྱོད་པའི་ཆ་ལ་མདོ་རྒྱན། ས་སྡེ་ལྔ། སྡོམ་རྣམ་པ་གཉིས་ལྟ་བུའོ། །དེས་ན། དོན་མེད་དོན་ལོག་དོན་དང་ལྡན། །ཐོས་རྩོད་སྒྲུབ་པ་ལྷུར་ལེན་པ། །ངན་གཡོ་བརྩེ་བྲལ་སྡུག་བསྔལ་སྤོང་། །བསྟན་བཅོས་དྲུག་བྲལ་གསུམ་དུ་འདོད། །ཅེས་པ་ལས། སྔར་བཤད་པ་རྣམས་གསུམ་པོའི་ནང་དུ་གཏོགས་ལ། དྲུག་པོ་ནི་བྱ་རོག་སོ་ཐོགས་ཀྱི་བསྟན་བཅོས། འཇོག་པོའི་གཙུག་རྒྱན་ལེན་པའི་བསྟན་བཅོས་ཕྱི་རོལ་པའི་ཐོས་པ་ཙམ་དང་རྩོད་པ་ཙམ་ལྷུར་ལེན་པའི་བསྟན་བཅོས། བྲམ་ཟེའི་གསང་ཚིག་སྟོན་པའི་བསྟན་བཅོས། ཕྱུགས་ཀྱི་མཆོད་སྦྱིན་བྱེད་པའི་བསྟན་བཅོས་རྣམས་སོ། །གོང་དུ་བཤད་པའི་བསྟན་བཅོས་རྣམ་དག་རྣམས་ཆོས་ཅན། ཁྱོད་བྱེད་ལས་ཁྱད་པར་ཅན་དང་ལྡན་ཏེ། མཐོ་རིས་ཀྱི་འཇིག་རྟེན་དུ་བསྟན་པ་རིན་པོ་ཆེ་ཡུན་རིང་དུ་གནས་པར་བྱེད་པའི་ཕྱིར། ལྷའི་བུ་བློ་གྲོས་རབ་གསལ་གྱིས་ཞུས་པའི་མདོ་ལས། ཆོས་རྣམས་ཐམས་ཅད་བཀའ་དང་བསྟན་བཅོས་གཉིས་སུ་འདུ། །ལེགས་པར་བཤད་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་ནི། །འཇིག་རྟེན་ཁམས་འདིར་ཡུན་རིང་གནས་པར་འགྱུར། །ཞེས་གསུངས་པའི་ཕྱིར། རྒྱས་འབྲིང་བསྡུས་གསུམ་དེ་བསྟན་བཅོས་ཆེན་པོའི་རྣམ་བཤད་མཛད་ཅེས་པའི་སྐབས་ཀྱི་བསྟན་བཅོས་ཡིན་ཏེ། ཚིགས་གསལ་ལས། ངེས་པའི་ཚིག་གི་ཚུལ་གྱིས་ན་བསྟན་བཅོས་ཏེ། དེ་ཡང་ཁྱད་པར་ཅན་རྒྱལ་བའི་ཡུམ་རྣམས་སོ། །ཞེས་དང་། རྣམ་བཤད་ལས། སྒྲ་བཤད་དུ་ཡོད་པས་བསྟན་བཅོས་ཆེན་པོ་མདོའི་ཞེས་གསུངས་པའི་ཕྱིར། གསུམ་པ་རྩོད་པ་སྤོང་

བ་ནི་ཉོན་སྒྲིབ་སྤངས་པའི་བྱང་སེམས་འཕགས་པ་ཁོ་ན་ལ་གསུངས་པའི་མདོ་ཆོས་ཅན། རང་ལུགས་ཀྱི་མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་སླ། འདོད་མི་ནུས་ཏེ། མདོ་དེའི་ཆེད་དུ་བྱ་བའི་གདུལ་བྱར་གྱུར་པའི་ཉོན་མོངས་སྤོང་དགོས་ཀྱི་སེམས་ཅན་མེད་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར་ན་མ་ཁྱབ་སྟེ། དེའི་ཆེད་དུ་བྱ་བའི་གདུལ་བྱར་གྱུར་པའི་ཐེག་ཆེན་དུ་རིགས་ངེས་ཀྱི་གང་ཟག་ཡོད་པ་གང་ཞིག །དེ་ཡིན་ན་ཉོན་སྒྲིབ་མ་སྤངས་པས་ཁྱབ་པའི་ཕྱིར། དང་པོ་གྲུབ་སྟེ། དེ་ཐེག་ཆེན་གྱི་མདོ་ཡིན་པའི་ཕྱིར། དེ་མདོ་གང་ཞིག །དེ་ཐེག་དམན་གྱི་མདོ་མ་ཡིན་པའི་ཕྱིར། ཕྱི་མ་མ་གྲུབ་ན། དེའི་ཆེད་དུ་བྱ་བའི་གདུལ་བྱར་གྱུར་པའི་ཐེག་དམན་དུ་རིགས་ངེས་པའི་ཐེག་དམན་སློབ་པ་ཡོད་པར་ཐལ། མ་གྲུབ་པ་དེའི་ཕྱིར། འདོད་མི་ནུས་ཏེ། ཉེས་པ་སོ་ན་གནས་པའི་ཕྱིར། ཡང་ཁོ་ན་རེ། ཉི་ཁྲི་དེ་ཉིད་རྣམ་ངེས་ཉི་ཁྲི་ཁོ་ནའི་འགྲེལ་པ་ཡིན་པར་ཐལ། མིང་དེ་ལྟར་དུ་སྨོས་པའི་ཕྱིར་ན། གསེར་འཕྲེང་ལས། འདི་ལ་ཉི་ཁྲི་དེ་ཉིད་རྣམ་ངེས་ཞེས་པ་བརྟག་དགོས་སོ་ཞེས་པའི་དོན་མི་འཐད་པར་ཐལ། ཁྱོད་ཀྱི་ཁྱབ་པ་གྲུབ་པའི་ཕྱིར། ཁ་ཅིག །ཤཱ་རིའི་བུའི་རྒྱུད་ཀྱི་བཀའ་བརྒྱད་སྟོང་པ་ཆོས་ཅན། སྒྲིབ་པ་སྤངས་པའི་གསུང་ཡིན་པར་ཐལ། སངས་རྒྱས་ཀྱི་གསུང་ཡིན་པའི་ཕྱིར། ཁྱབ་པ་ཡོད་དེ། སངས་རྒྱས་ཀྱི་སྐུ་ཡིན་ན། སྒྲིབ་པ་སྤངས་པའི་སྐུ་ཡིན་པས་ཁྱབ་པའི་ཕྱིར་ན། མ་ཁྱབ། འོ་ན། ཤཱ་རིའི་བུའི་ངག་དང་བྱིན་གྱིས་བརླབས་པའི་བཀའི་གཞི་མཐུན་ཆོས་ཅན། སྒྲིབ་པ་སྤངས་པའི་ངག་ཡིན་པར་ཐལ། སངས་རྒྱས་ཀྱི་ངག་ཡིན་པའི་ཕྱིར། དེར་ཐལ། སངས་རྒྱས་ཀྱི་བཀའ་ཡིན་པའི་ཕྱིར། རྩ་བར་འདོད་མི་ནུས་སོ། །ཁ་ཅིག །ཤེས་རབ་སྙིང་

པོ་ཆོས་ཅན། རྗེས་སུ་གནང་བའི་བཀའ་མ་ཡིན་པར་ཐལ། བྱིན་གྱིས་བརླབས་པའི་བཀའ་ཡིན་པའི་ཕྱིར་ན་མ་ཁྱབ་སྟེ། དེ་གཉིས་མི་འགལ་བའི་ཕྱིར་རོ། །གཉིས་པ་དབྱིག་གཉེན་གྱི་མན་ངག་དང་ལྡན་ཚུལ་ནི། འགྲོ་བའི་དོན་བདེ་ལེགས་ཀྱི་རྩ་ལག་ཏུ་གྱུར་བའི་དབྱིག་གི་གཉེན་ཆོས་ཅན། ཁྱོད་ཀྱིས་མདོ་འདིའི་དོན་རྣམ་པར་དཀྲོལ་ཚུལ་ཡོད་དེ། རང་གི་མོས་པ་གཙོ་བོར་བྱེད་པས། དབུ་མ་ལས་གཞན་དུ་གཟུགས་སོགས་ཤེས་བྱ་ནང་སེམས་ཀྱི་བདག་ཉིད་ཡིན་པའི་ལྟ་བ་ལ་ཡང་དག་པར་བརྟེན་ནས་སེམས་ཙམ་དུ་བཀྲལ་བའི་ཕྱིར། གསུམ་པ་གྲོལ་སྡེའི་མན་ངག་དང་ལྡན་ཚུལ་ནི། ཐེག་ཆེན་གྱི་མཐོང་ལམ་ཐོབ་པས་འཕགས་པའི་ཁོངས་སུ་གཏོགས་པའི་རྣམ་པར་གྲོལ་བའི་སྡེ་ཞེས་བྱ་བ་ཆོས་ཅན། སྐུ་མཆེད་གཉིས་ཀས་སྔར་བཀྲལ་ཀྱང་དབྱིག་གཉེན་དེས་ཡུམ་དོན་སེམས་ཙམ་དུ་བྱས་པ་དེ། དོན་བཞིན་བྱས་པ་མིན་པར་མཐོང་ནས་དབུ་མར་གནས་པ་ལྟར་བཀྲལ་ཏེ་དོན་དེ་མཁྱེན་པས་བློས་རྣམ་པར་ཕྱེ་བའི་ཕྱིར། བཞི་པ་བཙུན་པ་གྲོལ་སྡེའི་མན་ངག་དང་ལྡན་ཚུལ་ནི། འཕགས་པས་རྣམ་བཤད་མཛད་པའི་དུས་ དེའི་འོག་ཏུ ། དད་པའི་ས་ཚོགས་ལམ་ལ་གནས་པ་ཡི་བཙུན་པ་རྣམ་པར་གྲོལ་བའི་སྡེ་ཆོས་ཅན། ཁྱོད་ཀྱིས་མདོ་དང་བསྟན་བཅོས་ཀྱི་ཚིག་དོན་མཐའ་དག་མ་རྙེད་པར་རང་གིས་གང་རྙེད་དང་། རྗེས་མཐུན་དུ་ཉི་ཁྲི་དང་སྦྱར་བའི་རྣམ་བཤད་བྱས་པ་ལ་རྩོམ་མི་རིགས་པའི་སྐྱོན་མེད་དེ། རང་ཉིད་མདོ་རྒྱན་གྱི་དོན་ལ་བློ་གྲོས་འཕེལ་བའི་དགོས་པ་ཡོད་པའི་ཕྱིར། གཉིས་པ་ནི། དེ་ལྟར་སྔར་གྱི་མཁས་པ་བཞིས་ཚིག་དོན་ཅི་རིགས་
སྣང་བར་བྱས་ཤིང་། དབྱིག་གཉེན་སོགས་འགའ་ཞིག་ཁོ་ནས་ཇི་བཞིན་མ་རྙེད་པའི་བསྟན་བཅོས་ཡུམ་གསུམ་མཐའ་དག་འདི་སྙིང་པོའི་དོན་མཐར་ཐུག་དང་། མངོན་རྟོགས་བརྒྱད་ཚང་ཞིང་དེ་ཉིད་རྒྱན་གྱིས་འགྲེལ་པ་དེ་ལྟར་སེང་གེ་བཟང་པོ་བདག་གིས་རྙེད་པ་གང་དེ་ཆོས་ཅན། ཆེས་ཡ་མཚན་ཏེ། ཕྱི་རྐྱེན་དུ་མ་ཟད་ནང་རྐྱེན་བསྟན་བཅོས་ཀྱི་དོན་ཀུན་རྟོགས་པའི་ཤེས་རབ་དང་ལྡན་པ་ཡིན་པའི་ཕྱིར། གསུམ་པ་ནི། མཁས་པ་དབྱིག་གཉེན་དེ་ལྟ་བུས་ཀྱང་མ་རྙེད་པས་ཤིན་ཏུ་རྙེད་དཀའ་བའི་ཟབ་མོའི་ལམ་འདི་ཅི་ཞིག་ལྟར་སངས་རྒྱས་ཀྱི་བྱིན་རླབས་ཀྱི་དབང་གིས་རྙེད་པ་ནི་ཆོས་ཅན། སེང་བཟང་དང་མཚུངས་པའི་མཁས་པ་གཞན་རྣམས་ཀྱིས་ཀྱང་དབྱེ་བར་རིགས་ཏེ། བསྟན་བཅོས་རྩོམ་པའི་མཐུན་རྐྱེན་ཚང་བའི་ཕྱིར། གསུམ་པ་ཁེངས་པ་སྐྱུང་ཞིང་སྤྲོ་བ་སྐྱེད་ཚུལ་ནི། དགེ་བའི་བཤེས་གཉེན་གྱི་མཐུ་མེད་པར་རང་དབང་གིས་ཡུམ་དོན་རྣམ་པ་ཀུན་ཏུ་སེང་བཟང་བདག་གི་ནི་བློའི་སྤྱོད་ཡུལ་མིན་ཡང་། རྣམ་མཁྱེན་གྱི་ཆེད་དུ་བསོད་ནམས་དག་རྒྱ་ཆེར་སྒྲུབ་པ་དང་རྗེས་མཐུན་གྱི་ཐབས་འགྲེལ་པ་འདི་ཆོས་ཅན། ཁྱོད་རྩོམ་པ་ལ་སྤྲོ་བ་ཁྱད་པར་ཅན་སྐྱེས་པའི་རྒྱུ་མཚན་ཡོད་དེ། རང་དང་ཐེག་ཆེན་གྱི་རིགས་ཅན་གཞན་ལ་ཕན་གདགས་པར་འདོད་པ་བཞིན་སྒྲུབ་ནུས་པའི་ཕྱིར།